Luke

Luke

¹ Mawh kheu pui tom nie hoik tiiem ti yaox grawng ceu pa hoik naog grum mawh sinax ex, ² Awm kix pa mawh pa kham mhai ruk grawng ceu pa hoik yaox ka ngai tix mai cao pa viex ti tawx lox bwan ka ex tom yam jah. ³ Phan keud ti yaox, aux kawx, hoik sawg ti yaox grawng kuceu mhawm mhawm tom yam jah, khaw ti tiiem lai ka maix, Thawphilux pa mhawm eue, ⁴ yuh ka mawx maix tak sang grum tawng grawng ceu pa hoik gau ka maix, mawh pa mawh meh heue. ⁵ Bawg yam mawh Herut, simiang meung Yudax, koe cao giex kaing li tix kaux, pa kaux Zakharix, pa dex dawd mai cub Abiyax. Moeng nawh mawh kawn bun ru Arun mai ceu kaux nawh mawh Elizabiet heue. ⁶ Kiex khawm ra mawh pa rahsee sivoe Siyiex mai hawt lox tawm pinyap cie Siyiex khawmuik ang lai koe dee lud loe heue. ⁷ Kiex ang koe kawn, kheu Elizabiet mawh pui neh mai kiex hoik kuad. ⁸ Yam yuh Zakharix kaing cao giex kaing li sivoe Siyiex, ceu pa yuh cub pa neuex nawh, ⁹ awm pa koe been cao giex kaing li khankix, caw bawg yam laig nawh ti tok nyawng bhawng ka daux nyiex bwan Siyiex. ¹⁰ Cub pui hun khawmuik, ot ti rawg bwan ka plak praix, bawg yam nari tok nyawng bhawng heue. ¹¹ Yam an kawncau Siyiex tix kaux hoek ti cung plak dawm khu dee tan nyawng bhawng. ¹² Yam yaox Zakharix nawh sung sang rhawm kah mai lhat heue. ¹³ Viang mawh nan kawncau Siyiex ah nin ka nawh, "Zakharix eue, paw lhat graung, mawh kheu hoik nghiet lox pa rawg pa mhaing maix mai moeng maix Elizabiet tak keh kawn simex son maix tix kaux mai maix tak kok ceu kaux nawh mawh Yohan heue. ¹⁴ Maix tak sang gaux rhawm mai pui tom nie tak sang koe krax gaux rhawm kheu keh nawh. ¹⁵ Mawh kheu nawh tak ting lhaong sivoe ngai Siyiex, nawh tak ang nyaux plai rawm plix siiet, mai ceu pa chix kieh yoek, nawh tak naog mai Khuan Singax Singeh, tom yam ot nawh ka daux vaig miex tix heue. ¹⁶ Nawh tak kieh kawn praix Isarelax tom nie deeh tieh ti hoek ka Simiang mai Siyiex kix. ¹⁷ Nawh tak sang hu sivoe Nawh Cao ka daux khuan mai siawp sibrawm Eliyax, sonsang kieh keeing khankix mai kawn praix tix, deeh khaw paox tix mai sonsang kieh pa lheu lox khankix deeh hu ka daux pingnya pa rahsee khankix, sonsang cox pui tix ceu mawh pa hoik rien son Siyiex heue. ¹⁸ Zakharix ah nin ka kawncau Siyiex an, "Grawh grawng tak sang mawh, ceu in aux chix tawng yuh ka mawx? Mawh kheu aux uik mawh tax kuad mai moeng aux ka hoik riex ju uik kuad heue." ¹⁹ Kawncau Siyiex an deeh pawk lox ah nin ka nawh, "Aux mawh Gabrelax, pa cung sivoe Siyiex mai hoik ploi aux hoek sonsang sikah ka maix mai kieh aux viex lox gaux rhawm ceu in khankix ka maix heue. ²⁰ Jhak heue, kheu ang maix yum rhawm ka lox aux in maix tak aw khawm ang chix sikah, tom hoek singaix hoik mawh ceu in khankix, pa tak sang naog ka daux bawg yam kix heue." ²¹ Pui pa krox Zakharix khankix, daox deng kheu ot nawh ka daux nyiex bwan kied rheung heue. ²² Yam lih hoek nawh, nawh ang chix sikah mai kix, kix tom tawng hoik yaox nawh riang susai ka daux nyiex bwan. Viang mawh nan Zakharix jhi kix yaox mhai mai aw tix heue. ²³ Yam hoik naog singaix yuh nawh kaing, nawh deeh ing ka nyiex tix heue. ²⁴ Khaix singaix an khankix moeng nawh Elizabiet, koe kaux mai nawh mox tokaux tix son phwan khix, ah nin, ²⁵ "Simiang hoik yuh ceu in son aux, daux singaix yam kia Nawh aux, sonsang teei kieh aux luan khaing pa salao kawn pui heue." ²⁶ Khaix an ka daux liah khix, Siyiex ploi kawncau Nawh Gabrelax hu ka daux veng meung Galilie tix veng, pa kok mawh Nazariet, ²⁷ ka bunkrih tix kaux, pa hoik chawk pui tix kaux pa kaux Yosiep, pa mawh ru Davit mai ceu kaux bunkrih an mawh Marix heue. ²⁸ Kawncau Siyiex an laig mai ah nin ka nawh, "Bun pa koe bwanson eue, kieh maix gaux rhawm heue. Siyiex ot tau mai maix, ka daux ceu bun maix kied ting bwanson heue." ²⁹ Viang mawh nan, nawh kied sung sang rhawm ka lox in mai keud jee keud blaong daux rhawm tix, grawh grawng dee bleeh ceu an. ³⁰ Kawncau Siyiex an ah nin ka nawh, "Marix eue, paw lhat graung, kheu maix hoik pon bwan khaing Siyiex. ³¹ Jhak heue. Maix tak koe kaux daux vaig tix mai keh kawn simex tix kaux mai tak kok ceu kaux Nawh mawh Yesux heue. ³² Nawh tak ting lhaong mai tak kok Nawh mawh kawn, kaw pa ting lhaong khaing khawmuik mai Siyiex tak tawx dang ngeung keeing Nawh Davit ka Nawh heue." ³³ Nawh tak giex kaing ru Yakop leeing ju mai Meung Nawh tak ang chix sidah heue. ³⁴ Viang mawh nan Marix chawk ah nin ka kawncau Siyiex an, "Ceu in chix mawh yuh ka mawx? Kheu aux ang koe mex mai ang pied ang pha simex heue." ³⁵ Kawncau Siyiex an deeh pawk lox mai ah nin ka nawh, "Khuan Singax Singeh tak sang hoek ka piang maix mai sibrawm kaw pa ting lhaong khaing khawmuik, tak sang tawb veei ka piang maix, mawh kheu grawng in Kawn singax pa tak sang keh, tak kok mawh kawn Siyiex heue. ³⁶ Jhak heue, bun paox ru maix Elizabiet kawx, hoik nghe kawn simex, nawh kuad kawx mai yam in uik koe liah khix khawm ah pui pa neh kah, ³⁷ mawh kheu sibrawm Siyiex, pa ang Nawh chix yuh ang koe tix ceu kawx heue." ³⁸ Marix baox ah nin, "Aux mawh siliex Simiang, awm lox krai maix kieh mawh ka aux heue." Kawncau Siyiex an lih hu khaing nawh heue. ³⁹ Daux bawg yam singaix an khankix Marix nied ti kaoh mai hu ka daux haktiex dee koe gawng koe lua, ka veng Yudax tix veng. ⁴⁰ Laig ka daux nyiex Zakharix mai nawb bwan ka Elizabiet. ⁴¹ Yam mhong Elizabiet lox nawb Marix ka nawh, kawn ngie pa ot daux vaig nawh jaloh ka mai Elizabiet naog mai Khuan Singax Singeh heue. ⁴² Nawh yo lox sinum ah nin, "Ka daux ceu bun maix kied ting bwanson mai plix vaig maix kawx ting bwanson heue. ⁴³ Aux pon min plakngai pa hoek miex Simiang aux ka aux yuh nin, yuh ka mawx? ⁴⁴ Grawh grawng nawh, jhak heue, yam mhong lox pa nawb maix ka daux yhaok aux, kawn ngie pa ot daux vaig aux jaloh tix kheu gaux rhawm tix heue. ⁴⁵ Bun pa hoik yum rhawm ting bwanson, mawh kheu grawng ceu pa hoik krai Simiang ka nawh, tak sang naog sang grum heue." ⁴⁶ Marix ah nin, "Ju aux yaogyaw Simiang, ⁴⁷ mai khuan aux gaux rhawm ka daux Siyiex Cao Taoh aux heue. ⁴⁸ Mawh kheu Nawh hoik jhak ka bun siliex Nawh pa tiiem rhawm. Grawh grawng nawh, jhak heue, jah yam in tix ju hoik tix ju, ku ju, tak kok aux mawh pa ting bwan son heue." ⁴⁹ Mawh kheu Kaw pa ting sibrawm hoik yuh ceu pa ting lhaong son aux mai ceu kaux Nawh mawh pa Singax Singeh heue. ⁵⁰ Krax caux rhawm Nawh, hoek ka tix ju hoik tix ju, ka piang kix pa chix lhat ka Nawh heue. ⁵¹ Nawh hoik jhi yaox riang rao ka daux plawng taix tix. Nawh hoik kieh pa ting rhawm ting rhi, pa keud ka daux rhawm tix, khankix prung prang heue. ⁵² Nawh hoik khlut laux simiang khaing dang ngeung dee ngawm kix mai hoik yaog pa tiem kieh lhaong heue. ⁵³ Pa cai rhawm khankix Nawh hoik kieh sak ka ceu pa nyawm mai Nawh hoik ploi cao mi khankix hu yi giex going heue. ⁵⁴ Nawh hoik teem ka Isarelax kawncau mau soi Nawh, yuh ka mawx sonsang doh keud nawh ka krax caux rhawm heue. ⁵⁵ Awm lox pa hoik sikah Nawh ka tax du ex khankix ka Abraham, khawm ru nawh leeing ju heue. ⁵⁶ Marix ot tau mai Elizabiet dex loe khix mai deeh ing ka nyiex tokaux tix heue. ⁵⁷ Yam hoik naog bawg yam Elizabiet sang keh, nawh keh kawn simex tix kaux heue. ⁵⁸ Yam hoik mhong paox plawg, paox ru Elizabiet, grawng krax caux rhawm pa ting pa hoik yuh Siyiex son kiex, kix gaux rhawm tau mai kiex heue. ⁵⁹ Yam uik koe daix ngaix, kix hoek sonsang pat hak kawn nyawm an, mai kix dex sang kok nawh mawh Zakharix awm ceu kaux keeing nawh. ⁶⁰ Miex nawh deeh ah nin ka kix, "Ang mawh, tak kok nawh mawh Yohan heue." ⁶¹ Kix deeh ah nin ka kiex, "Ka daux paox ru maix, pui pa sum ceukaux yuh nin ang koe tix kaux kawx." ⁶² Kix yuh mhai chawk ka keeing nawh, grawng pa simie nawh ti tok ceu kaux mawh patix heue. ⁶³ Nawh mhaing ce tiiem lai mai tiiem ah nin, "Ceu kaux nawh mawh Yohan," kix pa ot tan khawmuik daox deng kah heue. ⁶⁴ Jheeh nawh deeh baoh dom mawx dom an mai siniag dak nawh deeh gah mai nawh deeh sikah, yaogyaw bwanson Siyiex heue. ⁶⁵ Kix pa ot sivie siveng tan khawmuik lhat ka mai grawh grawng ceu in khankix tah hu kudah kudee ka daux haktiex dee koe gawng koe lua meung Yudax heue. ⁶⁶ Kix pa mhong grawh grawng ceu in khawmuik priex ti tawng ka daux rhawm tix, ah nin, "Phan mawh nin, kawn nyawm in tak sang mawh pa yuh ka mawx? Mawh kheu ot taix Siyiex tau mai nawh heue." ⁶⁷ Keeing nawh Zakharix naog Khuan Singax Singeh mai krai lox jhai ah nin, ⁶⁸ "Kieh Simiang, Siyiex Isarelax ting bwanson heue. Mawh kheu Nawh hoik hoek ti lai ling mai hoik taoh pui cie tix. ⁶⁹ Nawh hoik kieh Cao Taoh koe son ex tix kaux, ka daux geh nyiex ru kawncau Nawh Davit. ⁷⁰ Awm hoik krai Nawh ka jheeh cao jhai pa singax singeh khankix, pa hoik koe di dix. ⁷¹ Grawh grawng sang taoh ex khaing pui pa koeng ka ex khankix mai khaing tawm taix pa boh rhawm pa khoi ka ex khawmuik heue. ⁷² Sonsang yuh krax caux rhawm ka tax du ex khankix mai sonsang doh keud ka lox sijax mukheu pa singax singeh Nawh heue. ⁷³ Pa mawh lox pa hoik tiextu Nawh mai tawx ka Abraham keeing ex dix. ⁷⁴ Sonsang taoh ex luan khaing daux tawm taix pa koeng ka ex khankix sonsang pon luan ex khaing krax lhat graung mai pon ti yuh son Nawh. ⁷⁵ Ka daux pa singax singeh mai pa rahsee, daux bawg yam ngaix pa kawn ot kawn koe ex ka sivoe Nawh khawmuik heue. ⁷⁶ Kawn nyawm eue, tak sang kok maix mawh cao jhai cie kaw pa ting lhaong khaing khawmuik, mawh kheu maix tak sang hu sivoe pakngai Siyiex sonsang cox krax heue. ⁷⁷ Sonsang kieh pui cie Nawh tawng grawh grawng krax taoh, ka daux pa pluat ploi phimap kix heue. ⁷⁸ Mawh kheu krax caux rhawm Siyiex ex, pa riang singaix khaing dee lhaong tak sang hoek ti lai ling ka ex. ⁷⁹ Sonsang jhan riang ka piang kix pa ngawm ka daux pa faik mai veei krax yum. Sonsang thong caong ex laig ka daux krax pa nhim heue. ⁸⁰ Kawn nyawm an haok hwan mai ting riang ka daux khuan mai nawh ot ka daux tiagtu, tom hoek singaix bawg yam jhi tokaux tix ka pui Isarelax heue.

¹ Ka daux bawg yam singaix an khankix, Simiang Kesa Awgutux tawx lox kieh pawd kieh teei ceu kaux pui pa ot ka daux haktiex khawmuik. ² Yam Kurine mawh simiang giex kaing ka daux meung Surix, in mawh bawg yam teei ceu kaux bawg phao ka tix bawg heue. ³ Pui khawmuik deeh ka daux yaong daux veng pui mawx pui an, sonsang tawx sang kieh pawd ceu kaux tix heue. ⁴ Yosiep kawx, kaoh khaing daux veng Nazariet meung Galilie mai haok ka meung Yudax, ka veng Davit pa kok mawh Bieliehiem, kheu mawh nawh doeh ru Davit. ⁵ Sonsang sau ceu kaux tokaux tix mai Marix, pa hoik chawk nawh, pa hoik koe kaux mai dex sang naog bawg yam sang keh heue. ⁶ Yam kiex ot tan, bawg yam singaix sang keh nawh uik naog, ⁷ nawh keh Kawn Ai tix mai pua nawh daux leem, daux man mai een ka daux dawng mawie, kheu ang dee ot koe son kix daux nyiex nyo heue. ⁸ Ka daux meung an koe cao liang yung tix blah pa pau cub yung kix daux yam pon sawm heue. ⁹ Kawncau Siyiex tix kaux hoek ti cung dex kix mai min plakngai Simiang jhan riang vung viang kix mai kix die lhat kah heue. ¹⁰ Kawncau Siyiex an ah nin ka kix, "Paw lhat paw graung, jhak heue, Aux viex lox ceu pa mhawm, pa kied ting gaux rhawm, pa sang mawh son pui khawm mu khawm miang. ¹¹ Mawh kheu singaix in, daux veng Davit, Cao Taoh hoik keh son pex tix kaux pa mawh Khrit Simiang heue. ¹² In tak mawh mhai ruk son pex. Pex tak yaox Kawn ngie pa hoik pua ka leem ka man mai it ka daux dawng mawie heue." ¹³ Dom mawx dom an cub kawncau raoma kied haoh hun, hoek ti ot tau mai kawncau Siyiex an mai yaogyaw Siyiex ah nin, ¹⁴ "Kieh yaog min plakngai Siyiex, ka dee kied lhaong khaing paox tix mai ka piang haktiex kieh pa nhim koe ka kawn pui, pa khaw caw rhawm Nawh heue." ¹⁵ Khaix hoik deeh ing kawncau Siyiex khankix ka meung raoma, cao liang yung khankix ah nin ka paox tix, "Ex hu ka veng Bieliehiem mai jhak ti yaox ceu pa hoik mawh in, pa hoik kieh Simiang ex tawng heue." ¹⁶ Kix nied ti hu tau, yaox Marix mai Yosiep mai Kawn ngie pa it ka daux dawng mawie. ¹⁷ Yam hoik yaox kix, kix krai grawng lox pa hoik krai ka kix, grawng Kawn nyawm in ku dah ku dee heue. ¹⁸ Pa mhong khawmuik daox deng ka grawh grawng ceu pa krai cao liang yung khankix, ka kix heue. ¹⁹ Viang mawh nan Marix een ti tawng, lox ceu in khawmuik mai keud grawh grawng khankix daux rhawm tix heue. ²⁰ Cao liang yung khankix deeh ing mai yaogyaw min plakngai Siyiex, kheu ceu pa hoik yaox hoik mhong kix khawmuik, jiet awm lox pa hoik krai ka kix heue. ²¹ Yam hoik naog daix ngaix, yam uik caw bawg yam sang pat hak Nawh, kok ceu kaux Nawh mawh Yesux, awm pa hoik grux kok kawncau Siyiex, ka ang nyang bax nghe Nawh daux vaig heue. ²² Khaix hoik naog bawg yam singaix pa kieh kix singax khankix, awm pa koe daux lox been Mose, kiex viex Nawh haok ka veng Yerusaliem, sonsang tawx Nawh ka Simiang. ²³ Awm hoik tiiem daux lox lai been Siyiex lengju, "Kawn Ai plix num ku kaux tak sang kok mawh pa singax son Siyiex leeing ju heue." ²⁴ Kiex yuh pa tan, awm pa hoik nhie yuh ka daux lai been Siyiex lengju, "Sikaux tix brawm, phan ang mawh nan keukie awn tix brawm" heue. ²⁵ Jhak heue, ka daux veng Yerusaliem koe pui pa kaux Simeon tix kaux, pa mawh pui rahsee pa chix nab yam yungyi mai krox jun son bawg yam sang teem kieh Isarelax mhawm mai Khuan Singax Singeh koe ka piang nawh heue. ²⁶ Khuan Singax Singeh hoik kieh doh ka nawh, grawng nawh tak ang nyang yum, ka ang tix bax yaox Cao Khrit cie Siyiex lengju heue. ²⁷ Khuan Cao tok nawh hu ka daux nyiex bwan, miex keeing Nawh Cao viex kawn nyawm Yesux hu tan, sonsang yuh son Nawh awm koe lox lai beenli. ²⁸ Nawh teei ti teem Nawh Cao ka daux tawm taix tix mai yaogyaw bwanson Siyiex ah nin, ²⁹ "Siyiex eue, phao in kieh kawncau Maix koi hu mhawm mhawm, awm hoik koe gumlox Maix. ³⁰ Kheu hoik yaox ngai aux krax taoh Maix, ³¹ pa hoik cox Maix sivoe pakngai ceu pui khawmuik heue. ³² Pa mawh pa riang pa sang kieh doh ka pui tang ceu khankix mai pa tak sang yaog min plakngai pui Maix Isarelax heue." ³³ Miex keeing Nawh Cao daox deng ka lox pa krai grawng Nawh heue. ³⁴ Simeon nawb bwan ka kiex, ah nin ka Marix miex Nawh Cao, "Jhak heue, kawn nyawm in tak mawh pa sang kieh pui Isarelax tom nie goh mai deeh kaoh heue. Tak sang mawh mhai pa salao pui kah heue. ³⁵ Lheu khaing an rhawm maix kawx tak suat ka vaid, sonsang plak kieh doh pa keud pa sawn rhawm rhi pui tom nie heue." ³⁶ Yam an koe yiex jhai tix kaux pa kaux Anax. Nawh mawh kawn bun Phanwelax, pa mawh ceu Asha. Nawh uik kied kuad mai yam awn ju nawh hoik ot mai mex tix aliah num. ³⁷ Nawh uik mawh miexmai tidaix pon num, nawh ang lih khaing nyiex bwan, nawh ot tan rawg bwan mai twah pa ih, krub ka Siyiex ku ngaix heue. ³⁸ Daux bawg yam nari an nawh hoek mai yaogyaw bwanson Siyiex, krai grawh grawng kawn nyawm an ka kix khawmuik pa krox jun son bawg yam sang taoh veng Yerusaliem heue. ³⁹ Khaix an miex keeing Nawh yuh awm pa hoik nhie lox been Siyiex lengju, kuceu khawmuik, kix deeh ing ka daux meung Galilie, ka veng tokaux tix Nazariet heue. ⁴⁰ Kawn nyawm an haok hwan mai ting riang ting rao mai naog krax tawng yung, pingnya cuyi mai bwanson Siyiex ot ka piang Nawh heue. ⁴¹ Miex keeing Nawh Cao hu ka veng Yerusaliem, ku num, ka pawie Pasakha heue. ⁴² Yam hoik koe ju Yesux kao ra num, kix haok awm hoik sax koe been pawie. ⁴³ Khaix hoik luan ngaix pawie khankix, kiex deeh ing mai kawn nyawm simex pa mawh Yesux, kawn ot plak khaix ka daux veng Yerusaliem mai miex keeing Nawh ang tawng grawng an heue. ⁴⁴ Viang mawh nan kiex ce Nawh ot ka daux cub pui pa ing kix tau mai kiex ing tix ngaix krax. Khaix an kiex sawg Nawh ka sinax puxaik paox ceu mai sinax pui paox meed tawng kiex, ⁴⁵ kheu ang kiex yaox Nawh, kiex deeh hu sawg Nawh ka veng Yerusaliem heue. ⁴⁶ Khaix an loe ngaix kiex yaox Nawh ka daux nyiex bwan, ngawm sinax sara cao gau, nghiet lox kix mai chawk lox ka kix heue. ⁴⁷ Kix pa mhong lox Nawh khawmuik daox deng ka pa kied tawng Nawh mai lox pa deeh chix pawk Nawh heue. ⁴⁸ Yam yaox kiex Nawh, kiex daox deng ka mai miex Nawh ah nin ka Nawh, "Kawn eue, yuh ka mawx Maix lai yuh nin ka yiex? Jhak heue, keeing Maix mai aux hoik sawg Maix mai khi rhawm tix heue." ⁴⁹ Nawh Cao ah nin ka kiex, "Kheu pax lai sawg Aux? Ang pax tawng grawng tak lai ot Aux ka daux nyiex Keeing Aux lie?" ⁵⁰ Kiex ang tawng dee bleeh lox pa krai Nawh ka kiex heue. ⁵¹ Nawh lih hu tau mai kiex, hoek ka veng Nazariet, Nawh Cao nghiet lox kiex heue. Miex Nawh een ti tawng grawng ceu in khankix ka daux rhawm tix heue. ⁵² Tokaux Yesux baox haok baox hwan, baox ting pingnya mai baox nie khaw rhawm Siyiex mai kawn pui heue.

¹ Simiang Kesa Tiberix yam hoik giex kaing kao phwan num, Pungtix Pilat mawh simiang giex kaing meung Yudax mai Herut mawh simiang meung Galilie, Philipux pux nawh mawh simiang haktiex Iture mai Tarakhawnit mai Lusanix mawh simiang haktiex Abilenix. ² Ka daux bawg yam, Annax mai Kayaphax mawh cao giex kaing li pa ting, lox Siyiex hoek ka Yohan kawn Zakharix, ka daux tiagtu heue. ³ Nawh hu daux haktiex rawb rim rawm Yawdan kudah kudee, sidiex gau been krax tawx cubcom, pa doh keud ka phimap tom pon luan khaing daux phimap heue. ⁴ Awm hoik tiiem daux phuk lai Cao jhai Isayax, gumlox pa ah nin, "Lox pa kok yo daux tiagtu, cox krax Siyiex leeing ju, yuh krax Nawh rahsee heue. ⁵ Klawk ku klawk tak sang kieh naog, gawng ku gawng mai ton ku ton tak sang kieh tiem. Pa kawk pa vawk tak sang kieh see. Krax khluk khlek tak sang kieh plang. ⁶ Pui khawmuik tak sang yaox krax taoh Siyiex heue. ⁷ Mawh kheu nan nawh tom ah nin ka cub pui hun pa hoek ti cubcom mai nawh, "Ceu siuing pa cai eue, mawx nhie pex to, sonsang luan khaing pa song rhawm pa tak sang hoek?" ⁸ Kieh plix plix pa keung pa doh keud ka phimap tokaux tix, paw jah ti ah ka daux tokaux tix Abraham mawh keeing ex, aux krai ka pex, Siyiex teei simaox in khankix yuh mawh kawn Abraham ka chix heue. ⁹ Yam in kawx moe hoik koe ka dex riah num khaox mai khaox pa ang plix plix pa mhawm khankix khawmuik, sang kid ti taing sau daux ngu heue. ¹⁰ Cub pui hun chawk nawh ah nin, "Phan mawh nan ex tak sang yuh ka mawx?" ¹¹ Nawh deeh pawk ah nin ka kix, "Kieh pui pa koe sibex ra pheen tawx ka pa ang koe khankix mai pui pa koe priex preem kieh yuh awm an heue." ¹² Pui koh mau khankix kawx hoek sonsang cubcom mai nawh. Kix chawk ah nin ka nawh, "Sara cao gau eue, ex tak sang yuh ka mawx?" ¹³ Nawh deeh ah nin ka kix, "Paw vi teei nie lheu khaing pa hoik nhie pex koh heue." ¹⁴ Pui naing khankix kawx hoek mai chawk nawh ah nin, " ex tak sang yuh ka mawx?" Nawh ah nin ka kix, "Paw vi khin ti teei khaing pui tix kaux kawx. Paw vi deuh phimap pa ang mawh ang meh ka piang pui mai kieh rhawm pex fah ka mau riang pa pon pex heue." ¹⁵ Yam pui khankix keud jun pot mai pui khawmuik keud daux rhawm tix grawh grawng Yohan, mawh nawh Cao Khrit lie, ang mawh lie. ¹⁶ Yohan baox deeh ah nin ka kix, "Aux cubcom pex ka daux rawm tete, viang mawh nan khaix in tak sang hoek tix kaux, pa nie ting khaing aux, pie maox kiep Nawh ang aux keung ti kah, Kaw an tak sang cubcom pex ka daux Khuan Singax Singeh mai daux ngu heue. ¹⁷ Ka daux tawm taix Nawh koe bia yib mai Nawh tak kieh nghox ca pa pah tix singax mai Nawh tak sau nghox ca cie Nawh daux krao mai Nawh tak teei grhip gleeing daux ngu pa ang chix yeet heue." ¹⁸ Nawh teei lox tang ceu tom nie sidiex gau lox bwan gaux rhawm ka pui khankix. ¹⁹ Viang mawh nan, kheu ah Yohan ka simiang Herut, grawng pa teei nawh Herodi moeng pux tix mai grawng ceu pa ang khaw pa caox caig pa hoik yuh Herut khawmuik. ²⁰ Nawh baox deeh yuh pa ang khaw, pa nie lheu ting khaing an khawmuik, pa mawh, pa sau nawh Yohan daux thawng heue. ²¹ Khaix pui khawmuik hoik cubcom tix ka rawm, Yesux kawx hoik cubcom mai rawg bwan, raoma baoh, ²² mai Khuan Singax Singeh lih ka daux riang tokaux, pa awm sikaux, ka piang Nawh mai lox lih khaing raoma, "Maix mawh Kawn pa moh Aux, pa khaw caw rhawm Aux heue. ²³ Yam jah tokaux Yesux ti sidiex gau, Nawh dex sang koe tixngoe num. Pui ce Nawh mawh kawn Yosiep, pa mawh kawn Elix. ²⁴ Pa mawh kawn Mathat, pa mawh kawn Lewix, pa mawh kawn Melakhix, pa mawh kawn Yannax, pa mawh kawn Yosiep. ²⁵ Pa mawh kawn Mattalix, pa mawh kawn Amox, pa mawh kawn Nahum, pa mawh kawn Esalix, pa mawh kawn Nakge. ²⁶ Pa mawh kawn Maat, pa mawh kawn Mattalix, pa mawh kawn Semex, pa mawh kawn Yosiep, pa mawh kawn Yudax. ²⁷ Pa mawh kawn Yohannax, pa mawh kawn Resax, pa mawh kawn Zerubabelax, pa mawh kawn Salutilax pa mawh kawn Merix. ²⁸ Pa mawh kawn Melakhix, pa mawh kawn Atdix, pa mawh kawn Kosam, pa mawh kawn Elamodam, pa mawh kawn Erax. ²⁹ Pa mawh kawn Yosiep, pa mawh kawn Eliyaza, pa mawh kawn Yorim, pa mawh kawn Mathat, pa mawh kawn Lewix. ³⁰ Pa mawh kawn Simeon, pa mawh kawn Yudax, pa mawh kawn Yosiep, pa mawh kawn Yanam, pa mawh kawn Eliakhim. ³¹ Pa mawh kawn Mele, pa mawh kawn Menan, pa mawh kawn Matathax, pa mawh kawn Natan, pa mawh kawn Davit. ³² Pa mawh kawn Yesie, pa mawh kawn Obet, pa mawh kawn Bawzax, pa mawh kawn Salamon, pa mawh kawn Nashon. ³³ Pa mawh kawn Acoidap, pa mawh kawn Aram, pa mawh kawn Hezaron, pa mawh kawn Pherit, pa mawh kawn Yudax. ³⁴ Pa mawh kawn Yakop, pa mawh kawn Icak, pa mawh kawn Abraham, pa mawh kawn Terax, pa mawh kawn Nakhaw. ³⁵ Pa mawh kawn Cerawk, pa mawh kawn Ragau, pa mawh kawn Phalek, pa mawh kawn Hebax, pa mawh kawn Salax. ³⁶ Pa mawh kawn Kainan, pa mawh kawn Aphakcat, pa mawh kawn Semax, pa mawh kawn Noax, pa mawh kawn Lamek. ³⁷ Pa mawh kawn Mathusalax, pa mawh kawn Enawk, pa mawh kawn Zarit, pa mawh kawn Mahalalelax, pa mawh kawn Kainan. ³⁸ Pa mawh kawn Enot, pa mawh kawn Sethax, pa mawh kawn Adam, pa mawh kawn Siyiex heue.

