Philippians

Philippians

¹ Pawlux mai Timose, pa mawh siliex Yesux Khrit tawx lai hu ka pui singax singeh ka daux Yesux Khrit, pa ot ka veng Philippix khawmuik mai ka cao giex kaing ceu cao mai ka pui bung kaing ceu cao khankix. ² Kieh pex koe bwanson mai pa nhim pa kaoh khaing Keeing ex Siyiex mai Simiang Yesux Khrit heue. ³ Yam doh keud aux ka pex ku bawg aux yaogyaw ka Siyiex aux, ⁴ yam rawg mhaing aux son pex khawmuik ku bawg, aux rawg bwan daux krax gaux rhawm, ⁵ kheu yuh pex paox pie ka daux pa tah hu lox bwan gaux rhawm, jah ka singaix pa mhong pex lox bwan an, tom yam in heue. ⁶ Aux hoik yum rhawm mhawm mhawm, grawh grawng kaw pa hoik jah ti yuh kaing pa mhawm ka daux pex, tak kawn sang yuh tom grum hoik, tom hoek singaix Yesux Khrit heue. ⁷ Pa keud aux yuh nin son pex khawmuik hoik khaw, mawh kheu ca koe pex ka daux rhawm aux, ka daux pa phyawk aux in mai khawm ka daux pa kham mhai rug tix tiebtie mai kieh lox bwan gaux rhawm kaux cong kawx, pex khawmuik hoik mawh pa neuex pa rom ti pon bwanson tau mai aux heue. ⁸ Grawh grawng nawh, Siyiex mawh cao pa kham mhai rug aux, grawng pa byaong aux ka pex khawmuik, ka daux ceu pa moh rhawm Yesux Khrit heue. ⁹ Aux rawg bwan sonsang ting krax moh pex sinyek sinyek, ka daux pa chix tawng ku ceu khawmuik, ¹⁰ sonsang chix tawng ti cheu ceu pa tang pa siyox khankix mai sonsang singax singeh pex mai ang koe dee cha tom hoek singaix Yesux Khrit, ¹¹ kheu hoik naog pex ka plix ceu pa rahsee, pa hoik mawh kheu Yesux Khrit, sonsang kieh Siyiex koe min pakngai mai pa yaogyaw heue. ¹² Puxaik khankix eue, aux mie ti kieh pex tawng grawh grawng ceu pa hoik mawh ka aux, hoik mawh ceu pa teem ti kieh lox bwan gaux rhawm tah hu heue. Khaing pa kieh pa raw kah heue. ¹³ Kheu grawng in, grawng pa ot aux mai maox ceng son Cao Khrit hoik lih mawh pa sidawng ka pui kru naing pa pau ka nyiex haw khawmuik mai ka pui ku kaux heue. ¹⁴ Kheu grawng pa ot aux mai maox ceng, puxaik pa ot ka daux Simiang Siyiex plak nie, hoik nie lheu koe rhawm kwa ti sang sidiex gum lox Siyiex ka daux pa kaux cong rhawm heue. ¹⁵ Pui tix blah sidiex grawng Cao Khrit mai pa boh rhawm rhi mai krax simah simaing, tix blah sidiex mai rhawm pa mhawm heue. ¹⁶ Pui pa ghoik ti krai khankix sidiex kheu koe krax moh krax rhawm mai kheu kix tawng grawng hoik deuh ka aux tin sonsang tiebtie ti priex ka lox bwan gaux rhawm heue. ¹⁷ Viang mawh kawx nan, pui pa sidiex phao ka khankix, sidiex grawng Cao Khrit kheu krax pa ang khaw paox tix, ang tie viex khawm rhawm tix mai nieb yuh mai keud ti sang nie baox lux ka pa kha rhawm pa ot aux mai maox ceng heue. ¹⁸ Pa sivix mawh pa tix lie? Nieb lak pie ti sidiex ang ah, sidiex ka daux pa mawh meh ang ah, sidiex yuh ka mawx ang ah, mawh pa sidiex grawh grawng Cao Khrit heue. Mawh kheu grawng in aux gaux rhawm kah heue. Mawh heue, aux tak sang baox deeh gaux rhawm kah heue. ¹⁹ Grawh grawng nawh, aux hoik tawng grawng in tak sang tieh ti mawh pa taoh ka aux kheu bwan pa rawg pex mai kheu pa teem Khuan Yesux Khrit heue. ²⁰ Aux keud pot jun pot yuh nin, aux ang lai kaig twa ka daux tix ceu kawx, viang mawh nan tak sang koe rhawm pa grum kwa, sonsang yaog min Cao Khrit ka daux tokaux aux, ka daux pa im ju aux ang ah, ka daux pa yum aux ang ah heue. ²¹ Ka son aux, pa im mawh Cao Khrit mai pa yum mawh bwan son heue. ²² Viang mawh kawx nan phan aux ca im ka daux nex nham, mawh plix pa plix ka kaing jhaw ka son aux heue. Aux sang laug ti cie pa yuh ka mawx? Aux ang tawng. ²³ Aux keud ang lai doh ka sinax an ra ceu, kheu mie aux ti lih hu ot tau mai Cao Khrit, mawh kheu an mawh pa kied nie lheu lang teung mhawm, ²⁴ viang mawh nan pa ot ka daux nex nham mawh pa nie lheu lo son pex heue. ²⁵ Mawh kheu hoik tawng aux ka grawng in, aux tawng grawng tak sang ot aux tau mai pex khawmuik, sonsang ting sang lhaong pex mai gaux rhawm ka daux krax yum rhawm in heue. ²⁶ Kheu khaing ka daux pa ot aux tau mai pex baox tix bawg, pa gaux rhawm pex ka daux Yesux Khrit tak nie lheu ting kheu aux heue. ²⁷ Kieh ngie pa yuh pex keung mai been lox bwan gaux rhawm gaux rhi Cao Khrit, yuh ka mawx phan aux hoek ka pex ang ah, siyang ot ang ah, aux tak pon ti mhong grawng kaux cong pex mai viex khuan tix mu mai rhawm tix mu khaing, mai niet ti yuh son krax yum rhawm pa dex dawt mai lox bwan gaux rhawm gauxrhi, ²⁸ mai grawng ang lhat graung ka pa koeng khankix heue.Grawh grawng nawh pa ang pex lhat mawh mhai mawh kheu ngha sang laux kix, viang mawh nan sang mawh mhai grawng pa taoh pex, an mawh khaing Siyiex heue. ²⁹ Mawh kheu hoik tawx ka pex, ka son Cao Khrit, pa ang joeng mawh ngie pa yum rhawm ka Nawh Cao, viang mawh nan khawm pa sang kham geu son Nawh, ³⁰ kheu pex ngah paox tix ka ceu pa awm pa hoik yaox pex aux ngah kah, mai pa pon pex tix mhong yam in heue.

¹ Mawh kheu nan phan koe pa jeeh pa sidiex ka daux Cao Khrit, phan koe pa nyawm rhawm ka daux krax moh krax rawm, phan koe ceu pa yuh paox pie mai Khuan Cao, phan koe ceu pa moh pa caux rhawm, ² kieh krax gaux rhawm aux grum naog kah, sonsang koe pex rhawm pa awm paox tix mai koe krax moh krax rhawm pa awm paox tix, pa koe rhawm tix mu khaing, pa chix ih rhawm paox tix heue. ³ Paw yuh tix ceu kawx ka daux pa simah simaing, phan ang mawh nan kheu pa nieb yuh grang pa giex going, yuh ka daux rhawm pa tiem mai een tang kaux mawh pa nie lheu mhawm khaing tokaux tix, ⁴ paw vi jhak ngie ka ceu cie tokaux tix khankix, pex ku kaux jhak ka khawm ceu cie pui tang kaux khankix heue. ⁵ Kieh rhawm pa hoik koe ka daux Yesux Khrit koe ka daux pex. ⁶ Viang Nawh cao hoik mawh ka daux riang pakpeung Siyiex kawx, ang lai een lai sawn ceu pa mawh pa sidu mai Siyiex ti mawh pa jhawp ka, ⁷ viang mawh nan klop ti kieh yi min plakngai tokaux tix mai teei riang pakpeung siliex mai yuh ti lih mawh awm kawn pui, ⁸ mai yam mawh Nawh riang pakpeung kawn pui, Nawh yuh tokaux tix tiem mai cu nghiet tom geu pa yum, mawh heue, tom yum ka piang khaox lhak heue. ⁹ Mawh kheu nan Siyiex hoik yaog tix kieh Nawh ting mai tawx ceu kaux pa nie lheu blon ting lhaong khaing can