1 Timoteo

Kallari TIMOTEO

1 de Timoteobi kallari parluguna

Kai cartadaga apóstol Pabloga paibuj yallidi k’uyashka churi shina Timoteomu kachasha (1Ti 1.2), Jesucristo wacharishka k’ipa sujta chunga pichka (65) wata shinabimi escribishka yuyachin. Timoteoga Listra llaktamundamiga. Taitaga griegomi, mamaga israelmi (Hch 16.1-3). Mamaj shutiga Eunicemiga, awilaga Loidamiga (2Ti 1.5). Timoteoga Éfeso pueblo tandanukushka crijkunaj michijmiga (1Ti 1.3).

Kaibi Pabloga Timoteomu Diosbuj Shimida parlasha ima laya trabajachun yachachin. Shuj yachanagunaga kaibi tiyan: pandachisha llulla yachachijkuna ama yachachisha katichun (1.3-11), crijkunada pushujkunadash iglillabi ayudajkunadash agllanamunda (3.1-16), alli parluj, alli kausuj, alli k’uyaj, alli crij, ima mapa yuyiguna illuj gachun (4.11-16), crijkunan ima laya rurana (5.1-25), ima charishkallan kushi kausana (6.3-10), ima charishkada kushilla kumbidasha kujlla gachun (6.17-21).

Pablo saludashkamunda

¹Ñukuchida kishpichij Diosbuj shinaidi ñukuchi shuyagushka Jesucristoj mandashkamunda Pai agllasha kachushka Pablomi gani. ²Jesusta crishkamunda ñukaj divirti churi shina Timoteomu kaida escribini: Taita Diosbish ñukuchij Mandaj Cristo Jesusbish kushka alligunada, llakinada, chulunlla kausidash kuchun.

Pandachijkunamunda

^3-4Macedonia llaktamu rigusha kanda ima laya Éfeso pueblobi sakirichun mañashka shinami kutin mañani. Shujkuna llulla yachachijkuna ama yachachisha katichun shinalladi ñauba yanga parlugunadash ñauba taitagunaj shutigunada escribishkadash ama katichun mandungaj chibi sakiri. Chi parlugunaga ashtangarin Diosta crishkamunda Paibujta ruranada ñaubujmu apana randiga rimanukigunabimi churun. ⁵Kai mandushkada kushaga linshu shungun, na juchachibuj yuyin, shinalladi na nij tukushalla crishkan k’uyanukuchunmi nini. ⁶Maijingunaga chi alligunada sakisha imakish na vali yanga parlugunabi watashka shina tukushkaguna. ⁷Moisés mandushkada yachachij gangu munajkunaga paigunalladikish imadash na yachungunachu. <Shinami gan> nishash na intindingunachu.

⁸Moisés mandashkagunada Dios munashka laya rurakiga mandashka alli gashkadaga yachanchimi. ⁹Kaida yachanchi: alligunamunga kai mandushkadaga na kushkachu, ashtangarin na kazujkunamu, na uyash nijkunamu, Diosta na manchujkunamu, juchayujkunamu, Diosta na yuyarijkunamu, Diosta p’iñusha rimajkunamu, taitada mamada wañuchijkunamu, shujkunadash wañuchijkunamu, ¹⁰piyunbish siririjkunamu, k’aripura warmipura siririjkunamu, gentegunada shuwasha k’atujkunamu, llullajkunamu, llullasha jurujkunamushmi gan. Yallidijka mashnalla Diosmunda kabishka yachachishkagunada p’iñasha ima na allida rurujkunamumi kushka. ¹¹Kai k’uilla Alli Shimibiga kai alli yachachinagunami tiyan. Chigunada parlachunmi alli nishka Diosga ñukamu mingushka.

