Zechariah

Zechariah

¹ Ka daux baux yam kwang simiang Darix, ra num tix num, daux khix daix, gumlox Siyiex hoik hoek ka cao jhai Zakharix pa mawh kawn simex Berekhix, kawn simiex Idaw ah nin, ² "Siyiex hoik dawg kied song rhawm ka keeing pex khankix heue." ³ "Mawh kheu nan maix ah nin ka kix. "Siyiex cao kru naing raoma ah nin "Deeh ing hoek ka Aux awx! "Aux tak deeh hoek ka pex heue. "Siyiex cao kru naing raoma ah nan heue. ⁴ "Paw lai yuh awm keeing pex khankix, pa hoik kok cao jhai khankix ka phao voe ah nin, Siyiex cao kru naing raoma ah nin, deeh veeh tix yam in khaing daux krax pa caox caig yuh pex khankix heue." Viang mawh nan, kix ang nghiet mai ang lai koe krax nghiet ka Aux heue. "Siyiex ah yuh nan heue. ⁵ "Keeing pex khankix koe dee mawx lie? Cao jhai khankix, pon im ju leeing ju lie? ⁶ Viang mawh nan, gumlox beenli pa deuh Aux khankix, ka pa hoik tawm Aux ti deuh ka kawncau Aux pa mawh cao jhai khankix, mawh ang hoek ka keeing pex lie? "Kix hoik deeh ing hoek mai ah nin awm hoik tat Siyiex cao kru naing raoma rhawm rhi tix ti sang yuh ka piang ex, awm koe krax grawng pa yuh ex mai awm koe kaing pa yuh ex, mawh kheu nan, Nawh Cao hoik yuh ka ex heue." ⁷ Ka daux num kwang simiang Darix ra num tix num, khix kao tix pa mawh Khishebat tixnga pon ngaix, gumlox Siyiex hoik hoek ka cao jhai Zakharix, pa mawh kawn simex Berekhix, kawn simex Idaw, ⁸ Ka daux plak ponsawm aux jhak mai yaox pui tix kaux pa brug brung raoh hoek mai cung ka daux sinax pang khaox kui daux ngawd tan mai ka plak khaix nawh koe brung pa raoh, pa pau mai pa paing khankix heue. ⁹ Yam an aux chawk ah nin "Siyiex aux eue, inkix mawh patix lie? "Mawh kheu nan, kawncau Siyiex, pa hoik sikah tau mai aux, krai ah nin ka aux, "Aux tak sang jhi maix yaox ka mawh ceu inkix patix heue. ¹⁰ Pui pa hoik cung ka sinax khaox kui an, hoik deeh pawk lox ah nin "Inkix mawh pa hoik ploi Siyiex lai ling ti hu jee hu blaong ka piang haktiex heue." ¹¹ Kix deeh pawk lox kawncau Siyiex, pa hoik cung ka sinax khaox Muratu, ah nin "Yix hoik lai ling ti hu jee hu blaong ka piang haktiex mai jhak heue, Haktiex laux lee tix ot yiien yawg khawmuik heue." ¹² Khaix an, kawncau Siyiex hoik deeh pawk lox ah nin "Siyiex kru naing raoma eue, Mawh ang Maix lai koe krax caux rhawm ka veng Yerusaliem mai ka veng Yudax khankix, ka piang hoik koe krax pa song rhawm Maix atixgliah num inkix rheung miex ding lie?" ¹³ Siyiex hoik deeh pawk lox ka kawncau Siyiex an, pa hoik sikah tau mai aux, ka gumlox pa mhawm mai pa koe krax pa nyhawm rhawm heue. ¹⁴ Kawncau Siyiex pa sikah mai aux ah nin, "Siyiex cao kru naing raoma ah nin, Aux kied koe krax pa caux rhawm ka son veng Yerusaliem mai ka son veng Zion, tau mai krax pa kied koe rhawmrhi tix heue. ¹⁵ Aux kied song rhawm songrhi ka ceu pui tang ceu pa ot yiien yawg tix khankix, grawh grawng nawh, Aux song rhawm ceeix ngie ka veng Yerusaliem mai kix hoik chax nie luan yuh ceu pa kha rhawm ka veng an heue. ¹⁶ Mawh kheu nan, Siyiex ah nin "Aux sang deeh ing hoek ka veng Yerusaliem tau mai krax pa caux rhawm, nyiex bwan Aux tak sang mawh pa deeh sum tix ka daux veng an mai tak sang bluh maox tiag lih ka piang veng Yerusaliem heue. "Siyiex cao kru naing raoma ah nan heue. ¹⁷ Siyiex cao kru naing raoma ah nin "Veng Aux khankix, tak sang baox grum naog ka daux krax pa haok hwan heue. Siyiex tak sang baox tawm krax nyawm rhawm ka grawng Zion mai tak sang baox laug ti teei veng Yerusaliem heue." ¹⁸ Khaix an, aux yaog ngai tix jhak mai yaox rung khankix pon mu heue. ¹⁹ Aux chawk ka kawncau Siyiex pa hoik sikah tau mai aux "Mawh inkix patix lie? "Nawh deeh pawk ka aux ah nin "Inkix mawh rung pa hoik prung prang ti tik haktiex Yudax, haktiex Isarelax mai veng Yerusaliem khankix heue. ²⁰ Khaix an, Siyiex hoik jhi aux yaox ka pui pa chix kaing khaox khankix pon kaux heue. ²¹ Aux ah nin "Mawh hoek kix ti yuh ceu patix lie? "Nawh deeh ah nin, inkix mawh rung pa hoik prung prang ti tik pui haktiex Yudax khankix, pa kieh pui ang lai pon yaog kaing tix heue. Viang mawh nan pui chix yuh kaing khaox ankix, sang hoek ti glhat ka kix mai sonsang teei ti tik rung pui tang ceu khankix, pa hoik mawh rung pa yaog ti prung prang ka haktiex Yudax heue.

