Ruth

Ruth

¹ Baux yam kwang cao prawng see haktiex yam an, sibhawm praix lih koe daux meung Isarelax heue. Simex tix kaux khaing veng Bieliehiem meung Yudax, viex moeng mai kawn simex tix ra kaux hu ot meung Mawbax heue. ² Ceu kaux nawh mawh Elimaliet, ceu kaux moeng nawh mawh Nawmix, ceu kaux kawn simex nawh ra kaux mawh Mahalon mai Khilon, kix mawh ru Epharax pa ot ka daux veng Bieliehiem meung Yudax mai kix hu haktiex Mawbax mai ot tan heue. ³ Khaix an Elimaliet mex Nawmix hoik yum, deuk moeng nawh mai kawn simex nawh ra kaux heue. ⁴ Kawn simex nawh ra kaux teei ti moeng bun haktiex Mawbax, ceu kaux kiex mawh Awrapax mai Ruthax, kix ot tan kao num. ⁵ Khaix an Mahalon mai Khilon yum khawm ra kaux, Nawmix ang lai koe mex koe kawn heue. ⁶ Nawmix jah ti deeh ing mai mun tix khankiex khaing meung Mawbax, mawh kheu mhong nawh yuh nin daux Meung Mawbax, Siyiex hoek ti kia ngien mai tawx pa ih son pui Nawh. ⁷ Mawh kheu nan nawh lih khaing dee ot tix tau mai mun tix khawm ra kaux mai lih hu krax, sonsang deeh ing ka meung Yudax. ⁸ Nawmix ah nin ka mun tix khawm ra, "Deeh ing ka nyiex miex tix, kaux mawx kaux an, kieh Siyiex koe krax caux rhawm ka piang pax, awm hoik yuh pax bwanson ka piang pui yum mai ka piang aux heue." ⁹ "Kieh Siyiex teem ka piang pax, sonsang yaox pax ti laux lee tix, daux nyiex mex khraox tix, kaux mawx kaux an." Khaix an nawh ngheet ka kiex mai kiex yiiem riag heue. ¹⁰ Mai kiex deeh ah nin ka nawh, "Yiex tak deeh ing tau mai maix ka ceu pui maix khankix tete heue." ¹¹ Nawmix deeh ah nin, "Kawn bun aux eue, deeh ing heue, pax sang ing tau mai aux yuh ka mawx? mawh kawn koe kawn simex daux vaig aux, sonsang mawh mex pax lie?" ¹² "Kawn bun aux eue, deeh veeh ti ing mai hu daux krax sang hu pax, mawh kheu aux hoik kuad, ang lai baox khaw ti koe mex, phan aux ah kawn koe krax pa keud pot jun pot tix mai phan aux baox koe mex, ka daux sawm in mai baox keh kawn simex kawx, ¹³ mawh sang pon pau pax tom hoik ting lhaong kix lie? mawh kawn sang pon krox jun pax tix ang koe mex lie? Kawn bun aux eue, paw yuh nan liak. Au pon pa nu pa cien son pax, ceu an kied mawh pa kin pa nu ka rhawm aux, taix Siyiex hoik yuh ka aux tom hoek mee in heue." ¹⁴ Khaix an kiex baox yiiem riag, Awrapax ngheet ka Nawmix mai deeh ing, viang mawh nan Ruthax kawn koe rhawm ti ot mai Nawmix heue. ¹⁵ Mai Nawmix ah nin, "O maix hoik deeh ing ka pui ceu tix mai ka siyiex tix, deeh ing hawt o maix heue." ¹⁶ Viang mawh nan Ruthax pawk ah nin, "Paw lai krai lox sonsang prah aux maix, phan ang mawh nan sonsang deeh ing aux, can dee hu maix, aux tak sang hu, pan maix dee mawx, aux tak paung tan, ceu pui maix tak mawh ceu pui aux, Siyiex maix tak mawh Siyiex aux heue. ¹⁷ Yum maix dee mawx aux tak yum tan, mai sipaung aux tan, lheu khaing krax yum phan aux gwieh tix khaing maix kieh Siyiex yuh pa nie lheu khaing an ka piang aux heue." ¹⁸ Yam yaox Nawmix ka hoik tat Ruthax rhawm tix sonsang hawt nawh, nawh yawg tix ka heue. ¹⁹ Khaix an kiex lih hu mai hoek ka veng Bieliehiem. Yam hoik kiex ka veng Bieliehiem, pui veng khawmuik hoek simeem kiex ah nin, "Ang in mawh Nawmix lie?" ²⁰ Nawh deeh ah nin ka kix, "Paw lai kok aux mawh Nawmix, deeh kok aux mawh Mara" mawh kheu Cao pa ting siawp sibrawm hoik tawx krax pa kied kin kied song ka aux heue." ²¹ Aux hoik lih hu mai pa grum naog, Siyiex deeh viex aux hoek mai pa yi, Siyiex yuh pa nu pa khawm hoek piang aux, Cao pa ting siawp sibrawm hoik kieh aux hoek krax kha rhawm, yuh ka mawx pex kok aux mawh Nawmix?" ²² Mawh kheu nan Nawmix mai mun nawh Ruthax ceu pui Mawbax ing tau mai nawh khaing haktiex Mawbax. Kiex hoek ka veng Bieliehiem, yam jah pui ti vawg nghox ca heue.