Pabloda Dios llakishkamunda

¹²Alli crisha katichun ñukada jinchiyachishkamunda shinaidi alli katij gashkada yachusha Paida sirvichun churushkamundash ñukuchij Mandaj Cristo Jesusta <Diosolopai> ninimi. ¹³Sarun ñuka narij crij gasha, imada rurashkadash na yachashkamundami Jesusta p’iñachisha rimusha katik’ichusha takusha lituj gakish ashtan Diosga ñukadaga llakishka. ¹⁴Shinash ñukuchij Mandajbuj kushka alligunada ñukaj jawabi manchanaidi tallij shina kusha Cristo Jesusmunda crinadash, k’uyanadashmi kushkaga. ¹⁵Kai parlashkaga kabishkami gan, shinaidi tukiguna japishkami gana gan: Kai pachabi kausujkunaj juchamundaga Cristo Jesusmi kishpichingu shamuga. Chi juchayujkunamunda ñukaga tukigunada yalli juchayujmi gani. ¹⁶Chimundami Jesucristo na tukuribuj llakin rikuchichunmi Diosga ñuka yalli juchayujta llakiga. Mashnalla Paida crisha na tukurij kausida japinada rikuchingumi ñukada shina ruruga. ¹⁷Shinushaga jatun na tukuribuj Mandaj, na wañuj, na rikibuj, shujlla Diosta <Alli k’uilladimi gangui> nishkaga na tukuribuj chashna gachun.

¹⁸Ñuka churi shina Timoteo, kanmunda sarunlla Dios nishkagunada parlujkuna ima laya nishka, kan alli takanukuj soldado shina Diosbujta rurachunmi kai mandushkada kanmu mingani. ¹⁹Shinalladi crishkan, alli yuyigunan katingui. Maijingunaga alli yuyigunada na kazusha tuki shungun crishkash barco takarisha illujta p’akirishtashka shina tukugaguna. ²⁰Shinami Himeneosh, Alejandrosh tukushka. Chimunda Diosta p’iñusha rimusha ama katinada yachachunmi paigunadaga Satanasmu kugani.

Tukigunamunda Diosta mañanamunda

¹Chimunda yallidijka tuki gentegunamunda Diosta mañachun, mañanukuchun, rugachun shinalladi <Diosolopai> nichunbishmi munani. ²Diosllabi yuyida churasha shujkunadash valichisha tukigunaj ñaubuki alli purisha alli k’uilla kausida charingaj jatun llaktada mandujkunamundash tuki mandujkunamundashmi Diosta mañana ganchi. ³Shina rurusha kausushkami alligun, shinaidi ñukuchida Kishpichij Diostaga kushiyachin. ⁴Paiga tukiguna kishpichishka gachun, kabishkada rijsi chayachunbish munan. ⁵Shuj Diosllami tiyun, shinaidi Dioskun gentegunada tandachijkish shujllami gan. Paiga Jesucristomi. ⁶Pailladi tukigunada kishpichingu wañunamu japi tukuga. Dios munashka p’unlla chayakimi Dios Kishpichij gashkada rikuchiga. ⁷Chimundami ñukaga na israelgunamu Diosbuj Shimida parlachun, Paibuj kabishka crinada yachachichun agllusha kachushka gani. Kai nishkaga kabishkami gan, ¡na llullanichu!

Ima laya k’ariguna warmigunash kausanashkamunda

⁸Shinushami k’arigunaga maibi gashash na p’iñarishalla, na rimanukushalla, linshu shungun makida alsusha, Diosta mañachun munani.

⁹Shinaidi warmigunadash ima layami warmiguna churarina gan, shinallami churarichun munani. Juakchash ama yalli parijarisha, manchanaidi valishka churanagunan, kurigunan, perlagunan churarichun na munanichu; ¹⁰chibuj randiga Diosbujllada rurungaj munaj warmiguna gashkamundaga alli ruranagunan churarishka shina kausachunmi munani.

¹¹Imalla yachachishkadash warmigunaga upalla uyusha kazuchun. ¹²Warmiguna, k’arigunada yachachisha mandachun na sakijchuni, ashtangarin upalla gachunmi munani. ¹³Kallaribiga Adanmi rurushka gaga; chi k’ipaga Evami. ¹⁴Adanga na pandachishka gagachu; ashtangarin pandachisha juchabi urmuchishkaga warmimi. ¹⁵Shina gashash warmigunaga alli crij gasha k’uyasha Diosbujlla alli linshu yuyigunan kausashaga maragunada charishkamunda kishpichishkami ganga.

