Proverbs

Proverbs

¹ Gumlox pa kied raux lai lox kab pa tiiem Sawlamon kawn simex Davit simiang Isarelax ti deuh. ² Kieh tawng ka cuyi pingnya, ka pa rahsee mai tawng ka been lox sidiex gau pa rahsee. ³ Kieh rieb ti teei ka ceu pa gau cuyi pingnya mai yuh pa rahsee mai prawng ca rahsee mai yuh ka daux pa rahsee heue. ⁴ Kieh pui caox deeh lhak haing mai tawx grum naog krax tawng yung pingnya satix ka sinaw khankix heue. ⁵ Mawh kheu pui pa koe cuyi pingnya khankix, nghiet mai tak sang ting lhaong ka cuyi pingnya heue. ⁶ Pui pa mhawm dong keud khankix, chix tawng ka dee bleeh lox pa raux mox mai tak mawh sara pa ting pingnya heue. ⁷ Rhawm pa lhat graung ka Siyiex mawh num riah pingnyaheue. Pui pa caox yuh pa ang cee ang cag ka been lox pa gau mai ka pingnya khankix heue. ⁸ Kawn simex aux eue, nghiet ka been lox sidiex gau keeing maix mai paw lai tik ka ceu pa sidiex gau miex maix awx. ⁹ Lox ceu an khankix, mawh lawk kaing pa mhawm grang son kaing maix mai mawh min plakngai soi pa tauk ka ngawg maix heue. ¹⁰ Kawn simex aux eue, phan pui caox nyaw glaw ka maix paw lai nghiet. ¹¹ Phan kix ah nin ka maix, hawt hu mai ex, ex kuan ti pah ju pui yum mai ex jawm ka kix pa ang koe phimap heue. ¹² Awm pa bleet meung yum ti ih ka pui pa laig ka daux simeeig khankix, ex kawx bleet ti ih ka pui pa im ju khankix heue. ¹³ Phan ex yaox kraung khrai pa ngawh kuceu, ex tud rhim ti teei mai sau tom naog ka daux nyiex ex heue. ¹⁴ Rom ti yuh paox pie tau mai ex mai ex gwieh kraung khrai pa pon ex sidu awm paox tix ah nan kawx, ¹⁵ Kawn simex aux eue, paw lai hu tau mai kix, via khaing krax pa hu kix. ¹⁶ Grawh grawng nawh, caong kix phai to ka daux phimap mai kix phai sonsang pah ju pui yum heue. ¹⁷ Rub pa nah ti deuh sivoe ngai sim mai mawh pa giex going, ang lih ti mawh tidtix. ¹⁸ Pui caox an khankix, pau mai hieh nham tokaux tix mai jawm ti pah ka ju tokaux tix heue. ¹⁹ Pui pa sawg mau khri, kraung khrai ka daux krax pa ang rahsee khankix khawmuik, bwanson pa sawg kix an, chix kieh ju tokaux kix yum heue. ²⁰ Cuyi pingnya kok yo ka praix mai chix ploi lox tix lih ka daux krax khankix heue. ²¹ Lox pa kok yo nawh, ka dee kum kawng ang ah, ka diang siviex veng ang ah, ka daux veng ang ah mai krai lox ah nin, ²² Pui caox khankix eue, pex moh ka pa caox caig, pui pa chix salao mai gaux rhawm ka daux pa salao mai pui pa caox khankix, chix koeng ka cuyi pingnya rheung miex grheung? ²³ Nghiet ka lox pa sidiex gau aux, deeh tieh loh tix, jhak heue, Aux prauk Khwan Aux lih piang pex mai pex tak tawng dee bleeh lox Aux pa raux mox heue. ²⁴ Aux kok ka pex, kheu thiang pex ti tik mai Aux daong taix tix ka pex mai pex ang kieh koe mu. ²⁵ Pex tik ka lox pa tawx Aux satix ka pex, mawh kheu ang pex rhawm nghiet ka lox pa sidiex Aux tix gum kawx. ²⁶ Yam yaox pex krax khi glawh Aux tak nyiah heue. Yam hoek pex krax pa lhat graung Aux nyiah maung pex heue. ²⁷ Yam yaox pex awm phlu bhaung keu kang lux mai yam yaox pex krax laux leeing, awm hoek bhaung caox piang pex mai yam yaox pex pa hot sibhawm mai pa kha rhawm, piang pex mai kix kok yo Aux kawx, Aux ang lai pawk. ²⁸ Viang kix coca tix sawg Aux kawx, ang lai yaox Aux. ²⁹ Grawh grawng nawh, kix koeng ka cuyi pingnya mai kix ang koe rhawm pa lhat graung kah. ³⁰ Kix ang nghiet ka lox pa tawx aux satix mai kix yuh ceu pa ang cee ang cag ka can ceu pa sidiex aux khawmuik heue. ³¹ Mawh kheu nan, kix yaox ti ih plix phimap pa hoik yuh tix mai kix sak ka ceu pa keud kix heue. ³² Pui pa ang koe pingnya, lud krax mai hoek krax som ju heue. Pui caox khankix, ang koe satix mai hoek krax laux leeing heue. ³³ Pui pa nghiet ka lox aux khankix, ang yaox krax lhat graung, yaox ti ot yiien yawg tix mhawm mhawm heue.

¹ Kawn simex aux eue, phan maix nghiet ka lox aux mai sau lox tawm beenli aux ka daux rhawm maix, ² daong yhaok maix, viex khawm rhawm tix mai sawg ka cuyi pingnya. ³ Pui pa kok pa sawg ka pingnya hawt khaix lox pa yo nawh, ⁴ Phan maix sawg awm sawg tix mau mai awm sawg sinngao pa hoik mox, ⁵ mawh kheu nan maix tak sang tawng rhawm pa lhat graung ka Siyiex mai yaox pa tawng pa yung cie Siyiex. ⁶ Grawh grawng nawh, Siyiex mawh cao pa tawx pingnya, krax tawng krax yung lih mawh kheu Gum lox Siyiex heue. ⁷ Nawh khrawm ti deuh pingnya son pui rahsee mai Nawh mawh cao pa tieb tie son pui pa yuh pa rahsee, ⁸ priex ka pui yuh pa rahsee mai ka daux krax pa rahsee mai pau daux krax pa lawng kix, ⁹ kheu nan maix tak sang tawng mai chix prawng ca daux krax pa rahsee mai daux krax pa mhawm khawmuik heue. ¹⁰ Kheu laig cuyi pingnya ka daux rhawm maix mai krax tawng yung rhawm maix koe krax gaux rhawm gaux rhi heue. ¹¹ Lox satix pau ka maix mai krax tawng yung kia ngien ka maix heue. ¹² Tak taoh maix luan khaing krax pa caox mai khaing daux tawm taix pui pa chix ah lox kawk lox vawk heue. ¹³ Pui pa tik ka krax rahsee mai pa hu ka daux krax pa faik. ¹⁴ Pui pa gaux rhawm gaux rhi ka daux phimap mai pa gaux rhawm gaux rhi ka pa kawk vawk mai pa caox caig heue. ¹⁵ Pui pa ang hu ka daux krax pa rahsee mai pa hu ka daux krax pa kawk vawk. ¹⁶ Tak taoh maix luan khaing bun pa chix nyaw glaw mai bun coh kaux pa ang mhawm. ¹⁷ Bun pa tik ka cao pa yuh bwanson cao pa gau yam iak ju nawh, piawm ka lox tawm mukheu Siyiex heue. ¹⁸ Nyiex bun an, dex dawd mai krax yum, krax nawh dex dawd mai simeeig khankix heue. ¹⁹ Pui pa laig ka daux nyiex nawh ang pon tix deeh hoek tix kaux kawx mai ang lai pon ti klawd heue. ²⁰ Mawh kheu in maix hu daux krax pui pa mhawm mhiem mai nied ti hu hawt daux krax pui pa rahsee heue. ²¹ Pui pa rahsee khankix, hoek ka daux meung Nawh Cao mai pui pa grum mhawm khankix, tak yaox ti ot ka dee an heue. ²² Pui pa ang rahsee khankix, yaox ti kham ka pa grheu ti tik khaing daux meung Nawh Cao mai pui pa nieb luan yuh khankix tak yaox ti kham geu ka pa teei ti tik heue.

¹ Kawn simex aux eue, paw piawm ka pa sidiex gau aux, viang mawh nan priex lox tawm beenli aux khankix ka daux rhawm maix, ² grawh grawng nawh, lox tawm beenli an khankix kieh maix lang ju mai koe pa haok hwan heue. ³ Paw lai kieh krax caux rhawm mai sijax mukheu gwieh hu khaing maix, teei gumlox an khankix mai tauk ka ngawg maix mai tiiem ti deuh ka khlawp rhawm rhi maix. ⁴ Phan yuh nan maix tak sang yaox pa fah rhawm mai pon min plakngai sivoe ngai Siyiex mai sivoe ngai kawn pui heue. ⁵ Deuh rhawm ka Siyiex khawm rhawm khawm rhi tix, mai paw lai deuh rhawm ka pingnya tokaux tix. ⁶ Can krax dee hu maix khawmuik deuh rhawm tix ka Siyiex, phan yuh nan Nawh Cao tak kieh krax hu maix rahsee heue. ⁷ Paw keud tokaux tix mawh pa koe pingnya, lhat graung ka Siyiex mai via khaing ceu pa caox. ⁸ Phan yuh nan, siniag maix khankix koe riang mai gua si-ang maix tak naog heue. ⁹ Sinngao cie maix mai plix num pa pon maix khankix tan ka Siyiex awx. ¹⁰ Phan yuh nan, krao maix tak naog mai kraung pa sau maix rawm plix siiet pa khraox tak kreh heue. ¹¹ Kawn simex aux eue, paw nieb een ka ceu pa sivied Siyiex ti gau tix ang koe cee, yam chawk cheng Nawh Cao ka phimap maix paw laux rhawm. ¹² Grawh grawng nawh, Siyiex sivied ti gau ka kawn praix pa moh Nawh mai puat ka kawn praix pa khaw rhawm Nawh heue. ¹³ Pui pa sawg ti pon pingnya, koe bwanson heue. ¹⁴ Grawh grawng nawh, pui pa yuh lai ka pingnya, nie lheu mhawm khaing pui pa yuh ka lai mau heue. Rao lai pa pon pingnya nie lheu mhawm khaing khri heue. ¹⁵ Pingnya, nie lheu ngawh khaing siang raoh heue. Can kraung pa khaw rhawm khawmuik, ang pon tiag sidu ngawh mai cuyi pingnya an heue. ¹⁶ Ka daux taix khawn dawm nawh, koe ceu pa lang ju, daux taix khawn gwiex nawh, koe pa mi pa koe mai min plakngai nawh heue. ¹⁷ Krax pingnya mawh daux krax pa mhawm, can daux krax pingnya khawmuik, mawh pa nhim pa yiien heue. ¹⁸ Can pui pa jhawp ka pingnya hoik pon khaox pa im ju mai pui pa ang ploi taix tix ka pingnya koe bwanson heue. ¹⁹ Siyiex phan haktiex mai: yuh raoma ka pingnya tix heue. ²⁰ Nawh Cao kieh rawm lih dee kied raux bih, kieh rawm ciex lih ka daux paiawm kheu pingnya tix heue. ²¹ Kawn simex aux eue, cuyi pingnya mai pa yuh satix paw kieh gwieh hu sivoe ngai maix mai priex ti hawt jheung jheung awx. ²² Phan yuh nan, ceu an khankix, mawh ju, khwan mai tak mawh min plakngai ka ngawg maix heue. ²³ Yam hu maix krax ang koe krax khi rhawm mai ang koe dee sideeing caong dee hu tix heue. ²⁴ Yam it maix ang koe ceu pa lhat, tak yaox ti laig it mhawm mhawm heue. ²⁵ Paw lhat graung ka ceu pa caox pa phai mai ceu pa laux leeing, pa yaox pui caox kix heue. ²⁶ Grawh grawng nawh, Siyiex mawh dee yum rhawm mai dee deuh maix rhawm, Nawh Cao tak priex maix son ang caong maix lai krix ka jhawk heue. ²⁷ Yuh bwanson ka pui pa khaw ti pon bwanson, phan ang yuh ang pon. ²⁸ Yam koe maix ti tawx tix ceuceu ka paox plawg maix, paw ah, "Hu ha, deeh hoek pasax, aux lawk tawx ka maix pasax." ²⁹ Phan ang tie koe ceu pa khi rhawm paw lai keud tix ceu pa ang mhawm, ka paox plawg pa ot dex maix awx. ³⁰ Maix paw lai yuh krax simah ka pui pa ang lud tidtix ka maix. ³¹ Maix paw ghoing ka kraung khrai pui pa tuktiak khankix mai paw laug ti hu ka krax hu nawh tix nyaing kawx. ³² Grawh grawng nawh, Siyiex seeing ka pui pa vawk rhawm khankix heue. Pui rahsee khankix, koe akhwang ti yuh paox pie ka Nawh heue. ³³ Lox pa jhax lawg Siyiex hoek piang nyiex pui pa ang rahsee khankix mai Nawh Cao nawb bwanson ka dee ot pui rahsee khankix heue. ³⁴ Nawh Cao salao ka pui pa chix sa lao khankix mai yuh bwanson ka pui pa awn rhawm khankix heue. ³⁵ Pui pa koe cuyi pingnya khankix, tak pon sin min plakngai mai pui pa yuh pa caox khankix, tak yaox ti kham geu krax kaig tua heue.

¹ Kawn simex aux khankix eue, sonsang tawng pex ka krax cuyi pingnya nghiet ka lox tawm pa sidiex gau keeing mhawm mhawm awx. ² Aux hoik tawx lox sidiex pa mhawm ka maix, paw lai tik ka lox tawm beenli aux khankix. ³ Phan mawh aux, mawh sok rhawm keeing, pa awn pa tiiem sivoe ngai pa kied moh miex tix kaux heue. ⁴ Keeing aux sidiex gau mai ah nin ka aux, "Sau ti priex lox aux ka daux rhawm maix mai priex ti hawt gumlox tawm beenli aux mai im ju awx." ⁵ Sawg pingnya awx, sawg pingnya pa tawng pa yung awx. Paw piawm yuh satix, paw lai via hu khaing lox pa lih khaing daux jheeh aux. ⁶ Paw tik ka cuyi pingnya, nawh tak priex maix heue. Moh ka nawh awx, nawh tak teem ka maix heue. ⁷ Pingnya mawh ceu pa ting lhaongheue. Sawg pingnya awx, sawg pingnya khaing sawg kraung khrai awx. ⁸ Deuh nawh mawh pa ting lhaong, nawh tak yaog maix ting lhaong heue. Phan maix kawm nawh, nawh tak tawx min plakngai ka maix heue. ⁹ Nawh tak fua lawk kaing pa mhawm grang ka kaing maix mai tak tawx mhok khri min plakngai ka maix heue. ¹⁰ Kawn simex aux eue, priex mai nghiet ka lox aux awx, phan yuh nan maix tak nie lang ju heue. ¹¹ Aux tak jhi pingnya ka maix mai aux thong maix hu ka daux krax pa mawh meh heue. ¹² Phan maix hawt hu, ang lai hoek krax pa sikhawp, yam to maix, caong maix ang lai sideeing, ang lai goh. ¹³ Jhawp kaux ka lox tawm pa sidiex aux, paw ploi, paw man, priex mhawm mhawm, grawh grawng nawh, mawh krax pa im ju son maix heue. ¹⁴ Paw laig ka daux krax pui pa ting rhawm ca nyhau khankix mai paw hu tau mai pui pa caox khankix heue. ¹⁵ Via hu khaing krax pa hu kix, paw lai hawt khaix kix, via hu khaing kix awx. ¹⁶ Phan kix ang yaox ti yuh phimap ka pui, kix ang nyawm it, phan kix ang pon ti yuh pui tix kaux kaux goh, kix ang chix laig it heue. ¹⁷ Kix ih blah pa dex dawd mai ceu pa caox mai nyaux rawm plix siiet pa dex dawd mai pa tuktiak heue. ¹⁸ Krax pui rahsee khankix, awm bah riang praix, tom lih singaix mai lih jhan pa riang sipie heue. ¹⁹ Krax pui pa ang rahsee khankix, awm pa faik mai yam goh kix, ang tawng ka ceu pa sideeing caong kix heue. ²⁰ Kawn simex aux eue, nghiet lox aux mai sau can lox pa sidiex aux ka daux yhaok maix awx. ²¹ Paw kieh gwieh hu khaing sivoe ngai maix, priex ti deuh ka daux rhawm rhi maix awx. ²² Grawh grawng nawh, pui pa yaox ka beenli ceu an khankix, mawh pa im ju mai krax nyawm ot ka son tokaux kix heue. ²³ Mawh kheu sok rhawm maix, mawh jaong num riah pa im ju, priex sok rhawm maix khaing kuceu khawmuik heue. ²⁴ Via hu singai khaing pa ang rahsee mai siyieb jheeh pa chix thong thiang khankix heue. ²⁵ Kieh ngai maix jhak sivoe rahsee mai siyieb ngai maix kawx kieh jhak sivoe rahsee heue. ²⁶ Keud krax pa hu caong maix mhawm mhawm mai kieh can dee hu maix kieh koe pa nhim heue. ²⁷ Paw lai gaing hu plak gwiex plak dawm mai via hu khaing krax pa caox caig heue.

