Jeremiah

Jeremiah

¹ Gumlox Yeramix kawn simex Helakhix, khaing cao giex kaing li khankix pui ot ka daux veng Anatot haktiex Biyamin, ² gumlox Siyiex hoek bleeh ka Yeramix ka daux baux ju Yosiyax kawn simex Amon pa mawh simiang haktiex Yudax, ka daux num kwang nawh kao loe num heue. ³ Yam hoik hoek ka daux baux ju Yehoyakim kawn simex Yosiyax pa mawh simiang haktiex Yudax tom sidah hoek baux ju kwang Zedikiyax, kawn simex Yosiyax pa mawh simiang Yudax, ka haktiex kao tix num tix num, tom hoek bawg yam viex ka pui veng Yerusaliem khankix hu tix mawh pui pa giex laung ka daux khix phwan heue. ⁴ Khaix an gumlox Siyiex hoik hoek ka aux ah nin, ⁵ "Aux hoik tawng ka maix sivoe ang nyang phan deuh maix ka daux vaig miex maix, sivoe ang maix nyang keh, Aux hoik singax mai Aux hoik yaog maix mawh cao jhai piang ceu pui kuceu heue." ⁶ Khaix an aux ah nin, "Siyiex eue, jhak heue, Aux ang chix sidiex chix krai lox kheu mawh aux kawn nyawm heue." ⁷ Viang mawh nan, Siyiex ah nin ka aux "Paw vi ah mawh tix kawn nyawm, mawh kheu sang ploi Aux maix hu krai lox ka pui pa hoik tawm Aux ka maix heue. ⁸ Siyiex ah nin, paw lhat graung ka plak sivoe plakngai kix, mawh kheu Aux ot tau mai maix sonsang taoh ka maix heue. ⁹ Khaix an Siyiex nyeu taix tix mai teeh ka jheeh aux ah nin, "Jhak heue, Aux hoik sau gumlox tix ka daux jheeh maix heue. ¹⁰ Jhak ti yaox ka daux singaix, Aux hoik yaog maix piang ceu pui kuceu mai piang meung haktiex an khankix, sonsang reeig mai sonsang yieh laux, sonsang yuh laux leeing mai sonsang teei ti tik, sonsang pang mai sonsang sum heue." ¹¹ Khaix an gumlox Siyiex hoek ka aux ah nin, "Yeramix eue, yaox maix ceu patix lie? "Aux ah nin," Aux yaox ka kak khaox Batan heue." ¹² Khaix an Siyiex ah nin ka aux, "Maix hoik yaox mhawm mhawm, mawh kheu Aux hoik pau ti jhak sonsang naog gumlox Aux heue." ¹³ Gumlox Siyiex baox hoek ka aux ra bawg tix bawg ah nin, "Yaox maix ceu patix lie?" aux ah nin, "Aux yaox ka aw pa kawn lok tix mu mai veeh pakngai tix ka plak laong heue." ¹⁴ Khaix an Siyiex ah nin, "Ka aux ceu pa lang teung kied kha rhawm tak preung ti hoek khaing plak laong piang pui ot ka daux haktiex in khawmuik heue." ¹⁵ Siyiex ah nin, "Jhak heue, Aux kok ka pui nyiex ma meung haktiex plak laong khawmuik, khaix hoek kix mai hoik tang sum ka dang ngeung cie mawx cie an ka dee laig daux siviex veng Yerusaliem khankix mai hoek vung viang guh veng khawmuik mai hawt vung viang veng Yudax khawmuik heue." ¹⁶ Aux tak prawng ca ka kix awm pa caox caig yuh kix khawmuik, grawh grawng nawh, kix hoik tik hoik vud ka Aux mai gleeing nyawng bhawng ka siyiex tang kaux tang hak khankix mai hoik krub ka kaing pa yuh ka taix cao tix heue. ¹⁷ Mawh kheu nan, kaoh mai rawd ka maox rawd nyoi tix mai krai ceu pa tawm Aux ka maix khawmuik ka kix heue. Paw lhat graung ka plak sivoe ngai kix, phan ang mawh nan, Aux tak kieh maix kaig ka plak sivoe ngai kix heue. ¹⁸ Jhak heue, ka daux singaix Aux hoik yaog maix mawh veng pa kaux cong mai mawh rong rhiem mai guh veng tawng lheung khankix ka piang haktiex khawmuik, piang simiang Yudax khankix, piang simiang greem simiang khankix, piang cao giex kaing li khankix mai piang pui haktiex khankix heue. ¹⁹ Siyiex ah nin, "Kix tak puing ka maix, viang mawh nan, kix tak ang pex ka maix heue. Mawh kheu ot Aux tau mai maix sonsang taoh tix ka maix heue."

¹ Khaix an gumlox Siyiex hoek ka aux ah nin, ² Khaix an Siyiex ah nin, "Hu mai kok yo ka veng Yerusaliem sonsang mhong kix ka, Aux doh keud ka krax caux rhawm yam awn ju maix, krax moh pa dex dawd yam mawh nyiex ma khraox, yam hawt hu maix khaix Aux daux tiagtu, ka haktiex pa ang nyang rhuat nyang sum heue. ³ Ceu pui Isarelax mawh pa singax singeh son Siyiex mai mawh plix num pa nie haok hwan cie Nawh Cao heue. Siyiex ah nin, can pui pa yuh kix laux leeing, tak mawh pa lud mai krax laux leeing tak hoek piang kix heue." ⁴ Nyiex ma ceu pui Yakop mai doeh ru pui Isarelax khankix eue, nghiet ka gumlox Siyiex heue. ⁵ Siyiex ah nin, "Mawh hoik yaox keeing pex khankix phimap ceu tix ka daux Aux mai lih hu dee singai khaing Aux mai hoik hoek hu krub riang grang khankix pa mawh riang rao pa giex going lie?" ⁶ Kix ang sax ah nin, mawh ot Siyiex dee mawx lie? Siyiex pa hoik viex ex lih khaing daux meung Ejiptux, pa thong ex daux tiagtu, ka daux tiag mhaik, ka daux tiex khankix, ka daux tiex kroh groing mai ka daux veei krax yum, ka haktiex ang pui tix kaux kawx pon lailing ka mai ang koe pui ot ka dee an tix kaux kawx heue. ⁷ Aux hoik viex pex laig ka daux haktiex dee pa kied nyawm tix ot, sonsang yaox pex tix ih plix nawh mai bee pa mhawm nawh khankix heue. Viang mawh nan, yam hoik laig pex, pex yuh haktiex Aux mawh pa caox caig mai hoik yuh sinngao Aux mawh pa seeing brai heue. ⁸ Cao giex kaing li khankix ang sax chawk ah nin, koe Simiang dee mawx lie? pui pa giex lox tat jawm prawng khankix ang tawng ka Aux, cao thung bung khankix hoik lud ka Aux mai cao jhai khankix krai lox jhai pa ang mawh ang meh khaing Balax mai hawt khaix ceu pa ang koe bwanson heue. ⁹ "Mawh kheu nan, Siyiex ah nin, Aux tak sang viex grawng see an khankix hoek piang pex, piang kawn, kawn praix pex khankix heue. ¹⁰ Tiang ka plak klawn tiex Saiparat mai jhak ti yaox, ploi pui hu ka haktiex Keda mai bre keud ti yaox mhawm mhawm mai kia ti yaox mawh hoik sax koe ceu pa awm in lie? ¹¹ Mawh hoik sax tieh loh ceu pui khankix ka siyiex tix, pa ang tie mawh siyiex lie? Viang mawh nan, pui Aux khankix hoik loh min plakngai tix ka siyiex pa ang koe bwanson heue. ¹² Siyiex ah nin, "Raoma khankix eue, kieh koe pa daox deng ka in mai kieh koe krax sikua rhawm lhat graung mai kieh koe krax pa lhat graung tom pruh hauk haw tix heue. ¹³ Grawh grawng nawh, pui Aux khankix hoik yuh phimap pa caox ra ceu, kix hoik tik vud Aux pa mawh dee lih rawm im ju mai hoik kaong ka rawm dung pa chix grhup chix bhieh son tix tom ang rawm chix dung chix nien ka heue." ¹⁴ "Mawh mawh Isarelax siliex? Mawh nawh siliex pa keh daux nyiex lie? Mawh kheu patix nawh lai yaox tix mawh pa rhim ti teei ka lie? ¹⁵ Sivai sangsi awn ju khankix hoik brawh ka nawh mai riag yo lox tix sinum, kix hoik yuh haktiex nawh laux leeing, veng nawh khankix kawx hoik gleeing tom ang pui lai chix ot ka heue. ¹⁶ Pui veng Nawphax mai pui veng Tapaniet khankix kawx, hoik raig mhok khri max khaing kaing maix heue. ¹⁷ Mawh kheu tik vud maix ka Siyiex Cao pa thong maix ka krax, jao an ceu in hoik hoek piang tokaux maix ang mawh lie? ¹⁸ Yam in maix lai hu krax plak meung Ejiptux, sonsang nyaux rawm klawng Nilax yuh ka mawx lie? Phan ang mawh nan maix lai hu krax plak haktiex Asurix, sonsang nyaux tix ka rawm klawng Ufrethix yuh ka mawh lie?" ¹⁹ Siyiex Cao kru naing raoma ah nin, "Krax pa caox caig maix tak mawh pa deeh sidiex maix, krax pa tieh feen maix tak dee tawx phimap ka maix heue. Mawh kheu nan, kieh maix tawng mai yaox ka ceu an mawh ceu pa caox mai ceu pa kied song, mawh kheu hoik tik vud maix Siyiex tix mai krax lhat graung ka Aux ang koe ka daux maix heue." ²⁰ Ka daux bawg yam an dix, Aux hoik raig khaox glawm maix pot mai hoik yah ti tik ka ceu pa phyawk ka maix khankix mai maix hoik ah nin, "Aux ang yuh pa lud, viang mawh nan, pex hoik lud hoik vao mai bun coh kaux piang gawng lhaong ku gawng mai greem pang khaox klai khankix ku pang heue." ²¹ Viang Aux hoik sum maix mawh nhu plix siiet pa kied mhawm mai simie pa ciied pa mhawm kawx maix lai veeh tix hu khaing sivoe Aux, ka daux pa lih ti mawh nhu plix siiet pa ang lai ciied lai mhawm yuh ka mawx lie?" ²² Simiang Siyiex ah nin, "Viang maix heem tokaux tix ka rawm nyaox pa jawg tix ciied mai shiao sidah khoek khankix tom nie kawx, viang mawh nan, krax lud maix hoik sidawng ka plak sivoe Aux heue." ²³ Maix sang pon ah, "Aux ang seeing brai mai aux ang hawt khaix siyiex Balax yuh ka mawx? Jhak ka khaix maix ka daux lung, doh keud ka ceu pa hoik yuh maix, maix mawh kala uk khaing pa kied phai pa vung vang tix hu jee hu blaong krax hu tix heue. ²⁴ Awm miex la iak pa vung vang ka daux tiag mai hawt ngheet jee blaong yam hoek rhawm kraing rhawm he nawh, mawx pa pon tiebtie ka lie? ang lai shiao yuh tix tawx sonsang rawg kah, yam hoik naog bawg yam, kix tak yaox ka heue. ²⁵ Paw kieh caong maix jud khaing pa ang tix ceep kiiep mai paw kieh ghok maix jud khaing krax pa sang nyaux nie rawm heue. Viang mawh nan maix hoik ah nin, krax keud pot jun pot ang koe, pon ang lai koe heue. Mawh kheu Aux hoik moh ka siyiex pui tang kaux tang hak mai aux hu hawt khaix kix heue. ²⁶ "Awm kaig cao briex yam pon giex pui ka nawh, awm an nyiex ma ceu pui Isarelax khankix tak kaig tua, khawm tokaux kix mai simiang kix mai kawn laux kawn simiang kix mai khawm cao giex kaing li kix mai khawm cao jhai kix, ²⁷ Maix ah nin ka num khaox, Maix Cao mawh keeing aux mai maix ah nin ka simaox, Maix Cao hoik keh ka aux heue. Mawh kheu kix hoik ghaix blawg tix ka Aux mai ang veeh pakngai tix ka Aux heue. Viang mawh nan, yam yaox kix krax kha rhawm mai kix ah nin, "kaoh mai taoh ka yix liak." ²⁸ Mawh kheu nan, siyiex pa hoik yuh maix son tokaux tix koe dee mawx lie? Phan kix pon taoh ka maix kieh kix kaoh mai taoh ka maix yam yaox maix krax pa kha rhawm heue. O meung Yudax eue, koe veng maix haoh hun miex ding, siyiex maix kawx haoh hun awm an heue. ²⁹ Siyiex ah nin, "Mawh keud pex tix sang pon bwanson ceu patix mai hoek yuh see ka Aux lie? Pex khawmuik hoik tieh feen mai lud ka Aux heue. ³⁰ Aux hoik sivied mai sidiex ka kawn praix pex khankix hoik mawh pa giex going heue. Kix ang rieb ka pa sidiex gau Aux heue. Pex hoik yuh cao giex kaing li tix laux leeing ka lawm vaig tix awm grang sivai sangsi ka totiag heue. ³¹ Ceu pui khankix eue, keud ti yaox ka gumlox Siyiex mawh hoik sax mawh Aux daux tiagtu son pui Isarelax, phan ang mawh nan, meung pa faik lie? Kheu pui Aux khankix lai ah nin, ex hoik pon hu kudah dee mai tak ang lai hoek ka Maix Cao khaix in pie tix bawg kawx heue." ³² Mawh sang piawm bunkrih pa singax ka kraung ceep pa hoik khre rien tix, phan ang mawh nan, bunkrih pa sang yuh ka paox ka maox rawd nyoi tix lie? Viang mawh nan, pui Aux khankix hoik piawm ka Aux bawg yam singaix tom nie pa ang lai uik simin ka heue. ³³ Kheu maix lai yuh beenli daux krax cao tix sonsang sawg ka paox moh tix lie? Mawh kheu nan maix hoik gau ka bun pa caox caig khankix ka daux krax tix heue. ³⁴ Ka piang sibex lang jung maix kawx, hoik yaox ka nham pui hot khankix pa ang koe phimap heue. Viang Aux ang sawg ti yaox an tom dee raux dee mox kawx, viang mawh nan, hoik sidawng piang kraung ceep maix heue. ³⁵ Viang yuh nan maix kawn ah nin, �Mawh kheu mawh aux pui pa ang koe phimap, krax pa song rhawm Maix Cao tak veeh khaing aux tete heue Jhak heue, Aux tak veeh krax prawng krax ciyang Aux hoek piang maix, kheu jao ah maix nin Aux ang koe phimap heue.� ³⁶ Kheu jao patix maix lai vung vang tix hu kudah dee sonsang tieh loh maix daux krax hu ti yuh ka mawx lie? Maix tak kaig tua ka meung Ejiptux, awm hoik kaig tua maix ka haktiex Asurix heue. ³⁷ Maix tak yaox tix lih hu khaing haktiex an, tau mai pa deuh maix taix tix piang kaing tix, mawh kheu Siyiex hoik thiang ti tik ka ceu an pa een maix rhawm tix mai maix tak ang koe krax haok hwan kheu kix heue."

¹ Kix ah nin, "Phan pui tix kaux tik moeng tix mai bun an lih hu khaing nawh mai mawh moeng pui tang kaux, mawh khaw nawh tix deeh teei ka bun an tix bawg lie? Haktiex pa yuh nan, tak mawh pa kied seeing ang mawh lie? Viang mawh nan maix hoik lud vao mai bun paox moh tix tom nie kaux, viang yuh nan, Siyiex kawn ah nin, deeh hoek ka aux heue." ² Yaog ngai tix ka dee lhaong mai jhak ka dee ang maix nyang sax it tau mai simex khankix maix hoik ngawm tix pau ka kix, hawt krax awm pui Arap ka daux tiagtu mai maix hoik kieh haktiex seeing brai kheu grawng lud vao maix ka bun tau mai krax pa caox caig yuh tix khankix heue. ³ Mawh kheu nan, lhiex ang lai lih mai rawm lhiex kawx ang koe ka heue. Maix mawh pa koe dong re bun coh kaux maix hoik thiang ka ceu pa kaig tua heue. ⁴ Jhak tom yam in, ang mawh maix pa kok ka Aux ah nin, keeing aux eue, Maix Cao mawh paox grawm aux tom kawn awn ju aux ang mawh lie? ⁵ Mawh sang song rhawm Siyiex jheung jheung lie? Mawh sang priex Nawh Cao ti deuh phimap tom sidah sidu lie? Jhak heue, maix hoik ah nin mai ca kawn yuh ceu pa caox khankix awm pa pon yuh tix heue." ⁶ Siyiex baox ah nin ka aux daux baux singaix kwang simiang Yosiyax ka haktiex "Mawh hoik yaox maix ka krax pa tieh feen ceu pui Isarelax khankix lie? Nawh haok piang gawng lhaong ku gawng mai ka greem pang khaox klai ku pang mai hoik lud hoik vao ka bun coh kaux tan heue. ⁷ Khaix hoik yuh nawh ceu an khankix mai Aux ah nin, deeh hoek ka Aux Viang mawh nan, nawh ang lai hoek heue.Nan nawh Yudax pa ang kaux sijax hoik yaox ka an heue. ⁸ Khaix an aux hoik yaox ka grawng ceu pa tieh feen pui Isarelax khawmuik mai hoik vao tau mai moeng kawn pui khankix heue. Aux hoik tik nawh luan singai mai hoik tawx lai gwieh mex moeng ka nawh heue. Viang yuh nan kawx, nan nawh Yudax pa kaux sijax an, ang lai koe krax lhat graung mai baox yuh kaing bun coh kaux heue. ⁹ Mawh kheu nan, nawh hoik lih ti mawh pa yuh kaing bun coh kaux mai nawh hoik seeing yuh haktiex ka daux pa lud vao tau mai simaox khankix mai pang khaox khankix heue. ¹⁰ Viang hoik yuh phimap kawx pa mawh nan nawh Yudax pa ang kaux sijax an, ang lai cu tix hoek ka Aux tau khawm rhawm tix khawmuik mai yuh grang tix awm pa sang hoek ka Aux, Siyiex ah nin heue. ¹¹ Khaix an Siyiex ah nin ka aux, "Krax pa tieh feen pui Isarelax hoik jhi tokaux tix mawh pa nie lheu rahsee khaing Yudax pa ang kaux sijax heue. ¹² Hu krai gumlox in khankix ka plak laong ah nin, Siyiex ah nin, "Isarelax pa tieh feen eue, deeh hoek heue. Aux ang kieh pa song rhawm tix glup piang maix, Siyiex ah nin, mawh kheu Aux mawh pa koe krax ju heue. ¹³ Mawh ngie khyox khaw maix ka pa lud tix ka Siyiex pa mawh Siyiex maix mai Siyiex ah nin maix ang nghiet ka lox mai hoik lud ka Aux mai hoik lud vao tau mai siyiex pui tang kaux tang hak greem pang khaox klai khankix ku pang heue. ¹⁴ Siyiex ah nin, kawn nyawm khankix eue, deeh hoek heue. Mawh kheu Aux mawh cao mawh miex ka maix heue. Aux tak sang teei pex khaing tix veng tix kaux mai khaing daux doeh nyiex ma tix cub ra kaux, Aux tak sang viex pex hoek ka veng Zion heue." ¹⁵ "Aux tak yaox tix tawx cao liang yung khankix ka pex awm krax pa koe rhawm Aux mai pa sang liang pex ka cuyi pingnya mai krax tawng yung heue. ¹⁶ Khaix an ceu ankix lih ti mawh, yam kied haoh hun mai haok hwan pex ka daux haktiex daux singaix an heue. Siyiex ah nin, "Kix tak ang lai baox deeh yaox tix ah, teug bwan sijax mukheu Siyiex kix tak ang lai koe krax keud ce ka teug bwan sijax mukheu mai tak ang lai doh keud ka an mai ang lai yaox ti hu pub ka an mai ang lai baox yuh khaix an tix bawg kawx heue." ¹⁷ Ka daux bawg yam an, veng Yerusaliem tak sang kok mawh dang ngeung Siyiex mai ceu pui khawmuik tak sang deeh kraix khrawm ti hoek ka an, ka daux min ceu kaux Siyiex ka veng Yerusaliem heue. Kix tak ang lai hawt khaix pa caox caig mai rhawm keud pa kiien tix heue. ¹⁸ "Ka daux singaix an, nyiex ma ceu pui Yudax tak yuh paox pie tau mai nyiex ma ceu pui Isarelax khankix mai kix tak hoek tau mai paox khaing haktiex plak laong mai hu ka haktiex pa hoik tawx Aux, mawh sinngao ka keeing kix heue." ¹⁹ Viang mawh nan, aux hoik ah nin, "Aux tak sang pon deuh maix ot ka sinax kawn praix khankix mai tawx haktiex pa mhawm, pa mawh singao mhawm grang meung haktiex khankix ka maix yuh ka mawx lie? Aux ah nin maix tak kok ka Aux, keeing Aux eue, mai tak ang lai lih hu khaing aux heue." ²⁰ Siyiex ah nin, "Ceu pui Isarelax khankix eue, awm lih hu moeng pa ang kaux sijax khaing mex tix pex kawx ang kaux sijax tau mai Aux heue." ²¹ Kix hoik mhong lox yiiem grai khyox khaw kawn praix ceu pui Isarelax khankix khaing dee lhaong heue. Grawh grawng nawh kix hoik lud loe krax hu tix mai kix hoik piawm ka Siyiex, pa mawh Siyiex kix heue. ²² "Kawn nyawm pa tieh feen khankix eue, deeh hoek mai Aux tak pai krax tieh feen pex heue. Jhak heue, deeh hoek ka Maix Cao tete heue. Grawh grawng nawh, Maix Cao mawh Siyiex pa mawh Siyiex ex heue." ²³ Krax keud pot jun pot khaing gawng mai gawng lhaong khankix mawh giex going tete, ka daux Siyiex pa mawh Siyiex ex, koe krax taoh son ceu pui Isarelax tete heue. ²⁴ Grawh grawng nawh, krax kaig tua hoik bleeh tix ih sinngao riang rao keeing ex khankix, pa mawh cub yung mai cub mawie khankix, ka kawn simex kawn bun kix khankix jah tom yam mawh ex kawn nyawm pa awn ju heue. ²⁵ Kieh ex it ka daux pa kaig tua tix mai ka daux pa laux pakngai tix heue. Mawh kheu hoik lud ex mai tieh feen ka Siyiex pa mawh Siyiex ex mai keeing ex khankix, jah tom yam kawn awn ju ex, tom hoek ka daux in singaix mai ang cu ang nghiet ka lox Siyiex pa mawh Siyiex ex heue."

