Romans

Romans

¹ Pawlux pa mawh siliex Yesux Khrit, pa hoik kok ti kieh mawh kawncau pa ting, pa hoik tiah ti deuh sonsang sidiex lox bwan gaux rhawm Siyiex, ² pa hoik grux tawx Nawh Cao lox mukheu ka cao jhai khankix ti tiiem daux phuk lai sigang khri pa singax singeh khankix, ³ grawh grawng Kawn Nawh Cao, pa hoik keh awm pa khaw plak nex nham ka daux ru Davit, ⁴ Phan mawh awm pa khaw plak khuan pa dex mai pa singax singeh, hoik sidawng mawh Kawn Siyiex tau mai sibrawm, ka pa deeh kaoh im khaing krax yum heue. Pa mawh Simiang ex Yesux Khrit. ⁵ Mawh ka daux Nawh heue, pa pon ex bwanson mai ara kawncau pa ting, sonsang kieh ceu pui khawmuik koe krax cu nghiet ka krax yum rhawm, son ceu kaux Nawh Cao, ⁶ pex kawx mawh ka daux kix, pa hoik kok tix mawh cie Cao Khrit heue. ⁷ Tawx ka pui pa ot ka daux veng Romax khawmuik, can pa moh Siyiex kah, pa hoik kok ti kieh mawh pui singax singeh heue. Kieh pex koe bwanson mai pa nhim pa kaoh khaing Keeing ex Siyiex mai Simiang Yesux Khrit liak. ⁸ Aux yaogyaw bwanson Siyiex aux Ka sivoe paox tix, ka daux Yesux Khrit, son pex khawmuik, kheu grawng krax yum rhawm pex hoik krai hoik tah ka piang haktiex ku dah dee khawmuik heue. ⁹ Grawh grawng nawh, Siyiex mawh cao pa kham mhai rug aux, pa mawh Kaw pa yuh aux son Nawh ka daux khuan aux, ka daux lox bwan gaux rhawm Kawn Nawh Cao, grawh grawng pa simawd aux ka pex ang jud jai, ka daux pa rawg aux bwan ku jheung jheung. ¹⁰ mai rawg mhaing, yuh ka mawx phan khaw mai alo Siyiex, aux tak sang pon hoek ka pex sax heue. ¹¹ Grawh grawng nawh, aux mie ti yaox pex, sonsang pon aux ti tawx totaix khuan tix ceu ceu ka pex, sonsang kieh pex kaux cong heue. ¹² Grawng ah nan sang ah nin, yuh ka mawx aux mai pex sang pon pa nyawm rhawm tau, ex ku kaux kheu krax yum rhawm paox tix tang kaux, khawm ka krax yum rhawm cie pex mai cie aux heue. ¹³ Puxaik khankix eue, aux ang rhawm kieh pex ang tawng, grawng pa yiag aux ti hoek ka pex tom nie bawg viang mawh nan hoik kieh raw aux tom yam in, sonsang pon aux tix koe plix khawm ka daux pex ceeix, awm pa hoik koe aux ka daux pui tang ceu pa tang khankix heue. ¹⁴ Aux mawh pa koe ceuk ka pui Helasax mai ka khawm pui pheem khankix mai ka pui koe pingnya mai ka khawm pui pa ang koe pingnya heue. ¹⁵ Mawh kheu nan aux koe rhawm tix sang sidiex lox bwan ka khawm pex pa ot daux veng Romax heue. ¹⁶ Grawh grawng nawh, ang aux kaig tua kheu lox bwan gaux rhawm, mawh kheu lox bwan an mawh sibrawm Siyiex, son can pui pa yum rhawm ku kaux sang hoek krax taoh, son pui Yudax ka paox tix mai khawm son pui Helasax heue. ¹⁷ Grawh grawng nawh pa rahsee Siyiex plak sidawng ka daux lox bwan an, kheu krax yum rhawm, sonsang yum rhawm, awm hoik tiiem ti deuh ah nin, "Pui pa rahsee tak sang im kheu krax yum rhawm heue."Siyiex Song Rhawm Ka Pui Ang Rahsee ¹⁸ Grawh grawng nawh pa song rhawm Siyiex plak sidawng khaing raoma, piang pui pa ang nab yam ka Siyiex mai pa ang rahsee khawmuik, pa mawh pa kieh raw ka pa mawh meh, ka daux pa ang rahsee heue. ¹⁹ Mawh kheu can pa pon ti tawng grawng Siyiex hoik sidawng ka daux kix, grawh grawng nawh Siyiex hoik plak sidawng ka kix heue. ²⁰ Grawh grawng nawh ceu pa ang chix yaox cie Nawh Cao, tom yam jah ti kaw ti phan haktiex dix, pa mawh sibrawm leeing ju, cie Nawh mai pa mawh Nawh leeing ju, pon ti yaox sidawng, kheu pon ti yaox ka daux ceu pa hoik yuh Nawh Cao, mawh kheu nan ang kix koe dee du grawng phimap tix, ²¹ mawh kheu viang kix hoik tawng ka Siyiex kawx, kix ang yaog yaw Nawh ting, awm pa khaw kix ti yaog yaw Siyiex mai ang kix deeh yaog yaw bwanson Nawh mai kix lih ti mawh pa ang koe bwanson ka daux ceu pa keud tix mai rhawm pa sivix pa ang kix chix tawng hoik vhaik hu heue. ²² Viang kix dhua tokaux kix mawh pa koe pingnya cuyi, kix lih mawh pui daox aw, ²³ mai loh min pakngai Siyiex, pa ang chix laux leeing ka son riang grang pa yaung pui pa chix lau leeing mai riang grang yaung sim khankix mai riang grang yaung totiag pa koe caong pon khawn khankix mai riang grang yaung ceu pa chix mu hu khankix heue. ²⁴ Mawh kheu nan Siyiex tom grham kix ka daux alo nex nham rhawm kix, ti yuh ceu pa ang singax singeh, son sang hoek tokaux kix krax laux min plakngai ka paox tix tiru heue. ²⁵ Mawh kheu kix hoik loh pa mawh meh Siyiex ka son pie lhen mai krub mai yuh son ceu pa hoik phan hoik yuh mai ang krub ang yuh son Cao Phan Cao Yuh, Kaw pa koe bwanson leeing ju. Amen. ²⁶ Mawh kheu jao in Siyiex tom grham kix yuh alo nex nham pa seeing, grawh grawng nawh bun kix khankix deeh loh ceu pa khaw ti shiao tix awm pa khaw mai been nex nham, tix nieb yuh ka ceu pa ang khaw, ²⁷ mai awm an simex khankix kawx, kix tik been ceu pa khaw ti shiao ka bun mai koe rhawm kraing ka paox tix, tix kaux lai tix kaux mai nieb yuh pa ang doh khaw ka paox simex tix mai son pa lud an kix deeh pon ka daux tokaux kix, awm pa keung kix ti pon heue. ²⁸ Awm pa ang kix rhawm tawng ka Siyiex, Siyiex hoik grham kix koe rhawm pa keud pa ang keung ang khaw, sonsang yuh ceu pa ang khaw ang jiet heue. ²⁹ Kix naog ka can pa ang rahsee khawmuik, pa mawh pa caox mai pa ghoing mai pa koe rhawm ti sang yuh pui laux, pa naog ka pa boh rhawm mai pa pah pui yum mai pa simah simiang mai pie lhen mai pa koeng mai pa ah lox suksiep, ³⁰ mai pa nieb yuh plakngai pui laux mai pa koeng Siyiex kah mai pa ang chix nab yam mai pa ca nyhau ting rhawm mai pa nieb yaw tix mai pui pa lih ti keud ti yuh ceu pa caox mai pa ang chix cu nghiet ka lox miex keeing tix, ³¹ mai pa ang chix tawng mai pa ang kaux sijax ka lox mukheu mai pa ang koe krax moh awm pasax koe been moh pui paox tix mai pa ang chix caux rhawm. ³² Viang kix hoik tawng grawng pa prawng ca Siyiex, hoik een grawng pui pa yuh nan khaw ti yum kawx, tokaux kix ang joeng yuh ceu an khaing, viang mawh nan kix yaw mai caw rhawm khawm ka pui pa yuh nan heue.

¹ Mawh kheu nan pui pa prawng ca ku kaux eue maix ang koe dee du ka phimap tix, grawh grawng nawh pa prawng ca maix ka pui tang kaux maix hoik prawng ca taix tokaux tix mawh pa khaw ti pon krax ciyang, mawh kheu prawng ca maix yuh nan ceu pa awm an heue. ² Ex tawng grawng pa prawng ciyang Siyiex piang kix pa yuh ceu an, mawh awm pa khaw mai pa mawh meh heue. ³ Pui pa prawng ca ka pui pa yuh ceu an kix mai tokaux tix kawx yuh nang ceu pa awm an eue, maix ce ti sang pon luan khaing krax prawng ciyang Siyiex lie? ⁴ Phan ang mawh nan maix nieb yuh pa ang cee ang cak ka krax pa nie mi nie koe ceu pa mhawm rhawm mai pa gun yeung mai pa lang gun yeung Nawh Cao, kheu ang maix tawng grawng pa mawh in rhawm Siyiex mawh sonsang thong maix ti doh keud ka phimap tix lie? ⁵ Kheu pa kiien rhawm mai rhawm pa ang chix doh keud ka phimap tix mai rhawm ti deuh ceu pa song rhawm son tokaux tix, ka daux ngaix pa song rhawm mai yam sang sidawng pa prawng ciyang Siyiex rahsee. ⁶ Kaw pa tak sang tawx ka ku kaux daux pui awm pa khaw mai kaing pa yuh tix heue. ⁷ Ka kix pa chix viex rhawm gun yeung mai ca yuh kaing pa mhawm mai sawg son min plakngai mai krax yung yi mai pa ang chix laux leeing, tak tawx ju leeing ju heue. ⁸ Viang mawh nan, ka kix pa yuh sipie lie sivoe mai ang cu nghiet ka pa mawh meh, viang mawh nan pa cu nghiet ka pa ang rahsee, tak tawx pa song rhawm, ⁹ mai pa lang teung kha rhawm mai pa khi rhawm, piang ju pui pa yuh pa caox ku kaux, ka pui Yudax ka paox tix mai ka khawm pui Helasax, ¹⁰ Viang mawh nan min plakngai mai pa yungyi mai pa nhim, ka pui ku kaux pa yuh ceu pa mhawm, ka pui Yudax ka paox tix mai ka khawm pui Helasax heue. ¹¹ Grawh grawng nawh Siyiex ang jhak ka plakngai pui heue. ¹² Grawh grawng nawh can kix pa ang koe lai beenli mai hoik lud, tak sang laux leeing khawm ang tix koe lai beenli mai can kix pa hoik lud greem lai beenli, tak sang prawng ca kix ka lox lai beenli heue. ¹³ Grawh grawng nawh pui pa mhong lox lai beenli mawh pa rahsee sivoe Siyiex ang mawh, viang mawh nan mawh pui pa hawt yuh lox tawm lai beenli pa tak hoek krax rahsee, ¹⁴ Grawh grawng nawh pui tang ceu khankix pa ang koe lai beenli, lak chix yuh sipie ceu pa koe ka daux lai beenli, pui inkix viang kix ang koe lai beenli kawx, kix mawh lai beenli ka tokaux tix tiru heue. ¹⁵ Kheu jhi kix kaing pa yuh lai beenli pa hoik tiiem daux rhawm kix mai dee chix keud tawng kix kham mhai rug ka an mai kheu tawng kix ti deuh phimap ka paox tix, phan ang mawh nan ti pluat ploi phimap ka paox tix heue. ¹⁶ Ka daux ngaix yam Siyiex tak sang teei Yesux Khrit mai prawng ca ka ceu pa hoik mox kawn pui, awm pa khaw mai lox bwan gaux rhawm pa sidiex aux heue. ¹⁷ Phan maix kok tokaux tix mawh pui Yudax mai een rhawm tix ka lox lai beenli mai yaw rhang di ka daux Siyiex, ¹⁸ tawng alo Nawh Cao mai chix cheu chix liiem ka pa tang siyox, yam mhong maix pa phat lox tawm lai beenli, ¹⁹ hoik yiag tokaux tix mawh cao pa jhi krax ka pui dug ngai mai pa mawh pa riang ka kix pa ot ka daux pa vhaik, ²⁰ mai pa gau ka pui daox aw khankix mai pa mawh sara cao gau ka kawn nyawm khankix, kheu koe grang krax tawng maix grang pa mawh meh, ka daux lox lai beenli. ²¹ Mawh kheu nan maix pa gau ka pui tang kaux, ang maix gau ka tokaux tix tiru lie? Maix pa sidiex gau nhie pui paw briex, tokaux maix lai briex lie? ²² Maix pa ah pui ang khaw ti lud vao, tokaux maix lai lud vao lie? Maix pa nieb yuh ti seeing ka riang grang khankix, tokaux maix lai mawh pui briex ka nyiex vad lie? ²³ Maix pa yaw rangdi ka daux lox lai beenli maix lai yuh min plakngai Siyiex laux, kheu lheu maix lox tawm lai beenli lie? ²⁴ Grawh grawng nawh pui tang ceu khankix salao ka ceu kaux Siyiex kheu pex, awm hoik tiiem daux phuk lai sigang khri heue. ²⁵ Grawh grawng nawh been pat hak mawh pa koe bwanson phan maix mawh pui pa hawt yuh lox tawm lai beenli, viang mawh nan phan maix mawh pa lheu lox tawm lai beenli, pa pat hak maix hoik lih ti mawh pa ang pat hak heue. ²⁶ Mawh kheu nan phan pui pa ang pat hak chix priex ti hawt been khankix pa koe daux lai beenli, pa ang pat hak nawh an, tak sang sawn ti mawh awm pa pat hak ang mawh lie? ²⁷ Kix pa ang pat hak ka pa dex mai nex nham, phan kix grum hawt lox tawm lai beenli, tak sang prawng ka maix, pa hoik koe lox tawm lai been ka ngai lai mai pa hoik pat hak mai baox lheu ka lox tawm lai beenli ang mawh lie? ²⁸ Grawh grawng nawh pui pa mawh pui Yudax plak praix, ang tie mawh pui Yudax tete, viang pa pat hak ka nex nham plak praix kawx, ang tie mawh pa pat hak tete, ²⁹ viang mawh nan pa mawh pui Yudax tete, mawh pa mawh pui Yudax ka plak daux heue. Ceu pa pat hak mawh pa dex mai rhawm mai khuan mai ang mawh ka daux ngai lai heue. Ang lai mawh pa yaog yaw pui kah, mawh pa yaog yaw Siyiex kah heue.

