1 Pedro

Kallari PEDRO

1 Pedrobi kallari parluguna

Tandanukushka crijkunada llakichi kallarikimi Jesús agllushka Pedroga tuki crijkunamu, ashtanga Uchilla Asia llaktabi gaj tandanukuj crijkunamu kai cartadaga kachasha Jesucristo wacharishka sujta chunga chusku (64) wata shinabimi escribishka yuyachin. Crijkuna llakigunan gashash alli katichun kayashkagunamu Pedroga paigunada kushiyachish nisha escribiga.

Shuj yachanagunaga kaibi tiyan: Ñukuchi crishkamunda Dios kishpichingagama tukida ruri pudishkan wakichishkaguna ganchi (1.3-9), Dios agllashkagunapuramunda, Jatun Mandujbujta ruraj curaguna, Diosllamu ch’ikunyachishka llaktamundaguna, Diosbujlla gachun randishka pueblomi ganchi (2.9-12), wauki panigunapura shina k’uyanukusha, shujkunamunda llakirijkuna gaichi (3.8-12), Jesucristoda katij gashkamunda llakida apagusha na pingui tukuchun (4.12-19), llakilla gashkagunada illujta Diosmu shitichi; Paiga ñukuchida chapana yuyillami gan (5.6-11).

Pedro saludashkamunda

¹Jesucristo agllasha kachashka Pedromi gani; kikingunaj llaktamunda llujshish risha Pontobi, Galaciabi, Capadociabi, Asiabi, Bitinia llaktabish kausaguj agllushkagunamu escribini. ²Taita Diosmi kangunadaga ñaubagunamundati rijsisha Espíritu linshuyachiki Paida kazuchun shinaidi Jesucristoj yaurgun p’itsilkishka gachunmi agllaga.1.2 Israelgunaga juchada rurujkunada linshuyachingujka animalda wañuchisha yaurgun paigunaj jawabi p’itsilkijkunaga. Jesús cruzbi wañushkamunda Paibuj yaurgun linshuyachishkami ganchi. Heb 9.13-14 Dios kushka alligunash k’uilla kausish kangunabi kutin kutin mirarichun.

Alligunada chapagushalla kausanamunda

³Ñukuchij Mandaj Jesucristoj Taita Diosta <Allimi gangui> nishunchi. Pai ñukuchida manchanaidi llakishkallamunda Jesucristoda wañushkagunapuramunda kausachishami alligunada chapagushalla kausachun ñukuchida kutin wacharishkagunada rurashka. ⁴Shinami jawa pachabi kangunamu wakichisha charishkada, pish na tukuchishtibuj naidi mapayibuj na maugayaj japinadami charinguichi. ⁵Kangunaga crishkamundami Dios kishpichinada japingagama tukida ruri pudishkan wakichishkaguna ganguichi; ña parijasha charishka kishpichinadaga tukurij p’unllabimi rikuchinga. ⁶Chimundami jatun kushida charinguichi; shinash kununga asha p’unllaguna tuki laya llakigunada apana gakimaga llakida apanguichimami. ⁷Shinami kurida ninan yakuyachishkama laya, kanguna crishkadaga kabishkadichu gashkada rikuchishka ganga;1.7 Kuridaga ninan yakuyachishami imanbish chagrushka na chagrushkachu rikungu shina ruran. Chibimi ima na allida anchichishtasha kurilla gachun sakin. Kaida parlashaga romanogunaj makibi crijkuna katik’ichushka gasha kuri shina linshulla tukungu llakida apanashkadami nigun. Ro 5.3-5; Stg 1.2-3; 1Pe 4.12 shina crishkaga chingarijlla kuridash yalli ashtandi valijmi gan, shinusha chi crijka Jesucristo rikurina p’unllabiga jatunyachishka, allibi churashka, Dios <Alli> nishkami ganga. ⁸Kangunaga Paida na rikushkashamash k’uyanguichimi, kununga na rikushash crigushami maida na parli pudibuj k’uilladij kushin kushiyaringuichi. ⁹Kangunaj almada kishpichigushkamundami shina kushiyaringuichi; crishkamunda japinaga chilladimi gan. ¹⁰Kai kishpirinamundaga Dios nishkada parlujkuna yuyillandi alli alli tapik’ichusha yachushami, Dios kangunamu kuna gashka alligunamunda parlugaguna. ¹¹Cristoj Espiritumi Dios nishkada parlujkunamunga Cristo llakigunada apanashkadash chi k’ipaga alli k’uilla tukunagunadash ñaubushadi yachi chayachiga. Chi Espíritu paigunabi gasha rikuchikimi, paigunaga ima shina ima p’unlladi shina tukunashkada yachungu munugaguna. ¹²Shinash Diosga Pai parlachigushkadaga na paigunamu gashkada ashtangarin kangunaj allibuj gashkadami yachi chayachiga. Shinakiga kununga, jawa pachamunda kachashka Diosbuj Espíritu Alli Shimida parlachiki kangunamu parlashkami gashka. ¡Kaigunadaga angelgunaidikish manchanaidi yachungu munanguna!

