Job

Job

¹ Koe pui tix kaux pa kaux Yawbax pa ot daux haktiex Uzax pui an mawh pui grum naog mai pa rahsee mai nawh mawh pui pa lhat graung ka Siyiex mai via khaing pa caox caig heue. ² Nawh koe kawn simex aliah kaux mai kawn bun loe kaux heue. ³ Sinngao nawh khankix mawh yung aliah rheng, kala-uk loe rheng, mawie tang phwan yieh, la shiang phwan yieh mu mai pui daux nyiex ma nawh khankix kied haoh hun heue. Mawh kheu nan, pui in mawh pui pa kied ting lhaong khaing sinax ceu pui baoh haktiex plak lih singaix khawmuik heue. ⁴ Yam hoek bawg yam singaix keh kawn simex nawh khankix, kix yuh pawie krax khan kheu ka daux nyiex cao kix mai kix ploi pui hu ghaok ka nan kix loe kaux hoek tix ih nyaux tau mai kix heue. ⁵ Mawh kheu nan yam hoik naog kix pawie pa yuh tix, Yawbax kok kix hoek sonsang yuh kix singax mai nawh yaog ti kaoh caocao daux ponngawb mai hu tan krax tan pa gleeing khankix, awm hoik koe carang kix khawmuik heue. Grawh grawng nawh, Yawbax hoik keud yuh nin, "Kawn simex aux khankix hoik lud mai jhax lawg ka Siyiex ka daux rhawm kix heue." Mawh kheu nan, Yawbax yuh awm an sijheeng heue. ⁶ Ka daux an tix ngaix yam hoek kawn simex Siyiex tix khrawm paox tix hoek ka plak sivoe Siyiex mai satan kawx rom ti hoek ka daux sinax kix heue. ⁷ Siyiex ah nin ka satan, "Mawh kaoh maix khaing dee mawx?" Satan deeh pawk lox ka Siyiex ah nin, "Aux kaoh khaing lailing ti hu piang haktiex mai hu jee hu blaong sonsang simi ti jhak piang ceu an kix heue." ⁸ Khaix an Siyiex ah nin ka satan, "Mawh hoik sax keud maix ti yaox ka grawng kawncau Aux Yawbax, pui pa awm nawh ang lai koe ka piang ca haktiex, pa mawh pui pa ang koe dee deuh phimap pa grum naog mai pa rahsee, nawh mawh pui pa lhat graung ka Siyiex mai pa via khaing pa caox caig lie?" ⁹ Khaix an satan deeh pawk lox ka Siyiex ah nin, "Phan Yawbax ang pon bwanson khaing Maix Cao nawh sang lhat graung ka Maix Cao lie? ¹⁰ Ang hoik mawh Maix Cao pa hoik yuh hawt vung viang nawh mai hawt vung viang daux nyiex nawh khankix ku daog ang mawh lie? Maix Cao hoik nawb bwanson piang kaing jhaw pa yuh nawh ka taix tix khankix mai kraung khrai sinngao nawh khankix, hoik haok hwan ka daux haktiex in heue. ¹¹ Viang mawh nan yam in nyeu plawng taix Maix Cao mai teeh ka can pa koe nawh khawmuik mai nawh tak jhax lawg ka Maix Cao ka plakngai Maix Cao tete heue. ¹² Mawh kheu nan Siyiex deeh ah nin ka satan, "Jhak heue, can pa hoik koe nawh khankix koe ka daux sibrawm maix, paw kieh ngie taix tix teeh piang nawh khaing. khaix an, satan lih hu khaing ka plak sivoe Siyiex heue. ¹³ Yam an ka daux tix ngaix, yam kawn ih kawn nyaux kawn simex kawn bun nawh khankix rawm plix siiet, ka daux nyiex puxke ting kix, ¹⁴ cao cau tix kaux hoek ka Yawbax ah nin, yam kawn thai mawie kaung mai la kawn sawm rib hawt praok kix, ¹⁵ pui Shebax khankix hoik puing ka kix mai viex kix hu dee singai mai kix hoik pah ti tik kawncau khankix ka vaig, mawh aux nong nong tix kaux pa klawd sonsang krai ka maix heue. ¹⁶ Yam kawn tak sikah nawh, pui tang kaux baox hoek ah nin, "Ngu Siyiex hoik cod khaing raoma mai hoik gleeing ka yung mai cao pau yung khankix proe uik mai mawh aux nong nong tix kaux pa klawd sonsang deeh ing krai ka maix heue." ¹⁷ Yam kawn tak sikah nawh, pui tang kaux baox hoek ah nin, ceu pui Kaladie loe cub, hoik rhim ka cub kala-uk an khankix mai viex kix hu dee singai, mai kix hoik pah cub kawncau khankix ka lawm vaig mai mawh aux nong nong tix kaux pa klawd deeh ing krai ka maix heue. ¹⁸ Yam kawn tak sikah nawh, pui tang kaux baox deeh hoek ah nin, kawn simex maix mai kawn bun maix khankix kawn ih kawn nyaux rawm plix siiet ka daux nyiex puxke ting kix, ¹⁹ bhaung ting hoek sijaox khaing daux tiag mai hoik klah ka nyiex an khawm pon daog mai nyiex an hoik grhup piang pui awn ju an khankix mai kix hoik yum mai mawh aux nong nong tix kaux pa klawd sonsang deeh ing krai ka maix heue. ²⁰ Khaix an Yawbax kaoh mai riah ka sibex lang jung ceep tix mai khlao hauk kaing tix mai nawh goh gup tix krub piang tiex heue. ²¹ Nawh ah nin, aux hoik lih khaing daux vaig miex tix ka daux pa ang tix viex kraung ceep mai aux tak deeh ing tau mai pa ang tix viex kraung ceep, Siyiex mawh pa tawx mai Siyiex kawx deeh teei hu, kieh ceu kaux Siyiex koe bwanson heue. ²² Ka grawng ceu in khawmuik, Yawbax ang yuh phimap mai ang lud ka Siyiex heue.

¹ Khaix an ka daux tix ngaix yam hoek cub kawn simex Siyiex khankix tix khrawm paox tix hoek ka plak sivoe Siyiex mai satan kawx rom paox hoek ka sinax kix ka plak sivoe Siyiex heue. ² Siyiex ah nin ka satan, "Mawh kaoh maix khaing dee mawx?" Satan deeh pawk lox ka Siyiex ah nin, "Aux kaoh khaing lailing tix hu piang haktiex mai hu jee hu blaong sonsang simi ti jhak piang ceu an kix heue." ³ Khaix an Siyiex ah nin ka satan, "Mawh sax keud maix ti yaox ka grawng kawncau Aux Yawbax, pui pa awm nawh ang lai koe piang ca haktiex, pa mawh pui pa ang koe dee deuh phimap, pa grum naog mai pa rahsee, nawh mawh pui pa lhat graung ka Siyiex mai pa via khaing pa caox caig lie? mai nawh ca kawn giex krax rahsee tix kaux cong, viang maix hoik sau riang Aux sonsang yuh nawh laux leeing ka daux pa ang koe ceu koe grawng heue." ⁴ Mawh kheu nan satan deeh pawk lox Siyiex ah nin, "Hak tak mawh son hak, pui tix kaux tak pon tawx can pa koe nawh khawmuik son ju nawh heue. ⁵ Viang mawh nan yam in nyeu taix Maix Cao mai teeh si-ang nawh mai nex nawh mai nawh tak jhax lawg ka Maix Cao ka plak sivoe ngai Maix Cao heue." ⁶ Mawh kheu nan Siyiex ah nin ka satan, "Jhak heue, nawh koe ka daux tawm taix maix, viang mawh nan kieh ngie ju nawh tix ceu klawd heue." ⁷ Khaix an satan lih hu khaing ka plak sivoe Siyiex mai kieh Yawbax geu jhawm saux muad pa kied kin jah ka tiag caong tom hoek piang kaing nawh heue. ⁸ Nawh teei shiag aw max, sonsang kraig tokaux tix ka mai nawh ngawm ka daux nyaox heue. ⁹ Khaix an moeng nawh ah nin ka nawh, "Mawh ca kawn giex maix ka pa rahsee tix lie? Jhax lawg Siyiex mai yum khaing heue." ¹⁰ Viang mawh nan Yawbax ah nin ka nawh, "Maix krai lox caox awm bun pa kwa pa meug tix kaux heue. Mawh sang rieb ex ti teei ceu pa mhawm khaing Siyiex mai ang ex pon rieb ti teei krax kha rhawm lie?" ka daux ceu in khawmuik, Yawbax ang kieh jheeh tix koe krax lud heue. ¹¹ Yam hoik mhong paox grawm Yawbax loe kaux ka grawng pa kha nawh rhawm tix kuceu, kix hoek ka nawh khaing dee ot tix kaux mawx kaux an pa mawh Eliphat ceu pui Tematix khankix heue. Kix hoik yuh krax pa tat tix bawg yam tix mu mai paox tix, sonsang bleeh kix tix mai khu rhawm tau mai nawh mai sonsang tawx tix krax pa nyawm rhawm ka nawh heue. ¹² Yam yaog kix ti jhak khaing dee singai mai ang tawng ka nawh, kix hoik yo lox tix mai yiiem riag, khaix an kix tang riah sibex lang jung ceep cao tix ku kaux mai rhuat phawng tiex piang raoma sonsang cod piang tix heue. ¹³ Mawh kheu nan kix hoik ngawm ti ot tau mai nawh piang tiex aliah singaix aliah sawm mai pui tix kaux kawx, ang lai sikah lox pie tix gum kawx ka nawh, kheu jao yaox kix ka krax pa kied lang teung ting kha nawh rhawm tix heue.

¹ Khaix an Yawbax ang jheeh tix mai deeh jhax lawg ka singaix keh tix heue. ² Yawbax sikah ah nin, ³ "Kieh singaix keh aux mawh pa laux leeing mai kieh ponsawm pa ah hoik nghe kawn simex tix kaux an laux leeing heue. ⁴ Kieh ngaix an mawh pa faik, paw kieh Siyiex khaing dee long simi ti jhak ka singaix an mai paw kieh pa riang jhan tix piang an heue. ⁵ Kieh pa faik veei meung yum map nai grawng nawh, kieh paiawm kheem piang an, kieh pa ceep daux singaix an mawh pa kied lhat graung heue. ⁶ Ka daux sawm an, kieh pa faik kheem ka nawh paw lai kieh nawh simin tix tau ka daux sinax singaix mai num, paw kieh an mawh pa rom tix tau mai khix khankix heue. ⁷ Kieh sawm an mawh sawm pa neh, paw kieh lox ceu pa gaux rhawm hoek laig ka daux an heue. ⁸ Kieh pui pa jhax lawg singaix khankix deeh jhax lawg ka singaix an, kieh pui pa pon so rhawm siyawng jhax lawg ka sawm an heue. ⁹ Kieh simuing plak ponngawb mawh pa faik, kieh nawh sawg ka pa riang viang mawh nan, nawh ang yaox ka mai paw kieh yaox ka bah riang praix daux ngaix an, ¹⁰ grawh grawng nawh ang lai nyeep ka siviex vaig miex aux mai ang lai mox krax laux rhawm khaing ngai aux heue. ¹¹ Aux lai ang yum ka bawg yam jah ti keh yuh ka mawx lie? Aux lai ang dud rhawm yam lih khaing daux vaig miex tix dix, yuh ka mawx lie? ¹² Ngawng lai rieb tix teem ka aux kheu jao patix? mai teeh lai tawx aux peuex kheu jao patix? ¹³ Phan ang mawh nan aux tak noi tix mai hoik pon krax yiien yawg, aux tak hoik laig it mai hoik mawh pa laux lee tix ¹⁴ tau mai simiang haktiex mai cao pa tawx rhawm keud dong sawn khaing piang haktiex, pa hoik deeh cox sum pa laux leeing son tokaux cao kix, ¹⁵ phan ang mawh nan tau mai kawn Simiang pa koe khri mai pui pa hoik naog yuh mau ka nyiex tix, ¹⁶ phan ang mawh nan aux lai ang awm ka kawnngie pa keh ang naog khix tix kaux mai kawnngie pa ang sax yaox ka pa riang yuh ka mawx lie? ¹⁷ Ka daux an pui caox ang pon tawx krax tuktiak ka mai can pui taug mao khankix hoik pon pa laux lee tix heue. ¹⁸ Pui pa giex laung khankix hoik pon krax laux lee tix tau, kix ang lai mhong ka lox map cao kaing tix heue. ¹⁹ Pui iak pui ting kawx ot baoh tan mai siliex an, hoik luad luan khaing cao Simiang tix heue. ²⁰ Kheu pa riang lai kawn jhan riang tix ka son pui pa kha rhawm tix, kawn kieh ju pa im koe ka daux pui pa kin rhawm yuh ka mawx, ²¹ pui pa pau son krax yum, viang mawh nan, krax yum ang chix hoek mai nie lheu sawg ti yaox krax yum, khaing kraung khrai sinngao khankix, ²² pui pa gaux rhawm sigrien sigre, yam yaox kix ka simeeig mai nie koe krax gaux rhawm ka ang mawh lie? ²³ Khex tawx pa riang ka pui, pa mox daux krax pa hu tix mai ka pui pa hoik laung Siyiex ti deuh khankix, yuh ka mawx lie? ²⁴ Aux hoik koe pa ngia sivoe sang ih tix pa ih mai rawm ngai pa yiiem doe aux hoik lih awm rawm heue. ²⁵ Grawh grawng nawh ceu pa kied lhat graung hoik hoek piang aux mai ceu pa lhat aux, hoik lih ti koe piang aux heue. ²⁶ Aux ang koe ceu pa nhim rhawm mai ang koe ceu pa yiien pa yawg, aux ang koe pa laux lee tix, kheu jao hoek krax kha rhawm heue."

¹ Khaix an Eliphat ceu pui Teman deeh pawk lox ah nin, ² "Phan aux cheuk tix krai lox tix gum ka maix, mawh sang pon kham maix ka lie? viang mawh nan, mawh pui mawx pa sang pon ot giex going khawm ang tix sikah lie? ³ Maix hoik sidiex gau ka pui tom nie mai maix hoik tawx riang rao ka taix pui pa iak riang khankix heue. ⁴ Gumlox maix khankix hoik joh jhan ka pui pa sideeing caong tix mai maix hoik tawx riang rao ka ngawng pa awn riang khankix, ⁵ viang mawh nan yam in ceu pa kha rhawm hoik hoek piang maix mai teeh kieh maix taug mao, ⁶ krax pa nab yam maix krax pa een maix rhawm tix mai krax pa rahsee pa hu maix mai krax keud pot jun pot maix khankix koe dee mawx lie? ⁷ Keud ti yaox yam in, mawh pui pa ang koe dee deuh phimap mawx pasax hoek krax laux leeing lie? Phan ang mawh nan, pui pa rahsee mawx pasax teei ti tik ka dee mawx lie? ⁸ Awm pa hoik tawng hoik yaox aux pui pa thai kaung phimap mai van simie pa caox caig khankix, tak deeh yaox tix vawg awm an heue. ⁹ Kix tak laux leeing kheu bhawm pa sileed Nawh Cao mai kix grai kheu bhawm pa song rhawm Nawh Cao heue. ¹⁰ Lox graox sivai sangsi mai lox riag sivai sangsi pa kied kwa mai rhang kawn sivai sangsi khankix hoik goh hoik groing ka heue. ¹¹ Sivai sangsi kwa an hoik yum kheu ang lai yaox ti ih kug mai kawn miex sivai sangsi khankix hoik prung prang ti hu kudah heue. ¹² Yam an lox sikah tix gum, hoek ka aux khaing dee glip mai yhaok aux hoik mhong ka lox pa koi sikah an heue. ¹³ Ka daux krax keud ce khaing susai ponsawm yam hoik laig it laig tom pui, ¹⁴ Krax lhat mai krax siyaung hoek piang aux mai kieh si-ang aux khankix siyaung ka heue. ¹⁵ Khaix an khwan tix mu tiang sivoe ngai aux, hauk haw pa koe piang aux khawmuik hoik pruh ka heue. ¹⁶ Khwan an kawn kaog, viang mawh nan, aux ang tie pon gwieh ka pakpeung mai yaox ngie riang pang peue ka plak sivoe ngai tix, yam an aux mhong lox pa nhim tix gum ah nin, ¹⁷ "Pui pa chix yum khex sang rahsee ka plak sivoe ngai Siyiex lie? Mawh chix singax kawn pui khaing sivoe ngai cao pa phan pa deuh tix lie? ¹⁸ Jhak heue, Nawh Cao kawn ang yum rhawm ka kawncau tix khankix mai kawn deuh kawncau Siyiex kawx mawh pa daox pa aw, ¹⁹ mawh kheu nan pui pa kaoh khaing phawng tiex mai pa ot daux nyiex tiex khankix, nie sang koe ceu pa krai grawng kix yuh ka mawx mai pui an khankix hoik phawng groing ka vaig ang mawh lie? ²⁰ Kix hoik mawh pa laux leeing ka daux tix singaix khaing, kix tak grai grup leeing ju mai pui tix kaux kawx ang simawd ka kix heue. ²¹ Viang mawh pa kied mhawm grang min plakngai kix kawx hoik luan hu khaing kix ang mawh lie? Kix tak yum, tau mai pa ang tix koe pingnya cuyi heue.

¹ "Kok yo yam in, mawh pui mawx pa sang pawk lox maix lie? Mawh kawn sang koe pui pa singax mawx sang veeh tix hoek teem ka maix lie? ² Grawh grawng nawh krax song rhawm an tak pah ka pui kwa pui caox mai krax boh rhawm pah ka pui pa ang koe krax tawng yung heue. ³ Yam yaox aux ka kaux num riah pui kwa pui caox, viang mawh nan aux hoik jhax lawg ka dee ot dee koe nawh heue. ⁴ Kawn praix nawh khankix, singai khaing dee yiien dee yawg, yam kha kix rhawm tix daux siviex veng mai cao pa taoh kix ang lai koe tix kaux kawx heue. ⁵ Grawh grawng nawh pui pa cai rhawm khankix, hoik teei ti ih nghox vawg nawh khaing sipeem pa vie tix ka pang kat mai pui pa simie tix nyaux rawm khankix hoik bleet ka sinngao kix heue. ⁶ Grawh grawng nawh krax kha rhawm ang lai kaoh khaing phawng tiex mai krax sivix ang lai lih khaing daux tiex, ⁷ mawh kheu nan kawn pui keh son pa kha rhawm, awm nyia ngu haok plak piang heue. ⁸ Viang mawh nan, phan mawh ka aux, aux tak sawg ka Siyiex mai aux tak ap tix tawx grawng kaing kuceu ka Siyiex, ⁹ pa yuh ceu pa kied ting lhaong mai pa daox deng khawmuik, pa ang lai dak uik simin ka heue. ¹⁰ Nawh Cao kieh lhiex lih piang haktiex mai ploi rawm khankix, lih ka tong kaung heue. ¹¹ Nawh Cao yaog pui tiem rhawm ot ka dee pa lhaong mai kieh pui pa koe krax yiiem grai khankix deeh nyawm rhawm heue. ¹² Nawh Cao kieh pui pa kawk rhawm khankix laux mai sonsang ang kix lai pon yuh ka can ceu pa bak kix heue. ¹³ Nawh Cao giex pui koe pingnya cuyi ka jhawm lhak tokaux kix mai kieh krax keud pui luk liak khankix mawh giex going heue. ¹⁴ Kix tak pub ka pa faik ka daux bawg yam pon ngaix mai pupi tix hu yam jung singaix, awm plak ponsawm heue. ¹⁵ Viang mawh nan, Nawh Cao taoh pui hot sibhawm khaing vaig lawm khaing daux jheeh pa kied ting riang rao mai khaing daux tawm taix kix heue. ¹⁶ Mawh kheu nan pui hot shia tak koe krax keud pot jun pot mai pui ang rahsee tak nyeep ka jheeh tix heue. ¹⁷ "Jhak heue, pui pa hoik ciied hoik thi Siyiex kah, mawh pa koe bwanson, mawh kheu nan, paw koe ceu pa sibriem, ka ceu pa hoik cox cao pa ting sibrawm mawh pa mhawm awx. ¹⁸ Grawh grawng nawh, Nawh Cao kieh dee saux koe, Nawh Cao pua ka dee saux an, Nawh Cao kieh krax mat koe, viang mawh nan, taix Nawh Cao deeh kieh moi khawmuik heue. ¹⁹ Nawh Cao tak taoh maix lih khaing daux pa kha rhawm liah ceu, ceu pa caox caig aliah ceu tak ang lai krox teeh ka maix heue. ²⁰ Ka daux yam hot sibhawm, Nawh Cao tak taoh maix khaing krax yum mai daux naing, Nawh Cao tak taoh maix khaing sibrawm vaig. ²¹ Tak mox maix khaing dak pa sibriem pui mai maix tak ang koe krax lhat graung, yam hoek ceu pa laux leeing. ²² Maix tak nyiah maung pa laux leeing an mai pa hot sibhawm an mai maix tak ang koe krax lhat graung ka totiag piang haktiex heue. ²³ Grawh grawng nawh maix tak yuh sijax mukheu tau mai simaox ka daux kaung mai totiag pa koe daux kaung khankix tak yuh pa nhim tau mai maix. ²⁴ Maix tak yaox nyiex gox tix koe ceu pa nhim, yam deeh ing maix ka dee ot dee koe tix mai ang lai koe krax laux rhawm. ²⁵ Maix tak tawng ka haoh hun doeh ru ceu cad tix mai kawn praix kawn saux kawn sex tix khankix nie awm rib riem piang haktiex. ²⁶ Maix tak hoek ka daux simeeig, yam naog ju tix, awm lhiem nghox pa kaux yam hoek bawg yam pa khaw tix vawg. ²⁷ Jhak heue, keud ti yaox ka in, hoik mawh pa mawh meh, nghiet ka heue, mai kieh maix tawng ka tokaux tix heue."

