Numbers

Numbers

¹ Yam in, Simiang Siyiex sikah mai Mose ka daux tiag gawng Sina, ka daux nyiex gox bwan man bang kum pui hun, ka daux num ra, khix ra tix ngaix, khaix hoik lih hu kix khaing daux meung Ejiptux ah nin. ² "Teei carang cub caw pui hun ceu pui Isarelax khankix khawmuik mai kawn nyiex ma kix mai nyiex ma keeing kix maix simin ceu kaux can pa mawh simex ku kaux, ³ jah ka pa koe ju tixnga num haok plak piang, can pui pa pon hu daux naing, khaing daux ceu pui Isarelax khankix maix mai Arun tak simin ti deuh kix tau mai kru naing kix heue. ⁴ Can pui pa ot tau mai maix khankix, tak mawh pui tix kaux, pa kaoh khaing doeh ru mawx ru an ku cub mai pa mawh cao kaing tix kaux ka nyiex ma keeing nawh khankix heue. ⁵ Inkix mawh ceu kaux pui pa sang teem cung tau mai maix, khaing ceu pui Rubin, mawh Elizurax pa mawh kawn simex Shedurax, ⁶ khaing ceu pui Simion mawh Shelumilax pa mawh kawn simex Zurishadie, ⁷ khaing ceu pui Yudax mawh Nashon pa mawh kawn simex Aminadat, ⁸ khaing ceu pui Isakha mawh Natanelax pa mawh kawn simex Zuah, ⁹ khaing ceu pui Zebulun mawh Eliabax pa mawh kawn simex Helon, ¹⁰ khaing kawn simex Yosiep khankix, khaing ceu pui Epharen mawh Elishama pa mawh kawn simex Amihut, khaing ceu pui Manashe mawh Gamalelax pa mawh kawn simex Pedazurax, ¹¹ khaing ceu pui Binyamin mawh Abidan pa mawh kawn simex Gidawnix, ¹² khaing ceu pui Dan mawh Aheza pa mawh kawn simex Amishadie, ¹³ khaing ceu pui Asha mawh Pagelax pa mawh kawn simex Awran, ¹⁴ khaing ceu pui Gat mawh Elishaphax pa mawh kawn simex Doelax, ¹⁵ khaing ceu pui Napthalix mawh Ahirax pa mawh kawn simex Enan khankix heue. ¹⁶ Inkix mawh pa hoik laug tix khaing cub caw pui hun khankix, pa mawh cao thung cao bung ka doeh ru keeing kix mai cao kaing ka piang pui tix rheng, ku cub ku caw daux ceu pui Isarelax heue. ¹⁷ Khaix an Mose mai Arun kok pui in khankix, pa hoik laug tix mhai ceu kaux kix, ¹⁸ mai kix kraix khrawm cub pui hun khawmuik tau, haok khix tix ngaix, daux khix ra heue. Kix deeh ciied tix yaox doeh ru kix, tau mai kawn nyiex ma kix, tau mai nyiex ma keeing kix, awm pa hoik simin ceu kaux khankix, jah ka pa koe ju tixnga num haok plak piang kaux mawx kaux an ku kaux daux pui heue. ¹⁹ Awm hoik tawx Simiang Siyiex lox ka Mose, mawh kheu nan nawh simin kix ka daux tiag daux tu gawng Sina heue. ²⁰ Kawn Ai Isarelax pa mawh Rubin mai kawn praix nawh khankix mai doeh ru kix mai kawn nyiex ma kix mai nyiex ma keeing kix, awm pa simin kix ceu kaux kix khankix, can simex ku kaux, jah ka pa koe ju tixnga num haok plak piang, pa pon hu daux naing khawmuik, ²¹ Can pui ankix pa hoik simin khaing daux doeh ru ceu pui Rubin khankix, koe pon mheen liah rheng phwan yieh kaux heue. ²² Khaing daux kawn praix Simion khankix, doeh ru kix mai kawn nyiex ma kix, khawm nyiex ma keeing kix, carang pa hoik teei kix, awm pa simin kix ka ceu kaux kix khankix, can pa mawh simex, jah ka pa koe ju tixnga num haok plak piang, pa pon hu daux naing khawmuik, ²³ khaing daux ru ceu pui Simion khankix, koe phwan mheen dim rheng loe yieh kaux heue. ²⁴ Khaing daux ceu pui Gat khankix, pa mawh doeh ru kix mai pao nyiex kix, khawm nyiex ma keeing kix, awm carang ceu kaux pa hoik koh kix khankix, jah ka pa koe ju tixnga num haok plak piang, pa pon hu daux naing khawmuik, ²⁵ Can pui ankix pa hoik simin tix khaing daux doeh ru ceu pui Gat, koe pon mheen phwan rheng liah yieh tixphwan kaux heue. ²⁶ Khaing daux kawn praix ceu pui Yudax doeh ru kix mai pao nyiex kix, khawm nyiex ma keeing kix, awm carang ceu kaux pa hoik koh kix khankix, jah ka pa koe ju tixnga num haok plak piang, pa pon hu daux naing khawmuik, ²⁷ Can pui ankix pa hoik simin khaing daux doeh ru ceu pui Yudax koe aliah mheen pon rheng liah yieh kaux. ²⁸ Khaing daux kawn praix ceu pui Isakha khankix doeh ru kix mai pao nyiex kix, khawm nyiex ma keeing kix, awm carang ceu kaux pa hoik koh kix khankix, jah ka pa koe ju tixnga num haok plak piang, pa pon hu daux naing khankix khawmuik, ²⁹ Can pui ankix pa hoik simin khaing daux doeh ru ceu pui Issakha koe phwan mheen pon rheng pon yieh kaux heue. ³⁰ Khaing daux kawn praix ceu pui Zebulun doeh ru kix mai pao nyiex kix, khawm nyiex ma keeing kix, awm carang ceu kaux pa hoik koh kix khankix, jah ka pa koe ju tixnga num haok plak piang, pa pon hu daux naing khankix khawmuik, ³¹ Can pui ankix pa hoik simin khaing daux doeh ru pui Zebulun, koe phwan mheen aliah rheng pon yieh ( 57400) kaux heue. ³² Khaing kawn simex Yosiep khankix, pa mawh ceu pui Epharem mai doeh ru kix, khawm pao nyiex kix mai nyiex ma keeing kix, awm carang ceu kaux pa hoik koh kix khankix, jah ka pa koe ju tixnga num haok plak piang, pa pon hu daux naing khankix khawmuik, ³³ Can pui ankix pa hoik simin khaing daux doeh ru ceu pui Epharem koe pon mheen mai phwan yieh kaux. ³⁴ Khaing daux ceu pui Manashe doeh ru kix mai pao nyiex kix, khawm nyiex ma keeing kix, awm carang ceu kaux pa hoik koh kix khankix, jah ka pa koe ju tixnga num haok plak piang, pa pon hu daux naing khankix khawmuik, ³⁵ Can pui ankix pa hoik simin khaing daux doeh ru pui Manashe koe loe mheen ra rheng ra yieh kaux heue. ³⁶ Khaing daux kawn praix ceu pui Binyamin doeh ru kix mai pao nyiex kix, khawm nyiex ma keeing kix, awm carang ceu kaux pa hoik koh kix khankix, jah ka pa koe ju tixnga num haok plak piang, pa pon hu daux naing khankix khawmuik, ³⁷ Can pui ankix pa hoik simin khaing daux doeh ru ceu pui Binyamin koe loe mheen phwan rheng pon yieh kaux heue. ³⁸ Khaing daux kawn praix ceu pui Dan doeh ru kix mai pao nyiex kix, khawm nyiex ma keeing kix, awm carang ceu kaux pa hoik koh kix khankix, jah ka pa koe ju tixnga num haok plak piang, pa pon hu daux naing khankix khawmuik, ³⁹ Can pui ankix pa hoik simin khaing daux doeh ru ceu pui Dan, koe liah mheen ra rheng aliah yieh kaux heue. ⁴⁰ Khaing daux kawn praix ceu pui Asha doeh ru kix mai pao nyiex kix, khawm nyiex ma keeing kix, awm carang ceu kaux pa koh kix khankix, jah ka pa koe ju tixnga num haok plak piang, pa pon hu daux naing khankix khawmuik, ⁴¹ Can pui ankix pa hoik simin khaing daux doeh ru ceu pui Asha koe pon mheen tix rheng phwan yieh kaux heue. ⁴² Khaing daux kawn praix ceu pui Napthalix doeh ru kix mai pao nyiex kix, khawm nyiex ma keeing kix, awm carang ceu kaux pa hoik koh kix khankix, jah ka pa koe ju tixnga num haok plak piang, pa pon hu daux naing khankix khawmuik, ⁴³ Can pui ankix pa hoik simin khaing daux doeh ru ceu pui Napthalix koe phwan mheen loe rheng pon yieh kaux heue. ⁴⁴ Inkix mawh pui pa hoik simin Mose mai Arun mai cao kaing ceu pui Isarelax khankix kao ra kaux, son tang nyiex ma keeing nawh, kaux mawx kaux an heue. ⁴⁵ Mawh kheu nan can pui pa hoik simin tix khaing daux ceu pui Isarelax khankix mai nyiex ma keeing kix, jah ka pa koe ju tixnga num haok plak piang, pa pon hu daux naing khankix khawmuik, ka daux ceu pui Isarelax khankix, ⁴⁶ Can pui pa hoik simin tix khawmuik koe liah sien mai loe rheng phwan yieh tixphwan kaux heue. ⁴⁷ Viang mawh nan ang simin ka ceu pui Lewix mai doeh ru keeing kix heue. ⁴⁸ Grawh grawng nawh Simiang Siyiex hoik ah nin ka Mose, ⁴⁹ "Maix tak ang pon ti simin doeh ru ceu pui Lewix nong nong mai ang pon ti koh carang pui kix, khaing daux sinax ceu pui Isarelax khankix heue. ⁵⁰ Viang mawh nan maix tak tawx beeh glawm ka ceu pui Lewix, son kaing jhaw daux nyiex gox bwan man pa koe teug kham mhai ruk sijax mukheu mai ka piang kraung khrai pa shiao ka daux nyiex gox bwan man khawmuik mai can ceu pa mawh cie daux nyiex gox bwan man khawmuik heue. Kix tak mawh pa klawm nyiex gox bwan man mai kraung khrai nawh khankix hu khawmuik, kix tak yuh kaing nyiex gox bwan man mai peung tix ot hawt vung viang praok nyiex gox bwan man heue. ⁵¹ Yam gah nyiex gox bwan man hu ka plak sivoe ngai, ceu pui Lewix khankix tak teei nawh lih. Yam jung kix tix sum ka nyiex gox bwan man, ceu pui Lewix khankix, tak jung tix sum nawh heue. Pui tang kaux pa hoek dex an, tak mawh pa pon ti yum heue. ⁵² Ceu pui Isarelax khankix tak sum nyiex bang cao tix mai nyiex bang cao nawh ku kaux mai glawk cie cao nawh ku kaux, awm man chix pa koe kru naing kix heue. ⁵³ Viang mawh nan ceu pui Lewix tak bang tix ot hawt vung viang nyiex gox bwan man Teug kham mhai ruk, son ang krax song rhawm lih tix koe ka piang cub caw pui hun ceu pui Isarelax khankix mai ceu pui Lewix tak mawh pui pa priex rien ka nyiex gox bwan man Teug kham mhai ruk heue." ⁵⁴ Mawh kheu nan ceu pui Isarelax khankix, hawt ti yuh awm gumlox pa hoik tawm Simiang Siyiex ka Mose khankix khawmuik heue.

¹ Simiang Siyiex ah nin ka Mose mai Arun, ² "Pui ku kaux khaing daux ceu pui Isarelax khankix, tak peung ti ot tau mai bang glawk cie cao kix, hawt praok man chix nyiex ma keeing nawh khankix, kix tak bang hawt vung viang see nyiex gox bwan man bang kum pui hun khawm pon daog heue. ³ Ka plak lih singaix, ka dee hoik ciak dah dee son kix, mawh glawk cie cub kru naing ceu pui Yudax tau mai man chix cie nawh mai kix tak bang tan, awm koe kru naing kix. Nashon pa mawh kawn simex Aminadat tak mawh cao kaing naing ceu pui Yudax heue. ⁴ kru naing nawh pa hoik simin tix, koe aliah mheen pon rheng liah yieh kaux heue. ⁵ Can pui pa bang ti ot dia hawt khaix nawh, tak mawh doeh ru Issakha mai Natanelax pa mawh kawn simex Zu-ax tak mawh cao kaing naing ceu pui Issakha heue. ⁶ Kru naing nawh pa hoik simin tix, koe phwan mheen pon rheng pon yieh kaux heue. ⁷ Khaix an pa bang ti ot tak mawh doeh ru Zebulun mai Eliabax pa mawh kawn simex Helon tak mawh cao kaing naing ceu pui Zebulun heue. ⁸ Kru naing nawh pa hoik simin tix, koe phwan mheen aliah rheng pon yieh kaux heue. ⁹ Can pui pa hoik simin tix khawmuik, awm pa koe riang rao kru naing kix tau mai Yudax, koe tix sien daix mheen liah rheng pon yieh kaux heue. Inkix tak mawh cub kru naing pa preeng ti hu sivoe heue. ¹⁰ "Ka plak seh tak mawh cub glawk riang rao kru naing pa koe tau mai man chix Rubin, awm pa mawh dee ot son kru naing cie kix khankix mai cao kaing naing ceu pui Rubin, tak mawh Elizurax pa mawh kawn simex Shedurax heue. ¹¹ Kru naing nawh pa hoik simin tix koe pon mheen liah rheng phwan yieh kaux heue. ¹² Can pui pa bang ti ot hawt khaix nawh, tak mawh ru ceu pui Simion mai cao kaing naing ceu pui Simion tak mawh Shelumelax pa mawh kawn simex Zurishadie heue. ¹³ Kru naing nawh pa hoik simin tix khankix, koe phwan mheen dim rheng loe yieh kaux heue. ¹⁴ Khaix an pa bang tix ot hawt khaix nawh tak mawh ru Gat mai cao kaing naing ceu pui Gat, tak mawh Elishaphax pa mawh kawn simex Doelax heue. ¹⁵ Kru naing nawh pa hoik simin tix khankix, koe pon mheen phwan rheng liah yieh tixphwan kaux heue. ¹⁶ Can pui pa hoik simin tix khawmuik, awm pa koe riang rao kru naing kix tau mai Rubin, koe tix sien phwan mheen tix rheng pon yieh tixphwan kaux, kix tak mawh kru naing cub ra pa preeng tix lih hu khaing nyiex bang heue. ¹⁷ Khaix an nyiex gox bwan man bang kum pui hun tak gah tix lih hu tau mai nyiex gox bang ceu pui Lewix mai kieh kix ot ka daux sigreung nyiex gox bang kix, awm pan peung kix tix ot, mawh kheu nan kix tak gah tix lih hu kaux mawx kaux an, khaing dee ot kix, awm pa koe glawk ot kix khankix heue. ¹⁸ Ka plak glip singaix, tak mawh cub glawk cie riang rao kru naing pa koe tau mai man chix Epharem, awm dee ot son kru naing kix mai cao kaing naing ceu pui Epharem tak mawh Elishama pa mawh kawn simex Amihut heue. ¹⁹ kru naing nawh pa hoik simin tix khankix, koe pon mheen mai phwan yieh kaux. ²⁰ Hawt khaix Epharen, tak mawh ru ceu pui Manashe mai cao kaing naing ceu pui Manashe, tak mawh Gamalelax pa mawh kawn simex Pedazurax heue. ²¹ Kru naing nawh pa hoik simin tix khankix, koe loe mheen ra rheng ra yieh kaux heue. ²² Khaix an pa bang tix ot khaix nawh tak mawh ru ceu pui Binyamin mai cao kaing naing ceu pui Binyamin, tak mawh Abidan pa mawh kawn simex Gidawnix heue. ²³ Kru naing nawh pa hoik simin tix khankix, koe loe mheen phwan rheng pon yieh kaux heue. ²⁴ Can pui pa hoik simin tix khawmuik, awm pa koe riang rao kru naing kix tau mai Epharem, koe tix sien mai daix rheng tix yieh kaux, kix tak mawh cub kru naing cub loe pa preeng tix lih hu khaing nyiex bang heue. ²⁵ Ka plak laong, tak mawh cub glawk cie riang rao kru naing pa koe tau mai man chix Dan, awm pa koe kru naing kix mai cao kaing naing ceu pui Dan tak mawh Aheza pa mawh kawn simex Amishadie heue. ²⁶ Kru naing nawh pa hoik simin tix khankix, koe liah mheen ra rheng aliah yieh kaux heue. ²⁷ Can pui pa bang ti ot hawt nawh tak mawh ru ceu pui Asha mai cao kaing naing ceu pui Asha tak mawh Pagelax pa mawh kawn simex Awkharan heue. ²⁸ Kru naing nawh pa hoik simin tix khankix khawmuik, koe pon mheen tix rheng phwan yieh kaux heue. ²⁹ Khaix an cub pa bang tix ot hawt khaix nawh, tak mawh ru ceu pui Napthalix, tak mawh Ahirax pa mawh kawn simex Enan heue. ³⁰ Kru naing nawh pa hoik simin tix khankix khawmuik, koe phwan mheen loe rheng pon yieh kaux heue. ³¹ Can pui pa hoik simin tix khawmuik, awm pa koe riang rao kru naing kix tau mai Dan, koe tix sien phwan mheen aliah rheng liah yieh kaux, kix tak mawh cub kru naing pa preeng tix lih hu khaing nyiex bang mai ghoik ti ot plak khaix, tau mai glawk cub caw cao kix heue. ³² Inkix mawh carang pui pa hoik simin tix khaing ceu pui Isarelax khankix, khaing doeh nyiex ma keeing kix khawmuik heue. Can pui pa hoik simin tix, awm pa koe riang rao kru naing kix, koe liah sien mai loe rheng phwan yieh tixphwan kaux heue. ³³ Viang mawh nan ceu pui Lewix, mawh pa ang simin daux sinax ceu pui Isarelax, awm lox pa hoik tawm Simiang Siyiex ka Mose heue. ³⁴ Mawh kheu nan ceu pui Isarelax khankix, hawt ti yuh awm lox pa hoik tawm Simiang Siyiex ka Mose khawmuik, kix bang tix ot awm pa koe glawk cie kix mai kix preeng tix lih hu khaing nyiex bang tix, cub nyiex ma mawx, cub nyiex ma an, awm pa koe doeh ru nyiex ma keeing kix khankix heue.

¹ Inkix mawh daoh doe Arun mai Mose khankix, yam sikah Simiang Siyiex mai Mose ka piang gawng Sina heue. ² Inkix mawh ceu kaux kawn simex Arun, Nadap mawh kawn Ai mai Abihux, Eliza mai Itama heue. ³ Inkix mawh ceu kaux kawn simex Arun pa hoik groi kix rawm bee ti tawx mawh cao giex kaing li mai pui pa hoik appong kix yuh kaing jhaw Siyiex, awm cao giex kaing li heue. ⁴ Nadap mai Abihux yum sivoe Simiang Siyiex, yam tan kix ngu pa ang singax ka sivoe Simiang Siyiex ka daux tiag gawng Sina mai kiex ang koe kawn praix, mawh kheu nan Eliza mai Itama yuh kaing jhaw cao giex kaing li, ka greem sivoe keeing kix Arun heue. ⁵ Simiang Siyiex ah nin ka Mose, ⁶ "Teei doeh ru pui Lewix khankix hoek dee dex mai deuh kix ka plak sivoe cao giex kaing li Arun, sonsang pon kix ti yuh kaing jhaw son nawh heue. ⁷ Kix tak yuh kaing tang nawh mai son pa lo cub pui hun khawmuik, daux sivoe nyiex gox bwan man bang kum pui hun, sonsang yuh kix kaing jhaw son nyiex gox bwan man heue. ⁸ Kix tak yaox ti khre rien ka kraung khrai pa koe ka daux nyiex gox bwan man bang kum pui hun mai ceu pa lo kawn praix Isarelax, sonsang yuh kix kaing jhaw nyiex gox bwan man heue. ⁹ Maix tak tawx ceu pui Lewix khankix ka Arun mai ka kawn simex nawh khankix, kix mawh pa hoik tawx maix ka nawh khawmuik, khaing daux sinax ceu pui Isarelax heue. ¹⁰ "Mawh kheu nan maix tak tawx beeh glawm ka Arun mai kawn simex nawh khankix mai kix tak priex rien ka kaing cao giex kaing li, pui tang kaux pa hoek dex tan tak pon ti yum heue." ¹¹ Khaix an Simiang Siyiex sikah ka Mose ah nin heue. ¹² "Jhak heue, tokaux Aux hoik laug ti teei ceu pui Lewix khaing sinax ceu pui Isarelax khankix, son tang kawn Ai ku kaux, pa liang tix keh, sinax ceu pui Isarelax khankix, mawh kheu nan ceu pui Lewix khankix, tak mawh pui cie Aux. ¹³ Mawh kheu kawn Ai khawmuik mawh cie Aux, ka daux singaix pa hoik pah Aux ka kawn Ai khankix khawmuik, ka daux meung Ejiptux, Aux hoik kieh kawn Ai pa koe daux ceu pui Isarelax khawmuik singax singeh, son tokaux Cao Aux, khawm pui mai khawm to brie khankix, kix tak mawh cie Aux, Aux mawh Simiang Siyiex heue. ¹⁴ Simiang Siyiex sikah mai Mose ka daux tiag gawng Sina ah nin, ¹⁵ "Simin ceu pui Lewix khankix, awm koe nyiex ma keeing kix mai kawn nyiex ma kix maix tak simin simex ku kaux, jah ka pa koe ju tix khix haok plak piang heue. ¹⁶ Mawh kheu nan Mose simin kix awm gumlox pa hoik tawm Simiang Siyiex ka nawh heue. ¹⁷ Inkix mawh ceu kaux kawn simex Lewix, Gerashon, Kawhat mai Merarix. ¹⁸ Ceu kaux kawn simex Gerashon, mawh Libanix mai Shimi awm pa koe kawn nyiex ma kix. ¹⁹ Kawn simex Kawhat, mawh Amaran, Izaha, Hebaron mai Awzazilax, awm pa koe kawn nyiex ma kix. ²⁰ Kawn simex Merarix mawh Mahalix mai Mushi, awm pa koe kawn nyiex ma kix, inkix mawh kawn nyiex ma ceu pui Lewix khankix, awm pa koe doeh nyiex ma keeing kix heue. ²¹ Pa lih tix koe khaing Gerashon mawh doeh nyiex ma ceu pui Libanix khankix mai doeh nyiex ma ceu pui Shimix, inkix mawh doeh nyiex ma ceu pui Gerashon heue. ²² Ceu pui an kix pa hoik simin tix, awm pa koe kawn simex khankix, jah ka pa koe ju tix khix, haok plak piang can pui pa hoik simin ti deuh, koe aliah rheng phwan yieh kaux heue. ²³ Doeh nyiex ma ceu pui Gerashon khankix, tak mawh pa sang bang ti ot plak khaix nyiex gox bwan man ka plak glip singaix heue. ²⁴ Cao kaing pa kwang ka piang nyiex ma keeing ceu pui Gerashon khankix, mawh Eliasap kawn simex Lelax heue. ²⁵ Beeh glawm kawn praix ceu pui Gerashon ka daux nyiex gox bwan man, mawh man vie vung viang nyiex gox bwan man mai braux, man tie son diang siviex nyiex gox bwan man bang kum pui hun khankix, ²⁶ mai man tie son diang siviex gwang nyiex gox bwan man mai can pa feuk hawt vung viang nyiex gox bwan man mai dee koe khu dee tan, khawm maox pa shiao khankix mai kaing jhaw pa dex mai kix khawmuik heue. ²⁷ Pa lih tix koe khaing Kawhat mawh doeh nyiex ma ceu pui Amaram, doeh nyiex ma ceu pui Izaha, doeh nyiex ma ceu pui Hebaron mai doeh nyiex ma ceu pui Awzalax khankix, inkix mawh doeh nyiex ma ceu pui Kawhat heue. ²⁸ Awm pa hoik simin kix ti yaox simex khawmuik jah ka pa koe ju tix khix haok plak piang, koe daix rheng liah yieh kaux, kix mawh cub pui pa priex rien ka dee pa singax singeh heue. ²⁹ Doeh nyiex ma Kawhat tak mawh pa bang ti ot plak seh nyiex gox bwan man heue. ³⁰ Mai cao kaing pa kwang ka piang doeh nyiex ma keeing ceu pui Kawhat mawh Elizaphan pa mawh kawn simex Awzelax heue. ³¹ Beeh glawm kix mawh pa viex teug bwan pa kham mhai ruk, pheen, pang jawk ten khri mai khu dee tan, khawm kraung pa shiao dee pa singax singeh, man tie plak daux mai can ceu pa shiao khawmuik heue. ³² Eliza kawn simex cao giex kaing li Arun tak mawh cao kaing ting ka piang cao kaing ceu pui Lewix mai kia ngien ka pa priex rien dee singax singeh khankix heue. ³³ Pa lih tix koe khaing Merarix mawh doeh nyiex ma ceu pui Mahalix mai doeh nyiex ma ceu pui Mushix, inkix mawh doeh nyiex ma Merarix khankix heue. ³⁴ Ceu pui pa hoik simin tix yaox ka simex khawmuik, jah ka pa koe ju tix khix haok plak piang, koe liah rheng ra yieh kaux heue. ³⁵ Cao kaing pa kwang ka piang nyiex ma keeing ceu pui Merarix mawh Zurelax pa mawh kawn simex Abihelax, in khankix mawh pui pa bang tix ot ka praok plak laong nyiex gox bwan man heue. ³⁶ Beeh glawm son kawn prai Merarix khankix mawh pa viex ceu in khankix, phia, lat, rong, daux jhup jaong kraung khrai pa shiao mai kaing jhaw pa dex mai ceu an khawmuik, ³⁷ rong hawt vung viang gwang nyiex gox bwan man, tau mai daux jhup jaong, lag mai maox khankix heue. ³⁸ Can kix pa bang ti ot sivoe nyiex gox bwan man plak lih singaix mai plak sivoe nyiex gox bwan man bang kum pui hun mawh Mose, Arun mai kawn simex nawh khankix, kix mawh pa priex ka dee pa singax singeh, sonsang pon yuh ti tawx ceu pa lo kuceu son ceu pui Isarelax khankix, pui tang kaux pa hoek dex tan tak pon ti yum heue. ³⁹ Can pui pa hoik simin khaing ceu pui Lewix khawmuik, pa hoik simin Mose mai Arun awm gumlox pa hoik tawm Simiang Siyiex, awm pa koe doeh nyiex ma kix, pa mawh kawn simex, jah ka pa koe ju tix khix haok plak piang koe ra mheen ra rheng kaux heue. ⁴⁰ Simiang Siyiex ah nin ka Mose, "Simin kawn Ai ceu pui Isarelax khawmuik jah ka pa koe ju tix khix haok plak piang mai teei carang kix khawmuik heue. ⁴¹ Maix tak teei ceu pui Lewix mawh son Aux, Aux mawh Simiang Siyiex mai teei kix son tang kawn Ai khaing daux sinax ceu pui Isarelax khawmuik mai to brie pa eei ceu pui Lewix khankix, son tang kawn liang pa keh daux sinax to brie ceu pui Isarelax khawmuik heue. ⁴² Mawh kheu nan Mose simin ka carang kawn Ai pa keh daux sinax ceu pui Isarelax khankix, awm gumlox pa hoik tawm Simiang Siyiex ka nawh heue. ⁴³ Can kawn simex pa mawh kawn Ai, pa hoik simin ka ceu kaux khawmuik, jah ka pa koe ju tix khix, haok plak piang, can pa hoik simin khawmuik koe ra mheen ra rheng ra yieh atixgliah loe kaux heue. ⁴⁴ Khaix an Simiang Siyiex sikah ka Mose ah nin, ⁴⁵ "Teei ceu pui Lewix khankix, son tang kawn Ai, khaing daux sinax ceu pui Isarelax mai teei to brie cie ceu pui Lewix khankix, son tang to briex pa eei ceu pui Isarelax khankix, ceu pui Lewix tak mawh cie Aux, Aux mawh Simiang Siyiex heue. ⁴⁶ Sonsang deeh taoh maix ka kawn Ai, ceu pui Isarelax khankix, ra yieh atixgliah loe kaux, pa nie lheu khaing carang ceu pui Lewix khankix, ⁴⁷ Maix tak teei mau phwan shekhe, ka kix ku kaux maix tak teei an khankix, ka plak mau shekhe pa priex kix singax, pa mawh mau tix shekhe sidu tixnga Gerax heue. ⁴⁸ Maix tak tawx mau pa tawx kix khaing ngawh pa deeh taoh kix pui pa lheu ka Arun mai kawn simex nawh khankix. ⁴⁹ Mawh kheu nan Mose teei mau pa deeh taoh khaing pui an pa lheu khaing pui pa hoik deeh taoh ceu pui Lewix ka. ⁵⁰ Khaing kawn Ai ceu pui Isarelax khankix, nawh teei mau tix rheng loe yieh tixgliah phwan shekhe, awm pa koe ngawh jum mau shekhe pa hoik priex nawh singax heue. ⁵¹ Mose tawx mau pa deeh taoh kix ka Arun mai kawn simex nawh khankix, awm lox krai Simiang Siyiex mai awm gumlox pa hoik tawm Simiang Siyiex heue.