¹ Phan mawh nan pui Yudax chix nie lheu koe bwanson yuh ka mawx? Phan ang mawh nan pa pat hak koe bwanson yuh ka mawx? ² Koe bwanson tom nie ka daux kuceu heue. Phaox ka tix ceu, hoik tawx pong lox tawm jhawm krai Siyiex ka kix heue. ³ Viang pui tix blah ang yum rhawm kawx, khex sang yuh ka mawx? Krax pa ang kix yum rhawm, sang chix laux yuh ceu pa kaux sijax Siyiex lie? ⁴ Ang doh mawh nan, viang pui khawmuik laux sijax kawx, Siyiex kaux sijax awm hoik tiiem ti deuh daux Phuk lai sigang khri ah nin, "Kheu sonsang yaox pa rahsee maix, ka daux gumlox maix mai sonsang pex maix, yam laig maix daux dee prawng ca heue." ⁵ Viang mawh nan phan pa ang rahsee ex, kieh pa rahsee Siyiex sidawng, ex sang ah ka mawx? Yam tawx Siyiex pa song rhawm pa ciyang Nawh ang rahsee lie? Aux ah hawt rhawm pui heue. ⁶ Ang doh mawh nan. Grawh grawng nawh, phan mawh nan Siyiex tak chix prawng ca pui haktiex yuh ka mawx? ⁷ Viang mawh nan phan pa kaux sijax Siyiex, nie lheu ting min plakngai, kheu pa laux sijax aux, lai kawn prawng ca aux awm pui pa koe phimap yuh ka mawx? ⁸ Kheu ang ah, awm pui tix blah nieb ah grawng ex mai dhua ex ah "Kieh ex yuh ceu pa caox, sonsang lih hoek ceu pa mhawm?"Pa ciyang ka pui pa yuh nan khaw heue. ⁹ Phan mawh nan yuh ka mawx? Ex lheu mhawm khaing kix lie? Ang doh lheu mhawm ceeix kawx heue. Grawh grawng nawh ex hoik ah grawng pui Yudax mai khawm pui Helasax, mawh pa ot greem phimap khawmuik, ¹⁰ Awm pa hoik tiiem ti deuh ah nin, Ang koe pui pa rahsee, pon ang koe tix kaux kawx heue. ¹¹ Pui pa tawng pa yung ang koe. Pui pa sawg ka Siyiex ang koe heue. ¹² Kix hoik lud loe khawmuik. Kix hoik rom ti mawh pa ang koe bwanson heue. Pui pa yuh pa mhawm ang koe, pie tix kaux kawx pon ang koe heue." ¹³ "Ghok kix mawh simeeig pa hoik bhang heue. Kix hoik teei dak tix, ti shiao pie lhen heue.""Jai siuing pa cai koe greem siyieb jheeh kix heue." ¹⁴ "Jheeh kix naog ka lox jhax mai lox pa song heue." ¹⁵ "Caong kix khran phai ti kieh nham lih heue. ¹⁶ Pa laux leeing mai pa kha rhawm koe daux krax pa hu kix heue. ¹⁷ Krax pa nhim kix ang sax tawng heue. ¹⁸ Ceu pa lhat graung ka Siyiex ang koe sivoe ngai kix heue." ¹⁹ Ex tawng grawng can pa ah lox lai beenli, sang ah ka kix pa ot greem lox lai beenli. Kheu sonsang thox jheeh ku mu mai sonsang viex pui haktiex khawmuik hoek greem pa prawng ca Siyiex heue. ²⁰ Mawh kheu pui tix kaux kawx ang lai hoek krax rahsee ka sivoe Siyiex, kheu pa twah pa klaung hawt lai beenli, Grawh grawng nawh pon ti tawng grawng phimap kheu lai beenli heue. ²¹ Viang mawh nan yam in, pa rahsee Siyiex, pa tang pa ang dex mai lox lai beenli hoik plak sidawng mai lox lai beenli mai cao jhai khankix hoik kham mhai rug ka an, ²² pa mawh pa rahsee Siyiex kheu krax yum rhawm ka Yesux Khrit, ka can kix pa yum rhawm khawmuik. Grawh grawng nawh ang lai tang siyox heue. ²³ Pui hoik yuh phimap khawmuik mai ang pon hoek ka min plakngai Siyiex, ²⁴ kheu bwanson Siyiex kix pon hoek krax rahsee giex ang tawx ngawh, kheu krax taoh pa koe ka daux Yesux Khrit, ²⁵ pa hoik een Siyiex ti kieh mawh pa tan, kheu krax yum rhawm ka daux nham Nawh Cao, sonsang jhi pa rahsee Nawh, kheu pa gun yeung Siyiex ka daux pa kieh luan khaing phimap pa hoik yuh glang ka khankix. ²⁶ Kheu sonsang jhi pa rahsee Nawh ka daux bawg yam in mai sonsang rahsee tokaux Nawh, yam kieh pui pa yum rhawm daux Yesux Khrit mawh pui rahsee heue. ²⁷ Phan mawh nan grawng pa yaw rangdi koe dee mawx? Hoik nyeep kieh ot plak praix heue. Hoik mawh kheu beenli pa yuh ka mawx? Kheu krax twah klaung lie? Ang mawh. Viang mawh nan hoik mawh kheu beenli krax yum rhawm heue. ²⁸ Mawh kheu nan ex tom sawn pa hoek pui ka krax rahsee, mawh kheu krax yum rhawm mai ang dex ka pa twah klaung hawt lai beenli heue. ²⁹ Siyiex mawh ngie Siyiex pui Yudax khaing lie? Nawh mawh Siyiex khawm pui tang ceu ang mawh lie? Mawh heue, mawh Siyiex khawm pui tang ceu heue. ³⁰ Grawh grawng nawh koe ngie Siyiex tix kaux khaing mai Nawh Cao tak sang kieh pui pa pat hak hoek krax rahsee kheu krax yum rhawm mai kieh pui pa ang pat hak hoek krax rahsee ka daux krax yum rhawm heue. ³¹ Phan mawh nan ex yuh ti kieh lox lai beenli mawh pa giex going kheu krax yum rhawm lie? Ang doh mawh nan, sex kieh lox lai beenli kaux cong heue.

¹ Phan mawh nan ex sang ah ka mawh grawng Abraham pa mawh tax du ex hawt plak nex nham, hoik pon nawh bwanson patix? ² Grawh grawng nawh phan Abraham hoik pon krax rahsee kheu krax twah klaung pa yuh tix, nawh koe grawh grawng dee yaw tix, viang mawh nan ang mawh plak sivoe Siyiex heue. ³ Grawh grawng nawh Phuk lai sigang khri ah ka mawx? "Abraham hoik yum rhawm ka Siyiex mai hoik sawn mawh pa rahsee son nawh heue." ⁴ Ngawh riang pa tawx ka kaw pa yuh kaing, ang lai chix sawn mawh pa yuh bwanson, hoik mawh ceuk heue. ⁵ Viang mawh nan kaw pa ang yuh kaing mai yum rhawm ka Kaw pa kieh pui caox pa ang nab yam mai pa yuh pa ang khaw ka Siyiex rahsee, pa yum rhawm nawh an hoik sawn mawh pa rahsee heue. ⁶ Awm khawm pa hoik krai Davit grawh grawng pa ting bwanson, pui pa hoik sawn Siyiex mawh pa rahsee, ka pa ang dex mai krax twah pa yuh tix, ⁷ pa ah nin, "Kix pa pon pa pluat ploi phimap tix mai pa hoik kheem phimap ting bwanson heue. ⁸ Pui pa luan khaing pa mhai deuh Siyiex phimap nawh ting bwan son heues." ⁹ Phan mawh nan bwanson in mawh son pui pa pat hak khaing lie? Phan ang mawh nan mawh khawm son pui pa ang pat hak lie? Grawh grawng nawh ex ah, krax yum rhawm Abraham hoik sawn mawh pa rahsee heue. ¹⁰ Phan mawh nan hoik sawn mawh khaix hoik pat hak nawh lie? Ka sang pat hak lie? Ang lai mawh khaix hoik pat hak, viang mawh nan hoik mawh tom ka sang pat hak heue. ¹¹ Nawh pon mhai pa pat hak, pa mawh cum pa rahsee, pa dex mai krax yum rhawm, pa hoik koe nawh tom ka sang pat hak, sonsang mawh nawh keeing kix can pa yum rhawm khawmuik, viang kix ang pat hak kawx, sonsang pon sawn kix mawh pa rahsee, ¹² sonsang mawh keeing pa pat hak mai ang joeng mawh ngie keeing kix pa pat hak khaing, viang mawh nan mawh son khawm kix pa hawt hu daux khaix caong krax yum rhawm keeing ex Abraham, pa hoik koe nawh ka sang pat hak heue. ¹³ Grawh grawng nawh lox mukheu pa hoik tawx ka Abraham. Phan ang mawh nan ka ru nawh, grawng sang mawh nawh cao sin haktiex khawmuik, ang lai mawh kheu lox lai beenli, mawh kheu pa rahsee pa dex mai krax yum rhawm heue. ¹⁴ Grawh grawng nawh phan kix pa dex mai lox lai beenli mawh cao sin, hoik yuh krax yum rhawm mawh pa giex going mai lox mukheu an kawx hoik yuh mawh pa ang koe bwanson heue. ¹⁵ Grawh grawng nawh lox lai beenli mawh pa yuh song rhawm, viang mawh nan phan ang koe lox lai beenli, dee lheu lud kawx ang koe heue. ¹⁶ Mawh kheu grawng in, pa rahsee tak mawh kheu krax yum rhawm, sonsang mawh kheu bwanson mai sonsang kaux lox mukheu ka ru khawmuik khawm leeing. Ang joeng mawh ngie ka ru pa dex mai lox lai beenli, mawh ka khawm ru pa dex mai krax yum rhawm Abraham, pa mawh keeing ex khawmuik. ¹⁷ Awm pa hoik tiiem ah nin, "Aux hoik ciak ti kieh maix mawh keeing ceu pui tom nie heue."ka sivoe Siyiex pa yum rhawm nawh kah, pa mawh Kaw pa kieh pui yum deeh im mai pa grux krai grawng ceu pa ang nyang bax mawh, awm pa hoik mawh heue. ¹⁸ Viang Abraham ang koe dee keud pot jun pot, grawng sang mawh nawh keeing ceu pui tom nie, nawh ca keud pot jun pot mai yum rhawm grawng sang mawh awm pa hoik grux krai ah nin, "Doeh ru maix tak mawh nan heue." ¹⁹ Krax yum rhawm nawh ang lai iak, viang nawh keud grawng tokaux nawh awm pa hoik yum, kheu nawh hoik dex koe tix yieh num mai grawng pa hoik neh hoik yum vaig Sara, ²⁰ Viang mawh nan nawh ang keud jee keud blaong ka grawng lox mukheu Siyiex, kheu krax ang yum rhawm, viang mawh nan nawh pon sibrawm kheu krax yum rhawm tix mai yaog yaw ka Siyiex, ²¹ mai nawh vah rhawm grawng Kaw pa tawx lox mukheu an, mawh Kaw pa koe sibrawm ti chix yuh heue. ²² Mawh kheu nan krax yum rhawm nawh hoik sawn mawh pa rahsee son nawh heue. ²³ Viang mawh nan pa hoik tiiem ah nin, "Hoik sawn mawh pa rahsee,"ang mawh ngie son Abraham khaing, ²⁴ mawh khawm son ex, pa tak sang sawn mawh awm nang nan, ka ex pa yum rhawm ka Kaw pa kieh Simiang ex Yesux deeh kaoh im khaing krax yum heue. ²⁵ Hoik tawx Simiang Yesux an kheu phimap mai hoik kieh deeh kaoh im, sonsang kieh ex hoek krax rahsee heue.

