Yunus

Kada to Keaka’

Pemasiä’na

Inde suha’ naongei Kada to Keaka’ pa’duppunganna pepatuduam diona lalanna katuboam mapia. Ingganna indo pepatuduam ditula’ umpake kada ma’battuam anna kada ma’kalembasam. Indo pepatuduam pembuda ma’tula’ diona kaha-kaha si kende’ illaam katuboam allo-allo. Inde suha’ naongei Kada to Keaka’ napahandu’ dio untula’ pepatuduam naua: <<Mengkahea’ längäm DEBATA ia too pa’pahandusanna kapaissangam.>> Sulibanna pepatuduam diona lalanna katuboam mapia illaam inde suha’, mepatudupi duka’ la umpakeguna pikkiham mapia anna ma’palako mendiada’. Indo kada ma’kalembasam buda hupanna anna sangngim buttu di Puang Allataala. Mepaissanni diua tä’ deem pada samandalam kapaissanganna to umbaba pepatuduam dio Israel yolona diona ujä’na anna pa’palakoanna to keaka’ illaam wattu ma’tantu. Indo kada ma’battuam buda handanna nakala’, susinna: kasilombungam illaam dapo’, diona pa’buleleam, saha’ anna kedo illaam kasilombungam padanta, anna diona pahallu tau ungkuasai kale. Sulibanna ia too, illaam inde suha’ buda duka’ natula’ diona sipa’ mapia susinna: mahempo penaba, sa’baha’, umposamele to mase-mase anna tontä manontom umpakamaja solana.

Tono’ Issinna

Kakeakasam dipomatande 1:1–9:18

Kada to Keaka’ buttu di Salomo 10:1–29:27

Kadanna Agur 30:1-33

Kada to keaka’ buttu di indona Lemuel 31:1-9

Tedena baine hatta’ 31:10-31

Kagunaanna Kada to Keaka’

1:1-7

¹Indem ia kada to keaka’ buttu di Salomo änä’na Daud, tomahaja Israel. Gunana:

²Mepaissanni kakeakasam anna pepanännä’,

mepaissanni umpekalembasam kada mala umpatibukka pikkiham,

³mebeem pepanännä’ la diaka susi ma’palako keaka’,

ma’palako malolo, umpake undu’ lollä, tama’bija tama’sangngana’,

⁴umpatibukka akkalanna to saidi’ kapaissanganna,

umbeem kapaissangam sola pikki’ pali’ lako to mangnguha.

⁵La napehingngii hi too to keaka’ anna mala tuttuam kehängäm kamanähänganna,

anna to kepikkiham la ullambi’ pepatette;

⁶anna mala diissam umpekalembasam kada to keaka’ anna tula’ pehapangam,

tula’na anna sangkahumena to keaka’.

⁷Mengkahea’ längäm DEBATA ia too pa’pahandusanna kapaissangam,

sapo’ to maho kalebu umpa’bahinni’i kakeakasam anna pepanännä’.

Pepanännä’ anna pepatuduam

1:8-19

⁸O änä’ku, tobei manda’ antii matoto’ pepanännä’na ambemu,

oli’i mamma’ salungkui metindo pepatuduanna indomu,

⁹aka pepatuduam ia too sihhapam songko’ bulu babam1:9 songko’ bulu babam: Kalembasanna bulu kaloe’ dibelo-beloiam/dibunga-bungaiam songko’, lambi’ tiala inaba muitai. yabo ulummu,

anna anggasanna mani’ maleke illaam bahokomu.

¹⁰O änä’ku, maka’ la napamammisangko tula’ to madosa,

daa untuhu’i tula’na.

¹¹Hapanna la nauaangko: <<Maiko tuhu’kam, anta laoa’ pangngabum umpatei to liu lalam,

talaoa’ pa’pemäjä’ anta pa’sangkaheha’ umpatei to tä’ deem kasalaanna.

¹²Taande mataia’, sihhapangkia’ pambo’bä’ to mate,

taamma’ kalebuia’, sihhapangkia’ pamombä to mate;

¹³anta alaa’ ebangam keangga’ ma’mata-mata,

anta pangngissia’ banuanta baham-baham pamuhuam;

¹⁴palumai penabammu umpembakkoikam,

anta taba pätä’ia’ pallolonganta!>>

¹⁵O änä’ku, daa ussola pa’palakoam to madosa,

daa muolai lalanna tau ia too,

¹⁶aka ma’didi’um tinanda lako kakadakeam

anna ma’sahha’um lao papateam.

¹⁷Tä’ ia deem gunana la umpatti poja bendo’ samelum buaja

ke naitai dassi la dipemäläi,

¹⁸sapo’ to madosa ia umpaalai ulä kalena

anna umpa’gahoängam kalena.

¹⁹Susim too kakendesanna lako to umpadondoi kulle pangngala kahha’,

kulle ia too la naposisulle sungnga’na.

Pepanännä’na kakeakasam

1:20-33

²⁰Metamba kakeakasam dio lalam kasalle,

umpa’pahingngiiam gamahanna dio pa’hanteam kalua’,

²¹katamba-tamba dio ongeam mahoa’,

ma’kada kasalle dio olona ba’ba suluhanna kota naua:

²²<<O inggannako to saidi’ kapaissangammu,

la padapi umba masäena umpohäeko kamahoammu,

o to mantelle, la padapi umba masäena ungkasajanniko pantelle,

o to maho, la padapi umba masäena untumpu pala’ko kapaissangam?

²³Pengkatoba’ko ke kutappakadaiko!

Aka setonganna, la kubukkaiangko issi penabangku

anna kupassubungangko batu ateku.

²⁴Aka umpa’talingalenda’iä’ wattunna kupa’kadaiko,

anna tä’ deem tau umposameleä’ wattunna kuka’bi’ kutambai.

²⁵Umpa’bahinni’iko petundam pepakilalaangku,

untumpupala’ko pantappaikadangku,

²⁶lambi’ la kupelale’iko ke nahuako kasägängam.

La kupa’pissi’ko ke nalambi’ko kamaheasam,

²⁷ke sulei kamaheasam untappiko susi hibu’ tatta’,

anna sussa tanggana-gana uhhuako anggasanna talimpuhu’,

anna kamapi’disam sola kasägängam untappaiko.

²⁸Wattu eta too la sikatamba mengkaala lako kaleku, sapo’ tä’ deem la kuposamele,

la lu sau’ lu dekke napeää’

sapo’ tä’ deem nalambi’ä’.

²⁹Aka silele ungkabassi kapaissangam,

anna tä’ napaalai penabanna mengkahea’ dio oloNa DEBATA.

³⁰Tä’ naaku untahima petundam pepakilalaangku,

anna untumpu pala’ pantappaikadangku.

³¹Nasuhum la nalambi’ pa’dallena,

anna nakaponnoanni pattuju kadakena.

³²Aka to saidi’ kapaissanganna la mate natumä pa’äena,

anna to maho la nalosu’ pa’sele-selena.

³³Sapo’ menna-menna umpehingngiiä’ la ussi’dim kamalinoam sola kamasannangam,

tala malallam tala tigiam dio mai tondom kakadakeam.>>

Gunana muampuam kakeakasam

2:1-22

¹O änä’ku, ianaanna umpehingngiiko kadangku,

anna umpaillaam penaba pahentaku,

²anna umpatananni talinga kakeakasam,

anna umpellantunni kamanähängam;

³ianaanna ma’kadako umpelau pikkiham,

anna menggamaha umpelau kamanähängam;

⁴ianaanna umpeäi sihhapam umpeä peha’,

anna undaka’ sihhapam undaka’ pangnganna nene palumpum tomatua,

⁵iya la muissammi too mengkahea’ längäm DEBATA,

anna la ullambi’ko kapaissangam diona Puang Allataala.

⁶Aka anggam DEBATA mebeem kakeakasam,

anggam Ia naongei buttu kapaissangam anna kamanähängam.

⁷Ia umbeem pikki’ pali’ to malolo penaba,

Ia mendadi unta’ matoto’na to malolo lingka salukatuboanna.

⁸Ia unjagai to umpalako undu’ lollä,

anna ungkambi’ lingkana ingganna to manontom lako kaleNa.

⁹Iya la muissangko diona kamaloloam sola undu’ lollä,

tama’bija tama’sangngana’, anna ingganna lalam kamapiaam.

¹⁰Aka kakeakasam la mentama pikkihammu,

anna kapaissangam la umpomasannam penabammu.

¹¹Pikki’ pali’ la ungkambi’ko,

anna kapaissangam la unjagaiko,

¹²la nakambi’ko indana untuhu’ko lingkana to kadake gau’,

lingkana to mebaba bulim tula’na,

¹³silele mangngopä’ umpellei lalam malolo,

anna muolai lalam mapättä.

¹⁴Sangngim tiala inabanna umpogau’ kakadakeam,

anna sikaahhe tilalla’ aka si umpasilekosam kamapiaam anna kakadakeam,

¹⁵angga muola lalam sengko’,

anna bulim pa’palakoanna.

¹⁶Iya la lappa’ko dio mai baine tameada’,

dio mai baine sassa’ lalam to mässi’-mässi’ pa’tula’;

¹⁷untibe muanena to nasialaam mengkalao di mangnguhanna

anna umpesi’ basseam kada to nadandi dio oloNa Puang Allataala;

¹⁸dadi, menna-menna tama banuanna sihhapam tinanda lako kamateam,

menna-menna lako banambena sihhapam tinanda lako kaliane anitu.

¹⁹Menna-menna la ullese’i tadongkonganna tala malapi ia ma’pasule sule,

anna tä’um deem la tinanda lako lalam katuboam.

²⁰Iam too anna la umpehapanningko to mapia gau’,

anna manontongko muola lalanna to meada’.

²¹Aka to malolo penaba la untadongkonni botto litä’ pa’dandianna Puang Allataala,

anna to tä’ deem sassainna la ma’ohoam eta too.

²²Sapo’ to tameada’ la dileoi illaam mai botto ia too,

anna to umpesi’ tula’na la dipempa’deam illaam mai tadongkongam ia too.

Pepatettena kakeakasam

3:1-26

¹O änä’ku, daa ungkalembei pepatuduangku,

sapo’ la umpaillaam penabako pahentaku,

²anna malako ma’tammu ubam ma’lullum buha-buha,

anna ussi’dim kamalinoam sola kamasannangam illaam salukatuboammu.

³Daa umpasilappa’ kalemu pangkaha’ pa’kamase anna kamanontongam!

La umpelluä illaam bahokomu sihhapam mani’, anna la umpatianna illaam unä’ penabammu.

⁴Ianaanna umpateenni, la untammuko pa’kamase anna kesanga mapia

dio oloNa Puang Allataala anna hupatau.

⁵Mahannuko längäm DEBATA sola sakalebu penabammu,

anna daa uhhannuam pikkiham kalemu.

⁶Paihandannai DEBATA illaam ingganna pa’palakoammu,

anna mala nahampasangko lalam la muolanna.

⁷Daa umpa’tokeaka’-aka’,

pengkahea’ko längäm DEBATA anna pasikambelai kalemu kakadakeam;

⁸ianaanna umpateenni, la napobono’ bätä puntimmu

anna napomaläpu’ kalemu.

⁹Pakei kullemu umpuji umpa’kasallei DEBATA,

babai uhuna bua pengkähämu dio oloNa,

¹⁰anna mala dipallapi’i ingganna lokomu,

anna lempam pole pa’pongngeam anggurmu.

¹¹O änä’ku, daa umpa’bahinni’i pepanännä’Na DEBATA,

daa umpasuhhä’ buamu ke natappakadaiko.

¹²Aka DEBATA untappakadai to nakaha’i anna nakamasei,

umba susi mesa ambe untappakadai änä’ pa’pakamajanna.

¹³Maupa’ anna katambasam to ullambi’ kakeakasam,

anna to ullolongam kamanähängam,

¹⁴aka keguna puha ia muampuam kakeakasam anna la muampuam peha’,

la’bi puha ia anna la bulabam,

¹⁵keangga’ puha ia anna la batu permata.

Ingganna aka-aka umpohäena tä’ deem la umpapadai kakeakasam.

¹⁶Lima kananna naongei buttu kamahendengam,

anna lima kaihinna naongei lemba’ katomakakaam sola pa’pakasalle.

¹⁷Kakeakasam mepatette muola lalam kamasannangam,

meundu’ ullingkai lalam kamalinoam.

¹⁸Kakeakasam sihhapam kaju katuboam lako to mengnganti manda’ mentobe matoto’ lako,

maupa’ anna katambasam to muoli’i mamma’ ussalungkui metindo.

¹⁹Kakeakasam napake DEBATA umballa’ lino,

anna kapaissangam napake ungkumbä langi’,

²⁰kapaissanganNa napake umpopa’kalimbuä uwai dio mai tando dokkona lino,

anna gabum yabo langi’ umpatuhum langullo.

²¹O änä’ku, antii manda’ tobei matoto’ kakeakasam sola pikki’ pali’,

oli’i mamma’ salungkui metindo.

²²Ianaanna umpateenni la tubo mahendengko,

anna la sihhapam mani’ bulabam illaam bahokomu.

²³Tala dondom bulu salamba’mu tala tobä bulu sangkahohimmu,

anna tatitedoko tatiassam illaam pellaoammu.

²⁴Tala deengko nahua kamaheasam dio petindoammu,

anna la happa’ penabammu mamma’.

²⁵Daa ummahea’ ke deenni sule säkä-säkä la mepakahea’na,

battu haka katilakaam la uhhua to tameada’.

²⁶Aka la nakambi’ko najagai DEBATA,

anna la napasikambelako poja bendo’ samelum buaja.

Pesasum la ma’gau’ mapia

3:27-35

²⁷Daa umpomabanda’ penabammu umpogau’ kamapiaam lako to la sipäto’ untahimai,

ke mala mammi umpogau’.

²⁸Daa muuaam padammu ma’hupatau: <<Le’ba’ poko yolo makale’pa ussule, mane kubeengko,>>

ke deem mammi lako kalemu indo to napelau.

²⁹Daa umpattujuam kakadakeam sambanuammu,

aka tä’ deem kabata-bataanna tohho dio ampe’mu.

³⁰Daa ussängä’ deem anna sipengkangko padammu,

ke tä’ mammi deem napogausangko kakadakeam.

³¹Daa ungkembuhui kullena to palampi,

anna daa muolai lalanna.

³²Aka nakabassi ia DEBATA to sassa’ lalam,

sapo’ sangkalamma’ ia to meada’.

³³Tohho tädoNa DEBATA illaam banuanna to tameada’,

sapo’ untamba’ ia banuanna to meada’.

³⁴DEBATA untelle to mantelle,

sapo’ ungkamasei to mahempo penaba.

³⁵To keaka’ la umpaipala’ sanga mapia,

sapo’ to maho la nahuham ia longko’.

Muanti manda’ untobe matoto’ kakeakasam

4:1-27

¹O inggammua’ änä’, pehingngii pepanännä’na ambemu,

paillaam penabai anna malako ullolongam pikkiham mapia.

²Aka kubeemmakoa’ pepatuduam mapia;

daa umpa’kalembei paondongku.

³Wattunna anna änä’-änä’pä’ nakuhäpä’ ambeku,

änä’ mesanna indoku to napakamaja,

⁴napatuduä’ ambeku naua: <<Patitananni illaam penabammu pepatuduangku;

antii manda’ tobei matoto’ paondongku, anna malako masakke mahendem.

⁵Pameäi kakeakasam! Pameäi pikkiham!

Daa umpa’kalembei, anna daa untekka to’doam pudu’ku.>>

⁶Daa untampeam kakeakasam, anna mala nakambi’ko;

kaha’i anna malako najagai.

⁷Handam too’na kakeakasam. Dadi pameäi kakeakasam.

Handam pahallu pikkiham. Dadi pameäi pikkiham.

⁸Pa’kasallei kakeakasam, anna mala napomatandeko;

la napadadiko to diangga’ ke muoli’i mamma’ ussalungku metindo.

⁹La napasongko’iko songko’ bulu babam,4:9 songko’ bulu babam: Kalembasanna bulu kaloe’ dibelo-beloiam/dibunga-bungaiam songko’, lambi’ tiala inaba muitai.

la napadokkoangko lisu pala’mu songko’ tomahaja sumpu malekena.

¹⁰O änä’ku, patanannii talinga anna umpaillaam penabai inde kadangku,

anna malako ma’tammu ubam ma’lullum buha-buha.

¹¹Kupatuduko lalanna kakeakasam,

anna kupatetteko lako lalam malolo.

¹²Maka’ mellaoko tä’ko deem la laba-labaam,

maka’ ma’sahha’ko tä’ko deem la titedo.

¹³Antii manda’ tobei matoto’ pepanännä’, daa ullappa’i,

kambi’i umpaliaha, aka ia umbeengko katuboam.

¹⁴Daa muola lalanna to tameada’,

anna daa untuhu’i lalanna to kadake gau’.

¹⁵Pasikambelai kalemu lalam ia too, daa muola eta,

äläiko kalemu dio mai, lalam senga’ ola.

¹⁶Aka silele tä’ mala mamma’ matanna,

ke tä’pi puha umpogau’ kakadakeam;

miko-miko liu matanna,

ke tä’pi puha umpakapi’di’ tau senga’.

