2 Corintios

K’ipa CORINTIOS

2 de Corintiosbi kallari parluguna

Kai cartadash apóstol Pabloga Corinto pueblobish Acaya llaktabish tandanukushka crijkunamu kachasha, Jesucristo wacharishka k’ipa pichka chunga kanchis (57) wata shinabimi escribishka yuyachin.

Chibi kausaj crijkunaga Pabloda piñachijkuna gashka. Kai k’ipa cartabiga paigunada jinchida, na pakasha rimashkami rikurin. Pabloga paiguna ama llagmusha engañajkunada crichun, paibuj shamunada parijasha chapachun escribiga. Shuj yachanagunaga kaibi tiyan: Diosbuj alligunada japishkamunda taugaguna Paida <Diosolopai> ningaguna (1.8-11), perdonasha alli kushiyachisha ayudanamunda (2.5-11), Cristoj randi parlachun kachushkaguna ganchi (5.11-21), kushilla kujtaga Dios k’uyujmi (9.6-15), Diosbuj ruri pudinaga na ruri pudijkunabimi tukida alli p’aktachichin (12.7-10).

Pablo saludashkamunda

¹Dios munashkamunda Cristo Jesús Paimunda parlachun agllusha kachushka Pablomi wauki Timoteondij Corinto pueblobi Diosbuj tandanukushka crijkunamu, tuki Acaya llaktabi gaj linshuyachishkagunamush escribinchi.

²Ñukuchij Taita Diosbuj shinaidi Mandaj Jesucristoj kushka allish k’uilla kausish kangunabi gachun.

Diosga ñukuchida kushiyachishkamunda

³Ñukuchida Manduj Jesucristoj Taita Diosta <Allimi gangui> nishunchi. Paiga ñukuchida llakij Taita, shinaidi ima tukukish kushiyachij Diosmi. ⁴Ima tuki llakibi gajkunada, ñukuchi Diosmunda japishka kushin kushichichunmi, Diosga tuki jatun llakigunamunda ñukuchida kushiyachin. ⁵Ima layami Cristoj llakiguna ñukuchin manchanaidi gagun, shinaidimi Paimunda, kushigunaga manchanaidi ñukuchin gan. ⁶Ñukuchi manchanaidi llakigunada apagushkaga, kanguna kushiyachun shinaidi kishpichishka1.6 Kai versobi “kishpichishka” nishaga “alli kausana”dami nin. gachunmi gan. Ñukuchida kushichishkaga kangunada kushichichun ñukuchi layaidi jatun llakigunada apagushkabiga na shaikushalla alli jinchiguna gachunmi gan. ⁷Ima layami ñukuchij llakigunabi ganguichi, shinaidimi ñukuchij kushibi kushiyanguichi. Shinada yachushkamunda kanguna jinchi katinadaga crinchimi.

⁸Wauki paniguna, Asia llaktabi jatun llakigunada ñukuchi japishkada yachachunmi munanchi. Na aguantibuj manchanaidi llakigunada apagushaga <Ña na kausashunchu> yuyaganchimi. ⁹Shinushaga wañuchun kachushka layami sintiganchi. Ñukuchillabidijka ama yuyisha, ashtangarin wañushkagunada kausachij Diosbi yuyida churachunmi shina tukushka. ¹⁰Wañuna jatun llakimundami Diosga ñukuchida kacharichiga, shinaidi kacharichinga. Shinushaga <Kacharichigungallami> nisha chi yuyinmi katigunchi. ¹¹Shina gachunga kangunashmi ñukuchimunda Diosta mañusha ayudagunguichi. Taugaguna ñukuchimunda mañakiga Diosbuj alligunada ñukuchi japishkamunda taugaguna Diosta <Diosolopai> ningaguna.

Pablo imamunda Corintomu na rishkamunda

¹²Ñukuchij shungu yuyishkaga kai pachabi, yallidijka kangunapurabi gasha, Dios kushka alli linshuyachishkan na llullasha kausushkada rikuchin. Na gentegunaj yachashkan, ashtangarin Dios kushka alligunanmi shina rurashkada rikuchinchi. Shinushkamundaga mejordi kushiyanchimi. ^13-14Kangunamu kachagushka cartabiga ima na liyi pudinada shinaidi na intindiribujtaga na escribishkanchichu. Kanguna ñukuchida ashada intindishka shinalla Manduj Jesús shamibi ima laya ñukuchi kangunamunda kushiyanada shinaidi kangunash ñukuchimunda kushiyi pudinadaga illujta intindichunmi munani.

^15-16Kaida alli yuyashkamundami kanguna ishki kutin kushiyachunga kangunajmundi chayungu munugani. Macedonia llaktamu rishaga kangunajmundi chayushka k’ipa Macedoniamu risha, kutin kangunajmu chayuki, ñuka Judea llaktamu rinabi ayudasha kachachun yuyagani. ¹⁷Shina ñuka ringu munashaga ¿nij tukushallachu rurashkani? ¿Aicha munushka layallachu chi ratulladi “Ari” “Na” nishkada yuyanguichi?

¹⁸Diosga ima layami p’aktachij gan, shinaidimi ñukuchish kangunamu <Ari> nishkash <Na> nishkash na nishkallachu. ¹⁹Ñukaga Silvanon Timoteonbish kangunapurabi gashaga Diosbuj Churi Jesucristomunda parlaganchi. Paiga “Ari” “Na” na nijchuga, ashtan Pai “Ari” nishkada p’aktachijmi. ²⁰Imallada Dios <Kushami> nishkagunaga, Cristobimi p’aktun. Chimundami Diosta jatunyachishka gachun Cristo Jesusbuj shutibi <Shina gachun> ninchi. ²¹Ñukuchidash kangunadash Cristobi jinchiyachigujka, Diosmi gan. Pai ñukuchida ch’ikunyachishaga ²²<Ñukajmi gangui> nisha selloda churasha, Pai ima kumbidana gashkada rikuchingu1.22 Diosga, ñukuchida pai kishpichinada <P’aktachishami> nishkada rikuchingajmi Paibuj Espirituda ñukuchimu kumbidan. Ef 1.13; 4.30 ñukuchij shungubi Paibuj Espirituda churaga.

²³Ñuka kangunada ama llakichingu nishallami Corinto pueblomu narij kutin rini. Chidaga ñuka kausida rijsij Diosga yachunmi. ²⁴Crishkamunda kanguna jinchi shayarijkuna gashkamundaga <Kashna chashna crichi> nisha mandungujka na ganchichu, ashtangarin kushillaguna gachunmi ayudangu munanchi.1.24 Pabloga kai laya nin: Kangunalladi alli crisha jinchilladi gashkamunda kushiyaringuichimi.

¹Chimundaga kangunada ama kutin llakichingujka na ringumi yuyarigani. ²Ñuka kangunada llakichikiga ¿pidi ñukadaga kushiyachingari? Ñuka llakichishkagunalladimi kushichij ganguichi. ³Shinushaga kangunajmu ñuka chayuki, kanguna ñukada kushiyachinaguna ama llakichichunmi escribisha kachugani, ashtan tuki kangunada yuyasha <Ñukaj kushin kushiyangagunami> nisha chi yuyin gagani. ⁴Chida escribigushaga, manchanaidi llakirisha iki ñawin wakugani. Kangunada na llakichingu, ashtangarin kangunada manchanaidi k’uyashkada rikuchingajmi shina escribigani.

