Joshua

Joshua

¹ Khaix hoik yum Mose, pa mawh kawncau Siyiex leeing ju mai khaix hoik luan ceu an khankix Siyiex leeing ju sikah mai Yawsux pa mawh kawn simex Nun mai cao teem ka Mose ah nin heue. ² "Kawncau Aux hoik yum heue. Mawh kheu nan, yam in yaog ti kaoh mai hu ka plak toi rawm klawng Yawdan in, maix khawm pui inkix khawmuik mai laig ka daux haktiex pa sang tawx Aux ka kix pa mawh kawn praix Isarelax khankix heue. ³ Can dee pa tak sang dig pex ka tiag caong tix khankix, Aux hoik tawx ka pex, awm krax pa hoik ah Aux ka Mose heue. ⁴ Jah khaing daux tiag mai gawng Lebanon in, tom hoek dee singai ka rawm klawng ting Upharetix mai haktiex ceu pui Hitix, khankix khawmuik mai ka rawm sigrit sigra ting pa koe plak klip singaix khankix, tak mawh mee haktiex dee pan dee kwang pex. ⁵ Pui tix kaux kawx, tak ang pon ti cung ka plak sivoe maix ka daux bawg yam singaix im ju maix awm krax pa hoik ot Aux tau mai Mose. Mawh kheu nan, Aux tak ot tau mai maix. Aux tak ang pon ti prah maix mai ang doh tik vud ka maix. ⁶ Teei riang rao tix mai kieh koe krax kwa rhawm ka daux ceu pa mhawm. Grawh grawng nawh, ka son pui inkix maix tak sang gwieh ti tawx haktiex, son sinngao krax pa sang pon kix ti cie, ka pa hoik tiextu Aux nawh ka keeing kix mai sonsang tawx Aux nawh ka kix heue. ⁷ Teei riang rao tix mai kieh koe rhawm kied kwa ka daux ceu pa mhawm sonsang pon hawt maix ti yuh awm gumlox beenli pa tawm kawncau mau soi Aux Mose ka maix khawmuik heue. Paw doh veeh tix ka plak khawn dawm mai ka plak khawn gwiex khaing ceu ankix, sonsang pon maix ti haok hwan ting lhaong ka can dee hu maix kudah heue. ⁸ Phuk lai beenli in, tak mawh pa ang chix gah tix khaing jheeh maix heue. Viang mawh nan maix tak doh keud mai phat nawh ku singaix, sonsang pon hawt maix ti yuh awm ceu an khankix, pa hoik tiiem tix ka daux an khawmuik heue. Grawh grawng nawh, mawh pa yuh maix haok hwan ting lhaong mai khaix an maix tak koe krax pa pex ka daux ceu pa mhawm heue. ⁹ "Aux hoik tawm nawh ka maix ang mawh lie? Teei riang rao tix mai kieh koe rhawm kwa daux ceu pa mhawm heue. Paw doh kieh koe krax lhat graung mai paw koe krax laux rhawm awx. Grawh grawng nawh, Siyiex leeing ju maix mawh pa ot tau mai maix, ka can dee hu maix ku dah heue." ¹⁰ Khaix an Yawsux tawx gumlox tix ka cao kaing pui khankix ah nin. ¹¹ "Hu vung viang ti jhak dee pan mai tawx gumlox tix ka pui khankix ah nin. Cox khre ti priex krax pa ih son tokaux cao pex. Grawh grawng nawh, ka daux loe singaix pex tak tiang ti hu ka plak toi rawm klawng Yawdan in, sonsang pon hu teei pex ti cie haktiex pa sang tawx Siyiex leeing ju ka pex, son krax pa sang yaox pex ti cie heue. ¹² Son pui Rubin, son ceu pui Gat mai son doeh ceu pui Manashe khankix tix plak, Yawsux krai ka kix ah nin. ¹³ Deeh doh keud ka gumlox sikah pa hoik tawm kawncau Siyiex leeing ju pa mawh Mose ka pex, pa hoik ah nin. "Siyiex leeing ju pex tak sang tawx pex laux lee tix mai Nawh Cao tak sang tawx haktiex in ka pex heue." ¹⁴ Moeng pex khankix, kawn nyawm iak pex khankix, to briex eei pex khankix tak sang mawh pa prah ti ot ka daux haktiex pa hoik tawx Mose ka pex, ka piang praok plak lih singaix rawm klawng Yawdan heue. Pex tak tiang ti hu ka plak sivoe kru naing puxaik pex khankix tau mai pui pa ting riang rao pa koe rhawm vao rhawm kwa mai hu teem ka kix, ¹⁵ tom hoek bawg yam hoik tawx Siyiex leeing ju puxaik pex khankix laux lee tix, awm krax pa hoik tawx Nawh Cao ka pex heue. Kix hoik mawh pa hoik teei ti cie haktiex pa sang tawx Siyiex leeing ju pex ka kix heue. Khaix an, pex tak deeh ing ka haktiex cie tix, ma koe krax gaux rhawm ka daux haktiex an pa hoik tawx kawncau Siyiex leeing ju Mose nawh ka pex heue. Ka piang praok plak in, hawt rawm klawng Yawdan ka dee plak lih singaix heue. ¹⁶ Kix deeh pawk lox Yawsux ah nin, "Yix tak yuh ceu ankix, pa tawm maix ka yix mai yix tak hu ka dee pa sang ploi maix yix hu kudah heue." ¹⁷ "Awm krax pa hoik cu nghiet yix ka Mose, ka daux grawng kuceu, yix tak nghiet ka maix heue. Kieh Siyiex leeing ju maix ot tau mai maix awm hoik ot Nawh Cao tau mai Mose heue. ¹⁸ "Can pui pa tieh feen ka gumlox maix mai pa ang cu tix nghiet ka gumlox sikah maix khankix ka daux krax pa hoik tawx maix gumlox tix ka nawh, tak kieh nawh pon krax yum heue. Teei riang rao tix mai kieh koe rhawm kwa ka daux ceu pa mhawm heue."

¹ Yam in, Yawsux pa mawh kawn simex Nun, briex ploi pui ra kaux lih hu khaing daux tiag Akashax, sonsang hu mox kiex ti jiang mai nawh ah nin ka kiex. "Hu jhak ti yaox ka haktiex pa mawh veng Yerikho. Mawh kheu nan kiex lih hu hoek ka daux nyiex bun coh kaux, pa mawh ceu kaux Rahap mai kiex peung daux nyiex nawh tan heue. ² Pui haktiex tiblah hu krai grawng ankix ka simiang veng Yerikho mai kix ah nin. "Jhak heue, pui khankiex pa hoik hoek tin ka daux sawm in mawh pa kaoh khaing kawn praix Isarelax khankix, sonsang sawg kix ti hu jiang ti jhak ka daux haktiex heue. ³ Mawh kheu nan, simiang veng Yerikho kok Rahap ah nin ka nawh, "Viex pui ankiex pa hoek mai pa hoik laig ka daux nyiex maix khankiex lih heue. Grawh grawng nawh, kiex hoik hoek sonsang sawg ti jiang ka daux haktiex khawmuik." ⁴ Khaix an, bun an teei pui ankiex ra kaux mai mox kiex mai nawh deeh ah nin. "Mawh heue, pui ankiex hoik hoek ka aux heue. Viang mawh nan, ang aux tie tawng ka plak dee kaoh kiex." ⁵ Ceu ankix hoik lih ti mawh, awm khaix hoik song kix siviex veng yam hoik hoek bawg yam faik praix, pui ankiex hoik lih hu ka plak praix mawx aux ang tawng heue. Nied pex hawt khaix kiex phaiphai liak, grawh grawng nawh, pex tak kawn krup kiex heue." ⁶ Viang mawh nan, nawh hoik viex kiex haok ka piang braux nyiex mai mox kiex ka daux sinax gawng khaox gan pa hoik deuh nawh ti priex ka piang braux nyiex heue. ⁷ Khaix an pui khankix, hawt khaix kiex ka diang tiang kix rawm klawng Yawdan heue. Awm hoik lih hu pui ankix, pa hawt khaix kiex dom mawx dom an kix song ka siviex veng heue. ⁸ Mawh kheu nan, sivoe ang pui pa jiang ankiex nyang laig it, bun an haok ka piang braux nyiex, ⁹ mai nawh ah nin ka pui ankiex. "Aux tawng ka hoik tawx Siyiex leeing ju haktiex in ka pex mai krax pa lhat graung khaing pex, hoik lih ti hoek ka piang yix mai sonsang khrup rhawm pui pa ot hawt baoh in khankix kheu jao grawh grawng pex heue. ¹⁰ Grawh grawng nawh, yix hoik mhong ka yuh Siyiex leeing ju rawm sigrit sigra raoh hit yuh ka mawx son pex, yam lih hu pex khaing daux haktiex meung Ejiptux mai grawng krax pa hoik yuh pex ka simiang haktiex Amawrix ra kaux, pa ot ka plak praok toi rawm klawng Yawdan plak an, pa mawh simiang Sihung mai simiang Awgax, pa hoik yuh pex nawh laux leeing khawmuik heue. ¹¹ Yam hoik mhong yix ka grawng ceu in khankix, rhawm yix hoik koe krax khrup rhawm mai krax pa vao rhawm khankix ang lai koe pie tix kaux kawx, ka daux sinax yix kheu jao pex heue. Grawh grawng nawh, Siyiex leeing ju pex, mawh Siyiex leeing ju piang meung raoma, mai ka piang haktiex khawm greem haktiex heue. ¹² Mawh kheu nan, yam in, aux khyox khaw pax mai aux simie pax tiextu ka Siyiex, awm hoik jhi aux krax pa caux rhawm tix ka pax, sonsang deeh jhi pax krax pa caux rhawm tix ka nyiex ma keeing aux mai tawx mhai rug pa mawh meh ka aux tix ceu, ¹³ mai son ang pex sang pah miex keeing aux, puxaik puxo aux khankix mai can ceu pa koe kix khawmuik mai tawx krax pa lawd luan ka ju yix khankix khaing daux krax pa yum liak. ¹⁴ Pui ankiex, deeh pawk lox ka nawh ah nin. "Phan pex tix kaux kaux ang krai grawng kaing pa yuh yix inkix, ju yix tak mawh son ju maix heue. Ceu an kix tak lih ti koe, yam hoik tawx Siyiex leeing ju haktiex ka yix heue. Yix tak keud krax pa caux rhawm mai krax pa mawh meh khankix ka son maix heue." ¹⁵ Khaix an nawh ploi kiex lih ka maox tix nyaing, khaing daux doh siviex iak kheu koe nyiex nawh ka piang guh veng mai nawh ot ka piang guh veng an heue. ¹⁶ Nawh deeh ah nin ka kiex heue. "Nied pax to ti hoek ka piang gawng, phan ang mawh nan pui pa hawt khaix pax tak pon ti krup ka pax heue. Mox pax tan loe singaix tom hoek bawg yam deeh hoik ing pui pa hawt khaix pax. Khaix hoik ceu an khankix pax pon ti hu ka daux krax hu cao tix heue." ¹⁷ Khaix an, pui ankiex deeh ah nin ka bun an. "Kieh yax mawh pa ang pon ti deuh phimap, ka son grawng lox pa hoik tiextu maix khankix, pa hoik yuh maix yax tiextu tix kah heue. ¹⁸ Phan ang mawh nan yam hoek yix ka daux haktiex in sax maix phyawk ti deuh maox raoh pa lang in, ka daux diang siviex iak, pa hoik kieh maix yax lih hu. Maix tak kok miex keeing maix mai puxaik puxo maix khankix mai can pui pa koe ka daux nyiex ma miex keeing maix khankix khawmuik hoek ti ot ka daux nyiex cao maix heue. ¹⁹ Mawh kheu nan, ceu ankix tak lih ti koe. Can pui pa lih hu plak praix daux krax khaing diang siviex nyiex maix khankix mai phan nawh yum, nham phimap nawh tak mawh pa koe ka piang kaing cao nawh mai yax tak mawh pa ang koe phimap kah heue. Can pui pa ot tau mai maix khankix ka daux nyiex, phan taix pui hoik krox teeh ka piang nawh, nham phimap nawh tak mawh pa koe ka piang kaing yax heue. ²⁰ Phan maix krai grawng kaing pa yuh yax in, khaix an, yax tak mawh pa lawd luan khaing krax pa tiextu maix khankix pa hoik tiextu maix ti yuh ka yax heue. ²¹ Khaix an, bun an deeh ah nin. "Awm gumlox pax kieh ceu an kix lih ti mawh." Nawh ploi kiex hu dee singai mai kix gwieh paox ti tan heue. Bun an teei maox raoh pa prah kiex mai phyawk ti deuh ka daux diang siviex iak nawh heue. ²² Khaix an, kix gwieh paox tix hu ka piang gawng mai ot tan been loe singaix tom hoek bawg yam deeh ing pui pa hawt khaix kiex heue. Cao pa hawt khaix kiex khankix sawg ti yaox kiex hawt krax hawt laux, viang mawh nan, kix ang yaox ka kiex heue. ²³ Mawh kheu nan, pui ankiex ra kaux deeh lih khaing piang gawng mai ing mai tiang ti hu baoh an kix mai kiex deeh hoek ka Yawsux pa mawh kawn simex Nun mai kiex krai nawh mhong grawng ceu ankix pa hoik lih mawh piang kiex heue. ²⁴ Kiex ankix ka Yawsux, "Siyiex leeing ju hoik ap ti tawx haktiex an khankix tete te lai ka daux tawm taix ex khawmuik heue. Grawh grawng nawh, can pui pa ot ka daux haktiex an, hoik mawh pa khrup rhawm khrup rhi kheu jao ex heue."

¹ Khaix an, Yawsaux yaog ti kaoh ka daux plak ponngawb caocao mai kix lih khaing daux tiag khaox Akashax mai hoek ka rawm klawng Yawdan heue. Nawh mai kawn praix ceu pui Isarelax khankix hoek ti bang sivoe sang tiang kix ti hu ka plak toi rawm. ² Mawh kheu nan, khaix hoik luan daux loe singaix mai cao kaing naing khankix hoik hu lailing ti jhak ka dee bang kix, ³ mai kix tawx gumlox ti lih ka pui khankix ah nin. "Yam yaox pex ka khwi bwan sijax mukheu Siyiex leeing ju pex mai ka cao giex kaing li pa mawh ceu pui Lewix khankix, pa klawm ka eug bwan sijax mukheu an, khaix an, pex tak lih hu khaing dee ot pex mai hawt khaix an. ⁴ Viang mawh nan, khwi bwan sijax mukheu tak khan sinax pex ra rheng sawk, ka plak dee hoik tiag pex ti deuh. Paw doh hoek dex nawh sonsang tawng daux krax pa sang hu pex heue. Mawh kheu ang pex nyang sax tiang ti hu ka daux krax in, glang ka singaix in." ⁵ Yawsux deeh ah nin ka pui khankix. "Yuh tokaux cao pex singax. Grawh grawng nawh Siyiex leeing ju tak yuh krax pa daox ding khankix ka daux sinax pex pasax." ⁶ Khaix an, Yawsux kok ka cao giex kaing li khankix ah nin. "Yaog ti klawm khwi bwan sijax mukheu mai tiang ti hu ka plak sivoe pui khankix heue." Mawh kheu nan, kix yaog ti teei khwi bwan sijax mukheu mai klawm nawh hu ka plak sivoe pui khankix heue. ⁷ Siyiex leeing ju deeh ah nin ka Yawsux. "Jah ka daux singaix in, Aux tak yaog maix ting ka plak sivoe ngai kawn praix ceu pui Isarelax khankix mai sonsang pon kix ti tawng ka ceu an kix, awm hoik ot tau Aux mai Mose, Aux tak ot tau mai maix heue." ⁸ Maix tak tawx gumlox tix ka cao giex kaing li maix khankix, pa klawm khwi bwan sijax mukheu ah nin ka kix heue. "Yam hoik lih hoek pex ka praok rawm klawng Yawdan, pex tak cung ka daux rawm klawng Yawdan heue." ⁹ Mawh kheu nan, Yawsux ah nin ka kawn praix ceu pui Isarelax khankix heue. "Hoek tin mai nghiet ka gumlox sikah Siyiex leeing ju pex." ¹⁰ Yawsux deeh ah nin. "Ka grawng ceu inkix pex tak tawng ka im ju Siyiex leeing ju ka daux sinax pex mai Nawh Cao tak grheu ti tik ceu pui Khanan, ceu pui Hitix, ceu pui Hiwix, ceu pui Pherazix, ceu pui Giragashix, ceu pui Amawrix mai ceu pui Yebusix khankix khaing plak sivoe pex heue." ¹¹ Jhak heue, khwi bwan sijax mukheu Siyiex leeing ju pa ting siawp sibrawm ka piang haktiex khankix khawmuik tak sang tiang ti hu ka plak sivoe pex ka daux rawm klawng Yawdan heue." ¹² Mawh kheu nan, yam in laug ti teei pui kao ra kaux khaing daux doeh ru pui Isarelax khankix, tix ceu tix kaux heue. ¹³ Khaix hoik luan bawg yam an, yam tak dig tiag caong cao giex kaing li khankix, pa klawm khwi bwan sijax mukheu Siyiex, sibrawm pa ting lhaong Siyiex leeing ju ka piang hak tiex khawmuik, hoik lih koe ka daux rawm pa koe ka daux rawm klawng Yawdan dom mawx dom an mai rawm pa koe daux rawm klawng Yawdan pa lih khaing plak laong tak dud mai rawm khankix kaog ti ot awm guh heue. ¹⁴ Mawh kheu nan, ceu an khankix hoik lih ti koe, yam lih hu pui khankix khaing dee bang peung tix, sonsang tiang kix ti hu ka plak toi rawm klawng Yawdan tau mai cao giex kaing li khankix pa klawm khwi bwan sijax mukheu ka plak sivoe pui khankix, ¹⁵ mai yam hoik hoek pui pa klawm khwi bwan sijax mukheu khankix ka rawm klawng Yawdan mai yam hoik dig cao giex kaing li pa klawm khwi bwan sijax mukheu khankix tiag caong tix ka daux rawm, grawh grawng nawh, rawm klawng Yawdan, hoik kheem piang praok nawh khankix khawmuik daux bawg yam glang kawn vawg kix nghox koi tix heue" ¹⁶ rawm khankix pa lih hoek khaing daux klawng daux ngawd pa koe ka plak laong, hoik haok ti cung mai yaog ti koe awm klon rawm, ka dee pa kied singai tom hawt veng Adam, pa mawh veng pa koe praok veng Zaratan heue. Mawh kheu nan, can rawm khankix pa lih hu ka daux rawm sigrit sigra Ariba, pa mawh rawm sigrit sigra kih khankix ang lai chix lih hu mai rawm khankix hoik mawh pa dud heue. Pui khankix hoik tiang ti hu ka plak toi veng Yerikho heue. ¹⁷ Khaix an, cao giex kaing li khankix pa klawm khwi bwan sijax mukheu Siyiex, cung sijung ka piang dee kroh tiex, ka daux sigreung rawm klawng Yawdan mai pui Isarelax khankix, tiang ti hu ka piang dee kroh tiex tom hoik hoek bawg yam hoik tiang pui khankix khawmuik ka plak toi rawm klawng Yawdan heue.

¹ Khaix luan bawg yam an, yam khaix hoik tiang pui khankix ti hu ka plak toi rawm klawng Yawdan khawmuik, Siyiex leeing ju deeh sikah ka Yawsux ah nin. ² "Laug ti teei pui kao ra kaux son tokaux cao maix, khaing doeh ru kix tix ceu tix kaux. ³ Tawx gumlox tix ka kix, "Teei lon simaox kao ra lon son tokaux cao pex khaing tin sigreung rawm klawng Yawdan, khaing dee cung cao giex kaing li khankix si jung heue. Pex tak teei ti viex lon simaox ankix tau mai pex ka plak toi rawm mai deuh ankix ka dee pan pex daux sawm in heue." ⁴ Khaix an, Yawsux kok ka pui kao ra kaux pa hoik tawx nawh beeh glawm khaing daux kawn praix ceu pui Isarelax khankix tix ceu tix kaux khaing doeh ru kix, ⁵ Yawsux deeh ah nin ka kix, "Tiang ti hu ka plak sivoe khwi bwan sijax mukheu Siyiex leeing ju pex, ka daux sigreung rawm klawng Yawdan mai pui tix kaux khaing daux pex tak teei ti viex simaox tix lon ka piang klip nawh awm pa simin ti deuh khaing daux doeh ru kawn praix ceu pui Isarelax khankix, ⁶ Sonsang mawh in mhai rug tix ceu ka daux sinax pex, yam chawk kawn praix pex ka daux bawg yam pa sang hoek khaix in sax mai kix tak ah nin. "Dee bleeh grawng lon simaox inkix mawh ceu patix ka son ex lie?" ⁷ Khaix an pex tak deeh pawk lox kix mai krai grawng krax pa hoik dud rawm klawng Yawdan, ka plak sivoe khwi bwan sijax mukheu Siyiex, yam tiang ka plak toi rawm klawnng Yawdan, rawm khankix, hoik mawh pa tat ti deuh mee heue. lon simaox inkix tak mawh son krax pa doh keud tix ceu ka son kawn praix ceu pui Isarelax khankix leeing ju heue. ⁸ Kawn praix ceu pui Isarelax khankix hawt ti yuh awm gumlox pa hoik tawm Yawsux mai kix yaog ti viex lon simaox khankix kao ra lon khaing daux sigreung rawm klawng Yawdan, awm krax pa hoik sikah Siyiex leeing ju ka Yawsux heue. Awm pa hoik simin kix ti deuh ka doeh ru kawn praix Isarelax khankix, hoik yaog ti viex lon simaox an khankix tau mai tix ka plak toi rawm, mai deuh ankix ka dee pan kix tan heue. ⁹ Khaix an, Yawsux hu teei ti deuh simaox an kao ra lon ka daux sigreung rawm klawng Yawdan, ka dee hoik cung cao giex kaing li pa klawm khwi bwan sijax mukheu mai lon simaox ankix mawh pa koe see tan tom in singaix heue. ¹⁰ Mawh kheu nan, cao giex kaing li khankix pa klawm khwi bwan sijax mukheu hoik cung ti ot sigreung rawm klawng Yawdan, tom hoik bawg yam hoik yuh kix kuceu, awm pa hoik tawm Siyiex leeing ju ka Yawsux, sonsang krai nawh ka pui khankix awm pa hoik tawm Mose khankix khawmuik ka Yawsaux heue. Pui khankix niied ti hu mai tiang ka plak toi rawm heue. ¹¹ Khaix hoik luan bawg yam an khankix mai khaix hoik tiang pui khankix ka plak toi rawm khawmuik, khwi bwan sijax mukheu Siyiex leeing ju mai cao giex kaing li khankix tiang ti hu ka toi plak an, ka plak sivoe ngai pui khankix heue. ¹² Cub pui ceu Rubin, cub pui ceu Gat, cub pui ceu Manashe khankix tix plak hoik tiang ti hu plak an tau mai kru naing tix, ka plak sivoe kawn praix Isarelax khankix awm pa hoik sikah Mose ka kix heue. ¹³ Can pui khankix pa hoik khre rien ti puing naing koe pon mheen kaux, hoik tiang ti hu ka toi plak an ka sivoe Siyiex, ka daux lung haktiex veng Yerikho sonsang yuh naing heue. ¹⁴ Ka daux singaix an, Siyiex leeing ju hoik yaog Yawsux ting plak sivoe ngai kawn praix ceu pui Isarelax khankix mai kix hoik koe krax lhat graung ka nawh, awm hoik lhat graung kix ka Mose ka daux singaix glang kawn im ju nawh khawmuik heue. ¹⁵ Khaix an, Siyiex leeing ju sikah ka Yawsux ah nin, ¹⁶ "Tawx lox maix ka cao giex kaing li khankix, pa klawm khwi bwan sijax mukheu pa kham mhai rug, sonsang lih kix khaing daux rawm klawng Yawdan heue. ¹⁷ Yawsux tawx lox tix ka cao giex kaing li khankix ah nin, "Lih khaing daux rawm klawng Yawdan." ¹⁸ Khaix hoik luan ceu an khankix, yam hoik haok cao giex kaing khankix pa klawm khwi bwan sijax mukheu Siyiex, khaing daux sigreung rawm klawng Yawdan mai yam hoik dig caong cao giex kaing li ka dee kroh tiex, rawm klawng Yawdan, deeh lih hu ka dee hoik koe tix mai lih kheem tom ka praok khankix awm phao voe heue. ¹⁹ Yam in, pui khankix hoik haok khaing daux rawm klawng Yawdan, ka daux khix tix kao singaix mai kix hu pan baoh Gilagalax, pa koe mee haktiex plak lih singaix khaing veng Yerikho heue. ²⁰ Lon simaox an khankix kao ra lon, pa hoik teei kix nawh lih khaing daux rawm klawng Yawdan, Yawsux deeh teei nawh mai sum ti deuh ankix ka daux haktiex Gilagalax. ²¹ Khaix an, nawh deeh ah nin ka ceu pui Isarelax khankix, "Yam chawk kawn praix ceu in ka keeing tix bawg yam singaix pa sang hoek sax, kix tak ah nin. Lon simaox inkix mawh son grawng ceu patix lie?" ²² Khaix an, pex tak kieh kawn praix pex khankix tawng mai ah nin ka kix awx, "Ceu pui Isarelax khankix hoik tiang ti hu ka daux rawm klawng Yawdan in ka piang dee kroh tiex heue." ²³ Grawh grawng nawh, Siyiex leeing ju pex hoik yuh rawm inkix pa koe daux rawm klawng Yawdan hit ka plak sivoe pex, tom hoik tiang pex ti hu ka plak toi an awm hoik yuh Siyiex leeing ju pex ka rawm sigrit sigra raoh, pa yuh Nawh Cao hit ka plak sivoe ex, tom hoik hoek bawg yam hoik tiang ex ti hu. ²⁴ Sonsang pon pui piang haktiex khankix ti tawng ka siawb sibrawm plawng taix Siyiex, pa kied ting riang mai sonsang pon pex ti lhat graung ka Siyiex leeing ju pex leeing ju heue.

