Yosua
Pemasiä’na
Inde suha’na Yosua ma’tula’ diona tulasanna to Israel wattunna ungkatama lembäna Kanaan napangngului Yosua. Yosuam too umbala’ Musa umpangngului to Israel. Indo kaha-kaha ma’kalolosam dadi ditula’ illaam inde suha’ susinna: ullambam Salu Yordan, hubä’-hubä’ tembo’na kota Yerikho, sibundu’ to Ai, anna umbakahui pa’dandianNa Puang Allataala lako umma’Na. Illaam inde suha’ deem tula’na Yosua umbukku ullemo-lemo to Israel indo naua: <<Sapo’ maka’ tä’ umpemapiaanna’ ussi’dim la menomba lako DEBATA, iya pileia’ inde allo temo mennaka’ iko la umpenombai ... Sapo’ kao-kao sola sahapungku, la menomba längängkam DEBATA>> (Yos. 24:15).
Tono’ Issinna
Dikatama lembäna Kanaan 1:1–12:24
Bahena litä’ 13:1–21:45
a. Litä’ tandai utarana Salu Yordan 13:1-33
b. Litä’ tandai katampusanna Salu Yordan 14:1–19:51
c. Sanaka-naka kota pentulindungam 20:1-9
d. Sanaka-naka kota bahena pessubunna Lewi 21:1-45
Sanaka-naka pehapuam kasalle to tohho dio tandai mata allo ma’pasule lako botto litä’na 22:1-34
Kada napandam Yosua tappana la mate kale 23:1-16
Pa’dandianNa Puang Allataala dibakahui dio Sikhem 24:1-33
1Yosua nasua Puang Allataala la ungkatama lembäna Kanaan
1Puhai mate Musa indo sabua’Na DEBATA, iya ma’kadam DEBATA lako Yosua änä’na Nun, to si umpamoloi Musa naua: 2<<Matem Musa sabua’Ku. Dadi tentomai, pengkalaongkoa’ sola ingganna to Israel lambangkoa’ Salu Yordan pentamakoa’ indo botto litä’ to la kupadokkoangkoa’ lisu pala’mu, ikoa’ pessubunna Israel. 3Pada ongeam nahondoinna bitti’mu kupadokkoam asangkoa’ lisu pala’mu, umba susi puha kupokada lako Musa. 4Attasa’mua’ la mengkalao dio pädä kukku’ sule lako tipatanetena Libanon. Anna mengkalao dio salu kasalle battu diua Salu Efrat naalapi bottona to Het sule lako Le’bo’ Itängä tandai katampusam. 5Tä’ deem tau moi podo la mesa nabela muebako upu’ salukatuboammu. Umba susi Musa kuundu’ kupatette la susim too duka’ la kuundu’ko kupatette. Tä’ko deem la kutampeam anna tä’ko la kupahandam-handam bäbä. 6Pomatohoi penabammu anna pobahanii kalemu aka iko la untetem inde mai hupatau umpomana’ indo botto to puha kudandi lako nene to naponene. 7Angga hia, pahallu umpomatoho penabammu anna umpobahani si’da-si’da kalemu. Maintingko palako ingganna pahentaKu to puha napaondongangkoa’ Musa sabua’Ku. Tä’koa’ la lempä dio mai Paondom ia too anna mala ma’tämpä’ anna ma’ulu ingganna pa’palakoammu. 8Tä’ deem la monda pudu’mu umpengkadaam Paondom ia too, sapo’ la umpasalui hia penaba allo bengi anna mala maintingko untuhu’i ingganna indo tituli’ illaam. Ianaanna umpateenni, la kehongko’ko anna la ma’tämpä’ anna ma’ulu pa’palakoammu. 9Tä’ daka too puhangko kuuaam: <Pomatohoi penabammu anna pobahanii kalemu?> Daa ummahea’ anna daa umpa’duhho aka Kao DEBATA, Puang Allataala to umpenombai kuundu’ko kupatette moi umba ngei muola.>>
10Puhai, umbeemmi pahenta ingganna to umpahe’ salengkoam oi to Israel Yosua naua: 11<<Leleia’ ingganna kemana to Israel anna umpahentaia’ muua: <Patokakoa’ tinallomu aka tallungngalloi too ullambammakia’ Salu Yordan la takatama anna tatadongkonni botto litä’ to la napadokkoangkia’ lisu pala’ta DEBATA, Puang Allataala to tapenombai la tapomana’.> >>
12Anna mane ma’kada Yosua lako pessubunna Ruben, pessubunna Gad, anna bahe duanna pessubunna Manasye, naua: 13<<Pengkilalaia’ indo tula’na Musa, indo sabua’Na DEBATA lako kalemu naua: <DEBATA, Puang Allataala to umpenombai umbeengkoa’ kamalinoam anna napadokkoangkoa’ lisu pala’mu inde botto.> 14Ingganna bainemua’ sola änä’mu anna olo’-olo’mu mala ia tohho eta inde botto to nabeengkoa’ Musa lambam dipena mai Salu Yordan. Sapo’ inggannakoa’ pa’bahani, la pahallukoa’ tungga’ sibaba paha’bunomu lambam umpendioloangam solasubummua’ pehapuam kasalle senga’. Pahallukoa’ la umpamoloi indo solasubummu 15sampe nabeem duka’ kamalinoam DEBATA indo solasubummua’ susikoa’, lambi’ natadongkonni indo botto litä’ to la napadokkoam lisu pala’na DEBATA, Puang Allataala to umpenombai. Puhai too, mane ma’pasule hakoa’ dipe mai botto litä’mu anna untadongkonniia’ inde botto to nabeengkoa’ Musa, indo sabua’Na DEBATA, lambam dipena mai Salu Yordan, tandai mata allo.>>
16Iya mentimba’im naua: <<Padai too umpahesangkam padam kituhu’i, anna iai too umpassuaikam iam kiola. 17Umba susi kamanuhusangki lako Musa illaam ingganna pa’palakoam la susim too duka’ kamanuhusangki matim. Angga mandam kipelau längäm DEBATA, Puang Allataala to tapenombai la naundu’ dako too napatette umba susi muundu’ umpatette Musa. 18Menna-menna umbali pahentamu anna tä’ naaku umpehingngii ingganna tula’ umpahesam tä’ mala tala dipatei. Angga hia, pomatohoi penabammu anna pobahanii kalemu!>>
2To lao ma’pesi’dim lako Yerikho
1Tappana dioi Sitim ma’kema, iya ussuam dua tau Yosua änä’na Nun lao ma’pesi’dim buni lako Kanaan nauaam: <<Laokoa’ pesi’dinniangkia’ lembäna Kanaan sola kota Yerikho illaanna.>> Iya le’ba’um duka’ indo to dua sampe landa’ lako banuanna mesa baine passunda’ isanga Rahab. Iya tohhom eta. 2Iya dipakahebaim tomahaja Yerikho diua: <<Deem to Israel sule inde bengi ummata-matai bottota.>> 3Iya ussuam tau tomahaja Yerikho umpellambi’i Rahab, anna nauaanni: <<Pasolai mai itim matim tau to sule illaam banuammu, aka sule hi tia ummata-matai inde botto!>>
4Sapo’ inna puham napasola lao Rahab indo to dua anna nabunii. Iya ma’kadam Rahab naua: <<Io, abana deem tau sule inde banua, sapo’ tä’ kuissam buttu umba amo ngei. 5Le’ba’i siam tappana la malillim kale tä’pi ditutu’i ba’ba kota. Tä’ kuissam lu umba amo ngei. Pasihha’ia’ umpadondo umba ke ullambi’pia’.>> 6Anna ke puham ia napasola längäm papa banua2:6 papa banua: Banuanna Yahudi (to Israel) si mahante papana anna dibalambai lao pali’. anna nabunii napatambunni dalame titombom yabo indo papa banua. 7Iya le’ba’i siaham duka’ indo pesuana tomahaja umpadondo indo to dua umpenandai Salu Yordan, lu lako ingganna kalambangam. Tappana messubum illaam mai kota indo to ma’padondo, iya ditutu’im ba’bana kota.
8Wattunna bassim tä’pi mamma’ indo to dua, iya längämmi Rahab indo papa banua napellambi’i 9anna nauaanni: <<Kuissam kuua napadokkoammokoa’ lisu pala’mu DEBATA inde botto. Sangngim mahea’kam umpabua’a’, anna häntä issinna inde botto la muoloikoa’. 10Aka kipelele diua napomabangi DEBATA uwainna Le’bo’ Teberau dio olomua’, wattunna messubungkoa’ illaam mai lembäna Mesir. Kipelele toi duka’ indo umpogausanna’ dua tomahajanna to Amori: Sihon anna Og sola pakketauanna umpempa’deanna’ dipe lambam libanna Salu Yordan. 11Tappana kipelele kaha-kaha ia too, iya mäläi kute’-kute’ki. Anggasangki tämbätä dipahha umpabua’a’, aka DEBATA, Puang Allataala to umpenombaia’ iam too Puang Allataala To kuasa yabo langi’ anna inde lino. 12Puhamä’ umpa’patandaam pangkaha’ pa’kamaseku lako kalemua’, iya tentomai, pa’dandi mate-mateangkoa’ ussa’bu’ sanganna DEBATA la umpa’patandaangkoa’ duka’ pangkaha’ pa’kamasemu lako kaleku sola sahapungku. Beennä’ mesa tanda la kupengnganda’i 13diua tä’ ia la umpatei ambeku, indoku, solasubungku muane sola baine anna ingganna sahapunna, anna la ullangnga’ikam kami’ dio mai kamateam.>> 14Iya natimba’im indo to dua naua: <<Naitakam DEBATA ke deenni la dondom bulu salamba’na sahapummu. Maka’ tä’ siakam untula’, iya maka’ too napadokkoammakam lisu pala’ki DEBATA inde botto, iya la kipa’patandaam pangkaha’ pa’kamaseki matim anna manontongkam lako kalemu.>>
15Puhai, nalollohammi indo to dua umpake uli’ yabo mai suleba’, aka indo banuanna Rahab tembo’ kota napohindim sabali. Dadi, iam too indo tembo’ kota si naongei tohho. 16Anna nauaampi yolo mane nalollohanni: <<Le’ba’ längängkoa’ tipatanetena anna mala tä’koa’ nalambi’ indo to ma’padondo. Pembunikoa’ yabo tallu bengi sampe ma’pasulei indo to ma’padondo. Lessu’pi mane tahhu’koa’.>> 17Iya nauam indo to dua: <<La kipasule lako indo pa’dandingki situhu’ pelauammu. 18Maka’ too kikatamam inde botto, iya la umpessäkesam inde uli’ bännä malea lako inde suleba’ to la umpallollohannikam dokko, anna uhhempunni ambemu, indomu anna ingganna solasubummu sola ingganna sahapunna illaam inde banuammu. 19Menna-menna messubum illaam mai ba’ba banuammu anna matei, taia kami’ issangki. Sapo’ menna-menna tohho illaam inde banuammu, iya kami’ untanggunni ke deenni la ussägäi. 20Sapo’ maka’ untula’ inde kasuleangki, iya la lappa’kam dio mai inde pa’dandingki.>> 21Natimba’um Rahab naua: <<Kutahima itim tula’mu.>> Puhai, nauaammi: <<Laongkoa’!>> Iya le’ba’um duka’. Anna mane napessäkesam Rahab indo uli’ bännä malea lako suleba’ banuanna.
22Le’ba’ lium indo to dua, iya landa’ längäm tipatanetena. Tallungngallo tohho yabo indo tipatanetena, sampe ma’pasulei indo to umpadondoi. Ussambai ingganna lalam indo to ma’padondo napeä, sapo’ tä’ deem nalambi’. 23Iya ma’pasulem sule indo to dua yabo mai tipatanetena ullambam salu, anna ma’pasulei lako Yosua änä’na Nun. Natulasam asam Yosua ingganna indo naolainna illaam pa’laoanna. 24Ma’tula’ lako Yosua naua: <<Mannassa napadokkoammakia’ lisu pala’ta DEBATA botto ia too. Sulibanna ia too, silelepi häntä issinna tapobua’a’.>>
3Ullambam Salu Yordan
1Iya makale’nai, mebengngi’-bengngi’um bangom dio Sitim Yosua sola ingganna to Israel anna le’ba’i lako Salu Yordan. Sulei lako, tohhoipi dio sanaka-naka benginna tä’pi tappa lambam. 2Tappana lessu’ tallu bengi, iya ma’dälä’um indo to umpahe’ salengkoam oi to Israel ullelei ingganna kema, 3anna umbeenni pahenta to Israel naua: <<Maka’ too muitanna’ indo Patti Pa’dandianNa DEBATA, Puang Allataala to umpenombai nabulle sando battu diua pessubunna Lewi, iya la mengkalao siahangkoa’ duka’ dio ongeammu anna le’ba’koa’ untuhu’i, 4anna mala muitaa’ indo lalam la muola, aka tä’pakoa’ deem lako indo ongeam la untinandai. Sapo’ angga hia, pahallu umpalallaa’ alla’mu indo patti kiha-kiha la dua sa’bu singkum3:4 dua sa’bu singkum: Kiha-kiha sakilo mambelanna. mambelanna, tä’ la ungkahuku’a’.>> 5Puhai, iya ma’kadam Yosua lako to Israel naua: <<Sehoi asangkoa’ kalemu, aka makale’i too la umpadadi tanda memängä-mängä DEBATA illaam alla’-alla’mua’.>> 6Anna mane ma’kada lako indo sando naua: <<Bulleia’ itim Patti Pa’dandiam ammu lambanna’ libam umpendioloangam solamua’ to Israel.>> Iya nabullem duka’ indo Patti Pa’dandiam anna mellaoi umpendioloangam to Israel.
7Puhai, iya ma’kadam DEBATA lako Yosua naua: <<Allo temo la kukasalleam sangammu dio olona to Israel, anna mala naissam naua: <Umba susi pangngundu’ pa’patetteNa DEBATA lako Musa yolona la susim too duka’ pangngundu’ pa’patetteNa matim.> 8Pahallu la umbeem pahenta lako sando to umbulle inde Patti Pa’dandiam muua: <Landa’koa’ too lako Salu Yordan, iya mentekkangkoa’ tama anna ke’de’koa’ illaam.> >> 9Puhai, iya ma’kadam Yosua lako to Israel naua: <<Pengkahuku’koa’ mai, anna umpehingngiia’ inde battakadanNa DEBATA, Puang Allataala to umpenombai.>> 10Anna mane naua: <<Indem ia la umpangngissannia’ muua Puang Allataala Debata tubo muolaangkoa’, anna tä’ mala tala uhhambai dio mai olomua’ to Kanaan, to Het, to Hewi, to Feris, to Girgasi, to Amori, anna to Yebus 11ke muitangkoa’ indo Patti Pa’dandianNa Debata To ungkuasai senambo lino napendioloangangkoa’ le’ba’ tama Salu Yordan. 12Dadi tentomai, pileia’ sapulo dua tau dio mai indo sapulo dua pehapuam kasalle änä’na Israel, mesa tau mesa pehapuam kasalle. 13Nahondoinna too sando to umbulle indo Patti Pa’dandianNa DEBATA, Debata To ungkuasai senambo lino indo Salu Yordan, iya titompä siaham uwainna. Indo uwai buttu illaam mai ulunna Salu Yordan la titompä anggasanna passadangam.>>
14Wattunna mengkalao to Israel umpellei ongeam naongei ma’kema la ullambam Salu Yordan, iya napendioloangam sando to umbulle indo Patti Pa’dandiam. 15Wattu eta too sipatu passäesam gandum, iya si ma’buntu-buntu uwai salu naemem sule lako bihinna. Tappana landa’ lako Salu Yordan indo to umbulle patti anna umpehhondoam bitti’na dokko Salu Yordan, 16iya tappa titompä indo uwai to buttu illaam mai ulu salu. Indo uwainna titompä anggasanna passadangam mambellä dekke sikahuku’ kota Adam, siampe’ kota Sartan. Indo uwai si lu lako Le’bo’ Araba battu diua Le’bo’ Mässi’ moim ia lolä tadeenni. Iya silelem lambam indo to Israel umpenandai kota Yerikho. 17Indo sando to umbulle Patti Pa’dandianNa DEBATA dehe-dehe liu umpehhondoi litä’ mabangi illaam tängäna Salu Yordan, sampe tappu’ asam to Israel ullambam Salu Yordan.
4Sapulo dua batu diosä’ mendadi tanda pengkilalaam
1Tappana tappu’ asam to Israel ullambam Salu Yordan, iya ma’kadam DEBATA lako Yosua naua: 2<<Pileia’ sapulo dua tau dio mai indo sapulo dua pehapuam kasalle änä’na Israel, mesa tau mesa pehapuam kasalle. 3Beenni pahenta susi indee: <Alaia’ sapulo dua batu illaam tängäna Salu Yordan, dio indo naongei ke’de’ sando. Babaia’ dio mai indo batu anna umpaokko’ia’ dio indo la muongei ma’bengi manii.> >>
4Iya natambaim Yosua indo to sapulo dua to puha dipilei situhu’ pahentaNa DEBATA illaam mai alla’-alla’na sapulo dua pehapuam kasalle änä’na Israel, mesa tau mesa pehapuam kasalle, 5anna nauaanni: <<Tamakoa’ tängäna Salu Yordan, dio olona Patti Pa’dandianNa DEBATA, Puang Allataala to umpenombai. Posandaia’ batu umpassam situhu’ budanna pehapuam kasalle änä’na Israel 6la mendadi tanda pengkilalaam lako ikoa’. Di dako’na di maniinna anna deenni pessubummua’ mekutana naua: <Aka hia kalembasanna lako ikoa’ inde mai batu?> 7Iya la muuaanna’: <Titompä uwainna Salu Yordan dio olona Patti Pa’dandianNa DEBATA. Wattunna dibaba indo patti ullambam Salu Yordan, iya titompä uwainna. Inde mai batu la mendadi tanda pengkilalaam lako to Israel sule lako salako-lakona.> >> 8Iya napalakom duka’ to Israel indo napahentaam Yosua. Naposanda simesa indo sapulo dua batu napassam illaam mai tängäna Salu Yordan situhu’ budanna pehapuam kasalle änä’na Israel, umba susi pahentaNa DEBATA lako Yosua. Sangngim nababa lako indo ongeam to naongei ma’bengi, anna napaokko’i dio. 9Mane naosä’i duka’ Yosua sapulo dua batu illaam tängäna Salu Yordan, dio tungka pehhondoanna indo sando to umbulle Patti Pa’dandiam. Da’da’ liupi indo batu sule lako temo. 10Indo sando to umbulle indo patti’ ke’de’-ke’de’ liu illaam tängäna Salu Yordan sampe puha asam dipalako indo to napahentaam DEBATA lako Yosua la napalandasam to Israel situhu’ pepakahi’dinna Musa lako Yosua.