¹ Khaix an Yawbax deeh pawk lox ah nin, ² "Krax pa laux rhawm aux, kieh ciang ti yaox mhawm mhawm mai krax pa kha rhawm aux khankix kieh khrawm tix daux ngai jiang. ³ Mawh kheu nan, an tak mawh pa nie cien khaing mhaik rawm sigrit sigra, mawh kheu lox sikah aux hoik kied luan heue. ⁴ Grawh grawng nawh te puing cao pa ting sibrawm ot ka daux aux, khwan aux nyaux ka jai kix, krax lhat graung pa jhi Siyiex hoik dia tix ka plak sivoe aux. ⁵ Mawh sax riag la tiag yam koe rib sawm tix mai mawh sax riag mawie yam koe rib sawm tix lie? ⁶ Mawh sang pon ih priex ceet khawm ang tix sau kih lie? Phan ang mawh nan, mawh koe jhawm nyawm ka daux brang tawm ia lie? ⁷ Ceu pa thiang aux tix ang teeh ka khankix, mawh priex pa seeing brai ka son aux heue. ⁸ Kieh aux pon ka can ceu pa rawg mhaing tix mai kieh Siyiex tawx ka can ceu pa mie aux tix pon ka heue. ⁹ An tak mawh pa khaw rhawm Siyiex, sonsang yuh aux laux leeing mai Nawh Cao tak nyeu plawng taix tix lih mai tat ti tik aux heue. ¹⁰ Khaix an aux tak koe krax nyawm rhawm, viang ka daux krax pa kied kha rhawm kawx aux kawn koe krax gaux rhawm, paw kieh Nawh Cao lai koe pa lhawk ka aux, mawh kheu aux ang thiang ka gumlox pa singax singeh Nawh Cao heue. ¹¹ Mawh koe riang rao ceu patix ka aux ka daux pa keud pot tix lie? mawh ceu pa sidah sidu patix, ka tak sang kawn kieh aux gun yeung tix baox lang ju lie? ¹² Mawh riang rao aux riang rao simaox lie? Phan ang mawh nan mawh nex aux nex tawng lie? ¹³ Krax teem ang lai koe ka daux aux tete mai krax keud aux hoik deek die ang mawh lie? ¹⁴ Pui pa koe krax caux rhawm ka paox grawm tix pa hoek krax kha rhawm, tak mawh pa luad luan khaing pa lhat graung ka cao pa ting sibrawm heue. ¹⁵ Puxaik aux khankix hoik vung viang hu awm rawm klawng iak, awm lih hu rawm daux ngawd klawng hit mai grai hu, ¹⁶ rawm klawng an hoik faik ka rawm sidap mai ka dee an hoik mox tix ka rawm rha. ¹⁷ Yam siu rawm an nawh grai hu mai yam hax koek kix kroh hit khaing dee ot dee koe tix. ¹⁸ Cub pui hu krax khankix hoik lud krax hu tix mai grai hu sipie. ¹⁹ Cub pui Tema pa yuh lai geu hu krax, jhak ka cub pui pa kaoh khaing haktiex Shebax ka daux krax pa keud pot jun pot tix. ²⁰ Kix koe krax laux rhawm, kheu jao keud pot jun pot tix, yam hoek kix tan kix koe krax kaig tua kah. ²¹ Grawh grang nawh pex ku kaux awm nang an mawh pa giex going, pex yaox ka krax tug kha aux mai pex lhat graung kah heue. ²² Mawh hoik sax ah aux nin, viex tix ceuceu hoek ka aux lie? Phan ang mawh nan, tan ti tawx totaix tix ceuceu son aux khaing daux sinngao pa koe maix lie? ²³ Phan ang mawh nan, taoh aux khaing daux tawm taix pui koeng lie? Phan ang mawh nan, laug ti teei aux khaing daux tawm taix pa nunai ka aux lie? ²⁴ "Gau ka aux mai aux tak ot yiien yawg tix, jhi aux yaox ka grawh grawng pa lud aux liak. ²⁵ Gumlox pa mawh meh mawh pa kied ting sibrawm tete, lox pa sibriem pex khankix koe bwanson ka ceu patix lie? ²⁶ Mawh keud maix tix sang deuh phimap ka lox sikah aux lie? lox sikah pui pa ang koe krax keud pot jun pot khankix awm bhaung heue. ²⁷ Mawh heue, pex hoik yuh pa kin pa kheem ka kawn doe mai pex coh ka paox grawm awm diang lai heue. ²⁸ Mawh kheu nan yam in koe krax fah rhawm sonsang jhak ka aux liak, grawh grawng nawh, mawh hoik sax pie lhen aux ka plak sivoe ngai pex lie? ²⁹ Yam in deeh keud ti yaox mhawm mhawm, paw yuh pa ang rahsee, yam in baox deeh keud ti yaox mhawm mhawm aux kawn cung sijung ka daux pa rahsee heue. ³⁰ Mawh koe pa ang rahsee piang dak aux lie? Mawh ang aux pon cim ti yaox mai pon gwieh tix tawng ka ceu pa koe phimap lie?"

¹ "Mawh ang kawn pui yaox tix taug mao yam ot tix piang haktiex in lie? Bawg yam singaix pa yaox nawh tix ot khankix, ang hoik awm pui pui vai tix kaux lie? ² Awm siliex tix kaux pa keud ce sonsang klip singaix mai awm pui vai tix kaux, pa ca keud ce ka son ngawh riang tix khankix, ³ mawh kheu nan aux hoik yaox ti kham geu pa kha rhawm tix kaing khix tix khix hoik tix khix mai krax pa taug mao aux daux ponsawm kawx hoik mawh nyum cie aux heue. ⁴ Yam it aux, aux ah nin, mawh sang kaoh aux yam mawx! mai mawh sang sidah sawm yam mawx lie? Grawh grawng nawh aux hoik tieh jee tieh blaong tix tom bah riang praix heue. ⁵ Graik mai phawng tiex khankix hoik kheem piang nex aux awm kraung ceep mai hak hoik bih tix mawh leem heue. ⁶ "Baux singaix aux nie lheu phai khaing breeing keei taing khankix mai hoik luan hu ka daux pa ang koe krax keud pot jun pot heue. ⁷ Kieh aux doh keud ka ju tix awm toek ex bhawm khaing, ngai aux tak ang lai baox yaox ka ceu pa mhawm heue. ⁸ Ngai pui pa yaox ka aux tak ang lai baox yaox ka aux, yam simi ngai Maix Cao piang aux, aux hoik grai hu heue. ⁹ Awm prung prang grai paiawm dee singai, mawh kheu nan pui pa lih ka daux simeeig khankix kawx tak ang lai yaox tix deeh hoek heue. ¹⁰ Nawh tak ang lai yaox tix deeh ing ka nyiex tix, dee ot dee koe nawh, tak ang lai tawng ka nawh tix bawg kawx heue. ¹¹ Mawh kheu nan aux tak ang lai nyeep ka jheeh tix mai khwan aux tak sikah ka daux pa taug mao tix, aux tak bawgbe ka daux pa laux rhawm tix heue. ¹² Khex mawh aux rawm sigrit sigra, phan ang mawh nan mawh siyawng pa deuh Maix Cao mawh cao pa pau tix kia piang aux lie? ¹³ Yam ah aux nin, dee it aux tak tawx krax nyawm rhawm aux mai ku it aux tak sang tawx krax pa nyawm pa nyiah aux, ¹⁴ khaix an Maix Cao ghlat aux ka krax pa camaox tix mai kieh aux yaoh yee ka riang susai khankix, ¹⁵ aux kawn laug ti teei krax pa yum mai krax yum tak nie lheu mhawm khaing krax pa lhawk aux ka si-ang tix heue. ¹⁶ Aux seeing ka krax im ju tix, aux tak ang lai im jheung jheung heue. Kieh aux ot nong nong, grawh grawng nawh baux singaix aux khankix hoik awm pa toek ex bhawm khaing heue. ¹⁷ Kawn pui mawh ceu patix, sonsang yaogyaw Maix Cao nawh mawh pa ting ceu mai Maix Cao lai koe rhawm piang nawh, ¹⁸ Maix Cao lai hoek fi ka nawh ku ngawb mai cheuk cheu ka nawh ku bawg yam lie? ¹⁹ Maix Cao tak ang jhak simi ka aux kawn sang rheung miex grheung, mai kieh aux ot nong nong tom sidah pon bleet aux rawm mia tix lie? ²⁰ Cao pa pau ka kawn pui eue, phan aux koe phimap, mawh sang caw aux ti yuh ceu patix ka Maix Cao lie? Maix Cao hoik kieh aux, awm mhai pa tang Maix Cao ti deuh kheu jao patix mai kieh aux mawh beeh glawm pa ciien ka son Maix Cao lie? ²¹ Kheu Maix Cao lai ang pluat ploi ka pa lud aux mai ang teei phimap aux luan kheu patix lie? Yam in aux tak sang it ka daux phawng tiex mai Maix Cao tak sawg aux plak ponngawb, viang mawh nan, aux ang lai ot heue."

¹ Khaix an Biladat ceu pui Shua pawk lox ah nin, ² "Mawh kawn sang sikah maix grawng ceu in miex grheung lie? mai lox jheeh maix khankix kawn sang awm bhaung ting miex grheung lie? ³ Mawh yuh Siyiex krax prawng ca tix ang rahsee lie? Phan mawh nan, mawh pluk pliak Siyiex pa ting sibrawm pa rahsee tix lie? ⁴ Phan kawn simex maix khankix yuh phimap mai phi lud ka Nawh Cao, Nawh Cao hoik teei ti tik kix kheu jao pa lud kix heue. ⁵ Phan maix tak sawg Siyiex ka daux krax pa singax rahsee rhawm tix mai khyox khaw ka cao pa ting sibrawm. ⁶ Phan maix hoik mawh pa singax mai pa rahsee, yam in Nawh Cao tak kaoh son maix tete mai kieh maix haok hwan ting lhaong ka daux krax pa rahsee can dee ot koe maix heue. ⁷ Yam jah, viang maix hoik mawh pa iak kawx, dee sidah sidu maix tak ting lhaong haok hwan heue. ⁸ Yuh bwanson chawk cheng ti yaox ka grawng pa hoik luan ka kuad riex ju mai keud ti yaox ka can ceu pa hoik gau keeing maix khankix mawh patix, ⁹ grawh grawng nawh, ex mawh kawn pa keh kawx ngie khaing mai ex ang tawng ka tidtix, mawh kheu singaix baux ju ex piang haktiex in, mawh ngie pang peue khaing heue. ¹⁰ Mawh ang kix gau maix mai ang krai maix mhong lie? mai ang kix krai lox pa tawng kix daux rhawm tix lie? ¹¹ Mawh chix kuah pang jo ka dah dee ang tiex leet lie? mai mawh chix klai rib kuah hawt klawng yam ang rawm koe lie? ¹² Viang ang kid glang yam kawn klai lhax kawx, an kawn nie yie fit sivoe pang tang ceu heue. ¹³ Awm an daux krax hu can pui pa piawm ka Siyiex khankix mai krax keud pot jun pot pui kin jhawm khankix tak laux tak leeing, ¹⁴ Can ceu pa een kix rhawm tix ka tak mawh pa dud mai can ceu pa deuh kix rhawm tix kawx tak awm nyiex greeih heue. ¹⁵ Nawh peung ka nyiex tix, viang mawh nan, ang kaux cong heue. Nawh giex ka nyiex an, viang mawh nan nyiex an ang kaux heue. ¹⁶ Nawh ting lhaong mai klai ka daux koek mai kak nawh khankix dih tix tah hu ka daux sipeem nawh heue. ¹⁷ Riah nawh hoik vung viien ti ka vung viang pum simaox mai ot ka sinax rang khankix heue. ¹⁸ Phan nawh mawh pa laux leeing khaing daux dee ot tix, khaix an dee an tak thiang ti tik nawh ah nin, aux ang sax yaox maix heue. ¹⁹ Jhak heue, krax pa gaux rhawm nawh, nawh tak awm in mai khaing ka daux haktiex nawh pui tang ceu tak kuah ka heue. ²⁰ Jhak heue, Siyiex tak ang lai tik vud ka pui pa kaux sijax mai rahsee mai Nawh Cao ang lai teem ka pui pa caox caig khankix heue. ²¹ Nawh Cao tak sang kieh jheeh maix nyiah mai kieh siyieb jheeh maix koe krax pa gaux rhawm heue. ²² Can pui pa koeng ka maix tak ceep tix ka pa kaig tua mai dee ot koe pa caox caig tak hoek krax som nai heue."

¹ Yawbax deeh pawk lox ah nin heue. ² "Mawh heue, aux tawng lox an mawh pa mawh meh, viang mawh nan, sang pon rahsee kawn pui sivoe ngai Siyiex miex ding? ³ Phan Siyiex koe rhawm ti sang deuh phimap ka pui tix kaux kaux, khaing ka daux tix rheng bawg nawh tak ang lai deeh pon pawk ka Nawh Cao pie tix bawg kawx. ⁴ Siyiex mawh pa koe pingnya pa daox deng, koe sibrawm mai ting riang rao heue. Mawh pui mawx pa sang pon tiextu mai pon pex ka Nawh Cao? ⁵ Nawh Cao gah gawng lua mai kix ang tien tawng, Nawh Cao pluk pliak ti tik kix ka daux pa song rhawm tix, ⁶ Nawh Cao yung yang haktiex kieh greed khaing dee ot nawh mai rong khankix kawx pung pang heue. ⁷ Nawh Cao tawx lox ka singaix mai ang kieh lih, Nawh Cao tie ka simuing khankix, ⁸ Nawh Cao nih ti kheem ka raoma mai dig piang pukpak rawm sigrit sigra khankix, ⁹ Nawh Cao hoik phan hoik deuh simuing Ashax, simuing Khatilax mai simuing Khimax, an khankix mai cub simuing pa koe ka plak seh, ¹⁰ Nawh Cao yuh kaing ceu pa kied ting lhaong pa ang ex lai dak pon tawng, Mawh heue, krax pa daox deng mawh pa ang lai uik simin ka heue. ¹¹ Nawh Cao hu ka plak sivoe aux, aux ang chix yaox ka Nawh Cao, Nawh Cao luan hu sivoe aux mai aux ang tien tawng kah. ¹² Phan Nawh Cao teei ti priex hu dee singai, pui mawx pa sang pon tiebtie Nawh Cao lie? Mawh mawx pa pon ah nin ka Nawh Cao yuh Maix Cao patix lie? ¹³ Phan Siyiex ang deeh yoi krax pa song rhawm tix, cub pa yuh paox pie pa lhaong rhawm khankix, tak phawng laux greem Nawh Cao heue. ¹⁴ Ka piang an aux tak sang deeh pawk ka Nawh Cao yuh ka mawx? Laug ti teei gumlox pa yuh ka mawx sonsang krai sivoe ngai Nawh Cao? ¹⁵ Viang aux rahsee kawx aux ang lai pon pawk lox ka Nawh Cao, aux tak khyox khaw ka cao pa prawng see rahsee piang aux heue. ¹⁶ Viang Nawh Cao deeh pawk lox pa kok aux kawx aux tak ang lai yum rhawm, ka nghiet Nawh Cao ka lox tix heue. ¹⁷ Grawh grawng nawh, Nawh Cao yuh aux laux leeing ka bhaung ting mai baox kieh jhawm saux haoh hun piang nex aux, pa ang koe grawng koe ceu heue. ¹⁸ Nawh Cao ang tawx akhwang sang sileed aux bhawm tix mai kieh jhawm saux pa kiied kin naog piang aux heue. ¹⁹ Phan ah een rhawm tix ka riang rao tix ceuceu, Nawh Cao mawh pa kiied ting riang rao, mai phan ah mawh pa rahsee, mawh pui mawx pa tak sang mawh mhai rug plak aux ka daux nyiex prawng see lie? ²⁰ Viang aux ah mawh tix pa rahsee kawx, jheeh aux mawh pa ciyang ka aux, viang aux ah mawh tix pa hoik grum naog kawx, rhawm pa kawk vawk aux hoik si dawng sivoe Nawh Cao heue. ²¹ Phan aux mawh pa grum naog kawx, aux ang nyang tawng ka tokaux cao tix, aux laux rhawm ka ju cao tix heue. ²² Awm lox pa sang krai aux khankix mawh yuh nin, Nawh Cao tak yuh pui pa ang koe dee deuh phimap mai khawm pui caox caig khankix laux leeing heue ²³ Phan jhawm saux preng mawh pa viex krax yum hoek tix taix neh, Nawh Cao tak nyiah ka krax kham geu pui pa ang koe phimap heue. ²⁴ Haktiex in hoik ap ti tawx ka daux tawm taix pui caox caig heue. Nawh Cao tieb thox ngai cao prawng see khankix heue. Phan ang mawh Nawh Cao, mawh pui mawx pa sang pon prawng see an lie? ²⁵ Singaix aux nie lheu phai khaing pui pa to tix kaux, kix to dee singai kawx mai ang yaox ka pa mhawm heue. ²⁶ Kix nie lheu phai khaing reu ting mai luan hu awm teei klang krih totiag ih cao tix heue. ²⁷ Phan aux ah nin, aux tak piawm ka lox riag yo tix mai aux tak peeik ti tik ngai baoh pa khi rhawm tix mai deeh ceep ka ceu pa nyawm rhawm, ²⁸ aux lhat graung ka ceu pa kham geu tix khawmuik, aux tawng ka ang Maix Cao lai giex ti deuh aux awm pui pa ang koe phimap heue. ²⁹ Phan aux yaox mawh tix pui koe phimap, yuh ka mawx aux lai kawn coca ti yuh kaing pa giex going kheu jao patix lie? ³⁰ Phan aux sigrhah tokaux tix ka rawm rha mai khoek taix tix sonsang singax ka sidah khoek kawx, ³¹ Maix Cao tak nyhot aux laig ka daux tiex mai kraung ceep aux khankix tak seeing ka aux. ³² Grawh grawng nawh, Nawh Cao ang mawh kawn pui awm aux, sonsang pon pawk aux lox Nawh Cao mai ex tak hu ka dee prawng see tau mai paox tix heue. ³³ Ang lai koe pui pa sang ah grawng ceu an ka sinax ex, pa tak sang deuh taix tix piang ex khawm ra lie? ³⁴ Kieh Nawh Cao teei khaox gix tix hu singai khaig aux mai paw kieh aux lhat graung ka pa ghlat Maix liak. ³⁵ Khaix an aux tak sikah ka daux pa ang koe krax lhat graung ka Nawh Cao, viang mawh nan rhawm aux ang lai koe yuh nan tete heue.

¹ "Khwan aux hoik ngau ka ju aux, aux tak kieh ceu pa ngau tix hoek piang tix, aux tak sikah ka daux krax pa kied song rhawm khwan tix heue. ² Aux tak ah nin ka Siyiex, paw nyang ciyang aux liak jhi aux yaox grawng deuh Maix Cao phimap ka aux heue. ³ Mawh yaox Maix Cao ceu pa yeen ya in khankix mawh pa mhawm mai seeing brai ka kaing pa yuh Maix Cao ka taix tix mai khaw tix tawx bwan piang krax keud pui caox caig lie? ⁴ Mawh koe ngai Maix Cao awm nex nham lie? Phan ang mawh nan mawh yaox Maix Cao awm pa yaox kawn pui lie? ⁵ Mawh awm singaix Maix Cao singaix kawn pui khankix lie? Mawh awm num Maix Cao singaix sawm simex ting riang rao tix kaux lie? ⁶ Kheu Maix Cao lai sawg ka krax pa lud aux mai sonsang yaox tix ka phimap aux, ⁷ viang Maix Cao tawng ka ang aux mawh pui lud mai ang lai koe pui tix kaux kawx pa sang taoh aux lih khaing daux tawm taix Maix Cao. ⁸ Plawng taix Maix Cao hoik phan hoik yuh pakpeung aux koe mhawm mhawm, viang mawh nan, Maix Cao tak sang deeh yuh aux laux leeing heue. ⁹ Doh keud ka hoik phan yuh Maix Cao aux ka tiex heue. Maix Cao sang deeh kieh aux mawh phawng tiex lie? ¹⁰ Ang hoik mawh Maix Cao pa rauk aux lih awm rawm teeih mai kieh aux kiien awm klon rawm teeih, ¹¹ mai lhop aux ka hak mai nex mai kleuk si-ang mai siniag aux khankix kaux tau ang mawh lie? ¹² Maix Cao hoik kieh aux im ju mai hoik nawb bwanson ka aux mai Maix Cao hoik liem lia kia ngien ka khwan aux heue. ¹³ Ceu inkix hoik mawh pa mox Maix Cao ka daux rhawm tix, aux hoik tawng mawh in pa koe tau mai Maix Cao, ¹⁴ phan aux lud, Maix Cao hoik mhai ti deuh ka aux mai ang pluat ploi aux khaing krax pa lud aux heue. ¹⁵ Phan aux mawh pui caox, aux tak pon krax kha rhawm, viang aux rahsee kawx, aux ang lai pon yaog kaing tix heue. Aux hoik naog ka pa kaig tua, jhak ka pa laux rhawm aux liak. ¹⁶ Phan aux yaog tokaux tix lhaong, Maix Cao tak leue aux awm sivai sangsi pa kied kwa mai Maix Cao deeh jhi krax lhat graung pa daox deng tix ka aux heue. ¹⁷ Maix Cao hoik plak jhi mhai rug pa lud aux mai kieh krax pa song rhawm Maix Cao nie haoh hun piang aux, Maix hoik khre naing pa khraox ka son aux ku jheeng heue. ¹⁸ Kheu Maix Cao lai viex aux lih khaing daux vaig miex tix? Phan ang mawh nan aux hoik yum ka ang pui nyang yaox aux ka ngai tix heue. ¹⁹ Pa ang caw ti mawh ka aux hoik lih ti mawh. Pa teei aux lih khaing daux vaig miex tix mai hoek ka daux simeeig heue. ²⁰ Singaix sawm khankix hoik mawh pa dawg sawn aux ang mawh lie? Prah aux ot nong nong, sonsang koe krax nyawm rhawm aux daux bawg yam pa deuk ceeix, ²¹ sivoe sang hu aux ka dee pa ang aux lai yaox tix ing, ka haktiex pa faik mai ka veei pa yum khankix, ²² pa mawh haktiex pa faik awm ponsawm mai veei yum, pa ang lai koe ceu pa riang pie tix bawk kawx, ka dee mawh pa riang an awm pa faik heue."

