Psalm

Psalm

¹ Pui pa ang hu ka daux pa nyaw glaw pui caox caig khankix, pui pa ang cung ka daux krax pui yuh phimap khankix, pui pa ang ngawm tau mai pui pa yuh pa ang cee ang cag khankix, ² mai pui pa gaux rhawm ka daux beenli Siyiex mai pa keud ku singaix ku sawm khankix, koe bwanson heue. ³ Nawh awm khaox pa sum praok rawm klawng, yam hoek bawg yam, chix plix heue. Lhax nawh kawx, ang chix teue chix kroh mai kaing pa yuh nawh kuceu khawmuik kawx tak ting lhaong heue. ⁴ Pui pa caox caig khankix ang lai mawh nan, kix awm kam riex pa phlu bhaung hu heue. ⁵ Mawh kheu in pui pa caox caig khankix, ang kaux cong bawg yam prawng ca, mai pui yuh phimap khankix, ang pon ti ot dee ot cub pui pa rahsee khankix heue. ⁶ Grawh grawng nawh, Siyiex hoik tawng ka daux krax pui pa rahsee khankix. Daux krax pui pa caox caig khankix tak sang hoek krax laux leeing heue.

¹ Mawh kheu patix ceu kawn pui khankix, rien ti sang tieh feen ka Siyiex. Mawh kheu patix ceu pui in khankix, briex kum kawng paox tix, sonsang yuh kaing pa ang koe ceu koe cag yuh ka mawx? ² Simiang haktiex khankix mai simiang khankix ah nin, "Ex briex kum kawng paox tix sonsang tieh feen ka Siyiex mai phyawk ka Simiang Cao Khrit pa hoik laug Nawh Cao heue." ³ Ex tieh feen ka kix, sonsang luan ex khaing pa kwang kix ka ex mai kix ah nin, ex yieh ti tik ka pa kwang kix ka piang ex heue. ⁴ Siyiex ngawm ka piang dang ngeung tix ka piang raoma mai nyiah ka kix heue. Nawh Cao kieh kix kaig tua heue. ⁵ Nawh Cao sikah ka kix ka daux pa song rhawm mai Nawh kieh kix khi rhawm mai lhat graung ka pa kied song rhawm Nawh heue. ⁶ "Aux hoik deuh Simiang cie Aux, ka piang gawng Zion pa singax singeh cie Aux heue." ⁷ "Aux tak sang krai lox pa hoik krai Siyiex ka pui khankix, "Maix mawh kawn simex Aux, Aux hoik kieh maix keh daux in singaix heue. ⁸ Rawg ka Aux heue, Aux tak sang tawx ceu pui khawmuik ka maix mai haktiex khawmuik kawx mawh cie maix heue. ⁹ Maix teei khaox gix rhiem mai kwang ka piang kix mai maix tak sang pah kix phawng, awm pah ka aw tiex phawng heue." ¹⁰ Mawh kheu nan, simiang khankix eue, kieh pex koe pingnya, mai simiang haktiex khankix eue, nghiet ka lox pa sidiex Aux yam in awx. ¹¹ Yuh kaing jhaw Siyiex ka daux pa lhat graung mai gaux rhawm gaux rhi heue. ¹² Ngeet ka kawn Cao, phan ang yuh nan, Nawh tak song rhawm mai maix tak hoek krax laux leeing heue. Pui pa een rawm ka Nawh Cao pon bwanson heue.

¹ Siyiex eue, pui pa koeng ka aux kied nie heue, pui pa sang lah cha ka aux kawx, kied haoh hun heue. ² Pui khankix krai grawng aux ah nin, ka daux ceu kaux Siyiex, ang koe cao teem ka nawh, ³ viang mawh nan, Siyiex eue, Maix mawh Cao pa tiebtie aux mai min plakngai aux mai Cao pa vaoh kaing aux heue. ⁴ Sonsang teem ka aux, yam kok yo aux ka Siyiex, Nawh Cao ot ka piang gawng pa singax singeh mai nghiet ka lox aux mai deeh pawk ka lox aux heue. ⁵ Aux laig it mai deeh siduad mhawm mhawm, grawh grawng nawh, Siyiex priex ka aux heue. ⁶ Viang pui pa koeng ka aux, rob vung viang aux, kaing mheen kaing sien kawx, ang aux doh lhat. ⁷ Siyiex eue, kaoh heue, mai Siyiex aux eue, taoh ka aux heue. Nawh Cao simang sibax pui pa koeng ka aux khankix mai raig rhang pui pa caox khankix heue. ⁸ Krax taoh mawh pa kaoh khaing Siyiex, kieh bwanson Nawh Cao koe ka piang pui Nawh Cao khankix liak.

¹ Siyiex pa rahsee cao pa priex aux eue, deeh pawk ka lox pa kok yo aux liak. Yam koe krax pa khi rhawm aux, Maix mawh Cao pa teem aux heue. Yam in kawx, caux rhawm ka aux mai nghiet ka lox pa rawg aux bwan liak. ² Pui khankix eue, pex kawn sang nieb yuh min plakngai aux laux miex grheung? Pex kawn sang pie lhen yuh kaing pa ang rahsee mai pex kawn sang moh ti yuh ka ceu pa ang koe bwanson miex grheung? ³ Deuh pex tawng Siyiex hoik laug ti teei pui pa singax singeh ti deuh son Nawh Cao mai Siyiex nghiet ka lox aux yam kok yo aux ka Nawh heue. ⁴ Ka daux pa lhat graung, tik ka phimap pa yuh tix mai pex laig ka daux lawg dee it mai nghiet ka daux rhawm tix, ka grawng inkix mhawm mhawm heue. ⁵ Krax tan pa rahsee, deuh rhawm ka Siyiex heue. ⁶ Mawh kheu jao pui tom nie ah nin, "Mawh pui mawx pa sang jhi ex yaox ceu pa mhawm nhieh, Siyiex eue, kieh pa riang min plakngai Maix jhan riang ka piang ex liak." ⁷ Kieh rhawm aux nie lheu gaux rhawm khaing kix pa pon gaox, pon nghox mai pa pon plix siiet tom nie liak. ⁸ Yam it, aux laig it mhawm mhawm, grawh grawng nawh, Maix Siyiex tix kaux khaing, kieh aux luan khaing pa caox pa ang mhawm heue.

¹ Siyiex eue, nghiet ka lox aux mai lox pa ngia aux liak. ² Siyiex eue, mawh kheu rawg aux bwan ka Maix, nghiet ka lox pa kok yo aux liak. ³ Siyiex eue, yam ponngawb Maix mhong ka lox aux mai yam ponngawb Maix mhong lox rawg aux bwan ka daux krax krox jun sivoe ngai Maix heue. ⁴ Maix mawh Siyiex pa ang moh ka pui pa ang rahsee mai ang rieb ti teei ka pui pa caox heue. ⁵ Pui pa caox caig ang pon ti hoek dee ot Maix mai Maix koeng ka pui pa ang rahsee khawmuik heue. ⁶ Maix tak sang yuh laux ka pui pie lhen khankix, Siyiex seeing brai ka pui pa pah pui yum mai pui pie lhen khankix heue. ⁷ Phan mawh aux pon ti hoek daux nyiex Maix, kheu pon bwanson Maix tom nie mai koe rhawm lhat ka Maix mai pon ti krub ka Maix, daux nyiex bwan pa singax singeh heue. ⁸ Siyiex eue, mawh kheu koeng pui ka aux, thong aux hu ka krax pa rahsee Maix liak, kieh daux krax Maix rahsee sivoe ngai aux liak. ⁹ Jheeh kix ang kaux sijax, daux rhawm kix mawh pa caox, daux ghok kix mawh simeeig pa hoik bhang, dak kix kawx jiet chix nyaw glaw heue. ¹⁰ Siyiex eue kieh phimap hoek ka piang kix, kieh kix sivu ka krax keud krax sawn tix mai grheu ti tik kix kheu phimap pa lud kix tom nie, mawh kheu tieh feen kix ka Maix heue. ¹¹ Pui pa deuh rhawm ka Maix, koe krax gaux rhawm. Kix koe krax gaux rhawm gaux rhi mai kok yo kheu kia ngien Maix ka kix heue. Kix pa moh ka ceu kaux Maix, kieh koe krax gaux rhawm gaux rhi ka daux Maix liak. ¹² Siyiex eue, nawb bwanson ka pui pa rahsee mai kieh bwanson Maix tiebtie ka kix, awm kraung naing pa tiebtie heue.

¹ Lox pa yaogyaw Davit Siyiex eue, paw nyang deuh phimap ka piang aux, ka daux pa song rhawm Maix mai paw nyang sivied ti gau aux ka daux pa kied song rhawm Maix liak. ² Siyiex eue, teem ka aux, mawh kheu iak riang aux, Siyiex eue, kieh aux deeh brax deeh moi, mawh kheu si-ang aux hoik yung yiang heue. ³ Ju aux kied lhat graung heue. Siyiex eue, aux kawn sang kham geu miex grheung? ⁴ Siyiex eue, Maix deeh hoek ti taoh ju aux liak. Deeh taoh aux ka daux krax pa caux rhawm Maix liak. ⁵ Ka daux meung yum ang pui lai doh keud ka Maix, ka dee an, pui mawx pa sang yaogyaw ka Maix? ⁶ Aux iak riang rao kheu kied kha aux rhawm tix mai jah rawm ngai ku singaix, tom kieh dee it aux caux lan heue. ⁷ Laux ngai aux kheu khi rhawm aux, vuvi ngai aux jao pui pa koeng ka aux khankix heue. ⁸ Pui pa yuh kaing pa caox caig khankix eue, via hu khaing aux heue. Siyiex hoik mhong ka lox yiiem riag yo aux heue. ⁹ Siyiex hoik mhong ka lox pa khyox khaw aux mai Siyiex hoik nghiet ka lox pa rawg aux bwan heue. ¹⁰ Can pui pa koeng ka aux khawmuik, tak hoek krax kaig tua mai hoek krax som nai heue. Kix kaig tua mai tang to dom mawx dom an heue.

¹ Siyiex aux eue, aux deuh rhawm ka Maix heue, teei aux lih khaing tawm taix pui pa tuktiaktukte mai taoh ka aux liak. ² Phan ang mawh nan, awm pa ang koe cao pa taoh mai kix teei ju aux, awm sivai sangsi pa kiied pa rud ti tik heue. ³ Siyiex aux eue, phan aux hoik yuh nan ang ah mai phan koe see pa ang khaw ka daux taix aux ang ah, ⁴ mai phan aux deeh yuh krax lud ka pui pa hoik khaw ka aux, pa ang tie koe grawh grawng mai tuktiak tukte awm pui pa koeng ang ah. ⁵ Phan aux siep koe phimap tix ceuceu, kieh pui pa koeng ka aux, hoek leue ti pon giex ka ju aux heue. Kieh kix dig ju aux ka piang tiex mai kieh min plakngai aux rau dee tiiem ka daux phawng tiex liak. ⁶ Siyiex eue, kaoh liak, ka daux pa song rhawm Maix, teei riang rao Maix mai tiebtie ka pui pa koeng ka aux liak, siduad ka son aux mai prawng ca ka son aux liak. ⁷ Kieh ceu kawn pui khawmuik krawk khrawm ti rob vung viang Maix mai Maix deeh haok ka piang kix ka dee lhaong, ⁸ Siyiex mawh Cao pa prawng ca ka kawn pui heue. Siyiex eue, aux rahsee ang ah, grum naog ang ah, jhak mai prawng ca ka piang aux liak. ⁹ Kieh pui pa yuh kaing pa caox caig khankix som, mai pui pa yuh kaing pa rahsee khankix kaux cong liak, Maix mawh Siyiex pa rahsee, Cao pa chawk cheng ka rhawm rhi mai sok lax heue. ¹⁰ Siyiex mawh Cao pa tiebtie ka aux mai mawh Cao pa taoh ka pui pa rahsee heue. ¹¹ Siyiex mawh Cao pa prawng ca rahsee mai Nawh Cao song rhawm ka pui pa ang rahsee jheung jheung heue. ¹² Phan pui ang thai lox cox rhawm tix, Siyiex klaing vaid mai Nawh Cao hoik vaik ak mai nyeu ti deuh heue. ¹³ Kraung naing pa chix kieh yum mai te pa hoik rup ngu, Nawh Cao hoik rien son kix heue. ¹⁴ Jhak heue, nawh yaox ti kham geu ka pa keh ka daux phimap mai nawh teei ti nghe ka krax keud sawn pa ang mhawm, lih keh ti mawh pa khi rhawm heue. ¹⁵ Nawh hoik kaong daux tiex pa kied raux mai tokaux nawh deeh rau ka daux tiex pa hoik kaong nawh tiru heue. ¹⁶ Krax keud sawn pa yuh nawh, pa ang mhawm deeh hoek ka piang kaing nawh mai kaing pa yuh nawh pa ang mhawm an, deeh hoek ka piang khwan kaing nawh heue. ¹⁷ Phan mawh aux, tak sang yaogyaw ka Siyiex, Cao pa prawng ca pa rahsee mai rhax lai yaogyaw ka ceu kaux Siyiex pa ting lhaong khaing khawmuik heue.

¹ Siyiex ex eue, ceu kaux Maix mawh pa ting lhaong ka piang haktiex in khawmuik heue. Min pakngai Maix pa ting lhaong hoik koe ka piang raoma heue. ² Maix tawx krax yaw rangdi ka jheeh kawn nyawm mai kawn ngie pa kawn peuex khankix mai pui pa koeng mai pui pa bak ti yuh krax lud daux rhawm tix ang ah, Maix chix kieh yiien yawg tix heue. ³ Phan aux keud ti yaox grawng pa phan pa deuh Maix raoma, khix, simuing ka gien taix Maix, ⁴ kawn pui mawh pa yuh ka mawx, Maix lai kawn doh keud ka nawh, kawn kawn pui mawh pa yuh ka mawx mai Maix lai kawn kia ngiien ka nawh? ⁵ Maix hoik yuh nawh tiiem khaing kawncau Siyiex khankix ceeix khaing heue. Maix hoik ceep nawh ka mhok min pakngai mai ceu pa nabyam yungyi heue. ⁶ Kieh nawh giex kaing ka can pa hoik phan hoik deuh Maix khankix. ⁷ Pa mawh yung, mawie, totiag ⁸ sim raoma, kax mai pa chix chuh chix hu ka daux rawm khankix hoik deuh ka greem caong Nawh heue. ⁹ Siyiex ex eue, ceu kaux Maix mawh pa ting lhaong ka piang haktiex in khawmuik heue.

¹ Siyiex eue, aux viex khawm rhawm tix, khawmuik yaogyaw ka Maix heue. Aux tak plak jhi ceu pa daox am Maix khawmuik heue. ² Aux tak gaux rhawm ka daux Maix mai aux tak rhax lai yaogyaw ka ceu kaux Maix Siyiex pa ting lhaong heue. ³ Grawh grawng nawh, pui pa koeng ka aux khankix, deeh plak khaix mai goh ti laux leeing sivoe ngai Maix heue. ⁴ Maix ot plak aux mai hoik prawng ca, Maix ngawm piang dang ngeung ti prawng ca rahsee heue. ⁵ Maix hoik sivied ti gau ka pui tang ceu khankix mai Maix yieh ti tik ka pui pa caox caig khankix mai preet ti tik ceu kaux kix leeing ju heue. ⁶ Pui pa koeng khankix hoik laux leeing mai veng dee ot kix kawx, hoik grai grhup pak lawg heue. ⁷ Siyiex mawh pa kaux cong leeing ju mai Nawh Cao hoik cox dangngeung dee prawng ca. ⁸ Nawh tak prawng ca ka kawn pui piang haktiex ka daux pa rahsee mai Nawh tak prawng ca rahsee ka kawn pui heue. ⁹ Siyiex mawh dee deuh rhawm pui pa yaox ti kham geu krax tuktiaktukte mai mawh dee deuh rhawm yam hoek krax khi rhawm heue. ¹⁰ Pui pa tawng ka ceu kaux Maix khankix tak yum rhawm ka Maix heue. Grawh grawng nawh, Siyiex eue, Maix ang chix tik vud ka can pui pa sawg ka Maix heue. ¹¹ Rhax lai yaogyaw ka Siyiex, pa ot ka daux veng Zion mai krai grawng pa yuh Nawh Cao ka pui khawmuik awx. ¹² Nawh Cao chawk cheng ka pui pa teei ju pui yum khankix mai doh keud ka pui pa hoik yum khankix heue. Nawh Cao ang doh pi awm ka lox pa kok yo pui pa kha rhawm khankix heue. ¹³ Siyiex eue, caux rhawm mai taoh ti teei ka aux liak. Jhak ka pui pa koeng ka aux mai pa tuktiak tukte kix ka aux liak mai taoh ti teei aux lih khaing krax yum liak. ¹⁴ Phan yuh nan, aux tak sang jhi bwanson Maix khawmuik ka sivoe ngai kawn pui pa ot ka daux veng Zion khankix heue. Aux gaux rhawm kheu hoik taoh Maix ti teei aux heue. ¹⁵ Pui tang ceu khankix, deeh rau ka daux tiex pa hoik kaong kix mai caong kix deeh krix ka kie pa hoik taong cao kix heue. ¹⁶ Siyiex yuh tokaux Nawh sidawng ka daux pa prawng ca tix heue. Pui pa ang rahsee khankix, deeh sivu ka kaing pa hoik yuh tix tiru heue. ¹⁷ Pui pa ang rahsee mai can pui pa pi awm ka Siyiex khankix, tak sang grheu kix lih hu ka daux meung yum heue. ¹⁸ Nawh Cao ang doh pi awm ka kix, pui pa hot sibhawm mai krax pa krox jun, pui pa kha rhawm khankix ang chix laux leeing, leeing ju heue. ¹⁹ Siyiex eue, kaoh heue, paw kieh pui pex mai kieh pui tang ceu kham geu ka krax pa chawk pa cheng sivoe ngai Maix mai prawng ca ka kix liak. ²⁰ Siyiex eue, ghlat ka kix liak mai kieh kix tawng grawng mawh kix pui giex liak.

¹ Siyiex eue, Maix chix cung dee singai yuh ka mawx? Mawh kheu patix Maix chix mox tix yam yaox krax pa khi rhawm yuh ka mawx? ² Pui pa ang rahsee pa ting rhawm khankix, chix kieh pui pa hot sibhawm khankix, kha rhawm heue. Kix tak yaox ti kham pa giex pa phyawk pui ka pa nieb lak keud kix ti yuh tiru heue. ³ Pui pa ang rahsee khankix, chix yuh grang tokaux tix mai chix yaw ka tokaux tix mai nieb yuh pa ang cee ang cag ka Siyiex heue. ⁴ Pui pa ang rahsee khankix, keud daux rhawm ti ah nin, "Nawh Cao ang lai deeh teei, " Kheu ang Siyiex koe heue. ⁵ Krax pa hu Nawh mawh pa kaux jheung jheung mai krax prawng ca Nawh, viang lhaong mai singai khaing Nawh kawx, Nawh Cao phlu ti tik ka pui pa koeng ka Nawh khawmuik heue. ⁶ Nawh keud ti ah nin daux rhawm tix, aux ang gah greed tix mai ang tau ti hoek ka daux pa kha rhawm tix bawg kawx heue. ⁷ Ka daux jheeh nawh hoik naog lox pa jhax lawg mai pie lhen mai coh lox sikah heue, greem dak nawh hoik naog ceu pa ang mhawm mai pa ang rahsee heue. ⁸ Nawh briex mox ti hawt dex praok yaong mai briex jawm ti pah pui pa ang koe phimap yum dee glip mai ngai nawh briex jiang ti jhak ka pui pa hot sibhawm khankix heue. ⁹ Nawh briex mox tix awm mox sivai sangsi ka daux yeem heue. Nawh mox tix sonsang giex ka pui hot sibhawm mai nawh taing sau rub ka pui hot sibhawm ti sang giex kix hu heue. ¹⁰ Pui pa iak riang rao khankix, rau hu ka daux tawm taix pui pa ting sibrawm khankix heue. ¹¹ Nawh keud daux rhawm tix, Siyiex hoik pi awm ka aux, Nawh Cao hoik veeh ngai tix khaing aux mai ang yaox ka aux tix bawg kawx heue. ¹² Siyiex eue, kaoh heue, Siyiex eue, yaog taix Maix liak, paw doh pi awm ka pui pa kha rhawm liak. ¹³ Mawh kheu patix pui pa ang rahsee khankix, nieb yuh pa ang cee ang cag ka Siyiex, ka daux rhawm tix mai ah, "Ang lai jhak ka kix lie?" ¹⁴ Viang mawh kawx nan, Maix hoik yaox heue, grawh grawng nawh, Maix mawh Cao pa chix teem ka pui pa kha rhawm khankix mai pui hot sibhawm khankix koe ka daux tawm taix Maix mai Maix mawh cao pa teem ka kawn doe pa ang koe miex keeing khankix heue. ¹⁵ Maix raig ti tik ka plawng taix pui pa ang rahsee khankix mai pui pa yuh pa caox pa caig khankix, son ang Maix sang yaox ka pa yuh kix tix bawg kawx heue. ¹⁶ Siyiex mawh Simiang leeing ju heue. Pui tang ceu khankix, tak sang grai hu ka daux meung Nawh heue. ¹⁷ Siyiex eue, Maix hoik mhong ka lox pa rawg mhaing pui pa kha rhawm khankix mai Maix kieh rhawm kix nhim mai daong yhaok Maix nghiet ka lox pa mhaing kix liak. ¹⁸ Maix tak sang nghiet ka lox pui pa kha rhawm mai kawn doe pa ang koe miex keeing khankix mai Maix ot ka plak kix mai prawng ca ka son kix ka pui pa glhat ka kix heue.

¹ Aux deuh rhawm ka Siyiex, mawh kheu patix pex ah nin ka ju aux, "Pu hu ka piang gawng awm sim yuh ka mawx?" ² Jhak heue, pui pa ang rahsee khankix, hoik vaik ak mai sau te sonsang puing ka pui pa rahsee khankix ka daux pa faik heue. ³ Phan num hoik laux leeing, pui pa rahsee chix yuh ka mawx? ⁴ Siyiex ot ka daux nyiex bwan Nawh pa singax singeh heue. Dangngeung Siyiex koe ka piang meung raoma, ngai Nawh jhak mai siyieb ngai Nawh sigaig ka pa yuh kawn pui heue. ⁵ Siyiex cheuk ti yaox ka pui pa rahsee mai pui pa caox caig, mai Nawh koeng ka pui pa moh ti yuh ceu pa laux leeing khankix heue. ⁶ Nawh Cao kieh gaox ngu rup lih ka piang kix pa caox caig, pa mawh ngu mhat mai bhaung caox pa kied hax, tak sang kieh mawh son pa ih kix heue. ⁷ Siyiex mawh pa rahsee, grawh grawng nawh, Nawh moh ka pa rahsee mai Nawh ot plak pui pa rahsee heue.

¹ Siyiex eue, taoh aux liak, grawh grawng nawh, pui pa mhawm ang koe mai pui pa kaux sijax kawx, hoik grai hu khaing kawn pui heue. ² Paox plawg paox nyhawm pa ot tau kawx, tix kaux lai tix kaux, lah cha ka paox tix, ka siyieb jheeh pie lhen mai kix sikah ka paox tix mai koe rhawm ra mu heue. ³ Siyiex tak sang pat ti tik siyieb jheeh mai dak pa ah lox ting lox lhaong mai pie lhen khawmuik heue. ⁴ Pui pa ah nin, ex teei dak tix pex heue, siyieb jheeh ex tang koe mai ex mai pui mawx mawh Simiang ka piang ex, kix nieb ah nan heue. ⁵ Siyiex ah nin, "Aux tak kaoh cung sipiag kix, pui pa yaox ti kham geu ka pa tuktiak tukte mai krax kha rhawm mai krax pa cai rhawm mai pui pa ngheeik ngia khankix heue. Mai Aux tak sang tawx krax pa nyawm rhawm ka pui pa yaox ti kham geu krax pa nunai khankix heue. ⁶ Sijax mukheu Siyiex mawh pa singax singeh awm mau pa hoik thi mai hoik tieh aliah bawg heue. ⁷ Siyiex eue, Maix kia ngien ka kix mai tiebtie ka kix, ceu pui yam in jheung jheung heue. ⁸ Pui pa ang rahsee khankix, vuvie tix sinax kawn pui kudah kudee tom yam hoek bawg yam yaog lhaong ka pui pa tiiem khankix heue.

¹ Siyiex eue, Maix tak sang pi awm ka aux miex grheung? Maix tak sang mox ngai tix khaing aux miex grheung? ² Ceu pa khi rhawm ka daux rhawm aux ku singaix ku sawm, aux kawn sang yaox ti kham miex grheung? Pui pa koeng ka aux khankix, kawn sang ting ka piang aux miex grheung? ³ Siyiex aux eue, veeh plakngai Maix mai nghiet ka lox aux liak, kieh ngai aux riang liak, phan ang mawh nan, ha kox laig it mai yum heue. ⁴ Pui pa koeng ka aux, tak sang ah nin nhieh, "Aux hoik pex ka nawh, " nu ka gaux rhawm gaux rhi pui pa lak lheet ka aux khankix, yam yaox aux krax khi rhawm heue. ⁵ Viang mawh kawx nan, aux deuh rhawm ka krax pa caux rhawm Maix mai rhawm aux koe krax gaux rhawm gaux rhi ka krax taoh Maix heue. ⁶ Aux rhax lai yaogyaw ka Siyiex, mawh kheu hoik yuh Nawh bwanson ka aux heue.

¹ Pui pa daox pa aw khankix keud ti ah nin ka daux rhawm tix, "Ang Siyiex koe, " Mai kix mawh pui pa hoik cux sium mai yuh pa seeing brai heue. Pui pa yuh pa mhawm ang koe tix kaux kawx. ² Siyiex ot ka piang meung raoma mai jhak ka kawn pui, pa sawg pa tawng pa yung ka Nawh koe tix kaux kaux lie? Ang koe lie? ³ Kawn pui khawmuik hoik lud krax mai hoik cux sium awm paox tix khawmuik, pui pa yuh pa mhawm ang koe, pon ang koe pie tix kaux kawx. ⁴ Can pui pa yuh pa caox khawmuik ang kix tawng lie? Kix kiied ti ih pui Aux, awm ih kix blah mai ang kok ka Siyiex lie? ⁵ Ka dee an, tak koe krax pa kied lhat graung, grawh grawng nawh, Siyiex ot plak pui pa rahsee heue. ⁶ Pex kieh pui pa hot sibhawm kaig tua, mawh kheu kix deuh rhawm ka Siyiex heue. ⁷ Kieh krax taoh pui Isarelax lih hoek khaing piang gawng Zion liak, yam deeh viex Siyiex siliex pa viex kix hu deeh hoek, Yakop tak gaux rhawm gaux rhi mai pui Isarelax tak sang gaux rhawm gaux rhi heue.

¹ Siyiex eue, pui mawx sang ot ka daux nyiex bwan Maix? Pui mawx sang ot ka piang gawng pa singax singeh Maix? ² Pui pa hu ka daux krax pa rahsee mai pui pa yuh pa mhawm mai pui pa krai lox pa kaux sijax ka daux rhawm tix. ³ Pui pa ang teei dak ti coh lox sikah mai pui pa ang yuh kaing pa ang mhawm ka paox grawm tix mai pui pa ang salao ka paox plawg tix. ⁴ Pui pa ang yuh paox pie ka pui pa caox caig sivoe ngai nawh mai lhat graung ka Siyiex, viang tokaux nawh laux leeing kawx, sijax mukheu nawh ang yuh laux awm pa hoik tiex tu nawh heue. ⁵ Nawh tawx pui yaog yaing mau kawx, ang teei rao mai mawh pui pa ang ih mau chun praok ka pui pa ang koe phimap mai nawh tak mawh pa kaux cong leeing ju heue.

¹ Siyiex eue, kia ngien ka aux liak, grawh grawng nawh, aux deuh rhawm ka Maix heue. ² Aux ah nin ka Siyiex, "Maix mawh Simiang aux, lheu khaing Maix ceu pa mhawm ang koe mai aux." ³ Pui pa singax singeh pa ot ka daux meung Maix, mawh pui pa mhawm pa khaw rhawm aux heue. ⁴ Can pui pa hawt khaix siyiex tang kaux, tak pon krax pa kha rhawm tom nie heue. Aux ang rhawm kieh nham ti lih, sonsang tan ka son kix pie ceu kaux kix kawx, aux ang rhawm kieh simawd. ⁵ Siyiex mawh sonsang pon aux sin mai son kawk pa sang nyaux aux heue. Maix mawh Cao pa priex sin aux mai Cao pa chix gwieh heue. ⁶ Mee haktiex pa keung aux ti kwang, caw dee mhawm mai sin pa pon aux mawh pa mhawm heue. ⁷ Aux yaogyaw bwanson Siyiex, ka pa tawx krax pa tawng pa yung ka aux, yam ponsawm kawx, rhawm aux deeh so ka aux heue. ⁸ Aux deuh Siyiex sivoe ngai aux jheung jheung. Grawh grawng nawh kheu Nawh Cao ot plak khawn dawm aux mai ang aux lai greed lai gah. ⁹ Mawh kheu in, rhawm aux tom nyawm rhawm mai min plakngai aux tak gaux rhawm gaux rhi, tokaux aux kawx, ot ka daux krax krox jun heue. ¹⁰ Grawh grawng nawh, Maix ang tik grham ju aux ka daux meung yum mai Maix ang kieh pui pa singax singeh cie Maix hoek krax cux sium. ¹¹ Maix tak jhi aux yaox krax pa im ju, krax pa grum naog mai krax pa gaux rhawm gaux rhi sivoe ngai Maix mai koe krax pa gaux rhawm gaux rhi dex taix khawn dawm Maix jheung jheung heue.

¹ Siyiex eue, ot plak pui pa rahsee mai nghiet ka lox pa kok yo aux liak, veeh yhaok Maix mai nghiet ka lox pa rawg mhaing aux ka daux jheeh pa ang pie lhen liak. ² Kieh krax prawng ca aux, mawh pa kaoh khaing Maix mai kieh ngai Maix jhak ka grawng pa rahsee liak. ³ Cheuk cheu ti yaox ka rhawm aux, hoek ti kia ngien ka aux yam ponsawm, yam cheuk cheu Maix ti yaox ka aux mai ang yaox pa caox caig daux aux, pa keud aux mai lox jheeh aux kawx, ang koe dee lud. ⁴ Mawh kheu hawt aux gumlox Maix mai via khaing ceu pa laux leeing pa yuh pui tang kaux khankix heue. ⁵ Kieh caong aux kaux cong yam hu aux daux krax Maix mai son ang caong aux cang klad liak. ⁶ Siyiex eue, aux rawg mhaing ka Maix mawh kheu hoik pawk Maix lox aux, veeh yhaok Maix mai nghiet lox aux liak. ⁷ Teei taix khawn dawm Maix taoh ka pui pa deuh rhawm ka Maix khaing tawm taix pui pa tieh feen ka Maix, Simiang eue, Maix jhi yaox krax moh krax rhawm pa daox am Maix liak. ⁸ Kia ngien aux, awm jhak Maix ka sok ngai tix mai tawb aux ka greem veei pruik Maix liak. ⁹ Kieh aux luan khaing tawm taix pui pa caox caig, pa tuktiaktukte ka aux, pa mawh pui pa koeng pa simie ti teei aux yum mai pa rob hawt vung viang aux khankix liak. ¹⁰ Kix ang koe krax pa caux rhawm mai ah lox ting lox lhaong heue. ¹¹ Aux hu dee mawx ang ah, kix hoik rob vung viang aux, sonsang goh aux ka piang tiex, kix jeung ngai ka aux heue. ¹² Awm sivai sangsi pa simie ti rud ti ih ka to pa hoik pon tix mai awm kawn sivai sangsi pa mox tix ka daux yeem dee ot tix heue. ¹³ Siyiex eue, kaoh heue, tiebtie ka kix mai nyhot kix goh liak, teei vaid Maix mai kieh aux luan khaing tawm taix pui caox caig khankix liak. ¹⁴ Siyiex eue, ka daux tawm taix Maix, kieh aux luan khaing tawm taix pui mai tawm taix pui haktiex liak. Yam kawn im ju kix yam in kieh kix sak naog ka sin Maix mai kieh kix deuh son kawn praix tix ang ah, son kawn saux kix heue. ¹⁵ Grawh grawng nawh, aux mawh pui pa rahsee tak sang pon ti yaox ka plakngai Maix heue. Yam siduad aux, rhawm aux hoik grum naog awm riang pak peung Maix heue.

¹ Siyiex eue, aux moh ka Maix, kheu mawh Maix riang rao aux heue. ² Siyiex mawh rang ting dee deuh aux rhawm tix mai mawh guh veng pa kaux pa tiebtie ka aux, rung pa lawm Nawh taoh ti teei aux mai mawh tab pa kaux son aux heue. ³ Aux tak kok yo ka Siyiex, pa khaw aux ti yaogyaw ka Nawh mawh kheu hoik taoh Nawh aux luan khaing daux tawm taix pui pa koeng ka aux khankix heue. ⁴ Maox krax yum hoik rob vung viang aux mai aux lhat ka rawm klawng yum pa chix kieh laux heue. ⁵ Maox meung yum hoik rob vung viang aux mai aux hoik krix ka kie krax yum heue. ⁶ Yam yaox aux krax nu krax khawm, aux kok yo ka Siyiex mai aux rawg mhaing ka Nawh heue. Nawh mhong ka lox kok yo aux ka daux nyiex bwan Nawh mai lox pa kok yo aux sivoe ngai Nawh hoek daux yhaok Nawh heue. ⁷ Yam an haktiex yung yiang prung prang mai gawng lua khankix greed ti hu, mawh kheu kied song rhawm Nawh Cao heue. ⁸ Taox ngu lih khaing daux meeh Nawh mai ngu lih khaing daux jheeh Nawh mai gaox ngu rup kheu Nawh heue. ⁹ Nawh Cao plak raoma lih hoek ka greem caong Nawh mai lih ti mawh pa faik heue. ¹⁰ Nawh Cao brug ka kawncau Siyiex Cherubin hoek mai pu hu vung viang mai hu ka piang pruik bhaung heue. ¹¹ Nawh yuh pa faik mai mox ka daux rawm mai paiawm lung rob vung viang Nawh heue. ¹² Mawh kheu jhan pa riang sivoe ngai Nawh mai paiawm viex mu pre mai gaox ngu prung prang hu heue. ¹³ Siyiex pa ting lhaong, kieh sinum praix lih ka piang raoma mai ploi lox sinum lih mawh mu pre mai gaox ngu heue. ¹⁴ Nawh puing ak hu ka kix mai ploi pukplak praix mai kieh kix som mai tang to heue. ¹⁵ Siyiex eue, Maix deuh phimap ka kix, ka daux pa toek Maix bhawm ka daux meeh tix mai Maix kieh greem rawm mai jaong num haktiex lih sidawng heue. ¹⁶ Nawh Cao ot dee lhaong mai nyeu taix tix tok aux lih khaing ka daux rawm pa ting pa raux heue. ¹⁷ Taoh ti teei aux lih khaing pui pa koeng ka aux, pa nie lheu ting riang khaing aux mai pa koeng riang ciang khoi ka aux khankix, mawh kheu ang aux lai pex ka kix heue. ¹⁸ Kix hoek ti yuh pa caox ka aux mai singaix yam yaox aux krax khi rhawm, viang mawh nan, Siyiex mawh dee deuh aux rhawm heue. ¹⁹ Nawh viex aux hu ka dee vieh va mai Nawh taoh ti teei aux, kheu kied moh Nawh aux heue. ²⁰ Siyiex tawx bwanson, awm pa rahsee aux mai tawx awm taix pa singax singeh aux heue. ²¹ Grawh grawng nawh, kheu hawt aux daux krax Siyiex jheung jheung, aux ang lai yuh pa caox caig mai ang lai tik ka Siyiex. ²² Krax prawng kra ca Nawh, hoik koe sivoe ngai aux mai aux ang tik ka beenli Nawh Cao heue. ²³ Aux hoik grum ceu pa mhawm mhiem sivoe ngai Nawh mai aux hoik via ka phimap pa caox heue. ²⁴ Grawh grawng nawh, Siyiex, tawx bwanson awm pa rahsee aux mai tawx awm taix pa singax singeh plak sivoe ngai Nawh Cao heue. ²⁵ Tawx krax pa caux rhawm ka kix, pui pa chix caox rhwm, Maix tawx krax grum naog ka kix pa grum naog heue. ²⁶ Maix tawx pa singax singeh ka kix pui pa singax singeh mai Maix tawx pa lah cha ka kix pui pa lah cha heue. ²⁷ Maix taoh ti teei ka pui pa hot pa sibhawm khankix mai yeen tiem ka pui pa ting rhawm lhaong ngai khankix heue. ²⁸ Siyiex tok kawk ngu aux mai jhan riang ka daux pa faik heue. ²⁹ Grawh grawng nawh, aux pon to dex tab Maix mai pon jao ka guh veng, mawh kheu deuh aux rhawm ka Maix heue. ³⁰ Daux krax Siyiex mawh pa grum naog, sijax mukheu Nawh, hoik mawh pa thi ti singax singeh heue. Nawh Cao mawh ceu pa tiebtie ka kix pui pa deuh rhawm ka Nawh heue. ³¹ Lheu khaing Siyiex, siyiex mawx pa kawn koe tix kaux kaux, lheu khaing Siyiex ex, simaox rang mawx pa kawn ting khaing Nawh lie? ³² Siyiex teei maox rawd nyoi mai nhawt ka nyoi aux mai kieh krax hu aux rahsee heue. ³³ Nawh kieh caong aux brax awm caong cak mai kieh aux cung ka dee lhaong heue. ³⁴ Nawh gau taix aux, sonsang chix puing naing mai plawng taix aux pon raig ti tik ka ak rhiem heue. ³⁵ Nawh tawx ceu pa tiebtie pa taoh ka aux mai taix khawn dawm Nawh joh jhan ka aux heue. Nawh yaog aux ting ka daux krax gun yeung pa caux rhawm Nawh heue. ³⁶ Nawh Cao kieh krax hu aux blang, son ang caong aux cang klad. ³⁷ Aux pheet ka pui pa koeng ka aux tom krup, phan aux ang nyang yuh kix laux lak pak leeing, aux ang deeh hoek. ³⁸ Aux dig kix goh ka greem caong tix, tom ang kix lai pon kaoh. ³⁹ Grawh grawng nawh, Maix nhawt maox rawd nyoi aux, sonsang koe riang ti chix puing naing ka kix pa ot tang plak goh greem caong aux heue. ⁴⁰ Maix hoik kieh pui pa koeng ka aux khankix, to plak khaix aux mai aux sang yuh laux leeing ka pui pa koeng ka aux pak lawg heue. ⁴¹ Kix riag yo miex ding kawx, ang koe pui pa taoh, kix kok yo ka Siyiex kawx, Nawh Cao ang lai pawk. ⁴² Yam an aux krid kix phawng awm phawng tiex pa phlu bhaung, aux klup ti tik kix ka daux krax awm nyheu nyhawk heue. ⁴³ Maix kieh aux luan khaing pui pa lah cha ka aux, Maix kieh aux mawh Simiang cao pa giex kaing piang pui tang ceu, pui ang aux tawng khankix, mawh siliex aux heue. ⁴⁴ Yam mhong kix lox aux, nghiet lox aux dom mawx dom an mai pui tang ceu khankix khyox khaw ka aux heue. ⁴⁵ Kix khleep ngai mai lih hu khawm siyaung tix khaing daux tab dee mox tix heue. ⁴⁶ Siyiex mawh Cao pa im ju mai rang ting aux, kieh koe bwanson liak, kieh yaog ting lhaong ka Siyiex Cao taoh aux liak. ⁴⁷ Siyiex Cao prawng ca plak aux, kieh cub pui khankix ot ka greem aux. ⁴⁸ Maix kieh aux luan khaing daux tawm taix pui pa koeng ka aux, Maix yaog aux ting lhaong ka piang pui pa ot tang plak mai kieh aux luan khaing daux tawm taix pui pa pa rhim khankix heue. ⁴⁹ Mawh kheu nan Siyiex eue, aux tak sang yaogyaw ka Maix mai aux tak sang rhax lai yaogyaw ka ceu kaux Maix heue. ⁵⁰ Nawh Cao hoik tawx krax taoh pa ting lhaong ka Simiang pa hoik laug Nawh mai Nawh Cao hoik yuh bwanson jah ka Davit kaw pa hoik groi Nawh rawm bee mai ru nawh leeing ju heue.

¹ Raoma plak jhi min plakngai Siyiex mai plak jhi grawng pa hoik yuh Nawh Cao ka taix tix khawmuik heue. ² Hoik krai tix ngaix hoik tix ngaix, hoik gau tix sawm hoik tix sawm. ³ Ang lai sikah, ang lai koe lox, ang mhong lox tidtix. ⁴ Maox tiag kix hoik tah hu ka piang haktiex kudauh kudee mai lox kix hoik tah praix tom sidah haktiex heue. Ka piang an Nawh deuh nyiex gox son singaix heue. ⁵ Singaix an, awm pui pa yuh kapaox pa lih khaing daux lawg nyiex nawh mai gaux rhawm gaux rhi to hu hawt krax awm pui pa ting riang heue. ⁶ Nawh lih hu lailing dee sidah raoma, tix dah hoik tix dah mai ang pon ti mox tix ceu kawx, kheu sidaing hax heue. ⁷ Beenli Siyiex mawh pa grum naog mai chix cox rhawm rhi ju ex heue. Mhai sakse pa kham Siyiex mawh pa mawh meh mai chix kieh pui pa ang koe pingnya deeh koe pingnya heue. ⁸ Beenli Siyiex mawh pa rahsee, chix kieh rhawm rhi koe krax gaux rhawm lox tawm beenli Siyiex mawh pa singax singeh mai chix kieh ngai ex riang heue. ⁹ Rhawm pa lhat graung ka Siyiex, mawh pa singax singeh jheung jheung mai krax pa prawng ca Siyiex mawh pa kaux sijax mai pa rahsee khawmuik heue. ¹⁰ Gumlox Siyiex mawh pa lheu mhawm khaing khri, lheu mhawm khaing khri pa hoik thi tom nie mai nie lheu tie khaing rawm kaing hia pa khaw ka rhawm rhi pui heue. ¹¹ Mawh kheu ceu in, awm pa hoik tawx Maix satix ka pa mawh siliex Maix, Maix deeh tawx ka kix, pui pa pon hawt ti yuh khankix, tak pon bwanson pa ting heue. ¹² Pui mawx pa chix tawng ka dee phit lud tokaux tix? kieh aux luan khaing phimap pa koe dee glip liak. ¹³ tiebtie ka siliex Maix, son ang lai yuh phimap pa ting liak, paw lai kieh phimap khankix ting ka piang aux liak, phan yuh nan, aux hoik grum naog mai luan khaing pa lud pa ting heue. ¹⁴ Kieh lox pa lih khaing daux jheeh aux mai krax pa keud pa sawn aux mawh pa khaw rhawm rhi ka plak sivoe ngai Maix liak. Siyiex eue, Maix mawh rang ting aux mai mawh Cao pa taoh aux heue.

¹ Kieh Siyiex pawk lox maix yam yaox maix krax khi rhawm, kieh ceu kaux Siyiex Yakop yaog Maix ting lhaong liak. ² Kieh Nawh Cao ploi krax teem krax coi pa kaoh khaing Maix dee singax singeh mai krax pa joh jhan lih khaing piang gawng Zion heue. ³ Kieh Nawh Cao doh keud ka krax tan ku ceu khawmuik mai rieb ti teei ka pa gleeing ti tan khankix liak. ⁴ Kieh Nawh Cao tawx can ceu pa simie maix tix lo mai baox tawx krax pa keud sawn maix grum naog khawmuik heue. ⁵ Aux gaux rhawm gaux rhi ka krax taoh Maix mai aux pak chix ka daux ceu kaux Siyiex, kieh Siyiex tawx pa rawg Maix bwan khawmuik liak. ⁶ Yam in aux hoik tawng grawng Siyiex hoik taoh ka Kaw pa hoik groi Nawh rawm bee, Nawh Cao ot ka piang meung raoma ka dee singax singeh mai pawk lox kix mai taoh kix ka taix khawn dawm Nawh Cao heue. ⁷ Pui tiblah deuh rhawm ka ling mawie, ling brung, phan mawh ex yaogyaw ka ceu kaux Siyiex ex heue. ⁸ Kix sideeing caong mai goh heue, phan mawh ex kaoh cung heue. ⁹ Siyiex eue, taoh ka aux liak mai deeh pawk ka lox aux yam kok yo aux ka Maix liak.

¹ Siyiex eue, ka daux riang rao pa tawx Maix, Simiang gaux rhawm gaux rhi mai ka daux pa taoh Maix kied gaux rhawm gaux rhi gaux rhi heue. ² Maix caux rhawm mai tawx awm pa lo nawh ka daux rhawm tix, Maix ang thiang ti tik ka lox pa rawg nawh bwan ka jheeh heue. ³ Grawh grawng nawh, Maix tawx bwanson pa kied mhawm mai Maix ceep mhok khri ka piang kaing Nawh heue. ⁴ Nawh rawg bwanson krax pa im ju mai Maix tawx krax pa lang ju leeing ju heue. ⁵ Nawh ting min plakngai kheu krax pa taoh Maix mai tawx min plakngai Maix mai sibrawm pa ting deuh ka piang nawh heue. ⁶ Maix hoik ciak ti deuh bwanson leeing ju ka Nawh mai kieh Nawh kied gaux rhawm gaux rhi sivoe ngai Maix heue. ⁷ Grawh grawng nawh, simiang deuh rhawm ka Siyiex mai Nawh kaux cong leeing ju, kheu bwanson Siyiex Cao pa ting lhaong khaing khawmuik heue. ⁸ Taix Maix tak sipub ka pui pa koeng ka Maix khawmuik mai taix khawn dawm Maix tak sipub ka pui pa koeng pa khoi ka Maix heue. ⁹ Yam lih pa song rhawm Siyiex, kieh kix lih mawh awm glah ngu, mawh kheu kied song rhawm Siyiex mai tak bleet kix mai tak sang gleeing ti tik kix ka daux ngu heue. ¹⁰ Maix tak yieh ti tik ru kix ka piang haktiex mai tak yuh kawn praix kix laux leeing ka sinax kawn pui heue. ¹¹ Grawh grawng nawh, kix keud ti yuh pa ang mhawm tang plak ka Maix, viang mawh nan, ceu pa nieb keud kix ti yuh khankix, lih ti mawh pa giex going heue. ¹² Grawh grawng nawh, Maix kieh kix deeh veeh ti hu plak khaix tix mai Maix nyeu te ka pakngai kix heue. ¹³ Siyiex eue, kieh yaogyaw ka Maix, kheu riang rao sibrawm Maix mai ex rhax lai yaogyaw ka Maix heue.

¹ Siyiex Aux, Siyiex Aux, Maix lai tik vud Aux yuh ka mawx? Yam kok yo Aux Maix, sonsang taoh ka Aux, Maix lai ot singai khaing Aux yuh ka mawx? ² Siyiex Aux eue, yam kok yo Aux Maix, yam pon singaix Maix ang pawk lox Aux mai yam ponsawm kawx, Aux kok yo Maix mai aux ang yaox dee laux dee lee tix heue. ³ Maix mawh Cao pa singax singeh, pa ot ka daux pa yaog yaw pui Isarelax heue. ⁴ Tax du ex khankix, deuh rhawm ka Maix, mawh kheu kix deuh rhawm ka Maix, Maix tom taoh kix heue. ⁵ Kix kok yo ka Maix mai hoek krax taoh mai Maix kieh kix luan khaing krax pa kaig tua heue. ⁶ Phan mawh aux, ang mawh pui, mawh ngie viag mai dee sa lao pui mai dee yuh pui khawmuik pa ang ceu ang cag kah heue. ⁷ Can pui pa yaox ka aux khawmuik, nyiah aux mai kix blex dak tix mai vut vied kaing kap tix heue. ⁸ Kix ah nin, nawh deuh rhawm ka Siyiex, sonsang taoh nawh luan heue. Mawh kheu khaw rhawm Nawh Cao ka nawh kieh taoh nawh lih heue. ⁹ Maix kieh aux deuh rhawm ka Maix, tom yam bluh Maix aux lih khaing vaig miex tix mai yam kawn peuex aux teeh miex tix heue. ¹⁰ Aux hoek ka daux tawm taix Maix tom yam keh mai Maix hoik dawg mawh Siyiex aux tom yam ot aux ka daux vaig miex tix heue. ¹¹ Paw lai ot singai khaing aux, grawh grawng nawh, krax khi rhawm hoik dex mai aux mai pui pa teem aux ang koe tix kaux kawx. ¹² Mawie mhaing, mawie praix rob vung viang aux tom nie mai mawie praix pa ting riang ting rao pa koe ka daux meung Bashan kawx, rob vung viang aux heue. ¹³ Kix ang jheeh tix awm sivai sangsi pa graoh mai rud kiied ti ih heue. ¹⁴ Kix klup ti tik aux, piang tiex awm rawm, si-ang siawp aux kawx, hoik tang hu, rhawm aux kawx, ceh hu awm bee kax, ka daux naok aux heue. ¹⁵ Riang rao aux hoik hit kroh hu awm aw tiex, dak aux kawx, hoik khlieb hu mai si-ang kap heue. Hoik kieh aux rau daux phawng tiex tom sidah yum heue. ¹⁶ Cub sox khankix rob vung viang aux mai cub pui pa caox khankix kawx, hoik rob vung viang aux mai suat taix caong aux doh heue. ¹⁷ Aux hoik pon simin ka si-ang tokaux aux mai kix maong ti jhak ka aux heue. ¹⁸ Kix teei kraung ceep aux gwieh ti ih mai sibex aux kawx, kix nieb ti yaox heue. ¹⁹ Viang mawh kawx nan, Siyiex eue, paw lai ot singai khaing aux liak. Maix pa mawh Cao riang rao aux eue, nied ti hoek laung mai teem aux liak. ²⁰ Taoh ju aux khaing lawm vaig mai taoh pui pa moh aux khankix lih khaing daux tawm taix sox khankix liak. ²¹ Taoh aux lih khaing jheeh sivai sangsi khankix liak mai deeh pawk lox aux yam kok yo aux Maix ka daux rung mawie riad liak. ²² Aux tak krai grawng Maix ka puxaik aux khankix heue. Aux tak yaogyaw Maix ka sinax pui hun khankix heue. ²³ Pui pa lhat graung ka Siyiex khankix eue, yaogyaw ka Nawh Cao heue. Doeh ru Yakop khawmuik eue, yaog min plakngai Nawh ting heue. Ceu pui Isarelax khankix eue, lhat graung ka Nawh Cao heue. ²⁴ Grawh grawng nawh, Nawh Cao ang nieb yuh pa ang cee ang cak ka pui pa hot sibhawm mai pa kha rhawm, Nawh ang veeh ngai khaing kix mai Nawh Cao nghiet ka lox pa rawg mhaing kix heue. ²⁵ Aux yaogyaw ka Maix ka daux sinax pui hun mai aux hawt yuh sijax mukheu awm pa hoik kham aux ti yuh sivoe ngai pui pa lhat graung ka Maix heue. ²⁶ Pui pa hot sibhawm tak yaox ti sawm tom sak heue. mai pui pa sawg ka Siyiex khankix tak yaogyaw ka Nawh Cao heue. Kieh rhawm pex koe riang rao jheung jheung liak. ²⁷ Dee sidah haktiex khawmuik, tak sang doh keud mai deeh tieh tix hoek ka Siyiex, pui kuceu khawmuik, tak sang krub plak sivoe ngai Maix heue. ²⁸ Grawh grawng nawh, piang haktiex khawmuik, hoik mawh meung cie Nawh mai Nawh Cao kwang ka piang pui khawmuik heue. ²⁹ Can kix pa mi pa koe khankix, deuh rhawm ka pa ih tix mai can kix pa hu daux phawng tiex ang krox ka ju tix, kix tak grux ngawng ti krub ka Nawh Cao heue. ³⁰ Doeh ru kix kawx, tak sang krub ka Nawh Cao mai krai grawng Siyiex ka pui leeing ju heue. ³¹ Kix tak sang deeh lih hoek ti plak jhi grawng pa rahsee Nawh Cao ka kix pui pa tak sang keh khankix heue.