¹ Simiang Siyiex ah nin ka Mose mai Arun, ² "Teei carang kawn simex Kawhat khankix, khaing daux sinax ceu pui Lewix, awm pa koe nyiex ma kix mai nyiex ma keeing kix, ³ jah ka pa koe ju tixngoe num haok plak piang, tom hoek ka pa dex koe ju tix phwan num, pa sang laig ti yuh kaing jhaw ka daux nyiex gox bwan man bang kum pui hun. ⁴ In mawh kaing jhaw kawn simex Kawhat khankix, ka daux nyiex gox bwan man bang kum pui hun, pa dex dawd mai ceu pa kied singax singeh khankix heue. ⁵ Yam khre rien kix ti lih hu khaing dee bang peung tix, Arun mai kawn simex nawh khankix tak hoek mai kix tak teei man tie plak daux lih mai tawb ti deuh teug bwan pa kham mhai ruk ka an heue. ⁶ Khaix an kix tak lhop hak phix ka piang an tix plah mai baox lhop man klai raoma tix plah ka piang mai kix tak chup ti deuh khaox glawm nawh heue. ⁷ Ka piang pheen khan blah, kix tak tawm ti deuh man pa klai raoma tix pheen mai deuh pan, cawn, tawg mai klong rawm, son pa sang see tix khankix ka piang mai blah pa khan, tak mawh pa koe ka piang an heue. ⁸ Kix tak tawb man pa raoh rawt tix pheen ka piang an kix mai baox deeh tawb hak phix tix plah ka piang an mai kix tak chup ti deuh khaox glawm nawh heue. ⁹ Kix tak teei man pa klai raoma tix pheen mai tawb ka piang pang jawk ten khri mai kawk ngu, sigiep ngu, tawg nyia ngu mai kawk bee mai ceu pa sang shiao kix ka son an. ¹⁰ Khaix an kix tak sau kraung khrai pa shiao khankix, ka plak daux mai tawb ka hak phix tix plah mai deuh ka piang khaox glawm. ¹¹ Ka piang khu khri dee tan, kix tak tawb man pa klai raoma tix pheen mai kheem ka hak phix tix plah mai chup ti deuh khaox glawm ka heue. ¹² Khaix an kix tak teei kraung khrai pa shiao tix khawmuik son kaing jhaw pa sang yuh kix ka dah dee pa singax mai sau ka plak daux man klai raoma tix pheen mai kix deeh kheem an khankix ka hak phix tix plah mai sau an ka piang khaox glawm. ¹³ Kix tak teei ti tik nyaox khaing ka piang khu dee tan mai tawm man lung pliex tix pheen ka piang. ¹⁴ Kix tak sau ti deuh kraung khrai pa sang shiao kix ka daux kaing jhaw pa yuh ti tan khawmuik, pa mawh pan ngu, khaox sigawng nex, sipeed vieh plah mai pan khoek mai can kraung pa shiao kix son khu dee tan. Mai kix tak lhop ti deuh hak phix tix plah ka piang kraung an mai chup ti deuh khaox glawm ka heue. ¹⁵ Yam hoik tawb Arun mai kawn simex nawh khankix ka dee pa singax singeh mai can kraung khrai pa shiao kix son dee pa singax singeh khawmuik, yam deeh lih hu kix khaing nyiex bang tix, khaix an kawn simex Kawhat khankix tak hoek ti klawm ceu an khankix hu heue. Viang mawh nan kix tak ang pon ti hu krox hu teeh ka ceu pa singax an tix ceu kawx, son ang kix pon ti hoek krax yum. Inkix mawh can ceu pa koe ka daux nyiex gox bwan man bang kum pui hun, pa sang klawm kawn simex Kawhat hu heue. ¹⁶ Beeh glawm pa hoik ap ka Eliza kawn simex cao giex kaing li Arun, mawh bee tok mai nyawng bhawng, krax tan phawng nghox ca im son ku singaix, bee groi mai can kraung khrai ka daux nyiex gox bwan man khawmuik mai can pa koe daux nawh khawmuik tau mai dee pa singax mai kraung khrai pa shiao kix khawmuik. ¹⁷ Simiang Siyiex ah nin ka Mose mai Arun, ¹⁸ "Paw tat ti tik doeh nyiex ma ceu pui Kawhat khankix khaing daux sinax ceu pui Lewix, ¹⁹ Viang mawh nan yuh ceu inkix pa dex mai kix, sonsang im ju kix mai son ang kix pon ti yum ka, yam hoek kix dex ceu pa kied singax singeh. Arun mai kawn simex nawh khankix tak hu laig ka plak daux sivoe mai tawx beeh glawm ka kix kaux mawx kaux an, son kaing jhaw mai kaing pa sang yuh kix. ²⁰ Viang mawh nan kix tak ang pon ti laig ka plak daux, sonsang jhak simi ka ceu pa singax singeh, phan ang mawh nan kix tak yum ka heue." ²¹ Simiang Siyiex ah nin ka Mose, ²² "baox teei carang kawn simex Gerashon khankix, awm pa koe doeh nyiex ma keeing kix mai pa koe doeh nyiex ma kix. ²³ Jah ka pa koe ju tixngoe num haok plak piang tom hoek ka pa koe ju tix phwan num maix tak simin ka pui pa laig ti yuh kaing jhaw mai pa sang pon yuh kaing daux nyiex gox bwan man bang kum pui hun. ²⁴ In mawh kaing jhaw cie doeh nyiex ma ceu pui Gerashon mai pa sang teei kix beeh glawm khankix. ²⁵ Kix tak klawm man tie nyiex gox bwan man mai man tawb ka piang nyiex gox bwan man bang kum pui hun mai hak phix pa kheem ka piang an, khawm man tie siviex nyiex gox bwan man bang kum, ²⁶ man tie siviex laig daux biang, man feuk son hawt vung viang biang nyiex gox bwan man mai khu dee tan mai maox nawh khankix, kraung pa shiao, son kaing jhaw khawmuik mai can ceu pa hoik yuh kix ti deuh khawmuik, kix tak yuh kaing jhaw inkix. ²⁷ Arun mai kawn simex nawh khankix, tak ap kaing jhaw ka kawn simex Gerashon, khawm kaing pa sang yuh kix mai kaing jhaw pa koe beeh glawm kix ti yuh khawmuik mai maix tak gwieh kaing pa sang yuh khawmuik awm pa koe beeh glawm kix. ²⁸ Inkix mawh kaing jhaw cie doeh nyiex ma kawn simex Gerashon khankix ka daux nyiex gox bwan man bang kum, beeh glawm kix tak koe greem tawm taix Itama pa mawh kawn simex Arun cao giex kaing li heue. ²⁹ "Son kawn simex Merarix khankix maix tak simin awm koe doeh nyiex ma kix mai doeh nyiex ma keeing kix. ³⁰ Jah ka pa koe ju tixngoe num haok plak piang tom hoek ka pa koe ju tixphwan num maix tak simin kix pa pon laig daux kaing jhaw ku kaux, sonsang yuh kix kaing jhaw daux nyiex gox bwan man bang kum. ³¹ Kaing pa caw kix ti teei beeh glawm, son nyiex gox bwan man bang kum, mawh pa tak klawm ka khaox phia nyiex gox bwan man, lat, rong mai daux jhup jaong khankix, ³² rong hawt vung viang biang mai daux jhup jaong khankix, lag mai maox, khawm kraung pa shiao kix tau mai an khawmuik mai kaing jhaw pa caw kix ti yuh maix tak tawx beeh glawm awm pa koe ceu kaux kix. ³³ In mawh kaing jhaw cie doeh nyiex ma kawn simex Merarix khankix, son nyiex gox bwan man bang kum, greem tawm taix Itama kawn simex Arun cao giex kaing li heue." ³⁴ Mose mai Arun khawm cao kaing pui hun hoik simin kawn simex ceu pui Kawhat khankix, awm pa koe doeh nyiex ma kix mai doeh nyiex ma keeing kix, ³⁵ jah ka pa koe ju tixngoe num haok plak piang tom hoek ka pa koe ju tixphwan num, pa pon laig daux kaing jhaw ku kaux, son kaing pa koe ka daux nyiex gox bwan man bang kum khankix, ³⁶ Can pui pa hoik simin tix, awm pa koe doeh nyiex ma kix, koe ra rheng aliah yieh tixphwan kaux. ³⁷ Inkix mawh doeh nyiex ma ceu pui Kawhat, pa pon ti yuh kaing ka daux nyiex gox bwan man bang kum, pa hoik simin Mose mai Arun, awm lox pa hoik tawm Simiang Siyiex ka Mose heue. ³⁸ Can pui pa hoik simin tix khaing kawn simex Gerashon, awm pa koe doeh nyiex ma kix mai doeh nyiex ma keeing kix, ³⁹ jah ka pa koe ju tixngoe num haok plak piang tom hoek ka pa koe ju tixphwan num, pa pon ti laig daux kaing jhaw ku kaux, son kaing pa koe ka daux nyiex gox bwan man bang kum, ⁴⁰ Can pui pa hoik simin tix, awm pa koe doeh nyiex ma kix, khawm doeh nyiex ma keeing kix, koe ra rheng liah yieh tixngoe kaux. ⁴¹ Inkix mawh pui pa hoik simin kix khaing doeh nyiex ma kawn simex Gerashon, pa sang pon ti yuh kaing jhaw ka daux nyiex gox bwan man bang kum pui hun khawmuik, pa hoik simin Mose mai Arun awm lox pa hoik tawm Simiang Siyiex heue. ⁴² Inkix mawh doeh nyiex ma kawn simex Merarix, pa hoik simin tix khaing nyiex ma kix mai doeh nyiex ma keeing kix khankix, ⁴³ jah ka pa koe ju tixngoe num haok plak piang tom hoek ka pa koe ju tixphwan num ku kaux, pa pon ti yuh kaing jhaw, son kaing pa koe ka daux nyiex gox bwan man bang kum pui hun khankix, ⁴⁴ Can pui pa hoik simin tix awm pa koe doeh nyiex ma kix khankix, koe loe rheng ra yieh kaux heue. ⁴⁵ Inkix mawh pui pa hoik simin tix khaing doeh nyiex ma kawn simex Merarix, pa hoik simin Mose mai Arun, awm lox tawm Simiang Siyiex ka Mose heue. ⁴⁶ Can pui pa hoik simin tix khaing ceu pui Lewix khawmuik, pa hoik simin Mose mai Arun, khawm cao kaing ceu pui Isarelax khankix, awm pa koe doeh nyiex ma kix mai doeh nyiex ma keeing kix, ⁴⁷ jah ka pa koe ju tixngoe num haok plak piang tom hoek ka pa koe ju tixphwan num ku kaux, pa sang hoek ti yuh kaing jhaw mai pa kham ti yuh kaing ceu an khankix, ka daux nyiex gox bwan man bang kum pui hun. ⁴⁸ Can pui pa hoik simin ti deuh, koe daix rheng phwan yieh tixdaix kaux. ⁴⁹ Awm lox pingnyap pa hoik tawx Simiang Siyiex, kix mawh pa hoik simin Mose kaux mawx kaux an, awm pa koe kaing jhaw kix mai awm kaing pa caw kix ti yuh khankix, mawh kheu nan kix mawh pa hoik simin tokaux Mose, awm lox pa hoik tawm Simiang Siyiex heue.

¹ Simiang Siyiex krai ka Mose ah nin, ² "Tawx lox ka ceu pui Isarelax khankix, sonsang kieh pui saux sipawg mai pui pa koe jhawm saux lih nham seeing ku kaux mai can pui pa seeing brai ka hu teeh tokaux pa yum khankix deuh ka plak praix dee bang kix. ³ Maix tak deuh simex mai bun khankix ot ka plak praix, khaing bang son ang kix pon kieh dee bang seeing brai ka dah dee ot Aux. ⁴ Ceu pui Isarelax yuh an khankix mai deuh kix ka plak praix nyiex bang kix, awm pa hoik tawm Simiang Siyiex ka Mose, mawh kheu nan ceu pui Isarelax khankix, hawt ti yuh awm an heue. ⁵ Simiang Siyiex ah nin ka Mose, ⁶ "Krai ka ceu pui Isarelax khankix, yam lud simex ang ah, bun ang ah, awm pa yie lud kawn pui mai nawh lud ka Simiang Siyiex. ⁷ Nawh tak krai doh ka phimap pa hoik yuh tix mai nawh jhaw ti khyox khaw heue. Mai nawh deeh plud ka pui pa lud nawh kah mai baox naok ti tawx phwan son tix son ka piang an, ⁸ viang mawh nan phan pui pa lud nawh ka hoik yum mai ang lai koe pao nyiex sonsang rieb ti krax pa pluat son pa lud nawh mai nawh tak hu ka cao giex kaing li Simiang Siyiex mai tan kawn yung mhaing tix mu sonsang pluat ploi phimap pa yuh nawh. ⁹ Krax tan kuceu pa singax ceu pui Isarelax khawmuik, pa viex kix hoek ka cao giex kaing li tak mawh cie kix. ¹⁰ Can ceu pa singax pa tan pui ku kaux ka cao giex kaing li tak mawx cie cao giex kaing li khankix heue, ¹¹ Simiang Siyiex krai ah nin ka Mose, ¹² "Krai ka ceu pui Isarelax khankix ah nin ka kix, phan moeng ti kaux kaux sawg ti hu vung viang mai yuh krax pa ang kaux sijax ka mex nawh, ¹³ Phan simex tix kaux, it tau mai nawh phan mex nawh ang tawng mai mawh pa mox tix mai laux min pakngai, ka grawng pa ang singax ka tokaux ti mai pa ang koe mhai ruk mai viang pui ang yaox dee lud kiex kawx, ¹⁴ Phan laux pakngai ang ah, ang laux ang ah, phan nawh ang yum rhawm ka moeng ti, ¹⁵ nawh tak viex moeng ti hoek ka cao giex kaing li mai nawh tak viex krax tan phawng nghox ca im, tix epha kao son tix son ka pa tan son nawh. Nawh tak ang pon ti see bee ka piang an mai ang pon ti see bee Lawpan pa sioe bhawng ka piang an, kheu mawh an krax tan pa ang yum rhawm ka moeng tix mai sonsang doh keut ka phimap pa yuh tix. ¹⁶ "Cao giex kaing li tak viex nawh hoek dee dex mai deuh nawh ka plak sivoe Simiang Siyiex, ¹⁷ Cao giex kaing li tak teei rawm pa singax mai sau daux aw tiex mai teei phawng tiex, pa koe ka piang tiex daux nyiex gox bwan man mai sau ankix ka daux rawm. ¹⁸ Cao giex kaing li tak deuh bun an ka plak sivoe ngai Simiang Siyiex mai plak ti tik pa kheem ka piang kaing bun mai sau krax tan son pa doh keud, ka daux taix nawh, pa mawh krax tan phawng nghox ca im, pa viex krax pa ang yum rhawm mai cao giex kaing li tak giex ti deuh kawk rawm song pa viex krax pa jhax lawg ka daux tawm taix tix. ¹⁹ Cao giex kaing li tak kieh nawh tiextu mai nawh ah nin ka bun an, phan simex tang kaux, ang it tau mai maix mai phan maix ang lud mai simex tang kaux mai ang seeing brai, kieh maix lawt luan khaing rawm song in pa viex krax pa jhax lawg. ²⁰ Viang mawh nan phan maix hoik lud ka simex tang kaux ka piang mex tix mai hoik kieh tokaux tix seeing brai mai phan simex tang kaux pa ang mawh mex maix hoik it tau mai maix, ²¹ Cao giex kaing li tak kieh bun an tiextu tix ka gumlox pa jhax lawg mai nawh tak ah nin ka bun an. Simiang Siyiex tak sang tawx krax pa jhax lawg mai krax pa tiextu, ka piang maix, khaing daux sinax ceu pui maix, Simiang Siyiex tak kieh ba maix fit hu mai kieh vaig maix uah. ²² Rawm pa hoik jhax lawg, tak sang laig daux vaig maix mai kieh vaig maix uah mai kieh khawn ba maix fit hu mai bun an tak sang ah, Amen, Amen. ²³ "Cao giex kaing li tak tiem ti deuh gumlox pa tiextu ka daux phuk lai mai nawh tuk taik ti sau an ka daux rawm pa song. ²⁴ Nawh tak tawx bun an nyaux rawm pa song, pa viex krax pa jhax lawg an mai rawm song pa viex krax pa jhax lawg, tak laig daux nawh, sonsang lih ti mawh pa song. ²⁵ Cao giex kaing li tak teei krax tan phawng nghox ca im pa ang yum rhawm ka moeng tix mai yuh krax tan yang yeuh ka sivoe Simiang Siyiex mai viex nawh hoek ka khu dee tan, ²⁶ cao giex kaing li tak teei krax tan an tix jhawp ka taix tix, son pa doh keud mai gleeing an ka piang khu dee tan, khaix an nawh tak tawx bun nyaux rawm an heue. ²⁷ Khaix hoik tawx nawh bun an nyaux rawm, ceu an lih ti mawh, phan nawh hoik yuh pa seeing ka tokaux tix mai hoik yuh pa lud piang mex tix, rawm an pa viex krax pa jhax lawg tak laig ka daux nawh mai lih ti mawh pa song mai vaig nawh tak uah mai ba nawh tak fit hu mai bun an tak lih ti mawh pa pon krax jhax lawg, khaing sinax ceu pui nawh khankix heue. ²⁸ Viang mawh nan phan bun ang nyang yuh pa seeing ka tokaux tix mai phan nawh mawh pa singax, khaix an nawh tak lawd luan mai nawh tak deeh koe kaux. ²⁹ "In mawh gumlox beenli pa ang yum rhawm ka moeng tix, pa lud ka simex tang kaux piang mex tix mai koe pa seeing brai, ³⁰ yam ang simex koe krax yum rhawm ka piang moeng tix, khaix an nawh tak deuh ka plak sivoe ngai Simiang Siyiex mai cao giex kaing li tak prawng ca nawh awm gumlox beenli in, ³¹ simex tak lawd luan khaing phimap, bun tak yaox ti kham geu ka phimap tix heue.

¹ Simiang Siyiex krai ah nin ka Mose, ² "Krai ah nin ka ceu pui Isarelax khankix, simex ang ah, bun ang ah, yam tiextu nawh tokaux ti yuh sijax mukheu ka gumlox been Nazarix mai sonsang tang gwieh nawh tokaux tix ka son Simiang Siyiex, ³ Nawh tak twah rawm plix siiet mai plai khiien, nawh tak ang pon ti nyaux plai rawm plix siiet pa niex pa hoik yuh ka plix siiet, nawh tak ang pon ti nyaux ka rawm plix siiet ang pon ti ih ka plix siiet pa im ang ah, pa kroh ang ah. ⁴ Glang yam tang tiah nawh tokaux tix, nawh tak ang pon ti ih khaing nhu plix siiet tix ceu kawx, pa mawh simie ang ah, glhaok ang ah. ⁵ "Glang yam kawn yuh nawh sijax mukheu mai tang tiah tokaux tix, nawh tak ang pon ti khlao hauk kaing tix tom hoek singaix grum naog, krax pa tang tiah tokaux ti son Simiang Siyiex, nawh tak caw ti singax singeh, khaix an nawh tak kieh hauk kaing tix kwah tom lang. ⁶ "Glang yam kawn tang tiah nawh tokaux cao tix son Simiang Siyiex, nawh tak ang pon ti hu dex tokaux pa yum. ⁷ Nawh tak ang pon yuh tokaux tix seeing yam yum keeing nawh ang ah, miex nawh ang ah mai pux aik pux o nawh ang ah, mawh kheu hoik tang tiah nawh ti ot son Siyiex, koe ka piang kaing nawh. ⁸ Glang yam kawn tang tiah nawh tokaux ti son Simiang Siyiex, nawh tak caw tix singax singeh. ⁹ "Phan pui tix kaux kaux yum sijaox hawt dex nawh mai nawh kieh kaing pa appong ti singax seeing brai, nawh tak khlao hauk kaing tix, ka daux singaix pa sang deeh kieh nawh tokaux tix singax ka daux singaix aliah. ¹⁰ Ka daux daix singaix nawh tak viex sikaux ra mu, phan ang mawh nan kawn keukie ra mu ang ah, cao giex kaing li hawt diang siviex nyiex gox bwan man bang kum, ¹¹ mai cao giex kaing li tak tan son krax tan pa pluat ploi phimap tix mu mai tang mu tan son krax tan pa gleeing mai yuh krax pa khyox khaw, son krax pa pluat ploi son nawh, kheu hoik lud nawh, ka Grawng tokaux pa yum. Nawh tak kieh kaing tix singax tau ka daux singaix an. ¹² Nawh tak viex kawn yung pa naog num son krax tan pa pluat ploi son krax lud mai appong tokaux tix son Simiang Siyiex ka bawg yam pa hoik tang tiah nawh tokaux tix singaix pa hoik luan khankix, tak mawh pa grai pa grup, mawh kheu pa hoik tang tiah nawh tokaux ti hoik mawh pa seeing. ¹³ "In mawh gumlox been son Nazarix yam hoik grum naog singaix pa tang tiah nawh tokaux tix mai tak viex nawh hoek ka diang siviex nyiex gox bwan man bang kum. ¹⁴ Nawh tak tan kawn yung mhaing pa naog num pa loig tix mu son krax tan pa gleeing ka Siyiex mai kawn yung shiang, pa naog num pa loig tix mu son krax tan pa pluat ploi phimap mai pex pa loig tix mu son krax tan pa nhim, ¹⁵ blah pa ang sau susaix tix khrawng, blah plah phawng nghox ca im ceu pa mhawm, pa hoik klao ti tau mai bee, blah rhi khlawp pa hoik klao tau mai bee mai krax tan phawng nghox ca im, khawm krax tan pa nyaux khankix. ¹⁶ Cao giex kaing li tak viex an khankix hoek sivoe ngai Simiang Siyiex mai yuh krax tan pa pluat ploi phimap mai krax tan pa gleeing, ¹⁷ Nawh tak tan pex mhaing son krax tan pa nhim ka Simiang Siyiex tau mai blah pa ang sau susaix tix khrawng, cao giex kaing li tak tan krax tan phawng nghox ca im mai krax tan pa nyaux. ¹⁸ Pui Nazarix tak khlao hauk kaing pa hoik appong ti hawt diang siviex nyiex gox bwan man bang kum mai kix teei hauk khankix khaing kaing pa appong ti mai sau ka piang ngu greem krax tan pa nhim pa tan tix. ¹⁹ Cao giex kaing li tak teei klip taix pex mhaing pa hoik ngaik tix tau mai blah pa ang sau susaix tix plah khaing daux khrawng mai blah rhi khlawp pa ang sau susaix tix khlawp mai deuh an ka piang taix pui Nazarix khaix hoik khlao nawh hauk kaing pa appong ti khankix, ²⁰ cao giex kaing li yang yeuh an son krax tan pa yang yeuh sivoe Simiang Siyiex, nex eek krax tan pa yang yeuh mai nex ba krax tan pa yaox mawh pa singax singeh son cao giex kaing li, khaix an pui Nazarix pon ti nyaux rawm plix siiet heue. ²¹ "In mawh beenli son pui Nazarix pa yuh sijax mukheu son pa yuh nawh krax tan pa tang tiah tix ka Simiang Siyiex, lheu khaing an, can krax pa pon yuh nawh khankix, mawh krax pa yuh nawh sijax mukheu, nawh tak caw ti hawt yuh awm beenli pa hoik tang tiah nawh ti yuh sijax mukheu pa yuh tix heue." ²² Simiang Siyiex krai ah nin ka Mose, ²³ "krai ah nin ka Arun mai kawn simex nawh khankix, in mawh grawng pa sang nawb maix bwan, ka ceu pui Isarelax maix tak ah nin ka kix, ²⁴ kieh Simiang Siyiex nawb bwan ka maix mai priex rien ka maix, ²⁵ kieh Simiang Siyiex jhan pa riang pakngai tix ka piang maix mai tawx bwanson krax pa caux rhawm tix ka maix, ²⁶ kieh Simiang Siyiex maong ti jhak ka piang maix, mai tawx krax pa nhim ka maix. ²⁷ Kix tak deuh min ceu kaux Aux, ka piang ceu pui Isarelax mai Aux tak nawb bwanson ka kix heue."

¹ Yam hoik sidah yuh Mose nyiex gox bwan man, nawh groi bee ka piang nyiex gox bwan man mai khrawm kraung pa shiao khankix mai baox groi rawm bee ka piang khu dee tan mai kraung pa shiao khankix tau mai kieh ceu an singax heue. ² Cao kaing ceu pui Isarelax khankix mai cao kaing doeh nyiex ma keeing kix, pa mawh cao kaing doeh ru kix mai pui pa hoik laig carang khankix yuh krax tan, ³ mai kix viex krax tan tix hoek sivoe Simiang Siyiex, ling lawx koe braux liah lhang mai mawie mhaing kao ra mu, son cao giex kaing ra kaux ling lawx koe braux tix lhang mai mawie mhaing tix kaux tix mu, kix tan ceu an ka Simiang Siyiex sivoe nyiex gox bwan man heue. ⁴ Khaix an Simiang Siyiex ah nin ka Mose, ⁵ "Rieb ceu in khaing kix sonsang shiao ka daux kaing jhaw nyiex gox bwan man bang kum mai ap ceu an ka ceu pui Lewix awm pa koe kaing jhaw pa yuh kix heue." ⁶ Mose rieb ling lawx an mai mawie khankix mai ap ka ceu pui Lewix. ⁷ Nawh tawx ling lawx ra lhang mai mawie pon mu ka kawn simex Gerashon, awm kaing jhaw pa yuh kaux mawx kaux an, ⁸ mai nawh tawx ling lawx pon lhang mai mawie daix mu ka kawn simex Merarix, awm kaing jhaw pa yuh kix pa ot greem pa thong Itama pa mawh kawn simex Arun cao giex kaing li heue. ⁹ Viang mawh nan nawh ang tawx ka kawn simex Kawhat, mawh kheu kaing jhaw kix mawh kaing jhaw pa klawm kraung pa singax. ¹⁰ Cao kaing khankix yuh krax tan pa appong ka khu dee tan ka daux singaix pa groi rawm bee mai cao kaing khankix yuh krax tan tix ka plak sivoe khu dee tan. ¹¹ Simiang Siyiex ah nin ka Mose, "Cao kaing tak yaox ti yuh krax tan tix ngaix tix kaux son krax tan pa appong ka khu dee tan heue. ¹² Pui pa tawx krax tan singaix jah, mawh Nashon kawn simex Aminadap khaing doeh ru ceu pui Yudax, ¹³ pa tan nawh mawh pan mau pa cien tix yieh tixngoe shekhe mai pan khoek mau pa cien atixgliah shekhe, awm pa hoik sawn kix ka plak mau shekhe dee pa singax, an khawm ra naog ka phawng nghox ca ceu pa mhawm, pa hoik klao ti mai bee son krax tan phawng nghox ca im, ¹⁴ mai klong khri pa koe kao shekhe tix mu pa naog nyawng bhawng pa sang gleeing, ¹⁵ son krax tan pa gleeing mawie mhaing pa awn ju tix mu, yung mhaing tix mu mai kawn yung mhaing pa naog num tix mu, ¹⁶ son krax tan pa pluat ploi phimap kawn pex iak tix mu, ¹⁷ mai son krax pa appong krax tan pa nhim, tak mawh mawie ra mu, yung phwan mu, pex mhaing phwan mu mai kawn yung mhaing pa naog num phwan mu. In mawh krax tan Nashon kawn simex Aminadap. ¹⁸ Ka daux ra ngaix Natanelax kawn simex Zurax, pa mawh cao kaing doeh ru Issakha yuh krax tan, ¹⁹ pa tan nawh mawh panmau tix mu pa cien tix yieh tixngoe shekhe, khawm pan khoek mau tix mu pa koe atixgliah shekhe, awm pa hoik sawn kix ka plak mau shekhe dee pa singax, an khawm ra naog ka phawng nghox ca ceu pa mhawm, pa hoik klao ti mai bee son krax tan phawng nghox ca im, ²⁰ klong khri pa koe kao shekhe tix mu mai pa naog nyawng bhawng pa sang gleeing, ²¹ son krax tan pa gleeing mawie mhaing pa awn ju tix mu, yung mhaing tix mu mai kawn yung mhaing pa naog num tix mu, ²² son krax tan pa pluat ploi phimap kawn pex iak tix mu, ²³ mai son krax pa appong ka krax tan pa nhim, tak mawh mawie ra mu, yung phwan mu, pex mhaing phwan mu mai kawn yung mhaing pa naog num phwan mu. In mawh krax tan Natanelax kawn simex Zurax. ²⁴ Ka daux loe ngaix Eliabax kawn simex Helon, pa mawh cao kaing doeh ru Zebulun yuh krax tan, ²⁵ Krax tan nawh mawh panmau tix mu pa cien tix yieh tixngoe shekhe, khawm pan khoek mau tix mu pa cien atixgliah shekhe awm pa hoik sawn kix ka plak mau shekhe dee pa singax singeh, an khawm ra naog phawng nghox ca ceu pa mhawm, pa hoik klao ti mai bee son krax tan phawng nghox ca im, ²⁶ klong khri pa koe kao shekhe tix mu pa naog nyawng bhawng pa sang gleeing, ²⁷ son krax tan pa gleeing mawie mhaing pa awn ju tix mu, yung mhaing tix mu mai kawn yung mhaing pa naog num tix mu, ²⁸ son krax tan pa gleeing kawn pex iak tix mu, ²⁹ mai son krax pa appong ka krax tan pa nhim, tak mawh mawie ra mu, yung phwan mu, pex mhaing phwan mu mai kawn yung mhaing pa naog num phwan mu. In mawh krax tan Eliabax kawn simex Helon heue. ³⁰ Ka daux pon singaix Elizurax kawn simex Shedurax, pa mawh cao kaing doeh ru Rubin yuh krax tan, ³¹ krax tan nawh mawh panmau tix mu pa cien tix yieh tixngoe shekhe, khawm pan khoek mau tix mu pa cien atixgliah shekhe, awm pa hoik sawn kix ka plak mau shekhe dee pa singax singeh, an khawm ra naog ka phawng nghox ca ceu pa mhawm, pa hoik klao ti mai bee son krax tan phawng nghox ca im, ³² klong khri pa cien kao shekhe tix mu, pa naog nyawng bhawng pa sang gleeing, ³³ son krax tan pa gleeing mawie mhaing pa awn ju tix mu, yung mhaing tix mu mai kawn yung mhaing pa naog num tix mu, ³⁴ son krax tan pa pluat ploi phimap kawn yung iak tix mu, ³⁵ mai son krax pa appong krax tan pa nhim, tak mawh mawie ra mu, yung phwan mu, pex mhaing phwan mu mai kawn yung mhaing pa naog num phwan mu. In mawh krax tan Elizurax kawn simex Shedurax heue. ³⁶ Ka daux phwan singaix Shelumilax kawn simex Zurishadie, pa mawh cao kaing doeh ru Simion yuh krax tan, ³⁷ krax tan nawh mawh pan mau tix mu, pa cien tix yieh tixngoe shekhe, khawm pan khoek mau tix mu pa cien atixgliah shekhe, awm krax pa hoik sawn kix ka plak mau shekhe dee pa singax singeh, an khawm ra naog ka phawng nghox ca ceu pa mhawm pa hoik klao ti mai bee son krax tan phawng nghox ca im, ³⁸ klong khri pa cien kao shekhe tix mu, pa naog nyawng bhawng pa sang gleeing, ³⁹ son krax tan pa gleeing mawie mhaing pa awn ju tix mu, yung mhaing tix mu mai kawn yung mhaing pa naog num tix mu, ⁴⁰ son krax tan pa pluat ploi phimap kawn pex iak tix mu, ⁴¹ mai son krax pa appong krax tan pa nhim tak mawh mawie ra mu, yung phwan mu, pex mhaing phwan mu mai kawn yung mhaing pa naog num phwan mu. In mawh krax tan Shelumilax kawn simex Zurishadie heue. ⁴² Ka daux liah ngaix Eliasap kawn simex Doelax, pa mawh cao kaing doeh ru Gat yuh krax tan, ⁴³ krax tan nawh mawh pan mau tix mu pa cien tix yieh tixngoe shekhe, khawm pan khoek mau tix mu pa cien atixgliah shekhe, awm krax pa hoik sawn kix ka plak mau shekhe dee pa singax singeh, an khawm ra naog ka phawng nghox ca ceu pa mhawm pa hoik klao ti mai bee son krax tan phawng nghox ca im, ⁴⁴ klong khri pa cien kao shekhe tix mu, pa naog nyawng bhawng pa sang gleeing, ⁴⁵ son krax tan pa gleeing mawie mhaing pa awn ju tix mu, yung mhaing tix mu mai kawn yung mhaing pa naog num tix mu, ⁴⁶ son krax tan pa pluat ploi phimap kawn pex iak tix mu, ⁴⁷ mai son krax tan pa ap pong krax tan pa nhim, tak mawh mawie ra mu, yung phwan mu, pex mhaing phwan mu mai kawn yung mhaing pa naog num phwan mu. In mawh krax tan Eliasap kawn simex Doelax heue. ⁴⁸ Ka daux aliah singaix Elishama kawn simex Amihut, pa mawh cao kaing doeh ru Epharen yuh krax tan, ⁴⁹ krax tan nawh mawh panmau tix mu pa cien tix yieh tixngoe shekhe, khawm pan khoek mau tix mu pa cien atixgliah shekhe, awm pa hoik sawn kix ka plak mau shekhe dee pa singax, an khawm ra naok ka phawng nghox ca ceu pa mhawm mai pa hoik klao ti mai bee son krax tan phawng nghox ca im, ⁵⁰ klong khri pa cien kao shekhe tix mu, pa naog nyawng bhawng pa sang gleeing, ⁵¹ son krax tan pa gleeing mawie mhaing pa awn ju tix mu, yung mhaing tix mu mai kawn yung mhaing pa naog num tix mu, ⁵² son krax tan pa pluat ploi phimap kawn pex iak tix mu, ⁵³ mai son krax tan pa appong krax tan pa nhim, tak mawh mawie ra mu, yung phwan mu, pex mhaing phwan mu mai kawn yung mhaing pa naog num phwan mu. In mawh krax tan Elishama kawn simex Amihut heue. ⁵⁴ Ka daux daix singaix Gamalelax kawn simex Pedazurax pa mawh cao kaing doeh ru Manashe yuh krax tan, ⁵⁵ krax tan nawh mawh panmau tix mu pa cien tix yieh tixngoe shekhe, khawm pan khoek mau pa cien atixgliah shekhe awm pa hoik sawn kix ka plak mau shekhe dee pa singax, an khawm ra naog ka phawng nghox ca ceu pa mhawm mai pa hoik klao ti mai bee son krax tan phawng nghox ca im, ⁵⁶ klong khri pa cien kao shekhe tix mu, pa naog nyawng bhawng pa sang gleeing, ⁵⁷ son krax tan pa gleeing mawie mhaing pa awn ju tix mu, yung mhaing tix mu mai kawn yung mhaing pa hoik naog num tix mu, ⁵⁸ son krax tan pa pluat ploi phimap kawn pex iak tix mu, ⁵⁹ mai son krax tan pa appong krax tan pa nhim, tak mawh mawie ra mu, yung phwan mu, pex mhaing phwan mu mai kawn yung mhaing pa tak naog num phwan mu, in mawh krax tan Gamalelax kawn simex Pedazurax heue. ⁶⁰ Ka daux dim singaix Abidan kawn simex Gidawnix, pa mawh cao kaing doeh ru Binyamin yuh krax tan, ⁶¹ krax tan nawh mawh pan mau tix mu pa cien tix yieh tixngoe shekhe, khawm pan khoek mau pa cien atixgliah shekhe, awm pa hoik sawn kix ka plak mau shekhe dee pa singax, an khawm ra naog ka phawng nghox ca ceu pa mhawm mai pa hoik klao ti mai bee son krax tan phawng nghox ca im, ⁶² klong khri pa cien kao shekhe tix mu, pa naog nyawng bhawng pa sang gleeing, ⁶³ son krax tan pa gleeing mawie mhaing pa awn ju tix mu, yung mhaing tix mu mai kawn yung mhaing pa naog num tix mu, ⁶⁴ son krax tan pa pluat ploi phimap kawn pex iak tix mu, ⁶⁵ mai son krax tan pa appong krax tan pa nhim, tak mawh mawie ra mu, yung phwan mu, pex mhaing phwan mu mai kawn yung mhaing pa naog num phwan mu, in mawh krax tan Abidan kawn simex Gidawnix heue. ⁶⁶ Ka daux kao ngaix Aheza kawn simex Amishadie, pa mawh cao kaing doeh ru Dan yuh krax tan, ⁶⁷ krax tan nawh mawh panmau tix mu pa cien tix yieh tixngoe shekhe, khawm pan khoek mau pa cien atixgliah shekhe, awm pa hoik sawn kix plak mau shekhe dee pa singax, an khawm ra naog ka phawng nghox ca ceu pa mhawm, pa hoik kluklao ti mai bee son krax tan phawng nghox ca im, ⁶⁸ klong khri pa cien kao shekhe tix mu, pa naog nyawng bhawng pa sang gleeing, ⁶⁹ son krax tan pa gleeing mawie mhaing pa awn ju tix mu, yung mhaing tix mu, kawn yung mhaing pa naog num tix mu, ⁷⁰ son krax tan pa pluat ploi phimap kawn pex iak tix mu, ⁷¹ mai son krax tan pa appong krax tan pa nhim, tak mawh mawie ra mu, yung phwan mu, pex mhaing phwan mu mai kawn yung mhaing pa naog num phwan mu, in mawh krax tan Aheza kawn simex Amishadie heue. ⁷² Ka daux kao tix singaix, Pagelax kawn simex Awkharan pa mawh cao kaing doeh ru Asha yuh krax tan, ⁷³ krax tan nawh mawh pan mau tix mu pa cien tix yieh tixngoe shekhe, khawm pan khoek mau pa cien atixgliah shekhe, awm pa hoik sawn kix plak mau dee pa singax, an khawm ra naog ka phawng nghox ca ceu pa mhawm pa hoik klao ti mai bee son krax tan phawng nghox ca im, ⁷⁴ klong khri pa cien kao shekhe tix mu, pa naog nyawng bhawng pa sang gleeing, ⁷⁵ son krax tan pa gleeing mawie mhaing pa awn ju tix mu, yung mhaing tix mu mai kawn yung mhaing pa naog num tix mu, ⁷⁶ son krax tan pa pluat ploi phimap kawn pex iak tix mu, ⁷⁷ mai son krax tan pa appong krax tan pa nhim, tak mawh mawie ra mu, yung phwan mu, pex mhaing phwan mu mai kawn yung pa naog num phwan mu, in mawh krax tan Pagelax kawn simex Awkharan heue. ⁷⁸ Ka daux kao ra ngaix Ahirax kawn simex Enan pa mawh cao kaing doeh ru Napthalix yuh krax tan, ⁷⁹ krax tan nawh mawh pan mau tix mu pa cien tix yieh tixngoe shekhe, khawm pan khoek mau pa cien atixgliah shekhe, awm pa hoik sawn kix plak mau shekhe dee pa singax, an khawm ra naog ka phawng nghox ca ceu pa mhawm pa hoik klao ti mai bee son krax tan phawng nghox ca im, ⁸⁰ klong khri pa cien kao shekhe tix mu, pa naog nyawng bhawng pa sang gleeing, ⁸¹ son krax tan pa gleeing mawie mhaing pa awn ju tix mu, yung mhaing tix mu mai kawn yung mhaing pa naog num tix mu, ⁸² son krax tan pa pluat ploi phimap kawn pex iak tix mu, ⁸³ mai son krax tan pa appong krax tan pa nhim, tak mawh mawie ra mu, yung phwan mu, pex mhaing phwan mu mai kawn yung mhaing pa naog num phwan mu, in hoik mawh krax tan Ahirax kawn simex Enan heue. ⁸⁴ In mawh krax tan khaing cao kaing pui Isarelax, singaix groi rawm bee mai pa appong khu dee tan pan mau kao ra mu, pan khoek mau kao ra mu mai klong khri kao ra mu. ⁸⁵ Pan mau ku mu cien tix yieh tixngoe shekhe mai pan khoek mau ku mu cien atixgliah shekhe, tawg klong mau khankix khawmuik cien ra rheng pon yieh shekhe, awm pa hoik sawn kix plak mau shekhe dee pa singax singeh, ⁸⁶ klong khri kao ra mu, pa naog nyawng bhawng pa sang gleeing, ku mu cien kao shekhe awm pa hoik sawn kix plak mau shekhe dee pa singax singeh, klong khri khankix khawmuik cien tix yieh tixnga shekhe, ⁸⁷ son krax tan pa gleeing khawmuik mawh mawie mhaing kao ra mu, yung mhaing kao ra mu, kawn yung mhaing pa naog num kao ra mu, tau mai krax tan phawng nghox ca im, mai son krax tan pa pluat ploi phimap kawn pex iak kao ra mu, ⁸⁸ mai son krax pa appong krax tan pa nhim mawie tixnga pon mu, yung tixgliah mu, pex mhaing tixgliah mu mai kawn yung mhaing pa naog num tixgliah mu. in mawh krax tan pa appong son khu dee tan khaix hoik groi rawm bee heue. ⁸⁹ Yam laig Mose ka daux nyiex gox bwan man bang kum sonsang sikah tix tau mai Siyiex, nawh mhong lox pa sikah ka nawh khaing ka piang dangngeung krax pa caux rhawm, pa koe ka piang dawb teug bwan pa kham mhai ruk, khaing sinax riang Cherubin ra mu, Nawh Cao sikah mai nawh heue.