¹⁷Muande bo’bo’ kakadakeam,

untahuttu’ uwai kamakahhasam.

¹⁸Sapo’ lalanna to meada’ sihhapam bihha’na allo,

tuttuam masäe tuttuam masiä’ sampe malepom kalibajo.

¹⁹Lalanna to tameada’ sihhapam bengi mapättä;

tanaissam tanapeamo’ aka nasuhum titedo.

²⁰O änä’ku, paalai manappai penaba kadangku,

patanannii talinga pessubungam pudu’ku!

²¹Daa ungkalembei ingganna ia too,

patitananni illaam penabammu.

²²Aka iam too lalanna katuboanna to ullambisanni,

anna napobono’ bätä puntinna.

²³Jagai manappai penabammu la’bi puha ia anna la ingganna aka-aka senga’,

aka eta naongei buttu katuboam.

²⁴Pasitäntänganni kalemu pudu’ pandem lila manähä,

pasikambelai kalemu tula’ kapendo-pendo.

²⁵Pasatutui matammu lako ulalam malolo,

pomanontonni pennenne’mu muundu’ kamaloloam.

²⁶Pikki’ manappai yolo indo to la ullingkai,

anna pomanontom liui pentekkamu.

²⁷Tala lempä kanangko tala lempä kaihi,

pasikambelai lingkamu kakadakeam.

Pepakilalaam diona lullusam banne tau

5:1-23

¹O änä’ku, paalai penaba kakeakasangku,

patanannii talinga kamanähängam to kupatuduangko,

²anna malako muoli’ mamma’ ussalungku metindo pikki’ pali’,

anna ungkambi’ pudu’mu umpassubum tula’ kapaissangam.

³Aka matannim susi duho pessubungam pudu’na baine ullullu’ muanena,

anna mammi’ tadiande tula’na lako muane senga’,

⁴sapo’ katampasanna mapäi’ susi hi pa’du,

anna pataham susi pa’dam pataham patomali.

⁵Lingkana lu lako kamateam,

pentekkana tinanda lako kaliane anitu.

⁶Tä’ muola lalam la tinanda lako katuboam,

bulim, sapo’ tä’ deem napelabillo.

⁷Iam too anna la umpehingngiinna’ tula’ku, o inggannakoa’ änä’,

anna tä’ la untekka pessubungam pudu’ku.

⁸Pasikambelai kalemu baine ia too,

anna daa muempe’-empe’i banuanna.

⁹Indana umpehingngangko angga’mu lako tau senga’,

anna umpentandoangko sungnga’mu lako to tamessai’,

¹⁰indana tau senga’ umpesenäi kamatohoammu,

anna tau bäbä umpokulle lupu’ hesomu.

¹¹Kaedo-edo hangko mane ussossoko kalemu,

ke bukummu mandam sikatekä’.

¹²Iya muua mandam: <<Aka si umpa’bahinni’i hä’ kao pepanännä’!

Anna si kutumpu pala’ ke untappakadaiä’!

¹³Akanna tä’i si kupehingngii tula’na tuangguhungku?

Akanna tä’i si kupatananni talinga kadanna to umpa’guhuä’?

¹⁴Saidi’ku tamendadi petabaam tau,

illaam alla’-alla’na tau buda.>>

¹⁵Daa ullullu’ pandaposammu,

daa ulluta-luta petindoammu.

¹⁶La sihatam daka laoko ulloläi baine senga’,

sihhapam salu mangngahoba lako lalam mahoa’?

¹⁷La anggam bainemu umpasola metindo,

tala sihatam ia tala sipäto’ tau senga’.

¹⁸La napasuleam dako too tamba’ bainemu,

la masannangkoa’ sola to ma’dapo’mu to ussialaam wattu di mangnguhammu.

¹⁹Maleke anna matitta susi jonga lundaha;

la napatiala liu hi too inabammu lemo dio dadanna,

anna la kende’ liu penabammu aka elo’ bunga-bunganna.

²⁰O änä’ku, aka gunana kende’ kamohäeammu lako baine ullullu’ muanena?

Aka gunana solako metindo baine sässä’ gau’?

²¹Aka nalampa’-lampa’i DEBATA pa’lao-laona hupatau,

anna nabändä-bändäi ingganna lingka salukatuboanna.

²²To tameada’ nasäke’ gau’ kadakena,

anna napungo dosana.

²³La mate aka tä’ umpehingngii pepanännä’,

anna natumä kamahoanna nasuhum bulim.

Sanaka-naka hupanna petundam pepakilalaam

6:1-19

¹O änä’ku, maka’ deengko umpangngindosam padammu,

anna ma’dandiko lako to sule illaam bottomu la iko melluä sambu’,

²iya nasäke’ungko too tula’mu,

napungongko kadammu.

³Dadi la susi inde änä’ku: la ullappa’iko kalemu,

aka diongko pala’ limanna padammu.

Laoko pellambi’i, pengkahumaseko dio olona, anna umpeäi lalanna anna malako nalappasam.

⁴Dapa yolo ummamma’,

dapa ullao säkä petindo.

⁵Lappasangko kalemu sihhapam jonga muäläi kalena dio mai to muasu,

sihhapam dassi ullappasam kalena dio mai to ma’pemälä.

⁶O to busungam, laoko petua’ linti’,

petua’ manappai pa’palakoanna ammu keaka’.

⁷Moinna anna tä’ deem pepungngu’na,

tä’ deem to mampahe’na battu haka to pebabanna,

⁸sapo’ naissam umpatoka kinandena wattu kulla’,

uhhempum alaam kinandena wattu kadeengam.

⁹O to busungam, la pada hia umba masäena mamma’ko?

La pihampi isanga mane bangongko?

¹⁰Sapäi’-sapäi’ tikahu’du’, tapakala mamma’ oham;

sapäi’-sapäi’ messingngammu’, tapakala lentem-lentem oham.

¹¹Pissananna sule säkä-säkä ham kapemase-maseam sihhapam to pahappa,

kakuhängam sihhapam to umbaba paha’buno.

¹²To takeguna anna kadake gau’

umbungkeko’ lilana,

¹³mangka’bi’ bulu matanna,

umpopaningo kalasi bitti’na, umpopangka’bi’ maneko tahuno-hunona,

¹⁴angga tengko kumeso’ illaam penabanna, angga umpattuju kakadakeam,

anna umpakende’ kasipengkaam.

¹⁵Iam too kasuhunganna anna nalambi’ säkä-säkäm katilakaam;

tapakala anna dahi ambummi tä’um deem paulena.

¹⁶Annam handanna kaha-kaha nakahidi’ DEBATA,

battu haka, pitu handanna nakabassi:

¹⁷yabo bulam mata, lila mambungkeko’,

umpatei to tä’ deem kasalaanna,

¹⁸penaba umpattuju ingganna kakadakeam,

bitti’ mahingngam ullomba kakadakeam,

¹⁹sa’bi tatappa’ umpobibi kakalasiam,

anna umpakende’ kasipengkaam illaam alla’-alla’na to ma’hapu.

Pepakilalaam diona lullusam banne tau

6:20–7:27

²⁰O änä’ku, antii manda’ tobei matoto’ tula’ napaondom ambemu,

oli’i mamma’ salungkui metindo pepatuduanna indomu.

²¹Patobä di tambu’i padondom di atei,

pelluäi illaam bahokomu sihhapam mani’.

²²Maka’ lumingkako la naundu’ko napatette,

maka’ mamma’ko, la nakambi’ko najagai,

maka’ milli’ko, la nanännä’ko napakilala.

²³Aka paondom ia too la meballoi, anna pepatuduam ia too la memasiä’i,

anna pantappakadai sola pepanännä’ la mepatinanda lako lalam katuboam.

²⁴Nasuhum la nakambi’ko najagai dio mai baine kadake gau’,

dio mai pangkati-kati lila kalasinna baine passunda’.

²⁵Taia la kamapiaanna umpakapitti’i penabammu,

daa ummaelo’ la nakeloi pangka’bi’ bulu matanna.

²⁶Aka baine passunda’

anggam sabokkom hoti baja’na,

sapo’ sigau’ bainena tau senga’ sungnga’ ia baja’na.

²⁷Maka’ hapanna deem tau la ungkoto’i api,

tä’ daka tia la mampu’ bajunna?

²⁸Maka’ hapanna deem tau la uhhondoi hobaja,

tä’ daka tia la lopa bitti’na?

²⁹Susim too duka’ to unggau’ bainena solana;

menna-menna umpogau’ gau’ ia too, tä’ mala tala dipassala.

³⁰Maka’ deem tau maboko aka natumä katadeasanna,

tä’ la dipetuna.

³¹Sapo’ maka’ kalambisam, la nabala’i pempitu tiluppi’,

anna la disollo’ kulakka’na dikolä’ täiabunna.

³²Menna-menna ullullu’ pa’bannetauam takepikkiham ia;

menna-menna ma’pogau’ susi, ungkadakei kalena.

³³La dipakasihi’ anna dipopehaha,

tala deemmi kebolom sihi’na sule lako salako-lakona.

³⁴Aka mesa muane ke kembuhui tä’ dibela dipa’gam aha’na,

maka’ lambi’um wattunna la dipepahottonganni, tä’um siampuam pa’häntängam bua.

³⁵Moi aka la dibolongam sihi’na tala nanenne’i;

moi la pada umba baja’na tala natahimai.

¹O änä’ku, antii manda’ tobei matoto’ kadangku,

anna patitanam di tambu’i patialim di sumusui tula’ kupaondom.

²Antii manda’ tobei matoto’ paondongku anna malako masakke mahendem;

kambi’ manappai pepanännä’ku umba susi unjagaiko lise’ matammu.

³Patisäke’i dio limammu susi ponto bännä,

anna patitananni illaam batu atemu.

⁴Ala änä’dahammui kakeakasam,

angga’ solasubunni pikkiham,

⁵anna mala najagaiko dio mai baine passunda’,

dio mai baine to kadake gau’ mässi’-mässi’ pa’tula’.

⁶Pissam wattu ma’pahandam-handam omä’,

ma’pahandam-handannä’ illaam mai suleba’ku,

⁷iya kuitam sanaka-naka to saidi’pi kapaissanganna;

kuita sanaka-naka änä’ gassim, pissananna deem mesa änä’ gassim takepikkiham ia,

⁸umpenandai kasengkängam lalam,

anna lu lakoi banuanna baine to kadake gau’,

⁹wattu eta too mahammom, sulipo’-lipo’um,

la hapa’ kalem bengi.

¹⁰Iya natammuim mesa baine,

baine ma’poheba passunda’ ma’penaba mateko;

¹¹baine lussu’ anna pa’mämmängam,

angga kabemba’-bemba’ tahapa’ dio banuanna,

¹²naala lako lalam, naala lako ongeam mahoa’,

anna kapuhaam lako ma’pohengana lalam ma’pemäjä’.

¹³Silambi’na indo änä’ gassim, iya nahuntu’ siaham anna naudunni,

napasindum ma’lindo batu ma’kada naua:

¹⁴<<Puhamä’ umbaba tunuam kasikapiaam,7:14 tunuam kasikapiaam: Deem to umpemandalam battakada DEBATA muuai: indo baine passunda’ mane puha untunu tunuam kasikapiaam lako DEBATA dio banua DEBATA. Iya nababa piha lako banuanna balena indo olo’-olo’ to natunu nanasu dio banuanna anna pahallu naande indo allo eta too.

anna allo temo puham kuponnoi pa’pa’naku.

¹⁵Iam too anna le’ba’mä’ kutammuiko,

aka kupeä si’da-si’dako, iya silambi’ungki’ temo.

¹⁶Puham kuampa’i sampim masuha’ petindoangku,

sampim linen7:16 sampim linen: Sahhupa sampim dipapia dio mai bätäna tanangam diuaam rami kiha-kiha 1-3 mete’ malangka’na. masuha’ buttu dio mai Mesir.

¹⁷Puham kupippi’i mur,

gaharu, anna kaju bubanau’.

¹⁸Maiko tapalosso’ penabanta sule lako masiä,

anta pasule lako elo’ bunga-bunganta.

¹⁹Sumala pa’dei inde muaneku,

mahassam illaam pa’laoam mambela.

²⁰Salambusam doi’ nababa lao,

iapi mane ma’pasulei ke pa’tängäannam inde bulam.>>

²¹Ungkäse-käse indo änä’ gassim napakate’de’,

napamammisam tula’ anna mala ma’dim.

²²Lambisam tappa mengngio indo änä’ gassim,

sihhapam sapim tama’geu’ dibaba lako petunuam,

anggasanna jonga umpengkahopäi poja,7:22 poja: Mala duka’ kalembasanna, susi to tana’ tama dipungo la lao ditahungkum.

²³katampasanna nalosa lappa’ batu bälä’du’ buana;

sihhapam dassi umpentia’i pa’pemälängam,

tala deem nalambi’ pikkihanna naua: <<Illaammä’ sädä hobaja.>>

²⁴Iam too, o inggannakoa’ änä’ku anna la umpehingngiimä’,

anna la umpaillaam penaba kada penännä’ku.

²⁵Daa umbeenni penaba baine susi ia too,

anna pissa’-pissa’ ai la untuhu’i lalam penabanna.

²⁶Aka budam tau natallangam,

anna mandasam mate natumä.

²⁷Banuanna mebaba lako kaliane anitu,

mepatinanda lako kamateam.

Pepanännä’na kakeakasam

8:1-36

¹Tä’ daka too metamba-tamba kakeakasam,

anna umpa’pahingngiam gamahanna kamanähängam?

²Ke’de’ yabo ongeam matande dio bihim lalam,

dio ma’puhengana lalam,

³dio sa’dena ba’ba suluhanna kota, dio olona ba’ba kota,

dio lalam messullu’ tama kota, nasa’ba tohoi metamba naua:

⁴<<O mentu’nako ma’hupatau, kupamatingangko tula’,

mentu’nako ma’tanda to lino, kusohongangko kada.

⁵O mentu’nako to saidi’ kapaissangammu, pakegunai akkalammu,

o inggannako to maho, popatahanni pikkihammu.

⁶Patananni talingammu, aka la umpengkadaannä’ kaha-kaha keangga’,

anna la tiku’mi’ pudu’ku umpassubum kaha-kaha tungka ianna.

⁷Pudu’ku untula’ kamaloloam,

anna lilaku napesapai la umpatappa tula’ kadake.

⁸Ingganna pessubungam pudu’ku malolo,

tama’sampa siluä tama’sepu’ siapalam.

⁹Masissä’ napenabaam to kepikkiham,

anna malollä nasi’dim to deem kapaissanganna.

¹⁰Paaha puhai ia penännä’ku anna la peha’,

pa’kalandoi puhai ia kapaissangam anna la bulabam täsä’.

¹¹Aka kakeakasam keangga’ puha ia anna la batu permata,

moi la ebangam maaka susi napemulu hupatau tala deenni nasipadaangam.

¹²Kaom too inde kakeakasam, siajokakam akkalam,

anna kuissam lalanna untammu kapaissangam sola pikki’ pali’.

¹³Mengkahea’ lako DEBATA kalembasanna ungkabassi kakadakeam;

kukabassi kao malangka’ penaba, ussanga-sanga kale, panggauam kadake,

anna tula’ mebaba bulim.

¹⁴Siampuannä’ petundam pepakilalaam anna pikki’ pali’,

siampuannä’ pikkiham anna kamatohoam.

¹⁵Kao anna malai ma’pahenta ingganna tomahaja,

kao anna malai unte’geham kamaloloam mentu’na to palumbängam.

¹⁶Kao anna malai muampuam kakuasaam to kasalle,

teem toi duka’ ingganna pedaengam anna to mahhotto’ malolo.

¹⁷Kukamasei mentu’na to umpohäeä’,

anna to manontom umpameää’ la nalambi’ä’.

¹⁸Siampuannä’ katomakakaam anna kamatandeam,

teem toi duka’ kulle mananna’ anna undu’ lollä.

¹⁹Ingganna aka-aka buttu illaam mai kaleku keangga’ ia anna la bulabam, keangga’ puha ia anna la bulabam täsä’;

susi siam duka’ keangga’ puha ia anna la peha’ ma’nini.

²⁰Mentekkaä’ muundu’ ulalam malolo,

mellao umpanete undu’ lollä.

²¹La kumana’ ebangam ma’mata-mata lako to umpohäeä’,

anna la kupalummi’ panito lokona.

²²Inna napadadimä’ DEBATA wattunna la umpahandu’ pengkähänganNa,

yolona anna la umpalakoi pengkähänganNa wattu puha lessu’.

²³Pempom diopi mai anna nalanti’mä’,

mengkalao diopi mai wattunna tä’pi dadi inde lino.

²⁴Tä’pi deem le’bo’ kalua’ anna dadimä’ kao,

tä’pi deem mentu’na kalimbuä anna deemmä’ kao.

²⁵Tä’pi deem dilemo buntu,

anna dibokkom tanete anna dadimä’;

²⁶tä’pi deem dipadadi lino sola pädä kalua’,

tä’ toopi deem sobä’ diita illaam lino.