¹ Khaix an, aux yaog ngai tix jhak mai yaox ka pui tix kaux pa giex maox tiag tix nyaing ka daux taix tix heue. ² Aux ah nin "Mawh sang hu maix dee mawx lie? "Nawh krai ka aux ah nin "Sang hu tiag ka veng Yerusaliem, jhak ka pa koe krax vieh miex ding mai koe krax lang miex ding heue." ³ Yam lih hu kawncau Siyiex pa hoik sikah tau mai aux an mai kawncau Siyiex tang kaux hoik lih hoek ti rieb ka nawh, ⁴ mai ah nin "Maix to hu krai ka pui awn ju in ka daux krax pa ah nin, veng Yerusaliem, tak mawh dee pa kawn ot pui khankix, awm veng khankix pa ang koe guh veng, mawh kheu kied hun pui mai tobrie khankix ka daux veng an heue. ⁵ Siyiex ah nin "Aux tak sang mawh guh veng ngu ka hawt vung viang nawh mai mawh min pakngai ka daux sigreung nawh heue. ⁶ "Kaoh heue, Kaoh heue, to ti lih hoek khaing haktiex plak blaong heue. "Siyiex ah nin heue. "Grawh grawng nawh, Aux hoik kieh pex prung prang awm bhaung pon plak daux raoma khankix heue. "Siyiex ah nan heue. ⁷ Pui veng Zion pa ot tau mai kawn bun veng Babulon khankix eue, to ti glawd heue." ⁸ Siyiex cao kru naing raoma ah nin, khaix hoik sidawng min pakngai Nawh ploi aux hu ka ceu pui khankix pa tud rhim ti teei pex, pui pa hu teeh ka pex, mawh pui pa teeh ka daux kawn ngai Nawh Cao heue. ⁹ Jhak heue, Aux sang sau taix tix ka kix mai kix tak sang lih mawh kraung pa hoik tud rhim ti laux leeing son siliex kix heue. Khaix an, pex tak tawng ka hoik ploi Siyiex cao kru naing raoma Aux hoek heue. ¹⁰ Kawn bun Zion eue, ah lai rhax mai koe krax gaux rhawm kah heue. Grawh grawng nawh, jhak heue, Aux hoik hoek ot ka daux sinax pex heue. "Siyiex ah nan heue. ¹¹ "Yam an tak sang koe ceu pui tom nie pa deeh hoek ka Siyiex mai kix tak sang mawh pui Aux heue. Aux tak ot ka daux sinax pex heue. Khaix an, pex tak tawng ka hoik ploi Siyiex cao kru naing raoma Aux hoek ka pex heue. ¹² "Siyiex tak sang teei kraung cie haktiex Yudax mawh sinngao ka daux haktiex pa singax Nawh Cao mai tak sang baox deeh laug ti teei veng Yerusaliem heue. ¹³ Can pa koe nex koe nham khankix eue, Koe krax pa yiien yawg, ka plak sivoe ngai Siyiex, mawh kheu Nawh Cao hoik yaog ti kaoh khaing dee ot pa singax singeh Nawh Cao heue.

¹ Nawh Cao baox jhi aux yaox Yawsux pa mawh cao giex kaing li pa ting cung ka plak sivoe kawncau Siyiex mai satan cung ka plak taix khawn dawm Yawsux sonsang tieh feen Nawh Cao heue. ² Siyiex ah nin ka satan an, "Satan eue, Siyiex sidiex ka maix! pa mawh Siyiex pa hoik laug ti teei veng Yerusaliem sidiex ka maix heue. Ang in mawh nge khix pa hoik yoi khaing daux ngu tix nge lie?" ³ Yam an Yawsux hoik ceep ka kraung pa seeing mai cung ka plak sivoe kawncau Siyiex an heue. ⁴ Kawncau Siyiex deeh krai lox ka pui pa hoik cung ka plak sivoe Nawh khankix ah nin "Peeik ti tik kraung ceep pa seeing an khaing nawh heue. "Krai ka Yawsux ah nin. "Jhak heue, Aux hoik teei ti tik phimap khaing maix mai Aux tak sang tawx maix ceep kraung pa mhawm grang heue." ⁵ Aux ah nin, "Kieh kix ceep mhok pa singax ka piang kaing nawh" awm an kix tawx nawh ceep mhok pa singax ka piang kaing nawh mai tawx nawh ceep kraung ceep nawh mai kawncau Siyiex kawx cung hawt praok tan heue. ⁶ Khaix an, kawncau Siyiex hoik tawx satix ka Yawsux ah nin, ⁷ "Siyiex Cao kru naing raoma ah nin, phan maix hawt ti hu ka daux krax Aux khankix mai priex ti hawt ka gumlox pingnyap Aux, khaix an maix tak yaox ti kwang ka nyiex Aux mai yaox ti pau ka daux gwang nyiex Aux, Aux tak sang kieh maix lai ling ti hu ka daux sinax pui inkix, pa cung ti ot tin heue. ⁸ Yawsux pa mawh cao giex kaing li pa ting eue maix khawm paox pa ngawm ka plak sivoe maix khankix, nghiet heue. Kix mawh mhai rug pa daox deng heue. Aux tak sang kieh kawncau Aux, pa mawh nyoeg kak Davit hoek heue. ⁹ Jhak heue, Lon simaox pa hoik deuh Aux ka plak sivoe Yawsux, ka piang lon simaox an tix lon koe ngai kah aliah mu heue. Jhak heue, Aux tak sang saik ka lon simaox an mai Aux tak sang preet ti tik phimap haktiex an ka daux tix singaix ngie heue. "Siyiex cao kru naing raoma ah nan heue. ¹⁰ "Ka daux singaix an, pui ku kaux tak sang ghaok ka paox plawg tix khankix hoek ka greem nhu plix siiet nawh mai ka greem khaox ruh nawh heue. Siyiex cao kru naing raoma ah nan heue.

¹ Kawncau Siyiex pa hoik sikah tau mai aux hoek so aux kaoh, awm pui pa hoik siduad ti kaoh khaing it tix heue. ² Nawh chawk ka aux ah nin "Mawh yaox maix ka ceu patix lie? "Aux deeh ah nin, aux yaox ka pang jawk ten pa hoik yuh ka khri nawnaw tix mu mai jawk ten koe ka piang toh an mai ka piang pang jawk ten koe jawk ten aliah mu mai koe blawng aliah mu pa hoik sitoe tix ka jawk ten aliah mu an heue. ³ "Ka praok koe khaox sanlun ra gaw, an tix gaw koe ka plak dawm jawk ten mai an tix gaw koe ka plak gwiex jawk ten an heue." ⁴ Aux chawk ka kawncau Siyiex pa hoik sikah tau mai aux ah nin "Simiang aux eue, inkix mawh ceu patix?" ⁵ Kawncau Siyiex pa hoik sikah tau mai aux hoik deeh pawk lox ka aux ah nin "Mawh ang maix tawng ka mawh inkix ceu patix lie? "Mai aux ah nin, "Simiang aux eue, aux ang tawng heue." ⁶ Nawh krai ka aux ah nin, in mawh gumlox Siyiex pa hoek ka Zerubabelax, ang tie mawh khaing ka daux pa kied ting riang rao mai khaing ka daux krax pa koe sibrawm, viang mawh nan, mawh pa kaoh khaing Khuan Aux heue. Siyiex cao kru naing raoma ah nan heue. ⁷ "Gawng ting eue, mawh maix patix lie? Sivoe Zerubabelax maix tak sang lih ti mawh daux lung heue. Nawh tak viex lon simaox tix lon hoek mai deuh piang dee choek nyiex mai pui yo lox tix ting ah nin kieh bwanson koe ka an heue. ⁸ Khaix an, gumlox Siyiex hoik baox hoek ka aux ah nin, ⁹ "Taix Zerubabelax hoik sum ti deuh num riah nyiex bwan in, taix nawh tak sang yuh an heue. Khaix an maix tak tawng ka hoik ploi Siyiex cao kru naing raoma Aux hoek ka pex heue. ¹⁰ mawh pui mawx pa hoik ah lox salao ka singaix pa ting in mawh singaix pa iak lie? Ngai inkix aliah mu mawh ngai Siyiex pa tah jhak ka piang haktiex khawmuik khawm leeing, pui pa yaox ka maox tiag pa koe ka daux taix Zerubabelax tak koe krax gaux rhawm heue. ¹¹ Aux baox chawk ah nin, Mawh khaox sanlun ra gaw pa koe ka plak dawm plak gwiex pang jawk ten an ceu patix lie?" ¹² Aux baox deeh chawk nawh ah nin, "Kak khaox sanlun ra kak an pa koe ka praok blawng khri pa sau bee mawh ceu patix lie? ¹³ Nawh hoik deeh pawk lox ka aux ah nin, "Mawh ang maix nyang tawng ka mawh inkix ceu patix lie? "aux ah nin "Simiang aux eue, Aux ang tawng heue. ¹⁴ Nawh deeh ah nin, kak khaox an ra kak, mawh pui pa hoik groi rawm bee ka piang pa cung hawt praok Siyiex, pa kwang ka haktiex khawmuik khawm leeing heue."