Ima juchash illuj kausachun Dios kayashkamunda

¹³Shinushaga kangunaj yuyibiga chumbillirishka shina ruranalladi gasha na alligunamunda yuyillandi jarkarichi; Jesucristo rikurina p’unllabi Dios kangunamu alligunada kunashkada japingu tuki yuyida chillabi churasha chaparianguichi. ¹⁴Alli kazuj churi ushigunashkamundaga, kabishkada narij yachasha rurungu munushka layaidijka ama munichichu. ¹⁵Ashtangarin kangunada Kayujka ima layami ima juchash illaj gan, shinaidi kangunash tuki imalla rurashkagunabi ima juchash illuj gaichi. ¹⁶Dios escribichishkabiga, “Ñuka jucha illaj gashkamundami kangunash ima juchash illaj ganguichi,” ninmi.1.16 Lv 11.45; Lv 19.2; Mt 5.48

¹⁷Diosga pibuj partish na tukushalla shuj shujta ima rurashkada rikusha kauzayujtichu gashkada rikujmi; Paidaga <Taita> nisha kayashadijka, kai pachabi pasagujlla shina kausashkagamaga manchusha kazusha kausichiri. ¹⁸Kangunaj ñauba taitagunamunda yangaidi kausida japiganguichi; chaimunda randiki kacharichishka shina gashkada yachanguichimi; kuriman kuchkiman ima tukurijllagunallan na randishkachu ganguichi. ¹⁹Ashtangarin Cristoj manchanaidi valij yaurgunmi shina ruraga. Paiga ima mapash ima na allimash illaj, malta oveja shinada wañuchichun kushkami gaga.1.19 Malta ovejamunda Apocalipsis 5.6 ura chakibi yachachishkada rikungui.²⁰Kai pachada narij rurujllabidi Cristoga shina tukuchun ñami agllushka gaga. Shinash kai tukuri p’unllagunabimi kangunaj allibuj rikurishka. ²¹Kangunaga Cristomundami Diosta cringuichi; kanguna tuki yuyida crishkadash Diosbi churasha chapaguchunlla, Paidami wañushkagunapuramunda kausachisha jatunyachiga. ²²Kununga kabishka parluda kazushkamunda kangunaj almagunada ña linshuyachishka gasha ña na nij tukushalla k’uyanukujkuna gashkamundami kaishuj chaishuj shungundijta kabishkada tuki munin k’uyanukugunguichilla. ²³Chibujtimi kangunaga wañujlla taitamundaga na kutin wacharishkanguichichu; ashtanbish kausaj shinaidi ima urash na chingarij Diosbuj Shimimundami na wañujbuj taitamunda wacharishkanguichi. ²⁴Dios escribichishkabiga,

“Tuki gentegunaga k’iwa shinallami,

paiguna k’uilla gashkash k’iwa sisa shinallami.

K’iwaga chakirinllami, sisash urmunllami.

