1 Tesalonicenses

Kallari TESALONICENSES

1 de Tesalonicensesbi kallari parluguna

Kai cartadaga apóstol Pabloga Corinto pueblobi gasha, Macedonia llaktabi tiyaj Tesalónica pueblobi tandanukushka crijkunamu kachasha (1.1), Jesucristo wacharishka k’ipa pichka chunga (50) wata shinabimi escribishka yuyachin. Tesalonicaga kunun p’unllaguna maibi Grecia llakta gan, chibimi gashka. Tesalonicami ñauba p’unllagunaga Macedonia llaktada mandaj gashka.

Kai libroga crijkuna ima laya Diosta kushiyachichun yachachin. Shuj yachanagunaga kaibi tiyan: crijkunamu alli katinada rikuchina (1.4-10), Diosga Paibujlla linshuyachishka kausachun kayaga (4.3-12), Jesús kutin shamunga (4.13-18).

Pablo saludashkamunda

¹Tesalónica pueblobi Taita Dioskun Mandaj Jesucristonbish tandanukushka crijkunamumi ñuka Pablomi Silvanon Timoteon Diosbuj kushka allish k’uilla kausish kangunabi gachun ninchi.

Tesalonicabi crijkuna alli crishkamunda

²P’unllandijta tuki kangunamunda yuyarisha mañagushkabiga Diostaga <Diosolopai> nigunchillami. ³Kanguna crishkamunda alli rurashkagunada, k’uyin imadash trabajashkada, shinaidi ñukuchida Mandaj Jesucristobi yuyida churashkan ñaubujmu katigushkada alli yachashami p’unllandi ñukuchij Taita shinaidi Diosbuj ñaubuki kangunada yuyarigunchilla.

⁴Dios k’uyashka wauki paniguna, Pai kangunada agllashkadami yachanchi. ⁵Na ñukuchij shimigunallan, ashtangarin imadash ruri pudishkan, Diosbuj Espiritun, tuki shungun crishkanbishmi, ñukuchi parlashka Alli Shimiga kangunamu shamuga. Ñukuchi kangunan gasha kangunaj allibuj ima laya k’uyusha ruruj gashkada kangunalladi alli yachanguichimi.

⁶Kangunaga ñukuchij, shinaidi Manduj Jesusbuj rurashkagunada rikusha rurusha katishkanguichi. Chimundami manchanaidi llakibi gagushash Diosbuj Espíritu kushida kushkan, Alli Shimida japiganguichi. ⁷Shina rurashami Macedonia Acaya llaktagunabi kausaj tuki crijkunamu alli katinada rikuchiganguichi. ⁸Kangunamunda kallarisha Mandujbuj Shimiga na Macedoniallabish Acayallabish yachi chayashkachu, ashtangarin tuki llaktagunabishmi kanguna Diosta crishkaga yacharishka gan. Shina gakimi ñukuchi imada parlanash na ministirin. ⁹Paigunalladimi kangunada rikungu riki ima laya ñukuchida kushilla japishkadash, rurashka dioskunada sakisha kausuj kabishka Diosmu kuchuyasha Paibujllada rurungu kallarishkadash paigunalladimi parlanguna. ¹⁰Shinaidi Dios kausachishka Paibuj Churi Jesús jawa pachamunda ima laya shamunada kanguna chapagushkadash parlangunami. Shamuj llakichina p’unllamundaga Jesusmi kishpichin.

