Kalappasam
Pemasiä’na
Inde sanganna suha’ Kalappasam diala dio mai indo kaha-kaha handam ma’kalolosam dadi to ditula’ illaam inde suha’, iam too indo kalappasanna to Israel illaam mai lembäna Mesir ongeanna disabua’i. Illaam inde suha’ deem tallu handanna gahi’ kasalle ditula’:
1. To Ibrani battu diua to Israel dilappasam dio mai kasabuasam anna pellaoanna tinanda lako Tanete Sinai.
2. Pa’dandianNa Puang Allataala lako umma’Na yabo Tanete Sinai. Dibeem sanaka handanna pahenta To Israel, susi pahenta la situhu’na busäsam penaba, pengngujä’, anna pakkedoam teem toi duka’ pahenta la situhu’na pa’palakoam mehhupataunna anna pa’palakoam mendiada’na la napehhondoi illaam salukatuboanna.
3. Umpapia Kema Kapenombaam sitonda ingganna pahamaka’na la napake to Israel menomba längäm Debata; ätoham la napehhondoi ingganna sando ma’hettem anna ätoham kapenombaam dio oloNa Puang Allataala.
Inde suha’ Kalappasam ma’tula’ diona pa’pogausanNa Puang Allataala wattunna ullappasam umma’Na illaam mai kasabuasam, anna mane napahundu’ anna napatette la mendadi mesa kahajaam ke dako’i siampuam pahhannuanna allo di dako’na. Musa to handam kesanga illaam inde suha’ to napilei Debata la umpatette umma’Na Puang Allataala messubum illaam mai lembäna Mesir. Indo sapulo PahentaNa Debata ia duka’ mesa too’na ditula’ illaam inde suha’ Kalappasam (hondongam 20:1-17).
Tono’ Issinna
To Israel dilappasam illaam mai lembäna Mesir Kal. 1:1–15:21
a. Disabua’i dio Mesir, Kal. 1:1-22
b. Kadadianna Musa anna wattunna tohhoi dio Midian, Kal. 2:1–4:31
c. Musa sola Harun mengngolo lako tomahaja Mesir, Kal. 5:1–11:10
d. Allo Kalappasam anna wattunna mengkalao dio Mesir, Kal. 12:1–15:21
Mengkalao dio le’bo’ Teberau le’ba’ längäm Tanete Sinai, Kal. 15:22–18:27
Pahentana anna Pa’dandianna Puang Allataala, Kal. 19:1–24:18
Kema Kapenombaam lako DEBATA anna ätoham illaam hettem kapenombaam, Kal. 25:1–40:38
1To Israel dipepi’ dio Mesir
1Indem ia sanganna ingganna änä’na Israel muane battu diua Yakub sitonda hepo’na le’ba’ lako Mesir sola Yakub: 2Ruben, Simeon, Lewi, Yehuda, 3Isakhar, Zebulon, Benyamin, 4Dan, Naftali, Gad, anna Asyer. 5Ingganna änä’na sola ampona Yakub muane mandi, pitu pulo ia asanna. Sapo’ inna diom ia Mesir, Yusuf. 6Masäei, iya matem Yusuf, anna susi siam duka’ ingganna solasubunna anna pada dadinna. 7Keänä’ keampo to Israel anna tuttuam buda bilanganna. Tuttuam membea’ anna matoho, lambi’ ussamba ongeam dio lembäna Mesir.
8Tappana masäe, iya ma’pahentam mesa tomahaja bakahu dio Mesir, tä’ ia muissam diona Yusuf. 9Ma’kada lako pakketauanna naua: <<Patananniia’ talinga inde tula’ku: tuttuam budam bilanganna to Israel anna matoho puham ia anna la kitaa’. 10Maikoa’ tapa’tangnga’, la taakaa’ susi untingngajoi, indana tuttuam membea’i. Maka’ deem to la mebundu’ la tundu lakom too anna napobalikia’, mane le’ba’i muäläi kalena illaam mai inde botto.>> 11Nasuhum muäkä’um buda mando’ la umpalu-palu bassii to Israel mengkähä kahha’. Mane umpapiai kota la napa’pake’de’i loko pa’pakissinganna Firaun. Indo kota isanga Pitom anna Raamses. 12Sapo’ tuttuam dipalu-palu bassii, tuttuam membea’ mandi anna kehängäm, lambi’ mahea’ to Mesir lako to Israel. 13Nasuhum tamessai’ tamennonno to Mesir umpepi’ to Israel mengkähä, 14anna nadahha tubo ungkähä pengkähängam kahha’. Napassa ullullu’ litä’ pulu’ natampa batu bata1:14 batu bata: Litä’ pulu’ ditampa ma’sulapa appa’ anna si ditunu yolo mane dipakei umpapia banua batu. sola napopanti’, anna ingganna hupanna kähängam bela’. Silele napana’i to Mesir ungkähä ingganna kähängam.
15Sulibanna ia too, napa’pahentaampi duka’ tomahaja Mesir lako Sifra anna Pua indo to Ibrani si ma’pakeänä’ naua: 16<<Maka’ too umpakeänä’koa’ baine to Ibrani, iya la pahallua’ too umpetua’ manappa ke subummi indo änä’-änä’. Ianaanna muanei änä’na, pateia’! Sapo’ ianaanna bainei pabäim tia tubo. 17Sapo’ aka mengkahea’ längäm Puang Allataala indo to si ma’pakeänä’, iya tä’ napalako situhu’ indo tula’na tomahaja Mesir nasuhum tä’ di napatei indo änä’-änä’ ke muanei to nadadiam to Ibrani.>> 18Iya natambaim tomahaja indo to dua anna nakutanai naua: <<Akanna ma’pateengkoa’? Akanna tä’ dia’ si umpatei ke muanei?>> 19Natimba’im indo to si ma’pakeänä’ naua: <<Aka inde ia baine to Ibrani, tä’ susi baine to Mesir. Sangngim si matoho ia. Tä’pi tau sule lako anna subummi änä’na.>> 20Lambi’ nakamasei Puang Allataala indo to si ma’pakeänä’, anna tuttuam kehängäm bilanganna to Israel anna tuttuam matoho. 21Anna solanapi buana pengkahea’na längäm Puang Allataala indo to si ma’pakeänä’, lambi’ napatamapi duka’ pandaposanna. 22Iya umpalaom pahenta tomahaja Firaun lako pakketauanna naua: <<Ingganna änä’-änä’ mane subunna to Ibrani ke muanei, pa’tumbusannia’ tama Salu Nil; sapo’ maka’ baine pabäim tia tubo.>>
2Kadadianna Musa
1Wattu eta too, deem mesa muane pessubunna Lewi siala mesa baine pessubunna siam duka’ Lewi. 2Iya kebättäm indo bainena lambi’ undadiam mesa änä’ muane-ane. Tappana naita tä’ deem pada samapia dadi indo änä’-änä’, iya nabunim tallu bulanna. 3Sapo’ tappana tä’um mala la nabuni liu, iya mualam bingka’ papirus2:3 papirus: Sahhupa humpu’ si tubo dio bihinna Salu Nil si ma’lampa-lampa bätäna sapo’ pihi’, anna deem si dua mete’ malangka’na. Mala si diapa’-apa’ bätäna anna diananni battu haka dipasiampim-ampim, lambi’ mala dipantuli’i anna mala duka’ dipapia bingka’. anna napasapu’i panti’ sola ter, anna nalole’i indo änä’-änä’ illaam. Mane napaokko’i illaam alla’ galanteom dio bihinna Salu Nil. 4Anna mane ke’de’ kakanna baine indo änä’-änä’ napahandam mambela aka amom la dadi lako adinna.
5Iya sulem änä’na Firaun baine, la mendio’ dio Salu Nil, anna mahassanni ia sabua’na baine ma’lao-lao lako bihim salu. Pissananna ham ia naita indo änä’na tomahaja, deem mesa bingka’ papirus illaam alla’ galanteom, iya ussuam mesa sabua’na baine lao naalaam. 6Tappana nabukkai, iya ke änä’-änä’ dia illaam mahassam sumahho. Iya häntäm buana muitai, lambi’ ma’kada naua: <<Mannassam tia indee änä’na to Ibrani.>>
7Iya sule siaham kakanna indo änä’-änä’ anna nauaanni: <<Kutambaiam dakoka mesa baine to Ibrani la umpasusuangko itim änä’-änä’?>>
8Natimba’i indo änä’na Firaun naua: <<Tappa’! Lao si’da hako tambaiannä’.>> Iya le’ba’ siaham indo kakanna untambai indona indo änä’-änä’. 9Sulei, iya ma’kadam indo änä’na Firaun lako naua: <<Babai inde änä’-änä’ anna umpasusuannä’ angku sahoihangko.>> Iya naalam duka’ indo änä’-änä’ anna si napasusuanni. 10Tappana kasalle indo änä’-änä’, iya nababaammi lako indo änä’na Firaun to ussähä’i. Iya nasangaim Musa,2:10 Musa: Saidi’ tasusi mesa kada illaam basa Ibrani, kalembasanna <<dihuntu’ illaam mai>>. aka naua: <<Aka kuala dio mai uwai.>>
Musa muäläi kalena lako Midian
11Pissam wattu tappana kasalle Musa, iya le’ba’um umpellambi’i solana to Ibrani, iya naitam pi’di’na mengkähä dipepi’. Pissananna, muitam mesa to Mesir umpongko mesa to Ibrani, sato-Ibraninna Musa. 12Iya umpalelem matanna lao pali’, naitai tä’ deem tau umpaalai mata, iya umpateim indo to Mesir, mane natambunnii bungim bakkena.
13Tappana masiä pole, le’ba’ oom Musa, iya ullambi’um dua tau bassim to Ibrani mahassam sitappai lima. Iya nakutanaim Musa indo to sala naua: <<Akanna untappai limako solamu?>> 14Iya natimba’im naua: <<Menna muäkä’ko mentopebaba anna uhhotto’kam? Umpattuju haka too la umpateiä’ duka’ susi indo umpateiko to Mesir isamai’?>> Iya mahea’um Musa aka naua inabanna: <<Mannassa kaissangammi indo pa’pogausangku.>> 15Tappana naissam Firaun kadadiam ia too, iya napeäm lalanna la umpatei Musa.
Sapo’ tappa le’ba’ Musa muäläi kalena umpellei Firaun anna tihubä’ dio lembäna Midian. Iya muokko’um dio ampe’ bujum. 16Dio lembäna Midian deem mesa sando isanga Yitro pitu baine änä’na. Wattu eta too sulei indo änä’na Yitro la tumimba la napangngissiam pahabam olo’-olo’na napaihusam bekena sola dombana ambena. 17Sapo’ sule to ma’kambi’ ussua lao indo baine. Iya mengke’de’um Musa napamoloi anna napaihusam bekena sola dombana. 18Tappana ma’pasulei lako Rehuel,2:18 Rehuel: Sanga senga’na Yitro. ambena, iya mekutanam Rehuel naua: <<Akanna bale’ sule opakoa’ temo?>> 19Sikanatimba’im naua: <<Deem mesa to Mesir umpamoloikam lambi’ tä’kam naganggu indo to ma’kambi’, anna tä’ angga ia too, sapo’ natimbaampakam buda uwai anna napaihusangkia’ beketa sola dombata.>> 20Iya nauam ambena: <<Umbam indo tau? Akanna umpellei bäbäia’? Laokoa’ tambai anna umbeenni kinande.>>
21Sulei, sipa’tula’um, iya ahu’ Musa la tohho dio banuanna Yitro. Iya nabeemmi Yitro änä’na isanga Zipora napobaine Musa. 22Pissananna, keänä’um indo baine undadiam mesa änä’ muane-ane, iya nasangaim Musa Gersom,2:22 Gersom: Saidi’ tasusi moninna kada illaam basa Ibrani kalembasanna <<to messihuhu>>. aka naua: <<Mendadimä’ to messihuhu dio tondä’na tau.>>
Nahingngiam Puang Allataala pengkaloa’na to Israel
23Tappana masäe lessu’na ia too, iya matem tomahaja Mesir. Sapo’ tontä liupi sikaloa’ to Israel aka dipepi’ mengkähä, anna sikatamba mengkaala, lambi’ mengkaala längäm oloNa Puang Allataala napelau la nalappasam dio mai kasabuasanna. 24Nahingngiam Puang Allataala pengkaloa’na, anna napaalai penaba pa’dandianNa lako Abraham, Ishak anna Yakub. 25Lambi’ unnenne’i to Israel Puang Allataala sola mata pa’kamaseNa, anna napaalai penaba pi’di’na.
3Api ma’nala-nala illaam satoo’ kaju-kaju
1Pissam wattu, lao Musa ungkambisam bekena sola dombana Yitro pasananna, sando dio Midian. Nahamba lako tandai lakona pädä kukku’, tinanda lako taneteNa Puang Allataala, si diuaam Tanete Horeb.3:1 Tanete Horeb: Sanga senga’na Tanete Sinai.2Iya umpa’patandaammi kalena Malaika’Na DEBATA3:2 DEBATA: Maka’ dituli’ sangngim huruf kasalle, iya illaam basa Ibrani dituli’ YHWH, sanganNa Puang Allataala. lako Musa illaam api ma’nala-nala illaam satoo’ kaju-kaju. Naita Musa ma’nala-nala api illaam alla’na indo satoo’ kaju-kaju, sapo’ tä’ ohi mampu’ indo kaju-kaju. 3Iya napikki’-pikki’um Musa naua: <<La lao hia dikahuku’ anna dipengkalesoi inde kadadiam memängä-mängä. Maaka hia umbai’ anna tä’i mampu’ inde dio kaju-kaju?>> 4Tappana naita DEBATA sule Musa napengkahuku’i la napengkalesoi, iya ma’kadam illaam mai indo satoo’ kaju-kaju naua: <<Musa, o Musa!>> Natimba’i Musa naua: <<Io, indeä’!>> 5Iya ma’battakadam Puang Allataala naua: <<Daa ummahuku’ mai! Tässu’i sapatummu illaam mai bitti’mu, aka itim litä’ muongei ke’de’, litä’ maseho.>> 6Mane ma’battakada polei naua: <<Kaom too inde Puang Allataala to napenombai ambemu, to napenombai Abraham, Ishak anna Yakub.>> Iya ussampummi lindona Musa, aka mahea’ la unnenne’i Puang Allataala. 7Iya ma’kadam DEBATA naua: <<Kuita si’dam pi’di’na umma’Ku dio lembänä Mesir, anna puham kuhingngi pengkaloa’na napobua’ pampepi’na to Mesir. Kuissam asammi pi’di’na. 8Iam too anna tuhummä’ la kulappasam dio mai pala’ limanna to Mesir anna kupatettei messubum illaam mai lembä ia too, la kupatinanda lako mesa botto mapia anna malobä, botto naongei bosa’ bumbungam makko anna bontä’ duho,3:8 duho: Indo nauaam duho illaam inde balajam tä’ makaleso, battu duho wani hi nauaam battu bua kurma (sahhupa tanangam dio Israel) dipapia susi uwai golla mapulu’. bottona to Kanaan, to Het, to Amori, to Feris, to Hewi, anna to Yebus. 9Kuhingngim pengkaalaanna to Israel, anna kuitam pampi’di’na to Mesir. 10Dadi tentomai, pengkalaongko! Kupake’de’ko la umpellambi’i Firaun, anna mala umpatetteko umma’Ku to Israel messubum illaam mai lembäna Mesir.>> 11Sapo’ ma’kada Musa lako Puang Allataala naua: <<Aka pungngaka hä’ kao, nasuhum kao la lao sitingngajo Firaun anna la umpatette to Israel messubum illaam mai lembäna Mesir?>> 12Iya natimba’im Puang Allataala naua: <<Ma’kaleä’ la muolaangko. Indem ia la mendadi tanda lako kalemu, diua Kao ma’kale umpake’de’ko: Maka’ too puhangko umpatette to Israel messubum illaam mai lembäna Mesir, iya la menombako lako Puang Allataala eta inde tanete.>> 13Natimba’i Musa naua: <<Sapo’ maka’ laoä’ kupellambi’i to Israel anna kuuaanni Puang Allataala to napenombai nene to umponene umpake’de’ä’ umpellambi’ikoa’, anna nakutanaiä’ naua: <Aka menna isanga Puang Allataala?> Iya aka isanga la kutimba’iam?>> 14Iya ma’battakadam Puang Allataala naua: <<KAOM too indo diuaam INNA DEEM.>> Mane ma’battakada pole oi naua: <<Indem ia la muuaam to Israel: <KAO to INNA DEEM, puha umpake’de’ä’ umpellambi’ikoa’.> >>
15Mane ma’battakada polei naua: <<Susi inde la muuaam to Israel: DEBATA, Puang Allataala to napenombai Abraham, Ishak anna Yakub nene to umponene, puha umpake’de’ä’ umpellambi’ikoa’. Iam too sangangKu sule lako salako-lakona, anna sanga iam too la si napake hupatau ussa’bu’ä’ ma’tintingam lako ingganna lapi’ pessubunna. 16Laongko anna uhhempunni ingganna matua ulunna to Israel anna muuaanni: DEBATA, Puang Allataala to napenombai Abraham, Ishak anna Yakub nene to umponene puha umpa’patandaam kalena lako kaleku, anna ma’battakada naua: <Kupaalai si’da-si’dangkoa’ penabangku, anna kuitam indo dipogausangkoa’ dio Mesir. 17Anna kuua: La kutässu’ikoa’ illaam mai kamasussaammu dio Mesir, anna kupatinandakoa’ lako bottona to Kanaan, to Het, to Amori, to Feris, to Hewi anna to Yebus, botto naongei bosa’ bumbungam makko anna bontä’ duho. 18La napehingngii tula’mu. Anna mane le’ba’koa’ sola matua ulunna to Israel umpellambi’i tomahaja Mesir anna muuaanni: puhangkam napellambi’i DEBATA, Puang Allataala to napenombai to Ibrani. Dadi, pabäikam le’ba’ lako pädä kukku’ tallu allona dilaoi mambelanna la umpehumalasam tunuam lako DEBATA, Puang Allataala to kipenombai. 19Sapo’ puha kuissam kuua, inna tä’ siakoa’ la napabäi ke tä’i napassa katea’ bassi. 20Iam too anna la kuäjäsammi katea’ bassingKu anna kusämbä’i to Mesir kupakendesam tanda memängä-mängä la dadi illaam alla’-alla’na. Puhapi too pole’ mane napabäikoa’ le’ba’. 21La kupakendesam penaba mapia illaam kalena to Mesir, lambi’ maka’ la le’ba’ungkoa’, iya tä’koa’ la le’ba’ ma’pala’ lo’bä. 22Ingganna baine to Israel la napelau lako to Mesir sambanuanna, anna lako baine to Mesir to tohho illaam banuanna solana to Mesir baham-baham keangga’ susinna peha’ sola bulabam anna poheba la umpapakeianna’ änä’mu muane sola baine. La susim too lalanna umpekulleikoa’ to Mesir.> >>
4Tanda memängä-mängä
1Iya natimba’im Musa naua: <<La maaka susi ke tää’ nakatappa’i anna tä’ napehingngii pa’tula’ku, sapo’ naua hi: <Tä’ko deem napellambi’i DEBATA!> >> 2Iya ma’kadam DEBATA naua: <<Aka itim dio limammu o?>> Natimba’i Musa naua: <<Tekkem.>> 3Ma’kada pole oom DEBATA naua: <<Pentibeanni dokko litä’!>> Tappana napentibeam dokko litä’, iya mendadi ula’um indo tekkem, lambi’ nakandi’i sehe lao Musa nakambela. 4Iya ma’kadam DEBATA naua: <<Kandoi anna muanda’i engko’na!>> Iya nakandoim duka’ Musa anna naanda’i engko’na, iya dadi tekkem sule dio limanna. 5Iya nauam DEBATA: <<La umpateemmi too anna mala nakatappa’i naua DEBATA, Puang Allataala to napenombai Abraham, Ishak anna Yakub nene to naponene puha umpa’patandaam kaleNa lako kalemu.>> 6Mane ma’kada polei naua: <<Pessususanni limammu tama bajummu!>> Iya napessususammi duka’. Tappana natässu’i sule illaam mai, iya naponnoi gisingam busa limanna. 7Iya ma’kada pole oom naua: <<Pessususanni sule limammu tama bajummu!>> Iya napessususam oom duka’. Tappana natässu’i sule illaam mai, iya bono’ sule susi lollo’ senga’na. 8Iya nauam DEBATA: <<Maka’ tä’ko nakatappa’i anna tä’ naposamele indo tanda memängä-mängä uhuna, iya la nakatappa’i inde tanda memängä-mängä kaduanna. 9Sapo’ maka’ tä’ liupi nakatappa’i indo dua hupa tanda memängä-mängä, anna tä’ napehingngii tula’mu, iya alai uwai dio mai Salu Nil anna untolloanni yabo galantangam, iya la mengkubalimmi too mendadi haha.>>
10Sapo’ mentimba’ Musa lako DEBATA naua: <<O Debata, kao inde to tabiasaä’ ma’tula’, mengkalao dio mai sule lako temo. Napahandu’napi ma’battakadaKo lako kaleku anna inna kuuam to tabiasaä’ ma’tula’, aka kao inde to banda’ pudu’ä’ anna tä’ hangga lila.>> 11Iya ma’battakadam DEBATA naua: <<Menna hia umpapia pudu’na hupatau? Menna hia umpamaho hupatau battu haka napabinga? Menna hia umpopaita battu haka umpabuta hupatau? Taia haka tia Kao, to disa’bu’ DEBATA? 12Dadi tentomai, pengkalaongko! Kao hi tia la umpopa’tula’ko, anna Kao hi tia la umpatuduko indo pahallunna la umpokada.>> 13Sapo’ natimba’i Musa naua: <<O Debata, suai tau senga’, to la sihatam ussua.>>
14Iya hede-hedem aha’Na DEBATA lako Musa naua: <<Kusanga deem kakammu, Harun, to messubum di Lewi duka’? Puha kuissam kuua to manähä ma’tula’, anna muolam lalam la napellambi’iko. Naitammu too sundedem buana. 15Pahallukoa’ la sipa’tula’ anna umpaissannii indo la pahallunna natula’. Kao la bassim umpamoloikoa’ ma’tula’, anna Kao siam la umpatudukoa’ indo la umpogau’na. 16Ia la pahallu umpalanda’ tula’ lako to Israel nabala’ko. Ia la ullombum pudu’mu, anna iko la sihhapangko Puang Allataala untulasanni indo la pahallunna napokada. 17Tetäi inde tekkem, aka tekkem iam too inde la umpake umpadadi tanda memängä-mängä.>>
Musa ma’pasule lako Mesir
18Puhai ia too, ma’pasulem Musa umpellambi’i Yitro, pasananna anna nauaanni: <<Umpabäi haka laoä’ lako Mesir umpessitai solasubungku battu tuboipi ia.>> Iya natimba’im Yitro naua: <<Io, laoko, pengnganda’ dangko.>> 19Yolona anna la umpellei lembäna Midian Musa, inna ma’battakadam DEBATA naua: <<Pa’pasuleko lako Mesir, aka ingganna to la umpemäläi sungnga’mu puhaim mate.>> 20Iya umpopessäkem bainena sola änä’na Musa längäm keledai, anna le’ba’i lako Mesir. Anna nababa duka’ indo tekkem to nauaam Puang Allataala tetäi.
21Mane ma’kadai DEBATA lako Musa naua: <<Maka’ too landa’ungkoa’ lako Mesir, pengkilalai manappai le, ingganna indo tanda memängä-mängä to puha kupadokkoangko lisu pala’mu. Pogau’ asanni ia too dio olona Firaun. Sapo’ la kupomakahha’ penabanna, lambi’ tä’ la umpabäi to Israel le’ba’. 22Palambisanni lako Firaun muua: <Susi inde battakadanNa DEBATA: Inde to Israel änä’ uluaKu, änä’ uluaKu muane. 23Ma’battakadaä’ matim kuua: <<Pabäi messubum inde änä’Ku, anna mala menomba dio oloKu.>> Sapo’ maka’ tä’ umpabäi messubum, iya la kupatei änä’mu, änä’ uluamu muane.> >> 24Muolai lalam, dio mesa ongeam si diongei mellube ma’bengi, iya umpellambi’im Musa DEBATA, anna napattujui la napatei. 25Sapo’ muala tiba’ batu4:25 tiba’ batu: Wattu eta too batu pataham si dipake dipotiba’. Zipora, mane ussunna’i änä’na anna mane naala indo passunnasanna anna napaissoi bitti’na Musa napasindum ma’kada naua: <<Setonganna, haha nasuhum malapaki’ silumbangam.>> 26Lambi’ tä’ danum napatei DEBATA, Musa. Ma’tula’ Zipora diona <<kasilumbangam>> aka indo sunna’ puha napalako.
27Wattu eta siam too duka’ anna ma’kadai DEBATA lako Harun naua: <<Laoko pellambi’i Musa lako pädä kukku’.>> Iya le’ba’um duka’ Harun. Silambi’na Musa yabo taneteNa Puang Allataala, iya naudummi. 28Anna mane natulasam asam lako Harun ingganna battakadanNa DEBATA indo to nasuaam la napalandasam, anna ingganna indo tanda memängä-mängä to la pahallu napogau’ umba susi indo to napahentaam. 29Puhai ia too, iya le’ba’um Musa sola Harun lako Mesir anna uhhempunni ingganna matua ulunna to Israel. 30Anna mane napalanda’ Harun lako to Israel ingganna indo battakadanNa DEBATA lako Musa, anna umpadadi tanda memängä-mängä dio olona to Israel. 31Lambi’ sangngim matappa’ to Israel, anna tappana nahingngi naua napaalaim penaba DEBATA anna naitam pi’di’na, iya sileleim ma’balinguntu’ anna menomba.
5Musa mengngolo lako Firaun
1Puhai ia too, iya le’ba’um Musa sola Harun mengngolo lako Firaun anna nauaanni: <<Susi inde battakadanNa DEBATA, Puang Allataala to napenombai to Israel: <Pabäi umma’Ku le’ba’ lako pädä kukku’ ma’hame-hame napa’kasalleiä’.> >> 2Sapo’ natimba’im Firaun naua: <<Mennaka tia itim diuaam DEBATA anna la kupehingngii lelenni battakadanNa, anna la kupabäi to Israel le’ba’? Tä’ kuissam itim diuaam DEBATA, anna tä’ toi la kupabäi to Israel le’ba’.>>
3Iya natimba’im indo to dua naua: <<Puang Allataala to napenombai to Ibrani puhakam napellambi’i. Pabäikam le’ba’ lako pädä kukku’ la tallu allona dilaoi mambelanna, anna umpehumalasangkam tunuam längäm DEBATA, Puang Allataala to kipenombai, indana napaba’diikam saki kahha’ paleleam battu haka nadidikam mataham.>> 4Sapo’ natimba’i tomahaja Mesir naua: <<O Musa solakoa’ Harun, akanna la muempa-empakoa’ itim matim hupatau mahassam mengkähä? Laokoa’ duka’ pengkähä!>> 5Anna mane naua: <<Petua’ siaia’ too, tä’um deem pada sabuda sabottomua’ illaam inde pa’lembängam. Akanna la ullabaikoa’ to disabua’i ungkähä kähänganna?>> 6Allo eta siam too duka’ anna umpassubunni pahenta Firaun lako to Mesir to dipatadongkom la mampahe’ anna lako to Israel to dipomando’ naua: 7<<Tä’unna’ deem la umpatokaam dalame to Israel susi biasa, la napake umpapia batu bata; ma’kale ham ia duka’ umpadeenni. 8Sapo’ la pada liu siam batu bata napapia susi biasa, tä’ deem la kuhäm. Sangngim to busungam. Iam too anna sikamelaum naua: <Pabäikam lao umpehumalasam tunuam längäm Puang Allataala to kipenombai.> 9Inde mai tau tuttuam la dipomabanda’ kähänganna, anna mala angga ham kähängam nauttu-uttui, tä’um umpehingngii tula’ tatappa’.>> 10Iya mengke’de’im indo ingganna to mampahe’ sola ingganna mando’ anna ma’kadai lako to Israel naua: <<Susi inde pahentana Firaun: <Tä’ungkoa’ deem la dipatokaam dalame. 11Pa’kalekoa’ lao peäi, ia mammoa’ iko duka’ anna ia umpangngalai. Sapo’ anggam ia, tä’ deem la kuhäm moi podo la sai’di’um batu bata umpapiaa’.> >>
12Iya le’ba’im ma’dälä’ to Israel ussambai lembäna Mesir uhhempum too’ gandum napodalame. 13Napanapi’ polepi indo to mampahe’ naua: <<La umpapiaa’ batu bata allo-allo, pada budanna indo si umpapiaa’ puha lessu’na, wattunna anna si dipatokaampokoa’ dalame.>> 14Puhai, iya dipongkoim indo to Israel to diäkä’ mendadi mando’, napongkoi indo to Mesir to dipatadongkom la mampahe’, napasindum mekutana naua: <<Akanna tä’um pada budanna indo lessu’ batu bata napapia to Israel inde temo?>>
15Iya le’ba’im indo mando’ to Israel mengngolo lako Firaun mengkahumase naua: <<Akanna umpateem dakam kami’ tuam? 16Tä’ungkam dipatokaam dalame, sapo’ moinna anna susi diuaam dakam, la pada sianna’ batu bata umpapia. Kela muitaka iko tuam, dipongkoikam moi kela daa indo hi to mampahe’mu sala.>>
17Sapo’ natimba’i Firaun naua: <<Busungangkoa’, busungam lambe’koa’! Iam too anna umpelaunna’ muua: <Pabäikam lao umpehumalasam tunuam lako DEBATA.> 18Dadi temo, le’ba’koa’ sule pengkähä! Tä’ungkoa’ deem la dipatokaam dalame, sapo’ la pada liu siam budanna batu bata umpadeenna’.>> 19Mane balingangaam di pole’ indo mando’ to Israel naua: <<Nahimpi’kam sussa naepe’ tanggana-gana,>> aka diuaam: <<Tä’ mala la ungkuhännia’ budanna batu bata umpadeem allo-allo.>> 20Tappana messubum umpellei Firaun, iya sitammum Musa sola Harun mahassam ke’de’ naampai. 21Iya ma’kadam indo mando’ lako indo to dua naua: <<La naita hakoa’ too DEBATA le, inde pa’pogau’mua’, anna la napassalakoa’. Aka umbosiikoa’ sangangki dio olona Firaun anna dio olona to mengkähäna. Sihhapam umpatetäia’ pa’dam anna mala napateikam.>>
22Iya le’ba’um Musa mengngolo lako DEBATA naua: <<O Debata, akanna umpalambi’i pi’di’ tanggana-gana umma’Mu? Akanna kao hi kao ussua? 23Aka pahandu’napi mengngoloä’ lako Firaun ullombungam pudu’Mu, iya napahandu’ toom duka’ ma’gau’ kadake lako umma’Mu. Anna tä’ punalaKo deem la ullangnga’i umma’Mu.>> 24Iya ma’battakadam DEBATA lako Musa naua: <<Tentomai, la muitam too indo la kupogau’ lako Firaun. Aka katea’ bassi la umpassai lambi’ la umpabäi umma’Ku le’ba’. Abana katea’ bassi la umpassai, lambi’ la ussua lao umma’Ku messubum illaam mai botto litä’na.>>
6Musa nasua DEBATA
1Mane ma’battakada polei Puang Allataala lako Musa naua: <<Kaom too inde DEBATA. 2Kao to disangai Puang Allataala To Handam Kuasa, puhaMä’ umpa’patandaam kaleKu lako Abraham, Ishak anna Yakub, sapo’ diona ia DEBATA6:2 DEBATA: Maka’ dituli’ sangngim huruf kasalle, iya illaam basa Ibrani dituli’ YHWH, sanganNa Puang Allataala. tungka sangangKu, tä’pi ia deem kupaissanni. 3Puhamä’ duka’ ma’dandi lako la kubeem lembäna Kanaan, indo to naongei messihuhu eta too. 4Kuhingngiammi duka’ pengkaloa’na to Israel nasabua’i to Mesir, lambi’ kupaalai penaba pa’dandiangKu.>> 5Dadi, palandasanni lako to Israel muua: <<Kaom too inde DEBATA. La kulangnga’ikoa’ dio mai pengkähängam to napapassaikoa’ to Mesir. La kulappasangkoa’ dio mai passabua’inna, anna la kusolongkoa’ umpake katea’ bassingKu, anna la kupahuai pa’tahungkungam mabanda’. 6La kupadadikoa’ umma’ petauangKu, anna Kao la mendadi Puang Allataala to umpenombai, anna mala muissanna’ muua: <Iko si’da hia DEBATA, Puang Allataala to kipenombai, to ullappasangkam dio mai pengkähängam to napapassaiangkam to Mesir.> 7La kupatettekoa’ lako botto to puha kudandi lako Abraham, Ishak anna Yakub. La kupadokkoangkoa’ lisu pala’mu umpomana’. Kaom too inde DEBATA.>>
8Iya napalandasammi Musa lako to Israel indo battakadanNa DEBATA, sapo’ sangngim tä’ di umpehingngii Musa, aka silelei kattu hannu anna tuttuam mabanda’ passabua’inna to Mesir. 9Iya ma’battakadam DEBATA lako Musa naua: 10<<Le’ba’ko pellambi’i Firaun, tomahaja Mesir, uaanni tä’ mala tala umpabäi to Israel messubum illaam mai bottona.>> 11Sapo’ natimba’i Musa naua: <<To Israel sia duka’ anna tää’ napehingngii, iya senga’um tia Firaun. La maakam ia susi la napehingngiiä’ aka kao inde to tatibuloloä’ ma’tula’?>>
12Susim too DEBATA ma’battakada lako Musa sola Harun, anna nasua lao umpellambi’i to Israel sola Firaun, tomahaja Mesir napalandasam naua: <<Kami’ napake’de’ Debata la umpasola to Israel messubum illaam mai lembäna Mesir.>>
Kalohonganna Musa sola Harun
13Indem ia tallu too’ naongei mentäke to Israel indo sapulo dua pehapuam kasalle:
Ruben änä’ uluana Israel undadiam:
Henokh, Palu, Hezron anna Karmi. Iam too pentäkena Ruben.