¹ Yesux naog ka Khuan Singax Singeh, deeh hoek khaing rawm Yawdan mai Khuan Cao tuk Nawh hu ka daux tiagtu heue. ² Ka daux tixpon ngaix, phicaox nyaw glaw ti yaox Nawh. Nawh Cao ang ih tidtix ka daux ngaix an khankix mai khaix ngaix an khankix hoik naog, Nawh Cao cai rhawm heue. ³ Phicaox ah nin ka Nawh Cao, "Phan Maix mawh Kawn Siyiex tawx lox kieh simaox in mawh blah heue." ⁴ Yesux pawk lox ka nawh ah nin, "Hoik tiiem ti deuh ah nin, Pui tak im kheu khaomun nong nong ang mawh," tak im kheu Gumlox Siyiex kugum heue. ⁵ Phicaox tuk Nawh Cao haok dee lhaong mai jhi Nawh yaox meung pa koe ka piang haktiex khawmuik, daux bawg yam tivud ngie. ⁶ Phicaox baox ah nin ka Nawh Cao, "Aux tak tawx sibrawm mai min plakngai pa koe khankix khawmuik, mawh kheu hoik tawx kix ka aux mai aux tak sang tawx ka kaw pa simie aux ti tawx heue. ⁷ Phan Maix krub ka aux tak mawh cie Maix khawmuik," ⁸ Yesux deeh ah nin ka nawh, "Hoik tiiem ti deuh ah nin, Maix tak krub ka Siyiex maix mai yuh kaing son Nawh heue." ⁹ Phicaox baox tuk Nawh Cao hu ka veng Yerusaliem mai deuh Nawh piang dee choek nyiex bwan mai ah nin ka Nawh, "Phan Maix mawh Kawn Siyiex, kieh tokaux tix rau sen. ¹⁰ Kheu hoik tiiem ti deuh ah nin, Nawh tak tawm lox grawh grawng Maix ka kawncau Siyiex Nawh khankix, sonsang kieh pau Maix. ¹¹ Kix tak yaog Maix ka piang tawm taix kix, son ang caong Maix sang krox ka simaox heue." ¹² Yesux baox pawk lox ah nin ka nawh, "Lox baox hoik deuh ti ah nin, Maix paw vi nyaw ka Siyiex maix." ¹³ Khaix hoik nyaw phicaox tix yaox kuceu, nawh lih hu khaing Nawh Cao ti vong heue. ¹⁴ Yesux naog mai sibrawm Khuan Cao mai deeh ing ka daux Meung Galilie. Min plakngai grawh grawng Nawh tah hu kudah kudee hawt praok sivie tan khawmuik heue. ¹⁵ Nawh Cao sidiex gau ka daux nyiex sidiex kix khankix mai pui khawmuik yaogyaw Nawh heue. ¹⁶ Nawh Cao deeh hoek ka veng Nazariet, dee eei Nawh ting mai Nawh laig ka daux nyiex sidiex, singaix twah, awm sax koe been Nawh mai cung tix phat lai heue. ¹⁷ Pui tawx phuk lai cao jhai Isayax ka Nawh, Nawh plak mai yaox dee hoik tiiem ah nin, ¹⁸ "Khuan Siyiex lengju ot ka piang Aux, mawh kheu hoik groi Nawh rawm bee ka Aux, sonsang kieh sidiex gau lox gaux rhawm ka pui hot pui sibhawm khankix heue. Nawh hoik ploi kieh Aux krai grawh grawng pa pluat ploi ka pui pa hoik laung, sonsang kieh pui dug ngai deeh yaox heue. Kheu sonsang ploi ka pui se pui sang heue. ¹⁹ Kheu sonsang krai grawng jhong num pa khaw caw mai Siyiex lengju heue. ²⁰ Nawh Cao deeh pua lai mai tawx ka cao pau nyiex sidiex mai ngawm heue. Pui pa ot ka daux nyiex sidiex khawmuik gaong ti jhak Nawh heue. ²¹ Nawh Cao jah ti ah nin ka kix, "Lox phuk lai sigang khri in hoik naog ka daux yhaok pex in ngaix heue." ²² Khawmuik kham mhai ruk ka Nawh grawng in mawh pa mawh meh mai kix daox deng ka lox bwan pa lih khaing daux jheeh Nawh Cao ah nin, "In ang mawh kawn Yosiep lie?" ²³ Nawh Cao ah nin ka kix, "Phan keud ti yaox pex tak sang ah lox tiag pa ah nin ka Aux tete Cao chix sidah eue, cox tokaux tix moi, ceu pa yuh ka mawx ang ah, pa hoik mhong ex grawh grawng pa yuh Maix ka daux veng Kapeniom, daux meung tokaux tix, dee in kawx, yuh liak" ²⁴ Nawh Cao baox ah nin, "Aux krai lox tete ka pex, ang koe cao jhai tix kaux kawx, pa sang rieb pui ti teei ka daux meung tokaux tix heue. ²⁵ Viang mawh nan Aux krai lox pa mawh meh ka pex, daux ju bawg yam singaix Eliyax, koe miexmai tom nie ka daux Isarelax, yam nyeep raoma loe num mai liah khix mai yam kin sibhawm praix khawmuik. ²⁶ Viang mawh nan ang ploi Eliyax hu ka kix tix kaux kawx, lheu khaing bun tix kaux pa mawh miexmai, ka daux veng Zarephax ka daux meung Sidom heue. ²⁷ Daux ju bawg yam cao Jhai Elishie koe pui sipawg tom nie ka daux Isarelax, viang mawh nan lheu khaing Ne man pui Surix, ang kieh kix tix kaux kawx singax heue." ²⁸ Pa ot ka daux nyiex sidiex khawmuik, Yam mhong kix grawh grawng ceu in khankix, kix kied song rhawm heue. ²⁹ Kix yaog ti kaoh mai grheu Nawh Cao lih khaing daux veng kix mai viex Nawh hu ka piang choek gawng pa tang veng kix tix ka, sonsang taing Nawh rau tan. ³⁰ Viang mawh nan Nawh Cao hu preeng sinax kix mai lih hu heue. ³¹ Nawh Cao lih hu ka veng Kapeniom pa mawh veng tix veng ka daux meung Galilie mai Nawh sidiex gau kix singaix twah. ³² Kix daox deng ka lox sidiex lox gau Nawh Cao, mawh kheu lox Nawh mawh pa koe sibrawm heue. ³³ Daux nyiex sidiex kix tan, koe pui pa laig phicaox pa seeing brai tikaux, nawh kok yo lox sinum ah nin, ³⁴ "Yesux Pui veng Nazariet eue, ex koe pa yuh mai Maix ceu patix? Maix hoek ti yuh ex laux lie? Kaw pa Singax Singeh Siyiex eue, aux hoik tawng Maix mawh mawx." ³⁵ Yesux ah ka nawh yuh nin, "Paw nye, lih hu khaing daux nawh heue." Phicaox an kieh pui an goh sinax kix mai lih hu khaing daux nawh, ang lai kieh nawh saux ceeix kawx heue. ³⁶ Pui khawmuik daox deng kah, kix tom chawk paox tix, tix kaux lai tix kaux ah nin, "In mawh lox pa yuh ka mawx?" Mawh kheu Nawh koe sibrawm tawx lox ka phi pa seeing brai khankix mai kix lih hu heue. ³⁷ Lox grawh grawng pa yuh Nawh Cao tah hu kudah kudee sivie tan heue. ³⁸ Nawh Cao yaog ti kaoh khaing nyiex sidiex mai laig ka daux nyiex Simon. Miex moeng Simon kin saux, kheu nan kix tom khyox khaw Nawh Cao son kiex heue. ³⁹ Nawh Cao cung liiep bun an mai ah ka jhawm saux an mai jhawm saux an grai mai dom mawx dom an kiex yaog ti kaoh khan kheu ka kix heue. ⁴⁰ Yam uik klip singaix kix khawmuik pa koe pui saux pui ngia kuceu viex kix hoek ka Nawh Cao mai Nawh deuh taix tix piang kix ku kaux mai kieh kix moi heue. ⁴¹ Phicaox kawx lih hu khaing pui tom nie mai kok yo ah nin, "Maix mawh Kawn Siyiex heue." Nawh Cao ah ka kix, ang kieh kix sikah, kheu hoik tawng kix mawh Nawh Cao Khrit heue. ⁴² Yam hoik riang praix Nawh lih hu ka daux tiag tix dah mai pui hun khankix hawt sawg Nawh Cao mai hoek ka Nawh, sonsang kieh nawh, yuh ka mawx son ang Nawh lih hu khaing kix heue. ⁴³ Viang mawh nan Nawh Cao ah nin ka kix, "Aux tak sang sidiex gau lox gaux rhawm pa dex dawd mai Meung Siyiex khawm ka daux tang yaong tang veng khankix, mawh kheu hoik ploi Aux son an heue." ⁴⁴ Nawh Cao hu sidiex gau daux nyiex sidiex khankix ka daux meung Galilie heue.

¹ Yam cung Nawh Cao dex rawm nhawng Gennesariet cub pui hun theet nyheen Nawh, sonsang mhong gumlox Siyiex. ² Nawh Cao yaox reu ra lhang praok nhawng, viang mawh nan pui teei kax khankix hoik lih khaing reu an mai sidaux rub cie tix heue. ³ Nawh Cao laig ka daux reu an tix lhang, pa mawh cie Simon, mhaing nawh greed reu khaing praok ceeix. Nawh ngawm tan mai sidiex gau ka cub pui hun khaing daux reu an heue. ⁴ Khaix hoik sidiex Nawh Cao, Nawh ah nin ka Simon, "Gah reu hu dee raux mai ploi rub maix khankix, sonsang pon kax heue." ⁵ Simon deeh pawk lox ah nin, "Simiang eue, ex hoik nyhap mao leeing sawm ang pon tidtix, viang mawh nan kheu lox Maix aux tak ploi rub khankix heue." ⁶ Yam yuh kix nan, kix pon krix kax tom nie mai rub kix jah ti griah heue. ⁷ Kix yib taix ka paox tix, pa ot daux reu tang lhang an, yuh ka mawx son sang hoek ti teem kix heue. Kix hoek mai kieh reu naog khawm ra lhang, tom reu an kiex jah ti com heue. ⁸ Yam yaox Simon Petrux ceu an, nawh krub dex ngawng Yesux ah nin, "Simiang eue, lih hu khaing aux liak, kheu mawh aux pui ting map heue." ⁹ Kheu nawh mai pui pa ot tau mai nawh khawmuik kied daox deng kah, grawng kax pa hoik pon kix. ¹⁰ Yakop mai Yohan kawn Zebedie, pa mawh paox pie Simon kawx, ka awm an heue. Yesux ah nin ka Simon, "Paw vi lhat, jah dom yam in maix tak sang mawh pui teei pui heue." ¹¹ Yam hoik viex kix reu hu ka praok, kix prah grham khawmuik mai hawt Nawh Cao heue. ¹² Yam ot Nawh Cao ka daux veng khankix tix veng, jhak heue, pui pa naog sipawg tix kaux, yam yaox nawh Yesux, nawh grux gup mai khyox khaw Nawh Cao ah nin, "Simiang eue, phan Maix koe rhawm ti cox aux kieh aux singax Maix chix heue." ¹³ Nawh Cao nyeu taix tix teeh ka kaw an ah nin, "Aux koe rhawm heue. Kieh maix singax heue."Jhawm saux sipawg an grai dom mawx dom an. ¹⁴ Nawh Cao nhie nawh paw krai ka pui tix kaux kawx, viang mawh nan Nawh ah, "Hu jhi cao giex kaing li yaox ka tokaux tix kheu hoik singax maix mai tan awm pa hoik nhie Mose, sonsang mawh mhai ruk ka kix heue." ¹⁵ Viang mawh nan grawh grawng Nawh Cao baox nie tah hu kudah kudee mai pui hun khrawm paox tix hoek ka Nawh, sonsang nghiet sang mhong Nawh mai sonsang kieh Nawh cox jhawm saux tix moi heue. ¹⁶ Viang mawh nan Nawh Cao lih hu daux tiagtu mai rawg bwan heue. ¹⁷ Ka daux singaix an khankix Nawh Cao sidiex gau mai Pharishie mai cao gau grawng lox been khankix ngawm dex tan, pa hoik lih hoek khaing yaong ku yaong ka daux meung Galilie mai meung Yudax mai veng Yerusaliem. sibrawm Simiang Siyiex koe tau mai Nawh sonsang cox jhawm saux moi heue. ¹⁸ Jhak heue, pui viex pui tix kaux pa koe jhawm saux pa yum taix yum caong pa it piang ku mai kix sawg ti viex nawh laig ti een sivoe Nawh Cao heue. ¹⁹ Kix ang yaox dee sang pon viex nawh laig, kheu cub pui hun, kix tom haok piang nyiex mai koi ploi nawh sinax braux khawm ku it ka sigreung pui sivoe Yesux heue. ²⁰ Yam yaox krax yum rhawm kix, Nawh Cao ah nin, "Pui eue, hoik pluat phimap maix heue." ²¹ Pui tiiem lai mai Pharishie khankix keud ti ah nin, "Kaw pa ah lox salao in mawh mawx? Lheu khaing Siyiex nong nong pui mawx pa chix ploi phimap?" ²² Viang mawh nan Yesux tawng grawh grawng pa keud pa sawn kix mai ah nin ka kix, "Pex keud pa yuh ka mawx ka daux rhawm tix? ²³ Lox pa yuh ka mawx lheu yie ti ah, hoik pluat phimap maix heue, yie ti ah lie? Phan ang mawh nan, kaoh mai hu heue." yie ti ah lie? ²⁴ Viang mawh nan, yuh ka mawx pex tak sang tawng grawh grawng Kawn kawn pui, koe sibrawm ti chix pluat phimap ka piang haktiex, Nawh Cao baox ah ka kaw pa yum taix yum caong an. Aux ah ka maix, kaoh mai teei kraung it maix mai deeh ing ka nyiex maix heue." ²⁵ Nawh kaoh dom mawx dom an, sivoe kix mai teei kraung it tix mai lih ing ka nyiex tix, yaogyaw bwanson Siyiex heue. ²⁶ Kix khawmuik kied daox deng kah mai yaogyaw bwanson Siyiex mai kix naog krax lhat graung ah nin, "Ex hoik yaox ceu pa ang sax yaox singaix heue." ²⁷ Khaix ceu an khankix Nawh Cao lih hu mai yaox pui koh mau tix kaux, pa kaux Lewix, ngawm dee koh mau mai ah nin ka nawh, "Hawt khaix Aux heue." ²⁸ Nawh prah khawmuik mai kaoh hawt khaix Nawh Cao heue. ²⁹ Lewix yuh pawie ting ka daux nyiex tix, son Nawh Cao. Pui koh mau haoh hun mai pui tang kaux khankix ngawm neung ti sawm tau mai kix heue. ³⁰ Pharishie mai pui tiiem lai khankix deuh phimap ka kawncau Nawh khankix ah nin, "Pex lai sawm rheep tau mai pui koh mau mai pui ting map yuh ka mawx?" ³¹ Yesux pawk lox ah nin ka kix, "Pui pa nyawm ot, ang lo pui pa chix sidah, viang mawh nan mawh pui pa koe jhawm saux khaing pa lo pui chix sidah. ³² Aux hoek sonsang kok pui rahsee ang mawh, Aux hoek sonsang doh keud pui koe map koe grham ka phimap tix heue." ³³ Kix ah nin ka Nawh Cao, "Kawncau Yohan khankix twah pa ih mai rawg bwan law lawx. Kawncau Pharishie khankix kawx yuh awm an, viang mawh nan kawncau Maix ih mai nyaux heue." ³⁴ Yesux chawk kix ah nin, "Pex chix kieh paox grawm pui pa yuh ka kapaox twah pa ih yam kawn ot kaw pa yuh kapaox mai kix lie? ³⁵ Viang mawh nan, bawg yam singaix tak sang hoek, yam tak sang teei kaw pa yuh kapaox khaing kix, mai ka daux ngaix an khankix, kix tak sang twah pa ih heue." ³⁶ Lox phektem kawx Nawh Cao teei ti sidiex ka kix, ah nin, "Pui tix kaux kawx ang sax riah kraung khraox tix bliah mai blaox ka kraung prim, phan yuh nan kienie, nawh tak kieh pa khraox griah mai bliah pa teei khaing kraung pa khraox an kawx, tak ang khaw mai pa prim. ³⁷ Pui tix kaux kawx, ang sax teei rawm plix siiet pa khraox sau ka daux hau hak pa prim khankix. Phan yuh nan kienie, rawm plix siiet pa khraox an tak kieh hau hak bih mai rawm plix siiet tak hieh mai hau hak tak laux heue. ³⁸ Viang mawh nan, rawm plix siiet pa khraox tak lai sau ka daux hau hak pa khraox mai khawm ra ceu tak ang laux ang leeing heue. ³⁹ Pui pa hoik nyaux rawm plix siiet pa prim, ang simie ti cie rawm plix siiet pa khraox. Kheu nawh ah, pa prim lheu mhawm heue."

¹ Daux ngaix twah tix ngaix Nawh Cao hu preeng ka daux ma nghox ca mai kawncau Nawh khankix caik sigleem nghox ca, mai boi ti ih daux tawm taix tix heue. ² Pharishie tix blah ah nin, "Yuh patix pex lai yuh pa ang khaw mai beenli ngaix twah?" ³ Yesux pawk lox ah nin ka kix, "Ang pex sax phat grawh grawng pa yuh Davit, yam nawh mai pui pa ot tau mai nawh kied cai rhawm lie? ⁴ Grawh grawng yam laig nawh ka daux nyiex Siyiex mai teei ti ih blah mai tawx ka khawm pui pa ot tau mai nawh, pa ang pui khaw ti ih, lheu khaing cao giex kaing li nong nong lie,?" ⁵ Nawh Cao baox ah nin ka kix, "Kawn kawn pui mawh Simiang ngaix twah heue." ⁶ Ka daux ngaix twah an tix ngaix, Nawh Cao laig ka daux nyiex sidiex mai sidiex gau heue. Dee an koe pui tix kaux pa yum taix khawn dawm. ⁷ Pui tiiem lai mai Pharishie khankix, jhak ti yaox Nawh Cao, sang cox Nawh kaw an moi singaix twah lie, ang cox lie? Yuh ka mawx sonsang yaox dee deuh phimap ka Nawh Cao heue. ⁸ Viang mawh nan Nawh Cao tawng ceu pa keud kix mai ah nin ka pui pa hoik yum kroh taix tix khawn, "Kaoh cung ka sinax tin heue."nawh kaoh cung heue." ⁹ Yesux ah nin ka kix, "Aux sang chawk pex, khaw mai beenli yuh tix pa mhawm ngaix twah lie, phan ang mawh nan yuh tix pa laux lie? Khaw ti taoh ju lie phan ang mawh nan khaw ti phah yum lie?" ¹⁰ Nawh Cao jhak vung viang ka piang kix khawmuik mai ah nin ka kaw an, "Nyeu taix maix heue."Mai nawh yuh nan mai taix nawh deeh mhawm heue. ¹¹ Viang mawh nan kix naog krax song rhawm mai kix kum paox tix grawng sang pon yuh ka mawx ka Yesux heue. ¹² Daux bawg yam ngaix an khankix, Nawh Cao haok ka gawng sonsang rawg bwan mai Nawh rawg bwan ka Siyiex leeing lang sawm heue. ¹³ Yam hoik riang praix, Nawh Cao kok kawncau mau soi Nawh khankix mai Nawh laug kao ra kaux ka daux kix, pa sum Nawh ceu kaux kawncau Nawh pa ting. ¹⁴ Kix mawh Simon pa sum Nawh Cao ceu kaux Petrux mai pux nawh Andare mai Yakop mai Yohan mai Philipux mai Bathawlamie. ¹⁵ Mathiex mai Thomax mai Yakop kawn Alaphie mai Simon pa kok mawh Zelut. ¹⁶ Yudax pux Yakop mai Yudax Isakariut pa mawh kaw pa tik pa tawx Nawh Cao heue. ¹⁷ Nawh Cao lih khaing gawng tau mai kix mai cung dee lung mai kawncau mau soi Nawh haoh hun, pui tom nie pa kaoh khaing meung Yudax khawmuik mai veng Yerusaliem mai praok rawm sigrit sigra veng Turux mai veng Sidom, khankix hoek ti nghiet ti mhong Nawh Cao, sonsang kieh Nawh cox jhawm saux kix moi heue. ¹⁸ Kix pa kham geu kheu phi pa seeing brai khankix pon tix moi nyawm ot heue. ¹⁹ Cub pui hun khawmuik sawg ti teeh Nawh Cao, kheu sibrawm lih khaing Nawh mai kieh kix moi khawmuik heue. ²⁰ Nawh Cao jhak ka piang kawncau Nawh khankix, ah nin, "Pex pa hot pa sibhawm khankix koe bwanson heue, kheu Meung Siyiex mawh cie pex heue. ²¹ Pex pa cai rhawm yam in khankix, koe bwanson heue, kheu pex tak sang sak heue. Pex pa yiiem grai yam in, koe bwanson heue, kheu pex tak nyiah. ²² Yam pui koeng ka pex mai gwieh pex grheu pex khaing cub kix mai salao pex mai tik ceu kaux pex awm mawh pa caox, mawh kheu Kawn kawn pui, pex koe bwanson heue." ²³ Gaux rhawm ka daux singaix an heue, gaux rhawm mai jaloh ka heue. Mawh kheu, bwanson pex kied ting ka daux meung raoma heue. Kheu tax du kix dix, hoik yuh awm an ka cao jhai khankix heue. ²⁴ Viang mawh nan pex pa mawh cao mi, tak kha rhawm heue, kheu hoik pon pex pa nyawm rhawm cie pex heue. ²⁵ Pex pa hoik sak hoik naog yam in, tak kha rhawm heue, kheu pex tak sang cai rhawm heue. Pex pa nyiah yam in, tak kha rhawm heue, kheu pex tak sang khi rhawm mai yiiem grai heue. ²⁶ Yam pui khawmuik yaw mai ah pa mhawm mhiem grawng pex, pex tak kha rhawm heue, mawh kheu tax du kix dix, hoik yuh awm an ka cao jhai pa ang mawh ang meh khankix heue. ²⁷ "Viang mawh nan Aux krai ka pex pa mhong khankix, moh ka pui pa koeng ka pex mai yuh pa mhawm son kix pa koeng ka pex heue. ²⁸ Nawb bwan ka pui pa lawg ka pex, rawg bwan, son kix pa yuh pa ang khaw ang jiet ka pex heue. ²⁹ Ka kaw pa simang sibax maix tix plak, tang plak kawx, baox tawx ti yaox heue. Kaw pa teei prux fua maix, sibex maix kawx, paw kieh thiang ti tawx kah heue. ³⁰ Tawx ka pui pa rawg ka maix ku kaux mai kaw pa teei kraung cie maix, paw lai deeh mhaing ka nawh heue. ³¹ Awm simie pex pui yuh ka tix, pex kawx, yuh awm an ka kix heue. ³² Phan pex moh ka pui pa moh ka pex khaing, pex tak koe bwanson yuh ka mawx? Mawh kheu pui tingmap khankix kawx, deeh moh ka pui pa moh ka kix heue. ³³ Phan pex yuh pa mhawm ka pui pa yuh pa mhawm ka pex khaing, pex tak koe bwanson yuh ka mawx? Mawh kheu pui ting map khankix kawx, yuh awm an heue. ³⁴ Phan pex tawx yaog yaing ka pui, pa keud pex ti deeh pon khaing, pex tak koe bwanson yuh ka mawx? Mawh kheu pui ting map khankix kawx, tawx yaog yaing ka paox pui ting map khankix, ti deeh pon awm pa tawx kix heue. ³⁵ Moh ka pui pa koeng ka pex mai yuh pa mhawm mai tawx yaog yaing paw keud ti deeh pon tidtix mai bwanson pex tak kied ting kied lhaong mai pex tak mawh kawn kaw pa ting lhaong khaing khawmuik heue. Mawh kheu Nawh yuh bwan son ka pui pa ang tawng bwan son mai ka pui caox khankix heue. ³⁶ Mawh kheu nan, awm Keeing pex koe krax caux rhawm, pex kawx kieh koe krax caux rhawm heue." ³⁷ Paw prawng ca, yuh ka mawx son ang pex sang hoek krax prawng ca. Paw prawng phimap pui mai pex tak ang hoek krax prawng phimap heue. Pluat ploi phimap ka pui mai pex tak hoek krax pluat ploi heue. ³⁸ Tawx ka pui mai tak sang tawx ka pex pa tong pa tiag mhawm mhawm, pa hoik yeen mai pa hoik yung yiang mai pa kreh, pui tak sang tawx naok ka pex heue. Mawh kheu pex tong pex tiag ti tawx ka pui tang kaux miex ding, tak sang baox deeh tong deeh tiag ti tawx ka pex yuh nan heue. ³⁹ Nawh Cao kawx krai lox tiag pa ah nin ka kix, "Pui dug ngai chix jhi, pui pa dug ngai yaox krax lie? Kiex khawm ra tak rau daux o ang mawh lie? ⁴⁰ Kawncau ang lheu ting khaing Sara cao gau tix, viang mawh nan kawncau ku kaux, yam hoik grum tawng, nawh tak awm sara cao gau tix heue. ⁴¹ Kheu maix jhak kuh ngai pa iak daux ngai puxaik maix mai ang keud grawh grawng nuk pa koe daux ngai tokaux tix? ⁴² Phan ang mawh nan maix chix ah ka puxaik maix, puxaik eue, kieh aux teei ti tik kuh ngai maix, yam ang maix yaox nuk pa koe ka daux ngai tokaux tix, yuh ka mawx? Pui pie pui lhen eue, teei ti tik nuk pa koe daux ngai maix ka ha mai maix tak sang yaox mhawm mhawm, sonsang teei kuh pa koe daux ngai puxaik maix heue. ⁴³ Grawh grawng nawh, khaox pa mhawm pa plix plix pa ang mhawm ang koe tix khaox kawx mai khaox pa ang mhawm pa plix plix pa mhawm, ang koe tix khaox kawx heue. ⁴⁴ Mawh kheu chix tawng khaox ku khaox ka plix nawh heue. Grawh grawng nawh, pui ang sax pieh plix ruh khaing pang kat mai ang sax pieh plix siiet khaing katsai brex. ⁴⁵ Pui pa mhawm viex ceu pa mhawm lih khaing daux rhawm rhi nawh dee deuh pa mhawm mai pui pa caox viex ceu pa caox lih khaing dee deuh pa caox heue. Kheu jheeh chix krai ceu pa koe daux rhawm tom naog kreh heue. ⁴⁶ "Pex lai kok Aux, Simiang eue, Simiang eue mai ang yuh ceu pa krai Aux khankix yuh ka mawx? ⁴⁷ Pui ku kaux daux pui pa hoek ka Aux, pa mhong gumlox Aux mai hawt ti yuh khankix, Aux tak jhi pex yaox nawh awm kaw pa yuh ka mawx. ⁴⁸ Nawh awm pui pa sum nyiex tix lhang, pa kaong tom raux mai yuh num ka piang simaox mai yam haok hwan rawm mai chun ka nyiex an, ang chix kieh nawh yung yiang, mawh kheu hoik sum nyiex an ka piang simaox heue. ⁴⁹ Viang mawh nan pui pa mhong lox Aux mai ang hawt ti yuh, tak awm pui pa sum nyiex nawh ka piang tiex mai ang koe num mai yam chun rawm nawh, nyiex an goh daux rawm dom mawx dom an mai pa laux pa leeing nyiex an kied ting heue."

