Yunus
1Yunus nasua DEBATA sapo’ le’ba’ di membuni
1Pissam wattu ma’kada DEBATA lako Yunus änä’na Amitai naua: 2<<Pengkalao siahangko temo ammu le’ba’ lako Niniwe, indo kota kasalle. Laoko tappakadaiannä’ ingganna tau dio, aka kende’um dio oloku kakadakeanna pesahobo bubosi.>>
3Iya mengkalaom Yunus sapo’ le’ba’ senga’ di la lu lako Tarsis umpembuniam DEBATA. Le’ba’ dokko katisoheam lopi dio Yope, iya ullambi’um lopi kasalle la mengkalao lako Tarsis. Iya nabaja’um sebana, anna längänni indo lopi le’ba’ lako Tarsis la umpembuniam DEBATA.
4Pissananna illaanni le’bo’ indo lopi, umpatuhum siaham talimpuhu’ DEBATA unta’du indo lopi, iya saidi’na tahuppu’. 5Iya häntä asam indo to mengkähä illaam lopi, lambi’ sikaoli pantam mengkaala lako debatanna napasindum untibei babaanna indo lopi tama le’bo’ aka naua: <<Anna malai mahingngam lopi.>>
Sapo’ wattu eta too, dio ia ongeam handam diongam illaam indo lopi Yunus metindo sampe limpe’ mamma’. 6Iya sulem indo to si umpalao lopi umpellambi’i Yunus, anna natundanni nauaam: <<Akanna malino hi iko penabammu limpe’ mamma’ inde ma’pateem tau? Bangongko, ammu pengkaalaangkia’ lako debatammu, umba-umba aka mehingngiam indana tallangkia’.>>
7Puha ia too, sipa’tula’-tula’um indo to mengkähä illaam lopi naua: <<Dotanna’ taundi anna malai taissanna’ menna amo napolalam, nasuhum la tallangkia’.>> Sikanaundim, iya Yunus nahua.
8Iya nauaim lako Yunus: <<Tulasangkanni, iko si’da isanga nasuhum nahuakia’ kamasussaam susi indee? Mennako iko isanga anna aka pengkähängammu? To akako anna buttu umbako ngei?>>
9Natimba’ Yunus naua: <<Kao to Ibraniä’ to mengkahea’ längäm DEBATA, battu diua Puang Allataala yabo suhuga, to umpadadi le’bo’ anna galantangam.>>
10Anna mane natulasam aka napolalam anna le’ba’i lahi umpembuniam DEBATA. Iya tuttuam häntäim indo tau anna nauai: <<Akanna ma’pateem doko iko?>>
11Iya tuttuam kasallem indo bombam lambi’ mekutanai pole lako Yunus naua: <<Aka la kipogausangko anna mala mattam inde bombam?>>
12Natimba’um Yunus naua: <<Pa’tibeannä’ tama le’bo’, iya la mattammi too bombam lambi’ tä’ungkoa’ natappi liu. Aka kuissam kuua kao buntu tumäna anna natappikia’ inde talimpuhu’.>>
13Sapo’ nasändä’i siapi pada-pada mengkatoho umbose indo lopi la napasohe battuam lako galantangam, sapo’ tä’ di nabela aka tuttuam kasalle hi indo bombanna le’bo’. 14Iya pada-padam sikaoli mengkaala längäm DEBATA naua: <<O DEBATA, ke la mala anna tä’kam untallangam ke kipatei inde tau, anna tä’kam la umpanuntu’i hahana inde to tapasala. Aka iko hi iko DEBATA umpadadi inde kaha-kaha situhu’ pa’elo’mu.>> 15Anna mane sikaumpa’tibeam Yunus tama le’bo’, iya mattam eta siaham indo bombam. 16Iya sangngim mahea’ pole’ indo tau dio olona DEBATA, lambi’ untunu olo’-olo’ napehumalasam lako DEBATA, anna mane pantam ma’dandi dio oloNa DEBATA.
17Iya umpasule siaham mesa bau kasalle DEBATA tappa muampello’ Yunus. Iya illaammi tambu’ bau tallungngallo tallum bengi.
2Sambajanna Yunus illaam tambu’ bau
1Tappana illaam tambu’ bau Yunus, iya ma’sambajammi längäm DEBATA, Puang Allataala to napenombai 2naua:
<<O DEBATA, mengkaloa’ä’ illaam kamapi’disangku, iya uhhingngiannä’. Dioä’ apa’ mahihinna litä’ meoli, iya uhhingngiam sa’hangku.
3Puhamä’ umpa’tibeam dokko ongeam mandalam, posi’ mapättäna le’bo’. Naputu’mä’ lembom; nakabu’mä’ bombam to umpatilulum.
4Iya kuuam: Kao to tala unnenne’imä’. La deempaka malaä’ umpahandam banua masehoMu?
5Nakabu’mä’ uwai le’bo’ la napotti’i, nasapu’imä’ le’bo’ kalua’ la napusa’i; anna nakapu’ humpu’ le’bo’ ulungku.
6Tallannä’ sule dokko posi’ mapättäna le’bo’ siandaha’ pentokoanna tanete; tikädo’ manda’um dio boko’ku sule lako salako-lakona. Sapo’ etam too duka’, o DEBATA, Puang Allataala to kupenombai, anna muangkahangko bätä penabangku dio mai pambo’bä’.
7Tappana kattu hannumä’ anna la mäläim bätä penabangku iya mengkilalamä’ sule matim olomu DEBATA. Anna kende’um pengkaalaangku dio olomu illaam ongeam kamasehoammu.
8Ingganna to umpenombai debata lino takeloä, umpemboko’i DEBATA to manontom ma’kamase.
