1234567891011121314151617181920212223242526272829303132333435363738394041424344454647484950
12345678910111213141516171819202122232425262728293031323334353637383940
123456789101112131415161718192021222324252627
123456789101112131415161718192021222324252627282930313233343536
12345678910111213141516171819202122232425262728293031323334
123456789101112131415161718192021222324
123456789101112131415161718192021
1234
12345678910111213141516171819202122232425262728293031
123456789101112131415161718192021222324
12345678910111213141516171819202122
12345678910111213141516171819202122232425
1234567891011121314151617181920212223242526272829
123456789101112131415161718192021222324252627282930313233343536
12345678910
12345678910111213
12345678910
123456789101112131415161718192021222324252627282930313233343536373839404142
123456789101112131415161718192021222324252627282930313233343536373839404142434445464748495051525354555657585960616263646566676869707172737475767778798081828384858687888990919293949596979899100101102103104105106107108109110111112113114115116117118119120121122123124125126127128129130131132133134135136137138139140141142143144145146147148149150
12345678910111213141516171819202122232425262728293031
123456789101112
12345678
123456789101112131415161718192021222324252627282930313233343536373839404142434445464748495051525354555657585960616263646566
12345678910111213141516171819202122232425262728293031323334353637383940414243444546474849505152
12345
123456789101112131415161718192021222324252627282930313233343536373839404142434445464748
123456789101112
1234567891011121314
123
123456789
1
1234
1234567
123
123
123
12
1234567891011121314
1234
12345678910111213141516171819202122232425262728
12345678910111213141516
123456789101112131415161718192021222324
123456789101112131415161718192021
12345678910111213141516171819202122232425262728
12345678910111213141516
12345678910111213141516
12345678910111213
123456
123456
1234
1234
12345
123
123456
1234
123
1
12345678910111213
12345
12345
123
12345
1
1
1
12345678910111213141516171819202122

Joel

1

1 Gumlox Siyiex lih hoek ka Yolax, kawn simex Petuelax, 2 "Pex pa mawh kuad song khankix eue, nghiet ka lox in, pex pa mawh pui ot ka daux haktiex khankix eue, daong yhaok tix nghiet heue. Mawh hoik sax koe ceu in ka daux baux singaix pex khankix, phan ang mawh nan, ka daux baux singaix keeing pex khankix lie? 3 Krai kawn praix pex mhong ka grawng an, kieh kawn praix pex deeh krai ka kawn praix kix mai kawn praix kix, deeh krai ka baux ju doeh ka khaix heue. 4 Khaix ih sido kai kip, sido nghox deeh ih, pa deuk khaix ih sido nghox, sido hauk mi deeh ih, pa deuk khaix ih sido hauk mi, sido ngai liag ih kah heue. 5 Pui pa nyaux tom yoek tix khankix eue, siduad mai yiiem heue. Pex pa brax nyaux rawm plix siiet khankix eue, riag yo heue, kheu rawm plix siiet pa khien hoik jud khaing daux jheeh pex heue. 6 Grawh grawng nawh ceu pui tix ceu hoik haok bleeh ka haktiex Aux, pa mawh cub pui pa kied ting riang rao mai pa ang lai uik simin, rhang nawh khankix awm rhang sivai sangsi mai rhang gieb nawh awm rhang