Crijkunada pushujkuna ima laya ganamunda

¹Maijinbish crijkunada rikusha pushuj3.1 <Crijkunada rikusha pushuj> nishaga castellanobiga obispodami nin. gangu munujka jatun allidami rurungu yuyarin. Kaiga kabishkamigun. ²Crijkunada rikusha pushujka: pish na juchachibuj, shuj warmiyujlla, na alligunamunda jarkarij, alli juilluyuj, alli nishka, maijinguna chayukish alli japij, alli yachachi pudij, ³na ubiana yuyilla gaj, takanukunada na munuj, alli apanukuj, p’iñanukunadash na munuj, kuchki charinada mana yalli munaj, ⁴paibuj wasibish alli manduj, maragunash uyusha kazuchunbish alli yachachijmi ganagun. ⁵Shinadijka maijinsh kikinbuj wasibi kausujkunadash na alli mandungu yachushadijka ¿ima layadi Diosbuj tandanukushka crijkunadaga pushungari? ⁶Crijkunada pushajka mushuj crij na gana ganchu. Na shina gashaga jatun tukusha diablo urmushka shina llakimu p’akta urmanmu. ⁷Shinalladi na alli nishkabish diablo pandachishkabish ama urmachunga, na crijkunaj ñaubukish valichishkami gana gan.

Iglillabi ayudajkuna ima laya ganamunda

⁸Shinaidi iglillabi ayudajkunash3.8 <Iglillabi ayudaj> nishaga castellanobiga diaconodami nin. alli nishka gaj, imada rurusha nishash p’aktachij, na ubiana yuyilla gaj, kuchkida japingu na allida na rurujkish gachun. ⁹Ashtangarin Diosta crinamunda pish na yachushka yachanagunada linshu yuyin wakichichun. ¹⁰Narikish churushaidimi, paiguna ima laya kausagushkadadi rikuna. Chibi pish na juchachibuj gakiga crijkunada ayudaj gachunga churanallami.

¹¹Ayudajkunaj warmigunash alli nishka gaj, shujkunada washalla na parlaj, ashtan na alligunamunda jarkarij, tukibi alli p’aktachij gachun.

¹²Crijkunada ayudajka shuj warmiyujlla, maragunadash alli yachachij, wasibish alli pushuj gachun. ¹³Shina allida rurusha, crijkunada ayudajkunaga alli nishkami gangaguna. Shinaidi imadash na manchushallami paiguna Cristo Jesusta crishkamundash parlunga.

Pish na intindibuj crishkamunda

^14-15Kanda ñalla rikungu rinada yuyashash ñuka na ut’ka chayukimaga Diosta crijkunapurabi ima laya kausanada yachachunmi kaida escribisha kachani. Chi tandanukuj crijkunaga kausuj Diosbuj iglilla gan, jinchi jinchi pilar shina kabishkada charirijmi gan. ¹⁶Pish na intindibuj ñukuchi crishkaga3.16 <Ñukuchi crishkaga> nishkaga <Dios yuyilla gashka> nishkashmi intindiri pudin. yalli jatunmi. Chidaga <Na shinachu> ningujka pish na ni pudinchu:

Paiga aichayuj tukusha rikurigami.

Pai kabishka gashkada Diosbuj Espíritu rikuchiga.

Angelgunash Paidaga rikugagunami.

Llaktagunabi Paimundaga parlugagunami.

Kai pachabi Paidaga crigagunami.

Jawa pachamu Diosbuj k’uillabi gachun pushashkamiga.

