Matthew

Matthew

¹ Lai grawng doeh ru Yesux Khrit, mawh kawn simex Davit, kawn simex Abraham. ² Abraham mawh keeing Icak, Icak mawh keeing Yakop mai Yakop mawh keeing Yudax mai puxaik nawh khankix heue. ³ Yudax mawh keeing Pheret mai Zara, khaing moeng nawh Tama. Pheret mawh keeing Hezaron mai Hezaron mawh keeing Aram, ⁴ Aram mawh keeing Aminadap, Aminadap mawh keeing Nashon mai Nashon mawh keeing Salamon heue. ⁵ Salamon mawh keeing Bawzax pa pon khaing moeng nawh Rakhap mai Bawzax mawh keeing Obet, pa pon khaing moeng nawh Ruthax mai Obet mawh keeing Yessie, ⁶ Yesie mawh keeing simiang Davit. Davit mawh keeing Sawlamon ka bun pa hoik mawh moeng Uriyax phao ka heue. ⁷ Sawlamon mawh keeing Robom mai Robom mawh keeing Abiyax mai Abiyax mawh keeing Asapha heue. ⁸ Asapha mawh keeing Yehoshaphat, Yehoshaphat mawh keeing Yoram mai Yoram mawh keeing Oziyax heue. ⁹ Oziyax mawh keeing Yotham, Yotham mawh keeing Akhat mai Akhat mawh keeing Hezakiyax. ¹⁰ Hezakiyax mawh keeing Manashe, Manashe mawh keeing Amon mai Amon mawh keeing Yosiyax heue. ¹¹ Yosiyax mawh keeing Yekhawniyax mai puxaik nawh khankix, yam mawh bawg yam giex laung ka kix ka veng Babulon heue. ¹² Khaix hoik giex laung kix ka daux veng Babulon, Yekhawniyax mawh keeing Shalatilax mai Shalatilax mawh keeing Zerubabelax heue. ¹³ Zerubabelax mawh keeing Abyut, Abyut mawh keeing Eliakim mai Eliakim mawh keeing Azaw heue. ¹⁴ Azaw mawh keeing Sadut, Sadut mawh keeing Akhim mai Akhim mawh keeing Elut. ¹⁵ Elut mawh keeing Elazax, Elazax mawh keeing Mathan mai Mathan mawh keeing Yakop heue. ¹⁶ Yakop mawh keeing Yosiep pa mawh mex Marix, pa keh Yesux ka, pa kok mawh Khrit heue. ¹⁷ Mawh kheu in jah ka Abraham tom hoek ka Davit koe kao pon ju mai jah ka Davit tom hoek yam giex laung ka daux veng Babulon koe kao pon ju mai jah ka yam giex laung ka daux veng Babulon tom sidah hoek ka Cao Khrit koe kao pon ju heue. ¹⁸ Grawh grawng pa keh ka Yesux Khrit mawh nin heue. Yam hoik chawk miex Nawh, Marix mai Yosiep paox tix, ka ang kiex bax dex dawd mai paox tix, nawh koe kaux kheu Khuan Singax Singeh heue. ¹⁹ Mawh kheu mex nawh Yosiep, mawh pui rahsee mai ang rhawm kieh pakngai Marix laux, nawh keud sang briex ti tik ka nawh heue. ²⁰ Yam keud nawh yuh nan, jhak heue, nawh yaox kawncau cie Siyiex lih bleeh ka nawh ka daux camaox ah nin, "Yosiep kawn Davit eue, paw lhat ti teei moeng maix Marix, kheu kaux pa koe daux nawh mawh kheu Khuan Singax Singeh heue. ²¹ Nawh tak keh kawn Simex mai maix tak kok ceu kaux Nawh mawh Yesux,mawh kheu Nawh tak sang taoh pui cie Nawh khaing phimap kix heue." ²² Ceu in khawmuik hoik mawh sonsang naog gumlox Simiang pa krai Cao jhai pa ah nin, ²³ "Jhak heue, bunkrih tak koe kaux mai keh kawn Simex, mai kix tak kok ceu kaux Nawh mawh " Emanoelax.Phan toe dee bleeh Emanoelax, mawh Siyiex ot tau mai ex" heue. ²⁴ Yam siduad Yosiep khaing it, nawh yuh awm hoik nhie kawn cau cie Siyiex nawh yuh mai teei moeng tix heue. ²⁵ Viang mawh nan nawh ang dex mai Marix, ka ang nyang keh kawn Ai mai nawh kok ceu kaux nawh mawh Yesux heue.

¹ Yam keh Yesux daux veng Bieliehiem, meung Yudax, baux yam kwang simiang Herut, jhak heue, pui pa ting pingnya cuyi kaoh khaing plak lih singaix mai hoek ka veng Yerusaliem, ² chawk ah nin, "Kaw pa hoik keh mawh Simiang pui Yudax koe dee mawx? Mawh kheu hoik yaox ex simuing Nawh lih plak lih singaix, ex tom hoek ti krub ka Nawh Cao heue." ³ Yam mhong simiang Herut ka lox an, nawh mai pui veng Yerusaliem khawmuik sung sang rhawm kah heue, ⁴ Nawh kieh cao giex kaing li pa ting khankix mai pui tiiem lai khawmuik khrawm paox tix mai nawh chawk kix grawh grawng tak sang keh Cao Khrit dee mawx heue. ⁵ Kix krai ka nawh ah nin, "Tak sang keh ka daux veng Bieliehiem, meung Yudax, kheu cao jhai hoik tiiem lox pa ah nin, ⁶ "Maix veng Bieliehiem pa koe daux meung Yudax eue, maix ang mawh veng pa nie iak khaing pa kwang simiang Yudax khankix, kheu cao giex kaing Tak sang lih khaing maix tix kaux, mai Nawh tak sang kia ngien Ka pui cie Aux, pa mawh pui Isarelax heue." ⁷ Yam an simiang Herut briex kok pui pa ting pingnya cuyi mai chawk kix grawh grawng yaox kix simuing lai mawx heue. ⁸ Nawh ploi kix hu ka veng Bieliehiem mai tawm lox ah nin, "Hu sawg Kawn nyawm an mhawm mhawm, yam hoik yaox pex ka Nawh, sonsang pon aux ti hu krub ka Nawh, deeh ing krai ka aux liak." ⁹ Khaix hoik mhong kix lox simiang, kix lih hu, jhak ka simuing pa yaox kix plak lih singaix pa hu sivoe kix, tom hu kaog piang dee ot Kawn nyawm an heue. ¹⁰ Yam yaox kix simuing an, kix kied gaux rhawm tete. ¹¹ Kix laig ka daux nyiex an mai yaox Kawn nyawm iak an tau mai miex Nawh Marix mai kix grux ngawng tix krub Nawh mai kix hoe sin ngao viex tix mai tawx totaix ka Nawh Cao pa mawh khri mai sidah bhawng, Lawban mai Muran heue. ¹² Khaix an son ang kix deeh ing ka simiang Herut, Siyiex tawx satix ka daux camaox mai kix deeh ing ka meung kix krax tang nyaing heue. ¹³ Khaix hoik ing kix, kawncau Siyiex tix kaux lih bleeh ka Yosiep ka daux camaox ah nin, "Maix kaoh heue, mai teei Kawn nyawm iak mai miex Nawh mai to hu ka daux meung Ejiptux mai ot tan tom deeh krai Aux maix mhong heue. Kheu simiang Herut tak sang sawg Kawn nyawm iak in, sonsang laux yuh ka Nawh heue." ¹⁴ Yosiep kaoh teei Kawn nyawm mai miex Nawh mai lih hu ka meung Ejiptux yam ponsawm heue. ¹⁵ Kix ot tan tom hoik yum simiang Herut heue. In mawh sonsang lih grum naog awm gumlox pa krai Simiang ka cao jhai pa hoik ah nin, "Aux hoik kok Kawn Aux lih khaing meung Ejiptux heue." ¹⁶ Yam tawng simiang Herut ka grawng pie lhien pui pa ting pingnya cuyi ka nawh, nawh kied song rhawm tete mai nawh ploi pui hu pah kawn nyawm simex yum, pa hoik koe ra num mai greem ra num khawmuik, pa ot ka daux veng Bieliehiem mai dee dex tan ku dah ku dee heue. Nawh keud ka bawg yam pa hoik mhong nawh ka pui pa ting pingnya cuyi nawh tom yuh nan heue. ¹⁷ Yam an gumlox cao jhai Yeramix, pa ah nin, hoik naog heue. ¹⁸ "Ka daux Ramax mhong lox pa yiiem riag, mai pa kied khi rhawm, mawh pa yiiem Rakhelax son kawn nyawm kiex khankix, mai ang chix kieh pa khu rhawm kiex nyawm rhawm, kheu ang kawn kiex lai deuk heue." ¹⁹ Viang mawh nan Khaix hoik yum simiang Herut, jhak heue, kawncau Siyiex tix kaux lih bleeh ka Yosiep daux camaox, ka daux meung Ejiptux, ²⁰ mai ah nin. "Maix kaoh heue, teei Kawn nyawm mai miex Nawh hu ka daux meung Isarelax, kheu pui pa sawg ti teei ju Kawn nyawm an yum khankix hoik yum heue." ²¹ Nawh kaoh, teei Kawn nyawm an mai miex Nawh mai hu ka meung Isarelax heue. ²² Yam mhong Yosiep grawh grawng plud kawn Herut pa mawh Akhelax ti mawh cao giex kaing meung Yudax nawh lhat hu tan heue. Kheu Siyiex kieh nawh tawng ka daux camaox, nawh hu ka daux haktiex meung Galilie heue. ²³ Nawh hu ot ka daux veng pa kok mawh Nazariet, sonsang naog gumlox krai cao jhai khankix pa ah, "Tak kok Nawh mawh pui Nazariet heue."

¹ Ka daux bawg yam an, Yohan cao cubcom hoek mai sidiex daux tiagtu haktiex Yudax, ah nin. ² "Doh keud ka phimap tix, kheu Meung Raoma dex sang hoek heue." ³ Kheu mawh kaw in, pa hoik krai cao jhai Isayax lox pa ah nin, "Lox kok yo pui tix kaux daux tiagtu, cox khre krax hu Simiang, yuh krax hu Nawh rahsee heue." ⁴ Tokaux Yohan ceep kraung hauk kala-uk mai nhawt maox hak ka nyoi tix mai pa ih nawh mawh sido mai rawm hia tiag heue. ⁵ Yam an pui veng Yerusaliem mai pui meung Yudax khawmuik mai pa ot sivie siveng rawm Yawdan khawmuik khawm leeing, hu ka Yohan heue. ⁶ Kix krai doh ka phimap tokaux tix mai cubcom ka daux tawm taix nawh ka daux rawm klawng ting Yawdan heue. ⁷ Viang mawh nan yam yaox Yohan ka pui Pharishie mai Sadukie khankix hoek sonsang rieb cubcom, nawh ah nin ka kix, "Ceu siuing pa cai eue, mawx nhie pex to sonsang luan khaing pa song rhawm pa tak sang hoek lie? ⁸ Kieh plix, plix pa keung khaw mai pa doh keud ka phimap tokaux tix heue. ⁹ Paw keud ti ah ka tokaux tix, Ex koe Abraham pa mawh keeing ex, aux krai ka pex, Siyiex chix yuh simaox in khankix lih mawh kawn Abraham heue. ¹⁰ Pie yam in, hoik deuh moe dex riah num khaox mai khaox pa ang plix, plix pa mhawm khankix khawmuik, sang kid taing sau daux ngu heue. ¹¹ Aux cubcom pex ka daux rawm kheu doh keud pex ka phimap tix heue. Viang mawh nan Kaw pa hoek khaix aux lheu ting sibrawm khaing aux, pie kiiep Nawh ang aux keung ti jiang. Nawh tak sang cubcom pex ka daux Khuan Singax mai ngu heue. ¹² Ka daux tawm taix Nawh koe bia yib Nawh tak kieh gwang pah nghox tix singax Nawh tak sau nghox ca cie Nawh daux krao mai Nawh tak teei grhip gleeing daux ngu pa ang chix yeet heue." ¹³ Yam an Yesux kaoh khaing meung Galilie mai hoek ka Yohan ka rawm klawng Yawdan, sonsang cubcom daux tawm taix nawh heue. ¹⁴ Viang mawh nan Yohan klat Nawh Cao ah nin, "Aux khaw ti cubcom ka daux tawm taix Maix mai Maix khex hoek ka aux lie?" ¹⁵ Yesux pawk lox mai ah nin ka nawh, "Kieh mawh yam in heue, kheu in mawh pa khaw son ex ti sang yuh naog ka pa rahsee khawmuik heue." Khaix an nawh tom khaw rhawm kah heue. ¹⁶ Khaix hoik cubcom ka Yesux, Nawh lih khaing daux rawm dom mawx dom an jhak heue, raoma baoh ka Nawh mai Nawh yaox Khuan Siyiex lih awm sikaux tum piang Nawh heue. ¹⁷ Jhak heue, lox lih khaing raoma ah nin, "In mawh Kawn pa moh Aux, pa khaw caw ka rhawm Aux heue."

¹ Yam an Khuan Cao tok Yesux hu ka daux tiagtu, sonsang kham geu pa nyaw phicaox heue. ² Nawh twah pa ih, tixpon ngaix, tixpon sawm, Nawh tom cai rhawm heue. ³ Yam an cao nyaw hoek mai ah nin ka Nawh, "Phan Maix mawh Kawn Siyiex tawx lox kieh simaox in khankix mawh blah heue." ⁴ Viang mawh nan Nawh Cao pawk lox ah nin, "Hoik tiiem ti deuh ah nin, Pui tak im kheu blah nong nong ang mawh, viang mawh nan, im kheu lox pa lih khaing jheeh Siyiex ku gum heue." ⁵ Yam an Phicaox baoh viex Nawh hu ka daux veng singax mai deuh Nawh piang dee choek nyiex bwan. ⁶ Ah nin ka Nawh Cao, "Phan Maix mawh Kawn Siyiex, kieh tokaux tix rau sen. Kheu hoik tiiem ti deuh, Nawh tak tawm lox grawh grawng Maix, ka kawncau Siyiex Nawh khankix mai kix tak yaog Maix piang tawm taix kix, son ang caong Maix sang krox ka simaox." ⁷ Yesux baoh ah nin ka nawh, "Baox hoik tiiem ti deuh ah nin, Maix paw vi nyaw ka Siyiex Maix" ⁸ Yam an phicaox baox viex Nawh Cao hu tix bawg piang gawng kied lhaong tix mu mai jhi Nawh yaox meung piang haktiex khawmuik mai min plakngai cie meung khankix, ⁹ mai ah nin ka Nawh Cao, "Phan Maix grux ngawng tix krub ka aux, ceu in khawmuik aux sang tawx ka Maix heue." ¹⁰ Yam an Yesux baoh ah nin ka nawh, "Satan eue, lih hu heue, kheu hoik tiiem ti deuh, Maix tak sang krub ka Siyiex maix mai yuh son Nawh khaing." ¹¹ Yam an phicaox hu khaing Nawh Cao mai jhak heue, kawncau Siyiex khankix hoek ti khan kheu ka Nawh heue. ¹² Yam an khaix hoik mhong Nawh Cao grawh grawng hoik sau Yohan ka daux thawng Nawh lih hu ka daux meung Galilie heue. ¹³ Nawh Cao prah veng Nazariet mai hoek ot ka daux veng Kapeniom, pa koe dex praok nhawng daux mee haktiex Zebulun mai Napthalix heue. ¹⁴ Kheu sonsang naog gumlox pa hoik krai cao jhai Isayax pa ah nin, ¹⁵ "Haktiex Zebulun mai haktiex Napthalix, pa koe dex krax pa hawt praok nhawng mai bleeh plak toi rawm Yawdan, Galilie dee ot pui tang ceu. ¹⁶ Pui pa ot ka daux pa faik khankix, pon yaox pa riang pa ting mai piang kix pa ot daux haktiex veei krax yum, pa riang hoik lih jhan heue." ¹⁷ Jah tom yam an Yesux jah ti sidiex gau ah nin, "Doh keud doh sawn ka phimap tix, kheu Meung Raoma dex sang hoek heue." ¹⁸ Yam hu Nawh dex rawm nhawng Galilie, Nawh yaox puxaik ra kaux pa mawh Simon pa kok mawh Petrux mai pux nawh Andare, ploi rub ka daux rawm nhawng, kheu mawh kiex pui pa teei kax heue. ¹⁹ Yesux ah nin ka kiex, "Hawt khaix Aux mai Aux tak kieh pax mawh pui pa teei pui heue." ²⁰ Dom mawx dom an kiex prah rub khankix tan mai hawt khaix Nawh Cao, ²¹ Nawh hu sivoe ceeix mai Nawh Cao yaox puxaik tang kaux ra kaux, pa mawh Yakop, kawn Zebedie mai pux nawh Yohan, ot ka daux reu tau mai keeing kiex Zebedie mai cox rub cie kix, Nawh kok kiex. ²² Dom mawx dom an kiex prah reu mai keeing tix mai hawt khaix Nawh Cao. ²³ Yesux hu lailing ka daux meung Galilie kudah dee mai gau ka daux nyiex sidiex khankix mai sidiex lox bwan gaux rhawm, pa dex dawd mai Meung Siyiex mai cox jhawm saux kuceu moi sinax pui khankix heue. ²⁴ Min plakngai Nawh Cao tah ka daux meung Surix kudah dee mai kix viex pui pa koe jhawm saux ku ceu mai pa kha rhawm mai pa laig phicaox khankix mai pui saux laung khankix mai pui yum taix yum caong khankix mai Nawh cox kix moi heue. ²⁵ Cub pui haoh hun hawt khaix Nawh Cao, pa kaoh khaing meung Galilie mai haktiex Dekapolix mai veng Yerusaliem mai meung Yudax mai plak toi rawm Yawdan khankix heue.

¹ Yam yaox Nawh Cao cub pui hun, Nawh haok piang gawng mai khaix hoik ngawm Nawh, kawncau Nawh khankix hoek ka Nawh heue. ² Nawh Cao ang jheeh tix mai gau kix ah nin, ³ "Pui pa hot daux khuan khankix koe bwanson heue, kheu Meung Raoma mawh cie kix. ⁴ Pui pa khi rhawm khankix koe bwanson heue, kheu kix tak pon pa nyawm rhawm. ⁵ Pui pa awn rhawm khankix koe bwanson heue, kheu kix tak pon haktiex. ⁶ Pui pa cai rhawm son pa rahsee khankix koe bwanson heue, kheu kix tak sak. ⁷ Pui pa chix caux rhawm khankix koe bwanson heue, kheu kix tak pon ceu pa caux rhawm. ⁸ Pui pa singax daux rhawm khankix koe bwanson heue, kheu kix tak yaox Siyiex. ⁹ Pui pa chix kieh raw pa simah simiang ka paox tix kieh yiien khankix, koe bwanson heue, kheu tak kok kix mawh kawn Siyiex. ¹⁰ Pui pa hoik kham geu pa tuktiak son pa rahsee koe bwanson heue, kheu Meung Raoma mawh cie kix. ¹¹ Yam pui yuh pa ang khaw jiet ka pex mai tuktiak ka pex mai ah pa caox pa ang mawh meh kuceu grawh grawng pex, kheu Aux, pex koe bwanson heue. ¹² Kieh kied gaux rhawm heue, kheu bwanson kied ting son pex ka daux Meung Raoma, kheu hoik tuktiak kix yuh nan, ka cao jhai khankix pa koe glangka pex." ¹³ "Pex mawh kih haktiex heue, viang mawh nan phan pa laoh kih hoik grai, kienie, chix deeh kieh laoh yuh ka mawx? Lheu khaing tik plak praix mai pui dig greem caong tix ang koe bwanson tidtix. ¹⁴ Pex mawh pa riang haktiex heue, veng pa hoik yuh piang gawng ang pon ti mox. ¹⁵ Pui pa tok kawk ngu ang sax sau greem phliex, viang mawh nan, deuh piang pheen, sonsang jhan riang son pui pa ot daux nyiex khawmuik. ¹⁶ Awm an kieh pa riang pex jhan riang sivoe ngai kawn pui heue, sonsang yaox kix kaing pa yuh pex pa mhawm mai yaogyaw Keeing pex pa ot daux Meung Raoma." ¹⁷ "Pex paw ce Aux hoek ti yuh lox lai beenli laux mai lox cao jhai khankix, Aux hoek ti yuh laux ang mawh, hoek ti kieh naog heue. ¹⁸ Aux krai lox tete ka pex, tom ang haktiex mai raoma nyang bax grai, ngai lai lai beenli viang ki iak miex ding kawx, ang chix grai grhup tix gum kawx, tom hoik mawh grum naog khawmuik. ¹⁹ Mawh kheu nan pui mawx ang ah phan nawh lheu gumlox tawm ceu in pa iak khaing paox tix mai gau pui tang kaux yuh nan, tak kok mawh pa nie iak khaing paox tix ka daux meung raoma. Viang mawh nan, pui mawx ang ah phan nawh hawt yuh mai gau pui tang kaux yuh, tak sang kok nawh mawh pa ting ka daux Meung Raoma. ²⁰ Aux krai ka pex, phan pa rahsee pex ang lheu khaing pui tiiem lai mai Pharishie khankix, pex ang tau ti pon laig ka daux Meung Raoma." ²¹ "Pex hoik mhong grawng lox pa hoik krai ka pui ju didix pa ah nin, Maix paw pah pui yum mai kaw pa pah pui yum tee hoek dee ciyang heue. ²² Aux krai ka pex, pui pa song rhawm ka puxaik nawh ku kaux, tee hoek dee ciyang. Pui mawx ang ah, pa ah ka puxaik nawh, tee hoek dee prawng ca cub kuad song cao prawng see khankix mai pui mawx ang ah, pa ah, maix mawh pui brai, tee hoek daux ngu mawnarhok heue. ²³ Mawh kheu nan, phan maix viex pa tan ka khu dee tan mai doh keud ka phimap pa deuh puxaik maix tix ceu ceu. ²⁴ Deuh pa tan maix sivoe khu dee tan mai hu ka puxaik maix mai kieh khaw caw paox tix ka ha, khaix an deeh hoek mai tan pa tan maix heue. ²⁵ Yam hu maix krax tau mai kaw pa sang yuh see ka maix, nied ti yuh pa khaw rhawm nawh heue, phan ang mawh nan ha nawh kox teei ti tawx maix ka cao prawng see mai cao prawng see an teei ti tawx maix ka cao giex kaing mai cao giex kaing sau maix daux thawng heue. ²⁶ Aux krai lox tete ka maix, maix ang pon ti lih khaing dee an, sidah ang maix nyang bax hoik plud mau ghoik tix piak heue. Paw lud vao mai moeng kawn pui. ²⁷ Pex hoik mhong gumlox pa hoik ah nin, Maix paw lud vao mai moeng pui ²⁸ Aux krai ka pex, pui mawx ang ah, pa jhak ka bun mai koe rhawm ti sang lud mai nawh, hoik lud vao mai nawh daux rhawm tix heue. ²⁹ Phan ngai khawn dawm maix, kieh maix lud, koh ti tik khaing maix heue. Laux kraung pak peung maix tix ceu nie lheu mhawm khaing laig maix daux mawnarhok khawm kaux tix heue. ³⁰ Phan taix khawn dawm maix kieh maix lud, kid ti tik heue. Laux kraung pak peung maix tix ceu nie lheu mhawm khaing laig maix daux mawnarhok khawm kaux tix heue." ³¹ Viang mawh lox pa krai ti deuh ah nin ka koe, Pui mawx ang ah pa simie ti tik moeng tix, kieh nawh tawx lai grawng hoik hoik lox heue. ³² Aux krai ka pex, pui mawx ang ah phan nawh tik moeng tix lheu khaing grawng pa lud vao nawh, nawh kieh bun an mawh pui lud vao mai pui mawx ang ah pa teei ti moeng bun an nawh lud vao heue. ³³ "Pex hoik mhong lox pa hoik krai ka pui ju didix khankix ah nin, Maix paw tiextu ka grawng pa ang mawh meh, yuh pa tiextu maix plak sivoe Simiang heue. Paw tiextu. ³⁴ Viang mawh nan Aux krai ka pex, paw tiextu ceeix kawx, paw tiextu ka raoma, kheu raoma mawh dang ngeung Siyiex heue. ³⁵ Haktiex in kawx paw tiextu kah, kheu mawh ngot dee deuh Nawh caong tix. Veng Yerusaliem kawx paw tiextu ka, kheu mawh veng laux simiang ting heue. ³⁶ Paw tiextu ka kaing tokaux tix, kheu pex ang chix yuh hauk kaing pex, kieh lung kieh paing tix gawng kawx. ³⁷ Kieh lox pex pa mawh, mawh heue, pa ang mawh, ang mawh heue, pa lheu khaing an mawh pa lih khaing pa caox heue. Paw pawk bix. ³⁸ Pex hoik mhong lox pa hoik deuh ah nin, Ngai tix mu son ngai tix mu mai rhang tix plah son rhang tix plah ³⁹ Aux krai ka pex, paw kieh raw ka pui caox heue. Pui mawx ang ah phan simang sibax pex khawn dawm, deeh veeh ka nawh khawm tang plak. ⁴⁰ Phan pui tix kaux kaux simie ti yuh see ka maix mai teei sibex maix, prux fua maix kawx, baox tawx ka nawh heue. ⁴¹ Pui mawx ang ah pa khin maix hu tix lag, hu mai nawh ra lag heue. ⁴² Tawx ka kaw pa rawg mhaing ka maix mai ka kaw pa sang yaog yaing kawx paw vud tix hu khaing nawh heue." ⁴³ "Pex hoik mhong lox pa deuh ah nin, Maix tak moh pui paox plawg paox nyhawm tix mai koeng ka pui pa koeng ka maix heue. ⁴⁴ Aux krai ka pex, moh ka pui pa koeng ka pex mai rawg bwan, son pui pa tuktiak ka pex heue. ⁴⁵ Kheu sonsang mawh pex kawn Keeing pex pa ot daux meung raoma, kheu Nawh kieh singaix lih piang pui caox pui mhawm mai Nawh kieh lhiex lih piang pui rahsee mai pui ang rahsee heue. ⁴⁶ Phan pex moh pui pa moh ka pex ngie, pex tak pon bwanson yuh ka mawx? Pie pui koh mau khankix kawx, yuh nan ang mawh lie? ⁴⁷ Phan pex nawb pex sikah mai puxaik pex ngie, pex yuh pa lheu khaing tang kaux yuh ka mawx? Pui tang ceu kawx yuh nan ang mawh lie? ⁴⁸ Mawh kheu nan pex tak grum mhawm, awm grum mhawm Keeing pex piang raoma heue."