¹ Simiang Siyiex krai ah nin ka Mose, ² "Krai ah nin ka Arun, yam tok maix kawk ngu, kawk ngu aliah mu tak kieh jhan riang ka piang pang jawk ten khri khawm ra plak." ³ Arun yuh awm an, nawh tok kawk ngu sonsang jhan riang ka piang pang jawk ten khri khawm ra plak, awm gumlox pa hoik tawm Simiang Siyiex ka Mose. ⁴ Grawng pa yuh ka jawk ten khri in, hoik yuh awm pakpeung pa krai Simiang Siyiex ka Mose, pang nawh kho tai nawh khankix hoik mawh pa tawk ti yuh ka khri khawm kreng, tom lih ti mawh jawk ten khri heue. ⁵ Simiang Siyiex krai ah nin ka Mose, ⁶ "Teei ceu pui Lewix khankix lih khaing daux sinax pui Isarelax mai kieh kix singax. ⁷ Sonsang singax kix maix tak yuh in khankix, teei ka rawm singax mai phruah ka piang kix mai kieh kix khlao hauk pa koe ka piang tokaux ti khawmuik mai kieh kix sidaux kraung ceep tix sonsang yuh kix tokaux ti singax. ⁸ Kieh kix teei mawie mhaing awn ju tix mu mai krax tan phawng nghox ca im pa mhawm pa hoik klao ti mai bee mai baox teei mawie mhaing awn ju tix mu son krax tan pa pluat ploi phimap. ⁹ Maix tak viex ceu pui Lewix khankix hoek sivoe nyiex gox bwan man bang kum mai kieh ceu pui Isarelax khawmuik khrawm paox tix. ¹⁰ Maix tak viex ceu pui Lewix khankix hoek sivoe ngai Simiang Siyiex mai ceu pui Isarelax tak deuh taix ti ka piang ceu pui Lewix khankix, ¹¹ Arun tak appong ceu pui Lewix ka plak sivoe ngai Simiang Siyiex, son krax tan yang yeuh, tang ceu pui Isarelax khankix, sonsang pon yuh kix kaing jhaw Simiang Siyiex. ¹² Ceu pui Lewix khankix tak deuh taix ti ka piang kaing mawie mhaing awn ju an khankix mai maix tak tan tix mu son krax tan pa pluat ploi phimap mai tan an tix mu son krax tan pa gleeing ka Simiang Siyiex, sonsang yuh pa khyox khaw mai pa pluat ploi son ceu pui Lewix khankix. ¹³ Maix tak viex ti deuh ceu pui Lewix sivoe Arun mai kawn simex nawh khankix mai appong ti tawx kix son krax tan pa yang yeuh ka Simiang Siyiex. ¹⁴ "Maix tak tang gwieh ti deuh ceu pui Lewix khaing daux sinax ceu pui Isarelax mai ceu pui Lewix tak mawh pui Aux heue. ¹⁵ Khaix an ceu pui Lewix tak hu laig yuh kaing ka daux nyiex gox bwan man bang kum maix tak kieh kix singax mai appong kix son krax tan pa yang yeuh. ¹⁶ Kix mawh pa hoik laug tix tawx Aux khawmuik khaing daux sinax ceu pui Isarelax, Aux hoik teei ti cie pa liang tix keh khaing sinax ceu pui Isarelax khankix. ¹⁷ Grawh grawng nawh kawn Ai pa keh khaing daux sinax ceu pui Isarelax khankix, pui khawm totiag mawh cie Aux, ka daux singaix khaix hoik ciyang Aux kawn Ai pa keh ka daux haktiex Ejiptux khankix, Aux hoik kieh kix mawh pa singax singeh son Cao tix. ¹⁸ Aux hoik teei ceu pui Lewix, son tang kawn Ai pa keh khaing ceu pui Isarelax khankix. ¹⁹ Aux hoik tawx ceu pui Lewix khankix awm totaix tix ceu son Arun mai kawn simex nawh khankix khaing daux sinax ceu pui Isarelax, sonsang yuh kix kaing son ceu pui Isarelax ka daux nyiex gox bwan man bang kum mai sonsang yuh kix krax pa khyox khaw mai krax pa pluat ploi son ceu pui Isarelax khankix, son ang krax pa laux leeing lai koe daux sinax ceu pui Isarelax, yam hoek ceu pui Isarelax khankix dex dah dee pa singax heue." ²⁰ Mose mai Arun mai cub pui hun ceu pui Isarelax appong ka ceu pui Lewix, awm gumlox pa hoik tawm Simiang Siyiex ka Mose son grawng pa dex mai ceu pui Lewix khankix, mawh kheu nan ceu pui Isarelax yuh an ka ceu pui Lewix. ²¹ Ceu pui Lewix yuh tokaux tix singax mai sidaux kraung ceep tix, mai Arun appong kix, awm krax tan pa yang yeuh sivoe Simiang Siyiex, Arun tak yuh krax khyox khaw mai krax pa pluat ploi son kix, sonsang kieh kix singax heue. ²² Khaix an ceu pui Lewix laig ka daux nyiex gox bwan man bang kum, ka plak sivoe Arun mai kawn simex nawh khankix, sonsang yuh kix kaing jhaw awm lox pa hoik tawm Simiang Siyiex ka Mose son grawng pa dex mai ceu pui Lewix, mawh kheu nan kix yuh an ka piang kix heue. ²³ Simiang Siyiex krai ah nin ka Mose, ²⁴ "In mawh grawng pa dex mai ceu pui Lewix khankix, pui pa hoik koe ju tixnga phwan num haok plak piang tak yaox ti laig yuh kaing jhaw ka daux nyiex gox bwan man bang kum, ²⁵ yam hoik hoek ju kix tix phwan num, kix tak laux tix khaing kaing pa yuh tix mai kix tak ang lai baox yuh kaing tix bawg kawx, ²⁶ kix tak yaox ti yuh kaing jhaw pa teem ka puxaik tix ka daux nyiex gox bwan man bang kum, viang mawh nan kix tak ang pon ti teei beeh glawm tix ceu kawx maix tak yuh nawh ka ceu pui Lewix awm grawng beeh glawm pa dex dawd mai kix heue."

¹ Simiang Siyiex sikah mai Mose ka daux tiag Sina, ka daux num ra khix tix khaix hoik lih kix khaing meung Ejiptux ah nin, ² "Kieh ceu pui Isarelax khankix yuh pawie Pasakha ka daux bawg yam pa hoik tat ti deuh. ³ Daux khix in kao pon ngaix plak bo maix tak yuh pawie an, ka daux bawg yam pa hoik tat ti deuh, awm pa koe been mai pa hoik tat ti deuh khankix pex tak yuh nawh. ⁴ Mose krai ka ceu pui Isarelax khankix, sonsang yuh kix pawie Pasakha. ⁵ Kix yuh pawie Pasakha ka daux khix tix kao pon ngaix, ponbo, ka daux tiag Sina, awm lox pa hoik tawm Simiang Siyiex ka Mose, mawh kheu nan ceu pui Isarelax khankix yuh pawie an. ⁶ Yam an koe pui tiblah, pa hoik seeing yuh tokaux ti ka pa yum pui son ang tix lai pon yuh pawie Pasakha ka daux singaix an, mai kix hoek ka plak sivoe ngai Mose mai Arun daux singaix an, ⁷ kix ah nin ka nawh, "Yix hoik seeing yuh tokaux tix ka pa yum, mawh sang pon kieh maix yix viex krax tan tix ka Simiang Siyiex ka daux bawg yam pa hoik tat ti deuh daux sinax ceu pui Isarelax khankix lie? ⁸ Mose ah nin ka kix, "Jun ha, Aux sang krox tix nghiet Simiang Siyiex sang ah yuh ka mawx ka grawng pa dex mai pex." ⁹ Simiang Siyiex krai ah nin ka Mose, ¹⁰ "Krai ka ceu pui Isarelax khankix, ka daux pex mai doeh ru pex tix kaux kaux seeing yuh tokaux tix ka pa yum, phan ang mawh nan hu krax deeh singai ang ah, nawh tak pon ti yuh pawie Pasakha cie Simiang Siyiex. ¹¹ Ka daux khix ra kao pon ngaix plak bo, kix tak pon ti yuh pawie, kix tak ih nex kawn yung tau mai blah pa ang sau susaix mai taux lhax pa song. ¹² Kix tak ang pon ti kieh nex an deuk tom hoek plak ponngawb mai ang pon ti kieh si-ang pot tix nyaing kawx, kix hawt ti yuh awm koe been pawie Pasakha. ¹³ Phan mawh pui pa singax mai pa ang koe krax hu, phan nawh ang yuh pawie Pasakha, tak teei ti tik kaw an khaing daux sinax pui ceu nawh, kheu ang nawh viex krax tan tix hoek ka Simiang Siyiex, ka daux bawg yam pa hoik tat ti deuh, nawh tak yaox ti kham geu phimap. ¹⁴ Nyo sinie pa hoek ti peung sinax pex tivud ticu, phan nawh simie ti yuh pawie Pasakha cie Simiang Siyiex, nawh tak hawt ti yuh awm pa koe been pawie Pasakha mai yuh awm pa hoik tat kix ti deuh, ka son kawn praix pa keh daux haktiex pex ka son nyo sinie ang ah tak koe been tix ceu khaing heue. ¹⁵ Ka daux singaix yam jung ka nyiex gox bwan man, paiawm hoik kheem ka piang nyiex gox bwan man pa koe teug pa kham mhai ruk, jah ponbo tom hoek ponngawb, an hoik awm grang ngu. ¹⁶ Ponngaix paiawm kheem ka nyiex gox bwan jheung jheung, ponsawm jhan riang awm grang ngu. ¹⁷ Yam hoik yaog paiawm tix haok khaing ka piang nyiex gox bwan man, ceu pui Isarelax khankix yaox ti hu krax mai yam jung paiawm tix ot dee mawx ang ah, ceu pui Isarelax khankix tak sum nyiex bang tix tan. ¹⁸ Awm lox pa tawm Simiang Siyiex, ceu pui Isarelax khankix tak lih hu krax mai awm lox pa tawm Simiang Siyiex, kix tak sum nyiex bang tix mai glang kawn ot paiawm ka piang nyiex gox bwan man, kix ca kawn ot daux nyiex bang. ¹⁹ Glang kawn ot paiawm ka piang nyiex gox bwan man tom rheung singaix, ceu pui Isarelax khankix yuh awm pa tawm Simiang Siyiex mai ang lai hu krax. ²⁰ Bawg blah yam kawn kheem paiawm ka piang nyiex bang tivud ticu, awm lox tawm Simiang Siyiex kix ca kawn ot ka daux nyiex bang, mai awm lox tawm Simiang Siyiex kix tak lih hu krax. ²¹ Bawg blah yam kawn kheem paiawm, jah ponbo tom hoek ponngawb mai yam deeh yaog paiawm tix haok ponngawb, kix tak hu krax, ponngaix ang ah, ponsawm ang ah, yam deeh yaog paiawm tix kix tak hu krax. ²² Ra singaix, tix khix ang ah, tix num ang ah, yam kawn kheem paiawm ka piang nyiex gox bwan man, ceu pui Isarelax khankix, kix ot daux nyiex bang mai kix ang pon ti hu krax, viang mawh nan, yam hoik deeh yaog paiawm tix kix hu krax. ²³ Awm lox pa tawm Simiang Siyiex, kix ca kawn ot ka daux nyiex bang mai awm lox pa tawm Simiang Siyiex kix hu krax, kix yuh awm pa tawm Simiang Siyiex, awm lox tawm Simiang Siyiex ka Mose heue.

¹ Simiang Siyiex krai ah nin ka Mose, ² "Maix tak yuh teettawng mau ra mu sonsang kraix khrawm ka pui hun mai sonsang gah ka nyiex bang. ³ Yam phlu ka teettawng an khawm ra, cub pui hun khawmuik, tak kraix khawm paox ti hoek ka plak sivoe maix hawt diang siviex nyiex gox bwan man bang kum. ⁴ Phan phlu ka teettawng tix mu ngie, cao kaing pa kwang ka piang pui tix rheng khaing daux ceu pui Isarelax khankix, tak kraix khrawm paox ti hoek ka maix. ⁵ Yam phlu maix teettawng pa so cub nyiex bang pa ot plak lih singaix, yaog ti hu krax. ⁶ Yam phlu teettawng pa so bawg ra, cub nyiex bang pa ot plak seh, yaog ti hu krax mai yam phlu ka teettawng pa so yam mawx ang ah, kix tak lih hu krax. ⁷ Yam sang kraix khrawm maix pui hun tau mai paox ti maix tak phlu teettawng, viang mawh nan maix paw phlu lox teettawng pa so. ⁸ Kawn simex Arun pa mawh cao giex kaing li khankix tak phlu teettawng. In tak mawh been pa caw pex ti hawt yuh ka daux doeh ru pex leeing ju heue. ⁹ Yam hu puing pex naing daux haktiex tix, ka pui koeng pa yeen pa khin ka piang pex, khaix an pex tak phlu teettawng pa so sonsang mawh krax pa doh keud pex ka sivoe Simiang Siyiex tix mai pex tak pon ti lawt luan khaing pui pa koeng tix. ¹⁰ Ka dau singaix koe krax gaux rhawm pex, daux bawg yam singaix yuh pex pawie mai singaix haok khix khraox pex tak phlu teettawng ka piang krax tan pa gleeing pex khankix mai krax tan pa appong krax tan pa nhim, sonsang mawh krax pa doh keud pex ka Siyiex, Aux mawh Simiang Siyiex, Siyiex pex heue." ¹¹ Ka daux num ra, khix ra, haok khix tixnga ngaix, paiawm yaog tix haok khaing ka piang nyiex gox bwan man pa koe teug pa kham mhai ruk, ¹² mai ceu pui Isarelax khankix lih hu khaing daux tiag Sina, khaix an paiawm lih kaog daux tiag Paran. ¹³ Mawh kheu nan kix jah ti lih hu bawg tix awm lox pa tawm Simiang Siyiex ka Mose. ¹⁴ Cub nyiex bang Yudax khankix lih hu sivoe tau mai chix kru naing tix, Nashon kawn simex Aminadat mawh cao kaing naing ka piang cub pui Yudax. ¹⁵ Natanelax kawn simex Zuah mawh cao kaing naing ka cub pui Issakha. ¹⁶ Eliabax kawn simex Helon mawh cao kaing naing ka cub pui Zebulon. ¹⁷ Yam hoik yieh nyiex gox bwan man, kawn simex Gerashon mai kawn simex Merarix khankix klawm nyiex gox bwan man an lih hu heue. ¹⁸ Cub nyiex bang Rubin khankix lih hu tau mai chix kru naing tix, Elizurax kawn simex Shedurax mawh cao kaing naing ka cub pui Rubin. ¹⁹ Shelumelax kawn simex Zurishadie mawh cao kaing naing ka cub pui Simion. ²⁰ Eliasap kawn simex Doelax mawh cao kaing naing ka cub pui Gat. ²¹ Ceu pui Kawhat khankix lih hu mai klawm kraung ceu pa singax singeh mai kix sum nyiex gox bwan man sivoe ka sang hoek kix. ²² Cub nyiex bang Epharem lih hu tau mai chix kru naing tix, Elishama kawn simex Amihut mawh cao kaing naing ka cub pui Epharem. ²³ Gamalelax kawn simex Pedazurax mawh cao kaing naing ka cub pui Manashe. ²⁴ Abidan kawn simex Gidawnix mawh cao kaing naing ka cub pui Binyamin. ²⁵ Cub nyiex bang Dan ghoit ti hu tau mai chix cub kru naing tix, Aheza kawn simex Amishadie mawh cao kaing naing ka cub pui Dan. ²⁶ Pagelax kawn simex Awkharan mawh cao kaing naing ka cub pui Asha. ²⁷ Ahirax kawn simex Enan mawh cao kaing naing ka cub pui Napthalix. ²⁸ In mawh Grawng pa sang yaog ceu pui Isarelax khankix ti lih hu krax cub mawx cub an, yam lih hu kix krax heue. ²⁹ Mose ah nin ka Hawbax kawn simex Yoelax ka ceu pui Midian pa mawh paox nawh, "Ex sang lih hu ka dee pa hoik ah Simiang Siyiex, aux tak sang tawx an ka pex, hoek tau mai yix mai ex tak yuh ceu pa mhawm ka maix, mawh kheu Simiang Siyiex hoik yuh sijax mukheu pa mhawm ka pui Isarelax." ³⁰ Hawbax deeh ah nin ka nawh, "Aux ang hu, aux deeh ing ka haktiex cao tix ka pao nyiex tix." ³¹ Mose deeh ah nin, "Yuh bwanson paw prah yix liak, mawh kheu maix hoik tawng yix sang yaox ti bang ka daux tiag mawh kheu maix hoik pon ti mawh ngai yix. ³² Phan maix hu tau mai yix awm yuh Simiang Siyiex pa mhawm ka yix, yix kawx tak yuh pa mhawm ka maix." ³³ Cub pui Isarelax lih hu khaing gawng Simiang Siyiex, been loe singaix krax, mai teug bwan sijax mukheu Simiang Siyiex thong kix hu sivoe loe singaix krax, sonsang sawg ka dee laux son kix. ³⁴ Paiawm Simiang Siyiex koe ka piang kix ponngaix yam lih hu kix krax. ³⁵ Yam lih hu teug bwan sijax mukheu yam mawx ang ah, Mose ah nin, "Simiang Siyiex eue kaoh heue, kieh pui koeng maix khankix, prung prang rairuat, mai kieh pui koeng maix to sivoe Maix." ³⁶ Yam kaog teug bwan sijax mukheu, Mose ah nin, "Simiang Siyiex eue, deeh hoek heue, deeh hoek ka dee ot ceu pui Isarelax kaing rheng kaing mheen liak."

¹ Simiang Siyiex mhong ka lox pa ngia pa ngheeik ceu pui Isarelax ka grawng pa caox caig, mai krax pa song rhawm Nawh Cao lih mai ngu Simiang Siyiex gleeing ka daux sinax kix mai proe ka pui pa paung ka praok nyiex bang tiblah. ² Pui khankix riag yo ka Mose mai Mose rawg bwan ka Simiang Siyiex ngu an kawx yeet. ³ Nawh kok ceu kaux dee an mawh Taberax kheu hoik gleeing ngu Simiang Siyiex ka daux sinax kix. ⁴ Pui pa hoik khon tix ka sinax pui hun, kied koe rhawm pa ghoing, ceu pui Isarelax baox yiiem ah nin, "Pui mawx sang tawx yix ih nex lie?" ⁵ "Ex doh keud ka nex kax pa yie ih ex, ka daux meung Ejiptux, khawm ke, ke khwang, tauxka, tauxmo mai tauxhaw khankix, ⁶ Yam in rhawm rhi yix hoik khrup, lheu khaing blah mannax in, sivoe ngai yix ang lai yaox koe tidtix." ⁷ Mannax an hoik awm simie taux kila mai pakpeung awm mu ploi. ⁸ Pui khankix hu lailing ka plak praix mai khrawm mannax, krit ka mhaw mai tauh daux po, ngaik daux aw, yuh blah ka an, jhawm nyawm awm blah pa hoik diag tau mai bee. ⁹ Yam lih rawm ciex ka piang nyiex bang kix ponsawm, mannax lih tau mai an. ¹⁰ Mose mhong yien pui khaing diang siviex nyiex bang, ka nyiex ma pui mawx pui an mai pa song rhawm Simiang Siyiex baox nie kaoh ka mai Mose ang nyawm rhawm ka. ¹¹ Mose ah nin ka Simiang Siyiex, "Maix Cao lai yuh krax kha rhawm ka kawncau tix yuh ka mawx? Mai aux lai mawh pa ang pon bwanson ka plak sivoe ngai Maix Cao mai deuh beeh glawm cien pui inkix khawmuik ka piang aux yuh ka mawx?" ¹² Khex mawh aux pa nghe ka pui inkix lie? khex mawh aux pa keh kix sonsang ah Maix Cao ka aux yuh nin lie? Klien kix ka daux naok Maix awm pui kia ngien ka kawn nyawm pa kawn peuex teeh mai klien kix hu ka daux haktiex pa hoik tiextu Maix Cao ti tawx ka keeing kix ¹³ Aux sang pon teei nex sonsang tawx ka pui in khankix khaing dee mawx? Mawh kheu kix riag yiiem sivoe aux ah nin, tawx yix ih nex liak ¹⁴ Aux ang pon klawm beeh glawm pui inkix nong nong, kheu mawh in beeh glawm pa kied cien son aux. ¹⁵ Phan Maix Cao yuh awm ceu in ka aux, yuh bwanson pah ka aux yam in, phan aux mawh pa pon bwanson ka plak sivoe ngai Maix Cao, paw doh kieh aux yaox krax kha liak." ¹⁶ Simiang Siyiex ah nin ka Mose, "Khrawm pui riex ju atixgliah kaux son Aux, khaing daux pui Isarelax pa tawng maix mawh pui riex ju mai pa mawh cao kaing ka piang kix, viex kix hoek ka nyiex gox bwan man bang kum cung tau mai maix tan. ¹⁷ Aux tak lih hoek sikah tau mai maix tan, Aux tak teei khwan pa koe ka piang maix tiblah mai deuh ka piang kix mai kix tak klawm beeh glawm tau mai maix son ang maix lai klawm beeh glawm an nong nong. ¹⁸ Ah nin ka pui khankix, kieh tokaux pex singax son pasax mai pex tak yaox ti ih nex, mawh kheu Simiang Siyiex hoik mhong lox riag yiiem pex ah nin, "Pui mawx sang tawx yix ih nex lie?" Mawh kheu yix hoik mhawm ka daux meung Ejiptux. Mawh kheu Simiang Siyiex tak tawx nex ka pex mai pex tak yaox ti ih. ¹⁹ Pex tak ang yaox ti ih ngie son tix ngaix, ra ngaix, phwan ngaix, kao ngaix mai tixnga ngaix, ²⁰ pex tak yaox ti ih leeing khix tom hoik lih nex khaing daux meeh pex tom hoik seeing pex ka, kheu hoik thiang pex ti tik ka Simiang Siyiex pa ot ka daux sinax pex mai riag yiiem sivoe Nawh Cao ah nin, "Kheu yix lai lih khaing daux meung Ejiptux lie?" ²¹ Mose ah nin, "Can pui liah sien kaux pa ot tau mai Aux khankix, Maix Cao hoik ah nin, Aux tak sang tawx kix ih nex tom naog tix khix ²² mawh sang pah ka phung yung, mawie mai pex son kix, sonsang kub ih kix lie? Phan ang mawh nan mawh sang khrawm kax pa koe daux rawm sigrit sigra son kix sonsang kub ih kix lie?" ²³ Simiang Siyiex ah nin ka Mose, "Mawh dawd plawng taix Simiang Siyiex lie? yam in maix tak yaox ka lox pa krai Aux ka maix mawh ang mawh." ²⁴ Mose lih hu mai krai lox Simiang Siyiex ka pui hun mai nawh khrawm simex pui riex ju atixgliah kaux khaing daux pui hun mai kieh kix cung vung viang nyiex gox bwan man. ²⁵ Simiang Siyiex lih hoek khaing daux paiawm mai sikah ka Mose mai teei khwan pa koe ka piang nawh tiblah mai deuh ka piang pui riex ju atixgliah kaux, yam hoek khwan ka piang kix, kix sikah lox jhai mai kix ang lai baox krai khaix an. ²⁶ Kawn koe pui ra kaux pa kut ti ot ka daux nyiex bang, tix kaux mawh Eladat mai an tix kaux mawh Medat mai khwan hoek ka piang kiex khawm ra kaux, kiex hoik mawh pa laig daux carang, viang kiex ang lih hu ka nyiex gox bwan man kawx, kiex sikah lox jhai ka nyiex bang. ²⁷ Nyawm simex awn ju tix kaux to hoek krai ka Mose ah nin, "Eladat mai Medat, sikah lox jhai daux nyiex bang." ²⁸ Yawsux kawn simex Nun cao teem Mose, pui pa hoik laug nawh tix kaux ah nin, "Simiang aux Mose tiebtie ka kix liak." ²⁹ Mose ah nin ka nawh, khoi rhawm maix ka aux jao tix? Kieh pui Simiang Siyiex sikah lox jhai khawmuik mai kieh Simiang Siyiex tawx khwan hoek ka piang kix." ³⁰ Mose mai pui riex ju Isarelax khankix deeh ing ka nyiex bang heue. ³¹ Bhaung ting lih khaing Simiang Siyiex mai tah keed hoek khaing rawm sigrit sigra mai kieh keed prung prang rawb rim nyiex bang been tix ngaix krax, ka plak in mai been tix ngaix krax, ka plak an, hawt vung viang nyiex bang mai lhaong pu khaing tiex been ra sawk. ³² Pui khankix kaoh khrawm keed ku singaix mai ngaix khaix leeing ngaix, pui pa khrawm keed dee iak pon khrawm kao Awmie mai hok hawt vung viang nyiex bang ku sidah son tix. ³³ Yam kawn koe nex keed ka sinax rhang kix mai ang nyang tien kraing krax song rhawm Simiang Siyiex lih ka pui khankix mai tawx preng pa kied ting ka pui khankix. ³⁴ Nawh tom kok dee an mawh Kibarok-hatava, kheu sipaung kix pui pa koe rhawm ghoing ka dee an. ³⁵ Pui khankix deeh gah tix khaing Kibarok-hatava mai hu bang ka Hazarot heue.

¹ Meriam mai Arun ne raw ka Mose, kheu jao teei nawh ti moeng bun Kushax, ² kiex ah nin, "Mawh sikah Simiang Siyiex ka maix ngie lie? Mawh ang Nawh Cao sax sikah ka yix nang lie?" Simiang Siyiex mhong ka lox sikah kix. ³ Mose mawh pa kied koe rhawm awn rhawm tiem lheu khaing pa koe ka piang haktiex. ⁴ Simiang Siyiex ah nin ka Mose, khawm Arun mai Meriam dom mawx dom an, "Pex loe kaux, lih hoek ka nyiex gox bwan man bang kum." Kix loe kaux lih hu hoek. ⁵ Simiang Siyiex lih hoek ka daux rong paiawm mai cung ka diang siviex nyiex gox bwan man, kok ka Arun mai Meriam, mai kiex khawm ra hoek sivoe. ⁶ Nawh Cao ah nin, "Nghiet ka lox Aux, phan cao jhai koe ka daux sinax pex, Aux Simiang Siyiex tak plak jhi tokaux tix ka nawh ka daux riang susai, Aux tak sikah mai nawh ka daux camaox. ⁷ Kawncau Aux Mose ang lai mawh nan, nawh mawh pa kaux sijax daux nyiex Aux khawmuik. ⁸ Aux sikah tau mai nawh pakngai taw pakngai, ka daux pa sidawng, ang lai mawh pa ang sidawng ka mai nawh yaox ka grang pakpeung Aux. Pax lai ang lhat graung ka neraw tix ka kawncau Aux Mose yuh ka mawx?" ⁹ Simiang Siyiex song rhawm ka kiex mai Nawh cao lih hu. ¹⁰ Yam gah paiawm tix khaing piang nyiex gox bwan man, Meriam lih koe saux sipawg, awm paing rawm rha, Arun veeh ti jhak ka Meriam mai yaox koe saux sipawg ka nawh. ¹¹ Arun ah nin ka Mose, "Simiang aux eue, paw deuh phimap ka piang yiex, kheu pa daox pa aw yiex mai pa caox caig yuh yiex liak. ¹² Paw kieh Meriam yum awm pa laux nex tix plak yam lih keh nawh khaing vaig miex tix." ¹³ Mose riag yo ka Simiang Siyiex ah nin, "Siyiex eue, yuh bwanson pai nawh moi liak." ¹⁴ Simiang Siyiex ah nin ka Mose, "Phan keeing Meriam baig ka ngai Meriam, nawh tak kaig aliah ngaix ang mawh lie? kieh nawh lih ot plak praix nyiex bang aliah ngaix, khaix an tak pon ti deeh viex nawh hoek." ¹⁵ Meriam lih ot plak praix nyiex bang aliah ngaix, pui khankix ang pon hu krax tom hoek bawg yam deeh viex kix nawh laig ka daux nyiex bang. ¹⁶ Khaix an pui khankix deeh gah tix khaing Hazarot mai hu bang ka daux tiag Paran heue.