¹ Siyiex ah nin, "Ceu pui Isarelax eue, phan maix sang deeh hoek, deeh hoek ka Aux heue. Phan maix koe rhawm ti sang tik pa seeing brai tix khankix luan singai khaing daux ngai Aux, khaix an paw lai gah ti hu khaing Aux heue. ² Maix tak tiextu ti ah nin, �Awm im ju Siyiex,� ka daux krax pa mawh meh mai ka daux krax prawng ca mai ka daux krax pa rahsee, ceu pui khankix tak nawb bwan ka daux Nawh Cao mai kix tak yaw rangdi ka daux Nawh Cao heue." ³ Mawh kheu Siyiex ah nin ka pui haktiex meung Yudax mai pui veng Yerusaliem khankix "Thai ka kaung pex mai paw ruat simie sinax pang kat khankix heue. ⁴ Pex pa mawh pui haktiex meung Yudax mai pui ot ka daux veng Yerusaliem khankix eue, pat doeh hak cao maix son Siyiex mai pat ti tik toeh hak rhawm pex heue. Phan ang yuh nan, krax pa song rhawm Aux tak lih hoek awm ngu mai gleeing tom ang pui tix kaux kawx pon preet ka, mawh kheu ceu pa caox caig yuh pex khankix heue." ⁵ Krai pao ka daux haktiex meung Yudax mai pao kok yo ka daux veng Yerusaliem ah nin, "Phlu teettawng ka daux haktiex Yudax, kok yo lox tix mai kieh pui tawng pa ah nin, khrawm paox tix kieh ex hu laig ka daux veng pa kaux cong khankix heue." ⁶ Jung ti deuh chix piang gawng Zion, nied ti to hu sonsang glawd, paw lai kaok lai cung, grawh grawng nawh, Aux tak sang viex pa laux leeing hoek khaing plak laong mai khawm pa laux leeing ting lhaong heue." ⁷ Sivai sangsi hoik lih khaing daux yeem ot tix mai pui pa sang yuh krax laux leeing haktiex khankix, hoik hoek hawt krax. Nawh hoik lih khaing dee ot tix, sonsang yuh haktiex ot maix mawh pa yiien hu pui ka heue. Veng pex khankix tak mawh pa hoik laux leeing tom ang pui pa ot lai koe ka heue. ⁸ Mawh kheu grawng in, ceep ka kraung chee rhix mai yiiem riag yo ka heue. Grawh grawng nawh, krax pa kied song rhawm Siyiex ang nyang bax luan hu khaing ex heue." ⁹ Siyiex ah nin, "Ceu pa tak sang lih ti mawh singaix yam an, rhawm simiang mai rhawm cub simiang greem nawh khankix tak sang laux hu heue. Cao giex kaing li khankix tak daox deng mai cao jhai khankix tak daox deng ka heue. ¹⁰ Khaix an aux deeh ah nin, "Siyiex eue, Maix Cao hoik pie lhen ka pui veng mai Yerusaliem tete, viang maix hoik ah nin, �Pex tak koe pa nhim rhawm,� tom hoik krox gawn ka sok rhawm heue." ¹¹ Ka daux bawg yam an, tak ah ka pui in kix mai ka pui veng Yerusaliem khankix heue. "Bhaung pa hax khaing dee lhaong tak phlu hu ka daux tiag ka plak see kawn bun pui aux khankix mai ang mawh bhaung pa sang vi sang boe mai ang mawh bhaung pa sang yuh singax heue. ¹² Bhaung pa kied ting riang khaing an, tak hoek ka sonsang yuh alo Aux naok heue. Yam an Aux tak sang chawk cheng mai prawng ca piang kix heue. ¹³ Nawh tak sang hoek bleeh awm paiawm mai ling lawx naing nawh khankix tak mawh pa awm keu kang lux tix mu heue. Bhaung Nawh khankix mawh pa nie lheu phai khaing klang krih an heue. ¹⁴ "Veng Yerusaliem eue, kieh rhawm maix luan khaing ceu pa caox caig, sonsang pon maix tix hoek krax taoh. kawn sang kieh maix krax pa caox khankix ot ka daux rhawm tix been miex greeng lie?" ¹⁵ Grawh grawng nawh, lox pa pao tix gum, kaoh khaing haktiex Dan mai krai grawng pa kha rhawm khaing gawng Epharem, ¹⁶ tawx satix ka pui haktiex an mai krai pao piang veng Yerusaliem, cao pau veng khankix hoek khaing haktiex pa kied singai mai yo lox tix lih piang veng haktiex Yudax heue. ¹⁷ Kix hoik vung viang ka haktiex Yudax awm cao pa pau ka kaung heue. Grawh grawng nawh, haktiex an, hoik tieh feen ka aux, Siyiex ah nan heue. ¹⁸ Daux krax maix mai grawng pa yuh maix, hoik kieh ceu in hoek piang maix heue. In mawh grawng pa caox caig cie maix heue. Grawh grawng nawh, an mawh ceu pa kied song kied saik ka rhawm maix kheu grawng hoek an ka daux rhawm maix heue." ¹⁹ Khwan ju aux eue, khwan ju aux eue, Aux hoik kied saux rhawm teeg rhawm tete, rhawm aux hoik kied si aoh ka daux aux. Aux ang lai pon ot yiien yawg tix, khwan ju aux eue, grawh grawng nawh maix hoik mhong ka lox sinum teettawng mai lox sinum naing heue. ²⁰ Riag yo lox ti ah nin, krax pa laux leeing piang pa laux leeing, haktiex khawmuik khawm leeing mawh pa hoik laux leeing heue. Nyiex gox aux khankix kawx hoik laux leeing sijaox mai man tieb aux khankix mawh pa hoik laux leeing dom mawx dom an heue. ²¹ Aux tak sang pon yaox ka chix an mai mhong ka lox sinum teettawng khankix reung been miex greeng lie? ²² Grawh grawng nawh, pui Aux khankix mawh pa daox pa aw mai kix ang tawng ka Aux heue. Kix mawh kawn nyawm pa ang koe rhawm keut mai kix ang koe krax tawng yung, kix koe cuyi tix sang yuh pa caox, viang mawh nan, kix ang tawng ti yuh ceu pa mhawm heue. ²³ Aux jhak ti yaox ka haktiex hoik yi mai ang lai koe tidtix heue. Aux deeh jhak ti yaox ka raoma khankix mai ang koe pa riang heue. ²⁴ Aux jhak ti yaox gawng khankix mai kix hoik siyaung mai ton khankix khawmuik hoik yung yang heue. ²⁵ Aux jhak ti yaox mai ang lai yaox pui tix kaux kawx mai sim raoma khankix khawmuik hoik to luan heue. ²⁶ Aux jhak ti yaox, haktiex pa naok ka plix haoh hun hoik lih mawh daux tiagtu heue. Veng khankix khawmuik hoik grup hoik laux, ka plak sivoe ngai Siyiex, kheu krax pa kied song rhawm Nawh Cao heue. ²⁷ Mawh kheu Siyiex ah nin, "Haktiex khawmuik tak mawh pa laux leeing heue. Viang mawh nan, Aux tak ang yuh laux khawmuik heue. ²⁸ Son grawng in, haktiex tak koe krax pa ngia ka mai raoma tak lung vaik kheu lox pa hoik ah Aux mai rhawm pa hoik keut Aux mai, Aux ang lai deeh chix tieh chix loh rhawm khaing an heue." ²⁹ Pui veng khankix khawmuik tak to tix lih hu, mawh kheu mhong ka lox sinum pui naing brung mai pui naing ak khankix, kix to daux tiag mai haok piang rang khankix heue. Veng ku veng tak mawh pa hoik tik vud tix mai ang lai koe pui pa ot ka daux veng tix kaux kawx heue. ³⁰ Yam hoek ceu pa laux leeing ka maix, mawh sang yuh maix ka mawx? Viang maix ceep ka kraung pa raoh kawx mai viang maix jawg tokaux tix ka kraung khri kawx, viang mai kraix ngai tix ka sidah awt kawx, pa yuh maix grang tix an mawh pa giex going heue. Paox moh maix khankix tak seeing ka maix mai tak sang sawk ti teei ju maix yum heue. ³¹ Mawh kheu Aux hoik mhong lox pa awm lox ngia bun keh pa ang sax keh kawn tix mai lox ngia pa saux nawh awm bun pa liang ti keh kawn tix, awm an lox yo kawn bun veng Zion ka daux pa ngia nawh pa neh taix tix ah nin, "Aux koe krax kha rhawm yam in heue. Aux kied koe krax pa laux rhawm kheu jao grawng cao pa pah pui khankix heue."

¹ "To hu to hoek ka daux krax daux veng Yerusaliem, hawt jhak mai sawk ti yaox ka plak praix khawm plak taoh plak caw khankix, sonsang pon ti yaox pui pa hawt ti yuh pa rahsee mai pa mawh meh, pie tix kaux tan mai Aux tak pluat ploi phimap veng Yerusaliem an heue. ² Viang kix ah mawh Siyiex pa im ju kawx, kix kawn tiextu ka daux pa ang mawh meh tete heue. ³ Siyiex eue, ngai Maix Cao mawh pa simi ti jhak piang pa mawh meh ang mawh lie? Maix Cao hoik siviet tix gau ka kix, viang mawh nan, kix cu tix tieh loh rhawm tix, Maix Cao hoik yuh kix laux leeing, viang mawh nan, kix hoik thiang ti tik ka ceu pa sidiex gau maix heue. Kix hoik kieh pakngai tix lheu kiien khaing simaox, kix hoik thiang tix ang deeh ing heue. ⁴ Mawh kheu nan, Aux ah nin, pui in kix mawh pa hot sibhawm, grawh grawng nawh, kix ang tawng daux krax Siyiex mai ang tawng ka alo Siyiex kix heue. ⁵ Aux tak sang hu ka pui ting khankix mai krai ka kix, mawh kheu kix tawng daux krax Siyiex mai khawm lox Siyiex kix heue. Viang mawh kawx nan, kix hoik raig ti tik ka khaox glawm mai ka gumlox sijax mukheu khankix heue. ⁶ Mawh kheu nan, sivai sangsi pa kaoh khaing daux tiag tak sang pah kix yum, sox tiag pa lailing pon sawm, tak sang yuh kix laux leeing, sivai maox, ca pau tix jhak ka veng kix mai tak kiied ka pui pa lih khaing veng ku kaux, dud baux mawx baux an heue. Grawh grawng nawh, krax pa lud kix mawh pa kied nie mai krax pa tieh feen kix hoik baox nie gawp tix heue. ⁷ Aux tak sang pon pluat ploi phimap maix son in yuh ka mawx lie? Kawn praix maix khankix hoik tik vud Aux mai hoik tiextu tix ka pui pa ang tie mawh siyiex khankix heue. Viang aux hoik tawx kix ih priex preem tom sak, kix hoik lud ka moeng kawn pui mai khrawm paox tix hu ka daux nyiex bun coh kaux heue. ⁸ Kix hoik awm brung pa sak tix mu ponngawb caocao, pui ku kaux hoik riag hawt khaix moeng paox plawg tix heue. ⁹ Siyiex ah nin, "Mawh ang Aux khaw tix tawx krax kham geu ka kix, son grawng ceu in kix lie? mawh ang Aux khaw tix pawk bix ka kix tom vah rhawm tix ka lie?" ¹⁰ Hu ka piang guh veng nawh khankix mai yuh laux leeing, viang mawh nan, paw yuh laux khawmuik, tat ti tik taix caong nawh mawh kheu ang mawh cie Siyiex heue. ¹¹ Grawh grawng nawh, nyiex ma ceu pui Isarelax mai nyiex ma ceu pui Yudax khankix, ang lai kaux sijax ka Aux heue, Siyiex ah nin heue. ¹² Kix hoik thiang ti tik ka grawng Siyiex ah nin, Ang tie mawh Nawh Cao, ceu pa caox caig tak ang pon hoek piang ex mai ex ang sipup ti yaox ka vaik lawm mai ka krax hot sibawm heue. ¹³ Cao jhai khankix mawh bhaung, kheu ang gumlox Siyiex koe ka daux kix, awm pa sidiex kix tak lih mawh piang kix heue. ¹⁴ Mawh kheu nan, Siyiex Cao kru naing raoma ah nin, mawh kheu jao sikah kix lox in, jhak heue, Aux tak kieh gumlox sikah Aux khankix awm ngu ka daux jheeh pex mai ceu pui in tak mawh khix mai an tak gleeing ka kix heue. ¹⁵ Siyiex ah nin, "Ceu pui Isarelax khankix eue, jhak heue, Aux tak sang viex ceu pui tix cub hoek khaing ka dee pa kied singai tix puing kix ka pex mawh ceu pui pa kied ting riang mai mawh ceu pui pa dawk koe tom dixdix, mawh pui ang pex tawng lox sikah kix mai ang tawng ka ceu pa krai kix heue. ¹⁶ Te cie kix awm daux simeeig pa paoh ti deuh mai kix mawh pui pa kied ting riang rao khawmuik heue. ¹⁷ Kix tak teei ti ih plix nghox plix koi can pa vawg maix mai khawm blah pa sang ih kawn simex kawn bun maix ka. Kix tak teei ti ih cub yung cub mawie maix khankix, kix tak ih nhu plix siiet khawm gawng khaox ruh maix, kix tak yuh veng pa kaux cong pa een maix rhawm tix ka laux leeing ka vaig heue. ¹⁸ Siyiex ah nin, "Viang yuh ka mawx kawx, ka daux singaix an, Aux tak ang nyang yuh krax laux leeing ka maix, tom grum naog heue." ¹⁹ Pui khankix ah nin, "Siyiex pa mawh Siyiex ex, lai yuh ceu in khankix piang ex kheu jao patix lie? Khaix an maix tak deeh pawk ah nin ka kix, mawh kheu tik vud pex ka Aux mai hu yuh kaing son siyiex pui tang kaux tang hak ka daux haktiex cao tix, mawh kheu nan maix tak yuh kaing son pui tang praix klawng ka daux haktiex, pa ang mawh cie maix heue. ²⁰ Krai pao ka ceu in ka nyiex ma ceu pui Yakop mai ka haktiex Yudax ah nin, ²¹ Pui caox caig mai pa ang koe krax tawng yung khankix eue, koe ngai ang chix yaox mai koe yhaok ang chix mhong heue. ²² Siyiex ah nin, "Ang maix lhat ka Aux lie? ang maix koe pa sikua rhawm plak sivoe ngai Aux, pa hoik tawm lox tix gum mai kieh mhaik khankix mawh vie lawng ka rawm sigrit sigra, son ang an pon tiang tix hu ka plak toi an leeing ju lie? Viang puk pak rawm khankix pukpak miex ding kawx mai ang chix pex ka heue. Viang kix sinum siaox miex ding kawx, kix ang pon jao piang an heue. ²³ Mawh kheu ceu pui in khankix koe rhawm chix lud chix feen mai kix ca tieh feen jheung jheung heue." ²⁴ Kix ang sax ah nin ka daux rhawm tix, "Kieh ex lhat graung ka Siyiex pa mawh Siyiex ex, pa tawx rawm lhiex cao mai rawm lhiex lha tau mai bawg yam praix klawng heue. Nawh Cao pon ti deuh bawg yam vang twah vawg nghox khankix son ex heue." ²⁵ Krax lud pex khankix hoik plak ti tik ceu in khankix luan mai phimap pex khankix hoik tiebtie ceu pa mhawm khankix khaing pex heue. ²⁶ Grawh grawng nawh, Aux yaox pui pa caox caig ka sinax pui Aux khankix heue, kix jawm tix pau pui pa taong jhawk, sonsang taong ti giex pui khankix ka heue. ²⁷ Awm naog sim daux grau, nyiex kix kawx mawh pa naog ka ceu pie lhen heue. Mawh kheu nan, kix hoik ting lhaong mai haok hwan ka krax pa magmi heue. ²⁸ Kix hoik kluing mai plang ngai baoh, mawh heue. Kix baox nie lheu yuh kaing pa caox caig, kix ang prawng rahsee ka grawh grawng pui pa ang koe miex keeing khankix. Viang yuh nan kawx, kix ca kawn koe krax hwan mai kix ang tiebtie ka pa khaw caw pui pa cud cha khankix tix pon ka heue. ²⁹ Siyiex ah nin, mawh ang Aux khaw ti tawx krax pa kham geu ka kix, son grawng ceu in lie? Mawh ang Aux khaw tix deeh pawk bix ka kix tom fah rhawm tix ka kix lie? ³⁰ Krax pa daox deng mai pa kied lhat graung, ceu pa seeing brai mawh pa lih ti koe ka daux haktiex, ³¹ cao jhai khankix ah lox jhai pa ang mawh ang meh mai cao giex kaing li khankix kawx rieb ti teei ka sibrawm pa kwang tix mai pui Aux khankix kawx khaw rhawm ka ceu an awm paox tix heue. Yam sidah ceu an khankix pex tak sang yuh ka mawx lie?

