Revelation

Revelation

¹ Ceu pa plak jhi Yesux Khrit, pa hoik tawx Simiang Siyiex ka Nawh Cao sonsang jhi ka siliex Nawh khankix pa mawh ceu pa tak sang khran hoek ti mawh khankix. Nawh Cao ploi kawncau Siyiex cie tix ti teei mhai mai plak jhi ka siliex Nawh Yohan, ² pa kham mhai ruk ka grawng gumlox Siyiex mai grawng mhai ruk Yesux Khrit, awm can pa hoik yaox nawh khawmuik heue. ³ Mawh kheu bawg yam dex sang hoek, kaw pa phat mai kix pa mhong gumlox jhai in khankix mai priex ti hawt ceu pa hoik tiiem ti deuh ka daux in khankix, ting bwanson heue. ⁴ Yohan tawx ka ceucao aliah mu pa koe ka daux meung Asix, kieh pex koe bwanson mai pa nhim pa kaoh khaing Nawh Cao, pa mawh yam in mai pa hoik mawh mai pa tak sang hoek tix mawh mai khaing Khwan aliah mu pa ot sivoe dang ngeung Nawh Cao, ⁵ mai khaing Yesux Khrit pa mawh cao pa kham mhai ruk pa kaux sijax, pa mawh pa liang ti keh khaing pa yum mai pa mawh cao pa giex kaing piang simiang haktiex khankix liak. Kaw pa hoik moh ka ex mai pa hoik ploi ex khaing phimap ex ka daux nham tix, ⁶ mai hoik yuh tix kieh ex mawh simiang mai cao giex kaing li ka Siyiex mai Keeing Nawh, kieh Nawh koe min plakngai mai sibrawm ku ju leeing ju liak. Amen. ⁷ Jhak heue, Nawh Cao tak hoek tau mai paiawm khankix mai ngai ku ngai tak sang yaox Nawh, khawm kix pa hoik suat ka Nawh Cao mai ceu pui haktiex khawmuik tak sang yiiem riag yiiem yo kheu Nawh heue. Tak sang mawh nan heue. Amen. ⁸ "Aux mawh Alaphax mai Omegax"Simiang Siyiex, kaw pa mawh yam in mai pa hoik mawh mai pa tak sang hoek tix mawh, pa mawh cao pa ting sibrawm piang khawmuik, ah nan heue. ⁹ Aux pa mawh Yohan, puxaik pex, mai paox pa rom tix neuex ka daux pa kha rhawm mai Meung, mai pa gun yeung ka daux Yesux Khrit, yaox ti ot ka klawn tiex pa kok mawh Patmox, kheu gumlox Siyiex mai grawng mhai ruk Yesux heue. ¹⁰ Daux singaix twah Simiang Siyiex, aux ot ka daux Khwan Cao mai aux mhong lox pa ting pa luah khaix aux, pa awm lox teettawng, ¹¹ pa ah nin, "Tiiem ceu pa yaox maix ka daux phuk lai mai sipaox ka ceucao aliah mu, pa koe ka daux veng Efesux mai ka daux veng Sameunax mai ka daux veng Perakam mai ka daux veng Swatirax mai ka daux veng Sadix mai ka daux veng Filadelfia mai ka daux veng Lawdikix khankix awx." ¹² Khaix an, aux gi sonsang yaox mawh lox pa yuh ka mawx pa sikah mai aux. Aux yaox jawk ten khri aliah mu yam gi ti jhak, ¹³ mai ka sigreung jawk ten an khankix, pa awm kawn kawn pui tix kaux,pa ceep kraung dha pa hoek tom sidaing caong mai pa nhawt maox rawd khri ka see piang teeh heue. ¹⁴ Kaing Nawh mai hauk kaing Nawh paing awm hauk yung awm rawm rha heue. Ngai Nawh awm rao ngu heue. ¹⁵ Caong Nawh awm tawng lheung pa mhawm pa hoik thi ka daux daux glah ngu heue. Lox Nawh awm lox rawm tom nie heue. ¹⁶ Ka daux taix khawn dawm Nawh, giex simuing aliah mu mai khaing ka daux jheeh Nawh lih vaig lawm pa lawm khawm ra plak mai pakngai Nawh awm yam sinied singaix ti jhan riang heue. ¹⁷ Yam yaox aux Nawh, aux goh liep caong Nawh, awm pa hoik yum heue. Nawh Cao deuh taix khawn dawm Nawh ka piang aux ah nin, "Paw vi lhat! Aux mawh pa jah mai pa ghoik khaix, ¹⁸ mai kaw pa im ju heue. Aux hoik yum, mai jhak heue, Aux ca im ku ju leeing ju mai Aux koe jiak saw pa yum mai meung yum heue. ¹⁹ Mawh kheu nan tiiem ceu pa hoik yaox maix khankix mai ceu pa mawh yam in khankix mai ceu pa tak sang hoek tix mawh khaix khankix awx. ²⁰ Ceu pa raux pa mox grawng simuing aliah mu pa hoik yaox maix ka daux taix khawn dawm Aux mai jawk ten khri aliah mu an khankix mawh nin, simuing aliah mu khankix mawh kawncau Siyiex ceucao aliah mu, mai jawk ten khankix mawh ceucao aliah mu an heue."

¹ "Tiiem ka kawncau Siyiex ceucao pa koe ka daux veng Efesux yuh nin, ceu in khankix mawh pa ah kaw pa giex simuing aliah mu ka daux taix khawn dawm Nawh mai pa hu lailing ka sigreung jawk ten khri aliah mu. ² Aux tawng grawng krax twah krax klaung maix mai kaing pa nyhap pa mao mai pa gun pa yeung maix mai grawng pa ang maix pon kham ka pui caox mai grawng pa hoik cheu ti yaox ka kix pa dhua tokaux kix mawh kawncau pa ting, pa ang tie mawh mai hoik yaox grawng mawh kix pa pie lhen. ³ Maix hoik gun yeung mai hoik kham geu son ceu kaux Aux mai ang laux rhawm kah heue. ⁴ Viang mawh kawx nan Aux koe ceu pa deuh phimap ka piang maix, mawh kheu hoik grham maix ka krax moh awm pa moh phao ka heue. ⁵ Mawh kheu nan doh keud khaing dee hoik rau maix mai doh keud ka phimap tix mai twah klaung ka ceu pa twah pa klaung phao ka, phan ang mawh nan Aux tak hoek ka maix mai gah jawk ten maix khaing dee ot nawh, phan maix ang doh keud ka phimap tix heue. ⁶ Awm koeng maix ka krax twah krax klaung pa mawh pui Nikawlax khankix, Aux kawx koeng kah heue. ⁷ Kaw pa koe yhaok kieh nawh mhong ceu pa krai Khwan Cao ka ceucao khankix awx. Ka kaw pa pex, Aux tak tawx nawh ih khaing khaox im ju, pa koe ka daux Paradisux Siyiex heue. ⁸ "Tiiem ka kawncau Siyiex ceucao pa koe ka daux veng Sameunax yuh nin, ceu in khankix mawh pa ah Cao pa jah mai pa ghoik khaix, kaw pa hoik yum mai pa im ju. ⁹ Aux tawng grawng krax kha rhawm maix mai pa hot pa sibhawm maix, viang mawh nan maix mawh pa mi pa koe mai grawng pa salao kix pa dhua kix mawh pui Yudax mai kix ang tie mawh, viang mawh nan mawh nyiex sidiex Satan heue. ¹⁰ Paw vi lhat ka ceu pa dex sang yaox maix ti kham geu khankix. Jhak heue, phicaox dex teei ti sau pex tiblah ka daux thawng, sonsang cheu ti yaox pex, mai pex tak sang koe krax kha rhawm been kao ngaix heue. Kieh maix kaux sijax tom yum, mai Aux tak sang tawx mhok khri pa im ju ka maix heue. ¹¹ kaw pa koe yhaok kieh nawh mhong ceu pa krai Khwan Cao ka ceucao khankix awx. Ka kaw pa pex, krax yum ra bawg tix bawg tak ang pon ti kieh nawh saux heue. ¹² "Tiiem ka kawncau Siyiex ceucao pa koe ka daux veng Perakam yuh nin, ceu in khankix mawh pa ah kaw pa koe vaig lawm pa lawm khawm ra plak. ¹³ Aux tawng dee ot maix pa mawh dee koe dang ngeung Satan mai maix ca giex tom kaux cong ka ceu kaux Aux mai ang lai thiang ti tik ka krax yum rhawm Aux, viang ka daux bawg yam singaix Antipax, pa mawh cao pa kham mhai ruk cie Aux mai pa mawh kaw pa kaux sijax cie Aux, pa hoik teei yum ka sinax pex, dee ot Satan heue. ¹⁴ Viang mawh nan Aux koe ceu pa deuh phimap ka maix ceeix, mawh kheu koe pui maix tan tiblah pa giex been gau Balam, kaw pa hoik gau ka Balak pa taing ceu pa sideeing sivoe kawn praix Isarelax, sonsang ih ceu pa hoik tan ka riang grang khankix mai sonsang lud vao heue. ¹⁵ Awm an maix koe nang tiblah pa giex ka been pa gau pui Nikawlax khankix heue. ¹⁶ Mawh kheu nan doh keud ka phimap tix, phan ang mawh nan Aux tak khran hoek ka maix mai teei vaig pa koe ka daux jheeh Aux mai yuh naing ka kix heue. ¹⁷ Kaw pa koe yhaok kieh nawh mhong ceu pa krai Khwan Cao ka ceucao khankix awx. Ka kaw pa pex, Aux tak tawx nawh mannax pa hoik mox an mai Aux tak tawx nawh simaox paing tix lon mai ka piang simaox an hoik tiiem ceu kaux pa khraox, pa ang pui tawng tix kaux kawx, lheu khaing kaw pa pon simaox an heue. ¹⁸ "Tiiem ka kawncau Siyiex ceucao pa koe ka daux veng Swatirax yuh nin, ceu in khankix mawh pa ah kawn Siyiex, ngai Nawh awm rao ngu mai caong Nawh awm tawng lheung mhawm. ¹⁹ Aux tawng grawng krax twah krax klaung maix mai krax moh krax rhawm maix mai krax yum rhawm mai pa yuh kaing cau kaing soi mai pa gun yeung mai grawng krax twah klaung maix phao khaix, mawh pa nie lheu khaing krax twah krax klaung phao ka heue. ²⁰ Viang mawh kawx nan Aux koe ceu pa deuh phimap ka piang maix, mawh kheu khaw maix paox tix ka bun Yezabelax, pa dhua tokaux tix mawh yiex jhai mai nawh gau mai jeeh nyaw ka siliex Aux khankix sonsang lud vao mai sonsang ih ka ceu pa hoik tan lu ka riang grang heue. ²¹ Aux hoik tawx bawg yam ka kiex, sonsang doh keud kiex ka phimap tix mai ang kiex koe rhawm ti sang doh keud ka pa lud vao tix heue. ²² Jhak heue, Aux taing kiex ka dee it mai kix pa lud vao mai kiex, Aux taing ka daux dee kha rhawm pa ting, phan kix ang doh keud ka jhawm yuh kiex khankix heue. ²³ Aux tak teei kawn praix kiex yum ka krax yum mai ceucao khawmuik tak tawng grawng mawh Aux kaw pa sawg liiem plak daux pui khawmuik mai daux rhawm rhi mai Aux tak sang tawx pex kaux pui mawx kaux pui an, awm pa khaw mai krax pa twah klaung tix heue. ²⁴ Viang mawh nan Aux ah nin ka pex, pa deuk khankix ka daux veng Swatirax, can pa ang lai tawng ka lox pa gau in mai pa ang tawng ka ceu pa miag kix tix kok mawh, pa raux Satan heue. Ang Aux lai baox sau beeh sau glawm tang ceu ka piang pex heue. ²⁵ Viang mawh kawx nan can pa hoik koe pex, giex tom cong tom hoek Aux ka pex heue. ²⁶ Ka kaw pa hoik pex mai ka kaw pa priex ti hawt krax twah krax klaung Aux tom sidah, Aux tak tawx sibrawm ka piang ceu pui khawmuik ka nawh, ²⁷ mai nawh tak sang kwang sang giex kaing kix ka khaox gix rhiem, awm pah ka aw tiex cie cao pa yuh aw khankix max phawng vid heue. Awm Aux kawx hoik pon khaing Keeing Aux heue. ²⁸ Aux tak tawx simuing griang ka nawh heue. ²⁹ Kaw pa koe yhaok kieh nawh mhong ceu pa krai Khwan Cao ka ceucao khankix awx."