¹ Khaix an aux yaog ngai tix jhak mai yaox ka bua lai pa po tix bua heue. ² Nawh chawk ka aux ah nin, "Mawh yaox maix patix lie? "Aux deeh pawk ah nin, "Aux yaox ka bua lai pa po tix bua heue. Krax lang nawh koe tixnga sawk mai krax vieh nawh koe kao sawk heue." ³ Nawh ah nin ka aux in mawh krax pa jhax lawg pa lih hu ka piang ca haktiex khawmuik khawm leeing heue. Can kix pa briex pa lak, tak sang mawh pa teei ti tik awm pa koe ka bua lai in tix plak mai can pui pa pie ti yuh krax tiextu, tak sang mawh pa teei ti tik awm pa koe ka bua lai an tix plak heue. ⁴ Siyiex cao kru naing raoma ah nin "Aux tak sang ploi bua lai in lih hu mai tak sang laig ka daux nyiex pui pa briex pa lak mai ka daux nyiex pui pa pie ti yuh krax tiextu ka daux ceu kaux Aux heue. Tak sang ot ka daux nyiex nawh mai ih ti tik nyiex an mai khaox nyiex khankix khawm lon simaox khankix heue. ⁵ Kawncau Siyiex, pa hoik sikah tau mai aux, lih hoek mai ah nin ka aux, "Yaog ngai maix jhak mawh ceu patix pa lih hoek lie? ⁶ Aux deeh chawk ah nin, "Mawh an patix lie? "Nawh ah nin, "Pa lih hoek tan mawh phliex heue. "Nawh baox deeh ah nin, "In mawh pak peung pa caox caig kix ka piang haktiex heue." ⁷ "Aux yaox plah dieb sivun pa hoik yaog tix tix plah mai in mawh bun tix kaux pa ngawm ka daux phliex an heue." ⁸ Nawh ah nin, "In mawh pa caox caig heue. "nawh cot bun an laig ka daux phliex mai tik plah dieb sivun an ka piang moing phliex heue. ⁹ Aux baox yaog ti jhak mai yaox bun ra kaux lih hoek mai bhaung koe ka daux pruik kiex, kiex hoik koe pruik awm pruik sim saoh mai kiex hoik yaog phliex an hu ka daux sinax haktiex mai raoma heue. ¹⁰ Aux chawk ka kawncau Siyiex pa hoik sikah tau mai aux ah nin, "Kiex sang thaih ti viex phliex an hu dee mawx lie?" ¹¹ nawh ah nin ka aux, "Sonsang sum nyiex tix lhang son nawh ka daux haktiex Shina heue. Yam hoik grum sum ka nyiex an mai deuh nawh ot ka dee ot tokaux tix tan heue."

¹ Aux yaog ngai tix jhak mai yaox ling lawx naing pon lhang hoik hoek khaing sinax gawng ra mu, gawng an hoik mawh gawng tawng lheung heue. ² Ling lawx naing phao ka tix lhang, tok ka brung raoh, ling lawx naing an ra lhang tix lhang tok ka brung lung, ³ ling lawx naing loe lhang tix lhang tok ka brung paing mai ling lawx naing pon lhang tix lhang tok ka brung preeh, pa mawh brung pa kied phai brax mai pa kied koe riang heue. ⁴ Aux deeh chawk ka kawncau Siyiex pa hoik sikah tau mai aux ah nin "Simiang aux eue, inkix mawh patix lie?" ⁵ Kawncau Siyiex hoik deeh pawk lox ka aux ah nin, "Inkix mawh khuan daux raoma pon mu, pa lih hoek khaing dee cung kix ka plak sivoe Siyiex pa kwang haktiex khawmuik heue. ⁶ Pa hoik tok ka brung lung an mawh pa sang hu ka haktiex plak blaong, brung paing an tak sang hu hawt khaix mai brung preeh an mawh pa sang hu ka haktiex plak seh heue." ⁷ Brung pa kied phai pa koe riang koe rao an hoik lih hoek, sonsang lailing jee blaong piang haktiex heue. Kawncau Siyiex ah nin, "Hu heue, lailing ti hu jee jee blaong blaong ka piang haktiex heue. "Kix hoik lailing ti hu jee hu blaong ka piang haktiex heue. ⁸ Nawh kok ka aux ah nin "Jhak heue, pa hu ka haktiex plak blaong hoik kieh khuan Aux laux lee tix ka daux haktiex plak blaong heue." ⁹ Gumlox Siyiex hoik hoek ka aux ah nin, ¹⁰ "Rieb ti teei totaix khaing pui pa giex laung an khankix, ka Heladie, Tawbiyax mai Yedayax khankix pa hoik hoek khaing veng Babulon mai hu tidom neh ka daux singaix an mai laig ka daux nyiex Yosiyax pa mawh kawn simex Zephanix heue. ¹¹ "Teei mau mai khri mai yuh mhok khri, ceep ka kaing Yawsux, pa mawh kawn simex Yehawzadax, cub cao giex kaing li pa ting khankix heue. ¹² Siyiex cao kru naing raoma ah nin, "Jhak heue, Pui pa kok ceu kaux mawh nyoek kak khaox Davit, nawh tak sang yaog ti lih khaing dee ot tix mai nawh tak sang sum nyiex bwan Siyiex heue. ¹³ Nawh tak sang sum nyiex bwan Siyiex, Nawh tak sang koe min pakngai mai tak sang ngawm ti kwang ka piang dang ngeung cao nawh mai krax keud krax sawn pa yuh paox pie ka daux krax pa nhim, tak sang koe ka daux sinax kiex khawm ra heue." ¹⁴ "Mhok khri in tak sang deuh mawh pa doh keud ka daux nyiex bwan Siyiex, son Heladie Tawbiyax, Yedayax mai Yosiyax, pa mawh kawn simex Zephanix heue. ¹⁵ "Pui pa ot dee pa kied singai, tak sang hoek ti sum nyiex bwan Siyiex, pex tak tawng ka hoik ploi Siyiex cao kru naing raoma Aux hoek ka pex. Phan pex koe krax cu nghiet ka lox Siyiex, pa mawh Siyiex pex, ceu in khankix tak sang lih ti mawh heue.