¹ Pex pa mawh kawn praix Benyamin khankix eue, khrawm paox pex to khaing sigreung veng Yerusaliem sonsang glawd tix heue, phlu teettawng ka daux yaong Tekaw mai yaog ti deuh rong ngu mhai rug ka daux yaong Biethararim, mawh kheu pa caox caig mai khawm krax laux leeing pa kied ting lhaong hoek khaing plak laong heue. ² Aux sang yuh ka kawn bun Zion pa kied mhawm grang mai pa awn kaux hak khankix laux heue. ³ Cao liang yung mai yung khankix, tak hoek bleeh ka nawh. Kix tak sum nyiex gox tix plak hawt vung viang nawh khawmuik. Kix tang kuah tix ih dee ot pui mawx pui an heue. ⁴ Khre rien tix mai yuh naing ka nawh, kaoh mai kieh ex haok puing ka nawh yam jung singaix heue. Krax laux rhawm hoik koe ka ex, kheu hoik klip singaix, mawh kheu kied lang veei ponbo heue. ⁵ Kaoh mai kieh ex haok puing plak ponsawm mai kieh ex hu yuh nyiex haw simiang khankix laux leeing heue. ⁶ Grawh grawng nawh, Siyiex Cao kru naing raoma ah nin, "Kid ti tik ka khaox an khankix mai yuh guh tiex ka plak toi veng Yerusaliem heue. In mawh veng pa sang pon krax pa sidiex gau heue. Ka daux nawh hoik naog ka ceu pa yeen ya khaing heue. ⁷ Awm mhawm lih rawm keut khaing daux tix, veng an kawx ceu pa caox caig lih khaing nawh. Ex mhong grawng pa tud rhim mai pa kied kin khaing daux nawh. Ka plak sivoe Aux koe ngie krax saux ngia mai krax mat lheet jheung jheung heue. ⁸ Veng Yerusaliem eue, rieb ti teei ka pa sidiex gau, phan ang mawh nan, khwan Aux tak lih hu khaing maix, Aux tak kieh dee ot maix yiien mai mawh haktiex dee ang pui ot ka heue." ⁹ Siyiex Cao kru naing raoma ah nin, "Kix tak mawh pa pieh tix khawmuik awm plix siiet pa kawn deuk khaing nhu tix, ka pui Isarelax pa kawn deuk khankix kawx tak pieh awm an heue. Baox teei taix maix pieh ka hawt kak khankix awm pui pa khrawm ka plix siiet heue." ¹⁰ Sonsang nghiet kix lox tawx Aux satix, Aux sang krai ka pui mawx lie? Yhaok kix mawh yhaok pa ang nyang pat hak mai kix ang nghiet heue. Jhak heue, gumlox Siyiex mawh ceu pa sibriem kix ka mai kix ang gaux rhawm ka daux an heue. ¹¹ Mawh kheu nan, krax pa meet rhawm Siyiex hoik naog ka daux aux heue. Aux taug mao ka giex tix an heue. "Aux tak klup an lih piang kawn nyawm pa ot daux krax mai piang pui awn ju pa kraix khrawm tix tau heue. Grawh grawng nawh, mex moeng khawm ra tak teei tix hu tau, khawm pui riex ju pa koe tau mai nawh khankix heue. ¹² Siyiex ah nin, nyiex kix tak loe tix ka pui tang kaux tau mai ma kaung mai moeng kix khankix heue. Grawh grawng nawh, Aux tak nyeu taix tix mai tawx krax kham krax geu piang pui pa ot ka daux haktiex an khankix heue." ¹³ "Grawh grawng nawh, jah ka pui iak tom hoek ka pui ting khawmuik, kix ku kaux hoik ghoing ka sinngao pa ang rahsee heue. Jah ka cao jhai tom hoek ka cao giex kaing li khankix, kix ku kaux yuh pa lud loe heue. ¹⁴ Kix hoik pai dee saux kawn bun ceu pui Aux khankix ceeix khaing ah nin, �Yam ang lai koe pa nhim, kix ah pa nhim, pa nhim,� ¹⁵ Siyiex ah nin, "Mawh hoik kaig kix khaix yuh tix ka ceu pa seeing brai lie? Ang mawh, kix pon ang koe krax kaig ceeix kawx, mai kix ang tawng tix laux pakngai heue. Mawh kheu nan, kix tak goh piang paox tix, tix kaux lai tix kaux, yam tawx Aux krax kham krax geu ka kix mai kix tak hoek ka daux pa yeen kix tiem heue. ¹⁶ Siyiex ah nin, "Cung ka daux krax mai jhak ti yaox mai chawk ka krax prim an, ka dee koe krax pa mhawm mai lawng hu ka daux krax an heue. Khaix an ju pex tak yaox dee laux lee tix heue. Viang mawh nan kix ah nin, �Ex tak ang lawng hu ka daux krax an heue.� ¹⁷ Aux deuh pui pau yam khankix piang pex ah nin, �Nghiet ka lox teettawng,� viang mawh nan, kix ah nin, �Yix ang nghiet heue.� ¹⁸ Mawh kheu nan, pex pa mawh ceu pui tang ceu khankix eue, nghiet heue, cub pui hun khankix eue, kieh tawng ka ceu pa koe piang kix heue. ¹⁹ Pui haktiex khankix eue, nghiet mai jhak heue, Aux tak viex krax pa ting kha rhawm hoek piang ceu pui in awm plix simie pa keud kix khankix heue. Mawh kheu ang kix nghiet ka gumlox Aux mai thiang ti tik ka lox tat jhawm prawng Aux khankix heue. ²⁰ Pex lai viex Lawpan khaing haktiex Shebax mai ox mex pa tie khaing haktiex pa kied singai, khankix hoek ka Aux yuh ka mawx lie? Krax tan pa gleeing pex ang lai rieb mai krax tan pa appong pa nyawm cie pex kawx Aux ang lai khaw rhawm ka heue." ²¹ Mawh kheu nan, Siyiex ah nin, "Jhak heue, Aux tak sang deuh ceu pa sideeing khankix ka plak sivoe ceu pui in, keeing mai kawn tak goh piang an tau, paox plawg mai paox grawm nawh khankix tak laux leeing tau heue." ²² Siyiex ah nin, "Jhak heue, ceu pui tix cub tak sang hoek khaing haktiex plak laong mai ceu pui pa kied ting tix ceu tak yaog ti kaoh khaing tom dee die haktiex heue. ²³ Kix tak sang giex ak mai pliah; kix mawh pui pa lang teung ca nyhau mai ang koe krax caux rhawm mai lox sikah kix siaox sinum awm rawm sigrit sigra, kawn bun Zion eue, kix brug brung hoek awm pui naing khankix pa hoik khre tix hoek puing ka pex heue." ²⁴ Ex hoik mhong ka grawh grawng satang an mai taix ex kawx awn riang ka heue. Krax kha rhawm hoik giex piang ex awm saux bun keh heue. ²⁵ Paw hu ka daux kaung mai paw hu ka daux krax. Mawh kheu koe vaig pui koeng, pa lhat graung ku plak heue. ²⁶ Kawn bun ceu pui Aux khankix eue, ceep ka chee rhix mai lu lieh tix ka daux nyaox heue. Kieh yiiem awm yiiem ka yum kawn simex tix kaux mai koe pa kied khi rhawm ka heue. Grawh grawng nawh, pui tud rhim tak hoek sijaox ka ex heue. ²⁷ Aux hoik deuh maix mawh cao ciied awm nyiex tab lhaong tix mu ka sinax ceu pui Aux, sonsang ciied maix tix tawng daux krax hu kix heue. ²⁸ Kix mawh pui pa kied tieh feen pa chix coh lox sikah khawmuik heue. Kix mawh tawng lheung mai rhiem giex going mai mawh pa yuh laux leeing heue. ²⁹ Jhauh hoik phlu bhaung lih sigrien sigre, sivun kawx hoik rawm ka ngu, cao pa raug pa ciied kawx mawh pa giex going heue. Grawh grawng nawh, ceu pa caox caig ang pon bluh lih heue. ³⁰ Pui khankix tak kok kix mawh pa hoik tik pui ka, kheu jao hoik tik Siyiex ka kix heue."

¹ Gumlox hoek khaing Siyiex ka Yeramix ah nin, ² "Cung ka diang siviex nyiex bwan Siyiex mai krai pao lox pa ah nin, pex pa mawh pui Yudax pa laig ka diang siviex sonsang krub ka Siyiex khankix eue, nghiet ka gumlox Siyiex heue." ³ Siyiex Cao kru naing raoma, pa mawh Siyiex pui Isarelax khankix ah nin, "Deeh cox daux krax been ot pex mai can pa yuh pex khankix, phan pex yuh nan, Aux tak sang kieh pex ot ka dee in heue. ⁴ "Paw doh een rhawm tix ka lox pie lhen ah nin, in mawh nyiex bwan Siyiex, nyiex bwan Siyiex, nyiex bwan Siyiex heue. ⁵ "Grawh grawng nawh, phan pex deeh cox been krax hu tix mai ceu pa yuh tix khankix mai phan pex prawng see ka daux krax pa rahsee sinax pui tix kaux mai paox plawg tix khankix tom kriem, ⁶ phan pex ang nunai ka nyo sinie mai kawn nyawm ang koe miex keeing mai ka miexmai mai ang kieh nham pui pa ang koe phimap khankix jauh nham ka dee in mai ang hawt khaix siyiex tang kaux tang hak sonsang som nai bwanson tix ang ah, ⁷ khaix an, Aux tak kieh pex ot ka dee in, ka daux haktiex pa hoik tawx Aux ka keeing pex leeing ju heue. ⁸ Jhak heue, pex een rhawm tix ka lox pie lhen, pa ang koe bwanson heue. ⁹ Pex briex kraung khrai pah pui yum, lud mai moeng kawn pui, kham sakse pa ang mawh ang meh mai gleeing nyawng bhawng ka siyiex Balax mai hawt hu khaix siyiex tang kaux tang hak, pa ang pex tawng ka khankix, ¹⁰ khaix an hoek mai cung ka plak sivoe Aux, ka daux nyiex bwan in, pa hoik kok tix ka min ceu kaux Aux ah nin, �Ex mawh pa hoik pon bwanson pa taoh,� tau mai yuh tix krax pa seeing brai khawmuik ang mawh lie? ¹¹ Mawh kheu kieh pex nyiex bwan in, pa hoik kok tix ka min ceu kaux Aux, lih mawh dee ot pui tud rhim ka daux ngai tix lie?" Siyiex ah nin, "Tokaux Aux kawx, hoik yaox ka ceu an heue." ¹² Viang mawh nan, yam in hu ka dee ot Aux, ka daux yaong Shilaw, ka dee deuh Aux min ceu kaux tix sivoe mai jhak ka ceu pa hoik yuh Aux ka dee an, kheu grawng pa caox caig pa yuh pui Aux Isarelax khankix heue. ¹³ Yam in Siyiex ah nin, mawh kheu jao hoik yuh pex ceu in khawmuik mai Aux kaoh caocao mai krai ka pex, viang mawh nan, pex ang nghiet mai Aux kok ka pex, viang mawh nan, pex ang pawk ka lox Aux heue. ¹⁴ Mawh kheu nan, Aux tak yuh ka nyiex bwan in pa hoik kok tix ka min ceu kaux Aux, ka dee een pex rhawm tix mai ka dah dee pa hoik tawx Aux nawh ka pex mai keeing pex khankix awm pa hoik yuh Aux ka yaong Shilaw heue. ¹⁵ Aux tak sang tik pex lih khaing plak sivoe ngai Aux, awm hoik tik Aux ka puxaik pex mai kraung khrai sinngao ceu pui Epharem khawmuik heue. ¹⁶ Mawh kheu nan, paw lai rawg bwan son ceu pui in mai paw lai riag yo mai paw lai rawg bwan ka son kix mai paw lai jeeh nyaw Aux, mawh kheu Aux ang lai nghiet ka lox maix heue. ¹⁷ Mawh ang pex yaox ka ceu pa hoik yuh kix ka daux veng Yudax mai ka daux krax veng Yerusaliem khankix lie? ¹⁸ Kawn nyawm khankix kraix khix mai keeing mawh cao sau ngu mai bun khankix klu klao phawng nghox ca, sonsang yuh khlawp blah son laux simiang raoma mai kix rawg tix tawx krax tan pa nyaux khankix ka siyiex tang kaux tang hak, sonsang so ti kieh Aux song rhawm ka heue." ¹⁹ Siyiex ah nin, "Mawh so kix Aux koe krax song rhawm lie? Ang mawh kix pa tang so tokaux tix koe krax kaig tua khaing lie?" ²⁰ Mawh kheu nan, Siyiex ah nin, "Jhak heue, Aux rawg krax pa song rhawm tix mai krax meet rhawm tix piang baoh dee in, piang pui, piang tobrie, piang khaox daux tiagtu mai piang simie tiextug khankix. An tak proe mai ang lai chix yeet heue." ²¹ Simiang Siyiex cao raoma mai pa mawh Siyiex ceu pui Isarelax ah nin, "Baox sau krax tan pa gleeing pex khankix piang krax tan tang ceu mai ih ka nex an heue. ²² Grawh grawng nawh, Aux ang krai lox ka keeing pex mai ang tawm lox ka kix, ka daux singaix yam viex Aux kix lih hu khaing daux meung Ejiptux son krax tan pa gleeing mai krax tan pa appong khankix heue. ²³ Viang mawh nan, ceu pa hoik tawm Aux ka kix ah nin, cu nghiet ka lox Aux mai Aux tak mawh Siyiex pex mai pex kawx tak mawh pui Aux, lawng hu ka daux krax pa hoik tawm Aux ka pex, sonsang mawh bwanson pa mhawm ka son pex heue. ²⁴ Viang mawh kix hoik ang cu tix nghiet mai ang veeh yhaok tix, viang mawh nan, kix hu ka daux krax pa keud cao tix mai rhawm pa caox caig kix mai hoik deeh plak khaix mai ang hu plak sivoe heue. ²⁵ Jah tom yam lih hu keeing pex khaing meung Ejiptux, tom hoek ka daux in singaix, Aux kaoh caocao ku ngaix mai ploi siliex cao jhai tix khankix hoek ka pex ang jud ang jai heue. ²⁶ Viang mawh nan, kix ang cu tix nghiet ka lox Aux mai ang veeh yhaok tix, kieh ngawg tix kiien. Kix hoik nie lheu yuh pa caox khaing keeing kix heue. ²⁷ Mawh kheu nan maix viang krai lox in khawmuik ka kix kawx, kix ang cu tix nghiet ka maix heue. Viang maix baox kok ka kix kawx, kix ang pawk lox maix heue." ²⁸ "Mawh kheu nan maix tak ah nin ka kix, in mawh ceu pui pa ang koe krax cu nghiet ka lox Siyiex pa mawh Siyiex kix mai ang rieb ka lox sidiex gau heue. Kix ang sikah pa mawh meh mai pa mawh meh hoik tat khaing jheeh kix heue. ²⁹ Khlao hauk kaing maix mai tik dee singai, haok ka dee lhaong mai yiiem grai heue. Grawh grawng nawh, Siyiex hoik thiang ti tik ka pui cie Nawh Cao ka daux pa meet rhawm tix heue." ³⁰ Mawh kheu Siyiex ah nin, "Kawn praix ceu pui Yudax khankix hoik yuh pa caox caig ka daux ngai Aux heue. Kix hoik sau ti deuh ceu pa seeing brai ka daux nyiex bwan, pa hoik kok ka min ceu kaux Aux, sonsang kieh mawh pa seeing heue. ³¹ Kix hoik sum dee pa lhaong Tawphiet khankix pa koe ka daux lung kawn simex Hinon, sonsang gleeing kawn simex kawn bun tix khankix ka daux ngu, pa ang Aux tawm ti deuh mai pa ang kaoh khaing daux rhawm Aux heue." ³² Mawh kheu nan, Siyiex ah nin, "Jhak heue, singaix bawg yam tak sang hoek, yam ang an lai kok mawh lung Tawphiet; mai ang lai mawh lung kawn simex Hinon mai tak deeh kok an mawh lung dee pah pui, grawh grawng nawh, kix tak yaox tix sipaung pui ka daux lung Tawphiet tom ang lai koe dee yi heue." ³³ Tokaux pui yum khankix tak mawh priex ih sim raoma mai totiag heue. Pui tix kaux kawx tak ang lai pon grheu kix heue. ³⁴ Khaix an Aux tak kieh lox nyawm rhawm mai lox gaux rhawm, lox sinaw mai lox bunkrih grai yiien khaing veng Yudax mai khaing daux krax daux laux Yerusaliem, mawh kheu haktiex an tak mawh pa yiien heue.

¹ Siyiex ah nin, "Ka daux bawg yam an, kix tak sang hoe si-ang simiang haktiex Yudax mai si-ang kawn simiang khankix mai si-ang cao giex kaing li khankix mai si-ang cao jhai mai si-ang pui pa ot ka daux veng Yerusaliem lih khaing daux simeeig kix heue. ² Kix tak sang prung prang si-ang khankix ka plak sivoe singaix mai khix mai kraung pa koe daux raoma khankix khawmuik, ka pa hoik moh kix ka mai pa hoik yuh kix kaing mai pa hoik hawt kix khaix mai pa hoik sawg kix mai pa hoik krub kix heue. Ang lai koe cao pa deeh khrawm mai cao pa sipaung ka si-ang an heue. Ankix tak awm aing piang haktiex heue. ³ Khaix an Siyiex Cao kru naing raoma ah nin, can nyiex ma pui pa kawn deuk khaing pa hoik grheu Aux kix lih kudah dee pa caox caig ca kawn koe ka daux nyiex ma kix, mawh kheu kix laug tix cie krax yum khaing pa im ju heue. ⁴ Khaix an maix tak ah nin ka kix, Siyiex ah nin, "Yam goh pui mawh ang nawh lai deeh kaoh lie? Yam lud pui krax mawh ang nawh lai chix deeh ing lie? ⁵ Kheu pui in pa mawh pui veng Yerusaliem khankix hoik tieh feen ka daux pa tieh feen tix leeing ju kheu jao grawng pa yuh ka mawx lie? Kix kawn cong ka daux pie lhen tix mai kix ca thiang tix ang lai deeh ing heue. ⁶ Aux nghiet mai hoik mhong heue. Kix ang sikah lox pa rahsee, pui tix kaux kawx ang doh keud ka pa caox caig pa yuh tix ah nin, "Mawh hoik yuh aux ceu patix? Pui ku kaux hoik lud krax hu tix mai to awm to brung tix laig ka daux biang naing heue. ⁷ Han tiag lang ngawg pa pu daux raoma khankix kawx tawng ka bawg yam cie tix heue. Sikaux krie, saik mai sivik khankix kawx, tang tawng ka bawg yam sang deeh hoek tix heue. Viang mawh nan, pui Aux khankix ang tawng ka krax pa prawng ciyang Siyiex heue. ⁸ Pex tak pon ah nin, ex mawh pa koe pingnya cuyi mai gumlox Siyiex koe tau mai ex, jhak heue, gawng nam meug cao tiiem lai pie lhen yuh gumlox Siyiex lud loe heue. ⁹ Pui pa koe pingnya cuyi khankix kaig tua heue, kix siyaoh mai krix ka kie. Jhak heue, kix thiang ti tik gumlox Siyiex, mawh koe pingnya cuyi ceu patix daux kix lie? ¹⁰ Mawh kheu nan, aux tak tawx moeng kix ka pui tang kaux mai kieh pui tang kaux cie ka kaung kix, grawh grawng nawh, jah ka pui iak tom hoek ka pui ting ku kaux mawh pa gawx ka sinngao, jah ka cao jhai tom hoek ka cao giex kaing li khankix, yuh krax pa lud loe heue. ¹¹ Kix hoik pai dee saux kawn bun ceu pui Aux khankix ceeix khaing mai ah nin yam ang lai koe pa nhim, kix ah pa nhim, pa nhim." ¹² Siyiex ah nin, "Mawh hoik kaig kix ka yuh tix ceu pa seeing brai lie? Ang mawh kix pon ang koe krax kaig ceeix kawx mai kix ang tawng tix laux pakngai heue. Mawh kheu nan, kix tak goh piang paox tix, tix kaux lai tix kaux yam tawx Aux krax kham geu ka kix mai kix tak hoek ka daux pa yeen tix tiem heue." ¹³ Siyiex ah nin, "Aux tak sang yuh kix laux leeing," plix siiet khankix tak ang lai koe piang nhu plix siiet mai plix ruh kawx tak ang lai koe piang khaox ruh mai lhax tak vit hu mai can ceu pa hoik tawx Aux ka kix, tak grai hu khaing kix heue." ¹⁴ "Ex lai kawn ot yawg ti yuh ka mawx lie? Deeh khrawm paox tix mai kieh ex laig ka daux veng pa kaux cong an mai kieh ex ot ka daux pa nhim heue. Mawh kheu Siyiex pa mawh Siyiex ex, hoik kieh ex ot ka daux pa yiien yawg mai tawx ex nyaux ghin song, kheu jao hoik lud ex ka Siyiex heue. ¹⁵ Viang ex keud pot jun pot son pa nhim, ceu pa mhawm ang lai chix hoek, viang ex keud pot jun pot son krax nyawm ot, mawh ngie krax pa kha rhawm pa koe heue. ¹⁶ Mhong lox bhawm sileet brung meeh tix tom khaing haktiex Dan an heue. Haktiex khawmuik hoik sikua rhawm ka mhong tix lox riag brung pa kied ting riang an heue. Grawh grawng nawh, kix hoik hoek mai bleet tix ih haktiex mai can pa koe ka daux an khawmuik, khawm veng mai pui pa ot ka daux an heue." ¹⁷ Siyiex ah nin, jhak heue, mawh kheu Aux tak sang ploi siuing hoek ka daux sinax pex, siuing pa ang pex pon phlu kieh nge tak tut ka pex heue." ¹⁸ Sonsang grai krax pa khi rhawm, aux sang yuh ka mawx, aux kied koe krax laux rhawm heue. ¹⁹ Nghiet ka lox riag yo kawn bun pui aux khankix khaing haktiex pa singai heue. Mawh ang Siyiex koe ka daux veng Zion lie? Mawh ang simiang koe ka daux veng lie? Kheu kix lai so krax song rhawm Aux ka riang rao krub pa saik kix mai ka riang rao krub pui tang meung khankix lie? ²⁰ Bawg yam vawg hoik luan, bawg yam rung kawx hoik sidah mai ex kawn ang nyang hoek krax taoh heue." ²¹ Mawh kheu saux kawn bun pui aux khankix mai Aux kawx saux ka heue. Aux hoik yiiem grai mai krax pa daox aw hoik kheem ka piang aux heue. ²² Mawh ang peeh khaox Balasan koe ka daux haktiex Gilat mai mawh ang cao sidah koe ka daux haktiex an lie? Viang cao sidax koe kawx yuh ka mawx kawn bun pui Aux khankix lai ang chix moi lie?

