Leviticus

Leviticus

¹ Siyiex kok ka Mose mai sikah ka nawh khaing daux nyiex gox bwan ah nin, ² "Krai ka ceu pui Isarelax ah nin, ka daux pex yam viex pui tix kaux kaux krax tan ka Siyiex, nawh tak viex ti tan tobrie pa mawh mawie, yung mai pex khankix. ³ Phan nawh sang yuh krax tan pa gleeing ka mawie, kieh nawh tan mawie mhaing pa loig, ka diang siviex nyiex gox bwan man bang kum pui hun, sonsang mawh pa khaw caw sivoe ngai Siyiex, ⁴ Nawh tak deuh taix tix piang kaing mawie sang tan an mai an tak mawh pa pon rieb ti teei son pa sang pluat ploi phimap nawh. ⁵ Nawh tak pah mawie mhaing an sivoe Simiang Siyiex, mai kawn simex Arun cao giex kaing li khankix tak teei nham mai phruah hawt vung viang piang khu dee tan, pa koe hawt diang siviex nyiex gox bwan man bang kum pui hun. ⁶ Nawh tak lieh mawie krax tan pa gleeing an mai tat nex lih khik mawx khik an, ⁷ Kawn simex Arun pa mawh cao giex kaing li khankix tak phlu ngu piang khu dee tan mai nawm khix piang ngu an, ⁸ mai kawn simex Arun pa mawh cao giex kaing li khankix tak teei khik nex mawie khawm kaing, khawm bee mai deuh piang khix pa koe ngu piang khu dee tan, ⁹ mai nawh tak sigrhah kraung vaig mai caong ka rawm, cao giex kaing li tak gleeing an khawmuik piang khu dee tan, kieh mawh krax tan pa gleeing ka ngu, pa sioe bhawng ka Simiang Siyiex. ¹⁰ Phan nawh sang yuh krax tan pa gleeing ka yung, phan ang mawh nan ka pex khankix mai tak tan mhaing pa loig, ¹¹ nawh tak pah an ka plak laong khu dee tan sivoe Simiang Siyiex mai kawn simex Arun pa mawh cao giex kaing li khankix tak phruah nham hawt vung viang piang khu dee tan khawmuik. ¹² Nawh tak tat nex to tan an lih khik mawx khik an mai bee nawh, cao giex kaing li tak teei ti deuh piang nawm khix pa koe ngu piang khu dee tan, ¹³ mai nawh tak sigrhah kraung vaig mai caong khankix ka rawm, cao giex kaing li tak viex nawh khawmuik mai gleeing piang khu dee tan, kieh mawh krax tan pa gleeing ka ngu pa sioe bhawng ka Simiang Siyiex, ¹⁴ phan nawh sang yuh krax tan pa gleeing ka sim khankix mai nawh tak viex pa mawh keukie, phan ang mawh nan, kawn sikaux nhum. ¹⁵ Cao giex kaing li tak viex hoek ka khu dee tan mai siyiied kaing nawh dud mai gleeing nawh piang khu dee tan, mai tak biiet nham lih hawt praok khu dee tan, ¹⁶ mai nawh tak pih ti tik ble mai can pa seeing, hu tik ka dee tik nyaox, ka praok khu dee tan plak lih singaix, ¹⁷ nawh tak giex pruik sim an khawm hauk mai lug naok nawh son ang dud khaing paox tix mai cao giex kaing li tak teei tix gleeing piang nawm khix pa koe ngu piang khu dee tan, kieh mawh krax tan pa gleeing ka ngu, pa sioe bhawng ka Simiang Siyiex heue.

¹ Yam pui tix kaux kaux tan phawng nghox ca im ka Siyiex, kieh nawh viex phawng ngox ca im pa mhawm mai see bee piang phawng nghox ca im an mai baox sau lawban kah, ² nawh tak viex an kix hoek ka sivoe ngai kawn simex Arun pa mawh cao giex kaing li khankix mai cao giex kaing li tak teei phawng nghox ca im tix jhawp mai bee tiblah mai can lawban pa koe, khaix an tak kieh ceu in mawh pa doh keud mai gleeing piang khu dee tan, kieh mawh krax tan pa gleeing ka ngu pa sioe bhawng ka Siyiex. ³ Phawng nghox ca im pa kawn deuk tak mawh son Arun mai kawn simex nawh khankix, an mawh krax tan pa nie blon singax singeh khaing paox tix khaing daux pa tan ka Siyiex pa gleeing ka ngu. ⁴ Phan maix sang yuh krax tan phawng nghox ca im pa ping daux glah ngu, an tak mawh blah pa ang sau susaix mai pa yuh ti ka phawng nghox ca im pa mhawm pa hoik klao ka bee, phan ang mawh nan blah rhi khlawp pa ang sau susaix mai pa hoik klao tix ka bee, ⁵ phan maix sang yuh krax tan phawng nghox ca im pa ping ka diang rhiem, an tak mawh phawng nghox ca im ceu pa mhawm pa ang sau susaix pa hoik klao tix ka bee, ⁶ maix tak sivit blah an lih mawh bliah mawx bliah an, mai see bee piang an, in mawh krax tan phawng nghox ca im. ⁷ Phan maix sang yuh krax tan phawng nghox ca im, diag daux aw khang, an tak mawh pa yuh ti ka phawng nghox ca im pa mhawm tau mai bee. ⁸ Maix tak viex krax tan phawng nghox ca im pa hoik yuh tix ka ceu inkix ka Simiang Siyiex, mai ap ka cao giex kaing li, nawh tak viex an hoek ka khu dee tan. ⁹ Cao giex kaing li tak teei khaing daux krax tan phawng nghox ca im an tix nyum sonsang mawh krax tan pa doh keud mai gleeing piang khu dee tan, kieh mawh krax tan pa gleeing ka ngu mai pa sioe bhawng ka Siyiex. ¹⁰ Phawng nghox ca im pa kawn deuk khankix, tak mawh son Arun mai kawn simex nawh khankix, an mawh krax tan pa nie blon singax singeh khaing paox tix khaing daux pa tan ka Siyiex pa gleeing ka ngu. ¹¹ Krax tan phawng nghox ca im pa viex maix hoek ka Siyiex tak ang sau susaix, ka daux krax tan pa gleeing ka Siyiex maix tak ang yaox ti gleeing susaix mai rawm hia ka. ¹² Maix tak yaox ti viex krax tan plix liang pa pon tix ka Siyiex, viang mawh nan maix tak ang pon ti gleeing piang khu dee tan sonsang mawh pa sioe bhawng. ¹³ Ka daux krax tan phawng nghox ca im pa yuh maix kuceu maix tak sau kih kah, maix tak ang pon ti kieh kih sijax mukheu Siyiex maix ceet khaing ka daux krax tan phawng nghox ca im maix, ceu pa tan maix khawmuik maix tak sau kih kah, ¹⁴ phan maix sang tan plix pa liang maix tix pon pa mawh krax tan phawng nghox ca im ka Siyiex maix tak teei sigleem nghox mai ka praok ngu mai boi ti teei plix nawh. ¹⁵ Maix tak sau bee piang an mai baox sau lawban piang an, an mawh krax tan phawng nghox ca im. ¹⁶ Cao giex kaing li tak gleeing son krax pa doh keud khaing sigleem nghox pa hoik boi an tix nyum pa mawh bee tau mai lawban, in mawh krax tan pa gleeing ka ngu son Simiang Siyiex heue.

¹ "Phan pui tix kaux kaux yuh krax tan pa nhim mai kieh nawh tan mawie mhaing, phan ang mawh nan mawie shiang pa mhawm loig tix mu mu ka plak sivoe Simiang Siyiex. ² Nawh tak deuh taix tix piang mawie pa sang tan an mai pah hawt diang siviex nyiex gox bwan man bang kum, mai kawn simex Arun pa mawh cao giex kaing li tak phruah nham hawt vung viang piang khu dee tan. ³ Nawh tak teei bee pa kheem kraung vaig khawmuik, pa mawh krax tan pa nhim mai krax tan gleeing ka ngu son Siyiex, ⁴ soklax ra mu pa koe ka daux nyoi mai bee pa koe piang nawh mai bee pa kawb tawm khankix tak teei lih. ⁵ Kawn simex Arun khankix tak gleeing an kix piang khu dee tan piang nawm khix pa koe ngu, kieh mawh krax tan pa gleeing ka ngu, pa sioe bhawng ka Simiang Siyiex. ⁶ Phan sang tan krax tan pa nhim ka Siyiex, pa mawh yung, pex mai kieh nawh tan pa mawh mhaing phan ang mawh nan shiang pa mhawm loig tix mu mu. ⁷ Phan nawh sang yuh krax tan ka kawn yung tix mu, nawh tak ap an ka sivoe Simiang Siyiex, ⁸ nawh tak deuh taix tix piang kaing yung pa sang tan an mai pah an sivoe nyiex gox bwan man bang kum, mai kawn simex Arun khankix tak phruah nham ankix piang vung viang khu dee tan. ⁹ Nawh tak yuh krax tan khaing krax tan pa nhim an, pa mawh krax tan pa gleeing ka ngu ka Siyiex, tak teei khlawp bee to tan an, bee pa kawb si-ang krawng tom hoek ka sidax mai bee pa kheem kraung vaig mai can bee pa koe piang kraung vaig khawmuik, ¹⁰ soklax ra mu pa koe ka nyoi to tan mai bee pa koe piang an mai bee pa kawb ka tawm khankix tak teei lih, ¹¹ mai cao giex kaing li tak gleeing an kix, piang khu dee tan, awm priex preem pa mawh krax tan, pa hoik gleeing ti ka ngu son Siyiex. ¹² "Phan nawh sang yuh krax tan ka pex tix mu, nawh tak ap ka sivoe Simiang Siyiex, ¹³ Nawh tak deuh taix tix piang kaing pex pa sang tan an mai pah ka sivoe nyiex gox man bang kum, mai kawn simex Arun khankix tak phruah nham ankix hawt vung viang piang khu dee tan. ¹⁴ Nawh tak tan khaing an, awm krax tan pa gleeing ka ngu ka Siyiex mai bee pa kheem piang kraung vaig mai can bee pa koe piang kraung vaig khawmuik, ¹⁵ soklax ra mu pa koe ka nyoi to tan mai bee pa koe piang an mai bee pa kawb piang tawm khankix tak teei lih, ¹⁶ mai cao giex kaing li tak gleeing ankix piang khu dee tan, awm priex preem pa mawh krax tan pa hoik gleeing ka ngu pa sioe bhawng. Bee khawmuik mawh cie Siyiex. ¹⁷ In tak mawh gumlox pingnyap sijax leeing ju ka dah dee ot doeh ru maix kudah dee, pex tak ang pon ti ih bee mai nham heue."

¹ Simiang Siyiex ah nin ka Mose, ² "Krai ah nin ka pui Isarelax khankix, phan pui tix kaux kaux lud ka gumlox pingnyap Siyiex ka daux pa ang nawh khaw ti yuh tix ceuceu, ³ mai phan cao giex kaing li pa hoik groi rawm bee ka lud mai kieh krax lud hoek piang pui khankix, kieh nawh viex krax tan ka mawie mhaing pa loig son krax tan pa pluat ploi phimap ka sivoe Simiang Siyiex, ⁴ nawh tak viex mawie mhaing hoek ka diang siviex nyiex gox bwan man bang kum ka sivoe Simiang Siyiex, nawh tak deuh taix tix piang kaing mawie an mai pah ka sivoe Simiang Siyiex. ⁵ Cao giex kaing li pa hoik groi rawm bee kah tak teei nham mawie an tiblah mai viex hoek ka nyiex gox bwan man bang kum, ⁶ cao giex kaing li tak cub giien taix tix ka daux nham mai phruah nham aliah bawg ka sivoe Simiang Siyiex, sivoe man tie dee pa singax singeh. ⁷ Cao giex kaing li tak sau nham tiblah piang rung khu dee tan nyawng bhawng ka sivoe Simiang Siyiex, pa koe ka daux nyiex gox bwan man bang kum mai nham mawie pa kawn deuk an nawh tak hieh ka caong khu dee tan krax tan pa gleeing pa koe ka diang siviex nyiex gox bwan man bang kum. ⁸ Nawh tak teei bee khawmuik khaing mawie mhaing pa mawh krax tan pa pluat ploi phimap, can bee pa kawb piang kraung vaig mai can bee pa koe piang kraung vaig khawmuik, ⁹ soklax ra mu pa koe ka nyoi to tan mai bee pa koe piang an mai bee pa kawb piang tawm khankix tak teei lih, ¹⁰ awm pa hoik teei tix khaing mawie mhaing pa tan tix son krax tan pa nhim mai cao giex kaing li tak gleeing an kix piang khu dee tan pa tan krax tan pa gleeing. ¹¹ Viang mawh nan, hak mawie mai nex khawmuik tau mai kaing, caong, khawm kraung vaig khankix mai roeng, ¹² nawh tak viex mawie an khawm mu lih hu ka plak praix nyiex bang ka dee hoik yuh kix blang, ka dee tik nyaox mai gleeing piang nawm khix pa koe ngu mai gleeing ka dee tik kix nyaox tan. ¹³ Phan pui haoh hun Isarelax khankix lud loe ka daux pa ang ti tawng mai can pa glip ka plak sivoe pui hun mai lud ka gumlox pingnyap mai an lih mawh pa lud, ¹⁴ yam deeh tawng kix ka phimap pa hoik lud ti mai pui haoh hun tak tan mawie mhaing tix mu son krax pa pluat ploi phimap mai viex hoek ka sivoe nyiex gox bwan man bang kum, ¹⁵ mai kwad song cub pui haoh hun khankix, tak deuh taix tix piang kaing mawie an sivoe Simiang Siyiex mai pah mawie mhaing an ka sivoe Simiang Siyiex. ¹⁶ Cao giex kaing li pa hoik groi rawm bee kah tak viex nham mawie an tiblah hoek ka nyiex gox bwan man bang kum, ¹⁷ mai cao giex kaing li tak cub giien taix tix ka daux nham mai phruah aliah bawg ka sivoe Simiang Siyiex ka plak sivoe man tie. ¹⁸ Nawh tak sau nham tiblah piang rung khu krub dee tan, pa koe sivoe Simiang Siyiex, ka daux nyiex gox bwan man bang kum mai nham pa kawn deuk an tak hieh ka caong khu dee tan krax tan pa gleeing, pa koe hawt diang siviex nyiex gox bwan man bang kum. ¹⁹ Nawh tak teei khlawp bee khawmuik khaing mawie mai gleeing piang khu dee tan. ²⁰ Nawh tak shieao mawie mhaing an, awm pa hoik shieao ti ka mawie mhaing pa tan kix son krax tan pluat ploi phimap mai nawh tak yuh awm an, mai cao giex kaing li tak yuh krax khyox khaw son kix mai kix tak pon krax pluat ploi phimap. ²¹ Nawh tak viex mawie lih ka praix dee bang kix mai gleeing awm mawie phao ka, an mawh krax tan pa pluat ploi phimap son pui hun. ²² Phan cao pa kwang tix kaux kaux lud loe ka daux pa ang ti tawng mai can pa glip ka gumlox pingnyap Siyiex ka daux pa ang nawh khaw ti yuh ka plak sivoe pui haoh hun mai lud ka gumlox pingnyap mai an lih mawh pa lud, ²³ Phan nawh hoik tawng dee lud tix, nawh tak viex krax tan pa pluat ploi phimap ka kawn pex mhaing pa loig tix mu, son phimap pa hoik yuh tix. ²⁴ Nawh tak deuh taix tix piang kaing kawn pex mhaing an mai pah ka dee gleeing kix krax tan pa gleeing sivoe Simiang Siyiex, in mawh krax tan son krax pluat ploi phimap. ²⁵ Cao giex kaing li tak teei nham tiblah khaing krax tan pa pluat ploi phimap ka giien taix tix mai sau piang rung khu dee tan pa gleeing mai nham pa kawn deuk an tak hieh ka caong khu dee tan krax tan pa gleeing. ²⁶ Nawh tak gleeing bee khawmuik piang khu dee tan, awm bee pa hoik appong ti tan son krax tan pa nhim, mai cao giex kaing li tak khyox khaw son phimap pa yuh nawh, mai nawh tak pon krax pluat ploi. ²⁷ Phan pui pa hot shia tix kaux kaux daux pui Isarelax lud loe ka daux pa ang ti tawng mai can pa glip ka plak sivoe ngai pui hun mai lud ka gumlox pingnyap mai an lih mawh pa lud, ²⁸ phan nawh hoik tawng dee lud tix, nawh tak viex krax tan pa pluat ploi phimap ka kawn pex shiang pa loig tix mu, son phimap pa hoik yuh tix. ²⁹ Nawh tak deuh taix tix piang kaing pex krax tan pa pluat ploi phimap an mai pah ka dee gleeing kix krax tan pa gleeing. ³⁰ Cao giex kaing li tak teei nham tiblah ka giien taix tix mai sau piang rung khu dee tan pa gleeing, nham pa kawn deuk nawh tak hieh ka caong khu dee tan krax tan pa gleeing. ³¹ Nawh tak teei bee an lih awm teei bee khaing krax tan pa nhim mai cao giex kaing li tak gleeing an piang khu dee tan, son krax tan pa sioe bhawng ka Siyiex, mai cao giex kaing li tak khyox khaw son nawh mai nawh tak pon krax pluat ploi phimap. ³² Phan nawh viex kawn yung son krax tan pa pluat ploi phimap, kieh nawh viex kawn yung shiang pa loig tix mu, ³³ nawh tak deuh taix tix piang kaing kawn yung krax tan pa pluat ploi phimap mai pah an son krax tan pa pluat ploi phimap ka dee pah kix krax tan pa gleeing. ³⁴ Khaix an cao giex kaing li tak teei nham tiblah khaing krax tan pa pluat ploi phimap ka giien taix tix mai sau piang rung khu dee tan ka krax tan pa gleeing, nham pa kawn deuk tak hieh caong khu dee tan krax tan pa gleeing. ³⁵ Nawh tak teei bee an lih, awm teei bee khaing kawn yung krax tan pa nhim mai cao giex kaing li tak gleeing an piang khu dee tan, awm krax tan pa hoik gleeing ka ngu ka Siyiex, cao giex kaing li tak yuh krax khyox khaw son phimap pa hoik lud nawh mai nawh tak pon krax pluat ploi phimap heue."

¹ "Phan pui tix kaux kaux mhong lox pa tiextu tix ceu mai nawh mawh mhai rug an mai phan nawh yaox ka an mai tawng ka grawng an, phan nawh ang krai, nawh tak yaox ti kham ka phimap. ² Phan pui tix kaux loe ti teeh ka pa ang singax tix ceuceu, pa mawh to yum totiag pa ang singax ang ah, to yum tobrie pa ang singax khankix ang ah, to yum totiag can ceu pa im ju chix mu ang ah mai an khankix pa ang tien yaox, nawh lih ti mawh pa ang singax nawh tak lud. ³ Phan nawh loe ti teeh ka ceu pa ang singax, pa koe ka pui khankix mai an lih mawh pa seeing yuh nawh, khaix hoik tawng nawh ka an nawh tak lih mawh pa lud. ⁴ Phan pui tix kaux kaux tiextu mai ang koe krax keud, sonsang yuh ceu pa caox ang ah, ceu pa mhawm ang ah mai pa hoik tiextu pui tix kaux ka nawh, ka ceu pa ang nawh tien tawng ka sivoe nawh khankix, yam hoik deeh tawng nawh grawng an, nawh tak lih koe pa lud ka grawng an. ⁵ Yam hoik koe krax lud nawh ka grawng ceu an khankix, nawh tak yaox ti krai sidawng phimap tix mai khyox khaw, ⁶ mai nawh tak viex krax tan ka Siyiex son phimap pa hoik yuh ti ka kawn yung shiang tix mu, phan ang mawh nan, kawn pex shiang tix mu, son krax tan pa pluat ploi phimap tix, cao giex kaing li tak khyox khaw son phimap pa hoik yuh nawh. ⁷ Phan nawh ang pon tan kawn yung iak, nawh tak teei ti tan sikaux ra mu phan ang mawh nan, kawn keukie ra mu ka Simiang Siyiex, son krax lud pa hoik yuh ti, son krax tan pa pluat ploi phimap tix mu, mai son krax tan pa gleeing tix mu. ⁸ Nawh tak viex an hoek ka cao giex kaing li mai cao giex kaing li tak tan krax tan pa pluat ploi phimap phao ka mai siyiied kaing khaing ngawg an, viang mawh nan ang pon ti kieh dud, ⁹ nawh tak phruah nham krax tan pa pluat ploi phimap tiblah ka praok khu dee tan mai nham pa kawn deuk tak biiet ka caong khu dee tan, in mawh krax tan pa pluat ploi phimap. ¹⁰ Nawh deeh tan sim an ra mu tix mu, son krax tan pa gleeing awm pa hoik koe lox tawm pingnyap, mai cao giex kaing li tak yuh krax khyox khaw tang nawh mai son phimap pa hoik lud nawh mai nawh tak pon krax pluat ploi phimap. ¹¹ Phan nawh ang pon viex sikaux ra mu, keukie ra mu ang ah, pui pa hoik lud an, tak viex phawng gaox nghox ca ceu pa mhawm kao son tix son, khaing tix Epha hoek son krax pluat ploi phimap, nawh tak ang pon ti sau bee mai lawpan piang, kheu mawh an krax tan pa pluat ploi phimap. ¹² Nawh tak viex an hoek ka cao giex kaing li mai cao giex kaing li tak teei phawng nghox ca tix jhawp sonsang mawh pa doh keud mai gleeing an piang khu dee tan, awm krax tan pa gleeing ka ngu son Simiang Siyiex, in mawh krax tan pa pluat ploi phimap. ¹³ Cao giex kaing li tak yuh krax khyox khaw son phimap pa hoik lud nawh ka grawng tix ceuceu, nawh tak pon krax pa pluat ploi mai pa kawn deuk khankix tak mawh cie cao giex kaing li, awm krax tan phawng nghox ca im heue." ¹⁴ Siyiex krai ah nin ka Mose, ¹⁵ "Phan pui tix kaux kaux lud ka ceu pa ang ti tien tawng ka ceu pa singax singeh Siyiex mai lih ti mawh phimap, nawh tak viex kawn yung mhaing phan ang mawh nan, kawn pex mhaing pa loig hoek ka Siyiex tix mu sonsang mawh krax tan pa pluat ploi krax lud maix tat jum tobrie an ka mau shekhe pa hoik ciang ti ka jiang dee pa singax singeh, in mawh krax tan pa pluat ploi pa lud. ¹⁶ Kieh nawh viied son pa lud loe nawh ka kraung pa dex mai dee pa singax singeh mai nawh tak dee baox thie piang an phwan son tix son mai ap ka cao giex kaing li, cao giex kaing li tak yuh pa khyox khaw son nawh, ka kawn yung son krax tan pa pluat ploi pa lud, nawh tak pon krax pluat ploi. ¹⁷ Phan pui tix kaux kaux lud loe, ka lox tawm Simiang Siyiex pa ang kieh nawh yuh, tix ceuceu viang nawh ang tawng pa yuh tix lud kawx, nawh hoik lud mai tak yaox ti kham geu son phimap an. ¹⁸ Nawh tak yaox ti viex kawn yung mhaing, phan ang mawh nan, kawn pex mhaing pa loig tix mu ka cao giex kaing li tau mai mau ngawh viied son krax tan pa lud tix mai son pa ang nawh koe krax tawng yung, ka daux pa hoik lud loe tix mai cao giex kaing li tak yuh pa khyox khaw ka son nawh, nawh tak pon pa pluat ploi. ¹⁹ An mawh krax tan pa pluat ploi krax lud, mawh kheu hoik lud nawh ka Simiang Siyiex heue."