Sikanapasihha’ to Israel lambam. 11Tappana lambam asam libam bihinna, iya lambammi duka’ indo sando to umbulle Patti Pa’dandiam anna umpendioloanganni to Israel. 12Situhu’ pepakahi’dinna Musa, to handam la mendiolo ullambam salu pessubunna Ruben, pessubunna Gad anna bahe duanna pessubunna Manasye tungga’ sibaba paha’buno. 13Kiha-kiha appa’ pulo sa’bu muane sangngim sediam la ma’bundu’ napaihandam DEBATA umpenandai tipahantena Yerikho la ma’bundu’.
14Allo etam too anna nakasalleanni DEBATA sanganna Yosua dio olona to Israel, nasuhum sikaumpengkahea’i Yosua upu’ tubona, umba susi umpengkahea’i Musa.
15Inna puham ma’battakada DEBATA lako Yosua naua: 16<<Suai indo sando to umbulle Patti Pa’dandiam messubum illaam mai Salu Yordan.>> 17Iya nasuam duka’ Yosua naua: <<Pessubungkoa’ illaam mai Salu Yordan.>> 18Tappana messubum illaam mai tängäna Salu Yordan indo sando to umbulle Patti Pa’dandiam, anna ia sia uhhondoinna galantangam, iya muolam sule lalanna indo uwainna Salu Yordan anna mellao susi biasa ma’buntu-buntu naemem sule lako bihinna. 19Allo kasapulona bulam mesa anna lambanni Salu Yordan to Israel. Iya ma’kemaim dio Gilgal, tandai mata allona kota Yerikho. 20Indo sapulo dua batu to naala dio Salu Yordan tungga’ naosä’ Yosua dio Gilgal. 21Mane ma’kadai Yosua lako to Israel naua: <<Di dako’na di maniinna anna deenni pessubummua’ mekutana lako ambena naua: <Aka hia kalembasanna lako ikoa’ inde mai batu?> 22Iya muuaanna’: <Yolona to Israel ullambam Salu Yordan muola litä’ mabangi.> 23Puham napamattisangkoa’ uwainna Salu Yordan dio olomu DEBATA, Puang Allataala to umpenombai nasuhum malaa’ muola lambam, umba susi napamattisangkia’ le’bo’ Teberau dio olota lambi’ malaa’ taola lambam. 24Napateem, anna mala naissam ingganna hupatau illaam inde lino naua matoho katea’ bassinNa DEBATA, anna mala tookoa’ duka’ si mengkahea’ liu lako DEBATA, Puang Allataala to umpenombai.>>
5Passunnasam anna umpakahoa’ allo Kalappasam dio Gilgal
1Tappana naissam ingganna tomahajanna to Amori dio tandai katampusanna Salu Yordan sola ingganna tomahajanna to Kanaan dio bihinna Le’bo’ Itängä diona indo puha umpamatti’ uwainna Salu Yordan DEBATA, lambi’ mala nalambam to Israel, iya sangngim mäläi kute’-kute’na anna anggasanna tämbätä dipahha la untingngajo to Israel.
2Wattu eta too ma’kada DEBATA lako Yosua naua: <<Alai batu umpapia tiba’ anna umpakei ussunna’ to Israel lapi’ kaduanna.>> 3Iya mualam duka’ batu Yosuaa’ anna napapiai sanaka-naka tiba’, mane ussunna’i to Israel yabo Tanete Passunnasam.5:3 Tanete Passunnasam: Inde Tanete Passunnasam, puha ham disunna’ to Israel mane disangai Tanete Passunnasam.4Indem ia kasuhunganna anna ussunna’i to Israel Yosua: ingganna muane to Israel to messubum illaam mai lembäna Mesir to malam tama pangngebaam, mate asammi dio pädä kukku’ tappana illaam pangngolalalangam messubunna illaam mai Mesir. 5Aka ingganna to messubum illaam mai lembäna Mesir puha asammi ia disunna’, sapo’ ingganna to subum illaam pangngolalalangam dio pädä kukku’ sangngim tä’pi ia deem disunna’. 6Appa’ pulo taunna muola pangngolalalangam to Israel dio pädä kukku’ messubunna illaam mai lembäna Mesir, lambi’ mate asammi indo to malam tama pangngebaam aka tä’ manuhu’ lako DEBATA. Inna puham ma’dandi DEBATA naua: <<Tä’ la kupabäi muita indo botto to kudandiam lako nene to naponene>> anna lako kitaa’ la napadokkoangkia’ lisu pala’ta mesa botto bosa’ bumbungam makko anna bontä’ duho. 7Iya napadeengam polem DEBATA änä’ la ussulle indo to mateim dio pädä kukku’, iam too inde mai nasunna’ Yosua. Tää’ipi deem disunna’ aka tä’pi deem nasunna’ illaam pangngolalalangam. 8Tappana puha asam disunna’, iya tohhoipi illaam kemana simesa-mesa sampe bono’. 9Iya ma’kadam DEBATA lako Yosua naua: <<Allo temo puham kupa’dei indo kamatunaammua’ to disa’bu’ sabua’na to Mesir.>> Iam too anna disangaim indo ongeam, Gilgal5:9 Gilgal: Basa Ibrani, susi moninna kada dilulum (dipa’dei). sule lako temo.
10Wattunna ma’kema to Israel dio Gilgal, iya umpakahoa’um allo Kalappasam illaam allo kasapuloappa’na bulam ia too, napalako mahammo dio tipahantena Yerikho. 11Sabengii puhanna allo Kalappasam, iya sikaussäe’um issi baha’ba’ dio Kanaan napokinande, battu diua napapia hoti tä’ diboloi bibi’ hoti anna gandum batte. 12Indo allo naongei sikamuande issi baha’ba’ dio Kanaan, allo eta siam too duka’ tä’um tuhum manna. Pa’dem manna nalambi’ to Israel taum eta too, iya tanangam tubo ham dio lembäna Kanaan napokinande.
Pangngulunna TentahaNa DEBATA
13Pissam wattu mahassam ma’pahandam-handam Yosua dio sikahuku’ Yerikho, iya muitam mesa muane ke’de’-ke’de’ dio olona untetä mata pa’dam. Iya napengkahuku’im Yosua anna nakutanai naua: <<Solakiko, balingkiko?>> 14Iya natimba’im naua: <<Bassim taia. Kao inde Pangngulunna tentahaNa DEBATA, suleä’ tentomai.>> Iya ma’balinguntu’um Yosua napenombai. Anna mane naua: <<Aka la muuaam inde sabua’mu puäku?>> 15Iya natimba’im indo Pangngulunna tentahaNa DEBATA naua: <<Tässu’i sapatummu illaam mai bitti’mu, aka itim ongeam muongei ke’de’, maseho.>> Iya muäläim duka’ sapatunna Yosua.
6Hubä’-hubä’ tembo’na kota Yerikho
1Wattu eta too ditutu’i mäntäm ba’ba suluhanna kota Yerikho indana malai tama to Israel. Tä’ deem moi podo la mesa tau dipabäi tama battu haka la messubum. 2Iya ma’kadam DEBATA lako Yosua naua: <<Pennassai, puhangko kupadokkoam lisu pala’mu kota Yerikho sola tomahajanna anna ingganna pa’bahani matittana. 3Pahallua’ la umpenggulilinni kota ia too. Ingganna tentaha la tiäto’ ma’lengko umpenggulilinni indo kota pissam illaam sangngallo, annam allona la naolaam. 4Pitu sando pahallu la umposanda simesa pitu sangkakala tandu’ domba nababa dio olona indo Patti Pa’dandiam. Allo kapitunnai too pahallu la pempitu ia umpenggulilinnia’ indo kota, anna ingganna sando la umponi indo sangkakala. 5Maka’ too uhhingnginna’ napakalando moninna sando indo sangkakala tandu’ domba, iya sangngim umbaku-bakuammokoa’ a’da’mu. Iya la hubä’-hubä’um too tembo’na indo kota, iya tungga’ ma’teka’ungkoa’ längäm umpepatu olomu.>>
6Iya untambaim ingganna sando Yosua änä’na Nun anna nauaanni: <<Bulleia’ pihakoa’ inde Patti Pa’dandiam! Anna pitu sando pahallu la umposanda simesa indo pitu sangkakala tandu’ domba la nababa dio olona indo Patti Pa’dandianNa DEBATA.>> 7Mane ma’kadai lako solana to Israel naua: <<Pengkalaongkoa’, penggulilinniia’ inde dio kota. Anna indo tentaha to umbaba paha’buno pahallu la mendiolona Patti Pa’dandianNa DEBATA.>> 8Tappana puha ma’tula’ Yosua lako solana to Israel, iya mellaom dio olona Patti Pa’dandianNa DEBATA indo pitu sando umposanda simesa indo pitu sangkakala tandu’ domba. Naponi indo sangkakala anna natuhu’i indo to umbulle Patti Pa’dandianNa DEBATA. 9Anna indo tentaha to umbaba paha’buno mellao dio olona indo sando to umponi sangkakala, anna lengkoanna tentaha senga’ handam ibundi dio boko’na indo Patti Pa’dandiam manjaga. Indo wattunna mellao diponi liu indo sangkakala. 10Sapo’ inna puham umpakahi’di mate-mate to Israel Yosua naua: <<Tä’koa’ deem la mua’da’, tä’koa’ deem la ma’tula’, anna tä’ deem la messubum moi podo la sabattam kada dio pudu’mua’ ke tä’koa’ kuuaam. Kuuaampokoa’: a’da’koa’! Mane mua’da’koa’.>> 11Susim too indo Patti Pa’dandianNa DEBATA napopebaba Yosua umpenggulilinni indo kota Yerikho, tiäto’ ma’lengko pissam pali’ napenggulilinni. Puhai, iya ma’pasuleim lako ongeanna ma’kema anna ma’bengii dio.
12Makale’na, mebengngi’-bengngi’um bangom Yosua, iya nabulle oom sando indo Patti Pa’dandianNa DEBATA. 13Indo pitu sando to umposanda simesa indo pitu sangkakala tandu’ domba mellao dio olona indo Patti Pa’dandianNa DEBATA napasindum naponi indo sangkakala. Anna indo tentaha to umbaba paha’buno mellao dio olona indo sando to umponi sangkakala, anna lengkoanna tentaha senga’ handam ibundi dio boko’na indo Patti Pa’dandiam manjaga. Indo wattunna mellao diponi liu indo sangkakala. 14Indo allo kaduanna pissam napenggulilinni indo kota mane ma’pasulei lako kemana. Napateem lium too annam allona naolaam.
15Allo kapitunnai, mebengngi’-bengngi’im bangom, ia sia buttunna allo, anna umpenggulilinnii kota Yerikho susi biasa pempitu opi pali’. Anggam allo eta too anna pempitui pali’ napenggulilinni. 16Kapempitunnai pali’, iya umponim sangkakalana indo sando, iya ma’kadam Yosua lako to Israel naua: <<A’da’koa’, aka nabehom DEBATA dokko lisu pala’mua’ inde kota! 17Padahi kapu’i indo kota, anna dappo’i ingganna menabanna illaam. Susim too lalanna la tapehumalasanna’ inde kota lako DEBATA. Anggam ia Rahab, indo baine passunda’ sola ingganna to napasola tohho illaam banuanna, la dipabäi ia tubo, aka puha umbuni indo to tasuaa’ lao ma’pesi’dim. 18Sapo’ ikoa’i, pissa’-pissa’ akoa’ la muala indo baham-baham to puham dipa’tantu la dipadahi kapu’. Maka’ deem tau mualai indo to la dipadahi kapu’, iya la napempa’deam asangkia’ DEBATA illaam indo ongeam taongei ma’kema inggannakia’ to Israel. 19Ingganna bulabam, peha’, anna pangkakka’ tembaga sola bassi la dipaseheam ia DEBATA, anna la sangngim dipalutama ia ongeanna ebangam dipehumalasam lako DEBATA.>>
20Iya mua’da’um duka’ to Israel anna umponi ia sangkakalana indo sando. Dadi, tappana nahingngi to Israel moni sangkakala anna sangngim umbaku-bakuammi a’da’na, iya hubä’-hubä’ yabo mai tembo’na kota Yerikho. Iya tungga’ umpepatu mandam olona to Israel ma’teka’ ungkatama indo kota anna naokko’i. 21Nadappo’i ingganna menabanna illaam indo kota natepa pa’dam, susi muane teem baine, susi tomatua teem to mangnguha, susi toi duka’ sapim, domba, anna keledai. 22Sapo’ inna puham napakahi’di Yosua indo to dua to disua lao ma’pesi’dim indo lessu’ naua: <<Lakokoa’ iko banuanna indo baine passunda’ anna umpasolaia’ messubum illaam mai sola ingganna to napasola illaam banuanna, umba susi puhangkoa’ ma’dandi mate-mateam lako.>> 23Iya le’ba’um indo dua änä’ gassim indo to ma’pesi’dim, anna umpasolai illaam mai banuanna Rahab, ambena, indona, solasubunna anna ingganna kasahapuanna to napasola illaam banuanna, anna napatuhoi ongeam la naongei tohho dio sulibanna ongeam naongei to Israel ma’kema. 24Anna tentaha Israel ia ussobe indo kota sola ingganna issinna. Anggam bulabam, peha’, anna pangkakka’ tembaga sola bassi nababa ia tama ongeanna ebangam dipehumalasam lako DEBATA. 25Rahab ia, indo baine passunda’ sola ingganna kasahapuanna anna ingganna to napasola napabäi ia tubo Yosua. Tohho illaam alla’-alla’na to Israel sule lako temo, aka puha umbuni indo to nasua Yosua lao ma’pesi’dim lako Yerikho.
26Puhai ia too, ma’dandim Yosua naua:
<<Menna-menna ma’pattuju la umpake’de’ sule inde kota Yerikho la natädo DEBATA.
Maka’ napake’de’ sule tembo’ kotana la mate änä’ uluana,
maka’ napake’de’ sule ba’ba suluhanna la mate änä’ tämpä’na.>>
27Naundu’ napatette DEBATA Yosua illaam ingganna pa’palakoanna, anna molele-lele sanganna illaam lembä ia too.
7Akhan umpogau’ dosa
1Sapo’ untekka pahentaNa DEBATA to Israel muala indo ebangam to puham dipa’tantu la dipadahi kapu’. Aka deem sanaka-naka indo baham-baham to puha dipa’tantu la dipadahi kapu’ naala Akhan änä’na Karmi, Karmi änä’na Zabdi, Zabdi änä’na Zerah, Zerah buttu di pessubunna Yehuda, nasuhum hede-hede aha’Na DEBATA lako to Israel.
2Wattu etam too anna umpake’de’i sanaka-naka tau Yosua dio Yerikho le’ba’ lako Ai, mesa kota sikahuku’ Bet-Awen, dio tandai mata allona Betel, nauaam: <<Lakokoa’ kota Ai anna umpesi’dinniia’ botto ia too.>> Iya le’ba’im indo to dipake’de’ anna umpesi’dinnii kota Ai. 3Tappana ma’pasulei, iya muuaammi Yosua: <<Tä’ manggi’ le’ba’ asam to Israel lako, podo dua sa’bu battu haka tallu sa’bu tau le’ba’ umbundu’ kota Ai. Damom umpanda’i to Israel la manggi’ lako asam aka anggam ia paha’ saidi’ taunna.>> 4Iam too anna anggam kiha-kiha tallu sa’bu to Israel le’ba’ lako, sapo’ silele napasosso’ to Ai. 5Kiha-kiha tallu pulo annam to Israel napatei to Ai. Mengkalao dio ba’bana kota Ai dipadondo to Israel le’ba’ lako Syebarim anna dipatei dio seppom tanete. Iya silele mäläi kute’-kute’na to Israel. 6Iya umpessepäsammi pohebana Yosua mane ma’balinguntu’i mendu’dum dokko litä’ dio olona indo Patti Pa’dandianNa DEBATA sule lako mahammo, sola ingganna matua ulunna to Israel, napasindum untantanni sobä’ ulunna.7:6 untantanni sobä’ ulunna: Situhu’ kabiasaanna to Yahudi, maka’ deem tau untantanni sobä’ ulunna ia too tandana mapi’di’ penabanna.7Mane ma’kadai Yosua naua: <<Iii, PUANG ALLATAALA, Debata to kupenombai! Akanna ia opi umpasola inde mai to Israel ullambam Salu Yordan? Abana isanga la umbehokam dokko pala’ limanna to Amori la napempa’deangkam? Mapia leko’um ia kela tohho dipengkam lambam libanna Salu Yordan! 8O Debata, akam la kuua, tappana napasosso’ balinna to Israel? 9Maka’ too naissammi to Kanaan sola ingganna issinna inde botto kadadiam ia too, iya la natalimbum tamakam too anna napempa’deanni sangangki illaam mai inde lino. Iya aka la umpogau’ anna mala titande sule sanga matandeMu?>>
10Iya ma’kadam DEBATA lako Yosua naua: <<Bangongko längäm! Akanna mendu’dum dako iko dokko litä’? 11Puham umpogau’ dosa to Israel aka untekka pahenta to situhu’ indo pa’dandiangKu to puha kupadandam dio olona. Deem sanaka-naka indo baham-baham to puha dipa’tantu la dipadahi kapu’ naboko, anna nabunii illaam ongeam pahuhunna. Mane naägä’i naua tä’ deem kiala. 12Iam too kasuhunganna anna tä’um nabela to Israel untingngajo balinna. Silele napasosso’ balinna aka dipa’tantum pole’ temo la dipempa’deam. Tä’ungkoa’ deem la kuolaam, ke tä’ia’ umpadahi kapu’ indo baham-baham to puha dipa’tantu la dipadahi kapu’. 13Pengke’de’ko, sehoi to Israel. Uaanni: <Sehoikoa’ kalemu tentomai anna mala sediakoa’ allo makale’, aka susi inde kadanNa DEBATA, Puang Allataala to napenombai to Israel: Oa’ to Israel, deem baham-baham to puha dipa’tantu la dipadahi kapu’ illaam pa’pongngeammua’. Inna tä’ siaa’ la umbela untingngajo balimmu, ke tä’pi puha muäläia’ dio mai kalemu indo baham-baham to puha dipa’tantum la dipadahi kapu’! 14Makale’ mebengngi’ pahallukoa’ sule dio oloKu situhu’ pehapuam kasallemua’ simesa-mesa. Iai too pehapuam kasalle kutahuno pedollo’i, iam pahallu mengngolo situhu’ pehapuam bahinni’na simesa-mesa. Iai too pehapuam bahinni’ kutahuno pedollo’i iam pahallu mengngolo simesa-mesa dapo’. Anna iai too dapo’ kutahuno pedollo’i iam pahallu mengngolo simesa-mesa bätä. 15Anna iai too kalambisam muanna indo baham-baham to puha dipa’tantu la dipadahi kapu’, iam ditunu mampu’ dipasitunu ingganna aka-akanna, aka untekka pahenta to situhu’ indo pa’dandiangKu anna umbabaam huhuam to Israel.> >>
16Makale’na, mebengngi’-bengngi’um bangom Yosua anna umpasolai to Israel pantam mengngolo lako DEBATA situhu’ pehapuam kasallena simesa-mesa, iya pessubunna Yehuda nahua. 17Iya mengngolom ingganna pehapuam bahinni’ illaam pessubunna Yehuda, iya pehapuanna Zerah nahua. Iya mengngolom simesa-mesa dapo’ pehapuanna Zerah, iya dapo’na Zabdi nahua. 18Iya dipasimesa-mesam bätä illaam dapo’ Zabdi dipopengngolo, iya Akhan nahua. Indo Akhan änä’na Karmi, Karmi änä’na Zabdi, Zabdi änä’na Zerah, Zerah buttu dio mai pessubunna Yehuda.