Perdonanamunda

⁵Maijinsh ñukada llakichijka na ñukallada llakichishkachu, ashtanbish ashadaga tuki kangunadashmi llakichishka. Shina nishaga na yallinga nigunichu. ⁶Chi na alli rurujtaga taugaguna llakichishkaga, ¡ña chilla gachun! ⁷Ashtanbish manchanaidi llakirisha yalli llakin ama tukurichunga perdonasha2.7 Diosmu vueltarishkamunda paida perdonana gan. alli kushiyachisha ayudanami ganguichi. ⁸Chimunda kanguna kutin llakishkada paimu rikuchichun mañani. ⁹Ñuka yachachishkada divirti tukida alli kazusha katigushkada yachungajmi chaishujtaga escribigani. ^10-11Maijinda kanguna perdonakiga ñukash perdonanimi. Kangunaj allibujmi Cristoj ñaubuki2.10-11 Pabloga Cristoj nishkada rurungu munugami. ima perdonana tiyashkadaga Satanás imabish ñukuchida ama pandachichunmi perdonagani. ¡Pai pandachina yuyigunada charijtaga allimi yachanchi!

Troasbi Pablo llakilla gashkamunda

¹²Troas pueblobi Cristomunda Alli Shimida parlungu chayukiga Manduj Dios punguda paskuga. ¹³Shinash wauki Titon na tupanukushkamunda ñukaj yuyiga na samagachu. Chimunda chi crijkunada <Shuj p’unllagamachi> nisha Macedonia llaktamu rigani.

Criston vincinamunda

¹⁴Criston vincigujkunada rurushkada rikuchisha ñukuchida pushuj Diosta <Diosolopai> ninimi. Cristomunda yachanaga, k’uilla ashnaj shinami tuki ladugunabi ñukuchimunda yacharishka gagun. ¹⁵Ñukuchiga kishpichishkagunamush chingarijkunamush, Cristomunda Diosmu kushka k’uilla ashnarigujkunami ganchi. ¹⁶Chingarijkunamunga, wañimu apaj wañushka ashnarij layami ganchi;2.16 Diosbuj Shimida parlashkaga na crijkunamunga na alli ashnarij uku pachamu apaj layami. kishpichishkagunamunga kausida kuj k’uilla sami shinami ganchi. Chashna ruranadaga ¿pidij p’aktachingu pudinga? ¹⁷Ñukuchiga na shujkuna shina imadash japina yuyillanga Diosbuj Shimidaga parlagunchichu, ashtangarin Dios kachashka gashkamunda shinaidi Criston shujlla tukushka gashkamundashmi na llullushalla Diosbuj ñaubuki alli parlagunchi.

Mushuj ari ninukushkada parlanamunda

¹Shina nishaga ¿kutin ñukuchilladichu <Alligunami ganchi> ningu kallarinchi? ¿Shujkuna laya ima shina gashkada rikuchij cartanchu kangunajmu chayana, na gashaga kangunalladadichu mañana ganchi? ²Kangunami ñukuchij shungubi escribishka carta laya ganguichi; tukiguna rijsishkash liyishkashmi ganguichi. ³Kangunaga ñukuchi kachashka Cristoj cartami ganguichi; shinaidi na tintan, ashtangarin kausuj Diosbuj Espiritun, na p’atuj rumibi, ashtangarin gentej shungubi escribishkami ganguichi. Kashna gashkaga laru rikushkami gan.

⁴Cristomunda Diosbi yuyida churasha tuki kaiguna shinadi gashkada cirtu crinchimi. ⁵Imada rurashabish <Ñukuchilladi ruri pudinchi> nisha na ninchichu, ashtangarin ñukuchi ima ruri pudishkaga Diosmundami shamun. ⁶Pailladimi kai mushuj ari ninukushkada ñukuchi parli pudichun yachachiga. Kaiga na ñauba mandashkamunda ganchu, ashtangarin Espiritumundami gan. Mandushkaga wañimumi pushan, ashtan Espirituga kausidami kun.

⁷Moisesbuj ñawi p’alanigushkamunda, p’alaniguj tukurina gakish, israelguna paibuj ñawidaga na riki3.7 Ex 34.29-35 pudigagunachu. Chi wañimu pushuj mingushkaga3.7 Kai wañimu pushuj mingushkaga 2 Corintios 3.14bimi Dios ñauba ari ninukushka gan Moisés mandashkagunadami nigun. rumigunabi escribishka gashash k’uidij p’alanigukiga ⁸kai Espíritu mingushkaga ¡ashtan yalli k’uillami ganga! ⁹Jatun llakimu kachaj mingashkabish k’uidij gashkakiga ima juchachinash illuj tukunamunda parlachun mingashkagarin ashtan yalli k’uidijmi ganga. ¹⁰Ñauba mandushka k’uilla p’alanigujka, kunun pachun p’alaniguj k’uillan rikukiga imash na ganchu. ¹¹Ñauba mandushka k’uilla p’alaniguj gashash chingarinalla gakidijka na tukuribujka ashtan yalli k’uidijmi ganga.

¹²Shinusha kai yuyillan chapagushkamundaga, imadash na manchushallami parlanchi. ¹³Ñukuchiga ñawida linsun taparij Moisés laya na ganchichu. Paiga chi p’alaniguj chingaringu gajta ama israelguna rikuchunmi shina tapariga.3.13 Pabloga crijkunallabi Jesusbuj p’alanigujta tukiguna rikuchunmi munan.¹⁴Paigunaj yuyiga jinchiyashkami gan. Ñauba <Ari> nisha Dios escribichishkada kunungama liyushash, linsun tapashka layami ganguna. Chi na anchuchishka linsoga Cristomundallami anchuchishka ganga. ¹⁵Kunun p’unllagamash Moisés rurushka librogunada liyakiga chi linsulladimi intindichunga na sakin. ¹⁶Shina gakish maijinsh Manduj Diosbujmu vueltukiga linsuga anchunllami. ¹⁷Manduj Diosga Espiritumi gan; Mandujbuj Espíritu maibi tiyashkabiga gentega ña kacharichishkami gan.3.17 Diosga Paibuj Espirituda crijkunamu kusha kachushaga Paibuj munushkada ñukuchi ruri pudichun ayudan.¹⁸Chimunda tuki ñukuchiga ñawida na tapachishkaguna gashkamundaga, Manduj Jesusbuj pachun p’alaniguj k’uillada espejo shina rikuchinchi. Shinushami Manduj Jesusbuj Espiritumundaga Pai laya p’alaniguj k’uilladij ashtan ashtan tukungama mushujyachigushkaguna ganchi.

Achpa vazu shinabi manchanaidi valishkamunda

¹Kai ruranada, Dios ñukuchida manchanaidi llakisha kushkamundaga na shaikurinchichu. ²Ashtanbish ima pakalla pinganai ruranada <Na rurashunchu> niganchimi. Pidash na engañasha purinchichu; Diosbuj Shimida na llullasha parlanchichu, ashtangarin ñukuchi kabishkada rurushkada tuki kangunaj yuyigunabi rikuchunmi Diosbuj ñaubuki mingarinchi. ³Ñukuchi Alli Shimida parlushka chairijti tapashka gakiga chingarinagunallamumi shina rikurin. ⁴Cristoga Dios ima layashkada rikuchijmi. Cristomunda pachun p’alaniguj Alli Shimida ama yachachunmi kai pachaj diosga4.4 Kai pachaj diosga nishaga Satanastami shina nin. Paimi kai pachabiga na allibuj mandan. Jn 12.31; Ef 2.2 na crijkunaj yuyida cigu layagunada rurashka. ⁵Ñukuchillamundadijka na parlagunchichu, ashtangarin Jesucristo ima laya Manduj gashkadami parlanchi. Ñukuchiga Jesusmundaga kangunaj sirvijkunallami ganchi. ⁶Chimunda, “Yanamangada luz p’alanichun,” mandusha nij Dioslladimi pachun k’uidij gashkada Jesucristoj ñawibi p’alanigujta yachachunmi ñukuchij shungubish p’unllayachiga.