¹ Siyiex mawh cao pa liang yung ka aux, aux ang lai lo tittix. ² Nawh kieh aux it mai: sawm dee klai rib, Nawh thong aux hu ka praok rawm klawng pa singaong. ³ Nawh baox tawx riang rao ka ju aux, Nawh thong aux hu ka daux krax pa rahsee son ceu kaux Nawh heue. ⁴ Viang aux yaox ti hu ka daux klawng ngawd veei krax yum kawx, aux ang lhat kah, grawh grawng nawh, Maix cao ot mai aux, khaox puat Maix mai khaox gix Maix kieh aux nyawm rhawm heue. ⁵ Maix cao cox khre pheen sawm aux sivoe ngai pui koeng ka aux khankix heue. Maix groi bee ka kaing aux mai: kawk aux deeh kreh heue. ⁶ Bwanson krax caux rhawm pa mhawm Maix hawt grawng lawng khaix aux, aux tak ot nyiex Siyiex leeing ju heue.

¹ Haktiex mai can pa koe piang haktiex khawmuik, hoik mawh cie Siyiex mai kawn pui pa ot ka piang haktiex khawmuik kawx mawh cie Siyiex heue. ² Grawh grawng nawh, deuh ceu an khankix piang rawm sigrit sigra mai kieh kaux cong ka piang rawm khankix heue. ³ Mawh pui mawx pon ti hoek ka piang gawng dee ot Siyiex? Mawh pui mawx pa pon ti cung dee singax singeh Nawh Cao? ⁴ Mawh pui pa singax taix mai pui pa singax daux rhawm mai pui pa ang kieh rhawm tix hu ka daux pa pie lhen mai pui pa ang jhax lawg khankix. ⁵ Tak pon bwan son krax taoh mai: krax pa rahsee khaing taix Siyiex heue. ⁶ Kix mawh ceu pui pa sawg ka Siyiex mai pui pa sawg ka plakngai Siyiex Yakop heue. ⁷ Mawh kheu sang hoek Simiang pa ting min plakngai, siviex ting mai siviex khankix eue, paoh heue, ⁸ Simiang pa ting min plakngai mawh mawx? Mawh Cao pa ting sibrawm mai pa ting riang mai mawh Siyiex Cao pa puing naing ka daux sibrawm heue. ⁹ Mawh kheu sang hoek Simiang pa ting min plakngai, siviex ting mai siviex khankix eue, paoh heue, ¹⁰ Simiang pa ting min plakngai mawh mawx? Mawh Siyiex Cao kru naing raoma mai mawh Simiang pa ting min plakngai heue.

¹ Siyiex eue, aux tawx ju tix ka Maix heue. ² Siyiex aux eue, aux deuh rhawm ka Maix, paw kieh aux hoek krax kaig tua mai paw kieh pui pa koeng ka aux, pex ka aux liak. ³ Pui pa keud pot jun pot ka Maix tete khankix, tak ang hoek krax kaig tua mai pui pa nieb yuh pa ang tie koe grawng khankix, tak hoek krax kaig tua heue. ⁴ Siyiex eue, jhi aux yaox daux krax Maix liak mai gau aux ka daux krax Maix liak. ⁵ Thong aux hu ka daux krax pa mawh meh Maix mai thong gau aux liak, grawh grawng nawh, Maix mawh Siyiex Cao pa taoh aux mai aux krox jun ka Maix leeing singaix heue. ⁶ Siyiex eue, doh keud ka krax pa caux rhawm Maix mai krax moh krax rhawm pa hoik dawg koe Maix didix. ⁷ Paw lai doh keud ka phimap pa yuh aux, yam kawn mawh aux kawn nyawm, awm krax pa caux rhawm Maix mai doh keud ka aux, mawh kheu mawh Maix, Cao pa jiet mhawm heue. ⁸ Siyiex mawh pa grum naog pa mhawm mhiem mai pa rahsee heue, mawh kheu in Nawh jhi daux krax ka pui pa koe phimap heue. ⁹ Nawh thong ka pui pa awn rhawm hu ka daux krax pa khaw caw Nawh mai thong gau kix ka daux krax Nawh. ¹⁰ Can pui pa hawt ka daux krax beenli Nawh mai pui pa hawt ti yuh ka sijax mukheu Nawh khankix, Nawh Cao tak sang thong kix hu ka daux krax moh krax rhawm Nawh heue. ¹¹ Siyiex eue, ka daux ceu kaux Maix, pluat ploi phimap aux pa kied ting liak. ¹² Pui pa lhat graung ka Siyiex, Nawh Cao jhi nawh yaox daux krax pa simie ti hu awm pa moh nawh heue. ¹³ Daux rhawm nawh yaox ti ot nhim mhawm mhawm mai ru nawh kawx, tak pon sin ka daux meung Nawh heue. ¹⁴ Siyiex yuh paox pie ka pui pa lhat graung ka Nawh khankix mai kieh kix tawng ka sijax mukheu Nawh heue. ¹⁵ Ngai aux jhak ka Siyiex jheung jheung, grawh grawng nawh, Nawh Cao hoik taoh caong aux lih khaing kie heue. ¹⁶ Veeh ngai Maix plak aux mai caux rhawm ka aux liak, deuk aux tix kaux khaing, kheu pa hot sibhawm heue. ¹⁷ Rhawm aux hoik naog ka krax pa khi rhawm mai kieh aux luan khaing ka daux pa kha rhawm liak. ¹⁸ Keud ka pa hot pa sibhawm aux mai krax pa khi rhawm aux mai pluat ploi phimap aux khawmuik liak. ¹⁹ Jhak ka pui pa koeng ka aux khankix, mawh kheu kied haoh hun pui pa koeng riang cieang khoi ka aux heue. ²⁰ Priex ka ju aux mai taoh aux liak, kheu aux deuh rhawm ka Maix, paw kieh aux hoek krax kaig tua liak. ²¹ Mawh kheu hoik krox jun aux ka Maix, kieh pa rahsee Maix priex aux liak. ²² Siyiex eue, taoh pui Isarelax lih khaing ka daux pa kha rhawm khaw muik liak.

¹ Siyiex eue, mawh kheu hawt aux ti yuh daux krax pa mhawm Maix mai prawng ca plak aux liak, Siyiex eue, aux ang gah greed tix, kheu aux deuh rhawm ka Maix heue. ² Siyiex eue, chawk cheng ti yaox aux, kieh rhawm aux mai sok lax aux singax liak. ³ Bwanson krax moh krax rhawm Maix koe sivoe ngai aux, kheu aux priex ti hawt ka beenli Maix, daux krax pa rahsee heue. ⁴ Aux ang lai ngawm tau mai pui pa chix pie chix lhen khankix, aux ang lai laig ka cub pui pa chix mox chix kheem khankix. ⁵ Aux koeng ka dee kum pui pa ang rahsee khankix, aux ang lai ngawm tau mai pui pa caox caig khankix. ⁶ Siyiex eue, aux tak sang khoek taix tix ka daux pa ang koe phimap mai ot hawt vung viang khu dee tan Maix. ⁷ Aux sang rhax lai yaogyaw bwanson Maix mai krai grawng pa daox am pa yuh Maix khawm uik heue. ⁸ Siyiex eue, aux kied moh ka nyiex dee ot Maix mai min plakngai Maix heue. ⁹ Paw lai kieh khwan ju aux ot tau mai pui phimap mai pui pa pah pui yum khankix liak. ¹⁰ Ka daux tawm taix kix koe krax pa caox pa ang mhawm mai taix khawn dawm kix hoik naog ka totaix chun praok heue. ¹¹ Phan mawh aux, tak hawt daux krax pa rahsee, caux rhawm mai taoh aux liak. ¹² Aux cung ka caong tix mai yaogyaw ka Maix ka daux sinax pui Pa haoh hun khankix heue.

¹ Siyiex mawh pa riang aux mai Cao taoh aux, aux sang lhat ka pui mawx? Siyiex mawh riang rao son ju aux, aux sang lhat ka pui mawx? ² Yam hoek pui pa caox caig mai pui pa koeng, pa deuh phimap ka aux khankix, kiied ti ih nex aux mai kix sideeing caong mai goh heue. ³ Viang pui naing khankix yuh tab kawx, aux ang lhat, viang kix viex kru naing mai hoek ti puing ka aux kawx, rhawm aux kaux cong kheu aux deuh rhawm ka Siyiex heue. ⁴ Aux rawg tix ceu ka Siyiex, yam kawn im ju aux, sonsang pon aux ti ot ka daux nyiex Siyiex mai sonsang yaox min plakngai pa mhawm grang Siyiex mai aux sawg sonsang yaox ti ot ka daux nyiex bwan Nawh heue. ⁵ Grawh grawng nawh, yam hoek krax khi rhawm, Maix tieb tie aux ka daux nyiex gox bwan mai Maix mox aux ka daux nyiex bwan Maix mai Nawh Cao deuh aux ka piang rang ting heue. ⁶ Yam in hoik yaog kaing aux ka piang pui pa koeng pa rob vung viang aux khankix, mawh kheu in, aux gaux rhawm gaux rhi mai tan ka daux nyiex bwan Maix, tak rhax lai mai ah lai rhax yaogyaw ka Siyiex heue. ⁷ Siyiex eue, nghiet ka lox pa kok yo aux liak, caux rhawm ka aux mai pawk lox aux liak. ⁸ Yam ah Maix nin ka aux, sawg pakngai Aux mai daux rhawm aux ah nin, Siyiex eue, aux sawg pakngai Maix heue. ⁹ Paw lai mox pakngai Maix khaing aux liak mai yam song rhawm song rhi Maix, paw lai tik aux liak, grawh grawng nawh, awm pa hoik sax teem Maix ka aux, paw lai tik vud ka aux mai teem aux liak. ¹⁰ Viang miex keeing aux prah ka aux kawx, Siyiex ang prah ka aux mai priex ka aux heue. ¹¹ Siyiex eue, jhi daux krax Maix mai gau thong aux hu ka daux krax Maix pa rahsee, mawh kheu pui pa koeng ka aux heue. ¹² Paw lai kieh aux hoek ka daux tawm taix pui pa koeng ka aux khankix, grawh grawng nawh, pui pa kham sakse pa ang mawh meh mai pui pa ting rhawm, pa tuktiak tukte ka aux khankix sang lah cha ka aux heue. ¹³ Phan aux ang koe krax yum rhawm ka bwanson Siyiex aux ang yaox ti ot dee ot kix pa im ju heue. ¹⁴ Keut pot jun pot ka Siyiex, teei riang rao mai viex rhawm kwa tix keut pot ka Siyiex heue.

¹ Siyiex mawh rang ting aux, aux kok yo ka Maix, paw lai yuh ti ang pawk lox aux liak, phan Maix ang pawk ka lox aux, aux awm kix pui pa lih hu ka daux simeeig heue. ² Nghiet ka lox aux, yam kok yo aux ka Maix mai yam yaog aux taix tix daux lawg dee kied singax singeh heue. ³ Paw kieh aux hu tau mai pui pa caox caig khankix mai pui pa yuh pa ang rahsee khankix mai pui pa ah lox bied ka paox plawg mai pa keud ceu pa ang mhawm ka daux rhawm khankix heue. ⁴ Deeh tawx ka kix, awm pa hoik yuh kix, deeh tawx pa caox ka kix, awm pa hoik yuh kix pa caox mai tawx ka kix, awm pa hoik yuh kix ka taix tix, prawng ca ka kix awm phimap pa yuh kix heue. ⁵ Grawh grawng nawh, mawh kheu kix map ka pa hoik yuh Siyiex mai khaix taix pa hoik yuh Siyiex khankix, Nawh Cao ang kieh kix kaux cong mai yieh kix laux leeing heue. ⁶ Kieh Siyiex koe bwanson liak, mawh kheu hoik nghiet Nawh lox pa rawg mhaing aux heue. ⁷ Siyiex mawh riang rao aux mai pa tiebtie aux, aux deuh rhawm ka Nawh mai Nawh teem ka aux, mawh kheu in, aux tom gaux rhawm gaux rhi mai rhax lai yaogyaw min plakngai Nawh Cao heue. ⁸ Siyiex mawh riang rao pui Nawh mai Cao pa taoh, kieh kaux cong ka kaw pa hoik groi Nawh rawm bee heue. ⁹ Taoh ka pui Maix khankix mai tawx sinngao son Maix ka kix liak, kia ngien ka kix mai yaog kix ting lhaong jheung jheung leeing ju liak.

¹ Kawn praix Siyiex khankix eue, yaog min plakngai Siyiex mai sibrawm Nawh heue. ² Tawx min plakngai ka ceu kaux Siyiex mai teei ti ceep kraung pa singax singeh mai krub ka Nawh heue. ³ Gumlox Siyiex koe ka piang rawm sigrit sigra mai Siyiex pa ting min plakngai, kieh praix sinum, Siyiex ot ka piang rawm khankix heue. ⁴ Gumlox Siyiex mawh pa grum naog sibrawm mai gumlox Siyiex grum naog ka min plakngai pa ting heue. ⁵ Gumlox Siyiex, raig ti tik ka khaox piakvan mai Siyiex raig ti tik ka khaox piakvan pa koe ka piang gawng Lebanon khankix heue. ⁶ Siyiex kieh gawng Lebanon mai gawng Sirion jaloh awm kawn mawie mai kawn mawie praix heue. ⁷ Gumlox Siyiex, kieh rao ngu gwieh tix heue. ⁸ Gumlox Siyiex kieh daux tiag tu yung yiang mai Siyiex, kieh daux tiagtu Kadeshax yung yiang heue. ⁹ Gumlox Siyiex kieh cak miex keh kawn mai gah ti tik khaox ox khankix mai can pa ot ka nyiex Nawh Cao khawmuik krai grawng min plakngai Nawh Cao heue. ¹⁰ Siyiex ot ka piang rawm pa hoik kheem an mai Siyiex ngawm mai yuh Simiang leeing ju heue. ¹¹ Siyiex tawx riang rao ka pui Nawh khankix mai Siyiex nawb bwanson pa nhim ka pui Nawh khankix heue.

¹ Siyiex eue, aux yaogyaw ka Maix, mawh kheu taoh Maix aux mai Maix ang kieh pui pa koeng khankix, gaux rhawm gaux rhi ka piang aux. ² Siyiex aux eue, aux kok yo ka Maix mai Maix kieh aux nyawm rhawm heue. ³ Siyiex eue, Maix hoik taoh aux lih khaing daux meung yum mai ang kieh aux hoek ka daux simeeig mai hoik kieh ju aux nyawm rhawm heue. ⁴ Pui pa singax singeh Siyiex khankix eue, rhax lai yaogyaw ka Nawh mai yaogyaw ka ceu kaux Nawh Cao pa singax singeh heue. ⁵ Krax pa song rhawm Nawh, mawh tivud khaing mai bwanson pa mhawm Nawh koe leeing ju mai pa yiiem pa grai mawh tix sawm khaing mai krax gaux rhawm gaux rhi tak hoek plak ponngawb heue. ⁶ Yam mhawm ot mhawm koe aux, aux ah nin, "Aux ang doh khi rhawm. ⁷ Siyiex eue, gawng dee ot aux kaux cong mawh kheu bwanson Maix, phan Maix veeh pakngai tix khaing aux, aux hoek krax kha rhawm heue. ⁸ Siyiex eue, nghiet ka lox pa rawg mhaing aux ka Maix liak. ⁹ Phan aux laig ka daux simeeig koe bwanson yuh ka mawx? Phawng tiex tak yaogyaw ka Maix lie? Nawh tak plak jhi sijax mukheu Maix lie? ¹⁰ Siyiex eue, nghiet ka lox aux mai caux rhawm teem aux liak, Siyiex eue, aux kok yo ka Maix teem ka aux liak. ¹¹ Yam an krax khi rhawm aux, Maix kieh mawh krax graoh thiao mai Maix peeik ti tik kraung ceep pa khi rhawm aux mai deeh tawx kraung ceep pa gaux rhawm gaux rhi heue. ¹² Mawh kheu in, phan aux ang yaogyaw ka Maix, aux ang doh pon ot, Siyiex aux eue, aux rhax lai yaogyaw bwanson Maix jheung jheung leeing ju heue."

¹ Siyiex eue, aux deuh rhawm ka Maix heue, Maix kieh aux luan khaing krax pa kaig tua jheung jheung liak mai taoh ka aux awm pa rahsee Maix liak. ² Veeh yhaok Maix plak aux mai nied ti taoh aux laung laung liak, Maix mawh rang ting pa kaux son aux mai mawh tab dee deuh aux rhawm tix heue. ³ Maix mawh rang ting son aux mai mawh tab dee deuh aux rhawm tete heue mai thong gau aux hu ka daux ceu kaux Maix liak. ⁴ Mawh kheu Maix mawh dee deuh aux rhawm, taoh aux lih khaing daux kie pa taong kix ka aux liak. ⁵ Siyiex pa kaux sijax eue, aux tawx ju tix ka Maix mai taoh aux liak. ⁶ Aux koeng ka pui pa krub ka pa giex going, phan mawh aux, deuh rhawm ka Siyiex heue. ⁷ Aux tak koe krax gaux rhawm gaux rhi, ka krax caux rhawm Maix mai Maix jhak ka pa hot sibhawm aux mai Maix hoik yaox ka ju aux pa kha rhawm heue. ⁸ Maix ang tawx aux ka tawm taix pui pa koeng ka aux khankix mai Maix kieh caong aux cung ka dee vieh va heue. ⁹ Siyiex eue, caux rhawm ka aux, mawh kheu hoik hoek krax pa khi rhawm mai ngai aux rhawm aux mai vaig aux kied tug kheu pa khi rhawm aux heue. ¹⁰ Aux hoik dawd ju, mawh kheu khi rhawm aux, aux ngia ku num mai riang rao aux rau hu mai si-ang aux graig hu kheu phimap heue. ¹¹ Mawh kheu pui pa koeng ka aux khankix, salao ka aux mai paox plawg aux mai paox meed aux khankix kawx, seeing brai ka aux heue. Pui pa yaox ka aux hawt krax kawx lhat mai to heue. ¹² Kix hoik pi awm aux mai ang lai doh keud ka aux, awm pui pa hoik yum tix kaux mai kix deuh aux awm diang aw caox heue. ¹³ Aux mhong lox pa salao pui grawng aux mai ceu pa lhat graung koe ku plak, kix khrawm ti yuh cub caw mai kum paox tix, keud ti sang teei ju aux yum heue. ¹⁴ Viang mawh kawx nan, Siyiex eue, aux deuh rhawm ka Maix heue. Aux krai yuh nin, Maix mawh Siyiex aux heue. ¹⁵ Bawg yam aux koe daux tawm taix Maix mai taoh aux luan khaing ka daux tawm taix pui pa koeng ka aux mai pui pa tuktiaktukte ka aux khankix liak. ¹⁶ Kieh pakngai Maix jhan riang ka piang aux liak, kieh bwanson krax pa caux rhawm Maix taoh aux liak. ¹⁷ Siyiex eue, aux rawg bwan ka Maix, paw lai kieh aux koe krax pa kaig tua liak, kieh pui pa caox caig khankix, hoek krax pa kaig tua mai kieh glaik tix daux meung yum liak. ¹⁸ Pui pa ting rhawm lhaong ngai, pui pa yuh pa ang cee ang cag, ang nab ang yam, pui pa ah lox map lox tiex ka pui pa rahsee khankix mai pui pa koe siyieb jheeh pa chix ling tix ah lox bied khankix, kieh yiien yawg liak. ¹⁹ Bwanson pa hoik priex Maix son pui pa lhat graung ka Maix, pa hoik cox Maix son pui pa deuh rhawm ka Maix, sivoe ngai kawn pui mhawm miex ding? ²⁰ Maix hoik teei tix mox kix daux tawm taix tix mai kieh kix luan khaing pa nieb yuh pui pa koeng khankix, Maix priex kix daux nyiex bwan Maix mai kieh kix luan khaing jheeh pa simah simiang heue. ²¹ Kieh Siyiex koe bwanson liak, grawh grawng nawh, Maix hoik jhi krax moh krax rhawm pa daox am ka aux, ka daux veng Maix pa kaux cong heue. ²² Aux lhat graung sivoe ngai Maix, mawh kheu ce aux Maix hoik tik ka tix, viang mawh nan, yam kok yo aux ka Maix mai yam rawg aux bwan, Maix nghiet ka lox aux heue. ²³ Pui pa singax singeh khankix eue, moh ka Siyiex heue. Siyiex kia ngien ka pui pa kaux sijax khankix mai deeh tawx phimap tom nie ka pui pa ting rhawm khankix heue. ²⁴ Pui pa deuh rhawm ka Siyiex khankix eue, teei riang rao mai kieh koe rhawm kwa rhawm vao heue.

¹ Pui pa hoik luan khaing phimap mai pui pa hoek ka daux pa tawb kheem phimap tix khan kix, koe bwanson heue. ² Pui pa luan khaing phimap pa deuh Siyiex mai rhawm pa ang koe ceu pa pie lhen, koe bwanson heue. ³ Phan aux ang krai doh ka phimap tix, si-ang aux kroik, kheu ngia aux leeing lang singaix heue. ⁴ Taix Maix cien ka piang aux ku singaix mai rawm lauh lih jheung jheung awm bawg yam rung praix heue. ⁵ Aux krai doh phimap sivoe ngai Maix, aux ang mox phimap pa lud tix, aux khyox khaw grawng pa lheu aux lox Maix Siyiex heue. Maix hoik pluat ploi phimap pa lud aux heue. ⁶ Mawh kheu in, pui pa singax singeh khankix, tak sang rawg mhaing ka Maix yam sipub kix ka Maix, phan yuh nan, rawm ting haok hwan kawx, ang lai pon tix kheem dex kix heue. ⁷ Maix mawh dee mox aux mai Cao pa tiebtie aux, yam khi rhawm aux heue. Kieh lox rhax grawng krax taoh rob vung viang aux heue. ⁸ Aux tak sang gau ka maix mai tak sang jhi krax pa sang hu maix, Aux kia ngien maix mai priex ka maix heue. ⁹ Paw lai kieh awm brung, law, pa ang tawng praix phan ang cu tix hoek ka maix, sau maox keu kag daux jheeh nawh mai sonsang pon tok nawh hu heue. ¹⁰ Pui pa ang rahsee khankix, yaox ti kham geu krax pa kha rhawm tom nie mai pui pa deuh rhawm ka Siyiex khankix, bwanson krax pa caux rhawm hoik rob vung viang nawh heue. ¹¹ Pui pa rahsee khankix eue, gaux rhawm gaux rhi ka daux Siyiex awx. Pui pa rahsee rhawm rhi khankix eue, rhax lai gaux rhawm gaux rhi awx.

¹ Pui pa rahsee khankix eue, rhax lai gaux rhawm gaux rhi ka daux Siyiex awx, krax pa gaux rhawm gaux rhi tix yaogyaw mawh pa keung pa khaw mai pui pa rahsee heue. ² Tah ting mai yaogyaw ka Siyiex awx, teei ting pa koe maox kao nyaing mai rhax lai yaogyaw awx. ³ Ah lox rhax pa khraox sivoe ngai Nawh Cao awx, gaux rhawm mai tah ting mhawm mhawm pa nyawm ti nghiet lox awx. ⁴ Grawh grawng nawh, gumlox Siyiex mawh pa rahsee mai krax prawng ca Nawh kawx, mawh pa khaw mai sijax mukheu pa rahsee heue. ⁵ Nawh Cao moh ka pui yuh kaing pa rahsee mai prawng ca awm pa khaw caw mai beenli heue. bwanson krax pa caux rhawm Siyiex hoik naog ka piang haktiex khawm bee ma heue. ⁶ Raoma mai can pa koe piang raoma khawmuik, Siyiex hoik yuh ka bhawm gumlox Nawh heue. ⁷ Nawh Cao kieh rawm sigrit sigra khrawm ti tau mai rawm sigrit sigra pa raux khankix, priex ka daux dee kaux heue. ⁸ Kieh haktiex khawm bieh khawm baung lhat graung ka Siyiex awx, kieh kawn pui can pa ot piang haktiex khawmuik, nab yam yungyi ka Nawh Cao heue. ⁹ Grawh grawng nawh, Siyiex ah ceu patix, lih mawh ceu an heue, Nawh Cao tawx lox mai lih mawh heue. ¹⁰ Siyiex tik vud ka ceu pa kum kawng pui tang ceu mai yieh ti tik ka krax pa keud sawn kix heue. ¹¹ Krax pa hoik ciak Siyiex ti deuh mawh pa kaux cong leeing ju mai ceu pa hoik keud Nawh Cao daux rhawm tix, kaux cong leeing ju heue. ¹² Pui pa hoik laug Siyiex ti teei khankix, mawh sin Nawh Cao mai kix koe bwanson heue. ¹³ Siyiex ot ka piang raoma jhak mai yaox ka kawn pui khawmuik heue. ¹⁴ Nawh Cao ot ka dee ot tix, jhak ka kawn pui piang tiex khawmuik mai tawng ka kix heue. ¹⁵ Nawh Cao yuh rhawm rhi kix koe mai jhak ka pa yuh kix khawmuik heue. ¹⁶ Simiang kaux pui mawx ang ah, pon krax nyawm rhawm kheu haoh hun pui naing ang mawh mai cao giex kaing naing pa hoek krax taoh mawh kheu ting riang ting rao tix ang mawh. ¹⁷ Brung kawx mawh pa giex going, nawh ang pon taoh ka riang rao pa ting nawh. ¹⁸ Jhak heue, ngai Siyiex jhak ka pui pa lhat graung ka Nawh mai pui pa deuh rhawm ka bwanson krax pa caux rhawm Nawh khankix heue. ¹⁹ Kieh kix luan khaing krax yum mai kieh kix im ju yam hot sibhawm heue. ²⁰ Ju ex krox pot jun pot ka Siyiex, Nawh Cao mawh Cao pa teem ex mai Cao pa tiebtie ex heue. ²¹ Mawh kheu ex deuh rhawm ka ceu kaux Nawh pa singax singeh mai rhawm ex tom koe krax gaux rhawm gaux rhi ka daux Siyiex heue. ²² Siyiex eue, mawh kheu krox jun ex ka Maix, kieh bwanson krax pa caux rhawm Maix koe ka piang ex liak.

¹ Aux tak sang yaogyaw ka bwanson Siyiex ku bawg yam mai yaogyaw ka Nawh jheung jheung heue. ² Ju aux deuh rhawm ka Siyiex mai yaw rangdi, yam mhong kix pui pa hot sibhawm khankix, tak gaux rhawm gaux rhi heue. ³ Yaogyaw bwanson Siyiex tau mai aux, ex yaogyaw ceu kaux Nawh ting lhaong heue. ⁴ Yam sawg aux ka Siyiex, Nawh deeh pawk ka lox aux mai taoh aux luan khaing pa lhat graung khawmuik heue. ⁵ Pui pa maong ti jhak ka Nawh Cao khankix, pon pa riang heue. Pakngai kix ang hoek krax pa kaig tua heue. ⁶ Lox kok yo pui pa hot pa sibhawm, Siyiex nghiet lox nawh mai taoh nawh lih khaing ka daux pa kha rhawm kuceu khawmuik heue. ⁷ Kawncau Siyiex cie Simiang, deuh tab rob vung viang kix pa lhat graung ka Nawh mai taoh ka kix heue. ⁸ Cim ti yaox grawng pa mhawm mhiem Siyiex mai pui pa deuh rhawm ka Siyiex, koe bwanson heue. ⁹ Pui pa singax singeh Siyiex khankix eue, lhat graung ka Siyiex awx, can pui pa lhat ka Nawh ang lai baox lo tittix. ¹⁰ Kawn sivai sangsi khankix, cai rhawm mai ang yaox ti ih pa ih kawx, can pui pa sawg ka Siyiex khankix, pa simie ti pon pa mhawm pa ang kix pon ang koe tix ceu kawx heue. ¹¹ Kawn nyawm khankix eue, hoek ka aux mai nghiet lox aux, aux tak sang gau pex ka beenli pa lhat graung ka Siyiex heue. ¹² Pui mawx pa simie ti im ju mai lang ju mai pa krox jun ka singaix bawg yam pa mhawm khankix. ¹³ Kieh dak tix luan khaing pa caox pa ang mhawm mai jheeh nawh kawx paw vi ah lox pie lhen, ¹⁴ via khaing ceu pa caox mai yuh ceu pa mhawm mai sawg ka pa khaw caw mai hawt leue tom krup awx. ¹⁵ Grawh grawng nawh, ngai Siyiex jhak ka piang pui rahsee khankix mai yhaok Nawh nghiet ka lox pa rawg pa mhaing kix heue. ¹⁶ Pui pa yuh pa caox caig khankix, Siyiex vud ngai khaing kix mai tik vud kix, tom kawn pui piang haktiex ang tawng mai ang lai doh keud ka kix heue. ¹⁷ Siyiex nghiet ka lox pa kok yo pui pa rahsee khankix mai taoh kix lih khaing krax pa kha rhawm kuceu khawmuik heue. ¹⁸ Siyiex ot dex mai pui pa laux rhawm laux rhi khankix mai Nawh taoh ka pui pa awn rhawm khankix heue. ¹⁹ Pui pa rahsee khankix, viang kix yaox krax pa kha rhawm tom nie kawx, Siyiex taoh kix lih khaing ceu an kuceu khawmuik heue. ²⁰ Nawh Cao priex si-ang Nawh khawmuik mhawm mhawm mai ang kieh pot tix nyaing kawx. ²¹ Pui pa yuh pa caox, yum ka pa caox, pui pa koeng ka pa rahsee khankix, yaox ti prawng ca ka phimap pa yuh tix heue. ²² Siyiex taoh ka ju siliex Nawh mai pui pa deuh rhawm ka Nawh khankix, ang hoek krax prawng krax ciyang phimap tix kaux kawx heue.

¹ Siyiex eue, Maix lah cha ka pui pa lah cha ka aux, Maix puing ka pui pa puing ka aux. ² Teei kraung naing pa tiebtie Maix, kaoh mai teem aux liak. ³ Teei pliah mai vaid Maix tiebtie ka pui pa hawt pheet khaix aux khankix liak, kieh daux rhawm aux ah nin, Maix mawh Cao pa taoh aux heue. ⁴ Pui pa sawg tix plaux ka ju aux khankix, kieh plakngai kix hoek krax pa kaig tua mai pui pa bak ti yuh pa caox ka aux khankix, kieh deeh blak plak khaix tix mai koe krax pa kaig pa tua khawm lhat tix liak. ⁵ Kieh kix awm kam riex pa phlu bhaung hu, kieh kawncau Siyiex cie Simiang hawt pheet ti tik kix liak. ⁶ Kieh krax hu kix faik mai nyu mai kieh kawncau Siyiex cie Simiang hawt pheet ti tik kix liak. ⁷ Ang koe krax koe grawng tittix kawx, kix mox ti taong kie mai kaong daux tiex mai tak sang teei ju aux yum heue. ⁸ Pui pa yuh nan, yam ang kix tien tawng, kieh krax laux leeing hoek ka piang kix liak mai kieh kix deeh krix ka kie pa hoik taong tix mai daux tiex pa hoik kaong kix tiru liak. ⁹ Phan yuh nan, ju aux deuh rhawm ka Siyiex mai koe krax gaux rhawm gaux rhi heue, deuh rhawm ka krax pa taoh Nawh mai gaux rhawm gaux rhi heue. ¹⁰ Siyiex eue, si-ang aux khawmuik ah nin, pui mawx sang awm Maix, Cao Taoh pui pa hot pa sibhawm khaing daux tawm taix pui pa ting riang ting rao khaing nawh mai tawx krax nyawm rhawm ka pui pa hot pa sibhawm mai pa cud cha khankix heue. ¹¹ Pui pa kham sakse pa ang rahsee khankix, kaoh mai chawk ka aux grawng pa ang aux tawng. ¹² Kix deeh pawk pa caox ka ceu pa mhawm pa yuh aux mai kix sang teei khawm ju mai kieh aux laux rhawm heue. ¹³ Phan mawh nan, yam yaox kix jhawm saux mai aux ceep kraung pa taing ka maox rhix mai aux kieh rhawm aux twah pa ih mai bwan pa rawg aux deeh hoek ka piang naok aux heue. ¹⁴ Aux deuh kix awm paox grawm mai puxaik, awm pui pa khi rhawm mai yiiem son miex tix, aux khi rhawm son kix mai gup kaing tix heue. ¹⁵ Yam yaox aux krax khi rhawm, kix khrawm paox tix gaux rhawm mai yuh pa ang cee ang cag mai pui pa ang aux tawng khankix giex aux mai tap toi ka aux heue. ¹⁶ Kix deuh aux awm pui pa caox caig mai greeik rhang tix ka aux heue. ¹⁷ Siyiex eue, Maix kawn tak sang jhak bawg yam miex grheung? Taoh ju aux khaing daux pa laux leeing, ceu pa lheu moh aux khaing paox tix, taoh aux khaing sivai sangsi khankix liak. ¹⁸ Phan yuh nan, aux tak yaogyaw bwanson Maix ka sinax pui hun heue. ¹⁹ Pui pa nieb koeng giex going ka aux, paw kieh kix gaux rhawm ka piang aux mai pui pa nieb ciang khoi ka aux, paw kieh nawh khiep ngai tix ka aux liak. ²⁰ Grawh grawng nawh, kix ang chix krai lox pa yiien yawg ti bawg kawx, sawg kix ti krai lox pie lhen ka pui pa ot mhawm mhawm khankix heue. ²¹ Kix ang jheeh tix mai ah nin ka aux, "ha ha!", ngai ex hoik yaox ka ceu an heue. ²² Siyiex eue, Maix hoik yaox ka ceu in, paw glaik yiien yawg tix, Siyiex eue, Maix paw lai ot singai khaing aux liak. ²³ Siyiex aux eue, siduad mai kaoh heue, prawng ca ka ceu pa hoek ka piang aux liak. ²⁴ Siyiex aux eue, prawng ca ka aux awm pa rahsee Maix liak, paw kieh kix gaux rhawm ka piang aux liak. ²⁵ Paw kieh kix ah nin, ka daux rhawm tix, haha, ex hoik naog alo tix, paw peung kieh kix ah, hoik pex ex ka nawh. ²⁶ Can pui pa gaux rhawm yam yaox aux krax khi rhawm khankix, kieh kix hoek krax pa kaig tua mai voi plakngai liak. Pui pa yaw ka tokaux tix, tak sang ceep kraung pa kaig tua mai laux plakngai heue. ²⁷ Pui pa deuh rhawm ka pa rahsee khankix, kieh kix rhax lai mai gaux rhawm gaux rhi liak. Kieh kix ah nin jheung jheung, kieh Siyiex khaw rhawm mai tawx krax pa nyawm rhawm mai min plakngai pa ting ka siliex Nawh heue. ²⁸ Dak aux tak sang krai grawng pa rahsee Maix mai yaogyaw ka Maix ku singaix heue.

¹ Pui pa koe phimap mai pa ang rahsee ah nin ka daux rhawm tix, krax pa lhat graung ka Siyiex ang koe sivoe ngai nawh. ² Grawh grawng nawh, nawh yuh grang tix awm pa ang koe phimap pa seeing brai mai pa koeng ka pa caox caig plak sivoe ngai tokaux tix heue. ³ Lox pa lih khaing jheeh nawh mawh pa seeing brai mai pa pie lhen, tik ka cuyi pingnya mai ceu pa mhawm mhiem khankix heue. ⁴ Nawh keud ceu pa caox caig pa ang mhawm ka dee it tix mai nawh hawt ka daux krax pa seeing brai mai nawh ang seeing brai ka ceu pa caox khankix heue. ⁵ Siyiex eue, krax moh krax caux rhawm Maix hoik hoek tom raoma mai sijax mukheu Maix hoek ka paiawm heue. ⁶ Krax pa rahsee Maix, awm gawng heue. krax prawng ca Maix mawh pa kied raux heue. Siyiex eue, Maix teem ka kawn pui mai khawm totiag heue. ⁷ Siyiex eue, krax pa moh pa caux rhawm Maix ting lhaong miex ding? kawn pui deuh rhawm ka Maix mai ot greem veei pruik Maix heue. ⁸ Kix tak sak mai kluing bee ka daux nyiex Maix mai Maix tak tawx kix nyaux rawm klawng im ju heue. ⁹ Grawh grawng nawh, daux lih rawm im ju koe mai Maix, aux yaox pa riang ka daux pa riang Maix heue. ¹⁰ Krax pa moh pa caux rhawm Maix koe ka piang pui pa tawng ka Maix, kieh pa rahsee Maix, koe ka piang kix pa koe rhawm rahsee liak. ¹¹ Paw kieh caong pui pa ting rhawm ting rhi dig ka aux liak, paw kieh taix pui pa ang rahsee grheu aux to liak. ¹² Pui pa yuh phimap hoik goh tan, kix goh mai ang lai pon ti kaoh heue.

¹ Paw khi rhawm ka cao tix kheu pui caox, paw lai ghoing ka grawng pa yuh pui pa ang rahsee. ² Grawh grawng nawh, ang lai rheung, tak sang teue awm rib riem mai rib riem pa klai tak awm pa kroh hu heue. ³ Yum rhawm ka Siyiex mai yuh ceu pa mhawm heue, ot ka daux meung Nawh mai kaux sijax mukheu ka daux beenli Nawh Cao awx. ⁴ Gaux rhawm ka daux Siyiex awx, phan yuh nan, Nawh tak sang tawx pa grum naog awm pa lo daux rhawm maix khawmuik heue. ⁵ Ap pong tokaux maix ka Siyiex awx, yum rhawm ka Nawh Cao awx, phan yuh nan, Nawh tak teem maix heue. ⁶ Nawh Cao kieh pa rahsee maix toh awm pa riang mai kieh pa rahsee pa yuh maix jhan riang awm yam jung singaix heue. ⁷ Ot yiien yawg tix sivoe ngai Siyiex mai krox jun ka Nawh Cao awx, paw khi rhawm ka grawng pui pa nieb khin ti yuh ka maix mai pui pa bak ti yuh pa caox pa ang mhawm ka maix. ⁸ Paw kieh song rhawm, tik ka ceu pa song rhawm, paw kieh rhawm maix koe krax lud heue. ⁹ Pui pa lud khankix, tak sang yaox ti kham ka pa tik pa vud heue. Pui pa krox jun ka Siyiex khankix, tak pon sin meung Nawh Cao heue. ¹⁰ Ang lai rheung tivud pui ang rahsee ang koe maix sawg kix kawx ang lai yaox dee ot kix heue. ¹¹ Pui pa awn rhawm khankix, tak pon sin ka daux meung Nawh Cao mai tak gaux rhawm pa grum naog pa nhim heue. ¹² Pui pa ang rahsee khankix, greeik rhang mai bak ti yuh ka pui pa rahsee khankix heue. ¹³ Siyiex hoik tawng bawg yam singaix hoik hoek mai nyiah ka nawh heue. ¹⁴ Pui pa ang rahsee khankix, lawd vaid tix mai vaik ak tix, sang plaux ka pui pa hot pa sibhawm mai pui pa rahsee yum heue. ¹⁵ Viang mawh nan, vaid kix tak deeh laig ka daux rhawm kix mai ak kix kawx, tak pot heue. ¹⁶ Kraung pa koe pui pa rahsee ceeix khaing kawx, nie lheu mhawm khaing, pa koe kraung pui pa ang rahsee tom nie heue. ¹⁷ Grawh grawng nawh, plawng taix pui pa ang rahsee khankix, tak pot heue. Siyiex teem ka pui pa rahsee khankix heue. ¹⁸ Siyiex hoik tawng bawg yam singaix mai kieh sin ngao kix grum kaux jheung jheung heue. ¹⁹ Yam yaox kix krax pa nu khawm, ang kix lai kaig tua mai yam sibhawm praix kix yaox ti ih tom sak heue. ²⁰ Pui pa ang rahsee khankix, tak hoek krax laux leeing heue, pui pa koeng ka Siyiex khankix, viang mhawm grang ka dee sax ih kix kawx, tak laux leeing grai hu awm taox ngu heue. ²¹ Pui pa ang rahsee khankix, yaog yaing mai ang lai rhawm deeh tawx, phan mawh pui pa rahsee khankix, koe krax pa caux rhawm mai deeh tawx heue. ²² Can pui pa pon bwanson Nawh Cao khankix, tak pon sinngao ka daux meung Nawh Cao, can pui pa jhax lawg Nawh Cao khankix, tak hoek krax pa tik vud Nawh heue. ²³ Siyiex jhi daux krax pa hu nawh mai Nawh khaw rhawm ka krax pa hu nawh heue. ²⁴ Pui an viang goh kawx, ang awt hoek krax laux leeing, grawh grawng nawh, Siyiex tok taix nawh heue. ²⁵ Jah tom yam awn ju aux, tom hoek yam kuad aux, ang sax yaox tik Maix ka pui pa rahsee mai kawn praix kix pa caung ti ih ang koe. ²⁶ Nawh koe rhawm pa chix caux rhawm jheung jheung mai tawx yaog yaing ka pui mai kawn praix nawh khankix, tak pon bwanson heue. ²⁷ Via khaing ceu pa caox mai yuh ka ceu pa mhawm awx, phan yuh nan, tak yaox ti ot kaux cong jheung jheung heue. ²⁸ Siyiex khaw rhawm ka krax rahsee mai Nawh ang tik ka pui pa singax singeh Nawh, Nawh Cao tak kia ngien ka kix jheung jheung heue. Nawh tak tik ka kawn praix pui pa ang rah ang see khankix heue. ²⁹ Can pui pa rahsee khankix, tak pon sin meung Nawh Cao mai yaox ti ot tau mai Nawh jheung jheung leeing ju heue. ³⁰ Jheeh pui pa rahsee, chix krai lox cuyi pingnya mai dak nawh kawx, chix krai lox pa rahsee heue. ³¹ Gumlox beenli Siyiex, ot ka daux rhawm nawh mai caong nawh ang cang klad ang goh heue. ³² Pui pa ang rahsee khankix, jawm ti pah pui pa rahsee yum heue. ³³ Viang mawh nan, Siyiex ang tik ka pui pa rahsee ka daux tawm taix pui caox an, yam chawk cheng Nawh, ang lai hoek krax prawng ca phimap heue. ³⁴ Krox jun ka Siyiex mai hu ka daux krax Nawh awx, Nawh Cao tak yaog maix ting mai tawx sin ka daux meung Nawh Cao mai maix tak yaox pa laux pa som pui pa ang rahsee khankix heue. ³⁵ Viang aux yaox pui pa ang rahsee khankix, pa nieb kwang tokaux tix, ting lhaong awm khaox ting khaox mhawm kawx. ³⁶ Khaix an nawh gah hu mai grai mu heue, aux sawg nawh kawx ang yaox. ³⁷ Keud ka pui pa hoik grum mhawm mai jhak ka pui pa rahsee awx mai pui an tak pon pa nhim, ju khaix tom sidah heue. ³⁸ Can pui pa lud khankix, tak hoek krax laux leeing mai pui pa ang rahsee khankix, kix tak yaox ti kham pa tik vud ju khaix heue. ³⁹ Krax taoh pui pa rahsee khankix, lih hoek khaing Siyiex mai mawh dee deuh rhawm yam yaox kix krax khi rhawm heue. ⁴⁰ Siyiex teem kix mai taoh kix mai Nawh Cao taoh kix lih khaing daux tawm taix pui pa ang rahsee khankix, kheu kix deuh rhawm ka Nawh Cao heue.

¹ Siyiex eue, viang Maix song rhawm kawx, paw lai deuh phimap ka aux liak. Paw lai sivied ti gau aux ka pa kied song rhawm Maix liak. ² Te Maix hoik laig ka aux mai taix Maix hoik yeen ka aux. ³ Mawh kheu lih krax pa song rhawm Maix, nex aux ang koe krax nyawm ot, mawh kheu phimap aux, ang koe krax brax krax moi. ⁴ Phimap pa yuh aux hoek ka piang kaing aux, awm kraung pa cien pa ang aux lai pex ti klawm heue. ⁵ Mawh kheu mawh aux pui pa seeing brai mai pon jhawm saux pa brai pa cux heue. ⁶ Aux kied yaox ti kham geu dee tiiem mai ceep kraung caox mai lailing tix leeing lang singaix heue. ⁷ Nyoi aux pon jhawm saux si aoh hax mai nex aux ang koe dee nyawm ot. ⁸ Rhawm aux bih mai siyaung tix mai riag yo heue. ⁹ Siyiex eue, can pa lo aux khawmuik hoik koe sivoe ngai Maix, lox pa ngia aux kawx, kieh Maix tawng heue. ¹⁰ Rhawm aux siyaung mai riang rao aux kawx, hoik grai khaing aux heue. ¹¹ Mawh kheu saux ngia aux, paox meed aux mai paox grawm aux khankix cung dee singai mai puxaik aux khankix kawx, via ti tik aux heue. ¹² Pui pa sawg ka ju aux khankix, taong kie ka aux heue. Pui pa sawg ti yuh pa caox caig ka aux khankix kawx krai lox pa ang khaw mai nieb keud ti yuh pa caox leeing lang singaix heue. ¹³ Phan mawh aux yuh tix ang mhong awm pui pa lheet yhaok mai yuh tix ang chix sikah awm pui aw heue. ¹⁴ Aux awm pui pa ang chix mhong mai awm pui pa ang chix pawk lox sikah heue. ¹⁵ Grawh grawng nawh, Siyiex eue, aux deuh rhawm ka Maix pa mawh Siyiex aux, deeh pawk ka lox aux liak. ¹⁶ Phan ang mawh nan, ha kix kox gaux rhawm ka piang aux, yam cang klad aux, pui pa ot tang plak khankix, ¹⁷ ha kix kox yaw tokaux ti ah nin, yam dex goh aux mai yam saux ngia aux doh deud ka heue. ¹⁸ Aux krai doh ka phimap tix, aux khi rhawm kheu hoik yuh aux phimap heue. ¹⁹ Pui pa koeng ka aux khankix, kix nyawm ot mai ting riang mai pui pa koeng ka aux ka daux pa ang mawh meh kawx, kied haoh hun heue. ²⁰ Mawh kheu yuh aux pa mhawm mai ceu pa rahsee kix deeh tawx pa caox ka pa yuh aux pa mhawm heue. ²¹ Siyiex eue, paw lai tik vud aux liak, Siyiex eue, paw lai ot singai khaing aux liak. ²² Siyiex Cao pa taoh ka aux eue, nied Maix lih teem ka aux liak.

¹ Aux ah nin, aux yuh satix mai priex rhawm ka dak tix son ang lai lud, yam ot pui pa ang rahsee sivoe ngai aux mai aux thox jheeh tix ang ah lox tidtix heue. ² Ang aux lai sikah awm pui aw, pie lox ceu pa mhawm kawx, ang aux krai, viang mawh nan, krax pa laux rhawm aux nie kin heue. ³ Ka daux rhawm aux hoik si aoh yam keud aux tokaux tix, lih hax awm ruk ngu heue. ⁴ Siyiex eue, kieh aux tawng tom sidah krax, ka grawng ju aux mai sonsang tawng aux grawng pa chix laux leeing tokaux tix heue. ⁵ Jhak heue, Maix hoik kieh ju aux dawd mai ju aux kawx ang mawh tidtix, sivoe ngai Maix, phan mawh kawn pui, viang nawh ting lhaong kawx, mawh pa giex going heue. ⁶ Phan mawh kawn pui awm ngie kawn pheue mai kha rhawm, ang koe bwanson tidtix, viang kix khrawm ti deuh kraung khrai kawx, ang kix tawng ka pui sang pon heue. ⁷ Siyiex eue, yam in aux keut pot ka ceu patix? Krax krox krax jun aux, koe ngie ka daux Maix khaing heue. ⁸ Taoh aux lih khaing phimap pa lud tix liak, paw kieh pui pa caox khankix, map mai salao ka aux liak. ⁹ Mawh kheu grawng kaing pa yuh Maix, aux tom ang lo ti ah tidtix heue. ¹⁰ Paw nyang ciyang ka aux ha, aux ot daux tawm taix pa sivied Maix ti gau mai riang rao aux hoik uik heue. ¹¹ Maix sivied ti ciyang ka kawn pui, mawh kheu phimap nawh, Maix kieh min plakngai pa khaw rhawm kix grai hu, awm viag pa chix yuh laux mai kawn pui khawmuik mawh pa giex going heue. ¹² Siyiex eue, nghiet ka lox pa rawg pa mhaing aux mai veeh yhaok Maix nghiet ka lox pa kok yo aux liak, paw lai jhak ka rawm ngai aux, aux mawh ngie nyo sinie sivoe ngai Maix, awm ju tax du ex khankix heue. ¹³ Veeh plakngai Maix ka aux sonsang nyawm rhawm rhi aux, tom ang aux nyang gah hu mai grai hu liak.

