Nehemiah

Nehemiah

¹ In mawh gumlox krai Nehamix kawn simex Hakhalix heue.Yam kwang simiang Atazarit haktiex tixnga num tix num ka daux khix Khisalix, mawh yam ot aux ka daux nyiex haw veng Shushan, ² yam an Hananix pa mawh puxaik aux tix kaux, hoek bleeh tau mai pui khankix khaing haktiex Yudax; mai aux chawk kix ka grawng pui Yudax pa hoik glawd tiblah mai pa glawd khaing pa giex laung tix khankix mai grawng veng Yerusaliem heue. ³ Kix ah nin ka aux, "Can pui pa glawd khaing pa giex laung khankix, ka daux kien haktiex an, koe krax pa kied kha rhawm mai ka lox sibriem heue. Guh veng Yerusaliem kawx hoik grhup, siviex veng khankix kawx hoik proe ka ngu heue. ⁴ Mawh kheu nan yam hoik mhong aux lox ankix, aux ngawm ti yiiem doe mai laux rhawm tom hoik kied rheung singaix; aux twah pa ih mai rawg Bwan ka plak sivoe Siyiex pa ot meung raoma heue. ⁵ Aux rawg Bwan ah nin, "O Simiang, pa mawh Siyiex raoma Siyiex pa kied ting lhaong, pa koe sibrawm pa lhat graung eue, Maix Cao mawh pa priex pa jhung ka gumlox sijax mukheu tix mai caux rhawm ka pui ankix pa moh ka Maix Cao mai pa hawt ti yuh awm pa koe gumlox pingnyap Maix Cao khankix heue. ⁶ Yuh bwanson kieh yhaok Maix Cao mawh pa nghiet mai kieh ngai Maix Cao mawh pa simi ti jhak, ka lox rawg Bwan kawncau Maix plak sivoe Maix Cao yam in ku singaix, son kawn praix ceu pui Isarelax, pa mawh kawncau Maix khankix mai aux khyox khaw krai doh ka grawng phimap kawn praix ceu pui Isarelax khankix, pa hoik lud ka Maix Cao heue. Cub nyiex ma keeing aux mai khawm tokaux cao aux hoik lud heue. ⁷ Yix hoik yuh ceu pa kied caox ka Maix Cao mai ang lai priex rien ka gumlox pingnyap mai gumlox beenli mai lox tat jhawm prawng pa hoik tawm hoik deuh Maix Cao ka kawncau Maix Mose heue. ⁸ Deeh doh keud ka gumlox pa hoik tawm Maix Cao ka kawncau Maix Mose, pa ah nin, "Phan pex ang kaux sijax Aux kieh pex prung prang ka daux sinax pui tang ceu, ⁹ viang mawh nan phan pex deeh veeh tix hoek ka Aux mai priex ti hawt gumlox pingnyap Aux mai hawt ti yuh ankix, viang pex hoik mawh pa grheu ti hu dee pa kied singai khaing greem raoma kawx, Aux tak kraix khrawm pex hoek khaing tan mai deeh viex pex hoek ka dee pa hoik laug Aux ti deuh, sonsang kaux cong min ceu kaux Aux heue. ¹⁰ Kix mawh kawncau mau soi Maix Cao mai ceu pui Maix Cao pa hoik taoh Maix Cao ti teei ka sibrawm pa kied ting lhaong Maix Cao, mai riang rao plawng taix Maix Cao heue. ¹¹ Siyiex eue, yuh bwanson daong yhaok Maix Cao nghiet ka lox bwan rawg kawncau Maix Cao mai lox bwan rawg kawncau mau soi Maix Cao khankix, pa koe krax lhat graung ka min ceu kaux Maix Cao mai tawx krax haok hwan ka kawncau Maix Cao ka daux in singaix mai tawx kix pon krax pa caux rhawm, ka plak sivoe ngai pui in liak. Grawh grawng nawh aux hoik mawh cao pa giex kawk nyaux simiang heue.

¹ Yam kwang simiang Atazarit ka haktiex tixnga num tix num ka daux khix nisan mai aux teei rawm plix siiet deuh ka sivoe ngai nawh mai tawx ankix ka simiang heue. Glang ka in ang sax koe krax laux rhawm plak sivoe nawh tix bawg kawx heue. ² Mawh kheu nan simiang ah nin ka aux, "Maix ang tie koe krax saux krax ngia kawx, kheu patix ngai baoh maix lai ngeem yuh nan lie? In ang tie mawh tidtix, mawh pa laux rhawm maix heue. "Khaix an aux hoik koe krax lhat graung, ³ mai aux deeh ah nin ka simiang, kieh simiang lang ju heue. Miex hoik laux leeing dee koe simeeig keeing aux khankix mai siviex veng khankix kawx hoik gleeing ka ngu, ngai baoh aux lai ang ngeem yuh ka mawh lie?" ⁴ Khaix an simiang ah nin ka aux, "Mawh sang mhaing maix ceu patix?" Mawh kheu nan aux hoik rawg bwan ka Siyiex raoma heue. ⁵ Aux ah nin ka simiang, "Phan an mawh pa khaw rhawm simiang mai phan kawncau maix hoik pon krax pa caux rhawm ka plak sivoe ngai Maix, aux rawg maix ploi ti hu ka haktiex Yudax, ka daux veng dee koe simeeig keeing aux khankix, sonsang deeh pon cox sum aux ankix heue." ⁶ Yam an simiang chawk aux ah nin, Laux simiang kawx ngawm praok nawh, "Mawh sang rheeng krax hu maix miex grheeng? sang deeh hoek yam mawx lie? Mawh kheu nan, an hoik mawh pa khaw rhawm simiang sonsang ploi aux hu mai aux hoik tat ti deuh bawg yam heue. ⁷ Lheu khaing an aux ah nin ka simiang, "Phan in mawh pa khaw rhawm simiang, tawx aux viex lai son cao kwang kien baoh haktiex toi rawm klawng plak klip singaix khankix, sonsang pon tawx kix akhwang ka aux sonsang pon tiang aux ti hu tom hoek ka haktiex Yudax, ⁸ mai baox tiiem ti tawx lai tix pheen ka Asapha pa mawh cao pa pau daux nong cie simiang son tak sang tawx nawh khaox an khankix ka aux, pa sang yuh khaox lat siviex tab nyiex bwan pa sitoe tix ka guh veng mai nyiex pa sang ot aux, awm koe plawng taix pa mhawm Siyiex piang aux, simiang kawx tawx ankix ka aux heue." ⁹ Khaix an aux hu ka cao kwang kien baoh haktiex toi rawm klawng mai plak klip singaix mai tawx lai pa tiiem simiang ka kix heue. Yam in simiang ploi cao kaing naing cub kru naing khankix mai pui naing brung khankix hu tau mai aux heue. ¹⁰ Yam mhong Sanbalat ceu pui Horonix mai Tobix cao kaing ceu pui Amon khankix ka grawng an, kix kied sung sang rhawm ka hoek pui tix kaux sawg ti yuh pa mhawm son kawn praix ceu pui Isarelax khankix heue. ¹¹ Mawh kheu nan aux hoek ka veng Yerusaliem mai ot tan loe ngaix heue. ¹² Khaix an aux yaog ti kaoh yam ponsawm khawm pui tiblah pa ot tau mai aux mai aux ang krai pui tix kaux kawx mhong ka ceu pa sau Siyiex ka daux rhawm aux, son kaing pa sang yuh tix ka daux veng Yerusaliem heue. Lheu khaing tobrie pa brug aux, tobrie tang mu ang lai koe mai aux heue. ¹³ Aux lih hu plak praix yam ponsawm, ka siviex ngawd mai hoek ka rawm siyawng mai ka siviex seeing, dee tik pui pa seeing brai khankix mai cied ti yaox ka guh veng Yerusaliem pa hoik grhup hoik groing mai siviex khankix pa hoik gleeing ka ngu heue. ¹⁴ Khaix an aux deeh hu ka plak siviex rawm keut mai ka dung rawm simiang, viang mawh nan krax sang hu brung cie aux ang lai koe heue. ¹⁵ Mawh kheu nan ka daux ponsawm, aux lih hu ka plak siviex daux ngawd mai cied ti yaox ka guh veng, khaix an aux deeh veeh tix plak khaix mai laig ka daux siviex daux ngawd mai ing ka daux krax an heue. ¹⁶ Cao pa kwang veng khankix ang tawng ka dee hu aux mai ceu pa yuh aux khankix, kheu aux ang nyang krai grawng inkix, ka pui Yudax mai ka cao giex kaing li, ka cub simiang, ka cub cao pa kwang veng mai ka pui tang kaux khankix, pui mawx pa sang yuh ka kaing heue. ¹⁷ Khaix an aux ah nin ka kix, "Pex hoik yaox krax pa kha rhawm ex in mai veng Yerusaliem hoik grhup groing mai grawng pa hoik gleeing siviex veng khankix ka ngu, hoek heue mai kieh ex deeh sum guh veng Yerusaliem, sonsang ang lai koe lox sibriem ka ex heue." ¹⁸ Aux krai grawng koe riang rao plawng taix Siyiex tau mai aux mai grawng gumlox pa mhawm simiang pa hoik krai nawh ka aux heue. Khaix an kix ah nin, "Ex kaox mai sum." Kix yaog taix yaing caong paox tix sonsang yuh ka kaing jhaw ceu pa mhawm in heue. ¹⁹ Viang mawh nan yam mhong Sanbalat ceu pui Horonix mai Tobix, pa mawh cao kaing ceu pui Amon mai Geshem ceu pui Arap khankix ka grawng an, kix hoik nyiah mai sibriiem ka ex ah nin, "Pa yuh pex in mawh ceu patix lie? mawh sang deeh tieh feen pex ka simiang lie?" ²⁰ Mawh kheu nan aux deeh pawk lox kix ah nin, "Siyiex meung raoma tak sang tawx akhwang yix yuh tom hoik heue. Yix pa mawh kawncau Nawh khankix, tak sang deeh sum, viang mawh nang phan mawx pex ang koe nyum ka daux veng Yerusaliem mai ang koe akhwang ti mhaing tidtix.

