Nahum

Nahum

¹ Ka grawng pa plak jhi son veng Nineve pa mawh lai riang susai pa yaox Nahum pa mawh pui yaong Elakawsha. ² Siyiex mawh pa ci krax pa caox mai Simiang Siyiex yuh krax pa pawk bix heue. Siyiex yuh krax pa pawk bix mai koe krax pa kied ting song rhawm songrhi heue. Siyiex tak sang pawk bix ka pui koeng Nawh khankix mai Nawh deuh krax pa song rhawm songrhi ka son pui koeng Nawh khankix heue. ³ Siyiex mawh pa ang yie song rhawm mai mawh pa kied ting sibrawm mai tak ang pluat phimap pui pa caox caig khawmuik heue. Siyiex hoik hu daux krax Cao Nawh, ka daux bhaung kang lux mai ka daux lhiex ting mai paiawm khankix mawh pa awm phawng tiex ka greem caong Nawh Cao heue. ⁴ Nawh Cao ah ka rawm sigrit sigra mai kieh kroh mai kieh rawm klawng khankix hit khawmuik heue. Gawng Bashan mai gawng Kharamelax khankix kroh ti hu mai pruh tai gawng Lebanon fit hu heue. ⁵ Gawng khankix yung yiang kheu Nawh Cao, ton khankix hoik rawm mai tiex gah hu ka plak sivoe ngai Nawh Cao, khawm haktiex mai can pui pa ot ka daux nawh khawmuik heue. ⁶ Pui mawx pa pon cung ka plak sivoe krax pa saux rhawm saux rhi Nawh Cao lie? Pui mawx pa pon thang krax pa kied kin pa song rhawm Nawh Cao lie? Krax pa saux rhawm Nawh hoik klup ti lih awm ngu mai rang khankix hoik phawng hoik nyau kheu Nawh Cao heue. ⁷ Siyiex pon mawh pa mhawm, dee pa kaux cong ka daux singaix pa kha rhawm mai Nawh Cao tawng ka pui an kix ka pui pa een rhawm tix ka Nawh Cao heue. ⁸ Viang mawh nan, Nawh Cao tak kieh rawm hwan kheem ka pui pa sang yaog ti tieh feen khankix pak lawg, mai leue pui koeng Nawh Cao khankix laig ka daux pa faik heue. ⁹ Mawh keud maix ti sang yuh ceu pa caox patix ka Siyiex lie? Nawh Cao tak sang kieh pex laux lak pak leeing heue. Krax kha rhawm tak ang lai pon yaog ti koe ra bawg heue. ¹⁰ Kix klung klien ti tau awm pang kat mai awm pa nyaux ti yoek ka rawm plix siiet, kix tak sang mawh pa proe ti laux awm nyhee pa hoik kroh kroing heue. ¹¹ Khaing maix tak sang lih hoek pui tix kaux, pa keud ti sang yuh pa caox ka Siyiex, pa keud sawn krax pa caox caig heue. ¹² Siyiex ah nin! Viang kix mawh pa hoik grum naog mai pa hoik pre koe pui tom nie kawx, viang yuh nan, kix tak sang mawh pa tat ti lih mai hoek krax grai grhup heue. Yudax eue, viang Aux hoik yuh krax kha rhawm ka maix kawx, Aux tak ang lai baox yuh krax kha rhawm ka maix khaix in tix bawg kawx heue. ¹³ Yam in Aux tak sang raig ti tik khaox glawm nawh khaing maix mai rud ti tik maox nawh khankix dud hu heue. ¹⁴ Siyiex tawx gumlox tix hoek ka veng Nineve ah nin, doeh maix tak sang dut heue. Khaing daux nyiex siyiex maix khankix, Aux tak sang tat ti tik riang grang pa hoik saik tix mai khawm riang grang pa hoik raug tix khankix heue. Aux tak sang kieh maix laig ka daux simeeig, kheu mawh maix pa pheem pa deux heue. ¹⁵ Jhak ti yaox ka caong pa krai lox bwan gaux rhawm mai pa pao ti krai grawng krax pa nhim ka piang gawng lua khankix heue. Ceu pui Yudax khankix eue, priex ti yuh pawie pa hoik tat maix ti deuh heue. Grawh grawng nawh, pui pa ang rahsee an tak ang lai pon tiang ti hu ka daux pex khaix in tix bawg kawx, nawh mawh pa hoik tat tix khawmuik heue.

