Mark

Mark

¹ Dee jah lox bwan gaux rhawm Yesux Khrit, Kawn Siyiex awm hoik tiiem daux lai Cao jhai Isayax. ² "Jhak heue, Aux ploi kawncau Aux hu sivoe Maix, pa tak sang cox krax Maix heue. ³ "Lox kaw pa kok yo daux tiagtu ah nin cox krax Siyiex leeing ju, yuh krax Nawh rahsee heue." ⁴ Yohan cao cubcom hoek daux tiag mai sidiex gau grawng krax cubcom pa doh keud ka phimap tom pon luan khaing daux phimap heue. ⁵ Pui meung Yudax, pui veng Yerusaliem khawmuik, hu ka nawh. Kix krai doh phimap tix mai Yohan cubcom kix daux klawng ting Yawdan heue. ⁶ Yohan ceep kraung hauk kala-uk mai nhawt maox hak ka nyoi tix mai ih sido mai rawm hia tiag heue. ⁷ Nawh sidiex ah nin, "Khaix in, pa nie ting khaing aux, tix kaux tak sang hoek, pie maox kiep Nawh, ang aux keung nom ti kah, ⁸ Aux cubcom pex ka daux rawm, viang mawh nan Nawh tak cubcom pex ka daux Khuan singax heue." ⁹ Daux bawg yam singaix an, Yesux kaoh khaing veng Nazariet, meung Galilie mai hoek cubcom tix daux tawm taix Yohan ka daux klawng Yawdan, ¹⁰ Yam lih Nawh khaing daux rawm dom mawx dom an, Nawh yaox baoh raoma mai Khuan lih awm sikaux piang Nawh heue. ¹¹ Lox lih khaing raoma ah nin, "Maix mawh kawn pa moh Aux, pa khaw caw rhawm Aux heue." ¹² Dom mawx dom an, Khuan Cao grheu Nawh hu ka daux tiag tu heue. ¹³ Nawh ot ka daux tiag tu tixpon ngaix mai kham geu pa nyaw Satan, Nawh ot daux tiag, Kawncau Siyiex khankix khan kheu ka Nawh Cao heue. ¹⁴ Khaix hoik sau Yohan daux thawng Yesux hoek ka daux meung Galilie mai sidiex gau lox bwan gaux rhawm pa dex dawd mai Siyiex. ¹⁵ Ah nin, "Bawg yam hoik naog mai meung Siyiex dex sang hoek, doh keud ka phimap mai yum rhawm ka lox bwan gaux rhawm heue." ¹⁶ Yam Nawh hoek dex rawm nhawng Galilie, Nawh yaox Simon mai Andare pux Simon, ploi rub ka daux rawm nhawng, kheu kiex mawh pui pa teei kax heue. ¹⁷ Yesux ah nin ka kiex, "Hawt khaix Aux heue, Aux tak sang kieh pax lih mawh pui pa teei pui heue." ¹⁸ Dom mawx dom an kiex prah rub khankix tan mai hawt khaix Nawh. ¹⁹ Nawh hu sivoe ceeix mai Nawh yaox Yakop, kawn Zebedie mai pux nawh Yohan, ot daux reu mai cox rub tan. ²⁰ Nawh kok kiex dom mawx dom an mai kiex prah keeing kiex Zebedie mai pui cang caing khankix ka daux reu mai hawt khaix Nawh. ²¹ Kix hu ka veng Kapeniom mai dom mawx dom an ngaix twah Nawh laig ka daux nyiex sidiex mai sidiex gau tan heue. ²² Kix daox deng ka lox sidiex gau Nawh Cao, kheu lox gau Nawh awm pui pa koe sibrawm mai ang awm pui tiiem lai khankix heue. ²³ Daux nyiex dee sidiex kix tan, koe pui pa laig phi pa seeing tix kaux, nawh kok yo ah nin, ²⁴ "Yesux Pui veng Nazariet eue, ex koe pa yuh mai Maix ceu patix. Maix hoek ti yuh ex laux lie? Kaw pa Singax Singeh Siyiex eue, aux hoik tawng mawh Maix pui mawx." ²⁵ Yesux ah ka nawh yuh nin, "Paw nye, lih hu khaing daux nawh heue." ²⁶ Phi pa seeing an, kieh pui an goh mai kok lox sinum lih hu khaing daux nawh heue. ²⁷ Pui khawmuik khawm leeing daox deng kah, kix tom chawk paox tix, tix kaux lai tix kaux ah nin, "Lox sidiex gau pa khraox pa koe sibrawm In mawh patix? Nawh tawx lox ka phi pa seeing kawx, kix nghiet lox Nawh heue." ²⁸ Grawh grawng Nawh Cao tah hu ka sivie siveng meung Galilie ku dah dee tan heue. ²⁹ Dom mawx dom an yam lih kix khaing nyiex sidiex, Yakop mai Yohan hu laig tau mai kix ka daux nyiex Simon, Andare heue. ³⁰ Miex moeng Simon kied saux mai it, dom mawx dom an kix krai grawh grawng kiex ka Nawh Cao heue. ³¹ Nawh hu giex taix kiex yaog kiex kaoh mai jhawm saux kiex grai dom mawx dom an mai kiex khan kheu ka kix heue. ³² Yam klip singaix, yam ponbo kix viex pui pa koe jhawm saux mai pui pa laig phicaox khawmuik hoek ka Nawh. ³³ Pui veng khawmuik khrawm paox tix ot praok sivie tan heue. ³⁴ Nawh Cao cox pui pa koe jhawm saux kuceu kieh kix moi mai Nawh grheu phicaox lih tom nie, Nawh ang kieh phicaox khankix sikah, kheu kix hoik tawng Nawh heue. ³⁵ Yam ponngawb yam ang praix bax mung riang, Nawh kaoh hu ka daux tiag tix dah mai rawg bwan dee an. ³⁶ Simon mai pui pa ot tau mai nawh khankix hawt Nawh heue. ³⁷ Kix yaox Nawh mai ah nin ka Nawh, "Pui khawmuik sawg Maix heue." ³⁸ Nawh Cao ah nin ka kix, "Ex hu tang dah tang dee, ka daux tang yaong tang vie, yuh ka mawx viang mawh tan kawx Aux ka pon tix sidiex, kheu Aux hoek son ceu in heue." ³⁹ Nawh Cao laig sidiex ka daux nyiex sidiex kix khankix daux meung Galilie ku dah dee mai Nawh grheu phicaox khankix lih hu heue. ⁴⁰ Pui sipawg tix kaux hoek ka Nawh Cao, grux ngawng khyox khaw ka Nawh ah nin, "Phan Maix koe rhawm ti cox aux kieh aux singax Maix chix heue." ⁴¹ Yesux caux rhawm ka nawh mai nyeu taix tix teeh ka kaw an, ah nin ka nawh, "Aux koe rhawm heue. Kieh maix singax heue." ⁴² Jhawm saux sipawg an grai dom mawx dom an mai nawh singax heue. ⁴³ Nawh Cao kieh kaw an lih hu, khaix hoik tawx Nawh lox. ⁴⁴ Pa ah nin ka nawh, "Rien rhawm tix paw vi krai tix ceu kawx ka pui tix kaux kawx, viang mawh nan hu mai jhi cao giex kaing li yaox ka tokaux tix mai tan kheu hoik singax maix, awm ceu pa hoik nhie Mose, sonsang mawh mhai rug ka kix heue." ⁴⁵ Kaw an lih hu jah ti krai grawh grawng ceu in tom nie, tah ku dah dee, tom Yesux ang pon ti laig ka daux veng sidawng. Nawh ot ka plak praix daux tiag mai pui ku dah dee hoek ka Nawh Cao heue.

¹ Khaix an tix ngaix Nawh Cao baox deeh laig ka daux veng Kapeniom, yam mhong kix grawh grawng ot Nawh Cao ka daux nyiex tix nyiex, ² pui haoh pui hun khrawm paox tix tan, tom ang dee ot koe tom dex ka mai siviex Nawh krai kix mhong gumlox bwan heue. ³ Yam an pui pon kaux klawm ti viex pui pa koe jhawm saux pa yum taix caong tix kaux hoek ka Nawh Cao heue. ⁴ Yam an kheu cub pui hun kix ang pon hoek dex ka Nawh Cao, kix tom yieh braux nyiex piang dee ot Nawh mai khaix hoik yieh kix braux nyiex kix teei ku it kaw pa yum taix caong an mai kix ploi lih dee an heue. ⁵ Yesux yaox krax yum rhawm kix mai Nawh ah nin ka kaw pa yum taix caong an, "Kawn eue, hoik pluat phimap maix heue." ⁶ Pui tiiem lai tix blah ngawm tan mai kix keud daux rhawm tix yuh nin, ⁷ "Kheu Pui in ah lox yuh nin, Nawh salao ka Siyiex heue. Lheu khaing Siyiex tix kaux khaing, pui mawx chix ploi phimap?" ⁸ Dom mawx dom an Yesux tawng ka daux rhawm tix, grawh grawng pa keud kix daux rhawm tix mai ah nin ka kix, "Pex lai keud ceu in khankix ka daux rhawm pex yuh ka mawx? ⁹ Lox yuh ka mawx lheu yie ti ah, ka kaw pa koe jhawm saux pa yum taix caong, Hoik pluat phimap maix heue, yie ti ah lie? Phan ang mawh nan Kaoh, viex kraung it maix mai hu heue, yie tix ah lie? ¹⁰ Kheu sonsang tawng pex grawh grawng Kawn kawn pui chix pluat phimap piang haktiex. Nawh ah nin ka kaw pa koe jhawm saux pa yum taix caong, ¹¹ Aux krai ka maix kaoh, viex kraung it maix mai deeh ing ka nyiex maix heue." ¹² Kaw an kaoh dom mawx dom an mai teei kraung it tix lih hu sivoe ngai pui khawmuik, tom kix khawmuik daox deng kah mai yaogyaw Siyiex, ah nin, "Ex ang sax yaox pa yuh nin tix bawg kawx." ¹³ Nawh Cao deeh hu ka dex praok rawm nhawng tix bawg mai cub pui hun khawmuik hoek ka Nawh mai Nawh Cao sidiex gau ka kix heue. ¹⁴ Yam hu krax Nawh Cao yaox Lewix kawn simex Alaphie, ngawm daux nyiex koh mau mai Nawh Cao ah nin ka nawh, "Hawt Aux heue." Nawh kaoh mai hawt khaix Nawh Cao heue. ¹⁵ Khaix an yam ngawm neung Nawh dex pheen ka daux nyiex kaw an, pui koh mau mai pui koe phi map khankix ngawm neung tau mai Yesux mai kawncau Nawh khankix, kheu kix, pui hun hawt khaix Nawh Cao heue. ¹⁶ Pui tiiem lai mai Pharishie khankix yaox yam sawm Nawh tau mai pui pa koh mau mai pui koe phimap khankix, kix ah nin ka kawncau Nawh khankix, "Nawh lai sawm tau mai pui koh mau mai pui koe phimap khankix yuh ka mawx?" ¹⁷ Yam mhong Yesux, Nawh ah nin ka kix, "Pui pa nyawm ot, ang lo ka pui pa chix sidah, mawh pui pa koe jhawm saux khaing pa lo ka pui chix sidah. Aux hoek sonsang kok pui pa rahsee ang mawh, hoek ti kok pui pa koe phimap heue." ¹⁸ Bawg yam an kawncau Yohan mai Pharishie khankix twah pa ih mai kix hoek mai ah nin ka Nawh Cao, "Kawncau Yohan mai kawncau Pharishie khankix twah pa ih, yuh ka mawx kawncau Maix lai ang twah pa ih?" ¹⁹ Yesux chawk kix ah nin, "Yam yuh pui ka paox ot tau mai paox grawm nawh khankix, kix chix twah pa ih lie? Yam yuh pui ka paox, kawn ot mai kix, kix ang tau ti chix twah pa ih. ²⁰ Bawg yam singaix tak sang hoek, yam tak sang teei kaw pa yuh ka paox khaing kix, ka daux ngaix an kix tak sang twah pa ih heue. ²¹ Pui tix kaux kawx ang sax teei man pa khraox blaox kraung ceep pa prim, phan yuh nan kienie, man pa khraox pa hoik blaox daux griah tak kieh pa prim laux mai daux griah tak nie vieh khaing phao ka heue. ²² Pui tix kaux kawx ang sax teei rawm plix siiet pa khraox sau ka daux hau hak pa prim, phan yuh nan kienie, rawm plix siiet pa khraox tak kieh hau hak an bih mai khawm rawm plix siiet mai khawm hau hak tak laux tak nai kah heue. Viang mawh nan kix sau rawm plix siiet pa khraox ka daux hau hak pa khraox heue." ²³ Ka daux ngaix twah tix ngaix yam hu preeng Nawh Cao daux ma nghox ca, kawncau Nawh khankix caik ti teei sigleem nghox ca heue. ²⁴ Pharishie khankix ah nin ka Nawh Cao, "Jhak heue, yuh patix kix lai yuh pa ang khaw mai beenli ngaix twah?" ²⁵ Nawh Cao baox pawk lox mai ah nin ka kix "Ang pex sax phat grawh grawng pa yuh Davit yam lo nawh, pui ot tau mai nawh kied cai rhawm lie? ²⁶ Grawh grawng yam laig nawh ka daux nyiex Siyiex, Yam mawh Abyathax cao giex kaing li pa ting mai ih blah mai tawx ka khawm pui pa ot tau mai nawh, ka pui pa ang mawh cao giex kaing li ang khaw ti ih lie?" ²⁷ Nawh Cao baox ah nin ka kix, "Ngaix twah hoik yuh son kawn pui heue. Yuh kawn pui son ngaix twah ang mawh. ²⁸ Mawh kheu in Kawn kawn pui mawh Simiang ngaix twah heue."