¹ Khaix an Zopha ceu pui Nemat pawk lox ah nin, ² "Mawh sang koe bwanson ka pawk tix lox lie? Mawh sang khaw pui tie lox sikah ti pon krax pa pluat ploi lie? ³ Mawh sang kieh maix pui yiien yawg ka lox pie tix lie? yam sikah maix ka lox sibriem, mawh ang pui tix kaux kawx kaig ka lie? ⁴ Grawh grawng nawh maix hoik ah nin, been cie aux hoik rahsee mai aux mawh pa singax ka plak sivoe ngai Maix Cao heue. ⁵ Viang mawh nan kieh mawh Siyiex pa ah ka maix mai paoh siyieb jheeh tix yuh maix laux, ⁶ sonsang jhi Nawh Cao maix yaox ka pingnya cuyi pa raux mox khankix, mawh kheu nan phan Nawh jhi maix yaox ceu an khankix viang maix keung tix kham geu ka phimap tix kawx maix tak tawng grawng ang lai tawx phimap ka maix heue. ⁷ "Mawh pon sawg maix ka ceu pa kied raux Siyiex lie? Mawh pon yaox maix ka mee pa hoik tat hoik deuh cao pa ting sibrawm lie? ⁸ An khankix mawh pa nie lheu lhaong khaing raoma, mawh sang pon yuh maix tix lie? Nie lheu khaing meung yum, mawh sang pon tawng maix yuh ka mawx lie? ⁹ An khankix phan tiag ti yaox mawh pa nie lheu lang khaing haktiex mai nie lheu vieh khaing rawm sigrit sigra heue. ¹⁰ Phan Nawh Cao giex tix laung maix daux thawng mai prawng see ka maix, mawh pui mawx pa sang pon tiebtie ka Nawh Cao lie? ¹¹ Grawh grawng nawh, Nawh Cao tawng ka krax pie lhen pui khankix, Nawh Cao yaox grawng pa caox caig yuh kix heue. Mawh ang Nawh Cao lai tiag cheu ti yaox grawng an khankix lie? ¹² Grawh grawng nawh pui daox pui aw tix kaux tak lih ti koe pingnya cuyi, yam hoik keh kawn la tiag tix mu ti mawh pui tix kaux heue. ¹³ "Yawbax eue, deuh rhawm maix rahsee mai deeh hoek sawg ka Nawh Cao, ¹⁴ phan krax lud koe ka daux tawm taix maix mai teei ti tik khaing maix dee singai mai paw kieh pa caox caig khankix ot daux nyiex gox maix. ¹⁵ Khaix an maix tak pon yaog ngai tix ka daux krax pa ang tix koe pa seeing brai, mawh heue maix tak mawh pa kaux cong mai ang koe krax lhat graung, ¹⁶ Grawh grawng nawh maix tak sang piawm ka krax kha rhawm tix mai doh deud ka ceu an khankix hoik luan hu awm rawm dee singai, ¹⁷ ju maix tak mawh pa nie lheu riang khaing pa riang yam jung singaix heue. Viang hoik faik kawx maix tak sang awm pa riang ponngawb heue. ¹⁸ Maix tak sang yaox ti ot ka daux pa yiien yawg, kheu koe krax keud pot jun pot tix, mawh heue, viang maix hoik som nai yam in kawx mai maix tak yaox tix laux lee ka daux pa yiien yawg heue. ¹⁹ Yam it maix pui tix kaux kawx, tak ang pon yuh maix lhat graung, mawh heue, pui tom nie tak mhaing krax teem ka maix heue. ²⁰ Viang mawh nan, ngai pui caox khankix tak sang iak riang iak rao mai kix ang lai yaox daux krax klawd tix mai krax keud pot jun pot kix tak mawh pa som nai tau mai ju kix heue."

¹ Khaix an Yawbax pawk lox ah nin, ² "Lox pa krai pex kawx mawh lox kawn pui mai yam yum pex, pingnya cuyi pex tak yum tau mai pex heue, ³ Viang mawh nan aux hoik koe krax tawng yung awm pex, ang aux lai mawh pa beuh khaing pex heue. Mawh pui mawx pa ang tawng ka can ceu pa krai pex inkix lie? ⁴ "Aux mawh pui pa hoik kham geu lox pa ne raw, khaing paox plawg khankix, yam kok yo aux ka Siyiex mai Nawh Cao pawk lox rawg aux bwan ka daux pa rahsee mai ka daux krax pa ang koe pa deuh phimap, hoik pon ka pa nyiah pui mai ka lox pa sibriem heue. ⁵ Daux pa keud pui pa magmi khankix hoik awm ceu pa map nai mai pa brah son, in khankix hoik mawh pa khre rien tix sonsang cang klad pui heue. ⁶ Nyiex gox pui tud rhim khankix tak koe ceu pa nhim ka mai can pui pa so Siyiex song rhawm tak yaox ti ot daux pa yiien yawg, mawh kheu viex kix siyiex tix hawt taix tix heue. ⁷ Viang mawh nan chawk cheng ti yaox ka totiag khankix mai kix tak gau pex ka mai sim sai raoma khankix tak krai pex mhong, ⁸ phan ang mawh nan chawk cheng ti yaox ka haktiex mai kix tak gau pex ka, mai kax daux rawm sigrit sigra tak sang krai pex mhong sidawng laing laing heue. ⁹ Ka daux sinax ceu in khawmuik mawh pui mawx pa ang tawng mawh taix Siyiex pa phan ka lie? ¹⁰ Ka daux can pa koe ju kuceu mai kawn pui pa toek bhawm tix khankix koe ka daux tawm taix Nawh Cao ang mawh lie? ¹¹ Ang mawh yhaok pa cheuk ka lox sikah pui mai ang mawh jheeh khankix pa cim ka jhawm priex lie? ¹² Pui pa riex ju naog mai pingnya cuyi mai pui lang ju kawx naog ka krax tawng yung heue. ¹³ Nawh Cao naog ka pingnya cuyi mai ka riang rao, Nawh Cao chix tawx rhawm keud dong sawn mai krax tawng yung heue. ¹⁴ Phan Nawh Cao yieh ka ceu an, an tak ang lai pon deeh sum ka, phan Nawh Cao phyawk laung ka pui tix kaux, ang lai chix koe krax luad luan heue. ¹⁵ Phan Nawh Cao thox ti deuh ka rawm khankix, rawm tak hit, phan Nawh Cao deeh ploi lih tak kheem ka haktiex heue. ¹⁶ Nawh Cao hoik naog ka sibrawm mai pingnya cuyi heue. Pa pie lhen mai pui pie lhen khankix, koe ka daux taix Nawh Cao heue. ¹⁷ Nawh Cao teei ti tik ka pingnya cao kwang haktiex khankix mai kieh cao prawng see khankix yhot vaw ka heue. ¹⁸ Nawh Cao pluat ara simiang khankix mai phyawk nyoi kix ka maox rawd nyoi heue. ¹⁹ Nawh Cao teei ti tik ka cao giex kaing li khankix hu awm pui tud rhim mai kieh pui ting riang rao khankix hoek krax som nai heue. ²⁰ Nawh Cao kieh pui koe sibrawm lox sikah yiien yawg tix mai teei ti tik ka pingnya krax keud kuad song khankix hu singai heue. ²¹ Nawh Cao kieh kawn laux Simiang khankix kaig tua mai teei ti tik ka kraung naing pui ting riang rao khankix heue. ²² Nawh Cao plak sidawng grawng ceu pa kied raux khankix khaing daux pa faik mai viex veei pa yum deeh hoek ka daux pa riang heue. ²³ Nawh Cao yuh meung haktiex ting lhaong mai deeh yuh kix laux leeing, Nawh Cao yuh meung haktiex khankix vieh mai kieh kix pung prang hu dee singai heue. ²⁴ Nawh Cao teei ti tik krax tawng yung khaing cao kaing ting pui khankix piang haktiex, kieh kix vung viang ka daux tiagtu pa ang krax lai koe heue. ²⁵ Kix pupi tix hu ka daux pa faik tau mai ang koe pa riang mai Nawh Cao kieh kix hu tutiex awm pui yoek heue.

¹ Jhak heue, Ngai aux hoik yaox in khawmuik, yhaok aux hoik mhong mai hoik tawng ka in heue. ² Can ceu pa tawng pex aux kawx tawng, aux ang mawh pui beuh khaing pex heue. ³ Viang mawh nan aux tak sikah ka cao pa koe sibrawm mai aux tak koe rhawm ti kum grawng an tau mai Siyiex heue. ⁴ Viang mawh nan pex mawh pa khre rien tix ka pie lhen, pex mawh cao sidah pa ang chix tix shiao heue. ⁵ Phan pex ot yawg tix mai pa ot yawg an tak awm koe pingnya pex heue. ⁶ Yam in nghiet ka grawng pa krai aux khankix mai priex ka gumlox pa khyox khaw siyieb jheeh aux khankix heue. ⁷ Mawh sang sikah maix lox caox ka Siyiex mai krai lox pie lhen khankix ka Nawh Cao lie? ⁸ Mawh sang jhak maix plakngai Nawh Cao lie? Mawh sang koe krax pa thung thiang maix ka Siyiex lie? ⁹ Phan Siyiex jawg tix jhak ka maix mhawm mhawm sang yaox Nawh Cao ceu pa mhawm ka maix tix ceuceu lie? Mawh keud maix tix pon pie lhen ka Siyiex awm pon pie lhen maix ka pui tix lie? ¹⁰ Phan pex mox tix jhak ka plakngai pui, Nawh Cao tak sidiex ka pex tete heue. ¹¹ Mawh ang pex koe krax lhat graung ka sibrawm min plakngai Nawh Cao mai ang lhat pa yaox yee Nawh Cao glup piang pex lie? ¹² Gumlox been kab pex khankix, ang koe bwanson awm nyaox, guh veng pa tiebtie pex tix ka khankix, tak awm guh veng glaox heue. ¹³ Ot yiien yawg tix ha mai tawx akhwang kieh aux sikah, khaix an kieh ceu pa sang mawh khankix lih ti mawh heue. ¹⁴ Aux tak khliak nex cao tix ka rhang tix mai giex ju tix ka taix ti yuh ka mawx lie? ¹⁵ Viang Nawh Cao pah ka aux mai ang lai koe krax keud pot jun pot kawx, viang yuh nan kawx, aux tak sang krai grawng pa yuh tokaux cao tix khankix ka plak sivoe Nawh Cao heue. ¹⁶ Nawh Cao tak mawh krax pa taoh son aux, mawh kheu pui tud rhim ang pon hoek ka plak sivoe Nawh Cao heue. ¹⁷ Jawg tix nghiet ka lox aux mai kieh lox pa krai aux laig daux yhaok pex heue. ¹⁸ Yam in jhak heue, aux hoik khre rien see son tokaux tix, mawh kheu tawng aux mawh tix pa caw heue. ¹⁹ Mawh pui mawx pa sang pon krai dee lud dee lud aux lie? Phan yuh nan aux tak ot yiien yawg tix mai aux tak kham ti yum ka heue. ²⁰ "Siyiex eue, kieh aux rawg tix chawk ka Maix ra ceu liak, khaix an aux tak ang lai mox ti ka plak sivoe ngai Maix Cao, ²¹ deeh yoi taix Maix Cao kieh singai khaing aux mai paw ghlat aux ka pa lhat graung Maix Cao liak? ²² Khaix an deeh kok aux mai aux tak deeh pawk, phan ang mawh nan kieh aux sikah sivoe Maix Cao deeh pawk ka lox aux liak? ²³ Phimap krax lud aux hoik koe miex ding? kieh aux tawng ka krax pa lud tix mai ka phimap pa hoik yuh tix khankix heue. ²⁴ Maix Cao lai mox pakngai tix mai keud aux awm pui koeng Maix Cao yuh ka mawx lie? ²⁵ Mawh sang ghlat Maix Cao ka lhax khaox phlu bhaung siyaoh lie? sang hawt pheet Maix Cao khaix brex nghox pa kroh an lie? ²⁶ Grawh grawng nawh Maix Cao hoik tiiem ceu pa sang lang teung kin khankix piang aux mai deeh kieh aux kham sinngao phimap pa yuh tix yam mawh kawn nyawm awn ju heue. ²⁷ Maix Cao hoik sau ti deuh gang ka caong aux mai pau tix kia krax hu aux khankix heue. Maix Cao hoik tat ti deuh mee ka diang caong hu aux khankix heue. ²⁸ Pui pa yaox ti kham ceu an tak awm ceu pa rham rhaw mai awm kraung ceep pa ih greeing heue.

¹ "Pui pa keh khaing bun mawh pa dawd ju mai mawh pa naog ka krax kha rhawm heue. ² Nawh lih pruh awm tai mai fit hu sipie, nawh to awm veei pang peue mai ang lai kaog lai nien heue. ³ Mawh sang blah Maix Cao ngai tix jhak piang pui yuh nan mai viex aux hoek sonsang prawng see tau mai Maix Cao lie? ⁴ Mawh pui mawx pa sang pon teei ceu pa singax lih khaing daux pa ang singax lie? Ang koe pie tix kaux kawx heue. ⁵ Baux singaix cie nawh khankix, hoik mawh pa tat ti deuh, bawg yam khix singaix ot nawh khankix mawh pa koe tau mai Maix Cao, Maix Cao hoik tat ti deuh baux yam nawh pa ang nawh lai pon yaox tix luan ka heue. ⁶ Veeh ngai tix singai khaing nawh, sonsang yaox nawh tix laux lee yiien yawg tix ka daux singaix nawh, awm pui vai tix kaux heue. ⁷ Grawh grawng nawh viang kid ti tik ka khaox an kawx kawn koe krax keud pot jun pot ka khaox an mai khaox an tak kawn sang glaoh mai glaoh awn ang jud heue. ⁸ Viang riah khaox an hoik mawh pa riex ka daux tiex kawx mai phan ngu khaox an yum piang tiex kawx, ⁹ yam haok bhawm rawm an tak deeh glaoh mai deeh kieh glaoh khaox lih mawh awm gaw khaox tix gawng heue. ¹⁰ Viang mawh nan pui tak yum mai grhup rham, khaix hoik dud rhawm nawh mai nawh sang ot dee mawx lie? ¹¹ Awm hoik jud rawm khaing rawm sigrit sigra mai klawng pa hit pa kroh rawm khaing, ¹² Mawh kheu nan pui pa laig it, ang lai deeh kaoh heue. Tom hoek bawg yam ang raoma baox lai koe, kix tak ang lai siduad mai ang lai kaoh khaing pa it tix heue. ¹³ Phan Maix Cao mox aux ka daux simeeig sang mawh pa mhawm miex ding, tom hoek bawg yam ang krax song rhawm Maix Cao nyang bax luan, khaix an deuh bawg yam pa doh keud Maix Cao ka aux liak. ¹⁴ Phan pui tix kaux hoik yum, mawh kawn sang baox im nawh lie? Aux ca kawn krox jun ka bawg yam singaix pa kha rhawm tix, tom sidah hoek bawg yam deeh tieh loh aux tokaux tix heue. ¹⁵ Maix Cao tak kok mai aux tak deeh pawk ka Maix Cao, Maix Cao tak koe rhawm piang kaing pa yuh Maix Cao ka taix tix heue. ¹⁶ Grawh grawng nawh yam in Maix Cao hoik simin ka diang caong hu aux khankix, viang mawh nan, paw jhak piang phimap aux liak! ¹⁷ Krax pa lud aux khankix hoik nyeep tix daux hau mai tawk cum ka, Maix Cao hoik vien ti deuh phimap pa lud loe aux heue. ¹⁸ "Viang mawh nan awm grhup gawng mai phawng hu mai awm gah greed rang khaing dee ot tix, ¹⁹ awm klah rawm ka simaox hu dee singai mai awm rawm lhiex pa thah phawng tiex khaing haktiex, mawh kheu nan Maix Cao tak yuh krax keud pot jun pot kawn pui laux leeing heue. ²⁰ Maix Cao pex ka nawh leeing ju mai nawh tak grai grup, Maix Cao tieh loh riang pakpeung nawh mai ploi nawh hu dee singai heue. ²¹ Viang kawn simex nawh hoek ka daux pa koe min kawx mai nawh ang lai tawng ka kix, viang kix hoek daux pa yeen tix tiem kawx mai nawh tak ang lai simawd tix tawng an kix heue. ²² Viang mawh nan nawh tawng ka kied saux kraing ka tokaux tix mai khwan ju nawh kawx hoik ngia ka tete heue."

¹ Khaix an Eliphat ceu pui Teman pawk lox ah nin, ² "Mawh khaw pui pa koe pingnya cuyi tix pawk lox pa ang koe tau mai bwanson mai kieh tokaux tix naog ka bhaung pa hoek khaing plak lih singaix lie? ³ Mawh khaw nawh ti kum grawng lox pa ang koe dee bleeh, phan ang mawh nan ka lox pa ang koe bwanson lie? ⁴ Krax pa lhat graung maix ang koe bwanson mai mawh pa tieb krax rawg bwan, ka plak sivoe Siyiex heue. ⁵ Grawh grawng nawh krax lud hoik gau ka jheeh maix mai maix laug ti teei dak pa vawk pa kawk heue. ⁶ Jheeh cao maix ciyang ka maix mai ang lai mawh aux, siyieb jheeh cao maix mawh pa kham sakse ka maix heue. ⁷ "Mawh maix pui pa liang ti keh lie? Phan ang mawh nan, mawh hoik phan hoik deuh ka sivoe ka sang phan gawng lua khankix lie? ⁸ Mawh hoik sax mhong maix ka kaing pa khre Siyiex lie? Mawh pon tiag maix mee koe pingnya cuyi tokaux tix lie? ⁹ Tawng maix ceu patix pa ang ex tawng ka lie? Tawng maix ka ceu patix pa ang koe ka daux ex lie? ¹⁰ Pui paing hauk kaing mai pui riex ju, pa nie kuad khaing keeing maix koe ka daux sinax ex, ¹¹ mawh keud maix krax nyawm rhawm pa tawx Siyiex maix mawh pa iak mai hoik koe gumlox ceu pa mox an tau mai maix lie? ¹² Kheu maix lai kieh tokaux tix hawt ka rhawm tix mai lud loe lie? blaig ngai maix tix jhak ka ceu patix, ¹³ maix lai kieh khwan ju tix tieh feen ka Siyiex mai kieh lox ceu in lih khaing jheeh tix lie? ¹⁴ Kawn pui mawh pa yuh ka mawx nawh sang chix singax lie? nawh mawh pui pa keh khaing bun, nawh sang chix rahsee yuh ka mawx? ¹⁵ Jhak heue, kawncau Nawh Cao kawx Nawh ang een rhawm kah, mai kix kawx ang lai mawh pa singax ka daux ngai Nawh Cao, ¹⁶ mai pui nyaux ka phimap pa seeing brai awm rawm, mawh heue, kix mawh pa caox caig mai ang koe bwanson tidtix heue. ¹⁷ "Aux krai ka maix nghiet lox aux, aux krai can ceu pa tawng pa yaox tix khankix ka Maix, ¹⁸ can ceu pa krai pui ting pingnya cuyi an khankix, ang lai mawh pa mox tix, pie tix ceu kawx mai an kix hoik mawh pa rieb kix ti teei khaing keeing kix, ¹⁹ Kix mawh pa tang ot ka haktiex cao tix nong nong mai pui tang ceu ang luklaig tix ot ka daux sinax kix, ²⁰ pui caox caig an tak yaox ti kham geu ka jhawm saux jhawm nyia tom sidah ju tix mai pui pa map pa yeen ya ka pui khankix tak ang lai tawng ka singaix ju tix heue. ²¹ Lox pa lhat graung koe ka daux yhaok nawh, yam koe krax pa haok hwan ting lhaong nawh pui pa yuh laux tak hoek ka nawh heue. ²² Nawh ang lai koe krax keud pot sonsang luad luan tix, khaing daux pa faik mai vaig lawm hoik jawm ka nawh heue. ²³ Nawh vung viang tix hu sawg ka pa ih ah nin, mawh koe an dee mawx lie? Nawh tawng ka koe bawg yam pa faik an ka son nawh heue. ²⁴ Krax kha rhawm mai krax laux rhawm khankix mawh pa kieh nawh koe krax lhat graung, kix pex ka nawh awm hoik khre rien simiang tix ka son naing heue. ²⁵ Grawh grawng nawh, nawh nyeu taix tix sonsang tiebtie ka Siyiex mai tang yuh tokaux tix kaux cong, khaing cao pa ting sibrawm, ²⁶ Nawh to ka daux pa kiien ngawg tix sonsang tieh feen ka Nawh Cao, tau mai kraung tieb pa pu tix heue. ²⁷ Mawh kheu ngai baoh nawh hoik naog ka pa kluing klon bee vaig nawh hoik rob tix ka nyoi nawh kawx, ²⁸ Nawh yaox ti ot ka daux veng pa yiien mai ka daux nyiex pa ang pui lai ot ka tix kaux kawx pa dex sang goh sang laux heue. ²⁹ Nawh tak ang lai chix mi mai krax magmi nawh tak ang lai pre hu mai kraung khrai sinngao nawh khankix, tak ang lai mawh pa tah hu piang haktiex heue. ³⁰ Nawh tak ang lai pon lih khaing daux pa faik, rao ngu tak voeg kak nawh khankix kroh mai bhawm pa kaoh khaing jheeh Nawh Cao tak phlu nawh luan hu dee singai heue. ³¹ Paw kieh nawh een rhawm tix ka ceu pa giex going mai deeh pie lhen ka tokaux cao tix, mawh kheu pa giex going an tak mawh totaix cie nawh heue. ³² An tak mawh pa sidah sivoe ang bawg yam cie nawh nyang hoek mai kak nawh khankix tak ang lai klai heue. ³³ Nawh tak yung yang ka plix siiet pa ang nyang teem cie nawh khrum ka nhu plix siiet mai awm cia kho tai khaox Sanlun heue. ³⁴ Grawh grawng nawh cub pui tud rhim khankix tak mawh pui nieh mai ngu tak proe ka nyiex gox pui pa ih mau cun praok heue. ³⁵ Kix nghe krax pa kha rhawm mai keh ceu pa giex going, vaig kix hoik koe kaux ka ceu pie lhen heue.

