Song of Solomon

¹ Lai rhax piang lai rhax, mawh lai rhax cie Sawlamon pa nie blon mhawm heue. ² Kieh nawh ngheet aux ka jheeh tix, mawh kheu krax moh nie lheu mhawm khaing rawm plix siiet heue. ³ Mawh kheu rawm bee kraix maix nyawm sioe bhawng, ceu kaux maix nyawm bhawng awm bee pa hieh ti lih mawh kheu nan, bunkrih khankix moh ka maix heue. ⁴ Thong aux luan liak, Ex tak sang to ti hawt khaix maix heue. Simiang viex aux laig ka daux lawg ot nawh heue. Yix tak nie lheu doh keud krax moh maix khaing rawm plix siiet heue. Kix moh ka maix tete heue. ⁵ Kawn bun veng Yerusaliem khankix eue, viang aux lung awm nyiex gox keda kawx kawn mhawm grang ti yaox awm man tieb cie Sawlamon heue. ⁶ Paw vi jhak piang aux liak, grawh grawng nawh, aux mawh pa lung nex, mawh kheu hax koek lung yuh nex aux heue. Kawn simex miex aux khankix hoik song rhawm ka aux, kix kieh aux mawh cao pa pau sipeem plix siiet, viang mawh nan, aux ang lai yaox ti pau sipeem plix siiet cao tix heue. ⁷ Rhawm moh dud aux eue, krai aux mhong liak! Mawh liang maix cub kawn yung tix dee mawx, yam jung singaix kieh maix kix laux lee tix dee mawx, grawh grawng nawh aux khex sang awm pui an pa kheem ngai tix hawt cub yung paox grawm meed maix khankix yuh ka mawx lie? ⁸ Maix pa kied mhawm tai khaing daux sinax bun khankix eue, phan maix ang nyang tawng, hawt ti hu khaix glah caong cub yung maix liang kawn pex maix, hawt nyiex gox cub cao liang yung heue. ⁹ Paox moh aux eue, aux tiag ti yaox maix, ka brung mhaing pa koe ka daux sinax cub ling lawx naing brung cie Pharaw heue. ¹⁰ Sibax maix mhawm grang ti yaox ka kraung pa jawg ngawg maix mhawm plang ka tauk ti maox soi khri. ¹¹ Ex sang jawg kraung maix ka khri mai kam ka mau. ¹² Yam kawn ngawm simiang hawt pheen sawm tix, rawm bee bhawng Nadu aux, ploi bhawm pa nyawm bhawng tix lih heue. ¹³ Rawm bee bhawng Muran tix hau, mawh rhawm moh dud, ka son aux mai it sinax naok aux leeing sawm heue. ¹⁴ Pruh tai Hena mawh rhawm moh dud ka son aux, ka daux sipeem plix siiet Enkedi heue. ¹⁵ Jhak heue, paox moh aux eue maix grang ti yaox, jhak heue maix kied mhawm grang ti yaox! maix koe ngai sikaux heue. ¹⁶ Jhak heue, paox moh aux eue maix mhawm grang ti yaox! mawh heue, kied nyawm ti yaox heue. Dee it dee tum ex kawx mawh pa klai ti yaox heue. ¹⁷ Lat nyiex ex mawh pa yuh ka khaox Arit mai si ox braux nyiex, mawh pa yuh tix ka khaox gix heue.