¹ Nawh Cao deeh laig ka daux nyiex dee sidiex mai pui yum taix kroh taix tix khawn, ot tan tix kaux. ² Nawh Cao sang cox ka kaw an ngaix twah lie, ang cox lie, kix jhak ti yaox Nawh Cao, yuh ka mawx sonsang pon ti deuh phimap ka Nawh heue. ³ Nawh Cao ah nin ka pui pa hoik yum taix, kroh taix tix khawn an, "Kaoh cung tin heue." ⁴ Nawh Cao baox chawk ah nin ka kix, "Khaw ti yuh pa mhawm ngaix twah lie? phan ang mawh nan khaw ti yuh laux lie? Khaw ti taoh ju lie, phan ang mawh nan khaw ti pah yum lie?"Kix ang nye heue. ⁵ Khaix an Nawh Cao song rhawm mai jhak sivie tan piang kix, Nawh Cao khi rhawm kheu kien rhawm kix mai ah nin ka pui an, "Nyeu taix maix heue."nawh nyeu taix tix mai taix nawh deeh mhawm heue. ⁶ Pharishie khankix lih hu mai dom mawx dom an kix kum kawng mai kawncau Herut grawh grawng sang pon kix ti yuh Nawh Cao laux yuh ka mawx heue. ⁷ Yesux mai kawncau Nawh khankix hu ka rawm nhawng mai cub pui hun pa kaoh khaing meung Galilie, hawt khaix kix heue. ⁸ Meung Yudax mai khaing veng Yerusaliem, khaing veng Idom mai haktiex plak toi rawm Yawdan, kix pa ot sivie siveng veng Turux mai veng Sidom khankix, pui hun mhong grawh grawng pa yuh Nawh Cao mai hoek ka Nawh heue. ⁹ Mawh kheu pui kied haoh hun tan, son ang kix sang theen Nawh tom tip, Nawh Cao nhie kawncau Nawh khankix kieh reu iak krox dex Nawh tix lhang heue. ¹⁰ Mawh kheu Nawh hoik cox pui moi tom nie, can pui pa koe jhawm saux khawmuik, tom theen ka Nawh sonsang pon teeh kix ka Nawh Cao. ¹¹ Yam yaox phi pa seeing khankix ka Nawh Cao kix goh gup sivoe Nawh mai kok yo ah nin, "Maix mawh Kawn Siyiex heue." ¹² Nawh tawm lox ka kix tom nie, son ang kix sang kieh pui tawng Nawh Cao heue. ¹³ Nawh Cao haok ka gawng mai kok pui pa mie Nawh ti kok khankix mai kix hoek ka Nawh heue. ¹⁴ Nawh Cao ciak ti deuh pui kao ra kaux, sonsang ot kix tau mai Nawh sonsang ploi kix hu sidiex, ¹⁵ Nawh tawx sibrawm ka kix sonsang chix cox jhawm saux moi mai chix grheu phicaox lih heue. ¹⁶ Kao ra kaux an mawh, Simon pa sum Nawh Cao ceu kaux khraox mawh Petrux, ¹⁷ Yakop kawn simex Zebedie, Yohan pa mawh pux Yakop mai Nawh Cao, sum ceu kaux khraox kiex Boneragiex, dee bleeh ceu kaux an, mawh kawn simex sinum praix. ¹⁸ Andare mai Philipux mai Bathawlamie, Mathiex, Thomax, Yakop pa mawh kawn simex Alaphie, Thatdie, Simon pui Kananix. ¹⁹ Yudax Isakariut, pa tik pa tawx Nawh Cao heue. Kix hu laig daux nyiex tix nyiex. ²⁰ Deeh khrawm pui hun tan tix bawg, tom ang lai pon ih pa ih heue. ²¹ Yam mhong puxaik Nawh khankix grawng an, kix hoek ti giex Nawh Cao kheu kix ah Nawh yhot heue. ²² Pui tiiem lai khankix pa lih hoek khaing veng Yerusaliem kawx, ah nin, "Nawh koe Belazebulax mai kheu een Nawh rhawm ka simiang phicaox Nawh tom grheu phicaox khankix lih heue." ²³ Nawh Cao kok kix hoek ka Nawh mai Nawh teei lox tiag ah nin ka kix, "Satan chix grheu Satan lih yuh ka mawx? ²⁴ Phan meung tix meung ang khaw paox tix, gwieh paox tix, meung an ang chix kaux cong heue. ²⁵ Phan nyiex tix nyiex ang khaw paox tix, gwieh paox tix, nyiex an ang chix kaux cong heue. ²⁶ Phan Satan kaoh mai ang khaw ka tokaux tix, gwieh paox tix, nawh ang chix kaux cong, dee sidah tak laux heue. ²⁷ Pui tix kaux kawx ang chix laig ka daux nyiex pui pa ting riang mai yuh kraung cie nawh laux, phan nawh ang phyawk pui pa ting riang an ka mai khaix an nawh tak yuh nyiex nawh laux heue. ²⁸ Aux krai lox tete ka pex, tak sang pluat phimap kawn pui khawmuik mai lox pa salao ka Siyiex khawmuik heue. ²⁹ Viang mawh nan, pui mawx ang ah pa salao ka Khuan Singax Singeh, ang pluat phimap nawh tix bawg kawx, viang mawh nan phimap pa yuh nawh an, mawh phimap leeing ju heue." ³⁰ Mawh kheu hoik ah kix, Nawh koe phi pa seeing Nawh tom ah nan. ³¹ Miex Nawh Cao mai pux Nawh khankix hoek cung plak praix mai kix ploi pui hu kok ka Nawh heue. ³² Cub pui hun ngawm sivie Nawh Cao mai kix ah nin ka Nawh, "Miex Maix mai pux Maix khankix ot plak praix mai sawg Maix heue." ³³ Nawh Cao pawk lox ah nin ka kix, "Miex Aux mai pux Aux khankix mawh mawx?" ³⁴ Nawh jhak piang pui pa ngawm sivie siveng Nawh khankix mai Nawh Cao baox ah nin, "Jhak heue, miex Aux mai pux Aux khankix, ³⁵ mawh kheu pui mawx ang ah pa yuh alo pa khaw caw rhawm Siyiex, pui an mawh pux Aux mai nan Aux mai miex Aux heue."

¹ Nawh deeh jah ti sidiex gau dex praok rawm nhawng cub pui hun khrawm paox tix hoek ka Nawh Cao, kheu nan Nawh laig ngawm ka daux reu mai reu ot ka daux rawm nhawng mai cub pui hun ngawm piang tiex ka praok rawm nhawng heue. ² Nawh Cao sidiex gau kix tom nie ceu ka daux lox tiag mai Nawh ah nin ka kix ka daux lox sidiex gau Nawh. ³ "Nghiet heue, jhak heue, pui rhuat simie hu ti rhuat simie heue. ⁴ Yam rhuat nawh simie, simie tix blah cod ka dex krax mai sim khankix hoek sut ti ih simie khankix heue. ⁵ Simie tix blah cod piang tiex dee koe simaox, dee ang tiex koe tom nie, simie an kuah dom mawx dom an, mawh kheu ang tiex raux tan. ⁶ Yam hoik lih singaix, kied hax koek, kheu ang kix koe riah, kix kroh hu heue. ⁷ Simie tix blah cod ka sinax pang kat mai pang kat an ting tom kheem gut kix, kix ang chix plix, plix heue. ⁸ Simie tix blah cod ka dee mhawm tiex mai plix plix heue, kix ting mai piien tom pon tixngoe son, tixgliah son mai tix yieh son heue." ⁹ Nawh baox ah nin, "Kaw pa koe yhaok ti mhong, kieh nawh mhong heue." ¹⁰ Yam ot Nawh Cao nong nong, kix pa ot sivie siveng Nawh mai kawncau Nawh kao ra kaux khankix hoek mai chawk Nawh grawh grawng lox tiag khankix heue. ¹¹ Nawh Cao ah nin ka kix, "Hoik kieh pex tawng grawh grawng pa raux pa dex dawd mai Meung Siyiex, Viang mawh nan ka kix pa ot plak praix tak krai kuceu ka daux lox tiag heue. ¹² Mawh kheu nan viang kix yaox kawx, kix yaox mai ang yaox mai viang kix mhong kawx, kix mhong mai ang pon ti tawng, phan ang mawh nan ha kix kox deeh tieh hoek mai luan khaing phimap kix." ¹³ Nawh Cao baox ah nin ka kix, "Pex ang tawng lox tiag in lie? Phan mawh nan pex tak chix tawng lox tiag khawmuik yuh ka mawx? ¹⁴ Pui pa rhuat simie kienie, rhuat gumlox bwan heue. ¹⁵ Grawh grawng pa rhuat simie lox bwan dex krax mawh nin, yam hoik mhong kix gumlox, Satan hoek dom mawx dom an mai teei gumlox pa hoik rhuat ka daux kix heue. ¹⁶ Grawh grawng pa rhuat simie dee haoh simaox mawh nin, yam hoik mhong kix lox bwan, kix gaux rhawm mai rieb ti teei dom mawx dom an, ¹⁷ kix ang koe riah ka daux tokaux tix, kix kaux cong tivud khaing. Yam yaox kix krax tuktiak kheu lox bwan kix laux rhawm dom mawx dom an heue. ¹⁸ Grawh grawng pa rhuat simie ka daux pang kat mawh nin, in mawh kix pa hoik mhong lox bwan, ¹⁹ pa khi rhawm pa dex dawd mai haktiex mai pa chix pie lhen sinngao mai pa mie ti pon tang ceu khankix, kheem gut lox bwan tom ang chix plix, plix heue. ²⁰ Grawh grawng pa rhuat simie dee mhawm tiex mawh nin, mawh kix pa mhong gum lox bwan mai rieb ti teei mai plix plix tixngoe son mai tixgliah son mai tix yieh son heue." ²¹ Nawh Cao baox ah nin ka kix, "Viex kawk ngu sonsang sau greem phliex greem ku lie? Ang mawh sonsang deuh piang dee deuh kawk ngu lie? ²² Mawh kheu pa hoik mox pa tak ang kieh sidawng ang koe tix ceu kawx, mai pa hoik yuh kieh glip pa tak ang plak kieh sidawng ang koe tix ceu kawx heue. ²³ Phan pui tix kaux kaux koe yhaok ti mhong, kieh nawh mhong heue." ²⁴ Nawh Cao baox ah nin ka kix, "Grawh grawng pa hoik mhong pex rien rhawm tix kah, pex tong pex tiag ti tawx ka pui tang kaux miex ding, tak sang deeh tong deeh tiag ti tawx ka pex yuh nan heue. ²⁵ Mawh kheu kaw pa hoik koe, tak sang baox tawx ka nawh heue, kaw pa ang koe, viang pa hoik koe nawh kawx, tak sang deeh teei khaing nawh heue." ²⁶ Nawh Cao baox ah nin, "Meung Siyiex awm pui pa rhuat simie piang tiex. ²⁷ Nawh it ponsawm mai deeh kaoh ponngaix, grawh grawng simie an, kuah mai ting lhaong yuh ka mawx, nawh ang tawng heue. ²⁸ Haktiex chix kieh koe plix nong nong heue. Phao ka kieh koe gawng, koe lhax mai khaix an kieh koe sigiag mai khaix an kieh koe plix pa naog ka daux sigleem nawh heue. ²⁹ Yam hoik kaux plix, pui an teei sivawg, vawg dom mawx dom an, kheu bawg yam kaux hoik hoek heue." ³⁰ Nawh Cao baox ah nin, "Meung Siyiex awm ceu patix? Ex tak teei lox tiag yuh ka mawx, krai grawh grawng nawh? ³¹ Awm simie taux klaox tix mu, yam rhuat piang tiex, mawh ceu pa iak khaing simie kuceu khawmuik pa koe piang haktiex in heue. ³² Viang mawh nan khaix hoik rhuat simie an, nawh kuah lih ting tom ting khaing num rib num riem khawmuik mai koe kak pa ting, tom sim raoma khankix pon ti ot tix laux lee greem veei nawh heue." ³³ Nawh Cao teei lox tiag pa awm an tom nie, sidiex krai gumlox bwan ka kix, pa chix nghiet kix heue. ³⁴ Phan ang mawh ka daux lox tiag Nawh ang sidiex ang krai lox ka kix, viang mawh nan ka kawncau Nawh khankix, Nawh krai sidawng kuceu khawmuik dee ang pui ot heue. ³⁵ Daux singaix an yam ponbo Nawh Cao ah nin ka kix, "Ex hu plak toi rawm heue." ³⁶ Kix prah cub pui hun mai kix viex Nawh Cao awm ot Nawh daux reu mai reu tang reu tix blah hu tau mai Nawh heue. ³⁷ Bhaung ting hoek ti phlu mai rawm pukpak chun ti laig daux reu tom naog heue. ³⁸ Tokaux Nawh Cao ot plak sidax reu, it piang mhawn gaong mai kix so Nawh siduad mai ah nin ka Nawh, "Sara Cao gau eue, Maix ang keud grawh grawng hoek ex krax laux lie" ³⁹ Nawh Cao kaoh mai ah ka bhaung mai Nawh ah nin ka rawm nhawng "Kieh nhim, yiien heue." bhaung yiien mai rawm nhawng yawg tix heue. ⁴⁰ Nawh Cao baox ah nin ka kix, "Pex lhat yuh ka mawx? Pex ang nyang koe krax yum rhawm lie?" ⁴¹ Kix die lhat kah mai tix kaux lai tix kaux ah nin ka paox tix, "Kaw in mawh mawx? viang bhaung mai rawm nhawng kawx nghiet lox Nawh heue."

¹ Kix hoek plak toi rawm nhawng, ka daux meung Gadarax. ² Khaix hoik lih Nawh Cao khaing daux reu dom mawx dom an, pui tix kaux pa koe phi pa seeing brai, lih khaing daux simeeig mai rieb Nawh Cao heue. ³ Kaw an ot ka daux simeeig, pui tix kaux kawx ang pon phyawk nawh, pie ka maox ceng kawx ang pon. ⁴ Mawh kheu hoik sax phyawk nawh ka ceng mai sau gang ka nawh law lawx glang ka an mai nawh hoik rud ceng mai gang khankix dud, pui tix kaux kawx ang koe riang ti kieh nawh nge heue. ⁵ Yam ponngaix ponsawm nawh ot ka daux simeeig mai piang gawng khankix, nawh kok yo mai teei simaox pat tokaux tix ka jheeng jheeng heue. ⁶ Yam yaox nawh Yesux dee singai nawh to hu mai krub ka Nawh Cao heue. ⁷ Nawh kok yo lox sinum ah nin, "Yesux, Kawn Siyiex pa ting lhaong khaing khawmuik eue, aux koe pa yuh mai Maix ceu patix? Aux khyox khaw ka Maix ka daux ceu kaux Siyiex, paw vi tuktiak ka aux liak." ⁸ Kheu Nawh Cao ah nin ka nawh, "Phi pa seeing eue, lih hu khaing daux pui in heue." ⁹ Nawh Cao chawk nawh ah nin, "Ceu kaux maix kaux patix?" Nawh pawk lox ka Nawh Cao ah nin, "Ceu kaux aux kaux Liecong kheu kied haoh hun yix heue." ¹⁰ Nawh khyox khaw ka Nawh Cao tom nie, son ang Nawh sang grheu kix lih khaing daux meung an heue. ¹¹ Ka dee an koe cub lig pa kied hun sawm ka gawng tan heue. ¹² Kix khyox khaw ka Nawh Cao ah nin, "Ploi yix hu ka daux lig khankix, sonsang laig yix ka daux kix heue." ¹³ Nawh Cao tawx akhwang ka kix mai phi pa seeing khankix lih hu mai laig ka daux lig khankix mai cub lig an pa dex koe ra rheng, to lih ka dee nie rieh nie jun jee laig ka daux rawm nhawng mai nok yum ka daux rawm nhawng heue. ¹⁴ Pui liang lig khankix to hu mai krai grawh grawng ceu an ka daux yaong daux veng khankix mai pui khankix hoek ti jhak grawh grawng pa hoik mawh an, ¹⁵ Yam hoek kix ka Yesux mai yaox kaw pa hoik laig phicaox khankix glang ka in pa koe Liecong, ngawm tan mai ceep kraung mai nawh hoik deeh mhawm, kix lhat kah heue. ¹⁶ Kix pa hoik yaox, krai pui khankix mhong grawh grawng pa hoik mawh ka kaw pa laig phicaox khankix mai grawh grawng lig khankix heue. ¹⁷ Kix khyox khaw ka Nawh Cao nhie Nawh lih hu khaing daux meung kix heue. ¹⁸ Yam laig Nawh Cao ka daux reu, kaw pa hoik laig phicaox ka glang ka an, khyox khaw mhaing ti ot tau mai Yesux. ¹⁹ Nawh Cao ang tawx akhwang ka nawh, ah nin ka nawh, "ing ka nyiex maix mai puxaik kawn keeing maix, krai kix mhong grawh grawng pa ting lhaong pa caux rhawm Siyiex mai pa yuh bwanson, son maix heue." ²⁰ Kaw an hu ka daux meung Dekapolix mai jah ti krai grawh grawng ceu pa ting lhaong pa hoik yuh Yesux son nawh mai pui khawmuik daox deng kah heue. ²¹ Yesux deeh hu plak toi rawm daux reu mai cub pui hun khrawm paox tix hoek ka Nawh, yam ot Nawh dex rawm nhawng tan heue. ²² Pui giex kaing nyiex sidiex tix kaux, pa kaux Yairux, yam yaox nawh Yesux, nawh krub dex caong Nawh, ²³ mai khyox khaw ka Nawh Cao ah nin, "Kawn nyawm bun iak aux, dex sang yum, hoek sonsang deuh Maix taix tix piang nawh liak, yuh ka mawx sonsang deeh moi nawh mai im heue." ²⁴ Nawh Cao hu tau mai kaw an mai cub pui hun hawt khaix Nawh mai theen ka Nawh Cao heue. ²⁵ Bun tix kaux pa hoik koe jhawm saux pa lih nham kao ra num. ²⁶ Pa hoik kham geu tom nie ceu daux tawm taix pui chix sidah khankix mai hoik cai can pa koe nawh khawmuik, viang mawh nan nawh ang moi ceeix kawx, baox nie khaing. ²⁷ Kheu hoik mhong nawh grawh grawng Yesux, nawh hoek daux cub pui plak khaix mai teeh kraung ceep Nawh Cao heue. ²⁸ Nawh keud ah nin, "Phan aux teeh kraung ceep Nawh Cao khaing, aux tak moi heue." ²⁹ Nham nawh hit dom mawx dom an mai nawh tawng daux tokaux tix grawh grawng jhawm saux nawh hoik moi heue. ³⁰ Dom mawx dom an Yesux tawng daux tokaux tix, grawh grawng sibrawm hoik lih khaing Nawh mai Nawh Cao deeh gi cub pui an ah nin, "Pui mawx pa teeh kraung ceep Aux?" ³¹ Kawncau Nawh khankix ah nin ka Nawh Cao, "Maix yaox cub pui hun nie ding nie dod theen ka Maix mai Maix chawk, Pui mawx pa teeh ka Aux lie?" ³² Nawh Cao simi ti yaox vung viang Nawh, sonsang yaox pui pa hoik yuh ceu in. ³³ Bun an nawh hoik tawng pa hoik yuh ka tokaux tix, nawh tom lhat tom siyaung mai hoek mai krub sivoe Nawh Cao mai krai ka Nawh khawmuik rahsee heue. ³⁴ Nawh Cao ah nin ka nawh, "Kawn bun Aux eue, krax yum rhawm maix hoik kieh maix moi, hu mhawm mhawm heue. Kieh maix luan khaing jhawm saux maix heue." ³⁵ Yam kawn sikah Nawh Cao, pui hoek khaing nyiex pui giex kaing nyiex sidiex ah nin, "Kawn bun maix hoik yum heue. Yuh patix maix lai kawn lak lheut ka Sara Cao gau?" ³⁶ Yesux mhong lox pa hoik krai an, ah nin ka pui giex kaing nyiex sidiex, "Paw vi lhat yum rhawm khaing heue." ³⁷ Nawh Cao ang kieh pui tix kaux kawx hawt khaix tix, lheu khaing Petrux, Yakop mai Yohan pux Yakop heue. ³⁸ Kix hoek ka daux nyiex pui giex kaing nyiex sidiex mai Nawh Cao yaox pa sinum siaox mai pui hun nied ti yiiem riag heue. ³⁹ Khaix hoik laig Nawh Cao tan Nawh ah nin ka kix, "Yuh patix pex lai sinum siaox mai yiiem riag yuh nin? Kawn nyawm in hoik yum ang mawh, mawh ngie laig it nawh khaing" ⁴⁰ Kix nieb yuh pa ang nab yam nyiah ka Nawh Cao heue. Nawh Cao kieh pui pa ot tan khawmuik lih hu mai Nawh teei miex keeing kawn nyawm an mai kix pa ot tau mai Nawh, laig ka dee ot kawn nyawm an heue. ⁴¹ Nawh Cao teei taix kawn nyawm an ah nin ka nawh, "Talita kumix" phan toe lox an dee bleeh ah nin, "Kawn nyawm bun eue, Aux krai ka maix, kaoh heue." ⁴² Dom mawx dom an kawn nyawm bun an kaoh mai hu, kheu ju nawh hoik koe kao ra num heue. dom mawx dom an kix kied koe krax daox deng kah heue. ⁴³ Nawh Cao tawm lox ka kix tom nie, paw kieh pui tix kaux kawx tawng grawh grawng ceu in. Nawh Cao nhie kix tawx nawh ih pa ih heue.