¹ Simiang Siyiex krai ah nin ka Mose, ² "Ploi cao kaing tix cub tix kaux, khaing doeh ru keeing kix hu jiang ka meung Khanan, pa sang tawx Aux ka ceu pui Isarelax, " ³ Mose ploi kix lih hu khaing daux tiag Paran, awm lox tawm Simiang Siyiex ka cao kaing ceu pui Isarelax heue. ⁴ In mawh ceu kaux kix, khaing ru Rubin mawh Shamua kawn simex Zakhurax, ⁵ khaing ru Simion mawh Shaphat kawn simex Hawrix, ⁶ khaing ru Yudax mawh Kaliep kawn simex Yiephunie, ⁷ khaing ru Issakha mawh Igalax kawn simex Yosiep, ⁸ khaing ru Epharon mawh Hawshe kawn simex Nun, ⁹ khaing ru Binyamin mawh Palatix kawn simex Raphu, ¹⁰ khaing ru Zebulon mawh Gadelax kawn simex Sawdix, ¹¹ khaing ru Yosiep pa kaoh khaing ru Manashe mawh Gadix kawn simex Susix, ¹² khaing ru Dan mawh Amelax kawn simex Gemalix, ¹³ khaing ru Asha mawh Seturax kawn simex Mikhelax, ¹⁴ khaing ru Napthalix mawh Nabix kawn simex Vophasix, ¹⁵ khaing ru Gat mawh Goelax kawn simex Makhix. ¹⁶ In khankix mawh ceu kaux pui ploi Mose lih hu jiang ka haktiex an. Mose sum ceu kaux Hawshe kawn simex Nun deeh mawh Yawsux. ¹⁷ Mose ploi kix hu jiang ka haktiex Khanan ah nin ka kix, "Hu krax plak seh mai haok ka piang gawng, ¹⁸ Jhak ti yaox ka haktiex an koe yuh ka mawh, can pui pa ot ka daux haktiex an, mawh ting riang phan ang mawh nan mawh iak riang, mawh tux phan ang mawh nan mawh hun, ¹⁹ haktiex ot kix mawh mhawm mawh caox, veng ot kix mawh nyiex bang mawh nyiex kaux, ²⁰ haktiex an mhawm lie, ang mhawm lie, koe ang koe khaox ox lie, kieh pex koe rhawm kwa rhawm vao mai viex plix kix tiblah khaing daux haktiex an." Yam an hoik mawh bawg yam jah plix siiet tix teem. ²¹ Kix lih hu jiang ka haktiex an, khaing daux tiag Zinax ka veng Rehawbax, dex krax laig daux veng Hamat. ²² Kix lih hu plak seh tom hoek ka veng Hebaron, dee ot ru Anagax pa mawh Ahiman, Sheshie mai Talamie, veng Hebaron hoik cao sum ti aliah num sivoe veng Zawnax daux meung Ejiptux. ²³ Kix hoek ka ngawd Eshakawlax mai tat nhu plix siiet tix kak, pa koe plix siiet tix sigleem mai klawm ka khaox glawm ra kaux, kix baox viex plix kla jiang mai plix ruh hoek tiblah. ²⁴ Dee an kok mawh ngawd Eshakaw mawh kheu tat pui Isarelax sigleem plix siiet tan. ²⁵ Khaix hoik luan tixpon singaix, kix deeh hoek khaing jiang tix haktiex an. ²⁶ Kix deeh hoek ka Mose mai Arun mai pui hun Isarelax ka daux tiag Paran baoh Kadeshax, kix viex lox satang hoek ka kiex mai pui hun mai jhi kix yaox plix khaing haktiex an. ²⁷ Kix krai ka Mose ah nin, "Yix hoik hoek ka haktiex dee ploi maix yix hu, rug mawh dee lih rawm teeih mai rawm hia, in mawh plix khaing tan. ²⁸ Can pui pa ot daux haktiex an, mawh pa ting riang mai veng kix kawx hoik sum ti tom kaux mai kied ting kied vieh, lheu khaing an yix hoik yaox ru Anagax tan. ²⁹ Pui Amaliet ot ka daux haktiex an baoh plak seh, pui Hitix, pui Yebusix mai pui Amawrix ot ka piang gawng, pui Khanan ot praok rawm sigrit sigra mai praok rawm klawng Yawdan." ³⁰ Kaliep kieh pui hun yawg ti ka plak sivoe Mose ah nin, "Kieh ex lih hu dom mawx dom an mai teei haktiex an, mawh kheu ex koe riang ti pex ka kix." ³¹ Viang mawh nan can pui pa hu mai Kaliep ah nin, "Ang ex kub riang rao ti pex kix, mawh kheu ting riang rao kix khaing ex." ³² Kix pa hu jiang ka haktiex an, deeh krai grawng satang pa caox ka pui Isarelax ah nin, "Haktiex pa lih hu jiang yix, mawh haktiex pa ot pui pa bleet ti ih pui mai can pui pa hoik yaox yix tan mawh pui pa kied ting lhaong kaux hak khawmuik. ³³ Yix yaox pui Nefelim pa ting lhaong, doeh ru Anagax pa kaoh khaing pui Nefelim pa ting lhaong, yix hoik awm sido ka daux pa jhak yix ka cao tix mai yix hoik mawh awm an ka daux pa yaox kix heue."

¹ Cub pui hun riag yo khawmuik mai pui hun yiiem daux sawm an. ² Ceu pui Isarelax ngia ka Mose mai Arun mai pui hun khawmuik ah nin ka kiex, "Yix mhawm ti yum ka haktiex Ejiptux, phan ang mawh nan, yix mhawm ti yum ka daux tiag! ³ Simiang Siyiex lai viex yix hoek ka haktiex in, sonsang yum yix ka lawm vaig yuh ka mawx? Moeng yix, kawn praix yix tak sang kham krax pa giex laung, yix deeh ing ka meung Ejiptux ang lheu mhawm lie?" ⁴ Kix ra lai ah nin ka paox tix, "Kieh ex laug cao kaing tix kaux mai deeh ing ka meung Ejiptux." ⁵ Mose mai Arun gup ti ka plak sivoe ngai pui hun ceu pui Isarelax pa kum paox ti. ⁶ Yawsux kawn simex Nun mai Kaliep kawn simex Yephunie pa hoik hu tau sinax pui jiang ka haktiex khankix riah ti tik kraung ceep tix, ⁷ mai krai ah nin ka pui hun ceu pui Isarelax, "haktiex pa hoik lailing yix ti jiang, mawh haktiex pa kied sidaing mhawm. ⁸ Phan Simiang Siyiex khaw rhawm ka ex, Nawh Cao tak viex ex laig ka haktiex in mai tawx haktiex an dee lih rawm teeih mai rawm hia ka ex. ⁹ Paw doh tieh feen ka Simiang Siyiex, paw lhat ka pui ot ka daux haktiex an, mawh kheu kix mawh priex ih son ex, krax tiep tie hoik lih hu khaing kix mai Simiang Siyiex ot tau mai ex, paw lhat ka kix." ¹⁰ Pui hun ah nin dheem kiex ka simaox, yam an min pakngai Simiang Siyiex lih bleeh ka daux nyiex gox bwan man bang kum ka ceu pui Isarelax heue. ¹¹ Simiang Siyiex ah nin ka Mose, "Mawh sang nunai pui in khankix ka Aux miex grheung? mai kix kawn ang yum rhawm ka Aux, ka mhai pa daox ding pa hoik yuh Aux daux sinax kix miex grheung? ¹² Aux tak sivied kix ka jhawm saux preng mai deeh teei sinngao an khaing kix, Aux tak kieh maix mawh ceu pui ting riang mai pa ting siawp sibrawm khaing kix. ¹³ Mose ah nin ka Simiang Siyiex, "Khaix an pui Ejiptux tak mhong ka an, mawh kheu Maix Cao hoik viex pui in khankix lih khaing sinax kix ka siawp sibrawm Maix Cao, ¹⁴ mai kix tak krai ka pui pa ot ka daux haktiex in. Kix hoik mhong koe Maix Cao ka sinax pui in khankix, Simiang Siyiex eue, Maix Cao hoik jhi kix yaox pakngai tix mai paiawm Maix Cao hoik ot ka piang kix ponngaix Maix Cao hoik thong kix hu ka rong paiawm mai ponsawm Maix Cao hoik thong kix hu ka rong ngu paiawm. ¹⁵ Phan Maix Cao pah ka pui in khankix awm pui tix kaux, pui pa hoik mhong ka min Maix Cao tak ah nin, ¹⁶ mawh kheu ang Simiang Siyiex ang pon viex pui in khankix hu ka haktiex pa hoik tiextu Nawh Cao sonsang tawx ka kix, Nawh Cao tom pah kix ka daux tiag. ¹⁷ Aux rawg bwan ka Maix Cao jhi ex yaox ka siawp sibrawm Siyiex, awm lox tawm Maix Cao liak. ¹⁸ Simiang Siyiex mawh pa lang rhawm, mawh pa naog ka krax caux rhawm mai mawh pa pluat ploi phimap, pluat ploi krax lud, viang mawh nan Nawh Cao ang doh deuh pui koe phimap mawh pa ang koe phimap, Nawh Cao deeh viied deeh pawk ka phimap keeing kix tom hoek ka piang kawn praix, tom hoek loe ju pon ju ka doeh ru kix. ¹⁹ Aux khyox khaw rawg mhaing ka Maix Cao pluat ploi phimap pui in khankix awm koe krax moh krax rhawm pa kied ting Maix Cao mai awm pluat ploi Maix Cao ka pui in khankix khaing meung Ejiptux tom hoek yam in." ²⁰ Simiang Siyiex ah nin, "Aux hoik pluat ploi kix awm pa khyox khaw maix, ²¹ mawh kheu nan awm im ju Aux tete, haktiex tak naog ka min plakngai Simiang Siyiex tete, ²² pui khawmuik pa hoik yaox ka min plakngai Aux mai ka mhai pa daox am yuh Aux ka meung Ejiptux mai ka daux tiag, kawn cheuk cheu ka Aux tom kao bawg mai ang nyang cu nghiet ka lox Aux, ²³ kix tak ang yaox ka haktiex pa hoik tiextu Aux ka keeing kix, pui khawmuik pa nunai ka Aux, tak ang yaox haktiex an tix kaux kawx. ²⁴ Viang mawh nan phan mawh kawncau Aux Kaliep, kheu koe khwan pa siyox ka daux nawh mai hawt khaix Aux jheung jheung, Aux tak viex nawh laig ka daux haktiex dee hoik hu nawh mai doeh ru nawh tak pon ka sinngao an. ²⁵ Cub pui Amaliet mai cub pui Khanan pa ot ka daux ngawd, pasax pex tak veeh ti hu ka daux tiag ka krax hu ka rawm sigrit sigra raoh heue." ²⁶ Simiang Siyiex ah nin ka Mose mai Arun, ²⁷ "Aux kawn yaox ti gun yeung ka pa ngia pui hun pa caox in khankix miex grheung? Aux hoik mhong pa ngia pa deuh pui Isarelax phimap ka Aux. ²⁸ Krai ka kix, Simiang Siyiex ah nin, awm im ju Aux, Aux tak yuh an awm mhong Aux pa krai pex. ²⁹ Tokaux yum pex pa ngia ka Aux, tak tik ka daux tiag in mai can pex pa hoik simin tix, awm pa koe pex khawmuik, jah ka pa koe ju tixnga num haok plak piang, ³⁰ Tak ang yaox ti laig daux haktiex tiextu Aux ti tawx ka pex, lheu khaing Kaliep kawn simex Yephunie mai Yawsux kawn simex Nun. ³¹ Viang mawh nan kawn nyawm iak pex, pa hoik ah pex mawh pa sang kham pa giex laung, Aux tak viex kix laig mai kix tak tawng ka haktiex pa seeing pex ka. ³² Phan mawh son pex, tokaux yum pex tak tik daux tiag. ³³ Kawn praix pex tak mawh cao liang yung ka daux tiag tixpon num mai kham geu son krax pa ang pex yum rhawm, tom hoek bawg yam tik ka tokaux yum pex ka daux tiag. ³⁴ Awm bawg yam hu jiang pex ka haktiex an tixpon singaix, tix ngaix tak deuh mawh tix num, pex tak yaox ti kham geu phimap yuh tix tixpon num mai pex tak tawng krax pa tik vud Aux pex. ³⁵ Aux Simiang Siyiex, hoik ah nin, Aux tak yuh ceu in tete ka pui hun pa caox caig, pa khrawm paox ti tieh feen ka Aux mai kix tak laux leeing mai kix yum ka daux tiag in." ³⁶ Pui pa deeh hoek pa hoik ploi Mose hu jiang ka haktiex an, krai grawng pa caox khaing haktiex an mai kieh pui hun khankix ngia mai tieh feen ka Mose, ³⁷ pui khankix pa viex grawng pa caox khaing haktiex an, tak yum ka saux preng plak sivoe ngai Simiang Siyiex. ³⁸ Viang mawh nan can kix pa hu jiang ka haktiex pa kawn im ju mawh Yawsux kawn simex Nun mai Kaliep heue. ³⁹ Mose krai gumlox in ka pui Isarelax khankix mai pui khankix kied ngia ka. ⁴⁰ Kix kaoh caocao ponngawb mai haok ka piang choek gawng ah nin, "Jhak heue, yix ot tin, yix tak hu ka dee pa hoik yuh Simiang Siyiex sijax mukheu, mawh kheu yix hoik lud." ⁴¹ Mose deeh ah nin, "Yuh patix pex lud ka lox tawm Simiang Siyiex, mawh kheu in pex tak ang chix pex ka. ⁴² "Paw vi hu, pex tak som nai sivoe pui koeng pex khankix, mawh kheu Simiang Siyiex ang ot sinax pex heue. ⁴³ Mawh kheu ceu pui Amaliet mai ceu pui Khanan hoik ot sivoe pex mai pex tak goh ka lawm vaig, kheu jao hoik veeh pex tix khaing pa hawt tix Simiang Siyiex, Simiang Siyiex tak ang ot tau mai pex." ⁴⁴ Kix kawn viex rhawm kwa tix haok ka piang choek gawng, viang mawh nan teug bwan sijax mukheu Simiang Siyiex mai Mose ang lai lih khaing nyiex bang. ⁴⁵ Khaix an ceu pui Amaliet mai ceu pui Khanan pa ot ka piang gawng lih puing kix mai pheet kix, tom hoek ka veng Hawma heue.

¹ Simiang Siyiex ah nin ka Mose, ² "Krai ka pui Isarelax khankix, yam hoek pex ka daux haktiex pa ot tix pa tawx Aux ka pex, ³ pex tak yuh krax tan ka Siyiex, pa mawh krax tan pa yuh ka ngu ang ah, krax tan pa gleeing ang ah, krax tan pa appong ang ah, sonsang grum naog krax tan pa tiextu pex, awm krax tan pa koe rhawm rhi pex ang ah mai pawie pa hoik tat ti deuh khankix, sonsang mawh krax tan pa sioe bhawng pa khaw rhawm Siyiex, khaing mawie mhaing mai pex mhaing ang ah, yung mhaing ang ah, ⁴ nawh tak viex krax tan tix hoek ka Simiang Siyiex, pa mawh krax tan phawng nghox ca im kao son tix son khaing tix Epha mai phawng nghox ca ceu pa mhawm, pa hoik klao ti tau ka bee pon son tix son, khaing tix heng, ⁵ mai rawm plix siiet pon son tix son khaing tix heng, son krax tan pa nyaux maix tak khre tau mai krax tan pa gleeing ang ah, krax tan pa appong ang ah, son kawn yung ku mu heue. ⁶ Son yung mhaing maix tak khre awm krax tan phawng nghox ca im ra son khaing kao son daux tix Epha khaing phawng nghox ca ceu pa mhawm, pa klao ti tau mai bee loe son tix son khaing tix heng, ⁷ son krax tan pa nyaux maix tak tan rawm plix siiet loe son tix son khaing tix Heng, son krax tan pa sioe bhawng ka Simiang Siyiex. ⁸ Yam khre maix mawie mhaing tix mu son krax tan pa gleeing, phan ang mawh nan son krax tan pa appong, sonsang grum naog krax pa tiextu pex, phan ang mawh nan son krax tan pa nhim ka Simiang Siyiex, ⁹ Maix tak viex tix tan phawng nghox ca im loe son tix son khaing tix Epha, khaing phawng nghox ca im ceu pa mhawm, pa kluklao ti tau mai bee tix plak heng tau mai mawie mhaing tix mu, ¹⁰ mai pex tak viex rawm plix siiet son krax tan pa nyaux tix plak heng, pa mawh krax tan pa gleeing ka ngu pa sioe bhawng pa khaw rhawm Siyiex. ¹¹ Maix tak yuh awm in ka mawie mhaing ang ah, yung mhaing ang ah, son kawn yung iak ang ah, son kawn pex mhaing ku mu ang ah. ¹² Awm diag koe to brie pa khre pex ti deuh, mawh kheu nan pex tak yuh tau awm diag pa koe an ku mu. ¹³ Can pui haktiex khawmuik, yam yuh krax tan pa gleeing ka ngu, pa mawh krax tan pa sioe bhawng ka Simiang Siyiex. ¹⁴ Phan nyo sinie hoek ti peung tau mai pex, phan ang mawh nan pui tix kaux kaux pa ot daux sinax doeh ru pex, phan nawh simie ti yuh krax tan pa gleeing ka ngu pa mawh krax tan pa sioe bhawng ka Simiang Siyiex, kieh kix yuh awm pa yuh pex. ¹⁵ Been pa deuh pex son pui hun mai son nyo sinie, tak mawh tix ceu khaing mai been pa caw pex tix priex ka daux doeh ru tix leeing ju, mawh pa yuh ka mawx ka pex tak kieh awm an ka nyo sinie sivoe Simiang Siyiex. ¹⁶ Caw ti koe lox tat jhawm prawng mai lox lai beenli tix mu khaing son nyo sinie pa hoek ti peung tau mai pex heue." ¹⁷ Simiang Siyiex ah nin ka Mose, ¹⁸ "Krai ah nin ka pui Isarelax, yam hoek pex ka daux haktiex pa viex Aux pex hoek, ¹⁹ yam ih pex priex ka daux haktiex an, pex tak caw tix viex krax tan pa yaogyaw ka Simiang Siyiex. ²⁰ Pex tak yuh blah tix khlawp khaing nghox ca pa liang tix pon, kieh mawh krax tan pa yaog, awm krax tan pa yaog khaing glah nghox, maix tak caw ti tan awm an. ²¹ Pex tak tawx nghox ca pa liang ti pon ka Simiang Siyiex, sonsang mawh krax tan pa yaog khaing doeh ru pex leeing ju heue. ²² Phan pex lud ka daux pa ang bak ti yuh mai ang pon hawt yuh awm lox tawm pingnyap in khawmuik, pa hoik krai Simiang Siyiex ka Mose, ²³ awm lox pa hoik tawm Simiang Siyiex ka pex, khaing Mose khawmuik, jah ka singaix tawx Simiang Siyiex lox tawm pingnyap, ka doeh ru pex khankix leeing ju, ²⁴ Phan pui kawn lud ka daux pa ang tix bak ti yuh mai ka daux pa ang pui hun koe krax tawng mai pui hun khankix, tak tan kawn mawie mhaing tix mu, son krax tan pa gleeing, pa sioe bhawng pa khaw rhawm Siyiex tau mai krax tan phawng nghox ca im mai krax tan pa nyaux mai kawn pex mhaing tix mu son krax tan pa pluat ploi phimap awm pa koe been. ²⁵ Cao giex kaing li tak yuh krax khyox khaw son pui hun ceu pui Isarelax khawmuik mai kix tak pon krax pluat ploi, kheu mawh pa lud loe, kix tak viex krax tan tix, krax tan pa gleeing ka ngu ka Simiang Siyiex mai krax tan son phimap kix ka plak sivoe ngai Simiang Siyiex, son phimap pa lud kix. ²⁶ Pui hun Isarelax khawmuik mai nyo sinie pa peung sinax kix tak pon krax pa pluat ploi, mawh kheu pui khawmuik, hoik lud ka daux pa lud loe tix. ²⁷ "Phan pui tix kaux lud ka daux pa lud loe tix, nawh tak tan pex shiang naog num tix mu, son krax tan pa pluat ploi phimap. ²⁸ Cao giex kaing li tak yuh krax pa khyox khaw sivoe Simiang Siyiex son pui pa lud ka daux pa lud loe, yam yuh nawh phimap pa ang bak ti yuh mai yuh pa khyox khaw son nawh, mai nawh tak pon krax pa pluat ploi. ²⁹ Maix tak deuh lox tat jhawm prawng tix mu ngie son pui pa lud ka daux krax pa ang tix bak ti yuh tix ceuceu, son ceu pui Isarelax mai son nyo sinie pa hoek peung sinax pex heue. ³⁰ Phan pui tix kaux kaux kwa rhawm tix lud, pa mawh pui haktiex an mai nyo sinie ang ah, yuh pa ang Khaw ang jiet ka Simiang Siyiex, tak teei ti tik pui an khaing sinax ceu pui nawh. ³¹ Mawh kheu hoik nunai nawh ka lox Simiang Siyiex mai yieh laux ka lox tawm pingnyap Nawh Cao, tak teei ti tik ka kaw an, phimap nawh tak koe ka piang nawh heue." ³² Yam kawn ot pui Isarelax khankix ka daux tiag, kix yaox pui tix kaux kraix khix singaix twah. ³³ Pui pa yaox ka cao kraix khix, viex nawh hoek ka Mose mai Arun mai ka cub pui hun. ³⁴ Kix laung nawh, kheu ang kix nyang tawng pa sang yuh tix ka nawh. ³⁵ Simiang Siyiex ah nin ka Mose, "Tak kieh pui an yum tete, cub pui hun tak dheem nawh ka simaox, ka plak praix nyiex bang." ³⁶ Awm gumlox pa hoik tawm Simiang Siyiex ka Mose, cub pui hun viex nawh lih plak praix nyiex bang mai dheem nawh yum ka simaox heue, ³⁷ Simiang Siyiex ah nin ka Mose, ³⁸ "Krai ka pui Isarelax khankix, kieh kix yuh ciem taix sibex hawt daog sibex ceep tix, tom sidah ju ru kix mai sonsang sau ciem tai keei klai raoma hawt daog sibex du daog. ³⁹ Yam jhak pex ka ciem tai sibex an, sonsang mawh pa doh keud ka lox tawm pingnyap Simiang Siyiex mai son ang pex sang hawt yuh awm alo rhawm rhi cao tix mai awm pa khaw ka ngai pex awm pa hoik sax lud pex. ⁴⁰ Sonsang doh keud pex mai hawt yuh awm lox tawm pingnyap Aux khawmuik mai mawh pui pa singax ka son Siyiex pex. ⁴¹ Aux mawh Simiang Siyiex pex, pa hoik viex pex lih khaing meung Ejiptux sonsang mawh Siyiex pex, Aux mawh Simiang Siyiex pex heue.

¹ Yam in Korax kawn simex Izaha, kawn simex Kawhat, kawn simex Lewix tau mai Datan mai Abiram kawn simex Eliabax mai Awnax kawn simex Peliet, kawn simex Rubin kok pui khankix hu tau, ² mai pui Isarelax tiblah mai cao kaing cub pui hun pa laug kix pa ao min ra yieh tixphwan kaux khaing daux pui hun, yaog tix cung mai tieh feen ka Mose. ³ Kix khrawm paox ti, sonsang tieh feen ka Mose mai Arun mai kix ah nin ka kiex, "Kaing yuh pax kied sidaing kin, mawh kheu pui hun khawmuik mawh pa singax singeh ku kaux mai Simiang Siyiex ot sinax kix, yuh ka mawx pax lai kawn sang yuh tix ting ka piang cub pui hun Simiang Siyiex?" ⁴ Yam mhong Mose grawng in, nawh gup ngai baoh tix, ⁵ nawh sikah ka Korax mai cub paox nawh khankix ah nin, "Daux ponngawb pasax, Simiang Siyiex tak jhi, pui mawx mawh pui Nawh Cao, mai mawh pui mawx pa singax singeh, tak kieh nawh hoek dex Nawh Cao, mawh pui mawx pa sang laug Nawh Cao ka! Nawh tak kieh kix hoek dex Nawh Cao, ⁶ Korax mai paox cub maix khawmuik eue, yuh awm in, viex pan ngu hoek, ⁷ daux pasax sau ngu mai nyawng bhawng ka daux an, sivoe Simiang Siyiex mai pui pa laug Siyiex ka nawh tak mawh pa singax singeh. Kawn simex Lewix khankix eue, kaing pa yuh pex sidaing kin." ⁸ Mose ah nin ka Korax, "Pex pa mawh kawn simex Lewix khankix eue, nghiet yam in, ⁹ pa gwieh Simiang Siyiex Isarelax pex khaing pui hun Isarelax, sonsang viex pex dex hawt tokaux Nawh Cao, sonsang yuh pex kaing jhaw nyiex gox bwan man Simiang Siyiex mai sonsang cung pex plak sivoe ngai pui hun, sonsang yuh pex kaing jhaw son kix, keud pex mawh kaing pa iak lie, ¹⁰ Nawh Cao hoik viex pex hoek dex ka tokaux tix maix mai khawm pux aik maix pa mawh kawn ceu pui Lewix tau, mai maix ang mawh lie? Pex kawn sawg ka ara cao giex kaing li lie? ¹¹ Mawh kheu nan maix mai paox cub paox caw maix khankix, hoik khrawm paox tix, yuh krax pa tieh feen ka Simiang Siyiex. Arun mawh pui yuh ka mawx, pex lai ngia mai tieh feen ka nawh?" ¹² Mose ploi pui hu kok ka Datan mai Abiram, kawn simex Eliabax mai kix ah nin, "Yix tak ang hoek, ¹³ pa hoik viex maix yix lih khaing haktiex pa lih rawm teeih mai rawm hia, sonsang pah yix ka daux tiag mai sonsang yaog maix ti yuh cao kaing ka piang yix kawn keut maix mawh pa iak lie? ¹⁴ Lheu khaing an maix ang tie viex yix laig ka haktiex lih rawm teeih mai rawm hia mai ang tie tawx yix cie sinngao, ma kaung mai sipeem plix siiet khankix. Mawh sang koik maix ti teei sok ngai pui inkix lie? Yix tak ang hoek." ¹⁵ Mose kied song rhawm ah nin ka Simiang Siyiex, "Paw lai rieb ka krax tan kix, Aux ang sax teei la khaing kix tix mu kawx mai ang sax yuh pa kin ka kix tix kaux kawx." ¹⁶ Mose ah nin ka Korax, "Pasax maix viex paox cub paox caw maix, maix khawm kix tau mai Arun hoek sivoe ngai Simiang Siyiex, ¹⁷ teei pan pex ku kaux mai sau nyawng bhawng ka daux mai viex pan pex hoek ka plak sivoe Simiang Siyiex ku kaux, pa mawh pan ra yieh tix phwan mu, maix mai Arun kawx, tak hoek tau mai pan tix, tix kaux tix mu. ¹⁸ Mawh kheu nan pui ku kaux teei pan cie tix mai sau ngu mai nyawng bhawng ka piang an mai cung hawt diang siviex nyiex bwan man bang kum tau mai Mose mai Arun. ¹⁹ Korax khrawm cub pui hun khankix, sonsang tieh feen kix ka hawt diang siviex nyiex gox bwan man bang kum. Min plakngai Simiang Siyiex lih bleeh ka piang cub pui hun. ²⁰ Simiang Siyiex sikah ka Mose mai Arun ah nin, ²¹ "Yoi tokaux tix khaing sinax cub pui hun in, sonsang yuh Aux kix laux leeing daux tivud khaing. ²² Kiex gup pakngai tix ah nin, "Siyiex eue, Siyiex pa mawh ju khwan ka piang nex nham kawn pui khawmuik, kheu jao phimap pui tix kaux mai Maix Cao song rhawm ka cub pui hun khawmuik lie?" ²³ Simiang Siyiex ah nin ka Mose, ²⁴ "Krai ka pui hun ah nin, lih hu singai khaing dee ot Korax, Datan mai Abiram." ²⁵ Mose krai ah nin ka Datan mai Abiram mai kwad song nong yu pui Isarelax hawt khaix nawh. ²⁶ Mose krai ah nin ka pui hun, "Lih hu khaing nyiex gox pui pa caox caig inkix, paw doh hu krox hu teeh ka kraung khrai kix tix ceu kawx, ha pex kox laux leeing tau mai phimap kix." ²⁷ Mawh kheu nan kix lih hu dee singai khaing dee ot Korax, Datan mai Abiram, Datan mai Abiram hoek cung ka siviex nyiex gox kix tau mai moeng kix, kawn simex kix mai kawn nyawm iak kix. ²⁸ Mose ah nin, "Pex tak tawng ka hoik ploi Simiang Siyiex Aux yuh ceu in, ang lai mawh pa yuh aux hawt alo tix. ²⁹ Phan pui inkix yum, awm been yum kawn pui khawmuik ang ah mai phan kix yaox ti kham geu awm koe been pui khawmuik, Simiang Siyiex ang tau ti ploi aux hoek. ³⁰ "Viang mawh nan, phan Simiang Siyiex sang phan ceu pa khraox tix ceu mai tiex tak ang daux jheeh tix mai bleet ka kix tau mai can pa koe kix khawmuik mai kix tak laig ka daux meung yum khawm tokaux im tix, pex tak tawng mawh pui inkix, pa hoik map ka Simiang Siyiex." ³¹ Khaix hoik ah nawh nan, tiex greem dee ot kix hoik bih, ³² tiex ang jheeh tix mai bleet kix tau mai nyiex khawm pui Korax khawm kraung khrai cie kix khawmuik, ³³ mawh kheu nan kix mai can pui pa koe kix khawmuik laig ka daux meung yum khawm tokaux im tix, mai tiex deeh nyeep tix ka piang kix mai kix laux leeing khaing sinax cub pui hun. ³⁴ Pui Isarelax pa ot hawt vung viang kix, to tau mai yiiem tix, mai kix hoik ah nin, "Phan ang mawh nan, tiex tak sang bleet ex khawmuik!" ³⁵ ngu lih hoek khaing Simiang Siyiex mai gleeing pui pa tan nyawng bhawng khankix, ra yieh tix phwan kaux. ³⁶ Simiang Siyiex ah nin ka Mose, ³⁷ "Krai ka Eliza kawn simex Arun cao giex kaing li, sonsang deeh sut nawh pan ngu khaing dee gleeing ngu mai prung prang gaox ngu singai khaing paox ti, mawh kheu nan pan ngu an mawh pa singax. ³⁸ Pan ngu cie pui pa lud tom som ju tix, mai tawk mawh khliep plah tawng sonsang mawh dawb tawb son khu dee tan, sonsang tan an sivoe Simiang Siyiex, mawh kheu an mawh pa singax mai tak mawh mhai ruk son pui Isarelax khankix." ³⁹ Eliza cao giex kaing li teei pan ngu tawng, pa hoik gleeing ti khaing pui pa tan khankix mai kix tawk mawh khliep plah tawng sonsang tawb ka khu dee tan. ⁴⁰ Sonsang mawh krax pa doh keud, son ceu pui Isarelax khankix mai son ang pui tang kaux pa ang mawh doeh ru Arun yuh cao giex kaing li son ang pon gleeing nyawng bhawng ka plak sivoe Simiang Siyiex, ha kox lih awm Korax mai paox cub paox caw nawh, awm pa hoik krai Simiang Siyiex ka Eliza khaing pa hoik tawm ka Mose heue. ⁴¹ Ka daux pasax pui hun Isarelax khankix, ngia tieh feen ka Mose mai Arun ah nin, "Pax hoik pah ka pui Simiang Siyiex." ⁴² Yam khrawm cub pui hun khankix paox ti tieh feen ka Mose mai Arun, kix veeh ngai tix plak sivoe nyiex gox bwan man bang kum, jhak heue, Paiawm lih kheem ka piang nyiex gox bwan man mai min plakngai Simiang Siyiex lih bleeh. ⁴³ Mose mai Arun hoek sivoe nyiex gox bwan man bang kum, ⁴⁴ mai Simiang Siyiex ah nin ka Mose, ⁴⁵ "Lih hu singai khaing sinax pui hun inkix, sonsang yuh Aux kix laux leeing, daux tivud khaing." Kiex gup pakngai tix. ⁴⁶ Mose ah nin ka Arun, "Teei pan ngu cie maix mai sau ngu pa koe ka piang khu dee tan mai sau nyawng bhawng ka piang mai viex hoek ka pui hun phaiphai, sonsang yuh krax khyox khaw son kix, kheu hoik lih krax song rhawm khaing Simiang Siyiex, jhawm saux preng hoik hoek." ⁴⁷ Arun teei pan ngu awm lox pa krai Mose mai to sinax pui hun khankix, jhak heue, jhawm saux preng hoik jah tix lih sinax pui hun, nawh sau nyawng bhawng ka daux an mai yuh krax khyox khaw son pui khankix. ⁴⁸ Nawh cung sinax pui yum mai pui im mai jhawm saux preng yiien. ⁴⁹ Ang sawn pui pa yum ka grawng pa yuh Korax, can pui pa yum ka jhawm saux preng koe tix mheen pon rheng aliah yieh kaux. ⁵⁰ Yam hoik yiien jhawm saux preng, Arun deeh ing ka Mose hawt diang siviex nyiex gox bwan man bang kum heue.