ceu kaux khawmuik ka Nawh heue. ¹⁰ Ngawng ku ngawng tak sang grux ngawng ka daux ceu kaux Yesux, can pa koe ka daux meung raoma ang ah, ka piang haktiex ang ah, ka greem haktiex ang ah, ¹¹ Dak ku dak tak sang kham grawng Yesux Khrit mawh Simiang, sonsang mawh min plakngai ka Keeing Siyiex heue. ¹² Mawh kheu nan pa moh aux khankix eue, awm hoik nghiet pex jheeng jheeng, ang mawh ngie yam ot aux, viang mawh nan yam in yam ang aux ot, pex khaw ti nie lheu yuh sonsang pon krax taoh tix, ka daux pa lhat pa siyaung heue. ¹³ Siyiex, mawh kaw pa yuh kaing ka daux pex, sonsang koe rhawm ti yuh mai sonsang yuh kaing, son pa caw rhawm Nawh heue. ¹⁴ Yuh ku ceu khawmuik ka daux pa ang koe pa bawg be mai pa thung thiang, ¹⁵ sonsang lih pex ti mawh pa ang koe dee lud mai pa ang chix lud, pa mawh kawn Siyiex pa loig, ka sigreung ju pa kawk vawk, pa tieh lud, jhi tokaux pex ka sinax pui pa yuh nin awm ceu pa toh riang ka daux haktiex, ¹⁶ mai yaog ti jung gum lox pa im ju, sonsang koe aux ceu pa yaw rangdi kah, ka daux singaix Cao Khrit, pa to aux ang mawh pa giex going mai viang pa nyhap pa yuh aux ang mawh pa giex going heue. ¹⁷ Viang sang prauk aux lih ka piang ceu pa tan mai ceu pa tan krax yum rhawm pex, aux gaux rhawm kah mai aux rom ti gaux rhawm tau mai pex khawmuik heue. ¹⁸ Awm an pex kawx gaux rhawm mai rom ti gaux rhawm tau mai aux heue. ¹⁹ Aux keud pot jun pot ka daux Simiang Yesux ti sang ploi Timose hu ka pex, khaix ang awt rheung, sonsang nyawm rhawm aux khaix tawng aux grawh grawng pex heue. ²⁰ Grawh grawng nawh aux ang koe pui tix kaux kawx pa awm rhawm nawh, pa sang viex khawm rhawm tix keud tete grawh grawng ceu pa dex mai pex heue. ²¹ Kix khawmuik sawg ceu son cie tokaux tix mai ang sawg ceu son cie Yesux Khrit heue. ²² Pex tawng mhai rug grawng nawh, grawng pa yuh nawh tau mai aux son lox bwan gaux rhawm, awm yuh kawn tau mai keeing heue. ²³ Mawh kheu nan aux keud pot jun pot ti sang ploi nawh hu dom mawx dom an, khaix hoik yaox aux ceu pa sang mawh ka aux heue. ²⁴ Aux een rhawm ka daux Simiang, yuh ka mawx tokaux aux kawx sang hoek ka pex khaix ang awt rheung heue. ²⁵ Aux keud pon lox pa ploi Epaphrawdit, puxaik aux mai paox pa yuh aux kaing mai paox pui naing aux, pa mawh kawncau pex pa kia ngien ka ceu pa lo aux, ²⁶ mawh kheu nawh byaong ka pex khawmuik, kied lulax rhawm kah, kheu hoik mhong pex grawng saux nawh heue. ²⁷ Nawh hoik saux tete tom dex sang yum tix, viang mawh nan Siyiex hoik caux rhawm ka nawh mai ang joeng mawh ngie ka nawh, viang mawh nan khawm ka aux kawx, son aux tak ang koe pa khi rhawm piang pa khi rhawm heue. ²⁸ Mawh kheu nan aux nie lheu coca ti ploi nawh hu, yam deeh yaox pex ka nawh, pex tak sang gaux rhawm kah, son krax khi rhawm aux sang moi dieh moi iak kah heue. ²⁹ Mawh kheu nan rieb ti teei nawh ka daux Simiang tau mai krax gaux rhawm khawmuik, yung yi ka pui pa yuh nan, ³⁰ mawh kheu son kaing Cao Khrit nawh dex sang yum mai hoik nyawk ka mawh ka ju tix, sonsang kieh naog, pa kawn cha ka ceu pa yuh pex ka aux heue.