¹ Aux krox jun ka Siyiex mai Nawh veeh plakngai ka aux mai nghiet ka lox pa kok yo aux heue. ² Nawh cao taoh aux lih khaing daux tiex mai daux glaox pa caox caig heue. Deuh caong aux ka piang rang ting mai kieh rhoi khaix caong aux kaux cong heue. ³ Nawh Cao teei lox rhax pa khraox sau ka daux jheeh aux, sonsang yaogyaw ka Siyiex heue. Yam pui hun yaox, kix lhat graung mai deuh rhawm ka Siyiex heue. ⁴ Pui pa deuh rhawm ka Siyiex mai pa via hu khaing pui pa ting rhawm mai khaing pui pa krub riang grang khankix koe bwanson heue. ⁵ Siyiex aux eue, ceu pa daox am mai pa keud Maix son ex, kied haoh hun heue. Ceu pa yiag pa bak Maix ti deuh sivoe ngai Maix ang doh uik, phan aux krai grawng ceu pa yuh Maix, kied haoh hun, tom ang aux lai uik simin heue. ⁶ Maix ang simie ti cie ka kraung ceu pa tan pa lu, aux hoik paoh yhaok tix mai ang rawg ka kraung ceu pa gleeing tix tawx sonsang ploi phimap. ⁷ Aux tak sang hu heue, awm pa hoik tiem aux ti deuh grawng aux, daux bua Phuk Lai heue. ⁸ Siyiex aux eue, aux kied gaux rhawm sonsang hawt yuh alo Maix, gumlox beenli Maix kawx, ot ka daux rhawm rhi aux heue. ⁹ Aux hoik sidiex gumlox pa rahsee Maix, sinax pui hun hankix heue. Siyiex eue, Maix hoik tawng grawng pa ang aux thox jheeh tix heue. ¹⁰ Lox beenli pa rahsee Maix kawx, ang aux lai mox ka daux rhawm tix mai aux hoik sidiex grawng krax taoh Maix mai pa kaux sijax, krax moh krax rhawm mai pa kaux sijax Maix, aux ang lai mox sinax pui hun khankix heue. ¹¹ Siyiex eue, paw gun krax pa caux rhawm pa moh Maix ka aux liak mai krax pa caux rhawm Maix mai sijax mukheu Maix kia ngien ka aux jheeing jheeng liak. ¹² Grawh grawng nawh krax khi rhawm haoh hun tom ang uik tawng hoik rob vung viang aux heue. Phimap hoik krup ka aux tom ang aux pon jhak, nie lheu khaing hauk kaing mai rhawm rhi aux hoik iak hu heue. ¹³ Siyiex eue, Maix taoh ka aux liak, Siyiex eue, nied tix teem ka aux liak. ¹⁴ Pui pa sawg tix plaux ju aux khankix, kieh kix kaig tua mai laux plakngai liak, pui pa simie ti yuh pa caox ka aux khankix, kieh kix lhat mai hoek krax pa kaig tua liak. ¹⁵ Can pui pa ah nin ka aux, haha, haha, kieh voi rhawm rhi mai hoek krax pa kaig tua liak. ¹⁶ Can pui pa sawg ka Maix khankix, kieh kix gaux rhawm ka daux Maix liak, can kix pa khaw rhawm ka bwanson krax taoh Maix mai kix ah nin, kieh min plakngai Siyiex ting lhaong jheung jheung liak. ¹⁷ Phan mawh aux viang aux hot sibhawm kawx, Siyiex kawn doh keud ka aux heue, Maix mawh Cao pa teem aux mai taoh ka aux heue, Siyiex aux eue, paw lai koi.

¹ Pui pa doh keud ka pui pa hot pa sibhawm khankix ting bwanson heue. Siyiex kieh nawh luan ka bawg yam singaix pa nu pa khawm heue. ² Siyiex tak teem ka nawh mai kieh ju nawh nyawm rhawm mai nawh tak sang pon bwanson ka daux meung Nawh Cao heue. Maix ang tawx nawh ka pui pa koeng ka nawh khankix. ³ Siyiex tak sang joh jhan teem ka nawh, yam saux yam ngia nawh mai Siyiex cox dee it nawh heue. ⁴ Aux ah nin, "Siyiex eue, caux rhawm ka aux liak mai kieh jhawm saux ju aux moi liak, mawh kheu hoik phit lud aux ka Maix heue." ⁵ Pui pa koeng ka aux khankix, krai lox map ka aux, nawh tak yum mai ceu kaux nawh grai lai mawx? ⁶ Yam hoek nawh ti jhak ka aux, nawh ah lox pie lhen heue, ka daux rhawm rhi nawh, keud tix krai grawng pa ang mhawm yam lih hu nawh heue. ⁷ Can pui pa koeng ka aux khankix, ot tang plak mai krai lox supsiep ka paox tix, tix kaux lai tix kaux mai keud pa ang mhawm ang mhiem ka piang aux heue. ⁸ Kix nieb ah nin, nawh hoik goh mai ang tau ti deeh pon kaoh tix bawg kawx heue. ⁹ Paox grawm pa yum rhawm aux, pa ih blah aux, yaog caong tix tiied ka aux heue. ¹⁰ Siyiex eue, caux rhawm ka aux, kieh aux deeh kaoh, sonsang deeh viied aux ti pawk phimap kix liak. ¹¹ Son ang pui pa koeng ka aux khankix pex aux, teem ka aux liak mai kieh aux tawng grawng pa moh Maix aux heue. ¹² Maix hoik teem mai kieh aux grum koe mai tawx dee ot aux sivoe ngai Maix leeing ju heue. ¹³ Kieh Siyiex ceu pui Isarelax koe bwanson leeing ju liak. Amen, Amen.

¹ Siyiex eue, awm krox jun cak ka rawm klawng pa si kiied, ju aux kawx, krox jun ka Maix heue. ² Ju aux cai rhawm ka Siyiex, pa mawh Siyiex pa im ju, aux tak sang hoek ti jhi plakngai tix ka Maix lai mawx? ³ Rawm ngai aux lih ti mawh pa ih aux ku singaix ku sawm yam chawk pui tang kaux ka aux ah nin, Siyiex maix koe dee mawx? ⁴ Yam doh keud aux ka ceu an khankix, aux khrup rhawm heue, grawh grawng nawh, yam rom aux tix hu tau mai pui hun mai ah lox gaux rhawm mai lox rhax yaogyaw mai thong pui hun khankix hu ka daux nyiex Siyiex heue. ⁵ Ju aux eue, mawh kheu patix rhawm maix iak hu yuh nin yuh ka mawx? Mawh kheu patix maix ang ot yiien yawg tix ka daux aux yuh ka mawx? Krox jun ka Siyiex awx. Aux tak sang ah lox rhax yaogyaw bwanson Siyiex pa krub aux mai Cao pa taoh aux tix bawg heue. ⁶ Siyiex eue, ju aux hoik iak riang hu ka daux aux heue. Grawh grawng nawh, aux doh keud ka Maix ka praok rawm klawng Yawdan mai ka piang gawng Heramon mai gawng Mizarax heue. ⁷ Rawm sigrit sigra pa raux tix mu hoik tix mu mai pukpak rawm sinum siaox khankix, hoik kheem ka aux heue. ⁸ Viang mawh kawx nan, yam pon singaix Siyiex caux rhawm tawx bwanson mai yam ponsawm kawx, rhax lai yaogyaw ka Siyiex Cao ju aux, ot mai aux heue. ⁹ Aux ah nin, ka Siyiex pa mawh Rang ting aux, mawh kheu patix Maix lai pi awm aux, yam yaox aux tix kham geu krax tuk tiak tukte mai pui pa koeng ka aux mai yam yaox aux ti ceep kraung pa caox pa blai yuh ka mawx? ¹⁰ Pui pa koeng ka aux khankix, ca chawk ah nin ka aux, Siyiex maix koe dee mawx? Kix salao ka aux mai simie ti raig si-ang aux pot heue. ¹¹ Ju aux eue, mawh kheu patix rhawm maix iak hu yuh nin yuh ka mawx? Mawh kheu patix maix ang ot yiien yawg tix ka daux aux yuh ka mawx? Krox jun ka Siyiex awx. Aux tak sang ah lox rhax yaogyaw bwanson Siyiex pa krub aux mai Cao pa taoh aux tix bawk heue.

¹ Siyiex eue, prawng ca ka see aux mai teem aux ka pui pa ot tang plak pa ang koe krax caux rhawm liak mai taoh aux luan khaing tawm taix pui pa ang kaux sijax mai pui pa ang rahsee liak. ² Maix mawh Siyiex dee deuh aux rhawm heue, mawh kheu patix Maix lai tik vud aux, yam yaox aux tix kham geu krax pa tuktiak tukte pui pa koeng ka aux mai yam yaox aux ti ceep kraung pa caox pa blai yuh ka mawx? ³ Ploi pa riang Maix mai pa kaux sijax Maix lih hoek liak mai thong kix hu ka piang gawng Maix pa singax singeh mai thong aux hu ka daux nyiex bwan Maix liak. ⁴ Phan yuh nan, aux tak hoek ka khu dee tan Maix mai gaux rhawm ti hoek ka dee ot Maix mai tah ting ah lox rhax yaogyaw ka Siyiex aux heue. ⁵ Ju aux eue, mawh kheu patix rhawm maix iak hu yuh nin yuh ka mawx? Mawh kheu patix maix ang ot yiien yawg tix ka daux aux yuh ka mawx? Krox jun ka Siyiex awx. Aux tak sang ah lox rhax yaogyaw bwanson Siyiex pa krub aux mai Cao pa taoh aux tix bawg heue.

¹ Siyiex eue, ex hoik mhong kaing pa yuh Maix ka ju tax du ex didix. ² Maix hoik teei taix tix mai sigrheu ka pui tang ceu khankix mai tawx dee ot ka tax du ex khankix heue, Maix tuktiaktukte ka pui tang ceu khankix mai kieh pui tax du ex khankix pre haoh hun heue. ³ Kix teei vaid mai kwang haktiex ang mawh, kix teei plawng taix tix, taoh ka tokaux tix ang mawh, mawh kheu koe alo Maix mai Maix teei taix khawn dawm Maix mai pa riang pakngai Maix taoh ka kix heue. ⁴ Siyiex eue, Maix mawh Simiang aux heue. Prawng ca mai taoh ka aux ceu pui Yakop liak. ⁵ Aux deuh rhawm ka Maix mai nyhot ti tik ka pui pa koeng ka aux heue. Aux deuh rhawm ka ceu kaux Maix mai dig ka pui pa koeng ka aux khankix heue. ⁶ Ang aux deuh rhawm ka ak viex tix mai vaid aux kawx, ang pon ti taoh aux. ⁷ Mawh Maix khaing pa pon ti taoh aux luan khaing pui pa koeng ka aux khankix heue. Maix kieh pui pa koeng ka aux khankix hoek krax pa kaig tua heue. ⁸ Aux yaw rangdi ka daux Siyiex, leeing lang singaix mai yaogyaw ceu kaux Maix jheung jheung heue. ⁹ Viang mawh kawx nan, Maix tik aux mai kieh aux kaig tua mai ang hu tau mai kru naing aux khankix. ¹⁰ Kieh aux deeh plak khaix, sivoe ngai pui pa koeng ka aux khankix mai pui pa koeng ka aux khankix hoik rud rhim ti teei pa simie kix ti teei khawmuik heue. ¹¹ Maix hoik teei ti tawx aux ka kix awm kawn yung pa sang pah ti ih mai hoik kieh prung prang hu sinax pui tang ceu heue. ¹² Maix ang teei ngawh mai hoik coh ka pui Maix, pa coh Maix ang koe krax pa mi pa koe mai ang chix haok hwan heue. ¹³ Pa yuh Maix ka ex kieh pui paox plawg salao mai pui pa ot dex sivie siveng ex nyiah mai kaig tua heue. ¹⁴ Pa yuh Maix ka ex kieh pui tang ceu map ka ex mai kieh cub pui hun vudvied kaing ka ex heue. ¹⁵ Aux laux min plakngai leeing lang singaix mai krax pa kaig tua aux koe sivoe ngai aux heue. ¹⁶ Grawh grawng nawh aux mhong lox map, lox pa salao mai lox bak lox viang pui pa koeng khankix heue. ¹⁷ Viang ex yaox ti kham nie ding nie dod kawx, ang ex doh pi awm Maix mai ang tik ka sijax mukheu Maix. ¹⁸ Rhawm aux ang deeh ka plak khaix mai ang lud hu khaing krax beenli Maix. ¹⁹ Phan mawh Maix teei ti tik dee ot sox praix mai kheem ex ka veei krax yum heue. ²⁰ Phan ex pi awm ka ceu kaux Siyiex ex, phan nyeu taix tix ka siyiex pui tang ceu khankix. ²¹ Phan Maix ang chawk cheng ka kaing pa yuh ex khex chix lie? Grawh grawng nawh, Maix hoik tawng ceu pa mox ka daux rhawm tix khawmuik heue. ²² Mawh kheu son Maix, ex yaox ti kham yum jheung jheung mai pui tang kaux deuh ex awm kawn yung pa sang pah heue. ²³ Siyiex eue, siduad heue, mawh kheu patix, Maix lai laig it, kaoh heue, paw lai tik ka ex jheung jheung liak. ²⁴ Mawh kheu patix Maix veeh plakngai khaing ex mai Maix pi awm ex yam yaox ex krax kha rhawm mai krax pa tuktiak tukte yuh ka mawx? ²⁵ Ju ex hoik rau hu tom siglaing tiex mai tokaux aux kawx, hoik cux ka piang tiex heue. ²⁶ Kaoh mai teem ka ex liak mai taoh ex ka daux krax moh krax caux rhawm Maix liak.

¹ Lai pa tiiem aux, ah lox rhax ka paox plak sivoe ngai Simiang, rhawm rhi aux kied naog krax gaux rhawm heue. Dak aux kawx sidaing chix ah awm gawng nameug pui pa chix tiiem lai tix kaux heue. ² Maix lheu mhawm khaing paox kawn pui heue, jheeh Maix hoik naog ka lox bwan son heue. Mawh kheu in Siyiex tom tawx bwanson ka maix jheung jheung heue. ³ Simiang pa ting sibrawm eue, teei vaid min plakngai Maix pa ting mai kawg heue. ⁴ Kieh sibrawm Maix pex hu mai brug hu ka lox pa mawh meh mai lox pa awn pa tiiem mai lox pa rahsee liak, taix khawn dawm Maix tak sang jhi ka ceu pa lhat graung heue. ⁵ Mawh kheu kied lawm te Maix mai laig ka daux rhawm rhi pui pa koeng ka Simiang khankix mai kix goh greem caong Maix heue. ⁶ Siyiex eue, dang ngeung Maix mawh dang ngeung pa kaux cong leeing ju heue. Meung Maix mawh pa rahsee heue. ⁷ Maix moh ka ceu pa rahsee mai koeng ka pa ang rahsee heue. Mawh kheu in, Siyiex eue, mai yaog maix nie lheu ting khaing paox grawm maix khankix mai hoik groi rawm bee pa gaux rhawm ka maix heue. ⁸ Muran, mai khaox caihung, pa sioe baux hoik bhawng ka kraung ceep mai lox tah ting rhax lai yaogyaw ka maix kieh maix gaux rhawm ka daux nyiex haw pa hoik yuh maix ka nga sang heue. ⁹ Kawn bun Simiang khankix ku dah, ot tau mai kawn bun Simiang mai plak taix khawn dawm maix, moeng maix laux simiang ceep kraung khri Awfirax mai cung tix heue. ¹⁰ Kawn bun eue, nghiet heue, veeh yhaok tix mai keud mhawm mhawm, pi awm ka ceu pui maix mai nyiex ma miex keeing maix awx. ¹¹ Phan yuh nan, simiang tak moh ka maix, mawh kheu mhawm grang maix mai nawh hoik mawh Simiang maix mai krub ka Nawh heue. ¹² Jah ka kawn bun Simiang veng Turux mai cub pui mag mi khankix, viex totaix mai hoek ti rieb ka maix heue. ¹³ Kawn bun simiang khankix koe min plakngai mai ceep kix kraung pa hoik yuh ka khri heue. ¹⁴ Khaix hoik ceep kix kraung pa mhawm grang ka nawh, hu tau mai paox bun krih nawh mai viex nawh hu ka simiang heue. ¹⁵ Kix viex ceu pa gaux rhawm mai laig ka daux nyiex haw simiang heue. ¹⁶ Son keeing khankix, Maix hoik ciak ti deuh ka kawn praix kix, sonsang mawh Simiang ka piang haktiex khawmuik heue. ¹⁷ Aux tak sang teei ceu kaux Maix tah hu ka kawn pui khankix mai ceu kawn pui ti ju hoik ti ju mai kawn pui khankix yaogyaw ka Maix ku ju leeing ju heue.

¹ Siyiex mawh dee deuh ex rhawm mai tawx riang rao ka ex heue.Krax teem Nawh nie lheu sidawng yam yaox ex krax laux leeing heue. ² Mawh kheu in viang haktiex gah greed hu, gawng lua yung yiang hu ka daux rawm sigrit sigra kawx mai rawm sigrit sigra sinum siaox mai sigu hu kawx, ³ mai pukpak rawm haok hwan mai gawng lua khankix yung yiang hu kawx, aux ang lhat heue. ⁴ Koe rawm klawng tix mu mai rawm klawng an, mawh dee ot Siyiex Cao pa ting lhaong mai veng pa singax singeh dee gaux rhawm gaux rhi heue. ⁵ Siyiex ot ka daux veng an mai veng an ang lai yung yiang mai Siyiex teem ka nawh, tom yam jah praix tix riang heue. ⁶ Ceu kawn pui khankix, lawh maw cuci mai haktiex khankix yung yiang mai Siyiex ploi lox tix lih mai haktiex ceh hu awm rawm heue. ⁷ Siyiex Cao kru naing raoma ot tau mai ex mai Siyiex ceu pui Yakop mawh dee deuh ex rhawm heue. ⁸ Hoek tix jhak ka pa yuh Siyiex, haktiex laux leeing heue. ⁹ Nawh Cao raig ak mai pliah pot, baux mawx baux an mai teei ngu gleeing ti tik ka ling khankix mai kieh naing yiien tom sidah haktiex khawmuik heue. ¹⁰ Ot yiien yawg mai kieh pex tawng, grawng mawh Aux Siyiex awx. Aux mawh Siyiex pa ting sibrawm piang kawn pui mai piang haktiex khawmuik heue. ¹¹ Siyiex Cao kru naing raoma ot tau mai ex mai Siyiex ceu pui Yakop mawh dee deuh ex rhawm heue.

¹ Ceu kawn pui khawmuik eue, dieh taix tix awx. Ah lox sinum mai kok yo ka Siyiex awx. ² Grawh grawng nawh Siyiex mawh Cao pa ting lhaong khaing khawmuik mai mawh Siyiex pa caw ex tix lhat graung kah, Nawh mawh Simiang pa giex kaing ka piang haktiex khawmuik heue. ³ Nawh Cao teei ti deuh ceu pui khankix ka greem mai cub pui ku cub, deuh ka greem caong ex heue. ⁴ Nawh Cao laug ti teei ka Yakop pa moh Nawh, sonsang mawh sin min plakngai son ex heue. ⁵ Siyiex kok yo lox pa gaux rhawm mai lox phlu teettawng mai haok heue. ⁶ Ah lox rhax mai yaogyaw ka Siyiex awx. Mai ah lox rhax yaogyaw ka simiang mai ah lox rhax awx. Ah lox rhax heue. ⁷ Grawh grawng nawh Siyiex mawh Cao pa giex kaing piang haktiex khawmuik, ah lox rhax yaogyaw ka Nawh heue. ⁸ Siyiex giex kaing piang ceu kawn pui khawmuik mai Nawh Cao ngawm ka piang dang ngeung Nawh, pa singax singeh heue. ⁹ Kuad song nong yu cub pui ku cub khawmuik, khrawm paox tix hoek ka kawn praix Siyiex Abraham heue. Grawh grawng nawh, kraung pa tiebtie mawh kraung cie Siyiex mai kieh Nawh mawh Cao pa ting lhaong heue.

¹ Siyiex mawh pa ting lhaong mai khaw ti yaogyaw ka Siyiex pa ot ka piang gawng dee singax singeh ka daux veng Nawh heue. ² Gawng Zion mawh pa lhaong mai pa mhawm grang mai mawh dee gaux rhawm ka piang haktiex khawmuik, ka daog plak laong mawh dee koe veng Simiang pa ting lhaong heue. ³ Siyiex kieh tawng, Nawh mawh dee deuh rhawm ka daux nyiex an heue. ⁴ Jhak heue, simiang khankix, hoek ti kum kawng mai paox tix heue. ⁵ Yam yaox, kix kied daox am, lhat yaoh mai to hu heue. ⁶ Kix kied lhat graung ka veng an mai yaox krax kha rhawm awm bun pa sang keh heue. ⁷ Maix teei bhaung plak lih singaix mai kieh raig ti tik ka nyiex reu ting veng Tasux heue. ⁸ Awm pa hoik sax mhong ex, ex hoik pon ti yaox ka veng Siyiex Cao kru naing raoma pa mawh Siyiex ex heue, Siyiex tak kieh veng an kaux cong leeing ju heue. ⁹ Siyiex eue, ex doh keud ka bwanson krax moh krax rhawm Maix, ka daux nyiex bwan Maix heue. ¹⁰ Siyiex eue, awm hoik tah hu ceu kaux Maix ka piang haktiex tom sidah, min plakngai Maix kawx, kieh sidah heue. taix khawn dawm Maix hoik grum naog ka been li pa rahsee heue. ¹¹ Mawh kheu krax pa prawng ca Maix, gawng Zion mai kawn bun Yudax khankix, gaux rhawm gaux rhi heue. ¹² Hawt rob vung viang veng Zion mai simin ti deuh ka nyiex pa ting lhaong khankix, ¹³ mai een tix tawng ka guh veng nyiex haw, sonsang pon ti krai ka ju kawn praix khankix heue. ¹⁴ Grawh grawng nawh, Siyiex ex mawh Siyiex leeing ju heue. Nawh Cao tak sang thong ex hu tom sidah yum heue.

¹ Ceu kawn pui khawmuik eue, nghiet awx. ² Kawn pui piang haktiex khawmuik, pa iak pa ting ang ah pa mi pa hot ang ah, khrawm paox tix nghiet awx. ³ Jheeh aux krai lox cuyi pingnya mai rhawm rhi aux keud sawn ka pa dex dawd mai cuyi pingnya heue. ⁴ Aux veeh yhaok tix nghiet ka lox been mai tah ting mai plak jhi grawng ceu pa raux pa mox heue. ⁵ Yam hoek bawg yam pa nu, pa caox caig mai yam hoek rob pui pa caox caig khankix kawx, aux tak lhat ka ceu patix? ⁶ Pui pa deuh rhawm ka kraung khrai tix mai kix yaw tix, kheu kied haoh kraung khrai kix heue. ⁷ Kaux pui mawx ang ah, ang doh pon taoh ka puxaik tix mai sonsang taoh, ang doh pon tawx ngawh ka Siyiex. ⁸ Sonsang taoh ka ju kix mawh pa kied ngawh kied ting jum heue. Phan yuh nan, ju kix tak som nai giex heue. ⁹ Pui ang pon taoh ka ju, sonsang im leeing ju mai son ang lai hoek ka daux simeeig heue. ¹⁰ Nawh yaox yuh nin, pui pa koe cuyi pingnya kawx chix yum awm an, pui pa daox pa aw pa koe rhawm totiag kawx, chix laux leeing mai kraung khrai kix, prah ka pui tang kaux heue. ¹¹ Kix keud daux rhawm tix, nyiex kix mai dee ot dee koe kix mawh pa kaux cong leeing ju mai ceu kaux kix ao min ka piang haktiex heue. ¹² Viang mawh kawx nan, min plakngai kix, ang lai chix kaux cong mai nawh chix laux leeing awm pa laux totiag heue. ¹³ Kix deuh rhawm tix ka daux pa yuh nan mai pui khankix nghiet lox sikah kix heue. ¹⁴ Grheu kix lih hu ka daux meung yum, awm cub yung mai Simiang meung yum, tak sang ih kix heue. Pui pa rahsee khankix, giex kaing kwang kix been tix ngawb mai tokaux dee ot kix, deeh tieh loh mai dee ot kix mawh meung yum heue. ¹⁵ Phan mawh aux, Siyiex priex aux mai taoh ju aux khaing sibrawm meung yum heue. ¹⁶ Yam yaox maix mag mi pui mai koe mau khri mai ting min plakngai haok huan nyiex ma nawh, paw kieh rhawm maix ghoing kah heue. ¹⁷ Yam yum nawh, kraung khrai nawh mai min plakngai nawh, ang lai pon ti viex hawt khaix nawh tix ceu kawx heue. ¹⁸ Yam kawn im ju nawh, nawh chix yaw ka tokaux tix mai yam yuh nawh kaing son tokaux tix, pui yaogyaw ka nawh heue. ¹⁹ Viang mawh nan, nawh tak sang hu ka dee ot tax du (Yadie kix) heue. Kix ang yaox ka pa riang leeing ju heue. ²⁰ Pui pa grum naog ka min plakngai mai pa ang koe cuyi pingnya khankix, awm totiag pa hoek krax pa laux leeing heue.

¹ Siyiex Cao pa ting sibrawm, tawx lox ka haktiex plak lih singaix tom sidah plak klip singaix heue. ² Pa riang Siyiex, pa jhan riang pa grum ceu pa mhawm grang, lih ka piang gawng Zion heue. ³ Siyiex ex hoik hoek mai Nawh Cao ang ot yiien yawg tix, ngu hax sivoe ngai Nawh Cao mai hawt dex sivie siveng Nawh, koe lhiex ting mai bhaung ting heue. ⁴ Nawh Cao kok ka raoma mai haktiex, sonsang chawk cheng tix prawng ca ka pui Nawh khankix ah nin, ⁵ "Kieh pui pa moh Aux mai pa hoik tan hoik lu pa hoik yuh sijax mukheu mai Aux, khrawm paox ti hoek ka Aux heue." ⁶ Raoma khankix, plak jhi grawng pa hoik yuh Nawh Cao pa rahsee, mawh kheu tokaux Siyiex mawh Cao pa prawng ca pa rahsee heue. ⁷ Pui Aux khankix eue, nghiet awx, Aux tak sang krai heue, ceu pui Isarelax eue, Aux tak kham sakse plak pex heue. Aux mawh Siyiex pex heue. ⁸ Aux ang deuh phimap ka pex, grawng pa gleeing pex tix tan mai pa tan lu pex kuceu, hoik koe sivoe ngai Aux jheung jheung heue. ⁹ Aux ang mhaing ti cie mawie daux nyiex maix mai pex mhaing pa koe daux kawg maix. ¹⁰ Totiag mai totiag, kaing rheng mai pa ot ka piang gawng khankix mawh cie Aux khawmuik heue. ¹¹ Aux tawng sim pa ot ka piang gawng khankix khawmuik mai totiag khankix, ot mai Aux heue. ¹² Phan Aux cai rhawm Aux ang krai ka maix, haktiex mai can pa koe ka haktiex mawh cie Aux heue. ¹³ Khex tak sang ih Aux nex mawie lie? Khex tak sang nyaux Aux nham pex lie? ¹⁴ Tan lu ceu pa yaogyaw bwanson ka Siyiex awx. Tawx ceu pa tan lu maix ka Siyiex Cao pa ting lhaong awm pa hoik deuh maix sijax mukheu awx. ¹⁵ Yam hoek krax khi rhawm kok yo ka Aux mai Aux tak taoh maix heue. Maix tak yaogyaw ka min plakngai Aux heue. ¹⁶ Siyiex ah nin ka pui pa ang rahsee khankix maix chix krai ka lox lai beenli Aux mai sijax mukheu Aux, dex dawd mai maix yuh ka mawx? ¹⁷ Maix koeng ka lox pa sidiex gau Aux mai tik lox Aux plak khaix tix ang mawh lie? ¹⁸ Yam yaox maix pui pa briex, rhawm maix awm nawh mai maix chix yuh paox pie ka pui pa phit vao ka moeng kawn pui heue. ¹⁹ Jheeh maix chix ah lox pa caox caig mai dak maix chix ah lox pie lhen heue. ²⁰ Maix ngawm mai krai lox pa lah cha ka puxaik tix mai salao ka kawn pa keh miex maix heue. ²¹ Aux glaik tix ka ceu pa yuh maix kawx maix ce Aux mawh awm maix nhieh, mai phimap pa yuh maix, Aux tak sang plak jhi maix yaox sivoe ngai maix heue. ²² Pui pa pi awm ka Siyiex khankix eue, doh keud ka grawng inkix awx. Phan ang mawh nan, nu ka ang Cao taoh pex koe, Aux tak rud ti tik pex, baux mawx baux an heue. ²³ Pui pa tan lu mai pa yaogyaw ka bwanson Aux mawh pui pa kieh min plakngai Aux sidawng heue. Daux krax pa keud pa hu nawh kawx, Aux tak plak jhi bwanson Siyiex Cao pa taoh heue.

¹ Siyiex eue, awm koe rhawm Maix, yuh bwanson caux rhawm ka aux liak, awm koe krax pa caux rhawm Maix tom nie, preet ti tik phimap pa lud aux liak. ² Sigrhah phimap aux tom bawh khawmuik mai kieh singax singeh liak. ³ Aux tawng aux yung pa lud tix mai doh keud ka phimap pa lud tix jheung jheung heue. ⁴ Aux hoik lud ka Maix mai aux hoik yuh pa ang rahsee sivoe ngai Maix, mawh kheu krax prawng ca Maix pa rahsee pluat ploi phimap aux heue. ⁵ Grawh grawng nawh, aux viex phimap, tom yam keh aux mai tom yam ot aux ka daux vaig miex tix heue. ⁶ Maix moh ka rhawm pa rahsee mai gau aux ka cuyi pingnya pa raux pa mox ka daux rhawm aux liak. ⁷ Sonsang singax singeh aux, teei lhax khaox haisop mai kieh aux singax singeh mai tawx bwanson ka aux liak. sigrhah aux paing awm rawm rha liak. ⁸ Sonsang nyawm rhawm gaux rhawm aux, kieh aux mhong lox Maix liak, phan yuh nan, si-ang pa hoik raig Maix tak sang gaux rhawm gaux rhi heue. ⁹ Veeh plakngai Maix khaing phimap pa hoik yuh aux mai preet ti tik ka phimap khawmuik liak. ¹⁰ Siyiex eue, kieh daux rhawm aux singax singeh liak. Cox rhawm rhi aux mawh pa khraox mai kieh kaux cong liak. ¹¹ Paw lai grheu ti tik aux khaing Maix liak, paw lai teei khwan singax Maix khaing aux liak. ¹² Caux rhawm deeh tawx akhwang krax gaux rhawm pa dex dawd mai krax taoh Maix ka aux liak, tawx krax gaux rhawm Maix mai teem ka aux liak. ¹³ Sonsang pon aux tix gau krax pa rahsee Maix ka kix pui pa ang rahsee mai sonsang deeh hoek pui pa koe phimap ka Maix heue. ¹⁴ Siyiex Cao pa taoh aux eue, kieh aux luan khaing phimap pa simie ti pah pui yum liak. dak aux ah lox rhax pa gaux rhawm grawng pa rahsee Maix heue. ¹⁵ Siyiex eue, paoh ka siyieb jheeh aux liak, jheeh aux tak sang yaogyaw bwanson Maix heue. ¹⁶ Maix ang moh ka ceu pa tan lu, phan ang mawh nan, aux tan ka Maix mai Maix ang khaw rhawm ka ceu pa gleeing tix tan heue. ¹⁷ Ceu pa tan lu pa khaw rhawm Siyiex mawh rhawm pa max, Siyiex eue, rhawm pa max Maix ang chix tik vud heue. ¹⁸ Kieh rhawm pa gaux rhawm Maix, yuh bwanson ka gawng Zion liak, deeh cox ka guh veng veng Yerusaliem liak. ¹⁹ Yam an krax lu krax tan, pa rahsee pa gleeing ti tan ang ah, pa gleeing ti tan khawm kaux ang ah, Maix gaux rhawm kah heue. Yam an, tak sang teei mawie mhaing mai tan ka piang khu dee tan Maix heue.

¹ Pui pa ting riang eue, mawh kheu patix maix yaw tix, sonsang yuh laux ka bwanson pa yuh pui yuh ka mawx? Krax moh krax rhawm Siyiex kaux cong jheung jheung heue. ² Dak maix lawm awm gawn mai pie lhen mai yuh pui laux leeing heue. ³ Maix nie lheu moh pa caox khaing pa mhawm mai nie lheu moh lox pie lhen khaing lox pa rahsee heue. ⁴ Dak pa chix pie lhen eue, maix khaw rhawm ka lox pa sang yuh pui laux heue. ⁵ Siyiex tak raig ti tik maix jheung jheung heue. Nawh Cao teei ti tik maix khaing nyiex gox maix mai bluh ti tik maix khaing dee ot pui pa im ju heue. ⁶ Pui pa rahsee khankix, yaox mai lhat graung heue. Kix nyiah ka nawh ah nin, ⁷ "Jhak heue, pui pa ang deuh rhawm ka Siyiex mai nawh deuh rhawm ka kraung khrai tix mai nawh kaux cong ka phimap pa caox heue." ⁸ Phan mawh aux, awm khaox sanlun pa mhawm klai pa koe ka daux nyiex Siyiex mai aux deuh rhawm ka krax moh krax rhawm Siyiex leeing ju heue. ⁹ Aux tak sang yaogyaw Maix ka kaing pa hoik yuh Maix jheung jheung leeing ju heue. Aux tak krox jun ceu kaux Maix sivoe ngai pui pa moh ka Maix, mawh kheu Maix mawh pa jiet mhawm heue.

¹ Pui pa daox aw khankix, keud ti ah nin ka daux rhawm tix, Siyiex ang koe mai kix mawh pui pa hoik cux sium mai chix yuh ceu pa seeing brai heue. Pui pa yuh pa mhawm mhiem ang koe tix kaux kawx. ² Siyiex ot ka piang raoma mai jhak ka kawn pui, koe pa tawng pa yung mai pui pa sawg ka Nawh tix kaux kaux lie? Ang koe lie? ³ Kawn pui khawmuik, hoik lud krax mai hoik cux sium awm paox tix khawmuik mai pui pa yuh pa mhawm mhiem ang koe, pie tix kaux kawx ang koe. ⁴ Can pui pa nieb yuh pa caox khankix khawmuik, ang kix tawng lie? Kiied ti ih pui Aux, awm ih kix blah mai ang kok yo ka Siyiex lie? ⁵ Ka dee an, tak koe krax pa kied lhat graung, grawh grawng nawh, Siyiex kieh si-ang pui pa yuh tab tang plak, prung prang hu heue. Kix hoek krax pa kaig tua heue. ⁶ Kieh krax taoh pui Isarelax lih hoek khaing piang gawng Zion liak. Yam deeh viex Siyiex pui Nawh, pa hoik viex kix hu deeh hoek, Yakop tak gaux rhawm mai pui Isarelax tak gaux rhawm gaux rhi heue.

¹ Siyiex eue, kieh ceu kaux Maix taoh aux liak. Teei sibrawm Maix prawng ca plak aux liak. ² Siyiex eue, nghiet lox pa rawg aux bwan mai veeh yhaok Maix nghiet ka lox pa lih khaing jheeh aux liak. ³ Grawh grawng nawh, pui tang praix ot ti plak, kaoh mai yuh pa caox ka aux, pui pa caox khankix, ang khan ngai Maix, sawg ti teei ju aux heue. ⁴ Jhak heue, Siyiex teem ka aux, Siyiex ot tau mai pui pa joh jhan ka ju aux heue. ⁵ Nawh Cao deeh pawk ceu pa caox ka pui pa koeng ka aux khankix heue. Mai tik vud kix awm pa koe lox mukheu Maix heue. ⁶ Aux tak sang gaux rhawm ti tan ka Maix, Siyiex aux eue, aux tak sang yaogyaw ka ceu kaux Maix mawh kheu Maix mawh pa jiet mhawm heue. ⁷ Grawh grawng nawh, Maix hoik taoh aux ka daux pa kha rhawm mai ngai aux hoik yaox ka pui pa koeng ka aux khankix heue.

¹ Siyiex eue, nghiet ka lox pa rawg aux bwan liak, paw lai mox khaing pa rawg mhaing aux liak. ² Jhak ka aux mai deeh pawk lox aux liak, aux iak riang rao mai ngia khi rhawm heue. ³ Mawh kheu lox pui pa koeng ka aux, kheu pa tuktiak tukte pa ang rahsee mai pa deuh phimap ka piang aux, ka daux pa song rhawm mai koeng ka aux heue. ⁴ Rhawm rhi tokaux aux siyaung mai kied lhat graung ka krax yum pa sang hoek ka piang aux heue. ⁵ Krax pa lhat pa siyaung hoek ka piang aux mai hoik kheem ka piang aux heue. ⁶ Aux ah nin, kieh aux koe pruik awm sikaux liak, phan yuh nan, aux sang pu hu tang dah tang dee mai laux lee tix mhawm mhawm heue. ⁷ Aux tak sang hu dee singai mai tom dee ot ka daux tiagtu heue. ⁸ Aux nied ti to sonsang luan khaing lhiex ting bhaung ting heue. ⁹ Siyiex eue, kieh lox pa ah kix prung prang grai mu liak, mawh kheu hoik yaox aux, pa khin ti teei mai tud rhim ka daux veng heue. ¹⁰ Kix ca daw hu ka piang guh veng ku singaix ang jud jai mai yuh krax pa caox caig mai yuh pa seeing brai ka daux veng heue. ¹¹ Kix khin ti yuh ceu pa ang khaw ka daux sigreung veng mai tuktiak tukte mai pie lhen ka pui daux krax heue. ¹² Pui pa salao ka aux, ang mawh pui pa koeng ka aux, phan mawh, aux pon gun pon yeung heue. Pui pa ot tang plak, ang mawh pui koeng ka aux, phan mawh, aux pon via heue. ¹³ Pui pa yuh nan mawh mhai pui plak aux mai paox grawm aux mai pui paox meed tawng aux heue. ¹⁴ Ex tang kum kawng mai paox tix mhawm mhawm mai ex hu tau mai cub pui hun ka daux nyiex Siyiex heue. ¹⁵ Kieh simiang kix yum giex liak, phan kix kawn im ju, kieh lih hu ka daux meung yum, grawh grawng nawh, phimap koe dee ot kix mai ka daux kix heue. ¹⁶ Phan mawh aux, kok ka Siyiex mai Siyiex taoh aux heue. ¹⁷ Yam ponbo, yam ponngawb mai yam pongaix, aux kha rhawm mai ngia mai Nawh Cao mhong lox aux heue. ¹⁸ Yam yuh kix naing ka aux, Nawh Cao taoh ju aux mai kieh aux nyawm rhawm heue. Pui pa ot plak aux kied sidaing nie hun heue. ¹⁹ Siyiex Cao pa jah bah ma la rawm dix, nghiet ka lox aux mai yeen kix goh, mawh kheu ang kix thai lox cox rhawm tix mai ang koe rhawm lhat ka Siyiex heue. ²⁰ Pui pa yuh nan, chix lud chix lud ka paox grawm tix mai ang kaux sijax heue. ²¹ Lox jheeh nawh nyu awm bee kawx, daux rhawm nawh keud grawng sang yuh naing heue. Lox nawh awn awm bee kawx, awm vaid pa hoik lawd ti deuh heue. ²² Kraung cien pa klawm maix deuh piang Siyiex awx. Nawh tak teem ka maix heue. Nawh ang sax kieh pa lhat graung hoek ka piang pui pa rahsee heue. ²³ Siyiex eue, Maix teei ti sau kix ka daux pa laux leeing heue. Pui pa teei ju pui yum mai pui pa ang kaux sijax, paw kieh kix im ju pie tix plak singaix, phan mawh aux, deuh rhawm ka Maix heue.

¹ Siyiex eue, caux rhawm ka aux liak, grawh grawng nawh, kix blin lox mai sawg ti yuh ka aux mai tuktiaktukte ka aux leeing lang singaix heue. ² Pui pa koeng ka aux khankix, puing ka aux leeing singaix mai pui pa puing ka aux kied nie heue. ³ Yam lhat graung aux, aux deuh rhawm ka Maix heue. ⁴ Aux deuh rhawm ka Siyiex mai yaogyaw ka gumlox Nawh heue. Aux deuh rhawm ka Siyiex, aux tak ang lhat ang graung mai kawn pui tak pon yuh patix ka aux. ⁵ Kix kieh lox aux mawh pa lud ku singaix mai kix keud ngie pa caox pa ang mhawm ka aux heue. ⁶ Kix khrawm paox tix, hawt jawm ti teei ju aux mai yuh ti tawng khaix caong aux heue. ⁷ Siyiex eue, pui pa yuh pa ang rahsee khankix, tak sang luan yuh ka mawx? Ka daux pa song rhawm song rhi Maix, kid ti tik pui ceu an khankix liak. ⁸ Maix hoik tawng grawng vu vie aux tix kudauh kudee, teei rawm ngai aux sau ti deuh daux kawk rawm Maix, hoik koe carang ka daux lai Maix ang mawh lie? ⁹ Mawh kheu ot Siyiex plak aux, yam kok aux ka Nawh, aux tawng pui pa koeng ka aux khankix, deeh dak plak khaix tix heue. ¹⁰ Aux deuh rhawm ka Siyiex mai yaogyaw ka gumlox Nawh heue. Aux deuh rhawm ka Siyiex mai yaogyaw ka gumlox Nawh heue. ¹¹ Aux deuh rhawm ka Siyiex, aux tak ang lhat ang graung, kawn pui tak sang pon yuh patix ka aux. ¹² Siyiex eue, awm pa hoik yuh aux sijax mukheu sivoe ngai Maix, aux tak hawt ka sijax mukheu pa hoik yuh tix mai yaogyaw ka Maix heue. ¹³ Grawh grawng nawh, Maix hoik taoh ju aux khaing krax yum mai Maix hoik taoh caong aux khaing pa sideeing, sonsang hu aux sivoe ngai Maix ka daux pa riang ka pui pa im ju khankix ang mawh lie?

¹ Siyiex eue, caux rhawm ka aux liak, caux rhawm ka aux liak. Ju aux deuh rhawm ka Maix mai deuh rhawm tix ka greem veei pruik Maix tom sidah luan ceu pa khi rhawm heue. ² Aux tak kok yo ka Siyiex Cao pa ting lhaong, Cao pa kieh see aux hoik mhawm heue. ³ Nawh Cao ot meung raoma mai taoh ka aux, pui pa ting rhawm ting rhi khankix kaig tua heue. Siyiex tak sang tawx krax caux rhawm mai sijax mukheu pa kaux hoek heue. ⁴ Ju aux ot ka daux cub sivai sangsi, aux yaox ti it mai pui ka daux glah ngu mai rhang kix awm pliah mai te, dak kix awm vaid pa kied lawm heue. ⁵ Siyiex eue, kieh Maix nie lheu lhaong khaing lhaong raoma liak mai kieh min plakngai Maix, tah hu ka piang haktiex in khawmuik liak. ⁶ Kix hoik taong ti deuh kie ka daux krax pa hu aux, rhawm rhi aux hoik iak hu ka dee tiiem mai kix hoik kaong ti deuh daux sivoe aux, tokaux kix deeh rau ka daux an tiru heue. ⁷ Siyiex eue, rhawm aux kaux cong heue, rhawm aux kaux cong heue. Aux rhax lai yaogyaw ka Maix heue. ⁸ Ju aux eue, siduad heue, chiang mai ting khankix eue, siduad heue. Aux kawx siduad caocao heue. ⁹ Siyiex eue, Aux tak yaogyaw ka Maix sinax pui hun khankix heue. ¹⁰ Grawh grawng nawh, krax caux rhawm Maix hoek tom sidah raoma mai pa kaux sijax mai pa mawh meh Maix, hoek tom sidah paiawm heue. ¹¹ Siyiex eue, kieh Maix nie lheu lhaong khaing lhaong raoma liak. Kieh min plakngai Maix tah hu ka piang haktiex khawm bee ma liak.

¹ Pui pa prawng ca khankix eue, khex prawng ca pex ka kawn pui ka daux pa rahsee nang lie? ² Ang tau ti mawh, ka daux rhawm pex ca keud pa caox mai pex ciang tix yaox ka pa tuktiak tukte pa yuh pex ka taix tix ka piang haktiex in heue. ³ Pui pa ang rah ang see khankix, koe rhawm pa caox tom yam ot daux vaig miex tix mai chix pie lhen mai lud krax hu tom yam keh tix heue. ⁴ Jai kix awm jai siuing. Kix awm siuing caox pa lheet pa thox yhaok tix. ⁵ Kix ang nghiet lox cao kix mai yuh tokaux ti mawh pa hoik tawng heue. ⁶ Siyiex eue, laoh ti tik rhang kix khaing jheeh kix liak, Siyiex eue, laoh ti tik rhang gieb sivai sangsi pa awn ju khankix liak. ⁷ Kieh kix grai mu awm rawm liak, yam nyeu kix ak, kieh kix graig awm te heue. ⁸ Kieh kix awm hoi lux pa mu hu mai awm kawn ngie pa laux daux vaig miex tix, pa ang tie yaox ka singaix heue. ⁹ Kieh kix awm khix braw pa phlu ngu mai aw pa ang tien tawng yam hax tix, yam im kix ang ah, yam hax kix ang ah, kieh bhaung tah kix hu liak. ¹⁰ Pui pa rahsee khankix, tak gaux rhawm yam yaox kix krax pa ciyang yuh nan mai tak khoek caong kix ka daux nham pui pa ang rahsee khankix heue. ¹¹ Pui tang dah tak ah nin, pui pa rahsee khankix, pon bwanson tete te lai heue. Siyiex Cao pa prawng ca pa rahsee koe tete ka piang haktiex, kawn pui ah nan heue.

¹ Siyiex aux eue, taoh aux lih khaing daux tawm taix pui pa koeng ka aux khankix mai yaog aux ting lhaong khaing pui pa ot tang plak khan kix liak. ² Maix taoh aux lih khaing tawm taix pui pa yuh phimap mai taoh aux lih khaing daux tawm taix pui pa pah pui yum khankix liak. ³ Jhak heue, kix jawm ti pah ju aux mai pui pa ting riang tang plak khrawm paox ti sang yuh ka aux heue. Siyiex eue, ang mawh kheu lud aux, aux ang tie koe phimap tidtix. ⁴ Kix nieb to ti hoek ti sang yuh ka aux, siduad mai teem ka aux mai jhak ka aux liak. ⁵ Siyiex Cao kru naing raoma, pa mawh Siyiex Isarelax eue, siduad mai sivied ti gau ka pui tang ceu khankix liak. Paw lai caux rhawm ka pui pa ot ka daux phimap ti kaux kawx. ⁶ Kix deeh hoek yam ponbo mai luan lox awm pa raoh sox mai lailing hawt veng heue. ⁷ Jheeh kix chix krai lox bied mai vaid koe mai siyieb jheeh kix mai chawk ah nin ka paox tix, pui mawx tak sang mhong lox ex. ⁸ Viang mawh kawx nan, Siyiex eue, Maix tak nyiah ka kix mai salao ka pui tang ceu khankix heue. ⁹ Riang rao aux eue, aux krox jun ka Maix heue. Siyiex mawh dee deuh aux rhawm heue. ¹⁰ Krax caux rhawm Siyiex, tak hoek ti teem ka aux mai Siyiex tawx akhwang awm pa simie aux sonsang yaox aux ka piang pui pa koeng ka aux khankix heue. ¹¹ Siyiex Cao pa tiebtie aux eue, paw awt nyang teei kix yum liak, phan Maix pah kix yum, ha pui aux kox pi awm rhawm tix mai teei sibrawm Maix mai kieh kix prung prang hu kudah kudee mai rau hu heue. ¹² Mawh kheu lox phimap jheeh kix mai ting lox sikah kix mai pie lhen mai lox pa ah kix, kieh deeh hoek ka piang kix liak. ¹³ Ka daux pa song rhawm Maix, kieh kix laux leeing grai hu pak lawg khawmuik liak. Kieh kix tawng mawh Maix Siyiex Cao pa giex kaing, jah ka ceu pui Yakop tom sidah haktiex khawmuik liak. ¹⁴ Kieh kix deeh hoek yam ponbo mai lawh awm raoh sox hawt vung viang veng heue. ¹⁵ Yam ponsawm kieh kix deeh hoek khru khrieh ti sawg pa ih mai ang sak mai kix ot giex yuh nan heue. ¹⁶ Phan mawh aux, rhax lai grawng sibrawm Maix, plak ponngawp, tak ah lox rhax pa gaux rhawm gaux rhi grawng krax caux rhawm Maix heue. Grawh grawng nawh, Maix mawh dee deuh aux rhawm, yam yaox aux krax khi rhawm heue. ¹⁷ Riang rao aux eue, rhax lai yaogyaw ka Nawh Cao heue. Siyiex mawh dee deuh aux rhawm mai Cao pa caux rhawm ka aux heue.

¹ Siyiex eue, ka daux pa song rhawm Maix, Maix hoik tik ka ex mai ex hoik prung prang rai ruat heue. Viang mawh nan, deeh kieh ex im ju liak. ² Maix hoik kieh haktiex yung yiang mai bih, viang mawh nan, haktiex pa bih an, kieh deeh kleuk ih paox tix singip liak, kawn ca yung yiang pot heue. ³ Maix hoik kieh kix kha rhawm mai hoik tawx rawm plix siiet pa chix yoek ka kix heue. ⁴ Maix tawx chix ka pui pa lhat graung ka Maix, sonsang pak kheu sijax mukheu pa kaux heue. ⁵ Sonsang nyawm rhawm pui pa moh ka Maix khankix mai teei taix khawn dawm Maix taoh ka pui pa nghiet lox aux khankix liak. ⁶ Siyiex sikah ka daux pa singax singeh Nawh Cao mai aux gaux rhawm heue. Aux tak sang gwieh ka veng Shekhem heue. Aux tiag ti yaox ka tong Sukot heue. ⁷ Aux giex kaing kwang meung Kilat heue. Meung Manashe kawx, aux giex kaing kwang kah heue. Meung Epharem mawh sibrawm kaing aux, meung Yudax mawh khaox gix min plakngai aux heue. ⁸ Meung Mawbax mawh aw dee khoek heem aux tix, meung Edom mawh dee deuh aux kiep tix, meung Philitix mawh dee riag yo aux, kheu pa pex aux. ⁹ Pui mawx pa sang thong aux hu ka veng pa ting riang ting rao mai pui mawx pa sang jhi daux krax hu aux ka meung Edom. ¹⁰ Siyiex eue, Maix hoik tik vud ka ex ang mawh lie? ¹¹ Siyiex eue, Maix ang hu tau mai cub kru naing ex lie? Maix teem ex khaing pa khi rhawm liak mai krax taoh kawn pui mawh pa giex going heue. ¹² Ka daux riang rao Siyiex, ex tom koe rhawm kwa heue. Nawh mawh Cao pa tak sang dig ka piang pui pa koeng.

¹ Siyiex eue, nghiet ka lox pa kok yo aux mai deuh ti tawng ka lox pa rawg aux bwan liak. ² Aux kok yo ka Maix jah tom sidah haktiex, yam iak rhawm rhi aux, Maix viex aux hu ka rang ting pa nie lheu lhaong khaing aux liak. ³ Maix mawh dee deuh aux rhawm mai mawh tab pa kaux sivoe ngai pui pa koeng ka aux khankix heue. ⁴ Aux ot ka daux nyiex gox Maix jheung jheung mai aux deuh rhawm ka greem veei pruik Maix heue. ⁵ Siyiex eue, Maix hoik mhong ka sijax mukheu pa hoik yuh aux mai Maix tawx sin ka pui pa lhat graung ka ceu kaux Maix khankix ka aux heue. ⁶ Maix tak kieh simiang lang ju lang phan mai jhong khix, mee num nawh kieh kaux cong ku ju leeing ju liak. ⁷ Nawh tak ngawm sivoe ngai Siyiex leeing ju heue. Maix kieh krax caux rhawm mai sijax mukheu Maix teem mai priex ka nawh liak. ⁸ Mawh kheu in, aux tak rhax lai yaogyaw ka ceu kaux Maix jheung jheung mai ku singaix ku sawm awm pa hoik yuh aux lox sijax mukheu heue.