¹ Khaix hoik sidiex gau Nawh Cao, kieh pui khankix mhong lox ceu pa krai Nawh, Nawh laig ka daux veng Kapeniom heue. ² Siliex cao giex kaing naing tix kaux, pa kied moh nawh, saux dex sang yum. ³ Yam mhong nawh grawh grawng Yesux, nawh ploi kuad song pui Yudax khankix hu rawg mhaing ka Nawh Cao, nhie Nawh hoek ti taoh siliex nawh heue. ⁴ Yam hoek kix ka Yesux, kix khyox khaw Nawh Cao mhawm mhawm ah nin, "Nawh keung ti pon, pa yuh Maix ceu in son nawh heue. ⁵ Kheu moh nawh ceu ex, nawh hoik yuh nyiex sidiex son ex heue." ⁶ Yesux hu tau mai kix, yam hoek Nawh Cao dee ang awt singai khaing nyiex nawh, cao giex kaing naing an ploi paox grawm nawh hu ti ah nin ka Nawh Cao, "Simiang eue, paw vi baox nyhap rhawm Maix, kheu ang aux keung ti kieh Maix hoek kreed greem braux nyiex aux. ⁷ Mawh kheu nan aux keud tokaux tix ang keung ti hoek ka Maix, viang mawh nan pie tawx Maix lox khaing mai siliex aux tak moi heue. ⁸ Kheu aux mawh pui ot greem simiang kawx, aux koe pui naing greem aux heue. Phan aux nhie tix kaux hu, nawh hu mai phan aux nhie tang kaux hoek, nawh hoek heue. Phan aux nhie siliex aux yuh ceu in, nawh yuh heue." ⁹ Yam mhong Yesux ceu an khankix, Nawh daox deng ka nawh mai veeh ti jhak cub pui hun pa hawt khaix Nawh Cao ah nin, "Aux krai ka pex, ang Aux sax yaox pui pa yum rhawm nie ding nie dod ka daux pui Isarelax heue." ¹⁰ Yam pui pa ploi cao giex kaing naing khankix deeh hoek ka nyiex, kix yaox moi siliex an heue. ¹¹ Khaix ngaix an pasax, Nawh Cao hu ka veng tix veng pa kok mawh Na-i-nax mai kawncau Nawh khankix mai cub pui hun hu tau mai Nawh Cao heue. ¹² Yam hoek Nawh Cao ka dex siviex veng, jhak heue, kix klawm pui yum lih tix kaux, pa mawh kawn simex miexmai pa koe tix kaux khaing, mai pui veng an tom nie ot tau mai kiex heue. ¹³ Yam yaox Simiang ka bun an Nawh Cao caux rhawm ka kiex mai ah nin ka kiex, "Paw vi yiiem heue." ¹⁴ Nawh Cao hoek mai teeh ka lawng an mai kix pa klawm khankix cung kaog heue. Nawh Cao ah nin, "Kawn nyawm simex eue, Aux krai ka maix, kaoh heue." ¹⁵ Kaw pa hoik yum an kaoh ngawm mai jah ti sikah heue. Nawh Cao teei nawh tawx ka miex nawh heue. ¹⁶ Pui khawmuik lhat graung kah mai kix yaogyaw Siyiex ah nin, "Cao jhai pa ting hoik lih sinax ex tix kaux mai Siyiex hoik hoek ti jhak pui cie Nawh heue." ¹⁷ Lox grawh grawng pa yuh Nawh Cao ceu in, tah hu daux meung Yudax khawmuik mai sivie tan kudah kudee heue. ¹⁸ Kawncau Yohan khankix krai grawh grawng ceu in khawmuik heue. ¹⁹ Yohan kok kawncau tix ra kaux, ploi kiex hu ka Yesux, kieh chawk ah nin, "Maix mawh kaw pa tak sang hoek an lie, phan ang mawh nan ex tak sang krox ti yaox son tang kaux lie?" ²⁰ Yam hoek pui an kiex ka Nawh Cao, kiex ah nin, Yohan cao cubcom ploi yiex hoek ka Maix, sonsang chawk ah nin, Maix mawh kaw pa tak sang hoek an lie? phan ang mawh nan ex tak sang krox ti yaox son tang kaux lie?" ²¹ Ka daux bawg yam nari an, Nawh Cao cox jhawm saux tom nie ceu mai jhawm saux preng khankix mai pa laig phicaox phicaig khankix mai Nawh Cao cox pui dug ngai haoh hun, kieh deeh chix yaox heue. ²² Yesux pawk lox ah nin ka kiex, "Pax hu mai krai ka Yohan grawh grawng ceu pa mhong pa yaox pax, pui dug ngai pon ti deeh yaox, pui laux caong pon ti deeh hu, pui sipawg deeh kieh singax, pui lheet yhaok deeh chix mhong mai pui pa hoik yum deeh kieh kaoh im mai sidiex gau ka pui hot pui sibhawm kieh mhong lox bwan gaux rhawm heue. ²³ Pui mawx ang ah, kaw pa ang yaox dee sideeing dee laux rhawm ka daux Aux, koe bwanson heue." ²⁴ Khaix hoik ing kawncau Yohan an kiex, Nawh Cao jah ti sidiex gau grawh grawng Yohan, ka cub pui hun khankix, "Pex lih hu daux tiagtu sang jhak patix? Pex hu jhak gawng priem pa phlu bhaung mai vuhvied lie? ²⁵ Phan ang mawh nan pex lih hu sonsang yaox patix? Hu sonsang yaox pui pa ceep kraung pa awn lie? Jhak heue, kix pa ceep kraung pa jiet mhawm mai pa ih priex preem pa nyawm, ot ka daux nyiex simiang ting khankix heue. ²⁶ Phan ang mawh nan pex lih hu sonsang yaox patix? Lih hu sonsang yaox cao jhai lie? Mawh heue, Aux krai ka pex, mawh pa lheu khaing cao jhai heue. ²⁷ In mawh kaw pa hoik tiiem grawh grawng nawh ah nin, jhak heue, Aux ploi kawncau Aux hu sivoe pakngai maix, pa tak cox krax maix sivoe maix heue. ²⁸ Aux krai ka pex, ka daux pui pa keh khaing bun khawmuik, pa lheu ting khaing Yohan cao cubcom ang koe tix kaux kawx, viang mawh nan kaw pa nie iak khaing paox tix ka daux Meung Siyiex lheu ting khaing nawh heue. ²⁹ Pui khawmuik, khawm pui koh mau khankix, yam mhong kix pa yaogyaw pa rahsee Siyiex mai cubcom ka daux been krax cubcom Yohan heue. ³⁰ Viang mawh nan Pharishie khankix mai cao tawng cao prawng lai been khankix tik pa keud Siyiex son kix mai ang cubcom daux tawm taix nawh heue. ³¹ Ceu pui ju in, Aux sang tiag awm patix? mai kix sang awm pa yuh ka mawx? ³² Kix awm kawn nyawm khankix pa ngawm daux lah mai kok paox tix ah nin, Ex hoik phlu pi son pex mai pex ang graoh ang thiao, ex hoik yiiem riag, viang mawh nan, pex ang yiiem ang riag heue. ³³ Kheu Yohan cao cubcom ang ih blah mai ang nyaux rawm plix siiet mai hoek kawx, pex ah, kaw in koe phicaox heue. ³⁴ Kawn kawn pui ih nyaux mai hoek kawx, pex ah, jhak heue, Kaw in cha nie luan ih mai cha nie luan nyaux rawm plix siiet mai yuh paox pie ka pui pa koh mau mai pui ting map khankix heue. ³⁵ Viang mawh nan pingnya cuyi hoik rahsee ka daux kawn praix tix khawmuik heue. ³⁶ Pharishie tix kaux nhie Nawh Cao hoek ti sawm tau mai tix mai Nawh Cao laig ka daux nyiex Pharishie an, ngawm neung dee sawm heue. ³⁷ Jhak heue, bun tix kaux ot ka daux veng an, pa mawh pui ting map mai yam mhong nawh grawh grawng Nawh Cao ngawm neung ka daux nyiex Pharishie an, nawh viex sidah bhawng ka daux kawng simaox paing, ³⁸ nawh cung plak khaix, dex caong Nawh Cao mai yiiem mai kieh rawm ngai tix cod piang caong Nawh mai teei hauk kaing tix awt kah mai ngheut caong Nawh Cao mai teei sidah bhawng an groi kah heue. ³⁹ Pharishie pa hoik kok Nawh Cao yaox grawng an, nawh keud ah nin ka daux tokaux tix, "Phan Pui in mawh Cao jhai, Nawh tee hoik tawng grawng bun pa teeh Nawh in, mawh pui pa yuh ka mawx, grawh grawng nawh mawh bun ting map heue." ⁴⁰ Yesux ah nin ka nawh, "Simon eue, Aux koe ceu krai ka maix ceeix," Kaw an ah nin, "Sara Cao Gau eue, krai ha" ⁴¹ Nawh Cao baox krai, "Cao tawx yaog yaing mau tix kaux, koe pui ceuk ka nawh ra kaux, tix kaux ceuk ka nawh denari phwan yieh plah mai tang kaux ceuk ka nawh tixphwan plah heue. ⁴² Mawh kheu ang kiex koe ti tawx ceuk an, nawh pluat ploi ceuk kiex khawm ra kaux heue. Ka daux kiex ra kaux, mawh kaw pa yuh ka mawx, pa nie lheu moh ka kaw an?" ⁴³ Simon baox pawk lox ah nin, "Aux ce kaw pa pluat nawh ceuk pa nie ting an, mawh pa nie lheu moh nawh heue." Nawh Cao baox ah nin ka nawh, "Pa keud pa prawng maix hoik caw heue." ⁴⁴ Nawh Cao deeh veeh ka bun an, ah nin ka Simon, "Yaox maix bun in lie? Yam laig Aux ka daux nyiex maix, maix ang tawx rawm khoek son caong Aux, viang mawh nan bun in hoik kieh rawm ngai nawh cod piang caong Aux mai awt ka hauk kaing tix heue. ⁴⁵ Maix ang ngheut ka Aux, viang mawh nan, jah yam laig Aux tin, tom yam in, bun in ngheut caong Aux ang jud ang jai heue. ⁴⁶ Maix ang groi rawm bee ka kaing Aux, viang mawh nan, bun in, hoik groi sidah bhawng ka caong Aux heue. ⁴⁷ Mawh kheu nan Aux krai ka maix, phimap nawh pa haoh pa hun, hoik pluat ploi. Mawh kheu nawh hoik moh tom nie. Viang mawh nan, pui pa pluat ploi ceeix ngie, moh ceeix ngie heue." ⁴⁸ Nawh Cao ah nin ka bun an, "Hoik pluat hoik ploi phimap maix heue." ⁴⁹ Kix pa ngawm neung ti sawm tau mai Nawh Cao, keud ti ah nin ka daux tokaux tix, "Kaw in mawh mawx? Viang mawh phimap kawx, Nawh khex ploi heue." ⁵⁰ Nawh Cao baox ah nin ka bun an, "Krax yum rhawm maix hoik taoh maix, hu mhawm mhawm heue."

¹ Khaix an ang awt rheung Nawh Cao hu lai ling ti sidiex gau, ka daux yaong daux veng khankix mai viex lox gaux rhawm pa dex dawd mai Meung Siyiex mai kawncau Nawh kao ra kaux. ² Bun tix blah kawx ot tau mai Nawh, pa hoik kieh Nawh Cao phicaox lih mai hoik cox jhawm saux kix moi heue. Marix pa kok mawh Magadalax, pa hoik kieh Nawh Cao phicaox lih khaing aliah kaux, ³ Yoanax moeng Khunzax, pa mawh kawncau Herut mai Susannax mai tang kaux tom nie teei kraung cie kix mai khan kheu ka Nawh Cao mai pui pa hu tau mai Nawh heue. ⁴ Yam an cub pui hun khrawm paox tix kaoh khaing ku veng, hoek ka Nawh Cao mai Nawh sidiex gau kix ka lox tiag ah nin, ⁵ "Pui rhuat simie hu ti rhuat simie cie tix heue. Yam rhuat nawh simie tix blah cod ka dex krax mai pui dig ka caong tix, sim raoma khankix sut ti ih simie an heue. ⁶ Simie tix blah cod ka piang simaox mai yam kuah, mawh kheu ang phon tiex koe tom fit kroh hu heue. ⁷ Simie tix blah cod ka sinax pang kat mai pang kat an ting tau mai kix, tom kheem gut kix. ⁸ Simie tix blah cod ka dee mhawm tiex mai ting tom plix plix tix yieh son heue. " Yam krai Nawh Cao grawng ceu in khankix, Nawh kok yo ah nin, " Kaw pa koe yhaok ti mhong kieh nawh mhong heue." ⁹ Kawncau Nawh khankix chawk Nawh Cao ka grawng dee bleeh lox tiag in heue. ¹⁰ Nawh Cao baox ah nin, "Hoik tawx kieh pex tawng grawng pa raux pa mox pa dex dawd mai Meung Siyiex, viang mawh nan, pa kawn deuk khankix tak krai ka lox tiag ka kix, yuh ka mawx kix yaox kawx ang chix yaox mai kix mhong kawx ang chix tawng heue. ¹¹ Dee bleeh lox tiag an mawh nin, simie an mawh gumlox Siyiex heue. ¹² Kix pa cod dex krax, mawh kix pa hoik mhong mai khaix an phicaox hoek mai teei lox bwan khaing daux rhawm kix, yuh ka mawx son ang kix sang yum rhawm mai son ang hoek krax taoh heue. ¹³ Kix pa cod ka piang simaox, mawh kix pa hoik mhong mai gaux rhawm rieb ti teei lox bwan mai kix ang koe riah, yum rhawm ngie tivud khaing, yam hoek bawg yam pa nyaw glaw, kix deeh laux leeing heue. ¹⁴ Pa cod sinax pang kat khankix, mawh kix pa hoik mhong mai yam hu kix krax, pa khi rhawm mai sinngao mai ceu pa gaux rhawm pa dex dawd mai ju in, kheem gut kix, tom ang chix mhawm plix heue. ¹⁵ Pa koe ka dee mhawm tiex, mawh kix pa rah pa mhawm rhawm pa hoik mhong lox bwan, mawh kix pa giex tom sied mai chix gun rhawm tix plix plix heue. ¹⁶ "Pui mawx ang ah, yam hoik tok nawh kawk ngu, ang sax tawb ka aw, lheu khaing an ang sax sau greem ku, deuh ka piang dee deuh kawk ngu, sonsang yaox kix pa laig tan pa riang nawh heue. ¹⁷ Mawh kheu pa hoik mox ang koe tix ceu kawx, pa tak ang kieh sidawng, Lheu khaing an ang koe tix ceu kawx pa hoik glip, pa tak ang tawng, ang koe heue. ¹⁸ Mawh kheu nan, mhong pex yuh ka mawx rien rhawm tix kah, kheu kaw pa hoik koe, tak baox tawx ka nawh heue, kaw pa ang koe, viang pa hoik koe cie nawh kawx, tak sang teei khaing nawh heue." ¹⁹ Miex Nawh Cao mai pux Nawh khankix hoek ka Nawh, viang mawh nan kix ang pon hoek dee ot Nawh Cao, kheu kied sikhox cub pui hun heue. ²⁰ Pui krai ka Nawh Cao ah nin, "Miex Maix mai pux Maix khankix cung plak praix, simie ti yaox Maix heue." ²¹ Nawh Cao pawk lox mai ah nin ka kix, "Miex Aux mai pux Aux khankix, mawh inkix, pa mhong gumlox Siyiex mai hawt ti yuh heue." ²² Ka daux ngaix an khankix tix singaix Nawh Cao laig ka daux reu, tau mai kawncau Nawh khankix mai Nawh Cao ah nin ka kix, "Ex hu plak toi rawm nhawng heue." Kix vai reu hu heue. ²³ Yam kawn hu kix Nawh Cao laig it mai bhaung ting lih ti phlu ka piang nhawng mai rawm jah ti naog ka daux reu mai kix dex sang hoek krax laux leeing heue. ²⁴ Kix hoek ka Nawh Cao so Nawh kieh siduad ah nin, "Simiang eue, Simiang eue, ex dex sang laux heue." Nawh Cao kaoh mai ah ka bhaung mai pukpak rawm mai kix yiien yawg tix heue. ²⁵ Nawh Cao chawk ah nin ka kix, "Krax yum rhawm pex koe dee mawx?" Viang mawh nan kix lhat mai daox kah, kix tom ah nin ka paox tix, tix kaux lai tix kaux, "Kaw in mawh mawx, Nawh tawx lox ka bhaung mai rawm khankix kawx, kix nghiet ka lox Nawh heue." ²⁶ Kix hoek ka meung Gadarax, pa koe praok sidieb rawm nhawng meung Galilie. ²⁷ Yam hoik lih hu Nawh Cao ka piang caong raog, pui tix kaux pa hoik lih khaing daux veng hoek ti rieb Nawh, kaw an mawh pa laig phicaox mai ang ceep kraung tom rheung, ang ot daux nyiex, nawh ot ka daux simeeig khankix heue. ²⁸ Yam yaox nawh Yesux, nawh krub sivoe Nawh Cao mai nawh riag kok yo lox tix sinum ah nin, "Yesux, Kawn Siyiex pa ting lhaong khaing khawmuik eue, aux koe pa yuh mai Maix ceu patix? Aux khyox khaw ka Maix paw vi tuktiak tukte ka aux liak" ²⁹ Kheu Nawh Cao hoik nhie phi pa seeing brai an lih khaing pui an heue. Kheu phi an hoik giex nawh tom nie bawg mai hoik kieh pui pau nawh phyawk nawh ka ceng mai hoik sau gang ka nawh heue. Viang mawh nan nawh pon rud maox ceng khankix dud mai phicaox an grheu nawh hu ot ka daux tiagtu heue. ³⁰ Nawh Cao chawk nawh ah nin, "Ceu kaux maix kaux patix? Nawh deeh ah nin, " Mawh Liecong heue." Mawh kheu hoik laig phicaox ka nawh tom nie, nawh tom ah nan. ³¹ Kix khyox khaw ka Nawh Cao, yuh ka mawx son ang Nawh sang nhie kix lih hu laig ka dee kied raux heue. ³² Ka dee an koe cub lig pa kied hun sawm ka gawng tan heue. Kix khyox khaw ka Nawh Cao, sonsang laig kix daux lig mai Yesux tawx akhuang ka kix heue. ³³ Phicaox khankix lih khaing daux pui an mai laig ka daux lig khankix, cub lig an, to lih ka dee nie rieh nie jun jee, laig ka daux nhawng mai nok ka rawm yum heue. ³⁴ Yam yaox pui liang lig khankix ka ceu pa hoik mawh an, kix to hu mai krai grawng an ka daux yaong daux veng khankix heue. ³⁵ Pui khankix hu ti jhak grawng pa hoik mawh an mai yam hoek kix ka Yesux mai yaox kaw pa hoik lih phicaox khaing, ngawm liep caong Yesux tan, hoik deeh mhawm mai ceep kraung, kix lhat kah heue. ³⁶ Kix pa hoik yaox, krai pui khankix mhong grawng pa cox ka kaw pa laig phicaox an mhawm yuh ka mawx. ³⁷ Pui meung Gadarax khawmuik mai pui pa ot sivie tan, khyox khaw ka Nawh Cao nhie Nawh lih hu khaing kix, mawh kheu kix kied lhat graung kah Nawh Cao deeh laig ka daux reu mai deeh ing heue. ³⁸ Pui pa hoik laig phicaox glang ka an, rawg ti ot tau mai Nawh Cao, viang mawh nan Nawh Cao ah nin, ³⁹ "Ing ka nyiex maix mai krai kix mhong grawng ceu pa ting lhaong pa caux rhawm Siyiex mai yuh bwanson, son maix heue." Kaw an lih hu mai krai grawng ceu pa ting lhaong pa hoik yuh Yesux son nawh, ka daux veng an khawmuik heue. ⁴⁰ Yam deeh ing Yesux, cub pui hun khankix rieb Nawh Cao, kheu kix khawmuik krox jun ka Nawh heue. ⁴¹ Jhak heue, pui tix kaux pa kaux Ya i rux, pa mawh pui giex kaing nyiex sidiex tix kaux, hoek mai krub dex caong Yesux mai khyox khaw nhie Nawh Cao hoek ka nyiex tix heue. ⁴² Mawh kheu kawn bun nawh pa koe ngie tix kaux khaing, pa dex koe ju kao ra num, it mai dex sang yum heue. Yam hu Nawh Cao cub pui hun khankix nyheen ka Nawh heue. ⁴³ Bun tix kaux pa hoik koe jhawm saux pa lih nham kao ra num, pa hoik uik cai can pa koe nawh khawmuik, ka pui chix sidah khankix, viang mawh nan, ang vai ceeix kawx, ⁴⁴ hoek plak khaix Nawh mai teeh caong kraung ceep Nawh mai jhawm saux pa lih nham nawh, hit dom mawx dom an heue. ⁴⁵ Yesux ah nin, "Mawx pa teeh ka Aux?" Yam thiang pui grawng an khawmuik, Petrux mai kix pa ot tau mai Nawh khankix, ah nin, "Simiang eue, cub pui hun khankix nyheen ka Maix, tom uik tip, Maix lai kawn chawk mawx pa teeh ka Aux lie?" ⁴⁶ Yesux baox ah nin, "Pui hoik teeh ka Aux tix kaux kaux, Aux tawng kheu hoik lih sibrawm khaing Aux heue." ⁴⁷ Yam tawng bun an grawng ang nawh pon ti mox tix, nawh siyaung mai hoek ti krub sivoe Nawh Cao, sivoe pui khawmuik, nawh krai mawh kheu grawng patix, nawh hoik teeh ka Nawh Cao mai grawng hoik moi tix dom mawx dom an heue. ⁴⁸ Nawh Cao ah nin ka nawh, "Kawn bun Aux eue, krax yum rhawm maix hoik kieh maix moi, hu mhawm mhawm awx." ⁴⁹ Yam kawn sikah Nawh Cao, pui tix kaux hoek khaing nyiex pui giex kaing nyiex sidiex ah nin, "Kawn bun maix hoik yum heue. Paw baox laklheut ka Sara Cao Gau heue." ⁵⁰ Viang mawh nan, yam mhong Yesux lox an, Nawh Cao ah nin, "Paw vi lhat yum rhawm khaing heue. Nawh tak sang deeh mhawm." ⁵¹ Yam hoek Nawh Cao ka nyiex an, Nawh ang kieh pui tix kaux kawx laig tau mai tix, lheu khaing Petrux, Yohan, Yakop mai miex keeing nyawm bun an khaing heue. ⁵² Pui khawmuik yiiem riag yo, son nyawm bun an, viang mawh nan, Nawh Cao ah nin ka kix, "Paw yiiem, mawh kheu bun in ang yum, mawh ngie laig it nawh khaing." ⁵³ Kix nieb yuh pa ang nab yam nyiah ka Nawh Cao, kheu tawng kix bun an hoik yum heue. ⁵⁴ Viang mawh nan Nawh Cao teei taix kawn bun an mai kok ah nin, "Kawn nyawm bun eue, kaoh heue." ⁵⁵ Khuan nawh deeh hoek mai kawn bun an kaoh dom mawx dom an. Nawh Cao nhie kix tawx pa ih tix ceu ceu ka nawh heue. ⁵⁶ Miex keeing nawh kied daox deng kah heue. Nawh Cao tawm kiex, son ang sang krai grawng pa hoik yuh an, ka pui tix kaux kawx heue.

