Pampujiam
Pemasiä’na
Inde suha’ Pampujiam tihekem duka’ battakadanNa DEBATA tituli’ illaam Suha’ Maseho ma’hupa penaniam anna sambajam. Inde suha’ Pampujiam napa’palosaam Puang Allataala anna natuli’ sanaka-naka to majatta unggahaga tula’ mendiada’ anna masäe naolaam natuli’. Ingganna indo penaniam sola sambajam nahempum to Israel anna si napakei illaam hettem kapenombaanna längäm DEBATA, ma’katampasanna dipatama duka’ Suha’ Maseho.
Ingganna indo kada diajangam illaam Pampujiam si dipake illaam hettem kapenombaam längäm DEBATA buda hupanna: deem penaniam dipake umpuji DEBATA, deem penaniam dipake umpenombai Puang Allataala, deem sambajam umpelau pepamolo, pa’kambi’ anna pallangnga’i; deem sambajam umpelau pepanampum, penaniam pa’kuhhusam sumanga’ untilalla’i pa’tamba’Na Puang Allataala, anna pelauam anna mala dipassala bali. Ingganna inde sambajam deem ma’hupa sambajam ikale, anna deem ma’hupa sambajam lu tama kakalebuam. Deem sanaka-naka umpellampasam unä’ penabanna mesa tau, anna deem umbukkai issi penabanna anna kapahalluanna ingganna umma’Na Puang Allataala.
Inde issinna Pampujiam si napake duka’ Puang Yesus yolona, si napamponge’i tula’ to untuli’ Pa’dandiam Bakahu, anna dipake illaam pa’hettengam tä’ deem pada sanapa’kasallei Kakalebuanna to Sahani mengkalao dio mai.
Tono’ Issinna
Indo sahatu’ lima pulo Pampujiam dibahe lima lesoam battu diua lima suha’. Susi inde sitono’na:
Suha’ Uhuna: Pampujiam 1-41
Suha’ Kaduanna: Pampujiam 42-72
Suha’ Katallunna: Pampujiam 73-89
Suha’ Kaappa’na: Pampujiam 90-106
Suha’ Kalimanna: Pampujiam 107-150
1Suha’ Uhuna:
Lingkana to meada’ anna lingkana to tameada’
1Maupa’ anna katambasam hupatau
to tä’ muola lalanna to tameada’,
tä’ pada ke’de’ to madosa,
anna tä’ pada isu’ to mantelle,
2sapo’ umpohä’di’ Paondom DEBATA,
anna napasalui penaba allo bengi.
3Tau ia too sihhapam kaju ditanam dio handam salu,1:3 Tau ia too sihhapam kaju ditanam dio handam salu, Yer. 17:8.
si kembua ke lambi’ oom wattunna,
anna tä’ deem malasso daunna,
ingganna pattujunna sule lako asam.
4Sapo’ tä’ ia susi to tameada’:
sihhapam ia pa’tappiam naliliam hibu’.
5La susim too to tameada’ la napassala Puang Allataala,
susi siam duka’ to madosa tä’ la mentama alla’-alla’na to meada’.
6Aka lingkana to meada’ naundu’ anna napatette DEBATA,
sapo’ lingkana to tameada’ tinanda ia lako kamateam.
2Tomahaja to nalanti’ Puang Allataala
1Aka hia anna ma’pattujui la pabali-bali ingganna kahajaam,
akanna umpemandannii kaha-kaha labu’ ma’hupatau?
2Mengke’de’ mentu’na tomahaja di lino
anna ungkalebui tula’ ingganna to kasalle
umbali DEBATA anna tomahaja to nalanti’.
3Sikama’kada naua:
<<Tapolo-poloia’ sangkalana
anta kattu-kattuia’ pepungona lako kaleta!>>
4Metaba la’ba DEBATA to untadongkonni suhuga;
napelale’i pattujunna.
5Mane nakissä’i sitonda aha’
anna natibuhesei sola aha’ kasalleNa naua:
6<<Puham kulanti’ tomahaja to kupilei
yabo Sion tanete masehoKu!>>
7La kupa’paissangam kada napandam DEBATA;
ma’kada lako kaleku naua: <<Ikom too änä’Ku!
Allo temo, Kaom too Ambemu.
8Pelauko mai,
anna mala kubeengko ingganna kahajaam mendadi mana’mu,
anna kupadokkoangko lisu pala’mu lino sitonda issinna.
9Sumambu bassi la umpake umpolo-polo balimmu,
anna la uhhuppu’-huppu’ susi kuhim litä’.>>
10Dadi pengkakeaka’ko, o inggammua’ tomahaja,
pa’pehingngiko, o inggammua’ to ma’pahenta di lino!
11Pengkahea’ko menomba längäm DEBATA,
anna pengkadioko tilalla’ dio oloNa,
12pa’balinguntu’ko menomba dio oloNa, anna mala tä’ko napempa’deam säkä-säkä,
aka si masimpam kende’ aha’ kasalleNa.
Maupa’ anna katambasam to mentuhehum lako DEBATA!
3Sambajam mebengngi’ muoloi bali
1Pampujiam napapia Daud, wattunna le’ba’ muäläi kalena umpellei Absalom änä’na.
2O DEBATA, tä’ deem pada sabuda balingku!
Buda punala tau mengke’de’ umbundu’ä’!
3Buda tau muuai:
<<Tä’ napesäkäi Puang Allataala.>> Sela3:3 Sela: Mesa kada illaam basa Ibrani biasa si dipake illaam Suha’ Pampujiam, sapo’ tä’ makaleso gege kalembasanna. Umbai’ mesa tula’ si dipake illaam penaniam, susi toi duka’ si dipake illaam hettem kapenombaam lako DEBATA. Anna mala duka’ kalembasanna, la tohho tau sapäi’ mellube dipikki’, dipasalui penabanna anna dipenabaam.
4Sapo’ Iko, o DEBATA, unta’ matoto’ku to umpa’tippasannä’,
Iko muangkahannä’ anna umpasule sumanga’ku umpaende’ pahajangku.
5Metambaä’ mengkaala längäm DEBATA,
anna nahingngiam pelauangku yabo mai tanete masehoNa. Sela
6Umbehesannä’ kaleku angku mamma’;
anna bangonnä’ masannam, aka naundu’ä’ DEBATA!
7Tä’ mahea’ä’ lako massa’bu-sa’bu bali,
sule natalimbum tamaä’ la nabundu’.
8O DEBATA, pengke’de’ko,
o Puang Allataala to kupenombai, pesäkäiä’!
Puham ussappaam papam sädäna balingku,
anna umpompoiam tandu’ masadi’na to tameada’.
9Pepamolo buttu yabo mai DEBATA.
Handandanni Iko untamba’ umma’Mu! Sela
4Sambajam wattu bengi
1Lu lako to untetem to menani. Penaniam dikatapii. Pampujiam napapia Daud.
2O Puang Allataala, to umpomaloloä’,
timba’iä’ ke mengkaalaä’ matim.
Illaam kamasippisangku umpatialaannä inabangku.
Kamaseiä’ anna hingngianni sambajangku!
3O inggammua’ hupatau, la pihampi mane mondakoa’ umpalele kadake sanga mapiangku?
La pihampi mane mondakoa’ umpadondoi kaha-kaha takeguna, anna sipangngula’ kaha-kaha tatappa’? Sela
4Pengngissanniia’, puham napileiam kaleNa DEBATA indo to napakamaja.
Nahingngiam DEBATA ke mengkaalaä’ längäm oloNa.
5Pabäiko keaha’, sapo’ daa umpogau’ dosa;
pasalui penaba dio petindoammu, sapo’ la mengkamma’ pudu’mu. Sela
6Pehumalasanni bua pemala’ la sipäto’na
anna matappa’ko längäm DEBATA.
7Buda tau mekutana naua: <<Menna la umpaitaikia’ kamapiaam?>>
La unnenne’i hakam too DEBATA, sola mata pa’kamaseMu!
8PuhangKo umpaponnoiä’ katilallasam,
la’bi puha ia anna la katilallasanna to bosa’ gandum anna anggur.
9Masannam penabangku metindo lambi’ mamma’,
aka anggam Iko DEBATA, umpadadiä’ tubo malino masannam.
5Sambajam wattu mebengngi’
1Lu lako to untetem to menani. Penaniam dipa’sulinni. Pampujiam napapia Daud.
2O DEBATA, patanannii talinga pa’tula’ku,
pehingngii pengkaloa’ku.
3O Tomahajangku anna Puang Allataala to kupenombai,
hingngianni pengkaalaangku umpelau pepamolo,
aka Iko kupa’patinandai sambajangku.
4O DEBATA, wattu mebengngi’ si uhhingngiangko sambajangku,
wattu mebengngi’ umpatokaä’ kaleku la mengngolo matim,
anna kuampai pentimba’Mu.
5Aka Iko Puang Allataala to ungkabassi kakadakeam;
tä’Ko deem la nalese’ to ma’gau’ kadake.
6Tä’ la umpabäi to malangka’ penaba sule dio oloMu;
ungkabassiKo ingganna to umpogau’ kakadakeam.
7Umpempa’deangKo to angga ma’tula’ tatappa’,
ungkahi’di’Ko to papateam anna to manipu.
8Sapo’ kao-kao, aka kasalle pangkaha’ pa’kamaseMu takattu tintim tamondo’ sahuham,
la malaä’ mentama banuamMu,
menomba dio olona ongeam masehoMu
sola mengkahea’ dio oloMu.
9O DEBATA, patetteä’ uhhuttu’ kamaloloamMu
aka nalilim pali’ä’ balingku;
hampasannä’ lalamMu la kuola.
10Aka tä’ punala deem mala dikatappa’i pa’kadanna,
ponno pattuju kadake illaam penabannai,
pessubungam pudu’na umpa’gahoängam tau senga’,
lilana mangkuhu-kuhu.
11O Puang Allataala, pabäi sangngim umpendudum kasalaanna;
pabäi natappai pa’lellenna;
hambai lao aka makambammi kasalaanna,
aka silele napobaliKo.
12Sapo’ la ussi’dim ia katilallasam ingganna to mentuhehum matim,
la sikaahhe tilalla’ sule lako salako-lakona, aka Iko muongannii;
la naponnoi katilallasam ingganna to umpake pangkaha’ pa’kamase lako sangamMu, aka indo pa’pogausamMu lako kalena.
13Aka Iko untamba’ to meada’, DEBATA;
mana’ pa’kamaseMu uhhindim batui, muunta’ matoto’i.
6Sambajam illaam kamasussaam
1Lu lako to untetem to menani. Penaniam dikatapii. Katapi kahua hitinna. Pampujiam napapia Daud.
2O DEBATA, illaam aha’Mu daa untappakadaiä’,
illaam aha’ kasalleMu daa umpassalaä’.
3Kamaseiä’ DEBATA, aka kangahe-ngaheä’;
pomaläpu’ä’, aka malu’bä’um bukungku,
4anna husa’ penabangku.
O DEBATA, la pada hia umba masäena umpemboko’iä’?
5Pa’pasulengKo DEBATA, langnga’iä’,
lappasannä’ aka pangkaha’ pa’kamaseMu takattu tintim tamondo’ sahuham.
6Aka tä’ungKo deem la dikilalai ke matem tau;
mennapi la umpujiKo dio kaliane anitu?
7Takubelam maaka napobua’ pengkaloa’ku;
bengi-bengiam si limbä allongangku,
bunengke’ petindoangku napobua’ uwai matangku.
8Bongom matangku aka mapi’di’ penabangku,
makuhibo-hibo pennenne’ku napobua’ balingku.
9Le’ba’koa’ lao inggammua’ to umpogau’ kakadakeam,
aka nahingngiammi DEBATA sahhoku;
10nahingngiammi pelauangku,
anna natahimam sambajangku.
11Sangngim mahea’ balingku anna masihi’;
silele ma’pasule kapui’-pui’ malea lindo.
7Puang Allataala To Mahhotto’ handam malolo
1Penanianna Daud längäm DEBATA, aka napomasussa Kush pessubunna Benyamin.
2O DEBATA, Puang Allataala to kupenombai, Iko pentuhehungangku;
pesäkäiä’ ammu lappasannä’ dio mai ingganna to umpadondoä’.
3Daa umpabäi balingku la susi singa,
nasepä’-sepä’ä’ anna nabiti’-biti’,
anna tä’ deem to la ullappasannä’.
4O DEBATA, Puang Allataala to kupenombai, maka’ deem kupogau’ kaha-kaha susi indee:
hapanna la deem sala tappaam limangku,
5hapanna la deem kupabala’i kakadakeam gau’ mapianna to mapia penaba lako kaleku,
battu haka la ungkahha’i bäbää’ balingku tä’ deem lalanna,
6iya pabäi mammi napadondoä’ balingku anna nasakka,
napa’ku’nä’ anna napa’lullu’ dokko litä’, lambisam pa’de hapammä’ anna takeangga’. Sela
7O DEBATA, pengke’de’Ko sola aha’ kasalleMu,
ebai pa’dallo’na balingku.
PekkalundangKo ammu undusannä’ kamaloloam,
umba susi puham ungkattu!
8Patipungngu’i ingganna hupatau nalilingKo,
ammu pahe’i yabo mai ongeam kamatandeamMu.
9Iko DEBATA to mahhotto’na ingganna kahajaam;
hotto’ä’ DEBATA, situhu’ kamaloloangku,
anna situhu’ kamahändängam penabangku.
10Popeanggam pa’pogausam kadakena to tameada’,
anna pomatohoanni penabanna ingganna to meada’,
Iko Puang Allataala to muundu’ lollä,
to ullosa tama penabanna anna pikkihanna hupatau.
11Puang Allataala unta’ matoto’ku,
to ullangnga’i to malolo penaba;
12Puang Allataala to malolo umpopa’tadongkongam hupatau,
anna Puang Allataala tamonda aha’Na.
13Maka’ tä’ muondo’ gau’na to tameada’,
iya muasam pa’danNa Puang Allataala anna umpasammi bälä’du’Na;
14umpatokam pangkakka’ la mepatei;
la umpa’tembasammi batu bälä’du’Na lekke’ api.
15Pehingngiia’! Tau kadake umpangngidengam kakadakeam;
ungkebättängam kamakahhasam, anna undadiam kamanekoam.
16Umbo’bäsam tolombu tau senga’,
sapo’ ia hi tilika’ dokko.
17Dadi natappai pa’lellenna,
anna nakumbali’ kamakahhasanna.
18Ma’kuhhu’ sumanga’ä’ längäm DEBATA, aka Ia to malolo illaam ingganna-ingganna sia,
anna menggamahaä’ umpuji sanganNa DEBATA, To Handam Matande.
8KamatandeanNa Puang Allataala anna tadongkonganna hupatau
1Lu lako to untetem to menani. Situhu’ ajanganna penaniam: Gitit.8:1 Gitit: Deem sarjana Alkitab muuai, Gitit buttu dio mai kada <<gath>> (basa Ibrani) kalembasanna <<ongeam pallullusam anggur>>. Gitit mesa penaniam si dipenaniam wattunna dipuppu’ bua anggur. Inde tula’ ia too naundu’i Septuaginta (Pa’dandiam Yolo dipalutama basa Yunani) diona, <<pangkakka’ dipake illaam pallullusam anggur>>. Pampujiam napapia Daud.
2O DEBATA, Debata to kipenombai,
tä’ deem pada samapuam sangamMu illaam inde lino!
Dipenaniam kamatandeamMu to untandolängänni langi’.
3Gamahanna änä’-änä’ sola änä’-änä’ sumusu DEBATA,
umpadadi kamatohoam lako balimMu,
la umpopa’luttu’ ingganna bali sola to ma’patumpui.
4Maka’ kupahandam langi’ kalua’ pa’tampa limamMu,
bulam sola ingganna bintä to umpatadongkonni ongeanna,
5iya mekutanamä’ kuua, aka ia inde hupatau DEBATA, nasuhum umpaillaam penaba?
Menna hia inde to lino DEBATA, nasuhum muandaham mata liu?
6Umpomahempo ia saidi’ anna la Puang Allataala,
anna umpatadongkom yabo ongeam matande anna malangka’.
7Umbeem kakuasaam yabona ingganna pa’padadimMu,
umbeem kakuasaam ungkuasai ingganna-ingganna sia, susinna:
8domba, sola sapim,
anna duka’ olo’-olo’ lako kaliane;
9dassi yabo lawwa, anna bau dio le’bo’,
sola issinna ingganna le’bo’ kalua’.
10O DEBATA, Debata to kipenombai,
tä’ deem pada samapuam sangamMu illaam inde lino!
9DEBATA to muundu’ kamaloloam
1Lu lako to untetem to menani. Situhu’ ajanganna penaniam Mut-Laben. Pampujiam napapia Daud.
2O DEBATA, la ma’kuhhu’ sumanga’ä’ matim sola sakalebu penabangku,
anna la kupa’paissangam indo pa’pogausamMu memängä-mängä.
3La kassiä’ anna tilalla’ aka Iko nasuhum DEBATA,
anna menaniä’ umpuji sangamMu, o To Handam Matande.
4Silele soho’ boko’ balingku dio oloMu;
titedo songka, anna tissämbä’ mate.
5Aka Iko umpekkalundangam sahaku anna muundusannä’ kamaloloam,
tadongkongKo yabo ongeam kamatandeamMu muundu’ lollä.
6PuhangKo umpassala ingganna kahajaam senga’,
anna umpempa’deam ingganna to tameada’;
tala dipahuaim ia suhi’ sanganna
sule lako salako-lakona.
7Tappu’ asammi balingki umpempa’deam,
tala mehä’dä’pi tala meata,
puha asammi kotana uhhuppu’ umpadahi täiabu;
tala nainga’pi tala nasalili ma’hupatau.
8Sapo’ ma’kuasa Ia DEBATA sule lako salako-lakona;
umpakatoto’ okkosam kahajaanNa, la naongei uhhotto’ ma’tanda to lino.
9Kamaloloam napake umpopa’tadongkongam ma’hupatau,
tama’bija tama’sangngana’ uhhotto’ ma’tanda to lino.
10Susim too DEBATA bettem matoto’na to didahha,
hindim batunna to illaam kamasippisam.
11To muissam sangamMu DEBATA mahannu matim,
aka tä’Ko untampeam to umpameäKo.
12Penanikoa’ umpuji DEBATA,
DEBATA to untadongkonni Sion!
Pa’pakahebaanni pa’pogausanNa lako ingganna kahajaam!
13Aka umpaillaam penaba liu to dipakahio-hio,
anna tä’ napehingngi-hingngii bäbä pengkaloa’na;
si umpahuai pa’tahungkungam lako to papateam.
14O DEBATA, kamaseiä’;
petua’i, nadahhaä’ balingku,
langnga’iä’ dio mai ba’ba pambo’bä’,
15anna mala kupa’pakahebaam ingganna pa’pogausam mapiamMu,
sola kakassiam anna katilallasam dio ba’bana kota Sion,9:15 kota Sion: Indo kota Sion, tontäm kota Yerusalem. Naua illaam basa Ibrani ke dipalutamai basa Bambam: <<Dio ba’bana änä’na Sion baine.>> Kalembasanna: dio olona issinna kota Yerusalem.
aka ullangnga’iä’ dio mai kamateam.
16Ingganna kahajaam mehonno’ dokko tolombunna,
naala uläna, nasakka pojana.
17DEBATA umpa’paissangam kaleNa, tandaam illaam pahhottosanNa sola undu’ lollä;
to tameada’, tappa tama lunu’na pa’battana, natappai pa’lellenna. Higayon.9:17 Higayon: Mesa kada basa Ibrani, umbai’ umpomakaleso maaka susi ajanganna indo pampujiam, battu haka la dipasalui penaba issinna.Sela
18To tameada’, kaliane anitu katihutusanna,
ingganna kahajaam to umpa’pa’de Puang Allataala, la tinanda lako kamateam.
19To mase-mase ia, tä’ la dipa’kalembei liu,
anna to masussa, tä’ la pa’de liu pahhannuanna.
20O DEBATA, pengke’de’Ko, daa umpabäi hupatau la napentaloiKo,
hotto’i ingganna kahajaam senga’.
21Padadii mahea’ dio oloMu DEBATA,
anna muissanni kalena naua, hupatau biasakam. Sela
101Aka hia anna ungkambelakam DEBATA,
anna tä’kam umposamele illaam kamasussaangki?
2Aka kamalangkasam penabanna to tameada’, nasuhum umpadondo panggähhe to masussa;
silele tappa tama lunu’na pa’battana, natappai pa’lellenna.
3To tameada’ ussengkengam pattuju kadakena,
anna to ma’podo kao, untelle anna umpa’pa’de DEBATA.
4To tameada’ tumonga pundu mengngu’be, naua illaam penabanna:
<<Umba hia ngei la meita DEBATA!
Tä’ tia deem Puang Allataala!>>
5To kadake gau’ sule lako asam pattujunna;
tanalambi’ suhi’na ulalamMu,
anna muita dokko ingganna balinna.
6Ma’kada illaam penabanna naua: <<Tala tibeho susu’ tala tidende katonam salukatuboangku,
tala deennä’ ussi’dim kamasussaam sule lako salako-lakona.>>
7Pudu’na umpassubum pantädo, pantipu, anna kada pa’pakahea’;
tula’na mebuno talemba’, sola ponno kakadakeam.
8Lao mangngabum lako tondä’
la umpatei to tadeem kasalaanna dio ongeam kabunianna.
Umpelässä’ mata to malamma;
9mangngabum dio ongeam kabunianna,
susi singa mangngabum illaam alla’ kuhha;
muabunni to mase-mase la nasakka.
Ussakka to mase-mase,
nasakka napaalai pa’pemäläanna.
10Umbukko’-bukko’ kalena, la pahopängam;
mane umpembantinganni to malamma.
11Naua illaam penabanna: <<Napa’lembeimä’ tia Puang Allataala anna napemboko’i;
anna tala deemmä’ nanenne’i!>>
12Pengke’de’Ko DEBATA! O Puang Allataala, pahuai pa’tahungkungam to tameada’!
Daa ungkalembei to didahha!
13Akanna umpa’pa’dei Puang Allataala to tameada’?
Akanna naua hia: <<Tä’ la mepassala Puang Allataala?>>
14Sapo’ muissam siangKo ingganna kaha-kaha. MuitaKo ingganna kamasussaam sola kamapi’disam,
anna toka liuKo la ma’pesäkä.
Iko napengkaalai to malamma,
Iko uhhande pala’ änä’ bium.
15Hengo-hengoanni limanna to tameada’ anna to ma’gau’ kadake;
passalai, anna mala nalämpäsam ube napatisam kaju ma’gau’ kadake.
16DEBATA, iam too Tomahaja sule lako salako-lakona;
mentu’na kahajaam la dihambai illaam mai botto litä’Na DEBATA.
17O DEBATA, uhhingngiammi pengkaalaanna to madio;
umpasule sumanga’na umpaende’ pahajanna,
untande talingai pelauanna.
18Unte’gehangko undu’ lollä lako to bium anna to didahha,
nasuhum tala deemmi tau si umpakahea’-hea’i.
11DEBATA ongeam pentuhehungam
1Lu lako to untetem to menani. Pampujiam napapia Daud.
DEBATA kuongei mentuhehum,
akanna deenni tau muuaannä’:
<<Pentia’ko längäm tanete sihhapam dassi!
2Aka, petua’ siai too to tameada’ illaam ongeam mabuni, umpasam bälä’du’na,
napadekke’ batunna,
la natembasam to malolo penaba.
3Maka’ dipa’lullu’um ulalam,
akapi la mala napogau’ to meada’?>>
4Muokko’ DEBATA illaam banua masehoNa,
tadongkonganNa DEBATA, yabo suhuga;
muita längäm dokkona hupatau,
tatilio-lio matanNa umpangngitai ma’hupatau.
5DEBATA umpangngitai to meada’ sola to tameada’,
anna ungkabassi to bassa’ patappaam lima.
6Umpatuhum hobaja palli, belerang11:6 belerang: Uba’ susi mala’bu’ sitonda api. anna hibu’ mellui’
muä’bäi to tameada’,
susim too pesämbä’ ullambi’i.
7Aka malolo DEBATA;
umpohäe kamaloloam;
to malolo penaba la silindo DEBATA.
12Sambajam umpelau pepamolo untingngajo to ma’pudu’ pandem ma’lila manähä
1Lu lako to untetem to menani. Penaniam dikatapii, katapi kahua hitinna. Pampujiam napapia Daud.
2O DEBATA, pamoloikam, aka pa’dem to meada’,
tä’um deem to manontom illaam alla’na hupatau.
3Tala deemmi to ma’tula’ setappa’ lako padanna, angga ham umpomatannim tula’
anna ma’pudu’ pandem ma’lila manähä.
4O DEBATA, sampunganni pudu’na to umpomatannim tula’na,
sissinganni sädäna to saboä,
5si ma’kada naua:
<<Lengko lilaki umpopatalokam!
Moi aka la napassubum pudu’ki,
mennaka la mala umpahe’kam?>>
6Iya ma’kadam DEBATA naua: <<Kahana dipakahio-hio to malamma,
kahana pengkaalaanna to mase-mase,
lambisam temo mengke’de’ä’,
umbeenni kalappasam pa’pemulunna.>>
7KadanNa DEBATA maseho,
sihhapam peha’ ma’nini,
pempitu dibahassii tama dapo’ pa’lällängam.
8Iko DEBATA ungkambi’kam,
Iko unjagaikam dio mai to tameada’ sule lako salako-lakona.
9To tameada’ sikalamba lu lako lu dio mai,
anna pa’pogausam kadake diangga’ mapia illaam alla’-alla’na ma’hupatau.
13Sambajam pahhannuam
1Lu lako to untetem to menani. Pampujiam napapia Daud.
2La padapi umba masäena umpa’lembeiä’ DEBATA? La umpa’lembei liumä’ isanga?
La padapi umba masäena umpemboko’iä’?
3La pada hia umba masäena umpendudunnä’ kamasussaam,
anna manabo inaba pusam allo?
La padapi umba masäena naondo-ondoiä’ balingku?
4O DEBATA, Puang Allataala to kupenombai,
nenne’iä’ sola mata pa’kamaseMu
timba’i sambajangku!
Patibukkannä’ matangku, pomasiäsannä’ pennenne’ku
indana tituhhunni matangku lambi’ mate,
5indana nauai balingku:
<<Kutalo mäne’-mäne’um,>>
anna sikaahhei ke naitaä’ ma’duhho.
6Sapo’ kao-kao kuhannuam pangkaha’ pa’kamaseMu takattu tintim tamondo’ sahuham,
kassiä’ anna tilalla’
aka Iko to ullangnga’iä’.
La menggamahaä’ umpuji DEBATA,
aka kusi’dingammi kamapiaam penabanNa lako kaleku!
14To maho kalebu umpa’pa’de Puang Allataala
1Lu lako to untetem to menani. Pampujiam napapia Daud.
Ma’kada illaam penabanna to maho kalebu naua:
<<Tä’ deem Puang Allataala.>>
Sangngim disoho’i pa’pogausanna to maho kalebu anna mehidi’-hidi’,
tala deem umpogau’ kamapiaam.
2Mennenne’ DEBATA yabo mai suhuga
la umpetua’ ma’hupatau,
battu la deempi to keaka’ naita,
battu la deempi to mengkahuku’ lako Puang Allataala.
3Sangngim umbanga’um tasalu sangka’, anna sassa’ lalam;
tala deemmi hupatau umpogau’ kamapiaam, moi podo la mesa tala deenni.
4Tä’ isanga muissam kamapiaam itim matim to tameada’?
Muande sola kutu umma’Ku sihhapam muande bo’bo’,
anna tä’ deem umpengkaalai DEBATA.
5La mahea’ anna tinggi’gi’ to tameada’,
aka naundu’ ia napatette Puang Allataala ingganna umma’Na to meada’.
6Tau kadake untelle anna muita dokko pattuju penabanna to mase-mase,
sapo’ to mase-mase ia DEBATA muongannii.
7La sule hi too yabo mai Tanete Sion to la ullappasam
to Israel!
Maka’ too umpapoletottommi umma’Na DEBATA,
la kassi anna tilalla’ pessubunna Yakub,
la losso’ penabanna sundede buana peänäsanna Israel.
15To sihatam sipäto’ tohho illaam banua masehoNa DEBATA
1Pampujiam napapia Daud.
O DEBATA, menna la sipäto’ tohho illaam banua masehoMu?
Menna la sihatam tohho yabo Sion tanete masehoMu?
2To tä’ deem sassainna lingkana anna ussoeam kamaloloam,
anna sola ponno penaba untula’ tappa’ anna sindoho;
3to tä’ deem ma’pakolo’-kolo’i tula’na,
tä’ umpogausam kakadakeam solana,
anna tä’ umpahuai tula’ kadake sambanuanna;
4ungkahidi’ to tameada’,
sapo’ umpa’kasallei to mengkahea’ längäm DEBATA,
to umponnoi pa’dandinna moi anna napohugi,
5to tä’ umpa’pehabesam doi’na ke la keänä’i,
tä’ naaku muala doi’ passahoma’dinni
la uhhonnosam to tä’ deem kasalaanna.
Menna-menna ma’pogau’ susi ia too, tala tilenggu’ tala tibosso’ sule lako salako-lakona.
16Sambajam kamatappasam anna pahhannuam
1Pampujiam16:1 Pampujiam: Illaam basa Ibrani naua: Miktam. Tä’ makaleso kalembasanna, umbai’ susi Pampujiam. napapia Daud.
O Puang Allataala, kambi’ä’,
aka Iko kuongei mentuhehum.
2Ma’kadaä’ lako DEBATA kuua: <<Iko Debatangku,
tadua tatallu anggam Iko kabuttuanna kamasannangangku!>>
3Ingganna to maseho illaam inde botto sangngim dipa’kasallei,
si naposundede buaku napotiala inabangku.
4Tuttuam la kehängäm sussa penabanna ingganna to angga umpenombai debata lino;
tä’ kao la mangngalatabaä’ umpatitollo hahana olo’-olo’ la dipehumalasam lako debata lino,
anna tä’ toi deem la kuhambem kada sanganna.
5O DEBATA, Iko ampuangku; Iko ihusam katuboangku,
Iko umpangnganda’iannä’ litä’ katabaangku.
6Sumpu mapianna indo baheam litä’ to umpadokkoannä’ lisu pala’ku,
tä’ deem pada saumpasundede buaku indo mana’ku.
7Kupuji DEBATA to umbeennä’ pepanännä’ anna pepakilalaam;
illaam wattu bengi natundannä’ napakilala penabangku.
8Dio liu lindoku DEBATA,
aka Ia passappi’ matoto’ku dio tandai kanangku, nasuhum tatilenggu’ä’ tatibosso’.
9Lambi’ tiala inabangku sundede buaku
anna masannam bätä puntingku.
10Aka tä’Ko umpabäiä’ tinanda lako kaliane anitu,
tä’Ko umpabäi inde to manuhu’ matim la ullambi’ kamateam.
11Iko umpatuhoiä’ lalam la tinanda lako katuboam;
olo tingngajoMu naongei buttu katilallasam sanda silapi’,
lima kanamMu naongei sule kamasannangam sule lako salako-lakona.
17Sambajanna to tä’ deem kakadakeanna
1Sambajanna Daud.
O DEBATA, pehingngii pelauangku umpelau kamaloloam;
hingngianni pengkaalaangku;
patanannii talinga sambajangku,
tama’pudu’ pandem tama’lila manähä.
2Pa’kadaannä’ illaam pahhottosam DEBATA,
ussangkamata-mataiKo to malolo.
3Maka’ umpangngitaiKo unä’ penabangku,
umpahessaä’ anna umpengkalesoi wattu bengi,
inna tä’ sia deem la ullolongam moi podo la mesam kakadakeangku;
puham kukattu tala deennä’ nakabuttui tula’ kadake.
4Taia kao pa’palakoam hupatau kutuhu’i,
sapo’ battakada messubum illaam mai pudu’Mu,
lambi’ ussehe’iä’ kaleku dio mai lingkana ingganna to bassa’ patappaam lima;
5lingkaku manontom untuhu’i lingkaMu,
pentekkaku tala lempä kanam tala lempä kaihi.
6O Puang Allataala, mengkaalaä’ matim oloMu aka si untimba’iä’;
o DEBATA, tande talingaiä’ pehingngii pelauangku.
7Pa’patandaanni pangkaha’ pa’kamaseMu takattu tintim tamondo’ sahuham to mepilla’-pilla’,
o To ullappasam ingganna to mentuhehum lako katea’ bassimMu
dio mai mentu’ balinna.
8Kambi’ä’ umba susi unjagaiKo lise’ matamMu,
buniä’ nakumbäi pani’Mu
9dio mai to tameada’ to la umpempa’deannä’,
dio mai pallimbutamanna balingku to la umpemäläi sungnga’ku.
10Sangngim tasiampuam pa’häntängam bua,
silele ma’kada saboä;
11nakadonti lingkaku anna nalebo puhhi’di’ä’,
napebujoä’ la napembussusam dokko litä’.
12Sihhapam singa la pahopängam ussempa-sempa balinna,
anggasanna singa kamagassinganna, mangngabum dio ongeam kabuniam.
13O DEBATA, pengke’de’Ko, ebai balingku ammu popa’bukkui dio oloMu.
Pakei pa’damMu ullappasannä’ dio mai pambundu’na to tameada’.
14O DEBATA, huntu’iä’ illaam mai alla’-alla’na
to angga umpikki’ kulle di lino;
la napokadeasam di too indo to umpatokaam,
lambi’ la napesanta’ipi mentu’ pandadianna,
anna la nalambi’pi sule lako pessubunna.
15Sapo’ kao-kao, mesaä’ to malolo nasuhum la kuita lindoMu;
wattungku bangom,
sumpu tialanna inabangku muita hupamMu.
18Penaniam pa’kuhhusam sumanga’na Daud
1Lu lako to untetem to menani. Pampujiam napapia Daud, sabua’Na DEBATA. Napenggamahaam Daud längäm DEBATA wattunna nalappasam dio mai pala’ limanna Saul sola ingganna balinna Daud.
2Ma’kada Daud naua: <<O DEBATA, umpakeä’ pangkaha’ pa’kamase lako kaleMu,
kamatohoamMu umpasukunnä’!
3O DEBATA, Iko buntu batungku, bettem matoto’ku, anna to ullappasannä’,
Puang Allataala To kupenombai, buntu batungku, Ia pentuhehungangku,
unta’ matoto’ku, tandu’ kasalamasangku,18:3 Tandu’ kasalamasangku: Inde tula’ mesa pehapangam diona kuasa kamatohoanNa Puang Allataala ullappasam hupatau. lempo kuongei mentuhehum!
4Mengkaalaä’ längäm DEBATA to sipäto’ dipuji,
lambisam nalappasannä’ dio mai ingganna balingku.
5Diampasammä’ pebalum,
napakao’dä-o’dä pallulunna katilakaam.
6Diettesammä’ pepungngu’ dua pesäke’ tängä,
tipattim poja la mepakattu sungnga’ dio oloku.
7Mengkaalaä’ längäm DEBATA illaam kamasussaangku,
metambaä’ längäm Puang Allataala to kupenombai umpelau pepamolo.
Nahingngi gamahangku längäm banua di ada’Na,
anna napaalai penaba pelauangku.
8Iya pahodom anna kakemba-kemba lino,
pagego’ anna pahundam ingganna pentokoanna tanete,
napobua’ aha’ kasalleNa DEBATA.
9Pelamboho hambu illaam mai illäNa,
mellelo api illaam mai sädäNa,
tisembu’ hobaja illaam mai pudu’Na.
10Umpatibukka langi’ naola yabo mai,
tihembom gabum malotä dio pehhondoanNa.
11Mentia’ ussäkei kerub,18:11 Kerub: Sahhupa pesuaNa Puang Allataala buttu yabo mai suhuga. Indo kerub ma’pani’. Batai Yeh. 1:10, 10:1-17.
mentia’ sumaniu’ umpa’tendam hibu’.
12Ussapu’ kaleNa malillim naongei mentuhehum,
naongei mentulindum,
umputu’ kaleNa gabum makambam ma’ku’dum.
13Pangkähhä dio oloNa umpassii lao gabum,
anna umpasule uham kembua sola hobaja.
14Mane magaluntu’i DEBATA yabo langi’;
To Handam Matande umpa’pahingngiam gamahanNa.
15Umpa’tembasam batu bälä’du’Na, nasuhum tiseham ke’de’ balinNa;
umpasilalle kila’, lambi’ sikalumpa’ lao to umbalii.
16Tibungkalle posi’ mapättäna le’bo’,
anna tandaam apa’ mahihinna litä’,
tappana untibuheseiKo balimMu DEBATA,
tappana messubum penaba kakuasaamMu illaam mai illäMu.
17Umpengkandoam limanNa DEBATA yabo mai ongeam malangka’;
naanda’iä’ anna nahuntu’ä’ dio mai uwai la mepusa’i.
18Nalappasannä’ dio mai balingku to bahani matoho,
anna dio mai ingganna to ungkabassiä’,
aka tä’ deem lalanna la kutaloi.
19Sikanaheba’ lalangku wattungku nahua kamasussaam,
sapo’ DEBATA sussaheangku.
20Nababaä’ lako pädä kalua’ ongeam malona’,
anna nalangnga’iä’ aka napohäeä’.
21Naulalannä’ DEBATA situhu’ kamaloloangku;
natamba’ä’ aka tadeennä ma’gau’ kadake.
22Aka kutuhu’i ulalanNa DEBATA
anna tama’gau’ kadakeä’ umpemboko’i Puang Allataala to kupenombai.
23Ingganna ätohanNa takupalappa’i mata takupasalai pikkiham,
anna ingganna pahentaNa kuoli’ mamma’ kusalungku metindo.
24Maseho pindannä’ maunna’ pebajoam dio oloNa,
anna kujagai liu kaleku anna mala tää’ umpogau’ kakadakeam.
25Nasuhum nabala’iannä’ DEBATA situhu’ kamaloloangku,
aka naissam naua, tä’ deem kasalaanna Daud.
26Lu lako to manontom, umpa’patandaangKo kamanontongamMu,
lu lako to tadeem sassainna umpa’patandaangKo katepuamMu.
27Lu lako to maseho umpa’patandaangKo kamasehoamMu,
sapo’ lu lako to manekko’ umpa’patandaangKo kakeakasamMu.
28UllappasangKo to dipakamase-mase,
sapo’ uhhonnosangKo to mangngita-ita dokko.
29O DEBATA, Iko umballoiä’;
o Puang Allataala to kupenombai, Iko ummasiä’i kamalillingangku.
30Iko umbeennä’ kamatohoam la umpentaloi mentu’ balingku;
anna pepamoloNa Puang Allataala to kupenombai lambisam kukahaba bettenna.
31Tepu ulalanNa Puang Allataala;
tä’ deem sassainna pa’dandinNa DEBATA.
DEBATA unta’ matoto’na
ingganna to mentuhehum lako kaleNa.
32Aka mennangka Puang Allataala senga’ sulibanna DEBATA,
anna mennangka buntu batu sulibanna Puang Allataala to tapenombai?
33Puang Allataala ussamba’ä’ kamatohoam,
anna Ia umpomalolo lalangku.
34Ia umpomatitta bitti’ku sihhapam bitti’ jonga,
anna Ia umpomatogonnä’ ke’de’ yabo tanete malangka’.
35Napatuduä’ laoanna pa’bundusam,
nasuhum matohoä’ ungkedoam bälä’du’ tembaga.
36O DEBATA, Iko umbeennä’ unta’Mu umpa’timpasannä’,
katea’ bassimMu ussamba’ä’;
kamapiaam penabamMu napolalam makkatalo-taloä’.
37Umpomalobännä’ lalangku,
anna tapuppu’ lente’ä’ tamangingngi’ taha-taha.
38Kupangngappi’ balingku sampe kusakka simesa,
anna tä’ kuaku ma’pasule ke tä’i kupempa’deam asam.
39Kupentettesam simesa lambi’ tä’ nabela ma’geu’,
silele tiampa’ dio oloku.
40Iko ussamba’ä’ kamatohoam illaam pa’bundusam,
Iko umpopa’balinguntu’ dio oloku to umpobaliä’.
41Iko umpasikalumpa’ lao balingku napelleiä’;
ingganna to ungkabassiä’ kupempa’deam.
42Sikatamba umpelau pepamolo,
sapo’ tä’ deem umpesäkäii,
silele mengkaala längäm DEBATA,
sapo’ tä’ deem natimba’i.
43Kupadahi kapu’ susi sobä’ natantam hibu’,
anna kupa’tibeanni lako lalam susi hossä’ la dipa’kuttä’.
44Ullangnga’iä’ dio mai kamesaanna hupatau to pabali-bali,
anna muäkä’ä’ ungkuasai buda kahajaam;
to tadiita hambu apinna kuposabua’.
45Napelelena pa’palakoangku,
tappa mengkahea’ lako kaleku;
to sulibam botto ma’bukku dio oloku.
46Silele maputtum lindona;
sangngim lumalla’ messubum illaam mai bettenna.
47Mannassa tubo DEBATA! Dipuji buntu batungku!
Dipomatande Puang Allataala to ullappasannä’!
48Puang Allataala, iam too to umpabala’i pa’pogausanna balingku;
buda kahajaam napopa’luttu’ dio oloku,
49nalappasannä’ dio mai pala’ limanna balingku.
O DEBATA, Iko umpopataloä’ mueba balingku,
ullangnga’iä’ dio mai pala’ limanna to bassa’ patappaam lima.
50Nasuhum la kupakende’ pa’kuhhusam sumanga’ dio oloMu illaam alla’-alla’na buda kahajaam,
anna kupenggamahaam pampujiam lu matim.
51Ia umbeem kapataloam kasalle lako tomahaja pantuhoNa,
anna umpa’patandaam pangkaha’ pa’kamaseNa takattu tintim tamondo’ sahuham lako to nalanti’,
Daud-um too diuaam sola ingganna pessubunna sule lako salako-lakona.>>
19KamatandeanNa DEBATA tandaam illaam pa’padadinNa anna illaam PaondonNa
1Lu lako to untetem to menani. Pampujiam napapia Daud.
2Langi’ umpa’pakahebaam kamatandeanNa Puang Allataala,
anna lawwa umpa’paissangam pa’padadinNa.
3Allo sibala’ allo umpa’paissangam kaheba kamatandeanNa,
anna bengi sibala’ bengi umpa’patandaam kakuasaanNa.
4Tala deem ma’kada anna tala deem ma’tula’,
tala deem dihingngi gamahanna.
5Sapo’ kahebana naissam asam senambo lino,
anna passa’biinna sule lako lili’na lino.
DEBATA umpapiaam ongeam mata allo yabo langi’,
6wattu mebengngi’ buttu sihhapam änä’ muane to la kabem messubum illaam mai tambinna,
susi mesa to matitta tilalla’ la umpahandu’ pa’laoanna.
7Mengkalao illaam bihinna langi’,
mellao tahhu’ sule sau’ bihinna langi’;
tä’ deem nasala mapana’na delle’na.
8PaondonNa DEBATA tepu,
umpatiala inaba;
ätohanNa DEBATA sipäto’ dikatappa’i,
umpadadi keaka’ to saidi’ kapaissanganna.
9PahentaNa DEBATA tappa’,
umpomasannam penaba;
kadanNa DEBATA malolo,
umpatibukka pikkiham.
10Mengkahea’ lako DEBATA abana mapia,
la da’da’ liu sule lako salako-lakona;
ingganna ätohanNa DEBATA tappa’,
anna sangngim malolo.
11ÄtohanNa DEBATA keangga’ ia anna la bulabam,
keangga’ puha ia anna la bulabam täsä’;
matannim ia anna la duho,
matannim puha ia anna la duho tadito’bo’;
12Ia asanna ia too umpakilala inde sabua’Mu,
anna tokam saho kasalle la napadipala’ ingganna to umpalakoi.
13Mennangka tau la muissam kabulinganna?
O DEBATA, lappasannä’ dio mai kasalaam balam takuissanna.
14Pasikambelai inde sabua’Mu dosa la diägä’inna dipogau’,
daa umpabäi la nakuasaiä’.
Lambi’ la tä’ deem sassaingku,
anna lappa’ä’ dio mai pa’pogausam handam kadake.
15O DEBATA, buntu batungku anna to ullappasannä’,
la umpohäe hi too pessubungam pudu’ku anna issi penabangku!
20Sambajam umpelauam kapataloam tomahaja
1Lu lako to untetem to menani. Pampujiam napapia Daud.
2La natimba’i hako too DEBATA illaam wattu kamasippisammu!
La nahindim batu hako too sanganNa Puang Allataala to napenombai Yakub!
3La napasuleam dako too pepamolo yabo mai ongeam masehoNa,
anna pepakatoto’ yabo mai Tanete Sion.
4La nakilalai asam di too indo bua pemala’mu,
anna la napomasannam penabanNa ingganna tunuammu. Sela
5La naponnoiam dako too ingganna pa’pemulummu,
anna napasule lako lolona napatianta’ di kati-katinna ingganna pattujummu.
6La sikaahhekam tilalla’ untilalla’i kapataloammu,
anna untandeangkam bandeha kapataloam umpuji sanganNa Puang Allataala to tapenombai.
La nahingngiam di too DEBATA ingganna pelauammu.
7Tentomai kuissammi kuua DEBATA umbeem kapataloam tomahaja pallanti’Na.
Nahingngiam DEBATA yabo mai suhuga ongeam masehoNa,
katea’ bassinNa DEBATA nasuhum ullolongam kapataloam kasalle.
8Deem tau uhhannuam bendi pa’bundusanna, deem duka’ uhhannuam dahanna.
Sapo’ kitaa’ kita, kakuasaanNa DEBATA, Puang Allataala to tapenombai tahannuam.
9La silele ia tappa bussu’ anna tissämbä’,
sapo’ kitaa’ kita, la bangongkia’ anna ke’de’ matoto’.
10O DEBATA, lappasanni tomahaja!
Hingngianni ke mengkaalakam matim!
21Pampujiam untilalla’i kapataloanna tomahaja
1Lu lako to untetem to menani. Pampujiam napapia Daud.
2O DEBATA, sundede buana tomahaja aka umbeem kamatohoam;
tiala inabanna aka indo kapataloam to umbeem!
3Umpasule lakoammi pa’pemulunna,
anna tä’ untumpu pala’ pelauam pudu’na. Sela
4Untingngajo kasuleanna sola mana’ sanda silapi’,
anna ma’songko’ tomahaja bulabam dipapia.
5Napelau tala dondom bulu salamba’na, iya umbeem
kamahendengam sule lako salako-lakona.
6Napa’kasallei hupatau aka umbeem kapataloam,
Iko umpadadii matande anna dipa’kasallei.
7Takattu tintim tamondo’ sahuham pa’tamba’Mu lako kalena;
mengkahuku’ dio oloMu nasuhum umpaponnoi katilallasam.
8Aka mahannu tomahaja längäm DEBATA,
anna takattu tintim tamondo’ sahuham pangkaha’ pa’kamaseNa To Handam Matande, lambisam tatige’ge’ tatigesse ma’pahenta tomahaja.
9La unta’galangKo mentu’na balimMu, DEBATA,
anna la ussakka ingganna to ungkabassiKo.
10La suleKo sihhapam api mellelo
la muä’bäii.
La napempa’deam asam aha’ kasalleNa DEBATA,
anna api la muä’bäi simesai.
11Ingganna pessubunna tala deemmi umpopehä’dä’,
mentu’na pandadianna tala deemmi umpopeata.
12Maka’ la napeängangko tuntungam su’be’,
nadakasam pa’posanga-sanga, talapalelle’ talapadissi.
13Uhhuntu’ko bälä’du’mu ammu penotoi,
nasuhum silele soho’ boko’ anna sikalumpa’ lao.
14DipomatandeKo DEBATA, aka tä’ deem pada sakasalle kakuasaamMu,
la menanikam anna kipuji kamatohoamMu.
22O Puang Allataala to kupenombai, akanna untampeannä’?
1Lu lako to untetem to menani. Situhu’ ajanganna penaniam: Jonga wattu mebengngi’. Pampujiam napapia Daud.
2O Puang Allataala, Puang Allataala to kupenombai, akanna untampeannä’?
Mengkaalaä’ matim, sapo’ tontäKo mambela
anna tä’ umpamoloiä’.
3O Puang Allataala to kupenombai, mengkaalaä’ matim wattu iallo, sapo’ tä’Ko deem mentimba’.
Ma’sambajannä’ matim wattu bengi, sapo’ tä’ siam mala masannam penabangku.
4Sapo’ moi anna susi, tontä liuKo Tomahaja Handam Maseho,
to napuji anna napa’kasallei to Israel.
5Iko nahannuangKo nene to kiponene;
nahannuangKo anna ullangnga’i.
6Mengkaalai matim, anna ullangnga’i;
sikamahannu matim, anna tä’ kasihisam.
7Sapo’ kao-kao indee, ula’-ula’ pakuä’, taia hupatau,
napa’pa’dei anna nakabassi tau buda.
8Ingganna to muitaä’, natelleä’,
sikamengngu’be, anna muilim-ilim.
9Sikama’kada naua: <<DEBATA nahannuam, pabäi toda’ Ia ham ullangnga’i;
pabäi Ia ham ullappasanni!
Kusanga napohäe paha’ DEBATA?>>
10Iko umpatibussannä’ illaam mai tambu’,
Iko umpomahannuä’ matim sumusu dio abinganna indoku.
11Mengkalao dadingku, inna dibehomä’ dokko lisu pala’Mu,
illaampä’ tambu’ anna Ikom Puang Allataala to muampuannä’.
12Daa ungkambelaä’,
aka mahuku’um kamasussaam,
anna tä’ deem la umpamoloiä’.
13Naleboä’ balingku sihhapam sapim laki buda,
napali’ tintinnä’ susi banteng ma’palasa buttu dio mai Basan;
14Sangngim mengängngä natammuiä’,
sihhapam singa meala, anna ma’ehhem.
15Pa’dem kamatohoangku sihhapam uwai titollo,
lussem asammi bukungku anggasanna silalla lesoanna,
mahehe pallam penabangku;
16mabangi bahokoku susi bibä dihehä,
tippodo’um lilaku tä’ mala tika’bi’.
O DEBATA, umpopetindoä’ dio sobä’ ongeanna to mate.
17Natalimbum tamaä’ kamesaanna to tameada’;
sihhapam asu buda ulleboä’,
nasibuno-bunoi bitti’ku anna limangku.
18Sikatekä’ bukungku mala kuhekem,
nasipetua’-tua’iä’, napengkitaiä’ balingku.
19Nataba-taba pohebaku,
anna naundi jubaku.
20Sapo’ Iko, o DEBATA, daa ungkambelaä’,
Iko kamatohoangku, simpannii mai umpamoloiä’.
21Lappasannä’ dio mai pala’ limanna to untetännä’ pa’dam,
langnga’iä’ dio mai passakkana asu buda.
22Tässu’iä’ illaam mai sädäna singa,
puhamä’ ullangnga’i dio mai tandu’ banteng.