¹ Ju aux chix ot yiien yawg tix sivoe ngai Siyiex mai krax taoh aux kaoh khaing Nawh Cao heue. ² Nawh Mawh rang ting mai Cao taoh aux mai mawh dee deuh aux rhawm mai aux ang lai lhat graung ka tix ceu kawx. ³ Pex reem ti puing ka pui tix kaux, sonsang laux nawh miex grheung, pex khawmuik keud ce nawh awm ding tiex pa yung yiang mai tiex luklin pa yuye miex grheung? ⁴ Kix keud ti kieh nawh rau khaing dee lhaong, jheeh kix chix nawb bwan, viang mawh nan, rhawm kix koe lox pa lawg pa jhax mai kix moh pa pie lhen heue. ⁵ Ju aux chix ot yiien yawg tix sivoe ngai Siyiex, grawng krax krox jun aux kaoh khaing Nawh Cao heue. ⁶ Nawh mawh rang ting mai Cao taoh aux mai mawh dee deuh aux rhawm mai aux ang lai lhat graung ka tix ceu kawx. ⁷ Krax taoh aux mai min plakngai aux mawh Siyiex mai rang ting pa tawx riang ka aux mai dee deuh aux rhawm mawh Siyiex heue. ⁸ Kawn pui khankix eue, deuh rhawm ka Nawh Cao ku bawg yam heue. Plak jhi rhawm rhi pex sivoe ngai Nawh Cao awx. Siyiex mawh dee deuh ex rhawm heue. ⁹ Pui brai pa ang koe bwanson, min plakngai kix mawh pa pie lhen mai phan ex ciang ti yaox daux jiang hoik grai mu ang lai koe tidtix heue. ¹⁰ Paw nieb ting rhawm rhi ka pon yuh krax tuktiaktukte, paw nieb kroh ti yuh grang ka kraung khrai pa nieb pon rhim ti teei ka pui, viang maix magmi ka mau, khri kawx, paw deuh rhawm ka an. ¹¹ Siyiex hoik krai tix bawg mai aux baox mhong ra bawg, grawng pa koe sibrawm mai Siyiex heue. ¹² Siyiex eue, Maix hoik grum naog mai krax caux rhawm, Maix deeh tawx bwanson ka kix, kaux pui mawx kaux pui an, awm kaing pa hoik yuh nawh heue.

¹ Siyiex eue, Maix mawh Siyiex aux, aux coca ti sawg Maix heue. Ju aux kied simie ti lo ka Maix mai tokaux aux kied byaong ka Maix, awm haktiex kroh kram dee ang rawm koe heue. ² Mawh kheu nan, aux maong ti jhak ka Maix, ka dee singax singeh sonsang yaox min plakngai sibrawm Maix heue. ³ Mawh kheu krax caux rhawm Maix nie lheu mhawm khaing ju mai jheeh aux tom yaogyaw ka Maix heue. ⁴ Mawh kheu in, yam kawn im ju aux, aux tak yaogyaw bwanson pa ting Maix, aux deuh rhawm ka ceu kaux Maix mai yaog taix tix krub ka Maix heue. ⁵ Ju aux hoik sak awm pa ih aux nex pa kluing pa bee mai jheeh aux tak gaux rhawm gaux rhi mai yaogyaw ka Maix heue. ⁶ Yam it aux dee it, aux doh keud ka Maix mai aux keud grawng Maix leeing sawm heue. ⁷ Mawh kheu teem Maix aux, aux gaux rhawm gaux rhi greem veei pruik Maix heue. ⁸ Ju aux deuh rhawm ka Maix mai taix khawn dawm Maix joh jhan ka aux heue. ⁹ Pui pa sawg ti yuh ju aux laux khankix, tak laig hu ka greem tiex heue. ¹⁰ Kix tak yum ka lawm vaid pa lawm mai sox praix ih nex kix heue. ¹¹ Phan mawh simiang tak gaux rhawm gaux rhi ka daux Siyiex heue. Can pui pa kaux sijax mai pa tiextu ka daux Nawh Cao khankix, tak mhawm grang heue. Pui pa ah lox pie lhen khankix tak sang thox jheeh kix heue.

¹ Siyiex eue, nghiet ka lox pa rawg aux bwan, taoh ju aux khaing pui pa koeng ka aux mai teem ka aux liak. ² Tiebtie aux khaing pa keud pui pa caox ti yuh mai pa kum kix ti yuh phimap liak. ³ Cub pui an khankix, dak kix awm vaid pa hoik klaing tix, pa kix hoik rien lox pa song awm te pa hoik nyeu tix heue. ⁴ Kix ot dee glip mai ah ti sang puing ka pui mhawm heue, kix ting rhawm khawm puing tix mai ang lhat heue. ⁵ Sonsang yuh kix pa caox pa ang mhawm mai tawx riang tawx rao ka paox tix, tix kaux lai ti kaux mai kum paox tix grawng sang taong kie mai kix ah nin, pui mawx pa tak sang yaox ex. ⁶ Kix chix sawg mai chawk cheng ka grawng see pa ang rahsee, kix chix klawng kloek ti chawk khawmuik mai pa keud kix ka daux rhawm tix, mawh pa kied raux kied mox heue. ⁷ Viang mawh kawx nan, Siyiex tak puing kix ka te dom mawx dom an mai kix kied mat kied lheet heue. ⁸ Dak kix deeh puing ka cao kix mai yam yaox pui ka kix, vuhvied kaing mai to heue. ⁹ Pui khankix khawmuik, lhat graung mai tawng pa yuh Siyiex mhawm mhawm mai krai ka pui khankix heue. ¹⁰ Pui pa rahsee khankix, tak gaux rhawm mai deuh rhawm ka daux Siyiex heue. Pui pa rahsee rhawm rhi khankix tak yaw rangdi heue.

¹ Siyiex eue, krax pa yiien yawg mai krax yaogyaw mai pa kaux sijax koe ka daux veng Zion heue. ² Siyiex Cao pa nghiet ka lox pa rawg aux bwan eue, kawn pui khawmuik, tak sang greed ti hoek ka Maix heue. ³ Aux ang lai pex pon kheu nie krax pa ang rahsee, viang mawh nan, Maix pluat ploi phimap pa lud aux liak. ⁴ Pui pa hoik laug Maix ti teei mai pui pa greed ti hu ka daux nyiex bwan Maix khankix koe bwanson heue. Kieh ex sak ka ceu pa mhawm, pa koe ka daux nyiex Maix mai pa koe ka daux nyiex bwan pa singax singeh Maix heue. ⁵ Siyiex Cao pa taoh ex eue, Maix hoik nghiet ka lox pa rawg ex bwan, ka daux pa jhi Maix ex yaox ka ceu pa daox am pa yuh Maix mai kawn pui pa ot tom sidah haktiex khawmuik mai pui pa ot ka daux rawm sigrit sigra ku daog dawn khawmuik, deuh rhawm ka Maix heue. ⁶ Maix hoik grum naog mai sibrawm mai riang rao pa ting mai Maix hoik kieh gawng lua kaux cong heue. ⁷ Lox pa sinum siaox rawm sigrit sigra mai lox pa sinum pukpak rawm mai lox pa mawh pa lawh kawn pui khankix, Maix chix kieh yiien yawg tix heue. ⁸ Pui pa ot dee singai khankix, yaox mhai pa daox am pa yuh Maix mai lhat graung heue. Kawn pui pa ot plak lih singaix mai khawm plak klip singaix, gaux rhawm gaux rhi heue. ⁹ Maix hoek ti jhak ka haktiex mai kieh lhiex lih mai kieh haktiex koe phon mai mhawm heue. Siyiex kieh rawm klawng naog mai cox haktiex mai chix kieh plix nghox plix koi lih koe plix son kawn pui heue. ¹⁰ Siyiex kieh haktiex caux mai kaung sidawm mhawm mhawm mai kieh lhiex lih sonsang awn tiex mai Nawh Cao tawx bwanson ka khaox pa kuah khankix heue. ¹¹ Nawh Cao teei bwanson pua ti deuh ka jhong khix mee num khankix mai khaix caong Maix mawh pa jauh bee bwanson heue. ¹² Jauh lih ka dee mhawm daux tiagtu mai gawng lua khankix kawx, rawd maox nyoi mai gaux rhawm gaux rhi heue. ¹³ Daux tong kaung dee mhawm dee sawm kawx, hoik naog ka cub yung cub pex mai daux kaung khankix kawx, hoik naog pang num nghox koi mai kix ah lox rhax sinum pa kied nyawm ti nghiet heue.

¹ Kawn pui piang haktiex khawmuik eue, ah lox sinum yaogyaw ka Siyiex awx. ² Rhax lai yaogyaw min plakngai ceu kaux Nawh Cao mai plak jhi min plakngai Nawh mai yaogyaw ka Nawh Cao heue. ³ Krax pa prawng ca Maix mawh pa kied daox am mai kheu kied ting sibrawm Maix mai pui pa koeng ka Maix khankix, lhat graung mai khyox khaw ka Maix heue. ⁴ Kawn pui piang haktiex khawmuik tak krub ka Maix mai rhax lai yaogyaw ka Maix heue, Kix rhax lai yaogyaw ka ceu kaux Maix heue. ⁵ Hoek ti jhak ka krax prawng ca pa yuh Siyiex khankix mai krax prawng ca Siyiex ka kawn pui mawh ceu pa daox am heue. ⁶ Nawh Cao kieh rawm sigrit sigra kroh hu mai lih mawh tiex mai kix pon ti hu ka caong tix heue. Ex gaux rhawm ka daux Siyiex ka dee an heue. ⁷ Nawh Cao giex kaing ka daux sibrawm Nawh jheung jheung heue. Ngai Nawh Cao jhak ka kawn pui kuceu, paw lai kieh pui pa thiang ti tik ka Nawh yaogyaw tokaux tix ting tiru heue. ⁸ Ceu kawn pui khawmuik eue, yaogyaw ka Siyiex ex awx, rhax lai yaogyaw ka bwanson Nawh Cao ka lox pa sinum heue. ⁹ Grawh grawng nawh, Maix kieh ex im ju mai ang kieh caong ex cang klad heue. ¹⁰ Siyiex eue, Maix hoik cheuk ti yaox aux, awm mau pa hoik thi heue. ¹¹ Maix hoik kieh ex krix ka daux kie mai hoik sau kraung pa cien ka piang blawg ex heue. ¹² Maix hoik kieh pui dig piang kaing aux, viang aux yaox ti hu daux ngu daux rawm kawx, mawh kheu bwanson Maix aux hoek dee nyaw rhawm nyawm rhi heue. ¹³ Aux viex krax tan lu mai gleeing ti tan ka daux nyiex Maix heue. ¹⁴ Yam yaox aux krax pa kha rhawm, siyieb jheeh aux mai jheeh aux krai lox sijax mukheu pa hoik yuh aux mai Maix heue. ¹⁵ Aux tak sang teei ti tan yung pa kluing pa bee mai ceu pa sioe baux mai gleeing ti tan ka Maix khawm mawie khawm pex heue. ¹⁶ Pui pa lhat graung ka Siyiex khankix khawmuik eue, hoek ti nghiet heue. Aux tak sang krai pex mhong grawng pa hoik yuh Nawh bwanson ka ju aux heue. ¹⁷ Jheeh aux kok yo ka Nawh Cao mai dak aux kawx, yaogyaw ka Nawh heue. ¹⁸ Phan aux koe phimap ka daux rhawm tix, Siyiex ang nghiet ka lox pa rawg aux. ¹⁹ Yam in Siyiex hoik nghiet mai deuh ti tawng ka lox pa rawg aux bwan heue. ²⁰ Siyiex ang tik ka lox pa rawg aux bwan mai ang lai deeh teei ka bwanson pa hoik tawx ka aux, kieh Nawh koe bwanson liak.

¹ Kieh Siyiex pa koe krax caux rhawm tawx bwanson ka ex liak, jhan pa riang pakngai Maix ka ex liak. ² Kieh kawn pui piang haktiex tawng ka grawng krax pa yuh Maix, kieh ceu pui khawmuik pon bwanson krax taoh Maix liak. ³ Siyiex eue, kieh ceu kawn pui yaogyaw ka Maix, kieh kawn pui yaogyaw ka Maix liak. ⁴ Kieh ceu pui kuceu gaux rhawm mai rhax lai gaux rhawm liak, grawh grawng nawh, Maix prawng ca kawn pui ka daux beenli pa rahsee mai Maix tawx krax nyawm rhawm ka ceu kawn pui piang haktiex khawmuik heue. ⁵ Siyiex eue, kieh ceu kawn pui yaogyaw ka Maix, kieh kawn pui yaogyaw ka Maix liak. ⁶ Haktiex tang deeh chix plix, Siyiex mawh Cao pa tawx bwanson ka ex heue. ⁷ Siyiex tak sang baox tawx bwanson ka ex mai tak lhat graung ka Nawh Cao tom sidah haktiex khawmuik heue.

¹ Siyiex kaoh mai yuh laux ka pui pa koeng ka Nawh mai kieh prung prang hu kudah dee liak, mai pui pa koeng ka Nawh khankix, kieh to khaing Nawh liak. ² Kieh kix vung viang hu, awm vung viang taox ngu liak, mai kieh kix ceh hu awm bee kax pa dex ngu, kieh pui pa ang rahsee, laux leeing sivoe ngai Siyiex liak. ³ Kieh pui pa rahsee khankix gaux rhawm sivoe ngai Siyiex liak mai kieh kix gaux sile hu sivoe liak. ⁴ Ah lai ka Siyiex mai rhax lai yaogyaw ka ceu kaux Nawh, cox daux krax sivoe sang hu Nawh daux tiag mai ceu kaux Nawh mawh Siyiex heue. Gaux sile hu sivoe, sivoe ngai Nawh Cao awx. ⁵ Siyiex ot ka daux nyiex bwan pa singax singeh Nawh mai mawh keeing ka kawn doe khankix mai prawng ca ka son miexmai khankix heue. ⁶ Siyiex tawx akhwang ka pui pa ang koe paox pie, mawh nyiex ma heue. Mai Nawh Cao tawx krax nyawm rhawm ka pui pa ot daux thawng daux gang khankix. Phan mawh pui pa tieh feen ka Nawh khankix, yaox ti ot dee kroh dee kram heue. ⁷ Siyiex eue, yam thong Maix ka pui Maix mai hu ka daux tiag, ⁸ mawh kheu min plakngai Maix, haktiex yung yiang mai lhiex lih khaing raoma heue. Mawh kheu min plakngai Siyiex, gawng Sina kawx, yung yiang heue. ⁹ Siyiex eue, Maix kieh lhiex lih tom nie mai joh jhan ka sinngao Maix pa mawh pui pa taug pa mao khankix heue. ¹⁰ Pui Maix khankix hoik yaox dee ot dee koe tix heue. Siyiex eue, Maix hoik rien ti deuh bwanson ka son kix pui pa hot sibhawm heue. ¹¹ Mawh kheu Siyiex tawx lox kieh pui hu sidiex lox bwan gaux rhawm gaux rhi ka son pui pa ang nyang tawng khankix heue. ¹² Simiang mai kru naing nawh khankix to heue. Mai bun pa deuk daux nyiex nawh khankix, gwieh ti ih ka kraung khrai pa hoik pon kix heue. ¹³ Mawh kheu hoik caw pex ti ot sinax gawng mai awm sikaux pa hoik om pruik tix ka mau mai hauk tix ka khri raoh heue. ¹⁴ Siyiex Cao pa grum mai sibrawm pa ting, yam kieh Nawh cub simiang khankix, prung prang dee ot kix tan mai awm rawm rha pa lih ka piang gawng Zalamon heue. ¹⁵ Gawng Bashan pa lhaong pa choek pa grum naog mawh gawng Bashan cie Siyiex heue. ¹⁶ Gawng pa grum naog pa lhaong pa choek khankix eue, yuh patix pex lai jiang ka gawng pa simie Siyiex ti ot yuh ka mawx? Siyiex yuh dee ot Nawh, ka piang gawng tan jheung jheung leeing ju heue. ¹⁷ Ling brung cie Siyiex pa nie lheu khaing kaing mheen kaing sien, lih hoek khaing gawng Sina mai hu ka dee ot pa singax singeh heue. ¹⁸ Yam deeh haok Nawh Cao ka dee lhaong, Nawh giex ti viex pui hu tom nie mai Siyiex ot ka daux sinax kawn pui mai pon rieb totaix khaing pui Nawh khankix mai khawm pui pa tieh feen heue. ¹⁹ Siyiex mawh pa koe bwanson ku jheung jheung mai Cao pa taoh ka ex yam tuktiaktukte pui ka ex heue. ²⁰ Siyiex ex mawh Cao pa taoh ka ex mai mawh Siyiex Cao pa taoh ex lih khaing ka daux krax pa yum heue. ²¹ Siyiex tak sang tawk kaing pui pa koeng ka Nawh mai viah ti tik ngawg pui pa yuh phimap tete heue. ²² Siyiex ah nin, Aux tak viex kix hoek khaing meung Bashan mai Aux viex kix hoek khaing rawm sigrit sigra pa raux. ²³ Phan yuh nan maix tak dig ka nham kix mai sox maix khankix tak sang lied ti ih nham kix heue. ²⁴ Siyiex eue, kix hoik yaox pa hu Maix, Siyiex aux mai simiang aux, ka dee singax singeh heue. ²⁵ Cao pa rhax lai hu sivoe mai bunkrih cao tah kraung hu sinax mai cao pa tah ting hawt khaix heue. ²⁶ Ceu pui Isarelax khawmuik eue, yaogyaw ka Siyiex, ka daux dee khrawm pui hun khankix paox tix heue. ²⁷ Jah ka Benyamin pa iak mai tom hoek ka Simiang Yudax mai Simiang Zebulon mai khawm Simiang Napthalix heue. ²⁸ Siyiex eue, jhi ex yaox sibrawm Maix liak. Siyiex eue, kieh bwanson pa yuh Maix ka ex kaux cong liak. ²⁹ Kieh simiang khankix, viex totaix ka Maix, son daux nyiex bwan pa koe ka daux veng Yerusaliem liak. ³⁰ Sidiex gau ka totiag pa caox pa vao, pa ot ka daux tiag priem ang ah mai cub phung mawie praix mai kawn mawie pa awn ju pa eei pui khankix, viex bliah mau mai krub ka Maix ka daux pa viex rhawm awn rhawm tiiem liak. Ceu pui pa simie ti yuh naing khankix, kieh prung prang hu kudah dee liak. ³¹ Kieh cao cau simiang khaing meung Ejiptux hoek liak. Mai kieh pui meung Ethiopia nied ti yaog taix tix ka Siyiex heue. ³² Can meung pa koe ka piang haktiex khawmuik eue, rhax lai yaogyaw ka Siyiex awx. ³³ Rhax lai yaogyaw ka Siyiex Cao pa jah tom dix mai Cao pa brug ka raoma ka piang raoma, jhak heue, Nawh Cao ploi lox pa ting pa sinum hu heue. ³⁴ Rieb ti teei grawng pa ting Siyiex sibrawm awx, min plakngai Nawh koe ka piang pui Isarelax mai sibrawm Nawh kieh sidawng ka daux pai awm heue. ³⁵ Siyiex eue, Maix mawh pa khaw ex ti lhat graung ka praix dee singax singeh Maix heue. Siyiex Isarelax mawh Cao pa tawx riang rao mai sibrawm ka pui Nawh khankix heue. Kieh Siyiex koe bwanson liak.

¹ Siyiex eue, taoh aux liak, grawh grawng nawh, rawm hoik hoek mee ngawg aux heue. ² Caong aux ang koe dee dig, hoik blawn daux glaox dee raux heue. Aux hoik hoek dee raux rawm mai pukpak rawm hoik kheem hoik lhop ka aux. ³ Aux kied taug mao mai hoik si oh ghok ka kok yo tix Maix, ngai aux kawx hoik meu ka maong ti jhak Maix, pa mawh Siyiex aux heue. ⁴ Pui pa nieb koeng ka aux, nie lheu khaing hauk kaing aux heue. Pui pa simie ti yuh aux laux khankix, nie lheu ting riang khaing aux, aux yaox ti deeh viied kraung pa ang aux teei heue. ⁵ Siyiex eue, Maix hoik tawng mawh aux pui pa caox mai phimap aux ang pon ti mox sivoe ngai Maix heue. ⁶ Siyiex Cao kru naing raoma eue, mawh kheu aux, paw kieh pui pa krox jun ka Maix hoek krax pa kaig tua liak. Siyiex ceu pui Isarelax eue, mawh kheu aux, paw kieh pui pa sawg ka Maix hoek krax lhat graung liak. ⁷ Aux hoik yaox ti kham krax pa salao mai krax pa kaig tua hoik naog ka ngai aux kheu Maix heue. ⁸ Aux hoik awm nyo ka daux puxaik aux mai awm pui tang praix sivoe ngai kawn nyiex kawn ma aux khankix heue. ⁹ Krax khi rhawm pa dex mai nyiex Maix hoik bleet ka aux heue. Lox pa salao kix ka Maix hoik hoek ka piang aux heue. ¹⁰ Yam yiiem aux khawm rhawm khawm rhi tix mai twah pa ih kawx, kix salao ka aux heue. ¹¹ Yam ceep aux kraung chee rhix, kix ah lox jiem lak law ka aux heue. ¹² Yam ngawm kix bang kum daux siviex lawng mai yoek ka plai mai ah lox rhax grawng aux heue. ¹³ Siyiex eue, phan mawh aux, rawg bwan ka Maix, bawg yam pa khaw pa mhawm, Siyiex eue, awm pa grum naog krax caux rhawm Maix mai sijax mukheu Maix, deeh pawk lox aux mai taoh aux liak. ¹⁴ Taoh aux lih khaing daux glaox mai paw kieh aux blawn liak, kieh aux luat luan khaing tawm taix pui pa koeng ka aux mai rawm pa raux liak. ¹⁵ Paw kieh rawm huan kheem aux liak, paw kieh aux glip dee raux liak, paw kieh rawm kheem eet aux liak. ¹⁶ Siyiex eue, mawh kheu bwanson pa mhawm pa yuh Maix mai nghiet lox aux liak, veeh ngai Maix ka aux, ka daux pa caux rhawm, krax moh krax rhawm Maix tom nie liak. ¹⁷ Paw mox ngai Maix khaing aux pa mawh siliex Maix liak, krax pa khi rhawm hoik hoek ka piang aux, nghiet lox aux laung laung liak. ¹⁸ Greed ti hoek dex ka ju aux mai taoh aux liak, mawh kheu kied haoh pui pa koeng ka aux, kieh aux luan khaing kix liak. ¹⁹ Maix hoik tawng grawng pa yaox aux ti kham geu, ka pa salao mai pa kaig tua mai laux min plakngai mai pui pa koeng ka aux khankix, hoik sidawng sivoe ngai Maix heue. ²⁰ Mawh kheu lox pa salao, aux kied khi rhawm mai laux rhawm mai sawg pui pa sang caux rhawm ka aux ang koe tix kaux kawx mai aux sawg pui pa sang kieh aux nyawm rhawm kawx, ang yaox tix kaux kawx heue. ²¹ Pie sang ih aux kawx, kix tawx aux ih sidah song, pie sang nyaux aux rawm kawx, kix tawx aux nyaux sidah niex heue. ²² Kieh pheen sawm kix mawh kie pa hoik taong sivoe ngai kix, pa yuh kix kieh deeh hoek ka piang kix liak. ²³ Kieh ngai kix dug, son ang kix sang yaox mai kieh nyoi kix siyaung hu jheung jheung liak. ²⁴ Kieh krax song rhawm Maix Cao hieh ka piang kix mai kieh krax meet rhawm Maix hawt krup kix liak. ²⁵ Kieh dee ot kix yiien tom ang mhong lox tidtix, pie pa ot daux nyiex gox kix kawx, paw lai kieh koe ti kaux kawx. ²⁶ Grawh grawng nawh, kix tuktiaktukte ka pui pa sivied Maix mai kix baox lux ka pui pa hoik kieh Maix kix saux heue. ²⁷ Baox thie phimap ka piang phimap ka kix, paw kieh kix laig ka daux pa rahsee Maix. ²⁸ Maix preet ti tik ceu kaux kix ka daux carang pa im ju mai paw lai tiiem ti deuh ceu kaux kix tau mai pui pa rahsee. ²⁹ Phan mawh aux hot sibhawm mai kha rhawm tix heue. Siyiex eue, bwanson krax taoh Maix tak yaog aux ting lhaong heue. ³⁰ Aux rhax lai yaogyaw ka ceu kaux Siyiex mai plak jhi ka bwanson Nawh Cao heue. ³¹ Pa yuh nan nie lheu khaw rhawm Siyiex, khaing mawie pa grum koe khawm rung khawm kloh heue. ³² Pui pa awn rhawm awn rhi khankix yaox mai gaux rhawm gaux rhi heue. Pui pa sawg ka Siyiex khankix eue, kieh pex koe riang rao liak. ³³ Siyiex nghiet ka lox pui hot pui sibhawm mai Nawh ang nieb yuh ka pui Nawh, pa hoik giex hoik laung khankix heue, ³⁴ Kieh raoma haktiex rawm sigrit sigra mai kawn pui khawmuik yaogyaw ka Siyiex heue, ³⁵ Siyiex taoh ka veng Zion mai deeh cox veng Yudax, kix ot tan mai giex kaing heue. ³⁶ Ceu cad kawn praix siliex Nawh khankix, tak pon ti cie sin veng an mai pui pa moh ka ceu kaux Nawh Cao khankix yaox ti ot tan heue.

¹ Siyiex eue, Maix taoh aux liak, Siyiex eue, nied tix teem aux liak. ² Pui pa sawg ti pah ju aux khankix, kieh kaig tua mai laux pakngai liak mai pui pa simie ti yuh pa caox khankix, kieh kix lhat graung mai hoek krax pa kaig tua liak. ³ Can pui pa ah nin ka aux, haha, haha, kieh kix voi rhawm mai hoek krax pa kaig tua liak. ⁴ Can pui pa sawg ka Maix khankix, kieh kix gaux rhawm gaux rhi ka daux Maix liak, can kix pa khaw rhawm rhi ka bwanson krax taoh Maix mai kix ah nin, kieh min plakngai Siyiex ting jheung jheung liak. ⁵ Phan mawh aux, viang aux hot sibhawm kawx, nied hoek ka aux liak, Maix mawh Cao pa teem aux mai taoh ka aux heue. Siyiex eue, paw lai koi, niied hoek liak.

¹ Siyiex eue, aux deuh rhawm ka Maix heue, kieh aux luan khaing krax pa kaig pa tua jheung jheung liak. ² Awm pa koe pa rahsee Maix kieh aux luan liak, veeh yhaok Maix plak aux mai taoh aux liak. ³ Kieh Maix mawh rang ting dee ot aux mai dee hoek aux jheung jheung liak. Maix koe sibrawm tix taoh aux, grawh grawng nawh, Maix mawh rang ting aux mai tab dee deuh aux rhawm heue. ⁴ Siyiex aux eue, taoh aux khaing daux tawm taix pui pa caox caig mai pa ang rah ang see liak. ⁵ Siyiex eue, Maix mawh pa krox jun pot aux mai Maix mawh dee deuh aux rhawm tom yam mawh aux kawn nyawm heue. ⁶ Aux deuh rhawm ka Maix tom yam keh aux mai aux hoik pon bwanson Maix tom yam kawn ot aux daux vaig miex tix, mawh kheu nan, aux tak yaogyaw ka Maix jheung jheung heue. ⁷ Viang aux awm ceu pa daox am sivoe ngai pui hun khankix kawx, Maix mawh dee deuh aux rhawm pa kaux cong heue. ⁸ Jheeh aux naog ka pa yaogyaw ka min plakngai Maix ku singaix heue. ⁹ Paw lai tik ka aux, yam hoik kuad aux liak. Paw lai tik vud aux, yam hoik iak riang rao aux liak. ¹⁰ Pui pa koeng ka aux, pa ot tang plak khankix, salao ka aux heue. Kix jawm ti teei ju aux. ¹¹ Siyiex hoik tik nawh, ex hawt pheet ti giex nawh, pui pa taoh nawh ang koe tix kaux kawx, kix ah nan heue. ¹² Siyiex eue, paw lai ot singai khaing aux liak. Siyiex eue, nied tix teem aux laung laung liak. ¹³ Kieh pui pa lud ka ju aux khankix hoek krax pa kaig pa tua mai hoek krax pa laux pa som heue. Kieh pui pa sawg ti deuh phimap ka aux khankix, hoek ka daux pa salao mai hoek krax pa som nai liak. ¹⁴ Phan mawh aux, krox jun pot ka Maix jheung jheung mai tak sang nie lheu yaogyaw piang yaogyaw ka Maix heue. ¹⁵ Jheeh aux tak sang krai pa rahsee Maix mai grawng krax taoh Maix ku singaix heue. Ang dak uik simin bwanson Maix Cao heue. ¹⁶ Ka daux sibrawm Siyiex aux tak sang krai grawng krax pa rahsee Maix khaing heue. ¹⁷ Siyiex eue, Maix hoik gau aux tom yam mawh aux kawn nyawm heue. Maix hoik jhi ceu pa daox am Maix tom singaix yam in heue. ¹⁸ Siyiex eue, viang aux hoik riex ju mai hoik paing hauk kaing kawx, paw awt nyang tik vud aux ha, mawh kheu aux, ang nyang yaox tix jhi sibrawm Maix ka pui inkix mai pui tak sang koe khaix khankix heue. ¹⁹ Siyiex eue, krax pa rahsee Maix mawh pa kied ting kied lhaong heue. Siyiex eue, pui mawx tak awm Maix? ²⁰ Maix hoik jhi aux yaox krax pa khi rhawm mai ceu pa nu pa khawm tom nie mai deeh kieh aux nyawm rhawm mai kieh aux deeh kaoh khaing haktiex pa raux heue. ²¹ Maix hoik kieh aux magmi mai nyawm rhawm, ka daux singaix pa hoik luan heue. ²² Siyiex eue, aux tah ting mai yaogyaw ka sijax mukheu Maix, Siyiex Cao pa singax singeh ceu pui Isarelax eue, aux tah ting mai rhax lai yaogyaw ka Maix heue. ²³ Yam rhax aux lai ka Maix, jheeh aux kawx tak gaux rhawm gaux rhi mai ju aux pa hoik taoh Maix kawx, gaux rhawm gaux rhi heue. ²⁴ Dak aux kawx, tak sang krai grawng pa rahsee Maix, ku singaix jheung jheung heue, grawh grawng nawh, pui pa sawg phimap pa lud aux, hoik hoek krax pa kaig pa tua mai laux pakngai heue.

¹ Siyiex eue, tawx akhwang krax pa prawng ca pa rahsee Maix ka kawn simiang liak. ² Sonsang chix prawng ca nawh ka pui Maix rahsee mai tawx krax pa rahsee ka pui pa hot sibhawm Maix khankix heue. ³ Ka daux krax pa rahsee Maix kieh gawng iak gawng ting khankix, tawx krax pa nyawm rhawm ka pui Maix liak. ⁴ Kieh nawh prawng ca rahsee ka pui pa hot pa sibhawm mai teem ka pui pa ang kub ih khankix mai yuh laux leeing ka pui pa tuktiaktukte ka pui heue. ⁵ Kieh ceu kawn pui ku ju, lhat graung ka Maix, glang yam kawn koe khix, singaix heue. ⁶ Nawh Cao tak sang lih hoek awm lhiex, pa lih piang rib pa hoik vawg mai awm lhiex pa kieh haktiex caux heue. ⁷ Yam singaix baux ju nawh, pui pa rahsee sang magmi mai nyawm rhawm tom pa riang khix ang nyang grai heue. ⁸ Rawm sigrit sigra tix mu tom sidah hoik tix mu mai rawm klawng ting tix klawng hoik tix klawng, tom sidah haktiex nawh tak sang giex kaing heue. ⁹ Pui pa ot ka daux tiagtu krub sivoe ngai Nawh mai pui pa koeng ka Nawh khankix, tak sang lied tix ih phawng tiex heue. ¹⁰ Simiang meung Tasux khankix mai simiang rawm sigrit sigra khankix, hoek tawx gha ka nawh mai simiang Shebax mai simiang Sebax hoek tix tawx totaix ka nawh heue. ¹¹ Lheu khaing an, simiang khawmuik, tak grux tix krub ka nawh mai ceu pui khawmuik tak yuh kaing jhaw nawh heue. ¹² Grawh grawng nawh, yam kok yo pui pa ang kub pa ih mai pui pa hot pa sibhawm pa ang koe dee deuh rhawm khankix, Nawh tawx krax pa nyawm rhawm ka kix heue. ¹³ Nawh caux rhawm mai taoh ka ju kix pui pa hot pa sibhawm mai pui pa ang kub pa ih khankix heue. ¹⁴ Nawh taoh ju kix lih khaing daux tawm taix pui pie pui lhen mai pui pa tuktiaktukte mai nham kix mawh pa ngawh sivoe ngai Nawh heue. ¹⁵ Yam im ju nawh, kix teei khri meung Shebax mai tawx ka nawh mai kix rawg bwan son nawh mai yaogyaw ka nawh ku singaix jheung jheung heue. ¹⁶ Plix nghox plix koi tak teen haoh ka daux meung nawh, awm rib riem pa koe ka daux tiag gawng Lebanon heue. Pui veng nawh kawx, tak haoh hun awm rib riem ka daux meung an heue. ¹⁷ Ceu kaux Nawh tak kaux cong mai ting lhaong haok hwan jheung jheung tom ang singaix grai hu heue. Kawn pui khankix tak pon bwanson Nawh, pui tang ceu tak yaogyaw bwanson khawmuik heue. ¹⁸ Kieh Siyiex, Siyiex pui Isarelax, Cao pa yuh ceu pa daox am tix kaux khaing koe bwanson liak. ¹⁹ Kieh ceu kaux min plakngai Nawh koe bwanson jheung jheung liak, kieh min plakngai Nawh grum naog mai tah hu ka piang haktiex in khawmuik liak, Amen! mai Amen! ²⁰ Lox rawg bwan Davit kawn Yessie hoik heue.

¹ Siyiex tawx bwanson ka piang pui Isarelax pa singax singeh ka daux rhawm khankix tete heue. ² Phan mawh aux caong aux bheet mai dex lud krax hu heue. ³ Grawh grawng nawh, yam yaox aux magmi pui pa ang rah ang see mai pui pa ting rhawm ting rhi khankix, aux briex boh rhawm ka kix heue. ⁴ Kix ang yaox tix kha rhawm mai koe riang rao tom sidah yum heue. ⁵ Kix ang yaox ceu pa nu pa khawm awm pui tang kaux mai kix ang yaox ti kham ka krax pa tuktiaktukte, awm pui khankix. ⁶ Mawh kheu in, kix ting rhawm ting rhi, awm pa tauk soi ka ngawg tix mai jawg tix ceep kraung pa tuktiaktukte heue. ⁷ Mawh kheu hoik kluing ngai kix naog ka ceu pa caox caig mai rhawm kix hoik luan keud luan sawn tix heue. ⁸ Kix chix yuh pa caox caig mai tuktiaktukte ka daux lox nyiah mai chix krai lox pa ting lhaongheue. ⁹ Jheeh kix tiextu ka raoma mai dak kix vung viang, tah hu ka haktiex heue. ¹⁰ Mawh kheu in, pui Siyiex khankix, deeh hoek ka kix mai yum rhawm ka lox kix, awm pa chix sak chix ih heue. ¹¹ Kix ah nin, Siyiex chix tawng yuh ka mawx? Khex koe krax tawng yung mai Siyiex lie? ¹² Pui pa ang rah ang see an khankix mai kix magmi jheung jheung mai kraung khrai kix kawx, haoh hun tom nie heue. ¹³ Viang aux kieh rhawm tix singax kawx, ang doh koe bwanson mai viang aux ploi phimap tix mai khoek taix kawx, ang koe bwanson. ¹⁴ Aux yaox ti kham geu krax pa laklheet krax pa sidiex ku ngawb ku singaix heue. ¹⁵ Phan aux ah, khaw rhwm ka daux rhawm tix, aux awm pie lhen ka ceu pui Maix heue. ¹⁶ Yam keud yam sawn aux ka grawng ceu an, aux ce mawh pa nu pa khawm heue. ¹⁷ Khaix hoik hoek aux ka daux nyiex bwan pa singax singeh Siyiex, aux tom tawng grawng pa sidah heue. ¹⁸ Maix hoik teei tix sau kix ka dee kied nyu tete mai ka daux pa laux leeing heue. ¹⁹ Ka daux tivud ticu khaing, kheu pa lhat graung, kix hoek krax laux lak pak leeing dom mawx dom an heue. ²⁰ Siyiex eue, awm pa deuh pui tix tawng grawng pa camaox yam siduad khaing it tix mai yam siduad Maix, tak kieh ceu pa yuh kix mawh pa ang koe cee koe cak heue. ²¹ Yam kied saux rhawm aux, tuat hoek tom sok lax aux heue. ²² Aux mawh pui pa daox pa aw, pa ang koe cuyi pingnya, awm totiag sivoe ngai Maix heue. ²³ Viang mawh kawx nan, aux ot mai Maix jheung jheung mai Maix giex ka taix khawn dawm aux heue. ²⁴ Maix tawx krax tawng yung mai thong aux hu heue. Khaix an Maix tak teei aux hu ka daux min plakngai Maix heue. ²⁵ Lheu khaing Maix tix kaux, pui mawx tak sang ot mai aux daux meung raoma? Lheu khaing Maix tix kaux, ka piang haktiex in, aux kawn lo pui mawx? ²⁶ Nex nham aux mai rhawm rhi aux, hoik laux hu heue. Viang mawh kawx nan, Siyiex mawh rang ting mai riang rao son ju aux leeing ju heue. ²⁷ Jhak heue, pui pa ot singai khaing Maix, tak hoek krax laux leeing heue. Pui pa gwieh hu khaing Maix mai pa lud khawmuik, yuh laux leeing heue. ²⁸ Phan mawh aux, greed tix hoek dex mai Siyiex mawh pa mhawm son aux heue. Aux deuh rhawm ka Siyiex mai krai grawng pa yuh Nawh ka pui khawmuik heue.

¹ Siyiex eue, mawh kheu patix Maix lai tik vud aux jheung jheung, mawh kheu patix Maix lai song rhawm song rhi ka yung khankix, pasax sawm ka dee sawm tix? ² Doh keud ka cub pui Maix khankix dix mai pui pa hoik laug Maix, sonsang mawh sin ang ah mai sonsang ot Maix ka gawng Zion ang ah heue. ³ Hoek tix jhak ka dee hoik yieh Maix ti tik ka pui pa koeng pa yuh pa ang rah ang see kuceu khawmuik, ka daux nyiex bwan Maix pa singax singeh liak. ⁴ Pui pa koeng ka Maix khankix, kok yo sinax pui Maix heue. Sakse Maix, kix yuh mawh sakse cie tix heue. ⁵ Kix yuh tix mawh awm pui pa viex moe mai hu kid khaox ka daux tiag. ⁶ Yam in kix tieh tix viex moe, daix mai yieh ti tik kraung nyiex bwan Maix heue. ⁷ Kix gleeing ti tik ka nyiex bwan Maix pa singax singeh, nyiex bwan dee ot ceu kaux Maix kawx, kix hoik yeen hoek tom siglaing tiex heue. ⁸ Kix ah nin ka daux rhawm tix, "Ex tak yieh ti tik ka ceu pui kix pak lawg, " Mai gleeing ti tik ka nyiex bwan Siyiex, pa koe ka piang haktiex khawmuik heue. ⁹ Ang ex lai yaox sakse tokaux tix, tix ceu kawx, cao jhai ka ang koe, cao pa krai ex mhong grawng bawg yam ka ang koe mai kawn koe miex grheung ang tawng? ¹⁰ Siyiex eue, pui pa koeng ka ex, tak salao ka ex miex grheung? Pui pa koeng ka Maix yuh pa ang cee ang cak ka ceu kaux Maix jheung jheung lie? ¹¹ Mawh kheu patix, Maix lai deeh yawn taix khawm dawm Maix khaing ex yuh ka mawx? Teei taix Maix lih khaing naok Maix mai yuh kix laux leeing heue. ¹² Tom yam jah, Siyiex dawg mawh Simiang Cao pa taoh ka sinax haktiex tete heue. ¹³ Maix hoik kieh rawm sigrit sigra gwieh hu ka daux sibrawm mai Maix hoik raig ti tik kaing siyawng pa ot ka daux rawm heue. ¹⁴ Maix hoik raig ti tik kaing kax ting Levitan mai tawx ka can pa ot ka daux tiagtu sonsang ih kix heue. ¹⁵ Maix kieh daux rawm keut mai rawm rawng lih mai rawm klawng pa koe rawm jheung jheung kawx, Maix kieh kroh hu heue. ¹⁶ Ponngaix mai ponsawm kawx, mawh cie Maix mai Maix hoik yuh pa riang mai singaix heue. ¹⁷ Maix hoik deuh bawg yam rung bawg yam kwat mai mee haktiex in khawmuik heue. ¹⁸ Siyiex eue, viang pui pa koeng salao ka Maix mai pui pa caox caig yuh pa ang cee ang cak ka ceu kaux Maix kawx, doh keud ka kix liak. ¹⁹ Paw lai teei ju sikaux Maix tawx ka totiag khankix liak. Paw lai pi awm ka pui pa hot pa sibhawm jheung jheung liak. ²⁰ Maix doh keud ka sijax mukheu Maix liak, grawh grawng nawh, ka daux pa vhaik ka piang haktiex in, hoik naog dee ot dee koe pui tud rhim mai pa tuktiaktukte khankix heue. ²¹ Paw kieh pui pa yaox ti kham geu ka krax pa tuktiaktukte hoek krax pa kaig pa tua mai krax pa laux rhawm lauxrhi liak. Kieh pui pa hot pa sibhawm khankix, yaogyaw ka ceu kaux Maix liak. ²² Siyiex eue, kaoh mai prawng ca ka see Maix liak, doh keud ka pui pa caox caig, pa sa lao ka Maix jheung jheung liak. ²³ Paw lai pi awm ka lox pui pa koeng ka Maix, lox pa mawh pa lawh pui pa tieh feen ka Maix nie lheu haoh hun sinyek sinyek heue.

¹ Siyiex eue, ex yaogyaw ka Maix heue, kheu hoik dex ceu kaux Maix mai ex khawm sakse ceu pa daox am pa yuh Maix mai ex yaogyaw ka Maix heue. ² Bawg yam pa bak aux ka kix, aux prawng ca ka kix rahsee heue. ³ Haktiex mai pui haktiex, viang yung yiang hu kawx, Aux kieh jaong num haktiex kaux cong heue. ⁴ Aux ah nin ka pui pa ting rhawm ting rhi khankix, pex paw lai ting rhawm ting rhi mai pui pa caox caig khankix, paw yuh rung tix choek, ⁵ paw yuh rung tix choek mai pui pa ang rah ang see khankix, paw yuh rung tix choek mai paw kieh ghok kiien lox sikah. ⁶ Grawh grang nawh, krax yaogyaw, ang mawh pa kaoh khaing plak lih singaix mai plak klip singaix mai ka daux tiagtu. ⁷ Cao pa prawng ca mawh Siyiex heue. Nawh yeen tix kaux tiem mai yaog tix kaux lhaong heue. ⁸ Ka daux tawm taix Siyiex, koe kawk pa hoik naog rawm plix siiet pa khiien heue. Nawh prauk rawm plix siiet pa hoik klao mai rawm sidah lih heue. Kawn pui piang haktiex pa ang rah ang see khankix khawmuik biiet tix nyaux ka glhaok an heue. ⁹ Phan mawh aux yaogyaw ka Siyiex ceu pui Yakop mai rhax lai yaogyaw ka jheung jheung heue. ¹⁰ Aux tak kid ti tik rung choek pui pa ang rah ang see khankix mai aux tak yaog rung choek pui pa rahsee khankix heue.

¹ Pui pa tawng ka Siyiex koe ka daux meung Yudax mai ceu kaux Nawh Cao ting lhaong ka daux Isarelax heue. ² Nyiex gox Nawh Cao koe ka veng Saliem mai dee ot Nawh mawh ka piang gawng Zion heue. ³ Ka dee an Nawh Cao raig ti tik te, kraung naing vaig mai kraung naing pa tie naok khankix heue. ⁴ Maix nie lheu ting min plakngai khaing gawng pa ot totiag khankix heue. ⁵ Pui pa vao pa kwa khankix, laig it khaix yaox kix tix kham geu pa tud pa rhim heue. Pui pa ting riang ting rao khankix, ang yaox taix kix tix kaux kawx. ⁶ Siyiex ceu pui Yakop eue, ka daux pa sivied Maix tix gau, cao pa brug ling brung mai khawm brung sidaing laig it heue. ⁷ Pa khaw ex tix lhat graung ka mawh ngie Maix tix kaux khaing, yam song rhawm song rhi Maix, pui mawx tak sang pon tix cung sivoe ngai Maix. ⁸ Siyiex taoh ka kawn pui haktiex, pa awn rhawm awn rhi khawmuik heue. ⁹ Yam kaoh Nawh tix prawng ca, Nawh ploi lox prawng ca lih khaing raoma mai haktiex lhat graung mai yiien yawg tix heue. ¹⁰ Krax pa song rhawm kawn pui, deeh tieh ti mawh pa yaogyaw ka Maix mai krax pa song rhawm song rhi pa kawn deuk khankix kawx, Maix hoik rawd ti deuh ka maox rawd nyoi heue. ¹¹ Kaux sijax mukheu, awm pa hoik yuh maix ti deuh sijax mukheu ka Siyiex pex awx. Kieh can pui pa ot sivie Maix, viex totaix hoek ka Maix mai lhat graung ka Maix Cao heue. ¹² Nawh Cao yeen tiem ka kawn Simiang mai kieh simiang haktiex khankix, lhat graung heue.

¹ Aux ploi lox mai kok yo ka Siyiex heue, Nawh nghiet lox pa kok yo aux heue. ² Yam hoek aux krax khi rhawm, aux sawg ka Maix Siyiex heue. Yam ponsawm aux yaog taix tix rawg bwan, ju aux thiang ti tik pa nyawm rhawm heue. ³ Aux keud grawng Siyiex mai khi rhawm mai ngia tix heue. Aux keud rhawm tix mai laux rhawm heue. ⁴ Maix kieh ngai aux blah leeing sawm, aux khi rhawm tom ang lai pon sikah heue. ⁵ Aux doh keud ka grawng singaix pa hoik luan mai jhong khix mee num pa hoik luan dix. ⁶ Bawg yam ponsawm aux jawg tix keud mai rhax lai mai aux chawk ka daux rhawm ti ah nin mai aux chawk cheng ka ju tix heue. ⁷ Siyiex khex hoik tik vud aux jheung jheung lie? Khaix in ang Nawh yuh bwanson ka aux tix bawg kawx lie? ⁸ Krax caux rhawm Nawh hoik uik jheung jheung lie? Sijax mukheu Nawh hoik laux leeing, leeing ju lie? ⁹ Hoik pi awm Nawh krax caux rhawm lie? Nawh Cao hoik prah hoik grham krax caux rhawm pa moh, kheu song rhawm song rhi Nawh lie? ¹⁰ Phan yuh nan, aux lawk kham geu grawng pa ting rhawm aux heue. Lheu khaing taix khawn dawm Siyiex, pa ting lhaong khaing, pa chix cox ka aux heue. ¹¹ Aux tak krai ka grawng kaing pa hoik yuh Maix mai doh keud ka ceu pa daox am pa hoik yuh Maix tom didix. ¹² Aux keud grawng ceu pa hoik yuh Maix mai krax prawng ca Maix khankix heue. ¹³ Siyiex eue, daux krax Maix mawh pa singax singeh heue. Siyiex mawx pa lheu ting khaing Maix Siyiex lie? ¹⁴ Maix mawh Siyiex Cao pa chix yuh ceu pa daox am mai pa hoik jhi sibrawm ka ceu kawn pui khankix heue. ¹⁵ Maix hoik teei plawng taix mai hoik taoh ka pui Maix, ceu pui Yakop mai ceu pui Yosiep khankix heue. ¹⁶ Siyiex eue, rawm khankix yaox ka Maix mai lhat graung heue. Rawm pa raux khankix kawx, yung yiang heue. ¹⁷ Paiawm khankix, lih mawh rawm, raoma kawx, sinum praix heue. Te Maix kawx, hoik tah hu kudauh kudee heue. ¹⁸ Lox tuh sah Maix viex tix ka daux bhaung keu kang lux mai puk plak praix khankix, hoik riang yuh haktiex heue. Haktiex kawx yung yiang hu heue. ¹⁹ Daux krax Maix koe ka daux rawm sigrit sigra mai grawng hu Maix kied sidaing vieh mai khaix Caong Maix ang chix yaox sidawng. ²⁰ Maix hoik teei taix Mose mai Arun, thong ka pui Maix awm cub phung yung heue.