¹ Mawh kheu nan, ceu ankix hoik lih ti koe, yam hoik mhong simiang haktiex Amawrix pa ot ka plak klip singaix khaing rawm klawng Yawdan, nawh kraix khrawm simiang haktiex baoh haktiex meung Khanan, pa ot hawt rawm sigrit sigra khankix, kheu hoik mhong nawh ka hoik yuh Siyiex leeing ju rawm klawng Yawdan hit ka plak sioe kawn praix Isarelax khankix mai kieh rawm kaog tom hoek bawg yam hoik tiang kix ti hu ka plak toi klawng, kix hoik koe krax pa khrup rhawm mai rhawm vao rhawm kwa kawx ang lai koe ka daux kix kheu jao kawn praix ceu pui Isarelax khankix heue. ² Ka daux bawg yam an, Siyiex leeing ju deeh ah nin ka Yawsux. "Yuh gawn simaox lawm son cao maix mai baox deeh pat toh hak kawn simex ceu pui Isarelax khankix ra bawg tix bawg heue." ³ Mawh kheu nan, Yawsux hoik yuh gawn simaox lawm khankix son cao tix mai deeh pat toh hak kawn simex ceu pui Isarelax khankix, hawt gawng dee pat kix toh hak heue. ⁴ In mawh grawh grawng pat Yawsux toh hak kix. Can pui pa lih hoek khaing daux haktiex meung Ejiptux khawmuik pa mawh simex mai pa mawh pui naing khankix hoik yuh ka daux tiag daux tu, hawt krax, khaix hoik lih hoek kix haktiex meung Ejiptux heue. ⁵ Grawh grawng nawh, ceu pui pa hoik lih hoek khaing daux haktiex meung Ejiptux khankix, hoik mawh pa hoik pat toh hak tix heue. Viang mawh nan, can pui pa hoik keh ka daux tiag khankix hawt krax khawmuik, ang nyang bax hoik pat toh hak tix awm pa lih hoek kix khaing daux meung Ejiptux heue. ⁶ Mawh kheu hoik vung viang kawn praix ceu pui Isarelax khankix ka daux tiag been tixpon num, can pui khankix pa mawh pui naing pa lih hu khaing daux haktiex meung Ejiptux, hoik mawh pa laux leeing khawmuik heue. Grawh grawng nawh, kix ang cu ti nghiet gumlox sikah Siyiex, ka pui pa hoik tiextu Siyiex leeing ju khankix, sonsang ang Nawh Cao pon jhi kix yaox haktiex pa hoik tiextu Siyiex leeing ju ka keeing kix mai pa ah Nawh Cao ti sang tawx ka ex pa mawh haktiex dee lih rawm teeih mai rawm hia khankix heue. ⁷ Mawh kheu nan, Yawsux pat toh hak kawn simex kix khawmuik pa hoik priex rien Nawh Cao ka dee ot kix, kheu jao ang kix nyang bax pat toh hak kix khawmuik heue. Grawh grawng nawh, kix ang nyang bax hoik pat toh hak tix hawt krax heue. ⁸ Mawh kheu nan, ceu ankix hoik mawh pa lih ti koe, yam hoik pat kix ka toh hak pui khankix khawmuik, kix ot ka daux dee ot tix mai ka daux nyiex pan tix tom hoek bawg yam hoik pon kix ti deeh moi. ⁹ Khaix an, Siyiex leeing ju deeh ah nin ka Yawsux heue. "Ka daux in singaix, Aux hoik teei ti tik krax pa sibriem meung Ejiptux khankix hu singai khaing pex heue." Mawh kheu nan, dee in hoik mawh pa kok ceu kaux nawh mawh Gilagalax tom hoek in singaix heue. ¹⁰ Mawh kheu nan, kawn praix ceu pui Isarelax khankix, pan ti ot daux Gilagalax mai khre rien ti yuh pawie Pasakha, ka daux khix tix kao pon ngaix, yam hoek bawg yam plakbo ka piang daux lung veng Yerikho heue. ¹¹ Kix ih plix khaox plix ox pa pon kix khaing haktiex ka daux singaix an, khaix hoik pawie Pasakha, pa mawh blah pa ang sau susaix mai gaox nghox ca pa hoik sin khankix, ka daux singaix an tidom heue. ¹² Yam in, blah mannax ang lai lih ti koe ka daux singaix an, khaix hoik ih kix plix khaox plix ox pa pon kix khaing haktiex mai kawn praix ceu pui Isarelax khankix ang lai pon blah mannax khaix an tix bawg kawx heue. Viang mawh nan, kix yaox ti ih ceu pa ih, pa pon kix khaing haktiex meung Khanan daux num an heue. ¹³ Khaix hoik ceu an khankix, yam ot Yawsux hawt veng Yerikho, nawh yaog ngai cao tix mai jhak simi ti yaox heue. Jhak heue, Pui tix kaux jung ka plak sivoe see nawh, tau mai vaig lawm pa lawd tix ka daux taix nawh heue. Yawsux hu ka nawh ah nin, "Mawh maix pa ot plak yix, phan ang mawh nan, pa ot plak pui koeng yix khankix lie?" ¹⁴ nawh dee ah nin heue. "Ang mawh, mawh cao kaing naing Siyiex leeing ju tix kaux, Aux hoik hoek yam in heue." Yawsux gup pakngai tix ka piang tiex mai krub ka Nawh Cao mai nawh dee ah nin ka nawh heue. "Simiang aux eue, sang ah maix ceu patix ka kawncau Maix Cao lie?" ¹⁵ Khaix an, cao kaing kru naing Siyiex leeing ju deeh ah nin ka Yawsux. "Peeik ti tik kiep maix khaing caong maix. Grawh grawng nawh, dee cung maix in, hoik mawh pa singax." Yawsux hawt ti yuh awm an heue.

¹ Yam in, veng Yerikho hoik nyeep tix tom kaux kheu jao kawn praix ceu pui Isarelax khankix. Pui pa lih hu mai pui pa laig ka daux, ang koe pie tix kaux kawx. ² Siyiex leeing ju ah nin ka Yawsux. "Aux hoik tawx veng Yerikho ka daux tawm taix maix, khawm simiang nawh mai khawm pui naing pa ting riang nawh khankix khawmuik." ³ "Maix mai pui naing khankix tak hu lai lawm ti cawng hawt vung viang veng an tix ngaix tix bawg mai tak yuh nin noag liah ngaix heue. ⁴ "Cao giex kaing li aliah kaux tak teei ti viex teettawng rung yung mhaing khankix, ka plak sivoe khwi bwan sijax mukheu heue. Yam hoek ka daux aliah singaix maix tak lai lawm cawng hawt vung viang veng aliah bawg mai cao giex kaing li khankix tak phlu teettawng heue." ⁵ Yam phlu kix lox teettawng rung yung mhaing tom lang mai yam mhong pex ka lox teettawng, pui khankix tak yo lox tix tau mai lox pa kied ting sinum heue. Khaix an guh veng tak khrup khawmuik heue. Pui khankix tak yaog ti haok see ku kaux ka sivoe heue. ⁶ Mawh kheu nan, Yawsux pa mawh kawn simex Nun, kok ka cao giex kaing li khankix ah nin ka kix. "Yaog ti klawm khwi bwan sijax mukheu mai kieh cao giex kaing li aliah kaux viex teettawng pa yuh tix ka rung yung mhaing khankix aliah mu mai hu ka plak sivoe khwi bwan sijax mukheu Siyiex leeing ju heue." ⁷ Nawh baox ah nin ka pui khankix. "Hu plak sivoe mai lai lawm ti cawng hawt vung viang veng mai kieh pui giex kraung naing khankix hu ka plak sivoe khwi sijax mukheu Siyiex leeing ju heue." ⁸ Yam hoik krai Yawsux ka pui khankix mai cao giex kaing li pa viex teettawng rung yung mhaing khankix pa koe ka plak sivoe Siyiex leeing ju, lih hu plak sivoe mai phlu teettawng khankix heue. Khwi bwan sijax mukheu Siyiex leeing ju tak hawt ka plak khaix kix. ⁹ Pui pa giex kraung naing khankix, lih hu ka plak sivoe cao giex kaing li pa phlu teettawng khankix heue. Cub lien pa giex kraung naing khankix hawt hu khaix khwi bwan sijax mukheu glang kawn phlu cao giex kaing li ka teettawng heue. ¹⁰ Yawsux tawx lox ah nin. "Ang pon ti lih lox, ang pon ti kieh lox tix sinum, ang pon ti sikah tom hoek bawg yam singaix pa kieh aux pex deeh kok yo, khaix an pex tak pon ti kok yo heue." ¹¹ Mawh kheu nan, nawh kieh khwi bwan sijax mukheu Siyiex leeing ju cawng ka veng mai hu hawt vung viang veng been tix bawg heue. Khaix an, kix laig ka dee pan tix mai ot ka daux nyiex bang tix heue. ¹² Yawsux yaog ti kaoh caocao ka plak ponngawb mai cao giex kaing li khankix yaog ti klawm khwi bwan sijax mukheu Siyiex leeing ju heue. ¹³ Khaix an, cao giex kaing li aliah kaux pa viex ka rung teettawng yung mhaing aliah mu, pa koe ka plak sivoe khwi bwan sijax mukheu Siyiex, nied ti hu ka plak sivoe mai phlu lox teettawng khankix luah heue. Pui pa giex kraung naing khankix hu sivoe kix. Viang mawh nan, cub lien pa giex kraung naing khankix, hawt ti hu ka plak khaix khwi bwan sijax mukheu Siyiex leeing ju glang kawn phlu cao giex kaing li khankix ka teettawng heue. ¹⁴ Ka daux singaix an, kix baox lih hu mai lai lawm tix cawng hawt vung viang veng baox tix bawg mai kix deeh ing ka dee pan dee peung tix heue. Mawh kheu nan kix yuh ceu ankix noag liah gaix heue. ¹⁵ Yam hoik noag aliah gaix, kix yaog ti kaoh caocao yam bah riang praix mai kix lih hu lai lawm ti cawng hawt vung viang veng aliah bawg awm krax pa hoik yuh kix heue. Mawh ngie singaix an kix cawng hawt vung viang veng aliah bawg heue. ¹⁶ Yam hoik naog aliah bawg, cao giex kaing li phlu teettawng mai Yawsux ah nin ka pui khankix, "Kok yo heue. Grawh grawng nawh, Siyiex leeing ju hoik tawx veng in ka pex." ¹⁷ Yam in veng an mai can pa koe ka daux nawh khankix, tak hoek krax laux sivoe Siyiex leeing ju heue. Mawh ngie Rahap pa mawh bun pa coh kaux pa pon ti im ju khawm nawh tau mai can pa koe tau mai nawh daux nyiex khankix, kheu jao hoik mox nawh kawncau pa hoik ploi ex heue. ¹⁸ Pex tak rien rhawm tokaux cao tix paw teei kraung can ceu pa hoik jhax lawg khankix, phan ang mawh nan, pex tak hoek ka daux krax pa jhax lawg yam teei pex ceu pa hoik jhax lawg khankix mai tak yuh nyiex pan ceu pui Isarelax khankix hoek ka daux krax pa jhax lawg mai an tak mawh pa khi rawm ka pex heue. ¹⁹ Viang mawh nan, can pa mawh mau, khri, aw, klong pa yuh tix ka tawng mai rhiem khankix, tak mawh pa deuh tix singax singeh son Siyiex leeing ju heue. Ceu ankix tak mawh pa sau ka daux sinngao cie Siyiex leeing ju heue. ²⁰ Mawh kheu nan pui khankix yo lox tix mai phlu teettawng. Yam hoik mhong pui ka lox teettawng mai pui yo lox tix tau mai pa kied ting sinum, guh veng khankix hoik khrup khawmuik heue. Khaix an pui khankix hu laig ka daux veng ku kaux daux pui, see ka plak sivoe mai kix hoik rhim ti teei veng an heue. ²¹ Kix yuh can ceu pa koe daux veng khankix laux khawmuik, khawm simex mai bun khawm pui awn ju mai pa riex ju, khawm mawie mai yung, la khankix ka lawm vaid heue. ²² Khaix an Yawsux ah nin ka pui an ra kaux pa hoik hu jiang ti yaox ka haktiex. "Hu laig ka daux nyiex bun coh kaux an mai teei bun an lih khaing tan khawm can ceu kraung pa koe nawh khawmuik awm pa hoik tiextu pax ka nawh heue." ²³ Pui awn ju ankiex pa hoik hu jiang ti yaox ka haktiex, hoik laig ka daux nyiex mai viex Rahap khawm miex keeing nawh, puxaik puxo nawh mai can ceu pa koe nawh khankix lih hu heue. Mawh kheu nan, kix baox viex paox nyiex nawh khankix lih hu mai deuh kix ka plak praix dee pan ceu pui Isarelax khankix heue. ²⁴ Khaix an kix gleeing veng khawmuik ka ngu heue. Mawh ngie kraung khri, mau, aw klong pa yuh ka tawng mai rhiem khankix khaing pa sau kix laig ka daux sinngao nyiex bwan Siyiex leeing ju heue. ²⁵ Yawsux tawx krax klawd ju ka Rahap, pa mawh bun coh kaux mai can ceu pa koe nawh khawmuik heue. Mawh kheu nan, nawh ot tau mai ceu pui Isarelax khankix tom hoek ka daux in singaix kheu jao hoik mox nawh ti deuh kawncau pa hoik ploi Yawsux nawh hu jiang ti yaox ka veng Yerikho heue. ²⁶ Khaix an, Yawsux tiextu ka kix ka daux bawg yam an ah nin. "Kieh pa jhax lawg koe ka piang kaw pa yaog ti kaoh mai deeh sum ka veng in pa mawh veng Yerikho, ka plak sivoe ngai Siyiex, yam sum nawh num riah veng an, nawh tak mawh pa som ka kawn Ai tix, yam sum nawh ka siviex guh veng, nawh tak som kawn ghoik nawh an heue. ²⁷ Mawh kheu nan, Siyiex leeing ju hoik ot tau mai Yawsux mai pa ao min nawh hoik mawh pa tah hu ka daux haktiex khawmuik heue.

¹ Viang mawh nan, kawn praix ceu pui Isarelax khankix koe krax lud ka ceu pa dex mai kraung pa hoik jhax lawg tix khankix heue. Akhan, pa mawh kawn simex Khamin, kawn saux Zabadix mai pa mawh kawn sex Zerax, khaing daux doeh ru ceu pui Yudax khankix, hoik teei ti viex kraung khri pa jhax lawg, Siyiex leeing ju hoik kied song rhawm ka kawn praix ceu pui Isarelax khankix. ² Yawsux deeh ploi pui lih khaing veng Yerikho mai kieh kix hu ka veng Ai, pa koe hawt praok veng Bet-avin mai pa koe hawt praok plak lih singaix khaing veng Betelax mai nawh krai ka kix ah nin heue. "Lih hu mai jiang ti yaox grawh grawng haktiex an." Mawh kheu nan pui khankix lih hu mai jiang ti yaox veng Ai heue. ³ Kix deeh ing ka Yawsux ah nin ka nawh. "Paw kieh pui lih hu khawmuik liak! Viang mawh nan, kieh pui hu been ra rheng kaux, phan ang mawh nan, been loe rheng kaux hu puing ka veng Ai heue. Paw kieh pui khawmuik koe krax taug mao tan. Can pui pa ot ka daux veng Ai mawh pa tux. ⁴ Mawh kheu nan, ploi pui been loe rheng kaux hu khaing daux cub caw khankix heue. Viang mawh nan, kix to khaing plak sivoe pui veng Ai khankix heue. ⁵ Pui veng Ai pah ti tik kix been tixgoe liah kaux heue. Kix hawt ti pheet kix, jah ka plak sivoe siviex veng, tom hoek dee singai hawt baoh Shebarim mai kix deeh baox pah ti tik kix yam lih jee caong gawng heue. Mawh kheu nan, rhawm kix, hoit awm rawm ngaik heue. ⁶ Khaix an Yawsux, riah ti tik kraung ceep nawh khankix mai gup pakngai tix ka piang tiex ka plak sivoe khwi bwan sijax mukheu Siyiex, tom hoek plakbo nawh khawm kuad riex ju Isarelax khankix mai sau mien tiex ka piang kaing tix heue. ⁷ Yawsux deeh ah nin. "Siyiex leeing ju eue, mawh kheu jao patix, Maix Cao hoik viex ceu pui inkix pa ot ka plak toi rawm klawng Yawdan, sonsang ap daux tawm taix ceu pui Amawrix sonsang yuh kix yix laux lie? Yix hoik koe krax fah rhawm yam ot yix ka plak an khaing rawm klawng Yawdan. ⁸ Siyiex leeing ju eue, aux tak sang yuh ka mawx, yam deeh dak ceu pui Isarelax khankix plak khaix tix ka plak sivoe pui pa koeng yix khankix lie? ⁹ "Grawh grawng nawh, ceu pui Khananix khankix mai can pui pa ot ka daux haktiex ankix khawmuik tak mhong ka grawng inkix mai kix tak lai lawm ka yix mai teei ti tik min ceu kaux yix khaing ka piang haktiex in heue. Khaix an, Maix Cao tak yuh ceu patix, ka son min ceu kaux pa kied ting Maix Cao lie?" ¹⁰ Mawh kheu nan, Siyiex leeing ju deeh ah nin ka Yawsux. "Kaoh heue, Maix hoik gup pakngai tix piang tiex yuh ka mawx lie?" ¹¹ "Ceu pui Isarelax khankix hoik yuh phimap mai kix hoik baox deeh lud ka gumlox sijax mukheu Aux, pa hoik tawm Aux ka kix, kix hoik teei ti viex kraung ceu pa hoik jhax lawg tix tiblah hoik briex ankix mai deuh ceu ankix ka daux sinax kraung cie cao kix." ¹² "Mawh kheu nan, ceu pui Isarelax khankix, ang lai pon cung ti ot ka plak sivoe pui pa koeng kix mai deeh dak plak khaix tix ka plak sivoe pui pa koeng kix heue. Kix hoik mawh pa pon krax pa jhax lawg ka daux krax pa laux heue. Aux tak ang lai mawh pa ot tau mai pex khaix in pie tix bawg kawx, phan pex ang nyang yuh ceu pa jhax lawg ankix laux khaing daux sinax pex heue." ¹³ Yaog tix kaoh mai yuh pui khankix singax mai ah nin ka kix. "Yuh tokaux cao pex singax son pasax. Siyiex leeing ju ceu pui Isarelax hoik ah in, "Ceu pui Isarelax khankix eue, kraung pa hoik jhax lawg koe sanax pex.Pex tak ang pon ti cung ka plak sivoe pui koeng pex khankix tom ang pex nyang bax teei ti tik ankix khaing pa koe daux sinax pex heue." ¹⁴ Yam hoek ka plak ponngawb, pex tak viex doeh ru pex khankix. Ankix tak lih ti mawh ka doeh ru mawx ru an, ru pa teei Siyiex, tak hoek khawm paox ru tix khankix mai paox nyiex teei Siyiex, tak hoek khawm kawn nyiex ma tix mai kawn nyiex ma pa teei Siyiex, tak hoek kaux pui mawx pui an heue. ¹⁵ Khaix an, pui pa hoik teei ka kraung pa hoik jhax lawg, tak mawh pa gleeing ti tik ka ngu mai can ceu pa koe nawh khankix khawmuik, grawh grawng nawh kheu jao hoik koe krax pa lud ka gumlox sijax mukheu Siyiex leeing ju mai kheu jao hoik yuh ceu pa laux min pakngai ka daux ceu pui Isarelax khankix heue. ¹⁶ Mawh kheu nan, Yawsux yaog ti kaoh plak ponngawb caocao mai viex pui Isarelax khankix hoek awm pa koe doeh ru kix mai teei cub doeh ru Yudax khankix lih, ¹⁷ Nawh viex cub geh ru nyiex ma Yudax khankix hoek, nawh baox viex paox nyiex Zarix khankix hoek kaux pui mawx pui an mai paox nyiex Zabadix, hoik mawh pa teei tix hoek heue. ¹⁸ Khaix an, nawh viex kawn nyiex ma tix hoek kaux pui mawx pui an mai Akhan kawn simex Khamix, kawn saux Zabadix pa mawh kawn sex Zerax khankix, daux doeh ru Yudax, nawh hoik teei kix hoek. ¹⁹ Khaix an, Yawsux ah nin ka Akhan. "Kawn simex aux eue, yuh pa yaogyaw tix ka Siyiex leeing ju ceu pui Isarelax mai krai grawng pa lud tix ka Nawh Cao heue. Yam in krai aux mhong ka ceu pa hoik yuh maix. Paw doh mox ti deuh ankix khaing aux awx. ²⁰ Akhan deeh pawk lox Yawsux ah nin. "Aux hoik lud ka Siyiex leeing ju ceu pui Isarelax tete mai in mawh ceu pa hoik yuh aux heue." ²¹ "Yam hoik yaox aux kraung pa tud rhim tix kraung ceep ceu pui Babulon, khawm mau ra yieh Shekhe mai gawng khri tix gawng pa cien been tixphwan Shekhe, aux koe krax ghoing rhawm ka ceu ankix mai teei ti cie heue. Aux hoik mox daux tiex, ka daux sigreung nyiex gox aux tau mai mau pa koe greem nawh heue." ²² Mawh kheu nan, Yawsux ploi kawncau tix to ti hu ka nyiex gox heue. Ceu ankix mawh pa koe tan, pa hoik mox tix ka daux nyiex gox nawh tau mai mau pa koe greem naw heue. ²³ Kix teei ankix khaing daux sigreung nyiex gox mai viex ankix hoek ka Yawsux mai ceu pui Isarelax khankix mai deuh ankix ka plak sivoe Siyiex leeing ju heue. ²⁴ Khaix an Yawsux mai pui Isarelax khankix, pa ot tau mai nawh teei Akhan pa mawh kawn sex Zerax khawm mau, kraung ceep, gawng khri, kawn simex kawn bun nawh khankix, mawie, la, yung, nyiex gox nawh mai can ceu pa hoik koe nawh khankix, hoek ka daux ngawd Akhaw heue. ²⁵ Yawsux ah nin. "Maix hoik tawx pa tuktiak ka yix yuh ka mawx lie? Siyiex leeing ju tak yuh krax tuktiak ka maix daux in singaix heue." Mawh kheu nan, pui Isarelax khawmuik dheem nawh yum ka simaox.Khaix hoik dheem kix ka simaox, kix tom gleeing ka ngu heue. ²⁶ Khaix an, kix teei simaox khankix tom nie mai pum ti deuh ka piang nawh heue. Ankix mawh pa koe tan tom in singaix. Mawh kheu nan, Siyiex leeing ju deeh yoi krax pa song rhawm Nawh Cao khaing piang kix heue.

