1 Corintios

Kallari CORINTIOS

1 de Corintiosbi kallari parluguna

Kai cartadash apóstol Pabloga Grecia llaktabi tiyaj Corinto pueblobi tandanukushka crijkunamu kachashka (1.2). Jesucristo wacharishka k’ipa pichka chunga sujta (56) wata shinabimi escribishka yuyachin. Corintoga yalli alligunaida charij pueblomiga, juchagunallandi jundashkamiga.

Crijkunapura rimanuki tiyashkamundami Pabloga kaida escribiga. Paiga crijkuna kabishkada agllusha linshuyachishka gachun munaga. Tuki yachanagunamunda ashallami kaibi tiyan: crijkuna ama juchada rurachun (6.9-11), tukigunami Cristoj cuerpoj partimi ganchi (12.14-31), k’uyiga yalli gan (13.1-13), kausarishka k’ipa Jesús taugagunamu rikuriga (15.1-11), wañushkaguna ima laya kausarina (15.35-58).

Pablo saludashkamunda

¹Dios munushkamunda Jesucristoj agllusha kachushka gachun kayashka Pablomi, wauki Sosteneskun, ²Cristo Jesusbi ch’ikanyachishkaguna Corinto pueblobi Diosbuj iglillamu1.2 Iglilla nishkaga tandanukushka crijkunami, na shuj wasi. escribini. Tukiguna maibi gashash ñukuchij Manduj Jesucristoj shutibi kayasha mañajkunandijmi kangunaga Diosbuj linshuguna gachun kayashkaguna ganguichi. Mandujka paigunakish ñukuchikishmi. ³Ñukuchij Taita Diosbuj shinaidi Mandaj Jesucristoj kushka allish k’uilla kausish kangunabi gachun.

<Diosolopai> nishkamunda

⁴Ñukaj Diostaga Paibuj kushka alligunada Cristo Jesusmunda kangunamu kumbidashkamundaga p’unllandijta <Diosolopai> nigunillami. ⁵Shinusha Paibuj tuki alli parlushkagunan shinaidi tuki yachushkagunanbish manchanaidi charijkuna tukushkanguichi. ⁶Shina Cristomunda ñukuchij parlushkaga kangunabi alli rikurishkami, ⁷yallidika ñukuchij Mandaj Jesucristo shamunada chapariajkunamu Espíritu kumbidashkaga imash na faltanchu. ⁸Ñukuchij Mandaj Jesucristo shamuki kangunada ima juchachinash illuj gachunga kai pacha tukuringama jinchi shayarisha alli katichun Diosga ayudangami. ⁹Diosga Pai <Rurushami> nishkadaga p’aktachijmi. Pailladimi Paibuj Churi ñukuchij Manduj Jesucriston shujlla tukusha kausachun kangunada kayuga.

Crijkunapura p’iñanukushkamunda

¹⁰Wauki paniguna, tukigunalladij shuj shinalla parlanukushaga ama chaubiringuichichu, ashtangarin tukiguna shuj shinalla, shuj yuyilla tukusha kausachunmi ñukuchij Manduj Jesucristoj shutibi kutin kutin mañani. ¹¹Ñuka wauki paniguna, kangunapurabi p’iñanuki tiyashkada Cloej familiamundaguna parluki yachani. ¹²Kangunaga, “Ñukaga Pabloda katijmi gani,” shujkunaga, “Apolosta katijmi gani,” kaishujkunaga, “Ñukaga Cefasta katijmi gani,” kutin shujkunash, “Ñukaga Cristoda katijmi gani,” nigujta uyani. ¹³¿Cristoga chaubirishkachumadi gan? ¿Pablochu kangunamunda chakatashkaga? na gashaga ¿Pabloj shutibichu kangunaga bautizashkanguichi?

¹⁴¡Kangunadaga maijindash na bautizashkamundaga Diosta <Diosolopai> ninimi. Crispoda shinaidi Gayolladami bautizagani! ¹⁵Shinushaga maijinsh <Pabloj shutibimi bautizashka gani> ningujka na pudingachu. ¹⁶Shinash Estefanasbuj familiadash bautizaganimi; kutin shujkunada bautizashkadaga na yuyarinichu. ¹⁷Cristoga ñukadaga bautizachunga na kachugachu, ashtangarin Alli Shimida parlachunmi kachuga. Cristo cruzbi wañushka ama yanga rikurichunmi ñukaga gentegunaj jatun yachushka shimigunanga na parlanichu.

Cristoga Dios pudinada yachanadash rikuchishkamunda

¹⁸Chingarijkunamunga Cristo cruzbi wañushkada parlushkaga imakish na sirvij yangallami gan, ashtanbish ñukuchi kishpichishkagunamunga kai parlushkaga Diosbuj podermi gan. ¹⁹Shinakiga Dios escribichishkabiga,

“Jatun yachujkuna yachushkadaga chingachishami.

Alli yuyiyujkunadash yuyi illujkunadami rurasha,”1.19 Is 29.14 nishka tiyagun.

²⁰Jatun yachujkish, manchanaidi yachachijkish, kai pachabi ima tukushkada parlujkish ¿maibishi gan? ¡Diosga kai pachabi imadash yachujkunadaga imakish na sirvij yanga muspagunada rurushka! ²¹Shinusha Diosga, yachuj gashkamundaga kai pachabi kausujkuna kikin yachushkan Paida rijsichunga na sakigachu. Chimundami shujkunamu kai parlushka imakish na sirvij yanga laya gakish ashtan chiyunmi Diosga Paida crijkunada kishpichingu munuga. ²²Israelgunaga pi na ruri pudishka señalgunadami rikush ninguna, shinaidi griegogunaga jatun yachigunadami mashkunguna. ²³Ashtan ñukuchiga chakatashka Cristomundami parlagunchi. Kaida parlushkaga israelgunamunga litushkami gan;1.23 Litushkami nishkaga trankasha urmachij layami. kutin na israelgunamunga imakish na sirvij yangallami. ²⁴Shina gakish Dios kayashkagunamunga israel gakish, griego gakish, kai Dios agllusha kachushka Mesiasga Diosbuj tuki ruri pudinada shinaidi alli yachaj gashkadash rikuchijmi gan. ²⁵Shinusha Diosmunda yachanaga na sirvij nishka gashash gentegunaj yachanadaga yallimi. Shinaidi Dios rurashkaga na valij gashash gentegunaj rurashkadaga tukida yallimi.

²⁶Wauki paniguna, kanguna ima layaguna gaki Dios kayashkada yuyarichiri. Gentegunaj yuyashkabiga ashagunallami yachujkuna, na taugaguna imadash ruri pudijkuna shinaidi valichishka familiamundash na gaganguichichu. ²⁷Ashtan Diosga yachujkunada pinganaibi sakingajmi kai pachabi <Na yachujkunachu> nishka gentegunada aglluga. Shinaidi manchanaidi rurajkunada pinganaibi sakingajmi kai pachabi imadash na ruri pudijkunada aglluga. ²⁸Shinaidi <¡Alligunami ganchi!> nijkunada na valichingumi kai pachabi yanga nishka, p’iñushka, imash na gaj gentegunada Diosga aglluga. ²⁹Shina rurukimi Diosbuj ñaubukiga <Yalli gani> ningujka pish na pudinga. ³⁰Ashtan Diosmundami kangunaga Cristo Jesuskun tandachishka ganguichi. Pailladimi kangunadaga Paimunda yachujkunada, kabishkagunada, Paibujlla gachun linshushkagunada, shinaidi randisha kishpichishkagunada ruruga. ³¹Chimundami escribichishkabi nishka shinaga, “Maijinbish jatun tukusha parlujka, ashtan Mandaj Diosmunda jatun tukusha parlachunlla.”1.31 Jer 9.24

Cristoda cruzbi chakatashkada parlushkamunda

¹Wauki paniguna, ñukaidi kangunamu Diosmunda parlungu rishaga na jatun yachuj tukusha, na gashaga k’uilla alli shimigunanga na parluganichu. ²Kangunan gashaga ima shujtaga na yachasha niganichu, ashtangarin Jesucristo chakatashka wañushkalladami parlungu munagani. ³Kangunajmu parlusha yachachingu chayushaga jursa illuj shina, manchinmi ch’ujchugani. ^4-5Shinash ñukaga imada nishash Alli Shimida parlushash na jatun yachuj tukusha k’uilladij alli shimigunanga na parluganichu. Kanguna crishkaga ama gentegunaj yachanamunda gachunga, ashtan Diosbuj ruri pudijmunda gachun nishami ruri pudij Espiritun rikuchishkan parlagani.

Diosbuj Espiritumunda yachachishka

⁶Shina gakish jinchi crijkunanga alli yachanada parlanukunchi. Kai alli yachanaga na gentegunajchu, shinaidi kai pachada mandajkunakish na ganchu. Paigunaj yachanaga chingaringajmi gan. ⁷Ashtangarin pish na yachushka Diosbuj yachimundami parlanchi. Chi yachiga pakushkamiga. Ñukuchi <Alli> nishka gachunmi chidaga ñaubamunda pacha munusha churushka. ⁸Kai pachabi mandajkunash maijinsh na yachugachu. Chida yachushkashaga k’uilla Mandajtaga na chakatanmuchuga. ⁹Ashtan Dios escribichishkabiga, “Diosga Paida k’uyujkunamuga pish na rikushkada, pish na uyushkada, maijinbuj shungubi na tiyashkadami kungu charigun,” ninmi.2.9 Is 64.4

¹⁰Shinaki kaigunadaga Diosmi Paibuj Espiritun ñukuchimunga laru rikuchiga. Espiritumi tukida shinaidi Diosbuj uku ukugama gashkadash mashkujmi gan. ¹¹Shujkunaj yuyagushkadaga ¿pi gente yachi pudinllachu? Kikinbuj yuyidaga kikinbuj espiritullami yachi pudin. Shinaidi Diosbuj Espiritullami Diosbi imalla tiyashkadash yachun. ¹²Ñukuchiga na kai pachaj espiritudachu, ashtan Dios k’uyushkamunda ñukuchimu alli kushkagunada intindingaj Diosmunda shamushka Espiritudami japishkanchi. ¹³Kaigunada parlashaga na gentegunaj yachanada yachachishka shimigunanchu, ashtan Diosbuj Espíritu yachachishka shimigunanmi parlanchi. Espiritujkunadaga Espirituj shimigunanmi2.13 “Espirituj shimigunanmi” na gashaga “Espirituyujkunamumi” ninguna. Kai ishki yuyiguna 1 Corintios 2.13bi tiyanmi. ima shina gashkada rikuchisha parlanchi.