¹ Pui cie Aux khankix eue, veeh yhaok pex nghiet ka lox lai beenli Aux mai gumlox pa krai Aux awx. ² Aux tak ang moing tix mai krai lox phektem ka pex mai Aux tak plak jhi grawng pa raux pa mox jah tom didix heue. ³ Ex hoik mhong hoik tawng grawh grawng pa hoik krai tax ex khankix. ⁴ Ex ang mox khaing kawn praix kix, sonsang yaogyaw ka Siyiex mai sibrawm mai ceu pa daox am, pa hoik yuh Nawh Cao khankix, krai ka kix, pa tak sang hoek tix mawh sax heue. ⁵ Grawh grawng nawh, Nawh Cao deuh sonsang kham sakse ka geh nyiex Yakop mai deuh lox tawm beenli ka geh nyiex Isarelax heue. Gumlox beenli an, Nawh Cao tawx ka tax ex, keeing ex, sonsang kieh kawn praix kix tawng heue. ⁶ Kawn praix kix pa keh khaix, deeh gau ka kawn kix, kawn kix tom deeh sitoe tix gau ka kawn saux, kawn sex kix tawng. ⁷ Sonsang yum rhawm, deuh kix rhawm ka Siyiex mai son ang lai pi awm ka ceu pa hoik yuh Siyiex khankix mai sonsang hawt ti yuh lox beenli Nawh Cao khankix, ⁸ son ang kix sang mawh pui pa tieh feen ka Siyiex mai son ang kix sang mawh rhawm pui pa ang rah ang see mai son ang kix sang mawh khwan pa ang kaux sijax ka Siyiex, awm tax du kix heue. ⁹ Ceu pui Epharim khankix, viang kix viex kraung naing mai ak kawx, yam puing naing kix deeh dah plak khaix heue. ¹⁰ Kix ang lai krox ka sijax mukheu Siyiex mai kix ang hawt ka daux krax beenli Nawh Cao. ¹¹ Kix pi awm ka ceu pa daox am pa jhi Nawh Cao ka kix heue. ¹² Nawh Cao hoik yuh ceu pa daox am, sivoe ngai tax kix, keeing kix, ka daux lung Zoan ka daux meung Ejiptux heue. ¹³ Nawh Cao kieh rawm sigrit sigra gwieh mai khrawm tix tau mai kieh kix tiang hu heue. ¹⁴ Bawg yam ponngaix Nawh Cao kieh rong paiawm jhi kix yaox daux krax mai bawg yam ponsawm kieh pa riang ngu jhi kix yaox daux krax leeing sawm heue. ¹⁵ Nawh Cao tawk simaox rang daux tiag mai kieh rawm lih tom nie mai tawx kix nyaux heue. ¹⁶ Nawh Cao kieh rawm pa lih khaing daux rang an, lih hu awm rawm klawng heue. ¹⁷ Pui an khankix nie lheu ting lud mai tieh feen ka Siyiex Cao pa ting lhaongka daux tiagtu heue. ¹⁸ Kix hawt alo tix mai keud daux rhawm ti yuh nin, ex cheu mhaing tix yaox pa ih ka Siyiex? ¹⁹ Kix baox ah nin ka Siyiex, "Khex pon khre Nawh pheen sawm ex ka daux tiagtu lie? ²⁰ Jhak heue, kix ah lox map ka Siyiex ah nin, Nawh Cao tawk ka rang mai chix kieh rawm lih awm rawm klawng, blah mai nex kawx, Nawh Cao tak sang pon tawx, pon khre ka son pui Nawh khankix lie?" ²¹ Siyiex mhong lox an mai kied song rhawm song rhi heue. Kieh ngu gleeing ti tik kix geh nyiex Yakop mai Isarelax heue. ²² Grawh grawng nawh, kix ang yum rhawm ka Siyiex mai ang tawng ka bwanson krax taoh Nawh Cao. ²³ Nawh Cao tawm lox ka paiawm dee lhaong mai paoh siviex raoma heue. ²⁴ Nawh Cao kieh Mannax lih, awm lih lhiex mai tawx pa ih, gaox, nghox son pa sang ih kix khaing raoma heue. ²⁵ Kix khawmuik, yaox ti ih ka blah pa ih kawncau Siyiex, pa tawx Nawh Cao ka kix mai kieh kix ih tom sak tix heue. ²⁶ Nawh Cao kieh bhaung plak lih singaix phlu hu ka raoma mai Nawh Cao teei sibrawm tix viex bhaung caong ma seh hoek heue. ²⁷ Nawh Cao kieh nex lih tom nie awm lih lhiex mai pa awm phawng tiex pa mawh sim pa pu tom haoh tom hun sidu awm mhaik rawm sigrit sigra, lih ka piang kix heue. ²⁸ Nawh Cao kieh rau hawt praok nyiex bang dee ot kix heue. ²⁹ Nawh Cao tawx ka kix, awm pa simie kix tix ih tom sak tix heue. ³⁰ Yam kawn tak sawm kix mai ang nyang tien sak, ³¹ krax pa song rhawm song rhi Siyiex deeh hoek ka piang kix mai Nawh Cao pah pui brax pui kwa mai teei ka pui Isarelax pa awn ju khankix yum heue. ³² Viang kix hoik yaox ceu pa daox am kuceu kawx, kix ang yum rhawm mai ca kawn lud heue. ³³ Mawh kheu nan, Nawh Cao kieh singaix sawm kix luan giex going mai khix num kix sidah ka pa kha rhawm heue. ³⁴ Yam teei Nawh Cao kix yum, kix sawg ka Nawh Cao heue. Kix deeh hoek tix sawg ka Nawh Cao heue. ³⁵ Kix doh keud ka grawng mawh Siyiex rang ting cie kix mai Siyiex Cao pa ting piang khawmuik mai mawh Cao pa taoh ka kix heue. ³⁶ Viang mawh nan, mawh ngie jheeh giex, dak kix ah lox pie lhen heue. ³⁷ Phan mawh rhawm kix, ang rah ang see ka Nawh mai ang kix tie kaux sijax ka Nawh Cao heue. ³⁸ Viang mawh nan, phan mawh Nawh Cao, caux rhawm ka kix mai ang tik ang vud ka kix mai pluat ploi phimap phighram kix heue. Nawh Cao gun yeung tom nie bawg, viang kied song rhawm kawx Nawh ang awt yuh kix laux. ³⁹ Nawh Cao doh keud ka mawh kix ngie nex nham khaing, phan khwan hoik luan hu, ang lai chix deeh hoek khaix heue. ⁴⁰ Kix tieh feen ka Nawh Cao ka daux tiagtu mai kix kieh Nawh Cao song rhawm song rhi ka daux tiag dee ang pui ot ka dee yiien tom nie bawg heue. ⁴¹ Kix cheuk tix yaox ka Siyiex lawlawx mai yuh pa ang cee ang cak ka Siyiex Isarelax Cao pa singax singeh heue. ⁴² Kix pi awm ka plawng taix Siyiex pa taoh kix lih khaing singaix bawg yam, yam ot kix ka daux tawm taix pui pa koeng ka kix heue. ⁴³ Nawh Cao hoik yuh sakse ka daux meung Ejiptux mai yuh mhai ceu pa daox am ka daux lung Zoan heue. ⁴⁴ Nawh Cao kieh rawm keut, rawm klawng khankix, lih mawh nham tom kieh kix ang chix ih chix nyaux heue. ⁴⁵ Nawh Cao ploi maing pa chix kiied mai khet khankix, pa chix yuh laux, hoek ka kix heue. ⁴⁶ Nawh Cao kieh kawng mai sido araphax yuh laux to ma to koi mai kraung khrai kix pak lawg heue. ⁴⁷ Nawh Cao kieh mu pre yuh laux ka nhu plix siiet khankix mai kieh lon sidap yuh laux ka khaox ruh khankix heue. ⁴⁸ Nawh Cao kieh mu pre yuh laux cub yung, mawie kix khankix yum mai kieh sah tuh, to brie kix khankix yum heue. ⁴⁹ Nawh Cao kied song rhawm song rhi ka kix mai tawx krax kha rhawm mai ploi kawncau Siyiex pa caox khankix, hoek tix tuktiaktukte ka kix heue. ⁵⁰ Nawh Cao hoik rien ti deuh krax ka pa song rhawm song rhi tix mai Nawh Cao ang lai lhawk ka ju kix, kieh kix yum ka saux preng heue. ⁵¹ Nawh Cao pah kawn Ai daux meung Ejiptux yum khawmuik, pa mawh pui ting pui lhaong khawm dee ot pui Hamax heue. ⁵² Phan mawh pui Nawh khankix, Nawh kieh lih awm cub yung mai viex kix lih daux tiagtu, awm cub yung heue. ⁵³ Nawh Cao priex kix luan mhawm mhawm mai ang kieh kix koe krax pa lhat graung, viang mawh nan, Nawh Cao kieh rawm sigrit sigra kheem ka pui pa koeng khankix heue. ⁵⁴ Nawh Cao thong kix hu tom sidah, mee haktiex Nawh Cao pa singax singeh mai haktiex gawng lua pa pon Nawh ka taix khawn dawm pa giex tix kaing heue. ⁵⁵ Nawh Cao grheu ti tik ka pui tang ceu khankix, sivoe ngai kix mai gwieh kix ih haktiex, sin pa khaw kix ti pon, ka geh nyiex Isarelax mai kieh kix sum nyiex bang dee ot kix tan heue. ⁵⁶ Viang mawh nan, kix cheuk cheu mai tieh feen ka Siyiex Cao pa ting lhaong mai kix ang nghiet ka lox grawng pa hoik kham Nawh ti deuh sakse khankix, ⁵⁷ kix deeh tieh hu mai yieh lox sijax mukheu laux awm tax du kix heue. Kix hoik lud krax hu, awm ak pa vawk te heue. ⁵⁸ Kix teei dee ot pa lhaong mai yuh Nawh Cao song rhawm song rhi mai krub ka riang grang pa hoik yuh ka tawng khankix, kieh rhawm Nawh Cao sung sang heue. ⁵⁹ Siyiex hoik mhong hoik tawng mai Nawh Cao lih songrhwm mai kied seeing brai ka pui Isarelax heue. ⁶⁰ Nawh Cao tik ka nyiex gox bwan man Silon pa deuh son pui Nawh khankix heue. ⁶¹ Nawh Cao teei sibrawm mai min plakngai Nawh tawx hu ka daux tawm taix pui pa koeng khankix heue. ⁶² Nawh Cao teei ti tawx pui cie Nawh ka lawm vaig mai Nawh Cao lih song rhawm song rhi ka sinngao cie Nawh khankix heue. ⁶³ Kieh sinaw khankix yum daux ngu mai ang kieh bunkrih khankix yaox tix koe mex. ⁶⁴ Cao giex kaing li khankix laux, yum ka lawm vaig, lawm pliah, miexmai tai nhang khankix, ang lai kieh kix yiiem. ⁶⁵ Yam an Siyiex siduad awm pui pa siduad khaing it tix mai ting riang rao awm pui pa nyaux rawm plix siiet heue. ⁶⁶ Nawh Cao tawx krax pa kha rhawm, kieh pui pa koeng khankix, deeh dah plak khaix mai kieh kix hoek krax pa kaig pa tua jheung jheung heue. ⁶⁷ Nawh Cao teei ti tik ka nyiex gox Yosiep mai ang laug ti teei ka geh nyiex Epharim. ⁶⁸ Viang mawh nan, Nawh Cao laug ti teei ka geh nyiex Yudax mai gawng Zion pa moh Nawh heue. ⁶⁹ Nawh Cao sum nyiex bwan, pa singax singeh awm pa koe choek dee lhaong mai awm pa kieh Nawh haktiex kaux cong jheung jheung heue. ⁷⁰ Nawh Cao laug ti teei aux, Davit lih khaing daux kawg yung heue. ⁷¹ Nawh Cao laug ti teei aux, awm yung miex pa priex kawn tix mai kieh aux priex pui Nawh geh nyiex Yakop pa mawh sinngao Nawh ceu pui Isarelax khankix heue. ⁷² Mawh kheu nan, Nawh priex kix mai thong kix hu ka daux tawm taix tix, awm pa koe rhawm Nawh heue.

¹ Siyiex eue, pui tang ceu khankix, hoik hoek ka daux sin Maix, kix hoik kieh nyiex Bwan pa singax singeh Maix, seeing brai mai hoik yieh ti tik veng Yerusaliem heue. ² Kix hoik teei ti tawx sim raoma khankix, ih ka tokaux yum siliex Maix khankix mai kix hoik teei ti tawx nex nham pui Maix ka totiag pa caox khankix heue. ³ Kix teei nham kix hieh hawt vung viang veng Yerusaliem, awm lih rawm mai ang koe pui sipaung. ⁴ Paox plawg paox nyhawm pa ot dex vung viang aux khankix, salao mai nyiah maung aux heue. ⁵ Siyiex eue, krax song rhawm song rhi Maix ang cu tix naox yiien, kawn sang rheung miex grheung? Rhawm rhi Maix ang nyang fah, tak sang hax awm ngu, kawn rheung miex grheung? ⁶ Krax pa song rhawm song rhi Maix teei tix hieh ka piang pui tang ceu pa ang tawng ka Maix mai ka piang pui meung pa ang kok ka ceu kaux Maix khankix heue. ⁷ Grawh grawng nawh, kix kiied tix ih ka nex geh nyiex Yakop mai yieh laux dee ot dee koe kix heue. ⁸ Phimap pa yuh tax keeing ex dix, paw kieh hoek ka piang ex liak. Mawh kheu ex hoik rau hoik ot dee tiiem mai Maix caux rhawm ka ex mai nied tix teem launglaung liak. ⁹ Siyiex Cao pa taoh ka ex eue, ka daux min plakngai ceu kaux Maix, teem ka ex liak. Ka daux ceu kaux Maix taoh ti teei aux mai ploi phimap aux liak. ¹⁰ Mawh kheu patix, pui tang ceu khankix ah nin, Siyiex kix koe dee mawx? Maix prawng ca ka nham pui Maix, pa hoik teei pui tang ceu khankix, sidawng ka sivoe ngai ex liak. ¹¹ Maix nghiet ka lox pa riag, pa ngia pui pa ot ka daux thawng khankix mai taoh ka pui pa tak sang pah yum khankix ka daux plawng taix Maix pa ting sibrawm liak. ¹² Siyiex eue, ka piang pui, paox plawg aux, pa salao ka Maix khankix, deeh viied tix tawx phimap ka piang naok kix, tom sidah aliah son liak. ¹³ Mawh kheu nan, can ex pa mawh pui Maix mai cub yung pasax sawm tau mai Maix khankix, tak sang yaogyaw ka Maix jheung jheung mai plak jhi bwanson Maix ka pui pa tak sang mawh khaix in leeing ju heue.

¹ Cao liang yung Isarelax mai pa thong ka ceu pui Yosiep awm cub yung eue, veeh yhaok Maix nghiet liak, Cao pa ot ka piang Cherubin eue, ploi pa riang Maix liak. ² Jhi sibrawm Maix ka sivoe ngai ceu pui Epharim, Binyamin, Manashe mai hoek tix taoh ka ex liak. ³ Siyiex eue, kieh ex deeh tieh loh mai jhi pa riang pakngai Maix liak, phan yuh nan, ex tak sang hoek krax taoh heue. ⁴ Siyiex Cao kru naing raoma eue, krax pa song rhawm song rhi Maix, kawn sang kieh koe ka piang pui Maix pa rawg bwan ka Maix rheung miex grheung? ⁵ Maix tawx kix ih blah rawm ngai mai tawx kix nyaux rawm ngai tom sak tix heue. ⁶ Kieh paox plawg ex khankix, thung thiang ka ex heue. Pui pa koeng ka ex khankix, ah lox map mai nyiah ka ex heue. ⁷ Siyiex Cao kru naing raoma eue, kieh ex deeh tieh loh mai jhi pa riang pakngai Maix liak, phan yuh nan, ex tak sang hoek krax taoh heue. ⁸ Maix hoik viex tix sum nhu plix siiet khaing meung Ejiptux mai grheu pui tang ceu khankix to heue. ⁹ Maix hoik rien hoik cox dee ot nawh mai riah nawh khankix, hoik tah hu ku meung heue. ¹⁰ Veei nawh hoik tah hoik kheem ka gawng khankix mai kak nawh khankix kawx, kheem veei ka piang khaox piakvan pa kied ting kied lhaong khankix heue. ¹¹ Nawh kieh kak nawh khankix, ting lhaong hu tom sidaing hoek ka rawm sigrit sigra mai nyoig rao nawh kawx, tah hu tom hoek ka rawm klawng ting, Upharat heue. ¹² Mawh kheu patix yam in, Maix lai yieh ti tik khaox vie nawh mai can pui pa hu krax dex nawh khankix, pieh tix ih plix nawh. ¹³ Prieh keeh nhu nawh dud mai totiag pa caox hoik ih ka heue. ¹⁴ Siyiex Cao kru naing raoma eue, ex khyox khaw ka Maix, deeh hoek ha tix bawg liak, ot piang meung raoma mai kia ngien ka ex liak. Hoek tix jhak ka nhu plix siiet khankix liak. ¹⁵ Ka nhu pa hoik sum taix khawn dawm Maix ti deuh, priex kix, sonsang haok hwan mai kaux cong son Maix. ¹⁶ Hoik gleeing ka ngu mai hoik kid ti tik heue. Mawh kheu pakngai Maix, pa sidiex kix hoik hoek krax pa laux leeing heue. ¹⁷ Teei taix Maix deuh ka piang pui pa dex mai taix khawn dawm Maix mai kieh kawn pui grum ting riang ting rao son Maix liak. ¹⁸ Phan yuh nan, ex ang lai deeh yawn plak khaix khaing Maix, kieh ex im ju liak, ex tak rawg bwan ka ceu kaux Maix heue. ¹⁹ Siyiex Cao kru naing raoma eue, kieh ex deeh tieh deeh loh mai jhi pa riang pakngai Maix liak, phan yuh nan, ex tak hoek krax taoh heue.

¹ Ex ah lox rhax pa gaux rhawm gaux rhi gauxrhi, yaogyaw ka Siyiex Cao pa tawx riang tawx rao ka ex heue. Kok yo lox sinum ka Siyiex Yakop heue. ² Ah lox rhax mai tah kraung, tah ting susi, pa nyawm tix nghiet heue. ³ Phlu teettawng ka singaix khix khraox mai singaix pang khix mai singaix yuh pawie ting heue. ⁴ Ceu in mawh beenli pa deuh Siyiex Yakop ka son pui Isarelax heue. ⁵ Nawh Cao prawng ca ti deuh ka geh nyiex Yosiep tix kham sakse yam lih hu nawh ka daux meung Ejiptux, dee ang aux tawng lox tawng pui ka heue. ⁶ Aux kieh kraung pa cien luan khaing piang klip nawh mai taix nawh kawx, kieh luan khaing beeh klawm pa cien heue. ⁷ Yam yaox maix krax pa kha rhawm maix kok yo Aux, Aux taoh ti teei ka maix heue. Aux deeh pawk lox Maix, dee tuh sah dee glip mai cheuk cheu tix yaox maix ka praok rawm klawng Meribax heue. ⁸ Pui aux khankix eue, nghiet heue, Aux tawm ti deuh lox ka maix, geh nyiex Isarelax eue maix nghiet ka lox Aux liak. ⁹ Siyiex pui tang ceu ang pon tix koe mai maix mai maix ang pon tix krub ka siyiex tang praix klawng. ¹⁰ Aux mawh Siyiex maix Cao pa taoh maix lih khaing daux meung Ejiptux heue, ang jheeh maix tom vieh tom va, Aux tak tawx maix ih tom sak tix heue. ¹¹ Pui Aux khankix, ang nghiet ka lox Aux, ceu pui Isarelax tee ang moh ka Aux nieh. ¹² Mawh kheu in, Aux tom kieh rhawm kix kiien mai kieh kix hu, awm pa sikix tix hawt yuh. ¹³ Pui Aux khankix, nghiet ka lox Aux, kieh ceu pui Isarelax hawt daux krax Aux liak. ¹⁴ Phan hawt pui pa koeng khankix, Aux nied tix yeen kix tiem mai taix Aux tiebtie, yuh laux ka kix pui pa lah cha ka kix heue. ¹⁵ Pui pa koeng ka Siyiex khankix, khyox khaw ka Nawh Cao mai pui aux khankix kawx, koe akhwang kaux cong jheung jheung heue. ¹⁶ Nawh Cao tak sang tawx kix ih ka gaox ka nghox tom sak, pa kied mhawm mai rawm hia pa lih khaing daux rang heue.

¹ Siyiex cung ka daux siyiex Pa haoh hun mai prawng ca ka sinax kix heue. ² Pex jhak ka pakngai pui pa ang rah ang see mai kawn prawng ca pa ang rah ang see rheung miex grheung? ³ Pex prawng ca mai ot plak pui pa hot pa sibhawm mai kawn doe pa ang koe miex keeing khankix, yuh pa khaw mai beenli mai ot plak kix pa hot pa sia mai pa cai rhawm cai rhi khankix awx. ⁴ Taoh ka pui pa hot pa sibhawm mai pa cai rhawm khankix, luan khaing daux taix pui pa ang rah ang see khankix awx. ⁵ Kix ang tawng ang yung, kix lailing ka daux pa vhaik mai jaong num haktiex yung yiang khawmuik heue. ⁶ Aux ah nin ka pex, pex mawh siyiex, mai can pa koe khawmuik mawh kawn Siyiex Cao pa ting lhaong heue. ⁷ Viang mawh kawx nan, pex tak sang yum awm kawn pui mai hoek krax laux krax sum awm kawn simiang heue. ⁸ Siyiex eue, kaoh mai prawng ca ka haktiex liak, grawh grawng nawh, kawn pui khawmuik mawh cie Maix heue.

¹ Lai yaogyaw pa ah Asapha Siyiex eue, paw lai glaik yiien yawg tix liak, Maix paw yuh tix ang tawx lox pa sang krai tix mai paw lai kaog liak. ² Jhak heue, pui pa koeng ka Maix khankix, yuh lox lawh maw cuci mai pui pa koeng ka Maix khankix, hoik kaoh heue. ³ Kix briex kum paox tix nong nong, sonsang yuh laux leeing ka pui pa priex Maix khankix heue. ⁴ Kix ah nin ka paox tix, hoek heue, ex preet ti tik ka ceu pui Isarelax, yuh ka mawx son ang pui lai doh keud ka ceu kaux kix khaix in sax heue. ⁵ Kix ih rhawm rhi simau paox tix mai briex kum tix sang tieh feen ka Maix heue. ⁶ Mawh cub pui Edom, ceu pui Ishamelax, pui Mawbax, pui meung Hagarax, ⁷ pui meung Gebalax, pui meung Amon, pui meung Amaliet, ceu pui Philitix mai pui veng Turux khankix heue. ⁸ Ceu pui Asurix khankix kawx, rom tau mai kix cub geh nyiex Lotax heue. ⁹ Maix yuh kix yaox jhawm, awm pa hoik yuh Maix ka ceu pui Midian mai Simiang Sisarax mai Simiang Yaben ka praok rawm klawng Khison liak. ¹⁰ Kix hoek krax laux krax som ka daux Endawrax mai mawh phon ka piang tiex heue. ¹¹ Yuh simiang kix, khankix, awm yuh Maix ka simiang Awrebax mai simiang Zebax mai yuh simiang haktiex kix khawmuik awm yuh Maix ka simiang Zebahax mai simiang Zalamonnax, ¹² Cao pa ah nin, ex rud ti teei nyiex bwan kix, mawh cie ex heue. ¹³ Siyiex aux eue, kieh kix awm phawng tiex pa phlu bhaung keu kang lux hu mai kam pa phlu bhaung hu liak. ¹⁴ Awm pa gleeing ngu ka daux tiagtu mai ka piang gawng lua khankix, ¹⁵ Maix teei bhaung ting lhiex ting lah ka kix mai teei bhaung caox ghlat ti tik kix liak. ¹⁶ Siyiex eue, kieh plakngai kix kaig tua mai kieh kix sawg ka ceu kaux Maix liak. ¹⁷ Kieh kix hoek krax pa kaig pa tua mai koe krax pa lhat graung liak mai kieh kix koe krax pa taug pa mao mai kieh hoek krax pa laux pa som liak. ¹⁸ Kieh kix tawng ka ceu kaux Maix tix kaux khaing pa mawh Siyiex tix kaux khaing, Cao pa ting ka piang haktiex khawmuik liak.

¹ Siyiex Cao kru naing raoma eue, nyiex bwan dee ot Maix, mawh pa kied sidaing mhawm heue. ² Ju aux sawg dee ot Siyiex mai hoik iak riang iak rao hu heue. Rhawm aux mai tokaux aux, sawg mai kok yo ka Siyiex pa im ju heue. ³ Siyiex Cao kru naing raoma mai Simiang aux mai Siyiex aux eue, sim saik koe dee ot dee koe mai sim sivoeg koe mheem dee tawm dee vah ka dee dex khu dee tan Maix heue. ⁴ Pui pa ot ka daux nyiex Maix khankix, koe bwanson heue, kix tak yaogyaw ka Maix jheung jheung heue. ⁵ Pui pa teei riang rao ka Maix mai pui pa koe rhawm ka daux krax Maix khankix, koe bwanson heue. ⁶ Yam preeng kix tix hu ka daux ngawd dee kroh dee kram kawx, ka dee an, deeh kieh rawm keut lih tom nie mai rawm lhiex cao kawx, kieh bwanson kheem veei ka heue. ⁷ Kix nie hu, nie koe riang sinyek mai jhi pakngai kix ka Siyiex, ka daux veng Zion heue. ⁸ Siyiex Cao kru naing raoma eue, nghiet ka lox pa rawg aux bwan liak. Siyiex Yakop eue, veeh yhaok Maix mai nghiet liak. ⁹ Siyiex Cao pa tiebtie eue, jhak ka pakngai pui pa hoik laug Maix ti teei liak. ¹⁰ Pon tix ot dee ot Maix tix singaix, nie lheu mhawm khaing ot tang dah tang dee tix rheng singaix heue. Aux nie lheu moh tix pau diang siviex nyiex Maix Siyiex, khaing ot nyiex dee ot pui pa caox pa ang rah ang see khankix heue. ¹¹ Siyiex mawh singaix mai Cao pa tiebtie heue. Siyiex mawh Cao pa tawx bwanson mai min plakngai heue. Nawh Cao ang lai tik vud ceu pa mhawm ka son pui pa rahsee khankix tix ceu kawx heue. ¹² Siyiex Cao kru naing raoma eue, pui pa deuh rhawm ka Maix khankix, koe bwanson heue.

¹ Siyiex eue, Maix moh ka meung tix mai geh nyiex Yakop pa hoik giex hu khankix, deeh hoek tawx liak. ² Maix pluat ploi phimap pui Maix khankix mai hoik kheem phimap kix khawmuik heue. ³ Kieh krax pa song rhawm song rhi Maix grai uik mai yawn rhawm Maix khaing krax pa song rhawm song rhi liak. ⁴ Siyiex Cao pa taoh ex eue, kieh ex deeh tieh deeh loh tix mai kieh yiien ka rhawm pa hoik sax song rhawm song rhi Maix liak. ⁵ Khex song rhawm song rhi Maix ka ex jheung jheung lie? Krax pa song rhawm song rhi Maix ang cu tix grai leeing ju lie? ⁶ Maix hoik kieh ex im ju mai kieh pui Maix khankix, gaux rhawm gaux rhi ka daux Maix ang mawh lie? ⁷ Siyiex eue, Maix jhi ex yaox krax pa caux rhawm Maix mai taoh ex ka bwanson Maix liak. ⁸ Aux tak sang krox tix nghiet ka gumlox pa sang krai Siyiex heue. Grawh grawng nawh, Nawh koe gumlox pa nhim, ka pui Nawh pa singax singeh khankix, viang mawh nan, paw lai deeh yuh pa caox caig khaix in liak. ⁹ Bwanson krax taoh Nawh Cao, hoik hoek dex kix ka pui pa lhat graung ka Nawh Cao mai min plakngai Nawh Cao, hoik ot ka daux meung ex tete heue. ¹⁰ Krax caux rhawm mai sijax mukheu hoik rob paox tix, pa rahsee mai pa nhim, tix kaux lai tix kaux ngheut paox tix heue. ¹¹ Sijax mukheu lih khaing haktiex mai pa rahsee lih khaing raoma tak num tix jhak heue. ¹² Siyiex tawx bwanson pa mhawm ka ex mai tawx kraung khrai plix nghox plix koi Nawh ka haktiex ex heue. ¹³ Krax pa rahsee hu sivoe Nawh Cao mai khaix Caong Nawh hawt hu heue.

¹ Siyiex eue, veeh yhaok Maix nghiet lox aux liak. Aux mawh pa hot pa sibhawm heue. ² Siyiex aux eue, priex ka ju aux, mawh kheu mawh aux pui pa moh Maix mai taoh ka siliex pa deuh rhawm ka Maix liak. ³ Siyiex eue, aux sawg tix kok yo Maix leeing lang singaix heue. Cauxrhawm teem ka aux liak. ⁴ Siyiex eue, mawh kheu sawg aux ka Maix, kieh rhawm siliex Maix gaux rhawm gaux rhi liak. ⁵ Siyiex eue, Maix hoik grum naog rhawm rhi pa mhawm mai rhawm pa gun pa yeung, can pui pa rawg bwan ka Maix pon krax caux rhawm Maix tom nie heue. ⁶ Siyiex eue, nghiet ka lox pa rawg aux bwan mai caux rhawm ka ceu pa rawg pa mhaing aux liak. ⁷ Singaix yam yaox aux krax khi rhawm, aux kok yo Maix mai deeh pawk ka lox aux liak. ⁸ Siyiex eue, ka daux siyiex khankix, Siyiex pa awm Maix ang koe, kaing pa yuh kawx, pa awm kaing pa yuh Maix ang koe heue. ⁹ Siyiex eue, can ceu pui pa phan pa deuh Maix khankix, greed tix hoek grux ngawng sivoe ngai Maix mai yaogyaw min plakngai ceu kaux Maix heue. ¹⁰ Maix mawh Cao pa ting lhaong mai hoik yuh ceu pa daox am khankix heue. Siyiex mawh ngie Maix tix kaux khaing heue. ¹¹ Siyiex eue, jhi daux krax Maix ka aux liak. Aux tak sang hawt daux krax pa mawh meh Maix heue. Kieh rhawm aux grum dex mai kied lhat kied graung ka ceu kaux Maix liak. ¹² Siyiex aux eue, aux viex khawm rhawm khawm rhi mai yaogyaw ka Maix mai yaog ceu kaux Maix ting lhaong jheung jheung heue. ¹³ Krax pa caux rhawm Maix, kied ting ka piang aux heue. Maix hoik taoh ju aux lih khaing tawm taix ka greem meung yum heue. ¹⁴ Siyiex eue, pui pa ting rhawm ting rhi khankix, kaoh cung tang plak ka aux mai cub pui pa caox caig khankix, ang khan ngai Maix mai sawg ti teei ju aux heue. ¹⁵ Siyiex eue, Maix mawh Siyiex pa grum naog krax pa caux rhawm mai Cao pa chix yuh bwanson mai pa chix gun chix yeung mai krax pa caux rhawm pa kaux sijax tom haoh tom hun heue. ¹⁶ Veeh ngai Maix plak aux mai caux rhawm teem ka aux liak. Tawx riang tawx rao sibrawm Maix ka aux mai taoh ka kawn simex, bun siliex cawng Maix liak. ¹⁷ Jhi aux yaox mhai ceu pa daox am pa mhawm mai kieh pui pa koeng ka aux, yaox mai kieh kix kaig tua liak. Grawh grawng nawh, Maix teem ka aux mai tawx pa nyawm rhawm liak.

¹ Jaong num nyiex bwan Nawh Cao sum ti deuh ka piang gawng pa singax singeh heue. ² Siyiex nie lheu moh, siviex Zion khaing can dee ot Yakop khawmuik heue. ³ Veng Siyiex eue, awm lox pa hoik koe ti deuh grawng Maix mawh pa ting min plakngai heue. ⁴ Can kix paox meed tawng ka aux, aux hoik mhai tix tawng ka veng Rakhap mai veng Babulon heue. Jhak ka meung Philitix, meung Turux, meung Kusax khankix mawh pui pa keh khaing ka daux veng an heue. ⁵ Veng Zion kawx, ceu pui kuceu hoik keh ka daux veng an heue, kix ah nin ka paox tix, Siyiex Cao pa ting lhaong to kaux Nawh pa kieh veng an kaux cong heue. ⁶ Yam teei Siyiex carang ceu pui an khankix, Nawh ah nin, ceu pui an khankix, mawh pa keh ka daux veng an heue. ⁷ Cub pui pa ah lai rhax mai pui pa yuh pawie, graoh thiao mai ceu pa gaux rhawm gaux rhi aux kieh koe ka daux maix heue.

¹ Siyiex Cao pa taoh aux eue, aux kok yo sivoe ngai Maix ku singaix ku sawm heue. ² Ceu pa rawg aux bwan, kieh hoek plak sivoe ngai Maix liak. Nghiet ka lox pa kok yo aux liak. ³ Khwan ju aux hoik naog krax pa kha rhawm mai ju aux kawx, dex hoek ka meung yum heue. ⁴ Kix hoik simin aux tau mai kix pa hoik lih hu ka daux simeeig awm pui pa hoik uik riang heue. ⁵ Tik aux awm pui pa hoik yum khankix mai awm pui pa hoik laig it ka daux simeeig pa ang Maix lai doh keud, pa hoik singai khaing tawm taix Maix heue. ⁶ Maix hoik taing ti sau aux ka daux pa kied raux, pa hoik kheem pa faik ka daux pa kied sidaing raux heue. ⁷ Krax pa song rhawm song rhi Maix hoik gut ka piang aux, Maix kieh pukpak rawm khankix, tuktiak tukte ka aux heue. ⁸ Maix hoik gah paox pa tawng pa yung aux, singai khaing aux, Maix hoik kieh kix seeing brai ka aux mai Maix hoik gang aux, ang pon ti lih plak praix heue. ⁹ Ngai aux laux kheu yaox aux ti kham geu krax pa kha rhawm, Siyiex eue, aux yaog taix tix kok yo ka Maix jheung jheung heue. ¹⁰ Maix tak sang jhi mhai ceu pa daox am ka pui pa hoik yum khankix lie? Pui pa hoik yum khankix, tak deeh kaoh ti yaogyaw ka Maix lie? ¹¹ Kix simawd krax pa caux rhawm Maix ka daux simeeig lie? Kix krai sijax mukheu Maix ka dee laux dee leeing lie? ¹² Kix chix tawng ceu pa daox am Maix ka daux pa faik lie? Kix chix tawng gumlox pa rahsee Maix ka daux meung yum lie? ¹³ Siyiex eue, aux kok yo ka Maix heue. Lox pa rawg aux bwan ponngawb hoek sivoe ngai Maix heue. ¹⁴ Siyiex eue, mawh kheu patix, Maix tik ju aux? Mawh kheu patix Maix veeh pakngai tix khaing aux? ¹⁵ Aux yaox ti kham geu krax pa kha rhawm mai dex sang yum tom yam iak ju aux heue. Aux yaox ti kham geu krax pa prawng ca Maix mai krax pa taug mao heue. ¹⁶ Krax pa song rhawm Maix hoik kheem veei ka aux, krax pa lhat pa prawng ca Maix hoik yuh aux laux heue. ¹⁷ Kix khrawm paox tix mai rob ka aux leeing lang singaix, awm hoik rob rawm vung viang aux heue. ¹⁸ Maix hoik gah paox grawm pa moh aux mai paox grawm aux, hu dee singai khaing aux mai pui paox meed tawng aux khankix kawx, mawh ngie pui pa ot ka daux pa faik heue.

¹ Aux tak sang ah lox rhax krax caux rhawm Siyiex jheung jheung mai jheeh aux tak sang krai grawng sijax mukheu Maix ka ceu pui jheung jheung leeing ju heue. ² Aux tak sang krai koe krax caux rhawm Maix jheung jheung mai sijax mukheu Maix, kaux cong ka piang raoma heue. ³ Siyiex ah nin, Aux yuh sijax mukheu tau mai kaw pa hoik laug Aux ti teei ka lox tiex tu ka siliex Aux Davit ah nin, ⁴ Aux tak sang kieh ru maix kaux cong jheung jheung mai kieh dang ngeung maix tak kaux cong ka daux ceu pui leeing ju heue. ⁵ Siyiex eue, raoma tak yaogyaw ka kaing pa hoik yuh Maix, ceu pa daox am mai sijax mukheu Maix ka sinax cub pui pa singax singeh khankix heue. ⁶ Grawh grawng nawh, ka daux raoma pui mawx tak sang pon ti lah cha ka Siyiex? Mai kawn praix Siyiex khankix mai pui mawx tak sang awm Siyiex? ⁷ Siyiex mawh pa lhat graung cub pui pa singax singeh khankix kah mai Nawh mawh pa nab yam nie lheu khaing pui pa ot rob vung viang Nawh khankix heue. ⁸ Siyiex Cao kru naing raoma eue, pui pa ting riang rao pa awm Maix ang koe, sijax mukheu Maix pa kaux cong kawx, rob vung viang Maix heue. ⁹ Maix mawh Cao pa giex kaing ka rawm sigrit sigra pa ting riang mai chix kieh yiien yawg ka haok huan pukpak rawm ting heue. ¹⁰ Maix hoik plaux ka riah ceu pui Rakhap yum mai teei plawng taix Maix pa ting riang ting rao mai kieh pui pa koeng khankix, prung prang hu kudah kudee heue. ¹¹ Raoma mai haktiex mai kraung can ceu pa koe ka daux an khankix, mawh cie Maix mai mawh pa hoik phan hoik yuh Maix heue. ¹² Caong ma seh mai caong ma laong kawx, mawh pa phan pa deuh Maix mai gawng Taborax mai gawng Heramon, deuh rhawm ka Maix mai rhax lai gaux rhawm gaux rhi heue. ¹³ Plawng taix Maix hoik grum naog ka sibrawm mai taix Maix mawh pa ting riang mai taix khawn dawm Maix mawh pa kied lhaong heue. ¹⁴ Krax pa rahsee mai krax prawng ca Maix, mawh jaong num dang ngeung Maix heue. Krax pa caux rhawm mai sijax mukheu hu sivoe ngai Maix heue. ¹⁵ Siyiex eue, ceu pui pa mhong pa tawng ka Maix mai pa gaux rhawm khankix, koe bwanson heue. Kix yaox ti lailing ka daux pa riang pakngai Maix heue. ¹⁶ Kix pon ti gaux rhawm ka daux ceu kaux Maix leeing lang singaix jheung jheung mai yaog kix ting, mawh kheu krax pa rahsee Maix heue. ¹⁷ Min plakngai Maix mawh riang rao kix, bwanson Maix kawx, hoik yaog ka rung choek ex heue. ¹⁸ Siyiex mawh Cao pa tiebtie ex, Siyiex pa singax singeh Isarelax mawh simiang ex heue. ¹⁹ Yam an tix bawg dix, Maix krai ka kix pui pa singax singeh khankix, ka daux riang susai ah nin, Aux hoik tawx pong krax pa teem ka pui pa ting riang rao, Aux hoik laug ti teei pui tix kaux ting, ka daux cub pui khankix heue. ²⁰ Aux yaox siliex Aux Davit mai groi rawm bee pa singax singeh mai hoik laug ti deuh nawh heue. ²¹ Taix Aux ot plak nawh mai plawng taix Aux kieh nawh kaux cong heue. ²² Pui pa koeng khankix, ang nieb pon tud rhim ti teei kraung khrai nawh mai pui pa ang rahsee khankix, ang lai pon ti tuktiak tukte ka nawh heue. ²³ Aux tak sang pah pui pa koeng ka nawh khankix sivoe ngai nawh mai tawx krax pa kha rhawm ka pui pa koeng ka nawh khankix heue. ²⁴ Sijax mukheu mai krax pa caux rhawm Aux tak ot tau mai nawh mai Aux yaog rung choek nawh ka daux ceu kaux Aux heue. ²⁵ Aux tak sang teei taix nawh, deuh piang rawm sigrit sigra mai teei taix khawn dawm nawh, deuh ka piang rawm klawng khankix heue. ²⁶ Nawh kok yo Aux ah nin, Maix mawh Siyiex aux, keeing aux mai mawh Rang Cao pa taoh aux heue. ²⁷ Aux tak sang ciak ti deuh nawh mawh ara kawn Ai mai yaog nawh ting ka piang Simiang haktiex khawmuik heue. ²⁸ Krax pa caux rhawm Aux tak sang een ka son nawh jheung jheung mai sijax mukheu Aux, kaux cong ka piang nawh heue. ²⁹ Aux tak sang kieh ru nawh kaux cong jheung jheung mai kieh dang ngeung nawh kaux cong leeing ju awm singaix meung raoma heue. ³⁰ Phan kawn praix nawh, tik vud ka lox tawm beenli Aux mai ang hawt ka lox pa hoik deuh Aux. ³¹ Phan kix nieb yuh mai ang hawt ka lox tawm beenli Aux khankix, ³² Aux tak sang teei khaox saux sivied ti gau kix, ka phimap pa lud kix, kheu yuh kix phimap heue. ³³ Viang mawh kawx nan, krax pa caux rhawm Aux, ang lai teei lih khaing nawh mai sijax mukheu Aux kawx, ang lai yuh laux heue. ³⁴ Aux ang nieb yuh ka sijax mukheu Aux mai ang doh tieh loh ka lox pa hoik lih khaing jheeh Aux. ³⁵ Aux hoik tiextu ka pa rahsee mai pa singax singeh ti ah nin, "Aux ang doh pie lhen ka Davit." ³⁶ Aux tak sang kieh ru nawh kaux cong jheung jheung mai dang ngeung nawh kawx, awm singaix ka plak sivoe ngai Aux heue. ³⁷ Nawh Cao ah nin, "Aux tak sang kieh Maix kaux cong awm khix jheung jheung mai kieh awm sakse pa pau ka sijax mukheu ka piang raoma heue." ³⁸ Viang mawh nan, Maix song rhawm mai seeing brai mai hoik tik ka Simiang pa hoik laug Maix ti teei heue. ³⁹ Maix hoik yuh laux ka sijax mukheu pa hoik yuh Maix tau mai siliex Maix mai hoik taing mhok khri nawh hoek tom siglaing tiex heue. ⁴⁰ Maix hoik raig ti tik ka nghaong pa vie nawh mai hoik yieh ti tik ka nyiex tab nawh heue. ⁴¹ Can pui pa lawng krax khankix, tud rhim ti teei nawh mai paox plawg nawh khankix, ah lox pa salao ka nawh heue. ⁴² Yaog taix khawn dawm pui pa koeng ka nawh khankix mai kieh pui pa lah cha ka nawh khankix khawmuik gaux rhawm heue. ⁴³ Maix kieh lawm vaid nawh vawk vak mai ang lai pon ti kieh nawh cung ka dee puing naing heue. ⁴⁴ Maix kieh min plakngai nawh grai hu, Maix hoik taing dang ngeung nawh tom siglaing tiex heue. ⁴⁵ Maix kieh ju pa awn nawh dawd hu mai kieh nawh kaig tua heue. ⁴⁶ Siyiex eue, Maix glaik tix mox, bawg yam miex grheung? Krax pa song rhawm Maix hax awm ngu, bawg yam miex grheung? ⁴⁷ Doh keud ka kawn pui pa hoik phan hoik deuh Maix, ka aux pa dawd ju, pa chix laux leeing, pa ang koe dee bleeh tidtix liak. ⁴⁸ Pui pa im ju mai pa ang yaox krax yum mai pa chix taoh ka ju tix, khaing daux tawm taix sibrawm meung yum mawh pui mawx? ⁴⁹ Siyiex eue, krax pa caux rhawm Maix mai sijax mukheu Maix, pa hoik tiextu Maix ka siliex Maix Davit dix, koe dee mawx? ⁵⁰ Doh keud ka aux, pa yaox ti kham geu ka pa salao pui liak. See pui kuceu khawmuik, aux hoik viex ka piang naok tix heue. ⁵¹ Grawh grawng nawh, Siyiex eue, pui pa koeng ka Maix khankix, chix salao ka Maix heue. Kix salao ka khaix caong pui pa hoik groi Maix rawm bee kah heue. ⁵² Kieh Siyiex koe bwanson leeing ju liak. Amen! Amen!

¹ Siyiex eue, Maix mawh dee deuh ex rhawm leeing ju heue. ² Ka sivoe ang Maix nyang phan nyang yuh, gawng lua mai haktiex mai can pa koe khawmuik, jah tom haktiex phao ka dix, tom sidah haktiex phao khaix leeing ju, Maix hoik dawg mawh Siyiex heue. ³ Maix ah nin, "Kawn pui khankix eue, deeh ka phawng tiex, dee hoik kaoh maix heue." ⁴ Sivoe ngai Maix, tix rheng num, awm ngie kawx mai bawg yam ponsawm tix yam khaing. ⁵ Nawh Cao tak viex kix hu awm rawm pa huan mai kix awm pui pa hoik laig it mai awm rib riem pa ting ponngawb khaing heue. ⁶ Plak ponngawb mhawm pruh mai haok huan, yam hoek plak ponbo kroh mai laix hu heue. ⁷ Ex hoek krax laux leeing kheu krax pa song rhawm Maix mai khi rhawm mai lhat graung kheu krax pa song rhawm Maix heue. ⁸ Phimap ex, pa sidawng ang ah, phimap ex pa mox ang ah, hoik sidawng daux pa riang plakngai Maix heue. ⁹ Bawg yam singaix, ex gah ti hu, mawh kheu krax pa song rhawm Maix mai jhong mee num ex luan hu, awm pa keud daux rhawm rhi tix heue. ¹⁰ Ju ex koe ngie atixgliah num, phan ting riang rao koe tidaix num, viang mawh nan, ex yaox ti ot khawm pa taug pa mao mai pa laux rhawm mai khran luan hu, ang lai lih ti mawh tidtix khaix heue. ¹¹ Pui mawx pa tawng ka jhawm krax pa songrhwm Maix mai krax pa song rhawm Maix mawh pa khaw ti lhat graung kah heue. ¹² Gau ka ex, kieh ex simin ti tawng ka bawg yam singaix tokaux tix mai kieh ex koe rhawm pa koe cuyi pingnya liak. ¹³ Siyiex eue, Maix deeh hoek liak, kawn sang ot miex grheung, doh keud ka son siliex Maix khankix liak. ¹⁴ Kieh ex pon krax pa caux rhawm Maix ku ngawb liak. Phan yuh nan, ex tak gaux rhawm mai rhax lai pa gaux rhawm gaux rhi heue. ¹⁵ Caux rhawm mai kieh ex deeh pon ti gaux rhawm gaux rhi, singaix bawg yam pa hoik luan, yam tuktiak tukte Maix ka ex mai jhong khix mee num Maix, krax pa hoik yaox ex ti kham geu liak. ¹⁶ Kieh kaing pa yuh Maix sidawng ka siliex Maix khankix mai kieh min plakngai Maix sidawng ka kawn praix kix liak. ¹⁷ Siyiex eue, kieh bwanson Maix hoek ka piang ex liak. Kieh kaing pa yuh ex, kaux cong son ex liak.

¹ Pui pa ot ka dee pa tiebtie Siyiex, Cao pa ting lhaong khaing khawmuik, tak pon ti ot ka greem veei sibrawm Nawh heue. ² Aux krai ka Siyiex ah nin, "Maix mawh dee deuh aux rhawm mai mawh tab aux mai Siyiex pa deuh aux rhawm heue." ³ Nawh Cao kieh maix luan khaing kie pa hoik taong cao jaw mai saux preng heue. ⁴ Nawh tak teei hauk pruik tix, mai maix yaox ti ot mhawm mhawm ka greem pruik Nawh mai sijax mukheu Nawh mawh kraung naing pa tiebtie heue. ⁵ Maix tak ang koe pa lhat graung ka ceu pa lhat ponsawm mai te pa puing pon singaix ⁶ mai ang lhat ka Jhawm saux pa hu ka daux pa faik mai jhawm saux pa chix yuh laux yam jung singaix khankix heue. ⁷ Viang pui tix rheng kaux goh dex maix mai pui tix mheen kaux goh plak taix khawn dawm maix kawx, tak ang doh pon yuh tidtix ka maix heue. ⁸ Maix tak jhak ka ngai tix mai briex yaox ka phimap pa hoek ka piang pui pa ang rahsee khankix heue. ⁹ Siyiex eue, Maix mawh dee deuh aux rhawm heue. Maix hoik hoek dee ot Siyiex pa ting lhaong, khaing khawmuik heue. ¹⁰ Ceu pa caox caig, ang pon ti hoek ka piang maix mai ceu pa lhat graung ang pon ti dex ka nyiex dee ot maix heue. ¹¹ Nawh Cao tak tawm lox grawng maix ka kawncau Siyiex khankix, tak sang kia ngien maix, ka daux krax pa hu maix khankix. ¹² Son ang caong maix sang krox ka simaox, kix tak sang yaog Maix ka tawm taix kix heue. ¹³ Maix tak sang dig ka sivai sangsi mai siuing pa cai mai yaog caong maix mai dig ka sivai sangsi pa awn ju mai siyawng heue. ¹⁴ Mawh kheu moh nawh Aux, Aux tak sang taoh ka nawh, mawh kheu tawng nawh ka ceu kaux Aux, Aux tak sang yaog nawh ting heue. ¹⁵ Yam kok nawh ka Aux, Aux deeh pawk ka lox nawh heue. Yam yaox nawh krax pa kha rhawm, Aux ot ka plak nawh heue. Aux tak taoh nawh lih mai yaog min plakngai nawh sidawng heue. ¹⁶ Aux tak sang kieh nawh lang ju mai kieh nawh nyawm rhawm mai jhi nawh yaox krax taoh Aux heue.

¹ Yaogyaw ka bwanson Siyiex mai rhax lai ka ceu kaux Siyiex, Cao pa ting lhaong khaing khawmuik. ² Teei ting pa koe maox kao nyaing mai teei ting pa mhawm lox pa khaw ti tah khankix, ³ mai jhi krax pa caux rhawm Nawh, ku ngawb mai sijax mukheu Nawh ku sawm jheung jheung heue. ⁴ Siyiex eue, Maix kieh aux gaux rhawm, kheu kaing pa hoik yuh Maix mai aux tak rhax lai, pa gaux rhawm ka ceu pa hoik yuh Maix ka taix tix heue. ⁵ Siyiex eue, kaing pa hoik yuh Maix, mawh ceu pa kied ting lhaong mai krax pa keud pa sawn Maix kawx, mawh pa kied nie raux heue. ⁶ Pui pa koe rhawm totiag mai pui pa caox pa ang tawng khankix. ⁷ Pui pa ang rahsee khankix, lih kuah awm rib riem mai yam pruh, pui pa nieb yuh khankix, tak hoek krax pa laux leeing, leeing ju heue. ⁸ Grawh grawng nawh, Maix mawh Siyiex, Cao pa ting piang khawmuik leeing ju heue. ⁹ Jhak heue, pui pa koeng ka Maix khankix, hoek krax pa laux leeing heue. Jhak heue, pui pa nieb yuh khankix khawmuik kawx, hoik prung prang rai ruad hu heue. ¹⁰ Maix hoik yaog rung choek aux, awm rung mawie praix mai teei rawm bee pa khraox kraix ka aux heue. ¹¹ Ngai aux hoik yaox ka pui pa koeng ka aux mai yhaok aux hoik mhong ka pui pa yuh pa caox pa lah cha ka aux khankix heue. ¹² Pui pa rahsee khankix, tak ting pang lang lhax awm khaox jhie yaong mai ting lhaong haok hwan awm khaox piakvan, pa koe ka piang gawng Lebanon heue. ¹³ Pui pa sum ka daux nyiex Siyiex khankix, tak mhawm pruh mhawm grang ka dee ot Siyiex ex heue. ¹⁴ Viang kix hoik rie ju kawx, deeh mhawm plix, mhawm tai heue. ¹⁵ Plak jhi sidawng, Siyiex mawh pa rahsee mai Nawh mawh Rang ting aux mai kieh aux luan khaing ceu pa ang rahsee heue.

¹ Siyiex ceep kraung pa koe min plakngai mai ot ka daux nyiex haw tix heue. Siyiex hoik ceep kraung pa yuh nan mai nhawt maox rawd nyoi, pa ting riang rao mai kieh haktiex kaux cong tom sidah mai ang kieh vuhvied yung yiang heue. ² Dang neung Maix hoik koe tom yam jah dix.Maix hoik koe tom yam jah dix mai Maix hoik koe jheung jheung ka sivoe ang haktiex nyang bax koe dix. ³ Siyiex eue, rawm klawng khankix kaoh mai klawng khankix ploi lox ti lih mai pukpak rawm klawng khankix, lih sinum siaox heue. ⁴ Siyiex pa ot ka dee lhaong khaing paox tix, Maix nie lheu koe sibrawm khaing rawm pa luah pa sinum tom nie mai pukpak rawm sigrit sigra pa ting riang heue. ⁵ Siyiex eue, sakse pa kham Maix, mawh pa kaux cong mai pa singax singeh mai pa rahsee, mawh pa koe ka daux nyiex Maix jheung jheung heue.