¹ Khaix an, Siyiex leeing ju deeh ah nin ka Yawsux, "Paw koe krax lhat graung, krax laux rhawm. Teei pui naing khawmuik tau mai maix yaog ti kaoh hu ka veng Ai. Jhak heue, Aux hoik ap ti tawx simiang veng Ai ka daux tawm taix pex khawm pui nawh khankix, khawm veng khawm haktiex nawh." ² Maix tak yuh ceu an khankix ka veng Ai mai ka simiang nawh, awm krax pa hoik yuh maix ka veng Yerikho mai ka simiang nawh heue. Maix tak teei ngie kraung pa tud rhim tix khankix mai to brie nawh khankix nong nong, awm kraung pa tud rhim tix son tokaux cao pex heue.Rien ti deuh cub pui naing jawm tix cub son veng ka plak khaix nawh awx. ³ Mawh kheu nan, Yawsux yaog ti kaoh tau mai pui naing khawmuik, sonsang hu puing tix ka veng Ai heue. Yawsux laug ti teei pui pa ting riang mai pa koe krax pa vao rhawm been loe mheen kaux mai ploi kix hu plak ponsawm. ⁴ Nawh tawx gumlox tix ka kix ah nin. "Jhak heue, pex tak yuh naing jawm ka veng an mai mox tix ot plak khaix veng. Paw doh hu dee pa kied singai khaing veng awx. Viang mawh nan, pex khawmuik tak mawh pa khre rien tix son naing. ⁵ Khaix an, aux mai can pui khawmuik pa ot tau mai aux, tak hu dee dex hawt veng mai ceu an khankix tak lih ti koe yam hoek kix ti puing ka ex, bawg phao voe ex tak lih to kix yaox ka plak sivoe kix heue. ⁶ Kix tak lih ka plak praix mai hawt ti pheet khaix ex, tom hoik nyaw glaw ex kix lih khaing daux veng heue. Kix tak ah nin. "Kix hoik to khaing sivoe ex, awm singaix phao voe nhaox. Mawh kheu nan ex tak to sivoe kix." ⁷ Khaix an, pex tak yaog ti kaoh khaing dee jawm tix mai, puing ti teei veng. Siyiex leeing ju pex tak sang ap ti tawx kix daux tawm taix pex heue. ⁸ Yam hoik rhim pex veng mai pex tak gleeing ti tik veng ka ngu. Awm gumlox pa hoik tawm Siyiex leeing ju, pex tak yuh nawh awm an heue. Aux tak tawx gumlox inkix ka pex. ⁹ Yawsux ploi kix hu mai kix hu yuh naing jawm, mox tix ot hawt sinax veng Betelax mai veng Ai, pa koe praok plak klip singaix ka veng Ai heue. Viang mawh nan, Yawsux laig ti ot ka daux sinax pui khankix ka daux sawm an heue. ¹⁰ Khaix an, nawh yaog ti kaoh caocao, ka daux plak ponngawb nawh simin ti yaox pui khankix mai nawh lih hu tau mai kuad riex ju ceu pui Isarelax khankix, ka plak sivoe pui hun ka veng Ai heue. ¹¹ Pui naing khawmuik, pa hoik ot tau mai nawh hoik lih hu mai nied ti hoek ka dee dex heue. Kix hoik hoek ka plak sivoe veng mai bang ti ot ka praok plak laong hawt veng Ai heue. Yam in, ngawd tix mu hoik mawh pa khan sinax kix mai veng Ai heue. ¹² Mawh kheu nan, nawh teei pui khankix been phwan rheng kaux mai nawh deuh kix yuh naing jawm hawt daux sinax veng Betelax mai veng Ai, pa koe ka praok plak klip singaix khaing veng heue. ¹³ Yam hoik deuh kix pui khankix, cub kru naing khawmuik hoik ot ka lak laong khaing veng heue. Yawsux lih hu ka daux sigreung ngawd daux sawm an heue. ¹⁴ Yam yaox simiang veng Ai ka ankix, pui pa ot ka daux veng khankix nied ti lih hu ka daux biang naing, khawm nawh mai pui nawh khawmuik, ka daux bawg yam pa hoik tin kix ti deuh sivoe daux lung heue. Viang mawh nan, nawh ang tawng kix hoik koe cub pa yuh naing jawm tix cub pa sang ah ti puing ka nawh plak khaix veng heue. ¹⁵ Yawsux mai pui Isarelax khawmuik, yuh ti awm pa hoik som ka plak sivoe kix mai to ti hu ka plak krax daux tiag heue. ¹⁶ Mawh kheu nan, pui pa ot ka daux veng Ai khawmuik hoik mawh pa kok tix tau sonsang hawt pheet ka khaix kix. Kix yaog ti hawt khaix Yawsux mai kix hoik hoek dee singai khaing veng heue. ¹⁷ Pui pa ang lih hu ti hawt khaix ceu pui Isarelax khankix ang lai koe ka daux veng Ai mai veng Betelax tix kaux kawx heue. Mawh kheu nan, kix prah siviex veng bhang khaix tix mai hawt khaix ceu pui Isarelax khankix heue. ¹⁸ Khaix an, Siyiex leeing ju deeh baox ah nin ka Yawsux heue. "Nyeu pliah pa koe ka daux taix maix lih ka plak see veng Ai heue. Grawh grawng nawh, Aux tak tawx ankix ka daux tawm taix maix." Yawsux nyeu pliah pa hoik koe ka daux taix tix lih ka plak see veng an heue. ¹⁹ Khaix an, can pui pa pau ti yuh naing jawm khankix, yaog ti kaoh phai phai khaing dee ot kix to dom mawx dom an, awm hoik nyeu nawh taix tix lih mai kix laig daux veng mai rhim ti teei veng, kix nied ti gleeing veng ka ngu heue. ²⁰ Yam deeh jhak pui veng Ai khankix ka plak khaix tix, kix hoik yaox kah. Jhak heue, Taox ngu veng yaog ti haok ka raoma heue. Mawh kheu nan kix ang lai koe riang ti to ka plak in plak an mai pui khawmuik hoik to ti hu ka daux tiag, mai deeh veeh ti puing ka pui pa hawt kix heue. ²¹ Yam hoik yaox Yawsux ka ceu pui Isarelax khankix, ka hoik pon rhim pui pa yuh naing jawm khankix ka veng mai yam yaox kix ka taox ngu veng pa haok ka raoma kix deeh veeh tix ka plak khaix mai puing ti tik pui veng Ai khankix heue. ²² Khaix an, pui tang kaux khankix lih hoek khaing daux veng mai hoek ti puing ka kix heue. Mawh kheu nan, kix hoik mawh pa kham ka daux sinax ceu pui Isarelax, ka praok plak in tiblah mai plak an tiblah heue. Kix pah son ang lai deuh pie tix kaux kawx mai son ang kix lai pon ti klawd. ²³ Viang mawh nan, kix pon giex im simiang veng Ai mai kix viex nawh hoek ka Yawsux heue. ²⁴ Khaix hoik luan ceu an khankix, yam ghoik pui Isarelax ti pah pui pa ot ka daux veng Ai khankix, ka daux lung mai ka daux tiag dee pa hoik hawt kix khaix kix mai, yam hoik yum kix ka lawm vaid tom hoik hoek bawg yam hoik laux kix, ceu pui Isarelax khankix, deeh ing ka veng Ai mai pah kix yum ka lawm vaid tix heue. ²⁵ Mawh kheu nan, pui pa yum ka daux singaix an khawm simex, bun, koe tix mheem ra rheng kaux, kix mawh pui veng Ai khawmuik heue. ²⁶ Yawsux ang nyang deeh yoi taix tix khaing krax pa nyeu nawh pliah pa giex tix, tom hoek bawg yam hoik yuh nawh pui pa ot ka daux veng Ai khankix laux khawmuik heue. ²⁷ Mawh ngie khawng brie pa eei kix mai kraung pa tud rhim kix khaing daux veng an khankix, tak mawh pa pon teei pui Isarelax ti cie awm kraung pa tud rhim son tokaux cao kix, awm gumlox sikah Siyiex leeing ju pa hoik tawm Nawh Cao ka Yawsux heue. ²⁸ Mawh kheu nan, Yawsux gleeing ti tik veng Ai mai yuh an mawh dee pum nyhee pa koe tom hoek in singaix heue. ²⁹ Kix teuk teue simiang veng Ai ka piang khaox tom hoek plakbo. Yam hoik laig singaix dom mawx dom an, Yawsux tawx lox tix, sonsang deeh teei kix tokaux yum nawh lih khaing piang khaox mai tik nawh hawt krax laig kix ka daux siviex veng mai kix yaog ti pum simaox ka piang tokaux yum an tom nie heue. Pum simaox ting an, koe tom in singaix heue. ³⁰ Khaix an, Yawsux hu sum khu dee tan tix mu son Siyiex leeing ju ceu pui Isarelax ka piang gawng Ebalax, ³¹ awm hoik tawm Mose pa mawh kawncau Siyiex, ka ceu pui Isarelax khankix, awm pa hoik tiiem ti deuh ka daux phuk lai gumlox pingnyap Mose khankix heue. Khu dee tan an, tak mawh pa yuh tix ka simaox rang tix mu, pa ang pui tix kaux kawx nyang sax saik ka kraung rhiem tix ceu kawx heue, kix tan tix tawx krax tan pa gleeing khankix ka piang an, son Siyiex leeing ju mai khawm krax tan pa appong ti tan krax tan pa nhim khankix heue. ³² Ka daux plak sivoe ngai pui Isarialax khankix tan, nawh tiiem ti deuh gumlox pingnyap ka piang simaox an, awm pa hoik tiiem Mose ti deuh heue. ³³ Khaix an, ceu pui Isarelax mai kuad riex ju mai cao kaing naing cao prawng see khankix, cung ka plak in plak an, hawt khwi bwan sijax mukheu ka plak sivoe cao giex kaing li khankix, khawm ceu pui Lewix khankix, pa klawm khwi bwan sijax mukheu Siyiex, khawm nyo sinie khankix mai can pui nawh pa hoik keh ka daux sinax kix heue. Khaing daux kix tix plak, hoik mawh pa koe ka plak sivoe gawng Gerizim mai khaing daux kix tix plak, hoik mawh pa koe ka plak sivoe gawng Ebalax, awm pa hoik tawm Mose pa mawh kawncau Siyiex, glang singaix pa hoik luan, sonsang nawb kix bwan ka ceu pu Isarelax khankix heue. ³⁴ Khaix hoik ceu an khankix, nawh phat gumlox beenli khawmuik pa mawh krax pa nawb bwan mai pa jhax lawg khankix khawmuik awm pa hoik tiiem tix ka daux phuk lai beenli heue. ³⁵ Gumlox pa hoik tawm Mose khankix khawmuik, pa ang Yawsux phat ang lai koe pie tix gum kawx ka plak sivoe cub pui hun, tau mai bun khawm kawn nyawm khankix mai sivoe nyo sinie pa ot ka daux sinax kix heue.

¹ Yam hoik mhong simiang khankix, pa ot ka praok plak in khaing rawm klawng Yawdan mai pa ot ka piang gawng mai pa ot ak daux lung daux ngawd mai pa ot ka piang praok rawm sigrit sigra ting plak krax see gawng Lebanon khankix, pa mawh ceu pui Hitix, Amawrix, Khananix, Pherazix, Hiwix mai ceu pui Zebuzix, ² Ceu pui ankix kraix khrawm paox tix tau sonsang puing ka Yawsux mai ka ceu pui Isarelax khankix, tix dom neh heue. ³ Viang mawh nan, can pui pa ot ka daux veng Gibon, hoik mhong ka ceu pa hoik yuh Yawsux ka veng Yerikho mai veng Ai heue. ⁴ Kix yuh ti awm pa koe cuyi mai yuh ti awm grang cao cau khankix heue. Kix teei chee pa prim khankix mai si ngiien hak rawm plix siiet pa hoik griah mai pa hoik deeh cox caing tix khankix mai tang ka piang la heue. ⁵ Mai ceep kiiep prim pa hoik deeh cox blaox ka caong tix mai ceep kraung prim khankix ka piang cao tix heue. Blah pa hoik viex kix ti ih son daux krax, mawh pa hoik kroh mai pa hoik moh heue. ⁶ Kix hu ka Yawsux ka dee pan nawh, hawt baoh Gilagalax ah nin ka nawh mai ka pui Isarelax khankix. "Yix hoik kaoh khaing, haktiex singai ti dah. Mawh kheu nan, yam in, pex yuh gumlox sijax mukheu tix ceu tau mai yix liak." ⁷ Viang mawh nan, pui Isarelax khankix deeh ah nin ka pui Hiwix khankix. "Yix tak sang tawng ka ot pex dex sinax yix yuh ka mawx lie? Mawh kheu nan, yix tak sang pon ti yuh gumlox sijax mukheu tix ceu tau mai pex yuh ka mawx lie?" ⁸ Kix deeh ah nin ka Yawsux. "Yix mawh siliex cawng maix." Yawsux deeh chawk ah nin ka kix. "Pex mawh pui dee mawx mai pex hoik hoek khaing plak dee mawx lie?" ⁹ Kix deeh ah nin ka nawh. "Siliex cawng maix khankix, mawh pa hoik hoek khaing meung dee singai ti dah, kheu jao min ceu kaux Siyiex leeing ju maix heue. Grawh grawng nawh, yix hoik mhong ka ao min ceu kaux Nawh Cao mai can ceu pa hoik yuh Nawh Cao ka daux haktiex meung Ejiptux khawmuik, ¹⁰ Mai can ceu pa hoik yuh Nawh Cao ka simiang haktiex Amawrix khankix ra kaux, pa ot ka plak toi rawm klawng Yawdan mai pa mawh simiang Sihong khaing haktiex Heshabon mai simiang Awgax khaing haktiex Bashan khankix pa ot daux veng Ashatarot heue." ¹¹ Mawh kheu nan, kuad riex ju khankix mai can pui pa ot ka daux haktiex yix khankix, hoik krai nawh ka yix mai kix hoik ah nin. "Viex priex preem pa ih tau mai pex son daux krax, hu rieb kix ah nin ka kix awx. "Yix mawh siliex cawng maix. Mawh kheu nan, yam in kieh pex yuh gumlox sijax mukheu tau mai yix liak." ¹² In mawh blah pa hoik teei yix ti viex yam kawn si u, son priex preem pa ih yix khaing daux nyiex cao yix, ka daux singaix hoik lih hu yix sonsang hoek tix ka maix heue. Viang mawh nan, yam in jhak heue. Blah ankix hoik kroh mai hoik moh uik heue." ¹³ Si ngiien hak rawm plix siiet inkix, pa hoik sau yix ti viex rawm kawx hoik mawh pa khraox yam an nhaox heue. Jhak heue, si ngiien hak inkix hoik griah mai kraung ceep yix khankix, khawm kiep ceep yix khankix kawx hoik prim kheu jao kied singai krax hoek yix heue." ¹⁴ Khaix an, pui Isarelax khankix teei ti ih priex preem hawt krax tiblah heue. Viang mawh nan, kix ang tie mhaing akhwang ka Siyiex leeing ju heue. ¹⁵ Mawh kheu nan, Yawsux yuh krax pa nhim tau mai kix mai deeh yuh gumlox sijax mukheu tau mai kix, son sang kieh nawh kix klawd ti im ju heue. Cao pa kwang cub pui hun khankix, yuh krax pa tiextu tau mai kix heue. ¹⁶ Khaix hoik sidah daux loe singaix, yam khaix hoik yuh kix sijax mukheu tau mai kix, kix mhong ka hoik mawh kix paox plawg pa ot hawt dex kix heue. ¹⁷ Khaix an, pui Isarelax khankix lih hu krax mai hoek ka veng kix, ka daux loe singaix heue. Yam in, veng pa ot kix mawh veng Gibon, veng Khephirax, veng Berot mai veng Kirayat Yarim khankix heue. ¹⁸ Viang mawh nan, pui Isarelax khankix ang nyang puing ka kix kheu jao hoik koe lox pa tiextu cao kaing pa kwang cub pui hun khankix ka kix, ka plak sivoe Siyiex leeing ju ceu pui Isarelax heue. Cub pui hun khakix hoik ngia mai deuh phimap ka cao pa kwang ka piang kix khawmuik heue. ¹⁹ Viang mawh an, cub cao kaing pa kwang khankix, deeh ah nin ka cub pui hun khankix heue. "Yix hoik koe lox pa tiextu ka kix, ka plak sivoe ngai Siyiex leeing ju ceu pui Isarelax khankix heue. Mawh kheu nan, yam in, ex ang pon ti hu krox hu teeh ka kix heue." ²⁰ In mawh pa tak sang yuh ex ka kix heue. Ex tak kieh kix im ju, phan ang mawh nan, krax song rhawm tak mawh pa hoek ka piang ex, kheu jao pa hoik tiextu ex ka kix heue. ²¹ Cao pa kwang khankix, deeh ah nin ka kix heue. "Kieh kix im ju heue. Viang mawh nan, kieh kix mawh cao pa kid khix mai cao pa kin rawm khankix son pui hun khankix, awm hoik koe lox sijax mukheu ex ka kix heue." ²² Khaix an, Yawsux kok kix mai nawh ah nin ka kix. "Yuh ka mawx pex hoik pie lhen ka yix ah nin, "Yix mawh pa kied singai dee ot khaing maix mai yam in pex hoik mawh pa ot hawt dex yix ang mawh lie?" ²³ Mawh kheu nan, yam in pex hoik mawh pa pon pa jhax lawg mai pex tix kaux kawx, tak ang lai pon ti glawd, pa mawh tix siliex awm cao kid khix mai cao pa kin rawm khankix son daux nyiex Siyiex leeing ju aux heue. ²⁴ Mawh kheu nan, kix hoik deeh pawk lox Yawsux ah nin. "Grawh grawng nawh, ceu an khankix hoik mawh pa hoik krai tix ka siliex cawng maix khankix, tom kriem tete heue. Siyiex leeing ju maix, hoik tawm gumlox tix ka kawncau Nawh Cao pa mawh Mose, sonsang tawx Nawh Cao haktiex inkix khawmuik ka maix mai sonsang yuh Nawh Cao pui pa ot ka daux haktiex inkix laux ka plak sivoe maix heue. Mawh kheu jao an, yix hoik kied koe krax lhat graung tom nie son ju tix jao maix mai yix hoik pon ti yuh ceu inkix kah heue." ²⁵ "Yam in, yix hoik koe ka daux tawm taix maix tin heue. Yuh ceu pa keud maix mawh pa mhawm mai pa khaw caw pa sang caw maix ti yuh ka yix heue." ²⁶ Mawh kheu nan, nawh yuh ceu ankix ka piang kix mai deeh ploi kix klawd khaing daux tawm taix pui Isarelax khankix, son ang kix lai sang pah kix yum heue. ²⁷ Ka daux singaix an, Yawsux kieh kix mawh cao kid khix mai cao kin rawm son cub pui hun khankix mai son khu dee tan Siyiex, ka dee pa sang laug Nawh Cao tom hoek ka daux in singaix heue.