¹ Kawn simex aux eue, veeh yhaok maix nghiet ka lox tawm pingnya aux mai priex ti hawt ka lox satix pa tawx aux awx. ² Siyieb jheeh maix gau ka pingnya krax tawng yung mai kieh mawh pui pa chix priex rhawm rhi tix. ³ Grawh grawng nawh, siyieb jheeh bun coh kaux, lheu tie khaing rawm kaing hia mai lox nawh nyu khaing rawm bee heue. ⁴ Viang mawh nan, dee sidah nawh song khaing lhax ghin mai lawm khaing vaig lawm khawm ra plak heue. ⁵ Caong nawh lih hu ka daux krax dee yum mai can krax hu nawh chix hoek ka daux meung yum heue. ⁶ Son ang maix lai keud krax pa im ju, nawh tieh loh ka been tix sipie tom ang maix lai tawng tidtix heue. ⁷ Mawh kheu in, kawn simex aux khankix eue, nghiet ka lox aux awx. Paw tik ka lox pa lih khaing jheeh aux khankix heue. ⁸ Via maix hu khaing bun pa yuh nan tom singai, paw lai dex ka siviex nyiex ot nawh. ⁹ Phan ang mawh nan, min plakngai maix mai ju maix tak sang tawx ka kix pui pa caox khankix heue. ¹⁰ Pui tang ceu khankix, tak sang grum pon kraung khrai maix mai kraung khrai pa yuh pa pon maix khankix, tak hoek ka daux nyiex pui tang ceu khankix heue. ¹¹ Dee sidah nawh deeh klih rhawm ka yam yaox nawh laux rham tokaux nex nham tix, kheu ang nawh nghiet ka lox sidiex gau. ¹² Aux hoik koeng ka ceu pa sidiex gau pui ka aux, daux rhawm aux hoik yuh pa ang cee ang cag ka lox sidiex pui lie? ¹³ Lox sara khankix kawx, aux ang nghiet mai aux ang nghiet ka lox pa sidiex pui khankix ka aux yuh nin lie? ¹⁴ Aux hoik luan yuh pa caox ka sinax pui hun khawmuik mai tak ah lox ngia tix heue. ¹⁵ Shiao ka aw rawm maix mai nyaux ka rawm pa lih khaing rawm daux maix awx. ¹⁶ Rawm keut cie maix kieh lih tom nie mai bla awm lih rawm klawng hawt krax. ¹⁷ Paw kieh mawh khawm cie pui tang ceu, kieh mawh son maix nong. ¹⁸ Rawm keut cie maix kieh mawh rawm pa koe bwanson son maix, gaux rhawm gaux rhi mai moeng pa hoik teei maix yam kawn awn ju maix khaing awx. ¹⁹ Kieh mhawm grang, awm cak miex mai poh miex pa khaw ti moh mai teeh nawh tawx pa lo maix grum naog jheung jheung heue. Moh ka kiex mai fah rhawm heue. ²⁰ Kawn simex aux eue, mawh kheu patix maix lai yoek tau mai bun pa ang mhawm been yuh ka mawx? Maix hu kawm naok bun coh kaux yuh ka mawx? ²¹ Krax hu kawn pui khawmuik hoik sidawng sivoe ngai Siyiex mai Nawh Cao jhak ka krax hu kix khawmuik heue. ²² Pui caox pa nieb yuh khankix, phimap pa caox pa yuh kix deeh giex ka kix mai tak sang kham geu ka pa phyawk maox phimap ka tix heue. ²³ Mawh kheu nawh kied kwa mai lud lawlawx, ang pon lox sidiex gau mai tak yaox ti yum heue.

¹ Kawn simex aux eue, phan maix hoik luan kham son paox grawm maix ang ah mai phan maix hoik luan tawx taix ka pui tang kaux ang ah, ² Maix hoik krix ka jhawk kheu jao lox pa hoik lih khaing jheeh maix, kheu hoik mawh lox pa hoik ah maix tom lih mawh see ka maix heue. ³ Kawn simex aux eue, phan maix hoik hoek ka daux taix paox grawm maix, tak sang pon taoh maix ka tokaux ti yuh nin mai hu ka paox grawm maix, viex rhawm pa awn pa tiem mai nied ti khyox khaw ka nawh awx. ⁴ Paw lai laig it, paw lai yip ngai mai paw gaing. ⁵ Taoh tokaux tix awm pa glawd cak mai sim khaing taix pui pa jaw khankix awx. ⁶ Pui pa nieh eue, hu ka meeik mai keud gau mai jhak ka kaing pa yuh kix mai gau pingnya mai kix awx. ⁷ Meeik khankix ang koe sara mai ang koe cao thong gau mai ang koe simiang. ⁸ Bawg yam rung praix mai yam vawg nghox, kix chix sawg ti deuh ceu pa ih son tokaux kix heue. ⁹ Pui pa nieh eue, maix tak sang laig it rheung miex grheung? Maix tak sang kaoh khaing dee it tix lai mawx? ¹⁰ Maix ah it tivud ha mai it yam bhok maix taix sonsang laig it tivud. ¹¹ Krax pa hot sibhawm tak sang hoek piang maix, awm pui pa hu krax mai kraung khrai maix tak sang som nai awm hoek pui naing piang maix heue. ¹² Pui pa caox mai pui pa ang rahsee khankix, chix krai ngie lox pa caox, pa ang rahsee khaing heue. ¹³ Kix khiep ngai tix mai chix gau ka caong mai gien taix kix heue. ¹⁴ Kix grum naog pa kawk vawk ka daux rhawm tix mai kix keud ceu pa ang mhawm jheung jheung mai chix kieh pui simah ka paox tix heue. ¹⁵ Mawh kheu in, krax lhat mai krax khi rhawm hoek piang kix dom mawx dom an mai kix ang koe dee deuh rhawm mai hoek krax laux leeing heue. ¹⁶ Grawng pa koeng Siyiex ang joeng mawh ngie liah ceu, pa seeing brai Nawh koe aliah ceu, mawh inkix heue. ¹⁷ Pa ting rhawm lhaong ngai tix ceu, dak pa chix pie lhen tix ceu, taix pa chix pah ka ju pui pa ang koe phimap tix ceu. ¹⁸ Rhawm pa chix keud pa ang mhawm tix ceu, caong pa phai to dee yuh phimap tix ceu. ¹⁹ Pui pa kham sakse pa ang mawh meh mai lox pie lox lhen tix ceu mai pui pa chix kieh puxaik simah ka paox tix, tix ceu heue. ²⁰ Kawn simex aux eue, nghiet ka lox tawm beenli keeing maix awx. Paw lai tik ka ceu pa sidiex gau miex maix awx. ²¹ Vien ka dieb rhawm rhi maix jheung jheung mai tauk ka ngawg maix awx. ²² Yam hu maix krax tang dah, lox tawm beenli an tak jhi krax ka maix heue. Yam it maix, tak sang pau ka maix, yam siduad maix, tak sang sikah ka maix heue. ²³ Grawh grawng nawh, lox tawm beenli mawh kawk ngu mai gumlox Nawh Cao mawh pa riang, lox sidiex gau pa jhi phimap mawh krax pa im ju heue. ²⁴ Nawh mawh pa pau ka maix sonsang luan khaing bun pa caox mai bun pa ang mhawm been mai jheeh pa chix nyaw glaw ka maix heue. ²⁵ Bun an kix, viang mhawm grang miex ding kawx, paw kieh rhawm maix ghoing mai paw lai kieh maix krix ka siyieb ngai nawh. ²⁶ Grawh grawng nawh, simex pa yuh paox pie tau mai bun coh kaux, hot tom sidah pon blah tix lon khaing mai bun pa hoik prah hoik tik pui khankix kawx, chix giex ti teei ka ju pa ngawh heue. ²⁷ Pui pon khawp ngu mai khawm ang kraung tix hax khex koe lie? ²⁸ Pui pa hu piang ngaox ngu mai ang hax caong khex koe tix kaux kaux lie? ²⁹ Pui pa laig hu ka moeng pui khankix kawx, awm an heue. Pui pa lud ka moeng pui khankix kawx, ang pon ti luan khaing phimap heue. ³⁰ Pui pa cai rhawm mai briex ti ih kawx, awm pui briex, ang pon ti luan khaing phimap. ³¹ Phan ex pon giex pui pa yuh nan, kieh nawh deeh viied aliah son mai kieh nawh se kraung pa koe daux nyiex nawh khawmuik heue. ³² Pui pa phit vao ka moeng pui, mawh pa ang koe pingnya heue. Pui pa yuh nan, mawh pa plaux ju tokaux laux tix heue. ³³ Nawh tak yaox ti kham ka jhawm saux tuat siviet kied sigrien mai krax pa laux min plakngai mai krax kaig tua nawh ang chix grai heue. ³⁴ Grawh grawng nawh, simex pa ang yum rhawm ka moeng tix, chix lih pa kied song rhawm mai yam hoek bawg yam tawx phimap ang lai koe krax caux rhawm heue. ³⁵ Pui tawx mau se miex ding ang ah, viang tawx totaix miex ding ang ah, nawh deuh ang koe ceu mai ang chix fah rhawm heue.

¹ Kawn simex aux eue, nghiet ka lox aux mai priex lox tawm beenli aux khankix ka daux rhawm maix awx. ² Priex lox tawm beenli aux khankix mai im ju awx, priex lox tawm aux khankix, awm sok ngai maix awx. ³ Vien ceu an khankix ka giien taix maix mai tiiem ti deuh piang dieb rhawm maix. ⁴ Deuh pingnya mawh nan tix, kok dong pa mhawm mawh paox grawm tix. ⁵ Phan yuh nan, tak taoh ti teei maix luan khaing daux taix bun pa laux been mai khaing jheeh bun coh kaux pa chix nyaw chix glaw heue. ⁶ Yam jhak aux ka daux doh siviex vawng nyiex aux mai aux yaox ceu pa yuh nin, ⁷ yam jhak aux ka paox simex cub pa iak cuyi pingnya khankix mai aux yaox sinaw pa ang koe pingnya tix kaux, ⁸ hu lailing dex bun pa ang koe cuyi pingnya pa awm nawh, ka daog krax heue. ⁹ Plak ponbo yam faik praix, nawh hu krax dee ot bun an heue. ¹⁰ Bun an, teei ti ceep kraung bun coh kaux mai hoek ti rieb ka nawh heue. ¹¹ Bun an chix ah lox ting lox sinum, koe rhawm pa kiien, ang ot daux nyiex tix mai ca lailing heue. ¹² Tivud ot plak praix nyiex, tivud ot daux krax, chix jiang praok krax kudah dee heue. ¹³ Yam yaox nawh ka sinaw an, ang koe ngai kaig mai kawm ngheut ka nawh ah nin, ¹⁴ "Aux yuh pawie tan, pa ih ka daux singaix hoik naog awm pa ah aux lox mukheu heue. ¹⁵ Mawh kheu in, aux tom lih rieb ka maix mai coca ti sawg pakngai maix mai hoik yaox yam in heue. ¹⁶ Aux hoik tawm man lai kuceu mai man pa mhawm plang, pa kaoh khaing meung Ejiptux piang ku it aux heue. ¹⁷ Aux sau muran mai rawm bee pa sioe baux mai khaox cai hung khankix, piang kraung it aux heue. ¹⁸ Hoek heue, ax it tau tom sidah riang praix mai yuh krax phit vao tom fah rhawm heue. ¹⁹ Cao nyiex aux ang ot daux nyiex, nawh viex hau mau tix mai hoik hu krax dee singai, ²⁰ Nawh sang deeh hoek ka singaix bak nawh ti deeh hoek heue." ²¹ Nawh ah lox nyawm rhawm mai nyaw glaw ka nawh, siyieb jheeh nawh nyaw glaw ka nawh mai yuh ti pex ka nawh heue. ²² Nawh hawt khaix nawh dom mawx dom an, awm hawt mawie ka dee plaux yum ang ah, cak, poh, ka sivoe ang te nyang krox ka tawm nawh, awm hu dee haoh pui hu ang ah. ²³ Awm sim pa nied laig ka jhawk pa taong pui mai ang tawng mawh pa som ju tix, sinaw an nied ti hawt khaix bun an dom mawx dom an heue. ²⁴ Mawh kheu in, kawn simex aux eue, nghiet ka lox aux mai deuh ti tawng ka lox pa sidiex aux khankix awx. ²⁵ Paw kieh rhawm maix simie ti hu ka krax dee ot bun yuh nan mai maix paw lud ti hu ka daux krax hu nawh. ²⁶ Grawh grawng nawh, nawh hoik kieh pui naing tom nie goh mai nawh hoik pah pui ting riang rao yum tom nie. ²⁷ Nyiex nawh mawh daux krax hoek meung yum mai laig ka daux mawnarhok heue.

¹ Pingnya mai krax tawng yung, kok yo mai ploi lox sinum ang mawh lie? ² Nawh cung ka dee lhaong dee choek mai praok krax heue. ³ Nawh kok yo praok siviex ting mai diang siviex veng mai ka daux siviex nyiex ah nin, ⁴ "Kawn pui khankix eue, aux kok ka pex mai ploi lox ka kawn pui heue. ⁵ Pui pa ang koe pingnya khankix eue, gau ka cuyi pingnya awx, pui pa caox khankix eue, kieh rhawm pex keud ka pingnya krax tawng yung awx. ⁶ Nghiet ha, aux tak krai lox pa ting jum, aux tak sang krai lox rahsee ka jheeh aux. ⁷ Lox pa kaoh khaing jheeh aux mawh pa dex dawd mai pa rahsee, siyieb jheeh aux seeing brai ka phimap heue. ⁸ Can lox pa sidiex aux khankix khawmuik mawh pa rahsee mai ang koe lox pa kawk vawk mai rhawm pa tieh feen heue. ⁹ Son pui pa tawng khankix, hoik sidawng laing laing, pui pa pon ka pingnya khankix, hoik mawh pa khaw caw heue. ¹⁰ Rieb ti teei ka lox pa sidiex aux sivoe, khaing mau, sawg pingnya krax tawng yung sivoe, khaing khri. ¹¹ Grawh grawng nawh, pingnya lheu mhawm khaing siang raoh heue. Can kraung khrai pa khaw rhawm khawmuik, ang pon tiag sidu ngawh mai pingnya an heue. ¹² Pingnya aux in, ot tau mai pa koe satix mai chix plak jhi ka pingnya krax tawng yung heue. ¹³ Krax pa lhat graung ka Siyiex mawh ceu pa koeng ka phimap mai pui pa ting rhawm, pui pa map ka pui mai pui pa hu ka krax pa ang mhawm mai pui pa ah lox pa kawk vawk khankix, aux tak koeng kah heue. ¹⁴ Pingnya mawh pa ngawh, pa chix tawx krax keud gau pa mhawm, koe ka aux heue. Aux mawh pingnya mai pa ting riang rao grum koe ka daux aux heue. ¹⁵ Mawh kheu pingnya aux, simiang khankix pon ti kwang mai simiang haktiex khankix, chix prawng ca rahsee heue. ¹⁶ Mawh kheu pingnya aux, kawn simiang ang ah, pui yuh kaing greem simiang ang ah mai cao prawng see khankix ang ah pon ti kwang ka haktiex heue. ¹⁷ Aux moh ka pui pa moh ka aux khankix, pui pa coca ti sawg ka aux khankix tak yaox ka aux heue. ¹⁸ Sinngao pa mi mai min plakngai koe mai aux, sinngao pa kaux cong mai pa rahsee kawx, koe mai aux heue. ¹⁹ Plix bwan son pa tawx aux, lheu mhawm khaing khri, nie lheu mhawm khaing khri nawnaw pa hoik thi heue. Gha sinngao pa pon kheu aux, nie lheu ngawh khaing mau heue. ²⁰ Aux mawh krax rahsee mai hu ka sinax pa prawng ca rahsee heue. ²¹ Can pui pa moh ka aux khankix, aux tak kieh grum naog ka sinngao, kraung khrai, mau, khri, ka daux nyiex ma kix heue. ²² Sivoe ang Siyiex nyang phan yuh tidtix dix, aux (cuyi) hoik mawh cie nawh heue. ²³ Sivoe ang haktiex nyang koe, aux hoik dawg koe heue. ²⁴ Sivoe ang rawm sigrit sigra pa raux mai rawm keut khankix ang nyang koe, Nawh hoik kieh aux koe heue. ²⁵ Ka ang gawng ting gawng iak nyang koe, aux hoik dawg koe. ²⁶ Ka ang nyang phan ka haktiex, daux tiagtu mai phawng tiex khankix, Nawh hoik kieh aux keh heue. ²⁷ Yam phan Nawh ka raoma aux ot tau mai Nawh mai yam phan Nawh ka rawm sigrit sigra ang ah mai yam phan ka paiawm pa koe dee lhaong ang ah, ²⁸ yam phan Nawh ka rawm keut pa kaux pa koe dee raux ang ah, ²⁹ yam tawx lox dee ot ka rawm sigrit sigra, son ang lai kheem hu tang dah mai yam jah jaong num haktiex ti koe. ³⁰ Aux ot mai Nawh awm kawn nyawm pa priex Nawh, aux mawh pa gaux rhawm son nawh mai aux gaux rhawm klieh sivoe ngai Nawh jheung jheung heue. ³¹ Aux gaux rhawm piang haktiex, ka pa phan pa deuh Nawh khawmuik mai aux yuh paox pie gaux rhawm tau mai kawn pui heue. ³² Mawh kheu in, kawn simex aux khankix eue, nghiet ka lox aux awx. Pui pa priex ti hawt krax aux khankix koe bwanson heue. ³³ Paw lai tik ka lox pa sidiex gau aux, nghiet mai kieh koe pingnya heue. ³⁴ Pui pa mhong lox aux mai pa pau ka diang siviex aux ku singaix mai pa krox jun ka diang siviex ting khankix koe bwanson heue. ³⁵ Pui pa sawg mai yaox ka aux, yaox ka ju heue. Nawh tak pon bwanson ka Siyiex heue. ³⁶ Pui pa lud ka aux khankix, lud ka ju, khwan tokaux tix heue. Pui pa koeng ka aux khankix moh ka krax yum heue."

¹ Pingnya teei rong nyiex aliah gawng mai hoik sum nyiex dee ot tix heue. ² Nawh teei tobrie khankix pah yum mai biiet ka rawm plix siie, hoik cox khre ka pheem sawm heue. ³ Nawh ploi siliex bun khankix, hu ka daux veng mai kok yo pa koe dee lhaong ah nin, ⁴ "Pui pa ang koe pingnya khankix, kieh laig ka dee in," mai pui pa ang koe pingnya khankix eue, ⁵ "Hoek heue mai ih ka blah aux mai nyaux rawm plix siiet pa biiet aux heue. ⁶ Via hu khaing pui caox mai sonsang pon ti im ju pa nyawm rhawm mai hu ka daux krax pingnya heue." ⁷ Pui pa sidiex gau ka pui pa nieb yuh pa ang cee ang cag khankix, yaox ti kham geu krax kaig tua mai pui pa jhi phimap ka pui pa caox khankix tak yaox ti kham geu ka pa salao heue. ⁸ Paw lai sidiex gau ka pui pa nieb yuh pa ang cee ang cag khankix, ha kix tak koeng ka maix, plak jhi phimap ka pui pa koe pingnya khankix, nawh tak moh ka maix heue. ⁹ Phan sidiex gau ka pui pa koe pingnya khankix, nawh tak nie lheu koe pingnya mai phan sidiex gau ka pui rahsee khankix, nawh nie lheu ting lhaong pingnya krax tawng yung heue. ¹⁰ Ceu pa lhat graung ka Siyiex mawh jaong num pingnya heue. Pa tawng ka Siyiex pa singax singeh mawh pingnya krax tawng yung heue. ¹¹ Grawh grawng nawh, pui pa deuh rhawm ka aux, aux tak sang kieh singaix ju, jhong khix mee num nawh ting lhaong heue. ¹² Phan maix koe cuyi pingnya, tak pon bwanson, son tokaux maix heue. Phan maix nieb yuh pa ang cee ang cag tokaux maix yaox ti kham phimap tix heue. ¹³ Bun pa caox khankix, chix ah lox ting lox sinum mai kheu ang koe pingnya mai ang tawng praix heue. ¹⁴ Nawh ngawm ka diang siviex nawh mai ngawm dee lhaong pa koe ka daux veng, ¹⁵ kok yo ka pui pa lawng krax sivoe nawh khankix ah nin, ¹⁶ "Pui pa ang koe pingnya khankix, kieh laig dee in," mai pui pa ang koe pingnya khankix eue, ¹⁷ "Rawm pa briex tix nyaux mawh pa nyawm heue. Blah pa briex tix ih dee glip mawh pa jiet nyawm heue." ¹⁸ Simex an, ang tawng ka simeeig pui yum koe tan mai grawng nyo sinie bun an khankix, ot ka dee raux meung yum heue.