23La kupa’paissangam sangamMu lako ingganna solasubungku;
la kupujiKo illaam alla’-alla’na umma’Mu.
24O inggammua’ to mengkahea’ längäm DEBATA, pujii sanganNa!
O inggammua’ pessubunna Yakub, pomatandekoa’ DEBATA!
O inggammua’ peampoanna Israel, pengkahea’ikoa’ DEBATA!
25Aka DEBATA, tä’ umpa’bahinni’i kamasussaanna to didahha,
anna tä’ napeela-elaam.
Tä’ umpemboko’i tau ia too,
sapo’ nahingngiam ke mengkaalai.
26KupujiKo illaam alla’-alla’na pa’hempungam kasallena umma’Mu, aka indo puha umpogau’.
La umponnoiä’ pa’dandingku matim dio olona ingganna to umpengkahea’iKo.
27To masussa la mangngande sampe dea’;
to umpameä DEBATA, la umpakende’ pampujiam.
La mahendem dakoa’ too sule lako salako-lakona!
28Ingganna hupatau sule lako lili’na lino la mengkilala,
anna ma’pasulei lako DEBATA,
mentu’na kahajaam la menomba dio oloNa.
29Aka DEBATA inna Tomahaja,
umpahenta ingganna kahajaam.
30Ingganna to makaka di lino la menomba dio oloNa DEBATA,
ingganna to la tinanda di assala’na la menomba längäm DEBATA,
inna tala mala ullombunni sungnga’na.
31Ingganna lapi’ mane la kende’ la menomba lako DEBATA,
anna la umpentulasam diona DEBATA
lako ingganna to mane la dadi.
32Lu lako ingganna hupatau to la kende’ allo di dako’na la ditulasam diua:
DEBATA puha ullappasam umma’Na.
23DEBATA to ma’kambi’ masokangku
1Pampujiam napapia Daud.
DEBATA-m too To ungkambi’ä’, tä’ deem la kakuhängannä’.
2Napopellubeä’ dio humpu’ mahombo;
napatinandaä’ lako uwai mahändä.
3Napatialaannä’ inabangku,
napatetteä’ lako lalam malolo,
anna mala lele mapia liu sanganNa.
4Moi la muolaä’ lembä mandalam,
tä’ deem la ungkahea’ä’ kasägängam,
aka Iko umpasolaiä’;
boseMu sola tekkemMu, iam too umpatiala inabangku.
5Umpatokaannä’ kinande
dio olona balingku.
Untammuä’ untolloi minnä’-minnä’ bubanau’ ulungku;
ussohäiä’ uwai ihu’ takupuha-puha.
6Kamapiaam penabamMu anna pangkaha’ pa’kamaseMu takattu tintim tamondo’ sahuham tama kaleku
upu’ salukatuboangku,
anna la tontä liuä’ tohho illaam banua DEBATA,
sule lako salako-lakona.
24DEBATA Tomahaja Handam Matande mentama ba’ba malobä
1Pampujiam napapia Daud.
DEBATA umpuängam lino sitonda issinna,
lino sola ingganna to tohho illaanna.
2Umpaokko’ lino yabona le’bo’,
anna napatadongkom yabona ingganna salu.
3Mennangka la sipäto’ längäm taneteNa DEBATA?
Mennangka la sihatam ke’de’ illaam ongeam masehoNa?
4To tä’ deem sassainna pa’palakoanna anna mahändä penabanna,
tä’ umpenombai debata lino
anna tä’ ma’dandi-dandi bäbä.
5Iam too la untahima pa’tamba’ DEBATA,
anna napomalolo Puang Allataala to ullappasanni.
6La susim too hupatau to umpameä Puang Allataala,
to umpameä hupanNa Puang Allataala, to napenombai Yakub. Sela
7Äkä’ko kalemu, o tondom ba’ba malobä,
tiäkä’ko längäm, o tondonna ba’ba malobä mahhatu’ taum dadinna,
anna mala naola mentama Tomahaja Handam Matande!
8Menna itim diuam Tomahaja Handam Matande?
DEBATA to handam matoho anna makkatalo-talo;
to makkatalo-talo illaam pa’bundusam.
9Äkä’ko kalemu, o tondom ba’ba malobä,
tiäkä’ko längäm, o tondonna ba’ba malobä mahhatu’ taum dadinna,
anna mala naola mentama Tomahaja Handam Matande!
10Menna itim diuam Tomahaja Handam Matande?
DEBATA to ungkuasai langi’ anna lino;
Iam too Tomahaja Handam Matande! Sela
25Sambajam umpelau pepanampum anna pa’kambi’
1Pampujiam napapia Daud.
O DEBATA, lu matim oloMu kuäkä’ penabangku.
2O Puang Allataala to kupenombai, Iko kukatappa’i!
Daa umpabäi balingku napakasihi’ä’,
daa umpabäi napetaba-tabaiä’.
3Ingganna to mahannu matim tä’ ia la dipakasihi’,
sapo’ la nahuham ia longko’ to umbombä’iKo tä’ deem lalanna.
4Paissanniä’ ulalamMu DEBATA,
patuduä’ untuhu’i ulalamMu.
5Patetteä’ muundu’ kamaloloamMu anna umpatuduä’,
aka Ikom too Puang Allataala to ullappasannä’,
to kuhannuam allo anna bengi.
6Ingahanni mentu’na pa’häntängam buaMu anna pangkaha’ pa’kamaseMu takattu tintim tamondo’ sahuham, DEBATA,
to inna deemmi pempom dio mai.
7O DEBATA, daa umpatumäiä’ mentu’na dosaku
anna gau’ kusala basaba kulenda di mangnguhangku,
sapo’ kilalaiä’ situhu’ pangkaha’ pa’kamaseMu takattu tintim tamondo’ sahuham,
umba susi kamapiaam penabamMu.
8Inde DEBATA, mapia penaba anna malolo,
iam too anna umpatudum ulalam lako to madosa.
9DEBATA umpatette to mahempo penaba umpalako undu’ lollä,
anna napatudu ulalanNa.
10Ingganna ulalanNa DEBATA, ia too pangkaha’ pa’kamase takattu tintim tamondo’ sahuham anna manontom,
lako hupatau to muoli’ mamma’ ussalungku metindo pa’dandianNa sola pahentaNa DEBATA.
11O DEBATA, ampunniannä’ kasalaangku anna mala lele mapia liu sangamMu,
aka tä’ deem pada sabuda gau’ kusala basaba kulenda dio oloMu.
12Menna-menna mengkahea’ längäm DEBATA,
napatudu ulalam la pahallunna naundu’.
13Tau ia too, la tontä liu masannam katuboanna,
anna sule lako pessubunna la mahapa’ untadongkonni botto litä’na.
14DEBATA sangkalamma’ lako to mengkahea’ dio oloNa,
anna napaissanni pa’dandianNa.
15Kupomanontom pennenne’ku längäm DEBATA,
aka nalappasannä’ dio mai tondom katilakaam.
16Tingngajoiä’ ammu kamaseiä’,
aka mabium-biunnä’ anna didahha.
17Tuttuam kehängäm kamasussaam penabangku,
lappasannä’ dio mai kamasippisangku.
18Petua’i pi’di’ku anna kamasussaangku,
anna ampunniannä’ ingganna dosaku.
19Petua’i, tä’ deem pada sabuda to umpobaliä’;
anna liba’ nakabassingku.
20Kambisannä’ sungnga’ku anna ullappasannä’,
indana kasihisannä’, aka Iko kupentuhehunni.
21La naundu’ dä’ too kamahändängam penaba anna kamaloloam,
aka mahannuä’ matim.
22O Puang Allataala, lappasanni umma’Mu to Israel
dio mai ingganna kamasippisanna!
26Sambajam umpelau kamaloloam
1Pampujiam napapia Daud.
O DEBATA, undusannä’ lollä,
aka tä’ deem sassainna pa’palakoangku.
Mahannuä’ längäm DEBATA,
anna tä’ deem moi podo sai’di’um kabata-bataangku.
2O DEBATA, pangngitaiä’ anna umpesi’dinniä’,
pahessai lalam penabangku anna pikkihangku.
3Aka kusi’dim liu pangkaha’ pa’kamaseMu takattu tintim tamondo’ sahuham,
anna tuboä’ illaam kamanontongamMu.
4Tää’ pada ke’de’ pada isu’ to manipu,
anna tää’ pada lao to ma’dua tambu’ to ma’tallu sumusu.
5Kukabassi kamesaanna to tameada’,
anna tää’ pada ke’de’ pada isu’ to tameada’.
6O DEBATA, membase mahändää’ dio oloMu tandana tä’ deem kasalaangku,
anna mellaoä’ ullilinni dapo’ pehumalasam matim oloMu,
7kupasindum kupopemamba guntu’ penaniam pa’kuhhusam sumanga’,
anna kupa’paissangam pa’pogausam memängä-mängäMu.
8O DEBATA, tä’ deem pada sakupohäe banuamMu,
okkosam kamatandeamMu.
9Daa umpakattu sungnga’ä’ sola to madosa;
daa umpakattu kollonnä’ sola to angga maelo’ papateam.
10Polima-limaanna umpogau’ kakadakeam,
anna angga nakähä mangngala saho lako padanna.
11Sapo’ kao-kao tä’ deem sassainna pa’palakoangku;
lappasannä’ anna kamaseiä’.
12Ke’de’ä’ dio ongeam mahampa’;
la umpujiä’ DEBATA illaam kakalebuanna umma’ petauanNa.
27Puang Allataala bettem matoto’ku
1Pampujiam napapia Daud.
DEBATA kamasiäsangku anna to ullangnga’iä’,
mennapi la kukahea’?
DEBATA bettem matoto’ku kuongei mentuhehum,
mennapi la mala umpakahea’ä’?
2Wattunna nabundu’ä’ to tameada’
maelo’ naamma’ kalebuä’,
ingganna indo to umpobaliä’,
ia leko’ di metalumbum tappa lumbä.
3Moi la nalebo puhhi’di’ä’ tentaha,
tä’ deem la mahea’ penabangku.
Moi kende’ bundu’ umbaliä’,
la tontä liuä’ mahannu.
4Anggam sahhupa kupelau längäm DEBATA,
iam too inde kuinaba-naba:
tohho illaam banua DEBATA
upu’ katuboangku,
la ungkannassai kamapiaanNa DEBATA
anna umpameä pa’elo’Na illaam banuanNa.
5Nakambi’ä’ DEBATA illaam ongeanNa
wattungku illaam kamasippisam;
najagaiä’ illaam ongeam masehoNa,
anna nababaä’ längäm tanete malangka’.
6Tentomai untandeammä’ kapataloam ullumbäi balingku to ullilim tikuä’;
lambisam umbaku-bakuannä’ a’da’
umbaba bua pemala’ pa’kuhhusam sumanga’ tama ongeam masehoNa DEBATA;
la menaniä’ anna umponi poni-poniam umpuji DEBATA.
7O DEBATA, hingngianni pengkaalaangku matim,
kamaseiä’, anna tahimai pelauangku!
8Kuhingngi ma’kadaKo illaam penabangku muua: <<Peäi lalanna anna muitai hupangKu.>>
Abana inna kupameä hupamMu DEBATA;
9daa umpemboko’iä’.
Daa ungkeaha’ nasuhum untumpu pala’ inde sabua’Mu,
o DEBATA to mepamoloingku.
Daa untibeä’
anna untampeam,
o Puang Allataala to ullangnga’iä’.
10Moi la napelleiä’ ambeku sola indoku,
deem siam DEBATA la uhhiba pakkannä’ nahande balida.
11Paitaiä’ ulalamMu DEBATA,
patetteä’ lako lalam malolo,
aka napasippi’ä’ balingku.
12Daa umbehoä’ lako pattuju penabanna balingku,
to si mendadi sa’bi tatappa’ anna buhassuam.
13Kukatappa’i kuua la kuita kamapiaam penabanNa DEBATA
wattungku tubo illaam inde lino.
14Mahannuko längäm DEBATA,
pomatohoi ammu pakasallei penabammu;
mahannuko längäm DEBATA!
28DEBATA unta’ matoto’ku
1Pampujiam napapia Daud.
O DEBATA, Iko buntu batungku, kuongei mengkaala,
daa umpa’talingalenda’iä’.
Maka’ tä’ uhhingngiannä’,
la susiä’ to dio apa’ mahihinna litä’.
2Hingngianni pelauangku
ke mengkaalaä’ umpelau pepamolo,
anna muäkä’ä’ limangku ma’sambajam
mengngolo lako ongeam masehoMu.
3Daa untibeä’ sola-sola to tameada’,
battu diua to umpogau’ kakadakeam.
Si mapia dio pudu’na,
sapo’ kadake illaam penabanna.
4Pabala’i situhu’ pa’palakoanna,
situhu’ pa’pogausam kadakena.
Tahungkunni situhu’ kakadakeam puha napogau’;
pabala’i la sihatanna pa’pogausanna.
5Sangngim umpa’bahinni’i pengkähäNa DEBATA,
anna ingganna pa’padadinNa.
Iam too anna la napatiampa’ simesam,
anna tä’um deem la napatibangom sule.
6Dipuji DEBATA,
aka nahingngiammi pelauangku.
7DEBATA kamatohoangku, anna unta’ matoto’ku;
Ia kuhannuam sola ponno penaba.
Napamoloiä’ nasuhum tiala inabangku,
umpenaniannä’ pa’kuhhusam sumanga’ längäm oloNa.
8DEBATA kamatohoanna umma’Na,
bettem to umpa’tippasam umpa’pehasiam tomahaja pallanti’Na.
9O DEBATA, pesäkäi umma’Mu,
tamba’i hupatau pangkaha’Mu.
Kambi’i anna hiba pakkanni uhhande balida sule lako salako-lakona.
29GamahanNa DEBATA matoho matande
1Pampujiam napapia Daud.
Pujiko DEBATA mentu’nako issinna suhuga;
pujii kamatandeanNa anna kamatohoanNa.
2Akui kamatandeanna sanganNa DEBATA,
penombako umpake poheba mendiada’.
3GamahanNa DEBATA memamba yabona le’bo’,
Puang Allataala to matande magaluntu’,
DEBATA memamba yabona le’bo’ kalua’.
4GamahanNa DEBATA, ponno kamatohoam,
gamahanNa DEBATA, ponno kamatandeam.
5GamahanNa DEBATA ungkopo-kopo kaju aras,29:5 kaju aras: Sahhupa kaju kasalle, matogom anna makahha’. Kaju masuli’ angga’na.
uhhuppu’-huppu’ kaju aras Libanon.
6Umpakahidä-hidä tanete Libanon sihhapam änä’ sapim,
umpakatibe-tibe Buntu Siryon sihhapam änä’ banteng.
7GamahanNa DEBATA umpatikiä kila’.
8GamahanNa DEBATA unggego’ pädä kukku’,
umpopahundam pädä kukku’ Kades.
9GamahanNa DEBATA umpatipa’läppu’ änä’ jonga,
anna ussäppe’-säppe’ kaju pangngala’.
Ingganna umma’Na metamba illaam banua DEBATA naua: <<Dipuji dipa’kasallei DEBATA!>>
10DEBATA ma’kuasa yabona uwai bussu,
DEBATA ma’pahenta sule lako salako-lakona.
11DEBATA hi too la umbeem kamatohoam umma’Na,
anna la namana’ kamasannangam.
30Penaniam pa’kuhhusam sumanga’ aka langnga’ dio mai ba’ba pambo’bä’
1Pampujiam napapia Daud. Penaniam untilalla’i Banua DEBATA tappana dadi.
2O DEBATA, la kupujiKo kupa’kasallei,
aka Iko muangkahannä’,
anna tä’ umpabäi balingku natelleä’ napa’pissi’.
3O DEBATA Puang Allataala to kupenombai, mengkaalaä’ matim umpelau pepamolo,
anna umpabono’mä’.
4Iko ullangnga’iä’ dio mai ba’ba pambo’bä’,
anna untutusannä’ ba’ba pamombä.
5O inggannakoa’ umma’Na to manontom meada’, penaniko umpuji DEBATA,
anna pa’kuhhu’ sumanga’ko längäm To Handam Maseho.
6Aka anggam sapäi’ keaha’ DEBATA,
sapo’ kamapiaam penabanNa upu’ katuboanta;
puli bengi angga sahho,
tibukka’ baja napessulle petaba.
7Wattungku masannam, ma’kadaä’ kuua:
<<Tala tige’ge’ä’ tala tigesse!>>
8O DEBATA, Iko umpayaboä’ tanete tatige’ge’ tatigesse,
aka mapia penabaKo tama kaleku.
Sapo’ tappana umpemboko’iä’, iya tinggi’gi’ä’ pole’ mahea’.
9O DEBATA, Iko kuongei mengkaala,
anna lu matim Debata mengkahumaseä’ kuua:
10<<Aka la gunana dio oloMu ke mateä’? Tä’ deem!
Anna aka la kauntungamMu ke dokkoä’ pamombä? Tä’ deem!
La mala haka to mate umpujiKo,
anna la mala paka to dahi litä’um umpa’pakahebaam kamanontongamMu? Tä’um mala!
11Pehingngii DEBATA anna ungkamaseiä’.
O DEBATA, pamoloiä’!>>
12Uhhu’ku umpopengkubalim mendadi sajo katilallasam,
ullendu’i pote bolongku,
umpasullei sende penaba.
13Nasuhum tala tikambu pudu’ku tala messingngammu’ limangku,
mengkalao illaam penabangku lemba’ dio pudu’ku kupujiKo o DEBATA, Puang Allataala to kupenombai,
anna la ma’kuhhu’ sumanga’ä’ matim sule lako salako-lakona!
31Malino masannam illaam pala’ limanNa DEBATA
1Lu lako to untetem to menani. Pampujiam napapia Daud.
2O DEBATA, Iko kuongei mentuhehum,
daa si’da-si’da umpabäiä’ dipakasihi’.
Lappasannä’ aka to muundu’Ko lollä.
3Patanannii talinga inde sabua’Mu simpannii ullangnga’iä’!
Kupemala la mendadiKo buntu batungku to kuongei mentuhehum,
bettem matoto’ku,
la umpa’tippasannä’ umpa’pehasiam.
4Aka inna Iko buntu batungku anna bettem matoto’ku!
Undu’ä’ umpatette anna mala lele mapia liu sangamMu.
5Lappasannä’ dio mai poja napattiannä’ balingku,
aka Iko pentuhehungangku.
6Kubeho penabangku dokko lisu pala’Mu;
o DEBATA, Puang Allataala to manontom, Iko ullappasannä’.
7Kukabassi to umpenombai pa’pasusiam takeguna to napa’debatai;
kao-kao matappa’ä’ längäm DEBATA.
8La kassiä’ anna tilalla’ aka kusi’dingam pangkaha’ pa’kamaseMu takattu tintim tamondo’ sahuham.
Aka muitaKo kamapi’disangku,
anna ussangkamata-matai kamahusasam penabangku.
9Tä’Ko umbehoä’ dokko lisu pala’na balingku,
sapo’ umpopehhondoä’ dio pädä kalua’ ongeam malona’.
10O DEBATA, kamaseiä’, aka illaannä’ kamasippisam;
bongom matangku aka masaki penabaä’, mapi’di’ penabangku malamma bätä puntingku.
11Angga salängäm allo katuboangku napobua’ kamasussaam,
angga tikalibajo katuboangku napobua’ kamapi’disam.
Kuhämmi kamatohoangku napobua’ gau’ kadakeku,
anna lussemmi bukungku.
12Napetaba-tabai asammä’ balingku,
senga’pa ia mentu’na sambanuangku.
Tikkedu’ asam solaku ke naitaä’,
tappa sikalumpa’ lao ke sitammukam lako lalam.
13To tadihekemmä’ kao susi to mate,
anna tadipaalai suhi’ susi huppu’ pindam.
14Umba-umba naongei kende’ kamaheasam;
kuhingngi balingku sikabisi’ napalilingannä’ tangnga’.
Napeängannä’ tuntungam su’be’ nadakasam pa’posanga-sanga,
maelo’ la napakattu sungnga’ä’.
15Sapo’ mahannuä’ matim, DEBATA,
ma’kadaä’ kuua: <<Iko Puang Allataala to kupenombai.>>
16Upu’ tuboku illaannä’ lisu pala’Mu;
lappasannä’ dio mai pala’ limanna mentu’na balingku,
anna ingganna to umpadondo panggähheä’.
17Paähhäi lindo mamaseMu inde sabua’Mu DEBATA;
pesäkäiä’ aka pangkaha’ pa’kamaseMu takattu tintim tamondo’ sahuham.
18O DEBATA, daa umpabäiä’ dipakasihi’,
aka mengkaalaä’ matim;
pabäi ia to tameada’ dipakasihi’,
anna bandam-bandam dio apa’ mahihinna litä’ tatiku’mi’ pudu’na.
19Sissinni sädäna to kaägä’-ägä’,
si untio’-tio’ to meada’
tanda kamalangkasam penabanna.
20Sundum ganna’ hongko’ anna upa’
umpatokaam lako to mengkahea’ dio oloMu!
Lanto anna kabangam nasa’bii ma’hupatau kamapiaam penabamMu,
lako to mentuhehum matim.
21Umpasamboi pangkähhäna hupamMu
dio mai pattujunna to tameada’;
muunta’i dio mai mentu’ pa’pakolo’-kolo’inna balinna.
22Dipuji DEBATA,
aka tä’ deem pada samemängä-mängä pangkaha’ pa’kamaseNa takattu tintim tamondo’ sahuham,
wattunna nalilim tikuä’ balingku illaam mesa kota.
23Kusanga untampeammä’ DEBATA
indo anna mahassannä’ hahu’.
Sapo’ nahingngiammi pelauangku
wattunna mengkaalaä’ dio oloNa.
24Pakeko pangkaha’ pa’kamase lako DEBATA, o inggannakoa’ umma’Na!
Nakambi’ najagai DEBATA to manontom,
sapo’ tä’ nakaja’-kaja’
ussämbä’i to malangka’ penaba.
25O inggannakoa’ to mahannu längäm DEBATA,
pomatohoi ammu pakasallei penabammu!
32Maupa’ anna katambasam to diampunniam dosana
1Penaniam pepatuduam napapia Daud.
Maupa’ anna katambasam hupatau to diampunniam pa’pogausam kadakena,
anna tä’ dipahandam ingganna dosana.
2Maupa’ anna katambasam
to tä’ nahekem DEBATA kasalaanna,
tä’ deem kende’ illaam penabanna pantipuam.
3Wattunna kusalindinnipi dosaku, si malullum bukungku,
anu’ mengkaloa’ liuä’ pusam allo.
4Aka naepe’ä’ limamMu allo bengi DEBATA;
tappu’ kamatohoangku,
susi nadä’dä’ allo. Sela
5Iya kuakuim dosaku dio oloMu
anna tä’ kubuni kasalaangku matim.
Kukattum DEBATA la kuakui asam gau’ kusala dio oloMu,
anna muampunniannä’ ingganna dosaku. Sela
6Iam too anna si mesa-mesa to meada’ dio oloMu la ma’sambajam,
sumala malapako dipellambi’i;
anna mala tä’ nalulum ke sulei mala’bu’ kasalle
illaam salu katuboanna.
7Iko DEBATA ongeam pembuniangku,
umpa’tippasannä’ dio mai kamasussaam.
Meoliä’ tilalla’, aka puhangKo ullangnga’iä’. Sela
8Ma’kada DEBATA naua:
<<La kupatuduko anna kupatuhoi
lalam la pahallu muola;
la kunännä’ko anna la kuandaham mata liu.
9Daa ussusi daham battu haka bagal32:9 bagal: Olo’-olo’ susi daham. Ia anna deenni diuaam bagal, aka dipasilakii daham anna keledai, iya dadim diuaam bagal. tä’ deem akkalanna,
manggi’ dingangnga’ mane maelo’i dipahe’,
maka’ tää’, la moka metuhu’.>>
10To tameada’ ia buda kamasussaam ullambi’i,
sapo’ to mahannu längäm DEBATA
nalilim ia pangkaha’ pa’kamaseNa takattu tintim tamondo’ sahuham.
11Kassikoa’ ammu tilalla’, o inggammua’ to meada’,
aka indo to napogau’ DEBATA;
sikaahhekoa’ tilalla’, o inggammua’ to malolo penaba!
33Pampujiam anna pa’pakasalle längäm Puang Allataala
1O inggammua’ to meada’, sikaahhekoa’ tilalla’ längäm DEBATA;
sihatam umpuji DEBATA to malolo penaba.
2Pa’kuhhu’ sumanga’koa’ längäm DEBATA umponi katapi,
pa’kelonnikoa’ katapi sapulo hitinna dio oloNa.
3Penaniannia’ penaniam bakahu längäm DEBATA,
pomapiai de’de’na poni-poniammu anna sikaahhekoa’ tilalla’!
4Pa’kadanNa DEBATA mala dikatappa’i;
manontom illaam ingganna pa’palakoanNa.
5DEBATA umpohäe kamaloloam anna undu’ lollä;
ponno lao lino pangkaha’ pa’kamaseNa takattu tintim tamondo’ sahuham.
6Ma’battakada DEBATA, iya dadi langi’;
menaba, iya dadi issinna langi’.
7Umpamesa uwai le’bo’ anggasanna uwai mellimbä,
umpopa’mesa le’bo’ mandalam illaam mesa pa’pongngeam.
8Sihatam sipäto’ mengkahea’ senambo lino längäm DEBATA,
sihatam sipäto’ mentu’ issinna lino la tinggi’gi’ dio oloNa DEBATA.
9Aka ma’battakada DEBATA, iya dadi ingganna-ingganna sia;
umpalao pahenta, iya kende’ asam aka-aka.
10DEBATA umpompoi pattujunna ingganna kahajaam,
ullabai pa’pikki’na simesa-mesa kahajaam;
11sapo’ pattujunNa DEBATA takattu tintim tamondo’ sahuham sule lako salako-lakona,
pattuju penabanNa ma’tintingam lako ingganna lapi’ pessubum.
12Maupa’ anna katambasam kahajaam to muakui DEBATA mendadi Puang Allataala to napenombai,
maupa’ anna katambasam lako kahajaam to napilei mendadi umma’Na!
13Ma’petua’ DEBATA yabo mai suhuga,
ungkamanta-manta ingganna hupatau.
14Mennenne’ DEBATA yabo mai ongeam kamatandeanNa
umpetua’ mentu’ issinna lino.
15Ia umpadadi penabanna hupatau,
nabändä-bändäi ingganna pa’palakoanna.
16Taia budanna tentaha nasuhum patalo tomahaja,
taia kamatohoanna tentaha anna malai lappa’.
17Tä’ mala dihannuam daham la mepopatalo,
moinna anna tä’ deem pada samatoho, sapo’ tä’ la mala melangnga’i.
18Nakambi’ DEBATA ingganna to mengkahea’ dio oloNa,
anna to uhhannuam pangkaha’ pa’kamaseNa takattu tintim tamondo’ sahuham.
19Nalangnga’i dio mai kamateam,
anna nabanneiam salukatuboanna wattunna illaam kakobeam.
20Iam too anna la mahannungkia’ längäm DEBATA,
aka Ia to umpamoloikia’ anna muunta’ matoto’i!
21Ia nasuhum kende’ katilallasam illaam penabanta,
aka takatappa’i sanga masehoNa.
22La naundu’ dakam too napatette pangkaha’ pa’kamaseMu takattu tintim tamondo’ sahuham, DEBATA,
umba susi pahhannuangki matim oloMu.
34Pa’kambi’Na DEBATA
1Pampujiam napapia Daud, indo anna naägä’i lelenni umpasala-sala kalena dio olona Abimelekh, nasuhum nasua lao, lambi’ le’ba’.34:1 1Sam. 21:13-15.
2La umpujiä’ DEBATA illaam mentu’ wattu,
tala deem lappa’ dio mai pudu’ku kupuji kupa’kasallei.
3Penabangku umpa’kasallei DEBATA;
la nahingngi hi too to ussi’dim pandahhaam anna tialai inabanna.
4Maikoa’ tasola-sola pomatande DEBATA,
maikoa’ tapada-pada pa’kasallei sanganNa.
5Umpameää’ DEBATA, iya natimba’iä’,
anna nalangnga’iä’ dio mai mentu’ kamaheasangku.
6To umpahandam DEBATA la delle’ hupanna,
anna tala malea lindo tala bohho pa’todingam.
7Mengkaala längäm DEBATA inde to kaasi-asi, iya nahingngiam;
nalangnga’i dio mai ingganna kamasussaanna.
8Ingganna to mengkahea’ längäm DEBATA nalilim pali’ malaika’Na DEBATA najagai,
anna nalappasam dio mai katilakaam.
9Sändä’i anna pesi’dinnii maaka susi kamapiaam penabanNa DEBATA!
Maupa’ anna katambasam ingganna to mentuhehum lako kaleNa.
10Pengkahea’koa’ längäm DEBATA, o inggammua’ umma’Na,
aka to mengkahea’ tä’ ia deem la kakuhängam.
11Tadea’ asam ia singa kamatohoanna aka kakuhängam kinande;
sapo’ to umpameä DEBATA tä’ ia deem la kakuhängam.
12O inggammua’ änä’-änä’, pehingngiiä’,
aka la kupatudukoa’ mengkahea’ längäm DEBATA!
13Mennakoa’ maelo’ la tubo masannam,
anna maelo’ mahendem ussi’dingam kamasannangam?
14Jagai pudu’mu indana nakabuttui kada kadake,
anna tula’ la mantipu;
15pasikambelai kalemu kakadakeam ammu pogau’ kamapiaam,
peäi lalanna anna kende’i kasiolaam!
16Naandaham mata liu ia DEBATA to meada’,
anna nahingngiam liu ke mengkaalai.
17Sapo’ napobali ia DEBATA to umpogau’ kakadakeam,
tala dipahuaim suhi’ ke umpelleim lino.
18Maka’ mengkaala to meada’, la nahingngiam DEBATA,
anna nalappasam dio mai ingganna kamasussaanna.
19Sangkalamma’ DEBATA to masussa penaba;
anna umpaule penabanna to kattu hannu.
20Buda kamasussaam natammu to meada’,
sapo’ nalappasam DEBATA dio mai ingganna kaha-kaha ia too.
21Najagai liu DEBATA bätä puntinna,
moi la mesa bukunna tala deenni polo.
22To tameada’ la mate napobua’ gau’ kadakena,
anna to ungkabassi to meada’ la dipalambi’i pesämbä’.
23DEBATA ullangnga’i bätä sungnga’na ingganna sabua’Na,
anna ingganna to mentuhehum lako tä’ la napahuai pesämbä’.
35Sambajam umpelau pepamolo untingngajo bali
1Pampujiam napapia Daud.
O DEBATA, ebai to umbaliä’,
bundu’i to umbundu’ä’.
2Pakei unta’-unta’Mu anna unta’ kasalleMu,
ammu pengke’de’ pamoloiä’.
3Huntu’i dokeMu sola kassaimMu
ammu bali to umpadondoä’.
Pa’kadaKo mai muua:
<<Kaom too to ullappasangko.>>
4La malea lindo hi too anna dipakasihi’
indo to maelo’ umpateiä’.
La kasihisam tubo hi too anna soho’ boko’
to umpattujuannä’ kasägängam.
5La sihhapam di too pa’tappiam naliliam hibu’,
nahambai lao malaika’Na DEBATA.
6La malillim di too anna malubellu’ lalanna,
napadondo malaika’Na DEBATA.
7Aka napattiam bäbää’ pa’pemälängam tä’ deem lalanna,
anna natolombu bäbää’ la nasakka tä’ deem kasuhunganna.
8La tä’ di too deem nabai-bai anna nalambi’um katilakaam.
La ia hi too naala pa’pemälänganna,
la mehonno’ di too dokko tolombunna anna matei.
9Iya la mua’da’ä’ tilalla’ aka pa’pogau’Na DEBATA,
anna tiala inabangku aka nalangnga’iä’.
10Ma’kadaä’ sola sakalebu penabangku kuua:
<<O DEBATA, tä’ deem la umpapadaiKo!
UllappasangKo to malamma dio mai to matoho,
untässu’iKo to mase-mase anna to masussa dio mai to uhhappai.>>
11Mengke’de’ ingganna sa’bi to polima-limaanna umpogau’ kamakahhasam nabaliä’,
anna natanda’ä’ umpogau’ kaha-kaha takuissam laoanna.
12Gau’ mapiangku napabala’i gau’ kadake;
naputu’ä’ kakattuhannuam.
13Wattunna sikamasaki,
umpakeä’ poheba bahata anna mengkakobe;
ma’udum guntu’ä’ ma’sambajam,
14anggasanna solaku,
anggasanna solasubungku.
Lumukkuä’ ussahhoi,
anggasangku to ussahhoi indona aka mate.
15Sapo’ wattungku mehonno’, silele kassi tilalla’,
anna naleboä’ nabali.
To kadake gau’ takattu napakapi’di’ä’,
tamonda napetunaä’;
16kadäkke’ gau’na takattu natelleä’,
napatikahikkisannä’ isinna.
17La pada hia umba masäena, DEBATA, umpahandam-handam bäbää’?
Pesäkäiä’ kao dio mai pa’dake-dakena,
langnga’iä’ illaam mai alla’-alla’na inde lako singa.
18Iya la ma’kuhhu’ sumanga’mä’ too matim illaam limboam kasallena hupatau,
anna kupuji sangamMu illaam pa’mesaanna tau buda.
19Daa umpabäi ma’petaba lako kaleku
to umpobaliä’ tä’ deem kasuhunganna.
Daa umpabäi nabillisannä’ matanna
to ungkabassiä’ tä’ deem lalanna.
20Tä’ deem umpassubum tula’ kasiolaam;
silele umpattuju kamanekoam
lako to tubo siolaam illaam botto.
21Napetaba-tabaiä’ naua:
<<Pissi’ belekela’, kalambisangko pole’.>>
22Sapo’ puham muita, DEBATA. Daa ungkanonnä, o Debata,
daa ungkambelaä’.
23O Puang Allataala to kupenombai anna Debatangku, pellimbangongKo ammu pengke’de’ pa’kadaannä’,
hottosannä’ kaha-kahaku!
24O DEBATA Puang Allataala to kupenombai, undusannä’ lollä aka to maloloKo,
daa umpabäi balingku napetaba-tabaiä’.
25Daa umpabäi ma’kada illaam penabanna naua:
<<Pissi’, puhanna’ taamma’ kalebu.
Sule lakonna’ pa’pemulunta!>>
26La malea lindo hi too anna kasihisam
to tilalla’ muita kamasussaangku.
Pabäi dipetuna anna dipakasihi’
indo to malangka’ penaba dio oloku.
27La sikaahhe hi too tilalla’
to maelo’ muitaä’ dipellatteam diua tä’ deem kasalaangku!
La napa’sule-sulei hi too naua: <<Abana tä’ deem pada samatande DEBATA!
Napemulu la ussi’dim kamalinoam sabua’Na!>>
28Nasuhum tadipolo pudu’ tadiletto lila kupengkadaam kamaloloamMu,
anna kupujiKo kupa’kasallei pusam allo.
36Gau’ kadakena to tameada’ anna kamapiaam penabanNa Puang Allataala
1Lu lako to untetem to menani. Pampujiam napapia Daud, sabua’Na DEBATA.
2Ma’kada-kada dosa illaam unä’ penabanna to tameada’;
tä’ umpengkahea’i Puang Allataala.
3Si umpuji kalena,
nasuhum tä’ muissam kasalaanna anna tä’ napekadakeam.
4Angga kakadakeam anna kamanekoam messubum dio pudu’na,
tä’um deem ma’gau’ keaka’ anna ma’gau’ mapia.
5Umpattuju kakadakeam yabo petindoanna;
muola lalam kadake,
tä’ untumpu pala’ kakadakeam.
6O DEBATA, sondä’ längäm langi’ pangkaha’ pa’kamaseMu takattu tintim tamondo’ sahuham,
ussaleho’i gabum kamanontongamMu.
7KamaloloamMu anggasanna tanete handam malangka’,
undu’ lolläMu sihhapam le’bo’ mandalam.
Hupatau anna olo’-olo’ Iko ungkambi’i unjagai, DEBATA.
8Taditondom angga’na pangkaha’ pa’kamaseMu takattu tintim tamondo’ sahuham, o Puang Allataala!
Ingganna ma’hupatau mentiongam nakumbäi pani’Mu.
9Silele tanapuha-puha kinande illaam banuamMu,
anna umbeem uwai ihu’ battu diua kamapiaam ma’salu-salu buttu di Iko.
10Iko kalimbuäna katuboam,
Iko kabuttuanna kamasiäsam to kiongei muita kamasiäsam.
11Pa’patandaam liui pangkaha’ pa’kamaseMu takattu tintim tamondo’ sahuham lako to muissam manappaKo,
pa’paitaam liui kamaloloamMu lako to malolo penaba.
12Daa umpabäi bitti’na to malangka’ penaba napa’lullu’ä’,
daa umpabäi limanna to tameada’ nahambaiä’ lao.
13Petua’i, lumbum-lumbummi indo to umpogau’ kakadakeam,
napembantingam Puang Allataala lambisam tä’um nabela bangom sule.
37Kamasannanganna to tameada’ tä’ pakala anna malassom sihhapam humpu’
1Pampujiam napapia Daud.
Daa ummasaha penaba lako to tameada’,
daa ungkembuhu lako to tameada’.
2Aka tä’ tia pakala anna malassom sihhapam humpu’,
anna mabangim susi tanangam.
3Matappa’ko längäm DEBATA, anna pogau’ko kamapiaam,
tohhoko illaam indo botto anna tontä liuko manontom.
4Tillalla’ko aka DEBATA,
anna Iai umpasulelakoangko pa’pemulummu.
5Behoi sakalebu salukatuboammu längäm DEBATA, matappa’ko lako,
anna Iai ma’palako.
6La napa’patandaam DEBATA kamaloloammu pangkihha’ mesilo,
anna undu’ lollämu pangkähhä susi mata allo.
7Pomasannanni penabammu dio oloNa DEBATA, sa’baha’ko ampai pepamoloNa.
Daa uhhahu’ muita to masannam katuboanna,
battu haka to umpogau’ kamanekoam.
8Tähänni aha’mu, anna mondangko buhassuam,
aka anggam tia umpakende’ kakadakeam.
9Aka to umpogau’ kakadakeam la dipempa’deam,
sapo’ to mahannu längäm DEBATA la umpomana’ botto ia too.
10Tä’um la masäe anna pa’dem to tameada’;
maka’ dipeä lako ongeanna, tä’um deem dilambi’ dio.
11Sapo’ to mahempo penaba la untadongkonni botto ia too,
anna ussi’dim kamasannangam sanda silapi’.
12To tameada’ umpattujuam kakadakeam to meada’,
anna tikahikki’ isinna muitai.
13Sapo’ napetaba la’bai Debata indo to tameada’,
aka naissam naua muolam lalam buana gau’ kadakena tau ia too.
14Ussintä’ pa’danna to tameada’
anna umpasam bälä’du’na
la umpatei to mase-mase anna to masussa,
la umpakattu sungnga’ to meada’.
15Sapo’ la ia leko’ di nakumbali’ pa’danna,
anna dipolo-polo bälä’du’na.
16Masannam puha ia penaba untingngajo baham-baham saidi’na to meada’,
anna la baham-baham titombonna to tameada’.
17Aka dipolo-poloam limanna to tameada’,
sapo’ DEBATA la umpasukum to meada’.
18Napoissam DEBATA salukatuboanna to tubo maseho,
anna la naampuam liu indo mana’na dio mai DEBATA.
19Tä’ deem la nahuham longko’ illaam kamasippisam,
anna la bosa’ illaam wattu kakobeam.
20Sapo’ to tameada’ ia la ullambi’ kamateam,
balinNa DEBATA la mahakasa susi bunga-bunga lako kaliane,
anna la pa’de bäbä susi hambu.
21Indo to tameada’ si ma’indam anna tä’i naaku nabaja’,
sapo’ to meada’ ia ponno pa’kamase anna lempam pa’pakamaja.
22Menna-menna natamba’ DEBATA la untadongkonni indo botto namanasam DEBATA,
sapo’ to nahua tädoNa DEBATA la dipempa’deam.
23DEBATA umpomanontom pentekkana
to napohäe DEBATA katuboanna.
24Maka’ metobä, tä’ la sägä,
aka natette DEBATA limanna.
25Duam beluä’ kududum,
tä’pi deem kuita to meada’ la natampeam DEBATA,
battu haka pessubunna la kapala’-pala’ kinande.
26Si ma’pehabe’ liu anna ma’kamase,
ingganna änä’na mendadi tamba’ lako kalena.
27Pasikambelai kalemu kakadakeam ammu pogau’ kamapiaam,
iya la untadongkonnim too indo litä’ sule lako ampo-ampomu.
28Aka napohäe Ia DEBATA undu’ lollä,
anna tä’ deem untampeam to meada’ dio oloNa.
Nakambi’ liu sule lako salako-lakona,
sapo’ pessubunna to tameada’ la dipempa’deam ia.
29To meada’ la umpomana’ botto ia too,
anna la natadongkonni sule lako salako-lakona.
30Pudu’na to meada’ umpassubum kakeakasam,
anna lengko lilana umpengkadaam undu’ lollä.
31PaondonNa Puang Allataala to napenombai napaillaam penaba liu,
pentekkana tala lempä kanam tala lempä kaihi.
32To meada’ napaimatanna to tameada’
anna napeä lalanna la napatei.
33Sapo’ tä’ napabäi DEBATA la honno’ dokko pala’ limanna to tameada’,
tä’ toi napabäi la dipassala wattunna dihotto’.
34Mahannuko längäm DEBATA anna tuhu’i ulalanNa,
iya la naäkä’ungko too umpomana’ pa’bottoam ia too;
anna la muitako to tameada’ dipempa’deam.
35Deem kuita to tameada’ mata’go’-ta’go’,
mapi’dä’ katuboanna, sihhapam kaju tumalumbum dio botto ia too.
36Pissananna liui, iya ke pa’de bäbäm ia,
kupeä, sapo’ tä’um deem kulambi’.
37Petua’ siai too indo to ma’penaba sambulo-bulo anna to malolo penaba;
to umpohäe kasiolaam la mapia katuboanna illaam allo la naoloinna.
38Sapo’ to untekka pahenta DEBATA la dipatei;
anna katuboanna to tameada’ allo di dako’na la dipempa’deam.
39Nalangnga’i ia DEBATA to meada’,
anna nahindim illaam kamasippisam.
40Napamoloi anna nalappasam,
nalangnga’i dio mai pala’ limanna to tameada’,
aka Ia napentuhehunni.
38Sambajam illaam wattunna masaki
1Pampujiam napapia Daud napenaniam wattunna umbaba bua pemala’ anna mala nakilalai DEBATA.
2O DEBATA, illaam aha’Mu daa untappakadaiä’,
illaam aha’ kasalleMu daa umpassalaä’.
3Nalosa lappa’ä’ batu bälä’du’Mu,
tä’ deem pada samabanda’ katea’Mu muepe’ä’.
4La hubu’ asam kaleku napobua’ aha’ kasalleMu;
malussem bukungku napobua’ dosaku;
5nakabu’ ulungku kasalaangku;
sihhapam babaam mabanda’ nalokkonnä’.
6Bubosi kämbäku pe’nana,
aka natumä kamahoangku;
7ma’dongkoä’ la tihuku;
pusam allo mellaoä’ masussa penaba.
8Nakahammunniä’ pi’di’ äbä’ku,
La hubu’ asam kaleku;
9malu’bä’ kaleku anna dahi pukkolli’,
kangahe-ngaheä’ aka masussa penabangku.
10O DEBATA, muissam asam pa’pemulungku,
anna pengkaloa’ku lampa’-lampa’ asam dio oloMu;
11ma’gändä-gändä buaku, mäläi bukungku,
anna takuitam mennenne’.
12Ingganna sangkalamma’ku anna solaku napessalaannä’ aka sakingku,
anna mentu’na kasahapuangku nakambelaä’.
13Ingganna to mohäe umpakattu sungnga’ä’ napattiammä’ poja;
to maelo’ umpeängannä’ katilakaam, napikkisannä’ kasägängam,
anna napattujuannä’ kaha-kaha tatappa’ pusam allo.
14Sapo’ ma’binga-binga mändä’ sihhapam to binga tä’ pahingngi,
muammu’iä’ pudu’ku anggasanna to pepe tanaissam ma’kada.
15Abana, anggasangku si’da to tä’ pahingngi,
tä’ deem manteläi.
16Aka Iko kuhannuam, DEBATA,
Iko la mentimba’, Debata, Puang Allataala to kupenombai.
17Iya kuuam: <<Assala’na hia tää’i muäde-äde tilalla’ muita sussaku,
tä’ tumonga pundu dio oloku ke sala’ tä’dä’ä’!>>
18Aka saidi’mä’ tamehonno’,
anna nahimpi’-himpi’ pi’di’ kamasussaam;
19kuakuim ingganna kasalaangku;
masaha penabangku aka dosaku.
20Tä’ deem pada sabuda balingku anna matoho,
tä’ deem pada samekahea’-hea’ to ungkabassiä’ tä’ deem lalanna;
21napabala’i kakadakeam gau’ mapiangku,
napobaliä’ aka umpogau’ä’ kamapiaam.
22O DEBATA, daa untampeannä’,
o Puang Allataala to kupenombai, daa ungkambelaä’!
23Simpannii umpamoloiä’,
o Debata, to ullappasannä’!
39Sambajam umpelau pepamolo
1Lu lako to untetem to menani. Pampujiam napapia Daud. Lu lako Yedutun.
2Kuua: <<La unjagaiä’ kaleku,
indana lengko lilaku umbabaä’ lako kamadosaam;
la ungkambuä’ pudu’ku,
ke lakopi ampe’ku to tameada’.>>
3Untutu’iä’ pudu’ku mengkamma’
tapandiu-diu, moi la kamapiaam tala kutula’i;
sapo’ tuttuam mabanda’ di sussaku.
4Suhhä’ buaku,
sundällä’ sihhapam api wattungku kabenga’-benga’;
ma’kadamä’ kuua:
5<<O DEBATA, paissanniä’ piham lambi’ kanna bunu’ku,
anna pada umba lämpä’ku,
anna mala kuissam kuua liu lalam katuboangku!
6Mannassa, anggam sanaka däkänna umpa’tantu katuboangku;
situhu’ Iko, tama’battuam masäena katuboangku.
Mannassa, ingganna hupatau sihhapam hibu’ tibussau! Sela
7Anggam liu lalam tikalibajo!
Bassa’ takehubä’;
untombom kulle di lino, sapo’ tä’ naissam menna la umpota’genai dako’.
8Tentomai, akam la kupemmitai, Debata?
Anggam Iko hannuangku.
9Lappasannä’ dio mai ingganna gau’ kusala basaba kulenda,
daa umpabäiä’ napetuna to maho kalebu!
10Mengkamma’ä’ kututu’i pudu’ku,
aka ma’kaleKo ma’palako.
11Patohhom pesämbä’Mu lako kaleku,
dahi pukkolli’ä’ nadanta’ limamMu.
12UntappakadaiKo hupatau
umpassala aka kasalaanna,
umpadahi kapu’ ingganna napohä’di’na, sihhapam naande panapu’;
mannassa, katuboanna hupatau sihhapam hibu’ tibussau. Sela
13Pehingngii sambajangku DEBATA,
patanannii talinga pengkaalaangku umpelau pepamolo,
daa umpahandam-handam bäbää’ wattunna tumahämpä’ uwai matangku!
Aka messihuhuä’ dio oloMu,
to suleä’ susi nene to kuponene.
14Pasalaiä’ mata keaha’Mu,
anna mala kassiä’ tilalla’
yolona anna la kutampeam inde lino anna tä’mä’ deem la diita pole!>>
40Penaniam pampujiam anna sambajam
1Lu lako to untetem to menani. Pampujiam napapia Daud.
2Sa’baha’ä’ umpemmitai DEBATA;
lambisam natingngajoiä’ anna nahingngiam pengkaalaangku.
3Naangkahannä’ dio mai gahoä mandalam,
dio mai pullam mapullu’;
napake’de’ä’ yabo tanete batu,
napasitontongam pentekkaku.
4Napakende’ penaniam bakahu dio pudu’ku,
penaniam pampujiam längäm Puang Allataala to tapenombai.
Buda tau ussa’bii anna mengkahea’,
lambisam mahannu längäm DEBATA.
5Maupa’ anna katambasam
to mahannu längäm DEBATA,
to tä’ mahannu lako to malangka’ penaba,
tä’ mengngolo lako to muundu’i kamanekoam.
6O DEBATA, Puang Allataala to kupenombai, buda punalam puha umpogau’,
pa’pogausam memängä-mängä anna pattujumMu lako kami’.
TadisihanteangKo tadisipadai!
Mohäeä’ la kutula’ anna kupa’paissangam,
sapo’ buda sugali’ bilanganna.
7Tä’Ko umpohäe tunuam anna kinande dipemalasam,
sapo’ Iko umpatitungkasannä’ talingangku;
tunuam ditunu mampu’ anna tunuam pebasei dosa tä’ umpemmitai.
8Mane ma’kadaä’ kuua: <<Pennassai, sulemä’;
illaam suha’ tilulum deem tituli’ diona kaleku;
9Kupohäe umpalako pa’elo’Mu, o Puang Allataala to kupenombai;
PaondomMu tianna mana’ illaam penabangku.>>
10Kupa’paissangam kamaloloam
illaam hempungam kasallena umma’Mu;
tä’ kututu’i pudu’ku,
umba susi puha muissam DEBATA.
11KamaloloamMu tä’ kuammu’i illaam penabangku,
kamanontongamMu anna pallangnga’imMu kupengkadaam,
pangkaha’ pa’kamaseMu takattu tintim tamondo’ sahuham anna kamanontongamMu tä’ kupengkammasam
illaam hempungam kasallena umma’Mu.
12O DEBATA, daa untähänni pa’häntängam buaMu lako kaleku;
la tontä liu hi too naonganniä’ pangkaha’ pa’kamaseMu takattu tintim tamondo’ sahuham anna kamanontongamMu!
13Napali’ tintinnä’ katilakaam,
tadikemba’ dihekem bilanganna.
Napadondo mäne’-mäne’ä’ kasalaangku,
lambisam tamalamä’ mennenne’;
buda puha ia bilanganna anna la beluä’ yabo ulungku,
nasuhum kattu hannumä’.
14O DEBATA, kela mala ullangnga’iä’,
o DEBATA, simpannii umpamoloiä’!
15La kasihisam di too anna bahakäpäm
ingganna to mohäe la umpakattu sungnga’ä’;
la ma’saha boko’ di too anna malea lindo
to umpeängannä’ tuntungam su’be’ nadakasam pa’posanga-sanga!
16La tippallem di too buana anna masihi’
ingganna to muuaannä’: <<Pissi’, belekela’!>>
17La kassi hi too anna tilalla’ ingganna to umpameäKo,
aka Iko nasuhum;
la ma’kada hi too mentu’na to umpohäe kalappasam buttu di Iko naua:
<<Matande DEBATA!>>
18Kao inde mehio-hio anna kaasi-asi,
sapo’ naandaham mata liuä’ Debata.