¹ "Rien rhawm tix son ang pex lai yuh pa rahsee sivoe ngai pui, sonsang yaox kix ka pex, phan ang yuh nan pex tak ang pon bwanson khaing Keeing pex pa ot ka daux meung raoma heue. ² Mawh kheu nan, yam yuh pex pa tan, paw phlu teettawng hu sivoe pex, awm pa yuh pui pie lhen khankix ka daux nyiex sidiex khankix mai ka daux krax khankix, sonsang pon kix min plakngai khaing kawn pui. Aux krai lox tete ka pex, kix hoik pon bwanson kix heue. ³ Viang mawh nan, yam tawx pex pa tan, paw kieh taix khawn gwiex pex tawng pa yuh taix khawn dawm pex. ⁴ Kheu sonsang yuh pa tan tix dee glip mai Keeing maix pa chix yaox dee glip, tak tawx bwanson ka maix heue." ⁵ "Yam rawg pex bwan, pex paw yuh awm pui pie lhen khankix, kheu moh kix ti cung mai rawg bwan ka daux nyiex dee sidiex khankix mai ka gah krax, sonsang kieh pui yaox ka tix heue. Aux krai lox tete ka pex, kix hoik pon bwanson kix heue. ⁶ Viang mawh nan, yam rawg pex bwan laig ka daux lawg plak daux mai khaix hoik nyeep pex siviex, rawg bwan ka Keeing pex pa ot dee glip mai Keeing pex pa chix yaox dee glip tak tawx bwanson ka pex heue. ⁷ Yam rawg pex bwan, paw deeh krai lox giex going awm pui tang ceu, kheu ce kix tak mhong lox kix, kheu lox pa rawg kix tom nie heue. ⁸ Kheu nan, paw kieh awm kix, mawh kheu Keeing pex hoik tawng pa lo pex khawmuik ka ang pex nyang rawg mhaing ka Nawh heue. ⁹ Mawh kheu nan pex rawg bwan yuh nin, Keeing ex pa ot piang meung raoma Kieh ceu kaux Maix koe krax yung krax yi heue. ¹⁰ Kieh meung Maix hoek heue. Awm naog alo Maix piang meung raoma, Ka piang haktiex in kawx kieh awm an heue. ¹¹ Tawx pa ih pa lo ex son singaix liak. ¹² pluat ploi phimap ex liak, awm pluat ploi ex pui pa lud ka ex heue. ¹³ Mai paw vieh ex hoek ka daux krax nyaw krax glaw, viang mawh nan taoh ex khaing kaw pa caox liak. Grawh grawng nawh, meung raoma mai siawb sibrawm mai min plakngai, mawh cie Maix leeing ju heue. Amen. ¹⁴ Phan pex pluat phimap pui tang kaux, Keeing pex piang meung raoma kawx tak pluat phimap pex heue. ¹⁵ Viang mawh nan, phan pex ang pluat phimap pui tang kaux, Keeing pex kawx ang pluat phimap pex heue." ¹⁶ "Lheu khaing in, yam twah pex pa ih, paw kieh voi pakngai awm pui pie lhen khankix, mawh kheu kix yuh pakngai kix ang nyawm ti jhak, sonsang kieh pui yaox kix twah priex tix heue. Aux krai lox tete ka pex, kix hoik pon bwanson cie kix heue. ¹⁷ Viang mawh nan, yam twah pex priex pa ih kraix rawm bee ka kaing tix mai khoek ngai pex heue. ¹⁸ Mawh son ang pui yaox pa twah pex priex, viang mawh nan sonsang yaox Keeing pex pa ot dee glip mai Keeing pex pa chix yaox dee glip tak tawx bwanson ka pex heue." ¹⁹ "Paw vi khrawm sin ngao son pex piang haktiex, dee pung piang siah mai dee chix rhaw chix laux mai dee chix yieh pui mai laig briex heue. ²⁰ Viang mawh nan khrawm sinngao son pex ka daux meung raoma, dee ang mawt chix siah mai dee ang rhaw chix yuh laux mai dee ang pui briex chix yieh, mai laig briex heue. ²¹ Kheu koe sin ngao maix dee mawx, rhawm maix kawx koe tan heue." ²² Pa riang tokaux mawh ngai heue. Mawh kheu nan, phan ngai maix mhawm koe tokaux maix khawmuik tak naog pa riang heue. ²³ Viang mawh nan, phan ngai maix ang mhawm koe, tokaux maix tak naog pa faik khawmuik heue. Mawh kheu nan, phan pa riang pa koe daux maix lih mawh pa faik, pa faik an kied faik miex ding." ²⁴ "Pui tix kaux kawx ang chix yuh pui cau son simiang ra kaux, mawh kheu nawh tak koeng ka tix kaux mai moh tang kaux an, phan ang mawh nan, nawh tak een rhawm ka tix kaux mai nieb yuh ka tang kaux an heue. Pex ang chix mawh pa cau soi ka Siyiex mai ka sinngao heue." ²⁵ "Mawh kheu nan Aux krai ka pex, paw vi khi ka grawng pa sang ih nyaux patix son ju tix mai sang ceep patix son tokaux tix. Ju kienie, nieh lheu mhawm khaing pa ih ang mawh lie? Tokaux lheu mhawm khaing kraung ceep ang mawh lie? ²⁶ Jhak ka sim pa po piang raoma khankix heue, kix ang rhuat ang van simie mai kix ang vawg, ang khrawm daux krao, viang mawh nan, Keeing pex piang raoma tawx kix ih heue. Pex nie lheu ngawh khaing sim khankix ang mawh lie? ²⁷ Ka daux pex, kheu pa khi rhawm, pui mawx chix kieh tokaux tix baox lhaong tix sawk lie? ²⁸ Kheu pa tix pex lai khi rhawm son kraung ceep yuh ka mawx? Keud ti yaox ka grawng ting lhaong tai siyak pa koe daux tiagtu. Kix ang yuh kaing mai ang kling heue. ²⁹ Viang mawh nan, Aux krai ka pex viang mawh kraung pa ceep simiang Sawlamon pa ting min plakngai ang mhawm awm tai an khankix tix kho kawx heue. ³⁰ Pex pa iak krax yum rhawm eue, phan Siyiex tawx kraung ceep pa mhawm ka rib pa koe daux tiag daux singaix mai pa tak sang taing sau daux ngu pasax, Nawh sang nie lheu tawx kraung ceep ka pex ang mawh lie? ³¹ Mawh kheu nan, paw khi rhawm ti ah nin, Ex sang ih patix? Phan ang mawh nan, Ex sang nyaux patix? Phan ang mawh nan, Ex sang ceep patix? ³² Mawh Kheu pui tang ceu khankix sawg ceu an khawmuik heue. Grawh grawng nawh, Keeing pex piang raoma hoik tawng grawng pa lo pex ceu in khankix khawmuik heue. ³³ Pex sawg meung Siyiex mai pa rahsee Nawh phao ka ha mai Nawh tak baox tawx ceu in khawmuik ka pex heue. ³⁴ Mawh kheu nan, paw khi son pa sax, kheu pa sax tak khi son tix heue. Ceu pa ang mhawm son in ngaix, hoik kub son in ngaix heue."

¹ "Paw prawng ca, yuh ka mawx son ang pex sang hoek krax prawng ca. ² Pex prawng ca ka pui yuh ka mawx, tak sang prawng ca ka pex yuh nan heue. Awm diag tong pex ti tawx ka pui, pex tak deeh pon awm an heue. ³ Kheu maix jhak kuh ngai pa iak daux ngai puxaik maix mai ang keud grawh grawng nuk pa koe daux ngai tokaux tix lie? ⁴ Sang chix krai maix ka puxaik tix, kieh aux teei ti tik kuh ngai maix, yuh ka mawx yam kawn koe nuk ka daux ngai maix? ⁵ Pui pie lhen eue, teei ti tik nuk pa koe daux ngai maix ka ha mai maix tak sang yaox mhawm mhawm, sonsang teei kuh lih khaing ngai puxaik maix heue. ⁶ Paw tawx pa singax ka sox khankix; siang mhawm ceu pa koe daux jawx cie pex kawx, paw taing sivoe lig, phan ang mawh nan ha kix kawx dig greem caong tix mai deeh veeh ti kiied ka pex heue." ⁷ "Rawg heue, mai tak sang tawx ka pex, sawg heue, mai pex tak sang yaox, gleuh sivieh heue, mai tak sang paoh son pex heue. ⁸ Grawh grawng nawh, pa rawg ku kaux tak pon mai kaw pa sawg tak yaox mai ka kaw pa gleuh siviex tak paoh son nawh heue. ⁹ Phan kawn pex rawg mhaing blah, pa teei simaox tawx ka nawh, koe ka daux pex tix kaux kaux lie? ¹⁰ Phan ang mawh nan, phan kawn pex rawg mhaing kax, sang tawx siuing lie? ¹¹ Phan pex pa mawh pui caox, chix tawx totaix pa mhawm ka kawn praix tix, Keeing pex pa ot daux meung raoma tak nie lheu tawx ceu pa mhawm ka pui pa rawg ka Nawh miex ding? ¹² Mawh kheu nan, can ceu pa simie pex pui yuh ka tix khawmuik, pex kawx, yuh nang nan ka kix heue. Kheu in mawh lox lai beenli mai lox cao jhai khankix heue." ¹³ "Pex laig ka daux siviex pa iak pa sikhawp heue. Mawh kheu siviex mai krax pa hoek dee laux leeing mawh pa ting pa vieh mai pui pa laig tan kied nie heue. ¹⁴ Mawh kheu siviex mai krax pa hoek dee sang pon ju leeing ju mawh pa iak pa sikhawp, pui pa yaox kied tux heue. ¹⁵ "Rien rhawm tix ka cao jhai pa ang mawh meh khankix, pa ceep hak yung plak piang, viang mawh nan ka plak daux mawh soxla pa caox heue. ¹⁶ Pex tak tawng kix ka plix kix heue. Pui pieh plix siiet ka pang kat lie? mai pieh plix ruh ka pang kat heeik lie? ¹⁷ Khaox pa mhawm ku khaox plix ka plix pa mhawm, viang mawh nan khaox pa ang mhawm plix ka plix pa ang mhawm heue. ¹⁸ Khaox pa mhawm ang chix plix ka plix pa ang mhawm, khaox pa ang mhawm kawx, ang chix plix ka plix pa mhawm heue. ¹⁹ Khaox pa ang plix ka plix pa mhawm ku khaox, kid goh mai taing sau daux ngu heue. ²⁰ Mawh kheu nan pex tak tawng kix ka plix kix heue." ²¹ "Pui pa kok ka Aux, Simiang eue, Simiang eue, pon ti laig ka daux meung raoma ku kaux ang mawh. Mawh kaw pa yuh hawt alo Keeing Aux pa ot ka daux meung raoma khaing pa pon ti laig heue. ²² Ka daux singaix an sax, pui hun tak sang ah nin ka Aux.Simiang eue, Simiang eue, ex hoik sidiex lox jhai ka daux ceu kaux Maix mai hoik grheu phicaox khankix lih ka daux ceu kaux Maix mai hoik yuh kaing pa ting sibrawm tom nie ka daux ceu kaux Maix ang mawh lie? ²³ Aux tak krai ka kix sidawng, Aux ang sax tawng pex, pex pa yuh pa ang khaw caw khankix eue, lih hu khaing Aux." ²⁴ "Pui pa mhong gumlox Aux in mai hawt ti yuh ku kaux daux pui, tak sang awm pui pa koe pingnya tix kaux, pa sum nyiex nawh piang simaox heue. ²⁵ Lhiex lih, rawm haok huan, bhaung khankix phlu mai klah ka nyiex an, viang mawh nan nyiex an ang goh, kheu hoik sum piang simaox heue. ²⁶ Pui pa mhong ka gumlox Aux in mai ang hawt ti yuh, tak sang awm pui daox tix kaux, pa sum nyiex nawh piang mhaik heue. ²⁷ Lhiex lih, rawm haok huan, bhaung khankix phlu, klah ka nyiex an mai nyiex an goh heue. Pa goh an kied ting." ²⁸ Khaix hoik sidiex Yesux lox ceu in khankix, cub pui hun khankix daox deng ka lox sidiex gau Nawh Cao heue. ²⁹ Mawh kheu Nawh sidiex gau ka kix awm pui pa koe sibrawm mai ang awm pui tiiem lai khankix heue.

¹ Yam lih hoek Nawh Cao khaing piang gawng, cub pui hun hawt khaix Nawh heue. ² Pui sibawg tix kaux hoek ti krub ka Nawh Cao ah nin, "Simiang eue, phan Maix koe rhawm ti cox, Maix chix kieh aux singax heue." ³ Nawh Cao nyeu taix tix mai teeh ka kaw an ah nin, "Aux koe rhawm heue, kieh maix singax heue." Dom mawx dom an pa sibawg nawh singax heue. ⁴ Yesux baox ah nin ka nawh, "Rien rhawm tix mai paw krai ka pui tix kaux kawx, hu mai jhi tokaux tix ka cao giex kaing li pa ting mai tawx pa tan awm pa nhie Mose, sonsang mawh mhai rug ka kix heue." ⁵ Yam hoik laig Nawh Cao ka daux veng Kapeniom, cao giex kaing naing tix kaux hoek ti khyox khaw ka Nawh, ⁶ Ah nin, "Simiang eue, siliex aux tix kaux koe jhawm saux yum taix caong mai it daux nyiex mai nawh tuat siviiet kied sigrien heue." ⁷ Nawh Cao ah nin ka nawh, "Aux sang hoek mai cox nawh moi heue." ⁸ Cao giex kaing naing an pawk lox ah nin, "Simiang eue, ang aux keung ti kieh Maix hoek kreed greem braux nyiex aux, viang mawh nan tawx ngie lox tix gum khaing mai siliex aux tak moi heue. ⁹ Aux mawh pui ot greem simiang, kheu nan aux koe pui naing khankix greem aux heue. Phan aux ah "Hu" ka tix kaux, nawh hu heue. Phan aux ah "Hoek" ka tang kaux, kaw an hoek heue. Phan aux ah, yuh in ka siliex aux, nawh yuh heue." ¹⁰ Yam mhong Yesux ka lox an, Nawh daox deng kah mai ah nin ka pui pa hawt khaix Nawh khankix, "Aux krai lox tete ka pex, ang Aux sax yaox pui pa yum rhawm nie ding ka daux pui Isarelax. ¹¹ Aux baox ah nin ka pex, pui tak hoek khaing plak lih singaix mai plak klip singaix tom nie mai tak ngawm tau mai Abraham mai Icak mai Yakop, ka daux meung raoma heue. ¹² Viang mawh nan, kawn praix meung an tak taing lih plak praix daux pa faik, dee tak yiiem riag mai dee greeik rhang heue." ¹³ Yesux baoh ah nin ka cao giex kaing naing an, "Maix hu heue, kieh mawh awm pa hoik yum rhawm maix heue." Siliex nawh moi bawg yam nari an heue. ¹⁴ Yam hoek Yesux daux nyiex Petrux, Nawh yaox miex moeng Petrux saux mai it heue. ¹⁵ Nawh Cao teeh taix nawh mai jhawm saux nawh grai mai nawh kaoh mai khan kheu ka Nawh Cao heue. ¹⁶ Yam hoek yam ponbo kix viex pui pa laig phicaox haoh hun ka Nawh Cao mai Nawh teei gumlox tix gum mai grheu phicaox khankix lih mai Nawh cox pui pa koe jhawm saux khawmuik moi heue. ¹⁷ Kheu sonsang naog lox pa krai cao jhai Isayax pa ah nin, "Tokaux Nawh teei pa iak riang rao ex mai kawg jhawm saux ex khankix heue." ¹⁸ Yam yaox Yesux cub pui hun ot sivie Nawh tan, Nawh cao tawx lox kieh hu plak toi rawm heue. ¹⁹ Pui tiiem lai tix kaux hoek mai ah nin ka Nawh Cao. "Caogau eue, aux sang hawt dee sang hu Maix ku dah dee heue." ²⁰ Yesux ah nin ka nawh, "Sox praix khankix koe daux mai sim piang raoma khankix koe mheem, viang mawh nan Kawn kawn pui ang koe dee deuh kaing tix heue." ²¹ Kawncau tang kaux tix kaux ah nin ka Nawh Cao, "Simiang eue, kieh aux hu sipaung keeing aux ka ha," ²² Yesux ah nin ka nawh, "Hawt khaix Aux mai kieh pui yum sipaung ka pui yum cie kix heue." (Mak 4:35-41; Luk 8:22-25) ²³ Yam hoik laig Nawh Cao ka daux reu, kawncau Nawh khankix hawt khaix Nawh heue. ²⁴ Jhak heue, bhaung ting hoek ti phlu ka daux rawm nhawng, tom pukpak rawm kheem reu an, yam an, Nawh Cao it heue. ²⁵ Kix hoek ka Nawh Cao mai so Nawh siduad ah nin, "Simiang eue, taoh ex liak, ex dex sang laux heue." ²⁶ Nawh Cao ah nin ka kix, "Pex pa iak krax yum rhawm eue, pex lhat graung yuh ka mawx?" Yam an Nawh kaoh mai sidiex ka bhaung khankix mai rawm nhawng deeh yiien sigrien sigre heue. ²⁷ Pui khankix daox deng mai tom ah nin, "Kaw in mawh Pui pa yuh ka mawx? Pie bhaung khankix mai rawm nhawng kawx, nghiet lox Nawh heue." ²⁸ Yam hoek Nawh Cao plak toi rawm ka daux meung Kadarax, pui pa koe phicaox ra kaux lih khaing daux simeeig mai rieb Nawh heue. Kiex kied kwa tom ang pui tix kaux kawx pon hu krax an heue. ²⁹ Jhak heue, kiex kok yo ah nin, "Kawn Siyiex eue, Maix koe pa yuh mai yiex ceu patix? Maix hoek ti tuktiak ka yiex ka sang hoek bawg yam lie?" ³⁰ Ka dee singai khaing kix koe cub lig tix cub pa sawm tan heue. ³¹ Phicaox khankix khyox khaw ka Nawh Cao ah nin, "Phan Maix grheu yix lih, ploi yix laig ka daux cub lig an liak" ³² Nawh Cao ah nin ka kix, "Hu heue." kix lih hu laig ka daux lig an khankix mai jhak heue, cub lig an khawmuik to lih ka dee nie rieh jung jee, laig ka daux rawm nhawng mai yum daux rawm heue. ³³ Pui pa liang lig khankix to hu laig ka daux veng mai krai grawh grawng kuceu, pa hoik mawh ka kiex pa hoik laig phicaox heue. ³⁴ Jhak heue, pui daux veng khawmuik hoek ti jhak yaox ka Yesux mai yam yaox kix Nawh Cao kix khyox khaw mai nhie Nawh lih hu khaing daux meung kix heue.

¹ Nawh Cao laig daux reu mai deeh tiang nhawng mai hoek ka daux veng ot tix heue. ² Pui tix blah grawng pui pa yum taix caong tix kaux, pa hoit it piang ku, hoek ka Nawh heue. Yam yaox Yesux krax yum rhawm kix, Nawh ah nin ka kaw pa yum taix caong an, "Kawn eue, gaux rhawm heue, hoik pluat ka phimap maix." ³ Pui tiiem lai tix blah tang ah ka tokaux kix, "Pui in salao ka Siyiex heue." ⁴ Viang mawh nan, Yesux tawng pa keud kix daux rhawm tix ah nin, "Kheu pa tix pex lai keud pa caox daux rhawm tix?" ⁵ Lox pa ah, "Hoik pluat phimap maix heue.", phan ang mawh nan, "Kaoh mai hu heue,"pa yuh ka mawx pa yie ti ah lie? ⁶ Kheu pex tak sang tawng grawng Kawn kawn pui koe sibrawm ti chix pluat phimap piang haktiex, Nawh Cao baox ah nin ka pui pa yum taix caong an "Kaoh mai teei kraung it maix deeh ing ka nyiex maix." ⁷ Kaw an kaoh mai ing ka nyiex tix heue. ⁸ Yam yaox cub pui hun ka ceu an, kix lhat mai yaogyaw Siyiex, pa hoik tawx sibrawm pa yuh nan ka pui heue. ⁹ Yam hu Yesux khaing tan Nawh yaox pui tix kaux, pa kaux Mathiex, ngawm dee koh mau mai ah nin ka nawh, "Hawt khaix Aux,"nawh kaoh mai hawt khaix Nawh Cao heue. ¹⁰ Khaix an yam ngawm neung Nawh Cao mai sawm ka daux nyiex, jhak heue, pui koh mau mai pui ting phimap hoek ngawm tau mai Yesux mai kawncau Nawh khankix heue. ¹¹ Yam yaox Pharishie khankix ka ceu an, kix ah nin ka kawncau Nawh khankix, "Sara Cao gau pex sawm tau mai pui koh mau mai pui ting map khankix kheu pa tix? ¹² Viang mawh nan yam mhong Nawh Cao ka lox an, Nawh ah nin, "Pui pa nyawm ot, ang lo pui pa chix sidah, viang mawh nan mawh pui pa koe jhawm saux khaing pa lo ka pui chix sidah. ¹³ Pex hu mai gau dee bleeh lox in, Aux moh krax caux rhawm mai ang moh ceu pa tan. Kheu hoek Aux sonsang kok pui rahsee khankix ang mawh, hoek ti kok pui pa koe map lud khankix heue." ¹⁴ Yam an kawncau Yohan khankix hoek ka Nawh Cao mai chawk ah nin, "Ex mai Pharishie khankix twah pa ih law lawx, viang mawh nan kawncau Maix khankix ang twah pa ih yuh ka mawx?" ¹⁵ Yesux ah nin ka kix, "Nyo ka paox khankix, sang chix ngau kix yam kawn ot kix mai kaw pa yuh kapaox lie? Viang mawh nan, singaix tak sang teei hu ka kaw pa yuh kapaox khaing kix tak sang hoek mai yam an kix tak twah pa ih heue. ¹⁶ Pui tix kaux kawx ang sax teei man pa khraox blaox ka kraung ceep pa prim, phan yuh nan kienie, man pa hoik blaox daux griah, tak kieh pa prim laux mai daux griah, tak nie vieh khaing phao ka heue. ¹⁷ Pui ang sax teei rawm plix siiet pa khraox sau ka daux hau hak pa prim, phan yuh nan kienie, hau hak tak bih mai rawm plix siiet tak hieh mai hau hak tak laux heue. Phan sau rawm plix siiet pa khraox ka daux hau hak pa khraox mai khawm ra ceu ang laux leeing heue." ¹⁸ Yam krai Nawh Cao lox ceu in khankix ka kix, jhak heue, pui giex kaing tix kaux hoek mai krub Nawh Cao ah nin, "Kawn bun aux tix kaux yam in kawx hoik yum, viang mawh nan hoek mai deuh taix Maix piang nawh mai nawh tak deeh im heue." ¹⁹ Yesux kaoh mai khawm kawncau Nawh khankix hawt kaw an heue, ²⁰ Yam an bun tix kaux pa hoik koe jhawm saux pa lih nham, kao ra num, hoek plak khaix Nawh mai teeh caong kraung ceep Nawh Cao heue. ²¹ Kheu nawh keud daux rhawm tix ah nin, "Phan aux teeh kraung ceep Nawh Cao khaing, aux tak moi heue." ²² Yesux deeh gi mai yaox bun an ah nin, "Kawn bun Aux eue, kieh gaux rhawm heue, krax yum rhawm maix hoik kieh maix moi,"ka daux bawg yam nari an bun an moi heue. ²³ Yam hoek Yesux ka daux nyiex pui giex kaing mai yaox pui pa phlu lawkleh khankix mai cub pui pa sinum siaox tan khankix. ²⁴ Nawh Cao ah nin, "Yoi heue, mawh kheu kawn bun in ang yum, mawh ngie laig it nawh khaing,"kix yuh pa ang yung ang yi, nyiah ka Nawh Cao heue. ²⁵ Khaix hoik kieh cub pui lih, Nawh Cao laig ka daux mai teei taix bun an mai kawn bun an kaoh heue. ²⁶ Kheu grawh grawng ceu an Min plakngai tah hu ka daux haktiex an khawmuik heue. ²⁷ Yam kaoh hu Yesux khaing tan, pui dug ngai ra kaux hawt khaix Nawh Cao mai kok yo ah nin, "Kawn Davit eue, caux rhawm ka yiex liak." ²⁸ Yam hoik laig Nawh Cao ka daux nyiex, pui dug ngai ankiex hoek dex Nawh Cao mai Yesux ah nin ka kiex, "Pax yum rhawm grawh grawng pa chix yuh Aux ka ceu in lie?"Kiex tom ah nin ka Nawh Cao, "Mawh heue. Simiang" ²⁹ Yam an Nawh Cao teeh ngai kiex, ah nin, "Awm yum rhawm pax kieh mawh ka pax heue." ³⁰ Ngai kiex blah heue. Yesux tawm lox ka kiex ah nin, "Paw vi kieh pui tawng tix kaux kawx." ³¹ Viang mawh nan, kiex hu mai kieh min plakngai Nawh Cao tah ka daux haktiex an khawmuik heue. ³² Khaix lih hu kiex, pui viex pui pa aw pa laig phicaox tix kaux, hoek ka Nawh Cao heue. ³³ Khaix hoik grheu phicaox an lih, pui pa aw an sikah heue. Cub pui hun khankix daox deng kah ah nin, "Ang sax yaox ceu pa awm in daux Isarelax heue." ³⁴ Pharishie khankix ah nin, "Nawh een rhawm ka simiang phicaox mai grheu phicaox khankix lih heue." ³⁵ Yesux hu lailing ka daux yaong daux veng khawmuik mai sidiex ka daux nyiex dee sidiex kix khankix mai sidiex lox bwan pa gaux rhawm pa dex dawd mai Meung Siyiex mai cox pui pa koe jhawm saux kuceu moi heue." ³⁶ Yam yaox Nawh Cao cub pui hun, Nawh koe krax caux rhawm son kix, kheu kix koe krax kha rhawm mai prung prang awm yung pa ang koe cao liang cao kia heue. ³⁷ Yam an Nawh Cao ah nin ka kawncau Nawh khankix, "Nghox pa kaux pa khaw ti vawg nie tete, viang mawh nan pui pa vawg tux heue. ³⁸ Mawh kheu nan pex rawg bwan ka Simiang cao nghox, sonsang ploi Nawh pui vawg nghox khankix hoek sonsang vawg nghox Nawh heue."