¹ Yam hoik mhong simiang Adawnizediet pa mawh simiang veng Yerusaliem ka krax pa hoik rhim Yawsux ka veng Ai mai hoik yuh nawh laux awm pa yuh nawh ka veng Yerikho mai ka simiang nawh, ka veng Ai mai simiang nawh khankix mai grawng pa hoik yuh pui veng Gibun khankix, krax pa nhim tau mai ceu pui Isarelax khankix kix hoik ot tau ka daux sinax kix, ² Kix kied koe krax lhat graung sigrien sigre, kheu jao hoik mawh Gibon veng pa ting tix veng awm veng pa kwang simiang khankix heue. Grawh grawng nawh, veng an mawh pa nie lheu ting khaing veng Ai mai pui kix khawmuik hoik mawh pa koe riang rao. ³ Mawh kheu nan, Adawnizediet simiang veng Yerusaliem, ploi pui hu ka simiang Hoham simiang veng Hebaron mai ka simiang Piram, simiang veng Yamok mai ka simiang Yaphiya, simiang veng Lekhisha mai ka simiang Debirax, simiang veng Egalon khankix ah nin. ⁴ "Hoek ka aux mai teem ka aux, sonsang pon ex ti puing ka veng Gibon heue. Grawh grawng nawh, kix hoik yuh pa nhim tau mai Yawsux mai ka pui Isarelax khankix heue." ⁵ Mawh kheu nan, simiang ceu pui Amawrix khankix phwan kaux, pa mawh simiang veng Yerusaliem, simiang veng Hebaron, simiang veng Yamok, simiang veng Egalon, simiang veng Lekhisha khankix, kraix khrawm paox tix tau mai lih hu khawm cao kix khawm kru naing kix khawmuik mai bang ti ot ka plak sivoe veng Gibon, sonsang yuh naing ka veng an heue. ⁶ Pui veng Gibun khankix, deeh ploi pui hu ka Yawsux, pa bang ti ot ka veng Gilagalax mai, kieh kix ah nin. "Paw tik vud ka kawn siliex maix khankix liak, nied ti hoek ka yix phai phai deeh taoh ka yix mai teem ka yix liak. Grawh grawng nawh, simiang ceu pui Amawrix khankix khawmuik, pa ot ka piang gawng lua khankix hoik kraix khrawm paox tix tau mai hoek ti puing ka yix heue." ⁷ Mawh kheu nan, Yawsux deeh lih hu khaing veng Gilagalax, khawm pui naing nawh khawmuik tau mai khawm pui pa ting riang pa koe krax kwa rhawm khawmuik heue. ⁸ Siyiex leeing ju deeh ah nin ka Yawsux. "Paw koe krax lhat graung ka kix awx. Grawh grawng nawh, Aux hoik ap ti tawx kix ka daux tawm taix maix. Pui khaing daux kix pie tix kaux kawx, tak ang pon ti cung ka plak sivoe maix heue. ⁹ Mawh kheu nan, Yawsux ah ti hoek ka kix dom mawx dom an mai kix lih hu khainng baoh Gilagalax leeing sawm heue. ¹⁰ Siyiex leeing ju kieh kix som tom nie ka plak sivoe ceu pui Isarelax khankix mai pah kix yum tom nie hawt veng Gibun heue. Kix pheet kix hawt krax hu plak veng Bet Hawron mai pah kix yum tan tom hoek dee singai ka veng Azeka mai veng Makeda heue. ¹¹ Khaix hoik lih ceu ankix ti koe, awm hoik to kix ka plak sivoe ceu pui Isarelax khankix mai yam lih kix ka jee veng Bet Hawron, Siyiex leeing ju ploi mu pre ting lih ka piang kix, khaing daux raoma tom hoek ka veng Azeka mai kix yum kah heue. Can pui pa yum ka mu pre khankix, kawn baox nie lheu khaing can pa pah pui Isarelax khankix ka lawm vaid tix heue. ¹² Khaix an, Yawsux deeh sikah mai Siyiex leeing ju ka daux singaix an, yam hoik ap Siyiex leeing ju ti tawx ceu pui Amawrix khankix ka plak sivoe pui Isarelax khankix mai nawh ah nin ka plak sivoe ngai ceu pui Isarelax khankix. "Singaix eue, kaog ti ot ka piang veng Gibun liak mai khix pa riang eue, kaog ti ot ka piang daux ngawd Ayalon liak." ¹³ Mawh kheu nan, singaix kaog ti ot tix dah mai khix hoik kaog ti ot tix dah, tom sidah hoik pawk kix bix tix ka piang pui pa koeng kix khankix heue. In mawh pa hoik tiiem tix ka daux phuk lai Yasha ang mawh lie? Mawh kheu nan, singaix jung tix kaog ka daux sigreung raoma mai ang nied ti hu klip been tix singaix heue. ¹⁴ Daux singaix pa awm an ang lai koe pie tix ngaix kawx, sivoe in mai khaix in sax, ka pa hoik nghiet Siyiex leeing ju ka lox sikah pui tix kaux heue. Grawh grawng nawh, Siyiex leeing ju hoik puing naing ka son ceu pui Isarelax khankix heue. ¹⁵ Khaix an, Yawsux deeh ing tau mai ceu pui Isarelax khankix ka dee bang kix tix, daux Gilagalax heue. ¹⁶ Viang mawh nan, simiang inkix phwan kaux hoik pon to mai mox tokaux tix ka daux rang ti dah ka Makeda. ¹⁷ An hoik mawh pa krai kix ka Yawsux ah nin, "Hoik yaox ka simiang phwan kaux ka dee mox kix tix ka daux rang Makeda heue." ¹⁸ Mawh kheu nan, Yawsux deeh ah nin. "Puplieh simaox pa ting khankix mai thox ka daux moing rang an mai kieh pui pau see an heue." ¹⁹ Tokaux cao pex paw lai ot tan awx. Viang mawh nan, nied ti hawt khaix pui pa koeng pex khankix mai puing kix dee krup pex kix. Paw kieh kix pon ti laig ka daux veng khankix awx. Siyiex leeing ju pex hoik ap ti tawx kix ka daux tawm taix pex heue. ²⁰ Glang yuh Yawsux mai pui Isarelax khankix, krax pa ghoik ti pah kix yum ka daux pa kied ting, tom hoek bawg yam pa hoik yuh kix ceu an khankix, can pui ankix pa pon ti glawd hoik laig ka daux veng pa kaux cong khankix heue. ²¹ Pui khankix khawmuik, deeh ing ka dee bang tix mai hoek ka Yawsux hawt Makeda tau mai krax pa yiien yawg heue. Pui tix kaux kawx ang pon ah lox pa deuh phimap ka dak tix, ka kawn praix ceu pui Isarelax khankix pie tix kaux kawx heue. ²² Khaix an, Yawsux deeh ah nin. "Paoh daux moing rang mai teei simiang ankix phwan kaux lih khaing daux rang, viex kix hoek ka aux. ²³ Kix hawt ti yuh awm pa ah nawh. Simiang ankix phwan kaux mawh simiang veng Yerusaliem, simiang veng Hebaron, simiang veng Yamok, simiang veng Lakheshax mai simiang veng Egalon khankix heue. ²⁴ Mawh kheu nan, ceu an khankix hoik lih ti koe, yam hoik viex kix simiang ankix hoek ka Yawsux mai Yawsux kok ceu pui Isarelax khawmuik ah nin ka cao kaing naing khankix, pa hoik hu tau mai nawh. "Hoek dee dex mai deuh caong pex ka piang ngawg simiang inkix heue. Kix hoek dee dex mai deuh caong tix ka piang ngawg pui ankix. ²⁵ Khaix an, Yawsux ah nin ka kix, "Paw koe krax lhat graung mai paw koe krax laux rhawm, Teei riang rao tix mai koe krax kwa rhawm ka daux ceu pa mhawm heue. Grawh grawng nawh, awm an, Siyiex leeing ju tak yuh ceu ankix ka pui koeng pex khankix pa sang ah pex tix puing heue." ²⁶ Khaix hoik ceu ankix, Yawsux mug kix ka vaig mai pah kix yum mai teuk teue kix ka piang khaox phwan gawng tom hoek plakbo heue. ²⁷ Mawh kheu nan, Yam hoek bawg yam sang klip singaix, Yawsux tawx gumlox tix ka kix mai teei kix lih khaing piang khaox mai tik kix ka daux rang dee hoik mox kix tix kah. Kix pum ti deuh simaox khankix ka daux moing rang mai an mawh pa kawn koe tom in singaix heue. ²⁸ Ka daux singaix an, Yawsux puing ti teei veng Makeda mai mug ti tik simiang veng an ka lawm vaid tix heue. Nawh yuh pui pa koe ka daux veng an laux khawmuik. Nawh ang lai prah pui klawd tix kaux kawx heue. Nawh yuh ka simiang veng Makeda, awm pa hoik yuh nawh ka simiang veng Yerikho heue. ²⁹ Khaix an, Yawsux deeh lih hu khaing veng Makeda tau mai ceu pui Isarelax khankix mai hu ka plak veng Libanax heue. Kix puing veng Libanax heue. ³⁰ Siyiex leeing ju baox deeh ap tix tawx veng an mai khawm simiang nawh ka daux tawm taix ceu pui Isarelax khankix heue. Nawh mug ti tik pui pa ot ka daux veng an khankix ka lawm vaid tix, nawh ang lai prah pui klawd koe tix kaux kawx ka daux veng an heue. Nawh yuh ka simiang veng an, awm hoik yuh nawh ka simiang veng Yerikho heue. ³¹ Khaix an, Yawsux deeh lih khaing veng Libanax tau mai pui Isarelax khankix hu ka veng Lakheshax mai kix lai lawm ti puing ka veng an heue. ³² Siyiex leeing ju hoik ap ti tawx veng Lakheshax ka daux tawm taix ceu pui Isarelax khankix heue. Kix puing ti teei veng an, ka daux singaix ra heue. Kix mug ka pui khankix pa ot ka daux veng ka lawm vaid tix, awm pa hoik yuh kix khawmuik ka veng Libanax heue. ³³ Khaix an, simiang Hawram, khaing veng Geza, hoek ti teem ka veng Lakheshax mai Yawsux mug ti tik nawh mai khawm pui nawh khankix heue. Nawh ang lai prah kix klawd pie tix kaux kawx heue. ³⁴ Kaoh khaing veng Lakheshax, Yawsux deeh lih hu ka veng Egalon, tau mai ceu pui Isarelax khankix khawmuik mai kix lai lawm ka veng an mai puing ka heue. ³⁵ Kix puing ti teei veng ka daux singaix an mai mug ti tik pui khawmuik, pa koe ka daux veng an ka lawm vaid kix heue. Nawh yuh kix laux lak pak leeing ka daux singaix an khawmuik awm pa hoik yuh nawh ka veng Lakheshax. ³⁶ Khaix an, Yawsux deeh lih khaing veng Egalon, tau mai ceu pui Isarelax khankix mai kix hu ka veng Hebaron mai puing ka veng an heue. ³⁷ Kix puing ti teei veng an mai mug ti tik simiang khawm pa dex dawd mai nawh khankix mai can pui pa ot daux veng an ka lawm vaid tix heue. Nawh ang lai prah kix klawd pie tix kaux kawx, awm pa hoik yuh nawh ka veng Egalon khawmuik laux leeing. ³⁸ Khaix an, Yawsux deeh ing tau mai ceu pui Isarelax khankix khawmuik ka veng Debirax mai kix puing veng an heue. ³⁹ Kix puing ti teei veng an tau mai simiang kix mai khawm veng khankix heue. Kix mug ti tik kix ka lawm vaid tix mai yuh pui can pa ot ka daux veng khankix laux lak pak leeing mai ang lai prah deuh pie tix kaux kawx, awm hoik yuh ka veng Hebaron mai veng Libanax mai tak yuh ka veng Debirax mai simiang khankix heue. ⁴⁰ Mawh kheu nan, Yawsux pex ka haktiex khawmuik, pa mawh haktiex gawng lua mai pa koe plak seh mai dee lung hawt caong gawng khankix mai ka simiang kix khawmuik heue. Nawh ang lai prah klawd pie tix kaux kawx mai nawh yuh can pa im ju khankix laux leeing, awm gumlox pa hoik tawm Siyiex leeing ju pui Isarelax heue. ⁴¹ Yawsux pex ka kix, jah khaing veng Kadeshabana, tom hoek ka hatiex baoh veng Gaza, Goshin mai baoh pa koe ka dee singai ka veng Gibun heue. ⁴² Yawsux hoik pon teei hatiex khawmuik mai simiang kix tidom neh heue. Grawh grawng nawh, Siyiex leeing ju ceu pui Isarelax hoik puing naing son pui Isarelax khankix heue. ⁴³ Khaix an, Yawsux deeh blak ti ing tau mai pui Isarelax khankix khawmuik ka dee bang peung kix daux Gilagalax heue.

¹ Khaix hoik luan ceu an khankix, yam hoik mhong simiang Yabin, pa mawh simiang veng Hazaw ka ceu inkix, nawh ploi pui hu ka simiang Yawbat, simiang veng Madon, simiang veng Shimaron, simiang veng Akhashap khankix, ² Mai ka simiang pa ot plak laong ka paing gawng khankix mai ka daux lung pa koe ka plak seh veng Gennesariet mai ka piang dee lung haktiex khankix mai ka dee lhaong tiex plak haktiex Dawrax khankix, pa koe ka plak klip singaix khankix, ³ mai ka pui Khanan, pa ot ka plak lih singaix mai ka plak klip singaix, pui Amawrix, pui Hitix, pui Pherazix, pui Yebusix, pa ot ka piang gawng lua khankix mai pui Hiwix, pa ot greem caong gawng Heramon ka daux haktiex Misapa khankix heue. ⁴ Mawh kheu nan, kix lih hu tau mai kru naing pa koe kix. Kru naing kix mawh pa viex pui tom nie, awm haoh hun mhaik praok rawm sigrit sigra, tau mai brung naing kix pa kied hun, khawm ling lawx brung naing kix pa kied nie hun khawmuik heue. ⁵ Yam hoik yaox cub simiang inkix ka paox ti tau, hoik hoek mai bang ti ot tau hawt rawm nhawng Merom, sonsang puing ka pui Isarelax khankix heue. ⁶ Khaix an, Siyiex leeing ju ah nin ka Yawsux, "Paw doh koe krax lhat graung kheu jao kix, grawh grawng nawh, ka daux yam in pasax, Aux tak ap ti tawx kix yum ka plak sivoe ceu pui Isarelax khankix heue. Pex tak pat ti tik siniag caong brung kix mai gleeing ti tik ling lawx brung kix khawmuik ka ngu. ⁷ Mawh kheu nan, Yawsux mai pui naing khawmuik pa koe tau mai nawh lih hu sijaox mai rieb ti puing kix hawt rawm nhawng Merom heue. ⁸ Siyiex leeing ju hoik ap ti tawx kix ka daux tawm taix pui Isarelax mai hoik pon ti pex kix mai hawt ti pheet tom hoek ka veng ting Sidom mai hoek ka rawm klawng Misarephot mai ka ngawd Mizapa, pa koe ka plak lih singaix heue. Kix puing ti tik kix tom ang lai prah kix pon klawd pie tix kaux kawx heue. ⁹ Mawh kheu nan, Yawsux yuh ceu an ka kix, awm pa hoik krai Siyiex leeing ju ka nawh heue. Nawh pat ti tik siniag caong brung kix mai gleeing ti tik ling lawx brung kix ka ngu heue. ¹⁰ Yawsux deeh blak ti ing bawg yam an mai puing ti teei veng Hazaw mai pah simiang nawh ka lawm vaid tix, veng Hazaw hoik mawh cao kaing haktiex simiang an khankix glang ka an dix heue. ¹¹ Kix mug pui ankix khawmuik pa koe ka daux veng an yum ka lawm vaid tix mai yuh laux leeing heue. Can pui pa im ju ang lai koe pie tix kaux kawx heue. Khaix an, nawh gleeing ti tik veng Hazaw ka ngu heue. ¹² Awm gumlox pa hoik tawm Mose pa mawh kawncau Siyiex, Yawsux puing ti teei veng pa kwang simiang ankix khawmuik mai mug simiang khankix khawmuik yum ka lawm vaid tix mai yuh kix laux leeing heue. ¹³ Viang mawh nan, can veng pa koe ka piang gawng khankix mai pui Isarelax ang gleeing ti tik ka ngu pie tix veng kawx lheu khaing veng Hazaw, pa gleeing Yawsux ti tik tix veng khaing heue. ¹⁴ Kraung pa pon tud pon rhim kix khaing daux veng inkix khawm to brie eei kix, pui Isarilax khankix teei ti cie, awm kraung pa pon tud rhim kix son cao kix heue. Viang mawh nan, kix pah ti tik pui ku kaux ka lawm vaid tix, tom hoek bawg yam hoik laux leeing kix mai kix ang lai prah pui im koe pie tix kaux kawx heue. ¹⁵ Awm hoik tawm Siyiex leeing ju gumlox tix ka kawncau Nawh Mose, mawh kheu nan Mose deeh tawm ka Yawsux mai Yawsux hawt ti yuh awm an heue. Nawh ang prah can ceu pa ang tix nyang hoik yuh khankix khawmuik, ka pa hoik tawm Siyiex leeing ju ka Mose heue. ¹⁶ Mawh kheu nan, Yawsux hoik rhim ti teei haktiex inkix khawmuik, pa mawh haktiex gawng lua, pa koe plak seh mai haktiex Goshin khawmuik daux lung daux ngawd mai daux lung rawm klawng Yawdan, khawm gawng Isarelax khankix tau mai daux lung daux ngawd nawh khankix, ¹⁷ jah khaing gawng Halat mai krax pa lih dung ka gawng Sirax, tom hoek dee singai ka veng Balagat, pa koe daux ngawd Lebanon, ka plak greem caong gawng Heramon heue. Nawh hoik giex simiang kix khawmuik mai mug kix ka lawm vaid mai pah kix yum heue. ¹⁸ Yawsux yuh naing tom nie rheung bawg yam tau mai simiang inkix khawmuik heue. ¹⁹ Lheu khaing pui Hiwix mai pui pa ot ka daux veng Gibun khankix, veng tix veng kawx ang yuh krax nhim tau mai pui Isarelax khanki heue. Veng tang dah khankix khawmuik, hoik mawh pa rhim ti teei khaing daux bang naing heue. ²⁰ Grawh grawng nawh, Siyiex leeing ju hoik yuh rhawm kix kien, sonsang hoek kix tix puing ka pui Isarelax khankix daux bang naing mai sonsang yuh Nawh Cao kix laux leeing mai kix tak ang lai mawh pa sang pon krax caux rhawm heue. Viang mawh nan, Nawh Cao tak sang yuh kix laux leeing, awm gumlox pa hoik tawm Siyiex leeing ju ka Mose heue. ²¹ Ka daux bawg yam an, Yawsux deeh hoek mai grheu ti tik ceu pui Anagax khaing piang gawng khankix, khaing veng Hebaron, khaing veng Debirax, kaing veng Anabax, khaing gawng Yudax mai khaing piang gawng Isarelax khawmuik heue. Yawsux yuh kix laux leeing tau mai veng pa ot kix khawmuik heue. ²² Can pui Anagax ang lai deuk tix kaux kawx, ka daux haktiex pui Isarelax khankix heue. Kix kawn ot ngie ka daux veng Gaza, veng Gata mai ka daux veng Ashadot, khankix nong nong heue. ²³ Mawh kheu nan, Yawsux rhim ti teei haktiex hawt baoh an khankix khawmuik, awm pa hoik ah Siyiex leeing ju ka Mose mai Yawsux hoik tawx ankix mawh singao ka pui Isarelax khankix, awm gwieh kix ti koe cub mawx cub an ka doeh ru kix heue. Khaix an, haktiex hoik yiien khaing naing heue.

¹ Inkix mawh simiang haktiex pa hoik pex ceu pui Isarelax khankix mai haktiex pa hoik pon kix ticie ka praok plak toi rawm klawng Yawdan, ka plak dee lih singaix jah khaing rawm klawng Anon, tom hoek ka gawng Heramon mai daux lung rawm klawng Yawdan, pa koe ka plak lih singaix. ² Simiang Sihong, pa mawh simiang ceu pui Amawrix khankix, pa ot ka daux veng Heshabon mai pa kwang ka piang haktiex Gilat tix plak, khawm veng Araw tix plak, pa koe ka piang praok rawm klawng Anon, khaing daux sigreung rawm klawng an, tom hoek dee singai ka rawm klawng Yabok, pa koe hawt mee haktiex ceu pui Amawrix khankix. ³ Mai daux lung daux ngawd rawm klawng Yawdan, pa koe ka plak lih singaix, khaing rawm sigrit sigra Gennisariet, tom hoek dee singai ka rawm sigrit sigra Arabax, rawm sigrit sigra kih mai daux krax hu kix ka plak veng Bietyeshimut mai ka plak seh pa koe ka greem caong gawng Pisaga. ⁴ Simiang Awgax, khaing haktiex Bashan mai mee haktiex pa kwang nawh khankix, pa kawn mawh pa deuk khaing pui pa ting lhaong ankix, pa ot ka veng Ashatarot mai veng Edarix. ⁵ Mai pa kwang ka piang gawng Heramon, haktiex Salakha mai ka piang haktiex Bashan khankix khawmuik, tom hoek dee singai ka hawt mee haktiex ot ceu pui Geshurix mai ceu pui Makhatix khankix mai haktiex Gilat tix plak, tom hoek dee singai ka hawt mee haktiex simiang Sihong, pa ot haktiex Heshabun khankix heue. ⁶ Inkix mawh pa hoik pex Mose, pa mawh kawncau Siyiex leeing ju tau mai pui Isarelax khankix heue. Mose pa mawh kawncau Siyiex leeing ju hoik tawx ankix ka ceu pui Rubin, ka ceu pui Gat mai ka doeh ru Manashe tix plak, awm pa sang pon kix ti cie heue.. ⁷ Inkix mawh simiang haktiex pa hoik pex Yawsux mai pui Isarelax kah, ka piang praok plak in rawm klawng Yawdan, mai ka piang praok plak klip singaix, jah khaing veng Balagat, ka daux ngawd Lebanon, tom hoek dee singai ka gawng Baliet mai ka plak jee ka daux krax hu Sirax heue. Yawsux tawx ankix ka doeh ru Isarelax khankix, son pa sang pon kix ti cie, awm pa koe doeh ru kix, ⁸ Ka daux haktiex piang gawng mai ka daux dee tiem tiex mai ka daux lung rawm klawng Yawdan mai ka plak jee haktiex mai ka daux tiag khankix mai ka daux plak seh khankix pa mawh dee ot pui Hitix, pui Amawrix, pui Khananix, pui Pherazix, pui Hiwix mai pui Yebusix khankix, ⁹ simiang veng Yerikho tix kaux, simiang veng Ai tix kaux, pa ot hawt praok veng Betelax tix kaux, ¹⁰ simiang veng Yerusaliem tix kaux, simiang Hebaron tix kaux, ¹¹ simiang veng Yamot tix kaux mai simiang veng Lakheshax tix kaux, ¹² simiang veng Egalon tix kaux mai simiang veng Geza tix kaux, ¹³ simiang veng Debirax tix kaux mai, simiang veng Geda tix kaux, ¹⁴ simiang veng Hawma tix kaux mai simiang veng Arat tix kaux, ¹⁵ simiang veng Lipanax tix kaux mai simiang veng Adulam tix kaux, ¹⁶ simiang veng Mageda tix kaux mai simiang veng Betalax tix kaux, ¹⁷ simiang veng Tapua tix kaux mai simiang veng Hepha tix kaux, ¹⁸ simiang veng Aphiet tix kaux mai simiang veng Lasharon tix kaux, ¹⁹ simiang veng Madon tix kaux mai simiang veng Hazaw tix kaux, ²⁰ simiang veng Shimaron-meron tix kaux mai simiang veng Akhashap tix kaux, ²¹ simiang veng Tanax tix kaux mai simiang veng Megidaw tix kaux, ²² simiang veng Kedeshax tix kaux mai simiang veng Yokanam pa ot piang gawng Kharamelax tix kaux, ²³ simiang veng Dawrax pa ot ka dee lhaong gawng Dawrax tix kaux mai, simiang pui haktiex Gilagalax, pa mawh Gaw-eng tix kaux, ²⁴ simiang veng Tiraza tix kaux, khawmuik simiang khankix koe tixgoe tix kaux heue.

