Micah

Micah

¹ Gumlox Siyiex hoek ka Mikha, pui yaong Mawrasha, ka daux baux singaix Yotham, Shap mai Hezakix,simiang meung Yudax khankix, ka pa hoik yaox nawh grawng veng Samarix mai veng Yerusaliem khankix. ² Pex pa mawh pui khankix eue, nghiet heue. Haktiex mai can pa koe ka daux an khankix eue, nghiet heue. Siyiex leeing ju pex mawh pa kham mhai ruk grawng ang pex mawh khaing nyiex bwan pa singax singeh Nawh heue. ³ Jhak heue, Siyiex sang lih khaing dee ot Nawh, Nawh Cao tak sang hoek mai dig ka piang dee pa lhaong piang haktiex khankix heue. ⁴ Gawng khankix tak sang lih ti awm rawm ka greem nawh, daux ngawd khankix tak sang vih ti max, awm ten ka plak sivoe ngu, awm rawm khankix pa chun ti lih jee heue. ⁵ In khawmuik hoik mawh kheu krax lud Yakop mai kheu phimap nyiex ma Isarelax khankix heue. Mawh krax pa lud Yakop ceu patix? Ang an mawh veng Samarix lie? Dee pa lhaong pui Yudax khankix mawh ceu pa patix? Ang an mawh veng Yerusaliem lie? ⁶ Mawh kheu nan, Aux tak sang kieh veng Samarix mawh pum tiex pa laux ka daux tong kaung, kieh awm dee pa sang sum tix sipeem plix siiet, Aux tak sang klup lon simaox guh veng nawh khankix ka daux ngawd mai Aux tak sang kieh num riah guh veng nawh khankix lih heue. ⁷ Riang grang pa hoik saik nawh khankix, tak sang mawh pa pah tom phawng mai mau ngawh pon nawh khaing pa yuh tix bun coh kaux khankix tak sang mawh pa gleeing tix ka ngu khawmuik, Aux tak sang kieh riang grang krub nawh khankix mawh pa laux khawmuik, kheu hoik mawh pa kraix khrawm nawh ti deuh khaing ngawh pon tix ka pa yuh nawh bun coh kaux mai kix tak sang deeh tawx an, son ngawh bun coh kaux heue. ⁸ Mawh kheu nan Aux tak sang yiiem yo ka daux pa kied ting kied lhaong, Aux tak sang hu ka caong giex mai ot ka kaong tix heue. Aux tak sang tawng lox tix lih awm sox praix mai koe krax khi rhawm ti yiiem awm sim kala-uk khankix, ⁹ kheu ang khaix mat nawh chix moi, rheung tom hoek ka haktiex Yudax mai hoek ka daux siviex veng pui Aux khankix daux veng Yerusaliem heue. ¹⁰ Paw krai grawng an ka daux veng Gata mai paw doh yiiem heue. Aux sang lu lieh tix ka daux phawng tiex daux veng Bietaphara heue. ¹¹ Pa ot ka daux veng Shaphire khankix eue, pex sang hu ka daux krax kaig tua mai ka kaong tix heue. Pui pa ot ka daux veng Zanan khankix ang lai pon lih hu ka plak praix heue. Veng Bietezalax hoik yiiem ti teei dee pa sang cung pex ti ot hu khaing pex heue. ¹² Pui pa ot ka dau veng Marot khankix hoik kied khi ka krax jun tix son ceu pa mhawm, mawh kheu krax kha rhawm hoik lih khaing Siyiex mai hoik hoek ka daux siviex veng Yerusaliem heue. ¹³ Pui pa ot ka daux veng Lakhisha khankix eue, tok ti sau ling lawx ka brung pa kied phai to khankix heue. Maix hoik mawh pui pa jah ti yuh krax pa koe map koe grham ka kawn bun veng Zion mawh kheu krax pa lud ceu pui Isarelax khankix hoik mawh pa yaox tix ka daux maix heue. ¹⁴ Mawh kheu nan maix tak sang yaox ti tawx totaix, ka veng Mawreshiet, pa koe ka daux haktiex Gata khankix heue. Nyiex ma veng Akhazip, tak sang mawh pui pie lhen ka simiang haktiex Isarelax khankix heue. ¹⁵ Pui pa ot ka daux veng Maresha khankix eue, Aux tak sang viex pui pa grang tix cie sinngao maix hoek ka maix heue. Min plakngai Isarelax tak sang hoek ka veng Adulam heue. ¹⁶ Yudax eue, khlao hauk maix mai kieh kaing tix pak son kawn simex kawn bun pa moh rhawm maix khankix, kieh kaing pak tix awm klang preng, grawh grawng nawh, kix tak sang hu khaing maix ka daux krax pa giex laung heue.