¹ Mawh kheu hoik pon hoek ex krax rahsee kheu krax yum rhawm, ex tom koe pa nhim ka plak Siyiex kheu Simiang ex Yesux Khrit heue. ² Mawh kheu Simiang an ex hoik pon laig ka daux bwanson in, dee ot dee cung ex mai ex yaw gaux rhawm ka daux krax keud pot jun pot sonsang pon min plakngai Siyiex heue. ³ Ang joeng mawh ngie nan, viang ka daux krax kha rhawm kawx, ex yaw gaux rhawm kah, kheu tawng ex krax kha rhawm chix yuh kieh lih pa pon kham geu, ⁴ mai pa pon kham geu chix yuh kieh lih, pa hoik cheu ti tawng mawh pa mhawm, chix yuh kieh pa keud pot jun pot lih, ⁵ mai pa keud pot jun pot, ang lai kieh kaig tua heue. Mawh kheu krax moh krax rhawm Siyiex hoik prauk ti sau ka daux rhawm ex, kheu Khuan Singax Singeh pa hoik tawx ka ex heue. ⁶ Grawh grawng nawh yam kawn iak riang ex, yam caw bawg yam yum Cao Khrit son pui pa ang chix nab yam mai pa yuh pa ang khaw ka Siyiex heue. ⁷ Pie pui pa sang yum tang son pui rahsee kawx neuex pa koe. Pui pa sang kwa ti yum tang son pui mhawm tee sang koe tix kaux kaux pleue. ⁸ Viang mawh nan Siyiex jhi mhai rug grawng pa moh Nawh ka ex, ka daux pa yum Cao Khrit son ex, yam kawn mawh ex pui phimap heue. ⁹ Mawh kheu nan, phan ex hoik pon ti hoek krax rahsee yam in, kheu nham Nawh Cao, ex tak sang nie lheu pon pa taoh khaing pa song rhawm Siyiex kheu Nawh Cao heue. ¹⁰ Grawh grawng nawh, yam kawn mawh ex pui koeng, hoik kieh ex deeh khaw paox tix ka Siyiex, kheu pa yum Kawn Nawh Cao, kheu hoik deeh khaw caw ex paox tix, ex tak nie lheu hoek krax taoh kheu pa im ju Nawh. ¹¹ Mai ang joeng mawh ngie nan, ex yaw gaux rhawm khawm ka daux Siyiex kheu Simiang ex Yesux Khrit, pa hoik pon ex pa deeh khaw caw paox tix yam in, ka daux Nawh heue. ¹² Mawh kheu nan, awm hoik laig phimap daux haktiex kheu sipieag pui tix kaux mai krax yum hoik laig kheu phimap mai mawh kheu pui khawmuik hoik yuh phimap, krax yum hoik tah ka pui khawmuik heue. ¹³ Ka sang koe lox lai beenli phimap hoik dawg koe ka daux haktiex, viang mawh nan phan lox lai beenli ang koe, dee deuh dee jhawp phimap kawx ang lai koe heue. ¹⁴ Viang mawh nan jah tom ju Adam, tom hoek ju Mose, krax yum hoik kwang giex kaing heue. Viang piang kix, pa ang yuh phimap awm phimap pa yuh Adam kawx, hoik giex kaing kah Adam an mawh riang lox tiag Kaw pa tak sang hoek khaix heue. ¹⁵ Viang mawh nan phimap mai totaix pa tawx giex ang lai awm paox tix. Grawh grawng nawh phan mawh kheu sipiag phimap pa yuh pui tix kaux, pui hoik yum tom nie, bwanson Siyiex hoik nie lheu ting khaing kub son pui tom nie, kheu totaix bwanson pui tix kaux pa mawh Yesux Khrit heue. ¹⁶ Grawng phimap pa lud pui tix kaux mai grawng totaix pa tawx giex ang lai awm paox tix. Grawh grawng nawh, kheu sipiag phimap tix mu, hoik pon krax prawng ciyang, viang mawh nan totaix bwanson pa tawx giex, tawx kheu phimap tom nie sonsang kieh hoek krax rahsee heue. ¹⁷ Grawh grawng nawh phan mawh kheu sipiag phimap pui tix kaux, krax yum hoik pon kwang, pon giex kaing, kheu tix Kaux, kix pa hoik pon bwanson pa kied lheu ting khaing kub mai totaix pa rahsee pa tawx giex, tak sang nie lheu pon kwang pon giex kaing ka daux pa im ju, kheu tix Kaux, pa mawh Yesux Khrit heue. ¹⁸ Mawh kheu nan awm pui khawmuik hoek krax prawng ciyang kheu sipiag phimap pa yuh pui tix kaux, awm an kheu pa rahsee pa yuh tix Kaux, pui khawmuik tom pon hoek krax rahsee, pa dex mai ju pa im heue. ¹⁹ Grawh grawng nawh awm kheu sipiag pui tix kaux pa lieh lox, pui tom nie hoik lih mawh pui phimap, awm an kheu pa cu nghiet tix Kaux, pui tom nie tak sang hoek krax rahsee heue. ²⁰ Lheu khaing an lox tawm lai beenli baox hoek laig, sonsang nie lheu ting koe phimap, viang mawh nan dee nie lheu ting koe phimap, bwanson kied nie lheu ting khaing kub, ²¹ awm hoik kwang hoik giex phimap kaing ka daux krax yum, viang bwanson kawx, sang pon kwang pon giex kaing kheu pa rahsee, tom lih pon ju leeing ju kheu Simiang ex Yesux Khrit heue.

¹ Phan mawh nan ex sang ah ka mawx? Ex kawn ca sang ot ka daux phimap, sonsang kieh nie lheu ting bwanson lie? ² Ang doh mawh nan. Ex pa hoik yum ka phimap, ex kawn baox chix im ka daux phimap yuh ka mawx? ³ Phan ang mawx nan, ang pex tawng grawng can ex pa hoik cubcom rawm ka daux Yesux Khrit, hoik cubcom ka daux pa yum Nawh lie? ⁴ Mawh kheu nan hoik sipaung ex tau mai Nawh Cao kheu krax cubcom ka daux pa yum Nawh, awm hoik deeh kieh Cao Khrit kaoh im khaing krax yum kheu min sibrawm Keeing Cao, ex kawx sang pon ti hu ka daux ju pa khraox heue. ⁵ Grawh grawng nawh, phan ex hoik kleuk tau mai Nawh Cao, ka daux pa yum awm pa yum Nawh, ex kawx tak sang deeh kaoh im awm pa hoik deeh kaoh im Nawh Cao, ⁶ kheu hoik tawng ex grawng pui prim ex hoik yum tau mai Nawh Cao piang khaox lhak, sonsang yieh sibrawm tokaux phimap laux, son ang ex sang baox mawh siliex ka phimap. ⁷ Grawh grawng nawh, kaw pa hoik yum hoik pon ti rahsee mai luan khaing phimap heue. ⁸ Viang mawh nan, phan ex hoik yum tau mai Cao Khrit, ex yum rhawm khawm grawng sang im ex tau mai Nawh Cao heue. ⁹ Kheu hoik tawng ex grawng Cao Khrit hoik deeh kaoh im khaing krax yum mai tak ang lai baox deeh yum khaix. Krax yum ang lai baox pon kwang pon giex kaing piang Nawh heue. ¹⁰ Grawh grawng nawh krax yum pa hoik yum Nawh Cao an, Nawh hoik yum ka phimap tix bawg khaing, viang mawh nan ju pa im Nawh Cao, Nawh im ka Siyiex heue. ¹¹ Awm an viang pex kawx, sawn tokaux pex mawh pa hoik yum ka phimap, viang mawh nan pa hoik im ka Siyiex ka daux Yesux Khrit heue. ¹² Mawh kheu nan paw kieh phimap kwang giex kaing ka daux tokaux pa chix yum pex, ti kieh cu nghiet hawt alo nex nham tokaux. ¹³ Viang kraung pakpeung tokaux pex kawx, paw tawx ti kieh mawh kraung naing pa ang rahsee, ka phimap, viang mawh nan tawx tokaux pex ka Siyiex, awm pui pa hoik kaoh im khaing krax yum mai kieh kraung pakpeung tokaux pex mawh kraung naing pa rahsee ka Siyiex heue. ¹⁴ Grawh grawng nawh phimap tak ang pon kwang giex kaing piang pex, kheu ang pex ot ka greem lox lai beenli, viang mawh nan ot ka greem bwanson heue. ¹⁵ Yuh ka mawx? Kheu ang ex ot greem lox lai beenli, viang mawh nan kheu ot greem bwanson, ex tak sang yuh phimap lie? Ang doh mawh nan. ¹⁶ Ang pex tawng grawh grawng, pex sang tawx tokaux tix, ti mawh siliex mai cu nghiet ka pa yuh ka mawx ang ah, pex mawh siliex ka pa cu nghiet pex kah lie? Viang mawh ka phimap tom hoek krax yum ang ah, phan ang mawh nan ka krax cu nghiet tom hoek krax rahsee ang ah heue. ¹⁷ Viang mawh nan yaogyaw bwanson Siyiex, mawh kheu viang pex hoik sax mawh siliex phimap kawx, pa hoik viex khawm rhawm tix cu nghiet ka been sidiex gau pa hoik rieb pex ti teei. ¹⁸ Mawh kheu hoik kieh pex luan khaing phimap, pex hoik lih mawh siliex ka pa rahsee heue. ¹⁹ Pa ah aux nan, aux ah hawt been pui kheu iak riang rao nex nham pex heue. Grawh grawng nawh awm pa hoik tawx pex kraung pakpeung pex, ti mawh siliex ka pa ang singax singeh mai ka phimap, sonsang lih mawh phimap sinyek sinyek, awm an yam in tawx kraung pakpeung pex, ti mawh siliex ka pa rahsee, sonsang mawh pa singax heue. ²⁰ Grawh grawng nawh yam mawh pex siliex phimap, pex hoik mawh pui ploi ka pa dex mai pa rahsee heue. ²¹ Pex hoik koe plix pa yuh ka mawx ka bawg yam an, ka daux ceu pa kaig tua pex kah yam in? Grawh grawng nawh dee sidah ceu an khankix mawh krax yum heue. ²² Viang mawh nan, yam in, kheu hoik luan pex khaing phimap mai hoik lih mawh siliex Siyiex mai plix pa sang pon pex mawh pa singax singeh mai dee sidah mawh ju leeing ju heue. ²³ Grawh grawng nawh ngawh riang phimap mawh krax yum, viang mawh nan totaix bwanson pa tawx Siyiex mawh ju leeing ju ka daux Simiang ex Yesux Khrit heue.