19Iya ma’kadam Yosua lako Akhan naua: <<O änä’ku, pandannii lako DEBATA, Puang Allataala to napenombai to Israel, anna akui pa’gau’mu dio oloNa, daa umbuniangannä’.>> 20Iya natimba’im Akhan naua: <<Abana madosaä’ dio oloNa DEBATA, Puang Allataala to napenombai to Israel. Indem ia pa’gau’ku: 21Tappana kuita mesa juba mapi’dä’ buttu dio mai Sinear7:21 Sinear: Sanga senga’na Babel. mentihau illaam ebangam pamuhu, anna dua hatu’ syikal peha’, anna salonga’ bulabam lima pulo syikal mabanda’na, iya kukailui lambi’ kuala. Sangngim kulamum dokko litä’ illaam kemaku, indo peha’ handam kupadiongam.>>
22Iya ussuam sanaka-naka tau Yosua nakandi’i le’ba’ lako kemana Akhan. Iya sangngim nabuni si’da Akhan indo ebangam illaam kemana, anna indo peha’ handam napadiongam. 23Iya naala asammi indo ebangam illaam indo kemana anna nababaanni lako Yosua sola ingganna to Israel, anna nabehoi lako oloNa DEBATA. 24Mane naalai Yosua sola ingganna to Israel Akhan änä’na Zerah napasiala indo peha’, juba, anna indo salonga’ bulabam pabokona. Susi toi duka’ ingganna änä’na muane sola baine, sapinna, keledainna, bekena sola dombana, kemana anna ingganna aka-akanna, mane nababa asanni lako lembä Akhor.7:24 lembä Akhor: Kalembasanna lembä kamasussaam.25Sulei lako, nauaammi Yosua: <<Akanna umpasuleangkam katilakaam? La napatilakako duka’ DEBATA allo temo.>> Mane nasileba’-leba’i batu to Israel Akhan sola sahapunna. Puhai nasileba’-leba’i batu natunu mampu’um. 26Mane natombonni buda batu yabona. Indo tombongam batu da’da’ liupi sule lako temo. Iya mehe pole’ aha’ kasalleNa DEBATA. Iam too kasuhunganna anna disangaim indo ongeam lembä Akhor sule lako temo.
8Kota Ai ditunu mampu’
1Puhai, iya ma’kadam DEBATA lako Yosua naua: <<Daa ummahea’ anna daa umpa’duhho. Pasolai ingganna tentaha, ammu pengkalaoa’ lao bundu’ Ai. Pennassai, kupadokkoammoko lisu pala’mu tomahajanna kota Ai, pakketauanna, kotana, anna bottona. 2La umpogau’ duka’ lako Ai sola tomahajanna umba susi indo umpogau’ lako Yerikho sola tomahajanna. Anggam alla’na, la mala ia umpamuhua’ baham-bahanna sola olo’-olo’na. Suai piha tentahamu mangngabum la muola boko’ kota ia too.>>
3Iya mengkalaom Yosua sola ingganna tentahana la ungkatama kota Ai. Napilei Yosua tallu pulo sa’bu pa’bahani matitta anna nasua bengii lako. 4Nabeem pahenta naua: <<Pehingngiia’, la mangngabungkoa’ anna muola boko’ia’ indo kota. Daa ussikambela sugali’a’ indo kota, anna la sangngim taja liukoa’. 5Anna kao-kao sola tentaha to kupasola la kipengkahuku’i indo kota. Maka’ too messubunnim nabalikam nabundu’ susi indo lessu’, iya sikalumpa’ungkam lao kipellei. 6Iya la napadondongkam too, lambi’ kikeloi umpellei indo kota, aka la nauam too inabanna: <Le’ba’i oom sikakondä inde mai tau dio mai olotaa’ susi indo lessu’.> Maka’ too le’ba’ungkam sikakondä kipellei, 7iya messubummakoa’ illaam mai indo ongeam muongei mangngabum anna ungkatamaia’ anna muokko’i indo kota. La napadokkoammokoa’ too lisu pala’mu DEBATA, Puang Allataala to umpenombai. 8Muokko’innaa’ too indo kota, iya ussobenna’. Pogau’a’ ia too umba susi kadanNa DEBATA. Pengkilalaia’ le, inde pahentaku matim.>> 9Mane nasua Yosua indo tentahana lako indo ongeam la naongei mangngabum, anna tohhoi dio tandai katampusanna Ai, illaam alla’na Betel anna Ai. Anna Yosua ia ma’bengi dio ongeanna to Israel ma’kema.
10Makale’na, mebengngi’-bengngi’um bangom Yosua anna uhhempunni tentahana napakatattam. Puhai, iya umpendioloangammi tentahana Yosua solai ingganna matua ulunna to Israel anna le’ba’i lako kota Ai. 11Iya tahhu’ lium Yosua sola ingganna tentahana sampe landa’ lako olona kota Ai. Iya ma’kemaim dio tandai utarana kota Ai angga ham mesa lembä mualla’i. 12Mane ussuai lima sa’bu tau Yosua la mangngabum illaam alla’na Betel anna Ai, dio tandai katampusanna kota Ai. 13Napateem inde muäto’ indo tentaha: indo tentaha to mambätä’ dipadio tandai utarana kota, anna ingganna tentaha mangngabum dio boko’ dipadio ia tandai katampusanna kota. Anna Yosua ia mengngala lembä bengi eta too. 14Makale’na, tappana muita tentaha to Israel indo tomahajanna kota Ai, iya messubum siaham sola ha’ja’na, issinna indo kota anna le’ba’i umbundu’ to Israel dio seppom tanete umpendadai indo lembä. Sapo’ tä’ naissam indo tomahaja naua, deem dia tau mangngabum la mangngola boko’. 15Iya sikalumpa’ lelemmi Yosua sola ingganna tentahana mato-mato napasosso’ to Ai. Sikakondä lako tandai pädä kukku’. 16Iya dipahhim asammi ingganna muane illaam kota Ai anna le’ba’i umpadondo to Israel. Silele umpadondo Yosua, lambi’ tuttuam mambela naola dikeloi umpellei kota. 17Tä’um deem moi podo la mesa muane tohho dio Ai sola Betel, le’ba’ asammi umpadondo to Israel. Napabäi bäbä titungka’ ba’ba suluhanna kota Ai, aka le’ba’ umpadondo to Israel.
18Iya ma’kadam DEBATA lako Yosua naua: <<Pentuhoanni itim doke dio limammu popentuho lakoi kota Ai, aka la kupadokkoammoko lisu pala’mu kota ia too.>> Iya napentuhoammi duka’ Yosua indo doke dio limanna lako kota Ai. 19Tappana umpentuhoam limanna, iya messubunni siaham illaam mai ongeam pangngabunganna indo tentaha, anna sikalumpa’i ungkatama kota Ai. Naokko’i, anna tappa nasobe indo kota. 20Tappana messaile lako boko’na indo to Ai, iya naitam hambunna indo kota pelamboho längäm langi’. Iya tä’ deem naola la muäläi kalena, aka indo tentaha to napadondo lako pädä kukku’ ingngena’ unggihi’ kalena la paeba. 21Naitanna duka’ Yosua sola ingganna tentahana hambunna indo kota pelamboho längäm langi’ anna naokko’im tentaha mangngabum indo kota, iya ma’pasuleim anna umpatei to Ai. 22Iya messubunnim duka’ illaam mai kota Ai indo tentaha mangngabum uhhomai to Ai, lambi’ tikuhum illaam alla’na to Israel aka nasitammui to Israel. Didappo’i to Ai, lambi’ tä’um mehä’dä’ anna tä’um deem lussu’. 23Indo tomahaja Ai nasakka tubo ia, anna napopengngoloi lako Yosua.
24Tappana puha nadappo’i to Israel ingganna muane to Ai dio pädä kukku’, dio ongeam naongei to Israel napadondo, anna tä’um deem mehä’dä’ dappo’ ditepa pa’dam, iya ma’pasuleim to Israel tama kota Ai anna untepai pa’dam ingganna pakketauam illaam indo kota. 25Mate asam to Ai allo eta too, susi muane teem baine, ia asanna sapulo dua sa’bu tau. 26Umpentuhoam liu dokena Yosua tä’ deem umpodo’ limanna, wattunna tä’pi dipempa’deam asam pakketauanna kota Ai. 27Anggam olo’-olo’ sola ebangam mala dipamuhu illaam indo kota naala to Israel situhu’ pahentaNa DEBATA lako Yosua. 28Nasobe Yosua kota Ai nasuhum mentombom lium kahuppusanna sule lako salako-lakona, mendadi botto maitu-itu sule lako temo. 29Indo tomahajanna Ai natoke’ yabo mesa kaju diosä’ sule lako kahubem. Tappana lendu’ allo, iya napesuaammi Yosua dipatuhum indo bakkena yabo mai indo andihi pantokesam, anna napa’tibeanni lako olona ba’bana kota. Mane untombonni batu yabona. Indo tombongam batu, malangka’ anna da’da’ liupi sule lako temo.
Dapo’ pehumalasam yabo Tanete Ebal - umbata Pepaondonganna Musa
30Masäe-säei, napake’de’um Yosua mesa dapo’ pehumalasam lako DEBATA, Puang Allataala to napenombai to Israel yabo Tanete Ebal, 31umba susi napa’pahentaam Musa, indo sabua’Na DEBATA lako to Israel. Ia too sihondoi indo puha tituli’ illaam suha’ Pepaondonganna Musa naua: <<Mesa dapo’ pehumalasam batu dipapia, batu tä’ dipaa’ anna tuli tadeempi naisso bassi.>> Yabo indo dapo’, la napehumalasam tunuam ditunu mampu’ lako DEBATA anna tunuam untilalla’i kasikapiaam. 32Dioi, natuli’um Yosua lako batu Pepaondonganna Musa dio olona to Israel, indo to natuli’ Musa yolona. 33Ingganna to Israel, susi to messihuhu susi issi litä’, sola ingganna matua ulunna to Israel, ingganna pangngumbabanna tentaha, anna ingganna to si mahhotto’na ke’de’ sipatomaliam untingngajoi indo Patti Pa’dandianNa DEBATA, dio olona ingganna sando pessubunna Lewi to umbulle indo patti. Sabaheam to Israel memboko’ lako Tanete Gerizim, anna sabaheam memboko’ lako ia Tanete Ebal, umba susi puha napa’pahentaam loppo’ Musa, indo sabua’Na DEBATA, la umpelauam tamba’ to Israel. 34Puhai ia too, nabatam Yosua ingganna indo issinna Pepaondonganna Musa, susi indo ma’hupa pa’tamba’ teem indo ma’hupa pantädo, umba susi indo tituli’ illaam suha’ Pepaondonganna Musa. 35Ingganna indo napa’pahentaam Musa, tä’ deem nahä’dä’ Yosua nabata asam dio olona ingganna to Israel moi duka’ baine sola änä’-änä’ anna ingganna to sule messihuhu illaam alla’-alla’na to Israel.
9To Gibeon muakkalanni Yosua
1Indo makkatalo-talo to Israel napelele ingganna tomahaja dio tandai katampusanna Salu Yordan, susinna ingganna tomahaja yabo tipatanetena, ingganna tomahaja lako tanete-nete si mahempo, anna ingganna tomahaja dio uhhuttu’ bihinna Le’bo’ Itängä sule lako tipatanetena Libanon. Ingganna tomahaja ia too susinna: tomahajanna to Het, to Amori, to Kanaan, to Feris, to Hewi, anna to Yebus 2muala kada sahandam anna umpasiamba’ buku la umbundu’ Yosua sola to Israel.
3Sapo’ tappana naissam to Gibeon indo to napogau’ Yosua lako Yerikho anna Ai, 4iya muakkalannim Yosua. Anggasanna lelem to la disua, umpatteke’i keledainna kahum si malusa napake anna anggur illaam pa’pongngeam anggur lollo’ malusam, sesse’um anna ditampi’. 5Ma’sapatu kadäkke’ ditampi’, ma’poheba sesse’-sesse’, anna ingganna hoti napa’tinallo sangngim matäli’um anna a’bungam. 6Napateemmi too anna le’ba’i umpellambi’i Yosua lako ongeanna to Israel ma’kema dio Gilgal, anna muuaanni Yosua sola to Israel: <<To buttu diokam mai botto mambela. Maka’ muakua’ sitalli’kia’ tentomai.>> 7Sapo’ ma’kada to Israel lako to Hewi9:7 to Hewi: Kada senga’na to Gibeon. Indo to umpangngissi kota Gibeon, issinna Hewi battu diua to Hewi. naua: <<Umbai’ to tohho inde siangkoa’ mai sikahuku’ki? La maakam ia susi la sitalli’kia’?>> 8Iya ma’kadaim lako Yosua naua: <<Kami’ indee sangngim sabua’mukam.>> Iya nakutanaim Yosua naua: <<Mennakoa’ indee, anna buttu umbakoa’ ngei?>> 9Iya natimba’im naua: <<Kami’ inde mai sabua’mu, to buttu diokam mai botto liba’ mambelanna aka molele-lele sanganNa DEBATA, Puang Allataala to umpenombaia’. Kipelele kaha-kaha mepilla’-pilla’ napogau’ dio Mesir, 10anna ingganna indo napogau’ lako dua tomahajanna to Amori, dipe lambam libanna Salu Yordan, isanga: Sihon tomahaja Hesybon, anna Og tomahaja Basan, to tohho dio Asytarot. 11Nasuhum nauaangkam matua ulunna bottoki sola ingganna issinna bottoki: <Pa’tinallokoa’ ammu laoa’ pellambi’i to Israel, anna muuaanni: <<Kami’ inde, sangngim sabua’mukam. Kipelau anna sitalli’kia’.>> > 12Indem ia hotingki kipa’tinallo, malussupi angki pengkalao dio banuangki sulekam kipellambi’ikoa’. Sapo’ tentomai, ita siaia’ too, matäli’um anna a’bungam. 13Inde duka’ pa’pongngeam anggur lollo’ bakahupi indo anna kipangngissii anggur. Sapo’ ita siaia’ too, sesse’um. Inde pohebaki sola sandala’ki malusam tandana mambela kiola mellao.>> 14Iya nasändä’um to Israel indo tinallona to Gibeon, sapo’ tä’ mekutana yolo lako DEBATA. 15Puhai, umpadeemmi kasitallisam Yosua sola to Gibeon anna ma’dandi tä’ la napakattu sungnga’. Ingganna pepungngu’na to Israel sangngim ma’dandi mate-mateam dio olona.
16Sapo’ tappana tallungngallo puhanna sitalli’ to Gibeon, iya napelelem to Israel diua indo tau salembanganna siam ia anna mahuku’i siam naongei tohho. 17Iya mengkalaom to Israel. Tappana katallungngallona mellao, iya landa’im lako kotana indo tau. Indo kota isanga: Gibeon, Kefira, Beerot, anna Kiryat-Yearim. 18Sapo’ tä’ napatei to Israel indo tau aka to pepungngu’na to Israel puham ma’dandi ussa’bu’ sanganna DEBATA, Puang Allataala to napenombai. Iya ma’naum-naummi to Israel lako pepungngu’na. 19Iya ma’kadam indo to pepungngu’ lako to Israel naua: <<Puhangkam ma’dandi ussa’bu’ sanganna DEBATA, Puang Allataala to napenombai to Israel dio olona inde mai tau. Nasuhum tä’unna’ mala tahumbu-humbu. 20Susi inde la tapogau’a’ lako: la tapabäia’ tubo indana nahuakia’ aha’Na DEBATA aka tatekkaa’ indo pa’dandi puha lendu’ dio pudu’ta dio olona inde mai tau.>> 21Mane nauai indo to pepungngu’: <<Pabäia’ tubo.>> Iya napadadiim to mamisä’ kajunna anna to tumimba uwainna to Israel umba susi puha nakattu pepungngu’na diona indo tau. 22Puhai, natambaim Yosua indo tau anna nauaanni: <<Akanna untipukam muuaangkam: <Sikambelläm bottoki anna bottomua’,> anna ke sikahukku’ siangkia’ ia?
23Nasuhum la nahuakoa’ tädo! La napokaponam tapuppu’ di too pakketauammua’ mendadi sabua’, to mamisä’ kaju, anna to tumimba uwai la dipake illaam banuanNa Puang Allataala to kupenombai.>> 24Iya natimba’im naua: <<Ia hi tia anna ma’pateengkam, aka puhangkam dipatamaam manappa talingangki diua DEBATA, Puang Allataala to umpenombaia’, puha umbeem pahenta lako Musa, sabua’Na la napadokkoangko lisu pala’mu ingganna inde botto, anna la napempa’deam asam pakketauanna inde pa’bottoam dio olomua’. Mahea’ punalakam la dipakattu sungnga’ dio olomua’. 25Iya tentomai, diongkam lisu pala’mu puäki. Iai too la umpemapiaanna anna la sipäto’na iam umpogausangkam puäki.>> 26Iya indem ia napogausam Yosua: Nalappasam dio mai pala’ limanna to Israel nasuhum tä’ napatei. 27Wattu etam too anna napadadii Yosua to mamisä’na anna to tumimbanna to Israel, anna umpamisäsam toi anna untimbaam indo dapo’ pehumalasam lako DEBATA sule lako temo dio indo ongeam to napilei.