¹ Yam an pa mawh Eliaship cao giex kaing li pa ting yaog ti kaoh tau mai paox pa giex kaing li khankix, pa mawh cao giex kaing li mai sum Siviex Yung, kix hoik yuh singax mai hoik jung ka plah siviex, kix cox sum guh veng singai hoek ka nyiex lhaong Hame-a tom hoek ka nyiex lhaong Hananelax, awm pa hoik ap tix kham cox khankix heue. ² Plak khaix Eliaship mawh pui veng Yerikho khankix pa cox sum heue. Khaix kix mawh Zakurax kawn simex Imarix pa cox sum heue. ³ Cub kawn praix Hasenax khankix hoik cox sum siviex kah, kix hoik sau ti deuh khaox lat nawh khankix mai plah siviex mai sau siviex mai khawm jhong siviex heue. ⁴ Khaix kix tom mawh Maramot kawn simex Uriyax, pa mawh kawn simex Koza, pa cox tix sum heue. Khaix kix tom mawh Meshulam, kawn simex Berokhix, kawn simex Meshazabelax pa cox ti sum, khaix kix tom mawh Zadok kawn simex Banax pa hoik cox sum heue. ⁵ Khaix kix tom mawh pui veng Teko pa cox sum, viang mawh nan pui kix pa koe min khankix, hoik ang sau riang rao klip kix sonsang yuh kaing cie cao simiang kix heue. ⁶ Khaix an Yoyadax kawn simex Pasha mai Meshulam kawn simex Beshodeyax pa cox sum siviex prim, kix hoik sau ti deuh khaox lat nawh khankix mai plah siviex mai saw mai khawm jhong siviex heue. ⁷ Khaix kix tom mawh Malatix pui veng Gebom mai Yadom pui Meronot mai khawm pui Gebom mai pui Mizapa khankix pa cox sum tom hoek ka nyiex ot cao kwang veng baoh haktiex toi rawm klawng plak klip singaix heue. ⁸ Khaix kix tom mawh Uzelax kawn simex Hahayax pa mawh pa chix yuh kraung mau khri tix kaux pa cox sum heue. Khaix nawh tom mawh Hananix pa mawh cao yuh sidah bhawng tix kaux pa cox sum mai kix hoik yuh veng Yerusaliem kaux cong tom hoek ka dee vieh guh veng heue. ⁹ Khaix kix tom mawh Rephayax kawn simex Harax, pa mawh cao pa kwang baoh haktiex veng Yerusaliem tix plak, pa cox tix sum heue. ¹⁰ Khaix kix tom mawh Yedayax kawn simex Harumap pa cox ti sum can pa koe ka plak sivoe nyiex cao nawh heue. Khaix nawh, tom mawh Hattux kawn simex Hashabanix pa cox khre ti sum heue. ¹¹ Malakhiyax kawn simex Harim mai Hashut kawn simex Pahat-mawbax pa cox sum tang baux mai khawm nyiex lhaong rong ngu khankix heue. ¹² Khaix nawh tom mawh Shalum kawn simex Halohat pa mawh cao pa kwang baoh haktiex veng Yerusaliem tix plak, cox ti sum tau mai kawn bun nawh khankix heue. ¹³ Hanum mai can pui pa ot ka daux veng Zanaw cox sum siviex ngawd heue. Kix hoik sum ankix mai sau ti deuh khaox plah siviex khankix, tau mai saw siviex khawm jhong siviex khankix mai hoik cox ti sum guh veng pa lang tix rheng sawk, tom hoek ka siviex seeing heue. ¹⁴ Malakhiyax kawn simex Rekhap pa mawh cao pa kwang baoh haktiex veng Biethakharem hoik cox sum siviex seeing heue. Nawh cox sum siviex an mai sau khaox plah siviex khankix tau mai saw siviex mai khawm jhong siviex heue. ¹⁵ Shalum kawn simex Kholahozie pa mawh cao pa kwang baoh haktiex veng Mizapa, hoik cox ti sum Siviex Rawm Keut heue. Nawh hoik sum ankix mai hoik sau braux mai hoik sau ti deuh khaox plah siviex khankix, tau mai saw siviex mai khawm jhong siviex mai hoik cox guh veng rawm dung Silawng pa koe hawt sipeem tai simiang tom hoek ka glawk bawng pa lih hu khaing veng Davit heue. ¹⁶ Khaix nawh tom mawh Nehamix kawn simex Azabuk, pa mawh cao pa kwang baoh haktiex veng Bietzurax tix plak pa cox ti sum tom hoek ka baoh dee koe sivoe simeeig Davit mai tom hoek ka rawm dung pa yuh pui khankix mai tom hoek ka nyiex pui kwa rhawm khankix heue. ¹⁷ Khaix nawh tom mawh cub pui Lewix khankix, Rehum kawn simex Banix pa cox ti sum, khaix nawh tom mawh Hashabix pa mawh cao kwang baoh haktiex veng Kilax tix plak, pa cox ti sum baoh haktiex nawh heue. ¹⁸ Khaix nawh tom mawh puxaik kix khankix, Bave kawn simex Henadat pa mawh cao kwang baoh veng Kilax pa kawn deuk an tix plak, pa cox ti sum heue. ¹⁹ Khaix nawh tom mawh Ezarax kawn simex Yeshuax, pa mawh cao kwang veng Mizapa pa cox ti sum ka tix baux pa koe ka plak sivoe krax haok ka plak nyiex krao kraung naing dee kawk daog veng heue. ²⁰ Khaix nawh tom mawh Baruk kawn simex Zabie sau riang rao ti cox sum ka tix baux, jah khaing dee kawk veng tom hoek ka siviex nyiex cao giex kaing li ting Eliaship heue. ²¹ Khaix nawh tom mawh Meramot kawn simex Uriyax pa mawh kawn simex Koza pa cox ti sum ka tix baux, jah khaing diang siviex nyiex Eliaship tom hoek dee sidah daog nyiex Eliaship heue. ²² Khaix nawh tom mawh cub cao giex kaing li pui ot daux lung khankix pa cox ti sum heue. ²³ Khaix an tom mawh Binyamin mai Hashup khankix pa cox sum baoh pa koe plak sivoe nyiex kix heue. Khaix kix tom mawh Azarix kawn simex Meseyax pa mawh kawn simex Ananix pa deeh cox ti sum hawt baoh nyiex nawh heue. ²⁴ Khaix nawh tom mawh Bennue kawn simex Henadat pa cox ti sum tix baux, jah khaing nyiex Azarix tom hoek ka daog veng dee kawk guh veng heue. ²⁵ Palalax kawn simex Usie cox ti sum ka dee kawk daok veng mai nyiex lhaong, jah ka nyiex lhaong simiang pa koe hawt biang nyiex pau yam heue. Khaix nawh tom mawh Pedayax kawn simex Parot pa cox ti sum heue. ²⁶ Khaix an pa kham ti yuh kaing jhaw nyiex bwan Siyiex, kix pa ot piang gawng Ophelax cox tom hoek sivoe siviex rawm pa koe plak lih singaix mai ka see dee jawn ti lih khaing nyiex lhaong heue. ²⁷ Khaix kix tom mawh pui veng Teko khankix pa cox ti sum tix baux, pa koe plak sivoe nyiex pau tap pa kied ting lhaong tom hoek ka guh veng Ophelax heue. ²⁸ Ka plak piang siviex brung tom mawh cao giex kaing li khankix, pa cox ti sum pa koe ka plak sivoe nyiex cao kix heue. ²⁹ Khaix kix tom mawh Zadok kawn simex Imerax pa cox ti sum ka pa koe plak sivoe nyiex cao nawh heue. Khaix nawh tom mawh Shemayax kawn simex Shekhanix pa mawh cao pau siviex plak lih singaix, pa cox ti sum heue. ³⁰ Khaix nawh tom mawh Hananix kawn simex Shelemix mai Hanun kawn simex Zalaphax liah kaux tix kaux, pa cox ti sum ka tix baux, khaix nawh tom mawh Meshulam kawn simex Berekhix pa cox ti sum pa koe ka plak sivoe baux dee ot nawh heue. ³¹ Khaix nawh tom mawh Malakhiyax pa mawh cao chix yuh kraung mau khri tix kaux, cox ti sum singai tom hoek ka nyiex pui pa kham ti yuh kaing jhaw nyiex bwan Siyiex mai tom hoek ka nyiex kix pa mawh cao lai geu khankix pa koe plak sivoe siviex Miphakat mai tom hoek ka lawg plak piang pa koe daog veng an heue. ³² Sinax lawg plak piang pa koe daog veng, tom hoek siviex yung tom mawh cao yuh kraung mau khri mai cao lai cao geu khankix, pa cox ti sum heue.

¹ Yam mhong Sanbalat ka grawng hoit deeh cox sum ex guh veng, nawh kied meet rhawm mai kied song rhawm mai salao ka pui Yudax khankix heue. ² Nawh krai lox plak sivoe puxaik tix mai cub kru naing Samarix khankix ah nin, "Pui Yudax pa awn riang inkix yuh patix lie? mawh sang kaux cong yuh kix ka tokaux cao tix lie? mawh sang tan kix patix lie? mawh sang hoik yuh kix ceu an tix ngaix ngie lie? mawh sang sum kix guh veng mai lon simaox pa vaoh kix khaing pum nyhee pa hoik gleeing khankix lie?" ³ Yam in Tobiyax ceu pui Amon pa ot mai praok nawh ah nin, "Guh veng pa sum kix, phan sox praix tix mu haok piang an, nawh tak max yuh ka lon simaox guh veng kix heue." ⁴ Siyiex eue, nghiet liak, mawh kheu hoik kham geu pa salao pui, deeh kieh lox pa salao kix hoek piang kaing cao kix mai kieh kix kham pa tut rhim ka daux haktiex pa giex laung liak. ⁵ Paw doh kheem ka pa lud kix mai paw doh preet phimap kix grai khaing plak sivoe Maix Cao liak, mawh kheu kix so krax song rhawm Maix Cao ka plak sivoe pui sum guh veng khankix heue. ⁶ Mawh kheu nan yix hoik sum guh veng mai guh veng hoik sitoe tix tau, plak lhaong hoik koe tix plak heue. Mawh kheu pui hun khankix hoik koe rhawm ti yuh kaing heue. ⁷ Yam hoik mhong Sanbalat, Tobix pa mawh ceu pui Arap, ceu pui Amon mai ceu pui Ashadot khankix, ka hoik jhak kix tix cox sum guh veng Yerusaliem mai ka jhak kix tix deeh thox daux doh khankix, kix kied song rhawm ka heue. ⁸ Kix khawmuik kum paox tix sang yuh pa caox mai hoek puing ka veng Yerusaliem mai kieh pa sivix koe heue. ⁹ Viang mawh nan ex hoik rawg bwan ka Siyiex ex, kheu jao pui ankix, ex deuh cao pa pau ti jak koe ku singaix heue. ¹⁰ Khaix an pui Yudax khankix tiblah ah nin, "Can pui pa yuh kaing khankix kawx hoik dhah riang rao mai nyhee nyhawk khankix kawx hoik kied nie, mawh kheu nan, ex ang lai sum ka guh veng heue." ¹¹ Pui koeng ex khankix ah nin, "Yam ang kix tawng, ang kix yaox ex lih hoek ka sinax kix mai pah kix yum, kieh kaing yuh kix kaog heue. ¹² Mawh kheu nan pui Yudax pa ot dex kix, hoek krai grawng an ka ex kao bawg, "Kix tak kaoh khaing dee ot tix kudah mai hoek puing ka ex heue." ¹³ Mawh kheu nan, aux hoik deuh pui khankix ka plak khaix guh veng dee tiem ka dee nie sidawng ti yaox awm pa hoik koe doeh nyiex ma kix cub mawx cub an tau mai vaig, pliah mai ak kix heue. ¹⁴ Aux jhak ti yaox mai yaog ti kaoh krai ka cub simiang mai ka cub cao kaing mai cub pui pa kawn deuk khankix ah nin, "Paw lhat graung ka kix awx. Doh keud doh ka Siyiex, pa kied ting lhaong mai koe sibrawm pa kied lhat graung ka mai puing naing son puxaik pex, son kawn simex kawn bun pex mai son moeng pex mai son nyiex ma pex khankix heue." ¹⁵ Yam mhong pui koeng ex khankix ka hoik tawng ex ka grawng in, Siyiex hoik yieh krax pa keud sawn kix laux leeing mai ex khawmuik deeh ing ka guh veng mai pui ku kaux tang deeh yuh kaing yuh cao tix heue. ¹⁶ Mawh kheu nan, jah ka daux bawg yam an, kawncau aux tix plak yuh kaing mai tix plak giex pliah, giex kraung plah tiebtie mai ak mai ceep ka kraung plah rhiem khankix mai cao kaing hoik ot ka plak khaix nyiex pui Yudax khawmuik heue. ¹⁷ Can pui khankix pa sum guh veng mai can pui pa klawm tiex pid khankix, tix khawn taix yuh kaing mai tix khawn taix giex ka kraung naing heue. ¹⁸ Pui pa cox sum khankix ku kaux, hoik tang giieb vaig ka nyoi tix, yam yuh nawh kaing mai pui phlu teettawng hoik cung hawt praok aux heue. ¹⁹ Khaix an aux ah nin ka cub simiang mai cao pa kwang mai can pui pa kawn deuk khankix, "Kaing in mawh pa kied ting mai pa kied vieh mai ex hoik kied singai ot khaing paox tix, tix kaux lai tix kaux piang guh veng heue." ²⁰ "Mawh kheu nan, yam mhong pex ka lox teettawng dee mawx ang ah, pex kraix khrawm paox tix hoek ka yix tan heue. Siyiex ex tak puing son ex heue." ²¹ Mawh kheu nan, sau riang rao ex yuh kaing mai pui tix plak hoik giex ka pliah, jah ka mee riang praix tom hoek bawg yam hoik toh simuing khankix heue. ²² Ka daux baux yam an, aux baox ah nin ka pui khankix, "Kieh pui ku kaux mai kawncau nawh, ot daux veng Yerusaliem ponsawm, sonsang mawh kix cao pau ex daux ponsawm mai yam yuh kaing plak ponngaix heue." ²³ Mawh kheu nan, tokaux aux, puxaik aux, kawncau aux mai pui pau veng pa hawt hu khaix aux khankix, ang lai peeik kraung ceep tix, tix kaux kawx yam lih kin kix rawm kawx tang giex kraung naing tix heue.