⁷Kai k’uidi tukida ruri pudina ñukuchibi gajka na ñukuchimunda ganchu, ashtangarin Diosbuj gashkada rikuchunmi ñukuchij achpa vazu shina cuerpobi kai manchanaidi valishkada charinchi. ⁸Tuki laya manchanaidi llakigunada japishash, na llapishtashka ganchichu. <¿Imachari tukushun?> nishash na musparinchichu. ⁹Katik’ichushka gashash, na shitushka ganchichu. Urmachishash ñukuchida na tukuchishtanchu. ¹⁰Ñukuchij cuerpobi Jesús kausashka rikurichunga maida rishash Pai wañushkada4.10 Ima layami Jesusta wañuchigaguna shinaidimi ñukuchish Paida laya wañuchishka shinaguna ganchi. ñukuchij cuerpobi p’unllandij apagunchilla. ¹¹Ñukuchi kausagujkunaga, Jesusbuj kausi ñukuchij wañunalla cuerpobi rikurichun Jesusmunda wañimu kushkami p’unllandijta purigunchilla. ¹²Ñukuchidaga wañimi katigun, ashtan kangunadaga kausimi katigun.4.12 Kanguna espiritun kausanada yachachunmi ñukuchiga wañungajlla kausanchi.

¹³Dios escribichishkabiga, “Crigani, chimundami parlugani,” ninmi.4.13 Sal 116.10 Ñukuchikish chi crina yuyillandi crishkamundami crinchi shinaidi kashna parlanchi. ¹⁴Ima layami Manduj Jesusta Dioslladi kausachiga, shinaidi ñukuchidash Jesuskun kausachishaga kangunan Diosbuj ñaubujmu pushanada yachanchi. ¹⁵Tuki kaigunaga kangunaj allibujmi shina tukun. Shinusha Dios <Alli k’uillami gangui> nishka gachunmi Paibuj kushka alliguna taugagunamu chayushkamunda Paida <Diosolopai> nijkunash ashtan miraringa.

¹⁶Shinushami na shaikurishalla chi yuyin ganchi, ashtangarin ñukuchij cuerpo yuyijyasha katigukish, yuyiga p’unllandijta mushujyasha katigunllami. ¹⁷Kai kausibi apagushka llakiga imash na ganchu, chingarinllami. Shinash kai llakigunamundaga ima urasbish na tukurij manchanaidi k’uilla tukunada ñukuchillabidimi ruragun. ¹⁸Ñukuchiga rikunalladaga na rikunchichu, ashtangarin na rikuribujtami rikurianchi. Rikurinallaga tukuringallami; na rikuribujka ima urash naidi tukuringachu.

Jawa pachabi na tukurij wasimunda

¹Ñukuchij cuerpo kai pachabi tiyaj carpa urmaj shina wañukish,5.1 Kai ismusha tukurinalla carpa shina cuerpon ñukuchi kausashkadaga yachanchimi. na genteguna rurashka, ashtangarin Diosbuj jatun na tukuribuj wasida jawa pachabi charishkada yachunchimi. ²Chimundami ñukuchij jawa pachabi gaj chi cuerpon ña churachishkaguna gangu munusha jiguinchi. ³Shina churashka gashaga llatunllagunaga na gashunchu. ⁴Kai carpa urmanalla shina cuerpon kausashkagamaga jiguisha ganchi. Llatunlla gangujka na munanchichu, ashtangarin wañunalla cuerpoda llujshichisha, na wañibuj shujtij cuerpon churarishkaguna kausangu munanchi. ⁵Diosmi ñukuchidaga shina tukuchun ruraga; Pai p’aktachinada rikuchingujka Paibuj Espirituda ñukuchimu kuga.

⁶Chimundami crisha chi yuyin p’unllandi gagunchilla. Kai cuerpobi kausagushaga Manduj Jesusmunda karubi gashkada yachanchimi. ⁷Na rikushash, crishallami kausanchi. ⁸Shinusha crisha chi yuyillami ganchi, ashtangarin kai cuerpomunda llujshingukish Manduj Jesuskun gangukish munanchimumi. ⁹Chimundami kai cuerpollandi gashash na gashaga kai cuerpoda sakishash Jesusta kushiyachina munilla ganchi. ¹⁰Kai cuerpobi kausagusha allida na allida rurashkamunda ima japina gashkada japingaj tukigunami Juez Cristoj ñaubuki5.10 Juez Cristoj ñaubuki nishkaga castellanobi tribunal de Cristomi gan. Chibi maijin na allida rurajta llakichina, allida rurajtaga <Alli> nina pushtumi. rikurinadi ganchi.

Dioskun alli tukunamunda

¹¹Mandujta kazuna gashkada yachushami tukigunamu ima layash crichun5.11 Kai versobi kai layadash intindi pudin: gentegunamu ñukuchi ima laya rurushkada yachachun parlagunchi. parlagunchi. Diosga ñukuchidaga allimi rijsin, shinaidi kangunash ñukuchida alli rijsishkanmu munani. ¹²Kangunamu kutin <Alligunami ganchi> ningajka na munanchichu, ashtangarin kanguna ñukuchi ima layashkada yachusha kushiyachunmi ninchi. Shinushami ñawi rikillabi rikusha shungu ima laya gashkada na rikushash <Allimi> nijkunan kanguna jinchi shayarichunmi gan. ¹³Ñukuchi loco shina gashash Diosbujmi shina ganchi. Alli yuyarijkuna gasha, kangunaj allibujmi shina ganchi. ¹⁴Tukigunamunda Cristo wañuga, chibimi tukiguna wañuga.5.14 Kaida nishaga ñauba yanga kausana yuyigunada sakisha Cristomunda mushuj kausana yuyin gashkamunda shina nin. Kaidaga alli yachashkamunda Paibuj k’uyiga ñukuchida mandagunllami. ¹⁵Kausajkunaga ama kikinbujlla kausachun, ashtangarin wañusha kausarijbuj kausachunmi Paiga tukigunamunda wañuga.

¹⁶Sarunguna ñukuchiga kai pachabi kausujkuna layalla Cristoda rijsijkuna gashash, ashtan kununga ña na shina rijsinchichu. Kununmunda ichimunga pilladash ña na shina rijsinchichu. ¹⁷Shinakiga Criston shujlla tukujka, mushujta rurashkami gan. Ñauba rurushkagunaga chingarishkami, kununga tuki mushujmi gan. ¹⁸Tuki kaigunaga Diosmundami shamun. Ñukuchidaga Diosga Paiyunlladi alli tukuchun Cristomunda kishpichisha Paiyun kutin tandachishaga <Dioskun alli tukichi> nisha parlachunmi minguga. ¹⁹Diosga kai pachabi kausujkunadaga ima jucha rurushkagunadash kungarisha Paigundi alli tukujkunada Cristomundami ruraguga; shinaidi ñukuchidami <Dioskun alli tukichi> nisha parlachun minguga. ²⁰Chimundami ñukuchiga Cristoj randi parlachun kachushkaguna ganchi. Shinushaga Dioslladi ñukuchida parlachikimi Cristoj shutibi <Kutin Paiyun alli tukichi> ruganchi. ²¹Cristoga ima juchadash na rurajchuga. Shinash ñukuchij kauzamunda Diosga ima juchachinash illujkuna Cristobi tukuchunmi Paidaga juchayuj shinada ruraga.