10Pa’bundusam dio sikahuku’ Gibeon Yosua untaloi Kanaan tandai selatan
1Tappana napelele Adoni-Zedek, tomahaja Yerusalem diua muokko’im anna ungkahäppusanni kota Ai Yosua anna napatei tomahajanna susi indo napogau’ lako Yerikho anna tomahajanna, anna duka’ diua puham umpadeem kasitallisam to Gibeon sola to Israel anna tohhom sola-sola, 2iya sangngim tä’ deem pada samahea’ issinna Yerusalem aka indo Gibeon mesa kota kasalle, sipadaam kota to napahenta mesa tomahaja. Kasalle puha ia anna la kota Ai anna ingganna muane issinna sangngim pa’bahani. 3Iam too napolalam umpake’de’ tau Adoni-Zedek, tomahaja Yerusalem, lao umpellambi’i Hoham, tomahaja Hebron, Piream, tomahaja Yarmut, Yafia, tomahaja Lakhis, anna Debir, tomahaja Eglon, anna napakahi’dii la nauaam: 4<<Maikoa’ anna ussamba’ä’. Tabundu’a’ kota Gibeon aka puham umpadeem kasitallisam solai Yosua anna to Israel.>> 5Iya umpamesam buku indo lima tomahajanna to Amori: tomahaja Yerusalem, tomahaja Hebron, tomahaja Yarmut, tomahaja Lakhis, anna tomahaja Eglon, anna mengkalaoi le’ba’ sola ingganna tentahana. Ma’kema umpali’ kota Gibeon mane nabundu’i. 6Iya umpake’de’um tau to Gibeon lao umpellambi’i Yosua lako ongeanna to Israel ma’kema dio Gilgal nauaam: <<Daa ullamba’i inde mai sabua’mu puäku. Pasihha’i mai ullombakam. Langnga’ikam anna pesäkäikam, aka ingganna tomahajanna to Amori to tohho yabo tipatanetena umpamesam buku napobalikam.>>
7Iya mengke’de’ siaham Yosua dio Gilgal sola ingganna tentahana, le’ba’ duka’ ingganna tentaha pa’bahani. 8Iya ma’kadam DEBATA lako Yosua naua: <<Daa ungkahea’i itim matim tau, aka puham kupadokkoangko lisu pala’mu. Tä’ deem moi podo la mesa la nasaha umbaliko.>> 9Iya napepusannim bengi Yosua sola tentahana mellao mengkalao dio Gilgal le’ba’ lako Gibeon, anna umpatikkedu’i to Amori nabundu’. 10Iya napahukkam napagege’ DEBATA indo to Amori dio olona to Israel nasuhum masambam kataloanna sola kasägänganna dio Gibeon. Napadondo mäne’-mäne’pi längäm petukasam dio Bet-Horon anna napasosso’ sule lako Azeka anna Makeda. 11Mahassanni le’ba’ sikalumpa’ to Amori napadondo to Israel dokko seppom tanete dio Bet-Horon, iya napatutuim uham kembua si pada batu-batu DEBATA yabo mai langi’ sule lako Azeka lambi’ buda mate. Buda puha ia mate natutu indo uham kembua anna la indo to natepa pa’dam to Israel.
12Indo allo naongei DEBATA umbeho to Amori dokko lisu pala’na to Israel, iya ma’kada Yosua lako DEBATA anna dio olona to Israel naua:
<<O mata allo, tohhoko yabo patunna Gibeon,
anna iko bulam, hapa’ko yabo patunna Lembä Ayalon!>>
13Iya tohhom duka mata allo,
anna hapa’ bulam
sampe membala’ to Israel lako balinna.
Tä’ daka too inna tituli’um illaam Suha’ Yasar10:13 Suha’ Yasar: Kalembasanna Suha’na To Malolo Penaba. kaha-kaha ia too?
Sangngallo bantahi tohho mata allo yabo tängä langi’ anna masäe mane lendu’i. 14Tä’pi deem dilalam mesa allo la susi allo ia too tando lakona anna tando diona mai kadadiam ia too, DEBATA la uhhingngiam pelauanna mesa hupatau, sapo’ aka DEBATA dio matanna umpa’bundusam to Israel. 15Puhai, ma’pasulem Yosua sola ingganna to Israel lako kemana dio Gilgal.
16Pissananna indo eta, indo lima tomahajanna to Amori le’ba’i muäläi kalena anna membunii tama leä dio Makeda. 17Iya ditulasammi Yosua diua: <<Indo lima tomahaja dilambi’ mahassam membuni illaam leä dio Makeda.>> 18Iya nauam Yosua: <<Lolinni sanaka-naka batu kasalle umpalapa’iam ba’bana indo leä anna umpatadongkonni sanaka-naka tau najagai. 19Sapo’ ikoa’-iko daa untohhoa’, padondo liuia’ balimmu anna umbundu’i dio mai boko’. Daa umpabäia’ mentama kotana aka puhangkoa’ napadokkoam lisu pala’mu DEBATA, Puang Allataala to umpenombai.>> 20Tappana puha nataloi Yosua sola to Israel indo to Amori napatei lambi’ saidi’ tadappo’ asam, anna indo malannapi untässu’i kalena le’ba’i tama kota dibettem, 21iya mane ma’pasulei hi pole’ to Israel tadondom bulu salamba’na tatobä bulu sangkahohinna umpellambi’i Yosua lako ongeanna ma’kema dio Makeda.
Tä’um deem moi podo la mesa tau la bahani umpassubum tula’ sabatta lako to Israel.
22Puhai, ma’kadam Yosua naua: <<Tungka’ia’ pelapa’na indo leä anna umpasolaannä’ illaam mai indo lima tomahaja.>> 23Iya napalakoim duka’, anna napasolaanni illaam mai leä indo lima tomahaja: tomahaja Yerusalem, tomahaja Hebron, tomahaja Yarmut, tomahaja Lakhis, anna tomahaja Eglon. 24Tappana dipasolaam sule Yosua indo lima tomahaja, iya untambaim ingganna to Israel Yosua anna ma’kadai lako ingganna pangngumbabanna tentaha indo to napasola lao naua: <<Pengkahuku’koa’ mai, ammu hondoia’ bätä bahokona10:24 hondoia’ bätä bahokona: Situhu’ kabiasaanna tau indo yolona maka’ deem tomahaja patalo, iya si uhhondoi bätä bahokona indo balinna to natalo. inde mai tomahaja.>> Iya suleim duka’ anna nahondoi bätä bahokona indo lima tomahaja. 25Puhai, nauam Yosua lako indo pangngumbabanna tentaha: <<Daa ummahea’a’ anna daa umpa’duhho. Pomatohoi penabammu anna pobahanii kalemu, aka la napateemmi too inde DEBATA lako ingganna balimmua’ to umbundu’.>> 26Puhai, napateim Yosua indo lima tomahaja, mane natoke’i längäm lima kaju diosä’, anna titoke’ liu sule lako mahammo. 27Tappana lendu’ allo, napesuaammi Yosua dipatuhum bakkena yabo mai indo kaju diosä’ mane napa’tumbusanni tama indo leä to naongei membuni. Mane dilapa’i batu si kasalle ba’bana indo leä, anna da’da’ liupi sule lako temo.
28Allo eta siam too duka’ anna untaloi anna muokko’i Makeda Yosuaa’ anna natepa pa’dam tomahajanna anna ingganna menabanna illaam. Nakahäppusanni indo kota anna nadappo’i ingganna hupatau illaam. Tä’um deem moi podo la mesa napabäi tubo. Umba susi indo napogausam lako tomahaja Yerikho susim too duka’ napogausam tomahaja Makeda.
29Anna mane umpatahhu’ pellaoanna Yosua sola ingganna to Israel mengkalao dio Makeda le’ba’ lako Libna, anna nabundu’i. 30Napadokkoam DEBATA lisu pala’na to Israel indo kota sola tomahajanna. Issinna indo kota sola ingganna menabanna illaam natepa pa’dam Yosua. Tä’um deem moi podo la mesa napabäi tubo. Umba susi indo napogausam lako tomahaja Yerikho susim too duka’ napogausam lako tomahajanna.
31Anna mane umpatahhu’ pellaoanna Yosua sola ingganna to Israel mengkalao dio Libna le’ba’ lako Lakhis, mane ma’kemai napepali’i indo kota, anna mane nabundu’. 32Napadokkoam DEBATA lisu pala’na to Israel kota Lakhis, sapo’ allo kaduanna ham mane nataloi Yosuaa’ indo kota. Natepa pa’dam Yosuaa’ issinna indo kota sola ingganna menabanna illaam, susi indo napogausam lako Libna. 33Wattu eta too, sule Horam, tomahaja Gezer pabaliam lako Lakhis, sapo’ napatei Yosua sola ingganna tentahana, tä’um deem moi podo la mesa napabäi tubo.
34Anna mane umpatahhu’ pellaoanna Yosua sola ingganna to Israel mengkalao dio Lakhis le’ba’ lako Eglon, mane ma’kemai napepali’i indo kota, anna mane nabundu’. 35Allo eta siam too duka’ anna nataloi anna naokko’i indo kota anna natepa pa’dam issinna. Ingganna menabanna illaam nadappo’i allo eta too, umba susi indo napogausam lako Lakhis.
36Anna mane umpatahhu’ pellaoanna Yosua sola ingganna to Israel mengkalao dio Eglon le’ba’ lako Hebron, mane nabundu’i. 37Nataloi anna naokko’i indo botto anna natepa pa’dam issinna, tomahajanna, ingganna kotana, anna ingganna hupatau illaam. Tä’um deem moi podo la mesa napabäi tubo, umba susi indo napogausam lako Eglon, wattunna nadappo’i issinna kota ia too.
38Puhai, iya ma’pasulem Yosua sola ingganna to Israel anna lu lako opi Debir, anna nabundu’i. 39Indo botto sola tomahajanna anna ingganna kotana nataloi anna naokko’i. Sangngim natepa pa’dam anna nadappo’i ingganna menabanna illaam. Tä’um deem moi podo la mesa napabäi tubo. Umba susi napogausam lako Hebron susim too duka’ napogausam lako Debir sola tomahajanna, susi toi indo napogausam lako Libna sola tomahajanna.
40Susim too Yosua untaloi ingganna botto ia too: botto yabo tipatanetena, lembäna Negeb, botto yabo tanete-nete si mahempo, botto lako seppom tanete sola ingganna tomahajanna. Tä’um deem moi podo la mesa napabäi tubo, sapo’ nadappo’i asam ingganna menabanna, umba susi napa’pahentaam DEBATA, Puang Allataala to napenombai to Israel. 41Sangngim napasosso’ Yosua mengkalao dio Kadesh-Barnea sule lako Gaza, duka’ ingganna naluäna lembäna Gosyen sule lako Gibeon. 42Ingganna indo tomahaja sola bottona nalamba pissanni Yosua nataloi aka DEBATA, Puang Allataala to napenombai to Israel dio matanna umpa’bundusam to Israel. 43Puha ia too, ma’pasulem Yosua sola ingganna to Israel lako ongeanna ma’kema dio Gilgal.
11Kanaan tandai utara nataloi Yosua
1Tappana napelele Yabin tomahajanna Hazor diona to Israel makkatalo-talo, iya umpake’de’um tau le’ba’ lako Yobab tomahajanna Madon, lako tomahajanna Simron lako tomahajanna Akhsaf, 2anna lako ingganna tomahaja dio tandai utara yabo tipatanetena, dio Araba-Yordan tandai selatanna Kinerot, yabo tanete-nete si mahempo, lako seppom tanete dio Dor tandai katampusam. 3Umpake’de’ toi duka’ tau le’ba’ lako to Kanaan tandai mata allo anna tandai katampusam, lako to Amori, to Het, to Feris, anna to Yebus yabo tipatanetena, anna lako to Hewi dio sepponna Tanete Hermon dio lembäna Mizpa. 4Iya mengke’de’im indo tomahaja sola ingganna tentahana pada budanna bungim dio bihim le’bo’, anna tä’ deem pada sabuda dahanna sola bendinna. 5Umpamesa buku indo ingganna tomahaja, anna pada-padai le’ba’ ma’kema lako sikahuku’ kabuttuam uwai dio Merom la umbundu’ to Israel.
6Iya ma’kadam DEBATA lako Yosua naua: <<Daa ummahea’a’ ebai. Aka makale’i too katenanna indee, la kubeho dokko lisu pala’na to Israel sangngim matem. Longko’ia’ gittinganna ingganna dahanna anna tunu mampu’i ingganna bendinna.>> 7Iya le’ba’um Yosua sola ingganna tentahana lako, anna napatikkedu’i nabundu’ dio sikahuku’ kabuttuam uwai dio Merom. 8Nabeho DEBATA dokko lisu pala’na to Israel. Piha napasosso’ anna napadondo sule lako Sidon-Kasalle, anna sule lako Misrefot-Maim, anna piha napadondo sule lako lembä Mizpa dio tandai mata allo. Sangngim napatei, tä’um deem moi podo la mesa la mehä’dä’. 9Napogau’ Yosua kaha-kaha ia too umba susi kadanNa DEBATA lako kalena. Nalongko’ gittinganna ingganna dahanna, anna natunu mampu’ ingganna bendinna.
10Wattu eta siam too duka’ anna ma’pasulei Yosua, anna mane muokko’i kota Hazor, natepa pa’dam tomahajanna lambi’ mate. Yolona, Hazor handam pataloam padai kahajaam eta too. 11Ingganna hupatau illaam natepa pa’dam Yosua. Nadappo’i ingganna indo hupatau, iya tä’um deem napabäi tubo ingganna menabanna. Anna ussobe kota Hazor. 12Sangngim naokko’i Yosua ingganna kota tadongkonganna pada indo tomahaja. Natepa pa’dam ingganna tomahajanna anna nadappo’i, umba susi napa’pahentaam Musa indo sabua’Na DEBATA. 13Anggam Hazor nasobe Yosua pada indo kota yabo mabuntu-buntunna sapo’ senga’na tä’ ia nasobe to Israel. 14Ingganna baham-baham malanna dipamuhu illaam indo kota anna ingganna olo’-olo’na napamuhu asam to Israel, sapo’ ingganna pakketauanna natepa ia pa’dam, lambi’ tamehä’dä’um tameata. Ingganna hupataunna tä’um deem napabäi tubo. 15Umba susi napa’pahentaam DEBATA lako Musa sabua’na, susim too duka’ napa’pahentaam Musa lako Yosua, anna susim too duka’ napalako Yosua. Ingganna indo napa’pahentaam DEBATA lako Musa, tä’ deem tä’ napalako Yosua.
Kapataloanna to Israel
16Susim too Yosuaa’ untaloi anna muokko’i ingganna botto ia too: susi botto yabo tipatanetena, pada naluäna lembäna Negeb, pada naluäna lembänä Gosyen, yabo tanete-nete si mahempo, Araba-Yordan, anna tipatanetena Israel sola tanete-netena; 17mengkalao yabo Tanete Mapesse’ (dio petukasam längäm Seir), sule lako Baal-Gad dio tipalembäna Libanon, dio sepponna Tanete Hermon. Nasakka asam tomahajanna, mane napatei. 18Masäe naolaam Yosua umbundu’ ingganna indo tomahaja. 19Tä’ deem moi podo la mesa kota umpadeem kasitallisam to Israel, sulibanna to Hewi issinna Gibeon. Ingganna kota senga’ sangngim nataloi illaam passibundusam. 20DEBATA umpomakahhasanni penabanna lambi’ umbundu’ to Israel, anna mala didappo’i tä’um deem dihäntängam bua anna tala mehä’dä’pi tala meata, umba susi pahentaNa DEBATA lako Musa.
21Wattu eta siam too duka’ anna le’ba’i Yosua umpempa’deam to Enak to tohho yabo tipatanetena, to tohho dio Hebron, dio Debir, dio Anab, anna to umpangngissi ingganna tipatanetena Yehuda anna tipatanetena Israel. Napempa’deam asam Yosua issinna sola ingganna kotana. 22Tä’um deem mehä’dä’ to Enak illaam bottona to Israel. Angga ham deem tohho dio Gaza, Gat anna Asdod. 23Susim too Yosua untaloi anna muokko’i asam paluäna indo botto, umba susi kadanNa DEBATA lako Musa. Indo botto ia too nabeem Yosua lako to Israel mendadi mana’na situhu’ katabaanna simesa-mesa pehapuam kasallena. Katampasanna malino pole’ indo botto, tä’um deem pa’bundusam.
12Ingganna tomahaja to nataloi Musa
1Indem ia tomahaja to nataloi to Israel, to naokko’i bottona dipe lambam libanna Salu Yordan, tandai kabuttuanna allo, mengkalao dio lembä mandalam Arnon sule lako Tanete Hermon, anna pada naluäna Araba-Yordan tandai mata allo, uhuna: 2Sihon, tomahajanna to Amori ma’tadongkongam dio Hesybon. Attasa’ kapahentaanna naala sapiä’na Gilead anna tama kota Aro’er siampe’ lembä mandalam Arnon. Naala mengkalao dio tängäna Lembä Arnon le’ba’ lako Salu Yabok, sikatonam to Amon; 3anna tandai katampusam sikatonam Araba-Yordan anna danau Kinerot tandai mata allo sule lako tandai mata allona Le’bo’ Araba battu diua Le’bo’ Mässi’, le’ba’ lako patunna Bet-Yesimot tahhu’ lako tandai selatan sule lako sepponna Tanete Pisga.
4Anna mane Og tomahajanna Basan. Indo Og, tihäntänapi to Refaim to tohho dio Asytarot anna dio Edrei. 5Attasa’ kapahentaanna, mengkalao yabo Tanete Hermon, le’ba’ lako Salkha, pada naluäna Basan sule lako sikatonam to Gesur anna to Maakha, sapiä’na Gilead, anna sikatonam attasa’na Sihon, tomahajanna Hesybon.
6Indo dua tomahaja bassim nataloi Musa indo sabua’Na DEBATA sola to Israel. Indo botto litä’na nabeem ia Musa lako pessubunna Ruben, pessubunna Gad anna bahe duanna pessubunna Manasye la napomana’.
Ingganna tomahaja to nataloi Yosua
7Indem ia tomahajanna simesa-mesa botto to nataloi Yosua sola to Israel dio tandai katampusanna Salu Yordan, mengkalao dio Baal-Gad dio Lembä Libanon sule lako Tanete Mapesse’ metuka’ längäm Seir. Indo botto ia too nabeem Yosua lako mentu’na pehapuam kasalle änä’na Israel la napomana’ situhu’ katabaanna simesa-mesa, 8susi mentanetena, teem tanete-nete si mahempo dio Araba-Yordan, seppom tanete, pädä kukku’ dio lembäna Negeb battu diua bottona to Het, to Amori, to Kanaan, to Feris, to Hewi, anna to Yebus.
9Mesa tomahajanna Yerikho,
mesa tomahajanna Ai dio sikahuku’ Betel,
10mesa tomahajanna Yerusalem,
mesa tomahajanna Hebron,
11mesa tomahajanna Yarmut,
mesa tomahajanna Lakhis,
12mesa tomahajanna Eglon,
mesa tomahajanna Gezer,
13mesa tomahajanna Debir,
mesa tomahajanna Geder,
14mesa tomahajanna Horma,
mesa tomahajanna Arad,
15mesa tomahajanna Libna,
mesa tomahajanna Adulam,
16mesa tomahajanna Makeda,
mesa tomahajanna Betel,
17mesa tomahajanna Tapuah,
mesa tomahajanna Hefer,
18mesa tomahajanna Afek,
mesa tomahajanna Lasaron,
19mesa tomahajanna Madon,
mesa tomahajanna Hazor,
20mesa tomahajanna Simron-Meron,
mesa tomahajanna Akhsaf,
21mesa tomahajanna Taanakh,
mesa tomahajanna Megido,
22mesa tomahajanna Kedesh,
mesa tomahajanna Yokneam dio Karmel,
23mesa tomahajanna Dor to yabo tipatanetena Dor,
mesa tomahajanna Goyim dio Galilea,
24anna mesa tomahajanna Tirza.