9Sapo’ kao-kao, la menggamahaä’ ma’kuhhu’ sumanga’ umbaba bua pehumala’ku matim. La kuponnoi pa’dandingku dio oloMu, aka anggam Iko kabuttuanna kasalamasam.>>
10Iya nasuam DEBATA indo bau ullua Yunus längäm galantangam.
3Kapenduanna Puang Allataala ussua Yunus lako Niniwe
1Puhai ia too ma’kada pole oom DEBATA lako Yunus kapenduanna naua: 2<<Pengkalao siahangko temo ammu le’ba’ lako Niniwe, indo kota kasalle, anna umpalandasannä’ kada pepakilalaangku indo puha kupakahi’diangko.>>
3Iya mengkalao siaham duka’ Yunus anna le’ba’i lako Niniwe untuhu’im pole’ kadanna DEBATA. Indo Niniwe mesa kota tä’ deem pada sakasalle, nasuhum tallungngallo diolaam mellao mane disambai.
To Niniwe untihokongam gau’ kadakena
4Iya mentamam kota Niniwe Yunus. Pissananna sangngalloi mellao, metamba-tambam naua: <<La appa’ pulo ham benginna anna ditallannim inde kota Niniwe!>> 5Iya ungkatappa’i pepakilalaanna Puang Allataala indo to Niniwe, nasuhum tappa mengkilala anna nakattu la pada-pada ma’puasa. Iya puasa asammi susi to kasalle teem to bahinni’ anna pada-pada ma’poheba bahata.
6Iya nahingnginna duka’ tomahaja Niniwe kaheba ia too, tappa tuhum yabo mai okkosam kahajaanna anna muäläi poheba kahajaanna napasullei poheba bahata, anna muokko’i dio sobä’. 7Anna umpalaoi pahenta tomahaja sola ingganna to kasallena naua:
<<Ingganna issinna Niniwe, susi hupatau teem sapim, domba, anna patuboam senga’, sangngim tä’ dipabäi mangngande anna mangngihu’. 8Ingganna hupatau pahallu ma’poheba bahata, susi toi duka’ olo’-olo’ la sangngim dipapoheba bahatai. Anna la mengkaala hupatau längäm Puang Allataala, untihokongam gau’ kadakena anna kasalleinabaanna anna ma’baju polei ma’dodo pole. 9Umba-umba aka umpodo’ pattujunna Puang Allataala, anna tä’um la hede-hede liu aha’na, lambi’ tä’ungkia’ danum natallanni.>>
10Tappana naita Puang Allataala maaka susi pa’pogau’na, untihokongam gau’ kadakena anna ma’baju pole ma’dodo pole, iya umpodo’ ohi pattujunna anna tä’ ohi danum natallanni.
4Meali-ali Yunus
1Sapo’ meali-ali ia Yunus indo umpodo’ ohi pattujunna Puang Allataala, lambi’ tä’ deem pada sakeaha’. 2Iya ma’sambajammi längäm DEBATA naua: <<O DEBATA, inna kuissam loppo’um indo anna diopä’ bottoku kuua: Tontäm umpodo’na pattujummu. Iam too anna la le’ba’mä’ membuni lako Tarsis eta too, aka inna kuissammi kuua Iko DEBATA to siampuam pangkaha’ anna pa’kamase, ponno sa’baha’ anna tatibeho susu’ tatidende katonam pa’kamasemu. Si umpodo’ ohi pattujummu ke deengko la umpatappa mesa kamapi’disam. 3Dadi, patei pissammä’ DEBATA, aka dotamä’ mate anna la tubo liu.>>
4Sapo’ natimba’ DEBATA naua: <<La sipäto’ daka umpokeaha’ kaha-kaha ia too?>>
Yunus napatudu Puang Allataala
5Eta too messubummi Yunus illaam mai kota Niniwe lu dekke tandai mata allo anna muokko’i. Anna mane umpake’de’ tu’dum si naongei mentiongam umpahandam indo kota aka amo la ullambi’i.
6Pissananna napatuboammi Puang Allataala DEBATA to napenombai satoo’ tanangam umpehhamboi indo tu’dunna Yunus lambi’ tä’um nadä’dä allo, nasuhum tipaule penabanna. Iya tiala penabanna aka umpohäe indo tanangam. 7Sapo’ makale’na la tibukka’ kalei baja, napasulem Puang Allataala ula’-ula’ umbumbum bätäna indo tanangam nasuhum malasso lambi’ mate. 8Tappana delle’ allo, napasulem Puang Allataala hibu’ malussu buttu dio mai tandai mata allo umpomapana’ allo undä’dä ulunna Yunus, lambi’ kadake inabanna saidi’ tamalimpä. Iya baju-bajum mate pissam anna ma’kadai naua: <<Dotamä’ mate pissam anna la tubo liu.>>
9Iya ma’kadam Puang Allataala lako Yunus naua: <<La sipäto’ daka umpokeaha’ tanangam ia too?>> Natimba’ Yunus naua: <<Io, abana sipäto’ä’ keaha’ lambi’ mateku.>>
10Iya ma’kadam DEBATA naua: <<Setonganna tä’ sipäto’ la umpokeaha’ itim tanangam, aka tä’ deem tama hesomu moi podo sai’di’um. Moi ke la daa sabengi liu tubo anna matem sule. 11Dadi, senga’um too Kao kukaha’inna Niniwe mesa kota kasalle sahatu’ dua pulo sa’bu tau issinna sangngim tä’pi naissam usse’la kamapiaam anna kakadakeam, senga’pi olo’-olo’na tä’ deem pada sabuda.>>