¹Igulda purisha Diosbujta rurajkuna gashami <Dios kushka alligunadaga ama yangabi charichichu> nisha ruganchi. ²Escribishkabiga Diosga,

“Kanda agllushka ratubi uyugani;

kishpichina p’unllabi kishpichigani,”6.2 Is 49.8 ninmi.

¡Shinusha kununmi agllushka ratu gan; kununmi kishpichishka gana p’unlla gan!

Pablo llakigunada apashkamunda

³Ñukuchiga, Diosmunda ruragushkada pish ama <Na allichu> nichunga pimush imallabish na trankarinchichu.6.3 Kaibi Pablo kai laya nish nin: Ama piyunbish p’iñanukungajka, imada rurushaga alli yuyinmi ruranchi. Na shina rurakiga Diosmunda parlakish gentegunaga na uyash ningachu.⁴Ashtangarin Diosbujta rurujkuna gashkadami imallabish rikuchingujka tukida aguantashami: jatun llakigunabi, ima ministirishkagunabi, katik’ichushkagunabi; ⁵dalishkaguna, carcelashkaguna, waikalladi litushkaguna; shaikujta rurachishkaguna, na puñushkaguna, shinaidi yarijinbishmi ganchi; ⁶pish na juchachibuj kausin, kabishkada yachushkan, gushtulla shuyagushkan, alli alli llakishkan; ñukuchibi gaj Diosbuj Espiritun, divirti k’uyin, ⁷kabishkada parlushkan, Diosbuj ruri pudinan; lluki ladumush alli ladumush kabishkada rurasha takanukunan; ⁸allibi churashka, na allibi churashka; alli nishka, na alli nishka; na llullusha parlakish <Llullajkuna> nishka; ⁹alli rijsishkaguna gakish, na rijsishkagunada rurushka; wañunalla gashash, kausagunchi; takakish na wañunchichu; ¹⁰llakilla laya gashash, ashtan kushiyanchi; na charij laya gashash, taugagunada charijta ruranchi; imadash na charishash, ashtan tukida charinchi.

¹¹Corinto pueblomunda wauki paniguna, kaigunadaga na pakusha, ashtangarin ñukuchij shungubi imalla tiyashkan larumi parluganchi. ¹²Ñukuchiga tuki shungunmi llakinchi; kutin kangunaga ñukuchida na yalli llakinguichi. ¹³Ima shinami ñuka kangunada llakini, shinalladi kangunash ñukada llakichunmi shuj taita maragunada nij layami nini.

“Kausuj Diosbuj wasimi ganchi”

¹⁴Na crijkunanga yugushka shinaga ama tandanukushka gaichichu. Kabishkan na kabishkanga ¿igulchu? P’unllaga tutanga ¿tandanukunchu? ¹⁵Cristoga diablonga ¿imalladash ari ninukujkunachu? Crijkunaga na crijkunanga ¿shuj yuyilla tukungunachu? ¹⁶Diosbuj wasiga, rurashka dioskunanga ¿imadash ari ninukushka tiyanchu? Ñukuchi kausuj Diosbuj wasi shinami ganchi. Dioslladimi, “Paigunanmi kaususha paigunapurabi purisha. Ñukaga paigunaj Dios gashami, shinaidi paigunaga Ñukaj agllushkaguna gangami,”6.16 Lv 26.12; Jer 32.38; Ez 37.27 niga. ¹⁷Shinushami Manduj Diosga kashna niga,

“Paigunaj chaubimunda llujshisha laduyichi.

Ima mapadash ama tupanguichichu.

Shina na tupakimi Ñukaga japisha.6.17 Is 52.11

¹⁸Kangunaj Taitami gasha,

kutin kangunaga Ñukaj churiguna ushiguna ganguichimi,”6.18 2Sa 7.14; Is 43.6 tukida ruri pudij Mandujka ninmi.

¹Shinakiga k’uyashka wauki paniguna, Dioslladi <P’aktachishaidimi> nishkamundaga7.1 2Co 6.16-18 ñukuchij cuerpoda espiritudash ima juchamundash linsharishunchi. Shinaidi Diosta manchusha Paibujlla alli linshuyangagama katishunchi.

Pablo ashtan kushiyashkamunda

²¡Ñukuchij nishkada kangunaj shungubi yuyarichi! Pidash na allidaga na rurashkanchichu; pidash na pandachishkanchichu; pidash naidi kichuganchichu. ³Kaigunadaga kangunada rimasha juchachingujka na ninichu, ashtangarin ña nishka shinaga ñukuchij shungubimi gagunguichi. Chimunda kangunan igulda kausanchimumi wañunchimumi. ⁴Kangunabi tuki yuyida churanimi, shinaidi kangunamunda <Allimi> nisha manchanai kushiyanimi. Kai tuki ñukuchij llakigunan gashash ñaubujmu rina yuyinmi ashtan kushi gani.

⁵Macedonia llaktamu chayushkamunda pacha nima na samuganchichu, ashtangarin tuki ladubi manchanaidi llakichishkaguna, washabiga p’iñashkaguna, shungu ukubish manchashkagunami gaganchi. ⁶Shina gakish urmuj ñawilla gajkunada kushichij Diosga, Tito chayushkan ñukuchida kushiyachiga. ⁷Na Tito chayushkallanga, ashtangarin kanguna paida kushiyachishkanbish ñukuchida kushiyachiga. Titoga kanguna ñukada rikungu munashkada, manchanai llakilla gashkada, ñukada llakisha <¿Imashi tukugun?> nisha yuyagushkadash parlushkamundagarin ashtanmi kushiyagani.

⁸Ñukaj kachashka carta kangunada asha p’unllagunada llakichishkada yachi chayushaga llakiriganimi. Chida escribisha kachashkan llakichishash kununga na llakirinichu. ⁹Na kangunada llakichishkamundachu, ashtangarin chi llaki kangunada Diosmu vueltachishkamundami kununga kushiyani. Kangunaga Dios munashka shinami chi llakigunada apaganguichi. Shinaki ñukuchiga kangunada ima na allidaga na rurushkanchichu. ¹⁰Diosmunda shamuj llakiga Diosmu vueltarisha kishpichishka gachun pushujmi. Chimundaga na llakirinachu. Kutin kai pachabi tiyaj llakiga wañuchunmi pushan. ¹¹¡Rikichi! Diosmunda shamuj llakiga kangunaj allibujmi gashka. Chimundami kununga kangunaga kutin kutin yuyarigujkuna, na juchayuj gashkada rikuchingu munajkuna, p’iñarijkuna, manchajkuna, ñukada rikungu munajkuna, tuki shungun chapajkuna, na kabishkada rurujta llakichinalla gajkuna tukushkanguichi. Kai tuki rurushkagunanga na juchachibujkuna gashkadami ña rikuchishkanguichi. ¹²Shinakiga chi cartadaga na allida rurujmunda llaki tukujmundash na escribiganichu, ashtangarin kanguna ñukuchida yuyarijkuna gashkada Diosbuj ñaubuki rikuchingujmiga. ¹³Shina rurashami kangunaga ñukuchida kushiyachishkanguichi.

