Lamentations

Lamentations

¹ Veng pa hoik naog ot pui ka in dix, yam in lai ngawm ti ot yiien yawg nong nong yuh ka mawx! Nawh pa hoik sax ting sax lhaong ka daux sinax ceu pui khankix ka in dix, yam in lai hoik awm miexmai yuh ka mawx! Laux simiang daux sinax haktiex ku meung ka in dix, yam in hoik lih ti mawh siliex heue. ² Nawh yiiem sigrien sigre ka daux ponsawm, rawm ngai nawh khankix lih ka piang sibax nawh, sinax daux paox moh nawh, pa tawx krax nyawm rhawm ka nawh ang lai koe tix kaux kawx heue. Paox grawm paox gru nawh khawmuik hoik yuh krax pie lhen ka nawh, kix hoik lih ti mawh pui koeng nawh heue. ³ Pui Yudax hoik yaox ti kham krax pa kha rhawm mai kham krax pa cau tix daux kaing pa nu sigrien sigre, nawh ot ka daux sinax ceu pui tang meung khankix mai nawh ang lai yaox krax pa laux lee tix, can pui pa hawt leue khaix nawh khawmuik, krup nawh ka dee sikhawp krax heue. ⁴ Daux krax hu veng Zion khankix koe krax pa khi rhawm, kheu jao ang pui tix kaux kawx hoek ti sang yuh pawie krax pa singax singeh heue. Siviex veng nawh khankix mawh pa hoik yiien, cao giex kaing li nawh khankix hoik ngia ngheeik, bunkrih nawh khankix mawh pa hoik kham krax laux rhawm mai nawh kawx mawh pa yaox ti kham krax laux rhawm pa kied lang teung heue. ⁵ Pui koeng nawh khankix hoik deeh mawh cao simiang nawh, pui khoi nawh khankix koe krax haok huan mai Siyiex hoik kieh nawh kha rhawm tix kheu jao kied nie haoh hun krax pa lud yuh nawh heue. Kawn praix nawh khankix hoik yaox ti hu ka daux krax pa giex laung pui koeng heue. ⁶ Min sire kawn bun veng Zion hoik grai hu khawmuik heue. Kawn simiang nawh khankix hoik awm cak pa ang yaox ka rib dee sawm tix maix pa to ti hu daux pa ang ti koe riang koe rao, sivoe pui pa pheet ti hawt khaix nawh heue. ⁷ Ka daux yam koe krax kha rhawm veng Yerusaliem mai yam vung vang nawh mai nawh deeh doh keud ka ceu pa nyawm rhawm tix khawmuik, ka pa hoik pon nawh ti koe daux baux tawm taix pui pa koeng, pui pa sang teem ka nawh ang lai koe pie tix kaux kawx, pui koeng hoik yaox mai hoik nyiah ka nawh heue. ⁸ Veng Yerusaliem hoik kied ting lud tom nie, mawh kheu nan, nawh hoik mawh ceu pa seeing heue. Can pui pa nab yam ka nawh khawmuik, deeh koe krax pa salao ka nawh, kheu jao yaox kix ang nawh ceep kraung heue. Mawh heue, tokaux nawh hoik ngia ngheeik mai deeh veeh ti hu plak khaix heue. ⁹ Krax pa seeing nawh hoik koe ka piang sibex dhah nawh heue. Nawh ang lai keud ka dee sidah ju tix, mawh kheu nan, krax pa laux leeing nawh hoik mawh pa daox am pui ka mai nawh ang lai koe cao pa tawx krax nyawm rhawm pie tix kaux kawx heue. Siyiex eue, jhak ka krax pa kha rhawm aux liak! Mawh kheu pui koeng hoik tang yaw tokaux cao tix heue. ¹⁰ Pui koeng khankix tang nyeu taix tix tud rhim ka ceu pa koe nawh khankix heue. Nawh hoik yaox ka laig ceu pui khankix ka dah dee pa singax singeh nawh, ka pui ankix pa hoik tawm Maix Cao ti deuh, son ang kix pon ti laig ka daux bang pui hun Maix Cao heue. ¹¹ Pui nawh koe krax ngia krax ngheeik, kix sawg ka pa ih, kix hoik loh pa ih ka kraung khrai tix mai sonsang taoh ka ju tix heue. Siyiex