¹ Pui khankix mai moeng kix kied riag yo mai pa deuh phimap ka puxaik kix pui Yudax heue. ² Mawh kheu can pui ankix ah nin, "Ex mai khawm kawn simex kawn bun ex khankix mawh pa kied nie, ex teei nghox khankix sonsang pon ex tix ih mai im ju ka heue." ³ Pui tiblah ah nin, "Yix hoik tang ka haktiex mai gwang sipeem plix siiet mai khawm nyiex tix khankix, sonsang pon yix teei ti tawx nghox khankix, kheu hoik sibhawm praix heue." ⁴ Pui tiblah baox ah nin, "Yix hoik yaog mau, sonsang tawx tix keen cie simiang ka son haktiex yix mai si peem plix siiet yix khankix heue. ⁵ Mawh kheu nan nex nham yix awm nex nham puxaik yix khankix mai kawn praix yix khankix awm kawn praix kix mai yaox tix khin kawn simex kawn bun tix khankix yuh siliex, kawn bun yix khankix pa hoik yuh siliex kawx yix ang lai pon taoh kix lih heue. Mawh kheu hoik laig haktiex mai sipeem plix siiet yix khankix ka daux tawm taix pui tang kaux heue." ⁶ Aux hoik kied song rhawm, yam mhong tix ka lox riag yo kix mai lox krai kix heue. ⁷ Khaix hoik bre aux tix keud, aux hoik ne hoik raw cub simiang mai pa kwang khankix mai ah nin ka kix, "Pex ku kaux lai teei rao mau khaing puxaik tix, " "Mawh kheu nan aux kraix khrawm pui khankix hoek tix klah lox ka kix daux bang kum heue. ⁸ Mai aux ah nin ka kix, "Awm pa hoik deeh pon taoh ex ka puxaik tix pui Yudax khankix, pa hoik coh tix ka pui tang ceu khankix. Yam in khex sang deeh coh pex puxaik tix khankix lie? Phan ang mawh nan mawh tak sang deeh mawh kix pa coh tix ka ex lie?" Khaix an kix yiien yawg mai ang lai tawng pa ah tix heue. ⁹ Aux ah nin, "Ceu pa yuh pex khankix ang lai mawh pa mhawm, mawh ang pex khaw tix hu ka daux pa lhat graung tix ka Siyiex ex, sonsang tiebtie lox salao pui tang ceu, pa mawh pui koeng ex khankix lie?" ¹⁰ "Aux mai puxaik aux, khawm puxaik aux khankix, kawn tawx kix ceuk mau mai nghox khankix, yuh bwanson kieh ex naox, krax pa teei tix rao mau in liak." ¹¹ "Ka daux in ngaix deeh tawx can pa mawh haktiex sipeem plix siiet mai nyiex mai mau pa teei pex rao khaing kix, tix yieh son tix son mai nghox an khankix, khawm rawm plix siiet pa khraox mai khawm rawm bee, pa hoik tat pex ti teei ka kix heue." ¹² Kix ah nin, "Yix sang deeh tawx ankix mai yix ang lai deeh mhaing tix ceu kawx khaing kix, yix tak sang yuh awm lox pa krai maix heue." Khaix an aux kok cao giex kaing khankix mai kieh kix yuh krax tiextu tix, sonsang hawt yuh kix awm gumlox sijax mukheu in heue. ¹³ Khaix an aux kah tix khruah ka man kraung ceep pa rawd ka nyoi tix ah nin, "Ceu pui pa ang hoek ti yuh awm sijax mukheu in, kieh Siyiex khruah nawh singai khaing nyiex cao nawh mai khaing sinngao nawh mai khruah nawh tom hoik yi heue." Cub pui hun khankix hoik ah "Amen" mai yaogyaw ka bwanson Siyiex khawmuik heue. Khaix an pui hun khankix yuh nawh awm pa koe gumlox sijax mukheu in heue. ¹⁴ Jah bawg yam yaog aux tix mawh cao pa kwang ka daux meung Yudax, jah ka num kwang simiang Atazerit ka haktiex tixnga num, tom hoek tixngoe ra num tix num, glang daux kao ra num, aux mai puxaik aux khankix ang nyang sax ih priex son nyum cao pa kwang khankix tibawg kawx heue. ¹⁵ Viang mawh nan cao pa kwang veng sivoe aux khankix, hoik deuh beeh pa cien piang pui khankix mai teei ti ih blah mai rawm plix siiet mai mau tix ngaix tixpon shekhe khaing kix, pie kawncau kix kawx, hoik yuh krax kwang pa lang teung piang pui khankix, viang mawh nan, aux ang lai yuh awm an kheu lhat graung tix ka Siyiex heue. ¹⁶ Aux ca baox toe ti yuh guh veng ang jud mai ex ang liag haktiex, kawncau aux khawmuik hoik kraix khawm paox tix yuh kaing tau heue. ¹⁷ Lheu khaing ankix pa hoek ka ex, khaing ceu pui tang ceu khankix pa ot hawt vung viang ex, koe pui Yudax mai cao pa kwang khankix tix yieh tixphwan kaux, pa sawm tau mai pheen aux jheung jheung heue. ¹⁸ Can ceu pa hoik khre rien ti ka son aux ku ngaix, mawh mawie tix mu, mai yung pa hoik laug ti liah mu mai ia sim khankix kawx hoik khre rien ti ka son aux kao ngaix tix bawg, rawm plix siiet kuceu hoik khre rien ti tom nie, viang mawh nan aux ang lai mhaing priex nyum ka son cao pa kwang veng, kheu jao kied cien kaing jhaw piang pui khankix heue. ¹⁹ Siyiex eue, doh keud ka ceu pa mhawm awm pa hoik yuh aux khawmuik ka son pui khankix mai nawb bwan ka aux liak.

¹ Yam hoik mhong Sanbalat, Tobix, Geshem pui Arap mai khawm pui koeng ex pa kawn deuk khankix, ka hoik sum aux guh veng mai ang dee doh lai koe tix dah kawx, viang aux ang nyang sau plah siviex khankix ka siviex veng khankix kawx, ² Sanbalat mai Geshem ploi pui hoek ka aux ah nin, "Hoek heue, kieh ex pub paox tix ka daux yaong tix yaong pa koe daux lung Onaw heue.Viang mawh nan kix hoik keud tix sang yuh krax pa ang mhawm ka aux heue." ³ Mawh kheu nan, aux ploi cao cau khankix hu ka kix ah nin, "Aux kawx yuh kaing pa kied ting lhaong, mawh kheu nan, aux ang nyang pon lih hoek, aux khex sang prah kaing yuh tix kheu sang hoek tix ka pex yuh ka mawh lie?" ⁴ Viang mawh nan, kix hoik ploi lox in hoek ka aux pon bawg mai aux hoik deeh pawk ka kix awm phao voe heue. ⁵ Khaix an Sanbalat baox ploi kawncau tix hoek ka aux, phwan bawg tix bawg awm phao voe tau mai lai pa ang nyang nyeep tix ka daux tawm taix nawh heue. ⁶ Ka daux lai an hoik tiiem ah nin, "An hoik mawh pa krai ka daux sinax ceu pui tang ceu khankix mai Geshem kawx ah yuh nin maix mai pui Yudax khankix hoik keud tix sang dee tieh feen, mawh kheu nan maix tom cox tix sum guh veng, sonsang yuh maix simiang kix heue. ⁷ Maix hoik yaog ti deuh cao jhai khankix sonsang krai pao grawng maix ka daux veng Yerusaliem pa ah nin, simiang koe tix kaux ka daux meung Yudax heue. Yam in tak sang krai grawh grawng inkix ka simiang, mawh kheu nan, kieh ex kum tau mai paox tix awx." ⁸ Khaix an aux deeh ploi pui hu ka nawh ah nin, "Awm can ceu pa ah maix khankix, ang tie mawh tix ceu kawx, mawh ngie pa lak keud maix tix sang yuh ka daux rhawm tix heue." ⁹ Grawh grawng nawh kix khawmuik mie ti yuh yix koe krax lhat graung ah nin, "Plawng taix kix tak mawh pa awn riang awn rao mai ang lai hoik yuh kaing pa yuh tix heue. Siyiex eue, yam in kieh plawng taix aux koe riang rao liak." ¹⁰ Khaix an aux hoik hoek ka nyiex Shemayax kawn simex Delayax, kawn simex Mahetabalax, pa mawh cao mox tix tawx lox satang mai nawh ah nin, "Kieh ex pub paox tix ka daux nyiex bwan Siyiex, ka plak daux lawg nyiex bwan mai kieh ex nyeep siviex nyiex bwan, mawh kheu kix hoek tix sang pah maix yum ka daux sawm in, kix tak hoek tix pah maix yum tete heue." ¹¹ Aux ah nin, "Pui pa awm aux in tak sang to lie? Pa awm aux tak sang laig ka daux nyiex bwan sonsang taoh ju tix lie? Aux ang laig heue." ¹² Khaix an aux hoik briex tawng ka ang mawh Siyiex pa ploi nawh hoek, viang mawh nan nawh hoik krai pao lox jhai krax pa tieh feen ka aux, kheu hoik vai Tobix mai Sanbalat ka nawh heue. ¹³ Grawh grawng cang kix ka nawh, mawh sonsang koe krax pa lhat graung aux mai koe krax lud, sonsang deeh pon kix tix krai pao ka grawng krax pa caox caig mai koe lox salao ka aux heue. ¹⁴ Siyiex eue, doh keud ka kaing pa yuh Tobix, Sanbalat mai cao jhai bun Nawdix mai cao jhai pa kawn deuk pa yuh aux koe krax pa lhat graung khankix liak. ¹⁵ Mawh kheu nan guh veng hoik sum ti daux khix Elula tixnga phwan ngaix, rheung tixphwan ra ngaix heue. ¹⁶ Yam hoik mhong cub pui koeng ex khankix ka grawng an mai ceu pui khawmuik pa ot hawt vung viang ex khankix, hoik yaox ka ceu inkix mai kix hoik kied kaig ka yaox kix ngai cao tix heue. Mawh kheu kix hoik briex tawng ka kaing pa hoik yuh Siyiex ex heue. ¹⁷ Lheu khaing an ka daux glang singaix ankix, cub simiang Yudax khankix hoik sipaox lai hoek ka Tobix tom nie mai lai pa tawx Tobix kawx hoik deeh hoek ka kix heue. ¹⁸ Mawh kheu pui Yudax tom nie hoik mawh pa kaux sijax tau mai Tobix mawh kheu mawh nawh kheue Shekhenix kawn simex Ara mai kawn simex Yehohanan hoik teei ti moeng kawn bun Meshulam, kawn simex Derakhix heue. ¹⁹ Kix hoik krai kaing pa mhawm yuh nawh khankix ka plak sivoe ngai aux mai deeh krai lox sikah aux hoek ka nawh heue. Tobix deeh sipaox lai hoek ka sonsang ghlat tix aux heue.