¹ Puxaik khankix eue, aux sikah ka pui pa tawng lai been ang pex tawng grawng ting lox lai been piang pui yam kawn im ju nawh lie? ² Grawh grawng nawh, bun pa hoik koe mex, beenli hoik phyawk nawh ka mex tix, yam kawn klawd mex nawh heue. Viang mawh nan phan mex nawh yum, nawh luan khaing lox lai beenli mex tix heue. ³ Mawh kheu nan yam kawn klawd mex nawh, phan nawh hu kleuk tokaux tix ka simex tang kaux, tak kok nawh mawh bun lud vao heue. Phan mex nawh yum, nawh hoik luan khaing lox beenli, mawh kheu nan, viang nawh hu kleuk ka simex tang kaux kawx nawh ang mawh bun lud vao heue. ⁴ Awm an, puxaik aux khankix eue, hoik yuh pui yum ka beenli, kheu tokaux Cao Khrit, sonsang kleuk pex ka tang kaux, pa mawh Kaw pa hoik deeh kaoh im khaing krax yum, sonsang lih ex ti plix plix son Siyiex heue. ⁵ Grawh grawng nawh yam kawn ot ex ka daux nex nham, rhawm pa sang yuh phimap, lih kheu lox lai beenli mai yuh ka daux kraung pakpeung tokaux ex, sonsang lih ex ti plix plix ka krax yum heue. ⁶ Viang mawh nan, yam in ex hoik luan khaing lox lai beenli, kheu hoik yum ex ka ceu pa hoik giex ka ex, sonsang yuh ex ka daux khuan pa khraox mai ang mawh ka daux been pa prim pa hoik tiiem ti deuh heue. ⁷ Phan mawh nan, ex sang ah ka mawx? Sang ah, lox lai beenli mawh phimap lie? Ang doh mawh nan. Viang mawh nan, aux ang lai tawng ka phimap phan ang mawh kheu lox lai beenli, grawh grawng nawh aux ang lai tawng ceu pa ghoing, phan lox lai beenli ang nyang ah, "Maix paw vi ghoing heue." ⁸ Viang mawh nan yam yaox phimap deeh pon yuh, kheu lox tawm an, tom yuh pa ghoing kuceu khawmuik ka daux aux heue. Grawh grawng nawh phan lox lai beenli ang koe, phimap mawh pa yum heue. ⁹ Glang ka in, kheu ang lox lai beenli koe, aux im ju heue. Viang mawh nan yam lih hoek lox tawm, phimap deeh im mai aux yum heue. ¹⁰ Lox tawm an, pa mawh sonsang im ju, aux yaox mawh pa kieh yum heue. ¹¹ Grawh grawng nawh yam yaox phimap deeh pon yuh, kheu lox tawm, tom pie lhen ka aux mai teei aux yum kheu heue. ¹² Mawh kheu nan lox lai beenli mawh pa singax mai lox tawm mawh pa singax mai pa rahsee mai pa mhawm heue. ¹³ Phan mawh nan, pa mhawm hoik lih mawh krax yum ka aux lie? Ang doh mawh nan, mawh phimap heue, sonsang sidawng grawng mawh phimap, hoik teei pa mhawm an mai yuh krax yum ka aux heue. Kheu lox tawm an phimap tak sang lih mawh phimap pa lang teung ting sigrien sigre heue. ¹⁴ Ex hoik tawng grawng lai beenli mawh pa dex mai khuan, viang mawh nan aux mawh pa dex mai nex nham, pa hoik coh ka phimap heue. ¹⁵ Grawh grawng nawh ang aux lai tawng ceu pa yuh tix, kheu ang aux yuh ceu pa koeng aux kah heue. ¹⁶ Mawh kheu nan phan aux yuh ceu pa ang aux simie ti yuh, aux hoik rieb ti teei grawng lox lai beenli mawh pa khaw caw heue. ¹⁷ Mawh kheu nan yam in ang lai baox mawh aux pa yuh, mawh kheu phimap pa ot ka daux aux pa yuh heue. ¹⁸ Grawh grawng nawh aux tawng ka daux aux, pa ah nan sang ah ka daux nex nham aux, ceu pa mhawm ang ot tix ceu kawx heue. Viang aux koe rhawm ti sang yuh kawx, aux ang chix yuh ceu pa mhawm lih heue. ¹⁹ Ceu pa mhawm pa mie aux ti yuh, aux ang yuh, viang mawh nan ceu pa caox pa ang aux mie ti yuh, aux yuh heue. ²⁰ Phan mawh nan, phan aux yuh ceu pa ang aux mie ti yuh, ang lai baox mawh aux pa yuh, mawh phimap pa ot ka daux aux pa yuh heue. ²¹ Mawh kheu nan aux yaox koe been pa yuh nin, yam simie aux ti yuh ceu pa mhawm, pa caox ca ot pot mai aux heue. ²² Grawh grawng nawh aux gaux rhawm ka daux lox lai beenli Siyiex, phan hawt pui plak daux, ²³ viang mawh nan aux yaox been pa tang, ka daux kraung pakpeung aux, pa cheu ti yuh naing ka been pa dex mai rhawm aux mai teei ti giex gang aux ka daux been pa dex mai phimap, pa koe ka daux kraung pakpeung aux khankix heue. ²⁴ Aux mawh pui pa nie lang teung kha rhawm heue. Mawx pa sang taoh aux khaing tokaux pa dex mai krax yum in? ²⁵ Yaogyaw bwanson Siyiex heue. Mawh ka daux Simiang ex Yesux Khrit heue. Phan mawh nan rhawm aux tom yuh kaing siliex ka beenli Siyiex, viang mawh nan plak nex nham aux yuh kaing siliex ka beenli phimap heue.

¹ Mawh kheu nan, yam in, ang lai koe dee prawng ciyang ka kix pa ot ka daux Yesux Khrit heue. ² Grawh grawng nawh been pa dex mai Khuan pa im ju, ka daux Yesux Khrit, hoik ploi aux luan khaing been phimap pa dex mai krax yum heue. ³ Pa ang lox lai beenli pon yuh, mawh kheu iak riang rao kheu nex nham, Siyiex hoik ploi Kawn tix lih ka daux pa yaung nex nham phimap mai grawh grawng phimap, Nawh prawng ciyang phimap ka daux nex nham, ⁴ son been pa hoik nhie ka daux lox lai beenli, tak sang naog ka daux ex, pa ang hu awm pa khaw mai nex nham, viang mawh nan pa hu awm pa khaw mai Khuan heue. ⁵ Kix pa ot hawt pa khaw mai nex nham, nie lheu keud grawng ceu pa dex mai nex nham, kix pa ot hawt pa khaw mai Khuan, keud grawng ceu pa dex mai Khuan heue. ⁶ Rhawm pa dex mai nex nham mawh krax yum heue. Viang mawh nan rhawm pa dex mai Khuan, mawh pa im ju mai pa nhim heue. ⁷ Mawh kheu rhawm pa dex mai nex nham, mawh pa ra lai koeng ka Siyiex, mawh kheu nawh ang cu nghiet, ka lox lai beenli Siyiex. Chix kawx, ang chix cu nghiet kah heue. ⁸ Kix pa ot ka daux nex nham, ang chix yuh pa khaw caw ka rhawm Siyiex. ⁹ Viang mawh nan pex ang ot ka daux nex nham, pex ot ka daux Khuan, phan Khuan Siyiex ot ka daux pex heue. Kaux pui mawx ang ah, phan ang koe Khuan Cao Khrit ang lai mawh cie Nawh heue. ¹⁰ Viang mawh nan phan Cao Khrit ot ka daux pex, viang tokaux hoik yum kheu phimap kawx, khuan mawh pa im kheu pa rahsee heue. ¹¹ Lheu khaing an, phan Khuan Kaw pa kieh Yesux deeh kaoh im khaing krax yum ot ka daux pex, Nawh pa hoik kieh Cao Khrit deeh kaoh im khaing krax yum tak sang kieh tokaux pex pa chix yum, im kheu Khuan Nawh Cao pa ot ka daux pex heue. ¹² Mawh kheu nan, puxaik khankix eue, ex mawh pa koe ceuk ka nex nham, sonsang im hawt nex nham, ang mawh, ¹³ Phan pex im hawt nex nham, pex tak lai yum, viang mawh nan phan pex kieh ceu pa yuh tokaux tix, yum kheu Khuan Cao, pex tak sang im heue. ¹⁴ Can pui pa hawt krax thong Khuan Siyiex hu khankix, mawh kawn Siyiex heue. ¹⁵ Pex hoik pon rhawm siliex pa deeh kieh chix lhat graung, ang mawh, viang mawh nan pex hoik pon rhawm, pa sang sawn kieh mawh kawn lih, mawh kheu nan ex tom kok, Abax, Keeing eue. ¹⁶ Mawh tokaux Khuan Cao pa kham mhai rug ka khuan ex, grawng pa mawh ex kawn Siyiex heue. ¹⁷ Phan mawh kawn, mawh cao pa pon sin heue. Pa mawh cao pa pon sin Siyiex mai pa rom ti pon sin tau mai Cao Khrit, phan ex rom ti kham geu tau mai Nawh Cao, sonsang pon khawm min plakngai tau mai Nawh heue. ¹⁸ Grawh grawng nawh aux sawn ceu pa yaox ti kham geu yam in, mawh pa ang keung ti tiag yaox ka min plakngai pa tak sang plak jhi ka ex sax heue. ¹⁹ Can pa phan deuh ca keud pot jun pot mai krox son bawg yam sang plak jhi kawn Siyiex khankix heue. ²⁰ Can pa phan pa deuh hoik yaox ti ot greem pa ang tie mawh, kheu alo tix ang mawh, hoik mawh kheu Kaw pa hoik kieh nawh ot greem heue. Viang mawh nan hoik koe krax keud pot jun pot, ²¹ grawh grawng can pa phan pa deuh kawx, tak sang yaox ti luan khaing pa mawh siliex ka pa chix laux leeing mai hoek ka daux pa pluat ploi pa dex mai min plakngai kawn praix Siyiex heue. ²² Ex tawng grawng can pa phan pa deuh khawmuik, hoik rom ngia tau, ka daux ceu pa kha rhawm saux yha tom yam in heue. ²³ Ang joeng mawh ngie nan, pie tokaux ex kawx, pa hoik pon plix liang Khuan Cao, pie tokaux ex kawx, ngia ka daux tokaux tix mai ca krox bawg yam pa sang sawn tix mawh kawn lih, pa mawh pa taoh ka tokaux ex heue. ²⁴ Ex hoek krax taoh ka daux pa keud pot jun pot heue. Viang mawh nan pa keud pot jun pot, phan hoik yaox, ang lai baox mawh pa sang keud pot jun pot heue. Ceu pa hoik yaox pui, nawh lai baox keud pot jun pot yuh ka mawx? ²⁵ Phan ex keud pot jun pot son ceu pa ang ex nyang bax yaox, ex tom chix gun tix krox son ceu an heue. ²⁶ Awm an, Khuan Cao teem ex, ka daux pa iak riang rao ex heue. Ex ang tawng grawng khaw ti rawg bwan yuh ka mawx, viang mawh nan, tokaux Khuan Cao khyox khaw son ex ka lox ngia pa ang jheeh chix ah heue. ²⁷ Kaw pa sawg liiem ka rhawm, tawng rhawm Khuan Cao, mawh kheu Nawh khyox khaw son pui pa singax singeh awm pa khaw mai alo Siyiex heue. ²⁸ Ex tawng grawng kuceu khawmuik rom ti yuh tau, sonsang mawh pa mhawm ka son kix pa moh ka Siyiex, pa mawh pa hoik kok ti teei awm pa khaw mai pa hoik yiag hoik bak Nawh Cao heue. ²⁹ Kix pa hoik grux tawng Nawh Cao kah, Nawh hoik ciak ti kieh awm riang Kawn tix, sonsang mawh Nawh pa liang ti keh ka daux puxaik tom nie heue. ³⁰ Kix pa hoik ciak ti deuh Nawh Cao khankix kawx, Nawh kok ti teei khawm heue. Kix pa hoik kok Nawh Cao ti teei kawx, Nawh kieh rahsee khawm. Nawh tawx khawm min plakngai ka kix heue. ³¹ Phan mawh nan ex sang ah ka mawx ka grawng ceu in khankix? Phan Siyiex ot plak ex, mawx pa sang ot tang plak ti yuh ka ex? ³² Kaw pa ang deuh pie ka Kawn tix, viang mawh nan hoik tawx Nawh son ex khawmuik, Nawh tak ang yuh bwanson ti tawx giex ka ex, kuceu khawmuik tau mai Nawh lie? ³³ Mawx pa sang chix deuh phimap ka pui pa hoik laug Siyiex ti teei? Mawh Siyiex pa kieh rahsee heue. ³⁴ Mawh mawx pa sang prawng ca ti deuh phimap? Mawh Cao Khrit pa hoik yum, mawh heue, nie lheu mawh pa hoik deeh kaoh im khaing krax yum mai pa ot plak taix khawn dawm Siyiex mai pa khyox khaw son ex heue. ³⁵ Mawh mawx pa sang gwieh ex khaing krax moh krax rhawm Cao Khrit? Mawh pa kha rhawm, phan ang mawh nan pa khi rhawm, phan ang mawh nan pa tuktiak, phan ang mawh nan pa sibhawm siya, phan ang mawh nan pa ot kakaong, phan ang mawh nan krax caox krax laux, phan ang mawh nan mawh vaid lie? ³⁶ Awm hoik tiiem ti deuh ah nin, "Hoik pah ex yum leeing ngaix ka son Maix heue. Hoik deuh ex mawh awm yung son pa sang pah heue." ³⁷ Ang mawh, ka daux ceu in khankix khawmuik, ex mawh pa nie lheu mawh khaing pa pex, kheu Kaw pa hoik moh ka ex heue. ³⁸ Grawh grawng nawh aux hoik yum rhawm, viang grawng pa yum ang ah, pa im ang ah, kawncau Siyiex khankix ang ah, pa giex kaing khankix ang ah, ceu pa koe yam in khankix ang ah, ceu pa sang hoek ti mawh khaix khankix ang ah, sibrawm khankix ang ah, ³⁹ pa lhaong ang ah, pa raux ang ah, viang mawh pa phan pa deuh tang ceu, ceu tix ang ah, tak ang chix gwieh ex khaing krax moh krax rhawm Siyiex, pa koe ka daux Simiang ex Yesux Khrit heue.