¹ Siyiex eue, Maix mawh Siyiex Cao pa prawng ca heue. ploi pa riang Maix liak. ² Cao pa prawng ca ka kawn pui piang haktiex eue, kaoh heue, deeh viied ti tawx ngawh phimap ka pui pa ting rhawm khankix liak. ³ Siyiex eue, pui pa yuh pa ang rahsee khankix, kawn sang gaux rhawm miex grheung? ⁴ Can pui pa nieb yuh khankix, kawn haoh lox sikah mai ah lox ting lhaong miex grheung? ⁵ Siyiex eue, kix yuh laux ka pui Maix mai tuktiaktukte ka sin Maix heue. ⁶ Kix teei ka miexmai yum mai plaux ka nyo sinie mai kawn doe pa ang koe miex keeing khankix yum heue. ⁷ Kix ah nin, "Siyiex ang yaox mai Siyiex ceu Yakop ang lai deuh tix tawng heue." ⁸ Pui pa koe rhawm totiag khankix eue, nghiet ti tawng heue. Pui pa caox khankix eue, pex koe cuyi pingnya mai koe satix yam mawx? ⁹ Siyiex Cao pa hoik yuh yhaok, khex ang Nawh mhong lie? Siyiex Cao pa hoik yuh ngai, khex ang Nawh yaox lie? ¹⁰ Nawh mawh Cao pa gau ka pui kuceu mai Cao pa gau cuyi pingnya ka pui khankix, khex ang Nawh tawx phimap lie? ¹¹ Siyiex tawng, grawh grawng pa keud kawn pui mawh pa giex going heue. ¹² Siyiex eue, pui pa hoik gau Maix mai pa hoik gau Maix ka beenli khankix, koe bwanson heue. ¹³ Maix tawx krax nyawm rhawm, kieh luan khaing singaix bawg yam krax pa kha rhawm, tom sidah kaong ti deuh daux tiex son pui pa ang rahsee khankix heue. ¹⁴ Siyiex ang doh tik vud ka pui Nawh khankix mai ang Nawh tik vud ka sin Nawh khankix heue. ¹⁵ Krax prawng ca Nawh mawh pa rahsee mai can pui pa koe rhawm pa rahsee khankix, tak hawt khaix Nawh heue. ¹⁶ Pui mawx tak kaoh cung plak aux mai tiebtie ka pui pa caox khankix, pui mawx tak kaoh cung plak aux mai tiebtie ka pui pa ang rahsee khankix. ¹⁷ Phan Siyiex ang teem aux, ang lai rheung ju aux tak rau hu ka dee yiien yawg heue. ¹⁸ Yam ah aux nin, caong aux cang klad mai Siyiex eue, joh jhan aux ka krax pa caux rhawm Maix liak. ¹⁹ Yam haoh rhawm keud aux, Maix kieh aux nyawm rhawm mai kieh ju aux gaux rhawm heue. ²⁰ Dang ngeung pa nieb yuh mai krax pa keud pa sawn pui pa ang rahsee, khex chix yuh paox pie ka pa khaw caw ka Maix lie? ²¹ Kix khrawm paox tix sang pah ka pui rahsee khankix mai kix pah ka pui pa ang koe phimap tidtix heue. ²² Viang mawh kawx nan, Siyiex mawh tab aux mai mawh rang ting dee deuh aux rhawm heue. ²³ Maix tak kieh phimap kix, deeh hoek ka piang kix mai kid ti tik ka pui pa nieb yuh khankix mai Siyiex ex tak sang kid ti tik mai yuh laux leeing heue.

¹ Hoek heue, ex rhax lai gaux rhawm gaux rhi ka Siyiex heue. Ah lox pa gaux rhawm gaux rhi pa sinum ka rang Cao pa taoh ex heue. ² Yaogyaw bwanson Nawh, hu plak sivoe ngai Nawh mai ah lox rhax yaogyaw mai kok yo lox sinum ka Nawh heue. ³ Grawh grawng nawh, Siyiex mawh pa ting lhaong khaing khawmuik, Nawh mawh Simiang pa ting piang siyiex khawmuik heue. ⁴ Dee kied raux haktiex khankix, koe ka daux tawm taix Nawh, gawng ting gawng lhaong khankix kawx, mawh cie Nawh Cao heue. ⁵ Rawm sigrit sigra kawx, mawh cie Nawh mai mawh pa hoik phan hoik yuh Nawh mai haktiex caong raog khankix kawx mawh pa hoik yuh Nawh ka taix tix heue. ⁶ Hoek heue, ex num ti krub ka Nawh mai grux ngawng sivoe ngai Siyiex, Cao pa phan pa deuh ka ex. ⁷ Grawh grawng nawh, Nawh Cao mawh Siyiex ex mai ex mawh pui pa hoik sax sawm mai Nawh mai mawh cub yung pa ot greem tawm taix Nawh heue. ⁸ Ka daux singaix, phan pex mhong lox plak jhi Nawh, paw kieh rhawm pex kiien. ⁹ Yam ot keeing pex, tax pex ka daux tiag Meribax tixpon num mai kix cheuk cheu laklheut ti yaox ka Aux kuceu, viang kix hoik yaox ka kaing ceu pa hoik yuh Aux khankix kawx, kix yuh ti mawh tang plak, mawh kheu nan, Aux tom seeing brai ka ceu pui in khankix. ¹⁰ Ah nin, "kix mawh pui pa koe rhawm pa chix lud loe heue. Kix ang tawng ka daux krax dee hu dee hoek Aux heue." ¹¹ Mawh kheu nan, Aux kied song rhawm mai tiextu ti ah nin, "Kix tak ang pon ti laig ka daux dee laux lee Aux heue."

¹ Ah lox rhax pa khraox yaogyaw ka Siyiex heue. Kawn pui piang haktiex khawmuik eue, ah lox rhax ka Siyiex heue. ² Ah lox rhax ka Siyiex mai yaogyaw ka ceu kaux Nawh heue. tix singaix hoik tix singaix krai grawng krax pa taoh Nawh Cao heue. ³ Plak jhi min pakngai Nawh Cao, ka pui tang ceu khankix mai grawng ceu pa daox am, pa hoik yuh Nawh khankix ka daux ceu pui kuceu heue. ⁴ Grawh grawng nawh, Siyiex mawh Cao pa ting lhaong, pa khaw ex ti yaogyaw heue. Mawh Cao pa khaw ex ti lhat graung khaing siyiex khawmuik heue. ⁵ Siyiex pui tang ceu khawmuik mawh ngie pa giex going heue. Siyiex mawh Cao pa yuh raoma mai haktiex heue. ⁶ Min plakngai mai sibrawm koe sivoe ngai Nawh, riang rao mai pa mhawm grang koe ka daux nyiex bwan Nawh Cao heue. ⁷ Ceu pui kuceu khawmuik eue, rieb ti teei ka Siyiex Cao pa koe min plakngai mai sibrawm heue. ⁸ Rieb ti teei ka ceu kaux Nawh pa ting min plakngai mai viex kraung pa tan mai laig ka daux nyiex Bwan Nawh heue. ⁹ Ceep kraung mhawm pa singax mai krub ka Siyiex heue. Pui piang haktiex khawmuik eue, koe krax pa lhat graung sivoe ngai Nawh Cao heue. ¹⁰ Krai ka pui tang ceu khankix, Siyiex mawh Cao pa giex kaing haktiex kaux cong mai ang chix gah greed, Nawh Cao prawng ca krax pa rahsee ka pui khawmuik heue. ¹¹ Kieh raoma mai haktiex gaux rhawm gaux rhi heue. Kieh rawm sigrit sigra mai can pa koe ka daux nawh khawmuik, kieh lox sinum siaox heue. ¹² Kaung mai can pa koe ka daux nawh khawmuik kawx, kieh gaux rhawm heue. Yam an, khaox, ox mai can pa koe ka daux tiagtu khawmuik ah lox rhax pa gaux rhawm gaux rhi sivoe ngai Siyiex heue. ¹³ Grawh grawng nawh, Nawh Cao lih hoek ti prawng ca ka kawn pui haktiex heue. Nawh Cao tak prawng ca ka haktiex hawt beenli pa rahsee mai ka kawn pui hawt awm sijax mukheu Nawh heue.

¹ Siyiex mawh cao pa giex kaing mai kieh haktiex gaux rhawm. Klawn tiex pa koe ka daux rawm khankix gaux rhawm liak. ² Pai awm mai pa faik rob vung viang Nawh Cao mai krax pa prawng ca Nawh hawt beenli rahsee mai mawh jaong num dangngeung aux heue. ³ Ngu hu sivoe ngai Nawh mai gleeing ka pui pa koeng ka Nawh khankix heue. ⁴ Pukplak praix Nawh Cao, kieh haktiex riang heue. Haktiex yaox mai siyaung heue. ⁵ Gawng lua khankix, hoik ceh awm rawm bee kax, ka plak sivoe ngai Siyiex Cao pa giex kaing haktiex khawmuik heue. ⁶ Raoma plak jhi ka krax pa rahsee Nawh Cao mai ceu pui khawmuik yaox ka min plakngai Nawh Cao heue. ⁷ Can pui pa krub riang grang mai pa yaw rangdi khankix, ang lai mawh tidtix mai hoek krax pa kaig tua heue. Siyiex khankix eue, krub ka Nawh Cao heue. ⁸ Siyiex eue, veng Zion mhong mai gaux rhawm mai kawn bun Yudax khankix, gaux rhawm kheu krax prawng ca Maix heue. ⁹ Siyiex eue, Maix mawh Cao pa ting lhaong khaing kawn pui haktiex khawmuik heue. Khaw ti nie lheu yaog Maix ting lhaong lheu khaing siyiex khawmuik heue. ¹⁰ Pui pa moh ka Siyiex khankix eue, seeing brai ka ceu pa ang mhawm khankix mai Nawh tak teem ka ju pui pa moh ka Nawh mai taoh kix lih khaing daux tawm taix pui pa ang rahsee khankix heue. ¹¹ Pa riang mawh son pui pa rahsee, krax pa gaux rhawm mawh pa hoik rhuat son pui pa rahsee rhawm rhi heue. ¹² Pui pa rahsee khankix eue, gaux rhawm ka daux Siyiex mai yaogyaw ka ceu kaux Nawh pa singax heue.

¹ Ah lox rhax pa khraox mai yaogyaw ka Siyiex mai Nawh Cao hoik yuh grawng ceu pa daox am, taix khawn dawm Nawh mai plawng taix Nawh pa singax hoik yuh krax taoh son Nawh heue. ² Siyiex hoik kieh bwanson krax taoh Nawh sidawng, krai gumlox Nawh pa rahsee, sivoe ngai pui tang ceu khankix heue. ³ Nawh Cao doh keud ka krax pa caux rhawm mai sijax mukheu pa hoik yuh Nawh mai ceu pui Isarelax mai bwanson krax pa taoh Siyiex, hoik yaox pui piang haktiex tom sidah heue. ⁴ Kawn pui haktiex khawmuik eue, teei lox pa ting pa sinum kok yo ka Siyiex mai ah lox rhax pa gaux rhawm mai yaogyaw ka Nawh heue. ⁵ Tah ting mai rhax lai ka Siyiex, tah ting mai yaogyaw heue. ⁶ Phlu teettawng mai kok yo sivoe ngai Siyiex, pa mawh Simiang heue. ⁷ Kieh rawm sigrit sigra mai can pa koe ka daux nawh, kieh haktiex mai can pa koe ka daux nawh, ah lox pa ting pa sinum ka Nawh heue. ⁸ Kieh rawm klawng khankix dieh taix tix mai gawng lua khankix, rhax lai gaux rhawm sivoe ngai Siyiex heue. ⁹ Grawh grawng nawh, Nawh Cao hoik hoek ti prawng ca ka pui haktiex, Nawh Cao teei beenli pa rahsee mai prawng ca ka haktiex mai teei sijax mukheu Nawh prawng ca ka kawn pui khankix heue.

¹ Siyiex mawh cao pa giex kaing mai kieh kawn pui khankix koe pa lhat graung heue. Nawh Cao ot ka piang Cherubin heue. Kieh haktiex khankix yung yiang heue. ² Siyiex pa ting lhaong ka piang gawng Zion mai yaog ti kieh Nawh ting lhaong ka piang kawn pui khawmuik heue. ³ Kieh kix yaogyaw ka ceu kaux Nawh, pa ting lhaong mai kieh koe krax pa lhat graung liak. Grawh grawng nawh, Nawh Cao mawh pa singax singeh heue. ⁴ Simiang pa ting sibrawm moh krax pa prawng ca pa rahsee heue. Maix kieh krax pa prawng ca rahsee mai kaux cong mai krax pa prawng ca pa rahsee ka daux geh nyiex Yakop heue. ⁵ Yaogyaw ka Siyiex ex liak. krub ka Nawh, sivoe ngot dee deuh Nawh Caong tix, grawh grawng nawh, Nawh Cao mawh pa singax singeh heue. ⁶ Ka daux cao giex kaing li khankix, mawh Mose mai Arun, ka daux kix pui pa krub ka ceu kaux Nawh mawh Samoelax, pui in khankix yam krub kix ka Siyiex, Nawh Cao deeh pawk lox kix heue. ⁷ Nawh Cao ot ka daux rong paiawm mai sikah ka kix heue. Kix kawx, priex tix hawt ka lox pa kham Nawh sakse mai ka lox tawm beenli pa deuh Nawh khankix heue. ⁸ Siyiex ex eue, Maix deeh pawk lox kix heue. Viang Maix tawx phimap awm ceu pa hoik yuh kix kawx, Maix mawh Siyiex Cao pa lang gun lang yeung ka kix heue. ⁹ Yaogyaw ka Siyiex mai krub ka Nawh ka gawng pa singax singeh Nawh heue. Grawh grawng nawh, Nawh Cao mawh pa singax singeh heue.

¹ Kawn pui haktiex khawmuik eue, kok yo lox sinum ka Siyiex heue. ² Gaux rhawm mai yuh kaing jhaw Siyiex awx. Ah lox rhax pa gaux rhawm mai hu plak sivoe ngai Nawh Cao heue. ³ Pex deuh ti tawng, Siyiex mawh Siyiex leeing ju awx. Nawh mawh Cao pa phan pa yuh ka ex mai mawh Siyiex ex, ex kawx mawh pui Nawh mai cub yung sawm dex Nawh heue. ⁴ Rieb ti teei ka bwanson Nawh pa kied ting mai laig ka daux siviex Nawh mai viex min pakngai Nawh laig ka dee ot Nawh heue. Yaogyaw ka bwanson Nawh mai yaogyaw ka ceu kaux Nawh heue. ⁵ Grawh grawng nawh, Siyiex mawh pa jiet mhawm heue. Krax pa caux rhawm Nawh koe jheung jheungs mai sijax mukheu Nawh mawh pa kaux cong ku ju leeing ju heue.

¹ Siyiex eue, aux rhax lai grawng krax pa caux rhawm Maix mai krax prawng ca hawt beenli pa rahsee, sivoe ngai Maix heue. ² Aux teei cuyi pingnya satix hawt beenli Maix grum heue. Maix tak sang hoek ka aux lai mawx? Aux tak viex rhawm pa singax pa grum mai hoek ka daux nyiex aux heue. ³ Aux ang nieb yuh ka kaing ceu pa ang mhawm, sivoe ngai tix mai aux seeing brai ka pui pa lud krax hu khankix mai ang lai kieh pied tix heue. ⁴ Pui pa vawk rhawm khankix, aux tak kieh kix lih hu khaing tix, aux ang lai yuh paox pie ka pui pa caox caig khankix heue. ⁵ Aux tak yieh ti tik ka pui pa yuh plakngai paox plawg tix laux khankix, aux ang lai gun yeung ka pui pa ting rhawm khankix heue. ⁶ Ngai aux tak jhak ka pui pa kaux sijax khankix mai kieh kix hoek ot mai aux mai pui pa hu daux krax pa grum pa tak sang yuh kaing aux heue. ⁷ Pui pa chix lukliak khankix, ang pon ti ot ka daux nyiex aux, pui pa chix ah lox pie lhen khankix, ang pon ti ot plak sivoe ngai aux heue. ⁸ Can pui pa caox caig khankix, tak sang teei ti tik khaing daux veng Siyiex heue. Pui meung pa yuh pa caox caig khankix, tak yuh kix laux caocao heue.

¹ Siyiex eue, nghiet ka lox pa rawg aux bwan mai lox pa kok yo aux kieh hoek ka Maix liak. ² Paw lai mox ngai Maix khaing aux, ngaix yam yaox aux krax pa khi rhawm mai yam kok yo aux ka Maix, nghiet lox aux mai nied tix pawk ka lox aux liak. ³ Grawh grawng nawh, singaix bawg yam aux uik hu, awm taox ngu mai si-ang aux uik hax awm gaox ngu heue. ⁴ Rhawm aux hoik sang hoik mat, awm rib riem pa hoik fit hoik kroh mai hoik pi awm ti sawm rheep heue. ⁵ Mawh kheu lox pa ngia pa riag aux, aux hoik krawx, deuk ngie si-ang heue. ⁶ Aux hoik awm sim "vampo" pa ot ka daux tiagtu mai awm sim pang plawh, pa ot ka gwang yaong prim pa hoik laux heue. ⁷ Aux pau nong nong, awm sim pa ot ka piang braux nyiex tix mu khaing heue. ⁸ Pui pa koeng ka aux khankix, salao ka aux, leeing lang singaix heue. Can pui pa ot tang plak khankix, ah pa ang cee ang cag mai map ka aux mai jhax lawg ka aux heue. ⁹ Aux yaox ti ih nyaox, awm ih blah mai yam nyaux aux, yaox tix nyaux mai rawm ngai, kheu ang Maix fah rhawm ka aux mai Maix song rhawm ka aux heue. ¹⁰ Maix hoik yaog aux ting lhaong mai deeh tik vud ka aux heue. ¹¹ Singaix bawg yam aux, awm veei peue pa lang mai aux hoik fit hoik kroh hu, awm rib riem heue. ¹² Siyiex eue, Maix mawh Siyiex leeing ju mai doh keud ka ceu kaux Maix ku ju leeing ju heue. ¹³ Maix kaoh mai caux rhawm ka veng Zion heue. Bawg yam pa caux rhawm ka nawh mai bawg yam pa hoik ciak Maix ti deuh hoik hoek heue. ¹⁴ Siliex Maix khankix, moh ka simaox Nawh khankix mai caux rhawm ka phawng tiex Nawh khankix heue. ¹⁵ Pui tang ceu khankix tak lhat graung ka ceu kaux Siyiex mai simiang haktiex khankix khawmuik, tak lhat graung ka min plakngai Maix heue. ¹⁶ Grawh grawng nawh, Siyiex, yuh veng Zion mai viex min plakngai Nawh sidawng heue. ¹⁷ Nawh Cao deuh ti tawng lox pa rawg kix bwan, pui pa ang koe dee peung pan khankix, Nawh ang nieb nunai ka pa rawg kix bwan heue. ¹⁸ Grawh grawng nawh, Nawh hoik tiem ti deuh son pui pa tak sang mawh phao khaix mai pui pa hoik phan hoik yuh Nawh khankix, tak sang yaogyaw ka Siyiex heue. ¹⁹ Siyiex ot dee lhaong, ka dee singax singeh mai num ti jhak khaing raoma mai yaox ka haktiex heue. ²⁰ Kieh nghiet ka lox pa riag pui pa ot ka daux thawng mai ploi lih ka pui pa hoik bak kix ti pah yum. ²¹ Kieh kawn pui khankix, teei ka ceu kaux Siyiex mai plak jhi sidawng ka piang gawng Zion mai yaogyaw ka bwanson Nawh Cao mai plak jhi sidawng ka daux veng Yerusaliem heue. ²² Yam ceu pui kuceu ku ru mai pui ku meung kudah, kraix khrawm pui tix mai krub ka Siyiex heue. ²³ Nawh Cao kieh riang rao aux dieh hu, ka daux krax pa hu aux mai kieh singaix bawg yam aux dawd hu heue. ²⁴ Siyiex aux eue, aux krai yuh nin, paw nyang teei ju aux lih, yam kawn awn ju aux liak. Jhong khix mee num Maix kaux cong ku ju leeing ju heue. ²⁵ Simiang aux eue, ka daux yam jah, Maix hoik kaw num haktiex heue. raoma kawx, mawh khaix taix Maix heue. ²⁶ Ceu an khankix tak sang laux leeing, viang mawh nan, Maix kawn ca kaux koe heue. Ceu an khankix tak sang prim hu awm kraung ceep mai Maix tak sang pua ka ceu an khankix, awm man vhua mai tak sang dee thai loh ceu an khankix awm kraung ceep heue. ²⁷ Viang mawh nan, Maix ca awm paox tix mai jhong khix mee num Maix, ang chix uik chix sidah heue. ²⁸ Maix ot mai kawn praix siliex Maix khankix mai ru kix kawx, tak kaux cong sivoe ngai Maix heue.

¹ Ju aux eue, yaogyaw ka Siyiex heue. Can pa koe ka daux aux khawmuik eue, yaogyaw ka ceu kaux Nawh pa singax singeh heue. ² Ju aux eue, yaogyaw ka Siyiex heue, paw pi awm ka bwanson Nawh Cao khankix heue. ³ Nawh Cao hoik pluat ploi phimap maix kuceu mai hoik kieh jhawm saux maix moi khawmuik heue. ⁴ Nawh Cao taoh ju maix lih khaing ka daux pa laux leeing mai bwanson krax caux rhawm Nawh, koe ka piang kaing maix heue. ⁵ Nawh Cao teei ceu pa mhawm mai kieh ju maix fah rhawm mai deeh cox ju maix, awn awm klang krih heue. ⁶ Siyiex prawng ca rahsee son pui pa kham geu ka krax pa tuktiak tukte khawmuik heue. ⁷ Nawh Cao hoik krai kaing ceu pa sang yuh Nawh ka Mose mai plak jhi kaing pa yuh Nawh khankix ka ceu pui Isarelax heue. ⁸ Siyiex hoik grum naog ka krax pa caux rhawm mai pa chix yuh bwanson mai pa lang gun lang yeung mai krax pa caux rhawm tom nie heue. ⁹ Nawh ca deuh phimap jheung jheung ang mawh, Nawh deuh pa lud daux rhawm tix jheung jheung ang mawh heue. ¹⁰ Nawh ang lai deeh tawx phimap ka phimap, awm phimap pa hoik yuh ex heue. ¹¹ Awm lhaong raoma khaing haktiex, krax pa caux rhawm Nawh Cao kied ting lhaong ka piang can pui pa lhat graung ka Nawh khankix heue. ¹² Awm pa singai, plak lih singaix, khaing plak klip singaix, Nawh Cao kieh phimap ex, singai khaing ex heue. ¹³ Awm pa caux rhawm keeing ka kawn tix, Siyiex caux rhawm ka can pui pa lhat graung ka Nawh khankix heue. ¹⁴ Grawh grawng nawh, Nawh Cao hoik tawng grawng tokaux ex mai doh keud ka mawh ex phawng tiex heue. ¹⁵ Singaix bawg yam ex kawn pui, awm num rib mai nawh chix pruh awm tai daux tiagtu heue. ¹⁶ Bhaung phlu nawh luan hu mai tai nawh grai hu mai ang tawng dee bleeh nawh khaix. ¹⁷ Krax pa caux rhawm Siyiex, jah tom dix, tom hoek leeing ju, ca koe ka piang can pui pa lhat graung ka Nawh heue. ¹⁸ Pui pa priex ka sijax mukheu Nawh mai pa koe satix mai pa priex ti hawt ka lox tawm beenli Nawh khankix mai krax pa rahsee Nawh, koe ka piang kawn praix kix leeing ju heue. ¹⁹ Siyiex deuh dang ngeung Nawh piang raoma mai sibrawm pa giex Nawh kaing tah hu kudah kudee heue. ²⁰ Kawncau Siyiex pa ting sibrawm mai pa nghiet ka gumlox Nawh mai pa hawt ti yuh ka gumlox pa tawx Nawh khankix eue, yaogyaw ka Siyiex heue. ²¹ Cub kawncau raoma pa hawt ti yuh ka alo Nawh Cao khankix eue, yaogyaw ka Siyiex heue. ²² Can pa phan pa deuh Nawh kudah kudee khawmuik eue, yaogyaw ka Siyiex heue. Ju aux eue, yaogyaw ka Siyiex heue.

¹ Ju aux eue, yaogyaw ka Siyiex heue. Siyiex aux eue, Maix mawh Cao pa kied ting lhaong heue. Maix hoik ceep ka min plakngai sibrawm pa ting lhaong heue. ² Maix teei pa riang Maix mai fua ka tokaux tix, awm pa teei ti ceep kraung, Maix teei ka raoma mai tawb ti deuh heue. ³ Maix teei jaong num dee ot daux lawg plak piang mai yuh dee ot Maix ka daux rawm mai brug ling paiawm mai hu lailing ka pruik bhaung khankix. ⁴ Maix kieh kawncau tokaux Maix khankix, awm bhaung mai kieh pui cau pui soi Maix khankix, awm raongu heue. ⁵ Maix hoik kaw ti deuh jaong num haktiex mai ang chix gah greed mai kaux cong jheung jheung heue. ⁶ Maix kieh rawm sigrit sigra kheem ka haktiex, awm tawb kraung ceep mai kieh rawm khankix, kheem ka piang gawng lua khankix heue. ⁷ Yam sidiex gau Maix ka kix, kix lih to heue. Yam mhong kix lox sinum praix, kix nied ti to hu heue. ⁸ Kix haok ka gawng khankix mai hoek ka dee cox Maix dee ot son kix heue. ⁹ Maix hoik gwieh ti deuh mee haktiex, ang kieh kix pon ti tiang mai ang kieh kix kheem ka haktiex heue. ¹⁰ Siyiex kieh rawm keut lih ka daux klawng ngawd mai ka piang gawng lua khankix heue. ¹¹ Kieh totiag piang haktiex khawmuik nyaux heue. La tiag khankix kawx, yaox tix nyaux tom sak heue. ¹² Sim raoma khankix, ot ka praok rawm an mai kix ah lox ka piang kak khaox khankix heue. ¹³ Maix ot ka daux lawg plak piang mai tawx rawm ka gawng lua mai haktiex mai kix hoik nyawm rhawm ka bwanson pa yuh Maix heue. ¹⁴ Maix kieh rib riem kuah sonsang ih totiag mai kieh nghox kuah son pa sang ih kawn pui, kieh pa ih lih khaing daux tiex heue. ¹⁵ Kieh rawm plix siiet koe, pa kieh rhawm kawn pui gaux rhawm, kieh rawm bee pa mhawm koe, blang yuh plakngai pui mai kieh blah koe, pa cong yuh rhawm rhi kawn pui heue. ¹⁶ Khaox piakvan pa sum Siyiex, ka piang gawng Lebanon khankix kawx, koe krax nyawm rhawm heue. ¹⁷ Sim khankix, hoek ti yuh mheem ka khaox an khankix mai sim sigaig khankix, hoek ti yuh mheem ka khaox gix an khankix heue. ¹⁸ Kieh kiah khankix ot ka dee lhaong gawng mai kieh ghot saphan khankix ot ka daux rang heue. ¹⁹ Nawh Cao hoik yuh ti deuh khix, mawh mhai son bawg yam mai singaix kawx, kieh tawng bawg yam tak laig it heue. ²⁰ Nawh Cao yuh pa faik kieh mawh ponsawm mai totiag khawmuik, lailing yam an heue. ²¹ Sivai sangsi pa awn ju khankix, graox mai sawg ti ih kug khaing Siyiex heue. ²² Yam lih singaix, kix deeh hoek mai deeh it ka daux dee ot kix heue. ²³ Kawn pui kawx lih hu yuh kaing tom hoek bawg yam ponbo heue. ²⁴ Siyiex eue, grawng pa phan pa yuh Maix khankix, kied nie haoh hun heue. Can pa koe khankix khawmuik, Maix hoik yuh ka cuyi pingnya tix heue. Kraungkhrai Maix hoik grum naog ka piang haktiex heue. ²⁵ Totiag pa iak pa ting, pa chix hu chix mu, pa ang lai uik simin khankix ot ka daux rawm sigrit sigra pa ting pa vieh heue. ²⁶ Ka dee an, reu ting khankix kawx lailing mai kax ting pa hoik yuh Maix khankix kawx, klieh ka daux rawm an heue. ²⁷ Totiag totu khankix khawmuik, kix krox jun ka ceu pa ih pa tawx Maix ka kix yam hoek bawg yam heue. ²⁸ Kix ih awm pa tawx Maix heue. Kix nyawm rhawm, ka pa tawx Maix ceu pa mhawm ka taix tix heue. ²⁹ Phan Maix vud ngai khaing kix, kix kha rhawm heue. Phan Maix teei ju kix yum, kix deeh ka phawng tiex heue. ³⁰ Maix ploi khwan singax Maix yuh kix, deeh cox yuh plakngai haktiex pa khraox heue. ³¹ Kieh min plakngai Siyiex kaux cong leeing ju liak. Kieh Siyiex koe krax pa gaux rhawm, ka ceu pa hoik yuh Nawh khankix liak. ³² Nawh Cao jhak ka haktiex mai haktiex siyaung heue. Nawh chuh ka gawng mai gawng lih mawh taox ngu heue. ³³ Aux tak ah lox rhax ka Siyiex, yam kawn im ju aux heue. Aux tak ah lox rhax yaogyaw ka Siyiex aux yam kawn klawd aux heue. ³⁴ Yam kawn keud aux daux rhawm tix, kieh khaw ka rhawm Nawh liak. Aux kawx, tak koe krax gaux rhawm ka daux Siyiex heue. ³⁵ Can pui pa lud khankix, Nawh Cao teei ti tik khaing haktiex mai pui pa ang rahsee khankix, ang lai kieh koe phao khaix, ju aux eue, yaogyaw ka Siyiex heue. Haleluya!

¹ Yaogyaw ka bwanson Siyiex heue. Rawg bwan ka ceu kaux Nawh mai plak jhi kaing ceu pa hoik yuh Nawh ka pui khankix heue. ² Rhax lai ka Nawh heue, rhax lai yaogyaw ka Nawh heue. Krai grawng kaing ceu pa daox am, pa yuh Nawh khankix. ³ Mai yaw rangdi ka daux ceu kaux pa singax singeh Nawh. Kieh rhawm can pui pa sawg ka Siyiex, gaux rhawm heue. ⁴ Sawg ka sibrawm Siyiex heue. Sawg ka plakngai Nawh jheung jheung heue. ⁵ Doh keud ka grawng ceu pa daox am pa hoik yuh Nawh mai ceu pa daox, lox tawm beenli pa hoik lih khaing jheeh Nawh khankix heue. ⁶ Doeh ru siliex Nawh Abraham mai kawn praix Yakop, pa hoik laug Nawh ti teei khankix eue, ⁷ Nawh Cao mawh Siyiex ex mai Nawh prawng ca ka piang haktiex khawmuik heue. ⁸ Nawh Cao doh keud ka sijax mukheu Nawh mai gumlox tawm beenli, pa hoik krai Nawh ti deuh tom sidah ju pui tix rheng ju heue. ⁹ Sijax mukheu pa hoik yuh Nawh ti deuh mai Abraham mai pa hoik tiextu Nawh ka Icak. ¹⁰ Sijax mukheu pa hoik yuh Nawh, sonsang mawh pa kaux cong ka Yakop mai sijax mukheu an, tak sang mawh pa kaux cong leeing ju son pui Isarelax heue. ¹¹ Aux tak teei haktiex meung Khanan, pa mawh sin, pa tak sang pon pex, tawx ka maix heue. ¹² Ka daux ceu pui ex, phan simin ti yaox ang awt nie tux, yam mawh kix nyo sinie ka daux meung an heue. ¹³ Yam lailing kix tix veng hoik tix veng mai tix meung hoik tix meung, ¹⁴ Siyiex ang kieh pui mawx tuktiak tukte ka kix, Siyiex sivied ti gau ka simiang ka son kix heue. ¹⁵ Paw lai chuh ka can pui pa hoik kraix Aux rawm bee mai paw lai deuh phimap ka cao jhai Aux khankix. ¹⁶ Siyiex kieh sibhawm praix hoek ka daux meung an mai teei ti tik ka ceu pa ih khawmuik. ¹⁷ Nawh Cao ploi pui hu tix kaux sivoe kix, pa mawh Yosiep pa yaox ti kham geu pa coh sonsang mawh siliex pui heue. ¹⁸ Kix sau gang ka caong nawh mai tuktiaktukte ka nawh mai kieh nawh kha rhawm heue. ¹⁹ Ka sivoe ang lox nawh nyang grum naog, Siyiex cheuk cheu ti yaox nawh heue. ²⁰ Simiang pa giex kaing pui khankix, ploi pui hu taoh nawh lih mai tawx krax nyawm rhawm heue. ²¹ Nawh deuh Yosiep mawh simiang pa giex kaing nyiex haw nawh mai kieh nawh priex kraung khrai sinngao nawh khawmuik heue. ²² Nawh tawx akhwang, sonsang phyawk mai sonsang sidiex gau ka simiang greem nawh khankix, awm pa simie nawh ti yuh heue. ²³ Isarelax hoek ka daux meung Ejiptux mai Yakop hu bang haktiex ceu pui Hamax heue. ²⁴ Siyiex kieh pui Nawh pre, haoh hun mai ting riang ting rao khaing pui pa koeng khankix heue. ²⁵ Nawh Cao tieh loh rhawm kix mai kieh kix koeng mai boh rhawm rhi ka pui Nawh khankix heue. ²⁶ Khaix an Nawh Cao laug ti teei mai ploi siliex Nawh Mose mai Arun heue. ²⁷ Maix kieh jhi sakse Nawh Cao khankix, ka daux meung Ejiptux mai yuh mhai ceu pa daox am, Nawh khankix, ka daux haktiex ceu pui Hamax heue. ²⁸ Nawh Cao ploi pa faik, kieh faik heue. Kix ang pon tiebtie ka gumlox Nawh Cao. ²⁹ Nawh Cao kieh rawm mawh nham mai kax khankix yum heue. ³⁰ Kieh khet naog ka haktiex kix, khawm daux nyiex haw dee ot simiang heue. ³¹ Nawh Cao tawx lox, kieh prawp mai maing lih, naog ka haktiex kix heue. ³² Nawh Cao kieh mu pre lih, tang lhiex mai kieh rao ngu lih ka haktiex kix heue. ³³ Nawh Cao kieh lah ka piang nhu plix siiet mai khaox ruh mai raig ti tik ka khaox pa koe ka daux meung kix heue. ³⁴ Nawh Cao tawx lox ka sido mai sido Pa haoh hun tom ang lai uik simin lih hoek ka daux meung kix heue. ³⁵ Ih taux lhax, rib riem mai plix nghox plix koi pa koe ka daux meung kix heue. ³⁶ Siyiex kieh kawn Ai kix yum khawmuik, pa moh mai pa deuh kix rhawm tix kah heue. ³⁷ Khaix an, Nawh Cao viex pui Isarelax lih hu khawm brax kwa mai viex mau khri lih hu heue. ³⁸ Pui meung Ejiptux, koe krax gaux rhawm yam lih hu pui Isarelax heue. ³⁹ Grawh grawng nawh, kix kied lhat graung ka kix heue. Nawh Cao kheem veei paiawm ka piang kix mai tawx pa riang ngu yam ponsawm ka kix heue. ⁴⁰ Yam rawg mhaing kix, Nawh Cao tawx keed hoek ka kix mai tawx blah raoma sonsang fah rhawm kix heue. ⁴¹ Nawh Cao paoh ka rang mai rawm lih mai lih hu ka dee kroh tiex, awm rawm klawng heue. ⁴² Grawh grawng nawh, Nawh Cao doh keud ka sijax mukheu pa singax singeh tau mai siliex Nawh Abraham heue. ⁴³ Nawh Cao kieh pui Nawh khankix lih mai pui pa hoik laug Nawh khankix, ah lox gaux rhawm mai lih hu heue. ⁴⁴ Nawh Cao teei ti tawx haktiex pui tang ceu ka kix mai kix pon ti ih ka kaing pa yuh pui tang ceu khankix heue. ⁴⁵ Kieh kix hawt yuh lox tawm beenli Nawh khankix mai hawt ti twah klaung lox tawm beenli Nawh heue. Haleluya!

¹ Yaogyaw ka bwanson Siyiex heue. Mawh kheu Nawh mawh pa jiet mhawm mai krax caux rhawm Nawh koe jheung jheung heue. ² Pui mawx pa tak sang pon ti krai grawng pa yuh Siyiex ka sibrawm pa ting lhaong Nawh? ³ Pui mawx pa tak sang pon ti plak jhi ka bwanson Nawh khawmuik? Can pui pa hawt ti yuh ka beenli Nawh mai pa hawt ka krax pa rahsee Nawh ku bawg, koe bwanson heue. ⁴ Siyiex eue, viex rhawm sibieh Maix doh keud ka aux mai taoh ka aux mai hoek ti jhak ka aux liak. ⁵ Kieh aux yaox ka pa mhawm can pui pa hoik laug Maix ti teei khankix, kieh aux gaux rhawm mai pui Maix, pa gaux rhawm i khankix, kieh aux yaw rangdi tau mai can kix pa mawh sin Maix liak. ⁶ Ex hoik lud awm pa hoik lud tax du ex mai ex hoik yuh phimap mai pa ang rahsee heue. ⁷ Tax du ex khankix ang kix tawng ka ceu pa daox am, pa hoik yuh Maix ka daux meung Ejiptux, kix pi awm ka krax caux rhawm Maix tom nie mai kix tieh feen ka Nawh praok rawm sigrit sigra pa raoh Edom heue. ⁸ Viang mawh kawx nan, Nawh Cao taoh kix, mawh kheu ceu kaux Nawh mai Nawh kieh sibrawm Nawh pa ting, sidawng heue. ⁹ Nawh Cao tawx lox ka rawm sigrit sigra pa raoh Edom mai rawm an kroh hu heue. Nawh Cao thong kix hu dee raux, awm hu piang tiex kroh heue. ¹⁰ Nawh Cao taoh kix khaing ka daux tawm taix pui pa koeng ka kix mai taoh kix lih ka daux tawm taix pui pa ciang khoi ka kix heue. ¹¹ Rawm an, kheem ti tik ka pui pa koeng ka kix khankix mai ang lai deuk tix kaux kawx heue. ¹² Yam an kix yum rhawm ka lox Nawh Cao mai rhax lai yaogyaw ka bwanson Nawh Cao heue. ¹³ Viang mawh kawx nan, kix khran pi awm ka ceu pa hoik yuh Nawh Cao mai kix ang krox ang pau ka krax pa keud pa sawn Nawh Cao heue. ¹⁴ Kix koe rhawm pa ghoing ka ceu pa ih ka daux tiag mai kix tom cheuk cheu ti yaox ka Siyiex, dee yiien dee ang pui ot heue. ¹⁵ Nawh Cao tawx ka kix awm pa mhaing kix heue. Viang mawh nan, Nawh Cao tawx pa yhawm pa krawx ka kix heue. ¹⁶ Kix boh rhawm rhi ka Mose ka daux tab mai Arun pa mawh pui pa singax singeh Siyiex heue. ¹⁷ Yam an, haktiex bih mai bleet ti ih ka Datan mai cub kix pa laig ka Abiram heue. ¹⁸ Ngu lih ka piang cub caw kix mai gleeing ka pui pa ang rahsee khankix heue. ¹⁹ Kix raug riang kawn mawie ka piang gawng Hawrap mai krub ka nawh heue. ²⁰ Kix teei min plakngai mai loh ka riang kawn mawie pa chix ih rib heue. ²¹ Kix hoik pi awm ka Siyiex, Cao pa hoik taoh ka kix mai Cao pa yuh grawng kaing ceu pa ting lhaong, ka daux meung Ejiptux, ²² mai yuh ceu pa daox am khankix, ka dee ot ceu pui Hamax mai grawng ceu pa lhat graung ka praok rawm sigrit sigra Edom heue. ²³ Mawh kheu in, Siyiex tom keud ti yuh laux ka pui Nawh khankix, viang mawh nan, Mose siliex pa hoik laug Nawh ti teei tom cung sivoe Nawh mai khyox khaw son ang Nawh sang yuh kix laux leeing heue. ²⁴ Kix nieb yuh ang kieh koe ceu ka meung pa jiet mhawm an mai kix ang yum rhawm ka lox mukheu pa hoik krai Siyiex heue. ²⁵ Kix ah lox bawg be ka nyiex bang dee ot tix mai ang lai nghiet ka gumlox Siyiex heue. ²⁶ Yam an Nawh Cao yaog taix tix tang plak mai kieh kix goh ti yum ka daux tiag heue. ²⁷ Kieh ru kix, goh sinax pui tang ceu khankix mai jhax lawg ka kix mai kieh kix prung prang rai ruad hu ku praix ku klawng heue. ²⁸ Kix hawt khaix siyiex Balapekurax mai ih ka ceu pa hoik tan lu sivoe ngai pa yum heue. ²⁹ Mawh kheu nan, kix yuh ceu pa song rhawm song rhi Siyiex mai kieh ceu pa saux preng hoek ka piang kix heue. ³⁰ Yam an Phinahat kaoh mai prawng ca ka pui pa yuh pa caox caig khankix mai saux preng grai hu khaix heue. ³¹ Mawh kheu yuh nawh nan, deuh nawh mawh pa rahsee, ku ju leeing ju heue. ³² Khaix an kix baox yuh krax pa song rhawm Nawh Cao, ka praok rawm Meribax mai Mose tom yaox ti kham geu krax kha rhawm sipiag kix heue. ³³ Mawh kheu yuh kix pa sung sang rhawm Mose, jheeh nawh tom ah lox pa ang khaw tix ah ka kix heue. ³⁴ Kix ang yuh laux ka pui tang ceu mai kix ang hawt yuh ka gumlox Siyiex heue. ³⁵ Kix ot tau mai pui tang ceu mai gau ka beenli kix heue. ³⁶ Kix krub ka riang grang kix mai krix ka kie pa taong kix heue. ³⁷ Kix teei kawn simex mai kawn bun kix mai tan ka phicaox heue. ³⁸ Kix plaux kawn simex mai kawn bun kix, pa ang koe phimap mai teei nham kix mai tan ka riang grang meung Khanan mai meung an, seeing brai ka nham heue. ³⁹ Kix yuh tokaux ti seeing brai ka kaing pa yuh kix mai kix lud ka pa yuh tix heue. ⁴⁰ Mawh kheu in, Siyiex tom lih krax song rhawm ka pui Nawh khankix mai seeing brai ka sin Nawh heue. ⁴¹ Nawh Cao teei ti tawx ka daux tawm taix pui tang ceu khankix mai kieh pui pa koeng ka kix, giex kaing ka piang kix heue. ⁴² Pui pa koeng ka kix, tuktiaktukte ka kix mai kix yaox ti ot mai yuh siliex greem tawm taix kix heue. ⁴³ Viang Nawh Cao hoik taoh ka kix, tom nie bawg kawx kix ca keud krax tieh feen, kheu phimap pa yuh kix heue. ⁴⁴ Viang mawh kawx nan, Nawh Cao jhak ka krax pa kha rhawm kix mai mhong ka lox pa kok yo kix heue. ⁴⁵ Nawh Cao doh keud ka sijax mukheu pa hoik yuh Nawh son kix mai caux rhawm ka kix, awm krax pa caux rhawm Nawh tom nie heue. ⁴⁶ Siyiex kieh kix deeh pon krax caux rhawm khaing pui pa hoik viex kix hu khawmuik heue. ⁴⁷ Siyiex eue, khrawm ti taoh ex lih khaing pui tang ceu mai rieb ti teei ka bwanson ceu kaux Maix pa singax singeh mai pa ting lhaong heue. Aux yaw rangdi mai gaux rhawm yaogyaw ka Maix heue. ⁴⁸ Kieh Siyiex ceu pui Isarelax koe bwanson tom sidah haktiex leeing ju liak. Kieh kawn pui khawmuik rieb tix ah, Amen. Haleluya!

¹ Yaogyaw ka bwanson Siyiex, mawh kheu Nawh mawh pa jiet mhawm mai krax pa caux rhawm Nawh koe jheung jheung heue. ² Siyiex pa hoik taoh kix khaing daux tawm taix pui pa koeng khan kix. ³ Can kix pa ot ka daux meung pa koe plak lih singaix mai plak klip singaix, caong ma laong mai caong ma seh khankix, Nawh deeh viex kix hoek heue. ⁴ Kix lailing ka daux tiagtu, dee yiien yawg mai ang yaox veng dee ot pui. ⁵ Kix laux rhawm kheu ang yaox ti sawm mai ang yaox ti nyaux rawm heue. ⁶ Kix kok yo ka Siyiex, yam yaox kix krax pa hot sibhawm mai Nawh Cao taoh kix ka daux pa kha rhawm heue. ⁷ Nawh Cao thong kix hu ka daux krax pa rahsee mai kieh kix hoek ka veng dee ot pui heue. ⁸ Kieh pui khankix khaw ti keud ka krax pa caux rhawm mai ceu pa daox am, pa hoik yuh Nawh ka kawn pui khankix mai kieh kix yaogyaw ka Siyiex heue. ⁹ Grawh grawng nawh, Nawh Cao tawx awm pa simie kix mai pui pa cai rhawm khankix, Nawh tawx ceu pa ih pa mhawm tom sak heue. ¹⁰ Kix yaox ti ot ka daux pa faik mai ka daux veei krax yum mai yaox ti kha rhawm ka pa phyawk maox ceng heue. ¹¹ Mawh kheu thiang kix ti tik ka gumlox Siyiex mai nieb yuh pa ang cee ang cag ka krax pa keud pa sawn Siyiex Cao pa ting lhaong khaing khawmuik heue. ¹² Mawh kheu in, Nawh Cao kieh kaing pa yuh kix, deeh hoek ka kix tiru mai rau dee tiiem mai kix goh mai ang koe cao pa yaog heue. ¹³ Kix kok yo ka Siyiex, yam yaox kix krax pa hot sibhawm mai Nawh Cao taoh kix ka daux pa kha rhawm heue. ¹⁴ Nawh Cao teei kix lih khaing ka daux pa faik mai veei krax yum, yah ti ploi kix khaing pa phyawk heue. ¹⁵ Kieh pui khankix khaw ti keud ka krax pa caux rhawm mai ceu pa daox am pa hoik yuh Nawh ka kawn pui khankix mai kieh kix yaogyaw ka Siyiex heue. ¹⁶ Grawh grawng nawh, Nawh Cao raig ti tik ka siviex tawng lheung mai tat dud ka gawng rhiem khankix heue. ¹⁷ Pui pa koe rhawm pa caox khankix, yaox ti kha rhawm, kheu lud kix krax hu tix mai yuh phimap heue. ¹⁸ Kix ih ceu pa seeing brai kuceu mai hoek dex siviex krax yum, ¹⁹ mai kix kok yo ka Siyiex, yam yaox kix krax pa hot pa sibhawm, Nawh Cao taoh kix ka daux pa kha rhawm heue. ²⁰ Nawh Cao ploi gumlox tix mai kieh jhawm saux kix moi mai taoh kix lih khaing daux pa laux leeing heue. ²¹ Kieh pui khankix khaw ti keud ka krax pa caux rhawm mai ceu pa daox am, pa hoik yuh Nawh ka kawn pui khankix mai kieh kix yaogyaw ka Siyiex heue. ²² Kieh kix tan mai rieb ti teei ka bwanson Nawh Cao mai rhax lai gaux rhawm mai plak jhi ka grawng kaing pa hoik yuh Nawh Cao khankix heue. ²³ Can kix pa brug reu ting mai tiang rawm sigrit sigra mai pa yuh kaing ka piang rawm khankix, ²⁴ kix pon ti yaox grawng kaing pa hoik yuh Siyiex mai ceu pa daox am pa yuh Nawh Cao, ka daux pa raux pa mox heue. ²⁵ Nawh Cao kieh bhaung ting phlu mai kieh pukpak rawm haok hwan heue. ²⁶ Kix haok ka piang raoma mai deeh lih ka dee raux dee mox mai kix laux rhawm kheu yaox krax pa khi rhawm heue. ²⁷ Viex kix vung vang awm pui pa yoek ka plai mai viex krax tawng kix grai hu heue. ²⁸ Kix kok yo ka Siyiex yam yaox kix krax pa hot pa sibhawm mai Nawh Cao taoh kix khaing ka daux pa kha rhawm heue. ²⁹ Nawh Cao kieh bhaung ting grai mai kieh pukpak rawm yiien yawg tix heue. ³⁰ Yam an kix koe krax gaux rhawm kheu yiien yawg hu yuh nan heue. Nawh Cao thong kix hu ka dee bang reu ting dee simie kix ti hu heue. ³¹ Kieh pui khankix, khaw ti keud ka krax caux rhawm mai ceu pa daox am pa hoik yuh Nawh ka kawn pui khankix mai kieh kix yaogyaw ka Siyiex heue. ³² Kieh kix yaog Nawh ting, sinax dee khrawm pui hun mai kieh kix yaogyaw ka dee khrawm kix kuad song khankix heue. ³³ Nawh kieh rawm klawng lih mawh daux tiagtu mai dee lih rawm keut khankix kieh kroh hu heue. ³⁴ Haktiex dee mhawm dee koe phon kawx, kieh ceet hu kheu phimap pa yuh pui haktiex heue. ³⁵ Nawh Cao deeh kieh rawm naog ka daux tiagtu mai kieh rawm keut deeh lih ka dee kroh haktiex heue. ³⁶ Nawh Cao tawx ka pui pa cai rhawm ot ka dee an mai kix yuh veng son dee ot kix heue. ³⁷ Kix yuh ma yuh kaung mai sum plix siiet mai pon plix khaox mai plix nghox plix koi tom nie heue. ³⁸ Nawh Cao nawb bwanson ka kix mai kieh kawn praix kix pre haoh hun mai cub yung, cub mawie kix kawx, kied haoh hun heue. ³⁹ Viang yuh nan kawx, yam yaox kix krax pa tuktiaktukte mai yaox krax laux som, kix laux rhawm heue. ⁴⁰ Nawh Cao teei krax pa kaig tua, tawx ka kawn laux Simiang khankix mai kieh kix vuvie ka daux tiagtu, dee ang krax koe heue. ⁴¹ Nawh Cao teei pui pa hot sibhawm lih khaing ka daux pa kha rhawm mai yaog kix deuh dee lhaong mai kieh mawh nyiex ma haoh hun awm cub yung heue. ⁴² Pui pa rahsee yaox mai gaux rhawm heue. Can phimap khankix, ang lai simawd thox jheeh tix heue. ⁴³ Pui pa koe cuyi pingnya khankix, kieh tawng ka grawng bwanson krax pa caux rhawm Siyiex heue.