¹ Aux mawh tai kat nghim klang haktiex Sharon mai tai siyak pa kuah daux ngawt heue. ² Awm pruh tai siyak daux sinax pang kat, paox moh aux sidawng daux sinax kawn bun khankix heue. ³ Awm ot khaox plix kawk tie daux sinax pang khaox daux tiagtu, paox moh dud aux kawx ot daux sinax kawn simex khankix heue. Aux ngawm greem veei nawh, tau mai krax pa kied gaux rhawm tix mai plix nawh mawh pa tie pa nyawm ka aux heue. ⁴ Nawh viex aux laig ka daux nyiex bang pawie mai kieh krax moh tix mawh man chix kheem piang aux heue. ⁵ Baox naok riang aux ka blah plix siiet, deeh kieh aux koe riang rao ka plix khaox kawk tie, mawh kheu aux saux ngia jao krax moh heue. ⁶ Taix khawn gwiex nawh, ot greem kaing aux mai taix khawn dawm nawh kawm ka aux heue. ⁷ Kawn bun veng Yerusaliem khankix eue, aux tawm ti deuh lox ka pex, ka plak sivoe kiah cak khankix ang ah, ka krax pa sidaing meed ot ceu ankix ka daux tiagtu. Paw lai so kaoh rhawm paox moh aux mai paw kieh rhawm paox moh aux deeh siduad, tom hoek bawg yam koe krax pa nyawm rhawm nawh heue. ⁸ Gumlox sikah paox moh dud aux! Jhak heue, nawh jao piang gawng phoh piang ton hoek heue. ⁹ Paox moh dud aux mawh pa awm kiah phan ang mawh nan pa awm kawn cak mhaing awn ju tix mu, jhak heue, nawh cung ka plak khaix guh veng ex, nawh kok buan ti jhak plak daux diang siviex iak mai simi ti jhak plak daux sinax man tie siviex iak heue. ¹⁰ Paox moh aux ah nin ka aux "Paox moh aux mai paox moh pa kied mhawm aux eue, yaog ti kaoh hu tau mai aux liak! ¹¹ Mawh kheu vong kwat praix hoik luan, vong raux praix hoik uik mai luan hu heue. ¹² Tai hoik pruh piang haktiex, bawg yam ah sim lox lai rhax hoik hoek mai lox kuh sikaux, hoik mhong ti ka daux haktiex ot ex heue. ¹³ Plix khaox ruh klai hoik dex teem mai tai plix siiet hoik pruh mai tawx krax nyawm sioe bhawng tix heue. Paox moh aux paox moh pa kied mhawm grang aux eue, yaog ti kaoh mai hoek ka aux heue." ¹⁴ Kawn sikaux moh aux pa ot daux sinax rang simaox mai pa ot dee glip rang simaox, kieh aux yaox ka ngai maix, kieh aux mhong ka lox sikah maix, mawh kheu lox sikah maix mawh pa nyawm tie; mai ngai baoh maix, mawh pa kied mhawm ti yaox heue. ¹⁵ Giex sox praix son ex, kawn sox praix pa laux yuh nhu plix siiet mawh kheu nhu plix siiet ex khankix, kawn tak jah tix pruh tai heue. ¹⁶ Paox moh dud aux, mawh cie aux mai aux mawh cie nawh heue. Nawh liang cub yung tix ka daux sinax pruh tai siyak heue. ¹⁷ Tom hoek bawg yam ang praix yang riang mai ang veei nyang luan, paox moh aux eue, deeh veeh tix ing awm kiah, phan ang mawh nan, awm kawn cak mhaing iak an, khaing piang gawng Beta liak."