²⁷Dioä’ heem wattunna ungkumbä langi’ DEBATA,

wattunna umpadadi katonanna le’bo’ sola langi’;

²⁸wattunna umpopa’ongeam gabum yabo lawwa,

anna wattunna umpopa’koä’-koä’ kalimbuä dio le’bo’,

²⁹wattunna ussapa’ pali’ uwai le’bo’,

anna mala tä’ lempam uwainna,

anna wattunna umpaokko’ pelanggana lino.

³⁰Dioä’ sa’deNa kao to disa’bu’ änä’ pa’pakamajanNa,

allo sibala’ allo kupomasannam penabanNa,

anna tamonda takattu sundede buaku dio oloNa;

³¹masannam penabangku muita lino pa’padadinNa,

tiala inabangku muita hupatau illaanna.

³²Dadi pa’pehingngikoa’ di kao, o inggammua’ to dipoänä’,

aka maupa’ anna katambasam to muoli’ mamma’ ussalungku metindo mentu’ ulalangku.

³³Pehingngiiko pepanännä’ anna malako keaka’;

daa umpa’bahinni’i!

³⁴Maupa’ anna katambasam to ma’pehingngi lako kaleku,

to allo-allo mangngampa dio ba’ba banuangku,

anna to unjagai andihi ba’ba suluhangku.

³⁵Aka menna-menna tinanda di kao, la ullambi’ katuboam,

anna la untammu kamapiaam penabanNa DEBATA.

³⁶Sapo’ menna-menna tä’ tinanda di kao, uhhugiam kalena;

menna-menna ungkabassiä’, umpemulu kamateam.>>

Petambana kakeakasam anna petambana kamahoam

9:1-18

¹Puham umpake’de’ banuanna kakeakasam,

napake’de’ pitu andihinna;

²untunu olo’-olo’, umpatoka anggur,

anna natahakam yabo meja.

³Mane ussuai to mealaanna baine, le’ba’ metamba

längäm ongeam matande illaam kota naua:

⁴<<Menna-menna saidi’ kapaissanganna, la lempä mai!>>

Anna lu lako to takepikkiham ma’kada naua:

⁵<<Maiko, ammu ande hotingku,

ammu ihu’ anggur to puha kubuli;

⁶pellei lalanna to saidi’ kapaissanganna, anna malako tubo,

anna tuhu’iko ulalanna to kepikkiham.>>

⁷Menna-menna umpatudu to mantelle, hapam di ussaho pantelle,

anna menna-menna untappakadai to tameada’, hapam di umpelau passassai.

⁸Daa untappakadai to mantelle, indana nakabassiko,

sapo’ maka’ to keaka’ untappakadai, la umpake pangkaha’ pa’kamase lako kalemu.

⁹Panännä’i to keaka’, anna mala tuttuam keaka’,

patudui to meada’, anna mala tuttuam kehängäm kamanähänganna!

¹⁰Mengkahea’ längäm DEBATA, ia too pa’pahandusanna kakeakasam,

anna muissam To Handam Maseho disangai kepikkiham.

¹¹Aka kao napolalam mahendem katuboammu,

anna kalando sungnga’mu.

¹²Maka’ muampuangko kakeakasam, iko siam tia duka’ la nakapolei,

sapo’ maka’ si mantelleko, iko siam tia duka’ la umpendudunni.

¹³Kamahoam sihhapam baine matahumimmi’ pudu’,

saidi’ kapaissanganna, anna tama’hohi’.

¹⁴Oko’-oko’ dio olo ba’bana,

deem toi muokko’ yabo kadeham yabo ongeam matande illaam kota.

¹⁵Etam too naongei si untambai to liu lalam,

untambai to ullingkai salukatuboanna naua:

¹⁶<<Menna-menna saidi’ kapaissanganna, nalempä mai!>>

Anna lu lako to takepikkiham ma’kada naua:

¹⁷<<Tä’ deem pada samahasa uwai diboko,

anna tä’ deem pada samammi’ hoti diande buni.>>

¹⁸Sapo’ tanaissam tanapegamo-gamo naua, ongeam ia too la mepatinanda lako kamateam,

anna ingganna to si natambai, diom kaliane anitu.

Sanaka-naka kada to keaka’ buttu di Salomo

10:1–22:16

¹Indem ia tula’ to keaka’ buttu di Salomo.

Änä’ keaka’ umpasundede buana ambena;

sapo’ änä’ to maho umpomapi’di’ penaba indona.

²Kulle diala malussu tadipohiakanna,

sapo’ kamaloloam dipotubo.

³To meada’ tä’ napalambi’i kakobeam DEBATA,

sapo’ to tameada’ tä’ dipasilambi’ pa’pemulunna.

⁴Lima busungam umpasule kapemase-maseam,

sapo’ lima bassa’ mepatomakaka ia.

⁵To umpatoka kinande wattu pepaheam, änä’ keaka’ ia,

sapo’ to mamma’ matanna wattu pepaheam, änä’ mepakasihi’ ia.

⁶Nasalokko’ tamba’ ulunna to meada’,

sapo’ tappaam pudu’na to tameada’ umbollei kamakahhasam.

⁷Ungkilalai sanganna to meada’ moinna anna matem, umpatiala inaba,

sapo’ sanganna to tameada’ baju-baju tä’um ditula’.

⁸To keaka’ natama tula’,

sapo’ to matomaho-maho ma’tula’ la nahonnosam tula’na.

⁹To malolo pa’palakoanna malino lingka salukatuboanna,

sapo’ to ma’palako sengko’ la dilambi’ lako-lakoam.

¹⁰To ma’mata kalasi umpakende’ kamasussaam,

to matomaho-maho ma’tula’ la nahonnosam tula’na.

¹¹Pessubungam pudu’na to meada’ sihhapam kalimbuä tamatti’ mepatubo,

sapo’ tappaam pudu’na to tameada’ umbollei kamakahhasam.

¹²Pangkabassi umpakende’ kasipengkaam,

sapo’ pa’kamase umpa’dei ingganna kasalaam.

¹³To kepikkiham umpassubum tula’ kakeakasam,

sapo’ to takepikkiham pesämbä’ ia la dipaabanniam boko’na.

¹⁴To keaka’ muanna mana’ kapaissanganna,

sapo’ tappaam pudu’na to maho kalebu mebaba dokko lembä.

¹⁵To makaka ia kullena napobettem batu,

sapo’ to mase-mase ia napopendokko kapemase-maseanna.

¹⁶Pengkähäna to meada’ ungkembuaam katuboam mapia,

pengkähäna to tameada’ ungkembuaam dosa.

¹⁷Menna-menna umpehingngii pepanännä’, tinanda lako lalam katuboam,

sapo’ menna-menna umpa’talingalenda’i pantappakadai, bulim ia.

¹⁸Menna-menna umbollei pangkabassi, mapia lelem dio pudu’na;

menna-menna ma’pakolo’-kolo’i to maho ia.

¹⁹Tuttuam buda tula’ messubum tuttuam deem lalanna palambangam,

sapo’ menna-menna nabela ungkambi’ pudu’na, keaka’ ia.

²⁰Pessubungam pudu’na to meada’ sihhapam peha’ ma’nini,

sapo’ pikkihanna to tameada’ tä’ deem angga’na.

²¹Pessubungam pudu’na to meada’ umpatubo buda tau,

sapo’ to maho kalebu ia mate aka takepikkiham.

²²Anggam pa’tamba’ DEBATA mala mepatomakaka,

taia toho hupatau dihannuam.

²³Umba susi to maho angga kakadakeam nakähä,

susim too duka’ to manähä angga ia kakeakasam napogau’.

²⁴Iai too pangkahea’na to tameada’, iam nasitammuam,

sapo’ pa’pemulunna to meada’ la dipasulelakoam ia.

²⁵Maka’ nalambi’ sussa to tameada’ sihhapam natappi talimpuhu’, la pa’de posa ia,

sapo’ to meada’ ia tatilenggu’ tatigesse sule lako salako-lakona.

²⁶Umba susi bua issu’ umpomangingngi’ isi anna hambu umpomapana’ mata,

susim too duka’ to busungam umpahusa’ penabanna to ussuai.

²⁷Mengkahea’ lako DEBATA mepomahendem,

sapo’ taum katuboanna to tameada’ dipondi’i.

²⁸Pahhannuanna to meada’ la umpasule kamasannangam,

sapo’ pahhannuanna to tameada’ labu’ di limbä tallam di pahupu.

²⁹UlalanNa DEBATA ussalokko’ to malolo penaba,

sapo’ napopa’de ia to ma’gau’ kadake.

³⁰To meada’ matosä’ manontom illaam botto sule lako salako-lakona,

sapo’ to tameada’ ia tamuokko’i sali isunganna.

³¹Pudu’na to meada’ umpassubum kada kakeakasam,

sapo’ lila manähhä-nähhä la dihuntu’i lao.

³²Pudu’na to meada’ naissam umpesukei tula’ mapia,

sapo’ pudu’na to tameada’ angga mebalum mata.

¹Timbangam dikanähäi nakabassi DEBATA,

sapo’ timbangam iannapi anna ia napohäe Ia.

²To malangka’ penaba ia la kasihisam,

sapo’ kakeakasam illaam ia kalena to mahempo penaba.

³To malolo penaba napatette kamahändängam penabanna,

sapo’ to ma’dua tambu’ la napa’deam kamanekoanna.

⁴Tä’um deem gunana kulle ke lambi’um allona umpasule aha’Na Puang Allataala,

sapo’ kamaloloam ullangnga’i hupatau dio mai kamateam.

⁵Kamaloloanna to tä’ deem sassainna iam too la uhhampasanni lalam katuboanna,

sapo’ to tameada’ ia la nahonnosam gau’ kadakena.

⁶To malolo penaba la nalappasam kamaloloanna,

sapo’ to ma’dua tambu’, la napungo lando soppä’na.

⁷Maka’ matem to tameada’, la pada pa’de pahhannuanna,

anna kamatohoam to nahannuam labu’ di limbä tallam di pahupu.

⁸To meada’ dilappasam dio mai kamasussaam,

anna napessullei to tameada’.

⁹Pessubungam pudu’na to tameada’ ungkadakei padanna hupatau,

sapo’ kapaissanganna to meada’ melangnga’i ia.

¹⁰Maka’ untammu hongko’ ullolongam dalle’ to meada’, la kassi tilalla’ issinna kota,

anna maka’ mate to tameada’, la sikaahhe hupatau tilalla’.

¹¹To malolo penaba napolalam tibangom pa’bottoam,

sapo’ pessubungam pudu’na to tameada’ ullumbungam lembä.

¹²Menna-menna umpetuna solana, takepikkiham ia,

sapo’ to manähä, ungkambi’ ia pudu’na.

¹³To ma’kada bu’busam, tambu’ lendom ia,

sapo’ to mala dikatappa’i, deem ia pangngannaam pakunna.

¹⁴Ianaanna tä’i deem pepungngu’na hupatau, titale bangke’ pa’bottoam,

sapo’ ianaanna budai to ma’pakilala, kende’ ia kamalinoam.

¹⁵Tilaka to umpangngindosam tau senga’,

sapo’ menna-menna moka mangngindo’ ullinoi ia kalena.

¹⁶Baine mapia penaba nalambi’ ia pa’pakasalle,

sapo’ muane ma’ila’-ila’ angga ia kulle di lino nalambi’.

¹⁷Lako to mapia penaba untendanniam kamapiaam kalena,

sapo’ lako to palampi ungkabia’ ia kalena.

¹⁸To tameada’ umpadondoi käle-käle,

sapo’ to ussoeam kamaloloam, ullolongam ia saho ma’lontongam.

¹⁹Menna-menna muanti manda’ untobe matoto’ kamaloloam, tinanda lako katuboam,

sapo’ menna-menna angga ungkähä kakadakeam, tinanda lako ia kamateam.

²⁰To ma’penaba sengko’ nakabassi DEBATA,

sapo’ to tä’ deem sassainna lingka salukatuboanna, napohäe ia DEBATA.

²¹Kannassai, to tameada’ tä’ mala tala dipahuai pa’tahungkungam,

sapo’ pessubunna to meada’ la dilangnga’i ia.

²²Umba susi antim-antim bulabam dio kalasubä babi,

susi tappa’um too baine mapia sapo’ hagi gau’.

²³Pa’pemulunna to meada’ angga kamapiaam napoleam,

sapo’ hannuanna to tameada’ angga ia aha’ napoleam.

²⁴Deem tau matutu ma’pebeem, sapo’ tuttuam tomakaka mandi,

deem tau madi’dim kadake, sapo’ tuttuam mase-mase mandi.

²⁵Menna-menna bassa’ ma’pebeem, la dipatitolloam pa’tamba’,

menna-menna si mampamoloi, la dipamoloi duka’.

²⁶Menna-menna untombom gandum,11:26 untombom gandum: Kalembasanna, deem tau battu haka pa’bulele uhhempum buda gandum aka la ma’pehandam sippi’, masuli’pi allinna mane nabalu’i. la natädo tau,

sapo’ la nalambi’ ia tamba’ lako to umbalu’i.

²⁷Menna-menna bassa’ umpeä kamapiaam, la napohäe hupatau,

sapo’ menna-menna umpogau’ kakadakeam, la kakadakeam duka’ ullambi’i.

²⁸Menna-menna uhhannuam kullena la mehonno’,

sapo’ to meada’ ia la tubo mapia sihhapam tanangam kendaum händä.

²⁹Menna-menna undake-dake pandaposanna, la ma’sapu pala’ ia;

to maho kalebu la naposabua’ to keaka’.

³⁰Bua pa’palakoanna to meada’ sihhapam kaju dipotubo buana;

menna-menna keaka’ nabulu’ to tando sau’ nabulu’ to tando dekke.

³¹Ianaanna la nalambi’ indei lino buana pa’pogausanna to meada’,

iya senga’um ia to tameada’ anna to madosa la nalambi’ duka’ buana pa’pogausanna.

¹Menna-menna umpohäe pepanännä’, umpohäe ia kapaissangam,

sapo’ menna-menna nakabassi ke ditappakadai, takepikkiham ia.

²To mapia gau’ la untammu kamapiaam penabanNa DEBATA,

sapo’ to ma’pattuju kadake la nalambi’ ia pa’tahungkunganNa.

³Maka’ deem tau angga ungkähä kakadakeam tä’ la sitontongam liu salukatuboanna,

sapo’ to meada’ ia ke’de’ matoto’ sihhapam kaju mandalam waka’na.

⁴Baine hatta’ sihhapam danga-danga tubo yabo ulunna muanena,

sapo’ baine mepakasihi’ sihhapam ia saki kahha’ umpasikatekä’ bukunna muanena.

⁵Pattujunna to meada’ umpake undu’ lollä,

sapo’ pattujunna to tameada’ angga mateko.

⁶Pessubungam pudu’na to tameada’ mebuno talemba’ mebatta tatida’,

sapo’ pessubungam pudu’na to malolo penaba melangnga’i dio mai katilakaam.

⁷To tameada’ dipadahi kapu’ lambi’ tamehä’dä’um tameata,

sapo’ pessubunna ia to meada’ tontä liu ke’de’ matoto’.

⁸Mesa tau dipuji situhu’ kakeakasanna,

sapo’ to sengko’ penaba dipetuna ia.

⁹Aha-ahangki’ disangai to bahinni’ sapo’ muampuangki’ sabua’,

anna la ussanga-sangaki’ kaleta sapo’ tasidandum kinandeta.

¹⁰To meada’ ia ullima’i manappa olo’-olo’na,

sapo’ moi ia pa’kamasena to tameada’ makahha’ toi.

¹¹Menna-menna ungkähä litä’ la buda alaam kinandena,

sapo’ menna-menna umpadondoi käle-käle takepikkiham ia.

¹²To tameada’ ungkailui pangngala malussunna to kadake gau’,

sapo’ to meada’ ia sihhapam kaju kalando waka’na tahha’ buana.

¹³To tameada’ nasambe’ kadanna,

sapo’ to meada’ ia lappa’ dio mai kamasussaam.

¹⁴To mapia pessubungam pudu’na la dipasogo’i kamapiaam,

anna to mengkähä manappa la nalambi’ bua pengkähäna.

¹⁵Ulalanna to maho kalebu nasangam ia duka’ malolo,

sapo’ to keaka’ ia umpehingngii petundam pepakilalaam.

¹⁶To maho kalebu ia madellä’ aha’na,

sapo’ to keaka’ ia tä’ umpaalai penaba pantelle.

¹⁷Menna-menna ma’tula’ malolo muundu’ ia lollä,

sapo’ sa’bi tatappa’ umbungkeko’ ia lilana.

¹⁸To ussassa’ tula’ mebuno talemba’ pessubungam pudu’na,

sapo’ tula’na ia to keaka’ mendadi tamba’ anna pamole.

¹⁹Tula’ malolo messubum dio pudu’ dikannangam liu,

sapo’ tula’ napassubum lila dibungkeko’ sappälli’ anna kaleängammi.

²⁰Angga kamanekoam illaam penabanna to umpattuju kakadakeam,

sapo’ to umpa’kadua-duai kasiolaam la masannam ia.

²¹To meada’ ia la sikambela ingganna kamasussaam,

sapo’ to tameada’ ia la sitammu liu kamasussaam.

²²Lila dibungkeko’ nakabassi ia DEBATA,

sapo’ to manontom tula’na napohäe ia DEBATA.

²³To keaka’ ia tä’ untappu’ lolo hea kapaissanganna,

sapo’ to maho ia muete’ lelem kamahoanna.