¹ Nawh Cao lih hu khaing tan mai hoek ka daux meung tokaux tix, kawncau Nawh khankix hawt Nawh Cao heue. ² Yam hoek singaix twah Nawh Cao jah ti sidiex gau ka daux nyiex sidiex mai pui hun pa mhong Nawh Cao, kied daox deng ah nin, "Pui in pon ceu in khankix dee mawx? Hoik tawx pingnya cuyi, pa yuh ka mawx ka Pui in? Kaing pa ting sibrawm ceu in chix mawh daux tawm taix Nawh yuh ka mawx? ³ In mawh Kaw pa chix kaing khaox, Kawn Marix, puxke Yakop, Yosiep, Yudax mai Simon khankix ang mawh lie?" Kix laux rhawm ka Nawh Cao heue. ⁴ Yesux ah nin ka kix, "Cao jhai ang mawh pa ang koe min plakngai, lheu khaing daux meung tokaux tix mai sinax paox ru tix mai ka daux nyiex tokaux tix heue." ⁵ Nawh Cao ang pon yuh kaing pa ting sibrawm tan, lheu khaing teei taix tix deuh piang pui pa koe jhawm saux tix blah mai kieh kix moi. ⁶ Nawh Cao daox deng ka krax pa ang kix yum rhawm heue. Nawh Cao hu lai ling ti sidiex gau ka daux yaong khankix sivie siveng tan heue. ⁷ Nawh Cao kok kawncau Nawh kao ra kaux hoek ka tix mai ploi kix hu tix cub ra kaux, ra kaux. Nawh Cao tawx sibrawm ka piang kix sonsang grheu phi pa seeing khankix heue. ⁸ Nawh Cao tawx lox ka kix, nhie kix paw vi viex tidtix hu, son yam hu daux krax, lheu khaing khaox gix. Paw vi viex bau mai blah mai mau daux hau maox khlax. ⁹ Ceep kiep mai paw vi ceep sibex ra pheen heue. ¹⁰ Nawh Cao ah nin ka kix, "Pex laig ka daux nyiex dee mawx ang ah, ot tan tom lih hu pex khaing tan heue. ¹¹ Dee mawx ang ah, pa ang rieb pex mai dee ang kix nghiet lox pex, yam lih hu pex khaing tan khruah phawng tiex pa koe greem caong pex, som sang mawh mhai rug ka kix heue." ¹² Kix lih hu mai sidiex gau, yuh ka mawx kawn pui sang doh keud ka phimap heue. ¹³ Kix grheu phicaox lih tom nie mai kix groi rawm bee ka pui saux haoh hun mai cox kix moi heue. ¹⁴ Mawh kheu hoik tawng grawh grawng ceu kaux Nawh Cao kudah dee, simiang Herut kawx, mhong mai nawh ah nin, "Yohan cao cubcom hoik deeh kaoh im khaing krax yum, mawh kheu nan sibrawm khankix tom yuh kaing ka daux nawh heue." ¹⁵ Pui tang kaux tix blah ah, "Mawh Eliyax heue." Tang kaux tix blah ah, "Mawh Cao jhai, awm cao jhai khankix tix kaux kaux pa koe phao ka heue." ¹⁶ Yam mhong Herut grawh grawng ceu an nawh ah nin, "In mawh Yohan pa hoik kid aux kaing nawh, pa hoik deeh kaoh im heue." ¹⁷ Grawh grawng nawh, tokaux Herut hoik ploi pui hu giex Yohan mai phyawk nawh sau daux thawng. Kheu Herodix moeng pux nawh Philipux, mawh kheu hoik teei nawh ti moeng heue. ¹⁸ Kheu Yohan hoik ah nin ka Herut, "Pa teei maix moeng pux maix, ang khaw mai been heue." ¹⁹ Tokaux Herodix koeng ka nawh mai koe rhawm ti sang pah nawh yum, viang mawh nan ang kiex pon yuh. ²⁰ Herut lhat ka Yohan, kheu tawng nawh grawh grawng mawh nawh pui rahsee mai pa singax singeh mai nawh kia ngien nawh heue. Yam nawh nghiet lox nawh, nawh kied sivix rhawm, viang mawh nan nawh koe rhawm gaux rhawm ti sang nghiet nawh heue. ²¹ Yam hoek bawg yam pa yie pa khaw tix ngaix, yam Herut yuh pawie singaix keh tix, son simiang nawh mai pui giex kaing naing mai pui pa ting lhaong daux meung Galilie khankix. ²² Yam hoek kawn bun Herodix mai yuh graoh, Herut mai pui khankix pa ngawm sawm tau mai nawh khaw rhawm mai simiang ah nin ka bunkrih an, "Maix mie ceu patix ang ah, rawg ka aux mai aux tak tawx ka maix heue." ²³ Nawh tiextu mai baox ah nin ka nawh, "Maix rawg mhaing ceu patix ang ah ka aux, tom hoek haktiex aux tix plak kawx, aux tak tawx ka maix heue." ²⁴ Bun an lih hu chawk ka miex nawh ah nin, "Aux sang rawg mhaing ceu patix?" miex nawh pawk lox ah nin, "Rawg kaing Yohan cao cubcom heue." ²⁵ Bun an grhawm ti laig ka simiang dom mawx dom an mai rawg mhaing ah nin, "Aux mie maix tawx kaing Yohan cao cubcom daux tawg ka aux yam in heue." ²⁶ Viang simiang kied khi rhawm kawx, kheu lox pa hoik tiex tu nawh mai kheu pui pa ngawm sawm tau mai nawh khankix, nawh ang rhawm lheu lox bun an heue. ²⁷ Dom mawx dom an simiang ploi pui naing pa pau tix, tix kaux hu mai nhie nawh hu viex kaing Yohan hoek. Kaw an hu kid kaing Yohan ka daux thawng. ²⁸ Viex kaing nawh daux tawg tawx ka bunkrih an heue. Bun an deeh tawx ka miex tix heue. ²⁹ Yam mhong kawncau Yohan khankix, kix hoek mai teei tokaux yum nawh mai hu sipaung deuh nawh daux simeeig heue. ³⁰ Kawncau pa ting khankix khrawm paox tix hoek ka Yesux mai krai ka Nawh Cao grawh grawng khawmuik, pa hoik yuh kix mai pa hoik sidiex gau kix heue. ³¹ Nawh Cao ah nin ka kix, "Pex hoek ka daux tiag dee ang pui ot mai laux lee tivud heue." Kheu pui hun hoek hoek hu hu, tom ang kix koe bawg yam sawm heue. ³² Kix brug reu hu daux tiag tix dah dee ang pui ot. ³³ Yam yaox pui kix hu mai tawng mawh kix, pui khrawm paox tix to hu ka caong tix, khaing yaong khaing veng khawmuik mai hoek ka sivoe kix heue. ³⁴ Yam lih Nawh Cao Nawh yaox cub pui hun mai Nawh Cao caux rhawm ka kix, mawh kheu awm kix yung pa ang koe cao liang cao kia mai Nawh Cao sidiex gau ka kix tom nie ceu heue. ³⁵ Yam uik dex sang hoek ponbo, kawncau Nawh khankix hoek ka Nawh Cao ah nin, "Ka dee in mawh ka daux tiag heue. Mai dex sang hoek yam ponbo. ³⁶ Kheu nan kieh pui khankix hu ka daux yaong khankix pa koe sivie siveng tin, yuh ka mawx sonsang liag kix pa ih son tokaux kix heue." ³⁷ Nawh Cao pawk lox ah nin ka kix, "Pex tawx kix ih heue." kix baox ah nin ka Nawh Cao, "Ex sang teei mau denari ra yieh hu liag blah mai tawx kix ih lie?" ³⁸ Nawh Cao baox ah nin ka kix, "Pex koe blah miex lon? Hu jhak ti yaox." Khaix hoik tawng kix, kix ah nin, koe blah phwan lon mai kax ra mu heue." ³⁹ Nawh Cao nhie pui khawmuik yuh cub caw mai ngawm piang rib pa klai heue. ⁴⁰ Kix ngawm daux cub caw pa koe been tix yieh mai pa koe been tixphwan tix cub heue. ⁴¹ Nawh Cao teei blah phwan lon mai kax ra mu, maong ka raoma mai Nawh nawb bwan, Nawh sivit lon blah mai tawx ka kawncau khankix, sonsang viex kix ti tawx ka pui khankix heue. Nawh Cao gwieh kax an ra mu ka pui khawmuik heue. ⁴² Kix khawmuik ih mai sak heue. ⁴³ Kix deeh khrawm ti teei blah pa max pa phawng mai kax, naog kao ra phliex heue. ⁴⁴ Pui pa ih blah an simex giex koe phwan rheng heue. ⁴⁵ Khaix an dom mawx dom an Nawh Cao nhie kawncau Nawh khankix laig daux reu mai hu sivoe Nawh plak toi rawm ka veng Biesedax. Yam kawn ploi tokaux Nawh Cao cub pui hun khankix hu. ⁴⁶ Khaix hoik ploi Nawh Cao pui khankix, Nawh haok ka gawng sonsang rawg bwan heue. ⁴⁷ Yam hoek ponsawm reu an ot ka sigreung rawm nhawng mai Nawh Cao ot ka haktiex nong nong heue. ⁴⁸ Nawh Cao yaox kawncau Nawh khankix kha rhawm tix vai reu, kheu ang caw plak bhaung. Yam hoek bawg yam pa tah pon taix, yam ponsawm Nawh Cao hu ka caong tix piang rawm nhawng hoek ka kix mai Nawh yuh awm pa sang luan hu khaing kix heue. ⁴⁹ Yam yaox kix Nawh Cao hu ka caong tix piang rawm nhawng, kix ce mawh miang mai kix tom riag yo, ⁵⁰ kheu kix khawmuik yaox Nawh mai die lhat kah dom mawx dom an Nawh Cao sikah ka kix ah nin. "Gaux rhawm heue, mawh Aux, paw vi lhat ka" ⁵¹ Nawh Cao hoek dee ot kix laig daux reu mai bhaung yiien mai kix kied daox deng kah, ka daux tokaux tix heue. ⁵² Mawh kheu ang kix tawng grawh grawng lon blah khankix, rhawm kix tom kien heue. ⁵³ Yam hoik tiang kix plak an, kix hoek ka haktiex meung Giennesarit mai phyawk reu ka praok heue. ⁵⁴ Yam lih kix khaing daux reu dom mawx dom an pui khankix tawng mawh Nawh Cao, ⁵⁵ mai to hu kudah dee ka daux haktiex an. Kix mhong grawh grawng Nawh Cao ot dee mawx ang ah, kix klawm pui saux khankix piang ku hoek tan heue. ⁵⁶ Nawh Cao laig daux yaong, daux veng, daux ma khankix, dee mawx ang ah, kix deuh pui saux khankix daux lah daux cau mai khyox khaw ka Nawh Cao, yuh ka mawx sonsang pon teeh kix caong sibex Nawh khaing heue. Pa pon teeh ka Nawh Cao ku kaux daux pui moi heue.

