Zephaniah

Zephaniah

¹ Gumlox Siyiex, hoek ka Zephanix, kawn simex Khushix kawn simex Gedalix pa mawh kawn simex Amarix, kawn simex Hezakix, ka daux baux singaix Yosix kawn simex Amon pa mawh simiang haktiex Yudax, ² Aux tak sang teei ti tik kuceu khawmuik pak lawg khaing ka piang ca haktiex heue. Siyiex ah nan heue. ³ Aux tak sang teei ti tik pui mai totiag tak sang teei ti tik sim sai piang raoma khankix, ka pa koe daux rawm sigrit sigra khankix mai khawm lon simaox pa sideeing caong mai pui pa ang rahsee heue. Aux tak sang tat ti tik kawn pui khaing piang haktiex heue. Siyiex ah nan heue. ⁴ Aux tak sang nyeu taix tix ka piang pui haktiex Yudax mai ka piang can pui pa ot ka daux veng Yerusaliem khankix heue. Aux tak sang tat ti tik siyiex Balax pa kawn deuk khaing daux haktiex khawm ceu kaux cao giex kaing li pa krub riang grang khankix mai cao giex kaing li tang kaux khankix, ⁵ khawm pui an kix pa krub kraung pak peung raoma khankix ka piang braux nyiex, pui ankix pa krub ka Siyiex mai khawm pa baox deeh tiextu tix ka siyiex Malakham, ⁶ khawm pui ankix pa hoik deeh blak ti hu khaing krax pa hawt tix khaix Siyiex mai pa ang sawg ti yaox ka Siyiex mai pa ang chawk cheng ti yaox ka Nawh Cao heue. ⁷ Ot yiien yawg ka plak sivoe ngai Siyiex, grawh grawng nawh, singaix Siyiex hoik dex hoek, Siyiex hoik khre rien krax pa appong, Nawh cao hoik kieh nyo sinie pa ghaok tix hoek khankix singax heue. ⁸ Ka daux singaix krax tan pa appong son Siyiex, Aux tak ciyang ka simiang khankix mai kawn praix nawh khankix mai pui ceep kraung tang meung khankix heue. ⁹ Ka daux singaix an, Aux tak sang tawx krax pa kham geu ka kix khawmuik, pa yaox ti luan khaing daux diang siviex mai pa naog yuh nyiex simiang kix ka krax pa lang teung kin mai ka pa pie lhen khankix heue. ¹⁰ Siyiex ah nin, ka daux singaix an, lox sinum pa yiiem tak lih khaing daux diang siviex kax mai lox pa riag yo khaing daux veng ra dah tidah mai lox yieh laux pa kied ting lih khaing ka piang gawng piang lua heue. ¹¹ Pex pa ot ka baoh haktiex Matesha khankix eue, koe krax pa riag yo kah heue. Grawh grawng nawh, cao lai geu meung Khanan khankix khawmuik hoik grai, pui ankix khawmuik pa viex mau kawx, hoik mawh pa tat ti tik heue. ¹² Ka daux bawg yam an, Aux tak sang viex kawk ngu hu jiang ti yaox ka veng Yerusaliem mai Aux tak tawx krax kham geu ka pui khankix, pa hoik vu vie ti ot ka dah dee pa seeing brai khankix mai pa ah nin ka daux kix, Siyiex tak sang tawx bwanson mai ang tawx ceu pa caox heue. ¹³ Kraung cie kix, tak sang mawh kraung pa sang tud rhim pui ti teei mai nyiex ma kix, tak sang mawh dee yiien hu pui heue. Kix tak sang sum nyiex, viang mawh nan, ang yaox ti ot ka dau nyiex ankix, kix tak sum sipeem plix siiet khankix, viang mawh nan, ang yaox ti nyaux ka rawm plix siiet heue. ¹⁴ Singaix pa ting lhaong Siyiex hoik dex, hoik dex mai kied phai, mawh lox satang Siyiex, pui pa ting riang rao khankix tak sang riag yo lox tix ka daux singaix an heue. ¹⁵ Singaix an mawh singaix koe krax song rhawm singaix koe krax pa kha rhawm mai krax pa laux rhawm, singaix koe krax pa laux leeing mai krax pa yiien yawg grai hu pui, singaix koe krax ceep paiawm khankix mai krax pa kied faik, ¹⁶ singaix pa phlu teettawng mai krax pa riag yo lox tix puing ka veng pa hoik kaux cong khankix mai ka nyiex pau pa lhaong khankix heue. ¹⁷ "Aux tak sang kieh krax pa kha rhawm hoek ka piang pui khankix mai kieh kix hu awm pui pa duk ngai, kheu hoik lud kix ka Siyiex heue. Nham kix tak sang klup ti lih awm phawng tiex mai nex kix tak sang awm aing pa seeing brai heue." ¹⁸ Ka daux singaix pa song rhawm Siyiex, mau khri kix ang pon taoh kix heue. Haktiex khawmuik tak sang mawh pa gleeing ka ngu krax pa song rhawm Nawh Cao heue. Grawh grawng nawh, Nawh Cao tak sang nied ti yuh pui ankix pa ot ka daux haktiex khawmuik laux lak pak leeing heue.