¹ Khaix hoik sum guh veng mai aux hoik tok plah siviex mai aux hoik tang tawx beeh glawm ka cao pa pau diang siviex mai cao pa ah lai rhax mai pui Lewix khankix, ² mai aux dee tawx veng Yerusaliem ka pux aux Hananix mai Hanan pa mawh cao kaing nyiex pau dee lhaong, kheu hoik mawh nawh pui pa kaux sijax tix kaux mai pa lhat ka Siyiex lheu khaing pui hun heue. ³ Aux krai ah nin ka kix, "Paw nyang paoh siviex veng Yerusaliem sivoe hax koek, glang yam kawn cung kix tix pau, caw tix nyeep siviex mai sau ti deuh jhong mai baox tawx beeh glawm pau veng ka can pui pa ot daux veng Yerusaliem khankix mai tang pau ti jhak ka plak sivoe nyiex pui mawx nyiex pui an heue." ⁴ Viang veng hoik kied vieh va kawx pui pa ot ka daux khankix kied tux mai ang nyang sum nyiex khankix ka daux heue. ⁵ Khaix an Siyiex hoik so ka daux rhawm aux, sonsang kraix khrawm ka cub simiang khankix mai cao pa kwang haktiex mai khawm pui khankix, sonsang laig carang kix awm pa koe doeh nyiex ma kix heue. Aux hoik yaox carang doeh nyiex ma pa mawh pui khankix pa hoik deeh hoek bawg phao voe mai yaox pa tiiem ti deuh ka daux an yuh nin heue. ⁶ Inkix mawh pui pa deeh hoek khaing krax pa giex laung tix, pa mawh pui pa hoik sax viex kix hu pa hoik rhim Nebukhaneza simiang veng Babulon hu mawh pui pa giex laung mai pa hoik deeh ing ka veng Yerusaliem mai ka meung Yudax ku kaux ka veng ot kaux mawx kaux an heue. ⁷ Can pui pa hoek tau mai Zerubabelax mawh Yeshu, Nehamix, Azarix, Ranix, Nahamanix, Modekhie, Bilashan, Misapariet, Bigavie, Nehum mai Bana khankix heue. Carang ceu pui Isarelax khankix mawh awm in plak greem, ⁸ Cub kawn praix Parot, ra rheng tix yieh atixgliah ra kaux. ⁹ Cub kawn praix Shephatix khankix loe yieh atixgliah ra kaux. ¹⁰ Cub kawn praix Ara liah yieh tixphwan ra kaux. ¹¹ Cub kawn praix Pahat-mawbax, pa mawh kawn praix Yeshu mai Yawbax khankix, ra rheng daix yieh kao daix kaux. ¹² Cub kawn praix Elam tix rheng ra yieh tixphwan pon kaux. ¹³ Cub kawn praix Zattux daix yieh tixpon phwan kaux. ¹⁴ Cub kawn praix Zakhai, aliah yieh tigliah kaux. ¹⁵ Cub kawn praix Binnui, liah yieh tixpon daix kaux. ¹⁶ Cub kawn praix Bebie, liah yieh tixnga daix kaux. ¹⁷ Cub kawn praix Azagat, ra rheng loe yieh tixnga ra kaux. ¹⁸ Cub kawn praix Adonikam, liah yieh tigliah aliah kaux. ¹⁹ Cub kawn praix Bigavie, ra rheng tigliah aliah kaux. ²⁰ Cub kawn praix Adin, liah yieh tixphwan phwan kaux. ²¹ Cub kawn praix Ata pa mawh Hezakix, tixdim daix kaux. ²² Cub kawn praix Hashum, loe yieh tixnga daix kaux. ²³ Cub kawn praix Bezie, loe yieh tixnga pon kaux. ²⁴ Cub kawn praix Harip, tix yieh kao ra kaux, ²⁵ Cub kawn praix Gibon, tixdim phwan kaux. ²⁶ Pui veng Bieliehiem mai pui veng Netawphah, tix yieh tidaix daix kaux. ²⁷ Pui veng Anatut, tix yieh tixnga daix kaux. ²⁸ Pui veng Bietazamaviet, tixpon ra kaux. ²⁹ Pui veng Kirayatvarim, veng Khephirax mai veng Berot, aliah yieh tixpon loe kaux. ³⁰ Pui veng Rama mai veng Geba, liah yieh tixnga tix kaux. ³¹ Pui veng Mikmat, tix yieh tixnga ra kaux. ³² Pui veng Betelax mai A-ix, tix yieh tixnga loe kaux. ³³ Pui veng Nebo tang kaux, tixphwan ra kaux. ³⁴ Cub kawn praix pui veng Elam tang kaux, tix rheng ra yieh tixphwan pon kaux, ³⁵ Cub kawn praix Harim, loe yieh tixnga kaux. ³⁶ Cub kawn praix pui veng Yerikho, loe yieh tixpon phwan kaux. ³⁷ Cub kawn praix pui veng Lawdax, veng Hadit mai veng Awnaw, aliah yieh tixnga tix kaux. ³⁸ Cub kawn praix pui veng Sena, loe rheng dim yieh tixngoe kaux; khankix heue. ³⁹ Carang cub cao giex kaing li mawh cub kawn praix Yedayax khaing daux cub nyiex ma Yeshu, dim yieh atixgliah loe kaux. ⁴⁰ Cub kawn praix Imerax, tix rheng mai tixphwan ra kaux. ⁴¹ Cub kawn praix Pashurax, tix rheng ra yieh tixpon aliah kaux; ⁴² Cub kawn praix Harim, tix rheng kao aliah kaux heue. ⁴³ Carang pui Lewix khankix mawh cub kawn praix Yeshu, khaing ceu pui Kamelax mai khaing cub kawn Hodeva, atixgliah pon kaux heue. ⁴⁴ Cao pa rhax lai khankix, mawh cub kawn praix Asapha, tix yieh tixpon daix kaux heue. ⁴⁵ Cao pau siviex mawh cub kawn praix Shalum, cub kawn praix Ata, cub kawn praix Talamon, cub kawn praix Akakup, cub kawn praix Hatita, cub kawn praix Shobiet, khankix tix yieh tixngoe daix kaux heue. ⁴⁶ Pui pa kham ti yuh kaing jhaw daux nyiex bwan khankix mawh cub kawn praix Zibax, cub kawn praix Hashupha cub kawn praix Tabaok. ⁴⁷ Cub kawn praix Kerot, cub kawn praix Siyax, cub kawn praix Padon. ⁴⁸ Cub kawn praix Lebana, cub kawn praix Hagaba, cub kawn praix Salamie, ⁴⁹ Cub kawn praix Hanan, cub kawn praix Giddelax, cub kawn praix Gaha. ⁵⁰ Cub kawn praix Reyax, cub kawn praix Rizin, cub kawn praix Nekoda, ⁵¹ Cub kawn praix Gazam, cub kawn praix Uza, cub kawn praix Paseyax. ⁵² Cub kawn praix Besie, cub kawn praix Munim, cub kawn praix Nepheshesim. ⁵³ Cub kawn praix Bakabuk, cub kawn praix Hakupha, cub kawn praix Harahurax. ⁵⁴ Cub kawn praix Bazalit, cub kawn praix Mehidax, cub kawn praix Harasha. ⁵⁵ Cub kawn praix Barakot, cub kawn praix Siserax, cub kawn praix Tama. ⁵⁶ Cub kawn praix Neziyax mai cub kawn praix Hatipha khankix heue. ⁵⁷ Cub kawn praix Sawlamon khankix mawh cub kawn praix Sotie, cub kawn praix Sopheriet, cub kawn praix Peradax. ⁵⁸ cub kawn praix Yala, cub kawn praix Dakon, cub kawn praix Giddelax, ⁵⁹ Cub kawn praix Shephatix, cub kawn praix Hattilax, cub kawn praix Pokheriet, khaing ceu pui Zebem mai cub kawn praix Amon khankix heue. ⁶⁰ Pui pa kham ti yuh kaing jhaw nyiex bwan Siyiex khankix mai cub kawncau Sawlamon khankix loe yieh tixdim ra kaux heue. ⁶¹ Mai kix can pui pa kaoh khaing veng Telamelax, veng Telaharasha, veng Kherup, veng Addon mai veng Imera khankix mai kix mawh pa ang pon tix sidawng tawng ka nyiex ma keeing kix mai doeh ru lih kix ka mawh ang mawh ceu pui Isarelax khankix, ⁶² pa mawh cub kawn praix Delayax, cub kawn praix Tobix, cub kawn praix Nekodax khankix liah yieh tixpon ra kaux, ⁶³ khaing daux cub cao giex kaing li khankix mawh cub kawn praix Habayax, cub kawn praix Koza, cub kawn praix Bazilie, pa teei ti moeng kawn bun Bazilie pui haktiex Gilat tix kaux mai hoik kok ceu kaux kix awm an heue. ⁶⁴ Inkix mawh pui pa sawg kix ti yaox ka daux sinax can pui pa laig daux carang daux ru kix, viang mawh nan, kix ang lai yaox kix ka daux carang mawh kheu nan kix hoik mawh pui pa teei tix lih khaing cao giex kaing li kheu ang kix lai singax heue. ⁶⁵ Cao kwang haktiex tawx lox ang cu kix ih can ceu pa kied singax singeh tom hoek bawg yam ang cao giex kaing li nyang bax shiao ka Urim mai Tumim heue. ⁶⁶ Cub pui hun khawmuik hoik koe pon mheen ra rheng loe yieh tixgliah kaux, ⁶⁷ lheu khaing an kawncau simex kawncau bun kix, pa ot tau mai kix tan hoik koe aliah rheng loe yieh tixngoe aliah kaux mai kix koe simex, bun cub pa ah lai rhax khankix ra yieh tixpon phwan kaux heue. ⁶⁸ Kix koe brung aliah yieh tixngoe liah mu mai kix koe law ra yieh tixpon phwan mu, ⁶⁹ Kala-uk pon yieh tixngoe phwan mu mai kix koe la liah rheng aliah yieh tixnga mu. ⁷⁰ Cao kaing nyiex ma keeing kix tiblah, hoik tawx pa tan tix khankix ka son kaing jhaw heue. Cao pa kwang haktiex hoik tawx plah khri tix rheng dalit mai khawm pan ting tixphwan mu mai khawm kraung ceep cao giex kaing li phwan yieh tixngoe pheen, laig ka daux krao sinngao an heue. ⁷¹ Cao kaing cub nyiex ma cub keeing kix tiblah, hoik tawx plah khri ra mheen dalit mai mau ra rheng ra yieh minax, laig ka daux krao sinngao heue. ⁷² Cub pui pa kawn deuk khankix hoik tawx plah khri ra mheen dalit mai mau ra rheng minax mai khawm kraung ceep cao giex kaing li tixgliah aliah pheen heue. ⁷³ Mawh kheu nan cao giex kaing li mai pui Lewix cao pau siviex, cao pa ah lai rhax mai khawm pui khankix tiblah, pui pa kham ti yuh kaing jhaw nyiex bwan Siyiex khankix mai ceu pui Isarelax khankix hoik ot ka daux veng cao kix heue.

