Pampujiam

RUT

Pemasiä’na

Tulasam diona Rut dadi illaam paluäna wattu kende’ kamakahhasam indo ditula’ illaam suha’ Pangngulunna to Israel. Indo Rut mesa baine to Moab siala mesa muane to Israel. Moinna anna matem muanena, sapo’ tontä liu manontom lako pasananna moinna anna to Israel ia, anna si umpalako liu kapenombaam lako Puang Allataala to napenombai to Israel. Illaam la kapuhaanna inde tulasam diona Rut, kemuane pole Rut umpomuane kasahapuanna siam indo to mate muanena. Tappana kemuane pole Rut, iya mendadim nenena Daud aka umpoampo guntu’ Daud, indo tomahaja handam kesanga dio Israel.

Ingganna tulasam illaam suha’ Pangngulunna to Israel umpa’patandaam diona kaha-kaha mabanda’ natammu umma’Na Puang Allataala aka umpemboko’i Puang Allataala. Sapo’ diona ia tulasanna Rut, umpa’patandaam ia pa’tamba’Na Puang Allataala lako mesa to sule messihuhu untampeam peadasanna anna matappa’i lako Puang Allataala to napenombai to Israel. Pa’palakoam iam too umbaba Rut mendadi umma’Na Puang Allataala, anna ia duka’ mesa mendadi nene to naponene Puang Yesus. Indo Rut umpoampo guntu’ tomahaja Daud, anna Daud iam too indo ditula’ illaam Pa’dandiam Yolo mendadi nene to naponene Puang Yesus.

Tono’ Issinna

Le’ba’ lako Moab Elimelekh sola sahapunna, iya mate diom ia Elimelekh sola indo dua änä’na 1:1-5

Ma’pasule Naomi sola Rut lako Betlehem 1:6-22

Rut mahhuhu’ jelai dio baha’ba’na Boas 2:1-23

Napelau Rut la nahuhu’ Boas 3:1-18

Siala Rut anna Boas anna undadiam mesa änä’ muane-ane 4:1-22

Rut anna Naomi

1:1-22

¹Wattunna linonapi sanaka-naka pangngulunna to Israel1:1 pangngulunna to Israel: Inde pangngulunna to Israel iapi si ma’takka’ dio Israel illaam mesa wattu kalando battu diua linonapi pangngulu ma’takka’. Si sibala’-bala’ indo pangngulu ma’takka’ dio Israel wattunna tä’pi deem tomahaja dio Israel. umbaba kapahentaam dio lembäna Israel, pissam wattu kende’ kakobeam illaam pa’lembängam ia too. Iya deem mesa muane sola bainena anna dua änä’na muane umpellei Betlehem illaam paluäna Yehuda le’ba’ lako lembäna Moab la messihuhu dio. ²Indo muane isanga Elimelekh, bainena isanga Naomi, anna indo dua änä’na isanga Mahlon anna Kilyon. Indo to sahapu pehapuanna Efrata dio Betlehem illaam paluäna Yehuda. Landa’i lako lembäna Moab, iya tohhoim dio. ³Masäe-säei, matem ia Elimelekh muanena Naomi. Iya angga mandam Naomi da’da’ sola indo dua änä’na muane. ⁴Lessu’i ia too, iya bassim kebainem indo änä’na umpobaine to Moab, mesa isanga Orpa anna mesa isanga Rut. Tappana kiha-kiha sapulo taunna tohhoi dio, ⁵iya bassim matem duka’ Mahlon sola Kilyon. Dadi, mesa-mesanna mandam Naomi napellei muanena sola indo dua änä’na.