¹ Koe krax kha rhawm ka pui khankix, pa keud ti yuh krax pa lud mai yuh kaing ceu pa caox, ka piang ku dee it dee tum heue. Yam riang praix kix yuh an, kheu koe sibrawm taix kix heue. ² Kix ghoing ka ma kaung khankix mai khin rhim ti teei, ghoing ka nyiex ma khankix mai kix hoik rhim tix heue. Kix yuh krax kha rhawm ka pui mai khawm paox nyiex nawh mai khawm ka kraung khrai sinngao nyiex ma nawh heue. ³ Mawh kheu nan, Siyiex ah nin "Jhak heue, Aux hoik keud ti sang tawx krax laux leeing ka piang nyiex ma pui in, krax laux leeing in tak ang pon ti boek khaing ka piang ngawg kix mai pex tak ang lai pon yaog kaing tix lailing, grawh grawng nawh, in mawh bawg yam koe ceu pa caox caig heue. ⁴ Ka daux singaix an, tak koe pui pa yaog ti ah lox yiiem ka pex, ka daux pa kied kin, khi rhawm ah nin, ex mawh pa hoik laux leeing pak lawg heue, Nawh Cao hoik loh ti tawx son cie pui aux khankix ka pui tang, Nawh Cao hoik gah khaing aux yuh ka mawx! Nawh Cao hoik gwieh ti tawx tong kaung ex khankix, ka pui tieh feen heue." ⁵ Mawh kheu nan maix tak ang lai yaox ti koe pui yuh nieb sonsang tiag ti deuh mee haktiex ka daux cub caw pui hun Siyiex heue. ⁶ Kix ah nin ka cao jhai khankix, "Pex ang pon ti krai lox jhai mai ang pon ti krai lox jhai ka pui inkix, pa tawx krax kaig tua ka ex sijheung heue. ⁷ Nyiex ma Yakop eue maix khex chix ah nin, rhawm rhi Siyiex mawh pa sikhawp lie? Mawh inkix ceu pa yuh Nawh Cao lie? Mawh ang gumlox Aux mawh pa mhawm, ka pui pa yuh pa rahsee khankix lie?" ⁸ Pex hoik yaog ti kaoh puing pui Aux awm pui koeng, pex peeik ti teei sibex dhah plak piang mai kraung ceep khankix, khaing pui ankix, pa een rhawm tix ka pex yam tiang kix ti hu hawt baox an, awm pui khankix pa hoik deeh ing khaing daux naing heue. ⁹ Pex hoik grheu bun pui Aux khankix lih khaing daux nyiex ma nyawm ot kix mai hoik teei min plakngai Aux hu khaing kawn praix kix khawmuik heue. ¹⁰ Pex yaog ti kaoh mai hu heue, grawh grawng nawh, in ang tie mawh dee pa sang laux lee pex tix, kheu mawh dah dee pa hoik seeing brai mai pa tak sang kieh pex koe krax laux leeing, tom hoik kied ting krax pa laux leeing pex heue. ¹¹ Phan daux rhawm rhi pui koe ceu pie lhen mai sikah lox pie lhen pa ah nin, aux tak sang krai lox jhai grawh grawng rawm plix siiet mai rawm plai khankix heue. Kaw an tak sang mawh cao jhai ka pui ceu inkix heue. ¹² "Yakop eue, Aux tak sang deeh kraix khrawm pex hoek khawmuik tete heue. Aux tak sang kraix khrawm Isarelax pa kawn deuk khankix, Aux tak sang deuh kix ot tau tidah, awm yung ot ka daux kawg yung, awm cub phung yung ka daux sinax biang dee klai rib, lox kix tak sinum siaox kheu kied nie hun pui kix heue. ¹³ Pui pa yieh daux siviex, tak sang hu ka plak sivoe kix mai kix tak preung ka daux diang siviex veng mai lih hu khaing ka daux siviex veng an. Simiang kix hu ka plak sivoe kix mai Siyiex thung kix hu heue."