14Indem ia pessubunna Simeon:
Yemuel, Yamin, Ohad, Yakhin, Zohar anna Saul. Saul ia nasibalii baine to Kanaan. Iam too pentäkena Simeon.
15Indem ia pessubunna Lewi situhu’ täkena si mesa-mesa:
Gerson, Kehat anna Merari. Sahatu’ tallu pulo pitu taunna tubo, Lewi.
16Gerson undadiam:
Libni sola Simei, situhu’ pentäkena ia duka’.
17Kehat undadiam:
Amram, Yizhar, Hebron anna Uziel. Sahatu’ tallu pulo tallu taunna tubo, Kehat.
18Merari undadiam:
Mahli sola Musi. Iam too inde pentäkena Lewi dihuntum kaka.
19Amram siala Yokhebed, solasubunna ambena, iya undadiammi Harun sola Musa.
Sahatu’ tallu pulo pitu taunna tubo, Amram.
20Yizhar undadiam:
Korah, Nefeg, anna Zikhri.
21Uziel undadiam:
Misael, Elsafan anna Sitri.
22Harun siala Eliseba, änä’na Aminadab, änä’ dahanna Nahason, iya undadiammi:
Nadab, Abihu, Eleazar anna Itamar.
23Korah undadiam:
Asir, Elkana anna Abiasaf. Iam too inde pentäkena Korah.
24Eleazar änä’na Harun, umpobaine mesa änä’na Putiel, iya undadiammi Pinehas.
Iam too too’ pentäkeanna kasahapuam to messubum di Lewi situhu’ pessubunna simesa-mesa.
25Harun-mi too sola Musa to untahima pahentaNa DEBATA naua: <<Patettei to Israel messubum illaam mai lembäna Mesir tungga’ ma’babangam situhu’ pehapuam kasallena simesa-mesa.>> 26Duai lao mengngolo lako Firaun, tomahaja Mesir, napelau anna mala napabäi umpatette to Israel messubum illaam mai lembäna Mesir. Musa iam too inde sola Harun ia indo ditula’ illaam kalohongam.
Musa mengngolo lako Firaun
27Wattunna ma’battakada DEBATA lako Musa dio lembäna Mesir, 28susi inde battakadanNa: <<Kaom too inde DEBATA. Palandasanni lako Firaun, tomahaja Mesir, ingganna indo puha kupokadaangko.>> 29Sapo’ natimba’i Musa lako DEBATA naua: <<Kao inde to tatibuloloä’ ma’tula’. La maakam ia susi la mala napehingngiiä’ Firaun?>>
71Iya ma’kadam DEBATA lako Musa naua: <<Pehingngii siai too, la kupadadiko sihhapam Puang Allataala sitingngajo Firaun, anna kakammu ia Harun, la sihhapam ia nabimmu. 2Tä’ mala talaumpalanda’ asam pada indo kupahentaangko, anna kakammu ia Harun, tä’ mala talanapalanda’ lako Firaun, anna mala umpabäi to Israel messubum illaam mai botto litä’na. 3Sapo’ la kupomakahha’ penabanna Firaun, anna la budapi tanda sola tanda memängä-mängä kupadadi dio lembäna Mesir. 4Moinna anna susi, tä’ siangko la napehingngii Firaun. Nasuhum la kupaepe’i katea’ bassingKu to Mesir kupalambi’i ma’hupa-hupa pi’di’ tanggana-gana, anna kutässu’i umma’Ku, to Israel, illaam mai lembäna Mesir. 5Lambi’ la naissam pole’ to Mesir naua: <Ia si’da hia DEBATA>, ke kupessambangammi katea’ bassingKu lako to Mesir anna kupatettei to Israel messubum illaam mai botto litä’na to Mesir.>> 6Iya napogau’um Musa sola Harun ingganna ia too. Umba susi napahentaam DEBATA, susim too napogau’ Musa sola Harun. 7Kahua pulom taunna Musa anna kahua pulom ia tallu taunna Harun, wattunna anna napalanda’i kada ia too lako Firaun.
8Puhai ia too, ma’kada oom DEBATA lako Musa sola Harun naua: 9<<Maka’ nauaangko Firaun: <Paitaipä’ mesa tanda memängä-mängä?> Iya la pahallu muuaam Harun: <Alai tekkemmu anna umpentibeanni dio olona Firaun, iya la mengkubalimmi too indo tekkem mendadi ula’.> >> 10Iya le’ba’um Musa sola Harun umpellambi’i Firaun, anna napalakoi umba susi indo napahentaam DEBATA. Umpentibeam tekkenna Harun dio olona Firaun sola ingganna indo to mengkähäna, iya mengkubalimmi indo tekkem mendadi ula’. 11Iya untambaim ingganna to si ma’issam-issam anna to si ma’potika dio Mesir Firaun lambi’ mala duka’ napasusii umpake pa’issanganna. 12Tungga’ umpentibeam tekkenna, iya mengkubalim duka’ mendadi ula’. Sapo ingganna indo tekkenna naamma’ kalebu tekkenna Harun. 13Moinna anna susi, tontä liu siam makahha’ batu penabanna Firaun, lambi’ tä’ umpehingngii Musa sola Harun, umba susi puha napokada DEBATA.
Pesämbä’ uhuna: uwai mendadi haha
14Puhai, ma’kada oom DEBATA lako Musa naua: <<Makahha’ batu penabanna Firaun. Tä’ umpabäi to Israel le’ba’. 15Pebengngi’-bengngi’ko lao tammui Firaun, wattunna biasa si lako Salu Nil. Ampai dio handam Salu Nil, babai indo tekkem to puha mendadi ula’.>> 16Uaanni: <<Nasuaä’ DEBATA, Puang Allataala to napenombai to Ibrani, umpellambi’iko kupalandasam battakadanNa naua: <Patiolai umma’Ku le’ba’, anna mala menomba dio oloKu dio pädä kukku’.> >> Sapo sule lako temo tä’ liu siam umpehingngii. 17Nasuhum susi inde battakadanNa DEBATA: <<Inde la dadi dako’, iam too la umpangngissanni muua: <Ia si’da hia DEBATA.> Petua’i inde tekkem dio limangku, la kupehhabisam dokko Salu Nil anna la mengkubalim uwainna mendadi haha. 18Ingganna bau dio Salu Nil la mate asam, nasuhum la kabubosiam Salu Nil, lambi’ la nakahidi’um to Mesir naihu’ uwainna.>>
19Mane ma’kadai DEBATA lako Musa naua: <<Uaanni Harun: <Alai tekkemmu, anna umpentuhoanni yabona ingganna uwainna to Mesir, susi salu, palempä, limbä anna ingganna uwai tihempum, anna mala mendadi haha asam. Nasuhum la nasamba haha dio lembäna Mesir, sule lako pa’palimbäam uwai susi kaju dipapia anna teem batu.> >> 20Iya napalakom duka’ Musa sola Harun umba susi napahentaam DEBATA. Muäkä’ tekkenna Harun dio olona Firaun sola ingganna to mengkähäna anna napehhabisanni dokko Salu Nil, iya mengkubalim asammi uwai dio Salu Nil mendadi haha. 21Dappo’ ingganna bau dio Salu Nil, lambi’ kabubosiam Salu Nil, nasuhum tä’um mala naihu’ to Mesir uwainna. Nasamba haha dio lembäna Mesir. 22Sapo’ ingganna to si ma’issam-issam dio lembäna Mesir mala napasusii umpake pa’issanganna, nasuhum tontä makahha’ batu penabanna Firaun. Tä’ naaku umpehingngii Musa sola Harun umba susi puha napokada DEBATA. 23Iya memboko’um Firaun, anna le’ba’i lako banua kahajaanna tä’um deem napaalai suhi’ kadadiam ia too. 24Iya silelem umbo’bä’ bujum-bujum to Mesir lako bihinna Salu Nil napangngalai uwai naihu’, aka tä’um mala muihu’ uwainna Salu Nil.
25Pitu allona nahua pesämbä’Na DEBATA Salu Nil.
8Pesämbä’ kaduanna: tongko’ buda
1Mane ma’kadai DEBATA lako Musa naua: <<Laoko pellambi’i Firaun anna muuaanni: <Susi inde battakadanNa DEBATA: Pabäi le’ba’ umma’Ku, anna mala menomba dio oloKu. 2Maka’ tä’ umpabäi le’ba’, iya la kupahuai pesämbä’ paluäna botto litä’mu, kupakende’ tongko’ buda. 3La naponnoi tongko’ Salu Nil. La sikatibe anna le’ba’i tama banua kahajaammu, tama tambimmu, längäm petindoammu, tama banuanna to mengkähämu, anna banuanna pakketauammu, tama pa’dängeam hotimmu anna tama panggahuam hotimmu. 4La sikatibe napa’teka’iko, umpa’teka’i pakketauammu, anna ingganna to mengkähämu.> >>
5Mane ma’kada polei lako Musa naua: <<Uaanni Harun, pentuhoanni tekkemmu yabona ingganna salu, palempä, anna limbä, anna tikängkäi tongko’ buda umponnoi lembäna Mesir.>> 6Iya umpentuhoammi duka’ tekkenna Harun yabona ingganna keuwainna dio Mesir, lambi’ tikängkä tongko’ buda umponnoi lembäna Mesir. 7Sapo’ mala duka’ napasusii pada indo to si ma’issam-issam illaam lembäna Mesir umpake pa’issanganna. Umpakende’ duka’ tongko’ buda dio lembäna Mesir.
8Iya untambaim Musa sola Harun, Firaun anna nauaanni: <<Pa’sambajangko längäm DEBATA, anna mala napatipahhim lao inde mai tongko’ buda dio mai oloku sola olona pakketauangku, iya la kupabäim too pole’ to Israel le’ba’, anna mala umpehumalasam tunuam lako DEBATA.>> 9Iya natimba’im Musa naua: <<Uaam damä’, pihangka la kupa’sambajangangko sola ingganna to mengkähämu anna pakketauammu, anna mala dipatipahhim lao dio mai olomu anna illaam mai banuammu, lambi’ angga ham la dio Salu Nil deem.>> 10Iya nauam Firaun: <<Makale’.>> Iya nauam Musa: <<Iam too la dituhu’i itim tula’mu, anna mala muissam muua: <Tä’ deem la umpapadai DEBATA, Puang Allataala to napenombai.> 11La dipatipahhim lao inde mai tongko’ buda dio mai olomu anna illaam mai banuammu, banuanna to mengkähämu anna banuanna pakketauammu, lambi’ angga ham la dio Salu Nil deem.>>
12Puhai, le’ba’um Musa sola Harun, umpellei Firaun anna melaui längäm DEBATA diona indo tongko’ buda to dipakendesam Firaun. 13Iya nahingngiam DEBATA pelauanna Musa. Dappo’ bete-bete indo tongko’ buda illaam ingganna banua, lako pa’hanteam anna lako bela’. 14Iya nahempummi to Mesir indo tongko’ mate natombo-tombonganni, lambi’ kabubosiam lembäna Mesir. 15Sapo’ tappana hoha’ nasi’dim Firaun, iya umpomakahha’ oom sule penabanna, anna tä’ naaku umpehingngii Musa sola Harun umba susi puha napokada DEBATA.
Pesämbä’ katallunna: kasisi’ londä
16Iya ma’kada oom DEBATA lako Musa naua: <<Uaanni Harun, pessämbäsanni tekkemmu dokko sobä’, iya la mengkubalimmi too indo sobä’ mendadi kasisi’ londä illaam paluäna Mesir.>> 17Iya natuhu’im duka’ indo to dua. Muäkä’ tekkenna Harun anna napehhabisanni dokko sobä’, lambi’ tikängkä kasisi’ londä ullebo hupatau anna olo’-olo’. Ingganna sobä’ mengkubalim mendadi kasisi’ londä dio lembäna Mesir. 18Ingganna to si ma’issam-issam dio Mesir napasusii duka’ umpake pa’issanganna, sapo’ tä’ ia mala. Susim too kasisi’ londä ullebo hupatau sola olo’-olo’. 19Iya ma’kadam indo to si ma’issam-issam lako Firaun naua: <<Indee, kuasanNa Puang Allataala.>> Sapo’ makahha’ mandi penabanna Firaun, anna tä’ naaku umpehingngii Musa sola Harun, umba susi puha napokada DEBATA.
Pesämbä’ kaappa’na: tamboli’
20Iya ma’kadam DEBATA lako Musa naua: <<Pebengngi’-bengngi’ko bangom, ammu lao ampai Firaun, wattunna biasa si lako salu, anna muuaanni: <Susi inde battakadanNa DEBATA: Pabäi le’ba’ umma’Ku, anna mala menomba dio oloKu. 21Aka maka’ tä’ umpabäi le’ba’ umma’Ku, iya la kupakendesangko tamboli’ buda, solakoa’ ingganna to mengkähämu, pakketauammu anna la naponnoi banuammu. Ingganna banuanna to Mesir la naponnoi tamboli’, teem menggalantanganna la naponnoi asam duka’. 22Sapo’ wattu eta too la kupasähä’ ia lembäna Gosyen, tadongkonganna umma’Ku. Tä’ ia la kende’ tamboli’ dio pa’lembängam ia too, anna mala muissam muua Kaom too inde DEBATA, sule illaam inde botto. 23La kuse’la umma’Ku anna pakketauammu. Makale’, la dadi inde tanda-tanda memängä-mängä.> >> 24Iya napalakom DEBATA umba susi puha natula’. Lambi’ sasuleammi tamboli’ buda mentama banua kahajaanna Firaun, sola banuanna to mengkähäna, anna ussamba lembäna Mesir. Tä’ deem pada samasussa pa’lembängam ia too, napobua’ indo tamboli’ buda.
25Iya untambaim Musa sola Harun, Firaun anna nauaanni: <<Laokoa’ umpehumalasam tunuam lako Puang Allataala to umpenombai illaam paluäna inde botto.>> 26Sapo’ natimba’i Musa naua: <<La mala haka tia ma’pogau’ susikam, aka indo tunuam la kipehumalasam lako DEBATA, Puang Allataala to kipenombai, ia too nakabassi to Mesir. Maka’ la kipaita-itai untunu bua pemala’ pangkabassinna, tä’ mammaka la nasileba’-leba’ikam batu? 27Pahallukam la lu lako pädä kukku’ tallu allona dilaoi mambelanna, la umpehumalasam tunuam lako DEBATA, Puang Allataala to kipenombai, umba susi battakadanNa lako kami’.>> 28Iya natimba’im Firaun naua: <<Io, la kupabäikoa’ lako pädä kukku’ lao umpehumalasam tunuammu lako DEBATA, Puang Allataala to umpenombai, anggam ia tä’koa’ la mambela sugali’. Pakala’iä’ kao sambajammua’.>> 29Iya nauam Musa: <<La mengkalao sia hamä’ temo kupelleiko, anna ma’sambajannä’ längäm DEBATA, anna mala makale’i too napatihisim lao dio mai kalemu Firaun, dio mai to mengkähämu, anna dio mai pakketauammu. Anggam ia, tä’ungko la kaägä’-ägä’ liu, tä’ ohi si umpabäi to Israel le’ba’ umpehumalasam tunuam längäm DEBATA.>>
30Puhai, iya le’ba’um Musa umpellei Firaun lao ma’sambajam längäm DEBATA. 31Iya nahingngiam DEBATA pelauanna Musa. Napatipahhim lao indo tamboli’ buda dio mai kalena Firaun, dio mai to mengkähäna anna dio mai pakketauanna. Moim salise’ taladeempi tohho. 32Sapo’ moi temo, tontä liu siam makahha’ batu penabanna Firaun tä’ umpabäi to Israel le’ba’.
9Pesämbä’ kalimanna: hopu olo’-olo’
1Iya ma’kada oom DEBATA lako Musa naua: <<Laoko pellambi’i Firaun anna muuaanni: <Susi inde battakadanNa Puang Allataala, DEBATA to napenombai to Ibrani: Pabäi le’ba’ umma’Ku anna mala menomba dio oloKu. 2Aka maka’ tä’ umpabäi le’ba’ anna untähäm liu, 3iya la sule pesämbä’Na DEBATA uhhopui olo’-olo’mu lako pa’kambisam, susinna daham, keledai, unta, sapim, anna beke sola domba. 4Sapo’ la nase’la DEBATA olo’-olo’na to Israel anna olo’-olo’na to Mesir. Moi ia la mesa tala deenni mate olo’-olo’na to Israel.> >> 5Iya umpa’tantum mesa allo DEBATA naua: <<Makale’na too, kupadadim kaha-kaha ia too illaam inde botto.>> 6Makale’na si’da iko, napadadim DEBATA kaha-kaha ia too, hopu olo’-olo’na to Mesir. Sapo’ olo’-olo’na ia to Israel tä’ deem mate moi podo la mesa. 7Iya ussuam tau Firaun lao umpetua’ olo’-olo’na to Israel, iya tä’ si’da deem mate moi podo la mesam. Sapo’ tontä liu siam makahha’ batu penabanna Firaun, tä’ umpabäi to Israel le’ba’.
Pesämbä’ kaannanna: bundä pe’nana
8Iya ma’kada oom DEBATA lako Musa sola Harun naua: <<Alai sahaku’ täiabu pa’lällängam, anna umpessembusanni längäm lawwa Musa, dio olona Firaun. 9Nasuhum la mendadi sobä’ indo täiabu ussambai lembäna Mesir, anna la umpakende’ bundä pe’nana lako hupatau anna olo’-olo’ illaam paluäna Mesir.>> 10Iya mualam duka’ täiabu indo to dua, anna le’ba’i lako olona Firaun, anna nasembu’i Musa längäm lawwa, iya kende’um bundä pe’nana lako hupatau anna olo’-olo’. 11Ingganna indo to si ma’issam-issam, sangngim tä’um nabela ke’de’ dio olona Musa, napobua’ indo bundä pe’nana, aka ingganna indo to si ma’issam-issam sangngim nahampoi duka’ bundä pe’nana susi tau senga’ dio Mesir. 12Sapo’ napomakahha’ batu DEBATA penabanna Firaun, lambi’ tä’ umpehingngii Musa sola Harun, umba susi puha napokada DEBATA.
Pesämbä’ kapitunna: uham kembua
13Puhai, iya ma’kadam DEBATA lako Musa naua: <<Pebengngi’-bengngi’ko bangom, ammu lao pellambi’i Firaun anna muuaanni, susi inde battakadanNa DEBATA, Puang Allataala to napenombai to Ibrani: <Pabäi le’ba’ umma’Ku, anna menombai dio oloKu. 14Aka tentomai la kupabäim ingganna pesämbä’Ku lu tama kalemu, lako ingganna to mengkähämu anna lako ingganna pakketauammu. Ia anna kupateenni, anna mala muissam muua: <<Tä’ deem la susinna DEBATA illaam lino.>> 15Indo kela kuaku muette’ katea’ bassingKu angku tappai limakoa’ sola ingganna pakketauammu, kupahuai saki mehopui, lambi’ tameatakoa’ illaam lino. 16Sapo’ indem ia kasuhunganna anna kupabäi liupoko tubo: anna mala kupaitaiko kakuasaangKu, anna duka’ mala kaleleam sangangKu illaam inde lino. 17Moinna anna susi, tontä liu hakoa’ salle inaba dio olona umma’Ku, anna tä’ umpabäi le’ba’. 18La muitam too, makale’ katenanna inde, la kupatuhum uham kembua masambam, tä’pi deem dilalam dadi susi illaam lembäna Mesir pempom dio mai sule lako temo. 19Dadi tentomai, suai tau napaseheangko olo’-olo’mu anna ingganna aka-akammu lako pa’kambisam nababa lako ongeam kationganna. Ingganna hupatau anna olo’-olo’ tää’na dipatinanda lako banua, la natalondoi uham kembua lambi’ mate.> >> 20Deem sanaka-naka to mengkähäna Firaun, umpengkahea’i battakadanNa DEBATA, lambi’ umpahhim sabua’na sola olo’-olo’na tama banua. 21Sapo’ to umpa’talingalenda’i battakadanNa DEBATA, umpabäi bäbä ia sabua’na sola olo’-olo’na lako pa’kambisam.
22Iya ma’kadam DEBATA lako Musa naua: <<Äkä’i limammu längäm langi’, anna mala tuhum uham kembua illaam lembäna Mesir, untappai hupatau, olo’-olo’, sola ingganna kaju, humpu’ anna tanangam lako bela’ dio Mesir.>> 23Iya umpentuhoammi tekkenna Musa längäm langi’, lambi’ umpadadi guntu’ DEBATA anna umpatuhum uham kembua, anna mellelo kila’ tama lino. DEBATA umpatuhum uham kembua untalodoi lembäna Mesir. 24Tuhum uham kembua, anna silalle kila’ sihau takka’ indo uham kembua liba’ mepakahea’na. Tä’pi deem dilalam kadadiam susi ia too dio lembäna Mesir, mengkalao dio mai napahandu’na ke’de’ kahajaam Mesir. 25Indo uham kembua umpadahi ambum ingganna-ingganna sia lako bela’ dio lembäna Mesir, susi hupatau, teem olo’-olo’. Indo uham kembua umpasitumbaleam kaju, anna umpadahi ambum humpu’ sola tanangam. 26Angga ham dio paluäna Gosyen tadongkonganna to Israel nasala uham kembua. 27Iya umpopetambaim Musa sola Harun Firaun anna nauaanni: <<Abana madosaä’ inde tentomai. DEBATA hia hua, kami’ si’da hia kasalaam solakam pakketauangku. 28Pa’sambajangko längäm DEBATA, anna napopeanggam inde guntu’ masambam sola uham kembua. La kupabäingkoa’ tia pole’ le’ba’, tä’ungkoa’ la tohho liu inde.>>
29Iya ma’kadam Musa naua: <<Messubungku too illaam mai inde kota, iya muäkä’mä’ limangku umballa’ pala’ku längäm DEBATA, iya la mattammi too guntu’ anna monda uham kembua, anna mala muissam muua inde lino DEBATA puäna. 30Sapo’ puha kuissam kuua iko solakoa’ ingganna to mengkähämu, tä’pia’ sule tama penabammu mengkahea’ längäm, DEBATA, Puang Allataala.>> 31(Rami9:31 rami: Sahhupa tanangam dio Israel mala dipapia bännä anna ditannunni poheba, anna si masäkke dipake. Umbai’ susi lelupä ke indei mai bottota. sola jelai9:31 jelai: Inde jelai sahhupa gandum, sapo’ si masimpam puha ia matäsä’ anna la gandum senga’. Biasa si ma’alla’ dua minggu sule lako sabulam. Inde jelai, biasa si dipandeam olo’-olo’ sapo’ biasa siam duka’ si naande to mase-mase aka masempo puha ia. Anna si kalando puha ia a’dona. sangngim dappo’, aka wattu eta too mahassam kembungam rami, anna kembua jelai. 32Sapo’ gandum ia sola sekoi,9:32 sekoi: Sahhupa duka’ tanangam tillise’. tä’ ia dahi ambum aka tä’pi ia subum.) 33Iya messubummi Musa illaam mai kota umpellei Firaun, mane muäkä’i limanna umballa’ pala’na längäm DEBATA, iya mattam siaham guntu’, monda uham kembua, anna tä’um deem to’do uham tama lino.
34Tappana naita Firaun, tä’um deem to’do uham, mondam uham kembua anna mattammi guntu’, iya umpogau’ pole oham dosa anna umpomakahha’ penabanna, susi siam duka ingganna to mengkähäna. 35Tontä makahha’ batu penabanna Firaun, tä’ umpabäi to Israel le’ba’, umba susi puha napokada DEBATA napalanda’ Musa.
10Pesämbä’ kakahuanna: bati’
1Iya ma’kadam DEBATA lako Musa naua: <<Laoko pellambi’i Firaun, aka puham kupomakahha’ penabanna sola ingganna to mengkähäna, anna mala kupadadi inde tanda memängä-mängäKu illaam alla’-alla’na, 2anna mala toi untulasam lako ingganna pessubummu, maaka susi kupakamaho-maho to Mesir, anna ingganna tanda memängä-mängä kupogau’ illaam alla’-alla’na. Lambi’ ungka’da’ ungkaleso muua Kaom too inde DEBATA.>>
3Iya le’ba’um Musa sola Harun umpellambi’i Firaun anna nauaanni: <<Susi inde battakadanNa DEBATA, Puang Allataala to napenombai to Ibrani: <La pihampi mane muakuia’ umpopengkadio kalemu dio oloKu? Pabäia’ le’ba’ umma’Ku anna mala menomba dio oloKu. 4Aka maka’ tä’ umpabäi le’ba’, iya makale’i too kupasuleammokoa’ bati’ buda illaam bottomu. 5Indo bati’ la umponnoi inde botto, nasuhum tä’um deem la tandaam litä’. Indo bati’ buda la umpakapuha indo tihäntänapi pallelu’na uham kembua, anna la untappu’ipi duka’ ingganna kajummu to tubo lako pädä. 6Anna la umponnoipi banua kahajaammu, banuanna ingganna to mengkähämu, anna banuanna ingganna to Mesir. Kadadiam ia too tä’pi deem nalalam ambemu sola nene to umponene, mengkalao dadinna illaam inde lino sule lako temo.> >> Mane memboko’i Musa le’ba’ umpellei Firaun.
7Iya ma’kadam ingganna to mengkähäna Firaun naua: <<La padapi isanga umba masäena naalaangkia’ saha-saha inde tau? Pabäim duka’ le’ba’i itim matim tau, anna mala lao umpenombai DEBATA, Puang Allataala to napenombai. Tä’ liu paka tiko isanga ussi’dim, tallammi too inde botto?>> 8Iya umpopetambaim sule Musa sola Harun Firaun anna nauaanni: <<Le’ba’ungkoa’ penomba lako oloNa DEBATA, Puang Allataala to umpenombai.>> Napalombunni siam naua: <<Menna isanga piha la lao?>> 9Natimba’i Musa naua: <<La laokam sola mentu’na tomatua anna to mangnguha. La kipasolapi duka’ ingganna änä’ki muane sola baine, bekeki sola dombaki anna ingganna sapingki, aka pahallukam la umpadeem pa’hame-hameam umpa’kasallei DEBATA.>> 10Iya nauam Firaun: <<Maka’ la kupabäikoa’ lao sola ingganna änä’mu, iya iam tia isanga kao umpelauangkoa’ pepatetteNa DEBATA! Muitangka too, tandaammi pattuju kadakemu? 11Tä’ mala susi! Malakoa’ le’ba’, sapo’ la muane mandi lao menomba dio oloNa DEBATA, aka iam too pelauammua’!>> Mane nasuai lao, messubum illaam mai banuanna.
12Iya ma’kada pole oom DEBATA lako Musa naua: <<Äkä’i limammu illaam lembänä Mesir, iya la tibombommi too sule bati’ buda umponnoi lembäna Mesir ungkukkui ingganna kaju, humpu’ anna tanangam tihäntänapi pallelu’na uham kembua.>> 13Iya muäkä’um tekkenna Musa illaam lembäna Mesir, iya napasulem DEBATA illaam lembä ia too hibu’ buttu illaam mai tandai mata allo sangngallo sabengi. Makale’na sia iko mebengngi’, sasuleammi bati’ buda nababa indo hibu’ buttu illaam mai tandai mata allo. 14Indo bati’ buda tikängkä illaam lembäna Mesir, hampo umponnoi ingganna ongeam dio Mesir, tä’ dibela dihekem budanna. Tando lakona eta too, tä’pi deem kende’ bati’ la pada budanna, anna puhanna eta too tä’um deem kende’ pole la susi budanna.
15Indo bati’ buda umponnoi menggalantanganna, nasuhum malotä kaliane napobua’. Ingganna kaju, humpu’ anna tanangam sola ingganna bua kaju tihäntänapi pallelu’na uham kembua, nakukkui indo bati’ buda. Tä’um deem mehä’dä’ ingganna daum malibulunna kaju, humpu’ anna tanangam dio lembäna Mesir.
16Iya untambai siaham Musa sola Harun Firaun anna nauaanni: <<Madosaä’ längäm DEBATA, Puang Allataala to umpenombai, anna madosaä’ lako kalemua’. 17Dadi, kupelau anna muampunniannä’ dosaku moi podo indem temo, anna pa’sambajangko längäm DEBATA, Puang Allataala to umpenombai, anna mala napasikambelaä’ inde to la mepakattu sungnga’.>> 18Iya le’ba’um duka’ Musa umpellei Firaun anna ma’sambajanni längäm DEBATA. 19Iya napaludekke opi DEBATA indo hibu’ ia too mendadi hibu’ buttu illau’ mai katampusam tä’ deem pada samanihhi’, ulliliam indo bati’ buda anna napatipassi lako le’bo’ Teberau. Tä’um deem mehä’dä’ bati’ moi podo la salise’um illaam lembäna Mesir. 20Sapo’ napomakahha’ DEBATA penabanna Firaun, nasuhum tä’ umpabäi le’ba’ to Israel.
Pesämbä’ kakasehanna: malillim pättä
21Mane ma’kadai DEBATA lako Musa naua: <<Pentuhoanni limammu längäm langi’, anna mala sule malillim umputu’ lembäna Mesir, nasuhum sikahama’ hupatau.>> 22Iya umpentuhoammi duka’ limanna Musa längäm langi’, lambi’ malillim pättä salembä Mesir tallungngallo tallu bengi. 23Indo to Mesir tä’um siita-ita, anna tä’um mala tilengka’ dio mai ongeanna tallungngallo tallu bengi, sapo’ tontä ia asi-asiam kaliane dio ongeanna to Israel.
24Iya umpopetambaim Musa Firaun anna nauaanni: <<Laongkoa’ too penomba lako oloNa DEBATA, sapo’ la umpatohhoa’ ia bekemu sola dombamu, anna sapimmu. Angga hia änä’mua’ mala ia le’ba’koa’ sola.>> 25Sapo’ natimba’i Musa naua: <<La umpabäikam umbaba olo’-olo’ki la kitunu biasa piha anna kitunu mampu’ piha, anna mala kipehumalasam längäm oloNa DEBATA, Puang Allataala to kipenombai. 26Ingganna olo’-olo’ki tä’ mala tala kibaba asam, moi mesa tala deenni kipatohho, aka iam too la pahallu kiala sisanaka-naka kipake menomba längäm DEBATA, Puang Allataala to kipenombai. Tä’pi kiissam temo umbanna la sihatam kipake menomba längäm DEBATA, landa’pakam mane kiissanni.>> 27Sapo’ napomakahha’ DEBATA penabanna Firaun, nasuhum tä’ napabäi le’ba. 28Iya ma’kadam Firaun lako Musa naua: <<Päläiko lao! Jagako le, deem pole ai kuita hupammu, aka kuitammu too matengko.>> 29Iya ma’kadam Musa naua: <<Tappa’ tula’mu! Tä’mä’ duka’ deem la muita pole.>>
11Pesämbä’ kasapulona dipa’paissangam
1Iya ma’kadam DEBATA lako Musa naua: <<La kupasuleampi mesa pesämbä’ lako Firaun anna Mesir, puhapi too mane napabäikoa’ le’ba’. Napabäimmua’ too le’ba’, iya abana too nahambai si’dangkoa’ illaam mai inde botto. 2Dadi, uaanni to Israel: ingganna muane la umpelau baham-baham bulabam sola peha’ lako sambanuanna, anna susi siam duka’ ingganna baine lako sambanuanna.>> 3Iya napakendesammi DEBATA penaba mapia illaam kalena to Mesir lako to Israel. Sulibanna ia too, indo Musa mesa duka’ to tä’ deem pada sadipa’kasallei dio lembäna Mesir, susi dio olona to mengkähäna Firaun teem dio olona pakketauanna.
4Iya nauam Musa lako Firaun: <<Susi inde battakadanNa DEBATA: <Manii tängä bengi la kupa’kahuntängä-tängäi lembäna Mesir. 5Lambi’ ingganna änä’ ulua muane illaam paluäna Mesir la mate asam. Mengkalao yabo änä’ uluana Firaun, tomahaja Mesir to untadongkonni okkosam kahajaam, sule dokko änä’ uluana sabua’ baine panggilim gandum. Teem toi duka’ ingganna uhu änä’na olo’-olo’. 6La sikauhhu’ salembä Mesir. Tä’pi deem dilalam kadadiam susi, anna tä’um deem la kende’ pole kadadiam susi ia too. 7Sapo’ dio ia tadongkonganna to Israel, moi ia la mesa asu tala deenni ma’buha. Tala hupatau nabuha tala olo’-olo’, anna mala muissanna’ muua napasise’la DEBATA to Mesir anna to Israel.> >> 8Mane nauai Musa: <<Ingganna to mengkähämu la sule dio oloku menomba napasindum ma’kada naua: <Le’ba’ungkoa’ sola ingganna pakketauam to untuhu’ko.> Puhai too, iya le’ba’mä’.>> Anna mane le’ba’ Musa hede-hede aha’na umpellei Firaun.