¹⁴Diosbuj Espirituda na charijka, Espíritu kushkagunadaga na japish ninchu. Paimunga pugllashka shinallami, shinaidi imadash na intindinchu. Espíritu yuyachijllabimi yachi pudin. ¹⁵Diosbuj Espirituda charijka tukida intindi pudin, ashtanbish pish paidaga na intindi pudinchu. ¹⁶Dios escribichishkabiga, “Mandaj Diosbuj yuyidaga ¿pidij rijsishkari? ¿Maijindi Paidaga yachachi pudinga?” ninmi.2.16 Is 40.13 Ashtan ñukuchiga Cristoj yuyidami charinchi.

Diosbujta rurujkunamunda

¹Wauki paniguna, ñuka kangunamu parlushaga Diosbuj Espirituda kazujkunamu shinaga na parli pudiganichu, ashtanbish Cristobi narij jinchiyashkaguna gashkamundaga mara layagunamu yachachij shinami kangunamunga yachachigani. ²Sarunga jinchi mikunada na japi pudishkamundaga lecheda kangunamunga ubiachigani. Kunungamash narij jinchigunada japi pudinguichichu. ³Chairijti narij jinchi gashami kangunapuraga shujkuna charishkadadi munusha shinaidi p’iñanukushadijka Cristobi narij jinchiyashka shinaidi kai pachabi kausujkuna shina rurusha puringuichi. ⁴Shujka, “Ñukaga Pabloda katijmi gani.” Chaishujka, “Ñukaga Apolosta katijmi gani,” nigushtijka kaishuj genteguna yuyashka layaidimi nigunguichi.

⁵Tukida ninukushka k’ipaga Pablobish, Apolosbish ¿imadi ganchiri? Ñukuchiga sirvijkuna gasha parlushkamundami kangunaga crij tukuganguichi. Imada rurachun Manduj Jesús kushkalladami ruragunchi. ⁶Ñukaga tarbuj layami gani, Apolosga yakuda riguj shinami, ashtan yurada iñachijka Diosmi gan. ⁷Tarbujkish yakuda rigujkish imash na ganchu; ashtangarin iñachijka Diosllami gan. ⁸Tarbujkish yakuda rigujkish igulmi; shinash kikin ima laya rurushkamundami kushkada japinga. ⁹Ñukuchiga Diosbujta rurusha ayudajkunami ganchi; kangunaga Diosbuj tarbushka pamba laya shinaidi Diosbuj wasi layashmi ganguichi.

¹⁰Ñukaga Dios kushka alligunanga wasichij shina gashami alli wasichingu kallarinadami churugani. Chi churushka jawabiga shujmi wasichisha katigun. Shinusha wasichisha katijkunaga alli yuyin rurusha katichun. ¹¹Wasichingu kallarishka layaga Jesucristomi. Pai tiyashkamundaga maijinsh shujta kallaringu churungajka ña na pudingachu. ¹²Wasida kallarishka jawabi maijinsh kurin, kuchkin, k’uilla rumigunan, na gashaga kaspin, p’untsun, lasrhunbish rurukiga ¹³alli na allidaga ninami chi tukurij p’unllabi rikuchinga. Shina gashkamunda kikin ima laya rurashkaga laruyashkami ganga; ninami ima laya kikin rurushkada rikuchinga. ¹⁴Maijinbuj rurashkash kallarishka jawabi rurashka na ima tukukiga kushka allidami japinga. ¹⁵Na gashaga paibuj rurashka rupukiga pailladimi llakiringa. Shinash paiga ninamunda llujshijma layami kishpichishka ganga.

¹⁶Kangunaga Diosbuj wasi layashkada, shinaidi Diosbuj Espíritu kangunabi kausashkadash ¿nachu yachunguichi? ¹⁷Diosbuj wasiga Paibujlla ch’ikanyachishkami; chi wasiga kangunaidimi ganguichi. Chimunda maijinsh Diosbuj wasida urmachijtaga Diosmi paida urmachinga.

¹⁸¡Kangunalladijka ama pandarichichu! Kangunapuramunda maijinsh <Kai pachabi tukida yachujkunami ganchi> yuyashash yachujtij gangujka imada na yachuj shina tukichi. ¹⁹Kai pachamunda yachigunaga Diosmunga imakish na sirvij yangami gan. Dios escribichishkabiga, “Yachujkunadaga paiguna yachushkallandimi muspachin,”3.19 Job 5.13 nin. ²⁰Shinaidi kutin, “Manduj Diosga, yachujkunaj yuyigunada rijsinmi, paiguna yachashkash na valij gashkadash yachunmi,”3.20 Sal 94.11 nin. ²¹Chimunda maijinsh gentegunaj yachachishkada katigushkamundash ama <Yalli gani> nichun. Tuki japishkagunaga kangunajmi gan. ²²Pablosh, Apolosbish, Cefasbish,3.22 “Cefas”taga Arameo parlubiga “Pedro”dami nin. kai pachash, kausish, wañish, kunun p’unllash, shamuj p’unllagunash tuki kangunajmi. ²³Kangunash Cristojmi ganguichi. Cristoga Diosbujmi gan.

Jesús agllushkaguna imada ruranashkamunda

¹Shinusha kanguna ñukuchidaga Cristoda sirvijkunashkada, shinaidi Dios kushka pish na yachashkada yachachichun mingushkaguna gashkadash yuyachun. ²Kununga maijinmu shuj ruranada minguki japijkunaga alli p’aktachisha rikuchichundi. ³Kanguna na gashaga juezkuna ñuka ima rurushkagunamunda juchachikish imash na ganchu. Ñukalladijka ima allida na allida rurashkagunadaga na yuyarinichu. ⁴Shina gakish <Na allidaga na rurushkanichu> yuyagushash <Alli linshumi gani> ningu na pudinichu, ashtanbish Manduj Jesusmi imadash juchachinga. ⁵Chimunda imadash juchachina p’unlla narij chayujllabidijka ama imadash nichichu, ashtangarin Manduj Jesús shamungagama shuyichi. Pai shamusha yanamangabi pakushka tiyajta p’unllabi rikuchishaga kangunaj shungu ukubi ima yuyigunada charishkadash rikuchinga. Chi k’ipami kanguna ima laya rurushkagunada rikusha Diosga imaidash alligunada ninga.

⁶Shinash wauki paniguna, ñukuchida rikushkanga, “Escribishkada ama ashtan yalli mirachinguichichu,” nishkada yachi tukuchun kangunaj allibujmi Apolosmundash ñukamundash yuyachisha kaigunada parlagani. Chimundami maijinsh Diosta sirvijkunadaga <Paimi alli. Chaishujka na allichu> na ninachunguichi. ⁷¿Pidi kandaga <Tukigunada yalli allimi gangui> ninri? Kan imalla charishkadaga ¿nachu tukida Dios kuga? Shinaga Pai kushkakiga ¿ima nishadi kambuj trabajonlla japishkada yuyangui?

⁸¡Kanguna munushkada tukida japisha ña charinguichimi! ¡Ñami charijkuna tukushkanguichi! ¡Ñukuchi illujmash mandajkuna shina tukushkanguichimi! Ñukuchish kangunan igulda mandungu kanguna mandujkunadi gashkashaga ¡allichari ganmu! ⁹Ñuka yuyibiga agllusha kachushka ñukuchidaga wañuchichun churushkagunada laya Diosga washa tukuribimi churushka. Kai pachaj gentegunamu angelgunamush rikunaidiguna tukushkanchi. ¹⁰Ñukuchiga Cristomundaga imadash na yachujkuna nishkami ganchi. Kangunaga Cristomundaga yachuj nishkagunami ganguichi. Ñukuchiga imash na pudijkunami ganchi; kangunaga jinchiguna ganguichi. Ñukuchiga p’iñushkagunami ganchi; kangunaga kazushkagunami ganguichi. ¹¹Kunungama yarijin, yakunaiyun ganchi. Churanash illujlla, pish lutskishka, maibi kausanadash na charinchichu. ¹²Ñukuchij makindijmi shaikungama ruranchi. Shujkuna ñukuchida p’iñusha rimukish paigunadaga alli ninchimi. Katik’ichukish jinchida aguantanchi. ¹³Ñukuchida maidadikish nikish k’uyillanmi imadash ninchi. Kunun p’unllagamash ñukuchidaga kai pachabi shitashka imakish na valij mapagunada layami rurunguna.

¹⁴Kaidaga kanguna pinganachichunga na escribinichu, ashtangarin ñukaj k’uyashka wawagunamu layami alli rikuchisha parluj shinami nini. ¹⁵Warangaguna Cristomunda yachachijkunada charishkashamash tauga taitagunadaga na charinguichichu. Alli Shimida ñuka parlukimi kangunaga Cristo Jesusta criganguichi. Chimundami kangunajka taita laya gani. ¹⁶Shinashaga ñuka kausashka shina kausachunmi rugani. ¹⁷Chimundami ñukaj k’uyashka churi shina Timoteoda kangunajmu kachugani. Paiga Mandaj Jesusbuj nishkada p’aktachijmi gan. Paimi ñuka Cristo Jesusta crisha ima laya kausuj gashkada kangunamu yuyachinga. Ñuka maibish tuki tandanukushka crijkunamunga chilladadij yachachishkadami parlunga.

¹⁸Ñukadaga <Na ñukuchijmu shamungachu> yuyishami kangunapuramunda shujkunaga tukida yachujkuna layami tukushkanguichi. ¹⁹Shinash Mandaj Dios munukiga ñallami kangunada rikungu risha. Ña chibi gashami chi jatun tukushkaguna ima nijta uyushkallanga na gashachu, ashtan imadash paiguna ruri pudijtami rikusha. ²⁰Diosbuj mandanaga na parlushkallachu, ashtangarin imadash ruri pudijmi gan. ²¹Ñuka kangunajmu rishaga ¿azilgunchu na gashaga k’uyin shinaidi na mandanalla yuyin chayachunchu mununguichi?

Crijkunapuramunda wainayajta llujshichinamunda

¹Kangunapurabiga <Shuj crijka ila mamallandij wainayasha kausagun> nijtami uyani. Shina wainayashkamaga na crijkunapurabish na uyarinchu. ²¡Kangunaidi jatun gashkada yuyanguichi! Chibuj randiga wakusha llakirina ganguichi, shinaidi chi kausagujta kangunapuramunda llujshichisha kachanami ganguichi. ³Ñukadi kangunan na chibi gashash ñukaj espirituga kangunanmi gan. Shinaidi kangunan chibi gaj layami juchada rurusha purijtaga <Na allichu> nisha rimagani. ⁴Kanguna, ñukaj espiritun shinaidi Manduj Jesusbuj tukida ruri pudinan tandanukushaga Mandaj Jesusbuj shutibi, ⁵chi k’aribuj espíritu Manduj Jesusbuj p’unllabi kishpichishka gachunga, paibuj milli muni cuerpoda llakichichun Satanasmu kuichi.