¹ Khaix an Yawbax pawk lox ah nin, ² "Aux hoik dawg mhong lox ceu ankix, krax khu pex rhawm aux mawh krax taug mao ka aux heue. ³ Mawh ang lox giex going pa phlu awm bhaung lai chix uik lie? mawh ceu patix pa so ka rhawm maix sonsang deeh pawk maix lox yuh nin lie? ⁴ Aux kawn pon sikah awm pon sikah pex, phan ju maix ot ka dee ot ju aux, aux kawx chix pon pum lox piang pex mai pon vuvied kaing tix ka pex, ⁵ Viang mawh nan aux tak kieh pex koe riang, ka jheeh tix mai krax pa nyawm rhawm khaing daux siyieb jheeh aux, tak sang deeh kieh pa laux rhawm maix moi dieh ka heue. ⁶ Viang aux sikah kawx krax laux rhawm aux ang nyang moi dieh mai viang aux ang nye nyux kawx, aux tak sang moi ka miex ding lie? ⁷ Viang mawh nan Nawh Cao hoik kieh aux taug mao, Maix Cao hoik kieh paox grawm aux khankix yiien heue. ⁸ Maix Cao hoik sau gang ka aux mai an tak mawh pa kham sakse piang aux mai tokaux pa krawx rhao aux kaoh tieh feen aux, mai baox nie kham sakse ka plakngai aux heue. ⁹ Nawh Cao riah ti tik aux ka daux pa song rhawm tix mai koeng ka aux, Nawh Cao greeik rhang tix ka aux, pui koeng aux hoik blaig ngai tix piang aux heue. ¹⁰ Kix ang moing tix ka aux, kix simang ka sibax aux, sonsang kaig tua aux, kix kraix khrawm paox tix deeh tieh feen ka aux heue. ¹¹ Siyiex hoik ap tix tawx aux ka pui pa ang rahsee mai hoik deeh veeh tix tawx aux ka daux tawm taix pui caox caig khankix heue. ¹² Yam ot aux yiien yawg tix, Nawh Cao raig ka aux, Nawh Cao giex ngawg aux mai siblat aux tom phawng, Nawh cao hoik tang ti deuh aux mawh mhai son Nawh Cao, ¹³ cao puing ak Nawh Cao khankix hoik lai lawm ka aux, Nawh Cao kieh te an kix klah daux sok rhawm aux mai ang lai koe krax caux rhawm, Nawh Cao hieh ti tik ghin aux piang tiex heue. ¹⁴ Nawh Cao kieh aux mat mai baox lux ka dee mat an; Nawh Cao breeng ti yuh aux laux awm pui naing pa vao pa kwa heue. ¹⁵ Aux hoik caing tix ceep chee rhix pa kawm piang nex tix mai deuh kaing tix ka daux phawng tiex heue. ¹⁶ Ngai baoh aux hoik raoh kheu yiiem tix mai veei krax yum hoik kheem ka siyieb ngai aux, ¹⁷ pie ka daux tawm taix aux kawx ang koe ceu pa kin mai lox bwan rawg aux mawh pa singax heue. ¹⁸ "Haktiex eue, paw doh kheem ka nham aux mai paw kieh lox yiiem yo aux ang koe dee laux lee tix liak. ¹⁹ Pie tom yam in mhai rug aux hoik koe ka daux raoma tete mai kaw pa kham sakse aux koe ka dee lhaong heue. ²⁰ Paox grawm paox gru aux khankix hoik sibriem ka aux, rawm ngai aux hoik jah sivoe ngai Siyiex heue. ²¹ Awm pon kah kum pui tau mai paox grawm tix mai kieh pui pon kah kum tau mai Siyiex awm nang nan heue. ²² Grawh grawng nawh bawg yam khix num ang lai rheung, aux tak sang hu krax pa ang tix lai koe krax deeh hoek heue.

¹ Khwan ju aux hoik sidah, bawg yam singaix aux hoik uik, simeeig hoik koe son heue. ² Ang hoik mawh pui pa nunai ka aux pa ot tau mai aux lie? ngai aux ca yaox ka pa tuktiak kix ang mawh lie? ³ "Yam in, deuh mhai rug tix ceuceu son aux ka Maix Cao liak. Mawh pui mawx pa sang singeuh taix tix tau mai aux lie? ⁴ Mawh kheu Maix Cao hoik nyeep rhawm kix khaing krax tawng, mawh kheu nan Maix Cao tak ang lai yaog kix lhaong heue. ⁵ Awm koe lox kab kuad ti deuh ah nin, pui pa ap paox grawm tix ka son mau mai kawn praix nawh khankix, tak yaox ti kham geu son an heue. ⁶ Nawh Cao hoik kieh aux mawh pa salao pui khankix mai kix baig rawm mia tix ka pakngai aux heue. ⁷ Ngai aux kawx hoik pupi kheu krax pa laux rhawm mai tokaux aux khawmuik hoik awm pang peue heue. ⁸ Pui rah pui see khankix tak daox deng ka grawng in mai pui ang koe phimap khankix so rhawm tix tieh feen ka pui ang rahsee khankix heue. ⁹ Pui rahsee tak kaux cong daux krax hu tix mai pui singax taix khankix, tak sang ting riang piang ting riang heue. ¹⁰ Viang mawh nan yuh bwanson, pex ku kaux baox deeh hoek khawmuik, grawh grawng nawh aux ang yaox pui pa koe pingnya cuyi ka daux sinax pex tix kaux kawx. ¹¹ Singaix sawm aux khankix hoik luan hu, krax bak krax viang aux mai rhawm keud aux khankix kawx hoik laux leeing. ¹² Kix tieh loh ponsawm mawh ponngaix mai kix ah nin, pa riang dex hoek mai pa riang an mawh pa faik heue. ¹³ Phan aux pau simeeig mawh son nyiex ot aux, phan aux tawm dee it tix ot daux pa faik, ¹⁴ phan aux ah nin ka pa cux pa si um, maix mawh keeing aux mai phan aux ah nin ka graik, maix mawh miex aux mai nan aux, ¹⁵ phan mawh nan krax keud pot jun pot aux, koe dee mawx? mawh pui mawx pa chix yaox ka krax keud pot jun pot aux lie? ¹⁶ Mawh tak sang lih hu krax keud pot jun pot aux tau mai aux daux siviex meung yum lie? Mawh sang laux lee an kix tix tau mai ex ka daux phawng tiex lie?"

¹ Khaix an Biladat ceu pui Shuhix pawk lox ah nin, ² "Mawh kawn sang rheung sikah maix miex grheung lie? Kieh koe krax tawng yung mai khaix an aux tak sang sikah heue. ³ Kheu ex lai sawn tix awm tobrie khankix, maix lai jhak ex awm pui daox aw ka daux ngai ti yuh ka mawx lie? ⁴ Maix pa mawh pui pa riah ti tik tokaux tix ka daux pa song rhawm tix, mawh tak sang tik vud haktiex tix ka sipiag maix lie? phan ang mawh nan, mawh sang gah rang khaing dee ot tix lie? ⁵ Pa riang pui caox caig tak yeet hu tete mai rao ngu nawh ang lai pon tix riang ka heue. ⁶ Pa riang ka daux nyiex gox nawh lih ti mawh pa faik mai kawk ngu pa koe praok nawh, tak mawh pa yeet heue. ⁷ Diang caong pa koe riang nawh hoik dawd mai krax keud nawh, tak kieh nawh cang klad goh heue. ⁸ Grawh grawng nawh, tokaux nawh hoik krix ka rub mai caong nawh hoik cub tix daux kie heue. ⁹ Kie hoik gluah kip ka loek caong nawh mai rub hoik vung viien ti giex nawh heue. ¹⁰ Maox jhawk hoik mox tix son nawh daux tiex mai kie hoik taung tix son nawh ka daux krax heue. ¹¹ Krax lhat graung hoik ghlat nawh ku plak mai sigheet loek caong nawh heue. ¹² Riang rao nawh hoik dieh kheu cai rhawm nawh mai krax laux leeing hoik pau praok nawh heue. ¹³ Pa laux leeing an hoik kraing kaux hak nawh mai kawn Ai meung yum hoik bleet riang rao nawh heue. ¹⁴ Nawh Cao hoik reeig nawh khaing nyiex gox dee een nawh rhawm tix mai viex nawh hu ka simiang pa lhat graung heue. ¹⁵ Pa ang mawh cie kix, tak ot ka daux nyiex gox kix, mhat tak rhuat tix piang dee ot dee koe nawh heue, ¹⁶ riah nawh hoik kroh tom plak greem mai kak plak piang khankix tak fit heue. ¹⁷ Krax pa doh keud ka nawh tak laux leeing khaing piang haktiex mai ceu kaux nawh tak ang lai koe daux krax laux heue. ¹⁸ Nawh hoik mawh pa grheu ti khaing pa riang mai laig ka daux pa faik mai pheet nawh lih khaing haktiex heue. ¹⁹ Nawh ang koe kawn praix sinax ceu pui nawh khankix mai ang lai koe doeh doe pie tix kaux kawx ka dee ot dee koe tix heue. ²⁰ Can pui pa ot ka plak klip singaix, tak koe krax daox deng ka baux singaix ju nawh mai pui pa ot ka plak lih singaix, tak koe krax yaoh yee ka heue. ²¹ An mawh dee ot dee koe pui caox caig tete, in mawh dee ot dee koe pui ang tawng ka Siyiex heue.

¹ Khaix an Yawbax pawk lox ah nin, ² "Mawh kawn sang tuktiak pex khwan ju aux mai tuktiak aux phawng vid ka lox sikah tix miex grheung lie? ³ Hoik mawh kao bawg pa sibriem pex ka aux, pex ang lai kaig tua ka lud loe tix ka aux heue. ⁴ Phan aux lud tete, krax lud aux tak ot tau mai aux heue. ⁵ Mawh kheu yaw pex tokaux tix piang aux mai teei krax kaig tua aux deeh sibriem aux ka, ⁶ pex khaw ti tawng ka hoik mawh pa yuh Siyiex ka aux mai hoik vung fiien aux ka rub Nawh Cao heue. ⁷ Phan aux yiiem doe son grawng lud loe tix, ang koe pui nghiet heue. Phan aux riag yo ang koe pui prawng rahsee heue. ⁸ Nawh Cao hoik thox vie krax hu aux ka die son ang aux pon tiang, Nawh Cao hoik deuh pa faik ka daux krax hu aux heue. ⁹ Nawh Cao hoik peeik ti tik ka min plakngai aux khaing aux mai hoik peeik mhok khri khaing kaing aux heue. ¹⁰ Nawh Cao hoik raig aux pot ku plak mai aux hoik pak khawmuik, Nawh Cao hoik reeig ti tik krax keud pot jun pot aux awm laoh ka gawng khaox heue. ¹¹ Nawh Cao hoik kieh krax pa song rhawm tix rup piang aux mai Nawh Cao simin aux awm pui koeng tix kaux heue. ¹² Pui naing Nawh khankix hoek tau mai kaong krax hoek puing tix aux mai yuh tab hawt vung viang nyiex gox aux heue. ¹³ Nawh Cao hoik gah puxaik aux khankix singai khaing aux mai can pui pa meed aux khankix, hoik deeh mawh pui tang pui praw ka aux khawmuik heue. ¹⁴ Paox nyiex ma aux hoik tik vud ka aux mai paox grawm pa kied dex mai aux khankix hoik piawm aux heue. ¹⁵ Can pui pa ot ka daux nyiex aux mai khawm kawncau bun aux khankix, hoik deuh aux awm nyo sinie, aux hoik mawh pui tang praix klawng ka daux ngai kix heue. ¹⁶ Aux kok ka kawncau tix, viang mawh nan nawh ang lai pawk, aux khyox khaw nawh ka jheeh tix heue. ¹⁷ Moeng aux ang pon dex aux kheu sioe bhawm aux mai puxaik lih aux kawx hoik seeing brai ka aux heue. ¹⁸ Pie kawn nyawm iak khankix kawx hoik nunai ka aux, yam yaog aux tix kaoh mai kix hoik nyiah maung aux heue. ¹⁹ Paox grawm pa dex dawd mai aux khankix seeing brai ka aux khawmuik mai can pui pa moh aux khankix, deeh tieh feen ka aux heue. ²⁰ Deuk ngie hak pa kawb ka si-ang aux mai mawh ngie aux pa kawn glawd nong nong heue. ²¹ "Pex pa mawh paox grawm aux khankix eue, caux rhawm ka aux, caux rhawm ka aux liak, grawh grawng nawh khawn taix Siyiex hoik tiah aux heue. ²² Pex lai khin ka aux, awm yuh Siyiex ka aux mai ang fah rhawm ka ih tix nex aux yuh ka mawx lie? ²³ Kieh tiiem tix een ka lox sikah aux yam in, kieh mhai ti deuh ka daux phuk lai heue. ²⁴ Saik ti deuh ngai lai an piang rang ka gawng tiiem rhiem sonsang kaux leeing ju heue. ²⁵ Mawh kheu tawng aux ka im ju cao pa taoh aux mai Nawh Cao tak cung piang tiex yam sidah praix, ²⁶ mai khaix hoik tawng aux laux leeing kaux hak tix, tokaux aux tak sang yaox ka Siyiex, ²⁷ ka kaw pa tak sang yaox ka tokaux cao aux ka mai ngai aux tak jhak ka nawh mai ang lai mawh pui tang kaux heue. Rhawm pa simie aux khankix hoik khrup ka heue. ²⁸ Phan pex ah mawh sang yuh ex krax khin ka nawh miex ding lie? num riah grawh grawng ankix hoik yaox ka daux aux, ²⁹ kieh tokaux pex koe krax lhat graung ka vaig, mawh kheu krax song rhawm viex krax ciyang ka vaig, kieh pex tawng ka koe krax prawng ca heue."

¹ Khaix an Zopha ceu pui Nemat pawk lox ah nin, ² Mawh kheu kied sung sang rhawm aux, aux koe lox pa sang pawk kheu jao grawng an heue. ³ Aux hoik mhong lox pa deuh phimap mai lox salao aux mai khwan krax tawng yung aux kieh aux pawk ka lox kix heue. ⁴ "Mawh ang maix tawng bawg yam jah didix mai yam jah ti deuh kawn pui piang haktiex, ⁵ krax pa yaw rangdi pui caox caig mawh tivud ticu mai krax gaux rhawm pui tud rhim khankix mawh ngie tivud ngie ang mawh lie? ⁶ Viang min plakngai nawh lhaong tom hoek raoma mai kaing nawh cux paiawm kawx, ⁷ nawh tak grai grup leeing ju awm aing pa tik cao nawh, can pui pa hoik sax yaox ka nawh tak sang ah nin, mawh ot nawh dee mawx lie? ⁸ Nawh tak pu luan awm camaox mai ang lai yaox ka, mawh heue, nawh tak grai hu awm riang susai daux ponsawm heue. ⁹ Can ngai pa hoik sax yaox ka nawh, tak ang lai baox yaox ka nawh tix bawg kawx mai ka dee sax ot nawh kawx, tak ang lai baox yaox ka nawh tix bawg kawx heue. ¹⁰ Kawn prai nawh khankix tak sawg krax teem ka pui hot shia mai taix nawh kawx, tak deeh viied sinngao ka pui heue. ¹¹ Si-ang nawh viang naog ka riang rao pui awn ju kawx, viang mawh nan an tak sang mawh pa noi tix it tau mai nawh daux phawng tiex heue. ¹² "Viang ceu pa caox caig ankix mawh pa tie pa ngaig ka daux jheeh nawh kawx mai nawh tak mox ti deuh an greem dak tix, ¹³ viang nawh lhawk ka mai ang tik, kawn ca kum daux jheeh tix, ¹⁴ priex ih pa kawn koe ka daux vaig daux tu nawh khankix, tak deeh tieh ti mawh pa niex mai an tak deeh tieh ti mawh cai siuing rang ka daux nawh heue. ¹⁵ Nawh tak bleet tix ih ka sinngao mai tak deeh hao lih, Siyiex tak teei an kix lih khaing daux vaig nawh heue. ¹⁶ Nawh tak peeb ka cai siuing rang, dak siuing num tak sang pah nawh yum heue. ¹⁷ Nawh tak ang yaox ka rawm klawng, pa mawh rawm klawng dee lih rawm hia mai rawm teeih khankix heue. ¹⁸ Nawh ang lai yaox tix bleet ka kaing pa yuh tix mai deeh yaox tix tawx ka pui, nawh ang lai fah rhawm ka, kheu mawh pa deeh tawx nawh ka pui heue. ¹⁹ Grawh grawng nawh, nawh kheem gut ka pui hot shia mai ang lai simi ka kix mai hoik tud rhim ka nyiex pa ang ti sum heue. ²⁰ "Grawh grawng nawh, rhawm ghoeng nawh ang chix fah, nawh tak ang pon priex ka ceu pa khaw rhawm tix pie tix ceu kawx heue. ²¹ Ceu pa deuk khankix pa ang nawh bleet tix ih ang koe tix ceu kawx, mawh kheu nan krax mhawm ot nawh tak ang lai kaux cong heue. ²² Yam ot nawh ka daux krax pa kub ih kub un mai nawh tak yaox ti ot ka daux pa cud cha tix, taix pa kha rhawm ku plak tak hoek ti yuh nawh laux heue. ²³ Yam ah nawh tix sang baox naok vaig tu tix naog, Siyiex tak ploi krax song rhawm Nawh Cao lih hoek piang nawh, yam kawn ih nawh heue. ²⁴ Viang nawh to khaing kraung naing rhiem kawx, ak tawng tak krox nawh mai phlat heue. ²⁵ Nawh toek te an lih khaing tokaux tix, toh vaig pa plang tak lih khaing daux ghin nawh heue. Krax pa lhat graung tak hoek piang nawh, ²⁶ pa faik khawmuik hoik khrawm ti deuh sonsang mawh kraung khrai sinngao nawh heue. Ngu pa ang chix yeet an tak gleeing ka nawh mai khawm pui pa kawn deuk ka daux nyiex gox nawh heue. ²⁷ Raoma tak vaoh phimap nawh lih mai haktiex tak kaoh mai deeh tieh feen ka nawh heue. ²⁸ Krax haok hwan nyiex ma nawh khankix tak lih hu khaing nawh mai kraung nawh khankix tak simam hu singai, daux singaix song rhawm Nawh Cao heue. ²⁹ In mawh nyum son pui pa caox caig pa kaoh khaing Siyiex mai sinngao pa hoik tat Siyiex tix tawx ka son nawh heue.

¹ Khaix an Yawbax pawk lox ah nin, ² "Bre ti nghiet ka lox sikah aux mai kieh mawh pa nyawm rhawm maix heue. ³ Gun rhawm maix tivud ha, sonsang sikah aux mai khaix hoik sikah aux pex sang krai patix pon ti krai heue. ⁴ Phan mawh lox son aux mawh koe lox ngau aux piang pui lie? phan an mawh ka aux yuh ka mawh aux lai sang pon gun ka lie? ⁵ Jhak ka aux mai pa daox deng kah, teei taix pex mai thox jheeh pex ka khaing, ⁶ yam doh keud aux ka grawng ceu in, aux hoik yaoh kah, mai kaux hak aux hoik siyaung ka heue. ⁷ Pui caox caig khankix pon tix im ju lang ju mai ting riang ka daux pa koe sibrawm ti yuh ka mawx lie? ⁸ Kawn praix kix tak pang ti tau mai kix ka plak sivoe kix mai cub doeh ru kix tak yaox ti ot plak sivoe ngai kix heue. ⁹ Nyiex kix mawh pa yiien yawg khaing krax lhat graung, khaox puat Siyiex kawx ang lai hoek piang kix heue. ¹⁰ Mawie mhaing kix mhawm simie ang koe krax som nai, mawie shiang kix keh kawn ang sax laux tix geh kawx heue. ¹¹ Kix tak ploi kawn nyawm iak khankix hu awm phung yung mai kawn praix kix tak graoh thiao heue. ¹² Kix rhax lai mai ting plah khaox mai ting sideed maox mai koe krax gaux rhawm tau mai lox pi langhai heue. ¹³ Kix kieh singaix sawm tix khankix nai hu daux krax magmi tix mai ka daux tivud khaing kix tak lih hu ka daux meung yum heue. ¹⁴ Viang mawh nan kix kawn ah nin ka Siyiex, "Lih hu khaing yix, grawh grawng nawh yix ang lai koe rhawm tix sang tawng daux krax Maix Cao heue. ¹⁵ Cao pa ting sibrawm pa sang yuh yix kaing jhaw Nawh Cao mawh pui mawx lie? Phan ex rawg bwan ka Nawh Cao sang pon ex bwan ceu patix? ¹⁶ Jhak heue, sinngao kix ang lai koe ka daux tawm taix kix, krax keud pui caox caig khankix hoik singai khaing aux. ¹⁷ Kawk ngu cie pui caox caig khankix yeet lawlawx, krax laux leeing tak hoek piang kix lawlawx mai Siyiex tak gwieh tix tawx krax laux rhawm tau mai krax song rhawm Nawh Cao ka kix ang mawh lie? ¹⁸ Kix awm nyhee nyhawk sivoe bhaung mai awm kam pa tah bhaung ting luan dee singai lawlawx heue. ¹⁹ Kix ah nin, Siyiex prawng ca phimap kawn kix kheu phimap miex keeing, ang doh mawh nan, kieh kix tawng mawh Siyiex pa prawng ca phimap cao kix heue. ²⁰ Kieh ngai nawh yaox ka krax pa laux leeing nawh mai kieh nawh nyaux ka pa song rhawm cao pa ting sibrawm heue. ²¹ Grawh grawng nawh khix num nawh hoik sidah nawh kawn sang chix priex rien ka kawn nyiex ma tix yuh ka mawx? ²² Mawh pui mawx pa koe krax tawng yung tix pon gau sawn ka Siyiex pa mawh cao prawng ka pui ankix pa ot ka dee pa lhaong lie? ²³ Pui tix kaux yum yam kawn naog riang rao tix, ka daux pa grum naog mai pa yiien yawg tix, ²⁴ tokaux nawh mhawm kluing mai gua si-ang nawh kawx kawn mhawm caux heue. ²⁵ Pui tang kaux yum ka daux krax pa kied kha rhawm ju tix mai ang nyang sax yaox tix cim ka priex nyawm rawm lhong heue. ²⁶ Kiex khawm ra it ka daux phawng tiex, awm paox tix mai ngaw hoik kheem ka kiex heue. ²⁷ "Jhak heue, aux tawng ka krax sawn maix khankix mai khawm grawng pa sang lud maix ka aux heue. ²⁸ Mawh kheu maix ah nin, mawh koe nyiex haw kawn lauxsimiang dee mawx lie? mai koe nyiex gox dee ot pui caox caig khankix dee mawx lie? ²⁹ Mawh ang maix nyang sax chawk ka pui pa hu krax lie? ang maix tawng ka mhai rug pa yuh kix lie? ³⁰ Grawh grawng nawh yam hoek ka daux singaix pa laux leeing, pui caox caig khankix tak pon tix luad luan mai kix tak pon krax teem kieh luan khaing krax song rhawm heue. ³¹ Mawh pui mawx pa sang pon ciak ci kaing yuh nawh ka plak sivoe ngai nawh lie? mawh pui mawx pa sang deeh viied phimap nawh son ceu pa hoik yuh nawh lie? ³² Nawh tak sang mawh pa viex hu ka daux simeeig mai cao pau simeeig an cox khre ka simeeig nawh heue. ³³ Lon tiex pa koe daux lung an mawh pa tie ka son nawh, pui ku kaux pa hoek khaix nawh mai pa hu sivoe nawh khankix ang lai uik simin ka heue. ³⁴ Maix ang pon tawx krax nyawm rhawm aux ka lox giex going tix khankix mai ka lox pawk pa ang koe bwanson yuh ka mawh lie?"