¹ Simiang Siyiex ah nin ka Mose, ² "Krai ka pui Isarelax mai teei khaox grix, khaing nyiex ma keeing kix, tix cub tix gawng, teei khaox grix kao ra gawng, khaing cao kaing kix khawmuik, awm pa koe nyiex ma keeing kix, tiem ti deuh ceu kaux pui ku kaux ka piang khaox grix kix, ³ tiem ceu kaux Arun ka piang khaox grix ceu pui Lewix. Mawh kheu doeh nyiex ma keeing kix, tak caw tix koe khaox grix tix nyiex tix gawng. ⁴ Maix tak deuh an khankix, ka daux nyiex gox bwan man bang kum, sivoe teug bwan sijax mukheu ka dee pub Aux ka pex. ⁵ Khaox grix pui pa laug Aux, tak pruh tai, mawh kheu nan Aux tak kieh lox ngia khaing pui Isarelax mai lox ngia pa tieh feen kix ka maix yiien." ⁶ Mose krai ka pui Isarelax khankix, mai, cao kaing kix ku kaux tawx khaox grix tix ka nawh tix kaux tix gawng, son cao kaing ku kaux, awm koe nyiex ma keeing kix, kao ra gawng, mai khaox grix Arun koe sinax khaox grix cie kix. ⁷ Mose deuh khaox grix an khankix, ka plak sivoe Simiang Siyiex, ka daux nyiex gox bwan man teug bwan sijax mukheu. ⁸ Ka daux singaix pasax, Mose laig ka daux nyiex gox bwan man dee koe teug bwan sijax mukheu, jhak heue, khaox grix Arun, khaing nyiex ma ceu pui Lewix hoik glaoh lhax, lih tix koe tux, pruh tai mai lih ti koe plix khaox batan pa teem. ⁹ Mose viex khaox grix khankix lih khaing plak sivoe Simiang Siyiex ka pui Isarelax khawmuik, mai kix jhak ti yaox mai pui ku kaux tang deeh teei khaox grix cie tix. ¹⁰ Simiang Siyiex ah nin ka Mose, "Deeh viex khaox grix Arun, deeh deuh ka plak sivoe teug bwan sijax mukheu, sonsang priex mawh mhai ruk son pui pa tieh feen khankix, sonsang pon kieh maix krax pa ngia pa tieh feen kix ka Aux grai, son ang kix yum." ¹¹ Awm pa hoik tawm Simiang Siyiex ka nawh, nawh yuh awm an, ¹² pui Isarelax khankix ah nin ka Mose, "Jhak heue, yix hoik laux leeing. Yix hoik grai grup. Yix hoik grai grup heue. ¹³ Can pui pa hoek dex nyiex gox bwan man Simiang Siyiex ku kaux tak yum, mawh tak sang yaox yix ti yum khawmuik lie?"

¹ Simiang Siyiex ah nin ka Arun, "Maix mai kawn simex maix khawm nyiex ma keeing maix pa ot tau mai maix, tak yaox ti klawm phimap pa dex dee pa singax singeh, maix mai kawn simex pa ot tau mai maix khankix, tak yaox ti klawm phimap grawng pa yuh cao giex kaing li. ² Viex puxaik maix khanix, pa mawh doeh ru pui Lewix mai doeh ru keeing maix hoek ka maix, sonsang kleuk kix tix tau mai maix mai yuh kaing jhaw tau mai maix, yam ot maix mai kawn simex maix khankix sivoe nyiex gox bwan man teug sijax mukheu. ³ Kix tak yuh can ceu pa lo maix mai can ceu pa lo son nyiex gox bwan man khankix. Kix tak ang pon ti hoek dex kraung khrai dee singax singeh ka khu dee tan, phan ang mawh nan kix mai maix tak yum. ⁴ Kix tak kleuk tix tau mai maix mai yuh kaing jhaw nyiex gox bwan man bang kum, son kaing jhaw nyiex gox bwan man khawmuik mai pui tang kaux tak ang pon ti hoek dex pex. ⁵ Maix tak yaox ti teei beeh glawm priex dee pa singax mai beeh glawm khu dee tan, son ang pa song rhawm lai sang baox lih ka piang pui Isarelax. ⁶ Jhak heue, tokaux cao Aux hoik teei puxaik maix khankix, ceu pui Lewix khaing daux sinax pui Isarelax, kix mawh totaix pa hoik tawx Simiang Siyiex ka maix, sonsang yuh kix kaing jhaw nyiex gox bwan man bang kum. ⁷ Maix mai kawn simex maix khankix, tak yuh kaing jhaw beeh glawm cao giex kaing li pa dex mai khu dee tan khawmuik mai pa koe plak daux man tie, maix tak yuh kaing jhaw an. Aux tawx totaix ara cao giex kaing li ka maix mai pui tang kaux pa hoek dex tak pah yum heue. ⁸ Siyiex ah nin ka Arun, "Jhak heue, khaing daux can pa hoik tan pui Isarelax ka aux pa hoik kieh singax khawmuik aux tak ap ka daux taix maix son sang mawh son maix mai kawn simex maix Aux tom tawx ka lox pinyap leeing ju heue. ⁹ In tak mawh cie maix ka daux pa kied singax singeh khaing pa ang nyang gleeing ka ngu, krax tan kix kuceu pa mawh krax tan phawng nghox ca im mai krax tan pa pluat ploi phimap, krax tan pa lud ka Siyiex, pa mawh krax tan kix ka Aux, tak mawh pa kied singax son maix mai ka kawn simex maix khankix. ¹⁰ Maix tak ih an khankix ka dee pa kied singax singeh, simex ku kaux tak ih ka an, an tak mawh pa singax ka son pex. ¹¹ In baox mawh cie maix. Krax tan pa yaog khaing daux totaix kix, tau mai krax tan pa yang yeuh cie kawn praix Isarelax khankix, Aux tak tawx an khankix, son maix khawm son kawn simex kawn bun maix, pa koe tau mai maix, awm beenli pingnyap leeing ju, pui pa singax singeh ku kaux khaing daux nyiex ma maix, tak pon ti ih. ¹² Khaing daux bee pa mhawm khawmuik mai khaing daux rawm plix siiet pa mhawm khawmuik mai khaing nghox ca khankix mai plix khaox pa liang ti pon pa tawx kix ka Simiang Siyiex, Aux hoik tawx ka maix. ¹³ Plix khaox pa liang ti teem khaing daux haktiex kix khawmuik, pa viex kix hoek ka Simiang Siyiex, tak mawh cie maix, pui pa singax singeh khaing daux nyiex ma maix ku kaux, tak pon ti ih. ¹⁴ Can ceu pa hoik tiextu kix tix tan, ka daux ceu pui Isarelax khankix, tak mawh cie maix. ¹⁵ Can ceu pa liang ti keh khaing daux khawmuik pui ang ah, to brie ang ah, pa tan kix ka Simiang Siyiex, tak mawh cie maix, viang mawh nan, kawn Ai plix num pa keh khaing pui maix tak deeh taoh ka mai to brie pa liang ti keh pa ang singax khankix kawx maix tak deeh taoh ka. ¹⁶ Yam hoik naog ju kix tix khix maix caw ti deeh taoh ka kix, awm pa hoik tat maix jum ka mau shekhe phwan plah, pa koe dee pa singax, pa sidu ngai jiang ka mau tix shekhe mawh tixnga Kerax. ¹⁷ Viang mawh nan kawn mawie pa liang ti keh ang ah, yung pa liang tix keh ang ah, kawn pex pa liang ti keh ang ah maix tak ang pon ti deeh taoh, an khankix mawh pa singax. Maix tak phruah nham kix ka piang khu dee tan mai gleeing khlawp bee khankix son krax tan pa gleeing ka ngu pa sioe bhawng pa khaw rhawm Simiang Siyiex, ¹⁸ nex nawh khankix tak mawh cie maix, nex eek pa yang yeuh mai ba dawm tak mawh cie maix. ¹⁹ Krax tan pa singax singeh pa viex pui Isarelax ka Simiang Siyiex khawmuik, Aux hoik tawx ka maix, ka kawn simex, kawn bun pa ot tau mai maix, awm beenli pingnyap leeing ju. An mawh sijax mukheu pa hoik tiag ti awm kih, ka plak sivoe Simiang Siyiex mai ka son maix mai son doeh ru maix leeing ju. ²⁰ Simiang Siyiex ah nin ka Arun, "Maix tak ang pon ti koe sinngao ka daux haktiex kix maix tak ang pon ti koe nyum khaing sinax kix. Aux mawh son plak cie maix mai sinngao cie maix khaing sinax pui Isarelax heue. ²¹ "Aux hoik tawx sinngao cie pui Isarelax kao son tix son ka ceu pui Lewix, sonsang pon yuh kix kaing jhaw, ka daux nyiex gox bwan man bang kum. ²² Jah yam in pui Isarelax khankix, tak ang pon ti hoek dex nyiex gox bwan man bang kum, phan ang mawh nan tak yaox ti kham ka phimap tix mai yum ka heue. ²³ Viang mawh nan ceu pui Lewix khankix, tak yuh kaing jhaw nyiex gox bwan man bang kum mai kix tak yaox ti kham ka phimap cao tix. An tak mawh lox pingnyap leeing ju, tom sidah hoek doeh ru pex, kix tak ang yaox ti pon sinngao ka daux sinax pui Isarelax. ²⁴ Mawh kheu krax tan pui Isarelax kao son tix son, pa viex kix ti tan ka Simiang Siyiex, Aux hoik tawx ka ceu pui Lewix son sang mawh sinngao kix, kix tak ang pon ti koe sinngao ka sinax pui Isarelax heue. ²⁵ Simiang Siyiex krai ah nin ka Mose, ²⁶ "Krai ah nin ka ceu pui Lewix, yam teei maix krax tan kao son tix son khaing pui Isarelax mai pa hoik tawx Aux mawh sinngao pa sang pon maix khaix kix, khaing ka daux an kao son tix son maix tak tan ka Simiang Siyiex. ²⁷ Krax tan pa tan maix, maix tak caw ti deuh mawh awm krax tan simie nghox ca pa kaoh khaing daux glah mai rawm plix siiet pa hoik pon ti khaing dee biiet rawm plix siiet. ²⁸ Awm an maix tak tan kao son tix son khaing daux pa koe tix ka Siyiex, khaing kao son pa pon maix ka pui Isarelax, khaing daux an maix tak tan ka Simiang Siyiex ka Arun cao giex kaing li. ²⁹ Khaing daux krax tan pa pon pex khankix, laug nyum pa nie mhawm mai pa singax khaing ka daux kuceu mai tan ka Simiang Siyiex. ³⁰ Mawh kheu nan maix ah nin ka pui Lewix, yam laug pex tix tan pa kied mhawm khaing daux an, pa kawn deuk khankix tak simin tix tawx ka ceu pui Lewix, awm pa pon ti khaing glah nghox mai awm rawm plix siiet pa pon ti khaing dee biiet rawm plix siiet, ³¹ Maix mai kawn nyiex ma maix khawmuik tak pon ti ih an, kudah, mawh kheu an mawh totaix pa tawx Aux son kaing jhaw pa yuh maix daux nyiex gox bwan man bang kum. ³² Khaix hoik tan maix ceu pa kied mhawm khaing daux an maix tak ang yaox ti kham geu phimap mai maix tak ang pon ti kieh krax tan pa singax singeh khaing pui Isarelax seeing brai, phan ang mawh nan maix tak yum heue."

¹ Simiang Siyiex ah nin ka Mose mai Arun, ² "In mawh been lox jhawm prawng pa tawm Simiang Siyiex mai krai ka pui Isarelax khankix, sonsang viex kix kawn mawie shiang raoh pa loig tix mu, pa ang preeh mai pa ang sax sau iak ka piang. ³ Maix tak tawx an ka Eliza cao giex kaing li, sonsang teei an lih ka plak praix nyiex gox bang mai pah mawie an sivoe nawh, ⁴ Eliza cao giex kaing li, tak teei nham tiblah ka gien taix ti mai phruah nham an aliah bawg sivoe nyiex gox bwan man bang kum. ⁵ Tak gleeing kawn mawie shiang an ka plak sivoe ngai cao giex kaing li mai gleeing hak, nex, nham tau mai roing khawmuik. ⁶ Cao giex kaing li teei khaox Akashax mai rao imkrim, man raoh rawt mai taing an khankix ka daux sigreung ngu pa gleeing ka mawie shiang an. ⁷ Khaix an cao giex kaing li tak sidaux kraung mai heem tokaux ti ka daux rawm, khaix an nawh tak laig ka daux nyiex gox bang mai cao giex kaing li tak mawh pa ang singax tom hoek plakbo. ⁸ Kaw pa gleeing ka an, tak sidaux kraung mai heem tokaux tix, ka daux rawm mai nawh tak mawh pa ang singax tom hoek plakbo. ⁹ Kieh pui pa singax kaux khrawm ka nyaox kawn mawie shiang an khankix mai priex an ka plak praix nyiex bang ka dee pa singax, mai kix tak priex an son pui hun Isarelax, sonsang shiao rawm an kieh kix singax khaing phimap. ¹⁰ Pui pa khrawm nyaox kawn mawie shiang an, tak sidaux kraung tix mai nawh tak mawh pa ang singax tom hoek plakbo, an tak mawh gumlox beenli leeing ju son pui Isarelax mai son nyo sinie pa hoek peung ka daux sinax kix. ¹¹ Kaw pa hu teeh ka tokaux pui yum tix kaux kaux, tak mawh pa ang singax aliah singaix, ¹² Yam hoek daux loe ngaix tix ngaix mai daux aliah ngaix tix ngaix nawh tak kieh tokaux tix singax ka rawm an, phan nawh ang kieh tokaux tix singax yam hoek daux loe singaix mai daux aliah singaix tix ngaix nawh tak mawh pa ang singax. ¹³ Pui hu teeh ka tokaux pui yum tix kaux kaux mai ang kieh tokaux ti singax, nawh mawh pa kieh nyiex gox bwan man Simiang Siyiex seeing brai mai tak teei ti tik kaw an khaing pui Isarelax, mawh kheu ang phruah rawm pa kieh singax ka tokaux tix, pa ang singax kawn koe ka piang nawh. ¹⁴ "In mawh been lox tat jhawm prawng yam yum pui ka daux nyiex bang. Can pui pa laig ka daux nyiex bang ku kaux mai can pui pa ot ka daux nyiex bang ku kaux tak mawh pa ang singax ka daux aliah singaix, ¹⁵ mai aw pa ang tawb ti deuh ku mu, tak mawh pa ang singax. ¹⁶ Can pui pa ot plak praix daux kaung khankix, pa hu teeh ka pui pa yum ka vaig ang ah, yum ka jhawm saux ang ah, si-ang pui yum ang ah, simeeig ang ah, tak ang singax aliah singaix. ¹⁷ Son kaw pa ang singax an, kix tak teei nyaox kawn mawie shiang pa hoik gleeing tiblah sonsang kieh phimap kix singax, sau tau mai rawm klawng pa lih hu ka piang an ka daux aw, ¹⁸ Pui pa singax tak teei rao imkrim mai cub ka daux rawm, phruah nawh ka piang nyiex gox bang mai ka piang kraung khrai mai ka piang pui pa ot baoh tan mai ka piang pui pa hu teeh ka si-ang pui yum mai pa yum ka pah pui mai pa yum ka jhawm saux mai ka piang pui pa teeh ka simeeig, ¹⁹ Pui pa singax tak phruah ka piang pui pa ang singax daux loe singaix mai daux aliah singaix, yam hoek daux singaix aliah, nawh yuh tokaux tix singax, tak sidaux kraung tix mai heem tix ka rawm, yam hoek plakbo, nawh tak mawh pa singax. ²⁰ "Pui pa ang singax phan ang nyang yuh tokaux tix singax, tak teei ti tik kaw an khaing sinax pui hun, mawh kheu hoik yuh nawh dee pa singax Simiang Siyiex seeing brai, jao ang nawh phruah rawm pa kieh singax ka piang tokaux tix, nawh ang singax. ²¹ An tak mawh pingnyap son kix leeing ju. Pui pa phruah rawm singax kawx, tak yaox ti sidaux kraung tix, mai pui pa hu teeh ka rawm singax an, tak mawh pa ang singax tom hoek plakbo. ²² Can ceu pa hu teeh pui pa ang singax an tak mawh pa ang singax, mai pui pa hu teeh ka ceu an, tak mawh pa ang singax tom hoek plakbo heue."

¹ Cub pui hun Isarelax khankix, hoek ka daux tiag Zin khix tix mai pui khankix ot baoh Kadeshax, Meriam yum tan mai kix sipaung nawh tan heue. ² Mawh kheu rawm nyaux son pui hun khankix ang koe, mai kix khrawm paox tix, tieh feen ka Mose mai Arun. ³ Pui khankix deuh phimap ka Mose ah nin, "Yix Khaw ti hoik yum, yam yum pux aik yix khankix ka plak sivoe Simiang Siyiex! ⁴ Maix lai viex cub pui hun Simiang Siyiex hoek ka daux tiag tin, sonsang yum yix tau mai to brie tix tin yuh ka mawx? ⁵ hoik kieh yix lih khaing meung Ejiptux, sonsang viex yix hoek ka dee pa caox caig in yuh ka mawx? Ka dee in mawh dee ang pon sum simie khaox plix ruh, nhu plix siiet mai plix kla jiang khankix, mai rawm nyaux kawx ang koe." ⁶ Mose mai Arun lih khaing dee ot pui hun mai hu ka diang siviex nyiex gox bwan man bang kum mai kiex gup pakngai tix tan. Min plakngai Simiang Siyiex lih bleeh ka kiex heue. ⁷ Simiang Siyiex ah nin ka Mose, ⁸ "Teei khaox grix, kok puxke maix Arun mai khrawm pui hun, tawx lox ka rang plak sivoe ngai kix, kieh nawh tawx rawm, awm an maix tak kieh rawm lih son kix khaing daux rang, mai tawx rawm nyaux ka cub pui hun mai to brie kix." ⁹ Mose teei khaox grix khaing plak sivoe Simiang Siyiex, awm pa hoik tawm Nawh Cao. ¹⁰ Mose mai Arun khrawm pui hun tau ka plak sivoe rang ah nin ka kix, "Pex pa tieh feen nghiet yam in, mawh sang kieh ex rawm lih son pex khaing daux rang in lie?" ¹¹ Mose yaog taix tix mai lah rang ka khaox grix tix ra bawg, khaix an rawm lih tom nie, cub pui hun mai to brie cie kix yaox ti nyaux ka. ¹² Simiang Siyiex ah nin ka Mose mai Arun, "Mawh kheu ang pax yum rhawm ka Aux mai ang yungyi ka Aux, ka plak sivoe ngai pui Isarelax, pax tak ang pon viex pui hun inkix laig ka daux haktiex pa hoik tawx Aux ka kix." ¹³ In mawh rawm Meribax, grawh grawng nawh, viang pui Isarelax yuh simah simiang mai Simiang Siyiex kawx, Nawh kawn jhi pa singax tix daux sinax kix heue. ¹⁴ Yam in Mose ploi pui cau tix khaing Kadeshax mai hu ka simiang Edom, pux maix Isarelax ah nin, "Maix tawng ka krax kha rhawm pa hoek ka piang yix khawmuik, " ¹⁵ keeing yix khankix hoik hu ka Ejiptux, yix ot daux meung Ejiptux, tom rheung, mai pui Ejiptux khankix, hoik tuktiak ka yix mai ka keeing yix khankix, ¹⁶ yam riag yo yix ka Simiang Siyiex, Nawh Cao hoik mhong lox yix mai Nawh ploi kawncau Siyiex mai viex yix lih khaing haktiex Ejiptux, yix ot tin ka daux Kadeshax, pa mawh veng pa koe ka sinax mee haktiex maix. ¹⁷ "Yuh bwan son kieh yix tiang ka daux haktiex maix. Yix tak ang tiang ka daux kaung daux sipeem plix siiet mai yix tak ang nyaux rawm khaing rawm daux pex, yix tak sang lawng hu krax ting cie simiang, yix tak ang veh plak dawm, plak gwiex, tom sidah tiang yix ka daux haktiex pa kwang maix." ¹⁸ Khaix an simiang Edom ah nin ka nawh, "Pex tak ang pon tiang haktiex aux, phan pex yuh nan, aux tak lih tiebtie pex ka vaig." ¹⁹ Pui Isarelax ah nin ka nawh, "Yix tak hoek krax ting, phan yix mai to brie yix nyaux ka rawm pex, yix tak tawx ngawh son an, kieh ngie yix tiang ti hu ka caong tix nong nong, yix tak ang yuh tidtix ka tang ceu." ²⁰ Nawh ah nin, "Pex tak ang pon ti tiang." Pui Edom hoek ti puing kix tom nie tau mai riang rao kru naing pa ting. ²¹ Pui Edom thiang pui Isarelax ka mee haktiex tix, mawh kheu nan pui Isarelax veeh ti hu singai khaing nawh heue. ²² Cub pui hun Isarelax khawmuik, lih hu khaing Kadeshax mai hoek ka gawng Hawrax. ²³ Simiang Siyiex krai ah nin ka Mose mai Arun ka piang gawng Hawrax hawt mee haktiex Edom. ²⁴ "Arun tak hu ka dee khrawm pui ceu nawh khankix paox ti, mawh kheu nawh tak ang pon ti laig ka daux haktiex pa tawx Aux ka pui Isarelax, kheu hoik tieh feen kiex ka gumlox Aux hawt rawm Meribax. ²⁵ Kok Arun mai kawn simex nawh Eliza, viex kiex haok ka piang gawng Hawrax, ²⁶ mai peeik kraung ceep Arun mai ceep an ka piang kawn simex nawh Eliza, Arun yum mai hu ka dee khrawm paox ru nawh khankix heue." ²⁷ Mose yuh ceu an awm lox pa tawm Simiang Siyiex, mai kix haok ka piang gawng Hawrax, ka plak sivoe ngai cub pui hun. ²⁸ Mose peeik kraung ceep Arun mai ceep ka piang kawn simex nawh Eliza, Arun yum ka piang choek gawng tan Khaix an Mose mai Eliza deeh lih khaing piang gawng. ²⁹ Yam yaox pui hun khankix hoik yum Arun, nyiex ma ceu pui Isarelax khawmuik, yiem doe son Arun tixngoe ngaix heue.

¹ Yam mhong simiang Arat ceu pui Khanan pa ot ka Nekep ka hoek ceu pui Isarelax khankix, ka krax Etarim, nawh puing ka pui Isarelax khankix mai giex kix tiblah mawh pui giex pui laung. ² Pui Isarelax khankix yuh sijax ka Simiang Siyiex ah nin, "Phan Maix Cao ap kix daux tawm taix yix, yix tak yuh veng kix laux lak pak leeing." ³ Simiang Siyiex nghiet ka lox pui Isarelax mai ap pui Khanan ka kix mai yuh kix mai veng laux lak pak leeing, mawh kheu nan tom kok ceu kaux dee an mawh Hawma heue. ⁴ Kix lih krax khaing gawng Hawrax mai hu ka plak rawm sigrit sigra raoh, sonsang via ka rawb rim haktiex Edom, mai kix kied laux rhawm kheu nu krax. ⁵ Pui khankix ah lox tieh feen ka Siyiex mai Mose, "Kheu maix lai viex yix lih hu khaing meung Ejiptux sonsang yum ka daux tiag lie? Mawh kheu pa ih mai rawm kawx ang koe, yix hoik seeing ka blah pa ang koe jhawm jheet in." ⁶ Mawh kheu nan Simiang Siyiex ploi siuing ngu, ka sinax pui khankix mai siuing tut ka pui khankix mai pui Isarelax yum tom nie. ⁷ Pui khankix hoek ka Mose ah nin, "Yix hoik yuh phimap kheu hoik ah yix lox tieh feen ka Simiang Siyiex mai maix, yuh bwanson rawg bwan ka Simiang Siyiex, sonsang teei Nawh Cao ti tik siuing ngu hu singai khaing yix liak." Mawh kheu nan Mose rawg bwan son pui khankix. ⁸ Simiang Siyiex ah nin ka Mose, "Yuh riang siuing ngu tix mu mai deuh ka piang khaox tix gawng, yam pui pa hoik tut siuing maong ti jhak ka an nawh tak deeh im." ⁹ Mawh kheu nan Mose yuh riang siuing tawng tix mu mai deuh ka piang khaox tix gawng, phan siuing tut ka pui tix kaux kaux, yam maong nawh ti jhak ka riang siuing tawng an nawh tak im heue. ¹⁰ Yam in pui Isarelax khankix, gah tix mai hu bang ka Awbok. ¹¹ Kix gah tix khaing Awbok mai bang ka hawt Iyeabarim, ka daux tiag pa koe see Mawbax ka plak lih singaix. ¹² Kix deeh gah tix khaing tan mai bang daux ngawd Zariet. ¹³ Kix deeh gah ti hu khaing tan mai bang praok rawm klawng Anon ka praok plak an, pa koe daux tiag pa kleuk ti daux khaing mee haktiex Amawrix, mawh kheu rawm klawng Anon mawh mee haktiex Mawbax mai haktiex Amawrix. ¹⁴ Awm pa hoik tiem ti deuh ka daux phuk lai naing Simiang Siyiex pa mawh baoh Wahiet awm Suphax, khawm rawm klawng Anon khankix, ¹⁵ mai lih ka baoh plak seh tom hoek ka haktiex Arax mai mawh pa koe ka piang mee haktiex Mawbax." ¹⁶ Kix lih khaing tan mai hu ka Berax pa mawh rawm daux dee hoik ah Simiang Siyiex nin ka Mose, "Khrawm pui khankix tau mai Aux tak tawx rawm ka kix." ¹⁷ Pui Isarelax khankix ah lai rhax, "Rawm daux eue, kieh rawm maix lih liak! mai rhax lai sonsang lih rawm. ¹⁸ "Rawm daux pa kaong cao kaing cao kap mai pa kaong cao thong cao bung khankix mai pa hoik kaong cao prawng see, ka khaox grix tix." Kix lih khaing daux tiag mai hu ka plak Matanax, ¹⁹ lih khaing Matanax hu ka plak Nahalelax mai lih khaing Nahalelax hu ka Bamot, ²⁰ lih khaing Bamot hu ka ngawd mee haktiex Mawbax mai haok ka choek gawng Pisaga, simi ti jhak haktiex Yeshimon heue. ²¹ Pui Isarelax ploi kawncau tix khankix hu ka Sihon simiang Amawrix ah nin, ²² "Kieh yix tiang ka haktiex cie maix, yix tak ang laig ka daux kaung, daux sipeem plix siiet pex, yix tak ang nyaux rawm daux pa koe haktiex pex, yix tak lawng hu ka daux krax ting cie simiang tom sidah tiang yix ka daux haktiex pa kwang maix." ²³ Simiang Sihon ang tawx akhwang tiang pui Isarelax ka mee haktiex tix, nawh khrawm pui tix tau khawmuik mai lih sonsang puing ka pui Isarelax ka daux tiag mai hoek ka veng Zahat mai puing ka pui Isarelax. ²⁴ Pui Isarelax pah simiang yum ka lawm vaig mai rhim ti teei haktiex cie nawh, jah khaing rawm klawng Anon tom hoek ka rawm klawng Yabok tom singai khaing ceu pui Amon, mawh kheu mee haktiex ceu pui Amon, hoik mawh pa kaux pa cong. ²⁵ Pui Isarelax khankix rhim ka veng in khawmuik mai pui Isarelax khankix laig ot ka daux veng pui Amawrix khankix mai ka daux veng Heshabon mai ka daux yaong kix khawmuik. ²⁶ Mawh kheu veng Heshabon, mawh veng ting simiang Sihon ceu pui Amawrix, mawh pui pa puing ka simiang haktiex Mawbax mai rhim haktiex khaing daux taix nawh, tom singai hoek ka rawm klawng Anon. ²⁷ Mawh kheu nan can pui pa ah lox leng khankix ah nin, "Hoek ka veng Heshabon, kieh deeh sum ka an, deeh pang ka veng simiang Sihon. ²⁸ "Ngu lih khaing veng Heshabon, rao ngu khaing veng Sihon gleeing veng Arax mai pa koe daux haktiex Mawbax mai simiang pa kwang dee lhaong hawt rawm klawng Anon. ²⁹ Haktiex Mawbax eue, pex tak kha rhawm! ceu pui Khemoshax khankix eue, pex tak laux leeing! siyiex pex hoik kieh kawn simex pex to tua mai kawn bun pex khankix mawh pa giex laung ka simiang Sihon meung Amawrix. ³⁰ Baox deeh yuh doeh ru kix laux, jah ka veng Heshabon tom hoek ka veng Dibun, khaix an baox deeh yuh kix laux jah ka veng Nawpha tom hoek ka veng Medabax." ³¹ Mawh kheu nan ceu pui Isarelax khankix yaox ti ot ka daux haktiex ceu pui Amawrix khankix. ³² Mose ploi cao jiang hu ka veng Yaza, mai kix rhim nyiex yaong khankix mai grheu ceu pui Amawrix pa ot tan to heue. ³³ Kix deeh veeh ti hu krax haktiex Bashan, mai Awgax simiang meung Bashan hoek ti puing ka kix, nawh mai pui nawh khankix yuh naing ka haktiex Edarix. ³⁴ Simiang Siyiex ah nin ka Mose, "Paw lhat ka nawh, mawh kheu Aux hoik ap nawh mai pui nawh mai haktiex nawh ka daux taix maix, maix tak yuh ka nawh awm hoik yuh maix ka Sihon simiang ceu pui Amawrix pa ot haktiex Heshabon. ³⁵ Kix pah nawh khawm kawn simex nawh, tau mai pui nawh khawmuik, tom ang lai deuk tix kaux kawx mai kix rhim sinngao haktiex nawh khankix heue.