²⁵Ashtangarin Mandujbuj Shimiga tuki ratugama chibi gagungallami,” ninmi.1.25 Is 40.6-8; Stg 1.10-11

Kangunamu yachi chayachishka Alli Shimiga kaimi gan.

¹Shinushaga tuki milligunada, tuki layada llagmashalla parlanadash, jawa shimillan nij tukunalladash, shujbujta munasha wañurinadash, shujmunda washalla rimanadash anchuchishtusha, ^2-3Mandajta divirti alli gashkada ña mallijkuna gashaidijka,2.2-3 Sal 34.8 ima layami wacharishkalla maraguna lecheida ministin, Diosbuj Shimidaga imanbish na chapushka lechemada layaidi manchanaidi munuj gaichi. Shina rurushami kishpichishka ganabi iñusha katinguichi.

Cristo kausuj rumi shina gashkamunda

⁴Mandujmu kuchuyichi; Paiga kausuj rumimi. Genteguna na munusha shitushka rumi gakish ashtangarin Diosbujka ch’ikunyachishka manchanaidi valijmi gan.2.4 Sal 118.22⁵Kangunash kausuj rumiguna shina Dios Paibuj Espiritumu Kikinbuj wasida wasichishkaguna laya ganguichi, shinaidi Diosbujlla curagunami tukuna ganguichi; chimunda Jesucristomundami Dios japinalla sacrificiogunada Espíritu yuyachiki kunguichi.2.5 Diosmu sacrificiogunada kungajka Dios munushka shina allida rurasha kausachun nishami shina nin.⁶Chimundami Dios escribichishkabi kashnada nin:

“Rikichi, Sionbiga2.6 Sionmunda Juan 12.15 ura chakibi yachachishkadash rikungui.

wasida rurungu kallarimu churana tukimunda ch’ikunyachishka,

yalli alli valichishka rumidami2.6 Tukimunda yalli alli valichishka rumiga Jesucristomigun; Paidami crina gan. Ñuka churani;

maijinsh Paibi yuyida churajka pinganaibiga naidi sakichishka gangachu.”2.6 Is 28.16

⁷Shinusha kanguna crijkunamuga chi rumiga manchanaidi valijmi gan; kutin na crijkunamuga,

“Wasichijkuna na munusha shitushka rumiga

ashtan kallarimu churana rumimi tukushka,” nin.2.7 Sal 118.22

⁸Shinaidi shuj pushtubiga,

“Trankarina rumi, urmachichij rukudi rumimi.”2.8 Is 8.14; Ro 9.33

Diosbuj Shimida na kazujkuna gashami chibi trankarisha urmunguna; shina tukuchunlladi nishkami gagaguna.

⁹Shinash kangunagarin Dios agllashkagunapuramunda, Jatun Mandujbujta ruraj curaguna,2.9 Ap 1.6; 5.10 Diosllamu ch’ikunyachishka llaktamundaguna, Diosbujlla gachun randishka pueblomi ganguichi. Yanamangamunda k’uitij luz shina kausimu llujshichisha kangunada Kayajmi Paibuj k’uitij rurashkagunada yachi chayachichun shina ruruga. ¹⁰Kangunaga ñaubaga pueblomallash na gaganguichichu, shinash kununga Diosbujtigunami ganguichi. Ñaubaga kangunamunda Dios na llakirigachu, shinash kunungarin kangunamunda llakirinmi.

Mandanabi gajkunadash kazunamunda

¹¹K’uyashka wauki paniguna, shuj llaktamunda shamujkuna laya shinaidi kai pachabi pasagujlla shinagunami ganguichi; chimundami kangunadaga alman makanukuj aicha munida ruranamunda wakichirichun rugani. ¹²Diosta na crijkunaj ñaubukish kabishkaida rurusha kausichi. Shina kausakimi kangunada, “Na allida rurujkunamigun,” nisha murmurajkunash kanguna alli ruragushkada rikushami, Dios shamuna p’unllabi Paida <Allimi gangui> ningaguna.2.12 Mt 5.16