⁶Masäe-säei, napelelem Naomi diua umpaalai penaba umma’Na DEBATA nabeem alaam kinande. Iya ma’kalili’um Naomi sola indo dua manintunna la umpellei Moab. ⁷Mengkalaom dio tondä’na dio Moab sola indo dua manintunna muola pangngolalalangam ma’pasule lako lembäna Yehuda. ⁸Muolai lalam, nauam Naomi lako indo dua manintunna: <<Pa’pasulengkoa’, le’ba’koa’ lako banuanna indomu. La umpa’patandaam di too pangkaha’ pa’kamaseNa DEBATA tama kalemua’, umba susi puhangkoa’ umpa’patandaam pangkaha’ pa’kamasemu lako indo to mate muanemua’ anna duka’ lako kaleku. ⁹La namana’ dakoa’ too DEBATA pandaposam bakahu sola muanemua’.>> Mane bassim naudunni. Sapo’ bassim kaoli-oli hi sumahho ¹⁰napasindum ma’kada naua: <<Tä’ ia pole’ Indo’! La laokia’ sola lako botto litä’mu.>> ¹¹Sapo’ natimba’ Naomi naua: <<Pa’pasulengkoa’ änä’ku, akanna la untuhu’ä’? La deempaka tia lalanna undadiam poleä’ änä’ la umpomuanea’?1:11 La deempaka tia lalanna undadiam poleä’ änä’ la umpomuanea’: Situhu’ peadasanna to Yahudi, maka’ deem mesa muane mate anna tä’pi deem änä’na muane natampe, iya indo balunna pahallu umpomuane pole solasubunna indo to mate muanena. (Batai Disl. 25:5-6).¹²Pa’pasulengkoa’ änä’ku. Le’ba’ungkoa’, aka matua punalamä’ ke la kemuane poleä’. Hapanna la kuua: <La kemuanepä’,> anna la deem siaham muaneku inde bengi temo, anna la undadiannä’ änä’ muane-ane, ¹³iya la muaku haka’ tiko muampai sampe kasalle? Toko la iangka tia ullabaikoa’ kemuane pole? Daa umpa’pateenna’ änä’ku! La mabanda’ sugali’koa’ ke la umpendudunnia’ duka’ inde kamapäisam kupendudum, aka napaepe’iä’ katea’ bassinNa DEBATA.>> ¹⁴Iya bassim kaoli-oli pole oom sumahho indo to dua. Mane muudunni pasananna Orpa napasaha’, sapo’ Rut ia muanda’-anda’i liu Naomi.

¹⁵Iya ma’kadam Naomi naua: <<Petua’ siai too, ma’pasulem ia lagomu lako botto litä’na anna lako debata to napenombai. Pa’pasuleko, tuhu’i dio lagomu!>> ¹⁶Sapo’ natimba’ Rut naua: <<Daa umpassaä’ la kupelleiko Indo’ battu diua la ma’pasule anna tä’ko kutuhu’. Aka iai too muola iam duka’ kuola. Iai too muongei tohho iam duka’ kuongei tohho. Bottomu la kupobotto, anna Puang Allataala to umpenombai Ia duka’ la kupenombai. ¹⁷Iai too muongei mate iam duka kuongei mate anna kuongei dilamum. La napalambi’i hä’ too pesämbä’ DEBATA, pesämbä’ mabanda’ ke la kupellappasangko, sulibanna ke kamateanni umpasilappa’ki’!>> ¹⁸Tappana naita Naomi natittinni liu Rut la le’ba’ sola, iya napengkamma’i bäbäm. ¹⁹Iya umpatahhu’um pellaoanna indo to dua sampe landa’ lako Betlehem.

Tappana mentama kota Betlehem, iya tikindä issinna kota napobua’ kasuleanna. Iya sikama’kadam baine illaam indo kota naua: <<Naomi haka inde dio?>> ²⁰Iya natimba’im Naomi naua: <<Daa muuaannä’ Naomi.1:20 Naomi: Basa Ibrani, kalembasanna mepomasannam. Si uaammä’ Mara1:20 Mara: Basa Ibrani, kalembasanna mapäi’. aka napalambi’imä’ kamapäisam To Handam Kuasa illaam salukatuboangku. ²¹Indo angku le’ba’ sitonda hepo’kam, sapo’ tentomai napopa’pasulemä’ DEBATA ussoeam pala’ puteku. Akanna muuaam liuä’ Naomi, aka tä’um tontä DEBATA mendadim sa’bi ma’dudungam tama kaleku, anna napahuaiä’ pi’di’ tanggana-gana To Handam Kuasa.>>

²²Susim too tulasanna anna ma’pasulei Naomi sola Rut, indo baine to Moab, manintunna. Landa’ dio Betlehem wattunna dipahandu’ ussäe’ jelai.1:22 jelai: Inde jelai sahhupa gandum, sapo’ si masimpam puha ia matäsä’ anna la gandum senga’. Biasa si ma’alla’ dua minggu sule lako sabulam. Inde jelai, biasa si dipandeam olo’-olo’ sapo’ biasa siam duka’ si naande to mase-mase aka masempo puha ia. Anna si kalando puha ia a’dona.