Pablo Tesalonicabi imada rurashkamunda

¹Wauki paniguna, ñukuchi kangunada rikungu rishkaga na yanga gashkada kangunalladi yachanguichimi. ²Sarun Filipos pueblobi ñukuchida litusha llakichishkadaga ña yachanguichimi. Na parlachun nigukish ashtangarin Dios ayudakimi, imadash na manchashalla Diosbuj Alli Shimimunda kangunamu parlaganchi.2.2 Pabloga Filiposbi gaga: Hch 16.12-40. Chi k’ipaga Tesalonicabi gagami. Hch 17.1-15³Ñukuchi alli yachachisha parlashkaga na pandarishkachuga. Milli yuyigunamada pandachina yuyimadash na chariganchichu. ⁴Ashtangarin Dioslladi ñukuchida agllasha Alli Shimida parlachun mingakimi parlanchi. Shujkunaj ñaubuki alli rikuringujka na munanchichu. Ñukuchij shunguda alli rijsij Diosta kushiyachingumi munanchi. ⁵Kanguna yachashka shina shuj kutinllash ñukuchiga nalladi k’uilla uyanaidi shimigunada parlashkanchichu, shinaidi kuchki japina yuyillash na gashkanchichu. Shina gashkadaga Diosga yachunmi. ⁶Shuj kutinllash pillash – kangunash shujkunash – ñukuchida <Alligunami ganguichi> nichunga na mashkashkanchichu. ⁷Cristoj agllashkaguna gashkamundaga kangunada mandi pudinalla gashash na mandaganchichu, ashtangarin kangunan gashaga ñukuchiga ima layami shuj mama kikinbuj maragunada k’uyillandi iñachin, shinaidimi kangunan gaganchi. ⁸Shina llakishkamundami kangunamunga Diosbuj Alli Shimida parlashkallanga na sakish niganchi, ashtangarin kangunada manchanaidi k’uyasha ñukuchi kausidadimi kungu munaganchi. ⁹Wauki paniguna, ñukuchi manchanaidi urmi jatari trabajashkada kangunaga yuyaringuichimi. Diosbuj Alli Shimida yachachigushaga imadash mañasha na kangunamunda kausash nishami, ñukuchiga tuti p’unlla trabajashkanchi.

¹⁰Kangunan ñukuchi linshu shungun, alligunaida rurasha, pish imadash na juchachibuj kausashkadaga kanguna crijkunaga rikunguichimi. Diosbish rikunmi. ¹¹Kangunalladi yachunguichimi: shuj taita paibuj maragunada yachachij layami kangunadash ñaubujmu katichun yachachiganchi. ¹²Ñukuchiga kanguna ñaubujmu katichun kushiyachisha, ama llaki gachun yuyachisha, Dios valichishkaguna gachun nisha kutin kutin niganchi. Dioslladimi kangunada Paibuj mandanamush Paibuj k’uilla gashkamushmi kayaga.

¹³Diosbuj Shimida kangunamu ñukuchi parlashkada uyusha criganguichi. Na gentegunaj yuyilla gashkada ashtangarin Diosbuj Shimidi gashkada japiganguichi. Chi Shimimi kanguna crijkunabi rurachigun. Kaigunamundami p’unllandijta Diosta <Diosolopai> nigunchilla. ¹⁴Wauki paniguna, ima layami Judea llaktabi Jesucristoda crisha Diosbuj iglillagunaga alli katiga, kangunash alli katiganguichi. Chibi kausaj israelgunalladi paigunadash llakichigaguna; shinaidimi kanguna Jesusta criki, kangunaj llaktamundagunalladimi llakichiga. ¹⁵Israelgunaidimi Mandaj Jesustash Dios nishkada parlajkunadash wañuchigaguna. Ñukuchidash llujshichish kachugaguna. Diostash na kushiyachisha tukigunada p’iñajkuna gasha ¹⁶na israelguna kishpichishka gachun na munasha Diosbuj Shimida ñukuchi parlachun na sakigagunachu. Chimundami paigunaga kikin juchan jundashka gagunllaguna. Diosga Paibuj p’iñarishkanmi yallijta llakichinga.

Crijkunada kutin rikungu munashkamunda

¹⁷Wauki paniguna, ñukuchi kangunamunda ashada ch’ikinyarishka gashash, na rikushkamundaga kanguna yuyillami gaganchi. Chimundami, kangunada rikungaj manchanaidi munashkamunda tuki pudishkada ruraganchi. ¹⁸Chimunda ringu kallariganchi. Yallidijka ñuka Pablollash tauga kutin ringu kallarigani. Shinash Satanasga ñukuchida trankashka.