¹ Nawh Cao kok kawncau Nawh kao ra kaux hoek ka tix mai tawx sibrawm tix ka piang kix sonsang grheu kix phicaox lih mai sonsang cox jhawm saux kuceu moi heue. ² Ceu kaux kawncau Nawh pa ting kao ra kaux mawh nin, kaw phao ka mawh Simon, pa kok mawh Petrux mai pux nawh Andare. Yakop kawn Zebedie mai pux nawh Yohan. ³ Philipux mai Bathawlamie. Thomax mai Mathiex pui koh mau. Yakop kawn Alaphie mai Lebie ceu kaux ru nawh mawh Thatdie. ⁴ Simon pui Kananix mai Yudax Isakariut, kaw pa tik pa tawx ka Nawh Cao heue. ⁵ Yesux ploi pui kao ra kaux in hu mai tawm lox ka kix ah nin, "Pex paw vi hu dee ot pui tang ceu mai paw vi laig daux veng pui Samarix tix veng kawx. ⁶ Hu ka yung pa hoik grai, pa dex mai geh nyiex Isarelax heue. ⁷ Yam hu pex sidiex gau ah nin, Meung Raoma uik dex sang hoek heue. ⁸ Cox pa koe jhawm saux moi, kieh pa hoik yum deeh kaoh im, kieh pui sipawg khankix singax mai grheu phi caox khankix lih heue. Pex hoik pon kheu yaox pex ti tawx ngawh ang mawh, mawh kheu nan paw lai teei ngawh mai tawx heue. ⁹ Paw sau khri, mau, tawng, daux hau maox khlax. ¹⁰ Paw vi viex bau son krax hu tix, paw viex sibex ra pheen, paw viex kiep, paw viex khaox gix, mawh kheu pui yuh kaing keung ti pon pa ih tix heue. ¹¹ Pex laig daux yaong daux veng mawx ang ah, sawg ka pui pa keung mai ot tan tom lih hu pex heue. ¹² Yam laig pex daux nyiex kienie, nawb heue. ¹³ Phan mawh nyiex pa keung, kieh pa nhim pex ot piang nyiex heue. Viang mawh nan, phan ang keung kieh pa nhim pex deeh ing ka pex heue. ¹⁴ Phan pui mawx ang rieb ka pex mai ang nghiet ka lox pex, yam lih hu pex khaing daux nyiex an, phan ang mawh nan khaing daux veng an, khruah ti tik phawng tiex pa koe ka caong pex tan heue. ¹⁵ Aux krai lox tete ka pex, daux singaix prawng ca sax, haktiex Sawdom mai Gawmawrax tak lheu chaong khaing veng an heue." ¹⁶ "Jhak heue, Aux ploi pex hu awm yung hu sinax soxla khankix heue. Kheu nan pex lhak lhiem awm siuing khankix mai ang koe cai awm sikaux khankix heue. ¹⁷ Rien rhawm tix ka pui, kheu kix tak teei pex tawx ka cub kuad song cao prawng see khankix mai kix tak sivied pex daux nyiex dee sidiex kix khankix heue. ¹⁸ Tak viex pex hu sivoe pui giex kaing mai simiang khankix kheu grawng Aux, yuh ka mawx sonsang mawh mhai rug son kix mai ka pui tang ceu khankix heue. ¹⁹ Viang mawh nan, yam teei kix tix tawx pex paw khi rhawm grawh grawng lox pa sang ah sang krai pex, kheu lox pa sang ah sang krai pex tak tawx ka pex ka daux bawg yam nari an heue. ²⁰ Mawh kheu ang mawh pex pa krai pa sikah, mawh Khuan Keeing Cao pa krai pa sikah ka daux pex heue. ²¹ Puxaik tix kaux lai tix kaux tak sang teei ti tawx puxaik tix sonsang pah yum mai keeing kawx tak teei ti tawx kawn tix mai kawn praix khankix kawx tak thiang ka miex keeing tix mai tak pah kix yum heue. ²² Pui khawmuik tak koeng ka pex mawh kheu ceu kaux Aux. Viang mawh nan, kaw pa kaux cong tom sidah, tak hoek krax taoh heue. ²³ Yam tuktiak pui ka pex daux veng in, to hu tang veng heue. Aux krai lox tete ka pex, ka ang pex nyang tah daux veng Isarelax khankix, Kawn kawn pui tak hoek heue. ²⁴ Kawncau ang lheu ting khaing sara cao gau mai siliex ang lheu ting khaing simiang nawh. ²⁵ Phan kawncau awm sara cao gau nawh mai siliex awm simiang nawh, ding heue. Phan kix hoik kok Cao nyiex Belazebulax kix tak nie lheu kok pui nyiex Nawh khaing in miex ding heue." ²⁶ Mawh kheu in paw vi lhat ka kix, mawh kheu pa hoik pie lhen, pa ang pon hoe ang koe tix ceu kawx mai ceu pa glip pa ang tawng, ang koe tix ceu kawx heue. ²⁷ Pa krai Aux ka pex, ka daux pa faik pex hu krai ka daux pa riang. Pa mhong pex daux yhaok, yo ti krai piang prang nyiex heue. ²⁸ Paw lhat ka kix pa chix teei tokaux yum mai ang chix teei ju yum. Viang mawh kawx nan, lhat ka kaw pa chix yuh laux ka ju khawm tokaux ka daux mawnarhok heue. ²⁹ Coh saik ra mu son mau tix piak ang mawh lie? Phan Keeing pex ang tawx akhwang, sim khankix ang rau piang tiex tix mu kawx. ³⁰ Pie hauk kaing pex kawx hoik simin khawmuik heue. ³¹ Mawh kheu in, paw lhat, pex lheu ngawh khaing saik khankix heue. ³² "Pui pa kham ti rieb ti teei ka Aux ku kaux, plak sivoe ngai pui, Aux tak kham ti rieb ti teei nawh sivoe ngai Keeing Aux pa ot ka daux meung raoma heue. ³³ Pui mawx ang ah, pa thiang titik ka Aux plak sivoe ngai pui, Aux tak thiang titik nawh plak sivoe ngai Keeing Aux pa ot ka daux meung raoma heue." ³⁴ "Paw ce Aux hoek ti tawx pa nhim piang haktiex in, Aux hoek ti tawx pa nhim ang mawh, viang mawh nan hoek ti tawx vaid tix mu heue. ³⁵ Mawh kheu hoek Aux ti kieh keeing mai kawn simex nawh, miex mai kawn bun nawh, yiex mai mun nawh tang rhawm mai gwieh paox tix heue. ³⁶ Pui koeng khankix, tak deeh mawh pui daux nyiex tokaux tix heue. ³⁷ Kaw pa nie lheu moh ka miex keeing tix khaing Aux, ang keung ka Aux mai kaw pa nie lheu moh kawn simex kawn bun tix khaing Aux, ang keung ka Aux. ³⁸ Kaw pa ang klawm khaox lhak tokaux tix mai hawt khaix Aux, ang keung ka Aux. ³⁹ Kaw pa sawg ti yaox ju tokaux tix tak som ju heue. Kaw pa som ju kheu Aux, tak yaox ju heue." ⁴⁰ "Kaw pa rieb ti teei ka pex, mawh pa rieb ti teei ka Aux mai kaw pa rieb ti teei ka Aux, rieb ti teei ka kaw pa ploi Aux hu heue. ⁴¹ Kaw pa rieb ti teei cao jhai ka daux ceu kaux cao jhai tak pon bwanson cao jhai heue. Kaw pa rieb ti teei pui rahsee ka daux ceu kaux pui rahsee, tak pon bwanson pui rahsee heue. ⁴² Pui mawx ang ah, tawx kaw pa iak khankix tix kaux nyaux rawm sikiied tix kawk ngie, ka daux ceu kaux kawncau tix kaux kaux, Aux krai lox tete ka pex, bwanson cie nawh tak ang som grai heue."

¹ Khaix hoik tawm Yesux lox ka kawncau Nawh kao ra kaux, Nawh Cao lih hu khaing tan mai hu sidiex gau ka daux veng khankix heue. ² Yam an Yohan ot ka daux thawng mai mhong grawng kaing pa yuh Cao Khrit khankix, nawh tom ploi kawncau tix hu tix blah, ³ mai chawk ah nin ka Nawh Cao, "Maix mawh Kaw pa tak sang hoek an lie?, phan ang mawh nan ex tak sang krox ka tang kaux lie?" ⁴ Yesux pawk lox mai ah nin ka kix, "Pex hu mai krai ka Yohan grawng ceu pa mhong pa yaox pex, ⁵ pui dug ngai deeh chix yaox, pui laux caong deeh chix hu, pui saux sipawg deeh singax, pui lheet yhaok deeh chix mhong mai pui pa hoik yum deeh kaoh im mai sidiex gau ka pui hot sia mhong ka lox bwan gaux rhawm heue. ⁶ Kaux pui mawx ang laux rhawm kheu grawng aux, tak pon bwanson heue." ⁷ Khaix hoik hu kix, Yesux jah ti sidiex gau grawng Yohan ka cub pui hun khankix, "Pex lih hu jhak patix daux tiagtu? Hu jhak pex ka gawng priem, pa vu vied yam phlu bhaung lie? ⁸ Phan ang mawh nan, pex lih hu jhak patix? Hu sonsang yaox pui pa ceep kraung pa awn lie? Kix pa ceep kraung pa awn khankix ot ka daux nyiex simiang ting khankix heue. ⁹ Pex lih hu kheu patix? Lih hu jhak ka cao jhai lie? Mawh heue, Aux krai ka pex, mawh pa lheu ting khaing cao jhai heue. ¹⁰ In mawh pa hoik tiiem ka grawh grawng nawh ah nin, Jhak heue, Aux ploi kawncau Aux hu sivoe Maix, pa tak sang cox khre krax hu Maix sivoe Maix heue. ¹¹ Aux krai lox tete ka pex, ka daux pui pa keh khaing bun khawmuik, pa lheu ting khaing Yohan cao cubcom ang sax lih koe tix kaux kawx, viang mawh nan kaw pa nie iak khaing paox tix ka daux meung raoma lheu ting khaing nawh heue. ¹² Jah ka baux yam Yohan cao cubcom tom hoek yam in, pui rhim ti teei Meung Raoma mai grhawm ti laig tan heue. ¹³ Grawh grawng nawh cao jhai khawmuik mai lox lai beenli grux krai lox jhai tom hoek Yohan heue. ¹⁴ Phan pex koe rhawm ti sang rieb teei, kaw in mawh Eliyax pa tak sang hoek heue. ¹⁵ Kaw pa koe yhaok kieh nawh mhong heue. ¹⁶ Sang chix tiag aux ka baux ju in ka ceu pa tix lie? Hoik awm kawn nyawm khankix pa ngawm daux lah mai kok yo ka tix kaux lai tix kaux, ¹⁷ Ah nin, "Ex hoik phlu pi son pex mai pex ang graoh. Ex hoik yiiem riag, viang mawh nan pex ang khi rhawm tix." ¹⁸ Kheu Yohan hoek, ang ih mai ang nyaux, kix tom ah, Kaw in koe phicaox; ¹⁹ Yam hoek Kawn kawn pui, ih mai nyaux, kix ah, jhak yaox, Kaw in mawh pui ting priex mai pui ting nyaux rawm plix siiet mai yuh paox pie ka pui koh mau mai pui ting map khankix heue. Viang mawh nan, pingnya cie Siyiex hoik plak jhi rahsee ka daux kaing pa yuh tix khankix heue." ²⁰ Yam an Nawh Cao jah ti ah ka veng khankix dee hoik yuh Nawh kaing pa ting sibrawm, kheu kix ang doh keud ka phimap tix heue. ²¹ "Veng Khawrazin eue, maix koe pa kha rhawm. Veng Biesedax eue, maix koe pa kha rhawm,"phan kaing pa ting sibrawm khankix pa hoik yuh ka daux pax, yuh ka daux veng Turux mai veng Sidom, kiex tak hoik doh keud ka phimap tom dix, ka daux pa ceep man pa taing ka hauk mai kraix ka nyaox heue. ²² Aux krai ka pax, daux singaix prawng ca sax, pax tak nie kin pa kham geu khaing veng Turux mai veng Sidom heue. ²³ Veng Kapeniom eue, Tak yaogyaw maix tom hoek meung raoma lie? Maix tak lih hu daux meung yum heue. Grawh grawng nawh, kaing pa ting sibrawm pa hoik yuh ka daux maix, phan yuh ka daux veng Sawdom, veng an tak koe tom singaix heue. ²⁴ Aux krai ka maix, ka daux singaix prawng ca sax, maix tak nie yaox ti kham geu lheu khaing haktiex Sawdom heue." ²⁵ Yam an Yesux ah nin, "Aux yaogyaw ka Maix Keeing Simiang pa ting piang raoma mai haktiex, kheu Maix hoik mox ceu in khankix, khaing pui lhak lhiem mai pui pa chix tawng khankix mai hoik plak jhi khankix ka kawn ngie khankix heue. ²⁶ Mawh heue, Keeing kheu Maix koe rhawm alo ti yuh nan heue. ²⁷ Keeing Aux hoik ap khawmuik ka Aux mai pui tix kaux kawx ang tawng ka Kawn Cao lheu khaing Keeing Cao mai pui tix kaux kawx ang tawng ka Keeing Cao lheu khaing Kawn Cao mai kaw pa laug kawn Cao ti plak jhi ka nawh heue. ²⁸ Pex pa taug pa mao mai klawm kraung cien khankix khawmuik eue, hoek ka Aux mai Aux tak kieh pex laux lee tix heue. ²⁹ Teei ti klawm khaox glawm Aux mai hoek ti gau ka Aux, kheu Aux koe rhawm pa awn pa tiem mai ju pex tak yaox dee laux lee tix heue. ³⁰ Mawh kheu khaox glawm Aux mawh pa yie ti klawm mai kraung Aux mawh pa chaong heue."

¹ Daux bawg yam an, Yesux hu preeng ka daux ma nghox ca ka daux ngaix twah mai kawncau Nawh khankix cai rhawm, kheu nan kix tom caik ti ih sigleem nghox ca heue. ² Yam yaox Pharishie khankix ka an, kix ah nin ka Nawh Cao, jhak heue, "Kawncau Maix lai yuh pa ang khaw mai beenli singaix twah." ³ Nawh Cao pawk lox ah nin ka kix, "Ang pex sax phat grawng pa yuh Davit nawh mai pui pa ot tau mai nawh khankix yam kied cai rhawm lie? ⁴ Yam laig nawh ka daux nyiex Siyiex mai ih ka blah, pa ang khaw nawh mai pui pa ot tau mai nawh khankix ti ih, viang mawh nan, mawh cao giex kaing li khankix khaing pa khaw ti ih heue. ⁵ Pex ang sax phat daux lai beenli, grawng yuh cao giex kaing li pa ot daux nyiex bwan khankix, yuh pa ang khaw daux ngaix twah mai ang koe phimap lie? ⁶ Viang mawh nan, Aux krai ka pex, pa lheu ting khaing nyiex bwan koe tin tix kaux heue. ⁷ Phan pex hoik tawng dee bleeh lox in, Aux moh krax caux rhawm mai ang moh krax tan, pex ang khaw ti tang phimap ka pui pa ang koe dee lud. ⁸ Grawh grawng nawh, Kawn kawn pui mawh Simiang singaix twah heue." ⁹ Nawh Cao lih hu khaing tan mai laig ka daux nyiex sidiex kix heue. ¹⁰ Jhak heue, koe pui pa yum taix kroh taix tix khawn tix kaux, sonsang pon ti deuh phimap ka Nawh Cao, kix chawk Nawh ah nin, "Cox jhawm saux moi daux singaix twah, khaw ka been lie?" ¹¹ Nawh Cao ah nin ka kix, "Ka daux pex pui pa koe yung tix mu phan yung an rau daux o singaix twah pa ang teei yung an lih, koe lie? ¹² Pui lheu ngawh khaing yung miex ding, mawh kheu nan pa yuh ceu pa mhawm singaix twah khaw daux been heue." ¹³ Khaix an Nawh Cao ah nin ka pui an, "Nyeu taix maix heue," kaw an nyeu taix tix mai deeh mhawm awm tang khawn heue. ¹⁴ Pharishie khankix lih hu mai kum kawng grawh grawng sang pon kix ti yuh Nawh Cao laux yuh ka mawx heue. ¹⁵ Kheu hoik tawng Yesux ka grawng ceu an, Nawh lih hu khaing tan mai pui hawt khaix Nawh Cao tom nie mai Nawh cox jhawm saux kix moi khawmuik heue. ¹⁶ Nawh Cao tawm lox ka kix son ang kix sang kieh pui tawng ka Nawh heue. ¹⁷ Sonsang naog gumlox pa hoik krai cao jhai Isayax pa ah nin, ¹⁸ "Jhak heue, Siliex Aux pa hoik laug Aux, pa moh Aux, pa khaw rhawm Aux, Aux tak deuh Khuan Aux piang Nawh, mai Nawh tak krai grawng bawg yam prawng ciyang ka pui tang ceu khankix heue. ¹⁹ Nawh tak ang thiang, ang kok yo, mai pui tak ang mhong lox Nawh daux krax tix kaux kawx heue. ²⁰ Priem pa hoik geh, Nawh ang raig pot, maox kawk ngu pa lih taox ngu, Nawh ang preet, tom hoik ploi pa prawng ciyang Nawh mai pex heue. ²¹ Daux ceu kaux Nawh, kawn pui tang ceu khankix tak keud pot jun pot een rhawm kah heue." ²² Yam an kix viex pui pa laig phicaox, pa dug ngai, pa aw tix kaux hoek ka Nawh Cao mai Nawh Cao cox nawh moi mai pui aw an chix sikah mai chix yaox heue. ²³ Cub pui hun khankix khawmuik daox deng ah nin, "Kaw in ang mawh kawn Davit lie?" ²⁴ Yam mhong Pharishie khankix ka grawng ceu an, kix ah nin, "Pui in een rhawm ka Belazebulax, pa mawh simiang phicaox khankix mai kaw in grheu phicaox khankix lih heue." ²⁵ Kheu tawng Nawh Cao ka grawh grawng pa keud kix daux rhawm kix, Nawh ah nin ka kix, "Meung ku meung pa ang khaw paox tix, pa gwieh paox tix, tak laux leeing heue. Veng ku veng, nyiex ku nyiex, pa ang khaw paox tix, pa gwieh paox tix, ang chix kaux cong. ²⁶ Phan Satan grheu Satan lih, nawh mawh pa gwieh ka tokaux tix heue. Phan mawh nan, meung nawh chix kaux chix cong yuh ka mawx? ²⁷ Phan Aux een rhawm ka Belazebulax ti sang grheu phicaox khankix lih, kawn praix pex sang een rhawm ka pui mawx ti sang grheu phicaox lih lie? Mawh kheu nan, kix tak mawh cao prawng ca pex heue. ²⁸ Viang mawh nan, phan Aux grheu phicaox khankix lih ka daux Khuan Siyiex, Meung Siyiex hoik hoek piang pex tete heue. ²⁹ Sang chix laig pui tix kaux ka daux nyiex pui pa ting riang mai khin ti teei kraung nawh, phan nawh ang phyawk ka pui pa ting riang an sivoe lie? Khaix an nawh tak chix yieh nyiex nawh laux heue. ³⁰ Kaw pa ang ot plak Aux, mawh pui pa koeng ka Aux heue. Kaw pa ang khrawm tau mai Aux, mawh pa kieh prung prang heue. ³¹ Mawh kheu nan Aux krai ka pex, tak pluat phimap mai pa salao ku ceu ka kawn pui, viang mawh nan pui mawx pa salao ka Khuan Cao tak ang pon pa pluat heue. ³² Pui mawx ah lox pa ang khaw ang jiet ka Kawn kawn pui, tak sang pluat nawh heue. Viang mawh nan, pui mawx ah lox pa ang khaw ang jiet ka Khuan Singax Singeh, tak ang pluat nawh ju in mai ju khaix heue." ³³ Cox khaox kieh mhawm mai plix nawh tak mhawm heue, phan ang mawh nan, cox khaox kieh ang mhawm, plix nawh tak ang mhawm heue. Grawh grawng nawh pon ti tawng khaox kheu plix nawh heue. ³⁴ Ceu siuing pa cai eue, yam kawn mawh pex pa caox kawx, chix krai lox pa mhawm yuh ka mawx? Kheu jheeh krai ceu pa koe daux rhawm tom nie heue. ³⁵ Pui pa mhawm viex ceu pa mhawm lih khaing kraung khrai pa mhawm pa deuh tix mai pui pa caox viex ceu pa caox lih khaing kraung khrai pa caox tix heue. ³⁶ Aux krai ka pex, ka daux singaix prawng ciyang sax, pex tak sang yaox ti pawk ka gumlox pa nieb krai pex giex going heue. ³⁷ Grawh grawng nawh mawh kheu gumlox pex, pex tak pon pa rahsee mai mawh kheu gumlox pex, pex tak pon pa prawng ciyang heue." ³⁸ Yam an pui tiiem lai mai Pharishie tix blah ah nin ka Nawh Cao, "Sara Cao Gau eue, ex simie ti yaox mhai pa daox deng khaing Maix tix ceu heue." ³⁹ Nawh Cao pawk lox mai ah nin ka kix, "Baux ju pa caox mai pa lud vao, sawg ka mhai pa daox deng lie. Viang mawh nan, lheu khaing mhai pa daox deng cie cao jhai Yonax, mhai pa daox deng tix ceu kawx, ang tawx ka kix heue. ⁴⁰ Mawh kheu awm hoik ot Yonax ka daux vaig kax ting loe singaix loe sawm, Kawn kawn pui kawx, tak ot ka daux tiex loe singaix loe sawm heue. ⁴¹ Pui veng Nineve tak kaoh cung tau mai pui baux ju in yam prawng ca mai tak tang phimap ka in, kheu hoik doh keud kix ka lox sidiex gau Yonax mai jhak heue, Kaw pa lheu ting khaing Yonax ot tin heue. ⁴² Yax simiang caong ma seh, tak kaoh tau mai pui baux ju in yam prawng ca mai tak tang phimap ka in, kheu hoik hoek nawh khaing dee sidah haktiex ti nghiet gumlox pingnya cuyi simiang Sawlamon heue. Jhak heue, Kaw pa lheu ting khaing simiang Sawlamon ot tin heue." ⁴³ "Khaix hoik lih phi pa seeing brai khaing daux pui tix kaux, nawh hu preeng ka dee ang rawm koe sonsang sawg dee laux kawx, ang yaox. ⁴⁴ Khaix an nawh ah nin, Aux sang deeh ing ka nyiex dee hoik kaoh aux. Yam hoik hoek nawh tan, nawh yaox nyiex yi, pa hoik pih mai pa hoik cox mhawm heue. ⁴⁵ Khaix an, nawh hu mai viex phicaox aliah kaux pa lheu caox khaing tokaux tix mai laig ka daux an mai kix laig ot tan heue. Bawg yam pa ghoik cie pui an nie lheu caox khaing bawg liang heue. Awm an tak lih mawh ka baux ju pa caox in heue." ⁴⁶ Yam kawn sidiex gau Nawh Cao ka cub pui hun khankix, miex Nawh mai pux Nawh khankix cung plak praix mai mhaing ti sikah ka Nawh Cao heue. ⁴⁷ Pui tix kaux ah nin ka Nawh Cao, "Miex Maix mai pux Maix khankix cung plak praix mai mhaing ti sikah ka Maix heue." ⁴⁸ Nawh pawk lox mai chawk ah nin ka kaw pa hoik krai ka Nawh, "Miex Aux mawh mawx? pux Aux khankix mawh mawx?" ⁴⁹ Nawh Cao nyeu taix tix plak kawncau Nawh khankix ah nin, "Jhak heue, inkix mawh miex Aux mai pux Aux khankix heue. ⁵⁰ Pui mawx ang ah, pa yuh alo pa khaw caw rhawm Keeing Aux pa ot ka daux meung raoma, mawh pux Aux mai nan Aux mai miex Aux heue."