¹ Yesux kok kawncau Nawh kao ra kaux khrawm paox tix mai tawx sibrawm ka kix pa pex piang phicaox khawmuik sonsang pon ti cox jhawm saux moi heue. ² Yesux ploi kix hu sidiex gau grawng Meung Siyiex mai sonsang cox pui pa koe jhawm saux moi heue. ³ Yesux ah nin ka kix, "Paw viex tidtix hu, son yam hu pex daux krax, paw viex khaox gix, bau, blah, mau, sibex kawx paw viex ra pheen heue. ⁴ Pex laig ka daux nyiex mawx ang ah, ot tan tom lih hu pex awx. ⁵ Pui miex ding ang ah, pa ang rieb ti teei pex, yam lih hu pex khaing veng an, khuah phawng tiex khaing caong pex, sonsang mawh mhai ruk piang kix heue." ⁶ Kix lih hu lai ling daux yaong daux veng khankix, sidiex gau lox bwan gaux rhawm mai cox jhawm saux moi ku dah dee heue. ⁷ Yam mhong simiang Herut grawng ceu pa hoik mawh khawmuik, nawh keud ang doh, daox kah, mawh kheu pui tix blah ah Yohan hoik deeh kaoh im khaing krax yum. ⁸ Tiblah ah Eliyax hoik lih hoek mai tang kaux khankix ah, cao jhai phao ka didix hoik deeh kaoh tix kaux kaux heue. ⁹ Viang mawh nan Herut ah nin, "Aux hoik kid kaing Yohan, viang mawh nan, kaw pa mhong aux grawng ceu in khankix mawh mawx?" Nawh sawg sonsang pon ti yaox Yesux heue. ¹⁰ Yam deeh hoek, kawncau khankix, kix krai grawng ceu pa hoik yuh kix ka Yesux. Yesux viex kix lih ka veng tix veng, pa kok mawh Biesedax heue. ¹¹ Viang mawh nan cub pui hun khankix, tawng grawng an mai hawt Yesux, Yesux rieb kix mai krai kix mhong grawng Meung Siyiex, Nawh cox pa koe jhawm saux kix moi heue. ¹² Yam dex sang faik praix plak bo, kawncau Nawh kao ra kaux hoek mai ah nin ka Yesux, "Ploi cub pui hun khankix hu heue, sonsang hu laig kix ka daux yaong khankix pa koe sivie siveng tin, sonsang pon kix pa ih tix mai dee it tum, mawh kheu ot ex daux tiag heue." ¹³ Viang mawh nan Yesux ah nin ka kix, "Pex tawx pa ih son kix awx." Kix deeh ah nin, "Lheu khaing blah phwan lon mai kax ra mu ngie phan ex ang hu liag ex ang koe pa ih son pui in kix khawmuik. ¹⁴ Kheu kix simex dex koe phwan rheng kaux heue. " Yesux ah nin ka kawncau Nawh khankix, " Kieh kix ngawm tix cub, koe been tixphwan kaux tix cub heue." ¹⁵ Kix yuh awm hoik nhie kix mai kieh pui khawmuik ngawm heue. ¹⁶ Nawh Cao teei blah phwan lon mai kax ra mu an mai maong ka raoma mai Nawh nawb bwan ka ankix mai sivit ti tawx ka kawncau Nawh khankix, sonsang viex kix ti tawx ka pui khankix heue. ¹⁷ Kix ih sak khawmuik. Mai deeh pon ti khrawm pa lheu khaix ih kix, pa max pa phawng koe kao ra phliex heue. ¹⁸ Yam ot tau mai kawncau tix khankix Nawh Cao rawg bwan nong nong, Nawh chawk kix ah nin, "Cub pui hun khankix ah Aux mawh mawx?" ¹⁹ Kix deeh ah nin tix blah ah, "Mawh Yohan cao cubcom, viang mawh nan tang kaux tix blah ah, mawh Eliyax mai tang kaux tix blah baox ah, mawh cao jhai phao ka didix, hoik deeh kaoh tix kaux kaux heue." ²⁰ Yesux baox chawk kix, "Pex kawx ah Aux mawh mawx lie?" Petrux deeh pawk ah nin, "Maix mawh Khrit cie Siyiex heue." ²¹ Viang mawh nan Yesux jawg ti sidiex gau ka kix mai tawm lox ang cu kix krai ka pui tix kaux kawx heue. ²² Nawh Cao ah nin, "Kawn kawn pui tak sang kham geu tom nie ceu, ka daux tawm taix kuad song mai cao giex kaing li pa ting mai pui tiiem lai khankix mai tak sang kham geu pa teei yum mai tak sang deeh kaoh im khaix an daux loe singaix heue." ²³ Nawh Cao ah nin ka pui khawmuik, "Phan pui tix kaux kaux simie ti hawt khaix Aux, kieh nawh thiang ti tik tokaux tix mai klawm khaox lhak tix ku ngaix mai hawt Aux heue. ²⁴ Mawh kheu pui mawx ang ah, pa simie ti taoh ju tokaux tix, tak sang som ju heue. Viang mawh nan, pui mawx ang ah pa som ju son Aux, nawh tak pon ti taoh ju heue. ²⁵ Grawh grawng nawh, phan pui tix kaux kaux pon haktiex khawmuik mai som tokaux tix, sang koe bwanson yuh ka mawx? ²⁶ Mawh kheu pui mawx ang ah, pa kaig kheu Aux mai gumlox Aux, Kawn kawn pui kawx, tak sang kaig kheu nawh, yam Nawh viex min plakngai cie tix mai min plakngai Keeing tix, hoek tau mai kawncau Siyiex pa singax singeh khankix heue. ²⁷ Aux krai lox pa mawh meh ka pex, pui pa cung tin tix blah, tak ang cim krax yum, tom kix yaox Meung Siyiex heue. ²⁸ Khaix hoik ah Nawh Cao lox ceu in khankix, yam dex hoek daix ngaix, Nawh Cao teei Petrux, Yohan mai Yakop, haok ka gawng sonsang rawg bwan heue. ²⁹ Yam rawg Nawh Cao bwan, pakngai Nawh tieh loh mai kraung ceep Nawh lih paing cawk tom lih riang heue. ³⁰ Jhak heue, pui ra kaux sikah mai Nawh Cao, pa mawh Mose mai Eliyax, ³¹ Pa lih hoek ka daux min plakngai mai kum grawng pa dex sang yum Nawh Cao ka daux veng Yerusaliem heue. ³² Petrux mai pa ot tau mai nawh, sang it nie mai gaing heue. Viang mawh nan yam hoik siduad kix mhawm mhawm, kix yaox min plakngai Nawh Cao mai pui ra kaux pa cung tau mai Nawh heue. ³³ Yam gwieh kiex ti hu khaing Nawh Cao, Petrux ah nin ka Yesux, "Simiang eue, ex ot tin mhawm son ex heue, kieh ex yuh nyiex bang loe lhang. Son Maix tix lhang mai son Mose tix lhang mai son Eliyax tix lhang," Nawh ang tawng ceu pa ah tix, tom ah nan heue. ³⁴ Yam kawn ah nawh ceu in khankix, paiawm hoek ti kheem veei kix mai kix lhat ka yam laig kix ka daux paiawm heue. ³⁵ Lox lih khaing daux pai awm an, ah nin, "In mawh Kawn Aux, pa laug Aux, pex cu nghiet ka Nawh awx." ³⁶ Yam lih hoek lox an, yaox ngie Yesux ot nong nong tix kaux khaing. Kix ang nye, ang krai grawng ceu pa hoik yaox kix khankix ka pui tix kaux kawx ka daux bawg yam ngaix an heue. ³⁷ Khaix an tix singaix, yam hoik lih hoek kix khaing gawng, cub pui pa kied hun hoek ti rieb Nawh Cao. ³⁸ Jhak heue, ka daux cub pui hun, pui tix kaux kok yo ah nin, "Sara Cao Gau eue, aux khyox khaw ka Maix, hoek ti jhak ka kawn simex aux liak. Kheu nawh mawh kawn pa koe aux tix kaux ngie khaing heue. ³⁹ Phi giex nawh mai nawh riag dom mawx dom an mai kieh nawh rak rawn, tom lih bai jheeh heue. Dex ang yawn khaing nawh, yuh nawh tom kreuk heue. ⁴⁰ Aux khyox khaw ka kawncau Maix khankix nhie kix grheu phicaox an lih kawx, kix ang pon ti grheu heue." ⁴¹ Yesux deeh ah nin, "pui pa ang koe krax yum rhawm mai pa nu ti sidiex eue, Aux kawn tak sang ot mai pex miex grheung? Aux kawn tak sang gun yeung pex miex grheung? Viex kawn simex maix hoek heue." ⁴² Yam kawn tak hoek nawh, phicaox an biak nawh goh mai kieh nawh rak rawn tix sigrien sigre. Viang mawh nan Yesux ah ka phi pa seeing brai an mai kieh kawn simex an moi mai deeh tawx nawh ka keeing nawh heue. ⁴³ Pui khawmuik daox deng ka sibrawm pa ting lhaong Siyiex heue. Viang mawh nan yam kawn daox deng kix ku kaux ka ceu pa yuh Yesux khankix, Nawh Cao ah nin ka kawncau Nawh khankix. ⁴⁴ "Kieh gumlox in khankix laig ka daux yhaok pex, kheu tak sang tawx Kawn kawn pui ka daux tawm taix kawn pui khankix heue." ⁴⁵ Viang mawh nan kix ang tawng dee bleeh lox in mai hoik mox khaing kix, yuh ka mawx son ang kix sang tawng mai kix lhat chawk Yesux ka grawng lox in heue. ⁴⁶ Kix thung thiang paox tix, ka grawng daux kix mawh pui mawx pa tak sang nie lheu ting khaing paox tix. ⁴⁷ Viang mawh nan yam yaox Yesux pa keud pa sawn kix ka daux rhawm tix, Nawh Cao teei kawn nyawm iak tix kaux deuh ka liep tix, ⁴⁸ mai ah nin ka kix, "Pui mawx ang ah, pa rieb ti teei kawn nyawm iak in ka daux ceu kaux Aux, rieb ti teei ka Aux heue. Pui mawx ang ah, pa rieb ti teei Aux, rieb ti teei ka kaw pa ploi Aux hoek heue. Mawh kheu pui pa iak khaing paox tix ka daux pex khawmuik, kaw an tak sang ting heue." ⁴⁹ Yohan ah nin ka Nawh Cao, Simiang eue, ex yaox pui tix kaux pa grheu phicaox lih ka daux ceu kaux Maix mai ex kieh nawh, kheu ang nawh hawt tau mai ex heue." ⁵⁰ Viang mawh nan Yesux ah nin ka nawh, "Paw kieh nawh, mawh kheu pui pa ang ot plak pui koeng ka pex, ot plak pex heue." ⁵¹ Yam an dex sang hoek bawg yam singaix, pa sang rieb ti teei Nawh haok ka piang dee long, Nawh Cao jawg veeh pakngai tix, sonsang hu ka veng Yerusaliem. ⁵² Nawh ploi kawncau tix hu plak sivoe ngai Nawh Cao mai kix hu laig ka daux yaong pui Samarix tix yaong, sonsang cox khre son Nawh Cao heue. ⁵³ Pui yaong an ang rieb ti teei ka Nawh Cao, kheu Nawh veeh pakngai tix, sang hu ka veng Yerusaliem heue. ⁵⁴ Yam yaox kawncau Nawh Yakop mai Yohan grawng in, kiex ah nin, "Simiang eue, Maix koe rhawm ti kieh yiex, nhie ngu lih khaing raoma mai gleeing kix, awm pa hoik yuh Eliyax lie?" ⁵⁵ Viang mawh nan Yesux deeh veeh mai ah ka kiex. ⁵⁶ Kix hu ka tang yaong heue. ⁵⁷ Yam kawn hu kix krax, pui tix kaux ah nin ka Nawh Cao, "Aux sang hawt Maix ka dee sang hu Maix kudah kudee heue." ⁵⁸ Yesux ah nin ka nawh, "Sox praix khankix koe daux mai sim pa po piang raoma khankix koe mheem, viang mawh nan, Kawn kawn pui ang koe dee deuh kaing tix heue." ⁵⁹ Nawh Cao ah nin ka pui tang kaux tix kaux, "Hawt khaix Aux heue," viang mawh nan kaw an ah nin, "Simiang eue, kieh aux hu sipaung keeing aux ka ha." ⁶⁰ Yesux baox ah nin ka kaw an, "Kieh pui yum sipaung pui yum cie kix heue. Maix hu mai krai grawng meung Siyiex heue." ⁶¹ Tang kaux tix kaux kawx ah nin, "Simiang eue, aux sang hawt khaix Maix heue, viang mawh nan, kieh aux hu sikah lox gwieh ka pui pa ot ka daux nyiex aux ka ha. " ⁶² Yesux baox ah nin ka nawh, "Kaux pui mawx ang ah, pa hoik giex krong thai mai pa deeh gi plak khaix, ang keung khaw son meung Siyiex heue."

¹ Khaix ceu in khankix, Simiang, baox laug ti teei kawncau tang kaux atixgliah kaux mai ploi kix hu tix cub ra kaux, ra kaux, plak sivoe ngai Nawh Cao, ka daux ku veng mai kudah kudee, dee dex sang hoek Nawh Cao heue. ² Nawh Cao ah nin ka kix, "Nghox pa kaux pa khaw ti vawg kied nie viang mawh nan pui pa vawg tux heue. Mawh kheu nan pex rawg bwan ka Simiang cao nghox, yuh ka mawx sonsang ploi Nawh pui vawg nghox khankix hoek sonsang vawg nghox Nawh heue. ³ Hu dee hu pex heue. Jhak heue, Aux ploi pex hu awm kawn yung iak, ka sinax soxla khankix heue. ⁴ Paw viex hau mau, bau mai kiep, yam hu pex krax paw vi ah lox nawb ka pui tikaux kawx heue. ⁵ Pex laig ka daux nyiex mawx ang ah, ah lox yuh nin ka ha, kieh pa nhim koe piang nyiex in liak. ⁶ Phan kawn praix pa nhim koe tan, pa nhim pex tak ot piang nawh, viang mawh nan phan ang koe, pa nhim an tak deeh ka pex heue. ⁷ Ot ka daux nyiex an mai ih nyaux ceu pa tawx kix. Grawh grawng nawh, pui yuh kaing keung ti pon ngawh riang tix. Paw gah hu tix nyiex hoik tix nyiex heue. ⁸ Pex laig ka daux veng mawx ang ah, phan kix rieb ti teei pex, ih ceu pa khankix sivoe pex heue. ⁹ Cox pui saux ka daux dee an mai ah nin ka kix, Meung Siyiex hoik hoek dex ka pex heue. ¹⁰ Viang mawh nan, veng mawx ang ah, phan kix ang rieb ti teei pex, lih hu ka daux krax veng an khankix ah nin, ¹¹ "Phawng tiex veng pex pa kawb ka caong ex kawx, ex kawt sonsang mawh mhai mawh khen ka piang pex. Viang mawh nan kieh tawng ceu in, Meung Siyiex hoik hoek dex ka pex heue. ¹² Aux krai ka pex, ka daux ngaix an sax, veng an tak lheu yaoh ti kham geu khaing veng Sawdom heue." ¹³ Veng Khawrazin eue, maix tak pon pa kha rhawm heue. Veng Biesedax eue, maix tak pon pa kha rhawm heue. Phan hoik yuh kaing pa ting sibrawm khankix pa hoik yuh ka daux pax, ka daux veng Turux mai Sidon, kiex tak hoik dawg doh keud ka phimap tom rheung mai fua tix ka man pa taing ka hauk mai ngawm ka daux nyaox heue. ¹⁴ Ka daux bawg yam prawng sax, tak lheu yie ti kham geu son veng Turux mai veng Sidon, khaing son pax heue. ¹⁵ Veng Kapeniom eue, tak yaogyaw maix tom hoek meung raoma lie? Tak viex maix lih hu ka daux meung yum heue. ¹⁶ Pui pa nghiet lox pex, nghiet lox Aux heue. Pui pa tik ka pex, tik ka Aux heue. Pui pa tik ka Aux, tik ka kaw pa ploi Aux hoek heue." ¹⁷ Kawncau atixgliah kaux deeh hoek gaux rhawm ah nin, "Simiang eue, phicaox phicaig khankix kawx, ot greem ex nghiet lox ex ka daux ceu kaux Maix heue." ¹⁸ Nawh Cao ah nin ka kix, "Aux hoik yaox Satan rau khaing raoma awm tuhsah heue. ¹⁹ Jhak heue, Aux hoik tawx sibrawm ka pex, sonsang pon dig pex piang siuing mai tamtim khankix mai ka piang sibrawm pui pa koeng ka pex mai tix ceu kawx ang tau ti pon kieh pex saux heue. ²⁰ Paw gaux rhawm kheu phi khankix ot greem pex nghiet lox pex, viang mawh nan gaux rhawm ka pa hoik tiiem ti deuh ceu kaux pex, ka daux meung raoma heue." ²¹ Ka daux bawg yam nari an Nawh Cao gaux rhawm ka daux Khuan Singax Singeh ah nin, "Aux yaogyaw bwanson Maix, Keeing eue, Simiang pa ting piang raoma mai haktiex, kheu hoik mox Maix ceu in khankix, khaing pui lhak lhiem mai pa chix tawng khankix mai hoik plak kieh kawn ngie khankix yaox heue. Mawh heue, Keeing, kheu Maix koe rhawm khaw rhawm ti yuh nan heue. ²² Keeing Aux hoik tawx khawmuik ka Aux heue. Tix kaux kawx ang tawng Kawn Cao mawh mawx, lheu khaing Keeing Cao tix kaux khaing mai tix kaux kawx ang tawng Keeing Cao lheu khaing Kawn Cao, Kawn Cao koe rhawm ti plak kieh nawh tawng heue." ²³ Nawh Cao veeh ka kawncau Nawh khankix, dee ot kix nong ah nin, "Ngai pa pon tix yaox ceu pa yaox pex khankix, ting bwanson heue. ²⁴ Grawh grawng nawh, Aux krai ka pex, cao jhai mai simiang khankix hoik koe tom nie pa simie ti yaox ceu pa yaox pex mai ang pon ti yaox mai kix simie tix mhong pa mhong pex mai ang pon ti mhong heue." ²⁵ Jhak heue, cao prawng cao tawng lai been tix kaux kaoh cung sonsang cheuk sang nyaw ti yaox Nawh Cao, chawk ah nin, "Sara Cao Gau eue, sonsang pon aux sin ju leeing ju, aux tak sang yuh ka mawx?" ²⁶ Nawh Cao ah nin ka nawh "Hoik tiiem ti deuh daux lai beenli pa yuh ka mawx? Maix phat pa ah ka mawx?" ²⁷ Kaw an deeh pawk lox ah nin, "Maix tak moh Siyiex maix khawm rhawm khawm rhi tix khawmuik mai khawm ju tix khawmuik mai khawm riang rao tix khawmuik mai khawm ka dee chix keud tix khawmuik mai maix tak moh paox plawg tix awm moh tokaux tix heue." ²⁸ Nawh Cao baox ah nin ka nawh, "Lox pa pawk maix khaw heue. Yuh nin heue, maix tak pon tix im ju heue." ²⁹ Viang mawh nan kaw an, mie ti yuh tokaux tix, awm pui rahsee pa ang koe dee lud, nawh tom chawk ah nin ka Yesux, "Paox plawg paox nyhawm aux mawh mawx?" ³⁰ Yesux pawk lox nawh ah nin, "Pui tix kaux kaoh lih hu khaing veng Yerusaliem, sonsang hu ka veng Yerikho, nawh sidah pui tud rhim pa rud ti teei kraung nawh khawmuik mai tap toi nawh, tom dex yum mai grham nawh tan mai lih hu heue. ³¹ Cao giex kaing li tix kaux lih hawt krax an, yam yaox nawh kaw an, nawh via plak teh krax mai luan hu heue. ³² Awm an pui Lewix tix kaux kawx, yam hoek nawh tan, yaox kaw an, via plak teh krax mai luan hu heue. ³³ Viang mawh nan, pui Samarix tix kaux, yam hu nawh krax hoek dee ot kaw an, yam yaox nawh kaw an, nawh caux rhawm kah, ³⁴ mai hoek ka nawh mai groi rawm bee mai rawm plix siiet ka dee mat nawh mai pua dee saux nawh mai deuh nawh ka piang khawng brug nawh mai viex nawh hu ka nyiex nyo mai kia ngien nawh heue. ³⁵ Singaix pasax yam lih hu nawh teei denari ra plah mai tawx ka cao nyiex nyo an mai ah nin ka nawh, kia ngien kaw in mai baox uik maix miex ding ka piang in, yam deeh hoek aux sax, aux tak deeh viied ka maix heue. ³⁶ Maix ce yuh ka mawx, ka daux pui in loe kaux, mawh mawx pa mawh paox plawg ka kaw pa sidah pui tud rhim an lie?" ³⁷ Cao prawng cao tawng lai been an, deeh pawk ah nin, "Mawh kaw pa caux rhawm ka nawh heue." Yesux baox ah nin ka nawh, "Maix kawx, hu mai yuh awm an heue." ³⁸ Yam hu kix krax, Nawh Cao laig ka daux yaong tix yaong mai bun tix kaux pa kaux Mathax, rieb ti teei Nawh Cao ka daux nyiex tix heue. ³⁹ Bun an koe pux tix kaux pa kaux Marix, pa ngawm liep caong Yesux mai nghiet lox Nawh Cao heue. ⁴⁰ Viang mawh nan Mathax ang nyawm rhawm, kheu kied haoh kaing pa khan pa kheu nawh mai hoek ti ah nin ka Nawh Cao, "Simiang eue, Maix ang keud grawng pux aux, hoik prah grham aux, yuh kaing khan kheu nong nong lie? Mawh kheu nan nhie nawh teem aux liak" ⁴¹ Yesux pawk lox ah nin ka nawh, "Mathax, Mathax eue maix khi rhawm mai sung sang rhawm, ka kied nie ceu heue. ⁴² Viang mawh nan, lo ngie tix ceu khaing, Marix hoik laug ti cie ceu pa mhawm an, pa tak ang teei khaing nawh heue."

¹ Ka daux bawg yam an, yam rawg Nawh Cao bwan tix dah, khaix hoik rawg Nawh bwan, kawncau Nawh tix kaux ah nin ka Nawh Cao, "Simiang eue, gau ex ka lox rawg bwan liak, awm hoik gau Yohan ka kawncau tix." ² Nawh Cao ah nin ka kix, "Yam rawg pex bwan ah nin, Keeing eue, kieh ceu kaux Maix koe krax yung krax yi heue. Kieh meung Maix hoek heue. ³ Tawx pa ih pa lo ex, son tix ngaix hoik tix ngaix liak. ⁴ Pluat ploi phimap ex liak, awm pluat ploi ex phimap pui pa lud ka ex heue. Paw viex ex hoek ka daux krax nyaw krax glaw liak." ⁵ Nawh Cao baox ah nin ka kix, "Ka daux pex pui mawx pa koe paox grawm tix kaux mai phan hu ka nawh yam greung sawm mai ah nin ka nawh, paox grawm eue, tawx aux yaog blah loe lon liak. ⁶ Mawh kheu paox grawm aux tix kaux, kaoh khaing dee hu tix mai hoek ka aux mai aux ang koe ceu pa khan ka nawh heue. ⁷ Kaw an pawk lox khaing plak daux ah nin, paw vi lak lheut aux, kheu hoik song siviex mai kawn praix aux khankix hoik it, dee it tau mai aux. Aux ang pon kaoh ti tawx ka maix heue. ⁸ Aux krai ka pex, phan kaw an ang kaoh ti tawx ka nawh, kheu mawh nawh paox grawm nawh, viang mawh nan, kheu ca rawg nawh pot ang jud, kaw an tak kaoh ti tawx ka nawh awm pa lo nawh heue. ⁹ Aux krai ka pex, rawg heue, mai tak sang tawx ka pex, sawg heue, mai pex tak sang yaox, gleuh siviex heue, mai tak sang paoh son pex heue. ¹⁰ Grawh grawng nawh, kaw pa rawg tak pon, mai kaw pa sawg tak yaox mai ka kaw pa gleuh siviex tak paoh son nawh heue. ¹¹ Ka daux pex pa mawh keeing koe tix kaux kaux lie? Yam rawg yam mhaing kawn tix blah, nawh sang tawx simaox kah lie? Phan ang mawh nan phan rawg kax, nawh sang tawx siuing kah, son kax lie? ¹² Phan ang mawh nan, phan nawh rawg tawm, nawh sang tawx tamtim ka nawh lie? ¹³ Phan pex pa mawh pui caox kawx, chix tawx kraung pa mhawm ka kawn praix tix, Keeing pex pa ot ka daux meung raoma tak nie lheu tawx Khuan Singax Singeh, ka pui pa rawg ka Nawh miex ding?" ¹⁴ Nawh Cao grheu phicaox pa aw lih tix kaux mai yam hoik lih phicaox an pui aw an chix sikah heue. Cub pui hun khankix kied daox deng kah heue. ¹⁵ Viang mawh nan kix tix blah ah, "Kaw in een rhawm ka Belazebulax simiang phicaox mai grheu phicaox khankix lih heue." ¹⁶ Tang kaux tix blah sawg ti yaox mhai khaing raoma, sonsang cheuk ti yaox Nawh Cao. ¹⁷ Viang mawh nan Nawh Cao tawng ceu pa keud kix mai ah nin ka kix, "Meung ku meung pa ang khaw paox tix, gwieh paox tix, tak laux leeing heue. Nyiex ku nyiex pa ang khaw paox tix, gwieh paox tix, tak goh tak laux heue." ¹⁸ Satan kawx, phan ang khaw, gwieh tokaux tix, meung nawh chix kaux chix cong yuh ka mawx? Mawh kheu pex ah, Aux een rhawm ka Belazebulax mai grheu phicaox khankix lih heue. ¹⁹ Phan Aux een rhawm ka Belazebulax mai grheu phicaox khankix lih, kawn praix pex, een rhawm ka pui mawx mai grheu phicaox lih? Mawh kheu nan, kix tak mawh cao prawng cao ca pex heue. ²⁰ Viang mawh nan phan Aux een rhawm ka giien taix Siyiex mai grheu phicaox khankix lih, meung Siyiex hoik hoek ka piang pex tete heue. ²¹ Yam pui ting riang tix kaux, yam hoik grum kraung naing mai pau nyiex nawh mhawm mhawm, kraung khrai nawh ot nhim mhawm mhawm. ²² Viang mawh nan, yam hoek kaw pa nie ting riang khaing nawh mai pex nawh mai teei kraung naing pa deuh nawh rhawm tix kah, tak teei ti gwieh kraung cie nawh heue. ²³ Kaw pa ang ot plak Aux, mawh pui pa koeng ka Aux heue. Kaw pa ang khrawm tau mai Aux, mawh pa kieh prung prang heue. ²⁴ Khaix hoik lih phi pa seeing brai khaing daux pui, nawh hu preeng dee ang rawm koe, sawg dee laux kawx, ang yaox heue. Nawh tom ah nin, aux sang deeh ing ka nyiex aux khaing dee hoik kaoh aux heue. ²⁵ Yam hoik hoek nawh tan, nawh yaox nyiex pa hoik pih, pa hoik cox mhawm heue. ²⁶ Khaix an nawh hu mai viex phicaox aliah kaux, pa lheu caox khaing tokaux nawh mai laig ka daux pui an mai ot tan heue. Pa mawh ka pui an, lheu caox khaing phao ka heue." ²⁷ Yam kawn krai Nawh Cao ceu in khankix, bun tix kaux ka daux cub pui hun an, yo lox sinum ah nin ka Nawh, "Vaig pa nghe Maix mai teeih pa peuex Maix, ting bwanson heue." ²⁸ Viang mawh nan, Nawh Cao ah nin, "Mawh heue, viang mawh nan pui pa mhong gumlox Siyiex mai priex ti hawt khankix, kied ting bwanson heue." ²⁹ Yam kawn tak khrawm cub pui hun kah, Nawh Cao jah ti ah nin, "Ju pui in, mawh ju pa caox heue. Kix sawg ti yaox mhai pa daox am mai lheu khaing mhai pa daox am Yonax, tak ang tawx mhai pa daox am ka kix heue. ³⁰ Mawh kheu awm Yonax hoik mawh mhai ka pui veng Nineve, Kawn kawn pui kawx, tak sang mawh mhai ka pui ju in heue. ³¹ Yax simiang caong ma seh, tak kaoh tau mai pui ju in, ka daux singaix prawng singaix ciyang sax mai deuh phimap ka piang kix, kheu hoik hoek nawh khaing dee sidah haktiex mai nghiet gumlox pingnya cuyi simiang Sawlamon heue. Jhak heue, Kaw pa lheu ting khaing simiang Sawlamon ot tin heue. ³² Pui veng Nineve tak cung tau mai pui ju in ka daux ngaix prawng ngaix ciyang sax mai deuh phimap ka piang kix, kheu hoik doh keud kix ka phimap tix, yam sidiex gau Yonax mai jhak heue, Kaw pa lheu ting khaing Yonax ot tin heue. ³³ "Pui tix kaux kawx, ang sax tok kawk ngu deuh dee glip mai greem phliex, viang mawh nan deuh piang dee deuh kawk ngu, yuh ka mawx sonsang jhan riang ka pui pa laig tan khawmuik heue. ³⁴ Pa riang tokaux mawh ngai heue. Yam riang ngai maix, tokaux maix khawmuik kawx, naog ka pa riang heue. Viang mawh nan phan ngai maix ang mhawm, tokaux maix kawx naog ka pa faik heue. ³⁵ Mawh kheu nan rien rhawm tix, yuh ka mawx pa riang pa koe ka daux maix, tak ang mawh pa faik. ³⁶ Phan tokaux maix naog ka pa riang, ang koe dee faik ceeix kawx, tokaux maix tak sang grum naog ka pa riang, awm yam jhan kawk ngu pa riang nawh, son maix heue." ³⁷ Yam kawn sikah Nawh Cao, Pharishie tix kaux kok Nawh, sonsang sawm tau mai nawh, Nawh Cao laig mai ngawm neung dee sawm heue. ³⁸ Yam yaox Pharishie an ka ang Nawh Cao heem tix, ka sang sawm, nawh daox deng kah heue. ³⁹ Simiang ah nin ka nawh, "Pex pa mawh Pharishie, phak kawk mai tawg plak praix khaing, viang mawh nan plak daux pex, naog pa rhim ti teei mai ceu pa caox heue. ⁴⁰ Pui daox khankix eue, kaw pa yuh plak praix, yuh khawm plak daux ang mawh lie? ⁴¹ Viang mawh nan son ceu pa tan tawx ceu pa koe plak daux khankix mai jhak heue, kuceu khawmuik tak singax ka pex heue. ⁴² "Viang mawh nan, Pharishie khankix eue, pex tak kha rhawm, kheu pex tan taux lhax sioe mai sidah sidim kuceu, kao son tix son mai ang pex keud grawng pa prawng ca mai krax moh krax rhawm Siyiex. Viang mawh ceu in khankix kawx pex khaw ti yuh mai ang khaw ti grham ti ang yuh tang ceu an khankix heue. ⁴³ Pharishie khankix eue, pex tak kha rhawm, kheu pex moh dee ngawm pa mhawm khaing paox tix, ka daux nyiex dee sidiex khankix mai ceu pa yungyi pui ka daux lah daux cau khankix heue. ⁴⁴ Pex tak kha rhawm, kheu pex awm simeeig pa ang sidawng mai pui pa hu ka piang kix ang tawng grawng simeeig koe tan heue." ⁴⁵ Pui pa tawng pa prawng lai been tix kaux, pawk ah nin ka Nawh Cao, "Sara Cao Gau eue, pa ah Maix nin, viang mawh ka ex kawx, Maix map heue." ⁴⁶ Nawh Cao ah nin, "Pui tawng pui prawng lai been khankix eue, pex tak kha rhawm, kheu pex kieh pui klawm kraung pa cien mai pa nu ti klawm mai tokaux pex, pie gien taix pex kawx, ang teeh ka kraung an heue. ⁴⁷ Pex tak kha rhawm, kheu pex cox pex yuh simeeig cao jhai khankix mai tax du pex khankix mawh pa teei kix yum heue. ⁴⁸ Mawh kheu nan pex mawh pa kham mhai ruk mai jhi pui yaox grawng pa caw rhawm pex, ka kaing ceu pa yuh tax du pex heue. Mawh kheu kix hoik teei cao jhai khankix yum mai pex cox yuh simeeig kix heue. ⁴⁹ Mawh kheu nan pingnya cuyi Siyiex kawx hoik ah nin, Aux ploi cao jhai mai kawncau khankix ka kix heue. Kix tak tuktieak tukte tix blah mai tak pah yum tix blah heue. ⁵⁰ Kheu nham cao jhai khawmuik, pa hoik lih tom yam jah ti kaw haktiex, tak sang hoek ka piang pui ju in heue. ⁵¹ Jah ka nham Abelax tom sidah hoek ka nham Zakharix, pa hoik laux hoik yum, sinax nyiex bwan mai khu dee tan heue. Mawh heue, Aux krai ka pex, tak sang hoek ka piang pui ju in heue. ⁵² Pui tawng pui prawng lai been khankix eue, pex tak kha rhawm heue. Kheu hoik teei pex jiak saw pingnya cuyi, tokaux pex ang laig mai kix pa sang laig kawx, pex kieh kang heue." ⁵³ Yam hoik lih Nawh cao khaing tan, pui tiiem lai mai Pharishie khankix, jah ti kied susie Nawh sonsang kieh Nawh Cao krai grawh grawng tom nie ceu heue. ⁵⁴ Sonsang pon ti giex lox lud, pa lih khaing jheeh Nawh Cao heue.