Iko to mepamoloingku anna to ullangnga’iä’,
o Puang Allataala to kupenombai, daa muanda bale’i!
41Sambajam umpelau kabonosam
1Lu lako to untetem to menani. Pampujiam napapia Daud.
2Maupa’ anna katambasam to umpikki’ to mase-mase;
la nalangnga’i DEBATA illaam wattu kamasippisam.
3DEBATA la ungkambi’i bätä puntinna anna napaliaha bätä sungnga’na,
la napomasannam illaam botto litä’na,
tä’ nabeho la napoelosam elo’ balinna!
4DEBATA sussaheanna dio petindoanna wattu masaki,
napatibangom sitonda kamaläpusam dio mai kamasakianna.
5Sapo’ kao-kao, kuua: <<Kamaseiä’ DEBATA,
pabono’i sakingku, aka madosaä’ lako kaleMu!>>
6Napelalanniannä’ kakadakeam balingku naua:
<<Kela matem, anna pada pa’dei sanganna.>>
7To sule muolläiä’, tä’ sule tama penabanna;
deem dia pattuju kadakena,
mane le’ba’i napobungam bibi lako dio mai.
8Ingganna to ungkabassiä’ sikabisi’ natula’ kadakeä’,
napelalanniannä’ kakadakeam naua:
9<<Natappai saki tanggana-gana,
metindona too, siotto’um petindoanna.>>
10Meangga sassipakamajangku to handam kukatappa’i,
to kupasola mangngande,
napenggihi’imä’ la nalappi’.
11Sapo’ Iko DEBATA, kamaseiä’ anna patibangonnä’,
anna mala kupabala’i gau’ kadakena.
12La kuissammi too kuua,
umpohäeä’ DEBATA,
ke tää’i umpabäi balingku nataloiä’.
13Sapo’ kao-kao, Iko samba’ matoto’ku aka unä’ penaba sambulo-buloku,
Iko umpake’de’ä’ matoto’ dio oloMu sule lako salako-lakona.
14Dipuji dipa’kasallei DEBATA, Puang Allataala to napenombai to Israel,
mengkalao dio mai sule lako salako-lakona!
Amin, Amin!
42Suha’ Kaduanna:
Muinaba-naba Puang Allataala
1Lu lako to untetem to menani. Penaniam pepatuduam napapia pessubunna Korah.
2Umba susi jonga muinaba-naba uwai salu,
susim too duka’ sungnga’ku muinaba-nabaKo, o Puang Allataala.
3Mabähhäm sungnga’ku lako Puang Allataala,
lako Puang Allataala DEBATA tubo.
Piham dia malaä’ sule
silindo Puang Allataala?
4Sitammi’ä’ uwai matangku
allo anna bengi,
aka allo-allo ma’kada balingku lako kaleku naua:
<<Umba hi Puang Allataala to umpenombai?>>
5Indem ia la kupaalai penabangku,
inde mahassam masussa penabangku:
si kuaka susi mellao indo lessu’ lako olona tau sipina’-pina’,
umpendioloanganni le’ba’ tama banuanNa Puang Allataala
dipasindum muahhe tilalla’ anna umpenaniam penaniam pa’kuhhusam sumanga’,
illaam pa’hame-hameanna tau buda umpakahoa’ allo kasalle.
6O penabangku, akanna masussako?
Akanna tahapa’ko kusi’dim?
Mahannuko längäm Puang Allataala! Aka la ma’kuhhu’ sumanga’ omä’ sule dio oloNa,
to ullangnga’iä’ anna Puang Allataala to kupenombai!
7Mahusa’ penabangku kusi’dim,
nasuhum tihaka’ä’ matim oloMu,
moi dioä’ lembäna Yordan, anna yabo Tanete Hermon,
moi yaboä’ Tanete Mizar.
8Tä’ deem kattu natalappi’ä’ kahusasam,
sihhapam pälämpä kasalle
natalappi’ä’ kamasussaam,
sihhapam tibusona mala’bu’ masambam.
9DEBATA ussua pangkaha’ pa’kamaseNa takattu tintim tamondo’ sahuham wattu masiä,
anna wattu bengi umpenggamahaannä’ penaniam,
ma’hupa sambajam längäm Puang Allataala too’na katuboangku.
10Ma’kadaä’ längäm Puang Allataala buntu batungku kuua:
<<Akanna umpa’kalembeimä’?
Aka hia anna nahuaä’ sussa tanggana-gana,
inde napakamase-maseä’ balingku?>>
11Sihhapam doke pamoso nabuno sule tama buaku,
natelleä’ nasassai balingku,
allo bengi ma’kada naua:
<<Umba hi Puang Allataala to umpenombai?>>
12O penabangku, akanna masussako?
Akanna tahapa’ko kusi’dim?
Mahannuko längäm Puang Allataala! Aka la ma’kuhhu’ sumanga’ omä’ sule dio oloNa,
to ullangnga’iä’ anna Puang Allataala to kupenombai!
431O Puang Allataala, undusannä’ lollä,
pekkalundanganni kaha-kahaku
lako hupatau to tameada’!
Langnga’iä’ dio mai to manipu anna mateko!
2Aka Iko Puang Allataala bettem matoto’ku kuongei mentuhehum.
<<Akanna untibemä’?
Aka hia anna nahuaä’ sussa tanggana-gana,
napakamase-mase balingku?>>
3Pasulei kamasiäsamMu anna kamaloloamMu,
anna mala natetennä’,
anna napatette längäm tanete masehoMu,
ongeam tadongkongamMu!
4Lambi’ malaä’ tinanda lako dapo’ pehumalasam längäm Puang Allataala,
mengngolo lako Puang Allataala kabuttuanna kakassiangku anna katilallasangku,
anna ma’kuhhu’ sumanga’ä’ matim oloMu kupasindum ma’katapi,
o Puang Allataala, Puang Allataala to kupenombai!
5O penabangku, akanna masussako?
Akanna tahapa’ko kusi’dim?
Mahannuko längäm Puang Allataala! Aka la ma’kuhhu’ sumanga’ omä’ sule dio oloNa,
to ullangnga’iä’ anna Puang Allataala to kupenombai!
44Pengkaloa’na to nahimpi’-himpi’ pi’di’ kamasussaam
1Lu lako to untetem to menani. Penaniam pepatuduam napapia pessubunna Korah.
2O Puang Allataala, kihingngim sola talingangki,
puha napaondongangkam nene to kiponene
diona pa’pogausamMu to puha umpalako wattunna linonaipi,
wattu lino yolo.
3Ma’kale limamMu uhhisi lao buda kahajaam,
anna umpatadongkonnii neneki botto litä’na;
simesa-mesa kahajaam undappo’i,
sapo’ neneki, ma’tällä matoosam ma’abo’ mahapuam.
4Taia mataham napake lambi’ natadongkonni inde pa’bottoam;
taia kamatohoam katea’na umbeenni kapataloam,
sapo’ katea’ bassimMu katea’ tabimMu, anna pangngähhäna lindo mamaseMu,
aka masannam penabamMu lako.
5Ikom too Tomahajangku anna Puang Allataala to kupenombai,
to umpa’tantu kapataloanna pessubunna Yakub.
6Iko nasuhum umpasosso’kam mentu’ balingki,
sangamMu nasuhum kilullu’ pahe käppi’ ingganna to mengke’de’ umbundu’kam.
7Aka taia bälä’du’ku kuhannuam,
taia pa’dangku umbeennä’ kapataloam,
8sapo’ Iko umbeengkam kapataloam lako mentu’ balingki,
anna ingganna to ungkabassikam umpakasihi’.
9Nasuhum kipa’kassiam Puang Allataala allo sibala’ allo,
anna la kipuji sangamMu sule lako salako-lakona. Sela
10Sapo’ temo, untibengkam anna umpakasihi’,
tä’ungKo ussahum mentu’na tentahaki illaam pa’bundusam.
11Iko nasuhum ma’sohoboko’kam dio mai balingki,
anna ingganna to ungkabassikam mamuhu.
12Umpebeengkam sihhapam domba la ditunu,
anna umpatisembu’ dalle battekam lako buda kahajaam.
13Umbalu’ tasihua’-hua’Ko umma’Mu,
anna tä’ deem kauntungam muala illaam mai.
14Umpadadikam napetuna botto salembangangki,
napetaba-tabai anna natelle to ulilingkam.
15Umpadadikam petabaanna buda kahajaam
silele muilim-ilim ma’piu’.
16Pusam allo umpendudunnä’ sihi’,
malea lindo bohho pa’todingam,
17uhhingngi tula’ pantelle anna pa’petuna
messubum dio pudu’na bali anna to ma’patumpui.
18Ingganna ia too puha asammakam nahua, sapo’ tä’Ko deem dipa’kalembei,
anna tä’ deem kitekka pa’dandiamMu.
19Tä’ deem lempä penabangki dio mai oloMu,
tä’ deem tieli’ lingkaki dio mai ulalamMu,
20sapo’ umpadahi kapu’kam dio ongeanna serigala,44:20 dio ongeanna serigala: Mala duka’ diua, mendadi ongeam maitu-itu.
anna umpasapu’ikam kamalillingam.
21Hapanna umpa’kalembeikam sanganNa Puang Allataala to kipenombai,
anna ma’balla’ pala’ lakokam debata senga’,
22tä’ daka tia la nalosa siam Puang Allataala?
Aka Ia ullosa limbä untahhu’ mandalam!
23Manete tondom pisokam allo-allo kahana kituhu’Ko,
dipasusingkam kami’ domba la ditunu.
24Milli’Ko! Akanna mamma’ dako Iko, Debata?
BangongKo! Daa untibe tahhu’kam!
25Akanna umpemboko’ikam,
anna umpa’lembe-lembei pi’di’ki anna pandahhaangki?
26Diongkam ba’ba talumbä,
la lendu’um penabangki.
27Pengke’de’Ko, ammu pamoloikam,
lappasangkam aka pangkaha’ pa’kamaseMu takattu tintim tamondo’ sahuham!
45Kelom pantede wattunna kebaine tomahaja
1Lu lako to untetem to menani. Situhu’ ajanganna penaniam: Bunga bakung. Penaniam pepatuduam napapia pessubunna Korah. Kelom pannia’.
2Lempam kada pantede illaam penabangku,
la kupalanda’ tula’ pantono’ kaleku lako tomahaja;
lengko lilaku sihhapam petuli’na to majatta mantuli’.
3Iko handam maleke illaam alla’-alla’na hupatau,
mahambem malute pessubungam pudu’mu,
nasuhum natamba’ko Puang Allataala sule lako salako-lakona.
4Takinni pa’dammu o tomahaja pa’bahani,
illaam kamatandeammu anna kamasokangammu!
5Illaam kamasokangammu, pa’dahangko ammu patalo lambi’ titande kamaloloam,
kamahammesam anna undu’ lollä!
Katea’ bassimmu umpaitaiko pa’pogausam mepilla’-pilla’!
6Bälä’du’ massa’di’mu, ullosa lappa’ ba’ba buana balimmu;
buda kahajaam tiampa’ dio olomu.
7O Puang Allataala, okkosam kahajaamMu la tontä liu sule lako salako-lakona,
tekkem dipappa’Mu, tekkem muundu’ kamaloloam.
8Umpohäeko kamaloloam anna ungkabassiko kakadakeam;
iam too nasuhum nalanti’ko Puang Allataala, Puang Allataala to umpenombai,
natolloi minnä’-minnä’ to umpasundede buamu, untondom ingganna solamu.
9Mentu’ pohebamu bubanau’ susi mur, gaharu, anna cendana;
dihingngi humiti’ katapi illaam mai banua tadongkonganna tomahaja dibelo-beloi toha gaja umpatiala inabammu;
10illaam alla’-alla’na baine to dikasalleam tadongkom sanaka-naka baine änä’na tomahaja,
dio tandai kanammu ke’de’ baine tomahaja ma’poheba dibelo-beloi bulabam buttu dio mai Ofir.
11O änä’ daha, pehingngii, paalai penaba, anna patanannii talinga tula’ku,
pasalai pikkiham botto litä’mu anna mentu’ kasahapuammu!
12La kende’ di too elo’ bunga-bunganna tomahaja aka kamapiaanna hupammu.
Ia puämu, penombako dio olona!
13Sule änä’ daha dio mai Tirus45:13 änä’ daha dio mai Tirus: Kalembasanna, issinna Tirus. umbaba pa’lalam penabanna,
deem to makaka illaam alla’-alla’na maelo’ la naala penabammu.
14Mekuhita’ indo änä’ daha to la napobaine tomahaja la mentama banua tadongkonganna tomahaja,
ma’poheba disumma’ bulabam;
15ma’poheba sanda dio hupanna, dipasola mengngolo lako tomahaja;
natuhu’ buda änä’ daha, änä’ daha sabainena,
la tinanda lako olona.
16Sikaahhe tilalla’ dipasola lao,
dipasola mentama banua tadongkonganna tomahaja.
17Ingganna pessubummu muane la umpessulle okkosam kahajaanna nene to umponene;
la muäkä’ mendadi to kuasa senambo lino.
18La kupakaleleam sangammu lako ingganna lapi’na hupatau,
nasuhum ingganna kahajaam napujiko napa’kasallei sule lako salako-lakona.
46Puang Allataala hindim batu papa uhu
1Lu lako to untetem to menani. Pampujiam napapia pessubunna Korah. Penaniam. Situhu’ ajanganna penaniam: Alamot.
2Puang Allataala pentuhehunganta anna kamatohoanta;
tatilio-lio matanNa mepamoloi illaam kamasippisam.
3Nasuhum tala häntäki’ tala sumojä, moi la kakemba-kemba lino,
moi la tallam tanete dokko le’bo’;
4moi la magaluntu’ uwai le’bo’ anna tilulum bombam,
moi la pahundam tanete nata’du. Sela
5Pallessä’inna mesa salu umpatiala inabanna
kota tadongkonganNa Puang Allataala, ongeam maseho naongei tohho To Handam Matande,
6Puang Allataala tadongkom illaanna, tatige’ge’ tatigesse kota ia too;
napamoloi Puang Allataala ke tibukka’um baja.
7Mahamba buda kahajaam, tigego’ simesa-mesa kahajaam;
umpa’pahingngiam gamahanNa Puang Allataala, lambisam mahehe pallam lino.
8DEBATA to ungkuasai langi’ anna lino passappi’ matoto’ta,
Puang Allataala to napenombai Yakub hindim batunta papa uhunta. Sela
9Maiko, petua’i pengkähäNa DEBATA,
DEBATA to umpadahi kapu’ lino,
10Umpamonda kasianu-anuam illaam lino,
umpolo-polo bälä’du’, uhheppo’-heppo’ doke,
untunu mampu’ ingganna unta’!
11Ma’kada naua: <<Mattangkoa’ ammu pengngissannii, Kaom too inde Puang Allataala!
La dipomatandeä’ illaam alla’na buda kahajaam, la dipomatandeä’ illaam lino!>>
12DEBATA to ungkuasai langi’ anna lino passappi’ matoto’ta,
Puang Allataala to napenombai Yakub hindim batunta papa uhunta. Sela
47Puang Allataala, Tomahajanna senambo lino
1Lu lako to untetem to menani. Pampujiam napapia pessubunna Korah.
2O inggannakoa’ hupatau, pa’sappa-sappakoa’,
sikaahhe tilalla’ menggamaha lako Puang Allataala!
3Aka DEBATA To Handam Matande, tä’ deem pada samepapilla’ memängä-mängä,
Tomahaja Matande umpahenta senambo lino.
4Untaloi buda kahajaam napadokko lisu pala’ta la takuasai,
mentu’na kahajaam napadio pehhondoam bitti’ta.
5Napileiangki’ botto litä’ la tapomana’ ma’tintingam,
umpasundede buana pessubunna Yakub to napakamaja. Sela
6Puang Allataala längäm ongeam kamatandeanNa natuhu’ to sikaahhe tilalla’,
DEBATA nalahu to umponi sangkakala.
7Penanikoa’ puji Puang Allataala, penaniangkoa’ pampujiam,
penanikoa’ puji Tomahajanta, penaniangkoa’ pampujiam!
8Aka Puang Allataala Tomahajanna senambo lino,
penanikoa’ penaniam pepatuduam!
9Puang Allataala tomahaja umpahenta ingganna kahajaam;
Puang Allataala untadongkonni okkosam kahajaanNa tangkapohasam tangkabissisam.
10Ingganna to palumbängam lako simesa-mesa kahajaam ma’hempum
mendadi umma’Na Puang Allataala to napenombai Abraham.
Aka Ia umpuängam mentu’na to uhhindim hupatau illaam lino;
Puang Allataala tä’ deem pada sadipomatande.
48Sion, kota tadongkonganNa Puang Allataala
1Pampujiam napapia pessubunna Korah. Penaniam.
2Tä’ deem pada samatande DEBATA, anna tä’ deem pada sadipa’kasallei
illaam kota tadongkonganNa Puang Allataala to tapenombai!
3Tanete masehoNa, malangka’ mapia,
umpatiala inabanna senambo lino;
Tanete Sion, dio tandai utara,
kota tadongkonganNa Tomahaja Matande.
4Dio bettenna,
Puang Allataala umpa’paissangam kaleNa mendadi bettem matoto’na.
5Petua’i, ussahandanni kada buda tomahaja,
sasuleam la ma’bundu’;
6tappana muita bettenna kota, silele pilla’ mängä-mängä,
tikkedu’, lambisam sikalumpa’ taia inabanna.
7Silele lumalla’ mahea’;
hässä’ lindona, anggasanna to mangnguhiba’,
8umpadahi kapu’,
sihhapam kappala’ Tarsis natappi hibu’ tandai mata allo.
9Umba susi puha tahingngi sola talinganta, taita sola matanta,
illaam kota tadongkonganNa DEBATA to ungkuasai langi’ anna lino,
illaam kota tadongkonganNa Puang Allataala to tapenombai;
nasamba’ napasukum sule lako salako-lakona. Sela
10O Puang Allataala, kipasalui penaba pangkaha’ pa’kamaseMu takattu tintim tamondo’ sahuham,
illaam ongeam masehoMu.
11O Puang Allataala, umba susi sangamMu kaleleam illaam lino, susim too duka’ dipujiKo dipa’kasallei
sule lako lili’na lino;
katea’ bassimMu unte’geham kamaloloam.
12Pahallu umpakende’ kakassiam Tanete Sion;48:12 Tanete Sion: Kalembasanna issinna kota Yerusalem.
pahallu umpakende’ katilallasam to untadongkonni Yehuda,48:12 to untadongkonni Yehuda: Naua illaam basa Ibrani, änä’ daha Yehuda.
aka muundu’Ko lollä uhhotto’ hupatau!
13Lilinnii Tanete Sion, penggulilinnii lao pali’,
ammu hekenni lempo pahhondaanna,
14petua’i tembo’na,
pahessai bettenna,
anna mala muissam untulasam pessubummu allo di dako’na muua:
15<<Iam too inde Puang Allataala,
Puang Allataala to tapenombai sule lako salako-lakona!
Iam too umpatettekia’ upu’ lino.>>
49Labu’ kamasannangam di lino
1Lu lako to untetem to menani. Pampujiam napapia pessubunna Korah.
2Patananniia’ talingammu, o inggannako hupatau,
palempei sulim patomalimmu, o mentu’nako issinna lino,
3susi to bahinni’ teem to kasalle,
susi to mase-mase teem to makaka tä’ deem se’lana!
4Pudu’ku la umpassubum tula’ ponno kakeakasam,
issi penabangku mebeem kapaissangam.
5La kupatananni talinga tula’ to keaka’,
la kupomasiä’ kalembasanna kada passelonni kupasindum ma’katapi.
6Akanna la mahea’ä’ muoloi wattu kamasussaam,
wattunna nalimbu tamaä’ balingku to tameada’,
7to umpopa’attaham katomakakaanna,
anna umpa’kassiam kulle budanna?
8Tä’ deem moi podo la mesa tau la mala ussolom solana,
battu haka la ullombunni sungnga’na dio oloNa Puang Allataala.
9Aka tä’ deem pada samasuli’ pelombunninna sungnga’,
moi la aka tala malai disolongam,
10lambi’ tubo sule lako salako-lakona,
lappa’ dio mai ba’ba talumbä.
11La nakannassai, naua: to keaka’ naande kamateam,
to maho anna to takepikkiham, pada-pada naande kamateam,
anna ingganna kulle pa’tampena la napota’gena tau senga’.
12Ku’bu’nam la napobanua sule lako salako-lakona,
la naongei tohho situngguam;
ingganna litä’na yolona nakona mandam.
13Sapo’ moi la umba susi katomakakaanna hupatau, tä’ siam la da’da’ liu;
la pa’de siam umba susi olo’-olo’ mate.
14La susim too ullambi’i to uhhannuam kamatohoam kalena,
katihotosanna to umpopa’attaham pangngoko di tambu’na. Sela
15Susi domba, sangngim tinanda lako kaliane anitu,
nakuasai kamateam;
la nadakka’ to meada’ wattu mebengngi’,
bosi bätä puntinna dio ongeam to mate,
sikambelam ongeam kamasannanganna.
16Sapo’ Puang Allataala la ullangnga’i sungnga’ku,
dio mai pantakka’na kaliane anitu,
napatinanda dio olo kamatandeanNa. Sela
17Daa ummahusa’ ke tomakakai mesa tau,
anna tuttuam längäm katuboanna illaam dapo’na,
18aka matei too tä’ siam la umbaba katomakakaanna,
tä’ siam la umbaba kullena lako ku’bu’.
19Moi la masannam katuboanna inde lino,
moi la napakate’de’ hupatau
aka manähä ussalu salukatuboanna,
20sapo’ la tinanda siam duka’ lako ongeanna nene to naponene,
tala deemmi muita pole paindona masiä sule lako salako-lakona.
21Hupatau to ponno yabo ponno dio, sapo’ tamuissam se’la,
la pa’de siam, umba susi olo’-olo’ mate.
50Bua pemala’ tungka ianna
1Pampujiam napapia Asaf.
Puang Allataala, DEBATA To Handam Kuasa ma’battakada untambai issinna lino,
mengkalao illaam mata allo sule sau’ katampusam.
2Yabo Tanete Sion, ongeam mekuhita’ mapianna,
diita Puang Allataala pangkähhä mesilo.
3Sule Puang Allataala to tapenombai, anna tä’ sule kanonnä bäbä,
mellelo api dio oloNa,
nalilim pali’ talimpuhu’ masambam.
4Metamba längäm langi’,
meoli lako lino la mendadi sa’binNa uhhotto’ umma’Na.
5Ma’kada naua: <<Popa’mesannä’ dio oloKu ingganna hupatau to manontom lako kaleKu,
to puha kusitallisam napomannassa tunuam!>>
6Langi’ umpa’patandaam kamaloloanNa Puang Allataala,
aka Ia ma’kale to mahhotto’. Sela
7<<O mentu’nako umma’Ku, patanannii talinga, la ma’battakadaä’,
o to Israel pehingngii, Kao la mendadi sa’bi diona kalemua’;
Kaom too inde Puang Allataala, Puang Allataala to umpenombai!
8Taia kahana tunuammu napolalam kupassalako;
taia kahana tunuam ditunu mampu’ tamonda takattu umpehumalasam dio oloKu.
9Tä’ kupahalluam sapim laki illaam lentommu,
battu haka beke laki illaam bala tanamu,
10aka Kao puäna ingganna olo’-olo’ illaam pangngala’,
anna mentu’na patuboam längäm massa’bu-sa’bu tanete.
11Kulise’-lisesanni dassi längäm tanete,
anna ingganna menabanna lako kaliane Kao umpuänganni.
12Hapanna la tadea’ä’, tä’ manggi’ kutulasangko,
aka Kao puäna lino sitonda issinna.
13Bale sapim laki isanga si kuande?
Haha beke laki isanga si kuihu’?
14Pakende’ko pa’kuhhusam sumanga’ mendadi bua pemala’mu längäm Puang Allataala,
anna lendu’iko hempe pudu’mu längäm To Handam Matande.
15Pengkaalako mai ke illaangko kamasippisam,
la kulappasammako too, lambisam umpomatande sangangKu.>>
16Sapo’ lu lako to tameada’ ma’battakada Puang Allataala naua:
<<Aka umpolalam umpa’tula’-tula’ kada kupandam,
anna umpobungam bibi pa’dandiangKu?
17Aka untumpu pala’ko pepanännä’Ku,
anna umpaiboko’na battakadangKu.
18Maka’ solako to maboko, mabokoko duka’,
anna sangkalama’ko to ullullu’ pa’bannetauam.
19Umpobungam bibi tula’ kadake,
anna umbungkeko’ko lilamu.
20Angga ungkähä untula’-tula’ kadake solasubummu,
anna umpakolo’-kolo’i siundu’mu.
21Susim too panggauammu, sapo’ kupengkamma’i mandako;
ussanga hiko la susi siangki’.
La kupassalako, anna la kulapisanni inde kaha-kaha dio olomu.
22Paalai penaba inde tula’ku, o inggammua’ to umpa’pa’dei Puang Allataala;
indana kubiti’-biti’ko, anna tä’ sia deem la umpesäkäiko.
23Menna-menna umpakende’ pa’kuhhusam sumanga’ mendadi bua pemala’na, iam too umpomatande sangangKu;
menna-menna muola lalam malolo,
la kupaitai kasalamasam buttu di Kao Puang Allataala.>>
51Sossoam gau’ tingkosam basaba
1Lu lako to untetem to menani. Pampujiam napapia Daud, 2wattunna natappakadai nabi Natan aka ungkamahoi Batsyeba.51:2 2Sam. 12:1-5.
3O Puang Allataala, kamaseiä’, situhu’ pangkaha’ pa’kamaseMu takattu tintim tamondo’ sahuham,
sapuiannä’ gau’ kusala basaba kulenda situhu’ kasallena pa’häntängam buaMu!
4Pomapattinni kaleku dio mai mentu’na kasalaangku,
pomaseho pindannä’ maunna’ pebajoam dio mai ingganna dosaku!
5Aka kilala to tumbämä’ tiu’dam to malangngi’ diona kasalaangku,
napopetindo kuli’ kamihiä’ dosaku.
6Lu lako kaleMu, anggam lu lako kaleMu kuongei madosa,
anna kupogau’ indo umpekadakeanna.
La makaleso diua maloloKo ke ma’passalaKo,
tama’bija tama’sangngana’ pahhotto’Mu.
7Setonganna, silolennä’ kasalaam didadiam,
anna sitimä dosa illaam tambu’na indoku.
8Setonganna, umpohäeKo kamaloloam illaam penaba,
Iko umpatitanam kakeakasam illaam penabangku.
9Pomaseho pindannä’ dio mai dosaku umpake hisop,51:9 hisop: Sahhupa humpu’ si tubo dio Israel, biasa si diala anna dihammei dokko uwai battu haka haha olo’-olo’, anna dipippi’ianni baham battu haka hupatau anna mala mapattim situhu’ peadasanna to Yahudi. angku mala mapattim,
pomaunna’ pebajoannä’ dio mai kasalaangku, angku mala mabusa susi kapa’!
10Kupemala la uhhingngi kakassiam anna katilallasam,
kupemulu la umpakende’ sule katilallasam, kao inde to puha umpolo-poloam bukungku!
11Daa umpahandam mentu’na dosaku,
sapuiannä’ ingganna kasalaangku!
12O Puang Allataala, sehoiannä’ penabangku,
patamaiä’ sule penaba manontom!
13Daa untibeä’ dio mai oloMu,
anna daa muäläi Penaba MasehoMu illaam mai kaleku!
14Pakendesannä’ sule katilallasangku aka kasalamasam buttu di Iko,
anna pasandeiä’ penaba kaahusam!
15Iya la kupa’patuduammi too ulalamMu lako to umbaliKo,
anna mala ingganna to umpogau’ dosa ma’pasule matim oloMu.
16O Puang Allataala, Puang Allataala to ullappasannä’,
langnga’iä’ dio mai dosa umpatitollo haha,
iya la tika’bi’um too lilaku kassi anna tilalla’ umpengkadaam undu’ lolläMu!
17O Debata, patibukkannä’ pudu’ku,
anna mala tika’bi’ lilaku kupujiko kupa’kasallei!
18Aka tä’Ko umpohäe tunuam,
hapanna la kupehumalasam dio oloMu;
tä’Ko umpohäe tunuam ditunu mampu’.
19Penaba pässä’ hia, mendadi tunuam pemala’ dio oloNa Puang Allataala;
sossoam gau’ anna tingkosam basaba
tä’ untumpu pala’, o Puang Allataala.
20La masannam di too penabamMu ma’pogau’ mapia lako Tanete Sion,
pake’de’i sule bettem batunna kota Yerusalem!51:20 kota Yerusalem: Indo kota Yerusalem yabo Tanete Sion. Iam too anna maka’ diua: Tanete Sion, iya tontäm ke diuai kota Yerusalem.
21Iya la masannammi too penabamMu untahima bua pemala’ la sihatanna,
tunuam ditunu mampu’, tunuam ditunu mampu’ kalebu;
lambisam la umpehumalasam sapim laki hupatau yabo dapo’ pehumalasam dio oloMu.
52Pesämbä’ lako to tameada’
1Lu lako to untetem to menani. Penaniam pepatuduam napapia Daud, 2wattunna anna sulei Doeg, to Edom, umpaissanni Saul naua, landa’um Daud lako banuanna Ahimelekh.
3O to bahani, akanna umpa’kassiangko gau’ kadakemu?
Pangkaha’ pa’kamaseNa Puang Allataala matosä’ puli allo.
4O to mateko,
ma’pattujuko la mandahha,
pataham susi tiba’ pa’källu’ lilamu!
5Umpohäe leko’ko kakadakeam anna la kamapiaam,
umpohäe puha iko kaägä’-ägä’ anna la ma’tula’ malolo. Sela
6O to ma’lila manähä,
umpohäeko iko tula’ mantallangam!
7Sapo’ la napempa’deam liungko iko Puang Allataala,
la nasakkako anna nabahui’ko illaam mai banuammu, anna naäläiko illaam mai lino. Sela
8Maka’ naitam to meada’, la sangngim pilla’ anna mängä-mängä,
anna la metaba la’ba napasindum ma’kada naua:
9<<Muitanna’ too, to tä’ umpettulindunni Puang Allataala,
to uhhannuam katomakakaanna,
anna umpopa’attaham kulle pangngalakahha’na!>>
10Sapo’ kao-kao, sihhapannä’ kaju zaitun maho’bä’ daunna
illaam banuanNa Puang Allataala;
kukatappa’i kuua pangkaha’ pa’kamaseNa Puang Allataala takattu tintim tamondo’ sahuham
mengkalao dio mai sule lako salako-lakona.
11La ma’kuhhu’ sumanga’ä’ matim oloMu sule lako salako-lakona,
aka pa’ulalamMu;
la kuuleleam sangamMu illaam alla’-alla’na to meada’ dio oloMu
aka sanga mapiamMu!
53Bulim anna sassa’ lalam hupatau
1Lu lako to untetem to menani. Situhu’ ajanganna penaniam: Mahalat. Penaniam pepatuduam napapia Daud.
2Ma’kada illaam penabanna to maho kalebu naua:
<<Tä’ deem Puang Allataala!>>
Sangngim disoho’i pa’pogausanna to maho kalebu anna mehidi’-hidi’,
tala deem umpogau’ kamapiaam.
3Mennenne’ Puang Allataala yabo mai suhuga,
la umpetua’ ma’hupatau,
battu la deempi to keaka’ naita,
battu la deempi to mengkahuku’ lako kaleNa.
4Sangngim umpemboko’im Puang Allataala, silele sassa’ lalam;
tala deemmi umpogau’ kamapiaam, moi podo mesa tala deenni.
5Tä’ isanga muissam kamapiaam itim matim to tameada’?
Muande sola kutu umma’Ku sihhapam muande bo’bo’,
anna tä’ deem umpengkaalai Puang Allataala.
6La mahea’ anna tinggi’gi’ to tameada’,
moi kela daa tä’ da deem umpakahea’i;
aka napatiseham ke’de’ Puang Allataala bakkena to umbundu’ umma’ petauanNa;
la silele nahuham longko’,
aka natumpu pala’um Puang Allataala.
7La sule hi too yabo mai Tanete Sion to la ullappasam to Israel!
Maka’ too umpapoletottommi umma’Na Puang Allataala,
la kassi anna tilalla’ pessubunna Yakub, la losso’ penabanna sundede buana peänäsanna Israel.
54Sambajam illaam pa’baliam
1Lu lako to untetem to menani. Penaniam dikatapii. Penaniam pepatuduam napapia Daud, 2wattunna le’ba’ to Zifi muuaam Saul: <<Membuni Daud dio bottoki.>>
3O Puang Allataala, lappasannä’ sola sangamMu,
undusannä’ kamaloloam situhu’ kamatohoamMu!
4O Puang Allataala, hingngianni sambajangku,
patanannii talinga to’doam pudu’ku!
5Aka mengke’de’ to malangka’ penaba nabundu’ä’,
maelo’ to makahha’ kadake la napakattu sungnga’ä’;
sangngim umpa’pa’de Puang Allataala. Sela
6Kuissam kuua, Puang Allataala to umpamoloiä’;
DEBATA samba’ matoto’ku.
7La nakumbali’ di too gau’ kadakena mentu’ balingku;
pempa’deanni aka kamanontongamMu lako kaleku!
8Mengkalao illaam unä’ penabangku la kupehumalasam bua pemala’ dio oloMu,
la ma’kuhhu’ sumanga’ä’ matim oloMu DEBATA, aka mapia sangamMu.
9Aka puhamä’ ullappasam dio mai mentu’na kamasippisam,
anna kuita sola matangku, balingku ditaloi.
55Sambajam umpelau pepamolo untingngajo bali
1Lu lako to untetem to menani. Penaniam dikatapii. Penaniam pepatuduam napapia Daud.
2O Puang Allataala, hingngianni sambajangku,
daa umpa’talingalenda’i pelauangku!
3Paalaiä’ penabamMu anna umpasule lakoi pengkaalaangku!
Tahapa’ penabangku, anna mahusa’ pikkihangku,
4napobua’ ahhena bali,
natumä pa’pasippi’na to tameada’;
aka silele napahuaiä’ kamasussaam,
anna liba’ aha’na napobaliä’.
5Husa’ penabangku,
nahäntäi amba-ambana kamateam.
6Naponnoiä’ kamaheasam anna naputu’ä’ katinggi’gisam,
anggasanna dipasongko’i baka ulungku.
7Iya kuuam: <<Kela ma’pani’ä’ susi dangam-dangam,
la mentia’ä’ lao umpeä ongeam malino,
8tä’pi la meangga eta, la muäläipä’ kaleku lako ongeam mambela,
anna tohhoä’ dio pädä kukku’. Sela
9La kusimpanni umpeä ongeam pentuhehungam
umpessalaam hibu’ tatta’ anna talimpuhu’.>>
10O Debata, patitutusanni pikkihanna balingku, pasisala-sala basai,
aka kuita kamakahhasam anna kasipengkaam illaam kota!
11Allo bengi menggulilim yabona tembo’ kota,
anna illaam hoäna kota kende’ kamakahhasam anna kahukkaam.
12Ma’sangkaheha’ lako dio mai;
tamonda takattu mandahha anna mateko lako pasa’.
13Maka’ la balingku ussassaiä’,
la kubela siapi kuamma’;
maka’ la to ungkabassiä’ ussanga-sanga kalena dio oloku,
la mala siapi kupessalaam.
14Sapo’ iko hi, sammuaneku, sassipakamajangku,
anna sangkalamma’ku.
15Yolona sangkalamma’ki’,
anna siambe baku tama banua DEBATA illaam alla’-alla’na tau buda.
16La mate ke’de’-ke’de’ di too balingku,
la naamma’ di too häkkäna litä’,
aka angga kakadakeam illaam banuanna, angga kakadakeam illaam penabanna.
17Sapo’ mengkaalaä’ längäm Puang Allataala,
iya nalangnga’iä’ DEBATA.
18Kahubem mebengngi’, anna tängä allo mengkaloa’ä’ anna sumahho lumoa’;
anna nahingngiam pengkaalaangku.
19Nalappasannä’ tadondom bulu salamba’ku tatobä bulu sangkahohingku,
dio mai pambundu’na balingku,
aka ma’silullu’ napobaliä’.
20Nahingngiannä’ kao Puang Allataala, anna silele ia dipetuna,
Puang Allataala to untadongkonni ongeam kamatandeanNa pempom dio mai. Sela
Aka sangngim tä’ deem muondo’ gau’na untingko’ basabanna,
anna tä’ mengkahea’ dio oloNa Puang Allataala.
21Solaku lessu’ untilakai sangkalamma’na,
umpesi’ tula’na untekka pa’dandinna;
22malunnä’-lunnä’ lelem pessubungam pudu’na,
sapo’ la meande mata illaam tambu’na;
mellolä minnä’ dihingngi to’doam pudu’na,
sapo’ setonganna mebuno talemba’ dia anggasanna pa’dam masadi’.
23Behoi kamalallangam penabammu längäm DEBATA,
anna Iai umpoissam salukatuboammu!
Inna tä’ sia la umpabäi liu
to meada’ la tigesse.
24Sapo’ Iko, o Puang Allataala, la umpatilikasannä’
dokko ba’ba talumbä;
ingganna to umpatitollo haha, anna to manipu,
la mahapo sungnga’na.
Sapo’ kao-kao, mahannuä’ matappa’ matim oloMu.
56Mahannu längäm Puang Allataala illaam kamasussaam
1Lu lako to untetem to menani. Situhu’ ajanganna penaniam: Dangam-dangam yabo lolo bahana’, dio botto mambela. Pampujiam napapia Daud wattunna anna nasakkai to Filistin dio Gat.
2O Puang Allataala, kamaseiä’, aka nalullu’ pahe käppi’ä’ balingku,
pusam allo napakadusi-dusiä’ anna napasippi’.
3Naondo-ondoi liuä’ balingku pusam allo,
buda tau umpaläjä tandu’na umpalongkom palasanna napobaliä’.
4Wattungku mahea’,
anggam Iko kupassedanni hannu;
5kupuji kupa’kasallei Puang Allataala, aka pa’dandianNa;
kukatappa’i Puang Allataala, lambisam tä’ deem la kende’ kamaheasangku.
Akam la mala napogau’ hupatau lako kaleku?
6Pusam allo silele umbeo’ kadangku;
napeängannä’ tuntungam su’be’ nadakasam pa’posanga-sanga.
7Nahändängannä’ pudu’ napappaham lila la nabundu’, ma’pemäjä’, napeninim pentekkaku,
anna umpeä lalam maelo’ la napakattu sungnga’ä’.
8La mala haka lappa’ dio mai gau’ kadakenai?
O Puang Allataala, tallannii hupatau ia too sola aha’ kasalleMu!
9Ullise-lisesanni kamasussaam kupendudum,
taumpekutanaam to’dona uwai matangku tama buli-bulimMu.
Tä’ daka too puha asammi untuli’ illaam suha’Mu?
10Ma’soho boko’ asam balingku wattunna mengkaalaä’ matim oloMu;
kusattuam kuua naundu’iä’ Puang Allataala.
11Lu lako Puang Allataala, kupuji kupa’kasallei battakadanNa,
lu lako DEBATA, kupuji kupa’kasallei battakadanNa,
12matappa’ä’ lako Puang Allataala, lambisam tä’ deem la kende’ kamaheasangku.
Akam la mala napogau’ hupatau lako kaleku?
13O Puang Allataala, la kuponnoi pa’dandingku dio oloMu,
la kupasule lako bua pemala’ pa’kuhhusam sumanga’ku matim oloMu.
14Aka Iko puha ullangnga’iä’ dio mai kamateam,
unjagai pentekkaku, lambisam tatitedo tatiassam;
nasuhum malaä’ mellao dio oloNa Puang Allataala,
namasiä’i to umballoi katuboanna hupatau.
57Napadondo bali, napamoloi Puang Allataala
1Lu lako to untetem to menani. Situhu’ ajanganna penaniam: Daa umpandappo’i. Pampujiam napapia Daud, wattunna le’ba’ tama leä umpembuniam Saul.
2Kamaseiä’, o Puang Allataala, kamaseiä’,
aka Iko ungkambi’ sungnga’ku;
Iko kuongei mentuhehum nakumbäi pani’Mu,
sampe lessu’ inde sussa tanggana-gana.
3Mengkaalaä’ längäm Puang Allataala To Handam Matande,
Puang Allataala to umpa’deiannä’ sussaku.
4Napasuleannä’ pepamolo yabo mai suhuga anna nalangnga’iä’;
umpakalongkosam ingganna to umpasippi’ä’. Sela
Puang Allataala umpasule pangkaha’ pa’kamaseNa takattu tintim tamondo’ sahuham anna kamanontonganNa.
5Illaannä’ alla’-alla’na to umpobaliä’, silele anggasanna singa,
singa peande tau,
isinna masadi’ susi doke malolä’ anna batu bälä’du’ matahu’bi’,
anna lilana pataham susi tiba’ pa’källu’.
6O Puang Allataala, pa’patandaanni kamatandeamMu sule lako handanna langi’,
pa’paitaanni kamasokangamMu sule lako lili’na lino!
7Napaampai ulä pada la kuolanna,
umpatasselam penabangku,
untolombu lalangku,
sapo’ iai hi tilika’ dokko. Sela
8O Puang Allataala, matoho penabangku, matoho penabangku,
la muäkä’ä’ penaniam, la umpakende’ä’ pampujiam.
9Suleko sumanga’ku, ende’ko pahajangku, la kuponi gambus57:9 gambus: Susi katapi sapo’ kasalle puha ia. la kuhemba’ katapi,
la umbukkaiä’ masiä untata’i baja!
10O Debata, la ma’kuhhu’ sumanga’ä’ ma’polepahaja matim oloMu, illaam alla’-alla’na kahajaam,
la kupujiKo kupa’kasallei illaam tängä-tängäna kahajaam;
11aka sule längäm langi’ malibulum pangkaha’ pa’kamaseMu takattu tintim tamondo’ sahuham,
sondä’ längäm langi’ kamanontongamMu.
12O Puang Allataala, pa’patandaanni kamatandeamMu sule lako handanna langi’,
pa’paitaanni kamasokangamMu sule lako lili’na lino!
58To ma’kuasa angga ussoeam kamakahhasam
1Lu lako to untetem to menani. Situhu’ ajanganna penaniam: Daa umpandappo’i. Pampujiam napapia Daud.
2O inggannakoa’ to ma’kuasa, si malolo hakoka’ illaam pahhottosammu?
Si tama’bija hakoka’ tama’sangngana’ uhhotto’ ma’hupatau?
3Tää’! Si umpattuju hakoa’ ia kakadakeam,
angga kamakahhasam ussoeam illaam botto.
4Illaampi tambu’ to tameada’ anna be’bäm,
mane tilläppu’ to ma’tula’ tatappa’ anna sala’ lalammi.
5Susi ula’ pabalu pessubungam pudu’na,
anggasanna ahae ma’babi pele,
6umpa’talingalenda’i pa’simbuhu’na to si umpamaho ula’,
battu pa’ito-itona to paissam kä’bä.
7O Puang Allataala, pupuianni isinna,
o DEBATA, himpoianni tohana itim matim singa kabahanianna!
8La mahakasa hi too susi uwai pesahobo,
la anggasanna hi too batu bälä’du’ pompo’.
9La sihhapam di too suso mahehe dadi lambehu’,
la anggasanna änä’-änä’ mate illaam tambu’ tä’um muolläi lino.
10Tä’pi la hede kuhimmu napahede hängkä keduhi,
hängkä keduhi mamata battu haka mabangi anna dipempa’deammi indo to kadake gau’.
11Tilalla’ to meada’ muita pembala’Na DEBATA,
la umpessalo hahana to tameada’.
12La ma’kada hupatau naua: <<Abana untahima sahona to meada’,
mannassa deem Puang Allataala to ussalu malolo muundu’ lollä inde lino.>>
59Sambajam umpelau pa’kambi’
1Lu lako to untetem to menani. Situhu’ ajanganna penaniam: Daa umpandappo’i. Pampujiam napapia Daud, wattunna Saul ussua tau lao ummata-matai banuanna Daud aka la napatei.
2O Puang Allataala to kupenombai, lappasannä’ dio mai balingku,
kambi’ä’ dio mai to mengke’de’ umbundu’ä’.
3Lappasannä’ dio mai ingganna to ma’gau’ kadake,
langnga’iä’ dio mai mentu’na to umpatitollo haha.
4Ita siai too DEBATA, silelem naabunniä’ la napakattu sungnga’;
umpamesam buku mentu’na to matoho nabundu’ä’;
moi kela daa tä’ da deem patekkaä’, battu haka la umpogau’ dosa.
5Moinna anna tä’ deem kasalaangku, silelei hi napadondoä’ sibaba paha’bunona.
MaiKo lombaä’, anna muitai sola matamMu!
6Iko DEBATA, Puang Allataala To Handam Kuasa, Puang Allataala to napenombai to Israel.
Pengke’de’Ko, ammu passalai mentu’na kahajaam senga’,
daa uhhäntänganni bua to ma’gau’ kadake umpesi’ tula’na! Sela
7Maka’ mahammom, ma’pasuleim lako banuanna,
sikaoli anggasanna asu mengkauä napasindum ullilinni kota.
8Ita hiko, pantelle messubum dio pudu’na;
pataham susi pa’dam bibinna,
aka naua: <<Menna hia la mehingngi?>>
9Sapo’ metaba la’ba mandaKo lako, DEBATA;
untelleKo ingganna kahajaam senga’.
10O kabuttuanna kamatohoangku, Iko la kusussahei,
aka Iko Puang Allataala ongeam pentuhehungangku.
11Puang Allataala to kupenombai, sola pangkaha’ pa’kamaseNa takattu tintim tamondo’ sahuham la sule napesäkäiä’;
napabäiä’ muita balingku ditaloi.
12Daa umpakattu sungnga’i, anna mala tä’ nakalembei sabottoku maaka susi umpassalaKo balingki.
Pakei kakuasaamMu umpatiseham ke’de’,
talo mäne’-mäne’i, o DEBATA, unta’ matoto’ki!
13Aka pessubungam pudu’na tappa kadanna umpomadosai;
la nasambe’ di too naalinni kamalangkasam penabanna,
aka umpobungam bibi pa’tädo anna tula’ tatappa’.
14Pempa’deanni umpake aha’ kasalleMu, pempa’deanni,
anna mala tamehä’dä’ tameata,
lambisam naka’da’ nakaleso hupatau naua Puang Allataala umpahenta pessubunna Yakub,
umpahenta senambo lino. Sela
15Maka’ mahammom, ma’pasuleim lako banuanna,
sikaoli anggasanna asu mengkauä napasindum ullilinni kota.
16Lao sikasapa umpeä kinande;
anna maka’ tä’pi dea’, iya sikata’ba.
17Sapo’ kao-kao, la kupenaniam kamatohoamMu,
wattu mebengngi’ la kupekasallei kupenaniam pangkaha’ pa’kamaseMu takattu tintim tamondo’ sahuham;
aka Iko ongeam pentuhehungangku,
ongeam pembuniangku, wattunna illaannä’ kamasippisam.
18O kabuttuanna kamatohoangku, Iko la kupa’patinandai pampujiangku;
aka Iko Puang Allataala, ongeam pentuhehungangku,
Puang Allataala to kupenombai, umpa’patandaam pangkaha’ pa’kamaseNa takattu tintim tamondo’ sahuham lako kaleku.
60Sambajam umpelau kapataloam
1Lu lako to untetem to menani. Situhu’ ajanganna penaniam: Bunga bakung kasa’biam. Pampujiam pepatuduam napapia Daud, 2wattunna umbundu’ to Aram-Mesopotamia anna to Aram-Zoba, anna wattunna ma’pasule Yoab puhanna untaloi sapulo dua sa’bu to Edom dio Lembä Masim.
3O Puang Allataala, umpemboko’ingkam, umpahandam-handam bäbäkam nakatama balingki;
umpahuaikam aha’ kasalleMu; papoletottongkam sule!
4UntutäKo lino anna uhhäkkäKo litä’;
pamohi’i sule batta’na, aka kakemba-kembam lino.
5Umpabäi bäbäKo umma’Mu ussi’dim pi’di’ tanggana-gana;
umpaihu’kam anggur mepamäbo’.
6UmbeengKo tanda lako to mengkahea’ dio oloMu,
napotanda umpessalaam batu bälä’du’. Sela
7Anna mala lappa’ ingganna to ungkaha’i ungkamasei,
langnga’i umpake katea’ bassimMu, anna timba’i pengkaalaangki!
8Ma’battakada Puang Allataala yabo mai ongeam masehoNa naua:
<<La kassiä’ tilalla’, la kubahe-bahe lembäna Sikhem;
anna la kubohä-bohä lembäna Sukot.
9Gilead ampuangKu, Manasye Kao puäna,
Efraim sihhapam saludum bassi yabo ulungKu, Yehuda sihhapam tekkem kahajaangKu;
10Moab pembaseam bitti’Ku,
Edom pa’tibeam sapatungKu,
kataloanna Filistea umpakassiä’ tilalla’.>>
11Menna hi kao la umpasolaä’ lako kota ma’bettem matoto’?60:11 kota ma’bettem matoto’: Kiha-kiha kota Sela nauaam. Indo kota Sela si naongei ma’tadongkongam tomahaja Edom.
Menna hi kao la umpatetteä’ lako Edom?
12O Puang Allataala, puhangkam untampeam.
Puhangkam umpaandei asu illaam pa’bundusam.
13Pamoloikam untingngajo balingki,
aka labu’ di limbä tallam di pahupu pa’pesäkäna hupatau.
14Ianaanna napasolaikia’ Puang Allataala la matohokia’ anna matitta,
aka Ia la ma’kale umpanete käsä balinta.
61Umpa’sambajangam tomahaja
1Lu lako to untetem to menani. Penaniam dikatapii, napapia Daud.
2O Puang Allataala, patanannii talinga pelauangku,
hingngianni sambajangku!
3Dio mai botto mambela mengkaalaä’ matim oloMu, aka mahussa penabangku;
patetteä’ längäm buntu batu ongeam malino.
4Aka Iko ongeam pentuhehungangku,
lempo batu kuongei umpessalaam balingku.
5Kupemulu la tohho illaam ongeam masehoMu upu’ salukatuboangku,
la nakumbäi pani’ pa’kamaseMu! Sela
6O Puang Allataala, puham uhhingngi pa’dandingku,
puham umpadokkoannä’ lisu pala’ku mana’ la sipäto’na umbeem to umpengkahea’i sangamMu.
7Pomahendenni tomahaja,
la ma’tintingam di too pessubunna ullombunganni ma’pahenta;
8la naundu’ di too Puang Allataala ma’pahenta sule lako salako-lakona,
pasuleanni pangkaha’ pa’kamase takattu tintim tamondo’ sahuham anna kamanontongam la ungkambi’i unjagai.
9Iya la kupujim too kupa’kasallei sangamMu upu’ salukatuboangku,
kupasindum umponnoi pa’dandingku dio oloMu allo sibala’ allo.