Tallu pulo mesa ia asanna indo tomahaja.
13Botto tää’napi nakatama anna naokko’i to Israel
1Tappana matua Yosua anna diom ba’ba talumbä, iya ma’battakadam DEBATA lako naua: <<Matuangko anna diongko ba’ba talumbä, moi kela daa budapi botto la pahallu dikatama anna diokko’i. 2Indem ia indo botto tihäntänapi: pada attasa’na to Filistin anna ingganna bottona to Gesur, 3mengkalao dio Salu Sikhor tandai mata allona Mesir sule lako katonanna Ekron katonanna dio tandai utara (sangngim tihekem bottona to Kanaan). Deem lima tomahaja tohho dio kotana to Filistin: dio Gaza, dio Asdod, dio Askelon, dio Gat, anna dio Ekron; anna dio bottona to Awi 4dio tandai selatan; ingganna bottona to Kanaan anna Meara, to napuängam to Sidon sule lako Afek dio katonanna bottona to Amori. 5Sitahhu’na bottona to Gebal anna sakalebunna Libanon dio tandai kabuttuanna allo, mengkalao dio Baal-Gad dio bitti’na Tanete Hermon sule lako lalam umpenandai lako kota Hamat; 6sitahhu’na ingganna to umpangngissi tipatanetena mengkalao dio tipatanetena Libanon sule lako Misrefot-Maim, battu diua ingganna to Sidon. La ma’kaleä’ uhhambai lao dio mai olona to Israel. Anggam ia la umbaheam yolo botto ia too lako to Israel la napomana’, umba susi puha kupahentaangko. 7Iam too anna la umbaheammi inde botto la napomana’ indo to kaseha pehapuam kasalle anna bahe duanna pessubunna Manasye.>>
Bahena litä’ dio tandai mata allona Salu Yordan
8Pissananna indo bahe duannapi pessubunna Manasye, pessubunna Ruben, anna pessubunna Gad puham ia untahima mana’na nabeem Musa dio tandai mata allona Salu Yordan umba susi puha napopa’tantum Musa, indo sabua’Na DEBATA. 9Indo attasa’na, mengkalao dio Aro’er dio bihinna lembä mandalam Arnon naalapi indo kota illaam tängäna indo lembä, susi toi duka’ pada hante kalua’ yabo tipatanetena dio Medeba sule lako Dibon; 10anna ingganna kota nakuasai Sihon, tomahajanna to Amori to ma’tadongkongam dio Hesybon, sule lako katonanna attasa’na pessubunna Amon; 11anna mane Gilead sola attasa’na to Gesur anna to Maakha, sakalebunna Tanete Hermon anna pada paluäna Basan sule lako Salkha; 12battu diua pada naluäna kapahentaanna tomahaja Og dio Basan, to ma’pahenta dio Asytarot anna Edrei. (Indo Og, tihäntänapi to Refaim.) Issinna attasa’ ia too puha nataloi anna nahambai lao Musa. 13Sapo’ tä’ ia nahambai lao to Israel to Gesur sola to Maakha, nasuhum tohho liupi ia illaam alla’-alla’na to Israel sule lako temo.
14Anggam pessubunna Lewi tä’ ia natabai litä’ Musa napomana’ aka ingganna ia tunuam to dipehumalasam dio oloNa DEBATA, Puang Allataala to napenombai to Israel napomana’, umba susi battakadanNa Debata lako.
Mana’na pessubunna Ruben
15Lako pessubunna Ruben, puham nabeem litä’ Musa situhu’ pehapuam bahinni’na simesa-mesa. 16Attasa’na, mengkalao dio Aro’er dio bihinna lembä Arnon naalapi indo kota illaam tängäna lembä ia too, anna ingganna hante kalua’ yabo tipatanetena sikahuku’ Medeba; 17susi toi duka’ Hesybon sola ingganna kota yabo hante kalua’ yabo tipatanetena, susinna kota Dibon, Bamot-Baal, Bet-Baal-Meon, 18Yahas, Kedemot, Mefaat, 19Kiryataim, Sibma, Zeret-Hasahar yabo tanete dio lembä ia too, 20Bet-Peor, pada sepponna Tanete Pisga, anna Bet-Yesimot. 21Ingganna indo kota yabo hante kalua’ yabo tipatanetena anna pada naluäna kahajaam Sihon, tomahajanna to Amori to ma’tadongkongam dio Hesybon, to nataloi Musa simbaha ingganna pepungngu’na to Midian ditaloi susinna: Ewi, Rekem, Zur, Hur, anna Reba (sangngim tomahaja to nakuasai Sihon anna naokko’i botto litä’na). 22Bileam-pi änä’na Beor to si ma’petanda, napatei to Israel pa’dam napake, sola ingganna tau senga’ to napatei. 23Dadi, katonanna attasa’na pessubunna Ruben ma’bala bihinna Salu Yordan. Iam too mana’na pessubunna Ruben situhu’ pehapuam bahinni’na simesa-mesa, susi ingganna kotana teem ingganna tondä’na.
Mana’na pessubunna Gad
24Lu lako pehapuam kasallena Gad, battu diua pessubunna Gad, natabai Musa situhu’ pehapuam bahinni’na simesa-mesa. 25Indem ia attasa’na: Yaezer anna ingganna kota dio Gilead sola bahe duanna botto litä’na to Amon sule lako Aro’er dio tandai mata allona Raba; 26mane mengkalaoi dio Hesybon sule lako Ramat-Mizpa anna Betonim, anna mengkalao dio Mahanaim sule lako katonanna Debir; 27anna dio tipalembäna mengkalao dio Bet-Haram, Bet-Nimra, Sukot, anna Zafon, tihäntänapi kahajaanna Sihon, tomahaja ma’tadongkongam dio Hesybon; le’ba’ dokko umpebihim Salu Yordan sule lako tämpä’na danau Kineret dio tandai mata allona Salu Yordan. 28Iam too mana’na pessubunna Gad situhu’ pehapuam bahinni’na simesa-mesa, susi ingganna kotana teem ingganna tondä’na.
Mana’na bahe duanna pessubunna Manasye
29Sitahhu’na bahe duanna pehapuam kasallena Manasye battu diua bahe duanna pessubunna Manasye nabahei Musa litä’ situhu’ pehapuam bahinni’na simesa-mesa. 30Attasa’na mengkalao dio Mahanaim, pada paluäna Basan, battu diua pada kahajaanna Og, tomahaja Basan, anna ingganna kota dio Yair dio Basan annam pulo kota ia asanna. 31Sitahhu’na sapiä’na lembäna Gilead, anna Asytarot sola Edrei, indo dua kota to si naongei ma’tadongkongam tomahaja Og dio Basan, napotaba ia pessubunna Makhir änä’na Manasye, battu diua bahe duanna pessubunna Makhir situhu’ pehapuam bahinni’na simesa-mesa.
32Iam too litä’ nabahe anna napa’manasam Musa dio tipahantena Moab, battu diua dipe lambam libanna Salu Yordan, tandai mata allona Yerikho. 33Sapo’ pessubunna ia Lewi tä’ ia nabahei litä’ Musa napomana’ aka kaleNa DEBATA, Puang Allataala to napenombai to Israel napomana’, umba susi battakadanNa Debata lako.
14Bahena litä’ dio tandai katampusanna Salu Yordan
1Indem ia ingganna mana’ natahima to Israel dio lembäna Kanaan, to puha nabaheam sando Eleazar, Yosua änä’na Nun, anna ingganna pepungngu’na kasahapuam to buttu dio mai simesa-mesa pentoosanna to Israel, 2naundi umba susi napahentaam DEBATA muolai Musa diona indo to kaseha setangnga pehapuam kasalle. 3Aka dua setangnga pehapuam kasalle puham ia nabeem Musa mana’na dipe lambam libanna Salu Yordan. Anggam ia pessubunna Lewi tä’ ia dimana’ litä’ susi pehapuam kasalle senga’. 4Aka pessubunna Yusuf dua ia pehapuam kasalle diuaam: Manasye anna Efraim. Tä’ ia deem katabaanna pessubunna Lewi, sulibanna sanaka-naka kota la naongei tohho sola pa’kambisam la napa’kambi’i olo’-olo’na. 5Umba susi napahentaam DEBATA lako Musa, susim too napogau’ to Israel. Nabahe-bahe indo botto.
Hebron dibeem Kaleb
6Pissam wattu sule pessubunna Yehuda umpellambi’ Yosua dio Gilgal. Iya ma’kadam Kaleb änä’na Yefune indo to Kenas lako Yosua naua: <<Puha muissam indo kada diona kita duaki’ napalanda’ DEBATA dio Kadesh-Barnea lako Musa, sabua’Na Puang Allataala. 7Appa’ pulom taunna dadingku wattunna nasuaä’ Musa, indo sabua’Na DEBATA, mengkalao dio Kadesh-Barnea sule umpesi’dinni inde botto, anna ma’pasuleä’ kutulasam kaheba mattunggaianna. 8Anna ingganna solaku to kupasola le’ba’, sule muäläi kute’-kute’na to Israel. Sapo’ tontää’ kao manontom sola ponno penaba lako DEBATA, Puang Allataala to kupenombai. 9Wattu eta too ma’dandi mate-mateam Musa naua: <Kannassai, indo litä’ nahondoi bitti’mu la mendadi mana’mu solakoa’ pessubummu sule lako salako-lakona, aka manontongko lako DEBATA, Puang Allataala to kupenombai sola ponno penabammu.> 10Dadi tentomai, kannassai, puham napaliaha DEBATA katuboangku, umba susi puha nadandi. Appa’ pulom lima taunna anna napengkadaanni DEBATA tula’ ia too lako Musa, indo anna ma’pentueli’-eli’ to Israel dio pädä kukku’. Tentomai, kahua pulom lima taunnna dadingku, 11iya allo temo tontä liupi kusi’dim kamatohoangku susi indo anna nasuaä’ Musa. Inde kamatohoangku tentomai susi siam kamatohoangku indo lessu’, susi untingngajo pa’bundusam teem pa’palakoam senga’. 12Iam too anna la umbeemmä’ inde litä’ tipatanetena, to nadandi DEBATA wattu eta too. Uhhingngi siam iko duka’ wattu eta too, diua natadongkonni to Enak ongeam ia too sola ingganna kota kasallena anna dibettem. La naolaam dä’ too DEBATA nasuhum kuhambai lao, umba susi kadanNa DEBATA.>>
13Iya umpelauammi tamba’ Kaleb änä’na Yefune Yosua, anna nabeenni Hebron mendadi mana’na. 14Iam too anna Hebron-mi ia mendadi mana’na Kaleb änä’na Yefune, indo to Kenas sola pessubunna sule lako temo, aka manontom sola ponno penaba lako DEBATA, Puang Allataala to napenombai to Israel. 15Yolona Hebron disangai Kiryat-Arba. Indo Arba ia handam kasalle pada to Enak.
Iya malinom pole’ botto ia too, lappa’um dio mai pa’bundusam.
15Bohisam litä’na pessubunna Yehuda
1Tappana diundi, iya bahena pessubunna Yehuda situhu’ pehapuam bahinni’na simesa-mesa sule lako katonanna Edom, meangga pädä kukku’ Zin tämpä’ tandai selatanna. 2Indo katonanna tandai selatan mengkalao dio tämpä’na Le’bo’ Mässi’, indo le’bo’ mengkoko tama galantangam mengkoko lako selatan; 3muola tandai selatanna petukasam Akrabim tahhu’ liu lako Zin, metuka’ längäm tandai selatanna Kadesh-Barnea, tahhu’ lako Hezron, metuka’ längäm Adar, memputa’ lako Karka, 4tahhu’ lako Azmon, anna uhhuttu’ salu matti’ dio katonanna Mesir, mane tihutu’i lako Le’bo’ Itängä. Iam too katonanna litä’na pessubunna Yehuda tandai selatan.
5Katonanna tandai mata allo mengkalao dio tämpä’ tandai selatanna Le’bo’ Mässi’ sule lako tämpä’ tandai utarana dio ba’bana Salu Yordan. Katonanna tandai utara mengkalao dio le’bo’ mengkoko tama galantangam dio ba’bana Salu Yordan, 6mane metuka’i längäm Bet-Hogla, ungkatembam Bet-Araba tandai utara, mane tahhu’i längäm batu Bohan dipakonai änä’na Ruben. 7Anna mane mengkalao dio lembä Akhor indo katonam metuka’ längäm Debir, mane tahhu’i lako tandai utara lako Gilgal sipendadai petukasam Adumim tandai selatanna kalo’ lembä. Mane tahhu’i lako kabuttuam uwai En-Semes, iya tihutu’ lako En-Rogel. 8Mane tahhu’i längäm Lembä Ben-Hinom, dio tandai selatan umpeteppu’ sepponna tanete Yebus, battu diua Yerusalem; mane metuka’i längäm pusu’ tanete sitingngajo Lembä Hinom dio tandai katampusam, dio tämpä’ tandai utarana Lembä Refaim. 9Anna mane le’ba’i yabo mai pusu’ tanete membe’be’ lako kabuttuam uwai Me-Neftoah, mane ma’paluillaanni mai le’ba’ lako mentu’na kota Tanete Efron, mane membe’be’i lako Baala, battu diua Kiryat-Yearim. 10Mane memputa’i dio mai Baala lu lako tandai katampusam, lako Tanete Seir, tahhu’ lako seppom tandai utarana Tanete Yearim, battu diua Tanete Kesalon, mane mesolo’i dokko Bet-Semes anna tahhu’i lako Timna. 11Mane tahhu’i lako seppom tandai utarana Tanete Ekron, mane membe’be’i lako Sikron, tahhu’ lako Tanete Baala, le’ba’ lako Yabneel, katampasanna tihutu’ lako Le’bo’ Itängä. 12Katonanna tandai katampusam ma’bala bihinna Le’bo’ Itängä. Iam too katonam litä’na pessubunna Yehuda pali’ lao, situhu’ pehapuam bahinni’na simesa-mesa.
Kaleb untaloi Hebron
13Umba susi pahentaNa DEBATA lako Yosua, iya nabeemmi Kaleb änä’na Yefune sabaheam indo mana’na pessubunna Yehuda. Kiryat-Arba nabeem battu diua Hebron. (Indo Arba ambena Enak). 14Nahambai lao Kaleb illaam mai indo botto indo tallu änä’na Enak isanga: Sesai, Ahiman, anna Talmai. Iam too änä’na Enak. 15Mengkalao etam too Kaleb le’ba’ umbundu’ to Debir. Indo kota Debir, yolona si diuaam Kiryat-Sefer. 16Iya ma’kadam Kaleb naua: <<Menna-menna ungkatama anna muokko’i Kiryat-Sefer, la kubeem Akhsa, änä’ku, napobaine.>> 17Iya Otniel änä’na Kenas muokko’i indo kota. Indo Kenas adinna Kaleb. Iya nabeemmi Kaleb Akhsa, änä’na, napobaine Otniel. 18Tappana siala Akhsa anna Otniel, iya ussasungammi bainena Otniel anna umpelaui sangngenam bela’ lako ambena. Iya tappana tuhum yabo mai keledainna Akhsa, iya ma’kadam Kaleb lako naua: <<Aka umpahalluam?>> 19Natimba’im naua: <<Hängänniam polepä’ kao mana’ku. Aka puhamä’ umbeem litä’ dio Negeb, iya la umbeempä’ kao duka’ sanaka-naka kabuttuam uwai.>> Iya nabeemmi Kaleb kabuttuam uwai yabo tandai ulunna anna tandai pollo’na attasa’na.
Kotana pessubunna Yehuda
20Indem ia litä’ dimanasam pessubunna Yehuda situhu’ pehapuam bahinni’na simesa-mesa. 21Kotana pessubunna Yehuda handam ibihim dio tandai selatan, sikahuku’ katonanna Edom dio lembäna Negeb susinna: Kabzeel, Eder, Yagur, 22Kina, Dimona, Adada, 23Kedesh, Hazor, Yitnan, 24Zif, Telem, Bealot, 25Hazor-Hadata, Keriot-Hezron battu diua Hazor, 26Amam, Sema, Molada, 27Hazar-Gada, Hesmon, Bet-Pelet, 28Hazar-Sual, Bersyeba, Biziotiah, 29Baala, Iyim, Ezem, 30Eltolad, Kesil, Horma, 31Ziklag, Madmana, Sansana, 32Lebaot, Silhim, Ain anna Rimon. Ia asanna dua pulo kaseha kota sola ingganna tondä’.
33Anna kota yabo tanete-nete si mahempo susinna: Esytaol, Zora, Asna, 34Zanoah, En-Ganim, Tapuah, Enam, 35Yarmut, Adulam, Sokho, Azeka, 36Saaraim, Aditaim, Gedera, anna Gederotaim. Sapulo appa’ kota sola ingganna tondä’.
37Zenan, Hadasa, Migdal-Gad, 38Dilean, Mizpa, Yokteel, 39Lakhis, Bozkat, Eglon, 40Kabon, Lahmas, Kitlis, 41Gederot, Bet-Dagon, Naama anna Makeda. Sapulo annam kota sola ingganna tondä’.
42Libna, Eter, Asan, 43Yiftah, Asna, Nezib, 44Kehila, Akhzib, anna Maresa. Kaseha kota sola ingganna tondä’na.
45Ekron sola ingganna kota si bahinni’na anna ingganna tondä’. 46Mengkalao dio Ekron sule lako Le’bo’ Itängä, ingganna kota sola tondä’ dio sikahuku’ Asdod, 47Asdod sola ingganna kota si bahinni’na anna ingganna tondä’na, Gaza sola ingganna kota si bahinni’na anna tondä’na, sule lako salu matti’ dio katonanna Mesir, anna bihinna Le’bo’ Itängä.
48Anna yabo tipatanetena susinna: Samir, Yatir, Sokho, 49Dana, Kiryat-Sana, battu diua Debir, 50Anab, Estemo, Anim, 51Gosyen, Holon anna Gilo. Sapulo mesa kota sola ingganna tondä’.
52Arab, Duma, Esan, 53Yanum, Bet-Tapuah, Afeka, 54Humta, Kiryat-Arba, battu diua Hebron anna Zior. Kaseha kota sola ingganna tondä’.