¹ Yam hoek ka daux khix aliah, kawn praix ceu pui Isarelax khankix hoik ot ka daux veng cao kix heue. Yam an pui hun khawmuik kraix khrawm paox tix tau awm pui tix kaux, ka daux bing pak pa koe plak sivoe siviex rawm mai kix nhie Ezarax cao tiiem lai viex phuk lai lox tat jhawm prawng Mose pa hoik tawm Siyiex ka ceu pui Isarelax khankix hoek heue. ² Ka daux khix aliah tix ngaix cao giex kaing li Ezarax hoik viex phuk lai lox tat jhawm prawng hoek plak sivoe cub pui hun, pa mawh simex mai bun khankix can pui pa chix nghiet chix tawng khawmuik heue. ³ Khaix an nawh phat khaing phuk lai an ka daux bing pak plak sivoe siviex rawm, jah ka plak ponngawb tom hoek bawg yam jung singaix, ka plak sivoe simex, bun, khankix can pui pa chix nghiet chix tawng, mai pui khankix daong yhaok tix nghiet ka phuk lai lox tat jhawm prawng an heue. ⁴ Mawh kheu nan Ezarax cao tiiem lai cung tix ot piang grah khaox pa hoik yuh ti deuh son an mai pui pa cung tix ot ka praok ka plak taix khawn dawm nawh tom mawh Matathix, Shemax, Anayax, Uriyax, Hilakhix mai Meseyax khankix mai pui pa cung tix ot ka plak taix khawn gwiex tom mawh Padayax, Mishelax, Malakhiyax, Hashum, Hashabadanax, Zakharix mai Meshulam khankix heue. ⁵ Ezarax plak ka phuk lai an ka plak sivoe ngai pui hun khawmuik, mawh kheu hoik cung ti ot piang dee pa lhaong khaing pui khawmuik mai yam plak nawh ka phuk lai an, pui yaog tix cung khawmuik heue. ⁶ Ezarax yaogyaw ka Siyiex, pa mawh Siyiex pa kied ting lhaong, khaix an pui hun khankix yaog taix tix deeh pawk tix ah "Amen, Amen" heue. Mai kix gup pakngai tix piang tiex mai ngeuh kaing tix krub ka Siyiex heue. ⁷ Yeshu mai Sherabix, yam in Akhup, Shabethie, Hodiyax, Maseyax, Kelita, Azarix, Yozabat, Hanan, Pelayax mai pui Lewix khankix, baox teem tix krai pui hun tawng ka dee bleeh lox tat jhawm prawng khankix mai pui khankix cung tix ot ka dax dee ot cao tix heue. ⁸ Mawh kheu nan kix hoik phat phuk lai lox tat jhawng prawng Siyiex; sidawng laing laing mai dee krai kix mhong sonsang tawng dee bleeh lox lai pa phat tix khankix heue. ⁹ Nehamix pa mawh cao pa kwang haktiex mai Ezarax pa mawh cao giex kaing li mai cao tiiem lai, pui Lewix cao pa gau ka pui hun mai ah nin ka pui khawmuik, "In singaix mawh ngaix pa singax singeh ka son Siyiex ex, paw lai koe krax pa khrup rhawm mai paw lai yiiem heue." Mawh kheu mhong pui khawmuik ka lox tat jhawm prawng in, kix tom yiiem ka heue. ¹⁰ Khaix an nawh ah nin ka kix, "Hu krax hu pex ih pa kluing pa bee mai nyaux ceu pa tie mai gwieh tix tawx nyum ka pui pa ang koe tidtix, mawh kheu in singaix mawh ngaix pa singax singeh ka son Siyiex ex, paw koe krax laux rhawm, mawh kheu krax gaux rhawm pa tawx Simiang Siyiex mawh riang rao pex heue." ¹¹ Mawh kheu nan pui Lewix kieh pui khawmuik yiien yawg tix ah nin, "Mawh kheu in singaix mawh ngaix pa singax singeh, paw koe krax laux rhawm heue." ¹² Pui khawmuik hu sonsang ih mai nyaux mai gwieh tix tawx nyum ka pui mai gaux rhawm ka daux pa kied ting lhaong, hoik tawng kix dee bleeh lox sidiex lox gau ka kix heue. ¹³ Ka daux ra ngaix tingaix cub cao kaing nyiex ma keeing cub pui hun khawmuik, tau mai cao giex kaing li mai pui Lewix khankix, kraix khrawm paox tix hoek ka Ezarax cao pa tiiem lai, sonsang tawng tix ka gumlox tat jhawm prawng heue. ¹⁴ Kix hoik yaox can ceu pa hoik tiiem tix ka daux lox tat jhawm prawng pa hoik tawx Siyiex ka Mose, pa sang ot kawn praix ceu pui Isarelax ka daux nyiex gox lhax khaox glang yam yuh pawie ka daux khix aliah. ¹⁵ Kix krai pao jah ka veng Yerusaliem mai veng kudah dee ah nin, "Lih hu piang gawng lua mai teei ti viex lhax khaox Sanlun, kak khaox gix, kak khaox grix kak khaox jhie yaong mai kak khaox pa nie lhax khankix, sonsang yuh nyiex gox, awm pa hoik tiiem ti deuh heue." ¹⁶ Khaix an pui khankix hoik lih hu mai deeh viex kak khaox khankix hoek mai yuh nyiex gox son tokaux tix mai pui ku kaux hoik tang sau piang braux nyiex cao tix mai ka biang dee ot dee koe tix mai ka biang nyiex bwan Siyiex mai ka bing pak siviex rawm mai ka bing pak siviex Epharem khankix heue. ¹⁷ Mawh kheu nan cub pui hun khawmuik khawm leeing pa mawh pui pa hoik deeh ing khaing pa giex laung tix khankix, hoik yuh nyiex gox kak khaox mai hoik ngawm ti ot greem nyiex gox; mawh kheu daux glang baux ngaix Yawsux kawn simex Nun tom hoek bawg yam in singaix kawn praix ceu pui Isarelax khankix ang nyang sax yaox ti yuh awm an tix bawg kawx mai pui khawmuik kied koe krax gaux rhawm ka heue. ¹⁸ Jah ka daux singaix liang tom hoek daux singaix ghoik, nawh phat ka phuk lai gumlox tat jhawm prawng ku ngaix heue. Mai kix khan kheu pawie aliah ngaix, mai yam hoek ka daux daix ngaix, kix yuh pawie singax singeh awm hoik koe been ti yuh heue.

¹ Yam hoik hoek khix in tixnga pon ngaix, kawn praix ceu pui Isarelax khankix krawk khrawm paox tix ot tau mai tawx pa ih mai ceep ka man chee rhix mai rhuat phawng tiex piang kaing tix heue. ² Khaix can pui pa kaoh khaing doeh ceu pui Isarelax khankix, tang tiah tokaux khaing pui tang ceu khankix mai kix yaog ti cung ti krai doh ka phimap tix mai ka phimap keeing kix heue. ³ Ka daux singaix an pon son tix son kix hoik yaog tix cung dee ot dee koe tix mai hoik phat khaing daux phuk lai lox tat jhawm prawng Siyiex kix mai son bawg yam pon son tix son kix hoik krai doh phimap cao tix mai krub ka Siyiex kix heue. ⁴ Khaix an Yeshu, Banix, Kamelax, Shebanix, Bunnix, Sherabix, Danix mai Khenanix khankix cung ka glawk bawng pui Lewix mai riag yo lox pa kied ting ka Siyiex kix heue. ⁵ Khaix pui Lewix, Yeshu, Kamelax, Hashabanix, Sherabix, Hodiyax, Shebanix mai Petahix khankix ah nin, "Kaoh cung mai yaogyaw bwanson Siyiex pex leeing ju, kieh yaogyaw ka min ceu kaux pa ting sibrawm Maix Cao, pa hoik ting lhaong piang bwanson khawmuik mai ka daux krax pa yaogyaw heue." ⁶ Mawh ngie Maix Cao tix kaux khaing pa mawh Siyiex, Maix Cao yuh raoma piang raoma, tau mai can pa koe khawmuik, haktiex mai can pa koe piang haktiex khawmuik, rawm sigrit sigra mai can pa koe ka daux khawmuik mai Maix Cao hoik priex jhung ka kix khawmuik, can pa koe daux raoma khankix krub ka Maix Cao heue. ⁷ Maix Cao mawh Siyiex pa hoik laug ka Abram, mai hoik viex nawh lih khaing veng Urax haktiex Kaladie mai hoik loh ceu kaux nawh mawh Abraham, ⁸ Maix Cao hoik yaox rhawm pa kaux sijax nawh ka plak sivoe Maix Cao mai hoik yuh sijax mukheu tau mai nawh, sonsang tawx tix haktiex ceu pui Khanan, ceu pui Hittix, ceu pui Amawrix, ceu pui Pharazi, ceu pui Yebusix mai haktiex ceu pui Gerashi khankix, ka doeh ru nawh khankix heue. Maix Cao yuh awm gumlox sikah tix khankix, mawh kheu Maix Cao mawh pa rahsee heue. ⁹ "Maix Cao yaox krax kha rhawm keeing yix ka daux haktiex meung Ejiptux mai hoik mhong lox riag yo kix hawt rawm sigrit sigra raoh heue. ¹⁰ Maix Cao hoik jhi mhai rug pa daox deng khankix ka Pharaw mai ka cub kawncau nawh khankix mai ka pui haktiex khankix, mawh kheu Maix Cao hoik tawng ka jhawm pa ting rhawm ca nyhau kix piang tax du yix heue. Mawh kheu grawng an, Maix Cao hoik koe min ceu kaux tom hoek ka daux in singaix heue. ¹¹ Maix Cao kieh rawm sigrit sigra gwieh tix sivoe kix, sonsang pon tiang kix tix hu sigreung rawm sigrit sigra piang tiex kroh; mai Maix Cao hoik tik ka pui pa yuh krax kha rhawm khankix daux rawm pa kied raux, awm simaox tix lon. ¹² Lheu khaing an Maix Cao hoik thong kix tau mai rong ngu paiawm mai ponsawm tau mai rong ngu sonsang jhan riang piang krax hu kix heue. ¹³ "Maix cao lih piang gawng Sina mai sikah tau mai kix khaing raoma mai hoik tawx been pa rahsee khankix mai ka lox tat jhawm prawng pa mawh meh, khawm lox lai beenli pa mhawm mai gumlox tawm pingnyap khankix, ¹⁴ Maix Cao hoik kieh kix tawng singaix twah pa singax singeh mai hoik tawm ti deuh been jhawm pa khaw caw tix hawt khankix mai lox lai beenli mai lox tat jhawm prawng khankix khaing daux tawm taix Mose kawncau Maix Cao heue. ¹⁵ Yam cai rhawm kix Maix cao hoik tawx kix ih blah khaing raoma, yam sang nyaux nie kix rawm Maix Cao viex kix nyaux rawm pa kaoh khaing daux rang mai hoik krai sonsang laig kix ti teei haktiex pa hoik tiextu Maix Cao tix tawx ka kix heue. ¹⁶ Viang mawh nan kix ku kaux pa mawh keeing ex khankix hoik ting rhawm ca nyhau mai hoik kieh ngawg tix cong mai ang nghiet ka gumlox tawm pingnyap Maix Cao heue. ¹⁷ Kix hoik thiang mai ang nghiet mai ang doh keud ka pa daox deng pa hoik yuh Maix Cao ka daux sinax kix, viang mawh nan kix kieh ngawg tix cong mai ka daux pa tieh feen kix, kix hoik yaog ka cao kaing tix kaux, sonsang deeh ing ka dee yuh tix siliex ka daux meung Ejiptux, viang mawh nan, Maix Cao mawh Siyiex pa chix pluat ploi phimap mai pa chix tawx bwanson mai krax caux rhawm mai nhim ka daux pa song rhawm, pa grum naog ka daux krax caux rhawm mai ang lai tik lai vud ka kix heue. ¹⁸ Lheu khaing an, kix hoik raug riang kawn mawie tix mu, son tokaux cao kix ah nin, "In mawh siyiex yix, pa hoik viex yix lih khaing meung Ejiptux mai hoik yuh pa salao pa kied ting lhaong kawx, ¹⁹ viang mawh nan Maix Cao koe krax pa caux rhawm, Maix Cao ang tik vud kix ka daux tiagtu, rong paiawm pa thong ka krax hu kix daux pon singaix ang grai mai rong ngu pa thong kix hu ka daux ponsawm ca jhan riang ka kix, ka daux krax pa tak sang hu kix heue. ²⁰ Maix Cao hoik tawx khwan pa mhawm tix gau ka kix mai ang nyang pluat blah Mannax khaing jheeh kix mai hoik tawx kix nyaux rawm yam sang nyaux nie kix rawm heue. ²¹ Daux tixpon num Maix Cao hoik priex rhawm kix, ka daux tiagtu kix ang koe pa cud cha tix ceu kawx, kraung ceep kix ang nyang prim mai caong kix ang uah heue. ²² Lheu khaing an