¹ Aux krai pa mawh meh ka daux Cao Khrit, ang aux pie lhen, rhawm aux kawx kham mhai rug tau mai aux ka daux Khuan Singax Singeh, ² grawh grawng kied ting khi rhawm aux mai pa kha rhawm rhawm aux ang jud jai heue. ³ Grawh grawng nawh aux chix simie ti kieh tokaux aux mawh pa hoik jhax lawg khaing Cao Khrit, son puxaik aux khankix, pa mawh paox ru aux awm pa khaw mai nex nham heue. ⁴ Kix mawh pui Isarelax, pa hoik pon pa sawn mawh kawn lih mai min plakngai mai sijax mukheu khankix mai pa hoik tawx lai beenli kah mai pa yuh kaing pa dex mai pa krub ka Siyiex mai lox mukheu khankix heue. ⁵ Kix mawh pa hoik toe lih khaing tax du khankix mai ka daux kix kawx Cao Khrit lih mawh, awm pa khaw mai plak nex nham, pa mawh pa giex kaing piang khawmuik, pa mawh Siyiex pa ting bwanson leeing ju heue. Amen. ⁶ Viang mawh kawx nan gumlox Siyiex hoik lih tix laux mawh pa ang koe bwanson ang mawh heue. Grawh grawng nawh kix pa toe lih khaing Isarelax, ang tie mawh pui Isarelax khawmuik, ⁷ Awm an, kheu mawh kix ru Abraham, kix ang tie mawh kawn praix khawmuik heue. Viang mawh nan, "Ka daux Icak tak sang kok mawh ru maix heue." ⁸ Mawh kheu nan, ang lai mawh kawn praix pa dex mai nex nham, pa mawh kawn praix Siyiex. Viang mawh nan mawh kawn praix pa dex mai lox mukheu pa sawn mawh ru heue. ⁹ Grawh grawng nawh lox mukheu an hoik mawh nin. "Awm pa khaw mai pa khop bawg yam in sax, aux tak sang hoek mai Sa ra tak sang koe kawn simex heue." ¹⁰ Ang joeng mawh ngie nan. Yam koe kaux Rebekha kheu keeing ex Icak, ¹¹ Yam ang bax keh kawn an kiex, ka ang nyang bax yuh ceu pa mhawm, phan ang mawh nan ceu pa caox sonsang khaw mai pa yiag pa bak Siyiex, sonsang kaux cong awm pa khaw mai pa laug ti teei, ang mawh pa dex mai krax twah klaung, viang mawh nan mawh pa dex mai Kaw pa kok, ¹² hoik grux ah nin ka bun an, "Pa mawh puxke tak sang yuh siliex ka pa mawh pux heue." ¹³ Awm hoik tiiem ti deuh ah nin, "Aux moh ka Yakop, viang mawh nan Aux koeng ka Esaw heue." ¹⁴ Phan mawh nan ex sang ah ka mawx? Khex koe pa ang rahsee mai Siyiex lie? Ang doh mawh nan. ¹⁵ Nawh Cao hoik ah nin ka Mose. "Aux tak yuh bwanson ka pui pa mie Aux ti yuh bwanson kah mai Aux tak caux rhawm ka pui pa mie Aux ti caux rhawm kah heue." ¹⁶ Mawh kheu nan ang koe ka alo pui mai ang koe ka pa to pui, viang mawh nan koe ka pa yuh Siyiex bwanson heue. ¹⁷ Grawh grawng nawh phuk lai sigang khri hoik ah nin ka Pharaw, "Grawh grawng nawh Aux hoik yaog maix ting kheu jao in sonsang pon jhi Aux sibrawm Aux ka daux maix mai sonsang tah hu ceu kaux Aux piang haktiex khawmuik heue." ¹⁸ Mawh kheu nan Nawh Cao yuh bwanson ka pui pa mie Nawh ti yuh kah mai Nawh Cao kieh kiien ka pui pa mie Nawh ti kieh kiien heue. ¹⁹ Phan mawh nan maix tak ah nin ka aux, "Kheu Nawh Cao kawn baox deuh phimap? Grawh grawng nawh kaux pui mawx chix tiebtie ka alo Nawh Cao?" ²⁰ Pui pa deeh pawk lox thiang ka Siyiex, "Siyiex eue, maix mawh mawx?" Ceu pa hoik phan hoik yuh, tak sang ah ka Kaw pa phan pa yuh tix, "Maix lai yuh aux awm in yuh ka mawx lie?" ²¹ Phan ang mawh nan, cao pa yuh aw ang ting piang tiex klox, ti sang teei tiex khaing tiex tix lon ngie mai yuh aw ti kieh koe min plakngai tix mu mai tix ang koe min plakngai tix mu kah lie? ²² Phan Siyiex koe rhawm ti sang jhi krax song rhawm Nawh mai ti sang kieh tawng sibrawm Nawh sidawng, viang mawh nan hoik gun yeung ka pa lang gun yeung tom nie ka aw son pa song rhawm khankix, pa hoik cox son pa laux leeing, tak sang koe ti ah ka mawx? ²³ son sang kieh Nawh tawng ka pa mi pa koe min plakngai Nawh piang aw pa caux rhawm khankix, pa hoik dawg grux cox Nawh son min plakngai, ²⁴ pa mawh ex, pa hoik kok Nawh Cao ti teei, ang mawh ngie khaing pui Yudax, viang mawh nan mawh khaing khawm pui tang ceu, tak sang koe ti ah ka mawx? ²⁵ Awm pa hoik ah Nawh Cao khawm ka daux lai Hose, "Aux tak kok mawh pui Aux, ka pa ang mawh pui Aux mai tak kok mawh bun pa moh Aux, ka pa ang Aux moh heue." ²⁶ "Tak sang mawh nin, ka dee pa hoik ah ka kix, Pex ang mawh pui Aux tak sang kok kix mawh kawn Siyiex pa im ju tan heue." ²⁷ Lheu khaing an Isayax hoik kok yo ah nin ka grawng pui Isarelax, "Viang kawn praix Isarelax hun awm mhaik rhawm sigrit sigra kawx, mawh ngie pa deuk khankix khaing pa sang hoek krax taoh heue. ²⁸ Siyiex tak sang prawng gumlox Nawh piang haktiex mai kieh hoik mai tat dawd heue." ²⁹ Awm pa hoik krai Isayax sivoe an, "Phan Siyiex giex kaing kru naing cao raoma ang grham simie ka ex, ex hoik lih mawh awm veng Sawdom mai tak hoik yuh kieh awm veng Gawmawrax heue." ³⁰ Mawh kheu nan ex tak sang ah ka mawx? Sang ah, pui tang ceu, tang cat pa ang hawt leue khaix pa rahsee, hoik pon giex ka pa rahsee, pa mawh pa rahsee pa dex mai krax yum rhawm lie? ³¹ Pui Isarelax pa hawt leue beenli pa dex mai pa rahsee, ang krup ang hoek ka beenli an heue. ³² Mawh kheu patix ang hoek ka? Hoik mawh kheu ang kix viex krax yum rhawm ti hawt leue ka, viang mawh nan kheu hawt leue ka krax twah klaung. Kix hoik sideeing ka simaox dee sideeing, ³³ Awm hoik tiiem ti deuh ah nin, "Jhak heue, Aux een Simaox dee sang sideeing ka Zion mai Simaox pa sang kieh lud mai pui pa yum rhawm ka Simaox an, tak ang hoek krax kaig tua heue."

¹ Puxaik khankix eue, pa kied mie rhawm aux mai pa rawg bwan ka Siyiex son kix, mawh sonsang hoek kix krax taoh heue. ² Aux kham mhai rug son kix grawng pa chix viex kix khawm rhawm tix yuh son Siyiex, viang mawh nan ang khaw mai krax tawng pa mawh meh heue. ³ Mawh kheu ang kix tawng ka krax rahsee Siyiex mai sawg ti kieh krax rahsee tokaux tix koe, kix ang koe krax cu nghiet ka pa rahsee Siyiex heue. ⁴ Grawh grawng nawh Cao Khrit mawh dee sidah dee ghoik lox lai beenli tom hoek krax rahsee, son can pui pa yum rhawm ku kaux heue. ⁵ Grawh grawng nawh Mose hoik tiem grawng krax rahsee pa dex mai lox lai beenli, ah nin, "Pui pa hawt yuh lox lai beenli, tak im kheu heue." ⁶ Viang mawh nan krax rahsee pa dex mai krax yum rhawm, ah nin, "Paw ah daux rhawm tix, Mawh mawx pa sang haok piang raoma?" ti sang viex Cao Khrit lih, ⁷ phan ang mawh nan, "Mawh mawx pa sang lih dee raux?" Ti sang viex Cao Khrit haok khaing dee yum. ⁸ Viang mawh nan hoik ah ka mawx? "Gumlox hoik koe dex ka maix, ka daux jheeh maix mai ka daux rhawm maix heue." Mawh in heue, pa mawh gumlox pa dex mai krax yum rhawm, pa sidiex gau ex kah heue. ⁹ Mawh kheu phan maix kham grawng rieb ti teei Yesux mawh Simiang ka jheeh tix mai yum rhawm ka daux rhawm maix, grawng Siyiex hoik kieh Nawh Cao deeh kaoh im khaing krax yum maix tak sang hoek krax taoh heue. ¹⁰ Grawh grawng nawh, mawh ka rhawm heue, pa yum rhawm pui ti sang hoek krax rahsee mai mawh ka jheeh heue, pa kham grawng rieb ti teei, tom hoek krax taoh heue. ¹¹ Phuk lai sigang khri ah nin, "Kaux pui mawx ang ah, pa yum rhawm ka Nawh Cao tak ang lai hoek krax kaig tua heue." ¹² Pui Yudax ang ah, pui Helasax ang ah, ang lai tang siyox, mawh kheu mawh ngie Simiang tix kaux khaing, pa mawh Simiang khawmuik, pa mawh pa mi pa koe ka son kix can pa kok ka Nawh khawmuik heue. ¹³ Grawh grawng nawh, "Can pa kok ka ceu kaux Simiang Yesux ku kaux tak sang hoek krax taoh heue." ¹⁴ Phan mawh nan kix tak sang chix kok ka Kaw pa ang kix nyang bax yum rhawm kah, yuh ka mawx? kix tak sang chix yum rhawm ka Kaw pa ang kix nyang bax pon tix mhong grawng yuh ka mawx? phan ang koe cao sidiex gau kix tak sang chix pon ti mhong yuh ka mawx? ¹⁵ Phan ang ploi pui hu, kix tak sang pon ti sidiex gau yuh ka mawx? Awm pa hoik tiiem ti deuh ah nin, "Caong kix pa viex lox bwan gaux rhawm grawng pa mhawm mhiem khankix, mhawm grang miex ding heue." ¹⁶ Viang mawh nan pui khawmuik hoik nghiet ka lox bwan gaux rhawm ang mawh, grawh grawng nawh Isayax hoik ah nin, "Simiang eue, mawh mawx pa hoik yum rhawm ka lox pa sidiex ex?" ¹⁷ Mawh kheu nan krax yum rhawm hoek kheu pa mhong mai pa mhong hoek kheu gumlox Cao Khrit heue. ¹⁸ Viang mawh nan aux ah nin, ang kix yaox ti mhong lie? Hoik mhong tete heue. "Lox kix hoik tah hu piang haktiex khawmuik mai gumlox kix hoik hu ka dee sidah haktiex heue." ¹⁹ Viang mawh nan aux baox ah nin, pui Isarelax ang tawng ka in lie? Bawg phao ka Mose hoik ah nin, "Aux tak cheeik ti kieh pex koe krax boh rhawm ka ceu pui pa ang mawh pui, Aux tak kieh pex song rhawm ka ceu pui pa ang koe krax tawng heue." ²⁰ Isayax sidaing kwa ti ah nin, "Kix pa ang sawg ka Aux, hoik yaox ka Aux heue. Aux hoik lih sidawng ka kix pa ang chawk ka grawng Aux heue." ²¹ Viang mawh nan nawh hoik ah nin grawng pui Isarelax, "Aux hoik taong taix tix leeing ngaix ka pui ceu pa lie lox mai pa brax thiang heue."