¹ "Tiem ka kawncau Siyiex ceucao pa koe ka daux veng Sadix yuh nin, ceu in khankix mawh pa ah kaw pa koe Khwan Siyiex aliah mu mai simuing aliah mu. Aux tawng grawng krax twah krax klaung maix, grawh grawng pa koe maix ceu kaux pa im maix, viang mawh nan maix hoik yum heue. ² Maix pau ti jhak mai kieh ceu pa kawn deuk pa dex sang yum khankix kaux cong ka awx. Grawh grawng nawh ang Aux yaox krax twah krax klaung maix pa hoik grum naog ka sivoe Siyiex Aux heue. ³ Mawh kheu nan doh keud ka ceu pa hoik pon hoik mhong maix mai priex ti hawt mai doh keud ka phimap tix awx. Mawh kheu nan phan maix ang pau ti jhak, Aux tak hoek awm pui briex mai maix tak ang tawng bawg yam nari pa sang hoek Aux ka maix heue. ⁴ Viang mawh kawx nan maix koe ceu kaux ka daux veng Sadix ceeix ceeix, pa ang lai kieh kraung ceep kix seeing brai ka mai kheu mawh kix pa keung, kix tak sang yaox ti ceep kraung paing mai hu lailing tau mai Aux heue. ⁵ Ka kaw pa pex tak sang kieh ceep ka kraung paing yuh nin heue. Aux tak ang doh preet ti tik ceu kaux nawh khaing phuk lai pa im ju, Aux tak sang kham grawng ceu kaux nawh sivoe Keeing Aux mai sivoe kawncau Siyiex cie Nawh khankix heue. ⁶ Kaw pa koe yhaok kieh nawh mhong ceu pa krai Khwan Cao ka ceucao khankix awx. ⁷ "Tiiem ka kawncau Siyiex ceucao pa koe ka daux veng Filadelfia yuh nin, ceu in khankix mawh pa ah kaw pa singax singeh, kaw pa mawh pa mawh pa meh, kaw pa koe jiak saw Davit, kaw pa paoh mai tix kaux kawx tak ang pon ti nyeep ka mai pa nyeep mai patix kaux kawx tak ang pon ti paoh kah. ⁸ Aux tawng grawng krax twah krax klaung maix, jhak heue, Aux hoik paoh ti deuh siviex sivoe maix pa ang pui tix kaux kawx pon ti nyeep ka, grawh grawng pa koe maix sibrawm ceeix ceeix mai hoik priex ti hawt gumlox Aux mai ang thiang ti tik ka ceu kaux Aux heue. ⁹ Jhak heue, Aux tak kieh kix pa neuex ka nyiex sidiex Satan tiblah, kix pa dhua kix mawh pui Yudax mai kix ang tie mawh, viang mawh nan pa nieb pie lhen. Jhak heue, Aux tak kieh kix hoek ti krub ka sivoe caong maix mai tawng grawng pa moh Aux ka maix heue. ¹⁰ Mawh kheu hoik priex maix ti hawt gumlox pa dex mai pa gun pa yeung Aux, viang Aux kawx tak sang priex maix khaing bawg yam nari pa cheuk cheu ti yaox an, pa tak sang hoek ka piang haktiex khawmuik, sonsang cheuk cheu ti yaox ka kix pa ot ka piang haktiex heue. ¹¹ Aux tak khran hoek heue. Giex tom kaux tom cong ka ceu pa hoik koe maix, yuh ka mawx son ang pui tix kaux kawx sang teei mhok khri maix heue. ¹² Ka kaw pa pex, Aux tak kieh nawh mawh rong ka daux nyiex bwan Siyiex Aux mai nawh tak ang baox deeh lih khaing tan tix bawg kawx heue. Aux tak tiiem ceu kaux Siyiex Aux mai ceu kaux veng Siyiex Aux, pa mawh veng Yerusaliem pa khraox, pa lih hoek khaing daux meung raoma, khaing Siyiex Aux mai ceu kaux pa khraox cie Aux, ka piang nawh heue. ¹³ Kaw pa koe yhaok kieh nawh mhong ceu pa krai Khwan Cao ka ceucao khankix awx. ¹⁴ "Tiiem ka kawncau Siyiex ceucao pa koe ka daux veng Lawdikix, yuh nin, ceu in khankix mawh pa ah Cao Amen. Pa mawh cao pa kham mhai ruk pa kaux sijax mai pa mawh pa meh, pa mawh pa liang ka daux ceu pa hoik phan hoik yuh Siyiex. ¹⁵ Aux tawng grawng krax twah krax klaung maix, grawh grawng pa ang maix tie sikiied tie hax. Aux simie ti kieh maix mawh pa sikiied phan ang mawh nan pa hax heue. ¹⁶ Mawh kheu mawh maix pa siu ngie ceeix ceeix khaing mai pa ang tie hax tie sikiied, Aux tak peh ti tik maix khaing daux jheeh Aux heue. ¹⁷ Mawh kheu ah maix, "Aux mawh pa mi pa koe mai hoik koe sinngao mai ang lai baox lo tidtix."Ang tawng grawng pa mawh maix kaw pa kha rhawm mai pa khaw ti caux rhawm ka mai pa hot pa sibhawm mai pa dug ngai mai pa kakaong heue. ¹⁸ Aux nhie maix liag khri pa hoik thi ka daux ngu, sonsang lih mawh maix pa mi pa koe mai ka kraung ceep pa paing sonsang ceep ka tokaux tix, son tak ang ceu pa kaig pa tua pa kakaong maix sidawng mai ka sidah kraix ngai, ti sang kraix ka ngai maix, sonsang chix yaox maix ka heue. ¹⁹ Ka can kix pa moh Aux ka, Aux ah ka mai sivied ti gau ka heue. Mawh kheu nan nied ti coca mai doh keud ka phimap tix awx. ²⁰ Jhak heue, Aux cung ka sivoe siviex mai gleuh ka heue. Phan pui tix kaux kaux mhong lox Aux mai paoh siviex, Aux tak laig ka dee ot nawh mai Aux tak sawm rheep tau mai nawh mai nawh tak sawm rheep tau mai Aux heue. ²¹ Ka kaw pa pex, Aux tak tawx ti kieh nawh ngawm tau mai Aux ka piang dang ngeung Aux, awm Aux kawx hoik pex mai ngawm tau mai Keeing Aux ka piang dang ngeung Nawh heue. ²² kaw pa koe yhaok kieh nawh mhong ceu pa krai Khwan Cao ka ceucao khankix awx."

¹ Khaix ceu an khankix jhak heue, aux yaox siviex pa hoik bhang ka meung raoma tix mu mai lox pa mhong aux phao ka, awm lox luah teettawng pa sikah mai aux ah nin, "Haok tin mai Aux tak jhi maix yaox ceu pa tak lai hoek ti mawh khaix heue." ² 2 Dom mawx dom an aux ot ka daux Khwan Cao mai jhak heue, koe dang ngeung pa hoik deuh ka daux meung raoma tix mu mai ngawm ka piang dang ngeung an tix kaux heue. ³ Grang kaw pa ngawm an, awm siang simaox pa toh riang kuceu mai siang simaox pa raoh awm nham mai koe siyawng mukheu pa grang nawh awm siang simaox klai pa vung viang ka dang ngeung an. ⁴ Vung viang dang ngeung an, koe dang ngeung tixnga pon mu mai ka piang dang ngeung an khankix aux yaox ngawm kuad song tixnga pon kaux, pa ceep kraung paing mai pa ceep mhok khri piang kaing kix heue. ⁵ Khaing dang ngeung an lih tuh sah mai lox sikah mai lox pa sinum praix heue. sivoe dang ngeung an, koe kawk ngu pa hoik tok aliah mu, pa mawh Khwan Siyiex aliah mu heue. ⁶ Ka sivoe dang ngeung an awm pa koe rawm sigrit sigra siliak pa awm simaox plaung heue. mai vung viang dang ngeung an koe totiag pa im ju pon mu, pa naog ngai ka tokaux kix khawm plak sivoe mai khawm plak khaix heue. ⁷ Totiag phao ka tix mu, awm sivai sangsi mai totiag ra mu tix mu, awm kawn mawie mai totiag loe mu tix mu an, koe pakngai awm pakngai pui mai totiag pon mu tix mu an awm klang krih pa pu heue. ⁸ Totiag pa im ju pon mu an, kix koe pruik tix mu liah pruik mai vung viang mai plak daux pruik an khankix naog ka ngai heue. Kix ang yaox ti laux lee tix, ca ah nin ku singaix, "Siyiex cao pa ting sibrawm piang khawmuik, pa hoik mawh mai pa mawh yam in mai pa tak sang hoek ti mawh, mawh Simiang Siyiex pa Singax, Singax, Singax heue." ⁹ Yam yaogyaw totiag pa im ju an khankix min plakngai mai yungyi, mai yaogyaw bwanson ka kaw pa ngawm ka piang dang ngeung an, pa mawh ka kaw pa im ju ku ju leeing ju, ¹⁰ kuad song tixnga pon kaux an khankix goh gup ka sivoe kaw pa ngawm piang dang ngeung an mai krub ka kaw pa im ju ku ju leeing ju mai taing mhok khri kix ka sivoe dang ngeung an, ah nin, ¹¹ "Siyiex ex eue, Maix mawh pa keung ti pon min plakngai mai pa yungyi mai sibrawm, mawh kheu hoik phan hoik yuh Maix kuceu khawmuik, mai an khankix hoik mawh mai hoik phan hoik yuh kheu alo Maix heue."

¹ Mai aux yaox phuk lai pa hoik tiiem lai plak daux mai plak khaix ka daux taix khawn dawm kaw pa ngawm ka piang dang ngeung an mai pa hoik tawk ti nyeep ka cum aliah mu heue. ² Aux yaox kawncau Siyiex pa ting riang tix kaux, pa ah nin ka lox pa ting pa sinum, "Mawh mawx pa keung ti paoh ka phuk lai an mai teei ti tik ka cum nawh khankix?" ³ Pui pa pon ti paoh ka lai an ang ah, pa pon ti jhak ang ah, ang lai koe ka daux meung raoma, ka piang haktiex, mai ka greem haktiex tix kaux kawx heue. ⁴ Mawh kheu ang lai yaox kaw pa keung ti paoh ka phuk lai an, phan ang mawh nan pa keung ti jhak ka, tix kaux kawx, aux tom yiiem tom nie heue. ⁵ Kuad song tix kaux ah nin ka aux, "Paw vi yiiem, jhak heue, sivai sangsi pa mawh khaing daux ru ceu Yudax, pa mawh Riah Davit, hoik pex ti paoh ka phuk lai an mai ka cum nawh aliah mu an heue." ⁶ Ka sigreung dang ngeung an mai ka sigreung totiag pa im ju pon mu an mai ka sigreung kuad song khankix, aux yaox cung kawn Yung tix mu, awm pa hoik phah yum kah, pa koe rung aliah mu mai ngai aliah mu, pa mawh Khwan Siyiex aliah mu, pa ploi hu ka piang haktiex khawmuik heue. ⁷ Nawh hoek mai teei phuk lai an khaing daux tawm taix khawn dawm kaw pa ngawm ka piang dang ngeung an heue. ⁸ Khaix hoik teei Nawh ka phuk lai an, totiag pa im ju pon mu an mai kuad song tixnga pon kaux an khankix, goh gup ka sivoe kawn Yung an heue. Kix ku kaux koe ting vawk mai klong khri pa naog ka nyawng bhawng pa mawh bwan ceu pa rawg pui pa singax singeh khankix heue. ⁹ Kix rhax lox rhax pa khraox, pa ah nin, "Maix mawh pa keung ti teei ka phuk lai an mai pa keung tix paoh ka cum nawh khankix, mawh kheu hoik pah Maix yum mai kheu hoik teei nham tokaux Maix teei ti tawx ex, pa mawh ceu pui kuceu mai pa mawh pa tang lox sikah kuceu mai pa mawh pui kuceu mai pa mawh pui meung ku meung son Siyiex, ¹⁰ mai hoik yuh ti kieh kix mawh simiang mai cao giex kaing li ka Siyiex ex mai kix giex kaing ka piang haktiex heue." ¹¹ Aux yaox mai aux mhong lox kawncau Siyiex pa haoh hun vung viang dang ngeung an mai totiag pa im ju khankix mai kuad song khankix mai kix koe tix mheen, tix mheen bawg mai kaing rheng bawg kaing rheng heue. ¹² Mai kix ah lox pa ting pa sinum ah nin, "Kawn yung pa hoik pah yum an mawh pa keung ti pon sibrawm mai sinngao mai pingnya cuyi mai riang rao mai pa yung pa yi mai min plakngai mai bwanson heue." ¹³ Can pa hoik phan hoik yuh kuceu, pa koe ka daux meung raoma mai ka piang haktiex mai ka greem haktiex mai ka piang rawm sigrit sigra mai aux mhong can pa koe ka daux khankix khawmuik ah nin, "Ka kaw pa ngawm ka piang dang ngeung mai ka kawn Yung, kieh koe bwanson mai pa yungyi mai min pakngai ku ju leeing ju liak." ¹⁴ Totiag pa im ju pon mu an kawx, ah "Amen." kuad song khankix goh gup mai krub ka heue.

