Jonah

Jonah

¹ Gumlox Siyiex lih hoek ka Yonax kawn simex Amitie ah nin, ² "Kaoh hu ka veng ting Nineve kok yo mai glhat ka kix, mawh kheu krax pa caox caig yuh kix hoik hoek ka plak sivoe ngai Aux." ³ Viang mawh nan Yonax keud ti sang to mai mox tix ka veng Tasux, khaing plak sivoe ngai Siyiex mai nawh lih hu ka veng Yawppax mai yaox reu ting pa sang hu ka veng Tasux. Nawh tawx ngawh brug tix reu, laig ka daux reu mai brug reu hu tau mai kix ka daux veng Tasux, khaing plak sivoe ngai Siyiex heue. ⁴ Yam an Siyiex kieh bhaung ting lih ka piang rawm sigrit sigra, tom dex sang laux reu ting heue. ⁵ Yam an pui yuh kaing daux reu ku kaux kied lhat graung mai pui ku kaux kok yo ka siyiex mawx siyiex an heue. Kix teei ti tik kraung tiblah daux rawm, sonsang chaong reu ting, yam an Yonax kied laig it ka daux lawg plak greem reu ting heue. ⁶ Mawh kheu nan, cao kaing reu hu ka nawh ah nin, "Pui pa laig it eue, yuh ka mawh maix lai laig it, kaoh! mai rawg bwan ka siyiex maix, ha siyiex maix nieb doh keud ka ex mai taoh ex khaing krax pa laux leeing in nie." ⁷ Khaix an pui pa ot ka daux reu "Phaw ti yuh nieb, sonsang tawng kix grawng in, mawh kheu pui mawx?" Kix nieb ti yaox mai caw ka Yonax heue. ⁸ Mawh kheu nan kix chawk ka nawh ah nin, "Mawh pui mawx pa kieh ceu in hoek ka piang ex, krai ex mhong liak? Yuh maix kaing patix? Kaoh maix khaing dee mawx? Mawh maix pui meung mawx? Mawh maix pui ceu tix?" ⁹ Nawh deeh pawk ah nin ka kix, "Aux mawh ceu pui Hebrie, pa lhat graung ka Siyiex raoma, Cao pa phan haktiex mai rawm sigrit sigra mai aux mawh pa to khaing plak sivoe ngai Siyiex heue." ¹⁰ Pui khankix nie koe krax lhat graung kah mai kix chawk nawh ah nin, "Maix lai yuh nin yuh ka mawx?" Mawh kheu krai nawh grawng tix ka kix, kix tom tawng mawh nawh pa to khaing plak sivoe ngai Siyiex heue. ¹¹ Khaix an kix chawk ka nawh ah nin, "Mawh kheu nie ting bhaung mai puk pak rawm, sonsang yiien yawg bhaung, ex sang caw ti yuh ka mawh ka maix?" ¹² Nawh ah nin ka kix, "Pex yaog ti taing aux daux rawm sigrit sigra, phan pex yuh nan rawm sigrit sigra tak yiien yawg hu heue. Aux tawng bhaung ting in hoek ka piang pex mawh kheu jao aux heue." ¹³ Viang mawh nan kix co ca ti vai reu sonsang hoek ka praok rawm. Viang mawh nan mawh kheu nie ting bhaung kix ang lai pex pon heue. ¹⁴ Mawh kheu nan kix kok yo ka Siyiex ah nin, "Siyiex eue, yix khyox khaw ka Maix, paw doh kieh yix laux leeing kheu jao pui in mai paw kieh nham pui pa ang koe phimap hoek ka piang yix liak! Siyiex eue, Maix hoik yuh awm pa koe alo tix heue." ¹⁵ Yam an kix yaog ti taing Yonax daux rawm sigrit sigra heue. ¹⁶ Yam an puk pak rawm sigrit sigra kawx yien yawg hu heue. Khaix an kix lhat graung ka Siyiex mai yuh krax tan mai yuh sijax mukheu ka siyiex heue. ¹⁷ Yam an Siyiex khre rien kax ting tix mu, kieh bleet ka Yonax, Yonax ot ka daux vaig kax ting loe singaix loe sawm heue.

¹ Khaix an Yonax ot ka daux vaig kax ting mai rawg bwan ka Siyiex tix, ² "Yam yaox aux krax kha rhawm aux kok yo ka Siyiex mai Nawh Cao pawk lox aux heue. Yam ot aux daux meung yum mai riag yo, Maix mhong ka lox aux heue. ³ Mawh kheu Maix hoik teei ti sau aux daux dee raux sigreung rawm, rawm sigrit sigra hoik vung viang aux mai puk pak rawm cie Maix khankix hoik kheem ka piang aux heue. ⁴ Aux ah nin, kheu mawh aux pui pa hoik tik tix khaing sivoe ngai Maix, aux keud ti ang lai yaox ka nyiex bwan pa singax singeh Maix heue ⁵ Rawm khankix hoik rob vung viang aux, tom dex sang yum aux mai dee pa raux sigreung rawm hoik ot vung viang aux, rib riem rawm sigrit sigra khankix hoik vung fiien ka kaing aux heue. ⁶ Aux hoik lih bleeh ka num caong gawng mai jhong siviex haktiex hoik nyeep ka aux leeing ju, viang mawh nan Siyiex aux eue, Maix tak sang taoh ju aux lih khaing dung raux daux nu heue. ⁷ Yam khrup rhawm rhi aux, aux doh keud ka Siyiex mai lox rawg aux bwan hoik laig hoek ka plak sivoe ngai Maix, ka daux nyiex bwan pa singax singeh Maix heue. ⁸ Pui pa yungyi ka riang grang pa giex going khankix, kix hoik tik vud krax caux rhawm siyiex tix heue. ⁹ Viang mawh nan, aux tak sang yaog yaw ka Maix ka daux pa tan pa lu pa ap pong ka Maix mai tak yuh sijax mukheu awm pa hoik ah aux ti yuh heue. Bwanson krax taoh mawh pa kaoh khaing Siyiex heue." ¹⁰ Khaix an Siyiex tawx lox ka kax ting, kax ting an hao Yonax lih caong raog ka dee kroh tiex heue.