¹⁹Shinash ¿pimundadi shuyanchi, kushiyanchi ñukuchij Manduj Jesús shamuki Paibuj ñaubuki ñukuchida allibi churaj coronada japishun? Chidaga kangunamundami. ²⁰Ari, ñukuchida allibi churajka kushichijka kangunami ganguichi.

Timoteoda kachashkamunda

¹Chimunda kangunada rikunaigun wañushash na ri pudishami Atenas pueblobi ñukuchilla3.1 <Ñukuchilla> nishaga Pabloda, Silastami nin. sakiringu yuyariganchi. ²Ñukuchij wauki Timoteoga Cristomunda Alli Shimida parlangu Dioskun igulda rurujmi. Kanguna crishkada jinchiyachisha ñaubujmu katina yuyida kuchun paida kachaganchi. ³Llakiguna rikurikish maijinbish ama washayachunmi paiga yuyachingu riga. Llakigunada ñukuchi apachun Dios sakishkadaga kangunalladi yachanguichimi.3.3 Hch 14.19-22; 2Ti 3.11⁴Kangunan gashaidimi ñukuchi kai llakigunada japinadaga niganchi. Kanguna yachashka shinaidimi chigunaga p’aktashka. ⁵Shinusha naidi shuyi pudishami kanguna ima laya crisha katigushkada tapuchun Timoteoda kachagani. Jucha rurachun munachij kangunada urmachikiga <Ñukuchi Alli Shimida parlashkash imakish na valingachu> yuyishami manchagani.

⁶Kununga Timoteo Tesalónica pueblomunda shamushami kanguna ima laya crisha k’uyanukusha katigushkada yachi chayachiga. Kanguna ñukuchin manchanai kushilla gashkada na kungarijkuna gashkada parlaga. Shinaidi ima laya ñukuchi kangunada rikuna yuyilla ganchi, shinaidimi kangunash ñukuchida rikuna yuyilla gashkada parlaga. ⁷Chimunda, wauki paniguna, ñukuchida llakichishka tuki laya jatun llakigunan gashash, kanguna alli crisha katigushkada yachasha ñaubujmu katina yuyida japiganchi. ⁸Mandajta kanguna jinchi katigushkada yachashami ashtan kununga kausagunchi. ⁹Kangunamunda Diosbuj ñaubuki manchanai kushiyanchi. Ñukuchida kushiyachishkamunda tauga kutin ñukuchij Diostaga ¿ima layashi <Diosolopai> nishun? ¹⁰Ñukuchi kangunaj ñawida kutin rikungaj shinaidi kangunaj crinabi jualtushkada p’aktachingaj nishami ñalla ñalla tuti p’unlla Diosta mañagunchilla.

Mañashkamunda

¹¹Kangunada rikungu ringaj Dioslladi ñukuchij Taita, ñukuchij Mandaj Jesusbish ñanda pushachunmi munanchi. ¹²Ñukuchi kangunada k’uyashka shina, Manduj kangunabi k’uyida iñachichun, kaishuj chaishujkun tukigunandi ashtan ashtan k’uyanukuna yuyida kuchun. ¹³Tuki shungun alli crijta Dios rurachunmi mañagunchi. Shina ruruki ñukuchij Mandaj Jesús tuki jucha illijkunan shamuna urasbi Dios ñukuchij Taitaj ñaubukish kanguna linshuyachishka, pish na juchachibuj ganguichi.

Diosllada kushichisha kausanamunda

¹Kununga wauki paniguna, Dios kushiyachun ima laya kausanada yachachiganchi. Chi layami kausagunguichi. Shina rurusha ashtan ashtan katichun Manduj Jesusbuj shutibimi mañasha rugagunchi. ²Mandaj Jesusmunda yachachishkagunada kangunamu ñukuchi kushkada kangunalladi ña yachunguichimi.