¹ Aux yaox yam paoh kawn Yung cum tix mu ka daux cum aliah mu an mai aux mhong totiag tix mu, ka daux totiag pa im ju pon mu an, ah nin ka lox pa awm lox sinum praix, "Hoek heue." ² Aux jhak mai yaox brung paing tix mu mai kaw pa ngawm ka piang brung an giex ak poh tix mu mai teei ti tawx mhok khri ka nawh mai nawh pex mai lih hu ti pex heue. ³ Yam paoh Nawh Cao ka cum ra mu tix mu an, aux mhong lox totiag pa im ju ra mu tix mu ah nin, "Hoek heue." ⁴ Brung tang mu tix mu, pa mawh brung raoh lih hu mai ka kaw pa ngawm ka piang brung an hoik tawx ti kieh nawh teei krax nhim khaing haktiex, yuh ka mawx sonsang pah pui yum ka paox tix mai teei ti tawx vaig ting tix kre ka nawh heue. ⁵ Yam paoh Nawh Cao ka cum loe mu tix mu an, aux mhong lox totiag pa im ju loe mu tix mu ah nin, "Hoek heue."Aux jhak mai yaox brung lung tix mu heue. kaw pa ngawm ka piang brung an koe jiang ka daux tawm taix nawh tix mu heue. ⁶ Aux mhong awm mawh lox ka sigreung totiag pa im ju pon mu an ah nin, "Denari tix plah pon gaox nghox ca tix tang mai denari tix plah pon gaox nghox ca lang sidax loe diag mai maix paw chuh yuh laux ka rawm bee mai ka rawm plix siiet heue." ⁷ Yam paoh Nawh Cao ka cum pon mu tix mu an, aux mhong lox totiag pa im ju pon mu tix mu ah nin, "Hoek heue." ⁸ Aux jhak mai yaox brung pau tix mu mai ceu kaux kaw pa ngawm ka piang brung an, mawh pa yum mai meung yum hawt hu tau mai nawh heue. Hoik tawx sibrawm ka kix ting piang haktiex pon son tix son, sonsang teei yum ka vaig mai ka sibhawm praix mai ka krax yum mai ka totiag haktiex khankix heue. ⁹ Yam paoh Nawh Cao ka cum phwan mu tix mu an, aux yaox ju kix pa hoik teei yum kheu gumlox Siyiex mai kheu sakse pa kham kix, ka greem khu dee tan heue. ¹⁰ Kix kok yo lox pa ting pa sinum, ah nin, "Simiang pa giex kaing, pa singax singeh, pa mawh meh eue, Maix tak ang prawng ciyang mai ang pawk bix ka son nham ex, ka kix pa ot ka piang haktiex khankix miex grheung. ¹¹ Teei ti tawx kraung ceep pa paing ka kix ku kaux heue. Hoik krai ka kix, grawng tak sang baox laux lee kix son bawg yam ceeix ceeix, tom paox siliex kix mai puxaik kix khankix, pa tak sang teei yum, awm nang pa hoik teei kix yum khankix tak sang grum naog ka heue. ¹² Aux yaox yam paoh Nawh Cao ka cum liah mu tix mu an mai lih tok kla reem ting mai singaix lih lung awm man pa taing ka hauk mai khix khawm mu lih mawh awm nham heue. ¹³ Simuing raoma khankix cod ka piang haktiex, awm khaox ruh kieh plix pa ang nyang teem cia yam vuh vied bhaung ting ka nawh heue. ¹⁴ Teei ti gah raoma hu, awm yam pua ka lai mai gah gawng ku gawng mai klawn tiex ku klawn khaing dee koe kix heue. ¹⁵ Simiang haktiex khankix mai pui ting khankix mai cao giex kaing naing pa ting khankix mai pui mi pui koe khankix mai pui ting riang ting rao khankix mai siliex ku kaux mai pui ploi ku kaux, mox tokaux kix ka daux daux rang mai ka rang pa koe ka gawng khankix heue. ¹⁶ Kix ah nin ka gawng mai ka rang khankix, "Grhup ka piang ex mai mox ex khaing pakngai Kaw pa ngawm ka piang dang ngeung an mai khaing pa song rhawm song rhi kawn Yung liak." ¹⁷ Grawh grawng nawh singaix pa ting pa song rhawm kiex hoik hoek. Pui mawx pon ti cung ka?

¹ Khaix ceu an aux yaox kawncau Siyiex pon kaux cung ka daog haktiex pon daog mai giex ka bhaung haktiex pon mu, yuh ka mawx son ang bhaung sang phlu ka piang haktiex mai ka piang rawm sigrit sigra mai ka piang khaox khankix tix gawng kawx heue. ² Aux yaox kawncau Siyiex tang kaux tix kaux haok khaing plak lih singaix pa koe cum Siyiex pa im ju mai nawh yo lox ting lox sinum ka kawncau Siyiex pon kaux, pa hoik tawx akhwang ka kix ti sang chuh yuh laux ka haktiex mai ka rawm sigrit sigra, ³ ah nin, "Paw chuh paw yuh laux ka haktiex. Mai ka rawm sigrit sigra mai ka khaox khankix, ka ang ex nyang bax tawk cum ka dong re siliex Siyiex ex khankix heue." ⁴ Aux mhong hoik koe kix miex kaux pa hoik tawk cum kah, ka daux ceu pui Isarelax khawmuik koe tix sien, pon mheen mai pon rheng heue. ⁵ Ka daux ceu Yudax hoik tawk cum ka tix mheen mai ra rheng. Ka daux ceu Ruben tix mheen mai ra rheng. Ka daux ceu Gat tix mheen mai ra rheng. ⁶ Ka daux ceu Asax tix mheen mai ra rheng. Ka daux ceu Napthalix tix mheen mai ra rheng. Ka daux ceu Manashe tix mheen mai ra rheng. ⁷ Ka daux ceu Simeon tix mheen mai ra rheng. Ka daux ceu Lewix tix mheen mai ra rheng. Ka daux ceu Issakha tix mheen mai ra rheng. ⁸ Ka daux ceu Zebulun tix mheen mai ra rheng. Ka daux ceu Yosiep tix mheen mai ra rheng. Kadaux ceu Benyamin hoik tawk cum ka tix mheen mai ra rheng heue. ⁹ Khaix ceu an khankix aux jhak mai yaox, pui pa kied haoh kied hun, pa ang pui tix kaux kawx pon ti simin ka, khaing pui meung ku meung mai khaing ceu pui kuceu mai khaing pui pa tang lox sikah kuceu, pa hoik ceep ka kraung paing mai giex ka lhax khaox jhie yaong ka daux tawm taix kix mai cung ka sivoe dang ngeung an mai ka sivoe kawn Yung heue. ¹⁰ Kix yo lox ting lox sinum ah nin, "Kieh Siyiex ex pa ngawm ka piang dang ngeung mai kawn Yung koe pa taoh liak." ¹¹ Kawncau Siyiex khawmuik pa cung ka vung vieang dang ngeung mai kuad song khankix mai totiag pa im ju pon mu an, goh gup ka sivoe dang ngeung mai krub ka Siyiex, ¹² ah nin, "Amen. Kieh Siyiex ex koe bwanson mai min plakngai mai pingnya cuyi mai pa yaogyaw bwanson mai pa yung pa yi mai sibrawm mai riang rao, ku ju leeing ju liak. Amen." ¹³ Kuad song khankix tix kaux chawk ah nin ka aux, "Pui inkix pa ceep kraung paing, mawh pa yuh ka mawx mai kix kaoh khaing dee mawx?" ¹⁴ Aux deeh ah nin ka nawh, "Simiang aux eue, Maix tawng heue." Nawh baox ah nin ka aux, "Pui inkix mawh kix pa hoik kaoh khaing daux krax kha rhawm pa ting an mai kix hoik sigrhah kraung ceep kix mai kieh paing ka daux nham kawn Yung heue. ¹⁵ Mawh kheu nan kix tom yaox ti ot ka sivoe dang ngeung Siyiex, kix yuh kaing krub ka Nawh Cao ka daux nyiex bwan Nawh ku singaix heue. Kaw pa ngawm ka piang dang ngeung, tak sang lhop nyiex gox bwan man ka piang kix heue. ¹⁶ Kix tak ang baox lai deeh cai rhawm khaix, mai tak ang baox lai deeh sang nyaux nie rawm khaix. Viang singaix tak ang jhan ka piang kix mai kix tak ang yaox ti kham ceu pa hax pa siaoh tix ceu kawx heue. ¹⁷ Grawh grawng nawh Kawn Yung pa ot ka sigreung dang ngeung tak mawh cao liang kix mai thong kix hu ka rawm keut dee lih rawm im ju heue. Siyiex tak sang awt rawm ngai kix khawmuik khaing ngai kix heue."

¹ Yam paoh Nawh Cao ka cum aliah mu tix mu an, yiien yawg ka daux meung raoma khaix been tix plak nari heue. ² Aux yaox kawncau Siyiex aliah kaux pa cung ka sivoe Siyiex mai tawx teettawng aliah mu ka kix heue. ³ Kawncau Siyiex tang kaux tix kaux hoek mai cung liep khu dee tan, pa koe klong khri dee gleeing nyawng bhawng heue. Tawx nyawng bhawng ka nawh tom nie, sonsang baox tiien thie nawh ka bwan pa rawg pui singax singeh khankix, ka piang khu khri dee tan, pa koe sivoe dang ngeung an heue. ⁴ Taox nyawng bhawng tau mai khawm bwan pa rawg pui singax singeh khankix, haok hu ka sivoe Siyiex khaing daux tawm taix kawncau Siyiex an heue. ⁵ Kawncau Siyiex an teei klong dee gleeing nyawng bhawng an mai nawh sau ngu tom naog ka klong an khaing khu dee tan mai taing nawh ka piang haktiex mai lih mawh pa sinum praix mai lox sikah mai pa tuh sah mai pa tok kla reem heue. ⁶ Kawncau Siyiex aliah kaux pa koe teettawng aliah mu an, cox rien tokaux tix sonsang phlu heue. ⁷ Yam phlu teettawng phao ka tix kaux, lih mawh pre mai ngu, pa hoik klao tau mai nham mai taing khankix ka piang haktiex mai haktiex loe son tix son gleeing uik mai khaox loe son tix son gleeing uik mai can rib pa klai khawmuik gleeing uik heue. ⁸ Kawncau Siyiex ra kaux tix kaux phlu teettawng mai teei ceu pa awm gawng ting pa kawn gleeing ka ngu, taing sau daux rawm sigrit sigra mai rawm sigrit sigra loe son tix son lih mawh nham heue. ⁹ Can ceu pa koe ka daux rawm sigrit sigra loe son tix son yum heue. Reu khankix loe son tix son kawx laux leeing heue. ¹⁰ Kawncau Siyiex loe kaux tix kaux phlu teettawng mai simuing pa kied ting tix mu rau khaing raoma, pa awm rup ngu mai nawh cod ka piang rawm klawng ting khankix loe son tix son mai ka piang rawm keut khankix heue. ¹¹ Ceu kaux simuing an mawh lhax ghin mai rawm loe son tix son lih mawh rawm ghin mai pui yum tom nie kheu rawm khankix, mawh kheu hoik yuh ti kieh kix song heue. ¹² Kawncau Siyiex pon kaux tix kaux phlu teettawng mai yuh laux ka singaix loe son tix son mai ka khix loe son tix son mai ka simuing khankix loe son tix son, yuh ka mawx sonsang kieh khankix loe son tix son faik hu, son ang singaix jhan riang been singaix loe son tix son mai khawm ponsawm kawx mawh nang nan heue. ¹³ Aux yaox mai aux mhong pa po klang krih ka sigreung raoma pa ah nin ka lox pa ting pa sinum, "Kix pa ot piang haktiex, tak kha rhawm, tak kha rhawm, tak kha rhawm, kheu lox teettawng kawncau Siyiex loe kaux pa kawn deuk pa dex sang phlu heue."