¹ Aux ah nin "Cao kaing ceu pui Yakop khankix mai cao pa kwang ka daux nyiex ma ceu pui Isarelax khankix eue, pex nghiet yam in, ang pex mawh pa caw ti koe krax tawng ka krax prawng krax ciyang pa rahsee heue. ² Pex pa koeng ka ceu pa mhawm mai moh ka ceu pa caox, pa tawx hak khaing pui Aux mai pawh nex khaing si-ang kix, ³ pa ih nex pui Aux khankix pa tawh hak kix, pa raig si-ang kix mai gam kix phawng, awm lon nex daux aw, awm nex pa koe ka daux aw rawm taux heue. ⁴ Yam an, kix tak sang riag yo lox tix ka Siyiex, viang mawh nan, Nawh Cao tak ang lai pawk lox kix, Nawh Cao tak sang veeh pakngai tix khaing kix ka daux bawg yam an, kheu hoik dawg yuh kix ceu pa caox ka daux kaing yuh kix heue. ⁵ Siyiex ah nin, ka son grawng cao jhai khankix, pa kieh pui Aux khankix koe krax lud loe, pa kok yo ti ah nin, "Koe krax pa nhim heue. Yam yaox rhang kix ti sai pa ih, pa khre rien ti sang yuh pa caox ka piang pui pa ang tawx pa ih tix ceu kawx ka daux jheeh kix heue." ⁶ Pex tak sang hoek ka daux pa faik ponsawm tom ang tix lai chix yaox riang susai mai tak sang hoek ka daux pa faik tom ang pon krai grawng pa tak sang hoek heue. Singaix tak sang klip ka son cao jhai mai plak pon ngaix tak sang mawh pa faik ka son kix heue. ⁷ Yam an cao jhai khankix tak koe krax kaig tua mai cao pa sibawk tak sang koe krax pa laux rhawm heue. Kix khawmuik, tak sang mip siyieb jheeh tix, kheu ang Siyiex pawk lox kix heue. ⁸ Aux mawh pa grum naog sibrawm kheu khuan Siyiex mai ka riang grang pa rahsee mai riang grang pa kied ting kied lhaong, sonsang pon pao krai Yakop grawng pa lud nawh khankix mai jhi Isarelax yaox ka phimap nawh khankix heue. ⁹ Pex pa mawh cao kaing nyiex ma pui Yakop mai cao pa kwang ka piang nyiex ma ceu pui Isarelax khankix eue, pa seeing ka krax pa rahsee khankix mai pa pluk pliak ti tik been pa khaw caw khankix, ¹⁰ pa sum veng Zion ka krax pa jah nham mai sum veng Yerusaliem, ka daux krax pa koe map koe grham khankix eue, nghiet ka lox in, daux yam in heue. ¹¹ Cao kaing nawh khankix, prawng see sonsang teei tix totaix pa cun praok, cao giex kaing li nawh khankix sidiex gau sonsang pon tix ngawh jum mai cao jhai nawh khankix yuh sibawk sonsang pon tix mau heue. Viang yuh nan, kix du lox tix ka piang Siyiex ah nin, mawh ang Siyiex ot ka daux sinax ex lie? Ceu pa kha rhawm tak ang lai pon hoek ka piang ex heue. ¹² Mawh kheu jao grawng pex, gawng Zion tak sang mawh pa thai tix awm gwang kaung tix gwang, veng Yerusaliem tak sang lih ti mawh pum tiex pa laux leeing mai gawng nyiex bwan in tak sang awm gawng daux tiagtu heue.