gieb sivai sangsi miex heue. 7 Nawh hoik yuh laux leeing ka nhu plix siiet Aux, mai hoik klawh lhox khaox ruh aux, nawh hoik klawh ti tik an plang mai hoik kieh kak khaox khankix mawh pa hoik yuh ti paing heue. 8 Koe pa riag yo awm bunkrih pa hoik rawd nyoi tix ka man chee rhix, son mex nawh pa kawn awn ju heue. 9 Krax tan phawng nghox ca im mai krax tan pa nyaux khankix, hoik jud khaing nyiex bwan Siyiex heue. Cao giex kaing li pa yuh kaing Siyiex khankix, khi rhawm ti yiiem heue. 10 Tong kaung hoik laux leeing, haktiex koe krax khi rhawm, kheu hoik laux nghox, rawm plix siiet pa khraox hoik kroh hoik hit, rawm bee hoik dieh hu heue. 11 Pui pa yuh kaung yuh ma khankix eue, koe pa kaig tua, pa priex rien sipeem plix siiet khankix eue, koe krax yiiem yo mawh kheu nghox ca mai nghox cao khawm simie si-un daux kaung khankix hoik grai grhup heue. 12 Nhu plix siiet hoik kroh, khaox ruh kawx hoik fit mai khaox plix jiang, khaox jhie yaong mai khaox plix kawk tie khawm khaox khankix khawmuik pa koe ka daux tiagtu, hoik fit kroh uik heue. Krax gaux rhawm pui khankix hoik grai hu khawmuik heue." 13 Cao giex kaing li khankix eue, rawd nyoi pex ka man chee rhix koe krax khi rhawm mai yiiem heue. Pex pa yuh kaing jhaw ka plak sivoe khu dee tan khankix eue, koe krax riag yo heue. Hoek mai ceep man chee rhix it leeing sawm, mawh kheu krax tan phawng nghox ca im mai krax tan pa nyaux mawh pa hoik jud khaing daux nyiex bwan Siyiex pex heue. 14 Pex tat ti deuh singaix pa singax singeh mai twah pa ih, krai pao pawie pa singax singeh, kraix khrawm kuad song mai khawm can pui pa ot ka daux hakiex khawmuik, laig ka daux nyiex bwan Siyiex, pa mawh Siyiex pex mai kok yo ka Siyiex heue. 15 Koe krax kha rhawm ka singaix an heue. Grawh grawng nawh, singaix Siyiex hoik dex heue. An tak sang hoek awm krax pa laux leeing khaing cao pa kied ting sibrawm heue. 16 Pa ih, hoik jud ka plak sivoe ngai ex ang mawh lie? Krax nyawm rhawm mai krax gaux rhawm hoik tat khaing daux nyiex bwan Siyiex ex ang mawh lie? 17 Simie si-un hoik laux hoik si-um greem lon tiex, nyiex krao hoik laux, sawng nghox hoik jieh kheu hoik fit kroh hu nghox heue. 18 Tobrie khankix kied koe krax kha rhawm cub phung mawie khankix hoik vuvie tix, kheu ang kix yaox dee klai rib, cub phung yung khankix kawx, hoik yaox ti kham geu krax cai rhawm heue. 19 Simiang Siyiex eue, aux kok yo ka Maix Cao, kheu hoik proe ngu biang dee klai rib mai rao ngu hoik gleeing khaox daux tiag khawmuik heue. 20 Totiag daux tiagtu riag yo ka Maix Cao, kheu hoik hit rawm khaing daux klawng mai ngu hoik proe biang dee klai rib khankix heue.

2

1 Phlu teettawng piang gawng Zion mai lox sinum pa tawx satix piang gawng singax singeh Aux heue. Kieh pui pa ot ka daux haktiex koe krax si yaung khawmuik heue. mawh kheu singaix Siyiex hoik hoek mai hoik dex heue. 2 Singaix pa faik uik mai singaix ceep paiawm mai singaix kied ceep pa faik, awm ceep simawg plak ponngawb piang gawng khankix heue. Ceu pui pa ting lhaong mai pa kied ting riang rao tak sang bleeh ti hoek, mawh cub pui pa ang sax koe glang ka in mai khaix in