¹ Pharishie khankix mai pui tiiem lai tix blah kaoh khaing veng Yerusaliem khrawm paox tix hoek ka Nawh Cao. ² Kix yaox kawncau Nawh tix blah, ih blah ka taix pa seeing, mai taix pa ang khoek, kix deuh phimap kah heue. ³ Mawh kheu Pharishie khankix mai pui Yudax khawmuik ang ih pa ih, ka ang kix nyang khoek taix tix mhawm mhawm, kheu kix hawt been tax yiex miex keeing kix heue. ⁴ Yam hoek kix khaing daux lah, ka ang kix nyang heem tokaux tix, kix ang ih pa ih, lheu khaing nan kawn koe been tang ceu tom nie pa hoik rieb kix ti teei ti hawt, pa mawh been phak kawk mai aw mai klong tawng khankix heue. ⁵ Pharishie mai pui tiiem lai khankix chawk ka Nawh Cao ah nin, "Kheu kawncau Maix khankix ang hawt been tax yiex miex keeing mai teei taix pa seeing brai ih blah cie kix?" ⁶ Nawh Cao ah nin ka kix, "Cao jhai Isayax hoik grux krai mhawm mhawm grawh grawng pex pa mawh pui pie lhen ah nin, pui ceu in yungyi Aux ka siyieb jheeh tix, viang mawh nan rhawm kix singai khaing Aux heue. ⁷ Kix krub ka Aux giex going, kheu sidiex gau kix been pa yuh kawn pui heue. ⁸ Pex tik vud lox tawm jhawm krai Siyiex mai giex been kawn pui tom sied heue." ⁹ Nawh Cao baox ah nin ka kix, "Pex tik mhawm mhawm lox pa hoik nhie Siyiex pex yuh, yuh ka mawx sonsang pon hawt pex been pex. ¹⁰ Mawh kheu Mose hoik ah nin, "Yungyi ka miex maix mai keeing maix heue, kaw pa map ka miex ka keeing tix tak kieh nawh yum tete heue. ¹¹ Viang mawh nan, pex ah, Phan pui tix kaux ah nin ka miex tix, phan ang mawh nan, ka keeing tix, cie aux ceu patix ang ah pa lo mai pa sang koe bwanson, son maix mawh Kawban, pa ah nan, sang ah ka pa hoik tan hoik tawx ka Siyiex. ¹² Pex ang baox kieh nawh yuh tix ceu kawx son miex keeing nawh. ¹³ Mawh kheu nan pex yuh laux gumlox Siyiex, kheu been pex pa toe ti tawx tix ju hoik tix ju heue. Pex yuh pa awm in tom nie ceu heue." ¹⁴ Yam an Nawh Cao kok pui khawmuik hoek ka tix mai ah nin ka kix, "Pex khawmuik nghiet mai enn ti tawng heue. ¹⁵ Pa koe plak praix kawn pui ang koe tix ceu kawx, pa chix laig daux nawh mai kieh nawh seeing, viang mawh nan mawh ceu pa lih khaing daux kawn pui pa chix kieh nawh seeing heue. ¹⁶ Pui mawx ang ah, phan nawh koe yhaok ti mhong, kieh nawh mhong heue." ¹⁷ Yam lih Nawh Cao khaing cub pui hun mai hoik laig daux nyiex tix nyiex, kawncau Nawh khankix chawk grawh grawng lox tiag an ka Nawh heue. ¹⁸ Nawh Cao ah nin ka kix, "Pex kawx ang chix tawng ti nghiet lie? Pex ang tawng grawh grawng ceu pa ot plak praix mai laig ka daux kawn pui, ang chix kieh nawh seeing lie? ¹⁹ Mawh kheu ceu an khankix ang laig ka daux rhawm nawh, viang mawh nan laig ka daux vaig nawh mai baox lih hu ka daux, daux iang heue." Pa krai Nawh nan, Nawh sang ah pa ih khawmuik mawh pa singax heue. ²⁰ Nawh Cao baox ah nin, "Mawh ceu pa lih khaing daux kawn pui pa chix kieh nawh seeing heue. ²¹ Kheu mawh khaing plak daux, daux rhawm kawn pui pa chix keud ceu pa ang mhawm ang mhiem khankix heue. Pa mawh ceu pa lud mai moeng pui, ceu pa lud vao mai bun, ceu pa pah pui yum, ²² Ceu pa briex mai ceu pa ghoing ka cie pui mai ceu pa yuh pa caox khankix, ceu pa pie lhen, ceu pa mie ti yuh ceu pa ang khaw ang jiet, ceu pa boh rhawm pa khoi mai ceu pa salao ka Siyiex, ceu pa ting rhawm, pa yuh ceu pa daox aw khankix heue. ²³ Ceu pa ang mhawm mhiem ceu in khawmuik, mawh ceu pa lih khaing plak daux mai kieh pui seeing heue." ²⁴ Nawh Cao kaoh khaing tan mai hu daux haktiex veng Turux mai veng Sidom mai laig ka daux nyiex tix nyiex, Nawh ang rhawm kieh pui tawng, viang mawh nan Nawh ang pon ti mox heue. ²⁵ Bun tix kaux pa koe kawn bun iak tix kaux pa laig phi pa seeing, mhong grawh grawng Nawh Cao mai hoek krub dex caong Nawh heue. ²⁶ Bun an mawh ceu pui Helasax, pui meung Suripinik kiex khyox khaw ka Nawh Cao, nhie Nawh grheu phicaox an lih khaing kawn bun tix heue. ²⁷ Nawh Cao ah nin ka kiex, "Kieh kawn praix sawm tom sak ka ha, mawh kheu ang khaw ti teei blah cie kawn praix khankix taing ka sox heue. ²⁸ Viang mawh nan bun an deeh pawk lox mai ah nin ka Nawh Cao, "Mawh heue, Simiang eue, viang mawh sox khankix kawx, ih pa cod pa roik greem pheen sawm kawn praix khankix heue." ²⁹ Nawh Cao baox ah nin ka kiex, "Mawh kheu gumlox in pax hu heue. Phicaox hoik lih hu khaing daux kawn bun pax heue." ³⁰ Bun an deeh ing ka nyiex tix mai yaox kawn nyawm an it piang ku mai phicaox hoik lih hu heue. ³¹ Nawh Cao baox lih hu khaing haktiex Turux mai hu preeng meung Sidom mai hu preeng sinax meung Dekapolix mai sidah hoek ka rawm nhawng Galilie heue. ³² Kix viex pui pa lheet yhaok mai kle yam sikah tix kaux mai kix khyox khaw ka Nawh Cao, nhie Nawh deuh taix tix piang kaw an heue. ³³ Nawh Cao teei nawh lih hu khaing cub pui hun, dee ang pui ot mai Nawh Cao teei gien taix tix sau daux yhaok kaw an mai Nawh Cao baig rawm mya mai teeh ka dak nawh heue. ³⁴ Nawh maong plak raoma mai ngia ah nin ka kaw an, "Ephathax" . Pa ah nan, sang ah, "Paoh" heue. ³⁵ Yhaok nawh paoh heue. Mai siniag dak nawh deeh gah mai nawh chix sikah sidawng heue. ³⁶ Nawh Cao tawm lox ka kix, son ang kix krai ka pui tix kaux kawx. Viang Nawh Cao tawm lox ka kix miex ding, kix nie kieh nawh tah hu heue. ³⁷ Kix kied daox deng ka tete tom ang chix tiag chix krai ah nin, "Nawh hoik yuh khawmuik mhawm mhawm heue. Viang mawh pui pa lheet yhaok kawx Nawh deeh cox kieh chix mhong, pui aw kawx, deeh kieh chix sikah heue."

¹ Daux bawg yam singaix an khankix, yam baox koe cub pui hun mai kix ang koe pa ih tidtix. Nawh Cao kok kawncau Nawh khankix ah nin, ² "Aux caux rhawm ka pui hun khankix, kheu hoik ot kix mai Aux loe ngaix mai ang koe pa ih tidtix heue. ³ Phan Aux ploi kix ing ka nyiex kix, yam kawn cai rhawm kix, kix tak khrup rhawm hawt krax heue. Lheu khaing in, kix tix blah hoek khaing dee singai heue." ⁴ Kawncau Nawh khankix deeh pawk ah nin ka Nawh Cao, "Pon ti kieh pui khankix sak ka blah daux tiag yuh ka mawx?" ⁵ Nawh Cao chawk kix ah nin, "Pex koe blah miex lon?"Kix deeh krai "Koe aliah lon heue." ⁶ Nawh Cao nhie pui hun khankix ngawm piang tiex, Nawh teei blah aliah lon an, khaix hoik yaogyaw bwanson, Nawh Cao sivit mai tawx ka kawncau Nawh khankix, kieh kix tawx ka pui khankix. Kix viex hu tawx ka pui hun khankix heue. ⁷ Kax iak kawx koe ceeix. Khaix hoik nawb bwanson, kax an kawx, Nawh Cao nhie kix tawx ka pui khankix heue. ⁸ Kix ih tom sak heue, kix khrawm pa lheu pa max pa phawng, koe aliah phliex heue. ⁹ Kix pa hoik ih khankix dex koe pon rheng heue. Nawh Cao ploi pui khankix hu heue. ¹⁰ Dom mawx dom an Nawh Cao laig ka daux reu, tau mai kawncau Nawh khankix mai hoek ka daux haktiex Dalamanutha heue. ¹¹ Pharishie khankix lih hoek mai chawk lox ka Nawh Cao mai sawg ti kieh Nawh Cao jhi kix yaox mhai pa daox deng khaing raoma, sonsang cheuk ti yaox rhawm Nawh heue. ¹² Nawh Cao ngia daux khuan tix ah nin, "Yuh patix pui ju in sawg mhai pa daox deng? Aux krai lox tete ka pex, tak ang tawx mhai pa daox deng ka pui ju in tix ceu kawx heue." ¹³ Nawh Cao lih khaing kix, deeh laig ka daux reu mai hu plak toi rawm heue. ¹⁴ Kix piawm ti viex blah hu, blah ang lai koe mai kix daux reu, lheu khaing tix lon khaing. ¹⁵ Nawh Cao tawm lox ka kix ah nin, "Rien rhawm tix ka susaix Pharishie khankix mai susaix Herut heue." ¹⁶ Kix tix kaux lai tix kaux keud ti ah nin ka paox tix, "Mawh kheu ang koe blah heue." ¹⁷ Yesux tawng grawh grawng an, tom ah nin ka kix, "Yuh patix pex keud ti ah ka paox tix, kheu ang pex koe blah? Pex ang chix yaox ang chix tawng lie? Rhawm pex kawn kien lie? ¹⁸ Pex koe ngai kawx, ang chix yaox lie? Pex koe yhaok kawx, ang chix mhong lie? Pex ang nyang doh keud kah lie? ¹⁹ Yam sivit Aux blah phwan lon ti tawx ka pui phwan rheng, pex hoik pon ti khrawm pa max pa phawng miex phliex?" kix ah nin ka Nawh Cao, "Pon kao ra phliex heue." ²⁰ "Yam sivit Aux blah aliah lon tawx ka pui pon rheng, pex pon ti khrawm pa max pa phawng miex phliex?"Kix baox ah nin ka Nawh Cao, "Pon aliah phliex heue." ²¹ Nawh Cao baox ah nin ka kix, "Pex ang nyang bax tawng lie?" ²² Kix hoek ka veng Biesedax, mai pui viex pui pa dugngai tix kaux hoek ka Nawh Cao, kix khyox khaw ka Nawh Cao nhie Nawh teeh ka kaw an heue. ²³ Nawh Cao giex taix pui dug ngai an mai viex nawh lih hu plak praix veng, khaix hoik baig Nawh Cao rawm myia piang ngai nawh mai deuh taix tix piang nawh, Nawh Cao chawk ah nin ka kaw an, "Maix uik chix yaox tix ceu ceu lie?" ²⁴ Kaw an yaog ti jhak ah nin, "Aux yaox pui heue, kheu aux yaox kix awm khaox pa hu krax heue." ²⁵ Nawh Cao baox deuh taix tix piang ngai kaw an mai nawh jhak mhawm mhawm mai nawh moi deeh chix yaox, tom nawh uik grum yaox kuceu sidawng heue. ²⁶ Nawh Cao ploi nawh ing ka nyiex nawh ah nin, "Paw vi laig ka daux yaong an mai paw vi krai ka pui tix kaux kawx ka daux yaong an heue." ²⁷ Yesux lih hu tau mai kawncau Nawh khankix mai laig ka daux yaong Kesarix Philipux khankix. Yam kawn hu krax Nawh Cao chawk ka kawncau Nawh khankix ah nin, "Pui khankix ah Aux mawh mawx?" ²⁸ Kix krai ka Nawh Cao ah nin, "Tix blah ah mawh Yohan cao cubcom, tix blah ah mawh Eliyax, tix blah ah mawh Cao jhai tix kaux kaux heue." ²⁹ Nawh Cao baox ah nin ka kix, "Pex ah Aux mawh mawx?"Petrux pawk lox mai ah nin ka Nawh Cao, "Maix mawh Khrit heue." ³⁰ Nawh Cao tawm lox ka kix, son ang kix sang krai grawng Nawh Cao ka pui tix kaux kawx heue. ³¹ Nawh Cao jah ti gau ka kix, "Grawh grawng Kawn kawn pui tak sang kham geu tom nie ceu, tak kham geu pa tik vud kuad song khankix mai cao giex kaing li pa ting khankix, pui tiiem lai khankix, grawh grawng tak kham geu pa teei yum, khaix an loe singaix tak deeh kaoh im heue." ³² Nawh Cao krai ceu an sidawng heue. Petrux teei Nawh Cao hu mai ah ka Nawh heue. ³³ Nawh Cao hoik veeh mai yaox kawncau Nawh khankix, Nawh Cao ah ka Petrux yuh nin, "Satan eue, hu plak khaix Aux, kheu ang maix keud grawh grawng ceu pa dex dawd mai Siyiex, viang mawh nan maix keud grawh grawng ceu pa dex dawd mai kawn pui khaing." ³⁴ Nawh Cao kok cub pui hun khankix mai kawncau Nawh khankix, hoek ka tix mai ah nin ka kix, "Phan pui tix kaux kaux mie ti hoek khaix Aux, kieh nawh thiang ti tik tokaux tix mai klawm khaox lhak tix mai hawt Aux heue. ³⁵ Mawh kheu pui mawx ang ah, pa simie ti taoh ju tokaux tix, tak sang som ju heue. Pui mawx ang ah pa som ju son Aux, son lox bwan gaux rhawm, tak pon ti taoh ju heue. ³⁶ Grawh grawng nawh, phan pui tix kaux kaux pon haktiex khawmuik mai som ju tokaux tix, sang koe bwanson yuh ka mawx? ³⁷ Kawn pui sang chix pon tawx ceu patix tideeh taoh khuan ju tix ka? ³⁸ Mawh kheu pui mawx ang ah, pa kaig kheu Aux mai gumlox Aux, ka daux bawg yam ju pui in, pa lud vao mai pa ting map, Kawn kawn pui kawx, tak sang kaig kheu nawh, yam Nawh viex min plakngai Keeing tix mai kawncau Siyiex pa singax hoek heue."