Rut silambi’ Boas

2:1-23

¹Deem hampeanganna Naomi isanga Boas kasahapuannapi to mate muanena. Indo Boas mesa to sugi’ tangkalantungam pehapuam Elimelekh. ²Pissam wattu, ma’kada Rut indo baine to Moab lako Naomi naua: <<O Indo’, mala haka laoä’ lako baha’ba’ uhhuhu’i jelai sisabuli untuhu’ boko’na to la mapia penaba lako kaleku?>> Natimba’i Naomi naua: <<Io, le’ba’ko änä’ku!>> ³Iya le’ba’um Rut lako baha’ba’ uhhuhu’i jelai untuhu’ boko’na to massäe’. Siampu’ eta too indo naongei baha’ba’na Boas, mesapi duka’ to mentama pehapuam Elimelekh. ⁴Iya diita ham sule Boas dio mai Betlehem. Iya ma’kadam lako ingganna to massäe’na naua: <<La naundu’ dakoa’ too anna naolaam DEBATA.>> Iya mentimba’im duka’ naua: <<La natamba’ dako too DEBATA tuam!>>

⁵Puhai, mekutanam Boas lako mando’na to massäe’na naua: <<Menna kasahapuanna inde dio änä’ daha?>> ⁶Natimba’i indo mando’ naua: <<Baine to Moab, sule sola Naomi dio mai lembäna Moab. ⁷Naua ingngena’: <Mala haka kutuhu’ boko’na inde lako to massäe’ anna kuhuhu’i jelai mehonno’ tama alla’na jelai diba’ba-ba’basanni?> Sulena ingngena’ mebengngi’ naukkunnim mahhuhu’ sule lako temo. Anggam sapäi’ mellube dio läntä.2:7 mellube dio läntä: Indo illaam basa Ibrani mala duka’ kalembasanna tä’ deem mellube Rut.>>

⁸Iya ma’kadam Boas lako Rut naua: <<Pehingngii änä’ku! Damom too ullulako baha’ba’ senga’ huhu’i jelai le, anna damom too umpentieli’ eta inde. Eta liungko too inde pengngampe’i to mengkähäku baine. ⁹Petua’ liui indo baha’ba’ to disäe’. Tuhu’i boko’na indo to mengkähäku baine. Puham tia kupakahi’di indo to mengkähäku muane anna tä’ko naganggu. Maka’ mabähhängko, iya le’ba’ mammoko seo’ uwai illaam busso to puha napangngissi to mengkähä.>> ¹⁰Iya ma’balinguntu’um Rut mendu’dum dokko litä’ tanda pa’pakasallena napasindum ma’kada naua: <<Akanna mapia penaba sugali’ko lako kaleku tuam, nasuhum unjappanni manappaä’, moi kela daa mesa hä’ to sule?>> ¹¹Natimba’i Boas naua: <<Puhamä’ ditulasam ingganna pa’palakoammu lako pasanammu tappana mate muanemu. Susi toi indo untampeangko ambemu sola indomu anna lamungam tabonimmu, anna le’ba’ko lako mesa botto tuli tadeempi muissam yolona. ¹²La nabala’iam dako too DEBATA indo pa’pogausammu anna la napadokkoangko lisu pala’mu saho sanda silapi’ DEBATA, Puang Allataala to napenombai to Israel, aka suleko umpopeonganni kalemu lako kaleNa!>> ¹³Iya nauam Rut: <<Abana tä’ deem pada samapia penabako lako kaleku tuam. Umpakahangaä’, anna mahambam malute pa’tula’mu lako kaleku, moinna anna taiaä’ mesa sabua’mu baine.>>

¹⁴Tappana lambi’ kamuandeam, iya napa’kadaim Boas naua: <<Maiko, andei inde hoti anna tu’doi dokko inde panduhoam hoti.>> Iya muokko’um duka’ Rut dio ampe’na indo to massäe’. Iya nasohäim Boas gandum batte. Iya mangngandem Rut sampe dea’, tä’ pole napuha. ¹⁵Tappana le’ba’ oo Rut uhhuhu’i jelai, iya umpakahi’dim to mengkähäna Boas naua: <<Pabäi mammi mahhuhu’ moi tama alla’na indo jelai puha diba’ba’ le, daa ungkambahoannia’. ¹⁶La si ullu’du’iampia’ liu saidi’ indo jelai ditombom anna umpaokkosannia’ anna mala nahuhu’i. Daa umpakada makahha’a’ lako.>>