¹ Veng Nineve eue, pa sang yuh krax laux leeing hoik hoek ka plak sivoe ngai maix, yuh satix maix ka daux nyiex tab lhaong, pau ti jhak daux krax, kieh nyoi maix cong, yuh riang grang pa kied ting kied lhaong maix kaux cong heue. ² Grawh grawng nawh, Siyiex tak sang deeh yaog min krax pa kied mhawm Yakop, awm min krax pa kied mhawm ceu pui Isarelax khankix, mawh kheu cao pa yuh krax yi, hoik kieh Yakop mai ceu pui Isarelax khankix yi mai hoik kieh krax nhu plix siiet kix laux heue. ³ Plah rhiem tiebtie naing pui pa ting riang rao nawh khankix mawh pa raoh, pui pa vao pa kwa khankix mawh pa ceep kraung pa raoh rawt heue. Ling lawx naing khankix hoik toh luk lak awm ngu ka daux ngaix pa khre pa rien nawh, ti puing naing mai krong pliah khankix hoik vuh vied tix heue. ⁴ Ling lawx naing khankix yaog ti to luah sinum ka daux piang krax khankix, kix to jee to blaung ka dah dee kied vieh khankix, grang kix awm riang ngu proh kix phai to awm puk plak braix heue. ⁵ Nawh krawk khrawm ka simiang cao kaing khankix mai kix sideeing ti goh yam hu lailing kix, kix nied ti haok ka guh veng khankix mai khre dee pa tiebtie heue. ⁶ Phai rawm klawng khankix hoik bang mai nyiex haw hoik grai grhup heue. ⁷ Laux simiang veng Nineve tak sang mawh pa peeik kraung ceep tix mai giex ti hu heue, bun kawncau nawh khankix tak sang tub naok tix mai yiiem awm lox sikaux, ka grawng ceu pa hoik tat ti deuh heue. ⁸ Viang veng Nineve pa dawg koe an, hoik awm rawm dung pa naog kawx yam in kix to ti lih heue. Viang koe pui pa kok yo lox tix ah, kaoh ha! kaoh ha! Mai pui tix kaux kawx ang lai deeh veeh tix ing heue. ⁹ Pex tud rhim ti teei mau khri mawh kheu kraung khrai ang lai chix uik mai kraung pa mhawm pa khaw rhawm pui kuceu kawx ang lai dak uik simin heue. ¹⁰ Veng Nineve hoik mawh pa yi, pa yiien grai hu pui mai mawh pa laux leeing heue. Rhawm pui veng koe krax laux rhawm mai ngawng hoik siyaung khawm ra khawn, nyoi ka hoik kied saux kraing saux ki mai pakngai kix hoik tieh loh tix heue. ¹¹ Dee ot dee koe sivai sangsi mai dee eei kawn sivai sangsi awn ju an khankix, dee hoik lailing sivai sangsi mhaing mai sivai sangsi miex mai kawn sivai sangsi khankix, dee pa ang pui koe krax lhat graung koe dee mawx lie? ¹² Sivai sangsi mhaing hoik puk paig ti kiied pa ih tom kub son kawn sivai sangsi iak khankix mai hoik ciiet ghok to pa im son miex sivai sangsi khankix mai hoik naog yuh daux rang ot nawh khankix ka to tiag heue. ¹³ Siyiex Cao kru naing raoma ah nin "Jhak heue, Aux mawh pui koeng ka maix heue. Aux tak sang gleeing ling lawx naing maix khankix mawh taox ngu mai vaid tak sang yuh sivai sangsi awn ju maix khankix laux leeing heue. Aux tak sang tat ti tik kraung khrai sinngao pa hoik tud rhim maix khankix khaing piang haktiex mai lox cao cau maix khankix tak ang lai mhong khaix in heue."