¹ Lox phektem pa kied raux lai lox kab pa sidiex simiang Sawlamon mawh nin, kawn simex pa koe pingnya mawh ceu pa kieh keeing tix gaux rhawm, kawn simex pa caox, mawh pa kieh miex tix khi rhawm heue. ² Sinngao mau khri, pa pon ka daux pa ang rahsee khankix, ang koe bwanson, krax pa rahsee chix taoh ex khaing krax yum. ³ Siyiex ang kieh pui rahsee khankix yum ca, Siyiex yieh ti tik ka kaing pui pa nieb yuh pa ang cee ang cag khankix. ⁴ Pui pa nieh khankix, tak hoek krax hot sibhawm mai pui pa rien pa coca khankix, tak hoek krax mi krax koe heue. ⁵ Pui pa khrawm ti priex yam plix khankix, mawh kawn simex pa koe pingnya heue. Pui pa it bawg yam vawg nghox mawh kawn simex pa kaig tua heue. ⁶ Bwanson tak sang hoek piang kaing pui pa rahsee heue. Ka jheeh pui pa ang rahsee khankix, phimap pa tuktiak thox jheeh kix heue. ⁷ Yam doh keud ka pui rahsee, tak pon bwanson mai ceu kaux pui pa ang rahsee khankix, chix laux leeing heue. ⁸ Pui pa koe pingnya khankix, chix priex ti hawt ka lox tawm beenli, pui caox pa haoh lox kankix, tak hoek krax som nai heue. ⁹ Pui pa lawng hu ka krax rahsee khankix, tak khaw diang hu nawh mai pui pa lawng hu ka daux krax pa ang rahsee khankix, tak lih sidawng pa yuh kix mai hoek krax laux leeing heue. ¹⁰ Pui pa khiep ngai khankix, tak khi rhawm heue. Pui caox pa haoh lox khankix, tak hoek krax som nai heue. ¹¹ Jheeh pui rahsee khankix, mawh rawm keut pa im ju heue. Jheeh pui pa ang rahsee khankix, phimap pa tuktiak kix tak thox jheeh kix heue. ¹² Rhawm pa koeng chix kieh krax simah lih heue. Krax moh krax rhawm mawh pa chix tawb kheem ka phimap khankix heue. ¹³ Pui pa mhawm pingnya krax tawng yung chix krai grawng pingnya heue. Pui pa ang koe pingnya khankix, khaox sivied hoik koe piang blawg kix heue. ¹⁴ Pui pa koe pingnya khankix, chix khrawm chix priex ti deuh ka can pa tawng pa mhong nawh khawmuik heue, jheeh pui pa caox khankix, dex dawd mai pa som nai heue. ¹⁵ Pui pa chix pon mau, can sinngao nawh, kaux cong awm veng pa kaux cong heue. Krax hot sibhawm pui hot pui sibhawm khankix, mawh pa som nai heue. ¹⁶ Kaing pa yuh pui rahsee khankix, dex dawd mai ju heue. Kaing pa yuh pui pa ang rahsee khankix, dex dawd mai phimap heue. ¹⁷ Pui pa chix priex ti hawt ka lox pa sidiex gau beenli, chix hawt hu krax im ju mai pui pa ang nghiet ka lox sidiex gau khankix, chix lud krax hu tix heue. ¹⁸ Pui tawb kheem ceu pa koeng ka siyieb jheuh pa pie lhen, pui chix krai lox kieh min plakngai pui laux, mawh pa koe rhawm pa caox heue. ¹⁹ Ka daux pa haoh lox sikah chix kieh phimap lih, pui pa chix priex jheeh tokaux tix mawh pa koe pingnya heue. ²⁰ Dak pui rahsee khankix, awm mau pa mhawm pa hoik thi heue. Rhawm pui caox khankix ang koe ngawh jum. ²¹ Siyieb jheeh pui rahsee khankix, chix tawx pui hun ih heue. Pui caox khankix, tak yum kheu ang koe pingnya krax tawng yung heue. ²² Bwanson Siyiex chix mawh sinngao, sinngao an ang khao tau mai krax khi rhawm heue. ²³ Pui caox khankix gaux rhawm ka dee yuh kix phimap mai pui mhawm pingnya pa tawng pa yung khankix, chix keud chix gau kah heue. ²⁴ Pui pa ang rahsee khankix, ceu pa chix lhat tak hoek piang nawh heue. Pui rahsee khankix, Siyiex tak tawx can pa simie kix ti pon khawmuik heue. ²⁵ Pui pa ang rahsee khankix, chix grai hu awm phlu bhaung keu kang lux heue. Pui rahsee khankix, jaong num kix kied kaux cong heue. ²⁶ Awm rawm niex pa siki yuh rhang, pa awm taox ngu pa meet ka ngai, pui pa nieh khankix kawx, mawh pa cau pa soi pui heue. ²⁷ Pui pa lhat graung ka Siyiex, kieh nawh lang ju mai pui pa ang rahsee khankix, khix num kix dawd heue. ²⁸ Krax pa krox jun pui rahsee khankix, mawh ceu pa gaux rhawm mai pa krox jun pui caox khankix, tak grai hu heue. ²⁹ Daux krax Siyiex mawh pa kaux cong son pui rahsee mai pui pa yuh pa ang rahsee khankix, tak hoek krax laux leeing heue. ³⁰ Pui rahsee khankix, kaux cong jheung jheung mai pui pa ang rahsee khankix, ang yaox ti ot kaux cong piang haktiex. ³¹ Pingnya chix lih khaing jheeh pui rahsee mai dak pie lhen tak yaox ti kham ka pa tat ti tik heue. ³² Siyieb jheeh pui rahsee khankix, chix tawng ka pa khaw caw rhawm pui kah heue. Pui pa ang rahsee khankix, chix ah lox tiebtie heue.

¹ Siyiex seeing ka jiang pa ang khaw, kla jiang pa khaw caw mawh pa khaw rhawm Siyiex heue. ² Yam ting rhawm, lih mawh krax kaig tua mai pui pa awn rhawm khankix, mawh pa koe pingnya heue. ³ Ceu pa rahsee, thong gau ka pui pa rahsee khankix heue, ceu pa kawk vawk rhawm khankix, cha nie luan yuh mai hoek krax laux leeing heue. ⁴ Sinngao kraung khrai khankix, ang chix tawx bwanson singaix bawg yam lih song rhawm ex, phan mawh ceu pa rahsee, chix taoh ex khaing pa yum heue. ⁵ Krax pa rahsee, thong gau ka pui pa grum naog pa rahsee, pui pa ang rahsee khankix, yaox ti som nai ka pa ang rahsee ka ceu pa yuh tix heue. ⁶ Rhawm pa rahsee, chix taoh ka kix pui rahsee khankix heue, mai pui pa cha nie luan yuh khankix, deeh krix ka jhawk pa luan yuh tix heue. ⁷ Yam yum pui caox khankix, pa krox jun nawh tak hoek krax laux leeing mai pui pa ang rahsee khankix, viang kix simie ti pon kawx, hoek krax laux leeing heue. ⁸ Pui rahsee khankix, tak luan hu khaing pa khi rhawm mai pui pa ang rahsee, tieh ti deeh kham tang nawh heue. ⁹ Jheeh pui pa nieb yuh khankix, chix kieh nyiex paox plawg tix laux heue. Pui rahsee khankix, chix luan khaing see, kheu koe pingnya heue. ¹⁰ Phan pui rahsee ting lhaong haok huan tix kaux, pui khawm veng gaux rhawm heue. Yam som nai pui ang rahsee tix kaux, pui lawh maw kah heue. ¹¹ Mawh kheu jheeh pui pa rahsee, tawx bwanson ka veng pa ot nawh an mai pon krax yaogyaw heue. Mawh kheu jheeh pui pa ang rahsee, chix yuh veng an laux leeing heue. ¹² Pui pa ang koe pingnya, chix yuh pa ang cee ang cag ka paox plawg tix mai pui pa koe pingnya krax tawng yung chix ot yiien yawg tix heue. ¹³ Pui pa lailing mai krai lox tom nie, chix plak jhi doh ka ceu pa caw ti mox khankix mai pui pa kaux sijax khankix, chix mox mhawm mhawm heue. ¹⁴ Phan pui pa koe pingnya ang koe, krax tawng yung, pa chix tawx krax keud gau, pui haktiex khankix, som nai heue. Phan koe cao pa tawx krax keud krax gau tom nie, pon ti luan khaing krax lhat graung heue. ¹⁵ Pui pa kham tang see pui pa ang nawh meed nawh tawng, nawh tak yaox ti kham tom nie heue. Pui pa koeng ka see dieh taix paox tix ang koe krax khi rhawm. ¹⁶ Bun pa chix priex rhawm tix, pon min plakngai mai simex pa ting riang rao chix pon sinngao mau khri heue. ¹⁷ Pui pa chix caux rhawm, nawh chix yuh bwanson ka tokaux tix mai pui caox pui caig chix laklheet ka tokaux tix heue. ¹⁸ Kaing pa yuh pui pa ang rahsee, ang chix kaux cong mai pui pa rhuat simie pa rahsee, tak pon bwanson pa kaux cong heue. ¹⁹ Awm dex dawd pa rahsee ka ju pa im mai pui pa hawt ti sawg phimap kawx, chix sawg tom sidah yum tix heue. ²⁰ Pui pa vawk rhawm khankix, Siyiex seeing ka kix heue. Pui pa hawt hu daux krax pa rahsee, Nawh Cao khaw rhawm ka kix heue. ²¹ Pui caox khankix, viang kix yuh cub caw kawx, ang pon ti luan khaing krax ciyang phimap, simie ceu cad pui rahsee khaing, pa pon tix luan khaing krax ciyang heue. ²² Bun pa ang koe satix mai pingnya, viang mhawm grang kawx, awm lig miex pa tauk ih kraung mau khri ka toh meeh nawh heue. ²³ Pui rahsee krox jun mai sawg ka ceu pa mhawm khaing mai pui pa ang rah ang see krox jun ka pa dex dawd mai pa song rhawm heue. ²⁴ Pui pa gwieh ti tawx ka pui, tak baox deeh koe sinngao mau khri tom nie mai pui pa khrawm ti deuh, baox deeh hot hu ka koe. ²⁵ Pui pa chix gwieh ti tawx ka pui, nawh tak mi koe heue. Pui pa see rawm ka pui tang kaux, nawh deeh pon bwanson pa deeh see ka tokaux tix heue. ²⁶ Pui pa khrawm ti deuh nghox, nawh tak yaox ti kham ka pa jhax lawg pui khankix heue. Ka piang cao pa coh ih nghox koe bwanson pa mhawm heue. ²⁷ Pui pa coca ti sawg ka ceu pa mhawm, tak pon bwanson heue. Pui pa sawg ti yuh pui laux, tokaux nawh tak hoek krax laux leeing heue. ²⁸ Pui pa deuh rhawm ka sinngao mau khri tix, tak som nai heue. Pui rahsee tak awm lhax khaox pa klai jheung jheung heue. ²⁹ Pui pa kieh nyiex ma tix sivix, pon ka sin bhaung, pui pa caox khankix kawx, tak yaox ti yuh siliex ka pui pa koe pingnya heue. ³⁰ Plix pui pa rahsee, plix nawh mawh num plix pa im ju heue. Pui pa pon ka ju pui khankix, mawh pui pa koe pingnya heue. ³¹ Jhak heue, pui pa rahsee, yam ot kix piang haktiex, yaox ti kham ka pa ciyang phimap heue. Pui phimap mai pui pa ang rahsee khankix, nie lheu yaox ti kham geu miex ding?

¹ Pui pa simie tix nghiet ka lox tawm beenli, mawh pui pa moh ka pingnya heue. Pui pa koeng ka lox pa sidiex gau, mawh pa koe rhawm totiag heue. ² Pui pa mhawm khankix, tak pon min plakngai sivoe ngai Siyiex heue. Pui pa keud pa ang mhawm khankix, tak pon krax ciyang phimap heue. ³ Kawn pui ang chix kaux cong kheu phimap, riah pui rahsee ang chix gah hu. ⁴ Bun pa chix priex rhawm pa mhawm been, mawh mhok khri min plakngai ka mex tix.Bun pa chix yuh krax kaig tua, awm yuh si-ang mex tix rham heue. ⁵ Krax keud pui rahsee, mawh pa rahsee heue. Krax keud pa tawx pui ang rahsee, mawh pa pie lhen heue. ⁶ Lox pui pa ang rahsee khankix, mawh pa chix jawm tix pah ju pui yum, jheeh pui pa rahsee chix taoh ka pui tang kaux heue. ⁷ Nyiex pui pa ang rahsee khankix, goh mai laux grai mu heue. Nyiex pui pa rahsee khankix, chix kaux cong jheung jheung heue. ⁸ Pui pa koe pingnya tak pon pa yaogyaw pui, pui pa vawk daux rhawm khankix tak yaox ti kham pa nunai pui heue. ⁹ Pui pa tang yuh tix ih khawm rhawm pa awn pa tiiem viang ang koe min plakngai kawx, nie lheu mhawm khaing pui pa yaw rangdi tix khawm ang tix koe pa ih heue. ¹⁰ Pui rahsee khankix, chix lhawk ka ju tobrie pa eei tix heue. Pui pa ang rahsee khankix, nieb khin ti yuh mai ang koe krax caux rhawm heue. ¹¹ Pui pa yuh tix ih ma kaung, yaox ti ih tom sak heue. Pui pa lailing giex, pa ang koe krax keud khankix, mawh pa ang koe pingnya heue. ¹² Pui pa ang rahsee khankix, kix simie ka jhawk pa shiao pui caox khankix, riah pui rahsee khankix, chix plix heue. ¹³ Jheeh pui pa cha nie luan lox sikah khankix, koe jhawk pa caox son kix mai pui rahsee khankix, luan khaing see pa nu pa khawm heue. ¹⁴ Kawn pui yaox ti ih sak kheu plix siyieb jheeh tix. Nawh tak deeh pon bwanson pa mhawm mai pa ang mhawm kaing pa hoik yuh ka taix tix heue. ¹⁵ Pui caox khankix, keud kaing pa hoik yuh tix mawh pa caw heue. Pui pa cu nghiet ka lox pa tawx krax keud, mawh pui pa koe pingnya heue. ¹⁶ Krax song rhawm pui caox khankix, lih sidawng dom mawx dom an, viang mawh nan, pui pa koe pingnya satix khankix, chix kheem krax kaig tua heue. ¹⁷ Pui pa sikah lox pa mawh meh, chix jhi ka pa rahsee mai pui kham sakse pa ang mawh meh khankix, chix jhi ka ceu pa pie kheem heue. ¹⁸ Pui tiblah chix sikah awm pa suat ka gawn, dak pui pa koe pingnya chix kieh jhawm saux moi heue. ¹⁹ Siyieb jheeh pui pa kaux sijax, mawh pa kaux cong jheung jheung. dak pui pie lhen, mawh pa kaux tivud khaing. ²⁰ Ka daux rhawm pui pa keud ceu pa ang mhawm khankix, koe ceu pa pie lhen heue. Viang mawh nan, ka daux rhawm pui pa chix tawx krax keud krax gau sonsang deeh khaw caw paox tix khankix, koe krax gaux rhawm heue. ²¹ Ka piang pui rahsee khankix, ang hoek ceu pa khi rhawm, piang pui pa ang rah ang see khankix, tak grum hoek ceu pa khi rhawm heue. ²² Siyieb jheeh pa pie lhen, Siyiex seeing ka heue. Viang mawh nan, pui pa priex tix hawt ka lox sijax mukheu Nawh, Siyiex khaw rhawm kah heue. ²³ Pui pa koe pingnya satix, nawh chix mox ka ceu pa tawng tix heue. Pui pa caox khankix, chix jhi ka jhawm pa kwa nawh heue. ²⁴ Pui pa rien ti yuh kaing khankix, pon tix mawh cao giex kuang, pui pa nieh khankix, yaox ti mawh cao tawx gha heue. ²⁵ Ceu pa khi rhawm mawh ceu pa kieh pui khrup rhawm. Lox pa mhawm mawh pa chix kieh pui gaux rhawm heue. ²⁶ Pui rahsee khankix, chix jhi daux krax ka paox plawg tix heue. Daux krax pa hu pui pa ang rahsee khankix, deeh pie ka cao kix heue. ²⁷ Pui pa nieh khankix, viang kix yuh cao jaw, totiag pa pon kix hoik ping kawx, ang yaox ti ih, pui pa rien khankix, sinngao cie nawh mawh pa ting jum heue. ²⁸ Daux krax pui rahsee khankix, ang koe krax lhat krax yum, mawh krax pa im ju heue.