³Kanguna linshuyachishkaguna gachun Dios munashkaga kaigunami: piyunbish siririnamunda anchurichun, ^4-5Diosta na rijsij na israelguna laya piyunbish sirinukuna munigunamadash ama charisha, tukigunalladi kikinbuj cuerpo4.4-5 Griego shimibiga <kikinbuj vazu> nin. Castellano biblia Reina Valera runa shimimunga <kikinbuj warmida valichisha kausanada> nin. ima mapash illuj, valichishka gachun jarkarinada yachachun, ⁶shinaidi kai tonobiga crijkunapuraga pidash ama llakichisha pandachichun.4.6 Kaibiga verso 4dash yuyasha, crijka shuj crijbuj warmin sirinukushkamunda paibuj waukidash llakichin. Tuki Diosbuj Shimida rikukiga crijkuna soltera gashash musu gashash, pi gashash ama sirinukuchunmi nin. Shina na allida rurajkunadaga <Manduj Diosga manchanaidi llakichingami> nisha kutin kutin ñami niganchi. ⁷Ñukuchidaga Diosga mapayashka kausachunga na kayagachu, ashtan Paibujlla linshuyachishkaguna kausachunmi kayaga. ⁸Shinusha maijin kai yachachishkagunada na valichishaga na ñukuchilladaga na valichinchu, ashtangarin Paibuj Jucha Illuj Espirituda kuj Diostami na valichin.

⁹Kangunalladi k’uyanukuchun Dios yachachishkami ganguichi. Chimunda wauki panigunapura ima laya k’uyanukusha kausanadagarin na escribinashchu gan. ¹⁰Shinashami kangunash Macedonia llaktabi kausuj tuki wauki panigunada k’uyasha kausanguichi. Shina katishaga kanguna, wauki paniguna, k’uyanukushkada ashtan ashtan mirachisha katichun nishami mañanchi. ¹¹Tukigunan k’uilla yuyin purisha, kikinbuj ruranaida rurasha, kangunaj makin imallada rurasha ñukuchi mandashka shina kausangu munichi. ¹²Shina alli kausakimi na crijkunash alli nishkaguna ganguichi, shinaidi pidash na ministijkunami ganguichi.

Jesús kutin shamunamunda

¹³Wauki paniguna, ima chapanadash na charijkuna laya ama llakirichun ña wañushkaguna ima tukuna gashkada yachachunmi munanchi. ¹⁴Jesús wañushkada kausarishkadash crinchimi, shinusha Jesusta crisha wañujkunada Paiyun Dioslladi pushash rinadash crinchimi.

¹⁵Manduj yachachishkada kangunamu kashna yachachinchi: Manduj shamungama ñukuchi kausaj sakirijkunaga, wañushkagunadaga na ñaubusha rishunchu. ¹⁶Chi p’unllami mandasha kaparishka, angelgunada mandaj parlarishka, Diosbuj trompetabi tukashkash uyarinmi jawa pachamunda Mandaj Jesuslladi uriyamunga. Chibimi Cristoda crisha wañushkagunaga ñaubusha kausaringa. ¹⁷Chi k’ipaga ñukuchi kausagujkunaga Mandajkun samibi tupanukungu kausachishkagunan p’uyubi tandachisha apushkaguna gashun. Shinami Mandajkun na tukuribuj gashunlla. ¹⁸Kai shimigunanga kaishuj chaishuj ñaubujmu katina yuyida kunukichi.