Chi kushiyachishka jawash Tito paibuj yuyida tuki kanguna jinchiyachishkamunda pai kushi tukujta rikushagarin ashtanmi kushilladi ganchi. ¹⁴Kangunamunda <Yallimi ganguna> nisha Titomunga ñami parlugani. Shinaidi ñukada na pingaibi sakishkanguichichu, ashtangarin ima layami tukibi kabishkada kangunamu parluganchi, shinaidimi kangunamunda <Yallimi ganguna> nisha Titomu parlushkash kabishka gan. ¹⁵Tuki kanguna paida kazuj gashkada shinaidi manchin ch’ujchusha japishkadash7.15 <Manchin ch’ujchusha japishka> nishaga Tito corintogunajmu chayaki alli japishaga tuki pai mandushkada rurashkadami nin. yuyarishami ashtan k’uyagun. ¹⁶¡Kangunabi tuki yuyida churashami manchanaidi kushiyani!

Na mitsushalla kunamunda

¹K’uyashka wauki paniguna, Macedonia llaktabi iglillagunamu8.1 Iglillaguna nishkaga crijkuna tandanukigunami, na wasigunachu. Dios kushka alligunada8.1 Kai <Dios kushka alliguna> nishaga crij wauki panigunada kushilladi ima ministishkabi Dios munushka shina ayudanadami nin. ima laya rikuchishkadami kununga kangunamu parlungu munanchi. ²Paigunaga jatun llakigunada pasushash kushillagunami gan; imash illujkuna gashash ashtan tuki shungun na mitsushalla kugaguna.8.2 1Ts 1.6; 2.14; 2Ts 1.4-5³Paigunaga kungu pudishkada kushash, ashtan yallinbish kushilladi kujkunada ñukadimi rikugani. ⁴Paigunalladimi <Linshuyachishkagunamu ñukuchish kusha ayudachun valichibaichi> nisha kutin kutin ñukuchida rugugaguna.8.4 Ro 15.26⁵Ñukuchiga <Ashalladami kunga> nisha yuyaganchimi; shinash ashtan yallidami kugaguna, kallarimunga paigunaidi Manduj Jesusmu, chi k’ipaga Dios munashka shina ñukuchimu. ⁶Sarun ima laya kanguna kushkada Tito tandachingu kallariga, shina layaidi kushka alligunada tandachisha tukuringagama katichun paida ruguganchi.8.6 Pabloga sarun kallarishka ofrendada tandachisha tukuchichun nisha Titoda kachushkadami nigun.⁷Kangunagarin, ima laya tukibi yalli ganguichi: crishkabi, k’uilla rimashkabi, yachashkabi, shujkunada ayudangu munushkabi, ñukuchida llakishkabish, shinaidi kushka alligunabi kungu ashtan yalliguna gaichi.

⁸Kaigunada nishaga na mandagunichu, ashtangarin shujkuna ima laya kujkuna gashkada alli yachushaga, kangunash divirti k’uyida charishkada rikuchichun niguni. ⁹Ñukuchij Mandaj Jesucristo kushka alligunadaga yachunguichimi. Paiga tukida charij gashash ashtan kangunada k’uyasha imadash na charij tukuga. Pai shina laya tukushkamunda kanguna charijkuna tukuchunmi shina ruruga.

¹⁰Ñuka yuyachishkadaga kangunaj allibujlladimi kashna nini: Chaishuj watami kanguna, tukigunada ñaubusha na kungajllaga kallariganguichichu, ashtangarin tuki muninbishmi kallariganguichi. ¹¹Shinakiga, kanguna tuki munin imalla charishkada kungu kallarishkadaga chi yuyillandi kununbish pudishkada rurusha tukuchichi. ¹²Maijinbish alli munin kungu munakiga Diosga imada na charishkamunda kuchun na mañan, ashtanbish ima charishkamunda kukiga alli japishkami ganga.

¹³Shujkunada ayudashkamunda kanguna imash illuj tukuchunga na ganchu, ashtangarin kangunash paigunash igul gachunmi gan. ¹⁴Kanguna kunun mejorda charishkamundaga ministijkunamu ayudanami ganguichi. Shuj p’unlla kanguna ministikimaga paigunash mejorda charishaga kungallami. Shina rurushami igul ganguichi. ¹⁵Dios escribichishkabiga, “Mirgada tandachijmush na puchugachu; ashallada tandachijmush na jualtugachu,”8.15 Ex 16.18 ninmi.

Titoda shujkunandij Pablo kachashkamunda

¹⁶Kangunada ñuka llakishka layaidi Titosh llakishkamunda Diosta <Diosolopai> ninimi. ¹⁷Kangunada rikungu richun ñuka mingakiga <Ari> niga. Pailladi rikungu rina munida charishkamundaga kushilla rigun. ¹⁸Paiyunmi shuj crij waukida kachunchi. Paiga Alli Shimida parlushkamunda mashnalla Diosbuj tandanukigunabi alli uyarishkami. ¹⁹Shinaidi, tandachishka kuchkida apasha rinabi, ñukuchin richun paidaga tauga iglillagunami aglluga. Kai tandashkanga Manduj Dios jatunyachishka gachun8.19 Jerusalenbi crijkunaga chi kushkada japinga. Chimunda paiguna Diosta jatunyachinga. shinaidi ñukuchi ayudana munida charishkada rikuchingajmi ruranchi.8.19 Kai ruranchi-da nishaga ima laya chi mingashka kushka kuchkida rurashkadami nin.²⁰Kai na mitsushalla kushka kuchkida ñukuchi ima laya allibuj rurashkada ama pish juchachichun munanchi. ²¹Ñukuchiga na Manduj Diosbuj ñaubujllabi, ashtangarin gentegunaj ñaubukish kabishkada rurasha katigunchi.

²²Chi ishki waukin ñukuchij chaishuj waukidash kachanchi. Paidaga tauga kutin kaida chaida alli rurajtami rikuganchi. Kunungarin kangunabi tuki yuyida churashkamundaga ashtanmi rurana yuyin gan. ²³Titoga ñukan apanukujmi shinaidi kangunaj allibuj ñukan rurusha purijmi. Kutin chaishuj waukigunaga crijkunaj tandanukigunamunda kachushkaguna, shinaidi Cristoda jatunyachijkunami. ²⁴Chimunda tuki tandanukushka crijkuna yachachunga kanguna divirti k’uyujkuna gashkada, imamunda ñukuchi kangunada <Alligunami gan> nishkadash kai chayujkunamu rikuchichi.

¹Linshuyachishkagunamu sirvinamunda9.1 Sirvinaga ministijkunamu kungu kuchkida tandanamundami parlan. escribisha katinaga na ministirinchu. ²Kanguna tuki munin kuna yuyida charishkadaga rijsinimi. Macedonia llaktabi kausujkunamunga <Acaya llaktamunda crijkunaga9.2 Corinto pueblo Acaya llaktabi gashkamunda Corinto crijkunaga Acayagunalladimi gan. pasuj watamundadimi ayudangu ganguna> nisha kushidi parlagani. Chi tuki munin gashkada uyushagarin chaubi yalli macedoniagunami manchanaidi kushiyasha ayudangu kallarigaguna. ³Shina gakish kangunamunda <Kungagunami> nisha parlushka ama llagmashka gachun, ashtan ñuka nishka layadi kanguna kunada tandachisha kachanalla chapachunmi kai kinsa waukigunadaga kachani. ⁴Maijin macedoniamundaguna ñukan kangunajmu risha, narij tandachishkada japikiga, ñukuchi kangunamunda <Kungagunami> nisha parlushkamundaga pinganaimi gashun, yallidijka kanguna. ⁵Chimundami kai waukiguna ñaubusha kangunajmu richun ruganaidi tukugani, kanguna sarun <Kushunllami> nishka kuchkida tandachichisha kachanalla gachun. Shinami kangunaj tandachishkaga na mandushkamunda gangachu, ashtangarin kungujti munusha na mitsashalla kushkami ganga.