Maix Cao hoik tawx meung haktiex mai ceu pui ka kix mai hoik gwieh veng baux mawx baux an, mawh kheu nan kix hoik rom tix cie haktiex Sihong simiang Heshabon mai haktiex Awga, pa mawh simiang Bashan heue. ²³ Maix Cao hoik kieh kawn praix kix haoh hun, awm simuing raoma khankix mai viex kix hu ka daux tiag, pa hoik krai Maix Cao ka keeing kix, sonsang hu kix mai teei ti cie heue. ²⁴ Mawh kheu nan kawn praix kix laig mai teei tix cie haktiex, Maix Cao hoik grheu ti tik pui pa ot daux haktiex an ka plak sivoe kix, pa mawh ceu pui Khanan mai hoik ap tix tawx kix ka daux tawm taix kix, tau mai simiang mai pui haktiex khankix, sonsang pon yuh kix ka kix, awm pa koe rhawm kix ti yuh heue. ²⁵ Kix rhim ti teei veng pa kaux cong khankix, haktiex pa mhawm phon, nyiex pa naog kraung khrai khawmuik, rawm daux pa hoik kaong tix khankix, sipeem plix siiet, sipeem khaox sanlum khankix mai khaox pa plix pa kied haoh hun heue. Mawh kheu nan kix hoik yaox ti ih tom sak tom kluing tix ka mai gaux rhawm ka daux bwanson Siyiex pa kied ting lhaong Maix Cao heue. ²⁶ Viang mawh nan kix ang cu nghiet mai hoik tieh feen ka Maix Cao mai tik vud ka lox tat jhawm prawng Maix Cao plak khaix tix mai hoik pah ka cao jhai Maix Cao khankix, pa sidiex gau kix sonsang veeh tix ing ka Maix Cao mai kix hoik yuh kaing pa salao pa kied ting lhaong heue. ²⁷ Mawh kheu nan Maix Cao hoik ap tix tawx kix ka daux tawm taix pui koeng kix khankix, pa hoik map nai ka kix, mai yam pa kha kix rhawm tix, yam riag yo kix ka Maix Cao, Maix Cao hoik nghiet khaing daux raoma, awm pa kied nie koe krax pa caux rhawm Maix Cao, Maix Cao hoik tawx cao taoh kax kix, pa hoik deeh taoh ti teei kix khaing daux tawm taix pui koeng kix heue. ²⁸ Viang mawh nan khaix hoik laux lee kix tix mhawm mhawm kix hoik baox yuh pa caox caig ka plak sivoe ngai Maix Cao, mawh kheu nan Maix Cao dee ap kix ka daux tawm taix pui koeng kix, sonsang kwang piang kix, viang yuh nan kawx, yam deeh hoek kix mai hoik riag yo ka Maix Cao, Maix Cao hoik nghiet khaing daux raoma mai Maix Cao hoik taoh ka kix tom nie bawg ka daux krax caux rhawm Maix Cao heue. ²⁹ Viang Maix Cao tawx satix sonsang deeh hoek kix ka lox tat jhawm prawng Maix Cao kawx, viang mawh nan, kix kawn koe krax ting rhawm ca nyhau mai ang cu nghiet ka lox tawm pingnyap Maix Cao khankix mai hoik lud ka grawng krax prawng krax ciyang Maix Cao khankix, awm pa khaw pui tix kaux, hawt jawh ti yuh mai im ju, kix hoik reek reen klip tix hoik kieh ngawg tix cong mai ang lai nghiet ka heue. ³⁰ Viang mawh nan, Maix cao hoik gun yeung ka kix tom rheeng num mai Maix Cao tawx satix mai sidiex gau kix ka khwan Maix Cao pa kaoh khaing jheeh cao jhai khankix heue. Viang mawh nan kix ang lai nghiet jao in, Maix Cao tom ap kix ka daux tawm taix pui haktiex an khankix heue. ³¹ Viang yuh ka mawh kawx ka daux krax caux rhawm pa kied ting lhaong Maix Cao, Maix Cao ang nyang yuh kix laux leeing mai ang nyang tik vud ka kix, mawh kheu Maix Cao mawh Siyiex pa grum naog ka pa caux rhawm heue. ³² Mawh kheu nan Siyiex ex eue, Siyiex pa kied ting lhaong, pa kied ting riang rao mai pa koe sibrawm krax lhat graung, pa priex pa jhung ka gumlox sijax mukheu mai krax caux rhawm tix eue, paw kieh krax pa kha rhawm an khankix, mawh pa iak pa lied ka plak sivoe ngai Maix Cao pa hoek piang yix mai ka simiang yix, ka cao giex cao kwang yix mai ka cao giex kaing li yix, ka keeing yix mai ka pui Maix Cao khawmuik, jah ka yam kwang simiang Asurix ka haktiex tom hoek ka daux in singaix heue. ³³ Viang yuh ka mawh kawx Maix Cao rahsee ka can ceu pa hoik lih ti mawh piang yix khawmuik, mawh kheu maix Cao hoik kied kaux sijax tete, viang mawh nan yix hoik yuh pa ang rahsee heue. ³⁴ Cub simiang yix mai cao kwang yix khankix, cao giex kaing li yix mai keeing yix khankix, ang lai priex rien ka lox tat jhawm prawng Maix Cao mai ang lai nghiet ka lox tawm pingnyap Maix Cao khankix mai, ka mhai rug Maix Cao, pa hoik kham Maix Cao mhai rug piang kix heue. ³⁵ Grawh grawng nawh kix ang lai yuh kaing jhaw Maix Cao, ka daux meung haktiex tix, viang Maix Cao tawx bwanson pa mhawm tom nie mai haktiex pa kied vieh, pa mhawm phon ka kix kawx, kix ang lai veeh khaing kaing pa caox caig pa yuh tix heue. ³⁶ "Ka daux in singaix yix hoik mawh siliex, mawh siliex ka daux haktiex tawx Maix Cao ka keeing yix khankix, ka daux haktiex pa yaox yix tix ih ka plix pa mhawm kuceu pa koe khaing tan heue. ³⁷ Mawh kheu jao phimap yix, simiang pa yaog Maix Cao ti deuh piang yix, hoik ghrang tix ih plix pa kied haoh hun ka daux haktiex in khaing yix, mai kwang piang tokaux yix mai piang tobrie yix awm pa koe rhawm kix mai yix ot ka daux pa kha rhawm tix heue. ³⁸ Mawh kheu jao grawng in, yix khawmuik yuh sijax mukheu mai tiiem ti deuh an, mai cub cao kaing pa thong bung yix khankix mai pui Lewix yix khankix mai cao giex kaing li yix khankix, hoik tawk cum piang an heue.

¹ Yam in can pui pa tawk cum piang lai pa hoik tiiem tix khankix, mawh Nehamix, cao pa kwang haktiex kawn simex Hakhali mai Zedekiyax. ² Serayax, Azarix, Yeramix, ³ Pashura, Amarix, Malakhiyax, ⁴ Hatut, Shebanix, Maluk, ⁵ Harim, Merarot, Obadix, ⁶ Danyelax, Gineton, Baruk, ⁷ Meshulam, Abiyax, Miyamin, ⁸ Mazix, Bilagie mai Shemayax, khankix heue. Inkix mawh cao giex kaing li khankix heue. ⁹ Pui Lewix khankix mawh Yeshu kawn simex Azaniyax mai Binnuix pa kaoh khaing daux cub kawn simex Henadat mai Kamelax khankix heue. ¹⁰ Puxaik kix mawh Shebanix, Hodiyax, Kelita, Pelayax, Hanan, ¹¹ Mikha, Rehop, Hashbix, ¹² Zakhurax, Sherabix, Shebanix, ¹³ Hodeyax, Banix mai Baninu, khankix heue. ¹⁴ Cao kaing ka pui khankix mawh Parot, Pahat-mawbax, Elam, Zatux, Banix, ¹⁵ Bunnix, Azagat, Bebie, ¹⁶ Adoniyax, Bigavie, ¹⁷ Ata, Hezakiyax, Azurax, ¹⁸ Hodiyax, Hashum, Bezie, ¹⁹ Harip, Anatok, Nebie, ²⁰ Magabisha, Meshulum, Hezirax, ²¹ Meshazabelax, Zadok, Yadua, ²² Pelatix, Hanan, Anayax, ²³ Hoshe, Hanarix, Hoshup, ²⁴ Halohiet, Pilaha, Shobek, ²⁵ Rehum, Hashabanax, Maseyax, ²⁶ Ahiyax, Hanan, Anan, ²⁷ Maluk, Harim mai Banax khankix heue. ²⁸ Can pui pa kawn deuk an khankix, cub cao giex kaing li, cub pui Lewix mai cub cao pau siviex, cub pa rhax lai, pui pa kham ti yuh kaing jhaw nyiex Siyiex khankix mai can pui pa hoik tang tiah tokaux khaing pui haktiex an, khawm moeng khawm kawn simex kawn bun kix khankix mai pui koe krax keud mai kax tawng yung khankix mai kix sang hawt lox tat jhawm prawng Siyiex, ²⁹ Kix hoik sitoe tix mai puxaik tix, cao kwang tix mai hoik laig ka daux pa tiextu tix, sonsang hawt kix ka daux gumlox tat jhawm prawng Siyiex pa hoik tawx ka Mose, pa mawh kawncau mau soi Siyiex mai sonsang priex rien mai awm pa koe gumlox pingnyap Siyiex Simiang cao ex mai been pa deuh Nawh Cao, khawm lox lai beenli Nawh Cao khankix, ³⁰ sonsang ang ex tawx kawn bun tix khankix mawh moeng pui haktiex an mai son ang kawn bun kix teei kawn simex ex khankix, ³¹ phan pui haktiex an khankix viex kraung khrai mai pa ih hoek coh singaix twah mai singaix pa singax singeh Siyiex ang ah, ex ang pon liag khaing kix mai ex ang lai yuh kaing kaung yuh tix yam hoek daux aliah num mai ang lai pon tix mhaing ka ceuk tix ceu kawx heue. ³² Ex hoik yuh ti deuh been khankix ka son cao tix, sonsang teei mau loe son tix son lih khaing daux tix shekhe pa pon tix ku num, son nyiex bwan Siyiex ex, ³³ mai blah pa khan tix tan sivoe mai krax tan phawng nghox ca im, son krax tan pa gleeing singaix twah sijheeng, son yam haok khix khraox mai pawie pa hoik tat ti deuh khankix, son kraung pa singax singeh khankix mai son krax tan pa gleeing pa pluat ploi phimap, sonsang yuh pa khyox pa khaw ka son ceu pui Isarelax khankix mai son kaing jhaw nyiex bwan ex khankix heue. ³⁴ Ex nieb ti yaox ka daux sinax cao giex kaing li, pui Lewix mai pui hun khankix, sonsang viex kix khix son krax tan ka daux nyiex Siyiex ex, awm pa hoik yuh cub nyiex ma keeing ex khankix, ka daux bawg yam pa hoik tat ti deuh tix num hoik tix num, sonsang gleeing tix piang khu dee tan Siyiex ex, awm krax pa hoik tiiem ka daux lox tat jhawm prawng heue. ³⁵ Ex yuh been sonsang viex ex plix liang khaing haktiex ex mai plix khaox plix ox pa liang ex tix pon khaing khaox plix pa koe khawmuik, hoek ka nyiex bwan Siyiex tix num hoik tix num, ³⁶ awm pa hoik tiiem ti deuh ka daux lox tat jhawm prawng mai viex kawn Ai plix num ex, khawng eei brie liang ex mai cub mawie pa liang ti keh mai cub pex, cub yung khankix hoek ka nyiex bwan Siyiex ex ka cao giex kaing li cao yuh kaing jhaw Siyiex ka daux nyiex bwan Siyiex ex heue. ³⁷ Viex blah phawng nghox ca pa hoik klu klao pa liang ti yuh khankix mai krax tan khawm plix khaox plix ox kuceu mai rawm plix siiet pa khraox, rawm bee pa khraox khankix, hoek ka cao giex kaing li daux lawg pa koe ka daux nyiex bwan Siyiex ex, sonsang viex kao son tix son hoek khaing haktiex cao ex ka pui Lewix khankix, mawh kheu pui Lewix mawh cao rieb kao son tix son khaing daux cub pui yuh kaing ma khawmuik heue. ³⁸ Yam rieb pui Lewix khankix ka kao son tix son, cao giex kaing li doeh ru ceu cat Arun caw tix ot tau mai kix mai pui Lewix tak teei kao son tix son khaing daux kao son tix son hoek ka nyiex bwan Siyiex ex, ka daux krao sinngao heue. ³⁹ Grawh grawng nawh kawn praix ceu pui Isarelax mai kawn praix pui Lewix khankix, tak viex krax tan phawng nghox ca im mai rawm plix siiet pa khraox khawm bee, hoek ka daux lawg priex kraung ka dee koe kraung sinngao pa singax singeh khankix mai ka dee ot cao giex kaing li pa yuh kaing jhaw Siyiex khankix mai cao pau siviex khankix cao rhax lai khankix, mai ex tak ang pon prah ka nyiex bwan Siyiex ex heue.