¹ Daux bawg yam an, yam cub pui pa ang lai uik simin tom nie khrawm paox tix, tom dig kix piang paox tix, tix kaux lai tix kaux, Nawh Cao jah ti ah nin phao ka, ka kawncau Nawh khankix, "Rien rhawm tix ka susaix Pharishie khankix, pa mawh pa pie pa lhen heue. ² Viang mawh nan ang koe tix ceu kawx, pa hoik kheem hoik tawb, pa tak ang deeh hoe mai pa hoik mox ang koe tix ceu kawx, pa ang deeh kieh tawng heue. ³ Mawh kheu nan, pex hoik ah ceu pa yuh ka mawx ang ah ka daux pa faik, tak sang mhong ka daux pa riang heue. lox pa hoik ah pex ka yhaok, ka daux lawg plak daux, tak sang yo khaing piang prang nyiex heue. ⁴ Paox grawm Aux khankix eue, Aux ah ka pex, paw lhat ka kix pa chix teei tokaux yum mai pa ang chix yuh tidtix khaix an heue. ⁵ Viang mawh nan, Aux sang krai ka pex grawh grawng khaw pex ti lhat ka pa yuh ka mawx. Lhat ka kaw pa teei yum mai koe sibrawm ti taing sau ka daux mawnarhok. Mawh heue. Aux krai ka pex, lhat ka kaw an heue. ⁶ Ngawh coh saik phwan mu mawh asarix ra piak, ang mawh lie? Siyiex ang piawm saik khankix tix mu kawx heue. ⁷ Viang mawh hauk kaing pex kawx hoik simin khawmuik heue. Paw vi lhat kah, kheu nie lheu mhawm pex khaing saik heue. ⁸ Aux krai ka pex, pui pa kham ti rieb ti teei Aux ku kaux plak sivoe ngai kawn pui, Kawn kawn pui kawx, tak sang kham ti rieb ti teei nawh plak sivoe ngai kawncau Siyiex khankix heue. ⁹ Viang mawh nan pui pa thiang ti tik Aux sivoe kawn pui, Aux tak sang thiang ti tik nawh sivoe ngai kawncau Siyiex khankix heue. ¹⁰ Pui pa ah lox map ka Kawn kawn pui ku kaux, tak sang pluat sang ploi phimap nawh heue. Viang mawh nan kaw pa salao ka Khuan Singax Singeh, tak ang pluat ploi nawh heue. ¹¹ Yam viex kix pex sivoe nyiex sidiex khankix mai pui giex kaing khankix mai simiang khankix, paw khi rhawm grawh grawng lox pa sang pawk sang ah pex. ¹² Mawh kheu Khuan Singax Singeh tak sang gau pex ka daux bawg yam nari an, grawng pa khaw pex ti ah lox pa yuh ka mawx heue. ¹³ Pui tix kaux ka daux cub pui hun an, ah nin ka Nawh Cao, "Sara Cao Gau eue, nhie puxke aux gwieh sin ka aux liak" ¹⁴ Viang mawh nan Nawh Cao chawk ah nin ka kaw an, "Pui eue, mawx pa kieh Aux mawh cao prawng cao gwieh ka piang pax?" ¹⁵ Nawh Cao baox ah nin ka kix, "Rien rhawm tix son ang sang ghoing kah heue. Mawh kheu ju pui ang ot ka daux pa haoh sin ngao pa koe tix heue." ¹⁶ Nawh Cao baox krai ka kix daux lox tiag ah nin, "Haktiex cao mi tix kaux kied nie pon plix heue. ¹⁷ Nawh keud ti ah nin ka daux tokaux tix, Aux tak sang yuh ka mawx? Kheu ang aux koe dee een plix cie tix khankix heue. ¹⁸ Nawh baox ah nin, Aux tak yuh nin heue. Aux sang yieh nyiex krao aux khankix mai baox deeh yuh pa nie ting mai an tak sau nghox ca mai sin ngao aux tan heue. ¹⁹ Aux tak ah nin ka ju aux. Ju eue, maix hoik nie koe sin ngao pa hoik deuh, son num tom nie heue, laux lee tix, ih nyaux mai gaux rhawm heue. ²⁰ Viang mawh nan, Siyiex ah nin ka nawh, Pui daox eue, tak teei ju maix khaing maix ka daux sawm in heue. Ceu pa hoik cox hoik priex maix khankix, tak mawh cie pui mawx? ²¹ Kaw pa sawg ti een kraung khrai son tokaux tix mai pa ang koe pa hot plak Siyiex, awm cao mi an heue." ²² Nawh Cao ah nin ka kawncau Nawh khankix, "Mawh kheu nan Aux ah nin ka pex, pex sang ih pa yuh ka mawx, son ju tix mai sang ceep pa yuh ka mawx son tokaux tix, paw vi khi kah. ²³ Kheu ju lheu mhawm khaing pa ih mai tokaux lheu mhawm khaing kraung ceep heue. ²⁴ Keud ti yaox grawh grawng lak khankix, kix ang rhuat ang van mai kix ang vawg ang pat mai kix ang koe lawg koe krao dee een kraung, viang mawh nan Siyiex tawx kix sawm. Pex lheu ngawh lheu mhawm khaing sim khankix miex ding? ²⁵ Mawh kheu krax khi rhawm, ka daux pex, mawx pa chix kieh, tokaux tix baox lhaong tix sawk? ²⁶ Phan pex ang chix yuh ceu pa nie iak khaing paox tix, pex lai khi rhawm grawh grawng tang ceu pa taig khankix yuh ka mawx? ²⁷ Keud ti yaox grawh grawng tai siyak, chix ting chix lhaong yuh ka mawx, kix ang yuh kaing mai ang kling, viang mawh nan Aux krai ka pex, viang mawh kraung pa ceep simiang Sawlamon pa ting min plakngai, ang mhawm awm tai an khankix tix kho kawx heue. ²⁸ Pex pa iak krax yum rhawm eue, phan Siyiex tawx pa ceep pa mhawm awm an, ka num rib num riem daux tiagtu, pa koe singaix mai pa teei tix sau ka daux, daux ngu pasax, Nawh sang tawx kraung ceep pa lheu khaing an ka pex ang mawh lie? ²⁹ Paw sawg, son pa sang ih pex, son pa sang nyaux pex, paw kieh koe krax ang yum rhawm pa keud jee keud blaong. ³⁰ Mawh kheu pui piang meung haktiex khankix khawmuik, sawg ceu an khankix heue. Viang mawh nan Keeing pex tawng grawh grawng pa lo pex ceu in khankix heue. ³¹ Mawh kheu nan sawg Meung Siyiex ha mai ceu in khankix tak sang baox tawx ka pex heue. ³² Cub yung iak eue, paw lhat graung, mawh kheu Keeing pex koe rhawm ti tawx meung an ka pex heue. ³³ Coh pa koe pex mai yuh bwanson tawx ka pui hot pui sibhawm khankix heue. Yuh hau pa ang chix prim, pa mawh sinngao daux meung raoma, pa ang chix uik chix laux, dee ang pui briex pon hoek dex, dee ang pung piang siah yuh laux heue. ³⁴ Mawh kheu koe sin ngao pex dee mawx, rhawm pex kawx koe tan heue. ³⁵ "Rawd nyoi pex mai kieh kawk ngu pex lah heue. ³⁶ Kieh tokaux pex mawh awm pui pa krox ti jhak son simiang kix, yam deeh hoek nawh khaing dee ih kapaox heue. Kheu yam deeh hoek nawh mai gleuh siviex. Kix tak pon ti paoh son nawh dom mawx dom an heue. ³⁷ Yam deeh hoek simiang, siliex pa yaox nawh, krox ti pau son nawh khankix, ting bwanson heue. Aux krai lox tete ka pex, nawh tak sang nhawt maox rawd nyoi tix mai kieh kix ngawm tix sawm mai tokaux nawh tak sang khan kheu ka kix heue. ³⁸ Phan nawh sang deeh hoek pon sawm, bawg yam pau ra bawg tix bawg ang ah, bawg yam pau loe bawg tix bawg ang ah mai yaox kix yuh nan, siliex khankix ting bwanson heue. ³⁹ Kieh tawng ceu in heue. Phan cao nyiex tawng bawg yam nari sang hoek pui briex, nawh tak sang pau ti jhak mai ang grham ang kieh yieh ti laig daux nyiex tix heue. ⁴⁰ Mawh kheu nan, pex rien rhawm tix, kheu daux bawg yam nari, yam ang pex ce Kawn kawn pui tak sang hoek heue." ⁴¹ Petrux chawk ah nin, "Simiang eue, Maix ah lox tiag in ka ex lie, phan ang mawh nan ah ka pui khawmuik lie?" ⁴² Simiang deeh ah nin, "Siliex pa kaux sijax mai pa koe pingnya, pa hoik kieh simiang nawh ting piang geh nyiex tix, sonsang tawx nyum pa ih, ka kix yam hoek bawg yam pa khaw ti tawx, mawh mawx? ⁴³ Yam deeh hoek, simiang nawh siliex pa yaox nawh yuh nan, ting bwanson heue. ⁴⁴ Aux krai lox pa mawh meh ka pex, simiang nawh tak kieh nawh ting piang pa koe nawh khawmuik heue. ⁴⁵ Viang mawh nan phan siliex an keud ti ah nin daux rhawm tix, Simiang aux tak sang koi hoek mai jah ti tap simex siliex mai bun siliex khankix mai ih mai nyaux tom yoek tix. ⁴⁶ Simiang nawh tak hoek ka daux singaix pa ang nawh keud nawh ce mai daux bawg yam nari pa ang nawh tawng mai mug nawh dud mai teei nawh deuh tau mai pui pa ang kaux sijax khankix heue. ⁴⁷ Siliex pa tawng alo pa caw simiang tix, ang yuh ti rien, awm alo pa caw simiang nawh, tak sang sivied nawh tom nie taix heue. ⁴⁸ Viang mawh nan kaw pa ang tawng mai hoik yuh ceu pa khaw ti sivied nawh kah tak sang sivied nawh ceeix ngie heue. Pui mawx ang ah, pa hoik tawx ka nawh tom nie, tak sang yuh ti teei khaing nawh tom nie heue. Ka pui mawx ang ah pa hoik tawx ka daux tawm taix nawh tom nie, tak sang deeh rawg deeh mhaing khaing nawh tom nie heue. ⁴⁹ "Aux hoek sonsang taing ngu ka piang haktiex mai alo Aux mawh pa yuh ka mawx? Viang mawh yam in kawx, phan ngu an hoik cap mhawm heue. ⁵⁰ Lheu khaing an, Aux koe krax cubcom, pa tak lai cubcom Aux ka tix ceu mai ka ang nyang bax hoik bawg yam an, Aux kied khi rhawm ka miex ding heue. ⁵¹ Pex ce Aux hoek ti tawx krax nhim rhawm ka piang haktiex in lie? Aux krai ka pex ang mawh, hoek ti kieh gwieh paox tix heue. ⁵² Mawh kheu khaix in, ka daux nyiex tix lhang, pa koe phwan kaux tak gwieh ang khaw paox tix heue. Loe kaux an ang khaw ka kiex ra kaux mai kiex ra kaux ang khaw ka kix loe kaux heue. ⁵³ Kix tak sang gwieh paox tix, keeing tak ang khaw ka kawn simex tix, kawn simex kawx tak ang khaw ka keeing nawh. Miex tak ang khaw ka kawn bun tix, kawn bun kawx tak ang khaw ka miex nawh. Yiex tak ang khaw ka mun tix, mun kawx tak ang khaw ka yiex nawh heue." ⁵⁴ Nawh Cao baox ah nin ka cub pui hun khankix, "Yam yaox pex paiawm haok plak klip singaix, dom mawx dom an, pex ah tak lhiex heue. Mawh heue. ⁵⁵ Yam yaox pex phlu bhaung khaing plak caong ma seh, pex ah, tak kied sieet siaoh heue. Mawh heue. ⁵⁶ Pex pa mawh pui pie lhen eue, pex chix jhak chix tawng mhai haktiex mai raoma heue. Kheu, pex khex ang chix tawng ka grawh grawng bawg yam, yam in? ⁵⁷ Yuh patix tokaux pex ang chix tawng, mawh pa yuh ka mawx, pa mawh pa rahsee? ⁵⁸ Yam hu maix ka simiang, tau mai kaw pa sang yuh see ka maix, nied tiyuh sonsang mhawm lox an hawt krax, phan ang mawh nan, ha nawh kox reu maix hu ka cao prawng see, cao prawng see an tak teei ti tawx maix ka cao giex kaing, cao giex kaing sau maix ka daux thawng heue. ⁵⁹ Aux krai ka maix, maix ang pon lih khaing dee an, tom sidah ang maix nyang bax plud mau ghoik tix piak heue."

¹ Daux bawg yam an pui ot tan tix blah, pa krai ka Nawh Cao grawh grawng pui Galilie tix blah, pa hoik kieh Pilat nham kix kluklao tau mai pa tan pa lu kix heue. ² Nawh Cao pawk lox ah nin ka kix, "Pex ce pui Galilie khankix nie ting phimap khaing pui Galilie tang kaux khawmuik, kheu hoik kham geu kix ceu an khankix lie? ³ Aux krai ka pex, ang mawh. Viang mawh pex kawx, phan pex ang doh keud ka phimap tix, pex tak sang laux leeing awm an khawmuik heue. ⁴ Phan ang mawh nan kix kao kaux daix, pa hoik grhup dheem nyiex lhaong Silom kix yum, pex ce kix nie lheu lud khaing pui pa ot ka daux veng Yerusaliem khawmuik lie? ⁵ Aux krai ka pex, ang mawh. Viang mawh pex kawx, phan pex ang doh keud ka phimap tix, pex tak sang laux leeing awm an khawmuik heue." ⁶ Nawh Cao baox krai lox tiag in, "Pui tix kaux koe khaox ruh pa hoik sum ka daux sipeem nawh tix khaox, nawh hoek ti sawg plix ka khaox an, ang yaox tidtix heue. ⁷ Nawh ah nin ka pui pa pau sipeem. Jhak heue. Daux loe num pa hoik luan in, aux hoek ti sawg plix ka khaox ruh in, ang yaox tidtix. Kid ti tik heue. Yuh patix kieh nawh kram haktiex yuh nin? ⁸ Pui pa pau sipeem an, pawk lox ah nin ka nawh, Simiang ka daux num in kawx, kawn grham nawh ha, tom hoik ciag aux sivie num nawh mai sau phon kah heue. ⁹ Khaix in phan nawh chix plix mhawm heue, ang plix maix pon kid ti tik heue." ¹⁰ Ka daux ngaix twah tix ngaix, yam sidiex gau Nawh Cao ka daux nyiex sidiex, ¹¹ bun tix kaux, pa hoik laig phi pa kieh nawh saux kao daix num. Nawh hoik pompox sikrawng, tom ang pon yaog tokaux tix ceeix kawx heue. ¹² Yam yaox Yesux nawh, Nawh Cao ah nin ka nawh, "Bun eue, maix hoik luan khaing jhawm saux tix heue." ¹³ Nawh Cao teei taix tix deuh ka piang nawh, nawh uik see dom mawx dom an mai yaogyaw bwanson Siyiex heue. ¹⁴ Viang mawh nan, pui giex kaing nyiex sidiex an, song rhawm kheu cox Yesux jhawm saux moi ngaix twah mai ah nin ka cub pui hun khankix, "Koe liah ngaix pa khaw pui ti yuh kaing jhaw. Hoek ka daux ngaix an khankix, paw vi hoek sonsang kieh cox jhawm saux pex moi, ka daux ngaix twah heue." ¹⁵ Simiang pawk lox ka nawh ah nin, "Pui pie pui lhen khankix eue, pex ku kaux daux pui, ploi mawie ploi la khaing kawg mai tuk ti tawx hu nyaux rawm, ngaix twah ang mawh lie? ¹⁶ Bun in, pa mawh kawn bun Abraham, pa hoik phyawk Satan ka daux kao daix num, ang khaw ti ploi nawh khaing pa hoik phyawk tix, ka daux ngaix twah lie?" ¹⁷ Yam ah Nawh Cao nan, pui pa koeng ka Nawh khawmuik, koe krax kaig heue. Cub pui hun khawmuik, gaux rhawm ka grawh grawng ceu pa ting min plakngai pa yuh Nawh Cao khankix heue. ¹⁸ Nawh Cao baox ah nin, "Meung Siyiex awm ceu patix? Aux tak plak kieh awm patix? ¹⁹ Awm simie taux klaox tix mu, pa rhuat pui tix kaux, ka daux sipeem tix heue. Nawh ting lhaong, lih mawh khaox ting, sim raoma hoek ti ot ti laux ka piang kak nawh khankix heue." ²⁰ Nawh Cao baox deeh ah nin, "Aux tak plak kieh Meung Siyiex awm patix? ²¹ Awm susaix pa teei bun tix kaux mai mox ka daux phawng gaox loe glawm, tom susaix an hoik laig ka daux khawmuik mai kieh ploh heue." ²² Yam hu kawncau Nawh Cao krax, Nawh hu preeng daux veng daux yaong khankix, sidiex gau mai baox loi hu ka veng Yerusaliem heue. ²³ Pui tix kaux chawk Nawh Cao ah nin, "Simiang eue, tux pui pa sang hoek krax taoh lie?" Nawh Cao ah nin ka kix, ²⁴ "Nied ti coca sonsang pon ti laig ka siviex pa sikhawp sighiep heue. Mawh kheu, Aux krai ka pex, pui tom nie tak sang sawg ti laig kah mai ang pon laig heue. ²⁵ Yam hoik kaoh cao nyiex mai hoik song siviex mai pex cung plak praix mai gleuh siviex ah nin, Simiang eue, paoh siviex son ex liak heue. Nawh tak pawk lox mai ah nin ka pex, grawng kaoh pex khaing dee mawx Aux ang tawng heue. ²⁶ Yam an pex tak sang ah nin, ex hoik ih hoik nyaux dee ot Maix mai Maix hoik sidiex gau ka daux krax cie ex khankix heue. ²⁷ Nawh tak sang baox ah nin, Aux krai ka pex, Aux ang tawng dee kaoh pex, pex pa mawh pui pa yuh pa ang rahsee khawmuik, lih hu khaing Aux heue. ²⁸ Yam yaox pex Abraham mai Icak mai Yakop mai cao jhai khawmuik, ka daux meung Siyiex mai hoik taing hoik tik tokaux pex plak praix, tak sang yiiem riag mai greeik rhang heue. ²⁹ Kix tak kaoh hoek khaing plak lih singaix mai plak klip singaix, khaing caong ma seh, caong ma laong, ngawm ka daux meung Siyiex heue. ³⁰ Jhak heue, kix pa dhah khaix tix blah tak hoek ka mai kix pa hoek ka tix blah tak dhah khaix heue." ³¹ Ka daux bawg yam nari an Pharishie tix blah hoek ti ah nin ka Nawh Cao, "Maix lih hu khaing tin, kheu simiang Herut mie ti pah Maix yum heue." ³² Nawh Cao ah nin ka kix, "Hu krai ka sox praix an, Aux sang grheu phicaox khankix lih mai cox jhawm saux moi, singaix mai pasax, ka daux loe ngaix Aux tak grum mhawm heue. ³³ Viang mawh nan, Aux tak hu krax hu Aux, in ngaix mai pasax mai sikaox, mawh kheu Cao jhai tix kaux kawx ang khaw ti laux leeing, plak praix veng Yerusaliem heue. ³⁴ Veng Yerusaliem eue, veng Yerusaliem, pa teei cao jhai khankix yum mai dheem pui pa ploi hoek ka maix ka simaox, Aux simie ti khrawm kawn praix maix, awm ia miex khrawm kawn tix greem pruik nawh miex bawg maix ang kieh Aux yuh. ³⁵ Jhak heue, hoik grham nyiex pex yi ka pex heue. Aux krai ka pex, pex tak ang lai baox yaox Aux, tom pex ah, "Kaw pa hoek ka daux ceu kaux Simiang ting bwanson heue."

¹ Ka daux ngaix twah tix singaix, Nawh Cao hu ka daux nyiex simiang Pharishie tix kaux, sonsang sawm mai kix jiang Nawh heue. ² Jhak heue, pui tix kaux pa koe jhawm saux pang daux vaig mai uah tix, ot ka sivoe Nawh Cao tan heue. ³ Yesux chawk ah nin, ka pui tawng pui prawng lai been mai Pharishie khankix, "Khaw ti cox jhawm saux moi ka daux ngaix twah lie, ang khaw lie?" ⁴ Viang mawh nan kix ang nye heue. Nawh Cao teei kaw an, cox jhawm saux nawh moi mai kieh nawh hu heue. ⁵ Nawh Cao baox chawk ah nin ka kix, "Ka daux pex tix kaux kaux pa koe la phan ang mawh nan pa koe mawie, pa rau ka daux o ngaix twah, pa tak ang bluh nawh lih dom mawx dom an koe lie?" ⁶ Kix ang pon pawk lox ka grawh grawng ceu an heue. ⁷ Yam yaox Nawh Cao pui pa hoik kok hoek ti sawm khankix laug dee ngawm pa mhawm khaing paox tix, Nawh krai lox tiag yuh nin ka kix. ⁸ "Yam kok pui tix kaux kaux maix ih ka paox, paw vi ngawm neung dee mhawm khaing paox tix, ha nawh hoik kok pui pa lheu ting min plakngai khaing maix, ⁹ pui pa kok maix mai kaw an, hoek ti ah nin ka maix, yoi maix, son kaw in heue. Yam an maix tak koe krax kaig mai lih hu dee tiem khaing paox tix heue. ¹⁰ Viang mawh nan, yam kok pui maix, hu ngawm neung dee nie tiem khaing paox tix, yuh ka mawx son yam hoek kaw pa kok maix, nawh tak ah nin ka maix, paox grawm eue, haok ka dee lhaong heue. Yam an maix tak koe min plakngai, sivoe kix pa ngawm sawm tau mai maix khawmuik heue. ¹¹ Mawh kheu pui mawx ang ah, pa yaog tokaux tix lhaong, tak sang yeen nawh tiem mai pui mawx ang ah, pa yuh tokaux tix tiem, tak sang yaog nawh lhaong heue." ¹² Viang mawh ka kaw pa hoik kok Nawh Cao kawx, Nawh ah nin, "Yam kok maix ti khan kheu priex ngaix, priex bo, paw vi kok paox grawm maix mai puxaik maix mai paox ceu paox cat maix mai paox plawg maix pa mawh cao mi khankix, phan yuh nan kix kawx tak deeh kok maix mai deeh pawk bwanson maix heue. ¹³ Viang mawh nan yam yuh maix pawie, kok pui hot pui sibhawm mai pui laux maung mai pui laux caong mai pui dug ngai khankix, ¹⁴ mai maix tak pon bwanson heue. Mawh kheu kix ang pon deeh pawk bwanson maix heue. Daux bawg yam deeh kaoh pui rahsee khankix sax maix tak sang deeh pon bwanson heue." ¹⁵ Yam ngawm neung pui pa sawm tau mai Nawh Cao tix kaux, mhong lox ceu an khankix nawh ah nin ka Nawh Cao, "Kaw pa tak pon ti ih blah ka daux meung Siyiex, ting bwanson heue. ¹⁶ Viang mawh nan, Nawh Cao ah nin ka kaw an, "Pui tix kaux khrex priex bo ting mai ghaok pui tom nie. ¹⁷ Yam hoek bawg yam sawm, nawh ploi kawncau tix, hu nhie pui pa hoik ghaok khankix hoek ah nin, hoek heue, kheu hoik cox hoik khrex kuceu, ¹⁸ kix khawmuik, awm rhawm paox tix, nieb ah lox sonsang luan tix heue. Kaw phao ka ah nin ka nawh, Aux hoik liag ma tix gwang mai aux tak lai hu ti jhak heue. Aux khyox khaw ka maix, ploi aux liak ha ¹⁹ tang kaux tix kaux ah nin, Aux hoik liag moi phwan brawm, aux sang hu cheu ti yaox kix heue. Aux khyox khaw ka maix, ploi aux liak ha, ²⁰ tang kaux tix kaux baox ah nin, Aux hoik teei ti koe moeng, mawh kheu nan aux ang pon hoek heue. ²¹ Kawncau an deeh hoek mai krai grawh grawng ceu an khankix ka simiang nawh heue. Yam an cao nyiex an song rhawm mai ah nin ka kawncau an, nied ti hu ka gah krax ting gah krax iak, ka daux veng mai viex pui hot pui sibhawm mai pui laux maung mai pui dug ngai mai pui laux caong khankix hoek heue. ²² Kawncau an ah nin, Simiang eue, hoik yuh awm pa nhie maix, viang mawh nan ang nyang bax naog, kawn koe dee ot heue. ²³ Simiang an baox deeh ah nin ka kawncau nawh an, lih hu ka gah krax ting khankix mai deeh koe khaox vie khankix mai khin kix hoek, yuh ka mawx, sonsang naog nyiex aux heue. ²⁴ Grawh grawng nawh, aux krai ka pex, pui pa hoik ghaok phao ka khankix tix kaux kawx tak ang pon ti laik priex bo aux heue." ²⁵ Cub pui hun tom nie, hu tau mai Nawh Cao mai Nawh veeh ti ah nin ka kix, ²⁶ "Phan pui tix kaux kaux hoek ka Aux, ang koeng ka miex tix, keeing tix, moeng tix, kawn praix tix, puxaik tix, nan tix mai khawm ju tix kawx, nawh ang pon ti mawh kawncau Aux heue. ²⁷ Pui mawx ang ah, pa ang klawm khaox lhak tokaux tix mai hawt khaix Aux, ang pon ti mawh kawncau Aux heue. ²⁸ Mawh kheu ka daux pex koe pui mawx, pa simie ti yuh nyiex lhaong, pa ang ngawm phao ka mai sawn ti yaox grawh grawng sang uik miex ding mai grawh grawng nawh koe mau sang kub ti yuh tom hoik lie, ang kub lie? ²⁹ Phan ang mawh nan, khaix hoik kaw nawh num, ha nawh ang pon yuh tom hoik, pui khawmuik tak ne raw ka nawh, ³⁰ ah nin, pui in jah ti sum mai ang pon yuh tom hoik heue. ³¹ Phan ang mawh nan koe simiang mawx, pa sang hu ti puing simiang tang kaux, pa ang ngawm ti kum kawng grawh grawng nawh pon teei pui tix mheen ngie mai pon ti hu cha paox tix, ka simiang pa viex pui ra mheen lie, ang pon lie? ³² Phan ang mawh nan, phan nawh yiag tix ang pex, yam kawn ot simiang an dee singai, nawh tak sang ploi cao cau hu khyox khaw, son ang naing sang jih mai kieh yien heue. ³³ Mawh kheu nan ka daux pex, pui mawx ang ah pa ang tik ang grham ceu pa koe tokaux tix khawmuik, ang pon ti mawh kawncau Aux heue. ³⁴ Kih kienie mawh pa mhawm, viang mawh kih kawx, phan pa laoh nawh hoik grai, tak sang deeh teei pa chix kieh nawh laoh yuh ka mawx? ³⁵ Ang mhawm son haktiex, viang mawh son pum phon kawx ang mhawm. Pui tik nawh plak praix khaing. Kaw pa koe yhaok ti mhong, kieh nawh mhong heue."