¹ Ka daux baux num kwang simiang Davit pon num tix num khix dim pa mawh khix khisalux pon ngaix gumlox Siyiex hoik hoek ka Zakharix heue. ² Yam an pui veng Betelax hoik ploi ka Shareza mai Reganmeliet mai pui nawh khankix hu sonsang rawg tix bwan ka plak sivoe Siyiex, ³ sonsang chawk tix ka cao giex kaing li khankix, pa koe ka daux nyiex bwan Siyiex cao kru naing raoma mai ka cao jhai khankix ah nin. "Mawh kawn sang ot ex ti yiiem ka daux khix num pa hoik luan khankix tom nie lie? Awm krax pa hoik yuh ex daux num pa hoik luan khankix tom nie lie? ⁴ Gumlox Siyiex cao kru naing raoma hoik hoek ka aux ah nin. ⁵ "Maix krai pao ka pui haktiex khankix khawmuik mai ka cao giex kaing li khankix ah nin, yam hoik twah pex pa ih mai yam khi rhawm pex ti yiiem ka daux khix phwan mai khix aliah glang daux atixgliah num khankix, khex ruk mawh hoik twah pex pa ih ka son Aux tete lie?" ⁶ Pex ih mai nyaux mawh ang pex ih mai nyaux son tokaux pex lie? ⁷ Mawh ang pex khaw ti koe krax cu nghiet ka gumlox pa hoik pao Siyiex ti krai khankix, khaing ka cao jhai khankix phao voe, yam veng Yerusaliem mai veng pa koe hawt vung viang nawh khankix hoik koe pui ot mai hoik haok hwan mai yam hoik ot pui ka baoh plak seh mai dee tiem tiex khankix lie?" ⁸ Gumlox Siyiex hoik hoek ka Zakharix ah nin, ⁹ "Siyiex Cao kru naing raoma ah yuh nan, "Prawng ca ka daux krax pa mawh pa meh, jhi krax caux rhawm mai yuh ti tawx krax pa koe bwanson, ka puxaik tix ku kaux daux pui heue. ¹⁰ Paw yuh krax kha rhawm ka miexmai kawn doe, ka pui haktiex tang meung mai ka pui pa hot sia khankix awx! Paw kieh tix kaux kawx, koe krax pa sang yuh tix pa caox ka daux rhawm tix ka piang puxaik nawh heue." ¹¹ "Kix ang cu ti nghiet mai hoik veeh klip tix mai hoik thox yhaok tix son ang sang mhong heue. ¹² Kix hoik kieh rhawm tix kiien awm siang simaox mai ang nghiet ka gumlox beenli mai ka gumlox pa hoik ploi Siyiex cao kru naing raoma hoek khaing khuan ka cao jhai khankix phao voe heue. Mawh kheu nan, krax pa kied song rhawm hoik hoek khaing Siyiex cao kru naing raoma heue. ¹³ Aux kok yo mai kix ang nghiet, awm an, kix rawg mhaing kawx Aux ang lai nghiet heue. Siyiex cao kru naing raoma ah nan heue. ¹⁴ "Aux tak prung prang ti tik kix ka bhaung kanglux, ka daux sinax ceu pui khankix pa ang kix nyang sax tawng heue. Mawh kheu nan, haktiex kix lih ti mawh dee hoik yiien grai hu pui khankix, tom ang pui tix kaux kawx lailing ing tiang ka dee an, grawh grawng nawh, kix hoik kieh haktiex pa mhawm an mawh dee pa laux leeing heue."

¹ Gumlox Siyiex cao kru naing raoma hoik hoek ka aux ah nin, ² "Siyiex cao kru naing raoma ah nin "Aux kied koe rhawm pa moh ka son Zion heue. Aux kied koe rhawm son nawh mai kied song rhawm ka pui koeng nawh heue. ³ "Siyiex ah nin, Aux deeh ing ka gawng Zion mai ot ka daux sigreung veng Yerusaliem heue. Veng Yerusaliem tak sang kok mawh veng pa kaux sijax, gawng Siyiex cao kru naing raoma tak kok mawh gawng pa singax heue." ⁴ "Siyiex cao kru naing raoma ah nin "Simex mai bun pa riex ju khankix, khaix in tak sang ngawm ka daux krax veng Yerusaliem, mawh kheu hoik kuad kix daux taix kix ku kaux tom giex khaox gix tix heue. ⁵ Krax daux veng khankix, tak sang naog ka kawn nyawm simex mai kawn nyawm bun, pa klieh ka daux krax khankix heue." ⁶ "Siyiex cao kru naing raoma ah nin viang an mawh ceu pa daox deng ka daux ngai pui pa kawn deuk khankix ka daux singaix ankix mai sang mawh an ceu pa daox deng ka daux ngai Aux lie? "Siyiex cao kru naing raoma ah nan heue. ⁷ "Siyiex cao kru naing raoma ah nin, "Jhak heue, Aux tak sang taoh pui Aux, khaing daux haktiex plak lih singaix mai khaing daux haktiex plak klip singaix, ⁸ Aux tak sang deeh viex kix hoek mai kix tak sang yaox ti ot ka daux sigreung veng Yerusaliem heue. Kix tak sang mawh pui Aux mai Aux tak sang mawh Siyiex kix, ka daux krax pa kaux sijax mai ka daux krax pa rahsee heue." ⁹ Siyiex cao kru naing raoma ah nin "Kieh taix pex koe riang rao heue. Can pex pa hoik mhong ka gumlox inkix pa kaoh khaing daux jheeh cao jhai khankix, pa hoik krai ka daux singaix sum pex ti deuh num riah nyiex bwan Siyiex cao kru naing raoma heue. ¹⁰ Grawh grawng nawh, sivoe singaix inkix, pui ang lai pon ngawh yuh tix kaing mai ngawh vai to brie kawx ang lai pon, mawh kheu jao pui pa lailing khankix kawx ang lai koe krax pa nhim, kheu Aux hoik kieh pui khawmuik ra lai phit paox tix heue. ¹¹ "Viang mawh nan, yam in Aux tak ang lai yuh ka pui pa kawn deuk in, awm glang ka singaix pa hoik luan heue. "Siyiex cao kru naing raoma ah nan heue. ¹² "Grawh grawng nawh, kix tak rhuat simie ka daux krax pa nhim, nhu plix siiet tak sang plix, tiex tak sang tawx rawm ciex lih heue. Aux tak sang kieh pui pa kawn deuk inkix pon ti cie ceu inkix khawmuik heue. ¹³ Nyiex ma ceu pui Yudax mai nyiex ma ceu pui Isarelax khankix eue, Awm hoik pon pex krax pa jhax lawg khaing ka daux sinax ceu pui khankix, mawh kheu nan, Aux tak sang taoh pex mai pex tak sang mawh pa koe bwanson heue. Paw kieh koe krax khi rhawm, kieh taix pex koe riang rao heue. ¹⁴ "Siyiex cao kru naing raoma ah nin, awm hoik tat Aux rhawm rhi tix, sonsang tawx krax kham geu ka pex, yam hoik so keeing pex Aux koe krax pa song rhawm mai Aux tak ang lai koe krax pa deeh doh keud kah heue. "Siyiex cao kru naing raoma ah nin heue. ¹⁵ Awm ka daux singaix inkix, Aux hoik tat rhawm rhi tix, sonsang yuh ceu pa mhawm ka veng Yerusaliem mai ka nyiex ma ceu pui Yudax khankix heue. Paw koe krax khi rhawm kah awx! ¹⁶ Inkix mawh ceu pa tak sang caw pex ti yuh, pex ku kaux krai lox pa mawh meh ka paox plawg tix khankix, yuh krax pa nhim ka daux diang siviex veng pex khankix heue. ¹⁷ Paw kieh pex tix kaux kawx keud pa caox ka daux rhawm tix ka paox plawg pex mai paw moh ti yuh krax pa tiextu pie lhen, grawh grawng nawh, inkix mawh ceu pa koeng Aux kah heue. Siyiex ah nan heue. ¹⁸ Gumlox Siyiex cao kru naing raoma hoik hoek ka aux ah nin; ¹⁹ Krax twah pa ih ka daux khix pon mai khix phwan, krax twah pa ih ka daux khix liah mai khix kao, tak sang mawh krax nyawm rhawm mai krax pa gaux rhawm, mawh pawie krax gaux rhawm son nyiex ma ceu pui Yudax khankix heue. Mawh kheu nan, moh ka pa mawh meh mai krax pa nhim heue." ²⁰ "Siyiex cao kru naing raoma ah nin, khaix in sax pui khankix tak sang hoek mai khawm pui pa ot ka daux veng khankix tom nie. ²¹ Pui pa ot daux veng in, tak sang hu ka daux pawie an mai ah nin "Kieh niied ti hu rawg bwan ka plak sivoe Siyiex mai sawg ka Siyiex cao kru naing raoma tokaux Aux kawx tak sang hu heue." ²² Pui khankix tom nie mai ceu pui tang meung pa kied ting riang rao khankix, tak sang hoek ti sawg Siyiex cao kru naing raoma ka daux veng Yerusaliem mai sonsang rawg tix bwan ka plak sivoe Siyiex heue." ²³ "Siyiex cao kru naing raoma ah nin, ka daux singaix ankix, pui kao kaux khaing pa chix sikah lox ceu pui khankix kuceu, tak sang bluh caong sibex pui Yudax tix kaux ah nin, "Kieh yix hu tau mai maix liak! Mawh kheu mhong yix ot Siyiex tau mai maix heue."

