Malachi

Malachi

¹ Gumlox pa plak jhi Siyiex ka ceu pui Isarelax khankix khaing ka Malakhix. ² Siyiex ah nin "Aux hoik moh ka pex, viang mawh nan, pex kawn ah nin "Mawh hoik moh Maix yix ka daux krax grawng ceu patix lie?" "Ang Esaw hoik mawh pux ke Yakop lie? "Siyiex ah nin, Aux hoik moh ka Yakop, ³ Aux hoik koeng ka Esaw, hoik kieh praix gawng ot nawh khankix mai sinngao nawh mawh pa laux leeing, son sox praix daux tiag heue. ⁴ Ceu pui Edom khankix ah nin, viang ex mawh pa hoik laux leeing yam in kawx mai ex tak sang deeh ing cox sum ka dee pa laux leeing ankix. "Siyiex cao kru naing raoma ah nin "Grham kix sum, Aux tak sang yieh ti tik. Pui tak sang kok kix mawh dee pang dee kwang pui caox caig mai kok kix mawh pui pa song rhawm Siyiex ka leeing ju heue. ⁵ Ngai pex tak sang yaox mai pex tak ah nin "Siyiex mawh pa koe min plakngai sibrawm ka mee haktiex Isarelax heue." ⁶ Kawn simex koe krax nab yam ka keeing tix mai siliex koe krax pa lhat graung ka Simiang tix. Phan Aux mawh keeing, koe krax pa nab yam ka Aux dee mawx lie? Phan Aux mawh Simiang mawh koe krax pa lhat graung ka Aux dee mawx lie? Siyiex cao kru naing raoma ah nin ka pex pa mawh cao giex kaing li khankix, pa koe lox salao ka ceu kaux Aux. Viang mawh nan, pex kawn ah nin "Mawh ah yix lox salao ka ceu kaux Maix ka daux krax ceu patix lie?" ⁷ "Pex tan pa ih pa hoik seeing brai ka piang khu dee tan Aux, viang mawh nan, pex kawn ah nin; "Mawh hoik seeing brai yuh yix Maix ka grawng ceu patix lie? "Mawh kheu pex ah nin; "Pheen Siyiex mawh pa ang cee ang cak heue. ⁸ Yam tan pex ti tawx pa dug ngai son krax tan pa appong, ang an mawh pa caox lie? Yam tan pex ti tawx pa chawh caong mai pa koe jhawm saux, ang an mawh pa caox lie? Phan maix tan ti tawx an ka cao kwang veng pex nawh khex sang koe krax pa khaw rhawm rhi ka pex lie? Nawh khex sang rieb ti teei pex ka daux krax pa koe rhawm tix lie? Siyiex cao kru naing raoma ah nan heue. ⁹ Yam in pex khyox khaw ti yaox krax pa koe rhawm rhi Siyiex, sonsang kieh Nawh Cao koe krax caux rhawm ka piang pex. Phan grawng in mawh pa hoik yuh tix khaing taix pex, Nawh Cao khex sang jhak ka pakngai pex lie? Siyiex cao kru naing raoma ah nan heue. ¹⁰ Kieh simie pui ka daux sinax pex koe tix kaux pa nyeep ti priex siviex nyiex bwan, son ang pex pon ti phlu ngu ka piang khu dee tan Aux ka daux pa giex going heue. Aux ang koe krax khaw rhawm ka pex mai Aux ang lai rieb ti teei krax tan tix ceu kawx khaing daux taix pex. Siyiex cao kru naing raoma ah nan heue. ¹¹ Grawh grawng nawh jah khaing baoh dee lih singaix, tom hoek ka baoh dee klip singaix, ceu kaux Aux tak sang mawh pa ting lhaong ka daux sinax ceu pui tang ceu, ka baoh dee an kix kudah tak sang tan nyawng bhawng ka ceu kaux Aux mai khawm krax tan pa singax, grawh grawng nawh, ceu kaux Aux, tak sang mawh pa ting lhaong ka daux sinax ceu pui khankix. Siyiex cao kru naing raoma ah nan heue. ¹² "Viang mawh nan pex koe krax map ka ceu kaux Aux ah nin, "Pheen Siyiex mawh pa hoik seeing mai pa ih ka piang nawh khankix, mawh pa ang koe ceu koe cak heue." ¹³ "Pex deeh baox ah nin, kaing inkix koe ceu pa taug pa mao kah! Pex koe lox salao kah heue. Siyiex cao kru naing raoma ah nin. "Pex viex tobrie pa tud rhim tix, pa chawh caong mai pa saux khankix hoek sonsang tan. Mawh tak sang rieb Aux ti teei in khaing daux taix pex lie? "Siyiex ah nan heue. ¹⁴ "Kieh krax jhax lawg koe ka piang pui pie lhen an, pa koe yung mhaing ka daux cub phung yung nawh, pa hoik yuh lox mukheu mai tieh ti tan pa laux maung ka Siyiex grawh grawng nawh, Aux mawh simiang pa ting lhaong, "Ceu kaux Aux mawh pa sang koe krax pa lhat graung, ka daux sinax ceu pui khankix heue. "Siyiex cao kru naing raoma ah nan heue.