¹ Khaix an Eliphat ceu pui Teman pawk lox ah nin, ² "Awm pon kawn pui bwanson ka pingnya pa yuh cao tix, khex sang pon yuh pui bwanson ka Siyiex lie?" ³ Mawh tak pon kieh maix cao pa ting sibrawm nyawm rhawm kheu pa rahsee tix lie? Phan ang mawh nan kheu pa rahsee pa mhawm maix tak kieh krax haok hwan bwanson koe ka Siyiex yuh ka mawx lie? ⁴ Mawh kheu jao lhat graung maix ka Nawh Cao, Nawh Cao tom sidiex gau ka maix mai yuh see ka maix lie? ⁵ Ceu pa caox caig yuh maix mawh pa kied ting lhaong mai phimap maix mawh pa ang lai koe dee sidah sidu ang mawh lie? ⁶ Grawh grawng nawh maix hoik rien ti teei kraung khrai pa tang puxaik maix ka daux pa ang rahsee mai peeik ti teei kraung ceep kix pui hot pui sibhawm heue. ⁷ Maix ang sax tawx pui taug mao nyaux rawm mai ang sax tawx pui cai rhawm sawm heue. ⁸ Viang mawh nan, pui pa koe sibrawm hoik teei giex tix cie haktiex mai pui koe min plakngai hoik pon tix ot ka dee an heue. ⁹ Hoik grheu miexmai hu dee singai mai taix yi tix mai hoik raig taix kawn doe graig heue. ¹⁰ Mawh kheu nan, kie pa taong hoik koe hawt vung viang maix mai krax lhat graung pa hoek dom mawx dom an tak tawx krax kha rhawm ka maix, ¹¹ phan ang mawh nan pa faik tak sang bleeh son ang maix lai chix yaox mai rawm pa kied ting tak kheem piang maix heue. ¹² Mawh ang Siyiex ot daux raoma ka dee lhaong lie? jhak ka simeeig pa kied ting lhaong khankix mai kix kied lhaong tete, ¹³ grawh grawng nawh maix ah nin, Siyiex tawng ceu patix lie? Mawh sang pon prawng Nawh Cao see ka daux pa kied faik an lie? ¹⁴ Paiawm pa kied pu ceep kheem ka Nawh Cao son ang Nawh Cao chix yaox mai Nawh Cao lailing piang mee dee choek raoma heue. ¹⁵ Mawh kawn sang lawng maix ka krax prim tix, pa mawh diang krax pa hoik sax hu pui caox khankix, ¹⁶ pui pa hoik tat ti tik num riah sivoe hoek bawg yam cie kix, pa hoik kheem rawm hu dee singai khankix ang mawh lie? ¹⁷ Kix ah nin ka Siyiex, lih hu khaing yix, mawh sang pon yuh cao pa ting sibrawm patix piang yix lie? ¹⁸ Nawh Cao hoik kieh nyiex kix naog tau mai ceu pa mhawm, viang mawh nan kieh krax keud pui caox khankix, singai khaing aux heue. ¹⁹ Pui rah pui see khankix gaux rhawm ka yaox tix an mai pui pa ang koe phimap khankix tak nyiah maung pui caox, ²⁰ pui koeng ex khankix hoik laux leeing tete mai ngu hoik gleeing ka can pa kawn deuk kix heue. ²¹ Yam in kieh maix yuh paox pie tau mai Nawh Cao mai ot ka daux krax pa nhim, phan yuh nan ceu pa mhawm tak hoek ka maix heue. ²² Yuh bwanson rieb ti teei lox sidiex gau pa kaoh khaing daux jheeh Nawh Cao mai priex gumlox Nawh Cao ka daux rhawm tix heue. ²³ Phan maix deeh hoek ka cao pa ting sibrawm mai tik krax lud tix khankix luan dee singai khaing nyiex gox maix, maix tak sum tix mawh pa kaux cong heue. ²⁴ Phan maix khrawm khri awm phawng tiex daux nyiex tix mai khrawm khri Awphirax ka daux rawm klawng awm lon simaox, ²⁵ mai phan Cao pa ting sibrawm mawh khri ka maix mai mawh mau pa kied koe ngawh jum ka maix, ²⁶ khaix an maix tak koe krax gaux rhawm ka daux cao pa ting sibrawm, mai maix tak maong ti jhak ka Siyiex heue. ²⁷ Yam rawg maix bwan ka Nawh, mai Nawh Cao tak nghiet ka maix mai maix tak pon bwanson ka sijax mukheu yuh tix heue. ²⁸ Kaing jhaw pa yuh maix khawmuik tak haok hwan ting lhaong mai pa riang tak jhan piang krax hu maix heue. ²⁹ Siyiex yeen ti tik ka pui ting rhawm mai yaog ka pui pa awn rhawm heue. ³⁰ Pie ka pui pa ang koe dee luan khaing phimap kawx, Nawh Cao tak taoh lawd ka nawh mai nawh tak hoek krax taoh ka khawn taix pa singax singeh tix khankix heue."

¹ Khaix an Yawbax pawk lox ah nin, ² "Ka daux in singaix, aux yaox ti kham geu ka ceu pa kied song ka daux pa ngia tix mai taix aux hoik simeue kheu jao grawng pa ngia aux heue." ³ Kieh aux tawng ka dee sang sipub tix ka Nawh Cao, sonsang pon hoek aux ka dang ngeung Nawh Cao liak! ⁴ Aux tak sang tang grawng see ka plak sivoe Nawh Cao mai kieh lox pa thung thiang naog ka jheeh tix heue. ⁵ Aux tak tawng ka lox pawk Nawh Cao ka aux mai doh rhawm ka ceu pa krai Nawh Cao ka tix heue. ⁶ Mawh sang thung thiang Nawh Cao ka aux tau mai sibrawm pa kied ting Nawh Cao lie? Ang mawh nan! Nawh Cao tak nghiet ka aux heue. ⁷ Pui rahsee pon kah kum tau mai Nawh Cao mai aux tak pon luad luan khaing krax prawng krax ciyang leeing ju heue. ⁸ Jhak heue, aux hu sivoe, viang mawh nan Nawh Cao ang ot tan mai yam deeh aux plak khaix aux ang tien yaox ka Nawh Cao, ⁹ Yam yuh Nawh Cao kaing ka plak gwiex, aux ang tie maong ti jhak ka Nawh Cao, yam deeh veeh Nawh Cao tix ka plak khawn dawm aux ang tien yaox ka Nawh Cao heue. ¹⁰ Viang mawh nan Nawh Cao tawng ka krax hu aux, khaix hoik ciied Nawh Cao ka aux, aux tak lih mhawm awm khri heue. ¹¹ Aux hawt grawng lawng khaix caong Nawh Cao tom sidah mai aux ang lai via khaing dau krax hu Nawh Cao heue. ¹² Aux ang tik ka gumlox pingnyap pa kaoh khaing jheeh Nawh Cao, aux hoik priex gumlox pa kaoh khaing jheeh Nawh Cao, nie lheu ting ngawh khaing pa ih tix heue. ¹³ Viang mawh nan mawh pui mawx pa sang pon tieh loh ka rhawm Nawh Cao pa ang chix tieh loh tix, tix bawg kawx lie? Nawh Cao tak yuh awm pa koe alo Nawh Cao tix sang yuh heue. ¹⁴ Grawh grawng nawh ka son aux Nawh Cao yuh tix tawx pa hoik tat ti deuh tom grum naog mai ceu an khankix tom nie koe tau mai Nawh Cao heue. ¹⁵ Mawh kheu nan aux hoik koe pa yaoh yee ka plak sivoe ngai Nawh Cao, yam keud aux ti yaox grawng in aux koe krax lhat graung ka Nawh Cao heue. ¹⁶ Grawh grawng nawh Siyiex hoik yuh rhawm aux laux mai cao pa ting sibrawm hoik kieh aux yaoh yee, ¹⁷ mawh kheu ang Nawh Cao tik aux laig ka daux pa faik mai ang lai mox pa kied faik an khaing pakngai aux heue.

¹ "Bawg yam khankix ang mawh pa ang mox khaing cao pa ting sibrawm, yuh ka mawx pui khankix pa tawng ka Nawh Cao, ang yaox ka singaix prawng Nawh Cao see lie? ² "Pui tiblah chix greed ka mhai rong haktiex khankix, kix tud rhim ka cub yung cub pex mai viex tix cie son cao tix heue. ³ Kix grheu ka la cub kawn doe khankix hu dee singai mai kix teei ti cie mawie miexmai awm kraung tang ti deuh heue. ⁴ Kix nyhot pui pa cud cha khankix lih khaing daux krax mai pui hot sibhawm piang haktiex hoik tang mox tix heue. ⁵ Kix lih hu awm totiag la tiag sonsang yuh kaing mai sau riang rao tix sawg pa ih daux tiagtu son kawn praix tix heue. ⁶ Kix khrawm nyhee nghox ka daux kaung mai sut tix viex plix siiet khaing sipeem pui caox caig heue. ⁷ Kix ang koe kraung ceep mai ceu pa lhop, kix it ka kaong leeing sawm bawg yam kuat praix heue. ⁸ Kix hoik caux ka lhiex khaing piang gawng mai blawm tix ot hawt rang, kheu ang koe dee peung heue. ⁹ Kawn nyawm pa ang koe keeing khankix, pui tiblah hoik pluat ti teei jheeh nawh khaing teeih miex nawh mai pui hot sibhawm hoik yaox tix tang kraung tix heue. ¹⁰ Pui hot shia lih hu khawm ka kaong tix mai pa ang tix koe kraung ceep mai kix klawm lhiem nghox pui khawm cai rhawm tix heue. ¹¹ Kix krid bee mai biiet rawm plix siiet cie pui daux dang biiet plix siiet mai pa sang nyaux nie tix rawm heue. ¹² Pui awn riang pa dex yum hoik ngia ka daux veng mai ju pui saux pui mat khankix riag yo rawg mhaing ka Siyiex, viang mawh nan Nawh Cao ang nghiet ka lox kix heue. ¹³ "Koe pui tiblah tieh feen ka pa riang, kix ang sax tawng ka pa riang mai ang hu ka daux krax pa riang an heue. ¹⁴ Cao pa pah pui yaog ti kaoh caocao, nawh pah pui hot shia mai pui cud pui cha khankix mai daux ponsawm nawh mawh pui briex heue. ¹⁵ Ngai pui lud vao mai moeng kawn pui khankix keud pot jun pot sonsang faik praix ah nin, ang ngai pui mawx chix yaox ka aux, mai nawh hoik mox grang pakngai tix heue. ¹⁶ Yam faik praix kix yieh tix laig ka daux nyiex khankix mai pon ngaix kix mox tokaux khaing pa riang heue. ¹⁷ Grawh grawng nawh plak ponngawb kix deuh awm veei pa yum son tix mai kix tawng veei pa yum mawh pa lhat graung ka son tix heue. ¹⁸ Kix tak mawh pa sibloe piang rawm, nyum cie kix mawh pa jhax lawg ka piang haktiex mai nawh tak ang lai yaox tix hoek ka daux sipeem plix siiet kix heue. ¹⁹ Awm kroh hit rawm ciex mai grai hu kheu hax koek, mawh kheu nan can pui pa koe krax lud tak grai grup ka daux meung yum heue. ²⁰ Vaig pa hoik keh ka nawh tak piawm ka nawh, graik tak ih nex nawh awm priex nyawm, pui tix kaux kawx tak ang lai doh keud ka nawh tix bawk kawx mai pui caox caig khankix, tak graig awm gaw khaox heue. ²¹ Mawh kheu nawh yuh krax kha rhawm ka bun neh ang chix koe kawn mai ang yuh ceu pa mhawm ka miexmai heue. ²² Viang mawh nan Siyiex yuh laux ka pui pa kied ting riang khankix ka sibrawm Nawh Cao, viang nawh yaog ti kaoh kawx ang koe pui pa rien ka ju nawh tix kaux kawx heue. ²³ Nawh Cao priex rien ka kix mhawm mhawm mai kix deuh rhawm tix piang an, mai ngai Nawh Cao ca jhak piang krax hu kix heue. ²⁴ Kix hoik yaog ka tokaux cao tix tivud ticu, khaix an tak grai hu, kix hoik hoek ka daux pa yeen ti kieh kix tiem mai hoik teei ti tik kix lih khaing daux krax awm pui tang kaux khankix mai kix tak kroh hu awm sigleem nghox khankix heue. ²⁵ Phan ang mawh nan, mawh pui mawx pa sang pon plih pon jhi ka mawh aux pui pie lhen tix kaux mai kieh lox sikah aux ang mawh tidtix lie?"

¹ Khaix an Biladat ceu pui Shuhix pawk lox ah nin, ² "Sibrawm mai min krax lhat graung mawh cie Nawh Cao, Nawh Cao kieh pa nhim tix koe ka dee pa kied ting lhaong heue. ³ Mawh sang pon simin pui tix kaux kaux ka cub kru naing Nawh Cao lie? Pa riang Nawh Cao jhan riang piang pui mawx lie? ⁴ Sang pon rahsee pui ka plak sivoe ngai Siyiex yuh ka mawx lie? Pui pa keh khaing bun tak sang singax yuh ka mawx? ⁵ Jhak heue, khix ang koe pa riang mai simuing khankix ang lai mawh pa singax plak sivoe ngai Nawh Cao, ⁶ Lheu khaing an, kawn pui pa iak awm viag tix mu sang koe dee bleeh ceu tix mai kawn pui pa awm ngaw tix mu sang koe bwanson ka plak sivoe ngai Siyiex yuh ka mawx?"

¹ Khaix an Yawbax pawk lox ah nin, ² "Mawh hoik teem maix ka pui pa iak riang yuh ka mawx? mai hoik taoh maix ka taix pa awn riang yuh ka mawx? ³ Mawh hoik tawx maix krax keud ka pui pa ang koe pingnya cuyi yuh ka mawx? hoik paoh maix tix tawx rhawm keud dong sawn ka pui khankix yuh ka mawx? ⁴ Mawh hoik krai maix gumlox in ka pui mawx? mawh khwan pui mawx pa kieh maix krai lie? ⁵ Pa yum pa ot greem tiex daux simeeig mai pa ot greem rawm khankix hoik sikua heue. ⁶ Meung yum hoik plak tix sidawng sivoe ngai Nawh Cao mai krax laux leeing ang lai pon kheem heue. ⁷ Nawh Cao hoik tawm hoik di raoma piang dee yi mai Nawh Cao teuk teue ti deuh haktiex piang pa ang lai koe ceu pa joh pa jhan tix ceu kawx heue. ⁸ Nawh Cao hoik kie ti deuh rawm ka daux paiawm pa kied pu ceep mai paiawm khankix ang lai dud lai ghah heue. ⁹ Nawh Cao hoik kheem ti deuh pakngai dang ngeung Nawh Cao mai rurie paiawm Nawh Cao piang an heue. ¹⁰ Nawh Cao hoik tat ti deuh mee rhoi praix piang rawm khankix, ka sinax mee pa riang mai pa faik heue. ¹¹ Rong raoma khankix hoik sikua mai daox deng ka krax pa sidiex gau Nawh Cao heue. ¹² Nawh Cao sidiex rawm sigrit sigra ka sibrawm tix mai kieh yiien, khaix an Nawh Cao yieh bhaung ting laux ka pingnya tix heue. ¹³ Khwan Nawh Cao phan ka can pa koe daux raoma khankix mhawm grang mai taix Nawh Cao hoik phan ka siyawng pa kied phai heue. ¹⁴ In khankix kawn mawh ngie pa iak pa liied ka Nawh Cao mai kawn mawh ngie awm mhong ex lox supsiep khaing Nawh Cao! mawh kheu nan mawh pui mawx pa sang pon tawng lox sibrawm sinum praix Nawh Cao lie?"

¹ Lheu khaing an Yawbax deeh toe lox kab tix ah nin, ² "Awm im ju Siyiex Cao pa ting sibrawm pa teei grawng see aux hu dee singai mai pa hoik yuh khwan ju aux hoek ka daux pa kham geu, ³ glang yam kawn im ju aux mai yam kawn toek aux bhawm pa tawx Siyiex ka meeh tix, ⁴ jheeh aux tak ang lai sikah lox caox caig mai dak aux tak ang lai ah lox pie lhen heue." ⁵ Sonsang ah aux mawh pex pa khaw caw, kieh an mawh pa singai khaing aux, tom hoek bawg yam sang yum aux kawx, aux tak ang thiang ka ah aux tix mawh pa khaw caw heue. ⁶ Aux giex tix priex krax pa rahsee tix kaux cong mai aux ang ploi ka, rhawm aux tak ang lai koe dee deuh phimap ka cao tix, glang yam im ju aux heue. ⁷ "Kieh pui koeng ka aux mawh awm pui caox caig mai kieh pui pa kaoh deeh tieh feen ka aux, mawh awm pui pa ang rahsee heue. ⁸ Grawh grawng nawh phan Siyiex teei ka ju pui tud rhim, krax keud pot jun pot kix ka sinngao pa pon tix sang koe bwanson yuh ka mawx? ⁹ Mawh sang nghiet Siyiex ka lox riag yo nawh, yam hoek krax pa kha rhawm piang nawh lie? ¹⁰ Tak sang koe krax nyawm rhawm nawh ka daux cao pa ting sibrawm lie? Tak sang rawg nawh bwan ka Siyiex jheung jheung lie?" ¹¹ "Aux tak sang gau pex ka grawh grawng taix Siyiex mai aux ang lai mox ka can ceu pa koe tau mai cao pa ting sibrawm an heue." ¹² Jhak heue, tokaux pex khawmuik hoik yaox ka ceu pa mawh an tete, pex lai kawn kieh rhawm keud pa giex going naog ka daux rhawm ti yuh ka mawx lie? ¹³ In mawh nyum pa pon pui caox khaing Siyiex mai mawh sinngao cie pui pa yuh krax kha rhawm pa hoik pon rieb khaing taix cao pa ting sibrawm, ¹⁴ viang kawn praix nawh koe tom nie kawx tak yum ka lawm vaig mai kawn praix nawh khankix, sawg miex ding kawx tak ang kub ih heue. ¹⁵ Can pui kix pa kawn deuk khankix kawx tak mawh pa sang sipaung tix ka daux meung yum, mai cub miexmai kix kawx ang yiiem doe kix, ¹⁶ viang nawh pum tix priex mau awm phawng tiex mai khrawm ti deuh kraung ceep awm glaox kawx, ¹⁷ viang nawh khrawm ti deuh an khankix kawx, pui rahsee tak sang ceep ka mai pui pa ang koe dee lud tak sang gwieh tix cai ka mau an heue. ¹⁸ Nawh sum nyiex tix awm kawn pung piang shiah mai awm nyiex gox pa yuh cao pa pau yam heue. ¹⁹ Yam laig it pui magmi nawh ang lai pon khrawm ti deuh kraung khrai mai yam blah nawh ngai tix sinngao nawh hoik grai uik heue. ²⁰ Krax lhat graung tak hoek piang nawh awm kheem rawm mai bhaung ting tak sang tah nawh hu dee singai ka daux ponsawm heue. ²¹ Bhaung plak lih singaix tak tah nawh luan hu dee singai mai bhaung an tak pih ti tik nawh lih khaing dee ot nawh heue. ²² An mawh pa kha rhawm pa tawx Siyiex lih piang nawh mai ang lai koe krax caux rhawm ka nawh, nawh tak simie ti luad luan khaing tawm taix sibrawm Nawh Cao heue. ²³ Pui khankix tak dieh taix tix ka nawh mai tak nyiah maung nawh mai grheu nawh lih khaing dee ot nawh heue.

¹ Mau koe hawt daux rhoi mau tete mai ka dah dee koe khri pui cied ti teei khri tan heue. ² Rhiem mawh pa kaong ti teei khaing daux tiex mai tawng raoh mawh pa hoik raug tix lih khaing simaox heue. ³ Kawn pui laig ka dah dee raux pa kied faik, kix sawg tix liiem ka daux pa kied raux haktiex mai kix kaong simaox ka daux pa kied faik an heue. ⁴ Kix hu dee singai ka dee ang pui sax ot mai ang sax dig ka caong tix mai kaong ka mau heue. Kix teuk teue tix ka maox mai laig yuh kaing ka daux an heue. ⁵ Viang priex preem lih khaing haktiex kawx, viang mawh nan ka greem haktiex tak hax awm ngu, awm an piang haktiex kawx tak hax ka ngu heue. ⁶ Lon simaox khankix mawh num riah dee lih simaox siang raoh mai phawng tiex an koe khri ka heue. ⁷ Krax an sim tix mu kawx ang sax tawng ka mai ngai klang kawx ang sax yaox ka heue. ⁸ Sivai sangsi mai totiag pa vao khankix kawx ang nyang sax dig sax pha ka krax an heue. ⁹ Nawh deuh taix tix piang simaox pa kiien mai nawh pluk pliak ka gawng lua tom hoek num riah gawng khankix heue. ¹⁰ Nawh toh rawng rawm phlat khaing rang khankix mai ngai nawh chix yaox ka ceu pa kied laoh lie kuceu heue. ¹¹ Nawh klat ka rawm klawng pa lih hu an mai nawh kaong ka ceu pa mox an khankix hoek ka daux pa riang heue. ¹² Viang mawh nan koe pingnya cuyi dee mawx lie? koe krax tawng yung khankix dee mawx lie? ¹³ Kawn pui ang pon tawng ka ngawh jum pingnya cuyi mai ang mawh ceu pa chix yaox ka dau pui pa im ju piang haktiex heue. ¹⁴ Ka daux dee pa kied raux ah nin, an ang koe ka daux aux mai rawm sigrit sigra ah nin, an ang koe tau mai aux, ¹⁵ pingnya cuyi ang mawh pa pon liag ka khri mai mawh pa ang pon ciang tix tawx jum pingnya cuyi ka mau heue. ¹⁶ An ang mawh pa pon tat jum ka khri Awphirax mai ka simaox siang raoh khankix heue. ¹⁷ Khri ang ah simaox siang ang ah, ang doh sidu jum awm pingnya cuyi tix ceu kawx mai ang pon loh ka kraung khrai simaox siang mai khri nawnaw khankix heue. ¹⁸ Simaox siang mai siang pa pruh riang ang pon tiag ka pingnya cuyi, grawh grawng nawh ngawh jum pingnya cuyi mawh pa kied ting lhaong khaing simaox siang raoh heue. ¹⁹ Simaox siang pa koe grang kuceu khaing haktiex Ethiopia kawx ang krup ka an mai ang pon tat ngawh jum an ka khri nawnaw heue. ²⁰ "Kheu nan pingnya cuyi kaoh khaing dee mawx lie? koe dee ot krax tawng yung dee mawx lie? ²¹ An khankix mawh pa mox khaing ngai can pa im ju khawmuik mai sim khaing raoma kawx ang chix yaox ka heue. ²² Krax laux leeing mai krax yum ah nin, ex hoik mhong grawng pingnya cuyi an khankix ka yhaok tix heue ²³ Siyiex tawng daux krax pingnya cuyi mai Nawh Cao tawng ka dee koe pingnya cuyi heue. ²⁴ Grawh grawng nawh, Nawh Cao hoik jhak tom sidah sidu haktiex mai yaox ka can ceu pa koe greem raoma khawmuik, ²⁵ Nawh Cao tiag diag ciien bhaung mai tiag ka diag pa koe rawm awm pa khaw mai diag tix heue. ²⁶ Nawh Cao yuh been koe ka son lhiex mai phan ka krax pa tuh sah mai pluk plak praix, ²⁷ Khaix an Nawh Cao hoik yaox ka pingnya cuyi mai hoik plak sidawng, Nawh Cao khre rien ti deuh mai cheuk cheu ti yaox ka heue. ²⁸ Nawh Cao ah nin ka kawn pui, jhak heue, krax lhat graung ka Siyiex mawh pingnya mai pa via khaing pa caox caig mawh krax tawng yung heue.