¹ Khaix an Simiang Siyiex krai ah nin ka Mose, ² "Phan pui tix kaux kaux koe pa lud loe ka Siyiex ka daux pa pie lhen tix ka paox plawg tix, son grawng kraung pa ap pui ti deuh ang ah, son kraung pa tang pui ti deuh ang ah, son kraung pa gut kheem ang ah mai son kraung pa tud rhim nawh khaing paox plawg tix ang ah, ³ Phan nawh yaox ka ceu pa grai pui yuh mai pie lhen ka grawng an mai tiextu ka pa ang mawh ang meh mai lud ka ceu pa lud pui tix ceuceu. ⁴ Yam pui tix kaux kaux lud mai lih ti mawh phimap, nawh tak deeh yaox ti viied ka kraung pa ap pui ti deuh ang ah, kraung pa tang pui ang ah kraung pa gut kheem ang ah, kraung pa tud rhim ang ah mai kraung pa grai yuh pui pa yaox nawh khankix, ⁵ mai grawng pa hoik tiextu nawh ka daux pa ang mawh ang meh, nawh deeh yaox ti viied ngawh kraung tom naog mai deeh baox thie phwan son tix son piang an mai tawx an ka cao kraung, ka daux singaix yuh nawh krax tan pa lud. ⁶ Nawh tak yaox ti viex kawn yung mhaing pa loig hoek ka Siyiex sivoe ngai cao giex kaing li, tau mai ngawh mau pa viied tix can krax tan pa pluat ploi pa lud tix. ⁷ Cao giex kaing li tak yuh krax khyox khaw son nawh ka sivoe ngai Siyiex mai nawh tak pon krax pluat ploi khaing pa lud tix kuceu." ⁸ Siyiex krai ah nin ka Mose, ⁹ "Tawx lox ka Arun mai kawn simex nawh khankix, in mawh grawng been krax tan pa gleeing. Krax tan pa gleeing tak koe piang glah ngu khu dee tan leeing sawm tom hoek plak ponngawb mai kieh glah ngu khu dee tan rup jheung jheung. ¹⁰ Cao giex kaing li tak ceep sibex man tix mai khlax man piang tokaux tix mai nawh tak hok nyaox krax tan pa gleeing piang khu dee tan mai deuh ka praok khu dee tan. ¹¹ Nawh tak loh kraung ceep tix mai deeh ceep kraung tang ceu mai viex nyaox an lih ka praix nyiex bang ka dee hoik yuh kix blang. ¹² Ngu pa koe piang khu dee tan tak ang pon kieh yeet tix bawg kawx, tak kieh rup jheung jheung, mai cao giex kaing li tak sau khix sau ngu piang an ku ngawb mai deuh krax tan pa gleeing piang nawm khix pa rup piang khu dee tan mai yaox ti gleeing khlawp bee krax tan pa nhim. ¹³ Ngu pa rup piang khu dee tan, tak ang pon ti kieh yeet tix bawg kawx tak kieh rup jheung jheung. ¹⁴ "In mawh grawng been son krax tan phawng nghox ca im, kawn simex Arun khankix tak tan an piang khu dee tan, sivoe Simiang Siyiex. ¹⁵ Nawh teei an khaing phawng gaox nghox ca im tix jhawp tau mai bee mai lawban pa koe daux krax tan an khawmuik mai gleeing an piang khu dee tan sonsang mawh pa sioe bhawng pa doh keud ka Siyiex. ¹⁶ Pa kawn deuk an Arun mai kawn simex nawh khankix tak ih blah pa ang sau susaix kix tak ih ka dee pa singax singeh ka biang nyiex gox bwan man bang kum, tau mai blah pa ang sau susaix. ¹⁷ An tak ang pon ti yuh sin tau mai susaix, mawh krax tan pa hoik tawx ka kix khaing krax tan pa gleeing, hoik mawh pa singax singeh, awm krax tan son pa pluat ploi phimap mai krax tan pa pluat ploi pa lud. ¹⁸ Can pa mawh simex ka daux kawn praix Arun khawmuik, tak ih ka an, an tak mawh gumlox beenli pa hoik deuh ka son doeh ru pex ti ju hoik ti ju khaing krax tan pa gleeing pex ka ngu ka Siyiex, can pui ku kaux pa teeh ka krax tan an tak caw ti mawh pa singax singeh." ¹⁹ Simiang Siyiex ah nin ka Mose, ²⁰ "In mawh krax tan Arun mai kawn simex nawh khankix pa yaox kix ti tan phawng nghox ca im ka Siyiex jah ka daux singaix hoik kham ti rieb pa groi rawm bee ka nawh kix tak tan phawng nghox ca im kao son tix son khaing tix Epha son krax tan ku gaix, plak ponngawb tix plak mai plak ponbo tix plak. ²¹ Sau bee tau mai phawng an yuh sin ka diang rhiem tix mu, maix tak viex hoek mai sivit ti tan mawh krax tan phawng nghox ca im, son krax tan pa sioe bhawng ka Siyiex. ²² Ka daux kawn simex nawh khankix, pa kham ti rieb pa groi rawm bee tang nawh, tak yuh krax tan an, in mawh gumlox pingnyap grawng krax tan ka Siyiex leeing ju, tak yaox ti gleeing khawmuik. ²³ Can krax tan phawng nghox ca im kuceu son cao giex kaing li khankix, tak yaox ti gleeing khawmuik tak ang pon ti ih heue." ²⁴ Khaix an Siyiex krai ah nin ka Mose, ²⁵ "Krai ka Arun mai kawn simex nawh khankix, in mawh grawng been son krax tan pa pluat ploi phimap, krax tan son phimap an tak yaox ti pah ka dee gleeing kix krax tan pa pluat ploi phimap ka plak sivoe Simiang Siyiex, an mawh pa kied singax singeh. ²⁶ Cao giex kaing li khankix pa tan ka son phimap, tak ih an ka dee pa singax singeh tidah, pa koe ka daux nyiex gox bwan man bang kum pui hun. ²⁷ Can pui pa teeh ka nex an tak singax singeh, mai kraung ceep pa caw nham tix phreeh ka, tak deeh sidaux ka dah dee pa singax singeh. ²⁸ Aw tiex pa hoik ngaik kix nex ka daux, tak pah max, mai phan kix ngaik nex ka daux aw tawng lheung, tak caw ti thui mai lang singax ka rawm. ²⁹ Can simex daux cao giex kaing li khankix tak ih ka nex an, an mawh pa kied singax singeh. ³⁰ Viang mawh nan, krax tan son pa pluat ploi phimap pa viex kix nham laig ka daux nyiex gox bwan man bang kum, son pa sang yuh krax khyox khaw ka dee pa singax singeh, tak ang pon ti ih ka nex an, tak gleeing an ka ngu heue.

¹ Grawng been son krax tan pa pluat ploi pa lud mawh pa kied singax singeh, ² Ka dee pah kix to tan pa gleeing kix tak pah krax tan pa pluat ploi krax lud, tak phruah nham hawt vung viang piang khu dee tan khawmuik. ³ Nawh tak tan khlawp bee nawh khawmuik tau mai bee pa koe plak sidax mai bee pa kheem piang kraung vaig, ⁴ mai soklax ra mu mai bee pa koe ka plak daux nyoi mai khlawp bee pa kawb tawm, piang soklax khankix nawh tak teei lih, ⁵ mai cao giex kaing li tak gleeing an piang khu dee tan awm krax tan pa gleeing ka ngu ka Siyiex, an mawh krax tan pa pluat ploi krax lud. ⁶ Can simex daux cao giex kaing li khankix, tak yaox ti ih an, mai caw ti ih dee pa singax singeh, an mawh pa kied singax singeh. ⁷ Krax tan son pa pluat ploi krax lud mawh pa awm krax tan pa pluat ploi phimap, been an mawh ngie tix mu khaing, cao giex kaing li pa yuh ti tawx krax khyox khaw ka son an khankix tak pon ti cie an. ⁸ Cao giex kaing li pa yuh krax tan pa gleeing son pui tix kaux kaux mai cao giex kaing li an tak yaox ti cie hak krax tan pa gleeing pa hoik tan nawh. ⁹ Krax tan phawng nghox ca im kuceu pa hoik ping sin ka daux glah ngu mai can pa hoik khre rien nawh ka daux aw khang phan ang mawh nan ka daux diang rhiem tak mawh cie cao giex kaing li pa yuh krax tan ka son an. ¹⁰ Can krax tan phawng nghox ca im, pa hoik klu klao tix ka bee ang ah, pa kroh ang ah tak mawh cie kawn simex Arun khankix, kieh kix gwieh sidu awm paox tix heue. ¹¹ "In mawh grawng been son krax tan pa appong krax tan pa nhim pa tak sang tan ti ka Simiang Siyiex. ¹² Phan nawh yuh krax tan son pa yaogyaw, khaix an nawh tak yuh krax tan an tau mai krax tan pa yaogyaw ka blah rhi khlawp pa klu klao ka bee pa ang sau susaix, blah rhi khlawp pa yuh ka phawng nghox ca im, pa hoik klu klao ti mai bee pa hoik diag sin. ¹³ Lheu khaing blah rhi khlawp an nawh tak yuh blah pa sau susaix tau mai son krax tan pa yaogyaw ka krax tan pa nhim. ¹⁴ Khaing ka daux krax tan blah rhi khlawp kuceu, nawh tak teei tix ceu tix khlawp pa yaog ka Siyiex, an tak mawh cie cao giex kaing li pa phruah nham krax tan pa nhim. ¹⁵ Nex pa yuh nawh krax tan pa yaogyaw son krax pa nhim tak ih nex an ka daux singaix pa yuh nawh krax tan, nawh tak ang pon ti deuh an tom hoek plak ponngawb. ¹⁶ Viang mawh nan, phan mawh krax tan pa hoik yuh nawh sijax ang ah mai krax tan pa kaoh khaing rhawm nawh ang ah, tak yaox ti ih ka daux singaix pa yuh ti krax tan mai pa kawn deuk tak pon ti ih tom hoek singaix khaix, ¹⁷ nex pa kawn deuk khaing krax tan khankix yam hoek loe ngaix tix ngaix, tak caw ti gleeing ka ngu, ¹⁸ Yam hoek loe ngaix tix ngaix phan ih ka nex krax tan pa nhim an ceeix ngie khaing, Siyiex ang khaw rhawm ka cao pa tan an, tak mawh pa seeing brai mai pui pa ih ka an khankix tak yaox ti kham phimap. ¹⁹ Nex pa hoik teeh ka ceu pa seeing brai tix ceuceu tak ang pon ti ih, an tak caw ti gleeing ka ngu. Can pui pa singax ku kaux tak pon ti ih ka nex pa singax an. ²⁰ Phan pui tix kaux kaux ih ka nex krax tan pa nhim pa appong ka Simiang Siyiex, yam ang tokaux tix singax tak teei ti tik pui an khaing ceu pui nawh. ²¹ Phan pui tix kaux kaux hu teeh ka pa seeing brai, pa seeing khaing kawn pui ang ah khaing tobrie ang ah, can viag pa seeing pa ang singax tix ceuceu mai ih ka nex krax tan pa nhim pa appong ka Siyiex, tak teei ti tik pui an khaing ceu pui nawh heue." ²² Khaix an Simiang Siyiex krai ah nin ka Mose, ²³ "Krai ka pui Isarelax khankix, pex tak ang pon ti ih khlawp bee mawie, yung mai khlawp bee pex, ²⁴ khlawp bee totiag pa tang yum mai bee tobrie pa hoik kiied totiag khankix, tak shiao son tang ceu mai pex ang pon ti ih ka. ²⁵ Pui pa ih ka khlawp bee tobrie pa hoik gleeing ka ngu, Siyiex tak teei ti tik pui an khaing ceu pui nawh. ²⁶ Lheu khaing an, pex tak ang pon ti ih nham tix ceu kawx, ka can dee ot tix, pa mawh nham ang ah mai nham totiag ang ah, ²⁷ can pui pa ih nham tix ceuceu tak teei ti tik pui an khaing ceu pui nawh. ²⁸ Khaix an, Simiang Siyiex ah nin ka Mose, ²⁹ "Krai ka pui Isarelax khankix pui pa yuh krax tan pa nhim pa appong ka Siyiex, nawh tak viex krax tan ti hoek ka Siyiex khaing krax tan pa nhim, ³⁰ tokaux nawh tak yaox ti viex krax tan pa gleeing ka ngu son Siyiex, nawh tak viex khlawp bee tau mai nex euk, son nex euk pa mawh krax tan yang yeuh mai yang yeuh sivoe Simiang Siyiex. ³¹ Cao giex kaing li tak gleeing khlawp bee piang khu dee tan mai nex euk an tak mawh cie Arun mai kawn simex nawh khankix. ³² Maix tak tawx ba khawn dawm ka cao giex kaing li, son krax tan pa yaog khaing krax tan pa nhim pa appong tix. ³³ Ka daux kawn simex Arun khankix, pa tan nham mai khlawp bee son krax tan pa nhim, ba taix khawn dawm tak mawh nyum cie nawh. ³⁴ Mawh kheu nex euk krax tan pa yang yeuh an mai ba krax tan pa yaog Aux hoik teei khaing pui Isarelax khankix mai khaing pa appong kix krax tan pa nhim, Aux hoik tawx ka cao giex kaing li Arun mai kawn simex nawh khankix, Aux hoik deuh mawh pingnyap leeing ju ka daux ceu pui Isarelax. ³⁵ In mawh yung pa pon Arun mai kawn simex nawh khankix khaing krax tan pa gleeing ka ngu ka Siyiex, ka daux singaix pa hoik ap kix yuh kaing jhaw cao giex kaing li cie Siyiex. ³⁶ Siyiex hoik tawx lox ka pui Isarelax khankix mai ap ceu in ka kix, jah ka singaix pa hoik kham kix ti rieb pa groi rawm bee, an hoik mawh pingnyap leeing ju ka daux doeh ru kix tix ju hoik tix ju." ³⁷ In mawh grawng been krax tan pa gleeing, krax tan phawng nghox ca im, krax tan pa pluat ploi phimap, krax tan pa pluat ploi krax lud, krax tan pa nhim in mawh grawng krax pa appong ti yam yuh kaing jhaw pa singax singeh. ³⁸ Pa hoik tawm Simiang Siyiex ka Mose piang gawng Sina daux singaix tawm Nawh Cao pui Isarelax khankix sonsang viex krax tan ka Siyiex ka daux tiag Sina heue.

¹ Simiang Siyiex ah nin ka Mose, ² "Viex Arun mai kawn simex nawh khankix tau mai kraung ceep mai bee pa sang groi mai mawie mhaing son krax tan pa pluat ploi mai kawn yung mhaing ra mu mai blah pa ang sau susaix tix khrawng, ³ mai krawk khrawm cub pui hun ka diang siviex nyiex gox bwan man bang kum." ⁴ Mose yuh awm lox pa tawm Simiang Siyiex ka nawh mai cub pui hun khankix khrawm paox tix ka diang siviex nyiex gox bwan man bang kum. ⁵ Mose ah nin ka cub pui hun, "In mawh lox pa hoik tawm Simiang Siyiex sonsang hawt yuh." ⁶ Mose viex Arun mai kawn simex nawh khankix mai heem kix ka rawm. ⁷ Nawh ceep sibex dhah plak daux ka Arun mai rhawt maox rawd nyoi mai ceep sibex dhah plak piang mai deeh ceep sibex dhah dawd taix piang nawh mai rhawt ka man pa taing ka keei kuceu, pa koe piang sibex dhah dawd taix mai rhawt piang an. ⁸ Sau man tie naok piang naok nawh mai deeh sau Urim mai Tumim ka daux man tie naok an. ⁹ Ceep lawk kaing ka kaing Arun mai kawb khlawp khri ka sivoe ngai man lawk kaing pa mawh mok khri awm pa hoik tawm Simiang Siyiex ka Mose. ¹⁰ Mose teei bee groi mai groi ka nyiex gox bwan man mai can pa koe daux nyiex mai yuh an khankix singax singeh, ¹¹ Nawh phruah bee piang khu dee tan aliah bawg mai groi ka khu dee tan mai can kraung pa shiao, ka pan khoek mai khawm ka caong nawh sonsang mawh pa singax singeh. ¹² Nawh groi bee groi piang kaing Arun mai groi nawh ka bee sonsang singax singeh. ¹³ Mose deeh kok ka kawn simex Arun khankix mai ceep sibex dhah plak daux piang kix mai rhawt maox rawd nyoi ka kix mai baox dee ceep mhok piang kix awm gumlox pa hoik tawm Simiang Siyiex ka Mose. ¹⁴ Nawh tuk mawie mhaing, son krax tan pa pluat ploi phimap, Arun mai kawn simex nawh khankix, deuh taix tix piang kaing mawie mhaing an, son krax tan pa pluat ploi phimap. ¹⁵ Mose pah ka mawie an mai teei nham ka giien taix tix mai sau piang rung khu dee tan hawt vung viang khawmuik mai kieh khu dee tan singax ka, nham pa kawn deuk nawh hieh ka caong khu dee tan kieh mawh pa singax singeh sonsang yuh krax pa pluat ploi. ¹⁶ Nawh teei khlawp bee pa koe piang kraung vaig mai bee pa kawb tawm mai pa kawb soklax ra mu mai Mose gleeing an khankix piang khu dee tan. ¹⁷ Nawh tak gleeing mawie an khawm hak, nex mai roeng ka ngu ka plak praix nyiex bang awm gumlox pa hoik tawm Simiang Siyiex ka Mose. ¹⁸ Nawh deeh viex kawn yung mhaing son krax tan pa gleeing, Arun mai kawn simex nawh khankix deuh taix tix piang kaing kawn yung an. ¹⁹ Mose pah to tan an mai phruah nham piang khu hawt vung viang khu dee tan, ²⁰ Nawh tat nex kawn yung khik mawx khik an mai Mose gleeing kaing mai khik nex mai khlawp bee khankix, ²¹ sigrhah kraung vaig mai caong ka rawm, Mose gleeing kawn yung khawm mu piang khu dee tan, mawh krax tan pa gleeing pa sioe bhawng mai krax tan pa gleeing ka ngu son Siyiex awm gumlox pa hoik tawm Simiang Siyiex ka Mose. ²² Nawh deeh viex kawn yung mhaing baox tix mu pa hoik laug sonsang tawx ara ka Arun mai kawn simex nawh khankix deuh taix tix piang kaing kawn yung an. ²³ Mose pah to tan an mai teei nham tiblah sau ka dawng yhaok plak dawm Arun mai piang giien ting taix khawn dawm mai piang giien ting caong khawn dawm. ²⁴ Khaix an nawh kok kawn simex Arun khankix, Mose sau nham tiblah piang giien ting taix khawn dawm kix mai piang dawng yhaok khawn dawm kix mai piang giien ting caong khawn dawm mai Mose phruah nham hawt vung viang piang khu dee tan. ²⁵ Nawh teei khlawp bee mai sidax, khlawp bee pa koe piang kraung vaig khawmuik mai khlawp bee pa kawb tawm mai bee pa kawb soklax ra mu mai bee khankix mai, ba khawn dawm, ²⁶ Nawh teei blah tix lon pa ang sau susaix khaing kraung pa deuk sivoe Simiang Siyiex, nawh teei blah pa ang sau susaix pa mawh blah pa hoik yuh ka bee mai blah rhi khlawp tix khlawp, nawh deuh piang khlawp bee mai piang ba khawn dawm, ²⁷ Nawh sau an khankix ka daux tawm taix Arun mai kawn simex nawh khankix, yang yeuh an khankix ka plak sivoe Simiang Siyiex mai yuh krax tan pa yang yeuh. ²⁸ Mose teei an khaing daux tawm taix kix mai gleeing piang khu dee tan krax tan pa gleeing, an mawh krax tan pa sioe bhawng pa tawx ara, mawh krax tan pa gleeing ka ngu son Siyiex. ²⁹ Mose teei nex euk mai yang yeuh sivoe Simiang Siyiex, mai yuh krax tan pa yang yeuh, nex euk kawn yung pa tawx ara an mawh nyum cie Mose, awm gumlox pa hoik tawm Simiang Siyiex ka Mose. ³⁰ Mose teei bee groi tiblah mai nham tiblah, pa koe piang khu dee tan mai, phruah piang Arun mai kraung ceep nawh mai piang kawn simex mai kraung ceep kix, nawh kieh Arun mai kraung ceep nawh mai kawn simex nawh khankix, singax singeh tau mai nawh. ³¹ Mose ah nin ka Arun mai kawn simex nawh khankix, "Ngaik nex hawt diang siviex nyiex gox bwan man bang kum, ih tan tau mai blah pa koe daux khrawng pa tan son pa tawx ara, awm gumlox pa hoik tawm Aux ah nin, Arun mai kawn simex nawh khankix tak ih an, ³² Maix tak gleeing can nex pa kawn deuk mai blah ka ngu. ³³ Maix tak ang pon ti lih ka praix diang siviex nyiex gox bwan man bang kum been aliah ngaix, tom ang singaix bawg yam tawx ara ka maix nyang sidah, mawh kheu bawg yam tawx ara ka maix rheeng aliah singaix. ³⁴ Awm pa hoik yuh ka daux in singaix, Siyiex hoik tawm lox, sonsang yuh krax pa pluat ploi son pex. ³⁵ Maix tak ot ka diang siviex nyiex gox bwan man bang kum aliah singaix ku singaix mai yuh kaing jhaw pa tawx Siyiex, son ang maix sang yum awm gumlox pa hoik tawm ka aux yuh nin." ³⁶ Mawh kheu nan, Arun mai kawn simex nawh khankix, yuh ceu an awm gumlox pa hoik tawm Simiang Siyiex ka Mose heue.

¹ Yam hoek daux daix singaix, Mose kok ka Arun mai kawn simex nawh khankix mai kwad song ceu pui Isarelax, ² Nawh ah nin ka Arun, "Teei kawn mawie iak tix mu son krax tan pa pluat ploi phimap mai kawn yung tix mu son krax tan pa gleeing, pa loig khawm ra mu mai tan an ka sivoe Simiang Siyiex. ³ Krai ah nin ka ceu pui Isarelax, teei kawn pex mhaing iak tix mu son krax tan pa pluat ploi phimap, kawn mawie iak tix mu mai kawn yung iak tix mu, pa hoik naog num pa loig khawm ra mu son krax tan pa gleeing. ⁴ Teei mawie mhaing tix mu mai kawn yung mhaing tix mu, son krax tan pa nhim, son pa sang appong tix sivoe Simiang Siyiex mai krax tan phawng nghox ca im pa hoik klao tau mai bee, Siyiex tak lih bleeh ka pex ka daux in singaix." ⁵ Kix viex can pa hoik tawm Mose sivoe nyiex gox bwan man bang kum, mai cub pui hun greed dex mai cung sivoe Simiang Siyiex. ⁶ Mose ah nin, "In mawh pa hoik tawm Simiang Siyiex pex yuh, mai min plakngai Siyiex tak lih bleeh ka pex." ⁷ Mose ah nin ka Arun, "Hu ka khu dee tan mai tan krax tan son pa pluat ploi phimap mai khawm krax tan pa gleeing, mai yuh krax khyox khaw pa pluat ploi phimap son tokaux maix mai son pui khankix, tan krax tan pa viex pui hoek mai yuh krax khyox khaw son kix, awm gumlox pa hoik tawm Simiang Siyiex." ⁸ Arun hu ka khu dee tan mai pah kawn mawie iak son krax tan pa pluat ploi phimap ka son cao tix. ⁹ Kawn simex Arun khankix viex nham hoek ka nawh, nawh cub giien taix tix ka daux nham sau piang rung khu dee tan mai hieh nham pa kawn deuk an hawt caong khu dee tan, ¹⁰ Nawh gleeing khlawp bee soklax mai khlawp bee tawm, son krax tan pa pluat ploi phimap piang khu dee tan, awm gumlox pa hoik tawm Simiang Siyiex ka Mose. ¹¹ Nawh gleeing nex mai hak tau ka daux ngu ka plak praix nyiex bang. ¹² Nawh pah ka to krax tan pa gleeing, mai kawn simex Arun khankix viex nham hoek plak sivoe nawh mai nawh phruah nham an khankix hawt vung viang piang khu dee tan. ¹³ Kix deeh viex krax tan pa gleeing hoek ka plak sivoe nawh khawm khik nex mai kaing, nawh gleeing an khankix piang khu dee tan. ¹⁴ Nawh sigrhah kraung vaig mai caong, nawh gleeing an khankix tau mai krax tan pa gleeing piang khu dee tan. ¹⁵ Nawh viex krax tan pui khankix hoek mai teei kawn pex son krax tan pa pluat ploi phimap son pui khankix mai pah ti tan son phimap, awm pa hoik tan kix phao ka tix mu. ¹⁶ Nawh baox viex krax tan pa gleeing hoek mai tan awm pa hoik koe been. ¹⁷ Nawh baox viex krax tan phawng nghox ca im mai teei ka taix tix naok tix jhawp mai gleeing an piang khu dee tan, sivoe dee gleeing kix krax tan plak ponngawb. ¹⁸ Nawh baox pah mawie mhaing mai kawn yung iak, pa ap kix son krax tan pa nhim son pui khankix, kawn simex Arun khankix viex nham hoek, nawh phruah nham an vung viang piang khu dee tan khawmuik. ¹⁹ Khlawp bee mawie mhaing mai kawn yung, khawm khlawp bee sidax mai khlawp bee pa kawb kraung vaig, soklax mai tawm, ²⁰ Kix deuh khlawp bee an khankix piang nex euk, nawh gleeing khlawp bee an khankix piang khu dee tan, ²¹ mai Arun yang yeuh nex euk mai ba khawn dawm, son krax tan pa yang yeuh sivoe Simiang Siyiex, awm gumlox pa hoik tawm Mose. ²² Arun yaog taix tix ka plak pui hun mai nawb bwan piang kix mai lih khaing ka dee krax tan son pa pluat ploi phimap mai krax tan pa gleeing khawm krax tan pa nhim khankix. ²³ Mose mai Arun laig daux nyiex gox bwan man bang kum pui hun mai deeh lih plak praix mai nawb bwan piang pui khankix. Khaix an, min plakngai Siyiex plak jhi ti ka pui khawmuik, ²⁴ Siyiex ploi ngu lih mai gleeing ka krax tan pa gleeing mai khlawp bee pa koe piang khu dee tan, yam yaox pui khankix ka an, kix kok yo mai gup ngai tix piang tiex khawmuik heue.

