Titus

Titus

¹ Pawlux pa mawh siliex Siyiex mai kawncau pa ting Yesux Khrit, awm pa khaw mai krax yum rhawm pui pa hoik laug Siyiex khankix, krax tawng ka pa mawh pa meh, pa khaw mai pa nab yam pa yuh pa khaw ka Siyiex. ² Ka daux krax keud pot jun pot son ju leeing ju, Siyiex, pa ang chix pie lhen hoik tawx lox mukheu tom ka sivoe yam jah bawg yam ti koe. ³ Ka daux bawg yam pa caw mai Nawh, Nawh hoik kieh sidawng ka daux gumlox tix, ka daux ceu pa sidiex pa hoik tawx pong ka aux awm pa khaw mai lox tawm Siyiex Cao Taoh ex, ⁴ tawx ka Titux pa mawh kawn aux tete kheu krax yum rhawm pa neuex ax, mawh tix ceu khaing heue. Kieh koe bwanson mai pa nhim pa kaoh khaing Siyiex Keeing Cao mai Yesux Khrit Cao Taoh ex liak. ⁵ Mawh kheu grawng in aux hoik prah maix ka klawn tiex Karete, sonsang kieh maix cox ka ceu pa ang nyang bax hoik khankix, sonsang ciak ti deuh kuad ceu cao, ka daux ku veng awm hoik tawm aux ka maix heue. ⁶ Phan pui tix kaux kaux koe, pa ang koe dee deuh phimap kah, pa koe moeng tix kaux khaing, pa koe kawn praix pa yum rhawm, pa ang pui deuh phimap ka grawng pa cuci pa lawh maw, ka pa ang chix cu nghiet, ciak ti deuh pa yuh nan heue. ⁷ Pui pa mawh cao giex kaing ceu cao, tak lai mawh pa ang koe dee deuh phimap kah, awm mawh kawncau pa priex kraung Siyiex, pa ang nieb hawt alo tokaux tix, pa ang dawd rhawm, pa ang nieb pleung ka plai rawm plix siiet, pa ang nieb tap ngah pui mai pa ang keud ti pon mau yie daux krax pa ang khaw. ⁸ Tak lai mawh pa chix khre ka nyo sinie, pa moh ka pa mhawm, pa chix keud ti priex rhawm tix, pa rahsee, pa singax, pa chix priex rhawm tix heue. ⁹ Tak lai mawh pui pa giex ka gumlox sijax mukheu pa khaw mai pa gau, son sang mawh nawh pa chix jeeh nyaw ka lox gau pa mawh pa meh, sonsang chix pawk lox ka pui pa kieh pa thiang khankix heue. ¹⁰ Koe pui pa ang chix cu nghiet tom nie, pa nieb krai lox pa ang tie koe bwanson, pie ka pui, nie ting mawh ka kix pa mawh cub pa pat hak, ¹¹ Tak lai thox jheeh kix, pui pa klup ti kieh laux ka pui khawm nyiex khankix, ka pa gau pa ang kix khaw ti gau, son sang pon kix mau yie ka grawng pa ang khaw heue. ¹² Ka daux kix tix kaux pa mawh cao jhai ceu kix, hoik ah nin, "Pui Karete mawh pui pie lhen, totiag pa caox mai pui nieh pa chax nie luan ih ku jheung jheung heue." ¹³ Lox pa kham mhai rug an mawh pa mawh meh heue. Mawh kheu nan nied ti ah ka kix son sang kieh kix kaux cong ka daux krax yum rhawm, ¹⁴ son ang sang nghiet ka lox been pui Yudax pa ang tie mawh, ka lox tawm pui khankix pa hoik tieh hu khaing pa mawh meh heue. ¹⁵ Ka pui pa singax kuceu khawmuik mawh pa singax heue. Ka kix pa seeing brai, pa ang yum rhawm, tix ceu kawx ang singax, rhawm kix mai khawm dee chix keud tawng kix mawh pa seeing brai heue. ¹⁶ Viang kix ah tawng ka Siyiex kawx, kix thiang ti tik Nawh ka ceu pa yuh tix, kheu mawh kix pa khreeing mai pa ang chix cu nghiet mai pa ang koe bwanson tidtix ka son pa yuh kaing ceu pa mhawm heue.