¹ Cub cao kaing pui khankix hoik ot ka daux veng Yerusaliem mai cub pui pa kawn deuk khankix hoik nieb ti yaox khaing daux pui kao kaux, tix kaux an tak tawx ot daux veng Yerusaliem veng pa singax singeh mai pa kawn deuk dim kaux khaing kao kaux an, tak ot ka daux veng tang dah dee heue. ² Pui khawmuik nawb bwan piang pui khankix pa hoik koe rhawm tix ot ka daux veng Yerusaliem heue. ³ In mawh cao kaing khankix khaing kien haktiex an pa hoek ka daux veng Yerusaliem heue. Viang mawh nan, pui pa hoik tang ot ka veng ka nyiex yaong cao tix ka daux haktiex Yudax mawh pui Isarelax mai cao giex kaing li, pui Lewix, pui kham ti yuh kaing jhaw nyiex bwan Siyiex mai khawm doeh ru kawncau simiang Sawlamon khankix heue. ⁴ In mawh cub kawn praix ceu pui Yudax mai kawn praix ceu pui Binyamin khankix pa ot ka daux veng Yerusaliem tan, kawn praix ceu pui Yudax khankix mawh Atayax kawn simex Urix kawn simex Zakharix, kawn simex Amarix, kawn simex Shephatix, kawn simex Mahalalelax, cub kawn praix Pariet khankix, ⁵ mai Maseyax kawn simex Baruk, kawn simex Kholahozie kawn simex Hazayax, kawn simex Adayax, kawn simex Yoyarip, kawn simex Zakharix, kawn simex Shilonix heue. ⁶ Cub kawn simex Pariet pa ot ka daux veng Yerusaliem khawmuik, koe pon yieh tixgliah daix kaux, pa mawh pui pa koe rhawm vao rhawm kwa heue. ⁷ Inkix mawh cub kawn simex Salux kawn simex Meshulam, kawn simex Yodax, kawn simex Pedayax, kawn simex Kolayax, kawn simex Meseyax, kawn simex Itelax, kawn simex Yeshayax, ⁸ mai khaix nawh mawh Gabie mai Salie khankix, koe dim yieh tixnga daix kaux heue. ⁹ Yolax kawn simex Zakharix, tom mawh cao kaing kix mai Yudax kawn simex Senua mawh cao kwang veng ra kaux heue. ¹⁰ Khaing daux cub cao giex kaing li khankix mawh Yedayax kawn simex Yoyarip mai Yakhin, ¹¹ Serayax kawn simex Hilakix, kawn simex Meshulam, kawn simex Zadok, kawn simex Merayot, kawn simex Ahitup; mawh cao kaing nyiex bwan Siyiex heue. ¹² Puxaik kix pa yuh kaing nyiex bwan khankix koe daix yieh tixnga ra kaux mai Adayax kawn simex Yeroham, kawn simex Pelalix, kawn simex Amazix, kawn simex Zakharix, kawn simex Peshurax, pa deeh mawh kawn simex Malakhiyax, ¹³ mai puxaik nawh pa mawh cao kaing daux nyiex ma keeing kix koe ra yieh tixpon ra kaux mai Amashen kawn simex Azarelax kawn simex Ahazen kawn simex Meshilamot, kawn simex Imarax, ¹⁴ mai puxaik kix pa mawh pui pa kied ting riang rao mai pa koe rhawm vao rhawm kwa khankix, koe tix yieh tixnga daix kaux, cao kaing kix mawh Zabadelax kawn simex Hagadoling heue. ¹⁵ Ceu pui Lewix khankix mawh Shemayax kawn simex Hashup, kawn simex Azarikam, kawn simex Hashabix, kawn simex Bunnix; ¹⁶ Shababetie mai Yozabat, cao kaing pui Lewix khankix, mawh cao pa kia ngiien kaing jhaw plak ka praix nyiex bwan Siyiex, ¹⁷ Mai Matania kawn simex Mikha, kawn simex Zabadix, kawn simex Asapha, pa mawh cao kaing pa thong kix jhak krax yaogyaw bwanson tau mai krax rawg bwan mai Bakabukiyax mawh ra kaux tix kaux khaing daux sinax puxaik nawh khankix mai Abada kawn simex Shammua, kawn simex Kalalax, kawn simex Yedutun heue. ¹⁸ Pui Lewix pa ot ka daux veng pa singax singeh khawmuik koe ra yieh tidaix pon kaux heue. ¹⁹ Lheu khaing an cub cao pau siviex khankix mawh Akkup, Talamon, mai cub puxaik kix pa priex rien ka siviex khankix koe tix yieh atixgliah ra kaux khawmuik heue. ²⁰ Can pui Isarelax pa kawn deuk pa mawh cao giex kaing pui Lewix khankix, pa ot ka daux veng nyiex yaong haktiex Yudax khankix mai pui ku kaux hoik tang ot ka daux haktiex sinngao cie tix heue. ²¹ Viang mawh nan, pui kham ti yuh kaing jhaw nyiex bwan Siyiex khankix ot ka daux Ophilax heue. Ziha mai Gishapax mawh cao kwang piang cao kham ti yuh kaing jhaw nyiex bwan Siyiex heue. ²² Cao pa kia nghiet piang pui Lewix pa ot ka daux veng Yerusaliem khankix mawh Ozix kawn simex Banix, kawn simex Hashabix, kawn simex Asapha cao pa rhax lai khankix mawh cao kia ngien kaing jhaw Siyiex heue. ²³ Grawh grawng nawh simiang tawx lox ka son grawng kix cub pa rhax lai sonsang pon kix nyum pa ih pa caw kix tix pon tix ngaix hoik tix ngaix heue. ²⁴ Petahix kawn simex Meshezabelax pa kaoh khaing cub kawn praix Zerax kawn simex Yudax mawh cao kaing son grawng kaing kuceu piang pui haktiex greem simiang heue. ²⁵ Pui tom nie ot ka dee dex kaing ma nyiex yaong tix khankix, kawn praix ceu pui Yudax tiblah ot ka daux veng Kirayatabax mai nyiex yaong an khankix, veng Dibon mai nyiex yaong an khankix, ²⁶ ka aux veng Yeshu, veng Moladax, veng Bietpeliet, ²⁷ Veng Haza, Shualax mai veng Berashebax mai nyiex yaong an khankix, ²⁸ ka daux veng Zikalat mai veng Hiekona mai nyiex yaong an khankix, ²⁹ ka daux veng Enrimon, veng Zorax, veng Yamut, ³⁰ veng Zanaw, veng Adalam mai nyiex yaong kix khankix, ka daux veng Lakhisha mai tong kaung an khankix; ka daux veng Azaka mai nyiex yaong an khankix heue. Kix hoik ot baoh an, jah khaing veng Berashebax tom hoek ka daux ngawd Hinnom khankix heue. ³¹ Cub kawn praix ceu pui Binyamin pa kaoh khaing veng Gebax khankix hoik ot ka dax veng Mimat veng Aija mai veng Betelax mai nyiex yaong kix khankix, ³² Ka daux veng Anatok, veng Nobax, veng Ananix, ³³ Ka daux veng Hazo, veng Rama, veng Gittem, ³⁴ Ka daux veng Hittix, veng Zebom, veng Nebalat, ³⁵ Ka daux veng Lodax, veng O maw mai ka daux ngawd pui chix yuh kaing tix khankix heue. ³⁶ Cub pui Lewix pa ot ka daux haktiex Yudax hoik gwieh tix ot ka daux haktiex Binyamin heue.

¹ In mawh cub cao giex kaing li mai pui Lewix khankix, pa hoik hoek tau mai Zerubabelax, kawn simex Shalatelax mai Yeshu Serayax, Yeramix, Ezarax, ² Amarix, Maluk, Hatut, ³ Shekanix, Rehum, Meramot, ⁴ Ido, Geneton, Abiyax, ⁵ Miyamin, Madia, Bilaga, ⁶ Shemayax, Yawyarip, Yelayax, ⁷ Salu, Amok, Hilakhix mai Yedayax, khankix heue. Inkix mawh cub cao kaing cao giex kaing li khankix mai khawm puxaik kix ka daux baux singaix Yeshu heue. ⁸ Lheu khaing an cub pui Lewix khankix mawh Yeshu, Binnui, Kamelax, Sherabix, Yudax mai Matania, mawh pa thong bung pui ka lai rhax pa yaogyaw bwanson tau mai puxaik nawh khankix heue. ⁹ Bakabukix mai Unix mai puxaik kix khankix hoik cung tix ot ka plak see kix yam koe beeh glawm kix heue. ¹⁰ Yeshu mawh keeing ka Yoyakim, Yoyakim mawh keeing ka Eliyaship, Eliyaship mawh keeing ka Yoyadax, ¹¹ mai Yoyadax mawh keeing ka Yawnasan, Yawnasan mawh keeing ka Yadua heue. ¹² Cao kaing ka daux cub cao giex kaing li, ka daux baux singaix Yoyakim hoik mawh inkix heue. Khaing Serayax mawh Merayax, khaing Yeramix, mawh Hananix, ¹³ khaing Ezarax mawh Meshulam, khaing Amarix mawh Yehohanan, ¹⁴ khaing Melikhu mawh Yawnasan, khaing Shebanix mawh Yosiep, ¹⁵ khaing Harim mawh Adanax, khaing Merayok mawh Helakie, ¹⁶ khaing Ido mawh Zakharix, khaing Giheton mawh Meshulam, ¹⁷ khaing Abiyax mawh Zikharix, kawn simex Minamin, khaing Mawdia mawh Pilatix, ¹⁸ khaing Bilaga mawh Shammua, khaing Shemayax mawh Yehonasan, ¹⁹ khaing Yoyarip, mawh Matatenie, khaing Yedayax mawh Uzi, ²⁰ khaing Salatie mawh Kalalie, khaing Amok mawh Eba, ²¹ khaing Hilakhix mawh Hashabix mai khaing Yedayax mawh Netanelax heue. ²² Daux glang bawg yam kwang simiang Darix ceu pui Pasha ka haktiex, carang pa tiiem ti deuh grawng pui Lewix mai cao giex kiang li pa hoik sax mawh cao kaing ka daux nyiex ma keeing kix hoik dawg koe tom baux ju Eliaship, Yoyadax, Yohanan mai Yadua heue. ²³ Carang cub kawn simex pui Lewix khankix mai cao kaing paox nyiex ma keeing kix to, hoek baux singaix Yohanan, pa mawh kawn simex Eliahship, hoik tiiem tix ka daux phuk lai been khankix heue. ²⁴ Cub cao kaing cub Lewix khankix, mawh Hashabix, Sherabix mai Yeshu kawn simex Kamelax, tau mai puxaik kix hoik cung tix ot see paox tix sonsang lai loh tix yaogyaw mai ting bwanson ka Siyiex awm gumlox pa tawm Davit, pa mawh pui Siyiex heue. ²⁵ Matania, Bakabukix, Obadix, Meshulam, Talamon mai Akkup khankix hoik mawh cao pau siviex krao kraung heue. ²⁶ In mawh pui pa ot tau mai kix, ka daux baux singaix ju Yoyakim kawn simex Yeshu, kawn simex Yozadak mai ka daux singaix ju Nehamix pa mawh cao pa kwang veng mai Ezarax cao giex kaing li cao tiiem lai heue. ²⁷ Yam hoek baux yam appong kix ka guh veng Yerusaliem kix hu sawg pui Lewix khankix, ka dee ot dee koe kix khawmuik, sonsang hoek yuh kix krax pa appong Yerusaliem, tau mai pa gaux rhawm mai pa ting bwanson tau mai pa rhax lai mai chiang mai ting koe maox khawm ting pawd khankix heue. ²⁸ Cub kawn simex cao pa rhax lai khankix kraix khrawm paox khaing hawt vung viang veng Yerusaliem mai khaing yaong Netawphah khankix, ²⁹ khaing nyiex yaong baoh veng Gilakalax mai khaing daux tong veng Gebax mai veng Azamaviet khankix heue. Mawh kheu cao pa rhax lai khankix, hoik sum tix ot nyiex yaong hawt vung viang Yerusaliem son cao kix heue. ³⁰ Khaix an cao giex kaing li mai pui Lewix khankix hoik kieh tokaux tix singax mai pui hun khawm guh veng singax heue. ³¹ Mawh kheu nan aux viex cao kaing pui Yudax khankix haok piang guh veng mai hoik yaog ti deuh cub caw ting pa rhax lai yaogyaw bwanson koe ra cub mai an tix cub hoik hu plak khawn dawm piang guh veng plak sivex dee tik pui ceu pa seeing brai, ³² Khaix kix mawh Hoshayax mai cub cao kaing pui Yudax khankix tix plak pa hu, ³³ mai Azarix, Ezarax, Meshulam, ³⁴ Yudax, Binyamin, Shemayax, Yeramix, ³⁵ mai cub kawn simex cao giex kaing li khankix pa giex teettawng, mawh Zakharix, kawn simex Yawnasan, Yawnasan mawh kawn simex Shemayax, Shemayax mawh kawn simex Matania, Matania mawh kawn simex Mikhayax, Mikhayax mawh kawn simex Zakhurax, Zakhurax mawh kawn simex Asapha, ³⁶ mai puxaik nawh khankix pa mawh Shenayax, Azarailax, Milalie, Gilalie, Maai, Natanelax, Yudax mai Hananix tau mai kraung ting tah Davit, pa mawh pui Siyiex; mai Ezarax pa mawh cao tiiem lai hu sivoe kix heue. ³⁷ Ka plak sivoe hawt baoh siviex rawm keut tan, kix haok piang krax guh veng ka glawk bawng veng Davit, see nyiex haw Davit ka blaong tom hoek ka siviex plak lih singaix heue. ³⁸ Cub pa rhax lai yaogyaw bwanson tang cub, hoik hu ka krax plak gwieh mai ang hawt khaix kix tau mai pui khankix tix plak piang guh veng mai tiang tix hu khaing dee pau pa lhaong nyiex tao ngu tom hoek dee kied siva guh veng, ³⁹ mai tiang piang siviex Epharem, piang diang siviex prim mai piang siviex Kax mai ka nyiex pau dee lhaong Hananelax mai ka nyiex pau dee lhaong Meax, tom hoek ka siviex yung mai kix kaog ka hawt siviex thawng heue. ⁴⁰ Mawh kheu nan, cao pa rhax lai yaogyaw bwanson khankix ra cub cung ka daux nyiex bwan Siyiex, aux mai cao pa kwang haktiex khankix tix plak hoik cung tau mai aux, ⁴¹ mai cub cao giex kaing li khankix pa mawh Eliakim, Maseyax, Mikhayax, Elionie, Zakharix mai Hananix, pa giex teettawng, ⁴² mai Maseyax, Shemayax, Eliaza, Urix, Yehohanan, Malakhiyax, Elam mai Eza khankix hoik ot tau tan heue. Cao pa rhax lai khankix hoik rhax lai ka daux pa kied ting sinum Yezarahix mawh cao bung cao thong ka kix heue. ⁴³ Ka daux singaix an kix hoik tan to tan pa appong tom nie mai krax pa gaux rhawm tix, mawh kheu Siyiex hoik kieh kix gaux rhawm mai krax pa kied ting, bun mai kawn nyawm khankix kawx gaux rhawm, krax pa gaux rhawm veng Yerusaliem hoik mhong tix tom singai heue. ⁴⁴ Ka daux bawg yam an, kix hoik yaox pui tiblah mawh pa teei beeh glawm piang krao lawg priex kraung khankix, son krax tan, plix khaox plix ox pa liang tix plix mai son kao son tix son, pa khrawm kix khaing daux tong kaung daux veng khankix, pa mawh nyum pa hoik tat awm lox tat jhawm prawng son cao giex kaing li mai pui Lewix khankix, mawh kheu ceu pui Yudax khankix hoik gaux rhawm ka cao giex kaing li mai pui Lewix pa yuh kaing jhaw Siyiex heue. ⁴⁵ Cao giex kaing li mai pui Lewix hoik priex rien ti yuh kaing jhaw Siyiex kix, cao pa rhax lai mai cao pau siviex khankix kawx, hoik priex rien ti yuh awm gumlox tawm Davit mai kawn simex nawh Sawlamon heue. ⁴⁶ Tom ka daux baux singaix ju Davit mai Asapha cao kaing ting ka cub cao rhax lai khankix mai pa rhax lai yaogyaw bwanson ka Siyiex hoik dawg koe tom yam an heue. ⁴⁷ Ka daux baux singaix Zerubabelax mai ka daux baux singaix ju Nehamix khankix, ceu pui Isarelax khawmuik hoik tang tawx nyum son cao pa ah lai rhax mai son cao pau siviex khankix, nyum pa caw kix tix pon son ku singaix, kix hoik tang gwieh tix tan ceu pa singax singeh an khankix son pui Lewix mai pui Lewix khankix hoik dee tang gwieh tix tan ceu ankix, son kawn praix Arun khankix heue.