¹ Kawn simex pa koe pingnya, chix nghiet ka lox pa sidiex keeing nawh, kawn simex pa nieb yuh pa ang cee ang cag, ang chix cu nghiet ka lox pa sidiex gau. ² Kawn pui yaox ti ih ka plix jheeh pa mhawm mai pui pa yuh phimap khankix, yaox ti ih ka plix pa ciyang phimap heue. ³ Pui pa priex ka jheeh tix priex ka ju tix heue. Pui pa ang jheeh tix tom vieh, hoek krax laux leeing heue. ⁴ Pui pa nieh khankix, ang pon ceu pa si mie tix tidtix, pui pa rien ti yuh kaing khankix, tak pon ka pa simie tix khawmuik heue. ⁵ Pui rahsee khankix, koeng ka lox pie lhen. Pui pa ang rahsee khankix, yuh pa seeing brai mai hoek krax kaig tua heue. ⁶ Ceu pa rahsee, chix priex ka pui pa rahsee. Ceu pa ang rahsee, chix kieh pui pa koe phimap goh heue. ⁷ Pui hot sibhawm chix yuh grang tix awm pui pa mi pa koe, pui pa mi pa koe kawx chix yuh grang tix awm pui hot sibhawm heue. ⁸ Sinngao, mau khri mawh pa taoh ka ju pui pa mi koe mai pui hot sibhawm khankix, ang mhong lox deuh phimap heue. ⁹ Pa riang pui pa rahsee mawh krax gaux rhawm, kawk ngu pui pa ang rahsee tak yeet hu heue. ¹⁰ Kheu krax ting rhawm, chix viex krax pa simah, pui pa cu nghiet ka lox sidiex gau mawh pa koe pingnya heue. ¹¹ Sinngao mau khri pa pon yie, chix deeh uik hu heue. Sinngao, mau khri pa pon ka daux pa coca, mawh pa chix haok hwan heue. ¹² Krax krox jun, phan rheung bawg yam chix kieh khi rhawm. Yam grum naog pa simie ti pon khankix, lih mawh khaox pa im ju heue. ¹³ Pui pa yuh pa ang cee cag ka gumlox Nawh Cao, tak hoek krax laux leeing. Pui pa yungyi ka lox tawm beenli, tak pon pa nyawm rhawm heue. ¹⁴ Lox pui pa koe pingnya, mawh rawm keut pa im ju, pa luan khaing jhawk dee yum heue. ¹⁵ Pui pa koe pingnya krax tawng yung, pon plakngai, krax pui pa yuh phimap khankix, mawh krax pa nu pa khawm heue. ¹⁶ Pui pa koe satix khawmuik, chix yuh kaing daux pingnya, pui caox chix kieh phimap yuh tix sidawng heue. ¹⁷ Siliex pa ang rahsee, chix kieh kaing pa yuh tix laux, simiang pa yuh tang Sandaman pa kaux sijax, pon krax nyawm ot heue. ¹⁸ Pui pa thiang ti tik ka lox sidiex gau, nawh tak hot sibhawm mai tak hoek krax kaig tua. Pui pa nghiet ka lox pa sidiex gau, tak pon min plakngai heue. ¹⁹ Phan naog alo pa simie ti pon hoik fah rhawm heue. Ceu pa via ka phimap mawh ceu pa seeing ka pui caox khankix heue. ²⁰ Pui pa yuh paox pie ka pui pa koe pingnya, tak chix pingnya. Pui pa yuh paox pie mai pui caox, tak hoek krax laux leeing heue. ²¹ Krax khi rhawm chix hawt khaix pui pa koe phimap. Pui rahsee khankix tak pon bwanson pa mhawm heue. ²² Pui mhawm khankix, chix deuh sin, kraung khrai son kawn praix kawn saux tix heue. Sinngao, mau khri pui pa koe phimap khankix, hoik priex ti deuh son pui rahsee khankix heue. ²³ Pui hot sibhawm khankix, haox pa ih kheu yuh kix ma kaung heue. Viang mawh nan, kheu yuh nawh pa ang rahsee, chix hoek krax laux leeing heue. ²⁴ Pui pa ang shiao ka saux, mawh pa koeng ka kawn tix.Pui pa moh ka kawn tix, chix sidiex gau tom yam iak heue. ²⁵ Pui rahsee khankix, pon ti ih tom sak, pui pa ang rah ang see khankix, tak yaox ti kham geu ka pa cai rhawm heue.

¹ Bun pa koe pingnya, chix priex nyiex ma tix mhawm mhawm. Bun pa caox pa ang koe pingnya chix yieh ti tik nyiex ma tix ka taix tix heue. ² Pui pa hawt krax rahsee, chix lhat graung ka Siyiex.Pui pa hawt krax pa kawk vawk khankix, chix yuh pa ang cee ang cak heue. ³ Ka daux jheeh pui caox khankix, koe saux son pa ting rhawm kix heue. Ka daux jheeh pui pa koe pingnya, chix taoh ka pui heue. ⁴ Kawg mawie pa ang koe mawie mhaing, singax heue. Viang mawh nan, pui chix pon mau khri tom nie ka riang rao mawie heue. ⁵ Pui pa kham sakse pa kaux sijax, ang chix pie lhen, pui pa kham sakse pa ang kaux sijax, chix pie lhen heue. ⁶ Pui pa nieb yuh pa ang cee cag, sawg pingnya kawx ang yaox, pui pa koe pingnya krax tawng yung khankix, yie tix sawg heue. ⁷ Phan maix yaox pui caox, phan maix hoik tawng grawng mawh nawh pui ang koe pingnya, via hu khaing nawh heue. ⁸ Pingnya mai pui pa koe pingnya satix khankix, nawh tawng ka krax hu tix mai krax caox pui caox khankix, mawh pa pie lhen heue. ⁹ Pui caox khankix, chix yuh phimap pa ang cee cag mai pui rahsee khankix, chix yuh bwanson ka paox tix, tix kaux lai tix kaux heue. ¹⁰ Rhawm pui tang tawng krax kha rhawm tokaux tix, rhawm pui pa gaux rhawm ang chix dex dawd ka pui tang kaux. ¹¹ Nyiex pui pa ang rahsee chix goh heue. Nyiex gox pui rahsee khankix chix pruh riang heue. ¹² Krax keud kawn pui viang awm pa mawh meh kawx, dee sidah tawx krax yum heue. ¹³ Kawn pui, yam nyiah kawx, daux rhawm nawh chix khi heue. Krax nyiah, krax gaux rhawm, dee sidah chix lih mawh krax voi rhawm heue. ¹⁴ Pui pa koe rhawm pa tieh feen ang ah, pui pa mhawm ang ah, tak sak ka pa yuh tix heue. ¹⁵ Pui pa ang koe krax keud krax gau pa ang koe pingnya khankix, yie yum rhawm ka lox pa krai pui mai pui pa koe pingnya satix khankix, chix jhak ka krax pa hu tix mhawm mhawm heue. ¹⁶ Pui pa koe pingnya chix lhat chix graung mai via hu khaing phimap heue. Pui caox khankix, ting rhawm mai koe rhawm kwa heue. ¹⁷ Pui pa dawd rhawm khankix, chix yuh ceu pa kied caox, pui pa keud ceu pa ang mhawm khankix, tak yaox ti kham ka pa koeng pui heue. ¹⁸ Pui pa ang koe pingnya krax keud krax gau khankix, chix pon sin pa caox mai pui pa koe pingnya satix, tak yaox tix ceep mhok khri pingnya krax tawng yung heue. ¹⁹ Pui caox khankix, tak grux ngawng tix krub sivoe ngai pui pa mhawm khankix, pui pa ang rahsee khankix, tak grux ngawng tix krub ka diang siviex nyiex pui rahsee khankix heue. ²⁰ Pui hot sibhawm khankix, tak yaox ti kham ka pa koeng paox plawg tix mai pui pa pon sawg mau khri tom nie khankix, haoh paox pie heue. ²¹ Pui pa nieb yuh pa ang cee cag ka paox plawg nawh, koe phimap mai pui pa caux rhawm ka pui hot sibhawm khankix, koe bwanson heue. ²² Pui pa keud ka ceu pa ang mhawm khankix, chix lud krax heue. Pui pa chix keud ti yuh bwanson ka pui, pon bwanson krax caux rhawm pa kaux sijax heue. ²³ Pa coca ti yuh kaing kuceu koe bwanson mai ceu pa haoh lox sikah mawh pa hot sibhawm khaing heue. ²⁴ Sinngao, kraung khrai, pui pa koe pingnya mawh mhok khri min plakngai, pa yuh pui caox khankix, mawh ngie ceu pa caox khaing. ²⁵ Sakse pa mawh meh, mawh pa chix taoh ka ju pui, sak se pa ang mawh ang meh, mawh pa shiao ka lox pa pie lhen heue. ²⁶ Krax pa lhat graung ka Siyiex, mawh riang rao dee deuh rhawm pa kaux, kawn simex nawh khankix, tak pon dee laux dee deuh rhawm heue. ²⁷ Krax pa lhat ka Siyiex, mawh rawm keut pa im ju, pa luan khaing jhawk krax yum heue. ²⁸ Simiang yaox ti giex kaing pui haktiex tom nie, koe min plakngai heue. Simiang pa yaox ti giex kaing pui haktiex pa tux pa iak, min plakngai kawx iak heue. ²⁹ Pui pa lang rhawm rhi khankix, ting pingnya mai pui pa dawd rhawm khankix rhawm kix nie caox heue. ³⁰ Rhawm pa nyawm ot, mawh pa kieh tokaux im ju mai pa bo rhawm mawh pa kieh si-ang rham heue. ³¹ Pui pa tuktiak ka pui hot sibhawm khankix, mawh pa salao ka Siyiex Cao pa phan pa deuh heue. Pui pa nab yam ka Siyiex khankix, chix caux rhawm ka pui hot sibhawm khankix heue. ³² Pui pa ang rahsee khankix, tak hoek krax laux leeing, kheu yuh kix pa ang rahsee, pui rahsee khankix tom yam yum kix kawx, kawn koe krax keud pot jun pot heue. ³³ Pui pa koe pingnya krax tawng yung khankix, pingnya chix ot chix koe ka daux rhawm kix, ceu pa koe ka daux rhawm pui caox khankix, chix lih sidawng heue. ³⁴ Ceu pa rahsee, mawh pa chix yaog pui haktiex ting lhaong, phimap mawh pa chix yeen pui haktiex hoek dee tiem heue. ³⁵ Siliex pa koe pingnya, simiang chix yuh bwanson ka nawh heue. Siliex pa yuh krax kaig tua, yaox ti kham geu ka pa song rhawm heue.

¹ Lox pa awn pa tiem kieh rhawm pui deeh nyawm rhawm, lox sikah pa riex mawh pa chix kieh pui song rhawm heue. ² Dak pa koe pingnya, chix kieh pui tawng pingnya, jheeh pui caox khankix, chix hieh pa caox lih heue. ³ Ngai Siyiex koe kudah dee mai jhak ka pa mhawm mai pa ang mhawm heue. ⁴ Dak pa awn mawh khaox pa im ju mai dak pa riex mawh pa chix kieh rhawm pui saux heue. ⁵ Pui caox khankix, deuh lox sidiex gau keeing ang koe cee cag mai pui pa nghiet ka lox sidiex gau khankix, mawh pui pa chix priex rhawm satix heue. ⁶ Ka daux nyiex pui rahsee khankix, sinngao koe tom nie heue. Gha pon pui pa ang rahsee khankix, hoik nie mai krax pa sung sang rhawm nawh heue. ⁷ Siyieb jheeh pui pa koe pingnya, chix gwieh tix tawx pingnya krax tawng yung ka pui heue. Viang mawh nan, pingnya ang koe ka daux rhawm pui caox. ⁸ Siyiex seeing ka krax tan pui pa ang rahsee khankix. Siyiex khaw rhawm ka lox rawg bwan pui rahsee khankix heue. ⁹ Siyiex seeing ka krax pa hu pui ang rahsee khankix mai Nawh moh ka pui pa hawt daux krax pa rahsee khankix heue. ¹⁰ Pui pa lud krax hu khankix, ang rhawm nghiet ka lox sidiex gau, pui pa koeng ka lox pa deuh phimap khankix tak yum tete heue. ¹¹ Meung yum mai meung laux leeing kawx, hoik sidawng sivoe ngai Siyiex, lheu khaing in, nie lheu sidawng ka daux rhawm kawn pui miex ding? ¹² Pui pa yuh pa ang cee cag khankix, ang lai moh ka lox pa sidiex gau, ang pon ot dex pui pa koe pingnya heue. ¹³ Rhawm pa chix gaux rhawm, chix tawx pakngai heue. Rhawm pa khi rhawm chix kieh pui laux rhawm heue. ¹⁴ Rhawm pui pa mhawm pingnya krax tawng yung, chix sawg ka pingnya heue. Jheeh pui caox khankix, moh ka pa caox heue. ¹⁵ Singaix cie pui hot sibhawm khankix, mawh pa caox ku singaix mai rhawm pui pa gaux rhawm khankix, mawh pawie gaux rhawm jheung jheung heue. ¹⁶ Pui pa lhat graung ka Siyiex, viang koe sinngao, mau khri ceeix khaing kawx, nie lheu mhawm khaing pui pa mi koe khawm ot tix mai sivix rhawm tix heue. ¹⁷ Phan ih taux klai giex tix brie ka daux krax moh, nie lheu mhawm khaing ih nex mawie tang pa kluing pa bee khawm mu, ka daux pa ang koe krax moh heue. ¹⁸ Pui pa ting rhawm khankix, chix kieh krax simah lih heue. Pui pa chix gun yeung khankix, chix kieh krax simah yiien heue. ¹⁹ Daux krax hu pui pa nieh khankix, awm vie pang kat pa tie krax, viang mawh nan, khaix hu pui rahsee khankix, awm krax ting heue. ²⁰ Kawn simex pa koe pingnya, mawh pa gaux rhawm son keeing heue. Phan mawh kawn simex pa caox, ang kieh miex tix koe cee koe cag heue. ²¹ Pui pa ang koe pingnya krax tawng yung, chix gaux rhawm ka daux kaing pa caox heue. Pui pa koe pingnya krax tawng yung, chix gaux rhawm ka daux kaing pa rahsee heue. ²² Kaing ceu pa ang rom ti kum tau, chix laux heue. Kaing pa rom ti kum yuh tau chix kaux cong heue. ²³ Pui pa koe krax gaux rhawm, ka lox pa deeh ah nawh, lox pa krai pa khaw mai bawg yam, nyawm tix nghiet miex ding? ²⁴ Krax im ju pa hawt pui pa koe pingnya, chix via khaing meung yum plak greem mai chix thong haok plak piang dee lhaong heue. ²⁵ Siyiex, tak yieh laux nyiex pui pa ting rhawm, phan mawh gwang dee ot miexmai tak kieh kaux cong heue. ²⁶ Siyiex seeing ka krax pa keud pui pa ang rahsee khankix mai Nawh Cao khaw rhawm ka lox pui pa singax singeh khankix heue. ²⁷ Pui pa sawg sinngao, mau khri ka daux pa ang rahsee khankix, chix kieh kawn nyiex ma tix khi rhawm heue. Pui pa koeng ka totaix pa ang rahsee khankix, tak pon ju pa nyawm rhawm heue. ²⁸ Pui rahsee khankix, chix keud gau ka lox pa sang deeh pawk ka pui heue. Jheeh pui caox khankix, chix krai lox pa caox heue. ²⁹ Siyiex singai khaing pui pa ang rahsee khankix mai Nawh nghiet ka lox rawg bwan pui rahsee khankix heue. ³⁰ Pa riang ngai ex, chix kieh rhawm ex gaux rhawm heue. Lox pa gaux rhawm kawx, chix kieh gua si-ang naog heue. ³¹ Pui pa nghiet ka lox pa sidiex gau pa dex mai ju, tak pon tix ot tau mai pui pa koe pingnya heue. ³² Pui pa thiang ti tik ka lox sidiex gau khankix, yuh pa ang cee ca? ka ju khwan tix heue. Viang mawh nan, pui pa chix nghiet ka lox pa sidiex gau khankix, chix pon pingnya krax tawng yung heue. ³³ Rhawm pa lhat graung ka Siyiex mawh krax pa gau pingnya heue. Krax pa awn rhawm awn rhi koe sivoe ngai min plakngai heue.

¹ Rhawm keud khawmuik mawh pa dex mai kawn pui, dak mai: lox kaoh khaing dak khawmuik, mawh cie Siyiex heue. ² Kawn pui chix fah rhawm ka kaing pa yuh tix, phan mawh Siyiex jhak ka rhawm kawn pui heue. ³ Kaing pa yuh maix ap ka Siyiex awx. Phan yuh nan, kaing pa keud maix tak kaux cong heue. ⁴ Siyiex hoik yuh khawm uik ka son Nawh heue. Nawh hoik phan ti deuh singaix sonsang ciyang ka pui caox khankix heue. ⁵ Siyiex seeing ka pui pa ting rhawm khankix heue. Kix tok taix paox tix mai yuh cub caw kawx, ang doh pon luan khaing krax ciyang phimap heue. ⁶ Mawh kheu krax caux rhawm mai bwanson pa rahsee, pon ti luan khaing phimap heue. Rhawm pa lhat graung ka Siyiex, mawh pa chix via hu khaing phimap heue. ⁷ Yam khaw rhawm Siyiex ka jhawm pa yuh kawn pui, koe pui pa koeng ka paox tix kawx, Nawh deeh kieh kiex khaw paox tix heue. ⁸ Sinngao, mau khri pa pon ka daux pa rahsee, viang mawh ceeix kawx, nie lheu mhawm khaing pa pon tom nie ka daux pa ang rahsee heue. ⁹ Ka daux rhawm kawn pui keud krax sang hu tix, viang mawh nan, cao pa thong hu mawh Siyiex heue. ¹⁰ Krax prawng ca pa rahsee, koe ka siyieb jheeh simiang, yam prawng ca nawh, ang chix lud heue. ¹¹ Jiang pa khaw mai kla jiang pa khaw, mawh cie Siyiex heue. Kla jiang pa koe ka daux bau khankix, mawh pa sang deuh tix prawng ca heue. ¹² Simiang pa yuh phimap, mawh ceu pa seeing brai heue. Grawh grawng nawh, kheu pa rahsee dang ngeung kaux cong heue. ¹³ Siyieb jheeh pa rahsee mawh pa khaw rhawm simiang mai simiang moh ka pui pa ah lox pa khaw caw heue. ¹⁴ Krax song rhawm simiang, awm kawncau simiang yum heue. Viang mawh nan, pui pa koe cuyi pingnya, chix kieh yiien ka pa song rhawm an heue. ¹⁵ Kheu mhawm pakngai simiang, pon ju pa nyawm rhawm heue. Bwanson nawh kawx, awm rawm lhiex lha heue. ¹⁶ Pa pon ka pingnya nie lheu mhawm khaing pon khri pa mhawm, pa pon pingnya krax tawng yung, nie lheu mhawm khaing pon mau pa mhawm heue. ¹⁷ Krax pa hawt pui rahsee khankix, mawh pa via hu khaing phimap, pui pa ang via mai hawt krax an jheung jheung, nawh tak priex ju khwan tix heue. ¹⁸ Pui pa ting rhawm khankix, krax laux leeing koe sivoe kix pui pa ting rhawm lhaong ngai khankix, tak rau hu dee tiem heue. ¹⁹ Pa yuh paox pie ka pui pa awn rhawm khankix, nie lheu mhawm khaing yuh paox pie mai pui pa ting rhawm, pa gwieh tix cie kraung khrai mau khri pa pon khaing pa tud rhim heue. ²⁰ Pui pa priex tix hawt ka pingnya, tak pon pa mhawm heue. Pui pa deuh rhawm ka Siyiex, koe bwanson heue. ²¹ Rhawm pui pa lhak lhiem, pui tak kok mawh pa koe pingnya satix heue. Jheeh pui pa chix krai lox pa nyawm pa tie kawx, chix kieh pingnya haok hwan heue. ²² Pui pa pon ka pingnya khankix, pon ka rawm keut pa im ju heue. Pa sidiex gau pui caox khankix, mawh ngie ceu pa caox heue. ²³ Rhawm pa koe cuyi pingnya khankix, chix gau ka jheeh nawh mai baox thiem thie cuyi pingnya ka siyieb jheeh nawh heue. ²⁴ Lox pa nyawm ti nghiet khankix, awm rawm kaing hia, tie laig tom daux khwan mai kieh nyawm ot tom hoek daux si-ang heue. ²⁵ Krax pa keud kawn pui ce hoik mawh pa mawh meh kawx, dee sidah mawh krax yum heue. ²⁶ Kawn pui yuh kaing, jao son jheeh tokaux tix heue. ²⁷ Pui caox chix keud grawng pa caox, pa ang mhawm, lox sikah pa lih khaing jheeh nawh kawx, awm ngu pa kied hax heue. ²⁸ Pui pa kawk rhawm, chix ruat simie krax pa simah heue. Lox pui pa suksiep kawx, chix kieh paox grawm tang gwieh hu heue. ²⁹ Pui pa caox jhawm, chix nyaw glaw ka paox plawg mai chix viex hu ka daux krax pa ang mhawm heue. ³⁰ Yam khiep kix ngai tix mai keud ceu pa kawk vawk mai siyieb jheeh kix chuh mai lih mawh pa caox heue. ³¹ Pui hoik paing hauk kaing, phan ot ka daux krax pa rahsee, mawh mhok khri min plakngai heue. ³² Pui pa lang rhawm, nie lheu mhawm khaing pui pa ting riang rao mai pui pa gun rhawm, nie lheu mhawm khaing pui pa pon puing veng tix veng heue. ³³ Ex nieb ti teei lai pa koe daux bau kawx, cao pa hoik laug ti teei tete mawh Siyiex heue.