¹ Yawbax sitoe lox kab tix ah nin, ² "Kieh aux deeh awm khix num pa hoik luan khankix mai awm ka singaix liiem lia kia ngien Siyiex piang aux, ³ Yam jhan riang kawk ngu Nawh Cao piang kaing aux, aux een rhawm ka pa riang Nawh Cao mai pon lawng ti hu ka daux pa faik. ⁴ Kieh aux deeh awm ngaix yam kawn awn ju tix, yam koe krax pa yuh Siyiex paox pie piang nyiex gox aux, ⁵ yam kawn koe cao pa ting sibrawm tau mai aux mai yam koe kawn praix aux khankix hawt vung viang aux, ⁶ ku diang caong hu aux khankix hoik naog ka rawm teeih mai simaox rang khankix hoik lih ti mawh bee ka son aux heue. ⁷ Yam hu aux ka siviex veng pa koe daux veng, yam khre aux tix sang ngawm ka daux krax tan, ⁸ Cub kawn nyawm awn ju khankix hoik mox tix ka yaox aux mai pui riex ju khankix yaog ti kaoh cung, ⁹ Kawn lauxsimiang khankix hoik naox ka lox sikah tix mai kix thox jheeh tix ka taix tix, ¹⁰ Pui ting lhaong khankix hoik yawg tix mai dak kix hoik pid dao kix heue. ¹¹ Yam mhong kix ka lox aux, khaix an kix nawb bwan ka aux mai yam hoik yaox ngai kix ka aux, khaix an kix yaogyaw ka aux, ¹² grawh grawng nawh aux hoik sax taoh pui hot shia, pui ang koe miex keeing mai pui pa ang koe cao teem khankix yam riag yo kix heue. ¹³ Bwanson pui pa dex sang hoek krax laux leeing, hoik hoek piang aux mai aux hoik kieh miexmai gaux rhawm tix pon rhax lai heue. ¹⁴ Aux ceep ka pa rahsee mai awm kraung ceep piang tix, krax pa rahsee aux hoik awm sibex lang jung mai lawk kaing heue. ¹⁵ Aux mawh ngai ka pui pa dug ngai mai aux mawh caong ka son pui laux caong khankix heue. ¹⁶ Aux mawh keeing ka pui pa hot pa sibhawm mai aux chawk cheng ti yaox grawh grawng kaing pui pa ang aux sax meed sax tawng heue. ¹⁷ Aux hoik raig ti tik ka nga pui caox khankix mai hoik teei ceu pa tud rhim nawh ti ih khaing rhang nawh heue. ¹⁸ Khaix an aux keud yuh nin, aux tak sang yum ka daux mheem tix mai singaix sawm aux khankix nie lheu haoh hun awm mhaik heue. ¹⁹ Riah aux hoik prung prang ti laig tom hoek daux rawm khankix mai rawm ciex khankix hoik jauh piang kak aux leeing sawm heue. ²⁰ Min plakngai aux mawh pa kawn pruh tau mai aux mai ak aux mawh pa tawx riang rao ka taix aux heue. ²¹ Pui khankix hoik pau ti nghiet ka lox sikah aux mai hoik yiien yawg tix ka pa tawx aux krax keud heue. ²² Khaix hoik krai aux lox ka kix, kix ang nye nyux mai lox sikah aux hoik jauh piang kix awm rawm ciex heue. ²³ Kix hoik pau ka aux, awm pau kix lhiex mai kix ang jheeh tix tom vieh, awm pau kix rawm lhiex lha praix heue. ²⁴ Aux nyiah huing ka kix yam laux rhawm kix mai grang pakpeung ngai nyiah huing aux an mawh riang rao ka kix heue. ²⁵ Aux laug ti tawx daux krax son kix mai ngawm ti mawh cao kaing, mawh kheu nan aux hoik ot awm simiang tix kaux sinax cub kru naing mai awm pui pa kieh pui laux rhawm khankix deeh nyawm rhawm heue.

¹ Viang mawh nan yam in pui awn ju khaing aux khankix nunai ka aux mai keeing kix kawx hoik seeing brai ka aux mai ang lai kieh aux koe jum awm ka sox pau yung aux heue. ² Taix pa koe riang rao kix, kix pa hoik grai grup, tak sang mawh pa koe bwanson ka son aux yuh ka mawx? ³ Kheu hot sibhawm mai cai rhawm, kix to ti ot ka daux tiagtu dee yiien pui mai ih riah khaox riah ox, ⁴ kix pon taux lhax ka daux yeem daux yaw mai kaong riah lhax lai khankix mawh priex ih ka son tix heue. ⁵ Grheu kix lih khaing daux sinax pui khankix mai pui yo hawt khaix kix, awm pheet ka cao briex heue. ⁶ Kix ot daux rang daux tiex ka hawt liep gawng pa kied rieh heue. ⁷ Kix ngia greem yeem greem yaw mai phux paox tix ot greem pang kat heue. ⁸ Kix hoik mawh kawn praix pui kwa pui caox, kix mawh kawn praix pa brai maung khankix mai hoik yaox ti kham pa grheu pui ti lih khaing haktiex heue. ⁹ Yam in aux lih ti mawh lai rhax pa sibriem kix ka aux heue. ¹⁰ Kix seeing ka aux mai kix via singai khaing aux, kix ang lai ring tix baig ka ngai aux heue. ¹¹ Grawh grawng nawh, Siyiex hoik deen ka lah ak aux mai hoik yuh krax kha rhawm aux mai kix hoik yah maox keu plak sivoe aux heue. ¹² Cub pui pa ang leut khankix yaog ti kaoh plak taix khawn dawm aux mai nyhot ka caong aux mai kix yaog ti kaoh tieh feen ka aux sonsang laux leeing aux heue. ¹³ Kix yieh krax hu aux laux, kix baox nie sau riang sonsang goh aux mai ang koe pui tawx satix ka kix heue. ¹⁴ Kix hoek awm hoek khaing daux krax pa vieh mai kling tix hoek ka aux awm bhaung ting khaing daux pa laux leeing heue. ¹⁵ Krax lhat graung hoik hoek piang aux, kix hawt min siawp sibrawm aux awm bhaung mai krax haok hwan aux hoik grai hu awm paiawm heue. ¹⁶ Yam in rhawm aux hoik bih kheu hoik krup krax pa kham pa geu ka diang hu aux heue. ¹⁷ Si-ang aux khankix hoik saux hoik greeing daux ponsawm mai siniag aux khankix ang lai chix moi heue. ¹⁸ Jhawm saux aux hoik kied kin, awm kraung ceep piang tokaux aux mai rhawt ka aux awm ngawg sibex aux heue. ¹⁹ Nawh Cao nyhot ti tik aux cod ka daux ung mai aux deeh lih awm phawng tiex mai nyaox heue. ²⁰ Aux riag yo ka Maix Cao, viang mawh nan Maix Cao ang lai pawk ka aux, aux kaoh cung mai Maix Cao ang lai gi ka aux heue. ²¹ Maix Cao hoik yuh krax pa kied kin ka aux, tau mai riang taix pa ting riang Maix Cao hoik ciyang ka aux heue. ²² Maix Cao yaog aux haok daux bhaung mai kieh aux brug ka bhaung an, Maix Cao hoik kieh krax pa pex aux laux leeing heue. ²³ Grawh grawng nawh aux tawng grawng sang viex Maix aux hoek ka daux pa yum mai ka nyiex khre riien Maix Cao ti deuh son pui pa im ju heue. ²⁴ Yam nih Nawh Cao taix tix piang pum pa laux leeing an khankix, viang kix riag yo khyox khaw kawx mawh giex going heue. ²⁵ Mawh ang aux sax yiiem son pui tug pui kha tix lie? Mawh ang khwan ju aux koe krax laux rhawm son pui hot shia lie? ²⁶ Viang mawh nan yam jhak aux ka pa mhawm, pa caox caig hoek bleeh ka aux mai yam krox jun aux ka pa riang pa faik bleeh ka aux heue. ²⁷ Ka daux rhawm aux koe pa hax pa siaoh mai ang koe pa nhim pa nghie, singaix pa kha rhawm hoek sipub ka aux heue. ²⁸ Aux lailing ka daux pa faik, ka dee ang pa riang lai koe, aux cung daux sinax pui hun mai riag yo son krax teem heue. ²⁹ Aux mawh puxaik sox tiag mai mawh paox grawm ka sim kala-uk khankix heue. ³⁰ Hak aux lih ti lung mai grhuah hu khaing aux; si ang aux khankix hoik hax awm ngu heue. ³¹ Lox ting feuk cie aux hoik deeh tieh mawh lox ngia mai lox shiao paung aux deeh tieh ti awm lox yiiem heue.

¹ "Aux hoik yuh sijax mukheu mai ngai tix, son ang aux sang jhak ka bunkrih awn ju heue." ² Grawh grawng nawh krax pa gwieh Siyiex tix tawx khaing plak piang mawh ceu patix mai sinngao pa sang tawx Siyiex khaing ka dee pa lhaong mawh ceu patix lie? ³ Ang an mawh krax laux leeing son pui caox caig mai krax som nai ka pui pa yuh ceu pa lud khankix lie? ⁴ Mawh ang Nawh Cao yaox krax lawng aux mai ang simin ka diang caong hu aux khankix lie? ⁵ Phan aux mawh pa lawng daux krax pie kheem, phan ang mawh nan phan caong aux hoik phai hu ka daux pa kheem pa vhee pui, ⁶ Kieh ciang aux ka jiang pa khaw ngai jiang mai kieh Siyiex tawng ka pa rahsee aux heue. ⁷ Phan diang caong hu aux lud daux krax hu tix, phan ang mawh nan, phan rhawm aux hoik hawt alo ngai aux, phan ang mawh nan mai phan ceu pa seeing hoik kawp ka taix aux tix ceuceu, ⁸ khaix an kieh pui tang kaux teei ti ih simie pa rhuat aux, kieh pui tang kaux reeig ti tik ka simie pa van aux heue. ⁹ Phan rhawm aux ghoing ka moeng pui tang kaux, phan ang mawh nan, phan aux jiang ka diang siviex paox plawg tix khankix, ¹⁰ kieh moeng aux krid mhaw ka son pui tang kaux mai kieh pui tang kaux khankix nunai piang moeng aux heue. ¹¹ Mawh kheu in mawh pa caox caig mai mawh krax lud pa sang keung tix hoek krax prawng krax ciyang heue. ¹² Mawh kheu an mawh ngu pa proe ti sang kieh krax laux leeing koe mai sang reeig ti tik krax haok hwan aux khankix heue. ¹³ Phan aux ang nghiet ka grawh grawng pa hoek ngia kawncau bun aux mai kawncau simex aux khankix ka aux, ¹⁴ yam kaoh cung Siyiex, aux sang yuh ka mawx? Yam yaog Siyiex tix kaoh mai yam cheuk cheu Nawh Cao ka aux, aux tak sang deeh pawk ka Nawh Cao yuh ka mawx lie? ¹⁵ Ang hoik mawh Nawh Cao pa hoik phan hoik deuh aux tom ka daux vaig miex tix lie? mai ang mawh Nawh Cao pa phan yiex khawm ra awm paox khaing ka daux vaig miex tix lie? ¹⁶ Ang aux sax tawx sax yee ka pui hot pui sibhawm yam koe ceu pa lo kix lie? hoik sax kieh aux miexmai laux pakngai lie? ¹⁷ Phan ang mawh nan, ang aux sax tawx kawn praix pa ang koe miex keeing ih priex mai ih sivoe ngai kix lie? ¹⁸ Jah tom yam kawn awn ju aux, aux hoik priex nawh awm keeing tix kaux mai khaix keh aux ka daux vaig miex tix aux hoik teem ka miexmai, ¹⁹ phan aux hoik yaox ka pui yum tix kaux kaux pa ang koe kraung ceep, phan ang mawh nan, pui hot sibhawm tix kaux kaux, pa ang koe kraung pa sang lhop ka tokaux tix, ²⁰ phan rhawm nawh ang tawx bwanson ka aux mai phan nawh ang siu ka hauk yung aux khankix, ²¹ phan aux yaog taix tix tiah piang pui pa ang koe miex keeing, yam yaox aux mai phan ang teem ka nawh ka dee prawng see, ²² khaix an kieh plawng taix aux khlut khaing klip aux mai kieh taix aux graig heue. ²³ Grawh grawng nawh krax laux leeing pa sang kaoh khaing Siyiex, mawh krax lhat graung ka son aux, mawh kheu jao sibrawm pa kied ting lhaong Nawh Cao, aux ang kan yuh tidtix heue. ²⁴ "Phan aux kieh khri mawh krax keud pot jun pot tix mai phan aux ah nin ka khri nawnaw, maix mawh pa een aux rhawm tix kah, ²⁵ phan aux koe krax pa gaux rhawm kheu jao hoik ting lhaong krax pa magmi aux mai kheu hoik kied nie pon aux pa yuh aux ka taix tix, ²⁶ phan aux jhak ka singaix pa riang mai yam simi aux ti yaox ka sawng riang khix, ²⁷ daux rhawm aux hoik koe pa yiien yawg pa raux mox mai jheeh aux hoik ngheet ka taix aux, ²⁸ in mawh krax lud pa keung ti hoek krax prawng ca, mawh kheu aux hoik thiang ka Siyiex, pa ot dee lhaong heue. ²⁹ Phan aux hoik gaux rhawm kheu pa laux leeing pui koeng ka aux mai ja loh tix yam hoik yaox mawh ceu pa caox caig lie? ³⁰ Aux ang lai kieh jheeh tix koe phimap ka mhaing tix jhax lawg ka ju nawh, ³¹ Mawh ang pui pa ot ka daux nyiex gox aux khankix sax ah nin, mawh pui mawx pa ang nyang bax fah rhawm tau mai nex mawie nawh tan lie? ³² Viang mawh nan son ang nyo sinie lai vu vie ti paung ka daux krax, aux hoik paoh siviex ka son pui hu krax, ³³ Phan aux kheem krax pa lud tix khankix awm Adam mai mox ti deuh phimap ka daux rhawm dieb naok aux, ³⁴ Grawh grawng nawh aux lhat graung ka cub pui ting mai pui hun khankix mai pui kuceu nunai aux kieh aux kaig tua, mawh kheu nan aux hoik yawg tix mai ang kan lih plak praix, ³⁵ Oh kieh pui tix kaux kaux nghiet ka lox krai aux mai hoek jhak ka lai mhai rug aux, oh kieh cao pa ting sibrawm pawk ka lox aux mai kieh cao prawng see tiiem ti priex grawng an khankix ka daux phuk lai heue. ³⁶ Aux tak sang deuh an piang klip tix tete mai ceep piang kaing tix awm mhok khri tix mu, ³⁷ aux tak sang plak ti kieh Nawh Cao tawng diang caong hu tix ku diang mai tak greed ti dex Nawh Cao awm Simiang tix kaux heue. ³⁸ Phan haktiex ot aux kok yo deuh phimap ka aux mai phan rhoi thai khankix yiiem tau mai paox tix, ³⁹ Phan aux ih plix khaox mai ang tix uik mau mai hoik yuh cao haktiex khankix koe krax som nai ju, ⁴⁰ kieh pang kat kuah tang sivawng mai kieh fang kuah tang nghox ca heue. Gumlox sikah Yawbax hoik sidah heue.

¹ Mawh kheu nan pui inkix loe kaux hoik yaog tix mai pawk lox Yawbax, mawh kheu jao hoik ah nawh mawh tix pui rahsee heue. ² Khaix an Elihux kawn simex Barakhelax ceu pui Buzix, pa mawh doeh ru Ramax song rhawm ka Yawbax heue. Krax song rhawm nawh hoik lih kheu jao jhi nawh grawng rahsee khaing Siyiex heue. ³ Krax song rhawm nawh hoik baox lih piang paox grawm nawh khankix loe kaux, kheu jao yaox nawh ka ang kix lai pawk lox tix mai kix prawng ca deuh Yawbax koe phimap heue. ⁴ Yam in kheu mawh kix loe kaux pa riex ju khaing Elihux nawh hoik pau ti sang sikah mai Yawbax heue. ⁵ Yam yaox Elihux ka ang jheeh kix loe kaux lai pawk lox tidtix nawh kied song rhawm ka kix heue. ⁶ Mawh kheu nan Elihux kawn simex Barakhelax ceu pui Buzi, pawk lox ah nin "Aux mawh pa awn ju mai pex mawh pa kied riex ju, mawh kheu nan aux koe krax lhat graung mai ang lai kan paoh grawng pa yaox tix ka pex heue." ⁷ Aux ah nin, pui riex ju khaw ti mawh pa krai lox mai pui pa kied lang ju khankix khaw ti mawh cao pa sidiex gau krax koe pingnya cuyi heue. ⁸ Viang mawh nan khwan koe ka daux kawn pui mai bhawm pa phlu Cao pa ting sibrawm tix sau mawh pa kieh nawh koe krax tawng heue. ⁹ Pui pa ting lhaong khankix ang lai mawh pa koe pingnya cuyi jheung jheung mai pui riex ju khankix ang mawh pa tawng ka pa mawh meh jheung jheung heue. ¹⁰ "Mawh kheu nan aux sang ah nin, nghiet ka lox krai aux, aux tak sang krai pao grawng krax pa yaox aux heue. ¹¹ Aux hoik pau tix mhong ka lox krai pex khankix, aux hoik krox tix nghiet ka grawh grawng pa rien pex tix sang krai heue. ¹² Aux hoik jawg ti nghiet ka pex mhawm mhawm mai pui khaing daux pex tix kaux kawx, ang pex ka Yawbax mai ang pon pawk lox nawh heue. ¹³ Paw lai ah yuh nin, yix hoik yaox ka pingnya cuyi, mawh Siyiex pa kieh nawh pex mai ang lai mawh kawn pui heue. ¹⁴ Yam in nawh ang lai pon jhi lox sikah tix ka aux, mawh kheu nan aux ang lai pawk lox ka nawh, tau mai lox pa hoik ah nawh heue. ¹⁵ Kix hoik daox deng mai ang lai baox pawk mai kix ang lai koe lox sang krai tix gum kawx heue. ¹⁶ Yam pau aux tix nghiet mai kix ang ah tidtix, kix cung ot yawg tix mai ang lai baox pawk lox tix bawg kawx heue. ¹⁷ Aux sang baox krai ka cie tix mai aux sang krai pao krax grawng pa yaox tix heue. ¹⁸ Grawh grawng nawh aux koe lox pa grum naog ti sang krai, khwan ka daux aux hoik so aux yuh an heue. ¹⁹ Jhak heue, vaig aux awm rawm plix siiet ang koe daux sang lih, mai an awm hau hak rawm plix siiet pa khraox pa dex sang bih heue. ²⁰ Aux sang sikah sonsang nghie rhawm tix, aux sang ang jheeh tix mai deeh pawk ka heue. ²¹ Aux ang lai jhak ka pakngai pui tix kaux kawx mai paw kieh aux yaogyaw mai glaw pui pie tix kaux kawx heue. ²² Grawh grawng nawh phan aux yaogyaw mai glaw pui tang kaux cao pa phan pa deuh aux tak sang teei ti tik aux heue.

¹ Mawh kheu nan, Yawbax eue, yuh bwanson nghiet ka lox aux mai hawt ti yuh khawmuik heue. ² Yam in aux ang jheeh tix, dak ka daux jheeh aux hoik sikah heue. ³ Lox sikah aux khankix kaoh khaing rhawm pa rahsee aux, siyieb jheeh aux krai grawng krax tawng yung aux heue. ⁴ Khwan Siyiex hoik phan hoik deuh ka aux mai bhawm cao pa ting sibrawm kieh aux im ju heue. ⁵ Phan maix pon pawk lox aux, pawk heue, khre rien lox pa sang sikah maix ka plak sivoe aux, kieh maix kaux cong heue. ⁶ Aux mai maix awm paox tix ka plak sivoe ngai Siyiex, aux kawx hoik mawh pa phan khaing phawng tiex heue. ⁷ Paw kieh maix koe krax lhat graung ka daux aux tix ceu kawx mai taix aux kawx tak ang tawx pa cien piang maix heue. ⁸ Lox pa sikah maix mai aux hoik mhong khaing maix yuh nin tete, ⁹ "Aux mawh pa singax mai pa ang koe dee lud, aux ang koe phimap mai ang koe dee deuh phimap ka aux tix ceu kawx heue. ¹⁰ Jhak heue, Nawh sawg dee sang deuh phimap piang aux, Nawh hoik simin aux awm pui koeng Nawh ¹¹ Nawh Cao sau gang ka caong aux mai Nawh Cao pau krax lih hu aux khawmuik heue." ¹² "Jhak heue, ka grawng in maix ang mawh pa rahsee, aux tak deeh pawk ka maix, mawh kheu Siyiex mawh pa nie lheu ting khaing kawn pui heue. ¹³ Maix lai yuh krax pa thung thiang ka Nawh Cao jao patix lie? Grawh grawng nawh Nawh Cao ang lai jhi grawng gumlox sikah tix pie tix ceu kawx heue. ¹⁴ Grawh grawng nawh Siyiex sikah ka daux an tix ceu, phan ang mawh nan ka daux tang ceu, viang mawh nan kawn pui ang chix tawng ka heue. ¹⁵ Ka daux camaox mai ka daux riang susai yam laig it nyawm tum nawh piang ku dee it tix ponsawm, ¹⁶ Khaix an Nawh Cao paoh yhaok kawn pui mai tawk cum ka gumlox sidiex gau ka kix heue. ¹⁷ Sonsang deeh veeh kawn pui khaing kaing pa yuh tix mai sonsang luan kix khaing pa ting jhawm kawn pui, ¹⁸ Nawh teei ti priex khwan kix khaing daux simeeig mai ju kix khaing krax pa yum ka vaig heue. ¹⁹ Kawn pui yaox ti kham geu tau mai krax saux ngia piang dee it tix mai khaing jhawm saux kraing si-ang khankix tom nie, ²⁰ ju nawh hoik seeing ka blah mai rhawm nawh kawx hoik hu ka priex preem heue. ²¹ Nex nawn nawh hoik dieh hu sipie mai si-ang pa ang sax yaox tix bawg kawx hoik lih plak praix heue. ²² Khwan nawh greed tix dex simeeig mai ju nawh sang hoek dex tawm taix cao prawng see khankix heue. ²³ "Mawh kheu nan sonsang jhi Nawh Cao grawng krax pa rahsee tix ka pui, viang cao cau pa ao min koe kaing rheng kawx, " ²⁴ Khaix an Nawh Cao tak koe krax pa caux rhawm ka son nawh ah nin, "deeh taoh ti teei nawh khaing krax pa sang laig nawh ka daux simeeig, aux hoik yaox krax pa deeh taoh tix, tix ceu, ²⁵ nex nham nawh tak sang lheu awn khaing kawn nyawm mai nawh tak lih tix awm baux singaix yam awn ju tix heue." ²⁶ Nawh rawg bwan ka Siyiex mai nawh pon bwanson khaing Siyiex, nawh tak yaox pakngai Nawh Cao tau mai krax pa gaux rhawm, grawh grawng nawh, Nawh deeh tawx krax taox tix ka pui heue. ²⁷ Nawh tak rhax lai sivoe ngai pui ah nin, "Aux hoik lud mai hoik tieh feen ka ceu pa mawh meh mai aux ang lai yaox ti kham phimap ka pa keung aux ti kham kah heue." ²⁸ Nawh Cao tak taoh ti teei khwan ju aux khaing krax pa sang laig nawh ka daux simeeig mai ju nawh tak pon ti yaox ka pa riang heue. ²⁹ "Jhak heue, Siyiex yuh ceu an khankix, ka pui ra bawg mai loe bawg heue." ³⁰ Sonsang teei khwan ju nawh khaing daux simeeig mai sonsang kieh pa riang nawh mawh pa jhan riang ka daux ju pui pa im heue. ³¹ "Yawbax eue, daong yhaok tix mai nghiet ka lox aux, kieh maix koe krax nhim rhawm mai Aux tak sang krai ka maix awx. ³² Phan maix koe pa sang krai tix ceuceu krai ka Aux, grawh grawng nawh, Aux koe rhawm ti sang kieh maix mawh pa rahsee heue. ³³ Phan ang koe ceu pa krai yawg tix mai nghiet ka lox Aux mai Aux tak gau maix ka pingnya cuyi heue."