¹ Gumlox pa plak jhi Siyiex hoik sidah ka piang haktiex Hadarok mai ka piang veng Damase, ngai pui khankix mai doeh ceu pui Isarelax khankix maong ti jhak ka Siyiex heue. ² Ka piang haktiex Hamat pa dex mee haktiex an mai ka piang veng Turux mai veng Sidon, viang kix mawh pa kied koe pingnya kawx heue. ³ Veng Turux hoik sum tokaux tix cie nyiex pau tab lhaong mai hoik pum ti deuh mau awm phawng tiex mai khri naw awm glaox pa koe ka piang krax khankix heue. ⁴ Jhak heue, Siyiex tak sang teei ti tik nawh lih, Nawh Cao tak sang kieh sibrawm nawh laux leeing ti luan ka daux rawm sigrit sigra mai veng an tak sang mawh pa hoik keeig tix laux ka ngu heue. ⁵ Veng Ashakelon, yaox ka an mai tak koe krax lhat graung kah heue. Veng Gaza yaox mai kied koe krax pa siyaung rhawm kah mai khawm veng Ekaron kawx kheu hoik grai krax keud pot jun pot kix mai hoik kaig tua kah heue. Siyiex tak sang grai khaing veng Gaza mai veng Ashakelon, tak sang mawh dee ang pui lai ot kah heue. ⁶ "Doeh pui tang ceu tak sang pang ti ot ka daux veng Ashadok mai Aux tak sang tat ti tik krax pa lhaong rhawm pui Philitix khankix heue. ⁷ Aux tak sang teei ti tik nham khaing jheeh nawh mai khawm ceu pa seeing brai khankix khaing daux sinax rhang nawh heue. Nawh tak sang mawh son pui pa kawn deuk son Siyiex ex mai tak sang mawh pa awm cao kaing ka daux haktiex Yudax mai pui veng Ekaron, tak sang mawh pa awm pui Yebusix heue. ⁸ Aux tak sang pang ti deuh tab hawt vung viang nyiex Aux, son ang kru naing pui koeng pon tiang ti hu hawt baoh an, pui pa nieb yuh krax kha rhawm ang lai yaox ti tiang ka daux hawt baoh an khaix in pie tix bawg kawx heue. Grawh grawng nawh, Aux hoik jhak inkix ka ngai aux daux yam in heue. ⁹ Kawn bun Zion eue, Koe krax gaux rhawm ka daux pa kied ting kied lhaong heue. Kawn bun veng Yerusaliem eue, Kok yox lox tix lih heue. Jhak heue, Simiang maix hoik bleeh ti hoek ka maix heue. Nawh Cao mawh pa rahsee mai pa tawx krax taoh, pa viex rhawm awn rhawm tiem mai brug ka piang la, pa mawh pa brug ka kawn la awn ju heue. ¹⁰ Aux tak sang tat ti tik ling lawx naing khaing Epharem mai brung naing khaing veng Yerusaliem, ak yuh naing khankix tak sang mawh pa tat ti tik uik heue. Nawh tak sang sikah lox pa nhim ka ceu pui khankix, dee kwang dee pang Nawh, tak sang mawh pa jah khaing rawm sigrit sigra in tom hoek ka rawm sigrit sigra an mai jah khaing rawm klawng ting tom hoek ka dee sidah sidu haktiex heue." ¹¹ Zion eue, phan mawh ka son maix, kheu jao nham sijax mukheu pa yuh Aux tau mai maix, Aux tak sang ploi pui maix pa giex laung khankix lih khaing daux tiex dee pa ang rawm koe heue. ¹² Pex pa mawh pui pa giex laung pa kawn koe krax keud pot jun pot khankix eue, Deeh ing ka nyiex tab lhaong dee pa kaux cong heue. Ka daux in singaix, Aux pao ti krai, grawng tak sang baox tawx bwanson ka pex ra son heue. ¹³ Aux hoik vaik ak Yudax mai hoik sau ti deuh te ka ak Epharem heue. Zion eue, Aux tak sang khrawh kawn simex maix hu puing ka kawn simex Helasax mai kieh maix awm vaid pui pa kied ting riang rao heue." ¹⁴ Siyiex tak sang plak jhi tix ka piang kix mai te Nawh tak sang lih hu awm pluk plak praix heue. Siyiex tak sang phlu teettawng mai hu tau mai bhaung kang lux khaing plak seh heue. ¹⁵ Siyiex Cao kru naing raoma tak sang tieb tie ti priex kix, kix tak sang kiied ti ih pui koeng kix mai dig lon simaox pa hoik sivuat tix khankix heue. Kix tak sang nyaux mai lawh maw, awm hoik sak nyaux ka rawm plix siiet, kix tak sang naog ka nham awm tawg klong khankix, awm daog khu dee tan heue. ¹⁶ Daux singaix an, Siyiex, pa mawh Siyiex kix, tak sang taoh kix awm cub phung yung pui Nawh Cao heue. Grawh grawng nawh, kix tak sang mawh pa awm siang simaox khankix pa koe ka piang mhok khri mai pa hoik yaog tix, awm man chix tix pheen ka piang haktiex Nawh Cao heue. ¹⁷ Ceu pa mhawm kix mawh pa kied ting kied lhaong miex ding, krax pa mhawm grang kix kied ting kied lhaong miex ding, nghox tak sang kieh pui awn ju khankix haok hwan ting lhaong mai rawm plix siiet khraox tak sang kieh bunkrih khankix haok hwan ting lhaong heue.