¹ Ih ex blah tix gum ka daux pa khaw caw, nie lheu mhawm khaing ih priex tan, pa naog ka daux nyiex ma pa simah ka paox tix heue. ² Siliex pa koe pingnya, yaox ti giex kaing piang kawn simex pa yuh krax kaig tua, pon sin tau mai kawn pui tang kaux heue. ³ Pa cheuk cheu ti yaox ka mau khri mawh ngu. Pa cheu ti yaox ka rhawm kawn pui mawh Siyiex heue. ⁴ Pui pa yuh pa ang rahsee khankix, chix yum rhawm ka lox pie lhen, pui pie kheem kawx, chix nghiet ka lox pa seeing brai heue. ⁵ Pui pa nieb yuh pa ang cee cag ka pui hot sibhawm khankix, map ka Siyiex Cao phan Cao deuh nawh, pui pa gaux rhawm ka yaox pui tang kaux krax khi rhawm, ang pon luan khaing krax ciyang phimap. ⁶ Kawn saux kawn sex mawh mhok khri ka pui pa riex ju, min plakngai kawn praix mawh keeing kix heue. ⁷ Lox pa mhawm ang doh keung ka pui caox, lheu khaing in, lox pie lhen, ang doh khaw ka simiang. ⁸ To taix awm siang pa mhawm sivoe cao pa pon, tak pex hu can dee vai ngai tix heue. ⁹ Pui pie kheem ka phimap, pa lud ka pui tang kaux, mawh pui pa sawg ka krax moh krax rhawm heue. Viang mawh nan, pui pa mie ti deeh krai pa lud pui tang kaux, mawh pui pa kieh paox grawm gwieh paox tix heue. ¹⁰ Lox pa sidiex gau tix gum ka pui pa koe pingnya, nie lheu mhawm khaing pa sivied tix yieh taix ka pui caox heue. ¹¹ Pui pa tieh feen khankix chix khrawm ti deuh pa ang rahsee khaing, mawh kheu nan, ploi kawncau pa caox hu ka nawh heue. ¹² sipup ka krih miex pa grai kawn, nie lheu mhawm khaing sipup ka pui caox yam lih song rhawm nawh heue. ¹³ Pui pa ang tawng ka bwanson mai pui pa deeh pawk ceu pa ang mhawm khankix, pa caox koe daux nyiex ma nawh jheung jheung heue. ¹⁴ Yam jah krax simah awm pa doh guh rawm nhawng, sivoe ang nyang koe krax simah, nied via hu khaing aw aw. ¹⁵ Pui pa ploi phimap ka pui pa ang rahsee mai pui pa ciyang phimap ka pui pa rahsee, Siyiex seeing ka kiex khawm ra heue. ¹⁶ Pui caox pa ang simie ka pingnya, tawx ngawh cuyi pingnya ka nawh chix koe bwanson yuh ka mawx? ¹⁷ Paox grawm chix moh paox tix jheung jheung, puxaik keh sonsang teem ka paox tix yam yaox krax kha rhawm heue. ¹⁸ Pui pa ang koe pingnya, dieh taix mai chix kham sivoe ngai paox grawm heue. ¹⁹ Pui pa moh pa simah khankix, mawh pui pa nie lheu moh ka pa cha nie luan yuh phimap heue. Pui pa yuh diang siviex tix ting lhaong khankix, sawg ka krax laux leeing heue. ²⁰ Pui pa vawk rhawm khankix, ang chix yaox ka ceu pa mhawm mai pui pa pie lhen khankix, chix yaox ka ceu pa khi rhawm pa caox heue. ²¹ Pui pa kieh keh ka pui caox, chix kieh tokaux tix laux rhawm heue. Kawn pa caox ang chix yuh ceu pa gaux rhawm son keeing tix. ²² Rhawm rhi pa chix gaux rhawm, chix kieh nyawm ot heue. Khwan pa chix laux rhawm, Kieh si-ang chix ceh rham heue. ²³ Pui pa ang rahsee khankix, chix cawk ti teei mau daux hau pui mai chix yuh laux ka pa rahsee heue. ²⁴ Pingnya koe sivoe ngai pui pa koe pingnya krax tawng yung khankix mai ngai pui caox khankix chix lulie tix jhak tom sidah haktiex heue. ²⁵ Kawn simex pa caox chix kieh keeing tix khi rhawm mai chix kieh miex tix laux rhawm heue. ²⁶ Ang mhawm tix ciyang ka pui pa rahsee, ang mhawm tix chuh ka simiang pa prawng see rahsee. ²⁷ Pui pa grum naog krax keud ang chix haoh lox mai pui pa koe pingnya krax tawng yung, chix deuh rhawm tix nhim yiien mhawm heue. ²⁸ Pui caox kawx, phan chix ot nhim mhawm mhawm, pui ce kix mawh pa koe pingnya krax tawng yung heue. Pui pa ang vaoh jheeh tix sikah kawx, pui tang kaux ce mawh pa koe pingnya krax tawng yung heue.

¹ Pui pa ang yuh paox pie mai pui tang kaux mai pui pa koe rhawm tix sawg ka pingnya krax tawng yung awm pa simie nawh, mawh pui pa chix sawg ka pingnya heue. ² Pui caox ang chix gaux rhawm ka daux pingnya, lheu khaing chix jhi nawh rhawm caox pa keud tix khaing. ³ Yam hoek pui pa ang rahsee khankix, yaox ti kham ceu pa ang cee cag mai yam laux min plakngai, yaox ti kham ka pa salao heue. ⁴ Lox lih khaing jheeh, awm rawm pa kied raux, rawm keut pingnya, awm rawm klawng ting pa lih hu khankix heue. ⁵ Yam prawng see, ang khaw ti jhak plakngai pui pa ang rahsee ka son sang som pui rahsee heue. ⁶ Siyieb jheeh pui caox khankix, chix kieh pui yuh simah, jheeh nawh kawx chix sawg ka krax ciyang phimap heue. ⁷ Jheeh pui caox khankix, mawh pa yuh tokaux tix laux, siyieb jheeh nawh kawx mawh jhawk son ju nawh heue. ⁸ Lox chix kieh pa simah khankix, nyawm awm pa ih, chix laig ka daux vaig daux tu heue. ⁹ Pui pa nieh yuh kaing khankix, mawh puxaik pui pa cai mau khri som nai heue. ¹⁰ Ceu kaux Siyiex, mawh tab pa kaux cong mai pui pa rahsee khankix, to tix laig tan mai luan khaing krax khi rhawm heue. ¹¹ Pui pa mi koe mau khri ah nin, sinngao aux awm veng pa kaux cong mai nawh keud ce awm guh veng pa lhaong heue. ¹² Num krax laux leeing mawh pa ting rhawm heue. Num min plakngai mawh pa tiem rhawm tiem rhi heue. ¹³ Pui pa prawng ca ka pui, ka sivoe ang nyang bax chawk cheng ka grawng kuceu, mawh pui caox, pa koe phimap mai pon krax kaig tua heue. ¹⁴ Ju khwan kawn pui, pon kham ka jhawm saux tix, pui mawx pa pon gun yeung ka krax khrup rhawm rhi tix lie? ¹⁵ Pui pa chix deuh rhawm satix khankix, mawh pui pa chix priex ka pingnya heue. Yhaok pui pa koe pingnya, chix sawg ka pingnya heue. ¹⁶ Mawh kheu totaix pa viex kawn pui, koe akhwang pon ti laig ka sivoe pui ting khankix heue. ¹⁷ Pui pa hoek pau tix ah see sivoe, viang nawh ah lox pa rahsee kawx, paox plawg nawh, kawn hoek tix chawk cheng ka nawh heue. ¹⁸ Nieb kieh pui cawk silak, sonsang kieh pa thung thiang yiien mhawm mai tat dud ka see pui pa ting riang an khankix heue. ¹⁹ Pa viang ti yuh pa simah ka puxaik tix, nie lheu nu khaing veng pa kaux cong, pui pa yuh krax simah ka puxaik khankix, awm jhong siviex pa tieb ka tab heue. ²⁰ Vaig pui naog ka plix jheeh tix mai nawh yaox tix sak ka kaing pa lih khaing siyieb jheeh tix heue. ²¹ Dak mawh pa kwang ka ju pa im mai ju pa yum heue. Pui pa moh dak tix, yaox ti ih plix dak tix. ²² Pui pa pon moeng, pon ceu pa mhawm, pon bwanson khaing Siyiex heue. ²³ Pui hot sibhawm, chix khyox khaw ka pui, phan mawh pui pa mi koe khankix, chix pawk lox riex lox si oh heue. ²⁴ Pui Pa haoh hun paox grawm khankix, chix laux leeing, phan mawh paox grawm pa mhawm, nie lheu ot dex ex khaing puxaik dex heue.

¹ Pui hot sibhawm pa hawt daux krax rahsee, nie lheu mhawm khaing pui caox pa ah lox kawk vawk heue. ² Phan rhawm khwan ang koe pingnya tawng yung ang khaw ti ot, caong pui pa hu phai, chix lud hu heue. ³ Mawh kheu kawn pui koe rhawm pa caox, ka daux rhawm nawh, deuh phimap ah lox salao ka Siyiex heue. ⁴ Pui pa koe sinngao khankix, haoh paox grawm, phan mawh pui hot sibhawm khankix, ang pon yuh paox pie tau mai paox plawg. ⁵ Pui pa kham sakse pa ang mawh ang lai pon tix luan khaing krax ciyang, awm an, pui pie lhen khankix kawx, ang pon tix luan khaing krax ciyang. ⁶ Pui haoh hun khankix, chix nyaw glaw lox ka simiang mai pui pa chix tawx totaix kawx, pui ku kaux chix yuh paox pie nawh. ⁷ Phan mawh pui hot sibhawm can puxaik nawh khankix kawx, koeng ka nawh mai paox grawm nawh khankix, nie lheu via hu singai khaing nawh heue. Viang nawh hawt kok kix kawx, kix mox tix grai khaing nawh heue. ⁸ Pui pa pon pingnya khankix, moh ka ju khwan tix, pui pa pon pingnya krax tawng yung kawx, tak pon bwanson pa mhawm heue. ⁹ Pui pa kham sakse pa ang mawh ang meh, ang lai pon tix luan khaing krax ciyang phimap, awm an, pui pie pui lhen khankix kawx, tak hoek krax laux leeing heue. ¹⁰ Krax gaux rhawm ang doh keung mai pui caox, lheu khaing an, siliex kawx ang keung tix kwang piang simiang nawh heue. ¹¹ Pui pa chix yuh satix, chix gun yeung ka pa song rhawm tix mai pui pa chix gun yeung ka pui pa lud ka tix, nawh koe min plakngai heue. ¹² Krax song rhawm simiang, awm graox sivai sangsi, viang mawh nan, bwanson nawh, awm rawm ciex pa lih piang rib khankix heue. ¹³ Kawn simex pa caox, mawh pa kieh keeing tix tug rhawm mai moeng pa chix brax simah lawlawx, awm jah rawm lhiex pa lih tix jah hoik tix jah heue. ¹⁴ Nyiex, sinngao, kraung khrai, mau khri, mawh sin pa pon khaing miex keeing, viang mawh nan, moeng pa koe satix mawh sin pa caux rhawm Siyiex ti tawx heue. ¹⁵ Rhawm pa nieh kieh pui chix luan it, pui pa nieh khankix, yaox tix pon pa cai rhawm heue. ¹⁶ Pui pa priex tix hawt ka lox tawm beenli, mawh pui pa priex ka ju khwan tix heue. Pui pa tik ka lox tawm beenli khankix, tak yaox tix yum heue. ¹⁷ Pui pa caux rhawm ka pui hot sibhawm, mawh pui pa tawx krax yaog yaing ka Siyiex, Nawh Cao deeh viied bwanson ka pa yuh nawh heue. ¹⁸ Yam kawn koe bawg yam, sidiex gau ka kawn simex maix awx. Son ang nawh sang hoek krax laux paw lai sidiex nawh ka daux krax caux rhawm. ¹⁹ Pui pa ting rhawm tak pon krax ciyang, phan maix taoh nawh maix tak yaox tix taoh nawh lawlawx heue. ²⁰ Nghiet ka lox pa sidiex gau ka maix mai rieb ti teei ka lox pa tawx riang rao, sonsang mawh maix pui pa koe pingnya singaix pa sang hoek sax. ²¹ Kawn pui chix keud kuceu ka daux rhawm tix, viang mawh nan, mawh krax keud Siyiex khaing pa kaux cong heue. ²² Phan mawh pui pa koe rhawm sibieh, mawh pa chix yuh bwanson mai pui hot sibhawm, nie lheu mhawm khaing pui chix pie lhen heue. ²³ Rhawm pa lhat graung ka Siyiex, mawh pa dex dawd mai pa im ju, pui pa koe rhawm yuh nan, koe krax fah rhawm mai nawh ang yaox krax khi rhawm. ²⁴ Pui pa nieh khankix, viang taix kix hoik cawk ka daux aw kawx, ang koe rhawm deeh toek taix tix sonsang sau ka daux jheeh tix heue. ²⁵ Phan sivied tix gau ka pui pa yuh pa ang cee ang cag, pui pa ang koe pingnya khankix, tak sang doh keud heue. Phan sidiex gau ka pui pa koe pingnya krax tawng yung nawh nie lheu koe pingnya heue. ²⁶ Kawn simex pa kieh sin keeing tix nai nawk mai grheu miex tix to, tak yaox ti kham krax kaig tua pa salao pui heue. ²⁷ Kawn simex aux eue, paw lai nghiet ka lox sidiex gau pa sang kieh maix via hu khaing pingnya krax tawng yung awx. ²⁸ Pui pa nieb kham sakse chix yuh pa ang cee ang cag ka been pa rahsee mai jheeh pui pa ang rahsee khankix kawx chix bleet tix ih ka phimap heue. ²⁹ Hoik rien ti deuh krax ciyang ka son pui pa yuh pa ang cee ang cag mai hoik rien ti deuh saux pa sivied son blawg pui pa caox khankix heue.

¹ Rawm plix siiet mawh ceu pa chix pie lhen kawn pui, plai mawh ceu pa chix kieh pui simah, pa yuh ka ceu an khankix, mawh pui pa ang koe pingnya heue. ² Ceu pa song rhawm simiang, awm graox sivai sangsi, pui pa kieh simiang song rhawm mawh pa plaux ju tix heue. ³ Pui pa kieh simah yiien mhawm, koe min plakngai, viang mawh nan, pui pa caox khankix chix simah jheung jheung heue. ⁴ Pui pa nieh khankix, ang rhawm yuh kaing kheu kwat, kheu in, yam hoek bawg yam vawg nghox nawh rawg ka pui tang kaux kawx ang pon. ⁵ Ka daux rhawm keud kawn pui, awm rawm pa kied raux kawx, pui pa mhawm pingnya khankix, tak kin ti teei heue. ⁶ Pui tom nie khankix, chix krai ka bwanson pa hoik yuh tix, viang mawh nan, mawh pui mawx pa pon sawg ti yaox ka pui pa kaux sijax lie? ⁷ Pui rahsee khankix, hawt krax pa rahsee tix mai kawn saux kawn sex nawh khankix kawx, tak pon bwanson heue. ⁸ Simiang, pa ngawm piang dang ngeung prawng ca, ngai nawh grheu ti tik ka ceu pa caox pa ang mhawm khawmuik heue. ⁹ Pui mawx pa pon ah, aux hoik kieh rhawm tix singax mai aux hoik luan khaing phimap tix heue. ¹⁰ Kla jiang pa ang khaw mai khrawng pa ang khaw khankix, mawh pa seeing Siyiex kah heue. ¹¹ Kawn nyawm kawx, ceu pa yuh nawh singax lie ang singax lie? Caw lie ang caw lie? Jhi ka kaing pa yuh nawh mai kieh sidawng ka rhawm nawh heue. ¹² Yhaok pa chix mhong ang ah, ngai pa chix yaox ang ah, mawh pa phan pa deuh Siyiex heue. ¹³ Mawh kheu lhat ka hot sibhawm, paw lai koe rhawm tix it, blah ngai tix awx. Maix tak yaox tix sawm sak heue. ¹⁴ Cao pa liag chix ah yuh nin, ang mhawm, ang mhawm, khaix hoik liag hu, chix deeh yaw tix heue. ¹⁵ Jheeh pui pa grum naog pingnya, nie lheu ngawh khaing khri, siang raoh pa ting jum tom nie heue. ¹⁶ Phan kham sakse son pui pa ang maix tawng mai son bun pa ang mhawm been, teei ti deuh kraung nawh tix ceuceu heue. ¹⁷ Ceu pa pie kheem tix ih, viang nyawm kawx, sidah khaix lih mawh simaox khrap ka jheeh cao ih heue. ¹⁸ Krax keud gau pa kum kawng tau, mawh pa kaux cong heue. Phan koe krax keud kum kawng tom chix yuh naing heue. ¹⁹ Pui pa vuvie haoh lox sikah khankix, chix krai doh ka ceu pa khaw tix mox. Mawh kheu in paw lai yuh paox pie ka pui pa chix nyaw glaw. ²⁰ Pui mawx ang ah, pa jhax lawg ka miex keeing tix, kawk ngu nawh tak yeet ka daux pa kied vhaik heue. ²¹ Viang phai pon sinngao yam jah kawx, dee sidah khaix mawh pa ang koe bwanson heue. ²² Paw ah, aux sang deeh pawk pa caox ka pui, krox jun ka Siyiex, Nawh tak taoh ka maix heue. ²³ Siyiex seeing ka kla jiang pa ang khaw heue. jiang pa ang khaw kawx koe phimap heue. ²⁴ Siyiex, hoik cox daux krax hu kawn pui heue. Phan ang mawh nan, kawn pui chix tawng krax hu ti yuh ka mawx? ²⁵ Pui pa hoik tiextu tix ah, in mawh pa mhawm heue. Nawh tieh feen khaix, mawh pui pa hoik krix ka jhawk heue. ²⁶ Simiang pa koe pingnya, grheu ti tik ka pui caox khankix mai teei ling lawx mai gut heue. ²⁷ Ju khwan kawn pui mawh kawk ngu Siyiex, mawh pa sang cheuk cheu ti yaox ka kraung pakpeung pa koe ka daux tokaux tix khawmuik heue. ²⁸ Krax pa caux rhawm mai ceu pa rahsee, mawh pa chix priex ka simiang heue. Kieh dang ngeung nawh kaux cong kheu krax caux rhawm heue. ²⁹ Min plakngai sinaw khankix mawh riang rao kix. Min plakngai kuad song khankix mawh haok kaing paing kix. ³⁰ Phan sigoih ka dee mat chix sighrah pa seeng singax, rhoi khaix saux kawx chix yuh bwanson daux tokaux tix heue.