¹ Koe krax kha rhawm ka veng pa kieh nham khankix lih, hoik mawh pa naog ka krax pie lhen mai krax pa yuh con cam khankix, kaing ceu pa tud rhim koe ang jud ang jai heue. ² Mhong luah lox sivied mai lox sinum jaong ling lawx khankix, lox to brung, lox luah to ling lawx naing khankix, ³ pui naing brung khankix yuh naing mai vaid pa plang ti sawng mai khawm pliah pa sawng luk lak, koe pa pah yum tom nie, tokaux pui yum khankix hoik pum hoik grux tix tom kied nie mai tokaux pa yum khankix mawh pa ang lai uik simin, pui khankix sideeing tix ka tokaux pui yum khankix mai goh heue, ⁴ kheu haoh hun krax pa lud vao, ka krax pa mhawm grawng bun coh kaux an, pa meed ti yuh phi caox pa ploi meet, pa coh ceu pui khankix ka daux krax pa lud vao nawh khankix mai yuh phi caox pa ploi sat ka pui ku meung heue. ⁵ Siyiex Cao kru naing raoma ah nin "Jhak heue, Aux mawh pui koeng ka maix heue. Aux tak sang khleeing dai maix hoek ka piang pakngai maix, kieh pui kuceu yaox tokaux ka kaung maix mai kieh ku meung yaox ka dee pa kaig pa tua maix heue." ⁶ Aux tak sang tik ceu pa seeing brai ka piang maix, kieh maix mawh ceu pa seeing mai kieh maix mawh pa jhak pui ka ngai tix heue. ⁷ Can pui pa jhak ka maix khankix khawmuik, tak sang yaog ti to khaing maix ah nin, "Veng Nineve mawh pa hoik laux leeing heue. Mawh pui mawx pa tak sang koe krax khi rhawm ka son nawh lie? Aux tak sang pon sawg ti tawx cao pa tawx krax nyawm rhawm khankix ka son maix dee mawx lie?" ⁸ Mawh nie lheu mhawm maix khaing veng Naw-amon, pa hoik pang ti ot sinax rawm klawng Nilax, pa hoik koe rawm khankix hawt vung viang nawh, pa hoik mawh rawm sigrit sigra guh nawh mai guh veng nawh lie? ⁹ Haktiex Ethiopiya mai meung Ejiptux hoik mawh riang rao pa ang lai chix uik nawh, pui haktiex Putax mai pui haktiex Lubim khankix hoik mawh cao pa teem nawh heue. ¹⁰ Viang mawh nan, nawh hoik mawh pa gah ti luan, nawh hoik hu ka daux krax pa giex laung, kawn ngie nawh khankix hoik dheem tix phawng, ka piang kaing krax ku krax heue. Kix hoik yuh nieb ka pui pa koe min pakngai nawh khankix mai pui pa ting nawh khankix kawx hoik phyawk tix ka maox ceng heue. ¹¹ Maix tak sang nyaux tom yoek tix, maix tak sang mawh pa glaik pa mox tix, maix tak sang baox deeh sawg dee peung tix khaing pui koeng heue. ¹² Dee pa kaux cong maix khankix, mawh pa tak sang awm plix ruh pa teem phao voe ka piang khaox ruh, phan yung yiang an kix tak sang khrum ka daux jheeh pui pa simie ti ih heue. ¹³ Jhak heue, lien maix mawh pa awm bun khankix, daux diang siviex haktiex maix mawh pa paoh ti vieh ka son pui koeng maix khankix, ngu tak sang gleeing jhong siviex maix laux leeing heue. ¹⁴ Kin ti deuh rawm nyaux maix son yam kham krax pa lai lawm yuh dee kaux cong maix kaux, laig chung chien ka daux glaox mai yuh lon tiex gleeing, yuh ti gleeing lon tiex khankix kaux cong heue. ¹⁵ Ngu tak sang gleeing maix tan, vaig tak sang mug ti tik maix, tak sang kiied tix ih maix awm sido heue. Yuh pui maix nie baox haoh hun awm sido klai, yuh pui maix nie lheu haoh hun awm sido nghox khankix heue. ¹⁶ Maix hoik baox naok ti haoh hun cao lai cao geu khankix nie hun khaing simuing piang raoma khankix kawx, sido klai tak ih khankix pak mai po ti luan heue. ¹⁷ Cao kaing maix khankix mawh pa hun awm sido klai, cao kaing naing maix khankix muma awm sido, pa peung ti ot ka piang vie khankix yam kwat praix mai yam lih singaix an kix tak po ti luan mai dee ot dee koe kix ang lai tawng kah heue. ¹⁸ Simiang haktiex Asurix eue, cao liang yung maix khankix laig it, pui pa ting lhaong maix khankix laux lee tix, pui maix khankix hoik prung prang tix ka piang gawng lua mai pui pa sang deeh kraix khrawm kix ang lai koe tix kaux kawx heue. ¹⁹ Dee mat maix ang pon pai ti moi, dee saux maix mawh pa kied kin lang teung heue. Can pui pa mhong lox pao grawng maix, tak dieh taix tix ka maix, grawh grawng nawh, mawh pui mawx pa ang sax kham krax pa caox caig awm maix sijeung lie?