²⁴Lima bassa’ la mendadi to mampahe’,

sapo’ to busungam la dipakatu’do-tu’do ia.

²⁵Kamalallangam penaba umpalussem buku,

sapo’ tula’ mapia umpasule sumanga’ umpaende pahaja.

²⁶To meada’ umpatuhoi lalam malolo solana,

sapo’ pa’ulalanna ia to tameada’ umbaba bulim kalena.

²⁷To busungam ia inna tala deem pealanna nanasu,

sapo’ to bassa’ ia la muampuam kulle buda.

²⁸Ulalam malolo mepatinanda lako katuboam,

anna ulalam ia too tä’ mepatinanda lako kamateam.

¹Änä’ keaka’ ia umpehingngii pepanännä’na ambena,

sapo’ änä’ patelle-telle ia tä’ ma’pehingngi ke ditappakadai.

²Pessubungam pudu’na mesa tau umpasuleanni kamapiaam,

sapo’ to bali sola angga ia kamakahhasam napohäe.

³Menna-menna unjagai pudu’na, ungkambi’ kalena,

sapo’ menna-menna bä’bä’ sädä, la ullambi’ ia katilakaam.

⁴To busungam anggam mohäe bäbä, sapo’ tä’ deem napoleam,

sapo’ to bassa’ ia, dipabosa’i kapahalluanna.

⁵To meada’ ungkabassi tula’ tatappa’,

sapo’ to tameada’ mepakasihi’ anna umbosii sanganna.

⁶Kamaloloam ungkambi’ lingkana to malolo penaba,

sapo’ panggauam kadake ia umpasuleam katilakaam to madosa.

⁷Deem tau ma’todeem-deem, sapo’ tä’ di deem akanna,

anna deem tau umpopemase-mase kalena, sapo’ buda hi kullena.

⁸Kulle napake mesa tau nasolongam sungnga’na,

sapo’ to mase-mase ia tala deem nalambi’ pa’pakahea’.

⁹Katuboanna to meada’ sihhapam lampu pangkähhä masissä’,

sapo’ katuboanna to tameada’ sihhapam ia lampu la pi’de.

¹⁰Kamalangkasam penaba umpakende’ kasipengkaam,

sapo’ to umpehingngii pepatuduam deem ia kakeakasanna.

¹¹Kulle diala malussu puhu’ tämbätä,

sapo’ kulle dipadukku dipotomakaka ia.

¹²Ianaanna tä’i sule lako pangnginaba-naba, umpomasussa penaba,

sapo’ ianaanna sule lakoi pa’pemulu, sihhapam kaju dipotubo buana.

¹³Menna-menna umpa’bahinni’i pepatuduam, la nalambi’ buana,

sapo’ menna-menna muanti manda’ untobe matoto’ pahenta, la natahima bala’na.

¹⁴Pepatuduanna to keaka’ umpasule katuboam mapia,

nasuhum mepalappa’ dio mai pepungona kamateam.

¹⁵To keaka’ la dipa’kasallei,

sapo’ pa’ulalanna to bali sola umpasuleam katilakaam kalena.

¹⁶To keaka’ umpake kapaissanganna ma’palako,

sapo’ to maho ia untantam kamahoanna.

¹⁷Pesua tameada’ nalambi’ katilakaam,

sapo’ pesua majulu’ tipakuli tau tula’na.

¹⁸Kapemase-maseam anna sanga kadake ullambi’ to umpa’bahinni’i pepanännä’,

sapo’ menna-menna ma’pehingngi ke ditappakadai la dipa’kasallei ia.

¹⁹Pa’pemulu sule lako umpasule sumanga’ umpaende pahaja,

sapo’ umpasikambela kale kakadakeam pangkahidi’na ia to maho.

²⁰Menna-menna sola to keaka’ la keaka’ duka’,

sapo’ menna-menna sola to maho la tilaka ia.

²¹To madosa sitammu liu kamasussaam,

sapo’ to meada’ ia silambi’ liu kamapiaam.

²²To mapia penaba la untampeam mana’ pessubunna,

sapo’ katomakakaanna to madosa la ma’tombom lako to meada’.

²³Moinna anna la umpakende’ alaam kinande bela’na to mase-mase,

sapo’ tä’ siam la napohiakanna napobua’ to umpa’lullu’ undu’ lollä.

²⁴Menna-menna ma’pakamaja sumändä’, setonganna ungkahidi’ änä’na,

sapo’ menna-menna umpakamaja änä’na, nasämbä’i ke pahallui.

²⁵To meada’ ia mangngande kahubem mebengngi’,

sapo’ to tameada’ ia mokobe-kobeam.

¹Baine keaka’ untampo punti pandaposanna,

sapo’ baine to maho ma’kale ia ungkadakei pandaposanna.

²Menna-menna malolo lingka salukatuboanna, mengkahea’ längäm DEBATA,

sapo’ menna-menna sala’ lalam, umpa’bahinni’i ia DEBATA.

³To maho kalebu ia nasambe’ tula’na,

sapo’ to keaka’ ia pudu’na umpasikambelai kakadakeam.

⁴Ianaanna tä’i deem sapim, iya mapattim balatana,

sapo’ ianaanna deenni sapim ma’tengko, buda alaam kinande.

⁵Sa’bi matoto’ ma’tula’ setappa’,

sapo’ sa’bi tatappa’ angga ia kaägä’-ägä’.

⁶To mantelle umpeä kakeakasam, sapo’ umba opa la nalambi’,

sapo’ to kepikkiham, masimpam ia ullolongam kapaissangam.

⁷Pasikambelai kalemu to maho,

aka tä’ ia deem kapaissangam lemba’ dio pudu’na la mala umpehapanni.

⁸Kakeakasanna to keakkalam umpaissannii lalam umba la naola,

sapo’ to maho ia napasalanduam kamahoanna.

⁹To maho kalebu ia umpa’bahinni’i tunuam pebasei dosa,

sapo’ to malolo penaba ia dadi kamapiaam illaam alla’-alla’na.

¹⁰Pi’di’ penabanna mesa tau anggam ia duka’ kalena muissanni,

anna kamasannanganna tä’ mala nasi’dim tau senga’.

¹¹Banuanna to tameada’ la titale bangke’,

sapo’ kemana to malolo penaba la ma’tällä matoosam ma’abo’ mahapuam.

¹²Deem lalam nasanga hupatau malolo,

sapo’ dio tämpä’na tinanda lako kamateam.

¹³Mala too metaba tau diita, sapo’ setonganna deem siam pi’di’ penaba,

anna katilallasam mala nabala’i kamasussaam.

¹⁴To umpemboko’i Debata la nalambi’ pa’dallena,

anna to mapia penaba la nalambi’ buana gau’ mapianna.

¹⁵To saidi’ kapaissanganna ungkatappa’i asam ia ingganna tula’,

sapo’ to keaka’ ia napikki’ yolo mane mentekkai.

¹⁶To keaka’ napaela’ ma’palako anna umpasikambela kalena kakadakeam,

sapo’ to maho ia ma’palako sihha’ anna ma’pekadommi’.

¹⁷Menna-menna lette aha’, ma’gau’ to maho,

anna menna-menna ma’pattuju kadake nakabassi tau.

¹⁸To saidi’ kapaissanganna umpokaponam tapuppu’ kamahoam,

sapo’ to keaka’ ia sihhapam umpa’songko’ kahajaam kapaissangam.

¹⁹To kadake gau’ ma’udum guntu’ dio olona to mapia penaba;

to tameada’ ma’udum guntu’ dio olo ba’bana to meada’.

²⁰To mase-mase nakabassi moi sola-solana,

sapo’ to makaka ia buda solana.

²¹Menna-menna umpetuna solana, madosa ia,

sapo’ maupa’ anna katambasam to uhhäntängam bua to mase-mase.

²²Tä’ daka tia bulim to umpattuju kakadakeam?

Sapo’ menna-menna umpattuju kamapiaam la untammu pangkaha’ pa’kamase anna kamanontongam.

²³Mengkähä kahha’ kembua mapia,

sapo’ pelamboho bäbä tula’ umpasule kapemase-maseam.

²⁴To keaka’ ia umpa’songko’ kahajaam katomakakaanna;

sapo’ to maho ia umpa’tali kamahoanna.

²⁵Sa’bi malolo ullappasam sungnga’ dio mai kamateam,

sapo’ sa’bi tatappa’ uhhonnosam solana.

²⁶Mengkahea’ längäm DEBATA umpahapa’ penaba,

anna mendadi hindim batunna papa uhunna pandadiam.

²⁷Mengkahea’ längäm DEBATA umpasule katuboam mapia,

nasuhum mepalappa’ dio mai pepungona kamateam.

²⁸Ianaanna budai pakka’ titande tomahaja,

sapo’ ianaanna pa’dei pakka’ pa’de hapam to pebaba.

²⁹Menna-menna ponno sa’baha’, mandalam pikkihanna,

sapo’ menna-menna pa’keaha’, umpatampanni kamahoanna.

³⁰Masannam penaba umpomapia pa’kaleam,

sapo’ sihi ate umpasikatekä’ buku.

³¹Menna-menna undahha to mase-mase, umpa’bahinni’i To metampana,

sapo’ menna-menna uhhäntängam bua to mehio-hio, umpa’kasallei ia To metampa.

³²To tameada’ dipembussusam natumä gau’ kadakena,

sapo’ to meada’ ia tihindim batu tipapa uhu sule lako matena.

³³Kakeakasam tianna mana’ illaam penabanna to kepikkiham,

sapo’ tala deem ia kende’ illaam penabanna to maho.

³⁴Kamaloloam umpatitande sanganna pa’lembängam,

sapo’ dosa ia untullungam lembä.

³⁵Tomahaja umpohäe sabua’ keaka’,

sapo’ napahuai ia aha’na lako to mepakasihi’.

¹Pentimba’ mahambam malute muoppo’ aha’,

sapo’ pentimba’ mepatei kada umpakende’ aha’.

²Pessubungam pudu’na to keaka’ ungkembuaam kapaissangam umpatiala inaba,

sapo’ tappaam pudu’na to maho angga ia untantam kamahoam.

³Ingganna ongeam nalampa’-lampa’i asam DEBATA,

anna ummata-matai to kadake gau’ anna to mapia gau’.

⁴Ingganna tula’ malute sihhapam kaju mepatubo buana,

sapo’ tula’ mateko mepi’di’ penaba mepatippallem bua.

⁵To maho kalebu untumpu pala’ pepanännä’ ambena,

sapo’ menna-menna untahima mapia ke ditappakadai keaka’ ia.

⁶Illaam banuanna to meada’ buda ebangam ma’mata-mata,

sapo’ pangngala malussunna to tameada’ umpakende’ kamasussaam.

⁷Pessubungam pudu’na to keaka’ muambo’ kapaissangam,

sapo’ tä’ ia susi lalam penabanna to maho.

⁸Tunuanna to tameada’ nakabassi DEBATA,

sapo’ sambajanna to malolo penaba napohä’di’ Ia.

⁹Lingka salukatuboanna to tameada’ nakabassi DEBATA,

sapo’ umpake pangkaha’ pa’kamase lako to umpa’buda-budai kamaloloam.

¹⁰Pesämbä’ kahha’ dipalambi’iam to sala’ lalam,

anna menna-menna nakabassi ke ditappakadai la napokattu sungnga’.

¹¹Nalampa’-lampa’i DEBATA kaliane anitu anna lembä bolom,

iya senga’pa ia issi penabanna hupatau!

¹²To patelle moka ditappakadai;

tanaaku umpellambi’i to keaka’.

¹³Penaba tilalla’ tandaam dio lindo malute,

sapo’ ianaanna masussai penaba umpalussem buku.

¹⁴Lalam penabanna to kepikkiham umpameä kapaissangam,

sapo’ pudu’na to maho angga ia ungkontalam kamahoam.

¹⁵Allo salukatuboanna to masussa tä’ deem sipopenaba penabanna,

sapo’ to masannam penaba anggasanna liu ia ma’hame-hame.

¹⁶Aham saidi’ kulle sapo’ mengkahea’ tau dio oloNa DEBATA,

anna la buda kulle sapo’ mahussa penaba.

¹⁷Aham tau muande daum kaju sapo’ siolaam tau,

anna la muande bale sapo’ sipemboko’-bokosam tau.

¹⁸To pa’keaha’ umpakende’ kasipengkaam,

sapo’ to ponno sa’baha’ umpa’dei kasipengkaam.

¹⁹Lingka salukatuboanna to busungam sihhapam lalam nakapu’ duhi,

sapo’ lingka salukatuboanna to malolo penaba mahampa’ ia tä’ deem laba-labaam.

²⁰Änä’ keaka’ umpasundede buana ambena,

sapo’ änä’ to maho umpa’bahinni’i indona.

²¹Kamahoam pa’pohäena ia to takepikkiham,

sapo’ to manähä ia muundu’ lalam malolo.

²²Ianaanna tä’i deem tula’ pepakilalaam, inna tä’ sia mala sule lako pattuju penaba,

sapo’ ianaanna budai to mepakilala sule lako ia pattuju penaba.

²³Mesa tau kassi tilalla’ aka uhhua kada pentimba’na,

anna tä’ deem pada samapia ke dipaokko’i okkosanna tula’!

²⁴Ma’palulängäm ia lalam katuboanna to keaka’,

anna mala sikambela dio mai kaliane anitu.

²⁵Banuanna to malangka’ penaba nataleam DEBATA,

sapo’ attasa’na mesa to balu baine tanahumbu-humbu ia tanaseho-seho.

²⁶Pattujunna to tameada’ nakabassi DEBATA,

sapo’ tula’ mahambam malute tä’ deem pada samahändä dio oloNa.

²⁷Menna-menna lando soppä’ lako pangngala buni, ungkadakei pandaposanna,

sapo’ menna-menna ungkabassi doi’ passahoma’dinni la tubo ia.

²⁸To meada’ napikki’ yolo mane mentimba’i,

sapo’ tappaam pudu’na to tameada’ ussembu’ ia tula’ kadake.

²⁹DEBATA umpemboko’i to tameada’,

sapo’ pelauanna to meada’ nahingngiam Ia.

³⁰Lindo malute umpatiala inaba,

anna kaheba mapia umpasule buku.

³¹To umpatananni talinga pantappakadai mepatubo

la tohho illaam alla’-alla’na to keaka’.

³²Menna-menna umpa’talingalenda’i pepanännä’ umpomatuna kalena,

sapo’ menna-menna ma’pehingngi ke ditappakadai ullolongam ia kamanähängam.

³³Mengkahea’ längäm DEBATA mesa pepanännä’ mepakeaka’,

anna kamahempoam penaba pentoosanna pa’pakasalle.

¹Hupatau mala ma’pattuju illaam penabanna,

sapo’ la huanna pessubungam pudu’, DEBATA kabuttuanna.

²Ingganna lingka salukatuboanna hupatau malolo situhu’ passangainna,

sapo’ DEBATA ussangai issi penabanna.

³Lentem palibui pa’palakoammu lako DEBATA,

anna mala sule lako asam pattuju penabammu.

⁴DEBATA umpadadi ingganna-ingganna sia situhu’ la kagunaanna simesa-mesa;

peangga to tameada’ napadadi la ullambi’ katilakaam.

⁵Ingganna to malangka’ penaba nakabassi ia DEBATA;

mannassa anna tä’i la lappa’ dio mai pa’tahungkungam.

⁶To umpake pangkaha’ pa’kamase anna manontom la diampunni kasalaanna,

anna to mengkahea’ längäm DEBATA la ungkambela kakadakeam.

⁷Ianaanna napohäei DEBATA lingka salukatuboanna mesa tau,

iya peangga balinna malapi napasikapiai.

⁸Aham saidi’ pallolongam sapo’ diala malolo,

anna la buda sapo’ diala malussu.

⁹Hupatau mala umpattuju lingka salukatuboanna,

sapo’ DEBATA untuhoanni lalam la naolanna.

¹⁰Tula’ buttu di Puang Allataala messubum dio pudu’na tomahaja,

lambi’ tä’ deem ma’bisaha hempe’.

¹¹Timbangam sola pegantam malolo DEBATA kabuttuanna,

anna ingganna batu timbangam sitonda lambu-lambusanna Ia umpa’tantui mabanda’na.

¹²Umpogau’ gau’na to tameada’ nakabassi tomahaja,

aka okkosam kahajaanna tomahaja nasalli’ kamaloloam.

¹³Pudu’ umpassubum tula’ malolo umpatiala inabanna tomahaja,

anna to untula’ tappa’ anna sindoho napohäe.

¹⁴Aha’na tomahaja sihhapam to la mepakattu sungnga’,

sapo’ mala ia naoppo’ to keaka’.

¹⁵Lindo malutena tomahaja umbaba katuboam,

anna kamapiaam penabanna sihhapam gabum umpatuhum uham wattu kulla’.

¹⁶Muampuam kakeakasam kedo ia anna la bulabam,

muampuam pikkiham keangga’ puha ia anna la muampuam peha’.

¹⁷Lingkana to malolo penaba ungkambela kakadakeam,

anna menna-menna unjagai lingkana, ungkambi’ sungnga’na.

¹⁸Läjä tandu’ longkom palasa umpasule katilakaam,

anna malangka’ penaba umpakende’ kasägängam.