¹ Cao giex kaing li khankix eue, "Gumlox pingnyap in, mawh son pex heue." ² Siyiex cao kru naing raoma ah nin, "Phan pex ang cu ti nghiet mai ang cu ti sau an kix laig ka daux rhawm tix mai ang tawx krax yaog yaw min pakngai ka cau kaux Aux, Aux tak sang kieh krax pa jhax lawg hoek ka piang pex mai Aux tak sang jhax lawg ka bwanson pa pon maix khankix. Mawh kheu Aux hoik dawg jhax lawg ka pex, kheu ang pex tie sau an kix ka daux rhawm tix heue. ³ "Jhak heue, Aux tak sang ah ka ru pex mai kraix aing tobrie pa tan daux pawie ka piang ngai baoh pex mai pui tang kaux tak sang teei tik pex tau mai aing tobrie heue. ⁴ Pex tak sang tawng ka hoik ploi Aux gumlox pingnyap in hoek ka pex, sonsang kieh gumlox sijax mukheu yuh aux tau mai ceu pui Lewix koe sijheung heue. Siyiex cao kru naing raoma ah nan heue. ⁵ Gumlox sijax mukheu pa hoik yuh Aux tau mai nawh, mawh ju mai krax pa nhim, aux hoik tawx in ra ceu ka nawh, sonsang kieh nawh koe krax lhat graung ka Aux. Mawh kheu nan, nawh hoik lhat graung ka Aux mai koe krax lhat ka ceu kaux Aux heue. ⁶ Gumlox been pa khaw caw hoik koe ka daux jheeh nawh mai krax pa ang rahsee ang lai koe ka siyieb jheeh nawh heue. Nawh hoik hu tau mai Aux ka daux krax pa nhim mai ka daux krax pa rahsee mai hoik deeh kieh pui tom nie veeh tix khaing phimap phighram heue. ⁷ "Siyieb jheeh cao giex kaing li, khaw ti koe krax priex rien ka pingnya mai pui khankix tak sang sawg ti yaox gumlox been khaing daux jheeh nawh, mawh kheu nan mawh cao cau Siyiex cao kru naing raoma heue. ⁸ Pex hoik lih hu khaing daux krax, pex hoik kieh pui khankix tom nie, sideeing ti goh ka gumlox been heue. Pex laux leeing yuh gumlox sijax mukheu ceu pui Lewix heue. "Siyiex cao kru naing raoma ah nin, ⁹ "Aux hoik baox kieh pex mawh pa kham krax pa salao mai pa map pui khankix khawmuik, kheu ang pex priex rien ka daux krax Aux mai jhak pakngai pui ka daux gumlox been heue." ¹⁰ Ex khawmuik hoik mawh keeing tix kaux khaing ang mawh lie? Hoik mawh Simiang tix kaux khaing pa hoik phan ti deuh ex ang mawh lie? Ex chix sang yuh pa ang kaux sijax ka puxaik tix, tix kaux lai tix kaux mai yieh ka sijax mukheu keeing ex khankix kheu grawng pa yuh ka mawx lie? ¹¹ Ceu pui Yudax hoik yuh kaing pa ang kaux sijax mai yuh pa seeing brai tix ceu ka daux haktiex Isarelax mai ka daux veng Yerusaliem. Grawh grawng nawh, ceu pui Yudax hoik salao beenli pa singax Siyiex, ka pa moh Nawh Cao mai hoik teei ti moeng kawn bun siyiex pui tang ceu heue. ¹² Kieh Siyiex tat ti tik ceu pui pa yuh inkix, pa mawh cao gau mai kawncau nawh pa viex krax tan tix hoek ka Siyiex cao kru naing raoma, khaing daux nyiex Yakop heue. ¹³ In mawh ceu pa baox yuh pex tix ceu, pex kheem ti deuh khu dee tan Siyiex ka rawm ngai mai krax pa yiiem riag yo tix, mawh kheu nan, Nawh Cao ang lai jhak simi ka krax tan an khaix in tix bawg kawx mai ang lai rieb an ka daux krax pa khaw rhawm rhi tix khaing daux tawm taix pex heue. ¹⁴ Viang mawh nan, pex kawn ah nin, "Mawh son grawh grawng ceu patix lie? "Mawh kheu Siyiex hoik mawh pa kham mhai rug ka daux sinax maix mai moeng maix tom yam awn ju maix heue. Nawh mawh paox moh maix mai mawh moeng pa hoik yuh maix sijax mukheu tau, viang mawh nan maix ang kaux sijax ka piang nawh heue. ¹⁵ Nawh Cao