¹ Ka daux singaix an kix phat pui mhong ka gumlox phuk lai Mose mai ka daux lai ankix kix yaox krax pa hoik tiiem tix sonsang ang ceu pui Amon mai ceu pui Mawbax khankix, pon laig ka daux sinax cub pui hun cie Siyiex khankix, ² mawh kheu ang kix rieb ka kawn praix ceu pui Isarelax khankix ka blah mai rawm, kix hoik vai Balam sonsang tieh feen mai jhax lawg ka kix, viang mawh nan, Siyiex hoik deeh loh krax pa jhax lawg an, mawh ceu pa nawb bwanson heue. ³ Yam hoik mhong kix ka gumlox tat jhawm prawng an, kix hoik gwieh pui hun pa neuex tix tau khawmuik khaing ceu pui Isarelax khankix heue. ⁴ Sivoe in cao giex kaing li Eliaship hoik koe sibrawm piang lawg krao priex kraung nyiex bwan Siyiex ex khankix mai hoik yuh paox pie tau mai Tobix heue. ⁵ Hoik khre lawg pa ting tix mu son nawh, ka dee priex kix krax tan phawng nghox ca im mai can ceu pa sioe bhawng, kraung shiao mai nghox ca kao son tix son mai rawm plix siiet pa khraox khawm bee khankix, pa hoik tawm tix sonsang tawx ka pui Lewix cao rhax lai, cao pau siviex mai krax tan khankix son cub cao giex kaing li khankix heue. ⁶ Viang mawh nan glang yam sinax in khankix, aux ang lai ot ka daux veng Yerusaliem, mawh kheu ka daux bawg yam hoik kwang Atazerit simiang veng Babulon ka haktiex tixngoe ra num tix num, aux deeh hu ka simiang ka daux khaix singaix an aux hoik pon akhwang khaing simiang, ⁷ Yam hoek aux ka veng Yerusaliem mai yaox ka ceu pa caox caig pa yuh Eliaship son Tobix ka pa khre rien lawg tix mu son nawh ka daux biang nyiex bwan Siyiex heue. ⁸ Ceu pa kied meet rhawm ka tete, mawh kheu nan aux tom teei ti tik kraung nyiex ma Tobix khawmuik khaing daux lawg heue. ⁹ Khaix an aux tawx lox sonsang yuh kix lawg singax mai aux hoik deeh viex kraung shiao nyiex bwan Siyiex khankix laig ka daux lawg tau mai krax tan phawng nghox ca im mai ceu pa sioe bhawng khankix heue. ¹⁰ Aux hoik deeh tawng ka ang pui Lewix khankix nyang bax pon nyum pa khaw tix tawx ka kix pa mawh pui Lewix khankix ku kaux mai cao pa rhax lai pa yuh kaing jhaw khankix mai hoik deeh ing ka tong kaung tix heue. ¹¹ Mawh kheu nan aux hoik ne raw ka cao pa kwang haktiex khankix ah nin, "Nyiex bwan Siyiex lai chix mawh pa tik pa vud ti yuh ka mawh lie?" Aux hoik kraix khrawm pui Lewix tau mai hoik deeh yaog ti deuh kix ka dee ot dee koe kix heue. ¹² Khaix pui Yudax khawmuik hoik viex nghox ca, rawm plix siiet pa khraox mai bee khankix pa mawh krax tan kao son tix son hoek ka nyiex krao priex kraung heue. ¹³ Aux hoik yaog ti deuh cao pa kwang khankix piang nyiex krao priex sinbwan, pa mawh cao giex kaing li Shelemix mai cao tiiem lai Zadok mai khaing daux pui Lewix khankix tom mawh Pedayax mai khaix kix tom mawh Hanan mawh kawn simex Zakharix, Zakhurax mawh kawn simex Matania heue. Kheu mawh kix pa hoik koe krax pa kaux sijax mai kaing jhaw tom mawh pa sang gwieh tix tawx kraung ka son puxaik kix heue. ¹⁴ Siyiex eue doh keud ka aux son grawng in mai paw doh preet ti tik kaing ceu pa mhawm yuh aux khankix, ka pa hoik yuh aux ka son nyiex bwan Siyiex aux mai son kaing jhaw khankix liak. ¹⁵ Ka daux singaix yam an aux hoik yaox pui tiblah ka daux haktiex Yudax, pa biiet rawm plix siiet ka daux singaix twah mai paw viex lhiem nghox khankix hoek mai tang rawm plix siiet piang la, khawm sigleem plix siiet mai plix ruh khankix mai kuceu khawmuik, pa hoik viex kix hoek ka daux veng Yerusaliem ka daux singaix twah mai aux hoik sax tawx satix ka kix sonsang ang kix coh cai lai gee singaix twah heue. ¹⁶ Pui veng Turux pa ot ka daux veng Yerusaliem teei kax mai kraung lai kuceu hoek mai coh ka pui Yudax daux singaix twah heue. ¹⁷ Khaix an aux hoik ne raw ka cub simiang pa laoh lie pui Yudax khankix mai ah ka kix, "Kheu pex lai yuh ceu pa caox caig yuh nin, sonsang kieh tix singaix twah seeing brai ka yuh ka mawh? ¹⁸ "Mawh ang keeing pex khankix hoik yuh awm an mai ang mawh Siyiex pa hoik viex krax laux leeing in khawmuik hoek piang ex mai piang veng in lie? lai kawn baox viex krax song rhawm hoek piang ceu pui Isarelax khankix, pa hoik seeing brai yuh tix singaix twah heue." ¹⁹ Mawh kheu nan ka daux siviex veng Yerusaliem ka daux bawg yam jah praix tix sang faik sivoe singaix twah tix ngaix, aux hoik tawx lox sonsang nyeep kix ka siviex veng khankix mai tawx beeh glawm sonsang ang kix paoh siviex tom hoik luan singaix twah, khaix aux yaog ti deuh kawncau tix khankix tiblah sonsang pau jhak ka siviex khankix, sonsang ang viex beeh glawm pa cien khankix laig ka daux veng singaix twah heue. ²⁰ Mawh kheu nan cao yuh lai geu khankix mai cao coh cao cai kraung kuceu, hoik pan hoik peung ka plak praix veng Yerusaliem been tix bawg ra bawg heue. ²¹ Tawx satix mai ah nin ka kix, "Pex lai pan peung plak praix guh veng yuh ka mawx lie? Phan pex baox deeh yuh nin, Aux tak giex ka pex, " jah khaing yam an, kix ang lai hoek tix bawg kawx ka daux singaix twah heue. ²² Aux tawx lox ka pui Lewix khankix, sonsang yuh kix tokaux tix singax mai sonsang hu pau kix ka siviex veng mai sonsang kieh kix singaix twah singax singeh, Siyiex deeh doh keud ka aux, son kaing in mai pluat ploi ka aux, awm koe krax caux rhawm pa kied ting Maix Cao liak. ²³ Ka daux singaix an aux hoik yaox ka pui Yudax tiblah pa teei ti moeng ceu pui Ashadok, ceu pui Amon mai ceu pui Mawbax khankix heue. ²⁴ Kawn praix kix tix plak hoik sikax lox ceu pui Ashadok mai ang lai chix sikax lox pui Yudax, viang mawh nan kix hoik sikah ka lox sikax ceu pui mawx pui an heue. ²⁵ Aux ne raw kix, jhax lawg ka kix, sivied kix tiblah, reeig hauk kix mai hoik kieh kix tiextu tix ka Siyiex ah nin, "Pex tak ang pon tawx kawn bun tix mex kawn simex kix mai pex tak ang pon ti teei kawn bun kix mawh moeng kawn simex pex khawm cao pex heue." ²⁶ Ang mawh Sawlamon simiang ceu pui Isarelax pa hoik lud ka grawng ceu inkix lie? Viang mawh nan, ka daux sinax haktiex pa haoh hun simiang pa awm nawh ang koe tix kaux kawx, pa kied moh Siyiex ka nawh mai Siyiex hoik kieh nawh mawh simiang piang ceu pui Isarelax, viang yuh ka mawh kawx, bun tang praix klawng khankix kawn pon kieh nawh lud heue. ²⁷ "Mawh khex sang nghiet yix ka krax pa yuh pex, pa caox caig pa kied ting in mai pa lud pex ka Siyiex ex, ka teei pex tix moeng bun tang praix klawng khankix lie?" ²⁸ Pui tix kaux pa kaoh khaing daux cub kawn simex Yoyadax pa mawh kawn simex cao giex kaing li pa ting Eliaship pa mawh kheue Sanbalat pui Horonix, mawh kheu aux hoik grheu nawh lih khaing tix heue. ²⁹ Siyiex aux eue, doh keud ka kix, mawh kheu kix hoik seeing yuh grawng pa mawh tix cao giex kaing li mai sijax mukheu pa hoik yuh Maix Cao tau mai cao giex kaing li mai pui Lewix khankix heue. ³⁰ Mawh kheu nan aux hoik kieh kix singax mai hoik kieh kix tang tiah khaing pui tang praix klawng kuceu, aux hoik yaog tix tawx beeh glawm ka cao giex kaing li mai pui Lewix khankix kaux mawx kaux an, ka daux kaing jhaw pa yuh nawh, ³¹ aux kieh kix viex ti tan khix mai plix khaox plix ox pa liang kix tix pon phao voe hoek ka bawg yam pa hoik tat ti deuh, Siyiex aux eue, doh keud ka aux mai tawx bwanson ka aux liak.