¹ Kawn simex Arun pa mawh Nadat mai Abihux viex pan ngu hoek tix kaux tix mu mai sau ngu ka mai baox sau pa sioe bhawng piang an mai kiex lak yuh krax tan pa gleeing ka ngu, ka sivoe Simiang Siyiex, pa ang Nawh Cao nyang tawm kiex yuh. ² Ngu lih khaing sivoe ngai Siyiex mai gleeing kiex khawm ra mai kiex yum plak sivoe Simiang Siyiex. ³ Mose ah nin ka Arun, "Siyiex hoik krai ah nin, Aux tak mawh pa singax singeh sinax ceu pui pa dex mai Aux mai sivoe pui hun khankix Aux tak mawh pa koe min plakngai, "Arun ot yiien yawg tix. ⁴ Mose kok ka Mishelax mai Elizapha kawn simex Awzalax, pa mawh keeing iak Arun mai nawh ah nin ka kiex. "Hoek dee dex mai klawm puxaik maix lih khaing sivoe dee pa singax singeh ka plak praix nyiex bang." ⁵ Kiex hoek dex mai klawm nawh hu ka sibex dhah ceep kiex ka plak praix nyiex bang, awm gumlox pa hoik ah Mose. ⁶ Mose ah nin ka Arun mai kawn simex nawh Eliza mai Itama, "Pex paw peeik mhok mai paw ploi hauk kaing tix yih mai paw riah ka kraung ceep tix, aux lhat pex yum mai lhat krax song rhawm Siyiex hoek piang pui khawmuik, viang mawh nan, kieh puxaik pex mai kawn nyiex ma pui Isarelax khawmuik yiiem yo mai khi rhawm ka ngu pa hoik yuh Siyiex. ⁷ Pex tak ang pon ti lih khaing daux siviex nyiex gox bwan man bang kum pui hun kheu lhat Aux pex yum, grawh grawng nawh bee groi pa hoik appong Siyiex koe piang pex. Kix yuh awm gumlox Mose heue. ⁸ Siyiex ah nin ka Arun, ⁹ "Maix khawm kawn simex maix khankix yam laig pex ka daux nyiex gox bwan man bang kum pui hun, paw nyaux rawm plix siiet mai plai, kheu lhat Aux pex yum, an tak mawh gumlox been pa caw pex ti hawt khawm doeh ru pex leeing ju, ¹⁰ sonsang chix gwieh pex pa singax singeh khaing pa ang singax singeh mai pa singax khaing pa ang singax, ¹¹ mai sonsang chix gau pex ceu pui Isarelax khankix ka gumlox beenli pa hoik sikah Siyiex ka kix khawmuik ka Mose." ¹² Mose krai ah nin ka Arun mai kawn simex nawh pa kawn deuk pa mawh Eliza mai Itama, "Teei krax tan phawng nghox ca im pa kawn deuk khaing krax tan pa gleeing ka ngu son Siyiex mai ih an kix tau mai pa ang sau susaix, hawt vung viang khu dee tan, mawh kheu an mawh pa kied singax singeh. ¹³ "Pex tak ih an khankix ka dee pa singax singeh, kheu hoik mawh an son maix, khawm kawn simex maix khankix, pa mawh krax tan pa gleeing ka ngu son Siyiex. In mawh gumlox beenli pa hoik tawm Siyiex ka aux." ¹⁴ Euk krax tan pa yang yeuh mai ba krax tan pa yaox maix ti ih dee pa singax tau mai kawn simex kawn bun tix. Mawh kheu an mawh son maix mai son kawn simex maix, pa pon kix khaing pa appong tix son krax tan pa nhim, pa kaoh khaing pui Isarelax. ¹⁵ Kix tak viex khawn ba krax tan pa yaog mai euk krax tan pa yang yeuh hoek tau mai khlawp bee krax tan pa gleeing ka ngu, sonsang mawh krax tan pa yang yeuh sivoe Simiang Siyiex mai an tak mawh cie maix, khawm cie kawn simex maix khankix, in mawh son pa caw pex ti pon leeing ju, awm gumlox pa hoik tawm Simiang Siyiex. ¹⁶ Khaix an Mose coca ti sawg ka pex mhaing son krax tan pa pluat ploi phimap mai nawh yaox ka hoik gleeing kix nawh tan, nawh song rhawm ka kawn simex Arun pa deuk an pa mawh Eliza mai Itama mai nawh ah nin, ¹⁷ "Pex lai ang ih krax tan son pa pluat ploi phimap ka dee pa singax singeh yuh ka mawx? awm hoik mawh ankix pa kied singax singeh, pa tawx Siyiex ka pex, sonsang klawm pex phimap cub pui hun khankix mai sonsang yuh pex krax khyox khaw mai krax pluat ploi phimap son kix sivoe Simiang Siyiex. ¹⁸ Jhak heue, pex ang nyang viex nham laig ka daux dee pa singax singeh, pex khaw ti ih nex tan an ka daux dee pa singax singeh, awm gumlox pa hoik tawm Aux." ¹⁹ Arun deeh ah nin ka Mose, "Kix hoik tan krax tan pa pluat ploi phimap tix daux in singaix mai krax tan pa gleeing ka sivoe Simiang Siyiex mai grawng ceu inkix hoik klup piang aux, phan aux hoik pon ti ih ka krax tan pa pluat ploi phimap an daux in singaix, khex mawh pa khaw caw ka sivoe ngai Siyiex lie?" ²⁰ Yam mhong Mose lox an, nawh koe krax fah rhawm ka heue.

¹ Simiang Siyiex ah nin ka Mose mai Arun, ² "Krai ka ceu pui Isarelax khankix ah nin, inkix mawh ceu totiag pa caw pex ti ih khaing totiag khankix pa koe piang haktiex, ³ can totiag pa koe gip pa jiah gip caong mai totiag pa deeh sai roeng ti khankix, pex tak pon ti ih. ⁴ Viang mawh nan pex tak ang pon ti ih totiag pa deeh sai roeng tix, totiag pa jiah gip caong pa mawh kala-uk, mawh kheu totiag pa deeh sai roeng tix pa ang jiah gip, mawh pa ang singax ka son pex, ⁵ Ghot pa deeh sai roeng tix, kheu ang gip caong kix jiah mawh pa ang singax ka son pex, ⁶ mai piet la pa deeh sai roeng tix kheu ang gip caong jiah, mawh pa ang singax ka son pex, ⁷ lig khankix viang gip jiah kawx, nawh ang deeh sai roeng tix, mawh pa ang singax son pex. ⁸ Nex totiag ceu in khankix pex tak ang pon ti ih mai ang pon ti hu teeh ka tokaux yum an, kix mawh pa ang singax son pex. ⁹ Inkix mawh pa pon pex ti ih khawmuik khaing totiag pa koe daux rawm, pa koe pruik, pa koe sibiak, can pa koe daux rawm sigrit sigra ang ah, daux rawm klawng khankix ang ah pex tak pon ti ih. ¹⁰ Viang mawh nan pa koe daux rawm sigrit sigra mai pa koe daux rawm klawng, pa ang koe pruik mai sibiak, pa im ju chix hu daux rawm, khawm can ceu pa im ju daux rawm khawmuik, mawh pa seeing son pex. ¹¹ An kix mawh pa seeing son pex mai pex tak ang pon ti ih nex an kix, viang mawh ka to yum, an kawx mawh pa seeing son pex. ¹² Can ceu pa koe daux rawm, pa ang koe pruik mai sibiak, tak mawh pa seeing son pex, ¹³ inkix tak mawh pa seeing, khaing daux ceu sim sai pa ang pex pon ti ih, pa mawh klang ting, klang preng mai klang krih, ¹⁴ klang teei ia mai klang cie khawm paox ceu nawh khankix, ¹⁵ lak mai paox ceu nawh khankix, ¹⁶ sim kala-uk, klang pon sawm, klang kax mai paox ceu nawh khankix, ¹⁷ plang plawh, sim tareei mai klang pet, ¹⁸ sim klang tareei, sim vampo mai klang preng, ¹⁹ klang lang gaoh, sim saoh mai paox ceu nawh khankix, gawx mai blak. ²⁰ Can ceu viag pa koe pruik pa chix mu ka caong pon khawn khawmuik, tak mawh pa seeing son pex. ²¹ Viang mawh nan, inkix tak mawh pa pon pex ti ih khaing can ceu viag pa koe pruik pa chix mu ka caong pon khawn, pa koe caong pa koe ba khankix, sonsang pon phoh kix ti piang tiex. ²² Pex tak pon ti ih sido nghox mai paox ceu nawh khankix, sido khaox glawm mai paox ceu nawh, tawng mai paox ceu nawh, sigra mai paox ceu nawh. ²³ Viang mawh nan can ceu viag pa koe pruik tang ceu, pa koe caong pon khawn tak mawh pa seeing son pex heue. ²⁴ "Inkix mawh pa kieh maix ang singax ka, can pui pa hu teeh ka to yum ankix, tak mawh pa ang singax tom hoek plak bo. ²⁵ Can pui pa viex to yum inkix mai tix, tak sidaux kraung tix mai nawh mawh pa ang singax tom hoek plak bo. ²⁶ Can totiag pa jiah gip caong, pa ang jiah gip caong ang ah, pa ang deeh sai roeng tix, ceu an khankix mawh pa seeing son pex, can pui pa hu teeh ka to yum an ku kaux, tak mawh pa seeing ka. ²⁷ Can totiag pa hu ka caong tix khaing daux sinax totiag khawmuik, pa koe caong pon khawn, mawh pa ang singax ka son pex, can pui pa hu teeh ka to yum an, tak mawh pa ang singax tom hoek plak bo. ²⁸ Can pui pa viex to yum ankix mai tix, tak yaox ti sidaux kraung tix mai nawh mawh pa ang singax tom hoek plak bo, ankix mawh pa ang singax son pex. ²⁹ "Ceu inkix kawx mawh pa ang singax son maix, khaing ceu pa chix mu mai pa mu ti hu piang tiex, pa mawh beei, kiang mai goe khawm paox ceu nawh, ³⁰ goe tawk kie, lai tang, lai lee, goe rang, goe rham. ³¹ Ankix mawh pa ang singax son pex, khaing sinax ceu pa chix mu chix hu, can pui pa hu teeh ka ceu pa hoik yum an khankix, tak mawh pa ang singax tom hoek plak bo. ³² Phan to yum an cod piang kraung ceu patix ang ah, an tak mawh pa ang singax ka, phan rau piang khaox pa shiao ang ah, piang kraung ceep ang ah, piang hak ang ah, piang chee khankix ang ah, ceu pa yuh ka mawx kawx, tak mawh pa ang singax, kraung an khankix tak yaox ti ce daux rawm mai an khankix tak mawh pa ang singax tom hoek plak bo, khaix an kraung khankix tak deeh singax. ³³ Phan to yum an cod ka daux aw tiex maix tak pah aw an max. Can ceu pa koe ka daux aw an khankix tak mawh pa ang singax, ³⁴ phan to yum an cod ka daux aw pa koe pa ih mai daux rawm nyaux, ceu an tak lih ti mawh pa ang singax mai rawm nyaux an tak mawh pa ang singax son maix. ³⁵ ceu pa hoik cod to yum an khankix ceeix ceeix kawx tak mawh pa ang singax, viang mawh ka tao ngu mai kiang ngu kawx caw ti yieh laux, an khankix tak mawh pa ang singax ka son pex. ³⁶ Viang mawh nan, dee lih rawm klawng khankix ang ah, rawm daux pa kaong pex ang ah, tak mawh pa singax, can pui pa hu teeh ka to yum an khankix ngie, tak lih ti mawh pa ang singax ka. ³⁷ Phan to yum an cod piang simie pa sang sum pex ceeix khaing, simie an kawn mawh pa singax. ³⁸ Viang mawh nan, phan to yum cod piang simie pa hoik ce hoik dum pex, an tak lih ti mawh pa ang singax son pex. ³⁹ Phan totiag pa chix pex tix ih yum, pui pa hu krox hu teeh ka to yum an, tak mawh pa ang singax tom hoek plak bo. ⁴⁰ Pui pa ih nex to yum an, tak yaox ti sidaux kraung ceep tix mai nawh tak mawh pa ang singax tom hoek plak bo. Pui pa viex to yum an hu kawx, tak yaox ti sidaux kraung ceep tix mai nawh tak mawh pa ang singax tom hoek plak bo. ⁴¹ Can ceu pa chix mu ti hu piang tiex khankix mawh pa seeing, pex tak ang pon ti ih ka. ⁴² Can ceu pa mu ti hu ka vaig tix mai can ceu pa hu ka caong pon khawn ang ah, can ceu pa koe caong haoh hun khaing ceu pa mu ti hu, pa chix mu ti hu piang tiex, ceu inkix pex tak ang pon ti ih, mawh kheu an khankix mawh ceu pa seeing. ⁴³ Pex tak ang pon ti yuh krax pa seeing ka tokaux tix, ka ceu pa chix mu chix hu tix ceu kawx, pex tak ang pon ti yuh tokaux tix seeing ka ceu an khankix, aux lhat pex seeing brai ka jao an. ⁴⁴ Aux mawh Simiang Siyiex pa mawh Simiang Siyiex pex. Mawh kheu nan, pex tak mawh pa singax, grawh grawng nawh Aux mawh pa singax, pex tak ang pon ti seeing brai ka jao ceu pa chix mu ti hu tix ceu kawx mai ka pa mu ti hu piang tiex khankix. ⁴⁵ Aux mawh Simiang Siyiex pa hoik viex pex lih hu khaing daux haktiex Ejiptux, sonsang mawh Aux Simiang Siyiex pex. Mawh kheu nan, pex tak mawh pa singax, mawh kheu mawh Aux pa singax singeh. ⁴⁶ In mawh grawng been son totiag mai sim sai khankix mai can ceu pa im ju pa koe daux rawm kuceu mai ceu pa chix mu ti hu piang tiex, ⁴⁷ Sonsang gwieh Aux ti deuh pa ang singax khaing sinax ceu pa singax mai sinax ceu pa pon pex ti ih mai ceu pa ang pex pon ti ih khankix heue.

¹ Simiang Siyiex ah nin ka Mose. ² "Krai ka ceu pui Isarelax khankix ah nin, phan bun nghe mai keh kawn simex, nawh tak mawh pa ang singax aliah singaix, awm yam hoek mee seeing nawh tak mawh pa ang singax. ³ Yam hoek daix singaix, tak yaox ti pat hak kawn simex an. ⁴ Khaix an, nawh tak baox yaox ti ot tixngoe loe ngaix glang deeh singax nham nawh, nawh tak ang pon ti hu krox hu teeh ka ceu pa singax tix ceu kawx. Nawh tak ang pon ti laig ka daux dee pa singax singeh, glang ang nawh nyang deeh naog singaix pa singax. ⁵ Phan nawh keh kawn bun, nawh tak mawh pa ang singax ra vang twah, awm yam ang mee seeing nawh nyang singax mai nawh tak baox deeh yaox ti ot tixgliah liah singaix glang sang deeh nham nawh. ⁶ Yam hoik deeh naog singaix singax nawh, son kawn simex nawh ang ah, son kawn bun ang ah, nawh tak viex kawn yung pa taug naog num hoek tix mu ka cao giex kaing li, son krax tan pa gleeing mai kawn sikaux keukie tix mu ang ah, sikaux tix mu ang ah, son krax tan pa pluat ploi phimap, ka diang siviex nyiex gox bwan man bang kum. ⁷ Cao giex kaing li tak tan ankix sivoe Simiang Siyiex mai yuh krax khyox khaw pluat ploi phimap son nawh mai nawh tak singax khaing pa lih nham tix. In mawh grawng been son bun, pa hoik keh kawn simex, kawn bun ang ah. ⁸ Phan nawh ang pon tan kawn yung tix mu khaix an nawh tak yaox ti viex sikaux ra mu, phan ang mawh nan, keukie ra mu hoek son krax tan pa gleeing tix mu mai son krax tan pa pluat ploi phimap tix mu. Mawh kheu nan, cao giex kaing li tak yuh krax khyox khaw pluat ploi phimap son kiex mai kiex tak mawh pa singax heue."