hoik phan ti deuh pui tix kaux khaing pa kawn deuk ti koe khuan ang mawh lie? Mawh kheu patix lai phan pui tix kaux khaing lie? Mawh sonsang sawg Nawh Cao ru pa khaw caw mai Siyiex nong nong heue. Mawh kheu nan, priex ka rhawm rhi pex mai paw kieh pui tix kaux kawx, yuh krax pa ang kaux sijax ka moeng pa hoik teei nawh tom yam awn ju tix heue. ¹⁶ "Grawh grawng nawh, Siyiex pa mawh Siyiex ceu pui Isarelax ah nin, Aux koeng ka grawng pa tik moeng tix mai koeng ka pui pa yuh krax pa kin ka moeng tix heue. "Siyiex cao kru naing raoma ah nin, "Mawh kheu nan priex ka rhawm rhi pex, son ang pon ti yuh ceu pa ang kaux sijax heue." ¹⁷ Pex hoik lak lheut Siyiex ka gumlox sikah pex. Pex kawn ah nin, "Mawh hoik lak lheut yix Nawh Cao ka daux grawng ceu patix lie? "Ka daux grawng an pex ah nin, "Can pui pa yuh ceu pa caox, mawh ceu pa mhawm ka plak sivoe ngai Siyiex mai Nawh Cao koe krax khaw rhawm ka daux kix heue. Phan ang mawh nan, Siyiex pa rahsee koe dee mawx lie?"

¹ Jhak heue, Aux ploi cao cau tix hoek mai nawh tak sang cox khre daux krax sivoe aux heue. Siyiex pa sawg pex ti yaox, tak sang hoek sijaox ka nyiex bwan Nawh, cao cau gumlox sijax mukheu an, mawh pui pa sang khaw rhawm pex kah heue. Jhak heue, Nawh Cao tak sang phai hoek. Siyiex Cao kru naing raoma ah nan heue. ² Viang mawh nan, mawh pui mawx pa pon kham singaix pa sang hoek Nawh Cao lie? mawh pui mawx pa pon cung yam bleeh Nawh Cao lie? Nawh Cao mawh pa awm ngu cao pa raug lon mau mai awm sipiak cao pa sidaux kraung heue. ³ Nawh Cao tak sang ngawm awm cao pa raug lon mau mai cao pa thi lon mau singax Nawh Cao tak sang kieh kawn simex ceu pui Lewix singax mai thi kix singax awm mau khri, sonsang tan kix ti tawx krax tan ka daux pa rahsee ka Siyiex heue. ⁴ "Yam an krax tan pui Yudax mai pui daux veng Yerusaliem khankix, tak sang mawh pa khaw rhawm rhi Siyiex, awm ka daux singaix pa prim khankix, awm baux num phao voe khankix heue. ⁵ Aux tak sang hoek dex pex, son krax ciyang, Aux tak sang mawh cao pa kham mhai rug pa kied phai, ka pui pa chix yuh phi yuh simeed khankix, ka pui pa phit vao, ka pui pa tiextu pie lhen, ka pui an kix, pa kheem ti ih ngawh kaing cao pa pon mau khankix mai ka pui pa yeen ya ti ih ka miexmai kawn doe mai ka pui an kix, pa nieb yuh ka nyo sinie khankix, kheu ang kix koe krax lhat graung ka aux heue. "Siyiex cao kru naing raoma ah nan heue. ⁶ "Aux mawh Siyiex pa ang chix loh tix heue. Mawh kheu nan, kawn simex ceu pui Yakop khankix eue, Pex ang nyang hoek krax pa laux leeing. ⁷ Jah khaing daux baux singaix keeing pex khankix, pex hoik via ti hu khaing beenli pa priex pa deuh Aux mai ang priex rien ti hawt ankix. Deeh ing hoek ka Aux mai Aux tak sang deeh ing hoek ka pex. Siyiex cao kru naing raoma ah nin. Viang mawh nan, pex kawn ah nin "Ex tak sang deeh ing hoek ka daux krax pa yuh ka mawx lie? ⁸ "Pui khiex sang tud rhim kraung cie Siyiex lie? Viang mawh nan, pex hoik tud rhim kraung cie Aux. Pex deeh chawk ah nin, "Ex hoik tud rhim kraung cie Maix ka ceu patix lie? "Mawh khaing ka daux kao son tix son mai krax tan khankix heue." ⁹ Pex mawh pa hoik kham krax pa kha rhawm ka krax pa jhax lawg, grawh grawng nawh, pex khawm ceu pui inkix khawmuik hoik tud rhim kraung sinngao Aux heue. ¹⁰ Siyiex cao