¹ Nawh Cao baox ah nin ka kix, "Aux krai lox tete ka pex. Koe pui pa cung dex tin tix blah, pa tak ang cim krax yum, tom ka ang kix bax yaox pa hoik hoek Meung Siyiex ka daux sibrawm heue." ² Khaix an liah ngaix, Yesux teei Petrux, Yakop, Yohan mai viex kix haok piang gawng lhaong nong nong, ka dee ang pui ot mai tokaux Nawh Cao loh tix sivoe kix tan heue. ³ Kraung ceep Nawh kied paing cawt tom lih riang, tom ang pui chix sidaux kraung piang haktiex in chix sidaux tix kaux kawx kieh paing awm an heue. ⁴ Kix yaox Eliyax hoek tau mai Mose mai kiex sikah mai Yesux heue. ⁵ Petrux ah nin ka Yesux, "Rabi eue, ex ot tin mhawm son ex heue, kieh ex yuh nyiex bang loe lhang. Son Maix tix lhang, son Mose tix lhang, son Eliyax tix lhang heue." ⁶ Kheu kix kied lhat mai nawh ang tawng lox pa sang krai tix, nawh tom ah nan heue. ⁷ Paiawm hoek ti kheem veei kix, lox lih khaing paiawm an ah nin, "In mawh Kawn pa moh Aux heue, nghiet ka Nawh awx." ⁸ Yam an dom mawx dom an kix jhak vung viang kix ang yaox pui tix kaux kawx lheu khaing Yesux nong nong, pa ot tau mai kix heue. ⁹ Yam lih hoek kix khaing gawng, Nawh Cao tawm lox ka kix, "yuh ka mawx son ang kix krai ka pui tix kaux kawx, ka grawng ceu pa hoik yaox kix, ka ang Kawn kawn pui nyang bax deeh kaoh khaing krax yum heue." ¹⁰ Kix priex ti hawt lox an mai chawk paox tix, tix kaux lai tix kaux grawng dee bleeh lox pa ah, "Deeh kaoh khaing krax yum heue." ¹¹ Kix chawk Nawh Cao ah nin, "Kheu pui tiiem lai khankix ah Eliyax tak sang hoek phao ka?" ¹² Nawh Cao ah nin ka kix, "Eliyax tak hoek phao ka tete mai cox mhawm khawmuik heue. Pa hoik tiiem grawng Kawn kawn pui, tak kham geu tom nie ceu mai pa tik vud sang yuh ka mawx? ¹³ Viang mawh nan Aux krai ka pex, Eliyax hoik hoek heue, kix hoik yuh ka nawh awm pa simie kix tiyuh awm pa hoik tiiem grawh grawng nawh heue." ¹⁴ Yam hoek kix ka kawncau Nawh khankix, kix yaox cub pui hun ot sivie kix tan, pui tiiem lai khankix chawk lox ka kix tan heue. ¹⁵ Dom mawx dom an yam yaox cub pui hun khawmuik ka Nawh Cao, kix kied daox deng kah mai to hu ka Nawh Cao mai ah lox nawb ka Nawh heue. ¹⁶ Nawh Cao ah nin ka kix, "Pex chawk lox patix ka kix?" ¹⁷ Pui tix kaux ka daux cub pui hun pawk lox mai ah nin ka Nawh Cao, "Sara cao gau eue, aux hoik viex kawn simex aux pa laig phi pa aw hoek ka Maix heue. ¹⁸ Phi an giex nawh dee mawx ang ah, nyhot nawh goh mai bai lih khaing jheeh nawh mai nawh greeik rhang tix mai krawx hu heue. Aux khyox ka kawncau Maix khankix nhie kix grheu phi an lih, viang mawh nan kix ang pon grheu lih heue." ¹⁹ Nawh Cao pawk lox mai ah nin ka kix, "Pui ju pa ang koe krax yum rhawm eue, Aux tak kawn sang ot mai pex miex grheung? Aux tak kawn sang gun yeung pex miex grheung? Viex nawh hoek ka Aux heue." ²⁰ Kix viex nawh hoek ka Nawh Cao mai yam yaox phi an ka Nawh Cao dom mawx dom an nawh nyhot kaw an goh piang tiex, nawh lulieh tix, bai lih khaing jheeh nawh heue. ²¹ Nawh Cao chawk ka keeing nawh ah nin, "Ceu in hoik hoek ka nawh miex grheung?"Keeing nawh pawk ah nin, "Mawh tom yam mawh nawh kawn nyawm iak heue. ²² Phi an hoik taing nawh daux ngu, daux rawm law lawx, kheu sang yuh nawh laux, heue. Phan Maix chix yuh tix ceu ceu, caux rhawm ka ex mai teem liak" ²³ Yesux baox ah nin ka nawh, "Maix ah, Phan Maix chix, pui pa yum rhawm chix kuceu heue." ²⁴ Dom mawx dom an keeing kawn nyawm an yo ah nin, "aux yum rhawm heue, teem krax ang yum rhawm aux liak" ²⁵ Yam yaox Yesux cub pui hun to hoek tau, Nawh Cao ah ka phi pa seeing brai, "Phi pa aw pa lheet eue, Aux tawx lox ka maix, lih khaing daux nawh mai paw lai baox laig ka nawh heue." ²⁶ Phi an kok yo mai biak nawh mai lih hu khaing daux nawh heue. Kawn nyawm an lih mawh awm pui pa hoik yum, tom pui hun ah nin, "Nawh hoik yum heue." ²⁷ Viang mawh nan Yesux teei taix nawh mai yaog nawh mai nawh kaoh heue. ²⁸ Yam hoik laig Nawh Cao ka daux nyiex, yam ot tau Nawh mai kawncau nong nong, kix chawk Nawh ah nin, "Kheu ang ex pon ti grheu phi an lie?" ²⁹ Nawh Cao pawk lox ah nin ka kix, "Phi ceu in phan ang mawh kheu rawg bwan mai twah pa ih ang pon ti lih heue." ³⁰ Kix lih hu khaing tan mai hu preeng ka daux meung Galilie mai Nawh Cao ang rhawm kieh pui tawng tix kaux kawx heue. ³¹ Kheu Nawh Cao gau ka kawncau Nawh khankix mai ah nin ka kix, "Tak sang tawx Kawn kawn pui ka daux tawm taix kawn pui khankix, kix tak teei Nawh yum, khaix hoik yum Nawh loe ngaix Nawh tak deeh kaoh im heue." ³² Viang kix ang tawng dee bleeh lox an kawx, kix lhat chawk ka Nawh Cao heue. ³³ Kix hoek ka veng Kapenion mai yam ot Nawh Cao ka daux nyiex, Nawh chawk kix ah nin, "Yam hoek pex daux krax pex kum pex thung thiang paox tix grawh grawng patix?" ³⁴ Kix ang nye, kheu hoik thung thiang kix paox tix, yam hoek daux krax, grawh grawng daux kix pui mawx, lheu ting khaing paox tix heue. ³⁵ Nawh Cao ngawm kok kix kao ra kaux hoek, Nawh ah nin ka kix, "Phan pui tix kaux kaux mie ti ting khaing paox tix, nawh tak mawh kaw pa dah khaix khawmuik mai siliex khawmuik heue." ³⁶ Nawh Cao teei kawn nyawm iak tix kaux mai deuh nawh sinax kix, kawm nawh ka taix tix mai Nawh Cao ah nin ka kix, ³⁷ "Pui mawx ang ah pa rieb ti teei kawn nyawm iak pa awm in khankix, tix kaux, ka daux ceu kaux Aux, rieb ti teei Aux, pui mawx ang ah pa rieb ti teei Aux, rieb ti teei Aux ang mawh, rieb ti teei Kaw pa ploi Aux hoek heue." ³⁸ Yohan ah nin ka Nawh Cao, "Sara Cao gau eue, ex yaox pui tix kaux pa grheu phicaox lih ka daux ceu kaux Maix, ex kieh ka nawh kheu ang nawh hawt mai ex heue." ³⁹ Viang mawh nan Yesux ah nin, "Paw vi kieh nawh, kheu ang koe pui tix kaux kawx, pa yuh kaing pa ting sibrawm ka daux ceu kaux Aux, pa pon ti krai pa caox ka grawng Aux laung laung heue. ⁴⁰ Mawh kheu pui pa ang koeng ka ex, ot plak ex heue. ⁴¹ Pui mawx ang ah pa tawx pex nyaux rawm tix kawk, mawh kheu mawh pex cie Cao Khrit, Aux krai lox tete ka pex, bwanson cie nawh tak ang grai, ang piawm heue. ⁴² Pui mawx ang ah pa kieh kawn nyawm iak khankix pa yum rhawm ka Aux tix kaux kaux sideeing caong tix, lheu mhawm son kaw an, phan preue simaox mhaw pa ting ka ngawg nawh mai taing nawh ka daux rawm sigrit sigra heue. ⁴³ Phan taix maix kieh maix sideeing caong tix, kid ti tik heue. Laux taix maix mai laig ka daux pa im ju, mhawm khaing koe taix ra khawn mai laig ka daux mawnarhok, ka daux ngu pa ang chix yeet heue. ⁴⁴ Dee ang kawng chix yum mai dee ang ngu chix yeet. ⁴⁵ Phan caong maix kieh maix sideeing caong tix, kid ti tik heue. Laux caong maix mai laig ka daux pa im ju, mhawm khaing koe caong ra khawn mai taing sau ka daux mawnarhok, ka daux ngu pa ang chix yeet heue. ⁴⁶ Dee ang kawng chix yum mai dee ang ngu chix yeet. ⁴⁷ Phan ngai maix kieh maix sideeing caong tix, koh ti tik heue. Koe ngai maix tix khawn mai laig ka daux Meung Siyiex, mhawm khaing koe ngai ra khawn mai taing sau daux mawnarhok heue." ⁴⁸ Dee ang kawng chix yum mai dee ang ngu chix yeet. ⁴⁹ Kheu tak teei kih ngu sau ka pui ku kaux daux pui, pa tan ku mu, tak teei kih sau kah heue. ⁵⁰ Kih kienie mawh pa mhawm, viang mawh nan phan pa laoh kih hoik grai, tak sang teei pa yuh ka mawx ti deeh chix kieh nawh laoh? Kieh kih koe ka daux tokaux pex mai kieh tix kaux lai tix kaux khaw paox tix heue."

¹ Nawh cao kaoh khaing tan mai hoek ka daux haktiex Yudax plak toi rawm Yawdan, cub pui hun baox deeh khrawm paox tix hoek ka Nawh Cao, Nawh baox deeh sidiex gau ka kix awm pa hoik sax yuh Nawh heue. ² Pharishie tix blah hoek ka Nawh mai chawk Nawh Cao ah nin, sonsang cheuk ti yaox Nawh, "Pui khaw ti tik moeng tix lie?" ³ Nawh Cao baox pawk lox mai ah nin ka kix, "Mose hoik nhie pex yuh ka mawx?" ⁴ Kix ah nin, "Mose kieh tiiem lai grawng hoik hoik lox mai kieh tik bun heue." ⁵ Yesux ah nin ka kix, "Mawh kheu kien rhawm pex Mose tom tiiem deuh lox tawm ka maix yuh nan heue. ⁶ Tom yam jah vah ma la rawm dix, Siyiex yuh simex mai bun heue. ⁷ Mawh kheu grawng in simex tak prah miex keeing tix mai ot tau mai moeng tix. ⁸ Kiex ra kaux tak mawh nex nham tix mu khaing, mawh kheu nin, kiex ang lai deeh mawh ra kaux, mawh tix kaux khaing heue. ⁹ Mawh kheu in pa hoik kleuk Siyiex tau paw kieh pui yieh heue." ¹⁰ Yam ot ka daux nyiex kawncau Nawh khankix baox chawk ka Nawh Cao grawh grawng ceu an heue. ¹¹ Nawh ah nin ka kix, "Pui mawx ang ah pa tik moeng tix mai baox moeng tang kaux, lud vao ka bun an heue. ¹² Phan bun tik mex tix mai baox mex tang kaux, nawh lud vao heue." ¹³ Kix viex kawn nyawm iak khankix hoek ka Nawh Cao, sonsang teeh Nawh kix, viang mawh nan kawncau khankix ah ka pui khankix heue. ¹⁴ Yam yaox Yesux song rhawm, ah nin ka kix, "Kieh kawn nyawm iak khankix hoek ka Aux, paw vi sidien kix, kheu Meung Siyiex mawh cie pa awm kix heue. ¹⁵ Aux krai lox tete ka pex, pui mawx ang ah pa ang rieb ti teei Meung Siyiex awm kawn nyawm iak, tak ang tau ti pon ti laig tan heue." ¹⁶ Nawh Cao kawm kix daux taix tix mai deuh taix tix piang kix mai nawb bwan ka kix heue. ¹⁷ Yam lih hu Nawh Cao ka daux krax, pui tix kaux to hoek ka Nawh, grux ngawng tix mai chawk ka Nawh Cao ah nin, "Sara Cao gau pa mhawm eue, aux tak yuh ka mawx, sonsang pon aux ju leeing ju?" ¹⁸ Yesux pawk lox ah nin ka nawh, "Kheu maix lai kok Aux mawh pa mhawm? Lheu khaing Siyiex tix kaux khaing, tix kaux kawx ang mhawm heue. ¹⁹ Maix tawng lox pingnyap khankix, Paw teei ju pui yum, paw lud vao, paw briex, paw kham mhai rug pa ang mawh meh, paw lhen ti teei kraung pui, yung yi ka miex keeing tix heue." ²⁰ Kaw an pawk lox ah nin ka Nawh Cao. "Sara Cao Gau eue, aux hoik hawt ti yuh ceu an khankix khawmuik tom yam iak aux heue." ²¹ Yesux jhak ka kaw an mai moh nawh mai ah nin ka nawh, "Pa taig maix kawn koe tix ceu. Hu coh pa koe maix kuceu tawx ka pui hot sibhawm khankix maix tak koe kraung khrai ka daux meung raoma mai hoek ti hawt Aux heue." ²² Nawh khi rhawm voi rhawm tix mai lih hu heue. Kheu mawh nawh pui pa koe kraung khrai tom nie heue. ²³ Yesux jhak ti yaox vung viang Nawh mai ah nin ka kawncau Nawh khankix, "Pui pa mawh cao mi sonsang laig ka daux Meung Siyiex nu miex ding heue." ²⁴ Kawncau Nawh khankix kied daox deng ka lox Nawh Cao an, viang mawh nan Yesux baox deeh ah nin ka kix, "Kawn praix eue, pui pa een rhawm ka sinngao tix khankix, sonsang laig ka daux Meung Siyiex nu miex ding heue. ²⁵ Laig kala-uk daux kre nyex lheu yie khaing laig cao mi ka daux Meung Siyiex heue." ²⁶ Viang mawh nan kix kied daox deng kah mai ah nin ka Nawh Cao, "Phan mawh nan, pui mawx tak sang pon hoek krax taoh?" ²⁷ Yesux jhak piang kix ah nin, "Grawh grawng in kawn pui ang chix yuh. Viang mawh nan ang mawh pa ang Siyiex chix yuh, kheu Siyiex chix yuh kuceu khawmuik heue." ²⁸ Yam an Petrux ah nin ka Nawh Cao, "Jhak heue, ex hoik prah hoik tik khawmuik mai hoik hawt Maix heue." ²⁹ Yesux ah nin, "Aux krai lox tete ka pex, ang koe pui tix kaux kawx pa hoik prah grham nyiex nawh, phan ang mawh nan, puxaik nawh, nan nawh, miex nawh, keeing nawh, kawn praix nawh mai ma kaung nawh khankix, kheu Aux mai kheu lox bwan gaux rhawm. ³⁰ Pa tak ang pon nyiex mai puxaik mai nan mai miex mai kawn praix mai ma kaung, tix yieh son ka daux bawg yam in, tau mai krax tuktiak daux ju khaix, tak pon ju leeing ju heue. ³¹ Viang mawh nan, pui pa ot ka tom nie, tak dah khaix mai pui pa ot khaix tom nie, tak ot ka heue." ³² Yam kawn hu kix krax, yam haok kix ka veng Yerusaliem, Yesux hu sivoe kix, kix kied daox deng kah mai pa hawt Nawh khankix die lhat heue. Nawh Cao baox teei kix kao ra kaux mai krai grawh grawng ceu pa tak sang mawh ka tokaux tix ka kix ah nin, ³³ "Jhak heue, ex tak sang haok hu ka veng Yerusaliem mai tak sang teei ti tawx Kawn kawn pui ka cao giex kaing li pa ting khankix, pui tiiem lai khankix, kix tak sang prawng kieh Nawh yum mai tawx Nawh ka pui tang ceu khankix, ³⁴ mai kix tak sang yuh pa ang cee ang cak ka Nawh mai baig rawm myia piang Nawh mai sivied Nawh mai teei Nawh yum heue. Khaix an loe ngaix Nawh tak deeh kaoh im heue." ³⁵ Yakop mai Yohan, pa mawh kawn Zebedie hoek dex Nawh Cao ah nin ka Nawh, "Sara Cao gau eue, yiex rawg mhaing ceu patix ka Maix ang ah, yiex simie ti kieh Maix yuh son yiex heue." ³⁶ Nawh Cao chawk ah nin ka kiex, "Pax simie ti kieh Aux yuh ceu patix son pax?" ³⁷ Kiex baox ah nin ka Nawh Cao, "Kieh yiex ngawm plak taix khawn dawm Maix tix kaux plak taix khawn gwiex Maix tix kaux, ka daux min plakngai Maix liak." ³⁸ Yesux ah nin ka kiex, "Pax ang tawng grawng pa rawg pax. Pax chix nyaux kawk pa nyaux Aux lie? Phan ang mawh nan, pax chix kham krax cubcom pa cubcom Aux lie?" ³⁹ Kiex baox ah nin ka Nawh Cao, "Chix tix heue."Yesux baox ah nin ka kiex. "Kawk pa nyaux Aux, pax tak sang yaox ti nyaux heue, mai pax tak sang cubcom, ka daux krax cubcom pa cubcom Aux heue. ⁴⁰ Viang mawh nan, pa ngawm plak taix khawn dawm Aux mai plak taix khawn gwiex Aux, ang mawh cie Aux ti tawx, hoik cox son pui mawx ang ah, tak mawh son kix heue." ⁴¹ Yam mhong kawncau Nawh kao kaux grawng ceu an, kix song rhawm ka Yakop mai Yohan heue. ⁴² Yesux kok kix, hoek ka tix mai ah nin ka kix, "Pex tawng grawng pa yuh simiang piang pui tang ceu khankix, giex kaing kix mai pui pa ting lhaong kix, khin ka kix heue. ⁴³ Ka daux pex tak ang mawh nan, ka daux pex pui mawx ang ah, pa mie ti ting lhaong, tak mawh kawncau pex heue. ⁴⁴ Ka daux pex, pui mawx ang ah, pa mie ti giex kaing pex, tak mawh siliex pui khawmuik heue. ⁴⁵ Grawh grawng nawh, Kawn kawn pui kawx, hoek sonsang kieh pui yuh son Nawh ang mawh. Viang mawh nan hoek sonsang yuh son pui mai tawx ju tokaux tix, sonsang taoh pui tom nie heue." ⁴⁶ Kix hoek ka veng Yerikho mai yam lih Nawh Cao khaing veng Yerikho tan, tau mai kawncau Nawh khankix, pui hun, kawn Timie, pa mawh Batimie pa dug ngai mai caung ti ih, ngawm dex krax heue. ⁴⁷ Yam mhong nawh grawng mawh Yesux pui Nazariet, nawh kok yo Nawh ah nin, "Yesux kawn Davit eue, caux rhawm ka aux liak." ⁴⁸ Pui tom nie ah ka nawh, sonsang yawg nawh tix heue, viang mawh nan nawh nie baox yo ah nin, "Kawn Davit eue, caux rhawm ka aux liak" ⁴⁹ Yesux cung ti kaog ah nin, "Kok nawh hoek heue."Kix kok pui pa dug ngai an mai ah nin ka nawh, "Gaux rhawm heue, kaoh, Nawh Cao kok maix heue." ⁵⁰ Nawh tik man fua tix, ja loh ti kaoh mai hoek ka Yesux heue." ⁵¹ Yesux chawk nawh ah nin, "Maix mie ti kieh Aux yuh patix ka maix?"pui dug ngai an ah nin ka Nawh Cao, "Rabonix eue, kieh ngai aux chix yaox liak" ⁵² Yesux baox ah nin ka nawh, "Hu heue, krax yum rhawm maix hoik kieh maix moi heue."Dom mawx dom an nawh deeh chix yaox mai hu hawt Nawh Cao daux krax heue.