¹ Simiang Siyiex ah nin ka Mose mai Arun. ² Phan pui tix kaux koe krax saux uah ang ah, saux dao ang ah, saux muad piang hak nawh ang ah mai yam koe krax saux an piang hak tokaux nawh awm pa saux sipawg, kieh kix viex nawh hoek ka cao giex kaing li Arun, phan ang mawh nan, kieh hoek ka kawn simex nawh tix kaux kaux pa mawh cao giex kaing li. ³ Cao giex kaing li tak jhak krax saux pa koe piang hak nex nawh, phan hauk pa koe piang dee saux nawh lih ti mawh pa paing mai krax saux an raux khaing hak nex nawh, an mawh jhawm saux sipawg, khaix an cao giex kaing li tak jhak ka nawh mai tat nawh mawh pa ang singax. ⁴ Phan dee saux an mawh pa paing piang hak tokaux nawh mai ang raux khaing hak nawh mai hauk nawh kawx ang paing, khaix an cao giex kaing li tak gang kaw pa koe jhawm saux an ot nong nong been aliah singaix. ⁵ Cao giex kaing li tak jhak lia ka nawh, yam hoik naog daux aliah singaix mai phan jhawm saux an ang nyang tah piang hak nawh, cao giex kaing li tak baox deeh gang tix jhak lia nawh aliah ngaix. ⁶ Khaix an cao giex kaing li tak deeh baox jhak lia nawh, yam hoik hoek aliah singaix, phan jhawm saux an hoik lung mai ang nyang tah piang hak nawh, khaix an cao giex kaing li tak krai pao nawh mawh pa singax, in mawh ngie jhawm saux dao mai nawh mawh pa singax khaix hoik sidaux nawh kraung ceep tix. ⁷ Viang mawh nan, phan jhawm saux dao nawh hoik pon ti tah piang hak nawh, khaix hoik jhak lia cao giex kaing li ka pa hoik singax nawh, nawh baox deeh kieh cao giex kaing li jhak lia jhawm saux nawh. ⁸ Phan cao giex kaing li hoik yaox tah saux dao an piang hak nawh tete, khaix an cao giex kaing li tak krai pao nawh mawh pa ang singax, an mawh jhawm saux sipawg. ⁹ Pui mawx tix kaux kaux pa hoik koe jhawm saux sipawg, khaix an kix tak viex nawh hoek ka cao giex kaing li. ¹⁰ Cao giex kaing li tak jhak lia ka nawh mai jhawm saux muad an hoik paing piang hak nawh tete mai kieh hauk nawh lih ti paing mai nex nawh lih ti raoh ka dee saux muad an, ¹¹ an mawh jhawm saux sipawg pa prim piang hak tokaux cao nawh, cao giex kaing li tak krai pao nawh mawh pa ang singax mai ang lai gang nawh ot nong nong kheu mawh nawh pa ang singax. ¹² Phan jhawm saux sipawg an hoik naog piang kaw pa pon jhawm saux an khawmuik, jah ka kaing tom hoek ka caong mai yam hoek jhak lia cao giex kaing li nawh see dee mawx ang ah, ¹³ Khaix an, cao giex kaing li tak jhak lia nawh mai phan jhawm saux sipawg hoik pon ti tah ka tokaux nawh, nawh tak krai pao nawh pui pa pon jhawm saux an mawh pa singax, ankix hoik lih ti mawh pa paing piang nawh khawmuik, nawh mawh pa singax. ¹⁴ Viang mawh nan, yam deeh lih saux nex raoh ankix piang nawh yam mawx ang ah, tak deeh mawh pa ang singax ka. ¹⁵ Cao giex kaing li tak jhak lia ka nex saux raoh pa hoik lih an mai krai pao nawh mawh pa ang singax. Mawh kheu nex raoh an mawh pa ang singax, an mawx jhawm saux sipawg. ¹⁶ Phan nex raoh an deeh loh tix mai deeh tieh tix paing, nawh tak hoek ka cao giex kaing li, ¹⁷ cao giex kaing li tak jhak lia ka nawh mai phan jhawm saux nawh hoik lih ti mawh pa paing, khaix an cao giex kaing li tak krai pao nawh mawh pa singax, ka kaw pa hoik pon jhawm saux an nawh mawh pa singax. ¹⁸ Phan jhawm saux muad lih ti koe piang nex hak nawh mai phan deeh moi, ¹⁹ jhawm saux dao pa paing ang ah, jhawm saux pa dee raoh mai dee paing ang ah, koe ka dee saux muad an, khaix an nawh tak mawh pa jhi tix ka cao giex kaing li, ²⁰ mai cao giex kaing li tak jhak lia, phan yaox raux laig jhawm saux khaing daux hak kaux nawh mai phan hauk nawh deeh tieh ti mawh pa paing, cao giex kaing li tak krai pao nawh mawh pa ang singax, an mawh jhawm saux sipawg pa hoik lih khaing jhawm saux muad nawh. ²¹ Viang mawh nan, phan cao giex kaing li jhak lia ka an kix mai yaox ka ang hauk paing lai koe ka daux dee saux nawh mai hoik grai hu, khaix an cao giex kaing li tak gang nawh ot nong nong aliah singaix, ²² Phan jhawm saux an hoik tah piang kaux hak nawh khawmuik, cao giex kaing li tak krai pao nawh mawh pa ang singax, an mawh jhawm saux sipawg. ²³ Viang mawh nan, phan khaix rhoi dee saux an koe ka daux tix dah nong nong mai ang prung prang ti tah hu tang dah, an mawh rhoi khaix saux muad mai cao giex kaing li tak krai pao nawh mawh pa singax. ²⁴ "Phan dee saux khaix hax ngu koe ka tokaux nawh mai khaix hax an mawh dee saux dao mai lih ti raoh ang ah, paing ang ah, ²⁵ cao giex kaing li tak jhak lia ka an mai phan hauk pa koe ka dee saux dao an tieh ti mawh pa paing mai raux greem hak nawh, an mawh saux sipawg pa pon nawh khaing krax saux hax ngu, cao giex kaing li tak krai pao nawh mawh pa ang singax, an mawh jhawm saux sipawg. ²⁶ Viang mawh nan phan cao giex kaing li jhak lia ka an mai phan hauk paing nawh khankix ang koe ka daux dee saux dao mai dee saux an ang tie mawh pa raux greem hak mai hoik deeh grai, khaix an cao giex kaing li tak gang nawh ot nong nong aliah singaix. ²⁷ Cao giex kaing li tak deeh jhak lia ka nawh, yam hoek aliah singaix, phan saux an tah piang hak kaux nawh, khaix an cao giex kaing li tak krai pao nawh mawh pa ang singax, an mawh jhawm saux sipawg. ²⁸ Phan dee saux dao an kawn koe daux tix dah mai ang nyang tah piang hak kaux nawh mai hoik deeh grai, an mawh ag saux khaix hax ngu, cao giex kaing li tak krai pao nawh mawh pa singax, mawh ngie khaix rhoi saux nawh khaing pa hax ngu. ²⁹ Simex ang ah, bun ang ah, phan koe krax saux piang kaing nawh, phan ang mawh nan, piang hauk bheup nawh, ³⁰ khaix an cao giex kaing li tak jhak lia ka jhawm saux an mai phan jhawm saux raux ka greem hak nawh mai koe hauk lheung pa cie ka plak daux, khaix an cao giex kaing li tak krai pao nawh mawh pa ang singax, an mawh jhawm saux maux sipawg ka kaing nawh, phan ang mawh nan, ka bheup nawh. ³¹ Cao giex kaing li jhak lia jhawm saux maux an mai phan dee saux an ang tie raux ka hak kaux nawh mai hauk lheung kawx ang tie koe daux saux an, khaix an cao giex kaing li tak gang kaw pa koe jhawm saux maux an ot nong nong aliah singaix. ³² Yam hoik hoek ka daux aliah singaix, cao giex kaing li tak jhak lia ka jhawm saux nawh, phan jhawm saux maux ang nyang tah mai hauk lheung ang nyang koe ka daux nawh mai jhawm saux maux an ang nyang raux plak greem hak, ³³ nawh tak khlao hauk tix, viang mawh nan, nawh tak ang pon ti khlao ka dee koe jhawm saux maux an mai cao giex kaing li tak baox gang kaw pa hoik pon jhawm saux an ot nong nong aliah singaix. ³⁴ Yam hoik hoek daux aliah singaix, cao giex kaing li tak deeh jhak lia ka dee koe jhawm saux maux mai phan jhawm saux maux ang nyang tah piang hak kaux nawh mai ang raux ka greem hak nawh, cao giex kaing li tak krai pao nawh mawh pui pa singax, nawh tak sidaux kraung tix mai nawh mawh pa singax. ³⁵ Viang mawh nan, phan jhawm saux maux an deeh tah piang hak kaux nawh, khaix hoik singax nawh, ³⁶ cao giex kaing li tak deeh jhak lia ka nawh mai phan jhawm saux maux hoik tah piang hak kaux nawh cao giex kaing li tak ang lo ti jhak lia ka hauk lheung, nawh mawh pa ang singax. ³⁷ Phan jhawm saux maux lih ti koe tix dah ngie mai hauk lung kuah ka, jhawm saux maux an hoik pon tix moi, nawh mawh pa singax mai cao giex kaing li tak krai pao nawh mawh pa singax. ³⁸ Simex ang ah, bun ang ah phan koe jhawm saux dao ka hak tokaux nawh, pa mawh jhawm saux dao pa paing hak khankix, ³⁹ cao giex kaing li tak jhak lia ka nawh mai phan jhawm saux dao pa koe piang hak tokaux nawh, pa ang tie paing an mawh dao pa paing pa koe piang hak nawh mai nawh mawh pa singax. ⁴⁰ Phan pui mawx greeid hauk kaing khaing kaing nawh, an mawh pui pa pak kaing, viang mawh nan, nawh mawh pui pa singax. ⁴¹ Pui pa hoik greeid hauk kaing khaing piang dongre nawh, nawh mawh pui pa pak dongre, viang mawh nan, nawh mawh pui pa singax. ⁴² Phan khaix rhoi saux pa raoh mai pa paing koe piang kaing pak nawh ang ah, piang dongre nawh ang ah, an mawh jhawm saux sipawg pa lih piang kaing nawh mai piang dongre nawh. ⁴³ Khaix an cao giex kaing li tak jhak lia ka mai phan jhawm saux uah nawh raoh mai paing piang kaing pak nawh ang ah, piang dongre nawh ang ah, awm grang jhawm saux sipawg piang hak tokaux nawh, ⁴⁴ nawh mawh pui pa saux sipawg, nawh mawh pa ang singax, cao giex kaing li tak krai pao nawh mawh pa ang singax, jao jhawm saux pa koe piang kaing nawh. ⁴⁵ Yam in, kix tak riah kraung ceep pui pa koe jhawm saux sipawg an mai kieh nawh bhang kaing tix mai nawh tak kheem siyiep jheeh plak piang tix mai kok yo lox ti yuh nin, ang singax, ang singax, ⁴⁶ glang koe jhawm saux nawh, nawh tak mawh pa ang singax, nawh ang singax mai nawh tak yaox ti ot nong nong plak praix nyiex bang. ⁴⁷ Kraung pa hoik kawb jhawm saux sipawg ka pa mawh kraung hauk yung ang ah, kraung ceep man ang ah, ⁴⁸ viang mawh keei pa taing ang ah, maox pa sang taing ang ah, man ang ah, hauk yung ang ah, hak ang ah mai can ceu pa yuh ti ka hak ang ah, ⁴⁹ Phan jhawm saux an klai ang ah, raoh ang ah hoik koe piang kraung ceep ang ah, piang hak ang ah, viang mawh piang keei pa taing ang ah, maox pa sang taing ang ah mai kraung pa sang yuh ka hak ang ah, an mawh jhawm saux sipawg, tak mawh pa hu jhi tix ka cao giex kaing li. ⁵⁰ Cao giex kaing li tak jhak lia ka jhawm saux an mai deuh kraung pa koe jhawm saux an ot nong nong aliah singaix. ⁵¹ Yam hoek daux aliah singaix, nawh tak deeh jhak lia ka jhawm saux an, phan jhawm saux an hoik tah piang kraung ceep nawh, pa mawh keei taing ang ah, maox pa sang taing ang ah mai hak ang ah, can ceu kraung pa yuh ka hak ang ah, jhawm saux sipawg an mawh pa kieh nawh koe jhawm saux, an mawh pa ang singax. ⁵² Kraung ceep pa koe jhawm saux sipawg pa mawh keei pa taing ang ah, maox pa sang taing ang ah, hauk yung mai man ang ah, kraung ceep hak mai kraung pa yuh ka hak ang ah, mawh kheu koe jhawm saux sipawg piang nawh, an tak mawh pa gleeing ti ka daux ngu. ⁵³ Cao giex kaing li tak jhak lia mai phan jhawm saux sipawg an ang nyang pon ti tah piang kraung ceep khankix, pa mawh keei taing ang ah, maox pa sang taing ang ah mai piang kraung pa hoik yuh ti ka hak, ⁵⁴ khaix an cao giex kaing li tawx lox ka kix, sonsang sidaux kix ka kraung pa koe jhawm saux sipawg mai tak baox deeh deuh tix yaox kraung an kix aliah singaix. ⁵⁵ Khaix an cao giex kaing li tak jhak lia ka jhawm saux sipawg khaix hoik sidaux kix kraung tix mai phan jhawm saux sipawg an, ang nyang tieh loh tix, viang jhawm saux sipawg an ang nyang pon ti tah kudah kawx, an mawh pa ang singax mai mawh jhawm saux pa si-um ka plak daux ang ah, plak praix ang ah maix tak gleeing ti tik can ceu kraung ankix ka ngu. ⁵⁶ Phan cao giex kaing li hoik jhak lia mai phan jhawm saux sipawg an kawn deeh koe khaix sidaux kix kraung, khaix an nawh tak riah kraung ceep khankix, keei pa taing ang ah, maox pa sang taing ang ah mai kraung ceep pa yuh ka hak ang ah, ka dee koe jhawm saux an. ⁵⁷ Viang mawh nan, phan jhawm saux sipawg an kawn deeh koe piang kraung ceep, keei pa taing ang ah, maox pa sang taing ang ah mai can kraung hak ang ah, an mawh jhawm saux sipawg pa sang tah hu, pex tak gleeing kraung pa koe jhawm saux sipawg an ka daux ngu. ⁵⁸ Kraung ceep pa hoik sidaux maix, keei pa taing ang ah, maox pa sang taing ang ah mai can kraung pa yuh ti ka hak ang ah, phan jhawm saux sipawg hoik grai hu khaing piang kraung an khankix, khaix an nawh tak deeh sidaux kraung an ra bawg tix bawg mai an tak mawh pa singax. ⁵⁹ In mawh grawng beenli son jhawm saux sipawg pa koe piang kraung ceep, pa mawh hauk yung mai man khankix, viang mawh pa koe piang keei pa taing ang ah, maox pa sang taing ang ah mai can kraung pa yuh ka hak ang ah, sonsang krai pao mawh pa singax, phan ang mawh nan, sonsang krai pao mawh pa ang singax heue.

¹ Simiang Siyiex ah nin ka Mose, ² In tak mawh grawng beenli, son pui pa saux sipawg, khaix hoik hoek daux singaix pa singax nawh, kix tak viex nawh hoek ka cao giex kaing li, ³ cao giex kaing li lih hu ka praix nyiex bang mai cao giex kaing li jhak lia ka nawh, phan pui saux sipawg an hoik moi khaing jhawm saux sipawg, ⁴ Cao giex kaing li tak tawx lox sonsang teei kix kawn sim pa im mai pa singax ra mu, khaox Arit mai maox keei raoh rawt khawm rao taux im krim son pui pa sang deeh singax an. ⁵ Cao giex kaing li tawx lox tix, sonsang pah kix sim an tix mu, ka daux aw tiex pa hoik kin kix ti sau rawm im ka. ⁶ Cao giex kaing li teei sim pa kawn im an mai khaox Arit mai maox keei raoh rawt mai rao taux im krim cub khankix tau mai sim pa im ka daux rawm nham sim pa hoik pah kix ka daux rawm im pa hoik kin kix, ⁷ phruah an aliah bawg piang kaw pa sang deeh kieh singax khaing jhawm saux sipawg mai tak krai pao nawh mawh pa singax mai ploi sim im an kah haktiex praix dee yi. ⁸ Pui pa sang deeh kieh nawh mawh pa singax, tak yaox ti sidaux kraung ceep tix mai khlao hauk tix khawmuik mai heem tix, sonsang mawh nawh pa singax, khaix hoik an nawh tak laig ka daux nyiex bang mai nawh tak yaox ti ot ka plak praix nyiex gox cao nawh aliah singaix. ⁹ Yam hoik hoek ka daux aliah ngaix, nawh tak baox khlao hauk kaing tix mai hauk bheup khawm hauk ngai tix, nawh tak khlao ti tik hauk tix khawmuik, nawh tak sidaux kraung ceep tix mai heem ti mai nawh tak mawh pa singax. ¹⁰ Yam hoik hoek ka daux daix singaix, nawh tak teei kawn yung mhaing ra mu, pa ang koe dee mat dee ne mai kawn yung shiang tix mu, pa tak naog num, pa ang koe dee mat dee ne mai nawh tak baox teei phawng ngox ca im pa jiet mhawm, loe son khaing kao son ka daux tix Epha pa hoik klao ti mai bee, son krax tan phawng ngox ca im mai bee tix lawga. ¹¹ Khaix an cao giex kaing li pa yuh krax singax ka nawh, tak viex pui pa sang kieh nawh mawh pa singax hoek tau mai ceu an khankix sivoe Siyiex, ka daux diang siviex nyiex gox bwan man bang kum pui hun. ¹² Cao giex kaing li tak teei kawn yung mhaing an tix mu mai tan son krax tan pa pluat ploi pa lud tau mai bee tix lawga mai yang yeuh an khankix son krax tan yang yeuh sivoe Simiang Siyiex. ¹³ Khaix an nawh tak pah kawn yung an, ka dee pah nawh to tan pa pluat ploi phimap mai to tan pa gleeing ka dah dee pa singax singeh, mawh kheu krax tan pa pluat ploi pa lud mawh cie cao giex kaing li, awm krax tan son pa pluat ploi phimap, an mawh pa kied singax. ¹⁴ Cao giex kaing li tak teei nham tiblah, khaing krax tan pa deeh pluat ploi pa lud mai cao giex kaing li tak kraix nham an piang dawng yhaok plak dawm kaw pa sang deeh kieh mawh pa singax mai piang giien ting taix dawm nawh mai giien ting caong plak dawm nawh. ¹⁵ Cao giex kaing li tak teei bee tiblah, khaing daux tix lawga mai hieh ka daux tawm taix khawn gwiex tix. ¹⁶ Khaix an cao giex kaing li cub giien taix khawn dawm tix ka daux bee pa koe ka daux tawm tai plak gwiex mai nawh tak phruah bee an tiblah ka giien taix tix aliah bawg sivoe Simiang Siyiex. ¹⁷ Cao giex kaing li tak kraix bee pa kawn deuk daux tawm taix nawh tiblah piang dawng yhaok khawn dawm pui pa sang deeh singax an mai piang giien ting taix khawn dawm nawh, khawm piang giien ting caong khawn dawm nawh mai piang dee kraix nham krax tan pa pluat ploi pa lud. ¹⁸ Cao giex kaing li kraix bee pa kawn deuk an daux tawm taix tix piang kaing pui pa sang deeh kieh nawh mawh pa singax, mawh kheu nan, cao giex kaing li tak yuh krax khyox khaw pa pluat ploi son nawh sivoe Simiang Siyiex. ¹⁹ Khaix an cao giex kaing li tak tan krax tan pa pluat ploi phimap mai yuh krax pa khyox khaw mai krax pa pluat ploi son pui pa sang deeh kieh nawh mawh pa singax, khaing krax pa ang nawh nyang singax, khaix hoik ceu an khankix nawh tak pah ka tobrie krax tan pa gleeing. ²⁰ Cao giex kaing li tak tan krax tan pa gleeing mai krax tan phawng nghox ca im piang khu dee tan, mawh kheu nan, cao giex kaing li tak yuh krax khyox khaw mai krax pa pluat ploi son nawh mai nawh tak mawh pa singax. ²¹ Viang mawh nan, phan nawh mawh pa hot shia mai ang pon ti tawx ceu an khankix, khaix an tak teei kawn yung mhaing tix mu son krax tan pa pluat ploi pa lud, pa sang yang yheuh mai sonsang yuh krax khyox khaw mai krax pa pluat ploi son nawh mai tak teei phawng nghox ca im pa mhawm kao son tix son khaing tix Epha pa hoik klao tau mai bee, son krax tan phawng nghox ca im mai bee tix lawga, ²² mai sikaux ra mu ang ah, kawn keukie ra mu ang ah, son krax tan pa pon nawh ti tan, tix mu tak mawh son pa pluat ploi phimap mai an tix mu tak mawh son krax tan pa gleeing. ²³ Nawh tak viex an khankix hoek ka cao giex kaing li, yam hoik hoek ka daux daix singaix, son krax pa sang dee singax nawh, ka diang siviex nyiex gox bwan man bang kum pui hun sivoe Siyiex. ²⁴ Cao giex kaing li tak teei kawn yung pa tan nawh son krax tan pa pluat ploi pa lud mai bee tix lawga mai cao giex kaing li tak yang yheuh ankix, mawh krax tan pa yang yheuh sivoe Siyiex. ²⁵ Khaix an nawh tak pah ka kawn yung, krax tan pa pluat ploi pa lud mai cao giex kaing li tak teei nham krax tan pa pluat ploi pa lud tiblah mai kraix piang dawng yhaok khawn dawm pui pa sang deeh kieh nawh mawh pa singax mai piang giien ting taix khawn dawm, khawm piang giien ting caong khawn dawm. ²⁶ Cao giex kaing li tak hieh bee an khankix tiblah ka daux tawm taix khawn gwiex tix. ²⁷ Khaix an cao giex kaing li tak phruah bee an khankix tiblah ka giien taix khawn dawm tix, khaing pa koe ka daux tawm taix gwiex nawh aliah bawg sivoe ngai Simiang Siyiex. ²⁸ Cao giex kaing li tak kraix bee an khankix, pa koe daux tawm taix nawh tiblah, piang dawng yhaok khawn dawm pui pa sang deeh kieh nawh mawh pa singax an mai piang giien ting taix khawn dawm tau mai piang giien ting caong khawm dawm nawh mai piang dee hoik kraix kix nham krax tan pa pluat ploi pa lud. ²⁹ Cao giex kaing li tak kraix bee pa kawn deuk an, pa koe daux tawm taix cao nawh piang kaing pui pa sang deeh kieh nawh mawh pa singax mai nawh tak yuh krax khyox khaw mai krax pluat ploi son nawh sivoe Simiang Siyiex. ³⁰ Nawh tak tan sikaux tix mu ang ah, kawn keukie tix mu ang ah, awm pa pon tan nawh, ³¹ awm can pa pon tan nawh, tix mu tak mawh son krax tan pa pluat ploi phimap mai tix mu tak mawh pa tan son krax tan pa gleeing tau mai krax tan phawng nghox ca im, Mawh kheu nan, cao giex kaing li tak yuh krax pa khyox khaw mai krax pa pluat ploi son pui pa sang deeh kieh nawh mawh pa singax sivoe Simiang Siyiex. ³² In mawh son pui pa hoik kham jhawm saux sipawg, pa ang pon yuh sonsang singax tix awm pa koe grawng beenli heue." ³³ Simiang Siyiex ah nin ka Mose, ³⁴ "Yam hoik hoek pex ka daux haktiex Khanan pa tawx Aux ka pex mai phan jhawm saux sipawg koe ka daux nyiex tix lhang daux haktiex pa hoik kieh Aux pex pon ti cie, ³⁵ mai cao nyiex tak hoek ti krai ka cao giex kaing li ah nin, aux hoik yaox awm pa hoik koe jhawm saux sipawg tiblah ka daux nyiex aux ³⁶ Khaix an cao giex kaing li tak tawx lox sonsang grux gah kix kraung uik sivoe sang laig cao giex kaing li tix jhak lia ka jhawm saux sipawg an, can pa koe ka daux nyiex an khawmuik, tak ang pon ti yuh nawh mawh pa ang singax mai khaix hoik ceu an khankix cao giex kaing li tak laig ti jhak lia ka daux nyiex. ³⁷ Nawh tak jhak lia ka jhawm saux sipawg an mai phan jhawm saux sipawg hoik koe ka daux klawk ding nyiex, klai ang ah, raoh ang ah, viang mawh nan, hoik raux laig ka daux ding, ³⁸ khaix an cao giex kaing li tak lih plak praix nyiex ka daux diang siviex mai nawh tak nyeep ti deuh nyiex an aliah ngaix. ³⁹ Cao giex kaing li tak baox hoek ti jhak lia yam hoik hoek ka daux aliah ngaix mai phan jhawm saux sipawg an hoik tah piang ding nyiex, ⁴⁰ Khaix an cao giex kaing li tak tawx lox sonsang khut kix simaox an lih, pa koe jhawm saux sipawg mai kix tak teei ti tik ka dee pa ang singax ka plak praix veng. ⁴¹ Kix tak khut plak daux vung viang nyiex khawmuik mai phawng tiex pa hoik khut tix, tak khrawm ti tik ka dee pa ang singax plak praix veng. ⁴² Khaix an kix tak teei lon simaox tang dah mai sau ka daux dee pa hoik sivaoh kix simaox an khankix mai tak teei tiex ceu pa kraix mai deeh kap nyiex. ⁴³ Phan jhawm saux sipawg deeh baox lih ka daux nyiex, khaix hoik sivaoh kix lon simaox an hu dee singai mai khaix hoik khut kix ka daux nyiex mai khaix hoik dee cox kawb kix ding, ⁴⁴ khaix an cao giex kaing li tak deeh hoek ti jhak lia, phan jhawm saux sipawg an hoik pon ti tah ka daux nyiex, an mawh jhawm saux sipawg pa chix haok ka daux nyiex, an mawh pa ang singax. ⁴⁵ Nawh tak yieh nyiex, lon simaox, khaox mai can pa kab tix ka nyiex tak gah plak praix veng ka dee pa ang singax. ⁴⁶ Lheu khaing an can pui pa laig ka daux nyiex an, yam hoik nyeep kix ka mai nawh tak mawh pa ang singax tom hoek plak ponbo. ⁴⁷ Can pui pa it ka daux nyiex an, tak yaox ti sidaux kraung ceep tix mai can pui pa ih nyaux ka daux nyiex an, tak yaox ti sidaux kraung ceep tix. ⁴⁸ Phan cao giex kaing li laig ka daux mai jhak lia ka mai phan jhawm saux sipawg ang nyang tah ka daux nyiex, khaix hoik deeh cox kawb kix ka nyiex, khaix an cao giex kaing li tak krai pao nyiex an mawh pa singax, mawh kheu hoik grai jhawm saux sipawg. ⁴⁹ Nawh tak teei sim ra mu mai khaox Arit mai maox keei pa raoh rawt khawm rao lhax im krim sonsang deeh yuh nawh nyiex singax, ⁵⁰ Nawh tak pah sim tix mu ka daux aw tiex, pa hoik kin ti sau rawm im ka, ⁵¹ Nawh tak teei khaox Arit mai rao lhax im krim khawm maox keei pa raoh rawt mai sim pa im tix mu mai cub tau ka daux nham sim pa hoik pah tix, ka daux rawm im pa hoik kin ti deuh mai nawh tak phruah an khankix ka nyiex aliah bawg. ⁵² Nawh tak yuh nyiex an singax ka nham sim mai rawm im pa hoik kin mai sim pa im tau mai khaox Arit khawm rao lhax im krim mai keei raoh rawt. ⁵³ Khaix an nawh tak deeh ploi sim pa im an, ka plak praix veng ka daux kaung mai yuh krax pa khyox khaw mai krax pa pluat ploi son nyiex an mai nyiex an tak mawh pa singax." ⁵⁴ In mawh grawng beenli son jhawm saux sipawg kuceu mai son jhawm saux maux sipawg, ⁵⁵ son kraung ceep mai nyiex pa koe jhawm saux sipawg, ⁵⁶ jhawm saux muad mai jhawm saux dao khawm jhawm saux dao paing, ⁵⁷ sonsang chix tawng chix gwieh kix, yam ang singax mai yam singax, in mawh grawng beenli son jhawm saux sipawg heue.