¹ O kieh kaing aux lih mawh rawm giex mai kieh sok ngai aux mawh rawm keut dee lih rawm ngai, aux tak sang yaox tix yiiem ku singaix son grawng pa yum kawn bun pui aux khankix liak. ² O kieh aux koe dee pan dee peung tix dah ka daux tiagtu, pa mawh pui hu krax singai khankix, sonsang pon prah aux ka pui aux mai lih hu khaing kix liak, grawh grawng nawh, kix mawh pui pa lud vao tau mai moeng kawn pui, pa mawh cub pui pa ang kaux sijax heue. ³ Kix buk dak tix vawk awm ak puh, sonsang pie lhen. Kix ang mawh pui pa kaux sijax mai mawh tix pui ting piang haktiex heue. Mawh kheu kix hoik nied ti yuh pa caox ka piang pa caox hu sivoe ngai mai kix ang lai tawng ka Aux, Siyiex ah in, ⁴ "Pui ku kaux tang rien tix ka paox plawg nawh mai ang lai een rhawm ka puxaik tix pie tix kaux kawx heue. Mawh kheu puxaik ankix ku kaux tak sang rhim ka ara puxaik tix khawmuik mai paox plawg pui ku kaux tak lailing mai ah lox sibriem ka paox tix heue. ⁵ Pui ku kaux tak sang pie lhen ka paox plawg nawh mai ang lai sikah lox pa mawh meh heue. Kix hoik gau dak tix sikah lox pie lhen mai yuh tix taug maox son krax lud phimap tix heue. ⁶ Dee ot dee koe maix koe ka baoh dee pa pie lhen mai ka daux pie lhen ankix thiang tix ang tawng ka Aux, Siyiex ah nan heue." ⁷ Mawh kheu nan, Siyiex Cao kru naing raoma ah nin; "Jhak heue, Aux tak sang raug kix mai cheuk cheu ti yaox kix heue. Phan ang mawh nan, Aux tak sang yuh ka mawx ka kawn bun pui Aux khankix lie? ⁸ Dak kix mawh te koe um pa kieh pui yum mai sikah ngie lox pie lhen heue. Nawh sikah lox pa nhim ka paox plawg tix, viang mawh nan, nawh kawn jawm kix daux rhawm tix heue." ⁹ Siyiex ah nin, "Khex ang Aux sang tawx krax kham geu ka kix son grawng ceu inkix lie? Khex ang Aux sang deeh pawk bix piang ceu pui an tix cub awm in lie? ¹⁰ Aux tak sang koe krax yiiem grai mai ngia son gawng lua khankix mai krax yiiem doe son daux tiagtu khankix, kheu jao hoik proe baoh dee an, tom ang pui tix kaux kawx pon tiang tix hu ka dee an, mai pui khankix ang lai pon tix mhong lox tobrie, sim raoma mai totiag hoik to tix luan heue. ¹¹ Aux tak kieh veng Yerusaliem mawh pum nyhee mai dah dee ot sox praix khankix heue. Aux tak kieh veng Yudax mawh dee yiien mai ang koe pui pa ot ka pie tix kaux kawx heue." ¹² Pui mawx pa koe pingnya cuyi ti tawng ka grawng in lie? Pui mawx pa hoik pon gumlox pa lih khaing jheeh Siyiex sonsang pon krai pao tix, grawng ankix lie? Haktiex laux leeing mai proe ka ngu awm daux tiang tu, son ang pui tix kaux kawx pon tiang tix hu ka dee an, kheu jao grawng pa yuh ka mawx lie? ¹³ Siyiex ah nin, "Kheu jao hoik tik vud kix ka lox tat jhawm prawng Aux pa hoik deuh Aux ka plak sivoe kix mai ang cu nghiet ka lox Aux mai ang hawt ti yuh awm an, ¹⁴ kix hawt hu awm krax pa keud rhawm tix mai hawt hu khaix siyiex Balax awm pa hoik gau keeing kix ti deuh ka kix, ¹⁵ mawh kheu nan, Siyiex Cao kru naing raoma pa mawh Siyiex ceu pui Isarelax ah nin, "Jhak heue, Aux tak tawx kix ih nya plix song mai tawx kix nyaux rawm ghin song heue. ¹⁶ Aux tak sang kieh kix prung prang ka daux sinax pui tang ceu khankix ka pui pa ang keeing kix sax tawng heue. Aux tak sang ploi vaig lawm hawt khaix kix, tom hoek bawg yam sidah yuh Aux kix laux leeing heue." ¹⁷ Siyiex Cao kru naing raoma ah nin, "Keut ti yaox mai kok ka bun pa chix yiiem doe khankix hoek mai ploi bun pa min ka jhawm yiiem, son tak sang pon hoek kix heue. ¹⁸ Kieh kix nied ti hoek phaiphai mai yiiem grai ka son ex, sonsang dung rawm ngai ex mai sonsang breeng rawm ngai tix lih khaing siyieb ngai ex heue. ¹⁹ Mawh kheu hoik mhong ka lox yiiem grai khaing veng Zion ah nin, "Ex nieb hoik yaox krax tud rhim pa laux leeing yuh nin lie? Ex hoik yaox krax kaig tua pa kied ting lhaong, mawh kheu hoik tik vud ex ka haktiex mai mawh kheu hoik yieh pui ka dee ot ex khankix heue." ²⁰ Bun khankix eue, nghiet ka gumlox Siyiex mai kieh yhaok pex rieb ka gumlox pa kaoh khaing jheeh Nawh Cao, gau kawn bun pex khankix chix lox jhawm yiiem mai tang gau paox plawg tix ku kaux chix yiiem grai heue. ²¹ Grawh grawng nawh, krax yum hoik hoek bleeh ka ex mai hoik laig ka daux nyiex haw simiang ex, sonsang pah ti tik kawn nyawm khankix ka plak praix mai pui awn ju khankix piang krax heue. ²² Krai heue, Siyiex ah nin, tokaux yum pui khankix kawx tak awm aing mawie pa koe daux tong kaung, awm lhiem nghox khaix cao vawk khankix mai ang koe pui pa deeh khrawm ka heue." ²³ Siyiex ah nin, "Paw kieh pui koe pingnya cuyi yaw rangdi ka daux pingnya cuyi tix, paw kieh pui ting riang rao yaw rangdi ka daux pa ting riang rao tix mai paw kieh pui pa magmi yaw rangdi ka daux pa magmi tix khankix, ²⁴ viang mawh nan, kieh pa yaw rangdi tix yaw rangdi ka ceu in, ka daux pa koe krax tawng yung nawh ka Aux mai ka mawh Aux Siyiex, pa yuh tix tawx krax pa caux rhawm mai krax prawng ca mai krax pa rahsee, piang haktiex heue. Mawh kheu aux koe krax pa khaw rhawm ka ceu in," Siyiex ah nin heue. ²⁵ Simiang siyiex ah nin "Jhak heue, bawg yam singaix khankix tak sang hoek mai Aux tak sang ciyang ka pui pat hak tau mai pui pa ang pat hak khawmuik, ²⁶ pa mawh pui Ejiptux, pui Yudax, pui Edom mai ceu pui Amon, ceu pui Mawbax mai can pui pa khlao hauk bheup tix pa ot ka daux tiagtu. Mawh kheu ceu pui inkix ang nyang mawh pa pat hak tix mai can pui daux nyiex pui Isarelax khankix kawx mawh pa ang nyang pat hak daux rhawm tix heue."

¹ Nyiex ma ceu pui Isarelax khankix eue, nghiet ka gumlox pa sikah Siyiex ka pex heue. ² Siyiex ah nin "Paw gau tix hawt been pui tang ceu khankix, paw koe krax yaoh yee ka mhai rug khaing raoma khankix, mawh kheu pui tang ceu mawh pa yaoh yee ka ceu ankix heue." ³ Mawh kheu been yungyi ceu pui khankix mawh pa giex going, mawh kheu kix kid khaox tix gaw khaing daux nong ka moe mai mawh kaing pa yuh pa chix khaox ka taix tix heue. ⁴ Kix jawg tix khre an ka mau mai khri, kix hoik tawk an ka jim rhiem khankix ka daux sonsang ang an lung lhiang heue. ⁵ Ankix mawh pa jung tix awm khaox jhie yaong mai ang chix sikah, ang chix tang hu, lo tix klawm kix hu heue. Paw lhat graung ka ankix, mawh kheu ankix ang pon yuh pa caox mai ang pon yuh ceu pa mhawm tix ceu kawx heue." ⁶ Siyiex eue, pui pa awm Maix ang lai koe tix kaux kawx, Maix Cao mawh pa ting lhaong mai ceu kaux Maix mawh pa ting sibrawm heue. ⁷ Simiang ceu pui khankix eue, mawh pui mawx pa ang lhat graung ka Maix lie? Mawh kheu mawh Maix Cao pa keung pa khaw tix lhat graung ka, grawh grawng nawh, khaing ka daux sinax ceu pui pa koe pingnya cuyi khankix mai ka daux meung haktiex khawmuik, pui pa awm Maix Cao ang lai koe pie tix kaux kawx heue. ⁸ Viang mawh nan, kix khawmuik mawh pa daox aw mai pa vao pa caox awm totiag heue. Krax gau krax gaux riang rao pa yuh tix ka khaox an mawh pa giex going heue. ⁹ Khlawp kraung mau pa toing kix khankix mawh pa viex hawt khaing veng Tasux mai khri mawh pa viex hoek khaing veng Upat, mawh kaing pa yuh cao chix kaing taix mai khaing cao pa yuh kaing khri khankix, man klai mai man pa klai raoh khankix mawh kraung pa vung ankix heue. An khankix mawh pa yuh pui pa min ka kaing taix khawmuik heue. ¹⁰ Mawh kheu Siyiex mawh Siyiex pa mawh meh; Nawh Cao mawh Siyiex pa im ju mai simiang leeing ju heue. Haktiex yung yiang kheu pa meet rhawm Nawh Cao mai ceu pui khankix ang lai pon kham ka pa song rhawm Nawh Cao heue. ¹¹ Maix tak sang caw ti ah nin ka kix, "Siyiex pa ang tie phan raoma mai haktiex khankix tak sang grai hu khaing piang haktiex mai khaing greem raoma heue." ¹² Nawh Cao hoik phan haktiex ka sibrawm Nawh heue. Nawh Cao hoik pang ti deuh haktiex ka pingnya cuyi tix mai hoik naih raoma khankix lih ka krax tawng yung tix heue. ¹³ Yam ploi Nawh Cao lox tix lih, rawm pa kied haoh hun lih ti koe ka daux raoma, Nawh kieh rawm simawg khankix lih tah tom sidah sidu haktiex heue. Nawh Cao phan pluk plak praix koe son rawm lhiex heue, Nawh Cao viex bhaung lih khaing daux nyiex krao sinngao Nawh khankix heue. ¹⁴ Pui ku kaux koe rhawm pa daox aw awm totiag mai ang koe krax tawng yung, cao pa yuh kaing khri khankix ku kaux hoik koe krax kaig tua, ka riang rao pa saik tix heue. Mawh kheu riang rao pa hoik raug nawh mawh pa lud loe mai krax pa toek bhawm ang koe ka daux an pie tix ceu kawx heue. ¹⁵ Ceu in khankix mawh pa giex going mai kaing pie kheem, ka daux bawg yam hoek singaix prawng ca, ceu an khankix tak grai hu heue. ¹⁶ Nyum son cie ceu pui Yakop ang mawh pa awm ceu ankix, mawh kheu Nawh Cao mawh pa phan ka kuceu khawmuik mai ceu pui Isarelax khankix mawh doeh ru sinngao Nawh Cao, Siyiex Cao kru naing raoma mawh ceu kaux Nawh heue. ¹⁷ Can pui pa ot ka daux nyiex tab lhaong khankix eue, khrawm can kraung pa shiao maix khaing piang tiex heue. ¹⁸ Mawh kheu Siyiex ex ah nin, "Jhak heue, Aux tak tik pui pa ot ka daux haktiex khankix lih yam in mai tak yuh krax kharawm ka kix, sonsang yaox kix jhawm tix heue. ¹⁹ Aux kied kharawm kheu krax mat krax lheet, aux mawh pa kied kin heue. Viang mawh nan, aux ah nin, "In mawh krax pa kied kin saux aux tete mai aux tak caw ti kham geu heue." ²⁰ Nyiex gox aux hoik laux leeing mai maox aux kawx hoik dud khawmuik, kawn aux khankix hoik lih hu khaing aux mai kix ang lai koe khaix in heue. Pui pa sum nyiex gox aux ang lai koe khaix in mai pui pa sang bluh ti sau man tieb aux khankix ang lai koe heue. ²¹ Grawh grawng nawh, cao liang yung khankix koe rhawm totiag mai hoik ang lai sawg ti yaox ka Siyiex, mawh kheu nan, kix ang lai koe krax haok hwan mai cub phung yung kix hoik prung prang ku plak heue. ²² Jhak heue, lox sinum grawng an hoik hoek mai lox sinum cuyi ting hoik lih hoek khaing plak laong, sonsang yuh tix veng meung Yudax yiien, mawh daux dee ot sox praix khankix heue. ²³ Siyiex eue, Aux tawng ka kawn pui ang pon appong ka daux krax cao tix mai pui pa lailing ti hu khankix kawx ang pon appong ka diang caong cao tix heue. ²⁴ Siyiex eue, deeh cox aux mhawm ka daux krax pa rahsee liak; mai paw kieh mawh ka daux krax pa song rhawm Maix Cao, phan ang yuh nan, lhat Maix Cao kieh ti hoek ka daux krax pa giex going heue. ²⁵ Klup krax pa meet rhawm Maix Cao lih piang ceu pui tang ceu khankix, pa ang tawng ka Maix Cao mai piang nyiex ma khankix pa ang cu tix kok ka ceu kaux Maix Cao, mawh kheu kix hoik kiied ti ih ceu pui Yakop mai hoik bleet hoik laux leeing yuh nawh mai hoik yuh dee ot dee koe nawh yiien heue.

¹ Gumlox pa kaoh khaing Siyiex hoek ka Yeramix ah nin, ² "Nghiet ka gumlox sijax mukheu in mai hu krai ka pui haktiex Yudax mai ka pui pa ot ka daux veng Yerusaliem khankix; " ³ ah nin ka kix, Siyiex pa mawh Siyiex ceu pui Isarelax ah nin, "Kieh pa jhax lawg hoek ka pui pa ang cu nghiet ka gumlox sijax mukheu in khankix, " ⁴ pa tawm Aux ti deuh ka keeing pex, ka daux singaix yam viex Aux kix lih khaing daux meung Ejiptux, khaing daux glah taox ngu rhiem, daux pa hoik ah nin, �Cu nghiet ka lox Aux mai yuh awm pa tawm Aux ka pex; mawh kheu nan, pex tak mawh pui Aux mai Aux tak mawh Siyiex pex,� ⁵ sonsang grum naog gumlox pa hoik tiextu Aux ti deuh ka keeing pex, sonsang tawx haktiex dee lih rawm teeih mai rawm hia ka kix, awm pa hoik mawh ka daux singaix heue." Khaix an aux deeh pawk ah nin "Siyiex eue, Amen." ⁶ Khaix an Siyiex ah nin ka aux, "Krai pao ka gumlox in khawmuik, ka daux veng Yudax mai ka daux krax daux laux veng Yerusaliem khankix ah nin, nghiiet ka gumlox sijax mukheu in mai hawt ti yuh heue." ⁷ Grawh grawng nawh, Aux hoik kied tawx satix ka keeing pex, ka daux singaix yam viex Aux kix lih khaing meung Ejiptux tom hoek ka daux in singaix, Aux hoik kaoh caocao mai tawx satix ka kix ah nin, "Cu ngiex ka lox Aux heue." ⁸ Viang yuh nan kawx, kix ang cu ti nghiet mai ang daong yhaok tix ka, viang mawh nan, pui ku kaux hoik tang hu ka daux krax pa koe rhawm keud cao tix, mawh kheu nan, Aux tak viex gumlox sijax mukheu in khawmuik hoek piang kix, ka pa hoik tawm Aux kix yuh mai ka pa ang kix cu ti yuh khankix heue. ⁹ Siyiex ah nin ka aux, "Grawng pa sang yuh pa tieh feen hoik yaox ka daux sinax pui Yudax mai pui pa ot ka daux veng Yerusaliem khankix heue." ¹⁰ Kix deeh veeh tix ing plak khaix ka pa lud yuh tax du kix pa thiang ti tik ka gumlox Aux mai ang nghiet mai kix lih hu hawt khaix siyiex tang kaux tang hak sonsang yuh kaing jhaw kix heue. Nyiex ma ceu pui Isarelax khankix mai nyiex ma ceu pui Yudax khankix hoik lieh ka gumlox sijax mukheu Aux, ka pa hoik yuh Aux ti deuh tau mai keeing kix heue. ¹¹ Mawh kheu nan, Siyiex ah nin, "Jhak heue, Aux tak sang viex krax kha rhawm hoek piang kix, ka pa ang kix lai pon klawd mai viang kix riag yo ka Aux kawx, Aux tak ang nghiet ka kix heue. " ¹² Khaix an pui veng meung Yudax mai pui pa ot ka daux veng Yerusaliem khankix tak sang hu mai riag yo ka Siyiex an khankix, ka pa tan kix ti tawx nyawng bhawng heue. Viang mawh nan, ankix ang pon taoh ka kix yam yaox kix krax pa kha rhawm heue. ¹³ Meung Yudax eue, awm koe carang veng pex miex ding, siyiex pex khankix kawx koe ding an mai awm koe carang krax veng Yerusaliem miex ding, pex kawx hoik sum ti deuh khu dee tan ding an ka ceu pa kaig tua pa sang gleeing ti nyawng bhawng ka siyiex Balax heue. ¹⁴ Mawh kheu nan, paw rawg bwan son ceu pui in, paw riag yo mai paw rawg bwan ka son kix, mawh kheu Aux tak ang lai nghiet lox kix, ka daux bawg yam kok yo kix ka Aux, yam yaox kix krax kha rhawm heue. ¹⁵ Paox moh dud aux hoik yuh kaing ceu pa seeing brai tau mai pui tom nie maix khex kawn sang keung mai nyiex bwan Aux yuh ka mawx? Nex nham pa singax hoik singai khaing maix, yam yuh maix ceu pa caox khankix maix koe krax gaux rhawm ka heue. ¹⁶ Siyiex hoik kok ceu kaux maix mawh khaox Sanlun klai pa mhawm grang mai pa kied mhawm plix heue. Nawh Cao hoik gleeing khaox an ka ngu pa kied sinum cap mai ka kak nawh khankix hoik pot hoik proe heue. ¹⁷ "Grawh grawng nawh, Siyiex Cao kru naing raoma, pa hoik sum ti deuh maix, hoik kieh pa caox hoek piang maix, mawh kheu nyiex ma ceu pui Isarelax mai nyiex ma ceu pui Yudax khankix hoik yuh ceu pa caox caig mai so krax song rhawm Aux lih ka daux krax tan nyawng bhawng ka siyiex Balax heue." ¹⁸ Siyiex hoik tawx aux koe krax pa tawng yung ka mai Aux tawng ka, mawh kheu Maix Cao hoik jhi aux yaox ka pa yuh kix heue. ¹⁹ Aux hoik awm kawn yung pa nge tix mu, pa hoik viex ti hu sonsang pah yum mai aux ang tawng, ka grawng pa sang yuh kix piang aux, ka daux krax pa ah nin, "Kieh ex yuh pang khaox an, khawm plix nawh khankix laux leeing mai kieh ex tat ti tik nawh lih khaing daux haktiex ot ceu pui pa im ju khankix, son ang lai sang doh keud ka ceu kaux nawh khaix in pie tix bawg kawx heue." ²⁰ Viang mawh nan, Siyiex Cao kru naing raoma eue, Maix Cao prawng see ka daux pa mawh meh mai pa cheuk ti yaox rhawm mai rhawm keud kawn pui khankix kieh aux yaox krax pa pawk Maix Cao bix tix piang kix, mawh kheu aux hoik jhi grawng see pa koe aux ka Maix Cao heue. ²¹ Mawh kheu nan, Siyiex ah nin ka grawng pui veng Anatot, "Pa sawg ti teei ju aux ka daux pa ah nin, paw krai lox jhai ka daux ceu kaux Siyiex, phan ang mawh nan maix tak yaox tix yum ka daux tawm taix yix heue. ²² Mawh kheu nan, Siyiex Cao kru naing raoma ah nin, jhak heue, aux tak sang ciyang ka kix heue. Pui awn ju khankix tak yum ka lawm vaig mai kawn simex kawn bun kix tak sang yum ka sibhawm praix, ²³ mai ka daux kix tak ang lai koe pa deuk tix kaux kawx, mawh kheu Aux tak sang viex krax pa kied kha rhawm hoek piang pui veng Anatot, ka daux num pa ciyang ka kix heue."

¹ Siyiex eue, yam ka kum aux tau mai Maix, Maix Cao mawh pa rahsee, viang mawh nan, kieh aux chawk grawng krax prawng ciyang Maix khankix ka Maix Cao liak, pui caox caig khankix lai koe krax haok hwan kheu jao grawng pa yuh ka mawx lie? Pui pa ang kaux sijax khankix lai koe krax nyawm rhawm kheu jao grawng pa yuh ka mawx lie? ² Maix Cao hoik sum ti deuh kix, mawh heue, kix hoik sau num riah tix, kix ting lhaong haok hwan plix heue. Maix Cao dex mai jheeh kix, viang mawh nan, Maix Cao singai khaing rhawm kix heue. ³ Viang mawh nan, Siyiex eue, Maix Cao hoik tawng ka aux, Maix Cao hoik yaox ka aux mai Maix Cao hoik cheuk ti yaox ka rhawm aux, mawh pa yuh ka mawx heue. Bluh kix lih awm yung pa sang pah yum mai khre ti deuh kix son singaix pa sang pah heue. ⁴ Pui haktiex tak sang koe krax kha rhawm mai rib riem kudah tak sang fit ti kroh rheung miex grheung lie? Totiag totu mai sim khankix hoik laux leeing, kheu jao pa caox caig pui ot dee an heue. Mawh heu kix ah nin, "Nawh Cao tak ang lai yaox dee sidah ex heue." ⁵ "Phan maix taug mai silah ti to tau mai pa to ka caong tix khankix, khaix an maix tak sang pon silah ti to tau mai brung khankix yuh ka mawx lie? Phan maix kawn taug mao ka daux haktiex pa koe krax nhim an, khaix an maix tak sang yuh ka mawx ka daux krax pa kheem rawm klawng Yawdan an lie? ⁶ Grawh grawng nawh, pie puxaik maix mai pui daux nyiex ma keeing maix khankix kawx, hoik yuh krax pa ang kaux sijax ka maix, kix hoik kok yo lox sinum hawt khaix maix, viang kix sikah lox pa mhawm ka maix kawx paw yum rhawm ka heue. ⁷ "Aux hoik tik vud ka nyiex ma tix, Aux hoik prah sinngao tix mai Aux hoik ap ti tawx paox moh dud Aux ka daux tawm taix pui koeng nawh khankix heue. ⁸ Sinngao cie aux hoik lih ti mawh awm sivai sangsi pa ot ka daux nong ka aux heue. An graox lox tix ka Aux mawh kheu nan Aux koeng ka nawh heue. ⁹ Sin ngao cie aux hoik lih awm klang preeh ka aux lie? Klang preeh an ot hawt rawb rim an khawmuik, mawh pa tieh feen ka nawh lie? Hoek heue, khrawm totiag pa koe daux tiag khankix hoek khawmuik, viex hoek sonsang kiied ti ih heue. ¹⁰ "Cao liang yung khankix tom nie hoik laux yuh sipeem plix siiet Aux, kix hoik dik daux nyum cie Aux ka greem caong tix, kix hoik yuh nyum pa khaw rhawm Aux mawh dee yiien yawg daux tiagtu heue." ¹¹ Kix hoik yuh an mawh dee pa yiien, dee pa yiien yawg an kieh aux laux rhawm ka, haktiex khawmuik mawh dee pa yiien, kheu jao ang pui teei grawng an laig daux rhawm tix pie tix kaux kawx heue. ¹² Pui tud rhim khankix hoek bleeh ka dee lhaong dee yiien khawmuik khaing daux tiagtu, mawh kheu vaig lawm Siyiex tak sang yuh krax laux leeing, jah ka dee sidah haktiex plak in tom hoek ka dee sidah haktiex plak an, pui tix kaux kawx tak ang lai koe krax nhim heue. ¹³ Kix hoik ruat simie nghox ca, viang mawh nan, yaox ti vawg ngie pang kat, kix hoik taug ka yuh kaing tom nie, viang mawh nan, ang pon bwanson tidtix heue. Kix tak pon krax kaig tua ka pa vawg tix, kheu jao grawng krax pa kied kin meet rhawm Siyiex heue. ¹⁴ Siyiex ah nin, "Ka piang pui caox caig paox plawg Aux khankix pa krox teeh ka sinngao, pa hoik tawx Aux ka pui Aux ceu pui Isarelax khankix pon tix cie, jhak heue, Aux tak sang reeig kix lih khaing daux tiex cie kix mai reeig nyiex ma pui Yudax lih khaing daux sinax kix heue. ¹⁵ Khaix hoik reeig Aux kix lih, Aux tak sang deeh hoek mai koe krax caux rhawm piang kix mai deeh veeh kix ku kaux ing ka haktiex sinngao cao kix mai khawm pui ku kaux ka daux haktiex cao kix heue. ¹⁶ Phan kix coca tix gaux rhawm ka daux krax been ceu pui Aux khankix mai tiextu tix ka ceu kaux Aux, pa mawh Siyiex pa im ju mai awm pa hoik gau kix ceu pui Aux khankix tiextu tix ka siyiex Balax khankix, kix tak sang mawh pa pang tix kaux cong ka daux sinax ceu pui heue." ¹⁷ Viang mawh nan, phan kix ang cu nghiet, Aux tak sang reeig ti tik kix pak lawg mai yuh ceu pui an laux leeing, Simiang Siyiex ah nin heue.