¹ Kawncau Siyiex phwan kaux tix kaux phlu teettawng mai aux yaox simuing tix mu pa hoik cod ka piang haktiex khaing raoma heue. Tawx jiak saw daux pa ang koe dee die ka nawh heue. ² Nawh paoh daux pa ang koe dee die an mai taox lih khaing daux an. Awm taox pa lih khaing daux glah ngu pa ting heue. Kheu taox pa lih khaing daux an, singaix mai bhawm tom faik hu heue. ³ Sido khankix lih hu ka piang haktiex khaing daux taox ngu an mai hoik tawx sibrawm ka kix awm sibrawm pa koe tamtim ka piang haktiex khankix heue. ⁴ Hoik tawm lox ka kix son ang kix sang chuh sang yuh laux ka rib haktiex mai ka ceu pa klai tix ceu kawx mai ka khaox tix gawng kawx, viang mawh nan sonsang chuh sang yuh saux ngie ka pui khankix pa ang koe khaix tawk cum Siyiex ka dong re kix heue. ⁵ Viang mawh nan ang lai tawx akhwang ka kix sonsang teei pui khankix yum, tawx akhwang sonsang kieh kix kha rhawm been phwan khix khaing heue. Ceu pa kha rhawm kix, awm pa kha rhawm yam heeik tamtim ka pui heue. ⁶ Ka daux bawg yam singaix an khankix, pui khankix tak sawg tix yum mai pon ang doh lai yaox kah kix simie tix yum kawx krax yum tak to khaing kix heue. ⁷ Grang pakpeung sido khankix awm brung pa hoik cox rien sonsang yuh naing heue. Ka piang kaing kix awm pa ceep mhok khri mai plakngai kix awm plakngai kawn pui heue. ⁸ Kix koe hauk kaing pa awm hauk kaing bun mai rhang kix awm rhang sivai sangsi heue. ⁹ Kix koe kraung naing pa tie naok, pa awm kraung naing pa tie naok pa yuh ka rhiem heue. Lox luah pruik kix, awm lox luah ling brung tom nie pa nied ti to hu dee yuh naing heue. ¹⁰ Kix koe sidax pa awm sidax tamtim mai nyeeig heue. Kadaux sidax kix khankix, koe sibrawm kix ti chuh ti yuh saux ka kawn pui been phwan khix heue. ¹¹ Kix koe simiang ka piang kix pa mawh kawncau Siyiex daux pa ang koe dee die. Ceu kaux nawh ka daux lox Hebrie mawh Abadon mai ka daux lox Helasax nawh koe ceu kaux Apawlion heue. ¹² Pa kha rhawm phao ka tix ceu hoik luan. Jhak heue, tak kawn sang hoek ceu pa kha rhawm ra ceu khaix heue. Teettawng liah mu tix mu kru naing pa hoek khaing plak lih Singaix. ¹³ Kawncau Siyiex liah kaux tix kaux phlu teettawng mai aux mhong lox pa lih khaing rung pon mu ka khu khri dee tan, pa koe sivoe Siyiex, ¹⁴ pa ah nin ka kawncau Siyiex liah kaux tix kaux pa koe teettawng an, "Ploi kawncau Siyiex pon kaux pa hoik phyawk ka rawm klawng ting Yufrethix awx." ¹⁵ Ploi ka kawncau Siyiex pon kaux an, pa hoik cox rien tix son bawg yam nari an mai singaix an mai khix an mai num an, sonsang teei kix yum ka kawn pui loe son tix son heue. ¹⁶ Kru naing brug brung khankix koe ra yieh lan heue. Aux hoik mhong grawng koe kix miex kaux heue. ¹⁷ Aux yaox brung khankix mai pui pa brug ka piang kix, ka daux riang susai yuh nin, kix pa brug khankix koe kraung naing pa tie naok, pa raoh awm ngu mai pa klai lung awm simaox Jasen mai pa lheung awm mhat heue. Kaing brung khankix awm kaing sivai sangsi mai rao ngu mai taox ngu mai mhat lih khaing daux jheeh kix heue. ¹⁸ Kheu preng in loe ceu, pa mawh rao ngu mai taox ngu mai mhat, pa lih khaing daux jheeh kix, teei pui loe son tix son yum ka heue. ¹⁹ Grawh grawng nawh sibrawm brung khankix koe ka daux jheeh kix mai ka daux sidax kix, mawh kheu sidax kix awm siuing mai koe kaing heue. Kix teei sidax tix, chuh ti yuh pui saux heue. ²⁰ Kawn pui pa deuk khankix pa ang yum ka preng in loe ceu, ang lai doh keud ka phimap, kaing ceu pa hoik yuh kix ka taix tix, yuh ka mawx son ang kix sang krub ka phicaox mai ka riang grang khankix, pa yuh ka khri mai ka mau mai ka tawng lheung mai ka simaox mai ka khaox, pa mawh pa ang chix yaox, chix mhong mai pa ang chix hu heue. ²¹ Kix ang lai doh keud ka phimap, pa teei kix pui yum mai ka pa yuh kix phicaox mai pa ploi sat mai ka ceu pa lud vao kix mai ka ceu pa briex pa lak kix, khankix heue.

¹ Aux yaox kawncau Siyiex tang kaux pa ting riang tix kaux lih hoek khaing raoma, pa hoik ceep ka paiawm tix mu mai siyawng mukheu koe ka piang kaing nawh mai pakngai nawh awm mawh singaix mai caong nawh awm rong ngu heue. ² Nawh koe phuk lai iak pa hoik plak tix pheen ka daux tawm taix nawh mai nawh deuh caong khawn dawm nawh ka piang rawm sigrit sigra mai caong khawn gwiex nawh ka piang haktiex heue. ³ Nawh yo lox pa ting pa sinum, awm lox graox sivai sangsi mai yam yo nawh, pa sinum praix aliah mu, ah lox kix heue. ⁴ Yam sinum praix aliah mu an ah lox kix, aux dex sang tiiem mai aux mhong lox pa kaoh khaing raoma ah nin, "Tawk cum tix nyeep ka lox pa krai pa sinum praix aliah mu an mai paw vi tiiem grawng khankix awx." ⁵ Kawncau Siyiex pa hoik yaox aux cung ka piang rawm sigrit sigra mai ka piang haktiex an, yaog taix khawn dawm tix ka raoma, ⁶ mai tiextu ka greem kaw pa im ju ku ju leeing ju, pa mawh kaw pa hoik phan hoik yuh raoma mai can pa koe ka daux nawh khankix mai haktiex mai can pa koe ka daux nawh khankix mai rawm sigrit sigra mai can pa koe ka daux nawh khankix ah nin, "Bawg yam tak ang lai baox koe, ⁷ viang mawh nan ka daux bawg yam singaix lox kawncau Siyiex aliah kaux tix kaux an khankix, yam dex sang phlu nawh teettawng yam an, ceu pa raux pa mox Siyiex ceu pa khaw mai lox pa mhawm mhiem, pa hoik krai Nawh Cao ka siliex Nawh pa mawh cao jhai khankix, tak grum hoik heue." ⁸ Lox mhong aux khaing raoma an, aux mhong baox sikah mai aux ah nin, "Hu teei phuk lai iak pa hoik plak, pa koe ka daux tawm taix kawncau Siyiex pa cung ka piang rawm sigrit sigra mai ka piang haktiex an awx." ⁹ Aux hu ka kawncau Siyiex an mai nhie nawh tawx phuk lai iak an ka aux heue. Nawh ah nin ka aux, "Teei nawh mai ih khawmuik awx, Nawh tak kieh vaig maix song, viang mawh nan ka daux jheeh maix nawh tak tie awm rawm hia heue. " ¹⁰ Aux teei phuk lai iak an khaing daux tawm taix kawncau Siyiex an mai ih nawh khawmuik mai ka daux jheeh aux nawh tie awm rawm hia mai khaix hoik ih aux nawh, kieh vaig aux song ka heue. ¹¹ Kix ah nin ka aux, "Maix tak baox deeh krai lox jhai grawh grawng ceu pui tom nie mai pui meung tom nie mai pui pa tang lox sikah tom nie mai simiang nie heue."

¹ Teei ti tawx gawng priem tix gawng, pa awm khaox grix ka aux mai ah lox yuh nin, "Kaoh mai tiag ti yaox ka nyiex bwan Siyiex mai ka khu dee tan mai ka kix pa krub ka daux dee an. ² Viang mawh nan brawk pa koe plak praix nyiex bwan, grham kah, mai paw tiag heue. Grawh grawng nawh hoik tawx nawh ka pui tang ceu mai kix tak dig veng pa singax singeh greem caong tix tixpon ra khix heue." ³ Aux tak tawx sibrawm ka cao pa kham mhai rug Aux ra kaux mai kiex tak ceep kraung man pa taing ka hauk mai krai lox jhai been tix rheng mai ra yieh mai tigliah ngaix heue. ⁴ In kiex mawh khaox Sanlun ra gawng mai jawk ten ra mu, pa jung sivoe Simiang Cao haktiex heue. ⁵ Phan pui tix kaux kaux simie ti chuh ti yuh kiex saux ngu lih khaing daux jheeh kiex mai gleeing ka pui pa koeng ka kiex heue. Phan pui tix kaux kaux simie tix chuh ti yuh kiex saux, nawh tak lai yaox tix yum ka pa yuh nan heue. ⁶ In kiex koe sibrawm ti nyeep ka raoma son ang lhiex sang lih ka daux been glang singaix yam krai kiex lox jhai heue. Kiex koe sibrawm ka piang rawm khankix ti sang loh tix kieh kix mawh nham mai sonsang kieh preng kuceu hoek ka haktiex awm pa simie kiex miex bawg ang ah heue. ⁷ Khaix hoik sidah kham kiex sakse, totiag tix mu pa lih hoek khaing daux daux pa ang koe dee die, tak yuh naing ka kiex mai pex kiex mai teei kiex yum heue. ⁸ Tokaux yum kiex tak noi ka daux krax veng ting an pa kok hawt khwan mawh Sawdom mai Ejiptux pa mawh dee hoik teei Simiang kiex yum ka piang khaox lhak heue. ⁹ Pui khaing ka daux pui kuceu mai ceu pui kuceu mai pui pa tang lox sikah kuceu mai pui meung kuceu, jhak ka tokaux pa yum kiex been loe singaix plak mai ang cu ti kieh sipaung tokaux yum kiex ka daux simeeig heue. ¹⁰ Kix pa ot ka piang haktiex gaux rhawm ka grawng kiex mai yuh krax gaux rhawm mai kix ralai sipaox totaix ka paox tix, mawh kheu cao jhai in ra kaux hoik laklheut ka kix pa ot ka piang haktiex heue. ¹¹ Khaix loe singaix plak an, bhawm pa im ju pa kaoh khaing Siyiex laig ka daux kiex mai kiex cung ka caong tix heue. Kix pa yaox ka kiex khankix kied lhat kied graung ka heue. ¹² Kix mhong lox pa ting pa sinum khaing raoma pa ah nin ka kiex, "Haok tin heue," kiex haok hu ka daux meung raoma, ka daux paiawm mai pui pa koeng ka kiex khankix kawx yaox kiex heue. ¹³ Ka daux bawg yam nari an tok kla reem ting mai veng kao son tix son grhup ka heue. Mai pa tok kla reem an pui yum aliah rheng mai pui pa deuk khankix kied lhat ka sigrien sigre mai yaogyaw ka Siyiex meung raoma heue. ¹⁴ Ceu pa kha rhawm ra ceu tix ceu hoik luan heue. Jhak heue, ceu pa kha rhawm loe ceu tix ceu tak khran hoek heue. ¹⁵ Kawncau Siyiex aliah kaux tix kaux phlu teettawng mai lih koe lox pa ting pa sinum ka daux raoma, pa ah nin, "Meung haktiex in hoik lih mawh meung Simiang ex, mai meung Khrit cie Nawh Cao, mai Nawh Cao tak sang giex kaing ku ju leeing ju leeing phan heue." ¹⁶ Kuad song tixnga pon kaux pa ngawm ka piang dang ngeung kix ka sivoe Siyiex, goh gup mai krub ka Siyiex, ¹⁷ ah nin, "Siyiex Cao pa ting sibrawm piang khawmuik, pa mawh yam in mai pa hoik mawh eue, ex yaogyaw bwanson Maix, mawh kheu hoik teei Maix siawp sibrawm pa ting Maix mai hoik giex kaing heue. ¹⁸ Ceu pui khankix hoik song rhawm song rhi mai krax song rhawm song rhi Maix hoik hoek heue. Mai bawg yam pa sang prawng sang ciyang ka pui pa hoik yum mai bawg yam pa sang tawx bwanson totaix ka siliex Maix cao jhai khankix mai ka pui pa singax singeh khankix mai ka kix pa lhat ka ceu kaux Maix, khawm pa iak pa ting khankix mai sonsang yuh laux ka kix, pa yuh laux ka haktiex khankix heue." ¹⁹ Paoh ka nyiex bwan Siyiex pa koe ka daux meung raoma mai pon ti yaox ka khui sijax mukheu Nawh Cao, ka daux nyiex bwan Nawh heue. Khaix an lih mawh pa tuh sah mai lox sikah mai lox pa sinum praix mai pa tok kla reem mai lih pre ting heue.

¹ Yaox mhai pa ting ka raoma tix ceu pa mawh bun tix kaux pa ceep ka singaix mai khix koe ka greem caong nawh mai koe mhok khri pa koe simuing kao ra mu ka piang kaing nawh heue. ² Bun an koe kaux mai riag kheu pa kha rhawm pa saux yha mai pa keh heue. ³ Yaox mhai pa tang tix ceu ka raoma mai jhak heue, koe siyawng ting pa raoh, pa koe kaing aliah mu mai rung kao mu mai ka piang kaing nawh khankix koe mhok khri aliah mu heue. ⁴ Sidax nawh reu ka simuing raoma loe son tix son mai taing kix ka piang haktiex heue. Siyawng an cung sivoe bun pa dex sang keh an, yuh ka mawx yam keh nawh kawn, nawh tak pon ti ih ka kawn pa keh bun an heue. ⁵ Nawh keh kawn simex mhaing, pa mawh kaw pa tak sang giex kaing ka ceu pui khawmuik ka khaox gix rhiem mai kliien kawn kiex haok hu ka Siyiex mai ka dang ngeung Nawh Cao heue. ⁶ Bun an to hu daux tiagtu, ka dee hoik cox Siyiex son kiex, yuh ka mawx sonsang kia ngien kiex tan been tix rheng mai ra yieh mai tigliah singaix heue. ⁷ Lih koe naing ka daux meung raoma. Mikkhelax mai kawncau Siyiex nawh khankix hu yuh naing ka siyawng an mai siyawng an mai kawncau nawh khankix yuh naing, ⁸ mai ang kix pex mai ang lai baox koe dee ot dee koe kix ka daux meung raoma heue. ⁹ Taing lih ka siyawng ting an, pa mawh siuing prim dix, kaw pa kok mawh phicaox mai satan, pa mawh cao pa pie lhen ka beu haktiex khawmuik heue. Hoik taing nawh lih ka piang haktiex mai kawncau nawh khankix kawx hoik taing lih tau mai nawh heue. ¹⁰ Aux mhong lox pa ting pa sinum ka daux meung raoma, pa ah nin, "Yam in uik hoek krax taoh mai sibrawm mai meung Siyiex ex mai sibrawm Khrit cie Nawh heue. Grawh grawng nawh, cao pa deuh phimap ka puxaik ex khankix, ka sivoe Siyiex ex ku ngaix, hoik taing lih heue. ¹¹ Kix hoik pex ka nawh kheu nham kawn yung mai kheu lox pa kham mhai rug kix heue. Kix ang lhawk ka ju tix, viang sidah yaox ti yum kawx heue. ¹² Mawh kheu nan, raoma khankix eue, gaux rhawm heue. Haktiex mai rawm sigrit sigra koe krax kha rhawm, mawh kheu phicaox hoik viex krax pa ting song rhawm song rhi mai lih hu ka pex, kheu hoik tawng nawh grawng koe tix bawg yam ceeix khaing heue. ¹³ Yam yaox siyawng an grawng hoik taing nawh lih ka haktiex, nawh tuktiak tukte ka bun pa hoik keh kawn simex an heue. ¹⁴ Teei ti tawx pruik klang krih ting an ra khawn ka bun an, sonsang po hu kiex ka daux tiagtu, ka dee ot kiex, dee sang kia ngien ka kiex been tix bawg yam mai ra bawg yam mai tix plak bawg yam, khaing plakngai siyawng an heue. ¹⁵ Siyawng an prauk rawm lih khaing daux jheeh nawh, hawt khaix bun an, awm rawm klawng ting, yuh ka mawx sonsang kieh nawh rawm an sibloe kiex hu heue. ¹⁶ Haktiex teem ka bun an mai ang jheeh tix mai bleet ka rawm klawng ting an pa hoik prauk siyawng an lih khaing daux jheeh tix heue. ¹⁷ Siyawng an song rhawm song rhi ka bun an mai lih hu ti sang yuh naing ka ru bun an pa kawn deuk khankix, pa kawn priex ti hawt ka lox tawm jhawm krai Siyiex mai pa giex ka mhai ruk Yesux.