¹ Yam dex hoek kix ka veng Yerusaliem, ka yaong Bephake mai yaong Betanix, ka gawng Sanlun, Nawh Cao ploi kawncau Nawh ra kaux hu, ² mai ah nin ka kiex, "Hu ka daux yaong pa koe sivoe pax mai yam laig pax ka daux yaong an, dom mawx dom an pax tak yaox kawn la pa hoik phyawk tan pa ang pui sax ngawm piang heue. Kah nawh mai viex hoek heue. ³ Phan pui tix kaux kaux chawk pax ah nin, Pax yuh ceu in kheu patix? Pax deeh krai ah nin, Simiang lo nawh heue. Kaw an tak deeh ploi nawh hoek tin dom mawx dom an heue." ⁴ Kiex hu mai yaox kawn la tix mu pa hoik phyawk dex siviex plak praix ka daux krax. Kiex kah nawh viex hu heue. ⁵ Pui pa cung tan tix blah ah nin ka kiex, "Pax kah la in yuh ka mawx?" ⁶ Kiex ah ka kix awm pa hoik krai Yesux mai kix ploi kiex hu heue. ⁷ Kiex viex kawn la an hu ka Yesux mai teei kraung ceep tix sau piang kawn la an mai Nawh Cao ngawm piang la an heue. ⁸ Pui hun teei krang ceep tix nah ti tawm ka daux krax mai tix blah teei lhax khaox pa hoik kid kix khaing daux ma mai tawm heue. ⁹ Kix pa hu sivoe mai kix pa hawt khaix khankix kok yo ah nin, "Hosanna, Kaw pa hoek ka daux ceu kaux Siyiex ting bwanson heue. ¹⁰ Meung keeing ex Davit pa dex sang hoek, ting bwanson heue. Hosanna dee lhaong khaing paox tix heue." ¹¹ Nawh Cao laig ka daux veng Yerusaliem mai laig ka daux nyiex bwan mai khaix hoik jhak Nawh Cao vung viang ka kuceu, mawh kheu hoik hoek bawg yam ponbo, Nawh Cao lih hu tau mai kawncau Nawh kao ra kaux ka yaong Betanix heue. ¹² Singaix pasax yam hoik lih hoek kix khaing yaong Betanix, Nawh Cao cai rhawm heue. ¹³ Nawh Cao yaox khaox ruh tix khaox ka dee singai pa koe lhax, kheu nan Nawh hu sonsang sawg ti yaox plix. Yam hoek Nawh Cao ka khaox an, Nawh yaox ngie lhax khaing, kheu bawg yam plix plix ruh ang nyang bax hoek. ¹⁴ Yesux ah nin ka khaox an, "Jah yam in tom hoek leeing ju, paw kieh pui tix kaux kawx ih plix khaing maix," kawncau Nawh khankix mhong lox an heue. ¹⁵ Kix hoek ka veng Yerusaliem mai Nawh Cao laig ka daux nyiex bwan mai jah ti grheu pui pa coh pa liag ka daux nyiex bwan khankix lih mai cot pheen pui pa loh mau khankix mai dee ngawm pui coh sikaux khankix cang klud heue. ¹⁶ Nawh Cao ang cu ti kieh pui tix kaux kawx, viex kraung tidtix hu preeng daux nyiex bwan. ¹⁷ Nawh Cao sidiex gau ah nin ka kix, "Hoik tiiem ti deuh ah nin, Nyiex Aux tak kok mawh nyiex dee rawg pui kuceu bwan, ang mawh lie? Viang mawh nan pex hoik kieh mawh dee ot pui tud rhim heue." ¹⁸ Cao giex kaing li pa ting khankix mai pui tiiem lai khankix mhong grawng an mai sawg ti yaox, kix sang pon ti yuh Nawh Cao laux yuh ka mawx. Kheu kix lhat ka Nawh Cao, mawh kheu cub pui hun daox deng ka lox sidiex gau Nawh heue. ¹⁹ Yam hoek ponbo ku bo Nawh Cao lih khaing daux veng heue. ²⁰ Pon ngawb yam hu kix krax, kix yaox khaox ruh an hoik fit hoik kroh hu khawmuik jah tom riah nawh heue. ²¹ Petrux doh keud ka grawng ceu an mai ah nin ka Nawh Cao, "Rabi eue, jhak heue, khaox ruh pa hoik jhax Maix, hoik fit hoik kroh hu khawmuik heue." ²² Yesux pawk lox ah nin ka kix, "Yum rhawm ka daux Siyiex heue. ²³ Aux krai lox tete ka pex, pui mawx ang ah pa ah ka gawng in, Gah dee ot maix mai rau ka daux rawm sigrit sigra heue, ang koe krax yum rhawm, viang mawh nan phan nawh yum rhawm grawng pa hoik ah nawh, tak mawh son nawh heue. ²⁴ Mawh kheu nan Aux krai ka pex, pa rawg bwan mai pa mhaing pex kuceu khawmuik, pex yum rhawm grawh grawng pon khankix mai pex tak sang pon heue. ²⁵ Yam mawx ang ah, yam cung pex ti rawg bwan, phan pex koe dee deuh phimap ka pui tang kaux, pluat phimap nawh heue. Kheu Keeing pex pa ot ka daux meung raoma tak pluat phimap son pex heue. ²⁶ Viang mawh nan phan pex ang pluat phimap pui tang kaux, Keeing pex pa ot daux meung raoma kawx tak ang pluat phimap pex heue." ²⁷ Kix deeh hoek ka daux veng Yerusaliem mai yam hu lai ling Nawh Cao ka daux nyiex bwan, cao giex kaing li mai pui tiiem lai mai kuad song khankix hoek ka Nawh Cao heue. ²⁸ Kix chawk ah nin ka Nawh Cao, "Maix pon akhuang sibrawm ti yuh ceu in khankix dee mawx? Pui mawx tawx akhuang sibrawm in ka Maix, ti yuh ceu in khankix lie?" ²⁹ Yesux ah nin ka kix, "Aux sang chawk pex ka grawng tix ceu mai pex deeh krai ka Aux mai Aux tak sang krai ka pex grawng pa pon Aux akhuang sibrawm ti yuh ceu in khankix khaing dee mawx heue. ³⁰ Krax cubcom Yohan kaoh khaing raoma lie? Phan ang mawh nan kaoh khaing kawn pui lie? Deeh krai ka Aux liak" ³¹ Kix keud tau ah nin, "Phan ex ah Kaoh khaing raoma, Nawh Cao tak chawk ah nin, phan mawh nan yuh patix pex ang yum rhawm ka nawh? ³² Viang mawh nan phan ex ah kaoh khaing kawn pui," kix lhat ka pui khankix, kheu pui khawmuik een Yohan mawh cao jhai tete heue. ³³ Kix pawk lox ka Yesux ah nin, "Ex ang tawng heue." Yesux baox ah nin ka kix, "Aux kawx ang krai ka pex grawng pon Aux akhuang sibrawm tiyuh ceu in khankix khaing dee mawx heue."

¹ Nawh Cao baox jah ti sidiex ka kix ka daux lox tiag heue. "Pui tix kaux nawh sum sipeem plix siiet tix dah mai sum khaox vie vung viang sipeem an mai kaong daux dee biiet rawm plix siiet mai sum nyiex lhaong tix lhang mai yaog mai tawx vai ka pui pa yuh sipeem plix siiet mai hu tang praix klawng heue. ² Yam hoek bawg yam nawh ploi kawncau tix, tix kaux hu ka pui yuh sipeem an khankix, sonsang rieb ti teei plix khaing sipeem plix siiet, ka pui pa yuh sipeem khankix heue. ³ Kix teei nawh mai tap nawh mai ploi nawh ing giex, taix yi tix heue. ⁴ Nawh baox deeh ploi kawncau tang kaux tix kaux mai kix teei simaox dheem kaing nawh saux mai yuh pa ang khaw ang jiet ka nawh mai ploi nawh ing heue. ⁵ Nawh baox ploi kawncau tang kaux mai kix teei nawh yum. Nawh baox ploi kawncau tang kaux tom nie mai kix tap tix blah mai teei yum tix blah heue. ⁶ Nawh kawn koe kawn pa moh tix kaux khaing mai nawh baox ghoik ti ploi kawn tix hu ka kix ah nin, kix tak yungyi ka kawn aux heue. ⁷ Viang mawh nan pui pa yuh sipeem an khankix, ah nin ka paox tix, kaw in mawh cao sin. Hoek heue, ex teei nawh yum mai sin nawh tak mawh cie ex heue. ⁸ Kix giex nawh mai teei nawh yum mai taing nawh khaing daux sipeem plix siiet heue. ⁹ Mawh kheu nan cao sipeem plix siiet tak sang yuh ka mawx? Nawh tak hoek yieh mai yuh pui pa yuh sipeem an khankix laux mai tawx sipeem plix siiet an ka pui tang kaux heue. ¹⁰ Ang pex sax phat phuk lai sigang khri pa ah nin lie? Simaox pa hoik tik pui yuh nyiex, hoik yuh kieh mawh kaing ka daog. ¹¹ In mawh pa hoek khaing Simiang, mai mawh pa daox deng ka ngai ex heue." ¹² Kix sawg ti giex Nawh Cao, viang mawh nan kix lhat ka cub pui hun, kheu tawng kix Nawh hoik sidiex lox tiag an ka grawng kix mai kix prah Nawh Cao mai hu heue. ¹³ Kix ploi Pharishie mai kawncau Herut tix blah hu ka Nawh Cao, sonsang pon kix ti giex, dee lud lox sikah Nawh heue. ¹⁴ Yam hoek kix, kix ah nin ka Nawh Cao, "Sara Cao gau eue, ex tawng Maix mawh pa mawh meh mai ang lhat ka pui tix kaux kawx, kheu ang Maix jhak ka pakngai kawn pui mai sidiex gau grawng krax Siyiex tete heue. Khaw ti tawx mau koh ka simiang Kesa lie, ang khaw ti tawx lie? ¹⁵ Ex tak tawx lie? Phan ang mawh nan, ex tak ang tawx lie?" Nawh Cao tawng grawng pie lhen kix mai ah nin ka kix, "Pex nyaw cheuk ti yaox Aux yuh ka mawx? Viex denari tix plah sonsang jhak Aux nawh," ¹⁶ kix viex mai Nawh Cao chawk ah nin ka kix, "In mawh riang mawh lai pui mawx?"kix ah nin ka Nawh Cao, "Mawh riang mai lai simiang Kesa heue." ¹⁷ Yesux baox ah nin ka kix, "Ceu pa mawh cie Kesa, tawx ka simiang Kesa heue. Ceu pa mawh cie Siyiex tawx ka Siyiex heue."Kix kied daox deng ka Nawh Cao heue. ¹⁸ Sadukie khankix hoek ka Nawh Cao, pa ah ang koe pa deeh kaoh im heue. Kix chawk Nawh Cao ah nin, ¹⁹ "Sara Cao gau eue, Mose tiiem ti deuh ka ex ah nin, phan puxaik pui tix kaux yum mai prah moeng tix khaix tix mai ang koe kawn, pux nawh, tak teei moeng nawh mai eei kawn praix son puxke nawh heue. ²⁰ Koe puxaik aliah kaux, kaw phao ka teei ti koe moeng, nawh ang koe kawn mai yum heue. ²¹ Ra kaux tix kaux kawx teei bun an, ang koe tix prah kawn khaix nawh mai yum heue, loe kaux tix kaux ka awm an heue. ²² Aliah kaux tix kaux kawx ang koe kawn ti prah heue. Khaix kix khawmuik, bun an kawx yum heue. ²³ Mawh kheu nan yam hoek bawg yam deeh kaoh im, ka daux kix nawh tak mawh moeng kaw pa yuh ka mawx? Kheu kix khawm aliah kaux hoik to moeng bun an heue." ²⁴ Yesux pawk lox mai ah nin ka kix "Pex lud kheu ang pex tawng phuk lai sigang khri mai sibrawm Siyiex, ang mawh lie? ²⁵ Mawh kheu yam kix tak deeh kaoh im khaing krax yum, kix ang teei mex moeng mai ang teei ti tawx ka paox tix, kix tak awm kawncau Siyiex ka daux meung raoma heue. ²⁶ Lheu khaing an grawng pui yum khankix tak sang deeh kaoh, ang pex sax phat ka daux phuk lai Mose lie? dee koe grawng yam sikah Siyiex mai nawh ka daux yeem khaox ah nin, Aux mawh Siyiex Abraham mai Siyiex Icak mai Siyiex Yakop lie? ²⁷ Nawh ang mawh Siyiex pui yum, viang mawh nan, Nawh mawh Siyiex pui im, pex kied lud heue." ²⁸ Pui tiiem lai tix kaux hoek mai mhong lox pa chawk kix ka paox tix mai nawh tawng grawng Nawh Cao hoik pawk lox ka kix mhawm mhawm mai chawk Nawh Cao ah nin, "Lox pingnyap pa yuh ka mawx lheu ting khaing paox tix khawmuik?" ²⁹ Yesux baox pawk lox ah nin, "Pa lheu ting khaing paox tix mawh in, Pui Isarelax eue, nghiet heue, Siyiex ex, mawh Siyiex leeing ju tix kaux khaing. ³⁰ Maix tak moh Siyiex maix khawm rhawm tix khawmuik, khawm ju tix, khawm ka dee chix keud tix khawmuik mai khawm riang rao tix khawmuik heue. ³¹ Pingnyap ra gum tix gum mawh in, Maix tak moh paox plawg paox nyhawm tix awm moh tokaux tix heue. Lox pingnyap pa lheu ting khaing ceu in ang koe." ³² Pui tiiem lai an ah nin ka Nawh Cao, "Mawh pa mawh meh heue. Sara Cao gau eue. Pa krai Maix mhawm, Siyiex koe tix kaux khaing mai lheu khaing Nawh Cao Siyiex tang kaux ang koe. ³³ Pa moh Nawh khawm rhawm khawm rhi khawmuik mai pa chix tawng khawmuik mai khawm riang rao khawmuik mai pa moh paox plawg paox nyhawm tix awm moh tokaux tix, nie lheu khaing pa tan khawmuik, pa gleeing ka ngu heue." ³⁴ Yam yaox Yesux nawh chix keud ti pawk lox mhawm mhawm, Nawh Cao ah nin ka nawh, "Maix ang singai khaing Meung Siyiex heue."Khaix an pui tix kaux kawx ang pon chawk Nawh Cao ka lox tidtix heue. ³⁵ Yam sidiex gau Yesux ka daux nyiex bwan Nawh ah nin, "Pui tiiem lai khankix ah Khrit mawh kawn Davit yuh ka mawx? ³⁶ Tokaux Davit hoik ah nin ka daux Khuan Singax, Simiang ah nin ka Simiang aux, ngawm plak taix khawn dawm Aux, tom kieh Aux pui pa koeng ka Maix mawh ngot dee deuh Maix caong heue. ³⁷ Tokaux Davit hoik kok Nawh mawh Simiang. Nawh chix mawh kawn nawh yuh ka mawx?" Pui hun khankix gaux rhawm ti nghiet lox Nawh Cao heue. ³⁸ Yam sidiex gau Nawh Cao, Nawh baox ah nin ka kix, "Rien rhawm tix ka pui tiiem lai khankix, pa mie tix ceep sibex dhah mai hu mai kieh pui ah lox yungyi ka daux lah daux cau khankix. ³⁹ Kix moh dee ngawm pa mhawm khaing paox tix, daux nyiex sidiex khankix mai dee mhawm khaing paox tix dee yuh pawie khankix heue. ⁴⁰ Kix mawh pa chix rud ti ih nyiex miexmai khankix mai sonsang chix pie lhen kix rawg bwan tom lang. Kix tak nie pon krax prawng ciyang pa ting heue." ⁴¹ Nawh Cao ngawm dex ka dee deuh mau mai jhak ka pui hun sau mau, dee sau mau tan mai cao mi tom nie sau tom nie. ⁴² Miexmai pa hot pa sibhawm hoek tix kaux mai sau tawng ra bliah iak, pa keung been tix piak. ⁴³ Nawh Cao kok kawncau Nawh khankix hoek ka tix mai ah nin ka kix, "Miexmai pa hot sibhawm in hoik sau nie lheu khaing kix pa sau, ka daux dee sau mau khawmuik. ⁴⁴ Kheu kix khawmuik, hoik sau khaing pa lheu kix, viang mawh nan, bun in hoik sau khaing pa hot tix pa koe nawh khawmuik, viang mawh pa mawh sonsang im ju tix, nawh hoik sau heue."