⁶Kangunaj jatun tukush parlanaga na allichu. Ashalla levadura tuki masada p’unguichijtaga yachunguichimi. ⁷Shinakiga tuki na allida rurachij ñauba levadura shinada shitichi. Shina rurushami mushuj masa, levadura illuj tanda laya ganguichi. Cristoga Pascua p’unllaj oveja shinami ñukuchimunda wañuga. ⁸Shina gakiga ñukuchij Pascua pishtadaga ama ñauba levadura milli shinaidi millanaidinga ama rurashun, ashtangarin levadura illaj tanda shina gashaga na nij tukushalla kabishkan p’aktachij gashun.

⁹Chaishuj cartabiga piyunbish siririjkunanga ama tandanukuchunmi nigani. ¹⁰Shina nishaga kai pachamundagunapura piyunbish siririjkunan, ashtan charingu munujkunan, shuwagunan, rurushka dioskunada adorajkunan imallamundash amalladi tandanukuchunga na niganichu. Chigunan na tandanukuna gakiga kai pachamunda llujshinami alli ganmu. ¹¹Ashtangarin <Crijmi gani> nishash, piyunbish siririjkunan, charishash ashtan charingu munujkunan, rurushka dioskunada adorajkunan, murmurajkunan, shingagunan, shuwagunanga mikungujllash ama tandanukuchunmi nigani.

^12-13Na crijkunadaga ima rimanadash na charinichu. Diosmi imadash ruranga. Shinakish crijkunapuraga kangunalladimi yuyachisha parlanguichi. Shinushaga “¡Chi milli juchayujtaga kangunapuramunda llujshichichi!”5.12-13 Dt 17.7; 19.19; 21.21; 22.21,24; 24.7

Crijkuna p’iñanukukiga crijkunalladi allichinamunda

¹Maijinsh kangunapura shujkunan p’iñanukushaga crijkunamu parlana randiga ¿ima nishadi na crij juezkunamu parlungu ringuichi? ²Kai pachabi kausujkunada kauzayuj na kauzayuj gashkada linshuyachishkaguna juchachinashkadaga ¿nachu yachunguichi? Kanguna shina rikuchinagunadijka ¿imashadi ashalla p’iñanukushkadaga kangunalladi na allichinguichi? ³Angelgunadash kauzayuj na kauzayuj gashkada ñukuchilladi rikuchina gashkadaga ¿nachu yachunguichi? ¡Kai pachabi ima na alligunadash imashti na allichi pudishun! ⁴Shinakiga kai kausibi imamundash kangunapura p’iñanukushaga ¿ima nishadi iglillabi imash na gaj juezkunajmu ringuichi? Paigunaga igllillanga imadash na rikunada charingunachu. ⁵Kaidaga kangunalladi pingui charichunmi nini. Crijkunapura p’iñanukuki allichingujka ¿nachu kangunapurabi shujllash alli yachuj tiyan? ⁶¡Ashtanbish crijkunapura p’iñanukushash na crij mandujkunajmu rigunguichi!

⁷Kangunapuralladi p’iñanukunaga nalladi allichu. Na allida rurusha llakichikiga ¿imashadi na upalla ganguichilla? Llagmusha crichisha llakichikish ¿imashadi na sakinguichilla? ⁸¡Shina sakina randiga kangunalladi llagmusha crichisha, nash kabigunada ruranguichi, yallidikarin crijkunapura shina ruranguichi! ⁹¡Ama pandarichichu! Millida rurujkunaga Diosbuj mandanamunga na chayana gashkadaga ¿nachu yachunguichi? Piyunbish siririjkuna, rurushka dioskunada adorajkuna, wainayajkuna, warmi laya tukujkuna, k’aripura warmipura siririjkunash, ¹⁰shuwaguna, ashtan charingu munujkuna, shingayajkuna, shujkunada na allida rimusha parlujkuna, crichisha shuwajkunash Diosbuj mandanabiga imadash na charingagunachu. ¹¹Kangunapuramunda shujkunaga shinagunami gaganguichi. Shinash kununga Manduj Jesucristoj shutibi shinaidi ñukuchij Diosbuj Espiritumundash ña armachishka, ña linshuyachishka, ña ima juchachinash illujkunada rurushkashmi ganguichi.

Cuerpondij Diosbujlla kausanamunda

¹²“Ñukaga ima munushkadash ruri pudinillami,” nishkadash uyushkanimi. Kabishkami gan. Shinash chida ruranaga na allichu. Ari, ñukaga ima munushkadash ruri pudinillami. Shinash chi yuyiguna rurachichunga na sakinachuni. ¹³“Mikunaga ijsajmi, ijsaga mikunajmi gan,” ninguna. ¡Ari shinami! Ima laya gakish Diosga kai ishkigunaidadimi chingachinga. Ñukuchij cuerpoga piyunbish siriringujka na ganchu, ashtan Manduj Diosbujmi gan. Manduj Diosga cuerpojmi gan. ¹⁴Ima layami Diosga Manduj Jesusta kausachiga, shinaidimi Paibuj tuki ruri pudinan ñukuchidash kausachinga. ¹⁵Kangunaj cuerpoga Cristoj gashkadaga ¿nachu yachunguichi? Shinakiga ¿Cristoj cuerpogunamunda japishachu cuerpoda k’atuj warmin tandachisha? ¡Chidaga manadij! ¹⁶Maijinsh cuerpoda k’atuj warmin sirinukushaga shuj cuerpolla tukushkada ¿nachu yachunguichi? Dios escribichishkabiga, “Ishkindijka shuj aichallami tukunga,”6.16 Gn 2.24 ninmi. ¹⁷Ashtanbish Manduj Jesuskun maijin tandanukujka Paiyunmi espiritubiga shujlla tukun. ¹⁸Shinaki piyunbish siririnamunda anchurichi. Chaishuj juchagunaga cuerpoda imada na rurunchu, ashtan piyunbish siririjmi paibuj cuerpodaga manchanaidi dañushtan. ¹⁹Kangunaj cuerpoga Dios kushka Paibuj Espíritu kausana wasi gashkada shinaidi chi Espíritu kangunabi kausagushkadash ¿nachu yachunguichi? Shinusha ña na kangunajlladijka ganguichichu. ²⁰Ashtanbish kangunadaga Diosga tukimunda yalli valishkanmi randiga. Chimunda kangunaj cuerpon Diostaga kushiyachinguichi.

Kazarajkunamu yachachinamunda

¹Kununga kanguna cartabi tapushkadami parlungu kallarini. K’ariga warmida na ministishaga ¡alli ganmuchari! ²Shinash piyunbish siririjkuna tiyashkamundaga k’arish kikin warmillada, warmish kikin kusallada charichun. ³Kusaga paibuj warmin, warmish paibuj kusan kazarashkaguna ruranada rurasha p’aktachichun. ⁴Warmij cuerposh na paibuj ganchu, ashtangarin kusajmi gan. Kusaj cuerposh na paibuj ganchu, ashtangarin warmijmi gan. ⁵Shinushaga ama mitsarichichu, ashtangarin Diosta mañagungajlla munusha shuj tiempollada ama tandanukungu ishkindijlladi ari ninukushaga alliminga. Diosta mañusha tukuchishka k’ipaga kanguna na jarkari pudikiga Satanás ama urmachichunga tandanukichilla.

⁶Kai shina rurachunga na mandanichu, ashtangarin <Shina rurana allimi ganmu> yuyanimi. ⁷Tukiguna ñuka laya gashaga alli ganmuchari nini. Shinash Diosbuj kumbidashkadaga7.7 Dios kumbidashkaga nishaga shuj k’arigunaga warmida na ministinga, shuj warmigunash k’arida na ministinga, shinaidi shujkuna ministinga nishami nin. Ministina na ministinaga Dios kumbidashkagunami. shuj shujtami charin: shujka shujta, chaishujka shujta.

⁸Narij kazarashkagunash viudagunash ñuka laya gasha ashtan alli ganmuchari nini. ⁹Shinash warminai k’arinaida na jarkari pudishaga kazarichi. Chi yuyillan ruparij shina purina randiga kazarana alli gan.

¹⁰Kazarashkagunamunga na ñukaj yuyimunda ninichu, ashtangarin Manduj Jesusmi: Warmiga kusanga ama partirichun. ¹¹Partirishaga kutinga ama kazarachun na gashaga kusan parlanukusha kutin tandanukuchun. Shinaidi kusash warminga ama partirichun, nin.

¹²Kaishujkunamundaga Manduj Jesusga kaida na ninchu, ashtan ñukami kaidaga nini: Maijin crij k’aribuj warmi na crij gashash, paigun kausasha nigukiga ama partirichun. ¹³Shinaidi crij warmi na crij kusada charishaga kusa paiyun kausungu munagukiga ama partirichun, nini. ¹⁴Na crij kusaga crij warmin kausagushkamundaga linshuyachishkami gan. Shinalladi na crij warmish crij kusan kausagushkamundaga linshuyachishkami gan. Na shina gakiga kangunaj maragunash mapayashkami ganmuga, shinash kununga linshugunami gan. ¹⁵Ashtanbish, na crij kusa gasha, na crij warmi gasha partirikiga sakichilla. Shina gakiga crij kusa, crij warmi ña na watushka layaguna ganchu. Diosga k’uillada kausachunmi kayuga. ¹⁶Kan warmi ¿ima layadi kambuj kusada kishpichichi pudinada yachungui? Shinaidi kan kusash ¿ima layadi kambuj warmida kishpichichi pudinada yachungui?

¹⁷Tuki kangunada Dios kayuki, Manduj Jesús imada kushkagunanmi kausana ganguichi. Chidami tuki iglillagunabi mandani. ¹⁸Maijin k’ari circuncisionda7.18 Gn 17.10-12 rurushkada kayashkakiga aicha karada na p’itishka ama tukunguichu. Maijinga na circuncidashkada kayushkakish, aicha karada ama p’itichinguichu. ¹⁹P’itishka gashash na p’itishka gashash imakish na valinchu, ashtangarin Dios mandashkagunada kazunami alli gan. ²⁰Kangunada kayibi ima laya gaganguichi, shinaidi katichilla. ²¹Watashka shinada kayushka gashash, ama llakirichu. Kachachishka gai pudishaga llujshinguillami. ²²Maijin watashka laya gashash, Manduj Jesús kayashka gashaga ña na watashka laya tukun. Shinaidi, na watashka laya gashash, Manduj Jesús kayashka gashaga Cristomu watashka laya tukun. ²³Kangunaga manchanaidi valishkan randishkami ganguichi. Shina gashkamundaga ama pibuj watushkaguna gaichichu. ²⁴Shinakiga wauki paniguna, ima layada Pai kayashkakish, chi layalladi Dioskun katigunguichilla.