62Anggam mengkahuku’ lako Puang Allataala masannam penaba
1Lu lako to untetem to menani. Situhu’: Yedutun. Pampujiam napapia Daud.
2Anggam mengkahuku’ lako Puang Allataala umpomasannam penabangku,
Ia kabuttuanna kalappasangku.
3Anggam Ia buntu batungku anna to ullangnga’iä’,
ongeam pentuhehungangku, tala tilenggu’ä’ tala tigesse.
4La pihampi mane mondakoa’ umbundu’ padammu ma’hupatau,
la umpakattu sungnga’,
moi kela daa sihhapammi hindim la tissumbä anna tembo’ la hubä’?
5Angganna’ iko umpikki’ la uhhonnosam padammu yabo mai okkosam kamatandeanna;
silele umpohäe tula’ tatappa’,
si ma’lambe dio pudu’na,
sapo’ mantädo illaam penabanna. Sela
6Anggam mengkahuku’ lako Puang Allataala umpomasannam penabangku,
aka Ia naongei buttu pahhannuangku.
7Anggam Ia buntu batungku anna to ullangnga’iä’,
ongeam pentuhehungangku, tala tilenggu’ä’ tala tigesse.
8Puang Allataala naongei buttu kalappasangku anna kamatandeangku,
Puang Allataala buntu batu kamatohoangku, ongeam pentuhehungangku.
9O inggannakoa’ hupatau, mahannukoa’ lako kaleNa illaam mentu’ wattu,
bukkai issi penabammu dio oloNa;
Puang Allataala ongeam pentuhehunganta. Sela
10To bahinni’ hibu’-hibu’ nababa,
to kasalle62:10 To bahinni’...to kasalle: Kalembasanna, tau biasa anna to ma’pangka’ sola to disanga illaam botto. anggam liu lalam katuboanna.
Maka’ la ditimbam, tala untekä’ timbangam,
mahingngam puha ia anna la hibu’.
11Daa uhhannuam pangngala kahha’,
daa ummahannu bäbä lako kulle pahappa;
maka’ längäm kullemu,
daa umpatahha’ lakoi penabammu.
12Tapenduam tapentallummi kuhingngi ma’battakadaKo Puang Allataala;
anggam Iko naongei buttu kakuasaam,
13anna Iko toi Debata, naongei buttu pangkaha’ pa’kamase takattu tintim tamondo’ sahuham;
Iko umpabala’i si mesa-mesa hupatau,
situhu’ pa’pogausanna.
63Mamalli’ längäm Puang Allataala
1Pampujiam napapia Daud, wattunna anna dioi pädä kukku’ Yehuda.
2O Puang Allataala, Ikom too Puang Allataala to kupenombai, kupameäKo,
sungnga’ku mabähhäm dio oloMu,
bätäku mamalli’ dio tingngajoMu,
sihhapannä’ litä’ mabangi anna makähhe umpemulu uwai.
3Susimä’ too kupahandangKo matim banua masehoMu,
anna kupetua’ kamatohoamMu sola kamatandeamMu.
4Aka keangga’ puha ia pangkaha’ pa’kamaseMu takattu tintim tamondo’ sahuham anna la katuboam,
lambisam la tiku’mi’ pudu’ku umpuji umpa’kasalleiKo.
5La susimä’ too la kupujiKo kupa’kasallei upu’ salukatuboangku;
la kuäkä’ limangku ma’sambajam ussa’bu’ sangamMu.
6Losso’ penabangku sihhapam umpesanta’i bale maloppä’,
anna tiku’mi’ pudu’ku kassi tilalla’ tika’bi’ lilaku kupujiKo kupa’kasallei.
7Maka’ kukilalaiKo dio petindoangku,
kupasalui penaba puli bengi,
8mannassa, Iko puha umpamoloiä’;
menggamahaä’ tilalla’ nakumbäi pani’ pa’kamaseMu.
9Sungnga’ku mengnganti manda’ mentobe matoto’ di Iko,
katea’ bassimMu umpasukunnä’.
10Sapo’ menna-menna la umpakattu sungnga’ä’,
la tinanda dokko apa’ mahihinna litä’.
11La mate naande pa’dam,
anna la nasempa-sempa olo’-olo’ to peande.
12Sapo’ tomahaja ia, la kassi anna tilalla’ aka naundu’ naolaam Puang Allataala;
menna-menna ma’dandi ussa’bu’ sanganNa Puang Allataala la umpakende’ katilallasam,
sapo’ to ma’tula’ tatappa’ ia la dikambu pudu’na.
64Puang Allataala umpaläppu’i batu bälä’du’ ma’ipo to tameada’
1Lu lako to untetem to menani. Pampujiam napapia Daud.
2O Puang Allataala, hingngianni pelauangku wattungku mengkaala,
kambisannä’ sungnga’ku dio mai to umpobalitutuannä’.
3Hindim pala’ä’ kulambu tahuno dio mai pa’mesaanna to ma’gau’ kadake,
dio mai pa’tombonganna to umpogau’ kakadakeam,
4lengko lilana pataham susi pa’dam,
ussembu’ tula’ kadake mebuno talemba’ sihhapam batu bälä’du’ ma’ipo,
5ullanta’ kada kadake to malolo penaba dio mai ongeam kabuniam;
taditajai sikamallanta’ tala deem hea’na.
6Si muanti puli pattuju kadakena,
ussahandanni kada la unggahaga tendam lendu’;
naua inabanna: <<Menna hia la meita?>>
7Sangngim umpattuju kakadakeam, mane nauai:
<<Hatta’um pattujungki, palakona mandam.>>
Abana tadilantum pikkihanna anna lalam penabanna hupatau!
8Sapo’ napaläppu’i batu bälä’du’ ma’ipo Puang Allataala;
pissananna ham ia sangngim sikasoa basana.
9Silele nasambe’ lengko lilana natobängam tappaam pudu’na;
ingganna to muitai sangngim muilim-ilim.
10Sangngim tinggi’gi’ hupatau mahea’, anna umpengkadaam pa’pogausanNa Puang Allataala,
anna naakui pa’palakoanNa.
11La kassi anna tilalla’ to meada’ aka ingganna pa’ulalanNa DEBATA.
La silele mentuhehum lako kaleNa;
ingganna to malolo penaba la umpakende’ katilallasam.
65Penaniam untilalla’i pa’tamba’Na Puang Allataala
1Lu lako to untetem to menani. Pampujiam napapia Daud. Penaniam.
2O Puang Allataala, lu matim oloMu pampujiam yabo mai kota Sion,65:2 kota Sion: Tontäm ke diuai kota Yerusalem.
anna lu matim tingngajoMu hupatau umponnoi pa’dandinna.
3Iko to si uhhingngiam sambajam;
Iko natinandai ma’hupatau,
4aka naepe’um kasalaanna.
Maka’ tä’um kibela kipendudum kasalaangki,
Iko uhhisii lako handanna langi’ kaleleanna uham.
5Maupa’ anna katambasam to umpilei anna untambai mengkahuku’
la tohho illaam ongeam masehoMu!
La dipabosa’i hakam too ingganna kamapiaam illaam banuamMu,
banua masehoMu.
6Pa’pogausam memängä-mängä anna kamaloloam umpake untimba’ikam,
o Puang Allataala, to melangnga’ingki.
Iko hannuanna hupatau sule lako lili’na lino,
sule lako bihinna le’bo’ kalua’.
7KamatohoamMu umpake ullemo buntu,
umpa’patandaam kakuasaamMu tadisihanteam;
8Iko umpatipondam magahugunna le’bo’, umpamattam magaluntu’na bombam,
anna umpompoi tandu’ masadi’na mentu’na kahajaam to pabali-bali!
9Ingganna ma’hupatau to umpangngissi sule lako lili’na lino,
tinggi’gi’ mahea’ muita tanda memängä-mängäMu;
mengkalao illaam mata allo sule sau’ katampusam
umpakassi tilalla’.
10Masannam penabamMu lako botto litä’ ia too anna umpahohä’i uwai,
umpakende’ malompona lambisam tadipuha-puha alaam kinande.
SalunNa Puang Allataala65:10 SalunNa Puang Allataala: Kalembasanna, uham nauaam, susi siam yabo bahi’ uhuna naua: <<napahohä’i uwai>>, iya uham duka’ nauaam. ma’butu-butu uwainna;
Iko umpatokaanni gandum issinna lino.
Abana tappa’, umpasusi inde lalanna umpatokaam:
11Umpalimbäiam uwai kalo’ bedenna,
anna umpahohä’iam uwai bedenna,
umpatibuheam litä’na nahehe uham;
umpamukkusam anna kellolo tananganna.
12Taum-taum umpatiähhe’ bua tananganna aka kamapiaam penabamMu,
pada ongeam muolanNa mellupa’ tananganna;
13pädä kukku’ mellupa’ humpu’na,
mentu’na tanete nasapu’ katilallasam;
14mentu’na pädä kehumpu’ nasihhinni beke sola domba,
mentu’na malembäna naponnoi gandum,
sikaahhe tilalla’ anna menani.
66Penaniam pa’kuhhusam sumanga’
1Lu lako to untetem to menani. Mesa penaniam. Pampujiam.
O mentu’nako issinna lino, sikaahhekoa’ tilalla’ längäm Puang Allataala,
2pakende’koa’ pampujiam umpomatande sanganNa,
pa’kasallei umpenggamahaam penaniam!
3Pengkadaanni längäm Puang Allataala muua: <<Tä’ deem pada samepilla’-pilla’ anna memängä-mängä pa’palakoamMu;
kahana tä’ deem pada sakasalle kakuasaamMu nasuhum ma’luttu’ balimMu dio oloMu.
4Senambo lino menomba dio oloMu,
umpakende’ pampujiam dio tingngajoMu, umpuji umpomatande sangamMu.>> Sela
5Maiko ammu petua’i pa’palakoanNa Puang Allataala;
tä’ deem pada samepilla’-pilla’ anna memängä-mängä pa’pogausanna lako ma’hupatau:
6Umpopengkubalim uwai le’bo’ mendadi litä’ mabangi;
nene to taponene mellao bitti’ ullambam salu.
Nasuhum kassikia’ tilalla’ aka pa’palakoanNa,
7ma’pahenta sola ponno kakuasaam sule lako salako-lakona,
umpaola mata buda kahajaam.
Ingganna to pabali-bali tä’um mala ussanga-sanga kalena. Sela
8O mentu’nako kahajaam, pa’kasalleikoa’ Puang Allataala to kipenombai,
pa’pahingngianni pampujiam dio oloNa!
9Ia ungkambi’ sungnga’ki anna malakam tubo,
anna tä’kam napabäi la sala’ bitti’ lambi’ mate.
10O Puang Allataala, puhangko umpangngitaikam,
ussehoikam sihhapam to ullällä peha’.
11Umpabäikam naala ulä,
umpaepe’ikam babaam mabanda’;
12umpabäikam napanete käsä balingki,
sihhapangkam naä’bäi api anna nabuso mala’bu’;
sapo’ Iko siam ullangnga’ikam umpasilambi’ kamalinoam.
13La mentamaä’ banuamMu umbaba tunuam ditunu mampu’,
la umponnoiä’ pa’dandingku dio oloMu,
14to puha suppi dio bibingku,
lendu’ dio pudu’ku wattunna illaannä’ kamasussaam.
15La kuala malompona olo’-olo’ku ditunu mampu’ mendadi bua pemala’ku dio oloMu,
la kende’ hambunna matim oloMu mentu’na domba laki,
sapim laki anna beke laki. Sela
16O inggannakoa’ to mengkahea’ längäm Puang Allataala,
maikoa’ patanannii talinga,
anna kutulasangkoa’ pa’palakoanNa lako kaleku.
17Puham ma’kada dio pudu’ku mengkaala dio oloNa;
puham tika’bi’ lilaku kupuji kupa’kasallei.
18Hapanna la deem pattuju kadake illaam penabangku,
mannassa anna tä’i la napehingngii DEBATA pelauangku.
19Sapo’ nahingngiannä’ Puang Allataala,
napaalai penaba sambajangku.
20Dipuji dipa’kasallei Puang Allataala, to tä’ untumpu pala’ sambajangku,
anna tä’ napasikambelaä’ pangkaha’ pa’kamaseNa takattu tintim tamondo’ sahuham.
67Penaniam pa’kuhhusam sumanga’ untilalla’i pa’tamba’Na Puang Allataala
1Lu lako to untetem to menani. Pampujiam. Penaniam dikatapii.
2La nakamasei hakia’ too anna natamba’ Puang Allataala,
la naähhä hakia’ too pangkähhäna lindoNa. Sela
3Anna mala naka’da’ nakaleso to lino ulalamMu,
anna naissam ma’hupatau kasalamasam buttu di Iko.
4O Puang Allataala, la napuji haKo too si mesa-mesa kahajaam,
la napuji haKo too napa’kasallei mentu’na kahajaam.
5La silele hi too kassi anna sikaahhe tilalla’ mentu’na kahajaam,
aka umpahentaKo simesa-mesa kahajaam sola undu’ lollä,
anna umpatette mentu’na kahajaam illaam inde lino. Sela
6O Puang Allataala, la napuji haKo too si mesa-mesa kahajaam,
la napuji haKo too napa’kasallei, mentu’na kahajaam.
7Tubom lamu-lamungam kende’ alaam kinande;
natamba’kia’ Puang Allataala, Puang Allataala to tapenombai.
8La natamba’kia’ Puang Allataala;
la napengkahea’i hi too ma’hupatau senambo lino!
68Lengkoam kasalleNa Puang Allataala
1Lu lako to untetem to menani. Pampujiam napapia Daud. Penaniam.
2Ma’takka’ ma’ulalam Puang Allataala, lambisam tiseham ke’de’ to umpobalii,
ingganna to ungkabassii le’ba’ muäläi kalena dio mai oloNa.
3Umba susi hambu tipassi naliliam hibu’,
umba susi lilim mahehe naande api,
la susim too, to tameada’ mahapo sungnga’ dio oloNa Puang Allataala.
4Sapo’ la kassi ia tilalla’ to meada’,
sundede buana, anna tiala inabanna dio oloNa Puang Allataala.
5Penggamahako längäm Puang Allataala, pujii sanganNa sitonda poni-poniam,
patokaanni lalam68:5 patokaanni lalam: Setonganna anggam naua illaam basa Ibrani ke dipalutamai basa Bambam: <<äkä’i längäm>>, kalembasanna <<äkä’i pampujiam längäm DEBATA>>. To umpanete gabum!
DEBATA tungka sanganNa; kassikoa’ tilalla’ dio oloNa!
6Puang Allataala to tohho illaam banua masehoNa,
to muambei änä’ bium anna to uhhindim pala’ ungkulambu tahuno mentu’na to balu baine;
7To umbeem tadongkongam balajam pumpum;
ullappasam mentu’na to ditahungkum,68:7 to ditahungkum: Kalembasanna, to Israel wattunna nataloi balinna lambi’ napahhim lako bottona anna nadakka’i (natahungkum), iam too nalappasam DEBATA. nasuhum ullambi’ kamasannangam.
Sapo’ lu lako to umbali-bali DEBATA untadongkonni litä’ makähhe.
8O Puang Allataala, wattunna umpendioloangangKo umma’Mu,
wattunna muolaKo pädä kukku’; Sela
9kakemba-kemba lino,
langi’ umpatibollo uham dio oloMu,
dio oloMu, o Puang Allataala to ma’battakada yabo Tanete Sinai,
Puang Allataala to napenombai to Israel.
10O Puang Allataala, Iko umpatitollo uham;
umpakende’ malompona litä’ ampuam ikaleMu to makähhe yolona,
11lambi’ natadongkonni umma’ petauamMu;
sola kamapiaam penabamMu, o Puang Allataala,
umponnoiangKo kapahalluanna to mase-mase.
12Umpalanda’ kadanNa Debata;
mentu’na baine ma’babangam lao umbaba kaheba mapia naua:
13<<Le’ba’im, le’ba’im sikalumpa’ tomahaja sola tentahana,
mentu’na baine dio banua untaba-taba pamuhu.
14Moi to membuni illaam alla’na-alla’na domba,
ussi’dim siam kapataloam sihhapam dangam-dangam ma’pani’ peha’,
ma’bulu pani’ bulabam täsä’.
15Tappana To Handam Kuasa, umpatiseham ke’de’ ingganna tomahaja, dio ongeam ia too,
iya tuhum salju tappa yabo Tanete Zalmon.>>
16Tanete Basan, tanete malangka’ kasalle,
tanete buda pusu’na!
17O, mentu’nako tanete buda pusu’na, akanna umbeo’ko pudu’mu kembuhu,
ungkembuhui tanete to natitondä’i manuhunNa68:17 tanete to natitondä’i manuhunNa: Tanete Sion diuaam, aka eta naongei Banua Debata. Puang Allataala mendadi tadongkonganNa?
Mannassa la naongei tohho DEBATA sule lako salako-lakona!
18Massa’bu-sa’bu bendi pa’bundusanNa Puang Allataala,
mampulo sa’bu budanna;
sulem Debata yabo mai Tanete Sinai, mentama ongeam masehoNa!
19PuhangKo längäm ongeam matande umbaba mentu’na pataloMu;
untahimaKo pa’pebeenna hupatau,
deem toi duka’ buttu dio mai ingganna to pabali-bali.
O DEBATA, Puang Allataala la tohhoKo yabo.
20Dipuji dipa’kasallei Debata!
Allo sibala’ allo Ia umpendudum kamabandasanta;
Puang Allataala to ullappasangkia’. Sela
21Puang Allataala to tapenombai, iam too Puang Allataala to ullappasangkia’,
PUANG ALLATAALA, Debata to kupenombai, ullangnga’ikia’ dio mai kamateam.
22Tä’ mala tala uhhäppu’-häppusam ulunna balinNa Puang Allataala,
uhhamu-hamuam kahohä’ ulunna to angga muola lalam sala.
23Ma’battakada Debata naua: <<La kupasuleangko sule balimmu yabo mai Basan,
la kupopa’pasuleangko dio mai posi’ mapättäna le’bo’,
24anna mala membase haha bitti’mu,
anna ma’peduho ia asummu ullepa’i bakkena balimmu.>>
25O Puang Allataala, naita hupatau lengkoam kasalleMu,
lengkoam kasalleNa Puang Allataala to kupenombai, Tomahajangku, tinanda tama ongeam maseho.
26Nayoloangam mentu’na to menani, nalahu to ma’katapi dio boko’na,
illaam tängä ingganna änä’ daha unde’de’ rebana.68:26 rebana: Kalembasanna, gändä-gändä ma’tihu’ dilapa’ sabali.
Naua penanianna:
27<<Pujii Puang Allataala illaam kapenombaanna umma’Na,
pujii DEBATA, o inggannakoa’ pessubunna Israel!>>
28Mendiolo pessubunna Benyamin, pehapuam kasalle änä’na Israel handam saidi’ bilanganna,
nahuntunni lengkoanna matua ulunna pessubunna Yehuda,
mane natuhu’i matua ulunna pessubunna Zebulon anna Naftali.
29O Puang Allataala, pasumpui kamatohoamMu,
o Puang Allataala, pa’patandaanni kamatohoamMu.
Umba susi puha umpogau’ lako kami’.
30Sasuleam tomahaja umbaba bua pemala’na dio oloMu,
illaam Banua MasehoMu dio Yerusalem.
31Lippä’i olo’-olo’ to peande68:31 olo’-olo’ to peande: Deem to umpemandalam battakada Debata muuai to Mesir diuaam. illaam alla’ galanteom,
pinamile sapim sola sapim kamatohoanna!
Panete käsäi itim matim to sipangngula’ peha’;
Puang Allataala umpatiseham ke’de’ mentu’na kahajaam to angga nakähä ma’bundu’!
32Buda to kasalle sule dio mai Mesir,
to Etiopia68:32 Etiopia: Sanganna mesa botto dio tandai selatanna Mesir. umballa’ pala’na längäm Puang Allataala.
33O mentu’nako kahajaam illaam lino, penggamahako längäm Puang Allataala,
penaniko sitonda poni-poniam längäm Debata; Sela
34lako to ma’bendi ullambam langi’ sitimäna lino.
Pennassai ammu pomakita-kitai! Umpa’pahingngiammi gamahanNa Debata, gamaha memamba guntu’!
35Tappasanni kakuasaanNa Puang Allataala;
kamatandeanNa tihandu’ dio Israel,
kakuasaanNa sule längäm langi’.
36Mepilla’-pilla’ Puang Allataala, wattunna messubum illaam mai ongeam masehoNa.
Puang Allataala to napenombai to Israel, ummana’ kakuasaam
anna kamatohoam lako umma’Na.
Dipuji dipa’kasallei Puang Allataala!
69Sambajam illaam kamasippisam
1Lu lako to untetem to menani. Situhu’ ajanganna penaniam: Bunga bakung. Pampujiam napapia Daud.
2O Puang Allataala langnga’iä’,
aka la napusa’imä’ uwai!
3Lämmä’mä’ dokko hano mandalam,
tä’ deem kuongei mengkalinumpu;
tallammä’ dokko uwai mandalam,
naanusammä’ uwai tibuso.
4Malupu’mä’ kaoli-oli, mapehhe’um bahokoku;
bongngommi matangku umpemmitai pepamoloNa Puang Allataala to kupenombai.
5Buda puha ia to ungkabassi bäbää’,
anna la beluä’ yabo ulungku;
tadikemba’ budanna to maelo’ umpempa’deannä’,
to umpobaliä’ tä’ deem kasuhunganna.
Dipassaä’ umpasule
baham-baham tadeem kuala.
6O Puang Allataala, muissam kamahoangku,
tatibuni ingganna kasalaangku dio oloMu.
7O PUANG ALLATAALA, Debata To Handam Kuasa,
jagaiä’ indana kaoi nasuhum kasihisam ingganna to mahannu lako kaleMu!
Jagaiä’ indana kaoi nasuhum nahuham longko’
ingganna to umpameäKo, o Puang Allataala to napenombai to Israel!
8Kamanuhusangku matim oloMu nasuhum umpendudunnä’ passassai,
lambi’ nahuhannä’ longko’.
9Naangga’ tau senga’mä’ solasubungku,
napakatausenga’mä’ siundu’ku.
10Pangkaha’ku lako BanuamMu la umpapuhu’ penabangku,
anna ingganna passassai tama kaleMu nahuaä’ duka’.
11Umpopengkadioä’ kaleku anna ma’puasa,69:11 ma’puasa: Kalembasanna mengkakobe battu diua diala ikale tamangngande tamangngihu’.
sapo’ napolalam di pantelle tama kaleku.
12Umpakeä’ poheba bahata tanda bahata,
sapo’ sikanaele-ele mändä’.
13Napobungam bibiä’ tau buda illaam ba’ba kota,
naposengo buntuä’ napogongga’ kabaleam ingganna to si umpamäbo’ kalena.
14Sapo’ kao-kao, ma’sambajannä’ dio oloMu, DEBATA,
wattunna mentingngajoKo, o Puang Allataala;
aka kasalle pangkaha’ pa’kamaseMu takattu tintim tamondo’ sahuham, timba’iä’
sola pepamolo manontomMu!
15Langnga’iä’ dio mai hano,
indana tallannä’,
lappasannä’ dio mai ingganna to ungkabassiä’
anna dio mai uwai mandalam!
16Daa umpabäi uwai tibuso naanusannä’,
daa umpabäiä’ tallam dokko posi’ mapättäna le’bo’,
battu haka tilamum dokko ba’ba talumbä.
17O DEBATA, timba’iä’, aka mapia pangkaha’ pa’kamaseMu takattu tintim tamondo’ sahuham,
tingngajoiä’ situhu’ pa’häntängam buaMu taditondom!
18Daa umbeosanni lindoMu inde sabua’Mu,
aka illaannä’ kamasippisam; simpannii untimba’iä’!
19Pengkahuku’Ko mai, pesäkäi sungnga’ku,
lappasannä’ dio mai mentu’na balingku.
20Muissammi maaka susi disassaiä’, dipakasihi’, anna dipetuna;
ungkamanta-manta asam balingku.
21Passassai ia too umpomapi’di’ penabangku,
anna umpakattu pahhannuangku;
kupemmitai to la ungkamaseiä’, sapo’ tä’ di deem,
kupeä to la umpakahangaä’, sapo’ tä’ deem kulambi’.
22Sikanapande mändä’ kinande pelango;
wattungku mabähhäm, sikanapaihu’ mändä’ cuka.69:22 cuka: Kalembasanna uwai liba’ maissu’na, sapo’ tä’ si diihu’ aka tuttuam mabähhäm mandi tau.
23La mendadi hi too tendam lendu’na indo tahakam dio olona,
anna hame-hamena la mendadi tolombunna.
24La buta hi too matanna anna mala tä’ landa’ naita;
la mapi’di’ liui hi too äbä’na!
25Patitolloi aha’Mu lako kalena,
anna popa’nala-nalai aha’ kasalleMu tama kalena.
26La maitu-itu hi too pa’tondäsanna,
anna la daum labuam di too mentu’ pa’bottoanna.
27Aka sikaumbanna’i to umpassala,
anna umbuländä’ to puha umpakapi’di’.69:27 umpassala...umpakapi’di’: Indo to napassala anna napakapi’di’ Puang Allataala kalena Daud diuaam, aka deem napassala anna napakapi’di’ Puang Allataala, sapo’ sulibanna Daud deempi duka’ tau senga’ diuaam.
28Patampannianni kasalaanna,
anna tä’ deem la ummaloloam!
29La disapuiam di too sanganna illaam mai suha’ katuboam;
anna tä’ la tituli’ sanganna sola ingganna to meada’!
30Sapo’ kao-kao inde didahhaä’ anna ussi’dim pi’di’,
o Puang Allataala, kalappasam buttu di Iko, la ia hi too ungkambi’ä’ unjagai!
31La umpujiä’ umpa’kasallei sanganNa Puang Allataala muolai penaniam,
la kupomatande sola penaniam pa’kuhhusam sumanga’;
32pa’pogausam ia too napohäe puha ia Puang Allataala anna la sapim laki,
sapim laki ma’tandu’, anna ma’sahäppä kalumpäna.
33Tappana naita mentu’na to mahempo penaba, la kassi tilalla’;
o inggannako to umpameä Puang Allataala, pakasallei penabammu!
34Aka nahingngiam ia DEBATA ingganna to mase-mase;
anna tä’ umpa’kalembei hupataunNa to illaam tahungkum.
35La napuji hi too napa’kasallei issinna langi’ sola lino,
le’bo’ kalua’ sola ingganna menabanna illaam.
36Aka Puang Allataala la ullappasam Sion69:36 Sion: Kalembasanna kota Yerusalem.
anna umpake’de’i sule ingganna kota illaam paluäna Yehuda,
anna mala natadongkonni hupatau anna naampuam;
37la napomana’ ma’tintingam mentu’na pessubunna sabua’Na,
anna ingganna to umpohäe DEBATA la tohho illaanna.
70Sambajam umpelau pepamolo
1Lu lako to untetem to menani. Pampujiam napapia Daud la dipenanaiam wattunna umbaba bua pemala’ anna mala nakilalai DEBATA.
2O Puang Allataala, lappasannä’,
o DEBATA simpannii umpamoloiä’!
3La kasihisam di too anna bahakäpäm
to mohäe la umpakattu sungnga’ä’;
La ma’saha boko’ di too anna malea lindo
to umpeängannä’ tuntungam su’be’ nadakasam pa’posanga-sanga;
4la ma’pasule kapui’-pui’ di too aka masihi’
to muuaannä’: <<Pissi’, belekela’!>>
5La kassi hi too anna tilalla’ dio oloMu,
ingganna to sule umpameäKo;
la ma’kada hi too mentu’na to umpohäe kalappasam buttu di Iko naua:
<<Matande Puang Allataala!>>
6Sapo’ kao-kao inde mehio-hioä’ anna kaasi-asi,
simpannii mai, o Puang Allataala!
Iko to mepamoloingku anna to ullangnga’iä’;
o DEBATA, pa’sahha’Ko mai!
71Sambajam umpelau pangngundu’ illaam kamatuaam
1O DEBATA, Iko kuongei mentuhehum,
daa si’da-si’da umpabäiä’ dipakasihi’.
2Lappasannä’ anna ullangnga’i, aka to muundu’Ko lollä,
hingngiannä’ ammu langnga’iä’!
3La mendadiKo sihhapam buntu batu kuongei mentuhehum, to la si kutinandai;
puhangKo umpassubum pahenta anna malaä’ dilangnga’i,
aka Iko buntu batungku anna bettem matoto’ku.
4O Puang Allataala to kupenombai, lappasannä’ dio mai pala’ limanna to tameada’,
dio mai lisu pala’na ingganna to paehoam anna meappi’i.
5Aka Iko hannuangku, Debata,
Iko kukatappa’i mengkalao di mangnguhangku, DEBATA.
6Illaampä’ tambu’ anna Ikom sussaheangku,
Iko ma’ulalam anna malai nadadiannä’ indoku;
tamonda takattu kupujiKo kupa’kasallei.
7Buda hupatau umpotandengannä’,
aka Iko pentuhehungam matoto’ku.
8Tamonda takattu messubum dio pudu’ku pampujiam matim oloMu,
pusam allo kupengkadaam kamatandeamMu.
9Daa untibeä’ ke illaammä’ kamatuaam,
daa untampeannä’ ke pa’dem kamatohoangku.
10Aka napaboboiä’ tula’ mentu’na balingku,
nahändängannä’ pudu’ napappaham lila hupatau to mohäe la umpemäläi sungnga’ku.
11Ma’kadai naua: <<Natampeammi Puang Allataala;
padondoi ammu sakkai, aka tala deem dia umpesäkäi!>>
12O Puang Allataala, daa ungkambelaä’!
O Puang Allataala to kupenombai, simpannii umpamoloiä’!
13La naposihi’ di too anna napopa’de
ingganna to la umpemäläi sungnga’ku;
la malea lindo hi too anna dipetuna
to umpeängannä’ tuntungam su’be’ nadakasam pa’posanga-sanga.
14Sapo’ kao-kao tontää’ mahannu matim oloMu,
anna tuttuam bassa’ä’, kupujiKo kupa’kasallei.
15La tiku’mi’ pudu’ku umpengkadaam pa’palakoam maloloMu,
umpentulasam pallangnga’i buttu di Iko pusam allo,
moinna anna budapi takuissanna makambam takulambi’na.
16Kupuji kupa’kasallei PUANG ALLATAALA, Debata to bahani matitta,
la kupakaleleam kamaloloamMu, anggam kamaloloamMu!
17O Puang Allataala, puhamä’ umpatudu mengkalao di mangnguhangku,
anna sule lako temo kupengkadaam pa’pogausam memängä-mängä buttu di Iko.
18Sule lako matuangku anna ma’tammu ubannä’ ma’lullum buha-buha.
O Puang Allataala, daa untampeannä’,
anna mala kupa’paissangam kakuasaamMu lako hupatau lapi’ temo,
anna kabahaniam matittaMu lako hupatau to mane la kende’.
19O Puang Allataala, sondä’ langi’ kamaloloamMu;
puhaKo umpogau’ kaha-kaha kasalle,
mennangka la mala umpapadaiKo?
20Iko umpahuaiä’ sussa anna pi’di’ tanggana-gana,
sapo’ Iko siam la umpauleä’ sule,
anna muangkaham dio mai apa’ mahihinna litä’.
21Iko la umpakesanga mapiaä’ sule,
anna la umpasule sumanga’ku ende’ pahajangku.
22La kupenggamahaam penaniam pa’kuhhusam sumanga’ matim oloMu kupasindum umponi gambus,
aka kamanontongamMu, o Puang Allataala to kupenombai;
la umpenggamahaannä’ pampujiam dio oloMu kupasindum umponi katapi,
o Puang Allataala To Maseho to napenombai to Israel.
23Tiku’mi’ pudu’ku kassi tilalla’ kupasindum umpenggamahaam pampujiam dio oloMu,
anna sundede buaku aka puhaKo ullangnga’iä’.
24La tika’bi’ lilaku umpengkadaam
kamaloloamMu pusam allo,
aka ingganna to umpeängannä’ tuntungam su’be’ nadakasam pa’posanga-sanga
la kasihisam anna bahakäpäm.
72Sambajam umpa’lambeam tomahaja
1Penaniam napapia Salomo.
O Puang Allataala, patudui pa’pemaloloMu lako tomahaja,
anna undu’ lolläMu lako änä’ tomahaja.
2La malolo hi too uhhotto’ umma’Mu,
anna la umpake undu’ lollä lako to didahha.
3La malino masannam di too lembäna Israel,72:3 lembäna Israel: Naua illaam basa Ibrani ke dipalutamai basa Bambam, mentu’na tanete.
anna umpake pa’pemalolo issinna pa’bottoam!72:3 issinna pa’bottoam: Naua illaam basa Ibrani ke dipalutamai basa Bambam, ingganna buntu.
4La umpa’kadaam di too
to kaasi-asi illaam pa’bottoam,
umpesäkäi to mase-mase,
anna umpempa’deam ingganna to ma’tengko kumeso’!
5La mahendem72:5 mahendem: Inde terjemahan untuhu’ Septuaginta (basa Ibrani dipalutama basa Yunani) anna TB sola BIMK. Naua ia illaam basa Ibrani ke dipalutamai basa Bambam <<la mengkahea’ dio oloMu>>. Indo la mengkahea’ taia tomahaja, sapo’ umma’Na DEBATA (to Israel). Anna indo la mahendem illaam Septuaginta tomahaja diuaam. di too situngguam mata allo,
ma’tintingam sitontäam bulam!
6La susi hi too uham umbossi’i kuhha mane puha dibatei,
la anggasanna uham mahämbä’ uhhehe kaliane!
7La tiballa’ kalua’ di too pa’pemalolo72:7 pa’pemalolo: Inde kada dipake situhu’ Septuaginta, sapo’ naua ia illaam basa Ibrani ke dipalutamai basa Bambam to malolo battu diua to meada’. upu’ kapahentaanna,
anna la malino masannam sule lako pa’de bulam!
8La ma’pahenta hi too mengkalao illaam mata allo sule sau’ katampusam,
mengkalao dio Salu Efrat sule lako lili’na lino!
9La ma’luttu’ di too dio olona, ingganna balinna to tohho lako pädä kukku’,
anna ingganna to umpobalii la ma’udum guntu’ dio olona.
10La umbaba hi too pa’pebeem tanda pa’pakasallena mentu’na tomahaja dio mai Tarsis72:10 Tarsis: Botto to nadakka’ to Funisia dio Spanyol.
anna dio mai simesa-mesa pulau;
la umbaba hi too pa’pebeem tanda pengkahea’na
mentu’na tomahaja dio mai Syeba anna Seba!
11La menomba asam di too mentu’na tomahaja dio olona,
anna ingganna kahajaam la mendadi sabua’na!
12Aka ullappasam to kaasi-asi kapala’-pala’,
to mase-mase, tä’ deem umpamoloi.
13Uhhäntängam bua to kaasi-asi anna to mase-mase,
umpesäkäi sungnga’na to mehio-hio.
14Nalangnga’i sungnga’na dio mai pandahhaam anna kamakahhasam,
aka sungnga’na kasalle angga’na dio olona.
15La mahendem di too tomahaja! La dibeem di too bulabam täsä’ dio mai Syeba tanda pa’pakasalle lako kalena!
La dipa’lambeam liu hi too illaam mentu’ wattu,
anna allo-allo dipelauam tamba’!
16La bosa’ di too tanangam gandum illaam pa’bottoam,
la tiähhe’ längäm tanete;
la mabuli mabissä hi too buana susi tanangam yabo tanete Libanon,72:16 Libanon: Sanganna mesa tanete dio Israel malompo litä’na.
anna la bakka’ ma’hupatau illaam bottona susi humpu’ lako kaliane.
17La ditula’ mapia liu hi too sanganna sule lako salako-lakona,
anna la tuttuam kaleleam situngguam mata allo.
La umpelau hi too tamba’ mentu’na kahajaam susi tomahaja,
anna la nasa’bu’ simesa-mesa kahajaam to kehongko’.
18Dipuji dipa’kasallei DEBATA, Puang Allataala to napenombai to Israel,
anggam Ia mala umpalako pa’pogausam memängä-mängä!
19Dipuji dipa’kasallei sanga matandeNa sule lako salako-lakona;
la nasamba hi too senambo lino kamatandeanNa!
Amin, Amin!
20Susim too sambajanna Daud, änä’na Isai.
73Suha’ Katallunna
Penaba manenne mendadi mahannu
1Pampujiam napapia Asaf.
Mannassa tä’ deem pada samapia penaba Puang Allataala lako to Israel,
lako to ma’penaba mahändä anna sambulo-bulo.
2Sapo’ kao-kao, saidi’ku tasala’ tekka,
saidi’ku tamehonno’.
3Aka ungkembuhuiä’ to malangka’ penaba,
tappana kuita masannam leko’ ia katuboanna to tameada’.
4Aka tala mengngallo ulu hia tala ma’temmeham kide,
masakke bätäna anna pohe kalena;
5tanahua sussa susi buda tau,
tanalambi’ pi’di’ susi tau senga’.
6Iam too anna umpa’mani’um kamalangkasam penaba,
anna umpa’baju malulla’73:6 umpa’baju malulla’: Kalembasanna, napogau’ liu. kamakahhasam.
7Ponno kakadakeam illaam penabanna,73:7 Ponno kakadakeam illaam penabanna: Indo basa Ibraninna ke dipalutamai basa Bambam naua: <<Tibulittä’ matanna aka malompo sugali’>>.
lempam pole pattuju kadake illaam tambu’na.
8Silele ma’petuna anna ussembu’ tula’ kadake,
sola kamalangkasam penabanna umpassubum tula’ pangngepe’.
9Pudu’na umpassubum tula’ panteläi lako to untadongkonni suhuga,
anna lilana ussembu’ tula’ saboä illaam lino.
10Nasuhum natinandai umma’Na Puang Allataala,
sangngim anggasanna untahuttu’ uwai buda.
11Ma’kada indo to malangka’ penaba naua: <<La naissam umba hia ngei Puang Allataala?
Umba hia ngei la naä’bä To Handam Matande?>>
12Susim too tula’na to tameada’;
tuttuam buda kullena anna tä’ deem nakasepa-sepai!
13Hapanna la kuua: <<Labu’ di limbä tallam di pahupu penaba mahändäku anna sambulo-bulo;
tä’ deem gunana umpattinniä’ kaleku dio mai dosa.
14Aka puli hi allo nahuaä’ pi’di’,
anna mesa mebengngi’ nalambi’ä’ pesämbä’.>>
15Maka’ hapanna la ma’kada susiä’,
iya setonganna umpogau’mä’ kasalaam lako umma’Na Puang Allataala.
16Sapo’ tappana kupeä lalanna la kupellantunni kaha-kaha ia too,
tä’ di deem pada samapahhi’ kusi’dim.
17Lambi’ le’ba’ä’ tama ongeam masehoNa Puang Allataala,
iya kuissammi pole’ katihutusanna to tameada’.
18Setonganna Iko umpadioi lalam malubellu’,
untobängam simesa lambi’ dahi kapu’.
19Sakappi’deam mata anna dahi ambummi,
mehäntäi kamateanna!
20O Debata, susi dipangngimpi,
tappana kilala tau, iya puham umpempa’deam.
21Tappana suhhä’ buaku
anna mapi’di’ penabangku,
22to takepikkihannä’ anna tadeem aka kuissam,
to maho susiä’ olo’-olo’ dio oloMu.
23Moinna anna susi, tontää’ dio ampe’Mu,
muanda’iKo lima kanangku.
24Petundam pepakilalaamMu umpake umpatetteä’,
anna ma’katampasanna la muäkä’ä’ längäm ongeam kamatandeam.
25Mennangka kuampuam yabo suhuga sulibanna Iko?
Tä’um deem senga’na kupohäe illaam inde lino sulibanna Iko.
26Moi la pa’de bätä puntingku anna kattu sungnga’ku,
sapo’ Puang Allataala kamatohoam penabangku anna ampuangku sule lako salako-lakona.
27Aka menna-menna umpemboko’iKo la ullambi’ katilakaam;
umpempa’deam ingganna to ullullu’Ko.
28Sapo’ kao-kao, kupohäe mengkahuku’ lako Puang Allataala;
PUANG ALLATAALA Debata kupadadi ongeam pentuhehungangku,
anna mala kuissam kutula’ ingganna pa’pogausanNa.
74Penaniam ungkasajanni Banua DEBATA didake-dake
1Penaniam pepatuduam napapia Asaf.
O Puang Allataala, aka hia anna la untibe liungkam kami’?
Maaka hia anna hede-hedei aha’Mu lako umma’ to ungkambi’ umpaliaha?
2Ingahanni umma’Mu to puha umpilei pempom dio mai,
to untässu’i mendadi umma’ petauamMu!
Ingahanni Tanete Sion, ongeam tadongkongamMu.
3PentekkaKo lako ongeam to daum labuammi;
ingganna aka-aka illaam banua maseho puham asammi napadahi kapu’ bali.
4Ingganna to umpobaliKo umbaku-bakuam a’da’na illaam ongeam kapenombaam dio oloMu,
anna untandeam bandehana tanda kapataloanna.
5Anggasanna to ussoeam wasena,
ullempo’-lempo’ kaju pangngala’,
6napateemmi too uhhuppu’-huppu’ ingganna pangkakka’ disuha’
nabisä’ wase anna natuttu’i palu.
7Sangngim ussumpum ongeam masehoMu napasihante litä’,
ungkussi’i ongeam tadongkongamMu.
8Sikama’kada illaam penabanna naua: <<Tadahha simesaia’!>>
Sikamuä’bäi ingganna ongeam kapenombaam lako Puang Allataala illaam pa’bottoam.
9Tala deemmi diita tanda memängä-mängä, tala deemmi meata nabi,
anna tä’kam deem moi podo la mesa la muissanni la meangga umba ma’pateem.
10O Puang Allataala, la pada hia umba masäena napetunaKo bali?
La pada hia umba masäena natelle sangamMu?
11Akanna umpodo’i sule katea’Mu, katea’ bassimMu?
Ette’i limamMu, ammu pempa’deam balimMu!
12Sapo’ Iko o Puang Allataala, tomahajangku mengkalao dio mai,
Iko to ullappasam hupatau illaam inde lino.
13Umpasisähä’Ko uwai le’bo’ sola kuasa kamatohoamMu,
anna uhhäppu’-häppusangko ulunna ula’ naga dio uwai.
14Iko uhhamu-hamuam ulunna Lewiatan,74:14 Lewiatan: Mesa sanganna ula’ naga.
anna umpadadii kinandena olo’-olo’ lako pädä kukku’.
15Iko umpabuttu uwai, anna umpalolä uwai salu;
Iko umpamatti’ uwai salu to mellao allo bengi.
16Iko puäna allo, Iko puäna bengi,
Iko umpopa’tadongkongam mata allo, anna bulam.
17Iko untete katonanna lino,
Iko muäto’ wattu kulla’ anna wattu palauham.
18Paalai suhi’ inde DEBATA: napetunaKo bali,
anna natelle sangamMu kahajaam to tamengkahea’ dio oloMu.
19Daa umbeho umma’Mu to malamma dokko pala’ limanna bali meappi’i!
Daa umpa’kalembei tahhu’ umma’Mu to mehio-hio!
20Ingahanni pa’dandiamMu lako kami’,
aka ingganna ongeam malillim illaam inde botto, napessehäi to meappi’i.
21Daa umpabäi to mehio-hio ma’pasule malea lindo,
la napuji hi too sangamMu to masussa anna to mase-mase.
22O Puang Allataala, pengke’de’Ko, pekkalundangangKo kaleMu!
Ingahanni, maaka susi to tamengkahea’ dio oloMu pusam allo natelleKo.
23Daa umpa’talingalenda’i pa’buhohona balimMu,
pa’mämmäna to mengke’de’ umpobaliKo,
pelaboha-boha liu!
75Puang Allataala To mahhotto’ malolo
1Lu lako to untetem to menani. Situhu’ ajanganna penaniam: Daa umpandappo’i. Pampujiam napapia Asaf. Penaniam.
2O Puang Allataala, ma’kuhhu’ sumanga’kam dio oloMu, ma’kuhhu’ sumanga’kam,
anna kipuji sangamMu aka mahuku’Ko, kipa’pakahebaam pa’pogausam memängä-mängäMu.
3Ma’kada Puang Allataala naua: <<Illaam wattu puha kupa’tantu,
la tama’bijaä’ tama’sangngana’ mahhotto’.
4Maka’ kakemba-kemba lino sola mentu’ issinna,
la kupakatoto’ ingganna pelanggana.>>75:4 pelanggana: Situhu’ to Yahudi battu diua to Israel yolona, inde lino anggasanna <<pihim>> dipaokko’ yabona le’bo’. Dadi, nasanga deem pelanggana battu diua andihinna anna mala tä’ tallam.Sela
5Ma’kadaä’ lako to malangka’ penaba kuua: <<Daa ummalangka’ penaba.>>
Anna lako to tameada’ kuua: <<Daa umpaläjä tandu’mu umpalongkom palasamu!
6Daa umpaläjä tandu’mu,
daa untumonga pundu pa’tula’!>>
7Aka kamatandeam tala buttu illaam mai mata allo, tala buttu illau’ mai katampusam,
tala buttu dio mai pohiallasam,
8sapo’ Puang Allataala umpopa’tadongkonganni;
deem napomatande anna deem napomahempo.
9Aha’Na DEBATA, sihhapam ihusam dio limanNa,
keissi anggur ma’tambuha, masahhu’ bulinna;
natolloam DEBATA, lambisam natahuttu’ to tameada’ inde lino
sampe puha sule lako galompa’na.
10Sapo’ kao-kao, la kupa’paissangam pa’pogausanNa sule lako salako-lakona,
la menggamahaä’ umpuji umpa’kasallei Puang Allataala to napenombai Yakub.
11La napompoi DEBATA tandu’ masadi’na to tameada’,
sapo’ to meada’ ia la tuttuam längäm kamatohoanna.
76Molele-lele sanganNa Puang Allataala
1Lu lako to untetem to menani. Pampujiam napapia Asaf. Penaniam dikatapii.
2Kaleleam Puang Allataala dio Yehuda;
molele-lele sanganNa dio Israel!
3Kota Salem76:3 Salem: Tontäm Yerusalem. Sanga yolona Salem, sanga bakahunna Yerusalem. tadongkonganNa,
Tanete Sion naongei tohho!
4Etam too naongei umpolo-polo batu bälä’du’ sitonda apinna,
unta’, pa’dam, anna paha’buno senga’. Sela
5Tä’ deem pada samatandeKo,
matande puhaKo Iko anna la mentu’na tanete to inna deemmi pempom dio mai.
6Ingganna pa’bahani disollo’ kulakka’na dikolä’ täiabunna;
sangngim mamma’ tahhu’um,
ingganna to bahani matoho
tä’um nabela muäjä’ limanna.
7Pangkissä’imMu, o Puang Allataala to napenombai Yakub,
napolalam tissämbä’ sola daham dokko litä’ ingganna to ma’bendi.
8Anggam Iko sipäto’ dipengkahea’i!
Mennangka la natua ke’de’ dio tingngajoMu
wattunna keaha’Ko?
9Buttu yabo mai langi’ umpengkadaam kattuamMu;
mahea’ anna ma’luttu’ issinna lino,
10wattunna mengke’de’ Puang Allataala uhhotto’,
anna la ullangnga’i ingganna to dipakamase-mase illaam lino. Sela
11Setonganna, aha’Mu lako hupatau napolalam dipujiKo dipa’kasallei,
anna tihäntänapi to nahua aha’Mu la napenombaiKo.
12Pa’dandiko dio oloNa DEBATA, ammu ponnoi pa’dandimmu dio oloNa DEBATA, Puang Allataala to umpenombai!
Ingganna hupatau to ullilim DEBATA,
la umbaba bua pemala’na lako To dipengkahea’i,
13Ia muäläiam kute’-kute’na ingganna to muanda’i kakuasaam,
Ia napengkahea’i mentu’na tomahaja di lino.
77Pa’pogausanNa Puang Allataala wattu puha lessu’
1Lu lako to untetem to menani. Situhu’: Yedutun. Pampujiam napapia Asaf.
2Kupekasallei mengkaala längäm Puang Allataala;
kupekasallei mengkaala, anna mala nahingngiannä’.
3Wattungku illaam kamasippisam mengkaalaä’ längäm Debata;
tamali-malisam kuballa’ pala’ku puli bengi,
sapo’ tä’ mala tipakahanga penabangku.
4Maka’ too ungkilalai omä’ Puang Allataala, iya si mengkaloa’ mandamä’,
maka’ too kupikki’ kupenabaam, iya si tuttuam kattu hannuä’. Sela
5Taumpamamma’Ko matangku Debata;
kapisa’ä’ makanano, lambisam takuissam ma’kada.
6Kupasalui penaba wattu puha lessu’,
kupenaba-nabaam taum puha kuboko’inna.
7Kupasalui penaba pampujiangku wattu bengi indo lessu’,
kupaalai pikkiham anna mekutana illaam penabangku naua,
8<<La metumpu pala’ liungka tia isanga Debata,
tä’ungka tia isanga la meihusam uwai sumule?
9La pa’de liungka tia isanga indo pangkaha’ pa’kamaseNa takattu tintim tamondo’ sahuham?
La tohho liungka tia isanga indo pa’dandianNa?
10Nakalembeingka tia isanga Puang Allataala la umpa’patandaam kamapiaam penabanNa?
Titompängka tia isanga pa’häntängam buaNa napobua’ aha’ kasalleNa?>> Sela
11Iya kuuam: <<Iam too inde umbungkum buaku ungka’dam penabangku,
umbai’ tieli’um penabanNa To Handam Matande.>>
12La kupasalui penaba mentu’na pa’palakoanNa DEBATA,
la kupaalai pikkiham ingganna tanda memängä-mängäMu pempom dio mai.
13La kupikki’ kupenabaam ingganna pa’pogausamMu,
anna la kupasalui penaba mentu’na pa’palakoamMu.
14O Puang Allataala, maseho ingganna ulalamMu,
debata mennangka la umpapadai kamatandeanNa Puang Allataala to kipenombai?
15Iko Puang Allataala to umpogau’ tanda memängä-mängä;
puhangKo umpa’patandaam kakuasaamMu illaam alla’-alla’na kahajaam.
16UllappasangKo umma’Mu sola katea’ bassimMu,
pessubunna Yakub anna pessubunna Yusuf. Sela
17NaitamMu uwai, o Puang Allataala,
naitamMu uwai, silelem mahea’,
meangga le’bo’ mandalam lumalla’ duka’ mahea’.
18Gabum umpatitollo uham,
magahugu guntu’ yabo langi’;
silalle kila’ lako dio mai.
19Magahugu moninna guntu’Mu,
tikiä kila’ lako lino,
pahodo lino anna pahundam kaliane.
20MellaoKo ungkellä’ uwai le’bo’,
umpa’tängäiKo le’bo’ kalua’,
sapo’ tala deem diita lalam bitti’Mu.