¹ Yam kawn ot aux piang dee it tix daux pon sawm, aux sawg ka rhawm moh tix, viang mawh nan, aux ang lai yaox ka nawh heue. ² Aux ah nin, "Aux sang yaog ti kaoh yam in mai hu lailing ka daux veng, ka daux krax laux mai ka daux bing pak, aux tak sawg ka rhawm moh aux heue. "Aux sawg nawh, viang mawh nan aux ang lai yaox ka nawh heue. ³ Cao pau veng pa lailing ka daux veng khankix hoik yaox ka aux, aux ah nin ka pui ankix, "Mawh yaox pex ka pui pa moh aux lie?" ⁴ Yam kawn tak jiet luan hu aux khaing kix, aux yaox ka pa koe rhawm moh tix heue. Aux giex nawh mai ang lai ploi nawh hu, tom hoek bawg yam viex aux nawh hoek ka daux nyiex ma miex aux mai ka daux lawg it nawh pa hoik keh kung aux heue. ⁵ Kawn bun veng Yerusaliem khankix eue, aux tawm ti deuh lox ka pex, ka plak sivoe kiah, cak khankix ang ah, ka daux krax pa sidaing meed ot ceu ankix, ka daux tiagtu, paw lai so rhawm paox moh aux kaoh mai paw kieh rhawm paox moh aux deeh siduad tom hoek bawg yam koe krax nyawm rhawm nawh heue. ⁶ Mawh pui mawx pa bleeh khaing daux tiagtu, awm jung rong simaox taox ngu mai sidah bhawng mai sidah bhawng Muran mai sidah bhawng Lawban mai mawk sidah bhawng cie cao lai cao geu khawmuik lie? ⁷ Jhak heue, an mawh dangkag cie simiang Sawlamon mai pui vao kwa tixgliah kaux hawt rawb rim an, hoik mawh pui vao kwa ceu pui Isarelax heue. ⁸ Kix giex vaig khawmuik, hoik sax mawh pui pa kied cheung daux naing. Pui ku kaux tang giieb vaig ka nyoi tix, jao lhat graung kix daux ponsawm heue. ⁹ Simiang Sawlamon yuh dangkag ngawm cao tix ka khaox gawng Lebanon, ¹⁰ Nawh yuh plawng rong jhong nawh ka mau, rong joh jhan nawh ka khri, dee ngawm nawh ka man lung pliex, plak daux nawh tawm mai krax moh krax rhawm, khaing cub kawn bun veng Yerusaliem khankix heue. ¹¹ Kawn bun Zion khankix eue, nied tix hu plak sivoe mai hu jhak simiang Sawlamon, pa hoik ceep ka mhok khri, pa hoik ceep miex nawh ka nawh, ka daux singaix ka paox caox nawh, singaix koe krax gaux rhawm daux rhawm nawh heue.

¹ Paox moh aux eue, jhak heue maix mawh pa mhawm tai ti yaox. Jhak heue, maix mawh pa mhawm tai ti yaox. Maix koe ngai sikaux ka plak khaix man tie maix. Hauk kaing maix awm cub pex khankix tix cub, pa lih khaing piang gawng Gilat heue. ² Rhang maix jiet awm cub yung pa tak khraox krhip hauk tix mai pa tak hoek khaing heem ti rawm, pa chix keh kawn brawm ku mu mai pa neh ang lai koe daux sinax kix pie tix mu kawx heue. ³ Siyieb jheeh maix jiet awm maox keei raoh gawng mai moing jheeh maix kawx mawh pa kied mhawm ti yaox heue. Baoh maix khawm ra plak pa koe plak khaix man tie maix mawh pa awm shiag plix khaox plix jiang heue. ⁴ Ngawg maix mawh pa awm nyiex lhaong simiang Davit, pa hoik sum son nyiex deuh kraung naing khankix tix lhang, piang kix teuk teue ti priex kraung rhiem khankix mai mawh plah rhiem tiebtie pa shiao cub pui ting riang rao khankix heue. ⁵ Teeih maix khawm ra plak awm kawn kiah iak ra mu, pa keh brawm miex kiah tix mu mai pa liang tix sinax pruh tai siyak khankix heue. ⁶ Tom hoek bawg yam ang praix nyang riang mai ang veei nyang luan, aux tak sang yaog ti hu daux krax hu tix