¹ Simiang Siyiex ah nin ka Mose mai Arun, ² "Krai ka ceu pui Isarelax khankix ah nin, yam koe jhawm saux lih rawm seeing khaing tokaux simex, jhawm saux lih rawm seeing an mawh pa ang singax. ³ In tak mawh pa yuh nawh ang singax, kheu jao jhawm saux lih rawm seeing an, phan rawm seeing kawn lih khaing tokaux nawh ang ah, phan hoik hit khaing tokaux nawh ang ah, an mawh krax pa ang nawh singax. ⁴ Dee it pa hoik it pui pa koe jhawm saux lih rawm seeing an kawx mawh pa ang singax mai khaix ngawm nawh khankix kawx tak mawh pa ang singax. ⁵ Can pui pa hu krox hu teeh ka kraung it nawh, tak yaox ti sidaux kraung tix mai heem rawm mai nawh tak mawh pa ang singax tom hoek plakbo. ⁶ Kaw pa ngawm ka dee hoik ngawm pui pa koe jhawm saux an, tak yaox ti sidaux kraung ceep tix mai heem rawm mai nawh tak mawh pa ang singax tom hoek plakbo. ⁷ Kaw pa hu krox hu teeh ka tokaux kaw pa koe jhawm saux an, tak yaox ti sidaux kraung ceep tix mai heem rawm mai nawh tak mawh pa ang singax tom hoek plakbo. ⁸ Phan pui pa koe jhawm saux an hu baik ka pui pa singax, pui an tak yaox ti sidaux kraung ceep tix mai heem rawm mai nawh tak mawh pa ang singax tom hoek plakbo. ⁹ An bruk kaw pa koe jhawm saux an kawx, tak mawh pa ang singax. ¹⁰ Can pui pa hu krox hu teeh, ka kraung pa koe greem nawh tak mawh pa ang singax tom hoek plakbo, pui pa viex kraung ceu an hu, tak yaox ti sidaux kraung ceep tix mai heem rawm mai nawh tak mawh pa ang singax tom hoek plakbo. ¹¹ Phan pui pa koe jhawm saux an, hu krox hu teeh ka pui tix kaux kaux, yam ang nawh nyang khoek taix tix ka daux rawm, pui an tak yaox ti sidaux kraung ceep tix mai heem rawm mai nawh tak mawh pa ang singax tom hoek plakbo. ¹² Kraung aw tiex pa hoik krox hoik teeh kaw pa koe jhawm saux an, tak pah max mai tawg khaox, tak phak ka rawm. ¹³ Yam hoik moi kaw pa koe jhawm saux an khaing jhawm saux lih rawm seeing, nawh tak simin tix yaox tom hoek aliah singaix son krax pa singax nawh mai nawh tak sidaux kraung ceep tix mai heem rawm, pa lih hu, khaix an nawh tak mawh pa singax. ¹⁴ Yam hoik hoek daix singaix, nawh tak teei sikaux ra mu ang ah, kawn keukie ra mu ang ah mai viex hoek sivoe Simiang Siyiex, hawt daux diang siviex nyiex gox bwan man bang kum pui hun mai tawx an ka cao giex kaing li, ¹⁵ cao giex kaing li tak tan an son krax tan pa pluat ploi phimap tix mu mai tan an tix mu son krax tan pa gleeing mai cao giex kaing li tak yuh krax khyox khaw mai krax pa pluat ploi son nawh, sivoe Simiang Siyiex jao jhawm saux lih rawm seeing khaing nawh. ¹⁶ Phan simex lih rawm ngang, kieh nawh heem rawm mai nawh tak mawh pa ang singax tom hoek plakbo. ¹⁷ Kraung ceep mai kraung hak pa hoik kawm ka rawm ngang, tak mawh pa sidaux tix ka rawm mai an tak mawh pa ang singax tom hoek plakbo. ¹⁸ Yam it simex tau mai bun, phan rawm ngang nawh hoik pon ti lih, kiex khawm ra tak heem rawm, kiex mawh pa ang singax tom hoek plakbo. ¹⁹ Phan bun hoik hoek bawg yam lih nham mee tix, bun an tak mawh pa ang singax aliah ngaix mai can pui pa hu krox hu teeh ka bun an, tak mawh pa ang singax tom hoek plakbo. ²⁰ Can kraung it nawh glang lih nham mee nawh, tak mawh pa ang singax, can ceu pa ngawm nawh piang khankix kawx tak mawh pa ang singax. ²¹ Pui mawx ang ah pa hu krox hu teeh ka kraung it nawh, tak yaox ti sidaux kraung ceep tix mai heem rawm mai nawh tak mawh pa ang singax tom hoek plakbo. ²² Pui mawx ang ah pa hu krox hu teeh ka kraung pa hoik ngawm nawh piang kawx, tak yaox ti si daux kraung ceep tix mai heem rawm mai nawh tak mawh pa ang singax tom hoek plakbo. ²³ Yam hu krox hu teeh pui ka kraung pa koe ka dee it nawh ang ah, ka dee ngawm nawh ang ah, pui an tak mawh pa ang singax tom hoek plakbo. ²⁴ Phan simex it tau mai bun yam ang mee seeing bun an nyang singax, pui an tak mawh pa ang singax aliah singaix mai can kraung pa hoik it nawh ka kawx tak mawh pa ang singax. ²⁵ Phan bun tix kaux lih jhawm saux rawm seeing tom rheung khaing bawg yam yie hoek nham pa ang singax nawh awm ku bawg mai phan hoik luan khaing bawg yam yie lih nham pa ang singax nawh ang ah, glang singaix kawn hoek nham jhawm saux rawm seeing an, tak deuh nawh awm singaix hoek nham bawg yam pa ang singax nawh, nawh tak mawh pa ang singax. ²⁶ Dee it dee tum nawh khawmuik glang singaix lih jhawm saux rawm seeing nawh, tak mawh dee it dee tum pa ang singax mai can ceu pa ngawm nawh kawx tak mawh pa ang singax awm ang nawh singax. ²⁷ Can pui pa hu krox hu teeh ka ceu an tak mawh pa ang singax, nawh tak yaox ti sidaux kraung ceep tix mai heem rawm mai nawh mawh pa ang singax tom hoek plakbo. ²⁸ Phan bun an hoik singax khaing jhawm saux lih rawm seeing an, nawh tak simin tom hoek aliah singaix, khaix an nawh tak mawh pa singax. ²⁹ Yam hoek daix singaix, nawh tak teei sikaux ra mu ang ah, kawn keukie ra mu ang ah mai viex an hoek ka cao giex kaing li hawt daux diang siviex nyiex gox bwan man bang kum pui hun. ³⁰ Khaix an cao giex kaing li tak tan an tix mu son krax tan pa pluat ploi phimap mai an tix mu son krax tan pa gleeing mai cao giex kaing li tak yuh krax khyox khaw mai krax pa pluat ploi son bun an sivoe Simiang Siyiex, son jhawm saux lih rawm seeing pa ang singax khaing nawh. ³¹ Mawh kheu nan maix tak tang gwieh ceu pui Isarelax khankix khaing pa ang singax kix, phan ang mawh nan Aux lhat kix yum ka daux pa ang kix singax, yam kieh kix nyiex gox bwan man Aux seeing pa mawh ceu pa koe ka daux sinax kix." ³² In mawh grawng beenli son pui pa koe jhawm saux lih rawm seeing mai rawm ngang, nawh tak mawh pa ang singax, ³³ son bun pa hoik pon jhawm saux lih rawm seeing mai hoek bawg yam mee pa ang nawh singax, pa mawh simex ang ah, bun ang ah mai son pui pa hoik it tau mai bun pa ang singax heue.

¹ Simiang Siyiex ah nin ka Mose, khaix hoik yum kawn simex Arun ra kaux, kheu jao pa tan kiex ngu pa seeing sivoe Simiang Siyiex mai yum ka, ² Simiang Siyiex ah nin ka Mose, "Krai ka puxke maix Arun, son ang nawh nieb hoek daux pa kied singax singeh jheung jheung, ka plak daux man tie, sivoe dangngeung krax pa caux rhawm, pa koe piang teug bwan, phan ang mawh nan, Aux lhat nawh yum ka, grawh grawng nawh, Aux tak sang plak jhi tix ka daux paiawm, pa koe piang dawb teug bwan, ka dangngeung krax pa caux rhawm. ³ Arun tak laig ka daux dee pa singax singeh mai viex kawn mawie mhaing tix mu, son krax tan pa pluat ploi phimap mai kawn yung mhaing tix mu son krax tan pa gleeing. ⁴ Nawh tak ceep man sibex mhawm da plak daux pa singax singeh mai man khlax mhawm pa singax singeh piang tix, nawh tak rhawt nyoi tix ka maox rawd nyoi pa mhawm mai nawh tak ceep man lawk kaing pa mhawm, inkix mawh kraung ceep pa singax singeh, nawh tak heem rawm mai ceep kraung an khankix. ⁵ Nawh tak rieb ti teei kawn pex mhaing ra mu, khaing cub pui hun ceu pui Isarelax khankix, son krax tan pa pluat ploi phimap mai kawn yung mhaing tix mu son krax tan pa gleeing. ⁶ Arun tak tan mawie mhaing son krax tan pa pluat ploi phimap mai yuh krax pa khyox khaw mai krax pluat ploi son tokaux tix, khawm son kawn nyiex ma tix. ⁷ Nawh tak teei pex ra mu mai deuh ka sivoe Simiang Siyiex hawt diang siviex nyiex gox bwan man bang kum pui hun. ⁸ Arun tak yuh nieb son pex an ra mu, nieb tix mu mawh son Simiang Siyiex mai nieb an tix mu mawh son pa deeh ploi lih hu. ⁹ Arun tak viex pex son pa hoik caw nieb cie Simiang Siyiex hoek mai tan son krax tan pa pluat ploi phimap. ¹⁰ Viang mawh nan, nawh tak viex pex pa caw nieb pa pluat ploi an hoek khawm im ka sivoe Simiang Siyiex, sonsang yuh krax khyox khaw mai krax pa pluat ploi ka an mai deeh ploi lih hu ka daux tiag tu, mawh pex pa hoik pon ti luad luan. ¹¹ Arun tak viex mawie mhaing hoek son krax tan pa pluat ploi phimap mai yuh krax pa khyox khaw son cao tix mai son kawn nyiex ma nawh mai nawh tak pah mawie mhaing an, son krax tan pa pluat ploi phimap, pa mawh son cie nawh. ¹² Khaix an nawh tak teei pan ngu, pa hoik naog gaox ngu khaing plak khu dee tan sivoe Simiang Siyiex mai ceu pa bhawng nyawng sioe bhawng naog daux tawm taix tix mai viex laig plak daux man tie. ¹³ Sau nyawng bhawng piang ngu sivoe Simiang Siyiex, sonsang kheem taox nyawng bhawng an piang dangngeung krax caux rhawm, pa koe ka plak piang teug pa kham sakse, phan ang mawh nan lhat nawh yum ka. ¹⁴ Nawh tak teei nham mawie mhaing tiblah mai phruah piang dangngeung krax caux rhawm ka giien taix tix, ka plak lih singaix mai tak phruah nham tiblah sivoe dangngeung krax caux rhawm ka giien taix tix aliah bawg. ¹⁵ Khaix an nawh tak pah pex krax tan pa pluat ploi phimap son pui khawmuik mai viex nham laig ka plak daux man tie mai nawh yuh nham an khankix awm hoik yuh nawh ka nham mawie mhaing mai phruah piang dangngeung krax caux rhawm sivoe dangngeung krax caux rhawm. ¹⁶ Mawh kheu nan, nawh tak yuh krax pa khyox khaw mai krax pa pluat ploi, son dee pa singax singeh, kheu jao ang ceu pui Isarelax khankix singax mai kheu krax lud kix, khawm son phimap kix khawmuik. Nawh tak yuh krax pa khyox khaw mai krax pa pluat ploi son nyiex gox bwan man bang kum pui hun, pa kawn koe sinax kix kheu ang kix nyang singax. ¹⁷ Jah yam laig Arun ti yuh krax khyox khaw mai krax pluat ploi ka dee pa singax singeh tom hoek bawg yam lih nawh plak praix son kawn nyiex ma nawh mai son cup pui hun ceu pui Isarelax khankix ka daux nyiex gox bwan man, ang pon ti kieh pui ot ka daux tix kaux kawx. ¹⁸ Nawh tak lih hu ka khu dee tan sivoe Simiang Siyiex mai yuh krax khyox khaw son an, nawh teei nham mawie mhaing tiblah mai nham pex mhaing tiblah mai kraix piang rung khu dee mai hawt vung viang tan. ¹⁹ Phruah nham tiblah piang khu dee tan aliah bawg ka giien taix tix mai kieh mawh pa singax mai kieh ceu pui Isarelax khankix singax khaing pa ang singax. ²⁰ Yam hoik yuh Arun krax khyox khaw mai krax pluat ploi son dee pa singax singeh, son nyiex gox bwan man bang kum pui hun mai khu dee tan nawh tak viex pex pa im an hoek, ²¹ Arun tak deuh taix tix khawm ra khawn piang pex kawn im an mai krai doh ka grawng phimap ceu pui Isarelax khankix mai krax pa lud kix khawmuik, pa dex mai phimap kix khawmuik mai nawh tak plee ceu an khankix piang kaing pex mai kieh pui pa hoik laug kix viex pex an hu ka daux tiag mai ploi lih hu dee singai. ²² Pex an tak klawm phimap kix khawmuik mai hu plak ang pui ot mai nawh tak ploi pex an ka daux tiag. ²³ Arun tak laig ka daux nyiex gox bwan man bang kum pui hun mai peeik sibex man mhawm pa ceep tix, yam laig nawh ka daux dee pa singax singeh mai prah an tan. ²⁴ Nawh tak heem rawm, ka daux dee pa singax singeh mai ceep kraung tix mai lih plak praix mai tan krax tan pa gleeing son tix mai krax tan pa gleeing son pui hun khankix yuh krax pa khyox khaw mai krax pa pluat ploi son tix mai son pui khankix. ²⁵ Nawh tak gleeing khlawp bee son krax tan phimap piang khu dee tan. ²⁶ Pui pa hu ploi ka pex pa pon krax pa luad luan an, tak sidaux kraung ceep tix mai heem tokaux tix ka daux rawm, khaix an nawh tak pon tix laig ka daux nyiex bang. ²⁷ Nham mawie mhaing mai nham pex pa hoik viex kix laig plak daux dee pa singax singeh, sonsang yuh kix krax khyox khaw mai krax pluat ploi, nawh tak deeh viex an kix lih hu plak praix nyiex bang mai tak gleeing hak, nex mai roeng khankix ka daux ngu. ²⁸ Pui pa hu gleeing ka ceu an khankix, tak sidaux kraung ceep tix mai heem tokaux tix, khaix an nawh tak pon tix laig ka nyiex bang. ²⁹ In mawh grawng beenli son pex leeing ju, yam hoek ka daux khix aliah haok khix kao ngaix, pex tak twah pa ih, viang mawh kawn meung haktiex cao pex ang ah, nyo sinie pa hoek ti peung sinax pex tivud ticu ang ah, ka daux singaix an tak ang pon ti yuh kaing tix ceu kawx. ³⁰ Grawh grawng nawh ka daux singaix an, cao giex kaing li tak yuh krax khyox khaw mai krax pluat ploi son pex, sonsang singax pex khaing phimap sivoe Simiang Siyiex. ³¹ An mawh singaix twah, sonsang laux lee pex tix mai twah pa ih, an mawh grawng beenli son pex leeing ju. ³² Cao giex kaing li pa hoik pon beeh glawm, pa hoik appong tokaux tix son kaing jhaw cao giex kaing li pa hoik plud tang keeing nawh, nawh tak yuh krax khyox khaw mai krax pluat ploi mai nawh tak ceep man sibex mhawm pa singax singeh. ³³ Khaix an nawh yuh krax khyox khaw mai krax pluat ploi son dee pa kied singax singeh mai nawh tak yuh krax khyox khaw mai krax pluat ploi son nyiex bwan man bang kum pui hun mai son khu dee tan, nawh tak yuh krax khyox khaw mai krax pluat ploi son cao giex kaing li khankix, khawm son cub pui hun khawmuik. ³⁴ In tak mawh grawng beenli ka son pex leeing ju, sonsang yuh pex krax khyox khaw mai krax pluat ploi, son ceu pui Isarelax khankix mai son phimap kix khawmuik tix num tix bawg. Mose hawt yuh awm gumlox pa hoik tawm Simiang Siyiex heue.

¹ Simiang Siyiex ah nin ka Mose, ² "Krai ka Arun mai kawn simex nawh khankix mai ka ceu pui Isarelax khankix ah nin, in mawh gumlox pa hoik tawx Simiang Siyiex. ³ Phan pui Isarelax khankix tix kaux kaux pah mawie, yung, pex ang ah ka daux nyiex bang, phan ang mawh nan, ka praix nyiex bang, ⁴ mai phan ang viex ceu an hoek ka daux diang siviex nyiex gox bwan man bang kum pui hun, sonsang tan ka Simiang Siyiex, sivoe nyiex gox bwan man Simiang Siyiex, tak klup nham phimap an piang pui an, mawh kheu hoik kieh nawh nham lih, kix tak tik nawh khaing paox pui ceu nawh, ⁵ ceu pui Isarelax khankix, tak deeh viex krax pa appong kix ti tan, daux tiag daux kaung mai kix tak viex khankix hoek hawt diang siviex nyiex gox bwan man bang kum pui hun ka cao giex kaing li mai tan an khawmuik son krax tan pa nhim ka Simiang Siyiex. ⁶ Cao giex kaing li tak phruah nham piang khu dee tan Simiang Siyiex, hawt diang siviex nyiex gox bwan man bang kum pui hun mai gleeing khlawp bee son krax tan pa sioe bhawng ka Simiang Siyiex. ⁷ Kix tak ang lai baox yaox ti tan krax pa appong ka phicaox phicaig mai ang lai yaox ti lud vao mai paox tix, in tak mawh grawng beenli leeing ju son kix ka doeh ru kix. ⁸ Maix tak ah nin ka kix, can pui pa kaoh khaing nyiex ma ceu pui Isarelax khankix ang ah, nyo sinie pa ot sinax pex ang ah, yam tan kix krax tan pa gleeing mai krax tan pa appong, ⁹ ang viex ceu an khankix hoek hawt diang siviex nyiex gox bwan man bang kum pui hun, sonsang tan ka Simiang Siyiex, pui tak tik nawh khaing paox pui ceu nawh. ¹⁰ Can pui daux nyiex ma ceu pui Isarelax khankix ang ah, nyo sinie pa ot sinax pex ang ah, phan nawh ih nham Aux tak veeh pakngai ti khaing pui an pa ih nham mai Aux tak tik nawh khaing paox pui ceu nawh. ¹¹ Mawh kheu ju pa im koe ka daux nham mai Aux hoik tawx an ka pex piang khu dee tan, sonsang mawh pa yuh krax pa khyox khaw mai krax pluat ploi son ju pex, grawh grawng nawh an mawh nham pa yuh krax pa khyox khaw mai krax pa pluat ploi son ju. ¹² Mawh kheu nan, Aux hoik ah nin ka ceu pui Isarelax khankix, pui mawx ang ah ka daux pex tak ang pon ih nham mai nyo sinie pa ot mai pex kawx tak ang pon ti ih nham. ¹³ Ceu pui Isarelax khankix ang ah, nyo sinie pa ot sinax pex ang ah, hu leue totiag mai pon sim ang ah sonsang ih an, nawh tak teei ti tik nham mai kheem ka phawng tiex. ¹⁴ Grawh grawng nawh, nham mawh ju son tokaux khawmuik, kheu mawh nham pa priex jhung ju nawh, mawh kheu nan, Aux ah nin ka ceu pui Isarelax khankix, pex tak ang pon ti ih nham pa kaoh khaing tokaux tix ceu kawx, mawh kheu ju pa im tokaux khawmuik, koe ka daux nham, can pui pa ih ka nham tak mawh pa teei ti tik. ¹⁵ Pui ku kaux pa ih ka nex to pa tang yum ang ah, nex pa hoik kiied totiag ang ah, viang nawh mawh pui pa keh daux haktiex cao pex ang ah, nyo sinie ang ah, nawh tak yaox ti sidaux kraung ceep tix mai heem rawm mai nawh tak mawh pa ang singax tom hoek plakbo, khaix an nawh tak mawh pa singax. ¹⁶ Viang mawh nan, phan nawh ang sidaux, ang heem tix, nawh tak kham geu ka phimap tix heue.

¹ Simiang Siyiex ah nin ka Mose, ² "Krai ka ceu pui Isarelax khankix ah nin, Aux mawh Simiang Siyiex, pa mawh Siyiex pex. ³ Pex tak ang pon ti yuh awm jhawm pa hoik yuh pex ka daux meung Ejiptux, ka dee hoik ot pex mai pex tak ang pon ti yuh jhawm pa hoik yuh pex, ka daux meung Khanan dee viex Aux pex hoek, pex tak ang pon ti hawt been cie kix. ⁴ Pex tak hawt lox tat jhawm prawng Aux mai hawt grawng lawng khaix beenli krax ot krax koe Aux mai hu ka daux beenli an khankix. Aux mawh Simiang Siyiex, pa mawh Siyiex pex. ⁵ Mawh kheu nan pex tak priex ti hawt gumlox beenli Aux mai lox tat jhawm prawng Aux, phan pui tix kaux kaux hawt ti yuh awm an, nawh tak im ju ka, Aux mawh Simiang Siyiex. ⁶ Pex tak ang pon ti dex dawd mai paox ru tix, tix kaux kawx, son ang pex pon plih tokaux kakaong nawh, Aux mawh Simiang Siyiex. ⁷ Maix tak ang pon ti yuh krax kaig tua ka keeing tix mai krax kaig tua ka miex tix maix tak ang pon ti plih tokaux kakaong krax pa kaig tua ka miex tix mai lud vao ka nawh, kheu mawh nawh miex maix. ⁸ Maix tak ang pon ti plih tokaux kakaong miex seeb tix mai lud vao ka nawh, an mawh krax pa kaig tua keeing maix. ⁹ Krax pa kaig tua pux bun maix mai puxke bun maix pa mawh kawn bun keeing maix ang ah, kawn bun miex maix ang ah, viang kix mawh pa keh ka daux nyiex ang ah, dee mawx ang ah maix tak ang pon plih tokaux kakaong pa kaig tua kix. ¹⁰ Krax pa kaig tua kawn saux bun maix, plak kawn simex ang ah, kawn saux bun plak kawn bun ang ah mai tak ang pon ti plih tokaux kakaong pa kaig tua kix, mawh kheu cie kix mawh krax pa kaig tua son maix. ¹¹ Kawn bun pa hoik pon keeing maix khaing moeng tix, hoik mawh nan maix, maix tak ang pon ti plih tokaux kakaong krax pa kaig tua nawh. ¹² Maix tak ang pon ti plih tokaux kakaong pa kaig tua nan keeing maix, nawh mawh pa dex mai ru nex nham keeing maix. ¹³ Maix tak ang pon ti plih tokaux kakaong pa kaig tua puxke bun miex tix, mawh kheu bun an mawh pa dex ru nex nham miex maix. ¹⁴ Maix tak ang pon ti kieh keeing ting tix, koe krax kaig tua mai ang pon ti dex dawd mai moeng nawh, kheu mawh nawh miex ting maix. ¹⁵ Maix tak ang pon ti plih tokaux kakaong pa kaig tua mun tix, nawh mawh moeng kawn simex maix, maix tak ang pon ti plih tokaux kakaong pa kaig tua nawh. ¹⁶ Maix tak ang pon ti plih tokaux kakaong pa kaig tua moeng puxke tix mai moeng pux tix, an mawh krax pa kaig tua puxke maix khawm pux maix. ¹⁷ Maix tak ang pon ti plih tokaux kakaong pa kaig tua bun tix kaux mai kawn bun nawh maix tak ang pon ti teei kawn saux bun pa keh khaing kawn simex nawh ang ah, kawn saux bun puxke khaing kawn bun nawh ang ah, son pa sang plih tokaux kakaong pa kaig tua nawh, kix mawh pa dex mai ru nex nham nawh, in mawh pa seeing brai. ¹⁸ Maix tak ang pon ti plih tokaux kakaong ka pux o moeng maix mai ang pon teei ti moeng ka kiex yam kawn im ju moeng maix. ¹⁹ Maix tak ang pon ti dex dawd tau mai bun, sonsang plih tokaux kakaong mai krax pa kaig tua kiex, yam kawn lih nham mee kiex. ²⁰ Maix tak ang pon ti it tau mai moeng paox plawg tix, sonsang yuh maix tokaux tix seeing brai. ²¹ Maix tak ang pon ti kieh doeh ru tix, tix kaux kawx, hu krub siyiex Mulawk ka ngu maix tak ang pon ti kieh ceu kaux Siyiex maix, mawh pa seeing brai, Aux mawh Simiang Siyiex. ²² Maix tak ang pon ti it tau mai paox simex tix mai lud ka nawh, awm lud vao maix ka bun, an mawh pa seeing brai. ²³ Maix tak ang pon ti lud vao ka totiag, sonsang kieh maix tokaux tix seeing brai, bun kawx tak ang pon tix cung sivoe totiag sonsang lud vao tau, in mawh krax pa lud loe tete. ²⁴ Paw doh kieh tokaux cao pex seeing brai tau mai ceu in khankix. Grawh grawng nawh kheu jao inkix khawmuik, ceu pui pa hoik grheu Aux kix lih hu khaing plak sivoe ngai pex khankix, hoik seeing brai ka ceu in. ²⁵ Meung haktiex kix hoik seeing brai, mawh kheu nan, Aux tak hoek mai ciyang ka phimap kix mai haktiex tak hao ti tik kawn praix pa ot baoh an khankix. ²⁶ Mawh kheu nan, pex tak hawt gumlox beenli Aux mai lox tat jhawm prawng Aux mai pex tak ang pon ti lud ka pa seeing brai in khankix tix ceu kawx mai pui ceu pex tix kaux kaux ang ah, nyo sinie pa ot sinax pex ang ah, tak ang pon ti lud ka an khankix. ²⁷ Grawh grawng nawh can pui pa hoik ot sivoe pex ka daux haktiex an, hoik yuh pa seeing brai inkix khawmuik, mawh kheu nan haktiex hoik seeing brai ka. ²⁸ Aux lhat haktiex deeh hao ti tik pex, yam yuh pex krax pa seeing brai, awm hao haktiex ti tik ceu pui pa hoik ot sivoe pex khankix. ²⁹ Pui pa lud ka pa seeing brai in khankix mai pui pa lud ka ceu an tak mawh pa teei ti tik nawh khaing daux sinax pui ceu nawh. ³⁰ Mawh kheu nan, pex tak priex ti hawt beenli Aux, son ang pex lud ka pa seeing brai in khankix, pa hoik lud kix sivoe pex mai paw doh kieh tokaux pex seeing brai ka ceu an, Aux mawh Simiang Siyiex pex heue.