55Maon, Karmel, Zif, Yuta, 56Yizreel, Yokdeam, Zanoah, 57Kain, Gibea anna Timna. Sapulo kota sola ingganna tondä’na.
58Halhul, Bet-Zur, Gedor, 59Maarat, Bet-Anot anna Eltekon. Annam kota sola ingganna tondä’.
60Kiryat-Baal, battu diua Kiryat-Yearim, anna Raba. Dua kota sola ingganna tondä’.
61Anna kota dio pädä kukku’ susinna: Bet-Araba, Midin, Sekhakha, 62Nibsan, Kota Sia anna En-Gedi. Annam kota sola ingganna tondä’.
63Sapo’ to Yebus to umpangngissi kota Yerusalem, tä’ ia mala nahambai lao pessubunna Yehuda. Dadi, indo to Yebus tohho liupi sola pessubunna Yehuda dio Yerusalem sule lako temo.
16Mana’na pessubunna Efraim anna Manasye
1Katonam litä’na pessubunna Yusuf tappana puha diundi mengkalao dio Salu Yordan sikahuku’ Yerikho, tandai mata allona kabuttuam uwai dio Yerikho, muola lako pädä kukku’, mane metuka’i längäm tipatanetena umpellei Yerikho, landa’ lako Betel. 2Mengkalao dio Betel le’ba’ lako Lus, tahhu’ lako Atarot bottona to Arki, 3mesolo’ dokko tandai katampusam lako bottona to Yaflet, sule dokko paluäna Bet-Horon Tando Dokko, mane tahhu’i lako Gezer lambi’ ma’tämpä’ dio Le’bo’ Itängä.
4Susim too dua pehapuam kasalle änä’na Yusuf, battu diua pessubunna Manasye anna pessubunna Efraim untahima mana’na.
5Katonam litä’na pessubunna Efraim situhu’ pehapuam bahinni’na simesa-mesa susi inde: katonanna mengkalao dio Atarot-Adar dio tandai mata allo sule längäm Bet-Horon Tando Längäm, 6mane tahhu’i lako Le’bo’ Itängä. Katonanna dio tandai utara mengkalao dio Mikhmetat le’ba’ lako tandai mata allo sule lako Taanat-Silo, mengkalao etam too tahhu’ lako tandai mata allona Yanoah. 7Dioi Yanoah le’ba’um dokko Atarot anna Naharat, siampim attasa’na Yerikho anna tihutu’i lako Salu Yordan. 8Mane mengkalaoi dio Tapuah indo katonam lu lako tandai katampusam le’ba’ lako Salu Kana anna tihutu’ lako Le’bo’ Itängä. Iam too mana’na pessubunna Efraim situhu’ pehapuam bahinni’na simesa-mesa. 9Nakala’pi sanaka-naka kota anna tondä’ to dipasähäsam pessubunna Efraim illaam paluäna attasa’na Manasye. 10Sapo’ tää’i uhhambai lao to Kanaan to tohho dio Gezer, nasuhum tohhoi liupi indo to Kanaan illaam alla’-alla’na to Efraim sule lako temo, sapo’ dipopengkähä dipepi’.
171Indem ia bahena pessubunna Manasye änä’ uluana Yusuf tappana diundi: Makhir änä’ uluana Manasye, ambena Gilead dibahei ia Gilead anna Basan, aka mesa pa’bahani. 2Anna pessubum senga’na Manasye dibahei duka’ situhu’ pehapuam bahinni’na simesa-mesa susinna: Abiezer, Helek, Asriel, Sekhem, Hefer, anna Semida. Iam too pessubunna Manasye muane ampona Yusuf, situhu’ pehapuam bahinni’na simesa-mesa. 3Sapo’ Zelafehad ia änä’na Hefer, ampo mammi’na Gilead, ampo guntu’na Makhir, ampo gahiginna Manasye tä’ ia deem muane änä’na anggam baine. Indem ia indo änä’na baine: Mahla, Noa, Hogla, Milka, anna Tirza. 4Le’ba’i mengngolo lako sando Eleazar, lako Yosua änä’na Nun anna lako ingganna to pepungngu’, anna ma’kadai naua: <<Puham napa’pahentaam DEBATA lako Musa la dibeengkam kami’ duka’ litä’ la kipomana’ umba susi solasubungki muane.>> Nasuhum nabeem duka’ Yosua mana’ illaam alla’-alla’na solasubunna ambena, situhu’ pahentaNa DEBATA. 5Susim too lalanna anna dipadokkoam asammi lisu pala’na pessubunna Manasye sapulo ngenanna litä’, hängänna indo litä’ dio lembäna Gilead sola Basan dipe lambam libanna Salu Yordan, 6aka indo pessubunna Manasye baine dimana’ duka’ litä’ umba susi solasubunna muane. Sapo’ lembäna Gilead dibaheiam ia pessubum senga’na Manasye.
7Katonam litä’na pessubunna Manasye, mengkalao dio Asyer sule lako Mikhmetat tandai mata allona Sikhem, mane tahhu’i lako tandai selatan lako attasa’na to En-Tapuah. 8Lembäna Tapuah bahena ia pessubunna Manasye, sapo’ kota Tapuah to illaam katonanna pessubunna Menasye anna Efraim bahena ia pessubunna Efraim. 9Anna mane mesolo’ dokko Salu Kana indo katonam, lu lako tandai selatanna indo salu. Ingganna kota dio ongeam ia too napuängam pessubunna Efraim moi anna illaam tängä-tängäna attasa’na pessubunna Manasye. Anna mane tahhu’ indo katonam litä’na pessubunna Manasye lako tandai utarana indo salu lambi’ tihutu’ lako Le’bo’ Itängä. 10Tandai selatan ia attasa’na pessubunna Efraim anna tandai utara ia attasa’na pessubunna Manasye. Le’bo’ Itängä katonanna tandai katampusam. Katonanna Manasye tandai utara siampim attasa’na Asyer, anna tandai mata allo siampim attasa’na Isakhar. 11Illaam attasa’na Isakhar anna Asyer deem kota sola tondä’ naampuam pessubunna Manasye susinna: Bet-Sean sola ingganna tondä’, Yibleam sola ingganna tondä’, kota Dor sola ingganna tondä’. Anna mane kota En-Dor, sola ingganna tondä’, kota Taanakh sola ingganna tondä’, anna kota Megido sola ingganna tondä’, tallu tadongkongam sangngim sikahuku’ tipatanetena. 12Sapo’ tä’ mala nahambai lao pessubunna Manasye issinna indo tallu tadongkongam, aka mempi’dim liu to Kanaan la tohho dio indo botto. 13Tappana tuttuam matoho to Israel, iya umpassam to Kanaan mengkähä dipepi’, sapo’ tä’ nahambai asam lao.
14Pissam wattu ma’kada pessubunna Yusuf lako Yosua naua: <<Akanna anggam kami’ saundi anna satabaam litä’ dibeengkam kipomana’? Moi kela daa pehapuam buda hakam aka sule lako temo natamba’ liukam DEBATA.>> 15Iya natimba’im Yosua naua: <<Maka’ abana pehapuam budakoa’, anna sippi’ungkoa’ yabo tipatanetena Efraim, iya le’ba’koa’ tama pangngala’na to Feris anna to Refaim ammu bukkaia’ muongei.>> 16Iya nauam pessubunna Yusuf: <<Tä’ungkam sihua inde tipatanetena Efraim, anna to Kanaan to umpangngissi hante kalua’ dio tipalembäna muampuam bendi pa’bundusam bassi dipapia, susi to tohho dio Bet-Sean sola ingganna tondä’ teem to tohho dio Lembä Yizreel.>> 17Iya ma’kadam Yosua lako dua pehapuam kasalle änä’na Yusuf, battu diua pessubunna Efraim anna pessubunna Manasye naua: <<Abana tappa’ pehapuam kasallekoa’ anna muampuam tookoa’ kamatohoam. Tä’ la anggam satabaam litä’ dibeengkoa’. 18La dibeempakoa’ duka’ indo tipatanetena. Litä’ ia too abana pangngala’pi, sapo’ la umbukkaa’ anna muampuanni sule lako tämpä’na anna bihinna. La uhhambaia’ lao indo to Kanaan moinna anna muampuam bendi pa’bundusam bassi dipapia anna sangngim si matoho.>>
18Tohhonapi lembäna Kanaan dibahe dio Silo
1Iya ma’hempunnim dio Silo to Israel anna umpake’de’i Kema Kasitammuam DEBATA dio, aka naokko’im indo botto. 2Deempi pitu pehapuam kasalle änä’na Israel tä’pi ia deem dibahei litä’ la napomana’. 3Iya ma’kadam Yosua lako to Israel naua: <<La padapi umba masäena anggakoa’ ma’dako’ la muokko’i indo botto to puha namanasangkoa’ DEBATA, Puang Allataala to napenombai nene to umponene? 4Tuhoia’ tallu tau illaam mai simesa-mesa pehapuam kasallena. La kusua lao untete lembäna Kanaan anna natuli’i gahi’ katonanna situhu’ mana’na simesa-mesa pehapuam kasallena, anna mane ma’pasule napellambi’iä’. 5La napa’pitu tabaanna. Pehapuam kasallena Yehuda la tontä ia tohho dio attasa’na dio tandai selatan, anna pessubunna Yusuf la tontä tohho dio attasa’na dio tandai utara. 6Pahallu la untuli’a’ gahi’ katonanna satabaam oi indo pitu tabaanna anna umbabannä’ sule indo to untuli’. Anna mane kuundiangkoa’ eta inde dio oloNa DEBATA, Puang Allataala to tapenombaia’. 7Anggam ia pessubunna Lewi tä’ ia ditabai litä’ illaam alla’-alla’mua’, aka babangam sando ia dio oloNa DEBATA mendadi mana’na. Anna pessubunna Gad ia, pessubunna Ruben, anna bahe duanna pessubunna Manasye puham ia dibeem mana’na dio tandai mata allona Salu Yordan, nabeem Musa indo sabua’Na DEBATA.>>
8Iya ma’kalili’im indo to dituho la mengkalao. Napakahi’di Yosua la natuli’ gahi’ katonanna indo botto naua: <<Le’ba’koa’ tetei indo botto anna untuli’ia’ gahi’ katonanna, mane ma’pasulekoa’ umpellambi’iä’. La kuundiangkoa’ eta inde, inde Silo, dio oloNa DEBATA.>> 9Iya le’ba’im indo to dituho untete indo botto anna natuli’i illaam mesa suha’ gahi’ katonanna satabaam oi napa’pitu tabaanna anna sanganna ingganna kota illaam indo satabaam oi. Puhai, ma’pasuleim lako Yosua dio ongeanna to Israel ma’kema dio Silo. 10Iya naundiammi Yosua dio Silo, dio oloNa DEBATA. Etam too naongei Yosua untaba indo botto lako pessubunna Israel situhu’ katabaanna simesa-mesa.
Mana’na pessubunna Benyamin
11Tappana diundi, iya pessubunna Benyamin handam yolo nahua situhu’ pehapuam bahinni’na simesa-mesa. Attasa’na tappana diundi illaam alla’na attasa’na pessubunna Yehuda anna pessubunna Yusuf. 12Katonam litä’na dio tandai utara, mengkalao dio Salu Yordan, mane messeppom tanetei längäm dio tandai utarana Yerikho, mane metuka’i längäm tipatanetena dio tandai katampusam, anna tihutu’ lako pädä kukku’ Bet-Awen. 13Mengkalao etam too tahhu’ lako Lus, le’ba’ lako seppom tanete dio tandai selatanna Lus, battu diua Betel. Mane mesolo’i indo katonam dokko Atarot-Adar sikahuku’ tanete dio tandai selatanna Bet-Horon Tando Dokko. 14Anna mane dio indo tanete tandai selatanna Bet-Horon memputa’ lako tandai selatan, anna tahhu’i sule lako Kiryat-Baal, battu diua Kiryat-Yearim, mesa kota naampuam pessubunna Yehuda. Iam too katonanna tandai katampusam. 15Katonanna tandai selatan mengkalao dio tämpä’na Kiryat-Yearim, mane tahhu’i lako tandai katampusam tinanda lako kabuttuam uwai dio Me-Neftoah. 16Mane mesolo’i indo katonam dokko tämpä’ tanete sitingngajo Lembä Ben-Hinom, tandai utarana Lembä Refaim, mane mesolo’i dokko Lembä Hinom, uhhuttu’ seppom tanete dio kota Yebus dio tandai selatan, mane mesolo’i dokko En-Rogel. 17Mane memputa’i lako tandai utara, lemba’ dio En-Semes, tinanda lako Gelilot sitingngajo petukasam Adumim, mane mesolo’i dokko batu Bohan dipakonai änä’na Ruben. 18Mane tahhu’i lako tandai utara uhhuttu’ seppom tanete lambam libanna Bet-Araba, mane mesolo’i dokko Araba-Yordan. 19Mane tahhu’i indo katonam lako sepponna tanete Bet-Hogla tandai utara anna tihutu’ lako le’bo’ mengkoko tama galantangam dio tandai utarana Le’bo’ Mässi’ dio ba’bana Salu Yordan. Iam too katonanna tandai selatan. 20Anna Salu Yordan katonanna tandai mata allo. Iam too mana’na pessubunna Benyamin sitonda katonam litä’na pali’ lao situhu’ pehapuam bahinni’na simesa-mesa.
21Indem ia kota naampuam pessubunna Benyamin situhu’ pehapuanna simesa-mesa: Yerikho, Bet-Hogla, Emek-Kezis, 22Bet-Araba, Zemaraim, Betel, 23Haawim, Para, Ofra, 24Kefar-Haamonai, Ofni, anna Geba. Sapulo dua kota sitonda ingganna tondä’.
25Gibeon, Rama, Beerot, 26Mizpa, Kefira, Moza, 27Rekem, Yirpeel, Tarala, 28Zela, Elef, anna Yebus, battu diua Yerusalem, Gibeat, anna Kiryat. Sapulo appa’ kota sola ingganna tondä’. Iam too mana’na pessubunna Benyamin situhu’ pehapuam bahinni’na simesa-mesa.
19Mana’na pessubunna Simeon
1Kaduanna nahua undi pessubunna Simeon situhu’ pehapuam bahinni’na simesa-mesa. Indo mana’na dipangngalaiam illaam tängäna mana’na pessubunna Yehuda. 2Indo mana’ naampuam susinna: Bersyeba, Syeba, Molada, 3Hazar-Sual, Bala, Ezem, 4Eltolad, Betul, Horma, 5Ziklag, Bet-Hamarkabot, Hazar-Susa, 6Bet-Lebaot anna Saruhen. Sapulo tallu kota sola ingganna tondä’. 7Ain, Rimon, Eter anna Asan. Appa’ kota sola ingganna tondä’; 8tamapi duka’ ingganna tondä’ to umpali’i lao indo ingganna kota sule lako Baalat-Beer battu diua Rama dio lembäna Negeb. Iam too mana’na pessubunna Simeon situhu’ pehapuam bahinni’na simesa-mesa. 9Mana’na pessubunna Simeon illaam tängäna mana’na pessubunna Yehuda, aka kalua’ punala ia tabana. Iam too anna dipangngalaiam illaammi ia mai tängäna mana’na pessubunna Yehuda napomana’ pessubunna Simeon.
Mana’na pessubunna Zebulon
10Katallunna nahua undi pessubunna Zebulon situhu’ pehapuam bahinni’na simesa-mesa. Indo mana’na sule lako Sarid katonanna. 11Mengkalao etam too le’ba’ lako tandai katampusam metuka’ längäm Marala, umpebihim Dabeset anna membihim kalo’ lembä dio tandai mata allona Yokneam. 12Anna mengkalao dio duka’ Sarid le’ba’ lako tandai mata allo lako kabuttuanna allo, tinanda lako bihinna Kislot-Tabor lemba’ dio Dobrat, metuka’ längäm Yafia. 13Mengkalao etam too tahhu’i liu indo katonam lako tandai mata allo, battu diua lako Gat-Hefer, mane tahhu’i lako Et-Kazin lemba’ dio Rimon, mane memputa’i lako Nea. 14Anna mane mempuhihi’ dio tandai utara lako Hanaton, anna tihutu’ lako Lembä Yiftah-El. 15Naalapi duka’ Katat, Nahalal, Simron, Yidala anna Betlehem. Sapulo dua kota sola ingganna tondä’. 16Ingganna kota sola tondä’ ia too mentamapi mana’na pessubunna Zebulon situhu’ pehapuam bahinni’na simesa-mesa.
Mana’na pessubunna Isakhar
17Kaappa’na nahua undi pessubunna Isakhar, battu diua pessubunna Isakhar situhu’ pehapuam bahinni’na simesa-mesa. 18Attasa’na pessubunna Isakhar susinna: Yizreel, Kesulot, Sunem, 19Hafaraim, Sion, Anaharat, 20Rabit, Kisyon, Ebes, 21Remet, En-Ganim, En-Hada, anna Bet-Pazes. 22Katonam litä’na umpebihim Tabor, Sahazima, Bet-Semes anna tihutu’ lako Salu Yordan. Sapulo annam kota sola ingganna tondä’. 23Ingganna kota sola tondä’ ia too mentamapi mana’na pessubunna Isakhar situhu’ pehapuam bahinni’na simesa-mesa.
Mana’na pessubunna Asyer
24Kalimanna nahua undi pessubunna Asyer situhu’ pehapuam bahinni’na simesa-mesa. 25Indo attasa’na tama duka’: Helkat, Hali, Beten, Akhsaf, 26Alamelekh, Amad, anna Misal. Katonanna tandai katampusam umpebihim Karmel anna Sikhor Libnat, 27mane lu lakoi tandai kabuttuam allo, lako Bet-Dagon. Mane umpebihinni litä’ Zebulon anna Lembä Yiftah-El tahhu’ lako tandai utara, le’ba’ lako Bet-Emek anna Nehiel, mane lemba’i dio Kabul tandai utara, 28mane le’ba’i lako Ebron, Rehob, Hamon, Kana, landa’ lako Sidon kota kasalle. 29Mane memputa’i lako Rama anna sule lako Tirus kota dibettem. Mane memputa’i lako Hosa, anna tihutu’ dio Le’bo’ Itängä. Indo attasa’na tamapi duka’ Mahalab, Akhzib, 30Uma, Afek, anna Rehob. Dua pulo dua kota sola ingganna tondä’. 31Ingganna kota sola tondä’ ia too mentamapi mana’na pessubunna Asyer situhu’ pehapuam bahinni’na simesa-mesa.