eue, jhak ti yaox liak! Grawh grawng nawh, aux mawh pa hoik pon krax pa salao pui heue. ¹² Pex khawmuik pa tiang ti hu hawt baoh an khankix eue, mawh ang an saux ka rhawm pex lie? Jhak ti yaox liak! ceu pa awm krax pa laux rhawm lauxrhi aux koe ang koe lie? Ka pa hoik dawg hoek ka piang aux mai ka pa kieh Siyiex aux kha rhawm tix, ka daux singaix kied song rhawm song rhi Nawh Cao heue. ¹³ Khaing ka plak piang, Nawh Cao hoik ploi ngu laig ka daux si-ang aux khankix mai an hoik kheem ti pex ka aux heue. Nawh Cao hoik taong ti deuh kie son sideeing caong aux mai kieh aux deeh veeh tix ing taug mao leeing lang singaix heue. ¹⁴ Khaox glawm krax pa lud aux hoik mawh pa phyawk tix ka khaing taix Nawh Cao, ankix hoik mawh pa vung viien tix vien tau mai sau nawh hoek ka piang ngawg aux, Nawh Cao hoik kieh riang rao aux yawm hu, Siyiex hoik ap aux ka daux tawm taix, pui ankix pa ang aux pon tiebtie heue. ¹⁵ Siyiex hoik dig pui pa kied ting riang ting rao khankix pa ot ka daux sigreung aux, Nawh Cao hoik kok cub pui hun tix cub hoek tuktiak ka aux, sonsang kleeig pui awn ju aux khankix phawng heue. Siyiex hoik biiet bunkrih Yudax awm biiet rawm plix siiet heue. ¹⁶ Kheu jao grawng ceu inkix aux yiiem mai ngai aux hoik lih rawm ngai, grawh grawng nawh, cao pa tawx krax nyawm rhawm pa tak sang deeh taoh ti teei ju aux, mawh pa kied singai khaing aux heue. Kawn praix aux khankix hoik voi, mawh kheu hoik pex pui koeng heue. ¹⁷ Kawn bun Zion yaog taix tix mai pui pa sang tawx krax nyawm rhawm nawh ang koe heue. Siyiex hoik tawm ti deuh lox ka son grawng Yakop, ka tak sang mawh pui pa ot hawt vung viang nawh khankix pui koeng nawh, mai veng Yerusaliem hoik mawh ceu pa ang singax ka daux sinax kix heue. ¹⁸ Siyiex mawh pa rahsee heue. Grawh grawng nawh, aux hoik lheu ka gumlox pingnyap Nawh heue. Pui khawmuik eue, nghiet heue. Mai jhak ka krax pa kha aux rhawm tix, bunkrih aux mai pui awn ju aux khankix hoik kham ka krax pa giex laung tix hu heue. ¹⁹ "Aux kok yo ka pui pa moh aux khankix, viang mawh nan, kix hoik pie lhen ka aux heue. Cao giex kaing li mai kuad song aux khankix, hoik dud rhawm ka daux veng, glang yam sawg kix pa ih sonsang deeh taoh ju tix heue." ²⁰ "Siyiex eue, jhak aux liak! Aux mawh pa kha rhawm mai daux vaig daux tu aux hoik ru raox, rhawm aux mawh pa hoik lukliak ka daux aux heue. Mawh kheu aux hoik mawh pui pa kied ting lud, ka plak praix koe vaig lawm sang teei aux yum, ka daux nyiex mawh pa awm krax yum heue. ²¹ Kix hoik mhong lox pa ngia ngheeik aux, pui pa sang tawx krax nyawm rhawm ang lai koe ka son aux heue. Pui koeng aux khawmuik hoik mhong ka grawng krax pa kha rhawm aux mai kix koe krax gaux rhawm ka hoik yuh Maix Cao ka ankix heue. Kieh singaix krax pa hoik pao Maix Cao ti deuh hoek liak! Sonsang pon kix tix awm aux heue." ²² Kieh krax pa caox caig yuh kix hoek ka plak sivoe Maix Cao khawmuik mai yuh ka piang kix awm pa hoik yuh Maix Cao ka aux, kheu jao krax pa lud aux khankix khawmuik heue. Grawh grawng nawh, krax pa ngia ngheeik aux khankix koe tom nie mai rhawm aux hoik kied koe krax laux rhawm heue.