Crishkada sakijkunamunda

¹Diosbuj Espirituga larudami nin: tukuri p’unllagunabiga shujkunaga pandachijlla espirituj yuyigunada shinaidi ayagunaj yachachishkadash katingaj nishami crishkada sakingaguna. ²Chi yachachinagunaga llulla ishki siki, llumiyashka yuyida charijkunamundami shamun. ³Chigunaga ama kazarachun, shinalladi maijin mikunada ama mikuchun ningunami. Chi mikunagunadaga kabishkada rijsij crijkuna <Diosolopai> nisha mikuchunmi Diosga kushka. ⁴Dios rurushkagunaga tuki allimigun. Shinusha imadash na millushalla <Diosolopai> nisha japinallamigun. ⁵Diosbuj Shimimundash Paida mañushkamundash chigunaga linshuyachishkami gan.

Jesucristoj alli sirvijmunda

⁶Kaigunada wauki panigunamu yachachishaga Jesucristoj alli sirvijmi gangui. Shinaidi kabishka shimida crishkan, alli yachachinagunada yachusha katishkanga alli mikushka shinami gangui. ⁷Kununga imakish na sirvij parlugunada shinaidi ñauba yanga nishkagunadash ama uyanguichu, ashtangarin Dios yuyilla tukungaj jinchiyarisha katingui. ⁸Cuerpo jinchiyachun imadash rurushkaga ashalla allimi gan. Shinash Dios yuyilla ganaga tukimumi ashtan yalli allimi gan. Shina rurakiga kai kausibish k’ipa kausibish alligunada kunga. ⁹Kai parlashkaga kabishkamigun, tukiguna japichun valin. ¹⁰Chillamundami yallidijka kausuj Diosta ñukuchi yuyin shuyashkamunda llakigunada apushash jinchida rurasha katigunchilla. Paiga tukigunada Kishpichijmi; ashtandijkarin Paida crijkunadami Kishpichij gan.

¹¹Kaigunadaga yachachisha mandangui. ¹²Kan chairijti gashkamunda ama pish yangabi churachun, ashtangarin alli parluj, alli kausuj, alli k’uyaj, alli crij, ima mapa yuyiguna illuj gashkadash chaishuj crijkunamu alli rikuchij gai. ¹³Ñuka chayungamaga tukigunaj ñaubuki Diosbuj Shimida liyusha crijkunada yachachishash kushiyachishash katigunguilla. ¹⁴Yuyijkuna kambuj jawabi makida churuki Diosmunda parluj nishkan Dios kushkadaga p’akta kungaringuimu. ¹⁵Kan ñaubujmu katishkada tukiguna rikuchun kai ruranagunadaga tuki shungun alli rurana yuyilla gai. ¹⁶Yachachigushkamunda kanllamundadikish yuyinlladi gai. Shina rurushaga kanlladi kishpiringuimi, kanda uyujkunadashmi kishpichingui.

Crijkunan ima laya ruranamunda

¹Yuyijtaga ama jinchida rimanguichu, ashtangarin kambuj taitada shina, k’ipa iñigunadash kambuj waukigunada shina yuyarisha yachachingui. ²Yuyij warmigunada kambuj mamada laya, k’ipa iñi warmigunadash panigunada laya ima mapa yuyiguna illuj yuyarisha yachachingui.

³Divirti pish na ayudashka viudagunada ayudangui. ⁴Shinash maijin viuda wawagunada nitugunada charikiga, kikinbuj familialladi tuki shungun ayudangaj, taita mamamu alligunada kungajka kaidarij yachachun. Kashna ruranaga Diosta kushiyachin. ⁵Pailla gaj divirti ministij viudaga Diosbi yuyida churasha shuyasha, tutash p’unllash Paida rugushaidi mañariagunadaga na sakinchu. ⁶Ashtangarin maijin viuda paibuj aicha munushkada rurushaga kausashash wañushka layamigun. ⁷Kai yachachishkagunadaga pish ama juchachishka gachun paigunamu mandangui. ⁸Maijinbish kikinpuramunda yallidijka paibuj wasibi kausujkunamundash ima ministishkada na yuyarijka, crishkadash na valichisha, na crijkunadash yalli millimi tukun.