9Inna deemmi ma’kada DEBATA lako Musa naua: <<Tä’ko la napehingngii Firaun, anna mala tuttuam buda tanda memängä-mängä kupadadi illaam lembäna Mesir.>> 10Ingganna inde tanda memängä-mängä napadadi Musa sola Harun dio olona Firaun, sapo’ napomakahha’ DEBATA penabanna Firaun, nasuhum tä’ umpabäi to Israel le’ba’ napellei bottona.
12Umpakahoa’ Allo Kalappasam
1Puhai ia too, ma’kadam DEBATA lako Musa sola Harun dio Mesir naua: 2<<Inde bulam temo la mendadi pa’pahandusanna ingganna bulam lako ikoa’ illaam sataum. 3Palanda’i lako kakalebuanna to Israel muua: <Allo kasapulonai too illaam inde bulam, mesa oi dapo’ muala oom mesa änä’ domba la napake sahapui; mesa änä’ domba mesa dapo’. 4Sapo’ maka’ deem mesa dapo’ saidi’ sugali’ ia illaam banua tä’ la napuha mesa änä’ domba, iya la sitappa sambanuanna. Pahallu la naala mesa änä’ domba napasikannai sanaka budanna to la mangngande, anna napasituhu’i la napuhanna simesa-mesa tau naande. 5Indo änä’ domba manggi’ laki, tä’ deem sassainna, anna sataummi dadinna. Maka’ taia domba iya mala duka’ beke. 6Pahallu la ungkambi’ senga’ sule lako allo kasapuloappa’na illaam inde bulam. Anna mane ingganna to Israel pahallu metunu wattu mahammo. 7Pahallu la naala hahana saidi’, anna nasussuianni andihi ba’bana patomali, anna tondom ba’ba banua, to la naongei muande bale domba. 8Indo bale, la dihähä anna tä’ mala tala diande bengi eta siam dipasiande hoti tä’ diboloi bibi’ hoti anna utam mapäi’. 9Tä’ la muande mata battu haka la unnasu, sapo’ la uhhähä kalebu sitonda ulunna, bitti’na, anna issi hoäna. 10Tä’um deem la uhhäntäa’ sule lako mebengngi’. Maka’ too deempi tihäntä sule lako mebengngi’ pahallua’ la untunu mampu’ tama api. 11Iapi mane mangngandekoa’ ke puhangkoa’ membeke’, ma’sandala’ dikabe’, anna sitetä tekkem limammu. Pasihha’ia’ mangngande! Susim too lalanna umpakahoa’ Allo Kalappasam buttu di DEBATA.
12Bengi eta siam too duka’ la kusambai lembänä Mesir, angkupatei asanni ingganna änä’ ulua, susi hupatau teem olo’-olo’. Ingganna to si napa’debatai to Mesir la kupahuai pesämbä’. Kaom too inde DEBATA. 13Indo haha to disussuiam andihi ba’bamu sola tondom ba’ba banuammu la mendadi tanda lako banuammua’. Maka’ too kuitam indo haha, iya kupenggulebanningkoa’ nasuhum tä’koa’ iko la nahua pesämbä’ mepempa’deam, ke kupahuaim pesämbä’ lembäna Mesir. 14Allo iam too, la si muongeia’ umpengkilalai kadadiam ia too. Pahallua’ la si umpakahoa’ mendadi allo pa’pakasalle lako DEBATA, la mendadi pehhondoam ma’tintingam sule lako salako-lakona. 15La si muandekoa’ hoti12:15 hoti: Hotinna tau wattu eta si dipeppä’ malepom anna didänge. tä’ diboloi bibi’ hoti pitu allona. Allo uhuna la untibe asanna’ pebolo umpasumbakka’ hoti illaam mai banuammu, aka menna-menna muande hoti diboloi bibi’ hoti mengkalao allo uhuna sule lako allo kapitunna, tä’ mala tala dihambai ia illaam mai alla’-alla’na to Israel.
16Allo uhuna la si ma’mesakoa’ umpalako kapenombaam, susi siam duka’ allo kapitunna. Allo eta too, tä’ si’da-si’dakoa’ mala ungkähä ingganna hupanna pengkähängam, sulibanna ungkähä kinandena pada issinna banua. 17La si umpakahoa’ liua’ allo kasalle muande hoti tä’ diboloi bibi’ hoti, aka allo etam too anna kutässu’ikoa’ illaam mai lembäna Mesir tungga’ ma’babangam. Iam too anna la si umpakahoa’unna’ allo ia too ma’tintingam lako pessubummu. Iam too inde la mendadi pehhondoam sule lako salako-lakona. 18Allo kasapuloappa’nai too illaam bulam uhuna wattu mahammo, la muandekoa’ hoti tä’ diboloi bibi’ hoti sule lako allo kaduapulona mesa illaam bulam ia too, wattu mahammo. 19Pitu allona tä’ la umpaillaanna’ banuammu pebolo umpasumbakka’ hoti, aka menna-menna muande hoti diboloi bibi’ hoti, tä’ mala tala dihambai illaam mai kakalebuanna to Israel, susi to sule teem pa’botto. 20Ingganna diboloinna bibi’ hoti tä’ mala muande. Andeia’ hoti tä’ diboloi bibi’ hoti illaam ingganna tadongkongammu.> >>
21Puhai ia too, iya untambaim ingganna matua ulunna to Israel Musa anna nauaanni: <<Laokoa’ ala änä’ domba anna untunuia’ sahapummu, mendadi änä’ domba Allo Kalappasam. 22Mane mualako sakappa’ humpu’ hisop,12:22 hisop: Sahhupa humpu’ si napake to Israel umpalako pa’hettengam illaam peadasanna (ussehoi baham-baham battu haka hupatau). Petua’i Sand. 14:4-7; Pah. 19:18. anna uhhammei dokko indo hahana änä’ domba dio kandeam, mane ussussuianni patomali andihi ba’bamu sola tondom ba’bamu. Tä’ deem tau la messubum illaam mai banuanna sule lako mebengngi’. 23Aka wattu eta too la mellao DEBATA ussambai lembäna Mesir napahuai pesämbä’. Maka’ deem haha naita yabo tondom ba’ba anna dio andihi ba’ba patomali, iya la napenggulebanni DEBATA ba’ba ia too anna tä’ la umpabäi indo malaika’ to meäläi tama indo banua la napahuai pesämbä’.
24Pahallua’ la si umpakahoa’a’ mendadi pehhondoam sule lako salako-lakona mengkalao ikoa’ sule lako pessubummu. 25Dadi maka’ landa’ungkoa’ lako indo botto la napadokkoangkoa’ lisu pala’mu DEBATA, umba susi puha napokada, iya tä’ mala tala umpakahoa’ liua’ inde Allo Kalappasam. 26Anna maka’ too nakutanaikoa’ änä’mu naua: <Aka hia gunana inde hettem pa’pakahoasammua’?> 27Iya la untimba’ia’ muua: <Hettem umpengkilalai allo Kalappasam, umpa’kasallei DEBATA. Wattunna DEBATA ussämbä’i to Mesir, umpenggulebanni ia banuanna to Israel dio Mesir, nabala bela’kia’ kita illaam banuanta.> >> Iya silelem ma’balinguntu’ indo matua ulunna to Israel napasindum menomba. 28Puhai ia too, iya le’ba’im to Israel umpalako indo pampahe’na Musa sola Harun, umba susi napahentaam DEBATA.
Pesämbä’ kasapulona: mate änä’ ulua
29Tappana tängä bengi, iya napateim DEBATA ingganna änä’ ulua dio lembäna Mesir, mengkalao änä’ uluana Firaun, tomahaja Mesir to untadongkonni okkosam kahajaam, sule dokko änä’ uluana to ditahungkum dio pa’tahungkungam dibumbum dio litä’, anna teem toi duka’ ingganna uhu änä’na olo’-olo’. 30Iya mellimbangommi Firaun bengi eta too sola ingganna to mengkähäna, anna mentu’na to Mesir. Iya dihingngim to sikauhhu’ dio Mesir, aka tä’ deem banua la nasala kamateam.
31Iya umpopetambai bengi eta siam Musa sola Harun Firaun, anna nauaanni: <<Pa’kalili’koa’, ammu pessubunna’ illaam mai alla’-alla’na pakketauangku, mengkalao iko sule lako ingganna to Israel. Le’ba’koa’ penomba lako DEBATA, umba susi pelauammu. 32Baba asannia’ duka’ bekemu, dombamu, anna sapimmu umba susi pelauammu, ammu le’ba’a’! Anna pelauannä’ kao duka’ tamba’.>> 33Ingganna duka’ to Mesir ussasungam to Israel anna napasihha’i le’ba’ illaam mai botto ia too, aka naua: <<Dako’i too dappo’ asammakam.>>
34Iya mualam kandeanna to Israel keissi tappum puha digahu, tä’ diboloi bibi’ hoti, anna nakoto’i dokko pohebana mane napassanni. 35Napalako duka’ to Israel umba susi tula’na Musa. Sikaumpelau to Mesir poheba bulabam sola peha’ anna poheba. 36Napakendesam DEBATA penaba mapia illaam kalena to Mesir lako to Israel, lambi’ naponnoiam pelauanna. Susim too lalanna to Israel umpekullei to Mesir.
To Israel messubum illaam mai lembäna Mesir
37Puhai ia too, iya mengkalaom to Israel dio Raamses lu lako Sukot. Kiha-kiha annam hatu’ sa’bu budana muane mandipi, tä’pi dihekem baine sola änä’-änä’. 38Buda duka’ tau senga’ sulibanna to Israel mentoä, anna buda toi duka’ beke sola domba anna sapim napasola.
39Indo tappum puha gahu nababa dio mai Mesir napapia hoti peppä’ anna nadängei tä’ diboloi bibi’ hoti, aka indo tappum puha gahu inna tä’ diboloi bibi’ hoti, aka disua sihha’ dio mai lembäna Mesir. Anna tä’um pakala umpatoka tinallo.
40Appa’ hatu’ tallu pulo taunna tohho to Israel dio Mesir. 41Lambi’i appa’ hatu’ tallu pulo taunna, iya messubunnim umma’Na DEBATA tungga’ ma’babangam illaam mai lembäna Mesir sipatu liu allo katampasanna illaam indo appa’ hatu’ tallu pulo taunna. 42Bengi etam too naongei DEBATA tä’ deem sisususam bulu matanna, wattunna untässu’i to Israel illaam mai lembäna Mesir. Iya la si bengi ia siam too duka’ naongei ingganna to Israel tä’ deem sisususam bulu matanna umpa’kasallei DEBATA, ma’tintingam lako ingganna pessubunna.
Kasitahhusanna kada dipandam diona Allo Kalappasam
43Mane ma’battakadai DEBATA lako Musa sola Harun naua: <<Susi inde kada dipandam diona Allo Kalappasam: Tä’ deem moi podo la mesa to messihuhu la mala muande balena änä’ domba ditunu illaam Allo Kalappasam. 44Lu lako sabua’ pangngalli, iapi mane malai naande ke puham disunna’. 45Lu lako to sule illaam botto anna to mosaho tä’ mala naande. 46Indo balena änä’ domba anggam mala diande illaam banua. Moi la sakea’ tala malai dipassubum illaam mai banua. Anna moi la mesa bukunna tala malai dipolo. 47Ingganna kakalebuanna to Israel pahallu la napakahoa’. 48Maka’ deem to sule illaam bottomua’ la maelo’ umpakahoa’ Allo Kalappasam to napadeem DEBATA, iya ingganna muane illaam simesa-mesa dapo’na, pahallu disunna’ yolo. Puhapi, mane malai sule ma’pakahoa’. Indo tau la malam dipasusi pa’botto. Sapo’ ingganna to tä’ disunna’ tä’ ia mala naande. 49Anggam mesa ätoham la napehhondoi susi pa’botto teem to sule illaam alla’-alla’mua’.>>
50Iya napalako asam duka’ to Israel ingganna indo to napa’pahentaam DEBATA napalambi’ Musa sola Harun. 51Tungka allo etam too anna natässu’i DEBATA to Israel illaam mai lembäna Mesir, tungga’ ma’babangam.
13Änä’ ulua tabana ia DEBATA
Allo kasalle Hoti Tä’ Diboloi Bibi’ Hoti
1Anna mane ma’battakadai DEBATA lako Musa naua: 2<<Pasähä’ia’ ingganna änä’ ulua muane, la tabaKu ia. Ingganna änä’ uluana to Israel anna uhu änä’na olo’-olo’, Kao ia puäna.>>
3Puhai ia too, ma’kadam Musa lako to Israel naua: <<Inde allo ia, la si umpengkilalaia’. Aka allo iam too inde muongeia’ messubum illaam mai lembäna Mesir, ongeammua’ disabua’i, katea’ bassinNa DEBATA napake untässu’ikoa’ illaam mai. Dadi, tä’koa’ la mala muande ingganna diboloinna bibi’ hoti. 4Allo temo, bulam Abib13:4 bulam Abib: Kalembasanna, bulam mesanna to Israel. muongeia’ messubum illaam mai lembäna Mesir. 5Maka’ too ke napatettengkoa’ DEBATA lako bottona to Kanaan, to Het, to Amori, to Hewi anna to Yebus, – botto to puha nadandi lako nene to umponene la napadokkoangkoa’ lisu pala’mu, mesa botto bosa’ bumbungam makko anna bontä’ duho – iya tä’ mala tala umpogau’a’ inde hame-hame illaam bulam katenanna inde. 6Pitu allona la muolaanna’ muande hoti tä’ diboloi bibi’ hoti, anna allo kapitunnai too ma’hame-hamengkoa’ umpa’kasallei DEBATA. 7La muandekoa’ hoti tä’ diboloi bibi’ hoti illaam indo pitu allona, ingganna diboloinna bibi’ hoti tä’ si’da-si’da mala umpakende’a’ illaam banuammu, dapaka ia bibi’ hoti, tä’ si’da-si’da mala umbaba tama bottomua’.
8Allo eta too pahallu untulasanna’ lako änä’mu muane muua: <Inde hame-hame dipalako umpengkilalai pa’pogau’Na DEBATA tama kaleki wattunna messubungkam illaam mai lembäna Mesir.> 9Indo hame-hame la sihhapam ponto bännä dio limammu anna tali yabo kidemu, anna mala pahentaNa DEBATA umpengkadaam liu dio pudu’mu, aka katea’ bassinNa DEBATA puha umpatettekoa’ messubum illaam mai lembäna Mesir. 10Iam too anna la si umpogau’ liunna’ taum-taum inde hame-hame illaam wattu puha dipa’tantu.
11Maka’ too ke napatettengkoa’ DEBATA lako bottona to Kanaan, umba susi puha nadandi lako nene to umponene, anna ke puham napadokkoangkoa’ lisu pala’mu botto ia too, 12iya tä’ mala tala umbehoa’ lako DEBATA ingganna änä’ uluamu muane, susi siam duka’ lakinna uhu änä’na olo’-olo’mu, tabana ia DEBATA. 13Sapo’ uhu änä’na ia keledai la ussulleia’ mesa änä’ domba. Maka’ too tä’ ussulleia’, iya tä’ mala tala ullutto’ bätä bahokona. Ingganna änä’ uluamu muane pahallu la ussullei. 14Ianaanna di dako’na di maniinna deem pekutanaanna änä’mua’ naua: <Aka hia anna dipateenni?> Iya la muuaanna’: <Katea’ bassinNa DEBATA umpatettekam messubum illaam mai lembäna Mesir, ongeangki disabua’i. 15Wattunna makahha’ batu penabanna Firaun tä’kam napabäi le’ba’, iya nadappo’i DEBATA ingganna änä’ ulua dio Mesir, susi änä’ uluana hupatau teem uhu änä’na olo’-olo’. Iam too kasuhunganna anna kipehumalasammi lako DEBATA ingganna lakinna uhu änä’na olo’-olo’ki, sapo’ änä’ uluaki ia muane pahallu kisullei lako DEBATA.> 16Pa’palakoam ia too pahallu sihhapam ponto bännä dio limammu anna tali yabo kidemu, aka katea’ bassinNa DEBATA umpatettekia’ messubum illaam mai lembäna Mesir.>>
Puang Allataala umpatette umma’Na
17Tappana napabäi Firaun to Israel le’ba’, iya tä’ napaola lako bottona to Filistin Puang Allataala, moinna anna mahuku’ puha ia muola eta, aka naua Puang Allataala: <<Mase manii, tieli’ pikkihanna ke muoloi pa’bundusam, nasuhum la ma’pasule lako Mesir.>> 18Iam too anna napopenggulilimmi muola lako pädä kukku’ tinanda lako Le’bo’ Teberau. Tungga’ ma’babangam to Israel messubum illaam mai lembäna Mesir sanda paha’buno. 19Nababa Musa bukunna Yusuf, aka inna puham ma’pakahi’di Yusuf umpopa’dandi mate-mateam pessubunna Israel naua: <<Tä’ mala tala la napaillaam penabakoa’ Puang Allataala, dadi pahallu la umbabaa’ bukungku messubum illaam mai inde botto.>> 20Mengkalao dio Sukot to Israel mane ma’kemai dio Etam, dio bihinna pädä kukku’. 21Maka’ iallo nayoloangam DEBATA illaam gabum mengke’de’ anggasanna andihi, anna maka’ bengi nayoloangam DEBATA illaam api mengke’de’ anggasanna andihi umballoi, nasuhum mala mellao allo bengi. 22Pusam allo indo gabum mengke’de’ anggasanna andihi tä’ deem umpellei to Israel, susi siam duka’ puli bengi indo api mengke’de’ anggasanna andihi.
14Firaun umpadondo to Israel
1Dioi Etam, ma’kadam DEBATA lako Musa naua: 2<<Uaanni to Israel, anna ma’pasulei, anna ma’kemai dio olona kota Pi-Hahirot, alla’na kota Migdol anna le’bo’. La ma’kema dio sikahuku’ Baal-Zefon, dio bihim le’bo’. 3Iya la nauam too Firaun: <Bulimmi pole’ to Israel illaam inde botto, napapusa pädä kukku’.> 4La kupomakahha’ penabanna Firaun, lambisam la umpadondo to Israel. La napa’kasalleiä’ hupatau aka kutaloi tomahaja Mesir sola tentahana, anna mala naissam to Mesir naua: <Ia si’da hia DEBATA.> >> Iya napalakom duka’ to Israel. 5Tappana ditulasam tomahaja Mesir diua le’ba’im malahi to Israel, iya tieli’ penabanna Firaun sola ingganna to mengkähäna lako to Israel, anna sipa’tula’-tula’i naua: <<Aka bäbä hia’ kita isanga tapogau’? Tapabäi hia’ kita to Israel lappa’ dio mai passabua’inta!>> 6Iya umpapohebaim bendinna Firaun, anna le’ba’i umpasola tentahana. 7Umpasola annam hatu’ bendi pampile anna ingganna bendi dio Mesir, sanda simesa tentaha to mampahe’na. 8Susim too DEBATA umpomakahha’ penabanna Firaun, tomahaja Mesir, nasuhum umpadondo to Israel. Tahhu’ liu siam ia duka’ to Israel muäkä’ limanna kassi tilalla’.
9Ingganna tentahana to Mesir, susi tentaha ma’daham, tentaha ma’bendi, anna tentaha senga’ umpadondo to Israel. Iya saidi’ dam tanalambi’ wattunna ma’kema dio bihim le’bo’, dio olona Pi-Hahirot sikahuku’ Baal-Zefon. 10Tappana la mahuku’ kale Firaun, iya messailem to Israel lako boko’na, iya muitam to Mesir tuttuam mahuku’um dio mai boko’na. Iya silelem tinggi’gi’ mahea’ to Israel anna sikaoli mengkaala längäm DEBATA. 11Anna mane ma’kada lako Musa naua: <<Tä’ isanga deem pa’ku’busam dio Mesir, anna umbaba sulekam la mate inde pädä kukku’? Aka hiko isanga illaam pikkihammu anna umbabakam messubum illaam mai lembäna Mesir? 12Inna puhangko kiuaam dio Mesir: <Daa untahu-tahukam, pabäi mammakam naposabua’ to Mesir. Aka dotangkam naposabua’ to Mesir anna la mate etakam inde pädä kukku’.> >>
13Iya ma’kadam Musa lako to Israel naua: <<Daa ummahea’a’! Pomatohoia’ penabammu! Ammu itaia’ pallangnga’i buttu di DEBATA, la napasuleangkoa’ inde allo temo. Aka itim to Mesir muitaa’ temo, tä’um deem la muita polea’ sule lako salako-lakona. 14DEBATA la umpangngebaangkoa’, anna la kanonnäkoa’ iko.>>
Ullambam Le’bo’ Teberau
15Mane ma’kadai DEBATA lako Musa naua: <<Akanna katamba-tambako dio oloKu? Uaanni itim matim to Israel anna mengkalaoi. 16Anna iko iko Musa, pentuhoanni tekkemmu yabona le’bo’ anna tikellä’i uwainna, lambi’ mala naola to Israel mellao ullambam le’bo’ mabangi. 17Anna Kao Kao, la kupomakahha’ penabanna to Mesir, lambisam umpadondo to Israel, anna lu lakona Firaun sola ingganna tentahana, tentaha ma’bendinna anna tentaha ma’dahanna, la kupaitai kamatandeangKu. 18Anna mala naissam to Mesir naua: <Ia si’da hia DEBATA>, ke kutaloi tomahaja Mesir, tentaha ma’bendinna, sola tentaha ma’dahanna.>> 19Iya mentieli’um indo malaika’Na Puang Allataala. Ingngena’na si mellao umpendioloangam tentahana to Israel, tentomai dio opi boko’ untuhu’ tentahana to Israel. Anna indo gabum mengke’de’ anggasanna andihi si dio olo, mentieli’ opi lako boko’, 20anna ke’de’i illaam alla’na tentahana to Mesir anna tentahana to Israel. Indo gabum ingngena’ umpadadi malillim tandai sabalinna anna masiä’ tandai sabalinna, nasuhum bassim tä’ mala silombam puli bengi.
21Iya muäkä’um limanna Musa yabona le’bo’, anna napatibussaui DEBATA hibu’ buttu illaam mai tandai mata allo puli bengi, umpatikellä’ uwai le’bo’, lambi’ mendadi litä’ mabangi, anna tipa’dua uwai le’bo’. 22Iya naolam tama to Israel umpa’tängäi le’bo’ muola litä’ mabangi, anna mempasapa’ uwai dio tandai kananna sola tandai kaihinna.
23Iya napadondom to Mesir anna naula’i tama le’bo’ ingganna dahanna Firaun, bendinna anna tentaha ma’dahanna. 24La tibukka’ kalei baja, ma’petua’um DEBATA yabo mai indo gabum sola api mengke’de’ anggasanna andihi umpahandam tentahana to Mesir, anna napahukkai napagege’. 25Napatigihi’ senga’ DEBATA legem bendinna, nasuhum tä’ mala tilao. Iya sikama’kadam to Mesir naua: <<Maikoa’ tapa’pasule, daa taula’ liua’ to Israel aka ma’kale DEBATA umpekkalundanganni umbali to Mesir.>>
26Iya ma’kadam DEBATA lako Musa naua: <<Äkä’i limammu yabona le’bo’, anna mala sikuku’ sule uwai untallanni to Mesir, bendinna anna tentaha ma’dahanna.>> 27Iya muäkä’um duka’ limanna Musa yabona le’bo’, iya la bihha’ kalei allo sikuku’ sule uwai le’bo’ susi ingngena’na. Lambi’ sikakondä lao to Mesir, iya untammui hi uwai. Susim too DEBATA untallangam to Mesir illaam le’bo’. 28Sikuku’ sule indo uwai le’bo’ susi ingngena’na, ussikuku’i tentaha ma’bendi sola tentaha ma’daham anna ingganna tentahana Firaun indo to muula’ to Israel tama le’bo’, nasuhum tä’um deem meata moi podo la mesa. 29Sapo’ to Israel ia, muola dio litä’ mabangi umpa’tängäi le’bo’, tontä siam ia duka’ mehhindim uwai dio tandai kananna sola tandai kaihinna. 30Susim too DEBATA ullangnga’i to Israel allo eta too dio mai pala’ limanna to Mesir. Naita to Israel bakkena to Mesir sikabante dio bihim le’bo’. 31Tappana naita to Israel tä’ deem pada sakasalle kuasanNa DEBATA napahuaiam to Mesir, iya sangngim mengkahea’um anna matappa’ lako DEBATA, anna matappa’ duka’ lako Musa, sabua’Na.
15Pampujianna Musa sola to Israel
1Puhai ia too, umpenggamahaammi pampujiam Musa sola to Israel umpuji DEBATA naua:
<<La kupenggamahaam penaniam längäm DEBATA, aka Ia to matande masokam,
mentu’na daham sola to ussäkei napa’tumbusam dokko le’bo’.
2DEBATA kamatohoangku, Ia anna malaä’ menggahama menani,
Ia to ullangnga’iä’.
Ia Puang Allataala to kupenombai, Ia kupuji kupa’kasallei,
Ia Puang Allataala to napenombai ambeku, kupomatande sanganNa.
3DEBATA pa’bahani illaam pa’bundusam,
DEBATA15:3 DEBATA: Illaam basa Ibrani dituli’ YHWH, sapo’ si nasepei to Israel natula’ naua: <<Adonia>> kalembasanna <<Debata>>. tungka sanganNa.
4Bendinna Firaun sola tentahana nalilliam dokko le’bo’;
ingganna pampile to umpahe’ tentaha natallangam dokko Le’bo’ Teberau.
5Nasikuku’i le’bo’ mandalam,
tallam dokko posi’ mapättäna le’bo’ anggasanna batu.
6Katea’ bassimMu, DEBATA, mepilla’-pilla’ matohona,
katea’ bassimMu, DEBATA, umpempa’deam bali.
7KamatandeamMu tä’ deem pada sakasalle
umpempa’deangKo ingganna to mengke’de’ umbaliKo;
Umpalippä’Ko aha’Mu sihhapam api ma’nala-nala,
sikamuä’bäi sihhapam muä’bäi too’ dalame.
8Ma’simbuhu’ penaba illaam mai illäMu, iya mempasapa’ uwai;
uwai mellao tihisi patomali mehhindim anggasanna passadangam;
anna uwai dio posi’ mapättäna le’bo’ bäkkum.
9Ma’kada bali naua: <La kupadondo,
la kusakka,
la kutaba dangge’ kullena;
la umpasoaä’ penabangku lako,
la kusintä’ pa’dangku;
limangku la umpempa’deam si mesai!>
10Umpasimbuhu’i hibu’Mu, iya nasikuku’i le’bo’;
anggasanna bassi kalebu tallam dokko le’bo’ mandalam.
11Mennangka debata lino, la umpapadaiKo, DEBATA?
Mennangka la umpasusiiKo? Matande kamasehoamMu, dipengkahea’iKo anna dipuji dipa’kasallei,
Iko to umpadadi tanda memängä-mängä.
12Muette’Ko katea’ bassimMu,
iya silele naamma’ häkkäna litä’ bali.
13Sola pangkaha’ pa’kamaseMu takattu tintim tamondo’ sahuham muundu’Ko umpatette umma’ to puha ussolom;
sola kamatohoamMu, muundu’ umpatinanda lako ongeam masehoMu.
14Nahingngi buda kahajaam, iya silele lumalla’ mahea’;
sangngim häntä pebaba’ issinna lembäna Filistin.
15Wattu eta too gege’ ingganna pepungngu’na täke Edom,
naepe’ kamaheasam ingganna to ma’kuasa dio Moab;
ingganna issinna Kanaan mäläi kute’-kute’na.
16Silele nalambi’ katinggi’gisam anna kamaheasam,
silele ma’luttu’ dahi batu napobua’ kakasalleanna kakuasaamMu,
sampe lessu’ umma’Mu, DEBATA,
sampe lessu’ umma’ to puha ullappasam.
17Iko umpatinandai anna umpatohhoi yabo tanete ampuam ikaleMu;
yabo ongeam to puha umpadadi tadongkongamMu, DEBATA;
yabo ongeam maseho, panggahaga limamMu, DEBATA.
18DEBATA ma’pahenta tä’ deem la meangganna, sule lako salako-lakona.>>
19Tappana le’ba’ tama le’bo’ dahanna Firaun, sola bendinna anna tentaha ma’dahanna, iya napasitappa sule DEBATA indo uwai le’bo’ ussikuku’i to Mesir, sapo’ to Israel ia muola dio litä’ mabangi illaam tängä le’bo’. 20Puhai ia too, mualam rebana Miryam, indo nabi baine änä’ dahanna Harun, iya pada-padam duka’ natuhu’ baine senga’ muala rebana anna nade’de’i napasindum sikasajo. 21Iya sitimbom menanim Miryam sola solana naua:
<<Penanikoa’ umpuji DEBATA, aka Ia to matande masokam.
Daham sola to ussäkei napa’tumbusam dokko le’bo’.>>
Dio Mara anna Elim
22Puhai ia too, untetemmi to Israel Musa umpellei Le’bo’ Teberau, lu lako pädä kukku’ Syur. Tallu allona naolaam mellao dio pädä kukku’ ia too, tä’ deem siita uwai. 23Pissananna landa’im lako mesa ongeam isanga Mara, sapo’ tä’ mala naihu’ indo uwai dio Mara aka mapäi’. Iam too anna nasangaim tau ongeam ia too Mara15:23 Mara: Inde tula’ mesa sanga illaam basa Ibrani kalembasanna <<mapäi’>>.. 24Iya silelem ma’naum-naum to Israel lako Musa naua: <<Akam la kiihu’?>> 25Iya mengkaalam Musa längäm DEBATA, iya napatuhoim salonga’ kaju. Iya natibem Musa indo kaju salonga’ dokko indo uwai, iya mengkubalimmi mendadi uwai biasa.
Etam too naongei DEBATA umbeem to Israel kada dipandam sola paondom, anna etam too naongei napangngitai. 26Ma’kada DEBATA naua: <<Ianaanna umpehingngii tongangkoa’ tula’Na DEBATA, Puang Allataala to umpenombai, anna umpalakoia’ indo napemaloloanNa, anna umpatananniia’ talinga ingganna pahentaNa, anna muanti manda’ untobe matoto’ ingganna kada puha napandam, iya moi la mesa kamapi’disam tala deenni kupahuaikoa’ umba susi puha kupahuaiam to Mesir, aka Kaom too inde DEBATA to umpabono’koa’.>>
27Pissananna ham ia landa’i lako mesa ongeam isanga Elim. Dio Elim, deem sapulo dua kalimbuä anna pitu pulo too’na kurma. Iya ma’kemaim eta too, dio ampe’na indo kalimbuä.
16Manna sola dassi puyuh
1Anna mane mengkalao ingganna to Israel dio Elim, sampe landa’i lako pädä kukku’ Sin, illaam alla’na Elim anna Tanete Sinai. Allo kasapulo limanna bulam kaduanna messubunna to Israel illaam lembäna Mesir anna landa’i. 2Sapo’ dio indo pädä kukku’, silele oom ma’menu-menu to Israel lako Musa sola Harun 3naua: <<Mala leko’ ia kela napatei diokam lembäna Mesir DEBATA, mahassam untingngajoi bale dio pamädä’ anna umpedea’i hoti. Sapo’ umbaba hakam sule eta inde pädä kukku’ la uhhopuikam mate tadea’.>>
4Iya ma’kadam DEBATA lako Musa naua: <<La muitam too, la kupatuhungangkoa’ hoti yabo mai langi’ susi uham mahämbä’. Allo-allo to Israel la messubum illaam mai kemana uhhempum indo hoti la sihuanna naande pa’sabengiam. Iam too la kupake umpangngitaii, untuhu’i haka pahentaKu tä’ daka. 5Allo kaannannai too, pahallu la naala pa’duangngalloam tä’ susi allo biasa, anna nanasui asanni indo babaanna.>>
6Iya umpa’tula’im to Israel Musa sola Harun naua: <<Inde mahammo, la ungka’da’a’ ungkaleso muua: <DEBATA too inde untässu’ikam illaam mai lembäna Mesir.> 7Anna makale’i too mebengngi’, la muitakoa’ pangkähhäna kamatandeanNa DEBATA, aka nahingngiammi pa’menu-menummua’ lako kaleNa. Aka pungngaka hakam kami’, anna la kami’i umpa’menu-menuia’?>> 8Anna mane naua Musa: <<La napandekoa’ bale DEBATA ke kahubenni, anna napadea’koa’ hoti ke mebengngi’i, aka nahingngiammi pa’menu-menummua’, pa’menu-menummua’ lako kaleNa. Aka pungngaka hakam kami’? Takami’ di tia umpa’menu-menuia’, sapo’ DEBATA hi tia.>>
9Anna mane ma’kada Musa lako Harun naua: <<Uaanni itim matim to Israel: <Maikoa’, tinandakoa’ lako oloNa DEBATA, aka nahingngiammi pa’menu-menummua’.> >> 10Mahassanni umpa’tula’i to Israel Harun, iya sangngim messailem lako pädä kukku’, pissananna muitaim pangkähhä kamatandeanNa DEBATA illaam gabum. 11Iya ma’kadam DEBATA lako Musa naua: 12<<Kuhingngiammi pa’menu-menunna to Israel. Tulasanni itim matim to Israel muua: <Maka’ mahammo balea’ la muande, anna maka’ mebengngi’ hotia’ la umpedea’i. Iya la muissammia’ too muua Kaom too inde DEBATA, Puang Allataala to umpenombai.> >>
13Tappana lendu’ allo, iya mentia’um sule dassi puyuh16:13 dassi puyuh: Sahhupa dassi bahinni’-hinni’ hame-hame bulunna saidi’ tasusi mäne’ lampum. Ia anna budai tau muissanni aka si mammi’ balena. umponnoi alla’ kema, anna tappana mebengngi’ diitam langullo umpali’-pali’ lao mentu’na kema. 14Tappana pesahobo lao indo langullo, iya diitam lako pädä kukku’ anggasanna sissi’ bau manipi’, anna malängngo’ anggasanna damo’ bäkkum. 15Tappana naita to Israel, iya sipa’tula’-tula’um naua: <<Aka hia indeä?>> Aka tä’ naissam aka amo isanga. Iya nauaammi Musa: <<Iam too inde diuaam hoti nabeengkoa’ DEBATA la umpokinandea’. 16Susi inde pahentaNa DEBATA: <Simesa-mesa tau la pantam nahempum la ganna’na naande. La mesa gomer16:16 Mesa gomer: Kiha-kiha dua lite’ la’bi (2, 3 lite’). naala mesa tau, mane napasituhu’i pole’ sanakai illaam mesa kema.> >>
17Iya napalakom duka’ to Israel. Tungga’ mahhempummi, deem buda naala anna deem saidi’. 18Tappana nagantam umpake gomer, iya to buda nahempum tä’ mela’bi, anna to saidi’ nahempum tä’ kakuhängam.16:18 to saidi’ nahempum tä’ kakuhängam: Batai 2 Korintus 8:15. Simesa-mesa tau nahempum la sihuanna naande.