¹ Ka daux ngaix sidah sidu khankix, gawng nyiex bwan Siyiex, tak sang mawh pa kaux cong khaing gawng khankix mai tak sang mawh pa yaog ti lhaong khaing choek gawng khankix mai pui tak sang simeem ti lih hu ka gawng an heue. ² Ceu pui tom nie tak sang hoek ah nin, "Hoek mai kieh ex haok ka piang gawng Siyiex, ka nyiex bwan Siyiex ceu pui Yakop heue. Nawh Cao tak sang gau ex ka daux krax Nawh mai ex tak sang hawt ti hu ka daux krax Nawh Cao heue. Grawh grawng nawh, gumlox beenli tak sang lih khaing gawng Zion mai gumlox Siyiex tak sang lih khaing daux veng Yerusaliem heue." ³ Nawh Cao tak sang prawng ca ka daux sinax pui khankix tom nie mai sidiex gau ka ceu pui pa kied ting riang rao an pa koe ka dee singai heue, kix tak sang tawk vaig lawm tix deeh mawh to thai mai yuh pliah kix deeh mawh sivawg heue. Meung in tak ang lai yaog vaid tix puing ka meung an mai kix tak ang lai gau ti puing naing khaix in tibawg kawx heue. ⁴ Pui ku kaux tak sang yaox ti ngawm greem nhu plix siiet tix mai greem pang khaox ruh tix mai pui tix kaux kawx, tak ang lai koe krax lhat graung heue. In mawh jheeh Siyiex Cao kru naing raoma pa hoik ah yuh nan heue. ⁵ Pui khawmuik hoik tang hu kok ka ceu kaux siyiex tix heue. Phan mawh ex, tak sang hu kok ka ceu kaux Siyiex ex pa mawh Siyiex leeing ju heue. ⁶ Siyiex ah nin, "Ka daux ngaix an, Aux tak sang deeh krawk khrawm pui pa chawh caong hoek, Aux tak sang deeh kok pui pa hoik grheu tix khankix mai pui ankix pa hoik tawx Aux krax kha rhawm, ⁷ Aux tak sang kieh pui pa chawh caong mawh pa kawn deuk mai kieh pui pa hoik grheu tix khankix mawh ceu pui pa kied ting riang rao heue. Siyiex tak sang kwang kix ka piang gawng Zion, jah ka daux yam in mai hu sivoe ngai tom hoek leeing ju heue. ⁸ Maix pa mawh nyiex pau dee lhaong cub phung yung khankix mai dee pa kaux cong ot kawn bun Zion eue, tak sang deeh hoek ka maix krax kwang krax pang pa dawg koe glang ka an, pa mawh meung haktiex kawn bun veng Yerusaliem heue. ⁹ Yam in maix riag yo ti ting lhaong kheu patix lie? Mawh ang simiang koe tix kaux kawx ka daux pex lie? Mawh hoik grai grhup cao pa tawx krax keud krax sawn maix tom hoik yaox maix ti kham krax saux krax ngia khankix awm bun pa saux yam keh nawh kawn tix lie?" ¹⁰ Kawn bun Zion eue, kham krax saux ngia mai sau riang tix awm bun pa koe krax saux krax ngia in maix tak sang yaox ti lih hu khaing ka daux veng mai ot ka daux tong kaung mai hu tom hoek ka veng Babulon heue. Maix tak sang pon krax pa luad luan tan, Siyiex tak sang deeh taoh ti teei maix, khaing daux tawm taix pui koeng maix khankix heue. ¹¹ Yam in ceu pui tom nie hoik deeh khrawm ti hoek ka maix, pa mawh pui pa ah nin, kieh veng Zion mawh pa seeing brai mai kieh ngai ex yaox ka ceu pa yaox nawh ti kham heue. ¹² Viang mawh nan, kix ang tawng ka krax pa keud pa sawn Siyiex mai kix ang koe krax tawng ka krax pa bak Nawh Cao heue. Nawh Cao tak sang khrawm kix, awm lhiem nghox pa sang viex hu ka biang glah dee pah nghox heue. ¹³ Kawn bun Zion eue, yaog ti kaoh dig ka nghox heue. Aux tak sang yuh rung maix ka rhiem mai Aux tak sang yuh kloh maix ka tawng lheung, maix tak sang tawk pui phawng tom nie mai teei sinngao kix tan ka Siyiex mai teei kraung khrai kix tan ka cao pa kwang ka piang ca haktiex khawmuik heue.