¹ Siyiex hoik kheem kawn bun veng Zion ka paiawm pa song rhawm song rhi Nawh Cao yuh ka mawx lie? Nawh Cao tik krax pa mhawm grang ceu pui Isarelax khankix khaing daux raoma tom hoek ka piang tiex mai Nawh Cao ang lai doh keud ka ngot dee deuh caong tix, ka daux singaix koe krax song rhawm Nawh Cao heue. ² Siyiex hoik bleet ti ih ka baoh deeh ot dee koe ceu pui Yakop khankix khawmuik mai ang lai koe krax caux rhawm ka heue. Nawh Cao hoik tik nyiex tab dee pa kaux cong kawn bun Yudax laig ka daux krax pa song rhawm Nawh, hoik kieh ankix grhup ka piang tiex, Nawh Cao hoik yuh laux ka min meung haktiex mai khawm simiang nawh khankix heue. ³ Nawh Cao hoik tat ti tik rung ceu pui Isarelax khawmuik, ka daux krax pa kied song rhawm tix heue. Nawh Cao deeh yoi taix khawn dawm Nawh khaing sivoe pui koeng heue. Awm hax ngu ku plak, Nawh Cao hoik kieh ceu pui Yakop khankix hax heue. ⁴ Nawh Cao hoik vaik ak tix awm pui koeng, Nawh Cao cung mai yaog taix khawn dawm tix, awm pa kieh pui koeng khankix pui khaw ngai mai hoik pah pui ankix khawmuik, ka piang nyiex gox kawn bun veng Zion, Nawh Cao hoik klup krax pa kied song rhawm Nawh lih awm ngu heue. ⁵ Siyiex awm pui pa koeng, Nawh Cao hoik bleet ti ih ceu pui Isarelax khankix, Nawh Cao hoik bleet ti ih can nyiex haw nawh khawmuik, Nawh Cao hoik yuh nyiex tab lhaong dee pa kaux cong nawh laux leeing khawmuik mai hoik nie baox yuh krax yiiem yo mai krax khi rhawm koe ka daux rhawm kawn bun Yudax heue. ⁶ Nawh Cao hoik yuh krax pa kin ka nyiex gox bwan man Nawh, awm hoik mawh nyiex gox daux sipeem, Nawh Cao hoik yuh dee pa kraix khrawm Nawh pui khankix laux leeing, Siyiex hoik kieh pawie singax singeh pa hoik tat tix mai singaix twah khankix mawh pa hoik pi awm tix ka daux veng Zion tan heue. Ka daux krax pa chu rhawm song rhawm Nawh, Nawh Cao hoik thiang ti tik ka simiang mai cao giex kaing li heue. ⁷ Siyiex hoik thiang ti tik ka khu dee tan Nawh Cao, Nawh Cao hoik seeing ka dee pa singax singeh Nawh mai Nawh Cao hoik ap ti tawx guh veng nyiex haw khankix ka daux tawm taix pui koeng heue. Kix hoik yuh lox sinum ka daux nyiex bwan Siyiex, awm ka daux singaix pawie pa singax singeh heue. ⁸ Siyiex hoik tat rhawm tix yuh guh veng kawn bun veng Zion laux leeing, Nawh Cao hoik tuk ka maox tiag mai ang lai deeh yoi taix khaing krax pa sang yuh tix krax laux leeing heue. Nawh Cao hoik kieh guh veng plak daux mai guh veng plak praix khankix koe krax khi rhawm mai kieh kix voi rhawm tau heue. ⁹ Siviex veng Zion hoik blawn ka daux tiex mai Nawh Cao hoik yuh nawh laux leeing mai hoik raig ti tik jhong siviex nawh khankix heue. Simiang nawh mai kawn simiang nawh khankix ot ka daux sinax ceu pui tang meung, pa ang koe been khankix, mai cao jhai nawh khankix ang lai chix pon ti yaox krax pa plak jhi khaing Siyiex heue. ¹⁰ Kuad song veng Zion khankix, ngawm ti ot ka piang tiex mai ot yiien yawg, kix rhuat phawng tiex ka piang kaing cao tix mai rawd nyoi ka man chee rhix heue. Bunkrih veng Yerusaliem khankix, gum kaing tix tom silaing tiex heue. ¹¹ Ngai aux hoik roik rawm ngai, tom hoik pupie, mai daux vaig daux tu aux hoik lukliak, ghin aux hoik glup ti lih ka piang tiex, kheu jao krax laux