²⁵Piyunbish narij purij solteragunamundaga Manduj Jesús mandashkadaga ima ninadash na charinichu. Shinash Manduj Jesús ñukada llakishkamunda kangunamush yachachishkada mingashkamunda shinaidimi ñuka yuyimunda kaidaga nini. ²⁶Ñukaj yuyibiga kai llaki p’unllaguna gashkamundaga kunun kausagushka layaidi katina allimi gan. ²⁷Warmida charishaga ama partiringu yuyanguichu. Na charishash ama mashkanguichu. ²⁸Kazarashaga na juchada ruranguichu; soltera kazarashash na juchada ruranchu. Shina gakish kazarajkunaga llakidami charinga. Ñukaga chi llakigunada charichunga na munanichu.

²⁹Kaidaga, wauki paniguna, ashalla p’unllaguna tiyashkamundami shina niguni. Kununmundaga kazarashkagunaga na kazarashka shina kausichi. ³⁰Wakagujkunaga na wakaguj shina, kushilla gajkunaga na kushilla gaj shina, imada randijkunash na charijkuna shina gachun. ³¹Kai pachabi imalla tiyashkagunan kushiyajkunash na kushiyajkuna shina gachun. Kai kunun rikushka pachaga tukurinallami gan.

³²Kanguna llakilla gachunga na munanichu. Musuga Manduj Jesusbujta ruranada shinaidi kushiyachinadashmi munan. ³³Kutin kusaga kai pachabi imada charinada, ima laya warmida kushiyachinadash chi yuyinmi gan. ³⁴Kusaga ishki yuyidami charinga. Kusa illujkuna shinaidi solteragunash paigunaj cuerpon, espiritun Diosbujlla gashkamundami Manduj Jesusbujllada rurana yuyida charin; kutin kusayujkunaga kai pachabi imada charinadash ima laya kusada kushiyachina yuyidashmi charin. ³⁵Chimunda kaidaga na jarkungaj ashtan kangunaj allibuj, tuki shungun Manduj Jesusllada alli sirvisha kausachunmi niguni.

³⁶Shuj musu kazarangu ari ninukushka solterada na allida rurushkada yuyishkamundaga solterash7.36 Kaida griegobi rikushkamunda musuga manchanai warminan ni pudin. Chimunda kai frasega: musuga ña manchanai warminashkamunda kazarangujti munushaga kazarachunlla, imash na juchachu. ña kazarana watada p’aktachishkamunda kazarangujti munushaga kazarachunlla, imash na juchachu. ³⁷Shinash pai allida rurungu yuyarishkada na kungarijka, paibuj yuyi muniguna na vincishka, ashtanbish paibuj munigunada vincijka, paibuj ari ninukushkan na kazarashaga allidami ruran. ³⁸Chimundaga kazarangu ari nishkan kazarashaga allidami ruran. Shinaidi na kazarashash ashtan allidami ruran.

³⁹Warmiga kusa kausashkagamaga watashka shinami. Kusa wañukiga ña na watushkachu, maijin k’ari Mandajbuj gakiga kazarachunlla. ⁴⁰Ñukaj yuyibiga kutin na kazarashaga ashtan kushimi ganga. Chidaga ñukash Diosbuj Espirituda charishkamunda shina yuyani.

Rurushka dioskunamu kushka mikunamunda

¹Kununga rurushka dioskunamu kushka aichamunda parlungu kallarini. Kai kabishkagunadaga tukigunami yachunchi. Shinash, yachushkaga jatun tukuna yuyida kun, ashtangarin k’uyiga shuj crijkunada jinchiyachin. ²Maijinsh <Imadash yachujmini> yuyushash, ima laya yachana gashkadadijka chairij narij yachanchu. ³Ashtanbish Diosta maijinsh k’uyuki, Diosga paida rijsinmi.

⁴Rurushka dioskunamu kushka mikunamundaga kaidami niguni: Chi diosga kai pachabi imakish na valishkada, shujlla Dios tiyashkadami yachanchi. ⁵Jawa pachabish kai pachabish <dios> nishkaguna tiyakish (Shina nishka dioskunash mandajkunash, taugagunami tiyan) ⁶ñukuchibujka shujlla Dios, Paiga Taitami. Tuki imash Paimundami; ñukuchish Paimumi kausanchi. Shinaidi shuj Mandujka Jesucristollami gan. Paimundami tuki imash tiyan, ñukuchish Paimundami kausanchi.

⁷Shujkunaga rurushka dioskunan amañarishkaguna gashami, chigunamu rupachichun kushkagunada yachushash kai aichada mikunguna. Paigunaj shungu yuyi narij alli jinchiyashkamunda, juchada rurushkada yuyanguna. ⁸Ima mikushkash Diosmunga na kuchuyachinchu. Mikushkamundash na mikushkamundash ashtan alli, na allish na ganchichu.

⁹Kanguna na watushka laya purishkamundaga ¡p’akta narij alli jinchi crijkunamada juchabi trankarisha urmachinguichimu! ¹⁰Kan alli yachushash rurushka dioskunada adorana pushtubi mikujta, na alli yachashkamunda juchada rurushkada yuyaguj crij kanda rikushaga ¿nachu paish chi dioskunamu kushka mikunada mikungu munanga? ¹¹Kan yachushka jawa shina rurushkamundaga paimundash wañuj Cristoda narij alli jinchi crij waukiga chingaringami. ¹²Shinushami wauki panigunada shina na allida rurasha paigunaj narij alli jinchi yuyida chugrichishaga Cristoda p’iñachisha juchada ruranguichi. ¹³Chimunda ñuka mikushkallamunda ñukaj wauki pani ama juchabi urmachunga chi aichadaga nalladi mikushachu.

Jesús agllushkaguna ima laya ruranashkamunda

¹Jesusbuj agllusha kachushkami gani. Shinaidi na watushka laya gani. Ñukuchij Manduj Jesustaga ñukash rikushkani. Kangunaga Mandujmunda ñukadi parlushkamundami crisha Paiyun ganguichi. ²Maijinguna <Paiga na agllusha kachushka ganchu> nigukish, kanguna Manduj Jesusta crisha Paiyun shuj shinalla tukushami, ñukadaga agllusha kachushka gashkadadi rikuchigunguichi.

³Ñukada juchachijkunadaga kai ima laya gashkadami nini: ⁴Mikunada ubianadash japingujka ¿nachu kabinchiri? ⁵Chaishuj agllusha kachushkaguna, Manduj Jesusbuj waukiguna shinaidi Cefasma9.5 “Cefas”taga Arameo parlubiga “Pedro”dami nin. laya ñukuchish ñukuchij crij warmida pushangujka ¿nachu kabinchiri? ⁶Na gashaga ¿ñukan Bernabenllachu kanguna ñukuchimu imalladash ayudachunga na mañana ganchi? ⁷¿Maijin soldadodi kikinbuj kuchkida pagusha trabajanri? ¿Maijindi uvada lantusha ña p’ukukiga na mikunga? ¿Maijin michijti lecheda kapisha na ubiunga? ⁸Kaidaga ñukaj yuyillamunda nigushkadaga ama yuyanguichichu; Moisés mandushkabishmi shina nin. ⁹Moisesmu Dios escribichishkabiga: “Trillaj wagrada ama shimida watunguichi,”9.9 Dt 25.4 ninmi. Shina nishaga wagragunada Dios llakij gashkadaga na ninchu. ¹⁰Na gashaga ¿ñukuchimundachu nin? Ñukuchimundashmi chida nigun. Shinakiga achpada yapukish granuda trillakish japina yuyinmi rurana kabin. ¹¹Shinakiga ñukuchi tarbuj layaidi Diosbuj shimida kangunamu parlushkamundaga kanguna imalla charishkamunda ¿nachu imadash japibuj ganchi? ¹²Shujkuna kangunamunda imadash japigukidijka ñukuchigarin ashtan japinadimi kabinchi.

Shinash ñukuchiga imadash na japishkanchichu, ashtan Cristomunda Alli Shimi ama imash jarkarichunmi tukibi ñukuchilladi jinchida aguantanchi. ¹³Diosbuj wasibi sirvijkunaga chibi imalla tiyashkan kausashkadaga yachunguichimi. Shinusha altarbi sirvijkunaga chi altarbi Diosmu kusha wañuchishka animalgunaj aichadami mikunguna. ¹⁴Shinaidi Alli Shimida parlujkuna chillamundadi kausachunmi Manduj Jesusga manduga. ¹⁵Shina gakish ñukaga chi japina gashkadaga ima urash na japishkanichu. Kanguna imalladash ñukamu kuchun nishash na escribigunichu. Pibuj imadash japishaga ñuka kushiyanadami kichuchisha. ¡Chibuj randiga wañunachari alli ganmu!

¹⁶Ñuka ima layash Alli Shimida parlanaidi gashkamundami parlugusha <Yallimi gani> nisha na parli pudinichu. Alli Shimida na parlushaga ¡ai, imachari tukusha! ¹⁷Ñukaj munillamunda parlashkashaga japinadami chapagunimuga, ashtanbish Dios parlachun mingushkada p’aktachingajlla kaida ruraguni. ¹⁸Shinushaga ¿iman kushiyasha? Ñukaga Alli Shimida na cobrushalla parlashkamunda kushiyani. Mashna kabishkada japinada na mañanichu.

¹⁹Ñukaga pibuj watashka shina na gashash, Cristoda crijkuna ashtan mirarichunga tukigunamu watashka shina tukuni. ²⁰Israelgunan gashaga paiguna crijkuna tukuchunga paiguna layami tukugani. Moisés mandushkada katijkunan gashaga paigunash crijkuna tukuchunga (Moisés mandushkada ñuka na katishash) paiguna layaidi tukugani. ²¹Shinaidi Moisés mandushkada na katijkunan gashaga yallidijka paigunash kishpichishka gachun paiguna layaidimi tukugani. (Shina rurushaga Diosbuj mandushkada na sakishalla ashtanbish Cristoj mandushkadami kazuguni.) ²²Narij jinchi crijkunan gashaga paigunada jinchiyachingajka paiguna layaidimi tukuni. Yallidijka maijinllash ima layash kishpichishka gachunmi tukida tukigunamu rurani. ²³Alli Shimimundaga chibi tiyashka alligunada japingajmi tukida ruraj gani.