¹ Kawn bun cub lien khankix eue, yam in kraix khrawm paox pex hoek ka daux cub lien khankix heue. Pui koeng hoik lai lawm ka ex heue. Kix tak sang sivied sibax cao pa prawng ceu pui Isarelax ka gawng khaox heue. ² Veng Bieliehiem, Epharat eue, viang maix mawh veng pa iak ka daux sinax veng meung Yudax khankix kawx, kheu cao giex kaing tak sang lih khaing maix tix kaux ka son Aux, pa sang mawh cao pa kwang ka daux ceu pui Isarelax, pa hoik dawg koe tom yam jah yam kaw dix heue. ³ Mawh kheu nan, Nawh Cao tak sang ap ti tawx kix ka pui koeng tom sidah hoek bawg yam hoik keh bun an kawn tix ka daux krax pa saux heue. Yam an pui pa kawn deuk khaing daux puxaik nawh khankix tak sang deeh ing ka ceu pui Isarelax heue. ⁴ Nawh tak sang cung kaux cong mai liang ka cub phung yung nawh, ka daux riang rao Siyiex, ka daux min sibrawm kwang ceu kaux Siyiex, pa mawh Siyiex nawh mai kix tak sang ot kaux cong kah heue. Grawh grawng nawh, nawh tak sang mawh pa ting lhaong, tom hoek ka dee sidah sidu haktiex heue. ⁵ Simiang in tak sang mawh krax pa nhim, yam hoek ceu pui Asurix ka daux haktiex ex mai yam dig nawh ka daux nyiex haw ex, ex tak sang yaog ti deuh cao liang yung aliah kaux mai simiang khankix daix kaux, puing ka nawh heue. ⁶ Kix tak sang laux yuh haktiex Asurix ka vaig mai khawm ka daux diang laig ka haktiex Nimrot heue. Nawh tak sang deeh taoh ex khaing daux tawm taix pui Asurix yam hoek kix ka daux haktiex ex mai yam dig kix ka plak daux mee haktiex ex khankix heue. ⁷ Ceu pui Yakop pa kawn deuk khankix, tak ot ka daux sinax pui khankix tom nie, awm rawm ciex pa lih hoek khaing Siyiex, awm rawm lhiex poe ka piang rib, pa ang lo ti pau riang rao pui mai pa ang lo ti krox jun krax teem kawn pui khankix heue. ⁸ Ceu pui Yakop pa kawn deuk khankix, tak ot ka dau sinax ceu pui tang ceu ka daux sinax pui khankix tom nie, awm sivai sangsi daux sinax totiag ka daux tiag daux nong, awm kawn sivai sangsi iak ka daux sinax cub phung yung khankix mai phan sivai sangsi an tiang ti hu, nawh tak dig mai puk paig ankix phawng mai pui tix kaux kawx ang lai pon ti taoh heue. ⁹ Taix maix tak sang mawh pa yaog ti lhaong ka piang pui koeng maix khankix mai pui koeng maix tak sang mawh pa tat ti tik heue. ¹⁰ Ka daux ngaix an, Siyiex ah nin, "Aux tak sang tat ti tik brung maix khankix khaing daux sinax maix mai yuh ling lawx maix khankix laux heue." ¹¹ "Aux tak sang tat ti tik veng maix khankix khaing daux haktiex maix mai yieh ti tik can dee kaux dee cong maix khankix khawmuik heue." ¹² Aux tak sang tat ti tik pui pa koe preu khaing daux taix maix mai maix tak ang lai koe cao pa sibawk khankix heue. ¹³ Aux tak sang baox tat ti tik riang grang pa hoik saik maix