¹³Mandanabi gaj tukigunadaga Mandaj Jesusmunda kazujkuna gaichi, kai pachabi jatun mandajtash tuki mandanada charishkamunda, ¹⁴pai churashka ashada mandujkunadashmi kazunanguichi; na alli rurajkunada llakichichun shinaidi alli rurajkunadaga <Allimi> nichun kachan. ¹⁵Yuyi illuj imadash na yachajkunadaga allida ruragushkan upayachichunmi Diosga munan. ¹⁶Watashkamunda kacharichishka shina gaichi, shina kausashash <Ña kacharishkami ganchi> nij tukusha p’akta na allida ruranguichimu, ashtangarin Diosbujta rurungu watushkaguna shina gaichi. ¹⁷Tukigunan allibi churanukichi. Wauki panigunada k’uyichi. Diostaga manchichi. Llaktada jatun mandujta kazichi.

Sirvijkuna ima imada ruranamunda

¹⁸Sirvijkuna, kangunada mandujkunada tuki yuyin kazujkuna gaichi; kanmunda allida rurujkunama yuyarijkunamaidash ama kazichu, ashtangarin naidi aguantibujkunadash kazichi. ¹⁹Shinushaga maijinsh shungubidi Diosbujta rurungu munilla gaki alli juilluidi llakichishka gashash llakigunada apagushaga <Alli> nishkami ganga. ²⁰Shinakiga kanguna na allida rurushkamunda juaktushtaki, na p’iñarishalla llakida apagushtijka, ima allibujkish na ganchu. Ashtangarin allida ruragushash llakida na shaikushalla apagujka, Diosti <Alli> nishkami gan. ²¹Shina rurachunmi Diosga kangunadaga kayuga; Cristoshmi ñukuchimunda llakida apashaga ñukuchikish Pai layaidi rurasha Pai sarushkallati katichunmi shina ruraga. ²²“Paiga ima juchadash na rurugachu, shinaidi jawalla shimin pidash na crichijchuga.”2.22 Is 53.9²³Litushtagukish shinamaidijka na litujchuga, llakichishka gagushash <Shinaidimi llakichisha> nishamaga na nijchuga; ashtangarin imadash kabishkada ruruj Juezmumi mingaj gaga. ²⁴Juchada rurangaj ña wañushaga2.24 Jesucristoda crijkunaga juchada kununmunda pacha ama rurush katingumi ñukuchiga chibujka wañushkama shina tukuganchi. Ro 6.2-13 kabishkada rurusha kausachunmi Cristolladi ñukuchij juchagunada Paibuj cuerpobi cruzmu apaga. Paida chugrichishkamundami alliyachishka gaganguichi. ²⁵Kangunaga ñaubaga maidash gachun rijlla ovejaguna shinami gaganguichi, shinash kununga kangunaj kausida Chapaguj shinaidi Michijmumi vueltushkanguichi.

Kusandij warmindij ima laya kausanamunda

^1-2Shinalladi warmigunash, kangunaj kusagunada alli kazujkuna gaichi; kanguna juchada na ruruj ashtan alli kazuj gashkada rikushkallamunda maijin kusagunaga Alli Shimida na crij gashash kikinbuj warmi ima laya gajta rikushalla imadash na nijllabidi crij tukungagunami. ³Kanguna k’uilla gashkaga ama jawa jawalla parijarishkallabi, juakchada k’uilladi nakcharishkama, kurin rurashkagunada aparishkama, allilladi churanada churarishkamamunda gachun. ⁴Chibuj randiga kanguna k’uilla gashkaga shungu ukumundadi na p’iñarij chulunyashka espiritun na tukuribujti k’uilla gashka gachun. Diosbuj ñaubukiga kaimi yallidijka valin. ⁵Ñaubagunagarin Diosbujlla gaj warmigunash shina layaidi Diosbi yuyigunada churasha kusagunada kazushami allilladi parijarijma laya rurujkuna gaga. ⁶Sarash shinami paibuj kusa Abrahamdaga <Ñukada mandaj> nisha kazuga. Kangunash allida rurasha shinaidi imadash na manchuj gashaga Saraj ushigunami tukuganguichi.