⁹Viudagunaj shutida escribisha churana librobiga shuj kusanlla alli gaj, sujta chunga (60) yalli watada charijllada churashka gachun. ¹⁰Paigunaj maragunada alli iñachij, wasimu chayujkunadash alli japij, linshuyachishka crijkunaj chakigunada mailluj,5.10 Chakigunada maillana nishaga shujkunada pachun ayudachun chakida maillangagama nishami nin. llakilla kausujkunada ayudaj, shinaidi tuki imadash allida ruruj gachun. Tuki kai alligunada rurushkamundami alli nishka ganga.

¹¹Chairij viudagunadaga chi librobiga ama escribinguichu. Paigunaj aicha muni vincikiga Cristomunda laduyasha kutin kazarasha ninguna. ¹²Shina rurushaga paiguna ñaubamu nishkada5.12 Chi viudaguna ñaubamu <Na kazarashachu> nigaguna. na p’aktachishkamunda kauzayujmi tukunguna. ¹³Shinaidi wasin wasin purisha imadash na rurusha yanga purida purijkunami tukun. Yanga purishka jawash yanga parluj, imabish satirisha nash kabida parlush purijllami tukun. ¹⁴Shinushaga na rikunachijkuna ama rimi pudichunmi chairij viudagunadaga kazarasha maragunada charichun, wasibi k’uilla kausachun munani. ¹⁵Maijin viudagunaga crinada sakisha Satanastami ña katishkaguna.

¹⁶Iglillamu ama yalli ayudana tukuchunga crijbuj familiabi viudaguna tiyakiga pailladimi ayudi tukun. Shina rurukimi iglillaga imadash na charij viudagunallamu ayudana tukunga.

¹⁷Iglillabi alli pushuj yuyijkunaga, yallidijka Alli Shimida parlusha yachachijkuna, ishki kutin valichishkami gan. ¹⁸Dios escribichishkabiga, “Trillaj wagraj shimida ama watachun,” shinaidi, “Trabajajka pai rurashkamunda japina gashkada japinami gan,” nishkagunami tiyan. ¹⁹Yuyijtaga pish juchachikiga ishki na gashaga kinsa rikushkada parlujkuna na tiyakiga, ama juchachinguichu. ²⁰Juchada rurusha katigujlladaga shujkuna manchachun tukigunaj ñaubuki rimangui.

²¹Pidash na yalli valichishalla tukigunada igulda p’aktachichunmi kaigunadaga Diosbuj, Jesucristoj, Pai agllashka angelgunaj ñaubukish kanmu mingani.

²²Narij alli yuyarishadijka maijinbuj jawabish ama makida churunguichu,5.22 Kai versobiga makida jawabi churachun nishaga Diosbujlla ruranabi sirvichunmi nisha shina nigun. p’akta shujkunaj jucha rurushkagunabi chagruringuimu. Linshu gai.

²³Kambuj iksa kutin kutin ungushkallamunda ama yakulladaga ubianguichu, ashtan asha vinodash ubiangui.

²⁴Maijingunaj juchagunaga narikish tapik’ichujllabidimi laru gan. Shinaidi shujkunaj juchagunaga k’ipamumi rikurin. ²⁵Shinalladi alli rurushkagunaga laru rikurinllami. Chiguna kallaribi pakalla gashash k’ipallaga rikuringallami.

¹Diosbuj shutidash ñukuchij yachachishkadash ama rimachunga mashnalla amoki yugon watashka shina kausagujkunaga amogunada tukimunda <Alli> nisha valichichun. ²Shinaidi maijinguna crij amoda charijkunaga <Crijmigun> nisha kazunada ama sakinguichichu, ashtangarin kanguna rurashkada japijkuna k’uyashka crij waukiguna gashkamunda yalli allida rurachun. Kaigunada alli alli yachachisha atiriguchunlla.