²⁴Kangunaga yachunguichimi, mishanukibiga tukigunami ut’kada rin. Shinash shuj vincijllami premiodaga japin. Shinakiga kangunash premioda japingujka ut’kada richi. ²⁵Ima pugllanabish ñaubusha chayungu mashnalla munujkunaga paigunaj cuerpodaga allimi cuidarin. Paigunaga chingarijlla coronada japingumi shina rurun, ashtan ñukuchiga naidi chingarij premioda japingajmi shina ruragunchi. ²⁶Chimundami ñukaga maimu chayana illujmaga na mishagunichu. Shinaidi wairabi juaktusha takanukuj layash na ganichu. ²⁷Ashtangarin ñukalladi shujkunamu parlushka k’ipa ama na valichishka gangumi munani. Chimunda ñuka cuerpo kazuchundi takuj shina ruraguni.

“Diosllada kazushunchi,” nishkamunda

¹Wauki paniguna, ñukuchij ñauba taitaguna p’uyu llandubi gashkadash jatun yaku kuchada tukiguna ch’imbushkadash ama kungarichunmi munani. ²Shinushami p’uyubish, jatun yaku kuchabish bautizarishaga tuki paiguna Moiseskun shujlla tukugaguna. ³Shinaidi tukigunami Dios kushka mikunada mikugaguna. ⁴Tukigunami chi espiritullamunda ubianada ubiagaguna. Paigunan igulda riguj rumi espiritumundami ubiagaguna. Chi rumiga Cristomi. ⁵Shina gashash chaubi yalliguna Diosta na kushiyachishkamunda shitashka pushtubi wañusha chutalla sakirishka.

⁶Kai tuki tukushkagunaga ñukuchish ama paiguna laya na allida munachunmi shina rikuchigun. ⁷Paigunapuramunda shujkuna laya rurushka dioskunada ama adorichichu. Dios escribichishkabiga, “Gentegunaga mikungu ubiungu tiyariga. Chi k’ipaga paigunaj milli munigunan kushiyangumi jatarigaguna,”10.7 Ex 32.6 nin. ⁸Paigunapuramunda shujkuna laya ama piyunbish siririjkuna gashunchi. Shina rurushkamundami shuj p’unllallabi ishki chunga kinsa warangaguna (23.000) wañuga. ⁹Shinalladi Mandujtaga paiguna shina ama p’iñachisha na kazujkuna tukushunchi. Paigunadaga culebraguna wañuchiga. ¹⁰Diosta p’iñusha ama rimichichu paigunapuramunda maijinguna laya. Shina rimushkamundami tukuchishtaj ángel wañuchiga.

¹¹Ñauba taitaguna yuyachun kai tuki llakiga tukuga, shinaidi ñukuchimu <P’akta> nisha yachachingujmi escribichisha sakishka. Kai tukuri p’unllagunaga ña ñukuchimu chayamun. ¹²Shinakiga maijinsh <Jinchi shayarijmini> yuyajka p’akta amadij urmachun. ¹³Kangunaga na alli muniguna shamuki pi gente na api pudibuj llakigunadaga na apushkanguichichu. Diosga p’aktachijmi; shinushaga kanguna na apibuj llakida apachunga na sakinga, ashtanbish na alli muniguna shamukiga Dioslladimi llujshinada kunga.

Rurashka dioskunada sakinamunda

¹⁴Shinusha k’uyushka wauki paniguna, rurushka dioskunada yuyarinamunda anchurichi. ¹⁵Kangunaga ña yachujkuna gakimi ñuka nishka alli na alli gashkada kangunaidi rikuchun nini. ¹⁶Diosta <Diosolopai> nisha copabi gaj vinoda ubiashaga Cristoj yaurgun shuj shinalla tukunchi. Tandada chaubisha mikushash Cristoj cuerpon shuj shinalla tukunchi. ¹⁷Taugaguna gashash chishuj tandallada tukiguna mikushkamundaga shuj cuerpollami tukunchi.

¹⁸Israelgunada alli yuyarichi. Animalda wañuchisha, Diosmu kusha altarbi rupachishka aichada mikujkunaga tukimi Dioskunga shuj shinalla tukunguna.10.18 Ñaubaga tauga laya sacrificio tiyaga. Diosbuj wasi altarbi rupachichun israelguna kushka animalgunaga chaubiga Diosmu, chaishuj chaubiga chibi gaj genteguna mikuchunmi gaga. Shinushaga tuki israelgunapura Dios munushkada rurashkamundaga Dioskunga shuj shinalla tukujkaga.¹⁹Shina nishaga chi rurushka dioskuna, na gashaga chi dioskunamu kushka animalgunaj aichagunaga <Alligunami> nishaga na ninichu. ²⁰Ashtangarin kaidami nini: Diosta na kazujkunaga animalgunada wañuchisha Diosmunga na kunchu; ayagunamumi kun. Kanguna ayagunan tandanukuchunga na munanichu. ²¹Kangunaga Manduj Jesusbuj vino vazomundash ayagunaj vazomundash na ubyi pudinguichichu. Shinaidi Manduj Jesusbuj mezabish ayagunaj mezabish na gai pudinguichichu. ²²¿Manduj Jesustachu p’iñachingu10.22 Dios ñukuchi Paibujlla gachun munan. Rurushka dioskunamu ayagunamu animalgunada wañuchisha kuki Dios p’iñanllami. mununchi? ¿Paida yalli jinchigunachu ganchi?

Na watashka shina ganamunda

²³Maijingunaga, “Tukida ruri pudinchimi,” ninga; shinash tukiga na allibuj ganchu. Maijingunaga, “Tukida ruri pudinchimi,” ninga; shinash jinchi crijkunadaga na ruranchu. ²⁴Pish na kikin alli gangu, ashtangarin shujkuna alli gachunmi mashkachun.

²⁵Aicha k’atubi imalla k’atushkada, kikin yuyibi <¿Allichu? ¿Na allichu?> nisha na tapushalla mikichilla. ²⁶“Kai pachash tuki kaibi imalla tiyashkash Manduj Diosbujmi,”10.26 Sal 24.1 gashkamundami kashna niguni.

²⁷Maijin na crij, kangunada mikuchun kayukiga rish nishaga richilla. Imalladash mikuchun kushkadaga kikin yuyibi <¿Allichu? ¿Na allichu?> nisha na tapushalla mikichilla. ²⁸Na gashaga maijinsh, “Kai aichaga rurushka dioskunamu kushkami gan,” nikiga chi parlujta shinaidi yuyida ama pandachingujka ama mikunguichichu. ²⁹Kashna nishaga na kambuj yuyibi, ashtangarin parlujbuj yuyibi ima tiyashkamundami niguni.

Ñuka na watashka shina gasha imadash rurajta rikusha10.29 Kai “na watashka shina gasha imadash rurajta rikusha” kai layadash nina: Ñuka – imadash ruranalla gasha rurajta rikusha – shujkunaj yuyashkan juchachichunga na munani. shujkunaj yuyashkan juchachichunga na munani. ³⁰<Diosolopai> nisha ñuka mikushkamundaga ¿ima nishadi Diosta mañusha mikushkamundaga ñukada juchachingari?

³¹Shinakish kanguna mikushash, ubiashash, imada rurushash Dios jatunyachishka gachun rurichilla. ³²Israelgunadash, na israelgunadash, Diosbuj tandanukushka crijkunadash ama trankarisha urmachinguichichu. ³³Ñukaga tukigunan alli gangumi shina tukida rurani. Ñukaj alli ganadaga na mashkanichu, ashtan taugagunaj allibuj shinaidi kishpichishka gachunmi shina rurani.

¹Ima laya Cristoda katiguni, kangunash ñuka kausashkada rikusha katichi.

Crijkunaj tandanukibi ima laya ganamunda

²Ñukada na kungarishkamunda shinaidi tuki ñuka yachachishka shina kanguna katigushkamundaga <Alliminguichi> ninimi. ³Kununga kaidami yachachun nini: Cristoga tuki k’arigunaj umami, kusash warmij umami shinaidi Diosbish Cristoj umami gan. ⁴Maijin k’arish umada t’iungurisha Diosta mañagusha na gashaga Dios nishkada parlagushaga paibuj uma shina gajtami na valichin. ⁵Shinaidi maijin warmish umada na t’iungurisha Diosta mañagusha na gashaga Dios nishkada parlagushaga paibuj kusadami na valichin. Juakchada illijta rutushka shinami gan. ⁶Shuj warmi na t’iungurishaga ashtan juakchada rutuchichun. Juakchada p’itichishka na gashaga illujta rutuchishka pinganai ganakiga t’iungurichunri. ⁷K’ariga Diosmu rijchaj shinaidi Dios ima laya gashkada rikuchij gashkamundaga paibuj umadaga na t’iungurina gan. Kutin warmiga kusabuj alli gashkadami rikuchin. ⁸K’aridaga na warmimunda llujshichishkachu, ashtanbish warmidami k’arimunda llujshichishka. ⁹Shinaidi k’aridaga na warmi ministishkamundaga rurugachu, ashtanbish warmidaga k’ari ministishkamundami ruruga. ¹⁰Chimunda angelgunamundash warmiga kusada kazuj gashkada rikuchingujka t’iungurinami gan. ¹¹Shinash Manduj Diosbuj gashaga k’arish warmi illujka shinaidi warmish, k’ari illujka na ganchu. ¹²Warmiga k’arimunda rurashka gashash, k’arish warmimundami wacharin; ashtan kai tukigunaga Diosmundami shamun. ¹³Warmi na t’iungurishalla Diosta mañanaga alli na alli gashkada kangunalladi yuyarichi. ¹⁴Genteguna ima laya kausachun Dios kushkaga ¿k’arish juakchada iñachun sakinaga pinganai ganchu? ¹⁵Kutin warmiga juakchada iñachun sakinaga ashtan allimi. Juakchadaga umada t’iungurij shina gachunmi Diosga kushka. ¹⁶Kaigunamunda maijinsh rimanukusha nishaga yuyarichi. Ñukuchish Diosbuj tandanukushka crijkunash, shina rurujkunaga na ganchichu.