¹ Nawh cung ka piang pak mhaik rawm sigrit sigra heue. Mai aux yaox totiag tix mu lih khaing daux rawm sigrit sigra pa koe kaing aliah mu mai rung kao mu mai ka piang rung nawh khankix koe mhok khri kao mu mai ka piang kaing nawh khankix koe ceu kaux ceu pa salao ka Siyiex khankix heue. ² Totiag pa yaox aux an awm sivai simuing mai caong nawh awm caong krih mai jheeh nawh awm jheeh sivai sangsi heue. Siyawng an tawx sibrawm tix mai dang ngeung tix mai sibrawm giex kaing tix ka totiag an heue. ³ Aux yaox kaing nawh tix mu pa awm pa hoik pah yum ka mai hoik kieh rhoi khaix dee hoik pah nawh an moi heue. Pui haktiex khawmuik daox deng kah mai hawt khaix totiag an heue. ⁴ Kix krub ka siyawng an, mawh kheu hoik tawx nawh sibrawm giex kaing tix ka totiag an heue. Kix krub ka totiag an ah nin, "Mawh mawx pa awm ka totiag in? Mawh mawx pa chix yuh naing ka nawh?" ⁵ Hoik tawx jheeh ka nawh, pa ah ceu pa ting lhaong mai lox salao ka Siyiex khankix heue. Hoik tawx sibrawm tix giex kaing ka nawh been tixpon ra khix heue. ⁶ Nawh ang jheeh tix sonsang ah lox salao ka Siyiex,ti sang salao ka ceu kaux Nawh Cao mai ka nyiex gox bwan man Nawh Cao, pa mawh kix pa ot ka daux meung raoma heue. ⁷ Tawx akhwang ka nawh ti sang yuh naing ka pui pa singax singeh khankix mai ti sang pex kix heue. Hoik tawx sibrawm tix giex kaing ka piang ceu pui kuceu mai pui kuceu mai pui pa tang lox sikah kuceu mai pui meung ku meung, ka nawh heue. ⁸ Can pui pa ot ka piang haktiex khawmuik tak sang krub ka nawh, pa mawh can pa ang lai tiiem ti deuh ka ceu kaux kix tom yam jah ti kaw haktiex ka daux phuk lai pa im ju, cie kawn yung pa hoik pah yum heue. ⁹ Phan pui tix kaux kaux koe yhaok kieh nawh mhong heue. ¹⁰ Phan pui tix kaux kaux mawh pa hoik laung ka pui, nawh tak laig ka daux pa laung heue.Phan pui tix kaux kaux teei pui yum ka vaig tak lai teei nawh yum ka vaig heue. Mawh ka grawng in heue, pa pui pa singax singeh khankix gun yeung mai koe krax yum rhawm. ¹¹ Aux yaox totiag tang mu pa lih hoek khaing daux haktiex mai nawh koe rung ra mu pa awm rung kawn yung mai lox sikah nawh awm siyawng heue. ¹² Nawh shiao ka sibrawm pa giex kaing totiag phao ka an tix mu khawmuik, ka sivoe ngai nawh. Nawh yuh ti kieh haktiex mai kix pa ot ka daux haktiex khankix, krub ka totiag phao ka an tix mu, pa hoik kieh rhoi khaix dee hoik pah nawh moi heue. ¹³ Nawh yuh mhai pa daox am pa kied ting khankix tom sidah kieh nawh ngu lih khaing raoma ka piang haktiex ka sivoe ngai kawn pui heue. ¹⁴ Nawh pie lhen ka kix pa ot ka piang haktiex ka mhai pa daox am, pa hoik tawx tix kieh nawh yuh sivoe ngai totiag phao ka an mai nawh nhie kix pa ot ka piang haktiex khankix yuh riang grang totiag pa koe rhoi khaix dee hoik mug ka vaig mai pa im an heue. ¹⁵ Hoik tawx sibrawm ka nawh ti tawx ju ka riang grang totiag an, sonsang chix sikah riang grang totiag an mai kieh teei yum ka can kix pa ang krub ka riang grang totiag tix heue. ¹⁶ Ka khawmuik, can pa iak mai pa ting mai pa mi pa koe mai pa hot pa sibhawm mai pa ploi mai pa mawh siliex khankix, nawh kieh sau mhai ka taix khawn dawm kix, phan ang mawh nan ka dong re kix, ¹⁷ mai yuh ka mawx son ang pui tix kaux kawx sang pon teei ti tawx, phan ang mawh nan sang pon ti coh, lheu khaing kaw pa hoik koe mhai an, pa mawh ceu kaux totiag an, phan ang mawh nan nambad ceu kaux nawh heue. ¹⁸ Koe pingnya cuyi ka in heue. kaw pa koe krax tawng yung, kieh nawh simin ti yaox ka nambad totiag an awx. Grawh grawng nawh nambad an mawh nambad pui tix kaux heue. Nambad an mawh liah yieh mai tigliah liah (666) mu heue.

¹ Aux jhak mai yaox kawn Yung cung ka gawng Zion tau mai Nawh Cao koe pui pa hoik tiem ceu kaux Nawh mai ceu kaux Keeing Nawh Cao, piang dong re kix heue. ² Aux mhong lox khaing raoma, pa awm lox rawm tom nie mai awm lox sinum praix pa ting heue. Lox mhong aux an awm lox cao pa tah ting vawk khankix, yam tah kix ting vawk heue. ³ Kix rhax lai rhax pa khraox sivoe dang ngeung sivoe totiag pa im ju pon mu mai kuad song khankix mai pui tix kaux kawx ang chix pon gau lox rhax an lheu khaing kaux pa hoik liag khaing haktiex heue. ⁴ In mawh kix pa ang sax kieh tokaux tix seeing brai mai bun. Grawh grawng nawh kix singax awm bunkrih heue. In mawh kix pa hawt khaix kawn Yung ka can dee sang hu Nawh heue. In mawh kix pa hoik liag khaing daux kawn pui, sonsang mawh plix liang ka son Siyiex mai ka son kawn Yung an heue. ⁵ Ka daux jheeh kix ang lai yaox lox pie lhen, kix mawh pa loig pa ang koe dee ne heue. ⁶ Aux yaox kawncau Siyiex tang kaux tix kaux, pa pu ka sigreung raoma mai pa koe lox bwan gaux rhawm leeing ju, sonsang sidiex gau ka kix pa ot ka piang haktiex mai ka pui meung ku meung mai ka ceu pui kuceu mai ka pui pa tang lox sikah kuceu mai ka pui kuceu heue. ⁷ Nawh ah nin ka lox pa ting pa sinum, "Lhat graung ka Siyiex mai yaogyaw ka Nawh Cao, mawh kheu bawg yam nari pa prawng pa ciyang Nawh hoik hoek heue. Krub ka Nawh Cao pa hoik yuh raoma mai haktiex mai rawm sigrit sigra mai rawm keut khankix heue." ⁸ Kawncau Siyiex tang kaux ra kaux tix kaux hawt khaix ah nin, "Veng Babulon pa ting hoik grhup, hoik grhup heue. Veng Babulon pa hoik kieh ceu pui khawmuik nyaux ka rawm plix siiet pa song rhawm ceu pa lud vao nawh heue." ⁹ Kawncau Siyiex tang kaux loe kaux tix kaux hawt khaix kawncau Siyiex an kiex mai ah nin ka lox pa ting pa sinum, "Phan pui tix kaux kaux krub ka totiag an mai ka riang grang nawh mai rieb ti teei mhai ka dong re tix, phan ang mawh nan ka taix tix, ¹⁰ nawh tak yaox ti nyaux ka khawm rawm plix siiet ceu pa song rhawm song rhi Siyiex, pa ang klao tidtix ka daux kawk pa song rhawm song rhi Nawh Cao heue. Tak sang yuh tix kieh nawh kha rhawm ka ngu mai mhat, ka sivoe kawncau Siyiex pa singax singeh khankix mai ka sivoe kawn Yung an heue. ¹¹ Taox ngu ceu pa kha rhawm kix haok hu ku ju leeing ju. Kix pa krub ka totiag an mai ka riang grang nawh mai can pa hoik rieb ti teei ka mhai ceu kaux nawh khankix, pon ang lai yaox ti laux lee ku ngaix heue. ¹² Mawh ka grawng in, pui pa singax singeh khankix gun yeung, pa mawh kix pa priex tix hawt ka lox tawm jhawm krai Siyiex mai ka krax yum rhawm Yesux heue. ¹³ Aux mhong lox khaing raoma pa ah nin, "Tiiem yuh nin, Jah tom yam in, kix pa yum ka daux Simiang ting bwanson heue. Mawh heue, Khwan Cao ah nan, yuh ka mawx sonsang pon kix ti laux lee khaing pa nyhap pa mao kix mai kaing ceu pa yuh kix hawt tau mai kix heue." ¹⁴ Aux jhak mai yaox, paiawm pa paing tix mu ka piang paiawm an, aux yaox pa ngawm tix kaux, pa awm Kawn kawn pui mai koe mhok khri ka piang kaing Nawh mai ka daux taix Nawh koe sivawg pa lawm tix mag heue. ¹⁵ Kawncau Siyiex tang kaux tix kaux lih hoek khaing daux nyiex bwan mai kok yo lox pa ting sinum ka Kaw pa ngawm ka piang paiawm an ah nin, "Ploi sivawg Maix mai vawg heue. Mawh kheu bawg yam nari pa vawg hoik hoek, mawh kheu hoik kaux plix ka piang haktiex heue." ¹⁶ Kaw pa ngawm ka piang paiawm an taing sivawg tix ka piang haktiex mai vawg nghox ka haktiex heue. ¹⁷ Kawncau Siyiex tang kaux tix kaux lih hoek khaing daux nyiex bwan pa koe ka daux meung raoma an, nawh kawx koe sivawg pa lawm tix mag heue. ¹⁸ Kawncau Siyiex tang kaux tix kaux lih hoek khaing khu dee tan pa mawh kaw pa koe sibrawm ka piang ngu mai nawh kok yo lox pa ting pa sinum ah nin ka nawh, "Ploi sivawg pa lawm maix mai khrawm ka sigleem nhu plix siiet ka haktiex, grawh grawng nawh plix siiet nawh khankix hoik sidaing teem heue." ¹⁹ Kawncau Siyiex an taing sivawg nawh ka haktiex mai khrawm ka plix siiet, ka haktiex mai taing sau ka daux dee biiet ti teei rawm plix siiet, pa mawh dee biiet pa ting, krax song rhawm song rhi Siyiex heue. ²⁰ Dig ka dee biiet ti teei rawm plix siiet an, ka plak praix veng mai nham lih khaing dee biiet ti teei rawm plix siiet an, tom hoek ka maox keu brung khankix, pa hoek been glang ra yieh lag heue.