¹⁹Aham tau umpopengkadio kale sola to mase-mase,

anna la sola to malangka’ penaba umbahe-bahe pamuhunna.

²⁰Menna-menna umpaillaam penaba pepatuduam la silambi’ kamapiaam,

maupa’ anna katambasam to mahannu längäm DEBATA.

²¹To keaka’ disangai to kepikkiham,

anna to mammi’ tadiande tula’na mepakannam sule lako lamba’ beluä’.

²²Kakeakasam sihhapam kalimbuä tamatti’ umpatubo to muampuanni,

sapo’ to maho kalebu ia nasussai kamahoanna.

²³Pikkihanna to keaka’ ungkembuaam tula’ kakeakasam,

anna pessubungam pudu’na mepakannam sule lako lamba’ beluä’.

²⁴Tula’ mellolä minnä’ sihhapam duho ma’nini,

umpasundede bua anna umpasule buku.

²⁵Deem lalam nasanga hupatau malolo,

sapo’ dio tämpä’na tinanda lako kamateam.

²⁶Issiam tambu’ umpatigaha’ mesa tau mengkähä,

katamaam bahoko mesasum muasai pala’.

²⁷To takeguna umpa’gahoängam solana,

anna pessubungam pudu’na anggasanna api la meä’bäi.

²⁸To mateko umpakende’ kasipengkaam,

anna to ma’pasihuso umpasisalla to sangkalamma’.

²⁹To makahha’ kadake ungkeloi padanna,

anna nababai lako lalam kasägängam.

³⁰Menna-menna umpopangka’bi’ bulu matanna umpattuju kakadakeam;

menna-menna metaba-taba tumbihim deem pattuju kadakena.

³¹Ubam sihhapam salokokati palelo bulabam,

dilolongam aka muundu’ lalam kamaloloam.

³²To ponno sa’baha’ keangga’ puha ia anna la mesa pa’bahani,

anna to ungkuasai kalena mapia puha ia anna la to ungkatama mesa kota.

³³Anna mala diissam lemba’na mesa aka-aka, iya diundi,

sapo’ DEBATA ia naissam loppo’um lemba’na ingganna-ingganna sia.

¹Aham tia saleppo andoha’ kaju bake’ diande sapo’ masannam penaba,

anna la muande bale sapo’ sipengka-pengka tau illaam dapo’.

²Sabua’ keaka’ umpahe’ leko’ änä’ puä to mepakasihi’,

anna la dimana’ duka’ susi solasubunna indo änä’ puä to mepakasihi’.

³Pamuttu dipammahehei peha’ anna api dipallälläi bulabam,

sapo’ DEBATA ia umpangngitai penaba.

⁴To kadake gau’ angga tula’ kadake napehingngii,

to ma’tula’ tatappa’ angga tula’ la metullungam napatananni talinga.

⁵Menna-menna untabu-tabuam tula’ to mase-mase umpetuna To metampana;

menna-menna umpetaba-tabai to masussa tä’ la lappa’ dio mai pa’tahungkungam.

⁶Änä’ ampo sihhapam danga-danga tubo yabo ulunna mentu’na tomatua,

tomatua napobunga-bunga mentu’na änä’.

⁷Tau hembu’ tä’ sipäto’ ma’tula’ tongam,

senga’pa ia sendana taditepä’ tä’ sipäto’ la umpokada tula’ tatappa’.

⁸Doi’ passahoma’dinni naangga’ pekelo to umpebeenni,

ia natingngajoi, ia naongei pakanna.

⁹Menna-menna nabela muamma’ kasalaanna solana, umpeä passiolaam,

sapo’ menna-menna ungkahoi pa’tappiam bosi, undake-dake ia kasilombungam mapia.

¹⁰Mangngande puha ia pissam untappakadai to kepikkiham,

anna la umpuppu’iam pesämbä’ to maho.

¹¹To kadake gau’ angga ia pabali-bali,

sapo’ la dipasuleam duka’ to makahha’ kadake.

¹²Aham asu keänä’17:12 asu keänä’: Illaam basa Ibrani naua ke basa Bambanni: <<Beruang bihä umpeä änä’na aka pa’de/bulim>>. disitammuam,

anna la to maho sipangngula’ kamahoanna.

¹³Menna-menna dileba’ kumba’ meleba’ di batu,

la nakessehäi ia kakadakeam dapo’na.

¹⁴Umpakende’ kasipengkaam sihhapam umboka’i panambuam;

dadi, podo’i tula’mu sumala tä’pi kende’ kasipengkaam.

¹⁵Ummaloloam to tameada’ anna umpasala to meada’,

bassim nakabassi DEBATA.

¹⁶Aka gunana doi’ la napake to maho la naalliam kakeakasam,

aka tä’ siam deem pikkiham mapianna?

¹⁷Sangkalamma’ ia tä’ deem malele pa’kamasena,

anna siundu’ ia mampamoloi liu illaam kamasussaam.

¹⁸To takepikkiham ma’dandi la ia melluä sambu’ umbajasam indanna solana,

anna umpangngindosam solana.

¹⁹Menna-menna umpohäe kasipengkaam, napohäe duka’ mantekka kalo’ mallambam mata uwai;

menna-menna umpa’pakatäjä’-täjäsam kadeenganna umpa’gahoängam kalena.

²⁰Menna-menna sengko’ penaba tä’ deem la silambi’ kasannangam,

menna-menna umbungkeko’ lilana la ullambi’ katilakaam.

²¹Menna-menna siampuam änä’ to maho la ussi’dim pi’di’ penaba;

menna-menna umpoänä’ tau hembu’ tä’ deem la meala inaba.

²²Penaba tilalla’ sihhapam pakuli masahhu’,

sapo’ ianaanna masussai penaba umpalussem buku.

²³To tameada’ untahima buni doi’ passahoma’dinni,

lambi’ ma’bisaha hempe’.

²⁴To kepikkiham angga kakeakasam napasatutui pikkihanna,

sapo’ to maho ia angga pelamboho pikkihanna ussamba lino.

²⁵Änä’ to maho umpi’di’ penaba ambena,

anna umpomasussa penaba indona.

²⁶Tä’ sihatam la umpassala to meada’,

tä’ toi sipäto’ la untappai lima to ma’penaba bulabam.

²⁷To deem kapaissanganna ungkambi’ pudu’na,

to manähä matänä’ penaba.

²⁸Mesa to maho kalebu la disaba’ disanga to keaka’ ke mengkamma’i,

anna la disaba’ disanga to kepikkiham ke muammu’i pudu’na.

¹To umpasähä’ kalena, umpoelo’ elo’na umpodakkula dakkulanna,

ingganna pikkiham mapia natelim asam.

²To maho tadiala tä’ umpohäe kapaissangam,

anggam napohäe umpassubum pikkiham kalena.

³Maka’ kende’ gau’ kadake, kende’ duka’ pa’petuna,

maka’ kende’ gau’ mesihi’-sihi’, kende’ duka’ pantelle.

⁴Pessubungam pudu’na hupatau sihhapam limbä mandalam,

sapo’ kabuttuanna kakeakasam sihhapam salu mellao allo bengi.

⁵Tä’ mapia mualaangam to tameada’,

anna umbisaha hempe’ to meada’.

⁶Lengko lilana to maho umpakende’ kasipengkaam,

anna tappaam pudu’na ussaho pesämbä’.

⁷Tappaam pudu’na to maho umpasuleanni katilakaam,

lengko lilana sihhapam poja bendo’na samelum buajana.

⁸Tula’na to ma’kada bu’busam mammi’ tadiande,

kannam sule lako lamba’ beluä’.

⁹To busungam mengkähä

yabo lemba’ tasitolam to ma’dake-dake.

¹⁰SanganNa DEBATA sihhapam bettem matoto’,

lu etam too to meada’ ma’sahha’ anna ussi’dingam kamalinoam.

¹¹To makaka ia kullena napobettem batu,

anna sihhapam bala tembo’ malangka’ situhu’ passangainna.

¹²Kamalangkasam penaba umpasule katilakaam,

sapo’ kamahempoam penaba umpakende’ pa’pakasalle.

¹³Menna-menna uhhopä’ tula’,

umpa’patandaam kamahoanna anna umpakasihi’ kalena.

¹⁴To matoho penaba tä’ napaju’ sakinna,

sapo’ mennangka la umbelai untohoi saki penaba?

¹⁵To kepikkiham umpemulu kapaissangam,

to keaka’ umpatanam talinganna lako kapaissangam.

¹⁶Pa’pebeenna mesa tau iam too umbukkaanni lalam,

anna ia umpatinandai lako olona to kasalle.

¹⁷Pa’huttu’na to ma’kada sabali tappa’ dihingngi,

sapo’ sulepi tia balinna mane diissanni tappa’ si’da haka tä’ daka.

¹⁸Undi dipake umpuhai kasipengkaam,

anna umpasikapiai dua bassim to kasalle.

¹⁹Mapahhi’ puha ia untingngajo siundu’ta to puha dipi’di’ penaba anna la bettem matoto’na kota;

kasipengkaam mebala sihhapam ba’ba bettem disulu’i.

²⁰Mesa tau nadea’i pessubungam pudu’na,

napadea’ lengko lilana.

²¹Lila mala mebaba lako katuboam anna mala mebaba lako kamateam,

menna-menna buda tula’ la nalambi’ buana.

²²Menna-menna silambi’ baine hatta’, kehongko’ ia,

anna ullambi’ pa’mana’ DEBATA.

²³Mengkahumase to mase-mase melau,

sapo’ natimba’ kadake hi to makaka.

²⁴Deem tau uhhonnosam solana,

sapo’ deem duka’ sangkalamma’ kalando puha ia anna la siundu’ta.

¹Aham to mase-mase sapo’ malolo lingka salukatuboanna,

anna la dähhi’ pudu’ to maho polepi.

²Kamohäeam tä’ siba’ba’ kapaissangam tä’ mapia;

ma’sahha’ takehubä’ pembuda sala’ lao.

³Kamahoanna hupatau umbaba bulinni,

sapo’ DEBATA hi nasosso.

⁴To makaka ia tuttuam buda solana,

sapo’ to mase-mase ia nasipellei-pellei solana.

⁵Sa’bi tatappa’ inna tä’ sia la lappa’ dio mai pa’tahungkungam,

anna to umpobibi tula’ tatappa’ saditahungkunnam ia.

⁶Buda tau muala penabanna to matutu,

ingganna tau maelo’ sangkalamma’ to bassa’ ma’pebeem.

⁷To mase-mase nakabassi asam solasubunna,

senga’pa ia sangkalamma’na, napellei asam lao.

Naula’ siapi mengkaala,

sapo’ umba opa la nalambi’.

⁸Menna-menna undaka’ kakeakasam, ungkaha’i anna ungkamasei kalena;

menna-menna muanti manda’ untobe matoto’ kamanähängam, ullolongam hongko’.

⁹Sa’bi tatappa’ inna tä’ sia la lappa’ dio mai pa’tahungkungam,

anna to umpobibi tula’ tatappa’ la ullambi’ katilakaam.

¹⁰Tä’ sipäto’ to maho la bosa’ katuboanna,

dapaka ia mesa sabua’ la umpahe’ to kasalle.

¹¹Kakeakasam umpaponno sa’baha’ mesa tau,

anna dipa’kasallei aka nabela muamma’ kasalaam.

¹²Aha’na tomahaja anggasanna pa’ehhenna singa kabahanianna,

sapo’ kamapiaam penabanna sihhapam langullo umbossi’i humpu’.

¹³Änä’ to maho umpasuleam katilakaam ambena,

anna baine pa’mämmängam susi uham mentalodo.

¹⁴Banua sola kulle pa’mana’na tomatua,

sapo’ baine keaka’ ia pa’mana’ DEBATA.

¹⁵To busungam angga mamma’na napakahua,

anna to makuttu la nalambi’ kakobeam.

¹⁶Menna-menna muanti manda’ untobe matoto’ paondom ungkaha’i sungnga’na,

sapo’ menna-menna umpa’bahinni’i, la mate ia.

¹⁷Menna-menna uhhäntängam bua to mase-mase, umpatondoi DEBATA;

Ia la naongei buttu pakkesullena.

¹⁸Sämbä’i änä’mu sumala wattunnapi,

ianaanna tä’i, iam tia isanga umpemuluam katilakaam.

¹⁹To pa’keaha’ la nalambi’ pa’dallena,

maka’ la umpamoloi, la tuttuam tama kakajuanna pa’keaha’na.

²⁰Patanannii talinga petundam pepakilalaam anna pehingngiiko pepanännä’,

anna mendadiko to keaka’ allo di dako’na.

²¹Buda pattuju penabanna hupatau,

sapo’ DEBATA umpa’tantui kasulelakoanna.

²²Pangkaha’ pa’kamase sola kamanontongam dipemmitai lako mesa tau;

aham to mase-mase anna la mesa to si ma’tula’ tatappa’.

²³Mengkahea’ längäm Puang Allataala ullolongam katuboam,

lambi’ happa’ mamma’na puli bengi, tatikkedu’ tatigiam.

²⁴To busungam la mehhaku’ mandam dokko pihim,

sapo’ moi messimpo nakapahhisam toi.

²⁵Sämbä’i to patelle, anna mala keaka’ to saidi’ kapaissanganna;

tappakadai to kepikkiham, anna mala tuttuam buda kapaissanganna.

²⁶Änä’ to muala tangngelo’na kullena ambena anna ussua lao indona,

umpakasihi’ kalena anna umbosii sanganna.

²⁷O änä’ku, ianaanna tä’i muaku si umpehingngii pepanännä’,

tä’ mala tala umpelleiko ulalam diona kapaissangam.

²⁸Sa’bi tatappa’ umpa’pa’de undu’ lollä,

pudu’na to tameada’ muande bo’bo’ kakadakeam.

²⁹Tokam pa’tahungkungam lako to mantelle,

anna pesämbä’ la dipaabanniam boko’na to maho.

¹To pa’anggur angga nakähä mantelle, anna to pangngihu’ umpakende’ kahukkaam,

tä’ ia keaka’ to napalimpu-limpu pangngihu’na.

²Aha’ kasallena tomahaja anggasanna pa’ehhenna singa kabahanianna,

menna-menna umpakendesanni aha’na ussupai kalena.

³Keangga’ mesa tau ke umpasikambelai kalena kasipengkaam,

sapo’ to maho kalebu ia napohäe massitimba’.

⁴To busungam tä’ naaku ma’tengko la nabaha’ba’i ke wattu pengkähänganni;

tappana pepaheam katangoa-ngoa hekko’ ia.

⁵Issi penabanna hupatau sihhapam limbä mandalam,

sapo’ mala ia nasillinni to manähä.

⁶Buda tau muangga’ kalena to siampuam pangkaha’ pa’kamase,

sapo’ to manontom si’da sia mennangka la ullambi’i?

⁷To meada’ mahändä pa’palakoanna

maupa’ anna katambasam pessubunna.

⁸Tomahaja to muokko’ yabo okkosam pahhottosanna,

ussangkamata-matai ingganna kakadakeam.

⁹Mennangka tau la mala ma’kada naua: <<Puham kupomaseho pindam penabangku,

kupomaunna’ pebajoam kaleku dio mai dosa>>?

¹⁰To umpake dua hupa datim anna dua hupa lite’,

bassim nakabassi DEBATA.

¹¹Iapi mane diissanni sipa’na mesa tau moi duka’ änä’-änä’ ke diita diom pakkedoanna,

mapia haka anna malolo pa’palakoanna tä’ daka.

¹²Talinga dipake ma’pehingngi anna mata dipake ma’petua’,

bassim DEBATA umpadeenni.

¹³Daa umpemammi’i mamma’ indana memase-maseko,

pomasissä’i matammu ammu bosa’ kinande.

¹⁴To mangngalli si mantaba’ naua: <<Masuli’ sugali’, taia allinna.>>

sapo’ puhai too naalli, memboko’um muäde-äde.

¹⁵Abana keangga’ bulabam sola batu permata,

sapo’ keangga’ puha ia pudu’ umpassubum tula’ kapaissangam.

¹⁶Menna-menna umpangngindosam tau senga’, sihatam dita’ga’ jubana,

sipäto’ dipatohho pohebana sulle bala’na tau ia too.

¹⁷Kinande diala malussu mammi’ disi’dim,

sapo’ katampasanna hapam tau muamma’ pahe kebulu.

¹⁸Mala sule lako pattuju ke deenni petundam pepakilalaam,

iam too anna untingngajo pa’bundusam pahallu deem to mepakilala.

¹⁹Menna-menna angga untula’-tula’ kadake solana, to ma’kada bu’busam ia,

iam too anna tä’ungko la siala penaba to ma’bibi-bibi.

²⁰Menna-menna untädo ambena battu haka indona,

katuboanna la sihhapam lampu pi’de illaam wattu tängä bengi.20:20 sihhapam lampu pi’de: Batai duka’ Kal. 21:17.

²¹Mana’ diaala yolo taiapi wattunna,

katampasam tä’ katambasam.

²²Pissa’-pissa’ ai la muua: <<La umpalaoä’ gau’ situmpu.>>

Paihandam DEBATA-i, anna Ia ham ma’ulalam.

²³To umpake dua hupa datim nakabassi DEBATA,

anna petimbam tamalolo tä’ mapia.