¹ Simiang Siyiex ah nin ka Mose, ² Krai ka cub pui hun ceu pui Isarelax khankix ah nin, pex tak mawh pa singax singeh, kheu mawh Aux Simiang Siyiex pex pa singax singeh. ³ Pex ku kaux tak yungyi ka miex keeing tix mai priex ti hawt singaix twah Aux, Aux mawh Simiang Siyiex pex. ⁴ Paw doh veeh ti krub riang grang mai paw raug ti yuh riang grang siyiex khankix son tokaux pex awx. Aux mawh Siyiex, pa mawh Simiang Siyiex pex. ⁵ Phan pex tan krax pa appong son krax tan pa nhim ka Simiang Siyiex, pex tak tan an khankix, sonsang mawh pa pon rieb ti teei. ⁶ An tak mawh pa ih ka daux singaix tan pex mai singaix khaix mai phan ankix kawn deuk tom hoek loe singaix, tak gleeing ti tik ka daux ngu. ⁷ Phan pex ih an khawmuik, yam hoek daux loe singaix, an mawh pa seeing brai, tak mawh pa ang pon ti rieb ka. ⁸ Pui pa ih an khankix tak yaox ti kham geu phimap tix, mawh kheu hoik yuh nawh krax pa seeing brai, ka krax tan pa singax singeh cie Simiang Siyiex mai tak tik pui an khaing pui ceu nawh. ⁹ "Yam vawg pex nghox daux kaung tix, pex tak ang pon ti vawg pa koe daux kaung khawmuik, pex tak ang pon ti khrawm nghox pa cod pa kawn deuk khaix tix khankix. ¹⁰ Maix ang pon ti kloi pieh plix siiet tix khawmuik khaing daux sipeem plix siiet maix ang pon ti khrawm plix siiet, pa cod pa rau khaing sipeem plix siiet tix maix tak prah son pui hot shia mai nyo sinie, Aux mawh Siyiex pa mawh Simiang Siyiex pex. ¹¹ Maix ang pon ti briex, ang pon ti sikah lox pa ang mawh ang meh mai ang pon tix pie lhen ka paox tix, tix kaux hoik tix kaux. ¹² Maix ang pon ti tiextu pa ang mawh ang meh ka daux ceu kaux Aux maix tak ang pon ti yuh ceu kaux Siyiex maix mawh pa seeing, Aux mawh Simiang Siyiex. ¹³ Maix ang pon ti kheem gut ka paox plawg tix mai ang pon ti tud rhim ka kraung khrai nawh, mau ngawh riang cang, pui pa vai maix nawh yuh kaing khankix, tak ang pon ti koe ka maix leeing sawm tom hoek plak ponngawb. ¹⁴ Maix ang pon ti jhax lawg ka pui pa lheet mai ang pon ti deuh ceu pa si deeing caong sivoe pui pa dug ngai maix tak koe krax lhat graung ka Siyiex maix, Aux mawh Simiang Siyiex. ¹⁵ Pex ang pon ti yuh pa ang rahsee, ka daux krax pa prawng see maix ang pon ti nunai pui pa hot shia, awm an maix ang pon ti jhak ka pakngai pui ting lhaong mai tak prawng see ka paox plawg tix, ka daux pa rahsee. ¹⁶ Maix ang pon ti hu lailing salao ti krai grawh grawng pui, daux sinax pui ceu maix, maix ang pon keud ti yuh pa koeng riang ciang khoi mai kieh paox plawg tix yum ka, Aux mawh Simiang Siyiex. ¹⁷ Maix ang pon ti koeng ka puxaik tix daux rhawm ti maix tak sidiex gau ka paox plawg tix mai son ang maix kham geu phimap kheu jao nawh. ¹⁸ Maix ang pon ti pawk bix mai ang pon ti koeng riang ciang khoi ka kawn praix pui ceu maix khankix maix tak moh ka paox plawg tix, awm moh maix tokaux tix, Aux mawh Simiang Siyiex. ¹⁹ Maix tak priex ti hawt gumlox beenli Aux maix ang pon ti kieh tobrie pa eei tix lih ti koe kawn tau mai pa ang mawh paox ceu nawh maix ang pon ti ruat simie pa hoik khon tix tau ka daux kaung maix, maix ang pon ti ceep kraung pa khao ti ka keei mai hauk yung. ²⁰ Phan pui it mai bun siliex pa hoik chawk pui mai pa ang nyang pon ti deeh taoh deeh ploi ka nawh, son grawng ceu inkix kiex khawm ra tak pon pa ciyang, viang mawh nan, tak ang pon ti pah kiex yum kheu jao mawh bun siliex pa ang nyang pon krax pa luad luan. ²¹ Simex an tak yaox ti viex kawn yung mhaing tix mu son krax tan pa pluat ploi pa lud hoek ka Simiang Siyiex hawt diang siviex nyiex gox bwan man bang kum pui hun. ²² Cao giex kaing li tak yuh krax pa khyox khaw mai krax pa pluat ploi son nawh mai kawn yung mhaing krax tan pa pluat ploi pa lud sivoe Simiang Siyiex, son phimap pa hoik yuh nawh mai phimap pa hoik yuh nawh tak pon krax pa pluat ploi son nawh. ²³ Yam hoek pex ka daux Khanan mai yam hoik sum pex khaox plix pa ih kuceu khawmuik, khaix an pex tak deuh tix tawng khaox plix cie pex mai deuh awm khaox pa ang nyang pat hak, ka daux loe num plix khaox an tak awm pa ang pat hak tix ka son pex, an tak mawh pa ang pex pon ti ih ka. ²⁴ Yam hoek ka daux num pon, plix khaox an khawmuik tak mawh pa singax singeh mai son pa yaogyaw ka bwanson Simiang Siyiex. ²⁵ Yam hoek ka daux num phwan, pex tak pon ti ih plix nawh, phan pex yuh nan khaox an tak deeh nie plix son pex, Aux mawh Siyiex pa mawh Simiang Siyiex pex. ²⁶ Pex ang pon ti ih ceu pa koe tau mai nham, pex ang pon ti gau tix ka ceu pa ang mawh ang meh, pex ang pon ti tawx sibawk chawk jhai. ²⁷ Pex ang pon ti khlao hauk kaing tix vung viang kaing tix, pex ang pon ti khlao ka hauk bheup tix. ²⁸ Pex ang pon ti pat ka nex hak tix son pui pa yum, pex ang pon ti breeh nam meug piang tix. Aux mawh Simiang Siyiex. ²⁹ Paw kieh kawn bun maix laux jhawm, sonsang lih nawh ti mawh bun coh kaux, phan yuh nan pui haktiex khawmuik tak lih ti mawh pa lud vao mai pa caox caig khankix tak lih naog piang haktiex. ³⁰ Pex tak priex singaix twah Aux mai yungyi ka dee pa singax singeh Aux, Aux mawh Simiang Siyiex. ³¹ Paw hu sawg ka pui chix yuh phi mai pui chix yuh simeed pa dex mai phicaox mai paw doh kieh tokaux tix seeing brai ka ceu an, Aux mawh Simiang Siyiex pa mawh Siyiex pex. ³² Maix tak kaoh cung sivoe ngai pui kuad paing hauk kaing mai yungyi ka kuad riex ju mai koe krax lhat graung ka Siyiex maix, Aux mawh Simiang Siyiex. ³³ Phan nyo sinie hoek ti peung mai pex ka daux haktiex pex, pex ang nieb pon ti yuh krax pa ang khaw ang jiet ka nawh, ³⁴ nyo sinie pa ot sinax pex, tak kieh nawh awm pui pa keh daux sinax pex, pex tak moh nawh awm moh pex ka tokaux tix, grawh grawng nawh, pex hoik sax mawh nyo sinie ka daux meung Ejiptux, Aux mawh Siyiex pa mawh Simiang Siyiex pex. ³⁵ Pex tak ang pon ti yuh pa ang rahsee ka daux krax prawng ca, ka pa tiag pex plak lang, ka pa ciang pex ngai jiang mai ka pa tong pex ka kraung tong pa koe pex khankix kawx, mawh awm an. ³⁶ Pex tak koe jiang yoi pa rahsee, kla jiang pa rahsee, phliex tong pa rahsee mai jiang pa rahsee, Aux mawh Siyiex pa mawh Simiang Siyiex pex, pa hoik viex pex lih khaing meung Ejiptux. ³⁷ Mawh kheu nan, pex tak priex ti hawt gumlox beenli Aux khawmuik mai lox tat jhawm prawng Aux khawmuik, Aux mawh Simiang Siyiex heue."

¹ Simiang Siyiex ah nin ka Mose, ² "Krai ah nin ka ceu pui Isarelax khankix, can ceu pui Isarelax ang ah, nyo sinie pa hoek ot sinax ceu pui Isarelax ang ah, kaw pa hu tawx doeh ru tix ka siyiex Molawk ang ah, nawh tak pon krax yum tete, pui haktiex khankix tak dheem nawh ka simaox. ³ Aux tak veeh pakngai ti khaing nawh mai teei ti tik nawh khaing daux ceu pui nawh, kheu hoik tawx nawh doeh ru tix tiblah ka siyiex Molawk sonsang yuh nawh dee pa singax singeh Aux seeing brai mai kieh ceu kaux pa singax singeh Aux, mawh pa nunai giex going. ⁴ Phan pui haktiex khankix mox ngai tix ka pui pa hu tawx doeh ru tix ka siyiex Molawk mai phan kix ang pah ka nawh. ⁵ Aux tak veeh pakngai tix khaing pui an mai kawn nyiex ma nawh mai Aux tak teei ti tik nawh khaing daux ceu pui nawh, khawm can pui pa yuh pa lud vao, tau mai siyiex Molawk. ⁶ Kaw pa hu sawg hu peung ka pui pa chix yuh phi mai pa chix yuh simeed pa dex mai phicaox, Aux tak veeh pakngai tix khaing kaw an mai teei ti tik nawh khaing ceu pui nawh. ⁷ Mawh kheu nan, kieh tokaux pex singax mai mawh pa singax singeh, grawh grawng nawh Aux mawh Siyiex pa mawh Simiang Siyiex pex. ⁸ Pex tak priex ti hawt gumlox beenli Aux mai hawt ti yuh, Aux mawh Simiang Siyiex pex, pa kieh pex singax singeh. ⁹ Can pui pa jhax lawg ka keeing tix ang ah, miex tix ang ah, tak kieh nawh yum tete, mawh kheu jhax lawg nawh ka miex keeing tix, nham phimap nawh tak hoek piang nawh. ¹⁰ Pui pa lud vao ka moeng pui tang kaux mai pui pa lud vao mai moeng paox plawg tix, tak yum tete, khawm simex pa lud mai bun pa koe krax lud an, ¹¹ pui mawx it tau mai moeng keeing tix, mawh pui plih tokaux kakaong pa kaig tua keeing tix, kiex khawm ra tak yum tete, nham phimap kiex tak hoek piang kiex. ¹² Phan pui tix kaux it mai mun tix, kiex khawm ra tak yum tete, mawh kheu jao hoik lud kiex khawm ra ka daux pa seeing brai, nham phimap kiex tak hoek piang kiex. ¹³ Phan simex it mai paox simex tix, awm it mai bun kiex khawm ra hoik yuh ceu pa seeing brai, kiex tak yum khawm ra nham phimap kiex tak hoek piang kiex. ¹⁴ Phan simex tix kaux teei ti moeng bun miex khawm kawn, an mawh pa caox caig, tak gleeing ti tik kix khawm loe ka ngu, son ang pa caox caig lai koe ka daux sinax pex. ¹⁵ Phan simex tix kaux lud vao ka totiag, nawh tak yum tete mai pex tak pah totiag an. ¹⁶ Phan bun tix kaux dex dawd mai totiag ceu pa tix ang ah mai lud vao mai totiag an maix tak pah bun khawm totiag an, kiex tak yum tete, nham phimap kiex tak hoek piang kiex. ¹⁷ Phan simex tix kaux teei ti moeng nan tix, pa mawh kawn bun keeing nawh ang ah, kawn bun miex nawh ang ah mai plih tokaux kakaong krax pa kaig tua nawh mai phan bun an yaox ka krax kaig tua simex, an mawh ceu pa kaig tua mai tak teei ti tik kiex khaing sivoe ngai ceu pui kix, kheu hoik pon nawh ti plih tokaux kakaong pa kaig tua nawh, kiex tak kham geu phimap tix. ¹⁸ Phan simex tix kaux hu it mai bun yam kawn koe nham mee nawh mai plih tokaux kakaong krax kaig tua nawh mai phan nawh hoik yaox krax lih nham nawh mai phan bun an ang kheem ka nham tix, kiex khawm ra tak mawh pa teei ti tik khaing ceu pui kix. ¹⁹ Pex tak ang pon ti plih tokaux kakaong pa kaig tua pux o miex tix mai nan keeing tix, grawh grawng nawh an mawh pa plih tokaux kakaong mai paox nyiex ma tix, kiex tak yaox ti kham geu phimap tix. ²⁰ Phan simex tix kaux it tau mai moeng keeing iak tix, nawh hoik mawh pa plih tokaux kakaong pa kaig tua keeing iak tix, kiex tak kham geu phimap tix mai kiex tak mawh pa ang lai chix koe kawn. ²¹ Phan simex tix kaux teei ti moeng puxaik tix, an mawh pa seeing brai, nawh hoik plih tokaux kakaong pa kaig tua puxaik tix, kiex tak mawh pa ang lai chix koe kawn. ²² Mawh kheu nan, pex tak hawt gumlox beenli Aux mai lox tat jhawm prawng Aux khankix mai hawt ti yuh an kix son ang haktiex dee pa sang viex Aux pex ot, hao ti tik pex. ²³ Pex tak ang pon ti hawt grawng lawng khaix grawng beenli pui an khankix, pa sang grheu Aux ti tik sivoe pex, grawh grawng nawh, kix hoik lud ka grawng ceu inkix khawmuik, mawh kheu nan, Aux koeng ka kix. ²⁴ Viang mawh nan, Aux hoik ah nin ka pex, pex tak pon ti cie haktiex kix mai Aux tak sang tawx mawh sinngao sonsang pon pex ti cie haktiex dee lih rawm teeh mai rawm hia, Aux mawh Siyiex pa mawh Simiang Siyiex pex, pa hoik tang gwieh pex khaing pui tang ceu khankix. ²⁵ Mawh kheu nan, pex tak tang gwieh tobrie pa singax mai totiag pa ang singax sidawng daux sinax pex, pex tak ang pon ti kieh tokaux tix seeing brai, ka totiag khankix mai sim sai mai can ceu pa im ju kuceu, pa chix mu chix hu piang tiex mai pa hoik tang gwieh Aux ti deuh khaing pex, awm ceu pa ang singax khankix. ²⁶ Pex tak mawh pa singax singeh ka son Aux, mawh kheu Aux mawh Siyiex pa singax singeh mai Aux hoik tang gwieh pex khaing pui tang ceu, sonsang mawh pex cie Aux. ²⁷ Simex ang ah, bun ang ah, pa mawh pui pa yuh phi pui pa chix simeed khankix tak yum tete, pui tak dheem kix yum ka simaox, nham phimap kix tak hoek piang kix heue."

¹ Simiang Siyiex ah nin ka Mose, "Krai ka cao giex kaing li pa mawh kawn simex Arun ah nin, cao giex kaing li tak ang pon ti kieh tokaux ti seeing brai, ka tokaux pui yum daux sinax pui ceu tix. ² Lheu khaing pao nyiex pa dex mai nawh khankix, pa mawh miex keeing khawm kawn simex kawn bun mai puxaik nawh ang ah, ³ pux o bun krih pa ang nyang koe mex, nawh tak pon ti kieh tokaux ti seeing brai ka. ⁴ Nawh tak ang pon kieh tokaux ti seeing brai, ka an khankix, kheu mawh nawh cao kaing pa ting tix kaux daux sinax ceu pui nawh khankix. ⁵ Kix tak ang pon ti khlao hauk kaing tix pak, kix tak ang pon ti khlao hauk bheup tix mai ang pon ti pat tokaux ti ka vaig ka gawn. ⁶ Kix tak mawh pa singax singeh son Siyiex kix mai ang pon ti kieh ceu kaux Siyiex tix nunai giex going, grawh grawng nawh kix mawh pui pa tan krax tan pa yuh tix ka ngu son Simiang Siyiex mai pa tan blah ka Siyiex, mawh kheu nan, kix tak mawh pa singax singeh. ⁷ Kix tak ang pon ti teei bun coh kaux tix, bun pa hoik seeing brai mai bun pa hoik tik mex tix mawh moeng tix, grawh grawng nawh cao giex kaing li mawh pa singax singeh son Siyiex. ⁸ Mawh kheu nan, pex tak yuh nawh mawh pa singax singeh, kheu mawh pa tan ti tawx blah ka Siyiex pex, nawh tak mawh pa singax singeh ka son pex, kheu mawh Aux Simiang Siyiex pa singax singeh mai pa kieh pex singax singeh. ⁹ Phan kawn bun cao giex kaing li yuh bun coh kaux mai kieh tokaux ti seeing brai, nawh mawh pa kieh keeing tix seeing brai, tak gleeing ti tik nawh ka ngu. ¹⁰ Nawh mawh cao giex kaing li, pa ting lhaong ka sinax puxaik tix, pa hoik groi kix bee piang kaing mai mawh pui pa appong tix ceep kraung pa singax singeh, nawh tak ang pon ti bhang kaing tix mai riah ti tik kraung ceep tix khankix. ¹¹ Nawh tak ang pon ti hu dex tokaux yum tix ceu kawx mai nawh ang pon ti kieh tokaux tix seeing brai son miex keeing tix. ¹² Nawh tak ang pon ti hu plak praix khaing dee pa singax singeh mai ang pon ti nunai ka dee pa singax singeh Siyiex tix, grawh grawng nawh bee groi pa appong Siyiex, koe piang kaing nawh, Aux mawh Simiang Siyiex. ¹³ Nawh tak teei ti moeng ka bun krih, ¹⁴ miexmai ang ah, bun hoik tik mex ang ah, bun coh kaux pa hoik seeing brai ang ah, ceu bun inkix nawh tak ang pon ti teei mawh moeng tix mai nawh tak pon ti teei bun krih mawh moeng tix tix kaux khaing daux ceu pui tix. ¹⁵ Nawh tak ang pon ti ah pa ang khaw ang jiet ka kawn praix tix ka sinax pui ceu tix, grawh grawng nawh Aux mawh Simiang Siyiex pa kieh nawh singax singeh." ¹⁶ Simiang Siyiex ah nin ka Mose. ¹⁷ "Krai ka Arun ah nin, ka daux doeh ru maix ku ju, pa koe dee mat dee ne, tak ang pon ti hoek dex, sonsang tan nawh blah ka Siyiex nawh. ¹⁸ Grawh grawng nawh can pui pa hoik koe dee mat dee ne, pui pa dug ngai ang ah, pui pa laux caong ang ah, pui laux meeh ang ah, pui kak giien taix giien caong ang ah, ¹⁹ mai pui pot taix caong ang ah, ²⁰ pui kawk nyoi ang ah, pui kalu ang ah, pui pa koe jhawm saux ngai ang ah, pui pa saux ngoi saux dao ang ah, pui pa laux tom kla ang ah, nawh tak ang pon ti hoek dee dex. ²¹ Pui daux doeh ru cao giex kaing li Arun, pa koe dee mat dee ne, tak ang pon ti hoek dex sonsang tan krax tan pa gleeing ka ngu son Simiang Siyiex, mawh kheu hoik koe krax lud nawh, nawh tak ang pon ti hoek dex sonsang tan nawh blah Siyiex. ²² Nawh tak pon ti ih blah Siyiex, pa singax singeh khawm pa kied singax singeh. ²³ Nawh tak ang pon ti hu dex man tie mai ang pon ti hoek dex ka khu dee tan, mawh kheu hoik koe dee mat dee ne nawh, Aux lhat nawh yuh pa nunai ka dee pa singax singeh Aux, mawh kheu Aux mawh Simiang Siyiex pa kieh kix singax singeh." ²⁴ Mose krai inkix ka Arun khawm kawn simex nawh khankix mai ka ceu pui Isarelax khankix heue.