¹ Phan mawh nan, aux ah nin, Siyiex hoik tik pui cie Nawh lie? Ang doh mawh nan. Grawng nawh pie tokaux aux kawx mawh pui Isarelax, pa mawh ru Abraham, pa mawh ceu Benyamin heue. ² Siyiex ang lai tik ka pui cie Nawh pa hoik grux tawng Nawh kah Ang pex tawng grawng phuk lai sigang khri hoik ah ka mawx grawng Eliyax lie? Grawng pa khyox khaw nawh ka Siyiex, sonsang deuh phimap ka pui Isarelax ah nin, ³ "Simiang eue, kix hoik pah cao jhai Maix khankix yum, kix hoik kaong ti tik khu dee tan Maix khankix, deuk ngie aux nong nong tix kaux khaing mai kix sawg ti teei ju aux heue." ⁴ Lox pa pawk Siyiex, hoik ah yuh ka mawx ka nawh? "Aux hoik prah kieh deuk pui aliah rheng son tokaux tix, pa ang sax grux ngawng ka Balax." ⁵ Awm an daux bawg yam in kawx, kawn koe pui pa deuk, awm pa khaw mai pa laug ti teei pa dex mai bwanson heue. ⁶ Viang mawh nan phan hoik mawh kheu bwanson, ang lai kawn baox mawh kheu krax twah klaung, phan ang mawh nan bwanson ang lai kawn baox mawh bwanson heue. ⁷ Phan mawh nan sang mawh pa yuh ka mawx? Ceu pa hoik sawg pui Isarelax ka, kix ang lai pon heue, viang mawh nan pa hoik laug ti teei khankix hoik pon nawh mai pa deuk khankix hoik kiien hu heue, ⁸ Awm pa khaw mai pa tiiem ti deuh ah nin, "Siyiex hoik tawx rhawm pa sang it nie ka kix, mai ngai pa ang pon ti yaox ka kix, yhaok pa ang pon ti mhong ka kix, tom sidah hoek ngaix yam in heue." ⁹ Davit ah nin, "Kieh yuh pheen kix mawh singoe mai kie mai dee sideeing mai pa keung ti kham ti pon ka kix liak. ¹⁰ Kieh ngai kix faik hu, son ang kix lai chix yaox mai Maix kieh nyoi kix buk ku jheung jheung liak." ¹¹ Phan mawh nan aux ah nin, kix sang sideeing yuh ka mawx sonsang goh lie? Ang doh mawh nan. Viang mawh nan kheu goh kix krax taoh tom hoek ka pui tang ceu, sonsang cheeik ti kieh kix boh rhawm kah heue. ¹² Phan pa goh kix mawh pa mi pa koe ka son pui haktiex mai pa som nai kix mawh pa mi pa koe ka son pui tang ceu, pa grum naog kix tak sang nie lheu kah miex ding? ¹³ Aux sikah ka pex pa mawh pui tang ceu, mawh kheu mawh aux kawncau pa ting ka son pui tang ceu, aux tom yaogyaw ka kaing jhaw krax pa yuh tix, ¹⁴ yuh ka mawx sonsang pon aux ti cheeik kix pa mawh ceu nex nham aux, ka tix ceu ceu sonsang boh rhawm kix ka mai hoek krax taoh tix blah kheu heue. ¹⁵ Phan pa tik vud kix mawh grawng pa deeh khaw caw pui haktiex paox tix ka Siyiex, pa sang deeh rieb ti teei kix tak sang lih bleeh ti mawh patix, lheu khaing mawh pa deeh kaoh im khaing krax yum? ¹⁶ Phan blah pa hoik kleeig nhia pa ran ti teei tix bin mawh pa singax singeh khawm pum kawx singax heue. Phan riah mawh pa singax singeh, khawm kak kawx mawh pa singax singeh heue. ¹⁷ Phan hoik raig ti tik kak tix blah mai hoik teei maix pa mawh khaox Sanlun tiag kab sau ka sinax kix mai maix hoik lih mawh pa rom ti pon riah mai bee khaox Sanlun an. ¹⁸ Paw vi yaw ti ting piang kak khankix, phan maix hoik luan yaw tokaux tix ting, paw piawm grawng ang maix mawh pa peeh riah khaox, viang mawh nan mawh riah khaox pa peeh maix heue. ¹⁹ Maix tee sang ah, "Hoik raig ti tik kak khankix sonsang kab sau aux kah heue." ²⁰ Mawh heue, mawh kheu ang kix koe krax yum rhawm tom hoik raig ti tik kix mai kheu yum rhawm maix tom yaox ti ot kah heue. Paw vi ting rhawm, viang mawh nan lhat graung heue. ²¹ Grawh grawng nawh phan Siyiex ang deuh ka kak pa mawh kak tete khankix, viang ka maix kawx Nawh ang tau ti deuh heue. ²² Mawh kheu nan jhak ka pa mhawm rhawm mai ka pa lang teung ciyang Siyiex heue. Ka piang kix pa hoik goh khankix pa lang teung ciyang, viang mawh nan ka piang maix pa mhawm rhawm Siyiex, phan maix ca kawn ot ka daux pa mhawm Nawh, phan ang mawh nan viang ka maix kawx tak sang kid ti tik heue. ²³ Khawm kix kawx, phan kix ang ca kawn ot ka daux krax pa ang yum rhawm kix, tak sang teei ti kab kix ka khaox heue. Grawh grawng nawh Siyiex chix ti teei kix, ti deeh kab kix heue. ²⁴ Phan hoik kid maix khaing khaox pa koe rhawm khaox Sanlun tiag mai hoik kab maix sau awm pa ang khaw mai been rhawm ka khaox Sanlun pa mhawm, tak sang nie lheu teei inkix pa mawh kak tete mai deeh kab sau ka khaox Sanlun cie tix miex ding. ²⁵ Puxaik khankix eue, aux ang rhawm kieh pex mawh pa ang tawng ka grawng pa raux mox in, pa mawh grawng pa hoik kiien rhawm hu pui Isarelax tix blah, tom sang grum naog bawg yam pui tang ceu, phan ang mawh nan ha pex kox yuh ti koe pingnya, ka daux pa nieb lak yuh ti ting rhawm tokaux pex tiru heue. ²⁶ Mawh kheu nan pui Isarelax khawmuik tak sang hoek krax taoh, awm pa hoik tiiem ti deuh ah nin, "Cao pa pluat ploi tak sang lih hoek khaing Zion. Nawh tak sang kieh veeh hu khaing pa ang nab yam ka Siyiex ka daux ceu Yakop heue." ²⁷ "In mawh sijax mukheu pa hoik yuh Aux mai kix, yam sang teei aux ti tik phimap kix heue." ²⁸ Phan mawh pa khaw mai lox bwan gaux rhawm kix mawh pui koeng kheu sipiag pex, viang mawh nan phan mawh pa khaw mai pa laug ti teei, kix mawh pa hoik moh kah, kheu sipiag tax du khankix heue. ²⁹ Totaix khankix mai pa kok Siyiex kah, ang mawh ceu pa deeh tieh loh khaing heue. ³⁰ Awm pa ang pex koe krax cu nghiet ka Siyiex, ka daux bawg yam pa hoik luan, viang mawh nan yam in hoik pon krax pa caux rhawm kheu krax pa ang cu nghiet kix, ³¹ Awm an inkix kawx pa ang koe krax cu nghiet yam in, kheu krax caux rhawm pa hoik tawx ka pex, kix kawx tak sang pon krax caux rhawm yam in heue. ³² Siyiex hoik laung pui khawmuik tau ka daux krax pa ang cu nghiet, sonsang pon tawx Nawh krax caux rhawm ka pui khawmuik heue. ³³ Pa mi, pa koe pingnya cuyi mai krax tawng ka Siyiex mawh pa raux miex ding miex glhaong. Pa prawng ca Nawh Cao mawh pa ang uik tah sawg mai krax pa hu Nawh Cao khankix mawh pa ang chix ti sikaw miex ding miex glhaong. ³⁴ "Mawh pui mawx pasax tawng ka rhawm Siyiex? Phan ang mawh nan mawh pui mawx pasax mawh cao pa teem kum, teem ah ka son Nawh Cao?" ³⁵ "Mawh pui mawx pasax tawx ka Nawh Cao ka sivoe, sonsang baox deeh pon kah?" ³⁶ Can pa koe kuceu khawmuik, hoik mawh kheu Nawh mai ka daux Nawh mai son Nawh heue. Kieh Nawh Cao koe min pakngai leeing ju liak. Amen.

¹ Mawh kheu nan, puxaik khankix eue, aux tom khyox khaw ka pex, kheu pa caux rhawm Siyiex, sonsang tawx pex tokaux tix, ti mawh pa tan pa im, pa singax singeh, pa khaw caw ka rhawm Siyiex, pa mawh kaing krub pa keung pex ti yuh heue. ² Paw kieh khaw mai riang baux ju in, viang mawh nan kieh pex deeh tieh loh, kheu baox yuh rhawm tix pa khraox, sonsang chix cheu pex ti tawng, mawh pa yuh ka mawx pa mawh pa mhawm mai pa khaw caw rhawm mai pa grum mawh alo Siyiex heue. ³ Grawh grawng nawh kheu bwanson pa hoik tawx ka aux, aux tom krai ka ku kaux daux pui pa ot ka daux pex, son ang lai chax nie luan keud grawng pa ting tokaux tix tiru, khaing pa keung nawh ti keud, viang mawh nan sonsang chix keud, pa khaw pa chix priex rhawm tix keud, awm pa khaw mai krax yum rhawm pa hoik gwieh Siyiex ti tawx ka kaux pui mawx kaux pui an heue. ⁴ Grawh grawng nawh awm koe kraung pakpeung ex tom nie ka daux tokaux tix mu khaing, mai kaing pa yuh kraung pakpeung khankix khawmuik, ang lai awm paox tix, ⁵ Awm an ex pa mawh pui tom nie, mawh tokaux tix mu khaing ka daux Cao Khrit mai ralai mawh kraung pakpeung ka paox tix heue. ⁶ Ex koe totaix bwanson, pa tang siyox awm pa khaw mai bwanson pa hoik tawx ka ex, phan mawh pa mawh cao jhai ang ah, kieh ex ah lox jhai awm pa khaw mai krax yum rhawm tix heue. ⁷ Phan ang mawh nan, phan mawh cao sidiex kieh ex viex khawm rhawm tix yuh kaing sidiex tix heue. Phan ang mawh nan kaw pa yuh sara cao gau, kieh nawh yuh kaing gau tix heue. ⁸ Phang ang mawh nan kaw pa jeeh nyaw, kieh nawh yuh kaing jeeh nyaw tix heue. Kaw pa tawx, kieh nawh viex rhawm sibieh ti tawx heue. Kaw pa giex kaing, kieh nawh viex khawm rhawm ti yuh heue. Kaw pa yuh krax caux rhawm kieh nawh viex rhawm haing tix yuh heue. ⁹ Kieh krax moh krax rhawm pex mawh pa ang koe pie lhen. Koeng ka ceu pa caox mai jawg ti giex ka ceu pa mhawm heue. ¹⁰ Ka daux krax pa moh rhawm ka puxaik khankix, kieh tix kaux lai tix kaux moh paox tix mhawm mhawm heue. Ka daux krax pa yaogyaw, tix kaux lai tix kaux, yaogyaw ka tang kaux nie khaing tokaux tix heue. ¹¹ Ka daux pa viex rhawm tix yuh, paw kieh nieh kah, viex rhawm pa rien tix yuh son Simiang. ¹² Gaux rhawm ka daux pa keud pot jun pot. Gun yeung ka daux pa kha rhawm. Ca kawn viex rhawm kaux tix rawg bwan jheung jheung. ¹³ Tawx ceu pa lo ka pui pa singax singeh khankix. Yuh krax khan kheu heue. ¹⁴ Nawb bwan ka kix pa tuktiak ka pex, nawb bwan mai paw jhax lawg kah. ¹⁵ Gaux rhawm mai kix pa gaux rhawm mai yiiem grai mai kix pa yiiem grai heue. ¹⁶ Kieh koe rhawm pa awm paox tix ka tix kaux lai tix kaux. Paw deuh rhawm pex ka ceu pa lhaong khankix, viang mawh nan yuh paox pie ka pa tiiem khankix. "Paw yuh tix koe pingnya, ka daux pa nieb lak yuh tix ting rhawm tix tiru."s ¹⁷ Paw deeh tawx pa caox, ka son pa caox ka tix kaux kawx. Keud ti yu ceu pa khaw pa mhawm ka sivoe pui khawmuik heue. ¹⁸ Phan chix tix, pa koe ka plak maix, kieh koe pa nhim tau mai pui khawmuik heue. ¹⁹ Pa moh khankix eue. Paw deeh pawk bix tokaux tix, viang mawh nan yoi tix kieh koe dee ot son krax song rhawm Siyiex heue. Grawh grawng nawh, hoik tiiem ti deuh ah nin, "Pa pawk bix mawh cie Aux heue, Aux tak sang deeh viied kah, Siyiex ah nan heue." ²⁰ Mawh kheu nan, "Phan pui pa koeng ka maix cai rhawm, tawx nawh sawm heue. Phan nawh sang nyaux nie rawm, tawx nawh nyaux heue. Grawh grawng nawh ka daux pa yuh nan maix tak sang pum sau gaox ngu piang kaing nawh heue." ²¹ Paw kieh pa caox pex ka pex, viang mawh nan teei ceu pa mhawm mai kieh pex ka pa caox heue.