⁷Kusagunash shinaidi kikinbuj warmin alli yuyarisha kausichi. Paiguna Dios kumbidashka kausida kangunandi japijkuna gashkamundaga jawaidi p’akirijlla vazumada shina warmidaga yalli valichichi. Kanguna Diosta mañaki imabish ama trankarichunga chaida rurichi.

Allida rurushash llakida apanamunda

⁸Kaida tukuchingaj tukiguna shuj shinalla yuyarisha llakirinukusha kushiyarinukusha shinaidi wauki panigunapura shina k’uyanukusha, shujkunamunda llakirijkuna shinaidi na jatun tukujkuna gaichi. ⁹Ima na allida rurakish ama shinaidijka rurichichu, litukish ama shinaidi litichichu. Chibuj randiga paigunamu Dios alligunaida kuchun mañichi. Alligunada japichunlladimi kangunadaga Diosga kayaga. ¹⁰Dios escribichishkabiga,

“Maijinsh kausida k’uyusha kushilla p’unllagunada charingu munujka

kikinbuj k’alluda na allida rimanamunda shimish llagmusha parlanamundash jarkarichi.

¹¹Na allida ruranamunda anchurisha allida rurichi;

tukigunan k’uilla kausungu munichi, chidati katichi.

¹²Mandujbuj ñawigunaga kabishkada rurujkunakimi churashka gan;

Paibuj rinringunash paiguna mañushkagunada uyungaj yuyinlladimi chapagun; shinash

Mandujka millida rurajkunadaga na allibi churashami rikun,” shinami nin.3.12 Sal 34.12-16

¹³Shinusha allida rurana yuyilla gakiga ¿kangunada pidij na allidaga ruri pudingari? ¹⁴Ashtanbish kabishkada ruragushash llakichishka gashamaga ¡kushiyachishka ganguichi! Chi llakichijkunamunda mancharishama musparishamash ama gaichichu. ¹⁵Chibuj randiga kangunaj shungubi Cristodaga <Mandajmi> nisha allibi churichi. Kanguna chapagushkada imamunda charishkada maijinguna tapukiga k’uiti vueltachingajka p’unllandijta parijarishka gagüichilla. ¹⁶Imada parlashash k’uyi shungun Diosta manchushash parlarichi. Cristoda crij shina kanguna alli gashkamunda rimusha juchachijkunaga pinganaibi sakirichun linshu yuyin gananguichi. ¹⁷Na allida rurashkamunda llakida apanabuj randiga, Dios munashka gakiga allida rurashkamunda llakida apanami alli gan. ¹⁸Cristolladikish kangunada Diosmu pushangajmi kabishkada ruruj gashash na kabishkada rurujkunamunda juchagunamunda shuj kutinlla llakida apaga; aichabiga wañuchishkamiga shinash Espiritubiga kausachishkami gaga. ¹⁹Espiritubi gashami prezu tiyaj espiritugunamush yachi chayachingu riga. ²⁰Chi gentegunaga Noé kausagushka ñauba p’unllaguna jatun barca rurarish katiguki Diosga na ut’kada p’iñarishalla shuyagukish na kazujkunami gaga. Chi barcamu waigushami chi llaki yakumundaga ashagunalla kishpiriga, tukigunamundaga pusujpurallamiga. ²¹Chi yakuga bautizarina ima laya gajtami rikuchin; kununga ñukuchikish yakun bautizarishkanga Jesucristo kausarishkamundami kishpichishka ganchi. Bautizarinaga na kikinbuj aichadaga mapalla gashkada maillarinachu, ashtangarin Diosbuj ñaubuki linshu yuyi gangu munushkadami nigun. ²²Jesucristomi jawa pachamu risha Diosbuj alli ladubi tiyagun; shinaidi angelguna, poderyuj manduj espiritugunash Pai mandushkabimi ganguna.