¹ Ka daux pux aik mex Nawmix doeh ru Elimaliet koe pui pa kied mi tix kaux, ceu kaux nawh mawh Bawzax heue. ² Ruthax pui Mawbax ah nin ka Nawmix, "Yuh bwanson kieh aux hu ka daux kaung mai sut sigleem nghox pa cod pa khrum khaing pui pa sang pon aux krax pa caux rhawm ka plak sivoe ngai nawh, " mai Nawmix ah nin ka nawh, "Kawn bun aux eue, hu heue." ³ Khaix an Ruthax hu sawg ti sut sigleem nghox pa kawn deuk khaix cao pa vawg nghox mai nawh hoek daux kaung Bawzax, pa mawh doeh ru Elimaliet pa ang nawh keud ce ka heue. ⁴ Yam an, Bawzax hoek khaing veng Bieliehiem ah nin ka cao vawg nghox, "Kieh Siyiex ot tau mai pex." Mai kix pawk ah nin, "Kieh Siyiex nawb bwan ka piang maix heue." ⁵ Bawzax ah nin ka cao kaing vawg nghox, "Bun awn ju an mawh pui mawx lie?" ⁶ Kawncau nawh cao kaing vawg nghox pawk ah nin, "An mawh bun awn ju pui Mawbax, pa hoek tau mai Nawmix khaing haktiex Mawbax heue." ⁷ Mai Ruthax ah nin, "Yuh bwanson kieh aux sut sigleem nghox pa cod pa khrum sinax lhiem nghox plak khaix cao pa vawg nghox liak, " Mawh kheu nan jah ponngawb tom hoek yam in, nawh ca yuh kaing in lheu khaing laux lee ti daux nyiex gox tivud ticu ngie heue. ⁸ Khaix an Bawzax ah nin ka Ruthax, "Kawn bun aux eue, nghiet ha, paw sut nghox pa deuk ka kaung tang dah mai paw hu khaing tin, ot hawt dex kawncau bun aux khankix heue." ⁹ "Hawt jhak daux kaung dee vawg kix mai hawt khaix kix, aux hoik tawm lox ka kawncau simex awn ju an khankix, sonsang ang kix yux pa ang ceu ang mhawm ka maix heue. Yam sang nyaux nie maix rawm hu pug ti nyaux daux aw rawm pa kin kawncau simex awn ju an khankix ti deuh heue." ¹⁰ Khaix an Ruthax gup pakngai tix ka piang tiex ah nin, "Kheu aux lai pon krax caux rhawm, plak sivoe ngai maix, daux pa mawh tix pui tang praix tang klawng lie?" ¹¹ Bawzax deeh pawk ah nin, "Aux hoik mhong can pa yuh maix ka miex tix, khaix hoik yum mex maix, maix hoik prah miex keeing tix mai haktiex dee keh dee kung tix mai maix hoek ka ceu pui pa ang maix sax tawng glang ka in heue." ¹² "Kieh Siyiex deeh pawk bwanson ka kaing jhaw pa yuh maix mai kieh Siyiex pui Isarelax pa hoek maix ti paung greem pruik, tawx bwanson pa grum naog ka maix heue." ¹³ Khaix an Ruthax ah nin, "Cao simiang aux eue, kieh aux koe min pakngai sivoe maix, mawh kheu hoik tawx maix krax nyawm rhawm, viang aux ang mawh kawncau bun maix kawx maix hoik krai lox pa caux rhawm ka aux heue." ¹⁴ Yam hoek bawg priex ngaix