¹ Aux yaox mhai ka daux raoma tang ceu tix ceu, pa ting lhaong mai pa koe dee daox deng ka, pa mawh kawncau Siyiex aliah kaux, pa koe preng aliah ceu, pa mawh pa ghoik khaix khankix, mawh kheu krax song rhawm song rhi Siyiex hoik grum ka daux khankix heue. ² Aux yaox ceu pa awm rawm sigrit sigra siliak pa hoik klao tau mai ngu mai ka kix pa hoik pex mai luan khaing totiag an mai khaing riang grang nawh mai khaing nambad ceu kaux nawh cung dex rawm sigrit sigra siliak an mai kix koe ting vawk Siyiex heue. ³ Kix rhax ka lox rhax Mose, pa mawh siliex Siyiex mai ka lox rhax kawn Yung pa ah nin, "Siyiex cao pa ting sibrawm piang Khawmuik eue, kaing Maix mawh pa ting lhaong mai pa koe dee daox deng ka Simiang leeing ju, krax pa yuh Maix khankix mawh pa rahsee mai pa mawh meh heue. ⁴ Simiang eue, mawh mawx pa tak ang lhat mai ang yaogyaw ka ceu kaux Maix, mawh kheu mawh ngie Maix khaing pa singax singeh heue. Mawh kheu ceu pui khawmuik tak sang hoek mai krub ka sivoe Maix heue. Mawh kheu jhawm pa rahsee yuh Maix hoik sidawng heue." ⁵ Khaix ceu in khankix aux yaox pa hoik paoh ka nyiex bwan, pa mawh nyiex gox bwan man mhai ruk, ka daux meung raoma heue. ⁶ Kawncau Siyiex aliah kaux pa koe preng aliah ceu an, lih hoek khaing daux nyiex bwan an heue. Kix ceep ka simaox pa singax mai pa pruh mai hoik nhawt maox rawd khri ka see piang teeih naok kix heue. ⁷ Ka daux totiag pa im ju pon mu an tix mu teei klong khri aliah mu pa naog ka pa song rhawm song rhi Siyiex, pa im ju ku ju leeing ju mai tawx ka kawncau Siyiex aliah kaux an khankix heue. ⁸ Nyiex bwan an naog ka taox ngu khaing min pakngai Siyiex mai khaing sibrawm Nawh Cao heue. Ang pon ti laig ka daux nyiex bwan an tix kaux kawx, tom sidah hoik hoik preng aliah ceu cie kawncau Siyiex aliah kaux an khankix heue.

¹ Aux mhong lox pa ting pa sinum khaing daux nyiex bwan pa ah nin ka kawncau Siyiex aliah kaux an, "Pex hu mai prauk klong pa song rhawm song rhi Siyiex aliah mu lih ka piang haktiex awx." ² Kawncau Siyiex phao ka tix kaux, hu mai prauk klong cie tix lih ka piang haktiex mai lih mawh muad yia pa lang teung saux ka piang pui khankix pa koe mhai totiag an mai pa krub ka riang grang nawh heue. ³ Ra kaux tix kaux prauk klong cie tix lih ka daux rawm sigrit sigra mai rawm an lih mawh nham pa awm nham pui pa hoik yum heue. Can ceu pa im ju pa koe ka daux rawm sigrit sigra yum khawmuik heue. ⁴ Loe kaux tix kaux prauk klong cie tix lih ka daux rawm klawng ting mai ka rawm keut khankix mai rawm khankix lih mawh nham heue. ⁵ Aux mhong kawncau Siyiex rawm an khankix ah nin, "Kaw Pa Singax Singeh, pa mawh yam in mai pa hoik mawh eue, Maix mawh pa rahsee, mawh kheu hoik prawng ca Maix yuh nin heue. ⁶ Grawh grawng nawh, kix hoik prauk lih ka nham pui pa singax singeh mai cao jhai khankix mai Maix hoik tawx kix nyaux nham. Kix mawh pa keung tix kham pa yuh nan heue." ⁷ Aux mhong khu dee tan ah nin, "Mawh heue, Siyiex, cao pa ting sibrawm piang khawmuik eue, ceu pa prawng ciyang Maix mawh pa mawh meh mai pa rahsee heue." ⁸ Pon kaux tix kaux prauk klong cie tix lih ka piang singaix mai tawx sibrawm ka singaix sonsang hax pui khankix ka ngu heue. ⁹ Pui khankix yaox ti kham pa hax ka ceu pa kied hax sigrien sigre mai kix salao ka ceu kaux Siyiex pa koe sibrawm ka piang preng in khankix mai ang kix doh keud ka phimap tix sonsang yaogyaw ka Nawh Cao heue. ¹⁰ Phwan kaux tix kaux prauk klong cie tix lih ka piang dang ngeung totiag an mai meung nawh lih mawh pa faik heue. Kheu kied saux kix, kix deeh kiied ka dak tix tiru heue. ¹¹ Kix salao ka Siyiex raoma, mawh kheu pa saux kix mai muad pa yia mai ang kix doh keud ka phimap jhawm pa yuh tix heue. ¹² Liah kaux tix kaux prauk klong cie tix lih ka daux rawm klawng ting pa mawh rawm klawng ting Yufrethix mai rawm ka daux rawm klawng ting an hit kroh, yuh ka mawx sonsang khre rien tix, son simiang pa sang hoek khaing plak lih singaix khankix heue. ¹³ Aux yaox khwan pa seeing brai loe mu, pa awm khiiet, lih khaing daux jheeh siyawng an mai khaing daux jheeh totiag an mai khaing daux jheeh cao jhai pa ang mawh ang meh an heue. ¹⁴ Grawh grawng nawh kix mawh khwan phicaox khankix, pa yuh mhai pa daox am pa hu ka can simiang haktiex khawmuik, sonsang kraix khrawm kix ti sang yuh naing ka daux singaix pa ting lhaong Siyiex, cao pa ting sibrawm piang khawmuik. ¹⁵ Jhak heue, Aux sang hoek awm pui briex kaw pa pau ti jhak mai pa priex ka kraung ceep tix ting bwanson, phan ang mawh nan, ha nawh kox yaox ti hu kakaong mai pui yaox ka pa kaig pa tua nawh heue. ¹⁶ Kix kraix khrawm kix tau ka daux dee kok lox Hebrie mawh Amagedon heue. ¹⁷ Aliah kaux tix kaux prauk klong cie tix lih ka piang bhawm mai lox pa ting pa sinum lih khaing daux nyiex bwan khaing dang ngeung ah nin, "Hoik hoik heue." ¹⁸ Lih mawh pa tuh sah mai lox sikah mai lox pa sinum praix mai lih tok kla reem ting, pa mawh pa tok kla reem pa kied ting sigrien sigre, pa ang sax tok pa awm an, khaix hoik koe kawn pui piang haktiex heue. ¹⁹ Gwieh ka veng ting an mawh loe pak, mai veng cie ceu pui khankix grhup heue. Doh keud ka veng Babulon pa ting ka plak sivoe Simiang Siyiex sonsang tawx kawk rawm plix siiet pa song rhawm song rhi Nawh Cao ka veng an, pa kied lang teung nu heue. ²⁰ Klawn tiex ku klawn to hu mai gawng khankix kawx ang lai baox yaox ka heue. ²¹ Lih pre pa ting mu khaing daux raoma ka piang kawn pui, jhawm cien tix mu pre dex koe kao phwan coi heue. Kawn pui khankix salao ka Siyiex kheu preng pre an. Mawh keu preng pre an mawh pa kied ting sigrien sigre heue.

¹ Ka daux kawncau Siyiex aliah kaux, pa koe klong aliah mu an tix kaux hoek mai sikah mai aux, ah nin, "Hoek tin mai aux tak jhi maix yaox krax pa prawng pa ciyang ka bun pa coh kaux pa ting pa ngawm piang rawm tom nie, ² pa mawh bun pa kieh simiang haktiex khankix lud vao mai nawh, mai hoik kieh kix pa ot ka piang haktiex khankix yoek ka plai rawm plix siiet ceu pa lud vao nawh heue. ³ Nawh viex aux hu ka daux Khwan Cao ka daux tiagtu. Aux yaox bun tix kaux pa ngawm ka piang totiag pa raoh tix mu, pa naog ceu kaux ceu pa salao ka Siyiex mai pa koe kaing aliah mu mai rung kao mu heue. ⁴ Bun an ceep kraung pa raoh klai mai pa raoh rawt mai nawh jawg ka khao kraung khri mai siang simaox pa ngawh mai siang pa koe daux jawx khankix mai nawh giex kawk khri daux taix tix pa naog mai ceu pa greeing, pa mawh ceu pa seeing brai pa dex mai pa lud vao nawh heue. ⁵ Hoik tiiem ceu kaux ka piang dong re nawh yuh nin, "Pa raux pa mox veng Babulon pa ting, pa mawh miex bun coh kaux khankix, mai miex ceu pa greeing cie haktiex." ⁶ Aux yaox bun an yoek ka nham pui pa singax singeh khankix mai ka nham pui pa kham mhai sakse son Yesux heue. Yam yaox aux nawh, aux daox deng kah, ka krax pa kied daox deng sigrien sigre heue. ⁷ Kawncau Siyiex an ah nin ka aux, "Maix lai daox deng ka yuh ka mawx? Aux tak sang krai ka maix grawh grawng ceu pa raux pa mox, pa dex mai bun an mai pa dex mai totiag an, pa koe kaing aliah mu mai rung kao mu, pa pux ka bun an heue. ⁸ Totiag pa hoik yaox maix an, hoik mawh, mai ang lai mawh, dex sang lih hoek khaing daux, daux pa ang koe dee die mai hu ka daux pa laux pa laux leeing heue. Pui pa ot ka piang haktiex khankix, pa mawh kix pa ang lai tiiem ti deuh ka ceu kaux kix, tom yam jah ti kaw haktiex, ka daux phuk lai pa im ju, yam yaox kix ka totiag an pa hoik mawh mai pa ang lai mawh mai pa tak sang hoek khaix, tak sang daox deng ka heue. ⁹ In mawh rhawm dee chix keud, pa koe pingnya cuyi heue. Kaing aliah mu an mawh gawng aliah mu pa ngawm bun an kah, ¹⁰ mai kix mawh simiang aliah kaux heue. Kix phwan kaux hoik rau mai kawn koe tix kaux mai ang nyang bax hoek tix kaux. Yam hoek nawh, nawh tak lai ot tivud ticu heue. ¹¹ Totiag pa hoik mawh mai pa ang lai mawh an, tokaux nawh kawx, mawh simiang daix kaux tix kaux mai mawh pa neuex mai simiang aliah kaux an heue. Nawh hu ka daux dee laux dee leeing heue. ¹² Rung kao mu pa hoik yaox maix an, mawh simiang kao kaux, pa ang nyang bax pon meung, viang mawh nan kix pon sibrawm giex kaing awm simiang tau mai totiag an, been tix nari heue. ¹³ Inkix koe rhawm tix mu khaing mai kix tawx sibrawm kix mai sibrawm giex kaing kix ka totiag an heue. ¹⁴ Inkix tak sang yuh naing ka kawn Yung mai kawn Yung tak sang pex ka kix, mawh kheu mawh Nawh Cao piang cao, mai Simiang piang simiang heue. Kix pa ot tau mai Nawh Cao, mawh pa hoik kok mai pa hoik laug ti teei mai pa kaux sijax heue." ¹⁵ Nawh baox ah nin ka aux, "Rawm pa hoik yaox maix khankix dee ngawm bun coh kaux an, mawh pui kuceu mai cub pui hun khankix mai pui meung ku meung mai pui pa tang lox sikah kuceu heue. ¹⁶ Rung kao mu pa hoik yaox maix an mai totiag an, khankix tak koeng ka bun coh kaux an mai yuh nawh yi pak lawg mai kakaong mai tak sang ih ka nex nawh mai gleeing nawh ka ngu, tom ngua heue. ¹⁷ Grawh grawng nawh Siyiex hoik sau jhawm keud ka daux rhawm rhi kix ti sang yuh hawt alo rhawm Nawh mai ti sang koe kix rhawm tix mu khaing mai ti sang tawx meung kix ka totiag an, tom sidah hoik grum mawh gumlox Siyiex khankix heue. ¹⁸ Bun pa hoik yaox maix an, mawh veng ting an pa giex kaing ka piang simiang haktiex khankix heue."