Mana’na pessubunna Naftali
32Kaannanna nahua undi pessubunna Naftali, battu diua pessubunna Naftali situhu’ pehapuam bahinni’na simesa-mesa. 33Attasa’na mengkalao dio Helef, dio kaju tumalumbum dio Zaananim, tahhu’ lako Adami-Nekeb, Yabneel, sule lako Lakum, anna tihutu’ lako Salu Yordan. 34Mane memputa’i lako tandai katampusam lako Aznot-Tabor, iya mengkalao etam too le’ba’ lako Hukok. Dio tandai selatan umpebihim attasa’na Zebulon, tandai katampusam umpebihim attasa’na Asyer, anna tandai kabuttuanna allo membihim Salu Yordan attasa’na Yehuda. 35Kota dibettenna isanga: Zidim, Zer, Hamat, Rakat, Kineret, 36Adama, Rama, Hazor, 37Kedesh, Edrei, En-Hazor, 38Yiron, Migdal-El, Horem, Bet-Anat anna Bet-Semes. Illaam indo attasa’na sapulo kaseha kota sola ingganna tondä’. 39Ingganna kota sola tondä’ ia too mentamapi mana’na pessubunna Naftali situhu’ pehapuam bahinni’na simesa-mesa.
Mana’na pessubunna Dan
40Kapitunna nahua undi pessubunna Dan situhu’ pehapuam bahinni’na simesa-mesa. 41Indo attasa’na tama duka’: Zora, Esytaol, Ir-Semes, 42Saalabin, Ayalon, Yitla, 43Elon, Timna, Ekron, 44Elteke, Gibeton, Baalat, 45Yehud, Bene-Berak, Gat-Rimon, 46Me-Yarkon, anna Rakon sola botto sipendadai Yafo. 47Sapo’ aka nalappa’i piha attasa’na pessubunna Dan, iya le’ba’im umbundu’ kota Lesem. Naokko’i indo kota, natepa pa’dam issinna lambi’ dappo’, natadongkonni, anna etaim tohho. Indo Lesem nasangaim Dan napakonai nene to naponene, isanga Dan. 48Ingganna kota sola tondä’ ia too mentamapi mana’na pessubunna Dan situhu’ pehapuam bahinni’na simesa-mesa.
Mana’na pessubunna Yosua
49Tappana puha nabahe indo botto napomana’ situhu’ attasa’na simesa-mesa, iya dibeemmi duka’ Yosua änä’na Nun litä’ illaam alla’-alla’na to Israel napomana’. 50Situhu’ pahentaNa DEBATA, dibeem kota Yosua situhu’ pelauanna isanga Timnat-Serah yabo tipatanetena Efraim. Iya nakassa’im Yosua indo kota anna naongei tohho.
51Iam too mana’ to nataba sando Eleazar, Yosua änä’na Nun, anna pepungngu’na simesa-mesa pehapuam padai pehapuam kasallena Israel umpake undi. Napalako dio Silo, dio oloNa DEBATA, dio olona Kema Kasitammuam DEBATA. Susim too suppi’ sule lako ditaba indo botto.
20Sanaka-naka kota pentulindungam
1Puhai ia too, ma’kadam DEBATA lako Yosua naua: 2<<Palandasanni to Israel muua: <Tuhoia’ sanaka-naka kota pentulindungam umba susi puha kuuaangko muolai Musa, 3anna mala maka’ deem tau tä’ naägä’i papateam anna tä’ deem napattuju la papateam, iya mala le’ba’ muäläi kalena lako. Indo kota la muongeia’ mentulindum dio mai to la membala’ papateam. 4La muäläi kalena indo tau lako sala’-sala’ ianna indo kota, mane ke’de’i dio olona ba’bana indo kota anna untula’i kaha-kahana lako matua ulunna indo kota. Iya pahallu la napasola tama indo kota anna nabeenni ongeam la naongei tohho. 5Ianaanna napadondoi indo to la membala’ papateam, iya tä’ mala la nabeho indo matua ulunna kota indo to papateam lako indo to la membala’, aka papateam sapo’ tä’ deem napattuju anna tä’ napemannaam. 6Pahallu la tohho liu illaam indo kota sampe puha dihotto’ dio olona handangam pudu’, anna sampe mate indo sando too’ to umbaba babangam wattu eta too. Puhai too, mane mala hi pole’ ma’pasule lako banuanna anna kotana, indo kota to naongei le’ba’ muäläi kalena.> >>
7Iya napasähä’um to Israel sanaka-naka kota pentulindungam susinna: Kedesh dio Galilea, yabo tipatanetena Naftali, Sikhem yabo tipatanetena Efraim, anna Kiryat-Arba battu diua Hebron yabo tipatanetena Yehuda. 8Dipe lambam libanna Salu Yordan, tandai mata allona Yerikho, Bezer ia dio pädä kukku’ natuho, mesa hante kalua’ yabo tipatanetena, illaam paluäna attasa’na Ruben; Ramot ia dio Gilead paluäna attasa’na Gad; Golan ia dio Basan paluäna attasa’na Manasye. 9Iam too sanaka-naka kota dituho la naongei to Israel anna ingganna to sule messihuhu illaam alla’-alla’na, anna mala menna-menna tä’ naägä’i papateam mala le’ba’ muäläi kalena lako indo kota anna tä’ la mala napatei indo to la membala’ papateam ke tä’pi deem dipopengngolo lako handangam pudu’.
21Kota dibeem pessubunna Lewi
1Pissam wattu le’ba’ mellambi’ ingganna pangngulunna pehapuam bahinni’ illaam pessubunna Lewi lako sando Eleazar, Yosua änä’na Nun, anna ingganna pangngulunna pehapuam bahinni’ dio mai ingganna pehapuam kasalle änä’na Israel 2dio Silo, dio lembäna Kanaan anna ma’kadai naua: <<Inna puham napa’pahentaam DEBATA muolai Musa anna mala dibeengkam kami’ duka’ sanaka-naka kota la kiongei tohho anna pa’kambisam la kipa’kambi’i olo’-olo’ki.>> 3Iya untuhu’im pahentaNa DEBATA to Israel, umbeem pessubunna Lewi sanaka-naka kota sola pa’kambisam illaam paluäna mana’na.
4Iya uhuna nahua undi pehapuam bahinni’na Kehat pessubunna Lewi, peänäsanna sando Harun untahima sapulo tallu kota dio mai pessubunna Yehuda, pessubunna Simeon, anna pessubunna Benyamin. 5Mane nahuai undi pihannapi pehapuam bahinni’na Kehat untahima ia sapulo kota dio mai pessubunna Efraim, pessubunna Dan, anna bahe duanna pessubunna Manasye. 6Mane nahuai undi pehapuam bahinni’na Gerson untahima sapulo tallu kota dio mai pessubunna Isakhar, pessubunna Asyer, pessubunna Naftali, anna bahe duanna pessubunna Manasye to dio Basan. 7Mane nahuai undi pehapuam bahinni’na Merari untahima sapulo dua kota dio mai pessubunna Ruben, pessubunna Gad, anna pessubunna Zebulon. 8Susim too lalanna pessubunna Israel untabai kota sola pa’kambisam lako pessubunna Lewi umpake undi umba susi pahentaNa DEBATA muolai Musa.
9Inde sanaka-naka kota la ditula’ sanganna buttu dio mai pessubunna Yehuda anna pessubunna Simeon dibeem 10peänäsanna Harun, to buttu di pehapuam bahinni’na Kehat pessubunna Lewi, aka ia uhuna nahua undi. 11Indem ia indo kota to dibeem: Kiryat-Arba (Arba nene to naponene to Enak) battu diua Hebron yabo tipatanetena Yehuda, anna pa’kambisam lao pali’. 12Sapo’ ingganna bela’ sola tondä’ lako sikahuku’na indo kota puha asammi dibeem Kaleb änä’na Yefune naampuam. 13Lu lako peänäsanna sando Harun dibeem ia Hebron, indo kota si naongei mentulindum to papateam, sola ingganna pa’kambisam, anna Libna sola ingganna pa’kambisanna, 14Yatir sola ingganna pa’kambisanna, Estemoa sola ingganna pa’kambisanna, 15Holon sola ingganna pa’kambisanna, Debir sola ingganna pa’kambisanna, 16Ain sola ingganna pa’kambisanna, Yuta sola ingganna pa’kambisanna, anna Bet-Semes sola ingganna pa’kambisanna. Kaseha kota dio mai indo dua pehapuam kasallena. 17Anna buttu di pessubunna Benyamin dibeem ia kota: Gibeon sola ingganna pa’kambisanna, Geba sola ingganna pa’kambisanna, 18Anatot sola ingganna pa’kambisanna, anna Almon sola ingganna pa’kambisanna, sangngim sitonda pa’kambisam (appa’ kota). 19Ia asanna kota naampuam sando pessubunna Harun sapulo tallu kota sola ingganna pa’kambisanna.
20Pihannapi pehapuam bahinni’na Kehat pessubunna Lewi to messubum di Kehatpi duka’ untahima ia sanaka-naka kota dio mai pessubunna Efraim tappana diundi. 21Indo kota natahima: Sikhem, indo kota pentulindunganna to papateam sola ingganna pa’kambisanna yabo tipatanetena Efraim, Gezer sola ingganna pa’kambisanna, 22Kibzaim sola ingganna pa’kambisanna, anna Bet-Horon sola ingganna pa’kambisanna (appa’ kota). 23Anna dio mai pessubunna Dan dibeem ia kota: Elteke sola ingganna pa’kambisanna, Gibeton sola ingganna pa’kambisanna, 24Ayalon sola ingganna pa’kambisanna, anna Gat-Rimon sola ingganna pa’kambisanna (appa’ kota). 25Dio mai bahe duanna pessubunna Manasye dibeem ia kota: Taanakh sola ingganna pa’kambisanna, anna Gat-Rimon sola ingganna pa’kambisanna (dua kota). 26Ia asanna kota naampuam pihannapi pehapuam bahinni’na Kehat sapulo kota sola ingganna pa’kambisanna.
27Pehapuam bahinni’na Gerson pessubunna Lewi untahima ia sanaka-naka kota dio mai bahe duanna pessubunna Manasye: Golan kota pentulindunganna to papateam sola ingganna pa’kambisanna dio Basan, anna Beestera sola ingganna pa’kambisanna (dua kota). 28Dio mai pessubunna Isakhar dibeem ia kota: Kisyon sola ingganna pa’kambisanna, Dobrat sola ingganna pa’kambisanna, 29Yarmut sola ingganna pa’kambisanna, anna En-Ganim sola ingganna pa’kambisanna (appa’ kota). 30Dio mai pessubunna Asyer dibeem ia kota: Misal sola ingganna pa’kambisanna, Abdon sola ingganna pa’kambisanna, 31Helkat sola ingganna pa’kambisanna, anna Rehob sola ingganna pa’kambisanna (appa’ kota). 32Dio mai pessubunna Naftali dibeem ia kota: Kedesh kota pentulindunganna to papateam sola ingganna pa’kambisanna dio Galilea, Hamat-Dor sola ingganna pa’kambisanna, anna Kartan sola ingganna pa’kambisanna (tallu kota). 33Ia asanna kota naampuam pessubunna Gerson situhu’ pehapuanna simesa-mesa sapulo tallu kota sola ingganna pa’kambisanna.
34Indo pessubunna Lewi pihannapi battu diua pehapuam bahinni’na Merari, untahima ia dio mai pessubunna Zebulon kota: Yokneam sola ingganna pa’kambisanna, Karta sola ingganna pa’kambisanna, 35Dimna sola ingganna pa’kambisanna, anna Nahalal sola ingganna pa’kambisanna (appa’ kota). 36Anna dio mai pessubunna Ruben dibeem ia kota: Bezer sola ingganna pa’kambisanna, Yahas sola ingganna pa’kambisanna, 37Kedemot sola ingganna pa’kambisanna, anna Mefaat sola ingganna pa’kambisanna (appa’ kota). 38Anna dio mai pessubunna Gad dibeem ia kota: Ramot indo kota pentulindunganna to papateam sola ingganna pa’kambisanna dio Gilead, Mahanaim sola ingganna pa’kambisanna, 39Hesybon sola ingganna pa’kambisanna, anna Yaezer sola ingganna pa’kambisanna (appa’ kota). 40Tappana diundi, iya sapulo dua kota ia asanna naampuam indo pessubunna Lewi pihannapi battu diua pehapuam bahinni’na Merari.
41Dadi, appa’ pulo kahua kota ia asanna natahima pessubunna Lewi dio mai mana’na pessubunna Israel sola ingganna pa’kambisanna. 42Mesa oi indo kota deem oom pa’kambisanna lao pali’, susi asam padai indo kota.
Kamalinoam dio botto to nadandi DEBATA
43Dadi, napadokkoam DEBATA lisu pala’na to Israel ingganna indo botto to puha nadandi la nabeem lako nene to naponene. Natadongkonni indo botto anna tohhoim eta. 44Nabeem kamalinoam DEBATA illaam paluäna indo botto, umba susi indo nadandi lako nene to naponene. Tä’ deem moi podo la mesa balinna la nabela muebai. Ingganna balinna napadokkoam DEBATA lisu pala’na. 45Ingganna kamapiaam to nadandiam DEBATA lako to Israel, tä’ deem tä’ naponnoi, naponnoi asam.
22Pehapuam kasalle dipe lambam libanna Salu Yordan
1Puhai ia too natambaim Yosua pessubunna Ruben, pessubunna Gad, anna bahe duanna pessubunna Manasye tandai mata allo, 2anna nauaanni: <<Umpalakonna’ ingganna indo napahentaangkoa’ Musa, indo sabua’Na DEBATA, anna untuhu’inna’ tula’ku illaam ingganna indo kupahentaangkoa’. 3Tä’koa’ deem untampeam solasubummu pehapuam kasalle senga’ änä’na Israel padam masäena inde dio mai sule lako temo, sapo’ manontongkoa’ untuhu’i pahentaNa DEBATA, Puang Allataala to umpenombai. 4Tentomai DEBATA, Puang Allataala to umpenombai umbeemmi kamalinoam lako ingganna solasubummua’, umba susi puha nadandiam. Nasuhum le’ba’ungkoa’, pa’pasulekoa’ lako kemamu, lako botto litä’mu to puha nabeengkoa’ Musa, indo sabua’Na DEBATA, dipe lambam libanna Salu Yordan. 5Angga hia, pengkilalai manappaia’, la umpalakoa’ too indo pahenta anna paondom to napalandasangkoa’ Musa indo sabua’Na DEBATA, indo naua: pakekoa’ pangkaha’ pa’kamase lako DEBATA, Puang Allataala to umpenombai, tuhu’i asanni ulalanNa, manuhu’koa’ palako ingganna pahentaNa, pengngantikoa’ manda’ pentobe matoto’ lako kaleNa, anna menombakoa’ dio oloNa sola sakalebu penabammu anna mentu’ pikkihammu.>> 6Puhai, iya napelauammi tamba’ Yosua anna mane nauaanni: <<Le’ba’ungkoa’.>> Iya le’ba’im duka’ lako kemana.
7Indo bahe duanna pessubunna Manasye puham nabeem Musa mana’na dio Basan, anna indo bahe duannapi pessubunna Manasye puham ia nabeem Yosua mana’na illaam alla’-alla’na solasubunna dio tandai katampusanna Salu Yordan. Wattunna nauaam Yosua: <<Le’ba’ungkoa’>> anna napelauam tamba’, 8iya nauaampi: <<Pa’pasulengkoa’ lako kemamu, sitonda kulle budammua’, olo’-olo’mua’ tä’ deem pada sabuda, peha’, bulabam, tembaga, bassi, anna poheba tä’ deem pada sabuda. Beennia’ ia piha solasubummu indo pamuhummua’.>>
Pehapuam kasalle to dipe lambam libanna Salu Yordan umpapia dapo’ kapenombaam
9Indo pessubunna Ruben, pessubunna Gad, anna bahe duanna pessubunna Manasye le’ba’ umpellei solana pessubunna Israel dio Silo dio lembäna Kanaan, le’ba’ lako lembäna Gilead, botto litä’na to naampuam situhu’ pahentaNa DEBATA muolai Musa. 10Tappana sule lako Gelilot dio sikahuku’ Salu Yordan dio lembäna Kanaan indo pessubunna Ruben, pessubunna Gad, anna bahe duanna pessubunna Manasye, iya umpapiam dapo’ pehumalasam kasalle dio. 11Pissananna napelele to Israel dio Silo diua: <<Umpake’de’ dapo’ pehumalasam pessubunna Ruben, pessubunna Gad, anna bahe duanna pessubunna Manasye mentingngajo lako lembäna Kanaan, dio Gelilot dio sikahuku’ Salu Yordan siampe’ attasa’na to Israel.>> 12Iya ma’hempum asammi to Israel dio Silo la lao nabundu’ tappana napelele indo kaheba.
13Iya umpake’de’um Pinehas änä’na sando Eleazar to Israel le’ba’ umpellambi’i pessubunna Ruben, pessubunna Gad anna bahe duanna pessubunna Manasye lako lembäna Gilead 14napasolai sapulo pepungngu’. Mesa oi pehapuam kasallena to Israel mesa oom pepungngu’. Indo sapulo pepungngu’ tungga’ umbännäi sahapunna to buttu di pehapuam bahinni’na to Israel.