¹Kununga wauki paniguna, ima wata ima p’unllamundaga kangunamu escribinaga na ministirinchu. ²Tutabi shuwa shamuj laya Mandajbuj p’unlla shamunadash kangunalladi ña alli yachanguichimi. ³Shujkuna, “Kununga ima manchimash illaki chulunllami kausagunchi,” ninukuki, ñash jatun llakiguna tukuchingu shamushaga, iksa charij warmi mirungaj nanida japijma layaidimi tukunga. Chigunamundaga nalladi mitiki pudingachu. ⁴Ashtangarin, wauki paniguna, kangunaga na tutabi laya gashkamunda Pai shamuna p’unlla kangunadaga shuwa layaga na manchachingachu. ⁵Tuki kangunaga p’alaniguj p’unllaj churi ushigunami ganguichi. Na tutaj na ansaj ganchichu. ⁶Shina gashkamundami ñukuchiga chaishujkuna laya na puñurinanchi, ashtangarin rijchujkuna tuki alli yuyillandi gashunchi. ⁷Puñujkunaga tutami puñun. Machajkunash tutami machan. ⁸Ashtangarin ñukuchiga p’unllaj gashkamundaga tuki yuyinmi jarkarijkuna gashunchi. Soldado shina jerro churanada churarij layami Jesusta alli crisha k’uyashash, cascoda churarij layami Jesús kishpichinada yuyillandi shuyasha kausashunchi. ⁹P’iñasha llakichishka gachunga Diosga na agllagachu, ashtangarin ñukuchij Mandaj Jesucristomunda kishpichishka gachunmi ñukuchida agllaga. ¹⁰Rijcharishash puñushash Paiyun kausachunmi Jesucristoga ñukuchimunda wañuga. ¹¹Ima shinami kanguna ruragunguichi, kaishuj chaishuj ñaubujmu katina yuyida kunukusha jinchiyachinukunguichi.

Alli kausachun yachachishkamunda

¹²Wauki paniguna, kangunapurabi jinchida trabajasha Manduj Diosbi yuyachisha pushujkunada allibi churachunmi mañanchi. ¹³Paiguna allida ruragushkamundaga k’uyasha <Alli allimi> nina ganguichi. Kaishuj chaishuj k’uillada kausichi.

¹⁴Wauki paniguna, kaigunada ruganchi: imadash na rurajkunada rimichi, mancharijkunamu ñaubujmu katina yuyida kuichi, na jinchi crijkunada jinchiyachichi, kangunash tukigunan na ut’ka p’iñarijkuna gaichi.

¹⁵Yuyin ganguichi: maijin ima na allida rurakish ama shinalladi ruranguichichu. Chibuj randiga kangunapurabish shujkunamush p’unllandi tukigunan allida rurana yuyillan gaichi.

¹⁶P’unllandijta kushilla gaichi. ¹⁷Diosta mañanada amalladi sakichichu. ¹⁸Tuki imamundash Diosta <Diosolopai> ninguichi. Cristo Jesusbi Diosbuj munashka kangunamu shinami gan.

¹⁹Diosbuj Espirituj nina shinada ama wañuchinguichichu. ²⁰Dios nishkada parlujkunaj parlushkada na valichisha na uyush ninguichimu. ²¹Imalla parlachishkagunadaga alli gashka na alli gashkada alli yuyarichi; alligunaidami wakichinguichi. ²²Tuki laya millimunda anchurichi.

²³Alli k’uilla kausida kuj Dioslladi kangunada illijta linshuyachichun. Paiga kangunaj tukida, espiritudash, almadash, cuerpodash Mandaj Jesucristo shamuna p’unllagama pish na juchachibujta alli alli wakichichun. ²⁴Kangunada Kayajka tukida P’aktachijmi; kaigunadash p’aktachingami.

Tukurina yuyigunamunda

²⁵Wauki paniguna, ñukuchimundash Diosta mañichi. ²⁶Tuki wauki panigunadash alli yuyin ñawi ichibi muchasha saludichi. ²⁷Mandajbuj shutibi kai cartadaga tuki wauki panigunamu liyachun mingani. ²⁸Ñukuchij Mandaj Jesucristo kushka alliguna kangunabi gachun.