kawx ang lai koe tom sidah ku ju leeing ju heue. 3 Ngu proe ka plak sivoe kix mai rao ngu hax ka plak khaix kix, haktiex mawh pa awm sipeem Edin ka sivoe sang hoek kix mai ka khaix hoik hoek kix, hoik lih mawh daux tiagtu pa hoik laux leeing heue. Tak ang lai koe tix ceu kawx pa pon glawd khaing kix heue. 4 Grang pakpeung kix, awm grang pakpeung brung mai awm brax to brung heue. 5 Lox sinum luah to kix piang gawng, awm lox luah jaong ling lawx mai awm lox sinum luah rao ngu pa proe ka nyhee nyhawk pa kroh, awm pui tix cub pa kied ting riang rao, pa khre rien ti sang puing naing heue. 6 Ka plak sivoe kix, pui lu lax mai khi rhawm tix, pakngai kix hoik tieh loh tix khawmuik heue. 7 Kix to awm pui pa kied ting riang rao khankix, kix haok piang guh veng, awm pui naing, pui ku kaux hu plak sivoe rahsee awm paox tix mai kix ang lai tang tiah khaing paox tix heue. 8 Kix ang lai teeh paox tix, tix kaux lai tix kaux, pui ku kaux tang hu ka daux krax cub mawx cub an heue. Yam krox brung kix ka daux sinax kraung naing, kix ang koe krax mat heue. 9 Kix to jee blaong ka daux veng, kix to piang guh veng, kix haok ka daux nyiex, kix laig ka daux diang siviex iak, awm pui briex heue. 10 Haktiex yung yiang ka plak sivoe kix, raoma kawx yung yiang, singaix mai khix tak sang faik mai simuing ang lai jhan riang tix heue. 11 Siyiex tawx lox tix, plak sivoe cub kru naing Nawh Cao, kheu mawh cub tab Nawh pa kied ting lhaong heue. Pa pon hawt ti yuh awm gumlox tawx Nawh Cao mawh kaw pa ting sibrawm heue. Grawh grawng nawh, singaix Siyiex mawh pa ting lhaong mai mawh pa kied koe krax lhat kah, mawh pui mawx pa pon thiang kah lie? 12 Mawh kheu nan yam in Siyiex ah nin, "Deeh veeh ti ing ka Aux, khawm rhawm khawm rhi tix mai twah pa ih mai yiiem yo mai krax pa khi rhawm tix heue. 13 Mawh kheu nan, riah rhawm pex mai paw riah kraung ceep pex, deeh ing ka Siyiex, pa mawh Siyiex pex heue." Mawh kheu Nawh Cao koe krax pa tawx bwanson mai krax pa chix caux rhawm, Nawh Cao lang rhawm mai mawh pa grum koe krax moh krax rhawm mai Nawh Cao tak sang deeh tieh rhawm tix ang tawx krax kha rhawm heue. 14 Ha Nawh Cao deeh veeh rhawm tix mai koe krax pa deeh doh keud mai deuh krax pa nawb bwanson, deuh krax phawng nghox ca im mai krax tan pa nyaux son Siyiex, pa mawh Siyiex pex, mawx pa tawng kah lie? 15 Phlu teettawng piang gawng Zion, tat ti deuh singaix twah pa ih, krai pao pawie pa singax singeh heue. 16 Kraix khrawm pui hun mai kieh kix tang yuh tix singax heue. Kraix khrawm kuad song khankix, kraix khrawm kawn nyawm mai khawm kawn nyawm pa kawn peux khankix heue. Kieh sinaw pa sang koe moeng lih khaing daux lawg mai kieh bunkrih pa sang koe mex lih khaing daux lawg jawg nawh tix heue." 17 Kieh cao giex kaing li pa yuh kaing jhaw Siyiex khankix, yiiem sinax sidub nyiex mai dee koe khu dee tan mai ah nin "Siyiex eue, caux rhawm ka pui Maix liak lox salao, son ang pui tang ceu pon ti kwang piang kix, maix lai sang grham pui tang meung ah nin, Siyiex kix koe dee mawx lie?" 18 Khaix an Siyiex tak sang deeh koe rhawm ka son haktiex Cao Nawh mai koe krax caux rhawm ka