¹⁷Iya mahhuhu’um Rut sule lako mahammo. Mane natämbä’i indo pahhuhu’na, iya kiha-kiha mesa efa2:17 mesa efa: Deem muuai: kiha-kiha sipadaam 10 kilo mabanda’na, deem muuai kiha-kiha 40 lite’, anna deem muuai kiha-kiha 22 lite’. budanna indo jelai. ¹⁸Iya nababam Rut ma’pasule tama kota, anna napaitai pasananna indo pahhuhu’na tä’ deem pada sabuda. Naalapi duka’ indo pamputu’na tää’nam napuha sangngallo anna nabeenni pasananna. ¹⁹Iya mekutanam pasananna naua: <<Umba hiko ngei muongei mahhuhu’ sangngallo? Umbako ngei mengkähä? La katambasam di too indo to unjappanni manappako!>> Iya natulasammi Rut lako pasananna indo to naongei mahhuhu’, naua: <<Indo to kuongei mahhuhu’ sangngallo dio baha’ba’na tau isanga Boas.>> ²⁰Iya nauam Naomi: <<La natamba’ di too DEBATA itim tau. Tä’ deem kattu pangkaha’ pa’kamaseNa DEBATA susi lako to tubopi teem lako to puham mate.>> Mane nauai: <<Itim tau kasahapuantapia’ tia. Iam too mesa to la sipäto’ uhhuhu’ki’.>> ²¹Iya ma’kadam Rut naua: <<Nauampä’ liu Indo’: <Pengngampe’i liuko to mengkähäku pahhuhu’ sampe puha asam nasäe’ baha’ba’ku.> >> ²²Iya natimba’im Naomi naua: <<Io änä’ku, abana mapia si’da hi tia ke si lao liuko sola indo to mengkähäna baine, indana nagangguko tau ke lu lakoko baha’ba’ senga’.>> ²³Iya si umpengngampe’i lium to mengkähäna Boas baine Rut mahhuhu’, sampe puha wattunna passäesam jelai sola gandum. Anna pada masäena indo wattu passäesam si tohho liu sola pasananna Rut.

Rut le’ba’ lako pallullusam jelainna Boas

3:1-18

¹Masäe-säei, nauam Naomi lako Rut: <<O änä’ku, pahallu la kupeängko muane anna malako masannam. ²Muissam daka indo Boas, to si umpasola lelem to mengkähäna baine, kasahapuantapia’ tia? Pehingngii sia too, bengi temo la ma’palili dio ongeam pallullusam jelai. ³Dadi, pendio’ko ammu pake minnä’-minnä’ bubanau’, pakei poheba handam mapiammu, ammu le’ba’ lako indo ongeam pallullusam jelai. Sapo’ peäi lalanna indana naitako Boas sampe puha mangngande anna mangngihu’. ⁴Maka’ too ke le’ba’um metindo, iya paola matai indo naongei metindo. Mane le’ba’ko umpengngampe’i, ammu silläi indo sambu’ illau’ bitti’na anna metindoko eta.3:4 silläi indo sambu’ illau’ bitti’na anna metindoko eta: Pa’pogausam ia too umpa’patandaanni diua le’ba’ Rut umpopeonganni kalena lako Boas situhu’ kabiasaanna to Yahudi wattu eta too (petua’i balajam 9). Iya la natulasammoko too indo la umpogau’na.>> ⁵Iya natimba’um Rut naua: <<Pada itim tula’mu Indo’ la kupalako asam.>>