¹ Khaix ceu an khankix, aux yaox kawncau Siyiex tang kaux tix kaux lih hoek khaing daux raoma, pa koe sibrawm pa ting mai haktiex riang kheu min plakngai nawh heue. ² Nawh kok lox pa ting pa sinum, ah nin, "Veng Babulon pa ting hoik grhup, maix hoik grhup. Mai hoik lih mawh dee ot phicaox khankix mai dee laung khwan pa ang singax kuceu mai dee laung sim pa seeing brai mai pa khaw tix koeng ka kuceu heue. ³ Grawh grawng nawh ceu pui khawmuik hoik goh, kheu plai plix siiet ceu pa lud vao nawh heue. Simiang haktiex khankix hoik lud vao mai nawh, cao lai geu haktiex khankix hoik mi koe, kheu sibrawm ceu pa cha nie luan nawh heue." ⁴ Aux mhong lox khaing raoma pa ah nin, "Pui Aux khankix eue, lih hu khaing daux nawh, yuh ka mawx son ang pex yuh paox pie tau mai phimap nawh khankix, son ang pex pon ka preng nawh khankix heue. ⁵ Grawh grawng nawh phimap nawh khankix hoik hoek tom ka raoma, Siyiex hoik doh keud ka ceu pa lud nawh heue. ⁶ Deeh viied ka nawh awm pa hoik tawx nawh mai deeh tawx ka nawh ra son, ka son ceu pa hoik yuh nawh heue. Ka daux kawk pa hoik klao nawh, klao ka son nawh ra son heue. ⁷ Nawh hoik yaw tokaux tix, hoik cha nie luan yuh mai ah nin, tawx krax tug kha mai krax khi rhawm daux aux awx awx. Nawh hoik ah nin ka daux rhawm tix, aux ngawm ti mawh laux simiang, ang aux mawh miexmai mai aux ang doh chix yaox krax khi rhawm heue. ⁸ Mawh kheu nan ka daux tix ngaix neh, preng ceu in khankix tak hoek ka piang nawh, pa mawh krax yum mai pa khi rhawm mai pa sibhawm mai tak sang gleeing nawh ka ngu paklawg heue. Grawh grawng nawh Siyiex, pa prawng pa ciyang ka nawh ting riang ting rao heue. ⁹ Simiang haktiex khankix pa hoik lud vao mai pa hoik cha nie luan ot mai nawh, tak sang yiiem grai mai yiiem riag yo son nawh, yam jhak kix ka taox pa gleeing nawh. ¹⁰ Kix tak sang cung dee singai kheu lhat ka krax tug kha nawh ah nin, Eue, eue, veng Babulon pa ting, veng pa ting riang rao eue, ka daux dom tix nari neh, krax prawng ciyang ka maix hoik hoek heue. ¹¹ Cao lai geu haktiex khankix, tak yiiem grai mai khi rhawm son nawh, mawh kheu pui tix kaux kawx ang baox liag kraung khrai kix khaix. ¹² Pa mawh kraung khrai, khri mai mau mai siang simaox pa ngawh mai siang pa koe ka daux jawx mai man rhi pa mhawm mai man raoh klai mai man pre mai man raoh rawt mai khaox pa sioe baux kuceu mai kraung nga sang kuceu mai kraung khaox pa ngawh kuceu mai kraung tawng lheung mai kraung rhiem, kraung simaox paing, ¹³ khaox caihung, amomum ceu siging mai ceu nyawng bhawng, sidah bhawng mai lawpan, rawm plix siiet, rawm bee, mawk gaox nghox ca, mawie, yung, brung, ling brung, siliex mai ju kawn pui khankix heue. ¹⁴ Plix pa hoik ghoing rhawm maix ka khankix hoik grai hu khaing maix, kraung ceu pa mhawm mai ceu pa mhawm grang khawmuik hoik grai khaing maix mai kawn pui tak ang lai baox deeh yaox khankix tix bawg kawx heue. ¹⁵ Cao pa yuh laig geu ceu in khankix, pa hoik mi hoik koe kheu nawh, tak sang cung dee singai kheu lhat ka krax tug kha nawh mai yiiem grai mai khi rhawm tix, ¹⁶ ah nin, "Eue, eue, veng ting eue, pa hoik ceep kraung man rhi pa mhawm mai kraung raoh klai mai kraung raoh rawt mai pa jawg ka khaox kraung khri mai siang simaox pa ngawh mai siang pa koe daux jawx khankix, ¹⁷ ka daux dom tix nari neh, sinngao pa ting nie ding nie dod hoik yuh laux pak lawg heue. Cao giex kaing reu ku kaux mai can pui pa brug reu hu tix dahdah mai pui yuh kaing piang reu khankix mai can kix pa yuh ti ih kaing piang rawm sigrit sigra khawmuik cung dee singai, ¹⁸ mai yam jhak kix ka taox ngu pa gleeing nawh, kix kok yo ah nin, veng pa yuh ka mawx, awm ka veng ting an?" ¹⁹ Kix ruat phawng tiex ka piang kaing tix mai yiiem riag yo, khi rhawm ti ah nin, "Eue, eue, veng ting eue, dee can pui pa koe reu ka piang rawm sigrit sigra khawmuik, hoik pon ti mi koe ka pa ting cai nawh mau, ka daux dom tix nari neh, hoik yuh nawh laux pak lawg heue. ²⁰ Raoma mai pex pui pa singax mai kawncau pa ting, mai cao jhai khankix eue, gaux rhawm rawb nawh heue. Kheu Siyiex hoik pawk bix pex ka nawh heue." ²¹ Kawncau Siyiex pa ting riang tix kaux teei ti yaog simaox tix lon pa awm simaox mhaw pa ting mai taing sau ka daux rawm sigrit sigra, ah nin, "Awm an ka veng ting Babulon kawx, tak sang sau riang ti taing nawh lih mai pon ang lai yaox nawh khaix heue. ²² Lox pui pa tah ting mai pui pa ah lox leng lox klao mai pui pa phlu pi lawk leh mai pui pa phlu teettawng khankix, tak ang lai pon ti mhong ka daux maix khaix heue. Pui pa chix yuh khaix taix, khaix taix pa yuh ka mawx ang ah, tak ang lai pon ti yaox ka daux maix khaix heue. Lox pa krid mhaw, tak ang lai pon ti mhong ka daux maix khaix heue. ²³ Riang kawk ngu, tak ang lai pon ti jhan ka daux maix khaix heue. Lox bun krih, sinaw, cao pa yuh kapaox, tak ang lai mhong ka daux maix khaix, grawh grawng nawh cao pa yuh lai geu khankix, hoik mawh pui ting haktiex mai ku meung heue. Hoik pie lhen ka ceu pui khawmuik, ka simeed pa yuh maix heue. ²⁴ Hoik yaox nham cao jhai khankix mai nham pui pa singax singeh khankix mai nham can pui pa hoik pah yum ka piang haktiex khawmuik ka daux maix heue."

¹ Khaix ceu an khankix aux mhong awm mawh lox cub pui hun, pa ting pa sinum, ka daux meung raoma pa ah nin, "Haleluya! Krax taoh mai min pakngai mai sibrawm, mawh cie Siyiex ex heue. ² Pa mawh meh mai pa rahsee mawh krax prawng Nawh Cao heue. Kheu Nawh Cao hoik prawng ka bun ting coh kaux an, pa hoik kieh haktiex seeing brai ka ceu pa lud vao nawh, mai hoik pawk bix nham siliex Nawh khankix, pa lih ka tawm taix nawh heue." ³ Kix baox ah, "Haleluya!" Taox ngu nawh haok hu ku ju leeing ju heue. ⁴ Kuad song tixnga pon kaux an mai totiag pa im ju pon mu an, goh gup mai krub ka Siyiex pa ngawm ka piang dang ngeung, ah nin, "Amen. Haleluya." ⁵ Lox lih hoek khaing dang ngeung, pa ah nin. "Can pex pa mawh siliex Nawh khankix mai pex pa lhat ka Nawh Cao khawm pa iak pa ting khankix eue, yaogyaw ka Siyiex ex awx." ⁶ Aux mhong awm pa mawh lox cub pui haoh hun mai awm lox luah rawm tom nie mai awm lox pa kied ting sinum praix pa ah nin, "Haleluya! Mawh kheu Siyiex ex hoik giex kaing, cao pa ting sibrawm piang khawmuik heue. ⁷ Kieh ex haing hia mai nied ti gaux rhawm mai tawx min plakngai ka Nawh Cao, mawh kheu hoik hoek bawg yam pa sang teei kawn Yung moeng mai moeng Nawh hoik jawg hoik khre tokaux tix heue. ⁸ Hoik tawx nawh ceep kraung man rhi pa mhawm, pa pruh mai pa singax singeh, ka tokaux tix. Man rhi pa mhawm an kienie, mawh ceu pa rahsee pa hoik yuh pui pa singax singeh khankix heue." ⁹ Nawh ah nin ka aux, tiiem yuh nin, "Kix pa hoik ghaok ka priex bo kapaox kawn Yung, ting bwanson heue." Nawh baox ah nin ka aux, "Lox inkix mawh lox Siyiex tete heue." ¹⁰ Aux goh gup ka sivoe caong nawh mai krub ka nawh heue. Nawh baox ah nin ka aux, "Maix paw vi yuh nan, Aux mawh paox siliex tau mai maix, mai puxaik khankix pa giex mhai rug Yesux heue. Krub ka Siyiex awx. Grawh grawng nawh mhai rug Yesux mawh rhawm khwan, mawh num ka pa krai lox jhai khankix heue." ¹¹ Aux yaox hoik baoh raoma.Jhak heue, lih bleeh brung paing tix mu mai Kaw pa ngawm piang brung an, kok ceu kaux Nawh mawh, "Pa kaux sijax mai pa mawh pa meh." Nawh prawng ca mai yuh naing ka daux pa rahsee heue. ¹² Ngai Nawh mawh rao ngu mai ka piang kaing Nawh koe mhok khri tom nie heue. Nawh koe ceu kaux pa hoik tiiem ti deuh, pa ang pui tawng tix kaux kawx lheu khaing tokaux Nawh heue. ¹³ Nawh ceep kraung pa hoik cub ti ka daux nham mai kok ceu kaux Nawh mawh, "Gumlox Siyiex heue." ¹⁴ Kru naing pa koe ka daux meung raoma khankix, brug brung paing mai ceep kraung man rhi pa mhawm, pa paing mai pa singax mai hawt khaix Nawh heue. ¹⁵ Khaing daux jheeh Nawh lih vaig lawm tix kre, sonsang mug ka ceu pui khankix kah Nawh tak sang kwang sang giex kaing kix ka khaox gix rhiem heue. Nawh dig ka dee biiet ti teei rawm plix siiet ceu pa song rhawm song rhi Siyiex, pa mawh Cao pa ting sibrawm piang khawmuik heue. ¹⁶ Nawh koe ceu kaux pa hoik tiiem ka Piang kraung ceep Nawh mai ka piang ba Nawh yuh nin, Simiang piang simiang, mai Cao piang cao. ¹⁷ Aux yaox kawncau Siyiex tix kaux cung ka daux singaix mai nawh kok yo lox sinum ah nin ka can sim pa pu sigreung raoma khawmuik, "Hoek mai krawk khrawm paox tix ka priex bo ting Siyiex. ¹⁸ Yuh ka mawx sonsang yaox pex ti ih nex simiang khankix mai nex cao giex kaing naing khankix mai nex pui pa ting riang khankix mai nex brung khankix mai nex cao pa brug ka brung khankix mai nex kawn pui khawmuik, khawm pui ploi mai pui pa mawh siliex mai pa iak mai pa ting khankix heue." ¹⁹ Aux yaox totiag an mai simiang khankix mai kru naing kix, pa hoik krawk khrawm paox tix sonsang yuh naing ka Kaw pa ngawm ka piang brung an mai ka kru naing Nawh heue. ²⁰ Giex ka totiag an mai ka khawm cao jhai pa ang mawh ang meh an tau mai nawh, pa hoik yuh mhai pa daox am ka sivoe nawh mai pa hoik teei mhai an kix tix pie lhen ka kix pa hoik pon mhai totiag an mai ka kix pa hoik krub ka riang grang nawh heue. Taing im kiex khawm ra ka daux nhawng ngu pa gleeing ka mhat heue. ²¹ Teei can pa deuk khankix yum ka vaig kaw pa ngawm ka piang brung an, pa mawh vaig pa lih khaing daux jheeh Nawh mai sim an khawmuik hoik sak ka nex kix heue.

¹ Aux yaox kawncau Siyiex lih hoek khaing daux raoma tix kaux, pa koe jiak saw daux pa ang koe dee die an mai daux taix nawh koe ceng pa ting tix nyaing heue. ² Nawh giex ka siyawng an, pa mawh siuing prim dix, pa mawh phicaox mai satan mai phyawk nawh son been tix rheng num, ³ mai taing nawh sau ka daux daux pa ang koe dee die an mai nyeep ka moing daux an mai tawk cum ka piang moing daux nawh an, yuh ka mawx son ang nawh lai baox pie ka ceu pui khankix khaix, tom hoik sidah tix rheng num an heue. Khaix an tak sang ploi nawh tivud ticu heue. ⁴ Aux yaox dang ngeung khankix mai ka kix pa ngawm ka piang dang ngeung an khankix mai hoik tawx akhwang tix prawng ca ka kix heue. Aux yaox ka ju kix pa hoik yaox ti kham pa kid kaing kix, son mhai ruk Yesux mai son gumlox Siyiex, pa mawh kix pa ang krub ka totiag an mai ka riang grang nawh mai pa ang rieb ti kieh sau mhai ka dong re kix mai ka taix kix heue. Kix im mai giex kaing tau mai Cao Khrit been tix rheng num heue. ⁵ Pui pa hoik yum pa deuk khankix, ang lai im tom hoik sidah tix rheng num an heue. In mawh pa deeh kaoh im phao ka tix bawg heue. ⁶ Kaw pa pon ti neuex ka daux pa deeh kaoh im phao ka an tix bawg koe bwanson mai singax heue. Ka piang inkix krax yum ra bawg tix bawg ang lai koe sibrawm tidtix, viang mawh nan kix tak sang mawh cao giex kaing li Siyiex mai Cao Khrit mai kix tak sang giex kaing tau mai Nawh Cao been tix rheng num heue. ⁷ Khaix hoik sidah tix rheng num an, tak sang ploi Satan lih khaing daux dee laung nawh, ⁸ mai tak sang lih hu sonsang pie lhen ka pui pa ot ka daog haktiex pon daog mai nawh tak khrawm kix tau sonsang yuh naing Gawgax mai Magawgax, kix koe pon gun awm mhaik rawm sigrit sigra heue. ⁹ Kix haok hu ka plak vieh haktiex khawmuik mai rob ka bang dee ot pui pa singax singeh khankix mai veng pa moh an mai ngu lih khaing raoma mai gleeing ti tik kix heue. ¹⁰ Phicaox pa hoik pie lhen ka kix kawx teei ti taing sau ka daux nhawng ngu pa gleeing ka mhat an, dee koe khawm totiag mai cao jhai pa ang mawh ang meh an heue. Tak sang kieh kix tug kha rhawm ku ngaix ku ju leeing ju heue. ¹¹ Aux yaox dang ngeung pa ting pa paing tix mu mai ka Kaw pa ngawm ka piang dang ngeung an. Haktiex mai raoma to hu khaing pakngai Nawh mai pon ang yaox dee ot son kix heue. ¹² Aux yaox pui pa hoik yum, khawm pa iak pa ting, cung ka sivoe dang ngeung an heue. Paoh ka phuk lai khankix mai baox paoh ka phuk lai tang pheen tix pheen, pa mawh phuk lai pa im ju heue. Prawng ca ka pui pa hoik yum khankix khaing daux ceu pa hoik tiiem ti deuh ka daux phuk lai khankix, awm pa khaw mai ceu pa hoik tang yuh kix heue. ¹³ Rawm sigrit sigra deeh tawx pong pui pa hoik yum pa koe ka daux nawh heue. Pa yum mai meung yum kawx deeh tawx pong pui pa hoik yum pa koe ka daux kiex heue. Prawng ca ka kix kaux pui mawx kaux pui an, awm pa khaw mai ceu pa hoik tang yuh kix heue. ¹⁴ Teei ti taing sau pa yum mai meung yum ka daux nhawng ngu heue. In mawh pa yum ra bawg tix bawg, pa mawh nhawng ngu heue. ¹⁵ Phan yaox pui tix kaux kaux pa ang lai tiiem ti deuh ka daux phuk lai pa im ju an, teei ti taing nawh sau daux nhawng ngu an heue.