leeing kawn bun ceu pui aux khankix mai kheu hoik khrup rhawm kawn nyawm mai kawn nyawm peuex teeih khankix ka daux krax daux veng heue. ¹² Kix ah nin ka miex kix, "Mawh koe nghox mai rawm plix siiet dee mawx lie?" Yam khrup rhawm kix, awm pui pa hoik mat, ka daux krax daux veng khankix mai rhawm kix hoik dex dud ka piang naok miex kix heue. ¹³ Kawn bun veng Yerusaliem eue, Aux sang tiag maix ka mhai patix lie? Aux tak sang tiag maix mai pui mawx lie? Kawn bunkrih veng Zion eue, Aux tak sang tiag maix ka ceu patix, sonsang pon tawx aux krax pa nyawm rhawm ka maix lie? Grawh grawng nawh, krax laux leeing maix mawh pa kied ting awm rawm sigrit sigra, mawh pui mawx pa pon pai maix lie? ¹⁴ Cao jhai maix khankix hoik yaox krax plak jhi ceu pie lhen ka son maix, kix ang nyang plak jhi krax pa lud maix, sonsang deeh viex tix pui pa giex laung maix khankix ing heue. Viang mawh nan, kix hoik yaox krax pa plak jhi ka son maix, pa mawh gumlox jhai pie lhen mai pa koe krax lud krax loe khankix heue. ¹⁵ Can pui pa tiang baoh an khankix, dieh taix tix ka maix, kix ah lox salao mai vuh vied kaing tix, ka kawn bun veng Yerusaliem ah nin, mawh in veng pa hoik kok tix mawh pa grum mhawm grang mai dee koe krax nyawm rhawm haktiex lie? ¹⁶ Pui koeng maix khankix hoik ang jheeh tix ka maix, kix ah lox salao mai greeik rhang tix ah nin, "Ex bleet ti ih nawh uik. In mawh singaix krox jun ex mai ex hoik yaox ka nawh heue." ¹⁷ Siyiex hoik yuh ceu pa tat Nawh Cao ti deuh, Nawh Cao hoik grum naog yuh gumlox pa hoik tawm Nawh Cao ti deuh ka daux singaix pa prim dix heue. Nawh Cao hoik yieh ti tik mai ang lai koe krax lhawk ka mai Nawh Cao hoik kieh pui koeng maix koe krax gaux rhawm ka hoik pex tix maix mai hoik yaog ti deuh rung pui koeng maix lhaong heue. ¹⁸ Rhawm kix kok yo ti sawg ka Siyiex, guh veng kawn bun veng Zion eue, kieh rawm ngai maix khankix lih hu awm rawm klawng, ku singaix mai paw kieh kawn ngai maix koe krax laux lee tix heue. ¹⁹ "Yaog ti kaoh mai kok yo plak ponsawm, yam jah praix ti riang, klup rhawm rhi maix lih awm rawm khankix, ka plak sivoe ngai Siyiex, yaog taix maix ka plak see Nawh, son ju kawn nyawm pa awn ju maix khankix, pa khrup rhawm ka cai rhawm tix, ka kaing krax ku krax heue." ²⁰ Siyiex eue, jhak ti yaox mai keud ti yaox liak! Maix Cao hoik yuh ceu inkix ka pui mawx lie? Mawh sang chix ih bun ka kawn cao tix, pa mawh kawn ngie pa hoik teem kix daux taix tix lie? Sang chix mawh cao giex kaing li mai cao jhai khankix pa pah ti yum ka dah dee pa singax singeh Siyiex lie? ²¹ Pui pa awn ju mai pui pa riex ju khankix nyat tix ka piang tiex ka daux krax khankix heue. Bunkrih mai sinaw aux khankix hoik goh ti yum ka vaig lawm mai Maix Caox hoik pah kix yum ka daux singaix koe krax pa song rhawm Maix Cao heue. Cao hoik pah ti tik kix mai ang lai koe krax caux rhawm ka piang kix heue. ²² "Maix Cao hoik kok pui khankix hoek, awm pa koe singaix pawie mai hoik kok ceu pa lhat graung koe hawt rawb rim aux heue. Ka daux singaix koe krax pa song rhawm Siyiex, ang lai koe pui pa glawd tix kaux kawx, ang lai koe heue. Ka pui pa hoik teem aux mai pa hoik eei aux ti deuh, pui koeng Aux khankix hoik yuh nawh laux leeing heue."