⁶Iya le’ba’um Rut lako indo ongeam pallullusam jelai, anna napalako asanni pada indo to napakahi’diam pasananna. ⁷Tappana puha mangngande anna mangngihu’ Boas anna tiala inabanna nasi’dim, iya le’ba’um metindo lako bihinna indo jelai titombom. Tappana mamma’ Boas, iya mengkamma’-kamma’um Rut napengngampe’i anna nasilläi sambu’ dio bitti’na, anna metindoi eta. ⁸La tängäi bengi, pissananna tihambam Boas. Tappana menggihi’, iya tikkedu’ aka deem mesa baine metindo dio ampe’ bitti’na. ⁹Iya mekutanam naua: <<Mennako indee?>> Iya natimba’im Rut naua: <<Kao Rut, sabua’mu! Pakumbäi pani’mu3:9 Pakumbäi pani’mu: Kalembasanna, napelau Rut lako Boas anna mala napobaine. inde sabua’mu tuam, aka mesako duka’ kasahapuangki la pahallu uhhuhu’kam.>> ¹⁰Iya natimba’im Boas naua: <<La natamba’ dako too DEBATA, änä’ku! Tentomai, umpa’patandaangko pangkaha’mu anna kamanontongammu mentondom puha ia anna la indo umpogau’ lako pasanammu, aka taia to mangnguha le’ba’ umpeä, susi to mase-mase teem to makaka. ¹¹Tentomai änä’ku, muaka tiko mahea’. La kupalako asam pada pelauammu aka naissam asam tau illaam kota naua, iko mesako baine ma’penaba litä’. ¹²Abana tappa’, kao duka’ mesa kasahapuammua’ to la pahallu uhhuhu’koa’. Sapo’ deempi mesa kasahapuammua’ mahuku’ puha ia anna la kao. ¹³Pa’bengingko too inde, anna makale’pa mebengngi’ mane kukutanai indo tau. Maka’ too naaku nahuhu’ko, iya mapiam too. Sapo’ maka’ tä’ naaku nahuhu’ko, iya ma’dandiä’ dio oloNa DEBATA tubo kao la uhhuhu’ko. Petindo liungko too sampe mebengngi’.>> ¹⁴Iya metindo lium duka’ Rut dio ampe’ bitti’na Boas sule lako la masiä kale.

Tä’pi landa’ diita anna bangommi Rut, aka nauaam Boas: <<Indana deenni tau muissanni deem mesa baine sule inde ongeam pallullusam jelai.>> ¹⁵Mane nauaanni: <<Lendu’i itim salendammu, babai mai anna umballa’i.>> Iya naballa’um duka’ Rut indo salendanna. Iya napadokkoammi Boas pengngannam pegantam3:15: pengngannam pegantam: Indo pegantam napake tä’ makaleso, anggam ia aka kasalle ia anna lite’. jelai mane nabalii naäkä’. Puhai, iya le’ba’um Boas lako kota.

¹⁶Tappana landa’ lako pasananna Rut, iya nakutanaim naua: <<Maaka susi pa’laoammu, änä’ku?>> Iya napahuttu’ asammi Rut indo to napogau’ Boas lako kalena. ¹⁷Anna mane naua Rut: <<Indepi jelai pengngannam pegantam nabeennä’ aka naua: <Indana tä’i deem aka umbaba ma’pasule lako pasanammu.> >> ¹⁸Iya nauam Naomi: <<Pahapa’i isu’mu änä’ku, ampai, sampe muita ma’tämpä’ inde saha. Aka tä’ tia la napatohho ke tä’i tika’lolä’ inde saha allo temo siam duka’.>>

Boas umpobaine Rut

4:1-17

¹Landa’i Boas, iya le’ba’um lako ba’bana kota4:1 ba’bana kota: Indo ba’bana kota dio Israel si diongei ma’hempum, susinna: ma’bisaha, umpopa’tadongkongam saha anna senga’-senga’na. anna muokko’i dio. Pissananna, liu siaham duka’ indo to nauaam Boas la sipäto’ puha mahhuhu’. Iya nauaammi Boas: <<Lempä säkäko, solasubum. Okko’ko eta inde!>> Iya lempäm duka’, anna muokko’i. ²Mane untambai sapulo matua ulunna indo kota Boas anna nauaanni: <<Okko’koa’ eta inde.>> Iya muokko’im duka’. ³Iya ma’kadam Boas lako indo to la sipäto’ puha mahhuhu’ naua: <<Indo litä’na solasubunta to mate Elimelekh, maelo’ la nabalu’ Naomi tappana ma’pasule dio mai Moab. ⁴Dadi, kuua pahallu la kutulasangko kaha-kaha ia too. Maka’ maelo’ko mentopehuhu’na indo litä’, iya huhu’i nasa’bii inde mai to tadongkom, anna nasa’bii matua ulunna inde bottota. Sapo’ maka’ mokako la uhhuhu’i, iya tulasannä’ angku issanni aka tä’ deem tau senga’ la mala uhhuhu’i sulibanna iko, anna lesuko too, iya kaom.>> Natimba’ indo tau naua: <<Kao mentopehuhu’na.>> ⁵Iya nauam Boas: <<Io. Sapo’ maka’ too muallii indo litä’ lako Naomi, iya la umpasialapi duka’ Rut, indo baine to Moab, balunna to mate Mahlon, anna mala deem pessubunna ullombunganni mana’na.>> ⁶Iya natimba’im indo to la sipäto’ puha mahhuhu’ naua: <<Maka’ susi, iya mokaä’ la uhhuhu’i aka la nahoho pamenta kulle mammi’ku.4:6 la nahoho pamenta kulle mammi’ku: Maka’ la umpobaine Rut indo to la sipäto’ puha mahhuhu’, iya malallam penabanna mase manii indo litä’ tä’ nalombungam änä’na. Iam too diuaam nahoho pamenta kulle mammi’. La ikom tia uhhuhu’i moi anna kao la sipäto’ puha uhhuhu’i aka mokaä’ kao.>>