¹ Simiang Siyiex ah nin ka Mose, ² Krai ka Arun mai kawn simex nawh khankix, sonsang chix tang gwieh kix tokaux ti khaing ceu pa singax singeh ceu pui Isarelax khankix mai son ang kix pon nunai ka min ceu kaux Aux, ka daux ceu an kix, son pa yuh kix mawh pa singax singeh son Aux, Aux mawh Simiang Siyiex. ³ Krai ka kix ah nin, ka daux doeh ru pex khankix ku ju, can pui pa hu dex ceu pa hoik gwieh ceu pui Isarelax mawh pa singax singeh son Simiang Siyiex mai yam koe pa ang singax piang nawh, tak teei ti tik pui an khaing sivoe ngai Aux, Aux mawh Simiang Siyiex. ⁴ Pui pa koe jhawm saux sipawg ang ah, jhawm saux lih rawm seeing ang ah, doeh ru Arun, tak ang pon ti ih krax tan pa singax singeh, tom ang nawh nyang pon ti singax mai can pui pa hu krox hu teeh ka tokaux yum pa ang singax ang ah mai pui pa hoik lih rawm ngang ang ah, ⁵ pa hu krox hu teeh ka totiag pa chix mu chix hu pa sang kieh nawh mawh pa ang singax ang ah mai hu krox teeh pui pa sang kieh nawh ang singax ang ah, ceu pa ang nawh singax koe yuh ka mawx kawx, ⁶ Pui pa hu krox hu teeh ka ceu ankix, tak mawh pa ang singax tom hoek plakbo, nawh tak ang pon ti ih krax tan pa singax singeh khankix, tom ang nawh nyang bax heem tix ka rawm. ⁷ Nawh tak mawh pa singax yam hoik klip singaix, khaix an nawh tak pon ti ih krax tan pa singax singeh, grawh grawng nawh an mawh pa ih nawh. ⁸ Nawh tak ang pon ti ih nex pa tang yum, nex pa hoik kiied totiag khankix, sonsang kieh nawh tokaux ti seeing brai ka an khankix, Aux mawh Simiang Siyiex. ⁹ Mawh kheu nan kix tak priex ti hawt gumlox beenli Aux, phan ang mawh nan, kix tak yaox ti kham geu phimap tix mai yum, Aux mawh Simiang Siyiex pa kieh pex singax singeh. ¹⁰ Pui tang ceu tang cat tak ang pon ti ih krax tan pa singax singeh, pui pa hoek ti peung tivud ticu tau mai cao giex kaing li ang ah, siliex pa cang ang ah, tak ang pon ti ih ceu pa singax singeh. ¹¹ Viang mawh nan, phan cao giex kaing li liag pui ka mau, nawh tak pon ti ih an mai pui pa keh ka daux nyiex ma nawh, tak pon ti ih pa ih nawh. ¹² Phan kawn bun cao giex kaing li mex ka pui tang ceu, kawn bun an tak ang pon ti ih ka krax tan pa singax singeh. ¹³ Viang mawh nan, phan kawn bun cao giex kaing li an mawh miexmai ang ah, bun pa hoik tik mex ang ah mai phan nawh ang nyang koe kawn mai phan nawh deeh ing ka nyiex keeing tix, awm yam mawh nawh kawn nyawm, bun an tak pon ti ih pa ih keeing nawh, viang mawh nan, pui tang ceu tak ang pon ti ih. ¹⁴ Phan pui kox ih krax tan pa singax singeh mai ang tix tawng, khaix an nawh tak deeh plud tix tan krax tan pa singax singeh ka cao giex kaing li phwan son tix son piang an. ¹⁵ Cao giex kaing li tak ang pon ti nunai, ka krax tan pa singax singeh ceu pui Isarelax khankix, pa tan kix ti tawx ka Simiang Siyiex, ¹⁶ mai tak ang kieh kix kham geu ka phimap pa hoik lud kix, kheu hoik pon kix ti ih ka krax tan pa singax singeh khankix, grawh grawng nawh Aux mawh Simiang Siyiex pa kieh kix singax singeh heue." ¹⁷ Simiang Siyiex ah nin ka Mose, ¹⁸ "Krai ka Arun mai kawn simex nawh khankix mai ka ceu pui Isarelax khawmuik ah nin, can pui pa kaoh khaing daux nyiex ma ceu pui Isarelax khankix ang ah, nyo sinie pa ot tau mai kix ang ah, pa tan krax pa appong son pa tiextu ang ah, son pa tan nawh khawm rhawm tix mai pa tan kix ka Simiang Siyiex pa mawh krax tan pa gleeing. ¹⁹ Nawh tak tan ti tawx pa mawh mawie mhaing, yung mhaing ang ah, pex mhaing ang ah pa ang koe dee mat dee ne, tak mawh pa pon ti rieb. ²⁰ Viang mawh nan, can pa hoik koe dee mat dee ne maix tak ang pon ti tan, grawh grawng nawh tak ang pon ti rieb tang maix. ²¹ Can pui pa tan krax pa appong son krax tan pa nhim ka Simiang Siyiex, sonsang grum naog lox pa tiextu nawh, krax tan pa koe rhawm nawh khaing tobrie pa eei nawh, mawie ang ah, yung ang ah, an tak mawh pa grum naog, sonsang mawh pa pon ti rieb, an khankix tak kieh nawh mawh pa ang koe dee mat dee ne. ²² Pa dug ngai ang ah, pa pot si-ang ang ah, pa laux maung ang ah, pa uah ang ah, pa ngoi mai pa dao ang ah, tak ang pon ti tan ka Simiang Siyiex, tak ang pon ti yuh krax tan pa gleeing piang khu krub dee tan, son Simiang Siyiex. ²³ Maix tak pon ti tan mawie mhaing ang ah, kawn yung iak ang ah, pa hoik nie lheu pakpeung tokaux mai pa cud cha pakpeung tokaux khankix, son krax tan pa koe rhawm tix, viang mawh nan phan an mawh son krax pa tiextu, an tak mawh pa ang pon ti rieb. ²⁴ Maix tak ang pon ti tan pa hoik laux kla, pa hoik phawng, pa hoik pliag mai pa hoik sieh tix khankix ka Simiang Siyiex. Maix tak ang pon ti yuh krax tan ceu an khankix ka daux haktiex pex. ²⁵ Maix tak ang pon rieb ti tan ceu in khankix tix ceu kawx, khaing daux tawm taix pui tang ceu, awm pa mawh blah pa khan maix son Siyiex tix, mawh kheu koe krax pa laux leeing mai koe dee mat dee ne, an khankix tak mawh pa ang pon ti rieb son maix." ²⁶ Simiang Siyiex ah nin ka Mose, ²⁷ "Yam keh kawn mawie tix mu ang ah, kawn yung tix mu ang ah mai kawn pex tix mu ang ah, tak yaox ti ot tau mai miex tix aliah ngaix, jah khaix daix singaix hu sivoe ngai, an tak rieb ti teei son krax tan pa gleeing, son Simiang Siyiex. ²⁸ Viang mawh mawie shiang ang ah, kawn yung shiang ang ah, paw doh pah an khawm ra mai kawn nawh ka daux tix singaix ngie. ²⁹ Yam tan maix pa appong tix, son krax pa yaogyaw bwanson ka Simiang Siyiex maix tak tan mawh pa pon rieb tix. ³⁰ An tak mawh pa ih ka daux singaix an maix tak ang pon ti deuh an khankix tom hoek plak ponngawb, Aux mawh Simiang Siyiex. ³¹ Pex tak priex ti hawt gumlox pingnyap Aux khankix mai hawt ti yuh awm an khankix, Aux mawh Simiang Siyiex. ³² Pex tak ang pon ti nunai ka ceu kaux pa singax singeh Aux, viang mawh nan, Aux tak mawh pa singax singeh ka daux sinax ceu pui ceu pui Isarelax khankix, Aux mawh Simiang Siyiex pa kieh pex singax singeh, ³³ Aux mawh pa hoik viex pex lih khaing daux meung Ejiptux, sonsang mawh Aux Siyiex pex, Aux mawh Simiang Siyiex heue."

¹ Simiang Siyiex krai ah nin ka Mose, ² "Krai ka pui Isarelax khankix, pex tak krai pao pawie Simiang Siyiex, awm pa hoik tat bawg yam sonsang yuh pex pawie pa singax singeh in mawh pawie Aux." ³ Pex tak yuh kaing ka daux liah singaix, viang mawh nan daux aliah singaix mawh singaix twah singaix laux lee pex tix mai singaix pawie pa singax singeh, pex tak ang pon ti yuh kaing tix ceu kawx, an mawh singaix twah Simiang Siyiex ka can dee ot pex kudah." ⁴ "In khankix mawh pawie Simiang Siyiex, pawie pa yuh pex daux pa singax singeh mai pa sang krai pao pex ti yuh yam hoik hoek bawg yam. ⁵ Ka daux khix jah, kao pon ngaix plak ponbo, an mawh singaix pawie Pasakha Simiang Siyiex. ⁶ Ka daux khix an kao phwan ngaix mawh singaix pawie blah pa ang sau susaix son Simiang Siyiex, pex tak ih blah pa ang sau susaix aliah singaix. ⁷ Ka daux singaix jah pex tak yuh pawie pa singax singeh tau, pex tak ang pon ti yuh kaing pa dex mai haktiex tix ceu kawx. ⁸ Pex tak tan krax tan pa gleeing son Simiang Siyiex glang daux aliah singaix an, singaix aliah tak mawh singaix pawie pa singax singeh, pex tak ang pon ti yuh kaing pa dex mai haktiex tix ceu kawx." ⁹ Simiang Siyiex krai ah nin ka Mose, ¹⁰ "Krai ka pui Isarelax khankix, yam hoek pex ka daux haktiex pa tawx Aux ka pex, phan pex vawg ka nghox khankix, pex tak viex lhiem nghox pa liang pex tix vawg hoek ka cao giex kaing li, ¹¹ sonsang mawh pa rieb ti teei son tang pex, khaix hoik luan khaing daux singaix twah, cao giex kaing li tak yang yeuh lhiem nghox an sivoe Simiang Siyiex. ¹² Pex tak pon ti tawx kawn yung mhaing pa hoik naog num pa loig tix mu, son krax tan pa gleeing son Simiang Siyiex ka singaix an, yam yang yeuh nawh ka lhiem nghox. ¹³ Krax tan phawng nghox ca im pa dex dawd mai to tan an tak mawh phawng nghox ca im pa hoik klao ti tau mai bee kao son ra son khaing tix Epha pa mawh krax tan pa gleeing ka Simiang Siyiex, son pa sioe bhawng, krax tan pa nyaux tak mawh rawm plix siiet pon son tix son khaing tix hing loe awga. ¹⁴ Pex tak ang pon ti ih blah, pa yuh ka gaox diag mai plix nghox plix koi pa im khankix tom hoek ka daux singaix ang pex nyang viex ti tan sivoe Siyiex pex, an tak mawh been leeing ju daux doeh ru pex can dee ot pex kudah." ¹⁵ "Khaix hoik luan singaix twah daux singaix pasax, khaix hoik viex pex lhiem nghox son krax tan pa yang yeuh, pex tak simin tom grum naog aliah vang twah, ¹⁶ khaix hoik luan ngaix twah jah pasax simin kieh naog tix phwan singaix, khaix an pex tak tan krax tan phawng nghox ca im ka Simiang Siyiex. ¹⁷ Pex tak viex blah pa yang yeuh ra lon khaing daux nyiex ma tix, kao son ra son khaing tix epha ra Awmie, ka phawng gaox nghox ca im pa hoik yuh sin tau mai susaix, pa mawh plix khaox plix ox pa liang tix plix khankix ka son Simiang Siyiex. ¹⁸ Pex tak tan kawn yung iak pa loig pa naog num aliah mu tau mai blah mai kawn mawie mhaing tix mu mai kawn yung ra mu, an tak mawh krax tan pa gleeing son Simiang Siyiex, tau mai krax tan phawng nghox ca im mai krax tan pa nyaux kix mai krax tan pa gleeing ka ngu pa sioe bhawng ka Simiang Siyiex. ¹⁹ Pex tak tan kawn pex mhaing tix mu son krax tan pa pluat ploi phimap mai kawn yung pa hoik naog num ra mu son pa sang yuh krax tan pa nhim. ²⁰ Cao giex kaing li tak yang yeuh an tau mai blah, plix khaox plix ox pa liang tix pon son krax tan pa yang yeuh sivoe Simiang Siyiex, tau mai kawn yung iak an ra mu, an khankix tak mawh pa singax singeh son cao giex kaing li ka Simiang Siyiex. ²¹ Ka daux tix ngaix an pex tak krai pao mawh pawie pa singax singeh ka son pex, pex tak ang pon ti yuh kaing pa dex mai haktiex ti ceu kawx, an tak mawh been leeing ju ka can dee ot pex, daux doeh ru pex. ²² Yam vawg pex nghox ka daux haktiex tix, pex tak ang pon ti vawg ka can pa koe ka daog kaung pex khawmuik, pex tak ang pon ti khrawm nghox pa cod pa roik pa kawn deuk khaix tix, pex tak prah an khankix son pui hot shia mai nyo sinie, Aux mawh Simiang Siyiex pa mawh Siyiex pex." ²³ Simiang Siyiex krai ah nin ka Mose, ²⁴ "Krai ka pui Isarelax khankix ka daux khix aliah, haok khix tix ngaix, pex tak laux lee tix mai twah klaung, pex tak phlu teettawng sonsang doh keud ka mawh pawie pa singax singeh. ²⁵ Pex tak ang pon ti yuh kaing pa dex mai haktiex, mai pex tak yuh krax tan pa gleeing ka ngu ka Simiang Siyiex." ²⁶ Simiang Siyiex krai ah nin ka Mose, ²⁷ "Ka daux khix aliah haok khix kao ngaix, mawh singaix yuh pa khyox khaw pa pluat ploi phimap, an tak mawh singaix pawie pa singax singeh son pex, pex tak khin ka tokaux tix mai yuh krax tan pa gleeing ka ngu ka Simiang Siyiex. ²⁸ Daux singaix an pex tak ang pon ti yuh kaing ti ceu kawx, mawh kheu an mawh singaix yuh pex krax khyox khaw mai krax pa pluat ploi phimap son tix, sivoe Simiang Siyiex. ²⁹ Mawh kheu pui mawx ang ah, pa ang pon khin tokaux tix singaix an, tak tat nawh khaing daux ceu pui nawh. ³⁰ Pui mawx ang ah pa yuh kaing ti ceuceu ka daux singaix an, Aux tak yuh laux leeing, khaing daux sinax ceu pui nawh. ³¹ Pex tak ang pon ti yuh kaing ti ceu kawx, an tak mawh been leeing ju ti ju hoik ti ju, can dee ot pex daux doeh ru pex. ³² Singaix an tak mawh singaix twah ot yiien yawg tix mai pex tak khin tokaux ti jah plakbo singaix dim khix an, tom hoek plakbo pasax pex tak priex ti hawt mai twah mhawm mhawm." ³³ Simiang Siyiex krai ah nin ka Mose, ³⁴ "Krai ka pui Isarelax khankix, ka daux khix aliah kao phwan ngaix, daux aliah singaix an tak mawh singaix pa yuh pex pawie nyiex gox bang son Simiang Siyiex. ³⁵ Ka daux singaix jah an tak mawh singaix pawie pa singax singeh, pex tak ang pon ti yuh kaing pa dex mai haktiex. ³⁶ Pex tak yuh krax tan pa gleeing ka ngu ka Simiang Siyiex aliah ngaix, ka daux singaix daix pex tak yuh pawie pa singax singeh mai pex tak yuh krax tan pa gleeing ka ngu ka Simiang Siyiex, an mawh pawie pa blon ting, pex tak ang pon ti yuh kaing pa dex mai haktiex. ³⁷ In mawh pawie Simiang Siyiex pa hoik tat ti deuh, pawie pa singax singeh pa sang krai pao pex bawg yam sonsang yuh pex krax tan pa gleeing ka ngu ka Simiang Siyiex, pa mawh krax pa gleeing mai krax tan phawng nghox ca im mai krax tan pa nyaux kuceu, daux ngaix mawx ngaix an, ³⁸ lheu khaing singaix twah Simiang Siyiex, pex tak yaox ti yuh krax tan pa appong, krax tan pa yuh sijax mukheu tix sang tan mai krax tan pa koe rhawm pex tix sang tan khawmuik, pex tak tan an khankix ka Simiang Siyiex. ³⁹ Khaix hoik khrawm pex plix nghox plix koi khaing daux haktiex, jah ka daux khix aliah kao phwan ngaix, pex tak yuh pawie Simiang Siyiex aliah ngaix, ngaix tix tak mawh ngaix twah sonsang laux lee pex tix mai ngaix daix kawx tak baox mawh ngaix twah sonsang laux lee pex tix. ⁴⁰ Ka daux ngaix tix maix tak viex plix khaox plix ox pa mhawm, kak khaox jhie yaong, kak khaox pa mhawm lhax khankix mai lhax kak khaox siglai khankix, pex tak yuh krax gaux rhawm sivoe Simiang Siyiex pa mawh Siyiex pex aliah ngaix. ⁴¹ Pex tak yuh pawie an ku num son Simiang Siyiex aliah ngaix, an tak mawh been leeing ju ka daux doeh ru pex, pex tak yuh pawie an ka daux khix aliah. ⁴² Pex tak yaox ti ot ka daux nyiex gox lhax khaox aliah ngaix, can pui pa keh kung khaing ceu pui Isarelax khankix tak yaox ti ot ka daux nyiex gox lhax khaox, ⁴³ sonsang tawng doeh ru pex mawh Aux pa kieh pui Isarelax khankix ot ka daux nyiex gox lhax khaox yam viex Aux kix lih khaing meung Ejiptux, Aux mawh Simiang Siyiex pa mawh Siyiex pex." ⁴⁴ Mawh kheu nan, Mose krai pao grawng pawie Simiang Siyiex ka ceu pui Isarelax khankix heue.

¹ Simiang Siyiex krai ah nin ka Mose, ² "Tawm lox ka pui Isarelax khankix, sonsang viex kix bee singax singeh pa hoik tauh tix khaing plix Sanlun son kawk ngu hoek ka maix sonsang tok maix kawk ngu riang ang jud ang jai. ³ Ka plak praix man tie, dee koe teug bwan sijax mukheu, ka daux nyiex gox bwan man bang kum, Arun tak mawh cao pa bung kaing an, jah ka plakbo, tom hoek ka plak ponngawb, sivoe Simiang Siyiex ang jud ang jai, an tak mawh been leeing ju ka daux doeh ru pex. ⁴ Nawh tak mawh pa khrex rien ka kawk ngu pa koe piang jawk ten khri ceu pa singax singeh, sivoe Simiang Siyiex ang jud ang jai heue. ⁵ "Maix tak teei phawng gaox nghox ca im ceu pa mhawm mai yuh blah kao ra lon, Blah ku lon, tak mawh pa koe phawng nghox ca kao son ra son khaing tix epha ra Awmie. ⁶ Maix tak deuh blah an piang pheen khri pa singax singeh ra pum, tix pum liah lon sivoe Simiang Siyiex. ⁷ Maix tak sau lawpan pa singax singeh piang pum blah an khawm ra pum, sonsang mawh an nyum krax tan pa doh keud son krax tan pa gleeing ka ngu son Simiang Siyiex. ⁸ Daux ngaix twah ku twah, Arun tak deuh pan blah an sivoe Simiang Siyiex ang jud ang jai tang kawn praix Isarelax khankix, awm gumlox sijax mukheu leeing ju. ⁹ An tak mawh son Arun mai kawn simex nawh khankix, kix tak ih an dee pa singax singeh, mawh kheu mawh an krax tan pa kied singax singeh pa gleeing ka ngu ka Simiang Siyiex, pa mawh been leeing ju. ¹⁰ Kawn simex khaing bun ceu pui Isarelax, keeing nawh pa mawh pui Ejiptux, lih hu sinax pui Isarelax, yam an kawn simex bun ceu pui Isarelax an mai pui Isarelax tix kaux simah ka paox tix daux nyiex bang. ¹¹ Mawh kheu kawn simex pa keh khaing bun ceu pui Isarelax an, hoik nunai ceu kaux Simiang Siyiex mai hoik jhax lawg kah, tom viex nawh hoek ka Mose. Ceu kaux miex nawh mawh Shelawmix kawn bun Dibarix ceu pui Dan. ¹² Kix gang ti deuh nawh tom sidah ang kix nyang tawng ka alo Simiang Siyiex mawh pa yuh ka mawx ka kaw an." ¹³ Khaix an Simiang Siyiex krai ah nin ka Mose, ¹⁴ "Teei ka kaw pa jhax lawg an lih ka plak praix nyiex bang, khaix an kieh pui pa hoik mhong lox pa jhax lawg nawh khawmuik, deuh taix ti piang kaing nawh mai kieh cub pui hun dheem nawh ka simaox. ¹⁵ Krai ah nin ka pui Isarelax khankix, can pui pa jhax lawg ka Siyiex tix, tak yaox ti kham geu phimap tix. ¹⁶ Can pui pa lud mai nunai ceu kaux Simiang Siyiex tak yaox ti yum tete, cub pui hun tak dheem nawh ka simaox, daux pui ceu pex ang ah, daux pui tang ceu ang ah, phan lud mai nunai ceu kaux Simiang Siyiex, tak yaox ti yum tete. ¹⁷ Can pui pa pah ka pui tix kaux kaux tak yaox ti yum tete. ¹⁸ Can pui pa pah ka tobrie tak yaox ti deeh plud tobrie son tobrie mai plud ju son ju. ¹⁹ Phan pui tix kaux yuh krax saux mat ka paox plawg ti, tak deeh yuh awm an ka nawh, ²⁰ pot si-ang son pot si-ang, ngai son ngai, rhang son rhang, awm hoik yuh nawh krax saux mat ka pui tix kaux, tak deeh yuh awm an ka nawh. ²¹ Pui pa pah tobrie nawh tak deeh yaox ti plud tobrie, pui pa pah ka pui tak yaox ti yum tete. ²² Pex tak yaox ti koe been lox tat jhawm prawng tix ceu khaing son daux pui ceu pex ang ah, pui tang ceu ang ah, mawh kheu Aux mawh Simiang Siyiex pex." ²³ Khaix hoik krai Mose ceu an ka pui Isarelax khankix mai kix viex kaw pa hoik jhax lawg an lih ka plak praix nyiex bang mai dheem nawh yum ka simaox. Mawh kheu nan, pui Isarelax khankix yuh awm gumlox pa hoik tawm Simiang Siyiex ka Mose heue.