⁶Ashallada tarbujka ashalladami japin; mirgada tarbujka mirgadami japin.9.6 Pr 11.24-25 Chida yuyaringuichi. ⁷Kushilla kujtaga Dios k’uyujmi. Shinushkamunda maijinsh kushaga na llakirishalla, na mandujllabi, ashtangarin kikinbuj shungun ña kungu yuyashkadami kuchun. ⁸Diosga kanguna maibi gashash tuki ministishkada charichun, shinaidi ashtanbish yallijta tuki laya alli ruranagunabi p’unllanda ayudachunmi tuki kushka alligunada kangunamu mirachi pudin. ⁹Dios escribichishkabiga, “Paibuj charishkadaga na charijkunamu rakisha kun. Paibuj chi kabishka ruranaga nalladi tukuringachu,”9.9 Sal 112.9 nin.

¹⁰Tarbuchun muyudash, mikuchun mikunadash kuj Diosga kanguna tarbuchun muyuda mejorda kunga, shinaidi alli granu shinagunada pachun kushaga kangunaj kabishka ruranada mirachinga. ¹¹Kangunaj charishkada tuki shungun shujkunamu kuchunmi Diosga tuki layagunada charichun ruranga. Kanguna tandachishkada ñukuchi kuchun kachushkamundaga paigunaga Diosta <Diosolopai> ningagunami.

¹²Kanguna, linshuyachishkagunamu ayudasha kushkaga na paigunaj ima ministishkamunda p’aktachingulla ganchu, ashtangarin Diosta tuki shungun tauga kutin paiguna <Diosolopai> nichunbishmi gan. ¹³Kanguna parlagushka Cristomunda Alli Shimida kazusha, na mitsushalla paigunamu tukigunamush kujkuna gashkamunda, shina sirvishkada paiguna rikushaga, Diosta <Allimi gangui> ningaguna. ¹⁴Shinaidi Dios kushka alligunada kanguna manchanaidi japishkamundaga kangunamunda paiguna manchanai llakisha Diosta mañungami. ¹⁵Shimillan imadash na ni pudishka kumbidashkamundaga9.15 Chi kumbidanamunda japijka alli parlungu pudinmi, shinash manchanaidi k’uidi pish na japinada japishkamundaga ima layash na illujta parli pudinchu, upa layami tukun. Diosta <¡Diosolopai!> ninchi.

Juchachijkunada Pablo rimashkamunda

¹Cristo alli llakij, alli yuyiyuj gashkamunda ñuka Pablodimi, kanguna kaida uyabaichi, nini: Shujkuna <Pablo kangunan gashaga mancharijlla; karubi gashaga pidash na manchusha rimujllami> nishka shinaga, ²kangunada rikungu ñuka chayushaga maijinguna <Aicha munillan kausujkunami> nisha ñukuchida rimujkunadaga ñuka yuyushka shina jinchida rimanaidi ama tukungajka ashtan kangunaidi allichichunmi rugani. ³Kai pachabi kausashash, kai pachaj genteguna shinaga na takanukunada ruranchichu. ⁴Ñukuchi takanukungu charishkagunaga na kai pachamundachu, ashtangarin jinchi pirka shinagunada chingachishtangu Diosbuj ruri pudinada charingunami. ⁵Diosta ama rijsichun nisha jarkuj jatun tukushkada, rimanukigunadash tukuchishtanchi. Cristoda kazuchunmi tuki yuyigunada prezuchinchi. ⁶Kanguna tuki shungun Paida kazujkuna tukushka k’ipa, na kazukiga llakichinalla ganchi.

⁷Rikurishkada rikichi. Maijinsh tuki shungun <Cristojtimi gani> yuyijka ñukuchidash pai layaidi Cristoj gashkada yuyachun. ⁸Manduj Jesusga ñukadaga mana kangunada chingachichun, ashtanbish alli jinchi crijta rurachunmi mandanada kuga. Chida kushkamunda <Yalli gani> kutin kutin nigushash na pingui tukushachu. ⁹Ñukaj cartagunan kangunada manchachingu kachushkadaga ama yuyanguichichu. ¹⁰Maijingunaga, “Paiga jinchida rimusha escribishami kachan, shinash ñukuchin pai gashaga pidash na manchachijchu, na alli parlujchu,” ninguna. ¹¹Shina nijkuna kaida alli yuyarichun: Ima shinami karubi gashash jinchida escribisha kachanchi, shinaidimi kangunan gashash ruranagunabi rikuchishun.

¹²Kikinlladi alabarijkunandijka <Paiguna layami ganchi> ningakish na chibuj ganchichu. Paigunalladi kaishujkun chaishujkun <¿Maijin yallidi valinchi?> ninukusha, paigunaidi ch’imbapurujkunaga yuyi illuj layagunami. ¹³Ñukuchiga <Yallimi valinchi> nisha na parlashunchu, ashtangarin Dios imada maigamalla rurachun nishkadami ruranchi; shinaidi Pailladimi kangunajmush chayachun kachuga. ¹⁴Ñukuchi kangunajmu chayushami Cristomunda Alli Shimida narij pish parlujllabidi parluganchi. Chimunda Dios maigamalla richun nishkada na pasuganchi. Kangunajmu na ñaubusha chayushkashaga diganami nigunchimu. ¹⁵Dios maigama rurachun nishkamundaga, shujkunaj rurushkada <Ñukuchimi ruruganchi> nishaga nalladi ninchichu, ashtangarin kangunaj crishka jinchiyasha katiguki, ñukuchish kangunamu Diosmunda yachachinada ashtan yachachisha katingu yuyagunchillami. ¹⁶Chimunda kangunaj llaktamunda ashtan karu llaktagunabimi Alli Shimida parlungu munanchi. Shujkuna parlushka pushtugunamu na chayungu munanchichu ama <Ñukuchimi parluganchi> ningaj. ¹⁷Shinaga, “Maijinbish jatun tukusha parlujka, ashtan Mandaj Diosmunda jatun tukusha parlachunlla.”10.17 Jer 9.24¹⁸Kikinlladi <Yallimi gani> nijka na valichishka tukun, ashtangarin Manduj Dios <Alli gan> nikimi valichishka tukun.

Pablomundash kachushka llullajkunamundash

¹¡Kanguna ñuka loco shina gashkada aguantachun allimi ganmu! Ima laya gakish aguantabaichi. ²Kanguna Diosbujlla gachun ñuka munashkaga Diosmundami. Kangunadaga piyunbish narij tandanukushka soltera shinada rikuchingu shuj kusallan, Criston, kazarachun ari nichishkani. ³Ashtanmi yuyisapa llullaj culebra, Evada ima layami pandachiga, shinaidimi kangunadash Cristoda divirti tuki shungun kazusha k’uyana yuyigunada pandachinadami manchani. ⁴Ñukuchi kangunamu Jesusmunda parlaki, Alli Shimida, Espiritudash japishka gashash maijinsh kangunajmu chayasha shujtij Jesusta, shujtij laya alli shimida, shinaidi shujtij laya espirituda parlakish ashtan kushilla japishkanguichi. ⁵Shina gakish chi jatun yachuj nishka agllushkagunada yangaga nalladi ganichu. ⁶Ñuka, paiguna laya na k’uilla parlushash yachanadaga ashtanmi yachani. Chidaga tukibi tuki layami kangunamu rikuchishkanchi.