Ñauba kausida sakisha mushujta kausanamunda

¹Shinushami Cristo Paibuj aichabi llakigunada apashkamunda kangunash llakida apana yuyillan parijarichi. Maijinsh kikinbuj aichabi llakida apajka, llakiga juchada ruranamundaga ña anchuchishtanmi; ²cuerpo wañuna p’unllagama genteguna milli munushkagunaida rurusha ama kausachun ashtangarin Dios munashka shina kausachunmi gan. ³¡Ña chilla! Diosta na rijsijkuna rurungu yachashka layaidi rurushami tauga watagunada chingachishkanguichi, piyunbish siririnada na jarkarisha, mapa yuyigunaida munusha, machashash, maidash gachun mikushash, pishtagunabi maidash gachun rurashash, millanaidi rurushkalla dioskunadash <Alli> nishami puriganguichi. ⁴Imabibish na jarkarisha milligunada rurusha kanguna paigunan ña na rigukimi kununga paigunamunga shuj layami rikurin, chimunda juchachisha rimunguna. ⁵Shinash wañushkagunash kausujkunash <Kauzayujmi, na kauzayujchu> ningu Shuyaguj ñaubukimi ima layashkadash paigunalladi parlaringaguna. ⁶Shina rurana gashkamundadimi wañushkagunamush Alli Shimida parlushka gaga; cuerpobi kausaguki tuki gentegunada layaidi llakichishka gashash espiritubigarin Dios munushka shina kausachunmi gan.

⁷Tuki imalla tiyajkuna tukurina p’unllaga ña chayamugunmi. Chimunda Diosta alli mañariangujka na killanachishalla yuyi japishka gaichi. ⁸Tukimunda yalliga kaishuj chaishujkun pachun k’uyanukichi. Shina k’uyanukushkaga taugaidi juchagunada k’atachishka shinami gan. ⁹Washa washa na rimashalla, kaishuj chaishujkun wasibi japinukujkuna gaichi. ¹⁰Tukigunami Dios kumbidashka ch’ikun ch’ikun ruri tukunagunada japiganguichi; chimunda Dios kushka tuki laya alligunada alli apujkuna shina chi ruri tukushkagunanga chaishujkunamu sirvinguichi. ¹¹Maijinsh parlarigushaga Diosbuj Shimigunadadi nigushka shina parlachun; maijinsh shujkunada ima allida rurushaga Dios kushka ruri pudishkan rurachun; shinakiga tuki imada rurashkabish Jesucristomunda Diostaga <K’uillami gangui> nishkami ganga; ima urash na tukuringama <K’uillami gangui> ninash tukida mandanabish ¡Paibujmi gan! Shina gachun.

Cristo apashka shinalladi llakida apanamunda

¹²K’uyashkagunalla, kanguna ima laya gashkada rikungaj llakiguna nina shina shamuki, naidi rikushka pasagushkama layada mancharishka ama sakirichichu; ¹³chibuj randiga Criston igulda mashna llakigunada apashkama shina apagushkamunda kushiyichi; shina rurushaga Pai k’uilla p’alaniguj gashkan rikuri p’unllabish manchanaidimi kushiyaringui. ¹⁴Cristoj shutida crishkamunda kangunada rimaki kushiyachishka ganguichi; Diosbuj k’uitij Espíritu kangunandi gagushkallamundami shina rurun. ¹⁵Maijinsh kangunapuramunda llakida apagushaga wañuchij gashkamundama, shuwashkamundama, millida rurushkamundama, shujkunaj kausibi satirishkamundamash ama gachun; ¹⁶ashtanbish Jesucristoda katij gashkamunda llakida apagushaga na pingui tukunachu gan, chibuj randiga chi shutida apashkamunda Diosta <K’uillami gangui> ninami.