¹ Yam in Yawsux hoik riex ju mai hoik hu sipie kuad ju tix heue. Siyiex leeing ju deeh ah nin ka nawh heue. "Maix hoik riex ju mai hoik hu sipie kuad ju tix heue. Haktiex pa sang baox rhim pex ti teei kawn koe tom nie heue." ² In mawh haktiex pa kawn deuk khankix, pa mawh haktiex kwang pui Philitix mai haktiex kwang pui Geshurix khankix khawmuik, ³ jah ka rawm klawng Shihawrax, pa koe ka plak lih singaix khaing meung Ejiptux, tom hoek dee singai ka mee haktiex veng Ekaron, pa koe ka krax plak laong, Pa hoik simin tix awm ceu pui Khanan khankix heue. Simiang haktiex Philitix phwan kaux pa mawh pui Gazatix, pui Ashadawdix, pui Ashakelonix, pui Gitix mai pui Ekarawnix, khawm pui Ewix khankix, ⁴ Jah khaing krax plak seh khankix hoik mawh haktiex pui Khanan mai haktiex Mara, pa mawh cie pui Sidom khankix, tom hoek ka dee singai ka veng Aphiet, ka mee haktiex pui Amawrix khankix, ⁵ haktiex pui Gebalix khankix mai haktiex Lebanon khankix khawmuik, pa koe plak lih singaix, jah khaing veng Balagat, pa koe greem caong gawng Heramon, tom hoek dee singai ka krax laig kix haktiex Hamat, ⁶ Can pui khankix pa ot piang gawng lua haktiex Lebanon, tom hoek dee singai ka rawm klawng Misarephot mai dee ot pui Sidom khankix heue. Aux tak grheu ti tik kix khaing ka plak sivoe pui Isarelax khankix mai gwieh tix tawx ankix ka pa yuh nieb, ka pui Isarelax khankix mawh sinngao pa sang pon kix, awm hoik tawm Aux gumlox ka maix heue. ⁷ "Mawh kheu nan, yam in gwieh tix tawx haktiex in, mawh krax pa pon kix sinngao ka doeh ru kix sidim cub mai ka doeh ru Manashe tix plak heue. ⁸ Cub doeh ru Manashe, an tix plak tau mai pui Rubin mai pui Gat khankix, pon ti cie sinngao pa hoik tawx Mose ka kix, ka plak toi rawm klawng Yawdan plak lih singaix, awm pa hoik tawx Mose, pa mawh kawncau Siyiex leeing ju ka kix, ⁹ jah khaing venng Araw, pa koe ka piang praok rawm klawng Anon mai veng pa koe daux sigreung dee kawk rawm khankix mai ka daux lung Medebax khawmuik, tom hoek dee singaix ka veng Dibun, ¹⁰ mai veng simiang Sihong, pa mawh ceu pui Amawrix khankix khawmuik, pa ot tix kwang ka daux veng Heshabon, tom hoek dee singai ka mee haktiex Amon, ¹¹ Ka haktiex Gilat mai ka mee haktiex pui Geshurix mai ceu pui Makhatix, khawm gawng Heramon mai haktiex Bashan khankix khawmuik, tom hoek ka haktiex Salakha, ¹² mai ka haktiex simiang Awgax, pa ot ka daux haktiex Bashan khankix khawmuik, pa kwang ka piang veng Ashatarot mai veng Edarix, pa mawh pui deuk khaing pui pa ting lhaong khankix heue. Grawh grawng nawh, Mose hoik pex ka kix mai hoik teei ti tik inkix khaing tan heue. ¹³ Viang mawh nan, pui Isarelax khankix, ang lai grheu ti tik pui Geshurix mai pui Makhatix khankix heue. Mawh kheu nan, pui Geshurix mai pui Makatix khankix, ot ka daux sinax pui Isarelax khankix tom hoek daux in singaix heue. ¹⁴ Mawh ngie doeh ru pui Lewix khankix, pa ang nawh tawx kix cie sinngao heue. Krax pa appong pui Isarelax khankix kuceu ka Siyiex, pa mawh krax tan pa geeing ka ngu khankix, tak mawh sinngao cie kix, awm hoik tawm Nawh Cao ka kix heue. ¹⁵ Mose hoik tawx sinngao ka doeh ru kawn praix Rubin khankix awm koe pao nyiex kix heue. ¹⁶ Mee krax pa kwang kix, tak mawh pa jah tix khaing veng Araw, pa koe ka piang praok rawm klawng Anon mai veng khankix pa koe daux sigreung dee kawk rawm klawng mai daux lung khankix pa koe hawt veng Medebax khawmuik, ¹⁷ veng Heshabon mai veng pa koe daux lung khawmuik, veng Dibun, veng Bamotbalax, veng Bietbalamon, ¹⁸ veng Yahaza, veng Gedamot, veng Mephat, ¹⁹ veng Girayatim, veng Sibama, veng Zeriet-shaha, pa koe ka daux ngawd piang gawng khankix, ²⁰ veng Bietpegurax mai haktiex caong gawng Bizaga khankix mai veng Bietyeshimot, ²¹ mai can veng khankix pa koe ka daux lung khankix khawmuik mai meung haktiex simiang Sihong, pa mawh ceu pui Amawrix, pa kwang ka daux veng Heshabon khankix heue. Mose hoik kieh simiang Midian phwan kaux, pa mawh simiang Ewix, simiang Rekim, simiang Zurax, simiang Hurax mai simiang Riba khankix, hu puing ti teei haktiex dee ot simiang Sihong khankix heue. ²² Pui Isarelax khankix baox deeh pah cao jhai Balam, pa mawh kawn simex Bawrax, ka lawm vaid tau mai daux sinax pui pa hoik pah kix yum khankix heue. ²³ Mee haktiex pui Rubin khankix, mawh pa koe ka piang praok rawm klawng Yawdan heue. In mawh sinngao cie pui Rubin khankix, awm krax pa koe pao nyiex kix, khawm veng khawm yaong cie kix khawmuik heue. ²⁴ Mose baox tawx sinngao ka doeh ru ceu pui Gat khankix mai ka kawn praix Gat khankix, awm pa koe pao nyiex kix heue. ²⁵ Mee haktiex pa kwang kix tak mawh veng Yaza mai veng khankix pa koe hawt veng Gilat khankix khawmuik mai haktiex cie ceu pui Amawrix khankix tix plak, tom hoek dee singai ka veng Araw, pa koe ka plak sivoe veng Raba, ²⁶ mai jah khaing veng Heshabon, tom hoek ka veng Ramatmizapa mai veng Betawnim khankix mai deeeh jah tix khaing veng Mahanem, tom hoek ka mee haktiex veng Debirax, ²⁷ mai ka daux ngawd veng Biet Haram, veng Biet Nimarax, veng Sugut mai veng Zaphon mai meung haktiex pa ghoik ti mawh cie Sihong, simiang veng Heshabon khankix heue. Rawm klawng Yawdan mawh mee haktiex cie kix mai hoek tom praok dee singai ka rawm sigrit sigra Genesariet, pa koe ka toi praok rawm klawng Yawdan plak an ka dee haktiex plak lih singaix khankix heue. ²⁸ In mawh sinngao cie kawn praix ceu pui Gat khankix, awm pa koe pao nyiex kix, khawm veng khawm yaong kix khawmuik heue. ²⁹ Mose baox deeh tawx sinngao ka doeh ru Manashe khankix tix plak heue. An mawh son cie doeh ru Manashe khankix tix plak, awm koe pao nyiex kix heue. ³⁰ Mee haktiex pa kwang kix, tak mawh pa jah tix khaing veng Mahanem, khawm haktiex Bashan khawmuik mai meung haktiex simiang Awgax, ka haktiex Bashan khawmuik mai pa koe hawt veng Ya-irax khankix tixgliah veng, pa koe ka daux haktiex Bashan khankix khawmuik, ³¹ haktiex Gilat tix plak mai veng Ashadarot mai veng Edarix, khawm veng pa koe ka daux meung haktiex simiang Awgax, ka haktiex Bashan khankix khawmuik hoik mawh son cie kawn praix Makhirax, pa mawh kawn simex Manashe mai son cie kawn praix Makhirax khankix tix plak, awm krax pa koe pao nyiex kix heue. ³² In mawh guang haktiex pa hoik gwieh Mose tix tawx mawh krax pa pon kix sinngao ka daux lung Mawbax, pa koe ka plak toi rawm klawng Yawdan plak an, hawt veng Yerikho ka plak dee lih singaix heue. ³³ Viang mawh nan, son doeh ru pui Lewix khankix, Mose ang lai tawx sinngao cie kix pie tix ceu kawx heue. Grawh grawng nawh, Siyiex leeing ju ceu pui Isarelax hoik mawh sinngao cie kix, awm hoik ah Nawh Cao ti deuh ka kix heue.

¹ Inkix mawh gwang haktiex pa hoik pon pui Isarelax khankix ti cie, awm sinngao kix, ka daux haktiex meung Khanan mai pa hoik gwieh cao giex kaing li Eliza mai Yawsux pa mawh kawn simex Nun mai cao kaing keeing doeh ru Isarelax khankix tix tawx, mawh sinngao pa pon kix ti cie heue. ² Sinngao cie kix hoik mawh pa gwieh tix ka nieb mai gumlox pa hoik tawx Siyiex leeing ju ka daux tawm taix Mose, son doeh ru kix sidim cub heue. ³ Mose hoik tawx sinngao ka doeh ru pui Isarelax khankix ra cub, sonsang pon kix ti cie haktiex pa koe toi plak praok rawm klawng Yawdan khankix heue. Viang mawh nan, son ceu pui Lewix khankix, nawh ang nyang bax tawx sinngao tix ceu kawx khaing daux sinax kix, ⁴ Mawh kheu jao koe doeh ru kawn praix Yosiep khankix ra cub, pa mawh Manashe mai Epharen khankix heue. Kix ang lai tawx dah dee ti dah kawx ka pui Lewix khankix, ka daux haktiex an, lheu khaing veng pa sang ot kix tau ka haktiex cie pui hun, son khawng brie eei kix mai sonsang deuh kix kraung khrai cie tix nong nong heue. ⁵ Awm gumlox pa hoik tawm Siyiex leeing ju ka Mose, pui Isarelax khankix hawt ti yuh nawh awm an mai kix hoik gwieh haktiex an ka daux sinax tix heue. ⁶ Khaix an, pui Yudax khankix hoek ka Yawsux, ka daux Gilagalax heue. Kaliep pa mawh kawn simex Yephunie mai pa mawh ceu pui Keniet ah nin ka nawh heue. "Maix hoik tawng ka gumlox pa hoik ah Siyiex leeing ju ka Mose, pa mawh pui Siyiex, son grawng maix khawm aux, ka daux haktiex Kadeshax heue." ⁷ "Aux hoik koe ju tixpon num yam hoik ploi Mose pa mawh kawncau Siyiex leeing ju aux lih hu khaing baoh haktiex Kadeshabana, sonsang jiang aux ti yaox ka haktiex ankix mai aux hoik deeh viex gumlox satang an khankix hoek ka nawh, awm krax pa hoik koe ceu ankix ka daux rhawm aux heue. ⁸ Viang puxaik aux khankix pa hoik hu tau mai aux, hoik yuh krax pa khrup rhawm pui khankix kawx, aux mawh pa hawt grawng lawng khaix Siyiex leeing ju tix khawmuik heue. ⁹ Mawh kheu nan, Mose koe lox pa tiextu ka daux singaix an mai hoik ah nin heue. "Haktiex dee pa hoik dig maix ka caong tix khankix, tak mawh sinngao cie maix tete mai ka kawn praix maix khankix leeing ju heue. Grawh grawng nawh maix hoik mawh pa hawt grawng lawng khaix Siyiex leeing ju aux khawmuik heue." ¹⁰ Yan in, jhak heue, Siyiex leeing ju hoik kieh aux im ju tixpon phwan num, awm krax pa hoik ah Nawh Cao glang ka singaix hoik sikah Siyiex leeing ju gumlox inkix, ka Mose yam kawn vung viang ceu pui Isarelax khankix ka daux tiag heue. Yam in, aux hoik koe ju tixdaix phwan num ka daux singaix in heue. ¹¹ Aux kawn koe riang rao ka daux singaix in, awm krax pa hoik koe aux, ka daux singaix yam ploi Mose aux hu heue. Awm krax pa hoik koe riang rao aux yam an, riang rao aux kawn koe tom yam in sonsang puing naing, khawm son krax pa lih hu mai son krax pa deeh laig heue. ¹² Mawh kheu nan, yam in tawx gawng lua in pa hoik ah Siyiex leeing ju ka daux singaix an ka aux heue. Grawh grawng nawh maix hoik mhong ka hoik koe ceu pui Anagax khankix tan mai veng cie kix hoik mawh pa ting lhaong mai pa kaux cong khawmuik heue. Ceu ankix tak pon ti mawh, phan Simiang ot tau mai aux mai aux tak mawh pa pon ti grheu kix lih awm pa hoik ah Siyiex leeing ju heue. ¹³ Yawsux nawb bwanson ka piang nawh mai tawx haktiex Hebaron ka Kaliep, pa mawh kawn simex Yephunie, mawh sinngao krax pa pon nawh ti cie heue. ¹⁴ Mawh kheu nan, haktiex Hebaron hoik pon ti mawh sinngao cie Kaliep pa mawh kawn simex Yephunie mai pa mawh ceu pui Keniet khankix, tom hoek ka daux singaix in, kheu jao hoik hawt nawh khaix Siyiex leeing ju ceu pui Isarelax heue. ¹⁵ Glang ka an, ceu kaux veng Hebaron hoik mawh Kirayat Arabax heue. Grawh grawng nawh, Arabax hoik mawh pui pa kied ting ka daux sinax ceu pui Anagax khankix heue. Khaix an, haktiex an khankix khawmuik hoik mawh pa yiien yawg khaing naing heue.

¹ In mawh nieb pa pon cawk pui Yudax khankix, awm pa koe paox nyiex kix heue. Mee haktiex Edom, hawt daux tiag Sin, ka sinax plak seh khankix hoik mawh praok mee haktiex kix ka plak seh heue. ² Mee haktiex plak seh mawh pa jah tix ka rawm sigrit sigra kih, khaing dee kawk rawm pa koe plak seh khankix heue. ³ Mee haktiex kix, deeh lih hu ka praok plak seh, hawt dee lih jee haktiex Akarabim mai mee an deeh hu hawt baoh yaong Sin mai deeh hu jee ka praok plak seh dee koe yaong Kadeshabana mai mee deeh hu hawt yaong Hezaron mai deeh haok ka plak yaong Ada mai an deeh hu hawt vung viang yaong Karaka heue. ⁴ Jah khaing tan, mee haktiex deeh hu ka plak yaong Azamon mai deeh lih hu ka hawt rawm klawng Ejiptux mai mee haktiex an ghoik ti hu sidah ka praok rawm sigrit sigra heue. In tak mawh mee haktiex pex ka plak seh awx. ⁵ Mee haktiex plak lih singaix, mawh pa jah tix khaing rawm sigrit sigra kih, Nhawng Sawdom tom hoek dee sidah rawm klawng Yawdan heue. Mee haktiex pa koe plak laong, mawh pa jah tix khaing hawt dee kawk rawm sigrit sigra dee sidah rawm klawng Yawdan heue. ⁶ Mee haktiex deeh haok ka plak yaong Biethawgalax mai hu ka plak laong yaong Bietarabax tan heue. Khaix an, mee haktiex deeh haok ka plak dee koe rang simaox cie Bawhan, pa mawh kawn simex Rubin heue. ⁷ Khaix an, mee haktiex deeh haok plak yaong Debirax, khaing daux ngawd Akhaw mai mee haktiex an deeh veeh ti hu ka baoh plak laong ka plak see veng Gilagalax, pa koe ka plak sivoe caong gawng Adumin mai pa koe ka praok plak seh daux ngawd heue. Mee haktiex deeh baox hu ka plak rawm nhawng Engshamit mai ghoik tix sidah ka yaong Engrawgelax heue. ⁸ Mee haktiex deeh haok hawt plak daux ngawd kawn simex Himnom mai deeh lih hu ka plak seh, hawt caong veng Yebusix, Yebusix mawh veng Yerusaliem heue. Mee haktiex deeh haok ka plak choek gawng khankix pa koe ka plak sivoe daux ngawd Himnom, ka plak klip singaix, pa koe hawt dee sidah daux ngawd Rephim ka plak laong heue. ⁹ Khaix an, mee haktiex deeh lih hu khaing hawt vung viang dee choek gawng an khankix mai hoek ka dee lih rawm gawng Nephataw mai deeh lang tom hoek ka veng pa koe hawt gawng Epharon khankix heue. Mee haktiex an, deeh hu hawt vung viang veng Balax (Veng Balax mawh veng Kirayatyarim) heue. ¹⁰ Khaix an, mee haktiex deeh veeh ti hu ka plak klip singaix khaing veng Balax, tom hoek ka gawng Sirax mai mee an deeh hu ka praok gawng Yarim pa koe ka plak laong pa mawh gawng Khesalon mai deeh hu jee ka veng Bietshemit mai mee an deeh hu plak veng Timanax heue. ¹¹ Mee haktiex an, deeh lih hu ka plak praok veng Ekaron, hawt plak laong heue. Khaix an, mee haktiex deeh hu hawt vung viang yaong Shikaron mai hu hawt ka gawng Balax mai deeh tuk tix lang tom hoek ka yaong Yabanelax mai mee haktiex an, deeh hu sidah hawt rawm sigrit sigra heue ¹² Mee haktiex plak klip singaix, mawh pa koe hawt praok rawm sigrit sigra ting heue. In mawh mee haktiex pui Yudax khankix khawmuik, awm pa koe doeh ru nyiex ma kix heue. ¹³ Yam in, son Kaliep pa mawh kawn simex Yephunie, Yawsux hawt tawx nyum pa pon nawh ti cie khaing daux sinax pui Yudax khankix, awm gumlox pingnyap pa tawx Siyiex leeing ju ka nawh heue. Ceu kaux veng pa tawx nawh khankix, mawh veng Arabax, mai Hebaron heue. Arabax mawh ceu kaux keeing Anagax heue. ¹⁴ Kaliep grheu ti tik kawn simex Anagax khankix loe kaux pa mawh Shesie, Ahiman mai Talamie, khaing tan heue. Kix mawh kawn praix Anagax heue. ¹⁵ Khaix an, nawh yaog ti hu khaing tan mai hoek ka dee ot pui veng Debirax heue. Glang ka an, ceu kaux veng Debirax mawh veng Kirayatsepha heue. ¹⁶ Kaliep deeh ah nin, "Pui pa pon puing ka veng Kirayatsepha pon rhim ti teei veng an, son nawh aux tak tawx nawh moeng kawn bun tix Akhasax heue. ¹⁷ Mawh kheu nan, Awtanelax, pa mawh kawn simex Kenat mai pa mawh pux Kaliep rhim ti teei nawh cie veng an heue. Nawh tawx kawn bun tix ka nawh mawh moeng nawh heue. ¹⁸ Yam in, khaix hoik luan ceu an khankix yam hoek bun an ka nawh, bun an nyaw glaw nawh mhaing biang kaung tix gwang ka keeing tix heue. Mawh kheu nan, yam lih bun an khaing law brug tix, yam an Kaliep ah nin ka nawh, "Mawh koe rhawm maix ti sang cie ceu patix lie?" ¹⁹ Nawh deeh ah nin, "Tawx krax pa nawb bwanson ka aux, awm hoik tawx maix haktiex pa koe plak seh maix deeh baox tawx aux cie haktiex dee lih rawm liak." Mawh kheu nan, Kaliep tawx haktiex dee lih rawm khankix pa koe ka plak laong khawm haktiex dee lih rawm pa koe plak dee lung ka nawh heue. ²⁰ In mawh sinngao cie doeh ru pui Yudax khankix, awm krax pa koe doeh nyiex ma kix heue. ²¹ Veng pa hoik tat ti deuh son doeh ru pui Yudax khankix, mawh pa koe ka plak see mee haktiex Edom ka baoh plak seh mai ankix hoik mawh veng Kabazelax, veng Edarax, veng Yagurax, ²² veng Kinax, veng Dimawrax, veng Adada, ²³ veng Kedesha, veng Hazaw, veng Itanan, ²⁴ veng Zipha, veng Telem, veng Balot, ²⁵ veng Hazawhatada, veng Kiriot, Hezaron pa mawh veng Hazaw pa prim, ²⁶ veng Amam, veng Shemax, venng Mawlada, ²⁷ veng Hazagadadax, veng Heshamon, veng Bietpaliet, ²⁸ veng Hazashula, veng Berashiba, veng Bikzawtaya, ²⁹ veng Balax, veng Iyim, veng Ezim, ³⁰ veng Elatawlat, veng Khesilax, veng Hawrama, ³¹ veng Zigalak, veng Madamana, veng Sansana, ³² veng Lebaok, veng Shilahim, veng Aen mai veng Remon khankix heue. Veng khawmuik koe been tixnga dim veng, tau mai yaong nawh khankix heue. ³³ Veng ankix, pa koe ka piang daux lung haktiex khankix, tom mawh veng Eshatawlax, veng Zawra, veng Ashana, ³⁴ veng Zanaw, veng Engganim, veng Tapua, veng Enam, ³⁵ veng Yamok, veng Adulam, veng Sawkhaw, veng Azeka, ³⁶ veng Sharim, veng Aditem, veng Gederax mai veng Gederawtem khankix khawmuik, hoik mawh veng kao pon veng tau mai yaong pa koe hawt vung viang veng ankix, ³⁷ mai veng Zenan, veng Hadasha, veng Migadalagat, ³⁸ veng Dilan, veng Mizapa, veng Yokathilax, ³⁹ veng Lakhishax, veng Bazakat, veng Egalon, ⁴⁰ veng Kabun, veng Laman, veng Kedalisha, ⁴¹ veng Gedarot, veng Bietdagon, veng Nama mai veng Makeda, khankix khawmuik, pa mawh veng kao liah veng tau mai yaong pa koe hawt vung viang veng ankix, ⁴² mai veng Libanax, veng Eta, veng Ashan, ⁴³ veng Yiphata, veng Ashana, veng Neziba, ⁴⁴ veng Kilax, veng Akhaziba mai veng Maresha khankix, pa mawh veng sidim veng tau mai yaong pa koe hawt vung viang an khawmuik, ⁴⁵ mai veng Ekaron, tau mai veng pa dex mai nawh khawm yaong khankix, ⁴⁶ jah khainng veng Ekaron, tom hoek ka rawm sigrit sigra, can veng mai yaong khankix khawmuik, pa dex vung viang veng Ashadok khankix khawmuik, ⁴⁷ mai veng Ashadok, tau mai veng nawh yaong nawh khankix, veng Gaza, tau mai veng nawh yaong nawh khankix, tom hoek dee singai rawm klawng Ejiptux mai ka rawm sigrit sigra ting tau mai hawt haktiex praok rawm nawh khankix heue. ⁴⁸ Haktiex pa koe ka piang gawng piang lua khankix, pa mawh veng Shmarix, veng Yatira, veng Sawkhaw, ⁴⁹ veng Dana, veng Kirayatsana (pa mawh veng Debirax), ⁵⁰ veng Anap, veng Ashatemaw, veng Anim, ⁵¹ veng Goshem, veng Hawlom mai veng Gilaw khankix, pa mawh veng kao tix veng tau mai yaong pa koe hawt baoh an, ⁵² mai veng Arap, veng Duma, veng Eshan, ⁵³ veng Yanum, veng Biettapua, veng Apheka, ⁵⁴ veng Homta, veng Arabax, pa mawh veng Hebaron mai veng Ziawrax khankix, pa mawh veng sidim veng tau mai yaong pa koe hawt baoh an khawmuik, ⁵⁵ mai veng Maon, veng Khamelax, veng Zipha, veng Yuta, ⁵⁶ veng Yezarilax, veng Yokadim, veng Zanua, ⁵⁷ veng Ka-inax, veng Giba mai veng Tima khankix, pa veng kao veng tau mai yaong pa koe hawt baoh an khankix, ⁵⁸ mai veng Halahula, veng Bietzurax, veng Gedaw, ⁵⁹ veng Marat, veng Biet Anot mai veng Elatekon, khankix pa mawh veng liah veng tau mai yaong baoh an khankix khawmuik, ⁶⁰ mai veng Kirayatbalax, pa mawh veng Kirayatyarim mai veng Raba, khankix pa mawh veng ra veng tau mai yaong baoh an khawmuik heue. ⁶¹ Plak ka daux tiag daux tu veng pa hoik koe ankix, tom mawh veng Biet Arama, veng Midin, veng Sekada, ⁶² veng Nibashan, veng Meliet, pa mawh veng kix mai veng Enggedi khankix, pa mawh veng liah veng tau mai yaong ankix khawmuik heue. ⁶³ Phan mawh ceu pui Yebusix khankix mai can pui pa ot ka daux veng Yerusaliem khankix, pui Yudax khankix, ang lai pon grheu kix lih hu heue. Viang mawh nan, pui Yebusix khankix, hoik ot tau mai pui Yudax khankix, hawt veng Yerusaliem tom hoek in singaix heue.

¹ Krax pa cawk nieb hoik caw ka son kawn praix Yosiep khankix mai kix caw ti pon haktiex inkix, jah khaing rawm klawnng Yawdan, tom hoek ka veng Yerikho mai mee haktiex cie kix deeh hu ka plak dee lih rawm klawng Yerikho khankix ka plak dee lih singaix mai deeh hu ka plak daux tiag, deeh haok ti hu khaing veng Yerikho mai hu daux sinax gawng khankix mai hoek ka veng Betelax heue. ² Khaix an, mee haktiex an deeh lih hu khaing veng Betelax mai hoek ka venng Luza mai mee an deeh tiang ti hu hawt mee haktiex veng Akhitix, hawt dee dex mai veng Atarot, ³ mee haktiex deeh lih jee ka plak klip singaix mai ka mee haktiex veng Yaphalet, tom hoek dee singai ka mee haktiex dee pa nie lheu tiem ka veng Biethawron mai hoek ka veng Geza mai mee haktiex an ghoik ti sidah ka rawm sigrit sigra heue. ⁴ Mawh kheu nan, kawn praix Yosiep khankix, kawn prai Manashe mai Epharem khankix, hoik teei ti cie sinngao pa pon kix heue. ⁵ Mee haktiex kawn praix Epharem khankix, awm krax pa koe doeh nyiex ma kix hoik mawh inkix heue. Mee haktiex sinngao cie kix, pa koe plak lih singaix hoik mawh veng Atarot Ada, tom hoek dee singai ka plak piang veng Biethawrom khankix heue. ⁶ Mee haktiex an, deeh lih hu ka plak see dee koe rawm sigrit sigra ka plak laong khaing veng Mekmitat heue. Khaix an, mee haktiex an deeh hu vung viang hawt baoh plak lih singaix mai hoek ka veng Tanatshilaw mai nawh deeh tiang ti hu hawt plak lih singaix ka veng Yanawha khankix heue. ⁷ Khaix an, mee haktiex kix deeh lih jee khaing veng Yanawha mai deeh hoek ka veng Atarot mai veng Narax khankix mai deeh lih bleeh ti hoek ka veng Yerikho mai deeh ghoik tix hoek ka rawm klawng Yawdan heue. ⁸ Mee haktiex kix deeh lih hu khaing veng Tapua, pa koe hawt baoh plak klip singaix mai deeh hoek ka rawm klawng iak Kana mai mee haktiex an hu ghoik tix sidah ka rawm sigrit sigra heue. In mawh sinngao cie doeh ru kawn praix Epharem khankix, awm krax pa koe doeh nyiex ma kix heue. ⁹ Can veng khankix, pa hoik gwieh tix son kawn praix Epharem khankix, hoik mawh sinngao pa koe ka daux sinax kawn praix Manashe khankix, khawm veng khawm yaong kix khawmuik heue. ¹⁰ Kix ang lai grheu ti tik ceu pui Khanan khankix, pa ot ka daux sinax ceu pui Epharem, tom hoek ka daux in singaix heue. Kix hoik lih ti mawh siliex pa yuh kaing son kix heue.