ka gawng Muran mai ka ton Lawban heue. ⁷ Paox moh dud aux eue maix mawh pa mhawm tai ti yaox khawmuik mai dee pliag dee deen khankix kawx ang lai koe pie tix dah kawx piang kaux maix heue. ⁸ Moeng aux eue, hoek tau mai aux khaing gawng Lebanon, hoek tau mai aux khaing gawng Lebanon, jhak ti yaox khaing dee choek gawng Amana, khaing choek gawng Shanira mai gawng Hamon, khaing daux doh rang ot sivai sangsi heue. Khaing dee choek gawng ot sivai heue. ⁹ Maix hoik rhim ti teei rhawm aux, pux aux, moeng aux; maix hoik rhim ti teei rhawm rhi aux mai krax pa jhak tix ka ngai tix, tix bawg mai krax pa veeh tix maox soi ngawg cao tix, tix bawg heue. ¹⁰ Krax moh maix mawh pa mhawm tai miex ding, pux aux, moeng aux, krax moh maix mawh pa nie lheu mhawm khaing rawm plix siiet miex ding mai pa nyawm bhawng sidah bhawng maix khankix, mawh pa nie lheu mhawm khaing sidah bhawng khawmuik heue. ¹¹ Moeng aux eue, siyieb jheeh maix jah rawm awm sigleem rawm hia, rawm hia mai rawm teeih koe greem dak maix mai pa bhawng kraung ceep maix kawx, awm pa bhawng gawng Lebanon heue. ¹² Pux aux, moeng aux, mawh sipeem pa hoik vie tix, rawm dung pa hoik tawb tix, rawm keut pa hoik tawk ti deuh cum heue. ¹³ Pang khaox maix khankix plix khaox plix jiang, pa nyawm plix ti ih, khaox tai Hena pa nyawm bhawng mai pang khaox Nadu, ¹⁴ khaox Nadu mai khaox Kurakuma, pang mex mai khaox caihung, khaox Lawban mai khaox Muran, khaox nyawng mai can pa kied bhawng khaing paox khaox tix khawmuik khawm leeing, ¹⁵ dee lih rawm keut ka daux sipeem, mawh dee lih rawm im ju ka daux rawm daux mai rawm klawng iak khaing gawng Lebanon heue. ¹⁶ Bhaung plak laong khankix eue, siduad liak mai bhaung plak seh khankix eue, hoek liak, hoek ti phlu piang sipeem aux, sonsang pon tai nawh tix lih pa nyawm sioe bhawng heue. Kieh paox moh dud aux hoek ka daux sipeem nawh mai ih ka plix khaox pa nyawm pa tie khankix heue.

¹ Pux nan aux, moeng aux eue, aux hoik hoek ka daux sipeem aux, aux hoik khrawm ti teei Muran mai taux sioe bhawng aux, aux hoik yaox ti ih sigleem rawm hia, pa koe rawm hia cie aux, aux nyaux rawm plix siiet mai rawm teeih heue. Paox grawm aux khankix eue, ih heue. Nyaux heue. Rhawm moh dud pa moh aux khankix eue, Nyaux tom sak awx. ² Aux it, viang mawh nan rhawm aux ca kawn haing, an mawh lox sikah paox moh dud aux, nawh gleuh siviex ah nin, "Pux aux, paox moh aux, kawn sikaux aux mai pui pa grum naog aux eue, paoh siviex son aux liak, mawh kheu rawm ciex hoik kheem ka kaing aux, hauk kaing aux hoik caux ka rawm ciex pa lih daux ponsawm heue." ³ Aux hoik peeik sibex lang jung tix, aux sang baox pon ceep yuh ka mawx lie? Aux hoik khoek caong tix, aux sang pon deeh kieh seeing yuh ka mawx lie? ⁴ Paox moh dud aux sau taix tix ka daux jhong saw siviex mai rhawm aux hoik kied koe krax byaong ka nawh heue. ⁵ Aux yaog ti kaoh mai paoh siviex son paox moh dud aux mai rawm bee muran hoik jah tix lih mai taix aux, gien taix aux khankix hoik caux ka peeh bee Muran, piang rong khaox jhong diang siviex an heue. ⁶ Aux hoik paoh siviex son paox moh dud aux, viang mawh nan, paox moh dud aux hoik deeh veeh