¹ Aux mawh pui pa yaox krax kha rhawm ka khaox gix krax pa song rhawm Nawh Cao heue. ² Nawh Cao hoik thong ka aux mai kieh aux hu ka daux pa faik mai ang tie kieh aux hu ka daux pa riang heue. ³ Nawh Cao teei taix tix sivied ka aux tete, tix bawg hoik tix bawg leeing singaix heue. ⁴ Nawh Cao hoik kieh nex mai hak aux rham mai hoik raig ti tik si-ang aux heue. ⁵ Nawh Cao hoik lai lawm ti puing aux mai hoik lai lawm aux ka ceu pa song mai ceu pa koe krax kha rhawm heue. ⁶ Nawh Cao hoik deuh aux ka dah dee pa faik, awm krax yuh ka pui pa yum tom yam ankix dix heue. ⁷ Nawh Cao yuh die lai lawm ka aux, son ang aux pon ti lih hu mai Nawh Cao hoik yuh ceng rhiem aux ciien heue. ⁸ Yam kok yo mhaing aux krax teem kawx, Nawh Cao nyeep thox ka lox bwan rawg aux heue. ⁹ Nawh Cao hoik thox daux krax hu aux, ka lon simaox pa hoik saik tix mai Nawh Cao hoik yuh daux krax hu aux mawh pa vawk heue. ¹⁰ Nawh Cao hoik awm krih pa jawm tix pin aux, mai awm sivai sangsi pa ot dee glip heue. ¹¹ Nawh Cao hoik kieh aux tang krax hu mai hoik riah ti tik aux tom phawng mai Nawh Cao kieh aux koe krax voi heue. ¹² Nawh Cao hoik vaik ak tix mai hoik deuh aux awm mhai tung tang son te heue. ¹³ Nawh Cao hoik kieh te pa koe daux lawk te Nawh, hu krox ka sok lax aux heue. ¹⁴ Aux hoik lih ti mawh krax pa nyiah pui ka mai krax grawng lai rhax pa ah kix leeing singaix heue. ¹⁵ Nawh Cao hoik kieh aux naog ka ceu pa kied song mai Nawh hoik kieh aux nyaux rawm ghin heue. ¹⁶ Nawh Cao baox deeh pot yuh rhang aux khankix ka lon simaox khrap mai hoik kheem aux ka nyaox heue. ¹⁷ Maix Cao hoik gah khwan ju aux luan dee singai khaing krax pa nhim mai aux hoik piawm ka grawng ceu pa mhawm tix heue. ¹⁸ Aux ah nin, riang rao aux mai krax pa keud pot jun pot aux, hoik grai grup khaing Siyiex heue. ¹⁹ Doh keud ka krax pa kha aux rhawm tix mai ka krax pa vung viang aux ti hu mai ka rawm ghin song heue. ²⁰ Rhawm aux kawn koe krax doh keud mai hoik awn hoik peei ka daux aux heue. ²¹ Mawh kheu nan, rhawm aux deeh doh keud ka grawng in, aux koe krax keud pot jun pot ka heue. ²² Ka daux krax moh krax rhawm Siyiex, ex ang lai laux leeing mai krax pa caux rhawm Nawh ang koe dee sidauh sidu heue. ²³ Ankix mawh pa khraox ku ngawb, ka grawng pa kaux sijax Maix Cao mawh pa kied ting lhaong heue. ²⁴ "Ju aux ah nin, Siyiex mawh num cie aux, mawh kheu nan, aux koe krax pa een rhawm ka daux Nawh Cao heue." ²⁵ Siyiex tak tawx bwanson ka pui ankix, pa krox jun Nawh mai ka ju pa sawg ti yaox Nawh heue. ²⁶ An mawh pa mhawm ka pui pa een rhawm tix ka Nawh Cao mai yiien yawg ti krox jun bwanson krax taoh Siyiex heue. ²⁷ An mawh pa mhawm son pui, pa klawm khaox glawm yam kawn awn ju nawh heue. ²⁸ Kieh nawh ngawm tix kaux nong nong mai ot yiien yawg tix, mawh kheu Siyiex hoik deuh khaox glawm an ka piang nawh heue. ²⁹ Kieh nawh jup jheeh tix ka daux phawng tiex, phan yuh nan, krax keud pot jun pot tak sang kawn pon ti koe ka pleue, ³⁰ kieh nawh tawx sibax tix ka pui pa simang ka nawh mai kieh nawh sak ka lox pa salao pui tix heue. ³¹ Grawh grawng nawh, Siyiex tak ang lai tik ka pui leeing ju heue. ³² Viang nawh kieh krax pa khi rhawm koe kawx mai Nawh Cao tak sang jhi krax pa caux rhawm tix, awm krax pa kied haoh hun krax moh krax rhawm Nawh Cao heue. ³³ Mawh kheu Nawh Cao ang koe rhawm tix sang yuh krax pa kha rhawm