⁷Kangunada ashtan jatunyachingumi, ñuka imakish na valij shina tukusha, Diosbuj Alli Shimida na cobrusha parlushkamundachu ¿juchada rurushkani? ⁸Kangunada sirvingajka, chaishuj tandanukushka crijkunajtami shuwaj laya kuchkida japigani. ⁹Kangunan gashaga, ima ministishkabi ayudachunga na mañaganichu; Macedonia llaktamunda shamuj crijkunami tuki ima ñuka ministishkada kuga. Kangunada imada mañasha carga laya na tukuganichu, shinaidi katigushallami. ¹⁰Cristomunda kabishkada yachushkaga ñukabimi gan. Ñuka jatun tukush parlashkadaga Acaya llaktabiga ni pish na jarkungachu. ¹¹Shina nishaga ¿kangunada na k’uyushkamundachu shina nini? ¡K’uyashkadaga Diosga yachanmi! ¹²Shinaki chaishujkuna alabarishkagunabi ñukuchin igul gashkada yuyachun munujkuna ama alabari pudichunga kunungama ñuka rurashkada rurasha katigushallami. ¹³Chi agllushka nishkagunaga llagmusha engañajkunami. Paigunaga <Cristoj agllushkagunami ganchi> nishami nij tukunguna. ¹⁴Ima mancharinash na ganchu. Satanaslladi p’alaniguj ángel laya tukujllami. ¹⁵Shinaga Satanasbujta rurujkuna kabishkada rurajkuna laya tukukiga na mancharinachu. ¡Paigunaga kikin rurashkaguna layaidi tukuringami!

Na ruri pudishash <Yallimi gani> nishkamunda

¹⁶Kutin nini: ñukada <Locomi> nishaga ama yuyanguichichu; kangunaidi shina yuyagushkashaga <Ñuka yallimi gani> nisha ashada ningu shinash loco shinada japibaichi. ¹⁷Shina na manchushalla parlashaga Manduj Jesús munushka shina na parlanichu, ashtangarin loco layalla parlani. ¹⁸Taugaguna kai pachabi kausujkuna laya jatun tukush parlashkamunda, ñukash paiguna laya parlashami. ¹⁹Kanguna <Alli yachajkunami ganchi> yuyashash, locogunadaga aguantanguichillami. ²⁰Shinaidi watushka shinada rurujkunada, kichujkunada, pandachijkunada, jatun tukujkunada, na gashaga ñawibi lutskijkunadash aguantajkunami ganguichi. ²¹Ñukuchiga paiguna shina rurungujka na pudiganchichu. ¡Chida ninadaga ñukada pingananmi!

Shinakish paiguna imamundash <Yalli ganchi> ningu pudijkidijka, ñukash – shuj locoma laya – <Yalli gani> ni pudinimi. ²²¿Paigunaga hebreogunachu? Ñukash chilladimi gani. ¿Israelgunachu? Ñukash israelmi gani. ¿Abrahambuj wawagunaj wawagunachu? Ñukash chilladimi gani.11.22 Hch 22.3; Ro 11.1; Flp 3.4-6²³¿Cristoda sirvijkunachu? Ñukagarin ashtan paigunada yallimi ruragani. (Kaidaga shuj locoma laya parlani.) Tauga kutinmi carcelbi gagani,11.23 Hch 16.23 pachun azilgun dalishka gagani, shinaidi tauga kutin wañunallabish gagani. ²⁴Pichka kutinmi kinsa chunga iskunda (39) israelguna azotishka gagani. ²⁵Kinsa kutinmi kaspin takashka gagani;11.25 kaspin Hch 16.22 shuj kutinga rumigunanmi pigushka gagani.11.25 rumigunan Hch 14.19 Ñuka rigushka barcoguna kinsa kutinmi jatun yaku kuchabi illujta p’akiriki chibi gagani.11.25 jatun yaku kuchabi Hch 27 Shuj tuta shuj p’unlladami jatun yaku kuchabidi pasugani. ²⁶Ñukaga tauga kutinmi maimush rigujlla gani. Shinushami jatiyakugunada, shuwagunada, ñukuchi israelpuragunada, karu llaktamundagunada, pueblogunada, gente illuj pambagunada, jatun yaku kuchada, nij tukushka crijkunadash llaki tukunalla pasugani. ²⁷Shaikungama trabajagani; tauga kutinmi na puñugani, yarijinbish yakunayinbishmi gagani; tauga kutinmi na mikugani; chiribiga churana illujlla llakidi gagani. ²⁸Kai tukida pasushka jawash <Kaibi chaibi tandanukushka crijkuna ¿imashi tukugun?> yuyasha p’unllandi llakirini. ²⁹Maijinbish jursa illuj gakiga ñukash jursa illujma laya ganimi; maijinsh pandachishka gakiga ñukaj shungu raurunmi.

³⁰Ñukaga <Yallimi gani> ninadij gakiga, na ruri pudishkagunamundami <Yallimi gani> nisha. ³¹Na tukuribuj, <Alli> nishka Diosga, Mandaj Jesucristoj Taitaga ñuka na llullagushkada yachanmi. ³²Damasco pueblobi gakimi Aretas shuti jatun manduj churashka gobernadorga ñukada prezungumi chi pueblomunda llujshina pungugunabi guardagunada churuga. ³³Shina gakish ayudangu munujkunaga jatun canastabi ñukada churusha chi puebloj pirka ventanamunda uriyachikimi chi gobernadorbuj makimunda vincigani.

Pabloj cuerpobi kasha shina tujsisha nanachichishkamunda

¹Imadash na japirikish, ñukalladi <Yallimi gani> nisha parlana gani. Chimunda puñi shinabi Manduj Jesús rikuchishkagunada parlungu kallarini: ²Cristoda katij shuj k’aridaga rijsinimi. Paiga kinsa jawa pachagama apushka gaga. Chiga ñami chunga chusku (14) wata tukun. (Paida cuerpondijchu, cuerpo illujtachu apashkada na yachanichu, Diosllami yachan.) ^3-4Chi k’ari jawa k’uilla llaktamu Dios apushkada yachanimi. (Shinash cuerpondijchu, cuerpo illujchu rishkada na yachanichu, Diosllami yachan.) Chibimi shimillan imadash na nina gashkada, pish na parli pudinagunadashmi uyuga. ⁵Ñukaga chi k’arimunda <Yallimi gan> nisha parli pudisha. <Ñukalladi yallimi gani> na nishachu, ashtangarin ñuka na pudishkagunallabimi <Yallimi gani> nisha. ⁶<Yalli gani> nisha parlashaga ashtan kabishkadami parlimu, na locoma laya gaimuchu; ñukada rikushkamundash ima parlashkada uyashkamundash yallida ama pish yuyachun upalla sakini.12.6 Pablo jawa pachamu rishkada parlashkallamunda shujkunaga, Pabloga pai jawa pachamu rishkada gentegunamu parlushaga, ama gentej alabarishka gangu nigun.