pui Nawh heue. 19 Siyiex deeh pawk mai ah nin ka pui Nawh heue. "Jhak heue, Aux tak sang tawx nghox koi, rawm plix siiet mai rawm bee ka pex mai kieh pex sak heue. Aux tak ang lai kieh pex pon lox salao ka daux sinax ceu pui tang meung khaix in heue. 20 Aux tak sang kieh cub kru naing plak laong singai hu khaing pex mai tak grheu kix luan ka dah dee ang pui koe mai ka haktiex pa kroh kroing an mai kieh cub phao voe laig daux rawm sigrit sigra plak lih singaix, kieh cub phao khaix laig ka daux rawm sigrit sigra plak glip singaix, mawh kheu bhawm sioe cux mai bhawm si um kix tak yaog ti haok dee lhaong kheu hoik yuh kix grawng ceu pa ting caox an khankix heue. 21 Haktiex eue, paw lhat graung, koe krax nyawm rhawm mai koe krax gaux rhawm heue. Grawh grawng nawh, Siyiex hoik yuh pa kied ting lhaong khankix heue. 22 Totiag daux tiagtu khankix eue, paw lhat graung, grawh grawng nawh, biang dee klai rib hoik glaoh mai khaox khankix hoik koe plix, khaox ruh mai nhu plix siiet khankix hoik kraoh ti koe riang rao heue. 23 Pui veng Zion khankix eue, kieh pex koe krax nyawm rhawm mai gaux rhawm ka daux Siyiex pa mawh Siyiex pex, kheu Nawh Cao hoik tawx rawm lhiex cao ka pex ka daux krax pa rahsee tix mai Nawh tak sang kieh rawm lhiex lih ka son pex, pa mawh rawm lhiex cao mai rawm lhiex lha awm phao voe heue. 24 Biang glah dee pah nghox, tak naog ka nghox ca, ang mai aw khang ting maix khankix tak kreh ti naog ka rawm plix siiet khraox mai rawm bee heue. 25 Mawh kheu nan aux tak sang deeh naok ti tawx ka pex can pa hoik kiied sido nghox khankix ti ih, sido hauk mi sido ngai liag mai sido kai kip khankix, pa mawh kru naing pa kied ting lhaong Aux khankix, ka pa hoik ploi Aux nawh hoek ka daux sinax pex heue. 26 Pex tak sang yaox ti ih tom nie mai hoik sak mai yaogyaw ceu kaux Siyiex, pa mawh Siyiex pex, pa hoik yuh krax pa daox deng ka pex mai pui Aux khankix, tak ang lai koe krax kaig tua khaix in leeing ju heue. 27 Pex tak tawng ka Aux ka daux sinax ceu pui Isarelax mai ka mawh Aux Siyiex, pa mawh Siyiex pex mai ka ang siyiex tang kaux ang lai koe heue. Pui Aux khankix tak ang lai koe krax kaig tua khaix in leeing ju heue. 28 Khaix in sax Aux tak kieh khuan Aux lih piang pui khawmuik heue. Kawn simex kawn bun pex tak sang krai lox jhai mai pui awn ju pex, tak sang yaox riang susai mai pui kuad song pex tak sang camaox ti yaox heue. 29 Ka daux singaix ankix Aux tak sang kieh khuan Aux lih piang kawncau simex cie Aux mai kawncau bun cie Aux khankix heue. 30 Aux tak jhi yaox mhai rug pa daox deng ka raoma long mai mhai ka greem piang haktiex pa mawh nham mai ngu mai taox ngu heue. 31 Singaix tak tieh loh ti mawh pa faik mai khix tak deeh tieh ti mawh nham, sivoe sang hoek singaix pa ting lhaong Siyiex mai singaix pa koe krax lhat graung kah heue. 32 Ka daux singaix an can pui pa kok ka ceu kaux Siyiex, tak sang hoek krax taoh heue. Grawh grawng nawh, piang gawng Zion mai ka daux veng Yerusaliem khankix, tak sang koe pui pa pon ti luad luan awm pa hoik ah Siyiex, ka daux sinax pui pa kawn deuk khankix, tak koe pa kok Siyiex ti teei heue.