19Puhai ia too, iya nauaammi Musa: <<Tä’ deem mesa tau la uhhäntä la’binna sule lako mebengngi’.>> 20Sapo’ deem di sanaka-naka tau tä’ umpehingngii Musa. Uhhäntä ia la’binna sule lako mebengngi’, lambi’ keolli’ anna bubosi indo la’binna. Iya nakeaha’i Musa.
21Mebengngi’ oi too silele oom mahhempum la sihuanna naande. Sapo’ malussunna too allo, iya mahehem. 22Tappana allo kaannanna, iya silelem uhhempum hoti penduam tiluppi’, dua gomer mesa tau. Iya suleim pepungngu’na to Israel natulasam Musa indo pa’pogausanna. 23Iya nauaammi Musa: <<Susi inde napa’pahentaam DEBATA: <Makale’, allo Katohhoam sabengi sangngallo, allo Katohhoam dipasähä’ lako DEBATA. Dadi, dängeia’ la undängena anna nasui la unnasunna. La muanna manappaa’ sabaheam dio ongeanna la umpakenaa’ allo makale’.> >> 24Iya sileleim duka’ naanna dio ongeanna sule lako masiä pole situhu’ pampahe’na Musa, iya tä’ bubosi anna tä’ keolli’ indo hoti. 25Iya nauaammi Musa: <<Andenna’ too itim hoti, aka inde allo temo allo Katohhoam la diongei umpasatutu penaba lako DEBATA. Allo temo tä’ opi deem la ullambi’a’ lako alla’ kaliane. 26Annam allona la muolaanna’ mahhempum, sapo’ allo kapitunnai too indo allo Katohhoam, iya tä’ opi deem hoti.>> 27Allo kapitunnai, deem siam sanaka-naka tau le’ba’ la uhhempum hoti, sapo’ tä’ deem nalambi’. 28Iya ma’battakadam DEBATA lako to Israel muolai Musa naua: <<La padapi umba masäena untekka kalo’koa’ ullambam mata uwai pahentaKu anna ätohangKu? 29Paalai manappaia’ penaba, puhangkoa’ nabeem DEBATA allo Katohhoam. Iam too anna illaam allo kaannanna nabeemmakoa’ hoti pa’duangngalloam. Allo kapitunnai too la sangngim tohhokoa’ illaam kemamu, tä’ deem tau moi podo la mesa la mala messubum.>> 30Susim too lalanna anna tohhoi to Israel illaam allo kapitunna.
31Nasangai to Israel indo hoti: manna;16:31 manna: Basa Ibrani, kalembasanna <<aka hia indeä’>>. mabusa hupanna, pada batu loka kasallena, anna susi kande-kande diboloi duho pengngamminganna. 32Mane ma’kadai Musa naua: <<Susi inde pahentaNa DEBATA: <Pangngissii mesa gomer la muannaam pessubummu, anna mala naita inde hoti to kubeengkoa’ muande dio pädä kukku’, tappana kutässu’ikoa’ illaam mai lembäna Mesir.> >>
33Iya nauam Musa lako Harun: <<Alai mesa buli-buli anna umpatamai manna mesa gomer ponno, mane umbabai lako oloNa DEBATA, la diannaam pessubuntaa’.>> 34Iya nababam duka’ Harun indo buli-buli lako olona indo dua bebä’ batu to dipantuli’i pahentaNa DEBATA la naanna, umba susi napa’pahentaam Puang Allataala lako Musa. 35Appa’ pulo taunna masäena to Israel muande indo manna, mane landa’i lako botto to natadongkonnim hupatau. Naande liu indo manna sampe sule lako katonanna lembäna Kanaan. 36Mesa gomer sipadaam bahe sapulona efa.16:36 bahe sapulona efa: Kiha-kiha 2 lite’ anna bahe tallunna lite’.
17Dio Masa anna Meriba
1Mane umpatahhu’i pa’laoanna to Israel, mengkalao dio pädä kukku’ Sin, ma’pentudende-dende mengkalao dio mesa ongeam le’ba’ lako ongeam senga’, umba susi pahentaNa DEBATA. Ma’kemaim dio Rafidim, sapo’ tä’ deem uwai la naihu’ to Israel eta too. 2Iya ungkallaim Musa to Israel naua: <<Padeengangkam uwai la kiihu’!>> Iya natimba’im Musa naua: <<Akanna kaoia’ ungkallai? Akanna umpa’sändä’ikoa’ DEBATA?>>
3Sapo’ liba’um mabähhänna to Israel eta too, anna maelo’ sugali’um la muihu’. Iya ma’naum-naummi lako Musa naua: <<Akanna umbabakam illaam mai lembäna Mesir? La umpateikam isanga sola änä’ki anna olo’-olo’ki, mate mabähhäm?>>
4Iya mengkaalam Musa längäm DEBATA naua: <<Akam la kupogausam inde mai to Israel? Bambangkum nasileba’-leba’i batu!>>
5Iya ma’kadam DEBATA lako Musa naua: <<Pendioloanganni to Israel, pasolai sanaka-naka matua ulunna. Babai indo tekkemmu to umpake uhhabisam Salu Nil ammu le’ba’. 6La sulemä’ too untammuiko yabo kumila’ batu yabo Tanete Horeb. La uhhambi indo kumila’ batu, iya la messubummi too uwai illaam mai, lambi’ mala naihu’ to Israel.>> Napogau’ Musa kaha-kaha ia too napahandam sanaka-naka matua ulunna to Israel. 7Indo ongeam disangai Masa anna Meriba,17:7 Masa anna Meriba: Masa kalembasanna, umpassa DEBATA la umpa’patandaam kuasanNa; Meriba kalembasanna, pakallaam. aka etam too naongei to Israel pakallaam anna umpassakoa’ DEBATA la umpa’patandaam kuasanNa naua: <<Naolaam dakika’ isanga DEBATA, tä’ daka?>>
To Israel untaloi to Amalek
8Pissananna sulem ham to Amalek umbundu’ to Israel dio Rafidim. 9Iya ma’kadam Musa lako Yosua naua: <<Pilei tau illaam mai alla’-alla’taa’, ammu laoa’ bundu’ to Amalek. Makale’i too ke’de’mä’ yabo indo pusu’ tanete kupasindum untetä indo tekkem to nabeennä’ Puang Allataala.>>
10Iya napalakom duka’ Yosua, umba susi kadanna Musa, le’ba’ umbundu’ to Amalek. Wattu eta siam too duka’ anna le’ba’i längäm pusu’ tanete Musa sola Harun anna Hur. 11Susi inde dadi wattu eta too, maka’ too muäkä’ oom limanna Musa, iya patalo oom to Israel, anna maka’ too napatuhum oom, iya to Amalek opi patalo. 12Tappana masäe, tojo’um limanna Musa. Lambisam muala batu Harun sola Hur anna napadioi ampe’na Musa anna mala naokko’i. Anna mane ussisabalii limanna Musa natokongam, nasuhum tiäkä’ liu limanna Musa sule lako lendu’ allo. 13Lambisam patalo Yosua untaloi to Amalek sola tentahana natepa pa’dam.
14Iya ma’battakadam DEBATA lako Musa naua: <<Tuli’i inde ingganna kadadiam illaam mesa suha’ la mendadi pepakilalaam, anna la untuli’ duka’ indo pa’dandiangKu diona la kupempa’deam si’da-si’dam to Amalek lambi’ tä’um deem la napaalai suhi’ hupatau illaam lino; anna la umpatamaam talinganna Yosua.>>
15Anna mane umpake’de’ dapo’ pehumalasam Musa, anna nasangai: <<DEBATA bandeha kapataloangku.>> 16Aka naua: <<Lima diäkä’ längäm okkosam kahajaanNa DEBATA, DEBATA nasibaliam to Amalek ma’tintingam lako ingganna lapi’ pessubunna.>>
18Yitro umpellambi’i Musa
1Pissananna napelelem Yitro, pasananna Musa, sando dio Midian, ingganna indo napogau’ Puang Allataala lako Musa sola to Israel umma’Na, diona DEBATA untässu’i to Israel illaam mai lembäna Mesir. 2Iya le’ba’um Yitro umpasola lao Zipora umpellambi’i Musa muanena, (aka indo lessu’ nasua Musa ma’pasule lako Midian) 3sola indo dua änä’na muane isanga: Gersom anna Eliezer. Ia anna nasangai Musa, Gersom, indo änä’ uluana aka naua: <<Kao to messihuhuä’ dio bottona tau.>> 4Anna indo änä’ kaduanna nasangai Eliezer aka naua: <<Puang Allataala to napenombai ambeku, ia too to mepamoloingku anna nalangnga’iä’ dio mai pa’dam matahanna Firaun.>>
5Tappana landa’ Yitro, pasananna Musa umpasola bainena Musa anna änä’na lako pädä kukku’, ongeanna Musa ma’kema dio sikahuku’ taneteNa Puang Allataala, 6iya ussuam tau Yitro umpellambi’i Musa nauaam: <<Kao, Yitro pasanammu, suleä’ kupasolaangko bainemu sola änä’mu.>>
7Iya messubummi Musa untammui pasananna, anna ma’balinguntu’i dio olona anna mane naudum. Iya sikuhhu’-kuhhu’im sikamoli’-moli’i mane le’ba’i tama kemana. 8Illaanni kema, iya umpa’huttusammi pasananna Musa ingganna indo to napogau’ DEBATA lako Firaun anna to Mesir aka la untässu’i to Israel, anna natulasam toi duka’ ingganna indo kamasussaam naoloi illaam pangngolalalangam, anna maaka susi napesäkäi DEBATA.
9Iya tä’ deem pada sakassi anna tilalla’ Yitro uhhingngi ingganna indo kamapiaam puha napogau’ DEBATA lako to Israel, nalappasam dio mai pala’ limanna to Mesir. 10Ma’kada Yitro naua: <<Dipuji dipa’kasallei DEBATA to puha ullappasangkoa’ dio mai pala’ limanna to Mesir sola Firaun, anna to puha ullappasam inde mai hupatau dio mai pandakka’na to Mesir. 11Tentomai kuka’da’um kukaleso kuua, abana mentondom puha Ia DEBATA anna la debata lino, aka kaha-kaha ia too napogau’ lako to ma’salle inaba lako to Israel.>>
12Puhai ia too, umpehumalasammi tunuam ditunu mampu’ sola tunuam biasa Yitro längäm Puang Allataala. Anna mane sule Harun sola ingganna matua ulunna to Israel anna mangngandei sola pasananna Musa dio oloNa Puang Allataala.
Musa umpatadongkom to pepungngu’ la si mahhotto’
13Masiäna eta too, iya tadongkommi Musa la uhhotto’ sahana to Israel to sisala bingkum. Sikadehe dio olona Musa mengkalao mebengngi’ sule lako mahammo. 14Tappana naita pasananna Musa ingganna indo to napogau’ Musa lako to Israel, iya ma’kadam naua: <<Muaka hiko susi muulalam inde mai hupatau? Aka hia anna anggangko mesa tadongkom mahhotto’, anna sikadehe ia inde lako hupatau mengkalao mebengngi’ sule lako mahammo?>>
15Iya nauam Musa lako pasananna: <<Aka sulei napellambi’iä’ inde mai hupatau la umpengngissanni pa’elo’Na Puang Allataala. 16Maka’ deem to sisala bingkum, iya sulei napellambi’iä’ anna kuhotto’i kaha-kahana. Anna kutulasam toi ingganna pehhondoam anna kada puha napandam Puang Allataala.>>
17Iya nauam pasananna Musa: <<Tä’ hua itim pa’palakoammu. 18Maka’ la umpateem liu, la potti’ bäbäkoa’ sola inde mai hupatau. Inde kähängam susi tä’ deem pada samabanda’ lako kalemu. La umbela haka tiko la ummesai ungkähä? 19Tentomai, pehingngii inde tula’ku. La kubeengko pepakilalaam anna la naundu’ dako too Puang Allataala. La si sitingngajoko iko Puang Allataala ullombungam pudu’na inde mai hupatau anna umpalambisam kaha-kahana lako Puang Allataala. 20La umpatudu mentu’na pehhondoam anna kada dipandam, anna la umpaissanni ulalam la sihatanna napehhondoi, anna pengkähängam la sipäto’na napalako. 21Sulibanna ia too, la umpilei illaam mai alla’-alla’na to Israel sanaka-naka to hatta’ anna mengkahea’ längäm Puang Allataala, to mala dikatappa’i, anna to ungkahidi’ doi’ passahoma’dinni. Tungga’ patadongkonni la umpungngu’ sasa’bu tau, sahatu’ tau, lima pulo tau, anna sapulo tau. 22La tontä liu manontom inde mai to pepungngu’ uhhotto’ hupatau. Ingganna saha bahinni’ la ia uhhotto’i, sapo’ ingganna saha kasalle pahallu la nababa lako olomu. Maka’ susi, iya la mahingngam pengkähängammu, anna sikamangngalataba umpendudum dudungammu. 23Ianaanna umpateenni, anna ke abanai susi pahentaNa Puang Allataala lako kalemu, iya la umbela too umpendudum, anna inde mai hupatau la ma’pasule lako ongeanna malino masannam.>>
24Iya napehingngii Musa indo tula’na pasananna, anna napalako asam indo ingganna kadanna. 25Napileim Musa sanaka-naka to hatta’ illaam mai alla’-alla’na to Israel, anna napatadongkonni mendadi pepungngu’na hupatau. Deem mendadi pepungngu’na sasa’bu tau, pepungngu’na sahatu’ tau, pepungngu’na lima pulo tau, anna pepungngu’na sapulo tau. 26Sikauhhotto’ hupatau ke deem oom kende’ sahana. Ingganna saha mabanda’ dibaba lako olona Musa, sapo’ ingganna saha bahinni’ la ma’kale ia indo pepungngu’ uhhotto’i.
27Puhai ia too, muanta’um pasananna Musa lako ba’ba, la ma’pasule lako bottona.
19DEBATA umpopa’tandaam kamatandeanNa yabo Tanete Sinai
1Tappana mentama allo uhuna bulam katallunna, puhanna messubum illaam mai lembäna Mesir to Israel, iya tisampoim dio pädä kukku’ Sinai. 2Mengkalaoi dio Rafidim, pissananna landa’i lako pädä kukku’ Sinai. Etam too naongei to Israel ma’kema dio sepponna Tanete Sinai.
3Puhai ma’kema, iya le’ba’um Musa längäm indo tanete umpellambi’i Puang Allataala. Iya ma’battakadam DEBATA yabo mai pusu’na indo tanete naua: <<Susi inde pahallu la umpalandasam lako pessubunna Yakub anna untulasam to Israel, muua: 4<Muitanna’ sola matammu indo to kupogausam to Mesir, anna maaka susi kuangkahangkoa’ sihhapanNä’ bunia gege umpayabo pani’na änä’na, anna kupatinandakoa’ lako kaleKu. 5Dadi tentomai, ianaanna ponno penabakoa’ untuhu’i kadangKu, anna muanti manda’ untobe matoto’ pa’dandiangKu, iya la mendadikoa’ ampuangKu to handam kupakamaja illaam alla’na ingganna kahajaam, moinna anna senambo lino Kao puäna. 6La mendadikoa’ mesa kahajaam to mendadi sando dio oloKu, anna kahajaam to kutondä’i senga’.> Battakada iam too inde la umpalandasam lako to Israel.>>
7Puhai ia too, iya ma’pasulem Musa yabo mai indo tanete. Mane untambai matua ulunna to Israel anna natulasanni ingganna indo battakada to napahentaam DEBATA lako kalena. 8Iya napada-padaim mentimba’ naua: <<Ingganna battakada to puha messubum illaam mai pudu’Na DEBATA, la kipogau’ asam.>> Iya napalanda’um Musa indo pentimba’na to Israel lako DEBATA.
9Iya ma’kadam DEBATA lako Musa naua: <<La muitam too, la suleä’ illaam gabum makambam, anna mala nahingngi itim matim to Israel ke ma’tula’mä’ matim, anna mala si nakatappa’i liuko.>> Puhai ia too, iya le’ba’ oom Musa umpalanda’ kadanna to Israel lako DEBATA.
10Mane ma’kadai DEBATA lako Musa naua: <<Laoko pellambi’i to Israel. Patettei ussehoi kalena allo temo anna makale’. La silele untappa’i pohebana. 11La mentamai too allo katallunna iya sikama’kalili’um, aka allo katallunnai too sulemä’ yabo Tanete Sinai, napahandam ingganna to Israel. 12Tondä’i lao pali’ la peangganna nahondoi to Israel, anna muuaanni: <Pissa’-pissa’ ahangkoa’ la längäm inde tanete, moi la muisso sepponna tala malai. Menna-menna muissoi inde tanete, tä’ mala tala dipatei.> 13Tau ia too la disileba’-leba’i batu, battu haka dibälä’du’ sampe mate, anna tä’ mala dihaka’. Tä’um deem la dipabäi tubo susi hupatau teem olo’-olo’. Monipi sangkakala19:13 sangkakala: Inde sangkakala biasa tandu’ olo’-olo’ dipapia; umbai’ susi moninna lalloho’. dipakalando moninna mane malai nakahuku’ indo tanete.>>
14Iya ma’pasule oom Musa yabo mai indo tanete umpellambi’i to Israel. Napatette tungga’ ussehoi kalena anna untappa’i pohebana. 15Ma’kada Musa lako to Israel naua: <<Pa’kalili’koa’ ke la tamam allo katallunna, anna tä’ deem tau la sola metindo baine.>>
16Mebengngi’na indo allo katallunna, iya lippä’-lippä’ guntu’, silalle kila’, anna tihembom gabum makambam yabo indo tanete, anna dihingngi moninna sangkakala tä’ deem pada sakasalle. Iya silelem lumalla’ mahea’ to Israel illaam ongeanna ma’kema. 17Iya napasolam Musa umpellei ongeanna to Israel ma’kema la napopengngolo lako Puang Allataala, mane sikake’de’i dio sepponna indo tanete. 18Indo Tanete Sinai nakabu’ hambu, aka tuhum DEBATA yabo indo tanete anggasanna api. Indo hambunna mengke’de’ längäm susi hambu to ma’lällä, anna pahundam sakalebu indo tanete. 19Tuttuam masäe tuttuam kasalle moninna indo sangkakala. Iya ma’kadam Musa, lambi’ natimba’i Puang Allataala anggasanna guntu’. 20Tuhum DEBATA yabo pusu’na Tanete Sinai; mane untambai Musa längäm pusu’na indo tanete, iya le’ba’um duka’ Musa längäm.
21Iya ma’battakadam DEBATA lako Musa naua: <<Tuhungko, ammu pakilalai to Israel, anna mala tä’ ullusu indo petondä’ la napengkahuku’iä’ napetua’, aka maka’ nalusu, iya la buda tau mate. 22Moi duka’ sando to la sule umpengkahuku’iä’ pahallu la ussehoi kalena, anna mala tä’ kupassala.>> 23Iya ma’kadam Musa lako DEBATA naua: <<Tä’ deem leleanna la längäm Tanete Sinai to Israel, aka inna puhangkam umpayololambangam muua: <Tondä’i lao pali’ indo tanete, anna tandaanni diua maseho.> >> 24Iya natimba’im DEBATA naua: <<Le’ba’ungko, dokkongko, ammu dio sule mai, pasolai Harun. Sapo’ ingganna sando sola tau buda, tä’ si’da-si’da ia mala la mallusu la napengkahuku’ä’, anna mala tä’ kupassala.>> 25Iya le’ba’um Musa umpellambi’i to Israel anna napalandasanni indo battakadanNa DEBATA.
20Sapulo pahentaNa DEBATA
1Puhai ia too, napengkadaammi Puang Allataala ingganna inde battakada naua: 2<<Kaom too inde DEBATA, Puang Allataala to umpenombai, to puha untässu’ikoa’ illaam mai lembäna Mesir, ongeammua’ disabua’i.
3Daa umpenombaia’ debata senga’, sulibanna Kao.
4Daa unggahaga pa’pasusiam moi la maaka susi hupanna ke la umpenombai, la umpasusii issinna langi’, issinna lino, battu haka issinna uwai dio tando dokkona lino. 5Daa umpenomba dio olona battu haka mehumala’ lako, aka Kao DEBATA, Puang Allataala to umpenombai, si kembuhu20:5 kembuhu: Kalembasanna, anggam DEBATA sihatam dipenombai, dadi tä’ napohäe ke la ma’debata senga’i umma’Na, aka tä’ sihatam. ke deenni tau umpenombai debata senga’. La mendadi kaponam tapuppu’ kasalaanna mesa ambe’ lako pessubunna, sule lako lapi’ katallunna anna kaappa’na lako ingganna to ungkabassiä’. 6Sapo’ la kupa’patandaam pangkaha’ pa’kamaseKu takattu tintim tamondo’ sahuham lako massa’bu-sa’bu lapi’na hupatau to umpake pangkaha’ pa’kamase lako kaleKu, anna muanti manda’ untobe matoto’ ingganna pahentaKu.
7Daa umpekadommi’ untula’ sanganNa DEBATA, Puang Allataala to umpenombai, aka napassala DEBATA to umpekadommi’i untula’ sanganNa.
8Pengkilalai manappai allo Katohhoam anna pasähä’i. 9Annam allona la muolaanna’ ungkähä anna umpalako ingganna kähängammu, 10sapo’ allo kapitunna, ia too allo Katohhoam la muongei umpa’kasallei DEBATA, Puang Allataala to umpenombai. Dadi allo ia too, tä’koa’ mala ungkähä ingganna kähängammu, moi iko, moi änä’mu muane, moi änä’mu baine, sabua’mu muane, sabua’mu baine, olo’-olo’mu battu haka to sule illaam bottomu. 11Aka annam allona naolaam DEBATA umpadadi langi’ sola lino anna le’bo’ sola ingganna issinna, sapo’ allo kapitunnai tohhom DEBATA. Iam too anna natamba’um indo allo Katohhoam anna napasähä’.
12Pa’kasalleikoa’ ambemu sola indomu anna malakoa’ mahendem untadongkonni litä’ to la napadokkoangkoa’ lisu pala’mu DEBATA, Puang Allataala to umpenombai.
13Daa umpapateam.
14Daa ullullu’ pa’bannetauam.
15Daa umpaboko.
16Daa ussa’bi tatappa’ diona padammu hupatau.
17Daa ungkailui anna ungkatinnai banuanna padammu hupatau; daa ungkailui anna ungkatinnai bainena padammu hupatau, battu haka sabua’na muane, battu haka sabua’na baine, battu haka sapinna battu haka keledainna, battu haka ingganna aka-akanna padammu hupatau.>>
To Israel ungkahea’ kasuleanNa DEBATA
18Naita sola matanna nahingngi sola talinganna to Israel, indo magahugunna guntu’ sola silallena kila’, moninna sangkakala,20:18 sangkakala: Inde sangkakala biasa tandu’ olo’-olo’ dipapia; umbai’ susi moninna lalloho’. anna tanete pelamboho. Iya silelem lumalla’ mahea’ to Israel, lambisam ke’de’ nakambela. 19Ma’kadaim lako Musa naua: <<Podo ikom pa’tula’ikam, anna kipehingngii ham; damom tia Puang Allataala, indana matekam.>> 20Iya natimba’im Musa naua: <<Daa ummahea’a’, aka sulem Puang Allataala napangngitaikoa’ anna mala siampuam liukoa’ hea’ anna sihi’ lako kaleNa, lambisam tä’koa’ umpogau’ dosa.>>
21Ke’de’ mambela ia to Israel, sapo’ Musa ia umpengkahuku’i indo gabum malotä to naongei sule Puang Allataala.
Dapo’ pehumalasam
22Iya ma’battakadam DEBATA lako Musa naua: <<Susi inde la umpalandasam lako to Israel: <Muitanna’ sola matammu uhhingngi sola talingammu puhangkoa’ kupa’tula’i yabo mai langi’. 23Daa unggahaga pa’pasusiam la peha’ daka la bulabam daka la umpahambunniannä’ umpenombai. 24Ia hia, gahagai dapo’ pehumalasam dio oloKu, litä’ la unggahaga, ammu pehumalasanni tunuam ditunu mampu’ sola tunuam untilalla’i kasikapiaam yabona.20:24 kasikapiaam: Deem muuai, indo tunuam untilalla’i kasikapiaam kalembasanna, kasikapiaanna indo tau/to umbaba tunuam anna DEBATA. Indo bua pemala’mua’, la beke, domba, anna sapim. La umpapia dio indo simesa-mesa ongeam la kupa’tantu mendadi ongeam umpengkilalai sangangKu. Etam too la kuongei sule umpellambi’ikoa’ anna kutamba’koa’. 25Ianaanna la unggahagakoa’ dapo’ pehumalasam dio oloKu batu la unggahaga, iya daa umpake batu dituttu’, aka wattunna untuttu’, iya ungkussi’im too indo batu. 26Daa unggahaga dapo’ pehumalasam dio oloKu ke la diehannii, indana tandaanni kambelämu ke längängko.> >>
21Ätoham diona sabua’ to Ibrani
1Anna mane naua lako Musa: <<Indem ia ätoham la untulasam lako to Israel: 2Ianaanna muallikoa’ mesa sabua’ to Ibrani, iya anggam la annam taunna mala napengkähängangko. Taum kapitunnai too, iya malam muala kalena. 3Ianaanna bätä sakäjunnai sule, iya la bätä sakäjunna siam duka’ ma’pasule. Sapo’ ianaanna kebainei sule, iya la sibaba duka’ bainena ma’pasule. 4Ianaanna puäna ham umpakebainei, anna nadadianganni änä’, muane haka baine haka, iya la napatohho ia puäna indo bainena sola änä’na, anggam ia duka’ bätä sakäjunna la le’ba’. 5Sapo’ ianaanna natanetei indo sabua’ naua: <Kukaha’i anna kukamasei puäku sola baineku anna änä’ku; tä’um kupapada la le’ba’ muala kaleku,> 6iya la napopengngolo puäna lako Puang Allataala, mane nababai lako ba’ba battu haka andihi ba’ba, anna natottä’i talinganna umpake petottä’. Iam too la mendadi tanda lako kalena diua la diposabua’ lium sule lako matena.
7Maka’ deem tau umbalu’ änä’na baine mendadi sabua’, iya tä’ ia mala dilappa’ susi sabua’ muane. 8Ianaanna tä’ ohi napohäe puäna indo sabua’ baine la napobaine laoam, iya mala napopesullei sule peallinna. Tä’ mala la nabalu’ indo puä lako to sulibam botto, aka tä’ umpasule lako pa’dandianna lako indo baine. 9Ianaanna indo puä la umpasiala indo sabua’na baine anna änä’na muane, iya tä’um la naangga’ sabua’, sapo’ la naangga’ änä’um indo baine. 10Ianaanna indo puä la muala pole baine laoam, iya tä’ la napalappa’i kinande, poheba, anna la si napasolapi metindo indo baine pangngallinna. 11Ianaanna tä’i naponnoi indo tallu handanna, iya mala le’ba’ indo baine muala kalena talakaindangam talakatondoam.>>
Ätoham diona to papateam
12Anna mane naua lako Musa: <<Menna-menna umpongko padanna hupatau, lambi’ mate, tä’ mala tala dipatei duka’. 13Sapo’ ianaanna tä’i deem pattujunna la papateam, sapo’ Kao ma’kale umbehoi dokko pala’ limanna indo to papateam, iya la kupatuhoiko mesa ongeam la naongei lao usseheam kalena.21:13 ongeam la naongei lao usseheam kalena: Petua’i 1 Haj. 1:50-53; Disl. 4:41-43.14Sapo’ maka’ deem tau umpake pikki’ kadakena umpatei padanna, iya la muäläiä’ indo tau dio mai dapo’ pehumalasam dio oloKu, anna dipatei duka’.
15Menna-menna umpongko ambena battu haka indona, tä’ mala tala dipatei.
16Menna-menna ussakka buni mesa tau, moi puham nabalu’ moi illaampi pala’ limanna, tä’ mala tala dipatei.
17Menna-menna untädo ambena battu haka indona, tä’ mala tala dipatei.
18Ianaanna deenni tau sipengka, anna sala’ mennanna untuttu’ solana batu battu haka nadänggu’, sapo’ tä’ siapi mate, anggam bandam bäbä dio petindoam, 19pissananna dako’i nabelam sule bangom anna messubunni banua ma’tekkem, iya tä’ la dipassala indo to patappaam lima. Anggam ia la nabala’iam kahugianna aka tä’um mala mengkähä, anna la naanggoso’i ma’pakuli sampe bono’.
20Ianaanna deenni tau umbosei sabua’na muane haka baine haka lambi’ mate, tä’ mala tala dipassala. 21Sapo’ ianaanna mala siapi menaba sabengi haka dua bengi haka, iya tä’ ia la dipassala, aka sabua’na siam.
22Ianaanna deenni tau sitappai lima, anna deenni mesa tä’ naägä’i ullusu to kebättä lambi’ boka’, sapo’ tä’ ia naposägä kalena, iya tä’ mala tala dipopa’palao situhu’ pangngontäna muanena, sapo’ kattuannapi to mahhotto’ mane nabaja’i. 23Sapo’ ianaanna masambanni sägäna, iya la umpasusii susinna. Maka’ kattu sungnga’ dipakattu sungnga’ duka’, 24maka’ sägä matanna disägäiam duka’ matanna, maka’ himpo isinna dihimpoiam duka’ isinna, maka’ sägä limanna disägäiam duka’ limanna, maka’ sägä bitti’na disägäiam duka’ bitti’na, 25maka’ malussu dilussui duka’, maka’ basa dibasai duka’, maka’ sunggatta’ dipasunggatta’ duka’.
26Ianaanna deenni mesa tau undänggu’ matanna sabua’na muane haka baine haka lambi’ tä’um mala paita, iya tä’ mala tala dilappasam indo sabua’ sulle bala’na tä’um mala paita matanna. 27Ianaanna deenni mesa puä uhhimpoiam isinna sabua’na muane haka baine haka, iya tä’ mala tala dilappasam indo sabua’ sulle bala’na himpo isinna.
28Ianaanna deenni sapim untandu’ mesa tau muane haka baine haka lambi’ mate, iya tä’ mala tala disileba’-leba’i batu sampe mate, anna tä’ mala diande balena, sapo’ tä’um ia la dipassala puäna. 29Sapo’ ianaanna biasam si patandu’ mengkalao dio mai indo sapim, anna deemmi dipaissanni puäna, sapo’ tä’ di najagai manappa, pissananna untandu’ muane haka baine haka lambi’ mate, iya la disileba’-leba’i batu indo sapim sampe mate, anna la dipatei duka’ puäna. 30Ianaanna dipabangonnii alliam sungnga’na, iya tä’ mala tala naponnoi pada indo dipabangonniam sullena sungnga’na. 31Ianaanna änä’-änä’i natandu’, muane haka baine haka, iya la ulalam ia siam duka’ dituhu’i. 32Sapo’ ianaanna mesai sabua’ natandu’, muane haka baine haka, iya la nabaja’ puäna indo sapim tallu pulo doi’ peha’21:32 doi’ peha’: Naua illaam basa Ibrani syikal. Syikal mesa pahhekengam doi’na to Ibrani. lako puäna indo sabua’, anna indo sapim la disileba’-laba’i batu sampe mate.
33Ianaanna deenni tau muäläi tutu’ bujum, battu haka umbo’bä’ bujum21:33 bujum: Bujunna to Israel si mandalam ia tä’ susi bujum inde mai. Deem ia si 13 mete’ mandalanna. Iam too anna si pahallum ditutu’i indana deenni to mehonno’ dokko. Anna indo bujunna tä’ si tappa keissi uwai; deem si uwai uham naampai napangngissiam. anna tä’i natutu’i, pissananna mehonno’ dokko sapim daka keledai haka, 34iya tä’ mala tala nabaja’ doi’ indo puäna bujum sulle bala’na lako puäna indo olo’-olo’, sapo’ indo bakkena olo’-olo’ la naala ia indo puäna bujum. 35Maka’ deem sapinna mesa tau untandu’ sapinna tau senga’ anna matei, iya la nabalu’ indo sapim to patandu’, anna napa’duai allinna, anna indo sapim mate la napa’dua balena. 36Sapo’ ianaanna si bassa’i patandu’ indo sapim mengkalao dio mai, sapo’ tä’ di najagai manappa puäna, iya la dipopambala’i indo puäna, la nabala’i napapadai padanna, sapim nabala’i sapim, sapo’ indo sapim mate la naala ia indo to dipopambala’i.>>
22Ätoham diona to dipopambala’i
1Anna mane naua: <<Ianaanna deenni tau umboko mesa sapim battu haka mesa domba anna natunui battu haka nabalu’, iya la dipopambala’i susi inde: indo sapim la nabala’i lima sapim anna indo domba la nabala’i appa’ domba.