¹ Rhawm simiang koe ka daux tawm taix Siyiex, awm rawm klawng, chix kieh vai hu awm koe alo Nawh heue. ² Kawn pui chix fah rhawm ka pa yuh tix, phan mawh Siyiex ciang tix yaox rhawm khankix heue. ³ Siyiex khaw rhawm ka pa yuh ceu pa rahsee mai pa prawng ca rahsee, nie lheu khaw rhawm khaing ceu pa tan heue. ⁴ Plakngai pui ting rhawm mai rhawm cong coh, pa riang pui pa ang rahsee khankix, mawh phimap heue. ⁵ Krax keud pui pa coca ti yuh, mawh pa mi pa koe heue. Krax keud pui pa ang koe satix pa mawh pa meh mawh pa hot sibhawm heue. ⁶ Sinngao, mau khri pa khrawm ti deuh ka lox pie kheem khankix, awm taox rawm pa chix grai hu mai hoik krix ka jhawk simiang yum heue. ⁷ Pui pa ang rahsee khankix, mawh kheu kix ang simie tix prawng see ka daux pa rahsee, phimap pa yuh kix tak deeh kieh kix laux leeing heue. ⁸ Pui pa lud krax hu tak hoek dee singai, kaing pa yuh pui mhawm khankix, mawh pa khaw caw heue. ⁹ Pa yaox ti ot ka daog piang braux nyiex, nie lheu mhawm khaing pa yaox ti ot ka daux nyiex ting mai bun pa simah ka nyiex ting pui hun heue. ¹⁰ Pui pa ang rahsee khankix, simie ti yuh ka pa caox mai nawh ang rhawm yuh bwanson ka paox plawg tix. ¹¹ Yam yaox pui pa yuh pa ang cee cag tix kham ka krax ciyang, pui pa ang koe pingnya deeh pon satix ka an mai pui pa koe pingnya yam deeh yaox nawh tix gau mai pingnya nawh koe krax haok hwan heue. ¹² Pui pa rahsee chix keud sawn ka nyiex pui pa ang rah ang see mai pui pa ang rahsee khankix, Siyiex tak yuh kix laux kheu phimap pa yuh tix heue. ¹³ Pui pa thox yhaok mai ang rhawm mhong lox yiiem pa kok yo pui hot sibhawm khankix, yam deeh yiiem kok yo nawh pui tix kaux kawx ang lai mhong. ¹⁴ Totaix pa briex tawx, mawh ceu pa kieh nyawm rhawm mai totaix sivoe naok nawh, chix kieh krax pa kied song rhawm grai heue. ¹⁵ Krax prawng ca pa rahsee mawh pa gaux rhawm son pui rahsee, viang mawh nan, pui pa yuh pa caox khankix tak hoek krax laux leeing heue. ¹⁶ Pui pa lud hu khaing krax pingnya, caw tix ot daux simeeig dee khrawm pui yum paox tix heue. ¹⁷ Pui pa gaux rhawm ka alo nex nham, tak hoek krax hot sibhawm mai pui pa miag ka rawm plix siiet mai rawm bee, tak ang chix mi chix koe. ¹⁸ Pui pa ang rahsee khankix, mawh sonsang taoh ka pui rahsee mai pa cha nie luan yuh khankix kawx, mawh sonsang taoh ka pui pa rahsee heue. ¹⁹ Pa yaox ti ot ka daux tiagtu, nie lheu mhawm khaing pa yaox ti ot mai bun pa dawd rhawm mai pa yie simah ka pui heue. ²⁰ Ka daux nyiex pui pa koe pingnya koe kraung khrai mai bee heue. Phan mawh pui caox khankix, chix kieh uik pak heue. ²¹ Pui pa sawg ka been pa rahsee mai krax caux rhawm, pon pa im ju pa rahsee mai plakngai sidawng heue. ²² Pui pa koe pingnya khankix, chix haok ka guh veng pa kaux cong mai teei ti tik ka pui ting riang dee deuh pui khankix rhawm heue. ²³ Pui pa chix priex jheeh mai dak tix, chix priex ju khwan tix khaing pa kha rhawm heue. ²⁴ Pui yie song rhawm mai pui pa ting rhawm khankix, deuh kix mawh pui pa yuh pa ang cee ang cag heue. ²⁵ Pui pa nieh khankix, mawh kheu nieh yuh kaing, ceu pa simie kix, chix kieh kix yum heue. ²⁶ Nawh kied chix simie ku singaix, phan mawh pui rahsee, ang lai lhawk mai chix gwieh ti tawx ka pui heue. ²⁷ Pa tan pui pa ang rahsee, mawh ceu pa seeing brai heue. Lheu khaing in, phan nawh tan mai rhawm pa ang rahsee, nie lheu seeing brai miex ding? ²⁸ Pui pa kham sakse pa ang mawh ang meh, chix hoek krax laux leeing, pui pa hoik mhong khankix jiet chix krai heue. ²⁹ Pui pa ang rahsee khankix, chix kieh pakngai tix riex reen, phan mawh pui rahsee, chix cox ka krax pa hu tix heue. ³⁰ Pingnya, krax keud krax gau mai pingnya krax tawng yung, ang chix kaux cong sivoe ngai Siyiex tix ceu kawx heue. ³¹ Viang hoik rien brung son bawg yam sang puing naing kawx, hoik pex mai pon pa nyawm rhawm kheu bwanson Siyiex heue.

¹ Khaw tix sawg min plakngai nie lheu khaing sawg krax pa mi pa koe, bwanson pa moh rhawm ka pui tang kaux, nie lheu mhawm khaing mau khri heue. ² Pui pa mi pa koe mai pui hot sibhawm sipub paox tix, mawh krax pa yuh Siyiex khawmuik heue. ³ Pui pa koe satix, nawh grux tawng ka see ceu pa khi rhawm pa sang hoek piang tix mai chix mox tix heue. Pui pa ang koe pingnya, hu awm pa hu nawh mai hu yaox see krax khi rhawm heue. ⁴ Bwanson pa tiem rhawm rhi mai pa lhat graung ka Siyiex, mawh pa pon sinngao, min plakngai mai ju heue. ⁵ Pang kat mai jhawk hoik koe ka daux krax hu pui pa vawk rhawm mai pui pa priex ju khwan khankix, chix via hu singai khaing kix heue. ⁶ Sidiex gau ka krax hu kawn nyawm awx. Phan yuh nan, yam riex ju sax, nawh ang lud hu ka daux krax an heue. ⁷ Pui mi pa koe khankix, giex kaing piang pui pa hot sibhawm mai pui pa yaog yaing mawh siliex ka cao pa tawx yaog yaing heue. ⁸ Pui pa rhuat simie pa caox pa ang mhawm, nawh tak yaox tix deeh vawg nghox krax kha rhawm heue. Kaing pa yuh nawh tak grai hu heue. ⁹ Pui pa koe ngai pa chix caux rhawm, koe bwanson, mawh kheu nawh tak tawx blah pa ih ka pui pa hot sibhawm heue. ¹⁰ Grheu ti tik ka pui pa yuh pa ang cee ang cag khankix, phan yuh nan, ceu pa koeng lih hu mai pa simah mai pa salao tak yiien hu heue. ¹¹ Pui pa moh ka rhawm pa singax singeh, chix krai lox pa awn pa tiem mai tak mawh pa chix yuh paox pie ka simiang heue. ¹² Ngai Siyiex chix priex ka pingnya pa tawng yung mai Nawh yuh laux ka pui pa lud heue. ¹³ Pui pa nieh pa chix ah nin, sivai sangsi koe ka praix tan mai phan aux lih hu, rien tix yum heue. ¹⁴ Jheeh bun pa ang mhawm been, mawh daux tiex pa kied raux, kaw pa seeing Siyiex kah, Nawh Cao tak rau nawh ka daux tiex an heue. ¹⁵ Rhawm pa caox, kie ti deuh ka daux rhawm kawn nyawm heue. Viang mawh nan, khaox saux pa sivied tix gau, grheu ti tik ka rhawm an singai heue. ¹⁶ Pui pa tuktiak ka pui pa hot sibhawm, sonsang mi sang koe tokaux nawh mai pui pa tawx ka pui pa mi pa koe khankix, tak hoek krax pa hot sibhawm tete heue. ¹⁷ Veeh yhaok maix mai nghiet ka lox pui pa koe pingnya awx. Pingnya pa tawng yung aux kawx, kieh koe ka daux rhawm maix heue. ¹⁸ Phan maix sau ceu an khankix, ka daux rhawm mai daux jheeh maix koe bwanson pa mhawm son maix heue. ¹⁹ Kheu sonsang deuh maix rhawm tix ka Siyiex, aux sidiex gau ka tokaux maix singaix heue. ²⁰ Aux hoik tiiem grawng lox tawm pingnyap pa tawx satix mai grawng lox tawm pingnyap pa tawng pa yung heue. ²¹ Sonsang tawng maix ka lox pa mawh meh mai sonsang chix krai maix lox pa mawh meh mai lox pa tawx satix mai lox mhai pa daox deng ka kix, pui pa ploi hoek ka maix, aux hoik tiem tix tawx ka maix ang mawh lie? ²² Paw lai tud rhim ti teei kraung khrai pui pa hot sibhawm, grawh grawng nawh, kheu kied hot sibhawm nawh, paw lai ciyang ka kix mai pui pa kha rhawm, ka diang siviex veng. ²³ Grawh grawng nawh, Siyiex priex ka kix mai pui pa tud rhim ti teei kraung khrai kix, Siyiex tak deeh rhim ti teei ju kix heue. ²⁴ Paw vi yuh paox grawm ka pui pa dawd rhawm mai paw lai hawt khaix pui pa yie song rhawm, ²⁵ phan maix hawt khaix kix, ha maix kox gau ti yuh pa yuh kix mai tokaux maix tak krix ka jhawk heue. ²⁶ Paw laig ti yuh paox pie mai cub pui pa dieh taix mai cub pui pa kham tang ceuk rom pui. ²⁷ Phan maix ang koe tix tawx, mawh kheu patix nawh teei kraung it maix hu? ²⁸ Paw lai greed mee haktiex pa hoik sum tax du pex ti deuh khankix. ²⁹ Sax yaox maix pui pa cheung ka kaing yuh tix tom hoik lie? Pui an, tak yaox tix yuh kaing jhaw simiang mai tak ang yuh kaing pui iak pui lied heue.

¹ Yam ngawm maix ti sawm tau mai simiang, keud ceu pa koe sivoe ngai maix mhawm mhawm awx. ² Phan maix cha nie luan ih, hoik teei gawn mai nyeu ka ghok maix heue. ³ Paw lai simie tix ih ka priex ih simiang, grawh grawng nawh, ceu pa ih an, chix pie lhen ka maix heue. ⁴ Paw lai coca ka sonsang pon mau khri, paw deuh rhawm ka pingnya tokaux tix. ⁵ Khex caw tix sawg ka ceu pa chix grai pa koe sivoe ngai maix khankix lie? Phan ah tete, ceu an khankix, chix yuh pruik tix po hu, awm pa po klang preng piang raoma heue. ⁶ Paw lai ih priex pa yuh pui pa koeng riang ciang khoi mai paw lai simie ka pa ih kix. ⁷ Nawh yuh awm pa keud rhawm nawh, viang nawh ah ih nyaux ka maix kawx, nawh ang koe rhawm pa simie ti tawx ka maix. ⁸ Maix tak sang deeh hao pa ih tix mai lox mhawm pa krai maix kawx, tak grai hu heue. ⁹ Paw lai sikah tom mhong pui caox, lox pa sikah maix ka pingnya khankix, ha nawh kox yuh pa ang cee ang cak ka heue. ¹⁰ Paw lai greed ka mee hak tiex pa sum tom dix, paw lai tud rhim ti teei kraung kawn doe khankix. ¹¹ Grawh grawng nawh, cao pa laug ti teei ka kix, mawh pa ting sibrawm mai priex kix heue. ¹² Priex lox pa sidiex gau ka daux rhawm maix jheung jheung mai nghiet ka lox pingnya pa tawng yung awx. ¹³ Paw lai yuh tix ang sidiex gau ka kawn nyawm, viang teei khaox saux sivied nawh kawx, nawh ang yum. ¹⁴ Teei khaox saux sivied nawh mai taoh ju khwan nawh khaing meung yum heue. ¹⁵ Kawn simex aux eue, phan rhawm maix koe pingnya, rhawm aux mai tokaux aux tak gaux rhawm heue. ¹⁶ Yam krai jheeh maix lox pa mawh meh, sok lax aux tak jih jhang hang haih heue. ¹⁷ Paw lai boh rhawm ka pui pa koe phimap, kieh koe rhawm pa lhat graung ka Siyiex leeing singaix. ¹⁸ Bawg yam prawng ca tak sang hoek tete, krax krox jun maix ang laux heue. ¹⁹ Kawn simex aux eue, nghiet lox aux mai kieh mawh pui pa koe pingnya mai kieh rhawm maix hawt hu ka daux krax an heue. ²⁰ Paw lai yuh paox pie ka pui pa cha nie luan nyaux rawm plix siiet mai pui pa cha nie luan ih nex heue. ²¹ Pui pa cha nie luan ih luan nyaux rawm plix siiet khankix, tak hoek krax pa hot sibhawm mai rhawm pa cha nie luan it, chix ceep kraung pa caox pa blai ka praix heue. ²² Nghiet ka lox keeing maix pa kieh maix koe awx. Paw yuh pa ang cee cag ka miex maix pa hoik riex ju. ²³ Liag ti teei ka pa rahsee (pa mawh meh) mai paw lai coh, pingnya ang ah, lox pa sidiex gau pingnya pa tawng pa yung ang ah, liag ti cie heue. ²⁴ Keeing pui rahsee, mawh pa kied si daing gaux rhawm mai pui pa keh kawn pa koe pingnya, gaux rhawm gaux rhi mai kawn an heue. ²⁵ Kieh miex keeing maix gaux rhawm mai kieh miex cao keh maix kawx, tak gaux rhawm heue. ²⁶ Kawn simex aux eue, tawx rhawm maix ka aux, kieh ngai maix jhak ti priex ka krax hu aux liak. ²⁷ Bun coh kaux awm daux pong pa kied raux mai bun pa ang mhawm been, awm daux tiex pa sikhawp sikhiep heue. ²⁸ Nawh chix jawm ti jhak, awm pui con mai nawh chix yuh simex tom nie lud heue. ²⁹ Pui mawx pa koe krax khi rhawm mai pui mawx pa koe krax kha rhawm, pui mawx pa yaox krax simah, pui mawx pa yaox krax yiiem krax doe, pui mawx pa ang koe krax koe grawng mai mat lheet tix mai pui mawx pa koe pa raoh ngai. ³⁰ Mawh kix pui pa rheung nyaux rawm plix siiet mai pui pa chix sawg rawm plix siiet, pa hoik pawng mai sidah khankix heue. ³¹ Paw lai jhak ka rawm plix siiet pa raoh, pa toh riang ka daux kawk pa nyawm pa tie ti ih. ³² Dee sidah chix kiied awm siuing mai chix tut saux awm siuing pa cai heue. ³³ Ngai maix tak jhak ka bun pa ang mhawm been mai rhawm maix kawx, tak chix krai lox pa kawk vawk heue. ³⁴ Maix awm pui pa it, ka daux sigreung rawm pang lai mai tak awm pui pa it piang toh rong nyiex reu ting heue. ³⁵ Kix hoik tap toi aux, viang mawh nan, aux ang saux, kix hoik tawk hoik klah aux mai aux ang tawng, aux tak siduad lai mawx? Aux deeh sawg ka ceu an tix bawg maix tak ah nan heue.