²⁴Lingka salukatuboanna hupatau DEBATA umpa’tantui,

dadi, la maakam ia susi hupatau la muissam lingka salukatuboanna?

²⁵Umpaalai tau ulä kale ke masimpanni tau la tidom-tidom pudu’ lako DEBATA,

anna mane manosso tau pole’ pa’ibundianna.

²⁶Tomahaja keaka’ uhhisi lao to tameada’,

anna napalelu’i legenna pallullu’ gandum.

²⁷Penabanna hupatau mendadi balloNa DEBATA,

napoballo umpahessa unä’ penabanna hupatau.

²⁸Pangkaha’ pa’kamase takattu tintim tamondo’ sahuham anna kamanontongam ungkambi’ tomahaja,

anna pangkaha’ pa’kamase napake ussamba’ umpasukum okkosam kahajaanna.

²⁹Kamatohoanna änä’ gassim nasuhum dikapilla’i,

anna ubanna tomatua nasuhum dipa’kasallei.

³⁰Pesämbä’ mala umpa’dei gau’ kadake,

anna pesämbä’ ube umpapiai tanangam penaba.

¹Penabanna tomahaja sihhapam pellaona uwai salu, DEBATA muäto’i,

iai too napohäeNa iam napa’paolai.

²Ingganna lingka salukatuboanna hupatau malolo situhu’ passangainna,

sapo’ DEBATA hi tia ussangai issi penaba.

³Umpalako kamaloloam anna undu’ lollä,

napakedo ia DEBATA anna la tunuam.

⁴Mata muola yabo anna penaba malangka’,

umballoi to tameada’, anna ia too dosa.

⁵Pattujunna to bassa’ angga kabosasam napoleam,

sapo’ menna-menna tipandaka-daka umpasuleam kalena kapemase-maseam.

⁶Kulle disalu nähä

sihhapam uwai dipalimbä anna sipuli sungnga’.

⁷To tameada’ nahui’ sesse’ kamakahhasanna,

aka silele tanaaku ussoeam undu’ lollä.

⁸Lingkana to kasalaam lu lako lu dio mai,

sapo’ to malolo ia malollä pa’palakoanna.

⁹Aham tau yabo papa banua21:9 papa banua: Banuanna to Israel si mahante papana, iya mala si diongei tohho, sapo’ meuham mealloi.

anna la sibanuai baine pa’mämmängam.

¹⁰Pikkihanna to tameada’ angga umpemulu kakadakeam,

anna tä’ muampuam pa’häntängam bua lako padanna.

¹¹Ianaanna ditahungkunni to mantelle, mendadi keaka’ ia to saidi’ kapaissanganna,

sapo’ ianaanna dipatudui to keaka’, la kehängäm kapaissanganna.

¹²To Handam Malolo umpeninim banuanna to tameada’,

anna napembussusanni lambi’ tilaka.

¹³Menna-menna tä’ umposamele pengkaloa’na to mase-mase,

tä’ la ditimba’i ke deenni mengkaala.

¹⁴Pa’pebeem dipasisi’i muoppo’ aha’,

doi’ passahoma’dinni dibeem buni umpamehe aha’ kasalle.

¹⁵Ussoeam undu’ lollä pa’pohäena to meada’,

sapo’ pangkahea’na ia to tameada’.

¹⁶To umpellei ulalam kakeakasam,

la tihutu’ lako kaliane anitu.

¹⁷To angga ma’masannam-sannam ma’doä la memase-mase;

to angga ussussui minnä’-minnä’ kalena anna pa’anggur la sikambela ia katomakakaam.

¹⁸To tameada’ umpessulle pambo’bä’na to meada’,

anna to uhhonnosam solana umpembala’ ongeanna to malolo penaba.

¹⁹Aham tau tohho lako pohiallasam,

anna la tohho sola baine pa’mämmängam anna pa’keaha’.

²⁰Deem kulle keangga’ anna minnä’ buda illaam banuanna to keaka’,

sapo’ to maho ia untasu-tasu kullena.

²¹Menna-menna umpameä kamaloloam anna siampuam pangkaha’ pa’kamase,

la ullambi’ katuboam, kamaloloam anna kamatandeam.

²²To keaka’ mala unteka’i tembo’na kota nahonda tentaha pa’bahani,

anna nahuppu’-huppu’ bettenna to nahannuam.

²³Menna-menna ungkambi’ pudu’na anna unjagai lilana,

kalembasanna ungkambi’ kalena dio mai sussa tanggana-gana.

²⁴To malangka’ penaba anna ussanga-sanga kalena, diuaam to mantelle,

angga makahha’ batu pa’palakoanna.

²⁵To busungam mengkähä napalenna’ kamohäeam sugali’na,

aka mabanda’ batu limanna mengkähä.

²⁶Lilu allo angga kata’ba-ta’ba penabanna,

sapo’ to meada’ ia ma’pebeem sola unä’ penaba.

²⁷Tunuanna to tameada’ nakabassi DEBATA,

la’bi-la’binna ke sitondai pikki’ kadake.

²⁸Sa’bi tatappa’ la ditahungkum,

sapo’ sa’bi malolo dipabäi liu ia ma’tula’.

²⁹To tameada’ ia lindo batu,

sapo’ to malolo penaba ia napikki’ yolo mane mentekkai.

³⁰Tä’ deem kakeakasam, tä’ deem kamanähängam,

anna tä’ deem petundam pepakilalaam la mala umpentaloi DEBATA.

³¹Daham dipapohebai la mentama pa’bundusam,

sapo’ kapataloam ia dio pala’ limanNa DEBATA.

¹Sanga mapia keangga’ puha ia anna la kulle buda;

dipa’kasallei kalando puha ia anna la peha’ sola bulabam.

²To makaka anna to mase-mase deem susinna:

sangngim DEBATA to metampana.

³To keakkalam ia usseheam kalena ke muitai la mesägäinna,

sapo’ to saidi’ kapaissanganna tahhu’-tahhu’ ia lambi’ sägä.

⁴Sahona to mahempo penaba anna mengkahea’ lako DEBATA:

katomakakaam, pa’pakasalle anna katuboam mapia.

⁵Suha sola poja bendo’ mangngampa dio lalam la naolanna to sengko’ penaba;

menna-menna ungkaha’i sungnga’na la umpasikambela kalena lalam ia too.

⁶Patudui to mangnguha untuhu’ ulalam la sipäto’na naola,

anna mala sule lako matuanna tä’ deem la lempä dio mai ulalam ia too.

⁷To makaka la umpahe’ to mase-mase,

to ma’indam naposabua’ to napa’indanni.

⁸Menna-menna ma’gau’ sengko’ la nalambi’ pa’dallena,

anna kasalleinabaanna lako tau senga’ angga allo nalambi’ sihhapam bose polo ta’bu.

⁹To matutu ma’pebeem la katambasam,

aka untaba kinandena lako to mase-mase.

¹⁰Suai lao to mantelle anna mala pa’de duka’ kasipengkaam,

anna pa’de toi duka’ kasisakkasam anna pa’petuna.

¹¹To umpohäe penaba mahändä,

anna mapia pessubungam pudu’na, siala penaba tomahaja.

¹²Tatilio-lio matanNa DEBATA ungkambi’ unjagai kapaissangam,

sapo’ tä’ umpatama tula’na to umpesi’ tula’na.

¹³To busungam angga mempi’dim dio banua,

aka naua: <<Deem singa lako lalam, sitammuä’ manii anna naandeä’.>>

¹⁴Pessubungam pudu’na baine passunda’ sihhapam gahoä mandalam;

to nahua aha’Na DEBATA la mehonno’ dokko.

¹⁵Mendekke’um kamahoam illaam penabanna änä’ mangnguha,

sapo’ pesämbä’ umpanännä’i lappa’ dio mai kalena.

¹⁶Menna-menna uhhoho’i to mase-mase umpatomakaka kalena,

battu haka untampoi to makaka, katampasanna ummase-masei kalena.

Tallu pulo handanna kada to keaka’

22:17–24:34

¹⁷Patananni talingammu ammu tande talingai kada to keaka’;

paalai penabammu kapaissangangku.

¹⁸La masannangko ke umpaillaam penabai umpatianna di ate;

la umpengkadaam mandam dio pudu’mu ke pahallum.

¹⁹Anna malako ussedam pahhannuammu längäm DEBATA,

iam too anna kupatudungko, kupatuduko tentomai.

²⁰Tä’ daka too puham kusuhasangko tallu pulo handanna kada to keaka’,

mebeem pepanännä’ anna kapaissangam,

²¹la napatuduko tula’ tungka ianna anna kada malolo,

lambi’ mala hua pentimba’mu lako to ussuako?

²²Daa uhhappa aka-akanna to mase-mase aka umpelamma;

daa uhhoho’i to dipi’di’ dipakamase-mase illaam pahhottosam.

²³Aka DEBATA ia la umpa’kadaanni,

anna umpakattu sungnga’ to uhhappai.

²⁴Daa ussola to buhassuam,

daa ussiala penaba to pa’keaha’,

²⁵indana umpolai gau’na,

anna umpaalaiko ulä kalemu.

²⁶Deem ako iko la ma’dandi,

la umpangngindosam solamu.

²⁷Maka’ tä’ deem akammu la umbajasam,

iya moi too petindoammu la naalapi.

²⁸Pissa’-pissa’ ako iko la umpadende katonam litä’,

to puha natete nene to umponene.

²⁹Deemmaka iko muita to hatta’ umpalako pengkähänganna?

La napake tomahaja, taia tia tau biasa la umpakei.

¹Maka’ muokko’ko mangngande sola to kasalle,

petua’ manappai aka dio olomu.23:1 aka dio olomu: Mala duka’ diua, <<menna ussitingngajoam>> kalembasanna indo to kasalle.

²Daa umpaula’i bahokomu,

ke si pa’andeko!

³Daa ungkaamma’-amma’i kinande mapianna,

aka nakeloiko manii.

⁴Daa umbumbu’ sugali’ katomakakaam,

popeanggam itim pikkiham susi.

⁵Maka’ umpahappai mata la pa’de bäbä,

aka la tubo säkä-säkä pani’na,

anna mentia’i längäm lawwa susi bunia gege.

⁶Daa muandei kinandena to di’di’ bosi,

anna daa ungkailui kinande mapianna.

⁷Aka umba susi to mahekem, susim too duka’ mahekenna.

La nauaangko: <<Andeko; ihu’ko!>>

Sapo’ tä’ tia sule tama penabanna indo tula’na.

⁸Maka’ muandem sasimpoam baju-baju ulluam sule,

anna labu’ di limbä tallam di pahupu ingganna tula’ mapiammu.

⁹Daa ullabusam tula’mu nahingngi to maho,

aka la naele-ele mandi tula’ keaka’mu.

¹⁰Pissa’-pissa’ ako iko la umpadende katonam litä’ to puha ditete yolona,

anna daa uhhappai bela’na änä’ bium.

¹¹Aka matoho To umpekkalundanganni,

Ia la umpa’kadaanni nabaliko.

¹²Pasatutui penabammu lako pepanännä’,

anna patananni talingammu kada mebeem kapaissangam.

¹³Daa ungkalaja’i umpanännä’ änä’mu,

tä’pi deem mate änä’-änä’ disämbä’i.

¹⁴Abana ussämbä’i bätäna,

sapo’ setonganna ullangnga’i hi tia sungnga’na dio mai kamateam.

¹⁵O änä’ku, ianaanna ma’penaba keaka’ko,

la tiala duka’ inabangku.

¹⁶La sundede buaku,

ke ia sia anna pudu’mu umpassubum tula’ tungka ianna.

¹⁷Daa umpakende’ kakembuhuam illaam penabammu lako mentu’na to madosa,

sapo’ la sanda manuhu’ dako ia lako Puang Allataala allo bengi.

¹⁸Aka la ullambi’ko kamapiaam illaam salukatuboammu,

anna pahhannuammu la umpai pala’.

¹⁹O änä’ku, patananni talingammu ammu pengkakeaka’;

pasatutui penabammu lako ulalam malolo.

²⁰Daa ussitappa to pa’anggur,

battu haka soko bale.

²¹Aka to pa’anggur anna to soko bale namase-masei,

anna to angga mamma’ katampasanna ma’poheba sepa-sepa ia.

²²Pehingngii manappako ambemu to undadiangko,

anna daa umpa’bahinni’i indomu illaam kamatuaanna.

²³Alliko kamaloloam anna daa umpobalusanni,

teem toi kakeakasam, pepanännä’, anna pikkiham.

²⁴Ambena to meada’ la kassi tilalla’;

la sundede buana to siampuam änä’ keaka’.

²⁵Sihatam la umpasundedeko buana ambemu sola indomu;

sipäto’ la umpakassiko tilalla’ to undadiangko.

²⁶O änä’ku, pehingngiiä’,

potandenganni lingka salukatuboangku.

²⁷Aka baine passunda’ sihhapam gahoä mandalam,

anna baine ullullu’ muane sihhapam tolombu mandalam.

²⁸Mangngampa lako lalam susi to si pahappa,

anna umpakehängänni bilanganna to ullullu’ bainena.

²⁹Menna hia mengkaloa’? Menna hia sumahho lumoa’?

Menna hia massikalla? Menna hia kaloa’-loa’?

Menna hia basa natumä kamahoanna? Menna hia malea matanna?

³⁰To angga umpengkahojai muihu’ anggur,

anna lao tungga’ ussändä’ anggur dibuli.

³¹Daa umpaalai matammu anggur, moi la mepakaamma’-amma’ diita,

moi la matti’ elo’ muitai illaam ihusam,

tiala inaba ma’gohhe’ dokko bahoko.

³²Sapo’ katampasanna anggasanna hi ula’ metombo’,

umpakende’ hasum susi ula’ pabalu.

³³La muitako kaha-kaha tä’ biasa diita,

anna la ma’tula’ sasa-sasa bäbäko.

³⁴La sihhapangko to yabo kappala’ napakakemba-kemba bombam,

la susiko to yabo lolä’na andihi somba’.

³⁵La ma’kadako muua: <<Napongkoä’ tau, sapo’ tä’ mapi’di’.

Natuttu’ä’ tau, sapo’ tä’ kusi’dim.

Piham dä’ kao kilala?

Angku lao oo suhu’i anggur.>>

¹Daa ungkembuhui to tameada’,

anna daa ummaelo’ sola pa’palakoam.

²Aka angga ia ma’pattuju la palampi,

ingganna pessubungam pudu’na angga umpeä tuntungam su’be’ undaka’ pa’posanga-sanga.

³Kakeakasam dipake umpapia banua;

kamanähängam dipake umpake’de’i matoto’,

⁴anna kapaissangam dipake muissii tambinna,

diissii ebangam ma’mata-mata masulli’ anna mekailu-ilu.

⁵To keaka’ keangga’ puha ia anna la to matoho;

to deem kapaissanganna mentandolängäm ia anna la to matege.

⁶Aka anggam ke deenni to ma’patette anna malako ma’bundu’,

anna ianaanna budai to menännä’ mepakilala, mala tau patalo.

⁷Kakeakasam tä’ nalambi’ akkalanna to maho kalebu;

tä’ nasaha umbukkai pudu’na illaam pa’bisahaam.

⁸Menna-menna angga umpattuju kakadakeam

la disangai to mateko.

⁹Umpattuju kamahoam ia too dosa,

anna to mantelle nakabassi hupatau.

¹⁰Ianaanna kattu hannuko illaam kamasussaam,

penäbbä’-näbbä’ko iko.

¹¹Lappasanni ingganna to puha dipaettenni kada sahandam la dipatei,

langnga’i to kabentä-bentä la lao dipatei.24:11 ...dipatei: Indo to puha dipaettenni kada sahandam la dipatei anna to kabentä-bentä la lao dipatei, iya indo to la dipatei sapo’ tä’ deem lalanna, tä’ ia nahua lako indo to abana sihatam la dipatei aka kasalaam.

¹²Ianaanna muuai: <<Taia kami’ issangki itim o!>>

Tä’ daka tia la naissam tungka ianna To ullosa lalam penaba?

Tä’ daka tia la naissam To ungkambi’ sungnga’mu?

Ia la umpabala’i simesa-mesa hupatau situhu’ pa’pogausanna.

¹³O änä’ku, ihu’ko duho, aka keguna;

duho ma’nini matannim dokko bahoko.

¹⁴Kannassai, susim duka’ kakeakasam keguna lako sungnga’mu.

Ianaanna ullambi’i, iya ullambi’ko kamapiaam illaam salukatuboammu,

anna pahhannuammu la umpai pala’.

¹⁵Daa umpantoho’ la ungkatama banuanna to meada’ susi to tameada’,

daa uhhuppu’-huppu’i banuanna.

¹⁶Moi la pembuda mehonno’ to meada’, sapo’ mala liu ia tibangom sule,

sapo’ to tameada’ ia la metalumbum nahua sippi’ tanggana-gana.

¹⁷Daa umpa’pissi’ balimmu ke sägäi,

anna daa umbillisanni matammu ke sallo’do’i,

¹⁸indana naitai DEBATA itim pa’pogausammu anna napesalaanni,

lambi’ napodo’um aha’Na dio mai tau ia too.

¹⁹Daa umpeali-ali muita to umpogau’ kakadakeam,

anna daa ungkembuhui to tameada’.