¹ Siyiex eue, aux hoik rien rhawm tix mai ju aux rhax lai yaogyaw ka Maix heue. ² Ting si mai ting tah eue, siduad heue, aux kawx siduad caocao heue. ³ Siyiex eue, aux tak yaogyaw Maix ka sinax pui hun khankix mai aux tak rhax lai yaogyaw Maix sinax ceu pui khankix heue. ⁴ Grawh grawng nawh, krax caux rhawm Maix hoik hoek tom raoma mai sijax mukheu Maix hoik hoek daux paiawm heue. ⁵ Siyiex eue, kieh Maix nie lheu lhaong khaing lhaong raoma mai kieh min plakngai Maix tah hu ka piang haktiex in khawmuik liak. ⁶ Sonsang pon can pui pa moh ka Maix, pa nyawm rhawm, teei taix khawn dawm Maix taoh mai nghiet ka lox aux liak. ⁷ Mawh kheu hoik krai Siyiex ka daux nyiex bwan pa singax singeh aux tak gaux rhawm heue. Aux tak gwieh ka veng Shekhem mai tiag ka daux lung Sukot heue. ⁸ Meung Gilat mai meung Manashe mawh cie aux heue. Phan mawh meung Epharem mawh riang rao dee deuh aux kaing tix mai meung Yudax mawh pliah dee ot aux heue. ⁹ Meung Mawbax mawh aw dee heem aux, meung Edom mawh dee deuh aux kiep, meung Philitix mawh dee yo aux lox pa pex. ¹⁰ Pui mawx pa sang tawx aux ka daux veng pa ting riang mai pui mawx tak sang jhi daux krax pa hu aux ka meung Edom. ¹¹ Siyiex eue, Maix hoik tik vud ka ex ang mawh lie? Siyiex eue, Maix ang hu mai kru naing ex lie? ¹² Teem coi ka ex sonsang luan khaing pui pa koeng ka ex khankix, grawh grawng nawh, kawn pui ang chix taoh tidtix heue. ¹³ Mawh kheu Siyiex, ex tak koe rhawm pa kwa heue. Nawh Cao tak dig ka pui pa koeng ka ex khankix heue.

¹ Siyiex pa yaogyaw aux eue, paw glaik tix ot yiien yawg liak. ² Pui pa ang rahsee mai pui pa ang kaux sijax khankix, ot tang plak mai ang moing tix mai ah lox pie lhen ka aux heue. ³ Kix nieb ah lox pa ang khaw mai hoek rob ti puing aux, ka pa ang tie koe grawng heue. ⁴ Aux moh kix mai rawg bwan son kix kawx, kix tiebtie lah cha ka aux heue. ⁵ Kix deeh viied ti tawx phimap pa ang mhawm ka bwanson pa yuh aux mai krax moh aux mai kix deeh tawx ceu pa koeng ka aux heue. ⁶ Teei pui pa ang rahsee mai deuh ka piang pui pa yuh nan mai kieh pui pa koeng ot dex plak taix khawn dawm nawh liak. ⁷ Yam hoek bawg yam prawng ca, kieh nawh som liak. Kieh lox pa rawg nawh bwan mawh pa lud liak. ⁸ Kieh ju nawh dawd mai kieh pui tang kaux, pon kaing pa yuh nawh liak. ⁹ Kieh kawn nawh mawh kawn doe mai kieh moeng nawh mawh miexmai liak. ¹⁰ Kieh kawn nawh khankix, vuvie kudah, kieh caung ti ih liak. Kieh kix lih khaing dee ot tix, pa laux leeing mai caung ti ih liak. ¹¹ Kieh cao pa ceuk rawm khrawt ti teei can pa koe nawh uik mai kieh pui tang praix tud rhim ti teei ka kraung khrai pa yuh pa pon nawh liak. ¹² Paw kieh pui yuh bwanson ka nawh mai paw kieh pui caux rhawm ka kawn doe, kawn nawh tix kaux kawx liak. ¹³ Kieh ru nawh dud mai kieh ceu kaux nawh grai hu khaix nawh heue. ¹⁴ Kieh Siyiex, doh keud ka phimap pa yuh tax du nawh mai paw lai ploi phimap pa yuh miex nawh heue. ¹⁵ Kieh phimap an sidawng sivoe ngai Siyiex jheung jheung mai kieh nawh teei ti tik ka ceu pa doh keud son kix khaing piang haktiex khawmuik heue. ¹⁶ Grawh grawng nawh, nawh ang koe krax caux rhawm ti teem mai nawh tuktiaktukte ka pui pa hot sibhawm mai pui pa laux rhawm khankix tom sidah yum heue. ¹⁷ Awm moh nawh pa jhax lawg, deeh hoek ka piang nawh heue. Nawh ang moh ka bwanson mai bwanson an, singai khaing nawh heue. ¹⁸ Nawh teei ti ceep pa jhax lawg, awm pa ceep kraung, ceu an laig ka daux vaig nawh, awm rawm mai laig ka daux si-ang nawh awm bee heue. ¹⁹ Kieh nawh teei ti fua, ka tokaux tix awm fua prux mai nhawt ka nyoi tix, awm maox rawd nyoi heue. ²⁰ Pui pa koeng ka aux, pa ah lox caox pa ang mhawm ka ju aux, pa ot tang plak khankix, kieh kix pon krax pa kham geu khaing Siyiex heue. ²¹ Siyiex eue, pau aux kheu ceu kaux Maix liak. Taoh aux ka daux krax caux rhawm Maix liak. ²² Aux hoik hot sibhawm mai rhawm aux hoik saux ka daux aux heue. ²³ Aux hoik gah hoik greed hu, awm kawn beue pa lang heue. Viex aux haok blaong lih jee awm sido heue. ²⁴ Nge ngawng aux hoik iak riang, yung ye kheu ang sawm mai nex aux kawx krawx hu heue. ²⁵ Pui tang kaux salao ka aux mai yam yaox kix ka aux, vudvied kaing tix heue. ²⁶ Siyiex aux eue, teem ka aux liak. Awm koe krax caux rhawm Maix, taoh ka aux liak. ²⁷ Kieh kix tawng grawng sibrawm taix Maix mawh Siyiex Cao pa prawng ca heue. ²⁸ Viang kix ah lox pa jhax lawg kawx, Maix tawx bwanson liak. Yam kaoh cung kix, kieh koe krax pa kaig tua mai kieh siliex Maix gaux rhawm heue. ²⁹ Pui pa koeng ka aux khankix, kieh kix ceep ka ceu pa lhat mai pa kaig tua, kieh kix pie lhen min plakngai pa laux ka tokaux tix, awm pa fua ka prux heue. ³⁰ Aux tak yaogyaw ka bwanson Siyiex, ka jheeh tix, sigrien sigre heue. Aux tak yaogyaw ka Nawh, sinax pui Pa haoh hun heue. ³¹ Grawh grawng nawh, Nawh Cao cung dex plak taix khawn dawm pui pa hot sibhawm mai taoh ju kix lih khaing daux tawm taix krax prawng ca phimap heue.

¹ Simiang ah nin ka Simiang aux, "Ngawm plak taix khawn dawm Aux, tom Aux kieh pui pa koeng ka maix mawh ngot dee deuh maix caong tix heue." ² Siyiex tak teei pliah sibrawm Nawh, ploi lih khaing veng Zion mai giex kaing ka daux sinax pui, pa koeng ka Maix khankix heue. ³ Singaix yam jhi Maix sibrawm pui Maix khankix, ceep ka kraung pa singax mai koe rhawm sibieh ti tan mai sinaw khankix hoek ka Maix awm lih rawm ciex ponngawb heue. ⁴ Siyiex tiextu ti ah nin, "Maix mawh Cao giex kaing li leeing ju, awm pa khaw mai Melakhizediek." Khaix in, ang koe rhawm pa tieh loh. ⁵ Siyiex pa ot plak taix khawn dawm Maix, yam lih pa song rhawm Nawh, Nawh Cao ciyang ka simiang khankix laux leeing heue. ⁶ Nawh tak prawng ca ka pui tang ceu khankix heue. Nawh kieh tokaux pui pa yum tah hu kudauh kudee mai pah kaing kix sau ka daux tiex pa ting pa vieh heue. ⁷ Nawh Cao nyaux rawm pa lih ka dex krax mai Nawh Cao yaog kaing tix heue.

¹ Aux tak viex khawm rhawm khawm rhi tix yaogyaw ka bwanson Siyiex, ka dee khrawm pui pa rahsee mai sinax pui pa haoh hun khan kix heue. ² Grawng kaing ceu pa hoik yuh Siyiex, mawh pa kied ting lhaong mai can pui pa khaw rhawm khankix, viex khawm rhawm tix, chawk cheng tix sawg ka ceu an heue. ³ Grawng kaing ceu pa hoik yuh Nawh khankix mawh pa grum ka min plakngai, beenli pa rahsee Nawh kaux cong jheung jheung heue. ⁴ Nawh Cao kieh ceu pa daox am khankix, mawh son pa tak sang doh keud mai Siyiex grum koe rhawm pa chix yuh bwanson mai rhawm pa chix caux rhawm heue. ⁵ Nawh Cao tawx ceu pa ih, ka pui pa lhat, pa nab yam ka Nawh heue. Doh keud ka sijax mukheu Nawh jheung jheung. ⁶ Nawh Cao jhi sibrawm ka daux kaing pa yuh Nawh khankix mai teei sin pui tang ceu khankix tawx ka kix heue. ⁷ Grawng ceu pa hoik yuh Nawh ka daux tawm taix tix khankix, mawh ceu pa dex dawd mai sijax mukheu mai pa rahsee mai lox tawm beenli Nawh khawmuik mawh pa kaux cong heue. ⁸ Sijax mukheu Nawh mai ceu pa rahsee Nawh, kaux cong jheung jheung heue. ⁹ Nawh Cao taoh ti teei ka pui Nawh khankix mai yuh ti deuh sijax mukheu pa kaux cong jheung jheung heue. Ceu kaux Nawh mawh pa singax singeh mai pa khaw ti lhat graung kah heue. ¹⁰ Ceu pa lhat graung ka Siyiex mawh num cuyi pingnya heue. Pui pa hawt grawng lawng khaix lox tawm beenli khankix, mawh pui pa chix keud sawn heue. Min plakngai nawh koe jheung jheung heue.

¹ Pui pa lhat graung ka Siyiex mai pa gaux rhawm ka lox tawm beenli Nawh khankix, koe bwanson heue. ² Doeh ru kix ting riang rao ka piang haktiex mai can kix pa rahsee koe bwanson heue. ³ Sinngao kraung khrai hoik naog ka daux nyiex nawh, bwanson pa rahsee nawh, kaux cong jheung jheung heue. ⁴ Son pui pa rahsee khankix, pa riang lih jhan ka daux pa faik, pui pa yuh nan, koe rhawm pa chix yuh bwanson mai koe rhawm pa chix caux rhawm mai koe rhawm pa rahsee heue. ⁵ Pui pa koe rhawm pa chix caux rhawm mai chix tawx pui yaog yaing khankix, koe bwanson heue. Phan hoek bawg yam singaix prawng ca, nawh mawh cao pa pex heue. ⁶ Nawh ang hoek krax laux som ti bawg kawx, tak kaux cong jheung jheung mai pui pa rahsee khankix, tak mawh sonsang doh keud jheung jheung heue. ⁷ Nawh ang lhat ka lox pa caox pa ang mhawm khankix, ka daux rhawm nawh, kaux cong ka daux Siyiex heue. ⁸ Rhawm nawh kaux cong mai ang lhat ang graung, mawh kheu hoik tawng nawh daux rhawm tix mai pui pa koeng ka nawh khankix tak hoek krax laux krax som heue. ⁹ Nawh hoik gwieh ti tawx ka pui pa hot sibhawm khankix mai krax pa rahsee nawh, kaux cong jheung jheung mai tak yaog min plakngai nawh ting lhaong heue. ¹⁰ Yam yaox pui pa ang rahsee khankix, song rhawm mai greeik rhang tix mai can kix pa ang rahsee khankix teh hu mai laux leeing grai mu heue.

¹ Yaogyaw heue, siliex Siyiex khankix eue, yaogyaw ka ceu kaux Siyiex awx. ² Kieh ceu kaux Siyiex koe bwanson jah tom yam in mai leeing ju liak. ³ Jah plak lih singaix tom hoek plak klip singaix, mawh pa khaw ti yaogyaw ka ceu kaux Siyiex heue. ⁴ Siyiex pa ting ka piang kawn pui khawmuik mai min plakngai Nawh koe piang raoma heue. ⁵ Pui mawx tak awm Siyiex ex pa ot ka dee lhaong. ⁶ Taing lih tokaux tix sonsang jhak ka kraung khrai piang raoma mai piang haktiex khankix heue. ⁷ Nawh Cao tak yaog ka kix pui pa hot sibhawm ting khaing daux phawng tiex mai yaog kix pui pa cud cha khaing daux phon. ⁸ Tawx dee ot ka kix, tau mai kawn laux kawn Simiang pa giex kaing ka piang pui khankix heue. ⁹ Nawh Cao kieh bun neh pa ang koe kawn ot ka daux nyiex mai deeh kieh keh kawn praix mai koe krax gaux rhawm heue. Haleluya!

¹ Yam lih pui Isarelax ru Yakop khaing dee ot ceu pui pa caox khankix khaing meung Ejiptux, ² Ceu pui Yudax mawh dee pa singax singeh mai ceu pui Isarelax mawh dee giex Nawh Cao kaing heue. ³ Rawm sigrit sigra yaox kawx to heue. Rawm Yawdan yaox kawx, deeh vai tix plak khaix heue. ⁴ Gawng ting khankix, jaloh tix awm yung mhaing mai gawng iak khankix, jaloh tix awm kawn yung heue. ⁵ Rawm sigrit sigra eue maix to yuh ka mawx? Awm Yawdan eue maix deeh vai tix plak khaix yuh ka mawx? ⁶ Gawng ting eue maix jah loh tix awm yung mhaing yuh ka mawx? Gawng iak eue maix jah loh tix awm kawn yung yuh ka mawx? ⁷ Haktiex eue, ot siyaung sivoe ngai Siyiex, pa mawh Siyiex Yakop heue. ⁸ Nawh Cao kieh simaox mawh rawm nhawng mai kieh rang mawh rawm keut heue.

¹ Siyiex eue, ex ang koe min plakngai, ex ang koe min plakngai, ka daux ceu kaux Maix, krax caux rhawm mai sijax mukheu Maix, kieh koe min plakngai liak. ² Mawh kheu patix pui tang ceu khankix ah nin, "Siyiex kix koe dee mawx?" ³ Siyiex ex ot ka piang meung raoma mai Nawh Cao yuh awm pa koe alo Nawh heue. ⁴ Riang pa krub kix mawh pa yuh pui ka mau, ka khri khankix mai mawh ngie pa yuh kawn pui ka taix tix heue. ⁵ Riang pa krub kix an, koe jheeh ang chix sikah, koe ngai ang chix yaox. ⁶ Koe yhaok ang chix mhong, koe meeh ang chix ngheet, ⁷ koe taix ang chix giex, koe caong ang chix hu mai ghok kix ang chix lih lox. ⁸ Cao pa yuh khankix kawx, awm an heue. Can pui pa deuh rhawm ka an khankix kawx, awm an heue. ⁹ Ceu pui Isarelax khankix eue, deuh rhawm ka Siyiex heue. Nawh Cao mawh Cao pa teem ka pui Isarelax mai Cao pa tiebtie ka pex heue. ¹⁰ Doeh ru Arun eue, deuh rhawm ka Siyiex heue. Nawh Cao mawh Cao pa teem ka ru Arun mai Cao pa tiebtie ka pex heue. ¹¹ Can pui pa lhat graung ka Siyiex khankix eue, deuh rhawm ka Siyiex heue. Nawh Cao mawh Cao pa teem mai mawh Cao pa tiebtie ka pex heue. ¹² Siyiex doh keud ka ex mai nawb bwanson ka ex heue. Nawh Cao nawb bwanson ka ceu pui Isarelax mai nawb bwanson ka ru Arun heue. ¹³ Can pui pa lhat graung ka Siyiex khankix, Nawh Cao nawb bwanson ka kix, khawm pa iak pa ting heue. ¹⁴ Kieh Siyiex, kieh pex mai kawn praix pex, pre haoh hun liak. ¹⁵ Pex mawh pui pa nawb Siyiex Cao pa phan pa yuh raoma mai haktiex bwanson ka heue. ¹⁶ Raoma mawh, raoma cie Siyiex heue. Haktiex mawh pa hoik tawx Nawh ka kawn pui heue. ¹⁷ Pui pa hoik yum mai pui pa hoik lih hu ka dee yiien yawg khankix, ang chix deeh yaogyaw ka Siyiex. ¹⁸ Phan mawh ex, yaogyaw ka Siyiex, jah tom yam in hoek tom leeing ju heue. Haleluya!

¹ Aux moh ka Siyiex, mawh kheu nghiet Nawh ka ceu pa rawg mhaing aux heue. ² Mawh kheu nghiet Nawh Cao ka lox aux, aux tak sang yaogyaw ka Nawh, yam kawn im ju aux heue. ³ Maox krax yum khankix, hoik rob ka aux mai meung yum hoik giex ka aux mai aux yaox krax pa kha rhawm heue. ⁴ Yam an aux rawg bwan ka ceu kaux Siyiex mai khyox khaw ah nin, "Siyiex eue, taoh ka ju aux liak." ⁵ Siyiex koe rhawm pa chix yuh bwanson mai koe rhawm pa rahsee mai Siyiex ex koe krax pa chix caux rhawm heue. ⁶ Siyiex teem ka pui pa daox aw khankix mai yam ot aux ka dee tiiem, Nawh Cao taoh ti teei aux heue. ⁷ Ju aux eue, deeh ka dee ot maix mhawm mhawm heue. Siyiex hoik yuh bwanson ka maix heue. ⁸ Maix hoik taoh ju aux khaing krax yum mai hoik awt rawm ngai khaing ngai aux mai hoik taoh caong aux khaing dee sideeing caong heue. ⁹ Mawh kheu in, aux tak hu sivoe ngai Siyiex, ka daux dee ot pui pa im ju khankix heue. ¹⁰ Viang aux yaox ti kham krax kham krax geu kawx, aux kawn ah kawn koe krax yum rhawm heue. ¹¹ Aux ang yuh satix mai loe ti ah nin, "Pui khawmuik chix ah lox pie lhen heue." ¹² Bwanson pa hoik yuh Siyiex ka aux kuceu khawmuik, aux tak sang deeh pon viied yuh ka mawx? ¹³ Aux tak giex ka kawk krax taoh mai rawg bwan ka daux ceu kaux Siyiex heue. ¹⁴ Aux tak tan ka plak sivoe ngai pui Siyiex khawmuik, awm pa hoik yuh aux sijax mukheu ka Siyiex heue. ¹⁵ Krax yum can pui pa singax singeh pa moh Nawh Cao, mawh pa kied ngawh, sivoe ngai Siyiex heue. ¹⁶ Siyiex eue, aux mawh siliex Maix tete heue, aux mawh siliex Maix, aux mawh kawn simex bun siliex Maix heue. Maix hoik yah aux lih khaing pa phyawk tix heue. ¹⁷ Aux tak tan mai yaogyaw ka bwanson Maix mai rawg mhaing ka daux ceu kaux Siyiex heue. ¹⁸ Aux tak tan ka plak sivoe ngai pui Siyiex khawmuik, awm pa hoik yuh aux sijax mukheu ka Siyiex heue. ¹⁹ Veng Yerusaliem eue, nyiex dee ot Siyiex, koe ka sigreung maix heue. Haleluya!

¹ Ceu pui kuceu khawmuik eue, yaogyaw ka Siyiex heue. Doeh ru ceu pui khawmuik eue, yaogyaw ka Nawh Cao heue. ² Grawh grawng nawh, krax caux rhawm Nawh ka ex kied ting lhaong mai sijax mukheu Siyiex mawh pa kaux cong leeing ju heue. Haleluya!

¹ Yaogyaw ka bwanson Siyiex, mawh kheu Nawh Cao mawh pa jiet mhawm mai krax caux rhawm Nawh koe jheung jheung heue. ² Kieh ceu pui Isarelax rieb ti teei ah nin, "Kieh krax caux rhawm Nawh Cao koe jheung jheung liak." ³ Kieh ru Arun rieb ti teei ah nin, "Kieh krax caux rhawm Nawh Cao koe jheung jheung liak." ⁴ Kieh can pui pa lhat graung ka Siyiex, rieb ti teei mai ah nin, "Kieh krax caux rhawm Nawh Cao koe jheung jheung liak." ⁵ Yam ot aux ka daux dee sikhawp sikhiep, aux kok yo ka Siyiex mai Nawh pawk lox aux mai kieh aux ot ka dee vieh va heue. ⁶ Siyiex ot plak aux mai aux tak ang lhat graung, kawn pui tak chix yuh ka mawx ka aux? ⁷ Siyiex ot ka plak aux mai mawh Cao pa teem aux, aux tak grum naog ceu pa lo ka daux pui pa koeng ka aux heue. ⁸ Pa deuh rhawm ka Siyiex, nie lheu mhawm khaing pa deuh rhawm ka paox kawn pui heue. ⁹ Pa deuh rhawm ka Simiang Siyiex nie lheu mhawm khaing pa deuh rhawm ka laux Simiang heue. ¹⁰ Viang pui khawmuik rob vung viang aux kawx, aux tak deuh rhawm ka ceu kaux Siyiex mai yuh kix laux leeing heue. ¹¹ Kix hoik rob vung viang aux, viang kix rob vung viang aux kawx, aux tak deuh rhawm ka ceu kaux Siyiex mai yuh kix laux leeing heue. ¹² Viang kix rob vung viang aux, awm phung hia kawx, tak yeet hu awm pang kat pa gleeing ka ngu heue. Aux tak deuh rhawm ka ceu kaux Siyiex mai yuh kix laux leeing heue. ¹³ Viang maix yuh lung mai nyhot aux goh kawx, Siyiex mawh Cao teem aux heue. ¹⁴ Siyiex mawh riang rao aux mai aux tak rhax lai grawng pa taoh Nawh aux heue. ¹⁵ Lox pa gaux rhawm mai lox grawng krax taoh koe ka dee ot pui pa rahsee heue. Taix khawn dawm Siyiex mawh pa ting riang rao heue. ¹⁶ Siyiex yaog taix khawn dawm tix mai taix khawn dawm Siyiex mawh pa ting riang rao heue. ¹⁷ Aux tak ang yum mai yam kawn im ju aux, aux tak baox krai grawng ceu pa hoik yuh Siyiex heue. ¹⁸ Viang Siyiex hoik sivied ti gau aux tom yaox jhawm kawx, Nawh ang nyang tawx aux yum. ¹⁹ Paoh siviex pa rahsee ka son aux mai aux tak sang laig ti yaogyaw bwanson Siyiex heue. ²⁰ In mawh siviex Siyiex, can pui pa rahsee khaing, pa pon ti laig heue. ²¹ Aux tak yaogyaw ka Maix, grawh grawng nawh, Maix hoik nghiet ka lox aux mai hoik taoh ka aux heue. ²² Simaox pa hoik tik pui pa yuh nyiex, sidah khaix pon ti mawh kaing ka daog heue. ²³ Grawng in mawh ceu pa hoik yuh Siyiex heue. Mawh ceu pa daox am ka ngai ex heue. ²⁴ Singaix in mawh singaix pa hoik kieh Siyiex ex gaux rhawm ka daux Nawh Cao heue awx. ²⁵ Siyiex eue, taoh ka ex liak, ex khyox khaw ka Maix, Siyiex eue, tawx bwanson liak, ex khyox khaw ka Maix heue. ²⁶ Kieh kaw pa hoek ka daux ceu kaux Simiang koe bwanson liak. Ex ot ka daux nyiex Siyiex mai yaogyaw ka Maix heue. ²⁷ Siyiex mawh Siyiex Cao pa ploi pa riang hoek ka ex heue. Teei maox phyawk ka to ceu pa tan lu mai sigang ka rung khu dee tan. ²⁸ Maix mawh Siyiex ex mai ex tak yaogyaw ka Maix heue. Maix mawh Siyiex ex mai ex tak yaogyaw Maix ting heue. ²⁹ Yaogyaw ka bwanson Siyiex, mawh kheu Nawh mawh pa jiet mhawm mai krax caux rhawm Nawh koe jheung jheung leeing ju heue.

¹ Can pui pa grum hawt ka beenli Siyiex khankix, koe bwan son heue. ² Can pui pa priex ka sakse pa kham Nawh khankix mai pui pa viex khawm rhawm tix mai sawg ka Nawh, koe bwanson heue. ³ Kix ang chix yuh phimap, viang mawh nan kix hu hoek ka daux krax Nawh heue. ⁴ Nawh Cao hoik tawx hoik gau lox tawm beenli sonsang cuca ex ti hawt twah klaung heue. ⁵ Kieh daux krax pa hu aux kaux cong mai sonsang pon ti hawt lox tawm beenli Maix khankix liak. ⁶ Yam hawt aux ti yuh ka lox tawm beenli Maix khawmuik, kieh aux luan khaing krax pa kaig tua liak. ⁷ Khaix hoik gau aux ti tawng ka krax pa rahsee Maix, aux tak yaog yaw Maix ka rhawm pa rahsee tix heue. ⁸ Aux tak hawt ti yuh ka lox tawm beenli Maix khankix heue. Paw lai tik vud aux liak. ⁹ Pui pa awn ju khankix, chix priex krax hu tix yuh ka mawh, yuh satix kheu gumlox Nawh Cao heue. ¹⁰ Aux viex khawm rhawm tix, sawg ka Maix heue. Paw kieh aux lud hu khaing lox tawm beenli Maix liak. ¹¹ Aux hoik priex gumlox Maix ka daux rhawm tix, son ang sang lud ka Maix heue. ¹² Siyiex eue, Maix koe bwanson heue. Gau aux ka lox tawm beenli Maix liak. ¹³ Aux kieh jheeh tix sidiex ka grawng pa kaoh khaing daux jheeh Maix khawmuik heue. ¹⁴ Aux gaux rhawm ka daux krax pa kham sakse khankix, awm pa pon aux kraung khrai kuceu khawmuik heue. ¹⁵ Aux tak keud ka grawng pa hoik sidiex gau Maix khankix mai jhak ka daux krax pa hu Maix khankix heue. ¹⁶ Aux tak gaux rhawm ka daux lox tawm beenli Maix khankix mai ang doh pi awm ka gumlox Maix heue. ¹⁷ Yuh bwanson ka aux, yam kawn im ju aux mai sonsang pon hawt aux gumlox Maix heue. ¹⁸ Paoh ngai aux, sonsang chix yaox aux ka ceu pa daox am, ka daux beenli Maix heue. ¹⁹ Aux mawh nyo sinie ka piang haktiex in, paw lai mox lox tawm beenli Maix khaing aux liak. ²⁰ Rhawm aux bih hu, kheu simie ti yaox ka krax prawng ca Maix ku jheung jheung heue. ²¹ Nawh Cao sivied tix gau ka pui pa ting rhawm mai pa yaox ti kham geu ka lox pa jhax lawg kheu cha nie luan yuh ka lox tawm beenli Maix khankix heue. ²² Kieh aux luan khaing pui pa salao mai pa ah lox pa ang cee ang cag, kheu hawt aux ka sakse pa kham Maix heue. ²³ Simiang khankix, ot tang plak briex ti kum grawng aux, viang mawh nan, aux mawh siliex Maix keud grawng lox tawm beenli Maix khankix heue. ²⁴ Grawng pa kham Maix ti deuh sakse khankix, mawh dee gaux rhawm mai pa tawx krax keud krax sawn ka aux heue. ²⁵ Ju aux ot ka daux phawng tiex mai kieh aux im ju awm pa koe gumlox Maix liak. ²⁶ Aux tak krai jhawm ceu pa hoik yuh aux khankix, Maix hoik nghiet ka lox aux mai Maix gau aux ka lox tawm beenli Maix liak. ²⁷ Kieh aux tawng daux krax pa sidiex gau Maix liak, phan yuh nan, aux doh keud ka ceu pa daox am pa hoik yuh Maix khankix heue. ²⁸ Rhawm aux sijieh mai teh hu kheu krax pa laux rhawm lauxrhi heue. Kieh aux kaux cong awm pa koe gumlox Maix liak. ²⁹ Kieh aux gwieh hu khaing krax pie lhen mai caux rhawm tawx lox tawm beenli Maix ka aux liak. ³⁰ Aux hoik laug ti teei ka krax sijax mukheu Maix mai aux hoik priex ka krax pa prawng ca Maix ka sivoe ngai aux heue. ³¹ Aux hoik priex ti hawt ka grawng ceu pa hoik kham sakse khankix, Siyiex eue, paw kieh aux hoek krax pa kaig tua liak. ³² Aux tak leue tix hawt ka daux krax lox tawm beenli Maix, yam kieh Maix aux koe cuyi pingnya heue. ³³ Siyiex eue, gau aux ka daux krax lox tawm beenli Maix liak, aux tak hawt tom sidah heue. ³⁴ Kieh aux tawng cuyi pingnya Maix liak. Aux tak hawt ka lox tawm beenli Maix mai viex khawm rhawm rhi tix mai hawt yuh heue. ³⁵ Thong aux hu ka daux krax lox tawm beenli Maix, aux moh ka daux krax an heue. ³⁶ Kieh aux koe rhawm rhi, ka grawng ceu pa kham sakse, lheu khaing pa koe rhawm pa mi pa koe liak. ³⁷ Kieh ngai aux via khaing pa ang koe bwanson tidtix mai kieh aux im ju ka daux krax Maix liak. ³⁸ Kieh gumlox Maix kaux cong ka siliex pa lhat graung ka Maix khankix liak. ³⁹ Kieh ceu pa salao mai pa lhat graung aux grai hu liak. Krax pa prawng ca Maix mawh pa mhawm heue. ⁴⁰ Aux krox ti nghiet ka lox pa sidiex gau Maix khankix heue. Kieh aux im ju ka beenli pa rahsee Maix liak. ⁴¹ Siyiex eue, kieh krax caux rhawm Maix mai bwanson krax taoh Maix hoek ka piang aux, awm pa koe gumlox Maix liak. ⁴² Mawh kheu nan, sonsang pon aux ti pawk lox pa salao pui khankix, kheu deuh aux rhawm ka gumlox Maix heue. ⁴³ Paw lai teei lox sijax mukheu lih khaing daux jheeh aux, mawh kheu krox jun aux ka krax prawng ca Maix heue. ⁴⁴ Aux ang lai laux lee mai hawt ti yuh lox tawm beenli Maix jheung jheung heue. ⁴⁵ Aux chawk cheng ti sawg ka lox pa sidiex gau Maix khankix mai aux tak yaox ti hu ka daux pa vieh pa ang koe pa tiebtie heue. ⁴⁶ Aux tak krai grawng ceu pa hoik kham sakse khankix, ka simiang khankix mai ang koe krax pa kaig tua. ⁴⁷ Aux tak gaux rhawm ka daux lox tawm beenli Maix ka pa moh aux khankix heue. ⁴⁸ Aux tak yaog ka taix tix, hu ka lox tawm beenli Maix pa moh aux mai pa doh keud aux ka lox tawm beenli Maix khankix heue. ⁴⁹ Doh keud doh sawn ka gumlox pa hoik deuh Maix ka aux, grawng pa kieh Maix aux krox jun liak. ⁵⁰ Mawh kheu gumlox Maix aux yaox ti im ju, kheu gumlox an, aux koe krax nyawm rhawm yam yaox aux krax pa kha rhawm heue. ⁵¹ Viang pui pa ting rhawm rhi khankix salao ka aux kawx, aux ang doh tik vud lox tawm beenli Maix. ⁵² Siyiex eue, aux doh keud ka krax prawng ca Maix tom dix mai kieh tokaux aux nyawm rhawm tiru heue. ⁵³ Aux kied song rhawm ka pui pa nieb yuh khankix, mawh kheu tik kix ka lox tawm beenli Maix khankix heue. ⁵⁴ Lox tawm beenli Maix khankix, mawh grawng lox rhax ka daux nyiex yam mawh aux nyo heue. ⁵⁵ Siyiex eue, aux doh keud ka ceu kaux Maix bawg yam ponsawm mai hawt ka lox tawm beenli Maix heue. ⁵⁶ Mawh kheu nghiet aux ka lox pa sidiex gau Maix khankix, aux tom koe riang heue. ⁵⁷ Siyiex eue, Maix mawh son aux, aux hoik krai ti deuh, aux tak sang nghiet gumlox Maix khankix heue. ⁵⁸ Aux khyox khaw ka Maix, khawm rhawm rhi tix mai kieh aux pon bwanson Maix mai krax caux rhawm Maix, awm pa koe gumlox Maix liak. ⁵⁹ Yam keud aux grawng krax pa hu aux khankix, caong aux deeh tieh ti hu ka grawng pa hoik kham sakse heue. ⁶⁰ Aux ang lai koi, nied tix hawt yuh ka lox tawm beenli Maix heue. ⁶¹ Viang pui pa ang rahsee rob vung viang aux kawx, aux ang doh pi awm ka lox tawm beenli Maix heue. ⁶² Yam jhak aux ka krax prawng ca Maix hawt beenli khankix, aux kaoh yam greung sawm mai yaogyaw ka bwanson Maix heue. ⁶³ Aux yuh paox pie ka pui pa lhat graung ka Maix mai pui pa nghiet ka lox pa sidiex gau Maix khankix heue. ⁶⁴ Siyiex eue, krax caux rhawm Maix hoik naog ka piang haktiex mai gau aux ka lox tawm beenli Maix liak. ⁶⁵ Siyiex eue, Maix yuh bwanson ka siliex Maix awm pa koe gumlox Maix heue. ⁶⁶ Tawx pa tawng pa yung cuyi pingnya pa mhawm ka aux, kheu aux yum rhawm Ka lox tawm beenli Maix heue. ⁶⁷ Ka sivoe ang aux nyang yaox ti kham geu krax kha rhawm, aux hoik lud krax hu tix heue. Viang mawh nan yam in, aux hoik deeh hawt ka gumlox Maix heue. ⁶⁸ Maix koe rhawm pa mhawm mhiem mai rhawm pa chix yuh bwanson heue. Gau aux ka lox tawm beenli Maix liak. ⁶⁹ Viang pui ting rhawm ting rhi khankix ot tang plak mai keud lox pie lhien kawx, aux tak viex khawm rhawm rhi mai priex ti hawt gumlox pa sidiex gau Maix heue. ⁷⁰ Rhawm kix hoik awm lon bee, phan mawh aux, gaux rhawm gaux rhi ka lox tawm beenli Maix heue. ⁷¹ Kra pa kha rhawm aux, mawh pa ting bwanson, son aux grawh grawng nawh, sonsang gau aux ka lox tawm beenli Maix heue. ⁷² Lox tawm beenli pa kaoh khaing jheeh Maix nie lheu mhawm khaing mau khri kaing rheng, kaing mheen ka son aux heue. ⁷³ Taix Maix hoik yuh aux mai kieh aux mawh pakpeung tix mai kieh aux tawng krax tawng yung sonsang chix gau aux lox tawm beenli Maix liak. ⁷⁴ Pui pa lhat graung ka Maix khankix, yam yaox kix ka aux gaux rhawm, mawh kheu krox jun aux ka gumlox Maix heue. ⁷⁵ Siyiex eue, aux tawng grawng krax prawng ca Maix mawh pa mawh meh mai pa kieh Maix aux yaox krax kha rhawm khaw mai sijax mukheu Maix heue. ⁷⁶ Aux rawg mhaing ka Maix, awm koe lox mukheu Maix, tawx krax caux rhawm Maix kieh aux nyawm rhawm liak. ⁷⁷ Kieh krax caux rhawm Maix hoek ka piang aux mai kieh aux im ju liak. Grawh grawng nawh, aux gaux rhawm ka lox tawm beenli Maix heue. ⁷⁸ Kieh pui pa ting rhawm rhi khankix kaig tua liak. Mawh kheu kix nieb yuh pa ang rahsee ka aux, phan mawh aux, doh keud ka lox pa sidiex gau Maix heue. ⁷⁹ Pui pa lhat graung ka Maix mai pui pa tawng ka Maix, sakse pa kham Maix ti deuh khankix tak deeh hoek ka aux heue. ⁸⁰ Kieh rhawm aux grum naog ka lox tawm beenli Maix, kieh aux luan khaing krax pa kaig tua liak. ⁸¹ Ju aux krox ju ka bwanson krax taoh Maix mai aux iak riang hu heue. Viang mawh kawx nan, aux krox jun ka gumlox Maix heue. ⁸² Ngai aux krox jun ka gumlox Maix mai iak riang hu mai Maix tak tawx krax nyawm rhawm ka aux bawg yam lai mawx? ⁸³ Aux hoik awm singiien rawm pa krat singao, viang mawh nan, aux ang doh pi awm ka lox tawm beenli Maix heue. ⁸⁴ Aux kawn sang yaox ti ot bawg yam miex grheung? Maix tak prawng ca ka pui pa tuktiak tukte ka aux lai mawx? ⁸⁵ Pui pa ting rhawm mai pa lheu ka lox tawm beenli Maix khankix, hoik kaong daux ka son aux heue. ⁸⁶ Lox tawm beenli Maix khawmuik mawh pa grum mai sijax mukheu heue. Kix nieb tuktiak tukte ka aux, teem ka aux liak. ⁸⁷ Kix dex teei ti tik aux khaing piang haktiex, viang mawh nan, aux ang tik ka lox pa sidiex gau Maix heue. ⁸⁸ Kieh aux im ju awm krax caux rhawm Maix liak. Aux tak priex ti hawt ka gumlox pa kham Maix ka jheeh tix heue. ⁸⁹ Siyiex eue, gumlox Maix kaux cong ka piang raoma jheung jheung heue. ⁹⁰ Sijax mukheu Maix kaux cong piang ceu pui leeing ju heue. Maix hoik phan haktiex mai kieh nawh kaux cong jheung jheung heue. ⁹¹ Can pa koe khawmuik mawh siliex Maix mai krax prawng ca Maix kaux cong tom hoek singaix heue. ⁹² Phan aux ang gaux rhawm ka beenli Maix, aux hoik dawg laux leeing yam yaox aux krax kha rhawm heue. ⁹³ Aux ang pi awm ka ceu pa sidiex gau Maix tix bawg kawx, grawh grawng nawh, Maix kieh aux im ka lox beenli Maix heue. ⁹⁴ Aux mawh cie Maix heue. taoh ka aux, mawh kheu sawg aux ka lox pa sidiex gau Maix heue. ⁹⁵ Pui pa ang rahsee khankix, kix pau tix sang yuh aux laux leeing heue. Viang mawh kawx nan, aux tak doh keud ka grawng pa kham sakse heue. ⁹⁶ Aux hoik grum yaox dee sidah kuceu khawmuik mai gumlox beenli Maix mawh pa kied ting kied vieh heue. ⁹⁷ Aux kied moh ka lox tawm beenli Maix sigrien sigre mai aux doh keud mai lih rhawm ka leeing lang singaix heue. ⁹⁸ Lox tawm beenli Maix khankix, kieh aux nie lheu koe cuyi pingnya khaing pui pa koeng ka aux khankix mai beenli an, kaux cong mai aux jheung jheung heue. ⁹⁹ Aux nie lheu tawng khaing sara cao gau tix mawh kheu doh keud aux ka pa kham sakse heue. ¹⁰⁰ Mawh kheu priex aux tix hawt ka lox pa sidiex gau Maix mai nie lheu koe krax tawng yung khaing pui pa riex ju khankix heue. ¹⁰¹ Aux tik ka ceu pa ang mhawm mai priex tix hawt ka gumlox Maix heue. ¹⁰² Aux ang tang hu khaing krax prawng ca Maix, mawh kheu hoik gau Maix ka aux heue. ¹⁰³ Gumlox Maix sidaing tie ka daux ghok aux mai nie lheu tie khaing rawm hia ka daux jheeh aux heue. ¹⁰⁴ Krax tawng krax yung aux, haok hwan, mawh kheu lox pa sidiex gau Maix mai aux koeng ka krax pa ang mawh ang meh khankix heue. ¹⁰⁵ Gumlox Maix mawh kawk ngu sivoe caong aux mai kieh krax pa hu aux riang heue. ¹⁰⁶ Aux hoik tiextu ah nin, "Aux tak priex ti hawt krax prawng ca Maix rahsee heue." ¹⁰⁷ Siyiex eue, aux kied kha rhawm tix, kieh aux im ju awm pa koe gumlox Maix heue. ¹⁰⁸ Siyiex eue, aux khyox khaw ka Maix rieb ti teei ka krax pa tan lu aux khawm rhawmrhi mai tokaux jheeh jhai tix liak. Gau aux ka krax prawng ca Maix liak. ¹⁰⁹ Ju aux koe ka daux taix Maix jheung jheung heue. Viang mawh kawx nan, aux ang pi awm ka beenli Maix heue. ¹¹⁰ Pui pa ang rahsee khankix, hoik taong ti deuh kie ka son aux heue. Viang mawh kawx nan, aux ang lud hu ka daux krax lox pa sidiex gau Maix heue. ¹¹¹ Aux rieb ti teei ka pa kham Maix ti deuh mhai sakse khankix, mawh son sin tokaux aux jheung jheung mai ceu ankix kieh rhawm aux gaux rhawm heue. ¹¹² Aux viex rhawm ti hawt ka lox tawm beenli Maix tom sidah jheung jheung heue. ¹¹³ Aux koeng ka pui pa koe rhawm ra mu, pa nieb yuh khankix mai aux moh ka beenli Maix heue. ¹¹⁴ Maix mawh dee mox aux mai kraung naing pa tiebtie aux mai krox jun ka gumlox Maix heue. ¹¹⁵ Pui pa yuh phimap khankix eue, lih hu khaing aux heue. Tak priex ti hawt ka lox tawm beenli Siyiex heue. ¹¹⁶ Joh jhan aux awm koe gumlox Maix mai kieh aux im ju liak. Paw kieh aux hoek krax pa kaig tua ka pa krox jun aux Maix liak. ¹¹⁷ Teem coi ka aux sonsang pon krax pa nyawm rhawm mai tak hawt ka lox tawm beenli Maix jheung jheung heue. ¹¹⁸ Maix tik vud ka pui pa lud krax ka lox tawm beenli Maix khankix heue. Pa keud kix mawh pa pie lhen heue. ¹¹⁹ Maix deuh pui haktiex pa ang rahsee khankix khawmuik mawh kraung pa dah jum heue. Mawh kheu in, aux tom moh ka pa kham mhai sakse heue. ¹²⁰ Hauk haw aux pruh kheu kied lhat kied graung ka Maix, kheu krax prawng ca Maix heue. ¹²¹ Aux yuh awm krax prawng ca mai prawng ca rahsee heue. Paw lai tik vud aux ka daux tawm taix pui pa tuktiak tukte ka aux liak. ¹²² Maix rieb ti teei ka siliex Maix ka daux pa mhawm liak. Paw kieh pui pa ting rhawm khankix, tuktiaktukte ka siliex Maix liak. ¹²³ Ngai aux hoik iak riang ka pau tix bwanson krax taoh Maix mai gumlox pa rahsee Maix heue. ¹²⁴ Yuh ka aux awm koe Maix krax caux rhawm mai gau aux ka lox tawm beenli Maix liak. ¹²⁵ Aux mawh siliex Maix heue. Cauxrhawm tawx krax tawng yung ka aux mai kieh aux tawng pa kham sakse khankix liak. ¹²⁶ Bawg yam sang prawng ca Siyiex hoik hoek, grawh grawng nawh, kix hoik tik ka beenli Maix heue. ¹²⁷ Phan mawh aux, moh ka lox tawm beenli Maix, nie lheu khaing khri pa hoik thi heue. ¹²⁸ Mawh kheu in, aux priex ka lox pa sidiex gau Maix khawmuik, mawh pa rahsee mai koeng ka krax pa ang mawh meh heue. ¹²⁹ Grawng pa kham sakse khankix mawh ceu pa daox am mai ju aux priex ti hawt heue. ¹³⁰ Gumlox Maix mawh pa plak jhi pa riang ka pui pa ang tawng tidtix khankix, kieh deeh tawng heue. ¹³¹ Aux ang jheeh tix mai taug mao ka simie ti pon ka lox tawm beenli Maix heue. ¹³² Yuh bwanson jhak ka aux, awm pa sax yuh Maix ka kix pui pa moh ka ceu kaux Maix liak. ¹³³ Awm koe gumlox Maix, kieh diang caong aux kaux cong liak. Paw kieh phimap ting ka piang aux liak. ¹³⁴ Taoh aux lih khaing daux pui pa tuktiak tukte ka aux liak. Aux tak priex ti hawt ka lox sidiex gau Maix heue. ¹³⁵ Kieh pakngai Maix jhan riang ka piang aux mai gau aux ka lox tawm beenli Maix khankix liak. ¹³⁶ Mawh kheu ang kix priex ti hawt ka beenli Maix, rawm ngai aux lih awm rawm klawng heue. ¹³⁷ Siyiex eue, Maix mawh pa rahsee heue. Grawng krax prawng ca Maix khankix kawx, mawh pa rahsee heue. ¹³⁸ Sakse pa kham Maix ti deuh khankix, mawh pa khaw mai beenli pa rahsee mai pa kaux sijax tom nie heue. ¹³⁹ Aux sung sang laux rhawm tix, kheu pui pa koeng ka aux khankix, pi awm ka lox beenli Maix heue. ¹⁴⁰ Mawh kheu gumlox Maix mawh pa kied singax singeh mai mawh pa khaw rhawm siliex Maix khankix kah heue. ¹⁴¹ Aux mawh pui pa iak, pa yaox ti kham geu ka pa nieb yuh pui pa ang cee ang cag kah heue. Viang mawh kawx nan, aux ang pi awm ka gumlox pa sidiex gau Maix khankix heue. ¹⁴² Pa rahsee Maix mawh pa rahsee leeing ju heue. Beenli Maix mawh beenli pa kaux sijax heue. ¹⁴³ Viang pa nu pa khawm mai pa kha rhawm hoek ka piang aux kawx, lox tawm beenli Maix khankix, kieh aux gaux rhawm heue. ¹⁴⁴ Grawng pa kham sakse khankix mawh pa rahsee jheung jheung heue. Tawx krax tawng yung mai kieh aux im ju liak. ¹⁴⁵ Siyiex eue, aux viex khawm rhawm khawm rhi ti kok yo, nghiet ka lox aux liak. Aux tak priex ti hawt ka lox tawm beenli Maix heue. ¹⁴⁶ Aux kok yo ka Maix, taoh aux liak mai aux tak priex ti hawt sakse pa kham Maix khankix heue. ¹⁴⁷ Aux kok yo ka Maix, ka ang praix nyang riang, aux krox jun ka gumlox Maix heue. ¹⁴⁸ Ka sivoe ang ponsawm nyang bax luan, aux siduad mai doh keud ka gumlox Maix heue. ¹⁴⁹ Siyiex eue, awm koe krax caux rhawm Maix nghiet ka lox aux liak. Kieh aux im ju ka krax prawng ca Maix liak. ¹⁵⁰ Pui pa ang mhawm, pa keud ti yuh pa ang mhawm khankix hoik hoek dex aux, kix mawh pa singai khaing beenli Maix heue. ¹⁵¹ Siyiex eue, Maix ot dex aux mai lox tawm beenli Maix khawmuik mawh pa kaux sijax heue. ¹⁵² Aux hoik tawng pa kham sakse khankix, mawh pa kaux cong jheung jheung tom didix heue. ¹⁵³ Jhak ka pa kha rhawm mai taoh aux liak, aux ang pi awm beenli Maix heue. ¹⁵⁴ Priex aux mai taoh aux liak, kieh aux im ju awm pa koe gumlox Maix liak. ¹⁵⁵ Krax taoh Maix singai khaing pui pa ang rahsee khankix, mawh kheu ang kix sawg ka lox tawm beenli Maix khankix heue. ¹⁵⁶ Siyiex eue, rhawm pa caux rhawm Maix, koe tom nie heue. Kieh aux im ju awm pa khaw mai krax prawng ca Maix liak. ¹⁵⁷ Pui pa tuktiaktukte ka aux mai pui pa lah cha ka aux kied nie heue. Viang mawh kawx nan, aux ang via hu khaing grawng pa kham sakse khankix heue. ¹⁵⁸ Yam yaox aux ka pui pa ang kaux sijax khankix, aux song rhawm heue. Grawh grawng nawh, kix ang nghiet ka gumlox Maix heue. ¹⁵⁹ Jhak mai keud grawng pa moh aux, ka lox pa sidiex gau Maix khankix liak. Siyiex eue, kieh aux im ju awm pa koe pa caux rhawm Maix liak. ¹⁶⁰ Gumlox Maix khawmuik mawh pa mawh meh heue. Pa prawng ca Maix ti deuh khawmuik mawh pa kaux cong jheung jheung heue. ¹⁶¹ Viang simiang khankix tuktiaktukte aux ka pa ang tie koe grawng kawx, rhawm aux lhat graung ka gumlox Maix heue. ¹⁶² Aux gaux rhawm ka gumlox Maix, awm pui pa yaox ka kraung khrai pa ngawh heue. ¹⁶³ Aux seeing brai mai nieh mhong ka lox pie lhen heue. Viang mawh kawx nan, aux moh ka lox beenli Maix heue. ¹⁶⁴ Aux yaogyaw ka Maix, tix singaix aliah bawg, kheu krax prawng ca Maix mawh pa rahsee heue. ¹⁶⁵ Pui pa moh ka gumlox beenli Maix khankix, ang koe krax laux rhawm mai pon pa nhim tom nie heue. ¹⁶⁶ Siyiex eue, aux krox jun ka bwanson krax taoh Maix mai priex ti hawt lox tawm beenli Maix heue. ¹⁶⁷ Ju aux priex ti hawt ka pa hoik kham Maix ti deuh mhai sakse khankix mai aux kied moh sigrien sigre heue. ¹⁶⁸ Aux priex ti hawt ka lox pa sidiex gau Maix mai pa kham Maix ti deuh sakse khankix heue. Daux krax aux khawmuik koe sivoe Maix heue. ¹⁶⁹ Siyiex eue, kieh lox pa kok yo aux hoek sivoe ngai Maix liak. Tawx krax tawng yung ka aux awm pa koe gumlox Maix liak. ¹⁷⁰ Kieh lox pa rawg pa mhaing aux hoek sivoe ngai Maix liak. Taoh ka aux awm pa koe gumlox Maix liak. ¹⁷¹ Jheeh aux tak ah lox yaogyaw, mawh kheu gau Maix aux ka lox tawm beenli Maix khankix heue. ¹⁷² Dak aux tak ah lox rhax ka gumlox Maix, mawh kheu lox tawm beenli Maix mawh pa rahsee heue. ¹⁷³ Kieh taix Maix teem ka aux, mawh kheu aux laug ti teei ka lox sidiex gau Maix heue. ¹⁷⁴ Siyiex eue, aux krox jun ka bwanson krax taoh Maix heue. Aux gaux rhawm gaux ka daux beenli Maix heue. ¹⁷⁵ Kieh aux im ju mai yaogyaw ka Maix mai teem ka aux ka krax prawng ca Maix liak. ¹⁷⁶ Aux hoik lud krax hu, awm yung pa hoik grai hu tix mu mai sawg ka aux liak. Aux ang pi awm ka lox tawm beenli Maix heue.

¹ Aux kok yo ka Siyiex yam yaox aux krax kha rhawm mai Nawh nghiet ka lox aux heue. ² Siyiex eue, taoh ju aux lih khaing jheeh pui pa ang koe sijax mai khaing dak pa pie lhen liak. ³ Dak pa pie lhen eue, Nawh Cao tak tawx patix ka maix, Nawh tak baox tawx sonsang baox pon maix patix, ⁴ Nawh Cao tak awm te lawm pui pa ting riang mai gaox ngu pa kied hax heue. ⁵ Aux koe krax kha rhawm, yam ot ka daux haktiex Mesiek mai ka daux nyiex gox Keda heue. ⁶ Ju aux hoik rheung ot tau mai pui pa koeng ka pa nhim heue. ⁷ Aux moh ka plak pa nhim, phan aux krai yuh nan, kix simie ti puing naing heue.