Bawzax ah nin ka nawh, "Hoek tin, hoek ih blah mai cux blah pa ih maix ka daux rawm pa niex, " Ruthax ngawm hawt praok cao vawg nghox khankix mai Bawzax tawx blah ka nawh, nawh ih tom sak mai kawn deuk tiblah heue. ¹⁵ Yam kaoh nawh ti sang hu sut sigleem nghox, Bawzax tawm kawncau simex awn ju khankix ah nin, "Kieh nawh sut sinax lhiem nghox mai paw sibriem ka nawh awx." ¹⁶ Ploi sigleem nghox cod khaing vien nghox tiblah son nawh, prah nawh sut mai paw deuh phimap ka nawh heue." ¹⁷ Mawh kheu nan Ruthax sut nghox pa cod pa khrum ka daux kaung tom sidah plak bo mai pah nghox pa sut tix an, pon nghox ca tix epha heue. ¹⁸ Nawh viex nghox ca an ing daux veng mai jhi miex tix yaox ka nghox ca pa pon sut tix heue. Mai teei ti tawx priex lheu khaing pa hoik sak ih tix ka miex tix heue. ¹⁹ Mai miex nawh ah nin "Mawh hu sut maix nghox dee mawx daux in singaix? Maix hu yuh kaing dee mawx? Kieh bwanson koe ka piang pui pa koe bwanson ka maix. "Mai Ruthax krai ah nin ka miex tix, "Ceu kaux pui pa yuh aux kaing tau mai nawh daux in singaix mawh Bawzax heue." ²⁰ Khaix an Nawmix ah nin ka mun tix, "Kieh Siyiex pa koe krax caux rhawm ang jut ang jai ka piang pui pa im ju mai ka piang pui pa hoik yum nawb bwan ka nawh, " "Pui an mawh paox nyiex dex mai ru ex tix kaux heue." ²¹ Ruthax pui Mawbax ah nin, "Lheu khaing an nawh ah nin ka aux maix ot dex kawncau aux, tom hoik vawg kix nghox aux heue. ²² Mai Nawmix deeh ah nin ka mun tix Ruthax, "Kawn bun aux eue, mhawm, hu tau maix mai kawncau bun awn ju nawh khankix, phan maix hu daux kaung tang dah ha pui kox yu pa ang ceu ang mhawm ka maix heue." ²³ Mawh kheu nan nawh ot dex kawncau bun awn ju Bawzax khankix sonsang sut sigleem nghox pa cod pa khrum khankix, tom hoik sidah vawg kix nghox cao mai nghox ca mai nawh ot tau mai miex tix heue.

¹ Khaix an, Nawmix ah nin ka Ruthax, "Kawn bun aux eue, mawh ang aux pon sawg dee pa yiien yawg sonsang pon maix krax nyawm rhawm lie?" ² "Bawzax pa mawh cao kawncau bun awn jux pa yuh kaing tau mai maix nawh hoik mawh paox ru ex ang mawh lie? Nawh sang boi nghox daux sawm in daux glah nghox heue." ³ Khoek maix ka rawm mai kraix bee ka tokaux tix, ceep kraung pa kied mhawm maix mai lih hu ka dee pah kix nghox, paw kieh nawh yaox tokaux maix, tom ang nawh nyang naox ih nyaux tix heue. ⁴ "Yam hu it nawh ci ti tawng dee it nawh mai laig ka dee it nawh mai plak man lhop piang caong nawh mai it tan mai nawh