¹ Daux singaix an, Yesux lih hu khaing daux nyiex mai hu ngawm dex praok rawm nhawng heue. ² Cub pui hun khrawm ti hoek ka Nawh Cao, kheu nan, Nawh laig ngawm daux reu tan, mai pui hun khankix khawmuik cung ka praok rawm heue. ³ Nawh Cao sidiex gau ka kix tom nie ceu, ka daux lox tiag ah nin, "Pui rhuat simie hu ti rhuat simie heue. ⁴ Yam rhuat nawh simie, simie tix blah cod piang krax mai sim khankix hoek sut ti ih simie an khankix heue. ⁵ Simie tix blah cod piang tiag simaox, dee ang tiex koe tom nie, mai simie khankix kuah dom mawx dom an, mawh kheu ang tiex raux tan heue. ⁶ Yam hoik lih singaix, kied hax koek mai kheu ang kix koe riah, kix kroh hu heue. ⁷ Simie tix blah cod ka daux pang kat mai pang kat an, ting tom kheem mai gut kix heue. ⁸ Simie tix blah cod ka dee mhawm tiex mai plix plix, tix blah tix yieh son, tixgliah son mai tixngoe son heue. ⁹ Kaw pa koe yhaok ti mhong, kieh nawh mhong heue." ¹⁰ Kawncau khankix chawk ah nin ka Nawh Cao, "Kheu patix Maix teei lox tiag khankix sidiex ka kix?" ¹¹ Nawh Cao pawk ah nin, "Hoik kieh pex tawng grawng pa raux mox pa dex dawd mai meung raoma, viang mawh nan, ang nyang tawx kix tawng heue. ¹² Grawh grawng nawh, pui mawx pa hoik koe ang ah, tak sang baox tawx ka nawh mai nawh tak sang koe tom nie heue. Ka pui pa ang koe tidtix, pa hoik koe ka nawh kawx, tak sang teei khaing nawh heue. ¹³ Grawng sidiex gau Aux mai lox tiag khankix ka kix, mawh kheu, kix yaox kawx, ang tie mawh pa yaox, mai kix mhong kawx, ang tie mawh pa mhong, kix tawng kawx ang tie mawh pa tawng heue. ¹⁴ Gumlox pa hoik grux krai cao jhai Isayax grawng kix, pa ah nin hoik naog heue. Pex mhong kawx, mhong mai ang tie tawng ceeix kawx, pex yaox kawx, yaox mai ang tie yaox ceeix kawx. ¹⁵ Kheu rhawm pui ceu in hoik mumi, mai yhaok kix hoik du, mai ngai kix, hoik tawb tix, yuh ka mawx son ang kix sang yaox. Kheu son ang yhaok kix chix mhong, mai rhawm kix chix tawng mai deeh tieh hoek plak Aux, ti cox kix moi heue. ¹⁶ Viang mawh nan, ngai pex koe bwanson kheu chix yaox, mai yhaok pex kawx koe bwanson kheu chix mhong heue. ¹⁷ Aux krai lox tete ka pex, koe cao jhai khankix mai pui rahsee khankix, pa simie ti yaox ka ceu pa yaox pex, viang mawh nan ang pon ti yaox mai pa simie ti mhong ka ceu pa mhong pex, viang mawh nan ang pon ti mhong heue." ¹⁸ "Mawh kheu in pex nghiet grawng lox tiag pui pa rhuat simie. ¹⁹ Yam mhong pui tix kaux kaux ka lox bwan pa dex dawd mai meung Siyiex mai ang chix tawng dee bleeh, mawh kaw pa caox pa hoek rud ti teei simie pa hoik rhuat ka daux rhawm nawh heue. In mawh simie pa hoik rhuat piang krax heue. ²⁰ Simie pa hoik rhuat piang tiag simaox, mawh pui pa mhong ka lox bwan mai gaux rhawm mai rieb ti teei dom mawx dom an. ²¹ Viang mawh nan, ang nawh koe riah ka daux tokaux tix, nawh kaux cong tivud khaing mai yam yaox nawh krax tuktiak kheu lox bwan nawh laux rhawm dom mawx dom an heue. ²² Simie pa rhuat ka daux sinax pang kat, mawh pui pa mhong ka lox bwan mai priex rhawm pa dex dawd mai haktiex mai pa chix pie lhen sinngao haktiex, kheem gut ka lox bwan mai nawh ang chix plix, plix heue. ²³ Simie pa rhuat dee mhawm tiex, mawh pui pa mhong lox bwan mai chix tawng chix nghiet mai chix plix plix, tix blah plix tix yieh son, tixgliah son, mai tix blah tixngoe son heue." ²⁴ Nawh Cao baox plih kix yaox lox tiag tang ceu pa ah nin, "Meung Raoma tak awm pui pa rhuad simie pa mhawm ka daux ma tix heue. ²⁵ Viang mawh nan, yam hoik laig it pui, pui koeng ka nawh hoek ti rhuat simie vang ka daux sinax nghox ca an mai lih hu heue. ²⁶ Yam kuah gawng mai lhax mai sigleem plix, vhang kawx lih hoek heue. ²⁷ Siliex khankix hu ka cao nyiex ah nin, Simiang eue, maix rhuat simie pa mhawm daux ma tix ang mawh lie? Kheu vang lai lih koe lie? ²⁸ Nawh pawk ah nin ka kix, Ceu in mawh pa hoik yuh pui koeng heue. Siliex khankix baox ah nin ka nawh, Maix simie kieh ex hu khrawm vang khankix lie? ²⁹ Viang mawh nan, nawh pawk lox ah nin, Ang, phan pex hu khrawm vang khankix, ha pex kawx loe reeig nghox ca glaoh tau mai kix. ³⁰ Kieh ting tau khawm ra ceu tom hoek bawg yam vawg, mai hoek bawg yam vawg sax, aux tak krai ka pui vawg khankix, sonsang khrawm vang khankix phao ka, vien vien mai gleeing kix ka ngu heue. Viang mawh nan, khrawm nghox ca mai sau daux krao aux heue." ³¹ Nawh Cao baox plak kix yaox lox tiag tang ceu pa ah nin, "Meung Raoma tak awm simie taux klaox tix mu, pa rhuat pui tix kaux ka daux ma tix heue. ³² Viang mawh simie pa iak khaing simie tang ceu kawx, khaix hoik ting, nawh lheu ting khaing num rib riem mai lih mawh gawng, tom sim raoma khankix hoek yuh mheem mai hoek laux piang kak nawh heue." ³³ Nawh Cao baox krai kix mhong lox tiag tang ceu pa ah nin, "Meung Raoma awm susaix, pa teei bun tix kaux klu klao ka daux phawng gaox loe diag, tom hoik laig susaix an ka daux khawmuik mai kieh ploh heue." ³⁴ Grawng ceu in khawmuik Yesux teei lox tiag krai ka cub pui hun khankix heue. Phan ang mawh lox tiag Nawh Cao ang sidiex ang krai lox ka kix heue. ³⁵ Kheu sonsang naog lox pa hoik grux krai cao jhai pa ah nin, "Aux tak ang jheeh tix ka daux lox tiag. Aux tak krai grawng ceu pa hoik mox tom yam jah haktiex heue." ³⁶ Khaix hoik ploi Nawh Cao cub pui hun khankix, Nawh laig ka daux nyiex mai kawncau Nawh khankix hoek dex Nawh Cao ah nin, "Krai ex mhong dee bleeh lox tiag grawng vang pa koe ka daux ma liak." ³⁷ Nawh Cao pawk lox ah nin, "Pui pa rhuat simie pa mhawm mawh Kawn kawn pui heue. ³⁸ Ma mawh haktiex, simie pa mhawm mawh kawn praix Meung an khankix mai vang mawh kawn praix kaw pa caox khankix heue. ³⁹ Pui koeng pa rhuat simie vang mawh phicaox, bawg yam vawg mawh yam sidah haktiex in, mai pui pa vawg mawh kawncau Siyiex khankix heue. ⁴⁰ Awm khrawm ka vang khankix mai gleeing ka ngu, yam sidah haktiex in tak awm an heue. ⁴¹ Kawn kawn pui tak ploi kawncau raoma Nawh hoek khrawm ti teei ceu pa kieh mawh phimap mai pui pa yuh pa caox khankix lih khaing Meung Nawh heue. ⁴² Tak taing kix sau daux glah ngu, dee tak yiiem riag mai dee greeik rhang heue. ⁴³ Yam an pui rahsee khankix tak jhan riang awm singaix ka daux Meung Keeing kix heue. Pui pa koe yhaok ti mhong, kieh nawh mhong liak." ⁴⁴ "Meung Raoma awm sinngao pa ngawh pa hoik mox ka daux ma mai pui tix kaux yaox sinngao an mai baox mox, khaix an ka daux pa gaux rhawm nawh hu coh pa koe tix khawmuik mai liag ma an heue." ⁴⁵ "Meung Raoma baox awm pui yuh lai tix kaux pa sawg siang ceu pa koe daux jawx pa mhawm khankix. ⁴⁶ Khaix hoik yaox nawh siang pa koe daux jawx pa kied ngawh, nawh hu mai coh pa koe tix khawmuik mai liag siang an heue." ⁴⁷ "Meung Raoma baox awm rub pa ploi daux rawm sigrit sigrah mai khrawm kax kuceu heue. ⁴⁸ Yam hoik naog rub an, kix bluh hu ka praok rawm, kix ngawm mai laug pa mhawm khankix sau daux aw daux klong, viang mawh nan, pa ang mhawm khankix kix tik heue. ⁴⁹ In tak mawh yam sidah haktiex heue. Kawncau raoma khankix tak hoek mai gwieh pa caox khaing sinax pa rahsee. ⁵⁰ Tak taing kix sau daux glah ngu, dee tak yiiem riag mai dee greeik rhang heue." ⁵¹ Yesux baoh ah nin ka kix, "Hoik tawng pex ka grawh grawng khankix khawmuik lie?"kix pawk ah nin ka Nawh Cao, "Tawng heue, Simiang." ⁵² Nawh Cao baox ah nin ka kix, "Mawh kheu in, pui tiiem lai ku kaux pa hoik gau grawh grawng Meung Raoma hoik awm cao nyiex tix kaux, hoe ceu pa khraox mai pa prim lih khaing kraung nawh heue." ⁵³ Khaix hoik sidiex Yesux lox tiag, ceu in khankix, Nawh Cao lih hu khaing tan heue. ⁵⁴ Nawh Cao hoek ka daux meung ot tix, mai Nawh gau kix ka daux nyiex sidiex, kix tom kied daox deng ah nin, "Pui in pon pingnya cuyi mai siawp sibrawm khankix khaing dee mawx lie? ⁵⁵ In mawh kawn pa yuh kaing kraung taix ang mawh lie? Miex Nawh mawh Marix ang mawh lie? Pux Nawh khankix mawh Yakop, Yosiep Simon mai Yudax ang mawh lie? ⁵⁶ Nan Nawh khankix ot tau mai ex khawmuik ang mawh lie? Phan mawh nan, kaw in, pon ceu in khankix khawmuik khaing dee mawx lie?" ⁵⁷ Kix laux rhawm ka daux Nawh Cao. Viang mawh nan Yesux ah nin ka kix, lheu khaing daux meung ot tix mai ka daux nyiex ot tix "Cao jhai mawh pa koe min plakngai tang dah heue." ⁵⁸ Nawh Cao ang yuh kaing siawp sibrawm tom nie tan, kheu ang kix yum rhawm heue.

¹ Yam an, simiang Herut mhong pa krai pui ka grawng Yesux. ² Mai ah nin ka kawncau nawh khankix, "In mawh Yohan cao cubcom. Nawh hoik deeh kaoh im khaing krax yum, mawh kheu nan, sibrawm khankix tom yuh kaing ka daux nawh heue." ³ Grawh grawng nawh, Herut hoik giex Yohan mai phyawk nawh mai sau nawh ka daux thawng, kheu Herodi moeng pux nawh Philipux heue. ⁴ Kheu Yohan, hoik ah nin ka nawh, "Pa teei maix bun in, ang khaw ka been heue." ⁵ Viang nawh mie ti pah Yohan yum kawx, nawh lhat ka pui hun, kheu hoik een kix nawh mawh cao jhai heue. ⁶ Viang mawh nan, yam hoek singaix keh Herut, kawn bun Herodi yuh graoh sinax kix mai jiet khaw ka rhawm Herut heue. ⁷ Mawh kheu nan, nawh tiextu ah nin ka bun an, maix rawg mhaing ka ceu patix ang ah aux tak sang tawx heue. ⁸ Bun an hawt yuh awm pa nhie miex nawh ah nin, "Tawx kaing Yohan cao cubcom ka aux tin daux tawg heue." ⁹ Simiang Herut khi rhawm kah, viang mawh nan kheu lox pa hoik tiextu nawh sivoe pui pa ngawm sawm tau mai nawh khankix, nawh tom tawx lox kieh tawx heue. ¹⁰ Nawh tom kieh kid kaing Yohan ka daux thawng heue. ¹¹ Kix viex kaing Yohan daux tawg mai tawx ka bunkrih an mai nawh viex ti tawx ka miex tix heue. ¹² Kawncau Yohan khankix hoek ti teei tokaux yum Yohan mai sipaung nawh mai kix hu krai nawh ka Yesux heue. ¹³ Yam mhong Yesux ka grawng an, Nawh Cao lih khaing tan, laig ka daux reu mai hu daux tiag dee ang pui ot, yam mhong pui hun khankix ka grawng in, kix lih khaing daux veng khankix mai hawt khaix Nawh Cao ka caong tix heue. ¹⁴ Yam lih hu Nawh Cao, Nawh yaox cub pui hun mai Nawh Cao caux rhawm ka kix mai cox pui saux khankix moi heue. ¹⁵ Yam hoek ponbo kawncau Nawh khankix hoek ka Nawh Cao ah nin, "Ka dee in mawh daux tiag mai bawg yam kawx hoik luan heue. Ploi pui hun khankix hu, sonsang hu laig ka daux yaong khankix mai liag ceu pa ih son tokaux tix heue." ¹⁶ Viang mawh nan Yesux ah nin ka kix, "Kix ang lo ti lih hu, pex tawx kix sawm heue." ¹⁷ Kix baox ah nin ka Nawh Cao, "Ex koe blah phwan lon mai kax iak ra mu ngie." ¹⁸ Nawh Cao baox ah nin, "Viex khankix hoek ka Aux heue." ¹⁹ Nawh Cao nhie pui hun khankix ngawm piang rib. Nawh Cao teei blah phwan lon mai kax ra mu an mai maong ka raoma mai Nawh Cao nawb bwan mai sivit blah tawx ka kawncau Nawh khankix mai kawncau Nawh tawx pui hun khankix ih heue. ²⁰ Khaix hoik sak ih pui khawmuik, kix deeh khrawm ti teei pa lheu pa max pa phawng mai naog kao ra phliex heue. ²¹ Pui pa ih khankix, simex giex, dex koe phwan rheng kaux, ang simin ka bun mai kawn nyawm khankix heue. ²² Dom mawx dom an, Nawh Cao nhie kawncau Nawh khankix laig daux reu mai hu sivoe Nawh plak toi rawm, yam ploi Nawh Cao cub pui hun khankix hu heue. ²³ Khaix hoik ploi Nawh Cao cub pui hun khankix hu, Nawh haok ka gawng dee ang pui ot, sonsang rawg tix bwan. Yam hoek ponsawm Nawh Cao ot tan nong nong heue. ²⁴ Yam an reu an ot sigreung rawm nhawng mai kha rhawm kheu pukpak rawm, kheu ang caw plak bhaung heue. ²⁵ Yam hoek bawg yam pa tah pon taix, yam ponsawm, Nawh Cao hoek ka kix, ka caong tix piang rawm nhawng heue. ²⁶ Yam yaox kawncau Nawh khankix ka pa hu Nawh Cao ka caong tix piang rawm nhawng, kix sidaing lhat ah nin, "Mawh miang heue." Kheu lhat kix kah, kix riag yo heue. ²⁷ Viang mawh nan dom mawx dom an, Yesux sikah mai kix, ah nin, "Gaux rhawm heue, mawh Aux, paw lhat kah" ²⁸ Petrux pawk lox Nawh Cao ah nin, "Simiang eue, phan mawh Maix, nhie aux hoek ka Maix piang rawm liak" ²⁹ Nawh Cao ah nin, "Hoek heue." Petrux lih khaing daux reu mai hu piang rawm ka caong tix, ka Yesux. ³⁰ Viang mawh nan, yam yaox nawh bhaung ting, nawh kied lhat mai jah ti laig ka daux rawm mai nawh kok yo ah nin, "Simiang eue, taoh aux liak." ³¹ Dom mawx dom an, Yesux nyeu taix tix giex nawh mai ah nin ka nawh, "Maix pa iak krax yum rhawm eue, maix chix ang yum rhawm yuh ka mawx lie?" ³² Yam hoik laig kiex ka daux reu, bhaung yiien hu heue. ³³ Kix pa ot ka daux reu, krub ka Nawh Cao ah nin, "Maix rug mawh Kawn Siyiex tete heue." ³⁴ Yam hoik tiang kix toi rawm plak an, kix hoek ka haktiex Giennesarit heue. ³⁵ Yam hoik tawng pui pa ot tan grawng mawh Nawh Cao, kix ploi pui hu kudah dee sivie siveng tan mai kix viex pui saux hoek ka Nawh Cao khawmuik. ³⁶ Kix khyox khaw ka Nawh Cao, sonsang pon kix ti teeh toh caong sibex Nawh mai pa teeh khankix ku kaux pon ti moi heue.

¹ Yam an Pharishie mai pui tiiem lai khankix kaoh khaing veng Yerusaliem mai hoek ka Yesux ah nin, ² "Yuh patix kawn cau Maix yuh pa ang khaw mai been tax yiex miex keeing? Kix ang khoek taix tix, yam ih priex heue." ³ Nawh Cao pawk lox ah nin ka kix, "Yuh patix pex chix lheu lox tawm jhawm krai Siyiex, kheu lox been prim pex lie?" ⁴ Kheu hoik ah Siyiex, "Yungyi ka miex keeing maix heue. Mai Kaw pa map ka miex keeing tix, tak kieh nawh yum tete heue." ⁵ Viang mawh nan pex ah nin, pui mawx krai ka miex keeing tix, ceu pa hoik pon maix khaing aux, tawx ka Siyiex. ⁶ Kaw an tak ang yungyi ka miex keeing tix. Mawh kheu nan, pex yuh gumlox Siyiex laux kheu been pex pa toe ti tawx tix ju hoik tix ju heue. ⁷ Pex pa mawh pui pie lhen khankix eue, Isayax hoik grux krai grawng pex mhawm mhawm, ah nin, ⁸ Pui ceu in, yungyi ka Aux ka siyieb jheeh tix ngie, viang mawh nan, rhawm kix singai khaing Aux heue. ⁹ Kix krub ka Aux giex going, kheu sidiex gau kix been pa yuh kawn pui heue." ¹⁰ Nawh Cao kok cub pui hun hoek ka tix mai ah nin ka kix, "Nghiiet mai tawng heue. ¹¹ Ang hoik mawh ceu pa laig ka daux jheeh pui kieh pui seeing brai, viang mawh nan, mawh ceu pa lih khaing jheeh pui pa kieh pui seeing brai heue." ¹² Yam an kawncau Nawh khankix hoek mai ah nin ka Nawh Cao, "Tawng Maix grawng pa thiang Pharishie khankix yam mhong kix ka lox pa ah nin lie?" ¹³ Nawh Cao pawk lox ah nin, "Khaox ku khaox, pa ang Keeing Aux sum piang Raoma, tak sang laoh ti tik heue. ¹⁴ Via kix heue, kix mawh pui dug ngai pa thong ka pui dug ngai heue. Phan pui dug ngai thong pui dug ngai, khawm ra kiex tak rau daux o heue." ¹⁵ Petrux pawk lox ah nin ka Nawh Cao, "Krai ex mhong lox tiag in liak." ¹⁶ Nawh Cao baox ah nin "Pex kawx ang nyang tawng tom yam in lie? ¹⁷ Ang pex tawng grawng ceu pa laig ka daux jheeh, laig ka daux vaig mai, deeh lih tik ka daux iang lie? ¹⁸ Ceu pa lih hoek khaing daux jheeh, mawh pa lih khaing daux rhawm mai chix kieh pui seeing brai heue. ¹⁹ Kheu ceu pa keud pa ang mhawm khankix, pa mawh ceu pa pah pui yum, ceu pa lud mai moeng pui, ceu pa lud mai bun, ceu pa briex, ceu pa kham mhai rug pa ang mawh meh mai ceu pa salao, lih khaing daux rhawm heue. ²⁰ Mawh ceu in khankix pa chix kieh pui seeing brai, viang mawh nan, pa ang khoek taix mai ih ceu pa ih, ang kieh pui mawh pa seeing brai." ²¹ Yesux lih hu khaing tan mai hu ka veng Turux mai veng Sidom heue. ²² Bun Khanan tix kaux lih hoek khaing haktiex an mai kok yo ah nin, "Simiang Kawn Davit eue, caux rhawm ka aux liak. Laig phicaox daux kawn bun aux kied sigrien sigre heue." ²³ Nawh Cao ang pawk lox ka nawh tix gum kawx. Kawncau Nawh khankix hoek khyox khaw ka Nawh Cao ah nin, "Kieh bun an hu liak, kheu nawh kok yo khaix ex heue." ²⁴ Nawh Cao pawk lox ah nin, "Ploi Aux hoek son yung pa hoik grai pa dex mai geh nyiex Isarelax ngie heue." ²⁵ Bun an hoek mai krub Nawh Cao mai khyox khaw ah nin, "Simiang eue, teem aux liak." ²⁶ Nawh Cao pawk lox ah nin, "Ang khaw ti teei blah cie kawn praix khankix, taing tawx ka sox khankix" ²⁷ Bun an deeh ah nin, "Mawh heue, Simiang eue, pie sox khankix kawx, ih pa cod pa roik greem pheen cao tix heue." ²⁸ Yam an Yesux baox pawk lox ah nin ka nawh, "Bun eue, krax yum rhawm maix kied ting heue, kieh mawh awm pa koe rhawm maix,"daux bawg yam nari an, kawn bun nawh moi heue. ²⁹ Yesux lih khaing tan mai tiang ka rawm nhawng Galilie mai Nawh Cao haok piang gawng mai ngawm tan heue. ³⁰ Cub pui hun khankix hoek ka Nawh Cao, viex pui laux caong, pui dug ngai, pui aw, pui laux maung mai pui tang kaux tom nie mai kix heue. Kix deuh khankix ka dex caong Nawh Cao mai Nawh Cao pai kix moi heue. ³¹ Pui haoh hun khankix daox deng kah, yam yaox kix pui aw deeh chix sikah, pui laux maung deeh mhawm, pui laux caong deeh chix hu, pui dug ngai deeh chix yaox mai kix yaog yaw ka Siyiex Isarelax heue. ³² Khaix an Yesux kok kawncau Nawh khankix hoek ka tix ah nin, "Aux caux rhawm ka pui hun khankix, kheu hoik ot kix mai Aux loe ngaix mai ang koe pa ih tidtix mai ang Aux rhawm ploi kix hu yam kawn cai rhawm kix. Phan yuh nan ha kix kox khrup hawt krax heue." ³³ Kawncau Nawh khankix ah nin ka Nawh Cao, "Ex sang pon blah dee mawx ka daux tiag in, sonsang tawx pui hun ding dawd ih tom sak lie?" ³⁴ Yesux baox chawk kix ah nin "Pex koe blah miex lon?"kix ah nin, "Koe aliah lon mai kax iak ceeix ngie heue." ³⁵ Nawh Cao nhie cub pui hun khankix ngawm piang tiex. ³⁶ Nawh Cao teei blah aliah lon an mai kax mai Nawh Cao yaogyaw bwanson mai sivit mai tawx ka kawncau khankix mai kawncau khankix tawx ka cub pui hun khankix heue. ³⁷ Khaix hoik ih tom sak khawmuik, kix khrawm pa max, pa phawng, pa lheu, naog aliah phliex heue. ³⁸ Kix pa ih, simex giex, koe pon rheng kaux, ang krai bun mai kawn nyawm khankix heue. ³⁹ Nawh Cao ploi cub pui hun khankix hu mai laig ka daux reu hu ka haktiex Magadalax.