21UntetengKo umma’Mu sihhapam domba buda
napatette Musa sola Harun.
78Muala tandengam tulasam
1Penaniam pepatuduam napapia Asaf.
O inggannakoa’ solaku to Israel, patanannii talinga pepatuduangku,
pehingngii pessubungam pudu’ku.
2La tiku’mi’ pudu’ku umpokada kada to keaka’,
umpassubum tula’ mandalam kalembasanna pempom dio mai.
3To puha kihingngi sola talingangki anna kipähäm sola penabangki,
napaondom nene to kiponene.
4Tä’ la kibuniangam lako pessubungki,
sapo’ la kitulasam lako to mane la dadi
diona pa’pogausanNa DEBATA sipäto’ dipuji anna kamatohoanNa,
anna ingganna pa’pogausam memängä-mängä puha napogau’.
5Puha umpandam petundam pepakilalaam lako pessubunna Yakub,
anna umbeem pepaondongam lako pessubunna Israel;
ussua nene to taponene
la natulasam lako ingganna pessubunna,
6anna mala naissam to mane la kende’,
nakaleso to mane la dadi,
anna nalombungam natulasam lako pessubunna.
7Nasuhum sangngim ussedam hannu längäm Puang Allataala,
anna tä’ nakalembei mentu’na pa’pogausanNa,
sapo’ la nakedoam naabiham ingganna pahentaNa;
8tä’ la susi nene to naponene,
lapi’ to kahha’ ulu anna pabali-bali;
lapi’ to ma’lutama lu subum penabanna,
anna to tä’ manontom pikkihanna lako Puang Allataala.
9Pessubunna Efraim to sundum anna ganna’ bälä’du’na,
soho’ boko’ di illaam wattunna pa’bundusam;
10sangngim tä’ muanti manda’ untobe matoto’ pa’dandianNa Puang Allataala,
anna tala ma’dim tala maelo’ untuhu’i paondonNa.
11Silele umpa’kalembei mentu’na pa’palakoanNa Puang Allataala,
anna ingganna pa’pogausam memängä-mängäNa, to puha napa’patandaam lako kalenai.
12Dio olona nene to naponene, Puang Allataala umpogau’ tanda memängä-mängä,
dio lembäna Mesir, dio hantena Zoan.
13Umpasisähä’ uwai le’bo’, napa’paolai lambam umma’Na;
napatitompä patomali sihhapam passadangam.
14Napatette umpake gabum wattu iallo,
anna napahundu’ umpake pangkähhäna api wattu bengi;78:14 gabum wattu iallo...api wattu bengi: Petua’i Kal. 13:21.
15umpahäkkä kumila’ batu dio pädä kukku’,
napabosa’i uwai naihu’ sihhapam uwai ma’kalimbuä dio mai le’bo’ mandalam;
16umpassubum uwai illaam mai kumila’ batu,
napatibuso ma’salu-salu.
17Moinna anna susi, sangngim umpogau’ liu siam dosa längäm Puang Allataala,
pabali-bali lako To Handam Matande dio pädä kukku’.
18Mengkalao illaam unä’ penabanna umpa’sändä’i Puang Allataala,
umpelau kinande umpangngula’ pangngua penabanna.
19Sikauntelle Puang Allataala naua:
<<La nabela haka Puang Allataala nabeengkia’ kinande illaam inde pädä kukku’?
20Abana toda’ uhhambi kumila’ batu,
nasuhum messubum uwai illaam mai ma’salu-salu;
sapo’ la nabela haka duka’ umbeem hoti
anna umpadeengam bale umma’Na?>>
21Nasuhum liba’ aha’Na DEBATA nahingnginna tula’ ia too;
sundällä’ api muä’bäi sanaka-naka pessubunna Yakub;
hede-hede aha’Na ullippä’i pessubunna Israel,
22aka sangngim tä’ matappa’ lako Puang Allataala,
anna tä’ nakannangam la mala nalappasam.
23Iya ussuam gabum yabo lawwa Puang Allataala,
umpatitungka’ mentu’na ba’ba langi’,
24napatitolloam uham manna78:24 manna: Kinandena to Israel wattunna muola pangngolalalangam dio pädä kukku’. Malepom tumpippä manipi’, mabusa hupanna. Petua’i Kal. 16:14-21 anna Pah. 11:7-9. la naande,
napatuhungam gandum buttu yabo mai suhuga.78:24 gandum buttu yabo mai suhuga: Indo diuaam gandum buttu yabo mai suhuga, tontäm <<manna>> indo ditula’ yabo bahi’ uhuna.
25Simesa-mesa tau muande kinande malaika’,
napatuhungam Puang Allataala kinande la napedea’i.
26Umpatibussau hibu’ buttu di mata allo yabo langi’,
anna umpasule hibu’ buttu di selatan sola kuasanNa.
27Napatuhungam bale dassi mellitä’ budanna,
dassi mentia’ pada budanna bungim dio bihim le’bo’.
28Nahonnosangam dokko alla’ kemana,
tama alla’ ongeam naongei tohho.
29Iya silelem mangngande sampe bese’;
aka naponnoiammi pa’pemulunna.
30Sapo’ tä’ liupi nasanga;
tä’pi puha naamma’ indo kinande,
31iya kende’um aha’Na Puang Allataala lako;
napatei ingganna pa’bahaninna,
anna umpakattu sungnga’ mentu’na änä’ gassinna to Israel.
32Moinna anna susi, sangngim umpatampanni mandi dosana,
anna tä’ nakatappa’i mentu’na pa’pogausam memängä-mängäNa.
33Nasuhum napamate ula’-ula’ Puang Allataala,
napatei sipuli kamaheasam.
34Deem opi solana napatei Puang Allataala, mane tihaka’ oi piha lako Puang Allataala,
pässä’ anna mengngala sule lako Puang Allataala.
35Sangngim kilala diona Puang Allataala buntu batunna,
anna Puang Allataala To Handam Matande to mesolonna.
36Sapo’ naio-ioam sola pudu’ pandenna,
anna napamammisam kada sola lila manähäna.
37Tä’ manontom penabanna lako,
anna tä’ naanti manda’ natobe matoto’ pa’dandianNa.
38Sapo’ Ia to pa’häntängam bua,
Ia umpanampum umma’Na,
anna tä’ umpempa’deam umma’Na;
tapenduam tapentallum muoppo’ aha’Na,
anna tä’ umpalippä’ aha’ kasalleNa.
39Naissam naua inde hupatau to naande kamateam,
sihhapam hibu’ liu lalam, tä’um deem la ma’pasulena.
40Pembuda umbali-bali Puang Allataala dio pädä kukku’,
anna napi’di’ penaba dio pohiallasam!
41Pembuda umpa’sändä’i Puang Allataala,
umpasengnga inaba To Handam Maseho, to napenombai to Israel.
42Napa’kalembei kakuasaanNa,
wattunna nalappasam dio mai pala’ limanna balinna,
43wattunna umpadadi tanda memängä-mängä dio Mesir,
tanda mepilla’-pilla’ dio hantena Zoan.
44Ingganna salunna anna mentu’na salu-salunna,
napopengkubalim mendadi haha, lambisam tamala diihu’um tamala ditummi’.
45Napasuleam tamboli’ muotta’i,
napakendesam tongko’ buda ungkadakei.
46Napatuhungam bengkä umpuha tananganna,
napakendesam bati’ ullosso’ bua pengkähäna.
47Napatei too’ anggurna umpake uham kembua;
nadappo’i too’ arana umpake langullo bäkkum.
48Napalondoi uham kembua sapinna,
napalilai kila’ patuboanna.
49Umpalippä’ aha’ hede-hedeNa,
aha’ kasalleNa, ali-alinNa, anna aha’ ma’sissinNa,
napasuleam salengkoam malaika’ to meäläi;
50Napalaona liu hede-hede aha’Na,
napabäi bäbä silele letta’ sungnga’na,
napakattu sungnga’ muolai saki kahha’ paleleam.
51Nahihisam umpatei änä’ uluana to Mesir,
änä’ ulua illaam simesa-mesa pessubunna Ham.78:51 Ham: sanga senga’na Mesir.
52Mane untässu’i umma’Na sihhapam domba salengkoam,
napatette sihhapam olo’-olo’ ma’lengko muola pädä kukku’.
53Natetem sola masannam, nasuhum tala mahea’ tala tigiam,
sapo’ balinna ia nasikuku’i uwai le’bo’.
54Umpatinanda umma’Na lako botto litä’ to natondä’i senga’ la mendadi ampuam ikaleNa,
lako botto tipatanetena,78:54 botto tipatanetena: Umbai’ Tanete Sion nauaam, umbaba sanganna lembäna Kanaan. to nakatama sola katea’ bassinNa.
55Uhhambai mäne’-mäne’ lao pa’botto napahandam umma’Na,
nateteam katonam litä’ la napomana’ ma’tintingam,
mane ussuai simesa-mesa pentoosanna to Israel umpessulle kemana pa’botto.
56Sapo’ umpa’sändä’ii hi anna umbali-bali Puang Allataala To Handam Matande,
anna ingganna pahentaNa tä’ naanti manda’ natobe matoto’.
57Susi nene to naponene, sangngim memboko’ anna tauntontonni gau’,
sihhapam bälä’du’ tombe’ be’bä laona.
58Umpasuhhä’ buaNa Puang Allataala, muolai kapehumalasanna lako debata lino yabo tanete kapenombaam,
Umpakembuhu Puang Allataala, muolai kapehumalasanna lako mentu’na tau-tau to napa’debatai issi litä’.
59Tappana naissam Puang Allataala, iya tä’ deem pada sakeaha’,
lambisam untumpu pala’ mate-mateam to Israel.
60Umpellei ongeam katadongkonganNa dio Silo,
ongeanNa tohho illaam alla’-alla’na umma’Na.
61Naahusam napamuhu bali Patti Pa’dandianNa;
naahusam dondom dokko lisu pala’na bali Patti Pa’dandianNa to mendadi tanda kamatandeanNa.
62Naahusam ditepa pa’dam umma’Na,
anna hede-hede aha’Na lako umma’ to napasähä’.
63Mentu’na änä’ gassinna dappo’ illaam pa’bundusam;
ingganna änä’ dahana sangngim nalebam bähä.
64Ingganna sandona mate ditepa pa’dam,
mentu’na to balunna tadibeem pakala ussahhoi sassibalinna.
65Iya mengke’de’um Debata sihhapam to bangom dio mai kamammasanna,
anggasanna mesa pa’bahani to kilala tappana puha napalintu anggur.
66Umpasosso’ ingganna balinNa,
sikanapakasihi’ sule lako salako-lakona.
67Untumpu pala’ pessubunna Yusuf,
anna tä’ umpilei pentoosanna Efraim,
68sapo’ Ia umpilei pessubunna Yehuda,
Tanete Sion napohäe.
69Umpake’de’ Banua masehoNa napasusii suhuga,
susi lino ke’de’ matoto’ sule lako salako-lakona.
70Umpilei Daud, sabua’Na,
natässu’i illaam mai pa’kambisam domba;
71illaam mai alla’-alla’na domba keänä’ bahinni’,
la ungkambi’ pessubunna Yakub umma’Na,
peänäsanna Israel to napilei.
72Nakambi’ sola penaba sambulo-bulo,
napatette sola lima hatta’na.
79Sambajanna to dipi’di’ dipakamase-mase
1Pampujiam napapia Asaf.
O Puang Allataala, nakatamam ingganna kahajaam senga’ botto litä’Mu,
ungkussi’i banua masehoMu,
umpatitale bangke’ kota Yerusalem.
2Silele umpa’sahantangam bakkena umma’ petauamMu,
nasiäläi dassi-dassi yabo lawwa,
bakkena umma’ to masehoMu nasibessui olo’-olo’ to peande lako kaliane.
3Napatitollo hahana sihhapam uwai
illaam paluäna kota Yerusalem, tä’um deem podo la mesa tau ullamunni.
4Napetuna mandangkam kahajaam salembangangki,
natelle anna nasassai sabanambeki.
5O DEBATA, la pihampi isanga monda hede-hede aha’Mu?
La ma’nala-nala haka kakembuhuamMu susi api?
6Boka’i aha’Mu
lako ingganna kahajaam to taumpenombaiKo,
lako mentu’na kahajaam to taumpengkaalai sangamMu.
7Aka puham sikamuande sola kutu pessubunna Yakub,
anna napadahi kapu’ botto litä’na.
8Daa umpalambannikam dosana nene to kiponene;
la bale’ nalambi’ dakam too pa’häntängam buaMu,
aka lussemmi bukungki bahinni’ penabangki.
9O Puang Allataala to ullangnga’ikam, pesäkäikam,
aka la kamatandeanna sangamMu!
Lappasangkam anna ampunniangkam dosaki
anna mala lele mapia liu sangamMu!
10Daa umpabäi kahajaam senga’ ma’kada naua:
<<Umba hia ngei Puang Allataala to napenombai?>>
La kiita hi too sola matangki ke dipabala’im kahajaam senga’
to umpatitollo hahana umma’ petauamMu.
11La kende’ di too dio oloMu pengkaloa’na to disabua’i;
pabäipi tubo ingganna to puham dipa’tantu la dipatei,
situhu’ kakuasaamMu!
12Pabala’i pempitu tiluppi’ lako kahajaam salembangangki
indo pa’petunanna tama kaleMu, o Debata!
13Anna mala kami’ to disa’bu’ umma’ petauamMu, umma’ to digalla’ domba pantahinanamMu,
la ma’kuhhu’ sumanga’ dio oloMu sule lako salako-lakona,
anna la kipujiKo kipa’kasallei ma’tintingam sule lako ampo-ampoki.
80Sambajam la dipapoletottom sule to Israel
1Lu lako to untetem to menani. Situhu’ ajanganna penaniam: Bunga bakung. Pampujiam kasa’bianna Asaf.
2O, to ma’kambi’na Israel, patananni talingamMu,
Iko to umpatette pessubunna Yusuf sihhapam domba salengkoam!
Iko to tadongkom yabona dua kerub,80:2 kerub: Sahhupa pesuaNa Puang Allataala ma’pani’ buttu yabo mai suhuga. Situhu’ pahentaNa Puang Allataala dipapia dua pa’pasusianna kerub yabona indo tutu’na Patti Pa’dandiam (tutu’ diongei muampunni dosa), anna mala ia umpa’patandaanni diua Puang Allataala tadongkom illaam alla’-alla’na umma’Na. pa’paitangKo kaleMu pangkähhä
3dio olona Efraim, Benyamin anna Manasye!
Pa’patandaanni kakuasaamMu,
anna suleKo ullangnga’ikam.
4O Puang Allataala, papoletottongkam sule;
padelle’ikam hupamMu, anna malakam langnga’.
5O DEBATA, Puang Allataala To Handam Kuasa,
la pihampi isanga monda hede-hede aha’Mu, moi anna takattu tamonda umma’Mu ma’sambajam?
6Iko umpasitammi’i uwai matanna sihhapam muande bo’bo’,
Iko umpatumahämpä’i uwai matanna sihhapam muihu’ uwai.
7Iko umpadadikam buntu tumäna lambisam sipengka-pengka mentu’na kahajaam salembangangki,
anna napetunakam nasassai ingganna balingki.
8O Puang Allataala To Handam Kuasa, papoletottongkam sule;
padelle’ikam hupamMu, anna malakam langnga’.
9Untässu’iKo umma’Mu dio mai lembäna Mesir sihhapangKo mueli’ tanangam anggur,
uhhisiKo lao kahajaam senga’, umpantananni tanangam anggurMu.
10Umpatokaammi botto litä’ la naongei tohho,
lambisam kewaka’ mandalam, anna membea’ umponnoi pa’bottoam;
11tubo mahombo uhhehunni ingganna tanete,
täke kasallena ussamboi kaju aras laum;80:11 aras laum: Kalembasanna, kaju aras massä’di’um tubo anna kassa’de’.
12buda täke bahinni’na mehhoe sule lako Le’bo’ Itängä,
anna buda lolo mangnguhanna sule lako Salu Efrat.
13O DEBATA, akanna untaleanni bala tembo’na,
nasuhum nasipuppu’-puppu’i buana to liu lalam?
14Nasempa-sempa babi kaliane,
anna nakela’ olo’-olo’ pangngala’.
15O Puang Allataala To Handam Kuasa, pa’pasulengKo sule,
pa’petua’Ko yabo mai suhuga, ammu pesi’dinnikam!
Pahuai suhi’ inde umma’Mu to sihhapam too’ anggur,
16too’ anggur pantanam limamMu, too’ anggur to umpomatogom umpomatoto’!
17Puham sikanata’ba’ bali mane nasumpunni naä’bäi;
la silele hi too dappo’ bete-bete nahua aha’ kasalleMu!
18La naonganni hi too katea’ bassimMu hupatau to dio tandai kanamMu,
änä’ to lino to puha umpakatoto’ mendadi ampuam ikaleMu,
19lambisam tä’kam deem la soho’ boko’ dio mai kaleMu.
Kambisangkam sungnga’ki, anna mala kipuji kipomatande sangamMu.
20O DEBATA, Puang Allataala To Handam Kuasa, papoletottongkam sule,
padelle’ikam hupamMu, anna malakam langnga’.
81Penaniam wattunna untoto’i pa’dandianNa Puang Allataala
1Lu lako to untetem to menani. Situhu’ ajanganna penaniam: Gitit. Pampujiam napapia Asaf.
2Sikaahhekoa’ tilalla’ längäm Puang Allataala, too’na kamatohoanta,
kassikoa’ tilalla’ lako Puang Allataala to napenombai Yakub.
3De’de’ko rebana, äkä’ko pampujiam,
poniko gambus, hemba’ko katapi mapia oninna.
4Buhhuko sangkakala wattunna pissam bulam di langi’,
wattunna maleponna bulam, illaam allo kasalleta.
5Aka ia too mesa ulalam puha dipandam lako to Israel,
mesa pahenta buttu di Puang Allataala to napenombai Yakub.
6Puha napandam la mendadi pehhondoanna pessubunna Yusuf,
wattunna mengke’de’ umbali lembäna Mesir.
Kuhingngi tula’ to maneanna kuhingngi naua,
7<<Puham kulendu’iam dudunganna,
kuleppa’iam lemba’ buhia’na;
8mengkaalako illaam kamasippisammu, iya kulangnga’iko;
kutimba’iko illaam mai ongeanna guntu’ tadongkongangKu,
kupangngitaiko dio ampe’na kabuttuam uwai dio Meriba. Sela
9O mentu’nako umma’Ku, pehingngii la kubeengko pepakilalaam;
o mentu’nako to Israel, kupelau kela mala umpehingngii tula’Ku!
10Daa umpadeenna’ debata senga’ illaam alla’-alla’mu,
anna daa umpenombai debatanna lembä senga’.
11Kaom too inde DEBATA, Puang Allataala to umpenombai,
to untässu’ikoa’ illaam mai lembäna Mesir.
Pengängngäko, anna kupasimpoko sampe dea’.
12Sapo’ tä’ di napehingngiiä’ umma’Ku,
tä’ di natuhu’iä’ to Israel.
13Nasuhum kupahandam-handam bäbäm sitonda kamakahhasam penabanna;
pabäi mammi umpasababa penabanna!
14Indo kela naaku umma’Ku napehingngiiä’,
indo kela maelo’i to Israel untuhu’i ulalangku,
15iya la kupopa’bukku eta siam ham balinna,
la kupatiseham ke’de’ ingganna to umpobalii.
16Ingganna to ungkabassi DEBATA, la ma’udum guntu’ dio oloNa,
la sangngim ditahungkum sule lako salako-lakona.
17Sapo’ lu lako umma’Ku, la kupande gandum handam mapia,
anna la kupasanta’i duho ma’nini illaam mai alla’ batu.>>
82Puang Allataala untappakadai to ma’bisaha hempe’
1Pampujiam napapia Asaf.
Puang Allataala untadongkonni ongeam pahhottosam yabo suhuga,
uhhotto’ ingganna debata naua:
2<<La pihampi mane mondakoa’ ma’bisaha hempe’,
anna mualaangam leko’ to tameada’? Sela
3Undusanni kamaloloam to dipelamma sola änä’ bium,
pa’kadaanni to dipakamase-mase anna to kaasi-asi!
4Langnga’i to dipelamma anna to mase-mase,
lappasanni dio mai pala’ limanna to tameada’!>>
5Silele tanaissam, silele tanahohi’,
sangngim ma’palako kambuta; tamuokko’im okkosanna tamuongeim ongeanna ulalam.
6PuhaMä’ ma’battakada kuua: <<Ikoa’-iko, sangngim debatakoa’ duka’,
sangngim änä’nakoa’ To Handam Matande.
7Sapo’ umba susi hupatau mate, la susingkoa’ too duka’,
umba susi mesa to kasalle naande kamateam, la susingkoa’ too duka’.>>
8O Puang Allataala, pengke’de’Ko, hotto’Ko to lino,
aka Iko umpuängam ingganna kahajaam.
83Sambajam umpelau pepamolo la muoloi pa’baliam
1Pampujiam napapia Asaf. Mesa penaniam.
2O Puang Allataala, daa muammu’i pudu’Mu,
daa umpa’lembe-lembe, anna daa umpessingngammu’!
3Ita hiko, sikaolim balimMu,
ingganna to ungkabassiKo sangngim umpaläjä tandu’na umpalongkom palasanna.
4Sangngim ma’pattuju manekko’ la umbali umma’ petauamMu,
umpasahandammi kada la mueba umma’ to ullumbäi.
5Ma’kada naua: <<Maikoa’ takahäppusanni kahajaam Israel,
anna mala tadihekemmi tadisuhi’ sanganna!>>
6Mannassa, umpasahandammi kada umpamesa penaba,
ungkalebui tula’ la nabaliKo, susinna:
7Lembäna Edom, pessubunna Ismael,
lembäna Moab, pessubunna Hagar;
8lembäna Gebal, lembäna Amon anna Amalek,
lembäna Filistea sola issinna Tirus,
9susi toi duka’ kahajaam Asyur, membakkom lako,
napobitti’ napolimam pessubunna Lot. Sela
10Pasusii lembäna Midian,
susi punggaba tentaha Sisera, susi tomahaja Yabin dio ampe’na Salu Kison,
11to puha dipempa’deam dio kota En-Dor,
mendadi lompona litä’.
12Pasusii Oreb sola Zeeb ingganna pangngumbabanna,
pasusii tomahaja Zebah sola Salmuna ingganna to pebabanna,
13aka silele ma’kada naua:
<<Maikoa’ takatamai anta tadongkonnii botto litä’Na Puang Allataala!>>
14O Puang Allataala to kupenombai, patitantanni susi sobä’,
patisembu’i susi pa’tappiam naliliam hibu’!
15Umba susi api muande pangngala’,
lelona api muä’bäi mentu’na tanete,
16la susim too umpalilii hibu’ tatta’Mu,
umpakahea’ umpake hibu’ panggego’ ha’bumMu.
17O DEBATA, paponnoi kamatunaam,
anna mala napameä sangamMu.
18La nahuham di too longko’ anna la tinggi’gi’ sule lako salako-lakona;
la malea malatto’ di too lindona anna tinandai lako kamateam,
19anna mala naissam naua anggam Iko to disa’bu’ DEBATA,
To Handam Matande senambo lino.
84Mamalli’ lako Banua DEBATA
1Lu lako to untetem to menani. Situhu’ ajanganna penaniam: Gitit.84:1 Gitit: Petua’i pemasiä’na Gitit illaam hondongam 8:1. Pampujiam napapia pessubunna Korah.
2O DEBATA to ungkuasai langi’ anna lino,
tä’ deem pada saumpatiala inaba banua masehoMu!
3La puhu’ buaku ungkamalli’i
pa’hanteanna banua masehoMu,
bätä puntingku anna penabangku mua’da’ tilalla’
lako Puang Allataala, DEBATA tubo.
4Sule lako dena’ ma’sehä eta,
kalumpini’ unggahaga sehä dio,
dio ampe’na dapo’ pehumalasam matim oloMu,
napa’pongngei somana, o DEBATA to ungkuasai langi’ anna lino,
Tomahajangku anna Puang Allataala to kupenombai.
5Maupa’ anna katambasam to tohho illaam banua masehoMu,
tamonda takattu umpuji umpa’kasallei sangamMu. Sela
6Maupa’ anna katambasam hupatau to umbeem buku kamatohoam,
to mangnginaba-naba la le’ba’ längäm Tanete Sion.84:6 le’ba’ längäm Tanete Sion: Mala duka’ diua: le’ba’ längäm Tanete Sion menomba lako Puang Allataala.
7Maka’ too mellaom ullambam lembä Baka,84:7 lembä Baka: Deem to manähä muuai kalembasanna ongeam mabangi.
napopengkubalingammi ongeam ia too mendadi kabuttuam uwai;
anna napatuhungam toi uham wattunna palauham mendadi tamba’na.
8Tuttuam masäe mellao tuttuam kehängäm kamatohoanna,
sampe landa’ mengngolo lako Puang Allataala yabo Tanete Sion.
9O DEBATA, Puang Allataala To Handam Kuasa, pehingngii sambajangku,
patanannii talinga pelauangku, o Puang Allataala to napenombai Yakub. Sela
10O Puang Allataala, andaham matai tomahaja to uhhindingkam umbaläbä’,
daa umpalappa’i mata tomahaja pallanti’Mu!
11Setongam-tonganna, aha leko’um sangngallo illaam banua masehoMu
anna la sasa’bu allona dio ongeam senga’;
aha leko’um ke’de’ dio ba’ba banua masehoNa Puang Allataala to kupenombai,
anna la tohho dio banuanna to tameada’.
12Aka Puang Allataala, DEBATA, to meundu’ mepatette anna to mehindim pala’ mekulambu tahuno;
memana’ pangkaha’ pa’kamase sola kamatandeam;
umpa’katutuam kamapiaam
lako to tä’ deem sassainna pa’palakoanna.
13O DEBATA to ungkuasai langi’ anna lino,
maupa’ anna katambasam hupatau to mahannu dio oloMu!
85Sambajam umpelau la dipapoletottom to Israel
1Lu lako to untetem to menani. Pampujiam napapia pessubunna Korah.
2O DEBATA, ungkasajanniKo botto litä’Mu,
umpapoletottom pessubunna Yakub.
3Muampunniammi kasalaanna umma’Mu,
napa’deiammi mentu’ dosana. Sela
4UmpamehengKo aha’Mu,
muoppo’ungKo aha’ kasalleMu.
5O Puang Allataala to melangnga’ingki, papoletottongkam sule,
pa’deim pi’di’ penabamMu lako kaleki.
6La sule isanga lako salako-lakona aha’Mu lako kami’?
La tahhu’ liu isanga aha’Mu sule lako ampo-ampoki?
7Tä’ isanga muaku ke muangkahanni sule katuboangki?
Lambi’ sule sumanga’na ende’ pahajanna umma’ petauamMu aka pepamoloMu.
8O DEBATA, pa’patandaanni pangkaha’ pa’kamaseMu takattu tintim tamondo’ sahuham lako kami’,
anna beengkanni kalappasam buttu di Iko.
9Maelo’ä’ la untande talingai tula’ la napokada Puang Allataala, to disa’bu’ DEBATA.
Tä’ daka tia la umpokada kamalinoam
lako umma’ petauanNa, anna ingganna to napasähä’,
sapo’ tä’um la ussulei kamahoanna?
10Setongam-tonganna, kalappasam buttu di Puang Allataala dio siam ampe’na to mengkahea’ dio oloNa,
umpa’patandaam kaleNa to disa’bu’ To Matande illaam botto litä’ta.
11Pangkaha’ pa’kamase takattu tintim tamondo’ sahuham anna kamanontongam la sitammu sikuhhu’-kuhhu’i,
kamaloloam anna kamasannangam la silambi’ sikamoli’-moli’i.
12Kamanontongam ombo’ di lino,
anna kamaloloanNa Puang Allataala mengngollä yabo mai langi’.
13La memana’pi DEBATA kamapiaam,
anna botto litä’ta la umpakende’ alaam kinande.
14Kamaloloam la mendioloNa,
anna nahampasam lalam la naolanNa.
86Sambajam pengkaalaam lako DEBATA
1Sambajanna Daud.
Patanannii talingamMu DEBATA, hingngianni sambajangku,
aka memase-maseä’ anna napipi’ kamasussaam.
2Anda’iannä’ bätä penabangku, aka kao to manuhu’ä’ dio oloMu,
langnga’i inde sabua’Mu, to mahannu matim oloMu.
3Iko Puang Allataala to kupenombai, kamaseiä’, Debata,
aka pusam allo angga Iko kupengkaalai.
4O Debata, pasuleanni sumanga’na paendesanni pahajanna inde sabua’Mu,
aka lu matim oloMu kuäkä’ penabangku.
5Aka mapia penabaKo, Debata, anna madomi’ mepanampum,
tadipuha-puha pangkaha’ pa’kamaseMu takattu tintim tamondo’ sahuham lako to mengkaala matim oloMu.
6O DEBATA, patanannii talinga sambajangku,
hingngianni pelauangku.
7Wattunna illaannä’ kamasippisam, mengkaalaä’ matim oloMu,
aka si uhhingngiangKo sambajangku.
8O Debata, tä’ deem debata lino la susiKo,
tä’ deem la umpapadai pa’palakoamMu.
9Ingganna kahajaam pa’padadimMu, la sasuleam
menomba dio oloMu,
anna napujii napa’kasallei sangamMu.
10Aka tä’ deem pada sakasalle kuasamMu anna umpogau’Ko tanda memängä-mängä;
anggam Iko disa’bu’ Puang Allataala.
11O DEBATA, patuduä’ ulalamMu,
anna mala maneteä’ yabona kamaloloamMu;
pasatutuannä’ penabangku la umpengkahea’i sangamMu.
12O Debata, Puang Allataala to kupenombai,
la ma’kuhhu’ sumanga’ä’ matim oloMu sola sakalebu penabangku,
anna kupuji kupa’kasallei sangamMu sule lako salako-lakona.
13Aka kasalle pangkaha’ pa’kamaseMu takattu tintim tamondo’ sahuham tama kaleku,
anna puhangKo muangkaham bätä sungnga’ku dio mai kamateam apa’ mahihinna litä’.
14O Puang Allataala, mengke’de’um to malangka’ penaba nabundu’ä’,
anna ma’babangammi to tameada’ mohäe la napakattu sungnga’ä’,
sangngim napa’pa’deKo.
15Sapo’ Iko Debata, Puang Allataala to pa’häntängam bua, mamase,
sumpu sa’baha’, ponno pangkaha’ pa’kamase takattu tintim tamondo’ sahuham, anna manontom.
16Tingngajoiä’ ammu kamaseiä’,
beenni kamatohoam sabua’Mu,
anna langnga’iä’ kao inde änä’na sabua’Mu baine!
17O DEBATA, padadii mesa tanda kamapiaam lako kaleku,
anna mala malea lindo ingganna to ungkabassiä’ naita,
aka puhaKo umpamoloiä’ anna umpakahanga.
87Sion kota tadongkonganNa Puang Allataala
1Pampujiam napapia pessubunna Korah. Mesa penaniam.
Yabo tanete Maseho, DEBATA umpake’de’ kota tadongkonganNa.
2Napohäe puha ia DEBATA ingganna ba’bana kota Sion,
anna la mentu’na kota tadongkonganna pessubunna Yakub.
3O, kota tadongkonganNa Puang Allataala,
ingganna kaha-kaha keangga’ dipasitula’ diona kalemu. Sela
4Ma’kada Puang Allataala naua: <<Rahab87:4 Rahab: Sanga senga’na Mesir (petua’i Yes. 30:7). Rahab digalla’ ula’ naga illaam tulasanna to tohho dio Timur Tengah. anna Babel mentamam bilanganna kahajaam to manuhu’ lako kaleKu,
teem toi Filistea, Tirus anna Etiopia,
la digente’ to didadiam illaam libusanna Sion.>>
5Anna diona ia Sion la naua tau:
<<Ingganna kahajaam la diangga’ to disubungam illaam Sion,>>
anna nasamba’ napakatoto’ To Handam Matande.
6Nahekem DEBATA, wattunna umbilam mentu’na kahajaam naua:
<<La digente’ to didadiam illaam libusanna Sion.>> Sela
7La sikasajo hupatau napasindum menani naua:
<<Kota Sion lamungam taboningku!>>
88Sambajanna to illaammi alla’-alla’na to melluä uhu mesambu’ kaju mate
1Lu lako to untetem to menani. Pampujiam napapia pessubunna Korah. Situhu’ ajanganna penaniam: Mahalat Leanot.88:1 Mahalat Leanot: Inde kada tä’ diissam kalembasanna, dadi aham dituli’ diua Mahalat Leanot tä’ manggi’ dipalutama basa Bambam. Penaniam pepatuduam napapia Heman, to Ezrahi.
2O DEBATA, Puang Allataala to ullangnga’iä’,
wattu masiä mengkaalaä’ dio oloMu,
wattu bengi tinandaä’ matim oloMu.
3La sule hi too matim oloMu sambajangku,
patanannii talinga pengkaalaangku.
4Aka nasanta’ polemä’ pi’di’ kamasussaam;
yabomä’ tondom piso diomä’ ba’ba talumbä.
5Sihhapammä’ bakke tubehe’ la dilolloham dokko pambo’bä’;
pa’dem bukungku tadeemmi kamatohoangku.
6Illaammä’ alla’-alla’na to melluä uhu to mesambu’ kaju mate,
anggasanna to mate dipatei, ette’-ette’ dio ku’bu’,
o DEBATA, tadeemmi umposamele,
aka lappa’um dio mai kakuasaamMu.
7Umpadiomä’ apa’ mahihinna litä’,
illaam lembä bolom, ongeam handam mandalam.
8Naepe’ä’ aha’Mu,
nata’duä’ aha’ kasalleMu sihhapam pallulunna bombam. Sela
9Umpasilappa’mä’ mentu’na sababangangku,
umpadadimä’ to mehidi’-hidi’ dio olona.88:9 mehidi’-hidi’ dio olona: Deem to umpekalembasam battakada Debata muuai: napahuai dolengam Debata, lambisam nakahidi’ naita sababanganna.
Anggasangkum to ditahungkum,
tä’mä’ mala messubum;
10bongngommi matangku napobua’ sussaku.
Allo-alloä’ mengkaala matim oloMu DEBATA,
umballa’ pala’ tangkebulungku dio oloMu.
11Si umpogau’ dakoka tanda memängä-mängä lako to mate?
La mala haka to mate bangom sule napujiKo napa’kasallei? Sela
12La mala haka dipa’pakahebaam pangkaha’ pa’kamaseMu takattu tintim tamondo’ sahuham dio ku’bu’,
anna kamanontongamMu dio ongeam to mate?88:12 ongeam to mate: Inde kada, naua illaam basa Ibrani ke dipalutamai basa Bambam: ongeam katilakaam.
13Deem paka to illaam lembä bolom la muissam tanda memängä-mängäMu,
anna kamaloloamMu dio kaliane anitu?88:13 kaliane anitu: Inde kada, naua illaam basa Ibrani ke dipalutamai basa Bambam: kaliane tadipaalai suhi’.
14Sapo’ kao-kao inde, DEBATA, mengkaala matim oloMu umpelau pepamolo,
mesa mebengngi’ kupakende’ sambajangku dio oloMu.
15O DEBATA, aka hia anna umpemboko’imä’ kao?
Aka hia anna umbeosannä’ lindoMu?
16Mengkalao dio bahinni’ku nahimpi’-himpi’ä’ kamasussaam anna napelässä’ mata kamateam.
Kattu hannumä’ umpendudum kaha-kaha mabanda’ buttu di Iko.
17Nasopa’iä’ aha’ kasalleMu,
napempa’deannä’ pesämbä’Mu,
18pusam allo napali’ tintinnä’ sihhapam uwai bussu,
napissanni natalimbum tamaä’.
19Umpasikambelamä’ ingganna sassipakamajangku,
angga mandam kamalillingam umpali’ä’.
89Tatilenggu’ tatigesse kamanontonganNa DEBATA lako Daud
1Penaniam pepatuduam napapia Etan, to Ezrahi.
2La kupenggamahaam sule lako salako-lakona pangkaha’ pa’kamaseNa DEBATA takattu tintim tamondo’ sahuham,
la kupa’paissangam ma’tintingam lako pessubungku kamanontongamMu.
3Aka kuissam kuua, pangkaha’ pa’kamaseMu takattu tintim tamondo’ sahuham, manda’ matoto’ sule lako salako-lakona;
kamanontongamMu tatilenggu’ tatigesse susi langi’.
4Ma’battakadaKo muua: <<Puham kupadeem pa’dandiam lako to kutodinni,
puham kudandi lako Daud, sabua’Ku kuua:
5<Tala lumme sipa’mu tala leo pembijangammu sule lako salako-lakona,
tatibosso’ tatilenggu’ okkosam kahajaammu ma’tintingam lako pessubummu.> >> Sela
6O DEBATA, issinna suhuga umpuji umpa’kasallei pa’palakoam memängä-mängäMu.
Kamesaanna to masehoMu umpuji umpa’kasallei kamanontongamMu.
7Mennangka issinna langi’ la umpapadai DEBATA?
Mennangka to untadongkonni suhuga la umpasusii DEBATA?
8Puang Allataala dipa’kasallei illaam alla’-alla’na to maseho issinna suhuga,
dipengkahea’i untondom ingganna to umpangngissi suhuga.
9O DEBATA, Puang Allataala To Handam Kuasa, mennangka la umpapadaiKo?
Iko DEBATA to matoho, nalahuKo nasappi’ kamanontongamMu.
10Umpahe’Ko tissopa’na uwai le’bo’,
umpamattangko tilulunna bombam.
11Uhhäppu’-häppusangko ulunna Rahab89:11 Rahab: Sanganna naga le’bo’ illaam mesa tiolo-olo, dipasihhapam to umpakende’ kahukkaam anna kakadakeam. susi to ditättä’ hinni’,
katea’ bassimMu umpake umpatisembu’ dalle batte balimMu.
12Iko muampuam langi’, Iko umpuängam lino,
Iko umpadadi lino sitonda issinna.
13Iko umpadeem utara, Iko umpadeem selatan,
kassi Tanete Tabor, tilalla’ Tanete Hermon aka sangamMu.
14Iko umpuängam katea’ tabi,
Iko muampuam katea’ bassi to ponno kuasa.
15Kamaloloam anna undu’ lollä mendadi pehhondoam illaam kahajaamMu,
pangkaha’ pa’kamase takattu tintim tamondo’ sahuham anna kamanontongam umpanete.
16O DEBATA, maupa’ anna katambasam lako to naissam kassi anna tilalla’ dio oloMu,
to tubo naindo pangkähhäna kamatandeanna hupamMu;
17sangamMu napolalam silele kassi tilalla’ pusam allo,
anna kamaloloamMu nasuhum sundede buana.
18Iko umbeengkam kamatandeam sola kamatohoam,
anna kamapiaam penabamMu umpakatoto’kam.
19Aka tomahaja to uhhindingkam umbaläbä’, DEBATA umpuänganni,
tomahaja to ullumbäikam, naampuam To Maseho to napenombai to Israel.
20Yolona puhaKo umpa’palosaam kadamMu
lako to manontom menomba dio oloMu, muua:
<<Puham kupamoloi mesa pa’bahani,
puham kupatadongkonni ongeam matande mesa to kupilei illaam mai alla’-alla’na umma’Ku.
21Puham kutodinni Daud, sabua’Ku;
puham kulanti’ kutolloi minnä’-minnä’ masehoKu.
22Katea’ bassingKu la ungkambi’i unjagai,
katea’ tabingKu la muundu’i umpakatoto’.
23Tala napatigesse tala napatilenggu’ balinna,
tala napakapi’di’ tala napakamase-mase to tameada’.
24La kupempa’deam balinna dio olona,
anna la kupakatttu sungnga’ ingganna to ungkabassii.
25KamanontongangKu anna pangkaha’ pa’kamaseKu takattu tintim tamondo’ sahuham la muolaanni,
anna sangangKu nasuhum tuttuam matoho anna matogom.
26La kupadadi katea’ bassinna undappai melle’bo’na,
la kupadadi katea’ tabinna undappai messalunna.
27La ma’kada lako kaleku naua: <Ikom too Ambeku,
Puang Allataala to kupenombai, buntu batu to ullangnga’iä’.>
28La kuäkä’ untadongkonni okkosanna änä’ ulua,
mendadi tomahaja untandolängänni ingganna tomahaja illaam lino.
29Tala kukalembei pangkaha’ pa’kamaseKu takattu tintim tamondo’ sahuham lako kalena sule lako salako-lakona,
anna tatilenggu’ tatibosso’ pa’dandiangKu dio mai kalena.
30Kutanggum la ma’tintingam pessubunna sule lako salako-lakona,
anna okkosam kahajaanna la sipohi lino.
31Sapo’ maka’ umpaiboko’na paondongKu, pessubunna,
anna tä’ untuhu’i ätohangKu;
32maka’ untekka kalo’ ullambam mata uwai kada puha kupandam,
anna untedo tintim ussahambem liu lalam pahentaKu,
33iya la kudidi bissä’na songkä pessalamana’na pellendabiasanna,
anna la kudidi lolä’na lidi buana kasalaanna.
34Sapo’ tala kupalappa’i pangkaha’ pa’kamaseKu takattu tintim tamondo’ sahuham,
anna tala kupalumbäi pesi’ tala kupalonga’i panggaga kamanontongangKu.
35Tala kutekka tala kusole’ pa’dandiangKu lako kalena,
anna ingganna puhanna lendu’ dio pudu’Ku tala kuhuntu’ tala kupodo’.
36Ma’kada pissannä’ ma’dandi aka sanga masehoKu kujaga,
anna tala deennä’ kaägä’-ägä’ lako Daud.
37La ma’tintingam pessubunna sule lako salako-lakona,
la tobäka matanna allo anna la tobä okkosam kahajaanna dio oloKu,
38la tontä bulam tadongkonganna,
bulam to mendadi sa’bi manontom yabo langi’.>> Sela
39Sapo’ Iko siam ma’kale untumpu pala’i anna untibengKo tomahaja,
suhhä’ buaMu lako to puha ullanti’ untolloi minnä’-minnä’,
40umpodo’ sule pa’dandiamMu lako sabua’Mu,
umpellopängam songko’ kahajaanna dokko hossä’.
41Umpatitale bangke’ tembo’ kotana,
umpadahi kapu’ mentu’ bettenna.
42Napamuhui ingganna to liu lalam,
napetuna kahajaam salembanganna.
43Iko nasuhum mua’da’ patalo ingganna balinna,
Iko nasuhum kassi tilalla’ ingganna to ummusu’i.
44Iko toi ullulunni mata pisona,
anna umpahandam-handam bäbä illaam pa’bundusam.
45Iko uhhonnosanni yabo mai okkosam kahajaanna,
anna umbalintua’ okkosam kahajaanna dokko litä’.
46Iko umpomasimpanni ma’dongko,
Iko umpatimbei longko’. Sela
47O DEBATA, la pada hia umba masäena memboko’Ko?
La pada hia umba masäena ma’nala-nala susi api aha’Mu?
48Puha muissam tä’ deem pada sakapodi’ sungnga’ku,
labu’ di limbä tallam di pahupu katuboanna ma’hupatau!
49Mennangka hupatau la tä’ naande kamateam?
Mennangka tä’ la tinanda lako kaliane anitu? Sela
50O Debata, umba hi pangkaha’ pa’kamaseMu takattu tintim tamondo’ sahuham mengkalao dio mai,
to puha undandi lako Daud situhu’ kamanontongamMu?
51O Debata, ungkilalai haka pantelle tama kalena inde sabua’Mu,
mapi’di’ buaku ussi’dim pantellena buda kahajaam.
52Ingganna ia too nasembu’ mentu’na balimMu, DEBATA,
nasembu’ mendadi pantelle lako lingkana tomahaja pallanti’Mu.
53Dipuji dipa’kasallei DEBATA sule lako salako-lakona.
Amin, Amin!
90Suha’ Kaappa’na
Debata diongei mentiongam sule lako salako-lakona
1Sambajanna Musa, sabua’Na Puang Allataala.
O Debata, Iko kiongei mentiongam
ma’lapi’-lapi’ungkam inde dio mai.
2Tä’pi deem dibokkom buntu dilemo tanete,
tä’pi deem diballa’ lino dihampa’ kaliane,
mengkalao dio mai sule lako salako-lakona, anggam Iko Puang Allataala.
3Iko umpatinanda hupatau di assala’na,
anna ma’kadaKo muua: <<O, mentu’nako ma’hupatau, la dadi litä’ko sule!>>
4Situhu’ Iko, sasa’bu taunna puha lessu’
pada hekenganna sangngallo,
pada wattunna sallesoam bahena to ma’honda wattu bengi.
5Iko muäläi sungnga’na ma’hupatau; susi pangngimpi labu’,
sihhapam humpu’ mukku’ lolona,
6lobo’ anna tumballa’ wattu mebengngi’,
tingkahehe’ anna malasso tappana mahammo.
7Setonganna, sangngim napakahea’kam aha’Mu,
napempa’deam aha’ kasalleMu.
8Ussangkamata-matai kasalaangki,
ullosa lappa’ dosa tibuningki.
9Setonganna, masimpangkam umpellei lino napobua’ aha’Mu,
masimpangkam pa’de, sihhapam penaba dipa’simbuhusam.
10Masäenam pitu pulo taunna tubokam,
maka’ magadingkam, iya mala kahua pulo taungki,
sapo’ angga kamasussaam anna kamapi’disam kisitammuam;
aka tikalibajo bäbä katuboangki, mane pa’dekam.
11Mennangka la naissam umpesi’dinni makahha’na aha’Mu?
Mennangka la naissam umpaju masanta’na kamaheasam napobua’ aha’ kasalleMu?
12Patudukam anna kiissanni kiua kapodi’ lämpä’ki,
lambisam siampuangkam penaba kakeakasam.
13O DEBATA, oppo’i aha’Mu! La pihampi isanga mane mondai aha’Mu?
Häntänganni bua inde mai sabua’Mu.
14Pabosa’ikam wattu mebengngi’ pangkaha’ pa’kamaseMu takattu tintim tamondo’ sahuham,
anna mala kassikam tilalla’ anna sule sumanga’ki ende’ pahajangki upu’ salukatuboangki.
15Pasuleangkam kakassiam katilallasam la sitimbäna wattu kamasussaam to puha umpahuaiangkam,
la pembala’na wattu kamapi’disam puha kisi’dim illaam lingka salukatuboangki.
16La ma’tandaam di too pa’palakoamMu lako mentu’ sabua’Mu,
anna kamatandeamMu lako ingganna pessubunna.
17La tandaam di too illaam salukatuboangki kamapiaam penabanNa Debata, Puang Allataala to kipenombai,
tamba’i pengkähängangki,
tamba’i pengkähängangki!
91Tubo naonganni Puang Allataala
1Menna-menna tubo naonganni To Handam Matande,
anna tohho nalumbäi To Handam Kuasa,
2la ma’kada längäm DEBATA naua: <<Iko pentuhehungangku anna bettem matoto’ku,
Puang Allataala too’na pahhannuangku.>>
3Mannassa, Ia la ullappasangko dio mai poja bendo’ samelum buaja,
dio mai saki kahha’ paleleam.
4La napakumbäiko pani’Na,
napasamboiko pani’Na umba susi indo mäne’ muoppäi änä’na;
kamanontonganNa la mendadi unta’mu anna bettem matoto’mu.
5Daa ungkahea’ kasupaam illaam bengi mapättä,
daa ungkahea’ tipa’sumpi’na batu bälä’du’ wattu masiä,
6daa ungkahea’ saki kahha’ lumombam wattu malillim,
daa ungkahea’ saki paleleam tama’pekuma’ba’ wattu iallo.
7Moi la massa’bu bakke sitebesam dio sa’demu,
anna mampulo sa’bu tiampa’ dio tandai kanammu,
sapo’ tala dondom iko bulu salamba’mu tala tobä bulu sangkahohimmu.
8La muita sola matammu,
umpahandam to tameada’ nalambi’ pa’dallena.
9Aka DEBATA ongeam pentiongangammu,
To Handam Matande umpadadi pentuhehungammu,
10tala nabuno duhi tanase’bä’ loäjä’,
anna tala naempe’-empe’ katilakaam banuammu.
11Aka la ussua malaika’Na Puang Allataala unjagaiko,
la nakambi’ko najagai illaam mentu’ lingka salukatuboammu.
12La natahimaiko,
anna mala moi bitti’mu tala tihuai lako batu.
13La umpaneteko singa sola dadoppä,
la umpanete käsäko singa kabahanianna sola ahae.
14Ma’kada DEBATA naua: <<Aka umpakeko pangkaha’ pa’kamase lako kaleKu, lambisam la kulangnga’i,
aka naissam sangangKu, nasuhum la kukambi’ kujagai.
15Maka’ mengkaala dio oloKu, la kuhingngiam pengkaalaanna.
La kuundu’ kupatette illaam kamasippisanna,
la kulangnga’i anna kupayabo pangka-pangka bulabam.
16La kupopa’tammu ubam kupopa’lullum buha-buha,
anna la kupaitai sola matanna kalappasam buttu di Kao.>>
92DEBATA to umpake pa’pemalolo
1Pampujiam. Dipenaniam illaam allo katohhoam.
2O DEBATA, sumpu mapianna umpenaniam pa’kuhhusam sumanga’ matim oloMu,
anna umpenggamahaam pampujiam lako kaleMu, o To Handam Matande;
3umpa’paissangam pangkaha’ pa’kamaseMu takattu tintim tamondo’ sahuham wattu mebengngi’,
anna kamanontongamMu wattu bengi,
4dipasindum umponi katapi sapulo hitinna,
dipasiolaam gambus anna kolele.
5Aka pa’palakoamMu DEBATA, umpasule sumanga’ku umpaende’ pahajangku,
pa’pogausamMu umpakassiä’ tilalla’.
6Tä’ deem pada sakasalle mentu’ pa’palakoamMu, DEBATA,
tä’ deem pada samandalam ingganna pikkihamMu.
7Tä’ naissam to takepikkiham,
tä’ napähäm to maho:
8ke sihhapanni humpu’ to tameada’, tubo mahombo,
anna tuttuam längäm katuboanna to umpogau’ kakadakeam,
sapo’ la dipempa’deam sule lako salako-lakona.
9Sapo’ Iko Iko, DEBATA, untadongkonniKo ongeam matande sule lako salako-lakona!
10Ita siai too balimMu, DEBATA,
ita siai balimMu la dipempa’deam,
ingganna to umpogau’ kakadakeam la dipatiseham ke’de’.
11Sapo’ kao-kao umbeennä’ kamatohoam sihhapam pinamile mose’,
ditamba’ä’ ditolloi minnä’ bakahu.92:11 minnä’ bakahu: Kalembasanna, tanda kakassiam anna katilallasam.
12Kuita sola matangku balingku ditaloi,
kuhingngi sola talingangku pengkaloa’na mentu’na to ma’gau’ kadake to mengke’de’ umbundu’ä’.