¹ Kieh pui ku kaux koe krax cu nghiet ka simiang pa giex kaing pa ting piang tix. Grawh grawng nawh ang koe sibrawm ti mawh simiang, phan ang mawh, kheu Siyiex mai kix pa mawh simiang yam in kawx, mawh pa ciak Siyiex ti deuh heue. ² Mawh kheu nan kaw pa lheu lox simiang, mawh pa thieh ka been pa deuh Siyiex heue. Kix pa thieh kah, tak sang pon pa prawng ciyang ka tokaux tix heue. ³ Grawh grawng nawh pa giex kaing khankix ang mawh ceu pa lhat graung kaing pa mhawm kah, viang mawh nan mawh pa lhat graung ka son kaing pa caox heue. Maix mie ti mawh pui pa ang lhat ka sibrawm simiang lie? Yuh ceu pa mhawm mai maix tak sang pon pa yaw simiang kah heue. ⁴ Simiang mawh pui cau soi Siyiex ka maix, son ceu pa mhawm heue. Viang mawh nan phan maix yuh pa caox, lhat graung ka awx, grawh grawng nawh simiang nieb kawg vaig giex ang mawh, mawh kheu simiang mawh pui cau soi Siyiex, pa mawh cao pa pawk bix, tang pa song rhawm, ka pui pa yuh pa caox heue. ⁵ Mawh kheu nan pex tak lai koe krax cu nghiet ka simiang, ang joeng mawh ngie kheu krax song rhawm an, viang mawh nan mawh kheu khawm pa koe dee chix keud ti tawng grawng mawh pa mhawm ang mhawm heue. ⁶ Mawh kheu jao in pex tom tawx mau koh heue. Kix mawh pui cau soi ka kaing Siyiex, pa kia ka kaing ceu in ku jheung jheung heue. ⁷ Mawh kheu nan tawx ka kix khawmuik awm pa khaw ti tawx kah Tawx mau koh ka pui pa khaw ti pon mau koh. Tawx mau koh keun ka pui pa khaw ti pon mau koh keun. Lhat ka pui pa khaw ti lhat graung kah yungyi ka pui pa khaw ti yungyi ka heue. ⁸ Paw koe ceuk ka pui tix kaux kawx, lheu khaing pa moh ka paox tix. Grawh grawng nawh kaw pa moh ka paox plawg tix, hoik kieh lox lai beenli grum naog heue. ⁹ Mawh kheu lox lai beenli pa ah nin, "Maix paw lud vao, Maix paw teei ju pui yum, Maix paw briex. Maix paw ghoing ka heue."phan koe lox tawm lai beenli tang ceu tix ceu ceu, hoik grum ka daux gumlox in, "Maix moh ka paox plawg awm moh ka tokaux tix heue." ¹⁰ Pa moh pa rhawm ang chix yuh krax caox ka paox plawg tix heue. Mawh kheu nan pa moh rhawm mawh pa kieh lox lai beenli grum naog kah heue. ¹¹ Lheu khaing an, kheu tawng ka bawg yam in, pex tawng grawh grawng hoik hoek bawg yam pa khaw pex ti siduad khaing it, grawh grawng nawh krax taoh nie lheu dex ka ex yam in, khaing yam jah ex ti yum rhawm heue. ¹² Bawg yam ponsawm dex sang hoik mai bawg yam pon ngaix dex sang hoek heue. Mawh kheu nan kieh ex peeik ti tik kaing pa dex mai pa faik mai kieh ex ceep kraung naing pa riang heue. ¹³ Kieh ex hu ka daux pa khaw caw, awm yam pon ngaix, ang mawh ka daux pa silao ka pawie mai pa yoek ka plai, ang mawh ka daux pa kraing pa nieb yuh hawt alo nex nham, ang mawh ka daux pa simah simiang mai pa boh rhawm heue. ¹⁴ Viang mawh nan pex teei ti ceep Simiang Yesux Khrit mai paw keud paw cox son nex nham, sonsang kieh alo nex nham grum naog heue.

¹ Lheu khaing nan, pex rieb ti teei kaw pa iak riang rao daux krax yum rhawm tix, viang mawh nan paw rieb ti teei sonsang prawng dud, ka grawng ceu pa tang keud jee keud blaong khankix heue. ² Pui tix kaux kaux koe krax yum rhawm ti sang ih ku ceu khawmuik, viang mawh nan kaw pa iak riang rao ih ngie taux lhax khaing heue. ³ Paw kieh kaw pa ih, nieb een mawh pa ang koe ceu ka kaw pa ang lai ih mai paw kieh kaw pa ang lai ih prawng ca ka kaw pa ih, grawh grawng nawh Siyiex hoik rieb ti teei nawh heue. ⁴ Maix pa prawng ca ka siliex pui tang kaux mawh mawx? Nawh yaox tix cung ang ah, phan ang mawh nan nawh goh ang ah, koe ka cao nawh heue. Grawh grawng nawh Simiang koe sibrawm tix sang kieh nawh cung heue. ⁵ Pui tix kaux kaux een tix singaix, mawh pa nie lheu ting khaing tang ngaix mai pui tang kaux een ku ngaix mawh pa awm paox tix heue. Kieh pui ku kaux tawng tom sidah, ka ceu pa keud daux rhawm tix heue. ⁶ Kaw pa keud grawh grawng singaix, keud grawng singaix an ka son Simiang mai kaw pa ih, ih ka son Simiang, mawh kheu yaogyaw nawh ka bwanson Siyiex heue. Kaw pa ang lai ih, ang lai ih ka son Simiang mai yaogyaw bwanson Siyiex nang heue. ⁷ Ka daux ex tix kaux kawx ang lai im ka son tokaux tix nong nong mai ang yum ka son tokaux tix nong nong heue. ⁸ Ex im ang ah, ex im ka son Simiang, phan ang mawh nan ex yum ang ah, ex yum ka son Simiang heue. Mawh kheu nan ex im ang ah, phan ang mawh nan ex yum ang ah, ex mawh cie Simiang. ⁹ Grawh grawng nawh sonsang sidah mawh nin, Cao Khrit tom hoik yum mai baox dee im, sonsang mawh Nawh Simiang khawm pa yum mai pa im heue. ¹⁰ Maix lai prawng ca ka puxaik ti yuh ka mawx? Phan ang mawh nan maix lai nieb deuh puxaik tix, mawh pa ang koe cee yuh ka mawx? Ex khawmuik tak sang cung ka sivoe dee ngawm Siyiex ti prawng ca heue. ¹¹ Grawh grawng nawh hoik tiiem ti deuh, "Simiang ah nin, Awm im Aux, ngawng ku ngawng tak sang grux ka Aux mai dak ku dak tak sang krai doh ka Siyiex heue." ¹² Mawh kheu nan ex ku kaux daux pui tak sang krai grawng tokaux tix ka Siyiex heue. ¹³ Mawh kheu nan paw kieh ex baox prawng ca ka paox tix, tix kaux lai tix kaux, nie lheu keud ti yuh son ang pui lai deuh dee sideeing, ceu pa sang kieh goh, ka daux krax pa hu puxaik tix, tix kaux kawx heue. ¹⁴ Aux hoik tawng mai tawng tom sidah, ka daux Simiang Yesux, grawh grawng ang koe tix ceu kawx pa nieb chix seeing ti tiru, phan ang mawh ka kaw pa sawn tix ceu ceu mawh pa seeing, ka son nawh ceu an tom mawh pa seeing heue. ¹⁵ Phan puxaik maix saux rhawm kheu pa ih maix, mawh sipiag pa ang maix hu awm pa khaw mai krax moh krax rhawm heue. Paw vi yuh laux ka kaw pa Cao Khrit hoik yum ka son nawh kheu pa ih maix heue. ¹⁶ Mawh kheu nan paw kieh pa mhawm pex, mawh pa salao pui kah, ¹⁷ grawh grawng nawh meung Siyiex ang lai mawh pa ih pa nyaux, viang mawh nan mawh pa rahsee mai pa nhim mai pa gaux rhawm ka daux Khuan Singax Singeh heue. ¹⁸ Grawh grawng nawh kaw pa hawt yuh ceu in ka son Cao Khrit, mawh pa khaw caw ka rhawm Siyiex mai pa yaw pui kah heue. ¹⁹ Mawh kheu nan kieh ex hawt khaix ceu pa dex mai krax nhim mai ka ceu pa chix kieh ex paox tix ra lai ting lhaong heue. ²⁰ Paw vi yieh kaing jhaw Siyiex laux kheu pa ih. Pa ih khawmuik mawh pa singax singeh, viang mawh nan, pui pa kieh pa ih tix mawh dee sideeing, phit lud heue. ²¹ Mawh pa khaw pa mhawm ti ang ih nex mai rawm plix siiet mai ti ang yuh tix ceu kawx, pa sang kieh puxaik maix sideeing ti goh heue. ²² Krax yum rhawm pa koe maix, kieh koe ka tokaux tix nong nong, ka plak sivoe Siyiex heue. Kaw pa ang prawng ti deuh phimap ka tokaux tix tiru, grawh grawng ceu pa rieb nawh ti teei, mawh pa gaux rhawm heue. ²³ Kaw pa keud jee keud blaong grawng pa ih, phan nawh lai ih, nawh tom pon krax prawng ciyang phimap, mawh kheu ang nawh ih hawt krax yum rhawm tix mai ceu pa yuh ka mawx ang ah, pa ang dex mai krax yum rhawm mawh phimap heue.