²⁰Aka tä’ ia deem pahhannuam allo di dako’na to umpogau’ kakadakeam,

sihhapam lampu la pi’de.

²¹O änä’ku, pengkahea’ko längäm DEBATA anna lako tomahaja;

anna daa ussitappa to umbali-balii.

²²Aka bassim mala umpakende’ säkä-säkä pi’di’ tanggana-gana,

anna mennangka la muissanni sussa mabanda’ aka la napakende’?

²³Deempi duka’ kada to keaka’ susi inde:

Tä’ mapia ma’bija ma’sangngana’ illaam pahhottosam.

²⁴Menna-menna muuaam to kasalaam: <<Tä’ deem kasalaammu,>>

la natädo ingganna kahajaam, la napanata’i mentu’na pa’lembängam.

²⁵Sapo’ menna-menna umpassala to kasalaam la ullolongam hongko’ upa’,

anna la untammu tamba’ sanda silapi’.

²⁶Menna-menna nasindohoi mentimba’,

umpa’patandaam to sangkalamma’ si’da sia.

²⁷Kähä manappai bela’mu,

papuhai ungkähä anna untanannii;

mane umpake’de’ko banuammu.

²⁸Daa umpassa’bii ke tä’i makaleso,

anna daa umbungkeko’ lilamu.

²⁹Daa muuai: <<La kupasusii duka’ susinna indo napogausannä’!

La kupabala’i pa’pogausanna tama kaleku!>>

³⁰Kuolai baha’ba’na to busungam

anna bela’ anggurna to takepikkiham.

³¹Kuita iko le, nakapu’ kuhha keduhi, naponnoi kini’-kini’,

anna titale bangke’ bala batunna.

³²Tappana kupengkalesoi anna kupaalai penaba,

iya kulio-liom, mane kualai mesa pepatuduam kuua:

³³<<Sapäi’-sapäi’ tikahu’du’, tapakala mamma’ oham,

sapäi’-sapäi’ messingngammu’, tapakala lentem-lentem oham,>>

³⁴pissananna sule säkä-säkä ham kapemase-maseam sihhapam to pahappa,

kakuhängam sihhapam to umbaba paha’buno.

Kada to keaka’ buttu di Salomo natuli’ pole to mengkähäna Hizkia

25:1–29:27

¹Indem ia sanaka-naka kada to keaka’ buttu di Salomo natuli’ pole to mengkähä illaam banua kahajaanna Hizkia, tomahaja Yehuda.

²Dipomatande ia Puang Allataala aka umpokada di tambim ingganna-ingganna sia,

sapo’ dipomatande ia tomahaja aka umpelalam ingganna-ingganna sia.

³Umba susi malangka’na langi’ malibulum anna mandalanna apa’ mahihinna litä’,

susi tappa’um too lalam pikkihanna mentu’na tomahaja tadilambi’ dipikki’.

⁴Äläi lao takka’na peha’,

anna mala kende’ peha’ ma’nini natampa pande peha’.

⁵Hisii lao to umpatamai tula’ kadake tomahaja,

anna mala ke’de’ matoto’ okkosam kahajaanna mentoko di kamaloloam.

⁶Daa ungkasalle-salleam kalemu dio olona tomahaja,

anna daa umpentamaalla’i to kasalle.

⁷Aka aham tia diuaam dangko: <<Dioko mai,>>

anna la dipakasihi’ko dio olona to kasalle.

Maka’ muitako mesa aka-aka,

⁸daa ummasimpam lao häppo’i lako to mahhotto’.

Anu’, aka la umpogau’ pa’ibundianna,

ke nabali’ tanda’ko padammu?

⁹Maka’ sisala’pähängangko padammu, sikapiaikoa’ sule,

sapo’ daa untula’i kada di tambinna solamu,

¹⁰indana napakasihi’ko indo to umpa’tula’i,

anna la ditula’ tapuppu’ pa’tambu’ lendommu.

¹¹Tula’ dipaokko’i okkosanna,

sihhapam bokkom bulabam dio baki peha’.

¹²Pantappaikadanna to keaka’ sihhapam antim-antim bulabam anna belo-belo bulabam täsä’

lako to ma’pehingngi.

¹³Umba susi uwai masäkke’ umpatiala inaba wattu pepaheam kulla’ allo,

susim too duka’ pesua manuhu’ umpatiala inabanna to ussuai.

¹⁴Umba susi ma’ku’dum kaliane sitonda hibu’ tä’ ohi uham,

susim too duka’ to massabu-sabu bäbä sapo’ tä’ ohi deem.

¹⁵Penaba sa’baha’ dipake umpopengngio to kasalle,

anna tula’ memmaja-maja umpolo pani’ uhheppo’ apam.

¹⁶Ianaanna muihu’ko duho, daa muula’i mammi’na,

indana kaponnoangko lambi’ tigo’gä’ko.

¹⁷Daa ummahikki’ sugali’ lako banuanna sambanuammu,

indana lule’i lambi’ tä’ungko pole’ napohäe.

¹⁸Umba susi bose tabi, battu haka pa’dam, battu haka balä’du’ matahu’bi’,

susi tappa’um too sa’bi tatappa’ lako padanna hupatau.

¹⁹Umba susi isi pagego’ anna bitti heppä’,

susi tappa’um too uhhannuam to mehonnosam illaam kamasussaam.

²⁰Umba susi to muäläi pohebana illaam wattu masäkke’ kaliane,

anna untolloi basana uwai maissu’,

susi tappa’um too to umpenaniam penaniam katilallasam lako to manabo inaba.

²¹Maka’ tadea’ balimmu, beenni naande,

anna maka’ mabähhäm, beenni naihu’.

²²Aka ianaanna umpateenni, iya umpadudunnim too hobaja,25:22 umpadudunnim too hobaja: Kalembasanna, nabeem sulum leko’ lambi’ masihi’ pa’ibundianna indo balinna.

anna la natamba’ko iko DEBATA.

²³Hibu’ buttu dio mai utara umbaba uham,

susim too duka’ umpalele kada di tambim umpakende’ aha’.

²⁴Aham tau yabo papa banua25:24 papa banua: Banuanna to Israel si mahante papana, iya mala diongei tohho, sapo’ meuham mealloi.

anna la sibanuai baine pa’mämmängam.

²⁵Umba susi uwai kula’ säkke’ ummolei bähä,

susi tappa’um too uhhingngi kaheba mapia buttu dio mai botto mambela.

²⁶Umba susi mata uwai malubu battu haka kalimbuä sahupu’,

susi tappa’um too to meada’ umpatiolai to tameada’.

²⁷Tä’ mapia buda sugali’ duho diihu’,

susi siam duka’ tä’ mapia maelo’ sugali’ la dipakate’de’.

²⁸Umba susi kota titale bala tembo’na,

susi tappa’um too to tä’ nabela ungkambi’ kalena.

¹Umba susi salju wattu malussu kaliane, anna uham wattu pepaheam,

susim too duka’ taia okkosanna la umpa’kasallei to maho.

²Umba susi dena’ katia’-tia’ anna kalumpini’ kaleba-leba,

susim too duka’ pantädo tadeem lalanna tä’ mentama.

³Pesämbä’ lako palona daham, ngangnga’ illaam sädäna keledai,

anna pesämbä’ ube yabo boko’na to maho.

⁴Daa untimba’i kamahoanna to maho,

indana pada mahokoa’.

⁵Timba’i to maho anna mala tandaam kamahoanna,

indana ussangai kalena keaka’.

⁶Menna-menna umpasam to maho,

sihhapam umpoloi bitti’na anna mualaam saha-saha kalena.

⁷To maho tadiala umpokada kada to keaka’,

sihhapam to malu’bä’ bitti’na la umpopellao bitti’ malu’bä’na.

⁸Umba susi batu sambam dipasipohi sambam,26:8 sambam: Sambanna to Israel, uli’ si napopelliko, sapo’ deem ongeam batunna dipapia illaam tängäna.

susim too duka’ umpa’kasallei to maho tä’ deem gunana.

⁹To maho tadiala umpokada kada to keaka’,

sihhapam duhi untossä’ limanna to mäbo’, bassim labu’.

¹⁰Menna-menna uhhi’ba’i to maho battu haka to liu lalam napopengkähä,

sihhapam to ma’bälä’du’ ullompo’-lompo’ tau buda.

¹¹Umba susi asu ullepa’i luana,

susim too duka’ to maho umpa’sule-sulei kamahoanna.

¹²Deemmaka iko muita to ussanga kalena keaka’?

Dihannuam leko’ ia to maho anna la tau ia too.

¹³To busungam angga mempi’dim dio banua, aka naua: <<Deem singa lako lalam!

Deem singa lako kaliane!>>

¹⁴Umba susi tutu’ ba’ba tiputa’ lelem dio andihi ba’ba,

susim too duka’ to busungam angga kagihi’-gihi’ dio petindoanna.

¹⁵To busungam la mehhaku’ mandam dokko pihim,

sapo’ moi messimpo nakapahhisam toi.

¹⁶To busungam ussanga kalena keaka’ puha ia

anna la pitu to mentimba’ keaka’.

¹⁷Umba susi to uhhaka’i talinga asu mellao,

susim too duka’ to ungkatama-tamaanni sahana to sipengka.

¹⁸Umba susi to tatta’ umpopaningoam batu balä’du’ sitonda api,

battu diua balä’du’ mepakattu sungnga’,

¹⁹susim too duka’ to maningo maho lako solana

mane nauai: <<Kuägä’i hi too kao.>>

²⁰Ianaanna puhai kaju, ma’pi’deam api tau pole’;

ianaanna tä’i deem to ma’kada bu’busam, monda kasipengkaam.

²¹Umba susi hobaja ditolloam osim tama anna api disäläi kaju mabangi,

susim too duka’ to napohäe ma’kalla-kalla ussäläi to sipengka.

²²Tula’na to ma’kada bu’busam mammi’ tadiande,

kannam sule lako lamba’ beluä’.

²³Umba susi kuhim litä’ disapu’ peha’,

susim too duka’ to mapia dio pudu’na sapo’ kadake illaam penabanna.

²⁴To mangkabassi mapia pessubungam pudu’na,

sapo’ maneko illaam penabanna.

²⁵Moinna anna malutte’ tula’na, daa umpehingngii,

aka tadipuha kakadakeam illaam tambu’na.

²⁶Moinna anna pangkabassinna napasamboi kamanekoam,

la tandaam siam gau’ kadakena naita tau buda.

²⁷Menna-menna untolombu tau senga’, la ia metalumbum dokko,

anna menna-menna la umpalentenni batu solana, la ia nalentenni.

²⁸Lila manähä ungkabassi to napi’di’,

pudu’ pandem umpasule katilakaam.

¹Daa ussengkenganni indo la umpogau’ allo makale’,

aka tala muissam sia aka la dadi illaam allo ia too.

²Daa umpuji kalemu, tau senga’ dam umpujiko,

daa ussangai kalemu, tau senga’ dam ussangaiko.

³Batu ia mabanda’, anna bungim meheko,

sapo’ mabanda’ puha ia ke mepi’di’ penabai to maho kalebu.

⁴Aha’ meepe’ anna aha’ kasalle medi’dim,

sapo’ mennangka tau la umbelai untingngajo kakembuhuam?

⁵Aham tau dilompä ditappakadai,

anna la dipakamaja illaam bäbä penaba.

⁶Pesämbä’na sangkalamma’ pehambi mahio,

sapo’ to mepobali mepa’kalapu’-lapu’i lelem ia.

⁷To dea’ umpa’lappi’ duho sau’ dekke,

sapo’ to tadea’ ia moi mapäi’ susi pa’du angga’ golla toi nasi’dim.

⁸Umba susi dassi umpellei sehäna,

susim too duka’ hupatau to umpellei lao banuanna.

⁹Minnä’-minnä’ bubanau’ anna bauam bubanau’ umpatiala inaba,

susim too duka’ petundam pepakilalaanna sangkalamma’ umpasundede bua.

¹⁰Daa ungkalembei sangkalamma’mu battu haka sangkalamma’na ambemu.

Daa ullulako banuanna solasubummu ke ussi’dingko kamasussaam;

kalando puha ia sambanua

anna la solasubum ke mambelai.

¹¹O änä’ku, pengkakeaka’ko, anna pomasannangannä’ penabangku,

anna mala deem kuola mentimba’ ke deennä’ ussassai.

¹²To keakkalam ia usseheam kalena ke muitai la mesägäinna,

sapo’ to saidi’ kapaissanganna tahhu’-tahhu’ ia lambi’ sägä.

¹³Menna-menna umpangngindosam tau senga’, sihatam dita’ga’ jubana,

sipäto’ dipatohho pohebana sulle bala’na tau ia too.

¹⁴Menna-menna mebengngi’-bengngi’pi anna lao ham katamba-tamba umpa’lambeam solana,

iya hapam di tia kada pantädo natula’.

¹⁵Baine napohäe ma’mämmä

mentalodo susi uham mahämbä’.

¹⁶Menna-menna la umpopengkamma’i sihhapam untähäm hibu’,

anna sihhapam ungkingkim tabaho tubo.

¹⁷Bassi ia umpopataham sabassinna,

hupatau ia umpopataham pikkihanna padanna hupatau.

¹⁸Menna-menna ullima’i kaju ara la napuppu’ buana,

anna menna-menna untahinana puäna la dipa’kasallei.

¹⁹Umba susi uwai dipa’petua’i hupa,

susim too duka’ tungka sipa’na hupatau diita dio busäsam penabanna.

²⁰Umba susi ku’bu’ tä’ deem la ussoho’i to mate,

susim too duka’ matanna hupatau tä’ deem la soho’na ungkailui pada naitanna.

²¹Pamuttu dipammahehei peha’ anna api dipallälläi bulabam,

sapo’ pa’pakate’de’ ia dipake umpangngitai sipa’na hupatau.

²²Moi la dilambu’ tama issä to maho kalebu dipasilambu’ gandum,

inna tä’ sia la mala dipasilappa’ kamahoanna.

²³Jappanni manappai olo’-olo’mu,

lima’i manappai ingganna patuboammu,

²⁴aka inde kulle sihhapam uwai dipalimbä.

Deem daka tia to sahapu toko la ia lium ia umbaba babangam tomahaja?

²⁵Ianaanna disäe’um humpu’ matua, iya napessullem humpu’ mangnguha,

anna ianaanna dikandaom humpu’ längäm tanete,

²⁶iya la mahombo bulunna dombamu napadeengangko poheba,

anna beke lakimmu la napadeengangko doi’ mualliam bela’.

²⁷La ganna’ toi bumbungam beke umpokatuboam, umpokatuboam sola sahapummu,

anna napokatuboam to ma’tahiammu baine.

¹To tameada’ ia lumumpa’ lao, moi anna tä’ deem umpadondoi,

sapo’ to meada’ ia, malino masannam susi singa kabahanianna.

²Ianaanna kende’ liui to pabali kahha’ illaam botto, tä’ deem manontom to mampahe’;

ianaanna deenni to kepikkiham, anna deem kapaissanganna mampahe’, la tontä ke’de’ matoto’ pa’bottoam.

³To mase-mase umpakapi’di’ satomase-masena,

sihhapam uham mahämbä’ umbosii alaam kinande.

⁴Menna-menna umpa’bahinni’i paondom DEBATA, kalembasanna umpa’kasallei to tameada’,

sapo’ menna-menna muanti manda’ untobe matoto’ paondom DEBATA, kalembasanna umpobali to tameada’.

⁵To tameada’ tanalambi’ pikkihanna diona undu’ lollä,

sapo’ to umpenombai DEBATA, muissam si’da-si’da ia undu’ lollä.

⁶Aham to mase-mase sapo’ malolo lingka salukatuboanna,

anna la to makaka sapo’ massalu sengko’.

⁷Mesa änä’ to untuhu’i paondom disangai änä’ kepikkiham,

sapo’ to siala inaba to soko umpakasihi’ ambena.

⁸Menna-menna umpalängäm kullena naala dio mai doi’ keänä’ keampo,

tihempum lako hi tia to uhhäntängam bua to mase-mase.

⁹Menna-menna umpa’talingalenda’i paondom DEBATA,

nakabassi duka’ DEBATA sambajanna.

¹⁰Menna-menna umbaba bulim to malolo penaba lako lalam kadake,

la mehonno’ dokko tolombu ikalena.

Sapo’ to tä’ deem sassainna la umpomana’ lolongam dalle’ upa’ mapia.

¹¹To makaka ussangai kalena keaka’,

sapo’ naissam ia to mase-mase kepikkiham, sipa’na tau ia too.

¹²Ianaanna to meada’i tiäkä’ mendadi to pebaba, buda tau kassi tilalla’,

sapo’ ianaanna to tameada’i tiäkä’ mendadi to pebaba, buda tau usseheam kalena.

¹³Menna-menna umbuniangam kasalaanna tä’ ia la kehongko’,

sapo’ menna-menna muakui anna nalämpäsammi ube napatisam kaju la napogau’ pole, la nahäntängam bua DEBATA.

¹⁴Maupa’ anna katambasam to mengkahea’ liu längäm DEBATA,

sapo’ menna-menna umpomakahha’ penabanna la mehonno’ tama katilakaam.