¹ Pharishie mai Sadukie khankix hoek ti cheuk ka Nawh mai rawg Nawh Cao jhi kix yaox ka mhai rug pa daox deng khaing raoma heue. ² Viang mawh nan, Nawh Cao pawk lox ah nin ka kix, "Yam kawn mawh ponbo pex ah, Tak blang praix, kheu raoh raoma, ³ Yam ponngawb, praix ang mhawm daux singaix, bhaung tak phlu kheu raoh raoma mai ceep paiawm. Pex tawng sang caw ti teei dee bleeh pakpeung raoma lih, viang mawh nan, pex ang chix teei dee bleeh mhai grawng bawg yam khankix lih lie? ⁴ Baux ju pa caox mai ru pa lud, rawg mhai pa daox deng heue. Viang mawh nan lheu khaing mhai pa daox deng cao jhai Yonax, tak ang tawx mhai pa daox deng ka kix heue." Nawh Cao prah kix mai lih hu heue. ⁵ Yam hoik hoek kawncau khankix plak toi rawm plak an, kix piawm ti viex blah heue. ⁶ Yam an Yesux ah nin ka kix, "Rien rhawm pex ka susaix Pharishie mai Sadukie khankix heue." ⁷ Kix tix kaux lai tix kaux ah nin ka paox tix, "Mawh kheu ang ex viex blah heue." ⁸ Yesux tawng grawng an ah nin, "Pex pa iak krax yum rhawm khankix eue, kheu pa tix pex tix kaux lai tix kaux ah ka paox tix ka grawng ang blah koe lie? ⁹ Pex ang nyang tawng lie? Ang pex doh keud ka grawng blah phwan lon mai pui phwan rheng kaux mai pex deeh pon ti khrawm miex phliex? ¹⁰ Blah aliah lon mai pui pon rheng mai pex deeh pon ti khrawm miex phliex? ¹¹ Yuh patix pex khex ang tawng pa ang Aux krai grawng blah ka pex? Rien rhawm pex ka susaix Pharishie mai Sadukie khankix." ¹² Yam an kix tawng, Nawh Cao ang krai grawng sang rien rhawm ka susaix blah, rien rhawm ka lox sidiex lox gau Pharishie mai Sadukie khankix heue. ¹³ Yam hoek Yesux ka daux haktiex Kesarix Philippix mai Nawh Cao chawk ka kawncau Nawh khankix ah nin, "Ka mawh aux kawn pui, Pui ah Kawn kawn pui mawh mawx lie?" ¹⁴ Kix deeh ah nin, "Tix blah ah mawh Yohan cao cubcom, viang mawh nan tix blah ah mawh Eliyax mai tang kaux ah mawh Yeramix, phan ang mawh nan, mawh cao jhai tix kaux kaux heue." ¹⁵ Nawh Cao baox chawk ka kix ah nin, "Pex ah Aux mawh mawx?" ¹⁶ Simon Petrux pawk lox mai ah nin ka Nawh Cao, "Maix mawh Khrit Kawn Siyiex pa im ju heue." ¹⁷ Yesux deeh pawk lox ah nin ka nawh, "Simon Bayonax eue, maix koe bwanson heue. Kheu ang mawh nex nham pa plak jhi ka maix, mawh Keeing Aux pa ot ka daux meung raoma pa plak jhi heue. ¹⁸ Aux krai ka maix, maix mawh Petrux mai Aux tak sum ceucao Aux piang simaox in mai siviex meung yum ang doh pex ka ceu cao an heue. ¹⁹ Aux tak tawx jiak saw meung raoma ka maix heue. Maix phyawk ceu patix ang ah piang haktiex in, tak sang phyawk ka daux meung raoma mai maix kah ceu patix ang ah piang haktiex in, tak sang kah daux meung raoma heue." ²⁰ Yam an Nawh Cao tawm lox ka kawncau Nawh khankix, son ang kix sang krai grawng mawh Nawh Cao Khrit ka pui tix kaux kawx heue. ²¹ Jah ka yam an hu sivoe, Yesux jhi kawncau Nawh khankix yaox, grawng tak sang hu Nawh ka veng Yerusaliem mai kham geu tom nie ceu, daux tawm taix kuad song mai cao giex kaing li pa ting mai pui tiiem lai khankix mai grawng tak kham geu pa yum mai grawng tak deeh kaoh im khaix an daux loe ngaix tix ngaix heue. ²² Petrux teei Nawh Cao hu mai ah nin ka Nawh, "Simiang eue, tiebtie liak, paw kieh ceu in lih mawh ka Maix pie tix bawg kawx." ²³ Nawh Cao deeh veeh ah nin ka Petrux, "Satan eue, hu plak khaix Aux maix mawh dee sideeing ka Aux, kheu ang maix keud grawng ceu pa dex dawd mai Siyiex, viang mawh nan maix keud grawng ceu pa dex dawd mai kawn pui khaing." ²⁴ Yam an Yesux ah nin ka kawncau Nawh khankix, "Phan pui tix kaux kaux simie ti hawt khaix Aux, kieh nawh thiang ti tik ka tokaux tix mai klawm khaox lhak tix mai hawt Aux heue. ²⁵ Pui mawx ang ah, pa simie ti taoh ju tokaux tix, tak sang som ju heue. Pui mawx ang ah pa som ju son Aux, tak sang yaox ju heue. ²⁶ Phan pui tix kaux kaux pon haktiex khawmuik mai som ju tokaux tix, sang koe bwanson ceu pa tix? Lheu khaing an, pui sang teei pa tix, taoh ka ju tix lie? ²⁷ Kawn kawn pui tak sang hoek ka daux min plakngai Keeing tix, tau mai kawncau Siyiex khankix, yam an Nawh tak tawx ka pui ku kaux awm pa hoik yuh nawh heue. ²⁸ Aux krai lox tete ka pex, pui pa cung tin tix blah, tak ang cim krax yum tom yaox kix Kawn kawn pui hoek ka daux Meung tix heue."

¹ Khaix an liah ngaix, Yesux kok Petrux, Yakop mai Yohan pa mawh pux Yakop mai thong kix haok piang gawng lhaong dee ang pui ot, dee yien yawg, ² tokaux Nawh Cao loh tix sivoe kix tan mai pakngai Nawh jhan riang awm singaix mai kraung ceep Nawh lih paing awm pa riang heue. ³ Khaix an, kix yaox Eliyax hoek tau mai Mose kiex sikah mai Nawh Cao heue. ⁴ Petrux ah nin ka Yesux, "Simiang eue, phan ex ot tin mhawm son ex heue. Phan Maix koe rhawm, aux tak yuh nyiex bang tin loe lhang. Son Maix tix lhang, son Mose tix lhang mai son Eliyax tix lhang heue." ⁵ Yam kawn sikah nawh, dom mawx dom an paiawm pa riang hoek ti kheem veei piang kix mai jhak heue, lox lih khaing daux paiawm an ah nin, "In mawh Kawn pa moh Aux, pa khaw caw rhawm Aux heue, nghiet ka Nawh heue." ⁶ Yam mhong kawncau khankix ka lox an, kix kied lhat mai goh gup piang tiex heue. ⁷ Yesux hoek ti teeh ka kix ah nin, "Kaoh heue, paw lhat kah." ⁸ Yam maong kix ti jhak, kix ang yaox tix kaux kawx lheu khaing Yesux nong nong heue. ⁹ Yam lih hoek kix khaing gawng, Yesux tawm lox ka kix ah nin "Paw krai grawng riang susai pa hoik yaox pex ka pui tix kaux kawx, ka ang Kawn kawn pui nyang bax kaoh khaing yum." ¹⁰ Kawncau Nawh khankix chawk Nawh Cao ah nin, "Kheu pui tiiem lai khankix ah Eliyax tak sang hoek sivoe?" ¹¹ Nawh Cao deeh pawk lox ah nin, "Eliyax sang hoek tete mai deeh cox mhawm khawmuik heue. ¹² Viang mawh nan, Aux krai ka pex, Eliyax hoik hoek mai pui ang tawng ka nawh, viang mawh nan kix hoik yuh ka nawh awm pa simie kix ti yuh heue. Awm an Kawn kawn pui tak kham geu ka daux tawm taix kix heue." ¹³ Yam an kawncau khankix tawng Nawh Cao krai ka kix grawng Yohan cao cubcom heue. ¹⁴ Yam hoek kix dee ot cub pui hun, pui tix kaux hoek grux ngawng mai ah nin ka Nawh Cao, ¹⁵ "Simiang eue, caux rhawm ka kawn simex aux liak, kheu mawh nawh pui saux laung mai kied kham geu mai nawh goh daux ngu, daux rawm law lawx heue. ¹⁶ Aux hoik viex nawh hoek ka kawncau Maix khankix, viang mawh nan kix ang chix cox nawh moi heue." ¹⁷ Yesux pawk lox ah nin, "Baux ju pa ang koe krax yum rhawm mai pa tieh feen eue, Aux tak kawn sang ot mai pex miex grheung lie? Aux tak kawn sang gun yeung ka pex miex grheung lie? Viex nawh hoek ka Aux," ¹⁸ Yesux ah ka phicaox an mai phicaox an lih hu khaing nawh mai kawn simex an, moi bawg yam an tix taix neh heue. ¹⁹ Yam an kawncau khankix hoek ka Yesux dee ang pui ot mai chawk ah nin, "Kheu ex ang pon tix grheu phicaox an lih?" ²⁰ Nawh Cao deeh pawk lox ah nin ka kix, "Mawh kheu iak krax yum rhawm pex heue. Aux krai lox tete ka pex, phan pex koe krax yum rhawm pon mu simie sok taux klaox tix mu, pex tak ah ka gawng in, gah maix hu khaing tin ka dee an mai nawh tak gah tix heue. Pa ang pex chix yuh tak ang koe tix ceu kawx heue. ²¹ Viang mawh nan phicaox ceu in phan ang mawh kheu rawg bwan mai twah pa ih, ang chix ti lih heue." ²² Yam ot kix tau daux meung Galilie Yesux ah nin ka kix, "Bawg yam tawx Kawn kawn pui ka daux tawm taix kawn pui khankix dex sang hoek heue, ²³ mai kix tak pah Nawh yum, daux loe ngaix tix ngaix, Nawh tak sang deeh kaoh im heue." Kix kied khi rhawm ka heue. ²⁴ Yam hoek kix ka daux veng Kapeniom, pui pa koh keun nyiex bwan hoek ka Petrux ah nin, "Sara cao gau maix ang tawx mau keun nyiex bwan lie?" ²⁵ Nawh ah nin, "Tawx heue." Yam laig nawh daux nyiex, Yesux sikah ka nawh ah nin, "Simon eue, maix ce yuh ka mawx? Simiang haktiex khankix koh mau gha khaing pui mawx? Pon khaing kawn praix tix lie? Phan ang mawh nan pon khaing pui tang lie?" ²⁶ Yam nawh deeh pawk lox ah nin, "Pon khaing pui tang heue." Yesux ah nin ka nawh, "Phan mawh nan kawn praix kix pon pa luad luan heue. ²⁷ Viang mawh nan, son ang kix lud keud ka ex. Maix hu ka rawm nhawng mai ploi myiet tix mu mai teei kax pa liang ti pon mai yam hoik vih maix jheeh nawh maix tak yaox mau tix piak heue. Teei an tawx ka kix son Aux mai son maix heue."

¹ Daux bawg yam nari an kawncau khankix hoek ka Yesux, chawk ah nin, "Pui mawx pa nie ting khaing paox tix daux meung raoma?" ² Nawh Cao kok kawn nyawm iak tix kaux deuh sinax kix, ³ ah nin, "Aux krai lox tete ka pex, tom ang pex deeh tieh loh ti mawh awm kawn nyawm iak khankix, pex ang tau ti pon laig ka dau meung raoma heue. ⁴ Pui mawx ang ah, pa kieh rhawm tix awn awm kawn nyawm iak in, mawh pa nie lheu ting khaing paox tix ka daux meung raoma heue. ⁵ Pui mawx ang ah, pa rieb ti teei kawn nyawm iak pa awm in ka daux ceu kaux Aux, rieb ti teei Aux heue." ⁶ Viang mawh nan pui mawx ang ah, pa kieh kawn nyawm iak khankix pa yum rhawm ka Aux tix kaux kaux sideeing caong tix, ka kaw an, phan preue simaox mhaw pa ting ka ngawg nawh mai teei nawh cub daux rawm sigrit sigra dee raux, mawh pa nie mhawm heue. ⁷ "Haktiex in tak kha rhawm heue, kheu koe dee sideeing caong khankix. Dee sideeing caong khankix tak sang hoek, viang mawh nan, pui pa yuh dee sideeing caong tak kha rhawm heue. ⁸ Phan taix maix, caong maix, kieh maix sideeing, kid ti tik khaing maix heue. Laux taix caong maix mai laig ka daux pa im ju mhawm khaing koe taix caong maix ra khawn mai laig ka daux ngu leeing ju heue. ⁹ Phan ngai maix kieh maix sideeing tix, koh ti tik khaing maix. Koe ngai maix tix khawn mai laig ka daux pa im ju, mhawm khaing koe ngai maix ra khawn taing ti sau daux ngu mawnarhok heue." ¹⁰ "Rien rhawm tix paw nieb pon yuh ka kawn nyawm iak khankix tix kaux kawx, grawh grawng nawh, Aux krai ka pex, daux raoma kawncau Siyiex cie kix tak yaox pakngai pak baoh Keeing Aux pa ot ka daux meung raoma jheung jheung heue. ¹¹ Mawh kheu Kawn kawn pui hoek ti taoh ka pui pa grai khankix heue. ¹² Pex keud yuh ka mawx? Phan pui tix kaux kaux koe yung tix yieh mai yung tix mu hoik lud krax mai grai, nawh prah pa kawn koe tixdim dim mu piang gawng mai hu sawg yung pa hoik lud krax pa grai an ang mawh lie? ¹³ Aux krai lox tete ka pex, phan nawh hoik yaox, nawh nie lheu gaux rhawm ka grawng yung an, khaing yung pa ang grai tixdim dim mu heue. ¹⁴ Awm an Keeing pex pa ot ka daux meung raoma, ang koe alo ti kieh kawn nyawm iak an khankix laux leeing tix kaux kawx heue." ¹⁵ "Phan puxaik maix lut ka maix, hu jhi nawh yaox dee lut yam ot pax nong nong ngie, phan nawh nghiet ka lox maix, maix hoik pon puxaik maix heue. ¹⁶ Viang mawh nan, phan nawh ang nghiet ka lox maix, baox viex pui tix kaux ra kaux hu mai maix, yuh ka mawx sonsang mawh mhai rug pa kaux cong ra kaux phan ang mawh nan, loe kaux ka lox pa krai ku gum heue. ¹⁷ Phan nawh thiang mai ang cu ti nghiet lox kix, krai ceu cao mhong, phan nawh ca thiang mai ang cu ti nghiet lox ceu cao, kieh nawh mawh ka maix awm pui tang ceu mai pui koh mau heue. ¹⁸ Aux krai lox tete ka pex, ceu pa tiebtie pex patix ang ah piang haktiex in, tak sang tiebtie ka daux meung raoma mai ceu pa kah pex patix ang ah piang haktiex in, tak sang kah daux meung raoma heue. ¹⁹ Aux deeh krai ka pex, phan kiex ra kaux ih rhawm paox tix piang haktiex in, ka grawng pa rawg kiex tix ceu ceu, Keeing Aux pa ot daux meung raoma tak yuh son kiex heue. ²⁰ Mawh kheu ka dee khrawm pui ra loe kaux, ka daux ceu kaux Aux, Aux tak ot sinax kix heue." ²¹ Yam an Petrux hoek mai ah nin ka Nawh Cao, "Simiang eue, sang caw aux ti pluat ka phimap pa lud puxaik aux miex bawg lie? Tom sidah aliah bawg lie?" ²² Yesux ah nin ka nawh, "Aux ang krai ka maix tom sidah aliah bawg, Aux krai tom sidah hoek atixgliah aliah bawg heue. ²³ Mawh kheu nan meung raoma awm simiang ting tix kaux, pa sang sawn carang mau mai siliex nawh khankix heue. ²⁴ Yam jah nawh ti sawn carang, kaw pa ceuk talantan tix mheen hoek ka nawh heue. ²⁵ Viang mawh nan kheu kaw an ang pon tawx ceuk, simiang nawh nhie kix coh nawh mai moeng nawh mai kawn nawh khankix mai can pa koe nawh khawmuik, sonsang tawx ceuk ka nawh heue. ²⁶ Mawh kheu nan siliex an grux ti krub nawh ah nin, "Simiang eue, Gun yeung piang aux liak mai aux tak sang deeh tawx ka maix khawmuik." ²⁷ Simiang siliex an caux rhawm ka kaw an mai ploi nawh mai pluat ceuk nawh khawmuik heue. ²⁸ Viang mawh nan siliex an lih hu mai yaox paox siliex tix, tix kaux pa koe ceuk ka nawh denari tix yieh mai nawh giex nyhup ti kloeg ghok nawh ah nin, "Tawx pa ceuk maix ka aux." ²⁹ Mawh kheu nan paox siliex nawh grux ti krub ka nawh mai khyox khaw ah nin, "Gun yeung ka aux liak, aux tak sang deeh tawx ka maix heue." ³⁰ Viang mawh nan nawh ang nghiet, teei nawh sau daux thawng tom sidah hoik tawx nawh ceuk tix khawmuik heue. ³¹ Mawh kheu nan yam yaox paox siliex tang kaux khankix ka grawng pa yuh nawh, kix kied caux rhawm ka mai kix hoek ti krai simiang kix mhong grawng pa yuh kaw an khawmuik heue. ³² Yam an Simiang kok nawh hoek ka tix ah nin, Siliex pa caox eue, aux hoik pluat ceuk maix khawmuik, mawh kheu khyox khaw maix ka aux heue. ³³ Maix khaw ti caux rhawm ka paox siliex tix, awm hoik caux rhawm aux ka maix lie? ³⁴ Simiang nawh song rhawm mai tawx nawh ka tawm taix pui pa kieh kham geu, tom sidah hoik tawx nawh ceuk tix khawmuik heue. ³⁵ Phan pex ku kaux ang pluat phimap puxaik tix, khaing daux rhawm pex awm an Keeing Aux piang raoma kawx tak sang yuh nan ka pex heue."

¹ Khaix hoik sidiex Yesux lox ceu an khankix, Nawh Cao lih hu khaing meung Galilie mai hoek ka daux haktiex Yudax plak toi rawm Yawdan heue. ² Cub pui hun khankix hawt Nawh Cao mai Nawh cox jhawm saux kix moi tan heue. ³ Pharishie khankix hoek ka Nawh Cao sonsang cheuk ti yaox rhawm Nawh mai chawk ah nin, "Phan pui tix kaux tik moeng tix kheu grawng tix ceu ceu, khaw ka been lie?" ⁴ Nawh Cao pawk lox ah nin, "Ang pex sax phat grawng Kaw pa yuh kix yam jah, yuh kix mawh simex mai sibun, ⁵ "Mawh kheu in simex tak prah miex keeing tix mai ot tau mai moeng tix mai kiex ra kaux tak mawh nex nham tix mu khaing, ⁶ Mawh kheu in, kiex ang lai mawh ra kaux, viang mawh nan mawh nex nham tix kaux khaing heue. Mawh kheu in, pa hoik kleuk Siyiex tau, paw kieh pui tix kaux kawx yieh laux heue." ⁷ Kix ah nin ka Nawh Cao, "Phan mawh nan Mose chix tawx lox kieh tawx lai grawng pa hoik hoik lox mai tik ka bun?" ⁸ Nawh Cao baox ah nin ka kix, "Mawh kheu kiien rhawm pex Mose tom kieh pex tik moeng tix heue, viang mawh nan yam jah ang mawh nan. ⁹ Aux krai ka pex, pui mawx ang ah phan nawh tik moeng tix lheu khaing grawng pa lut pa vao nawh mai teei ti moeng tang kaux, nawh hoik lut vao heue. Kaw pa teei ti moeng bun pa hoik tik an, nawh hoik lut vao heue." ¹⁰ Kawncau khankix ah nin ka Nawh Cao, "Phan grawng ceu in lih mawh ka simex mai moeng, ang khaw teei ti moeng heue." ¹¹ Nawh Cao ah nin ka kix, "Pui khawmuik ang pon rieb ti teei ka lox in, viang mawh nan mawh pui pa hoik pon akhwang khaing pa pon rieb ti teei heue. ¹² Kheu koe pa mawh pui sieh tom yam keh khaing daux vaig miex tix mai koe pui sieh pa hoik yuh kieh mawh pui sieh mai koe pui sieh pa hoik yuh tokaux tix mawh pui sieh son meung raoma heue. Kaw pa chix rieb ti teei kieh nawh rieb ti teei heue." ¹³ Yam an kix viex kawn nyawm iak khankix hoek ka Nawh Cao, sonsang deuh Nawh taix tix piang kix mai rawg bwan heue. Viang mawh nan, kawncau khankix ah ka pui khankix heue. ¹⁴ Yesux ah nin, "Kieh kawn nyawm iak khankix hoek ka Aux, paw sidien kix, kheu meung raoma mawh cie pa awm kix heue." ¹⁵ Nawh Cao deuh taix tix piang kix mai lih hu khaing tan heue. ¹⁶ Khaix an, pui tix kaux hoek ka Nawh Cao ah nin, "Sara cao gau eue, sonsang pon aux ju leeing ju, aux tak yuh pa mhawm, ceu pa yuh ka mawx lie?" ¹⁷ Nawh Cao ah nin ka nawh, "Yuh ka mawh maix lai chawk aux ka grawng ceu pa mhawm lie? Pa mhawm koe tix kaux khaing, viang mawh nan, phan maix simie ti laig ka daux pa im ju, priex ti hawt gumlox pingnyap khankix heue." ¹⁸ Kaw an baox ah nin ka Nawh Cao, "Pingnyap pa yuh ka mawx?"Yesux ah nin, "Paw pah pui yum, paw lut vao, paw briex mai paw kham mhai rug pa ang mawh ang meh, ¹⁹ yungyi ka miex keeing tix, moh paox plawg paox nyhawm tix awm moh maix ka tokaux tix heue." ²⁰ Pui awn ju an baox ah nin ka Nawh Cao, "Aux hoik hawt yuh ceu in khankix khawmuik heue. Aux kawn cha ceu patix?" ²¹ Yesux baoh ah nin ka nawh, "Phan maix simie ti grum naog, hu coh ceu pa koe maix, tawx ka pui hot sibhawm khankix mai maix tak koe sin ngao ka daux meung raoma. Hoek heue, hawt khaix Aux heue." ²² Viang mawh nan yam mhong pui awn ju an lox an, nawh khi rhawm mai lih hu heue. Kheu mawh nawh pui pa koe kraung khrai tom nie heue. ²³ Yesux ah nin ka kawncau Nawh khankix, "Aux krai lox tete ka pex, pui pa mawh cao mi, nu ti laig ka daux meung raoma heue. ²⁴ Aux baox krai ka pex, laig kala-uk daux kre nyex nie lheu yie khaing laig cao mi ka daux meung Siyiex heue." ²⁵ Yam mhong kawncau Nawh khankix ka lox an, kix kied daox deng kah ah nin, "Phan mawh nan, pui mawx tak sang pon hoek krax taoh?" ²⁶ Yesux jhak kix ah nin, "Grawng in kawn pui ang chix yuh, viang mawh nan Siyiex chix yuh kuceu khawmuik heue." ²⁷ Yam an Petrux pawk lox mai ah nin ka Nawh Cao, "Ex hoik prah pa koe tix khawmuik mai hawt khaix Maix. Mawh kheu nan ex tak pon ceu patix?" ²⁸ Yesux baoh ah nin ka kix, "Aux krai lox tete ka pex, pex pa hoik hawt khaix Aux khankix, ka daux haktiex pa khraox, yam tak ngawm Kawn kawn pui piang dang ngeung min plakngai Nawh, pex kawx, tak sang ngawm piang dang ngeung kao ra mu mai prawng ka pui Isarelax kao ra ceu heue. ²⁹ Pui mawx ang ah pa hoik prah grham nyiex nawh, puxaik nawh, nan nawh, keeing nawh, miex nawh, kawn praix nawh, ma kaung nawh khankix, kheu ceu kaux Aux, tak sang pon bwanson tix yieh son mai sinngao ju leeing ju heue. ³⁰ Pui pa dha khaix tom nie tak ot ka mai pui pa ot ka tom nie tak dha khaix heue."

¹ Meung raoma awm cao sipeem tix kaux, pa lih hu ponngawb caocao, sonsang sawg pui cang pui yuh kaing ka daux sipeem plix siiet tix heue. ² Khaix hoik khaw rhawm ka mau ngawh riang son tix ngaix tix plah denari, nawh ploi kix hu ka sipeem plix siiet tix heue. ³ Nawh baox lih hu bawg loe taix mai nawh yaox pui tang kaux khankix pa ang yuh tid tix cung ka daux lah heue. ⁴ Nawh ah nin ka kix, "Pex kawx hu ka daux sipeem plix siiet mai khaw tix tawx miex ding aux tak tawx ka pex"Kix kawx hu heue. ⁵ Yam hoek koe been 6 taix mai dim taix nawh deeh baox lih hu mai yuh awm phao ka heue. ⁶ Yam koe kao tix taix nawh baox lih hu mai yaox pui tang kaux khankix cung, nawh baox ah nin ka kix, "Kheu pa tix pex lai cung, ang pex yuh tid tix leeing lang singaix lie?" ⁷ Kix deeh ah nin ka nawh, Mawh kheu pui tix kaux kawx ang cang yix. Nawh ah nin ka kix, Pex kawx hu ka daux sipeem plix siiet heue. ⁸ Yam hoek ponbo, cao sipeem plix siiet ah nin ka kaw pa jhak ka kaing nawh, Kok pui pa yuh kaing khankix mai tawx riang kix, jah ka pui pa hoek ti yuh dha khaix, tom hoek ka pui pa yuh phao ka heue. ⁹ Yam hoek pui pa cang bawg yam kao tix taix, kix ku kaux pon denari tix kaux tix plah heue. ¹⁰ Yam hoek pui pa yuh phao ka paox tix, kix ce ti sang nie lheu pon nie khaing paox tix, viang mawh nan, kix ku kaux kawx pon denari tix kaux tix plah heue. ¹¹ Yam hoik pon kix yuh nan, kix sibriem ka cao sipeem, ¹² Ah nin, Pa hoek yuh khaix khankix tak yuh tix taix ngie khaing maix hoik tawx ka kix situ awm yix pa hoik yuh kaing leeing lang singaix mai kham geu pa kied hax koek. ¹³ Viang mawh nan, nawh baox pawk lox ah nin ka kix tix kaux, Paox grawm eue, aux ang yuh pa ang khaw ka maix tix ceu kawx maix hoik khaw rhawm ka ngawh riang pa tat son denari tix plah ang mawh lie? ¹⁴ Teei pa khaw maix ti pon mai hu heue. Mawh Aux pa koe rhawm ti tawx ka pui pa dha khaix awm pa hoik tawx aux ka maix. ¹⁵ Aux ang koe akhwang ti laug yuh ka ceu pa shiang ka aux lie? Phan ang mawh nan boh rhawm maix kheu mhawm rhawm aux lie? ¹⁶ Kheu nan pa dha khaix tak ot ka mai pa ot ka, tak dha khaix heue. Viang pa kok koe tom nie kawx, pa laug ti teei kied tux heue." ¹⁷ Yam haok hu Yesux ka veng Yerusaliem, Nawh Cao teei kawncau tix kao ra kaux, hu dee ang pui ot mai yam hu kix krax Nawh ah nin ka kix, ¹⁸ "Ex tak sang haok hu ka veng Yerusaliem mai tak sang teei ti tawx Kawn kawn pui ka cao giex kaing li pa ting khankix mai pui pa tiiem lai khankix mai kix tak sang prawng ca kieh Nawh yum heue. ¹⁹ Tawx Nawh ka pui tang ceu khankix, sonsang yuh kix pa ang cee mai sivied Nawh mai tawk Nawh yum piang khaox lhak mai daux loe ngaix tix ngaix Nawh tak sang deeh kaoh im heue." ²⁰ Yam an miex kawn Zebedie hoek tau mai kawn kiex khankix ka Nawh Cao, grux ngawng sivoe Nawh mai rawg tix ceu ka Nawh Cao heue. ²¹ Nawh Cao ah nin ka kiex, "Lo maix ceu pa tix?"Kiex deeh ah nin ka Nawh Cao, "Tawx lox kieh kawn aux ra kaux in ngawm plak taix khawn dawm Maix tix kaux mai plak taix khawn gwiex maix tix kaux daux meung Maix liak." ²² Viang mawh nan Yesux pawk lox ah nin "Pex ang tawng ka ceu pa rawg pex. Pex chix nyaux ka kawk pa nyaux Aux lie?"Kix baox ah nin ka Nawh Cao, "Chix tix heue." ²³ Nawh Cao baox ah nin ka kix, "Kawk pa nyaux Aux, pex tak sang nyaux tete, viang mawh nan pa ngawm plak taix khawn dawm Aux mai plak taix khawn gwiex Aux, ang mawh cie pa chix Aux ti tawx, viang mawh nan mawh pa hoik cox khre Keeing Aux son pui khankix heue." ²⁴ Yam mhong kawncau Nawh kao kaux ka grawng ceu an, kix song rhawm ka puxaik an ra kaux heue. ²⁵ Viang mawh nan Yesux kok kix hoek ka tix ah nin, Pex tawng grawng pa ot simiang cao kwang pa mawh pui tang ceu khankix piang kix mai pui pa ting khankix, koe sibrawm piang kix heue. ²⁶ Ka daux pex tak ang mawh nan, pui mawx mie ti mawh pa ting, caw ti mawh kawncau pex heue. ²⁷ Ka daux pex, pui mawx pa simie ti mawh pa ting, caw ti mawh siliex pex heue. ²⁸ Awm Kawn kawn pui hoek sonsang kieh pui yuh son tix ang mawh, hoek sonsang yuh son pui mai tawx ju tix, kieh mawh ngawh riang pa taoh son pui khankix heue." ²⁹ Yam lih hu kix khaing veng Yerikho cub pui hun hawt khaix Nawh Cao heue. ³⁰ Jhak heue, pui dug ngai ra kaux ngawm dex krax mai yam mhong kiex grawng hu Yesux praok kiex, kiex kok yo ah nin, "Simiang kawn Davit eue, caux rhawm ka yiex liak." ³¹ Cub pui hun ah ka kiex, nhie kiex yawg tix, viang mawh nan kiex nie kok yo ah nin, "Simiang kawn Davit eue, caux rhawm ka yiex liak." ³² Yesux cung kaog mai kok kiex ah nin, "Pax sang kieh Aux yuh ceu patix ka pax?" ³³ Kiex ah nin ka Nawh Cao, "Simiang eue, yuh ngai yiex kieh blah liak." ³⁴ Yesux caux rhawm, teeh ngai kiex, dom mawx dom an kiex deeh chix yaox mai hawt khaix Nawh Cao heue.