¹ Aux maong ti jhak ka gawng lua khankix, krax pa teem aux kaoh khaing dee mawx? ² Krax pa teem aux kaoh khaing Siyiex Cao pa yuh raoma mai haktiex heue. ³ Nawh Cao ang kieh caong maix cang klad mai Cao pa pau maix ang it heue. ⁴ Jhak heue, Cao pa pau ka ceu pui Isarelax ang gaing ang it heue. ⁵ Siyiex mawh Cao pa priex maix heue. Siyiex mawh veei dee deuh maix rhawm mai ot plak taix khawn dawm maix heue. ⁶ Yam ponngaix tawx singaix, yam ponbo tawx khix mai: ang kieh maix krox tix heue. ⁷ Siyiex tiebtie ka pa ang mhawm pa caox khawmuik mai priex ka ju maix heue. ⁸ Siyiex tak priex yam lih yam laig maix, jah tom yam in mai hu sivoe ngai ang jud ang jai heue.

¹ Yam ah kix ka aux ex hu ka daux nyiex Siyiex ex, aux kied koe krax gaux rhawm heue. ² Veng Yerusaliem eue, caong ex cung ka daux siviex maix khankix heue. ³ Veng Yerusaliem, hoik yuh pa mhawm, pa awm paox tix. ⁴ Ka daux veng an, awm pa koe lox tawm beenli ka ceu pui Isarelax pa mawh pui Siyiex, sonsang haok kix ti yaogyaw ka ceu kaux Siyiex tan heue. ⁵ Dangngeung dee prawng ca hawt beenli mai dangngeung ceu cad simiang Davit koe tan heue. ⁶ Rawg bwan sonsang yiien yawg veng Yerusaliem mai can pui pa moh ka veng an, tak pon pa nyawm rhawm heue. ⁷ Kieh pa yiien yawg koe ka guh veng maix mai kieh koe krax nyawm rhawm ka daux nyiex haw Maix liak. ⁸ Aux tak krai ah nin ka son puxaik mai paox grawm khankix, "Kieh pa yiien yawg koe ka daux maix liak." ⁹ Aux tak sawg bwanson son maix ka daux nyiex Siyiex heue.

¹ Aux maong ti jhak ka Siyiex pa ot ka piang meung raoma heue. ² Awm siliex khankix, maong ti jhak ka taix Simiang kix mai awm bun siliex khankix maong ti jhak ka taix miex simiang kix khankix, ex kawx maong ti jhak ka Siyiex tom pon ex bwanson krax caux rhawm Maix heue. ³ Siyiex eue, yuh bwanson caux rhawm ka ex liak. Mawh kheu hoik yaox ex ti kham geu ka krax pa kaig tua tom nie heue. ⁴ Ju ex hoik yaox ti kham geu ka pui pa nieb ah pa ang cee ang cag mai pa salao mai pui pa ting rhawm khankix, yuh ti kieh ex kaig tua tom nie heue.

¹ Ceu pui Isarelax ah nin, "Keud ti yaox phan Siyiex ang ot plak ex, ² pui pa koeng ka ex tang plak khankix, ³ Krax pa song rhawm kix lih mai hoik bleet ti ih ex khawm kaux khawm ju pleue. ⁴ Yam an, rawm khankix kheem ex mai rawm klawng khankix hoik jao hu ka piang ju ex pleue, ⁵ rawm klawng caox khankix hoik jao hu ka piang ju ex pleue." ⁶ Kieh Siyiex pa ang tawx ex hoek ka krax pa laux leeing ting bwan son heue. ⁷ Ju ex hoik pon ti luan hu, awm sim pa luan khaing maox jhawk pa taong kix, ex kawx hoik pon ti luan kheu hoik dud maox jhawk heue. ⁸ Cao pa teem ex koe ka daux ceu kaux Siyiex Cao pa yuh raoma mai haktiex heue.

¹ Pui pa deuh rhawm ka Siyiex kaux cong jheung jheung, awm gawng Zion ang chix gah greed tix bawg kawx heue. ² Awm rob gawng hawt vung viang veng Yerusaliem, Siyiex rob hawt pui Nawh khankix, jah tom yam in mai hu sivoe ngai leeing ju heue. ³ Pui pa rahsee khankix, tak ang pon ti yuh phimap mai krong pliah pui pa ang rahsee khankix ang lai pon ti giex kaing ka piang sin pui pa rahsee heue. ⁴ Siyiex eue, yuh bwanson ka pui pa mhawm mai pui pa rahsee daux rhawm khankix liak. ⁵ Pui pa lud hu ka krax pa kawk vawk khankix, Siyiex tak teei lih tau mai pui pa ang rahsee khankix heue. Kieh pa nhim koe tau mai ceu pui Isarelax liak.

¹ Yam kieh Siyiex pui Zion pa phyawk hu deeh hoek, ex awm ngie pui pa camaox heue. ² Yam an, jheeh ex grum naog ka krax nyiah mai dak ex grum naog ka lox rhax pa gaux rhawm heue. Pui tang ceu khankix kawx, ah nin, "Siyiex hoik yuh kaing pa ting son kix heue." ³ Siyiex hoik yuh kaing pa ting lhaong son ex mai ex kawx, koe krax gaux rhawm kah heue. ⁴ Siyiex eue, can ex pa hoik phyawk hu khankix kieh deeh hoek awm rawm klawng plak seh liak. ⁵ Pui pa jah rawm ngai mai rhuat simie khankix, tak gaux rhawm gaux rhi mai vawg nghox heue. ⁶ Pui pa jah rawm ngai mai viex simie lih hu sonsang rhuat, tak sang deeh viex lhiem nghox hoek khawm gaux rhawm tix tete heue.

¹ Phan Siyiex ang yuh nyiex, kix pa yuh mawh pa giex going heue. Phan Siyiex ang pau veng in, kix cao pa pau mawh pa giex going heue. ² Viang pex kaoh caocao mai ang it tom lha pon sawm kawx, viang khin kha tix ih priex kawx, ang koe bwanson. Siyiex tawx krax pa nyawm it ka pui pa moh Nawh khankix heue. ³ Can kawn praix pa keh khankix mawh bwan son, sin pa tawx Siyiex. Mawh totaix pa tawx Nawh Cao heue. ⁴ Kawn praix pa keh yam awn ju khankix, awm te pa koe ka daux taix pui pa kwa pa vao heue. ⁵ Pui pa naog mawk te ka kix, koe bwanson heue. Kix ang koe pa kaig tua mai: tak tieb tie ka pui pa koeng ka daux diang siviex heue.

¹ Pui pa lhat graung ka Siyiex mai pa hawt hu ka daux krax Nawh khankix, koe bwanson heue. ² Phan yuh nan maix tak yaox ti ih ka ceu pa yuh ka taix tix heue. Maix tak koe bwanson mai yaox ti ih mhawm mhawm heue. ³ Moeng maix tak awm nhu plix siiet pa plix tom nie, ka daux nyiex maix kawn praix maix rob vung viang pheen sawm maix, awm khaox sanlun pa sum ti deuh heue. ⁴ Pui pa lhat graung ka Siyiex khankix koe bwanson yuh nan heue. ⁵ Siyiex, tak ot ka piang gawng Zion mai nawb bwanson ka maix mai maix tak yaox bwanson pa pon veng Yerusaliem ka ju maix heue. ⁶ Tak sang kieh maix yaox ka kawn saux maix khankix heue. Kieh pa nhim koe ka piang ceu pui Isarelax liak.

¹ Ceu pui Isarelax ah nin, "Kix hoik tuktiaktukte aux, tom yam awn ju aux miex bawg nhieh, ² kix hoik tuktiaktukte aux, tom yam awn ju aux miex bawg nhieh, viang mawh nan kix ang pex aux." ³ Pui pa thai khankix, thai ka piang si-ang krawng aux, rhoi thai kied lang awm khaix mug heue. ⁴ Siyiex mawh pa rahsee heue. Nawh tat dud ka maox pui pa ang rahsee khankix heue. ⁵ Can pui pa koeng ka veng Zion khankix khawmuik, kieh kix hoek krax pa kaig tua mai deeh dak plak khaix liak. ⁶ Kieh kix awm rib pa kuah piang braux nyiex mai kieh kix lak kroh hu ka ang pui nyang reeig ti tik heue. ⁷ Pui pa vawg ka rib an, ang lai pon pie ti jhawp mai pui pa jhoi nawh kawx, ang pon ti glien heue. ⁸ Can pui pa lawng krax an, ang pon ti ah, "Kieh bwanson Siyiex hoek ka piang pex liak. Ex deuh rhawm ka ceu kaux Siyiex mai nawb bwan ka pex heue."

¹ Siyiex eue, aux ot ka dee raux dee nu mai kok yo ka Maix heue. ² Siyiex eue, veeh yhaok Maix, mhong ka lox aux mai nghiet ka lox pa rawg aux bwan liak. ³ Siyiex eue, phan Maix tiem ti deuh ka phimap ex, pui mawx pon ti cung sivoe Maix. ⁴ Pa chix ploi phimap mawh Maix, kieh ex lhat graung ka Maix heue. ⁵ Aux krox ka Siyiex, ju aux kawx, krox jun ka Maix heue. ⁶ Aux krox jun ka gumlox Maix mai ju aux kawx, krox jun ka Siyiex nie lheu khaing kix, pa krox jun yam bah riang praix ponngawb heue. ⁷ Ceu pui Isarelax eue, krox jun ka Siyiex liak, grawh grawng nawh, krax caux rhawm mai bwanson krax taoh koe mai Siyiex tom nie heue. ⁸ Nawh Cao taoh ti teei ceu pui Isarelax khaing daux phimap khawmuik heue.

¹ Siyiex eue, rhawm aux ang lhaong mai ngai aux kawx ang maong ti jhak mai aux ang hu, ang hoek, ka daux kaing pa ting pa ang keung ka tokaux tix heue. ² Aux hoik fah rhawm ka tokaux tix mai ot nhim awm kawn nyawm pa prah peuex teeh miex mai rhawm aux kawx, awm kawn nyawm pa prah peuex heue. ³ Can pui Isarelax eue, krox jun ka Siyiex jah tom yam in, hu sivoe ngai leeing ju heue.

¹ Siyiex eue, doh keud ka Davit, pa yaox nawh ti kham geu mai krax kha rhawm nawh liak. ² Nawh hoik tiextu tix ka Siyiex pa ting sibrawm pa krub ceu pui Yakop ah nin, ³ "Aux ang nyang laig ka daux nyiex dee ot tix, aux ang lai haok it ka piang ku dee it tix. ⁴ Ang kieh ngai it mai ang kieh siyieb ngai aux yip, ⁵ tom sidah ang aux nyang yaox nyiex dee ot Siyiex mai dee ot Siyiex pa ting sibrawm pa krub ceu pui Yakop kah heue. ⁶ Ex hoik mhong nyiex gox Siyiex an koe ka meung Epharat, ka daux tiagtu heue." ⁷ Laig ka daux nyiex bwan dee ot Nawh mai ex grux ngawng ti krub dex ngot dee deuh Nawh caong heue. ⁸ Siyiex eue, tokaux Maix mai teug sijax mukheu mai min plakngai sibrawm Maix haok ot ka dee ot Maix liak. ⁹ Kieh cao giex kaing li Maix khankix, ceep kraung pa rahsee mai kieh pui pa singaix Maix khankix rhax lai pa gaux rhawm liak. ¹⁰ Mawh kheu jhak Maix ka plakngai siliex Maix Davit mai paw lai tik plakngai kaw pa hoik groi Maix rawm bee ka liak. ¹¹ Lox sijax mukheu pa hoik tiextu Siyiex ka Davit mai Nawh ang yuh laux ka sijax an mai Aux tak sang kieh simie ceu cad maix mawh pa ngawm ka piang dang ngeung maix heue. ¹² Phan kawn praix maix priex ti hawt yuh ka lox tawm beenli Aux mai grawng pa hoik kham Aux sakse, pa hoik gau Aux ka maix khankix, kawn praix kix kawx, tak sang pon ti ngawm ka piang dang ngeung maix jheung jheung leeing ju heue. ¹³ Siyiex laug ti teei ka veng Zion mai khaw ka rhawm Nawh mai yuh mawh dee ot Nawh jheung jheung heue. ¹⁴ Veng in mawh, veng dee ot Aux jheung jheung, mawh kheu simie Aux ti ot ka daux veng in heue. ¹⁵ Aux tak nie lheu nawb bwanson, son pa ih ka nawh heue. Aux tak tawx pui pa hot sibhawm nawh ih pa ih tom sak heue. ¹⁶ Aux tak kieh cao giex kaing li nawh khankix, jawg tix ceep ka kraung krax taoh mai pui pa singax singeh nawh khankix, ah lox sinum mai ah lox rhax pa gaux rhawm heue. ¹⁷ Aux tak kieh rung lawm Davit lih tan heue. Aux hoik cox khre kawk ngu son kaw pa hoik groi Aux rawm bee heue. ¹⁸ Aux tak teei krax pa kaig tua ceep ka pui pa koeng ka nawh khankix mai teei mhok khri nawh pa pruh riang ceep ka piang kaing nawh heue.

¹ Puxaik pa ih rhawm rhi paox tix mai pa yuh paox pie ot tau, kied mhawm heue. Mai kied sidaing mhawm grang heue. ² Awm rawm bee pa hieh lih piang kaing Arun mai pa lih hu ka hauk jheeh nawh tom hoek ka ngawg sibex nawh heue. ³ Awm rawm ciex pa koe ka piang gawng Heramon mai pa lih hu ka gawng Zion heue. Ka dee an, Siyiex hoik prawng ca ti deuh bwanson pa mhawm pa im ju leeing ju heue.

¹ Siliex Siyiex pa pau ka daux nyiex Siyiex pon sawm khankix khawmuik eue, yaogyaw ka Siyiex heue. ² Yaog taix tix ka dee singax singeh mai yaogyaw ka Siyiex heue. ³ Kieh Siyiex Cao pa yuh raoma mai haktiex, ot ka piang gawng Zion mai nawb bwanson ka maix liak.

¹ Yaogyaw ka ceu kaux Siyiex heue. Siliex Siyiex khankix eue, yaogyaw ka Nawh heue. ² Pex pa cung ka daux nyiex Siyiex khankix mai pa pau ka jaong num nyiex Siyiex ex khankix eue, yaogyaw heue. ³ Mawh kheu Siyiex mawh pa jiet mhawm mai yaogyaw ka Siyiex heue. Rhax lai yaogyaw ka ceu kaux Nawh heue. Pa yuh nan mawh pa mhawm grang heue. ⁴ Grawh grawng nawh, Simiang hoik laug ti teei ka ceu Yakop son Nawh mai ceu pui Isarelax mawh kraung cie Nawh heue. ⁵ Aux tawng grawng Siyiex ex mawh Cao pa ting khaing siyiex khawmuik heue. ⁶ Siyiex an, awm pa simie Nawh, Nawh Cao hoik yuh raoma mai haktiex mai rawm sigrit sigra pa raux pa mox kudah kudee heue. ⁷ Nawh Cao kieh bhawm rawm haok ka dee sidah haktiex heue. Nawh Cao yuh pukplak praix pa viex lhiex mai Nawh Cao teei bhaung lih khaing daux teug kraung Nawh heue. ⁸ Nawh Cao plaux kawn Ai ka daux meung Ejiptux, jah ka pui tom hoek ka to brie heue. ⁹ Meung Ejiptux eue, Nawh ploi sakse grawng ceu pa daox am khankix, hoek ka maix, jah ka Pharaw mai siliex nawh mai pui nawh khawmuik heue. ¹⁰ Nawh Cao yuh ka ceu pui tom nie laux leeing mai simiang pa ting min pa mawh, ¹¹ Sihon simiang meung Amawrix mai Awgax simiang meung Bashan khankix yum mai yuh ka meung Khanan laux leeing khawmuik heue. ¹² Teei ti tawx haktiex an, mawh dee ot kix pa mawh sin pui Nawh Isarelax khankix heue. ¹³ Siyiex eue, ceu kaux Maix kaux cong jheung jheung mai Siyiex eue, ceu kaux Maix mawh pa doh keud ka ku ju leeing ju heue. ¹⁴ Siyiex prawng ca ka plak pui cie Nawh khankix mai doh keud ka son siliex Nawh khankix heue. ¹⁵ Riang grang pa krub pui tang ceu khankix, mawh mau, mawh khri heue. Mawh kraung pa yuh pui ka taix tix heue. ¹⁶ Koe jheeh kawx, ang chix sikah, kix koe ngai kawx, ang chix yaox, ¹⁷ mai kix koe yhaok kawx, ang chix mhong, ka daux jheeh kix ang koe ju toek bhawm lih, bhawm laig heue. ¹⁸ Cao yuh khawm cao pa deuh rhawm kah kix hoik awm paox tix heue. ¹⁹ Ceu pui Isarelax eue, yaogyaw ka Siyiex heue. Ceu pui Arun eue, yaogyaw ka Siyiex heue. ²⁰ Ceu pui Lewix eue, yaogyaw ka Siyiex heue. Pex pa lhat graung ka Siyiex khankix eue, yaogyaw ka Siyiex heue. ²¹ Kieh koe bwanson ka Siyiex pa ot ka daux veng Yerusaliem mai ka piang gawng Zion liak. Haleluya!

¹ Yaogyaw ka bwanson Siyiex, mawh kheu jiet mhawm Nawh mai krax caux rhawm Nawh koe jheung jheung leeing ju heue. ² Yaogyaw ka bwanson Siyiex, mawh kheu mawh Nawh pa ting ka piang siyiex khawmuik mai krax caux rhawm Nawh koe jheung jheung leeing ju heue. ³ Yaogyaw ka bwanson Simiang, mawh kheu mawh Nawh pa ting ka piang Simiang khawmuik mai krax caux rhawm Nawh koe jheung jheung leeing ju heue. ⁴ Yaogyaw ka Cao pa yuh ceu pa daox am tix kaux khaing, kheu koe krax caux rhawm Nawh jheung jheung leeing ju heue. ⁵ Nawh teei cuyi pingnya mai yuh raoma, mawh kheu krax caux rhawm Nawh koe jheung jheung leeing ju heue. ⁶ Nawh tawm haktiex ka piang rawm khankix, mawh kheu krax caux rhawm Nawh koe jheung jheung leeing ju heue. ⁷ Nawh yuh pa riang pa ting, mawh kheu krax caux rhawm Nawh koe jheung jheung leeing ju heue. ⁸ Nawh yuh singaix kieh mawh son pon singaix, mawh kheu krax caux rhawm Nawh koe jheung jheung leeing ju heue. ⁹ Nawh yuh khix mai simuing khankix, kieh mawh son ponsawm heue. Mawh kheu krax caux rhawm Nawh koe jheung jheung leeing ju heue. ¹⁰ Nawh plaux kawn Ai meung Ejiptux yum, mawh kheu krax caux rhawm Nawh koe jheung jheung leeing ju heue. ¹¹ Nawh taoh ceu pui Isarelax lih khaing kix, mawh kheu krax caux rhawm Nawh koe jheung jheung leeing ju heue. ¹² Nawh teei taix pa ting sibrawm mai nyeu plawng taix tix yuh nan, mawh kheu krax caux rhawm Nawh koe jheung jheung leeing ju heue. ¹³ Yam tiang kix rawm sigrit sigra Edom dud hu khawm ra plak, mawh kheu krax caux rhawm Nawh koe jheung jheung leeing ju heue. ¹⁴ Kieh ceu pui Isarelax khankix preeng hu ka daux rawm sigrit sigra, mawh kheu krax caux rhawm Nawh koe jheung jheung leeing ju heue. ¹⁵ Teei Pharaw mai cao giex kaing naing nawh khankix, goh ka daux rawm sigrit sigra Edom, mawh kheu krax caux rhawm Nawh koe jheung jheung leeing ju heue. ¹⁶ Nawh teei pui Nawh khankix hu tawx ka daux tiagtu, mawh kheu krax caux rhawm Nawh koe jheung jheung leeing ju heue. ¹⁷ Nawh yuh ka simiang ting khankix laux leeing, mawh kheu krax caux rhawm Nawh koe jheung jheung leeing ju heue. ¹⁸ Nawh teei simiang pa ting min plakngai khankix yum, mawh kheu krax caux rhawm Nawh koe jheung jheung leeing ju heue. ¹⁹ Nawh teei Sihon simiang meung Amawrix yum, mawh kheu krax caux rhawm Nawh koe jheung jheung leeing ju heue. ²⁰ Nawh teei Awgax simiang meung Bashan yum, mawh kheu krax caux rhawm Nawh koe jheung jheung leeing ju heue. ²¹ Nawh teei haktiex dee ot kix tawx sin ka kix, mawh kheu krax caux rhawm Nawh koe jheung jheung leeing ju heue. ²² Nawh teei ti tawx sin ka siliex Nawh ceu pui Isarelax khankix, mawh kheu krax caux rhawm Nawh koe jheung jheung leeing ju heue. ²³ Nawh doh keud ka ex, yam yaox ex ti ot dee tiiem, mawh kheu krax caux rhawm Nawh koe jheung jheung leeing ju heue. ²⁴ Nawh hoik taoh ex lih khaing daux tawm taix pui pa koeng ka ex, mawh kheu krax caux rhawm Nawh koe jheung jheung leeing ju heue. ²⁵ Nawh tawx ceu pa ih ka can pa koe khawmuik, mawh kheu krax caux rhawm Nawh koe jheung jheung leeing ju heue. ²⁶ Yaogyaw ka bwanson Siyiex, Cao raoma, mawh kheu krax caux rhawm Nawh koe jheung jheung leeing ju heue.

¹ Ex ngawm dex praok rawm klawng Babulon khankix mai doh keud ka veng Zion mai yiiem heue. ² Ting ex khankix, ex teei ti fak ka khaox siglai khankix ka dee an heue. ³ Grawh grawng nawh, ka dee an kix pa viex ex hu khankix, nhie ex rhax lai mai tuktiak ka ex, "Ah ex mhong lox pa gaux rhawm mai lox rhax pa rhax pex ka gawng Zion tix phuk ka ex liak." ⁴ Ex tak pon ah lox rhax Siyiex, ka meung tang dah yuh ka mawx? ⁵ Veng Yerusaliem eue, phan aux pi awm ka maix, kieh taix khawn dawm aux, pi awm ka pa chix tix liak. ⁶ Phan aux ang doh keud ka maix, phan aux ang teei ka veng Yerusaliem mai deuh ka dee mhawm, lheu khaing pa gaux rhawm pa ting aux kieh dak aux, kawb ka ghok aux liak. ⁷ Siyiex eue, doh keud ka singaix hoek yuh kix veng Yerusaliem laux, ceu pui Edom khankix ah nin, "Yuh nawh laux, yuh nawh laux, yuh laux tom hoek ka jaong num nawh heue." ⁸ Kawn bun Babulon eue maix tak sang hoek krax laux leeing heue. Pui pa deeh viied phimap ka maix awm pa hoik yuh maix ka ex, koe bwanson heue. ⁹ Pui pa teei kawn praix maix mai blok ka piang simaox, koe bwanson heue.

¹ Siyiex eue, aux tak viex khawm rhawm rhi tix yaogyaw ka Maix heue. Aux tak rhax lai yaogyaw ka Maix sivoe ngai siyiex kix heue. ² Aux tak grux gawng ti krub Maix ka daux nyiex bwan Maix pa singax singeh mai yaogyaw ceu kaux Maix, kheu krax caux rhawm Maix mai sijax mukheu Maix heue. Grawh grawng nawh, Maix nie lheu kieh sijax mukheu Maix ting khaing ceu kaux Maix heue. ³ Singaix kok yo aux ka Maix, Maix nghiet ka lox aux mai teei sibrawm Maix, kieh ju aux deeh koe riang rao heue. ⁴ Siyiex eue mai simiang haktiex yaogyaw ka min plakngai Maix, kheu hoik mhong kix lox pa hoik lih khaing jheeh Maix khankix heue. ⁵ Kix tak hawt ka daux krax Siyiex mai rhax lai heue. Grawh grawng nawh, min plakngai Siyiex kied ting heue. ⁶ Siyiex, viang mawh Nawh pa ot dee lhaong kawx, jhak ka pui pa awn rhawm heue. Pui pa ting rhawm rhi khankix, Nawh Cao hoik tawng tom dee singai heue. ⁷ Viang aux hu ka daux pa kha rhawm tom nie kawx, Maix tak kieh aux im ju heue. Maix nyeu taix tix ka pui pa koeng, pa kied song rhawm ka aux khankix, taix khawn dawm Maix taoh ti teei ka aux heue. ⁸ Siyiex, tak kieh grawng pa dex mai aux hoik, Siyiex eue, krax caux rhawm Maix, kaux cong jheung jheung leeing ju, Maix paw lai tik ka ceu pa hoik yuh Maix ka taix tix liak.

¹ Siyiex eue, Maix chawk cheng tix yaox aux Maix tawng heue. ² Maix hoik tawng ka pa ngawm aux mai pa cung aux heue. Maix ot dee singai mai tawng ka pa keud sawn aux heue. ³ Maix chawk cheng ti yaox ka pa hu pa it aux mai Maix tawng ka jhawm hu jhawm ing aux khawmuik heue. ⁴ Ka sivoe ang aux nyang lih lox tix gum kawx, Siyiex eue, Maix hoik tawng ka grawng khawmuik heue. ⁵ Maix ot hawt vung viang mai aux mai teei taix Maix deuh ka piang aux heue. ⁶ Krax tawng krax yung an khankix, mawh ceu pa daox am, pa ang aux lai chix yuh, ang lai pon ti hoek krup kah heue. ⁷ Aux tak sang hu dee mawx? Sonsang luan khaing Khwan Maix? Tak sang to dee mawx? Sonsang luan khaing pakngai Maix? ⁸ Phan aux haok daux raoma kawx, Maix hoik ot tan, phan aux tawm ti it ka daux meung yum kawx, Maix hoik ot tan heue. ⁹ Phan aux teei pruik ponngawb mai hu dee sidah rawm sigrit sigra kawx, ¹⁰ Ka dee an kawx, taix Maix tak tawx ka aux mai taix khawn dawm Maix giex ka aux heue. ¹¹ Phan aux ah, pa faik kheem aux, yam ponsawm kawx pa riang jhan rob vung viang aux heue. ¹² Pa faik ang doh pon kheem sivoe ngai Maix tix ceu kawx, ponsawm riang awm pon singaix, pa riang kiex pa faik awm paox tix sivoe ngai Maix heue. ¹³ Maix hoik phan hoik yuh sok lax aux mai tokaux aux khawmuik, ka daux vaig miex aux heue. ¹⁴ Aux tak yaogyaw ka Maix, mawh kheu aux hoik grum naog ka mhai rug ceu pa daox am mai ceu pa lhat graung khankix heue. Kaing pa yuh Maix in khankix mawh ceu pa daox am mai ju aux hoik tawng mawh tete heue. ¹⁵ Tokaux aux hoik sidawng sivoe ngai Maix, yam kleuk yam yuh Maix aux, ka greem tiex ka dee glip heue. ¹⁶ Ka ang aux nyang bax mawh pui, Maix hoik yaox heue. Ka sivoe ang Maix nyang yuh ka ceu an khankix tix ceu kawx, Maix hoik tiem ti deuh daux carang Maix khawmuik heue. ¹⁷ Siyiex aux eue, krax pa keud pa sawn Maix ka aux mawh ceu pa kied ting ngawh ting jum mai kied nie sigrien sigre heue. ¹⁸ Phan aux simin ti yaox nawh, nie lheu nie khaing mhaik khankix heue. Yam siduad aux, ot tau mai Maix heue. ¹⁹ Siyiex aux eue, Maix teei pui pa ang rahsee khankix yum liak. Pex pa pah pui yum khankix eue, lih hu khaing aux heue. ²⁰ Kix ah lox pa lah cha ka Maix mai pui pa koeng ka Maix khankix, nieb ah lox pa ang cee ang cag ka Maix heue. ²¹ Siyiex eue, aux koeng ka pui pa koeng ka Maix khankix, ang mawh lie? Aux seeing brai ka pui pa cung tang plak ang mawh lie? ²² Aux koeng ka kix, khawm rhawm rhi tix mai deuh kix mawh pui pa koeng aux heue. ²³ Siyiex aux eue, Maix chawk cheng ka aux mai tawng daux rhawm aux heue. Cheu ti yaox aux mai tawng ka rhawm pa keud sawn aux liak. ²⁴ Jhak ka aux, hu ang hu ka daux krax pa caox lie? tawx aux hu ka daux krax leeing ju liak.

¹ Simiang siyiex eue, taoh aux khaing tawm taix pui pa caox liak. Tiebtie teem aux khaing tawm taix pui pa caox khankix liak. ² Kix keud ceu pa ang mhawm ka daux rhawm tix, kix cheeik naing koe ku singaix jheung jheung heue. ³ Kix klaing dak tix awm siuing, siyieb jheeh kix koe cai awm siuing pa vao heue. ⁴ Siyiex eue, tiebtie mai teem aux khaing tawm taix pui pa ang rahsee mai tiebtie teem aux khaing tawm taix pui pa caox caig mai keud ti sang kieh aux goh heue. ⁵ Pui pa ting rhawm khankix, teei maox siah mai mox ti taong kie ka son aux, kix teei rub di ti deuh ka daux krax ka son aux heue. ⁶ Aux krai ti deuh ka Siyiex ah nin, "Maix mawh Siyiex aux heue. "Siyiex aux eue, nghiet ka lox pa rawg mhaing aux liak. ⁷ Siyiex aux eue, sibrawm pa taoh Maix aux, Maix tawb kheem ka kaing aux singaix puing naing heue. ⁸ Siyiex eue, paw lai tawx akhwang pa grum naog ka pui pa ang rahsee liak. Paw lai tawx krax pa keud kix grum naog liak. ⁹ Yam yaog kix kaing mai rob vung viang aux, lox pa ang mhawm pa lih khaing jheeh kix, kieh deeh hoek ka piang kix liak. ¹⁰ Kieh gaox ngu khankix rau ka piang kix liak. Kieh rau ka daux ngu mai ka daux pa kied raux liak. Paw kieh kix deeh pon kaoh tix bawg kawx heue. ¹¹ Pui pa ah lox pa caox caig khankix, paw kieh dee ot kix kaux cong piang haktiex in mai krax kha rhawm khankix, hawt leue khaix kix, pa mawh pui pa caox caig, tom sidah laux leeing heue. ¹² Aux tawng Siyiex teem ka pui pa hot sibhawm mai prawng ca ot plak pui pa hot sibhawm heue. ¹³ Pui pa rahsee khankix, tak yaogyaw ka ceu kaux Maix mai pui pa rahsee ka daux rhawm rhi khankix, pon ti ot tau mai Maix heue.

¹ Siyiex eue, aux kok yo Maix, nied ti hoek ka aux liak. Yam kok yo aux ka Maix, nghiet ka lox aux liak. ² Kieh pa rawg pa mhaing aux, awm nyawng bhawng pa sang gleeing ti tan mai kieh aux yaog taix tix rien awm krax pa tan plak ponbo sivoe ngai Maix liak. ³ Siyiex eue, deuh pa tiebtie sivoe jheeh aux liak, pau siviex siyieb jheeh aux liak. ⁴ Paw kieh rhawm aux keud ka ceu pa ang mhawm khankix, paw lai kieh aux neuex mai pui pa yuh phimap mai paw lai kieh aux hu ka daux krax pui pa ang rahsee khankix liak. Paw lai kieh aux ih ceu pa ih pui an khankix liak. ⁵ Kieh pui pa rahsee sivied ti gau aux liak. Tak koe bwanson heue. Kieh nawh sidiex gau aux liak. Tak mawh rawm bee pa kraix ka kaing aux heue. Baox yuh kawx, paw kieh kaing aux thiang liak. Yam in aux ot tang plak mai rawg bwan grawng pui pa nieb yuh khankix heue. ⁶ Pui ting cao giex kaing kix, ploi rau khaing daux rang, kix mhong lox aux heue. Lox an mawh pa nyawm ti nghiet. ⁷ Awm prung prang khix lug pui, si-ang ex kawx, prung prang ka siviex meung yum heue. ⁸ Siyiex eue, aux maong ti jhak ka Maix heue. Aux deuh rhawm ka Maix heue. ⁹ Paw lai hieh ti tik ju aux liak, Maix kieh aux luan khaing kie pa taong kix son aux mai kieh aux luan khaing jhawk pa taong pui pa yuh phimap khankix liak. ¹⁰ Yam hoik luan aux khaing khankix, kieh pui pa ang rahsee khankix, kieh cao kix deeh krix ka kie pa hoik taong kix tiru liak.

¹ Aux kok yo ka Siyiex, aux rawg bwan mai kok yo ka Siyiex heue. ² Aux ah lox ngia sivoe ngai Nawh mai krai lao ceu pa kha rhawm ka sivoe ngai Nawh heue. ³ Yam laux rhawm aux, Maix hoik tawng ka krax hu aux heue. Kix briex mox ti taong kie ka krax hu aux heue. ⁴ Aux jhak ka plak taix khawn dawm mai ang yaox ka pui pa tawng aux mai ang koe krax glawd krax to, pui pa lhawk ka ju aux ka ang koe. ⁵ Siyiex eue, aux kok yo ka Maix heue. Maix mawh dee deuh aux rhawm, sonsang pon aux ti ot meung dee ot pui pa im ju khankix heue. ⁶ Nghiet ka lox pa kok yo aux, pui pa kha rhawm liak. Taoh aux lih khaing daux tawm taix pui pa tuktiaktukte ka aux liak. Mawh kheu kix ting riang t rao khaing aux heue. ⁷ Taoh aux lih khaing daux thawng, sonsang pon aux ti yaogyaw ceu kaux Maix liak. Yam yuh Maix bwanson ka aux, kix pa mawh pui pa rahsee khankix, tak ot rob vung viang aux heue.

¹ Siyiex eue, nghiet ka lox pa rawg aux bwan mai ceu pa rawg mhaing aux liak. Deeh pawk ka lox aux awm pa koe sijax mukheu mai pa rahsee Maix liak. ² Maix paw lai prawng ca aux liak, pui mawx ang ah, pui pa im ju khankix, pui pa ang koe phimap, pa rahsee sivoe ngai Maix ang koe tix kaux kawx. ³ Pui pa koeng khankix, tuktiaktukte ka ju aux, dig ju aux tom hoek siglaing tiex mai kieh aux ot ka daux pa faik awm pui pa hoik rheung yum heue. ⁴ Aux laux rhawm mai rhawm aux bih heue. ⁵ Aux doh keuh ka singaix bawg pa hoik luan khankix dix mai keud can pa hoik yuh Maix khawmuik mai pa hoik yuh Maix ka taix tix khankix heue. ⁶ Aux taung taix tix ka Maix heue. Mai ju aux simie ti ih Maix, awm tiex krox pa simie ti nyaux rawm heue. ⁷ Siyiex eue, nied ti deeh pawk ka lox aux liak, aux hoik laux rhawm heue. Paw lai mox ngai Maix khaing aux, awm kix pa lih hu daux tiex heue. ⁸ Kieh aux mhong krax caux rhawm Maix, yam ponngawb caocao liak, aux deuh rhawm ka Maix heue. Kieh Maix tawng krax hu aux liak, aux viex rhawm ti hu ka Maix heue. ⁹ Siyiex eue, taoh aux khaing tawm taix pui pa koeng ka aux liak. Aux deuh rhawm ka Maix heue. ¹⁰ Gau ka aux, sonsang chix hawt aux alo Maix liak, Maix mawh Siyiex aux heue. Kieh Khwan singax Maix thong aux hu ka dee lung dee mhawm liak. ¹¹ Siyiex eue, kieh aux im ju kheu ceu kaux Maix liak, teei ju aux lih khaing ka daux pa kha rhawm awm pa rahsee Maix liak. ¹² Awm koe krax caux rhawm Maix, teei ti tik pui pa koeng ka aux khawmuik mai yuh laux leeing ka pui pa tuktiaktukte ka aux khawmuik, aux mawh siliex Maix heue.

¹ Siyiex pa mawh rang ting mai Cao pa gau aux chix puing naing, kieh koe bwanson liak. ² Nawh caux rhawm ka aux mai mawh guh veng aux, mawh tab aux mai mawh Cao pa taoh aux lih mai Cao pa tiebtie aux mai mawh dee deuh Cao pa teei ceu pui aux deuh greem aux heue. ³ Siyiex eue, kawn pui mawh pa yuh ka mawx? Khex deuh Maix ti tawng lie? Kawn pui mawh pa yuh ka mawx, Maix lai doh keud ka nawh? ⁴ Kawn pui awm ngie taox bhawm mai bawg yam nawh dawd mai chix luan hu, awm kawn beue heue. ⁵ Siyiex eue, Maix plak raoma mai lih hoek liak, chuh ka gawng khankix liak, kix tak lih taox ngu heue. ⁶ Ploi pukplak praix Maix mai puing ak Maix ka kix mai tuktiak tukte ka kix mai kieh kix prung prang hu liak. ⁷ Yaog taix Maix dee lhaong mai taoh aux lih khaing ka daux rawm pa kied raux mai ka daux tawm taix pui tang praix klawng khankix liak. ⁸ Jheeh kix chix ah lox pie lhen mai taix khawn dawm mawh pa chix pie lhen heue. ⁹ Siyiex eue, aux tak ah lox rhax pa khraox ka Maix heue. Aux tah ting pa koe maox kao nyaing mai yaogyaw ka Maix heue. ¹⁰ Maix tawx krax pa pex pa pon ka simiang khankix mai kieh siliex Maix Davit luan khaing krax lawm vaid lawm pliah heue. ¹¹ Taoh aux lih khaing tawm taix pui tang praix klawng liak, jheeh kix chix ah lox pie lhen mai taix khawn dawm kix kawx chix pie chix lhen heue. ¹² Kieh kawn simex ex, pa awn ju khankix, ting lhaong awm kawn khaox pa sum mai kieh kawn bun ex khankix, kieh awm rong simaox pa mhawm pa koe ka daog nyiex bwan liak. ¹³ Ka daux nyiex daux ma aux, kieh grum naog kraung khrai pa shiao mai pa ih mai plak praix kieh yung aux khankix keh haoh hun kaing rheng kaing mheem liak. ¹⁴ Mawie aux khankix, kieh haoh hun tom nie, paw kieh grai, paw kieh pui nieb rhim ti teei mai yam lih hu aux daux krax, paw kieh koe lox riag yo liak. ¹⁵ Pui pa yaox ti ot yuh nan koe bwanson heue. Pui pa kieh Siyiex mawh Siyiex kix koe bwanson heue.

¹ Siyiex Simiang aux eue, aux yaog Maix ting mai yaogyaw ka ceu kaux Maix leeing ju heue. ² Aux tak yaogyaw ka Maix ku singaix jheung jheung mai aux tak yaogyaw ka ceu kaux Maix ku ju leeing ju heue. ³ Siyiex mawh Cao pa ting lhaong mai khaw ti yaogyaw ka Nawh heue. Nawh ting lhaong miex ding ex ang dak uik krai heue. ⁴ Kawn pui tix ju hoik tix ju, yaogyaw ka kaing pa hoik yuh Maix mai plak jhi ka sibrawm Maix pa ting khankix heue. ⁵ Aux doh keud mai yaogyaw ka sibrawm pa ting pa hoik yuh Maix mai ceu pa daox am pa yuh Maix khankix heue. ⁶ Kix krai grawng sibrawm Maix pa khaw ti lhat graung khankix mai aux kawx, tak sang krai grawng pa ting lhaong Maix heue. ⁷ Kix doh keud mai krai grawng pa jiet mhawm Maix, kix tak rhax lai gaux rhawm grawng pa rahsee Maix heue. ⁸ Siyiex hoik grum naog bwanson krax caux rhawm mai koe krax pa gun yeung mai krax caux rhawm Nawh kied ting heue. ⁹ Siyiex yuh pa mhawm khawmuik mai Nawh caux rhawm ka pa hoik phan tix khawmuik heue. ¹⁰ Siyiex eue, can pa phan pa deuh Maix khankix, yaogyaw ka bwanson Maix mai pui pa singax singeh khankix yaogyaw ka Maix heue. ¹¹ Kix tak krai grawng min plakngai meung Maix mai krai grawng sibrawm Maix, ¹² mai tak krai grawng sibrawm pa ting lhaong pa hoik yuh Maix khankix mai min plakngai meung Maix ka kawn pui khankix heue. ¹³ Meung Maix mawh meung leeing ju mai Maix mawh Simiang ku ju leeing ju heue. ¹⁴ Siyiex joh jhan ka pui pa goh khankix mai yaog kaoh ka pui pa awn rhawm khankix heue. ¹⁵ Ceu pa phan pa deuh pa im ju khankix khawmuik, maong ti jhak ka Maix mai yam hoek bawg yam, Maix tak tawx kix ih heue. ¹⁶ Maix di taix tix mai kieh can pa im ju khankix sak heue. ¹⁷ Daux krax Siyiex mawh pa rahsee mai pa yuh Nawh ti deuh khawmuik mawh pa singax singeh heue. ¹⁸ Siyiex ot dex mai pui pa kaux sijax mai pa rawg mhaing ka Nawh khawmuik heue. ¹⁹ Nawh Cao kieh alo pui pa lhat graung ka Nawh, grum naog heue. Nawh nghiet ka lox pa kok yo kix mai taoh kix heue. ²⁰ Siyiex teem ka pui pa moh ka Nawh khankix heue. Nawh yuh laux leeing ka pui pa ang rahsee khankix heue. ²¹ Jheeh aux tak ah lox rhax yaogyaw ka Siyiex heue. Kieh pui khawmuik yaogyaw ka ceu kaux Nawh pa singax singeh ku ju leeing ju heue.

¹ Yaogyaw ka Siyiex heue, ju aux eue, yaogyaw ka Siyiex heue. ² Yam kawn im ju aux, aux tak sang yaogyaw ka Siyiex heue. Aux tak yaogyaw ka Maix yam kawn klawd aux heue. ³ Paw deuh rhawm ka simiang khankix mai ka kawn pui, pa ang chix taoh. ⁴ Yam lih ju khaing nawh, nawh deeh ka tiex heue. Ka daux singaix an, krax pa keud sawn nawh kawx grai hu heue. ⁵ Pui pa teem Siyiex Yakop mai pui pa krox jun ka Siyiex nawh, koe bwanson heue. ⁶ Nawh Cao yuh raoma mai haktiex mai rawm sigrit sigra mai can pa koe khawmuik, Nawh priex ka sijax mukheu tix jheung jheung heue. ⁷ Nawh Cao prawng ca hawt beenli mai ot plak pui pa yaox ti kham geu krax tuktiaktukte heue. Nawh tawx pui pa cai rhawm khankix sawm mai Nawh ploi ka pui pa hoik laung khankix heue. ⁸ Siyiex kieh pui pa dug ngai khankix deeh chix yaox heue. Siyiex yaog pui pa awn rhawm khankix kaoh heue. Siyiex moh ka pui pa rahsee khankix heue. ⁹ Siyiex teem ka nyo sinie khankix mai joh jhan ka miexmai mai kawn doe khankix heue. Krax pui pa ang rahsee khankix, Nawh kieh kawk vawk heue. ¹⁰ Veng Zion eue, Siyiex maix mawh Simiang ku ju leeing ju heue. Haleluya!

¹ Yaogyaw ka Siyiex heue. Grawh grawng nawh, krax pa yaogyaw ex ka Siyiex mawh kaing pa khaw pa keung ex ti yuh heue. ² Siyiex yuh ka veng Yerusaliem mai kieh pui Isarelax pa hoik to dee singai khankix, deeh kieh kix hoek khrawm paox tix tan heue. ³ Nawh Cao kieh pui pa laux rhawm khankix nyawm rhawm mai pai dee saux kix moi heue. ⁴ Nawh Cao simin ka simuing khankix mai sum ti deuh ceu kaux mu mawx mu an heue. ⁵ Siyiex ex mawh pa kied ting sibrawm mai krax tawng yung Nawh ang lai uik krai heue. ⁶ Siyiex yaog kaoh ka pui pa awn rhawm khankix mai Nawh Cao kieh pui pa ang rahsee khankix goh ka piang tiex heue. ⁷ Rhax lai yaogyaw ka bwanson Siyiex heue. Tah ting yaogyaw ka Siyiex ex awx. ⁸ Nawh Cao teei paiawm mai kheem ka raoma mai khrex rawm lhiex son haktiex, kieh rib riem kuah ka piang gawng lua khankix heue. ⁹ Nawh Cao tawx ceu pa ih ka totiag mai kawn lak pa ah lox khankix heue. ¹⁰ Nawh Cao ang moh ka riang rao brung mai plawng taix plawng caong pui heue. ¹¹ Siyiex moh ka pui pa lhat graung ka Nawh mai moh ka pui pa krox jun ka krax caux rhawm Nawh heue. ¹² Veng Yerusaliem eue, yaogyaw ka Siyiex awx. Veng Zion eue, yaogyaw ka Siyiex maix awx. ¹³ Grawh grawng nawh, Nawh Cao kieh siviex veng maix kaux cong mai nawb bwanson ka kawn praix pa ot mai maix heue. ¹⁴ Nawh Cao kieh mee haktiex maix yiien yawg tix mai tawx nghox koi pa kied mhawm sonsang ih maix tom sak heue. ¹⁵ Nawh Cao ploi gumlo tix hu ka piang haktiex mai gumlox Nawh phai khran tah tom sidah haktiex heue. ¹⁶ Nawh Cao tawx rawm rha awm hauk yung mai Nawh Cao rhuat rawm ciex lih awm nyaox heue. ¹⁷ Nawh Cao ploi mu pre lih awm ceu pa ih mai pui mawx pon kham ti cung, ka pa kied sikiied an. ¹⁸ Nawh Cao baox deeh ploi gumlox tix mai kieh rawm rha an ceh hu awm rawm heue. Nawh kieh bhaung hoek mai rawm lih hu heue. ¹⁹ Nawh tawx gumlox tix ka ceu pui Yakop mai lox tawm beenli Nawh mai krax prawng ca Nawh ka pui Isarelax heue. ²⁰ Nawh Cao ang yuh nan, ka pui tang ceu mai kix ang tawng ka krax prawng ca Nawh ti deuh. Haleluya.

¹ Yaogyaw ka Siyiex piang raoma awx. Yaogyaw ka Nawh dee kied lhaong heue. ² Kawncau Siyiex khankix eue, yaogyaw ka Nawh Cao awx. Cub kru naing raoma khawmuik eue, yaogyaw ka Nawh Cao heue. ³ Khix, singaix khankix eue, yaogyaw ka Siyiex heue. Simuing pa pruh riang khankix khawmuik eue, yaogyaw ka Nawh Cao heue. ⁴ Raoma tix thaix hoik tix thaix mai rawm raoma khankix eue, yaogyaw ka Nawh Cao heue. ⁵ Kieh kix yaogyaw ka ceu kaux Siyiex, kheu Nawh Cao tawx lox mai hoik yuh ti deuh ka kix heue. ⁶ Nawh Cao kieh kix kaux cong leeing ju mai ang kieh lheu ka lox tawm jhawm krai Nawh heue. ⁷ Can pa ot ka piang haktiex khawmuik eue, yaogyaw ka Siyiex heue. Kax ting khankix mai can pa koe dee raux, ⁸ ngu mai mu pre, rawm rha mai taox bhawm mai bhaung keu kanglux, nghiet ka lox Nawh. ⁹ Gawng ting, gawng iak pa koe khankix mai khaox plix pa plix khankix mai khaox piakvan pa koe khankix, ¹⁰ totiag pa he mai pa nge mai totiag pa chix mu mai sim pa pu khankix, ¹¹ mai simiang haktiex khankix mai kawn nyiex pui yaong khankix, simiang mai cao pa prawng ca haktiex khankix, ¹² bunkrih mai sinaw khankix, kuad mai kawn nyawm khankix eue, kieh yaogyaw ka Siyiex heue. ¹³ Mawh kheu ceu kaux Nawh tix kaux khaing pa jiet mhawm mai koe ka piang haktiex mai meung raoma heue. Kieh yaogyaw ka ceu kaux Siyiex liak. ¹⁴ Nawh cao yaog ka rung choek cub pui Nawh mai pui pa singax singeh pa mawh ceu pui Isarelax cub pui pa ot dex nawh khankix, yaogyaw ka Nawh Cao heue. Haleluya!

¹ Ah lox rhax pa khraox mai yaogyaw ka Siyiex mai min plakngai Nawh ka dee khrawm pui pa singax singeh khankix heue. ² Kieh ceu pui Isarelax gaux rhawm ka daux Cao pa phan pa deuh pex liak. Mai kieh pui Zion khankix gaux rhawm ka daux Simiang kix liak. ³ Kieh kix graoh thiao mai yaogyaw ka ceu kaux Nawh liak, kieh kix tah kawng, tah ting mai yaogyaw ka Nawh Cao liak. ⁴ Grawh grawng nawh, Siyiex moh ka pui Nawh khankix mai Nawh kieh pui pa awn rhawm khankix koe min plakngai ka krax taoh Nawh heue. ⁵ Kieh pui pa singax singeh khankix gaux rhawm liak. Kieh rhax lai pa gaux rhawm ka dee it dee tum kix liak. ⁶ Kieh krax pa yaogyaw min plakngai Siyiex koe ka jheeh kix liak. Kieh vaid lawm khawm ra plak koe ka tawm taix kix liak. ⁷ Kieh deeh tawx phimap ka pui tang ceu khankix, awm pa khaw mai beenli mai tawx krax pa kha rhawm ka pui khankix, ⁸ teei ceng mai phyawk ka simiang khankix mai teei ceng phyawk ka simiang greem kix, ⁹ mai sonsang prawng ca ka phimap, awm pa hoik tiem ti deuh mai pui pa singax Nawh khankix koe min plakngai heue. Haleluya!

¹ Yaogyaw ka Siyiex ka dee singax singeh heue. Yaogyaw ka Nawh Cao piang raoma dee sidawng sibrawm Nawh Cao heue. ² Yaogyaw ka Nawh, mawh kheu Nawh teei sibrawm mai yuh ti deuh ka ceu in khankix heue. Yaogyaw ka Nawh Cao kheu mawh Nawh Cao pa kied ting kied lhaong heue. ³ Phlu teettawng mai yaogyaw ka Nawh heue. Tah ting mai ting si, yaogyaw ka Nawh Cao heue. ⁴ Tah kawng mai graoh thiao mai yaogyaw ka Nawh Cao heue. Tah ting si pa grum naog maox khankix phlu byaong, phlu pi yaogyaw ka Nawh Cao heue. ⁵ Tah chiang lox pa kied luah pa sinum mai yaogyaw ka Nawh Cao heue. Tah chiang lox pa gaux rhawm mai yaogyaw ka Nawh Cao heue. ⁶ Kieh can pa im ju khawmuik, yaogyaw ka Siyiex heue. Haleluya!