pui mai ang yuh krax pa khi rhawm kawn pui khankix heue. ³⁴ Sonsang dig pui haktiex pa ot daux thawng phawng khawmuik, ka greem caong tix, ³⁵ sonsang yieh krax pa rahsee pa khaw pui tix kham, sivoe ngai Cao pa kied ting lhaong, ³⁶ Phan ang mawh nan, sonsang yuh krax pa som pui koe ka grawng see nawh, in mawh pa ang Siyiex khaw rhawm ka heue. ³⁷ Yam ang Siyiex nyang bax tawm lox, mawh pui mawx pa pon ah hoik lih mawh tix ceuceu lie? ³⁸ Krax kha rhawm mai krax pa koe bwanson, ang mawh pa kaoh khaing daux jheeh cao pa kied ting lhaong lie? ³⁹ Pui pa kawn im ju koe krax ngia yuh ka mawx, son krax kham geu nawh phimap tix lie? ⁴⁰ Kieh ex sawg ciied ti yaox daux krax pa yuh tix khankix mai deeh veeh ti hoek ka Simiang Siyiex heue. ⁴¹ Kieh ex viex rhawm rhi tix mai yaog taix tix khankix, ka Siyiex pa koe ka piang raoma heue. ⁴² Ex hoik lud mai hoik tieh feen, Maix Cao ang nyang koe krax pa pluat ploi heue. ⁴³ Maix Cao hoik mox tokaux tix ka krax pa song rhawm mai hawt leue yix, Maix Cao koe krax pah mai ang lai koe krax pa caux rhawm heue. ⁴⁴ Maix Cao hoik kheem tokaux tix ka paiawm, son ang lox rawg bwan pon tix phlat ka heue. ⁴⁵ Maix Cao hoik kieh yix mawh sibroe sibrok ceu pa seeing brai, ka daux sinax pui khankix heue. ⁴⁶ Pui koeng yix khawmuik, hoik ang jheeh tix ka yix heue. ⁴⁷ Krax lhat graung mai daux tiex hoik hoek ka piang yix, khawm krax pa yiien grai hu pui mai khawm krax pa laux leeing heue. ⁴⁸ Rawm ngai aux khankix hoik lih hu awm rawm klawng, kheu jao grawng krax pa laux leeing kawn bun pui aux khankix heue. ⁴⁹ Rawm ngai aux hoik lih ang jud ang jai, ⁵⁰ tom sidah kok puan Siyiex tix jhak mai yaox ka ankix khaing piang raoma heue. ⁵¹ Ngai aux kieh rhawm aux kham geu krax saux, kheu jao grawng kawn bun veng aux khankix heue. ⁵² Pui koeng aux khankix hoik leue aux awm sim, ka daux krax pa ang koe grawng koe ceu heue. ⁵³ Kix hoik pah ju aux yum ka daux tiag mai teei lon simaox gut ka piang aux heue. ⁵⁴ Rawm hoik kheem ka piang aux mai aux ah nin, "Aux mawh pa hoik som nai heue." ⁵⁵ Siyiex eue, khaing ka daux tiex pa kied raux, aux kok yo ceu kaux Maix Cao heue. ⁵⁶ Maix Cao hoik mhong lox aux, "Paw doh veeh yhaok Maix Cao khaing lox pa ngia ngheeik aux mai khaing lox kok yo aux son krax teem liak." ⁵⁷ Maix Cao hoik greed tix dex ka daux singaix yam kok aux ka Maix ah nin, "Paw koe krax lhat graung awx." ⁵⁸ Siyiex eue, Maix Cao hoik prawng grawng see aux khankix ka son ju aux, Maix Cao hoik deeh taoh ju aux heue. ⁵⁹ Siyiex eue, Maix Cao hoik yaox ka grawng krax kham geu aux, prawng ka grawng see aux liak. ⁶⁰ Maix Cao hoik yaox ka krax pa sang pawk kix bix tix mai grawng pa sang keud kix ti yuh ka piang aux khawmuik heue. ⁶¹ Siyiex eue, Maix Cao hoik mhong ka lox salao kix mai grawng krax pa sang keud kix ti sang yuh ka piang aux khawmuik, ⁶² khawm lox jheeh pui koeng aux khankix mai grawng krax pa deuh kix phimap ka piang aux leeing singaix heue. ⁶³ Maix Cao jhak ka yam ngawm kix mai ka yam yaog kix tix kaoh liak. Aux hoik mawh lox lai rhax kab kix ti ah heue. ⁶⁴ Siyiex eue, deeh viied ti tawx ka kix, awm kaing pa hoik yuh kix ka taix tix heue. ⁶⁵ Tawx rhawm pa kiien ka kix mai kieh krax pa jhax lawg Maix hoek ka piang kix liak. ⁶⁶ Ka daux krax pa song rhawm Maix Cao, hawt leue kix mai yuh kix laux leeing khaing greem raoma cie Siyiex heue.