¹ Simiang Siyiex krai ah nin ka Mose piang gawng Sina, ² "Krai ah nin ka pui Isarelax mai yam hoek pex ka haktiex pa tawx Aux ka pex, kieh haktiex an priex rien ngaix twah son Simiang Siyiex. ³ Pex tak sum simie nghox koi ka daux kaung been liah num mai pex tak cox pawt nhu plix siiet daux sipeem tix daux liah num mai khrawm plix khankix. ⁴ Ka daux num aliah an, tak mawh num pa twah mai kieh haktiex laux lee ti mai mawh ngaix twah son Simiang Siyiex maix ang pon sum simie nghox koi daux kaung tix mai ang pon pawt ka nhu plix siiet ka daux sipeem tix. ⁵ Nghox koi pa tu khaing daux kaung pex kawx, ang pon ti vawg, pex tak ang pon pieh pon khrawm ka plix siiet, pa ang pex cox pawt khaing daux sipeem plix siiet tix, mawh kheu mawh num laux lee son haktiex. ⁶ Ceu pa lih khaing num pa twah haktiex an, tak mawh pa ih son maix, son siliex simex, siliex bun son pui cang mai son nyo sinie pex, ⁷ can ceu pa lih ti koe khawmuik, tak mawh pa ih, son tobrie pa eei pex mai son totiag pa koe daux haktiex pex heue. ⁸ "Maix tak simin num ngaix twah aliah num aliah bawg, bawg yam num twah aliah num, tak mawh tixpon dim num ka maix. ⁹ Ka daux khix aliah kao ngaix phlu teettawng pawie naog num Jubili lih, ka daux ngaix pa khyox khaw pa pluat ploi pex phimap tix mai pex tak phlu teettawng luah daux haktiex tix khawmuik. ¹⁰ Maix tak appong num naog tixphwan num an mawh num pa singax singeh mai krai pao krax luad luan son pui pa ot daux haktiex an khawmuik, an tak mawh pawie naog num jubili son pex mai pui ku kaux tak deeh ing ka dee koe sinngao cie tix mai ka dee ot pao nyiex tix. ¹¹ Num naog tixphwan num an, tak mawh pawie naog num jubili son pex, ka daux num an pex tak ang pon ti ruat simie, ang pon ti vawg ka nghox tu mai ang pon ti khrawm plix siiet pa ang pex nyang cox pawt khankix. ¹² Mawh kheu pawie naog num jubili mawh num pa singax singeh ka pex mai pex tak ih ceu pa lih khaing daux kaung daux ma. ¹³ Ka daux pawie naog num jubili in, pex tak deeh ing ka dee koe sinngao cie cao tix ku kaux. ¹⁴ Phan pex coh tix ceuceu ka paox plawg tix ang ah, liag tix ceuceu khaing paox plawg tix ang ah, pex ang pon ti yeen ka paox tix, tix kaux lai tix kaux. ¹⁵ Pex simin tix yaox khaix pawie naog num jubili pex tak liag khaing paox plawg tix, awm num pa simin pex ti yaox ka krax lih plix nghox koi khankix, nawh tak coh ti tawx an ka pex. ¹⁶ Num nie pon pex plix tom nie, pex tak yaog ngawh jum nawh haok mai num iak lih plix pex tak ngreuh jum, mawh kheu hoik coh nawh plix an ka maix, awm num pa hoik pon ti plix. ¹⁷ Pex tak ang pon kheem pon yeen ka paox tix, tix kaux lai tix kaux, viang mawh nan, lhat graung ka Siyiex pex, mawh kheu Aux mawh Simiang Siyiex pex heue. ¹⁸ "Pex hawt yuh awm been pa deuh Aux khankix mai priex ti hawt awm lox lai beenli Aux khankix mai pex tak yaox ti ot yiien yawg ka daux haktiex an. ¹⁹ Haktiex tak tawx plix tix mai pex tak yaox ti ih tom sak mai yaox ti tan ka daux krax pa yiien yawg. ²⁰ Phan pex ah nin, kheu ang yix yaox ti ruat simie mai khrawm ka plix nghox koi tix, ka daux num aliah yix sang ih patix? ²¹ Ka daux liah num Aux tak tawx lox nawb bwanson piang pex mai tak kieh plix nghox koi kub son pex loe num. ²² Pex tak yaox ti ruat simie ka daux num daix mai ih ka plix nghox koi pa prim tom hoek ka daux num dim, tom yam hoek bawg yam khrawm pex plix nghox koi pa khraox ka daux num dim, pex tak yaox ti ih plix nghox koi pa prim heue. ²³ Ang pon ti coh haktiex ka pui leeing ju, mawh kheu haktiex mawh cie Aux kheu mawh pex nyo sinie mai pui hoek paung mai Aux. ²⁴ Ka daux haktiex pa mawh sinngao cie pex, pex tak pon akhwang ti deeh taoh ka haktiex an. ²⁵ Phan puxaik maix lih ti mawh pui pa hot shia mai hoik coh haktiex cie tix, tix dahdah, phan doeh pao nyiex nawh deeh hoek ti taoh ka an, nawh tak deeh pon ti taoh ka ceu pa hoik coh puxaik nawh. ²⁶ Phan pui pa sang taoh ka an ang koe tix kaux kawx mai phan tokaux cao nawh deeh pon taoh ka an, ²⁷ kieh nawh simin ti yaox ka num pa hoik coh nawh an, kieh nawh dee plud ngawh haktiex ka pui pa hoik coh nawh ka, sonsang deeh mawh haktiex an cie nawh. ²⁸ Phan nawh ang nyang pon plud ngawh an, nawh tak deeh haktiex ka daux taix kaw pa liag tom hoek pawie naog num jubili, yam hoek pawie naog num Jubili an tak bheeik khaing nawh mai tak deeh hoek ka cao pa prim. ²⁹ Phan pui tix kaux coh nyiex ti daux veng pa koe plak daux guh veng, khaix hoik coh nawh nyiex an, ka daux tix num nawh tak pon ti deeh taoh ka. ³⁰ Phan nawh ang lai pon taoh ka daux tix num, khaix an nyiex daux veng pa koe plak daux guh veng tak mawh cie pui pa hoik liag leeing ju, tom hoek baux ju doeh ru nawh, an tak ang lai bheeik khaing nawh tom hoek pawie naog num jubili. ³¹ Phan mawh nyiex pa koe daux yaong pa ang koe guh veng hawt vung viang tak sawn nawh awm ma kaung, kix tak deeh pon ti taoh an mai kix tak yaox ti kieh bheeik ka daux pawie naog num jubili. ³² Kheu kawx, veng ceu pui Lewix mai nyiex pa koe daux veng pa mawh cie kix khankix, yam mawx ang ah, pui Lewix tak yaox ti deeh taoh ka. ³³ Phan pui tix kaux liag nyiex khaing ceu pui Lewix khaing veng cie kix tak yaox ti bheeik khaing daux taix nawh yam hoek daux pawie naog num jubili, mawh kheu nyiex ceu pui Lewix pa koe ka daux veng khankix tak mawh sinngao cie kix daux sinax ceu pui Isarelax khankix. ³⁴ Viang mawh nan, haktiex ma kaung cie pui hun pa koe daux veng kix, tak mawh pa ang pon ti coh, mawh kheu an mawh sinngao cie kix leeing ju. ³⁵ "Phan puxaik pex tix kaux kaux, mawh pui hot shia mai ang lai pon eei tokaux ti sinax pex, pex tak teem eei nawh, awm nyo sinie tix kaux ka daux sinax pex, sonsang pon ot nawh mai pex. ³⁶ Paw lai teei rao khaing nawh mai paw lai baox gawp rao ka nawh, viang mawh nan, lhat graung ka Siyiex pex, sonsang pon ot puxaik maix tau mai maix. ³⁷ Maix tak ang pon ti tawx nawh ceuk mau tix, sonsang pon rao mai ang pon ti tawx nawh yaog ceu pa ih sonsang pon lih rao. ³⁸ Aux mawh Simiang Siyiex pex pa hoik viex pex lih khaing meung Ejiptux sonsang tawx meung Khanan ka pex mai sonsang mawh Aux Siyiex pex heue. ³⁹ "Phan puxaik pex tix kaux kaux, hot shia sinax pex mai coh tokaux ti ka pex maix tak ang pon ti khin nawh yuh kaing awm siliex, ⁴⁰ nawh tak ot tau mai maix awm pui cang, awm kawncau mai awm nyo sinie, nawh tak yaox ti yuh kaing jhaw maix tom hoek bawg yam pawie naog num jubili, ⁴¹ nawh tak lih hu khaing maix, tau mai kawn praix tix khankix mai kix tak deeh ing ka nyiex ma tix mai deeh hoek ka haktiex keeing tix. ⁴² Kheu mawh kix kawncau Aux pa hoik viex Aux lih khaing meung Ejiptux, tak ang pon ti coh kix awm siliex. ⁴³ Maix tak ang pon ti kwang mai ang pon yuh pa khin ka nawh maix tak lhat ka Simiang Siyiex tix. ⁴⁴ Phan mawh siliex simex, siliex bun maix an, maix tak liag kawncau pui pa ot hawt vung viang maix. ⁴⁵ Lheu khaing an maix tak pon ti liag ka nyo sinieh khankix, pa ot sinax maix khawm kawn nyiex ma nawh, pa keh ka daux haktiex maix mai kix tak mawh cie maix. ⁴⁶ Maix tak pon ti kieh kix mawh sinngao pa pluat kawn praix maix khankix khaix maix, sonsang mawh sinngao ka kix leeing ju, maix tak pon cau kix awm siliex, viang mawh nan, phan mawh son puxaik maix, pui Isarelax maix tak ang pon ti kwang piang kix tix kaux lai tix kaux, ka daux krax pa khin. ⁴⁷ Phan pui tang ceu ang ah, nyo sinie pa ot dex maix ang ah, pon ti magmi mai phan puxaik maix pa ot hawt nawh tix kaux kaux, lih ti hot shia mai coh tokaux tix ka nyo sinie an ang ah, ka pui pa hoek ti ot tivud ticu, pa deeh hawt maix ang ah mai ka pui tix kaux kaux pa mawh kawn nyiex ma nyo sinie khankix, ⁴⁸ khaix hoik coh nawh tokaux tix, nawh tak deeh pon ti deeh taoh ka tix mai puxaik nawh khankix tix kaux kawx tak deeh pon taoh ka nawh, ⁴⁹ paox nawh ang ah, kawn pux kawn aik nawh ang ah, tak pon ti deeh taoh ka nawh, phan ang mawh nan, paox nyiex pa dex mai ru nawh, tak pon ti deeh taoh ka nawh, phan nawh deeh koe mau, nawh tak deeh taoh ka tokaux ti. ⁵⁰ Nawh tak jah tix simin ka num jah ti coh tokaux tix tom hoek ka pawie naog num jubili, tau mai cao pa liag, tak sawn ngawh riang yam mawh nawh pui cang hawt num iak num nie. ⁵¹ Phan num kawn deuk tom nie, nawh tak yaox ti deeh tawx ngawh pa deeh taoh kix nawh khaing mau ngawh pa hoik liag kix ka nawh. ⁵² Phan num khankix kawn deuk ngie ceeix khaing, tom hoek bawg yam pawie naog num jubili, khaix an nawh tak simin num an khankix tau mai nawh, hawt awm num an khankix nawh tak deeh tawx ngawh pa deeh taoh kix ka nawh. ⁵³ Nawh tak yaox ti ot tix num hoik tix num awm pui cang, ang yaox ti kwang piang nawh daux pa khin. ⁵⁴ Phan nawh ang nyang pon deeh taoh ka daux num in, yam hoek pawie naog num Jubili, khaix an nawh tak pon ti luad luan khawm kawn praix nawh khankix tau. ⁵⁵ Mawh kheu pui Isarelax khankix mawh kawncau Aux, kix mawh kawncau Aux khankix, pa hoik viex Aux lih khaing meung Ejiptux, Aux mawh Simiang Siyiex pa mawh Siyiex pex heue.

¹ "Pex tak ang pon ti yuh riang grang son tokaux tix, riang grang pa saik ang ah, rong khaox pa mhawm ang ah, ka daux haktiex pex tak ang pon ti jung simaox pa hoik saik ka taix ti, sonsang krub tix ka, mawh kheu Aux mawh Simiang Siyiex pa mawh Siyiex pex. ² Pex tak priex ti hawt ngaix twah Aux mai yungyi ka dee pa singax singeh Aux, Aux mawh Simiang Siyiex. ³ Phan pex hawt grawng lawng khaix beenli Aux mai priex ti hawt gumlox pingnyap Aux khankix mai hawt ti yuh, ⁴ Aux tak tawx rawm lhiex ka pex, bawg yam mawx bawg yam an, haktiex tak sang tawx plix tix mai khaox pa koe daux kaung khankix tak lih tix koe plix. ⁵ Kaing pah pex nghox tak sang sidah tom hoek bawg yam pieh plix siiet mai kaing pieh pex plix siiet tak sidah tom hoek bawg yam ruat simie, pex tak yaox ti ih tom sak mai luad luan khaing pa lhat graung daux haktiex tix. ⁶ Aux tak tawx pa nhim koe daux haktiex mai ang koe pui pa ghlat pex lhat graung mai pex tak yaox ti it mhawm mhawm, Aux tak grheu totiag pa vao khankix mai pui caox pui caig khaing haktiex pex mai lawm vaig lawm pliah tak ang lai kieh koe ka daux haktiex pex. ⁷ Pex tak pheet pui koeng mai kix tak goh ka lawm vaig lawm pliah sivoe ngai pex. ⁸ Pex phwan kaux tak pon pheet ka pui tix yieh kaux, pex tix yieh kaux tak pon pheet ka pui tix mheen kaux, pui koeng pex khankix tak yum ka lawm vaig lawm pliah sivoe ngai pex. ⁹ Mawh kheu Aux tak kia ngiien ka pex mai kieh pex haoh hun mai kieh gumlox sijax mukheu Aux, kaux cong tau mai pex. ¹⁰ Pex tak ih nghox prim mai kieh thawk pa prim lih kheu jao hoik hoek nghox khraox pa hoik pon pex. ¹¹ Aux tak sum nyiex gox bwan tix daux sinax pex mai Aux tak ang lai seeing ka pex. ¹² Aux tak lailing daux sinax pex mai mawh Siyiex pex mai pex tak mawh ceu pui Aux. ¹³ Aux mawh Simiang Siyiex pa mawh Siyiex pex, pa hoik viex pex lih khaing daux meung Ejiptux, son ang pex lai mawh siliex kix, Aux hoik raig khaox glawm pex khankix mai hoik kieh pex jung see see. ¹⁴ Phan pex ang cu nghiet ka gumlox Aux mai ang hawt yuh awm lox tawm pingnyap Aux khankix, ¹⁵ Phan pex seeing ka lox tawm jhawm krai Aux khankix mai phan pex nunai ka beenli Aux khankix, son ang pex pon hawt ti yuh ka gumlox pingnyap Aux mai yieh laux ka sijax mukheu Aux, ¹⁶ Aux tak deeh yuh in khankix ka pex, Aux tak kieh krax lhat graung koe piang pex mai kieh jhawm saux, jhawm saux krawx, jhawm saux pa laux ngai mai kieh rhawm pex hoek ka daux pa laux rhawm pex tak yaox ti ruat simie ka daux pa giex going, mawh kheu pui koeng pex khankix tak ih an, ¹⁷ Aux veeh pakngai tix khaing pex mai pex tak som ka plak sivoe ngai pui koeng pex mai pui koeng ka pex tak kwang piang pex mai pex tak to khawm ang pui tie pheet ka pex. ¹⁸ Pex hoik yaox ti kham geu ding dod kawx, phan pex ang cu nghiet ka lox Aux, Aux tak tawx krax ciyang pa nie lheu kheu jao phimap pex aliah son. ¹⁹ Aux tak raig ti tik siawp sibrawm pa ting rawm pex, Aux tak kieh raoma awm rhiem mai haktiex awm tawng lheung. ²⁰ Pex tak uik riang rao giex going, haktiex pex tak ang chix tawx plix mai khaox pa koe piang haktiex tak ang chix plix, plix. ²¹ Phan pex ang nghiet lox Aux, Aux tak viex krax kham geu hoek piang pex aliah son, kheu jao phimap pex. ²² Aux tak ploi totiag pa vao khankix, laig daux sinax pex mai kieh yuh laux ka kawn praix pex mai tobrie pex mai kieh ceu pui pex nie iak hu si pie mai krax lawng pex tak yiien. ²³ Viang hoik yaox ti kham geu yuh nin kawx, ang cox rhawm tix mai ca kawn tieh feen ka Aux, ²⁴ Aux kawx tak tieh feen ka pex mai Aux tak tawx krax pa ciyang ka pex aliah son kheu jao phimap pex. ²⁵ Aux tak kieh vaig lawm pa ot plak sijax mukheu Aux hoek ka pex mai prawng ca ka pex, yam khrawm pex paox ti tau ka daux veng, Aux tak ploi jhawm saux preng hoek sinax pex mai pex tak laux leeing daux tawm taix pui pa koeng. ²⁶ Yam hoik tat Aux krax teem pa ih ka pex, bun kao kaux tak yuh blah sin ka daux glah ngu tix mu mai kix tak deeh ciang ti tawx blah son pex, pex tak ih mai ang sak. ²⁷ Viang pex hoik kham geu yuh nin kawx, pex ang nghiet lox Aux mai ca kawn tieh feen ka Aux, ²⁸ Aux tak tieh feen ka pex ka daux pa kied song rhawm tix, Aux tak deeh tawx krax ciyang ka pex aliah son kheu jao phimap pex. ²⁹ Pex tak ih nex kawn simex kawn bun tix khankix, ³⁰ Aux tak yuh dee lhaong dee krub pex laux leeing mai raig khu dee tan pa tok pex nyawng bhawng khankix mai taing ti tik tokaux yum pex piang riang grang yum pa krub pex, Aux tak seeing ka pex. ³¹ Aux tak yuh veng pex laux mai yieh dee singax singeh pex khankix laux leeing mai Aux tak ang lai ngheet ka taox nyawng bhawng pex. ³² Aux tak kieh haktiex pex laux leeing mai pui koeng pa ot ka daux haktiex pex, tak koe krax daox deng ka an. ³³ Aux tak kieh pex prung prang ka daux sinax ceu pui tang ceu, lawm vaig hawt pheet khaix pex, haktiex pex tak mawh pa yi mai veng pex tak hoek krax laux leeing. ³⁴ Yam hoik yiien pui ka daux haktiex pex, haktiex pex tak gaux rhawm daux ngaix twah Nawh mai pex tak ot ka daux haktiex pui koeng pex khankix, yam an haktiex tak yiien mai laux lee ti gaux rhawm daux ngaix twah Nawh. ³⁵ Glang bawg yam kawn yiien pui, an tak mawh pa laux lee tix, mawh kheu ang koe bawg yam yiien yawg daux ngaix twah yam kawn ot pex ka daux veng an. ³⁶ Kix pa kawn deuk ka daux pex khankix Aux tak sau krax yaoh yeu ka daux rhawm kix daux haktiex pui koeng kix, lox luah lhax khaox kawx tak pheet kix to mai kix tak to awm to kix khaing lawm vaig mai kix tak goh khawm ang pui hawt khaix kix tix kaux kawx. ³⁷ Kix tak sideeing mai goh piang paox ti, tix kaux lai tix kaux, awm to tix ka lawm vaig, khawm ang pui pheet kix tix kaux kawx, mai pex tak ang lai koe siawp sibrawm tix cung sivoe ngai pui koeng tix. ³⁸ Pex tak laux leeing sinax pui kuceu mai haktiex pui pa koeng pex tak bleet ka pex. ³⁹ Can pex pa kawn deuk an khankix, tak khrup ka daux haktiex pui pa koeng pex kheu phimap pa yuh keeing kix. Kix tak khrup ka daux krax an awm keeing kix. ⁴⁰ Phan kix khyox khaw pluat ploi phimap tix mai phimap yuh keeing kix, kheu pa tieh feen tix ka Aux mai pa tieh feen tix ang hu daux krax Aux, ⁴¹ Mawh kheu nan, Aux kawx tak tieh feen ka kix mai hu tawx kix ka haktiex pui koeng kix, phan rhawm pa ang pat hak tix yeen tix tiem mai rieb ka phimap pa yuh tix, ⁴² Aux tak doh keud ka sijax mukheu pa yuh tix mai Yakop, sijax mukheu pa yuh tix mai Icak mai sijax mukheu pa yuh tix mai Abraham, Aux tak doh keud ka haktiex. ⁴³ Kix tak prah haktiex tix mai haktiex an tak koe krax gaux rhawm ka daux ngaix twah, yam hoik yi pui khaing dee an, kix tak yaox ti rieb ka phimap pa yuh tix, kheu hoik nunai kix ka lox lai beenli Aux mai rhawm kix seeing ka lox tat jhawm prawng Aux. ⁴⁴ Viang yuh nan kawx, yam ot kix daux haktiex pui koeng tix, Aux ang tik vud ka kix mai ang seeing ka kix, awm pa sang khaw kix tix laux leeing mai Aux ang yieh ka sijax mukheu pa hoik yuh Aux tau mai kix, mawh kheu Aux mawh Simiang Siyiex kix. ⁴⁵ Aux tak doh keud ka sijax mukheu pa hoik yuh Aux tau mai doeh ru kix, pa hoik viex Aux lih khaing meung Ejiptux, plak sivoe ngai pui kuceu sonsang mawh Aux Siyiex kix, Aux mawh Simiang Siyiex." ⁴⁶ In khankix mawh gumlox pingnyap mai lox tat jhawm prawng mai gumlox beenli khankix, pa hoik yuh Simiang Siyiex sinax pui Isarelax piang gawng Sina khaing daux taix Mose heue.

¹ Simiang Siyiex krai ah nin ka Mose, ² "Krai ka pui Isarelax khankix, phan pui tix kaux kaux yuh sijax tix sang tan ka Simiang Siyiex, awm pa tat maix jum nawh tak mawh cie Simiang Siyiex. ³ Phan mawh jum pa caw maix ti tat son simex tix kaux pa koe ju tixnga num tom hoek tixgliah num, jum nawh tak mawh tixphwan plah Shekhe ka mau dee pa singax singeh. ⁴ Phan mawh bun, jum nawh tak mawh tixngoe plah shekhe. ⁵ Phan nawh mawh pa koe ju phwan num tom hoek tixnga num maix tat jum simex mawh tixnga plah shekhe mai jum bun mawh kao plah shekhe, ⁶ Phan ju nawh koe tix khix, tom hoek phwan num maix tat jum simex mawh phwan plah mau shekhe mai jum bun loe plah mau shekhe, ⁷ phan ju nawh koe tixgliah num haok plak piang maix tat jum simex mawh kao phwan plah mau shekhe mai jum bun kao plah shekhe. ⁸ Phan nawh mawh pa kied hot sonsang plud tix ka ngawh jum pa hoik tat maix, tak viex nawh hoek plak sivoe cao giex kaing li, cao giex kaing li tak tat jum nawh, awm sijax pa hoik yuh nawh, cao giex kaing li tak tat jum. ⁹ Phan pui viex ti tan totiag ka Simiang Siyiex, ceu pa tan an ka Simiang Siyiex tak mawh pa singax singeh. ¹⁰ Pa mhawm ang ah, pa caox ang ah, ang pon ti loh ka tang mu mai phan nawh sang loh an khawm ra tak mawh pa singax singeh. ¹¹ Phan mawh totiag pa ang singax mai pa ang khaw ti tan ka Simiang Siyiex, nawh tak jhi totiag an ka cao giex kaing li, ¹² cao giex kaing li tat jum an mhawm ang ah, ang mhawm ang ah maix caw ti hawt awm jum pa tat cao giex kaing li. ¹³ Phan nawh simie ti deeh taoh ka an, nawh tak deeh naok ti tawx phwan son tix son piang jum an. ¹⁴ Phan pui tix kaux sang ap nyiex ti sonsang mawh pa singax singeh son Simiang Siyiex, cao giex kaing li tak tat jum son nawh, mhawm ang ah, ang mhawm ang ah maix caw ti hawt awm jum pa tat cao giex kaing li. ¹⁵ Phan kaw pa ap nyiex ti singax simie ti deeh taoh ka nyiex ti, nawh tak baox naok mau phwan son tix son piang jum an mai tak deeh teei nyiex an. ¹⁶ Phan pui sang ap kaung cie tix ti dahdah mawh pa singax, son Simiang Siyiex maix tak tat awm jum simie nghox koi pa van nawh, phan van simie tix Awmie jum tak mawh tixphwan plah mau shekhe. ¹⁷ Phan nawh jah ti ap kaung cie tix singax, ka daux pawie naog num jubili, nawh tak yaox ti tawx ngawh awm pa tat maix. ¹⁸ Phan nawh ap kaung tix singax, khaix hoik luan bawg yam pawie naog num jubili, cao giex kaing li tak simin num glang sinax pa kawn deuk, tom hoek daux bawg yam pawie naog num jubili mai gheuh jum pa tat maix ka nawh. ¹⁹ Phan nawh simin ti deeh taoh ka kaung pa hoik ap tix singax an, nawh tak deeh naok mau, phwan son tix son piang jum an mai an tak deeh mawh kaung cie nawh. ²⁰ Phan nawh ang lai simie ti taoh ka kaung an mai hoik coh kaung an ka pui tang kaux, nawh ang lai pon ti deeh taoh ka, ²¹ yam hoik luan kaung an, daux pawie naog num Jubili, tak mawh pa singax singeh, ka son Simiang Siyiex, awm kaung pa hoik tiextu, mai an tak mawh cie cao giex kaing li. ²² Phan pui tix kaux ap kaung pa hoik liag nawh mai pa ang mawh cie nawh, sonsang singax ka Simiang Siyiex, ²³ cao giex kaing li tak simin num sinax pa kawn deuk tom hoek bawg yam pawie naog num Jubili, nawh tak tawx ngawh jum awm pa hoik tat maix ka daux ngaix an, awm krax tan pa singax singeh ka son Simiang Siyiex. ²⁴ Yam hoek daux pawie naog num jubili, nawh tak deeh tawx kaung an ka kaw pa hoik liag pa mawh cao haktiex, sonsang deeh mawh cie nawh. ²⁵ Maix tak tat jum khawmuik hawt awm jum mau plah shekhe dee pa singax tixnga Gerax mawh tix shekhe. ²⁶ "Tobrie pa liang ti keh khankix, mawie ang ah yung ang ah, hoik mawh cie Simiang Siyiex, pui tix kaux kawx tak ang pon ti baox deeh tang gwieh mawh pa singax, mawh kheu an mawh cie Simiang Siyiex. ²⁷ Phan an mawh tobrie pa ang singax, tak pon ti deeh taoh awm jum pa hoik tat maix mai deeh naok mau phwan son tix son piang an, phan an ang lai deeh taoh, tak coh awm jum pa hoik tat maix. ²⁸ Viang yuh ka mawx kawx, krax tan pa hoik tiextu nawh ti tawx ka Simiang Siyiex, ka daux pa koe tix khankix, pui khawm tobrie mai kaung cie nawh khankix, tak ang pon ti coh mai ang pon ti deeh taoh, can ceu krax tan pa hoik tiextu nawh kuceu mawh pa kied singax singeh son Simiang Siyiex. ²⁹ Pui pa hoik tiextu appong tan tokaux tix, pa sang hoek krax laux leeing mai krax yum ka daux sinax pui khankix tix kaux kaux, tak ang lai pon ti deeh taoh ka, tak yaox ti pah yum tete. ³⁰ Ceu pa lih khaing daux tiex, kao son tix son, pa mawh plix nghox koi ang ah, plix khaox plix ox ang ah, mawh cie Simiang Siyiex, an mawh pa singax singeh son Simiang Siyiex. ³¹ Phan pui tix kaux simie ti deeh taoh pa mawh kao son tix son an, nawh tak deeh naok phwan son tix son piang an. ³² Mawie ang ah, pex ang ah, yung ang ah, can pa tiang ti hu greem khaox gix pex khankix kao son tix son, tak mawh pa singax singeh son Simiang Siyiex. ³³ Nawh tak ang pon ti chawk cheng, sonsang tawng grawng an khankix, mawh pa mhawm ang ah, pa caox ang ah, nawh tak ang pon ti loh ceu an khankix, phan nawh sang deeh lo an khankix pa deeh loh son an khawm ra tak mawh pa singax singeh, an tak mawh pa ang lai pon ti deeh taoh." ³⁴ Inkix mawh gumlox tawm pingnyap pa hoik deuh Simiang Siyiex ka Mose, son ceu pui Isarelax khankix piang gawng Sina heue.