2Ianaanna deenni mesa pa’boko kalambisam mahassam mangkoka wattu bengi, anna dipongkoi sampe mate, iya tä’ la dipassala indo to papongko; 3sapo’ ianaanna masiä ham mane napongkoi sampe mate, iya la dipassala ia.
Mesa pa’boko la nabala’i asam pada pabokona; sapo’ maka’ tä’ deem akanna indo pa’boko, iya kalena la dibalu’ dibala’iam indo pabokona. 4Maka’ da’da’pi indo pabokona, sapim daka, keledai haka, domba haka, iya la napasule indo pabokona anna la nabala’ipi penduam tiluppi’.
5Ianaanna deenni tau ullamba’ olo’-olo’na dio baha’ba’na battu haka bela’ anggurna, pissananna lambam di lako baha’ba’na tau senga’ mangkukkui, iya tä’ mala tala nabala’i handam mapianna issi bela’na battu haka bua anggurna.
6Ianaanna deem tau ussobe dalame dio baha’ba’na anna mangngandei lako bihinna, lambisam palambangam lako baha’ba’na tau senga’ muande gandum diopi too’na battu haka gandum titombommi, iya tä’ mala tala dipopambala’i indo to palambangam apinna.
7Ianaanna deenni tau umpopeanna doi’na battu haka baham-baham senga’na lako solana, pissananna naboko tau indo baham-baham illaam banuanna indo to muannai, iya maka’ dilambi’ indo to maboko, iya tä’ mala tala napasule indo pabokona anna la dipopambala’ipi penduam tiluppi’. 8Sapo’ ianaanna tä’i dilambi’ indo to maboko, iya tä’ mala tala dibaba lako oloNa Puang Allataala indo puäna banua, battu tä’ si’da hi deem nahumbu-humbu indo ebanganna solana.
9Illaam ingganna kasipengkaam diona to kapa’deam kullena, susinna: sapim, keledai, domba, poheba, battu haka aka-aka senga’, anna deenni tau senga’ muampui, iya pahallu dibaba lako oloNa Puang Allataala indo kaha-kaha ia too. Iai too napasala Puang Allataala, iam mamaja’ penduam tiluppi’. 10Ianaanna deenni tau umpopekambi’ olo’-olo’na lako solana susinna: keledai, sapim, domba, battu haka olo’-olo’ senga’ anna matei indo olo’-olo’ battu haka polo bitti’na, battu nahamba buni lao tau, 11iya tä’ mala tala ma’dandi dio oloKu indo to ma’kambi’ tandana tappa’ indo tula’na naua: <Tä’ deem kuhumbu-humbu indo olo’-olo’na solaku.> Iya la nakannangam indo puäna olo’-olo’ indo pa’dandinna solana, anna tä’ manggi’ dipopambala’i indo to ma’kambi’. 12Sapo’ ianaanna naboko si’dai tau, iya tä’ mala tala dipopambala’i indo to ma’kambi’. 13Ianaanna nasakkai olo’-olo’ to peande, iya pahallu la nababa sule bakkena mendadi tanda kamalesoanna, anna tä’ manggi’ dipopambala’i.
14Ianaanna deenni tau muindam mesa olo’-olo’na solana, anna poloi bitti’na battu haka mate indo olo’-olo’ wattunna tä’ dio heem puäna, iya tä’ mala tala dipopambala’i. 15Sapo’ ianaanna dioi heem puäna, iya tä’ manggi’ dipopambala’i. Ianaanna naindannii indo olo’-olo’, iya la dipasipuha illaammi indanninna.
Sanaka-naka ätoham
16Ianaanna deenni tau usse’de’ mesa änä’ daha to tä’pi deem nasianda’iam, anna solai metindo, iya la nababaam somba anna napobainei. 17Sapo’ ianaanna mokai ambena indo baine la siala indo muane, iya la sumomba soho’ indo muane umba susi sombanna mesa änä’ daha.>>
18Anna mane naua: <<Mesa baine ma’issam-issam daa umpabäi liui tubo.
19Menna-menna umpasola metindo olo’-olo’, tä’ mala tala dipatei.
20Menna-menna umpehumalasam tunuam lako debata senga’ sulibanna lu lako kaleKu, tä’ mala tala dipempa’deam.>>
Ätoham diona to tapa’bela
21Anna mane naua: <<Daa umpakapi’di’ battu haka umpakamase-mase lako to messihuhu illaam bottomu, aka ikoa’ duka’ yolona to messihuhukoa’ dio lembäna Mesir.
22Daa umpakamase-mase to balu baine battu haka änä’-änä’ to pa’dem ambena. 23Ianaanna umpakamase-masei, la kuhingngiam pengkaalaanna, ke mengkaalai lako kaleKu. 24La kende’ aha’Ku lambi’ kupateikoa’ mate naande pa’dam, lambisam la balu bainemua’ anna la bium änä’mu.
25Ianaanna umpa’pehabesangkoa’ doi’mu lako umma’Ku to mase-mase illaam alla’-alla’mua’, iya daa ussinga’ pa’paindanni anna daa umpakeänä’i.
26Ianaanna jubanai padammu unta’ga’, iya tä’ mala tala umpasuleam ke la lendu’um allo, 27aka angga-angga ia la napengngammu’, naammu’iam kalena; maka’ tää’, iya akam ia la napesambu’? Ianaanna mengkaalai dio oloKu, la kuhingngiam, aka Kao to pa’häntängam buaä’.>>
Sanaka-naka pahenta
28Anna mane naua: <<Daa untädo Puang Allataala, anna daa umpanata’i mesa to pepungngu’ illaam bottomu.
29Daa umpa’kalembei umpehumalasam gandummu anna anggurmu. Tä’ mala tala umpehumalasam dio oloKu änä’ uluamu muane. 30Susi toi duka’ lakinna uhu änä’na sapimmu, sola änä’ dombamu. Pasolai indona pitu allona, allo kakahuannapi mane umpehumalasanni dio oloKu.
31Tä’ mala tala masehokoa’ dio oloKu: daa muandea’ balena olo’-olo’ nasakka olo’-olo’ to peande; tibeanni lako asu.>>
23Ätoham diona undu’ lollä
1Anna mane naua: <<Daa umpalombum kada taditekkenni; daa muundu’i to kasalaam mendadi sa’bi tatappa’. 2Daa untuhu’i tau buda umpogau’ kakadakeam. Anna maka’ ussa’biiko mesa kaha-kaha, daa untuhu’i tau buda umpasala’ lao ulalam. 3Daa mualaangam to mase-mase illaam pahhottosam.
4Maka’ deengko muita sapinna battu haka keledainna to umpobaliko bulim, iya popa’pasuleanni lako puäna. 5Maka’ muitako keledainna to ungkabassiko nalokkom babaanna, iya daa umpellei bäbäi. Pahallu la umpamoloi umpesäkäi keledainna.
6Daa umpaolai taia lalam to mase-mase illaam alla’-alla’mua’ ke umpopeballa’i kaha-kahana. 7Pasikambelai kalemu tula’ mampakolo’-kolo’i. Tä’ko mala umpatei to tä’ deem kasalaanna anna to malolo penaba, aka tä’ deem la kumaloloam to ma’gau’ susi. 8Daa untahima doi’ passahoma’dinni, aka doi’ passahoma’dinni umbutai matanna tau lambi’ tä’um muita kamaloloam anna tä’ umpaokko’i okkosanna kaha-kahana to malolo. 9Daa umpaolai taia lalam to messihuhu, aka puhanna’ duka’ ussi’dim maaka susi diuaam to messihuhu, aka yolona messihuhukoa’ duka’ dio lembäna Mesir.
Ätoham diona pa’hettengam anna allo kasalle
10Annam taunna la muolanna’ umpekamuandei litä’mu, 11sapo’ taum kapitunnai too umpelaunni opi tä’ la ungkähä, anna mala indo änä’ gandummu napekamuandei sabottomua’ to mase-mase, anna la’binnai too pabäiammi tia naande olo’-olo’ pangngala’. La umpateem siam duka’ bela’ anggurmu sola bela’ zaitunmu.
12Annam allona la muolaanna’ ungkähä kähängammu, sapo’ allo kapitunnai too tä’ mala tala untohhoam, anna mala mellube duka’ sapimmu sola keledaimmu, sola änä’na sabua’mu, anna to messihuhu illaam bottomu.
13Kambi’ manappai indo tula’ to puha kupengkadaam matim; daa umpengkaalai debata lino, tä’ deem la messubum dio pudu’mu sanganna debata lino.>>
14Anna mane naua: <<Pentallum illaam sataum tä’ mala tala umpadeengkoa’ hame-hame umpa’kasalleiä’. 15Allo kasalle Hoti Tä’ Diboloi Bibi’ Hoti tä’ mala tala umpakahoa’ liua’. Pitu allona la muolaanna’ muande hoti tä’ diboloi bibi’ hoti indo puha kupahentaangkoa’, umba susi puha dileta’ la dipalako illaam bulam Abib, aka bulam etam too muolaanna’ messubum illaam mai lembäna Mesir.23:15 ...muande hoti tä’ diboloi bibi’ hoti...messubum illaam mai lembäna Mesir: Indo pitu allona la naolaam muande hoti tä’ diboloi bibi’ hoti, ia too umpengkilalai kalappasanna to Israel illaam mai lembäna Mesir, aka wattu eta too muande hoti tä’ diboloi bibi’ hoti to Israel, anna mala masimpam messubum illaam mai lembäna Mesir. Aka maka’ la manggi’ naboloi bibi’ hoti, iya tä’ la mala masimpam messubum (Batai Kal 12:14-20, 39; 13:3-8). Sapo’ anggam ia tä’koa’ deem la sule dio oloKu ma’pala’ lo’bä. 16La si umpakahoa’ liua’ duka’ Allo Kasalle Pangkahingisam Baha’ba’, battu diua uhuna umpuppu’ bua pengkähämu. Susi toi duka’ la si umpakahoa’ liua’ Allo Kasalle Umpuppu’ Bua Pengkähä,23:16 Allo Kasalle Umpuppu’ Bua Pengkähä: Mala duka’ diua Allo Kasalle Bahum Daum (Petua’ Sand. 23:34, Disl. 16:12). ke mepahengkoa’ illaam kapuhaanna pa’taungam. 17Pentallum illaam sataum ingganna muane illaam bottomua’ tä’ mala tala sule menomba dio oloKu, Kao PUANG ALLATAALA Debatammu.
18Daa umpasihaui hahana tunuam dipehumalasam dio oloKu anna kinande diboloi bibi’ hoti. Anna tä’ mala umpalambam lako mebengngi’ lompona indo olo’-olo’ to umpehumalasam dio oloKu.
19Taum-taum tä’ mala tala umbaba tama banuanNa DEBATA Puang Allataala to umpenombai handam mapianna pangkahingi’mu.
Daa umpa’nasui bumbunganna indona balena änä’ beke.>>
Pa’dandiam sola pahenta
20Anna mane naua: <<Pennassai, kusua malaika’ napendioloangangkoa’, la nakambi’koa’ najagai lako lalam anna napatettekoa’ lako ongeam to puha kupatokaangkoa’. 21Pehingngii manappai anna untuhu’i tula’na. Daa umpabali-bali lako, aka maka’ patekkakoa’ dio olona tä’koa’ la naampunni, aka deem kuasangKu illaam kalena. 22Sapo’ ianaanna untuhu’i si’da-si’daia’ tula’na, anna umpalako asam indo tula’Ku matim, iya Kao la nasibaliam balimmu anna balinna to umpobalikoa’. 23Aka la napendioloangangkoa’ anna la napatettekoa’ lako botto litä’na to Amori, to Het, to Feris, to Kanaan, to Hewi anna to Yebus, anna la silele kupempa’deam.
24Daa umpenombaia’ debatanna anna mehumala’ lako, anna daa untuhu’i pa’pogausanna. Sapo’ la umpadahikapu’ ingganna pa’pasusianna to napa’debatai anna batu diosä’ kasalle malangka’ to napa’debatai. 25Sapo’ ikoa’-iko tä’ mala tala menombakoa’ lako kaleKu, Kao DEBATA, Puang Allataala to umpenombai, iya la kutamba’ungkoa’ too kupasondoi kinande sola uwai ihu’, anna la kupasikambelakoa’ saki. 26Tala deem baine illaam botto litä’mua’ la mäläi bättäna battu haka la tämänä, anna la kupomahendengkoa’.
27Ingganna indo pa’bottoam to umpentamai la kuhäntäi; la kupatiseham ke’de’, anna la kupasikalumpa’ lao balimmua’ mapappa’ pupunna. 28La kupendioloangangkoa’ umpasikalumpa’ lao balimmu taia inabanna23:28 umpasikalumpa’ lao...taia inabanna: Indo dituli’ illaam basa Ibrani pehapangam naua: la kupasuleam wani buda. anna la kuhambai lao to Hewi, to Kanaan, anna to Het. 29Tä’ la kupissanni illaam sataum kuhambai lao, indana mabium-biunni anna indana naongei membea’ lampa’ olo’-olo’ pangngala’ lambi’ tä’ umbelaa’ muumbä’. 30La kuhisianni kuhambai lao sampe membea’koa’, lambi’ ikoa’ muampuanni anna untadongkonni botto ia too. 31La kuteteangkoa’ katonam mengkalao dio le’bo’ Teberau sule lako le’bo’ Filistin anna mengkalao dio pädä kukku’ sule lako Salu Efrat, aka la kupadokkoangkoa’ lisu pala’mu indo pa’bottoam, nasuhum la uhhambaia’ lao ke ungkatamanna’ botto ia too. 32Daa umpadeem pa’dandiam lako issinna indo botto battu haka lako debatanna. 33Tä’um deem la tohho illaam botto litä’mua’, indana nababaikoa’ madosa dio oloKu. Aka maka’ umpenombaia’ debatanna, iya mendadim too poja bendo’ samelum buaja lako kalemua’.>>
24Haha to umpomannassa Pa’dandianNa DEBATA
1Mane ma’kadai DEBATA lako Musa naua: <<Längängkoa’ tanete pengngolo di Kao sola Harun, Nadab, Abihu anna pitu pulo matua ulunna Israel, anna menombakoa’ mambela-bela dio oloKu. 2Anggam iko mala mengkahuku’ dio oloKu, sapo’ itim ia matim solamu tä’ ia mala mengkahuku’, anna tau buda ia tuli tamala la längäm tanete.>>
3Iya le’ba’um Musa napalandasam to Israel ingganna indo kadanNa DEBATA anna ätoham ia too, iya pada-padam mentimba’ to Israel naua: <<Ingganna kada puha lendu’ dio pudu’Na DEBATA la kikedoam asam.>> 4Puhai ia too, natuli’ asammi Musa indo battakadanNa DEBATA. Tappana makale’ mebengngi’ napake’de’um Musa dapo’ pehumalasam dio sepponna indo tanete, sola sapulo dua batu diosä’ kasalle malangka’ situhu’ budanna pehapuam kasalle änä’na Israel. 5Mane ussuai sanaka-naka änä’ muane Musa, umpehumalasam tunuam ditunu mampu’, anna untunu sanaka-naka sapim laki mendadi tunuam untilalla’i kasikapiaam längäm DEBATA. 6Anna mane naala Musa sabaheam hahana indo sapim napadokko lojam, anna indo sambaheanna napippi’iam indo dapo’. 7Mane naalai Musa indo suha’ naongei tituli’ pa’dandianNa DEBATA, anna nabataanni to Israel. Iya mentimba’um to Israel naua: <<Ingganna battakadanNa DEBATA la kiabiham anna kikedoam.>> 8Anna mane naala Musa indo haha anna napippi’ianni lako to Israel napasindum naua: <<Iam too inde haha to umpomannassa pa’dandianNa DEBATA lako ikoa’ situhu’ pahentaNa.>>
9Puhai, iya le’ba’um längäm tanete Musa sola Harun, Nadab, Abihu anna indo pitu pulo matua ulunna to Israel. 10Sulei längäm muitam Puang Allataala to napenombai to Israel umpehhondoi anggasanna sali batu nilam bahassi susi langi’ masissä’. 11Sikaumpetua’um Puang Allataala indo matua ulunna to Israel, sapo’ tä’ mammi napempa’deam. Iya pada-padam mangngande anna mangngihu’.
Musa yabo Tanete Sinai
12Iya ma’kadam DEBATA lako Musa naua: <<Längängko inde tanete mengngolo di Kao. Yaboi too kubeemmako dua bebä’ batu naongei ätoham sola pahenta to puha kutuli’ la umpa’patuduam lako to Israel.>> 13Iya mengke’de’um Musa sola Yosua to si umpamoloi, anna mengkalaoi längäm indo taneteNa Puang Allataala. 14Sapo’ ma’pakahi’di yolo lako indo matua ulunna to Israel naua: <<Ampaingkam too eta inde sampe ma’pasulekam yabo mai. Inde siam Harun sola Hur umpasolaa’, maka’ deem sahamua’, pellambi’i mammi inde to dua.>> 15Iya tahhu’um ia Musa längäm indo tanete anna nasapu’ gabum. 16Diita pangkähhä kamatandeanNa DEBATA yabo indo Tanete Sinai, anna nasapu’ gabum annam allona. Allo kapitunnai, iya napa’kadaim DEBATA Musa illaam mai indo gabum. 17Naita to Israel indo pangkähhäna kamatandeanNa DEBATA anggasanna api la meä’bäi yabo pusu’na indo tanete. 18Iya tahhu’ lium Musa längäm indo tanete umpa’tängäi indo gabum. Appa’ pulo allona appa’ pulo benginna tohho yabo indo tanete.
25Kema Kapenombaam anna Pa’hettengam illaanna
Bua pemala’ ma’kalolosam
1Mane ma’kadai DEBATA lako Musa naua: 2<<Uaanni to Israel anna napasehei sanaka-naka hupanna ebangam la mendadi bua pemala’na lako kaleKu. Hempunni indo bua pemala’ ia too, dio mai ingganna to tigaha’ penabanna. 3Indo bua pemala’ to napasehe to Israel, la uhhempum susinna: bulabam, peha’, tembaga; 4bännä malibulum, bännä mellolo pao, bännä kasa eja, sampim linen25:4 sampim linen: Sahhupa bännä/sampim dipapia dio mai bätäna tanangam diuaam rami kiha-kiha 1 - 3 mete’ malangka’na. malängngo’, bulu beke, 5lollo’ domba laki diwante’ malea, lollo’na olo’-olo’ malängngo’, anna kaju akasia; 6minnä’ zaitun la dipoballo, bauam bubanau’ la diboloiam piha minnä’ zaitun mendadi minnä’-minnä’ si dipake massehoi anna mallanti’, anna la dipotunuam bubanau’ piha, 7batu permata isanga krisopras anna batu permata senga’ si ditehe dio baju efod anna dio pesapu’ dadanna Sando Too’.
8La muuaam toi duka’ anna napapiannä’ ongeam maseho, anna mala tohhoä’ illaam alla’-alla’na. 9La napasusii indo Kema Kapenombaam anna ingganna pahamaka’ illaanna situhu’ indo la kupaitaiko.>>
Patti Pa’dandiam
10Mane nauai: <<Uaanni to Israel anna unggahagai mesa patti, kaju akasia la napapia, dua singkum satangnga kalandona, sasingkum satangnga kalua’na, anna sasingkum satangnga malangka’na. 11La ussapu’ bulabam ma’nini, susi illaanna teem sulibanna, anna la umpalapi’i pamihim bulabam pali’ lao yabona. 12Tolloi appa’ galege’-lege’ bulabam anna umpasandai lao appa’ sikunna dua dio sa’de mesanna anna dua dio sa’de sabalinna. 13La mualako kaju akasia unggahaga pebullena anna la ussapu’ bulabam. 14La ussollo’ indo pebullena tama indo galege’-lege’ dio sa’dena patomali indo patti, anna mala si dibulleam indo patti. 15Indo pebullena la sitonda liu indo galege’-lege’, tä’ mala diäläi illaam mai.
16Indo patti la umpa’pongngei dua bebä’ batu to dipantuli’i pahenta la kubeengko. 17La unggahaga tutu’na indo patti diuaam tutu’ diongei diampunni dosa, bulabam ma’nini la umpapia, dua singkum satangnga kalandona anna sasingkum satangnga kalua’na. 18Anna la unggahaga duka’ dua kerub25:18 kerub: Sahhupa siam duka’ malaika’, dipapia susi to ma’penaba ma’pani’, umpa’patandaam kamatandeanNa Puang Allataala anna tanda kadioanNa heem. bulabam la untampa tä’ la untollo, la umpayabo sipatomaliam indo tutu’ diongei muampunni dosa. 19Mesa dio tämpä’ mesanna anna mesa dio tämpä’ sabalinna. Indo bulabam to untampa tutu’ diongei diampunni dosa la bulabam ia siam duka’ untampa kerub anna umpadekke’i yabo sipatomaliam tämpä’na. 20Indo kerub bassim la tiballa’ pani’na yabo, ussamboi indo tutu’ diongei muampunni dosa, anna la sitingngajo bassim mennenne’ dokko indo tutu’ diongei muampunni dosa.
21Patamai indo patti indo dua bebä’ batu to dipantuli’i pahenta to la kubeengko, mane untutu’i indo tutu’ diongei muampunni dosa. 22Etam too la kuongei umpellambi’iko. La kutulasangko ingganna pahentaKu yabona indo tutu’ diongei diampunni dosa illaam alla’na indo kerub yabo indo Patti Pa’dandiam. Ingganna pahenta ia too la umpalandasam lako to Israel.>>
Meja ongeam hoti dipehumalasam
23Mane nauai: <<Gahagai duka’ mesa meja, kaju akasia la umpapia, dua singkum kalandona, sasingkum kalua’na, anna sasingkum satangnga malangka’na. 24La ussapu’ bulabam ma’nini indo meja, anna la unggahagaam pamihim bulabam pali’ lao bihinna. 25La unggahaga duka’ pamihim papam pali’ lao sa’dena sapala’ kalua’na, mane umpalapi’i polei pamihim bulabam pali’ lao indo pamihim papam. 26La untollo duka’ appa’ galege’-lege’ bulabam, mane umpadekke’i yabo appa’ sikunna indo meja umpasandai appa’ bitti’na. 27Indo galege’-lege’ la dipasikahuku’ indo pamihim papam dio sa’dena la dipassollo’i tama pebulle, anna mala si dibulle indo meja. 28Pahallu la kaju akasia umpapia pebullena anna la disapu’ bulabam, iam too la si dipake umbulle indo meja. 29Gahagai pihim, ihusam, tangkihi’ gege, anna lojam-lojam la dipa’pongngei bua pemala’ dipopantebo’. Ingganna ia too sangngim bulabam ma’nini la umpapia. 30Anna tä’ deem la lo’bä hoti dipehumalasam dio oloKu yabo indo meja.>>
Andihi lampu
31Mane nauai: <<La unggahaga toi duka’ andihi lampu bulabam ma’nini la umpapia. La untampa indo bulabam umpapia too’na, bätäna, täke buana, kalopä’ buana, anna buana. Pahallu la salenggam bulabam umpapia indo andihi lampu. 32La annam täkena messubum illaam mai sa’dena: tallu dio sa’de tandai kaihi tallu dio sa’de tandai kanam. 33Mesa oi too täkena tallu todo’ oom kalopä’ täkena susi bunga-bunga badam. Sangngim deem kalopä’ buana anna buana; la tallu todo’ asam duka’ kalopä’na indo täke senga’na. La umpasusi asammi too indo annam täke messubum illaam mai indo andihi lampu. 34Anna indo bätäna la umpapia ia appa’ todo’na kalopä’ bätäna susi bunga-bunga badam, anna la sitonda kalopä’ buana sola buana. 35Gahagai duka’ mesa susi kalopä’ bua dio ahena kasitammuanna too’ täke uhuna, dio ahena kasitammuanna too’ täke kaduanna, anna dio ahena kasitammuanna too’ täke katallunna indo annam täke messubum illaam mai sa’dena indo andihi lampu. 36Indo la untampa kalopä’ bua dio ahena kasitammuanna too’ täke la indo siam salenggam bulabam ma’nini to la napapia bätäna indo andihi lampu. 37Gahagai pitu lampu, anna umpaokko’i umpasandai yabo tämpä’na indo andihi lampu, anna mala paindo masiä’ lako olona. 38Gahagai duka’ pesepi’ sombum ke puppu’um sola petahimai lattona bulabam ma’nini la umpapia. 39Mesa talenta25:39 mesa talenta: Pada tallu pulo lima kilo timbanganna bulabam. bulabam ma’nini la unggahaga indo andihi lampu sola ingganna pahamaka’na. 40Pengkilalai manappai le, ingganna ia too la umpasusii indo to puha kupaitaiangko yabo inde tanete.>>
26Kema Kapenombaam
1Mane nauai: <<Gahagai Kema Kapenombaam la sapulo lamba’na sampim umpapia. Bännä linen malängngo’, bännä malibulum, bännä mellolo pao, anna bännä kasa eja la ditannum. Summa’i gamba’na kerub dio nasumma’ to majatta massumma’. 2Salamba’ oi indo sampim dua pulo oom kahua singkum kalandona anna appa’ singkum kalua’na. Dadi indo sampim la pada-pada kalua’na anna kalandona. 3Lima lamba’na indo sampim la dipasiampim-ampim mendadi salamba’, anna la diampim susi siam duka’ indo limapi senga’na. 4Talinga-lingai dio bihim kalandona indo sampim diampim uhuna, la sampim malibulum umpake, anna la umpateem siam duka’ indo sampim diampim kaduanna. 5La lima pulo talinga-linga umpadekke’ dio indo sampim diampim uhuna, anna la lima pulo siam duka’ indo sampim diampim kaduanna. Indo talinga-linga la pantam sipatu-patu. 6Gahagai lima pulo pekädä-kädä patomali, bulabam la umpapia la dipasikädäam indo dua lamba’ sampim puha diampim, nasuhum mendadi salamba’um la papana sitonda hindinnam indo Kema Kapenombaam.
7Gahagai duka’ sampim bulu beke la sapulo mesa lamba’na la mendadi papana sitonda hindinna indo Kema Kapenombaam lapi’ kaduanna. 8Mesa oi indo sampim bulu beke tallu pulo oom singkum kalandona anna appa’ singkum kalua’na. Dadi, indo sapulo mesa lamba’na sampim la pada-pada kalua’na anna kalandona. 9Lima lamba’na la umpasiampim-ampim mendadi salamba’, anna annam lamba’na la umpasiampim-ampim duka’ mendadi salamba’. Indo to annam lamba’na dipasiampin-ampim, la ulluppi’ tängä indo ampim kaannanna mendadi pelapa’ dio olona indo kema. 10Talinga-lingai dio bihinna indo sampim diampim uhuna la lima pulo talinga-linganna, anna lima pulo siam duka’ indo sampim diampim kaduanna. 11La unggahaga duka’ lima pulo pekädä-kädä tembaga la umpapia, anna umpasikädänni talinga-linganna indo dua lamba’ sampim to puha diampim, anna mala silombum mendadi salamba’. 12Indo to lima lamba’na dipasiampim-ampim la kadobe-dobe ia bahe duanna dio boko’na indo Kema Kapenombaam aka dipopelapa’um bahe duanna dio olona. 13Bihinna indo sampim bulu beke pabäi kadobe-dobe sisasingkungam patomali sa’dena indo Kema Kapenombaam mendadi pelapa’ sa’de. 14La unggahagapi duka’ pesambona sitonda hindinnam indo kema salapi’ lollo’ domba laki diwante’ malea, anna lollo’na olo’-olo’ malängngo’ la umpalapi’iam polepi yabona.
15La unggahaga duka’ andihi dipasiundu’ dikatea’i alla’na kaju akasia la umpapia mendadi pahamaka’na indo Kema Kapenombaam. 16Mesa oi indo andihi dipasiundu’ dikatea’i alla’na sapulo oom singkum kalandona anna sasingkum satangnga alla’na indo andihi dipasiundu’. 17Mesa oi too indo andihi dipasiundu’ bassim diotim oom dio tämpä’ tando dokkona anna mala sitohoi. La umpateem asammi too pada indo andihi dipasiundu’na Kema Kapenombaam. 18Papiai dua pulo andihi dipasiundu’ la dio sa’de tandai selatanna indo Kema Kapenombaam, 19anna gahagai appa’ pulo pentokoam peha’ la napentokoi indo dua pulo andihi dipasiundu’. Dua pentokoam mesa oi indo andihi dipasiundu’, nasimesai indo dua otinna. 20Susi toi duka’ sa’dena indo Kema Kapenombaam tandai utara, gahagai dua pulo andihi dipasiundu’ 21anna appa’ pulo pentokoam peha’. Dua pentokoam mesa oi indo andihi dipasiundu’. 22Dio boko’na indo Kema Kapenombaam, battu diua tandai katampusam, gahagai ia annam andihi dipasiundu’. 23La umpapia polepi duka’ dua andihi dipasiundu’ dio sikunna patomali dio boko’na indo Kema Kapenombaam. 24Indo dua andihi dipasiundu’, la dipaundu’iam polepi indo andihi dipasiundu’ dio sikunna sipatomaliam mengkalao dio sule längäm la napasianda’i susi galege’-lege’. 25Dadi, la kahua andihi dipasiundu’ dio boko’ sitonda sapulo annam pentokoanna peha’ dipapia, dua pentokoam mesa oi indo andihi dipasiundu’.
26La unggahaga duka’ sapulo lima pesulu’ kaju akasia la umpapia, lima pesulu’ dio sa’de mesanna indo kema, 27lima pesulu’na dio sa’de kaduanna, anna lima pesulu’na indo andihinna Kema Kapenombaam dio boko’, battu diua tandai katampusam. 28Indo pesulu’ illaam tängäna andihi, la umpadekke’ bahe tängäna längäm indo andihi dipasiundu’, salolo tungngette’ mengkalao dio tämpä’ sabalinna sule lako tämpä’ sabalinna. 29Indo andihi dipasiundu’ la sangngim ussapu’ bulabam; indo galege’-lege’ la dipassollo’i tama pesulu’ la bulabam dipapia; anna indo pesulu’na la ussapu’ bulabam. 30Pake’de’i Kema Kapenombaam la umpasusii indo to kupaitaiangko yabo inde tanete.
31La unggahaga sampim pesapa’, bännä malibulum, bännä mellolo pao, bännä kasa eja, anna bännä linen malängngo’ la ditannum. La disumma’ gamba’na kerub dio, napapia to majatta massumma’. 32Gahagai appa’ andihinna indo sampim pesapa’, kaju akasia la umpapia la disapu’ bulabam, anna padekke’i indo sampim pesapa’ lako indo passedangam bulabam dio indo andihi, anna la dipopentoko indo andihi dokko appa’ pentokoam peha’. 33Indo sampim pesapa’ la umpadekke’ sipatu yabo mai indo pekädä-kädä to umpasianda’i indo sampim dipopapa. Anna mane umbaba tama indo Patti Pa’dandiam, paillaanni tandai tamanna indo sampim pesapa’. Indom too sampim pesapa’ la mualla’i Tambim Maseho anna Tambim Handam Maseho. 34Anna mane untutu’i tutu’ diongei diampunni dosa indo Patti Pa’dandiam illaam indo Tambim Handam Maseho. 35Indo meja ongeanna hoti dipehumalasam, la umpaillaam tando illaanna mai indo sampim pesapa’, illaam sa’de tandai utarana Kema Kapenombaam. Anna pake’de’i indo andihi lampu illaam sa’de tandai selatanna Kema Kapenombaam sitingngajo indo meja.