¹ Pa mawh ceu pa deuk, puxaik aux khankix eue, kieh gaux rhawm ka daux Simiang heue. Pa tiiem ceu pa awm paox tix ka pex, ang mawh pa dah rhawm aux kah, ka pex mawh pa kaux cong heue. ² Rien rhawm tix ka sox khankix, rien rhawm tix ka pa yuh pa caox khankix, rien rhawm tix ka cub pa pat pa kid dud khankix heue. ³ Ex pon mawh cub pat hak pa mawh meh, pa yuh kaing krub ka daux Khuan Siyiex mai pa yaw rangdi ka daux Yesux Khrit, pa ang een rhawm ka daux nex nham, ⁴ aux khaw ti chix pon een rhawm, pie ka daux nex nham heue. Phan pui tang kaux ce ti chix een rhawm ka nex nham, aux nie lheu chix tix. ⁵ Hoik pat hak aux yam koe daix ngaix, aux mawh ceu Isarelax, pa mawh ru Benyamin, aux mawh pui Hebrie pa mawh khaing pui Hebrie, phan hawt lox lai beenli mawh Pharishie. ⁶ Phan mawh plak viex rhawm tix coca, aux mawh pa tuktiaktukte ka ceu cao, phan mawh pa rahsee pa koe ka daux lox lai beenli ang koe dee khluk khlaik dee cha heue. ⁷ Ceu pa mawh ceu pa koe bwanson ka aux, aux hoik een hoik sawn mawh pa som pa nai son Cao Khrit heue. ⁸ Lheu khaing an viang ku ceu khawmuik kawx aux een aux sawn mawh pa som pa nai, mawh kheu ceu pa kied nie lheu ting mhawm krax tawng ka Simiang aux Yesux Khrit, kheu Nawh Cao aux hoik geu pa som pa nai ku ceu khawmuik, hoik een hoik sawn khankix mawh ngie pa seeing pa tik pa vud khaing, sonsang pon aux Cao Khrit, ⁹ mai sonsang yaox ka aux ka daux Nawh Cao, pa ang koe pa rahsee cie tokaux tix pa mawh khaing lox lai beenli, viang mawh nan pa rahsee pa pon kheu krax yum rhawm ka daux Cao Khrit, pa mawh pa rahsee khaing Siyiex kheu krax yum rhawm, ¹⁰ sonsang tawng aux Nawh Cao mai sibrawm ceu pa deeh kaoh im Nawh mai pa yuh paox pie ka krax kham geu pa kha rhawm Nawh mai yum awm yum Nawh Cao, ¹¹ ka daux krax keud pot jun pot sonsang pon aux krax pa deeh kaoh im khaing krax yum heue. ¹² Aux ang lai ah hoik pon tix mai hoik grum mhawm tix, viang mawh nan aux nied ti hu sivoe, sonsang pon giex aux ka ceu pa hoik giex Yesux Khrit ka aux, ka son an heue. ¹³ Puxaik khankix eue, aux ang een ang sawn tokaux tix mawh pa hoik pon, viang mawh nan aux yuh ngie tix ceu khaing, aux piawm ceu pa hoik koe plak khaix mai nyeu tix sang pon ceu pa koe plak sivoe khankix, ¹⁴ aux kawn nied ti baox hu ka dee koe mhai, dee sang pon totaix pa dex mai pa kok Siyiex dee long ka daux Yesux Khrit heue. ¹⁵ Mawh kheu nan kieh can ex pa hoik grum die huan deuh rhawm tix yuh nin, phan pex koe rhawm pa tang siyox ka daux tix ceu ceu, grawng an kawx Siyiex tak plak kieh pex yaox, ¹⁶ viang mawh nan ex hoik pon hu sivoe die pie mawh, kieh ex hu awm pa khaw mai ceu an heue. ¹⁷ Puxaik khankix eue, pex rom ti hawt jawh ka aux mai jhak ka kix pa hu yuh nin, awm pa koe pex sonsang mawh mhai pa hawt ex ti jawh kah heue. ¹⁸ Pui tom nie hu awm hoik sax krai aux ka pex law lawx, yam in kawx baox krai ka pex khawm yiiem tix, grawh grawng mawh kix pui koeng ka khaox lhak Cao Khrit, ¹⁹ dee sidah cie kix mawh pa laux pa leeing, Siyiex cie kix mawh vaig kix mai pa yaw kix ka mawh ceu pa kaig pa tua cie kix, kix ca keud pot grawng ceu pa dex mai haktiex heue. ²⁰ Lai ceu kaux grawng mawh yix kawn rai hoik koe ka daux meung raoma, ex tom nied ti krox son Cao Taoh khaing tan khawm pa mawh Simiang Yesux Khrit, ²¹ Kaw pa sang loh tokaux ex pa ang koe cee tix kieh mawh, awm pakpeung tokaux Nawh pa koe min plakngai, ka sibrawm pa koe Nawh ti chix kieh ku ceu khawmuik ot greem tokaux tix heue.