¹ Pui pa ang tawng ti kaig tua khankix eue, khrawm pex tau heue. ² Sivoe ang nyang bax tawm gumlox lih, sivoe ang singaix an nyang luan awm kam, sivoe ang krax pa kied song rhawm Siyiex nyang bax hoek ka piang pex, sivoe ang krax song rhawm Siyiex nyang bax hoek, pex khrawm tix tau heue. ³ Pex pa koe rhawm awn rhawm tiiem ka piang haktiex khankix, pa hoik priex ti hawt gumlox tat jhawm prawng Siyiex khankix eue, pex sawg ka Siyiex heue. Sawg ka krax pa rahsee sawg ka krax pa tiiem rhawm rhi, phan yuh nan ka daux singaix lih krax song rhawm Siyiex, pex nieb pon mox tix nie. ⁴ Grawh grawng nawh veng Gaza tak sang mawh pa hoik tik vud tix mai veng Ashakelon, tak sang mawh dee pa laux leeing, kix tak grheu pui veng Ashadot khankix lih hu ka daux bawg yam jung singaix mai veng Ekaron tak sang mawh pa reeig ti tik heue. ⁵ Pui ankix pa ot hawt praok rawm sigrit sigra, pa mawh ceu pui Kheratix khankix eue, koe krax kha rhawm heue. Haktiex Khanan pa mawh haktiex dee ot pui Philitix khankix eue gumlox Siyiex tieh feen ka pex ah nin, Aux tak sang yuh maix laux leeing, son ang pui lai ot tan tix kaux kawx heue." ⁶ Haktiex praok rawm sigrit sigra khankix tak sang mawh dee pa klai rib riem mai dee peung son cao pa liang yung khankix mai kawg yung khankix son cub phung yung heue. ⁷ Haktiex praok rawm sigrit sigra in tak sang mawh son nyiex ceu pui Yudax pa kawn deuk an khankix, kix tak sang yaox ti liang cub phung yung kix tan, ka daux ponsawm kix tak sang it ka daux nyiex veng Ashakelon khankix heue. Grawh grawng nawh Siyiex pa mawh Siyiex kix, tak sang hoek ti kia ngien ka kix mai deeh teei pui pa giex laung kix ing heue. ⁸ Aux hoik mhong lox salao ceu pui Yudax mai grawng pa tang ceu pui Amon phimap, ka pa hoik salao kix ka pui Aux khankix mai ah lox ting ca nyhau mai laig baox ka mee haktiex kix heue. ⁹ Mawh kheu nan, Siyiex Cao kru naing raoma, Siyiex ceu pui Isarelax ah nin "Awm im ju Aux, haktiex Mawbax tak sang mawh pa awm veng Sawdom mai pui haktiex Amon khankix tak sang mawh pa awm veng Gawmawrax, pa hoik tieh ti mawh pang kat khankix mai daux kih, mawh dee pa laux leeing jheung jheung heue. Pui aux pa kawn deuk khankix tak sang hu tud rhim ti teei kix mai pui pa kawn deuk khankix ka daux meung, Aux tak sang pon ti cie sin kix heue. ¹⁰ Grawng in hoek ka piang kix, kheu krax pa lhaong rhawm kix, kheu hoik ah kix lox pa ting ca nyau mai hoik salao ka pui Siyiex cao kru naing raoma heue. ¹¹ Siyiex tak sang mawh pa lhat graung kix kah heue. Mawh kheu Nawh Cao tak sang kieh siyiex piang haktiex khankix krawx hu heue. Pui khankix ku kaux mai khawm ceu pui khankix, pa ot ka klawn tiex rawm sigrit sigra kawx tak sang krub ka Nawh Cao ka dee ot dee koe tix heue. ¹² Pex pa mawh ceu pui Ethiopiya khankix eue, vaid Aux tak sang mawh pa pah pex yum heue. ¹³ Nawh Cao tak sang