khankix mai khawm rong pa krub maix khankix khaing daux sigreung maix heue. Maix tak ang lai yaox ti krub ka kaing pa yuh maix ka taix tix khaix in tix bawg kawx heue. ¹⁴ Aux tak sang laoh ti tik khaox riang grang Asherax khaing daux sinax maix mai tak sang yuh veng maix khankix laux heue. ¹⁵ Aux tak sang ciyang ti pawk bix ka daux krax pa saux rhawm saux rhi mai ka daux krax pa song rhawm, ka piang ceu pui tang ceu, pa ang cu ti nghiet ka lox Aux heue.

¹ Nghiet ka lox Siyiex, yaog ti kaoh mai krai grawng see maix ka plak sivoe gawng khankix mai kieh ton khankix mhong ka lox maix heue. ² Gawng khankix mai num riah haktiex khankix eue, nghiet ka lox grawng see prawng Siyiex heue. Grawh grawng nawh, Siyiex hoik koe grawng see pa sang yuh krax pa thung thiang ka ceu pui Isarelax heue. ³ Pui Aux khankix eue, mawh yuh aux ceu patix ka maix lie? Mawh hoik yuh Aux maix koe krax meet rhawm ka ceu patix lie? Tawx mhai ruk ka Aux heue. ⁴ Aux hoik viex maix lih hoek khaing meung Ejiptux mai hoik taoh maix khaing nyiex ma krax pa kham maix ti yuh siliex mai Aux hoik ploi Mose, Arun mai Meriam hu ka plak sivoe maix heue. ⁵ Ceu pui Aux khankix eue, doh keud ka ceu pa hoik yuh Balak, pa mawh simiang haktiex Mawbax mai lox pa hoik deeh pawk Balam, pa mawh kawn simex Bawrax ka nawh, khawm ceu pa yaox pex jah ka veng Shittim tom hoek ka veng Gilagalax, sonsang kieh maix tawng ka krax pa mawh meh Siyiex heue. ⁶ Aux tak hoek ka plak sivoe Siyiex mai grux ti krub ka plak sivoe Siyiex pa kied ting kied lhaong tau mai ceu patix nie? Mawh tak sang hoek aux ka Nawh Cao tau mai krax tan pa gleeing khankix mai khawm kawn mawie iak pa koe ju tix num lie? ⁷ Siyiex khex khaw rhawm ka yung mhaing khankix kaing rheng, phan ang mawh nan, klawng rawm bee kaing mheen lie? Aux khex sang tan kawn Ai tix son krax pa lud aux, kawn Ai num pa kaoh khaing tokaux aux son phimap khuan ju aux lie? ⁸ Kawn pui eue, Nawh Cao hoik jhi maix yaox ka ceu pa mhawm mai mhaing Siyiex ceu patix khaing maix lie? Mawh son pa yuh maix krax pa rahsee mai sonsang moh ka krax pa caux rhawm mai sonsang koe krax pa tiem rhawm mai hu tix tau mai Siyiex ang mawh lie? ⁹ Siyiex kok yo ka veng in, pui pa koe pingnya cuyi tak sang lhat graung ka ceu kaux Nawh Cao heue. Nghiet heue, mawh pui mawx pa hoik tat ti deuh khaox sivied lie? ¹⁰ Ka daux nyiex pui pa ang rahsee kawn koe kraung sinngao pa ang rahsee khankix mai kawk tong pa iak ceu pa seeing brai ang mawh lie? ¹¹ Phan Aux shiao jiang pa ang rahsee mai khawm hau kla jiang pie lhen khankix, aux khex kawn sawn ti mawh pa singax lie? ¹² Pui pa mag mi daux veng in mawh pa naog ka krax pa kin, pui pa ot ka daux veng an khankix hoik ah lox pie lhen mai