¹ Siyiex ah nin ka aux, "Hu mai teei maox rawd nyoi keei tix nyaing son tix mai rawd ka nyoi maix, viang mawh nan, paw sidaux an daux rawm awx." ² Mawh kheu nan, aux hoik teei maox rawd nyoi keei tix nyaing awm gumlox krai Siyiex mai rawd ka nyoi tix heue. ³ gumlox Siyiex hoek ka aux ra bawg tix bawg ah nin, ⁴ "Teei maox rawd nyoi keei pa hoik rawd maix ka nyoi tix an mai yaog ti kaoh hu ka rawm klawng Yufrethix mai mox ti deuh an ka daux doh rang tan heue." ⁵ Mawh kheu nan, aux lih hu mai hoik mox ti deuh an hawt rawm klawng Yufrethix awm gumlox pa hoik tawm Siyiex ka aux heue. ⁶ Khaix hoik luan singaix bawg yam khankix tom nie, Siyiex ah nin ka aux, "Yaog tix kaoh mai hu ka rawm klawng Yufrethix mai teei maox rawd nyoi keei hoek khaing dah dee hoik tawm Aux maix mox tan heue." ⁷ Khaix an aux hoik lih hu ka rawm klawng Yufrethix mai kaong ti teei maox rawd nyoi keei an khaing dee hoik mox aux ti deuh tan, maox rawd nyoi keei an hoik rham ang lai chix tix shiao heue. ⁸ "Khaix an gumlox Siyiex hoek ka aux ah nin, ⁹ "Siyiex ah nin, awm in Aux tak yuh pa ting rhawm ca nyhau meung Yudax khankix laux mai khawm pa ting rhawm ca nyhau veng Yerusaliem khankix laux heue. ¹⁰ Ceu pui caox in pa thiang tix ang nghiet ka gumlox Aux khankix, pa hu awm rhawm keud cao tix mai pa hawt khaix Siyiex tang kaux tang hak khankix, sonsang yuh kix kaing jhaw mai krub ka ankix, tak sang mawh awm maox rawd nyoi keei in, pa ang lai chix tix shiao ka heue. ¹¹ Siyiex ah nin, awm vien maox rawd nyoi tix ka nyoi pui, awm an, Aux tak kieh nyiex ma ceu pui Isarelax mai nyiex ma ceu pui Yudax khankix khawmuik vien tix ka Aux, sonsang pon mawh kix ceu pui Aux mai kieh Aux pon min plakngai, pon krax pa yaogyaw mai pon min sibrawm, viang mawh nan, kix ang lai nghiet heue. ¹² Mawh kheu nan maix caw tix krai gumlox in ka kix, Siyiex pa mawh Siyiex ceu pui Isarelax ah nin, "Kawng ku mu tak sang naog ka rawm plix siiet, mai kix tak deeh ah nin ka maix, mawh ang yix kriem tawng, ka sang naog kawng ku mu ka rawm plix siiet lie?" ¹³ Khaix an maix tak ah nin ka kix, Siyiex ah nin, "Jhak heue, Aux tak kieh pui khankix pa ot ka daux haktiex in, jah ka simiang pa ngawm piang dang ngeung simiang Davit, cao giex kaing li, cao jhai mai can pui pa ot ka daux veng Yerusaliem khankix naog ka ceu pa chix yoek heue. ¹⁴ Siyiex ah nin, "Aux tak kieh kix ralai sikleeing paox tix, keeing mai kawn khankix tau, Aux tak ang lai caux rhawm mai ang lai lhawk mai ang lai koe krax pa caux rhawm, tom hoik yuh Aux kix laux leeing heue." ¹⁵ Daong yhaok tix mai nghiet heue, paw koe krax ting rhawm ca nyhau, mawh kheu Siyiex hoik krai ti deuh heue. ¹⁶ Sivoe ang Nawh Cao nyang kieh pa faik hoek mai sivoe ang pex nyang sideeing caong tix, piang gawng pa faik khankix mai yam kawn keud pot jun pot pex ka pa riang, sivoe ang Nawh Cao nyang kieh an mawh veei pa yum mai yuh an mawh pa ceep ka pa faik, tawx min sibrawm ka Siyiex pa mawh Siyiex pex heue. ¹⁷ Viang mawh nan, phan pex ang cu tix nghiet ka an, khwan ju Aux tak yiiem ka dee glip ka son krax ting rhawm ca nyhau pex, ngai aux tak yiiem sigrien sigre mai roik rawm ngai, kheu jao hoik teei cub phung yung Siyiex hu awm pa giex laung heue. ¹⁸ Ah nin ka simiang mai ka laux simiang, "Yeen rhawm tokaux tix tiem mai ngawm heue, mawh kheu mhok khri min plakngai pa mhawm grang maix hoik bheeik khaing kaing maix heue." ¹⁹ Veng pa koe plak seh khankix hoik nyeep tix khawmuik mai pui tix kaux kawx ang lai pon paoh ka, pui Yudax hoik viex kix hu mawh pa giex laung khawmuik, mai hoik mawh pa giex laung khawmuik khawm leeing heue. ²⁰ Yaog ngai pex mai maong ti jhak ka pui pa hoek khaing baoh plak laong heue. Mawh koe cub phung yung pa hoik tawx ka maix mai yung pa mhawm grang maix khankix dee mawx lie? ²¹ Yam tawx Nawh Cao krax prawng ca ka maix, sang ah maix ka mawx ka lie? Mawh kheu maix hoik gau kix, sonsang mawh cao thung bung mai cao kaing ka piang maix heue. Mawh ang krax saux giex ti deuh ka maix, awm bun pa kha tix yam keh lie? ²² Phan maix ah nin ka daux rhawm tix, "Ceu khankix hoek piang aux, kheu grawng pa yuh ka mawx lie? "Kheu jao pa kied ting phimap maix, kraung ceep maix khankix hoik bheeik khaing maix mai loek caong maix kawx hoik mat ka ang koe kiep ceep heue. ²³ Mawh pon pui Ethiopia tix tieh lox hak tix, phan ang mawh nan, mawh pon tieh loh sivai maox preeh tix lie? Phan pon tieh loh tix maix pa koe been meed ti yuh ceu pa caox tak pon yuh ceu pa mhawm heue. ²⁴ Mawh kheu nan, Aux tak sang kieh kix prung prang awm kam, pa taih bhaung pa kaoh khaing daux tiex tug heue. ²⁵ Siyiex ah nin, �In mawh nyum pa tiag Aux tix tawx ka maix, kheu jao hoik piawm maix ka Aux mai een rhawm tix ka ceu pie lhen heue.� ²⁶ Mawh kheu nan, Aux tak sang khleeing kraung ceep khankix piang pakngai baoh maix, sonsang sidawng krax kaig tua maix heue. ²⁷ Aux hoik yaox krax seeing brai maix khankix mai lox kraing lox he maix, khawm pa seeing brai maix piang gawng ka daux tiagtu khankix heue. Siyiex eue, maix tak kha rhawm heue. Mawh kawn sang rheung miex grheung sonsang kieh maix tokaux tix singax singeh lie?"

¹ Gumlox Siyiex hoek ka Yeramix son grawng kroh khroing haktiex. ² Haktiex Yudax koe krax khi rhawm mai siviex veng khankix koe lox yiiem doe kix ceep kraung lung mai yiiem doe piang tiex mai lox yiiem yo pui veng Yerusaliem hoik haok ka plak piang heue." ³ Cub pui ting lhaong khankix hoik ploi kawn iak kix hu kin rawm, kix hoek ka dung rawm mai ang lai yaox ka rawm heue. Kix hoik deeh ing mai pung yi tix, kix koe krax kaig tua mai kheem kaing tix hoek heue. ⁴ Mawh kheu ang rawm lhiex lai lih piang haktiex, tiex tom kroh tom max, pui thai kaing khankix hoik kaig tua mai kix hoik kheem kaing tix heue. ⁵ Mawh heue, cak hoik keh kawn tix ka daux tong kaung, viang mawh nan, hoik prah kawn tix jao ang rib lai koe heue. ⁶ La tiag khankix hoik cung tix ot piang dee lhaong pa yiien mai kix hoik toek bhawm awm sox la, ngai kix hoik pu pi kheu jao ang rib riem lai koe heue." ⁷ Siyiex eue, viang phimap yix hoik kham sakse ka piang yix kawx, yuh awm koe min ceu kaux Maix Cao, mawh kheu ang yix kaux sijax mai yix hoik lud ka Maix Cao lawlawx heue. ⁸ Krax keud pot ceu pui Isarelax khankix, pa mawh cao taoh kix ka daux bawg yam koe krax pa kha rhawm eue, Maix Cao lai yuh tix awm nyo sinie ka daux haktiex mai awm pui pa hu krax singai, pa sang peung been tix sawm khaing yuh ka mawx lie? ⁹ Maix Cao lai yuh tix awm pui pa daox deng tix kaux awm pui pa ting riang rao pa ang pon tawx krax taoh, yuh ka mawx lie? Viang mawh nan, Maix Cao pa mawh Siyiex pa ot ka daux sigreung yix mai yix mawh pa hoik kok tix ka min ceu kaux Maix Cao, paw prah ka yix liak. ¹⁰ Siyiex ah nin ka ceu pui in yuh nin, "Ceu pui inkix hoik moh tix vung viang, kix ang lai pon yut diang caong tix heue. Mawh kheu nan, Siyiex ang lai rieb ka kix, yam in Nawh Cao doh keud ka krax lud kix mai tawx krax ciyang ka phimap kix heue." ¹¹ Khaix an Siyiex hoik ah nin ka aux, paw doh rawg bwan son ceu pui in, sonsang mhawm kix awx. ¹² Yam twah kix pa ih, Aux tak ang lai nghiet ka lox kok yo kix mai yam tan kix krax tan pa gleeing mai krax tan phawng nghox ca im khankix, Aux tak ang lai rieb ka heue. Aux tak yuh kix laux leeing ka lawm vaig, ka sibhawm praix mai ka jhawm saux preng heue." ¹³ Khaix an aux ah nin, "Siyiex pa mawh Siyiex eue, jhak heue, cao jhai khankix ah nin ka kix, pex tak ang pon ti yaox krax kha rhawm ka lawm vaig mai ang lai yaox krax sibhawm praix, viang mawh nan, aux tak sang tawx pa nhim pa kriem ka pex ka dee in heue. ¹⁴ Siyiex ah nin ka aux, cao jhai khankix krai lox jhai pie lhen ka daux ceu kaux Aux heue. Aux ang tie ploi kix hu mai ang tie tawm lox ka kix mai ang tie plak jhi ka kix, kix krai lox jhai pie lhen mai pa sibawk mai ceu pa giex going mai pie kheem ka daux rhawm kix heue. ¹⁵ Mawh kheu nan Siyiex ah nin, son grawng cao jhai an khankix, pa krai lox jhai pie lhen ka daux ceu kaux Aux pa ang Aux tie ploi mai ang kieh krai, grawng lawm vaig mai sibhawm praix ang lai hoek ka daux haktiex in, mawh kheu nan, cao jhai khankix tak laux leeing ka lawm vaig mai krax sibhawm praix heue." ¹⁶ Pui pa nghiet ka lox jhai kix khankix tak tik ka daux krax laux veng Yerusaliem, ka sibhawm praix mai lawm vaig, pui pa sang sipaung ka kix ang koe tix kaux kawx, khawm cao kix, moeng kix mai khawm kawn simex kawn bun kix mai Aux tak lhauk ceu pa caox caig kix piang kix heue. ¹⁷ Mawh kheu nan maix tak krai gumlox in ka kix, kieh rawm ngai Aux jauh lih ku singaix mai ang chix naox heue. Mawh kheu kawn bunkrih ceu pui aux khankix, hoik pot si-ang mai krax kham pa kied ting kin saux heue. ¹⁸ Phan aux lih hu ka daux tong kaung jhak heue, pui yum ka lawm vaig koe tan heue. Phan aux laig ka daux veng jhak heue, yaox pui pa saux ka sibhawm praix, cao jhai mai cao giex kaing li khankix vung vang ka daux haktiex ang tawng ka sang yuh tix heue." ¹⁹ Mawh hoik thiang Maix Cao ti tik ka haktiex Yudax pak lawg lie? Mawh hoik seeing brai Maix Cao ka veng Zion lie? Maix Cao hoik tap toi ka yix tom ang yix lai pon pai ti yuh ka mawx lie? Yix hoik maong ti jhak ka pa nhim rhawm, viang mawh nan, ceu pa mhawm ang lai koe, viang yix hoik maong ti jhak sonsang moi tix kawx, krax kha rhawm hoik lih ti koe heue. ²⁰ Siyiex eue, yix krai doh grawng krax pa caox caig yix mai khawm krax pa lud keeing yix khankix heue. Mawh kheu yix hoik yuh phimap mai lud ka Maix Cao heue. ²¹ Mawh kheu ceu kaux Maix Cao paw seeing ka yix liak, paw yuh min sibrawm dang ngeung Maix Cao laux liak, deeh doh keud mai paw lai yieh gumlox mukheu yuh Maix Cao tau mai yix liak. ²² Mawh koe siyiex riang grang pa krub pui tang ceu tix kaux kaux pa pon kieh lhiex lih lie? Phan ang mawh nan, mawh sang pon tang tawx raoma khankix lhiex lih lie? Siyiex pa mawh Siyiex ex eue, ang mawh Maix Cao pa pon yuh inkix khaing lie? Mawh kheu nan, yix sang krox jun ka Maix Cao, mawh kheu Maix Cao hoik phan ka ceu in khawmuik heue.

¹ Khaix an Siyiex ah nin ka aux, "Viang Mose mai Samoelax hoik cung tix ot ka plak sivoe Aux kawx, rhawm Aux ang lai simi lai jhak ka pui in khankix heue. Grheu kix lih khaing plak sivoe ngai Aux mai kieh kix hu heue." ² Phan kix chawk ah nin ka maix, yix sang hu plak mawx lie? Khaix an maix tak krai ka kix ah nin, Siyiex ah nin, "Pa hoik tat ti deuh mawh pa yum, kieh hoek krax yum mai pa hoik tat ti deuh mawh pa pah ka vaig, kieh yum ka vaig, pa hoik tat ti deuh mawh son sibhawm praix, kieh koe krax sibhawm praix mai pa hoik tat ti deuh mawh son pa giex laung, kieh hoek ka daux pa giex laung heue." ³ Simiang ah nin, "Aux tak sang deuh ceu pa laux leeing pon ceu piang kix, pa mawh vaig lawm pa sang pah, sox khankix pa sang sileed hu, sim piang raoma mai totiag piang haktiex khankix pa sang kiied mai pa yuh laux leeing heue. ⁴ Aux tak sang baox kieh kix yaox krax kha rhawm ku meung piang haktiex khawmuik, kheu jao grawng pa yuh Manashe, kawn simex Hezakiyax simiang meung Yudax ka daux veng Yerusaliem heue. ⁵ "Veng Yerusaliem eue, mawh pui mawx pa sang caux rhawm ka maix lie? Phan ang mawh nan, mawh pui mawx pa sang laux rhawm tau mai maix lie? Phan ang mawh nan, mawh pui mawx pa sang veh tix chawk grawng nyawm ot maix lie?" ⁶ Siyiex ah nin, "Maix hoik tik vud ka Aux mai hoik deeh plak khaix. Mawh kheu nan, Aux tak nyeu taix tix piang maix mai yuh maix laux leeing, Aux koe krax khi rhawm mai ang lai pon gun heue. ⁷ Aux tak sang keem ti tik kix ka bia, ka siviex laig daux haktiex an, Aux tak kieh kawn simex kawn bun kix som nai, Aux tak sang yuh ceu pui Aux khankix laux leeing, kheu ang kix nyang veeh tix ing khaing daux krax hu tix heue. ⁸ Miex mai tak nie baox haoh hun khaing mhaik pa koe daux rawm sigrit sigra ka plak sivoe Aux, aux tak sang viex pui pa yieh laux hoek piang kix mai piang miex pui awn ju an khankix, ka daux bawg yam jung singaix, Aux tak kieh krax kha rhawm mai krax lhat graung hoek dom mawx dom an piang kix heue. ⁹ "Bun pa hoik keh kawn aliah kaux, tak dieh riang mai dud rhawm. Singaix nawh hoik klip, yam kawn mawh plak pon singaix, nawh koe krax kaig tua mai kied laux rhawm. Ka pui pa kawn deuk khaing daux kix kawx, Aux tak sang ap tix tawx kix ka vaig lawm plak sivoe pui koeng kix," Siyiex ah nan heue. ¹⁰ Miex aux eue, Aux koe krax kha rhawm, kheu hoik keh maix aux, mawh pui pa koe krax simah simiang mai pui pa thung thiang piang haktiex khawmuik heue. Aux ang sax tawx taik rom sonsang pon tix rao mai pui khankix kawx ang sax tawx taik rom sonsang pon rao ka aux. Pui ku kaux koe krax jhax lawg ka aux heue. ¹¹ Siyiex ah nin, "Aux tak sang tawx ceu pa mhawm ka maix mai pui maix pa kawn deuk khankix tete, Aux tak sang kieh pui koeng deeh hoek tix khyox khaw tix ka maix tete, yam koe krax nu krax kin mai ka daux bawg yam koe krax kha rhawm heue. ¹² Mawh pon raig pui tix kaux kaux ka rhiem, pa mawh rhiem pa kaoh khaing plak laong mai tawng khankix lie? ¹³ Sinngao kraung khrai maix khankix Aux tak sang tawx ka pui tud rhim ka daux pa ang koe ngawh koe jum, phimap pa yuh maix khawmuik, ka daux haktiex dee kwang maix khankix heue. ¹⁴ Aux tak sang kieh maix hu tau mai pui koeng maix khankix, ka daux haktiex pa ang maix tawng heue. Mawh kheu ngu pa meet rhawm Aux tak gleeing ka pex heue. ¹⁵ Siyiex eue, Maix Cao tawng ka heue. Doh keud ka aux mai hoek kia ngien ka aux mai deeh pawk bix ka son aux piang pui pa yuh krax kha rhawm ka aux liak, paw teei aux luan dee singai ka daux krax lang gun yeung Maix Cao, tawng ka hoik yaox aux tix kham geu lox sibriem simiang son Maix Cao heue. ¹⁶ Siyiex pa mawh Siyiex Cao kru naing raoma eue, aux hoik yaox ka gumlox Maix Cao mai aux hoik teei ti ih mai gumlox Maix Cao hoik mawh pa nyawm rhawm mai pa gaux rhawm ka daux rhawm aux, mawh kheu aux mawh pa hoik kok tix ka min ceu kaux Maix Cao heue. ¹⁷ Aux ang lai ngawm ka deeh khrawm pui pa ang nab yam mai aux ang lai yuh pa gaux rhawm. Aux hoik ngawm nong nong kheu sibrawm plawng taix Maix Cao, mawh kheu Maix Cao hoik kieh aux naog ka pa song rhawm heue. ¹⁸ Kheu krax saux ngia aux lai koe sijheeng mai krax mat krax lheet aux lai ang chix pai grai kheu grawng pa yuh ka mawx lie? Mawh tak sang kieh Maix Cao ceu an hoek piang aux, awm rawm klawng pa hit ang koe dee een rhawm tix ka mai awm rawm pa nai pa nawk lie? ¹⁹ Mawh kheu nan, Siyiex ah nin, "Phan maix deeh ing, khaix an, Aux tak sang deeh viex maix hoek maix tak yaox tix cung ka plak sivoe aux, phan maix gwieh ceu pa mhawm lih khaing ceu pa caox maix tak sang mawh pa awm jheeh Aux heue. Kieh kix deeh ing hoek ka maix, viang mawh nan maix tak ang lai ing hoek ka kix heue. ²⁰ Aux tak kieh maix mawh guh veng tawng pa kaux cong ka son ceu pui in mai kix tak sang puing ka maix mai ang pex maix, grawh grawng nawh, Aux ot tau mai maix sonsang taoh ka maix mai Aux tak sang taoh maix heue, Siyiex ah nan heue. ²¹ "Aux tak sang taoh maix lih khaing tawm taix pui caox caig mai Aux tak deeh laug ti teei maix khaing tawm taix pa lhat graung maix heue."