tix hu mai hoik luan heue. Rhawm aux hoik lih hu tau mai nawh yam hoik sikah nawh lox tix. Aux sawg ka nawh, viang mawh nan aux ang lai yaox ka nawh, aux kok ka nawh, viang mawh nan, nawh ang lai deeh pawk lox aux heue. ⁷ Cao pa lailing tix pau jhak daux veng khankix, yaox ka aux heue. Kix tawk aux, kix yuh aux mat, cao pau guh veng khankix, teei man tie ngai aux hu khaing aux heue. ⁸ Kawn bun veng Yerusaliem khankix eue, aux tawm ti deuh lox ka pex heue. Phan pex yaox ka paox moh dud aux, krai nawh mhong ka saux aux kheu moh tix nawh liak. ⁹ Maix pa sidaing mhawm tai khaing daux sinax bun khankix eue, paox moh maix tak sang mawh pa nie blon mhawm khaing paox moh dud tang kaux ka daux ceu patix lie? Paox moh dud maix tak sang mawh pa nie blon mhawm khaing paox moh dud tang kaux, ka ceu patix, awm lox sikah pa tawm maix tix priex ka yix lie? ¹⁰ Paox moh dud aux koe grang pa paing mai grang pa raoh nex nham mai mawh cao kaing ting daux sinax pui khankix tix mheen kaux heue. ¹¹ Kaing nawh awm khri pa mhawm, hauk kaing nawh mawh pa pu mai lung awm lak heue. ¹² Ngai nawh mawh pa awm sikaux, pa ot hawt rawm klawng, pa hoik heem tix ka rawm teeih mai ot nyawm nyiem hawt rawm khankix heue. ¹³ Sibax nawh awm tiag baoh dee koe sidah bhawng, awm baoh dee kuah rib riem pa nyawm sioe bhawng heue. Siyieb jheeh nawh jiet awm tai siyak, pa jaux rawm peeh Muran heue. ¹⁴ Plawng taix nawh awm gawng khri, pa hoik kab tix mai siang simaox klai heue. Kaux cao nawh awm nga sang, pa hoik dia tix sau siang simaox raoh khankix heue. ¹⁵ Plawng caong nawh jiet awm rong siang simaox paing, pa hoik deuh tix piang dang khri pa mhawm, ngai baoh nawh kied mhawm awm pang khaox Arit gawng Lebanon heue. ¹⁶ Lox jheeh moing nawh, mawh pa kied nyawm tix nghiet, nawh mawh pa mhawm grang khawmuik heue. Kawn bun veng Yerusaliem khankix eue, In mawh paox moh dud aux mai in mawh paox grawm aux heue.

¹ Maix pa jiet mhawm tai khaing daux sinax bun khankix eue, mawh lih hu paox moh maix dee mawx lie? Mawh veeh paox moh dud maix tix hu plak mawx, sonsang hu sawg ex ti yaox nawh tau mai maix dee mawx lie? ² Paox moh dud aux hoik lih hu ka daux sipeem cao nawh, ka dee koe tiag khaox pa sioe bhawng khankix, sonsang liang nawh cub phung yung tix ka daux sipeem mai sonsang khrawm ti tai siyak heue. ³ Aux mawh cie paox moh dud aux mai paox moh dud aux mawh cie aux, nawh liang cub yung tix sinax tai siyak heue. ⁴ Paox moh aux eue maix kied mhawm tai awm veng Teraza mai mhawm ti yaox awm veng Yerusaliem mai koe krax pa yungyi awm man chix pui naing khankix heue. ⁵ Veeh ngai maix luan dee singai khaing aux liak, mawh kheu kix hoik pex ka aux heue. Hauk kaing maix mawh pa awm phung pex tix cub, pa lih hu khaing gawng Gilat heue. ⁶ Rhang maix jiet awm cub phung yung, pa hoek khaing heem tix rawm, pa chix keh kawn brawm ku mu mai pa neh ang lai koe ka daux sinax kix pie tix mu kawx heue. ⁷ Baoh maix khawm ra plak pa koe plak khaix man tie maix mawh pa awm shiag plix khaox plix jiang heue. ⁸ Koe laux simiang tixgliah kaux mai moeng iak tixdaix kaux mai bunkrih pa ang lai dak uik simin heue. ⁹ Kawn