dak daux jheeh kix mawh pa pie lhen heue. ¹³ "Mawh kheu nan, Aux sang tawx maix kham geu krax saux pa kied kin, ka krax pa sang yuh tix maix laux leeing kheu phimap maix khankix heue. ¹⁴ Maix tak ih mai ang sak, krax pa cai rhawm tak sang koe ka daux sigreung maix heue. Maix tak teei ti luan mai ang pon taoh tix mai pa deeh taoh tix khankix, Aux tak sang ap ti tawx ka vaig lawm heue. ¹⁵ Maix tak rhuat simie mai ang yaox ti vawg maix biiet plix khaox sanlun khankix mai ang yaox ti awt tokaux tix ka rawm bee mai biiet rawm plix siiet kawx ang yaox ti nyaux ka rawm plix siiet heue. ¹⁶ Grawh grawng nawh maix hoik hawt ti priex been deuh simiang Amorix khankix, hawt yuh kaing pa yuh nyiex ma simiang Ahap mai kawn hawt ti hu ka daux krax pa keud pa sawn kix mawh kheu nan, Aux tak sang kieh maix mawh dee pa yiien hu pui mai kieh can pui pa ot ka daux maix khankix mawh pa kham krax pa nyiah pui tix maix tak sang yaox ti kham geu krax pa kaik tua pui Aux khankix heue.

¹ Aux koe krax kha rhawm heue. Grawh grawng nawh, aux hoik awm plix khaox ruh uik pieh tix bawg yam rung praix mai awm plix siiet pa kawn deuk khankix khaix hoik pieh mai ang lai koe sigleem plix siiet pa chix ti ih heue. Ang lai koe plix ruh pa teem phao voe, ka pa koe rhawm rhi aux ti ih heue. ² Pui pa mhawm mhiem hoik grai khaing piang haktiex mai pui pa rahsee ang lai koe pie tix kaux kawx ka daux sinax pui khankix heue. Kix khawmuik jawm ti pah pui kieh nham jauh mai taong kie giex puxaik tix kah heue. ³ Taix kix khawm ra khawn yuh ceu pa caox caig, simiang mhaing ti cie totaix, cao prawng see kawx sawg ti ih mau cun praok mai pui pa ting lhaong kawx ah lox krax koe rhawm pa caox caig tix mai kix keud ti sang yuh ceu an kix tau mai paox tix heue. ⁴ Pui pa kied mhawm ka daux kix, mawh pa awm pang kat heeit, pui pa kied rahsee ka daux kix, mawh pa awm pang kat pa koe hawt vie heue. Singaix pui pa pau maix mai krax pa kham geu maix khankix hoik hoek, tak sang mawh baux singaix koe krax pa sung sang rhawm kix heue. ⁵ Paw een rhawm ka paox plawg tix, paw yum rhawm ka paox grawm paox gru tix, priex rien ka daux jheeh maix, khaing moeng pa it ka piang naok maix heue. ⁶ Grawh grawng nawh, kawn simex yuh krax pa laux min plakngai keeing tix, kawn bun yaog ti simah ka miex tix, mun yuh simah ka miex tix, pui koeng pui mawh pui khaing daux nyiex ma tix tiru heue. ⁷ Phan mawh aux, aux tak sang maong ti jhak ka Siyiex, aux tak sang krox jun ka Siyiex Cao pa taoh aux, Siyiex aux tak sang nghiet ka lox aux heue. ⁸ Pui koeng aux khankix eue, paw koe krax gaux ka piang aux, yam goh aux, aux tak sang deeh yaog ti kaoh heue. Yam ngawm aux ti ot ka daux pa faik, Siyiex tak sang mawh pa riang