nyeu taix taix lih ka piang plak laong mai yuh haktiex Asurix laux leeing mai kieh veng Nineve mawh dee pa yiien grai hu pui, awm kroh kroing daux tiagtu heue. ¹⁴ Cub tobrie mai totiag khankix kuceu tak it ka daux sigreung veng heue. Sim Vam po mai goh tak sang ot ka piang nuk daux siviex iak, sim khankix tak ah lox tix ka heue. Krax yiien yawg grai hu pui tak sang koe ka daux diang siviex tan, khaox Arit pa hoik thui ti deuh plang khankix hoik jieh laux heue. ¹⁵ In mawh veng pasax koe krax gaux rhawm, pa hoik sax ot yiien yawg tix heue. Ah nin ka daux rhawm tix, "Koe ngie aux, lheu khaing aux ang lai koe pui tang kaux heue. Yam in nawh hoik lih ti mawh dee pa yiien grai hu pui mai dee it totiag khankix yuh ka mawx, can pui pa tiang ti hu hawt baoh nawh, tak ah lox nyiah mai yaog vuh vied taix tix kah heue."

¹ Veng pa hoik deeh kaoh ti tieh feen mai pa hoik seeing in koe krax pa kha rhawm heue. ² Nawh ang nghiet ka gumlox Siyiex, nawh ang rieb ti teei krax pa sidiex gau ceu pa mhawm, nawh ang een rhawm tix ka Siyiex, nawh ang greed tix dex mai Siyiex tix heue. ³ Simiang pa koe ka daux sinax nawh khankix, mawh sivai sangsi pa brum lox tix, cao prawng see nawh, mawh sox la pa lih daux plak ponsawm, pa ang tie prah si ang pie tix gawng kawx tom hoek daux plak ponngawb heue. ⁴ Cao jhai nawh mawh pa ang koe simu mai mawh pui pa luk liak luk le; cao giex kaing li nawh hoik seeing yuh dee pa singax singeh, kix hoik map nai ka gumlox beenli heue. ⁵ Siyiex mawh pa rahsee, ka daux sigreung nawh, Nawh Cao ang yuh krax pa ang rahsee tix ceu kawx, ka daux plak ponngawb ku ngawb, Nawh Cao jhi krax pa rahsee tix sidawng mai ang koe ngaix tang siyox, viang mawh nan, pui pa ang rahsee ang tawng ti koe krax kaig tua heue. ⁶ Aux hoik tat ti tik ceu pui khankix kuceu, nyiex tab lhaong kix mawh pa hoik laux, Aux hoik kieh daux krax daux laux kix mawh pa yiien grai hu pui, pa ang pui tix kaux kawx tiang ti hu heue. Veng kix mawh pa hoik laux leeing, pui tix kaux kawx ang lai koe ka daux mai pui pa ot kawx ang lai koe heue. ⁷ Aux ah nin, "Maix tak sang koe krax lhat graung ka Aux maix tak sang rieb ti teei lox pa sidiex gau khankix, son ang dee ot dee koe maix mawh pa tat ti tik awm pa hoik keud Aux ti deuh, viang mawh nan, pex hoik yaog ti kaoh cao cao mai hoik lud yuh kaing pa hoik yuh tix khawmuik heue." ⁸ Siyiex ah nin, "Pex krox jun ka Aux, tom hoek singaix sang yaox Aux ti kaoh, son krax pa giex laung, mawh kheu hoik tat Aux ti deuh, sonsang kraix khrawm Aux meung ku meung pui kuceu hoek, sonsang klup Aux krax pa saux rhawm saux rhi tix lih ka piang kix, ka daux krax pa kied song rhawm aux khawmuik heue. Haktiex tak sang mawh pa gleeing ti laux, ka ngu koe krax pa song rhawm Aux heue. ⁹ Yam an Aux tak sang deeh kieh ceu pui khawmuik sikah lox pa singax, sonsang pon kix ti kok ceu