¹ Yam lih hu Yesux khaing nyiex bwan, kawncau Nawh tix kaux hoek ah nin, "Sara cao gau eue, jhak heue, simaox mai nyiex pa ting khankix kied si daing mhawm grang ting lhaong." ² Yesux ah nin ka nawh, "Yaox maix nyiex pa ting an khankix lie? Viang ang yieh ti tik kawx, samaox koe tin khankix tak prung prang mai ang lai koe piang paox tix, tix lon kawx heue." ³ Yam ngawm Nawh Cao piang gawng Sanlun, pa koe sivoe nyiex bwan, Petrux mai Yakop mai Yohan mai Andare, hoek mai chawk ka Nawh dee ang pui ot, ah nin, ⁴ "Ceu in khankix tak sang mawh lai mawx? Yam tak sang dex mawh ceu in khankix, tak koe mhai pa yuh ka mawx? Krai ka ex liak." ⁵ Yesux ah nin ka kix, "Son ang pui sang pon pie lhen pex kieh lud, rien rhawm tix kah heue. ⁶ Pui tom nie tak sang briex ti teei ceu kaux Aux mai hoek ah nin, Aux mawh Nawh heue. Tak pon pie lhen kieh pui lud tom nie heue. ⁷ Yam tak sang mhong pex grawh grawng naing mai grawh grawng sang yuh naing, paw vi khi rhawm kah heue, ceu in tak sang mawh, viang mawh nan ang nyang bax mawh bawg yam sidah heue. ⁸ Mawh kheu pui tix ceu mai tix ceu, tix meung mai tix meung tak cha paox tix mai kla reem tak sang tok dee haoh dee mai praix tak sang sibhawm. Ceu in khawmuik mawh pa jah krax kha rhawm tix heue. ⁹ Rien rhawm tix kah, kheu kix tak tawx pex ka cub kuad song cao prawng ca khankix mai tak sang sivied pex ka daux nyiex dee sidiex khankix mai pex tak sang cung sivoe cao giex kaing haktiex mai simiang khankix, son Aux, sonsang mawh mhai rug ka kix heue. ¹⁰ Tak sang sidiex gau lox bwan gaux rhawm ka ceu pui khawmuik phao ka. ¹¹ Yam tok kix ti tawx pex hu dee prawng ca, paw khi rhawm ka grawng lox pa sang ah sang krai pex phao ka, viang mawh nan, lox pa sang tawx ka pex daux bawg yam nari an, pex krai pex ah lox an, mawh kheu ang mawh pex pa krai pa ah, mawh Khuan Singax Singeh heue. ¹² Puxaik tix kaux lai tix kaux tak sang teei ti tawx puxaik tix, sonsang pah yum mai keeing kawx tak teei ti tawx kawn tix mai kawn praix khankix kawx tak kaoh ti yuh ka miex keeing tix mai kieh pah kix yum heue. ¹³ Pui khawmuik tak koeng ka pex mawh kheu ceu kaux Aux, viang mawh nan kaw pa kaux cong tom sidah, tak sang hoek krax taoh heue." ¹⁴ "Yam yaox pex ceu pa greeing pa yuh laux, cung dee ang nawh khaw ti cung, kieh kaw pa phat ti yaox tawng heue, yam an kieh kix pa ot ka daux meung Yudax to hu piang gawng khankix heue. ¹⁵ Pui pa ot piang prang nyiex, paw kieh nawh lih laig teei tix ceu kawx khaing daux nyiex tix. ¹⁶ Pui pa ot ka daux ma, paw kieh nawh deeh ing teei kraung ceep tix heue. ¹⁷ Bun pa koe kaux mai bun pa tawx kawn tix peuex, ka daux bawg yam ngaix an khankix, tak kha rhawm heue. ¹⁸ Pex rawg bwan son bawg yam an, son ang caw yam kwat heue. ¹⁹ Mawh kheu yam an tak sang koe pa kha rhawm, ceu pa ang sax koe, tom yam jah Siyiex ti vah ma la rawm, sidah hoek bawg yam in mai khaix an kawx tak ang lai baox koe heue. ²⁰ Phan Simiang ang kieh bawg yam ngaix an khankix dawd, tix kaux kawx ang pon ti luan, viang mawh nan mawh kheu pui pa laug Siyiex, pa hoik laug Nawh, Nawh kieh ngaix an khankix dawd heue. ²¹ Yam an phan pui tix kaux kaux ah nin ka pex, Jhak heue, Khrit ot tin, phan ang mawh nan, ot tan, paw vi yum rhawm kah. ²² Mawh kheu Khrit pa ang mawh ang meh mai cao jhai pa ang mawh ang meh khankix tak sang lih hoek mai tak sang jhi mhai ceu pa daox deng, sonsang pon pie lhen kieh lud, phan chix ka pui pa hoik laug Siyiex kawx heue. ²³ Viang mawh nan pex rien rhawm tix, jhak heue, Aux hoik grux krai ka pex grawng kuceu sivoe ka sang mawh heue." ²⁴ "Khaix pa kha rhawm daux bawg yam ngaix an khankix, singaix tak faik mai khix tak ang tawx pa riang tix, ²⁵ mai simuing khankix tak sang rau khaing raoma mai sibrawm pa koe ka daux raoma khankix tak sang yung yiang heue. ²⁶ Yam an kix tak yaox Kawn kawn pui viex sibrawm pa ting mai min plakngai mai hoek ka daux paiawm heue. ²⁷ Yam an Nawh tak sang ploi kawncau Siyiex khankix hu khrawm pui pa hoik laug cie Nawh, khaing bhaung pon plak, jah dee sidah haktiex, tom hoek dee sidah raoma kudah dee heue. ²⁸ "Gau ka khaox ruh grawng lox tiag nawh. Yam awn kak nawh mai lih lhax, pex tawng bawg yam raux dex sang hoek, ²⁹ Awm an yam yaox pex ceu in khankix uik sang mawh, kieh tawng Nawh dex hoek ti ot ka praok siviex khankix heue. ³⁰ Aux krai lox tete ka pex, pui ju in tak ang bax luan, tom ceu in khankix khawmuik tak hoik mawh heue. ³¹ Raoma mai haktiex tak sang grai, viang mawh nan gumlox Aux in tak ang grai heue. ³² "Ang tawng singaix bawg yam nari an tix kaux kawx, viang mawh kawncau Siyiex ka daux meung raoma khankix kawx ang tawng, Kawn Cao kawx ang tawng, mawh ngie Keeing Cao pa tawng heue. ³³ Mawh kheu ang pex tawng bawg yam an, rien rhawm tix, pau ti jhak mai rawg bwan heue. ³⁴ Grawh grawng in tak awm pui tix kaux, pa prah nyiex tix mai hu ot tang praix klawng, khaix hoik tawx nawh sibrawm ka kawncau nawh khankix mai hoik tawx kaing ka kaux pui mawx kaux pui an mai hoik nhie pui pau siviex. ³⁵ Pau ti jhak heue, kheu ang pex tawng bawg yam sang hoek simiang cao nyiex, tak mawh yam ponbo lie, phan ang mawh nan, yam greung sawm lie, phan ang mawh nan, yam ux ia lie, phan ang mawh nan, yam ponngawb lie, pex ang lai tawng heue. ³⁶ Phan ang mawh nan, ha Nawh kox hoek yam ang pex ce mai yaox laig it pex heue. ³⁷ Pa krai Aux ka pex, Aux krai ka khawmuik, pau ti jhak heue."

¹ Khaix an ra ngaix mawh pawie Pasakha mai pawie blah pa ang sau susaix mai cao giex kaing li pa ting khankix mai pui tiiem lai khankix, sawg ti lhen nyaw Nawh Cao, sonsang pon giex mai teei Nawh yum heue. ² Kheu kix ah nin, "Paw yuh yam yuh pawie, phan ang mawh nan ha pui khankix kox lih koe krax lawh maw cuci kheu heue." ³ Yam ot Nawh Cao ka daux yaong Betanix, daux nyiex Simon pui sipawg, yam ngawm Nawh ti sawm, bun tix kaux hoek ka Nawh Cao pa koe sidah bhawng Nadu pa kied ngawh, daux kawng simaox paing mai nawh pah kawng an max mai groi sidah an piang kaing Nawh Cao heue. ⁴ Viang mawh nan koe tix blah pa song rhawm mai ah nin ka paox tix, "Kieh sidah bhawng in nai giex going yuh nin yuh ka mawx? ⁵ Phan coh sidah bhawng in tak sang pon ngawh lheu denari loe yieh plah mai tawx ka pui hot sibhawm khankix heue." Kix deuh phimap ka bun an heue. ⁶ Viang mawh nan, Yesux ah nin, "Paw chuh nawh, pex lai laklheut nawh yuh ka mawx? Nawh hoik yuh kaing pa mhawm piang Aux heue. ⁷ Mawh kheu pui hot pui sibhawm ot mai pex jheung jheung mai pex mie ti yuh pa mhawm ka kix lai mawx ang ah, pex pon ti yuh, viang mawh nan, Aux ot mai pex jheung jheung ang mawh. ⁸ Nawh hoik yuh pa chix yuh tix. Nawh hoik groi sidah bhawng ka tokaux Aux, sivoe, son bawg yam sipaung heue. ⁹ Aux krai lox tete ka pex, dee mawx ang ah, dee sang sidiex gau lox bwan gaux rhawm in ka piang haktiex kudah dee khawmuik, grawng ceu pa yuh bun in kawx, tak sang krai, sonsang doh keud ka nawh heue." ¹⁰ Yudax Isakariut pa mawh tix kaux ka daux kawncau kao ra kaux, hu ka cao giex kaing li pa ting khankix, sonsang tawx Nawh Cao ka kix heue. ¹¹ Yam mhong kix lox an, kix gaux rhawm mai tawx lox mukheu grawng sang tawx mau ka nawh heue. Nawh sawg bawg yam pa mhawm, sonsang pon tawx nawh Yesux ka kix heue. ¹² Daux ngaix tix, blah pa ang sau susaix, khaix hoik pah hoik tan kix yung Pasakha, kawncau Nawh khankix ah nin ka Nawh Cao, "Maix mie ti kieh ex hu cox dee sang ih Maix pawie Pasakha dee mawx? ¹³ Nawh Cao ploi kawncau Nawh ra kaux hu mai ah nin ka kiex, "Hu ka daux veng mai pui pa viex aw rawm tix kaux tak sipub pax heue. Hawt khaix nawh. ¹⁴ Nawh laig dee mawx ang ah, ah nin ka cao nyiex an, Sara Cao gau ah nin, Lawg son nyo maix, dee tak sang ih Aux Pasakha tau mai kawncau Aux khankix, koe dee mawx? ¹⁵ Tokaux nawh tak sang jhi pax yaox lawg pa ting plak piang, pa hoik koe kraung mai pa hoik cox. Cox khre dee an son ex heue." ¹⁶ Kawncau ankiex hu laig ka daux veng mai yaox awm pa hoik krai Nawh Cao ka kiex mai kiex cox khre pawie Pasakha heue. ¹⁷ Yam hoek ponbo Nawh Cao hoek tau mai kix kao ra kaux. ¹⁸ Yam ngawm neung kix mai sawm, Yesux ah nin, "Aux krai lox tete ka pex, ka daux pex tix kaux pa sawm tau mai Aux, tak sang tik sang tawx Aux heue." ¹⁹ Kix khi rhawm kah mai tix kaux lai tix kaux ah nin ka Nawh Cao, "Mawh aux lie?" ²⁰ Nawh Cao baox ah nin ka kix, "Mawh ka daux kao ra kaux tix kaux, pa mawh kaw pa cub daux klong tau mai Aux heue. ²¹ Kawn kawn pui tak hu, awm hoik tiiem grawh grawng Nawh, viang mawh nan pui pa tik pa tawx Kawn kawn pui tak kha rhawm heue. Son pui an phan nawh ang keh lheu mhawm son nawh heue." ²² Yam sawm kix Nawh Cao teei blah, khaix hoik nawb Nawh bwan. Nawh sivit mai tawx ka kix ah nin, "Pex teei, in mawh tokaux Aux heue." ²³ Nawh Cao teei kawk mai khaix hoik yaogyaw Nawh bwanson, Nawh tawx ka kix mai kix khawmuik nyaux kah heue. ²⁴ Nawh Cao ah nin ka kix, "In mawh nham Aux pa dex dawd mai sijax mukheu pa khraox, pa lih son pui tom nie heue. ²⁵ Aux krai lox tete ka pex, Aux tak ang nyaux rawm plix siiet in, tom sidah ngaix yam tak nyaux Aux pa khraox ka daux meung Siyiex heue." ²⁶ Khaix hoik rhax kix lai rhax tix mu kix lih hu ka gawng Sanlun heue. ²⁷ Yesux ah nin ka kix, "Pex khawmuik tak sang laux rhawm kah heue. Kheu hoik tiiem ah nin, Aux tak pah cao liang yung mai yung khankix tak prung prang heue. ²⁸ Viang mawh nan, khaix hoik deeh kaoh Aux, Aux tak sang hu sivoe pex ka daux meung Galilie heue." ²⁹ Viang mawh nan Petrux ah nin ka Nawh Cao, "Viang kix khawmuik laux rhawm kawx, aux tak ang laux rhawm heue." ³⁰ Yesux ah nin ka nawh, "Aux krai lox tete ka maix, daux ngaix, daux sawm in, ka ang ia nyang ux ra bawg maix tak thiang titik vud Aux loe bawg heue." ³¹ Viang mawh nan nawh baox krai lox kied riex ah nin, "Phan aux tak yum tau mai Maix kawx, ang aux doh thiang titik vud Maix heue." kix khawmuik kawx, ah awm an heue. ³² Kix hoek tix dah dee Kesasemanix, Nawh Cao ah nin ka kawncau Nawh khankix, "Pex ngawm tin yam hu rawg Aux bwan heue." ³³ Nawh Cao teei Petrux mai Yakop mai Yohan, hu tau mai Nawh mai Nawh Cao kied daox deng mai sung sang rhawm heue. ³⁴ Nawh Cao ah nin ka kix, "Aux kied khi rhawm, tom dex sang yum, pex ot tin mai pau heue." ³⁵ Nawh Cao hu sivoe ceeix mai grux gup piang tiex mai rawg bwan, bawg yam an tak luan khaing Nawh, phan chix kieh luan heue. ³⁶ Nawh Cao ah nin, "Abax, Keeing eue, Maix chix yuh kuceu heue. Teei kawk in khaing Aux liak, viang mawh nan, paw kieh mawh alo pa khaw caw rhawm Aux, kieh mawh pa khaw caw rhawm Maix heue." ³⁷ Nawh Cao deeh hoek mai yaox kix laig it mai ah nin ka Petrux, "Simon eue, laig it maix lie? Ang maix pon ti pau tix nari khaing lie? ³⁸ Pau mai rawg bwan heue, yuh ka mawx son ang pex laig ka daux pa nyaw glaw. Khuan koe rhawm ti sang yuh tete, viang mawh nan nex nham mawh pa iak riang iak rao heue." ³⁹ Nawh Cao baox deeh lih hu mai rawg bwan mai ah lox awm phao ka heue. ⁴⁰ Nawh Cao baox deeh hoek mai yaox kix laig it, kheu ngai kix cien. Kix ang tawng lox pa sang pawk ka Nawh heue. ⁴¹ Nawh Cao deeh hoek loe bawg tix bawg mai ah nin ka kix. "Yam in kawn it mai laux lee tix heue. Ding heue, bawg yam nari hoik hoek, jhak heue, tak sang tik sang tawx Kawn kawn pui daux tawm taix pui phimap khankix heue. ⁴² Kaoh, ex hu heue, jhak heue, kaw pa sang tik sang tawx Aux dex hoek heue." ⁴³ Yam kawn sikah Nawh Cao, dom mawx dom an, Yudax pa mawh ka daux kix kao ra kaux tix kaux, hoek tau mai cub pui hun, pa viex vaid viex khaox mai lih hoek khaing cao giex kaing li pa ting mai pui tiiem lai mai kuad song khankix heue. ⁴⁴ Kaw pa tik pa tawx Nawh Cao hoik tawx mhai, sonsang kieh kix tawng tix ceu ah nin, "Aux ngheut pui mawx ang ah, mawh Kaw an. Giex Nawh mai tuk Nawh hu mhawm mhawm." ⁴⁵ Yam hoek nawh, nawh hoek ka Nawh Cao dom mawx dom an ah nin, "Rabi eue," mai ngheut ka Nawh heue. ⁴⁶ Kix giex ti teei Nawh Cao heue. ⁴⁷ Viang mawh nan ka daux kix pa cung dex tan tix kaux lawd vaid tix mai kid yhaok siliex cao giex kaing li pa ting piang khawmuik dud heue. ⁴⁸ Yesux ah nin ka kix, "Pex viex vaid viex khaox hoek ti giex Aux awm giex ka pui tud rhim lie? ⁴⁹ Aux ot tau mai pex mai sidiex gau ka daux nyiex bwan ku ngaix mai pex ang giex Aux. Viang mawh nan, ceu in hoik mawh sonsang naog phuk lai sigang khri heue." ⁵⁰ Kawncau Nawh khawmuik prah Nawh Cao mai to hu heue. ⁵¹ Pui pa awn ju tix kaux hawt khaix Nawh Cao, pa koe man fua tix pheen, pa fua ka tokaux kakaong tix mai kix giex nawh heue. ⁵² Viang mawh nan nawh prah man fua nawh tan mai to hu kakaong heue. ⁵³ Kix tok Yesux hu ka cao giex kaing li pa ting piang khawmuik mai cao giex kaing li pa ting khankix mai kuad song, mai pui tiiem lai khankix, khrawm paox tix tau mai nawh heue. ⁵⁴ Petrux hawt khaix Nawh Cao dee singai mai hoek ka brawk nyiex cao giex kaing li pa ting an mai ngawm tau mai pui cau simiang khankix mai co ngu heue. ⁵⁵ Cao giex kaing li pa ting khankix mai kuad song cao prawng see khawmuik sawg mhai rug grawh grawng Yesux, sonsang pon ti teei Nawh yum mai ang kix yaox. ⁵⁶ Mawh kheu pui tom nie kham mhai rug pa ang mawh meh grawng Nawh Cao mai mhai rug pa kham kix ang khaw paox tix. ⁵⁷ Tix blah cung mai kham mhai rug grawng Nawh Cao ah in, ⁵⁸ "Ex mhong Nawh ah nin, Aux tak yieh nyiex bwan in pa hoik yuh ka taix daux loe ngaix mai Aux tak baox yuh tix lhang pa ang yuh ka taix heue." ⁵⁹ Viang yuh nan kawx mhai rug kix ang khaw paox tix. ⁶⁰ Cao giex kaing li pa ting cung sinax kix mai chawk Yesux ah nin, "Maix ang deeh pawk lox tidtix lie? Pa kham mhai rug ceu in grawh grawng Maix, mawh pa yuh ka mawx?" ⁶¹ Viang Nawh Cao ang nye, ti pawk lox tidtix. Cao kaing li an, deeh baox chawk Nawh Cao ah nin, "Maix mawh Khrit, Kawn Cao Pa Ting Bwan lie?" ⁶² Yesux ah nin, "Mawh Aux heue. Pex tak sang yaox Kawn kawn pui ngawm plak dawm daux sibrawm mai hoek tau mai paiawm raoma khankix heue." ⁶³ Cao giex kaing li pa ting an riah kraung ceep tix ah nin, "Ex baox lo mhai rug yuh ka mawx? ⁶⁴ Pex hoik mhong lox salao Nawh ka Siyiex heue. Pex ce yuh ka mawx?" kix khawmuik prawng ca Nawh, ah Nawh keung ti yum heue. ⁶⁵ Tix blah baig rawm myia piang Nawh Cao mai tawb pakngai Nawh Cao mai jhawp taix tix klah Nawh Cao mai ah nin ka Nawh, "Krai lox jhai heue." Pui cau simiang khankix kawx, yam rieb ti teei Nawh Cao, kix simang Nawh ka taix tix. ⁶⁶ Yam ngawm Petrux greem ka brawk, bun pa mawh kawncau cao giex kaing li pa ting an hoek, ⁶⁷ Yaox Petrux co ngu mai bun an jhak ka nawh ah nin, "Maix kawx, mawh pa ot tau mai Yesux pui veng Nazariet heue." ⁶⁸ Viang mawh nan nawh thiang ah nin, "Aux ang tawng pa ah maix heue." Nawh lih hu ka grah nyiex mai ia ux heue. ⁶⁹ Bun an baox yaox nawh tix bawg mai ah nin ka pui pa cung dex tan, "In mawh kix tix kaux heue." ⁷⁰ Nawh baox thiang tix bawg mai khaix an tivud, kix pa cung dex tan baox ah nin ka Petrux, "Maix mawh daux kix tix kaux tete heue, kheu maix mawh pui meung Galilie heue." ⁷¹ Viang mawh nan nawh jah ti jhax mai tiextu ah nin, "Ang aux tawng Pui in pa krai pex." ⁷² Dom mawx dom an ia ux ra bawg tix bawg heue. Petrux doh keud ka lox pa hoik krai Yesux ka nawh ah nin, "Ka ang ia nyang ux ra bawg maix tak thiang ti tik Aux loe bawg heue." Yam keud nawh grawng ceu an nawh yiiem heue.