¹ Gumlox Siyiex baox hoek ka Yonax ra bawg tix bawg ah nin, ² "Kaoh, hu ka veng ting Nineve, krai pao awm lox pa hoik tawm Aux ka maix heue." ³ Mawh kheu nan Yonax kaoh hu ka veng ting Nineve awm gumlox pa hoik tawm Siyiex heue. Veng ting Nineve mawh veng pa kied ting mai veng pa ting ceu mai vieh loe singaix krax heue. ⁴ Mawh kheu nan Yonax jah ti laig hu ka daux veng tix singaix krax mai pao ah nin, "Khaix hoik luan tixpon ngaix tak sang pluk pliak ti tik ka veng Nineve heue." ⁵ Mawh kheu nan, pui veng ting Nineve khankix yum rhawm ka Siyiex, kix krai pao sonsang twah pa ih, jah ka pui ting tom hoek ka pui iak khawmuik mai ceep ka chee rhix heue. ⁶ Yam hoik mhong simiang veng ting Nineve ka lox satang in khankix, nawh lih khaing dang ngeung dee ngawm tix mai peeik sibex dhah tix mai ceep ka chee rhix ngawm ka daux nyaox heue. ⁷ Nawh tawx lox hu ka pui pa ot ka daux veng ting Nineve, grawng hoik mawh lox tawm khaing simiang mai pui ting pa ot greem nawh khankix pa ah nin, "Paw doh kieh pui tix kaux kawx mai tobrie pa mawh mawie, yung khankix ih nyaux tix ceu kawx heue. ⁸ Mawh kheu nan kieh pui ku kaux mai tobrie khankix ceep ka chee rhix mai kieh pui ku kaux sau riang tix rawg bwan ka Siyiex heue. Kieh pui ku kaux tieh loh khaing kaing pa caox caig pa yuh tix mai tik vud ka pa lang teung kin pa yuh nawh ka taix tix heue. ⁹ Pui mawx pa tawng ka pa sang deeh tieh Siyiex tix mai doh keud mai deeh veeh tix khaing pa song rhawm Nawh Cao mai ang lai kieh ex hoek krax laux leeing?" ¹⁰ Khaix an Siyiex hoik yaox kaing pa yuh kix mai hoik tieh loh kix tix khaing pa caox caig yuh tix mai Siyiex deeh tieh loh rhawm rhi tix khaing krax pa ah Nawh ti sang ciyang ka kix mai caux rhawm, Nawh ang lai ciyang heue.

¹ Viang mawh nan Yonax ang lai nyawm rhawm mai nawh kied song rhawm heue. ² Nawh rawg bwan ka Siyiex ah nin, "Siyiex eue, yam ot aux daux haktiex, aux hoik ah yuh nan ang mawh lie? Aux tom nied ti to hu ka veng Tasux, mawh kheu hoik tawng aux Maix mawh Siyiex pa koe bwanson mai pa koe krax caux rhawm mai ang khran song rhawm, pa naog ka krax moh krax rhawm mai pa hoik tieh loh tix khaing pa hoik ah Maix ti sang ciyang heue. ³ Mawh kheu nan yam in, phan teei ju aux khaing aux, nie lheu mhawm khaing im aux heue." ⁴ Khaix an Siyiex ah nin, "Pa song rhawm maix yuh nin, khex khaw lie?" ⁵ Yonax lih hu khaing daux veng mai ngawm praok veng plak lih singaix heue. Nawh yuh ti cie nyiex gox tix lhang tan mai ngawm greem veei nyiex gox an, tom hoek bawg yam pon yaox ti ceu pa sang yuh ka mawx ka veng heue. ⁶ Siyiex cox khre khaox bee ia son nawh tix pang kieh lhaong ka piang Yonax tom veei ka piang nawh, sonsang kieh nawh nyawm rhawm khaing krax laux rhawm heue. Mawh kheu nan, Yonax kied koe krax gaux rhwm kheu khaox an heue. ⁷ Viang mawh nan yam hoik bah riang praix ponngawb singaix khaix, Siyiex khre viag tix mu mai kiied ka khaox bee ia an fit kroh hu heue. ⁸ Yam lih singaix, Siyiex khre bhaung pa kied hax khaing plak lih singaix mai kieh koek tong ka kaing Yonax mai kieh nawh peei awn riang heue. Khaix an nawh koe rhawm pa simie ti yum ah nin, "Yum aux nie lheu mhawm khaing im aux heue. ⁹ Khaix an, Siyiex ah nin ka Yonax, "Pa song rhawm maix kheu jao khaox bee ia in khex khaw caw lie? "Nawh deeh ah nin, "Pa song rhawm aux sonsang yum tix mawh pa khaw caw heue." ¹⁰ Siyiex ah nin, "Khaox pa ang maix taug mao ti sum mai pa ang maix priex kieh ting lhaong, kuah daux tix sawm mai deeh yum daux tix sawm khaing maix lai kawn lhawk kah. ¹¹ Ka veng ting Nineve pa ot pui daux tix sien ra mheen kaux haoh, pa ang nyang tawng ti gwieh taix gwiex dawm mai tobrie pa haoh hun an khankix ang Aux khaw ti nie lhawk kah lie?"