ka son aux heue. ⁹ Aux tak gun ti kham geu krax pa song rhawm Siyiex, kheu hoik lud aux ka Nawh Cao tom hoek bawg yam chawk cheng nawh son grawng see tix mai prawng ti tawx pa rahsee ka son aux heue. Nawh Cao tak sang viex aux hoek ka daux pa riang mai aux tak sang yaox ka krax pa rahsee Nawh Cao heue. ¹⁰ Yam an pui pa koeng ka aux, pa hoik sax ah nin ka aux, Siyiex maix pa mawh Siyiex leeing ju koe dee mawx lie? Yam yaox nawh ka ceu inkix krax kaig tua tak sang kheem ka piang nawh, ngai aux tak sang yaox ka nawh, nawh tak sang mawh pa dig tix greem caong, awm glaox pa koe ka piang krax khankix heue. ¹¹ Singaix sang deeh cox sum maix ka guh veng tix hoik hoek, ka daux singaix an, gumlox pa tawx tak sang tah hu tom dee singai hawt mee haktiex khankix heue. ¹² Ka daux singaix an, pui tak sang khrawm ti hoek ka maix, khaing Asurix mai khaing veng meung Ejiptux khankix, khaing rawm klawng ting meung Ejiptux, khaing rawm sigrit sigra in tom hoek ka rawm sigrit sigra an mai khaing gawng in tom hoek ka gawng an khankix heue. ¹³ Viang mawh nan, haktiex tak sang mawh dee pa hoik yiien grai hu pui, kheu jao pui ankix pa ot ka dau haktiex an mai kheu jao plix kaing pa yuh kix heue. ¹⁴ Liang pui Maix ka khaox gix maix, pa mawh cub phung yung sinngao Maix Cao, pa ot nong nong ka daux nong tiag khaox sinax gawng Kharamelax heue. Liang kix ka daux haktiex Bashan mai haktiex Gilat, awm ka daux baux singaix pa prim dix liak. ¹⁵ Awm ka daux baux singaix yam lih maix khaing daux meung Ejiptux, Aux tak sang jhi kix yaox ceu pa kied daox deng heue. ¹⁶ Ceu pui khankix tak sang yaox mai tak sang koe krax pa kaig tua ka daux riang rao pa kied ting lhaong kix khawmuik, kix tak teei taix tix thox ka jheeh tix mai yhaok kix tak sang mawh pa lheet kah heue. ¹⁷ Kix tak sang lhat ti ih phawng tiex awm siuing, kix tak mu tix hu ka daux tiex ka vaig tix, awm ngaw mai lhat siyaung lih khaing daux tiex heue. Kix tak sang koe krax lhat graung ka Siyiex, pa mawh Siyiex ex mai tak sang koe krax lhat graung kheu Maix heue. ¹⁸ Mawh Siyiex mawx pa awm Maix Cao, pa pon pluat ploi phimap mai pa pon kieh krax pa lud sinngao pa kawn deuk Maix Cao khankix luad luan lie? Nawh Cao ang lai een ti deuh krax pa song rhawm tix leeing ju heue. Nawh Cao koe krax gaux rhawm ka daux krax pa caux rhawm heue. ¹⁹ Nawh Cao tak sang deeh koe krax caux rhawm ka ex mai tak sang dig ka krax lud ex khankix heue. Maix Cao tak sang teei ti tik phimap ex khankix ka daux dee pa raux rawm sigrit sigra heue. ²⁰ Maix Cao tak sang tawx ceu pa mawh meh ka Yakop mai tawx krax caux rhawm ka Abraham, ka pa hoik tiextu Maix Cao ti tawx ka keeing ex khankix, khaing daux baux singaix pa prim khankix dix heue.