¹ Elihux deeh pawk lox ah nin, ² "Pex pa koe pingnya cuyi khankix eue, nghiet lox pa krai aux, pex pa koe krax tawng khankix daong jhaok ti nghiet ka aux, ³ mawh kheu yhaok chix cheuk ka lox, awm chix cim jheeh ti yaox ka priex preem khankix heue. ⁴ Kieh ex laug ti teei pa rahsee son tokaux tix, kieh tokaux ex tawng mawh ceu patix pa mhawm ka son cao ex heue." ⁵ "Mawh kheu Yawbax ah nin, aux mawh pui rahsee, viang mawh nan, Siyiex hoik kieh pa rahsee aux som, ⁶ mawh sang pie lhen aux maix krai lud tix ka daux pa rahsee tix lie? Viang aux ang koe krax lud kawx, jhawm saux pa ang lai chix moi koe ka aux heue. ⁷ Mawh pui mawx pa awm Yawbax pa nyaux ka lox sibriem khankix awm rawm, ⁸ kix mawh pui yuh paox hu krax tau mai pui caox mai lailing hu tau mai pui ang rahsee heue. ⁹ Kheu hoik ah nin, pa gaux rhawm nawh ka daux Siyiex ang mawh pa tawx bwanson ka pui tix ceu kawx heue. ¹⁰ Mawh kheu nan, can pex pa koe krax tawng, nghiet ka lox aux kieh pa caox caig mai pa yuh phimap mawh pa singai khaing Siyiex Cao pa ting sibrawm heue. ¹¹ Nawh Cao tak deeh viied ka nawh awm kaing yuh nawh mai kieh lih koe ka nawh, awm pa yuh nawh heue. ¹² Tete te lai, Siyiex ang sax yuh pa caox caig tete, cao pa ting sibrawm tak ang koe krax tieh loh ka krax rahsee tix heue. ¹³ Mawh pui mawx pa hoik tawx beeh glawm kwang haktiex in ka Nawh Cao lie? Phan ang mawh nan mawh pui mawx pa hoik yaog Nawh Cao mawh pa kwang khawm bee haktiex lie? ¹⁴ Phan Nawh Cao ang koe alo ka pui mai phan Nawh Cao teei tix priex ka khwan ju Nawh Cao deeh hoek ka tix, ¹⁵ nex nham kawn pui khankix tak mawh pa laux leeing mai pui deeh ing ka tiex heue. ¹⁶ Phan maix koe krax tawng, keud ti yaox ka lox aux khankix. ¹⁷ Mawh tak sang kwang pui koeng ka pa rahsee ka haktiex lie? Mawh sang prawng ca maix ka Cao pa ting sibrawm pa mawh pui pa kied rahsee lie? ¹⁸ Mawh khaw ti ah nin ka simiang, maix mawh pa giex going mai khaw tix ah ka pui ting lhaong khankix mawh kix pui caox caig lie? ¹⁹ Viang yuh nan Nawh Cao ang tie mawh pa jhak ka plakngai kawn lauxsimiang, Nawh Cao ang tie mawh pa khan ka ngai cao mi lheu khaing pui hot shia, grawh grawng nawh kix mawh pa phan pa deuh Nawh Cao ka taix tix khawmuik heue. ²⁰ Ka daux tivud ticu kix tak yum daux greung sawm, pui khankix hoik siyaung mai grai hu, pui pa ting riang rao khankix hoik teei ti tik ka daux pa ang taix pui tiah kix heue. ²¹ Grawh grawng nawh ngai Nawh jhak piang krax hu kawn pui khankix, Nawh Cao yaox ka diang caong hu kix khawmuik heue. ²² Pa faik mai veei yum ang lai pon mox tokaux pui yuh krax lud heue. ²³ Grawh grawng nawh, Nawh Cao ang lai lo tix prawng ca ka daux pa chawk cheng, ka plak sivoe ngai Siyiex lawlawx heue. ²⁴ Nawh Cao raig ti tik ka pui pa ting riang rao khankix tom phawk, tau mai pa ang tix lai chawk cheng mai yaog ti deuh pui tang kaux plud ka dah dee ot kix heue. ²⁵ Mawh kheu nan Nawh Cao tawng ka kaing yuh kix, Nawh Cao tik kix laig ka daux pa faik ponsawm mai kix hoik mawh pa phawng laux leeing heue. ²⁶ Nawh Cao tawk ka kix awm pui caox caig ka sivoe ngai pui hun khankix heue. ²⁷ Grawh grawng nawh kix deeh veeh tix hu khaing Nawh Cao mai ang lai keud grawng krax Nawh Cao tix ceu kawx heue. ²⁸ Mawh kheu nan kix hoik kieh lox yiiem pui hot shia hoek ka Nawh Cao, grawh grawng nawh Nawh Cao mhong ka lox yiiem pui pa kha rhawm khankix heue. ²⁹ Yam tawx Nawh Cao krax pa yiien yawg, khaix an mawh pui mawx pa sang pon tuktiak tukte ka lie? yam mox Nawh Cao pakngai tix, khaix an mawh pui mawx pa sang pon yaox ka Nawh Cao, pui tix meung ang ah mai pui tix kaux kaux ang ah, sang pon yaox ka Nawh Cao lie? ³⁰ Son ang pui caox caig sang pon kwang mai lhat pui khankix krix ka jhawk taong heue. ³¹ Grawh grawng nawh koe pui mawx pa ah nin ka Siyiex, aux hoik yaox ti kham krax pa sidiex gau mai aux tak ang lai baox yuh krax lud tix bawg kawx, ³² gau aux ka ceu pa ang aux chix yaox, phan aux hoik yuh krax lud, aux tak ang lai yuh tix bawg kawx heue. ³³ Mawh keud maix tix sang pon bwanson khaing Nawh Cao, ka daux pa yuh alo tix kheu jao thiang maix ka kaing yuh Nawh Cao lie? Maix tak yaox tix laug ti teei an mai ang mawh aux, mawh kheu an krai ceu pa tawng maix heue. ³⁴ Kieh pui koe krax tawng yung khankix krai ka aux mai kieh pui koe pingnya khankix nghiet ka lox aux, ³⁵ Yawbax krai lox tau mai pa ang tix koe krax tawng yung, lox nawh khankix mawh lox pa ang koe pingnya heue. ³⁶ Kieh Yawbax mawh pa kham geu tom sidah, grawh grawng nawh lox pawk nawh khankix awm lox pui caox caig khankix heue. ³⁷ Grawh grawng nawh, nawh baox naok krax tieh feen piang phimap tix, nawh dieh taix tix ka sinax ex mai baox nie ah lox pa tieh feen ka Siyiex heue."

¹ Lheu khaing an Elihux pawk lox ah nin, ² "Mawh keud maix pa ah ti mawh pa caw lie? mawh keud maix krax pa rahsee tix mawh pa nie lheu blon khaing Siyiex lie? ³ Maix ah yuh nin, mawh sang pon aux bwanson ceu patix lie? mai sang nie pon aux rao ceu patix khaing yuh phimap lie? ⁴ "Aux tak pawk lox maix mai paox grawm khankix pa ot tau mai maix heue. ⁵ Maong ti jhak plak raoma mai simi ti jhak ka paiawm pa nie lheu lhaong khaing maix heue. ⁶ Phan maix yuh phimap, mawh sang pon kieh maix pa grum naog Siyiex laux leeing lie? phan ang mawh nan, phan maix yuh phimap tom nie, mawh sang pon yuh maix patix ka Nawh Cao lie? ⁷ Phan maix mawh pa rahsee, mawh sang pon tawx maix patix ka Nawh lie? Phan ang mawh nan, mawh sang pon rieb Nawh patix khaing daux tawm taix maix lie? ⁸ Krax pa caox caig yuh maix hu krox ka pui pa awm cao maix, mai krax pa rahsee maix tak tawx bwanson ka kawn pui pa awm maix heue. ⁹ Kix riag yo kheu jao pa kha rhawm tom nie mai kix riag yo son pa sang pon krax teem khaing taix pa kied ting riang rao heue. ¹⁰ Viang mawh nan, ang pui koe tix kaux kawx pa ah nin, koe Siyiex Cao pa phan pa deuh aux, pa tawx akhwang rhax aux lai daux ponsawm, ¹¹ pa nie lheu gau ex khaing totiag haktiex mai pa yuh ex nie lheu koe pingnya khaing sim raoma khankix koe dee mawx lie? ¹² Viang kix kok yo lox tix kawx, Nawh ang lai pawk, kheu pa yaw kix rangdi daux pa caox caig heue. ¹³ Siyiex ang nghiet ka lox pa giex going tete mai cao pa ting sibrawm ang lai yuh ti tawng ka lox kix heue. ¹⁴ Viang maix ah ang ti yaox Nawh Cao kawx, kheu mawh Nawh Cao pa prawng rahsee mai maix krox jun daux Nawh Cao heue. ¹⁵ Yam in kheu grawng ang Nawh Cao nyang tawx krax kham geu ka daux pa song rhawm tix mai Nawh Cao ang nyang teei krax lud maix koe ceu. ¹⁶ Yawbax ang jheeh tix ka daux pa ah tix lox giex going mai nawh baox nie sikah ka lox pa ang koe cee cak heue."

¹ Elihux baox toe tix krai lox ah nin, ² "Gun yeung ka aux ceeix ha mai aux tak jhi maix yaox ka koe lox pa sang krai tix tang Siyiex heue. ³ Aux tak viex krax tawng yung tix hoek khaing dee singai, aux tak jhi grawng rahsee Siyiex Cao pa phan pa deuh aux heue. ⁴ Grawh grawng nawh lox sikah aux in ang lai mawh pa lud loe, pui pa grum naog ka krax tawng yung tix kaux ot tau mai maix heue. ⁵ "Jhak heue, Siyiex mawh pa ting sibrawm mai ang mawh pa nunai ka pui tix kaux kawx, Nawh Cao mawh pa koe sibrawm ka daux riang rao krax tawng yung heue. ⁶ Nawh Cao ang mawh pa priex jhung ka ju pui caox caig, viang mawh nan Nawh Cao prawng ca rahsee ka pui pa kha rhawm heue. ⁷ Nawh Cao ang lai ghaix ngai khaing pui rahsee mai kieh kix ngawm piang dang ngeung tau mai simiang khankix, mawh kheu Nawh hoik yaog kix ot tan leeing ju mai kix hoik mawh pa ot dee lhaong heue. ⁸ Phan mawh pa hoik phyawk kix ka maox ceng khankix mai phan maox pa kha rhawm vung vhien tix ka kix, ⁹ khaix an Nawh Cao tak krai grawng kaing pa yuh kix mai khawm krax pa lud kix khankix mai ka pa hoik yuh kix ka daux krax pa ang khaw caw heue. ¹⁰ Nawh Cao tak paoh yhaok kix, sonsang nghiet ka lox tawm jhawm krai Nawh Cao mai tawx lox ka kix sonsang veeh kix khaing krax lud tix heue. ¹¹ Phan kix cu nghiet mai yuh kaing jhaw Nawh Cao, singaix sawm khix num kix tak luan ka daux krax pa haok hwan mai ka daux krax pa gaux rhawm khankix heue. ¹² Viang mawh nan phan kix ang cu nghiet, kix tak laux leeing ka vaig mai kix tak yum ka daux krax pa ang tix koe krax tawng yung heue. ¹³ Viang mawh nan pui tud rhim khankix khrawm ti deuh krax song rhawm ka daux rhawm tix, yam phyawk laung Nawh Cao kix, kix ang lai kok yo son krax teem heue. ¹⁴ Kix yum yam kawn im ju tix mai ju kix tak sidah ka daux sinax pui pa seeing brai khankix heue. ¹⁵ Nawh Cao deeh taoh pui hot shia khaing ka daux pa kha rhawm mai paoh yhaok kix yam hoek krax kha rhawm heue. ¹⁶ Nawh Cao tak viex maix lih hu khaing daux krax pa kin pa nu mai laig dah dee vieh dee va, pa ang mawh dah dee si khawp mai tak sang khan priex preem pa nyawm pa ngaig piang pheen sawm maix heue. ¹⁷ Viang mawh nan maix hoik naog ka krax ciyang ka daux krax yuh pui pa caox caig, krax ciyang mai krax prawng ca tak giex gang ka maix heue. ¹⁸ Yuh satix tix, grawh krax song rhawm Nawh Cao tak koe piang maix mai paw kieh mau taoh pa ting ngawh ting jum an viex maix lud krax heue. ¹⁹ Krax pa magmi maix mai sibrawm pa kied ting maix an sang pon taoh ka maix khaing krax pa kha rhawm lie? ²⁰ Paw koe rhawm ka ponsawm, pa mawh bawg yam tat ti tik pui khankix khaing dee ot dee koe kix heue. ²¹ Yuh satix tix paw lai veeh ti hu plak krax lud awx, grawh grawng nawh maix hoik laug ti teei in khaing krax pa kha rhawm heue. ²² Jhak heue, Siyiex hoik jhi pa ting lhaong Nawh Cao ka sibrawm tix mai mawh pui mawx pa chix tawx krax gau awm Nawh Cao lie? ²³ Mawh pui mawx pa pon jhi krax hu Nawh Cao, phan ang mawh nan mawh pui mawx pa pon ah nin, �Maix Cao hoik yuh pa lud loe lie�? ²⁴ "Doh keud ti yaogyaw kaing jhaw yuh Nawh Cao, khaing lai rhax pa rhax pui khankix heue. ²⁵ Kawn pui ku kaux hoik yaox kaing yuh Nawh Cao khaing dee singai heue. ²⁶ Jhak heue, Siyiex mawh pa ting lhaong mai ex ang chix pon tawng ka Nawh Cao mai khix num Nawh Cao khankix mawh pa ang ex dak pon simin ti tawng heue. ²⁷ Grawh grawng nawh, Nawh Cao jhok rawm ciex khankix haok plak piang mai deeh tieh ti mawh rawm lhiex ka daux paiawm heue. ²⁸ Pa kieh paiawm khankix groi rawm lhiex lih cod piang pui tom nie heue. ²⁹ Mawh pui mawx pa sang pon tawng ka grawng tah hu paiawm khankix ku sidah mai ka grawng lih sinum praix khankix ka daux nyiex gox bwan Nawh Cao lie? ³⁰ Jhak heue, Nawh Cao kieh pa riang pluk plak praix jhan ku caong daog nyiex gox bwan mai kheem tom ka dee pa kied raux rawm sigrit sigra heue. ³¹ Ka son grawng in Nawh prawng ca piang pui khankix mai Nawh tawx pa ih tom kub tom naog ka kix heue. ³² Tawm taix Nawh kheem piang pluk plak praix mai tawx lox kieh sah tuh ka pui koeng heue. ³³ Lox sinum praix krai pao grawng Nawh mai tobrie khankix kawx tawng ka grawng hoek bhaung ting heue.

¹ "Ka son grawng in rhawm aux hoik kied siyaung luah ah pug pug mai phuh tix lih khaing dee ot tix heue. ² Nghiet ka lox sinum praix Nawh Cao mai mawh lox sinum pa kaoh khaing daux jheeh Nawh Cao heue. ³ Nawh Cao ploi sinum praix luah hu sidah greem raoma mai kieh sah tuh tom dee sidah haktiex heue. ⁴ Khaix hoik an, lox sinum praix lih tau mai lox sinum tuh sah mai sibrawm Nawh Cao, khaix hoik mhong ka lox an mai Nawh Cao ang lai yut ka lox sinum praix mai bhaung ting heue. ⁵ Siyiex kieh lox tix lih mai sinum praix mai krax pa kied daox deng, Nawh Cao yuh ceu pa kied ting lhaong ka pa ang ex lai dak uik tawng ka heue. ⁶ Grawh grawng nawh, Nawh Cao ah nin ka rawm rha, �Lih koe piang haktiex�, awm an lhiex mai lhiex ting khankix kawx lih ti koe kheu sibrawm Nawh Cao heue. ⁷ Nawh Cao vien ka taix kawn pui ku kaux, sonsang pon tawng pui khankix ka kaing jhaw yuh Nawh Cao heue. ⁸ Totiag khankix laig ot daux tiex mai laux lee tix tan heue. ⁹ Keu kang lux kaoh khaing caong ma seh mai bhaung sikiied hoek khaing caong ma laong heue. ¹⁰ Siyiex phlu bhawm tix lih mawh sidap mai kieh rawm pa kied vieh lih tix klon heue. ¹¹ Nawh Cao kieh bhawm rawm ciex deeh tieh ti mawh paiawm, pa riang Nawh Cao kieh paiawm grai heue. ¹² Kix cuang vung viang piang bee ma haktiex mai hu ka daux pa kia ngien Nawh Cao, sonsang mawh awm can ceu pa hoik tawm Nawh Cao ti deuh ka kix, piang bee ma haktiex khawmuik heue. ¹³ Nawh Cao kieh ceu an khawmuik lih tix mawh, son pa ciyang ang ah, sonsang priex rien haktiex ang ah mai son krax caux rhawm Nawh khankix ang ah heue. ¹⁴ "Yawbax eue, nghiet ka lox in, cung yawg tix mai jawg tix keud ka kaing jhaw pa daox deng yuh Siyiex khankix heue. ¹⁵ Mawh hoik tawng maix ka grawng tawx Siyiex lox tix ka ceu an khankix mai kieh pa riang paiawm cie Nawh Cao jhan riang lie? ¹⁶ Mawh tawng maix ka sidawm phin tum paiawm ka raoma, pa mawh kaing jhaw krax pa daox deng Nawh Cao, Kaw pa grum naog ka daux krax tawng yung lie? ¹⁷ Yam yuh Nawh Cao haktiex yiien ka bhaung pa phlu tix hoek khaing plak seh mai kieh kraung ceep maix si aoh ka, tawng maix ka lie? ¹⁸ Mawh hoik yaox maix tix nih tawm raoma khankix tau mai Nawh Cao, pa kiien awm siliak pa raug tix lie? ¹⁹ Gau yix ka grawng pa sang caw yix tix krai ka Nawh Cao, mawh kheu yix ang lai chix krai tix ceu kawx, kheu jao koe pa faik yix heue. ²⁰ Mawx pa sang pon krai ka Nawh Cao awm pa koe rhawm tix sang krai lie? Koe pui tix kaux kaux pa koe rhawm tix sang mie tix hoek krax laux leeing lie? ²¹ Yam phlu bhaung raoma kieh blang, kawn pui ang lai pon simi ti jhak ka pa riang an heue. ²² Pa sawng riang khri jhan hoek khaing plak laong mai sibrawm krax pa lhat koe tau mai Siyiex heue. ²³ Ex ang lai pon sawg liiem ka Kaw pa ting sibrawm, Nawh Cao mawh pa kied blon mhawm ka daux sibrawm, ka daux krax prawng ca mai ka daux pa grum naog ka daux pa rahsee, Nawh Cao ang lai yeen ya ka pui tix kaux kawx heue. ²⁴ Mawh kheu nan kawn pui khankix koe krax lhat graung ka Nawh Cao, Nawh Cao ang lai deuh lai sawn pui pa een tokaux tix koe pingnya cuyi ka daux rhawm tix koe ceu heue.