¹ Khaix an pui Isarelax deeh gah tix mai bang tix ot ka daux lung Mawbax plak lih singaix hawt praok rawm klawng Yawdan plak toi veng Yerikho. ² Baliet kawn simex Ziphaw yaox ka pa hoik yuh pui Isarelax ka ceu pui Amawrix. ³ Pui haktiex Mawbax kied lhat graung ka pui Isarelax kheu kied haoh hun kix. ⁴ Pui Mawbax ah nin ka kwad song nong yu pui Midian, "Awm mawie sawm rib pa koe rawb rim tix, cub pui hun in khankix tak yuh can ceu pa koe rawb rim ex laux leeing, "yam an Baliet kawn simex Ziphaw mawh simiang pui Mawbax. ⁵ Nawh ploi pui cau khankix hu ka Balam kawn simex Bawrax, pa ot ka veng Petaw pa koe dex rawm klawng Yufrethix haktiex Amaw mai kok nawh ah nin, "Jhak heue, pui khankix hoek khaing Ejiptux, mai kix hoik kheem ka piang haktiex mai kix hoik ot see aux. ⁶ Yuh bwanson jhax lawg ka pui in khankix son aux liak, mawh kheu kied ting riang kix khaing aux, aux bak tix pon grheu kix lih khaing daux haktiex in, mawh kheu tawng aux pui pa nawb maix bwan ka pon bwanson mai pui pa jhax lawg maix ka kawx tak pon pa jhax lawg." ⁷ Mawh kheu nan kwad song nong yu pui Mawbax mai kwad song nong yu pui Midian, viex totaix mau sonsang yuh simeed ka taix tix mai hoek ka Balam mai krai lox simiang Baliet ka nawh. ⁸ Balam ah nin ka kix, "Paung tin daux sawm in, aux tak deeh krai lox ka pex, awm pa krai Simiang Siyiex ka aux." Mawh kheu nan cub cao kaing Mawbax khankix, ot tau mai Balam. ⁹ Siyiex hoek ah nin ka Balam, "Pui in khankix pa ot tau mai maix mawh pui mawx?" ¹⁰ Balam deeh ah nin ka Siyiex, "simiang Baliet kawn simex Mawbax, ploi pui hoek ah nin ka aux, ¹¹ "Jhak heue, pui tix cub kaoh khaing meung Ejiptux mai hoik kheem ka piang haktiex, yam in hoek jhax lawg kix son aux liak, aux bak ti pon puing kix mai grheu kix." ¹² Siyiex ah nin ka Balam, "Paw lai hu mai kix. Maix tak ang pon ti jhax lawg ka pui in khankix, mawh kheu kix mawh ceu pui pa pon bwanson." ¹³ Balam kaoh ponngawb ah nin ka cao kaing cao kap cie Baliet khankix, "Deeh ing ka haktiex pex, mawh kheu Simiang Siyiex hoik thiang aux ang hu mai pex." ¹⁴ Cao kaing cao kap Mawbax khankix kaoh mai ing ah nin ka Baliet, "Balam thiang ti ang hoek mai yix." ¹⁵ Baliet baox ploi cao kaing cao kap tom nie pa nie lheu ting min plakngai khaing pa hu sivoe. ¹⁶ Kix hoek ka Balam ah nin ka nawh, "Baliet kawn simex Ziphaw ah yuh nin, paw kieh pa tiebtie tix ceu kawx koe ka maix, sonsang hoek maix ka aux, ¹⁷ Mawh kheu aux tak yaog maix ting min mai aux tak yuh can ceu pa ah maix ka aux khankix, hoek mai jhax lawg pui inkix son aux liak." ¹⁸ Balam deeh pawk lox ah nin ka pui cau simiang Baliet, "Viang simiang Baliet sang tawx mau khri tom naog ka nyiex haw tix kawx, aux tak ang pon lheu lox tawm Simiang Siyiex tix, sonsang yuh tix kaing ceu pa ting mai ceu pa iak ang ah. ¹⁹ "Mawh kheu nan pex baox ot tin daux sawm in, sonsang tawng aux ceu pa sang baox ah Simiang Siyiex ka aux. ²⁰ Siyiex hoek ka Balam ponsawm ah nin ka nawh, "Phan pui hoek kok maix kaoh hu tau mai tix, viang mawh nan maix tak yuh awm pa hoik krai Aux ka maix khaing." ²¹ Awm an Balam kaoh ponngawb mai sau an brug tix ka piang la mai lih hu tau mai cub cao kaing Mawbax heue. ²² Simiang Siyiex song rhawm kheu lih hu nawh, mai kawncau Simiang Siyiex tix kaux cung ka daux krax mai tiebtie ka nawh. Nawh brug la tix mai hu tau mai kawncau tix ra kaux. ²³ La yaox ka cung kawncau Simiang Siyiex ka daux krax tau mai vaig pa lawd ka daux taix nawh, la veeh ti hu ka praok krax mai laig daux kaung, mai Balam sivied ka la sonsang lawng daux krax. ²⁴ Kawncau Simiang Siyiex deeh cung ka dee sikhawp krax pa koe guh lhaong khawm ra plak sinax sipeem plix siiet, ²⁵ Yam yaox la ka kawncau Simiang Siyiex, nawh greed tix ka plak guh mai yeen caong Balam ka guh, mawh kheu nan Balam baox sivied ka la. ²⁶ Khaix an kawncau Simiang Siyiex hu sivoe mai cung ka dee sikhawp krax dee ang krax via lai koe ka plak dawm mai plak gwiex. ²⁷ Yam yaox la ka kawncau Simiang Siyiex, la gup ti ka greem Balam mai Balam song rhawm mai baox sivied la ka khaox grix tix. ²⁸ Khaix an Simiang Siyiex paoh jheeh la ah nin ka Balam, "Hoik yuh aux ceu ti ka maix, maix lai sivied aux tom loe bawg?" ²⁹ Balam ah nin ka la, "Mawh kheu hoik map maix ka aux. Aux simie ti koe vaig tix kre daux taix tix sonsang pah aux ka maix. ³⁰ La deeh ah nin ka Balam, "Aux mawh la pa hoik brug maix jih jang glang gleeing tom hoek in singaix ang mawh lie? Khex sax yuh aux ceu in ka maix lie?" Balam deeh ah nin, "Maix ang sax yuh." ³¹ Khaix an Simiang Siyiex paoh ka ngai Balam mai nawh yaox kawncau Simiang Siyiex pa cung daux krax, tau mai vaig pa lawd tix ka daux taix tix, Balam num kaing tix mai gup ngai tix. ³² Kawncau Simiang Siyiex ah nin ka nawh, "Kheu maix lai sivied la tix, tom loe bawg? Jhak heue, Aux hoek ti cung sonsang tiebtie tix ka maix, mawh kheu krax hu maix mawh krax pa lud ka plak sivoe Aux, ³³ Phan La ang yaox Aux mai via khaing Aux loe bawg, Aux hoik dawg pah maix yam an mai kieh la im ju." ³⁴ Balam ah nin ka kawncau Simiang Siyiex, "Aux hoik lud kheu ang aux tawng Maix Cao cung ka daux krax, sonsang tiebtie ka aux. Phan ang mawh pa khaw ka plak sivoe ngai Maix aux tak deeh ing." ³⁵ Kawncau Simiang Siyiex ah nin ka Balam, "Hu mai pui an khankix, viang mawh nan maix tak krai awm lox pa kieh Aux maix krai ngie." Mawh kheu nan Balam hu tau mai kawncau Baliet. ³⁶ Yam mhong Baliet ka hoek Balam, Baliet lih hu rieb nawh ka veng Mawbax, ka toh mee hawt rawm klawng Anon, ³⁷ Baliet ah nin ka Balam, "Aux ploi pui hu kok maix, tix bawg hoik tix bawg ang mawh lie? yuh ka mawx maix lai ang cu tix hoek ka aux ang aux mawh pa pon yaog min maix lie?" ³⁸ Balam deeh ah nin ka Baliet, "Jhak heue, Aux hoek ka maix phao! mawh koe sibrawm aux tix sang krai tix ceuceu lie? Aux sang krai ngie lox pa deuh Siyiex ka daux jheeh aux khaing." ³⁹ Khaix an Balam hu tau mai Baliet mai kix hoek ka veng Kiriyat Huzot. ⁴⁰ Baliet yuh krax tan ka mawie mhaing mai yung mai ap krax tan an ka Balam khawm cao kaing pa hoek tau mai nawh heue. ⁴¹ Ka daux singaix pasax Baliet kok ka Balam mai viex nawh haok ka dee pa singax dee koe siyiex Balax, khaing tan nawh pon simi ti jhak ka pui Isarelax pa ot dee dex heue.

¹ Balam ah nin ka Baliet, "Sum khu dee tan son aux aliah mu tin, khre ti tawx mawie mhaing aliah mu mai yung mhaing aliah mu son aux." ² Baliet yuh awm pa krai Balam, Baliet mai Balam tan mawie mhaing tix mu mai yung mhaing tix mu, ka piang khu dee tan ku mu. ³ Balam ah nin ka Baliet, "Cung dex praok krax tan pa gleeing maix mai aux tak lih hu, aux bak Simiang Siyiex sang hoek ti rieb ka aux, mai can ceu pa jhi Nawh Cao ka aux khankix, aux tak krai ka maix." Mawh kheu nan nawh kawx haok ka dee pa kied lhaong. ⁴ Siyiex rieb ti yaox Balam mai Balam ah nin ka Nawh Cao, "Aux hoik khre rien khu dee tan aliah mu mai hoik tan mawie mhaing tix mu mai yung mhaing tix mu ka piang khu dee tan ku mu." ⁵ Simiang Siyiex sau lox tix ka daux jheeh Balam ah nin, "Deeh ing ka Baliet mai maix tak krai awm in." ⁶ Balam deeh ing ka Baliet mai yaox Baliet mai cao kaing Mawbax khankix kawn cung dex praok krax tan pa gleeing ti. ⁷ Balam krai lox jhai ah nin, "Baliet simiang pui Mawbax, viex aux hoek khaing haktiex Aram mai khaing gawng plak lih singaix, hoek heue, jhax lawg ka pui Yakop son aux mai hoek heue. Ap pui Isarelax khankix hoek krax laux leeing. ⁸ "Aux tak sang jhax lawg ka pui pa ang Siyiex jhax lawg yuh ka mawx? mai aux tak sang ap pui pa ang Siyiex nyang ap hoek yuh krax laux leeing yuh ka mawx? ⁹ Mawh kheu Aux yaox nawh khaing ka piang choek gawng mai hoik simi nawh khaing ka piang ton, jhak heue ceu pui tix cub ot nong nong, ang lai neuex tix daux sinax ceu pui tang ceu! ¹⁰ Mawh pui mawx pa pon simin ka ceu pui Yakop pa nie awm phawng tiex, phan ang mawh nan, mawh pui mawx pa pon simin ka ceu pui Isarelax pa koe pon son tix son! kieh aux yum awm pui rahsee mai kieh dee sidah aux, awm dee sidah nawh. ¹¹ Baliet ah nin ka Balam, "Hoik yuh maix patix ka aux? aux kok maix, sonsang jhax lawg maix ka pui pa koeng tix mai jhak heue maix ang yuh tidtix mai hoik nawb bwanson ka piang kix, " ¹² Nawh pawk lox ah nin, "Mawh ang aux Khaw tix rien lox sikah ceu pa hoik deuh Simiang Siyiex ka daux jheeh aux lie?" ¹³ Baliet ah nin ka nawh, "Hoek tau mai aux ka tang dah, khaing dee chix yaox maix kix, maix tak yaox ngie kix ceeix ceeix mai ang yaox kix khawmuik, mai maix jhax lawg ka kix son aux dee an." ¹⁴ Nawh viex Balam hoek ka daux kaung Zophim ka piang choek gawng Pisaga mai sum khu dee tan aliah mu mai tan mawie mhaing tix mu mai yung mhaing tix mu, ka piang khu dee tan ku mu. ¹⁵ Balam ah nin ka Baliet, "Cung dex praok krax tan pa gleeing maix tin, yam kawn hu pub aux ka Simiang Siyiex plak an." ¹⁶ Simiang Siyiex pub Balam mai sau lox sikah tix ka daux jheeh nawh ah nin, "Deeh ing ka Baliet mai maix tak sikah awm in." ¹⁷ Balam deeh hoek ka nawh, yaox kawn cung nawh praok krax tan pa gleeing ti tau mai cub cao kaing Mawbax khankix mai Baliet ah nin ka nawh, "Simiang Siyiex krai lox patix?" ¹⁸ Balam krai lox jhai ah nin, "Simiang Baliet kaoh mai nghiet heue, kawn simex Ziphaw nghiet ka lox aux heue, ¹⁹ "Siyiex ang mawh kawn pui pa sang pie lhen mai ang mawh kawn pui pa sang doh keud, ang Nawh Cao yuh awm pa hoik ah ti lie? Awm koe sijax mukheu Nawh mai Nawh Cao ang yuh awm pa hoik krai tix lie? ²⁰ Jhak heue aux hoik pon rieb lox tawm son pa nawb bwanson, Nawh Cao hoik nawb bwanson mai aux ang lai pon preet ka bwanson an. ²¹ "Nawh Cao ang doh pon yaox ka krax kha rhawm ka daux ceu pui Yakop mai ang doh pon yaox ka pa caox caig, ka daux pui Isarelax khankix. Simiang Siyiex kix ot tau mai lox kok yo simiang koe sinax kix. ²² Siyiex hoik viex kix lih khaing meung Ejiptux, mai hoik kieh kix koe riang rao awm rung mawie praix. ²³ "Ang koe pui simeed sonsang yuh ka ceu pui Yakop laux, mai ang koe pui yuh sibawk sonsang yuh ceu pui Isarelax laux, yam in hoik mawh bawg yam ah pui lox ceu in ka pui Yakop mai ka pui Isarelax, Siyiex tak sang yuh ka mawx? ²⁴ Jhak heue, pui tix cub tak kaoh awm sivai sangsi shiang mai yaog ti kaoh awm sivai sangsi mhaing, nawh ang lai it lai tum tom ang nawh nyang ih kug pa pon ti mai yot ka nham totiag pa hoik pah tix." ²⁵ Baliet ah nin ka Balam, "Paw doh jhax lawg ka kix mai paw doh nawb bwan ka kix." ²⁶ Balam pawk lox Baliet ah nin, mawh ang aux hoik dawg krai lox ka maix mai aux tak sang yuh awm lox pa hoik krai Simiang Siyiex khawmuik ang mawh lie?" ²⁷ Mai Baliet ah nin ka Balam, "Hoek heue, Aux tak viex maix hu ka tang dah, Aux bak an mawh pa khaw pa caw rhawm Siyiex, sonsang jhax lawg maix kix, son aux ka dee an." ²⁸ Baliet viex Balam haok ka piang choek gawng Pegurax, pa veeh ngai tix ka tiag Yeshimon. ²⁹ Balam ah nin ka Baliet, "Sum khu dee tan son aux aliah mu mai khre mawie mhaing aliah mu mai yung mhaing aliah mu ka son aux. ³⁰ Baliet yuh awm pa hoik krai Balam mai tan mawie mhaing tix mu mai yung mhaing tix mu, ka piang khu dee tan ku mu heue.

¹ Yam yaox Balam koe rhawm Simiang Siyiex ti sang nawb bwan ka pui Isarelax khankix, nawh ang lai hu awm ku bawg, sonsang chawk tix jhai mai nawh veeh ngai tix hu ka plak daux tiag. ² Balam maong ti jhak mai yaox ka bang ceu pui Isarelax khankix, awm pa koe doeh ru kix tix ceu hoik tix ceu mai khwan singax Siyiex lih ka piang nawh, ³ mai nawh krai lox jhai tix ah nin, "Gumlox pa plak jhi khaing Balam kawn simex Bawrax, gumlox pa plak jhi khaing pui pa hoik riang ngai, ⁴ Pui pa pon mhong gumlox Siyiex khaing pui pa hoik plak jhi mai pui pa yaox riang susai khaing kaw pa ting siawp sibrawm tau mai pa goh gup tix mai ngai nawh hoik baoh. ⁵ Pui Yakop eue, nyiex gox maix khankix mawh pa mhawm grang miex ding, pui Isarelax khankix eue, dee ot maix khankix mawh pa mhawm grang miex ding! ⁶ Awm daux ngawd pa vieh tom hoek dee singai, awm sipeem pa koe hawt praok rawm klawng khankix mai awm khaox nyawng pa hoik sum Simiang Siyiex khankix. Awm khaox Arit pa kuah hawt praok rawm khankix. ⁷ Rawm tak lih khaing daux pung rawm nawh khankix mai simie nawh tak koe ka daux dee nie rawm khankix mai simiang nawh tak ting lhaong khaing Agat mai meung haktiex nawh tak mawh pa blon ao min. ⁸ Siyiex viex nawh lih khaing meung Ejiptux, nawh hoik koe riang rao awm mawie praix, nawh tak kiied ti ih ceu pui khankix, pa mawh pui koeng nawh khankix, nawh tak raig ti tik si-ang kix graig siag mawx siag an mai te ak nawh tak phlat ka kix. ⁹ Nawh tum mai nyat tix awm sivai sangsi mhaing mai awm sivai sangsi shiang, pui mawx pa sang pon so nawh kaoh lie? pui pa nawb bwan ka maix tak pon bwanson mai pui pa jhax lawg ka maix tak pon krax pa jhax lawg." ¹⁰ Baliet song rhawm ka Balam mai dieh taix ti, simiang Baliet ah nin ka Balam, aux kok maix sonsang jhax lawg ka pui pa koeng tix, jhak heue maix hoik nawb bwan ka piang kix tom loe bawg. ¹¹ "Mawh kheu nan yam in nied to ing ka dee ot maix, aux hoik ah ti sang tawx min ka maix, viang mawh nan Simiang Siyiex hoik kieh maix veeh ti khaing pa tawx min plakngai." ¹² Balam deeh ah nin ka simiang Baliet, "Aux hoik krai ka pui cau maix khankix pa ploi maix hoek ka aux, ¹³ Viang simiang Baliet sang tawx mau khri tom naog ka nyiex haw tix kawx aux tak ang pon lheu lox tawm Simiang Siyiex tix, sonsang yuh aux kaing ceu pa mhawm ang ah, ceu pa caox ang ah, son alo tokaux tix, aux tak krai ngie lox pa hoik krai Simiang Siyiex ka aux khaing ang mawh lie? ¹⁴ Aux tak sang deeh hu ka ceu pui tix khankix, hoek heue, Aux tak sang kieh maix tawng pa sang yuh pui in khankix ka piang ceu pui maix khankix daux singaix khaix heue." ¹⁵ Nawh krai lox jhai tix ah nin, "Gumlox pa plak jhi khaing Balam kawn simex Bawrax mai gumlox pa plak jhi khaing pui pa hoik riang ngai, ¹⁶ Pui pa pon mhong gumlox Siyiex khaing pui pa hoik plak jhi mai tawng ka pingnya khaing kaw pa ting lhaong mai pui pa yaox riang susai khaing kaw pa ting siawp sibrawm tau mai pa goh gup tix mai ngai hoik baoh." ¹⁷ Aux yaox ka Nawh Cao, viang mawh nan ang nyang mawh yam in, aux simi ka Nawh Cao, viang mawh nan ang nyang mawh pa dex, simuing tak lih khaing daux ceu pui Yakop, pliah Simiang tix giang tak lih kaoh khaing ceu pui Isarelax, mai tak tawk ka dongre ceu pui Mawbax mai yuh kawn simex Shetax laux lak pak leeing. ¹⁸ Nawh tak rhim ka haktiex Edom mai gawng Sirax kawx tak mawh cie pui koeng nawh khankix, viang mawh nan ceu pui Isarelax khankix tak koe rhawm vao rhawm kwa. ¹⁹ Pui pa kwang tix kaux tak lih hoek khaing ceu pui Yakop mai yuh veng pa kawn deuk khankix laux leeing!" ²⁰ Nawh jhak ka piang haktiex Amaliet mai nawh krai lox jhai ah nin, "Viang ceu pui Amaliet mawh pa kied cheung sinax ceu pui khankix kawx, dee sidah nawh tak mawh pa grai grup." ²¹ Nawh jhak ka piang ceu pui Kenix mai nawh krai lox jhai ah nin, "Dee ot maix mawh pa kaux pa cong mai tak deuh mheem maix daux rang, ²² Viang mawh nan ceu pui Kenix tak laux leeing, tom hoek bawg yam viex Simiang Ashux pex hu mawh pui pa giex laung rheung miex ding lie?" ²³ Nawh krai lox jhai ah nin, "A lo! pui mawx pa sang im ju, yam yuh Siyiex inkix lie?" ²⁴ Reu sang phaw khankix tak hoek khaing haktiex Kitim mai yuh ka meung Ashux mai meung Heba, mai pui Amaliet khankix kawx tak laux leeing tau." ²⁵ Khaix an Balam kaoh mai ing ka dee ot tix, mai Simiang Baliet kawx deeh hu krax hu tix heue.

¹ Yam ot pui Isarelax khankix ka daux Shittim mai pui khankix jah ti koe pa lud pa vao tau mai kawn bun ceu pui Mawbax. ² Bun khankix kok pui hoek ka dee yuh kix krax tan ka siyiex tix, pui khankix ih ka pa tan kix mai krub ka siyiex kix. ³ Pui Isarelax khankix rom ti tau mai siyiex Balax Pegurax mai Simiang Siyiex song rhawm ka pui Isarelax khankix, ⁴ Simiang Siyiex ah nin ka Mose, "Viex cao kaing cao kap khaing pui hun mai teuk teue ka kix pui pa lud ka daux koek sivoe ngai Simiang Siyiex sonsang veeh Simiang Siyiex ka pa song rhawm tix singai khaing ceu pui Isarelax." ⁵ Mose ah nin ka cao prawng see pui Isarelax khankix. "Pex ku kaux pah ka pui khankix pa rom tix tau mai Balax Pegurax." ⁶ Jhak heue, pui Isarelax tix kaux viex bun pui Midian hoek ka puxaik ti, ka sivoe ngai Mose mai ka sivoe ngai cub pui hun kawn praix Isarelax, yam yiiem grai kix ka diang siviex nyiex gox bwan man bang kum. ⁷ Yam yaox Phenihat kawn simex Eliza pa mawh kawn simex Arun cao giex kaing li ka an, nawh yaog ti kaoh khaing sinax cub pui hun mai giex pliah tix giang ka daux taix tix, ⁸ hu ka pui Isarelax ka daux lawg mai suat ka pui Isarelax mai bun an, tom phlat ka kiex khawm ra, mawh kheu nan jhawm saux preng hoik grai khaing pui Isarelax khankix. ⁹ Pui yum ka jhawm saux preng an koe ra mheen pon rheng kaux heue. ¹⁰ Simiang Siyiex ah nin ka Mose, ¹¹ "Phenihat kawn simex Eliza pa mawh kawn simex Arun cao giex kaing li, hoik kieh krax pa song rhawm Aux veeh ti khaing pui Isarelax khankix, mawh kheu kied koe rhawm koe rhi nawh, tau mai krax pa kied koe rhawm rhi Aux daux sinax kix, sonsang ang Aux yuh pui Isarelax hoek daux pa laux leeing, ka daux krax pa kied koe rhawm rhi Aux. ¹² Mawh kheu nan maix ah nin, "Jhak heue, aux tawx gumlox sijax mukheu pa nhim ka nawh, ¹³ gumlox sijax mukheu in tak mawh son nawh mai son doeh ru pa koe khaix nawh, pa mawh gumlox sijax mukheu pa dex dawd mai cao giex kaing li, mawh kheu nawh kied koe rhawm ka son Siyiex mai nawh hoik yuh krax khyox khaw son pui Isarelax khankix." ¹⁴ Ceu kaux pui Isarelax pa hoik pah kix tau mai bun pui Midian, mawh Zimarix kawn simex Salux pa mawh cao kaing daux nyiex ma keeing kix, pa ao min sinax ceu pui Simion khankix. ¹⁵ Ceu kaux bun Midian pa hoik pah kix, mawh Khawzabix kawn bun Zurax, pa mawh cao kaing pui pa ao min khaing daux nyiex ma keeing kix pui Midian heue. ¹⁶ Simiang Siyiex ah nin ka Mose, ¹⁷ "Yuh cuyi ka ceu pui Midian khankix mai pah ka kix, " ¹⁸ Mawh kheu kix hoik yuh cuyi tau mai pa pie lhen ka pex, sonsang yuh kix pex laux leeing, ka grawng pa dex dawd mai siyiex Pegurax mai ka grawng bun Khawzabix kawn bun cao giex kaing ceu pui Midian, pa mawh nan kix, pa hoik pah ka daux singaix lih saux preng jao siyiex Pegurax heue."

¹ Khaix hoik luan jhawm saux preng, Simiang Siyiex ah nin ka Mose mai Eliza kawn simex Arun cao giex kaing li, ² "Teei carang cub pui hun Isarelax khankix, jah ka pui koe ju tixnga num haok plak piang, awm pa koe doeh nyiex ma keeing kix, pa pon hu daux naing, ka daux pui Isarelax khawmuik." ³ Mose mai Eliza cao giex kaing li, krai lox ah nin ka kix daux lung Mawbax hawt rawm klawng Yawdan, pa koe toi veng Yerikho, ⁴ "Teei carang pui khankix, jah ka pui pa koe ju tixnga num haok plak piang, awm pa hoik tawm Simiang Siyiex ka Mose mai pui Isarelax pa hoik lih khaing meung Ejiptux ⁵ Rubin mawh kawn Ai ka ceu pui Isarelax, mai kawn praix Rubin khankix mawh Hanok, pa lih mawh doeh nyiex ma ceu pui Hanawkhix, Phalux pa lih mawh doeh nyiex ma ceu pui Paluwix khankix, ⁶ Hezaron pa lih mawh doeh nyiex ma ceu pui Hezarawnix, mai Khamit pa lih mawh doeh nyiex ma ceu pui Khamaik. ⁷ In mawh doeh nyiex ma ceu pui Rubin, pa laig carang koe pon mheen loe rheng aliah yieh tixngoe kaux. ⁸ Kawn simex Phalux mawh Eliabax. ⁹ Kawn simex Eliabax mawh Nemoelax, Datan mai Abiram. Inkix mawh Datan mai Abiram pa hoik laug kix daux pui hun, pa tieh feen ka Mose mai Arun pa rom paox ti mai cub Korax yam tieh feen kix ka Simiang Siyiex, ¹⁰ mai haktiex ang jheeh tix bleet kix khawmuik tau mai Korax, yam yum paox cub paox caw kix, tau mai yam gleeing ngu kix ra yieh tixphwan kaux mai kix lih mawh mhai ruk pa tawx satix. ¹¹ Viang mawh nan kawn praix Korax khankix ang yum. ¹² Doeh nyiex ma kawn simex Simion khankix mawh Nemoelax pa lih ti mawh doeh nyiex ma Nemoelix, mai Yamen pa lih mawh doeh nyiex ma Yaminix mai Yakhin lih mawh doeh nyiex ma Yakhinix, ¹³ Zerax pa lih mawh doeh nyiex ma Zerahix mai Shawlax pa lih mawh doeh nyiex ma Shawlix. ¹⁴ In khankix mawh doeh nyiex ma ceu pui Simion koe ra mheen ra rheng ra yieh kaux, ¹⁵ doeh nyiex ma kawn simex Gat khankix mawh Zephon, pa deeh lih mawh doeh nyiex ma Zephawnix, mai Hagie pa lih mawh doeh nyiex ma Hagrix, mai Shunix pa lih mawh doeh nyiex ma Shunit, ¹⁶ mai Awzanix pa lih mawh doeh nyiex ma Awzanet mai Erix pa lih mawh doeh nyiex ma Erit, ¹⁷ mai Arot pa lih mawh doeh nyiex ma Arodix, mai Arelix pa lih mawh doeh nyiex ma Arelit. ¹⁸ In khankix mawh doeh nyiex ma kawn simex Gat pa hoik laig carang koe pon mheen mai phwan yieh kaux. ¹⁹ Doeh nyiex ma kawn simex Yudax mawh Erax mai Awnan, Erax mai Awnan yum ka daux meung Khanan. ²⁰ Doeh nyiex ma kawn simex Yudax mawh Shelax, pa lih mawh doeh nyiex ma Shelanix, mai Pariet pa lih mawh doeh nyiex ma Parazix, mai Zerax pa lih mawh doeh nyiex ma Zerahix. ²¹ Doeh nyiex ma kawn simex Pharet mawh Hezaron, pa lih mawh doeh nyiex ma Hezarawnix, mai Hamulax pa lih mawh doeh nyiex ma Hamulix. ²² In khankix mawh doeh nyiex ma Yudax pa hoik laig carang, koe aliah mheen liah rheng phwan yieh kaux. ²³ Doeh nyiex ma kawn simex Issakha khankix mawh Tawlax, pa lih mawh doeh nyiex ma Tawlix, mai Phua pa lih mawh doeh nyiex ma Phunit, ²⁴ mai Yashu pa lih mawh doeh nyiex ma Yashubit, mai Shimaron pa lih mawh doeh nyiex ma Shimaronit. ²⁵ In khankix mawh doeh nyiex ma Issakha, pa hoik laig carang koe liah mheen pon rheng loe yieh kaux. ²⁶ Doeh nyiex ma kawn simex Zebulun khankix mawh Sarait, pa lih mawh doeh nyiex ma Saradix, mai Elon pa lih mawh doeh nyiex ma Elonit, mai Yalelax pa lih mawh doeh nyiex ma Yalelit. ²⁷ In mawh doeh nyiex ma Zebulun pa hoik laig carang koe liah mheen mai phwan yieh kaux. ²⁸ Doeh nyiex ma kawn simex Yosiep, mawh Manashe mai Epharem. ²⁹ Doeh nyiex ma kawn simex Manashe khankix, mawh Makhirax, pa lih mawh doeh nyiex ma Makhirax, mai, Makhirax pon kawn tix Gilat, mai Gilat lih mawh doeh nyiex ma Gilidix. ³⁰ In khankix mawh kawn simex Gilat, mai Yezerax lih mawh doeh nyiex ma Yezerit, mai Heliet lih mawh doeh nyiex ma Helikit, ³¹ mai Asarilax lih mawh doeh nyiex ma Asarilit, mai Shekhim lih mawh doeh nyiex ma Shekhimit, ³² mai Shemidax lih mawh doeh nyiex ma Shemidit, mai Hephax lih mawh doeh nyiex ma Hepharit. ³³ Zelophihat kawn simex Hephax ang koe kawn simex, nawh koe kawn bun nong nong ceu kaux kawn bun Zelophihat khankix mawh Mala, Nawa, Hawgala, Milaka mai Tiraza. ³⁴ In khankix mawh doeh nyiex ma Manashe, pa hoik laig carang koe phwan mheen ra rheng aliah yieh kaux. ³⁵ In khankix mawh doeh nyiex ma kawn simex Epharem mai Shutelax lih mawh doeh nyiex ma Shutalit, mai Bekha lih mawh doeh nyiex ma Bekharit, mai Tahan lih mawh doeh nyiex ma Tahanit. ³⁶ In khankix mawh kawn simex Shutelax mai Eran lih mawh doeh nyiex ma Eranit. ³⁷ In khankix mawh doeh nyiex ma kawn simex Epharem pa hoik laig carang, koe loe mheen ra rheng phwan yieh kaux. In khankix mawh doeh nyiex ma kawn simex Yosiep. ³⁸ In khankix mawh doeh nyiex ma kawn simex Benyamin, mai Belax lih mawh doeh nyiex ma Belit, mai Ashabelax lih mawh doeh nyiex ma Ashabelit mai Ahiram lih mawh doeh nyiex ma Ahiramit, ³⁹ mai Shuphan lih mawh doeh nyiex ma Shuphamit, mai Hupham lih mawh doeh nyiex ma Huphamit. ⁴⁰ Kawn simex Belax mawh Aradax mai Ne man, Aradax lih mawh doeh nyiex ma Aradit, mai Ne man lih mawh doeh nyiex ma Nemanmit. ⁴¹ In khankix mawh doeh nyiex ma kawn simex Binyamin, mai pui pa hoik laig carang koe pon mheen phwan rheng liah yieh kaux. ⁴² In khankix mawh doeh nyiex ma kawn simex Dan mai Shuham lih mawh doeh nyiex ma Shuhamit. In khankix mawh doeh nyiex ma Dan. ⁴³ Doeh nyiex ma Shuhamit pa hoik laig carang, koe liah mheen pon rheng pon yieh kaux. ⁴⁴ Doeh nyiex ma kawn simex Asha, mai Yimanax lih mawh doeh nyiex ma Yimanit mai Yesuwit lih mawh doeh nyiex ma Yesuwit mai Berix lih mawh doeh nyiex ma Berit. ⁴⁵ Kawn simex Berix khankix mawh Hebarax lih mawh doeh nyiex ma Hebarit, mai Malakhelax lih mawh doeh nyiex ma Malakhelit. ⁴⁶ Ceu kaux kawn bun Asha mawh Sera. ⁴⁷ In khankix mawh doeh nyiex ma kawn simex Asha pa hoik laig carang, koe phwan mheen loe rheng pon yieh kaux. ⁴⁸ Doeh nyiex ma kawn simex Napthalix mai Yazelax lih mawh doeh nyiex ma Yazelit mai Gunix lih mawh doeh nyiex ma Gunit, ⁴⁹ mai Yezerax lih mawh doeh nyiex ma Yezerit mai Shiliem lih mawh doeh nyiex ma Shilimit. ⁵⁰ In khankix mawh doeh nyiex ma kawn simex Napthalix, pa hoik laig carang, koe pon mheen phwan rheng pon yieh kaux. ⁵¹ In khankix mawh pui pa hoik laig carang ka daux pui Isarelax, koe liah siien mai tix rheng aliah yieh tixngoe kaux heue. ⁵² Simiang Siyiex ah nin ka Mose, ⁵³ "Tak gwieh haktiex in awm pa hoik koe ceu kaux kix sonsang mawh sinngao kix. ⁵⁴ Son cub pui pa nie maix tak gwieh sinngao awm pa nie kix mai son cub pui pa iak maix tak gwieh sinngao awm pa iak kix, pui ku cub tak pon sinngao awm pa hoik koe carang kix. ⁵⁵ Viang mawh nan caw ti yuh nieb mai gwieh ka, kix tak pon sinngao awm pa koe ceu kaux doeh ru keeing kix. ⁵⁶ Awm pa hoik cawk kix nieb, kix tak pon ti cie sinngao hawt nie mai hawt iak pui kix." ⁵⁷ In khankix mawh pui pa hoik laig carang ka daux doeh nyiex ma pui Lewix mai Geshon lih mawh doeh nyiex ma Geshonit mai Kawhat lih mawh doeh nyiex ma Kawhatit mai Merarix lih mawh doeh nyiex ma Merarit. ⁵⁸ In khankix mawh doeh nyiex ma pui Lewix, pa mawh doeh nyiex ma Libanit, doeh nyiex ma Hebaronit, doeh nyiex ma Mahali, doeh nyiex ma Mushix mai doeh nyiex ma Kawratit. Kawhat pon kawn simex tix Amaram. ⁵⁹ Moeng Amaram kaux Yawkhebiet pa mawh kawn bun Lewix pa keh khaing Lewix ka daux meung Ejiptux, bun an keh Arun mai Mose khawm Meriam pa mawh puke bun kix son Amaram. ⁶⁰ Arun koe kawn simex pa mawh Nadax mai Abihux, Eliza mai Itama. ⁶¹ Nadax mai Abihux yum, yam tan kiex ngu pa seeing ka plak sivoe Simiang Siyiex. ⁶² Kix pa hoik laig carang koe ra mheen loe rheng kaux, kix ang lai sau carang kawn nyawm simex jah ka pa koe ju tix khix haok plak piang sinax pui Isarelax, mawh kheu ang sinngao pa sang tawx ka kix koe sinax pui Isarelax. ⁶³ In khankix mawh pui an kix pa hoik laig carang pa hoik simin Mose mai Eliza cao giex kaing li daux kawn praix Isarelax daux lung Mawbax hawt rawm klawng Yawdan plak toi veng Yerikho. ⁶⁴ Viang mawh nan pui in khankix, ang laig ka daux carang tix kaux kawx pa hoik simin Mose mai Arun cao giex kaing li, yam simin kix pui Isarelax ka daux tiag gawng Sina. ⁶⁵ Mawh kheu Simiang Siyiex hoik ah nin ka kix, "Kix tak yum ka daux tiag." Ang lai koe pui pa deuk ka daux kix tix kaux kawx, lheu khaing Kaliep kawn simex Yephunie mai Yawsux kawn simex Nun heue.