13To meada’ la kentähe’ susi kurma,92:13 kurma: Sahhupa tanangam susi palem. Buana si matannim lambi’ si dipapia <<duho kurma>>.
la mahombo susi kaju aras dio Libanon.
14La sihhapam kaju ditanam illaam banua DEBATA,
kendaum poppä kentähe’ bentasu illaam pa’hanteanna banuanNa Puang Allataala to tapenombai.
15Sihhapam kaju, kembua liu sule lako matua,
mapia tubo anna matitta.
16Iam too umpopa’tandaanni diua, malolo DEBATA,
Ia buntu batungku, anna tä’ deem kamanekoam illaam kaleNa.
93DEBATA, tomahaja sule lako salako-lakona
1DEBATA iam too Tomahaja,
umpa’poheba kamatandeam, umpa’juba kamatohoam.
Pennassai, lino ke’de’ matoto’, tatige’ge’ tatigesse.
2Okkosam kahajaamMu matoto’ matogom mengkalao dio mai;
inna deemmaKo pempom dio mai.
3Magaluntu’ uwai salu, DEBATA,
magahugu moninna,
memamba tibuha’na.
4Dihingngi pemambana uwai buda,
magaluntu’na bombam kasalle,
sapo’ mentondom puha Ia DEBATA to untadongkonni ongeam kamatandeam.
5O DEBATA, ätohamMu takattu tintim tamondo’ sahuham;
tangkapohasam tangkabissisam banua masehoMu,
sule lako salako-lakona.
94Puang Allataala, to unte’geham kamaloloam
1O Puang Allataala, Iko DEBATA to mampembalasam,
o Puang Allataala to mampembalasam, pa’paitangKo kaleMu!
2Pengke’de’ko, o To Mahhotto’na senambo lino,
pabala’i gau’ kadakena to malangka’ penaba la sipäto’na pa’gau’na!
3O DEBATA, la pada hia umba masäena ussengkengam pa’gau’na inde lako to tameada’?
La pada hia umba masäena?
4Si umpassubum tula’ matampo-tampo,
anna ingganna indo to umpogau’ kakadakeam ussanga-sanga kalena.
5Silele umpakapi’di’ umma’Mu, DEBATA,
anna undahha tubo umma’ to umpasähä’.
6Umpaletta’ bamba kollonna to balu baine sola änä’ bium,
umpakattu sungnga’ to messihuhu illaam inde botto.
7Silele ma’kada naua: <<Tä’ da meita DEBATA,
umba hia ngei la napelabillo Puang Allataala to napenombai Yakub.>>
8Pengngissannii, o inggannako to ma’maho-maho illaam alla’-alla’na hupatau!
O inggannako to maho kalebu, la pihampi isanga mane ma’pikki’ keaka’ko?
9Tä’ daka tia la pahingngi Puang Allataala, Ia umpadeem talinga?
Tä’ daka tia la paita, Ia umpadeem mata?
10Ia ussämbä’i mentu’na kahajaam to tamuakui DEBATA, tä’ daka tia la natappakadaikoa’ duka’?
Ia umpatudu ma’hupatau, tä’ daka tia la deem kapaissanganNa?
11Naissam DEBATA ingganna pattujunna hupatau;
naissam naua, sangngim labu’ di limbä tallam di pahupu.
12O DEBATA, maupa’ anna katambasam lako hupatau to untappakadai,
anna to umpatudu ingganna paondomMu.
13Umpahapasam penabanna wattunna sule katilakaam,
sampe dadi pambo’bä’na to tameada’.
14Aka inna tä’ sia la untampeam umma’ petauanNa, DEBATA,
inna tä’ sia la ullamba’ umma’ to napasähä’.
15Ianaanna dite’gehammi sule undu’ lollä uhhotto’ to meada’,
iya la naundu’i ingganna to malolo penaba.
16Menna la muundu’iä’ mueba to ma’gau’ kadake?
Menna la ussamba’ä’ umbali to umpogau’ kakadakeam?
17Indo kela taia DEBATA umpamoloiä’,
sabihim kanuku ham anna diomä’ kaliane anitu.
18Wattunna naua inabangku: <<La sägää’,>>
iya nasamba’ä’ napakatoto’ pangkaha’ pa’kamaseMu takattu tintim tamondo’ sahuham, DEBATA.
19Maka’ too sahubeba’ penabangku,
iya kusi’dim pepakahangaamMu, umpasule sumanga’ku umpaende’ pahajangku.
20La maakam ia susi la mala sitappaKo to mahhotto’ tamalolo,
to ma’pattuju la umpasala’ lalam paondom?
21Ungkalebui tula’ la umpakattu sungnga’ to meada’,
anna la umpahuai pa’tahungkungam mate to tadeem kasalaanna.
22Sapo’ DEBATA bettem matoto’ku,
Puang Allataala buntu batu pentuhehungangku.
23Ia la umpabala’i to tameada’ la sipäto’na gau’ kadakena,
anna la napempa’deam buana dosa budanna;
DEBATA, Puang Allataala to tapenombai, la umpempa’deanni.
95Umpa’kasallei anna manuhu’ lako DEBATA
1Maikoa’ taahhe tilalla’ dio oloNa DEBATA,
takassia’ tilalla’ lako buntu batunta to ullangnga’ikia’!
2Maikoa’ tapengngolo längäm DEBATA sola penaniam pa’kuhhusam sumanga’,
takassia’ tilalla’ dio oloNa sola penaniam pampujiam.
3Aka DEBATA, iam too Puang Allataala to handam matande,
anna Tomahaja masokam to untandolängänni ingganna debata lino.
4Mengkalao dio apa’ mahihinna litä’ dio lisu pala’Na,
sule längäm pusu’na buntu malangka’ Ia umpuänganni.
5Ia muampuam le’bo’, aka Ia umpapiai,
Ia umpuängam galantangam, aka Ia umpadadii.
6Maikoa’, maikoa’ tapa’udum guntu’ penomba,
tapa’balinguntu’a’ dio oloNa DEBATA, to metampata.
7Aka iam too Puang Allataala to tapenombai,
anna kitanna’ too umma’ to nakambi’ napatette,
sihhapam domba nakambi’ napaliaha.
Maka’ uhhingngikoa’ kadanNa Puang Allataala inde allo temo,
8daa umpomakahha’ penabammu susi nene to umponene dio Meriba,
wattunna dio Masa, dio pädä kukku’.
9Wattu eta too napa’sändä’iä’,
napangngitaiä’, moi kela daa naitam sola matanna pa’pogausangKu.
10Appa’ pulo taunna nasanta’ä’ gau’nai;
iya kuuam: <<Abana inde mai hupatau sangngim mangngopä’,
anna silele tamuissam ulalangKu.>>
11Keaha’ä’, lambisam ma’dandiä’ kuua:
<<Sangngim tä’ la kupabäi landa’ lako indo pellubeam la kubeem.>>
96Puang Allataala, DEBATA anna Tomahajanna lino
1Penggamahaanni penaniam bakahu längäm DEBATA,
penggamahakoa’ längäm DEBATA, o mentu’nako issinna lino!
2Penggamahakoa’ längäm DEBATA, pujii sanganNa;
pa’pakahebaanni pallangnga’inNa allo sibala’ allo.
3Pa’paissanganni kamatandeanNa lako ingganna kahajaam,
anna pa’pogausam memängä-mängäNa lako simesa-mesa pa’lembängam.
4Aka taditondom kamatandeanNa DEBATA, anna To lantum dipuji,
sihatam sipäto’ dipengkahea’i anna la ingganna debata lino.
5Aka ingganna debata lino to napa’debatai buda kahajaam tä’ deem hubä’na,
sapo’ DEBATA hi Ia umpadadi langi’.
6Kamatandeam anna kamasokangam dio oloNa,
kamatohoam anna pa’pakasalle illaam ongeam masehoNa.
7Pujii DEBATA, o mentu’nako pa’lembängam,
pujii kamatandeanNa, anna kamatohoanNa!
8Pakende’i pampujiam la sipäto’na lako sanga matandeNa DEBATA,
babai bua pemala’mu ammu pentama pa’hanteanna banua masehoNa!
9Penombako dio oloNa DEBATA, umpake poheba mendiada’,
pengkahea’ko dio oloNa, o mentu’nako issinna lino!
10Pengkadaanni lako ingganna kahajaam muua: <<DEBATA, iam too Tomahaja!
Pennassai, lino ke’de’ matoto’, tatige’ge’ tatigesse.
Tama’bija tama’sangngana’ uhhotto’ simesa-mesa kahajaam.>>
11Sihatam sipäto’ langi’ muahhe tilalla’, anna lino kassi tilalla’!
Sihatam sipäto’ magahugu le’bo’ sitonda issinna!
12Sikaelongkoa’ tilalla’ o hante kalua’ sola ingganna tanangam to tubo yabona,
sikaahhekoa’ tilalla’ o mentu’na kaju pangngala’,
13dio oloNa DEBATA, aka sule,
sule la uhhotto’ inde lino.
La uhhotto’ issinna lino muundu’ kamaloloam,
anna mentu’na hupatau mennumpu di kamanontonganNa.
97DEBATA iam too Tomahaja
1DEBATA iam too Tomahaja! Sihatam sipäto’ muahhe tilalla’ issinna lino,
sihatam sipäto’ kassi tilalla’ mentu’na pulau!
2Nalilim gabum anna napali’ malillim;
kamaloloam anna undu’ lollä mendadi pehhondoam illaam kahajaanNa.
3Mellelo api dio oloNa,
muä’bäi balinna to ullilim pali’i.
4Silalle kila’Na muähhä lino,
lumalla’ kaliane muitai.
5Mahehe pallam ingganna tanete dio oloNa DEBATA,
dio oloNa Debata, to ungkuasai senambo lino.
6Langi’ umpa’paissanganni kamaloloanNa,
anna nasa’bii ingganna kahajaam kamatandeanNa.
7La kasihisam ingganna to umpenombai panggahaga lima,
to ussengkengam debata lino pa’papia hupatau;
ingganna debata lino la menomba dio oloNa DEBATA.
8Kassi tilalla’ issinna kota Sion uhhingngii,
sikaahhe tilalla’ issinna kota illaam paluäna Yehuda,
aka pesämbä’Mu, DEBATA.
9Aka Iko DEBATA To Handam Matande yabona lino,
dipomatandeKo untondom asam ingganna debata lino.
10O inggannakoa’ to umpake pangkaha’ pa’kamase lako DEBATA, kahi’di’koa’ kakadakeam!
Debata umpaliaha katuboanna to manuhu’ dio oloNa,
nalappasam dio mai pala’ limanna to tameada’.
11Sulem pa’tamba’Na Debata lako to meada’ susi bihha’na allo,
anna katilallasam lako to malolo penaba.
12O inggannako to meada’, kassiko tilalla’ aka pa’pogausanNa DEBATA,
pujii umpa’kasallei sanga masehoNa.
98Mahuku’um kalappasam buttu di Puang Allataala
1Pampujiam.
Penggamahaanni penaniam bakahu längäm DEBATA,
aka puham umpogau’ pa’pogausam memängä-mängä!
Katea’ bassinNa, katea’ masehoNa
umbeenni kalappasam.
2DEBATA umpa’paissangam kalappasam buttu di kaleNa,
umpellatteam pa’pemaloloNa dio olona ingganna kahajaam.
3Ungkilalai pangkaha’ pa’kamaseNa takattu tintim tamondo’ sahuham anna kamanontonganNa
lako to Israel.
Nasa’bii senambo lino
kalappasam buttu di Puang Allataala to tapenombai.
4Sikaahhekoa’ tilalla’ längäm DEBATA, o mentu’ko issinna lino!
Kassikoa’ tilalla’, sikaahhekoa’ tilalla’ anna penaniangkoa’ pampujiam!
5Penaniangko pampujiam längäm DEBATA, umpasindum umponi katapi,
ungkatapii penaniam.
6Poniko lalloho’ anna sangkakala malao oninna,
ahheko tilalla’ dio oloNa Tomahaja, to disa’bu’ DEBATA!
7Sihatam sipäto’ magaluntu’ le’bo’, sitonda issinna,
lino, sola mentu’ issinna!
8Sihatam sipäto’ tibuha’-buha’ salu sihhapam to ma’sappa-sappa,
anna buntu sihengke sitimba’ sihhapam to sikaahhe tilalla’,
9dio oloNa DEBATA,
aka sule la uhhotto’ issinna lino.
Kamaloloam la kupake uhhotto’ issinna lino,
la tama’bijaä’ tama’sangngana’ uhhotto’ ma’hupatau.
99DEBATA, Tomahaja tadisipadai tohoNa
1DEBATA iam too Tomahaja, sihatam sipäto’ napengkahea’i ingganna kahajaam.
Tadongkom yabona kerub,99:1 kerub: Sahhupa malaika’ yabo suhuga, mendadi okkosam kahajaanNa Puang Allataala. sihatam sipäto’ pahodo lino pahundam kaliane.
2DEBATA to untadongkonni kota Sion, tadisihanteam,
tadisipadai kamatandeanNa, ullumbäi ingganna kahajaam.
3Sihatam sipäto’ silele napuji napa’kasallei sangamMu, o to matande anna mekähhä bulu.
Maseho DEBATA!
4Tomahaja tadisipadai tohoNa, to unte’geham undu’ lollä,
Iko umpandam ätoham tama’bija tama’sangngana’;
undu’ lollä anna kamaloloam
ussoeam illaam alla’-alla’na pessubunna Yakub.
5Pomatandei DEBATA, Puang Allataala to tapenombai,
pa’balinguntu’ko menomba dio olona okkosam kahajaanNa!
Maseho DEBATA!
6Musa sola Harun diangga’ sandoNa DEBATA,
Samuel tihekem to umpengkaalai sanganNa DEBATA.
Silele mengkaala längäm DEBATA, anna nahingngiam pelauanna.
7DEBATA ma’battakada lako, illaam mai gabum;
silele muoli’ mamma’ ussalungku metindo pahentaNa DEBATA,
anna ingganna kada to puha napandam to napadokkoam lisu pala’na.
8O DEBATA, Puang Allataala to kipenombai, uhhingngiammi pelauanna;
Iko Puang Allataala to ponno pa’panampum lako,
sapo’ Iko siam umpabala’i mentu’ pa’pogausam kadakena.
9Pomatandei DEBATA Puang Allataala to tapenombai,
anna pa’balinguntu’ko menomba yabo tanete masehoNa!
Aka maseho DEBATA, Puang Allataala to tapenombai!
100Penaniam ussullu’ ba’ba suluhanNa DEBATA
1Pampujiam dipenaniam wattunna umbaba bua pemala’ pa’kuhhusam sumanga’.
Sikaahhekoa’ tilalla’ längäm DEBATA, o mentu’ko issinna lino!
2Penombakoa’ memala’ längäm DEBATA sola ponno kakassiam,
sulekoa’ dio oloNa umpakende’ penaniam katilallasam!
3Pengka’da’i anna umpengkalesoi muua, DEBATA, iam too Puang Allataala;
Ia to metampata, anna Ia to muampuangki’,
umma’ petauanNa, anna dombaNa to nakambi’ napaliaha.
4Pentamako ba’ba suluhanNa umpenggamahaam penaniam pa’kuhhusam sumanga’,
pentamai pa’hanteanNa umpakende’ penaniam pa’pakasalle!
Pa’kuhhu’ sumanga’ko dio oloNa anna umpujii umpa’kasallei sanganNa!
5Aka DEBATA to mapia penaba,
pangkaha’ pa’kamaseNa takattu tintim tamondo’ sahuham sule lako salako-lakona,
anna kamanontonganNa lako ingganna lapi’ pessubum.
101Tomahaja umpemulu penaba sambulo-bulo
1Pampujiam napapia Daud.
La kupenggamahaam pangkaha’ pa’kamase takattu tintim tamondo’ sahuham anna undu’ lollä,
la kupenaniam pampujiam dio oloMu, o DEBATA.
2La kupaalai penaba lalam katuboam tää’na deem sassainna.
Pihampi suleKo umpellambi’iä’?
Pa’elo’ku kao la tuboä’ ma’penaba sambulo-bulo
illaam banua tadongkongangku.
3Tala kupaalai sambihi matangku
pa’pogausam kadake;
tala kupohäe pa’pogausanna to umbali-bali DEBATA,
tala kuaku naempe’-empe’ gau’ susi ia too.
4La sikambela kaleku penaba sengko’,
tala kuaku kupengngissanni kakadakeam.
5Menna-menna umbatta-batta boko’ solana,
la kupempa’deam.
Menna-menna ussanga-sanga kalena anna malangka’ penaba,
tä’ la kubela untähäm kaleku lako.
6Tiala inabangku muita to mala dikatappa’i illaam botto litä’ku,
anna malakam tohho sola-sola.
Menna-menna tä’ deem sassainna katuboanna,
la mendadi to mengkähäku.
7Menna-menna umpogau’ kamanekoam,
tä’ la kupabäi tohho illaam banua tadongkongangku,
menna-menna kaägä’-ägä’
tala nasaha tala natua ke’de’ dio oloku.
8Mesa mebengngi’ la kupempa’deam
ingganna to tameada’ illaam pa’bottoam;
la kupemposisam illaam mai kota tadongkonganNa DEBATA,
ingganna to umpogau’ kakadakeam.
102Sambajam la dihäntängam bua kota Sion
1Sambajanna mesa to untammu sussa, wattunna kattu hannu anna umpasoa pengkaloa’na längäm DEBATA.
2O DEBATA, hingngianni sambajangku,
la landa’ di too pengkaalaangku matim oloMu.
3Daa umbuniannä’ lindoMu
wattungku illaam kamasippisam.
Hingngiannä’, wattunna mengkaalaä’ matim oloMu,
simpannii untimba’iä’!
4Aka allo-allo katuboangku pa’de bäbä susi hambu;
bukungku malussu susi api pehobaja.
5Hosso penabangku anna malu’bä’ susi humpu’ malasso;
tanalambi’um suhi’ku kinande.
6Aka kusa’batohoi mengkaloa’,
iya bukungku mandam sikatekä’.
7Anggasangku mandam dassi undan102:7 dassi undan: Sahhupa dassi malaiha susi sihu’ tillä’na. dio pädä kukku’,
susi mandamä’ totosi’ dio ongeam daum labuam.
8Tamalam mamma’ matangku,
susi mandamä’ bium-bium yabo papa banua.
9Allo-allo napetunaä’ balingku;
ingganna to untelle-telleä’, untädo tau senga’, napasusii pi’di’ku.
10Täiabum kupodea’ anggasanna hoti,
anna sihau takka’ uwai mata, ihu’ku,
11napobua’ aha’Mu anna aha’ kasalleMu,
umpi’du’ä’ anna umpa’tibeannä’ lao.
12Allo-allo katuboangku masimpam pa’de, sihhapam kalibajo naindo allo la lendu’;
malu’bä’ mandamä’ susi humpu’ malasso.
13Sapo’ Iko Iko, DEBATA, tadongkongKo yabo okkosam kahajaamMu sule lako salako-lakona,
tadikalembeiKo illaam mentu’ wattu.
14La mengke’de’Ko, uhhäntängam bua kota Sion,
aka lambi’um wattunna,
lambi’um wattunna la umpauleam penabanna.
15Aka nakamaha’i mentu’na sabua’Mu katitaleanna,
anna nakasajanni kahuppusanna.
16Lambi’ mentu’na kahajaam umpengkahea’i sanganNa DEBATA;
anna ingganna tomahaja inde lino tinggi’gi’ muitai kamatandeanNa,
17ke umpake’de’um sule kota Sion DEBATA,
anna umpa’patandaam kaleNa illaam kamatandeanNa.
18La uhhingngiammi sambajanna ingganna to kaasi-asi,
anna tä’ napa’bahinni’i pelauanna.
19Tulisanni inde pa’pogausanNa DEBATA lako lapi’ to mane la kende’,
anna pessubum to mane la dadi, anna mala umpuji umpa’kasallei DEBATA.
20Ma’pahandam DEBATA yabo mai ongeam matande masehoNa,
ma’pahandam yabo mai suhuga umpetua’ lino,
21la umpatananni talinga pengkaloa’na to ditähäm,
la ullappasam to mannassam la dipakattu sungnga’.
22Anna mala dipotulasam sanganNa DEBATA illaam kota Sion,
anna dipuji dipa’kasallei illaam Yerusalem,
23tappana tihempum hupatau dio mai mobotto-bottoam,
dio mai simesa-mesa kahajaam la menomba längäm DEBATA.
24Naäläi DEBATA bukungku illaam lingka salukatuboangku,
anna napondi’i sungnga’ku.
25Iya ma’kadamä’ kuua: <<O Puang Allataala to kupenombai,
daa umpomasimpanni muala sungnga’ku!
Tubo batuKo ungkala’ ingganna lapi’na hupatau!>>
26Pempom dio mai Iko umballa’ lino,
ma’kale limamMu ungkumbä langi’.
27Ingganna ia too la pa’de asam sule,
sapo’ Iko-Iko la da’da’ liuKo;
ingganna ia too la malusa sihhapam poheba,
la sihhapam juba umbokkom-bokkom untibe lao;
28sapo’ Iko-Iko la tontä liuKo,
anna la tubo batuKo.
29Mentu’ pessubunna sabua’Mu la tubo masannam anna malino,
anna ingganna peampoanna la dada’ liu muonganni.
103Ussasum penaba la umpuji DEBATA
1Pampujiam napapia Daud.
O penabangku, pujiko DEBATA!
Sakalebuko o penabangku, umpuji umpa’kasallei sanga MasehoNa!
2O penabangku, pujiko DEBATA,
daa ungkalembei ingganna kamapiaam penabanNa!
3O penabangku, Ia umpanampum ingganna kasalaammu,
Ia umpabono’ mentu’ sakimmu.
4O penabangku, Ia ussolongko dio mai kamateam,
namana’ko103:4 namana’ko: Illaam basa Ibrani ke dipalutamai basa Bambam naua: napasalokokatiiko. Salokokati kalembasanna, songko’ kapataloam battu diua songko’ tomahaja (mahkota). pangkaha’ pa’kamase takattu tintim tamondo’ sahuham anna pa’häntängam bua.
5O penabangku, Ia umponnoi pa’pemulummu sola mentu’ kamapiaam,
lambisam tontä liuko matitta di mangnguhammu susi bunia gege.
6DEBATA muundu’ lollä
anna unte’geham kamaloloam lako ingganna to dipi’di’ dipakamase-mase.
7Ia umpa’paissangam ulalanNa lako Musa,
anna mentu’ pa’palakoanNa lako to Israel.
8DEBATA pa’häntängam bua, mamase,
sumpu sa’baha’, anna ponno pangkaha’ pa’kamase takattu tintim tamondo’ sahuham.
9Tala metappakadai liu,
tala mekeaha’i liu.
10Tanapatumäiki’ dosata,
tanapatumpuiki’ kasalaanta.
11Sapo’ umba susi malangka’na alla’na langi’ anna lino,
susim too kasallena pangkaha’ pa’kamaseNa takattu tintim tamondo’ sahuham lako to mengkahea’ dio oloNa;
12umba susi sikambelanna mata allo anna katampusam,
susim too mambelanna dosata napasitäntängangki’.
13Umba susi pa’pakamajanna mesa ambe lako änä’na,
susim too pa’pakamajanNa DEBATA lako to mengkahea’ dio oloNa.
14Aka puha naissam Debata kabuttuanta,
manähhä naua, sobä’-sobä’kia’ ditampa.
15Katuboanna hupatau susi humpu’ sapäi’ tubo,
anggasanna bunga-bunga lako pädä tumballa’ bunganna;
16nasimbuhu’inna hibu’, iya masapu bäbäm,
anna moim pendekkesanna tala naissampi.
17Sapo’ pangkaha’ pa’kamaseNa DEBATA,
takattu tintim tamondo’ sahuham mengkalao dio mai sule lako salako lakona, lako to mengkahea’ dio oloNa,
anna undu’ lolläNa ma’tintingam liu lako ingganna lapi’ pessubum,
18lako to muanti manda’ untobe matoto’ pa’dandianNa,
anna ungkedoam muabiham pahentaNa Debata.
19Ma’pahentam DEBATA dio okkosam kahajaanNa yabo suhuga,
anna kapahentaanNa ungkuasai ingganna-ingganna sia.
20Pujiko DEBATA, o mentu’nako malaika’Na Debata,
malaika’ pa’bahani to umpalakoi pahentaNa,
anna natuhu’i battakadanNa.
21Pujiko DEBATA, o inggannako tentahaNa Debata yabo suhuga,
o mentu’nako pesuaNa Debata to umpalakoi pa’elo’Na.
22Pujiko DEBATA, o inggannako pa’padadinNa,
to untadongkonni ongeam to nakala’ kakuasaanNa!
O penabangku, pujiko DEBATA!
104KamatandeanNa DEBATA tandaam illaam pa’padadinNa
1O penabangku, pujiko DEBATA!
O DEBATA, Puang Allataala to kupenombai, Iko To handam matande!
Umpa’babu’Ko kamatandeam sola kamasokangam,
2anna nasapu’Ko masiä’ sihhapam juba,
ussamboKo langi’ sihhapam sähe kalua’,
3umpadadiKo bamba malona’ tambim maseba-seba, yabona uwai yabo langi’,
umpadadiKo gabum mendadi bendimMu,
sumassiuKo ussäkei hibu’.
4Hibu’ umpadadi to mallingkaimMu,
anna kila’ umpadadi pesuaMu.
5Umballa’Ko lino dio pentokoanna,
nasuhum tatige’ge’ tatigesse mengkalao dio mai sule lako salako-lakona.
6Lino umpasapu’i le’bo’ mandalam,
natammei sule längäm pusu’na tanete.
7Tappana ungkissä’i, iya tibuso siaham lao,
tihisi lao uhhingnginna gamahamMu memamba guntu’,
8mengkalao yabo tanete le’ba’ dokko lembä,
tinanda lako ongeam to umpa’tantu la naongei.
9Untete pata’ muosä’ batu katonam, tala malanna napelebanni,
lambisam tä’um la umbussui pole lino.
10Umpopa’kalimbuäKo uwai lako mentu’na lembä,
ma’salu-salu muolai alla’na tanete,
11naihu’ ingganna olo’-olo’ malaiha,
umpamole bähäna ingganna keledai pangngala’;
12naongei dassi ma’sehä lako ampe’na uwai ma’salu-salu,
pantam oni illaam alla’na lolo kaju.
13UmpatuhungKo uham yabo mai bamba malona’ tambim maseba-seba umbossi’i mentu’na tanete,
lino nahehe pa’padadimMu.
14UmpatuboKo humpu’ la napokinande olo’-olo’,
anna umpatuboKo ma’hupa-hupa tanangam la najagai anna napokatuboam hupatau,
lambi’ litä’ umpakende’ alaam kinande,
15anggur la umpatiala inabanna hupatau,
minnä’ la umpomapia hupa,
anna kinande la umpomatoho hupatau.
16Mentu’ kajunNa DEBATA napomahombo uwai uham,
mentu’na kaju aras dio Libanon pantanam limanNa.
17Etam too naongei ingganna dassi ma’sehä,
naongei alo ma’sehä yabo lolä’na.
18Mentu’na tanete malangka’ naongei beke lampum;
alla’ batu naongei tangngali membuni.
19UmpadadiKo bulam la dipake uhhekem wattu,
mata allo lendu’ ke lambi’um wattunna.
20Maka’ umpasulengKo malillim, allo napessulle bengi;
wattu etam too pahinängkä olo’-olo’ pangngala’.
21Sikaehhem singa kabahanianna umpeä to la naande,
umpemmitai kinandena yabo mai Puang Allataala.
22Maka’ bihha’um allo, sangngim ma’pasule
anna mellika’i illaam ongeanna;
23messubum ia hupatau untinandai kähänganna,
anna mengkähäi sule lako lendu’ allo.
24O DEBATA, tä’ deem pada sabuda pa’padadimMu,
sangngim umpadadi sola kakeakasamMu;
hupatau sola olo’-olo’ umpadadi umponnoi lino.
25Ita hiko le’bo’ kalua’ anna malobä,
naponnoi olo’-olo’ kasalle anna bahinni’,
tadikemba’ dihekem budanna.
26Etam too naongei kappala’ le’bo’ mellao,
anna naga le’bo’ pa’padadimMu sipaningo-ningo.
27Hupatau sola olo’-olo’ ma’pemmita matim oloMu,
la umbeem kinande ke lambi’um wattunna.
28Maka’ too sikaumbeemmi, iya pantam mangngalam;
maka’ too sikauntandoim, iya silelem umpedea’i kinande mapia.
29Maka’ too sikaumpemboko’im, iya sangngim mahea’um pa’de la umpandei;
maka’ too muäläim penabanna, iya kattum sungnga’na,
anna mendadi sobä’i sule.
30Maka’ too umpatamaim penabamMu,104:30 umpatamaim penabamMu: Mala duka’ kalembasanna, ussua Penaba MasehoMu. iya kende’ oom salapi’ pa’padadimMu,
anna umbannei poleKo inde lino.
31La tontä liu hi too kamatandeanNa DEBATA sule lako salako-lakona,
la kassi hi too anna tilalla’ DEBATA muita mentu’ pa’padadinNa!
32Umpahandam lino, lambi’ pahundam,
muanti tanete, nasuhum pelamboho.
33La kupenggamahaam penaniam längäm DEBATA upu’ salukatuboangku,
la kupakende’ pampujiam längäm Puang Allataala to kupenombai upu’ tuboku.
34La napohäe hi too uhhingngi pa’pikki’ku pa’penabaangku!
La kassiä’ tilalla’ aka DEBATA nasuhum.
35La tamehä’dä’ di too illaam lino ingganna to madosa,
la tameatai hi too taipebati’i to tameada’!
O penabangku, pujiko DEBATA!
Haleluya!
105Untilalla’i pa’ulalanNa DEBATA puha di boko’inna
1Pa’kuhhu’ sumanga’ko längäm DEBATA, sa’bu’i sanganNa,
pa’paissanganni mentu’ pa’pogausanNa illaam alla’-alla’na kahajaam!
2Penggamahako umpuji DEBATA, pakende’i pampujiam dio oloNa,
pa’pakahebaanni ingganna pa’pogausam mepilla’-pilla’Na!
3Pasundedei buamu patialai inabammu aka sanga MasehoNa;
la kassi hi too tilalla’ ingganna to umpameä DEBATA!
4Pengkahuku’ko lako DEBATA, ammu lambei kamatohoanNa,
talamali-malisangko tabassa-bassaam menomba dio oloNa!
5Ingahanni mentu’ pa’pogausam memängä-mängä to puha napogau’,
pasalui penaba mentu’ pa’pogausam mepilla’-pilla’Na anna ingganna kattuam puha lendu’ dio pudu’Na,
6o mentu’nako pessubunna Abraham, sabua’Na DEBATA,
o inggannako pessubunna Yakub, umma’ to natodinni!
7DEBATA, iam too Puang Allataala to tapenombai,
kattuanNa dipehhondoi senambo lino.
8Tä’ deem ungkalembei pa’dandianNa sule lako salako-lakona,
muingaham liu kada pa’dandianNa lako massa’bu-sa’bu lapi’na hupatau.
9Pa’dandiam to nasitalli’i Abraham,
anna kada pa’dandianNa lako Ishak;
10napakatoto’ la napehhondoi Yakub,
mendadi pa’dandiam la tontä liu lako Israel.
11Ma’battakada naua: <<La kupadokkoangko lisu pala’mu lembäna Kanaan,
la umpomana’ ma’tintingam sule lako ampo-ampomu.>>
12Wattunna tä’pi pada umba bilanganna,
saidi’pi hekenganna, anna mendadi to messihuhu illaam lembä ia too.
13Ma’pentudende-dende mengkalao dio mesa botto le’ba’ lako botto senga’,
mengkalao dio mesa kahajaam le’ba’ lako kahajaam senga’.
14Tä’ deem tau napabäi DEBATA la umpa’tomaho-mahoi to Israel,
ia napolalam untappakadai buda tomahaja DEBATA naua:
15<<Daa uhhumbu-humbu umma’ to kupasähä’,
daa umpogausam kakadakeam mentu’na nabingKu!>>
16DEBATA umpakende’ kakobeam illaam botto ia too,
anna umpasule kasosoam alaam kinande,
17sapo’ yolom ia nasua DEBATA, mesa to umpendioloanganni;
Yusuf-um too indo to dibalu’ mendadi sabua’.
18Dipaekkei sangkala bitti’na,
anna dihante bassii bahokona,
19sampe sule lako indo to natula’ loppo’ Yusuf,
anna napakatoto’ kadanNa DEBATA.
20Napa’pahentaam tomahaja Mesir dilappasam,
napesuaam to untakka’ buda kahajaam ditässu’i.
21Naäkä’ tomahaja ungkapalai banua tadongkonganna tomahaja,
anna dibeem kakuasaam la muäto’ kulle tomahaja,
22anna la umpahe’ ingganna to kasalle illaam kahajaam situhu’ pangngua penabanna,
anna la umpaitai lalam katuboam matua ulunna kahajaam.
23Lessu’i ia too le’ba’um Yakub, to disa’bu’ Israel lako Mesir,
anna tohhoi dio mendadi to messihuhu illaam botto litä’na pessubunna Ham.
24Napabakka’ DEBATA banne taunna,
anna napadadi ussau’ kamatohoam ingganna balinna.
25Anna mane nabali’ Debata penabanna to Mesir lambisam ungkabassi umma’Na,
anna umpeängam tuntungam su’be’ undakasam pa’posanga-sanga umma’ petauanNa Debata.
26Mane ussämpäi limanna Musa, sabua’Na,
anna Harun to puha napilei.
27Umpadadi tanda memängä-mängä teem sola dua dio Mesir,
anna pa’pogausam mepilla’-pilla’ dio botto litä’na pessubunna Ham.
28Umpasule kamalillingam DEBATA, nasuhum malillim pättä pa’lembängam ia too,
sapo’ sangngim ussumbala hi battakadanNa Debata;
29umpopengkubalim uwai dio Mesir mendadi haha,
nasuhum dappo’ ingganna baunna.
30Pahinängkä tongko’ illaam botto litä’na,
naponnoi sule tama tambinna tomahaja.
31Ma’battakada Puang Allataala, lambisam tibombom sule tamboli’,
anna sasuleam kasisi’ londä umponnoi bottona.
32Umpakembua uham ussulle uham biasa,
anna umpasilalle kila’ illaam bottona.
33Nasongkangam anggurna sola kaju arana,
anna napasitumbaleam ingganna kajunna.
34Ma’battakada, lambisam sasuleam bati’,
bati’ mangkenta tadikemba’ budanna;
35ungkukkui tanangam illaam pa’bottoam,
anna ullosso’ ingganna bua pengkähä.
36Anna mane nadappo’i Puang Allataala ingganna änä’ ulua,
änä’ pa’bunga’ illaam pa’bottoam.
37Mane umpatettei to Israel messubum illaam mai lembäna Mesir, umbaba bulabam sola peha’,
ingganna pessubunna Yakub tatitedo tatiassam.
38Silele kassi tilalla’ to Mesir tappana le’ba’i,
aka sangngim mahea’ lako to Israel.
39Umpatisohom gabum Debata napalullunniam umma’Na,
anna api naballoiam wattu bengi.
40Sikamelau, lambisam napasuleam dassi puyuh,105:40 dassi puyuh: Sahhupa dassi memmalea-lea bulunna, anna ma’soha-sohapi bulu malotä anna mabusa.
anna napatuhungam hoti yabo mai langi’ napedea’i.
41Uhhäkkä kumila’ batu, lambisam tissindi uwai illaam mai,
anna ma’salu-salui dio pädä makähhe.
42Aka tä’ ungkalembei pa’dandiam masehoNa,
lako Abraham, sabua’Na.
43Umpatette messubum umma’ petauanNa sola ponno katilallasam,
umma’ to natodinni umpakende’ penaniam katilallasam.
44Debata umpadokkoanni lisu pala’na botto litä’na buda kahajaam,
lambisam sikaumpaitaluttu’ tahuno bua pengkähäna simesa-mesa kahajaam.
45Anna mala sikaumpalako anna ungkedoam mentu’na kada puha napandam,
anna umpaillaam penaba umpatitanam di ate ingganna ätohanNa DEBATA.
Haleluya!
106Pangkaha’ pa’kamaseNa Puang Allataala anna kamakahhasam penabanna to Israel
1Haleluya!106:1 Haleluya: Kalembasanna dipuji Debata.
Pa’kuhhu’ sumanga’ko längäm DEBATA,
aka Ia to mapia penaba!
Mannassa maleso pangkaha’ pa’kamaseNa takattu tintim tamondo’ sahuham sule lako salako-lakona.
2Mennangka la mala uhhetinganni kuasa kamatohoanNa DEBATA?
Mennangka la umbelai umpakende’ ingganna hupanna pampujiam dio oloNa?
3Maupa’ anna katambasam to ungkedoam muabiham undu’ lollä,
anna umpalako kamaloloam illaam mentu’ wattu!
4O DEBATA, ingahannä’ kao, ke umpa’patandaammoKo kamapiaam penabamMu lako umma’Mu,
paillaam penabaä’ kao, ke ullangnga’ingKo pakketauamMu.
5Anna mala kusi’dingam kamasannanganna umma’ to untodinni;
anna mala kuindam kupehapi katilallasanna umma’ petauamMu;
anna mala tiala inabangku sundede buaku sola umma’ to umpasähä’.
6Messala mana’ungkam mellenda biasa susi nene to kiponene,
dondom mana’ungkam tobä kabiasaam.
7Tanaissam tanapähäm pa’pogausam memängä-mängäMu
nene to kiponene wattunna dio Mesir,
tanakilalai tanaingaham pangkaha’ pa’kamaseMu takattu tintim tamondo’ sahuham tadipuha-puha.
Sapo’ silele hi umbali To Handam Matande dio bihinna le’bo’ Teberau.
8Sapo’ napesäkäi Debata anna mala lele mapia liu sanganNa,
anna la umpa’paissangam kuasa kamatohoanNa.
9Ungkissä’i le’bo’ Teberau lambi’ mabangi,
mane naolai umpatette umma’Na ullambam le’bo’, anggasanna muola galantangam.
10Napateemmi too ullappasam umma’Na illaam mai pala’ limanna to ungkabassii,
natässu’i dio mai lisu pala’na balinna.
11Sapo’ sangngim tallam ia balinna;
tala deemmi mehä’dä’ moi podo la mesam.
12Mane silele hi pole’ matappa’ umma’Na lako mentu’ battakadanNa,
anna umpakende’ pampujiam pa’pakasalle dio oloNa.
13Sapo’ tä’ masäe anna sikaungkalembei oham mentu’ pa’pogausanNa Debata,
anna tä’ sa’baha’ muampai pattujunNa Debata.
14Sangngim madoä-doä dio pädä kukku’,
anna umpa’sändä’i Puang Allataala dio pohiallasam.
15Naponnoiam Puang Allataala ingganna pelauanna,
sapo’ napalambi’ipi duka’ saki kahha’.
16Sangngim manäni’ lako Musa wattunna ma’kema dio pohiallasam,
anna lako Harun to natodinni DEBATA.
17Häkkä litä’ muamma’ Datan,
ullamum tubo Abiram sola pentuhu’na.
18Tuhum api muande tau buda,
muä’bäi ingganna to tameada’.
19Sikaumpapia pa’pasusianna änä’ sapim dio sepponna Tanete Horeb,
anna silelei napenombai.
20Dadi, umpemboko’i Puang Allataala to Matande
napasullei pa’pasusianna sapim peande humpu’.
21Umpa’kalembei Puang Allataala to untässu’i,
to puha umpadadi kaha-kaha kasalle dio Mesir;
22pa’pogausam mepilla’-pilla’ dio botto litä’na pessubunna Ham,
pa’palakoam memängä-mängä dio bihinna le’bo’ Teberau.
23Lambi’ nakattum Puang Allataala la napempa’deam simesa,
kela daa Musa, to napilei,
mendadi to ma’todialla’,
umpamehe aha’Na Puang Allataala,
nasuhum tä’ danum napempa’deam.
24Lessu’i ia too, sikauntumpu pala’um lembäna Kanaan mesa botto mapia,
aka tä’ ungkannangam pa’dandianNa Puang Allataala.
25Silele ma’naum-naum illaam kemana,
anna moka umpehingngii kadanNa DEBATA.
26Iya muäkä’um limanNa DEBATA ma’dandi,
la sikanapempa’deam dio pädä kukku’,
27anna la napatisembu’ dalle batte pessubunna tama alla’-alla’na buda kahajaam,
la napatitähhä’ lako mobotto-bottoam.
28Anna umpenombai Baal106:28 Baal: Mesa debata lino si napenombai to Kanaan. yabo Tanete Peor,
anna muande bale dipehumalasam lako debata tamenaba.
29Inde pa’gau’nai umpakende’ aha’Na DEBATA,
nasuhum napalambi’i saki kahha’.
30Sapo’ mengke’de’ Pinehas umpassala to kasalaam,
lambisam tionto saki kahha’ ia too.
31Pa’pogausam ia too diangga’ pa’palakoam malolo,
anna dikilalai liu sule lako salako-lakona.
32Silele umpakende’ aha’Na DEBATA, dio ampe’na kalimbuä Meriba,
nasuhum mehonno’ Musa napobua’.
33Silele umpasuhhä’ buana Musa,
nasuhum umpassubum tula’ tamendiada’.
34Sangngim tä’ di umpempa’deam issi litä’ dio lembäna Kanaan,
umba susi napahentaam Debata,
35sapo’ sangkalamma’ di pa’botto,
anna untuhu’i sangka’na to taumpenombai Puang Allataala.
36Silele umpenombai tau-tau pa’pasusianna to napa’debatai,
iam mendadi poja bendo’ samelum buaja lako kalena.
37Umpehumalasam änä’na muane sola baine
lako debatanna to Kanaan.
38Umpatitollo hahana to tadeem kasalaanna,
hahana änä’na muane sola baine,
napehumalasam lako tau-tau pa’pasusianna to napa’debatai to Kanaan,
nasuhum botto ia too napatitolloi haha.
39Pa’pogausam ia too napokadake dio oloNa Debata,
anna umpa’lullu’ Puang Allataala.
40Lambisam hede-hede aha’Na DEBATA lako umma’Na,
anna ungkabassi umma’ petauanNa.
41Nasuhum nabeho tama pala’ limanna kahajaam senga’,
nalappa’ tama kakuasaanna bali tutuanna.
42Napaepe’i tanggana-gana balinna,
lambisam nadakka’ bata’ ulunna.
43Pembudam nalangnga’i DEBATA,
sapo’ angga hi nakähä pabali-bali ma’sangka’ elo’,
nasuhum dondom mana’ tobä kabiasaam natumä kasalaanna.
44Sapo’ napaalai penaba DEBATA kamasussaanna,
tappana nahingngi pengkaalaanna.
45Ungkilalai pa’dandianNa DEBATA aka iai nasuhum,
anna nahäntängam bua aka kasalle pangkaha’ pa’kamaseNa takattu tintim tamondo’ sahuham.
46Pa’ulalam DEBATA lambisam nahäntängam bua
ingganna to undakka’i bata’ ulunna.
47Pesäkäikam DEBATA, Puang Allataala to kipenombai,
tässu’ikam dio mai simesa-mesa kahajaam,
anna malakam ma’kuhhu’ sumanga’ lako sanga masehoMu,
anna sende penabangki umpuji umpa’kasalleiKo.
48Dipuji dipa’kasallei DEBATA, Puang Allataala to napenombai to Israel,
mengkalao dio mai sule lako salako-lakona.
Sihatam sipäto’ umma’Na DEBATA ma’kada naua: <<Amin!>>
Haleluya!
107Suha’ Kalimanna:
Sihatam sipäto’ ma’kuhhu’ sumanga’ längäm DEBATA
1Pa’kuhhu’ sumanga’ko längäm DEBATA aka Ia to mapia penaba!
Mannassa maleso pangkaha’ pa’kamaseNa takattu tintim tamondo’ sahuham sule lako salako-lakona.
2Kada ia too sihatam sipäto’ napokada to nalappasam DEBATA,
to nalangnga’i dio mai pala’ limanna balinna.
3To natässu’i DEBATA dio mai mobotto-bottoam,
illaam mai mata allo anna illau’ mai katampusam,
dio mai utara anna dio mai selatan.
4Deem to tä’ manontom tadongkonganna dio pohiallasam,
tamuita lalam lako kota tadongkonganna hupatau;
5sangngim tadea’ anna mabähhäm,
ha’ba tangnga’na pusa buntunna bulim tanetena.
6Lambisam mengkaala längäm DEBATA illaam kamasippisanna,
anna nalappasam DEBATA dio mai kamasussaanna.
7Napatette muola lalam malolo,
lambisam tinanda lako kota tadongkonganna hupatau.
8Sihatam sipäto’ sikama’kuhhu’ sumanga’ längäm DEBATA, aka pangkaha’ pa’kamaseNa takattu tintim tamondo’ sahuham,
anna pa’pogausam mepilla’-pilla’Na lako ma’hupatau.
9Aka Ia umpabosa’i uwai to mabähhäm,
anna umpabosa’i kinande to tadea’.
10Deem to tikuhum illaam ongeam mapättä anna malillim,
naputu’ pi’di’ anna napungo hante bassi,
11aka sangngim untekka kalo’ ullambam mata uwai kadanNa Puang Allataala,
anna umpa’bellu’ petundam pepakilalaanNa To Handam Matande.
12Lambisam sangngim tanapopa’geu’ napaloko’i kähängam kahha’;
silele tappa lumbum anna tä’ deem to umpamoloi.
13Lambi’ mengkaala längäm DEBATA illaam kamasippisanna,
anna nalappasam dio mai kamasussaanna.
14Nalappasam illaam mai ongeam mapättä anna malillim,
anna nakattuiam hante bassinna.
15Sihatam sipäto’ sikama’kuhhu’ sumanga’ längäm DEBATA, aka pangkaha’ pa’kamaseNa takattu tintim tamondo’ sahuham,
anna pa’pogausam mepilla’-pilla’Na lako ma’hupatau.
16Aka uhhuppu’-huppu’ ingganna tutu’ ba’ba tembaga,
anna umpolo-polo mentu’na pesulu’ bassi.
17Deem tau matomaho-maho napobua’ pessalamana’na,
anna nalambi’ pandahhaam natumä kasalaanna;
18sangngim ungkabassi ingganna hupanna kinande,
anna sikaedo mandam mua’do.
19Lambisam sikamengkaala längäm DEBATA illaam kamasippisanna,
anna nalappasam dio mai kamasussaanna.
20Napatuhungam battakadanNa anna nabeem kabonosam,
nalangnga’i dio mai kaliane anitu.
21Sihatam sipäto’ sikama’kuhhu’ sumanga’ längäm DEBATA, aka pangkaha’ pa’kamaseNa takattu tintim tamondo’ sahuham,
anna pa’pogausam mepilla’-pilla’Na lako ma’hupatau.
22Sihatam sipäto’ umbaba bua pemala’ pa’kuhhusam sumanga’na,
anna umpengkadaam mentu’ pa’palakoanNa DEBATA napasindum muahhe tilalla’.
23Deem tau ma’tängä le’bo’ ma’kappala’,
lao danggam ullambam le’bo’ kalua’.
24Silele ungkannassai pengkähä DEBATA,
anna pa’pogausam mepilla’-pilla’Na illaam le’bo’ kalua’.
25Ma’battakada DEBATA, lambisam tibussau hibu’ tatta’,
anna tilulum bombam.
26Tipa’buä kappala’na längäm lawwa, mane melläppä’i sule dokko le’bo’ mandalam;
silele tipasäkkä’ ussi’dim sussa tanggana-gana.
27Tiponi kaliane naita anna sikabentä anggasanna to mäbo’,
anna sangngim ha’ba tangnga’na.
28Lambisam mengkaala längäm DEBATA illaam kamasippisanna,
anna nalappasam Debata dio mai kamasussaanna.
29Napamattammi Debata indo hibu’ tatta’,
lambisam hapa’ bombam tilulum.
30Silele kassi tilalla’, aka mattammi hibu’, hapa’ bombam,
iya napatettem lako katisampoam kappala’ situhu’ pa’pemulunna.
31Sihatam sipäto’ sikama’kuhhu’ sumanga’ längäm DEBATA, aka pangkaha’ pa’kamaseNa takattu tintim tamondo’ sahuham,
anna pa’pogausam mepilla’-pilla’Na lako ma’hupatau.
32Sihatam sipäto’ silele umpomatande DEBATA illaam kakalebuanna umma’Na,
anna napuji napa’kasallei illaam pa’mesaanna to dipotomatua.
33Ingganna salu napopengkubalim mendadi pädä kukku’,
anna mentu’na kalimbuä mendadi litä’ mabangi.
34Litä’ malompo napopengkubalim mendadi litä’ kähhe,
napobua’ gau’ kadakena ingganna to untadongkonnii.
35Pädä kukku’ napopengkubalim mendadi limbä,
anna litä’ mabangi napadadi kalimbuä.
36Napatadongkonni to tadeem kamuandeanna,
anna sikaumpadadii kota la naongei tohho.
37Sikamuambo’ pamulaam lako bela’, anna untanam anggur,
lambisam kende’ bua pengkähäna tadipuha-puha.
38Natamba’ DEBATA lambisam lohom banne taunna,
anna humekä olo’-olo’na.
39Sapo’ katampasanna mampuhu’i hi anna napopa’bukku balinna,
aka ditä’gähhä’, didahha anna dipomasussa penaba.
40Napahuai longko’ DEBATA ingganna to pebabanna,
anna napopa’liko-liko pellaoanna dio pädä kukku’ ongeam tama’lesoam lalanna.
41Sapo’ muangkaham to mase-mase dio mai kamasussaanna,
anna napopentale kasahapuanna ma’tällä matoosam ma’abo’ mahapuam.
42Silele kassi tilalla’ to meada’ muitai,
sapo’ sangngim ma’luttu’ ia to tameada’.
43Menna-menna keakkalam, sihatam sipäto’ napasalui penaba napaalai pikkiham kaha-kaha ia too,
anna umpengngissanni manappa ingganna pangkaha’ pa’kamaseNa DEBATA takattu tintim tamondo’ sahuham.
108Pangkaha’ pa’kamaseNa Puang Allataala sondä’ längäm langi’
1Penaniam. Pampujiam napapia Daud.
2O Puang Allataala, matoho penabangku,
la muäkä’ä’ penaniam, la umpakende’ä’ pampujiam.
Suleko sumanga’ku, ende’ko pahajangku,
3la kuponi gambus la kuhemba’ katapi,
la umbukkaiä’ masiä untata’i baja.
4O DEBATA, la ma’kuhhu’ sumanga’ä’ ma’polepahaja matim oloMu, illaam alla’-alla’na kahajaam,
la kupujiKo kupa’kasallei illaam tängä-tängäna kahajaam;
5aka sule längäm langi’ malibulum pangkaha’ pa’kamaseMu takattu tintim tamondo’ sahuham,
sondä’ längäm langi’ kamanontongamMu.
6O Puang Allataala, pa’patandaanni kamatandeamMu sule lako handanna langi’,
pa’paitaanni kamasokangamMu sule lako lili’na lino.