¹ Ex pa mawh pa ting riang rao, khaw ti yeung ka ceu pa iak riang rao kix pa ang koe riang khankix mai ang khaw ti yuh ceu pa khaw rhawm tokaux tix heue. ² Kieh ex ku kaux daux pui yuh pa khaw caw rhawm paox plawg tix, ka son ceu pa mhawm, tom sang ting lhaong nawh kah heue. ³ Grawh grawng nawh pie Cao Khrit kawx, ang lai yuh pa khaw caw rhawm tokaux tix heue. Viang mawh nan awm pa hoik tiiem ti deuh ah nin, "Lox pa salao kix mai pa salao ka Maix, hoik hoek piang Aux heue." ⁴ Can pa hoik tiiem ti deuh glang ka in dix, mawh pa hoik tiiem sonsang gau ka ex, sonsang koe krax keud pot jun pot, kheu pa chix gun yeung mai pa nyawm rhawm kheu phuk lai sigang khri heue. ⁵ Kieh Siyiex pa tawx krax chix gun yeung mai krax nyawm rhawm, kieh pex tix kaux lai tix kaux, koe rhawm tix mu khaing, awm pa khaw ka Yesux Khrit, ⁶ son sang chix viex pex rhawm tix mu, jheeh tix mu, ti yaogyaw Siyiex mai Keeing, Simiang ex Yesux Khrit liak heue. ⁷ Mawh kheu nan pex tix kaux lai tix kaux rieb ti teei ka paox tix, awm Cao Khrit hoik rieb ti teei ka pex, sonsang koe min pakngai Siyiex kah heue. ⁸ Grawh grawng nawh pa sang ah aux mawh nin, Cao Khrit hoik lih mawh pui cau soi ceu pui pa pat hak, sonsang sidawng pa mawh meh Siyiex, ka daux pa yuh ti kieh mawh, lox mukheu pa hoik tawx ka tax du ex khankix, ⁹ mai yuh ka mawx pui tang ceu khankix tak sang yaogyaw ka Siyiex, son bwanson Nawh Cao awm pa hoik tiiem ti deuh ah nin, "Mawh kheu nan aux tak sang yaogyaw ka Maix, ka daux pui tang ceu khankix mai aux tak sang rhax lai yaogyaw ka ceu kaux Maix heue." ¹⁰ Nawh baox deeh ah nin, "Pui tang ceu khankix eue, pex gaux rhawm tau mai pui cie Nawh heue." ¹¹ Baox deeh ah nin, "Pui tang ceu khawmuik eue, yaogyaw ka Siyiex heue. Kieh ceu pui khawmuik yaogyaw Nawh heue." ¹² Isayax baox deeh ah nin, "Tak sang koe riah Yessie mai Kaw pa sang kaoh ti giex kaing pui tang ceu tak sang koe krax keud pot jun pot ka Nawh heue." ¹³ Kieh Siyiex pa tawx krax keud pot jun pot, kieh pex naog ka krax gaux rhawm mai krax nhim khawmuik ka daux pa yum rhawm, son sang nie lheu ting krax keud pot jun pot pex ka daux sibrawm Khuan Singax Singeh heue. ¹⁴ Puxaik aux khankix eue, aux hoik yum rhawm grawng tokaux pex hoik naog ka pa mhawm mhiem mai naog ka krax tawng yung khawmuik mai chix ti sidiex ka paox tix, tix kaux lai tix kaux heue. ¹⁵ Aux hoik nie lheu tiiem lox kwa ka pex, tix blawng mawh sonsang kieh pex doh keud, mawh kheu bwanson pa hoik tawx Siyiex ka aux, ¹⁶ sonsang mawh aux pui cau soi Yesux Khrit ka pui tang ceu khankix, ti yuh kaing cao giex kaing li ka lox bwan gaux rhawm Siyiex, kheu sang tan pui tang ceu khankix ka Nawh Cao, sonsang mawh kix pa khaw caw rhawm Nawh, pa mawh pa hoik kieh Khuan Singax Singeh nawh singax singeh kah heue. ¹⁷ Mawh kheu nan pa yaw rangdi aux mawh ka daux Yesux Khrit, ka daux ceu pa dex dawd mai Siyiex heue. ¹⁸ Aux ring ti krai grawng tang ceu, phan lheu khaing grawng pa hoik yuh Cao Khrit ka daux aux, sonsang kieh pui tang ceu koe krax cu nghiet, kheu gumlox mai ceu pa yuh, ¹⁹ ka daux sibrawm pa mawh mhai mai pa daox deng, ka daux sibrawm Khuan Singax Singeh heue. Mawh kheu nan jah ka veng Yerusaliem mai hawt sivie tan, tom hoek ka meung Ilirikam, aux hoik grum sidiex gau lox bwan gaux rhawm Cao Khrit heue. ²⁰ Aux koe rhawm ti sang sidiex gau lox bwan gaux rhawm ngie ka dee ang nyang bax tawng ka ceu kaux Cao Khrit, son ang aux lai caw ti sum piang jaong num pa hoik kaw pui tang kaux heue. ²¹ Awm pa khaw mai pa hoik tiiem ti deuh ah nin, "Kix pa ang pui sax krai grawh grawng Nawh tak yaox mai kix pa ang sax mhong grawng Nawh tak sang tawng heue." ²² Mawh kheu nan, pa sang hoek aux ka pex, hoik koe pa sidien tom nie bawg heue. ²³ Viang mawh nan, yam in, mawh kheu ang lai baox koe dee sang sidiex ka daux meung in khankix mai kheu hoik dawg simie aux tix hoek ka pex tom nie num, ²⁴ yam sang hu aux ka meung Sapenix lai mawx ang ah, aux koe krax keud pot jun pot ti sang yaox pex yam hu aux krax mai ti sang kieh pex hu tawx aux tan, khaix hoik ot aux tau mai pex tom kub fah rhawm heue. ²⁵ Viang mawh nan yam in aux kawn sang hu ka veng Yerusaliem, ti sang viex krax teem hu ka pui pa singax singeh khankix heue. ²⁶ Grawh grawng nawh pui meung Makedonix mai pui meung Akhayax hoik viex khawm rhawm, gaux rhawm ti tawx pa tan, son pui singax singeh pa hot khankix, pa ot ka daux veng Yerusaliem heue. ²⁷ Mawh heue, kix hoik viex khawm rhawm, gaux rhawm ti tawx mai kix mawh pui pa koe ceuk, ka kix heue. Grawh grawng nawh phan hoik kieh pui tang ceu mawh pa rom ti pon ceu pa dex mai khuan tau mai pui Yudax, kix kawx khaw ti deeh tawx kraung ceu pa dex mai nex nham, sonsang teem sang yuh son kix heue. ²⁸ Mawh kheu nan khaix hoik yuh aux kaing in tom hoik sidah mai hoik tawx hoik pong totaix pa tan ka kix mhawm mhiem aux tak sang veh ka pex mai phlat hu ka meung Sapenix heue. ²⁹ Aux tawng yam hoek aux ka pex, aux tak sang hoek ka daux pa grum naog bwanson Cao Khrit heue. ³⁰ Puxaik khankix eue, aux khyox khaw ka pex ka daux Simiang ex Yesux Khrit mai kheu krax moh krax rhawm Khuan Cao, son sang nied pex ti coca tau mai aux, ka daux pa rawg pex bwan ka Siyiex son aux heue. ³¹ Kheu sonsang pon luan aux khaing kix pa ang koe krax cu nghiet ka daux meung Yudax mai yuh ka mawx kaing teem pa sang hu yuh aux son veng Yerusaliem tak sang mawh pa khaw caw rhawm mai pa rieb ti teei pui singax singeh khankix, ³² sonsang pon hoek aux ka pex ka daux krax gaux rhawm mai ka daux pa khaw mai alo Siyiex mai sonsang pon aux ti laux lee tau mai pex heue. ³³ Kieh Siyiex pa tawx krax nhim ot tau mai pex khawmuik liak. Amen.

¹ Aux sang tawx pong nan ex Phibe ka pex, pa mawh bun cau soi ka daux ceu cao veng Kinkhre, ² sonsang rieb pex ti teei nawh ka daux Siyiex, awm pa keung pa khaw pui singax singeh ti yuh mai sonsang teem pex ka nawh, ka daux can ceu pa lo nawh khaing pex heue. Grawh grawng nawh tokaux nawh kawx mawh cao pa teem ka pui tom nie mai khawm ka tokaux aux heue. ³ Nawb ka Prisikilax mai Akulax pa mawh paox pa rom ti yuh kaing tau mai aux ka daux Yesux Khrit, ⁴ pa mawh pa hoik tang ngawg tix, ka son ju aux heue. Ang lai mawh ngie aux pa yaogyaw bwanson kiex, viang mawh nan mawh khawm ceu cao pui tang ceu khawmuik heue. ⁵ Nawb ka ceu cao pa krawk khrawm ka nyiex kiex heue. Nawb ka Epenit pa moh aux ka, pa mawh plix liang ka son Cao Khrit ka daux meung Asix heue. ⁶ Nawb ka Marix, pa hoik nied ti yuh kaing tom nie ka son pex heue. ⁷ Nawb ka Andrawnit mai Yunix, pa mawh paox ru aux mai paox pa hoik laung tau mai aux. Pa mawh pa koe ceu ka sinax kawncau pa ting khankix, pa hoik ot ka daux Cao Khrit ka sivoe aux heue. ⁸ Nawb ka Ampalix pa moh aux kah, ka daux Simiang Yesux Khrit heue. ⁹ Nawb ka Uraban pa mawh paox pa rom ti yuh kaing tau mai ex ka daux Cao Khrit mai ka khawm Satakhux pa moh aux kah heue. ¹⁰ Nawb ka Apele pa khaw caw rhawm Cao Khrit heue. Nawb ka kix pui geh nyiex Arittawbulux heue. ¹¹ Nawb ka Herodion pa mawh paox ru aux heue. Nawb ka kix pui geh nyiex Nakisux, pa ot ka daux Cao Khrit. ¹² Nawb ka Taruphenix mai Taruphosax, pa yuh kaing ka daux Cao Khrit heue. Nawb ka Perusix pa moh kah, pa hoik yuh kaing tom nie ka daux Cao Khrit heue. ¹³ Nawb ka Rufux, pa mawh pa hoik laug Cao Khrit mai ka miex nawh pa mawh khawm miex aux heue. ¹⁴ Nawb ka Asunkritux, Phalekhon, Heramet, Patrawbax, Heramat mai ka khawm puxaik khankix pa ot tau mai kix heue. ¹⁵ Nawb ka Philologut mai Yuliax, ka Nerux mai nan nawh mai ka Awlumpax mai ka khawm pui singax singeh pa ot mai kix khawmuik heue. ¹⁶ Nawb ka paox tix, tix kaux lai tix kaux, ka pa ngheut pa singax singeh heue. Ceu cao Cao Khrit khawmuik nawb ka pex heue. ¹⁷ Puxaik khankix eue, aux khyox khaw ka pex, een ti tawng ka kix pa kieh koe krax tang gwieh paox tix mai dee sang lud pa ang khaw mai lox gau pa hoik gau pex kah mai veeh ti hu khaing kix heue. ¹⁸ Grawh grawng nawh kix pa awm kix khankix, mawh pa ang yuh son Simiang ex Cao Khrit, viang mawh nan kix keud son vaig tix khaing mai kix chix pie lhen ka rhawm kix pa ang koe dee lud, ka lox nyawm lox ghoik nyaw kix heue. ¹⁹ Krax cu nghiet pex hoik tah hu ka pui khawmuik, mawh kheu nan aux tom gaux rhawm kheu pex, viang mawh nan aux mie ti kieh pex mawh pa tawng ka pa mhawm mai pa ang koe dee lud ka pa mawh pa caox heue. ²⁰ Khaix in ang lai rheung, Siyiex pa tawx krax nhim tak sang teei Satan tix kieh nawh khlaix vid greem caong pex heue. Kieh bwanson Simiang ex Yesux Khrit ot tau mai pex liak. ²¹ Timose pa mawh paox pa yuh kaing tau mai aux mai Lukix mai Yason mai Sosipatax pa mawh paox ru aux khankix nawb ka pex heue. ²² Aux Teratix, pa tiiem lai in, nawb ka pex ka daux Simiang Yesux Khrit heue. ²³ Kayux pa mawh cao nyiex dee paung aux mai khawm ceu cao in nawb ka pex heue. Eratux pa mawh cao priex mau veng in mai Kwatux pa mawh puxaik nawb ka pex heue. ²⁴ Kieh bwanson Simiang ex Yesux Khrit ot tau mai pex khawmuik liak. Amen. ²⁵ Yam in ka Kaw pa chix kieh pex kaux cong, awm pa khaw mai lox bwan gaux rhawm aux, pa mawh pa sidiex grawh grawng Yesux Khrit, awm pa khaw mai pa hoik plak kieh yaox ka pa raux pa mox tom ju di dix, ²⁶ viang mawh nan pa hoik plak jhi sidawng yam in, kheu phuk lai sigang khri cao jhai khankix, awm pa khaw mai lox tawm jhawm krai Siyiex leeing ju, pa hoik kieh tawng ka ceu pui khawmuik, sonsang koe krax cu nghiet pa dex mai krax yum rhawm, ²⁷ Ka Siyiex pa mawh pa grum krax tawng yung tix kaux khaing, kieh koe min pakngai kheu Yesux Khrit leeing ju liak. Amen.