¹ Khaix an Siyiex pawk lox Yawbax khaing daux bhaung ting ah nin, ² "Mawh pui mawx pa kieh krax keud Aux faik ka lox sikah pa ang koe krax tawng yung lie? ³ Yam in rawd nyoi maix awm mawh tix simex tix kaux, aux tak chawk ka maix mai deeh pawk lox chawk Aux ka maix heue. ⁴ "Yam sum Aux ka num riah haktiex khankix mawh ot maix dee mawx lie? Phan maix hoik tawng ka inkix krai Aux mhong heue. ⁵ Mawh pui mawx pa pon tiag ka diag koe haktiex, phan maix tawng krai Aux mhong, phan ang mawh nan mawh pui mawx pa pawd ti deuh rhoi mee nawh piang an lie? ⁶ Mawh hoik phyawk num riah haktiex tix ka patix lie? phan ang mawh nan mawh pui mawx pa sum ti deuh lon simaox daog nawh lie? ⁷ Yam khrawm simuing ponngawb paox tix rhax lai mai yam hoik riag yo cub kawn praix Siyiex khankix tau mai pa gaux rhawm. ⁸ "Phan ang mawh nan, mawh pui mawx pa hoik nyeep ti deuh siviex rawm sigrit sigra, yam hoik breeng nawh tix lih keh khaing daux vaig miex tix, ⁹ yam hoik yuh Aux paiawm khankix mawh kraung ceep nawh mai kieh pa kied vhaik an mawh man leem pa pua ka mee koe an, ¹⁰ yam hoik yuh aux ti deuh mee pa tat aux khankix kaux son an mai hoik sau ti deuh siviex mai jhong siviex, ¹¹ ah nin, maix tak pon tix hoek singai die pie in, viang mawh nan maix paw lai luan singai khaing in, mai krax pukpak rawm pa lhaong rhawm maix kieh kaog tin heue. ¹² Mawh sax tawm maix lox ka ponngawb tom yam jah maix tix keh mai mawh hoik khre maix ka dah dee ot bah riang praix lie? ¹³ Sonsang mawh pa riang ponngawb an pa giex tom ka yoh haktiex mai khruah pui caox caig lih khaing daux haktiex lie? ¹⁴ Haktiex hoik awm glaox pa koe greem cum tix mu mai cung tix lih awm kraung ceep pa mhawm heue. ¹⁵ Pa riang pui caox caig khankix hoik grai khaing kix mai plawng taix pa yaog tix kawx hoik grai heue. ¹⁶ Mawh hoik sax laig maix ka daux rawm keut ka daux rawm sigrit sigra khankix lie? Phan ang mawh nan mawh hoik sax laig lailing maix ka daux kawn moik lie? ¹⁷ Mawh hoik sax paoh siviex meung yum tix ka son maix lie? hoik sax yaox maix ka diang siviex yum khankix lie? ¹⁸ Mawh hoik sax tah tum grum tawng maix ka haktiex in khawmuik lie? phan maix tawng uik, krai aux mhong. ¹⁹ "Mawh koe krax pa sang thong hu ka dee koe pa riang dee mawx? mai koe dee ot pa faik ka dee mawx? ²⁰ Mawh sang pon viex maix kix hoek ka dee ot dee koe kix mai sang pon tawng maix ka daux krax pa sang hoek ka nyiex nawh lie? ²¹ Maix tee tawng ka grawng pa hoik dawg keh tix mai pa kied lang ju tix heue. ²² Mawh hoik sax laig maix ka daux nyiex krao sinngao rawm rha, phan ang mawh nan mawh hoik sax yaox maix ka nyiex krao sinngao rawm pre khankix, ²³ ka pa hoik khre aux ti deuh son bawg yam krax pa kha rhawm mai son singaix bawg yam puing naing daux naing khankix lie? ²⁴ Mawh tah hu pa riang ka daux krax yuh ka mawx? Phan ang mawh nan mawh hoik tah hu bhaung plak lih singaix piang haktiex yuh ka mawx? ²⁵ Mawh pui mawx pa hoik paoh ti deuh rhoi hu rawm raoh, sonsang ba rawm, phan ang mawh nan rhoi grawng krax hu sah, ²⁶ sonsang kieh nawh lhiex lih piang haktiex, ka dee ang pui ot tix kaux kawx mai ka daux tiagtu, ka dee ang pui ot tix kaux kawx, ²⁷ sonsang tawx haktiex yi, leet ka rawm mai kieh rawm klawng lih hu kieh rib awn kuah ting lhaong heue. ²⁸ Mawh koe keeing lhiex lie? Phan ang mawh nan mawh pui mawx pa kieh rawm ciex lih koe lie? ²⁹ Mawh kaoh rawm sidap khaing daux vaig pui mawx lie? klon rawm ciex daux raoma mawh pui mawx pa keh nawh lie? ³⁰ Rawm khankix kiien awm simaox mai ka dee raux rawm hoik mawh lon heue. ³¹ Mawh pon khrawm maix tix phyawk ka simuing khimax, simuing grawng lat khankix ot tau, phan ang mawh nan mawh chix yah maix maox vien rawb simuing pa kied riang an lie? ³² Mawh pon plih maix simuing Mazarot lih ka daux bawg yam cie nawh lie? Phan ang mawh nan, mawh pon thung bung maix ka simuing krih ting grang hu tau mai cub simuing iak khankix lie? ³³ Mawh tawng maix ka been pa koe raoma lie? Mawh pon deuh maix been an mawh pa kwang piang ca haktiex lie? ³⁴ "Mawh pon pao maix lox tix hoek ka daux paiawm, sonsang pon kheem rawm lhiex tom nie ka maix lie? ³⁵ Mawh pon ploi maix pa riang plukplak praix lih, sonsang hu kix mai ah nin ka maix lie? �Yix koe tin heue.� ³⁶ Mawh pui mawx pa sau ti deuh pingnya cuyi ka daux tokaux lie? mawh pui mawx pa sau krax tawng yung ka daux rhawm lie? ³⁷ Mawh pui mawx pa pon simin ka paiawm ka pingnya cuyi tix lie? phan ang mawh nan mawh pui mawx pa pon lhauk si ngiien rawm raoma khankix lie? ³⁸ Yam klao phawng tiex tix kiien tau mai klon tiex khankix mai deeh kab tix mawh tiex tau mai paox tix lie? ³⁹ Mawh pon leue maix totiag sonsang ih sivai sangsi, phan ang mawh nan mawh sang pon tawx maix kawn sivai sangsi awm ju pa cai rhawm an sak lie? ⁴⁰ Yam kawn tum kix ka daux rang, phan ang mawh nan yam kawn nyat kix tix ka daux yeem daux yaw mai jawm kix tix pau lie? ⁴¹ Mawh pui mawx pa tawx lak ih priex, yam riag yo kawn lak ka Siyiex mai vung viang kheu ang pa ih kix koe lie?

¹ "Mawh tawng maix bawg yam sang keh kawn pex rang lie? Phan ang mawh nan mawh pon mhai maix ka bawg yam sang keh cak lie? ² Mawh pon simin maix khix, singaix, yam naog bawg yam sang keh kix lie? Phan ang mawh nan mawh tawng maix ka bawg yam nghe kix kawn tix lie? ³ Kix buk nyoi tix mai keh kawn tix lih mai luan khaing saux yha tix heue. ⁴ Kawn iak kix nyawm ot siu koe mai kix ting lhaong ka daux tiagtu, kix lih hu mai ang lai deeh hoek ka miex tix heue. ⁵ Mawh pui mawx pa ploi la tiag ot ka daux pa ang koe krax tieb krax tie lie? Mawh pui mawx pa yah ka maox keu brung tiag khankix, ⁶ Aux hoik yuh daux tiag mawh nyiex kix mai hoik kieh lung ting mawh dee ot kix lie? ⁷ Nawh sibriem ka lox sinum kawn pui pa ot daux veng, nawh ang deuh lox yo pui hoh tiag koe ceu koe mu heue. ⁸ Hawt liiep gawng lua mawh dee sawg kuah kix tix ih mai sawg liiem ka rib klai kuceu heue. ⁹ "Mawh sang cu mawie praix ti yuh kaing son maix lie? Mawh sang cu nawh tix it ka daux kawg maix lie? ¹⁰ Mawh pon phyawk maix moi praix ka maox sonsang hawt nawh daux rhoi grawng thai lie? Phan ang mawh nan mawh sang cu nawh tix hawt khaix maix yam thai maix ka daux lung lie? ¹¹ Mawh sang yum rhawm maix ka nawh kheu jao kied ting riang nawh lie? Phan ang mawh nan mawh sang pon ap maix kaing cien yuh tix ka nawh lie? ¹² Mawh sang yum rhawm maix sonsang viex nawh nghox khaing daux glah nghox mai hoek sau daux krao nyiex maix lie? ¹³ "Sim kala-uk jiet chix yib pruik tix daux pa yaw rangdi tix, viang mawh nan han tiag naog ka hauk mai pruik pa mhawm ang mawh lie? ¹⁴ Grawh grawng nawh, nawh prah tawm tix piang tiex mai kieh tawm khankix siu ka daux phawng tiex, ¹⁵ nawh ang khi rhawm ka sang dig caong tix khawn ka tawm tix max, phan ang mawh nan ka sang yuh totiag ka tawm an phawng heue. ¹⁶ Nawh nieb pon yuh ka kawn tix ka daux pa kin rhawm, awm ang kix lai mawh kawn nawh, riang rao kaing yuh nawh mawh pa giex going mai ang koe cee koe cak heue. ¹⁷ Grawh grawng nawh Siyiex hoik phan hoik deuh nawh mawh pa koe pingnya mai ang lai kieh nawh koe krax tawng heue. ¹⁸ Yam yaog nawh tokaux tix lhaong, nawh nyiah maung brung mai pui brug heue. ¹⁹ "Mawh pon tawx maix brung kieh koe riang lie? Mawh hoik jhup maix ti deuh ngawg nawh ka grang plukplak praix lie? ²⁰ Mawh pon kieh maix nawh phuh tix awm sido lie? lox phliah nawh meeh tix mawh ceu pa lhat graung heue. ²¹ Nawh haik tiex ka daux lung daux ngawd mai yaw rangdi jaloh tix ka pa koe riang tix, nawh breeng tix laig ka daux naing heue. ²² Nawh sibriem ka ceu pa lhat graung mai ang koe krax yaoh yee mai nawh ang chix via khaing lawm vaig heue. ²³ Lox luah khruah lawk te sidah ka nawh, tau mai rao pliah mai plah rhiem tieb pa mhawm plang heue. ²⁴ Nawh ting rhawm ca nyhau mai haik tiex tau mai krax pa song rhawm tix, nawh ang lai pon cung yawg tix kheu jao mhong ka sinum luah lox teettawng heue. ²⁵ Ka sigreung sinum lox teettawng, nawh ah lox tix Ha, ha! Nawh mhong sioe bhawm naing khaing dee singai mai ka lox yo cao kaing naing khankix mai khawm siaox naing heue. ²⁶ Mawh pon pu klang ce ka pingnya tawx maix mai di pruik tix pu hu ka see plak seh lie? ²⁷ Mawh tawx maix lox tix kieh klang krih pu mai yuh mheem tix piang dee pa lhaong lie? ²⁸ Nawh ot ka piang rang mai ot piang choek rang ka dee pa kaux cong heue. ²⁹ Khaing dee an ngai nawh kok puan dee singai mai jiang ka totiag heue. ³⁰ Kawn nawh khankix yawt ka nham, phan pa yum koe dee mawx nawh kawx ot tan heue."

¹ Lheu khaing an Siyiex pawk lox Yawbax ah nin, ² "Mawh sang khaw pui an pa tieh feen ka cao pa ting sibrawm tix sidiex Nawh lie? Nawh pa mawh pui pa tang phimap ka Siyiex, kieh nawh deeh pawk heue." ³ Khaix an Yawbax deeh pawk lox Siyiex ah nin, ⁴ "Jhak heue, aux mawh pui caox, aux tak sang deeh pawk ka Maix Cao yuh ka mawx lie? Aux tak thox jheeh tix ka taix tix heue. ⁵ Aux hoik loe ti sikah tix bawg, viang mawh nan aux tak ang lai baox ah khaix in, aux hoik loe ti pawk ra bawg, viang nawh nan aux tak ang lai baox jiiem lox tix heue. ⁶ Khaix an Siyiex pawk lox ka Yawbax khaing daux bhaung ting ah nin, ⁷ "Yam in rhawt maox nyoi maix awm mawh tix simex tix kaux, Aux tak chawk ka maix mai deeh pawk lox chawk aux ka maix heue. ⁸ Mawh sang preet maix ti tik ka krax prawng ca Aux lie? Mawh keud maix tix mawh pui rahsee mai deuh Aux mawh pa koe phimap lie? ⁹ Mawh koe riang rao plawng taix maix awm plawng taix Siyiex lie? Phan ang mawh nan mawh sang pon kieh maix lox tix sinum awm sinum lox Nawh Cao lie? ¹⁰ Khaix an ceep ka sibrawm min plakngai mai pa mhawm grang mai khre tokaux tix ka ceu pa yaogyaw koe min mai ka ceu pa mhawm grang an khankix heue. ¹¹ Peeik ti tik krax song rhawm khaing daux maix, mai jhak ka pui pa ting rhawm ca nyhau khankix mai yeen nawh tiem heue. ¹² Jhak ka pui pa ting rhawm ca nyhau ku kaux mai deeh kieh kix hoek dee pa tiem, dig ti tik pui caox caig khankix ka dee ot dee koe kix heue. ¹³ Mox kix tau ka daux phawng tiex mai tawb ngai kix ka pa faik heue. ¹⁴ Khaix an Aux tak sang deeh rieb ka maix, sonsang pon taoh taix khawn dawm cao maix ka maix heue. ¹⁵ "Yam in jhak ka totiag Behemok, Brung rawm, pa phan Aux ti deuh tau mai maix, nawh sawm rib awm moi heue. ¹⁶ Jhak heue, riang nawh koe ka nyoi nawh mai sibrawm nawh koe ka si niak vaig nawh heue. ¹⁷ Nawh vuh vied sidax tix awm gaw khaox Arit mai siniag ba viang nawh kab tix kaux tix gap hoik tix gap heue. ¹⁸ Si-ang nawh khankix awm gawng tawng lheung mai si-ang praok nawh khankix awm gawng rhiem heue. ¹⁹ Nawh mawh ceu pa phan pa deuh Siyiex phao voe, Mawh ngie Nawh Cao pa phan pa deuh nawh nong nong, pa pon viex vaig lawm tix hoek dex heue. ²⁰ Gawng lua khankix tawx pa ih ka son nawh mai totiag klieh tau mai paox tix daux tong tan heue. ²¹ Nawh noi ti it greem veei pang kraox nhawng khankix mai ka daux yeem pang jo khankix mai ka daux ung heue. ²² Veei pang kraox nhawng khankix, kheem ka nawh, pang khaox siglai hawt klawng khankix vung viang ka nawh heue. ²³ Viang rawm klawng hwan miex ding kawx, nawh ang khi rhawm mai viang rawm klawng Yawdan thah tix laig daux jheeh nawh kawx nawh ang gah ang greed tix. ²⁴ Mawh pui mawx pa sang pon dung ngai nawh dug mai phyawk ka mai teei rhiem cieh meeh nawh mai tuk hu lie?

¹ "Mawh sang pon bluh maix ti teei totiag Levitan, goe rawm ka miiet mai pon phyawk dak nawh ka maox lie? ² Mawh sang pon cieh maix meeh nawh ka gawng jo, phan ang mawh nan mawh sang pon toh maix kap nawh ka rhiem feuk lie? ³ Mawh sang khyox khaw nawh tix ka maix tom nie lie? Mawh sang sikah nawh lox awn lox tiem ka maix lie? ⁴ Mawh sang yuh nawh sijax mukheu mai maix lie? Mawh sang kieh maix nawh mawh kawncau tix leeing ju lie? ⁵ Mawh sang klieh maix mai nawh awm sim lie? Phan ang mawh nan mawh sang phyawk maix ti laung nawh son kawncau bun tix khankix lie? ⁶ Mawh sang khan kheu paox grawm maix priex preem tix brie son nawh lie? Mawh sang gwieh kix tix tawx nawh ka sinax pui yuh lai geu lie? ⁷ Mawh sang pon suat maix hak nawh ka pliah kak rao lie? phan ang mawh nan mawh sang pon suat maix kaing nawh ka pliah suat lie? ⁸ Deuh taix tix piang nawh, paw lai baox keud tix sang yuh naing ka nawh tix bawg kawx, ⁹ pa keud pex tix sang pex ka nawh mawh pa giex going, pie yaox ex ka nawh hoik mawh pa lhat ex ka ang mawh lie? ¹⁰ Ang koe pui tix kaux kawx pa kan hu so nawh kaoh cung. Awm an mawh pui mawx pa pon cung tix ot ka plak sivoe Aux lie? ¹¹ Mawh pui mawx pa hoik yuh bwanson ka Aux, sonsang deeh viied Aux bwanson ka nawh lie? Can ceu pa koe greem raoma kuceu mawh cie Aux heue. ¹² "Aux tak ang mox ti deuh ka grawng caong Levitan khankix mai riang rao sibrawm nawh mai khawm ka kraung pa koe min plakngai nawh heue. ¹³ Mawh pui mawx pa pon khleeing ti tik kraung ceep plak praix nawh lie? Mawh pui mawx pa pon greed tix dex hawt kap brung pa koe ra thaix an lie? ¹⁴ Mawh pui mawx pa pon paoh siviex plak sivoe ngai nawh mai dia rhang nawh khankix mawh pa kied lhat ex ka ang mawh lie? ¹⁵ Dia glawk rhang nawh, mawh pa kieh nawh koe min plakngai hoik nyeep tix kaux awm pa hoik tawk tix cum, ¹⁶ an tix mu hoik tix mu singip paox tix son ang bhaung pon laig ka dau sinax khankix, ¹⁷ kix hoik sitoe paox tix, tix mu hoik tix mu, kix kab tau mai paox tix, tix plak hoik tix plak mai ang lai chix tang tiah khaing paox tix heue. ¹⁸ Yam miah nawh lih tix sawng riang mai ngai nawh awm pa riang plak ponngawb heue. ¹⁹ Khaing daux jheeh nawh lih mawh rong ngu pa rup mai nyia ngu khankix pu tix lih khaing an heue. ²⁰ Taox ngu lih khaing daux meeh nawh, awm kaoh khaing aw rawm lok pa kied hax heue. ²¹ Yam si leed nawh bhawm tix kieh suah rup mai rao ngu pa rup an lih khaing jheeh nawh heue. ²² Nawh koe riang ka ngawg tix mai krax lhat graung hoik graoh ka plak sivoe nawh heue. ²³ Nex nawn siniag nawh khankix hoik kleuk tix tau mai paox tix mai kaux cong ang lai chix greed chix gah tix heue. ²⁴ Rhawm nawh kied kiien awm simaox mai mhaw pa koe plak greem heue. ²⁵ Yam yaog nawh tix kaoh, can pa kied ting riang rao khankix koe krax lhat graung, mawh kheu kied lhat kix mai kix hu teed ka can pa koe hawt praok tix heue. ²⁶ Viang pui blung nawh ka vaig kawx ang koe dee bleeh mai ka pliah ang ah, te ang ah mai pliah kak ang ah, ang lai mawh pa koe bwanson heue. ²⁷ Nawh hoik een hoik sawn rhiem awm brex nghox mai tawng lheung awm khaox rham heue. ²⁸ Te ang pon kieh nawh to, simaox puing ka ak maox vuh vied kawx awm sibroe ka son nawh heue. ²⁹ Krong pliah khankix nawh hoik deuh awm gawng nghox, nawh nyiah ka nyeu pui pliah ka tix heue. ³⁰ Ka greem nawh lawm awm shiag aw brak max mai khaix hu nawh awm rhoi thai ka daux ung heue. ³¹ Nawh kieh dee pa raux lok awm lok aw, nawh kieh rawm sigrit sigra awm aw pa kraix bee ka heue. ³² Nawh prah pa sawng riang plak khaix krax hu tix mai kieh rawm sigrit sigra paing awm hauk paing heue. ³³ Ka piang ca haktiex ang lai koe pa awm nawh tix ceu kawx, nawh hoik mawh ceu pa phan tix pa ang koe krax lhat graung heue. ³⁴ Nawh deuh can ceu pa ting khankix ang koe ceu mai nawh mawh Simiang piang kawn praix pa koe krax lhaong rhawm khawmuik heue.

¹ Khaix an Yawbax pawk lox Siyiex ah nin, ² "Aux tawng ka pon yuh Maix Cao kuceu mai krax keud Maix Cao, ang koe pui pa pon kieh pon thiang ka heue. ³ Maix Cao hoik chawk yuh nin, mawh pui mawx pa pon mox krax keud daux pa ang tix koe krax tawng yung lie? "Mawh kheu nan aux hoik loe tix ah, ka ceu pa ang aux tawng dee bleeh, ceu pa ang tawng khankix kieh mawh pa daox deng ka son aux heue. ⁴ "Nghiet liak, mai kieh aux sikah liak, aux tak sang chawk cheng ka Maix, mai Maix deeh pawk lox aux liak. ⁵ Aux hoik sax mhong grawng Maix Cao ka daux yhaok tix heue. Viang mawh nan yam in aux hoik yaox Maix Cao heue. ⁶ Mawh kheu nan aux seeing ka tokaux tix mai doh keud ka phimap tix ka daux pa ngawm daux phawng tiex mai nyaox heue." ⁷ Khaix hoik ah Siyiex lox in ka Yawbax mai Siyiex deeh ah nin ka Eliphat ceu pui Teman, "Krax pa song rhawm Aux hoik lih piang maix mai paox grawm maix ra kaux heue. Grawh grawng nawh ang maix lai krai ceu pa khaw caw ka Aux awm hoik krai kawncau Aux Yawbax heue. ⁸ Mawh kheu nan yam in teei mawie mhaing aliah mu mai yung aliah mu son maix, mai hu ka kawncau Aux Yawbax mai yuh krax tan pa gleeing ka son maix, khaix an mai kawncau Aux Yawbax tak rawg bwan son maix heue. Grawh grawng nawh Aux tak rieb ka lox bwan rawg nawh, mawh kheu nan Aux tak ang lai deuh phimap ka maix awm pa koe rhawm cao maix heue. Grawh grawng nawh maix ang lai krai ceu pa khaw caw ka Aux awm hoik krai kawncau Aux Yawbax heue." ⁹ Mawh kheu nan Elihux ceu pui Teman mai Biladat ceu pui Shua mai Zopha ceu pui Nemat lih hu mai yuh nawh awm gumlox pa tawm Siyiex ka kix, mawh kheu hoik rieb Siyiex ka lox rawg Yawbax bwan heue. ¹⁰ Siyiex deeh tawx can pa hoik som nai Yawbax khankix, khaix hoik rawg nawh bwan ka son paox grawm tix heue. Siyiex hoik tawx lheu khaing pa koe nawh glang ka an ra son heue. ¹¹ Khaix an pux aik pux o nawh khankix mai pui meed pui tawng nawh glang ka in ku kaux, hoek bleeh ka nawh mai hoik ih nyaux tau mai nawh ka daux nyiex nawh mai kix tawx lox nyawm rhawm mai khu rhawm nawh, son krax pa kha rhawm pa hoik viex Siyiex hoek piang nawh khankix heue. Kix ku kaux hoik tawx mau plah mai jheep gien khri tix taix ka nawh heue. ¹² Siyiex hoik nawb bwan piang Yawbax, bwanson pa pon nawh baox nie lheu pon khaing pa koe nawh yam jah heue. Grawh grawng nawh, nawh hoik koe yung khankix tix mheen pon rheng mu mai kala-uk liah rheng mu mai mawie tang tix rheng mu mai la shiang tix rheng mu heue. ¹³ Nawh baox pon kawn simex aliah kaux mai kawn bun loe kaux heue. ¹⁴ Nawh kok ceu kaux kawn Yex tix mawh Yemima mai ceu kaux kawn I tix mawh Kizi mai ceu kaux kawn Am tix mawh Kerin Hapapuk heue. ¹⁵ Ka daux haktiex baoh an khawmuik bun pa lheu mhawm grang khaing cub kawn bun Yawbax ang koe tix kaux kawx mai keeing kix tawx kix sidu pon sin sinax puxaik kix heue. ¹⁶ Khaix an Yawbax im ju tix yieh tixpon num mai hoik yaox kawn praix mai kawn saux kawn sex tix khankix son daux ju pui pon ju heue. ¹⁷ Mawh kheu nan Yawbax hoik yum mai riex ju tix mai grum naog ju tix heue.