¹ Khri hoik laix rawm sawng yuh ka mawx, khri nawnaw hoik bheet yuh ka mawx. Lon simaox koe dee pa singax singeh khankix hoik prung prang ti hu ka piang gah krax kudauh heue. ² Kawn simex pa laoh lie veng Zion khankix, koe ngawh koe jum awm khri ceu pa mhawm, kix hoik sawn ti mawh aw tiex, pa mawh kaing tiex yuh pui pa yuh aw tiex khankix yuh ka mawx? ³ Pie sox praix kawx tawng tix tawx teeih tix ka kawn iak tix heue. Viang mawh nan, bun pui aux khankix hoik deeh lih ti mawh pa yuh krax pa kin awm sim kala uk khankix pa ot ka daux tiagtu heue. ⁴ Dak kawn nyawm pa kawn peuex teeih an, kawp daoh nawh, kheu jao sang nyaux nie tix rawm heue. Kawn nyawm khankix mhaing tix ih blah, viang mawh nan, ang koe pui pa sivit tix tawx ka kix heue. ⁵ Glang ka in, pui ankix pa hoik ih ka priex pa nyawm, yam in mawh pa hoik voi piang krax, pui ankix pa hoik it ka piang bi tawm man pa raoh rawt, tak yaox ti it ka piang pum phon heue. ⁶ Kheu jao pa lud kawn bun pui aux khankix, mawh pa nie lheu ting khaing krax kham geu phimap veng Sawdom,pa hoik yuh laux leeing ka daux tivud khaing mai pa ang pui mawx tawx taix tix ka nawh heue. ⁷ Pui ting pui lhaong nawh khankix glang ka in nie lheu singax khaing rawm rha mai nie lheu paing khaing rawm teeih heue. Nex nham tokaux kix hoik mawh pa nie lheu raoh khaing siang simaox pa raoh ankix, plak grang pakpeung kix mai plang awm siang simaox pa klai ankix heue. ⁸ Yam in grang pakngai kix mawh pa nie lheu lung khaing suah, tom ang pui lai tawng kix ka daux krax daux laux, hak kix kawb ka si-ang kix mai hoik kroh awm nge khix heue. ⁹ Pui ankix pa hoik pah tix ka vaig, mawh pa nie mhawm khaing pui ankix pa yum ka krax cai rhawm heue. Grawh grawng nawh, inkix krawx hu kheu jao pon tix krax pa kham geu mai kheu jao cud cha plix khaox plix ox ka daux tong kaung heue. ¹⁰ Taix bun pa caux rhawm, hoik tang braok ka kawn cao tix, mawh pa ih son kix, ka daux bawg yam koe krax laux leeing kawn bun pui aux khankix heue. ¹¹ Siyiex hoik grum naog yuh krax song rhawm Nawh mai Nawh hoik laug krax pa kied song rhawm tix lih heue. Nawh Cao hoik keeig ngu ka daux veng Zion mai hoik proe ti tik num riah veng nawh khankix heue. ¹² Simiang haktiex khankix mai pui pa ot ka piang haktiex khawmuik, ang lai koe krax pa yum rhawm ka sang pon laig pui koeng mai pui khoi ka daux siviex veng Yerusaliem, ¹³ kheu jao grawng phimap cao jhai nawh khankix mai krax pa lud cao giex kaing li nawh khankix, pa hoik jauh yuh nham pui pa rahsee ka daux sigreung veng Yerusaliem heue. ¹⁴ Kix vuvie ti hu awm pui dug ngai ka daux krax mai hoik seeing yuh tokaux tix ka nham, son ang pui tix kaux kawx pon hu krox hu teeh ka kraung ceep kix heue. ¹⁵ Pui kok yo ka kix ah nin, "Hu dee singai heue. Pex pa ang singax singeh khankix eue, hu luan dee singai heue, paw krox teeh ka yix!" Yam hoik to kix mai yam hoik vung viang kix tix hu, pui ankix pa ot ka daux sinax ceu pui khankix ah nin, "Kix ang lai pon tix ot tin heue." ¹⁶ Siyiex song rhawm mai prung prang ti tik kix, Nawh Cao ang lai kia ngien ka kix khaix in heue. Pui khankix ang lai koe krax yungyi nab yam ka cao giex kaing li khankix mai ang lai koe krax grix krax ring ka kuad song khankix heue. ¹⁷ Ngai ex hoik vuvix ka pau ex tix jhak giex going mai ang koe pui pa sang teem ex heue. Ka daux krax pa pau ex ti jhak, ex hoik pau ti jhak ka son ceu pui pa ang pon taoh ka ex heue. ¹⁸ Kix hoik leue tix hawt khaix caong ex, tom ang ex pon lailing ti hu ka daux krax heue. Dee sidauh ex hoik dex, baux singaix ex khankix hoik uik, grawh grawng nawh, dee sidauh ex hoik hoek phao heue. ¹⁹ Pui pa hawt leue ex khankix, nie lheu phai khaing klang krih piang raoma heue. Kix hawt tix leue ex ka piang gawng lua, pau ti jawm ex ka daux tiagtu heue. ²⁰ Simiang kaw pa deuh ex rhawm tix ka, pa hoik groi Siyiex rawm bee ka piang, hoik krix ka daux tiex kix mai ka pui pa hoik ah ex nin heue. "Greem veei bwan nawh, ex tak sang yaox tix im ju ka daux sinax ceu pui tang meung khankix heue." ²¹ Kawn bun Edom pa ot ka daux haktiex Uzax eue, gaux rhawm mai koe krax pa nyawm rhawm heue. Kawk nyaux tak sang loe tix hoek ka dee ot maix heue. Maix tak sang nyaux ti yoek, tom ang lai ceep kraung heue. ²² Kawn bun Zion eue maix hoik sak ka kham geu ti krax pa lud tix heue. Nawh Cao tak ang lai kieh maix laig ka daux krax pa giex laung khaix in heue. Kawn bun Edom eue, Nawh Cao tak sang sikaw krax pa lud maix mai tak jhi ka phimap maix khankix heue.