⁷Jawa pachabi gashkada ñuka jatun k’uidi rikushkagunamunda ama yalli jatun tukuchunga Satanasbuj parlujta ñukamu kachashkami ñukaj cuerpobi kasha shina tujsisha nanachichin. ⁸Chida ñukamunda anchuchichunga kinsa kutinmi Manduj Jesusta mañagani. ⁹Shina mañakish Manduj Jesusga, “Ñuka kushka alligunada charishkan imadash ña na ministinguichu. Ñukaj ruri pudinaga na ruri pudijkunabimi tukida alli p’aktachichin,” nigami. Shinusha, Cristoj ima ruri pudina ñukabi gachun ñuka na ruri pudishkagunamundagarin <Allimini> nishami. ¹⁰Chimunda na pudij gashash, litushka gashash, imada ministij gashash, katik’ichushka gashash, shinaidi llakichishka gashash Cristobuj kushiyanimi. Shinushkamunda na pudij gashaga, chibimi ruri pudij tukuni.12.10 Flp 4.11-13

Corinto crijkunada Pablo llakishkamunda

¹¹Ñuka loco laya parlashaga kangunamundami shina tukushkani. Kangunami ñukadaga <Paiga allimi> nina gaganguichi. Ñuka imash na gashash yachuj nishka agllushkagunamundaga imabish paigunamunda yanga gashkadaga na yuyanichu. ¹²Ñukaga agllusha kachushkadij gashkamundami kangunapurabi gashaga tukida aguantashami mancharinagunada, pish narij rurashkada, pish na ruri pudishkadashmi rurugani. ¹³¿Imashadi chaishuj iglillagunamunda yalli yanga gashkada kangunaga yuyanguichi? Ñukaidi imadash na mañushkamundachu. ¡Kangunaj yuyibi na allikiga perdonabaichi!12.13 Kaibiga Pablolladi divirti ima na allida na rurushkada yuyan. Chimundami Corinto crijkunada rimungu kaida escribiga.

¹⁴Kaiyunga kinsa kutinmi kangunajmu ña rinalla gani. Kanguna ima charishkada na munashkamunda, ashtangarin kangunada ayudangu munashkamundami kununbish imada na mañushachu. Tukimunda yalliga wawaguna taita mamagunamu kuchkida kunaga na ganchu, ashtangarin taita mamagunami wawagunamu kungaj tandachina gan.12.14 Pabloga Jesusmunda parlasha crichishkamunda paigunaj taita layamiga.¹⁵Shinushami kanguna alli gachun imalla ñuka charishkada kushilladi kusha, ñukaidi tukurij shina tukurishami. Shina rurusha kangunada ashtan k’uyakish ¿ashalladachu ñukada k’uyanguichi? ¹⁶Shinash ñuka imadash na mañushkada kanguna yachukish maijingunaga <Yachuj Pabloga engañasha urmachijmi> ninguna. ¹⁷Shinushaga ¿kangunajmu shujkunada kachushkan engañaganimachari? ¹⁸Tito kangunajmu richun rugusha, paiyun chaishuj waukida kachagani. ¿Titochu kangunada engañaga? Ñukuchi ishkindijka ¿nachu chi espiritullandi chi ruranagunada shina layaidi rurasha katigunchi?

¹⁹Kanguna ñukuchidaga <Paigunaga na alligunada rurushaga kununga alliguna rikuringajmi shina nigunguna> yuyagunguichichari, ashtangarin Criston shujlla tukusha Diosbuj ñaubukimi parlagunchi.12.19 Pabloga <Diosbuj ñaubukimi parlagunchi> nishaga Dios kabishkada ruruj Juez gashkada yachan. Paigunaga Criston shujlla tukushkamunda nalladi llagmujkuna gan. K’uyashka wauki paniguna, tuki kaigunaga kangunaj espíritu jinchiyachunmi gan. ²⁰Chimu risha kangunada na ñuka munushka shina japinada ñukada na kanguna munushka shina japinadashmi manchani. Kangunapurabiga rimanukiguna, shujkuna charishkada muniguna, manchanaidi p’iñanukiguna, chaubirinukiguna, litunukiguna, washalla rimanukiguna, jatun tukuna yuyiguna, maidash gachun rurigunash tiyanadami manchani. ²¹Kangunada kutin rikungu rinabi kangunaj ñaubuki ñukaj Dios ñukada pinganaibi sakinadami manchani. Kangunaga sarunmundadi juchagunada rurasha ashtan mapayanada, piyunbish siririnada, millida rurana munidash na sakisha Diosmu na vueltarishkanguichi; tauga shina rurujkunamunda wakusha llakirishami.

Yuyindi ganamunda

¹Kaiyunga kinsa kutinmi kangunada rikungu risha. “Ima tukushkaga ishki na gashaga kinsa rikujkuna kabishkada parlashkan tuki allichishka ganga.”13.1 Kinsa rikujkunada ninaga Pabloj kinsa kutin rinami ganmu.13.1 Dt 19.15; Mt 18.15-17^2-3Sarun k’ipa ribi kangunan gasha yuyachishka shinaidimi kunun karubi gashash kutinlladi nini: Kanguna Cristo ñukabi parlagushkada yachungu munagushkamundami ñuka rikungu rishaga sarunmundadi juchada rurujkunada, kunun rurajkunadash, ¡nalladi shina sakishachu! Cristoga kangunapurabi gasha ima laya rurusha imadash na ruri pudijka na ganchu, ashtangarin Paibuj tuki ruri pudinadami kangunabi rikuchin. ⁴Jesusta ima jursash illuj shinada chakatashkaga cirtumi gan. Shinash Diosbuj ruri pudinamunda kununga kausagunmi. Shinaidi ñukuchikish Pai jursash illuj laya tukuganchi, shinash Diosbuj ruri pudinamundami kangunada sirvingu Criston kausashun.

⁵Kangunalladi <¿Crishkabi allichu katiguni?> nisha yuyarichiri. Ima shina gashkadash rikurichi. Kangunapurabi Jesucristo gashkadaga ¿nachu cuenta kunguichi? Na gashaga crishkabiga ¿na alli gashkanguichichu? ⁶Shina gakish ñukuchi crishkabi alli gashkada kanguna alli yachachunmi munani. ⁷Shinalladi kanguna ima na allida ama rurachunmi na ñukuchi crishkabi alli gashkada rikuchingujka, ashtangarin ñukuchi na alli gashka laya rikurikish kanguna alligunallada rurachunbishmi shina Diosta mañanchi.13.7 Narij chayusha Pabloga Corinto crijkuna alli ruranada agllachun munan. Pabloga alli pushuj gashka na rikurikish na paigunada llakichish ninchu.⁸Kabishkajka ima na allida ruranagunamadaga na ruri pudinchichu, ashtanbish kabishkaj allibujmi ruranchi.13.8 Kabishkada rurasha kausana ganchi. Corinto crijkuna na alli kausaki Pabloga llakichingaj gan. Diosmu vueltariki Pabloga kushiyangaj gan.⁹Shinusha ñukuchiga na jinchi gashash kanguna ashtan alli jinchiguna gakimi kushiyanchi. Shinushkamunda kanguna ashtan tukibi alliguna tukuchunmi Diosta mañanchi.13.9 Pabloga Corinto crijkunada na llakichishaga na jinchi gaj rikuringa. Corintoguna crishkabi imash na jualtujkuna tukuchunmi Pabloga munan. Paiguna alli purikiga kushilla tukunga.¹⁰Manduj Jesusga ñukamu mandanadaga kangunada crinabi jinchiyachichun, ashtangarin ama tukuchishtachun kuga. Kangunajmu chayusha chi mandanan ama p’iñaidi rimungaj, kangunamunda karubi gasha escribisha kachaguni.

Tukurina yuyigunamunda

¹¹Ña tukuchingaj, wauki paniguna, kushiyichi, jinchi crij tukunada mashkichi, ñuka nishkada kazichi, shuj yuyilla gaichi, chulunlla kausichi. Shina gakiga k’uyida, chulunlla kausida kuj Diosga kangunan gangami.

¹²Linshuyachishka yuyin kaishujkun chaishujkun muchusha saludanukichi. ¹³Tuki linshuyachishka crijkuna saludanmi.

¹⁴Manduj Jesucristo kushka alliguna, Diosbuj k’uyana, shinaidi Diosbuj Espíritu shujlla ganash tuki kangunan gachun.