¹ Krax pa pon cawk nieb hoik mawh pa caw ka doeh ru cub Manashe khankix, kheu jao hoik mawh nawh kawn Ai Yosiep pa kok kix ceu kaux nawh mawh Makhirax, pa mawh kawn Ai Manashe, pa mawh keeing ka Gilat mai kheu jao hoik mawh nawh pui naing tix kaux heue. Mawh kheu nan, kix tawx haktiex Gilat mai haktiex Bashan ka nawh heue. ² Krax pa cawk nieb khankix hoik mawh pa caw ka kawn praix pa ghoik khaing cub Manashe, awm pa koe doeh nyiex ma kix mai son kawn praix Abiza, kawn praix Heliet, kawn praix Asarie, kawn praix Shekhim, kawn praix Hepha mai kawn praix Shemida khankix heue. Inkix mawh kawn simex Manashe, pa mawh kawn simex Yosiep, awm pa koe doeh nyiex ma kix heue. ³ Viang mawh nan, Zelophihat, pa mawh kawn simex Hepha, kawn simex Gilat, kawn simex Makhirax, kawn simex Manashe khankix, ang koe kawn simex pie tix kaux kawx mai nawh koe ngie kawn bun khankix heue. Inkix mawh ceu kaux kawn bun nawh khankix, pa mawh Mala, Nawa, Hawgalax, Milakha mai Tiza khankix heue. ⁴ Kix hoek dex ka plak sivoe cao giex kaing li Eliza mai ka plak sivoe Yawsux, pa mawh kawn simex Nun mai ka plak sivoe cao pa kwang pa bung khankix ah nin. "Siyiex leeing ju hoik tawm gumlox ka Mose, sonsang tawx nawh sinngao cie yix khainng daux sinax puxaik yix khankix heue. Mawh kheu nan, awm pa hoik koe gumlox pingnyap Siyiex, nawh hoik tawx sinngao ka kix khaing daux sinax puxaik keeing kix heue. ⁵ Lheu khaing haktiex Gilat mai haktiex Bashan khankix, pa koe plak toi rawm klawng Yawdan khankix kao son tix son, hoik mawh cie cub Manashe khankix heue. ⁶ Grawh grawng nawh, kawn bun Manashe khankix, hoik mawh pa pon ti cie sinngao khaing daux sinax kawn saux simex kawn simex Manashe, pa kawn deuk khankix, hoik mawh pa pon ti cie haktiex Gilat heue. ⁷ Haktiex dee kwang Manashe, hoik mawh pa jah tix khaing veng Asha, tom hoek ka veng Mikmetat, pa koe hawt plak lih singaix khaing veng Shekhim heue. Mee haktiex deeh lih hu ka plak seh tom hoek ka dee ot pui veng Engtapua khankix heue. ⁸ Manashe hoik pon ti cie veng Tapua. Viang mawh nan, veng Tapua, pa koe piang mee haktiex veng Manashe, hoik mawh cie kawn praix cub Epharem khankix heue. ⁹ Mee haktiex an deeh lih jee ka rawm klawng iak Kana, pa koe ka plak seh. Veng cie Epharem inkix, mawh pa koe daux sinax veng cie Manashe khankix heue. Haktiex cie Manashe, mawh pa koe plak laong khaing rawm klawng iak an mai mee haktiex an hu ghoik ti sidah ka rawm sigrit sigra heue. ¹⁰ Ankix pa koe baoh plak seh, hoik mawh cie Epharem heue, pa koe plak laong, hoik mawh cie Manashe mai rawm sigrit sigra hoik mawh mee haktiex nawh heue. Dee kwang Manashe mawh pa sideet mai haktiex veng Asha, hawt plak laong mai haktiex veng Issakha, mawh pa koe plak lih singaix khaing nawh heue. ¹¹ Ka daux mee haktiex dee kwang Issakha mai Asha, veng cie Manashe khankix caw ti mawh veng Bietshan mai veng khawm yaong khankix, veng Ibalam mai veng mai yaong khankix, can pui pa ot ka daux veng Dawrax mai veng mai yaong khankix, can pui pa ot ka daux veng Engdawrax, veng mai yaong khankix, can pui pa ot ka daux veng Tanak, veng mai yaong khankix mai can pui pa ot ka daux veng Megidaw, veng mai yaong khankix, pa mawh dee koe gawng lua baoh an loe dah heue. ¹² Viang mawh nan, kawn praix Manashe khankix, ang lai pon grheu pui pa ot ka daux veng ankix hu heue. Mawh kheu nan, ceu pui Khanan khankix hoik tat rhawm rhi tix ot ka daux haktiex an heue. ¹³ Ceu ankix hoik lih ti koe, yam hoik kied koe riang rao pui Isarelax khankix, kix khin ti kieh ceu pui Khanan mawh pa yuh kaing son tix heue. Viang mawh nan, kix ang lai grheu ti tik lih khaing tan khawmuik heue. ¹⁴ Khaix an, kawn praix Yosiep khankix deeh ah nin ka Yawsux. "Mawh kheu jao patix mai lai tawx ngie krax pa cawk yix nieb, sonsang pon yix sinngao tix dah khaing yuh ka mawx? Yix kawx hoik mawh cub caw pui pa kied ting tix cub, awm pa hoik nawb Siyiex leeing ju bwanson ka yix tom nie heue." ¹⁵ Mawh kheu nan, Yawsux deeh pawk ah nin. "Phan pex mawh cub pui pa kied ting tix cub, pex hu ka plak haktiex daux nong khankix mai soh dah dee son cao pex ka daux haktiex ceu pui Parazix khankix mai dee ot cub pui pa ting lhaong khankix, kheu hoik kied sikhox baoh gawng lua Epharem ka son pex heue." ¹⁶ Kawn praix Yosiep khankix deeh ah nin. "Haktiex gawng lua an khankix ang lai mawh pa kub ti ot ka son yix heue. Ceu pui Khanan khawmuik pa ot ka daux ngawd daux lung khankix, hoik mawh pa koe ling lawx brung naing pa yuh tix ka rhiem khankix, khawm pui ankix, pa ot ka daux veng Bietshan mai khawm pui pa ot hawt baoh veng nawh khankix mai khawm can pui ankix, pa koe ka daux ngawd veng Yezerelax khankix heue." ¹⁷ Yawsux deeh krai ka doeh nyiex ma Yosiep mai khawm doeh nyiex ma Epharem mai Manashe khankix ah nin. "Pex mawh cub pui pa kied ting mai hoik koe sibrawm pa kied ting heue. Pex tak ang pon ti mawh pa pon nieb tix mu ngie heue." ¹⁸ Viang mawh nan, haktiex piang gawng lua khankix, tak mawh cie pex heue. Viang dee ankix mawh pa kied haoh khaox ox kawx, pex tak kid ti tik mai haktiex pa sang deeh baox nie vieh an khankix, tak mawh cie pex heue. Pex tak mawh pa grheu ti tik ceu pui Khanan khankix khaing tan, viang kix mawh pa hoik koe ling lawx brung naing pa yuh tix ka rhiem mai viang kix mawh pa kied ting riang rao kawx heue.

¹ Khaix an, cub pui hun pui Isarelax khawmuik, khrawm paox ti tau ka veng Shilaw mai sum nyiex gox bwan man bang kum tan heue. Pui haktiex khankix hoik ot ka greem pa kwang kix heue. ² Khaing daux sinax doeh ru pui Isarelax khankix, pa kawn deuk aliah cub, ang nyang bax pon ti rieb sinngao cie tix kawn koe heue. ³ Kheu nan, Yawsux deeh ah nin ka pui Isarelax khankix, "Pex ang cu ti hu mai teei ti cie haktiex pa hoik tawx Siyiex leeing ju nawh ka keeing pex khankix glang gleeing yuh ka mawx lie?" ⁴ "Laug ti teei pui loe kaux khaing daux sinax pex, son doeh ru pex ku cub mai aux tak ploi kix hu heue. Kix tak yaog ti hu hoek ka haktiex kudah tiiem mai viex haktiex ankix awm pa simie kix tix pon sinngao cie kix mai deeh ing hoek ti krai ka aux awx. ⁵ Kix tak gwieh haktiex ankix aliah son. Ceu pui Yudax tak mawh pa kawn ot ka dee kwang kix ka plak seh mai doeh nyiex ma Yosiep tak mawh pa kawn ot ka haktiex dee kwang kix ka plak laong heue. ⁶ Mawh kheu nan, pex tak gwieh haktiex an aliah son mai viex riang haktiex an hoek ka aux tin, sonsang pon aux ti kieh pex cawk nieb ka son cao pex tin, ka plak sivoe ngai Siyiex leeing ju ex heue. ⁷ Viang mawh nan, pui Lewix khankix, tak mawh pa ang pon ti cie tix son kawx khaing daux sinax pex heue. Grawh grawng nawh, krax grawng pa yuh kix cao giex kaing li Siyiex leeing ju hoik mawh sinngao pa pon kix heue. Ceu pui Gat, ceu pui Rubin mai doh doe ru Manashe khankix tix plak, hoik mawh pa pon sinngao cie tix ka plak toi rawm klawng Yawdan, ka plak lih singaix, pa hoik tawx Mose, pa mawh kawncau Siyiex leeing ju ka kix heue" ⁸ Khaix an, pui khankix yaog ti kaoh mai hu ka dee singai mai Yawsux tawm gumlox tix ka pui pa hu sawg ti tiiem mhai haktiex khankix ah nin. "Hu lailing ti jhak haktiex kudah mai yuh riang haktiex ankix mhawm mhawm mai deeh hoek ka aux, sonsang pon yuh aux ti tawx krax pa cawk nieb ka son pex, ka plak sivoe Siyiex leeing ju, ka daux veng Shilaw tin heue." ⁹ Mawh kheu nan, pui ankix hu ka daux haktiex ankix kudah mai tiiem mhai tix viex riang haktiex aliah son, ka daux phuk lai tix mu, awm pa koe veng an khankix heue. Kix deeh hoek ka Yawsux, ka dee bang kix ka daux veng Shilaw heue. ¹⁰ Khaix an, Yawsux yuh krax pa cawk nieb, ka son kix ka daux veng Shilaw, ka plak sivoe Siyiex leeing ju heue. Yawsux gwieh ti tawx haktiex ka pui Isarelax khankix tan, awm pa koe cub kix heue. ¹¹ Yam in, nieb cie doeh pui Binyamin khankix, mawh pa caw ti lih sivoe awm pa koe doeh nyiex ma kix heue. Haktiex dee pa kwang kix, hoik mawh pa lih khaing pa cawk kix nieb ka daux sinax kawn praix Yudax khankix mai kawn praix Yosiep khankix heue. ¹² Haktiex cie kix ka plak laong, mawh pa jah tix ka rawm klawng Yawdan mai mee haktiex an deeh hu ka praok veng Yerikho, ka plak laong heue. Mee haktiex an, deeh lih hu ka piang gawng khankix pa koe ka plak klip singaix heue. Mee haktiex an deeh hu sidah ka daux tiag Bietavin heue. ¹³ Mee haktiex kix deeh hu khaing tan mai hu ka plak see veng Luza mai tiang hawt praok veng Luza, pa mawh veng Betelax, ka baoh plak seh heue. Mee haktiex deeh lih hu ka plak veng Atarot, pa dex mai gawng khankix, pa koe ka plak seh mai ka dee tiem haktiex hawt veng Biethawron heue. ¹⁴ Khaix an, mee haktiex deeh baox jawn ti lang khaing tan, hawt vung viang plak klip singaix mai hoek ka baoh plak seh, khaing plak greem caong gawng Khanan, deeh hu sidah ka veng Kirayatbalax, pa mawh veng Kirayatyarim, pa mawh veng cie pui Yudax khankix tix veng heue. In mawh mee haktiex pa koe plak klip singaix heue. ¹⁵ Mee haktiex praok plak seh mawh pa jah tix ka dee sidah veng Kirayatyarim mai mee haktiex an deeh sitoe ti hu ka plak klip singaix mai deeh lih hu ka dee lih rawm keut Nephataw heue. ¹⁶ Khaix an, mee haktiex an deeh lih jee mai hu ka plak dee sidah gawng khankix, pa koe ka plak sivoe daux ngawd kawn simex Hinnun, pa koe ka daux ngawd ceu pui Epharem khankix ka plak laong, mai mee haktiex an, deeh lih ka daux ngawd Hinnun mai hoek ka praok veng ceu pui Yebusix khankix, ka baoh plak seh mai mee haktiex an deeh lih hu ka yaong Engrawgalax heue. ¹⁷ Mee haktiex an, deeh hu hawt vung viang plak laong mai deeh lih ka yaong Engshemiet mai deeh sitoe tix lang tom hoek plak see yaong Gelilot, pa koe ka praok caong gawng Adumim mai deeh lih ka simaox Bawhan, pa mawh kawn simex Rubin heue. ¹⁸ Khaix an, mee haktiex deeh tiang ti hu hawt see plak laong veng Arabax mai deeh lih jee ka veng Arabax heue. ¹⁹ Mee haktiex deeh tiang ti hu ka plak laong veng Biethawgalax heue. Khaix an, mee haktiex deeh hu sidah ka dee kawk rawm plak laong rawm sigrit sigra kih, hawt dee sidah rawm klawng Yawdan ka plak seh heue. In mawh mee haktiex kix ka plak seh heue. ²⁰ Rawm klawng Yawdan hoik mawh mee haktiex nawh ka plak lih singaix heue. In hoik mawh sinngao cub pui Binyamin khankix, awm pa hoik koe mee haktiex kix hawt vung viang baoh tan khawmuik mai awm pa koe doeh nyiex ma kix heue. ²¹ Yam in, veng cie doeh pui Binyamin khankix, awm pa koe doeh nyiex ma kix, hoik mawh veng Yerikho, veng Biethawgalax, veng Emietkezix, ²² veng Bietarabax, veng Zamarem, veng Betelax, ²³ veng Avin, veng Para, veng Ophara, ²⁴ veng Khephahamawni, veng Ophani mai veng Gaba khankix, pa mawh veng kao ra veng tau mai yaong pa koe hawt vung viang nawh khankix, ²⁵ veng Gibun, veng Ramax, veng Berut, ²⁶ veng Mizapa, veng Khephirax, veng Mawzax, ²⁷ veng Rekim, veng Irapelax, veng Taralax, ²⁸ veng Zelax, veng Alat, veng Yebusix (Pa mawh veng Yerusaliem), veng Gibat mai veng Kirayat khankix, pa mawh veng kao pon veng, tau mai yaong pa koe hawt vung viang veng an khankix heue. In mawh sinngao cie kawn praix Binyamin khankix, awm pa koe doeh nyiex ma kix heue.

¹ Krax pa cawk nieb ra bawg tix bawg, hoik mawh pa caw ka Simeon mai ka son doeh ru kawn praix nawh khankix, awm pa koe doeh nyiex ma kix heue. Sinngao cie kix, hoik mawh pa koe ka daux sinngao cie pui Yudax khankix heue. ² Can veng khankix pa mawh sinngao cie kix, hoik mawh veng Berashibax, pa mawh veng Shebax, veng Mawlada, ³ veng Hazashula, veng Bala, veng Azim, ⁴ veng Elatawlax, veng Betulax, veng Hawma, ⁵ veng Zigalax, veng Bietmakhabok, veng Hazasusa, ⁶ veng Bietlebot mai veng Sharuhim khankix, pa mawh veng kao loe veng mai yaong hawt vung viang nawh khankix, ⁷ veng Ain, veng Rimon, veng Eta mai veng Ashan khankix, pa mawh veng pon veng mai yaong pa koe hawt vung viang veng an khankix, ⁸ mai yaong khankix pa koe hawt vung viang veng inkix khawmuik, tom hoek dee singai ka veng Balietber Ramat, pa koe ka plak seh khankix heue. In hoik mawh sinngao cie doeh kawn praix Simeon khankix, awm pa koe doeh nyiex ma kix heue. ⁹ Sinngao cie kawn praix Simeon khankix, mawh pa viex ka daux nyum cie kawn praix Yudax khankix heue. Grawh grawng nawh, nyum pa pon kawn praix Yudax khankix, hoik mawh pa kied nie ka son kix. Mawh kheu nan, sinngao cie kawn praix Simeon khankix, hoik mawh pa koe daux sinngao cie pui ankix heue. ¹⁰ Krax pa cawk kix nieb loe bawg tix bawg, hoik mawh pa caw son kawn praix ceu pui Zebulun, awm pa koe doeh nyiex ma kix heue. Mee haktiex sinngao cie kix hoek tom dee singai ka veng Sarit heue. ¹¹ Mee haktiex cie kix lih hu ka plak see plak klip singaix mai hoek ka veng Maralax. Kaoh khaing tan, deeh lih hu ka veng Dabasiet mai deeh toe ti hu hawt rawm klawng pa koe ka plak lih singaix khaing veng Yokanam heue. ¹² Khaix an, mee haktiex deeh jah tix ka veng Sarit mai deeh hu see ka plak lih singaix hawt mee haktiex veng Khishalottebaw mai deeh lih hu ka plak see veng Debarat, hawt dee tiang nawh ka veng Yaphia heue. ¹³ Jah khaing tan, deeh tiang ti hu hawt plak lih singaix ka veng Gat Hepha mai hu ka plak see veng Itakazin mai deeh sitoe tix lang tom hoek ka veng Rimon, pa koe ka piang mee haktiex veng Nea heue. ¹⁴ Mee haktiex an, deeh hu hawt vung viang ka piang plak laong ka veng Hanaton mai deeh hu sidah ka daux ngawd Yiphatela, ¹⁵ mai can pa viex ka daux an khankix hoik mawh veng Katat, veng Nahalelax, veng Shimaron, veng Idala mai veng Bieliehiem khankix, pa mawh veng kao ra veng tau mai yaong pa koe hawt vung viang nawh khankix heue. ¹⁶ In mawh sinngao cie kawn praix Zebulun khankix, awm pa koe doeh nyiex ma kix tau mai veng inkix, khawm yaong pa koe hawt vung viang nawh khankix heue. ¹⁷ Krax pa cawk nieb pon bawg tix bawg, hoik caw ka son Issakha mai son kawn praix Issakha khankix, awm pa koe doeh nyiex ma kix heue. ¹⁸ Mee haktiex dee kwang kix, deeh lih hu ka plak veng Yezarilax mai viex khawm veng Khesulut mai veng Shunim, ¹⁹ veng Hapharim, veng Sihon, veng Anaharat, ²⁰ veng Rabit, veng Kishon, veng Abeza, ²¹ veng Hamiet, veng Enganim, veng Enhada mai veng Bietpaziet khankix, ²² mee haktiex an deeh hoek ka veng Tebaw, veng Shahazima mai veng Bietshemiet khankix heue. Mee haktiex kix deeh hu sidah ka rawm klawng Yawdan tau mai veng khankix kao liah veng khawm yaong pa koe baoh an khankix heue. ²³ In mawh sinngao cie doeh kawn praix Issakha khankix, awm pa koe nyiex ma kix tau mai veng khawm yaong cie kix khawmuik heue. ²⁴ Krax pa cawk nieb phwan bawg tix bawg, hoik mawh pa caw ka son doeh ru kawn praix cub Asha khankix, awm pa koe doeh nyiex ma kix heue. ²⁵ Mee haktiex dee kwang kix, viex nawh khawm veng Helakat, veng Halix, veng Betin, veng Akhashapha, ²⁶ veng Alameliet, veng Amat mai veng Mishalax, khankix heue. Mee haktiex an deeh hoek ka gawng Kharamelax ka plak klip singaix mai deeh hu hawt dee lih rawm klawng Shihawlibanat, heue. ²⁷ Mee haktiex an, deeh veeh tix hu ka plak see dee lih singaix ka veng Bietdagon mai hoek ka veng Zabulun mai deeh hu ka plak daux ngawd Yephatela, khaix an, mee haktiex deeh hu ka plak laong, ka plak toi veng Bietemiet mai veng Nielax mai deeh tiang ti hu hawt veng Khabulax, pa koe ka plak khawn gwiex, ²⁸ mai deeh viex nawh khawm veng Ebaron, veng Rehok, veng Hamon mai veng Kanax, tom hoek ka veng ting Sidom heue. ²⁹ Mee haktiex deeh veeh ti hu ka plak veng Ramax mai ka veng Tairax, (Turax), pa mawh veng pa kaux cong tan heue. Mee haktiex an deeh veeh tix hu ka veng Hawsax mai mee haktiex an deeh hu sidah ka rawm sigrit sigra hawt baoh haktiex veng Akhazip khankix heue. ³⁰ Veng Umma, veng Aphiet mai veng Rebok, khankix mawh veng pa hoik viex ka daux veng tixnga ra veng tau mai yaong pa koe hawt vung viang veng an khankix heue. ³¹ In mawh sinngao cie doeh ru kawn praix Asha, awm pa koe doeh nyiex ma, tau mai veng inkix khawm yaong inkix khawmuik heue. ³² Krax pa cawk nieb liah bawg tix bawg, hoik mawh pa caw ka kawn praix ceu pui Napthalix, awm pa koe doeh nyiex ma kix heue. ³³ Mee haktiex cie kix, hoik mawh pa jah tix ka veng Helap mai khawm plak daux haktiex dee kwang nawh khankix, khaing dee koe khaox gix hawt veng Zananim, veng Adami, Nekap mai veng Yabanelax, tom hoek dee singai ka veng Lakum mai mee haktiex an hu sidah ka rawm klawng Yawdan heue. ³⁴ Jah khaing veng Helap, mee haktiex an deeh sitoe tix lang mai hu ka plak klip singaix, ka veng Azanottabaw mai deeh lih khaing tan mai hu ka plak see veng Hukok heue. Mee haktiex an deeh sitoe tix ka veng Zebulun, ka plak seh mai ka veng Asha, hawt plak klip singaix mai mee nawh hu sidah ka haktiex Yudax, hawt rawm klawng Yawdan, ka plak see dee lih singaix khaing tan heue. ³⁵ Veng pa kaux cong nawh khankix, mawh veng Zidim, veng Zerax, veng Hamat, veng Rakat, veng Khinatariet khankix, ³⁶ mai veng Adama, veng Ramax, veng Hazaw, ³⁷ veng Kadeshax, veng Adarix, veng Enhazaw, ³⁸ veng Iron, veng Migadalax Elax, veng Hawrim, veng Biet Anat mai veng Bietshemiet khankix, pa mawh veng kao dim veng, tau mai yaong pa koe hawt rawb reem nawh khankix heue. ³⁹ In mawh sinngao cie doeh ru kawn praix cub ceu pui Napthalix khankix, awm pa koe doeh nyiex ma kix khawm veng khawm yaong khankix heue. ⁴⁰ Krax pa cawk nieb aliah bawg tix bawg, hoik mawh pa caw ka kawn praix Danaix khankix, awm pa koe doeh nyiex ma kix heue. ⁴¹ Mee haktiex sinngao cie kix, hoik mawh veng Zawrax, veng Eshatawlax, veng Irashemiet, ⁴² veng Shalabin, veng Ayalon, veng Yetalax, ⁴³ veng Elon, veng Tima, veng Ekaron, ⁴⁴ veng Elateka, veng Gibaton, veng Balap, ⁴⁵ veng Yehot mai veng Benaberiet, veng Gatarimon, ⁴⁶ veng Meyakon mai veng Rekon, tau mai baoh haktiex Yawppa khankix heue. ⁴⁷ Mee haktiex cie kawn praix Dan khankix, deeh lih hu ka plak toi inkix heue. Grawh grawng nawh, kawn praix ceu pui Dan khankix, hu puing ti teei veng Lieshem mai rhim ti cie veng an mai kix pah ti tik pui ankix ka lawm vaid tix mai teei ti cie kraung kix mai kix ot ka daux veng an, kix deeh kok ceu kaux veng Lieshem an mawh veng Dan, khaix ceu kaux Dan, pa mawh keeing kix heue. ⁴⁸ In mawh sinngao cie doeh ru kawn praix Dan khankix, awm pa ke doeh nyiex ma kix, khawm veng khawm yaong khankix heue. ⁴⁹ Yam khaix hoik sidah gwieh kix haktiex khankix, pa mawh sinngao pa pon kix mai awm hoik koe mee haktiex kix pui Isarelax khankix, deeh tawx sinngao pa koe daux sinax kix tix dah ka Yawsaux, pa mawh kawn simex Nun heue. ⁵⁰ Awm pa koe gumlox sikah Siyiex, kix hoik tawx veng pa mhaing nawh ti cie heue. Veng an mawh veng Tinatserax, pa koe ka piang gawng Epharim khankix mai nawh sum ti cie veng mai ot ka daux veng an heue. ⁵¹ Inkix mawh sinngao pa hoik gwieh cao giex kaing li Eliza, Yawsux pa mawh kawn simex Nun mai cao kaing doh doe ru pui Isarelax khankix, awm sinngao pa hoik cawk kix nieb tix ceu, ka daux veng Shilaw, ka plak sivoe Siyiex, hawt diang siviex nyiex gox bwan man bang kum heue. Mawh kheu nan, kix hoik yuh dee sidah krax gwieh kix haktiex heue.