Crijkunaj tandanukibi ch’ikanyarishcagunamunda

¹⁷Kaigunada nisha katishkanga kangunaj tandanukigunada <Allimi rurashkanguichi> ningujka na pudinichu, ashtan allida ruranadaga na allidami rurashkanguichi. ¹⁸Kallarimunga kashna Diosta yuyaringu tandanukushaga <Ch’ikanyarinukugun> nijtami uyagani. ¡Ashadaga crinimi! ¹⁹Kangunapuramunda ch’ikanyarishaga <Diosbuj gashkada rikuchingumi shina ruranchi> yuyanguichichari.11.19 Pabloga crijkunaj tandanuki ch’ikanyarishkamunda p’iñarisha riman. Diosta alli nijkuna ch’ikanyarichunga na munanchu; ch’ikanyarishash alliguna tukunadaga na yuyanchu.²⁰Chimunda, kanguna Manduj Jesús wañushkada yuyarisha mikungaj tandanukushkaga ña na chibuj gashkachu. ²¹Ashtanbish tukigunan mikungu kikinbuj mikunadaga ñaubushadi mikunguna, chaishujkunaga yarijin sakirin, kutin maijingunaga shingayanguna. ²²Shina mikungaj ubiungajka ¿nachu kikin wasida charinguichiri? ¿Ima nishadi Diosbuj tandanukushka crijkunada na valichisha, imada na charijkunadash pinganachichinguichi? ¿Imada nisha? ¿<¡Alligunami gan!> nishachu? ¡Chimadaga na!

Manduj Jesús wañushkada yuyarisha mikunamunda

²³Ima laya ñukamu Manduj Jesús yachachishkadadimi kangunamush yachachigani. Mandaj Jesusga Paida japichina tutaidimi tandada japisha, ²⁴Diosta <Diosolopai> nishka k’ipa chaubishaga, “Kaimi Ñukaj cuerpo kangunamunda kushka. Ñukada yuyarisha kashna rurunguichi,” niga. ²⁵Shinalladi mikushka k’ipa, copada japishaga, “Kai vino copaga Ñukaj yaurmi. Kaiyunmi mushuj yuyida p’aktachinada p’aktachini. Mashna kutin kaida ubiushaga Ñukada yuyarisha kashna rurunguichi,” niga. ²⁶Shinusha, Manduj Jesús shamungagama mashna kutin kai tandada mikusha kai vinoda ubiushaga Pai wañushkada yachi chayachinguichi.

Manduj Jesusbuj cuerpoda yaurda alli valichinamunda

²⁷Shinaki, maijinsh na valichishash Manduj Jesusbuj tandada mikujka shinaidi copamunda ubiujka, juchada rurasha Manduj Jesusbuj cuerpoda yaurdash na alli ruranga. ²⁸Shinushaga maijinsh tandada narij mikushaidi, copamundash narij ubiushaidi, kikinmunda ima laya gashkada alli yuyaringuichi. ²⁹Maijinsh, Manduj Jesusbuj cuerpo imaj gashkada na yachushalla mikuj ubiujka kikinlladi llakichishka gangumi mikun, ubian. ³⁰Chimundami kangunapurabiga taugaguna ungushka, ima jursa illujkuna, shinaidi shujkunaga ña wañushkami. ³¹Ñukuchilladadi alli yuyarikiga Manduj Diosga na llakichingachu. ³²Pai ñukuchida alli na alli gashkada rikusha llakichishaga Diosta na kazujkunan ama igulda llakimu kachungumi yachachin. ³³Shinakiga ñukaj wauki paniguna, mikungu tandanukushaga kaishujkun chaishujkun shuyanukichi. ³⁴Kangunaj tandanukiguna ama llakichishka tukuchunga maijinsh yarijachijllagunaga wasillabidi mikuchun. Chaishuj tapushkagunamundaga kangunada rikungu rishami imadash nisha.

Espíritu kumbidashkagunamunda

¹Wauki paniguna, kanguna ruri pudinada Espíritu kumbidashkagunamundami alli yachachunmi munani.

²Kanguna narij crijkuna gashaga upa dioskunamu maidash gachun pushashka katijkuna gashkadaga yachanguichimi. ³Kununga alli yachichi: Maijinsh Diosbuj Espiritun gajka, “Jesusga ima llakish tukushkanmu,” nishaga na rimangachu. Shinaidi Diosbuj Espiritun gajllami, “Jesusga Mandajmi,” ninga.

⁴Shinakiga tuki laya kumbidanagunami tiyan; shinash chigunadaga shuj Espiritullami kun. ⁵Tuki laya sirvinagunami tiyan; shinash shuj Mandujllami rurachin. ⁶Shinaidi tuki laya ruranagunabiga shuj Diosllami tukigunada tukibi rurachin. ⁷Tukigunabuj alli gachunmi Diosga Espíritu rikuchishkada shuj shujmu kun. ⁸Chi Espiritulladimi shujkunamunga alli yuyigunan parlanada, kutin shujkunamunga alli yachushkan parlanada kun. ⁹Shujkunaga chi Espiritullamundadimi alli crina yuyida, kutin shujkunaga ungushkagunada alliyachina kumbidashkada japin. ¹⁰Shujkunamunga pi na ruri pudishkagunada rurachun, shujkunamunga Dios ima nishkada parlachun, shujkunamunga maijinbuj espirituguna gashkada rijsichun, shujkunamunga shuj shimigunabi parlachun, shinaidi shujkunamunga chi shimigunada shujkunamu intindichichunmi kun. ¹¹Kai tuki rurashkagunadaga chi shujlla Espiritulladimi pai kungaj munushkada rakisha shujmu shujmu kun.

Tukiguna shuj cuerpo shinalla gashkamunda

¹²Gentej cuerpo tauga partigunada charishash shujllami; shinaidimi Cristoda crijkunaga Cristoj cuerpo shina shujlla tukun. ¹³Tuki israel gashash, na israel gashash, watushka laya gashash, na watushka laya gashash shuj cuerpo shinalla gangujka chi Espiritullandi bautizashka ganchi. Shinaidi chi Espiritulladadi tukiguna ubiachun kuga.

¹⁴Shuj cuerpoga na shuj partilla ganchu, ashtangarin tauga partigunanmi rurashka gan. ¹⁵Chakiga, “Na makishkamundaga na cuerpoj ganichu,” nishamash cuerpoj ganadaga na sakingachu. ¹⁶Rinrinbish, “Na ñawi gashkamunda na cuerpoj ganichu,” nishamash cuerpoj ganadaga na sakingachu. ¹⁷Tuki cuerpo ñawi gashkakiga na uyi pudinchimuchuga. Tuki cuerpo rinrin gashkakish imadash na mut’ki pudinchimuchuga. ¹⁸Shinushami Diosga tuki cuerpoj partigunadaga maibi alli ganada rikusha churuga. ¹⁹Tukiguna shuj partilla gakiga cuerpoga ¿maibishi ganmuga? ²⁰Ashtan tauga partiguna gashash, cuerpoga shujllami.

²¹Ñawiga makidaga, “Na ministinichu,” ningujka na pudinchu. Umash chakigunada, “Na ministinichu,” ningujka na pudinchu. ²²Ashtangarin cuerpo partibiga ima ruri pudinash illuj layagunami ashtan ministirin. ²³Yangalla partidaga ashtan yalli k’uilladi churarinchi. Pinganai rikurina partidash ama rikurichunga ashtanmi yalli churarinchi. ²⁴Ashtanbish cuerpobi alli rikurij partigunabiga ima churanada na churachi tukunchichu. Dioslladi ñukuchij cuerpobiga alli rurusha, yangalla partigunada yalli valichishka. ²⁵Shinakiga cuerpo na partirishalla kaishuj chaishujkun ayudanukuchunmi shina rurashka. ²⁶Cuerpobi shuj parti llakida apakiga shujkunash paigun llakida apanmi; shinaidi maijin parti alli nishka tukukiga tukigunami paigun kushiyan.

²⁷Shinaki, kangunaga Cristoj cuerpo gashkamundaga tukigunami chi cuerpoj partimi ganguichi. ²⁸Diosga tandanukushka crijkunabiga: kallarimunga agllush kachushkagunada, ishkibiga Dios nishkada parlujkunada, kinsabiga yachachijkunada, chi k’ipaga pi na ruri pudishkada rurujkunada, ungushkagunada alliyachijkunada, ayudajkunada, pushujkunada shinaidi shujtij shimigunada parlujkunadashmi churaga. ²⁹¿Tukichu agllasha kachushkaguna? ¿Tukichu Diosbuj nishkada parlajkuna? na gashaga ¿tukichu yachachijkuna? Pi na ruri pudinadash ¿tukichu ruran? ³⁰¿Tukichu ungushkagunada alliyachi pudinada charinguna? ¿Tukichu shujtij shimigunada parlunguna? ¿Shujtij shimigunabi parlushkagunada tukichu intindichinguna? ³¹Shinaki, Espíritu tuki kumbidashkada yalli alligunada japingaj ashtan munichi.

Ñukaga yalli alli ñandami yachachisha.

K’uyiga yalli gashkamunda

¹Ñuka, gentegunakish angelgunakish shimibi parlashash k’uyida na charishaga jirrubi takuki ch’ilin nij shina na gashaga platillobi takuki ch’ilin nij shinallami gaimu. ²Dios nishkada parlashash, pi na yachushkada intindishash, tuki yachanada yachuj gashash, urkugunada shujtijmu churangaj manchanaidi crij gashash, k’uyida na charishaga imash na ganichu. ³Ñuka imalla charishkada na charijkunamu tukida kushash shinaidi ñukaj cuerpodadi rupachichun kushash, k’uyida na charishaga imakish na valinichu.

⁴K’uyiga na ratu p’iñarinchu, tukin allida rurunmi, shujbujta na munanchu, jatun tukush na parlanchu, jatun gashkada na yuyachinchu; ⁵k’uyiga ima na allida na ruranchu, na paibujllamu mashkanchu, imallamundash na ñash p’iñarinchu, llakichikish kungarinmi, ⁶na kabishkada rurujkunanga na kushiyanchu, ashtan kabishkanmi kushiyan. ⁷K’uyiga tuki llakida apan, tuki crinadash alli crin, tukida shuyan, tukida aguantanmi.

⁸Dios nishkada parlanash tukuringami, shujtij shimibi parlanash upayangami, imada yachanash tukuringami; shinash k’uyiga naidi chingaringachu. ⁹Yachanadash ashalladami yachanchi, Dios nishkadash ashalla yachushkadami parlanchi. ¹⁰Tukimunda yalli alli allichishka shamukiga ashalla yachashkaga tukuringami.

¹¹Ñuka marashaga mara laya parluj, yuyarij shinaidi imadash kaida chaida rurash nij gagani; ashtan jatun tukushaga marasha ima laya gashkadaga tukidami sakigani. ¹²Kununga espejobi ansalla rikuj shinami rikunchi. Shinash shuj p’unllaga ima laya gashkada ch’imbapura rikunukushun. Kununga ashalladami rijsini; shinash ima layami ñukada Dios rijsin, shinaidimi ñukash illijta rijsisha.