15Tappana landa’ lako ongeanna pessubunna Ruben, pessubunna Gad, anna bahe duanna pessubunna Manasye dio lembäna Gilead, iya napa’tula’im naua: 16<<Susi inde tula’na ingganna umma’Na DEBATA: <Gau’ aka hia’ iko umpogau’, tä’koa’ manontom lako Puang Allataala to napenombai to Israel umpemboko’ikoa’ DEBATA inde tentomai, anna umpake’de’koa’ mesa dapo’ pehumalasam lambi’ umbali-balikoa’ DEBATA inde allo temo? 17Tä’paka’ tiko ussanga indo dosataa’ dio Peor? Sule lako temo tä’pakia’ deem umpehändäi kaleta dio mai dosa ia too indo to untumä umma’Na DEBATA nahua pesämbä’. 18Iya la umpemboko’i pole ongkoa’ iko DEBATA inde temo? Maka’ umbali-balikoa’ DEBATA inde allo temo, iya makale’na too kende’um aha’Na lako kitaa’ to Israel. 19Pissananna hi manii anna umpekadakeannia’ itim litä’ mana’mua’ la muongei menomba lako DEBATA, iya lu dipekoa’ mai inde litä’ ampuanNa DEBATA, ongeanna dipake’de’ Kema Kapenombaam lako DEBATA, anna tohhokoa’ illaam alla’-alla’ki. Daa umbali-balia’ DEBATA anna daa umpobalikam, itim umpake’desam polekoa’ kalemu dapo’ pehumalasam, sulibanna indo dapo’ pehumalasam lako DEBATA, Puang Allataala to tapenombai. 20Wattunna umpesi’ kamanontonganna Akhan änä’na Zerah diona baham-baham to dipa’tantu la dipadahi kapu’, tä’ daka too nahua aha’ kasalle ingganna to Israel? Tä’ angga tau ia too mate natumä dosana.> >>
21Iya natimba’im pessubunna Ruben, pessubunna Gad anna bahe duanna pessubunna Manasye lako ingganna indo pepungngu’na simesa-mesa pehapuam kasalle änä’na Israel naua: 22<<Puang Allataala, DEBATA To Handam Kuasa, Puang Allataala, DEBATA To Handam Kuasa! Naitakam DEBATA anna pahallu duka’ naissam to Israel, ke kipogau’i inde kaha-kaha aka pattuju la pabali-balikam battu haka pattuju la umpesi’kam kamanontongangki lako DEBATA, iya lalanna la umpakattu sungnga’kam inde allo temo. 23Anna ianaanna kipake’de’i inde dapo’ pehumalasam aka tä’ungkam manontom lako DEBATA la umpehumalasam tunuam ditunu mampu’ yabona anna bua pemala’ tappum gandum battu haka tunuam untilalla’i kasikapiaam, iya la ma’kale DEBATA umpabala’ikam. 24Setonganna, ia anna kipake’de’i aka malallam penabangki mase manii di dako’na di maniinna ma’kada änä’mua’ lako änä’ki naua: <Akaa’ iko kasilombungammu DEBATA, Puang Allataala to napenombai to Israel? 25Indem ia Salu Yordan puha napa’tantu DEBATA mendadi katonam illaam alla’taa’, o pessubunna Ruben anna pessubunna Gad! Tä’ iko deem kasilombungammua’ DEBATA.> Dadi, malallam penabangki mase manii änä’mua’ la nasuhungam tä’um kami’ la menomba änä’ki lako DEBATA. 26Iam too anna kiuam: Tapake’de’a’ dapo’ pehumalasam, tä’ la taongeia’ umpehumalasam tunuam ditunu mampu’ battu haka tunuam biasa, 27sapo’ la mendadi sa’bi illaam alla’taa’, anna lako pessubuntaa’ allo di dako’na diua tontäkam menomba lako DEBATA dio olona Kema Kapenombaam lako kaleNa umbaba tunuam ditunu mampu’, tunuam biasa, anna tunuam untilalla’i kasikapiaam. Dadi, tä’um deem lalanna änä’mua’ allo di dako’na la muuaam änä’ki: <Tä’ iko deem kasilombungammua’ DEBATA.> 28Nasuhum kiua: Ianaanna la ma’kada susii peänäsammua’ lako peänäsangki allo di dako’na, iya la natimba’ peänäsangki naua: <Petua’ siaia’ too inde dapo’ pehumalasam napapia nene to kiponene napasusii indo dapo’ pehumalasam lako DEBATA. Tä’ la diongei umpehumalasam tunuam ditunu mampu’ battu haka tunuam biasa, sapo’ la mendadi tanda kasa’biam illaam alla’taa’.> 29Inna tä’ sia kiaku la umbali-bali DEBATA, anna tä’ la manontom lako kaleNa inde allo temo inde umpake’de’kam dapo’ pehumalasam la dipantunui tunuam ditunu mampu’, bua pemala’ tappum gandum, battu haka tunuam biasa, yabo dapo’ sulibanna dapo’ pehumalasam lako DEBATA, Puang Allataala to tapenombai dio olona Kema Kapenombaam.>>
30Tappana nahingngi sando Pinehas sola ingganna indo pepungngu’, battu diua pepungngu’na simesa-mesa pehapuam kasalle änä’na Israel to napasola Pinehas indo tula’na pessubunna Ruben, pessubunna Gad, anna bahe duanna pessubunna Manasye, iya napemapiaam indo to napogau’. 31Iya ma’kadam Pinehas änä’na sando Eleazar lako pessubunna Ruben, pessubunna Gad, anna bahe duanna pessubunna Manasye naua: <<Kiissammi pole’ tentomai kiua, natadongkonnikia’ DEBATA, aka tä’ mammokoa’ umpesi’ kamanontongammu lako DEBATA. Lambisam ullappasangkoa’ to Israel dio mai pesämbä’Na DEBATA.>>
32Puhai ia too, iya ma’pasulem Pinehas änä’na sando Eleazar sola ingganna indo pepungngu’na simesa-mesa pehapuam kasalle dio mai ongeanna pessubunna Ruben sola pessubunna Gad dio lembäna Gilead lako Kanaan umpellambi’i to Israel, anna napalandasanni kaheba ia too. 33Iya napemapiaam duka’ to Israel kaha-kaha ia too. Lambi’ umpuji umpa’kasallei Puang Allataala to Israel anna tä’um maelo’ la lao nabundu’ anna ungkahäppusanni botto litä’na pessubunna Ruben anna Gad. 34Iya nasangaim pessubunna Ruben sola pessubunna Gad indo dapo’ pehumalasam: Sa’bi aka naua: <<Iam too inde mendadi sa’bi illaam alla’taa’ diua, DEBATA iam too Puang Allataala.>>
23Kada napembassaham Yosua tappana la mate kale
1Tappana masäe naolaam DEBATA umbeem kamalinoam sola kamasannangam to Israel dio mai ingganna balinna to umpali’-pali’i, anna matua toom duka’ Yosua anna mesolo’um allona, 2iya untambaim ingganna to Israel Yosua, ingganna matua ulunna to Israel, ingganna pepungngu’, ingganna to mahhotto’, anna ingganna pangngumbabanna tentaha anna nauaanni: <<Matuamä’ anna mesolo’um alloku. 3Muita asammia’ indo to napogausangkoa’ DEBATA, Puang Allataala to umpenombai lako inde mai ingganna botto. DEBATA, Puang Allataala to umpenombai puha umpa’bundusangkoa’. 4Pennassaia’, puham kuundi ingganna indo botto tohhonapi la napomana’ simesa-mesa pehapuam kasallemua’, susi toi duka’ ingganna indo botto to puha kukahäppusanni mengkalao dio Salu Yordan sule lako Le’bo’ Itängä dio tandai kalendusanna allo. 5DEBATA, Puang Allataala to umpenombai la uhhambai lao anna napasosso’ dio olomua’, nasuhum la untadongkonnia’ botto litä’na, umba susi puha nadandiangkoa’ DEBATA, Puang Allataala to umpenombai.
6Dadi, pomatohhäia’ penabammu antia’ manda’ tobei matoto’ anna ungkedoanni ingganna indo tituli’ illaam suha’ Pepaondonganna Musa, anna mala tä’koa’ deem lempä dio mai pepaondongam ia too, 7lambi’ tä’koa’ sibakko issi litä’ indo tohhonapi illaam alla’-alla’mua’. Daa umpengkaalaia’ sanganna debatanna, daa umpa’dandia’ ussa’bu’ sanganna debatanna, daa umpehumala’a’ dio olona, anna daa umpenombai. 8Sapo’ la manontom dakoa’ ia lako DEBATA, Puang Allataala to umpenombai, umba susi indo si umpogau’unna’ sule lako temo.
9Puham nahambai lao DEBATA dio mai olomua’ ingganna indo pa’bottoam si kasalle anna matoho. Anna ikoa’-iko, tä’ deem tau moi podo la mesa la nasaha muebakoa’ sule lako temo. 10Mesa mandakoa’ iko iya mala umpasosso’ sasa’bu tau, aka DEBATA, Puang Allataala to umpenombai, Ia ma’kale umpa’bundusangkoa’, umba susi nadandiangkoa’. 11Pakekoa’ pangkaha’ pa’kamase lako DEBATA, Puang Allataala to umpenombai aka la kamapiaammua’.
12Maka’ umpemboko’ikoa’ DEBATA anna membakko lakokoa’ indo tohhonapi issi litä’ illaam alla’-alla’mua’, sihampe-hampekoa’, anna sibakkokoa’, 13iya pemmitaim too tä’ungkoa’ la nahambaiam lao DEBATA, Puang Allataala to umpenombai indo tohhonapi issi litä’ illaam inde botto dio mai olomu. Sapo’ la mendadim poja bendo’mua’ anna samelum buajamu, sihhapam pesämbä’ ullikoi boko’mu, anna sihhapam petossä’ untuhä’i matammu, lambi’ dipempa’deangkoa’ illaam inde botto tä’ deem pada samapia, to namanasangkoa’ DEBATA, Puang Allataala to umpenombai.
14Inde tentomai, sabihim kanuku ham angku pa’dem. Muissam lantu’unna’ sule tama penabammu anna pikkihammu muua tä’ deem moi podo la mesa kamapiaam to puha nadandiangkoa’ DEBATA, Puang Allataala to umpenombai tä’ la napasule lako. Puha asammi napasule lako. Tä’ deem moi podo la mesa tä’ napasule lako. 15Sapo’ umba susi puham napasulelakoangkoa’ ingganna kamapiaam, indo to puha nadandingkoa’ DEBATA, Puang Allataala to umpenombai, la susim too duka’ la napasuleangkoa’ ingganna kakadakeam sampe napempa’deangkoa’ illaam mai inde botto litä’ tä’ deem pada samapia, to puha namanasangkoa’ DEBATA, Puang Allataala to umpenombai, 16ke untekkakoa’ pa’dandianNa DEBATA, Puang Allataala to umpenombai to puha napahentaangkoa’, anna le’ba’koa’ mehumala’ lako debata senga’ anna menomba dio olona. Iya la hede-hede aha’Na DEBATA lako ikoa’, lambi’ la napempa’deam siahangkoa’ illaam mai inde botto litä’ tä’ deem pada samapia to puha namanasangkoa’.>>
24Pa’dandiam dio Sikhem
1Puhai ia too, uhhempum asammi pehapuam kasalle änä’na Israel Yosua dio Sikhem. Anna mane untambai ingganna matua ulunna to Israel, ingganna to mahhotto’, anna ingganna pangngulunna tentaha la mengngolo lako Puang Allataala. 2Mane ma’kadai Yosua lako ingganna to Israel naua: <<Susi inde kadanNa DEBATA, Puang Allataala to napenombai to Israel: <Yolona, indo nene to umponenea’ si diuaam Terah, ambena Abraham sola Nahor si tohho dipe lambam libanna Salu Efrat anna si umpenombai debata senga’. 3Sapo’ kupasähä’ Abraham, nene to umponenea’ dipe mai lambam libanna Salu Efrat, anna kusuai ussambai lembäna Kanaan. Mane kumana’i Ishak anna kupalohom banne taunna. 4Mane kumana’i änä’ Ishak isanga Yakub anna Esau. Esau kumana’ tipatanetena Seir la naampuam, anna Yakub ia sola ingganna änä’na mentieli’ lako Mesir. 5Masäei lessu’na ia too, kupake’de’um Musa sola Harun anna kupahuai pesämbä’ to Mesir, anna mane kulappasangkoa’ illaam mai. 6Tappana kupasola tomatuammua’ messubum illaam mai lembäna Mesir anna landa’im lako bihim le’bo’, iya napadondom to Mesir lako le’bo’ Teberau umpake bendi pa’bundusam anna tentaha ma’daham. 7Iya mengkaalaim dio oloKu umpelau pepamolo, iya kupasulem malillim illaam alla’na tomatuammua’ anna to Mesir. Anna mane kupasikuku’i uwai le’bo’ to Mesir, lambi’ tallam asam. Muissam asammia’ indo kupogausam to Mesir. Puhai ia too, iya masäe tohhokoa’ dio pädä kukku’. 8Mane kupasolakoa’ lako botto litä’na to Amori to tohho dipe lambam libanna Salu Yordan. Tappana nabundu’koa’, iya Kao dio matanna umpa’bundusangkoa’ anna kubehoi dokko lisu pala’mua’ anna kupempa’deam dio olomua’, nasuhum malaa’ muokko’i botto litä’na. 9Puhai ia too, mengke’de’um Balak änä’na Zipor, tomahaja Moab la umbundu’ to Israel. Umpopetambai Bileam änä’na Beor la natädokoa’. 10Sapo’ tä’ kupehingngii Bileam, nasuhum napa’lambeam leko’ dakoa’. Susim too lalanna kulappasangkoa’ dio mai pala’ limanna Balak. 11Mane ullambangkoa’ Salu Yordan sampe landa’koa’ lako Yerikho. Iya nabundu’ungkoa’ to Yerikho, to Amori, to Feris, to Kanaan, to Het, to Girgasi, to Hewi, anna to Yebus, sapo’ kubeho asam dokko pala’ limammua’. 12Kupakahea’ anna kupatinggi’gi’ lambi’ sikalumpa’ lao dio mai olomua’24:12 ...lambi’ sikalumpa’ lao dio mai olomua’: Indo dituli’ illaam basa Ibrani pehapangam naua: la kupasuleam wani buda. indo dua tomahajanna to Amori. Dadi, taia kahana pa’dammua’ anna taia kahana bälä’du’mua’ nasuhum patalokoa’. 13Kupadokkoangkoa’ lisu pala’mu botto litä’ tanatamaa’ lupu’mu tanasullu’ hesomu anna ingganna kota taikoa’ umpake’de’i mendadi tadongkongammua’. Anna umpehasaipokoa’ anggur sola zaitun moi kela daa taikoa’ untananni.>
14Iam too anna la mengkahea’ungkoa’ dio oloNa DEBATA anna menombakoa’ lako mengkalao illaam unä’ penabammu anna manontom lako. Pasehei lao mambela ingganna pa’pasusianna to si napa’debatai nene to umponenea’ dipe lambam libanna Salu Efrat anna dio Mesir, anna menombakoa’ lako DEBATA. 15Sapo’ maka’ tä’ umpemapiaanna’ ussi’dim la menomba lako DEBATA, iya pileia’ inde allo temo mennaka’ iko la umpenombai: la indo haka debata to napenombai nene to umponenea’ dipe lambam libanna Salu Efrat, iya la indo haka debata to napenombai to Amori to untadongkonnia’ botto litä’na tentomai? Sapo’ kao-kao sola sahapungku, la menomba längängkam DEBATA.>> 16Iya natimba’im to Israel naua: <<Inna tä’ sia kiaku la umpemboko’i DEBATA la menomba lako debata senga’! 17Aka DEBATA, Puang Allataala to tapenombai, Ia umpatettekia’ sola tomatuanta messubum illaam mai lembäna Mesir, ongeantaa’ disabua’i. Ia puha umpadadi tanda memängä-mängä taitaa’ sola matanta anna Ia ungkambi’kia’ najagai illaam pangngolalalanganta pada taolanna anna ingganna botto taolainnaa’. 18DEBATA uhhambai lao dio mai olotaa’ to Amori anna ingganna pehapuam kasalle senga’ to umpangngissi inde lembä. Dadi, la menomba lakokam duka’ DEBATA, aka Ia Puang Allataala to tapenombaia’!>>
19Iya ma’kadam Yosua naua: <<Tä’ siaa’ la umbela menomba lako DEBATA, aka Ia Puang Allataala to maseho, Ia Puang Allataala to si kembuhu.24:19 kembuhu: Kalembasanna, anggam DEBATA sihatam dipenombai, dadi tä’ napohäe ke la ma’debata senga’i umma’Na, aka tä’ sihatam. Inna tä’ sia la naampunni ingganna kasalaammua’ anna dosamu. 20Ianaanna umpemboko’ikoa’ DEBATA anna menomba lakokoa’ debatanna botto senga’, iya la Ia opi too pole’ umpobalikoa’ anna napahuaikoa’ kaha-kaha tä’ mapia anna napempa’deangkoa’, moinna anna puham ma’pogau’ mapia lako kalemua’.>>
21Iya natimba’im to Israel naua: <<Tää’! La menomba lakokam DEBATA.>> 22Iya ma’kadam Yosua naua: <<Ma’kalengkoa’ ussa’bii kalemu, puhangkoa’ umpilei DEBATA la umpenombai.>> Iya natimba’um to Israel naua: <<Io, kami’ ussa’bii kaleki!>> 23Iya nauam Yosua: <<Tentomai, tibeia’ lao mambela ingganna pa’pasusiam illaam alla’-alla’mua’ to si napa’debatai botto senga’ anna pasatutuia’ penabammu lako DEBATA, Puang Allataala to tapenombaia’ kitaa’ to Israel.>> 24Iya nauam to Israel lako Yosua: <<La menomba lakokam DEBATA, Puang Allataala to tapenombai, anna la kituhu’i kadanNa.>>
25Iya allo etam too anna umpadeenni pa’dandiam Yosua illaam alla’na to Israel dio Sikhem anna umpapia pehhondoam sola ätoham la natuhu’i to Israel. 26Ingganna ia too natuli’ Yosua illaam mesa suha’ naongei pahentaNa Puang Allataala,24:26 natuli’ Yosua... pahentaNa Puang Allataala: Indo natuli’ Yosua illaam mesa suha’ naongei pahentaNa Puang Allataala, iya indo ätoham to napandam Yosua la napehhondoi to Israel ditula’ illaam balajam 25. anna mane muala mesa batu kasalle anna naosä’i eta too, dio ibi’na kaju kasalle, dio ongeam masehoNa DEBATA.24:26 ongeam masehoNa DEBATA: Indo nauaam ongeam masehoNa DEBATA, tä’ makaleso aka tä’ deem dituli’ diona ongeam Maseho dipake’de’ dio Sikhem. Indo nauaam ongeam Maseho umbai’ dapo’ pehumalasam battu haka dapo’ pantunuam tunuam ditunu mampu’ napake’de’ Abraham yolona dio ibi’na kaju kasalle dio sikahuku’ Sikhem (batai Kad. 12:6-7).27Anna mane naua Yosua lako to Israel: <<Pennassaia’, inde batu mendadi sa’bi aka sihhapam too nahingngi asam indo battakadanNa DEBATA to napengkadaam lako kitaa’. Dadi, inde batu la mendadi sa’bi lako ikoa’ anna mala tä’koa’ umbahoi Puang Allataala to umpenombai.>> 28Puhai ia too, napabäim Yosua to Israel tungga’ le’ba’ lako botto litä’na to napomana’ simesa-mesa.
Yosua anna Eleazar mate anna bukunna Yusuf dilamum
29Masäe-säei lessu’na ia too, iya matem Yosua änä’na Nun indo sabua’Na DEBATA, tappana sahatu’ sapulo taunna dadinna. 30Iya dilamummi illaam paluäna litä’ mana’na dio Timnat-Serah, yabo tipatanetena Efraim, tandai utarana Tanete Gaas.
31Menomba liu lako DEBATA to Israel pada masäena tubo Yosua anna pada masäena tubo ingganna matua ulunna to Israel to mahendem puha ia anna la Yosua, anna to muissam ingganna pa’palakoam to napogau’ DEBATA lako to Israel.
32Indo bukunna Yusuf to nababa to Israel dio mai Mesir, dilamum dio Sikhem, sangngenam litä’ naalli Yakub lako Hemor ambena Sikhem sahatu’ doi’ peha’. Indo litä’ napomana’ pessubunna Yusuf.
33Tappana mate duka’ Eleazar änä’na Harun, iya dilamummi yabo mesa tanete dio tipatanetena Efraim to puham nabeem Pinehas, änä’na.