kaux Siyiex mai sonsang yuh kaing jhaw Nawh Cao tau mai krax grum rhawm heue. ¹⁰ Kaing ka plak toi rawm klawng haktiex Ethiopiya, pa mawh pui pa krub ka Aux mai kawn bun pa hoik prung prang rai rhuat khaing ceu pui Aux khankix, tak sang viex krax pa tan tix hoek ka Aux heue. ¹¹ Ka daux singaix an maix tak ang lai koe krax kaig tua, son kaing pa lud maix ka Aux khawmuik, grawh grawng nawh, yam an Aux tak sang teei pui ankix pa koe krax yaw min pakngai tix ka maix khankix luan khaing daux maix mai tak ang lai mawh pa lhaong rhawm khaix in ka gawng pa singax singeh Aux heue. ¹² Aux tak sang deuh pui pa hot shia pa tiiem rhawm khankix, ka daux sinax maix mai kix tak een rhawm tix ka daux ceu kaux Siyiex heue. ¹³ Ceu pui Isarelax pa kawn deuk khankix, tak ang lai yuh pa ang rahsee mai ang lai sikah lox pie lox lhen mai dak pa luk liak luk le tak ang lai koe ka daux jheeh kix heue. Grawh grawng nawh, kix tak yaox ti ih nyaux mai yaox ti it nyawm mai tix kaux kawx, tak ang lai pon kieh kix koe krax lhat graung heue." ¹⁴ Kawn Bun Zion eue, ah lai rhax heue. Ceu pui Isarelax khankix eue, Kok yo lox tix heue. Kawn bun veng Yerusaliem eue, koe krax nyawm rhawm mai krax gaux rhawm khawm rhawm rhi tix khawmuik heue. ¹⁵ Siyiex hoik teei krax ciyang maix khankix luan mai Nawh Cao hoik teei ti tik pui koeng maix luan heue. simiang ceu pui Isarelax, pa mawh Siyiex, ot ka daux sigreung maix heue. Maix tak ang lai yaox krax pa laux leeing khaix in baox pie tix bawg kawx heue. ¹⁶ Ka daux singaix an, tak sang koe lox ka veng Yerusaliem ah nin, paw koe krax khi rhawm mai ka gawng Zion paw kieh taix maix mawh pa awn riang heue." ¹⁷ Siyiex pa mawh Siyiex maix ot ka daux sinax maix, Siyiex pa kied ting sibrawm, tak sang taoh ka maix, Nawh Cao tak koe krax pa gaux rhawm kheu maix mai krax pa nyawm rhawm heue. Nawh Cao tak kieh maix ot yiien yawg tix ka daux krax moh krax rhawm Nawh mai Nawh Cao tak koe krax pa gaux rhawm kheu maix mai krax pa ah lai rhax heue." ¹⁸ Aux tak sang kraix khrawm pui inkix pa ot ka daux sinax maix, pa koe krax khi rhawm ang yaox ti hu yuh pawie pa hoik tat ti deuh khankix, pa mawh pui pa koe beeh glawm ti kham krax salao kheu maix khankix heue. ¹⁹ Jhak heue, ka daux bawg yam an, Aux tak ciyang ka pui ankix khawmuik pa yuh krax kha rhawm maix heue. Aux tak sang taoh pui pa chawh caong mai khrawm pui ankix pa hoik grheu lih, Aux tak sang kieh kix pa hoik yaox ti kham krax pa kaig tua ka daux haktiex ku dah khankix pon krax yaog yaw mai krax pa ao min heue. ²⁰ Ka daux bawg yam an, Aux tak sang deeh viex pex hoek, kraix khrawm pex tau heue. Grawh grawng nawh, aux tak sang tawx maix koe krax pa ao min mai krax pa yaog yaw, ka daux sinax pui piang haktiex khawmuik, yam dee viex Aux pui pa giex laung pex khankix hoek ka daux plak sivoe ngai maix. Siyiex ah nan heue.