¹³Kununga kai kinsaga: crinash, shuyanash, k’uyish gagungallami. Kai kinsamunda ashtan yalliga k’uyimi.

Tandanukushkabi ima laya parlanamunda

¹K’uyin ganallada yuyichi, shinaidi Espíritu kumbidashkagunada japingu ashtan munichi, yallidika Dios nishkada parlanada. ²Shujtij shimigunabi parlujka, na gentegunamu parlunchu ashtan Diosmumi parlan. Shinushaga Diosbuj Espiritubi pish na yachushkagunada parlukimi pish na intindin. ³Ashtanbish Dios nishkada parlujka crijkuna jinchiyachun, alli tukuchun shinaidi kushiyachunmi parlan. ⁴Shujtij shimigunabi parlujka pailladimi alli jinchi crij tukun, ashtanbish Dios nishkada parlujka crijkunadami jinchiyachin.

⁵Tuki kanguna shujtij shimigunabi parluchunmi munani, yallidijka Dios nishkada parlachunmi nini. Dios nishkada parlajka shujtij shimigunada parlujkunada yallimigun. Na gashaga iglilla alli jinchi tukuchun shujtij shimigunabi parlashkada intindichi pudikiga igul allimi tukun. ⁶Chimunda wauki paniguna, ñuka kangunada rikungu rishaga shujtij shimigunabi parlukiga imakish na sirvingachu. Chibuj randiga Dios imada rikuchishkada, ima alli yachanada, Dios nishkada, na gashaga ima yachashkada parlushkami alli gan.

⁷Tunuchinagunabi, lautabi na gashaga arpabi, tukashash na shuj shujta imabuj tukashkash na uyarikiga ¿ima layadi ima tunu gashkada rijsinga? ⁸Shinaidi takanukungu rina tunuda trompetabi na alli tukakiga ringujka pish na kallarinmuchu. ⁹Shinalladijmi kangunanbish tukun. Intindinalla shimigunada na parlukiga ima nigushkadash ¿ima layadi yachungari? Shina parlushkaga wairamu parlaguj shinallami ganga. ¹⁰Kabishkadika, mashna shimiguna kai pachabiga tiyanchari. Shinash chi shimida parlujpuragunaga intindinllami. ¹¹Ashtan shuj imada nigujta na intindishaga karu llaktamunda shamushka layami parlujmunga ñuka gaimu, shinaidimi paish ñukamunga ganmu. ¹²Chimunda kanguna Espíritu kumbidashkagunada japina yuyillan gashkamundaga crijkuna jinchiyachun chigunada mirachingu ashtan munichi.

¹³Shinushaga maijinsh shujtij shimigunabi parlujka, chi nishkada shujkunamu parlusha intindichina yuyida kuchun Diosta mañachun. ¹⁴Ñuka shujtij shimibi rimarisha mañakiga ñukaj espirituga Diosta mañan. Shinash ñukaj yuyiga chushujmi sakirin. ¹⁵Shinakiga ¿imadadi rurasha? Espiritun yuyinbish mañashami; espiritun yuyinbish Diosta cantashami. ¹⁶Kan espiritullabi Diosta <Allimi gangui> nigujta shuj narij yachij uyushaga kan <Diosolopai> nigushkada na yachushaga ¿ima layadi kan <Diosolopai> nisha tukuchikiga <Shina gachun> ningari? ¹⁷Diosta <Diosolopai> nisha kan k’uilladi mañakish, chaishujmunga imash na ruranchu. ¹⁸Ñuka tuki kangunadash yalli shujtij shimigunabi parluj gashkamundaga Diosta <Diosolopai> ninimi. ¹⁹Shinash, crijkunaj tandanukibiga chunga waranga (10.000) shimigunada, na rijsishka shimibi parlana randiga shujkunadash ayudashka gachun intindinalla pichka shimilladami parlungu munani.

²⁰Wauki paniguna, kanguna ama maraguna laya yuyichichu; millibujka maraguna laya gaichi. Yuyanabiga rukuguna laya yuyichi. ²¹Diosbuj escribichishkabiga, “Kai gentegunamunga na rijsishka shimigunabi, karu llaktagunamunda shamujkunaj shiminmi parlusha. ¡Shinash na uyangagunachu!”14.21 Is 28.11-12 ninmi Manduj Diosga. ²²Shinakiga shujtij shimigunabi parlashkaga crijkunamu rikuchingujka na ganchu, ashtan na crijkunamumi. Dios nishkada parlanaga na crijkunamunga na ganchu, ashtan crijkunamumi gan. ²³Crijkuna tandanukushaga shujtij shimigunabi tukiguna rimariguki, na crijkuna na gashaga na yachujkuna waigushaga <Kaigunaga locomi tukushka> ningami. ²⁴Ashtan tukiguna Dios nishkada parlaguki, shuj na crij na gashaga na yachuj waigusha uyashaga juchayuj gashkadash tukiguna juchachishkadash yuyaringa. ²⁵Shina gashami paibuj shungubi ima pakalla tiyashkagunada rikuchishka gaki, Diosbuj ñaubuki kungurishaga, “Divirtimi Diosga kangunan gashka,” nisha Diosta jatunyachinga.

Crijkuna tandanukibi allida rurachun

²⁶Shinakiga wauki paniguna, kanguna tandanukushaga shujkunaga salmoskunada, chaishujkunaga Dios imada rikuchishkada na gashaga yachachinada, shujkunaga shujtij shimibi parlanada, chaishujkunaga chi shimibi nishkagunada intindichinada charichun. Ima ruranadash crijpuraguna ashtan jinchi tukuchun rurichi. ²⁷Shujtij shimigunabi parlushaga ishki na gashaga kinsagamalla shuj shujlla parlachun. Chi parlushkagunadaga maijinsh intindichichun. ²⁸Crijkuna tandanukushkabi shujtij shimibi parlashkada intindichij illakiga upalla sakirichun, kikinllamu Diosmush parlachun. ²⁹Shinaidi Dios nishkada parlajkunaga ishki na gashaga kinsamalla parlachun, chaishujkunaga chi parlushkada alli na alli gashkada yuyariguchun. ³⁰Maijin chibi tiyaguj, Dios rikuchishkada japikiga ñaubusha parlajka paimu parlachun kuchun. ³¹Shinaki tukiguna yachusha kushiyarichunga Dios nishkagunada tukiguna shuj shujlla parlunguichi. ³²Dios nishkada parlachun kumbidashkaga Dios nishkada parlujkunaj munibimi gan. ³³Diosga na muspachijchu, ashtangarin k’uilla apanukuchij Diosmi.

Tuki crijkunaj tandanukigunabi ima laya gan shina layaidimi, ³⁴warmigunaga tandanukigunabiga upallami gana; parlachunga na sakishkachu. Mandushkabi nishka shina ashtan kazuj gachun. ³⁵Warmiguna ashtan imada yachungu munushaga kangunaj kusada wasibi tapuchun. Crijkunaj tandanukigunabi warmiguna parlarinaga na alli rikurinchu.

³⁶Alli yuyarichi; Diosbuj shimiga na kangunamunda llujshigachu, japidash na kangunalla japiganguichichu. ³⁷Maijinsh Dios nishkada parlaj na gashaga Espirituyuj gashaga kai ñuka escribishkadaga Manduj Dios mandashkada rijsingami. ³⁸Na rijsish nikiga paish na rijsishkami ganga.

³⁹Shinakiga, wauki paniguna, Dios nishkada parlanada mashkichi. Shinalladi shujtij shimigunabi parlujkunadaga ama jarkichichu. ⁴⁰Imada rurashash tukida ruranashka shina kabishkada rurichi.

Cristo kausarishkamunda

¹Kununga, wauki paniguna, Alli Shimida kangunamu parlushkada yuyachish nini. Chida kanguna japishami, chi yuyi jinchida katigushkanguichi. ²Ñuka parlashkada jinchi chaririashaga kai Alli Shimimunda kishpichishkami ganguichi; na shina gakiga crishkash yangaminga.

³Tukimunda yalliga ñuka ima laya japishkadami kangunamunga yachachigani: Dios escribichishkabi nishka shinami, Cristoga ñukuchij juchagunamunda wañuga. ⁴Shinaidi Dios escribichishkabi nishka shinami, pambushka gashash kinsa p’unllabi kausariga. ⁵Kausarishaga Cefasmu rikuriga, chi k’ipaga chunga ishkigunamu (12). ⁶Chi k’ipaga shuj rikurillabi pichka patsaj (500) yalli wauki panigunamu rikuriga. Paigunapuramundaga taugagunami kausagun; maijingunaga ña wañushkami. ⁷Chi k’ipaga Jacobomu, asha k’ipaga tuki Pai agllusha kachashkagunamu rikuriga.

⁸Shinaidi tukimu rikurishka k’ipaga narij p’unlla p’aktuki wacharishka laya ñukamushmi rikuriga. ⁹Agllushkagunamundaga yalli yangami gani, shinaidi Diosbuj tandanukushka crijkunada katik’ichushkamundaga agllusha kachushka ganash na kabinichu. ¹⁰Shinash, Dios kushka alligunamundami agllusha kachushka gani; ñukabujka Pai kushka alliguna na yanga gagachu, ashtangarin tukigunadash yalli rurugugani. Shinash ñukallaga na ruruganichu; ashtan Diosbuj ñukamu kushka alligunanmi rurugani. ¹¹Ima laya gashash, paigunash ñukash chilladadimi parlagunchi; chidami crishkanguichi.

Wañushkaguna kausarinamunda

¹²<Cristo kausarigami> nisha parlaguki ¿ima nishadi kangunapuramunda shujkunaga <Wañushkagunaga na kausarinchu> nigunguna? ¹³Wañushkaguna na kausarina gashkakiga Cristosh na kausarinmuchuga. ¹⁴Cristo na kausarishkakiga ñukuchi parlashkash kanguna crishkash imakish na vali yangami ganmu. ¹⁵<Diosmi Cristodaga kausachiga> nisha ñukuchiga yachachinchi. Wañushkaguna cirtu na kausarinaki Cristodash na kausachishkakiga ñukuchi Diosmunda yachachishkaga llullashka ganmuga. ¹⁶Shinushaga wañushkaguna na kausarina gashkakiga Cristosh na kausarinmuchuga. ¹⁷Shinadijka Cristo na kausarishkakiga kanguna crishkash yangami; chairijti juchallandijmi ganguichi. ¹⁸Shina gakimaga Cristoda crisha wañujkunash chingarishkami. ¹⁹Kai kausibujlla Cristo yuyilla gashkashaga tuki genteda yalli llakimi ganchimu.