kru naing raoma ah nin, viex kao son tix son khawmuik laig ka daux nyiex krao, kieh pa ih koe ka daux nyiex bwan Aux mai cheu ti yaox Aux yuh nin, "Aux paoh ang paoh daux siviex iak raoma ka son pex mai klup krax pa nawb bwanson lih ka piang pex, tom kreh mai ang lai koe dee een heue. ¹¹ "Aux tak sang ah ka ceu pa chix kiied ting ih ka cie pex, son ang nawh lai laux leeing yuh plix simie pa kaoh khaing daux tiex pex mai plix siiet pex, tak ang lai cia sivoe sang teem ka daux tong kaung. Siyiex cao kru naing raoma ah nin heue. ¹² "Ceu pui khankix, tak sang kok pex mawh pui pa koe bwanson, mawh kheu haktiex pex tak sang mawh haktiex pa koe krax gaux rhawm. "Siyiex cao kru naing raoma ah nin heue. ¹³ "Lox sikah pex hoik kied riex ka piang Aux. "Siyiex ah nin, Viang mawh nan, pex kawn ah nin, "Mawh hoik sikah yix lox pa kied riex ceu patix ka piang Maix lie?" ¹⁴ Pex ah nin! "Pa yuh kaing krup ka Siyiex mawh ceu pa giex going, pa hoik priex ex ti hawt beenli pa deuh Nawh Cao mai pa hoik lai ling ex ti hu, awm pui pa koe krax khi rhawm khankix, ka plak sivoe Siyiex cao kru naing raoma koe bwanson ceu patix lie? ¹⁵ Yam in ex kok pui pa ting rhawm rhi mawh pa koe bwanson mai pui pa yuh ceu pa caox caig, mawh pa hoik yaog ti haok hwan pui ankix pa nyaw ti yaox ka Siyiex pon lawd luan heue." ¹⁶ Yam an pui ankix pa hoik koe krax lhat graung ka Siyiex hoik ra lai krai lox ka paox tix, tix kaux lai tix kaux mai Siyiex hoik nghiet lox ankix heue. Koe phuk lai pa hoik tiiem ti deuh ka plak sivoe Nawh Cao, son pui ankix, pa koe krax lhat graung ka Siyiex mai pui pa koe krax doh keud ka ceu kaux Nawh Cao heue. ¹⁷ Siyiex cao kru naing raoma ah nin, "Kix tak sang mawh cie Aux, ka daux singaix yuh Aux kix mawh sinngao pa blon mhawm. Aux tak sang koe rhawm lhawk ka kix, awm lhawk pui ka kawn simex tix pa yuh ti tawx kaing ka son nawh heue." ¹⁸ Yam an pex tak sang deeh tawng ti gwieh sinax pui pa rahsee mai pui pa caox caig, sinax pui pa yuh kaing krub ka Siyiex mai pui pa ang yuh kaing krub ka Siyiex heue.

¹ "Jhak heue, Singaix an dex hoek mai awm ngu pa rup ka daux glah ngu mai can pui pa ting rhawm ting rhi an kix khawmuik, pa yuh kaing ceu pa caox caig, tak sang mawh nyhee pa kroh kroing. Singaix pa sang hoek an, tak gleeing ti tik kix, ang lai deuh khawm num khawm rao heue. Siyiex cao kru naing raoma ah nan heue. ² Viang mawh nan, ka pex pa koe krax lhat graung ka ceu kaux Aux, singaix pa rahsee tak sang lih mai krax pa pai jhawm saux ka daux pruik Nawh Cao mai pex tak sang jaloh ti lih hu, awm kawn mawie pa hoik lih khaing daux kawg heue. ³ Pex tak sang dig ka pui pa caox caig. Kix tak sang awm nyaox greem tiag caong pex, ka daux singaix hoik tat Aux ti deuh. "Siyiex cao kru naing raoma ah nan heue. ⁴ "Deeh doh keud ka gumlox beenli Mose pa mawh kawncau Aux, ka gumlox tat jhawm prawng pa hoik tawm Aux ka nawh daux baoh Hawrap son ceu pui Isarelax khankix heue. ⁵ Jhak heue, sivoe sang hoek singaix Siyiex pa ting lhaong mai pa koe pa lhat graung, Aux tak sang ploi cao jhai Eliyax hoek ka pex heue. ⁶ Nawh tak deeh veeh rhawm rhi keeing hoek ka kawn nyawm khankix mai rhawm rhi kawn nyawm hoek ka keeing. Phan ang yuh nan, Aux tak sang hoek mai tawx krax kham geu haktiex ka krax pa jhax lawg heue.