¹ Yam dex hoek kix ka veng Yerusaliem, hoek ka yaong Bephake, pa koe ka dex gawng Sanlun, yam an Yesux ploi kawncau Nawh ra kaux hu, ² mai ah nin ka kiex, "Hu ka daux yaong pa koe sivoe pax mai dom mawx dom an pax tak yaox ka la pa hoik phyawk pa ot kawn tau mai nawh. Kah, viex hoek ka Aux awx. ³ Phan pui tix kaux kaux, ah tix ceu ceu ka pax, pax tak deeh krai ah nin, Simiang koe ceu lo heue, kaw an tak ploi hoek dom mawx dom an heue. ⁴ Ceu in hoik mawh, sonsang naog lox cao jhai pa ah nin, ⁵ "Pex krai ka kawn bun Zion, Jhak heue, Simiang maix hoek ka maix, viex rhawm awn mai brug, Ka piang kawn la awn ju heue." ⁶ Kawncau ankiex hu yuh awm pa hoik nhie Yesux kiex yuh heue, ⁷ viex la mai kawn la awn ju hoek sau kraung ceep kix piang la mai Nawh Cao ngawm piang heue. ⁸ Ka daux cub pui hun plak nie teei kraung ceep tix nah ti tawm ka daux krax mai tang kaux khankix kid kak khaox tawm ka daux krax heue. ⁹ Cub pui hun khankix, pa hu sivoe mai pa hawt khaix Nawh Cao kok yo ah nin, "Hosanna ka Kawn Davit, Kaw pa hoek ka daux ceu kaux Simiang ting bwanson heue. Hosanna dee lhaong khaing paox tix heue." ¹⁰ Yam laig Nawh Cao ka daux veng Yerusaliem, khawm veng khawmuik lulax rhawm, lawh maw mai chawk ah nin, "Kaw in mawh mawx?" ¹¹ Cub pui hun khankix ah nin, "In mawh cao jhai, Yesux, pa hoek khaing veng Nazariet ka daux meung Galilie heue." ¹² Yesux laig ka daux nyiex bwan Siyiex mai grheu pui pa coh pa liag ka daux nyiex bwan khankix lih mai cot pheen pui pa loh mau khankix mai dee ngawm pui coh sikaux khankix cang klud heue. ¹³ Nawh Cao ah nin ka kix, "Hoik tiiem ti deuh ah nin, Nyiex Aux tak kok mawh dee rawg bwan heue. Viang mawh nan pex hoik kieh mawh Dee ot pui tud rhim heue." ¹⁴ Pui dug ngai mai pui laux caong khankix hoek ka Nawh Cao ka daux nyiex bwan mai Nawh cox kix moi heue. ¹⁵ Viang mawh nan yam cao giex kaing li pa ting khankix mai pui tiiem lai khankix yaox ceu pa daox deng pa yuh Nawh Cao khankix mai kawn nyawm khankix pa kok yo ka daux nyiex bwan ah nin, "Hosanna ka Kawn Davit"kix song rhawm ka, ¹⁶ mai ah nin ka Nawh Cao, "Mhong Maix pa ah pui ceu in khankix lie?"Yesux ah nin ka kix, "Mawh heue, ang pex sax phat, Maix hoix kieh krax yaog yaw grum, khaing daux jheeh kawn nyawm iak, Kawn nyawm peuex khankix, lie." ¹⁷ Nawh Cao prah kix mai lih hu khaing daux veng, ka yaong Betanix, mai it tan heue. ¹⁸ Yam deeh ing Nawh Cao ka veng plak ponngawb cao, Nawh cai rhawm, ¹⁹ yaox khaox ruh tix khaox dex krax mai Nawh Cao hu ka khaox an, yaox ngie lhax giex mai Nawh Cao ah nin ka khaox an, "Jah yam in tom hoek leeing ju, paw lai kieh maix plix tix bawg kawx"Dom mawx dom an, khaox ruh an fit mai kroh hu heue. ²⁰ Yam yaox kawncau khankix ka in, kix kied daox deng ka ah nin, "Khaox ruh in chix kroh hu dom mawx dom an yuh ka mawx?" ²¹ Yesux pawk lox ah nin ka kix, "Aux krai lox tete ka pex, phan pex koe krax yum rhawm, pa ang sang tang rhawm, pex tak ang joeng pon yuh pa hoik yuh ka khaox ruh in khaing, phan pex ah ka gawng in kawx, gah dee ot maix mai rau ka daux rawm sigrit sigra, tak sang mawh awm ah pex heue. ²² Ceu pa rawg mhaing pex, ka daux krax pa yum rhawm, pex tak pon heue." ²³ Yam hoek Nawh Cao ka daux nyiex bwan, cao giex kaing li pa ting khankix mai kuad song pui khankix hoek ka Nawh Cao yam sidiex gau Nawh ah nin, "Maix yuh ceu in khankix ka akhwang sibrawm pui mawx? pui mawx pa tawx sibrawm in ka Maix?" ²⁴ Yesux pawk lox ah nin ka kix, "Aux kawx tak sang chawk pex ka grawng tix ceu, phan pex pon pawk ka Aux, Aux kawx tak sang krai ka pex grawng pa pon Aux akhwang sibrawm ti yuh ceu in khankix dee mawx heue. ²⁵ Krax cubcom Yohan kaoh khaing dee mawx? Kaoh khaing raoma lie, phan ang mawh nan kaoh khaing kawn pui lie?" Kix keud tau ah nin, "Phan ex ah, Kaoh khaing raoma, Nawh Cao tak chawk ah nin, Phan mawh nan yuh patix pex ang yum rhawm ka nawh? ²⁶ Viang mawh nan phan ex ah, Kaoh khaing kawn pui, ex lhat ka cub pui hun khankix, kheu kix khawmuik een Yohan mawh cao jhai heue." ²⁷ Mawh kheu nan kix pawk lox ka Yesux ah nin, "Yix ang tawng heue."Nawh Cao baox ah nin ka kix, "Aux kawx ang krai ka pex grawng pon Aux akhwang siawp sibrawm ti yuh ceu in khankix khaing dee mawx heue." ²⁸ Pex ce yuh ka mawx? Pui tix kaux koe kawn simex ra kaux mai nawh hu ka kaw phao ka ah nin, Kawn simex aux eue maix hu ka daux sipeem plix siiet singaix heue." ²⁹ Nawh deeh pawk lox ah nin, " Aux ang hu, viang mawh nan khaix an nawh doh keud ka phimap tix mai hu heue. ³⁰ Pui an hu ka kawn nawh ra kaux tix kaux mai ah awm pa hoik ah nawh phao ka. Kawn an pawk lox ah nin, Keeing, Aux sang hu heue, viang mawh nan, nawh ang hu. ³¹ Kiex ra kaux, mawh mawx pa hawt yuh alo keeing tix?" kix ah nin, "Kaw phao ka heue." Yesux ah nin ka kix, "Aux krai lox tete ka pex, pui pa koh mau khankix mai bun pa coh kaux tix, tak laig ka daux meung Siyiex ka pex heue. ³² Kheu hoek Yohan ka pex daux krax pa rahsee, pex ang yum rhawm ka nawh, viang mawh nan pui koh mau khankix mai bun pa coh kaux tix khankix yum rhawm ka nawh heue. Pex hoik yaox ka grawng in kawx, pex ang doh keud ka tokaux tix mai ang yum rhawm ka nawh." ³³ "Pex baox nghiet lox tiag tang ceu tix ceu heue. Koe cao sipeem plix siiet tix kaux, pa sum plix siiet tix dah mai vie vung viang sipeem an mai kaong dee biiet rawm plix siiet mai sum nyiex lhaong pa pau sipeem tix lhang mai nawh tawx pui vai ka sipeem plix siiet an mai hu ka praix tang klawng heue. ³⁴ Yam dex hoek bawg yam sang teem plix, nawh ploi kawncau tix khankix hu ka pui yuh sipeem, sonsang teei plix cie nawh heue. ³⁵ Pui yuh sipeem khankix giex kawncau nawh mai tap toi ka tix kaux, pah yum ka tix kaux mai dheem ka simaox tix kaux heue. ³⁶ Nawh baox deeh ploi kawncau tang kaux khankix hu, nie lheu khaing phao ka mai pui yuh sipeem khankix yuh ka kix awm pa hoik yuh phao ka an heue. ³⁷ Khaix an nawh keud ah nin "Kix tak yungyi ka kawn aux,"mai ploi kawn tix hu ka kix heue. ³⁸ Viang mawh nan, yam yaox pui yuh sipeem khankix ka kawn nawh, kix ah nin ka paox tix, "Kaw in mawh cao sin. Hoek, ex pah nawh yum mai teei sin nawh." ³⁹ Kix giex nawh mai taing nawh plak praix sipeem mai pah nawh yum heue. ⁴⁰ Yam hoek cao sipeem, nawh tak sang yuh pa tix ka pui yuh kaing sipeem khankix lie?" ⁴¹ Kix ah nin ka Nawh Cao, "Nawh tak yieh laux ka pui caox an khankix yum, mai nawh tak sang deeh tawx pui vai ka sipeem plix siiet nawh ka pui tang kaux, pa tak tawx plix siiet ka nawh, yam hoek bawg yam teem plix heue." ⁴² Yesux baoh ah nin ka kix, "Ang pex sax phat ka daux Phuk lai sigang khri pa ah nin lie? Simaox pa hoik tik pui pa yuh nyiex, hoik yuh kieh mawh kaing ka daog. In mawh pa yuh Siyiex, mai mawh pa daox deng ka ngai ex heue. ⁴³ Mawh kheu nan Aux krai ka pex, tak teei Meung Siyiex khaing pex mai tawx ka pui pa chix plix, plix pa dex dawd mai Meung Siyiex heue." ⁴⁴ Pui pa rau piang simaox in, tak pot mai simaox in phan rau piang pui mawx ang ah, tak kieh nawh phawng awm phawng tiex heue." ⁴⁵ Cao giex kaing li pa ting khankix mai Pharishie, khankix yam mhong kix lox tiag Nawh Cao, kix tawng Nawh krai grawng kix heue. ⁴⁶ Yam sawg kix ti giex ka Nawh Cao, kix lhat ka cub pui hun khankix, kheu kix ce Nawh mawh cao jhai heue.

¹ Yesux pawk lox mai deeh krai lox tiag tix blah ka kix ah nin, ² "Meung Siyiex awm simiang ting tix kaux, pa yuh pawie ku paox son kawn simex tix heue. ³ Nawh ploi kawncau tix khankix hu kok ka kix pa hoik ghaok ka pawie ka paox glang ka an, viang mawh nan kix ang hoek. ⁴ Nawh baox deeh ploi kawncau nawh tang kaux ah nin, krai ka kix pa hoik ghaok, aux hoik cox khre pa ih mai hoik pah mawie, tobrie pa kluing khankix mai hoik cox khre ti deuh kuceu, hoek ih pawie ku paox liak. ⁵ Viang mawh nan, kix ang cu nghiet mai hu khaing tan, tix kaux hu ka ma, mai tang kaux hu ka kaing lai geu yuh tix heue. ⁶ Kix pa deuk tan, giex kawncau an khankix mai yuh pa ang khaw ka kix mai pah kix yum heue. ⁷ Simiang ting an song rhawm kah mai ploi pui naing nawh khankix hu yieh mai yuh pui pa pah khankix laux leeing mai gleeing veng kix heue. ⁸ Khaix an nawh ah nin ka kawncau nawh khankix, hoik khre rien ka pawie ka paox, viang mawh nan kix pa hoik ghaok ang keung ka pawie heue. ⁹ Mawh kheu nan pex hu ka gah krax ting khankix mai ghaok pui pa yaox pex ka pawie ku paox tom nie awm pa chix pex heue. ¹⁰ Kawncau nawh khankix lih hu ka krax ting khankix mai khrawm pui pa yaox kix khawmuik, khawm pui pa caox mai pa mhawm, mawh kheu nan nyo naog ka pawie ka paox heue. ¹¹ Viang mawh nan yam laig simiang ting ti jhak ka nyo khankix, nawh yaox pui pa ang ceep kraung ka paox tix kaux. ¹² Nawh ah nin ka kaw an, paox grawm eue, yuh patix maix lai hoek tin maix khex ang ceep kraung ka paox lie? kaw an ang nye ka heue. ¹³ Khaix an simiang ting an ah nin ka kawncau nawh khankix, phyawk taix caong nawh taing daux pa faik plak praix, dee yiiem riag mai dee greeik rhang heue. ¹⁴ Grawh grawng nawh, pa kok koe tom nie, viang mawh nan pa laug ti teei kied tux heue." ¹⁵ Yam an Pharishie khankix kum kawng paox tix, grawng sang pon kix ti yaox dee lud lox Nawh Cao heue. ¹⁶ Mawh kheu nan, kix ploi kawncau kix khankix hu tau mai pui Herut khankix ka Nawh Cao, ah nin, "Sara cao gau eue, yix tawng Maix mawh pa mawh meh mai sidiex gau grawng krax Siyiex rahsee mai ang lhat ka pui tix kaux kawx heue. Kheu ang Maix jhak ka pakngai kawn pui heue. ¹⁷ Mawh kheu nan, Maix ce yuh ka mawx, krai ex mhong liak. Khaw tix tawx mau koh ka simiang Kesa lie, ang khaw ti tawx lie?" ¹⁸ Viang mawh nan Yesux tawng grawng pa caox pa keud kix ah nin, "Pui pie lhen khankix eue, pex nyaw cheuk ti yaox Aux yuh ka mawx? ¹⁹ Jhi Aux yaox ka mau koh heue." Kix viex denari tix plah hoek ka Nawh Cao heue. ²⁰ Nawh Cao chawk ah nin ka kix, "In mawh riang mawx ceu kaux pui mawx?" ²¹ Kix deeh ah nin ka Nawh Cao, "Mawh riang mai ceu kaux Simiang Kesa heue."Yam an Nawh Cao baox ah nin ka kix, "Mawh kheu nan ceu pa mawh cie Kesa tawx ka simiang Kesa heue. Ceu pa mawh cie Siyiex tawx ka Siyiex heue." ²² Yam mhong kix lox an, kix kied daox deng ka heue. Prah Nawh Cao mai hu khaing tan heue. ²³ Ka daux ngaix an Sadukie khankix, pa ang yum rhawm ka grawng deeh kaoh im hoek ka Nawh Cao mai chawk lox tix gum ah nin, ²⁴ "Sara Cao gau eue, Mose krai ah nin, pui tix kaux ang koe kawn, phan yum, pux nawh tak deeh teei moeng nawh, son ang ceu cat puxke bawt heue. ²⁵ Yam an koe puxaik aliah kaux mai yix. Kaw phao ka tix kaux teei ti moeng mai yum heue. Ang koe kawn mai nawh prah moeng tix mai pux nawh heue. ²⁶ Awm an ra kaux tix kaux mai loe kaux tix kaux. Tom sidah hoek ka aliah kaux tix kaux yum heue. ²⁷ Khaix hoik yum kix khawmuik, bun an kawx yum heue. ²⁸ Mawh kheu nan, yam hoek bawg yam deeh kaoh im, ka daux kix aliah kaux bun an tak mawh moeng kaw mawx lie? Kheu kix khawmuik hoik to moeng ka nawh heue." ²⁹ Yesux pawk lox ah nin, "Pex lud kheu ang pex tawng phuk lai sigang khri mai sibrawm Siyiex. ³⁰ Bawg yam deeh kaoh im sax, ang lai teei mex, moeng kix tak awm kawncau raoma heue. ³¹ Ka grawng pa deeh kaoh im, pex ang sax phat pa hoik krai Siyiex ka pex ah nin lie? ³² Aux mawh Siyiex Abraham, Siyiex Icak mai Siyiex Yakop heue. Siyiex ang mawh Siyiex pui pa yum, viang mawh nan mawh Siyiex pui pa im heue." ³³ Yam mhong cub pui hun khankix lox an, kix kied daox deng ka lox sidiex gau Nawh Cao heue. ³⁴ Viang mawh nan yam mhong Pharishie khankix, ka grawng hoik kieh Nawh Cao yawg yiien ka Sadukie khankix, kix khrawm paox tix heue. ³⁵ Ka daux kix tix kaux pa mawh cao prawng, cao tawng lai been chawk Nawh Cao ka lox tix ceu, sonsang cheuk ti yaox ka Nawh heue. ³⁶ "Sara cao gau eue, ka daux lai beenli, lox pingnyap pa yuh ka mawx, lheu ting khaing paox tix?" ³⁷ Nawh Cao ah nin ka nawh, "Maix tak moh Siyiex maix khawm rhawm tix khawmuik mai khawm ju tix mai khawm pa chix keud chix tawng tix khawmuik heue. ³⁸ In mawh pingnyap pa ting lhaong phao ka heue. ³⁹ Pingnyap ra gum tix gum pa ah nin kawx awm in heue. Maix tak moh paox plawg paox nyhawm tix awm moh ka tokaux tix heue. ⁴⁰ Ka daux lox pingnyap ra gum in lox lai beenli mai lox cao jhai khawmuik hoik grum ka heue." ⁴¹ Yam khrawm Pharishie khankix paox tix, Yesux chawk kix ka lox tix gum, ⁴² Ah nin, "Pex ce grawng Khrit yuh ka mawx? Nawh mawh Kawn mawx?"kix ah nin ka Nawh Cao, "Mawh kawn Davit heue." ⁴³ Nawh Cao baox ah nin ka kix, "Phan mawh nan yuh ka mawx Davit kok Nawh mawh Simiang ka daux Khuan ah nin, ⁴⁴ Simiang ah nin ka Simiang aux, Ngawm plak taix khawn dawm Aux, tom Aux deuh pui pa koeng ka Maix, ot greem caong Maix?" ⁴⁵ Phan Davit kok Nawh mawh Simiang, Nawh chix mawh kawn nawh yuh ka mawx?" ⁴⁶ tix kaux kawx, ang chix pawk ka lox Nawh Cao tix gum kawx mai khaix ngaix an pui ang lai kan chawk lox ka Nawh Cao heue.

¹ Yam an Yesux sidiex gau ka cub pui hun mai kawncau Nawh khankix, ah nin, ² "Pui tiiem lai khankix mai Pharishie khankix ngawm piang dee ngawm Mose heue. ³ Ceu pa sidiex kix ka pex, pex priex mai hawt yuh heue. Viang mawh nan paw hawt yuh awm pa yuh kix. Kheu patix kien nie, kix sidiex kawx kix ang hawt yuh. ⁴ Mawh heue, kix phyawk kraung pa cien, pa nu ti klawm mai deuh piang klip pui khankix heue. Viang mawh nan tokaux kix ang gah ka kraung an ka gien taix kix heue. ⁵ Pa yuh kix khawmuik kix yuh sonsang yaox kawn pui khaing heue. Kheu ceep kix sibex pa vieh hau, pa sau ti deuh lai Siyiex, pa mawh sibex ting ciem tai ka heue. ⁶ Kix moh dee ngawm pa mhawm dee koe pakngai dee yuh pawie khankix mai dee ngawm pa mhawm khaing paox tix ka daux nyiex dee sidiex khankix, ⁷ moh ka ceu pa yaog yaw pui ka daux lah daux cau mai pa kok pui sara cao gau ka kix heue. ⁸ Paw kieh pui kok pex mawh sara cao gau, kheu Sara cao gau koe tix kaux ngie khaing mai pex khawmuik ra lai mawh puxaik heue. ⁹ Paw kok keeing ka pui tix kaux kawx piang haktiex in, kheu pex koe keeing tix kaux ngie khaing pa ot ka daux meung raoma heue. ¹⁰ Paw kieh pui kok pex mawh cao sidiex gau, kheu pex koe cao sidiex gau tix kaux ngie, pa mawh Khrit heue. ¹¹ Ka daux pex pa mie ti ting khaing paox tix, tak mawh siliex pex heue. ¹² Pui mawx ang ah, pa yaog tokaux tix ting, tak sang yeen nawh koe rhawm tiem mai pui mawx ang ah, pa deuh rhawm tokaux tix tiem, tak sang yaog nawh ting heue." ¹³ "Pui tiiem lai mai Pharishie, pui pa pie lhen khankix eue, pex tak kha rhawm, mawh kheu nyeep pex meung raoma sivoe kawn pui heue. Kheu tokaux pex kawx ang laig ka pui pa mie ti laig khankix kawx pex ang tawx akhwang khankix heue. ¹⁴ Pui tiiem lai mai Pharishie pui pie lhen khankix eue, pex tak kha rhawm, kheu pex rud ti ih nyiex miexmai khankix mai yuh grang tix mai kieh lox rawg bwan tix lang, mawh kheu nan pex tak nie pon krax prawng ciyang pa ting heue. ¹⁵ Pui tiiem lai mai Pharishie pui pa pie lhen khankix eue, pex tak kha rhawm. Kheu pex tiang krax rawm mai hu krax gawng sonsang pon pui pa laig ka beenli tix kaux. Khaix hoik laig nawh daux beenli, pex yuh nawh mawh kawn mawnarhok lheu khaing tokaux pex ra son heue. ¹⁶ Pui dug ngai pa thong ka pui khankix eue, pex tak kha rhawm heue. Pex ah, pui mawx ang ah, phan tiextu ka nyiex bwan ang ot ceun. Viang mawh nan phan tiextu ka khri nyiex bwan, tak ceun heue. ¹⁷ Pui brai pui dug ngai eue, mawh khri pa nie lheu ting lie, phan ang mawh nan mawh nyiex bwan pa kieh khri singax pa nie lheu ting lie? ¹⁸ Pex ah, pui mawx ang ah pa tiextu ka khu dee tan, ang mawh tidtix. Viang mawh nan pui mawx ang ah, tiextu ka pa tan pa koe piang khu, nawh koe ceuk heue. ¹⁹ Pui dug ngai eue, pa yuh ka mawx lheu ting, pa tan lie, phan ang mawh nan khu dee tan, pa kieh pa tan singax lie? ²⁰ Mawh kheu nan kaw pa tiextu ka dee tan, nawh tiextu ka dee tan mai ka ceu pa koe piang dee tan khawmuik. ²¹ Kaw pa tiextu ka nyiex bwan, tiextu ka nyiex bwan mai ka Kaw pa ot ka daux nyiex bwan heue. ²² Kaw pa tiextu ka raoma, tiextu ka dang ngeung Siyiex mai ka Kaw pa ngawm piang dang ngeung an heue. ²³ Pui tiiem lai mai Pharishie, pui pa pie lhen khankix eue, pex tak kha rhawm heue, kheu pex tan, taux pak haw, taux ki, taux ki la, kao son tix son, viang mawh nan pex ang yuh grawng pa ting pa koe daux lox lai beenli, pa rahsee, pa khaw caw, pa caux rhawm mai pa kaux sijax khankix heue. Pex khaw ti yuh tang ceu an khankix mai ceu in khankix kawx khaw ti yuh heue. ²⁴ Pui dug ngai pa thong ka pui chix yaox eue, pex cia ti tik maing mai bleet kala-uk heue. ²⁵ Pui tiiem lai mai Pharishie, pui pa pie lhen khankix eue, pex tak kha rhawm heue, kheu phak pex plak praix kawk mai tawg ngie, viang mawh nan plak daux naog mai pa rud ti teei mai yuh pa ang rahsee heue. ²⁶ Pharishie pa dug ngai eue, phak plak daux kawk mai tawg ka ha, phan yuh nan plak praix kawx, tak singax heue. ²⁷ Pui tiiem lai mai Pharishie, pui pa pie lhen khankix eue, pex tak kha rhawm heue, kheu pex awm simeeig pa hoik kraix simaox ceed, pa nyawm ti jhak plak praix, viang mawh nan plak daux hoik naog si-ang pui yum mai pa seeing brai kuceu heue. ²⁸ Awm an pex kawx, yam yaox pui plak praix pex, awm pa rahsee, viang mawh nan plak daux pex, naog mai pa pie lhen, pa ang rahsee kuceu heue. ²⁹ Pui tiiem lai mai Pharishie, pui pa pie lhen khankix eue, pex tak kha rhawm heue, kheu pex yuh simeeig cao jhai khankix mai yuh simeeig pui rahsee kieh mhawm grang ti jhak, ³⁰ ah nin, Phan ex pon ti ot ka daux bawg yam singaix tax du ex khankix, ex ang laig neuex mai kix yam hieh kix ka nham cao jhai khankix heue. ³¹ Mawh kheu nan pex kham mhai rug grawng tokaux pex, grawng mawh pex kawn kix pa pah cao jhai khankix yum heue. ³² Ca kawn baox yuh pa lud pa hoik yuh tax du pex naog heue. ³³ Pex pa mawh siuing, pa mawh ru siuing pa cai eue, pex sang pon ti luan khaing krax ciyang mawnarhok yuh ka mawx? ³⁴ Mawh kheu nan, Aux ploi cao jhai mai pui koe pingnya pui tiiem lai khankix hoek ka pex heue. Ka kix tix blah pex tak sang teei yum mai tawk piang khaox lhak mai ka tix blah pex tak sang sivied ka daux nyiex dee sidiex pex khankix mai tukiak ka kix tix veng hoik tix veng heue. ³⁵ Kheu, nham pui rahsee pa hoik lih piang haktiex in khawmuik, tak hoek piang pex, jah ka nham Abelax pa rahsee, tom sidah hoek ka nham Zakharix pa mawh kawn Barakhix, pa hoik pah pex yum sinax nyiex bwan mai khu dee tan heue. ³⁶ Aux krai lox tete ka pex, ceu in khawmuik tak sang hoek piang baux ju pui yam in heue." ³⁷ "Veng Yerusaliem eue, veng Yerusaliem pa teei cao jhai khankix yum mai dheem pui pa ploi hoek ka maix ka simaox, Aux simie ti khrawm kawn praix maix, awm miex ia khrawm kawn tix greem pruik nawh miex bawg mai maix ang kieh Aux yuh. ³⁸ Hoik grham nyiex pex yi ka pex heue. ³⁹ Grawh grawng nawh Aux krai ka pex, khaix in pex tak ang lai baox yaox Aux, tom pex ah, Kaw pa hoek ka daux ceu kaux Simiang koe bwanson heue."