¹ Aux yaox ka raoma pa khraox mai ka haktiex pa khraox, grawh grawng nawh raoma phao ka an mai haktiex phao ka an hoik grai hu heue. Rawm sigrit sigra ang baox lai koe heue. ² Aux yaox ka veng pa singax singeh, pa mawh veng Yerusaliem pa khraox, lih hoek khaing daux raoma khaing Siyiex, pa hoik cox khre tix awm bun pa sang koe mex, pa hoik jawg tix son mex nawh heue. ³ Aux mhong lox pa ting pa sinum pa lih khaing daux dang ngeung ah nin, "Jhak heue, nyiex gox bwan man Siyiex koe tau mai kawn pui mai Nawh Cao tak sang ot tau mai kix mai kix tak sang mawh pui cie Nawh khankix mai tokaux Siyiex tak sang ot tau mai kix mai mawh Siyiex kix heue. ⁴ Nawh Cao tak sang awt ti tik rawm ngai can pa koe khaing ngai kix heue. Krax yum tak ang lai baox koe khaix heue. Viang pa khi rhawm mai pa yiiem mai pa saux kawx tak ang baox lai koe khaix, mawh kheu ceu pa hoik sax mawh phao ka khankix hoik grai hu heue." ⁵ Kaw pa ngawm ka piang dang ngeung an ah nin, "Jhak heue, Aux yuh khawmuik mawh pa khraox heue."Nawh Cao baox ah nin, "Tiiem heue, mawh kheu gumlox in khankix mawh pa kaux sijax mai pa mawh meh heue." ⁶ Nawh Cao baox ah nin ka aux, "An khankix hoik lih mawh heue, Aux mawh Alaphax mai Omegax, pa mawh Pa Jah mai pa Sidah heue. Aux tak sang tawx giex rawm keut pa im ju ka kaw pa sang nyaux nie rawm heue. ⁷ Kaw pa pex, tak sang pon tix cie sin ceu in khankix heue. Aux tak sang mawh Siyiex nawh mai nawh tak sang mawh kawn Aux heue. ⁸ Viang mawh nan ka son pa lhat pa graung mai pa ang yum rhawm mai pa greeing mai pa mawh pa pah pui yum mai pa mawh pa lud vao mai pa mawh pa yuh simeed yuh sat mai pa mawh pa krub riang grang khankix mai can pa mawh pie lhen khawmuik, nyum cie kix tak mawh ka daux nhawng pa gleeing ka ngu mai mhat, pa mawh krax yum ra bawg tix bawg heue." ⁹ Ka daux kawncau Siyiex aliah kaux an, pa koe klong aliah mu pa naog ka preng pa ghoik khaix aliah ceu an, tix kaux hoek mai nawh sikah mai aux ah nin, "Hoek tin mai aux tak sang jhi maix yaox bun pa sang koe mex, pa mawh moeng kawn Yung heue." ¹⁰ Nawh viex aux hu ka daux Khwan Cao, ka gawng pa kied ting lhaong tix mu mai jhi aux yaox veng Yerusaliem pa singax singeh, lih hoek khaing daux raoma khaing Siyiex, ¹¹ pa koe min pakngai Siyiex mai pa riang nawh awm siang simaox pa kied ngawh, pa awm siang simaox pa toh riang kuceu, pa awm simaox plaung pa singaong, ¹² pa koe guh veng pa ting lhaong, pa koe siviex kao ra mu mai ka siviex an khankix koe kawncau Siyiex kao ra kaux mai ceu kaux pui Isarelax kao ra ceu kawx hoik tiiem ti deuh ka siviex an khankix heue. ¹³ Plak lih singaix koe siviex loe mu mai plak caong ma laong siviex loe mu mai plak caong ma seh siviex loe mu mai plak klip singaix siviex loe mu heue. ¹⁴ Guh veng an koe jaong num kao ra mu mai ka piang jaong an khankix koe ceu kaux kawncau pa ting cie kawn Yung an kao ra kaux heue. ¹⁵ Kaw pa sikah mai aux koe gawng priem khri son diag, sonsang tiag ka veng an mai ka siviex nawh khankix mai ka guh veng nawh heue. ¹⁶ Veng an mawh pa jiet kreng khawm pon daog mai plak lang nawh sidu ting awm plak vieh heue. Kaw an teei gawng priem an mai tiag ka veng an mai koe pon rheng mai phwan yieh lag. Plak lang mai plak vieh mai plak lhaong veng an sidu heue. ¹⁷ Nawh tiag ka guh veng an mai koe tix yieh tixpon pon sawk, awm pa khaw mai sawk pa tiag pui, pa mawh sawk pa tiag kawncau Siyiex heue. ¹⁸ Guh veng nawh mawh pa hoik tham ka siang simaox, pa mawh siang simaox pa toh riang kuceu mai veng an mawh khri nawnaw, pa awm siliak pa singax heue. ¹⁹ Jaong num guh veng an khankix, hoik jawg bre ka can siang simaox pa ngawh kuceu khawmuik heue. Jaong num phao ka tix mu mawh siang simaox pa toh riang kuceu, ra mu tix mu mawh siang simaox pa klai singi pa toh riang awm khri tao tie, loe mu tix mu mawh siang simaox pa paing pau, pon mu tix mu mawh siang simaox pa klai sium, ²⁰ phwan mu tix mu mawh siang simaox pa bawd raoh bawd paing pau, liah mu tix mu mawh siang simaox pa raoh awm nham, aliah mu tix mu mawh siang simaox pa lheung awm khri, daix mu tix mu mawh siang simaox pa klai paing, dim mu tix mu mawh siang simaox pa raoh eem, kao mu tix mu mawh siang simaox pa klai lheung, kao tix mu tix mu mawh siang simaox pa klai singi, mai kao ra mu tix mu mawh sieang simaox pa raoh klai heue. ²¹ Siviex kao ra mu an, mawh siang pa koe ka daux jawx kao ra mu mai siviex mawx siviex an hoik tang mawh siang pa koe daux jawx kumu mai krax veng an mawh khri nawnaw, pa pon yaox phlat awm siliak heue. ²² Ang aux yaox nyiex bwan ka daux veng an, grawh grawng nawh Siyiex cao pa ting sibrawm piang khawmuik mai kawn Yung mawh nyiex bwan nawh heue. ²³ Veng an ang lai lo pa jhan riang singaix mai riang khix, grawh grawng nawh mawh min pakngai Siyiex pa kieh nawh riang mai kawn Yung mawh kawk ngu veng an heue. ²⁴ Ceu pui khawmuik tak sang hu ka greung pa riang veng an mai simiang haktiex khankix kawx tak sang viex min pakngai kix ka daux nawh heue. ²⁵ Siviex veng an khankix tak ang lai nyeep ti yam ponngaix, ponsawm kienie ang lai koe, ²⁶ mai kix tak sang viex min pakngai mai krax yungyi pui kuceu khankix ka daux veng an heue. ²⁷ Ceu pa seeing brai, phan ang mawh nan kaw pa yuh ceu pa greeing mai pa pie lhen ang pon ti laig tan, viang mawh nan mawh ngie kix pa hoik tiiem ka daux phuk lai pa im ju kawn Yung khaing pa pon ti laig kah heue.

¹ Nawh jhi aux yaox rawm klawng ting rawm pa im ju tix klawng, pa pruh awm simaox plaung, pa lih hoek khaing dang ngeung Siyiex mai kawn Yung, ² ka daux sigreung krax veng an heue. Ka khawm ra plak rawm klawng ting an, koe khaox pa im ju, pa plix, plix kao ceu ra, pa plix, plix nawh ku khix mai lhax khaox an mawh sonsang kieh ceu pui kuceu moi heue. ³ Ceu pa jhax lawg tak ang lai baox koe khaix, mai dang ngeung Siyiex mai kawn Yung tak koe ka daux veng an mai siliex Nawh khankix tak sang yuh kaing krub ka Nawh Cao heue. ⁴ Kix tak sang yaox ka pakngai Nawh mai ceu kaux Nawh tak sang koe ka dong re kix heue. ⁵ Tak ang lai baox koe pon sawm tan khaix. Kix tak ang lo pa riang kawk ngu, viang pa riang singaix kawx ang lo, grawh grawng nawh Siyiex tak tawx pa riang ka kixmai kix tak sang giex kaing ku ju leeing ju heue. ⁶ Nawh ah nin ka aux, "Gumlox in khankix mawh pa kaux sijax mai pa mawh meh mai Simiang pa mawh Siyiex khwan cao jhai khankix, hoik ploi kawncau Siyiex cie tix, sonsang jhi ceu pa dex sang hoek ti mawh khankix ka siliex Nawh khankix heue. ⁷ Jhak heue, Aux tak sang khran hoek laung laung, kaw pa priex ti hawt gumlox jhai phuk lai in khankix ting bwanson heue." ⁸ Aux Yohan mawh kaw pa hoik mhong mai hoik yaox ceu in khankix heue. Yam mhong yam yaox aux, aux goh gup mai krub sivoe caong kawncau Siyiex pa hoik jhi ceu an khankix ka aux heue. ⁹ Nawh ah nin ka aux, "Maix paw vi yuh nan. Aux mawh nang paox siliex tau mai maix mai tau mai puxaik pa mawh cao jhai khankix mai tau mai kix pa priex ti hawt gumlox phuk lai in khankix heue. Krub ka Siyiex heue." ¹⁰ Nawh baox ah nin ka aux, "Paw vi tawk cum ti nyeep ka gumlox jhai phuk lai in khankix, grawh grawng nawh bawg yam dex sang hoek heue. ¹¹ Kaw pa ang rahsee, kieh nawh kawn ca yuh pa ang rahsee awx. Kaw pa seeing brai, kieh nawh kawn ca yuh mawh pa seeing brai awx. Kaw pa rahsee, kieh nawh kawn ca yuh pa rahsee awx. Kaw pa singax singeh, kieh kawn ca yuh nawh mawh pa singax singeh awx. ¹² Jhak heue, Aux tak sang khran hoek laung laung mai Aux viex ngawh riang mai Aux, ti sang tawx ka kaux pui mawx kaux pui an awm pa khaw mai kaing pa yuh tix heue. ¹³ Aux mawh Alaphax mai Omegax, pa mawh pa liang phaox ka mai pa ghoik khaix mai pa mawh pa jah mai pa sidah heue. ¹⁴ Kix pa sigrhah kraung ceep tix mai pa koe akhwang ti hoek ka khaox pa im ju mai pon ti laig ka siviex khankix ka daux veng an, ting bwanson heue. ¹⁵ Ka plak praix koe sox khankix mai pui pa mawh cao yuh simeed yuh sat khankix mai pui pa lud vao khankix mai pui pa pah pui yum khankix mai pui pa krub riang grang khankix mai can pui ku kaux pa moh ka ceu pie lhen mai pa yuh ceu pie lhen heue. ¹⁶ "Aux Yesux, hoik ploi kawncau Siyiex tix hu sonsang kham mhai sakse ka maix grawh grawng ceu in khankix, son ceucao khankix heue. Aux mawh riah mai ru Davit, pa mawh Simuing Griang pa pruh heue." ¹⁷ "Khwan Cao mai bun pa sang koe mex ah, "Hoek heue, kaw pa mhong kieh nawh ah, hoek heue, kaw pa sang nyaux nie rawm, kieh nawh hoek heue. Kaw pa koe rhawm ti teei, kieh nawh teei giex ka rawm pa im ju heue." ¹⁸ Aux kham mhai sakse ka can pui ku kaux pa mhong gumlox jhai phuk lai in khankix, phan pui tix kaux kaux baox tiien lox ka khankix, Siyiex tak sang baox tiien preng ceu pa hoik tiiem ka daux phuk lai in khankix ka nawh heue. ¹⁹ Phan pui tix kaux kaux teei tix tieh lih khaing gumlox jhai phuk lai in khankix, Siyiex tak sang teei ti tik nyum son cie nawh pa dex mai khaox pa im ju mai pa singax singeh, pa hoik tiiem ka daux phuk lai in heue. ²⁰ Kaw pa kham mhai sakse grawh grawng ceu in khankix ah nin, "Mawh heue, Aux tak sang khran hoek laung laung."Amen. Simiang Yesux eue, hoek heue. ²¹ Kieh bwanson Simiang Yesux koe tau mai pui pa singax singeh khankix liak. Amen.