¹ Gumlox Siyiex hoek ka aux ah nin, ² "Maix tak ang pon ti teei moeng mai ang pon tix koe kawn simex kawn bun khankix ka dee in heue. ³ Grawh grawng nawh, Siyiex ah nin son grawng kawn simex kawn bun pa keh ka dee in khankix mai son grawng miex kix pa keh kix mai keeing kix pa pon tix cie kix ka daux haktiex in heue. ⁴ Kix tak sang yum caox mai ang koe pui yiiem doe mai ang lai koe pa sang sipaung kix, mawh kheu nan, kix tak awm aing piang ca haktiex heue. Kix tak laux leeing ka lawm vaig mai ka sibhawm praix mai tokaux yum kix tak mawh priex ih sim mai totiag khankix piang haktiex heue." ⁵ Siyiex ah nin, "Paw laig ka daux nyiex yum mai paw yiiem grai mai paw laux rhawm son kix, mawh kheu Aux hoik teei ti tik krax pa nhim Aux, khawm krax moh pa caux rhawm aux mai krax pa caux rhawm Aux khankix khaing ceu pui in, Siyiex ah nin heue. ⁶ Pui ting pui iak khankix tak sang yum tau ka daux haktiex in mai tak ang lai yaox ti sipaung kix mai ang lai koe pui yiiem grai son kix mai ang pon ti pat tokaux cao tix mai ang pon khlao hauk kaing tix pak son kix heue. ⁷ Ang koe pui sivit blah ka pui pa yiiem grai son pui yum mai ang koe pui khu rhawm kix son pa yum mai ang koe pui tawx kawk nyaux ka pui pa khu rhawm yam yum miex keeing kix heue. ⁸ Awm an maix paw laig ka daux nyiex yuh pawie dee khan kheu sonsang ngawm mai ih nyaux tau mai kix heue." ⁹ Siyiex Cao kru naing raoma pa mawh Siyiex ceu pui Isarelax ah nin, "Jhak heue, Aux tak sang kieh inkix grai khaing dee in ka plak sivoe ngai maix mai ka daux baux singaix ju maix, pa mawh lox nyawm rhawm mai lox pa gaux rhawm, pa mawh lox sinaw lox bunkrih pa sang yuh ka paox tix heue. ¹⁰ "Yam krai maix lox ceu in ka pui in khankix, kix tak ah nin ka maix, Siyiex lai krai grawng pa sang koe krax pa ting laux leeing in piang yix, kheu jao patix lie? Phan ang mawh nan, mawh lud yix ka ceu patix lie? Phan ang mawh nan, mawh yuh yix phimap pa lud piang Siyiex pa mawh Siyiex yix ka ceu patix lie? ¹¹ Khaix an maix tak deeh ah nin ka kix, Siyiex ah nin, mawh kheu jao hoik tik vud keeing pex khankix ka Aux mai kix hoik hu hawt khaix siyiex tang kaux tang hak khankix mai hoik yuh kaing jhaw son kix mai hoik krub ka kix mai hoik tik vud ka Aux mai ang lai priex rien ka gumlox tat jhawm prawng Aux heue. ¹² Pex hoik nie lheu yuh pa caox khaing keeing tix, jhak heue, mawh kheu ku kaux hoik hawt hu awm krax keud rhawm cao tix, tom ang pui tix kaux kawx lai nghiet ka Aux heue. ¹³ Mawh kheu nan, aux tak grheu pex lih hu khaing haktiex in mai laig ka daux haktiex pa ang pex tawng mai khawm pa ang keeing pex khankix tawng mai pex tak sang yaox ti yuh kaing jhaw siyiex tang kaux tang hak an khankix ku singaix tan, ka dee ang Aux lai jhi krax pa caux rhawm tix ka pex heue. ¹⁴ Mawh kheu nan, Siyiex ah nin, "Jhak heue, singaix bawg yam pa ang kawn pui lai tiextu ti ah nin tak sang hoek, Siyiex hoik teei kawn praix Isarelax khankix lih khaing daux meung Ejiptux mawh pa im ju heue. ¹⁵ Mawh kheu nan, daux singaix bawg yam pa tiextu kawn pui ti ah nin tak hoek, Siyiex pa teei kawn praix ceu pui Isarelax khankix lih khaing haktiex plak laong mai khaing haktiex an khawmuik, khaing haktiex pa hoik grheu Nawh Cao kix to, mawh pa im ju heue. Grawh grawng nawh, Aux tak deeh viex kix hoek ka daux haktiex pa hoik tawx Aux ka keeing kix heue. ¹⁶ Siyiex ah nin, jhak heue, aux tak sang ploi pui pa teei kax tom nie mai kix tak sang miiet ka kix, khaix an, Aux tak sang ploi pui leue tiag tom nie mai kix tak sang jaw ka kix, khaing gawng ku gawng mai khaing ton ku ton mai khaing daux rang khankix heue. ¹⁷ Mawh kheu ngai Aux jhak piang krax hu kix khawmuik mai kix ang chix mox tix plak sivoe ngai Aux mai krax lud kix ang lai chix mox khaing ngai Aux heue. ¹⁸ Tak deeh viied son krax lud mai phimap kix ra son, kheu hoik seeing yuh kix haktiex Aux, kix hoik kieh haktiex sinngao Aux hoik naog ka tokaux yum pa seeing brai mai ka riang rao krub pa seeing brai khankix heue. ¹⁹ Siyiex pa mawh riang rao aux mai nyiex tab aux mai dee peung aux, singaix yam yaox aux krax kha rhawm, pui tang ceu khankix tak hoek, khaing dee sidah haktiex ka Maix Cao ah nin, "Keeing ex khankix hoik pon sinngao pie kheem, pa giex going mai pa ang koe bwanson tete heue." ²⁰ Pui mawx pa sang pon yuh siyiex, son tokaux tix pa ang tie mawh siyiex lie? ²¹ Mawh kheu nan, jhak heue, yam in aux tak kieh kix tawng tix bawg, ka grawng plawng taix Aux mai pa ting sibrawm Aux mai kix tak sang tawng mawh min ceu kaux Aux Siyiex heue."

¹ Phimap ceu pui Yudax hoik tiiem tix ka gawng nam meug tiiem mai ka toeh siang simaox piang plah dieb rhawm kix mai piang rung khu dee tan khankix. ² Kawn praix kix kawx kawn doh keud ka khu dee tan ka khaox Asherax khankix mai hawt pang khaox klai pa koe piang gawng lhaong khankix heue. ³ Gawng aux pa koe daux tiag khankix eue, Aux tak tawx krax magmi maix mai sinngao maix khankix mai dee lhaong pa lud maix, pa koe ka mee haktiex maix khawmuik ka tawm taix pui tud rhim heue. ⁴ Sinngao pa tawx aux ka maix kawx tak sang gah tix hu khaing maix mai Aux tak kieh maix yuh ka kaing jhaw pui koeng maix khankix, ka daux haktiex pa ang maix sax tawng, grawh grawng nawh maix hoik keeig ka ngu pa song rhawm Aux gleeing leeing ju heue." ⁵ Siyiex ah nin, "Kieh pa jhax lawg koe ka pui pa een rhawm tix ka kawn pui mai pa deuh rhawm ka riang rao tix mai pa kieh rhawm tang tiah khaing Siyiex heue. ⁶ Mawh kheu nawh tak awm gaw khaox kroh jung pa koe ka daux lung tiag mhaik mai ang lai yaox ka hoek ceu pa mhawm, viang mawh nan, tak yaox ti ot ka daux dee tuh tiex ka daux tiagtu mai ka daux haktiex song kih ka dee ang pui lai ot ka heue. ⁷ Pui een rhawm tix ka Siyiex mai pui pa kieh Siyiex mawh dee een rhawm tix koe bwanson heue. ⁸ Nawh tak awm khaox pa hoik sum ti hawt rawm, pa raux riah tom hoek hawt rawm klawngmai ang lai koe krax lhat, yam hax koek, lhax nawh tak klai jheung jheung mai ang lai koe krax khi rhawm ka daux num kroh praix klawng mai plix ang jud jai heue. ⁹ Rhawm kawn pui mawh pa lheu chix pie lhen khaing kuceu khawmuik mai koe ceu pa caox caig sigrien sigre, mawh pui mawx pa pon tawng ka an lie? ¹⁰ Aux Siyiex mawh pa sawg liiem ka rhawm kawn pui mai ciied ka tom krax keud mai deeh tawx ka pui ku kaux awm krax ceu pa yuh nawh mai awm plix kaing ceu pa yuh nawh heue. ¹¹ Awm keed mhaing pa num piang tawm pa ang tix tawm, pui magmi pa pon daux pa ang rahsee khankix, tak sang hoek krax kha jah yam awn ju nawh tom sidah nawh tak lih mawh pui vao caox heue." ¹² Dang ngeung dee lhaong pa koe min sibrawm khaing tom yam jah, mawh dee pa singax singeh ex heue. ¹³ Siyiex pa mawh dee keud pot ceu pui Isarelax eue, pui pa tik vud ka Maix Cao khankix tak pon krax kaig tua khawmuik heue. "Pui pa lih hu khaing Aux, tak mawh pa tiiem ti deuh carang piang tiex. Mawh kheu kix hoik tik vud ka Siyiex pa mawh dee lih rawm im ju heue." ¹⁴ Siyiex eue, pai ka aux mai aux tak moi, taoh ka aux mai aux tak pon krax taoh, mawh kheu mawh Maix Cao dee pa yaogyaw aux ka heue. ¹⁵ Kix ah nin ka aux, mawh koe gumlox Siyiex dee mawx lie? Kieh hoek daux yam in liak." ¹⁶ Phan mawh tokaux aux, ang nyang nied tix via khaing pa mawh tix cao liang yung pa hawt khaix Maix Cao mai aux ang nyang bax keud pot ka singaix pa kha rhawm, Maix Cao tawng ka lox pa kaoh khaing daux jheeh aux khankix hoik koe ka plak sivoe Maix Cao tan heue. ¹⁷ Paw doh mawh pa yaoh yee ka son aux liak yam hoek singaix kha rhawm Maix Cao mawh dee een aux rhawm tix heue. ¹⁸ Kieh kix pa tuktiak ka aux, hoek krax kaig tua, viang mawh nan, paw kieh aux hoek krax kaig tua liak, kieh kix koe krax yaoh yee, viang mawh nan, paw kieh aux koe krax yaoh yee ka liak, kieh singaix pa kha rhawm hoek piang kix, yuh kix laux leeing mai baox kieh laux leeing heue. ¹⁹ Siyiex ah nin, "Hu mai cung ka diang siviex kawn praix ceu pui Benyamin khankix, ka dee lih lih laig laig simiang meung Yudax mai ka siviex veng Yerusaliem khankix khawmuik, ²⁰ ah nin ka kix, �Pex pa mawh cub simiang pui Yudax mai pui haktiex Yudax khankix mai can pui pa ot ka daux veng Yerusaliem, pa laig laig lih lih ka daux diang siviex inkix eue, nghiet ka gumlox Siyiex heue.� ²¹ Siyiex ah nin, �Yuh satix pex mai paw klawm beeh pa cien ka daux singaix twah klaung mai paw viex laig ka daux diang siviex veng Yerusaliem khankix, ²² paw viex beeh pa cien lih khaing nyiex tix ka daux singaix twah klaung mai paw yuh kaing tix ceu kawx, deuh singaix twah mawh pa singax singeh awm hoik tawm Aux ka keeing pex heue.� ²³ Viang mawh nan, kix ang cu ang nghiet mai ang daong yhaok tix ka, viang mawh nan, hoik yuh ngawg tix kiien, son ang kix sang mhong mai ang rieb ka lox sidiex gau heue. ²⁴ Siyiex ah nin, "Phan pex cu nghiet ka Aux mhawm mhawm mai ang viex beeh pa cien laig ka daux diang siviex veng khankix ka daux singaix twah klaung, viang mawh nan, kieh singaix twah mawh pa singax singeh mai ang yuh kaing pie tix ceu kawx ka daux singaix an, ²⁵ khaix an simiang kix pa ngawm piang dang ngeung simiang Davit, cub kawn simiang mai cub cao kaing, pa brug ka ling lawx brung mai pa brug ka brung khankix, khrawm paox tix tau mai pui Yudax khawm pui pa ot ka daux veng Yerusaliem khankix, tak sang laig ka daux diang siviex veng in mai veng in tak sang koe leeing ju heue." ²⁶ Kix tak hoek khaing veng Yudax mai khaing baoh rawb rim veng Yerusaliem, khaing haktiex Benyamin mai khaing daux lung, khaing piang gawng mai khaing haktiex plak seh mai viex krax tan pa gleeing mai krax tan pa appong, krax tan phawng nghox ca im mai pa sioe bhawng mai krax tan pa yaogyaw hoek ka nyiex bwan Siyiex heue. ²⁷ "Phan pex ang cu nghiet ka Aux, ang deuh singaix twah mawh pa singax singeh mai viang ang viex beeh pa cien laig ka daux diang siviex veng Yerusaliem singaix twah kawx, khaix an Aux tak sang keeig ngu ka diang siviex veng khankix mai ngu an tak sang proe yuh nyiex haw simiang pa koe ka daux veng Yerusaliem mai ngu an tak ang lai chix yeet heue."

¹ Gumlox Siyiex, hoek ka Yeramix ah nin, ² "Yaog tix kaoh mai lih hu ka nyiex cao yuh aw tiex mai aux tak kieh maix mhong gumlox Aux tan heue. ³ Khaix an aux lih hu ka daux nyiex cao yuh aw tiex mai nawh ot sivoe aux mai yuh aw tiex ka ling yuh aw heue. ⁴ Aw tiex pa yuh ka glaox hoik laux daux tawm taix cao yuh aw, mawh kheu nan, nawh hoik deeh baox yuh aw tiex tang mu tix bawg, awm keud cao pa yuh aw mawh yuh ka mawx, nawh yuh awm an heue." ⁵ Khaix an gumlox Siyiex hoek ka aux ah nin, ⁶ Siyiex ah nin, "Nyiex ma ceu pui Isarelax khankix eue, Mawh ang Aux pon yuh ka maix awm cao pa yuh aw in lie?" Nyiex ma ceu pui Isarelax khankix eue, "Jhak heue, awm koe glaox ka daux tawm taix cao pa yuh aw, pex kawx koe ka daux taix Aux heue. ⁷ "Yam mawx ang ah, son grawng haktiex tidauh mai son grawng meung tix meung Aux pon reeig ti tik, yieh mai yuh laux tix taix neh heue. ⁸ Phan meung haktiex pa krai aux an, deeh veeh khaing pa caox caig yuh tix, Aux tak sang deeh tieh krax pa laux leeing pa keud aux tix sang viex piang kix mai ang lai kieh hoek piang kix heue. ⁹ Yam mawx ang ah, son grawng haktiex tixdah mai son grawng meung haktiex tix meung Aux pon sum mai pon khre rien ka tix taix neh heue. ¹⁰ Phan meung haktiex an yuh ceu pa caox caig ka plak sivoe ngai Aux mai ang cu nghiet ka lox Aux, khaix an Aux tak sang deeh tieh bwanson ceu pa mhawm, pa hoik ah Aux ti deuh mai Aux tak ang lai tawx ka kix heue. ¹¹ Mawh kheu nan, yam in, krai ka pui meung Yudax mai ka pui pa ot ka daux veng Yerusaliem khankix ah nin, Siyiex ah nin, Jhak heue, Aux yuh krax pa laux leeing tix ceu mai keud ti yuh grawng tix ceu piang pex heue. Deeh veeh khaing pa caox yuh tix ku kaux daux pui yam in mai yuh daux krax hu pex mai kaing pa yuh pex khankix mawh pa mhawm heue." ¹² Kix ah nin, "Ang ex lai koe krax keud pot jun pot, mawh kheu nan, ex tak sang hu awm pa koe rhawm cao ex khankix mai ex tak yuh ka daux krax pa caox ku kaux daux pui heue." ¹³ Mawh kheu nan Siyiex ah nin, "Chawk ti yaox ka daux pui tang ceu, mawh pui mawx pasax mhong ka ceu inkix lie? Bunkrih ceu pui Isarelax khankix hoik yuh ceu pa kied seeing kied brai heue. ¹⁴ Mawh sang that rawm rha pa koe ka gawng Lebanon, khaing rang pa koe daux lung an lie? Mawh sang hit rawm klawng sikiied lih hu pa kaoh khaing gawng an lie? ¹⁵ Mawh kheu hoik piawm pui Aux khankix ka Aux, kix hoik gleeing nyawng bhawng ka riang rao pa giex going khankix heue. Kix kieh tokaux tix sideeing ka daux krax hu tix, pa dawg koe tom dix mai hu daux krax pa iak pa ang pui lai cox lhop tiex ka, ¹⁶ mawh kheu nan, kix kieh haktiex tix mawh dee pa yiien mai mawh dee pa sibriem pui sijeeng, pui pa lailing hawt baoh an ku kaux tak daox deng mai vuh vied kaing tix ka heue. ¹⁷ Aux tak kieh prung prang awm bhaung khaing plak lih singaix ka plak sivoe pui koeng, singaix yaox kix krax kha rhawm Aux tak jhi kix yaox plak blawg tix mai ang jhi kix yaox ka plakngai tix heue." ¹⁸ Khaix an kix ah nin, "Hoek mai kieh ex keud grawng pa sang yuh tix ka Yeramix, mawh kheu nan, gumlox tat jhawm prawng ang lai grai khaing cao giex kaing li mai krax keud ang grai khaing pui koe pingnya cuyi mai lox jhai ang chix grai khaing cao jhai, hoek mai kieh ex puing nawh ka dak tix, paw lai kieh ex nghiet ka lox pie tix gum kawx heue. ¹⁹ Siyiex eue, kia ngien ka aux mai nghiet maix mhong ka lox pui pa yuh krax pa simah simiang ka aux heue. ²⁰ Mawh khaw tix vied pa caox ka son pa mhawm lie? Mawh kheu kix hoik kaong daux son ju aux heue. Doh keud ka hoik cung aux ka plak sivoe Maix Cao, sonsang krai lox ceu pa mhawm son kix mai sonsang veeh Maix Cao ti tik krax pa meet rhawm tix luan khaing kix heue. ²¹ Mawh kheu nan, ap kawn praix kix ka pa sibhawm praix mai ap kix ka sibrawm lawm vaig, kieh moeng kix mawh miexmai mai kieh kawn praix kix yum heue. Kieh pui pah ka pui ting kix yum mai kieh pui awn ju kix yum ka lawm vaig daux naing heue. ²² Yam viex Maix Cao kru naing pui koeng hoek sijaox ka dee ot kix kieh mhong lox riag yo khaing daux nyiex ma kix, mawh kheu hoik kaong kix daux tiex, sonsang giex tix aux mai mox tix taong jhawk ka caong aux heue. ²³ Siyiex eue, Maix Cao tawng krax pa keud kix piang aux khawmuik, sonsang pah ka aux heue. Paw lai pluat ploi ka pa lud kix mai paw preet ka phimap kix khaing plak sivoe ngai Maix Cao, yuh awm in ka kix, ka daux bawg yam pa song rhawm Maix Cao heue.

¹ Siyiex ah nin "Hu mai teei singiien tiex ka cao yuh aw tiex mai kok ka kuad riex ju tiblah khaing daux pui khankix mai khawm kuad riex ju tiblah khaing daux cao giex kaing li heue. ² Lih hu ka daux lung kawn simex Henon, pa koe hawt diang siviex laig Pawshat mai krai pao gumlox pa tak sang krai Aux ka maix tan, ³ ah nin, "Simiang meung Yudax mai can pui pa ot ka daux veng Yerusaliem khankix eue, nghiet ka gumlox Siyiex, Siyiex Cao kru naing raoma pa mawh Siyiex ceu pui Isarelax ah nin, jhak heue, Aux tak sang viex krax kha rhawm hoek piang dee in mai can pui pa mhong ka lox an, yhaok nawh tak lheet ka heue. ⁴ Mawh kheu hoik tik vud kix ka Aux mai hoik yuh ka dee in mawh haktiex pui tang praix klawng, grawh grawng nawh kix hoik gleeing nyawng bhawng ka siyiex tang kaux tang hak ka dee in, pa ang kix mai keeing mai simiang meung Yudax khankix nyang sax tawng mai hoik kieh dee in, naog ka nham pui pa ang koe phimap khankix heue. ⁵ Kix hoik baox sum dee lhaong ka son siyiex Balax, sonsang gleeing kix ka kawn simex tix ka ngu, son krax tan pa gleeing ka siyiex Balax, ka pa ang Aux sax tawm, sax krai mai pa ang sax lih khaing daux rhawm Aux." ⁶ Siyiex ah nin, "Mawh kheu nan, jhak heue, singaix bawg yam tak sang hoek, son ang lai baox kok baoh dee in mawh Tophiet, phan ang mawh nan, daux lung kawn simex Hinon khaix in tix bawg kawx, viang mawh nan, tak kok mawh daux lung dee pah yum ka heue. ⁷ Aux tak sang yuh krax keud meung Yudax mai veng Yerusaliem khankix mawh pa giex going ka dee in mai Aux tak kieh kix goh gup ka lawm vaig plak sivoe pui koeng kix mai ka taix pui pa sawg tix pah ju kix. Aux tak sang tawx tokaux yum kix mawh priex ih sim raoma mai son totiag piang tiex khankix heue. ⁸ Aux tak sang kieh veng in mawh pa yiien mai dee pa koe lox sibriem pui ka, pui ku kaux pa lailing hawt baoh in tak koe krax daox deng ka mai koe lox sibriem, kheu grawng pa laux leeing kix khawmuik heue. ⁹ Aux tak sang kieh kix deeh ih nex kawn simex tix mai nex kawn bun tix mai pui ku kaux tak ih nex paox grawm tix yam hoek ka daux pa kied kin kha rhawm lai lawm pui koeng ka kix mai pui pa sawg tix pah ka ju kix heue. ¹⁰ Khaix an maix tak pah singiien tiex an max sivoe ngai pui pa hu tau mai maix khankix, ¹¹ ah nin ka kix, Siyiex Cao kru naing raoma ah nin, Awm an, Aux tak sang pah ka ceu pui in mai veng in phawng awm pah pui ka singiien tiex cao pa yuh aw, baoh haktiex Taphiet, tom ang koe dee sipaung heue." ¹² Siyiex ah nin, "Awm an, Aux tak kieh baoh dee in mai ka pui pa ot ka dee in mai yuh veng in awm haktiex Tophiet heue. ¹³ Nyiex ma pui veng Yerusaliem mai nyiex haw simiang meung Yudax khankix tak sang seeing brai awm haktiex Yophiet, mawh kheu kix gleeing nyawng bhawng piang braux nyiex tix ku nyiex ka pa koe piang raoma khawmuik mai raug tix tawx krax tan pa nyaux ka siyiex tang kaux tang hak khankix heue." ¹⁴ Khaix an Yeramix kaoh khaing baoh haktiex Tophiet ka dee hoik ploi Siyiex nawh hu krai lox jhai mai nawh cung ka brawk nyiex bwan Siyiex mai ah nin ka pui khankix, ¹⁵ Siyiex Cao kru naing raoma, Siyiex ceu pui Isarelax ah nin, jhak heue, Aux tak sang viex krax kha rhawm pa krai pao Aux hoek, piang veng in mai piang veng pa kwang nawh khawmuik, kheu jao hoik kiien ngawg kix mai ang nghiet ka gumlox Aux heue."