¹ Mhaing rawm lhiex ka Siyiex, ka daux bawg yam lhiex lha heue. Siyiex mawh pa kieh pluk plak praix lih, Nawh Cao tak sang tawx rawm lhiex pa poe ti lih tom nie ka kix, son rib riem pa koe ka daux tong kaung mai ka son pui ku kaux heue. ² Grawh grawng nawh, riang grang Terap khankix, krai lox pa giex going, cao pa sipawk kawx, yaox riang susai pie lhen khankix mai sawg ti krai grawng dee bleeh camaox pa lud loe mai kix tawx krax nyawm rhawm pa giex going heue. Mawh kheu nan, pui khankix hoik vu vie ka daux krax hu tix, awm yung khankix, kix hoek ka daux krax pa kha rhawm kheu ang cao liang lai koe heue. ³ Aux tak song rhawm ka cao liang yung khankix, Aux tak sang tawx krax kham geu ka pex mhaing khankix heue. Mawh kheu Siyiex cao kru naing raoma hoik hoek ti kia cub phung yung Nawh, pa mawh nyiex ma ceu pui Yudax mai tak sang kieh kix mawh pa awm brung naing Nawh ka daux naing heue. ⁴ Lon simaox num riah daog nyiex hoek khaing Nawh, lhax khaox nyiex gox hoek khaing Nawh, ak puing naing hoek khaing Nawh, kix cao pa kwang ku kaux mawh pa hoek khaing Nawh heue. ⁵ Kix tak sang mawh pa awm pui pa kied ting riang ting rao khankix, pa dig ka pui koeng kix, ka daux ung glaox pa koe ka daux krax khankix ka daux naing heue. Kix tak sang puing naing, mawh kheu Siyiex ot tau mai kix mai pa brug brung khankix, tak sang mawh pa kaig pa tua heue. ⁶ "Aux tak sang kieh nyiex ma ceu pui Yudax kaux cong mai Aux tak sang taoh nyiex ma Yosiep khankix heue. Aux tak sang deeh viex kix ing, kheu hoik koe krax caux rhawm Aux ka kix heue. Kix tak sang mawh pa awm pui ankix, pa ang nyang sax grheu ti tik heue. Grawh grawng nawh, Aux mawh Siyiex kix, pa mawh Siyiex leeing ju mai Aux tak sang nghiet lox kix heue. ⁷ Pui Epharem khankix tak sang mawh pa awm pui pa kied ting riang ting rao mai rhawm rhi kix tak sang koe krax gaux rhawm awm pa hoik sak ka rawm plix siiet heue. Kawn praix kix tak sang yaox ka ankix mai koe krax gaux rhawm ka daux Siyiex heue. ⁸ Aux tak sang paong lox sighlu mai kraix khrawm kix hoek, mawh kheu Aux hoik taoh ti teei kix mai kix tak sang baox naok tix haok hwan awm krax pa hoik haok hwan kix tix blah heue. ⁹ "Aux tak sang rhuat kix awm simie ka daux sinax pui tang ceu khankix mai kix tak sang doh keud ka Aux ka daux haktiex dee singai mai kix tak sang im ju tau mai kawn praix kix mai tak deeh ing hoek heue. ¹⁰ Aux tak sang deeh baox viex kix ing khaing daux meung Ejiptux mai kraix khrawm kix lih khaing haktiex Asurix, Aux tak sang viex kix laig ka daux haktiex Gilat mai haktiex Lebanon, tom ang dee ot dee koe lai kub ka son kix heue. ¹¹ Nawh Cao tak sang tiang ti hu ka daux rawm sigrit sigra pa kha rhawm mai sivied ka puk pak rawm sigrit sigra khankix, kieh dee pa raux rawm klawng Nilax kroh heue. Krax ting rhawm ting rhi pui haktiex Asurix, tak sang mawh pa yeen tix tiem mai sibrawm krong pliah meung Ejiptux sang grai grhup heue. ¹² Aux tak sang kieh kix een rhawm tix kaux cong ka daux Siyiex mai kix tak sang lailing ka daux ceu kaux Nawh Cao heue. "Siyiex ah nan heue.

¹ Gawng Lebanon eue, paoh daux siviex maix khankix, kieh ngu gleeing khaox piak van maix khankix heue. ² Khaox gix khankix eue, koe krax riag yo heue. Grawh grawng nawh, khaox piak van hoik goh mai khaox pa mhawm khankix hoik laux leeing heue. Khaox tiah Bashan khankix eue, koe krax riag yo heue. Grawh grawng nawh, nong raug tiag khaox hoik goh heue. ³ Lox riag yo cao liang yung khankix koe baoh tan heue, Grawh grawng nawh, min plakngai kix hoik laux leeing heue. Lox brum sivai sangsi awn ju khankix koe baoh tan heue. Grawh grawng nawh, min pakngai rawm klawng Yawdan mawh pa hoik laux leeing heue. ⁴ Siyiex, pa mawh Siyiex aux ah nin "Liang cub phung yung khankix, son pa sang pah tix yum, ⁵ pa mawh cao liag khankix pah ka kix mai keud tix mawh pa ang koe phimap, pui khankix pa coh ti cai kix, tak ah nin "Kieh krax pa yaogyaw bwanson koe ka Siyiex, kheu Nawh hoik kieh aux mag mi heue. Cao liang kix ang lai koe krax caux rhawm ka kix heue. ⁶ Siyiex ah nin "Khaix in Aux tak ang lai koe krax caux rhawm ka can pui pa ot ka daux haktiex in heue. Aux tak sang ap ti tawx pui ku kaux ka daux tawm taix paox plawg kix mai ka daux tawm taix simiang kix heue. Kix tak sang puing ka haktiex in mai Aux tak ang lai deeh taoh ti teei kix lih khaing daux tawm taix kix heue. ⁷ Mawh kheu nan, Aux hoik liang cub phung yung khankix, son pa sang pah tix yum, pa mawh cub phung yung pa blon kha rhawm tix heue. Aux hoik teei khaox grix tix ra gawng, tix gawng Aux hoik kok mawh bwanson pa mhawm grang mai an tix gawng Aux hoik kok mawh maox vien krax grum rhawm mai Aux hoik liang cub phung yung khankix heue. ⁸ Aux hoik pluat ti tik cao liang yung khankix loe kaux, ka daux tix khix heue. Rhawm rhi Aux hoik meu ka kix mai rhawm rhi kix kawx, hoik seeing ka Aux heue. ⁹ Khaix an, Aux ah nin Aux tak ang lai liang pex heue. Pa sang yum, kieh grham nawh yum mai pa sang grai kieh grham nawh grai heue. Can pa kawn deuk khankix grham kieh kix ra lai ih nex paox tix heue. ¹⁰ Aux hoik teei khaox grix Aux pa kok mawh pa mhawm grang an mai hoik raig pot koe ra plak, mawh sonsang preet Aux ti tik gumlox sijax mukheu, pa hoik yuh tix tau mai pui khankix khawmuik heue. ¹¹ Mawh kheu hoik laux sijax mukheu an ka daux singaix an heue. Mawh kheu nan cub phung yung pa hot shia khankix, pa kawn een rhawm tix ka Aux, hoik tawng ka hoik mawh an gumlox Siyiex heue. ¹² Aux ah nin ka kix, "Phan mawh pa khaw rhawm ka son pex, tawx ngawh yuh aux kaing mai phan ang mawh pa khaw rhawm pex paw lai tawx heue. "Mawh kheu nan, kix hoik tawx mau tixngoe plah ka son ngawh kaing yuh aux heue. ¹³ Siyiex krai ka aux ah nin, "Tik mau ngawh pa hoik tat kix pa kied nie an ka plak sivoe cao yuh aw heue. Mawh kheu nan, aux hoik teei mau tixngoe plah an mai hu tik ka daux nyiex bwan Siyiex, ka cao pa yuh aw heue." ¹⁴ Aux hoik baox raig pot ka khaox gix cie aux tang gawng an pa kok mawh maox vien koe ra plak, sonsang yieh Aux laux krax pa mawh tix puxaik ka daux sinax ceu pui Yudax mai ceu pui Isarelax khankix heue. ¹⁵ Siyiex krai ka aux ah nin, "Maix baox teei kraung shiao cie cao liang yung pa pheem, ¹⁶ "Aux tak sang yaog ti deuh cao liang yung tix kaux ka daux haktiex in heue. Nawh ang kia ngien son pa kham pa laux pa yum mai ang sawg ka pa prung prang mai ang lai pai pa hoik mat mai ang lai liang ka pa kawn brax viang mawh nan, nawh tak sang ih nex pa kluing mai riah ti tik gip kix heue. ¹⁷ Kieh krax kha rhwm koe ka cao liang yung pa ang koe dee bleeh pa tik ka cub phung yung khankix! vaig lawm tak sang hoek ka piang plawng taix nawh mai ka ngai khawn dawm nawh heue. Plawng taix nawh tak sang fit ti kroh khawmuik mai ngai plak khawn dawm nawh tak sang faik khawmuik heue.