¹ Yam an kawn bun Zelophehat mawh Mala, Nawa, Hawgala, Milaka, Tiraza, khaing Hepha, khaing kawn simex Gilat, khaing kawn simex Makhirax, khaing kawn simex Manashe, khaing kawn simex Yosiep. ² Kix cung ka plak sivoe Mose mai ka plak sivoe Eliza cao giex kaing li mai ka plak sivoe cao kaing cao kap mai ka plak sivoe pui hun ka diang siviex laig ka daux nyiex gox bwan man bang kum pui hun ah nin, ³ keeing yix yum ka daux tiag, nawh ang laig ka daux sinax cub pa kraix khrawm paox ti tieh feen ka Simiang Siyiex, tau mai cub Korax, viang mawh nan nawh yum kheu phimap tix mai nawh ang koe kawn simex tix kaux kawx. ⁴ Mawh kheu ang keeing yix koe kawn simex tix kaux kawx, tak sang tik yix khaing daux doeh nyiex ma nawh lie? Mawh kheu nan, tawx sinngao cie yix khaing daux sinax puxaik keeing yix khankix liak." ⁵ Mose viex Grawng see kix hoek sivoe Simiang Siyiex. ⁶ Simiang Siyiex ah nin ka Mose, ⁷ "Lox krai kawn bun Zelophihat khaw heue, maix tak tawx kix cie sinngao ka daux sinax puxaik keeing kix mai kieh sinngao keeing kix mawh cie kix. ⁸ Maix ah nin ka pui Isarelax khankix, phan pui tix kaux kaux pa ang koe kawn simex yum maix tak kieh sinngao nawh mawh son kawn bun nawh. ⁹ Phan nawh ang koe kawn bun maix tak tawx sinngao nawh ka puxaik nawh khankix. ¹⁰ Phan nawh ang koe puxaik maix tak tawx sinngao nawh ka puxaik keeing nawh khankix. ¹¹ Phan keeing nawh ang koe puxaik maix tak tawx sinngao nawh ka ru pa dex dawd mai doeh nyiex ma nawh khankix mai nawh tak pon ti cie ka an. An tak mawh been lox tat jhawm prawng ka son kawn praix Isarelax, awm pa hoik tawm Simiang Siyiex ka Mose heue." ¹² Simiang Siyiex ah nin ka Mose, "Haok ka piang gawng Abarim mai jhak ka haktiex pa hoik tawx Aux ka pui Isarelax." ¹³ Yam hoik yaox maix ka an maix kawx tak khrawm tix tau mai pui, awm khrawm puxke maix Arun tix tau mai kix, ¹⁴ mawh kheu pax hoik tieh feen ka gumlox Aux ka daux tiag Zin, yam thung thiang pui hun paox ti maix ang yungyi ka Aux ka plak sivoe ngai kix. In mawh rawm klawng Meribax pa koe hawt Kadesha ka daux tiag Zin. ¹⁵ Mose ah nin ka Simiang Siyiex, ¹⁶ "Kieh Simiang Siyiex pa mawh Khwan ka piang kawn pui khankix laug pui tix kaux thung ka pui hun, ¹⁷ pui pa sang pon hu laig ka plak sivoe kix mai pui pa pon thung kix lih mai pa pon viex kix laig, sonsang ang pui Simiang Siyiex khankix awm yung pa ang koe cao liang." ¹⁸ Simiang Siyiex deeh ah nin ka Mose, "Kok Yawsux kawn simex Nun pa mawh pui pa koe khwan ka daux nawh mai deuh taix tix ka piang nawh, ¹⁹ "Kieh nawh cung sivoe ngai Eliza cao giex kaing li mai sivoe ngai pui hun mai ap beeh glawm nawh ka plak sivoe kix. ²⁰ Tak tawx min siawp sibrawm tix ka nawh tiblah, sonsang cu nghiet cub pui hun Isarelax ka nawh. ²¹ Nawh tak cung ka plak sivoe Eliza cao giex kaing li mai cao giex kaing li tak chawk cheng grawng krax prawng ca been Urim ka plak sivoe ngai Simiang Siyiex ka son nawh, mai pui ku kaux tak lih tak laig awm gumlox nawh, tau mai nawh khawm pui Isarelax mai cub pui hun khankix." ²² Mose yuh awm lox pa hoik tawm Simiang Siyiex ka nawh, nawh kok Yawsux mai kieh nawh cung sivoe ngai Eliza cao giex kaing li mai pui hun khankix. ²³ Nawh deuh taix tix ka piang Yawsux mai ap beeh glawm ka nawh, awm pa hoik tawm Simiang Siyiex ka Mose heue.

¹ Simiang Siyiex ah nin ka Mose, ² "Tawm lox ka pui Isarelax ah nin ka kix, krax tan son Aux, pa ih Aux mai krax tan pa gleeing ka ngu pa mawh krax tan pa sioe bhawng pa khaw rhawm Aux maix tak yuh satix tix yam tan maix ka Aux, ka daux bawg yam pa hoik tat ti deuh." ³ Maix tak ah nin ka kix, "In mawh krax tan pa gleeing ka ngu, pa sang tan maix ka Simiang Siyiex, tak mawh kawn yung mhaing iak pa naog num, pa loig ra mu tix ngaix hoik tix ngaix jheung jheung. ⁴ Maix tak tan kawn yung iak ponngawb tix mu mai tan ka plakbo tix mu tau, ⁵ mai phawng nghox ca ceu pa mhawm kao son tix son khaing tix epha pa mawh krax tan phawng nghox ca im, pa hoik klao ti tau mai bee sanlon pa krid tix lih khaing plix sanlon pon son tix son khaing tix heng. ⁶ An mawh krax tan pa gleeing jheung jheung pa hoik tat ti deuh ka piang gawng Sina krax tan pa sioe bhawng pa khaw rhawm Siyiex pa mawh krax tan pa gleeing ka ngu. ⁷ Maix tak tan kawn yung tix mu tau mai krax tan pa nyaux, pon son tix son khaing tix Hing, maix tak hieh krax tan pa nyaux an dee pa singax singeh son Simiang Siyiex. ⁸ Maix tak tan kawn yung tang mu ka plakbo awm krax tan phawng nghox ca im ka plak ponngawb tau mai krax tan pa nyaux. Maix tak tan krax tan pa gleeing ka ngu mai krax tan pa sioe bhawng pa khaw rhawm Simiang Siyiex heue. ⁹ "Ka daux singaix twah maix tak tan kawn yung iak pa naog num pa loig ra mu mai phawng nghox ca ceu pa mhawm pa hoik klao tau mai bee kao son ra son khaing tix epha, tau mai krax tan pa nyaux, ¹⁰ lheu khaing krax tan pa gleeing tau mai krax tan pa nyaux jheung jheung, in tak mawh krax tan pa gleeing son singaix twah ku twah heue. ¹¹ Haok khix khraox tix ngaix maix tak viex ti tan kawn mawie mhaing ra mu, kawn yung mhaing tix mu mai kawn yung pa naok num pa loig aliah mu son krax tan pa gleeing ka Simiang Siyiex, ¹² Mai phawng nghox ca ceu pa mhawm, kao son loe son khaing tix epha mawh son mawie mhaing tix mu, krax tan phawng nghox ca ceu pa mhawm pa hoik klao tau mai bee kao son ra son khaing tix epha son yung tix mu, ¹³ phawng nghox ca ceu pa mhawm kao son tix son khaing tix epha pa hoik klao ti tau mai bee, son kawn yung iak ku mu, mai son krax tan pa gleeing pa sioe bhawng, pa mawh krax tan pa gleeing ka ngu pa khaw rhawm Simiang Siyiex. ¹⁴ Krax tan pa nyaux kix rawm plix siiet tix plak heng mawh son mawie mhaing tix mu mai loe son tix son khaing tix heng mawh son yung tix mu mai pon son tix son khaing tix heng mawh son kawn yung tix mu, in mawh krax tan pa gleeing son ku khix, tom sidah num. ¹⁵ Lheu khaing krax tan pa gleeing jheung jheung mai krax tan pa nyaux, maix tak baox viex kawn pex tix mu son krax tan son phimap ka Simiang Siyiex heue. ¹⁶ "Ka daux khix tix kao pon ngaix mawh pawie Pasakha Simiang Siyiex. ¹⁷ Ka daux khix in kao phwan ngaix mawh singaix pawie, ka daux aliah ngaix tak yaox ti ih blah pa ang sau susaix. ¹⁸ Ka daux singaix jah pex tak khrawm paox tix ka daux pa singax singeh. Pex tak ang pon ti yuh kaing jhaw tix ceu kawx, ¹⁹ mai pex tak yuh krax tan pa yuh ka ngu, son krax tan pa gleeing ka Simiang Siyiex, ka mawie mhaing ra mu, yung tix mu mai kawn yung iak pa naog num aliah mu, an khawmuik tak mawh pa loig. ²⁰ Krax tan phawng nghox ca ceu pa mhawm pa hoik klao tau mai bee kao son loe son khaing tix epha mawh son mawie mhaing tix mu mai kao son ra son mawh son yung tix mu, ²¹ pex tak tan kao son tix son khaing tix epha son kawn yung iak an kix khawm aliah mu, ²² son krax tan pa pluat ploi phimap pex tak yuh krax tan pa khyox khaw ka pex mhaing tix mu son pex. ²³ Lheu khaing krax tan pa gleeing ka plak ponngawb, pa mawh krax tan pa gleeing jheung jheung pex tak tan krax tan in khankix. ²⁴ Krax tan pa gleeing jheung jheung mai krax tan pa nyaux khankix pex tak tan pa ih pa mawh krax tan pa yuh ka ngu aliah singaix pa sioe bhawng pa khaw rhawm Simiang Siyiex. ²⁵ Ka daux singaix aliah pex tak khrawm paox tix ka daux pa singax singeh, pex tang ang pon ti yuh kaing jhaw heue. ²⁶ "Awm an ka daux singaix tan pex plix pa liang, pex tak tan krax tan phawng nghox ca pa khraox ka Simiang Siyiex ka daux pawie aliah vang twah, pex tak khrawm paox tix ka daux pa singax singeh, pex tak ang pon ti yuh kaing jhaw, ²⁷ pex tak viex krax tan pa gleeing pa sioe bhawng pa khaw rhawm Simiang Siyiex. Pa mawh kawn mawie mhaing ra mu mai kawn yung tix mu mai kawn yung pa naog num aliah mu tau, ²⁸ mai krax tan pa mawh phawng nghox ca ceu pa mhawm pa hoik klao mai bee kao son loe son khaing tix epha son mawie mhaing tix mu mai kao son ra son, son yung tix mu, ²⁹ kao son tix son, son kawn yung aliah mu tau, ³⁰ mai kawn yung mhaing tix mu, sonsang yuh krax pa khyox khaw son pex. ³¹ Lheu khaing krax tan pa gleeing jheung jheung tau mai krax tan phawng nghox ca, pex tak tan krax tan pa nyaux, an kix tak mawh pa loig heue.

¹ "Ka daux haok khix aliah tix ngaix, pex tak khrawm paox tix ka dee pa singax singeh, pex tak ang pon ti yuh kaing. Singaix an mawh singaix phlu pex teettawng, ² pex tak yuh krax tan pa gleeing ka mawie mhaing tix mu, kawn yung tix mu mai kawn yung pa naog num pa loig aliah mu, pa sioe bhawng pa khaw rhawm Simiang Siyiex. ³ krax tan phawng nghox ca ceu pa mhawm, pa hoik klao tau mai bee kao son loe son khaing tix Epha ka son mawie mhaing mai kao son ra son ka son yung mhaing, ⁴ mai kao son tix son, son kawn yung aliah mu tau, ⁵ mai kawn pex tix mu son krax tan pa pluat ploi phimap, sonsang khyox khaw ka son pex, ⁶ lheu khaing krax tan pa gleeing yam haok khix khraox maix tak tan phawng nghox ca mai krax tan pa gleeing tix jheung jheung tau mai krax tan phawng nghox ca mai krax tan pa nyaux khankix awm pa koe deen maix tak yuh krax tan ka ngu pa sioe bhawng pa khaw ka rhawm Simiang Siyiex. ⁷ "Yam haok khix aliah, kao ngaix, pex tak khrawm paox tix ka daux pa singax singeh, pex tak twah pa ih mai pex tak ang pon ti yuh kaing. ⁸ Pex tak tan krax tan pa gleeing son pa sioe bhawng pa khaw rhawm Simiang Siyiex khawm mawie mhaing tix mu, kawn yung tix mu mai kawn yung pa naog num aliah mu, an khankix tak mawh pa gleeing, ⁹ mai krax tan phawng nghox ca ceu pa mhawm pa hoik klao mai bee, kao son loe son khaing tix Epha ka son mawie mhaing tix mu mai kao son ra son, son yung mhaing tix mu, ¹⁰ mai kao son tix son, son kawn yung mhaing aliah mu, ¹¹ lheu khaing krax tan pa plua ploi phimap, pa mawh krax pa khyox khaw mai krax tan pa gleeing jheung jheung tau mai krax tan phawng nghox ca khawm krax tan pa nyaux maix tak viex kawn pex mhaing tix mu son krax tan pa pluat ploi phimap heue. ¹² "Yam haok khix aliah, kao phwan ngaix, pex tak khrawm paox ti ka dee pa singax singeh, pex tak ang pon ti yuh kaing jhaw mai pex tak khre rien pawie son Simiang Siyiex aliah singaix, ¹³ pex tak yuh krax tan pa gleeing, pa mawh krax tan pa yuh ka ngu, pa sioe bhawng pa khaw rhawm Simiang Siyiex, ka kawn mawie mhaing kao loe mu, kawn yung ra mu mai kawn yung pa naog num kao pon mu, an khankix tak mawh pa loig, ¹⁴ mai krax tan phawng nghox ca im ceu pa mhawm, pa hoik klao mai bee kao son loe son khaing tix epha son kawn mawie mhaing kao loe mu ku mu mai kao son ra son, son yung ra mu ku mu, ¹⁵ mai kao son tix son, son kawn yung kao pon mu, ¹⁶ mai baox viex kawn pex iak tix mu, son krax tan pa pluat ploi phimap, lheu khaing krax tan pa gleeing jheung jheung, khawm krax tan phawng nghox ca mai krax tan pa nyaux khankix maix tak viex kawn pex tix mu son krax tan pa pluat ploi phimap. ¹⁷ "Ka daux singaix ra, pex tak tan mawie mhaing kao ra mu yung ra mu mai kawn yung pa naog num pa loig kao pon mu tau, ¹⁸ mai krax tan phawng nghox ca im mai krax tan pa nyaux, son mawie mhaing an khankix mai son yung mhaing mai son kawn yung pa hoik simin tix awm pa koe been, ¹⁹ mai baox viex kawn pex iak hoek tix mu, son krax pa pluat ploi phimap, lheu khaing krax tan pa gleeing ti jheung jheung mai krax tan phawng nghox ca mai krax tan pa nyaux khankix maix tak viex kawn pex son krax tan pa pluat ploi phimap. ²⁰ Ka daux singaix loe, pex tak viex mawie mhaing kao tix mu, yung mhaing ra mu mai kawn yung mhaing pa naog num pa loig kao pon mu tau, ²¹ mai krax tan phawng nghox ca mai krax tan pa nyaux son mawie mhaing son yung mhaing mai son kawn yung khankix pa hoik simin tix awm pa koe been, ²² lheu khaing krax tan pa gleeing jheung jheung tau mai krax tan phawng nghox ca mai krax tan pa nyaux khankix maix tak viex kawn pex tix mu son krax tan pa pluat ploi phimap. ²³ Ka daux singaix pon, pex tak tan mawie mhaing kao mu, yung mhaing ra mu mai kawn yung pa naog num pa loig kao pon mu tau, ²⁴ mai krax tan phawng nghox ca mai krax tan pa nyaux khankix, son mawie mhaing, son yung mhaing mai son kawn yung khankix, pa hoik simin tix awm pa koe been, ²⁵ lheu khaing krax tan pa gleeing jheung jheung mai krax tan phawng nghox ca mai krax tan pa nyaux khankix maix tak viex kawn pex tix mu son krax tan pa pluat ploi phimap. ²⁶ Ka daux singaix phwan, pex tak tan mawie mhaing dim mu, yung ra mu mai kawn yung pa naog num pa loig kao pon mu tau, ²⁷ mai krax tan phawng nghox ca mai krax tan pa nyaux, son mawie mhaing, son yung mhaing mai son kawn yung pa hoik simin tix awm pa koe been, ²⁸ lheu khaing krax tan pa gleeing jheung jheung tau mai krax tan phawng nghox ca mai krax tan pa nyaux khankix maix tak viex pex mhaing tix mu son krax tan pa pluat ploi phimap. ²⁹ Ka daux singaix liah, pex tak tan mawie mhaing daix mu, yung mhaing ra mu mai kawn yung pa naog num pa loig kao pon mu tau, ³⁰ mai krax tan phawng nghox ca mai krax tan pa nyaux, son mawie mhaing, son yung mhaing mai son kawn yung pa hoik simin tix awm pa koe been, ³¹ lheu khaing krax tan pa gleeing jheung jheung mai krax tan phawng nghox ca mai krax tan pa nyaux khankix maix tak viex pex mhaing tix mu son krax tan pa pluat ploi phimap. ³² "Ka daux singaix aliah pex tak tan mawie mhaing aliah mu, yung mhaing ra mu mai kawn yung pa naog num pa loig kao pon mu tau, ³³ mai krax tan phawng nghox ca mai krax tan pa nyaux khankix, son mawie mhaing, son yung mhaing mai son kawn yung pa hoik simin tix awm pa koe been, ³⁴ mai baox viex pex hoek tix mu, awm krax tan pa pluat ploi phimap, lheu khaing krax tan pa gleeing jheung jheung mai krax tan phawng nghox ca mai krax tan pa nyaux khankix maix tak viex pex mhaing tix mu son krax tan pa pluat ploi phimap. ³⁵ Ka daux singaix daix, pex tak khrawm paox tix ka dee pa singax singeh, pex tak ang pon ti yuh kaing jhaw. ³⁶ Viang mawh nan pex tak yuh krax tan pa gleeing ka ngu, awm krax tan pa sioe bhawng pa khaw rhawm Simiang Siyiex, ka mawie mhaing tix mu, yung mhaing tix mu mai kawn yung pa naog num pa loig aliah mu tau, ³⁷ mai krax tan phawng nghox ca mai krax tan pa nyaux, son mawie mhaing, son yung mhaing mai son kawn yung khankix pa hoik simin tix awm pa koe been, ³⁸ lheu khaing krax tan pa gleeing jheung jheung mai krax tan phawng nghox ca mai krax tan pa nyaux khankix maix tak viex pex mhaing tix mu son krax tan pa pluat ploi phimap. ³⁹ "Pex tak tan ceu in khankix ka Simiang Siyiex, awm pawie pa hoik tat pex ti deuh, son krax tan pa gleeing mai krax tan phawng nghox ca im, son krax tan pa nyaux mai krax tan pa nhim. An khankix mawh krax tan pa lheu yuh pex khaing krax tan pa tiextu pex mai krax tan pa koe rhawm rhi pex khankix." ⁴⁰ Mose hoik krai ceu in khankix ka pui Isarelax, awm pa hoik tawm Simiang Siyiex ka nawh heue.

¹ Mose ah nin ka cao kaing doeh ru pui Isarelax, "In mawh lox pa hoik tawm Simiang Siyiex. ² Phan simex tix kaux kaux yuh sijax tix ceuceu ka Simiang Siyiex, phan ang mawh nan tiextu phyawk laung tokaux tix ka lox pa kham tix, nawh tak ang pon ti tieh loh ka lox tix, nawh tak yuh an awm lox pa lih khaing daux jheeh tix. ³ Phan ang mawh nan phan bun tix kaux kaux yuh sijax tix ceuceu ka Simiang Siyiex mai pa phyawk laung tokaux tix, ka lox pa kham tix, yam ot nawh ka daux nyiex ma keeing tix yam awn ju nawh, ⁴ mai phan keeing nawh mhong lox sijax pa kham nawh mai pa phyawk nawh tokaux tix ka lox pa kham tix mai ang nye ang nyux ka nawh khaix an lox sijax pa yuh nawh tak mawh pa kaux cong mai pa phyawk laung nawh tokaux tix ka lox pa kham tix tak mawh pa kaux cong. ⁵ Viang mawh nan phan keeing nawh mhong ka lox sijax pa kham nawh mai pa phyawk laung nawh tokaux tix ka lox pa kham tix mai tiextu ka, khaix an lox sijax pa yuh nawh tak ang kaux cong mai Simiang Siyiex tak pluat ploi nawh, mawh kheu keeing nawh hoik tiebtie nawh. ⁶ Phan bun an koe mex tix kaux kaux yuh sijax mai phyawk laung tokaux tix ka lox pa kham nawh ka jheeh tix, ⁷ phan mex nawh mhong ka lox an mai ang nye ang nyux ka nawh yam mhong tix lox sijax pa kham nawh mai pa phyawk laung nawh tokaux tix tak kaux cong. ⁸ Viang mawh nan phan mex nawh hoik mhong daux singaix an mai tiebtie ka lox sijax pa kham nawh mai pa phyawk laung nawh ka tokaux tix mai gumlox pa lih khaing jheeh mai pa phyawk laung nawh tokaux tix, tak mawh pa giex going mai Simiang Siyiex tak pluat ploi nawh. ⁹ Viang mawh nan miexmai tix kaux kaux ang ah, bun pa hoik tik mex tix, tix kaux kaux ang ah, yuh sijax pa kham nawh pa phyawk pa laung tokaux tix, an khakix tak mawh pa kaux cong nawh. ¹⁰ mai phan nawh yuh sijax ka daux nyiex mex tix, phan ang mawh nan pa phyawk laung tokaux tix ka daux pa tiextu tix, ¹¹ mai phan mex nawh hoik mhong ka lox an mai ang nye ang nyux mai ang tiebtie nawh, khaix an lox pa kham nawh pa phyawk pa laung tokaux tix tak mawh pa kaux cong. ¹² Viang mawh nan phan mex nawh mhong ka daux singaix an mai tiebtie ka lox pa lih khaing daux jheeh nawh, sijax pa yuh nawh mai pa phyawk pa laung nawh pa dex dawd mai tokaux tix, tak mawh pa ang kaux cong. Mawh kheu hoik tiebtie mex nawh ka nawh Simiang Siyiex tak pluat ploi nawh. ¹³ Lox sijax pa yuh nawh tix ceuceu mai pa phyawk laung nawh tokaux tix ka lox pa kham nawh mai pa khin ka tokaux tix, mex nawh pon kieh kaux cong mai pon yieh laux. ¹⁴ Viang mawh nan phan mex nawh ang nye ang nyux ka nawh, tix ngaix hoik tix ngaix, lox sijax pa yuh nawh, phan ang mawh nan can lox pa kham pa koe ka piang nawh khawmuik, mex nawh tak kieh an khankix kaux cong, mawh kheu ang nawh nye nyux daux singaix mhong nawh ka ceu an. ¹⁵ Phan mex nawh tak thiang ceu an khaix singaix hoik mhong nawh ka nawh tak klawm ka phimap moeng tix. ¹⁶ In khankix mawh lox tat jhawm prawng pa tawm Simiang Siyiex ka Mose, sinax simex mai moeng nawh mai sinax keeing mai kawn bun nawh, yam awn ju yam ot nyiex keeing tix heue.

¹ Simiang Siyiex ah nin ka Mose, ² "Maix tak pawk bix ka ceu pui Midian tang pui Isarelax, maix tak khrawm tix tau mai cub pui maix." ³ Mose ah nin ka pui khankix, "Khrawm pui naing ka daux pex tiblah sonsang yuh naing mai hu puing ka pui Midian khankix, sonsang pawk pex bix tix son Simiang Siyiex ka ceu pui Midian." ⁴ Laug pui khaing daux doeh ru tix ceu tix rheng kaux, sonsang hu puing ka naing. ⁵ Kix khrawm pui naing khaing daux pui Isarelax pa koe kaing rheng kaing mheen mai khrawm pui khaing doeh ru kix ku cub, tix cub tix rheng khawmuik koe tix mheen ra rheng kaux sonsang puing naing. ⁶ Mose ploi kix hu daux naing tix ceu pui, tix rheng hu tau mai Phenahat kawn simex Eliza cao giex kaing li tau mai kraung naing pa singax mai teettawng pa sang phlu ka daux tawm taix nawh. ⁷ Kix puing pui Midian, awm pa hoik tawm Simiang Siyiex ka Mose mai pah simex ku kaux. ⁸ Kix pah simiang pui Midian phwan kaux, pa mawh Ewix, Rekin, Zurax, Hurax, Rebax, mai kix baox pah Balam kawn simex Bawrax ka vaig. ⁹ Pui Isarelax khankix viex bun Midian mai kawn nyawm khankix mawh pa giex laung tau mai to brie kix, mawie, pex, yung mai kraung khrai khawmuik. ¹⁰ Kix gleeing veng kix mai dah dee ot kix mai tab kix khawmuik ka ngu. ¹¹ Kix khrawm kraung pa pon rhim tix khawm pui mai to brie khankix heue. ¹² Kix viex pui pa giex laung mai kraung pa pon mai pa rhim kix hoek ka Mose mai Eliza cao giex kaing li mai pui hun Isarelax khankix ka daux tab lung Mawbax hawt rawm klawng Yawdan ka toi veng Yerikho. ¹³ Mose mai Eliza cao giex kaing li khawm cao kaing cao kap pui hun khankix, lih hu sonsang rieb kix plak praix nyiex bang. ¹⁴ Mose song rhawm ka cao kaing naing mai cao kaing pa kwang pui kaing rheng khankix mai pa kwang ka piang pui kaing yieh, pa kaoh khaing daux naing. ¹⁵ Mose ah nin ka kix, "Mawh kawn kieh pex bun khankix im ju lie?" ¹⁶ Jhak heue, bun khankix hoik kieh pui Isarelax lud ka daux pa hawt krax keud krax sawn pa kaoh khaing Balam mai tieh feen lud kix ka Simiang Siyiex ka kaing jhaw siyiex Pegurax mai jhawm saux preng hoik hoek ka piang pui hun cie Simiang Siyiex, ¹⁷ mawh kheu nan pah simex ku kaux daux sinax kawn nyawm khankix mai pah bun ku kaux pa hoik it tau mai simex, ¹⁸ viang mawh nan deuh kawn nyawm bun awn ju khankix, pa ang nyang sax it mai simex im ju. ¹⁹ Pex tak yaox ti ot ka praix nyiex bang aliah singaix, kaw pa hoik pah pui tix kaux kaux mai kaw pa hoik hu teeh ka pui yum mai pui pa giex laung tak kieh tokaux tix singax ka daux singaix loe mai singaix aliah. ²⁰ Kieh kraung ceep pex singax pa mawh pa yuh ka hak ku plah mai can pa taing ka hauk pex khankix mai kraung shiao can pa yuh ka khaox khankix." ²¹ Eliza cao giex kaing li ah nin ka pui naing pa hoik hu daux naing khankix "In mawh lox lai beenli, lox tat jhawm prawng pa hoik tawm Simiang Siyiex ka Mose, ²² mawh ngie khri, mau, tawng lheung, rhiem, tawng paing mai sivun khankix, ²³ can ceu pa pon kham ka ngu khankix, pex tak thi ka daux ngu mai ankix tak mawh pa singax, yuh ka mawx kawx caw tix sigrhah pa seeing singax ka rawm mai pa ang pon kham daux ngu khankix, pex tak cub ka daux rawm. ²⁴ Pex tak sidaux kraung tix ka daux singaix liah mai pex tak mawh pa singax, khaix hoik an khankix, pex tak pon ti laig ka daux nyiex bang heue." ²⁵ Simiang Siyiex krai ka Mose ah nin, ²⁶ "Maix mai cao giex kaing li Eliza, khawm cao kaing pui hun cub mawx cub an, deeh simin khraung pa pon rhim hoek, khawm pui mai to brie khankix. ²⁷ Gwieh kraung pa pon rhim hoek khankix lih ra son, tix son tawx ka pui pa hu daux naing mai tix son tawx ka pui hun. ²⁸ Gwieh ti tawx gha can pa pon khaing daux naing ka Siyiex, pa mawh pui, mawie, la mai yung khankix phwan yieh mu tix mu. ²⁹ Mai deeh teei an khankix tix plak khaing cie kix, tawx ka cao giex kaing li Eliza, son krax tan pa yaog sivoe Simiang Siyiex. ³⁰ Khaing daux cie pui Isarelax khankix tix plak maix tak teei khaing daux tix phwan mu tix mu son kuceu, khaing pa mawh pui, mawie, la mai yung khankix mai tawx ka ceu pui Lewix, pa priex ka nyiex gox bwan man Simiang Siyiex." ³¹ Mawh kheu nan Mose mai cao giex kaing li Eliza yuh awm lox tawm Simiang Siyiex ka Mose. ³² Kraungkhrai pa kawn deuk khaing pa pon rhim pui naing ti viex hoek khankix, mawh yung liah sien aliah mheen phwan rheng mu, ³³ mawie aliah mheen ra rheng mu, ³⁴ la liah mheen tix rheng mu, ³⁵ mai bun pa ang nyang sax dex dawd mai simex, khawmuik koe loe mheen ra rheng kaux. ³⁶ An tix plak pa mawh son pui pa lih hu ka daux naing khankix, mawh yung loe sien loe mheen aliah rheng phwan yieh mu, ³⁷ gha pa tawx ka Simiang Siyiex, mawh yung liah yieh atixgliah phwan mu, ³⁸ ka daux mawie koe loe mheen liah rheng mu, tawx gha son cie Simiang Siyiex atixgliah ra mu, ³⁹ ka daux la khankix koe loe mheen mai phwan yieh mu, tawx gha son cie Simiang Siyiex tixgliah tix mu, ⁴⁰ ka daux pui khankix tix mheen liah rheng kaux, tawx gha son cie Simiang Siyiex tixngoe ra kaux. ⁴¹ Mose tawx gha khankix ka Eliza cao giex kaing li son krax tan pa yaog sivoe Simiang Siyiex, awm lox pa hoik tawm Simiang Siyiex ka nawh. ⁴² Cie pui Isarelax khankix tix plak, pa hoik gwieh Mose ti tawx ka kix khaing pui pa hu puing naing, ⁴³ pa mawh cie pui hun khankix tix plak an, mawh yung loe sien loe mheen aliah rheng phwan yieh mu, ⁴⁴ mawie loe mheen liah rheng mu, ⁴⁵ la loe mheen mai phwan yieh mu, ⁴⁶ pui tix mheen liah rheng kaux, ⁴⁷ khaing daux cie pui Isarelax khankix tix plak, Mose deeh teei khaing daux tixphwan mu tix mu son kuceu khaing pui, khaing to brie mai ka ceu pui Lewix khankix, pa priex ka nyiex gox bwan man Simiang Siyiex, awm lox pa hoik tawm Simiang Siyiex ka Mose. ⁴⁸ Khaix an cao kaing naing pa kwang ka piang kru naing, cao kaing naing pa kwang pui kaing rheng mai cao kaing naing pa kwang pui kaing yieh khankix hoek dex Mose, ⁴⁹ mai kix ah nin ka Mose, "Siliex maix cao khankix, hoik teei carang pui naing pa ot greem pa kwang yix mai pui yix tix kaux kawx ang grai. ⁵⁰ Yam in yix hoik viex krax tan hoek ka Simiang Siyiex, ka pa hoik pon pui ku kaux, pa mawh kraung khri, ble, kong, jheep giien, beu yhaok mai maox soi khankix, sonsang taoh ju yix khaing phimap ka plak sivoe Simiang Siyiex." ⁵¹ Mawh kheu nan Mose mai cao giex kaing li Eliza rieb ti teei kraung khri khaing kix, pa hoik mawh kraung pa shiao khawmuik. ⁵² Khri pa tan kix ka Simiang Siyiex, khaing cao kaing naing pa kwang pui kaing rheng mai cao kaing naing pa kwang pui kaing yieh khawmuik koe tix mheen liah rheng aliah yieh tixphwan shekhe. ⁵³ Pui naing khankix hoik teei ti viex kraung khrai ka daux naing, son tokaux cao tix ku kaux. ⁵⁴ Mose mai cao giex kaing li Eliza rieb ti teei kraung khri khaing cao kaing naing pui kaing rheng mai cao kaing naing pui kaing yieh khankix mai viex laig ka daux nyiex gox bwan man bang kum son krax pa doh keud son pui Isarelax khankix ka plak sivoe Simiang Siyiex heue.