¹ Paw lai bo rhawm ka pui pa ang rahsee mai paw si mie ti yuh pao pie mai kix. ² Ka daux rhawm kix, chix keud sonsang yuh pui laux, jheeh kix kawx, chix ah lox caox heue. ³ Nyiex pa sum mai pingnya chix kaux cong heue. ⁴ Kheu pingnya pa tawng yung, chix kieh kraung khrai pa ngawh mai kraung pa khaw rhawm kuceu khawmuik, naog ka daux lawg heue. ⁵ Pui pa koe pingnya khankix, koe sibrawm mai pui pa grum tawng ka pingnya, chix ting lhaong riang rao nawh heue. ⁶ Khaix hoik kum kawng tau mai pui pa koe pingnya, caw ti hu yuh naing, phan pui tawx krax keud koe tom nie, chix luan khaing krax khi rhawm heue. ⁷ Mawh kheu kied lhaong pingnya, pui caox khankix ang krup ang hoek, kix ang pon ang jheeh ka diang siviex veng. ⁸ Pui pa keud ti yuh pa ang mhawm khankix, tak kok kix mawh pui pa caox heue. ⁹ Krax pa keud pui caox khankix, mawh phimap mai pui pa yuh pa ang cee ang cag khankix mawh ceu pa seeing brai pui kah heue. ¹⁰ Phan maix laux rhawm, singaix yam yaox maix see, riang rao maix iak hu heue. ¹¹ Taoh ka pui pa sang teei yum ka daux simeeig mai teei lih ka pui pa sang dex pah yum. ¹² Viang maix ah ex ang tawng ka kix kawx, cao pa sawg ti yaox ka daux rhawm keud kawn pui khex ang tawng lie? Nawh tak sang deeh viied bwanson phimap pa yuh kaux pui mawx kaux pui an ang mawh lie? ¹³ Kawn simex aux eue, ih rawm hia, kheu mhawm mai ih ka rawm kaing hia pa nyawm pa tie awx. ¹⁴ Awm an, pingnya pa tawng yung maix kieh grum naog jhawm pa nyawm ka ju khwan maix, son ang laux krax pa krox jun mai maix tak pon bwanson pa mhawm heue. ¹⁵ Pui pa ang rahsee eue, paw lai jawm ti jhak ka nyiex pui rahsee mai paw lai yuh laux ka dee ot kix. ¹⁶ Pui rahsee khankix, viang goh aliah bawg kawx, tak deeh kaoh, phan mawh pui pa ang rahsee, yam goh nawh tak som heue. ¹⁷ Yam goh pui pa koeng ka maix, paw lai gaux rhawm kah, yam sideeing nawh caong tix kawx, paw koe pa gaux rhawm gaux rhi. ¹⁸ Phan koe, Siyiex tawng mai Nawh ang khaw rhawm mai krax pa song rhawm Siyiex gah hu khaing nawh heue. ¹⁹ Maix paw khi rhawm, kheu pa ang rahsee, paw lai boh rhawm ka pui pa caox. ²⁰ Grawh grawng nawh, pui pa ang rahsee khankix, dee sidah ang pon bwanson mai kawk ngu pui pa yuh pa caox tak yeet heue. ²¹ Kawn simex aux eue, lhat graung ka Siyiex mai simiang awx. Paw yuh paox pie tau mai pui lukliak khankix heue. ²² Ceu pa khi rhawm chix hoek pa piang kiex dom mawx dom an, mawh pui mawx pa tawng ka ceu pa kieh kiex laux? ²³ Lheu khaing an, ceu pa dex mai pui pa koe pingnya mawh nin, yam prawng see, ang khaw tix jhak plakngai pui. ²⁴ Pui pa ah ka pui pa ang rahsee an yuh nin, maix mawh pui rahsee heue. Pa ah nan, ceu pui khankix tak jhax lawg mai salao ka nawh mai ceu pui kuceu tak seeing brai ka nawh heue. ²⁵ Pui pa sidiex gau ka pui pa deuh phimap ka tix, pon pa nyawm rhawm mai tak pon bwanson pa mhawm piang kix heue. ²⁶ Pui ku kaux, nghiet ka jheeh pui pa chix krai lox pa khaw caw heue. ²⁷ Khre kaing maix plak praix mai khre ma kaung son maix, khaix an maix tak sum nyiex ot maix. ²⁸ Phan ang koe krax grawng, paw kham sakse ka paox plawg tix, paw kieh jheeh maix pie lhen ti ih ka pui tang kaux. ²⁹ Aux tak yuh ka nawh, awm pa yuh nawh ka aux, paw lai ah tix deeh viied ka nawh, awm pa hoik yuh nawh. ³⁰ Yam hu lailing aux, ka praok kaung pui pa nieh mai sipeem plix siiet pui pa ang koe pingnya. ³¹ Aux yaox ka pa hoik kheem pang kat khawm gwang mai yaox ka hoik grhup guh simaox pa hoik vie heue. ³² Aux yaox mai keud tix yaox mhawm mhawm mai aux pon ceu pa hawt gau ti yuh heue. ³³ Ah it tivud ha mai it, yam bhok maix taix sonsang laig it tivud. ³⁴ krax pa hot sibhawm tak sang hoek piang maix, awm pui pa hu krax mai kraung khrai maix tak sang som nai awm hoek pui naing piang maix heue.

¹ Pa tiiem pui simiang Hezakix pui Yudax ti deuh, ka lox pa raux mox lai lox kab simiang Sawlamon mawh nin heue. ² Kaing ceu pa ting pa raux mox tix ceuceu, mawh pa khaw mai min plakngai Siyiex, phan mawh simiang, koe min plakngai kheu pa chawk cheng ka see pa ting heue. ³ Raoma mawh pa lhaong, haktiex mawh pa raux mai rhawm simiang chawk cheng kawx, ang pon tix tawng. ⁴ Phan teei ti tik aing mau khaing daux mau, lih mawh kawk pa mhawm son cao pa yuh mau heue. ⁵ Phan teei ti tik pui pa ang rahsee khaing simiang, sibrawm nawh tak kaux cong ka daux pa rahsee heue. ⁶ Paw lai yaogyaw ka tokaux tix sivoe simiang, paw lai cung ka dee ot pui pa ting lhaong. ⁷ Grawh grawng nawh, pui ah nin ka maix haok tin, nie lheu mhawm khaing kieh maix lih ka dee tiem dee yaox pui sivoe ngai simiang heue. ⁸ Paw brax yuh simah ka paox plawg maix, ha kix kox kieh maix kaig tua maix tom sang yuh ka mawx? ⁹ Maix kum kawng see ti tau mai paox plawg maix awx. Paw lai krai see pa khaw tix mox, ka pui tang kaux. ¹⁰ Phan ang mawh nan, pui pa mhong ka lox maix nawh tak kieh maix kaig tua mai kieh min plakngai maix laux jheung jheung heue. ¹¹ Lox pa jiet khaw, awm plix kawk khri tie pa sau mau joi khri heue. ¹² Pui pa chix nghiet mai: pui pa chix sidiex gau lox pa mhawm, awm krim khri mai awm khao kraung khri nawnaw heue. ¹³ Awm pa lih rawm ciex, kheu pa sikied bawg yam vawg nghox, siliex pa kaux sijax kawx, nawh chix kieh rhawm simiang cao pa ploi nawh lih nyawm rhawm, nhim rhawm, jheung jheung heue. ¹⁴ Pui pa yuh plakngai mai hoik ah tix tawx mai ang lai tawx khankix, awm bhaung mai paiawm pa ang viex lhiex heue. ¹⁵ Pa lang gun yeung, pon glaw rhawm simiang, dak pa awn, chix kieh si-ang pot heue. ¹⁶ Phan maix yaox rawm hia, ih pie khaw pie jiet, phan maix cha nie luan ih tak deeh hao heue. ¹⁷ Maix paw lai rheung ot ka daux nyiex paox plawg maix, phan maix rheung ot, nawh meu mai tak koeng ka maix heue. ¹⁸ Pui pa kham sakse pa ang mawh ang meh ka paox plawg tix, awm khaox, vaid mai pliah pa lawm heue. ¹⁹ Yam yaox maix see, phan maix yum rhawm ka pui pa ang kaux sijax, tak yaox ti kham geu pa pot rhang mai pa kluik jhong si-ang caong heue. ²⁰ Pui pa rhax lai ka pui pa khrup rhawm, awm pui pa peeik kraung ceep bawg yam kwat mai awm teei rawm niex sau ka daux numsu paing heue. ²¹ Phan pui pa koeng ka maix cai rhawm, tawx nawh sawm. Phan nawh sang nyaux nie rawm, tawx nawh nyaux. ²² Phan yuh nan maix tak pum sau gaox ngu piang kaing nawh heue. Siyiex kawx, tak tawx bwanson ka maix heue. ²³ Awm bhaung pa kaoh khaing caong ma laong, viex rawm lhiex hoek, dak pa kieh pui simah kawx, chix vieh plakngai pa song rhawm hoek heue. ²⁴ Pa yaox ti ot ka daog piang praux nyiex, nie lheu mhawm khaing yaox ti ot daux nyiex ting mai bun pa yie simah ka nyiex ting pui hun heue. ²⁵ Lox pa gaux rhawm pa kaoh khaing meung dee singai, awm rawm pa sikied ka son pui pa mie tix nyaux rawm heue. ²⁶ Phan pui rahsee lud sivoe ngai pui pa ang rahsee, awm rawm dung pa sigu mai awm rawm daux pa cux sium heue. ²⁷ Awm pa ang mhawm ka cha nie luan ih rawm hia mai pui pa sawg ka min plakngai tokaux tix, ang koe min plakngai heue. ²⁸ Pui pa ang pon gun rhawm tix, awm veng pa hoik laux guh veng ba la heue.

¹ Awm ang rawm rha sax lih yam rung praix mai awm ang lhiex sax lih yam vawg nghox, min plakngai ang doh keung ka pui pa caox. ² Awm sim saik mai sim sivoeg pa po hu kudah dee, awm an, lox pa jhax lawg pa ang khaw ang lai koe dee bleeh. ³ Awm hoik koe khaox puat son brung khankix mai koe maox keu son la, hoik koe khaox saux son blawg pui caox heue. ⁴ Paw lai hawt, paw lai deeh pawk lox ka pui caox, phan maix yuh nan maix tak awm nawh heue. ⁵ Tiebtie mai pawk lox ka pui caox, phan ang mawh nan, ha kix kox ting rhawm mai: yuh sire tix heue. ⁶ Pui pa tawm lox ka pui caox, awm deeh tat ti tik ka caong tix mai ang koe bwanson heue. ⁷ Lox pa raux mox lai lox kab pa krai pui caox, awm pui laux caong pa hu khawm chawh tix heue. ⁸ Pa yaogyaw ka pui caox, awm tik siang simaox pa ngawh ka daux grux simaox heue. ⁹ Lox kab raux mox pa koe ka daux jheeh pui caox, awm krix kat ka taix pui pa yoek ka plai heue. ¹⁰ Siyiex Cao pa ting khawmuik, yuh bwanson awm paox tix, ka pui caox mai pui pa lud heue. ¹¹ Sox deeh ih pa hao tix, awm an, pui caox ca deeh yuh kaing pa caox heue. ¹² Tang krox jun khaing pui pa ce to kaux tix mawh pa koe pingnya, awm nie khaw ti krox jun khaing pui caox heue. ¹³ Pui pa nieh chix ah nin, sivai sangsi koe ka praix tan mai sivai sangsi koe daux krax laux heue. ¹⁴ Awm vid siviex ka jhong siviex, pui pa nieh chix lulie piang ku it tix heue. ¹⁵ Pui pa nieh viang taix nawh hoik cawk ka daux aw kawx, ang rhawm toek taix lih sonsang deeh sau ka daux jheeh tix heue. ¹⁶ Pui pa nieh chix ah nin, aux nie kheu koe pingnya, khaing pui aliah kaux pa chix krai grawng kuceu heue. ¹⁷ Yam hu lailing daux krax pui pa laig ti yuh see, pa ang dex mai: tix, awm pui pa rud lhax yhaok sox heue. ¹⁸ In mawh klieh aux maix, yuh ti ah nin mai: pie lhen ti ih ka paox plawg paox nyhawm tix ¹⁹ pui an awm pui yhot pa teei gaox ngu mai te, puing pui yum kah heue. ²⁰ Phan khix ang koe ngu yeet yum, phan pui cheeik ang koe simah ang koe. ²¹ Awm khrawm gaox ngu mai kieh khix gleeing, pui pa sawg gleeh chix khrawm krax pa simah heue. ²² Pui pa chix cheeik lox caox, lox nawh nyawm, awm ceu pa ih mai chix laig ka daux vaig tu heue. ²³ Jheeh pa krai lox krax moh mai pa koe rhawm caox, awm diang aw pa kraix rawm khran mau heue. ²⁴ Pui pa deuh rhawm koeng, nawh chix mox lox khaing jheeh tix, ka daux tokaux chix mox ti deuh lox pie lhen heue. ²⁵ Lox pui pa yuh nan, viang nyawm miex ding kawx, paw lai yum rhawm, ka daux rhawm nawh hoik naog ka ceu pa seeing brai aliah ceu heue. ²⁶ Pa deuh krax pa koeng pa pie lhen mai pa mox pa blawm mai phimap nawh tak sidawng sivoe ngai pui hun heue. ²⁷ Pui pa kaong daux tiex deeh rau ka daux pa kaong tix, pui pa banglia simaox tak deeh dheem nawh. ²⁸ Dak pa chix pie lhen, chix koeng ka pui pa tuktiak ka nawh mai jheeh pa chix nyaw glaw kawx, chix kieh laux leeing heue.

¹ Paw lai deuh ti ting rhawm rhawm son pasax, grawh grawng nawh, ka daux tix singaix khaing tak sang lih mawh yuh ka mawx maix ang chix tawng? ² Paw lai yaw ka tokaux tix, kieh pui tang kaux yaw maix, jheeh maix paw lai yaw tokaux tix, kieh pui pa ang dex dawd mai: maix yaogyaw maix. ³ Simaox mai mhaik mawh pa cien heue. Pa song rhawm pui caox nie lheu cien khaing an ra ceu heue. ⁴ Pa ting rhawm lih koe rhawm caox heue. Pa song rhawm, lih mawh pa luan yuh, pui mawx pon kham tix tiebtie ka pa boh rhawm. ⁵ Pa sidiex raw sidawng ka pui deuh phimap, nie lheu mhawm khaing pa briex moh dee glip heue. ⁶ Yam ciyang paox grawm ka maix, nawh kawn kaux sijax mai priex maix, yam ngheet pui koeng ka maix, mawh pa sang tieh ka maix heue. ⁷ Pui pa hoik sawm sak, via hu khaing rawm kaing hia heue. Pui pa cai rhawm khankix, ceu pa song kawx chix keud mawh ceu pa tie. ⁸ Pui pa tik vud dee ot tix mai vuvie khankix, awm sim pa tik vud mheem tix mai to heue. ⁹ Rawm sidah bhawng mai rawm sidah bee, awm kieh rhawm gaux rhawm mai lox pa tawx krax keud paox grawm pa moh, mawh mhai pa chix kieh gaux rhawm heue. ¹⁰ Paw lai tik ka paox grawm maix mai paox grawm keeing maix, bawg yam hoek see piang maix, paw vi hu ka nyiex puxaik maix, nyiex paox plawg pa ot dex maix, nie lheu mhawm khaing puxaik lih pa ot dee singai heue. ¹¹ Kawn simex aux eue, kieh koe pingnya awx. Kieh aux nyawm rhawm tom chix deeh pawk ka lox pui pa salao ka aux heue. ¹² Pui pa koe satix, nawh hoik grux tawng see, ceu pa khi rhawm pa sang hoek piang tix mai chix mox tix heue. Pui pa ang koe pingnya, hu awm pa hu nawh mai hu yaox see krax khi rhawm heue. ¹³ Phan kham sakse son pui pa ang maix tawng mai son bun pa ang mhawm been, teei ti deuh kraung nawh tix ceuceu heue. ¹⁴ Pui pa kaoh ponngawb caocao mai ah lox sinum mai nawb bwanson ka paox grawm nawh khankix, awm pa jhax lawg ka paox grawm tix heue. ¹⁵ Bun pa chix yuh krax simah ka pui, awm singaix lih lhiex ting, lih jah ang jud ang jai heue. ¹⁶ Pui pa priex ti deuh ka bun an, awm pui pa priex ti deuh ka bhaung.Awm ang chix mox ka taix khawn dawm pa kraix ka rawm bee. ¹⁷ Awm rhiem yuh paox rhiem lawm, pui chix kieh plakngai paox grawm tix mhawm. ¹⁸ Pui pa priex ka khaox ruh yaox ti ih plix ruh, awm an pui pa yuh kaing simiang pon min plakngai heue. ¹⁹ Awm lih pakngai pui ti awm paox tix daux rawm, rhawm kawn pui kawx awm paox tix, tix kaux lai tix kaux heue. ²⁰ Awm meung yum mai meung laux leeing ang chix fah rhawm, ngai kawn pui kawx ang chix sak ka jhak tix heue. ²¹ Sonsang cheu tix yaox mau, aw cheu, sonsang cheu tix yaox khri mawh jhah ngu, sonsang cheu tix yaox kawn pui, mawh lox yaogyaw pui tang kaux. ²² Pui caox khankix, teei tix tah daux po tau mai nghox kawx, ang cu tix lih khaing nawh heue. ²³ Coca kieh yuh tix tawng grawng cub yung maix, cub mawie maix kawx jawg tix jeung ngai maix mai jhak mhawm mhawm awx. ²⁴ Sinngao ang chix kaux cong jheung jheung, sinngao simiang kawx ang chix kaux cong leeing ju. ²⁵ Rib riem chix kuah, pa sum pa van kawx, chix plaung, plix toma tokoi kawx, yaox tix priex heue. ²⁶ Kawn yung khankix, mawh son kraung ceep, pex khankix, mawh son ngawh haktiex heue. ²⁷ Son pa sang ih maix mai kawn nyiex kawn ma maix mai khawm siliex bun khan kix, maix tak sang kub ka rawm teeih pex heue.