¹ Grawng gumlox plak jhi Siyiex ka ceu pui Isarelax, Siyiex pa hoik nih ti deuh raoma khankix mai pa kaw ti deuh num riah haktiex mai pa yuh khuan pa koe ka daux pui khankix ah yuh nin, ² "Jhak heue, Aux tak sang kieh veng Yerusaliem mawh kawk nyaux son can pui pa ot hawt vung viang nawh khankix khawmuik ti yoek, yam kham nawh krax pa lai lawm, haktiex Yudax khawm krax pa lai lawm heue. ³ Ka daux singaix an, Aux tak sang kieh veng Yerusaliem mawh lon simaox pa kied cien tix lon son pui khawmuik mai can pui pa yaog lon simaox an, tak sang mawh pa graig ti phawng mai ceu pui piang haktiex hoik khrawm ti hoek puing ka nawh heue. ⁴ Siyiex ah nin, "Ka daux singaix an, Aux tak sang tawx krax kham geu mai pa kieh brung khankix yaoh mai kieh cao pa brug brung yhot kah heue. Aux tak sang blah ngai tix kia ngien ka nyiex ma ceu pui Yudax mai tak sang tawx krax kham geu pa dug ngai ka brung cie pui tang ceu khankix heue. ⁵ "Cao kwang veng Yudax khankix tak sang ah nin ka daux rhawm tix "Pui pa ot ka daux veng Yerusaliem khankix koe riang rao ka daux Siyiex cao kru naing raoma, pa mawh Siyiex kix heue." ⁶ "Ka daux singaix an, Aux tak sang kieh cao kwang veng Yudax khankix, awm glah ngu ka daux grux khix mai awm ngu proh ka daux pum nghox heue. Kix tak sang gleeing pui hawt vung viang baoh an khawmuik, pa ot ka plak khawn dawm mai pa ot ka plak khawn gwiex heue. Veng Yerusaliem tak sang mawh pa ot dee ot tix ka dah dee prim pa mawh veng Yerusaliem heue. ⁷ "Siyiex tak sang taoh nyiex gox pui Yudax khankix phao voe, son ang min plakngai nyiex ma simiang Davit mai min pakngai can pui pa ot ka daux veng Yerusaliem khankix pon ti mawh pa nie ting khaing haktiex Yudax heue. ⁸ "Ka daux singaix an, Siyiex tak sang tieb tie ti priex pui pa ot ka daux veng Yerusaliem khankix mai pui pa iak riang rao daux sinax kix ka daux singaix an, tak sang mawh pa awm Simiang Davit mai nyiex ma Simiang Davit tak sang mawh pa awm Siyiex mai pa awm kawncau Siyiex ka plak sivoe kix heue. ⁹ "Ka daux singaix an, Aux tak sang sawg ti yuh krax laux leeing ceu pui khankix khawmuik, pa sang hoek ti puing ka veng Yerusaliem heue. ¹⁰ "Aux tak sang see khuan pa yuh bwanson mai khuan pa yuh pa khyox khaw ka piang nyiex ma simiang Davit mai ka piang pui pa ot ka daux veng Yerusaliem. Khaix an, kix tak sang maong ti jhak ka Aux, pa mawh pui pa hoik blung kix heue. Kix tak koe krax khi rhawm ti yiiem son Nawh Cao, awm khi rhawm pui ti yiiem son kawn simex nawh pa koe tix kaux khaing mai koe krax laux rhawm son Nawh Cao, awm pui pa koe krax laux rhawm son kawn Ai nawh tix kaux heue. ¹¹ "Ka daux singaix an, krax yiiem doe pa kied ting tak sang koe ka daux veng Yerusaliem, awm krax yiiem doe ka daux veng Hadarimon, pa koe ka daux lung Megido heue. ¹² "Haktiex tak sang koe krax yiiem doe nyiex mawx nyiex an ka dee ot tix mai pui daux nyiex ma simiang Davit khankix, simex ot nong tidah mai bun ot nong tidah heue. Pui daux nyiex ma Natan khankix simex ot nong tidah mai bun ot nong tidah heue. ¹³ "Pui nyiex ma Lewix khankix, simex ot nong tidah mai bun ot nong tidah heue. Pui daux nyiex ma Shimi khankix, simex ot nong tidah mai bun ot nong tidah heue. ¹⁴ "Can pui daux nyiex ma pa kawn deuk khankix ku nyiex ma, simex ot nong tidah mai bun ot nong tidah, kix hoik tang khrawm paox tix yiiem cub mawx cub an heue.

¹ "Ka daux singaix an, dee lih rawm tix dah, tak sang mawh pa hoik paoh tix ka son nyiex ma simiang Davit mai son can pui pa ot ka daux veng Yerusaliem khankix mai son phimap mai son pa seeing brai khankix heue. ² Siyiex Cao kru naing raoma ah nin ka daux singaix an, Aux tak sang tat ti tik ceu kaux riang grang khankix khaing daux haktiex mai khaix in tak ang lai mawh pa deeh doh keud kah heue. Aux tak sang deeh baox kieh cao jhai khankix mai khuan pa seeing brai ankix lih hu khaing daux haktiex heue. ³ "Phan pui tix kaux kaux krai lox jhai khankix, miex keeing pa keh nawh, tak sang ah nin ka nawh! "Maix tak ang lai yaox ti im ju, mawh keu hoik krai maix lox jhai pie lhen ka daux ceu kaux Siyiex heue. "Miex keeing pa hoik keh nawh, tak sang blung nawh phlat, yam krai nawh lox jhai khankix heue. ⁴ "Ka daux singaix an, cao jhai pa krai lox jhai pie lhen khankix, tak koe krax pa kaig pa tua kheu grawng riang susai pa yaox kix heue. Kix tak ang lai ceep sibex hauk sonsang pie lhen tix pui heue. ⁵ Nawh tak sang ah nin, aux ang mawh cao jhai, aux mawh ngie cao pa yuh kaing ma, mawh kheu jah tom yam iak aux, pa koe aux mawh ngie ma heue. ⁶ "Pui tak sang chawk nawh ah nin, khaix mat pa koe ka daux taix maix mawh ceu patix lie? "Nawh tak sang deeh pawk ah nin, "In mawh khaix mat aux ka daux nyiex paox grawm aux khankix heue. ⁷ Siyiex cao kru naing raoma ah nin, "Vaid eue, siduad ti kaoh puing ka cao liang yung Aux mai ka paox pie Aux heue. Tawk cao liang yung yum mai yung khankix tak sang prung prang heue. Khaix an Aux tak sang baox deeh veeh taix tix ka piang kawn yung iak khankix heue. ⁸ Siyiex ah nin, "Pui ka daux haktiex in khawmuik, loe son ra son, tak sang mawh pa hoik tat tix yum, loe son tix son, tak sang mawh pa prah tix heue. ⁹ Aux tak sang kieh loe son tix son in cheu ka daux ngu mai tak sang thi kix awm thi lon mau mai cheuk ti yaox kix awm hoik cheuk ka khri heue. Kix tak kok yo ka ceu kaux Aux, Aux tak sang deeh pawk lox kix heue. Aux tak sang ah nin, "In mawh pui Aux! "Mai kix tak sang ah nin, "Siyiex mawh Siyiex ex heue.