¹ Siyiex leeing ju baox deeh sikah ka Yawsux ah nin. ² "Krai ka pui Isarelax khankix ah nin ka kix. Deuh ti priex veng son pui to khankix, ka son tokaux cao pex awm pa hoik sikah Aux ka Mose son pex, ³ sonsang pon to cao pa pah pui tix klawd tan, pa mawh pui tix kaux kaux, ka daux pa ang nawh yiag ti yuh, phan ang mawh nan, ka daux pa ang tix koe rhawm heue. Kix tak mawh pa hoek ti peung bwan maix, khaing pui pa pawk bix nham tix heue. ⁴ Yam to nawh ti klawd ka veng ankix tix veng mai phan nawh cung hawt diang siviex veng mai phan nawh pao tix krai grawh grawng hoek ti ka kuad pui riex ju veng an khankix mhong, kix tak teei nawh laig ka daux veng mai tawx dee ot tix dah ka son nawh sonsang pon nawh ti ot ka daux sinax kix heue. ⁵ Khaix an, phan cao pa pawk bix nham tix hawt khaix nawh, kix tak ang pon ti ap kaw pa pah pui yum an, ka daux tawm taix kix heue. Nawh mawh pa pah paox plawg tix, ka daux krax ang tix koe rhawm pa sang keud ti yuh mai ka daux ang tix koe krax pa koeng ka nawh, sivoe sang hoek taix ka nawh heue." ⁶ Nawh tak yaox ti ot ka daux veng an, tom hoek bawg yam yaox nawh ti cung ka plak sivoe pui hun khankix son krax prawng ciyang mai tom hoek bawg yam hoik yum cao giex kaing li pa ting tix kaux, khaing daux sinax kix ka daux singaix ankix heue. Khaix an, cao pa pah pui tak pon ti deeh ing mai hoek ka veng dee ot tix ka nyiex cao nawh, khaing veng pa hoik to nawh ti klawd heue." ⁷ Mawh kheu nan, kix deuh ti priex veng Kadeshax, ka daux haktiex meung Galilie, pa koe ka piang gawng Napthalix khankix mai veng Shekhim, pa koe ka piang gawng Epharim khankix mai veng Kirayat Arabax, pa mawh veng Hebaron, pa koe ka piang gawng Yudax khankix heue. ⁸ Ka piang plak toi rawm klawng Yawdan, kix hoik laug ti deuh veng Beza, pa koe ka daux tiag mai pa koe ka daux lung ka dee ot doeh ru pui Rubin khankix, hawt plak lih singaix, khaing veng Yerikho heue. Kix deeh laug ti deuh veng Ramot, pa koe daux haktiex Gilat, khaing dee ot doeh ru pui Gat khankix mai veng Golan, pa koe daux haktiex Bashan, khaing dee ot doeh ru pui Manashe khankix heue. ⁹ Inkix hoik mawh veng pa hoik laug kix ti deuh son pui Isarelax khankix mai son nyo sinie pa hoek ti ot sinax kix been tivud ticu heue. Mawh kheu nan, kaw pa hoik pah pui tix kaux kaux ka daux ang tix koe rhawm keud ti sang yuh ceu ankix, tak pon to ti klawd tan mai sonsang ang nawh pon ti yum ka taix pui pa pawk bix nham tix, tom hoek bawg yam cung nawh ka plak sivoe cub pui hun khankix heue.

¹ Cao kaing pui Lewix, hoek dee dex ka cao giex kaing li Eliza mai ka Yawsux, pa mawh kawn simex Nun mai cao kaing doeh ru pui Isarelax khankix heue. ² Kix ah nin ka kix daux veng Shilaw, pa koe daux haktiex meung Khanan mai kix ah nin. "Siyiex leeing ju hoik tawm gumlox tix ka Mose, sonsang tawx nawh veng pa sang ot yix khankix tau mai haktiex dee sawm pui hun khankix, son to brie eei yix khankix heue. ³ Mawh kheu nan, pui Isarelax khankix, hoik tawx ceu pui Lewix ot ka daux sinngao haktiex, khaing pa hoik pon kix awm krax pa hoik koe gumlox pingnyap Siyiex leeing ju heue. Kix baox deeh tawx veng inkix mai haktiex pui hun kix ka ceu pui Lewix heue. ⁴ Krax pa cawk nieb hoik mawh pa caw ka cub doeh nyiex ma Kawhat khankix heue. Kawn praix cao giex kaing li Arun, pa mawh cub pui Lewix khankix, hoik pon ti cie veng kao loe veng khaing krax pa cawk kix nieb ka daux haktiex doeh ru cub pui Yudax mai khaing daux haktiex doeh cub ceu pui Simeon mai khaing ka daux haktiex doeh ru cub ceu pui Benyamin khankix heue. ⁵ Kawn praix Kawhat, pa kawn deuk khankix, hoik mawh pa pon ti cie veng kao veng ka daux krax pa hoik cawk kix nieb, khaing doeh nyiex ma ceu pui Epharem khankix mai khaing daux doeh ru ceu pui Dan khankix mai khaing daux doeh ru Manashe an tix plak heue. ⁶ Kawn praix Geshon khankix, hoik pon ti cie veng kao loe veng ka daux krax pa cawk kix nieb khaing daux doeh nyiex ma cub pui Issakha mai khaing daux doeh ru Asha khankix mai khainng daux doeh ru, ceu pui Napthalix khankix mai khaing daux doeh ru ceu pui Manashe, ankix pa koe tix plak ka daux haktiex Bashan heue. ⁷ Kawn praix ceu pui Merarix khankix, hoik pon ti cie veng kao ra veng, awm krax pa koe doeh nyiex ma kix khaing daux doeh ru Rubin mai khaing daux doeh ru Gat khankix mai khainng daux doeh ru Zebulun khankix heue. ⁸ Pui Isarelax khankix, tawx veng inkix tau mai haktiex dee sawm pui hun kix ka daux pa cawk nieb, son ceu pui Lewix khankix, awm gumlox pa hoik tawm Siyiex leeing ju ka daux tawm taix Mose heue. ⁹ Kix hoik tawx can pa koe khaing doeh ru Yudax khankix mai khaing pa koe daux doeh ru Simeon khankix, pa mawh veng inkix pa hoik simawd kix ti priex ka ceu kaux tin heue. ¹⁰ Phan mawh son kawn praix Arun, pa mawh doeh nyiex ma Kawhat khankix tix cub mai pa mawh kawn praix ceu pui Lewix khankix, caw ti mawh pa pon krax pa cawk nieb phao voe heue. ¹¹ Kix hoik tawx veng Kirayat Arabax, Arabax mawh keeing Anagax heue. Pa mawh Hebaron, pa koe ka piang gawng Yudax khankix, tau mai haktiex pa koe hawt rawb reem veng kix heue. ¹² Viang mawh nan, kix tawx tong kaung pa koe hawt vung viang veng an ka Kaliep, pa mawh kawn simex Yephunie, awm krax pa pon nawh sinngao cie tix heue. ¹³ Kix hoik tawx veng Hebaron, tau mai haktiex pui hun hawt praok veng khankix, Hebaron mawh veng dee peung pui to khaing krax pah tix pui heue. khawm veng Libanax, tau mai haktiex pa koe hawt vung viang nawh khankix, tawx ka son kawn praix cao giex kaing li Arun khankix, ¹⁴ veng Yatix, mai haktiex pui hun nawh mai veng Eshatamaw, tau mai haktiex pui hun nawh khankix, ¹⁵ mai veng Hawlon, tau mai haktiex pa koe hawt vung viang nawh khankix mai veng Debirax, tau mai haktiex pui hun nawh khankix, ¹⁶ mai veng Ain, tau mai haktiex pa koe hawt vung viang haktiex nawh, veng Yuta, tau mai haktiex pa koe hawt vung viang nawh khankix mai veng Bietshemiet, tau mai haktiex pa koe hawt vung viang nawh khankix, pa mawh veng dim veng khaing daux doeh ru kix ra cub, ¹⁷ mai khaing doeh ru Benyamin, pa mawh veng Gibun, tau mai haktiex pa koe hawt vung viang nawh khankix, khawm veng Geba, tau mai haktiex pa koe hawt vung viang veng nawh khankix, ¹⁸ veng Anatot, tau mai haktiex pa koe hawt vung viang nawh khankix mai veng Elamon, tau mai haktiex pa koe hawt vung viang nawh khankix pon veng, ¹⁹ Can veng cie kawn praix cao giex kaing li Arun khankix, khawmuik koe kao loe veng, tau mai haktiex pa koe hawt vung viang nawh khankix heue. ²⁰ Doeh nyiex ma kawn praix Kawhat, pa mawh ceu pui Lewix khankix mai khawm kawn praix Kawhat pa kawn deuk khankix, hoik pon ti cie veng khankix, khaing daux doeh ru Epharim, awm krax pa hoik pon kix krax pa cawk nieb heue. ²¹ Grawh grawng nawh, kix hoik tawx veng Shekhem, tau mai haktiex pa koe hawt vung viang nawh khankix, pa koe ka piang gawng Epharim ka son kix, veng Epharim mawh veng tix veng, son pa sang peung kaw pa pah pui khankix tix ot mai veng Gaza, tau mai haktiex pa koe hawt vung viang nawh khankix, ²² veng Kibazem, tau mai haktiex pa koe hawt vung viang nawh mai veng Biet Hawrom, tau mai haktiex pa koe hawt vung viang nawh khankix pon veng, ²³ mai khaing daux doeh ru Dan, kix pon ti cie veng Elateka, tau mai haktiex Pa koe hawt vung viang nawh, veng Beton, tau mai haktiex pa koe hawt vung viang nawh, ²⁴ veng Ayalon, tau mai haktiex pa koe hawt vung viang nawh mai veng Garimon, tau mai haktiex pa koe hawt vung viang nawh khankix pon veng, ²⁵ mai khaing daux cie doeh ru Manashe an tix plak, kix pon ti cie veng Tanak, tau mai haktiex pa koe hawt vung viang nawh mai veng Gatrimon, tau mai haktiex pa koe hawt vung viang nawh ra veng heue. ²⁶ Veng ankix kao veng, tau mai haktiex pa koe hawt vung viang nawh khankix, hoik mawh son doeh nyiex ma kawn praix Kawhat khankix pa kawn deuk heue. ²⁷ Ka son kawn praix Geshon, khaing daux doeh nyiex ma ceu pui Lewix khankix, pa mawh doeh ru Manashe, pa kawn deuk an tix plak, kix hoik tawx veng Gulan, pa koe ka daux haktiex Bashan, tau mai haktiex pa koe hawt vung viang nawh, veng Galon mawh dee pan dee peung kaw pa pah pui tix veng mai veng Beshatarax, tau mai haktiex pa koe hawt vung viang nawh khankix ra veng, ²⁸ mai khaing daux cie doeh ru Ishkha, kix pon ti cie veng Kishon, tau mai haktiex pa koe hawt vung viang nawh, veng Daberat, tau mai haktex pa koe hawt vung viang khankix, ²⁹ veng Yamut, tau mai haktiex pa koe hawt vung viang nawh mai veng En-ganin, tau mai haktiex pa koe hawt vung viang nawh khankix pon veng, ³⁰ mai khaing daux cie doeh ru Asa, kix pon ti cie veng Mishalax, tau mai haktiex pa koe hawt vung viang nawh, veng Abadon, tau mai haktiex pa koe hawt vung viang nawh, ³¹ veng Helikat, tau mai haktiex pa koe hawt vung viang nawh mai veng Rehawbax, tau mai haktiex pa koe hawt vung viang nawh khankix pon veng, ³² mai khaing daux cie doeh ru Napthalix, kix pon ti cie veng Kedesha, pa koe ka daux haktiex meung Galilie, tau mai haktiex pa koe hawt vung viang nawh, veng Kadesha mawh veng tix mu son dee pan dee peung kaw pa pah pui mai veng Hamotdawrax, tau mai haktiex pa koe hawt vung viang nawh mai veng Katan, tau mai haktiex pa koe hawt vung viang nawh khankix loe veng heue. ³³ Veng cie ceu pui Geshon khankix khawmuik, awm krax pa koe doeh nyiex ma kix hoik mawh pa koe kao loe veng, tau mai haktiex pa koe hawt vung viang nawh khankix heue. ³⁴ Ka son doeh nyiex ma kawn praix ceu pui Merarix, pa mawh ceu pui Lewix khankix pa kawn deuk sinax kix mai pa kaoh khaing doeh ru Zebulun khankix, kix pon ti cie veng Yokanam, tau mai haktiex pa koe hawt vung viang nawh, veng Kata, tau mai haktiex pa koe hawt vung viang nawh khankix, ³⁵ veng Dimanax, tau mai haktiex pa koe hawt vung viang nawh mai veng Nahanelax, tau mai haktiex pa koe hawt vung viang nawh khawmuik pon veng, ³⁶ mai khaing daux cie doeh ru Rubin khankix, kix pon ti cie veng Beza mai haktiex pa koe hawt vung viang nawh, veng Yahaza, tau mai haktiex pa koe hawt vung viang nawh, ³⁷ veng Kedemot, tau mai haktiex pa koe hawt vung viang nawh mai veng Mephat, tau mai haktiex pa koe hawt vung viang nawh khankix khawmuik pon veng heue. ³⁸ Khaing daux cie doeh ru Gat khankix, kix pon ti cie veng Ramot, pa koe ka daux haktiex Gilat, tau mai haktiex pa koe hawt vung viang nawh (Pa mawh veng tix mu son dee pan dee peung kaw pa pah pui) mai veng Mahanem, tau mai haktiex pa koe hawt vung viang nawh khankix, ³⁹ veng Heshabon, tau mai haktiex pa koe hawt vung viang nawh mai veng Yaza, tau mai haktiex pa koe hawt vung viang nawh khankix pon veng khawmuik heue. ⁴⁰ Mawh kheu nan, can veng khankix khawmuik, son kawn praix ru Merarix khankix, awm krax pa koe doeh nyiex ma kix pa mawh kawn doeh nyiex ma pa kawn deuk khaing ceu pui Lewix khankix, pa hoik pon kix tix cie mawh veng kao ra veng ka daux pa hoik cawk kix nieb heue. ⁴¹ Can veng cie pui Lewix khankix khawmuik, pa koe ka daux cie kawn praix ceu pui Isarelax khankix, hoik mawh pa koe tixpon daix veng tau mai haktiex pa koe hawt vung viang kix heue. ⁴² Veng inkix ku veng, hoik mawh pa koe ka daux haktiex hawt vung viang veng heue. Mawh kheu nan, veng inkix hoik mawh cie kix khawmuik heue. ⁴³ Mawh kheu nan, Siyiex leeing ju hoik tawx haktiex inkix khawmuik ka ceu pui Isarelax khankix, ka pa hoik tiextu Nawh Cao tix tawx ka keeing kix mai sonsang teei kix ti cie ankix mai sonsang ot kix ka haktiex an heue. ⁴⁴ Siyiex leeing ju hoik tawx can pa kawn deuk hawt vung viang haktiex an ka kix khawmuik, awm pa hoik tiextu Nawh Cao ka keeing kix heue. Pui tix kaux kawx khaing daux pui pa koeng kix tak ang pon ti cung ka plak sivoe kix heue. Grawh grawng nawh, Siyiex leeing ju hoik ap ti tawx pui koeng kix khawmuik ka daux tawm taix kix heue. ⁴⁵ Gumlox tix gum kawx tak ang pon ti yawm, tak ang pon ti teei lih khaing ceu pa mhawm tix ceu kawx, pa hoik sikah Siyiex leeing ju ka nyiex ma ceu pui Isarelax khankix heue. Ceu an khankix hoik mawh pa grum naog khawmuik heue.