Kuchkida k’uyashkamunda

³Maijinsh na kabishkada parlasha ñukuchij Mandaj Jesucristoj shimigunadash ima laya crijkuna kausanada yachachishkadash <Na allichu> nisha shuj yuyigunada yachachijka, ^4-5jatun tukushka imadash na yachujmi. Imalla yanga parlushkamunda ch’imbapura rimanukusha amañarishka gashami: paigunaga chaishuj shina gangaj munana, p’iñarina, lituna, imada nikish na cribuj, shinaidi piyunbish takanukuna yuyigunallanmi gan. Chigunaga milli yuyidami charin, kabishkadash na rijsijkunachu. Paigunaga maijin crinabish kuchkida japisha charij ganada munusha crij tukunguna.

⁶Ashtangarin ima charishkallan kushi kausajka kabishka crinanga yalli charijma shinami. ⁷Imadash kai pachamunga na apamushkanchichu, shinaidi imadash na apush ri pudishunchu. ⁸Mikunada, churanadash charishaga kushilla gashunchi. ⁹Ashtan charij tukunaida munujkunaga na alli yuyiguna pandachiki jawallami urman. Llakichij na alli muniguna trampa shinabi japisha illujtami tukuchishtan. ¹⁰Kuchkida k’uyashkallamundami tuki laya na alligunada rurungu kallarin. Chimundami charij tukush nishkamunda maijingunaga crinada sakisha paigunaj kausibi manchanai llakida apanguna.

Crishkada alli katinamunda

¹¹Ashtangarin kan Diosbujlla k’ari gashkamundaga kai tukigunamunda laduyi; kabishka alli ruraj, Dios yuyilla gaj, crij, k’uyuj, na shaikurishalla katij, na yalli gashkada rikuchijbish gai. ¹²Kanga taugagunaj ñaubuki crishkada rikuchisha parlasha na tukurij kausida japichun Dios kayushkami gagangui. Chi kausida japishalla crishkan alli takanukuj shina katilla. ¹³Kununga imalla tiyajkunamu kausida kuj Diosbuj ñaubuki shinalladi Poncio Pilatomu kabishkada parlusha rikuchij Jesucristoj ñaubukishmi kandaga ¹⁴kai mandushkada kazusha na mapayashalla pish na juchachishka ñukuchij Manduj Jesucristo shamungagama alli katichunmi mingani. ¹⁵Kaidami Diosga Paibuj p’unllabi p’aktachinga. Paillami alli nishka gaj, tukida yalli Manduj, mandujkunadash yalli jatun Manduj shinaidi amogunadash yalli jatun Amomi gan. ¹⁶Pailla nima na wañibuj, pish na kuchuyi pudishka p’alaniguj luzbi kausajmi. Paidaga pi gentesh na rikushka, rikungujllash na pudishkami. Alli ninash shinaidi tukida mandi pudinash na tukuribuj Paibujllami gan. Shina gachun.

¹⁷Kai pachabi imada charishkash tukuringallami. Shinusha yallida charijkunadaga ama jatun tukuchun, charishka yuyilla ama gachun ashtangarin Dios yuyilla tukuchun yachachingui. Paillami ñukuchi kushiyachun tukida manchanaidi kun. ¹⁸Allida rurachun, alli rurushkagunan charij tukuchun, shinaidi ima charishkadash kushilla kumbidasha kujlla gachun mandungui. ¹⁹Shina alligunada rurashaga mejorda valigunadami jinchida wakichij shina k’ipabuj charingaguna, k’ipaga na tukurij kausidami charingaguna.6.19 Kaibiga <na tukurij kausidami charingaguna> nishaga kai pachabish k’uilla kausiga kallarin. Jn 10.10

Tukurina yuyigunamunda

²⁰Timoteo, kanmu mingushkadaga alli wakichingui. Milli yanga parlugunadash <Kaimi alli yachanagun> nisha llullusha yachachishkagunadash p’akta uyunguimu. ²¹Maijingunaga shina na alli yachachijkunada katishami crinadash sakishkaguna.

Dios kushka alliguna kangunabi gachun.