tak krai ceu pa sang caw maix ti yuh heue." ⁵ Ruthax deeh ah nin, "Aux tak yuh awm pa krai maix ka aux khawmuik heue." ⁶ Mawh kheu nan nawh lih hu ka dee pah kix nghox mai yuh awm pa hoik tawm miex nawh khankix heue. ⁷ Khaix hoik ih nyaux Bawzax mai koe krax nyawm rhawm mai nawh hu it praok dee sidah pum nghox mai Ruthax koi mo ti hu mai plak man lhop piang caong nawh mai it tan heue. ⁸ Kaw simex an siduad greung sawm mai tieh tix, nawh tawng ka hoik it bun tix kaux ka plak caong tix! ⁹ Mai nawh ah nin, "Mawh maix mawx?" Nawh pawk ah nin, "Aux mawh Ruthax kawn bun cau maix, mai lhop aux ka man lhop maix, mawh kheu maix mawh paox nyiex pa dex ka aux tix kaux heue." ¹⁰ Khaix an nawh ah nin, "Kawn bun aux eue, kieh Simiang Siyiex nawb bwan ka piang maix, mawh kheu sijax pa yuh maix bawg khaix nie lheu ting khaing bawg ka, mawh kheu ang maix lai hawt khaix simex awn ju pa hot ang ah, pa mag mi ang ah heue. ¹¹ "Kawn bun aux eue, paw khi rhawm aux tak yu can ceu pa rawg maix khawmuik ka son maix, mawh kheu pui pa ot daux veng khawmuik, hoik tawng mawh maix bun pa kaux sijax mai pa mhawm jhawm tix kaux heue." ¹² "Aux mawh paox nyiex pa dex mai maix tete, viang mawh nan paox nyiex pa nie lheu dex khaing aux kawn koe tix kaux heue. ¹³ Ot tin daux bo in tom hoek plak ponngawb, phan nawh sang yuh beeh glawm pa dex mai paox nyiex son maix mawh pa mhawm, kieh nawh yuh ceu an, phan nawh ang yuh beeh glawm pa dex mai paox nyiex son maix, awm im ju Simiang Siyiex aux tak yuh son maix, it tin tom hoek ponngawb heue." ¹⁴ Mawh kheu nan Ruthax it plak caong nawh, tom bah riang praix plak ponngawb mai nawh kaoh sivoe ang pui nyang chix yaox ka paox ti, khaix an nawh ah nin, "Paw kieh pui tawng ka hoek bun ka glah dee pah ex nghox awx" ¹⁵ Mai nawh ah nin, "Tawx man fua pa koe ka piang maix mai nih tin, " Yam hoik nih nawh man an, Bawzax tong nghox ca liah epha mai sau ka piang man an, khaix an Ruthax ing daux veng heue. ¹⁶ Yam deeh hoek nawh ka miex tix, miex nawh ah nin, "Kawn bun aux eue, yuh ka mawx?" Nawh krai can pa hoik yuh pui an khawmuik, ¹⁷ Mai nawh ah nin, "Nghox ca in liah e pha mawh pa tawx nawh ka aux, mawh kheu nawh ah nin ka aux, paw ing khawm taix yi tix ka miex maix heue." ¹⁸ Miex nawh ah nin, "Kawn bun aux eue, krox jun tom hoek bawg yam lih grawng ceu ankix, mawh kheu kaw simex an tak ang yawg tix tom ang nawh nyang sidah yuh grawng ceu ankix ka daux in singaix heue."