¹ Khaix an, Yawsux kok ka ceu pui Rubin, ceu pui Gat mai ceu pui Manashe tix plak, ² mai nawh ah nin ka kix heue. "Pex hoik priex rien ti hawt gumlox pa hoik tawm Mose, pa mawh kawncau Siyiex leeing ju ka pex khawmuik mai pex hoik cu hoik nghiet ka gumlox sikah aux khankix khawmuik, awm krax pa hoik tawm aux ka pex heue." ³ "Pex hoik mawh pa ang tie prah ka puxaik tix ka daux singaix inkix tom nie mai hoek tom ka daux in singaix mai pex hoik priex rien ka lox tawm pingnyap Siyiex leeing ju tix heue." ⁴ Yam in, Siyiex leeing ju pex, hoik tawx krax pa yiien yawg ka puxaik pex khankix, awm gumlox sijax mukheu, pa hoik yuh Nawh Cao tau mai pex heue. Mawh kheu nan, yam in, pex deeh ing mai hu ka nyiex gox pex khankix mai deeh hu ka haktiex cao pex pa hoik tawx Mose, pa mawh kawncau mau soi Siyiex leeing ju ka pex, ka plak toi rawm klawng Yawdan khankix heue. ⁵ Rien rhawm tix cu nghiet ka gumlox pingnyap mai been pa hoik tawx Mose, pa mawh kawncau Siyiex leeing ju ka pex mai sonsang moh pex ka Siyiex leeing ju tix mai sonsang hawt pex daux krax pa jhi Nawh Cao mai sonsang priex pex ti hawt gumlox tawm pingnyap Nawh Cao khankix mai sonsang giex pex ti priex Nawh Cao tom kaux cong mai yuh kaing Nawh Cao tau mai khawm rhawm tix mai khawm ju tix khawmuik heue. ⁶ Mawh kheu nan, Yawsux hoik nawb bwan ka piang kix mai ploi kix hu mai kix ing ka daux nyiex cao tix khankix heue. ⁷ Yam in, son doeh ru Manashe khankix tix plak, Mose hoik tawx haktiex cie kix ka daux haktiex Bashan heue. Son pa kawn deuk an tix plak, Yawsux hoik tawx haktiex cie kix tix dah, ka daux cie puxaik kix, pa koe ka praok plak in ka rawm klawng Yawdan, hawt baoh plak klip singaix heue. Yam hoik ploi Yawsux kix lih hu dee singai, ka nyiex cao kix khankix, nawh nawb bwan ka piang kix heue. ⁸ Nawh ah nin ka kix, "deeh ing tau mai krax pa mag mi pex tom nie, ka nyiex cao pex khankix, tau mai khawngbrie eei pex pa kied haoh hun, tau mai mau khri pex, tau mai tawng, rhiem pa shiao pex, tau mai kraung ceep pex tom nie heue. Gwieh kraung pa pon tud rhim pex khaing pui koeng khankix ka puxaik pex khankix heue. ⁹ Mawh kheu nan, kawn praix Rubin, kawn praix Gat mai doeh ru Manashe tix plak, deeh ing mai lih hu khaing pui Isarelax khankix, ka veng Shilaw, pa koe ka daux haktiex meung Khanan, sonsang hu kix ka daux haktiex Gilat, pa mawh haktiex pa hoik pon kix ti cie mai pa mawh cie kix, awm gumlox pa hoik tawm Siyiex leeing ju ka Mose heue. ¹⁰ Yam hoik hoek kix ka baoh rawm klawng Yawdan, pa koe ka daux haktiex meung Khanan, kawn praix Rubin, kawn praix Gat mai doeh ru Manashe tix plak, sum khu dee tan pa ting mai pa kied sidawng tix yaox ti mu hawt rawm klawng Yawdan tan heue. ¹¹ Yam in, pui Isarelax khankix, hoik mhong ka krai pui tix kaux pa ah nin heue. "Jhak heue, ceu pui Rubin mai ceu pui Gat mai doeh ru Manashe tix plak, hoik sum khu dee tan tix mu, ka piang toh mee haktiex Khanan, hawt baoh rawm klawng Yawdan, ka piang praok plak pa hoik teei pui Isarelax khankix ti ot heue." ¹² Yam hoik mhong pui Isarelax khankix ka grawng ankix, cub pui hun pui Isarelax khankix, khrawm paox tix tau, ka veng Shilaw, sonsang hu yuh naing ka kix heue. ¹³ Khaix an, pui Isarelax khankix ploi Phinihat, pa mawh kawn simex cao giex kaing li Eliza, hu ka pui Rubin, pui Gat mai ka doeh ru Manashe tix plak pa ot ka daux haktiex Gilat. ¹⁴ Tau mai cao kaing pa kwang piang kix kao kaux, pa laug kix ti teei khaing cao kaing ting pa kwang ka piang doeh nyiex ma ceu pui Isarelax khankix ku cub mai cao kaing pa kwang pui tix rheng ka daux nyiex ma keeing kix ku cub, khaing daux sinax cub pui Isarelax khankix heue. ¹⁵ Khaix an, kix hoek ka pui Rubin, ka pui Gat mai ka pui Manashe tix plak pa ot ka daux haktiex Gilat mai kix sikah tau mai kix ah nin heue. ¹⁶ "Cub pui hun Siyiex leeing ju khankix khawmuik, hoik ah yuh nin, in mawh krax pa ang pex kaux sijax mai krax pa hoik lud pex ka Siyiex leeing ju ceu pui Isarelax, sonsang veeh pex ti hu ka dee singai, ka daux singaix in, khaing hawt tix Siyiex leeing ju mai pex hoik sum khu dee tan tix mu ka son tokaux cao pex, sonsang pon tieh feen pex ka Siyiex leeing ju ka daux in singaix, ka grawng ceu patix lie?" ¹⁷ "Mawh ang phimap pa yuh pex ka baoh veng Pegurax, nyang bax kub son pex lie? Khaing pa mawh ex pa ang singax, tom hoek ka daux singaix in, viang krax kham geu hoik koe ka daux cub pui hun Siyiex leeing ju khankix, ¹⁸ Mawh sang veeh pex ti hu ka dee singai, ka daux in singaix khaing krax pa hawt tix Siyiex leeing ju lie? ankix tak lih ti mawh, phan pex tieh feen ka Siyiex leeing ju ka daux in singaix mai Nawh Cao tak koe krax pa song rhawm ka cub pui hun ceu pui Isarelax khankix pasax heue." ¹⁹ Viang mawh nan, phan haktiex pa pon pex ti cie mawh pa singax, khaix an, tiang ti hu ka haktiex pa hoik pon Siyiex leeing ju ti cie ka dee jung nyiex gox bwan man Siyiex leeing ju ti ot mai teei ti cie ankix tau mai yix heue. Paw doh tieh feen ka Siyiex leeing ju mai paw doh tieh feen ka yix, ka hoik sum ti khu dee tan tix mu, ka son cao pex, lheu khaing khu dee tan Siyiex leeing ju ex heue. ²⁰ Akhan, pa mawh kawn simex Zerax, hoik lud ka daux ceu pa jhax lawg tix mai pa song rhawm hoik hoek ka piang pui hun Isarelax khankix ang mawh lie? Pui an ang tie mawh pa grai grup nong nong ka daux phimap pa yuh nawh heue. ²¹ Khaix an, kawn praix Rubin, kawn praix Gat mai doeh ru Manashe an tix plak, deeh pawk lox ah nin ka cao kaing pa kwang ka piang tix rheng kaux khankix khaing daux ceu pui Isarelax heue. ²² "Siyiex piang siyiex, Siyiex piang siyiex mai Tokaux Nawh Cao hoik mawh pa tawng mai kieh ceu pui Isarelax khankix tawng ka tokaux Cao tix, phan yix mawh pa tieh feen mai phan yix mawh pa ang koe krax kaux sijax ka Siyiex leeing ju, paw lai kieh yix im ju in singaix heue. ²³ Phan yix hoik sum khu dee tan tix mu son tokaux tix, sonsang deeh veeh yix tix khaing daux krax pa hawt tix khaix Siyiex leeing ju, phan ang mawh nan, pa yuh yix son krax tan pa gleeing khankix, phan ang mawh nan, krax tan mien nghox ca im khankix ang ah, pa yuh yix sonsang tan tix krax tan pa nhim khankix ka piang an ang ah, kieh Tokaux Siyiex leeing ju chawk ti yaox ka grawng an heue. ²⁴ Viang mawh nan, yix hoik yuh ka son pa koe grawng tix ceu mai pa ah nin. "Ka daux bawg yam pa sang hoek sax, lhat ex doeh ru pex ah nin ka doeh ru ex khankix, mawh hoik yuh pex ceu patix tau mai Siyiex leeing ju ceu pui Isarelax lie?" ²⁵ Siyiex leeing ju hoik yuh rawm klawng Yawdan mawh mee haktiex tix dah ka son pex mai yix pa mawh kawn praix Rubin mai kawn praix Gat khankix heue. Pex ang koe ceu pa sang pon ka daux Siyiex leeing ju heue. Mawh kheu nan, doeh ru pex tak yuh doeh ru ex khankix, ang lai koe krax lhat graung ka Siyiex leeing ju heue. ²⁶ Mawh kheu nan, ex tom ah nin. "Kieh ex khre rien tix sum khu dee tan tix mu son cao ex, pa ang mawh son krax tan pa gleeing mai krax pa appong ti tan tang ceu khankix heue." ²⁷ Viang mawh nan, sonsang mawh an mhai rug ka sinax pex mai yix, khaix yix sax, doeh ru yix, tak pon ti yuh kaing krub ka Siyiex leeing ju ka plak sivoe Nawh Cao, tau mai krax tan pa gleeing yix, mai krax pa appong yix tix tan mai krax tan pa nhim yix, son ang doeh ru pex, pon ti ah lox ka doeh ru yix, ka daux bawg yam pa sang hoek. Pex ang koe ceu pa sang pon ka daux Siyiex leeing ju heue." ²⁸ Mawh kheu nan, yix tom ah yuh nin jao an heue. Ceu an khankix tak lih ti koe yam ah pex inkix ka yix ang ah, ka doeh ru yix ang ah, ka daux bawg yam pa sang hoek sax, yix tak pon ti ah nin. "In mawh grang khu dee tan Siyiex, pa hoik yuh keeing ex khankix, an ang mawh son krax tan pa gleeing mai son krax pa appong ti tan tang ceu khankix heue. Viang mawh nan, an mawh mhai rug ka sinax pex mai yix heue." ²⁹ "Kieh ankix mawh pa singai khaing yix, sonsang pon yix ti tieh feen ka Siyiex leeing ju mai son krax pa veeh yix tix khaing krax hawt yix khaix Siyiex, ka daux in singaix mai sonsang sum yix khu dee tan tix mu, son krax tan pa gleeing khankix mai son krax tan mien nghox ca, phan ang mawh nan, son krax pa appong yix ti tan, hawt praok khu dee tan Siyiex leeing ju yix, pa koe ka plak sivoe nyiex gox bwan man Nawh Cao heue." ³⁰ Yix hoik mhong cao giex kaing li Phinihat mai cao kaing pa kwang ka piang cub pui hun, cao kaing pa kwang ka piang pui Isarelax tix rheng, pa hoik ot tau mai nawh khankix, kawn praix ru Rubin, kawn praix ru Gat mai kawn praix ru Manashe khankix, deeh sikah lox pa nyawm rhawm ka kix heue. ³¹ Khaix an, Phinihat pa mawh kawn simex cao giex kaing li Eliza, deeh ah nin ka ceu Rubin, ceu Gat mai ceu Manashe khankix. "Ka daux singaix in, ex hoik yaox ka ot Siyiex leeing ju ka daux sinax ex. Pex ang lai koe krax lud, ka daux krax pa kaux sijax pex, ka Siyiex leeing ju heue. Yam in, pex hoik deeh taoh pui Isarelax lih hu khaing daux tawm taix Siyiex leeing ju heue." ³² Khaix an, Phinihat, kawn simex cao giex kaing li Eliza mai cao kaing pa kwang ka piang pui Isarelax, deeh ing khaing ceu Rubin mai ceu Gat khankix, khaing haktiex Gilat mai deeh ing ka haktiex meung Khanan, ka dee ot pui Isarelax, kix deeh viex gumlox ankix hoek ka pui Isarelax heue. ³³ Mawh kheu nan, ceu pui ankix mawh pa khaw rhawm ka pui Isarelax mai kix yaogyaw bwanson Siyiex leeing ju yam an heue. Kix ang lai koe lox ne, sonsang hu puing kix naing mai sonsang yuh kix haktiex dee ot ceu Rubin mai ceu Gat khankix laux leeing heue. ³⁴ Ceu Rubin, ceu Gat khankix, kok ceu kaux khu dee tan an mawh Eda, grawh grawng nawh, an mawh pa kham mhai rug tix ceu daux sinax yix, grawng mawh Siyiex, Siyiex leeing ju heue."

¹ Khaix hoik luan ceu an khankix mai khaix hoik tawx Siyiex leeing ju krax yiien yawg ka pui Isarelax khankix tom rheung bawg yam, khaing pui pa koeng kix, pa ot hawt vung viang kix khawmuik, Yawsux hoik kuad hu sipie mai riex ju tix heue. ² Yawsux kok ka ceu pui Isarelax khawmuik, khawm kuad riex ju mai khawm cao kaing kix, cao prawng see kix, cao kaing naing kix khawmuik mai nawh ah nin ka kix. "Aux hoik kuad hu sipie mai riex ju tix heue." ³ "Pex hoik yaox ka can ceu pa hoik yuh Siyiex leeing ju khawmuik, ka ceu pui inkix kheu jao pex heue. Siyiex leeing ju pex, hoik mawh pa hoik puing naing ka son pex heue. ⁴ "Jhak heue, Aux hoik gwieh ti tawx haktiex pa kawn deuk an khankix ka ceu pui inkix, ka pa cawk kix nieb, sonsang pon ankix ti mawh sinngao ka son doeh ru pex, jah ka rawm klawng Yawdan tau mai ceu pui pa hoik teei aux ti tik khawmuik, tom hoek dee singai ka rawm sigrit sigra ting, ka plak baoh plak klip singaix heue." ⁵ "Siyiex leeing ju pex tak grheu ti tik kix khaing plak sivoe pex mai grheu kix lih hu ka plak sivoe ngai pex heue. Mawh kheu nan, pex tak pon ti cie haktiex kix, awm hoik yuh Siyiex leeing ju gumlox sijax mukheu tau mai pex heue. ⁶ Mawh kheu nan, priex rhawm tix mai kieh koe rhawm kwa mai yuh ceu ankix khawmuik, pa hoik tiiem tix ka daux phuk lai beenli Mose awx. Phan ang mawh nan, aux lhat pex veeh rhawm tix hu khaing ceu ankix, ka plak khawn dawm mai khawn gwiex, ⁷ aux lhat pex hu laig ka daux sinax ceu pui inkix, pa kawn deuk ka daux sinax pex heue. Pex tak ang pon ti simawd ka ceu kaux siyiex kix mai pex tix kaux kawx tak ang pon ti yuh krax pa tiextu tau mai siyiex kix heue. Pex tak ang pon ti yuh kaing kix mai pex tak ang pon ti krub ka kix heue." ⁸ "Viang mawh nan, pex tak mawh pa kaux cong ka daux Siyiex leeing ju pex, awm krax pa hoik yuh pex ka daux in singaix heue." ⁹ "Grawh grawng nawh, Siyiex leeing ju hoik grheu kix lih khaing plak sivoe pex, pa mawh ceu pui pa ting mai pa koe riang khankix heue. Viang mawh nan, pui tix kaux kawx ang nyang bax pon ti cung ka plak sivoe pex ka daux in singaix heue." ¹⁰ "Pui pex tix kaux tak pon ti pheet ka pui tix rheng heue. Grawh grawng nawh, Siyiex leeing ju pex mawh Cao pa puing naing ka son pex, awm hoik yuh Nawh gumlox sijax mukheu tau mai pex heue. ¹¹ Mawh kheu nan, rien rhawm tix, ka son tokaux cao pex sonsang moh pex ka Siyiex pex Siyiex leeing ju heue." ¹² Phan ang mawh nan, pex tak deeh plak khaix tix mai hu peung tix ka ceu pui pa kawn deuk inkix pex tak prawng tix mai kix mai hu laig ka daux kix mai kix tak deeh laig ka daux sinax pex, ¹³ tawng ti priex tom kriem ka ang Siyiex leeing ju pex lai koe rhawm tix grheu ceu pui inkix, lih khaing plak sivoe pex heue. Viang mawh nan, kix tak mawh kie pa taong mai kreem pa taong khankix ka son pex mai khaox pa sivied khankix ka praok pex mai kat lawm ka daux ngai pex, tom hoek bawg yam grai grup pex khaing daux haktiex pa mhawm in, pa hoik tawx Siyiex leeing ju ka pex heue." ¹⁴ "Jhak heue, aux sang hu ka daux krax hu kawn pui piang haktiex khawmuik, ka daux in singaix heue. Pex hoik tawng ceu inkix khawmuik ka daux rhawm pex mai ka daux khwan ju pex, son ang ceu inkix sang pon ti mawh ceu pa som nai tix ceu kawx, ka daux can ceu pa mhawm khankix mai ka pa hoik sikah Siyiex leeing ju pex ka son grawng pex heue. Ceu an khawmuik hoik mawh pa lih mawh ka son pex mai gumlox Nawh tix gum kawx tak ang mawh pa hoik som nai ka son pex heue. ¹⁵ Mawh kheu nan, ceu an khankix tak mawh pa lih ti hoek, awm hoik hoek can ceu pa mhawm khawmuik ka piang pex, pa hoik yuh Siyiex leeing ju pex gumlox sijax mukheu tau mai pex heue. Awm ankix, Siyiex leeing ju tak viex can ceu pa kham geu khawmuik hoek ka piang pex, tom hoek bawg yam hoik yuh Nawh Cao pex lau leeing khaing haktiex pa mhawm in, pa hoik tawx Siyiex leeing ju pex ka pex heue. ¹⁶ Yam hoik koe krax lud pex ka gumlox sijax mukheu Siyiex leeing ju pa hoik tawm Nawh Cao ka pex, pex hoik lih hu yuh kaing jhaw siyiex tang kaux khankix mai phan pex hu krub ka ankix, khaix an, krax pa song rhawm Siyiex leeing ju, tak lih ka piang pex awm hax ngu mai pex tak nied ti grai grup khaing haktiex mhawm pa hoik tawx Nawh Cao ka pex heue."

¹ Khaix an, Yawsux kraix khrawm doeh ru ceu pui Isarelax khankix hoek ka veng Shekhem mai nawh kok kuad riex ju pui Isarelax khankix mai cao giex kaing kix mai cao prawng see kix mai cao kaing naing kix khawmuik mai kix hoek ka plak sivoe Siyiex leeing ju heue. ² Yawsux ah nin ka pui khankix, "Grawng lox pa hoik ah Siyiex leeing ju ka pui Isarelax, mawh pa koe yuh nin heue. Keeing pex khankix khawm Terax, pa mawh keeing Abraham mai pa mawh keeing Nakhaw khankix hoik dawg ot ka plak toi rawm klawng in tom didix mai kix hoik mawh pa yuh kaing jhaw siyiex tang kaux khankix heue." ³ "Khaix an, Aux hoik teei keeing pex Abraham, khaing plak toi rawm klawng mai thung kix hu ka daux haktiex meung Khanan khawmuik mai hoik yuh doeh ru nawh khankix haoh hun mai Aux hoik tawx Icak ka nawh heue. ⁴ "Ka son Icak, Aux hoik tawx Yakop mai Isaw heue. Son Isaw, Aux hoik tawx nawh cie gawng Sirax khankix heue. Viang mawh nan, Yakop mai kawn praix nawh khankix lih hu ka plak meung Ejiptux heue. ⁵ Aux baox deeh ploi Mose mai Arun mai Aux hoik yuh krax pa ciyang ka meung Ejiptux, awm ceu pa hoik yuh Aux, ka daux sinax kix heue. Khaix hoik ceu ankix Aux hoik viex pex lih hu heue. ⁶ Khaix an, Aux hoik viex keeing pex lih hu khaing daux meung Ejiptux mai pex hoik hoek ka rawm sigrit sigra, rawm sigrit sigra Edom mai pui Ejiptux khankix hoik hawt ti pheet khaix keeing pex khankix, tau mai ling lawx brung mai pui naing brung, tom hoek ka rawm sigrit sigra raoh heue. ⁷ Mawh kheu nan, kix kok yo lox tix ka Siyiex leeing ju mai Nawh Cao hoik deuh pa faik ka daux sinax pex mai pui Ejiptux khankix mai viex rawm sigrit sigra hoek ka piang kix mai kheem ti tik kix heue. Ngai pex hoik yaox ka ceu pa yuh Aux, ka daux meung Ejiptux heue. Khaix an, pex hoik yaox ti ot ka daux tiag tom nie rheung bawg yam heue. ⁸ Aux viex pex hu ka daux haktiex ceu pui Amawrix khankix, pa hoik ot ka plak toi rawm klawng Yawdan mai kix puing ka pex heue. Viang mawh nan, Aux hoik ap ti tawx kix ka daux tawm taix pex, sonsang pon pex ti cie haktiex kix mai Aux hoik yuh kix laux leeing khaing plak sivoe pex heue. ⁹ Khaix an, Baliep pa mawh kawn simex Ziphaw mai pa mawh simiang haktiex Mawbax, yaog ti yuh naing ka ceu pui Isarelax khankix mai nawh hoik ploi pui hu kok Balam, pa mawh kawn simex Bawrax, sonsang hoek ti jhax lawg pex heue. ¹⁰ Viang mawh nan, Aux ang cu ti nghiet ka Balam heue. Mawh kheu nan, nawh baox sitoe ti nawb bwan ka piang pex sinyek sinyek heue. Kheu jao an, Aux deeh taoh pex lih khaing daux tawm taix nawh heue. ¹¹ Khaix an, pex tiang ti hu ka rawm klawng Yawdan mai hoek ka veng Yerikho heue. Pui veng Yerikho khankix deeh puing ka pex, khawm pui Amawrix, ceu pui Pherazix, ceu pui Khanan, ceu pui Hitix, ceu pui Giragashix, ceu pui Hewix mai khawm ceu pui Yebusix khankix heue. Viang mawh nan, Aux hoik tawx kix ka daux tawm taix pex heue. ¹² Aux hoik ploi awng lung hu ka plak sivoe pex mai grheu ti tik kix lih khaing plak sivoe pex khawm simiang haktiex ceu pui Amawrix khankix ra kaux heue. Viang mawh nan, ang tie mawh vaig lawm pex mai ak pex pa grheu kix lih heue. ¹³ Mawh Aux pa hoik tawx haktiex tix mu ka pex, pa ang pex yaox ti yuh ka riang rao tix mai veng khankix pa ang pex yaox ti sum mai pex yaox ti ot ka daux ankix heue. Pex yaox ti ih sipeem plix siiet mai sipeem khaox sanlun khankix, pa ang pex yaox ti sum khankix heue." ¹⁴ Mawh kheu nan, yam in koe krax lhat graung ka Siyiex leeing ju mai krub ka Nawh Cao ka daux krax pa koe rhawm rahsee tix mai ka daux krax pa mawh pa meh heue. Tik siyiex ankix, pa hoik krub keeing pex khankix nawh, ka plak toi rawm klawng an mai ka daux haktiex meung Ejiptux ka daux singaix heue. Krub ka Siyiex leeing ju awx. ¹⁵ Phan pex keud grawng pa krub ka Siyiex leeing ju mawh pa caox son pex, laug son cao pex daux in singaix, sang krub siyiex keeing pex pa koe plak toi rawm klawng pui Amawrix pa hoik ot sinax pex lie? "Viang mawh nan, Phan mawh aux mai nyiex ma aux, yix tak krup ka Siyiex leeing ju heue." ¹⁶ Mawh kheu nan, pui khankix deeh pawk lox nawh ah nin heue. "Sonsang tik vud yix ka Siyiex leeing ju mai krax pa sang krub yix siyiex tang kaux, Kieh inkix singai khaing yix liak." ¹⁷ Grawh grawng nawh, Siyiex leeing ju mawh pa hoik viex ex mai keeing ex lih hu khaing daux haktiex meung Ejiptux mai khaing daux nyiex ma pa yuh ex kaing siliex mai krax pa hoik yuh Nawh Cao mhai pa daox ding pa ting mai krax pa hoik priex rien Nawh Cao ka ex, ka daux krax pa hoik hu ka daux sinax pui khankix mai can dee pa hoik tiang ex ti hu heue. ¹⁸ Siyiex leeing ju hoik grheu pui ankix khawmuik khaing plak sivoe ex, khawm ceu pui Amawrix khankix, pa hoik ot ka daux haktiex an heue. Ex kawx tak sang yuh kaing krup ka Siyiex leeing ju, kheu mawh Nawh Siyiex leeing ju ex heue." ¹⁹ Viang mawh nan, Yawsux deeh ah nin ka pui khankix, "Pex tak ang pon ti krup ka Siyiex leeing ju kheu mawh Nawh Siyiex leeing ju pa singax singeh heue. Nawh mawh Siyiex leeing ju pa bak pa viang heue. Nawh tak ang pon pluat ploi pa lud pex khankix, khawm phimap pex heue." ²⁰ Phan pex tik vud ka Siyiex leeing ju mai krub siyiex tang meung khankix, khaix an, Nawh Cao tak veeh tix mai yuh krax pa ciyang ka pex mai yuh pex laux leeing, khaix hoik yuh Nawh Cao pa mhawm ka pex heue. ²¹ Pui khankix deeh ah nin ka Yawsux. "Ang mawh, viang mawh nan, yix tak krup ka Siyiex leeing ju heue." ²² Mawh kheu nan, Yawsux deeh ah nin ka pui khankix. "Pex mawh pa kham mhai rug ka tokaux cao tix mai pex hoik laug ti teei Siyiex leeing ju son tokaux cao pex, sonsang krub pex ka Nawh Cao heue." Kix deeh ah nin. "Yix mawh pa kham mhai rug khankix heue." ²³ Nawh deeh ah nin ka kix. "Mawh kheu nan, yam in teei ti tik siyiex tang meung pa koe ka daux sinax pex khankix hu dee singai mai deeh tieh rhawm pex hoek ka Siyiex leeing ju ceu pui Isarelax heue." ²⁴ Pui khankix deeh ah nin ka Yawsux. "Yix tak krup ka Siyiex leeing ju mai yix tak cu nghiet ka gumlox sikah Nawh Cao heue." ²⁵ Mawh kheu nan, Yawsux hoik yuh sijax mukheu tau mai pui khankix ka daux singaix an mai nawh hoik yuh tix tawx been pa hoik priex deuh ka son kix mai khawm been lox tat jhawm prawng son kix ka daux veng Shekhem heue. ²⁶ Khaix an, Yawsux hoik tiiem gumlox inkix ka daux phuk lai beenli Siyiex leeing ju heue. Nawh teei lon simaox pa ting tix mu mai jung ti deuh nawh tan greem khaox tiah, pa hoik koe hawt dee singax singeh Siyiex leeing ju heue. ²⁷ Yawsux deeh ah nin ka pui khankix, "Jhak heue, Lon simaox in, tak mawh mhai rug ka son pex, kheu hoik mhong pex gumlox sikah Siyiex leeing ju pa hoik krai Nawh Cao ka ex khawmuik heue. Mawh kheu nan, an tak mawh pa kham mhai rug ka son pex. Phan ang mawh nan, aux lhat pex thiang ti tik Siyiex leeing ju pex heue." ²⁸ Mawh kheu nan, Yawsux deeh kieh pui khankix lih hu khaing tix mai kieh kix deeh ing ka sinngao cie cao tix ku kaux heue. ²⁹ Yam in, khaix hoik luan ceu inkix, Yawsux pa mawh kawn simex Nun, pa mawh kawncau Siyiex leeing ju hoik yum, yam koe ju nawh tix yieh kao num heue. ³⁰ Mai kix hoik sipaung nawh ka daux mee haktiex sinngao cie nawh, ka veng Timanaserax, pa koe ka piang gawng Epharim khankix, ka plak laong khaing gawng Gasha heue. ³¹ Ceu pui Isarelax khankix hoik krup ka Siyiex leeing ju glang singaix im ju Yawsux tau mai kuad riex ju an khankix, khaix ang Yawsux lai koe tau mai kix, pa hoik tawng ka kaing krub ka Siyiex leeing ju khankix khawmuik mai ka pa hoik priex Nawh Cao ka ceu pui Isarelax khankix heue. ³² Mai kix hoik sipaung si ang Yosiep, pa hoik viex kawn praix Isarelax khankix lih hu khaing daux meung Ejiptux, ka veng Shekhem, ka daux gwang haktiex pa hoik liag Yosiep khaing kawn simex Hamaw khankix, pa mawh keeing Shekhem, ka mau luah tix yieh plah heue. Mai biang haktiex an, hoik lih ti mawh sinngao cie kawn praix Yosiep khankix tix dah heue. ³³ Eliza, pa mawh kawn simex Arun hoik yum. Kix hoik sipaung nawh ka piang ton gawng tix mu pa mawh cie kawn simex nawh Phinihat mai pa hoik tawx kix ka nawh ka piang gawng Epharim khankix heue.