sikaux aux mai pui pa grum naog cie aux, mawh pa koe tix kaux khaing, pa mawh kawn bun miex nawh tix kaux khaing mai pa kied moh nawh tix kaux mai kok nawh mawh pa koe bwanson, cub laux simiang mai cub moeng iak khankix mai kix yaogyaw nawh heue. ¹⁰ Awm pa riang praix plak ponngawb, awm pa mhawm sawng riang khix, awm pa jhan riang singaix, pa koe krax yung krax yi awm man chix cub pui naing, mawh bun mawx lie? ¹¹ Aux lih hu ka daux sipeem plix makman, sonsang jhak tix rib riem klai pa koe daux ngawd, sonsang hu jhak tix ka hoik plaung ang nhu plix siiet plaung, ka krax hoik pruh ang tai khaox plix jiang pruh heue. ¹² Sivoe ang aux nyang bax rien rhawm tix, khwan ju aux hoik yuh aux awm brug tix ling lawx naing brung cie simiang heue. ¹³ Deeh ing, deeh ing, bun Shulamix eue, deeh ing, deeh ing, sonsang pon ex tix jhak simi ka maix liak, mawh sang yaox pex ceu patix ka daux Shulamix, awm krax pa graoh cub kru naing khankix ra tab lie?

¹ Kawn bun simiang eue, caong pa ceep maix daux kiep, mawh pa mhawm miex ding, ba maix, jiet awm simaox siang, pa yuh pui min ka kaing taix tix heue. ² Sitaing maix hoik mawh pa mhawm lawm le awm kawk rawm, pa ang chix cud ka rawm nyaux pa nyawm sioe bhawng heue. Nyoi maix mawh pa awm pum nghox tix pum, pa hoik deuh tix priex tau mai tai siyak khankix heue. ³ Teeih maix khawm ra plak awm kawn kiah iak ra mu, pa keh brawm khaing miex kiah tix mu heue. ⁴ Ngawg maix awm nyiex tab lhaong tix lhang pa hoik yuh tix ka nga sang, ngai maix awm rawm dung an khankix pa koe ka daux veng Heshabon hawt daux diang siviex Batrabim heue. Gawng meeh maix, awm nyiex tab lhaong Lebanon, ot ka plak see veng Damasekat heue. ⁵ Kaing maix pa hoik ceep ka mhok khri, awm gawng Kharame mai hauk kaing maix mawh pa lung pliex, simiang hoik mawh awm pui pa giex laung ka kleen hauk kaing maix heue. ⁶ Paox moh eue, krax pa mhawm tai maix mawh pa khaw rhawm mai pa nyawm rhawm ka miex ding, ⁷ grang grao maix awm pang khaox jhie yaong mai teeih maix awm sigleem plix nawh heue. ⁸ Aux hoik ah, "Aux tak sang haok pang khaox jhie yaong an, aux tak giex ka kak khaox nawh khankix heue. "Yam in, kieh teeih maix awm sigleem plix siiet mai kieh krax toek maix bhawm tix, bhawng awm plix kawk tie, ⁹ moing jheeh maix, awm rawm plix siiet pa sidaing nyawm heue. Rawm plix siiet an koi lih, son paox moh dud aux mai koi lih hoek ka siyieb jheeh pui pa laig it khankix heue. ¹⁰ Aux mawh cie paox moh dud aux mai pa simie nawh hoik bleeh see aux heue. ¹¹ Hoek heue, paox moh dud eue, kieh ex hu ka daux tiagtu; kieh ex hu ot ka daux nyiex yaong khankix heue. ¹² Kieh ex yaog ti kaoh caocao mai hu ka sipeem plix siiet, kieh ex hu jhak ti yaox, ka hoik lih plaung nhu plix siiet mai ka tai nhu plix siiet khankix pruh ang pruh mai khawm pruh tai plix plix jiang khankix heue. Aux tak sang tawx krax moh tix ka maix tan heue. ¹³ Pang khaox pa awm khaox plix kheu niex khankix tawx pa nyawm bhawng tix mai plak praix diang siviex ex khankix mawh pa koe plix khaox can ceu pa nyawm, pa khraox mai pa prim khawmuik, paox moh dud eue, aux hoik priex ti deuh ceu an kix ka son maix heue.