¹⁷Diosbujkunandi kallarisha kauzayuj na kauzayujchushka rikuna p’unllaga ña p’aktushkami, ñukuchida shina llakichi kallarishadijka, Diosbuj Alli Shimida na kazujkunagarin ¿ima tukungagunashi? ¹⁸Shinaidi kabishkada rurajkish jarka jarkalla kishpirikidijka ¿Diosta nalladi crij shinaidi juchada rurujkarin maibi sakiringashi?4.18 Pr 11.31¹⁹Shinakiga Dios munashka shina llakida apagujkunaga allida rurush katishalla tukida Ruruj shinaidi tukida P’aktachij Diosbuj makibi kikinbuj kausida mingarichunguna.

Crijkunada pushujkunamu

¹Kununga kangunapurabi gaj pushaj yuyijkunadami, ñukash kanguna layaidi yuyij gasha shinaidi Cristo llakigunada apagujtadi rikuj gasha Pai k’uilladi gashkada yachi chayachina p’unllabi ñukash Paigundi chibi ganashami, kaigunada mañush nini. ²Dios kangunamu mingushka ovejagunada alli michichi; muni na muniidimaga ama rurichichu, kuchkida japina yuyillamamundash ama rurichichu; ashtangarin Dios munushka shina tuki munashkan paigunada chapanguichi. ³Kangunamu mingushkagunadaga ama paigunaj dueñogunama shina mandichichu, ashtangarin ovejagunamunga kanguna rurashkada rikusha katinallaguna gaichi. ⁴Shinami michijkunada Jatun Michij rikurina p’unllabiga kangunaga p’alaniguj na chingarij k’uitij coronada japinguichi.

Tuki crijkunamu

⁵Shinalladi k’ipa iñigunash, pushuj yuyijkunada kazujkuna gaichi; tukigunami na jatun tukushalla kaishujkun chaishujkun kazunukujkuna gananguichi, kashna nishkamunda: “Jatun tukushkagunanga Diosga jinchi tukunmi, ashtanbish ‘Imash na ganichu’ nijkunamunga Diosga alligunada kujmi.”5.5 Pr 3.34⁶Chimunda Diosbuj ruri pudibuj makibi gashkamundaga imash na gaj shina tukichi. Chibimi kangunada jatunyachina p’unlla chayukiga Paiga jatunyachinga. ⁷Kanguna llakilla gashkagunada illujtada Diosmu shitichi; Paiga kangunada chapana yuyillami gan.

⁸Kangunada na rikunachij diabloga kaningudi niguj león shina, maijindash mikushtangu saltik’ichushaidimi mashkagun. Shina gashkamunda na alligunamunda jarkarisha yuyillandi puringuichi. ⁹Illujta kai pachamunda kangunaj wauki panigunash chi llakigunalladati apagushkada yachushami crishkan jinchi shayarisha diablodaga ima layash jarkush katichi. ¹⁰Tuki laya alligunada kuj Diosga Paibuj na tukuribuj k’uilladij ganamu Jesucriston gashkamunda kayagami; shinusha asha p’unllagunada llakida apagushka k’ipaga, kangunadaga tukibi alliguna gajta, crishkabi jinchi shayajta, chi yuyillan katigujta, pish na kuyuchibujta Pailladi rurunga. ¹¹Ima urash na tukuringama illujtada mandana Paibuj gachun.5.11 Shuj versiongunabiga, “k’uilla gashkash Paibuj gachun,” nishkada churan. Shina gachun.

Tukurina yuyigunamunda

¹²Wauki Silvano5.12 Silvanodaga Silas nishashmi nijkuga. Hch 15—18 alli p’aktachij crij gashkada yachashami kangunamu ashallada escribisha paigun kachani. Kai alligunada kushkanmi Diosga kangunada divirti k’uyashkada yachi chayachingu ñaubujmu katina yuyidash kachani. Chi k’uyimundaga amalladi laduyanguichichu.

¹³Kanguna layaidi agllushka Babiloniabi gaj crijkunash ñukaj churi shina Marcosbish saludangunami. ¹⁴Kaishujkun chaishujkun k’uyanukusha ñawi ichibi muchusha <Alli gashka ganguichi> ninukichi. Tuki mashnalla Cristoj gajkuna k’uilla kausi kangunan gachun.