¹ Yam lih hu Yesux khaing daux nyiex bwan, kawncau Nawh khankix hoek ka Nawh Cao sonsang jhi Nawh yaox nyiex bwan khankix heue. ² Viang mawh nan Nawh Cao ah nin ka kix, "Pex yaox ceu in khawmuik ang mawh lie? Aux krai lox tete ka pex, tak ang grham simaox koe tin kieh koe piang paox tix, tix lon kawx, pa tak ang yieh ti tik heue." ³ Yam ngawm Nawh Cao piang gawng Sanlun, kawncau khankix hoek ka Nawh Cao dee ang pui ot ah nin, "Ceu in khankix tak sang mawh yam mawx? Mhai rug grawng sang deeh hoek Maix mai grawng sang sidah haktiex in, tak sang mawh pa yuh ka mawx? krai ex mhong liak." ⁴ Yesux pawk lox ah nin ka kix, "Kheu son ang pui sang kieh krax lawng pex lud, rien rhawm tix kah heue. ⁵ Kheu pui tom nie tak sang hoek mai ceu kaux Aux ah nin, Aux mawh Khrit heue. Tak kieh pui tom nie lud krax lawng tix heue. ⁶ Pex tak mhong grawng naing mai lox susiah grawng naing heue. Rien rhawm tix son ang pex sang khi rhawm ka, kheu ceu in tak sang mawh, viang mawh nan ang nyang bax mawh bawg yam sidah heue. ⁷ Mawh kheu pui tix ceu mai tix ceu, tix meung mai tix meung tak puing paox tix mai praix tak sang sibhawm, saux preng tak sang lih mai tuk kla reem tak sang tuk dah dee tom nie heue. ⁸ Viang mawh nan ceu in khawmuik mawh pa jah tix kha rhawm awm bun jah tix saux yam sang keh heue. ⁹ Bawg yam an, kix tak sang teei ti tawx pex sonsang kha pex pa tuktiak mai tak sang teei pex yum mai pui kuceu khawmuik tak sang koeng ka pex, kheu ceu kaux Aux heue. ¹⁰ Yam an, pui tom nie tak sang goh grhup mai teei ti tawx ka paox tix mai koeng ka paox tix, tix kaux lai tix kaux heue. ¹¹ Cao jhai pa ang mawh meh tak sang lih koe tom nie mai tak jeeh nyaw ka pui tom nie heue. ¹² Kheu pa ang khaw ang jiet baox nie lih koe, krax moh krax rhawm pui tom nie tak sang iak hu heue. ¹³ Viang mawh nan pui pa kaux cong tom sidah, tak sang pon krax taoh heue. ¹⁴ Lox bwan gaux rhawm pa dex dawd mai Meung An, tak sang sidiex gau piang haktiex khawmuik, sonsang mawh mhai jhi ka ceu pui khawmuik mai khaix an bawg yam sidah tak sang hoek heue." ¹⁵ "Mawh kheu nan yam yaox pex ceu pa seeing, ceu pa yuh laux grawng pa hoik krai cao jhai Danyelax, yam cung dee singax. Kieh kaw pa phat grawh grawng an tawng heue. ¹⁶ Yam an kieh kix pa ot ka daux meung Yudax to hu piang gawng khankix heue. ¹⁷ Pui pa ot piang prang nyiex, paw kieh nawh lih ti teei kraung pa koe ka daux nyiex tix. ¹⁸ Pui pa ot ka daux ma paw kieh nawh deeh ing ti teei kraung ceep tix heue. ¹⁹ Bun pa koe kaux mai bun pa tawx kawn tix peuex ka daux bawg yam ngaix an khankix, tak kha rhawm heue. ²⁰ Pex rawg bwan, yuh ka mawx son ang caw bawg yam kuat praix mai ngaix twah heue. ²¹ Mawh kheu yam an, tak sang koe pa kied kha rhawm, ceu pa ang sax koe, tom yam jah ti kaw haktiex dix, tom sidah hoek bawg yam in mai khaix an kawx tak ang lai baox koe heue. ²² Phan bawg yam singaix an khankix ang mawh singaix pa dawd, tix kaux kawx ang pon ti luan, viang mawh nan son pui pa hoik laug Siyiex tak mawh bawg yam singaix pa dawd heue. ²³ Yam an, phan pui tix kaux kaux ah nin ka pex, "Jhak heue, Khrit ot tin, phan ang mawh nan ot tan", paw yum rhawm kah. ²⁴ Khrit pa ang mawh meh khankix mai cao jhai pa ang mawh meh khankix tak sang lih hoek mai plak jhi mhai mai ceu pa daox deng ceu pa kied ting, sonsang pon nyaw glaw ka pui hu krax lud, phan chix tix, ka pui pa hoik laug Siyiex kawx heue. ²⁵ Aux hoik grux krai ka pex heue. ²⁶ Mawh kheu nan, phan kix ah nin ka pex, Nawh ot daux tiag tu, paw hu. Phan ah Nawh ot daux lawg plak daux paw yum rhawm kah. ²⁷ Awm pluk plak praix lih hoek khaing plak lih singaix mai phlat ti riang tom hoek plak klip singaix, Kawn kawn pui tak sang hoek awm an heue. ²⁸ Tokaux yum koe dee mawx ang ah, klang preng tak khrawm tix tan heue." ²⁹ "Khaix pa kha rhawm daux bawg yam singaix an khankix, dom mawx dom an, Singaix tak vhaik, mai khix tak ang tawx pa riang tix, mai simuing khankix tak sang rau khaing raoma, mai sibrawm raoma khankix tak sang yung yiang heue. ³⁰ Yam an, mhai Kawn kawn pui tak lih ka raoma heue. Yam an ceu pui piang haktiex khawmuik tak yiiem mai kix tak sang yaox Kawn kawn pui tak hoek tau mai sibrawm mai min plakngai pa ting piang paiawm raoma heue. ³¹ Nawh tak sang ploi kawncau raoma cie tix hu mai lox teet tawng pa kied ting kied luah mai kix tak sang khrawm pui pa hoik laug mawh cie Nawh, khaing pon plak, jah dee sidah daog raoma tix plak, tom sidah hoek daog raoma plak an heue. ³² "Gau khaing khaox Ruh heue.Yam awn kak nawh mai lih lhax khankix, pex tawng bawg yam rung dex sang hoek. ³³ Awm an yam yaox pex ceu in khankix khawmuik, pex tawng heue, Kawn kawn pui dex sang hoek, hoik bleeh dex ka siviex khankix heue. ³⁴ Aux krai lox tete ka pex, baux ju pui yam in tak ang luan, tom ceu in khankix khawmuik ang lih mawh heue. ³⁵ Raoma mai haktiex tak sang grai, viang mawh nan gumlox Aux, tak ang grai heue." ³⁶ Singaix mai bawg yam an ang pon tawng tix kaux kawx, pie kawncau Siyiex meung raoma khankix kawx ang tawng. Kawn Cao kawx ang tawng, mawh Keeing Cao tix kaux khaing pa tawng heue. ³⁷ Singaix pa tak sang deeh hoek Kawn kawn pui, tak awm bawg yam singaix Noax khankix heue. ³⁸ Hoik awm ka singaix kheem rawm khankix, tom hoek singaix laig Noax ka daux nyiex reu ting, kix ih mai nyaux, teei mex, teei moeng mai teei ti tawx paox tix heue. ³⁹ Kix ang tawng tom haok huan rawm mai sibloe kix hu khawmuik heue. Awm an, yam hoek Kawn kawn pui tak sang mawh nan heue. ⁴⁰ Yam an pui ra kaux pa ot daux ma, tak sang teei ka tix kaux mai prah ka tix kaux heue. ⁴¹ Bun ra kaux pa krid mhaw tau, tak sang teei ka tix kaux mai prah ka tix kaux heue. ⁴² Mawh kheu nan rien rhawm pex, kheu pex ang tawng bawg yam singaix sang hoek Simiang pex heue. ⁴³ Viang mawh nan tawng ka ceu in. Phan cao nyiex tawng bawg yam sang hoek pui briex, nawh tak pau mai ang kieh yieh ti laig daux nyiex tix heue. ⁴⁴ Mawh kheu nan pex kawx rien rhawm tix, kheu daux bawg yam ang pex ce, Kawn kawn pui tak sang hoek heue." ⁴⁵ "Simiang hoik deuh siliex pa kaux sijax mai pa koe pingnya mawh cao kaing ting piang geh nyiex tix, sonsang tawx pa ih ka kix awm pa khaw bawg yam khankix heue. ⁴⁶ Yam deeh hoek simiang nawh mai yam yaox cao ka kaing pa yuh siliex an, kaw an tak koe bwanson heue. ⁴⁷ Aux krai lox tete ka pex, simiang nawh tak deuh nawh ting piang tobrie nawh khawmuik heue. ⁴⁸ Viang mawh nan phan siliex pa caox keud ti ah nin daux rhawm tix, Simiang aux tak sang lha hoek, ⁴⁹ mai tap ka paox siliex tix mai ih nyaux ceu pa yoek tau mai pui pa yoek khankix, ⁵⁰ mai simiang nawh tak hoek ka daux singaix pa ang nawh keud nawh ce mai daux bawg yam nari pa ang nawh tawng heue. ⁵¹ Mug nawh dud mai deuh nawh tau mai pui pa pie lhen khankix, dee tak yiiem riag mai dee greeik rhang heue."

¹ "Yam an meung raoma tak sang awm bunkrih kao kaux, pa teei kawk ngu kix mai hu rieb kaw pa yuh ka paox heue. ² Ka daux kix, phwan kaux mawh bun deux mai phwan kaux mawh bun lhak pa koe pingnya heue. ³ Yam teei bun deux khankix ka kawk ngu, kix ang teei ti viex rawm bee hu mai tix. ⁴ Viang mawh nan, bun lhak pa koe pingnya khankix, teei ti viex rawm bee daux lawk mai kawk ngu kix heue. ⁵ Kheu kaw pa yuh ka paox ang nyang khran hoek, kix khawmuik gaing mai laig it heue. ⁶ Yam hoek bawg yam greung sawm, koe lox pa yo ah nin, jhak heue, kaw pa yuh ka paox hoik hoek, pex hu rieb ka nawh heue. ⁷ Yam an bunkrih an khawmuik kaoh mai cox kawk ngu kix heue. ⁸ Pa deux khankix ah nin ka pa lhak pa koe pingnya khankix, tawx rawm bee pex ka yix ceeix liak, kheu kawk ngu cie yix dex sang yeet heue. ⁹ Viang mawh nan pa lhak pa koe pingnya khankix pawk lox ah nin, ha rawm bee ang kub son yix mai son pex, pex hu liag ka pui pa coh rawm bee son tokaux pex heue. ¹⁰ Yam hu liag kix rawm bee, kaw pa yuh ka paox hoek mai kix pa hoik rien tix mhawm mhawm, laig tau mai nawh dee sang yuh pawie ka paox heue. Mai siviex hoik nyeep tix. ¹¹ Khaix an bunkrih tang kaux phwan kaux an kawx hoek ah nin, Simiang eue, simiang eue, paoh siviex son yix liak. ¹² Viang mawh nan nawh pawk lox ah nin, Aux krai lox tete ka pex, Aux ang tawng ka pex. ¹³ Mawh kheu nan pau ti jhak, kheu ang pex tawng singaix mai bawg yam nari an heue." ¹⁴ "Grawh grawng nawh tak awm pui tix kaux pa sang hu ka tang praix klawng, pa kok siliex nawh khankix mai tawx kraung cie nawh ka kix heue. ¹⁵ Nawh tawx ka tix kaux phwan talantan mai baox tawx ka tix kaux ra talantan mai baox tawx ka tang kaux tix talantan, nawh tawx ka ku kaux awm pa chix kaux pui mawx kaux pui an mai lih hu heue. ¹⁶ Dom mawx dom an kaw pa hoik pon phwan talantan an hu yuh lai geu mai baox pon rao phwan talantan heue. ¹⁷ Awm an, kaw pa hoik pon ra talantan kawx, hu mai baox pon rao ra talantan heue. ¹⁸ Viang mawh nan kaw pa pon tix talantan, hu mai kaong daux tiex mai mox mau cie simiang nawh heue. ¹⁹ Yam hoik rheung, simiang siliex an khankix deeh hoek mai sawn carang mau mai kix heue. ²⁰ Kaw pa hoik pon phwan talantan an hoek mai viex pa khraox phwan talantan ah nin, Simiang eue maix tawx ka aux phwan talantan, aux hoik baox pon rao phwan talantan heue. ²¹ Simiang nawh ah nin ka nawh, Mhawm heue, siliex pa mhawm mai pa kaux sijax eue, maix hoik kaux sijax piang pa iak pa tux, aux tak kieh maix ting piang ceu pa nie heue. Laig ka daux pa gaux rhawm simiang maix heue. ²² Kaw pa hoik pon ra talantan kawx hoek ah nin, Simiang eue, maix tawx ka aux ra talantan, aux hoik baox pon rao ra talantan heue. ²³ Simiang nawh ah nin ka nawh, Mhawm heue, siliex pa mhawm mai pa kaux sijax eue, maix hoik kaux sijax piang pa iak pa tux, aux tak kieh maix ting piang ceu pa nie heue. Laig ka daux pa gaux rhawm simiang maix heue. ²⁴ Kaw pa hoik pon tix talantan kawx hoek ah nin, Simiang eue, aux tawng maix mawh pui nu tix ah, pa vawg dee ang maix rhuat mai pa khrawm dee ang maix van heue. ²⁵ Aux tom lhat mai aux hu mox talantan maix ka daux tiex, jhak heue, pa mawh cie maix kawn koe heue. ²⁶ Simiang nawh pawk lox mai ah nin ka nawh, Siliex pa caox mai pa nieh eue, maix tawng grawh grawng aux vawg dee ang aux rhuat mai khrawm dee ang aux van. ²⁷ Mawh kheu nan maix khaw ti sau mau aux daux nyiex mau mai yam deeh hoek aux, aux tak deeh pon num mai rao mau cie aux heue. ²⁸ Mawh kheu nan pex teei talantan an khaing nawh mai tawx ka kaw pa koe kao talantan an heue. ²⁹ Grawh grawng nawh, pa koe ku kaux daux pui tak sang baox tawx ka nawh mai nawh tak sang nie grum koe heue. Viang mawh nan, kaw pa ang koe, viang pa hoik koe nawh kawx tak sang teei khaing nawh heue. ³⁰ Grheu siliex pa ang koe bwanson an lih plak praix daux pa faik, dee tak yiiem riag mai dee greeik rhang heue." ³¹ "Yam tak sang hoek Kawn kawn pui ka daux min pakngai Nawh, tau mai kawncau Siyiex khawmuik, yam an Nawh tak sang ngawm piang dang ngeung min pakngai Nawh. ³² Ceu pui khawmuik tak sang krawk khrawm paox tix sivoe Nawh mai Nawh tak sang gwieh kix tix kaux khaing tix kaux, awm pui liang yung gwieh yung khaing pex khankix heue. ³³ Nawh tak sang deuh yung khankix plak taix khawn dawm Nawh, viang mawh nan pex khankix tak sang deuh plak khawn gwiex heue. ³⁴ Yam an Simiang tak sang ah ka kix pa ot plak taix khawn dawm Nawh, Hoek heue, pex pa hoik pon bwanson khaing Keeing aux, teei sin Meung pa hoik cox son pex, tom yam jah ti kaw haktiex heue. ³⁵ Yam cai rhawm Aux pex tawx Aux sawm, yam sang nyaux nie Aux rawm mai pex tawx Aux nyaux mai yam mawh Aux nyo pex rieb ti teei Aux. ³⁶ Yam ot Aux kakaong, pex tawx Aux ceep kraung. Yam saux Aux pex hoek ti priex pau Aux mai yam ot Aux ka daux thawng pex hoek ka Aux heue. ³⁷ Yam an pui rahsee khankix tak sang pawk lox ah nin ka Nawh, Simiang eue, ex yaox yam cai rhawm Maix mai tawx Maix sawm lai mawx? Ex yaox yam sang nyaux nie Maix rawm mai tawx Maix nyaux lai mawx? ³⁸ Ex yaox yam mawh Maix nyo mai rieb ti teei Maix lai mawx? Ex yaox ot Maix kakaong mai tawx Maix ceep kraung lai mawx? ³⁹ Ex yaox yam saux Maix phan ang mawh nan yam ot Maix daux thawng mai hoek ka Maix lai mawx? ⁴⁰ Simiang tak sang pawk lox ah nin ka kix, Aux krai lox tete ka pex, pa yuh pex ka pui pa iak ka daux puxaik Aux khankix tix kaux, pex hoik yuh ka Aux heue. ⁴¹ Yam an, ka kix pa ot plak taix khawn gwiex Nawh kawx, Nawh tak sang ah nin, pex pa mawh pa hoik jhax lawg eue, lih khaing Aux mai laig ka daux ngu leeing ju, pa hoik cox son phicaox mai kawncau nawh khankix heue. ⁴² Kheu pex ang tawx aux ih ceu pa ih tid tix yam cai rhawm Aux. Yam sang nyaux nie Aux ka rawm, pex ang tawx Aux nyaux. ⁴³ Yam mawh Aux nyo sinie mai pex ang rieb ti teei Aux. Yam ot Aux mai kakaong, pex ang tawx Aux ceep kraung. Yam saux mai ot daux thawng pex ang hoek ka Aux. ⁴⁴ Yam an kix kawx tak sang pawk lox ah nin, Simiang eue, ex yaox Maix cai rhawm lai mawx, yam sang nyaux nie Maix rawm, yam mawh nyo, yam ot kakaong, yam saux, yam ot daux thawng mai ang kia ngien Maix lai mawx? ⁴⁵ Yam an Nawh tak sang pawk lox ah nin ka kix, Aux krai lox tete ka pex, pa ang pex yuh ka kaw pa iak khaing paox tix khankix in tix kaux, pex ang yuh ka Aux heue. ⁴⁶ Kix tak sang hu laig ka daux pa ciyang leeing ju heue. Viang mawh nan pa rahsee khankix tak sang laig ka ju leeing ju heue."