36La umpapia duka’ sampim pesapa’ la ditutu’iam ba’bana indo Kema Kapenombaam, bännä malibulum, bännä mellolo pao, bännä kasa eja, anna bännä linen malängngo’ ditannum la disumma’ sanda dio hupanna. 37La unggahaga lima andihi, kaju akasia la umpapia la umpantoke’i indo sampim pesapa’ anna la ussapu’ bulabam. La deem passedanganna, bulabam la umpapia, anna la untollo lima pentokoanna tembaga la napentokoi indo andihi.>>
27Dapo’ pehumalasam
1Mane nauai: <<La unggahaga duka’ dapo’ pehumalasam la ma’sulapa appa’, kaju akasia la umpapia. Lima singkum kalandona, lima singkum kalua’na, anna tallu singkum malangka’na. 2Yabo appa’ sikunna la unggahaga appa’ anggasanna tandu’. Indo tandu’ la unggahaga silombum indo dapo’, anna la ussapu’ tembaga. 3Gahagai duka’ kuhim la umpa’pongngei täiabu, peso’do’ dapo’, lojam-lojam, pesalo ma’häkä’, anna pa’pongngeam hobaja. Ingganna indo ebangam dapo’ la sangngim tembaga unggahaga. 4Ananni talikaba’ tembaga susi paha-paha, anna gahagai appa’ galege’-lege’27:4 appa’ galege’-lege’: Indo appa’ galege’-lege’ la dipassollo’i tama pebulle. umpadekke’ lako appa’ sikunna sipatu illaam mai indo paha-paha. 5Indo paha-paha tembaga la umpadekke’ illaam hoäna indo dapo’ tando dokko ia anna pamihim sa’dena, la umpaola dio mai ibi’na sampe bahe tängä längäm malangka’na indo dapo’. 6La unggahaga pebullena indo dapo’, kaju akasia la umpapia anna ussapu’i tembaga. 7Sollo’i indo pebulle tama indo galege’-lege’ dio sa’dena indo dapo’ ke la umbullenna’ lao. 8Indo dapo’ papam la umpapia läbä hoäna, susi indo kupaitaiangko yabo inde tanete, la umpasusim too umpapia.>>
Pa’hanteanna Kema Kapenombaam
9Mane nauai: <<Balai lao pali’ pa’hanteanna indo Kema Kapenombaam. Dio tandai selatan, la dihindim sampim linen malängngo’ ditannum, sahatu’ singkum kalandona. 10La diandihii dua pulo andihi tembaga anna dua pulo siam duka’ pentokoanna tembaga dipapia. Anna pekädä-kädä dio indo andihi sola talikaba’ to la umpasianda’-anda’i peha’ la dipapia. 11La susi siam duka’ dio tandai utara: sahatu’ singkum indo hindim sampim, dua pulo andihinna, dua pulo pentokoanna, tembaga dipapia, anna pekädä-kädä dio indo andihi sola talikaba’ to umpasianda’-anda’i, la peha’ ia dipapia. 12Pämpäna indo pa’hanteam tandai katampusam la uhhindim ia sampim lima pulo singkum kalandona, sapulo andihinna anna sapulo pentokoanna. 13Anna pämpäna tandai mata allo, lima pulo ia singkum. 14Indo pämpäna tandai mata allo, la dihindim sampim sapulo lima singkum sa’dena ba’ba tandai kaihi, tallu andihinna anna tallu pentokoanna. 15Susi siam duka’ sa’de tandai kananna ba’ba la dihindim sampim sapulo lima singkum, tallu andihinna anna tallu pentokoanna. 16Ba’bana indo pa’hanteam dio tandai mata allo, la ditutu’i dua pulo singkum sampim pa’tannum: bännä malibulum, bännä mellolo pao, bännä kasa eja, anna bännä linen malängngo’ ditannum, anna disumma’ sanda dio hupanna. Indo sampim tutu’ ba’ba’na pa’hanteam appa’ andihinna anna appa’ pentokoanna. 17Ingganna indo andihi pali’ lao pa’hanteam la dipasianda’-anda’i umpake talikaba’ peha’, anna ingganna pekädä-kädäna peha’ siam duka’ dipapia, anna pentokoanna tembaga dipapia. 18Hindinna indo pa’hanteam la sahatu’ singkum kalandona, lima pulo singkum pämpäna, anna lima singkum malangka’na, bännä linen malängngo’ ditannum, anna pentokoanna sangngim tembaga dipapia. 19Anna ingganna pahamaka’ dipake illaam indo Kema Kapenombaam sola ingganna tana’-tana’na, anna tana’-tana’na indo hindim pa’hanteam, sangngim tembaga la dipapia.>>
Diona minnä’na lampu
20Mane nauai: <<La muuaam to Israel anna nababangko sule minnä’ zaitun ma’nini dilambu’, la dipangngissiam lampu, anna mala lekke’ liu. 21Illaam indo Kema Kasitammuam DEBATA27:21 Kema Kasitammuam DEBATA: Tontä siam indo Kema Maseho/Kapenombaam to ditula’ illaam hondongam 26. Harun sola änä’na muane la ullima’i indo lampu tandai illaanna mai indo sampim pesapa’ to mualla’i Tambim Maseho anna Tambim Handam Maseho mengkalao mahammo sule lako mebengngi’ dio oloKu. Iam too inde ätoham la napehhondoi to Israel sola pessubunna ma’tintingam sule lako ampo-ampona.>>
28Poheba sando
1Mane nauai: <<La untambai Harun, kakammu sola änä’na isanga: Nadab, Abihu, Eleazar anna Itamar, aka puham kupilei illaam mai alla’-alla’na to Israel la mendadi sando dio oloKu. 2La umpapiam senga’ poheba sando kakammu, Harun, anna mala kapuangam anna kandebataam. 3Tambai indo ingganna to majatta mandasi’, to puha kumana’ kamanähängam. Uaanni anna undasisanni poheba Harun, anna umpasähä’i la muanda’i babangam sando dio oloKu. 4Indo poheba la nadasi’, susinna: pesapu’ dada, baju efod,28:4 baju efod: Susi babu’ kaha sapo’ si dipelluä anna dibeke’. Mala duka’ diua babu’ sando. juba takekängkä, juba tando tama ma’balo-balo, saputangam lepom, anna beke’. Iam too inde mai poheba sando la didasisam kakammu Harun sola änä’na, anna mala muanda’i babangam sando dio oloKu. 5Indo to majatta la muala bännä bulabam, bännä malibulum, bännä mellolo pao, bännä kasa eja, anna bännä linen malängngo’. 6Indo baju efod la ditannum umpake bännä bulabam, bännä malibulum, bännä mellolo pao, bännä kasa eja, anna bännä linen malängngo’, natannum to majatta tumannum. 7Indo baju efod, pahallu dipasitonda loppo’ dua pekabe’ palempem la dipasisäke’ tämpä’na lambi’ sitammu tämpä’ palempenna patomali indo baju efod. 8Sulibanna ia too, la deempi beke’na indo baju efod la dipomatuntum siam duka’ tannunna, anna la bännä ia siam indo to ditannum baju efod: bännä bulabam, bännä malibulum, bännä mellolo pao, bännä kasa eja, anna bännä linen malängngo’, anna dipasidasi’um indo baju efod. 9La muala dua batu permata krisopras anna ussuha’i dio sanganna sapulo dua änä’na Israel,28:9 Israel: Puang Allataala mueli’ sanganna Yakub mendadi Israel. Petua’i dio Kad 35:10. 10annam dio indo batu uhuna anna annam dio indo batu kaduanna, la dihuntum kaka. 11Umba susi pande batu permata ussuha’ stempel, la umpateemmi too ussuha’ dio indo batu permata sapulo dua sanganna änä’na Israel.28:11 änä’na Israel: Indo Israel, tontäm Yakub aka naeli’ Puang Allataala sanganna (batai Kad 35:10). Pamihinnii kaba’-kaba’ bulabam dianam. 12Puhai too, umpadekke’um indo batu permata lako indo dua pekabe’ palempenna indo baju efod mendadi tanda la ungkilalai pessubunna Israel. Dadi, maka’ too le’ba’ oom Harun mengngolo lako DEBATA, iya umbaba oom sanganna änä’na Yakub yabo palempenna mendadi tanda pengkilalaam. 13La unggahagapi duka’ kaba’-kaba’ bulabam dianam, 14anna dua kahahham bulabam ma’nini diampingngi’. Puhai too, umpessäkesammi indo kahahham lako indo kaba’-kaba’ bulabam.
15La unggahaga duka’ pesapu’ dada la dipake umpengngissanni pa’elo’Na DEBATA, pa’papianna mesa to majatta. Indo pesapu’ dada la susi siam indo baju efod, la ditannum umpake bännä bulabam, bännä malibulum, bännä mellolo pao, bännä kasa eja, anna bännä linen malängngo’. 16La ma’sulapa appa’ ke diluppi’ duam, sadäkäm kalandona anna sadäkäm kalua’na. 17Tehei dio appa’ bahhi’na batu permata. Bahhi’ uhuna: batu yaspis malea, krisolit, anna malakit. 18Bahhi’ kaduanna: batu darah, lazurit, anna yaspis malibulum. 19Bahhi’ katallunna: batu ambar, akik, anna kecubung. 20Bahhi’ kaappa’na: batu permata pirus, krisopras, anna nefrit. Indo batu permata la dipamihinni kaba’-kaba’ bulabam illaam bahhi’na simesa-mesa. 21Umba susi sapulo dua sanganna änä’na Yakub, la padam too duka’ indo batu permata. Mesa oi too indo batu permata, disuha’ oom dio susi stempel mesa sanganna indo sapulo dua pehapuam kasalle änä’na Israel. 22Indo pesapu’ dada la umpapiaam duka’ dua lolo kahahham bulabam ma’nini susi uli’ dikahahham. 23Gahagai duka’ dua galege’-lege’ bulabam, anna umpadekke’i lako sipatomaliam sikunna indo pesapu’ dada. 24Puhai too, umpessäkesammi indo dua lolo kahahham bulabam lako indo dua galege’-lege’ dio sipatomaliam sikunna indo pesapu’ dada. 25Anna tämpä’ sabalinna indo dua lolo kahahham bulabam la umpopengngala lako ia indo dua pamihinna batu permata. Dadi, indo dua tämpä’na kahahham bulabam dipessäkesam lako indo pekabe’ yabo palempenna indo baju efod tandai lako olo. 26Gahagai duka’ dua galege’-lege’ bulabam, anna umpadekke’i lako sikunna patomali indo pesapu’ dada tandai tamanna, siissona indo baju efod. 27Gahaga toi duka’ dua galege’-lege’ bulabam, mane umpadekke’i lako indo dua pekabe’ palempenna indo baju efod tandai lako olo, dio-dio saidi’, siampe’ pendekkesanna indo pekabe’ lako indo baju yabo tondonna indo beke’ baju. 28Anna mane umpasisäke’ indo galege’-lege’na pesapu’ dada anna galege’-lege’na baju efod umpake bännä malibulum, lambi’ hapa’ liu indo pesapu’ dada yabo tondonna beke’ baju to ditannum matuntum, anna tä’ deem tibeho dio mai baju efod. 29Dadi, maka’ too tama oom Tambim Maseho Harun, iya si yabo liu ba’ba buana sanganna sapulo dua änä’na Israel tisuha’ dio indo pesapu’ dada dipangngissanni pa’elo’Na DEBATA, mendadi tanda pepakilalaam dio oloKu. 30Illaam hoäna indo pesapu’ dada la umpaillaam Urim anna Tumim,28:30 Urim anna Tumim: Dua hupa pangkakka’ maseho si napake sando umpengngissanni pa’elo’Na DEBATA. Sapo’ tä’ diissam diaka amo susi dipake. la si napayabo ba’ba buana Harun ke laoi mengngolo lako kaleKu. La tontä liu napayabo ba’ba buana Harun anna mala diissam pa’elo’Na DEBATA lako to Israel.
31La unggahaga duka’ juba takekängkä tando tamanna indo baju efod, sampim malibulum asam la umpapia. 32So’boi tängäna la dipa’paolai ulu. La dipamihinni sasehe’ sampim pa’tannum indo to diso’boi susi bahoko baju indana sesse’i. 33Dio tahämpä’na indo juba takekängkä la dipapali’i lao hombe-hombe anggasanna bua kaju delima bännä malibulum dipake, bännä mellolo pao, anna bännä kasa eja, anna dipanalla’i gihim-gihim bulabam, 34lambi’ siolla’ gihim-gihim bulabam anna bua kaju delima si mesaam lelem pali’ tähämpä’na indo juba takekängkä. 35Pahallu la si napake Harun ke umpalako oom pa’hettengam. Anna pahallu la dihingngi moninna ke mentama oom indo Tambim Maseho mengngolo lako DEBATA anna ke messubunni, indana matei. 36Gahagai duka’ pita bulabam ma’nini la umpapia; la ussuha’ lako susi stempel naua: <Dipasähäsam DEBATA.> 37Mane mualai bännä malibulum anna umpatondai indo pita, mane umpadekke’i lako indo saputangam lepom tandai lako olona. 38Indo pita disuha’ la napayabo kidena Harun, la umpopa’tandaanni diua Harun la umpendudum ingganna kasalaanna to Israel wattunna nababaam bua pemala’na to napaseheam DEBATA. La tontä liu napayabo kidena Harun anna mala kutahima to Israel.
39La untannungam duka’ juba tando tama ma’balo-balo, bännä linen malängngo’ untannum. Anna la umpapia duka’ saputangam lepom, sampim linen malängngo’ la umpapia, anna beke’ la disumma’ sanda dio hupanna. 40La umpapiaam duka’ änä’na Harun juba tando tama, beke’, anna saputangam masadi’28:40 saputangam: tä’ susi indo saputangam lepom napake Harun, sapo’ saputangam biasa ia (saputangam masadi’ tindä’ längäm battu diua saputangam podä)., anna mala kapuangam anna kandebataam. 41Ingganna indo poheba sando, la umpapohebaiam Harun sola änä’na, anna mane untolloi minnä’-minnä’, ullanti’ anna umpasähä’, lambi’ mala muanda’i babangam sando dio oloKu. 42Papianni duka’ talana kapodi’ sampim linen la umpapia, indana tandaanni kambeläna. Indo talana la peangga apam. 43La si napake Harun sola änä’na indo talana kapodi’ ke tama oom Kema Kasitammuam DEBATA battu haka lako dapo’ dipantunui tunuam la umpalako hettem dio ongeam maseho, indana kasalaanni dio oloKu, lambi’ mate. Ätoham ia too la napehhondoi Harun sola änä’na ma’tintingam lako ingganna lapi’ pessubunna.>>
29Dipopellatte babanganna Harun sola änä’na
1Mane nauai DEBATA: <<Susi inde la umpogau’ umpasähä’ Harun sola änä’na, anna mala muanda’i babangam sando dio oloKu: Alai mesa sapim laki mangnguha anna dua domba laki tä’ deem sassainna. 2Alai duka’ tappum gandum maninnim, anna umpapiai tallu hupa hoti tä’ diboloi bibi’ hoti. Uhuna hoti tä’ diminnä’i; kaduanna hoti peppä’ diminnä’i mane didängei; katallunna hoti manipi’ puhapi didänge mane disussui minnä’. 3Patama asanni baka indo hoti anna umpehumalasanni dio oloKu sola indo mesa sapim laki anna dua domba laki.
4Puhai too, umpasolam Harun sola änä’na lako olo ba’bana Kema Kasitammuam DEBATA anna undio’i. 5Mane umpapohebai Harun indo juba tando tama, juba takekängkä, baju efod, pesapu’ dada, anna beke’na baju efod; 6papakei duka’ indo saputangam lepom anna umpatalii indo pita maseho bulabam ma’nini to disuha’. 7Anna mane mualako minnä’-minnä’ si dipake massehoi anna mallanti’, anna ullanti’i untolloi ulunna. 8Puhai too, umpasolam änä’na Harun mengkahuku’ anna umpapohebai indo juba tando tama. 9Anna mane umpabeke’i Harun sola änä’na, anna umpasaputanganni. La susim too ullanti’ko Harun sola änä’na la muanda’i babangam sando. Iam too inde ätoham la napehhondoi ma’tintingam lako ingganna lapi’ pessubunna.
10Puhai too, umbabam indo sapim laki lako olona Kema Kasitammuam DEBATA, mane ussuai Harun sola änä’na uhhaka’ ulunna indo sapim laki. 11Hehe’i indo sapim laki dio oloKu, dio olona Kema Kasitammuam DEBATA. 12Alai saidi’ hahana indo sapim laki anna untu’doi tahuno-hunomu mane ussussuianni indo appa’ tandu’na indo dapo’ pehumalasam, anna indo la’binna la untolloam dio pali’ lao pollo’na indo dapo’. 13Mane muala asanni lompona to ussapu’ tambu’, tämpä’ atena, dua balekke’na anna ingganna lompo to ussapu’i, anna untunu mampu’i yabo indo dapo’. 14Sapo’ balena, lollo’na, anna tambu’na la untunu mampu’ ia dio sulibanna ongeam muongeia’ ma’kema. Iam too tunuam pebasei dosana sando.
15Anna mane muala indo domba laki mesa, anna nahaka’i ulunna Harun sola änä’na. 16Puhai too, uhhehe’um mane mualai hahana anna umpippi’ianni pali’ lao indo dapo’. 17Mane umbakei situhu’ lesoanna. Basei tambu’na sola gahiginna, mane umpatompoi yabona bale senga’na anna ulunna. 18Puhai too, untunu mampu’ asammi indo balena domba laki yabo dapo’ pehumalasam. Iam too tunuam ditunu mampu’, mesa bua pemala’ bubanau’ dio oloKu, indo si diuaam bua pemala’ ditunu dio oloKu.
19Anna mane muala indo domba laki kaduanna, anna nahaka’i ulunna Harun sola änä’na. 20Puhai too, uhhehe’um mane mualai hahana saidi’ anna ussussuianni daum talinga kananna Harun sola änä’na, tahuno kasallena lima kananna anna tahuno kasallena bitti’ kananna, anna la’binna la umpippi’iam pali’ lao indo dapo’. 21Anna mane muala saidi’ indo haha yabo dapo’, anna indo minnä’-minnä’ dipake massehoi anna mallanti’ ingngena’ anna umpippi’ianni Harun sola pohebana, anna änä’na sola pohebana. Nasuhum maseho kalena Harun sola pohebana, susi siam duka’ änä’na sola pohebana.
22Indo domba laki la muala lompona, lompo dio too’ engko’na, lompo ussapu’ tambu’na, tämpä’ atena, dua balekke’na sola lompo to ussapu’i, apam kananna, aka iam too inde domba laki dipake ullanti’ sando. 23Alai duka’ sapeppä’ indo hoti tä’ diminnä’i, sapeppä’ hoti diminnä’i mane didängei, anna sapeppä’ hoti manipi’ didängei yolo mane disussui minnä’ illaam indo baka naongei hoti tä’ diboloi bibi’ hoti to dipehumalasam dio oloKu. 24Padokkoanni pala’na Harun sola änä’na, mane ussuai naäkä’ längäm oloKu, mendadi bua pemala’ ditandeam längäm oloKu. 25Anna mane muala asam sule dio mai limanna, anna umpatompoi yabona indo untunuam to puha ditunu mampu’ yabo indo dapo’, mane untunu mampu’i, mendadi bua pemala’ bubanau’ dio oloKu; iam too bua pemala’ ditunu dio oloKu. 26Puhai too, mualam dadanna indo domba laki dipake ullanti’ Harun, anna naäkä’i längäm mendadi bua pemala’ ditandeam längäm oloKu, anna iam tiko la tabamu. 27Pasehei indo dadanna to mendadi bua pemala’ ditandeam, anna apanna to mendadi bua pemala’ ditandeam, to dipake ullanti’ Harun sola änä’na. 28Indo bua pemala’ ditandeam la tabana ia Harun sola änä’na, iam too la mendadi pehhondoam la napehhondoi liu to Israel, aka iam too inde bua pemala’ ditandeam. Dadi iai too la mendadi bua pemala’ ditandeam napalako to Israel, diala dio mai tunuam untilalla’i kasikapiaam, anna mendadi bua pemala’ ditandeam längäm oloKu.
29Indo pohebana Harun to puha disehoi, pahallu nalombungam änä’na, anna mala napake ke ditolloim minnä’-minnä’ anna dilanti’ mendadi sando too’. 30Indo poheba la pitu allona napake änä’na Harun to umbala’i mendadi sando too’, ke tamam Kema Kasitammuam DEBATA la umpalako hettem illaam Tambim Maseho.
31Indo domba laki to dipake ullanti’ Harun sola änä’na, la muala balena anna unnasui dio mesa ongeam dipalao senga’. 32Mane naandei Harun sola änä’na napasiandeam indo hoti illaam baka dio olona Kema Kasitammuam DEBATA. 33Indo kinande to dipake umpadeem kasikapiaam wattunna dilanti’i anna disehoi tä’ mala tala naande. Sapo’ tä’ ia mala naande tau biasa, aka kinande ia too sangngim maseho. 34Maka’ too deem mela’bi indo bale sola hoti sule lako mebengngi’, iya pahallu la untunu mampu’ tama api. Tä’um mala diande pole, aka sangngim kinande maseho. 35Susim too lalanna la ullanti’ko Harun sola änä’na, pitu allona la muolaam, umba susi puha kupahentaangko. 36Illaam indo pitu allona, la si umbaba liuko tunuam pebasei dosa mesa sapim laki la untunu sangngallo oi la mendadi tunuam kasikapiaam. Indo sapim ditunu yabo indo dapo’ iam too dipake ussehoi, anna susim too lalanna umpadeem kasikapiaam indo dapo’. Puha oi too umbaba tunuam, umpippi’i oom minnä’-minnä’ bubanau’ anna mala maseho. 37Pitu allona la muolaam umpadeem kasikapiaam ussehoi indo dapo’, lambi’ tä’ deem pada samaseho, anna iai too muissoi indo dapo’ la maseho duka’.>>29:37 la maseho duka’: Deem 3 hupa mala dilemba’iam: (1) Maseho situhu’ peadasam aka maseho busäsam penaba tä’ mala dipopendekke’ (Batai Hag. 2:12-13); (2) Tau biasa battu haka ebangam la tilaka ke muantii mesa ebangam maseho (Batai 2Sam. 6:6-7); (3) Tau battu haka ebangam pahallu maseho yolo mane malai muantii ebangam maseho (Batai Hag. 2:13). Petua’i duka’ Kal. 30:29; Sand. 6:18, 27.
Tunuam mebengngi’ anna mahammo
38Mane nauai: <<Indem ia la si untunu liua’ allo-allo yabo indo dapo’ pehumalasam: dua domba sataummi dadinna. 39Mesa la untunu mebengngi’ anna mesa la untunu mahammo. 40Indo mesa domba la umpehumalasam sola sakilo tappum gandum maninnim, salite’ minnä’ zaitun ma’nini, anna salite’ anggur mendadi bua pemala’ dipopantebo’. 41Anna domba kaduanna la untunu mahammo ia, la susi siam indo to ditunu mebengngi’ la umpasola duka’ tappum gandum, minnä’ zaitun, anna anggur mendadi bua pemala’ dipopantebo’. La mendadi bua pemala’ bubanau’, iam too bua pemala’ ditunu dio oloKu. 42Inde tunuam ditunu mampu’, la dipogau’ liu ma’tintingam lako ingganna lapi’na pessubum, dio olona ba’ba Kema Kasitammuam DEBATA dio oloKu. Aka etam too la kuongei sitammuki’ la ma’battakadaä’ matim. 43Etam too duka’ la kuongei sitammu to Israel, anna la nasehoi kamatandeangKu ongeam ia too. 44La kusehoi indo Kema Kasitammuam DEBATA sola indo dapo’ pehumalasam, anna kusehoi Harun sola änä’na la muanda’i babangam sando dio oloKu. 45La tohhoä’ illaam alla’-alla’na to Israel, anna Kao Puang Allataala la mendadi Debatanna. 46Lambisam la naissam naua: <Abana Iko DEBATA, Puang Allataala to kipenombai to puha untässu’ikam illaam mai lembäna Mesir nasuhum la tohhoKo illaam alla’-alla’ki. Abana Iko DEBATA, Puang Allataala to kipenombai.> >>
30Dapo’ tunuam bubanau’
1Mane nauai DEBATA lako Musa: <<Gahagai mesa dapo’ tunuam bubanau’ kaju akasia la umpapia. 2La ma’sulapa appa’: sasingkum kalandona, sasingkum kalua’na, anna dua singkum malangka’na. La unggahaga duka’ appa’ anggasanna tandu’ la silombum siam indo dapo’. 3Sapu’i bulabam ma’nini yabo salinna, sa’dena pali’ lao, sola indo appa’ anggasanna tandu’. Anna la umpamihinni pamihim bulabam pali’ lao yabona. 4Gahagai siduangam galege’-lege’ bulabam, anna umpadekke’i dio ahena indo pamihim sipatomaliam sa’dena tandai kanam anna tandai kaihi. Indo galege’-lege’ la dipassollo’i tama pebulle, anna malai si dibulle indo dapo’. 5Gahagai pebullena kaju akasia la umpapia, anna ussapu’i bulabam. 6Padioi tandai illaanna mai sampim pesapa’ to dipalabaiam indo Patti Pa’dandiam indo dapo’ tunuam bubanau’, tandai illaanna mai indo tutu’ diongei diampunni dosa to ditutu’iam indo patti to naongei indo dua bebä’ batu dipantuli’i pahenta, to la kuongei sule umpellambi’iko.
7Mesa mebengngi’ Harun la untunu tunuam bubanau’ yabo indo dapo’. La napateem ke mahassam oom umpatoka lampu. 8Susi toi duka’ ke umpau’ oom lampu wattu mahammo, pahallu la si untunu tunuam bubanau’ dio oloKu. Kaha-kaha ia too la umpogau’ liua’ ma’tintingam lako ingganna lapi’ pessubummua’. 9Tä’ si’da-si’da mala ditunu tunuam bubanau’ tää’na biasa dipake yabo indo dapo’, battu haka tunuam ditunu mampu’, bua pemala’ tappum gandum, anna tä’ toi duka’ mala ditolloam bua pemala’ dipopantebo’30:9 bua pemala’ dipopantebo’: Indo bua pemala’ dipopantebo’ kalembasanna anggur diuaam. yabona indo dapo’. 10Pissam sataum tä’ mala tala umpadeem kasikapiaam Harun indo dapo’ tunuam bubanau’ umpake hahana tunuam pebasei dosa to umpadeem kasikapiaam nasussuiam tandu’na indo dapo’. Pissam sataum pahallu la napogau’ kaha-kaha ia too ma’tintingam lako ingganna lapi’ pessubunna, aka indo dapo’ tä’ deem pada samaseho dio oloKu.>>
Doi’ alliam sungnga’na to Israel wattunna dihekem
11Mane nauai lako Musa: 12<<Maka’ la uhhekengko bilanganna to Israel anna muissanni sanaka budanna, iya pahallu si mesa-mesa tau la umpehumalasam doi’ alliam sungnga’na dio oloKu wattunna dihekem, anna mala tä’ nahua pesämbä’ illaam pahhekengam ia too. 13Simesa-mesa tau to la dihekem pahallu umpehumalasam satangnga syikal peha’,30:13satangnga syikal peha’: Mesa syikal kiha-kiha 11, 4 gram. Dadi, satangnga syikal kiha-kiha 5, 7 gram. ditimbam umpake syikal ma’tantu illaam Kema Kapenombaam sipadaam mabanda’na dua pulo gera.30:13 gera: Indo gera mesa batu petimbam handam mahingngam, ahenapi 0, 6 gram. Indo satangnga syikal peha’ iam too bua pemala’ ma’kalolosam lako kaleKu. 14Indo to la dihekem illaam indo pahhekengam, to dua pulom taunna längäm, pahallu la umbaba indo bua pemala’ ma’kalolosam lako kaleKu. 15To makaka tä’ la la’bi satangnga syikal napehumalasam, anna to mase-mase tä’ la kuhäm satangnga syikal napehumalasam wattunna umbaba indo bua pemala’ ma’kalolosam mendadi alliam sungnga’na dio oloKu. 16Hempunni indo doi’ to umpadeem kasikapiaam dio mai to Israel anna umpakei umpake’de’ anna ungkassa’i Kema Kasitammuam DEBATA,30:16 Kema Kasitammuam DEBATA: Tontäm Kema Kapenombaam. anna mala mendadi tanda pepakilalaam lako to Israel dio oloKu diua puhaim umbaja’ alliam sungnga’na.>>
Busso pembaseam
17Mane nauai: 18<<Gahagai mesa busso tembaga la si dipembasei sitonda okkosanna tembaga duka’ la umpapia. Paillaanni alla’na Kema Kasitammuam DEBATA anna dapo’ pehumalasam, anna pangngissii uwai. 19Etam too la si naongei Harun sola änä’na umbasei limanna sola bitti’na. 20Maka’ to la tama oom Kema Kasitammuam DEBATA, pahallu la si umbasei yolo limanna sola bitti’na, indana matei. Susi siam duka’ ke la lakoi indo dapo’ ma’hettem umbaba bua pemala’ ditunu dio oloKu, 21pahallu la umbasei limanna sola bitti’na indana matei. Iam too la si napehhondoi liu Harun sola änä’na ma’tintingam lako ingganna lapi’ pessubunna.>>
Minnä’-minnä’ maseho la si dipake mallanti’
22Mane nauai: 23<<Alai handam mapianna bauam bubanau’ susinna: lima hatu’ syikal mur menguwai,30:23 lima hatu’ syikal: Sipadaam annam kilo mabanda’na. kaju manis bubanau’ bahe duanna budanna mur menguwai, ta’bu busahengngo’ dua hatu’ lima pulo syikal, 24kaju teja30:24 kaju teja: Saidi’ siam tasusi kaju manis sapo’ kuhäm-kuhäm ia angga’na. lima hatu’ syikal ditimbam umpake syikal ma’tantu illaam Kema Kapenombaam, anna minnä’ zaitun mesa hin.30:24 mesa hin: Sahhupa pegantam uwai, kiha-kiha appa’ lite’ issinna.25Ingganna ia too la unggahaga minnä’-minnä’ maseho la si dipake massehoi anna mallanti’, diala dio mai bauam bubanau’ dipasibolo-bolo susi pa’papianna to majatta umpasibolo-bolo bauam bubanau’. Iam too la mendadi minnä’-minnä’ maseho la si dipake massehoi anna mallanti’.
26Minnä’-minnä’ ia siam duka’ la umpake ussussuiam30:26 ussussuiam: ingganna pahamaka’ ke disussui minnä’-minnä’ maseho iam too umpopa’tandaanni diua baham-baham ia too mendadi masehom. Kema Kasitammuam DEBATA anna Patti Pa’dandiam, 27meja sola ingganna pahamaka’ yabona, andihi lampu sola inggana pahamaka’na, anna dapo’ tunuam bubanau’, 28dapo’ pehumalasam sola ingganna pahamaka’na, anna busso pembaseam sitonda okkosanna. 29Pasähä’i ingganna ia too anna mala mahhu maseho. Menna-menna muissoi la maseho duka’. 30La untolloi minnä’-minnä’ Harun sola änä’na anna umpasähä’i la muanda’i babangam sando dio oloKu.
31Anna la muuaam to Israel: <Iam too inde minnä’-minnä’ maseho la si umpakea’ mallanti’ dio oloKu ma’tintingam lako ingganna lapi’ pessubummua’. 32Tä’ ia mala ditolloiam tau biasa minnä’-minnä’ ia too, anna tä’ toi mala umpapiaa’ minnä’-minnä’ la susi pasibolona minnä’-minnä’ ia too. Minnä’-minnä’ ia too maseho, anna pahallua’ muangga’ maseho. 33Menna-menna umpapia minnä’-minnä’ la susi inde pasibolona battu haka napasussuiam tau biasa, tä’ mala tala dihambai ia illaam mai alla’-alla’na to Israel.> >>
Bauam bubanau’ maseho
34Mane nauai lako Musa: <<Alai sanaka-naka hupanna bauam bubanau’, susinna: lite dama’, kalubibi, lite rasamala,30:34 lite rasamala: Saidi’ siam tasusi lite dama’ sapo’ senga’ ia duka’ hupanna si diuaam rasamala. Inde rasamala si tubo dio Turkistan anna lako Timur Tengah. anna kemenyan ma’nini sipada-padaam budanna. 35Ia asanna ia too la umpapia tunuam bubanau’ dipasibolo-bolo susi pa’papianna to majatta umpasibolo-bolo bauam bubanau’, anna la ussiaipi duka’ anna mala tontä liu mapia anna maseho. 36Lambu’i sabaheam sampe maninnim indo bauam bubanau’ to dipasibolo-bolo, anna alai saidi’ umpadio olona Patti Pa’dandiam illaam Kema Kasitammuam DEBATA, indo ongeam to la kuongei umpellambi’iko. Indo bauam bubanau’ to dipasibolo-bolo puha dilambu’ la muangga’a’ tä’ deem pada maseho. 37Tä’ si’da-si’daa’ mala umpapiaam kalemu bauam bubanau’ susi ia too. La muangga’a’ bauam bubanau’ maseho dio oloKu. 38Menna-menna umpapia bauam bubanau’ susi ia too aka la napeudu’i bauanna, tä’ mala tala dihambai ia illaam mai alla’-alla’na to Israel.>>
31Ditodinni Bezaleel anna Aholiab
1Mane ma’kadai DEBATA lako Musa naua: 2<<Pennassai, puham kutodinni Bezaleel änä’na Uri ampona Hur, pessubunna Yehuda, 3anna puham kupasalokko’i Penaba MasehoKu, kubeem kakeakasam, kamanähängam, kapaissangam, anna ingganna hupanna kamajattaam kapapia-pia, 4la napattuju unggahaga pahamaka’ bulabam, peha’ anna tembaga; 5la ussuha’ batu permata anna natehei; la umbunga kaju, anna la ungkähä ingganna hupanna kähängam tukam. 6Puha toom duka’ kupilei Aholiab änä’na Ahisamakh, pessubunna Dan la umpamoloi. Sulibanna ia too, ingganna to majatta puham kupatamaam kalena kakeakasam. La umpapia ingganna indo puha kupahentaangko, susinna: 7Kema Kasitammuam DEBATA, Patti Pa’dandiam, tutu’ diongei diampunni dosa, anna ingganna pahamaka’ illaam indo kema, 8susinna: meja sola ingganna pahamaka’ yabona, andihi lampu bulabam ma’nini dipapia sola ingganna pahamaka’na, dapo’ tunuam bubanau’, 9dapo’ pehumalasam sola ingganna pahamaka’na, busso pembaseam sitonda okkosanna, 10poheba pa’hettengam, poheba masehona sando Harun sola änä’na la napake umpalako oloam sando, 11minnä’-minnä’ dipake massehoi anna mallanti’, anna tunuam bubanau’ diala dio mai sanaka-naka hupanna bauam bubanau’ la dipaillaam Tambim Maseho. La napapia ingganna ia too umba susi indo puha kupahentaangko.>>
Pepakilalaam la si umpakahoa’ allo Katohhoam
12Anna mane ma’kada lako Musa naua: 13<<Uaanni to Israel: <Pahallukoa’ si umpakahoa’ allo Katohhoam to puha kupasähä’, aka iam too mendadi tanda pepakilalaam illaam alla’taa’ ma’tintingam lako ingganna lapi’ pessubummua’, anna mala muissanna’ muua: <<Abana Iko DEBATA to umpasähä’kam.>> 14La si umpengkilalaikoa’ allo Katohhoam aka allo ia too allo dipasähä’ lako ikoa’. Menna-menna umpa’bahinni’i tä’ mala tala dipatei, aka menna-menna mengkähä illaam allo ia too, tä’ mala tala dihambai ia illaam mai alla’-alla’na to Israel. 15Annam allona malakoa’ ungkähä kähängammu, sapo’ allo kapitunna allo Katohhoam ia, la umpesatutuia’ mellube, allo to dipasähäsam DEBATA. Menna-menna mengkähä illaam allo Katohhoam, tä’ mala tala dipatei. 16Iam too anna ingganna to Israel pahallu la umpengkilalai allo Katohhoam la napakahoa’i ma’tintingam lako ingganna lapi’ pessubunna, la mendadi pa’dandiam sule lako salako-lakona. 17Allo ia too la mendadi tanda pengkilalaam illaam alla’ki to Israel sule lako salako-lakona, aka annam allona naolaam DEBATA umpadadi langi’ sola lino, anna allo kapitunnai tohhom mengkähä anna umpalosso’ inabanna.> >>
18Puhai umpa’tula’i Musa DEBATA yabo Tanete Sinai, iya nabeemmi indo dua bebä’ batu naongei pahentaNa Puang Allataala, to ma’kale limanNa Puang Allataala untuli’i dio.