¹ Daux ponngawb dom mawx dom an, cao giex kaing li ting khankix mai kuad song mai pui tiiem lai khankix mai cub cao prawng see khawmuik, kum paox tix mai phyawk Yesux mai viex Nawh Cao hu tawx ka Pilat heue. ² Pilat chawk Nawh ah nin, "Maix mawh Simiang pui Yudax lie? Nawh cao pawk lox ka nawh ah nin " Pa ah maix mawh heue." ³ Cao giex kaing li khankix deuh phimap ka Nawh Cao tom nie ceu heue. ⁴ Pilat baox deeh chawk Nawh Cao ah nin, "Maix ang pawk lox tidtix lie? Jhak heue, kix deuh phimap ka Maix tom nie ceu miex ding." ⁵ Viang mawh nan Yesux ang lai pawk lox tidtix, tom daox deng Pilat kah heue. ⁶ Yam yuh pawie an nawh hoik sax ploi pui pa ot daux thawng ka kix tix kaux, awm kaw pa rawg kix ka nawh heue. ⁷ Koe pui tix kaux pa kok mawh Barabax, pa phyawk tau mai kix pa mawh pui tieh feen, pui pa hoik teei pui yum yam tieh feen kix heue. ⁸ Cub pui hun khankix hu mai rawg mhaing ka nawh, nhie nawh yuh awm pasax yuh nawh, son kix heue. ⁹ Pilat pawk lox ka kix ah nin, "Pex mie ti kieh aux ploi Simiang Pui Yudax ka pex lie?" ¹⁰ Kheu nawh tawng cao giex kaing li pa ting khankix, hoik teei ti tawx Nawh kheu boh rhawm kix kah heue. ¹¹ Viang mawh nan cao giex kaing li pa ting khankix cheeik ka cub pui hun khankix, son sang ploi nawh Barabax ka kix khaing Nawh heue. ¹² Pilat baox deeh chawk kix ah nin, "Phan mawh nan aux tak yuh patix ka Kaw pa kok pex mawh Simiang pui Yudax?" ¹³ Kix baox kok yo ah nin, "Tawk Nawh piang khaox lhak heue." ¹⁴ Pilat baox ah nin ka kix, "Mawh kheu grawng patix, Nawh hoik yuh pa caox pa yuh ka mawx?" Viang mawh nan kix nied ti yo ah nin, "Tawk Nawh piang khaox lhak heue." ¹⁵ Pilat simie ti kieh pui hun khankix fah rhawm, nawh tom ploi Barabax ka kix mai teei ti tawx Yesux, son sang sivied Nawh mai tawk Nawh Cao piang khaox lhak heue. ¹⁶ Pui naing khankix tuk Nawh Cao hu ka brawk nyiex dee ot pui naing mai kok pui naing khawmuik khrawm paox tix heue. ¹⁷ Kix teei kraung raoh klai ceep ka Nawh Cao mai taing mhok kat lawm sau ka Nawh Cao heue. ¹⁸ Kix jah ti ah nin ka Nawh Cao, "Simiang pui Yudax eue, kieh nyawm ot heue." ¹⁹ Kix sivied kaing Nawh Cao ka priem mai baig rawm myia piang Nawh mai grux ngawng tix krub ka Nawh Cao heue. ²⁰ Khaix hoik yuh kix pa ang cee cak ka Nawh Cao, kix peeik kraung pa raoh klai khaing Nawh mai deeh ceep kraung cie Nawh. Kix tuk Nawh hu son sang tawk Nawh Cao piang khaox lhak heue. ²¹ Kix khin Simon pui meung Kurene, pa mawh keeing Alezandru mai Rufux, pa hoek khaing daux tiag, hu mai kix, sonsang kieh nawh klawm khaox lhak Nawh Cao heue. ²² Kix viex Nawh Cao hu ka dee Gawlaxgawthax, phan toe dee bleeh mawh, "Dee Si-ang Kaing" heue. ²³ Kix tawx ti yaox sidah niex pa hoik klao tau mai Muran ka Nawh Cao. Viang mawh nan Nawh ang rieb ti teei. ²⁴ Kix tawk Nawh Cao piang khaox lhak mai gwieh kraung Nawh sinax kix, khaix hoik nieb kix ti yaox mawh pui mawx pa tak sang teei pa yuh ka mawx. ²⁵ Yam tawk kix Nawh Cao piang khaox lhak, mawh bawg yam loe nari heue. ²⁶ Lai tiiem grawng deuh Nawh lud, hoik tiiem deuh ka piang ah nin, "SIMIANG PWI YUDAX" ²⁷ Kix tawk pui tud rhim ra kaux tau mai Nawh Cao piang khaox lhak, plak dawm Nawh tix kaux mai plak gwiex Nawh tix kaux. ²⁸ Phuk lai sigang khri ah nin, "Hoik simin Nawh tau mai pui pa yuh pa ang khaw jiet khankix hoik naog heue." ²⁹ Kix pa hu hoek dex tan, ah pa ang khaw ang jiet ka Nawh Cao mai vuvied kaing tix ah nin, "Ha, Maix pa yieh nyiex bwan mai deeh yuh daux loe ngaix eue, ³⁰ taoh tokaux Maix mai lih khaing khaox lhak heue." ³¹ Awm an cao giex kaing li pa ting mai pui tiiem lai khankix kawx, ah pa ang cee ang cak ka Nawh Cao ah nin, "Nawh chix taoh pui tang kaux, tokaux Nawh, Nawh ang chix taoh. ³² Kieh Khrit, Simiang Pui Isarelax, lih khaing khaox lhak yam in, sonsang yaox ex mai yum rhawm ex kah heue." Kaw pa hoik tawk piang khaox lhak tau mai Nawh Cao kawx, ah pa ang cee ang cak ka Nawh heue. ³³ Yam hoek liah nari praix faik piang haktiex khawmuik tom hoek dim nari. ³⁴ Yam hoek dim nari Yesux kok yo lox sinum ah nin, "Elix, Elix, lama sabak-tanix?" Phan toe dee bleeh mawh, "Siyiex Aux, Siyiex Aux, Maix lai tik vud Aux yuh ka mawx?" ³⁵ Pui pa cung dex tan tix blah yam mhong kix lox an, ah nin, "Jhak heue, Nawh kok ka Eliyax." ³⁶ Kix tix kaux to hu mai teei gai ploh pa awm tih tix mu pa sau rawm sidah niex naog mai sau ka toh gawng priem mai tawx Nawh nyaux ah nin, "Paw chuh, kieh ex jhak Eliyax sang hoek ti teei Nawh lih lie, ang hoek lie?" ³⁷ Yesux ah lox sinum mai deeh tawx khuan tix heue. ³⁸ Yam an man tie daux nyiex bwan griah lih ra pak, jah plak piang tom hoek ka caong heue. ³⁹ Yam an pui giex kaing naing pa cung dex Nawh Cao, yaox Nawh deeh tawx Khuan mai nawh ah nin, "Pui in mawh Kawn Siyiex tete heue." ⁴⁰ Bun khankix kawx ot dee singai mai jhak heue. Ka daux kix koe Marix Magadalax mai Marix miex Yakop pa iak mai Yosiep mai Salom, ⁴¹ pa hoik hawt Nawh yam ot Nawh Cao ka daux meung Galilie, mai khan kheu ka Nawh Cao mai bun tang kaux tom nie pa hoik hoek tau mai Nawh Cao ka veng Yerusaliem heue. ⁴² Yam hoek ponbo kheu mawh Singaix Khre, pa mawh ngaix sivoe ngaix twah, ⁴³ Yosiep pui Arimase, pa mawh simiang pa koe min plakngai tokaux nawh kawx, krox ti jhak son yam sang hoek Meung Siyiex. Nawh viex rhawm kwa hu ka Pilat mai rawg mhaing tokaux yum Yesux heue. ⁴⁴ Pilat daox deng ka grawng Nawh Cao hoik khran yum yam an nawh kok pui giex kaing naing hoek ka nawh mai chawk grawng hoik rheung yum Nawh Cao lie? ⁴⁵ Yam hoik mhong nawh grawng ceu an ka pui giex kaing naing, nawh tawx tokaux yum Nawh Cao ka Yosiep heue. ⁴⁶ Nawh liag man paing mai teei Nawh lih pua Nawh ka man paing an mai sau ka daux, daux simeeig, pa hoik saik ka daux rang heue. Nawh plu plie simaox mai thox ka moing daux simeeig an heue. ⁴⁷ Marix Magadalax mai Marix miex Yosiep, yaox dee een tokaux yum Nawh Cao heue.

¹ Yam hoik luan ngaix twah, Marix Magadalax mai Marix miex Yakop mai Salom liag sidah bhawng, sonsang kraix ka Nawh Cao. ² Daux aliah ngaix, singaix tix, ponngawb cao cao, kix hu hoek ka simeeig yam hoik lih singaix heue. ³ Kix ah nin ka paox tix, "Pui mawx tak sang plu plie simaox an khaing moing daux simeeig son ex." ⁴ Kix yaog ti jhak mai yaox simaox an hoik plu plie hoik gah tix. Simaox an mawh pa kied ting heue. ⁵ Kix laig ka daux simeeig mai yaox pui awn ju tix kaux ngawm plak khawn dawm mai ceep sibex dha pa paing mai kix yaoh kah heue. ⁶ Nawh ah nin ka kix, "Paw yaoh paw lhat awx. Pex sawg Yesux pui veng Nazariet pa hoik tawk piang khaox lhak. Nawh Cao hoik kaoh. Nawh ang ot tin, jhak ka dee hoik een kix Nawh Cao heue. ⁷ Viang mawh nan pex hu krai kawncau Nawh khankix mai Petrux mhong. "Nawh sang hu sivoe pex ka daux meung Galilie, pex tak sang yaox Nawh Cao tan, awm hoik krai Nawh ka pex heue." ⁸ Kix lih mai to hu khaing simeeig, kheu krax lhat siyaung mai krax daox deng, hoik hoek piang kix, kix ang krai tidtix ka pui tix kaux kawx, kheu kied lhat kix heue. ⁹ Yam hoik deeh kaoh im Yesux cao cao daux aliah ngaix, ngaix tix, Nawh jhi tokaux tix ka Marix Magadalax phao ka heue. Pa mawh bun pa hoik grheu Nawh phi caox aliah kaux lih khaing heue. ¹⁰ Nawh hu krai kix pa hoik ot tau mai Yesux mhong, yam yiem kix mai khi rhawm. ¹¹ Yam mhong kix, grawng hoik deeh im Yesux mai grawng hoik yaox Marix ka Nawh, kix ang yum rhawm kah. ¹² Khaix an Nawh Cao baox jhi tokaux tix, daux riang pak peung tang ceu, yam hu kawncau Nawh krax daux tiag ra kaux heue. ¹³ Kiex hu krai grawh grawng ceu in ka kawncau pa deuk khankix, kix ang yum rhawm ka kiex heue. ¹⁴ Khaix an Nawh Cao baox jhi tokaux tix ka kix kao tix kaux, yam ngawm neung kix ti sawm. Nawh Cao ah ka kix, kheu krax ang yum rhawm mai pa kien rhawm kix, mawh kheu kix ang yum rhawm ka pui pa hoik yaox Nawh Cao, khaix hoik deeh kaoh Nawh heue. ¹⁵ Nawh Cao ah nin ka kix, "Pex hu piang haktiex khawmuik mai sidiex gau lox bwan gaux rhawm in, ka can pui pa hoik phan hoik yuh khawmuik heue. ¹⁶ Pui pa yum rhawm mai cubcom, tak hoek krax taoh heue, pui pa ang yum rhawm tak hoek krax prawng ciyang heue. ¹⁷ Mhai rug ceu in khankix tak mawh ka kix pa yum rhawm. Kix tak sang grheu phicaox lih ka daux ceu kaux Aux mai kix tak sang sikah daux lox pui ceu pa khraox. ¹⁸ Kix tak sang pon teei ti yaog siuing mai phan kix nyaux pa awp tix ceu ceu, ang chix kieh kix saux tidtix. Kix tak sang deuh taix tix piang pui saux pui ngia mai kix tak moi heue." ¹⁹ Khaix hoik krai Simiang Yesux ceu in ka kix, rieb ti teei Nawh haok ka daux meung raoma mai kieh ngawm plak taix khawn dawm Siyiex heue. ²⁰ Kix lih hu mai sidiex gau kudah dee. Siyiex yuh kaing tau mai kix, kieh lox bwan kaux cong, kheu mhai pa lih mawh daux kix khankix heue.