¹ Pui koh mau mai pui ting map khawmuik, hoek dex ka Nawh Cao, sonsang nghiet Nawh heue. ² Pharishie khawm pui tiiem lai khankix, salao ah nin, "Pui in nieb rieb ti teei pui ting map khankix mai sawm tau mai kix heue." ³ Nawh Cao krai lox tiag in ka kix ah nin, ⁴ "Ka daux pex koe pui tix kaux kaux, pa koe yung tiyieh mai phan grai tix mu, pa ang prah ang grham, yung tix dim dim an, ka daux tiag mai hu sawg pa grai an tom hoik yaox nawh lie? ⁵ Yam hoik yaox nawh yung an, nawh gaux rhawm mai deuh piang klip tix heue. ⁶ Yam hoek nawh ka nyiex tix, nawh kok khrawm paox grawm nawh khankix mai paox plawg nawh khankix, ah nin ka kix, gaux rhawm tau mai aux heue, kheu hoik deeh yaox aux yung aux pa hoik grai heue. ⁷ Aux krai ka pex, ka daux meung raoma kawx, nie lheu koe krax gaux rhawm, yam doh keud pui koe map koe grham tix kaux, ka phimap tix, khaing son pui rahsee tix dim dim kaux, pa ang loh krax doh keud phimap tix heue. ⁸ "Phan ang mawh nan bun tix kaux kaux, pa koe mau kao pieak, phan grai tix plah, nawh ang tok kawk ngu mai pih nyiex tix mai nied ti sawg tom yaox mau an lie? ⁹ Yam hoik yaox nawh mau an, nawh kok khrawm paox grawm nawh khankix, paox plawg nawh khankix ah nin, gaux rhawm tau mai aux heue. Kheu hoik deeh yaox aux mau tix plah pa hoik grai khaing aux heue. ¹⁰ Awm an, Aux krai ka pex, koe krax gaux rhawm, dee ot kawncau Siyiex khankix, yam pui koe map koe grham tix kaux doh keud ka phimap tix heue." ¹¹ Nawh Cao baox ah nin, "Pui tix kaux koe kawn simex ra kaux. ¹² Ka daux kiex, kaw pa mawh pux ah nin ka keeing tix, Keeing eue, tawx sin ngao cie maix, pa khaw aux ti pon liak mai nawh gwieh sin ngao tix ka kiex heue. ¹³ Khaix an ang awt rheung, kawn pa mawh pux, khrawm kraung khrai cie tix mai hu daux meung dee singai tix meung heue. Nawh nieb yuh pa ang khaw ang jiet mai kieh sin cie tix som nai nawk tan heue. ¹⁴ Yam hoik uik cai nawh pa koe tix khawmuik, daux meung an kied lang teung sibhawm mai tokaux nawh kawx hot sibhawm heue. ¹⁵ Yam an nawh hu ka pui meung an tix kaux mai yuh siliex nawh heue. Kaw an ploi nawh hu ka daux ma tix, sonsang kia, sang tawx, lig sawm heue. ¹⁶ Nawh simie ti sak tu ka ceem pa ih lig khankix, pui tix kaux kawx ang tawx ka nawh heue. ¹⁷ Viang mawh nan yam deeh doh keud nawh, nawh ah nin, kawncau pa cang caing ka keeing aux koe miex ding pa sak mai ang uik ih mai aux siya tix tin, dex sang yum heue. ¹⁸ Aux tak kaoh mai deeh hu ka keeing aux mai ah nin ka nawh, keeing eue, aux hoik lud hoik yuh phimap ka Siyiex raoma mai sivoe ngai maix heue. ¹⁹ Ang keung ti kawn kok aux, mawh kawn simex maix, kieh aux mawh ngie kawncau pa cang pa caing ka maix tix kaux liak. ²⁰ Nawh kaoh mai deeh hoek ka keeing tix. Yam kawn tak hoek nawh, dee singai, keeing nawh yaox nawh, koe krax caux rhawm, to ti hu, khawp ngawg nawh mai ngheut nawh heue. ²¹ Kawn simex an ah nin ka nawh, keeing eue, aux hoik lud hoik yuh phimap ka Siyiex raoma mai sivoe ngai maix heue. Ang keung ti kawn kok aux mawh kawn simex maix heue. ²² Viang mawh nan, keeing nawh ah nin ka kawncau nawh khankix, nied ti hu teei kraung ceep pa lheu mhawm khaing paox tix mai ceep ka nawh mai sau jeep giien ka taix nawh mai ceep kiep ka caong nawh heue. ²³ Hu teei kawn mawie pa kluing pa bee mai pah nawh, kieh ex ih mai yuh krax gaux rhawm heue. ²⁴ Mawh kheu kawn simex aux in hoik yum, yam in hoik deeh im, nawh hoik grai, hoik deeh yaox yam in heue. Kix jah ti yuh krax gaux rhawm heue. ²⁵ Yam hoek kawn nawh pa mawh puxke, khaing ma mai hoek ka dex nyiex, nawh mhong luah lox pi kuceu mai lox graoh lox thiao. ²⁶ Nawh kok kawncau tix kaux mai chawk nawh, grawng ceu an mawh pa yuh ka mawx. ²⁷ Kawncau an deeh krai ka nawh, pux maix hoik deeh hoek mai keeing maix hoik pah mawie iak pa kluing pa bee, kheu hoik deeh pon nawh ti rieb nawh mhawm mhawm heue. ²⁸ Viang mawh nan, pa mawh puxke an, song rhawm mai ang laig ka daux nyiex mai keeing nawh lih hu khyox khaw nawh heue. ²⁹ Nawh deeh pawk lox ka keeing tix ah nin, jhak heue, aux hoik yuh son maix tom nie num in kix mai aux ang sax lheu lox maix tix bawg kawx, viang mawh nan maix ang sax tawx kawn pex ka aux tix mu kawx, yuh ka mawx sonsang yuh aux krax gaux rhawm tau mai paox grawm aux khankix heue. ³⁰ Kawn maix pa hoik kieh sin maix nai ka bun coh kaux khankix, deeh hoek maix hoik phah kawn mawie pa kluing pa bee son nawh heue. ³¹ Keeing nawh ah nin ka nawh, kawn simex aux eue maix ot tau mai aux jheung jheung, can pa koe aux khawmuik, mawh cie maix heue. ³² Khaw ti yuh krax gaux rhawm mai gaux rhawm heue. Mawh kheu pux maix in hoik yum mai yam in hoik deeh im, nawh hoik grai mai yam in hoik deeh yaox heue."

¹ Ka kawncau Nawh khankix kawx Nawh Cao ah nin, "Koe caomi tix kaux, pa koe kawncau pa bung kaing tix kaux, pa dhua pui nawh kieh kraung khrai caomi an nai mai krai ka simiang nawh heue. ² Simiang nawh kok nawh mai ah nin ka nawh, pa mhong aux grawh grawng maix mawh pa yuh ka mawx? Deeh tawx lai carang, grawh grawng yam yuh maix kawncau pa bung kaing. Mawh kheu ang maix lai baox pon ti yuh kawncau pa bung kaing heue. ³ Kawncau pa bung kaing an keud ah nin daux tokaux tix, aux tak sang yuh ka mawx, kheu simiang aux hoik deeh teei, kaing bung aux khaing aux? Aux ang koe riang ti sang kaong tiex mai phan caung ti ih, kaig aux kah heue. ⁴ Khaix hoik rau aux khaing kaing bung, aux tak yuh ka mawx! Aux hoik tawng, sonsang rieb pui aux ka daux nyiex kix. ⁵ Nawh kok pui pa ceuk ka simiang nawh ku kaux mai chawk ah nin ka kaw phao ka, maix ceuk ka simiang aux miex ding? ⁶ Kaw an deeh ah nin, Aux ceuk rawm bee tix rheng coi heue. Kawncau pa bung kaing an ah nin ka nawh, teei lai grawng ceuk maix mai nied ti tiiem phwan yieh coi heue. ⁷ Khaix an nawh baox chawk ka tang kaux ah nin, maix ceuk cie tix miex ding? Kaw an deeh ah nin ka nawh, ceuk nghox ca tix rheng glawm heue. Kawncau pa bung kaing an ah nin ka nawh, teei lai grawng ceuk maix mai nied ti tiiem daix yieh glawm heue. ⁸ Simiang nawh yaw kawncau pa bung kaing pa ang rahsee an, kheu hoik yuh nawh pa lhak lhiiem. Grawh grawng nawh, kawn praix pa dex dawd mai haktiex khankix nie lhak lhiem son bawg yam ju yam ot yam koe kix, khaing kawn praix pa riang khankix heue. ⁹ Aux baox krai ka pex, teei sinngao pa nieb hoik pon pex mai shiao, yuh ka mawx sonsang pon paox grawm, yam pa hoik laux sinngao an, pa tak sang rieb pex ka daux nyiex gox pa tak koe leeing ju heue. ¹⁰ Kaw pa kaux sijax ka ceu pa nie iak, ka grawng pa ting kawx, kaux sijax heue. Kaw pa ang rahsee, ka ceu pa nie iak, ka ceu pa ting kawx, ang rahsee heue. ¹¹ Mawh kheu nan phan pex ang kaux sijax, ka sinngao ceu pa ang rahsee, mawx sang tawx pex priex sinngao pa mawh pa meh? ¹² Phan pex ang hoik kaux sijax ka cie pui tang kaux, mawx tak sang tawx cie tokaux pex, ka pex? ¹³ Kawncau tix kaux kawx ang pon yuh son simiang ra kaux, mawh kheu nawh tak koeng ka tix kaux mai moh tang kaux an, phan ang mawh nan, nawh tak een rhawm ka tix kaux mai nieb yuh ka tang kaux an heue. Pex ang pon ti yuh son Siyiex mai khawm son sinngao heue." ¹⁴ Pharishie khankix pa mawh pui pa moh mau, yam mhong kix lox ceu an khawmuik, kix yuh pa ang cee ang cak nyiah ka Nawh Cao heue. ¹⁵ Nawh Cao ah nin ka kix, "Pex mawh pui pa yuh awm grang pa rahsee sivoe kawn pui, viang mawh nan Siyiex tawng rhawm rhi pex. Mawh kheu pa yaog kawn pui ti kieh ting, mawh pa seeing brai sivoe ngai Siyiex heue. ¹⁶ Lox lai beenli mai cao jhai khankix, koe tom hoek Yohan heue. Jah ka bawg yam an, sidiex gau lox bwan gaux rhawm pa dex dawd mai meung Siyiex mai pui ku kaux grhawm ti laig kah heue. ¹⁷ Viang mawh nan raoma mai haktiex lheu yie grai, khaing ngai lai pa nie iak tix mu cod grai khaing daux lai beenli heue. ¹⁸ "Pui mawx ang ah, pa tik moeng tix mai baox moeng tang kaux, nawh lud vao heue. Kaw pa teei ti moeng bun pa hoik tik mex nawh, lud vao heue. ¹⁹ "Koe caomi tix kaux, nawh ceep kraung raoh klai mai kraung man paing pa mhawm, yuh krax pa gaux rhawm ku ngaix heue. ²⁰ Koe pui hot tix kaux, pa kaux Lazarux, pa ot dex siviex caomi an, nawh muad mie naog yia leem khawm kaux tix. ²¹ Nawh simie ti ih, pa pruat pa roik, pa cod khaing pheen caomi an, mawh heue. Viang mawh sox khankix kawx hoek ti lied dee saux nawh heue. ²² Yam an tix ngaix pui hot an yum mai kawncau Siyiex khankix, teei nawh hu deuh nawh ka daux naok Abraham heue. Caomi an kawx yum mai sipaung nawh heue. ²³ Nawh kied kha rhawm daux meung yum, nawh yaog ngai tix jhak mai yaox ka Abraham dee singai, mai Lazarux ka daux naok Abraham heue. ²⁴ Nawh kok yo ah nin, Keeing! Abraham eue, caux rhawm ka aux liak, ploi Lazarux hoek, son sang cub nawh toh giien tix daux rawm mai kieh caux ka dak aux nghie liak, kheu aux kied kha rhawm ka daux rao ngu in heue. ²⁵ Viang mawh nan Abraham ah nin, kawn praix eue, doh keud ka grawng pa hoik pon maix ceu pa mhawm cie maix, yam kawn im ju maix, awm an Lazarux hoik pon ceu pa ang mhawm, pa caox heue, viang mawh nan, yam in nawh pon ceu pa khu rhawm nawh, pa nyawm rhawm tin mai maix kham geu pa kha rhawm heue. ²⁶ Lheu khaing in khawmuik, sinax yiex mai maix, koe ngawd rang ting raux, yuh ka mawx son kix pa sang hu khaing tin ka maix, tak ang chix hu mai tix kaux kawx ang pon tiang ti hoek khaing tan ka yiex heue. ²⁷ Caomi an baox ah nin, keeing eue, phan mawh nan, aux khyox ka maix, kieh Lazarux hu ka nyiex keeing aux liak. ²⁸ Sonsang hu nawh ti kham mhai ruk ka kix heue, mawh kheu aux koe puxaik phwan kaux, phan ang mawh nan ha kix kawx, hoek ka dee kha rhawm tin heue. ²⁹ Viang mawh nan, Abraham ah nin, kix koe Mose mai cao jhai khankix, kieh kix nghiet lox kix heue. ³⁰ Kaw an baox ah nin, Ang mawh, keeing Abraham eue, viang mawh nan, phan tix kaux pa hoik yum, hu ka kix, kix tak sang doh keud ka phimap tix heue. ³¹ Abraham baox ah nin ka nawh, phan kix ang nghiet Mose mai cao jhai khankix, viang pui tix kaux deeh kaoh khaing krax yum kawx, kix tak ang cu nghiet ka lox nawh heue."

¹ Nawh Cao ah nin ka kawncau Nawh khankix, "Phan dee sideeing ang hoek ang doh mawh, viang mawh nan kaw pa kieh koe dee sideeing caong khankix, tak kha rhawm heue. ² Son kaw an, phan preue simaox mhaw ka ngawg nawh mai taing nawh ka daux rawm sigrit sigra lheu mhawm khaing kieh nawh kawn nyawm iak khankix tix kaux sideeing caong tix heue. ³ Tokaux pex rien rhawm tix heue, phan puxaik maix lud, ne nawh ka, phan nawh deeh doh keud, ploi phimap nawh heue. ⁴ Phan nawh lud maix daux tix ngaix, tom aliah bawg mai deeh tieh ti hoek ka maix aliah bawg ah nin, Aux deeh doh keud ka phimap heue. Pluat ploi phimap nawh heue." ⁵ Kawncau pa ting Nawh khankix ah nin ka Simiang, "Kieh krax yum rhawm ex baox nie ting liak" ⁶ Simiang deeh ah nin, "Phan pex koe krax yum rhawm pon ding mu simie sok taux klaox tix mu, pex ah ka khaox liah in, maix reeig khawm riah tix mai hu jung ka daux rawm sigrit sigra heue. Khaox an tak nghiet lox pex heue. ⁷ Phan pex koe siliex pa thai ma ang ah, pa liang yung ang ah, yam deeh hoek nawh khaing ma, hoek dom in mai ngawm ti sawm heue. Kadaux pex koe pa nghaox ah nin lie? ⁸ Jalao sang ah nan, nawt maox rawd nyoi maix mai khre ceu pa sang sawm aux mai khan kheu tom hoik sawm rheep aux, maix koe sawm rheep khaix aux. Tee sang ah nin ka nawh ang mawh lie? ⁹ Mawh kheu siliex an hoik yuh ceu pa hoik nhie nawh yuh khankix, nawh khex sang yaog yaw bwanson nawh kah lie? ¹⁰ Awm an pex kawx, khaix hoik yuh pex ceu pa hoik nhie pex yuh khawmuik. Ah nin, ex mawh ngie siliex pa ang koe bwanson, ex hoik yuh ceu pa khaw ex ti yuh khaing heue." ¹¹ Yam kawn tak hu Nawh Cao ka veng Yerusaliem, Nawh hu preeng ka sinax meung Samarix mai meung Galilie heue. ¹² Yam laig Nawh Cao ka daux yaong tix yaong pui sipawg kao kaux, cung dee singai, ¹³ mai kok yo ah nin, "Yesux, Simiang eue, caux rhawm ka yix liak." ¹⁴ Yam yaox Nawh Cao kix, Nawh ah nin ka kix, "Hu jhi tokaux pex ka cao giex kaing li pa ting khankix heue." Yam kawn tak hu kix, kix deeh singax heue. ¹⁵ Ka daux kix tix kaux yam nawh yaox grawh grawng hoik deeh moi tix, nawh deeh tieh ti hoek mai ah lox sinum yaog yaw Siyiex heue. ¹⁶ Nawh gup ngai tix dex caong Nawh Cao mai yaog yaw bwanson Nawh Cao, kaw an mawh pui Samarix heue. ¹⁷ Yesux ah nin ka nawh, "Pa hoik deeh kieh singax koe kao kaux ang mawh lie? Viang mawh nan kix dim kaux ot dee mawx? ¹⁸ Ang koe pa sang deeh hoek ti yaog yaw bwanson Siyiex, lheu khaing pui tang ceu in lie?" ¹⁹ Nawh Cao baox ah nin ka kaw an, "Kaoh hu krax hu maix, krax yum rhawm maix hoik kieh maix moi heue." ²⁰ Pharishie khankix hoek tix chawk ah nin, "Meung Siyiex tak sang hoek lai mawx?" Nawh Cao pawk lox ah nin ka kix, "Meung Siyiex hoek ka daux pa chix yaox pui ang mawh heue. ²¹ Viang mawh nan kawx, kix tak ang ah, jhak heue, koe tin, phan ang mawh nan, jhak heue, koe tan mawh kheu meung Siyiex koe ka daux pex heue." ²² Nawh Cao ah nin ka kawncau Nawh khankix, "Singaix bawg yam tak sang hoek, yam sang simie pex tix yaox, singaix bawg yam Kawn kawn pui tix singaix mai pex tak ang lai pon ti yaox heue. ²³ Kix tak sang ah nin ka pex, jhak heue tan, jhak heue tin, paw lih hu, viang khaix kix kawx paw hawt heue. ²⁴ Mawh kheu awm tuhsah, yam nawh tuh plak daog raoma tix plak, jhan riang tom hoek daog raoma tang plak, yam tak sang hoek Kawn kawn pui ka daux singaix Nawh, tak sang awm an heue. ²⁵ Viang mawh nan Nawh tak sang kham geu tom nie ceu mai kham geu pa tik pa vud pui ju in, phao ka heue. ²⁶ Awm pa hoik mawh ka daux bawg yam singaix Noax khankix, ka daux bawg yam singaix Kawn kawn pui kawx, tak sang mawh awm an heue. ²⁷ Kix ih, kix nyaux, teei mex teei moeng, teei ti tawx ka paox tix, tom hoek singaix laig Noax ka daux nyiex reu ting mai rawm haok hwan mai naog piang haktiex, yuh kix laux khawmuik heue. ²⁸ Awm an ka daux bawg yam singaix Lotax khankix, kix ih, kix nyaux, kix liag, kix coh, kix sum mai kix yuh nyiex heue. ²⁹ Viang mawh nan ka daux singaix yam lih Lotax khaing daux veng Sawdom, lih lhiex ngu mai mhat khaing raoma mai yuh kix laux khawmuik heue. ³⁰ Ka daux singaix yam tak sang kieh sidawng Kawn kawn pui, tak awm an heue. ³¹ Ka daux singaix an, pui pa ot ka piang prang nyiex, paw kieh nawh lih ti teei kraung tix ka daux nyiex, awm an pui pa ot ka daux ma, paw kieh nawh deeh plak khaix tix heue. ³² Doh keud ka moeng Lotax heue. ³³ Pui mawx ang ah pa sawg ti taoh ju tix, tak sang som ju heue. Viang mawh nan pui mawx ang ah pa sang som ju, tak sang pon taoh ju tix heue. ³⁴ Aux krai ka pex, ka daux sawm an, pui ra kaux pa it piang ku tix mu ngie, tak sang teei tix kaux mai tak sang prah tang kaux an heue. ³⁵ Bun ra kaux pa krid tau ka mhaw, tak sang teei tix kaux mai tak sang prah tang kaux an heue." ³⁶ Pui ra kaux pa ot daux kaung, tak sang teei tix kaux mai tak sang prah tang kaux an heue." ³⁷ Kix chawk Nawh Cao ah nin, "Simiang eue, ceu in tak sang mawh ka dee mawx?" Nawh Cao pawk lox ah nin ka kix, "Tokaux yum koe dee mawx ang ah klang preng tak sang khrawm tix tan heue."

¹ Nawh Cao krai lox ka kix, yuh ka mawx sonsang khaw kix ti rawg bwan jheeng jheeng mai son ang kix sang khrup rhawm, ² ah nin, "Ka daux veng tix veng koe cao prawng see tix kaux, pa ang lhat ka Siyiex mai ang chix nabyam pui heue. ³ Ka daux veng an koe miexmai tix kaux, pa hu ka cao prawng see an law lawx, ah nin, prawng son aux mhawm mai yuh ka pui pa yuh see ka aux liak. ⁴ Ka daux tix vong nawh ang prawng ang yuh, viang mawh nan khaix an nawh keud tiah nin ka daux tokaux tix, viang aux ang lhat ka Siyiex mai ang nabyam ka pui kawx, ⁵ Mawh kheu miexmai in hoek ti lag lheut suksag aux, aux tak sang prawng plak kiex, phan ang mawh nan kiex tak sang kieh aux taug nyhap tix heue." ⁶ Simiang baox ah nin, "Nghiet ka lox cao prawng see pa ang rahsee an heue. ⁷ Siyiex tak ang prawng, ang yuh plak pui pa hoik laug Nawh ti teei, pa kok ka Nawh yam pon singaix mai yam pon sawm, viang ang Nawh khran yuh kawx lie? ⁸ Aux krai ka pex, Nawh tak sang nied ti prawng laung laung plak kix heue. Yam sang hoek Kawn kawn pui, Nawh tak sang yaox krax yum rhawm ka piang haktiex in lie?" ⁹ Lox tiag in kawx, Nawh Cao krai ka kix tix blah, pa een rhawm ka tokaux tix, grawng uik rah uik see tix mai nieb een ti ang koe cee ka pa kawn deuk khawmuik an heue. ¹⁰ "Pui ra kaux haok daux nyiex bwan son sang rawg bwan, tix kaux mawh Pharishie mai tang kaux an, mawh pui pa koh mau heue. ¹¹ Pharishie an cung ti rawg bwan nong nong ah nin, Siyiex eue, aux yaog yaw bwanson Maix, kheu ang aux awm pui tang kaux khankix, pa nieb rhim ti teei, yuh pa ang rahsee, lud vao, awm pui koh mau in kawx, aux ang awm heue. ¹² Aux twah pa ih, tix twah ra ngaix mai aux tawx kao son tix son khaing pa pon aux khawmuik heue. ¹³ Viang mawh nan pui pa koh mau an, cung dee singai mai pie ngai nawh, ang yaog tix maong plak raoma, nawh dieh naok ti ah nin, Siyiex eue, caux rhawm ka aux pa mawh pui tingmap liak. ¹⁴ Aux krai ka pex, yam lih hu pui in ka nyiex tix, nawh hoik nie lheu pon pa rahsee, khaing tang kaux an heue. Mawh kheu pui mawx ang ah, pa yaog tokaux tix lhaong, tak sang yeen nawh tiem, pui mawx ang ah, pa yuh tokaux tix tiem, tak sang yaog nawh lhaong." ¹⁵ Kix viex kawn iak tix khankix hoek ka Nawh Cao, son sang teeh Nawh ka kix heue. Yam yaox kawncau Nawh khankix, kix ah ka kix heue. ¹⁶ Viang mawh nan Yesux kok kix hoek ka tix ah nin, "Kieh kawn nyawm iak khankix hoek ka Aux, paw sidien ka kix, kheu meung Siyiex mawh cie pa awm kix heue. ¹⁷ Aux krai lox tete ka pex, pui mawx ang ah, pa ang rieb ti teei Meung Siyiex awm kawn nyawm iak, tak ang pon ti laig tan heue." ¹⁸ Cao mi pui awnju tix kaux hoek ti chawk Nawh Cao ah nin, "Sara cao gau pa mhawm eue, sonsang pon aux, ju leeing ju aux tak sang yuh ka mawx?" ¹⁹ Yesux pawk lox ah nin ka nawh, "Kheu maix lai kok Aux mawh, pa mhawm? Lheu khaing Siyiex tix kaux khaing, tix kaux kawx ang mhawm heue. ²⁰ Maix tawng lox pingnyap khankix, paw lud vao, paw teei ju pui yum, paw briex, paw kham mhai ruk pa ang mawh meh, yungyi ka miex keeing tix heue." ²¹ Kaw an pawk ah nin, "Aux hoik hawt ti yuh ceu an khankix khawmuik, tom yam iak aux heue." ²² Yam mhong Yesux lox an, Nawh Cao ah nin ka nawh, "Kawn koe pa cha maix tix ceu khaing. Hu coh pa koe maix khawmuik mai tawx ka pui hot sia khankix mai maix tak koe kraung khrai ka daux meung raoma mai hoek ti hawt Aux heue." ²³ Viang mawh nan, yam mhong nawh ceu an khankix, nawh kied khi rhawm, kheu mawh nawh pa kied koe heue. ²⁴ Yesux jhak ka nawh ah nin, "Pui pa mawh cao mi nu sonsang laig ka daux meung Siyiex miex ding heue. ²⁵ Laig kala-uk ka daux kre nyex lheu yie khaing laig cao mi ka daux meung Siyiex heue." ²⁶ Kix pa mhong lox an chawk ah nin, "Phan mawh nan, pui mawx tak sang pon hoek krax taoh?" ²⁷ Nawh Cao deeh ah nin, "Ceu pa ang kawn pui chix yuh, Siyiex chix yuh heue." ²⁸ Petrux ah nin, "Jhak heue, ex hoik prah grham cie ex mai hawt khaix Maix heue." ²⁹ Nawh Cao baox ah nin ka kix, "Aux krai lox tete ka pex, ang koe pui tix kaux kawx, pa hoik prah grham nyiex nawh, phan ang mawh nan, moeng nawh, puxaik nawh, miex keeing nawh, kawn praix nawh, kheu son meung Siyiex. ³⁰ Pa tak ang baox nie lheu pon ka daux bawg yam in mai ju leeing ju ka daux ju khaix heue." ³¹ Nawh Cao kok kawncau tix kao ra kaux ah nin ka kix, "Jhak heue, ex tak sang haok hu ka veng Yerusaliem, ceu pa hoik tiem cao jhai khankix ti deuh, tak sang grum mawh ka Kawn kawn pui heue. ³² Grawh grawng nawh, tak sang teei ti tawx Nawh ka pui tang ceu, yuh pa ang cee ang cad mai pa ang khaw ang jiet mai baig rawm myia ka heue. ³³ Kix tak sang sivied Nawh, teei Nawh yum, yam hoik hoek loe ngaix Nawh tak deeh kaoh im heue." ³⁴ Kawncau Nawh khankix ang tawng grawng ceu in khankix, tix ceu kawx heue. Mawh kheu hoik mox lox in khaing kix mai kix ang tawng grawng ceu pa ah Nawh Cao heue. ³⁵ Yam hoek Nawh Cao dex ka veng Yerikho, pui dugngai tix kaux ngawm dex krax mai caung ti ih heue. ³⁶ Kheu mhong nawh cub pui hun hu daux krax, nawh tom chawk grawng in mawh pa yuh ka mawx. ³⁷ Kix krai ka nawh, mawh Yesux pui veng Nazariet pa hu lawng krax heue. ³⁸ Kaw an kok yo ah nin, "Yesux kawn Davit eue, caux rhawm ka aux liak." ³⁹ Pui pa hu sivoe khankix, ah ka nawh, sonsang yawg nawh tix heue. Viang mawh nan nawh nie baox yo ah nin, "Kawn Davit eue, caux rhawm ka aux liak" ⁴⁰ Yesux cung mai tawx lox, nhie kix viex kaw an hoek ka tix, yam hoek nawh dex, Nawh Cao chawk ka nawh ah nin, ⁴¹ "Maix simie ti kieh Aux yuh patix son maix? " Kaw an ah nin, " Simiang eue, kieh ngai aux chix yaox liak" ⁴² Yesux baox ah nin ka nawh, "Kieh yaox heue, krax yum rhawm maix hoik kieh maix moi" ⁴³ Dom mawx dom an kaw an chix yaox mai yaog yaw Siyiex, hawt khaix Nawh Cao. Yam yaox pui khawmuik ceu an, kix yaog yaw Siyiex heue.