¹ Yam in Pashurax pa mawh kawn simex cao giex kaing li Imerax mawh cao kaing ting pa kwang ka daux nyiex bwan Siyiex, hoik mhong ka lox jhai pa krai Yeramix grawng ceu an khankix. ² Khaix an Pashurax sivied ka cao jhai Yeramix mai gang ti deuh nawh ka pang siviex lhaong Benyamin pa koe hawt nyiex bwan Siyiex heue. ³ Singaix khaix, Pashurax deeh ploi Yeramix lih khaing daux gang, khaix an Yeramix ah nin ka nawh, "Siyiex ang lai kok ceu kaux maix mawh Pashurax, tak kok maix mawh Magoramisabib pa koe krax lhat ku plak heue." ⁴ Grawh grawng nawh, Siyiex ah nin, "Jhak heue, Aux tak sang kieh krax yaoh yee ka tokaux cao maix mai ka paox grawm maix khankix mai kix tak goh tix yum ka lawm vaig pui koeng kix mai ngai maix tak sang yaox ka an heue. Aux tak sang ap haktiex Yudax khankix ka daux tawm taix simiang veng Babulon mai nawh tak rhim kix hu mawh pui giex pui laung ka veng Babulon mai pah kix yum ka vaig heue. ⁵ Lheu khaing an, Aux tak ap krax magmi veng in khawmuik mai can pa lih khaing ka daux nawh mai can pa kied koe ngawh jum nawh khawmuik mai can sinngao simiang meung Yudax khawmuik, Aux tak tawx ka daux tawm taix pui koeng kix mai pui koeng kix tak sang tud rhim kix mai giex viex kix hu ka veng Babulon heue. ⁶ Maix pa mawh Pashurax mai can pa ot ka daux nyiex maix khankix, tak sang mawh pa giex laung tix hu maix tak yaox tix hoek ka veng Babulon maix tak sang yum tan mai sipaung tix tan, cao maix khawm paox grawm maix khawmuik mai can pui pa nghiet lox jhai pie lhen maix khankix heue" ⁷ Siyiex eue, Maix Cao jeeh nyaw ka aux mai aux hawt khaix jeeh nyaw maix heue. Maix Cao mawh pa nie lheu ting riang rao khaing aux mai hoik pex ka aux. Aux hoik yaox ti kham lox sibriem ku singaix mai pui ku kaux nunai ka aux heue. ⁸ Grawh grawng nawh, yam sikah aux yam mawx ang ah, aux riag yo lox tix ah nin, "Aux kied koe krax pa kin mai pa tuktiak. Mawh kheu gumlox Siyiex hoik mawh pa kieh aux pon lox sibriem mai lox pa nunai hu singai heue. ⁹ Khaix an aux keud yuh nin, Aux tak ang lai krai grawng Nawh Cao mai ang lai sikah grawng min ceu kaux Nawh Cao lheu pie tix bawg kawx heue." Gumlox Nawh Cao pa koe ka daux rhawm aux, hoik rup awm ngu mai hoik si eet ka daux si-ang aux khankix, aux hoik kied taug kied awn riang tom ang lai pon kut pon gun ka an heue. ¹⁰ Grawh grawng nawh, aux hoik mhong ka lox nunai pui tom nie, koe pa lhat graung ka ku praok, kix ah nin, ex tak sang kao ka nawh heue. Can pui pa meed aux khankix hoik pau tix jhak sonsang sideeing aux caong tix ah nin, ex nyaw glaw ka nawh, sonsang pie ka nawh mai tak sang pon pawk bix piang nawh heue." ¹¹ "Viang mawh nan, Siyiex ot tau mai aux awm pui naing pa ting sibrawm, mawh kheu nan, pui tuktiak ka aux khankix tak sideeing caong tix mai ang pex heue. Kix tak koe krax pa kied kaig kied tua mai kix tak ang lai koe krax haok hwan heue. Krax pa tua tak ang lai piawm leeing ju heue. ¹² Siyiex Cao kru naing raoma, Maix Cao pa cheuk ti yaox pui pa rahsee mai pa yaox ka daux rhawm kawn pui khankix eue, kieh aux yaox krax pa pawk Maix Cao bix piang kix liak, mawh kheu aux hoik krai grawh grawng tix sidawng ka plak sivoe Maix Cao heue. ¹³ Rhax lai ka Siyiex, yaogyaw ka Siyiex heue. Mawh kheu Nawh Cao hoik taoh ju pui pa hot shia, khaing daux tawm taix pui caox khankix heue. ¹⁴ Kieh singaix keh aux pon krax pa jhax lawg! kieh singaix keh miex aux ka aux mawh pa ang koe bwanson heue, ¹⁵ kieh pui pa hoik viex grawng satang hoek ka keeing aux pa ah nin, kawn nyawm simex hoik keh ka son maix tix kaux pa kieh keeing aux gaux rhawm ka kieh pon pa jhax lawgheue. ¹⁶ Kieh pui an mawh pa awm veng khankix pa hoik yuh Siyiex laux leeing mai pa ang lai koe krax kleh ka heue. Kieh nawh mhong ka lox yiiem plak ponngawb mai lox riag yo bawg jung singaix heue. ¹⁷ Mawh kheu nawh ang lai pah aux yum, tom ka daux vaig miex aux, sonsang mawh vaig miex aux simeeig aux mai vaig nawh, mawh pa nghe aux sijheeng heue. ¹⁸ Aux lai keh khaing vaig miex tix sonsang yaox tix grawng pa taug mao mai grawng pa laux rhawm, sonsang mawh baux singaix aux pa laux leeing tau mai krax kaig tua jao patix lie?"

¹ Gumlox Siyiex pa hoek ka Yeramix, yam ploi simiang Zedekix ka Shurax kawn simex Maseyax pa mawh cao giex kaing li hoek ka Yeramix ah nin, ² "Yuh bwanson chawk cheng Siyiex ka son ex kheu grawng yuh Nebukhaneza simiang Babulon naing ka ex heue. Ha Siyiex tak sang yuh kaing jhaw pa daox deng Nawh Cao khankix ka son ex, sonsang luan simiang an singaix khaing ex heue." ³ Khaix an Yeramix ah nin ka kix, "Pex tak caw ti ah nin ka simiang Zedekix, ⁴ Siyiex, Siyiex ceu pui Isarelax ah nin, Jhak heue, Aux tak sang deeh blak ti kieh kraung naing pa koe daux tawm taix pex khankix pa puing pex Simiang Babulon mai pui Khaladie, pa lai lawm ka pex plak praix guh veng mai Aux tak deeh khrawm kix hoek ka daux sigreung veng in heue. ⁵ Tokaux Aux tak puing pex ka taix pa hoik nyeu tix mai ka klip pa ting riang rao tix, ka daux krax pa song rhawm mai krax meet rhawm mai krax pa kied ting praix rhawm tix. ⁶ Aux tak sang tawk ka can ceu pa ot ka daux veng in, ka pui khawm totiag, kix tak yum ka jhawm saux preng pa kied kin." ⁷ Siyiex ah nin, " Khaix an Aux tak sang ap Zedekix simiang meung Yudax, khawm kawncau nawh mai pui nawh khankix, pa kawn deuk ka daux veng in, khaing jhawm saux preng mai ka lawm vaig mai ka sibhawm praix, ka daux tawm taix Nebukhaneza simiang Babulon pa mawh pui koeng kix mai ka daux tawm taix pui pa sawg tix pah ju kix, mai nawh tak pah kix ka rao vaig. Simiang an tak ang lhawk ka kix mai ang lai caux rhawm, ang lai koe krax moh ka kix heue. ⁸ Yam in maix tak sang caw ti ah nin ka pui khankix, Siyiex ah nin Jhak heue, Aux hoik deuh daux krax pa im ju maix mai daux krax pa yum ka plak sivoe pex heue. ⁹ Pui pa ot ka daux veng in, tak yum ka vaig mai ka sibhawm praix mai ka jhawm saux preng; viang mawh nan, pui lih hu plak praix mai deeh tieh tix laig ka plak pui Khaladie khankix pa lai lawm ka pex, nawh tak yaox tix im ju mai ju nawh tak mawh pa awm kraung pa pon rhim ti teei heue. ¹⁰ Siyiex ah nin, grawh grawng nawh, Aux hoik jeung ngai tix piang veng in, sonsang tawx krax kha rhawm mai ang mawh son pa mhawm, tak sang tawx an ka daux tawm taix simiang Babulon mai nawh tak gleeing veng in ka ngu heue." ¹¹ Pui nyiex ma simiang Yudax eue, nghiet ka gumlox Siyiex pa ah nin, ¹² Nyiex ma simiang Davit eue, Siyiex ah nin, "Prawng ca rahsee plak ponngawb mai deeh taoh ka pui pa kham tud rhim, lih khaing daux tawm taix pui pa yeen ya, phan ang yuh nan, krax pa meet rhawm Aux tak sang lih awm ngu mai gleeing tom ang pui tix kaux kawx pon preet ka, kheu pa caox caig pa yuh pex khankix heue. ¹³ Siyiex ah nin, can pui pa ot daux ngawd mai pa ot piang simaox daux lung khankix eue, Jhak heue, Aux mawh pa deeh tieh feen ka pex heue. Pex ah nin, mawh pui mawx pa sang hoek puing ka ex lie? Phan ang mawh nan, mawh pui mawx pa sang laig ot ka dah dee ot ex khankix lie? ¹⁴ Siyiex ah nin, "Aux tak sang ciyang ka pex, awm plix kaing pa yuh pex khankix, Aux tak sang kieh ngu proe ka daux nong yu mai tak gleeing can pa koe hawt vung viang an heue."

¹ Siyiex ah yuh nin, "Lih hu ka nyiex haw simiang meung Yudax mai krai lox in tan ² ah nin, simiang meung Yudax, pa ngawm piang dang ngeung simiang Davit maix mai khawm kawncau maix mai pui maix khankix pa laig ka daux siviex veng inkix eue, nghiet ka gumlox Siyiex heue. ³ Siyiex ah nin, "Prawng ca ka daux pa rahsee mai deeh taoh ka pui pa kham krax tud rhim khankix lih khaing daux tawm taix pui pa yeen ya. Paw yuh krax lud krax loe mai paw yuh krax pa kin ka nyo sinie mai ka pa ang koe miex koe keeing mai miexmai khankix mai paw kieh nham pui pa ang koe map koe grham jauh ka dee in heue. ⁴ "Grawh grawng nawh, phan pex hawt yuh ceu in mhawm mhawm, khaix an simiang pa ngawm piang dang ngeung simiang Davit khankix, pa brug brung mai pa brug ling lawx brung khankix, hoek khawm kawncau mau soi mai pui haktiex khankix, tak sang yaox tix laig ka diang siviex nyiex haw in heue. ⁵ Mawh kheu nan, phan pex ang nghiet ka gumlox in khankix, Siyiex ah nin, Aux tiextu ka tokaux tix mai nyiex haw in tak lih mawh dee yiien pui ka heue." ⁶ Mawh kheu nan, "Siyiex ah nin ka grawng nyiex haw simiang meung Yudax, viang mawh haktiex Gilat mai choek gawng Lebanon ka son Aux kawx; Aux tak sang kieh maix mawh daux tiagtu mai veng pa ang pui lai ot ka heue. ⁷ Aux tak sang khre pui pa yuh krax laux leeing piang maix, tau mai pa viex kraung naing tix ku kaux, kix tak sang kid khaox Arit pa kied mhawm maix khankix mai taing laig ka daux ngu heue. ⁸ Ceu pui khankix tom nie tak lailing hawt baoh veng in mai pui ku kaux tak ah nin ka paox plawg tix, Siyiex lai yuh ceu pa yuh nin ka veng ting in yuh ka mawx lie?" ⁹ Khaix an kix tak deeh pawk ah nin, "Mawh kheu kix hoik piawm ka gumlox sijax mukheu Siyiex pa mawh Siyiex kix mai hoik krub ka siyiex tang kaux tang hak mai hoik yuh kaing jhaw kix heue. ¹⁰ Paw yiiem grai son pui pa yum mai paw laux rhawm ka son nawh, viang mawh nan, yiiem grai sigrien sigre son pui pa hu dee singai, mawh kheu nawh tak ang lai deeh hoek khaix in pie tix bawg kawx mai ang lai yaox ka haktiex dee keh dee kung tix heue." ¹¹ Grawh grawng nawh, Siyiex ah nin, son grawng pa dex dawd mai Shalum, kawn simex Yosiyax, pa mawh simiang meung Yudax, pa plud ti kwang haktiex khaix keeing tix Yosiyax mai pa hoik lih hu khaing dee in, "Nawh tak ang lai dee hoek tin khaix in pie tix bawg kawx, ¹² nawh tak yum ka dee pa hoik viex kix nawh mawh pui pa giex laung tan mai ang lai yaox ka haktiex in tix bawg kawx heue. ¹³ Kieh krax kha rhawm koe ka pui pa sum nyiex ka daux pa ang rahsee mai pa yuh lawg ot tix khankix ka daux pa ang khaw caw mai pa cau paox plawg tix khankix ka daux pa ang tawx ngawh riang, tidtix ka son kaing pa yuh nawh. ¹⁴ Nawh ah nin, aux tak sang sum tix cie nyiex pa kied ting mai laug pa kied va son tix mai paoh siviex iak son an mai sau braux ka khaox Arit mai kraix ka rawm san plang raoh khankix heue. ¹⁵ Mawh tak sang mawh maix simiang, kheu jao sum tix ot ka nyiex khaox Arit lie? Mawh ang keeing maix hoik ih nyaux mai yuh tix pa rahsee mai pa mawh meh lie? Khaix an mawh kheu an hoik mawh pa mhawm ka son nawh heue. ¹⁶ Nawh hoik prawng ca ka pui hot shia mai pui cud cha, mawh kheu an hoik mawh ceu pa mhawm heue. Siyiex ah nin, Ang an hoik mawh pa tawng pa yung ka Aux lie? ¹⁷ Viang mawh nan, ngai maix mai rhawm maix mawh ngie son pa ghoing mai son nham pui pa ang koe map grham jauh mai krax pa yeen ya mai krax kin khankix heue." ¹⁸ Mawh kheu nan, Siyiex ah nin ka grawng pa dex dawd mai Yehoyakim kawn simex Yosiyax pa mawh simiang meung Yudax, kix tak ang lai yaox ti yuh krax yiiem doe son nawh, pa ah nin, "Puxke eue phan ang mawh nan, pux nan eue kix tak ang lai yaox ti yuh krax yiiem doe son nawh, pa ah nin, cao simiang aux eue phan ang mawh nan, min sibrawm cao simiang aux eue. ¹⁹ Tak sang sipaung nawh awm sipaung la tix mu mai sileed ti tik nawh khaing diang siviex Yerusaliem heue. ²⁰ Haok yiiem ka gawng Lebanon mai riag yo lox tix sinum ka haktiex Bashan mai yiiem ka baoh haktiex Abarim, mawh kheu paox grawm can pa moh maix khankix hoik laux leeing heue. ²¹ Aux hoik krai ka maix yam kawn haok hwan mhawm ot maix, viang mawh nan maix hoik ah nin, aux ang lai nghiet heue. In hoik dawg mawh jhawm pa yuh maix tom yam iak ju maix, son ang maix sang cu nghiet ka lox Aux heue. ²² Bhaung tak sang ih ka cao pa liang yung maix khankix mai paox grawm can pa moh maix khankix tak sang yaox ti hu awm pa giex laung, khaix an maix tak kaig tua mai laux rhawm, kheu jao pa caox caig yuh tix heue. ²³ Pui pa ot piang gawng Lebanon pa yuh mheem piang khaox Arit khankix eue, krax kha rhawm tak sang hoek piang maix awm krax saux ngia yam keh bun kawn tix, tak sang mawh pa koe krax caux rhawm ka maix miex ding lie?" ²⁴ Siyiex ah nin, "Awm im ju Aux, viang Khonix pa mawh kawn simex Yehoyakim simiang meung Yudax, hoik mawh cum jeep giien piang taix dawm Aux kawx, Aux tak sang peeik ti tik maix, ²⁵ Aux tak sang ap maix ka daux tawm taix pui pa sawg tix pah ka ju maix mai ka daux tawm taix pui pa kied lhat graung maix ka, pa mawh Nebukhaneza, simiang Babulon mai ka daux tawm taix ceu pui Khaladie khankix heue. ²⁶ Mawh kheu nan, aux tak sang grheu maix lih mai khawm miex pa hoik keh maix, ka haktiex tang dah ka dee ang maix keh mai maix tak yum tan heue. ²⁷ Viang mawh nan, ka haktiex pa keud maix tix sang deeh ing maix tak ang lai yaox ti deeh ing ka heue. ²⁸ Pa mawh Khonix in hoik mawh riang rao pa hoik graig pa nunai pui ka lie? Mawh nawh kraung shiao pa ang pui lai khaw rhawm ka lie? nawh mai khawm doeh ru nawh khankix, lai mawh pa hoik tik tix ka daux haktiex pa ang kix tawng, kheu jao pa yuh ka mawh lie? ²⁹ Haktiex, Haktiex, Haktiex eue, Nghiet ka gumlox Siyiex heue, ³⁰ Siyiex ah nin, "Tiiem ti deuh grawng pui in, sawn mawh pui pa ang lai koe kawn, mawh pui pa ang sax koe krax haoh krax hwan ka daux baux ju nawh khankix, grawh grawng nawh, doeh ru nawh, tak ang koe krax haok hwan pie tix kaux kawx mai ang yaox tix ngawm piang dang ngeung simiang Davit mai ang lai yaox tix kwang ka haktiex Yudax pie tix bawg kawx heue."