¹ Bawzax hu ka plak diang siviex veng mai ngawm tan, yam an paox nyiex pa dex pa krai Bawzax kawx hoik hoek, mawh kheu nan Bawzax ah nin ka nawh, "Paox grawm eue, hoek veh ngawm tin ha, " mai nawh veh ngawm tan heue. ² Mai nawh kok kuad riex ju yu khaing daux veng kao kaux ah nin, "Ngawm tin" kix kawx ngawm tan heue. ³ Nawh ah nin ka paox nyiex pa dex mai nawh, "Nawmix pa deeh hoek khaing haktiex Mawbax, coh gwang haktiex cie puxke ex Elimaliet heue. ⁴ Aux simie ti krai maix mhong ah nin maix liag haktiex an, ka plak sivoe ngai pui pa ot tin mai sivoe ngai kuad song ceu pui aux, phan maix sang deeh taoh haktiex an, taoh heue, phan maix ang taoh krai ka aux, sonsang tawng aux, lheu khaing maix pui pa sang deeh taoh haktiex an, ang koe tix kaux kawx, aux kawn caw ti mawh khaix maix pa dex" mai paox nyiex nawh deeh ah nin, "Aux tak sang taoh heue." ⁵ Bawzax deeh ah nin, "Singaix liag maix kaung an khaing taix Nawmix maix tak yaox ti liag khawm Ruthax pui Mawbax, moeng pui pa hoik yum, sonsang deeh plud maix ka min ceu kaux pa hoik yum ka piang sinngao cie nawh heue." ⁶ Paox nyiex pa dex an ah nin, "Aux ang pon taoh an son tokaux tix, phan aux taoh aux lhat sinngao cie cao tix laux leeing, maix taoh pa sang caw aux ti taoh ka son cao tix, mawh kheu aux ang lai pon taoh heue." ⁷ In mawh been pa dawg koe daux pui Isarelax tom yam an dix, pa dex ka grawng pa deeh taoh mai grawng pa deeh loh kraung khrai, sonsang mawh pa kriem son tix ceuceu, pui tix kaux tak peeik kiiep tix mai tawx ka an tix kaux sinax pui Isarelax heue. ⁸ Mawh kheu nan paox nyiex pa dex an ah nin ka Bawzax, "Liag an son cao maix" mai nawh peeik kiiep tix heue. ⁹ Bawzax ah nin ka kuad song mai pui khawmuik, "Daux singaix, pex mawh mhai rug grawng pa liag aux can cie Elimaliet mai can cie Khilon khawm cie Mahalon khawmuik khaing tawm taix Nawmix heue. ¹⁰ Lheu khaing an aux hoik teei Ruthax pui Mawbax, moeng Mahalon mawh moeng tix, sonsang deeh plud min ceu kaux pui pa hoik yum mai ka piang sinngao cie nawh mai son ang min cau kaux pui pa hoik yum, sang grai khaing sinax puxaik nawh khankix mai khaing daux siviex veng dee ot nawh, daux in singaix pex mawh mhai rug heue." ¹¹ Pui khankix pa ot daux siviex veng mai kwad riex ju ah nin, "Yix mawh mhai rug, Simiang Siyiex tak kieh bun pa hoek ka daux nyiex maix, awm Rakhelax mai Leax kiex ra kaux pa deeh sum nyiex ma pui Isarelax. Kieh maix koe krax haok hwan ting lhaong ka daux haktiex Epharat mai kieh maix ao min ka daux veng Bieliehiem heue. ¹² Kieh nyiex ma maix awm nyiex ma Periet, pui pa hoik keh Tama ka son Yudax, kheu jao ru pa tawx Simiang Siyiex ka maix, khaing bun awn ju in heue. ¹³ Bawzax teei Ruthax mawh moeng tix mai yam hu laig it nawh tau mai nawh Simiang Siyiex tawx nawh koe kaux mai nawh keh kawn simex tix kaux heue. ¹⁴ Cub bun khankix ah nin ka Nawmix, "Kieh krax pa yaog yaw koe ka Simiang Siyiex, pa ang nyang prah maix khaing paox nyiex pa dex mai maix daux in singaix, kieh ceu kaux nawh mawh pa ao min daux pui Isarelax! ¹⁵ Kieh nawh mawh pa khre rien ka ju maix mai mawh pa kia ngien ka yam riex ju maix, mawh kheu mun maix moh ka maix mai nie lheu mhawm ka maix, khaing pa hoik koe nawh kawn simex aliah kaux heue." ¹⁶ Nawmix teei ti teem kawn nyawm an ka piang naok tix mai kiex mawh cao priex rien ka kawn nyawm an heue. ¹⁷ Bun paox plawg khankix ah nin, "Kawn simex tix kaux, hoik keh ka son Nawmix, mai sum ceu kaux nawh mawh Obet, nawh mawh keeing Yessie, pa mawh keeing Davit heue." ¹⁸ In khankix mawh grawng doeh ru Pariet, Pariet pon kawn simex tix Hezaron, ¹⁹ Hezaron pon kawn simex tix Aram mai Aram pon kawn simex tix Aminadat, ²⁰ Aminadat pon kawn simex tix Nashon mai Nashon pon kawn simex tix Salamon, ²¹ Salamon pon kawn simex tix Bawzax mai Bawzax pon kawn simex tix Obet, ²² Obet pon kawn simex tix Yessie mai Yessie pon kawn simex tix Davit heue.