¹ Aux simie maix awm prie lih tix, pa miex aux tawx nawh peuex rawm teeih tix, phan aux yaox maix ka plak praix, aux tak ngheet ka maix, pui mawx kawx ang pon tix ne raw ka aux heue. ² Aux tak sang thong maix mai viex maix laig ka daux nyiex miex aux, cao pa sidiex gau ka aux heue. Aux tak sang kieh maix nyaux rawm plix siiet pa hoik kuklao tix mai sidah mai rawm plix plix jiang cie aux heue. ³ Taix khawn gwiex nawh ot greem kaing aux mai taix khawn dawm nawh rawm ka aux heue. ⁴ Kawn bun veng Yerusaliem khankix eue, aux tiextu ti deuh lox ka pex, paw lai so kaoh rhawm paox moh aux deeh siduad, paw kieh rhawm paox moh aux deeh siduat tom hoek bawg yam koe krax pa nyawm rhawm nawh heue. ⁵ In mawh pui mawx pa hoek khaing daux tiagtu, pa neung tix piang paox moh dud nawh lie? Aux so maix kaoh greem pang khaox plix kawk tie, miex maix hoik viex maix bleeh see dee an, see dee an, nawh pa hoik keh kung ka maix, hoik viex maix hoek heue. ⁶ Deuh tix priex aux awm cum ka piang rhawm maix, awm cum piang plawng taix maix, mawh kheu krax moh ting riang awm krax yum, krax boh rhawm lang teung caox awm meung yum heue. Taox nawh khankix awm taox ngu, pa kied blon hax taox heue. ⁷ Rawm khankix ang pon preet ti tik krax moh, rawm hwan khankix ang pon kheem nawh heue. Phan pui tix kaux sang koe rhawm tix tawx son krax moh ka kraung khrai, sinngao nyiex ma nawh khankix khawmuik, tak mawh pa ang koe cee koe cak heue. ⁸ Yix koe nan pa iak tix kaux mai nawh ang nyang koe teeih heue. Ex tak sang yuh patix ka son nan ex, ka daux singaix, yam hoek pui ti mhaing nawh lie? ⁹ Phan nawh mawh guh veng tix mu, ex tak sang yuh nyiex choek mau piang nawh mai phan nawh mawh siviex tix mu, ex tak sang nyeep nawh ka khaox phia Arit heue. ¹⁰ Aux mawh guh veng tix mu mai teeih aux hoik awm nyiex tab lhaong, khaix an, aux hoik pon krax pa koe min plakngai ka daux ngai nawh, awm pui pa hoik yaox krax pa nhim heue. ¹¹ Simiang Sawlamon koe sipeem plix siiet tix dah ka daux haktiex Balahomon, nawh hoik vai tix tawx sipeem plix siiet an ka cao pau sipeem, pui ku kaux tak sang viex mau tix rheng plah hoek son plix an khankix heue. ¹² Sipeem plix siiet cao aux koe ka plak sivoe aux heue. Simiang Sawlamon eue maix tak mawh pa pon mau tix rheng plah mai can pui ankix, pa priex rien ka plix nawh khankix, tak pon mau ra yieh plah heue. ¹³ Maix pa ot ka daux sipeem an, paox grawm maix tak nghiet ka lox maix, kieh aux mhong lox an liak! ¹⁴ Paox moh dud aux eue, nied ti hoek phaiphai piang gawng pa koe sidah bhawng khankix, mai yuh ti awm kiah tix mu mai kawn cak mhaing iak tix mu heue.