32Sapim-sapim bulabam
1Tappana nasi’dim to Israel tä’ liu yabo mai indo tanete Musa, iya ma’mesam le’ba’ ullebo Harun anna nauaanni: <<Maiko, papiangkam debata to la umpatettekam aka indo Musa, to umbabakam messubum illaam mai lembäna Mesir, takiissam aka amom tia dadi lako kalena.>> 2Iya nauam Harun: <<Äläia’ lao antim-antim bulabanna bainemu sola änä’mu muane anna baine, anna umbabaannä’ mai.>> 3Iya sileleim muäläi antim-antim bulabanna anna nababaanni lako Harun. 4Iya naalam Harun indo antim-antim bulabam anna namahehei mane natolloi nagahaga mesa sapim-sapim laki lundaha. Iya sileleim ma’kada naua: <<Oa’ to Israel, iam too inde debatantaa’ to umpatettekia’ messubum illaam mai lembäna Mesir!>> 5Tappana naita Harun kaha-kaha ia too, iya napake’desammi dapo’ pehumalasam dio olona indo sapim-sapim laki lundaha, mane nauai: <<Makale’ la ma’hame-hamekia’ umpa’kasallei DEBATA!>> 6Makale’na mebengngi’-bengngi’im bangom, anna umpehumalasanni tunuam ditunu mampu’ anna tunuam untilalla’i kasikapiaam. Puhai, iya sikaoko’um to Israel anna mangngandei sola mangngihu’, mane ke’de’i sikahidä ma’doä.
7Iya ma’kadam DEBATA lako Musa naua: <<Le’ba’ungko, pasihha’i dokko, aka indo pakketauammu to umbaba messubum illaam mai lembäna Mesir, taiam gau’ napogau’. 8Masimpam sugali’ lempä dio mai ulalam to kupahentaam. Unggahaga sapim-sapim laki lundaha bulabam natollo, mane ma’balinguntu’i napenombai anna umpehumalasam tunuam dio olona, napasindum naua: <Oa’ to Israel, iam too inde debatantaa’ to umpatettekia’ messubum illaam mai lembäna Mesir!> >> 9Mane nauai DEBATA lako Musa: <<Inna kuissammi inde to Israel. Setonganna, sangngim hupatau to makahha’ penaba. 10Tentomai, daa ullabaiä’ angku popa’nala-nalai aha’Ku lako. La kupempa’deam simesa, sapo’ iko-iko la kupadadiko mesa kahajaam kasalle.>>
11Iya mengkahumasem Musa lako DEBATA, Puang Allataala to napenombai naua: <<O DEBATA, akanna ma’nala-nalai aha’Mu lako umma’Mu? Kusanga puham untässu’i illaam mai lembäna Mesir umpake kakuasaamMu tadisihanteam anna katea’ bassimMu? 12Indana nauai to Mesir: <Natässu’i illaam mai lembäna Mesir aka deem pattuju kadakeNa la nahopui yabo tipatanetena, anna la napempa’deam illaam mai inde lino.> Oppo’i aha’ ma’nala-nalaMu DEBATA, anna eli’i pattujumMu, daa umpahuai katilakaam umma’Mu. 13Paalai penaba sabua’Mu Abraham, Ishak, anna Yakub. Puhangko ma’dandi ussa’bu’ kaleMu lako anna ma’kadaKo lako muua: <La kupopembea’ pessubummu susi budanna bintä yabo langi’, anna ingganna botto to puha kudandiangko la umpadokkoam lisu pala’na pessubummu, anna la napomana’ ma’tintingam sule lako salako-lakona.> >> 14Iya mueli’um pattujunNa DEBATA anna tä’ ohi danum umpahuai katilakaam umma’Na situhu’ pattujunNa.
15Puhai, iya tuhummi Musa yabo mai indo tanete untetä indo dua bebä’ batu naongei pahentaNa Puang Allataala. Indo dua bebä’ batu dipantuli’i patomali. 16Bassim pa’papianNa Puang Allataala anna indo pantuli’ pantuli’Na Puang Allataala, tituli’ dio indo dua bebä’ batu. 17Tappana silambi’ Yosua anna Musa, iya ma’kadam Yosua naua: <<Deem kuhingngi susi ahhena to sibundu’ dio ongeanna ma’kema.>> 18Natimba’i Musa naua: <<Taia ahhena to patalo anna taia toi ahhena to ditalo, sapo’ gamahanna kao to sitimba’ menani kuhingngi.>> 19Tappana la landa’ kale Musa lako indo ongeanna to Israel ma’kema anna naitam indo sapim-sapim laki lundaha anna muita to sikasajo, iya hede-hedem aha’na. Napellopängam indo dua bebä’ batu dio limanna anna nahuppu’-huppu’i dio indo seppom tanete. 20Anna mane naala indo sapim-sapim laki lundaha to napapia to Israel, anna natunui tama api, mane nagilinni sampe dahi kapu’ anna natantanni dokko uwai mane ussuai to Israel naihu’.
21Puhai, iya ma’kadam Musa lako Harun naua: <<Aka hiko napogausangko inde mai to Israel nasuhum umpasuleam dosa kasalle?>> 22Natimba’i Harun naua: <<Daa umpahede-hede aha’mu puäku. Inna puha muissam dia muua sangngim to kadake gau’ inde mai hupatau. 23Sikanauaannä’: <Gahagangkam debata to la umpatettekam, aka indo Musa to umbabakam messubum illaam mai lembäna Mesir, tä’ kiissam aka amom tia dadi lako kalena.> 24Iya kuuaammi: <Iai too umpuängam bulabam, la naäläi.> Anna mane nabeennä’ anna kutibei tama api, iya messubummi illaam mai inde sapim-sapim laki lundaha.>>
25Tappana naissam Musa naua ussangka’ bäbä elo’na to Israel aka nalamba’ bäbä Harun lambisam mendadi petabaanna ingganna balinna, 26iya ke’de’um Musa dio olona ba’ba tama ongeanna to Israel ma’kema anna ma’kada kasallei naua: <<Menna-menna manontom lako DEBATA, pembakkoko mai!>> Iya sasuleammi pessubunna Lewi mulilim Musa. 27Iya ma’kadam Musa lako naua: <<Susi inde battakadanNa DEBATA, Puang Allataala to napenombai to Israel: <Tungga’ takingkoa’ pa’dammu, ammu leleia’ ingganna kema mengkalao kema uhuna sule lako kema katampasam, anna tungga’ pateikoa’ kasahapuammu, solamu, anna sambanuammu!> >> 28Iya napalakom duka’ pessubunna Lewi situhu’ indo kadanna Musa. Allo eta too kiha-kiha tallu sa’bu to Israel mate. 29Puhai, iya ma’kadam Musa naua: <<Allo temo puhangkoa’ umpasähä’ kalemu lako DEBATA aka tungga’ umpateingkoa’ änä’mu sola kasahapuammu. Iam too anna natamba’ungkoa’ inde allo temo.>>
30Makale’nai ma’kadam Musa lako to Israel naua: <<Puhangkoa’ umpogau’ dosa kasalle. Dadi tentomai, la längännä’ inde tanete mengngolo lako DEBATA, umba-umba aka malakoa’ kupasikapiai sule aka indo dosamua’.>> 31Iya le’ba’um Musa mengngolo lako DEBATA anna ma’kadai naua: <<Kamaseiä’ DEBATA, inde mai hupatau puham umpogau’ dosa kasalle. Sikaumpapiaam kalena debata lino bulabam napapia. 32Dadi tentomai, kupelau matim kela mala muampunniam dosana. Ianaanna tä’i, iya sapuim too kao sangangku illaam mai indo suha’ to untuli’.>> 33Iya ma’kadam DEBATA naua: <<Iai too madosa lako kaleKu, iam too la kusapui sanganna illaam mai indo suha’Ku. 34Pengkalaongko tentomai. Pasolai itim dokko to Israel lako ongeam to puha kutulasangko. Pennassai, la nayoloangangko malaika’Ku, sapo’ pissam wattu la kupabala’i, la kupabala’i dosana to Israel.>>
35Puhai ia too, umpahuaim pesämbä’ to Israel DEBATA, aka puha ussua Harun napapiaam sapim-sapim lundaha bulabam napapia.
33Musa umpelau pepatetteNa DEBATA
1Mane ma’kadai DEBATA lako Musa naua: <<Laongkoa’, pellei inde ongeam solakoa’ to Israel to umpasola messubum illaam mai lembäna Mesir, tinandakoa’ lako indo botto to puha kudandi lako Abraham, Ishak anna Yakub kuua: <Pessubummu la kumana’ botto ia too.> 2La kusua mesa malaika’ napendioloangangkoa’, anna la kuhambai lao to Kanaan, to Amori, to Het, to Feris, to Hewi, anna to Yebus. 3La tinandakoa’ lako mesa botto naongei bosa’ bumbungam makko anna bontä’ duho.33:3 duho: Indo nauaam duho illaam inde balajam tä’ makaleso, battu duho wani hi nauaam battu bua kurma (sahhupa tanangam dio Israel) dipapia susi uwai golla mapulu’. Sapo’ Kao-kao tä’ungkia’ la sola illaam pellaoam indana kupempa’deangkoa’ lako lalam, aka sangngim to makahha’ penabakoa’.>> 4Tappana nahingngi to Israel indo tula’ makahha’ ia too, iya sileleim anggasanna to ma’bahata anna moim mesa tala deenni umpake belo-belona. 5Iya ma’battakadam DEBATA lako Musa naua: <<Uaanni to Israel: ikoa’ inde sangngim hupatau to makahha’ penaba. Maka’ la solakia’ illaam pellaoam moi la sappälli’um, mannassa la kupempa’deangkoa’. Dadi tentomai, äläia’ belo-belomu, iya la kuissammi too aka la kupogausangkoa’.>> 6Iya napahandu’ yabom too Tanete Horeb tä’um si umpake belo-belona to Israel.
7Iya mualam pa’mesaam kema Musa umba susi si napogau’, anna napake’de’i dio sulibanna ongeanna to Israel ma’kema, sikambela ongeanna to Israel ma’kema, anna nasangai Kema Kasitammuam DEBATA. Dadi, iai too maelo’ la muissam pa’elo’ DEBATA, iya iam le’ba’ lako indo Kema Kasitammuam DEBATA dio sulibanna ongeanna to Israel ma’kema. 8Maka’ too le’ba’ oom Musa lako indo Kema Kasitammuam DEBATA, iya pada-pada oom to Israel ke’de’ dio olo kemana simesa-mesa, anna umpaula’i mata Musa, sampe le’ba’ tama indo kema. 9Lessu’i too Musa tama indo kema, iya tuhummi gabum anggasanna andihi anna mengke’de’i dio ba’bana indo kema. Iya ma’battakadam DEBATA lako Musa illaam mai indo gabum. 10Tappana naita to Israel mengke’de’ indo gabum susi andihi dio ba’ba kema, iya silelem ma’balinguntu’ menomba dio ba’ba kemana simesa-mesa. 11Iya umpa’tula’im Musa DEBATA anggasanna sitingngajo susi mesa tau umpa’tula’i solana. Puhai, iya ma’pasulem Musa lako ongeanna to Israel ma’kema. Sapo’ Yosua ia änä’na Nun, to umpamoloi Musa, mesa to mangnguha, tä’ ia umpellei indo kema. 12Iya ma’kadam Musa lako DEBATA naua: <<Abana puhangKo ma’kada lako kaleku muua: <Patettei inde to Israel, sapo’ tä’pä’ deem untulasam menna umpatadongkom la umpamoloiä’.> Sapo’ ma’battakadaKo duka’ muua: <Kukamäsängko anna masannam penabangKu matim.> 13Dadi tentomai, maka’ masannam si’da penabamMu lako kaleku, iya kupelau anna untulasannä’ pattujumMu anna mala kuissam tongangKo, anna tontä liu masannam penabamMu lako kaleku. Puha muissam dia, inde to Israel umma’ petauamMu.>> 14Iya ma’kadam DEBATA naua: <<La ma’kaleä’ umpatetteko anna kupomasannangangko penabammu.>>
15Iya natimba’im Musa naua: <<Maka’ tä’ la Iko umpatettekam, iya daa ussuakam umpellei inde ongeam. 16La naissam umba hia ngei hupatau naua, masannam penabamMu tama kaleku, anna lako inde mai umma’ petauamMu? Tä’ daka tia aka umpatettekam nasuhum kao solakam inde mai umma’ petauamMu, ma’alla’ ingganna kahajaam senga’ inde lino?>> 17Iya ma’kadam DEBATA lako Musa naua: <<La kupalakopi duka’ itim tula’mu, aka masannam penabangKu matim anna kukamäsängko.>>
18Iya nauam Musa: <<O DEBATA, kupelau anna umpaitaiä’ kamatandeamMu.>> 19Iya ma’kadam DEBATA naua: <<La kupaliu maaka susi kamapiaam penabangKu dio olomu anna kupengkadaam sangangKu to disa’bu’ DEBATA dio olomu. La kukamasei to la kukamasei anna la kuhäntängam bua to la kuhäntängam bua.>> 20Mane nauai: <<Tä’ la ussaha unnenne’i lindoKu, aka tä’ deem tau la tubo ke nanenne’iä’.>> 21Anna nauapi: <<Deem mesa ongeam dio ampe’Ku, etam too la muongei ke’de’ yabo buntu batu. 22Maka’ too lium kamatandeangKu, iya kupalakongko häkkäna indo buntu batu mane kupalabaiko limangKu sampe lessu’ä’. 23Puhai too, kupodo’um limangKu anna muitai boko’Ku, sapo’ tä’ ia la muita lindoKu.>>
34Dua bebä’ batu bakahu
1Anna mane ma’kada DEBATA lako Musa naua: <<Gahagai dua bebä’ batu susi indo yolona. Indo dua bebä’ batu la kupantuli’i ingganna indo pahenta umba susi tituli’ dio indo dua bebä’ batu yolona, to puha uhhuppu’-huppu’. 2Pa’kalili’ko makale’ mebengngi’-bengngi’ anna mebengngi’ko längäm Tanete Sinai. Ke’de’ko pengngolo dio oloKu yabo pusu’na indo tanete. 3Sapo’ tä’ deem tau moi podo la mesa la umpasola anna tä’ toi deem tau moi podo la mesa la diita lako sakalebunna indo tanete, moi duka’ beke, domba, anna sapim tä’ toi mala la uhhessu humpu’ lako pili’na indo tanete.>>
4Iya nagahagam Musa dua bebä’ batu susi indo yolona. Makale’i, mebengngi’-bengngi’um bangom Musa anna le’ba’i längäm Tanete Sinai, umba susi pahentaNa DEBATA lako kalena nababa indo dua bebä’ batu dio limanna. 5Iya tuhummi DEBATA illaam gabum, mane ke’de’i dio ampe’na Musa, anna ma’kada kasallei naua: <<Kaom to inde to disangai DEBATA>>. 6Anna mane mellao DEBATA dio olona Musa anna ma’kada kasallei naua: <<Kao DEBATA, Puang Allataala To ma’kamase anna pa’häntängam bua, sumpu sa’baha’, ponno pangkaha’ pa’kamase anna kamanontongam, 7takattu tintim tamondo’ sahuham pangkaha’ pa’kamaseKu lako massa’bu-sa’bu lapi’na hupatau, si kuampunni to kasalaam, to patekka, anna to madosa, sapo’ inna tala kulappasam to kasalaam dio mai pa’tahungkungam, sapo’ la kupadadi kaponam tapuppu’ kasalaanna mesa ambe’ lako pessubunna, sule lako lapi’ katallunna anna kaappa’na.>>
8Iya ma’balinguntu’ siaham Musa mendu’dum dokko litä’ napasindum menomba. 9Mane ma’kadai naua: <<O Debata, ianaanna masannanni penabamMu inde tentomai lako kaleku, iya maiKo anna mellaokia’ sola-sola. Abana inde to Israel sangngim to makahha’ penaba. Sapo’ moinna anna susi, ampunniangkam kasalaangki sola dosaki, anna untahimakam mendadi ampuam ikaleMu.>>
10Iya ma’kadam DEBATA naua: <<Pennassai, la kupadeem mesa pa’dandiam. Dio olona ingganna to Israel, la kupadadi buda tanda memängä-mängä tä’pi deem dadi illaam inde lino moi la botto umba ngei. Ingganna botto to umpaitängä-tängäkoa’ la muita pa’pogausanNa DEBATA, aka indo la kupogausangkoa’ la mepakahea’. 11Antii manda’ tobei matoto’ indo to kupahentaangkoa’ inde allo temo. Pennassai, la kuhambai dio mai olomu: to Amori, to Kanaan, to Het, to Feris, to Hewi, anna to Yebus. 12Oli’i mamma’ salungkui metindo indee: daa umpadeem kasitallisam issinna indo botto to la umpellambi’ia’, indana mendadii poja bendo’ samelum buaja lako kalemua’. 13Sapo’ inde hia la umpogau’a’: la untaleam ingganna dapo’ pehumalasanna, la uhhuppu’-huppu’ ingganna batu naosä’ kasalle malangka’ to si napa’debatai, anna songkanganni pa’pasusianna debata Asyera to si napenombai. 14Tä’koa’ mala ma’udum guntu’ umpenombai debata senga’, aka DEBATA, disangai to Kembuhu,34:14 DEBATA, disangai to Kembuhu: Kalembasanna, anggam DEBATA sihatam dipenombai, dadi tä’ napohäe ke la ma’debata senga’i umma’Na, aka tä’ sihatam. iam too Puang Allataala to si kembuhu. 15Daa umpadeenna’ kasitallisam issinna botto ia too. Aka maka’ too sikama’gau’ sessu’ oom umpenombai debatanna anna umpehumalasam tunuam lako debatanna, iya la natambaikoa’ too anna la muandea’ duka’ balena indo tunuanna. 16Ianaanna umpasialaia’ änä’mu muane anna änä’na baine, iya maka too ma’gau’ sessu’ oom indo baine umpenombai debatanna, iya la umbabaim too indo änä’mua’ muane umpogau’ gau’ sessu’ natuhu’ napenombai debatanna. 17Daa unggahaga debata ditollo la umpenombai.
18Pakahoa’ liuia’ allo kasalle Hoti Tä’ Diboloi Bibi’ Hoti. Umba susi puha kupahentaangkoa’, pitu allona la muolaanna’ muande hoti tä’ diboloi bibi’ hoti illaam wattu puha dipa’tantu illaam bulam Abib, aka bulam etam too anna messubungkoa’ illaam mai lembäna Mesir.
19Ingganna änä’ uluamua’ muane tabaKu ia. Susi toi duka’ ingganna lakinna olo’-olo’mua’, uhu änä’na sapim battu haka domba. 20Sapo’ uhu änä’na ia keledai pahallu la ussulleia’ mesa änä’ domba. Maka’ tä’ la ussullei, iya tä’ mala tala ullutto’ bahokona. Ingganna änä’ uluamua’ muane tä’ mala tala ussullei. Daa ussulea’ dio oloKu ma’pala’ lo’bä.
21Annam allona la muolanna’ ungkähä kähängammu, sapo’ allo kapitunnai too tä’ mala tala untohhoanna’. La tohhokoa’ moi wattu pa’tengkoam moi wattu pepaheam.
22Pakahoa’ia’ Allo Kasalle Pitu Minggunna, battu diua Allo Kasalle Pangkahingisam wattunna massäe’ gandum, susi toi duka’ Allo Kasalle Umpuppu’ Bua Pengkähä,34:22 Allo Kasalle Umpuppu’ Bua Pengkähä: Mala duka’ diua Allo Kasalle Bahum Daum (Petua’ Sand. 23:34, Disl. 16:12). ke mepahengkoa’ illaam kapuhaanna pa’taungam. 23Pentallum sataum ingganna muane illaam bottomua’ pahallu la sule menomba dio oloKu,34:23 Pentallum sataum ingganna muane illaam bottomua’ pahallu la sule menomba dio oloKu: Indo allo kasalle la naongei to Israel sule menomba dio oloNA Puang Allataala, iya allo kasalle Hoti Tä’ Diboloi Bibi’ Hoti, Allo Kasalle Pitu Minggunna, anna Allo Kasalle Umpuppu’ Bua Pengkähä diuaam (34:18, 22). Kao PUANG ALLATAALA, Debata to napenombai to Israel. 24La kuhisi lao ingganna pa’botto dio mai olomua’ anna kupomalobä attasa’mua’. Tä’ deem tau moi podo la mesam la ungkailui anna ungkatinnai botto litä’mua’, ke laokoa’ mengngolo lako DEBATA, Puang Allataala to umpenombai, pentallum sataum. 25Daa umpasihaui hahana tunuam dipehumalasam dio oloKu anna kinande diboloi bibi’ hoti. Anna tä’ mala umpalambanna’ lako mebengngi’ tunuam illaam allo Kalappasam. 26Babai handam mapianna pangkahingi’mu tama banua DEBATA, Puang Allataala to umpenombai. Daa umpa’nasui bumbunganna indona balena änä’ bekemu.>>
27Anna mane ma’kada DEBATA lako Musa naua: <<Tuli’i ingganna inde battakada, aka battakada iam too inde napolalam kupadeem pa’dandiam lako iko anna lako to Israel.>> 28Appa’ pulo allona anna appa’ pulo benginna naolaam yabo indo tanete Musa sola DEBATA, tä’ deem muande hoti tä’ muihu’ uwai. Natuli’ DEBATA dio indo dua bebä’ batu indo ingganna pa’dandiam battu diua Sapulo Pahenta.
29Tappana ma’pasule Musa yabo mai Tanete Sinai umbaba indo dua bebä’ batu to dipantuli’i pahentaNa Puang Allataala, tä’ naissam Musa naua: <<Pangkähhä hi kao lindoku aka puhakam sipa’tula’ DEBATA.>> 30Tappana muita Musa Harun solai ingganna to Israel pangkähhä lindona, iya sangngim mahea’ nakahuku’. 31Sapo’ natambai Musa, iya ma’pasulem sule Harun sola ingganna to pepungngu’na to Israel, iya napa’tula’im Musa. 32Puhai ia too, napengkahuku’im duka’ ingganna to Israel, iya napalandasammi Musa ingganna indo pahenta to puha napengkadaam DEBATA lako Musa yabo Tanete Sinai. 33Puhai umpa’tula’i to Israel Musa, iya ussapu’im lindona. 34Sapo’ maka’ too la tama oom indo kema Musa mengngolo lako DEBATA la sipa’tula’, iya naäläi oom indo pesapu’ lindona sampe messubum sule. Messubunni too, iya napalanda’um lako to Israel indo to napahentaam DEBATA, 35lambi’ si muita lindona Musa to Israel pangkähhä. Iya ussapu’i oom sule lindona Musa sampe tama oo sule indo kema la sipa’tula’ DEBATA.
35Pepakilalaam la umpasähä’ allo Katohhoam
1Anna mane uhhempum ingganna to Israel Musa anna nauaanni: <<Indem ia kadanNa DEBATA napa’pahentaam la dipogau’. 2Annam allona malakoa’ ungkähä kähängammu, sapo’ allo kapitunna pahallu dipasähä’ la umpesatutuia’ mellube, battu diua allo Katohhoam, allo katohhoam dipasähäsam DEBATA. Menna-menna mengkähä allo eta too, tä’ mala tala dipatei. 3Daa umpalekke’ api illaam banuammu illaam allo Katohhoam.>>
Bua pemala’ ma’kalolosam la dipake umpake’de’ Kema Kapenombaam
4Anna mane ma’kada Musa lako ingganna to Israel naua: <<Indem ia kada napa’pahentaam DEBATA: 5<Alaia’ baham-bahammu la mendadi bua pemala’ dipalaosengasam DEBATA. Menna-menna mengkalao illaam unä’ penabanna pahallu la umbaba bua pemala’ dipalaosengasam DEBATA, susinna: bulabam, peha’, tembaga, 6bännä malibulum, bännä mellolo pao, bännä kasa eja, sampim linen malängngo’, bulu beke; 7lollo’ domba laki diwante’ malea, lollo’na olo’-olo’ malängngo’, kaju akasia, 8minnä’ zaitun la dipoballo, bauam bubanau’ la diboloiam piha minnä’ zaitun mendadi minnä’-minnä’ si dipake massehoi anna mallanti’, anna la dipotunuam bubanau’ piha, 9batu permata isanga krisopras anna batu permata senga’ si ditehe dio baju efod anna dio pesapu’ dadanna Sando Too’. 10Ingganna to majatta kapapia-pia illaam alla’-alla’mua’ pahallu sule la unggahagai ingganna indo napa’pahentaam DEBATA, susinna:
11Kema Kapenombaam sola papana sitonda hindimmi, pesambona sitonda hindimmi, pekädä-kädäna, andihi dipasiundu’na dikatea’i, pesulu’na, andihinna sampim pesapa’, anna ingganna pentokoanna;
12Patti Pa’dandiam sola pebullena, tutu’ diongei diampunni dosa anna sampim pesapa’,
13meja sola pebullena, ingganna pahamaka’ yabona, anna hoti dipehumalasam;
14andihi lampu la naongei ballo sitonda pahamaka’na, ingganna lampu anna minnä’ la dipoballo;
15dapo’ tunuam bubanau’ sola pebullena, minnä’-minnä’ si dipake massehoi anna mallanti’, tunuam bubanau’;
sampim pesapa’ la ditutu’iam ba’bana indo Kema Kapenombaam;
16dapo’ pehumalasam sola talikaba’ tembaga dianam susi paha-paha, pebullena sola ingganna pahamaka’na;
busso pembaseam sitonda okkosanna;
17sampim la dihindingam pa’hanteam, ingganna andihinna, pentokoanna, anna sampim tutu’ ba’bana pa’hanteam;
18ingganna tana’-tana’na Kema Kapenombaam sola tana’-tana’na indo hindim pa’hanteam anna pesäke’na;
19poheba sando la dipake ma’hettem illaam ongeam maseho, poheba dipapiaam senga’ sando Harun, anna pohebana änä’na la napake umpalako oloam sando.> >>
20Puhai ia too, iya le’ba’im to Israel untampeam Musa. 21Anna mane sule to tigaha’ penabanna anna to ponno penaba umbaba bua pemala’ napaseheam DEBATA, la dipake umpake’de’ Kema Kasitammuam DEBATA, la dipake umpalako mentu’na pa’hettengam, anna la dipake umpapia poheba dipapiaam senga’ sando. 22Ingganna to ponno penaba susi muane teem baine, sasuleam umbaba antim-antim illäna, antim-antim talinganna, sissim, ponto, anna ingganna hupanna belo-belo bulabanna. Silele umbaba bulabanna naäkä’i längäm mendadi bua pemala’ ditandeam längäm oloNa DEBATA. 23Sulibanna ia too, ingganna to muampuam sampim malibulum, sampim mellolo pao, sampim kasa eja, sampim linen malängngo’, bulu beke, lollo’ domba laki diwante’ malea, lollo’na olo’-olo’ malängngo’, sulei nababa. 24Ingganna to umbaba bua pemala’ napasehe peha’ daka tembaga haka, la napa’sulappasam mendadi bua pemala’ napaseheam DEBATA. Anna ingganna to muampuam kaju akasia nababa duka’ sule la dipake umpake’de’ indo ongeam kapenombaam. 25Ingganna baine to majatta limanna mangngunu’ umbaba sule indo pangngunu’na: bännä malibulum, bännä mellolo pao, bännä kasa eja, anna bännä linen malängngo’. 26Susi duka’ ingganna baine to tigaha’ penabanna aka muampuam kamajattaam muunu’ bulu beke. 27Ingganna to pepungngu’ umbaba sule batu permata krisopras anna batu permata senga’ la ditehe dio baju efod sola pesapu’ dada, 28minnä’ zaitun la dipoballo, bauam bubanau’ la diboloiam piha minnä’ zaitun mendadi minnä’-minnä’ si dipake massehoi anna mallanti’, anna la dipotunuam bubanau’ piha. 29Ingganna muane sola baine to ponno penaba umbaba sule baham-baham la dipake unggahaga indo to napa’pahentaam DEBATA muolai Musa. Sangngim sule to Israel umbaba bua pemala’ unä’ penabanna napehumalasam längäm DEBATA.
Ditodinni Bezaleel sola Aholiab
30Iya ma’kadam Musa lako to Israel naua: <<Pennassaia’, puham natodinni DEBATA Bezaleel änä’na Uri ampona Hur, pessubunna Yehuda. 31Puham napasalokko’i Penaba MasehoNa Puang Allataala. Puham nabeem kakeakasam, kamanähängam, kapaissangam, anna ingganna hupanna kamajattaam kapapia-pia, 32la napattuju unggahaga pahamaka’ bulabam, peha’ anna tembaga, 33la ussuha’ batu permata anna natehei; umbunga kaju, anna ungkähä ingganna hupanna kähängam indo to puha napattuju. 34Napadeengam DEBATA kamanähängam illaam penabanna Bezaleel la umpatudu tau senga’. Susi siam duka’ illaam penabanna Aholiab änä’na Ahisamakh pessubunna Dan. 35Bassim napaponnoipi kakeakasam la ungkähä ingganna pengkähängam tukam, pengkähänganna to majatta, massumma’ sanda dio hupanna bännä, susinna bännä malibulum, bännä mellolo pao, bännä kasa eja, anna bännä linen malängngo’, anna kakeakasampi tumannum. Dadi, bassim mala ungkähä ingganna hupanna kähängam anna bassim to si ma’pattuju.
361Bezaleel sola Aholiab anna ingganna to majatta kapapia-pia puham namana’ DEBATA kakeakasam sola kamanähängam anna mala naissam ungkähä ingganna hupanna kähängam la umpake’de’ Kema Kapenombaam, la mengkähä umba susi indo to napa’pahentaam DEBATA.>>
2Anna mane natambai Musa Bezaleel, Aholiab, anna ingganna to majatta kapapia-pia, sangngim puham namana’ DEBATA kakeakasam anna sangngim tigaha’ penabanna la sule ungkähä indo pengkähängam ia too. 3Mane nabeenni ingganna indo bua pemala’ dipasehe to nababa sule to Israel la dipake umpake’de’ Kema Kapenombaam. Sulibanna ia too, mesa mebengngi’ sule liupi to Israel umbaba bua pemala’ unä’ penabanna lako Musa. 4Iya untampe salam pengkähänganna indo to majatta to ungkähä ingganna pengkähängam la umpake’de’ Kema Kapenombaam, 5anna ma’kadai lako Musa naua: <<La’bi polem indo pa’passubunna hupatau la dipake umpalako indo pengkähängam to napa’pahentaam DEBATA.>> 6Iya napa’pahentaammi Musa anna mala dipa’paissangam illaam ongeanna to Israel ma’kema diua: <<La tä’ opi umpassubum baham-baham susi muane teem baine mendadi bua pemala’ dipasehe lu lako Kema Kapenombaam.>> Dipateemmi too dipatohho opi hupatau umbaba bua pemala’na, 7aka ganna’um, anna la’bi polem indo baham-baham la dipake ungkähä ingganna indo pengkähängam.