¹ Khaix hoik krai Yesux grawh grawng lox ceu an khankix khawmuik, Nawh Cao ah nin ka kawncau Nawh khankix, ² "Pex tawng, khaix in ra singaix tak hoek bawg yam pawie Pasakha mai tak sang tawx ka Kawn kawn pui, sonsang tawk Nawh piang khaox lhak heue." ³ Yam an cao giex kaing li khankix mai kuad song pui khankix khrawm paox tix ka daux nyiex haw cao giex kaing li pa ting, pa kok mawh Kayaphax, ⁴ mai kum paox tix grawng kaing, sonsang pon lhen nyaw ti teei Nawh Cao yum heue. ⁵ Viang mawh nan kix ah nin "Ang mawh bawg yam yuh pawie, phan yuh nan, pa sung sang tak lih koe ka daux pui khankix heue." ⁶ Yam ot Yesux ka daux yaong Betanix, daux nyiex Simon pui sipawg, ⁷ bun tix kaux hoek ka Nawh Cao pa koe sidah bhawng pa kied ngawh, daux kawng simaox paing mai nawh groi sidah an piang kaing Nawh Cao yam ngawm Nawh mai sawm heue. ⁸ Yam yaox kawncau Nawh khankix, kix song rhawm ka ah nin, "Kieh nai giex going yuh nin yuh ka mawx? ⁹ Phan coh sidah bhawng in tak pon ngawh tom nie mai chix ti tawx ka pui hot pui sibhawm khankix heue." ¹⁰ Viang mawh nan Yesux tawng grawng an mai ah nin ka kix, "Pex chuh ka bun in yuh ka mawx? Nawh hoik yuh kaing pa mhawm piang Aux heue. ¹¹ Grawh grang nawh, pex ot tau mai pui hot pui sibhawm sijeung heue. Viang mawh nan Aux ang ot tau mai pex sijheung. ¹² Ka daux pa groi nawh sidah bhawng piang tokaux Aux, nawh hoik cox khre son Aux, son pa sipaung ka Aux heue. ¹³ Aux krai lox tete ka pex, dee mawx ang ah, dee sidiex gau lox bwan gaux rhawm in piang haktiex khawmuik, krai grawh grawng ceu pa yuh bun in, sonsang doh keud ka nawh heue." ¹⁴ Yam an, ka daux kawncau kao ra kaux, pa mawh tix kaux, Yudax Isakariut, hu ka cao giex kaing li pa ting khankix, ¹⁵ ah nin, "Phan aux tawx Nawh Cao ka pex, pex sang tawx pa tix ka aux?" kix tawx mau ka nawh tixngoe plah heue. ¹⁶ Jah ka yam an, nawh sawg bawg yam sang pon ti tawx Nawh Cao ka kix heue. ¹⁷ Ka daux singaix pa liang ih ka blah pa ang sau susaix, kawncau Nawh khankix hoek ka Yesux ah nin, "Maix mie ti kieh ex cox khre dee sang ih pawie Pasakha son Maix dee mawx?" ¹⁸ Nawh Cao ah nin, "Hu ka daux veng ka pui tix kaux mai ah nin ka nawh, Sara Cao gau ah nin, bawg yam Aux dex sang hoek, Aux sang ih pawie Pasakha tau mai kawncau Aux daux nyiex maix heue." ¹⁹ Kawncau Nawh khankix yuh awm pa hoik nhie Yesux kix yuh mai kix cox khre pawie Pasakha heue. ²⁰ Yam hoek ponbo, Nawh Cao ngawm neung mai sawm tau mai kawncau Nawh kao ra kaux, ²¹ mai yam sawm kix, Nawh Cao ah nin, "Aux krai lox tete ka pex, ka daux pex tix kaux tak sang tik sang tawx Aux heue." ²² Kix kied khi rhawm kah mai kix tix kaux lai tix kaux, chawk ka Nawh Cao ah nin, "Simiang, mawh aux lie?" ²³ Nawh Cao pawk lox ah nin, "Kaw pa hoik cawk taix nawh daux klong tau mai Aux, mawh pa sang tik sang tawx Aux heue. ²⁴ Kawn kawn pui tak hu, awm hoik tiiem ti deuh grawng Nawh heue. Viang mawh nan, pui pa tik pa tawx ka Kawn kawn pui tak kha rhawm heue. Phan kaw an ang lih keh, nie lheu mhawm son nawh heue." ²⁵ Yudax, kaw pa tik pa tawx ka Nawh Cao pawk lox ah nin, "Rabi eue, mawh aux lie?" Nawh Cao ah nin ka nawh, "Mawh, awm pa hoik ah maix heue." ²⁶ Yam sawm kix, Yesux teei blah mai nawb bwan mai sivit ti tawx ka kawncau Nawh khankix ah nin, "Teei, ih, in mawh tokaux Aux heue." ²⁷ Nawh Cao teei kawk mai yaogyaw bwanson mai tawx ka kix ah nin, "Pex khawmuik nyaux heue. ²⁸ Kheu in mawh nham Aux pa dex dawd mai sijax mukheu pa khraox, pa lih son pui tom nie, sonsang ploi phimap khankix heue. ²⁹ Aux krai ka pex, Aux tak ang lai nyaux rawm plix siiet in, tom hoek singaix nyaux Aux pa khraox tau mai pex, ka daux Meung Keeing Aux heue." ³⁰ Khaix hoik rhax kix lai rhax tix mu, kix lih hu ka gawng Sanlun heue. ³¹ Yam an Yesux ah nin ka kix, "Daux sawm in pex khawmuik tak prah ka Aux heue. Kheu hoik tiiem ah nin, Aux tak pah cao liang yung, mai cub yung an khankix, tak prung prang heue. ³² Viang mawh nan khaix hoik kaoh Aux, Aux tak sang hu sivoe pex ka daux meung Galilie heue." ³³ Petrux pawk lox mai ah nin ka Nawh Cao, "Phan khawmuik prah ka Maix kawx, aux tak ang prah tix bawg kawx heue." ³⁴ Yesux ah nin ka nawh, "Aux krai lox tete ka maix, daux sawm in ka ang ia nyang ux, maix tak sang thiang ti tik ti vud ka Aux loe bawg heue." ³⁵ Petrux baox ah nin ka Nawh Cao, "Phan aux yaox ti yum tau mai Maix kawx, ang aux doh thiang ti tik ka Maix heue." Kawncau Nawh khawmuik kawx, ah nan heue. ³⁶ Khaix an Yesux hu tau mai kix tix dah ka dee kok mawh Kesasemanix mai ah nin ka kawncau Nawh khankix, "Pex ngawm tin yam Aux hu rawg bwan tan." ³⁷ Nawh Cao kok Petrux mai kawn Zebedie ra kaux hu tau mai Nawh mai Nawh khi rhawm mai sung sang rhawm heue. ³⁸ Yam an Nawh Cao ah nin ka kix, "Aux kied khi rhawm tom dex sang yum, pex ot tin mai pau tau mai Aux heue." ³⁹ Nawh Cao hu sivoe ceeix mai grux gup mai rawg bwan, ah nin, "Keeing Aux eue, phan chix, kieh kawk in luan khaing Aux liak, viang mawh nan paw kieh mawh alo Aux, kieh mawh alo pa caw pa khaw rhawm Maix heue." ⁴⁰ Nawh Cao deeh hoek ka kawncau khankix mai yaox kix laig it mai ah nin ka Petrux, "Ang pex pon ti pau tau mai Aux tix nari khaing lie? ⁴¹ Pau mai rawg bwan heue, yuh ka mawx son ang pex sang laig ka daux pa nyaw glaw. Khuan koe rhawm tix sang yuh tete, viang mawh nan nex mawh pa iak riang iak rao heue." ⁴² Nawh Cao baox deeh hu ra bawg tix bawg mai rawg bwan ah nin, "Keeing Aux eue, phan ang chix luan kheu aux ang nyaux ka kawk in, kieh mawh awm pa koe alo Maix heue." ⁴³ Nawh Cao baox deeh hoek mai yaox kix laig it, kheu cien ngai kix heue. ⁴⁴ Mawh kheu nan, Nawh Cao baox prah kix tix bawg mai hu mai rawg bwan loe bawg tix bawg mai baox deeh rawg awm lox phao ka heue. ⁴⁵ Yam an Nawh Cao baox hoek ka kawncau Nawh khankix mai ah nin ka kix, "Pex ca kawn it mai laux lee tix lie? Jhak heue, bawg yam nari dex sang hoek mai tak sang tik sang tawx ka Kawn kawn pui daux tawm taix pui phimap khankix heue. ⁴⁶ Kaoh, ex hu heue, jhak heue, kaw pa sang tik sang tawx Aux dex hoek heue." ⁴⁷ Yam kawn sikah Nawh Cao, Yudax pa mawh tix kaux ka daux kix kao ra kaux, hoek tau mai cub pui kied haoh hun pa viex vaid viex khaox mai lih hoek khaing cao giex kaing li pa ting mai kuad song pui khankix heue. ⁴⁸ Yam an kaw pa tik pa tawx ka Nawh Cao hoik tawx mhai ka kix tix ceu pa ah nin, "Kaw pa ngheut aux, tak mawh kaw an, giex ka Nawh heue." ⁴⁹ Dom mawx dom an nawh hoek ka Yesux ah nin, "Rabi eue, kieh nyawm ot" mai ngheut ka Nawh Cao heue. ⁵⁰ Yesux ah nin ka nawh, "Paox grawm eue, yuh awm pa sang yuh maix tin heue." kix hoek mai taix kix tum piang Yesux mai giex ka Nawh heue. ⁵¹ Jhak heue, pui pa ot tau mai Yesux tix kaux, nyeu taix mai lawd vaid tix mai kid yhaok siliex cao giex kaing li pa ting piang khawmuik, dud heue. ⁵² Yam an Yesux ah nin ka nawh, "Deeh sau vaid maix daux phak tix. Grawh grawng nawh, pui pa giex vaid khawmuik, tak laux leeing ka vaid heue. ⁵³ Maix lai ce Aux ang pon mhaing ka Keeing Aux, sonsang ploi Nawh kawncau Siyiex, pa nie lheu khaing kao ra lie cong hoek dom mawx dom an ka Aux yam in lie? ⁵⁴ Phan mawh nan lox Phuk lai sigang khri, pa ah tak mawh nin, tak chix naog yuh ka mawx?" ⁵⁵ Daux bawg yam nari an, Yesux ah nin ka cub pui hun khankix, "Pex viex vaid viex khaox hoek ti giex Aux awm giex ka pui tud rhim lie? Aux ngawm ti sidiex gau ka daux nyiex bwan ku singaix mai pex ang giex Aux. ⁵⁶ Viang mawh nan, ceu in khawmuik hoik lih mawh, sonsang naog lox phuk lai sigang khri cao jhai khankix heue." Yam an kawncau khankix khawmuik prah Nawh Cao mai to hu heue. ⁵⁷ Kix pa hoik teei Yesux khankix tok Nawh hu ka Kayaphax, pa mawh cao giex kaing li pa ting piang khawmuik, dee pui tiiem lai mai kuad song khankix hoik khrawm paox tix heue. ⁵⁸ Petrux hawt khaix Nawh Cao dee singai mai hoek ka brawk nyiex cao giex kaing li pa ting an mai laig ka daux mai ngawm tau mai pui pau yam khankix, sonsang yaox dee tom sidah heue. ⁵⁹ Cao giex kaing li pa ting khankix mai cub bang kum sawg mhai rug pa ang mawh ang meh, grawh grawng Yesux, sonsang pon kix ti teei Nawh yum heue. ⁶⁰ Viang mawh nan, kix ang yaox, viang mawh pui pa kham mhai rug pa ang mawh ang meh kawx hoek tom nie heue. Khaix an pui pa ghoik ra kaux hoek, ⁶¹ ah nin, "Pui in ah, Aux chix yieh nyiex bwan Siyiex laux mai chix deeh cox mhawm daux loe singaix heue." ⁶² Cao giex kaing li pa ting piang khawmuik, kaoh cung mai ah nin ka Nawh Cao, "Maix ang koe lox pawk tidtix lie? mhai rug pa kham pui inkix ka grawh grawng Maix mawh pa tix?" ⁶³ Viang mawh nan, Yesux ang nye kah, cao giex kaing li pa ting an baox ah nin ka Nawh Cao, "Aux chawk ka Maix ka daux ceu kaux Siyiex pa im ju, krai yix mhong mawh Maix Khrit, Kawn Siyiex lie, ang mawh lie?" ⁶⁴ Yesux ah nin ka nawh, "Mawh awm pa hoik ah maix, Aux krai ka maix, khaix in pex tak sang yaox Kawn kawn pui ngawm plak taix khawn dawm Sibrawm mai hoek piang paiawm raoma heue." ⁶⁵ Yam an cao giex kaing li pa ting an riah kraung ceep tix ah nin, "Kaw in hoik ah lox pa salao ka Siyiex, ex baox lo pui kham mhai rug yuh ka mawx? Jhak heue, pex hoik mhong lox pa salao ka Siyiex heue. ⁶⁶ Pex ce yuh ka mawx? " Kix pawk lox ah nin, " Nawh keung ti yum heue." ⁶⁷ Yam an kix baig rawm mya ka pakngai Nawh Cao mai jhawp taix tix klah Nawh mai tix blah simang ka Nawh Cao, ⁶⁸ ah nin, "Cao Khrit eue, krai lox jhai ka ex liak, mawh pui mawx pa tap toi ka Maix lie, krai lox jhai ka ex liak." ⁶⁹ Yam an Petrux ngawm ka dee brawk nyiex mai bun tix kaux hoek ka nawh ah nin, "Maix kawx mawh pa ot tau mai Yesux pui meung Galilie heue." ⁷⁰ Viang mawh nan nawh thiang sivoe kix khawmuik ah nin, "Aux ang tawng ka grawng pa ah maix." ⁷¹ Khaix hoik lih hu nawh ka grah nyiex, bun tang kaux yaox nawh mai ah nin ka kix pa ot tan, "Pui in kawx ot tau mai Yesux Pui veng Nazariet heue." ⁷² Nawh baox deeh tiextu thiang ah nin, "Aux ang tawng ka Pui an." ⁷³ Khaix an tix vud kix pa cung dex tan ah nin ka Petrux, "Maix kawx mawh tix kaux daux kix tete, kheu lox sikah maix hoik jhi ka grawng maix heue." ⁷⁴ Yam an nawh jah ti jhax mai tiextu ah nin, "Aux ang tawng ka Pui an" dom mawx dom an ia ux heue. ⁷⁵ Petrux doh keud ka lox pa hoik krai Yesux ah nin, "Ka ang ia nyang ux maix tak thiang ti tik ka Aux loe bawg heue." Nawh lih hu mai nied ti yiiem heue.

¹ Yam hoek ponngawb, cao giex kaing li pa ting khankix mai kuad song pui khankix khawmuik kum kawng paox tix ka grawng Yesux, sonsang pon ti teei Nawh yum heue. ² Kix phyawk Nawh Cao mai tok Nawh hu tawx Nawh ka Pilat heue. ³ Yam an Yudax kaw pa tik tawx Nawh Cao, yam yaox nawh ka grawng pa prawng ciyang kix ka Nawh Cao, nawh doh keud ka phimap tix mai deeh viex mau tixngoe plah tawx ka cao giex kaing li pa ting mai kuad song khankix, ⁴ Ah nin, "Aux hoik lud, kheu hoik tik hoik tawx aux nham pa ang koe dee lud heue." Viang mawh nan kix ah nin, "Shiang mai yix pa tix? In mawh pa sung sang pa yuh maix" ⁵ Nawh taing ti tik mau an ka daux nyiex bwan mai lih hu mai nhawt ngawg tix yum heue. ⁶ Cao giex kaing li pa ting khankix teei mau an ah nin, "Ang khaw mai been ti sau mau in ka daux mau sin ngao, kheu mawh mau pa hoik caux ka nham heue." ⁷ Kix kum kawng teei mau an mai liag haktiex cie pui pa yuh aw tix dah, sonsang yuh dee sipaung ka nyo sinie khankix heue. ⁸ Mawh kheu grawng in, haktiex an tom kok mawh, "Haktiex Nham" tom hoek singaix yam in heue. ⁹ Yam an hoik naog gumlox cao jhai Yeramix pa ah nin, "Kix teei mau tixngoe plah an, pa mawh ngawh jum Nawh, pa hoik tat kawn praix pui Isarelax tix blah heue. ¹⁰ Kix tawx mau an son haktiex cie pui pa yuh aw, awm hoik plak jhi Siyiex ka aux heue." ¹¹ Yam an Yesux cung sivoe simiang mai simiang an chawk Nawh Cao ah nin, "Maix mawh Simiang pui Yudax lie?" Yesux pawk lox ah nin ka nawh, "Mawh awm pa ah maix." ¹² Viang cao giex kaing li pa ting mai kuad song khankix deuh phimap ka Nawh Cao kawx, Nawh ang pawk lox tidtix heue. ¹³ Yam an Pilat baox ah nin ka Nawh Cao, "Ang maix mhong mhai rug pa tang kix phimap ka grawng maix tom nie ceu lie?" ¹⁴ Viang mawh nan, Nawh Cao ang pawk lox tix gum kawx, ka pa tang kix phimap, mawh kheu nan simiang an kied daox deng kah heue. ¹⁵ Yam yuh pawie, simiang koe been ploi pui pa ot daux thawng lih tix kaux kaux, pa khaw ka rhawm pui hun khankix heue. ¹⁶ Yam an kix koe pui pa ao min daux kaing pa caox ka daux thawng tix kaux, pa kok mawh Barabax heue. ¹⁷ Khaix hoik kraix khrawm kix paox tix, Pilat chawk ah nin ka kix, "Pex mie aux ploi pui mawx ka son pex? Barabax lie, phan ang mawh nan Yesux pa kok mawh Khrit lie?" ¹⁸ Nawh tom ah nan, kheu tawng nawh kix hoik tawx Nawh Cao, kheu boh rhawm kix kah heue. ¹⁹ Yam ngawm nawh piang dee prawng see, moeng nawh tawx lox hu ka nawh ah nin, "Paw yuh tidtix ka Pui rahsee an, mawh kheu hoik kham geu aux tom nie ceu singaix ka daux camaox kheu Nawh heue." ²⁰ Cao giex kaing li pa ting mai kuad song khankix nyaw pui hun khankix rawg sonsang ploi ka Barabax mai sonsang pah ka Yesux heue. ²¹ Simiang baox chawk lox ka kix ah nin, "Daux pui ra kaux in, pex mie ti kieh aux ploi pa yuh ka mawx ka son pex?" kix ah nin, "Barabax." ²² Pilat baox ah nin ka kix, "Phan mawh nan aux sang yuh patix ka Yesux pa kok mawh Khrit?" Kix khawmuik ah nin, "Tawk Nawh piang khaox lhak heue." ²³ Nawh baox ah nin, "Mawh kheu grawng patix, Nawh hoik yuh pa caox pa yuh ka mawx?" Viang mawh nan kix nied ti yo ah nin, "Tawk Nawh piang khaox lhak heue." ²⁴ Yam tawng Pilat ka tokaux tix ang chix yuh tidtix mai yaox pui dex simah ka paox tix, nawh teei rawm mai khoek taix tix sivoe pui hun khankix mai ah nin "Aux ang koe dee lud, aux luan khaing nham Pui pa rahsee in. Pex jhak grawh grawng in heue." ²⁵ Pui khawmuik pawk lox ah nin, "Kieh nham Nawh koe piang ex mai kawn praix ex heue." ²⁶ Yam an nawh ploi Barabax ka son kix, viang mawh nan nawh sivied Yesux mai tawx sonsang tawk piang khaox lhak heue. ²⁷ Yam an pui naing simiang khankix teei Yesux hu ka daux nyiex haw tix dah mai kix kraix khrawm pui naing sivoe Nawh heue. ²⁸ Kix peeik kraung Nawh Cao mai kix ceep sibex raoh ka Nawh heue. ²⁹ Kix taing mhok kat lawm sau piang kaing Nawh Cao mai sau priem tix gawng daux taix khawn dawm Nawh mai kix grux ngawng sivoe Nawh mai ah lox briem ka Nawh Cao ah nin, "Kieh koe bwanson ka maix Simiang pui Yudax eue" . ³⁰ Kix baig piang Nawh Cao mai kix teei gawng priem an mai sivied ka kaing Nawh heue. ³¹ Khaix hoik yuh kix pa ang cee cak ka Nawh Cao, kix peeik sibex an mai deeh ceep kraung ceep cie Nawh mai tok Nawh hu sonsang tawk Nawh Cao piang khaox lhak heue. ³² Yam lih hu kix, kix yaox pui Kurene tix kaux, pa kaux Simon, mai kix khin nawh hu, sonsang kieh nawh klawm khaox lhak Nawh Cao heue. ³³ Yam hoek kix "Dee Si-ang Kaing" pa kok mawh Gawlaxgawthax. ³⁴ Kix tawx Nawh Cao nyaux sidah niex pa hoik klao tau mai ghin mai yam hoik cim Nawh Cao ti yaox Nawh ang nyaux heue. ³⁵ Khaix hoik tawk kix ka Nawh Cao piang khaox lhak, kix gwieh kraung Nawh Cao mai nieb ti cie heue. ³⁶ Kix ngawm mai jhak ka Nawh Cao tau heue. ³⁷ Kix deuh lai pa tang phimap ka Nawh Cao piang kaing Nawh pa ah nin, "IN MAWH YESUX SIMIANG PWI YUDAX," heue. ³⁸ Yam an kix tawk pui tud rhim ra kaux tau mai Nawh Cao piang khaox lhak, tawk tix kaux plak taix khawn dawm mai tix kaux plak khawn gwiex heue. ³⁹ Kix pa hu hoek dex tan, ah pa ang khaw ang jiet ka Nawh Cao mai vud vied kaing tix, ⁴⁰ Mai ah nin, "Maix kaw pa yieh nyiex bwan mai deeh yuh daux loe singaix eue, taoh tokaux Maix. Phan Maix mawh Kawn Siyiex lih khaing khaox lhak heue." ⁴¹ Awm an, cao giex kaing li pa ting mai pui tiiem lai mai kuad song khankix kawx, ah pa ang cee ang cak ka Nawh Cao ah nin, ⁴² "Nawh chix taoh ka pui tang kaux, Nawh pon taoh ka tokaux tix lie. Nawh mawh Simiang Isarelax, kieh Nawh lih khaing khaox lhak yam in mai ex tak chix yum rhawm ka Nawh heue. ⁴³ Nawh een rhawm ka Siyiex, kieh Siyiex taoh Nawh yam in, phan Nawh koe alo ka Nawh. Mawh kheu hoik ah Nawh, Aux mawh Kawn Siyiex heue." ⁴⁴ Pui tud rhim pa hoik tawk piang khaox lhak tau mai Nawh Cao kawx, ah lox pa ang khaw ang jiet ka Nawh awm an heue. ⁴⁵ Jah ka bawg yam liah nari tom hoek dim nari praix faik piang haktiex khawmuik heue. ⁴⁶ Yam dex hoek dim nari Yesux kok yo lox sinum ah nin, "Elix, Elix, lama sabak-tanix?" pa ah, "Siyiex Aux, Siyiex Aux, Maix lai tik vud Aux yuh ka mawx?" ⁴⁷ Kix pa cung tan tix blah yam mhong kix lox an, kix ah nin, "Pui in kok Eliyax heue." ⁴⁸ Dom mawx dom an kix tix kaux to hu mai teei gai ploh pa awm tih tix mu, pa sau rawm sidah niex naog mai sau ka toh gawng priem mai tawx Nawh Cao nyaux heue. ⁴⁹ Pui tang kaux khankix ah nin, "Pau ti jhak, mawh sang hoek taoh Eliyax ka Nawh lie, ang hoek lie?" ⁵⁰ Yesux baoh deeh kok yo lox sinum mai tawx khuan tix dud rhawm heue. ⁵¹ Jhak heue, man tie daux nyiex bwan griah ra pak, jah plak rao tom hoek ka caong mai tuk kla reem mai simaox rang tuh heue. ⁵² Simeeig khankix kawx baoh mai tokaux pui singax pa hoik laig it tom nie deeh kaoh heue. ⁵³ Kix lih khaing daux simeeig khaix hoik kaoh im Nawh Cao mai laig ka daux veng pa singax singeh mai plak jhi ka pui tom nie heue. ⁵⁴ Pui giex kaing naing mai pui pa pau ka Yesux, yam yaox kix tuk kla reem mai ceu pa hoik mawh khankix, kix kied lhat kah ah nin, "Kaw in mawh Kawn Siyiex tete heue." ⁵⁵ Bun pa hawt khaix Yesux khaing meung Galilie, pa khan kheu ka Nawh ot tan tom nie mai ca jhak khaing dee singai heue. ⁵⁶ Ka daux kix koe Marix Magadalax mai Marix miex Yakop mai Yosiep mai miex kawn simex Zebedie heue. ⁵⁷ Yam ponbo cao mi tix kaux pa mawh pui Arimase, pa kaux Yosiep, pa mawh kawncau Yesux hoek heue. ⁵⁸ Nawh hu ka Pilat mai mhaing tokaux yum Yesux heue. Pilat tawx lox sonsang tawx tokaux Nawh cao ka nawh heue. ⁵⁹ Yosiep teei tokaux yum an mai pua ka man pa singax, ⁶⁰ mai hu deuh ka daux simeeig pa khraox cie nawh, pa hoik saik nawh ka daux rang heue. Nawh plu plie simaox ting mai thox moing daux simeeig mai hu heue. ⁶¹ Marix Magadalax mai Marix tang kaux ngawm dex ka simeeig tan heue. ⁶² Yam hoek pasax, pa mawh singaix khaix Ngaix Khre, cao giex kaing li pa ting mai Pharishie khankix khrawm paox tix ka Pilat, ⁶³ ah nin, "Simiang eue, yam kawn im ju Pui pie lhen an, pa ah Nawh ex kawn doh keud heue, " Khaix hoik loe singaix Aux tak deeh kaoh heue." ⁶⁴ Mawh kheu nan tawx lox kieh pau simeeig mhawm mhawm tom sidah loe singaix. Phan ang mawh nan ha kawncau Nawh khankix kawx hoek mai briex tokaux yum Nawh mai ah nin ka pui khankix, "Nawh hoik deeh kaoh khaing krax yum" mai pa lhen bawg ghoik tak nie lheu caox khaing pa lhen bawg liang heue." ⁶⁵ Pilat ah nin ka kix, "Pex koe lien cao pau. Pex hu mai yuh kaux cong awm pa chix tix heue." ⁶⁶ Mawh kheu nan kix hu yuh simeeig kaux mai tawk cum ka simaox mai kieh lien pau heue.

¹ Khaix sidah ngaix twah, yam jah praix ti riang ka daux aliah ngaix, ngaix tix, Marix Magadalax mai Marix tang kaux hoek ti jhak ka simeeig heue. ² Jhak heue, yam an kla reem ting tuk, kheu kawncau cie Siyiex tix kaux lih hoek khaing raoma mai plu plieh ti tik simaox mai ngawm piang an heue. ³ Grang nawh awm pluk plak praix mai kraung ceep nawh paing awm rawm rha, ⁴ mai pui pau khankix siyaung kheu lhat ka Nawh mai lih mawh awm pui yum heue. ⁵ Kawncau Siyiex an ah nin ka bun an, "Pax paw vi lhat, kheu tawng aux pax sawg Yesux, pa hoik tawk piang khaox lhak heue. ⁶ Nawh Cao ang lai ot tin, kheu Nawh Cao hoik kaoh, awm pa hoik krai Nawh heue. Hoek mai jhak dee hoik it Nawh Cao. ⁷ Nied ti hu krai ka kawncau Nawh khankix grawng hoik kaoh im Nawh Cao khaing krax yum Nawh hu sivoe pex ka daux meung Galilie mai pex tak yaox Nawh Cao tan heue. Aux hoik krai ka pax." ⁸ Mawh kheu nan kiex nied ti lih hu khaing simeeig mai pa lhat graung tix mai pa kied gaux rhawm mai to hu krai ka kawncau Nawh khankix heue. ⁹ Yesux yaox kiex dom an ah nin, "Kieh pa nhim koe mai pax," khaix an kiex hoek mai giex caong Nawh mai krub ka Nawh Cao heue. ¹⁰ Yam an Yesux ah nin ka kiex, "Paw vi lhat, hu krai ka puxaik Aux khankix, nhie kix hu ka daux meung Galilie mai kix tak yaox ka Aux tan heue." ¹¹ Yam kawn hu kiex, pui pa pau tix blah laig ka daux veng mai krai grawng ceu pa hoik mawh khawmuik ka cao giex kaing li pa ting khankix heue. ¹² Yam hoik khrawm kix paox tix tau mai kuad song khankix mai hoik kum kawng, kix tawx mau tom nie ka pui naing khankix, ¹³ ah nin, "Pex krai ka pui, Kawncau Nawh khankix hoek yam ponsawm mai briex ti teei Nawh hu, yam laig it ex, ¹⁴ Phan gum lox in hoek ka yhaok simiang, ex tak kieh nawh fah rhawm mai kieh pex luan khaing krax prawng ca heue." ¹⁵ Mawh Kheu nan, kix teei mau mai yuh awm pa cau ka kix heue. Grawng in, tah hu kudah ka daux pui Yudax, tom singaix heue. ¹⁶ Yam an, Kawncau kao tix kaux hu ka meung Galilie, piang gawng dee hoik krai Yesux ka kix heue. ¹⁷ Yam yaox kix ka Nawh Cao, kix krub ka Nawh, viang mawh nan, tix blah ang yum rhawm kah heue. ¹⁸ Yesux hoek ka kix ah nin, "Sibrawm ka daux meung raoma mai piang haktiex hoik tawx ka Aux khawmuik heue. ¹⁹ Mawh kheu nan pex hu mai yuh ceu pui khawmuik mawh kawncau mau soi mai cubcom kix ka daux ceu kaux Keeing Cao, Kawn Cao mai Khuan Singax Singeh Cao heue. ²⁰ Gau kix kieh kix hawt yuh ceu pa hoik nhie Aux ka pex khawmuik, Aux tak ot tau mai pex jheung jheung, tom hoek bawg yam sidah haktiex heue."