¹ Kawn praix Rubin mai kawn praix Gat khankix koe to brie tom haoh hun mai kix yaox haktiex Yaza mai haktiex Gilat, pa mawh dee mhawm rib riem son to brie tix, ² tom hoek ah nin ka Mose mai cao giex kaing li Eliza mai ka cao kaing pui hun khankix ah nin, ³ "Atarok, Dibun, Yaza, Nimarax, Heshabon, Elale, Shebam, Nibo mai Beon, ⁴ can haktiex pa hoik pex Simiang Siyiex ka sivoe pui Isarelax khankix, mawh haktiex pa mhawm sonsang eei to brie mai siliex maix khankix hoik koe to brie tom nie." ⁵ Kix ah nin, "Phan yix hoik mawh pa pon bwanson ka plak sivoe ngai maix, tawx haktiex in ka siliex maix khankix sonsang mawh sinngao cie yix mai paw viex yix luan ka plak toi rawm klawng Yawdan liak." ⁶ Mose ah nin ka kawn praix Gat mai kawn praix Rubin khankix. "Glang hu puxaik pex khankix daux naing, mawh sang ngawm pex ti ot tin lie? ⁷ Pex lai sang kieh rhawm rhi pui Isarelax khankix ang koe rhawm kwa rhawm cong, sonsang tiang kix ti hu ka daux haktiex pa hoik tawx Simiang Siyiex ka kix yuh ka mawh? ⁸ Keeing pex khankix hoik yuh nawh awm in, yam ploi aux kix hu khaing Kadeshabanax, sonsang jhak tix ka haktiex an. ⁹ Yam hu kix ka daux ngawd Eshakawlax mai khaix hoik hu kix jhak ka haktiex an, kix kieh rhawm rhi pui Isarelax khankix, ang koe rhawm kwa rhawm cong, son ang kix laig ka daux haktiex pa hoik tawx Simiang Siyiex ka kix. ¹⁰ Yam an krax song rhawm Simiang Siyiex hoik lih mai Nawh Cao tiextu ah nin, ¹¹ can pui pa kaoh khaing daux meung Ejiptux, pui pa hoik koe ju tixnga num haok ka piang, tak ang pon ti yaox ka haktiex pa hoik tiextu Aux ka Abraham, Icak mai Yakop tix kaux kawx, mawh kheu kix ang viex rhawm tix hawt khaix Aux, ¹² mawh ngie Kaliep kawn simex Yephunie pa mawh ceu pui Keniet mai Yawsux kawn simex Nun khankiex pa pon ti yaox, mawh kheu kiex ra kaux hoik hawt khaix Aux khawm rhawm rhi tix. ¹³ Krax song rhawm Simiang Siyiex lih ka piang pui Isarelax khankix mai Nawh Cao kieh kix vung viang ka daux tiag tixpon num, tom sidah hoik laux leeing cub pui pa yuh pa caox caig khankix ka plak sivoe ngai Simiang Siyiex. ¹⁴ Jhak heue, pex hoik kaoh tang keeing pex mai hoik baox pui pa koe phimap khankix, sonsang nie baox lih krax song rhawm Simiang Siyiex ka piang pui Isarelax khankix tom sigrien sigre. ¹⁵ Phan pex veeh ti hu khaing pa hawt grawng lawng khaix Nawh Cao, Nawh tak baox deeh prah pex ka daux tiag daux tu mai pex tak mawh pa yuh pui in khankix laux leeing." ¹⁶ Kix hoek dex nawh ah nin, "Yix tak sang sum kawg son to brie tin mai yuh veng son kawn nyawm khankix, ¹⁷ mai tokaux yix tak sang giex kraung naing tix mai hu ka plak sivoe pui Isarelax khankix, tom hoik viex yix kix hoek ka dee ot kix, viang mawh nin kawn nyawm yix khankix tak ot ka daux veng pa kaux pa cong, kheu jao kawn koe pui pa ot baoh haktiex in. ¹⁸ Yix tak ang lai deeh ing ka nyiex ma tix, glang bawg yam ang kawn praix Isarelax ku kaux nyang bax pon ti rieb ka sinngao ti. ¹⁹ Yix tak ang teei ti cie sinngao pa koe toi rawm klawng Yawdan ka plak an tau mai kix, mawh kheu hoik caw sinngao cie yix ti koe ka plak lih singai rawm klawng Yawdan." ²⁰ Mose ah nin ka kix, "Phan pex yuh nin, khre rien kraung naing cao tix, ka plak sivoe Simiang Siyiex son naing, ²¹ kieh can kru naing pex khankix, tiang ka plak toi rawm klawng Yawdan, ka plak sivoe Simiang Siyiex glang ang Nawh Cao nyang grheu pui koeng Nawh Cao khankix khaing sivoe Nawh, ²² phan haktiex an mawh pa hoik pex tix ka plak sivoe Simiang Siyiex, khaix an pex tak pon ti deeh ing mai pex tak ang lai mawh pa koe krax deuh phimap ka plak sivoe Simiang Siyiex mai ka plak sivoe ceu pui Isarelax khankix, haktiex in tak mawh sinngao cie pex ka plak sivoe Simiang Siyiex. ²³ Phan pex ang yuh nin, pex tak tawng ka hoik lud tix ka Simiang Siyiex mai phimap pex tak mawh pa hawt ka tokaux pex. ²⁴ Sum veng khankix son kawn nyawm pex mai kawg yung son yung pex khankix mai yuh awm gumlox pa lih khaing daux jheeh pex." ²⁵ Kawn praix Gat, khawm kawn praix Rubin khankix ah nin ka Mose, "siliex maix tak yuh awm lox pa tawm maix cao simiang. ²⁶ Kawn nyawm yix moeng yix khankix, cub yung yix mai to brie yix khankix khawmuik tak mawh pa ot ka daux veng haktiex Gilat tan. ²⁷ Viang mawh nan siliex maix khankix, tak sang tiang toi plak an tau mai kraung naing ku kaux son naing ka plak sivoe Simiang Siyiex mai puing naing awm pa ah cao Simiang ex." ²⁸ Mawh kheu nan Mose kok cao giex kaing li Eliza mai Yawsux kawn simex Nun mai cao kaing doeh ru pui Isarelax khankix. ²⁹ Mose ah nin ka kix, "Phan kawn praix Gat mai kawn praix Rubin khankix pa giex kraung naing ka plak toi rawm klawng Yawdan tau mai pex, sonsang puing naing ka plak sivoe Simiang Siyiex mai phan pex hoik pex ka haktiex an. Khaix an pex tak tawx haktiex Gilat mawh sinngao cie kix. ³⁰ Viang mawh nan phan kix tiang toi plak an mai ang tix giex kraung naing tau mai pex, kix tak pon ti cie haktiex Khanan ka daux sinax pex." ³¹ Kawn praix Gat mai kawn praix Rubin khankix deeh pawk lox ah nin, "Awm pa hoik ah Simiang Siyiex ka siliex maix khankix, mawh kheu nan yix tak yuh. ³² Yix tak tiang toi plak an mai giex tix kraung naing ka plak sivoe Simiang Siyiex, ka daux haktiex Khanan, viang mawh nan sinngao cie yix ka praok rawm klawng Yawdan plak in, tak mawh cie yix. ³³ Mose tawx meung Sihon cie simiang Amawrix mai meung Awgax cie simiang Bashan, khawm haktiex khawm veng khankix, pa hoik koe ka daux meung an khankix mai veng pa koe hawt vung viang mee haktiex an ka kawn praix Gat mai ka kawn praix Rubin khankix mai doeh ru Manashe kawn simex Yosiep tix plak. ³⁴ Kawn praix Gat, sum veng Dibun, veng Atarok mai veng Araw, ³⁵ veng Atarotsophan veng Yaza mai veng Yobehax, ³⁶ veng Betnimara mai veng Betharan mawh veng pa kaux pa cong khawmuik mai kix sum kawg yung khankix. ³⁷ Kawn praix Rubin sum veng Heshabon, veng Elale mai veng Kirayatin khankix, ³⁸ veng Nebaw veng Balameon, ceu kaux veng in kiex hoik mawh pa deeh loh ti mawh pa khraox mai veng Shibamax khankix. ³⁹ Ceu pui Makhirax kawn simex Manashe, hu ka veng Gilat mai rhim tix cie haktiex an mai grheu ceu pui Amawrix pa dawg ot daux haktiex an to. ⁴⁰ Mose tawx veng Gilat ka ceu pui Makhirax kawn simex Manashe mai kix ot tan heue. ⁴¹ Ya-irax kawn praix Manashe hu rhim tix cie yaong Gilat khankix mai kok ceu kaux an kix mawh Havotya-irax. ⁴² Nawba hu rhim tix cie veng Kenat mai nyiex yaong khankix mai kok mawh Nawba hawt ceu kaux tix heue.

¹ Inkix mawh krax lih hu ceu pui Isarelax khankix khaing meung Ejiptux, awm pa koe kru naing kix, greem tawm taix Mose mai Arun. ² Mose tiem ti deuh grawng pa sang hu kix awm lox tawm Simiang Siyiex. in mawh grawng krax pa jah kix tix lih hu. ³ Kix lih khaing veng Ramase ka daux khix tix kao phwan ngaix, khaix ngaix hoik pawie Pasakha, ceu pui Isarelax khankix lih hu mai ang tix lai ring ka plak sivoe ngai ceu pui Ejiptux khankix. ⁴ Yam an ceu pui Ejiptux tak sipaung kawn Ai tix khawmuik, pa hoik pah Simiang Siyiex ka daux sinax kix, ka siyiex krup kix kawx, Simiang Siyiex hoik ciyang uik. ⁵ Ceu pui Isarelax khankix, gah ti hu khaing veng Ramase mai bang baoh Sukot. ⁶ Kix deeh lih hu khaing baoh Sukot mai bang hawt veng Etham pa koe dex praok daux tiag daux tu. ⁷ Kix deeh gah tix khaing veng Etham mai deeh veeh ti hu ka plak veng Pihahirok pa koe see veng Balazephon mai bang ka veng Migadawlax. ⁸ Kix deeh gah ti hu khaing veng Pihahirot mai kix tiang daux rawm sigrit sigra raoh mai hoek ka daux tiag daux tu. Khaix hoik hu kix krax loe ngaix ka daux tiag daux tu Etham, kix bang hawt baoh Marax. ⁹ Kix deeh gah ti hu khaing Marax mai hoek ka yaong Elim, ka yaong Elim koe rawm keut ka kao ra mu mai khaox jhie yaong atixgliah gawng mai kix tom bang tan. ¹⁰ Kix deeh gah tix khaing yaong Elim mai hu bang hawt praok rawm sigrit sigra raoh Edom. ¹¹ Kix deeh gah tix khaing hawt praok rawm sigrit sigra raoh mai hoek ti bang ka daux tiag daux tu Zin. ¹² Kix deeh gah khaing daux tiag daux tu Zin mai bang hawt baoh Dawphaka. ¹³ Kix deeh gah tix khaing Dawphaka mai bang hawt baoh Alushax. ¹⁴ Kix deeh gah tix khaing baoh Alushax mai bang hawt baoh Rephidim, ka dee ang rawm nyaux koe son pui khankix, ¹⁵ kix deeh gah tix khaing baoh Rephidim mai bang ka daux tiag daux tu Sina. ¹⁶ Kix deeh gah tix khaing baoh daux tiag daux tu Sina mai bang hawt baoh Kibarok-hatava. ¹⁷ Kix deeh gah tix khaing baoh Kibarok-hatava mai bang hawt baoh Hazarok. ¹⁸ Kix deeh gah tix khaing baoh Hazarok mai bang hawt baoh Ritama. ¹⁹ Kix deeh gah tix khaing Ritama mai bang hawt baoh Rimonpariet. ²⁰ Kix deeh gah tix khaing Rimonpariet mai bang hawt baoh Libanax. ²¹ Kix deeh gah tix khaing yaong Libanax mai bang hawt baoh Risa. ²² Kix deeh gah tix khaing baoh Risa mai bang hawt baoh Kehalatax. ²³ Kix deeh gah tix khaing baoh Kehalatax mai bang hawt gawng Shepha. ²⁴ Kix deeh gah tix khaing gawng Shepha mai bang baoh Haradax. ²⁵ Kix deeh gah tix khaing Haradax mai bang hawt baoh Makhelok. ²⁶ Kix deeh gah tix khaing Makhelok mai bang hawt baoh Tahat. ²⁷ Kix deeh gah tix khaing Tahat mai bang hawt baoh Tarax. ²⁸ Kix deeh gah tix khaing Tarax mai bang hawt baoh Mitakha. ²⁹ Kix deeh gah tix khaing Mitakha mai bang hawt baoh Hashamawnax. ³⁰ Kix deeh gah tix khaing Hashamawnax mai bang hawt baoh Mawsarot. ³¹ Kix deeh gah tix khaing Mawsarot mai bang hawt baoh Beniyakan. ³² Kix deeh gah tix khaing Beniyakan mai bang hawt baoh Hawhagidagat, ³³ Kix deeh gah tix khaing Hawhagidagat mai bang hawt baoh Yobatax. ³⁴ Kix deeh gah tix khaing Yobatax mai bang hawt baoh Abunax. ³⁵ Kix deeh gah tix khaing Abunax mai bang hawt baoh Eziongeba. ³⁶ Kix deeh gah tix khaing Eziongeba mai bang ka daux tiag daux tu Zin, baoh Kadishax. ³⁷ Kix deeh gah tix khaing Kadishax mai bang hawt baoh gawng Hawrax pa koe ka mee haktiex Edom. ³⁸ Khaix hoik lih hu ceu pui Isarelax khankix khaing daux meung Ejiptux tixpon num, ka daux khix phwan tix ngaix, Arun cao giex kaing li haok ka piang gawng Hawrax, awm lox tawm Simiang Siyiex mai nawh yum tan. ³⁹ Nawh hoik koe ju tix yieh tixnga loe num, yam yum nawh ka piang gawng Hawrax, ⁴⁰ simiang Arat ceu pui Khanan pa ot ka plak seh haktiex Khanan, mhong ka hoek pui Isarelax khankix. ⁴¹ Pui Isarelax deeh gah tix khaing gawng Hawrax mai bang hawt baoh Zalamawnax. ⁴² Kix deeh gah tix khaing Zalamawnax mai bang hawt baoh Punon. ⁴³ Kix deeh gah tix khaing Punon mai bang hawt baoh Awbot. ⁴⁴ Kix deeh gah tix khaing Awbot mai bang hawt baoh Iyeabarim hawt mee haktiex Mawbax. ⁴⁵ Kix deeh gah tix khaing Iyeabarim mai bang hawt baoh Dibun-gat. ⁴⁶ Kix deeh gah tix khaing Dibun-gat mai bang hawt baoh Alamon-dibalatin. ⁴⁷ Kix deeh gah tix khaing Alamon-dibalatin mai bang piang gawng Abarim pa koe ka sivoe gawng Nebaw. ⁴⁸ Kix deeh gah tix khaing piang gawng Abarim mai bang ka daux lung Mawbax hawt rawm klawng Yawdan ka toi veng Yerikho. ⁴⁹ Kix bang hawt rawm klawng Yawdan, jah ka veng Betyesimot tom hoek ka veng Abelashitin ka daux lung haktiex Mawbax heue. ⁵⁰ Simiang Siyiex sikah ka Mose ka daux lung Mawbax hawt rawm klawng Yawdan pa koe plak toi veng Yerikho ah nin. ⁵¹ "Krai ah nin ka pui Isarelax khankix, yam hoik tiang pex rawm klawng Yawdan mai laig ka daux haktiex Khanan, ⁵² pex tak grheu pui pa ot baoh haktiex an khawmuik, khaing plak sivoe ngai pex mai yuh can ceu pa saik kix ka simaox khankix mai yuh riang grang pa hoik raug kix khawmuik mai yieh ti tik nyiex meeig kix pa koe dee lhaong laux lak pak leeing khawmuik, ⁵³ pex tak grheu pui pa ot ka daux haktiex an khankix to mai ot ka daux haktiex an. Kheu Aux hoik tawx haktiex an mawh sinngao cie pex. ⁵⁴ Pex tak gwieh haktiex an hawt awm pa koe doeh nyiex ma pex ka krax pa yuh nieb, son pa hun pui, pex tak tawx sinngao pa nie mai son pa tux pui, pex tak tawx sinngao pa iak, son pui ku kaux tak pon awm pa caw nieb cie kix, pex tak pon ti cie sinngao an awm pa koe doeh ru keeing pex khankix. ⁵⁵ Phan pex ang grheu pui pa ot baoh haktiex an, pui pa kawn prah pex khankix, tak mawh krix ka daux ngai pex mai mawh kat lawm son paw pex mai kix tak tuktiaktukte ka pex, ka daux haktiex dee ot pex. ⁵⁶ Lheu khaing an awm pa keud Aux ti sang yuh ka piang kix, tak lih ti yuh ka piang pex heue."

¹ Simiang Siyiex ah nin ka Mose, ² "Tawx lox maix ka pui Isarelax khankix ah nin, yam hoik hoek pex ka daux haktiex Khanan, in mawh haktiex sinngao pa sang pon pex, pa mawh mee haktiex Khanan. ³ Daog haktiex plak seh, jah khaing daux tiag Zin dex hawt mee haktiex Edom, mee haktiex plak seh jah khaing taoh rawm sigrit sigra kih ka plak lih singaix, ⁴ mai deeh gah tix bleeh ka praok plak seh ton gawng Akarabim mai deeh sitoe ti hu ka plak yaong Zin mai bleeh ka plak seh yaong Kadeshax Banax mai deeh sitoe ti hu ka yaong Hazaadax mai deeh bleeh ka yaong Azamon, ⁵ deeh veeh ti khaing yaong Azamon mai hawt ka kawn klawng Ejiptux, tom hoek sidah hawt rawm sigrit sigra. ⁶ "Son mee haktiex plak klip singaix, mawh rawm sigrit sigra ting in, tak mawh mee haktiex pex, ka plak klip singaix. ⁷ Mee haktiex plak laong, jah khaing rawm sigrit sigra ting, pex tak mhai ti deuh rhoi mee hawt ka gawng Hawrax, ⁸ jah khaing gawng Hawrax, pex tak mhai ti deuh rhoi mee hoek ka diang krax laig ka veng Hamat mai phlat hu ka plak yaong Zedax, ⁹ mai deeh sitoe ti hu ka plak yaong Zipharon, tom sidah hoek hawt yaong Hazaraenan. In tak mawh mee haktiex pex plak laong. ¹⁰ Pex tak mhai ti deuh mee haktiex plak lih singaix, jah khaing yaong Hazaraenan, tom hoek ka yaong Shephan. ¹¹ Mee haktiex in tak lih khaing yaong Shephan mai hoek ka yaong Ribalax, pa koe plak lih singaix yaong A-inax, deeh hu plak jee mai hoek ka plak lih singaix ka rawm nhawng Ginesiet. ¹² Mee haktiex in tak hu hawt praok klawng Yawdan mai sidah ka rawm sigrit sigra Kih. In tak mawh haktiex pex tau mai mee haktiex hawt vung viang khankix heue." ¹³ Mose tawx lox ka pui Isarelax khankix ah nin, "In mawh haktiex sinngao pa sang pon pex ti cie ka daux krax pa yuh nieb, awm pa hoik tawm Simiang Siyiex ka doeh ru pex dim ceu mai tix plak. ¹⁴ Mawh kheu doeh ru Rubin mai doeh ru Gat, awm krax pa koe doeh nyiex ma keeing kix, hoik pon rieb ti cie sinngao cie kix mai doeh ru Manashe tix plak, hoik pon ti cie ka sinngao cie kix. ¹⁵ Doeh ru an ra cub mai doeh ru an tix plak, hoik pon rieb ti cie sinngao kix ka praok plak in khaing rawm klawng Yawdan, toi veng Yerikho ka plak lih singaix heue." ¹⁶ Simiang Siyiex ah nin ka Mose, ¹⁷ "In khankix mawh ceu kaux pui pa sang gwieh tix tawx haktiex sinngao ka daux sinax pex, an mawh cao giex kaing li Eliza mai Yawsux kawn simex Nun. ¹⁸ Maix tak laug cao kaing tix kaux khaing doeh ru kix ku cub, sonsang teem ka kiex. ¹⁹ In mawh ceu kaux pui khankix pa sang laug maix, khaing daux doeh ru Yudax, tak mawh Kaliep kawn simex Yephunie. ²⁰ Khaing daux doeh ru Simion, mawh Shemoelax, kawn simex Amihut. ²¹ Khaing daux doeh ru Binyamin mawh Elidat, kawn simex Khisalon. ²² Cao kaing tix kaux khaing daux doeh ru Dan, mawh Bukhix kawn simex Yawgalix. ²³ Khaing daux kawn simex Yosiep, cao kaing tix kaux khaing doeh ru Manashe, mawh Hanelax kawn simex Ephot. ²⁴ Cao kaing tix kaux khaing daux doeh ru Epharem, mawh Kemoelax kawn simiex Shiphatan. ²⁵ Cao kaing tix kaux khaing daux doeh ru Zebulon, mawh Elizaphan kawn simex Panat. ²⁶ Cao kaing tix kaux khaing daux doeh ru Issakha, mawh Palatelax kawn simex Azan. ²⁷ Cao kaing tix kaux khaing daux doeh ru Asha, mawh Arihut kawn simex Shelawmix. ²⁸ Cao kaing tix kaux khaing daux doeh ru Napthalix, mawh Pedahelax kawn simex Amihut." ²⁹ Inkix mawh pui pa hoik tawm Simiang Siyiex lox sonsang gwieh kix tix tawx sinngao daux sinax pui Isarelax khankix, ka daux haktiex Khanan heue.

¹ Simiang Siyiex sikah ka Mose ka daux lung Mawbax, hawt rawm klawng Yawdan, ka plak toi veng Yerikho ah nin. ² "Tawx lox maix ka pui Isarelax khankix mai kieh kix tawx veng ka ceu pui Lewix, sonsang ot kix ka daux, khaing haktiex sinngao cie tix mai tawx haktiex pa koe hawt vung viang veng an ka ceu pui Lewix khankix. ³ Veng an khankix mawh sonsang ot kix ka daux mai haktiex pa koe hawt vung viang veng, tak mawh haktiex dee eei kix mawie, yung, to brie khankix mai son dee deuh kix kraung khawmuik. ⁴ Haktiex hawt vung viang pa sang tawx pex ka ceu pui Lewix, tak kieh vieh khaing ka plak praix, hawt vung viang guh veng tix rheng sawk. ⁵ Tiag plak praix veng, ka praok plak lih singaix ra rheng sawk, ka plak seh ra rheng sawk, ka plak klip singaix ra rheng sawk mai ka plak laong ra rheng sawk, veng tak mawh pa koe ka daux sigreung. In tak mawh haktiex son veng cie kix. ⁶ Khaing ka daux sinax veng pa sang tawx pex ka ceu pui Lewix khankix, tak tat ti deuh veng liah veng son dee peung pan pui pa loe ti pah pui tix klawd ka. Lheu khaing veng inkix, tak baox tawx veng tixpon ra veng ka kix. ⁷ Veng pa sang tawx maix ka ceu pui Lewix khankix, tak mawh tixpon daix veng. Maix tak tawx in khankix tau mai haktiex hawt vung viang khawmuik ka kix. ⁸ Veng pa sang tawx maix khankix, tak mawh khaing daux cie pui Isarelax khankix, khaing daux doeh ru pa nie lheu pon maix tak teei ti tawx tom nie mai khaing daux doeh ru pa iak pon maix tak teei ti tawx iak, ku cub tak tawx veng cie tix, tiblah ka ceu pui Lewix, khaing daux sinngao pa pon kix ku cub heue. ⁹ Simiang Siyiex ah nin ka Mose, ¹⁰ "Krai ka pui Isarelax khankix, yam tiang pex rawm klawng Yawdan mai hoek ka daux haktiex Khanan, ¹¹ Khaix an pex tak tat ti deuh veng khankix son tix, sonsang mawh veng pa to pui pa lud loe tix pah pui mai hoek peung tix klawd ka. ¹² Veng an khankix tak mawh veng pa sang hoek pui pa lud loe ti pah pui tix peung, son ang pui pa pah pui an sang pon ti yum ka cao pa pawk bix, tom hoek bawg yam cung nawh ka plak sivoe cub caw pui hun khankix, ka daux pa prawng ka. ¹³ Veng pa sang tawx pex khankix, son pui pa hoek to ti peung koe liah veng. ¹⁴ Pex tak laug veng loe veng ka plak lih singaix rawm Yawdan mai loe veng ka daux haktiex Khanan, pa sang peung kix kah. ¹⁵ Veng inkix liah veng, tak mawh dee peung pui lud tix pah pui, son pui Isarelax, son nyo sinie mai son pui pa hoek ot tivud ticu daux sinax pex, sonsang pon kix tix klawd kah. ¹⁶ "Phan nawh tawk nawh tom yum ka rhiem, nawh mawh pa pah ka pui. Cao pah an tak hoek krax yum. ¹⁷ Phan nawh tawk nawh tom yum ka simaox pa koe daux taix tix, nawh mawh pa pah ka pui. Cao pa pah an tak hoek krax yum. ¹⁸ Phan nawh tawk nawh tom yum ka khaox giex tix, nawh mawh pa pah ka pui. Cao pa pah an tak hoek krax yum. ¹⁹ Cao pa pawk bix son nham tokaux pui yum an, phan yaox ka cao pa pah pui an yam mawx ang ah tak pon ti deeh pah ka nawh. ²⁰ Phan nawh nyhot nawh ka daux pa koeng tix ang ah, yam jawm tix khwang nawh tom yum ka tix ceuceu ang ah, ²¹ phan tawk nawh tom yum ka taix tix, ka daux pa koe rhawm koeng tix ka nawh, nawh mawh pa pah pui yum. Cao pa pawk bix son nham tokaux pui yum an, phan yaox ka cao pa pah pui an yam mawx ang ah, tak pon ti deeh pah ka nawh. ²² "Phan ang mawh nan, phan nawh nyhot mai ang tix koe rhawm koeng mai khwang nawh ka tix ceuceu daux pa ang tix jawm ang ah, ²³ mai phan nawh khwang ka simaox yum yuh pui tix kaux, ka daux pa ang nawh yaox ka pui an mai ang mawh pui koeng nawh ka mai ang su ti yuh ka nawh ang ah, ²⁴ cub pui hun tak prawng sinax cao pah pui mai cao pa pawk bix nham tix, awm pa koe lox lai beenli. ²⁵ Cub pui hun tak ploi ka cao pa pah pui an, khaing daux tawm taix cao pa pawk bix nham tix, tak deeh tawx nawh hu ka veng dee peung pui to tix klawd ka. Nawh tak ot tan, tom sidah yum cao giex kaing li pa ting, pa hoik groi kix rawm bee pa singax singeh ka piang. ²⁶ Phan cao pa pah pui an lih plak praix ka mee veng khaing pa hoik tat kix ti deuh, sonsang pon nawh ti klawd kah, ²⁷ cao pa pawk bix nham, phan yaox nawh ka plak praix mee veng pa hoik tat kix ti deuh son pui to ti klawd mai pah nawh yum, cao pa pah tak ang koe phimap. ²⁸ Grawh grawng nawh, nawh tak caw ti ot ka daux veng pa peung pui to tix klawd, tom sidah yum cao giex kaing li an, khaix hoik yum cao giex kaing li pa ting cao pa pah pui an tak deeh pon ti ing ka haktiex cao tix. ²⁹ "In mawh gumlox beenli mai lox tat jhawm prawng, son doeh ru pex khankix mai ka can dee ot pex khankix, ³⁰ Can pui pa pah ka pui, pa mawh cao pa hoik pah pui tak pah nawh yum ka daux pa koe mhai ruk, viang mawh nan phan mhai ruk koe tix kaux khaing tak ang pon ti pah nawh yum. ³¹ Lheu khaing an pex tak ang pon ti teei mau deeh taoh ka nawh, tix ceu kawx son ju cao pa pah pui pa koe phimap krax yum, mawh kheu nawh tak yaox ti yum tete. ³² Pex tak ang pon teei mau pa deeh taoh ka pui pa hoik pon to ti klawd ka daux veng peung pui to, sonsang deeh ing ot ka daux haktiex cao tix, sivoe ang cao giex kaing li pa ting nyang yum. ³³ Pex tak ang pon ti kieh haktiex ot tix seeing brai. Mawh kheu nham mawh pa kieh haktiex seeing brai, lheu khaing nham nawh pa deeh jah son an ang koe tix ceu kawx pa pon kieh haktiex singax. ³⁴ Mawh kheu nan paw kieh haktiex ot pex seeing brai ka daux sinax dee ot Aux. Mawh kheu Aux mawh Simiang Siyiex pa ot ka daux sinax pui Isarelax khankix heue."

¹ Cao kaing cao kap nyiex ma pui Gilat kawn simex Makhirax pa mawh kawn simex Manashe, khaing daux nyiex ma kawn simex Yosiep khankix, hoek ka plak sivoe Mose mai pa mawh cao kaing ru pui Isarelax, ² Kix ah nin "Simiang Siyiex hoik tawm lox ka cao Simiang ex kieh yuh nieb mai gwieh haktiex sonsang tawx sinngao, son pui Isarelax khankix mai cao Simiang ex hoik pon lox pa tawm Simiang Siyiex, sonsang tawx sinngao puxaik yix, Zelophat ka kawn bun nawh khankix. ³ Phan kix mawh pa mex ka kawn simex doeh ru tang ru daux pui Isarelax khankix, sinngao kix tak teei lih khaing doeh ru keeing ex mai deeh naok ka piang sinngao doeh ru pa mex kix, mawh kheu nan sinngao yix tak mawh pa dieh hu khaing yix. ⁴ Yam hoek num Jubili pui Isarelax khankix, sinngao kix tak mawh pa deeh naok tix ka piang sinngao doeh ru pa mex kix, mawh kheu nan tak teei sinngao kix lih khaing sinngao cie doeh ru keeing ex sax." ⁵ Mose krai awm lox tawm Simiang Siyiex ka pui Isarelax khankix ah nin, "Can lox pa krai ru kawn simex Yosiep mawh pa Khaw pa caw. ⁶ In mawh lox pa tawm Simiang Siyiex, son Grawng pa dex mai kawn bun Zelophat pa ah nin.Kieh kix mex ka pui pa simie kix tix mex, viang mawh nan kix tak yaox ti mex ka daux doeh ru nyiex ma keeing tix khaing. ⁷ Mawh kheu nan sinngao pui Isarelax khankix, tak ang pon ti luan khaing daux tawm taix doeh ru mawx ru an. Mawh kheu pui Isarelax khankix, tak priex sinngao doeh ru keeing tix. ⁸ Bun pa pon ti cie sinngao, ka daux doeh ru pui Isarelax khankix ku cub, tak yaox ti mex khaing daux doeh ru keeing tix, sonsang pon nawh ti cie sinngao keeing tix. ⁹ Mawh kheu nan sinngao pon kix, tak ang lai yaox ti gah khaing daux tawm taix doeh ru kix tix cub mai tix cub, kix tak priex rien ka sinngao cie cao tix" ¹⁰ Awm lox pa hoik tawm Simiang Siyiex ka Mose, kawn bun Zelophat khankix hawt ti yuh awm an. ¹¹ Kawn bun Zelophat mawh Mala, Tiraza, Hawgala, Milakha mai mex Nawa mawh kawn simex puxke keeing kix. ¹² Kix teei ti mex daux doeh ru Manashe kawn simex Yosiep mai sinngao kix tak kaux ka daux doeh ru nyiex ma keeing kix khawmuik. ¹³ In mawh been lox tat jhawm prawng pa hoik tawm Simiang Siyiex ka pui Isarelax khankix, ka daux tawm taix Mose ka daux lung haktiex Mawbax, hawt rawm klawng Yawdan, pa koe ka plak toi veng Yerikho heue.