3

1 Jhak heue, ka daux singaix bawg yam an, Aux tak deeh viex pui pa giex laung haktiex Yudax mai pui veng Yerusaliem khankix hoek, 2 Aux tak sang deeh baox kraix khrawm ceu pui khawmuik mai viex kix hoek ka daux lung Yehoshaphat mai Aux tak sang ciyang ka kix tan, mawh kheu kieh kix pui Aux mai sinngao Aux Isarelax khankix hoik prung prang ti ot ka daux sinax haktiex khankix mai kix hoik baox deeh gwieh ti teei haktiex Aux heue. 3 Kix hoik yuh nieb ka son pui Aux, kix teei kawn nyawm simex loh ka bun coh kaux mai hoik coh kawn nyawm bun mai liag ti nyaux rawm plix siiet kah heue. 4 Veng Turux mai veng Sidom,mai baoh rawb rim haktiex Philitix khankix eue,? mawh koe pa sang deeh pawk bix tix ka Aux mai Aux tak sang dee nied ti tawx krax pawk bix hoek phai phai piang kaing pex, 5 kheu pex hoik rhim ti teei mau khri Aux mai khawm kraung khrai sinngao totaix pa hoik pon Aux ti cie khankix laig ka daux nyiex vad pex heue. 6 Pex hoik baox deeh coh pui Yudax mai pui veng Yerusaliem ka ceu pui Helasax, sonsang luan kix dee singai khaing mee haktiex tix heue. 7 Jhak heue, Aux tak sang yaog kix lih khaing dee pa hoik coh pex kix mai Aux tak sang deeh viied ti pawk bix hoek piang kaing pex heue. 8 Aux tak sang coh kawn simex kawn bun pex khankix, ka daux tawm taix pui Yudax mai kix tak deeh coh ka pui haktiex Sheba pa ot dee singai heue. Siyiex ah nin heue. 9 Pao ti krai grawng in daux sinax ceu pui khankix heue, khre rien son naing so kaoh ka pui pa kied ting riang rao khankix, kieh pui naing khawmuik greed tix dex kieh kix haok heue. 10 Tawk to thai pex khankix mawh vaig lawm mai sivawg pex mawh pliah, kieh pa iak riang ah nin, Aux mawh pa koe riang rao heue. 11 Pex pa mawh pui tang ceu pa ot hawt vung viang khankix eue, khrawm paox tix tau heue. Siyiex eue, kieh pui pa kied ting riang rao Maix khankix lih hoek heue. 12 Kieh ceu pui khawmuik so ti kaoh mai haok ka daux ngawd Yehoshaphat heue. Grawh grawng nawh, Aux tak sang ngawm ti ciyang ka ceu pui pa ot hawt vung viang khankix khawmuik heue. 13 Khre sivawg heue, mawh kheu nghox pa sang vawg hoik kaux heue. Hoek mai laig biiet heue.. Grawh grawng nawh, dee krid rawm plix siiet hoik naog heue. Ang mai aw khankix hoik kreh hoik naog, grawh grawng nawh, ceu pa caox yuh kix mawh pa kied ting lhaong heue." 14 Pui kied haoh hun ot ka daux lung dee tat see heue. Grawh grawng nawh, singaix Siyiex hoik dex hoek daux lung dee tat see heue. 15 Singaix mai khix tak sang lih ti mawh pa faik mai simuing khankix tak ang jhan pa riang tix heue. 16 Siyiex tak briah lox tix khaing piang gawng Zion mai yo lox tix lih khaing veng Yerusaliem, raoma mai haktiex tak sang yung yiang, viang mawh nan, Siyiex tak mawh dee peung ka son pui Nawh Cao mai mawh dee cong ceu pui Isarelax khankix heue. 17 Pex tak tawng ka mawh Aux Siyiex, pa mawh Siyiex pex, pa ot piang gawng Zion pa mawh gawng pa singax singeh Aux heue. Yam an veng Yerusaliem tak sang mawh pa singax singeh mai pui tang ceu khankix tak ang lai yaox ti tiang ka daux nawh khaix in heue. 18 Hoek ka daux singaix an, rawm plix siiet tie tak sang jauh ti lih ka gawng khankix, rawm teeh tak sang lih khaing ton khankix mai klawng haktiex Yudax khankix tak sang mawh pa lih hu rawm ka daux khawmuik, tak koe daux rawm keut pa lih hu khaing nyiex bwan Siyiex mai caux yuh daux lung Shitem heue. 19 Meung Ejiptux tak sang mawh dee yiien hu pui mai haktiex Edom tak sang mawh daux tiagtu, pa hoik yiien hu pui, kheu krax pa kin yuh pui khankix piang pui Yudax heue. Kheu kix hoik jauh yuh nham pa ang koe phimap ka daux haktiex kix heue. 20 Viang mawh nan haktiex Yudax, tak sang mawh pa koe leeing ju mai veng Yerusaliem tak sang mawh pa koe ku ju leeing ju heue. 21 Aux tak sang pawk bix ka nham phimap pa lih yuh kix, ka pui pa ang Aux nyang bax pawk bix ka pui pa koe map koe grham heue. Grawh grawng nawh, Siyiex ot piang gawng Zion heue.