¹ Yesux kawx laig hu mai breeng daux veng Yerikho. ² Yam an koe cao kaing pui koh mau pa kaux Zakkhie nawh mawh cao mi heue. ³ Nawh sawg ti sang yaox Yesux mawh pui pa yuh ka mawx, kheu hun pui nawh ang pon ti yaox, kheu nawh mawh pui kalux, iak heue. ⁴ Nawh to sivoe mai haok piang khaox lieah tix khaox, son sang pon yaox Yesux, kheu sang lawng Nawh krax an heue. ⁵ Yam hoek Yesux ka dee an, Nawh yaog tix simi mai ah nin ka nawh, "Zakkhie eue, nied ti lih laung laung, Aux tak paung daux nyiex maix singaix heue." ⁶ Nawh nied tix lih mai koe krax gaux rhawm, rieb tix teei Nawh Cao heue. ⁷ Yam yaox pui, kix khawmuik salao ah nin, "Nawh hoik laig ti paung mai pui pa ting map heue." ⁸ Zakkhie cung ah nin ka Simiang, "Simiang eue, sinngao pa koe aux tix plak aux tawx ka pui hot sia khankix, phan aux hoik teei pa ang khaw ti teei ka pui mawx ang ah, aux tak deeh pheuex pon son heue." ⁹ Yesux ah nin ka nawh, "Krax taoh hoik hoek ka daux nyiex in singaix, kheu hoik mawh kaw in kawn simex Abraham heue. ¹⁰ Mawh kheu Kawn kawn pui hoek sonsang sawg ti taoh ka pui pa hoik grai khankix heue." ¹¹ Yam kawn nghiet kix ceu in khankix, Nawh Cao baox krai lox tiag in, mawh kheu Nawh Cao dex hoek ka veng Yerusaliem, kheu ce kix meung Siyiex tak sang bleeh dom mawx dom an heue. ¹² Kheu nan Nawh Cao ah nin, "Simiang tix kaux hu ka daux meung dee singai tix meung, sonsang pon haktiex son tokaux tix mai deeh hoek heue. ¹³ Nawh kok kawncau tix kao kaux mai tawx mau ka kix kao coi mai ah nin ka kix, yuh lai geu ka mau in tom deeh hoek aux heue. ¹⁴ Viang mawh nan, pui meung, pui haktiex nawh, koeng ka nawh mai ploi pui hawt khaix nawh ah nin, "Ex tak ang kieh pui in ting piang ex heue. ¹⁵ Yam deeh hoek nawh khaix hoik pon nawh haktiex, nawh tawx lox kieh kok ka kawncau khankix, pa hoik tawx nawh mau, hoek ka nawh, sonsang pon nawh ti tawng, kix hoik pon rao yuh lai miex ding. ¹⁶ Kaw phao ka hoek sivoe nawh, ah nin, Simiang eue, mau cie maix tix coi an, hoik baox pon rao kao coi heue. ¹⁷ Nawh baox ah nin ka kawncau an, mhawm heue, kawncau pa mhawm eue, mawh kheu hoik kaux sijax maix ka daux pa iak pa liied maix giex kaing veng kao veng heue. ¹⁸ Ra kaux tix kaux hoek ah nin, Simiang eue, mau cie maix tix coi, hoik baox pon rao phwan coi heue. ¹⁹ Ka kawncau an kawx nawh ah nin, maix kawx giex kaing piang veng phwan veng heue. ²⁰ Tang kaux tix kaux hoek ah nin, Simiang eue, jhak heue, mau cie maix tix coi an, aux hoik pua ti deuh ka daux man khoek in. ²¹ Mawh kheu lhat aux ka maix, kheu mawh maix pui riex nu ti ah heue. Maix teei ceu pa ang maix deuh mai vawg ceu pa ang maix rhuat heue. ²² Nawh ah nin ka kawncau an, kawncau pa caox eue, aux tak prawng maix ka lox pa lih khaing jheeh maix heue. Kheu hoik tawng maix grawng mawh aux pui riex nu ti ah, teei ceu pa ang aux deuh mai pa vawg ceu pa ang aux rhuat heue. ²³ Phan mawh nan yuh ka mawx maix ang tawx mau cie aux ka nyiex dee deuh mau? Yam deeh hoek aux, aux tak pon mau aux khawm rao heue. ²⁴ Nawh ah nin ka kix pa cung dex tan khankix, deeh teei mau tix coi an khaing nawh mai tawx ka kaw pa hoik koe kao coi heue. ²⁵ Kix ah nin ka nawh, Simiang eue, nawh hoik koe kao coi heue. ²⁶ Aux krai ka pex, pa hoik koe ku kaux daux pui, tak sang baox tawx ka nawh heue. Kaw pa ang koe viang pa hoik koe nawh kawx, tak sang deeh teei khaing nawh heue. ²⁷ Lheu khaing an, pui pa koeng ka aux khankix, pa ang rhawm kieh aux yuh simiang giex kaing kix, pex viex tin mai pah kix yum sivoe aux heue." ²⁸ Yam hoik krai Nawh ceu an, Nawh thong kix hu sivoe haok ka veng Yerusaliem. ²⁹ Yam hoek Nawh dex yaong Bephake mai yaong Betanix, ka gawng pa kok mawh gawng Sanlun, Nawh ploi kawncau Nawh hu ra kaux, ³⁰ ah nin, "Hu ka daux yaong pa koe sivoe pax mai yam laig pax ka daux yaong an, pax tak yaox kawn la pa hoik phyawk tan, pa ang pui sax brug piang heue. Kah pax viex nawh hoek heue. ³¹ Phan pui tix kaux kaux chawk pax, pax lai kah kawn la in yuh ka mawx? Pax tak deeh ah nin, Simiang lo nawh heue." ³² Kiex pa hoik ploi, hu yaox awm pa hoik krai Nawh Cao ka kiex heue. ³³ Yam kawn tak kah kiex kawn la an, cao la an khankix, chawk kiex ah nin, "Pax lai kah la in yuh ka mawx?" ³⁴ Kiex deeh ah nin, "Simiang lo nawh heue." ³⁵ Kiex viex la an hoek ka Yesux mai kix teei kraung ceep tix, sau ka piang la an mai Nawh Cao brug ka piang heue. ³⁶ Yam hu Nawh Cao, kix teei kraung ceep tix nah tix tawm ka daux krax heue. ³⁷ Yam hoek Nawh Cao dex ka veng Yerusaliem mai lih jee gawng Sanlun, cub kawncau pa hun khawmuik, koe krax gaux rhawm mai yaog yaw Siyiex ka lox sinum, grawng kaing sibrawm pa hoik yaox kix khankix, ³⁸ ah nin, "Simiang pa hoek ka daux ceu kaux Siyiex leeing ju, ting bwanson heue. Kieh nhim ka daux meung raoma, kieh koe min plakngai dee lhaong khaing paox tix heue." ³⁹ Pharishie tix blah pa ot ka daux cub pui hun an, ah nin ka Nawh Cao, "Sara Cao Gau eue, ne ka kawncau Maix khankix." ⁴⁰ Nawh Cao deeh pawk lox ah nin ka kix, "Aux krai ka pex, phan pui khankix yawg tix ang nye, simaox rang khankix tak sang riag yo lox tix heue." ⁴¹ Yam hoek bleeh Nawh dex veng Yerusaliem mai yaox veng an, Nawh yiiem, ⁴² ah nin, "Phan maix hoik tawng ceu pa dex dawt mai pa nhim daux singaix in, viang mawh nan yam in maix ang pon yaox heue. ⁴³ Grawh grawng nawh, bawg yam singaix tak sang hoek ka piang maix, yam pui pa koeng ka maix khankix tak sang yuh tab, yuh lawng, rob maix mai tak ot vung viang maix ku plak mai laung maix ka heue. ⁴⁴ Tak sang kieh maix sidawm sidu mai tiex, khawm kawn praix pa koe ka daux maix heue. Kix tak ang grham kieh simaox koe tix lon piang tix lon ka daux maix, kheu ang maix tawng bawg yam pa hoek pa tawx bwanson ka maix heue." ⁴⁵ Nawh Cao laig daux nyiex bwan mai grheu pui pa coh khankix lih, ⁴⁶ ah nin ka kix, "Hoik tiiem ti deuh ah nin, nyiex Aux tak mawh nyiex rawg bwan, viang mawh nan pex hoik kieh mawh dee ot pui tud rhim heue." ⁴⁷ Nawh Cao sidiex gau ka daux nyiex bwan ku singaix. Viang mawh nan cao giex kaing li pa ting khankix mai pui tiiem lai khankix mai kix pa mawh pui pa ting khankix, sawg ti yuh Nawh laux. ⁴⁸ Kix sawg ang pon mai ang yaox, ceu pa sang yuh kix, kheu pui ku kaux daux pui khawmuik, breuk Nawh mai nghiet lox Nawh Cao heue.

¹ Ka daux ngaix an tix ngaix, yam gau Nawh Cao ka pui khankix, ka daux nyiex bwan mai sidiex gau lox bwan gaux rhawm, cao giex kaing li pa ting khankix mai pui tiiem lai khankix, hoek tau mai kuad song khankix ka Nawh Cao, ² mai chawk ah nin ka Nawh Cao, "Krai ex mhong liak, Maix pon akhuang sibrawm ti yuh ceu in khankix dee mawx? Pui mawx pa tawx akhuang sibrawm in ka Maix." ³ Nawh Cao pawk lox ah nin ka kix, "Aux kawx, tak sang chawk pex ka grawng tix ceu heue. Deeh krai ka Aux ha. ⁴ Krax cubcom Yohan, kaoh khaing raoma lie? Phan ang mawh nan kaoh khaing kawn pui lie?" ⁵ Kix keud tau ah nin, "Phan ex ah kaoh khaing raoma, Nawh Cao tak chawk ah nin, phan mawh nan yuh patix, pex ang yum rhawm ka Mose lie? ⁶ Phan ex ah, kaoh khaing kawn pui, pui khawmuik tak sang dheem ex ka simaox heue. Kheu kix hoik yum rhawm grawng mawh Yohan cao jhai heue." ⁷ Kix tom pawk lox ah, ang kix tawng grawng kaoh khaing dee mawx heue. ⁸ Yesux baox ah nin ka kix, "Aux kawx ang krai ka pex, grawng pon Aux akhuang sibrawm ti yuh ceu in khankix khaing dee mawx heue." ⁹ Nawh Cao baox jah ti sidiex lox tiag in, ka pui khankix ah nin, "Pui tix kaux nawh sum sipeem plix siiet tix dah mai tawx pui pa yuh sipeem plix siiet vai mai hu tang praix klawng tom rheung nyao heue. ¹⁰ Yam hoek bawg yam, nawh ploi kawncau tix, tix kaux hu ka pui yuh sipeem an khankix, sonsang tawx kix, plix sipeem plix siiet an ka nawh. Viang mawh nan pui pa yuh sipeem an, tap nawh mai ploi nawh ing gieg, taix yi heue. ¹¹ Nawh baox deeh ploi kawncau tix, tix kaux ka nawh kawx, kix tap mai yuh pa ang khaw ang jiet ka nawh mai ploi nawh ing giex, taix yi heue. ¹² Nawh baox ploi kawncau loe kaux tix kaux, ka nawh kawx, kix yuh nawh ngud mai nyhot grheu nawh lih heue. ¹³ Simiang sipeem plix siiet an ah nin, Aux tak sang yuh ka mawx? Aux tak ploi kawn simex aux pa moh tix hu ka heue. Kix tee sang yungyi ka nawh pleue. ¹⁴ Viang mawh nan, yam yaox pui yuh sipeem khankix ka nawh, kix keud ti ah nin ka paox tix, tix kaux lai tix kaux, "Kaw in mawh cao sin, ex teei nawh yum, yuh ka mawx sin an tak mawh cie ex heue. ¹⁵ Kix taing vud nawh khaing sipeem plix siiet an mai teei nawh yum heue. Mawh kheu nan simiang sipeem plix siiet an, tak sang yuh ka mawx ka kix? ¹⁶ Nawh tak hoek ti yieh yuh laux, pui yuh sipeem an khankix mai tawx sipeem plix siiet an ka pui tang kaux heue. " Yam mhong pui khankix ka lox an, kix ah nin, " Paw doh kieh mawh nan." ¹⁷ Viang mawh nan, Nawh Cao jhak ka piang kix ah nin, "Phan mawh nan lox pa hoik tiiem ti deuh ah nin, Simaox pa hoik tik pui yuh nyiex, hoik yuh kieh mawh kaing ka daog, mawh pa yuh ka mawx? ¹⁸ Pui pa rau ka piang simaox in ku kaux tak max mai simaox in rau ka piang pui mawx ang ah tak kieh nawh prung prang awm phawng tiex heue." ¹⁹ Pui tiiem lai khankix mai cao giex kaing li pa ting khankix sawg ti giex Nawh Cao ka daux nari dom an heue. Kix lhat ka pui khankix, kheu tawng kix Nawh Cao hoik krai lox tiag in ka grawng kix heue. ²⁰ Kix jhak Nawh Cao mai ploi pui jiang, pa yuh tokaux tix awm pui rahsee, yuh ka mawx sonsang pon giex kix Nawh dee lud lox sikah Nawh, sonsang pon ti tawx Nawh ka daux tawm taix simiang giex kaing haktiex heue. ²¹ Kix chawk Nawh Cao ah nin, "Sara Cao Gau eue, ex tawng pa sidiex pa krai Maix, mawh pa rahsee mai grawng ang Maix jhak ka pakngai pui tix kaux kawx maix sidiex gau grawng krax Siyiex tete heue. ²² Ex khaw ti tawx mau koh ka simiang Kesa lie? Ang khaw ti tawx lie?" ²³ Viang mawh nan Nawh Cao tawng grawng pa lhak lhiiem pa pie kix mai ah nin ka kix, ²⁴ "Jhi Aux yaox mau denari tix plah heue. Mau in koe riang mai lai pui mawx? " Kix deeh ah nin, " Mawh riang mai lai simiang Kesa heue." ²⁵ Nawh Cao ah nin ka kix, "Ceu pa mawh cie Kesa, tawx ka simiang Kesa heue. Ceu pa mawh cie Siyiex tawx ka siyiex heue." ²⁶ Kix ang pon ti giex dee lud lox Nawh Cao, ka sivoe pui khankix mai kix daox deng ka lox pawk Nawh mai kix yawg tix ang nye heue. ²⁷ Sadukie tix blah hoek ka Nawh Cao, pa ah ang koe pa deeh kaoh im heue. Kix chawk Nawh, ²⁸ ah nin, "Sara Cao Gau eue, Mose tiiem ti deuh ka ex ah nin, phan puxke pui tix kaux yum, pa koe moeng mai pa ang koe kawn, pux nawh tak sang teei moeng nawh mai eei kawn praix doeh ru son puxke nawh heue. ²⁹ Koe puxaik aliah kaux. Kaw phao ka teei ti koe moeng, nawh ang koe kawn praix mai yum heue. ³⁰ Ra kaux tix kaux, ³¹ loe kaux tix kaux tom hoek aliah kaux tix kaux kawx, teei bun an, ang koe ti prah kawn praix mai yum heue. ³² Khaix an bun an kawx yum heue. ³³ Yam hoek bawg yam deeh kaoh im, ka daux kix nawh tak mawh moeng kaw pa yuh ka mawx? Kheu kix khawm aliah kaux hoik to moeng bun an heue." ³⁴ Yesux ah nin ka kix, "Kawn pui haktiex in, teei mex teei moeng mai teei ti tawx ka paox tix heue. ³⁵ Viang mawh nan kix pa keung ti pon, ju khaix mai ceu pa deeh kaoh khaing krax yum khankix, ang teei mex teei moeng mai ang teei ti tawx ka paox tix heue. ³⁶ Grawh grawng nawh, kix ang baox deeh chix yum khaix an, kheu kix sidu awm kawncau Siyiex khankix mai kix mawh kawn Siyiex, kheu kix mawh pui pa hoik deeh kaoh im heue. ³⁷ Lheu khaing an, grawh grawng pui pa yum tak deeh kaoh im, viang mawh Mose kawx hoik jhi yaox, dee koe yeem khaox, yam kok nawh Siyiex mawh Siyiex Abraham, Siyiex Icak mai Siyiex Yakop heue. ³⁸ Nawh ang mawh Siyiex pui yum, Nawh mawh Siyiex pui im, mawh kheu Nawh pui khawmuik mawh pa im heue." ³⁹ Pui tiiem lai tix blah deeh ah nin, "Sara Cao Gau eue, caw, mhawm pa ah Maix heue." ⁴⁰ Khaix an kix ang pon chawk lox ka Nawh Cao tix ceu kawx heue. ⁴¹ Yesux ah nin ka kix, "Kix ah Khrit mawh kawn Davit yuh ka mawx? ⁴² Grawh grawng nawh, tokaux Davit hoik ah nin ka daux Lai Yaogyaw, Siyiex leeing ju ah nin ka Simiang aux, ngawm plak taix khawn dawm Aux, ⁴³ tom kieh Aux pui koeng ka Maix, mawh ngot dee deuh Maix caong heue. ⁴⁴ Mawh kheu nan, phan Davit hoik kok Nawh mawh Siyiex, nawh chix mawh kawn Nawh yuh ka mawx?" ⁴⁵ Nawh Cao ah nin ka kawncau Nawh khankix, ka dee pon mhong pui khawmuik. ⁴⁶ "Rien rhawm tix via ka cao tiiem lai khankix pa simie ti ceep sibex dha hu mai moh ti kieh pui ah lox yungyi ka tix daux lah cau, moh dee ngawm pa mhawm khaing paox tix daux nyiex sidiex khankix mai dee yuh pawie khankix heue. ⁴⁷ Kix chix rud ti ih nyiex miexmai khankix mai sonsang chix pie lhen, kix rawg bwan tom lang, kix tak nie pon krax prawng ciyang pa ting heue."

¹ Nawh Cao yaog ti jhak mai yaox cao mi khankix sau pa tan kix, ka daux dee deuh mau heue. ² Nawh Cao yaox miexmai tix kaux pa hot sia, pa sau tawng raoh ra blah. ³ Nawh Cao ah nin, "Aux krai lox pa mawh meh ka pex, miexmai pa hot sia in, hoik lheu sau khaing kix khawmuik heue. ⁴ Kheu pui in khankix khawmuik, hoik sau khaing pa lheu kix, viang mawh nan bun in hoik sau khaing pa hot tix, pa koe sonsang im ju tix khawmuik heue." ⁵ Yam krai pui tix blah grawng koe nyiex bwan an simaox pa mhawm mai pa tan, pa hoik cox mhawm grang, Nawh Cao ah nin, ⁶ "Ceu in khankix pex tak yaox, bawg yam singaix tak sang hoek, pa tak ang yieh ti tik, tom pa ang simaox koe piang paox tix tix lon kawx, heue." ⁷ Kix chawk Nawh Cao ah nin, "Phan mawh nan, ceu in khankix tak sang mawh lai mawx? Yam tak sang dex mawh ceu in khankix, tak koe mhai pa yuh ka mawx?" ⁸ Nawh Cao deeh ah nin ka kix, "Kheu son ang pui sang pon thong kieh pex lud, rien rhawm tix kah heue. Mawh kheu pui tom nie tak sang brex ti teei ceu kaux Aux mai hoek ti ah nin, Aux mawh Nawh heue. Mai bawg yam hoik hoek heue. Pex paw hawt khaix kix. ⁹ Yam mhong pex grawng naing mai grawng krax simah simiang, paw kieh lhat kah mawh kheu ceu in khankix tak lai hoek ti mawh phao ka, viang mawh nan, ang nyang bax mawh, bawg yam sidah dom an heue." ¹⁰ Yam an Nawh Cao baox ah nin ka kix, "Pui tix ceu mai tix ceu, tix meung mai tix meung, tak cha paox tix, ¹¹ kla reem ting tak sang tuk, praix tak sang sibhawm, ceu pa saux preng, tak sang koe dee haoh dee mai tak sang koe ceu pa lhat graung, pa ting khaing raoma heue. ¹² Viang mawh nan, ka sivoe ceu in khawmuik, kix tak sang giex pex ka taix tix, tak sang tuktieak tukte pex, tawx pex ka nyiex sidiex khankix mai sau pex daux thawng, viex pex sivoe simiang khankix mai cao giex kaing haktiex khankix, kheu ceu kaux Aux heue. ¹³ Ceu in khankix tak sang mawh mhai ruk ka grawng pex heue. ¹⁴ Mawh kheu nan, kieh een ti tawng ka daux rhawm tix, son ang pex sang grux keud, grawng sang pawk lox yuh ka mawx. ¹⁵ Aux tak sang tawx jheeh mai pingnya cuyi ka pex, pui pa koeng ka pex khawmuik, ang pon ti tieh thiang heue. ¹⁶ Viang mawh miex keeing pex, puxaik, ru, paox grawm khankix kawx, tak sang teei ti tawx pex mai tak sang plaux pex yum tix blah heue. ¹⁷ Mawh kheu ceu kaux Aux, pui khawmuik tak koeng ka pex heue. ¹⁸ Viang mawh nan, hauk kaing pex tix gawng kawx tak ang laux leeing heue. ¹⁹ Pex tak sang pon ti cie ju tokaux tix kheu kaux cong mai krax gun yeung. ²⁰ "Yam yaox pex rob pui naing ka veng Yerusaliem, kieh tawng grawng pa dex sang laux veng an heue. ²¹ Yam an kieh kix pa ot ka daux meung Yudax, to hu ka piang gawng khankix heue. Kieh kix pa ot ka daux veng an lih hu, kix pa ot daux tiagtu, paw kieh laig tan heue. ²² Mawh kheu singaix an khankix, mawh bawg yam sang prawng ciyang ti kieh ceu pa hoik tiiem ti deuh khawmuik grum naog heue. ²³ Bun pa koe kaux mai bun pa tawx kawn tix peuex, ka daux bawg yam singaix an khankix tak kha rhawm heue. Grawh grawng nawh, tak sang koe pa ting kha rhawm ka haktiex in mai ceu pa song rhawm ka pui ceu in heue. ²⁴ Kix tak goh tak laux ka lawm vaig mai tak sang giex ti tuk kix hu, ku praix ku meung heue. Pui tang ceu tak sang dig veng Yerusaliem tiem, tom hoik naog bawg yam pui tang ceu khankix heue. ²⁵ "Tak sang koe mhai ka daux singaix, khix, simuing khankix, ceu pui ka piang haktiex tak kha rhawm, ka daux krax daox deng, kheu lox sinum siaox, lox pukpak rawm sigrit sigra heue. ²⁶ Kawn pui kied lhat mai laux rhawm, kheu keud grawng ceu pa tak sang hoek lih ti mawh ka piang haktiex, mawh kheu sibrawm raoma khankix tak sang yung yiang heue. ²⁷ Yam an kix tak sang yaox Kawn kawn pui, viex sibrawm mai min plakngai pa ting, hoek ka daux paiawm heue. ²⁸ Yam jah ceu in khankix ti mawh, yaog kaing pex mai maong ti jhak heue. Mawh kheu dex hoek bawg yam sang taoh ka pex" ²⁹ Nawh Cao krai lox tiag pa yuh nin ka kix, jhak ka khaox ruh mai khaox khawmuik. ³⁰ Yam glaoh lhax kix, pex yaox mai pie tokaux pex kawx, tawng grawng dex sang hoek yam rung praix heue. ³¹ Awm an yam yaox pex ceu in khankix, kieh pex tawng mawh grawng dex sang hoek Meung Siyiex heue. ³² Aux krai lox tete ka pex, pui ju in tak ang bax luan, tom ceu in khankix khawmuik, tak hoik mawh heue. ³³ Raoma mai haktiex tak sang grai, viang mawh nan, gum lox Aux in tak ang grai heue. ³⁴ "Rien rhawm tix ka tokaux pex, phan ang mawh nan, rhawm pex tak sivix tak cien kheu ceu pa nie luan yuh pex, pa yoek, ceu pa khi rhawm pa dex dawd mai ju in khankix, singaix an ha kox hoek piang pex yam ang pex keud ce sax, awm khlap rub heue. ³⁵ Mawh kheu tak sang hoek piang kix pa ot piang ca haktiex khawmuik awm an heue. ³⁶ Viang mawh nan, pex pau ti jhak ku bawg yam, rawg bwan, sonsang pon pex ti luan khaing ceu in khankix khawmuik, pa tak sang hoek ti mawh, sonsang pon ti cung sivoe Kawn kawn pui heue." ³⁷ Nawh Cao sidiex gau ka daux nyiex bwan ku ngaix, Nawh hu it tum ka gawng pa kok mawh gawng Sanlun ku sawm heue. ³⁸ Yam ponngawb cao cao pui khawmuik hoek ka Nawh Cao sonsang nghiet lox bwan gaux rhawm khaing nawh daux nyiex bwan heue.