¹ Maix krai grawh grawng ceu pa khaw mai lox gau pa mawh meh khankix. ² Son simex pa riex ju khankix sang mawh pa chix rien tix, pa chix keud mhawm mhawm, chix priex rhawm tix, pa kaux cong ka daux krax yum rhawm mai ka daux krax moh mai ka daux krax gun yeung heue. ³ Awm an bun riex ju khankix kawx sang mawh pa chix nab yam ka daux ceu pa yuh tix, son ang kix sang mawh pui pa nieb bied ti krai grawng pui, siliex plai plix siiet tom nie, sonsang mawh cao gau ka ceu pa mhawm. ⁴ Son sang gau kix ka bun pa awn ju khankix, moh ka mex tix, moh ka kawn tix. ⁵ Son sang mawh pa chix keud ti priex rhawm tix, pa singax, pa chix yuh kaing nyiex tix, pa mhawm rhawm, pa chix cu chix nghiet ka mex tix, son ang sang koe dee salao ka gumlox Siyiex heue. ⁶ Awm an ka simex awn ju khankix kawx gau son sang mawh kix pa chix keud ti priex rhawm tix. ⁷ Ka daux ku ceu khawmuik jhi ti kieh tokaux tix mawh mhai pa jawh ka grawng pa mhawm pa yuh tix, ka daux ceu pa gau maix, paw kieh koe pa ang mhawm pa sium, kieh koe rhawm pa chix keud mhawm mhawm, ⁸ Kieh lox pa sidiex gau maix mawh pa mawh meh, pa ang koe dee deuh phimap kah, son kaw pa ang khaw plak ex, sang hoek krax kaig twa kheu ang nawh koe ceu pa caox ti ah grawng ex heue. ⁹ Jeeh nyaw ka pa mawh siliex khankix, son sang chix ot kix greem cao tix mai yuh ceu pa khaw ka cao kix ka daux ku ceu khawmuik, paw kieh thiang, ¹⁰ paw kieh briex tieh, kieh jhi sijax pa mhawm ka daux khawmuik, son sang kieh kix ceu pa gau cie Siyiex, Cao Taoh ex, koe pa mhawm grang ka dau ku ceu khawmuik heue. ¹¹ Bwanson Siyiex hoik lih bleeh, viex krax taoh ka pui khawmuik, ¹² gau ka ex, sonsang thiang ex ti tik ka ceu pa ang nab yam mai pa ang khaw ka Siyiex, alo pa dex dawd haktiex, son sang chix keud ti priex rhawm tix, yuh pa rahsee, yuh pa nab yam mai ceu pa khaw ka Siyiex ka daux ju in heue. ¹³ Jhak son krax keud pot jun pot pa ting bwanson, pa lih bleeh min pakngai Siyiex pa ting pa mawh Yesux Khrit Cao Taoh ex, ¹⁴ Kaw pa hoik tawx tokaux tix son ex, son sang taoh Nawh ex khaing daux phimap khawmuik, yuh ti kieh pui tix ceu singax son sang mawh cie tokaux tix, pa nied ti coca ti yuh kaing pa mhawm heue. ¹⁵ Jeeh nyaw mai sidiex gau ceu in khankix, viex sibrawm khawmuik ti ah kah heue. Paw kieh pui tix kaux kawx nunai ka maix awx.

¹ Kieh kix doh keud kah, sonsang chix ot kix greem simiang giex kaing, pa koe sibrawm khankix, son sang koe krax chix cu chix nghiet, sonsang rien tix ka son kaing pa mhawm ku ceu. ² Son ang sang ah lox caox ka grawng pui tix kaux kawx, son ang sang simah, son sang koe rhawm pa mhawm, son sang plak jhi rhawm pa awn pa tiem ka pui khawmuik heue. ³ Ex kawx hoik sax mawh pui pa daox aw tix bawg, pa ang chix cu nghiet, pa hoik pie lhen kah, pa hoik yuh son alo nex nham mai krax gaux rhawm ku ceu, ot ka daux pa nieb keud ti yuh pui laux, pa boh rhawm, pa chix koeng, koeng ka paox tix, tix kaux lai tix kaux heue. ⁴ Yam lih bleeh krax moh ceu pa mhawm rhawm Siyiex Cao Taoh ex, ka kawn pui. ⁵ Ang mawh kheu pa hoik yuh tokaux ex ka daux pa rahsee, mawh kheu pa caux rhawm Nawh, Nawh hoik taoh ex, ka pa sigrhah pa dex dawd mai ceu pa deeh keh, ka Khuan Singax Singeh deeh kieh mawh pa khraox, ⁶ pa hoik prauk Nawh Cao lih ka piang ex tom nie grum, ka daux Yesux Khrit Cao Taoh ex, ⁷ son sang hoek ex ka krax rahsee kheu bwanson Nawh, son sang mawh ex pui pa sang pon sin, pa khaw mai krax keud pot jun pot son ju leeing ju heue. ⁸ Lox in mawh pa kaux sijax, aux simie ti kieh maix sidiex grawng ceu in khankix mawh pa lung pa loi, son pui pa hoik yum rhawm ka Siyiex khankix, tak rien rhawm tix, yuh kaing ceu pa mhawm heue. Ceu in khankix mawh pa mhawm mai pa koe bwanson son kawn pui heue. ⁹ Via hu khaing lox chawk pa daox aw, ka grawng doeh ru pa ang jud jai khankix, pa simah simiang, pa thung thiang ka grawng lox lai beenli, ceu an khankix mawh pa ang koe bwanson, pa giex going heue. ¹⁰ Pui pa yie kieh pui ang khaw gwieh paox tix, khaix hoik sidiex nawh tix bawg ra bawg paw lai baox rieb nawh heue. ¹¹ Maix pon ti tawng grawng pui pa yuh nan hoik tieh ti lud hu khaing krax, yuh phimap, viang tokaux nawh kawx hoik deuh phimap ka tokaux tix tiru. ¹² Yam ploi aux Atemax, Tukhik hu ka maix, coca ti hoek ka aux ka veng Nikawpolix, mawh kheu hoik bak aux ti ot tan yam kuat heue. ¹³ Nied ti coca teem Zenax pa mawh cao gau lai beenli, Apawlux, son krax sang hu kiex, son ang kiex lai sang cud tix ceu kawx heue. ¹⁴ Kieh pui ex khankix gau ti yuh ceu pa mhawm jheung jheung, son sang koe pa shiao kix, son ceu pa lo khankix, son ang kix sang mawh pa ang plix plix heue. ¹⁵ Can pui pa ot mai aux khawmuik nawb ka maix heue. Nawb ka kix pa moh ka ex daux krax yum rhawm awx. Kieh bwanson ot mai pex khawmuik liak.