²⁰Ashtanbish Cristoga kausarishkami. Paimi wañushkagunaj chaubimunda ñaubusha kausarij gan. ²¹Ima layami shuj k’arillamunda wañi kallariga, shinaidimi wañushkapuramunda kausarinash shuj k’arillamunda kallariga. ²²Ima layami Adanmunda tukiguna wañun, shinaidimi tukiguna Cristobi gashkamunda kausachishka ganga. ²³Ima shina kausarina gashka shinami ñaubushaga Cristomi kausariga; chi k’ipaga Paibujkunami Pai shamibi kausaringa. ²⁴Chi k’ipa tukida jatun mandujkunada, mandanada charijkunada, imadash ruri pudijkunadash Cristo tukuchishtashaga Pai mandagushkada Taita Diosmu kukiga tuki tukuringallami. ²⁵Cristoga tuki Paida p’iñajkunada Paibuj chaki sarunabi churungagama mandanadijmi gan. ²⁶Tukuribi tukuchishtashka gana p’iñajka wañimi. ²⁷Diosga “tukidami Paibuj chaki sarunabi churuga.”15.27 Sal 8.6 Chi “tukidami Cristoj chaki sarunabi churuga,” nishaga Diosta mandanadaga na ninchu. Diosga Cristoda kazuchun tukida kujmi. ²⁸Tukiguna ña Cristoda kazuj tukukiga Pai Churilladimi tukida mandachun kuj Dioslladadi kazunga. Shinami Dioslladi maibish tukida mandunga.

²⁹Wañushkagunamunda bautizarishaga ¿imadadi japinguna? Wañushkagunaga nalladi kausarina gakiga ¿imashadi paigunamunda bautizaringuna? ³⁰¿Imashadi ñukuchilladijka p’unllandijta llakichinalla tukunchi? ³¹Wauki paniguna, ima laya kanguna ñukuchij Manduj Cristo Jesusbi gashkamunda manchanaidimi kushiyani, shinaidi p’unllandami wañuna nishka gani. ³²Éfeso pueblobi p’iña animal layagunan gentej yuyashkallamunda takanukushamash ¿imadadi japishkani? Wañushkaguna na kausarina gakiga shujkuna nishka shinaga, “¡Kayamash wañuna gashkamundaga mikushunchi, ubiashunchi!”15.32 Is 22.13

³³Shinusha pandachichunga ama sakinguichichu. Shujkuna nishka shinaga, “Milligunan tandanukushaga alli kausagushkadami chingachin.” ³⁴Alli yuyin ganguichi, juchada ama ruranguichichu. Kangunapuramunda maijingunaga Diosta na rijsijkuna gakimi paiguna pinganachichun shina niguni.

Wañushkaguna ima laya kausarinamunda

³⁵Maijingunaga, “¿Ima layashi wañushkaguna kausaringa? Paigunaj cuerpoga ¿ima layashi ganga?” nisha tapungachari. ³⁶¡Yuyi illujkuna! Mushuj yura iñachunga tarbushka muyuga ismunmi. ³⁷Tarbushaga iñashka lantadaga iñachunga na tarbunchu, ashtangarin trigo gakish ima shujkuna gakish muyulladami tarbun. ³⁸Ashtangarin Diosga Pai munushka yuradami kun. Shinaidimi tuki laya muyugunamush shuj shuj yurada kun. ³⁹Tuki cuerpogunaga na chipura ganchu: gentegunash, animalgunash, alisyujkunash, chaulagunash shuj shujkunami. ⁴⁰Shinaidi cuerpogunaga jawa cielobish kai pachabish tiyan. Jawa cielobi gajkunaj k’uillaga shujmi, kai pachabi gajkunaj k’uillash shujmi. ⁴¹Indish, lunash, luzerogunash shuj shujtami p’alanin. Luzerogunapura p’alanishkash shujmi.

⁴²Wañushkaguna kausarinash shinaidimi gan. Pambushaga ismujlla cuerpodami pambun, kausarishaga na wañibujmi kausaringa. ⁴³Na valishkada pambakish k’uidijmi kausaringa. Irkillada pambakish jinchi na wañungajmi kausaringa. ⁴⁴Aicha cuerpoda pambukiga espirituyuj cuerponmi kausaringa. Aicha cuerpo tiyakiga espirituyuj cuerposh tiyanmi.

⁴⁵Dios escribichishkabiga, “Kallari Adanga kausuj almayujmiga,”15.45 Gn 2.7 ninmi. Shinash k’ipa Adanga kausida kuj Espiritumi gan. ⁴⁶Ashtangarin aichayujmi ñaubusha kausungu kallarishka, k’ipami espiritumunda gajka shamushka. ⁴⁷Kallari k’ariga achpamunda rurushkami; k’ipa k’ariga jawa pachamundami. ⁴⁸Kai pachabi kausujkunaga achpan rurashka Adán layami; jawa pachajkunaga jawa pachamunda Shamuj layagunami.

⁴⁹Ima layami achpamunda gaj laya ganchi, shinaidimi jawa pachamunda Shamuj laya gashun.

⁵⁰Wauki paniguna, kaidami nish nini: aichash yaurbish Dios mandagushkamunga na waigungachu. Ismujllaga na ismuna pushtumunga na waigungachu. ^51-52Pish narij yachashkadami yachachun munani. Tukigunaga na wañushunchu, ashtangarin ñash ñawi ichki shinabi, shinaidi shuj tukurij trompeta tukashka uyariki tukiguna shujtijta rurashkami gashun. Trompeta tukashka uyariki wañushkagunaga na ismuj cuerpon kausachishka ganga. Ñukuchiga shujtijta rurashkami gashun. ⁵³Wañusha ismunalla ñukuchij cuerpoga na wañuj na ismujdimi tukunga. ⁵⁴Ñukuchij ismujlla cuerpo ña na ismuj tukuki, shinaidi wañujlla cuerposh ña na wañuj tukukimi Dios escribichishkabi kashna nishkaga chibimi p’aktunga: “Vincijka wañidami tukuchishtaga.”15.54 Is 25.8

⁵⁵“¡Wañi! kambuj vincinaga ¿maibidi gan?

Kambuj nanachinaga ¿maibidi gan?”15.55 Os 13.14

⁵⁶Juchamundami wañiga tujsisha nanachin. Mandashkamundami juchaga poderda15.56 Juchamundami tukiguna wañunchi. Mandana tiyashkamundami juchayujkunada juchachi pudin. charin. ⁵⁷Ashtanbish ñukuchij Mandaj Jesucristomunda vincinada ñukuchimu Dios kushkamundaga Paida <¡Diosolopai!> ninchi.

⁵⁸Chimunda, ñukaj k’uyashka wauki paniguna, jinchi jinchi, pish na kuyuchibuj jinchi shayaribanguichi. Mandaj Jesusbuj ruranadaga yalli alli rurasha katigunguichilla. Kanguna Mandaj Jesuskun igulda ruragushka na yanga gashkadaga yachanguichimi.

Crijkunamu kachangaj kuchkida tandushkamunda

¹Linshuyachishkagunamu kuchkida tandusha kachanamundaga Galacia llaktabi kaibi chaibi tandanukushkagunamu ñuka yachachishka layaidi rurichi. ²Ñuka kangunajmu chayuki ama tandachigungujka tuki semanaj kallari p’unllabi kanguna mashnalla ganashkamunda asha kuchkida kungujka wakichisha churichi. ³Shinami ñuka chayashaga mashna kuchki tandachishkada japisha cartada rurusha kanguna agllushkaguna Jerusalén pueblomu apachun kachushami. ⁴Ñukash rina alli gakiga igulda rishunllami.

Pablo maimu rinada yuyashkamunda

⁵Kangunajmu rishaga Macedonia llaktadami rina gani; chida pasushka k’ipaga kangunajmunga chayashami. ⁶Asha p’unllagunada na gashaga tamia p’unllaguna pasungama kangunan sakirishachari. Chi k’ipaga ñuka maimu rina gashkabi ayudanguichi. ⁷Kununga rikusha pasungujllaga na munanichu, ashtangarin Manduj Jesús munakiga tauga p’unllagunadami kangunan gasha nini. ^8-9Jesusbujta alli p’aktachisha rurachun punguguna illujta paskashkamundami taugaguna ñukada p’iñakish Pentecostés pishta p’unllagamami Éfeso pueblobi sakirisha.

¹⁰Timoteo kangunajmu chayukiga pai kushiyachun alli japibanguichi; paiga ñuka layaidi Manduj Jesusbujta rurajmi. ¹¹Shinaki, maijinbish paidaga ama yangabi churanguichichu. Waukigunandijmi chapaguni. Pai ñukajmu kushilla shamuchun ayudabanguichi.

¹²Wauki Apolostaga kaishuj waukigunan kangunada rikungu richun nisha kutin kutin mañakish na risha nigachu. K’ipa p’unllami ri pudishaga ringa.

Alli yuyigunada kushkamunda

¹³Chapariajkuna, crishkabi jinchi katijkuna, k’ari k’ariguna, vincijkunash gaichi. ¹⁴Imada rurashabish k’uyin rurichi. ¹⁵Wauki paniguna, Acaya llaktabi Estéfanas paibuj familiandij kallari crij tukushkada shinaidi crijkunamu paiguna sirvisha katigushkadash yachunguichimi. ¹⁶Shinusha paiguna laya rurujkunada shinaidi mashnalla trabajajkunada ayudajkunadash kazuchunmi kutin kutin rugani. ¹⁷Estéfanas, Fortunato, Acaicosh chayamukimi k’uilla kushiyagani. Kanguna illasha na kui pudishkadami paigunaga kuga. ¹⁸Paigunami kangunaj ñukajkish espirituda k’uilladij kushiyachiga. Shina ayudajkunadaga <Allidami rurashkanguichi> nishkagunami gana gan.

Tukurina yuyigunamunda

¹⁹Asia llaktabi kaibi chaibi tandanukushka crijkunaga saludogunada kachan. Aquilash Priscilash paigunaj wasibi tandanukushka crijkunash Manduj Jesusbuj shutibi kushilladi saludangunami. ²⁰Tuki wauki panigunami kangunada saludan. Linshuyachishka yuyin muchasha saludanukubanguichi.

²¹Kai saludashkadaga ñuka Pablomi kikin makindi escribisha kachani.

²²Maijinsh Manduj Jesucristoda na k’uyujka llakichishka gachun. ¡Manduj, shamubai!

²³Manduj Jesucristoj kushka alliguna kangunabi gachun. ²⁴Tuki kangunadaga Cristo Jesusbuj k’uyinmi k’uyani.