¹ Pui pa ang rahsee, viang ang pui pheet kawx, nawh yuh lung to heue. Phan mawh pui rahsee, kwa awm sivai sangsi heue. ² Simiang lih haoh, kheu phimap pui haktiex, haktiex chix kaux cong, kheu pui pa grum mai: pingnya krax tawng yung heue. ³ Pui hot deeh tuktiak ka paox pui hot, ang lai kieh deuk ceeix kawx, awm pa si kheet rawm raoh lhiex heue. ⁴ Pui pa preet ka been pa rahsee, nawh chix yaogyaw ka pui pa ang rahsee mai pui pa hawt ka been pa rahsee khankix, tak gwieh tix tang plak khaing kix heue. ⁵ Pui pa ang rahsee khankix, ang tawng been krax prawng ca, phan mawh pui pa sawg ka Siyiex, chix tawng ka been krax prawng ca khawmuik. ⁶ Pui hot sibhawm, pa hawt ka been pa rahsee, nie lheu mhawm khaing pui pa pon mau mai yuh tix pa ang khaw caw heue. ⁷ Pui pa chix priex tix hawt ka lox tawm beenli, mawh kawn pa koe pingnya heue. Pui pa yuh paox pie ka pui pa cha nie luan ih, chix kieh keeing tix kaig tua heue. ⁸ Pui pa ang rahsee, pa teei ti ih rao mau ka daux pa ang rahsee mai pa mi pa koe, mawh pui pa priex mau son pui caux rhawm ka pui hot sibhawm heue. ⁹ Pui pa ang nghiet mai veeh hu khaing pa sidiex lox tawm beenli, viang nawh rawg bwan kawx, mawh pa seeing heue. ¹⁰ Pui pa nyaw pa glaw ka pui rahsee, kieh lud krax hu pa ang mhawm, nawh tak rau ka daux tiex pa kaong tix heue. Pui pa rauh daux rhawm, tak pon sin pa mhawm heue. ¹¹ Pui pa mi koe, chix keud tix mawh pa koe pingnya, phan mawh pui hot pui sibhawm pa koe cuyi pingnya, chawk cheng tix yaox ka nawh heue. ¹² Yam gaux rhawm pui rahsee, pon min plakngai pa kied ting heue. Yam yaog pui ang rahsee ting, pui khankix glaik mox tix heue. ¹³ Pui pa kheem ka phimap tix, ang lai pon pa mhawm, pui pa doh keud ti tik ka phimap tix nawh tak pon krax caux rhawm Nawh Cao heue. ¹⁴ Pui pa lhat graung jheung jheung koe bwanson heue. Phan mawh pui pa kiien rhawm, tak yaox ceu pa lhat pa khi rhawm heue. ¹⁵ Simiang pa caox pa ang mhawm, pa giex piang pui hot sibhawm khankix, awm graox sivai sangsi mai krih pa lailing heue. ¹⁶ Simiang pa ang koe pingnya, chix tuktiak ka pui mai simiang pa koeng ka pa ang rahsee, nawh tak lang ju heue. ¹⁷ Pui pa plaux ju pui yum, kieh to hu ka daux simeeig, paw kieh pui mawx tiebtie tix kaux kawx. ¹⁸ Pui pa hu ka daux krax pa rahsee, tak luan khaing krax khi rhawm mai pui pa hu ka daux krax pa kawk vawk, tak goh dom mawx dom an heue. ¹⁹ Pui pa yuh ma kaung tak yaox tix sawm sak mai pui pa ot giex, tak hot piang hot heue. ²⁰ Pui pa kaux sijax khankix, tak pon bwanson pa grum naog heue. Viang mawh nan, pui pa coca ka sonsang pon mau, ang pon luan khaing krax pa ciyang heue. ²¹ Ang khaw tix kham ka plakngai pui, grawh grawng nawh, kawn pui yuh phimap jao sang pon blah tix pliah heue. ²² Pui pa coca tix sawg ka mau khri, chix boh rhawm pa caox mai ang tawng ceu pa sang hoek krax pa hot sibhawm khaix. ²³ Pui pa ah, pa sidiex ka pui phimap, sidah khaix sax, nawh nie lheu ting bwanson khaing pui pa chix ah lox nyaw glaw ka pui heue. ²⁴ Pui pa tud rhim ti teei kraung khrai miex keeing tix mai ah ang koe phimap, mawh pui pa yuh paox pie ka pui pa chix yuh laux heue. ²⁵ Pui pa ting rhawm, chix thong krax pa simah, phan mawh pui pa deuh rhawm ka Siyiex, chix grum naog kuceu heue. ²⁶ Pui pa deuh rhawm ka rhawm tokaux tix, mawh pui caox heue. Pui pa priex tix hawt ka pingnya satix, luan khaing krax khi rhawm heue. ²⁷ Pui pa chix gwieh tix tawx ka pui hot sibhawm, tokaux nawh ang lai hot sibhawm mai pui pa via hu khaing pui hot sibhawm khankix, tak yaox ti kham geu pa jhax lawg heue. ²⁸ Yam yaog pui ang rahsee ting, pui khankix glaik mox tix heue. Yam hoek kix krax laux leeing, pui rahsee khankix, pre haoh hun heue.

¹ Pui hoik kham ka lox sidiex gau lawlawx kawx mai kieh ngawg tix kiien, ang koe dee deuh rhawm mai tak laux leeing dom mawx dom an heue. ² Yam giex pui rahsee kaing, pui haktiex chix gaux rhawm heue. Yam giex pui ang rahsee kaing, pui haktiex khi rhawm heue. ³ Pui pa moh ka been pingnya, chix kieh keeing tix gaux rhawm mai pui pa yuh paox pie mai bun coh kaux, chix kieh kraung khrai som nai heue. ⁴ Simiang pa chix prawng see hawt been, chix kieh haktiex kaux cong heue. Simiang pa ih mau chun praok chix kieh haktiex glup laux heue. ⁵ Pui pa chix nyaw glaw ka paox plawg, awm nah ti deuh rub son caong tix heue. ⁶ Daux krax pa hu pui caox pa lud, hoik taong ti deuh jhawk, phan mawh pui rahsee, chix ah lox rhax gaux heue. ⁷ Pui rahsee, chix keud son pui hot sibhawm, phan mawh pui pa ang rahsee, ang lai yuh tix tawng ka grawng ceu an heue. ⁸ Pui pa yuh pa ang cee ang cag khankix, chix gleeing ti tik ka veng heue. Phan mawh pui pa koe pingnya, chix via hu khaing krax pa song rhawm. ⁹ Phan pui pa koe pingnya, yuh see ka pui caox, nawh song rhawm ang ah, nawh nyia ang ah, ang chix kieh khaw paox tix. ¹⁰ Pui pa chix plaux ju pui yum khankix, koeng ka pui grum mhawm, phan mawh pui rahsee, chix priex ka ju pui tang kaux heue. ¹¹ Pui caox chix jhi ka ceu pa keud nawh khawmuik, phan mawh pui pa koe pingnya, chix mox yiien tom hoek singaix krai heue. ¹² Phan simiang nghiet ka lox pa pie lhen, siliex pa yuh kaing greem tak sang lih mawh pui caox khawmuik heue. ¹³ Pui hot sibhawm mai pui kham pa tuktiak sipub paox tix, Siyiex caux rhawm mai tawx pa riang ka ngai kiex heue. ¹⁴ Simiang, pa prawng see rahsee, ka pui hot sibhawm, dang ngeung nawh kaux cong jheung jheung heue. ¹⁵ Pui pa yaox tix sivied ka khaox saux mai yaox ti kham ka lox pa sidiex gau, chix ting lhaong pingnya heue. kawn nyawm pa tang yuh alo tix, mawh pa chix kieh miex tix kaig tua heue. ¹⁶ Yam haoh pui pa ang rahsee, phimap pa cha nie luan yuh kawx haoh heue. Viang mawh nan, pui rahsee khankix, yaox ka pa laux leeing kix heue. ¹⁷ Sidiex gau ka kawn simex maix awx. Phan yuh nan, nawh tak kieh maix nyawm rhawm, lheu khaing in, nawh tak kieh rhawm maix gaux rhawm heue. ¹⁸ Phan ang koe lox plak jhi kawn pui hoek krax laux leeing heue. Pui pa priex tix hawt lox tawm beenli Siyiex, koe bwanson heue. ¹⁹ Sidiex gau lox giex, ka siliex ang pex ang pon, viang nawh hoik tawng kawx, ang nghiet mai ot giex heue. ²⁰ Phan koe pui pa ang koe satix mai haoh lox sikah, pa krox jun pui caox nie lheu mhawm khaing pa krox jun nawh heue. ²¹ Siliex pa teei pui tix eei, tom yam iak nawh mhawm mhawm, sidah khaix pon tix mawh awm kawn lih tix heue. ²² Pui pa yie song rhawm, chix cheeik kieh pui simah heue. Pui pa dawd rhawm khankix kawx, lih mawh pa cha nie luan yuh heue. ²³ Krax pa ting rhawm maix, tak yeen tokaux maix hoek dee tiem, phan mawh pui pa tiem rhawm tiem rhi, tak pon min plakngai heue. ²⁴ Pui pa yuh paox mai pui briex, mawh pui pa koeng ka ju tix heue. Viang nawh mhong lox pa jhax lawg miex ding kawx, ang koe ceu pa jhi tix ceu kawx. ²⁵ Ceu pa lhat ka kawn pui, chix taong jhawk, phan mawh pui pa deuh rhawm ka Siyiex, tak luan khaing krax khi rhawm heue. ²⁶ Kawn pui khankix, chix sawg ti yuh pa khaw rhawm simiang, viang mawh nan, Siyiex chix mawh cao prawng ca see kawn pui heue. ²⁷ Pui rahsee, seeing ka pa ang rahsee mai pui pa ang rahsee, seeing brai ka pui pa priex tix hawt beenli pa rahsee heue.

¹ Lox pa sidiex gau Agurax, kawn simex Yake ka Itelax mai Ukalax mawh nin. ² Aux ang lai mawh pui, hoik mawh totiag heue. Aux ang lai grum ka pingnya kawn pui. ³ Aux ang gau ka been pingnya mai aux ang tawng ka ceu pa singax singeh. ⁴ Mawh pui mawx pa haok meung raoma mai deeh hoek? Pui mawx pa pon jhawp bhaung daux taix tix? Pui mawx pa pon kie ti deuh rawm ka kraung ceep tix? Pui mawx pa kieh haktiex kaux cong tom sidah? Phan maix ang tawng Nawh, ceu kaux Nawh mai ceu kaux kawn simex Nawh, kaux patix? khex pon krai maix lie? ⁵ Gumlox Siyiex khawmuik, mawh pa singax singeh, Nawh mawh dee tiebtie, pui pa deuh rhawm ka Nawh heue. ⁶ Paw lai baox naok lox piang lox Nawh, phan yuh nan, Nawh deuh phimap ka maix mai maix tak mawh pui pie lhen heue. ⁷ Aux rawg bwanson ka tokaux Maix Simiang ra ceu, tom sidah ang aux nyang yum, paw thiang ti tik aux liak. ⁸ Ceu pa ang mhawm mai pie lhen teei ti tik khaing aux liak, paw kieh aux hot mai paw kieh aux mi, tawx ngie mee kub eei ju tix liak. ⁹ Phan ang mawh nan, ha aux kox cha nie luan mi mai thiang ti tik ka Siyiex ah nin, Maix mawh mawx? Phan ang mawh nan, ha aux kox cha nie luan hot sibhawm mai briex kraung khrai pui mai jheeh aux ah lox sibriem ka ceu kaux Siyiex heue. ¹⁰ Phan ex sang yuh siliex laux, paw krai ka simiang nawh, ha nawh kox jhax lawg ka maix mai phimap tak hoek piang maix heue. ¹¹ Ceu pui pa jhax lawg ka keeing mai pa ang chix nawb bwanson ka miex tix, ¹² Ceu pui pa keud tokaux tix, mawh pa singax mai ang khoek, pa seeing brai ka tokaux tix, ¹³ mai ceu pui pa ting rhawm pa deuh tokaux tix ting lhaong. ¹⁴ Ceu pui pa grum naog rhang, pa awm gawn, rhang gieb pa awm vaig, pa chix kiied tix ih ka pui cud pui cha mai pui hot sibhawm piang haktiex heue. ¹⁵ Pling koe kawn bun ra mu pa ah nin, tawx liak tawx liak, lheu khaing an, pa ang chix fah rhawm, ang joeng mawh loe ceu, pa ang chix ah naox heue. ¹⁶ Pa ah nin pon ceu, simeeig tix ceu, vaig bun neh pa ang koe kawn tix ceu, haktiex pa ang chix sak ka rawm tix ceu, ngu pa ang chix ah naox heue tix ceu. ¹⁷ Ngai pui pa ah lox pa ang cee cag mai naknon ka keeing tix mai pa ang nghiet lox miex tix khankix, lak pa po daux klawng daux ngawd khankix, tak tut ngai nawh jiiet mai kawn klang preng tak hoek tix ih nex nawh heue. ¹⁸ Pa daox deng aux, ang joeng mawh loe ceu mai pa ang aux tawng koe pon ceu, ¹⁹ mawh nin, krax pa po klang preng daux bhaung tix ceu mai daux krax hu siuing piang simaox tix ceu, daux krax hu reu ting daux sigreung rawm pang lai tix ceu, daux krax hu sinaw mai bunkrih tix ceu heue. ²⁰ Daux krax bun pa koe mex mai pa phit vao kawx, awm an heue. Bun pa hoik ih pa ih mai khaix hoik awt jheeh jhai tix ah nin, aux ang yuh phimap heue. ²¹ Pa chix kieh haktiex yung yiang, ang joeng mawh loe ceu mai pa kieh haktiex ang pon kham pon ceu pa ah nin, ²² siliex pa yaox ti yuh simiang tix kaux mai pui caox pa yaox tix sawm sak tix kaux, ²³ bun caox pa koe mex tix kaux, bun siliex pa pon sin, miex simiang cao nyiex tix kaux heue. ²⁴ Ka piang haktiex, viang mawh ceu pa nie iak kawx, pa koe pingnya, koe pon ceu mawh inkix, ²⁵ mawh meeik tix ceu, viang mawh ceu pa iak riang rao kawx, chix sawg ti deuh pa ih bawg yam rung heue. ²⁶ Petla tix ceu, mawh ceu pa iak riang kawx, chix yuh dee ot tix ka daux rang. ²⁷ Sido tix ceu, viang ang koe laux simiang kawx, chix khrawm tix ot tau heue. ²⁸ Lai tang ceu pa iak tix ceu, viang mawh pa iak kawx, chix pin taix tix mai ot ka daux nyiex haw heue. ²⁹ Ceu pa chix hu mhawm mhawm, ang joeng mawh loe ceu, pa nyawm tix jhak grang, pa hu koe pon ceu, mawh inkix, ³⁰ sivai sangsi tix ceu, mawh ceu pa ting riang khaing totiag khawmuik, pa ang chix via ka pui mawx tix heue. ³¹ Brung puing naing tix ceu, pex mhaing tix ceu mai simiang pa ang pui mawx lai pon tix tiebtie tix ceu heue. ³² Phan maix yaw tokaux tix maix yuh pa caox ang ah maix keud ti yuh pa ang mhawm ang ah, teei taix maix thox ka jheeh maix awx. ³³ Nied tix sigwiex ka rawm teeih mawie tom lih mawh bee lon teeih, phan ex siyiied gawng meeh, chix kieh nham lih, awm an, phan cheeik krax pa song rhawm, chix lih ti mawh krax pa simah heue.

¹ Phan mawh lox pa sidiex gau miex simiang, Lemoelax ka kawn simex ti ah nin, ² kawn simex aux eue, khex yuh ka mawx? Kawn simex pa keh aux eue, khex yuh ka mawx? Kawn simex aux, pa keh mai pa dex dawd mai sijax mukheu eue, khex yuh ka mawx? ³ Paw tawx riang rao maix ka bun khankix, paw lai tawx krax keud ka pui pa sang yuh simiang khankix laux. ⁴ Lemoelax eue, simiang mai kawn simiang khankix, ang khaw tix nyaux rawm plix siiet mai plai ceu pa chix yoek heue. ⁵ Lhat kix tak nyaux mai piawm ka lox tawm beenli mai prawng ca pa ang khaw ang jiet ka pui hot sibhawm khankix heue. ⁶ Tawx plai ka pui pa sang dex hoek krax laux leeing mai tawx rawm plix siiet ka pui pa koe krax khi rhawm heue. ⁷ Kieh kix nyaux, sonsang piawm kix ka pa hot sibhawm mai ceu pa khi rhawm heue. ⁸ Ot plak pui daox pui aw mai teem ka pui pa ang koe dee deuh rhawm khankix heue. ⁹ Ang moing tix mai teem prawng rahsee ka pui hot sibhawm mai pui pa cud cha khankix awx. ¹⁰ Pui mawx pa yaox ka bun pa grum naog ka been pa rahsee, bun pa yuh nan, nie lheu ngawh khaing siang raoh pa mhawm heue. ¹¹ Mex nawh deuh rhawm ka nawh mai ang koe krax khi rhawm heue. ¹² Moeng pa yuh nan, nawh chix priex ka mex tix mai chix yuh ceu pa mhawm ka mex tix tom sidah ju tix heue. ¹³ Nawh sawg hauk yung mai tai, yuh kaing taix tix heue. ¹⁴ Nawh awm reu pui yuh lai pa chix viex pa ih khaing dee singai heue. ¹⁵ Nawh kaoh caocao, tom ang praix nyang riang mai khre tix tawx pa ih, ka kawn praix daux nyiex ma mai bun siliex khankix heue. ¹⁶ Nawh chix keud chix gau mhawm mhawm mai liag ma kaung mai mau pa pon nawh, chix khre chix cox ka sipeem plix siiet tix heue. ¹⁷ Nawh nhawt maox rawd nyoi tix cong mai kieh taix tix cong phai heue. ¹⁸ Nawh tawng kaing pa yuh tix mawh pa mhawm mai nawh ang kieh kawk ngu tix yeet leeing sawm. ¹⁹ Taix nawh giex kong mai kling mawh keei heue. ²⁰ Nah taix tix ka pui hot sibhawm mai nyeu plawng taix tix tawx ka pui pa cai rhawm, pa siya khankix heue. ²¹ Viang rawm rha lih kawx, nawh ang khi rhawm son kawn praix daux nyiex ma, grawh grawng nawh, hoik koe kraung ceep pa raoh pa si u hoik koe son kix khawmuik heue. ²² Nawh taing prux son tix mai ceep kraung man raoh rawt pa mhawm heue. ²³ Mex nawh kawx, ngawm tau ka diang siviex veng mai pui haktiex pa mawh pui ting khankix heue. ²⁴ Nawh chix taing tix coh ka man pa mhawm heue. Coh maox rawd nyoi ka pui yuh lai gee khankix heue. ²⁵ Man pa taing nawh mawh pa kaux mai jiet mhawm grang, mawh kheu nan, nawh tak sang koe krax gaux rhawm son bawg yam bawg phao khaix heue. ²⁶ Nawh chix ah lox pa koe pingnya mai jheeh nawh chix ah lox been krax moh krax rhawm pa rahsee heue. ²⁷ Nawh chix kia ngien ka jhawm yuh kawn praix daux nyiex tix, nawh ang ih pa ih ceu pa chix kieh nieh. ²⁸ Kawn simex, kawn bun nawh khankix kaoh mai chix nawb bwanson ka miex tix heue. ²⁹ Mex nawh kawx, ka daux bun tom nie maix hoik yuh pa mhawm, lheu khaing an maix nie lheu yuh khaing kix khawmuik mai yaw nawh yuh nan heue. ³⁰ Ceu pa mhawm chix dia mai: pa pie lhen, pa mhawm grang mawh pa giex going, phan mawh bun pa lhat graung ka Siyiex, tak pon pa yaogyaw heue. ³¹ Bun pa yuh nan, tawx ngawh riang ka kaing pa yuh nawh, kaing pa yuh nawh, kieh min plakngai nawh sidawng ka diang siviex veng heue.