7Anna mala lappa’ ingganna to ungkaha’i ungkamasei,
langnga’i umpake katea’ bassimMu, anna timba’i pengkaalaangku!
8Ma’battakada Puang Allataala yabo mai ongeam masehoNa naua:
<<La kassiä’ tilalla’, la kubahe-bahe lembäna Sikhem,
la kubohä-bohä lembäna Sukot.
9Gilead ampuangKu, Manasye Kao puäna,
Efraim sihhapam saludum bassi yabo ulungKu,
Yehuda sihhapam tekkem kahajaangKu,
10Moab pembaseam bitti’Ku,
Edom pa’tibeam sapatungKu,108:10 Edom pa’tibeam sapatungKu: Mala duka’ kalembasanna, Edom ampuanNa DEBATA.
kataloanna Filistea umpakassiä’ tilalla’.>>
11Menna hi kao la umpasolaä’ lako kota ma’bettem matoto’?
Menna hi kao la umpatetteä’ lako Edom?
12O Puang Allataala, puhangkam untampeam.
Puhangkam umpaandei asu illaam pa’bundusam.
13Pamoloikam untingngajo balingki,
aka labu’ di limbä tallam di pahupu pa’pesäkäna hupatau.
14Ianaanna napasolaikia’ Puang Allataala, la matohokia’ anna matitta,
aka Ia la ma’kale umpanete käsä balinta.
109Sambajanna to dipaboboi tula’ tatappa’
1Lu lako to untetem to menani. Pampujiam napapia Daud.
O Puang Allataala to kupuji kupa’kasallei, daa ungkanonnä!
2Aka napa’mämmäiä’ to tameada’ anna to maneko,
silele napaboboiä’ tula’ tatappa’.
3Nasembusannä’ tula’ kadake,
anna nakallai tä’ deem lalanna.
4Kukamasei kao, nasangai kadake hi,
sapo’ kupa’sambajangam mandi.
5Kamapiaam penabangku napabala’i penaba kadake,
anna pa’kamaseku napabala’i pangkabassi.
6Tuhoi mesa to tameada’ la umbisahai;
la tadongkom di too dio tandai kananna mesa to la mandu’dungam.
7Maka’ dibisaham, la ia hi too natitolanni kasalaam,
anna la nasambe’ di too sambajanna.
8La mahapo sungnga’ di too,
anna la naala hi too tau senga’ babanganna.
9La bium di too änä’na,
anna la balu bainena.
10La kalamba-lamba hi too änä’na anna kapala’-pala’,
anna dihambai109:10 dihambai: Naua mesa terjemahan kuno: dihambai. Sapo’ indo tituli’ illaam basa Ibrani naua ke basa Bambanni: kaempä’-empä’. illaam mai banua hu’bunna.
11La napohhom di too to napa’indanni ingganna ebanganna,
anna napamuhu tau senga’ to’doam appu’na.
12La tä di too deem tau umpa’patandaam kamapiaam penabanna lako,
la tä’ di too deem tau uhhäntänganni bua änä’ biunna.
13La dipempa’deam di too pessubunna,
anna tala naissammi sanganna lapi’ to mane la kende’.
14La napokaponam tapuppu’ di too dio oloNa DEBATA gau’ kadakena nene to naponene,
anna tä di too la diampunni dosana indona.
15La bändä-bändängam liu hi too dio oloNa DEBATA ingganna gau’ ia too,
anna tala deem di too tau ungkilalai illaam lino.109:15 anna tala deem di too tau ungkilalai illaam lino: Indo to tä’ la nakilalai tau illaam lino, iya indo nene to naponene sola indona to tameada’.
16Aka tuli tadeem ia la umpa’patandaam pangkaha’ pa’kamase,
sapo’ umpakamase-mase mandi anna umpakattu sungnga’
to ussi’dim pi’di’, to kaasi-asi anna to mapi’di’ penaba.
17Napedommi’ mantädo; la ia hi too nakumbali’ pantädona.
Napempahhi’ umpassubum tula’ pa’tamba’; tala katambasam di too.
18Napobaju malulla’ ia mantädo;
la mengngala hoäna hi too pantädona, mellao susi uwai,
la nasisi balu’bu’ di too sule tama buku-bukunna susi loläna minnä’ zaitun.
19La nasapu’ di too pantädo sihhapam poheba allo-alloanna,
la mendadi hi too beke’na napemba’ba’ allo bengi.
20La mendadi hi too pesämbä’na buttu yabo mai DEBATA, ingganna ia too lako to umpaboboiä’,
lako mentu’na to untula’-tula’ kadakeä’.
21Sapo’ Iko-Iko, o PUANG ALLATAALA, Debata to kupenombai,
pengke’de’Ko pamoloiä’ anna mala lele mapia liu sangamMu,
lappasannä’ aka sumpu mapianna pangkaha’ pa’kamaseMu takattu tintim tamondo’ sahuham.
22Aka tasipopenabaä’ penabangku anna mehio-hio,
anna anggasanna disasa’-sasa’ ateku illaam hoäku.
23Saidi’mä’ tapa’de sihhapam kalibajo wattu la lendu’ allo,
dipentalampeäsannä’ sihhapam bati’.
24Malu’bä’ guntu’ku aka ma’puasaä’,
anna madokko’mä’, bukungku mandam sikatekä’.
25Silele natebe’-tebe’iä’,
sangngim umbeo’ pudu’na mengngu’be.
26O DEBATA, Puang Allataala to kupenombai, pamoloiä’,
langnga’iä’ situhu’ pangkaha’ pa’kamaseMu takattu tintim tamondo’ sahuham.
27Anna mala naissam balingku naua, DEBATA ungkandoi,
naissam naua, pa’ulalanNa DEBATA.
28Moi la sikanatädoä’, sapo’ Iko-Iko, la untamba’ä’;
la malongko’ di too balingku,
sapo’ kao-kao inde sabua’Mu, la kassiä’ tilalla’.
29La malea lindo hi too ingganna to untanda’ä’,
anna naputu’ sihi’ anggasanna ma’juba.
30La ma’kuhhu’ sumanga’ä’ längäm DEBATA mengkalao illaam unä’ penabangku lemba’ dio pudu’ku,
anna kupuji kupa’kasallei illaam pa’mesaanna umma’Na.
31Aka Ia ussappi’ to mase-mase
la nalappasam dio mai pala’ limanna to la umpahuai pa’tahungkungam mate.
110DEBATA umbeem tekkem kakuasaam tomahaja
1Pampujiam napapia Daud.
Ma’battakada DEBATA lako puäku naua:
<<Okko’ko dio tandai kanangKu,
sule lako wattunna la kupopa’udum guntu’ ingganna balimmu dio olomu
lambi’ uhhondoi dokko.>>110:1 Mat. 22:44; Mrk. 12:36; Luk. 20:42-43; Kis. 2:34-35; 1Kor. 15:25; Efs. 1:20-22; Kol. 3:1; Ibr. 1:13, 8:1, 10:12-13.
2La napatidollo’ DEBATA tekkem tanda kakuasaammu mengkalao yabo Tanete Sion;
pa’kuasako yabona ingganna balimmu!
3Wattunna ma’kalili’ tentahamu, tigulili tau kambam sule sola unä’ penabanna,
naähhä kamatandeam sola kamasehoam;
nakende’iko änä’ gassim,
susi millo’na langullo naähhä allo mebengngi’.
4Puham ma’dandi DEBATA naua:
<<Ikom too la mendadi sando sule lako salako-lakona,
susi sando Melkisedek yolona.>>110:4 Ibr. 5:6, 6:20, 7:17, 21.
Pa’dandiam ia too tä’um deem la napodo’ sule.
5Nasamba’ko napasukum DEBATA,
umpadahi ambum mentu’na tomahaja wattunna kende’ aha’Na.
6Untalappi’ ingganna kahajaam, nasuhum tiampa’ bakke;
umpadahi ambum ingganna to pebaba senambo lino.
7Tomahaja la muihu’ uwai salu dio ampe’ lalam,
tappana sule kamatohoanna, untandeammi kapataloam.
111Matande pa’pogausanNa DEBATA
1Haleluya!
La ma’kuhhu’ sumanga’ä’ längäm DEBATA sola sakalebu penabangku,
illaam kakalebuanna to meada’, illaam kombonganna umma’ petauanNa.
2Tä’ deem pada sakasalle pa’pogausanNa DEBATA,
sihatam sipäto’ napasalui penaba ingganna to umpohäei.
3Matande anna mepilla’-pilla’ pa’pogausanNa DEBATA,
tatibeho susu’ tatidende katonam undu’ lolläNa sule lako salako-lakona.
4Umpadadi buda tanda memängä-mängä la mendadi pepakilalaam lako kita;
DEBATA to mamase anna pa’häntängam bua.
5Umpasondoi kinande lako to mengkahea’ dio oloNa,
taungkalembei pa’dandianNa sule lako salako-lakona.
6Puham umpa’paitaam kakuasaanNa lako umma’Na muolai pa’palakoanNa,
ma’tandaam napadokkoam lisu pala’na botto litä’na kahajaam senga’.
7DEBATA ma’palako manontom anna ussoeam undu’ lollä,
ingganna pahentaNa dihannuam ponno,
8matoto’ talatilenggu’ anna sule lako salako-lakona,
dikedoam diabiham sitonda kamanontongam anna penaba sambulo-bulo.
9Umpasuleam kalappasam umma’Na,
anna umpandam pa’dandianNa la sule lako salako-lakona;
maseho sanganNa anna sihatam sipäto’ dipengkahea’i.
10Mengkahea’ längäm DEBATA, too’na kakeakasam,
menna-menna umpalakoi siampuam akkalam mapia.
Dipuji dipa’kasallei DEBATA sule lako salako-lakona!
112Kamasannanganna to meada’
1Haleluya!
Maupa’ anna katambasam to mengkahea’ dio oloNa DEBATA,
tä’ deem pada saumpohäe ingganna pahentaNa DEBATA.
2La mempokom tassaju’ mengngette’ tambalala pessubunna illaam inde botto;
la katambasam peänäsanna to meada’.
3Sugi’ anna kalumannam kasahapuanna,
pa’pogausam mapianna la sule lako salako-lakona.
4To meada’ sihhapam ballo paindo illaam kamalillingam,
mamase, pa’häntängam bua, anna malolo.
5Maupa’ anna katambasam to pa’häntängam bua, umpaolai lalam solana,
anna muundu’ lollä ullingkai salukatuboanna.
6Tatilenggu’ tatibosso’ upu’ lino;
to meada’ tadikalembei sule lako salako-lakona.
7Tä’ mahea’ uhhingngi pa’pelele kadake,
manontom penabanna aka mahannu längäm DEBATA.
8Tamanangnga, tamahea’,
nasuhum ussau’ ingganna balinna.
9Matutu ma’pebeem, ma’pebeem lako to mase-mase;
pa’pogausam mapianna la tontä liu sule lako salako-lakona,
mendadi to matande anna masokam.
10Kembuhu bassi to tameada’ muitai,
tikahikki’, lambisam sangngim huppu’ dahi kapu’;
pattuju kadakena to tameada’ untallanganni.
113DEBATA muangkaham to siandaha’ sumangguhi
1Haleluya!
O mentu’nako sabua’Na DEBATA,
pujiko sanganNa DEBATA!
2La dipuji hi too dipa’kasallei sanganNa DEBATA,
mengkalao temo sule lako salako-lakona.
3Mengkalao illaam mata allo sule sau’ katampusam
sihatam sipäto’ umpuji umpa’kasallei sanganNa DEBATA.
4DEBATA ullumbäi ingganna kahajaam,
anna kamatandeanNa untandolängänni langi’.
5Mennangka la susi DEBATA, Puang Allataala to tapenombai,
to tadongkom yabo ongeam handam matande,
6ahu’ mengkaulu umpahandam langi’ sola lino?
7Muangkaham to siandaha’ sumangguhi dio mai sobä’,
anna untässu’i to kaasi-asi dio mai tombongam humpä.
8Anna napatadongkonni sola ingganna pedaengam,
sola ingganna pappuangam illaam alla’-alla’na pakketauanNa.
9Ummana’ änä’ to tämänä anna deenni umpasolai lako sali,
mendadi to titanam indo ponno kakassiam katilallasam lako änä’na.
Haleluya!
114Memängä-mängä kuasanNa Debata
1Wattunna messubum to Israel illaam mai lembäna Mesir,
pessubunna Yakub umpellei botto litä’na to tadiissam basana,
2Yehuda napadadi DEBATA ongeam masehoNa,
Israel napadadi attasa’ kakuasaanNa.
3Tihisi le’bo’ Teberau tappana muita DEBATA,
tibali’ ulunna Salu Yordan.
4Sikatibe lao tanete susi domba laki,
sikabuä lao buntu susi änä’ domba.
5Maaka hia le’bo’, anna tihisiko lao,
maaka hia Salu Yordan, anna tibali’i ulummu?
6Aka hia tanete, anna sikatibekoa’ susi domba laki,
aka hia buntu, anna sikabuäkoa’ susi änä’ domba?
7O lino, tinggi’gi’ko dio oloNa DEBATA,
dio oloNa Puang Allataala to napenombai Yakub,
8to umpadadi kumila’ batu mendadi limbä uwai,
batu tubo mendadi kalimbuä!
115Mahannu anna matappa’ lako DEBATA
1La takami’ DEBATA, la takami’,
sapo’ la sangamMu hia sipäto’ dipomatande,
aka pangkaha’ pa’kamaseMu takattu tintim tamondo’ sahuham, aka kamanontongamMu!
2Akanna naua hia buda kahajaam:
<<Umba hi Puang Allataala to napenombai?>>
3Puang Allataala to kipenombai, ma’tadongkongam yabo suhuga;
iai too napoelo’, iam napalako!
4Peha’ anna bulabam napapia tau-tau napasusii to napa’debatai,
panggahaga limanna hupatau.
5Siampuam pudu’, sapo’ tä’ mala ma’kada,
siampuam mata, sapo’ tä’ paita.
6Siampuam talinga, sapo’ tä’ pahingngi,
siampuam illä, sapo’ tä’ paudu’.
7Siampuam lima, sapo’ tä’ mala mengnganti,
siampuam bitti’, sapo’ tä’ mala mentekka,
anna tadeem umpassubum gamaha dio mai langngahona.
8Ingganna to manggahaga tä’ deem sipalempeanna indo debata panggahaganna,
anna susi siam duka’ ingganna to ungkatappa’i.
9O to Israel, mahannuko lako DEBATA!
Ia to umpamoloiko anna unta’ matoto’mu.
10O mentu’nako sando pessubunna Harun, mahannuko lako DEBATA!
Ia to umpamoloiko anna unta’ matoto’mu.
11O inggannako to mengkahea’ lako DEBATA, mahannuko lako DEBATA!
Ia to umpamoloiko anna unta’ matoto’mu.
12Tanakalembeikia’ DEBATA; la natamba’kia’ pada-pada,
la untamba’ to Israel,
la untamba’ pessubunna Harun,
13la untamba’ ingganna to mengkahea’ lako DEBATA,
susi to bahinni’ teem to kasalle.
14La napalohom di too banne taummu DEBATA,
susi iko teem pessubummu.
15La natamba’ dako too DEBATA,
to ungkumbä langi’ anna umballa’ lino!
16Langi’ ia, ampuanNa DEBATA,
sapo’ lino ia, napadokkoam lisu pala’na hupatau.
17Taia to mate la umpuji DEBATA,
taia to dio kaliane anitu,
18sapo’ kita hia’ ia, kita to tubo la umpuji DEBATA,
mengkalao temo sule lako salako-lakona.
Haleluya!
116Langnga’ dio mai amba-ambana kamateam
1Umpakeä’ pangkaha’ pa’kamase lako DEBATA, aka nahingngiam pengkaalaangku
anna natahima pelauangku.
2Aka napatananniä’ talinganNa,
lambisam la mengkaalaä’ lako oloNa upu’ salukatuboangku.
3Diampasammä’ pebalum,
napatinggi’gi’mä’ amba-ambana kamateam,
husa’ penabangku anna masussa.
4Iya umpengkaalaimä’ sanganNa DEBATA kuua:
<<O DEBATA, kupelau anna ullangnga’iä’!>>
5Indo DEBATA, mamase anna malolo,
indo Puang Allataala tapenombai, pa’häntängam bua.
6DEBATA umpaliaha to saidi’ kapaissanganna;
tappana pa’dem kamatohoangku, napesäkäiä’ DEBATA.
7O penabangku, hapa’ko dokko,
aka napalambi’ingko kamapiaam, DEBATA.
8Abana puhangKo ullangnga’iä’ dio mai kamateam, DEBATA,
umpoli’ uwai matangku,
anna taumpatitedo bitti’ku.
9Lambisam malaä’ ullingkai salukatuboangku dio oloNa DEBATA,
illaam lino tadongkonganna ma’hupatau.
10Tontää’ matappa’, moi anna kuua:
<<Tä’ deem pada sanahimpi’-himpi’ä’ sussa naepe’ tanggana-gana.>>
11Buntä bäbä pikkihangku lambi’ kuua:
<<Ingganna hupatau sangngim tä’ mala dikatappa’i.>>
12Akam umbai’ la kupogausam DEBATA,
kubala’iam kamapiaam penabanNa tama kaleku?
13La kupehumalasam ihusam keissi anggur tanda kalappasam,
anna la kupa’kasallei sanganNa DEBATA.
14La umponnoiä’ pa’dandingku lako DEBATA
nasa’bii ingganna umma’ petauanNa.
15Nababa penabanNa DEBATA,
kamateanna to nakamasei.
16O DEBATA, kao inde sabua’Mu!
Kao inde sabua’Mu, änä’na sabua’Mu baine!
Iko ullappasannä’ dio mai sangkala bassi.
17La umpehumalasannä’ bua pemala’ pa’kuhhusam sumanga’ dio oloMu,
anna la kupa’kasallei sanganNa DEBATA.
18La umponnoiä’ pa’dandingku dio oloNa DEBATA,
nasa’bii ingganna umma’ petauanNa,
19dio pa’hanteanna Banua DEBATA,
illaam tängä-tängämu, o, issinna Yerusalem!
Haleluya!
117Umpuji umpomatande DEBATA
1Pujiko DEBATA, o inggannako kahajaam,
pomatandei sanganNa, o mentu’nako kahajaam!
2Aka tä’ deem pada sakasalle pangkaha’ pa’kamaseNa takattu tintim tamondo’ sahuham lako kita,
anna kamanontonganNa sule lako salako-lakona.
Haleluya!
118Ma’kuhhu’ sumanga’ lako DEBATA
1Pa’kuhhu’ sumanga’ko längäm DEBATA, aka Ia to mapia penaba!
Mannassa maleso pangkaha’ pa’kamaseNa takattu tintim tamondo’ sahuham sule lako salako-lakona.
2Sihatam sipäto’ to Israel ma’kada naua:
<<Mannassa maleso pangkaha’ pa’kamaseNa takattu tintim tamondo’ sahuham sule lako salako-lakona!>>
3Sihatam sipäto’ pessubunna sando Harun ma’kada naua:
<<Mannassa maleso pangkaha’ pa’kamaseNa takattu tintim tamondo’ sahuham sule lako salako-lakona!>>
4Sihatam sipäto’ to mengkahea’ längäm DEBATA ma’kada naua:
<<Mannassa maleso pangkaha’ pa’kamaseNa takattu tintim tamondo’ sahuham sule lako salako-lakona!>>
5Illaam kamasippisangku mengkaalaä’ längäm DEBATA.
Nahingngiam DEBATA pengkaalaangku nabeennä’ kamalonasam.
6Naundu’ä’ naolaam DEBATA. Tä’ deem la kende’ hea’ku.
Akapi la mala napogau’ hupatau lako kaleku?
7Naundu’ä’ naolaam DEBATA, nabeennä’ pepamolo;
la kusangkamata-matai ditaloi to ungkabassiä’.
8Mapia puha ia meongam lako DEBATA,
anna la uhhannuam hupatau.
9Mapia puha ia meongam lako DEBATA,
anna la uhhannuam pappuangam.
10Nalilim pali’ä’ ingganna kahajaam;
sapo’ sola sanganNa DEBATA, sangngim kulullu’ pahe käppi’ kupanete käsä.
11Natalimbum tamaä’, napali’ tintim;
sapo’ sola sanganNa DEBATA, sangngim kulullu’ pahe käppi’ kupanete käsä.
12Nalebo puhhi’di’ä’ susi wani buda;
sapo’ umba susi hea mapa nasuhhu’ api,
susim too duka’ sappälli’ kulullu’ pahe käppi’ kupanete käsä sola sanganNa DEBATA.
13Nasa’ba tohoi nasumbängannä’, iya saidi’ku talumbum-lumbum,
sapo’ napesäkäiä’ DEBATA.
14DEBATA kamatohoangku anna kupuji kupa’kasallei;
Ia puha ullangnga’iä’.
15Dihingngi a’da’ katilallasam anna ahhe kapataloam
illaam kemana to meada’ naua:
<<Katea’ bassinNa DEBATA umpogau’ pa’palakoam mepilla’-pilla’!
16Katea’ bassinNa DEBATA untandeam kapataloam,
katea’ bassinNa DEBATA umpogau’ pa’palakoam mepilla’-pilla’!>>
17La tuboä’, tala dondom bulu salamba’ku tala tobä bulu sangkahohingku,
anna la kuuleleam ingganna pa’pogausanNa DEBATA.
18Puhamä’ napahuai petalappi’ kahha’ DEBATA,
sapo’ tää’ napabäi dipakattu sungnga’.
19Tungka’iannä’ ba’ba suluhanna si naola to meada’ mentama,
la kuola mentama,
lao ma’kuhhu’ sumanga’ längäm DEBATA.
20Iam too inde ba’ba suluhanNa DEBATA,
la naola mentu’na to meada’ mentama.
21La ma’kuhhu’ sumanga’ä’ matim oloMu, aka uhhingngiammi pelauangku,
puhangKo ullangnga’iä’.
22Batu tubo natibe mentu’na tukam,
ia hi mendadi batu longkahhim.
23Ia too pa’ulalanNa DEBATA,
memängä-mängä anna mepilla’-pilla’ lako kita.
24Iam too inde allo puha napadadi DEBATA;
tapada-padaa’ kassi tilalla’ anna sundede buata illaanna.
25O DEBATA, kipelau anna ullangnga’ikam!
O DEBATA, pahua tekkakam illaam pa’laoangki!
26Katambasam to sule illaam sanganNa DEBATA!
Kipelauangko tamba’ buttu di banua DEBATA.
27Indo DEBATA, iam too Puang Allataala, To umballoi salukatuboanta.
Pungoi indo olo’-olo’ la ditunu illaam allo kasalle,
babai lako ampe’na tandu’ dapo’ pehumalasam.118:27 dapo’ pehumalasam: Sahhupa ongeam anggasanna meja, dipasandai susi tandu’ appa’ sikunna, si napantunui bua pemala’na to Israel lako Debata.
28Ikom too Puang Allataala to kupenombai, la ma’kuhhu’ sumanga’ä’ dio oloMu,
o Puang Allataala to kupenombai, la kupujiKo kupomatande.
29Pa’kuhhu’ sumanga’ko längäm DEBATA, aka Ia to mapia penaba!
Mannassa maleso pangkaha’ pa’kamaseNa takattu tintim tamondo’ sahuham sule lako salako-lakona.
119Maupa’ anna katambasam to ungkedoam muabiham Paondom DEBATA
Alep
1Maupa’ anna katambasam to tadeem sassainna lingka salukatuboanna,
anna tubo situhu’ paondom DEBATA.
2Maupa’ anna katambasam to umpatobä di tambu’ umpatialim di sumusu pahentaNa,
anna sola ponno penaba umpameä Debata,
3anna tä’ deem umpogau’ kakadakeam,
sapo’ tubo situhu’i ulalanNa Debata.
4Iko ma’kale umpandam pahentaMu,
anna mala dianti manda’ ditobe matoto’.
5Sumpu mapianna ke sitontonganni lingka salukatuboangku
la kukedoam kuabiham kada puha umpandam.
6Lambi’ tala malea lindoä’ tala bohho pa’todingam,
ke kupaalai penaba kupasatutui pikkiham pahentaMu.
7La ma’kuhhu’ sumanga’ä’ dio oloMu sola penaba sambulo-bulo,
wattunna kupe’guhui mentu’na ätoham maloloMu.
8La kukedoam kuabiham kada puha umpandam,
daa si’da-si’da la untampeannä’.
Bet
9La naaka susi mesa to mangnguha unnonnoi sipa’na?
La nakambi’ situhu’ battakadamMu.
10KupameäKo sola sakalebu penabangku,
daa umpabäiä’ untekka pahentaMu.
11Kupaillaam penaba kupadondom di ate pa’dandiamMu,
anna mala tala madosaä’ dio oloMu.
12O DEBATA, dipujiKo dipa’kasallei;
patuduä’ ingganna kada puha umpandam.
13Tiku’mi’ pudu’ku umpa’paissangam
ingganna ätoham to puha umpengkadaam.
14Kassiä’ tilalla’ napatette mentu’ ätohamMu,
susi untilalla’i ebangam ma’mata-mata.
15La kupasalui penaba ingganna pahentaMu,
anna tatilio-lio matangku umpetua’ mentu’ ulalamMu.
16Naposundede buaku ingganna kada puha umpandam;
anna tala kukalembei battakadamMu.
Gimel
17Pakendesanni kamapiaam inde sabua’Mu, angku mala ha tubo,
anna kukedoam kuabiham battakadamMu.
18Patibukkannä’ matangku anna mala kuita
kaha-kaha mepilla’-pilla’ illaam paondomMu.
19Kao inde to messihuhu illaam lino;
daa umbuniangannä’ ingganna pahentaMu.
20Puhu’ penabangku aka mamalli’,
ungkamalli’i ingganna paondomMu allo bengi.
21UntibuheseiKo to malangka’ penaba,
to nahua tädo, to untekka ingganna pahentaMu.
22Daa umpabäi nasassaiä’ anna naita-ita dokko,
aka kukedoam kuabiham ingganna pahentaMu.
23Moinna anna ussahandanni kada to sibaba lalam inaba illaam lembä la nabaliä’,
sapo’ kao-kao inde sabua’Mu kupasalui penaba ingganna kada puham umpandam.
24Ingganna pahentaMu umpatiala inabangku umpasundede buaku,
mendadi petundam pepakilalaam lako kaleku.
Dalet
25Diomä’ ba’ba talumbä,
anda’iannä’ sungnga’ku, antiannä’ bätä penabangku situhu’ battakadamMu.
26Kuhetinganni dio oloMu lingka salukatuboangku, iya uhhingngiannä’;
patuduä’ ingganna kada puha umpandam.
27Pamoloiä’ anna mala kupähäm ingganna pahentaMu,
anna kupasalui penaba ingganna pa’pogausam memängä-mängäMu.
28Mahehe pallam penabangku napobua’ nabo inaba,
pakatoto’ä’ situhu’ battakadamMu.
29Pasikambelaä’ lalam sengko’,
anna patuduä’ paondomMu, aka kamapiaam penabamMu.
30Puham kupilei ulalam manontom,
tipandammi ätohamMu dio oloku.
31O DEBATA, kuanti manda’ kutobe matoto’ ingganna ätohamMu,
daa umpomalea lindoä’ bohho pa’todingam.
32La kusimpanni umpalako mentu’ pahentaMu,
aka umpasanda masiä’ sanda maleso illaam penabangku.
He
33O DEBATA, patuduä’ kalembasanna kada puha umpandam,
anna mala kutuhu’i kupalako upu’ salukatuboangku.
34Papähänniä’ ätohamMu, anna mala kupaillaam penaba kupadondom di ate,
kuoli’ mamma’ kusalungku metindo sola ponno penaba.
35Patetteä’ untuhu’i mentu’na pahentaMu,
aka iam too umpatiala inabangku umpasundede buaku.
36Palulakoannä’ penabangku ätohamMu,
damom tia lu lako kauntungam kale.
37Pasalai matangku kaha-kaha takeguna,
pasikatuboissiiä’ mentu’ ulalamMu.
38Pasulelakoanni inde sabua’Mu, pa’dandiamMu,
pa’dandiam to umpalulako to mengkahea’ dio oloMu.
39Pasikambelai kaleku pantelle to kukahea’,
aka ingganna ätohamMu sumpu mapianna.
40Setonganna, mamalli’ä’ lako ingganna pahentaMu,
anda’iannä’ sungnga’ku, antiannä’ bätä penabangku aka to si muundu’Ko lollä!
Waw
41O DEBATA, la natihandu’i hä’ too pangkaha’ pa’kamaseMu takattu tintim tamondo’ sahuham,
anna kalappasam buttu di Iko situhu’ pa’dandiamMu.
42Anna mala ha kuissam kutimba’i to umpetunaä’,
aka kukatappa’i battakadamMu.
43Daa si’da-si’da umpasilallaham pudu’ku battakada maloloMu,
aka mahannuä’ lako ingganna ätohamMu.
44La tontä liu kukedoam kuabiham ätohamMu,
mengkalao temo sule lako salako-lakona.
45La soa penabangku ullingkai salukatuboangku,
aka kupameä pahentaMu.
46La kupengkadaam ingganna kada puha umpandam dio olona mentu’na tomahaja,
anna tala kupomasihi’ tala kupomalea lindo.
47La masannam penabangku umpalako mentu’na pahentaMu
aka kupohä’di’.
48Kuangga’ anna kupa’kasallei ingganna pahentaMu to kupohä’di’,
anna la kupasalui penaba mentu’na kada umpandam.
Zayin
49Daa ungkalembei battakada to puha umpalambi’ lako inde sabua’Mu,
aka Iko puha umbeennä’ pahhannuam.
50Indem ia mendadi pepakahangaangku illaam kamasussaangku,
diona pa’dandiamMu umbeennä’ katuboam.
51To malangka’ penaba tä’ deem pada sanatelleä’ napetuna,
sapo’ tala kutampeam tala kupemboko’i paondomMu.
52O DEBATA, kukilalai ingganna ätohamMu to inna deemmi pempom dio mai,
lambisam tipakahanga penabangku.
53Tä’ deem pada sasuhhä’ buaku lako to tameada’,
to umpemboko’i paondomMu.
54Mentu’na kada puha umpandam mendadi penaniam pampujiangku,
illaam inde ongeam kuongei messihuhu.
55O DEBATA, bengi-bengiam kukilalai sangamMu,
anna kuoli’ mamma’ kusalungku metindo ätohamMu.
56Iam too dadi lako kaleku,
aka kuanti manda’ kutobe matoto’ ingganna pahentaMu.
Het
57O DEBATA, Iko ampuangku,
puham kudandi la kukedoam kuabiham ingganna battakadamMu.
58Sola sakalebu penabangku kupelau matim,
kamaseiä’ situhu’ pa’dandiamMu.
59Kupasalui penaba lingka salukatuboangku,
angku mane pa’pasule tuhu’i mentu’na pahentaMu.
60Takupaela’ takupa’dako’i
ungkedoam muabiham ingganna pahentaMu.
61Moi la napungoä’ anna nasäke’ to tameada’,
sapo’ tala kukalembei tala kutampeam paondomMu.
62Wattu tängä bengi bangonnä’ angku pa’kuhhu’ sumanga’ matim oloMu,
aka ingganna ätoham maloloMu.
63Siala penabaä’ ingganna to mengkahea’ dio oloMu,
anna to muoli’ mamma’ ussalungku metindo pahentaMu.
64O DEBATA, ponno lino pangkaha’ pa’kamaseMu takattu tintim tamondo’ sahuham,
patuduä’ ingganna kada puha umpandam.
Tet
65O DEBATA, puhangKo umpogau’ kamapiaam lako inde sabua’Mu,
situhu’ battakadamMu.
66Patuduä’ kakeakasam sola kapaissangam,
aka kukatappa’i ingganna pahentaMu.
67Wattunna tä’pä’ nahua pi’di’, iya sala’ lalannä’,
sapo’ temo, kukedoam kuabiham battakadamMu.
68Iko to mapia penaba anna to umpogau’ kamapiaam;
patuduä’ ingganna kada puha umpandam.
69Napaboboiä’ tula’ tatappa’ to malangka’ penaba,
sapo’ kukedoam kuabiham pahentaMu sola ponno penaba.
70Sangngim makahha’ batu penabanna,
sapo’ kao-kao, paondomMu umpatiala inabangku umpasundede buaku.
71Deem gunana lako kaleku ke nahuaä’ pi’di’,
anna mala kupe’guhui ingganna kada puha umpandam.
72Indo paondom puha umpokada sangngim keangga’ lako kaleku,
keangga’ puha ia anna la massa’bu bokkom bulam sola peha’.
Yod
73LimamMu ungkombää’, limamMu siam untampaä’,
beennä’ kapaissangam, anna mala kuissam umpe’guhui ingganna pahentaMu.
74Ingganna to mengkahea’ dio oloMu la naitaä’ anna kassi tilalla’,
aka kao inde mahannuä’ lako battakadamMu.
75O DEBATA, kuka’da’ kukaleso kuua malolo ingganna ätohamMu,
anna kahana kamanontongamMu lambisam puhaKo umpahuaiä’ pi’di’.
76La mendadi hi too pepakahangaangku pangkaha’ pa’kamaseMu takattu tintim tamondo’ sahuham,
situhu’ pa’dandiamMu to puha umpokada lako inde sabua’Mu.
77La nalambi’ dä’ too pa’häntängam buaMu, angku mala ha tubo,
aka paondomMu umpatiala inabangku umpasundede buaku.
78La malea lindo hi too kasihisam to malangka’ penaba,
aka silele napaboboiä’ tula’ tä’ deem lalanna;
sapo’ kao-kao la kupasalui penaba kupaalai suhi’ ingganna pahentaMu.
79La silele hi too mengngala lako kaleku ingganna to mengkahea’ dio oloMu,
anna muissam ingganna pahentaMu.
80La malängngo’ di too penabangku untuhu’i kada puha umpandam,
indana kasihisannä’ malea lindo.
Kap
81La puhu’ penabangku ungkamalli’i kalappasam buttu di Iko,
mahannuä’ lako battakadamMu.
82Bullo’um matangku umpemmitai pa’dandiamMu;
ma’kadaä’ kuua: <<La pihampi sule pepakahangaamMu lako kaleku?>>
83Anggasangku mandam pingku’ lollo’ naoho hambu,
sapo’ tä’ deem kukalembei mentu’na kada puha umpandam.
84La padapi umba masäena inde sabua’Mu muampai pepamoloMu?
Pihampi mane umpassalai ingganna to umpadondo panggähheä’?
85Napa’gahoängammä’ ingganna to malangka’ penaba,
ingganna to tauntuhu’i paondomMu.
86Ingganna pahentaMu mala asam dikatappa’i;
sangngim napadondo panggähheä’ tä’ deem lalanna. Pesäkäiä’ kao!
87Sai’di’na ham tanapakattu sungnga’ä’,
sapo’ tä’ deem kukalembei ingganna pahentaMu.
88Anda’iannä’ sungnga’ku, antiannä’ bätä penabangku situhu’ pangkaha’ pa’kamaseMu takattu tintim tamondo’ sahuham,
anna mala kukedoam kuabiham pahenta to puha umpandam.
Lamed
89O DEBATA, la da’da’ sule lako salako-lakona battakadamMu,
tatibeho susu’ tatidende katonam yabo suhuga.
90KamanontongamMu sule lako ingganna lapi’ pessubunna hupatau;
Iko umpamanda’ matoto’ lino, nasuhum tontä liu da’da’.
91Situhu’ ätohamMu ingganna ia too da’da’ sule lako temo,
aka ingganna-ingganna sia sanda manuhu’ dio oloMu.
92Hapanna la taia ätohamMu umpatiala inabangku umpasundede buaku,
masäem pa’deku natambunni kamasussaangku.
93Inna tala kupa’lembei pahentaMu sule lako salako-lakona,
aka lalam iam too umpake anna malapä’ tubo.
94Kao inde ampuamMu, lappasannä’,
aka kupameä liu ingganna pahentaMu.
95Napelässä’ mata liuä’ to tameada’ la napakattu sungnga’,
sapo’ la kupaalai liu penaba ingganna pahentaMu.
96Kuka’da’ kukaleso kuua ingganna kaha-kaha tepu deem la meangganna,
sapo’ pahentaMu ia tä’ deem la meangganna.
Mem
97Tä’ deem pada sakupohäe paondomMu!
Kupasalui penaba kupasatutui pikkiham allo bengi.
98PahentaMu umbeennä’ kakeakasam untondom ingganna balingku,
aka illaam liu kaleku sule lako salako-lakona.
99Keaka’ puhaä’ kao anna la ingganna tuangguhungku,
aka kupasalui penaba kupasatutui pikkiham ingganna kada puha umpandam.
100Keaka’ puhaä’ kao anna la ingganna to dipotomatua,
aka kukedoam kuabiham ingganna pahentaMu.
101Kujagai pentekkaku indana tinanda lakoi lalam kakadakeam,
anna mala kukedoam kuabiham battakadamMu.
102Takutampeam takupemboko’i ingganna ätohamMu,
aka Iko ma’kale umpatuduä’.
103Matannim tadiande battakadamMu,
matannim puha ia anna la duho!
104PahentaMu umbeennä’ kakeakasam,
nasuhum kukabassi ingganna lalam sengko’.
Nun
105BattakadamMu umballoi lingkaku,
ummasiä’i pentekkaku.
106Puhamä’ ma’dandi anna la kuponnoi kuua:
la kuoli’ mamma’ kusalungku metindo ätoham maloloMu.
107O DEBATA, tä’ deem pada sanahimpi’ä’ sussa,
anda’iannä’ sungnga’ku, antiannä’ bätä penabangku situhu’ battakadamMu.
108O DEBATA, la untahima hi too inde pampujiangku lendu’ dio pudu’ku,
anna patuduä’ mentu’ ätohamMu.
109Si umbotoham liuä’ sungnga’ku,
sapo’ tä’ deem kukalembei ätohamMu.
110Napattiammä’ poja bendo’ samelum buaja to tameada’,
sapo’ takutampeam takupemboko’i mentu’ pahentaMu.
111Ingganna pahentaMu kupomana’ kupopahandangam sule lako salako-lakona,
aka ingganna ia too umpasule sumanga’ku umpaende’ pahajangku.
112Kupalulakom penabangku la untuhu’i ingganna kada puha umpandam,
upu’ salukatuboangku.
Samek
113Kukabassi to ma’lutama lu subum penabanna,
sapo’ kupohä’di’ ia paondomMu.
114Iko hindim batungku anna unta’ matoto’ku;
kuhannuam battakadamMu.
115Päläiko lao, o mentu’nako to tameada’;
la kukedoam kuabiham pahentaNa Puang Allataala to kupenombai.
116Samba’ä’ umpasukum situhu’ pa’dandiamMu, angku mala ha tubo,
anna daa umpakasihi’ä’ malea lindo illaam pahhannuangku.
117Samba’ä’ umpasukum anna malaä’ lappa’;
la kupaalai penaba ingganna kada puha umpandam.
118Untumpu pala’Ko to untampe umpemboko’i mentu’na kada puha umpandam,
aka labu’ di limbä tallam di pahupu kamatekoanna.
119Muangga’ humpäKo ingganna to tameada’ illaam inde lino,
iam too anna kupohä’di’um kao ingganna pahentaMu.
120Lumalla’ä’ mahea’ aka kukahea’Ko,
tinggi’gi’ä’ ungkahea’ pa’tahungkungamMu.
Ayin
121Kute’gehammi undu’ lollä anna kamaloloam;
daa umbehoä’ tama pala’ limanna to umpakamase-maseä’!
122Pa’dandiKo la tontä liu malino inde sabua’Mu,
daa umpabäi to malangka’ penaba napakamase-maseä’.
123Bullo’um matangku umpemmitai kalappasam buttu di Iko,
umpemmitai pa’dandiam maloloMu.
124Pogau’i lako inde sabua’Mu situhu’ pangkaha’ pa’kamaseMu takattu tintim tamondo’ sahuham,
anna patuduä’ ingganna kada puha umpandam.
125Kao inde sabua’Mu, papähänniä’
anna mala kuissam ingganna pahentaMu.
126O DEBATA, lambi’um wattunna la mengke’de’Ko,
aka sangngim ullullu’ pahe käppi’ paondomMu.
127Iam too anna kupohä’di’um ingganna pahentaMu,
kupohäe puha ia anna la bulabam, la’bi puha ia anna la bulabam täsä’.
128Iam too anna kuangga’ malolom ingganna pahentaMu;
anna kukabassi ia ingganna ulalam tatappa’.
Pe
129Ingganna ätohamMu mepilla’-pilla’ memängä-mängä,
iam too anna kukedoammi kuabiham.
130Maka’ dipemandalam dipemaleso battakadamMu, masissä’ meballoi,
umpasoa-soa talibobonna to saidi’ kapaissanganna.
131Mengängngää’ kaamma’-amma’,
aka kunaba-naba pahentaMu.
132Tingngajoiä’ anna kamaseiä’,
umba susi biasanna umpogau’ lako to umpake pangkaha’ pa’kamase dio oloMu.
133Pakatotosannä’ lingkaku situhu’ pa’dandiamMu,
daa umpabäi ingganna kakadakeam umpahe’ salukatuboangku.
134Lappasannä’ dio mai pandahhana ma’hupatau,
anna mala kukedoam kuabiham pahentaMu.
135Paähhäi lindo mamaseMu inde sabua’Mu,
anna patuduä’ ingganna kada puha umpandam.
136Ma’salu-salu uwai matangku,
aka tala ungkedoam muabiham paondomMu hupatau.
Tsadhe
137O DEBATA, ussoeangKo kamaloloam,
anna malolo ingganna ätohamMu.
138Ingganna pahentaMu to puha umpandam sangngim malolo,
anna dihannuam ponno.
139Suhhä’ buaku naputa’ aha’ku,
aka ingganna balingku umpa’lembei battakadamMu.
140Pa’dandiamMu tala dibata-batai,
iam too anna napohä’di’um inde sabua’Mu.
141Kao inde to bahinni’ anna to matuna,
sapo’ ingganna pahentaMu tä’ deem kukalembei.
142KamaloloamMu takattu tintim tamondo’ sahuham sule lako salako-lakona,
anna malolo paondomMu.
143Nahimpi’-himpi’ä’ kamasussaam anna kamasippisam,
sapo’ ingganna pahentaMu umpatiala inabangku umpasundede buaku.
144Ingganna kada puha umpandam malolo sule lako salako-lakona,
papähännia’ ingganna ia too angku mala ha tubo.
Qop
145O DEBATA, mengkaalaä’ matim oloMu sola ponno penaba; timba’i pengkaalaangku!
La kukedoam kuabiham mentu’na kada puha umpandam.
146Mengkaalaä’ matim oloMu; pesäkäiä’ ullappasam!
La kuoli’ mamma’ kusalungku metindo ingganna pahentaMu.
147Tibukka’na baja bangommä’ angku pengkaala umpelau pepamolo;
kusedam pahhannuangku lako battakadamMu.
148Puli bengi tadeem sisususam bulu matangku,
umpasalui penaba umpasatutui pikkiham pa’dandiamMu.
149O DEBATA, hingngianni pengkaalaangku situhu’ pangkaha’ pa’kamaseMu takattu tintim tamondo’ sahuham;
anda’iannä’ sungnga’ku antiannä’ bätä penabangku aka to si muundu’Ko lollä.
150Kamala naanti boko’mä’ napalola to umpeängannä’ tuntungam su’be’ nadakasam pa’posanga-sanga,
silele umpemboko’i paondomMu.
151Sapo’ mahukku’ siangKo DEBATA,
anna malolo ingganna pahentaMu.
152Mengkalao diopi mai anna kuissammi diona ingganna pahentaMu,
kuissam kuua puham umpandam la sule lako salako-lakona.
Res
153Petua’i kamasussaangku ammu langnga’iä’,
aka tä’ deem kupa’lembei paondomMu.
154Pengke’de’Ko pengkadaanni kaha-kahaku ammu lappasannä’;
anda’iannä’ sungnga’ku, antiannä’ bätä penabangku situhu’ pa’dandiamMu.
155Tä’ deem leleanna la nalangnga’i DEBATA to tameada’,
aka sangngim taumpamille taumpelalam kada puha umpandam.
156O DEBATA, taitondom taisipadai pa’häntängam buaMu,
anda’iannä’ sungnga’ku, antiannä’ bätä penabangku situhu’ ätohamMu.
157Buda to umpobaliä’ anna napadondo panggähhe,
sapo’ talempä kanam talempä kaihi lingkaku dio mai ingganna pahentaMu.
158Kukabassi kuita ingganna to soho’ boko’,
aka silele tä’ ungkedoam muabiham battakadamMu.
159O DEBATA, ita siai too keta kupohä’di’i ingganna pahentaMu,
anda’iannä’ sungnga’ku, antiannä’ bätä penabangku situhu’ pangkaha’ pa’kamaseMu takattu tintim tamondo’ sahuham.
160Kamaloloam, iam too pungngu’ tannunna battakadamMu,
anna ingganna kada puha umpandam malolo da’da’ sule lako salako-lakona.
Sin anna Shin
161Ingganna to dibulle ulunna napadondo panggähheä’ tä’ deem lalanna,
sapo’ anggam mesa-mesanna battakadamMu umpatinggi’gi’ä’ mahea’.
162Pa’dandiamMu umpasundede buaku,
umba susi to umpamuhu ebangam buda.
163Kukabassi anna kukahi’di’ ingganna tula’ tatappa’,
sapo’ kupohä’di’ ia paondomMu.
164Pempitu illaam sangngallo kupujiKo kupa’kasallei,
aka ingganna ätoham maloloMu.
165Sumpu kamalinoam anna kamasannangam natammu ingganna to umpohäe paondomMu,
tala titedo tala tiassam.
166O DEBATA, kuampai kuhannuam kalappasam buttu di Iko,
anna kupalako kukedoam ingganna pahentaMu.
167Mentu’ salukatuboangku ungkedoam muabiham ingganna pahentaMu,
anna tä’ deem pada sakupohä’di’.
168Kukedoam kuabiham ingganna pahentaMu anna paondomMu,
aka ullampa’-lampa’i mentu’na lingka salukatuboangku.
Taw
169O DEBATA, la kende’ di too matim oloMu pengkaalaangku;
beennä’ kapaissangam situhu’ battakadamMu.
170La kende’ di too dio oloMu pelauangku;
lappasannä’ situhu’ pa’dandiamMu.
171Sihatam sipäto’ tiku’mi’ pudu’ku umpakende’ pampujiam pa’pakasalle,
aka umpatuduä’ ingganna kada puha umpandam.
172Sihatam sipäto’ tika’bi’ lilaku umpenaniam pa’dandiamMu,
aka malolo ingganna pahentaMu.
173La tikando hi too limamMu umpamoloiä’,
aka kupileim pahentaMu kutuhu’i.
174O DEBATA, kupemulu kuinaba-naba kalappasam buttu di Iko,
anna kupohä’di’ paondomMu.
175Pabäipä’ tubo anna mala kupujiKo kupa’kasallei,
anna kupemala la napamoloiä’ ingganna kada puha umpandam.
176Sala’ lalannä’ sihhapam domba bulim, kandoi inde sabua’Mu,
aka tä’ kupa’lembei ingganna pahentaMu.
120Napaitängä-tängä to ma’pudu’ pandem ma’lila manähä
1Penaniam muende’ Yerusalem.120:1 Penaniam muende’ Yerusalem: Naua illaam basa Ibrani ke dipalutamai basa Indonesia: <<Nyanyian ziarah>>. Kalembasanna, inde pampujiam si napenaniam to Israel wattunna le’ba’ längäm banua Debata dio Yerusalem la umpakahoa’ mesa allo kasallena to Yahudi.
Illaam kamasippisangku mengkaalaä’ längäm DEBATA,
anna nahingngiam pengkaalaangku kuua:
2<<O DEBATA, tässu’iä’
dio mai to ma’pudu’ pandem,
ma’lila manähä.>>
3O to ma’lila manähä,
aka la napalambi’iangko Puang Allataala,
anna aka la napahuaiangko?
4Batu bälä’du’ matahu’bi’na pa’bahani,
pekähä’na hobaja palli.
5Tilakaä’ kusi’dim, aka tohhokia’ sola;
tä’ deem sipalempeanna tohhoä’ dio Mesekh, battu haka tohho illaam kemana to Kedar.
6Masäe punalamä’ tohho sola-sola
mentu’na to ungkabassi kasiolaam.
7Kao-kao muinaba-nabaä’ kasiolaam, sapo’ maka’ ma’tula’ä’ diona kasiolaam,
iya silele ia umpakende’ passibundusam.
121DEBATA to mekambi’ mejagai
1Penaniam muende’ Yerusalem.
Kupalilim pennenne’ku längäm mentu’na tanete,
umba la naongei buttu pepamoloku?
2Pepamoloku buttu di DEBATA,
to umpadadi langi’ sola lino.
3Tala napabäi Debata la titedo anna tiassam bitti’mu,
tala sisususam bulu matanna to ungkambi’ko unjagai.
4Mannassa, tala deem sisususam bulu matanna, anna tala deem mamma’
to ungkambi’ unjagai to Israel.
5Anggam DEBATA to ungkambi’ko unjagai,
anggam DEBATA to muonganniko121:5 muonganniko: Deem pehapangam naua: DEBATA dio tandai kananna to Israel muanda’i susi la’lam napalullunniam battu diua napaonganniam to Israel.
dio tandai kanammu.
6Tä’ko la nadä’dä’ allo mapana’ wattu masiä,
battu haka nakadakei bulam wattu bengi.121:6 bulam wattu bengi: Yolona, nakatappa’i tau naua, paindona bulam mala umpakende’ saki. Indo mapana’na allo ke masiä’i, susi siam indo mesakii ia bulam ke bengii.
7DEBATA la unjagaiko dio mai ingganna kasägängam;
Ia la ungkambi’ unjagai sungnga’mu.
8DEBATA la ungkambi’ unjagai längäm dokkomu,
mengkalao temo sule lako salako-lakona.
122Ullambeam kamalinoam sola kamasannangam Yerusalem
1Penaniam muende’ Yerusalem napapia Daud.
Kassiä’ tilalla’, tappana naambennä’ tau naua:
<<Maiko talängänna’ banua DEBATA!>>
2O kota Yerusalem, tentomai ke’de’ungkam
inde ba’ba suluhammu.
3O Yerusalem, to dipake’de’
mendadi kota sitoho-tohoi mentu’na banua dipake’de’ illaanna.
4Naende’ko simesa-mesa pehapuam kasalle,
pehapuam kasalle umma’Na DEBATA,
sule umpuji umpa’kasallei sanganNa DEBATA,
situhu’ ätohanNa lako to Israel.
5Etam too naongei okkosam pahhottosam,
okkosam pahhottosanna pessubunna tomahaja Daud.
6Lambeanni kamasannangam Yerusalem muua:
<<La malino masannam di too ingganna to umpohäeko.