¹ Jhak heue, singaix Siyiex hoik dex hoek mai kraung pa tud rhim maix khankix, tak sang mawh pa hoik gwieh tix ka daux sinax pex heue. ² Grawh grawng nawh, aux tak sang kraix khrawm ceu pui khankix khawmuik hoek ti puing naing ka veng Yerusaliem, veng tak sang mawh pa pon teei tix, nyiex khankix hoik tud rhim tix mai bun khankix hoik kham krax pa phit vao, pui veng tix plak tak sang yaox ti kham krax pa giex tix hu heue. Pui pa kawn deuk khankix, tak ang lai tat tix khaing daux veng heue. ³ Yam an, Siyiex tak sang lih hu mai puing ka ceu pui khankix, awm puing Nawh Cao naing ka daux singaix koe naing heue. ⁴ Ka daux singaix an, caong Nawh Cao tak sang cung ka piang gawng sanlun, pa koe ka plak sivoe veng Yerusaliem ka plak lih singaix heue. Gawng sanlun, tak sang bih ti koe ra plak, jah khaing plak lih singaix, tom hoek ka plak klip singaix mai lih mawh daux ngawd pa kied ting heue. Gawng tix plak, tak sang gah ti hu ka plak blaong mai an tix plak tak sang gah ti hu plak seh heue. ⁵ Pex tak sang to ti luan khaing daux ngawd gawng Aux heue. Grawh grawng nawh, daux ngawd gawng an, tak sang lang tom hoek ka veng Azalax heue. Pex tak sang to awm to pex khaing tuk kla reem ka daux baux singaix Uziyax, pa mawh simiang haktiex Yudax heue. Siyiex aux pa mawh Siyiex leeing ju tak sang hoek mai khawm pui pa singax khankix hoek tau mai Nawh Cao heue. ⁶ Ka daux singaix an, tak ang lai koe pa riang mai pa riang khankix tak sang grai heue. ⁷ Ka daux singaix an, tak mawh pa tawng Siyiex kah heue. Ang mawh ponngaix mai ang mawh ponsawm mai ka daux plak ponbo tom tak koe pa riang heue. ⁸ Ka daux singaix an, tak koe rawm im ju pa lih hoek khaing veng Yerusaliem, tix plak tak sang lih hu ka plak rawm sigrit sigra plak lih singaix mai an tix plak, tak sang lih hu ka plak rawm sigrit sigra plak klip singaix, ka daux bawg yam rung praix mai ka daux bawg yam kwat praix rawm an koe sijheung heue. ⁹ Siyiex, tak sang mawh simiang ka piang ca haktiex khawmuik heue. Ka daux singaix an, "Siyiex mawh tix kaux khaing mai ceu kaux Nawh Cao mawh tix ceu khaing heue." ¹⁰ Haktiex khawmuik tak sang mawh pa hoik deeh tieh ti mawh awm daux lung Arabax, jah khaing veng Gebax tom hoek ka veng Rimmon, pa koe plak seh veng Yerusaliem heue. Veng Yerusaliem tak kawn mawh pa lhaong ot ka dah dee prim nawh, jah khaing ka siviex Benyamin tom hoek ka dee koe siviex phao ka mai hoek ka siviex daog veng mai jah khaing nyiex pau tab Hananelax, tom hoek ka dah dee biiet rawm plix siiet cie simiang heue. ¹¹ Pui khankix tak sang ot ka daux an mai krax pa jhax lawg tak ang lai koe khaix in heue. veng Yerusaliem tak sang mawh dee pa yiien yawg ot pui kah heue. ¹² Siyiex tak sang tawx krax kham geu ka pui khankix, pa hoek puing ka veng Yerusaliem yuh nin, nex kix tak sang rawm, yam kawn cung kix ka caong tix, ngai kix tak sang klawk mai dak kix tak sang si-um ka daux jheeh kix heue. ¹³ Ka daux singaix an mai krax lawh maw ka krax tong teen pa ting pa kaoh khaing Siyiex tak sang koe ka daux sinax kix mai kix tak ra lai giex taix paox tix mai yaog taix tix ra lai pah ka paox tix heue. ¹⁴ Ceu pui Yudax khankix pa ot ka veng Yerusaliem tak sang puing naing heue. Krax mag mi ceu pui pa ot hawt vung viang baoh an khankix, tak sang mawh pa kraix khrawm tix tau, pa mawh khri, mau mai kraung khrai pa shiao khankix ka daux krax pa kied haoh hun heue. ¹⁵ Awm ceu ankix, krax kham geu tak sang hoek ka piang brung law, ka piang kala-uk mai la mai ka piang to brie khankix khawmuik, pa koe ka daux tab heue. Mawh kheu nan, krax kham geu in tak sang mawh pa lih ti koe heue. ¹⁶ Pui pa kawn deuk khaing ceu pui khankix pa hoik hoek ti puing ka veng Yerusaliem, tak ang haok hu ku num sonsang krub tix ka Siyiex pa mawh Siyiex cao kru naing raoma mai sonsang yuh tix ka pawie nyiex gox bang heue. ¹⁷ Can ceu pui piang haktiex, ceu pui mawx ang ah, pa ang hoek ka veng Yerusaliem, sonsang krub tix ka Siyiex pa mawh Siyiex Cao kru naing raoma, ka piang kix rawm lhiex tak ang lai lih kah heue. ¹⁸ Phan pui meung Ejiptux khankix ang lai haok hoek ti krub, rawm lhiex tak ang lai lih ka piang kix heue. Kix tak pon ti rieb krax kha rhawm, pa tawx Siyiex ka ceu pui khankix, pa ang cu ti haok sonsang yuh tix ka pawie nyiex gox bang heue. ¹⁹ In tak sang mawh krax kham geu ceu pui Ejiptux mai krax kham geu ceu pui khankix khawmuik, pa ang haok ti yuh ka pawie nyiex gox bang heue. ²⁰ Ka daux singaix an, ngai lai Son Pa Singax Singeh Siyiex tak sang mawh pa hoik tiiem ka piang hing tauk brung khankix heue. Aw tawng pa koe ka daux nyiex bwan Siyiex khankix, tak sang mawh pa awm tawg klong pa koe plak sivoe khu dee tan heue. ²¹ Can aw tawng pa koe ka daux veng Yerusaliem mai haktiex Yudax, tak sang mawh pa singax singeh ka son Siyiex cao kru naing raoma heue. Can pui pa hoek ti tan krax pa appong tix, tak sang hoek teei ankix mai ngaik nex ka daux ankix heue. Ka daux singaix an, pui Khananix, tak ang lai koe tix kaux kawx ka daux nyiex bwan Siyiex cao kru naing raoma heue.