¹⁵Umba susi singa ma’ehhem battu haka beruang pahopängam,

susim too duka’ to tameada’ ungkuasai hupatau mase-mase.

¹⁶To pebaba takepikkiham makahha’ pandahhana,

sapo’ to pebaba ungkahidi’ pangngala malussu, la tubo mahendem.

¹⁷Menna-menna umpatitollo hahana pada säppä’na

umbateam lalam kamateam kalena.

Deem aham ungkalako-lakoanni!

¹⁸Menna-menna tubo tä’ deem sassainna la dilangnga’i,

sapo’ menna-menna massalu sengko’ la tilaka säkä-säkä.

¹⁹Menna-menna ungkähä litä’ la buda alaam kinandena,

sapo’ menna-menna umpadondoi käle-käle la sitammu ia kapemase-maseam.

²⁰To mala dihannuam la ullambi’ tamba’ sanda silapi’,

sapo’ to maelo’ masimpam to makaka, tä’ la lappa’ dio mai pa’tahungkungam.

²¹Tä’ mapia mangngalaangam illaam pahhottosam;

sapo’ deem ohi to mahhotto’ maelo’ disissingam sädäna saiha’ hoti lambi’ umpa’lullu’ ätoham.

²²To di’di’ bosi sipangngula’ kulle,

tä’ nalambi’ pikkihanna naua: la nalambi’ä’ kapemase-maseam.

²³Menna-menna mantappakadai la dipa’kasallei puha ia pa’ibundianna,

anna la to umpopeala-ala bakunna.

²⁴Menna-menna muala kahha’ kullena ambena sola indona

mane nauai: <<Taia kasedaam kukähä,>>

yabo lemba’ tasitolam to pahappa.

²⁵To lando soppä’, umpakende’ kasipengkaam;

sapo’ to mahannu längäm DEBATA, la silambi’ kabosasam.

²⁶Menna-menna uhhannuam pikkiham kalena, to maho ia,

sapo’ menna-menna tubo sibaba kakeakasam la sikambela ia katilakaam.

²⁷Menna-menna ma’pebeem lako to mase-mase tä’ la napolalam tioho’ salukatuboanna,

sapo’ menna-menna tä’ umposamele to mase-mase la buda tädo ullambi’i.

²⁸Ianaanna to tameada’i tiäkä’ mendadi to pebaba, buda tau usseheam kalena,

sapo’ ianaanna pa’dem, tuttuam buda to meada’.

¹Menna-menna tontä liu toho tambu’ moi anna pembudam ditappakadai,

la nalambi’ säkä-säkä katilakaam tä’um deem paulena.

²Ianaanna tuttuam kehängänni to meada’ la kassi tilalla’ tau buda,

sapo’ ianaanna to tameada’i palumbängam, la sikaloa’ tau buda.

³Menna-menna umpohäe kakeakasam, umpasundede buana ambena,

sapo’ menna-menna sikamahoi baine passunda’ untallangam ia kullena.

⁴Undu’ lollä napake tomahaja umpakatoto’ botto litä’na,

sapo’ tomahaja muala passahoma’dinni untallangam ia bottona.

⁵Menna-menna umpopeala-ala bakunna lako padanna hupatau,

umpaalai ulä’ kalena.

⁶To kadake gau’ ia napungo pa’gau’ kadakena,

sapo’ to meada’ ia ponno kakassiam anna sikaahhe tilalla’.

⁷To meada’ ia naissam umpelalangam tabana to mase-mase,

sapo’ to tameada’ ia tanalambam ulu salunna tanatekka ba’ba minanganna.

⁸To ma’petuna umpakende’ kahukkaam illaam kota,

sapo’ to keaka’ ia muoppo’ aha’.

⁹Maka’ sikaha-kaha to keaka’ anna to maho kalebu,

iya la ma’mämmä keaha’ indo to maho kalebu anna metaba mangngele-ele, lambi’ tä’ tibulolo pahhottosam.

¹⁰To maelo’ la umpatitollo haha ungkabassi to tä’ deem sassainna,

sapo’ to malolo penaba ia la melappasam.

¹¹To maho ia umpasoa lao aha’na,

sapo’ to keaka’ ia muoppo’ aha’na.

¹²Ianaanna umpehingngii kada tatappa’ to palumbängam,

ingganna to mengkähäna ma’gau’ kadake.

¹³Deem susinna to mase-mase anna to mepi’di’ mepakamase-mase,

bassim DEBATA umbeenni mata napopennenne’.

¹⁴Ianaanna umpakei undu’ lollä tomahaja uhhotto’ to mase-mase,

talatilenggu’ talatibosso’ okkosam kahajaanna sule lako salako-lakona.

¹⁵Pesämbä’ anna pantappakadai mepakeaka’,

sapo’ änä’ to dipalonda umpakasihi’ indona.

¹⁶Ianaanna tuttuam budai to tameada’, tuttuam membea’ duka’ kakadakeam,

sapo’ talanapekaade’ tanapekapaha’ to meada’ kapehonnosanna.

¹⁷Patudu manappai änä’mu, anna mala napomasannangko,

anna napatiala inabammu naposundede buamu.

¹⁸Ianaanna tä’i deem pa’palosai buttu di DEBATA, lao sasa bäbä hupatau.

Sapo’ maupa’ anna katambasam to muanti manda’ untobe matoto’ pahenta DEBATA.

¹⁹Mesa sabua’ tä’pi ganna’ ke anggai tula’ dipatuduam,29:19 ...tula’ dipatuduam: Mala duka’ kalembasanna: pahallu disämbä’i susi änä’-änä’ anna mala umpalako pengkähänganna.

aka moinna anna naissammi, sapo’ tä’ siam la napalako.

²⁰Deemmaka iko muita to si ma’tula’ sihha’?

Dihannuam leko’ ia to maho anna la ia.

²¹Sabua’ to dipalonda mengkalao bahinni’na,

katampasanna kahha’ ulu.29:21 kahha’ ulu: Deem piha muuai, katampasanna naala asam kullemu.

²²To pa’keaha’ umpakende’ kasipengkaam,

anna to buhassuam umpakende’ buda gau’ kadake.

²³To malangka’ penaba untämmä’i kalena,

sapo’ to mahempo penaba ia la dipa’kasallei.

²⁴Menna-menna pada boko pa’boko, ussägäi kalena;

puham ma’dandi, sapo’ tä’ di ma’tula’ setappa’.

²⁵Ungkahea’ hupatau umpaalai ulä kale,

sapo’ menna-menna uhhannuam DEBATA, la tikambi’ ia tipaliaha.

²⁶Buda tau umpopeala-ala bakunna lako to palumbängam,

sapo’ anggam DEBATA umpake undu’ lollä.

²⁷To tä’ malolo penaba nakabassi to meada’,

to malolo lingkana nakabassi to tameada’.

Kadanna Agur änä’na Yake

30:1-33

¹Susi inde kadanna Agur änä’na Yake to Masa,30:1 Masa: Kalembasanna illaam basa Ibrani ke dipalutamai basa Bambam naua: <<Kada napa’palosaam DEBATA>>.

Ma’kada naua: <<O Puang Allataala, malupu’mä’,

abana malupu’mä’, kapuhaammä’!

²Kuakui kuua, kaom handam to takepikkiham,

tä’ deem pikkiham hupatau kuampuam.

³Tuli tadeennä’ kao umpe’guhui kakeakasam,

anna tala deem kapaissangangku diona To Handam Maseho.

⁴Mennangka tau deem längäm suhuga mane tuhunni sule?

Mennangka tau mala ungkingkim hibu’?

Mennangka tau ungkoto’i uwai dokko bajunna?

Mennangka tau untete pali’ katonanna lino?

Aka sanganna, anna aka sanganna änä’na?

Tulasampä’ ke muissanni?

⁵Ingganna battakadanNa Puang Allataala maseho pindam maunna’ pebajoam.

Puang Allataala napounta’ matoto’ to mentulindum lako.

⁶Daa ulländonnii battakadanNa,

indana natappakadaiko anna natahuno pedollo’i naua, to kaägä’-ägä’ko iko.

⁷Deem dua handanna la kupelau dio oloMu,

kupelau anna tä’i untäe’i wattunna tubopä’:

⁸Pasikambelaä’ kada maneko anna tula’ kaägä’-ägä’.

Tala kapemase-maseam umbeennä’ tala katomakakaam.

Beem mammä’ kinande indo la tahakangku kao duka’.

⁹Aka mase manii to makakaä’, katampasanna kupemboko’iKo

anna ma’kadaä’ kuua: Mennaka tia diuaam DEBATA?

Mase-mase hä’ manii, iya laomä’ too maboko,

lambi’ kukadakei sanganNa Puang Allataala to kupenombai.

¹⁰Daa umpakolo’-kolo’i mesa sabua’ dio olona puäna,

indana natädoko anna naalako tädona.

¹¹Deem salapi’ tau untädo ambena

anna tä’ umpelauam tamba’ indona.

¹²Deem salapi’ tau ussanga kalena maseho pindam maunna’ pebajoam,

moi kela daa tontäpi sitampulä gau’ kadakena.

¹³Deem salapi’ tau tumonga pundu,

yabo bulam matanna.

¹⁴Deem salapi’ tau la meinta pataham susi pa’dam isinna,

masadi’ susi tobo’ tohana,

la ussoho sau’ ussoho dekke to mase-mase illaam lino,

to kaasi-asi illaam mai alla’-alla’na padanna hupatau.

¹⁵Deem mesa litta muampuam dua änä’ bassim bihä.

Isanga: <Palumai too!> anna <Palumai too!>

Deem tallu hupanna tä’ deem la ponnona,

battu haka appa’ hupanna tä’ deem la naua: <Sihuam!> Issa’ handanna:

¹⁶Pambo’bä’ to mate,

tambu’ tämänä, litä’ hekko’ umpahalluam liu uwai,

anna api mangngalela’ liu.

¹⁷Mata untonga-tongaam ambena,

anna umpa’talingalenda’i tula’na indona

la natittä’ matanna kadoaja

anna nadodam dassi peande bakke.

¹⁸Deem tallu hupanna napapilla’ä’ mängä-mängä,

battu haka appa’ hupanna pusa’ä’ umpenabaanni. Issa’ handanna:

¹⁹bunia gege mala kaleba-leba yabo lawwa,

ula’ muola kumila’ batu,

kappala’ mala muäbä illaam le’bo’,

anna lalanna mesa änä’ muane anna mesa änä’ daha toko mala sipohäe.

²⁰Susi inde lalanna mesa baine ullullu’ muanena:

puhai ma’gau’, umpattinni kalena,

anna naua: <Taia hi too kao gau’ kadake inde kupogau’ä!>

²¹Deem tallu hupanna umpagege’ lino,

battu haka appa’ hupanna umpapusa’ issinna lino. Issa’ handanna:

²²mesa sabua’ mendadi tomahaja,

mesa tau hembu’ tanapuha-puha alaam kinandena,

²³mesa baine tä’ deem dialaangam tampaam dahum, toko deem duka’ muakui,

anna mesa baine pa’hengnge’ sampa umpessulle okkosanna puäna baine.

²⁴Deem appa’ hupanna olo’-olo’ bahinni’ illaam lino,

sapo’ tä’ deem pada sakeaka’. Issa’ handanna:

²⁵linti’, olo’-olo’ tä’ matoho,

sapo’ umpatoka kinandena wattunna malussu kaliane;

²⁶tangngali, sahhupa olo’-olo’ malamma,

sapo’ umpapia bumbunna yabo kumila’ batu;

²⁷bati’, sahhupa olo’-olo’ tä’ deem tomahajanna,

sapo’ tiäto’ pissam tiäkä’na pissam hampona;

²⁸tokke-tokke, sahhupa olo’-olo’ mala dipi’du’ bäbä,

sapo’ mala ia tohho illaam banua tomahaja.

²⁹Deem tallu hupanna olo’-olo’ gagaham pellaona,

battu haka appa’ hupanna gagaham pentekkana. Issa’ handanna:

³⁰singa, olo’-olo’ handam matoho,

tä’ deem ungkatuka’i ingganna-ingganna sia;

³¹londä lu sau’ lu dekke katonga-tonga, beke laki,

anna mesa tomahaja mellao sola tentahana.

³²Ianaanna malangka’ penabako matomaho-maho battu haka ma’pikki’ kadake,

sampunni pudu’mu!

³³Aka ianaanna dipa’senggo’-senggo’i bumbungam ma’nini, la mendadi bumbungam makko,

ianaanna didänggu’i illä, la tissopa’ haha illaam mai,

susim too duka’, ianaanna dipakende’i aha’, la dadi kasipengkaam.>>

Kada to keaka’ buttu di indona Lemuel

31:1-9

¹Susi inde kadanna Lemuel, tomahaja Masa31:1 Masa: Kalembasanna illaam basa Ibrani ke dipalutamai basa Bambam naua: <<Kada napa’palosaam DEBATA>>. ullombum tula’na indona naua:

²<<O änä’ku, änä’ to buttu subum hoäku, änä’ to kudadiam buana sambajangku.

Pehingngiiä’!

³Daa umpapuhu’ lakoi baine tohomu,

anna läpu’mu lako baine to umpopehonno’ buda tomahaja.

⁴O Lemuel, tä’ too sipäto’ le, lako mesa tomahaja,

tä’ sipäto’ mesa tomahaja ungkamammi’i muihu’ anggur,

battu haka mesa to kasalle naala kehu’na uwai mepamäbo’.

⁵Aka ianaanna muihu’i tau uwai mepamäbo’, iya mala too ungkalembei tau kada dipandam,

anna umpasala’ lao tahakanna to dipelamma.

⁶Inde uwai mepamäbo’ la dibeem ia lako to la salendu’-lendu’na penabanna,

anna uwai anggur lako to nahimpi’-himpi’ sussa.

⁷Pabäi naihu’ anna mala ungkalembei kapemase-maseanna

anna tä’um umpikki’ kamasussaanna.

⁸Pa’kadaanni to malaja’ ma’tula’,

pelalanganni tahakanna to dipa’bahinni’i.

⁹Pabäkkä’i sädämu, ammu pa’bisaha situhu’ undu’ lollä,

pekkalundanganni to mase-mase anna to mehio-hio.>>

Tedena baine hatta’

31:10-31

¹⁰Madähä dalle busa la dilambi’ baine hatta’;

keangga’ puha ia anna la permata.31:10 permata: Sahhupa batu keangga’.

¹¹Nahannuam ponno muanena,

längäm liu allo sangngallona muanena.

¹²Ma’gau’ mapia liu lako muanena, tala deem dia ma’gau’ kadake,

sule lako matena.

¹³Bassa’ umpeä rami31:13 rami: Sahhupa tanangam dio Israel mala dipapia bännä anna ditannunni poheba, anna si masäkke dipake. Umbai’ susi lelupä ke indei mai bottota. anna uhhempum bulu domba,

anna happa’ penabanna ungkähäi.

¹⁴Anggasanna kappala’na to lao danggam,

sule umbaba kinande dio mai ongeam mambela.

¹⁵Mane nannahi anna milli’um,

umpatokaam kinande solana lako sali,

anna tungga’ umpatotä’i pengkähängam to mealaanna baine.

¹⁶Tappana hatta’ pattujunna, iya muallim sangngenam bela’,

anna bussu’ kanukunna napake untanannii anggur.

¹⁷Muahha’i dodona,

anna muette’i katea’na.

¹⁸Naka’da’ nakaleso ingganna nakähäna la kentakim kanam,

malalam bengi mane mamma’i.

¹⁹Dio unusam limanna,

anna dio pangngonnosam tahuno-hunona.

²⁰Matutu ma’pebeem lako to mase-mase,

bassa’ mentando lako to mehio-hio.

²¹Tä’ ungkasahaam sahapunna lako sali ke lambi’ oom wattu masäkke’ kaliane,

aka ingganna sahapunna umpasilapi’ pohebana.

²²Umpapia kale sambu’ dale,

anna sampim linen malängngo’ sola sampim mellolo pao pohebana.

²³Kesanga mapia muanena dio ba’ba suluham,

wattunna sitadongko-dongkongam matua ulunna pa’bottoam.

²⁴Untannum sampim linen malängngo’ napobalusam,

anna umpapia beke’ nabalu’ lako pa’bulele.

²⁵Umpa’baju umpa’dodo sipa’ mapia anna dipa’kasallei,

metaba ia untammu allo la ditingngajona.

²⁶Angga ia kakeakasam messubum dio pudu’na,

anna lengko lilana umpengkadaam pangkaha’ pa’kamase.

²⁷Umpenabaam liu dapo’na,

anna tala deem ia muanna tohhona.

²⁸Sangngim mengke’de’ änä’na nauaam: <<To maupa’ anna katambasam indoki,>>

anna natede-tede duka’ muanena naua:

²⁹<<Abana buda baine mapia pa’palakoanna,

sapo’ tä’ sia deem la umpapadaiko.>>

³⁰Pempasse’ dipapia-pia mepasalanduam, kamapiaanna hupa labu’ di limbä tallam di pahupu,

sapo’ baine mengkahea’ lako DEBATA, sihatam sipäto’ dipa’kasallei.

³¹Padokkoanni lisu pala’na bussu’ kanukunna,

sihatam sipäto’ to’doam appu’na napolalam napa’kasallei hupatau dio ba’ba suluham!