¹ Puxaik pa moh aux khankix mai pa byaong aux kah, pa mawh krax gaux rhawm mai mhok khri aux, ot kaux cong ka daux Simiang, pui pa moh aux khankix eue. ² Ka Eodia aux jeeh nyaw kah mai ka Suntukke aux jeeh nyaw kah, sonsang koe rhawm pa awm paox tix ka daux Siyiex heue. ³ Mawh heue, aux khyox khaw ka maix kaw pa mawh paox pa yuh tau mai aux tete heue. Teem ka bun in kiex, mawh kheu kiex hoik yuh tau mai aux ka daux lox bwan gaux rhawm, tau mai khawm Klemen mai paox yuh kaing pa deuk khankix, pa hoit koe ceu kaux kix ka daux phuk lai ju pa im heue. ⁴ Gaux rhawm ka daux Simiang Siyiex jheeng jheeng, aux baox deeh ah gaux rhawm heue. ⁵ Ceu pa awn rhawm pex kieh pui khawmuik tawng kah heue. Simiang Siyiex ot dex heue. ⁶ Paw khi rhawm ka grawh grawng tix ceu kawx, ka daux ku ceu, rawg bwan mhaing tau mai krax yaogyaw bwanson, kieh Siyiex tawng pa rawg pa mhaing pex, ⁷ pa nhim cie Siyiex, pa nie lang teung ting khaing krax tawng yung khawmuik, tak sang pau rhawm rhi pex mai pa keud pex ka daux Yesux Khrit heue. ⁸ Lox pa deuk mawh nin, puxaik khankix eue, can ceu pa mawh, pa mawh meh, pa koe min plakngai, pa rahsee, pa singax, pa mhawm mhiem, pa yaw min pa mhawm kah, phan siep koe bwanson, phan siep koe krax yaog yaw, keud ka grawng ceu in khankix heue. ⁹ Ceu pa hoik gau mai khawm pa hoik rieb pex ti teei, pa hoik mhong, pa hoik yaox ka aux, hawt ti yuh ceu an khankix mai Siyiex pa nhim tak sang ot tau mai pex heue. ¹⁰ Aux kied ting gaux rhawm ka daux Siyiex, kheu yam in viang hoik koe jih jang glang gleeing kawx, krax pa kia ngien pex ka aux hoik deeh pruh kah, viang pex hoik keud ti yuh tete kawx, pex ang yaox ti yuh heue. ¹¹ Aux ang ah grawng pa ang kub tix, mawh kheu aux hoik gau ti chix fah rhawm viang aux yaox ti ot ka daux pa yuh ka mawx ang ah heue. ¹² Aux chix ot ka daux pa hot pa blai mai aux chix ot khawm ka daux pa nie haoh nie lheu khaing kub, ka daux ku ceu khawmuik aux hoik gau ti chix kham pa sak mai khawm pa chix cai rhawm mai ti chix koe pa nie haoh nie lheu khaing kub mai khawm pa ang kub tix heue. ¹³ Aux chix yuh ku ceu khawmuik ka daux kaw pa tawx riang rao ka aux heue. ¹⁴ Viang mawh nan pa yuh pex paox pie mai krax kha rhawm aux, pex hoik yuh pa mhawm heue. ¹⁵ Pui Philippix khankix eue, pex kawx hoik tawng, grawng yam jah lox bwan gaux rhawm, yam lih hu aux khaing meung Makedonix, ceu cao tix mu kawx ang yuh paox pie mai aux, ka daux krax tan mai ka daux pa rieb ti teei, lheu khaing pex khaing, ¹⁶ grawh grawng nawh pie yam ot aux ka daux veng Thesalonix kawx pex hoik sipaox son pa lo aux ra bawg heue. ¹⁷ Ang mawh kheu sawg aux totaix, viang mawh nan aux sawg son plix pa sang teen ka son pex heue. ¹⁸ Viang mawh nan aux grum koe ku ceu khawmuik mai aux koe nie haoh nie lheu khaing kub, aux hoik kub hoik naog, khaix hoik pon rieb aux ceu pa viex Epaphrawdit khaing pex, pa mawh bhawng pa sioe baux mai pa tan ceu pa keung pa khaw caw ka Siyiex heue. ¹⁹ Siyiex aux tak sang kieh ceu pa lo pex grum naog ku ceu, awm pa khaw mai sinngao min plakngai Nawh, ka daux Yesux Khrit heue. ²⁰ Kieh Siyiex mai Keeing ex koe min plakngai ku ju leeing ju liak. Amen. ²¹ Tawx lox nawb ka pui singax ka daux Yesux Khrit ku kaux awx. Puxaik pa ot tau mai aux khankix kawx nawb ka pex heue. ²² Pui pa singax khawmuik kawx nawb ka pex, nie lheu mawh kix pa dex mai geh nyiex haw Kesa heue. ²³ Kieh bwanson Simiang Yesux Khrit koe tau mai khuan pex liak. Amen.