¹ Siyiex eue, doh keud ka ceu pa hoik hoek ka piang yix, jhak ti yaox ka lox salao pa hoik kham yix liak. ² Sinngao yix hoik deeh veeh ti hu ka ceu pui tang ceu khankix mai nyiex ma yix hoik deeh veeh ti hoek ka daux tawm taix pui tang meung khankix heue. ³ Yix hoik mawh kawn doe pa ang koe keeing, miex yix hoik mawh pa awm miexmai heue. ⁴ Yix yaox ti tawx mau son rawm pa sang nyaux yix mai khix taung yix mawh pa liag ka pui heue. ⁵ Kix hawt ti leue yix tom phoek loek caong yix heue. Yix hoik taug mao mai ang lai koe krax laux lee heue. ⁶ Yix hoik yaog taix tix tu ka pui Ejiptux mai ka pui Asurix khankix, sonsang sawg ka pa ih heue. ⁷ Keeing yix khankix hoik lud mai kix ang lai koe heue. Yix yaox ti kham geu krax pa lud kix heue. ⁸ Siliex khankix kwang ka piang yix mai pui pa sang deeh taoh yix khaing daux tawm taix kix ang lai koe heue. ⁹ Yix hoik kham ti tik ju ka vaig lawm ka daux tiagtu kheu jao sang pon pa ih heue. ¹⁰ Hak yix hax awm daux glah ngu, mawh kheu hax jao sibhawm praix heue. ¹¹ Kix hoik khin ti lud vao tau mai bun khankix ka daux veng Zion mai bunkrih ka daux veng Yudax heue. ¹² Taix simiang khankix mawh pa phyawk tix mai tak teue ka kix mai ang lai koe krax yungyi nab yam ka kuad song khankix heue. ¹³ Pui awn ju khankix hoik krid ka mhaw mai kawn nyawm khankix, hoik sideeing tix goh greem gawg khix heue. ¹⁴ Kuad song khankix hoik grai hu khaing krax pa kraix khrawm ti hawt siviex veng mai pui awn ju khankix kawx hoik grai hu khaing daux pawie yuh kix heue. ¹⁵ Krax pa gaux daux rhawm yix hoik grai mai krax graoh yix hoik deeh tieh ti mawh krax pa ngia pa ngheeik heue. ¹⁶ Mhok khri hoik rau khaing kaing yix, krax pa kha rhawm koe ka yix, kheu jao hoik lud yix heue. ¹⁷ Mawh kheu jao grawng in, rhawm rhi yix koe krax pa taug pa mao, mawh kheu jao grawng inkix ngai yix hoik vuvix, ¹⁸ mawh kheu jao hoik yiien hu pui khaing gawng Zion, sox praix khankix hoik lailing ka baoh dee an heue. ¹⁹ Siyiex eue, Maix Cao koe leeing ju heue. Dang neung Maix tak koe ku ju leeing ju heue. ²⁰ Maix Cao sang piawm ka yix leeing ju mai sang tik vud ka yix, tom rheung bawg yam yuh ka mawx lie? ²¹ Siyiex eue, deeh veeh yix ing ka Maix Cao mai yix tak sang pon veeh tix ing heue. Deeh cox baux singaix yix khankix mawh pa khraox, awm baux singaix pa prim dix heue. ²² Phan Maix Cao ang yang bax thiang ti tik yix pak lawg mai ang koe krax pa kied song rhawm ka yix hoik mhawm heue.