Unggahaga Kema Kapenombaam
8Iya ingganna to majatta illaam alla’-alla’na indo to ungkähä Kema Kapenombaam umpapia sapulo lamba’na sampim bännä linen malängngo’ natannum, bännä malibulum, bännä mellolo pao, bännä kasa eja, anna disumma’pi dio gamba’na kerub, nasumma’ to majatta. 9Salamba’ oi indo sampim dua pulo oom kahua singkum kalandona anna appa’ singkum kalua’na. Dadi indo sampim pada-pada kalua’na anna kalandona. 10Lima lamba’na indo sampim napasiampim-ampim mendadi salamba’, anna naampim susi siam duka’ indo lima lamba’pi senga’na. 11Natalinga-lingai dio bihim kalandona indo sampim diampim uhuna, sampim malibulum napake, anna napateem siam duka’ indo sampim diampim kaduanna. 12Lima pulo talinga-linganna indo sampim diampim uhuna, anna lima pulo siam duka’ indo sampim diampim kaduanna, lambi’ tungga’ sipatu-patu indo talinga-linganna. 13Mane nagahagai lima pulo pekädä-kädä patomali, bulabam napapia dipasikädäam indo dua lamba’ sampim puha diampim, nasuhum mendadi salamba’um papana sitonda hindinnam indo Kema Kapenombaam. 14Nagahaga duka’ sampim bulu beke sapulo mesa lamba’na mendadi papana sitonda hindinna indo Kema Kapenombaam lapi’ kaduanna. 15Mesa oi indo sampim bulu beke tallu pulo oom singkum kalandona anna appa’ singkum kalua’na. Dadi, indo sapulo mesa lamba’na sampim pada-pada kalua’na anna kalandona. 16Lima lamba’na indo sampim napasiampim-ampim mendadi salamba’, anna annam lamba’na napasiampim-ampim duka’ mendadi salamba’. 17Natalinga-lingai dio bihinna indo sampim diampim uhuna lima pulo talinga-linganna, anna lima pulo siam duka’ indo sampim diampim kaduanna. 18Nagahaga duka’ lima pulo pekädä-kädä tembaga napapia napake umpasiampim indo dua lamba’ sampim, nasuhum mendadi salamba’. 19Nagahagapi duka’ pesambona sitonda hindinnam indo kema salapi’ lollo’ domba laki diwante’ malea, anna lollo’na olo’-olo’ malängngo’ napalapi’iam polepi yabona.
20Nagahaga duka’ andihi dipasiundu’ dikatea’i alla’na kaju akasia napapia la mendadi pahamaka’na indo Kema Kapenombaam. 21Mesa oi indo andihi dipasiundu’ dikatea’i alla’na sapulo oom singkum kalandona anna sasingkum satangnga alla’na indo andihi dipasiundu’. 22Mesa oi indo andihi dipasiundu’ bassim diotim oom dio tämpä’ tando dokkona anna mala sitohoi. Napateem asammi too pada indo andihi dipasiundu’na Kema Kapenombaam. 23Napapiai dua pulo andihi dipasiundu’ dio sa’de tandai selatanna indo Kema Kapenombaam, 24anna nagahaga appa’ pulo pentokoam peha’ la napentokoi indo dua pulo andihi dipasiundu’. Dua pentokoam mesa oi andihi dipasiundu’, nasimesai indo dua otinna. 25Susi toi duka’ sa’dena indo Kema Kapenombaam tandai utara, nagahaga dua pulo andihi dipasiundu’ 26anna appa’ pulo pentokoam peha’. Dua pentokoam mesa oi indo andihi dipasiundu’. 27Dio boko’na indo Kema Kapenombaam, battu diua tandai katampusam, annam ia andihi dipasiundu’ nagahaga. 28Sulibanna ia too, nagahaga duka’ dua andihi dipasiundu’ dio sikunna patomali dio boko’na indo Kema Kapenombaam. 29Indo dua andihi dipasiundu’ napaundu’iam polepi indo andihi dipasiundu’ dio sikunna patomali mengkalao dio sule längäm, anna napasianda’i umpake galege’-lege’. Napateemmi too napadekke’. 30Dadi, kahua andihi dipasiundu’ dio boko’ sitonda sapulo annam pentokoanna peha’, dua pentokoam mesa oi indo andihi dipasiundu’.
31Nagahaga duka’ sapulo lima pesulu’ kaju akasia napapia, lima pesulu’ dio sa’de mesanna indo kema, 32lima pesulu’na dio sa’de kaduanna, anna lima pesulu’na indo andihinna Kema Kapenombaam dio boko’, battu diua tandai katampusam. 33Indo pesulu’ illaam tängäna andihi, napadekke’ bahe tängäna längäm indo andihi dipasiundu’, salolo tungngette’ mengkalao dio tämpä’ sabalinna sule lako tämpä’ sabalinna. 34Indo andihi dipasiundu’ sangngim nasapu’ bulabam; indo galege’-lege’ dipassollo’i tama pesulu’ bulabam napapia; anna indo pesulu’na nasapu’ bulabam.
35Nagahaga sampim pesapa’, bännä malibulum, bännä mellolo pao, bännä kasa eja, anna bännä linen malängngo’ ditannum. Nasumma’ gamba’na kerub dio, napapia to majatta massumma’. 36Nagahaga duka’ appa’ andihinna indo sampim pesapa’ kaju akasia napapia anna nasapu’i bulabam. Nagahaga toi duka’ passedangam bulabam dio indo andihi, anna untollo appa’ pentokoam peha’.
37Mane nagahagai sampim pesapa’ la natutu’iam ba’bana indo Kema Kapenombaam, bännä malibulum, bännä mellolo pao, bännä kasa eja, anna bännä linen malängngo’ natannum, anna disumma’ sanda dio hupanna. 38Indo sampim pesapa’ la ditutu’iam ba’bana indo kema nagahagaam lima andihi sitonda passedangam dio. Nasapu’ bulabam yabo tämpä’na sola indo talikaba’ to umpasianda’-anda’i indo andihi, anna indo lima pentokoanna tembaga ia nagahaga.
37Unggahaga Patti Pa’dandiam
1Mane nagahagai Bezaleel mesa patti, kaju akasia napapia, dua singkum satangnga kalandona, sasingkum satangnga kalua’na, anna sasingkum satangnga malangka’na. 2Nasapu’ bulabam ma’nini, susi illaanna teem sulibanna, anna napalapi’i pamihim bulabam pali’ lao yabona. 3Natollo appa’ galege’-lege’ bulabam anna napasandai lao appa’ sikunna, dua dio sa’de mesanna anna dua dio sa’de sabalinna. 4Mane mualai kaju akasia nagahaga pebullena anna nasapu’i bulabam. 5Anna nasollo’i indo pebulle tama indo galege’-lege’ dio sa’dena patomali indo patti anna mala si dibulleam indo patti.
6Mane nagahagai tutu’na indo patti diuaam tutu’ diongei diampunni dosa bulabam ma’nini napapia, dua singkum satangnga kalandona anna sasingkum satangnga kalua’na. 7Anna nagahaga duka’ dua kerub bulabam natampa tä’ natollo, napayabo sipatomaliam indo tutu’ diongei muampunni dosa. 8Mesa dio tämpä’ mesanna anna mesa dio tämpä’ sabalinna. Indo bulabam to natampa tutu’ diongei diampunni dosa bulabam ia siam duka’ natampa kerub anna napadekke’i yabo sipatomaliam tämpä’na. 9Indo kerub bassim tiballa’ pani’na yabo, ussamboi indo tutu’ diongei muampunni dosa, anna sitingngajo bassim mennenne’ dokko indo tutu’ diongei muampunni dosa.
Unggahaga meja hoti dipehumalasam
10Nagahaga duka’ Bezaleel meja kaju akasia napapia, dua singkum kalandona, sasingkum kalua’na, anna sasingkum satangnga malangka’na. 11Nasapu’ bulabam ma’nini indo meja, anna nagahaganni pamihim bulabam pali’ lao bihinna. 12Mane nagahagai duka’ pamihim papam pali’ lao sa’dena sapala’ kalua’na, mane napalapi’i polei pamihim bulabam pali’ lao indo pamihim papam. 13Mane natolloi appa’ galege’-lege’ bulabam, anna napadekke’i yabo appa’ sikunna indo meja napasandai appa’ bitti’na. 14Indo galege’-lege’ napasikahuku’ indo pamihim papam dio sa’dena dipassollo’i tama pebulle, anna mala si dibulle indo meja. 15Mane nagahagai pebullena kaju akasia napapia anna nasapu’i bulabam, anna mala si dibulleam indo meja. 16Nagahaga duka’ pahamaka’ la dipake yabo indo meja, susinna: pihim, ihusam, tangkihi’ gege, anna lojam-lojam la dipa’pongngei bua pemala’ dipopantebo’. Sangngim bulabam ma’nini napapia.
Unggahaga andihi lampu
17Mane nagahagai Bezaleel andihi lampu bulabam ma’nini napapia. Natampa indo bulabam napapia too’na, bätäna, täke buana, kalopä’ buana, anna buana. Salenggam bulabam napapia indo andihi lampu. 18Annam täkena messubum illaam mai sa’dena: tallu dio sa’de tandai kaihi anna tallu dio sa’de tandai kanam. 19Mesa oi indo täkena tallu todo’ oom kalopä’ täkena susi bunga-bunga badam. Sangngim deem kalopä’ buana anna buana, anna tallu todo’ asam duka’ kalopä’na indo täke senga’na. Susi asammi too indo annam täke messubum illaam mai indo andihi lampu. 20Indo bätäna andihi lampu appa’ ia todo’na kalopä’ bätäna susi bunga-bunga badam sitonda kalopä’ buana sola buana. 21Nagahaga duka’ mesa susi kalopä’ bua dio ahena kasitammuanna too’ täke uhuna, dio ahena kasitammuanna too’ täke kaduanna, anna dio ahena kasitammuanna too’ täke katallunna indo annam täke messubum illaam mai sa’dena indo andihi lampu. 22Indo natampa kalopä’ bua dio ahena kasitammuanna too’ täke indo siam salenggam bulabam ma’nini to napapia bätäna indo andihi lampu. 23Nagahaga duka’ pitu lampu la napaokko’ napasandai yabo tämpä’na indo andihi lampu, pesepi’ sombum ke puppu’um, anna petahimai latto bulabam ma’nini napapia. 24Mesa talenta37:24 mesa talenta: Pada tallu pulo lima kilo timbanganna bulabam. bulabam ma’nini nagahaga indo andihi lampu sola ingganna pahamaka’na.
Unggahaga dapo’ tunuam bubanau’
25Mane nagahagai Bezaleel dapo’ tunuam bubanau’ kaju akasia napapia ma’sulapa appa’: sasingkum kalandona, sasingkum kalua’na, anna dua singkum malangka’na. Nagahaga duka’ appa’ anggasanna tandu’ silombum siam indo dapo’. 26Nasapu’ bulabam ma’nini yabo salinna, sa’dena pali’ lao, sola indo appa’ anggasanna tandu’. Anna napamihinni pamihim bulabam pali’ lao yabona. 27Nagahaga siduangam galege’-lege’ bulabam anna napadekke’i dio ahena indo pamihim sipatomaliam sa’dena tandai kanam anna tandai kaihi. Indo galege’-lege’ la dipassollo’i tama pebulle, anna malai si dibulle indo dapo’. 28Anna pebullena kaju akasia nagahaga, anna nasapu’ bulabam.
Unggahaga minnä’-minnä’ bubanau’ anna tunuam bubanau’
29Nagahaga duka’ Bezaleel minnä’-minnä’ maseho la si dipake massehoi anna mallanti’ anna tunuam bubanau’ ma’nini diala dio mai sanaka-naka hupanna bauam bubanau’, susi pa’papianna to majatta umpasibolo-bolo bauam bubanau’.
38Unggahaga dapo’ pehumalasam
1Mane nagahagai Bezaleel dapo’ pehumalasam kaju akasia napapia ma’sulapa appa’: lima singkum kalandona, lima singkum kalua’na, anna tallu singkum malangka’na. 2Yabo appa’ sikunna nagahaga appa’ anggasanna tandu’. Indo tandu’ nagahaga silombum indo dapo’, anna nasapu’ tembaga. 3Nagahaga duka’ ingganna ebangam dapo’ susinna: kuhim, peso’do’ dapo’, lojam-lojam, pesalo ma’häkä’, anna pa’pongngeam hobaja, sangngim tembaga nagahaga. 4Mane muananni talikaba’ tembaga napasusi paha-paha la disaliiam indo dapo’. Indo paha-paha tembaga napadekke’ illaam hoäna indo dapo’ tando dokko ia anna pamihim sa’dena, napaola dio mai ibi’na sampe bahe tängä längäm malangka’na indo dapo’. 5Mane untolloi tembaga nagahaga appa’ galege’-lege’ anna napadekke’i napasandai appa’ sikunna sipatu illaam mai indo paha-paha tembaga la dipassollo’i pebulle. 6Nagahaga duka’ pebullena kaju akasia napapia anna nasapu’i tembaga. 7Mane nasollo’i indo pebulle tama indo galege’-lege’ dio sa’dena indo dapo’ anna mala si dibulleam indo dapo’. Indo dapo’ papam digahaga anna läbä hoäna.
Unggahaga busso pembaseam
8Nagahaga duka’ Bezaleel busso pembaseam sitonda okkosanna tembaga napapia. Indo tembaga naala dio mai dahamminna mentu’na to mealaam baine to si mengkähä dio ba’bana Kema Kasitammuam DEBATA.
Unggahaga pa’hanteanna Kema Kapenombaam
9Mane nagahagai Bezaleel pa’hanteanna indo Kema Kapenombaam. Tandai selatan nahindim sampim linen malängngo’ ditannum, sahatu’ singkum kalandona. 10Diandihii dua pulo andihi tembaga anna dua pulo siam duka’ pentokoanna tembaga dipapia. Anna pekädä-kädä dio indo andihi sola talikaba’ to umpasianda’-anda’i peha’ ia dipapia. 11Susi siam duka’ tandai utara, nahindim sampim linen malängngo’: sahatu’ singkum kalandona, dua pulo andihinna anna dua pulo siam duka’ pentokoanna tembaga dipapia. Anna pekädä-kädä dio indo andihi sola talikaba’ to umpasianda’-anda’i peha’ ia dipapia. 12Pämpäna tandai katampusam nahindim sampim lima pulo singkum, sapulo andihinna anna sapulo pentokoanna. Anna pekädä-kädä dio indo andihi anna talikaba’ to umpasianda’-anda’i peha’ dipapia. 13Anna pämpäna tandai mata allo lima pulo singkum. 14Sapiä’ tandai kaihinna indo pämpäna tandai mata allo nahindim sampim sapulo lima singkum, tallu andihinna anna tallu pentokoanna. 15Anna pada siam duka’ sapiä’ tandai kananna. Dadi, tandai kaihinna anna tandai kananna indo ba’bana hindim pa’hanteam bassim dihindim sampim sisapulo limaam singkum kalandona. Sitalluam andihinna anna sitalluam pentokoanna. 16Iya dihindim sampim linen malängngo’ ditannum pali’ lao indo pa’hanteam. 17Ingganna pentokoanna indo andihinna hindim pa’hanteam tembaga dipapia, sapo’ indo pekädä-kädä dio indo andihi sola talikaba’ to umpasianda’-anda’i peha’ ia dipapia. Ingganna tämpä’na indo andihi disapu’ peha’, anna indo andihinna dipasianda’-anda’i umpake peanda’i peha’. 18Tutu’ ba’bana indo pa’hanteam: bännä malibulum, bännä mellolo pao, bännä kasa eja, bännä linen malängngo’ ditannum, anna disumma’ sanda dio hupanna. Dua pulo singkum kalandona, anna lima singkum malangka’na battu diua kalua’na, sipadaam malangka’na indo hindinna pa’hanteam. 19Indo tutu’ ba’bana pa’hanteam appa’ andihinna sitonda appa’ pentokoanna tembaga dipapia. Ingganna pekädä-kädäna, talikaba’ to umpasianda’-anda’i, anna to disapusam tämpä’na indo andihi sangngim peha’ dipapia. 20Ingganna tana’-tana’na indo Kema Kapenombaam anna tana’-tana’na pali’ lao indo pa’hanteam sangngim tembaga dipapia.
Anggoso’ umpake’de’ Kema Kapenombaam
21Pada inde hekenganna baham-baham la dipake umpake’de’ Kema Kapenombaam, indo Kema Kapenombaam to naongei indo dua bebä’ batu dipantuli’i pahentaNa Puang Allataala. Inde baham-baham nahekem pessubunna Lewi natetem Itamar, änä’na sando Harun, situhu’ pahentana Musa. 22Bezaleel änä’na Uri, ampona Hur, pessubunna Yehuda ungkähä ingganna indo napahentaam DEBATA lako Musa, 23nabalii Aholiab, änä’na Ahisamakh, pessubunna Dan, mesa to majatta massuha’, ma’pattuju, anna duka’ ussumma’ sampim malibulum, sampim mellolo pao, sampim kasa eja, anna sampim linen malängngo’. 24Ia asanna indo bulabam la dipake umpake’de’ indo Kema Kapenombaam, battu diua bulabam bua pemala’ ditandeam dua pulo kaseha talenta38:24 dua pulo kaseha talenta: sipadaam 991 kilo mabanda’na. anna pitu hatu’ tallu pulo syikal,38:24 pitu hatu’ tallu pulo syikal: kiha-kiha sipadaam 9 kilo mabanda’na. ditimbam umpake syikal ma’tantu illaam Kema Kapenombaam. 25Wattunna anna dihekenni to Israel ia asanna peha’ to napassubum to Israel sahatu’ talenta anna sasa’bu pitu hatu’ pitu pulo lima syikal, ditimbam umpake syikal ma’tantu illaam Kema Kapenombaam. 26Simesa-mesa tau napassubum mesa beka,38:26 mesa beka: Kiha-kiha 5,71 gram. battu diua satangnga syikal, ditimbam umpake syikal ma’tantu illaam Kema Kapenombaam. Ia asanna indo to dihekem to dua pulom taunna längäm, annam hatu’ tallu sa’bu lima hatu’ lima pulo tau. 27Sahatu’ talenta38:27 sahatu’ talenta: kiha-kiha sipadaam 3.400 kilo mabanda’na. peha’ dipake la ditollo pentokoanna indo andihinna Kema Kapenombaam anna pentokoanna andihinna indo hindim pesapa’, ia asanna sahatu’ pentokoam indo sahatu’ talenta. Dadi, mesa talenta38:27 mesa talenta: kiha-kiha sipadaam 34 kilo mabanda’na, aka 100 talenta kiha-kiha 3.400 kilo dibahe 100 = 34 kilo. mesa pentokoam. 28Anna indo la’binna sasa’bu pitu hatu’ pitu pulo lima syikal peha’ la dipake umpapia pekädä-kädä dio indo andihi, disapusam tämpä’na indo andihi, anna dipapia indo talikaba’ to umpasianda’-anda’i. 29Tembaga to buttu dio mai bua pemala’ ditandeam ia asanna pitu pulo talenta anna dua sa’bu appa’ hatu’ syikal. 30Indo tembaga digahaga ia pentokoanna andihi ba’bana Kema Kasitammuam DEBATA, dapo’ sitonda salinna talikaba’ dianam susi paha-paha, ingganna pahamaka’na indo dapo’, 31pentokoanna andihi hindinna pa’hanteam pali’ lao, pentokoanna andihi ba’bana pa’hanteam, ingganna tana’-tana’na Kema Kapenombaam, anna ingganna tana’-tana’na andihi hindinna pa’hanteam pali’ lao.
39Unggahaga poheba sando
1Mane nagahagai Bezaleel sola Aholiab poheba pa’hettengam la dipake ma’hettem illaam Tambim Maseho, battu diua pohebana sando Harun, bännä malibulum, bännä’ mellolo pao, anna bännä kasa eja napomatuntum tannunna, umba susi pahentaNa DEBATA lako Musa.
2Indo baju efod natannum umpake bännä bulabam, bännä malibulum, bännä mellolo pao, bännä kasa eja, anna bännä linen malängngo’. 3Umpippä bulabam napomanippi’ mane nasehe’-sehe’i napadadi bännä, anna napasitannunni indo bännä malibulum, bännä mellolo pao, bännä kasa eja, anna bännä linen malängngo’ natannum to majatta tumannum. 4Indo baju efod, napasitonda loppo’ dua pekabe’ palempem napasisäke’ tämpä’na lambi’ sitammu tämpä’ palempenna patomali indo baju efod. 5Sulibanna ia too, beke’na indo baju efod napomatuntum siam duka’ tannunna, anna bännä ia siam indo to ditannum baju efod dipake: bännä bulabam, bännä malibulum, bännä mellolo pao, bännä kasa eja, anna bännä linen malängngo’, anna dipasidasi’um indo baju efod umba susi pahentaNa DEBATA lako Musa. 6Nagahaga duka’ dua batu permata krisopras napamihinni kaba’-kaba’ bulabam dianam, anna nasuha’i dio sapulo dua sanganna änä’na Israel, umba susi pande batu permata ussuha’ stempel. 7Mane napadekke’i indo dua batu permata lako indo dua pekabe’ palempenna indo baju efod mendadi tanda la ungkilalai pessubunna Israel, umba susi pahentaNa DEBATA lako Musa.
8Mane nagahagai pesapu’ dada, pa’papianna mesa to majatta. Indo pesapu’ dada susi siam indo baju efod, ditannum umpake bännä bulabam, bännä malibulum, bännä mellolo pao, bännä kasa eja, anna bännä linen malängngo’. 9Ma’sulapa appa’ ke diluppi’ duam, sadäkäm kalandona anna sadäkäm kalua’na. 10Mane natehei dio appa’ bahhi’na batu permata. Bahhi’ uhuna: batu yaspis malea, krisolit, anna malakit. 11Bahhi’ kaduanna: batu darah, lazurit, anna yaspis malibulum. 12Bahhi’ katallunna: batu ambar, akik, anna kecubung. 13Bahhi’ kaappa’na: batu permata pirus, krisopras, anna nefrit. Indo batu permata dipamihinni kaba’-kaba’ bulabam illaam bahhi’na simesa-mesa. 14Umba susi sapulo dua sanganna änä’na Israel, padam too duka’ indo batu permata. Mesa oi too indo batu permata, disuha’ oom dio susi stempel mesa sanganna indo sapulo dua pehapuam kasalle änä’na Israel. 15Indo pesapu’ dada napapiaam duka’ dua lolo kahahham bulabam ma’nini susi uli’ dikahahham. 16Anna nagahagapi duka’ kaba’-kaba’ bulabam dianam anna dua galege’-lege’ bulabam. Indo dua galege’-lege’ bulabam napadekke’ lako sipatomaliam sikunna indo pesapu’ dada. 17Anna napessäkesanni indo dua lolo kahahham bulabam lako indo dua galege’-lege’ dio sipatomaliam sikunna indo pesapu’ dada. 18Anna tämpä’ sabalinna indo dua lolo kahahham bulabam napopengngala lako ia indo dua pamihinna batu permata. Dadi, indo dua tämpä’na kahahham bulabam napessäkesam lako indo pekabe’ yabo palempenna indo baju efod tandai lako olo. 19Nagahaga duka’ dua galege’-lege’ bulabam, anna napadekke’i lako sikunna patomali indo pesapu’ dada tandai tamanna, siissona indo baju efod. 20Nagahaga toi duka’ dua galege’-lege’ bulabam, mane napadekke’i lako indo dua pekabe’ palempenna indo baju efod tandai lako olo, dio-dio saidi’, siampe’ pendekkesanna indo pekabe’ lako indo baju, yabo tondonna indo beke’ baju. 21Anna mane napasisäke’ indo galege’-lege’na pesapu’ dada anna galege’-lege’na baju efod umpake bännä malibulum, lambi’ hapa’ liu indo pesapu’ dada yabo tondonna beke’ baju to ditannum matuntum, anna tä’ deem tibeho dio mai indo baju efod, umba susi pahentaNa DEBATA lako Musa.
22Nagahaga duka’ juba takekängkä tando tamanna indo baju efod, sampim malibulum asam, natannum to tumannum. 23Naso’boi tängäna la dipa’paolai ulu anna napamihinni sasehe’ sampim pa’tannum indo to diso’boi susi bahoko baju indana sesse’i. 24Dio tahämpä’na indo juba nahombe-hombei anggasanna bua kaju delima bännä malibulum napake, bännä mellolo pao, bännä kasa eja, anna bännä linen malängngo’ matuntum tannunna. 25Sulibanna ia too, nagahaga polepi duka’ gihim-gihim bulabam ma’nini, mane napanalla’ianni indo hombe-hombe susi bua kaju delima dio pali’ lao tähämpä’na indo juba. 26Lambi’ siolla’ lelem, mesa gihim-gihim mane napanalla’i oi mesa bua kaju delima, susi lium too pali’ lao tähämpä’na indo juba takekängkä la si dipake umpalako hettem, umba susi pahentaNa DEBATA lako Musa.
27Mane digahaganni Harun sola änä’na juba tando tama, bännä linen malängngo’ ditannum, 28susi toi duka’ saputangam lepom, saputangam masadi’ sangngim bännä linen malängngo’ dipapia, ingganna talana kapodi’ bännä’ linen malängngo’ ditannum, 29anna beke’ bännä linen malängngo’, bännä malibulum, bännä mellolo pao, bännä kasa eja ditannum, dibelo-beloi passumma’, umba susi pahentaNa DEBATA lako Musa. 30Anna nagahaga duka’ pita maseho bulabam ma’nini napapia anna nasuha’ lako susi stempel naua: <<Dipasähäsam DEBATA>>. 31Mane naalai bännä malibulum anna napatondai indo pita, mane napadekke’i lako indo saputangam, umba susi pahentaNa DEBATA lako Musa.
Natahima Musa indo pengkähäna to Israel
32Susim too suppi’ sule lako dikähä indo Kema Kapenombaam, battu diua Kema Kasitammuam DEBATA. Ingganna ia too nakähä to Israel umba susi pahentaNa DEBATA lako Musa. 33Iya nababa asammi lako olona Musa indo Kema Kapenombaam sitonda pahamaka’na:
papana sitonda hindimmi, pekädä-kädäna, andihi dipasiundu’na dikatea’i, pesulu’na, andihinna sampim pesapa’, anna ingganna pentokoanna;
34pesambona sitonda hindinnam indo kema salapi’ lollo’ domba laki diwante’ malea, anna lollo’na olo’-olo’ malängngo’, anna sampim pesapa’na;
35Patti Pa’dandiam to naongei pahentaNa Puang Allataala sitonda pebullena anna tutu’ diongei diampunni dosa;
36meja sitonda ingganna pahamaka’ yabona, anna hoti dipehumalasam;
37andihi lampu bulabam ma’nini dipapia, ingganna lampu to la ditehe yabona, sola ingganna pahamaka’na, anna minnä’ la dipoballo;
38dapo’ tunuam bubanau’ bulabam dipapia, minnä’-minnä’ si dipake massehoi anna mallanti’, tunuam bubanau’; sampim pesapa’ ditutu’iam ba’bana indo Kema Kapenombaam;
39dapo’ pehumalasam tembaga dipapia sola talikaba’ tembaga dianam susi paha-paha, pebullena, sola ingganna pahamaka’na;
busso pembaseam sitonda okkosanna;
40sampim hindinna pa’hanteam, ingganna andihinna, pentokoanna, anna sampim tutu’ ba’bana pa’hanteam, ingganna pesäke’na sola tana’-tana’na, anna ingganna pahamaka’ la dipake ma’hettem illaam Kema Kapenombaam battu diua Kema Kasitammuam DEBATA.
41Sulibanna ia too, dibabapi duka’ lako olona Musa poheba sando la dipake ma’hettem illaam ongeam maseho, poheba dipapiaam senga’ sando Harun, anna pohebana änä’na la napake umpalako oloam sando.
42Nakähä asam to Israel ingganna ia too umba susi pahentaNa DEBATA lako Musa. 43Napahessa asam Musa indo pengkähäna to Israel, iya puha si’dam napalako umba susi indo napahentaam DEBATA. Iya napelaummi tamba’ Musa.
40Kema Kapenombaam dipake’de’
1Iya ma’kadam DEBATA lako Musa naua: 2<<Allo uhunai too bulam mesa umpake’de’um indo Kema Kapenombaam, battu diua Kema Kasitammuam DEBATA. 3Patamai indo Patti Pa’dandiam to naongei pahenta, anna untoke’i sampim pesapa’ dio olona umpalabaiam. 4Patamai duka’ indo meja, anna muäto’ yabona ingganna pahamaka’na situhu’ ätohanna. Patamai duka’ indo andihi lampu, anna tungga’ umpaokko’i indo lampu yabona. 5Patamai duka’ indo dapo’ tunuam bubanau’ bulabam dipapia tando illaanna mai indo Patti Pa’dandiam, mane untoke’i sampim tutu’ ba’bana indo Kema Kapenombaam. 6Paokko’i duka’ indo dapo’ pehumalasam dio olo ba’bana indo Kema Kapenombaam, battu diua Kema Kasitammuam DEBATA. 7Mane umpaokko’i indo busso pembaseam illaam alla’na indo Kema Kasitammuam DEBATA anna indo dapo’, mane umpangngissii uwai. 8Balai lao pali’ pa’hanteanna indo kema anna toke’i sampim tutu’ ba’bana indo pa’hanteam. 9Mane mualai minnä’-minnä’ si dipake massehoi anna mallanti’ anna ussussuianni indo Kema Kapenombaam sola ingganna pahamaka’ illaanna. Susim too la ussehoi ingganna ia too lambi’ mendadi maseho. 10Sussui duka’ indo minnä’-minnä’ si dipake massehoi anna mallanti’ indo dapo’ pehumalasam sola ingganna pahamaka’na. Susim too lalanna ussehoi indo dapo’, lambi’ mahhu maseho indo dapo’. 11Sussui duka’ minnä’-minnä’ si dipake massehoi anna mallanti’ indo busso pembaseam sitonda okkosanna, susim too lalanna ussehoi.
12Anna mane ussua Harun sola änä’na le’ba’ lako olo ba’bana Kema Kasitammuam DEBATA anna undio’i. 13Papohebai Harun poheba sando, mane untolloi minnä’-minnä’ anna umpasähä’i la muanda’i babangam sando dio oloKu. 14Mane untambai änä’na Harun, anna umpapohebai juba tando tama. 15Mane untolloi minnä’-minnä’ susi ambena, anna mala muanda’i babangam sando dio oloKu. Indo hettem ditolloi minnä’-minnä’, iam too umpomannassai diua muanda’im babangam sando ma’tintingam lako ingganna lapi’ pessubunna sule lako salako-lakona.>> 16Iya napalako asammi duka’ Musa umba susi indo napahentaam DEBATA.
17Illaanni allo uhuna bulam mesa taum kaduanna, iya dipake’de’um indo Kema Kapenombaam. 18Napake’de’a’ Musa indo kema: napaokko’ yolo pentokoanna, mane napa’pahondäi dokko indo andihi dipasiundu’, mane napasanni pesulu’na, anna napake’de’ indo andihinna sampim pesapa’. 19Mane naballa’i indo papa sitonda hindinnam kema anna pesambona sitonda hindimmi napasamboiam yabona indo Kema Kapenombaam umba susi napahentaam DEBATA.
20Puhai, naalam indo dua bebä’ batu to dipantuli’i pahentaNa Puang Allataala anna napatamai indo Patti Pa’dandiam. Mane napadekke’i pebullena anna natutu’i indo tutu’ diongei diampunni dosa. 21Mane nababai indo Patti Pa’dandiam tama Kema Kapenombaam, mane natoke’i indo sampim pesapa’ napalabaiam indo Patti Pa’dandiam, umba susi napahentaam DEBATA.
22Mane napaokko’i indo meja illaam Kema Kasitammuam DEBATA tandai illaanna mai indo sampim pesapa’, illaam sa’de tandai utarana Kema Kapenombaam. 23Mane natehei yabona hoti dipehumalasam dio oloNa DEBATA, umba susi napahentaam DEBATA lako Musa.
24Mane napake’de’i indo andihi lampu illaam Kema Kasitammuam DEBATA sitingngajo indo meja, illaam sa’de tandai selatanna Kema Kapenombaam. 25Mane napaokko’i indo lampu yabo ongeanna simesa-mesa dio oloNa DEBATA, umba susi napahentaam DEBATA.
26Mane napaokko’i indo dapo’ tunuam bubanau’ bulabam dipapia illaam Kema Kasitammuam DEBATA tandai illaanna mai indo sampim pesapa’. 27Puhai, untunum tunuam bubanau’ yabona indo dapo’, umba susi pahentaNa DEBATA lako Musa.
28Mane natoke’i Musa sampim tutu’ ba’bana indo Kema Kapenombaam. 29Mane napaokko’i indo dapo’ pehumalasam dio olo ba’bana indo Kema Kapenombaam, battu diua Kema Kasitammuam DEBATA, anna umpehumalasanni tunuam ditunu mampu’ yabona anna tappum gandum, umba susi napahentaam DEBATA.
30Mane napaokko’i indo busso pembaseam illaam alla’na Kema Kasitammuam DEBATA anna indo dapo’, mane napangngissii uwai la dipembase. 31Etam too si naongei Musa sola Harun anna änä’na umbasei limanna sola bitti’na, 32ke la tama oom indo Kema Kasitammuam DEBATA battu haka la lako indo dapo’, umba susi pahentaNa DEBATA lako Musa.
33Puhai, napake’de’um Musa andihinna sola hindinna pali’ lao indo pa’hanteanna Kema Kapenombaam sola indo dapo’, mane natoke’i sampim tutu’ ba’bana indo pa’hanteam. Susim too lalanna suppi’ sule lako indo pengkähängam nakähäa’ Musa.
KamatandeanNa DEBATA umponnoi Kema Kapenombaam
34Iya nakabu’um gabum indo Kema Kasitammuam DEBATA, anna pangkähhä kamatandeanNa DEBATA umponnoi indo Kema Kapenombaam. 35Tä’ mala tama Musa indo Kema Kasitammuam DEBATA aka tohho indo gabum yabona anna pangkähhä kamatandeanNa DEBATA umponnoi indo Kema Kapenombaam. 36Maka’ too tiäkä’ oom längäm indo gabum umpellei indo kema, iya mengkalao oom duka’ to Israel umpatahhu’ pellaoanna. 37Sapo’ maka’ too tä’pi tiäkä’ längäm indo gabum, iya tä’pi duka’ mengkalao to Israel tiäkä’ opi mane mengkalao oi. 38Indo gabum DEBATA si tohho yabona indo Kema Kapenombaam ke ialloi, anna si deem api paindo illaam mai ke bengii, si naita to Israel pada masäena mellao.