7La nalambi’ di too kamalinoam sola kamasannangam issinna paluäna tembo’mu,
anna la malino masannam di too to nakala’ bettemmu!>>
8Kahana ingganna hapu indu’ku anna mentu’na satondä’ku,
lambisam la ma’kadaä’ kuua: <<La kende’ di too kamasannangam sola kamalinoam illaam paluämu!>>
9Kahana banua DEBATA, Puang Allataala to tapenombai,
la kupameä anna kupamille kamapiaam tama kalemu, o Yerusalem.
123Umpemmitai pa’kamase DEBATA
1Penaniam muende’ Yerusalem.
Kupasatutu pennenne’ku matim oloMu ma’sambajam,
lu matim oloMu DEBATA, To untadongkonni suhuga.
2Pennassai, umba susi matanna sabua’ muane
tatilio-lio umpemmitai pentandona puäna muane,
umba susi matanna sabua’ baine
tatilio-lio umpemmitai pentandona puäna baine,
susim too duka’ matangki tatilio-lio umpemmitai DEBATA, Puang Allataala to kipenombai,
sampe nahäntängangkam bua.
3O DEBATA, kamaseikam, kamaseikam,
aka nasanta’ polengkam pa’petuna;
4nasanta’ polengkam pantellena to ussanga-sanga kalena,
anna pa’petunanna to malangka’ penaba.
124Pesamba’ pepasukum buttu di DEBATA
1Penaniam muende’ Yerusalem napapia Daud.
Hapanna la taia DEBATA ussamba’kia’ umpasukum,
pengkadaannia’ to Israel muua,
2<<Hapanna la taia DEBATA ussamba’kia’ umpasukum,
wattunna mengke’de’ hupatau nabundu’kia’,
3iya la tappu’ungkia’ naamma’ kalebu,
wattunna hede-hede aha’na lako kita;
4iya la puhangkia’ nabuhhu’ mala’bu’,
anna ma’buntu-buntu salu ungkabu’kia’,
5lambisam nakabu’ungkia’ uwai,
uwai ma’buntu-buntu.>>
6Dipuji dipa’kasallei DEBATA aka tä’kia’ napahandam-handam bäbä,
nasibessui nasihenu’i balinta.
7Langnga’um sungnga’taa’
sihhapam dassi lappa’ dio mai poja pa’pemälängam;
ha’ba’-ha’ba’ poja,
anna langnga’kia’ kita!
8Pesamba’ pepasukum lako kita buttu di DEBATA,
to ungkumbä langi’ umballa’ lino.
125Malino masannam to nahande pala’ nakulambu tahuno DEBATA
1Penaniam muende’ Yerusalem.
Menna-menna matappa’ längäm DEBATA,
la sihhapam Tanete Sion tatilenggu’ tatibosso’,
tatibeho susu’ tatidende katonam sule lako salako-lakona.
2Umba susi mentu’na tanete ullilim pali’ Yerusalem,
susim too duka’ DEBATA uhhande pala’ ungkulambu tahuno umma’Na,
mengkalao temo sule lako salako-lakona.
3Anggam la salängäm allo muanda’i kakuasaam to tameada’
illaam botto litä’na to meada’ to namanasam DEBATA,
anna mala indo to meada’
tä’ sola pa’palakoam to tameada’.
4O DEBATA, beenni kamapiaam lako to mapia penaba,
anna to malolo penaba;
5sapo’ lu lako to sassa’ lalam,
la napempa’deam di too DEBATA sola ingganna to umpogau’ kakadakeam.
La untammu hi too kamalinoam sola kamasannangam to Israel!
126Uwai mata napessulle katilallasam
1Penaniam muende’ Yerusalem.
Wattunna napapoletottom DEBATA kota Sion,
iya anggasantaa’ to mangngimpi.
2Wattu eta too tibukkaa’ sädäta metaba tilalla’,
anna tika’bi’ lilata muahhe tilalla’.
Wattu eta too ma’kada hupatau illaam mai alla’-alla’na kahajaam senga’ naua:
<<DEBATA puha umpadadi pa’pogausam mepilla’-pilla’ lako inde hupatau!>>
3DEBATA puha umpadadi pa’pogausam mepilla’-pilla’ lako kita,
iam too anna ponnongkia’ katilallasam.
4O DEBATA, papoletottongkam,
umba susi keuwai sule salu matti’ dio lembäna Negeb!
5To sitonda uwai mata mangngambo’,
la umpuppu’ bua pengkähäna naponnoi katilallasam.
6To sitonda uwai mata lao mangngambo’,
tä’ mala tala ma’pasule naponnoi katilallasam,
napasindum umbaba bua pengkähäna tingkutu’-kutu’.
127Napasondoi DEBATA wattu mamma’
1Penaniam muende’ Yerusalem napapia Salomo.
Ianaanna taiai DEBATA umpake’de’ banua,
labu’ di limbä tallam di pahupu pengkähäna hupatau.
Ianaanna taiai DEBATA uhhonda kota,
labu’ di limbä tallam di pahupu pengkahojana pahhonda.
2Tä’ deem gunana la mengkajo-kajoko bangom,
anna ma’pasiala bengi mengkähä,
mengkapolo-polo mengkähä umpeä katamaam bahokomu,
aka to napohäe hi tia DEBATA napasondoi wattunna mamma’.
3Setonganna, inde pandadiam, mana’ ma’kalolosam buttu di DEBATA,
anna inde to dilessusam pa’tamba’Na DEBATA.
4Umba susi batu bälä’du’ naanda’i pa’bahani,127:4 batu bälä’du’ naanda’i pa’bahani: Indo batu bälä’du’ napake pa’bahani la unjagai kalena dio mai balinna, susim too duka’ änä’ to dadi wattunna magassimpi tomatuanna. Aka maka’ matuam tomatuanna anna kasallem ia indo änä’, iya malam ia unjagai tomatuanna.
susim too duka’ änä’ to dadi wattunna magassimpi tomatuanna.
5Maupa’ anna katambasam to umponnoi
pasallona batu bälä’du’!
Tala nahuham longko’ ke sitandoi tula’
balinna dio ba’ba suluham.
128Tamba’ illaam pandaposam
1Penaniam muende’ Yerusalem.
Maupa’ anna katambasam to mengkahea’ lako DEBATA,
to untuhu’i ulalam puha napandam.
2La muande masannangko bua pengkähämu,
la maupa’ko sola katambasam anna silambi’ kamasannangam!
3La ma’tällä matoosam ma’abo’ mahapuam sibalimmu illaam dapo’mu
sihhapam anggur mahombo;
la hua dadi mapia tubo änä’mu umpali’ dapo’mu
sihhapam tähe’ zaitun!
4La susim too pa’tamba’ natammu
lako muane to mengkahea’ lako DEBATA.
5La natamba’ dako too DEBATA yabo mai Tanete Sion,
anna la muita hako too kamasannanganna Yerusalem
upu’ salukatuboammu.
6La nalambi’pako too änä’mu, anna la muitapako ampomu!
La nalambi’ di too kamalinoam sola kamasannangam Israel!
129DEBATA uhha’ba’-ha’ba’ pampungona to tameada’
1Penaniam muende’ Yerusalem.
Pembudamä’ napasippi’ bali mengkalao di mangnguhangku
pengkadaannia’ to Israel muua,
2<<Pembudangkam napasippi’ bali mengkalao dio mai,
sapo’ sangngim tanapue’ tanapussu nataloikam.
3Silele napasikabäeangkam boko’ki,
anggasanna lalam tengko.
4Sapo’ aka DEBATA to malolo,
uhha’ba’-ha’ba’ pampungona to tameada’.>>
5La malea lindo hi too anna dipasosso’
ingganna to ungkabassi Sion.
6La sihhapam di too humpu’ tubo yabo papa,
mane mukku’ anna mabangim,
7tä’pi naala limanna to massäe’,
dapaka ia la napoli’ to umba’ba’-ba’basanni passäe’;
8anna ingganna to liu lalam tä’ deem la ma’kada naua:
<<Natamba’ko DEBATA!
Kipa’lambeangko sola sanganNa DEBATA!>>
130Mengkaala längäm DEBATA dio mai gahoä mandalam
1Penaniam muende’ Yerusalem.
O DEBATA, mengkaalaä’ matim oloMu, dio mai gahoä mandalam!
2O Debata, hingngianni pengkaalaangku!
Patanannii talinga pelauangku.
3O DEBATA, maka’ la umpaillaam penaba liu kasalaangki,
mennangka la nabela umpendudunni?
4Sapo’ Iko to ponno pa’panampum,
anna mala napengkahea’ingKo hupatau.
5Kupemmitai pepamoloNa DEBATA, penabangku tontä ma’pemmita,
anna kuhannuam battakadanNa.
6Penabangku tontä umpemmitai Debata,
untondompi pahhonda umpemmitai tibukka’na baja,
untondompi pahhonda umpemmitai tibukka’na baja.
7O to Israel, mahannuko längäm DEBATA!
Aka DEBATA siampuam pangkaha’ pa’kamase takattu tintim tamondo’ sahuham,
anna toka liu melangnga’i.
8Iam too la ullappasam to Israel
dio mai mentu’ kasalaanna.
131Mahannu längäm DEBATA
1Penaniam muende’ Yerusalem napapia Daud.
O DEBATA, tää’ malangka’ penaba,
anna tää’ muita-ita dokko padangku;
tää’ sipangngula’ penabangku
battu haka umpikki’ tala kulambi’na kupalako.
2Sapo’ kupahapa’ anna kupamattam penabangku;
umba susi änä’-änä’ dipalappa’ masannam naoli’ indona,
abana, susiä’ änä’-änä’ dipalappa’ masannammi penabangku.
3O inggannako to Israel, mahannuko längäm DEBATA,
mengkalao temo sule lako salako-lakona!
132Pa’dandianNa DEBATA lako Daud
1Penaniam muende’ Yerusalem.
O DEBATA, kilalai Daud yolona,
sola ingganna kamapi’disanna.
2Puham ma’dandi dio oloNa DEBATA,
anna ma’dandi lako To Tadisihanteam MatohoNa, Puang Allataala to napenombai Yakub naua:
3<<Kannassai, inna tä’ siaä’ la mentama banuangku,
anna metindo yabo petindoangku;
4kannassai, inna tä’ sia deem la tikalipi matangku
anna tä’ deem la sisususam bulu matangku,
5ke tä’pi dadi ongeam masehoNa DEBATA,
tadongkonganNa To Tadisihanteam matohoNa, Puang Allataala to napenombai Yakub.>>
6Mannassa puhanna’ tahingngi dio Efrata diona indo Patti Pa’dandiam,
talambi’a’ dio lembäna Yaar.132:6 Yaar: Sanga senga’na Kiryat Yearim, mesa kota tando sau’na kota Yerusalem kiha-kiha sapulo appa’ kilo mambelanna.
7Tauaa’ eta too: <<Maikoa’ talao lako ongeam tadongkonganNa DEBATA,
ma’udum guntu’ dio pehhondoam bitti’Na.132:7 pehhondoam bitti’Na: Mala kota Yerusalem diuaam, mala duka’ Banua DEBATA diuaam, anna mala toi duka’ Patti Pa’dandiam illaam Tambim Handam Maseho diuaam.
8O DEBATA pengke’de’Ko, ammu lako ongeam tadongkongamMu,
sola Patti Pa’dandiam tanda kamatohoamMu.
9Sihatam sipäto’ mentu’na sandoMu umpa’baju umpa’dodo kamaloloam,
anna ingganna to meada’ dio oloMu kassi tilalla’!>>
10Daud sabua’Mu la umpengngitai,
daa untumpu pala’ tomahaja pampileMu!
11Puham ma’dandi DEBATA lako Daud yolona,
tä’um deem la napakasule-sule, naua:
<<Mesa änä’ to buttu subum hoämu
la kupatadongkom yabo okkosam kahajaammu.
12Maka’ ingganna pessubummu muanti manda’ untobe matoto’ pa’dandiangKu,
anna mentu’na kada puha kupandam to kupatuduam,
iya la ma’tintingam pessubunna
untadongkonni okkosam kahajaammu sule lako salako-lakona.>>
13Aka puham umpilei Tanete Sion DEBATA;
napohäe la naongei ma’tadongkongam.
14Ma’kada naua: <<Iam too inde ongeam la kuongei ma’tadongkongam sule lako salako-lakona,
etam too inde la kuongei tohho aka kupohäe.
15La kupasondoi kapahalluanna sanda silapi’,
ingganna to mase-masena la kupabosa’i kinande.
16Ingganna sandona la kupapakei poheba kalappasam;
anna mentu’na to maimam lako kaleKu la naponnoi kakassiam anna katilallasam.
17Etam too la kupatadongkom mesa pessubunna Daud la muanda’i kakuasaam;
la kupomanontom kapahentaanna indo to kulanti’ umba susi ballo lekke’ liu.
18Ingganna balinna la kupahuhanni longko’,
sapo’ ia-ia la mekuhita’ salokokati yabo ulunna.>>
133To ma’hapu pallumu-lumu
1Penaniam muende’ Yerusalem napapia Daud.
Pennassai, tä’ deem pada samapia anna umpatiala inaba,
ke sitadongkonganni to ma’hapu pallumu-lumu!
2La sihhapam minnä’ masuli’ ditollo yabo ulu
lolä dokko danggu’,
lolä dokko danggu’na Harun
tihandu’ dokko opem jubana.
3Sihhapam langullo lolä yabo Tanete Hermon,
lolä dokko mentu’na Tanete Sion.
La etam too naongei DEBATA umpatuhum pa’tamba’Na,
katuboam sule lako salako-lakona.
134Mehumala’ wattu bengi
1Penaniam muende’ Yerusalem.
Maiko, pujii DEBATA,
o mentu’nako umma’Na,
to sule mehumala’ illaam banua DEBATA
mehumala’ wattu bengi.
2Äkä’i limammu längäm ongeam maseho umpasindum ma’sambajam,
anna pujiko DEBATA!
3Handandanni DEBATA to umpadadi langi’ sola lino,
la untamba’ko yabo mai Sion.
135Anggam DEBATA sihatam sipäto’ dipuji
1Haleluya!
Pujii sanganNa DEBATA,
pujii, o inggannako sabua’Na DEBATA,
2o mentu’nako to sule mehumala’ illaam banua DEBATA,
illaam pa’hanteanna banuanNa Puang Allataala to tapenombai!
3Pujii DEBATA, aka Ia to mapia penaba,
Penaniko pujii sanganNa, aka sanganNa umpatiala inaba.
4Aka puham umpilei Yakub napasähä’,
Israel mendadi ampuanNa ma’kalolosam.
5Mannassa kuissam kuua, DEBATA tadisihanteam kakasalleanNa,
anna DEBATA to tapenombai untondom ingganna debata lino.
6DEBATA ma’palako situhu’ pa’elo’Na,
susi yabo langi’ teem illaam lino,
susi dio le’bo’ teem dokko le’bo’ mandalam.
7Umpakende’ gabum dio mai lili’na lino,
umpasilalle kila’ sitonda uham.
Umpassubum hibu’ illaam mai pa’palumpunganNa.
8Ia undappo’i mentu’na änä’ ulua dio Mesir,
susi hupatau teem olo’-olo’,
9anna umpadadi buda tanda anna tanda memängä-mängä
illaam alla’-alla’na to Mesir,
umpakapi’di’ Firaun sola ingganna to mengkähäna.
10Ia umpempa’deam buda kahajaam,
anna undappo’i ingganna tomahaja bahani matitta, susinna:
11Sihon tomahajanna to Amori,
Og tomahajanna lembäna Basan,
anna ingganna tomahaja senga’ dio Kanaan.
12Anna botto litä’na naala napa’manasam,
mendadi mana’ ma’tintingam lako to Israel umma’Na.
13O DEBATA, sangamMu la da’da’ liu sule lako salako-lakona;
o DEBATA, la dikilalai liuKo ma’tintingam sule lako peampoangki.
14Aka DEBATA muundusam lollä hupataunNa,
anna uhhäntängam bua mentu’ umma’Na.
15Debatanna kahajaam senga’, bulabam sola peha’ dipapia,
pa’papia limanna hupatau.
16Siampuam pudu’, sapo’ tä’ mala ma’kada,
siampuam mata, sapo’ tä’ paita,
17siampuam talinga, sapo’ tä’ pahingngi,
taladeem penaba messubum illaam mai pudu’na.
18Ingganna to manggahaga tä’ deem sipalempeanna indo debata panggahaganna,
anna susi siam duka’ ingganna to ungkatappa’i.
19O mentu’nako to Israel, pujiko DEBATA!
O mentu’nako pessubunna sando Harun, pujiko DEBATA!
20O mentu’nako pessubunna Lewi, pujiko DEBATA!
O inggannako to mengkahea’ lako DEBATA, pujiko DEBATA!
21Pampujiam pa’pakasalle buttu yabo mai Sion lu lako DEBATA,
DEBATA to untadongkonni Yerusalem!
Haleluya!
136Pangkaha’ pa’kamaseNa Puang Allataala
1Pa’kuhhu’ sumanga’ko längäm DEBATA, aka Ia to mapia penaba;
mannassa maleso pangkaha’ pa’kamaseNa takattu tintim tamondo’ sahuham sule lako salako-lakona.
2Pa’kuhhu’ sumanga’ko längäm Puang Allataala to ungkuasai ingganna debata lino;
mannassa maleso pangkaha’ pa’kamaseNa takattu tintim tamondo’ sahuham sule lako salako-lakona.
3Pa’kuhhu’ sumanga’ko längäm DEBATA puäna ingganna to dipopuä;
mannassa maleso pangkaha’ pa’kamaseNa takattu tintim tamondo’ sahuham sule lako salako-lakona.
4Anggam Ia tangkaduangam umpadadi tanda memängä-mängä kasalle;
mannassa maleso pangkaha’ pa’kamaseNa takattu tintim tamondo’ sahuham sule lako salako-lakona.
5Ia umpadadi langi’ sitonda kapaissanganNa;
mannassa maleso pangkaha’ pa’kamaseNa takattu tintim tamondo’ sahuham sule lako salako-lakona.
6Ia umballa’ lino yabona uwai;
mannassa maleso pangkaha’ pa’kamaseNa takattu tintim tamondo’ sahuham sule lako salako-lakona.
7Ia umpadadi ingganna to ma’pomasiä’ kasalle yabo langi’;
mannassa maleso pangkaha’ pa’kamaseNa takattu tintim tamondo’ sahuham sule lako salako-lakona.
8Mata allo ma’pomasiä’ wattu iallo;
mannassa maleso pangkaha’ pa’kamaseNa takattu tintim tamondo’ sahuham sule lako salako-lakona.
9Bulam sola bintä ma’pomasiä’ wattu bengi;
mannassa maleso pangkaha’ pa’kamaseNa takattu tintim tamondo’ sahuham sule lako salako-lakona.
10Ia undappo’i ingganna änä’ ulua dio Mesir;
mannassa maleso pangkaha’ pa’kamaseNa takattu tintim tamondo’ sahuham sule lako salako-lakona.
11Anna umpatette to Israel messubum illaam mai lembäna Mesir;
mannassa maleso pangkaha’ pa’kamaseNa takattu tintim tamondo’ sahuham sule lako salako-lakona.
12Sola katea’ bassinNa anna lima kamatohoanNa;
mannassa maleso pangkaha’ pa’kamaseNa takattu tintim tamondo’ sahuham sule lako salako-lakona.
13Ia umpasisähä’ le’bo’ Teberau;
mannassa maleso pangkaha’ pa’kamaseNa takattu tintim tamondo’ sahuham sule lako salako-lakona.
14Anna napa’paolai to Israel lambam;
mannassa maleso pangkaha’ pa’kamaseNa takattu tintim tamondo’ sahuham sule lako salako-lakona.
15Sapo’ untallangam ia Firaun sola tentahana illaam Le’bo’ Teberau;
mannassa maleso pangkaha’ pa’kamaseNa takattu tintim tamondo’ sahuham sule lako salako-lakona.
16Ia umpatette umma’Na muola pädä kukku’;
mannassa maleso pangkaha’ pa’kamaseNa takattu tintim tamondo’ sahuham sule lako salako-lakona.
17Ia untaloi ingganna tomahaja bahani matoho;
mannassa maleso pangkaha’ pa’kamaseNa takattu tintim tamondo’ sahuham sule lako salako-lakona.
18Ia umpakattu sungnga’ ingganna tomahaja molele-lele;
mannassa maleso pangkaha’ pa’kamaseNa takattu tintim tamondo’ sahuham sule lako salako-lakona.
19Sihon tomahajanna to Amori;
mannassa maleso pangkaha’ pa’kamaseNa takattu tintim tamondo’ sahuham sule lako salako-lakona.
20Anna Og, tomahajanna lembäna Basan;
mannassa maleso pangkaha’ pa’kamaseNa takattu tintim tamondo’ sahuham sule lako salako-lakona.
21Mane napebeenni botto litä’na mendadi mana’ ma’tintingam;
mannassa maleso pangkaha’ pa’kamaseNa takattu tintim tamondo’ sahuham sule lako salako-lakona.
22Napomana’ ma’tintingam pessubunna Israel, sabua’Na;
mannassa maleso pangkaha’ pa’kamaseNa takattu tintim tamondo’ sahuham sule lako salako-lakona.
23Tanakalembeikia’ wattunta illaam kamasippisam;
mannassa maleso pangkaha’ pa’kamaseNa takattu tintim tamondo’ sahuham sule lako salako-lakona.
24Anna nalangnga’ikia’ dio mai pala’ limanna ingganna balinta;
mannassa maleso pangkaha’ pa’kamaseNa takattu tintim tamondo’ sahuham sule lako salako-lakona.
25Ia umbeem kinande lako ingganna menabanna;
mannassa maleso pangkaha’ pa’kamaseNa takattu tintim tamondo’ sahuham sule lako salako-lakona.
26Pa’kuhhu’ sumanga’ko längäm Puang Allataala to ungkuasai langi’;
mannassa maleso pangkaha’ pa’kamaseNa takattu tintim tamondo’ sahuham sule lako salako-lakona.
137Sahho dio bihim salu Babel
1Dio bihinna ingganna salu dio Babel, etam too taongeia’ sikaoko’ tapasindum sumahho,
wattunna ungkilalaikia’ Sion.
2Lako mentu’na kaju tumalumbum dio ongeam ia too,
taongeia’ ussedam katapinta.
3Etam too naongei mentu’na to untähängkia’
nasuakia’ la tapenaniam, anna ingganna to undahhakia’
nasuakia’ la tapenaniam penaniam katilallasam naua:
<<Penaniangkam mesa penaniam dio mai Sion!>>
4La maakam ia susi la umpenaniangkia’ penaniam längäm DEBATA
dio botto senga’?
5O Yerusalem, maka’ la kukalembeiko,
la mato’do’ di too lima kanangku!
6La tippodo’ di too lilaku
ke la kukalembeiko,
anna tä’ko kupadadi
too’na kakassiam katilallasangku!
7O DEBATA, kilalai pa’gau’na to Edom
wattunna dihuppu’-huppu’ kota Yerusalem. Ma’kada naua: <<Patitalebangke’i, patitalebangke’i sihante litä’!>>
8O issinna Babel, to la dipempa’deam,
maupa’ anna katambasam to umpabala’i
ingganna pa’pogausam kadakemu lako kami’.
9Maupa’ anna katambasam to undokko’ anna umpehhabisam
änä’-änä’ maleammu lako batu!
138Penaniam pa’kuhhusam sumanga’
1Napapia Daud.
O DEBATA, la ma’kuhhu’ sumanga’ä’ matim oloMu, sola ponno penaba,
la umpenaniannä’ pampujiam matim, dio olona ingganna debata lino.
2La menombaä’ mentingngajo lako banua masehoMu
kupasindum kupuji kupa’kasallei sangamMu,
aka pangkaha’ pa’kamaseMu takattu tintim tamondo’ sahuham anna kamanontongamMu;
aka umpatitandeKo sangamMu anna pa’dandiamMu untondom ingganna-ingganna sia.
3Wattunna mengkaalaä’ matim, iya untimba’iä’,
umpakatotosannä’ penabangku sola kamatohoam.
4O DEBATA, la ma’kuhhu’ sumanga’ matim oloMu ingganna tomahaja illaam lino,
aka sikanahingngim pa’dandiam lendu’ dio pudu’Mu.
5La silele umpenaniam diona ulalanNa DEBATA,
aka tä’ deem pada sakasalle kamatandeanNa DEBATA.
6Moinna anna to handam matande DEBATA, sapo’ muita to handam madio,
anna muissam to malangka’ penaba yabo mai ongeam mambela.
7Moi anna illaannä’ kamasippisam,
Iko ungkambi’ sungnga’ku;
katea’ bassimMu usseham ke’de’ aha’na balingku,
anna katea’ tabimMu ullangnga’iä’.
8DEBATA la umpasipoleam sahaku!
O DEBATA, pangkaha’ pa’kamaseMu takattu tintim tamondo’ sahuham sule lako salako-lakona;
daa ungkalembei umma’ pa’padadimMu!
139Puang Allataala muissam längäm dokkona hupatau
1Lu lako to untetem to menani. Pampujiam napapia Daud.
O DEBATA, Iko ungkalesso’ sule tama unä’ penabangku anna muissam sule tama batu ateku;
2Iko muissam längäm dokkoku,
Iko ullosa lalam pikkihangku yabo mai ongeam mambela.
3Iko ungkaleso längäm dokkoku,
mentu’na lingka salukatuboangku inna puha muissammi.
4Aka tä’pi deem lemba’ dio pudu’ku sabatta kada,
anna puha muissam asammi DEBATA.
5Iko uhhindim pala’ä’ ungkulambu tahuno,
Iko ussalokko’ä’.
6Tä’ deem pada sakukamängä-mängäi kapaissangamMu,
sumpu malangka’na, tanalambi’ suhi’ku tanalambam pikkihangku.
7La lu umbamä’ ngei ungkambela Penaba MasehoMu?
La lu umbamä’ ngei umpessalaam lindoMu?
8Maka’ la längännä’ langi’, iya yaboKo;
maka’ la umbehesannä’ kaleku dio ongeanna to mate, iya dioKo.
9Maka’ la mentia’ä’ dekke mata allo,
battu haka tohhoä’ illau’ katampusam,
10katea’ bassimmu la umpatetteä’,
anna lima kanamMu la umpasukunnä’.
11Maka’ la ma’kadaä’ kuua: <<La naputu’ä’ kamalillingam,
anna masiä’ lako ampe’ku mengkubalim mendadi bengi mapättä,>>
12iya kamalillingam ia too anggasanna Iko pa’de dio oloMu,
anna bengi mapättä ia too anggasanna Iko allo masiä’ muita,
aka tontä bäbäm Iko malillim anna masiä’.
13Iko ungkombää’,
Iko umpapantam dadingku illaam tambu’na indoku.
14Ma’kuhhu’ sumanga’ä’ matim oloMu aka mepilla’-pilla’ anna memängä-mängä tampaku;
memängä-mängä pa’padadimMu,
anna kukannassai sule tama unä’ penabangku.
15Ullampa’-lampa’i bukungku,
wattunna dipadadiä’ illaam ongeam tibuni,
dikombää’ illaam tambu’na indoku;
16ussangkamata-matai wattunna mane kombää’ illaam tambu’,
anna tituli’ asammi illaam suha’Mu
allo katuboangku to puha umpa’tantu lako kaleku,
yolona anna la dadii ingganna allo ia too.
17O Puang Allataala, takulambam ulu salunna takutekka ba’ba minanganna pikkihamMu;
tadikemba’ dihekem tadipuha dihetinganni!
18Maka’ la kuhekem, la buda puha ia anna bungim.
Maka’ hapanna la kuhekem, iya iam tia isanga la tuboki’ situngguam.
19O Puang Allataala, la umpakattu sungnga’ di too to tameada’,
pasikambelaä’ ingganna to umpatitollo haha,
20to ma’tula’ kadake diona kaleMu,
anna ma’dandi-dandi bäbä umpake sangamMu.
21O DEBATA, ussanga haka too tä’ kukahidi’ indo to ungkabassiKo,
ussanga haka too tä’ kukasuma indo to mengke’de’ umbali-baliKo?
22Tä’ deem pada sakukahidi’,
kuangga’ bali tutuangku.
23O Puang Allataala, pengkalesoiä’, anna pahessai issi penabangku,
pellantunniä’ anna pahessai lalam pikkihangku;
24pennassai, deem manii be’bä lingkaku,
anna umpatetteä’ muundu’ ulalam puha umpandam mengkalao dio mai sule lako salako-lakona!
140Sambajam umpelau pa’kambi’ DEBATA
1Lu lako to untetem to menani. Pampujiam napapia Daud.
2O DEBATA, langnga’iä’ dio mai to tameada’,
pa’tippasannä’ pa’pehasiam dio mai to palampi,
3sangngim angga pattuju kadake illaam penabanna,
anna allo-allo umpakende’ passibundusam!
4Lengko lilana pataham susi ula’ pabalu,
pessubungam pudu’na pabalu susi petombo’na ula’ dadoppä. Sela
5O DEBATA, jagaiä’ dio mai pandakka’na to tameada’,
pa’tippasannä’ pa’pehasiam dio mai to palampi,
to umpeäi lalanna la nahonnosannä’.
6Napattiammä’ poja bendo’ samelum buaja,
anna natanangammä’ kahihi’ pa’pemälängam,
napaponnoi pesämbe’ lako lalam la kuolanna, anna malaä’ tappa lumbum. Sela
7Ma’kadaä’ längäm DEBATA kuua: <<Iko Puang Allataala to kupenombai,
O DEBATA, hingngianni pelauangku!>>
8O PUANG ALLATAALA, Debata to kupenombai, to melangnga’i matoto’ku,
umpasaludunni ulungku wattunna kende’ passibundusam.
9O DEBATA, daa umpasulei lako lolona pa’pemulunna to tameada’,
daa umpatihumbui lako kati-katinna pattuju kadakena, indana yabo langkanni! Sela
10Ingganna to untalimbum tamaä’ umpaläjä tandu’na umpalongkom palasanna;
la nakumbali’ di too kada pantädona tula’ pampanata’inna!
11La napatolloi hi too DEBATA hobaja palli!
La natalumbungam di too tama api ma’nala-nala,
la nasu’be’ di too dokko gahoä mandalam, lambisam tala malam tibangom sule!
12To ma’pakolo’-kolo’i la tasiita kapia-piaam illaam lino;
to palampi la nalambi’ pi’di’ naepe’ tanggana-gana.
13Kuissam kuua, DEBATA la muundusam kamaloloam to dipi’di’ dipakamase-mase,
anna umpekkalundangam to kaasi-asi.
14Mannassa maleso la napuji napa’kasallei sangamMu to meada’;
anna ingganna to malolo penaba la tohho dio oloMu.
141Sambajam umpelau kalappasam
1Pampujiam napapia Daud.
O DEBATA, mengkaalaä’ matim oloMu, simpannii mai ullombaä’,
patanannii talinga sa’hangku, wattunna mengkaalaä’ matim oloMu!
2La kende’ di too dio oloMu sambajangku sihhapam tunuam bubanau’,
anna tiäkä’ limangku ma’sambajam sihhapam bua pemala’ wattu kahubem.
3O DEBATA, kambisannä’ pudu’ku,
jagaiannä’ bibingku!
4Daa umpabäiä’ umpikki’ kakadakeam,
la untuhu’i gau’na to tameada’,
mesa pa’palakoam ingganna to umpogau’ kakadakeam;
anna daa umpabäiä’ kupaolai pudu’ku kinandena.
5Maka’ nasämbä’iä’ anna natappakadai to meada’, ia too pa’kamasena tama kaleku;
sihhapam minnä’-minnä’ bubanau’ kupelänge’!
La tä’ di too kutumpu pala’, la tamondaä’ takattu ma’sambajam untumpu pala’ to kadake gau’.
6Ianaanna dipa’tumbusanni to mahhotto’na dokko kumila’ batu,
iya la naka’da’um too nakaleso to tameada’ naua: <<Ingganna pessubungam pudu’na umpatiala inaba.>>
7Umba susi batu dipiä’-piä’ anna dihuppu’-huppu’ dokko litä’,
la susim too duka’ bukunna la titale bangke’ dio ku’bu’.
8Sapo’ tatilio-lio matangku matim oloMu, o PUANG ALLATAALA, Debata to kupenombai;
Iko kupentionganni, daa umpabäiä’ dipakattu sungnga’!
9Kambi’ä’ dio mai pa’pemälängam dihondonganni lako kaleku,
dio mai poja bendo’na samelum buajanna to tameada’.
10La naala hi too uläna nasakka pojana to tameada’,
sapo’ kao-kao kuola tahhu’ tatitedo tatiassam.
142Pengkaalaanna to dipadondo panggähhe
1Penaniam pepatuduam napapia Daud, wattunna illaam leä. Mesa sambajam.
2Kupekasallei mengkaala längäm DEBATA,
kusa’batohoi melau längäm DEBATA.
3Kupasoa pengkaloa’ku dio oloNa;
kuhetinganni sussaku dio tingngajoNa.
4Wattunna hosso penabangku,
Iko puha muissam lingka salukatuboangku.
Napattiam buniä’ poja bendo’ samelum buaja ingganna to umpobaliä’,
lako lalam la kuolanna.
5Petua’ siai too lako sa’deku,
tä’ punala deem moi podo la mesa tau umposameleä’;
tala deemmi kuola la ullangnga’i kaleku,
tala deem tau la umpesäkäiä’.
6O DEBATA, mengkaalaä’ matim oloMu, kuua:
<<Iko ongeam pentuhehungangku,
Iko ampuangku illaam inde lino!>>
7Hingngianni pengkaalaangku,
aka tadeemmi gappaku takubelam ma’geu’.
Lappasannä’ dio mai to umpadondo panggähheä’,
aka kukatuka’i punala kutingngajo.
8Lappasannä’ illaam mai inde sippi’ tanggana-gana kuoloi,
anna mala kupuji kupa’kasallei sangamMu.
La nalilim pali’ä’ to meada’,
aka mapia penabaKo lako kaleku.
143Sambajam umpelau pallangnga’i
1Pampujiam napapia Daud.
O DEBATA, hingngianni sambajangku,
patanannii talinga pelauangku!
Timba’iä’ aka kamanontongamMu,
aka to muundu’Ko lollä!
2Daa uhhessai inde sabua’Mu,
aka tä’ deem moi podo la mesa hupatau la tubo malolo dio oloMu.
3Napadondo panggähheä’ balingku,
anna napopa’bukkuä’ dokko litä’,
napalulakoä’ ongeam malillim anna mapättä
bandam-bandannä’ anggasanna to mate.
4Kattum pahhannuangku,
masussa si’da-si’da penabangku.
5Kukilalai allo puha lessu’,
kupasalui penaba ingganna pa’palakoamMu,
kupikki’ kupenabaam pa’padadimMu.
6Umballa’ä’ pala’ku ma’sambajam matim oloMu;
mamalli’ä’ dio tingngajoMu, sihhapam litä’ mabangi umpahalluam uwai. Sela
7Simpannii untimba’iä’ DEBATA,
aka kattu hannumä’!
Daa umpemboko’iä’,
indana anggasangkui to mate.
8Pa’patandaanni lako kaleku mesa mebengngi’ pangkaha’ pa’kamaseMu takattu tintim tamondo’ sahuham,
aka anggam Iko kukatappa’i!
Paitaiä’ lalam sipäto’na la kuola,
aka Iko kupa’patinandai issi penabangku.
9O DEBATA, langnga’iä’ dio mai mentu’na balingku,
Iko to muonganniä’!
10Patuduä’ umpalako pa’elo’Mu,
aka Iko Puang Allataala to kupenombai!
La napatette hä’ too Penaba MasehoMu to masokam,
lako lalam mahampa’!
11O DEBATA, anda’iannä’ sungnga’ku antiannä’ bätä penabangku, anna mala lele mapia liu sangamMu,
langnga’i sungnga’ku dio mai kamasippisam, aka Iko to muundu’ lollä.
12Pempa’deanni ingganna balingku aka takattu tintim tamondo’ sahuham pangkaha’ pa’kamaseMu tama kaleku.
Pemposisanni ingganna to umpi’di’ penabaä’,
aka kao inde sabua’Mu!
144Penaniam pa’kuhhu’ sumanga’na tomahaja
1Pampujiam napapia Daud.
Dipuji dipa’kasallei DEBATA buntu batungku!
To umpakabiasa limangku ma’bundu’,
umpa’guhu hengke’-hengke’ku muäkä’ mataham;
2to umpa’paitaam pangkaha’ pa’kamaseNa lako kaleku anna bettem matoto’ku,
lempo kuongei mentuhehum anna to melangnga’ingku,
unta’ matoto’ku ongeam pentuhehungangku,
to umpopa’bukku mentu’na kahajaam senga’ dio oloku!
3O DEBATA, aka ia inde hupatau anna umpaillaam penabai?
Menna hia inde ma’hupatau anna umposamelei?
4Inde hupatau hibu’-hibu’ nababa,
allo katuboanna anggam tikalibajo.
5O DEBATA, silläi langi’Mu ammu tuhum,
haka’i tanete anna mala pelamboho!
6Pasilallei kila’ anna patiseham ke’de’i to umpobaliä’,
pa’tembasanni batu bälä’du’Mu, anna mala silele tisembu’ dalle batte!
7Pengkandoanni limamMu yabo mai ongeam kamatandeamMu,
langnga’iä’ anna angkahannä’
dio mai uwai bussu la mepusa’i,
dio mai pala’ limanna to sulibam botto,
8si umbungkeko’ lilana,
anna ma’dandi-dandi bäbä.
9O Puang Allataala, la umpenaniannä’ penaniam bakahu dio oloMu,
la kuponi gambus sapulo hitinna kupasindum muajangam pampujiam dio tingngajoMu.
10Iko umbeem kapataloam ingganna tomahaja Israel,
anna ullangnga’iKo Daud sabua’Mu!
11Langnga’iä’ dio mai pantepana pa’dam;
lappasannä’ dio mai pala’ limanna to sulibam botto,
si umbungkeko’ lilana,
anna ma’dandi-dandi bäbä.
12La sihhapam di too tanangam mentu’na änä’ta muane,
lobo’ mendadi kasalle di mangnguhanna;
anna mentu’na änä’ta baine la sihhapam andihi disuha’,
untohodasii sikunna banua tadongkonganna tomahaja!
13La si ponno-ponno hi too lokota
ma’hupa-hupa alaam kinande;
la massa’bu-sa’bu hi too dombata,
mampulo sa’bu umponnoi pa’kambisanta!
14La membea’ lampa’ di too sapinta;
tala deem tassala battu haka mäläi bättäna.
La tä’ di too deem dihingngi pengkaloa’ illaam botto.
15Maupa’ anna katambasam lako kahajaam to susi katuboanna!
Maupa’ anna katambasam lako kahajaam to umpenombai Puang Allataala to disa’bu’ DEBATA!
145Tadisipadai pangkaha’ pa’kamaseNa DEBATA
1Penaniam pampujiam napapia Daud.
O Puang Allataala to kupenombai, o Tomahajangku, la kupomatandeKo,
anna la kupuji kupa’kasallei sangamMu mengkalao temo sule lako salako-lakona.
2Allo sibala’ allo la kupujiKo kupa’kasallei,
anna kupomatande sangamMu mengkalao temo sule lako salako-lakona.
3Tadisihanteam kamatandeanNa DEBATA anna lantum dipuji dipa’kasallei,
tadilambi’ dipikki’ tadiissam ditula’ kamatandeanNa.
4Ingganna lapi’na hupatau la umpatitande ingganna pengkähäMu
anna umpa’patandaam kuasa kamatohoamMu.
5La silele napa’pakahebaam kamatandeamMu anna kamasokangamMu,
anna la kupasalui penaba ingganna pa’palakoamMu to mepilla’-pilla’.
6La silele napa’pakahebaam ingganna pa’pogausamMu tadisihanteam,
anna kao-kao la kupa’paissangam kamatandeamMu.
7La nauleleam hupatau maaka susi kasallena kamapiaam penabamMu,
anna la sikaahhe tilalla’ untilalla’i ulalam maloloMu.
8Indo DEBATA to mamase anna pa’häntängam bua,
ponno sa’baha’ anna tadisipadai pangkaha’ pa’kamaseNa takattu tintim tamondo’ sahuham.
9Indo DEBATA mapia penaba lako ingganna hupatau,
anna pa’häntängam bua lako ingganna pa’padadinNa.
10Ingganna pa’padadimMu DEBATA, la ma’kuhhu’ sumanga’ dio oloMu,
anna ingganna to manuhu’ lako kaleMu la napujiKo napa’kasallei.
11La napa’paissangam kamatandeanna kahajaamMu,
anna la napengkadaam kakuasaamMu,
12anna mala naissam ma’hupatau pa’pogausamMu tadisipadai,
anna kamatandeanna kahajaamMu to mepilla’-pilla’.
13KahajaamMu, kahajaam mengkalao dio mai sule lako salako-lakona,
anna kapahentaamMu ma’tintingam lako ingganna lapi’ pessubum.
DEBATA manontom umpasule lako battakadanNa,
anna ponno pangkaha’ pa’kamase illaam ingganna pa’palakoanNa.
14DEBATA ussamba’ ingganna to nahimpi’-himpi’ sussa,
anna umpasukum mentu’na to naepe’ tanggana-gana.
15Ponno pahhannuam hupatau napemmitaiKo,
anna umpasondoi kinande ke lambi’um wattunna;
16umbukkaam pala’ pa’kamaseMu,
anna umpaponnoiam kapahalluanna ingganna menabanna.
17DEBATA unte’geham kamaloloam illaam mentu’ ulalanNa,
anna ponno pangkaha’ pa’kamase illaam ingganna pa’palakoanNa.
18DEBATA untingngajo ingganna to mengkaala dio oloNa,
ingganna to mengkaala dio oloNa sitonda kamaloloam penaba.
19Ia umpasule lakoam pa’pemulunna ingganna to mengkahea’ dio oloNa,
nahingngiam pengkaalaanna anna nalangnga’i.
20DEBATA uhhindim pala’ ungkulambu tahuno ingganna to umpake pangkaha’ pa’kamase lako kaleNa,
sapo’ ingganna to tameada’ la napempa’deam ia.
21Lendu’ dio pudu’ku pampujiam pa’pakasalle lako DEBATA;
sihatam sipäto’ ingganna menabanna la napuji napa’kasallei sanga masehoNa
mengkalao temo sule lako salako-lakona.
146Anggam mesa-mesanna DEBATA to mepamoloi
1Haleluya!
O penabangku, pujiko DEBATA!
2La umpujiä’ umpa’kasallei DEBATA upu’ salukatuboangku,
anna menggamahaä’ längäm Puang Allataala to kupenombai baju angku tubopa.
3Daa ussussahe lako to kuasa di lino,
lako ma’hupatau to tadeem kuasanna la melangnga’i.
4Maka’ kattum sungnga’na, tinandam di assala’na;
wattu eta siam too duka’ anna pada pa’dei mentu’ pattuju penabanna.
5Maupa’ anna katambasam to umpelau pepamolo lako Puang Allataala to napenombai Yakub,
to mahannu lako DEBATA, Puang Allataala to napenombai.
6Ia umpadadi langi’ sola lino,
le’bo’ sola ingganna issinna;
tontä manontom sule lako salako-lakona,
7Ia muundusam kamaloloam to dipi’di’ dipakamase-mase,
Ia umbeem kinande to tadea’.
DEBATA toi ullappasam ingganna to ditahungkum,
8umpopaita to buta,
umpasukum mentu’na to naepe’ tanggana-gana,
anna umpohäe to meada’.
9Uhhindim pala’ ungkulambu tahuno to messihuhu,
ussamba’ umpasukum änä’ bium anna to balu baine,
sapo’ umpasala’ lalam to tameada’.
10Indo DEBATA, Tomahaja ma’pahenta sule lako salako-lakona.
O issinna Sion,146:10 issinna Sion: Mala duka’ kalembasanna issinna Yerusalem battu haka to untadongkonni Israel. Puang Allataala to umpenombai, ma’pahenta sule lako ingganna lapi’ pessubum.
Haleluya!
147Tadisihanteam kuasa kamatohoanNa DEBATA
1Haleluya!
Tä’ deem pada samapia umpakende’ pampujiam pa’pakasalle längäm Puang Allataala to tapenombai,
sumpu tialanna inaba, anna sipäto’ dipakende’ pampujiam dio oloNa.
2DEBATA ungkahoiam sule timbunna umbajaiam sule pa’tondäsanna kota Yerusalem,
umpasule tama tondä’na umpatinanda tama pa’bottoanna to Israel to tisembu’ dalle batte;
3umpamolei sussana to mapi’di’ penaba,
anna nasapu’iam mentu’ basana;
4Ia umpa’tantu bilanganna bintä yabo langi’,
anna pantam nasangai.
5Tadisipadai kamatandeanNa Debatanta anna tadisihanteam kuasa kamatohoanNa,
tadilantum kamanähänganNa.
6Ussamba’ umpasukum to dipi’di’ dipakamase-mase,
sapo’ umpembussusam dokko litä’ to tameada’.
7Penanianni längäm DEBATA penaniam pa’kuhhusam sumanga’,
penggamahaanni längäm Puang Allataala to tapenombai penaniam dikatapii!
8Ia umpatihembom gabum umponnoi langi’,
Ia umpatuhum uham ullessä’i lino,
umpatubo humpu’ lako ingganna tanete.
9Ia umpadeengam kinande olo’-olo’,
umpatokaam kinande mentu’na soma kadoaja sikakää’.
10Taia daham gagaham napohäe DEBATA,
taia bitti’ muane matitta napahalluam.
11Napohäe DEBATA to mengkahea’ dio oloNa,
to mahannu lako pangkaha’ pa’kamaseNa takattu tintim tamondo’ sahuham.
12Pomatandeko DEBATA, o kota Yerusalem,
Pujiko Puang Allataala to umpenombai, o issinna Sion!
13Aka Ia umpomatoto’ pesulu’na ba’bamu,
anna untamba’ hupatau to untadongkonniko.
14Ia umpakende’ kamalinoam sola kamasannangam illaam paluämu,
anna napabosa’iko gandum sumpu maläpu’na.
15Ia umpalao pahentaNa tama lino;
battakadanNa masimpam landa’ tipalako.
16Ia umpatuhum salju mabusa susi bulu domba,
anna untantam damo’ bäkkum susi sobä’.
17Ia umpakembua uham susi hippe’na batu.
Mennangka la nasaha umpentapai masäkke’na?
18Ma’battakada DEBATA, lambi’ mahehe;
umpatibussau hibu’, lambisam lolä uwai.
19Umpalanda’ battakadanNa lako pessubunna Yakub,
umpalambi’ kada napandam anna tula’ napaondom lako to Israel.
20Tä’ ia napateem lako mentu’na kahajaam senga’,
ingganna tula’ napaondom DEBATA tanaissam tanapelabillo.
Haleluya!
148Issinna langi’ sola lino, pujiko DEBATA
1Haleluya!
Pujiko DEBATA, o issinna suhuga!
Pujii, o inggannako to untadongkonni bamba malona’ tambim maseba-seba!
2Pujii, o inggannako malaika’Na DEBATA,
pujii, o mentu’nako tentaha suhuga!
3Pujii, o mata allo sola bulam,
pujii, o inggannako bintä pangkähhä masiä’!
4Pujii, o langi’ malibulum,
pujii, o uwai yabona langi’!
5Sihatam sipäto’ silele umpuji umpa’kasallei sanganNa DEBATA,
aka ma’battakada DEBATA, lambisam dadi issinna langi’ sola suhuga.
6Ia pantam umpatadongkonnii ongeanna simesa-mesa sule lako salako-lakona,
anna napalandangam kada tala mala pa’de tala mala dibala’i.
7Pujiko DEBATA, o issinna lino,
o ingganna ula’ naga anna mentu’na le’bo’ mandalam,
8kila’ tikiä anna uham kembua, salju anna gabum tihembom,
talimpuhu’ to untuhu’i kadanNa DEBATA;
9o ingganna buntu anna tanete,
ingganna kaju kembua anna mentu’na kaju aras;
10o ingganna olo’-olo’ malaiha anna patuboam,
ingganna tissollo’na dio litä’ anna ingganna hupanna dassi;
11o ingganna tomahaja di lino anna mentu’na kahajaam,
ingganna to kasalle illaam kahajaam anna to ma’pangka’ malangka’;
12o ingganna änä’ muane anna änä’ daha,
tomatua anna to mangnguha!
13Sihatam sipäto’ sikaumpuji umpa’kasallei DEBATA,
aka anggam sanganNa matande masokam,
kamatandeanNa untandolängänni langi’ sola lino.
14Ia umbeem kamatohoam umma’ petauanNa,
Ia napuji napa’kasallei umma’ to manuhu’ lako kaleNa,
to Israel, umma’ to nakaha’i anna nakamasei.
Haleluya!
149To Israel umpakende’ penaniam katilallasam
1Haleluya!
Penggamahaanni penaniam bakahu längäm DEBATA!
Pujii illaam kombonganna umma’ to manuhu’ lako kaleNa!
2Sihatam sipäto’ to Israel umpakende’ kakassiam katilallasam längäm To metampana;
sihatam sipäto’ issinna Sion sikaahhe tilalla’ längäm Tomahajanna!
3Sihatam sipäto’ sikasajo napuji napa’kasallei sanganNa,
sihatam sipäto’ umpakende’ pampujiam napasindum umponi rebana sola katapi!
4Aka DEBATA untahima umma’ petauanNa sola ponno penaba,
Ia umpasalokokatii149:4 umpasalokokatii: Too’na <<salokokati>> kalembasanna songko’ tomahaja. kapataloam lako to mahempo penaba.
5Sihatam sipäto’ to manuhu’ sikasajo tilalla’ illaam kapataloanna,
sihatam sipäto’ menggamaha tilalla’ dio petindoanna!
6Sihatam sipäto’ umpenggamahaam pampujiam umpomatande Puang Allataala,
napasindum untetä pa’dam pataham patomali,
7la umpabala’i pa’pogausanna mentu’na kahajaam,
umpaka’dasa ingganna kahajaam senga’,
8la nahantebassii ingganna tomahajanna,
anna napungo hante bassi ingganna to kasallena,
9la umpahuai pa’tahungkungam to puha napandam Puang Allataala lako mentu’na kahajaam.
Pa’palakoam iam too la mendadi tanda pa’pakasalle lako kalena ingganna to manuhu’ lako DEBATA.
Haleluya!
150Pujii DEBATA
1Haleluya!
Pujii Puang Allataala illaam ongeam masehoNa!
Pujii yabo langi’ to umpa’patandaanni kakuasaanNa!
2Pujii aka tadisipadai pa’pogausanNa,
pujii aka tadisihanteam kamatandeanNa!
3Pujii umponi sangkakala,
pujii umponi gambus anna katapi!
4Pujii umponi rebana150:4 rebana: Gändä-gändä bahinni’ dilapa’ sabali. umpasindum sumajo,
pujii umponi katapi anna sulim!
5Pujii unde’de’ padalim-dalim humiti’,
pujii unde’de’ padalim-dalim magalattim!
6Sihatam sipäto’ ingganna menabanna umpuji umpa’kasallei DEBATA!
Haleluya!