⁷Susi inde kabiasaam dio Israel yolona diona lalanna mahhuhu’ anna sipalendu’: Maka’ deem dua tau la umpahatta’ kasipalakoanna, iya mesa si untässu’i sandala’na sabali anna nabeenni indo solana. Susim too lalanna tau dio Israel umpahatta’ kasipalakoanna.

⁸Mane nauai indo tau lako Boas: <<Ikom too allii.>> Anna mane untässu’i sandala’na. ⁹Iya ma’kadam Boas lako indo matua ulunna kota sola ingganna to dio heem eta too naua: <<Allo temo ikonna’ too titanam sa’bi muua: <Naalli asammi Boas ampuanna to mate Elimelekh, Kilyon anna Mahlon lako Naomi.> ¹⁰Susi toi duka’ Rut, indo baine to Moab, balunna to mate Mahlon, la kuala kupobaine, anna mala da’da’ liu sanganna to mate Mahlon, anna deem ullombunganni mana’na. Nasuhum tä’ pa’de sanganna illaam alla’-alla’na kasahapuanna anna ingganna tau illaam kota. Ikonna’ too titanam sa’bi inde allo temo.>> ¹¹Iya ingganna to dio heem dio ba’bana kota eta too sola ingganna matua ulunna kota ma’kada naua: <<Io, kami’ titanam sa’bi. La natamba’ di too DEBATA itim baine to la umpangngissi banuammu umba susi Rahel sola Lea, aka iam too indo dua baine naongei membea’ pessubunna Israel. La mempokom dako too tassaju’ mengngette’ tambalala untadongkonni Efrata, anna la kaleleam di too sangammu dio Betlehem. ¹²Indo änä’ la manasangko DEBATA muolai itim to balu baine mangnguha, la susi hi too pessubunna Peres änä’na Yehuda nasibalii Tamar.4:12 Peres änä’na Yehuda nasibalii Tamar: Yehuda sola Tamar dua änä’na muane (Batai Kad. 38). Adi ia Peres sapo’ buda puha ia pessubunna anna la kakanna.>>

¹³Puhai, iya mualam Rut Boas anna napobainei. Iya solam metindo, lambi’ sola pa’mana’Na DEBATA kebättä Rut, iya undadiammi mesa änä’ muane-ane. ¹⁴Iya ma’kadam buda baine lako Naomi naua: <<Dipuji dipa’kasallei DEBATA, tä’ko napabäi bäbä inde allo temo la pa’de uhhuhu’ko. La kaleleam di too sanganna itim änä’-änä’ illaam Israel. ¹⁵Iam too la umpasuleangko sumanga’mu, anna iam too la umpaliahako ke illaammoko kamatuaam, aka nadadiangammoko manintummu to umpakamäjjäko, keangga’ puha ia anna la pitu änä’ muane.>> ¹⁶Iya naalam Naomi indo änä’-änä’ anna naabinni. Naomi si umpaliahai indo änä’-änä’. ¹⁷Ingganna baine sambanuanna Naomi ussangai indo änä’-änä’ napasindum ma’kada naua: <<Didadiangammi Naomi mesa änä’ muane-ane.>> Sikanasangai Obed.4:17 Sikanasangai Obed: Kalembasanna to metahiai. Obed-um too ambena Isai, anna Isai, ambena Daud.

Kalohonganna Daud

4:18-22

¹⁸Indem ia pessubunna Peres: Keänä’ Peres undadiam Hezron, ¹⁹keänä’ Hezron undadiam Ram, keänä’ Ram undadiam Aminadab, ²⁰keänä’ Aminadab undadiam Nahason, keänä’ Nahason undadiam Salmon, ²¹keänä’ Salmon undadiam Boas, keänä’ Boas undadiam Obed, ²²keänä’ Obed undadiam Isai, keänä’ Isai undadiam Daud.