¹ Yam an dex hoek pawie blah pa ang sau susaix, pa kok mawh Pasakha. ² Cao giex kaing li pa ting mai cao tiiem lai khankix, sawg grawng ceu pa sang pon kix ti teei Nawh Cao yum, mawh kheu kix lhat ka pui khankix heue. ³ Satan laig ka daux Yudax pa kok mawh Isakariut, pa mawh daux kao ra kaux tix kaux an heue. ⁴ Nawh lih hu kum kawng mai cao giex kaing li pa ting khankix mai cao giex kaing nyiex bwan khankix, grawng sang pon nawh ti tawx Nawh Cao ka kix yuh ka mawx. ⁵ Kix gaux rhawm, ah lox dud grawng sang tawx kix mau ka nawh heue. ⁶ Nawh cu lox an mai sawg bawg yam sonsang pon ti tawx Nawh Cao ka kix, yam ang cub pui hun ot heue. ⁷ Singaix pawie blah ang sau susaix, pa mawh yam tak pah kix ti tan yung Pasakha hoek heue. ⁸ Nawh Cao ploi Petrux mai Yohan, ah nin, "Hu cox khre Pasakha son ex, sonsang ih ex heue." ⁹ Kiex chawk ka Nawh Cao, "Maix simie yiex cox khre dee mawx?" ¹⁰ Nawh Cao deeh ah nin ka kiex, yam laig pax ka daux veng, pui pa viex aw rawm tix kaux tak sipub pax heue. Hawt khaix nawh mai laig ka daux nyiex dee hu nawh, ¹¹ mai ah nin ka cao nyiex an, Sara Cao Gau chawk ah nin ka maix, lawg son nyo maix, dee tak sang ih Aux Pasakha tau mai kawncau Aux khankix, koe dee mawx? ¹² Nawh tak jhi pax yaox lawg pa ting plak piang, pa hoik koe kraung khre dee an heue." ¹³ Kiex hu mai yaox awm pa hoik krai Nawh Cao ka kiex, kiex cox khre pawie Pasakha heue. ¹⁴ Yam hoik hoek bawg yam nari, Nawh Cao ngawm tau mai kawncau pa ting Nawh kao ra kaux. ¹⁵ Nawh Cao ah nin ka kix, "Aux koe rhawm mai simie ti ih pawie Pasakha in, tau mai pex ka sivoe ang Aux nyang bax kham geu heue. ¹⁶ Grawh grawng nawh, Aux krai ka pex, Aux tak ang baox ih Pasakha, tom sidah hoik grum naog daux Meung Siyiex heue." ¹⁷ Nawh Cao rieb ti teei kawk, khaix hoik yaogyaw Nawh bwanson, Nawh ah nin, "Teei in, gwieh ka paox tix heue. ¹⁸ Grawh grawng nawh, Aux krai ka pex, Aux tak ang lai baox nyaux rawm plix siiet, tom sidah ang meung Siyiex nyang bax hoek heue." ¹⁹ Nawh Cao teei khaomun, khaix hoik yaogyaw Nawh bwanson, Nawh sivit ti tawx ka kix ah nin, "In mawh tokaux Aux pa hoik tawx son pex heue. Yuh ceu in sonsang doh keud ka Aux heue." ²⁰ Awm an, khaix hoik ih priex bo, Nawh teei kawk ah nin "Kawk in mawh sijax mukheu pa khraox, ka daux nham Aux, pa mawh pa lih son pex heue. ²¹ Viang mawh nan, taix kaw pa sang tik sang tawx Aux, koe tau mai Aux, piang pheen in heue. ²² Grawh grawng nawh, Kawn kawn pui tak sang hu awm pa hoik dud ah tete, viang mawh nan, pui pa tik pa tawx Nawh, tak kha rhawm heue." ²³ Kix jah ti chawk ka paox tix, pui mawx pa sang yuh ceu in ka daux ex lie. ²⁴ Lheu khaing an kix thung thiang paox tix ka daux kix pui mawx nie ting khaing paox tix. ²⁵ Nawh Cao ah nin ka kix, "Simiang pui tang ceu khankix giex kaing kix, mai pa ting piang kix, kok mawh cao pa teem khankix heue. ²⁶ Viang mawh nan, ka daux pex tak ang mawh nan, kaw pa ting khaing paox tix ka daux pex, kieh nawh mawh awm pui awn ju heue. Cao kaing kawx, kieh awm pui cau heue. ²⁷ Grawh grawng nawh, kaw pa yuh ka mawx nie lheu ting, mawh kaw pa ngawm ti sawm lie, phan ang mawh nan mawh kaw pa khan kheu lie? Kaw pa ngawm ti sawm lheu ting ang mawh lie? Viang mawh nan, Aux ot sinax pex awm kaw pa khan kheu heue. ²⁸ Pex mawh kix pa hoik ot tau mai Aux, ka daux ceu pa nyaw glaw pa kham Aux heue. ²⁹ Aux tawx meung tix meung ka pex, awm Keeing Aux tawx ka Aux, ³⁰ yuh ka mawx son pex tak pon ti ih nyaux ka pheen Aux, ka daux meung Aux mai kieh pex ngawm piang dang ngeung prawng kwang piang pui Isarelax kao ra ceu heue. ³¹ "Simon eue, Simon, jhak heue, satan hoik mhaing maix, sonsang pon nawh ti grheung maix, awm grheung nghox ca heue. ³² Viang mawh nan Aux hoik rawg bwan, son maix, son ang krax yum rhawm maix sang laux heue. Yam deeh tieh maix ti hoek maix tak kieh puxaik maix khankix kaux cong heue." ³³ Simon deeh ah nin ka Nawh Cao, "Simiang eue, aux hoik pon ti hu mai Maix, daux thawng mai khawm dee yum heue." ³⁴ Nawh Cao baox ah nin, "Aux krai ka maix Petrux eue, ka daux singaix, ka ang ia nyang ux, maix tak thiang ti tik vud Aux loe bawg heue." ³⁵ Nawh Cao baox ah nin ka kix, "Yam ploi Aux pex hu, yam ang pex viex hau mau mai bau mai kiep, pex koe dee lo tix ceu ceu lie?" Kix deeh ah nin, "Ang lo tidtix heue." ³⁶ Nawh Cao baox ah nin ka kix, "Viang mawh nan, yam in, kaw pa koe hau mau, kieh nawh viex hu mai kaw pa koe bau kieh nawh viex hu heue. Kaw pa ang koe vaid, kieh nawh coh kraung ceep tix mai liag heue. ³⁷ Grawh grawng nawh, Aux krai ka pex, ceu pa hoik tiiem ti deuh tak lai naog ka daux Aux heue. Pa mawh, pa hoik simin Nawh tau mai pui pa lud khankix, mawh kheu grawng ceu pa dex dawd mai Aux tak hoik sidah heue." ³⁸ Kix baox ah nin, "Simiang eue, jhak heue, ex hoik koe, vaig ra kre tin heue." Nawh Cao baox ah nin ka kix, "Hoik kub heue." ³⁹ Nawh Cao lih hu, awm hoik sax koe been Nawh, ka dee gawng Sanlun mai kawncau Nawh khankix kawx hawt khaix Nawh Cao heue. ⁴⁰ Yam hoek Nawh Cao dee an, Nawh ah nin ka kix, "Rawg bwan heue, yuh ka mawx, son ang pex sang laig ka daux pa nyaw glaw" ⁴¹ Nawh Cao gwieh ti hu khaing kix, tom dee hoek nyak tix taix simaox, Nawh grux ngawng Tix rawg bwan, ⁴² ah nin, "Keeing eue, phan Maix koe rhawm, teei kawk in khaing Aux liak, viang mawh nan paw kieh mawh alo pa khaw caw mai Aux, kieh mawh alo pa khaw caw Maix heue." ⁴³ Kawncau Siyiex tix kaux lih hoek mai baox thien riang rao ka Nawh heue. ⁴⁴ Nawh Cao kha rhawm kied sigrien sigre mai baox nied ti rawg bwan mai rawm lah Nawh lih mawh awm jah nham mai cod piang tiex heue. ⁴⁵ Yam hoik kaoh Nawh Cao khaing rawg bwan, Nawh hoek ka kawncau Nawh khankix mai yaox laig it kix, kheu krax khi rhawm heue. ⁴⁶ Nawh Cao ah nin ka kix, "Pex laig it yuh ka mawx? Kaoh mai rawg bwan, son ang pex sang laig ka daux pa nyaw glaw heue." ⁴⁷ Yam kawn sikah Nawh Cao, pui hun mai kaw pa kok mawh Yudax, pa mawh tix kaux ka daux kix kao ra kaux, thong kix hoek mai nawh hoek dex ka Yesux mai ngheet Nawh heue. ⁴⁸ Yesux chawk nawh ah nin, "Yudax eue, maix tik maix tawx Kawn kawn pui ka pa ngheut lie?" ⁴⁹ Yam an kawncau Nawh khankix, ot sivie Nawh Cao, yaox grawng pa tak sang mawh, kix chawk ah nin, "Simiang eue, ex tak sivoeg ka vaid lie?" ⁵⁰ Ka daux kix tix kaux kid ka yhaok siliex cao giex kaing li pa ting dud khawn dawm nawh heue. ⁵¹ Yesux ah nin, "Naox heue." Nawh Cao teei ka yhaok kaw an mai kieh nawh moi heue. ⁵² Yesux ah nin ka cao giex kaing li pa ting khankix mai ka cao giex kaing nyiex bwan khankix mai ka kuad song khankix pa hoek ti teei Nawh Cao, "Pex viex vaig viex khaox, hoek ti giex ka Aux, awm giex pui tud rhim lie? ⁵³ Yam ot Aux tan mai pex ka daux nyiex bwan ku ngaix, pex ang nyeu taix tix, ti giex Aux, viang mawh nan in mawh bawg yam nari pex mai sibrawm pa faik heue." ⁵⁴ Kix giex Nawh Cao mai tuk Nawh mai viex Nawh hu ka nyiex cao giex kaing li pa ting piang khawmuik heue. Petrux hawt hu dee singai heue. ⁵⁵ Yam hoik phlu kix ngu ka sinax brawk nyiex mai hoik ngawm tau, Petrux kawx, ngawm ka sinax kix heue. ⁵⁶ Bun pa mawh siliex tix kaux, yaox nawh ngawm ka daux pa riang ngu mai jawg ti jhak nawh, ah nin, "Pui in kawx, ot tau mai Nawh heue." ⁵⁷ Viang mawh nan, nawh thiang ti ah nin, "Bun eue, Aux ang tawng Nawh." ⁵⁸ Khaix an tivud tang kaux tix kaux, yaox nawh ah nin, "Maix kawx, mawh ka daux kix tix kaux heue." Viang mawh nan Petrux deeh ah nin, "Pui eue, aux ang mawh." ⁵⁹ Khaix an dex rheung tix nari, tang kaux tix kaux, krai awm pa hoik tawng nawh ah nin, "Kaw in kawx mawh pa hoik ot tau mai Nawh tete, kheu mawh nawh pui meung Galilie heue." ⁶⁰ Viang mawh nan Petrux deeh ah nin, "Pui eue, aux ang tawng pa ah maix" Yam kawn tak sikah nawh, ia ux dom mawx dom an heue. ⁶¹ Simiang veeh mai jhak ka piang Petrux. Petrux doh keud ka gumlox Simiang, pa hoik krai Nawh Cao ka nawh, ah nin, "Ka daux singaix ka ang ia nyang ux, maix tak thiang ti tik vut Aux loe bawg heue." ⁶² Nawh lih hu mai yiiem heue. ⁶³ Pui pa giex ka Nawh Cao khankix, yuh pa ang cee ang cag ka Nawh mai tap Nawh heue. ⁶⁴ Kix lhop vien ka ngai Nawh Cao mai chawk Nawh ah nin, "Krai lox jhai ka ex liak, mawh pui mawx pa tap Maix?" ⁶⁵ Kix ah lox tang ceu tom nie ka Nawh Cao, sonsang yuh ceu pa ang cee ang cak ka Nawh heue. ⁶⁶ Yam hoik riang praix, kix pa mawh kuad song pui khankix, khrawm paox tix, khawm cao giex kaing li pa ting khankix mai khawm pui tiiem lai khankix mai kix tuk Nawh Cao hu, ka dee khrawm ti prawng see cie kix ah nin, ⁶⁷ "Phan Maix mawh Khrit krai ka ex, " viang mawh nan Nawh Cao ah nin ka kix, " Phan Aux krai ka pex, pex tak ang yum rhawm kah, ⁶⁸ phan Aux chawk ka pex, pex tak ang deeh pawk heue. ⁶⁹ Viang mawh nan jah tom yam in, Kawn kawn pui tak sang ngawm, plak taix khawn dawm, sibrawm Siyiex heue." ⁷⁰ Kix khawmuik ah nin, "Phan mawh nan mawh Maix Kawn Siyiex lie?" Nawh Cao ah nin ka kix, "Mawh awm pa ah pex heue." ⁷¹ Kix baox ah nin, "Ex kawn baox lo mhai rug yuh ka mawx? Kheu tokaux ex hoik mhong lox khaing jheeh Nawh heue."

¹ Cub kix khawmuik kaoh mai viex Nawh Cao hu ka sivoe Pilat. ² Kix jah ti deuh phimap ka piang Nawh Cao, ah nin, "Ex yaox Pui in yuh kieh pui meung ex lud mai ang kieh tawx mau koh ka simiang Kesa, Nawh ah tokaux tix mawh, Khrit Simiang heue." ³ Pilat chawk Nawh Cao ah nin, "Mawh Maix Simiang Pui Yudax lie?" Nawh Cao pawk lox ah nin, "Mawh awm pa ah maix heue." ⁴ Pilat ah nin ka cao giex kaing li pa ting khankix mai ka cub pui hun khankix, "Ang aux yaox dee lud ka daux pui in tix ceu kawx heue." ⁵ Viang mawh nan, kix nie baox lheu, nied ti ah nin, "Nawh hoik cheeik ka kawn pui, ka lox sidiex lox gau Nawh, jah ka meung Galilie, ka daux meung Yudax kudah kudee, tom hoek ka dee in heue." ⁶ Yam mhong Pilat lox an, nawh chawk kix grawng an "Mawh Nawh pui meung Galilie lie?" ⁷ Yam tawng nawh grawng mawh Nawh Cao Pui pa ot greem simiang Herut, nawh ploi Nawh Cao hu ka simiang Herut, tokaux nawh kawx ot ka daux veng Yerusaliem, ka daux bawg yam singaix an khankix heue. ⁸ Yam yaox Herut Yesux, nawh kied gaux rhawm, mawh kheu nawh hoik uik dawg rheung mie ti yaox Nawh Cao, kheu nawh hoik mhong grawng Nawh mai simie ti yaox mhai pa daox am pa yuh Nawh Cao tix ceu ceu heue. ⁹ Nawh chawk Nawh Cao ka lox tom nie, viang mawh nan Nawh ang pawk lox tidtix ka nawh heue. ¹⁰ Cao giex kaing li pa ting khankix, pui tiiem lai khankix, cung tan, nied ti baox deuh phimap ka Nawh Cao heue. ¹¹ Herut, khawm pui naing nawh khankix, nieb yuh pa ang nab ang yam, yuh pa ang cee ang cak ka Nawh, kieh Nawh ceep kraung pa jiet mhawm grang mai deeh ploi Nawh Cao hu ka Pilat heue. ¹² Simiang Herut mai Pilat mawh paox grawm dom an ka daux singaix an heue. Grawh grawng nawh, glang ka in kiex koeng ka paox tix heue. ¹³ Pilat kok cao giex kaing li pa ting khankix mai simiang khankix, pui khankix, khrawm paox tix, ¹⁴ ah nin ka kix, "Pex hoik viex pui in ka aux, awm mawh pui pa kieh pui lud heue. Aux hoik chawk cheng Nawh ka sivoe pex, ang yaox dee lud pui in, grawng ceu pa deuh pex phimap ka Nawh heue. ¹⁵ Lheu khaing an simiang Herut kawx ang yaox dee lud, kheu nawh hoik deeh ploi Nawh hoek ka ex Nawh ang nyang yuh ceu pa keung ti yum tidtix heue. ¹⁶ Mawh kheu nan aux tak sang sivied Nawh mai ploi Nawh heue." ¹⁷ Mawh kheu nan tak lai ploi tix kaux ka kix, ka daux pawie an heue. ¹⁸ Viang mawh nan kix khawmuik kok yo tau ah nin, "Teei ti tik pui in mai ploi Barabax ka ex heue." ¹⁹ Barabax mawh pui pa hoik sau ka daux thawng, kheu mawh nawh pa hoik tieh feen tix kaux, yam tieh feen ka daux veng an nawh mawh pa hoik pah pui yum heue. ²⁰ Pilat baox deeh ah ka kix tix bawg, kheu mie nawh ti ploi Yesux. ²¹ Viang mawh nan kix khawmuik kok yo ah nin, "Tawk Nawh piang khaox lhak, tawk piang khaox lhak heue." ²² Nawh chawk ka kix loe bawg tix bawg ah nin, "Mawh kheu patix, pui in hoik yuh pa caox pa yuh ka mawx? Aux ang yaox grawng ceu pa khaw Nawh ti yum tix ceu kawx heue. Mawh kheu nan aux tak sang sivied Nawh mai ploi Nawh heue." ²³ Viang mawh nan kix nied ti baox kok lox sinum, mhaing ti kieh tawk Nawh Cao piang khaox lhak, lox kix mai lox cao giex kaing li pa ting khankix pex heue. ²⁴ Pilat prawng ca, yuh ka mawx sonsang yuh, awm ceu pa rawg mhaing kix heue. ²⁵ Nawh ploi ka kaw pa hoik sau ka daux thawng, kheu pa hoik tieh feen mai kheu hoik pah pui yum, awm pa rawg mhaing kix. Viang mawh nan nawh tawx Yesux ka kix, sonsang yuh awm pa mie kix ti yuh heue. ²⁶ Yam tuk kix Yesux hu, kix giex Simon pa mawh pui meung Kurene, pa kaoh khaing daux tiag mai kix deuh khaox lhak ka piang nawh, sonsang klawm khaox lhak an hawt Yesux heue. ²⁷ Cub pui pa kied hun hawt Nawh Cao, khawm bun pa yiiem grai son Nawh. ²⁸ Viang mawh nan Nawh Cao deeh gi ah nin, "Kawn bun veng Yerusaliem khankix eue, paw yiiem son Aux, viang mawh nan yiiem son tokaux pex, son kawn praix pex khankix heue. ²⁹ Grawh grawng nawh, singaix bawg yam tak sang hoek, yam kix tak sang ah, bun pa neh mai vaig pa ang sax nghe kawn mai teeih pa ang sax kieh peuex khankix koe bwanson heue. ³⁰ Yam an kix tak sang ah nin ka gawng khankix, rau ka piang ex liak mai ton khankix tawb kheem ex liak. ³¹ Kheu phan kix yuh ceu in khankix ka khaox im khaox klai, tak sang yuh ka mawx ka khaox kroh?" ³² Viang mawh pui caox ra kaux kawx, kix tuk hu tau mai Nawh Cao, sonsang teei kiex yum heue. ³³ Yam hoek kix tix dah pa kok mawh, si-ang kaing, kix tawk Nawh Cao piang khaox lhak tan mai pui caox an kiex, kix tawk plak taix khawn dawm Nawh tix kaux, khawn gwiex tix kaux heue. ³⁴ Yesux ah nin, "Keeing eue, pluat ploi phimap kix liak, kheu ang kix tawng pa yuh tix heue." Kix teei kraung ceep Nawh Cao mai nieb ti yaox mai gwieh sinax kix heue. ³⁵ Pui khankix cung ti jhak tan, simiang khankix kawx, nied ah pa ang cee ang cag ka Nawh ah nin, "Nawh hoik taoh ka pui tang kaux khankix, kieh Nawh taoh tokaux tix, phan Nawh mawh Khrit cie Siyiex, pa hoik laug Nawh ti teei." ³⁶ Pui naing khankix kawx, yuh pa ang cee ang cak mai tawx ti yaox sidah niex ka Nawh, ³⁷ ah nin, "Phan Maix mawh simiang pui Yudax, taoh tokaux tix tiru heue." ³⁸ Kix tiiem ti deuh lai pa ah nin, ka piang Nawh Cao, "IN MAWH SIMIANG PWI YUDAX" . ³⁹ Ka daux pui caox an kiex pa hoik preue, tix kaux ah pa ang khaw ang jiet ka Nawh Cao ah nin, "Phan Maix mawh Khrit taoh tokaux tix mai yiex heue." ⁴⁰ Viang mawh nan tang kaux an deeh ah ka kaw an ah nin, "Viang ka Siyiex kawx ang maix lhat lie, siyox kham geu maix krax prawng awm paox tix lie? ⁴¹ Ax kham geu yuh nin hoik khaw, kheu ax pon pa khaw tix geu, son ceu pa hoik yuh tix, viang mawh nan pui in ang sax yuh pa lud tidtix heue." ⁴² Nawh ah nin ka Yesux, "Simiang eue, yam hoek Maix ka daux meung tix, doh keud ka aux liak." ⁴³ Yesux dee ah nin ka nawh, "Aux krai lox tete ka maix, ka daux singaix maix tak ot tau mai Aux ka daux Paradisux heue." ⁴⁴ Yam an dex liah nari mai praix faik piang haktiex khawmuik tom hoek dim nari heue. ⁴⁵ Singaix uik faik, man tie ka daux nyiex bwan griah ka sigreung heue. ⁴⁶ Yesux kok lox sinum ah nin, "Keeing eue, Aux tawx khuan tix ka daux tawm taix Maix." Khaix hoik ah Nawh nan, Nawh Cao deeh tawx khuan tix mai dud rhawm heue. ⁴⁷ Yam yaox cao giex kaing naing an, grawng ceu pa hoik mawh, nawh yaogyaw Siyiex ah nin, "Kaw in mawh pui rahsee tete heue." ⁴⁸ Cub pui hun pa hoek ti yaox ceu in tau, yam hoik yaox kix ceu pa hoik mawh khankix, kix dieh naok tix mai deeh ing heue. ⁴⁹ Pui pa meed tawng Nawh Cao, bun pa hoik hawt hoek tau mai Nawh Cao khaing meung Galilie, cung dee singai mai jhak ka ceu in khankix heue. ⁵⁰ Yam an pui tix kaux pa kaux Yosiep, pa mawh cao prawng see, pui mhawm, pa rahsee. ⁵¹ Nawh ang rieb ang khaw rhawm ka grawng pa hoik kum kawng kix mai yuh pa mawh pui Arimasie, veng pui Yudax tix veng, pa krox ti jhak son yam sang hoek meung Siyiex. ⁵² Pui in hu ka Pilat mai rawg mhaing tokaux yum Yesux heue. ⁵³ Nawh teei tokaux yum Nawh Cao lih mai nawh pua ka man paing mai deuh Nawh ka daux simeeig, pa hoik saik ka daux rang mai dee ang bax sax deuh pui heue. ⁵⁴ Singaix an mawh singaix khre mai singaix twah dex sang hoek heue. ⁵⁵ Bun khankix pa hoik hoek tau mai Nawh Cao khaing meung Galilie, hawt khaix mai yaox simeeig mai grawng deuh tokaux yum Nawh Cao yuh ka mawx. ⁵⁶ Kix deeh ing mai cox khre sidah bhawng mai sidah kraix khankix heue. Kix laux lee tix, singaix twah, awm pa khaw mai lox tawm pingnyap heue.

¹ Ka daux aliah singaix ngaix tix, yam bah riang praix cao cao, kix hoek ka simeeig mai viex sidah bhawng khankix, pa hoik cox khre kix heue. ² Kix yaox simaox hoik plu plie ti gah khaing simeeig an mai ³ kix laig ka daux kix ang lai yaox tokaux yum Simiang Yesux heue. ⁴ Yam daox deng kix ka grawng ceu an, pui ra kaux cung dex kix pa ceep kraung pa jiet pruh. ⁵ Yam kix lhat mai num gup ngai tix ka tiex, kiex ah nin ka kix, "Kheu pex lai sawg Kaw pa im ju, ka sinax pui yum? ⁶ Nawh ang ot tin, Nawh hoik kaoh heue. Doh keud ka lox pa hoik krai Nawh Cao ka pex, yam kawn ot Nawh ka daux meung Galilie, ⁷ pa krai grawh grawng tak sang tawx Kawn kawn pui ka daux tawm taix pui phimap khankix mai tawk ka piang khaox lhak mai daux loe ngaix tak sang deeh kaoh heue. ⁸ Kix doh keud ka lox Nawh Cao an ⁹ mai deeh khaing simeeig mai krai grawh grawng ceu in khawmuik, ka kix kao tix kaux mai ka pa kawn deuk khawmuik heue. ¹⁰ Kix pa krai grawh grawng ceu in khankix, ka kawncau pa ting khankix, mawh Marix Magadalax mai Yohannax mai Marix miex Yakop mai bun tang kaux khankix pa ot tau mai kix heue. ¹¹ Viang mawh nan kix ang yum rhawm ka lox bun khankix, kheu ce kix mawh lox nieb krai heue. ¹² Viang mawh nan, Petrux kaoh mai to hu ka simeeig an mai nom ti jhak ka daux mai nawh yaox ngie man paing khaing mai nawh daox deng ka grawng ceu pa hoik mawh an mai deeh ing ka nyiex tix heue. ¹³ Jhak heue, ka daux ngaix an ka daux kix ra kaux hu ka yaong pa kaux Emawk, pa singai khaing veng Yerusaliem dex aliah lhak. ¹⁴ Kiex kum ka paox tix grawh grawng ceu pa hoik mawh an khawmuik heue. ¹⁵ Yam kawn kum kiex chawk ka paox tix, tokaux Yesux hoek dex mai hu tau mai kiex heue. ¹⁶ Viang mawh nan hoik yuh ngai kiex, yuh ka mawx son ang sang tawng ka Nawh Cao heue. ¹⁷ Nawh Cao chawk ah nin ka kiex, "Lox kum pax ka paox tix, yam hu pax krax, mawh ceu pa yuh ka mawx?" Kiex yut ti kaog mai yuh awm pa voi rhawm tix heue. ¹⁸ Ka daux kiex tix kaux, pa kaux Kalawphax, pawk lox ah nin ka Nawh Cao, "Maix mawh nyo pa ot ka daux veng Yerusaliem nong nong lie? Kheu ang Maix tawng grawh grawng ceu pa hoik mawh tan, ka daux bawg yam singaix in khankix" ¹⁹ Nawh Cao chawk kiex ah nin, "Grawh grawng ceu pa yuh ka mawx?" Kiex deeh ah nin ka Nawh Cao, "Mawh grawh grawng Yesux, Pui Nazariet, pa mawh Cao jhai, pa ting sibrawm ka daux pa yuh mai ka daux gumlox, sivoe Siyiex mai kawn pui khawmuik heue. ²⁰ Grawng cao giex kaing li pa ting khankix mai simiang ex khankix, prawng ti tawx Nawh Cao kieh yum mai tawk Nawh piang khaox lhak heue. ²¹ Viang mawh nan ex hoik keud hoik ce, Nawh mawh Kaw pa tak sang taoh ceu pui Isarelax heue. Mawh mai lheu khaing in khawmuik, khaix hoik mawh ceu in khankix, uik koe loe ngaix heue. ²² Lheu khaing an, bun tix blah daux cub ex, kieh ex daox deng kah heue. Kix hoik hu ka simeeig cao cao, ²³ yam ang kix yaox tokaux yum Nawh Cao, kix deeh hoek mai krai ka ex, grawh grawng hoik yaox kix riang susai kawncau Siyiex, pa krai ka kix, Nawh Cao klawd heue. ²⁴ Pui tix blah pa ot tau mai ex, hu ka simeeig an mai yaox awm pa hoik krai bun khankix, viang mawh nan kix ang yaox Nawh Cao heue." ²⁵ Nawh Cao ah nin ka kiex, "Pui pa daox mai pa sivix tix yum rhawm, ka lox khawmuik, pa hoik krai cao jhai khankix eue, ²⁶ Khrit tak lai kham geu ceu in khankix mai khaix an laig ka daux min plakngai Nawh ang mawh lie?" ²⁷ Nawh Cao teei lox Phuk lai sigang khri khawmuik jah ka lai Mose, lai cao jhai khawmuik, plak tix nih nai krai lao grawh grawng tokaux tix heue. ²⁸ Kiex hoek dex ka yaong dee sang hu kiex mai Nawh Cao yuh awm Nawh sang baox hu, luan khaing heue. ²⁹ Kiex kieh raw Nawh Cao ah nin, "Ot tau mai yiex ha, kheu dex hoek bawg yam ponbo mai yam pon ngaix dex luan heue." Nawh Cao laig ot tau mai kiex heue. ³⁰ Yam hoik ngawm neung Nawh Cao ti sawm tau mai kiex, Nawh Cao teei blah mai nawb bwan mai Nawh sivit blah an mai tawx ka kiex heue. ³¹ Ngai kiex deeh blah mai kiex tawng nawh mawh Nawh Cao mai Nawh Cao grai khaing pa yaox kiex heue. ³² Kiex ah nin ka paox tix, "Yam sikah Nawh Cao mai ax hawt krax mai plak ax mhong dee bleeh Phuk lai sigang khri, rhawm ax lulieh kah ang mawh lie?" ³³ Kiex kaoh ka bawg yam nari dom an mai deeh hu ka veng Yerusaliem mai kiex yaox kawncau kao tix kaux khrawm paox tix, pui pa ot tau mai kix, ³⁴ ah nin, "Simiang hoik deeh kaoh im tete mai hoik jhi tokaux tix ka Simon heue." ³⁵ Kiex krai grawh grawng ceu pa hoik mawh, pa yaox kiex hawt krax mai grawng pa tawng kiex Nawh Cao, yam sivit Nawh blah heue. ³⁶ Yam kawn sikah kix grawh grawng ceu in khankix, tokaux Nawh Cao cung ka sinax kix mai ah nin ka kix, "Kieh pa nhim koe mai pex heue." ³⁷ Viang mawh nan kix die lhat graung kah mai kix ce mawh yaox tix miang heue. ³⁸ Nawh Cao baox ah nin ka kix, "Pex sung sang rhawm yuh ka mawx? Pex keud jee keud blaong daux rhawm tix yuh ka mawx? ³⁹ Jhak ka taix Aux mai caong Aux ha. Mawh Aux heue. Giex ti yaox Aux, mawh kheu miang ang koe nex ang koe si-ang, awm pa yaox pex koe Aux." ⁴⁰ Khaix hoik ah Nawh Cao nan, Nawh jhi kix yaox taix tix mai caong tix heue. ⁴¹ Yam kawn ang kix nyang yum rhawm, kheu gaux rhawm mai daox deng tix, Nawh Cao chawk kix ah nin, "Khex koe ceu pa ih pex tin tix ceu ceu lie?" ⁴² Kix tawx kax tong tix siag, ka Nawh Cao, ⁴³ mai Nawh Cao teei ti ih sivoe kix heue. ⁴⁴ Nawh Cao baox ah nin ka kix, "Ceu in khankix mawh awm lox pa hoik krai Aux ka pex, yam kawn ot tau Aux mai pex, grawh grawng ceu in khankix khawmuik tak sang naog, pa hoik tiiem ti deuh grawh grawng Aux, ka daux lai been Mose mai daux lai cao jhai khankix mai daux lai yaogyaw heue. ⁴⁵ Yam an Nawh Cao paoh rhawm kix doh, yuh ka mawx sonsang tawng kix dee bleeh Phuk lai sigang khri heue. ⁴⁶ Nawh Cao baox ah nin ka kix, "Hoik tiiem ti deuh, grawng Cao Khrit tak kham geu mai deeh kaoh im khaing krax yum daux loe singaix. ⁴⁷ Grawng tak sang sidiex gau grawh grawng pa sang doh keud ka phimap mai krax pluat ploi ka daux ceu kaux Aux, jah ka veng Yerusaliem mai ka ceu pui khawmuik khawm leeing heue. ⁴⁸ Pex mawh pui pa kham mhai ruk grawh grawng ceu in khankix heue. ⁴⁹ Jhak heue, Aux sang ploi awm lox mukheu pa hoik tawx Keeing Aux, ka piang pex, mawh kheu nan pex ot ka daux veng in, tom pon ceep pex sibrawm khaing dee long heue." ⁵⁰ Nawh Cao thong kix hu tom hoek dex yaong Betanix, Nawh yaog taix tix nawb bwan ka kix heue. ⁵¹ Yam kawn nawb Nawh Cao bwan ka kix, Nawh Cao gwieh khaing kix mai viex Nawh haok ka piang raoma heue. ⁵² Kix krub ka Nawh Cao mai gaux rhawm tix mai deeh ing ka veng Yerusaliem heue. ⁵³ Kix ot ka daux nyiex bwan jheeng jheeng mai yaogyaw Siyiex heue.