¹ Siyiex ah nin, "Cao pa liang yung khankix, pa yuh krax laux leeing mai kieh yung khankix prung prang khaing daux gwang rib Aux koe krax kha rhawm heue. ² Mawh kheu nan, Siyiex pa mawh Siyiex ceu pui Isarelax ah nin ka cao liang yung khankix pa tawx pa ih ka pui Aux khankix, pex hoik kieh yung Aux khankix prung prang mai hoik grheu kix luan mai ang kia ang ngien ka kix heue. Jhak heue, Aux tak sang jhak tix viied ka ceu pa caox caig yuh pex khankix, Siyiex ah nan heue. ³ Aux tak deeh khrawm cub kawn yung Aux pa kawn deuk khankix khaing haktiex pa hoik grheu Aux kix lih mai deeh viex kix hoek ka daux kawg yung kix mai kix tak baox pre nie haoh hun heue. ⁴ Aux tak yaog ti deuh cao liang yung pa kwang piang kix, pa sang tawx kix ih priex preem mai kix tak ang lai koe krax lhat graung krax yaoh yee khaix in pie tix bawg kawx mai ang lai koe krax cud krax cha, Siyiex ah nan heue. ⁵ Siyiex ah nin, jhak heue, singaix bawg yam khankix hoik hoek, Aux tak sang yaok ti kieh kak pa rahsee glaoh khaing Davit, pa mawh simiang tix kaux pa naog mai piangnya cuyi mai kwang, prawng ca ka daux pa rahsee mai pa mawh meh ka piang haktiex heue. ⁶ Singaix bawg yam nawh khankix, meung Yudax tak pon krax taoh mai ceu pui Isarelax khankix tak yaox ti ot yiien yawg, yam in ceu kaux Nawh Cao tak kok mawh "Siyiex mawh pa rahsee ex heue." ⁷ Mawh kheu nan, Siyiex ah nin, jhak heue, Singaix bawg yam pa ang kix lai tiextu ah nin tak sang hoek, Siyiex pa hoik viex kawn praix ceu pui Isarelax lih khaing meung Ejiptux mawh pa im ju, ⁸ Viang mawh nan, tak tiextu ti ah nin, Siyiex pa im ju hoik teei doeh ru nyiex ma ceu pui Isarelax khankix, lih khaing haktiex plak laong mai khaing ka daux haktiex an khawmuik, pa hoik grheu Aux kix to kix tak sang yaox ti ot ka daux haktiex cao tix heue." ⁹ Rhawm Aux hoik koe krax tug kha ka daux aux, kheu pa dex dawd mai cao jhai khankix, si-ang aux khawmuik hoik siyaung heue. Aux hoik awm pui pa yoek ka rawm plix siiet, mawh kheu Siyiex mai kheu gumlox pa singax singeh Nawh Cao khankix heue. ¹⁰ Grawh grawng nawh, haktiex hoik naog ka pui pa lud vao, mawh kheu pa jhax lawg, haktiex koe krax yiiem grai ka. Daux tiag tu khankix, hoik groing, krax hu kix mawh pa caox mai riang rao sibrawm kix ang lai rahsee heue. ¹¹ Grawh grawng nawh, cao jhai mai cao giex kaing li khawm ra, mawh pa ang singax singeh, Aux hoik yaox pa caox caig yuh kix ka daux nyiex Aux, Siyiex ah nan heue. ¹² Mawh kheu nan, krax hu kix tak awm krax pa nyu ka daux pa faik mai kix tak mawh pa grheu tix mai goh ka daux krax an heue. Aux tak sang viex krax laux leeing hoek piang kix, yam hoek daux num pa ciyang ka kix, Siyiex ah nan heue. ¹³ Aux hoik yaox rhawm pa vao pa caox ka daux cao jhai veng Samarix, kix ah lox jhai khaing siyiex Balax mai hoik kieh ceu pui Aux Isarelax khankix lud heue. ¹⁴ Aux hoik yaox ceu pa seeing brai ka daux cao jhai veng Yerusaliem khankix, kix lud vao mai hu ka daux pie lhen, kix tawx riang rao ka taix pui pa yuh pa caox caig pui tix kaux kawx, ang lai deeh veeh khaing pa caox caig yuh tix heue. Kix khawmuik hoik awm pui veng Sawdom ka Aux mai pui ot ka daux veng Yerusaliem khankix, awm pui pa ot ka daux veng Gawmawrax heue. ¹⁵ Mawh kheu nan, Siyiex Cao kru naing raoma ah nin, son grawng pa dex dawd mai cao jhai khankix jhak heue, Aux tak sang tawx kix ih ceu plix song mai tawx kix nyaux rawm ghin song, mawh kheu kaing pa ang singax singeh khaing cao jhai Yerusaliem khankix, hoik tah hu ka daux haktiex khawmuik heue." ¹⁶ Siyiex Cao kru naing raoma ah nin, "Paw nghiet ka lox cao jhai khankix, pa krai lox jhai ka pex heue. Kix sidiex pex ka lox pa giex going, kix sikah ngie lox riang susai khaing daux rhawm tix mai ang tie mawh pa kaoh khaing daux jheeh Siyiex heue. ¹⁷ Kix ah nin ka pui pa nunai ka aux jheung jheung, Siyiex ah nin, "pex tak sang koe krax pa nhim, mai baox ah nin ka pui ku kaux pa tang hoek hu awm alo rhawm cao tix, ceu pa caox tak ang lai hoek piang pex heue." ¹⁸ Grawh grawng nawh, mawh pui mawx pa pon cung tix kum tau mai Siyiex mai hoik tawng hoik yaox mai hoik mhong ka gumlox Nawh Cao lie? Mawh pui mawx pa hoik mhai ti deuh gumlox Nawh Cao mai hoik mhong ka an lie? ¹⁹ Jhak heue, bhaung keukanglux Siyiex hoik lih ka daux pa meet rhawm pa mawh bhaung keukanglux pa kied kin, An tak sang tah piang kaing pui caox caig heue. ²⁰ Krax song rhawm Siyiex lai veet tix plak khaix, tom hoek bawg yam ang Nawh nyang bax ciyang awm pa hoik keud Nawh Cao daux rhawm tix heue. Ka daux singaix khaix khankix, pex tak sang tawng ka grawng an heue. ²¹ Aux ang nyang bax ploi cao jhai ankix, viang mawh nan, kix hoik to hu heue. Aux ang nyang sikah ka kix, viang mawh nan, kix hoik krai lox jhai heue. ²² Viang mawh kawx nan, phan kix hoik mawh pa cung tix kum tau mai Aux mai kieh pui Aux khankix mhong ka gumlox Aux, khaix an kix tak khaw deeh veeh khaing daux krax pa caox caig tix mai khaing pa caox caig yuh tix heue." ²³ Siyiex ah nin, "Mawh Aux Siyiex pa ot dee dex, ang lai mawh Siyiex pa ot dee pa kied singai lie? ²⁴ Siyiex ah nin, mawh sang pon mox pui tix kaux tokaux tix daux dee glip, son ang Aux sang yaox ka nawh lie? Siyiex ah nin, Mawh ang Aux tah ot ka raoma mai haktiex lie? ²⁵ Aux hoik mhong ka ah cao jhai khankix, ka lox jhai pie lhen ka daux min ceu kaux Aux ah nin, aux hoik camaox ti yaox, aux hoik caomaox ti yaox heue. ²⁶ Cao jhai khankix kawn sang krai lox jhai pie lhen pa koe khaing daux rhawm tix reung miex greung lie? Kix mawh cao jhai pie lhen awm rhawm cao tix, ²⁷ kix coca ti kieh pui Aux khankix piawm ka ceu kaux aux kheu camaox tix, ka ceu pa krai pui ku kaux ka paox plawg tix khankix, awm hoik piawm keeing kix ceu kaux Aux, kheu jao siyiex Balax heue. ²⁸ Cao jhai pa koe krax pa camaox kieh nawh krai grawng camaox an, mai pui pa pon ka gumlox Aux, kieh nawh krai gumlox Aux ka daux pa kaux sijax heue. Siyiex ah nin, grhip nghox sang pon tiag tix mai nghox yuh ka mawx lie? ²⁹ Siyiex ah nin, "Mawh ang gumlox Aux awm ngu lie?, ang awm daix ting pa tawk rang khankix phawng lie? ³⁰ Mawh kheu nan, Siyiex ah nin, jhak heue, Aux tak sang tieh feen ka cao jhai khankix, pa krai ka gumlox Aux, ka pui tix kaux lai tix kaux khaing paox plawg tix heue. ³¹ Siyiex ah nin, Jhak heue, Aux tak sang tieh feen ka cao jhai khankix, pa shiao dak kix ah nin, Nawh Cao ah nin heue. ³² Siyiex ah nin, jhak heue, Aux tak tieh feen ka cao jhai pa krai lox jhai pie lhen grawng camaox khankix, pa krai pa kieh pui Aux khankix lud loe ka ceu pie lhen kix mai pa tang yaw kix tix heue. Viang mawh nan, aux ang ploi kix mai ang tie tawm lox ka kix heue. Mawh kheu nan, kix krai lox pa ang tie koe bwanson ka ceu pui in khawmuik, Siyiex ah nan heue. ³³ Mawh kheu nan, yam pui inkix ang ah, cao jhai ang ah, cao giex kaing li ang ah, chawk ah nin ka maix, pa plak jhi Siyiex mawh ceu patix lie? Khaix an maix tak ah nin ka kix, pa plak jhi Siyiex ah nin, jhi ceu patix? Aux tak sang tik vud ka pex. ³⁴ Ka cao jhai, cao giex kaing li mai pui khankix pa ah nin, an mawh pa plak jhi Siyiex, Aux tak sang ciyang ka pui an mai nyiex ma nawh heue. ³⁵ Awm an, pui ku kaux daux pex, tak ah nin ka paox plawg tix mai ka puxaik tix ku kaux, mawh hoik deeh pawk Siyiex lox ceu patix lie? Hoik krai Siyiex lox ceu patix lie? ³⁶ Pex tak ang lai pon tix krai grawh grawng pa plak jhi Siyiex khaix in heue. Grawh grawng nawh, gumlox pa plak jhi pui ku kaux, mawh gumlox pa tang kaoh khaing tokaux pex, mawh kheu pex hoik tik gumlox Siyiex Cao kru naing raoma pa mawh Siyiex ex heue. ³⁷ Awm an, pex tak ah nin ka cao jhai, mawh hoik deeh pawk Siyiex lox patix ka maix lie? hoik krai Siyiex lox patix lie? ³⁸ Viang mawh nan, phan pex ah nin, mawh pa plak jhi Siyiex, mawh kheu nan, Siyiex ah nin, mawh kheu krai pex gumlox in mawh pa plak jhi Siyiex, Aux ploi pui ah nin ka pex, paw ah nin, an mawh pa plak jhi Siyiex, ³⁹ mawh kheu nan, jhak heue, Aux tak piawm ka pex mai tik vud ka pex mai ka veng pa hoik tawx Aux ka pex mai ka keeing pex khankix kawx, Aux tak sang teei ti tik pex khaing plak sivoe ngai Aux heue. ⁴⁰ Aux tak viex lox pa sibriem krax kaig tua hoek piang pex leeing ju, pa ang lai chix piawm ka jheung jheung heue."

¹ Siyiex jhi Aux yaox ka khrawng plix ruh ra mu pa deuh ka plak sivoe nyiex bwan Siyiex, khaix hoik teei Nebukhaneza simiang veng Babulon Yekhonix kawn simex Yehoyakim, simiang meung Yudax mai cub cao kaing Yudax khankix mai cao pa chix kaing taix mai pa chix kaing kaing khaox, kaing rhiem khankix hu mawh pui pa giex laung khaing veng Yerusaliem mai rhim kix hu ka veng Babulon khawmuik heue. ² Ka daux khrawng tix mu koe plix ruh pa kied mhawm awm plix ruh pa teem phao voe mai ka daux khrawng an tang mu, hoik koe plix ruh pa kied laux pa ang lai chix ih ka heue. ³ Khaix an Siyiex chawk ah nin ka aux, "Yeramix eue, yaox maix ceu patix?" Aux ah nin, "Aux yaox plix ruh, plix pa mhawm khankix kawx kieh mhawm mai pa laux kawx kied laux tom ang lai chix ih ka heue." ⁴ Gumlox Siyiex baox hoek ka aux ah nin, ⁵ "Siyiex pa mawh Siyiex ceu pui Isarelax ah nin, pui pa hoik ploi Aux mawh pa giex laung, khaing meung Yudax, Aux tak sang deuh tix tawng, kix awm plix ruh pa mhawm mai kieh kix mhawm ka daux haktiex pui Khaladie heue. ⁶ Grawh grawng nawh, Aux tak sang kia ngien piang kix mai kieh kix pon bwanson pa mhawm mai Aux tak sang deeh viex kix hoek ka haktiex in mai Aux tak sang pang kix mai ang lai yieh kix laux, aux tak sang sum kix mai ang lai reeig ka kix heue. ⁷ Khaix an Aux tak sang tawx rhawm pa tawng kix ka Aux mai grawng mawh Aux Siyiex, kix tak sang mawh pui Aux mai Aux tak sang mawh Siyiex kix, grawh grawng nawh, kix tak sang deeh hoek ka Aux tau khawm rhawm tix heue. ⁸ Siyiex ah nin, "Aux tak sang tik vud ka Zedekix simiang meung Yudax, khawm cub cao kaing nawh mai pui veng Yerusaliem, pa kawn deuk ka daux haktiex in mai pui pa kawn ot ka daux meung Ejiptux khankix, awm plix ruh pa kied laux pa ang lai chix tix ih heue. ⁹ Aux tak kieh kix koe krax kha rhawm ka daux meung haktiex pui, ka lox salao pui mai ka lox jhax lawg pui, ka can dee hoik grheu Aux kix to heue. ¹⁰ Aux tak kieh vaig lawm, sibhawm praix mai jhawm saux preng khankix hoek piang kix tom hoik sidah sidu laux leeing kix khaing haktiex pa tawx Aux ka kix mai ka keeing kix heue."

¹ Lox hoek ka Yeramix son grawng pa dex dawd mai pui meung Yudax khawmuik, baux num kwang simiang Yehoyakim kawn simex Yosiyax Simiang Yudax pon num tix num, pa hoik mawh baux num jah Nebukhaneza Simiang Babulon ti kwang ka haktiex. ² Cao jhai Yeramix krai lox ka pui pa ot haktiex Yudax mai ka pui ot ka daux veng Yerusaliem khawmuik ah nin, ³ "Jah khaing num hoik kwang Yosiyax kawn simex Amon simiang meung Yudax kao loe num tix num, tom hoek ka daux in singaix, ka daux tixnga loe num in, awm hoik hoek gumlox Siyiex ka aux mai aux hoik krai lox inkix ka pex yam kaoh tix caocao, viang mawh nan, pex ang nghiet heue. ⁴ Siyiex kaoh caocao mai ploi kawncau tix khankix pa mawh cao jhai hu ka pex lawxlawx, viang mawh nan, pex ang nghiet mai ang veeh yhaok tix sonsang mhong ka heue." ⁵ Kix ah nin, "Deeh veeh khaing pa caox mai kaing pa caox yuh pex ku kaux mai ot ka daux haktiex pa hoik tawx Siyiex ka pex mai ka keeing pex khankix leeing ju heue." ⁶ "Paw hawt siyiex tang kaux tang hak, paw yuh kaing jhaw kix, paw krub ka kix mai paw so Aux song rhawm ka kaing taix yuh pex, mai Aux tak ang lai yuh krax kha rhawm ka pex heue. ⁷ Siyiex ah nin, "Viang krai yuh nan kawx, pex ang nghiet ka Aux, mawh kheu so pex Aux song rhawm ka kaing taix yuh tix, sonsang baox krax kha rhawm cao tix heue. ⁸ Mawh kheu nan, Siyiex Cao kru naing raoma ah nin, mawh kheu ang pex nghiet ka gumlox Aux, ⁹ jhak heue, Aux tak sang ploi mai teei nyiex ma pui khaing plak laong mai kawncau Aux Nebukhaneza simiang Babulon mai viex kix hoek puing ka daux haktiex in, ka pui pa ot ka daux nawh mai ka ceu pui pa ot hawt vung viang nawh khawmuik mai tak yuh kix laux lak pak leeing mai kieh kix koe pa daox deng mai lox pa sibriem mai dee pa yiien pui sijheeng heue. ¹⁰ Lheu khaing an, Aux tak kieh lox nyawm rhawm, lox gaux rhawm, lox sinaw, lox bunkrih yuh ka paox, lox sinum krid mhaw mai pa riang kawk ngu yeet grai khaing kix heue. ¹¹ Haktiex in khawmuik khawm leeing, tak sang mawh dee yiien pui mai ceu pa daox deng ka mai ceu pui in khankix tak yuh kaing jhaw simiang Babulon atixgliah num heue. ¹² Khaix hoik grum naog atixgliah num, Aux tak sang ciyang ka Simiang Babulon mai haktiex pui Khaladie khankix, kheu pa lud kix mai Aux tak kieh dee an mawh pa yiien pui sijheeng, Siyiex ah nan heue. ¹³ Aux tak kieh gumlox Aux khawmuik, pa hoik krai pao Aux piang nawh, can pa hoik tiem ka daux phuk lai in khawmuik mai pa hoik jhai Yeramix son grawng pa dex dawd mai ceu pui meung an khawmuik hoek piang haktiex an heue. ¹⁴ Ceu pui tom nie mai simiang pa kied ting lhaong khankix, tak sang kieh ceu pui Khaladie yuh siliex cawng ka son tix mai Aux tak deeh pawk bix ka kix awm kaing caox pa hoik yuh kix heue." ¹⁵ 15 Siyiex, pa mawh Siyiex ceu pui Isarelax ah nin ka aux, "Teei kawk rawm plix siiet krax meet rhawm in khaing daux tawm taix Aux mai kieh ceu pui pa ploi Aux maix hu ka khawmuik nyaux heue. ¹⁶ Kix tak nyaux mai tutiex awm pui yhot, kheu vaig lawm pa sang ploi Aux hoek ka sinax kix heue. ¹⁷ Khaix an aux teei kawk nyaux khaing daux tawm taix Siyiex mai tawx ceu pui khankix nyaux, ka pui pa hoik ploi Siyiex aux hu ka, ¹⁸ pa mawh pui veng Yerusaliem mai pui veng meung Yudax mai simiang mai cub cao kaing, kieh dee an mawh dee yiien pui, dee pa daox deng mai dee koe lox sibriem mai lox jhax lawg awm pa koe ka daux in singaix, ¹⁹ khawm Pharaw simiang Ejiptux mai kawncau nawh khankix mai cao kaing nawh khankix mai pui nawh khawmuik, ²⁰ mai pui tang ceu pa khon tix ot tau mai kix khawmuik, Simiang haktiex Uzax khankix, simiang haktiex Philitix khankix pa kok mawh ceu pui haktiex Ashakelon, pui haktiex Gaza, pui haktiex Ekaron mai pui pa kawn deuk khaing haktiex Ashadok khankix, ²¹ pui haktiex Edom, pui haktiex Mawbax mai pui haktiex Amon khankix, ²² simiang haktiex Turux khankix, simiang Sidon khankix mai simiang pa ot praok toi rawm sigrit sigra khankix, ²³ pui haktiex Dedan, pui haktiex Tema, pui haktiex Buza mai ceu pui haktiex pa khlao hauk daog kaing tix khankix, ²⁴ simiang Arebiyax khankix mai simiang pui tang ceu pa khon tix ot ka daux tiag khankix, ²⁵ simiang Zimrix khankix mai simiang pui tang ceu pa khon tix ot ka daux tiag khankix, ²⁶ simiang haktiex plak laong khankix, dee singai dee dex mai paox tix, tix kaux lai tix kaux, can meung pa koe piang ca haktiex khawmuik nyaux ka mai simiang haktiex Sheshiet tak baox nyaux khaix kix heue. ²⁷ Mawh kheu nan maix tak ah nin ka kix, Siyiex Cao kru naing raoma, pa mawh Siyiex ceu pui Isarelax ah nin, nyaux heue, nyaux tom yoek mai hao, goh mai paw lai kaoh khaix in tix bawg kawx, kheu vaig lawm pa ploi Aux hoek ka sinax pex. ²⁸ Phan kix thiang tix ang teei kawk an khaing daux taix maix sonsang nyaux ka maix tak ah nin ka kix, Siyiex Cao kru naing raoma ah nin, pex tak caw tix nyaux tete heue. ²⁹ Grawh grawng nawh, jhak heue, Aux jah tix viex krax kha rhawm hoek piang veng, pa hoik kok ka ceu kaux Aux mai mawh pex pa ang pon krax ciyang pak lawg lie? pex tak ang mawh pa pon luan khaing pa ciyang heue. Grawh grawng nawh, Aux tak sang kok vaig lawm tix kre hoek piang can pui pa ot piang ca haktiex khawmuik, Siyiex Cao kru naing raoma ah nin heue. ³⁰ Mawh kheu nan, krai lox jhai pa tieh feen in khawmuik ka kix, Siyiex kok yo lox sinum khaing dee lhaong mai ah lox lih khaing dee ot pa singax singeh Nawh Cao, Nawh Cao kok yo lox sinum pa kied ting piang dee ot Nawh Cao heue. Nawh Cao tak riag yo lox tix awm riag yo pui dig plix siiet, ka pui pa ot piang haktiex khawmuik heue. ³¹ Lox pa sinum tak sang tah hoek ka dee sidah sidu haktiex. Grawh grawng nawh, Siyiex tak sang simah tau mai ceu pui khankix, Nawh Cao tak prawng ca ka can pa koe nex nham khawmuik. Nawh Cao tak sang ap pui pa caox caig ka lawm vaig, Siyiex ah nin heue. ³² Siyiex Cao kru naing raoma ah nin, Jhak heue, krax kha rhawm tak sang lih hoek khaing haktiex tix meung hoik tix meung mai bhaung keukanglux pa kied kin ting tak taih khaing sidah sidu haktiex heue. ³³ Ka daux singaix an, krax pa pah Siyiex tak sang koe, jah khaing dee sidah haktiex plak in tom hoek ka dee sidah haktiex plak an heue. Tak ang lai koe pa yiiem doe kix mai pa deeh khrawm kix mai pa sipaung kix, kix tak sang mawh aing pa seeing brai piang tiex heue. ³⁴ Cao pa liang yung khankix eue, yiiem grai riag yo heue. Pex pa mawh cao thong cao bung ka cub phung yung khankix eue, lu lieh pex ka daux nyaox. Grawh grawng nawh, bawg yam singaix pa sang pah ka pex mai singaix pa sang prung prang rairuat pex hoik grum hoik naog; pex tak sang goh awm kawn yung mhaing pa mhawm kluing tix mu heue. ³⁵ Cao liang yung khankix tak ang lai koe krax to mai cao thong bung phung yung khankix tak ang koe krax glawd heue. ³⁶ Nghiet ka lox riag yo cao liang yung mai lox yiiem grai cao thong bung phung yung khankix, mawh kheu Siyiex hoik yieh laux ka gwang rib sawm kix heue. ³⁷ Kheu jao pa kied kin song rhawm Siyiex mai kawg yung pa koe krax nhim hoik yiien hu heue. ³⁸ Nawh Cao hoik prah dee laux tix awm sivai sangsi awn ju, haktiex hoik mawh dee yiien pui, kheu jao kied kin pui pa yeen ya piang kix mai jao pa kied kin krax song rhawm Nawh Cao heue.

¹ Yam jah simiang Yehoyakim, kawn simex Yosiyax, simiang meung Yudax ti kwang ka haktiex, gumlox hoek khaing Siyiex ah nin, ² Siyiex ah nin, "Cung ka brawk nyiex bwan Siyiex mai krai ka pui veng Yudax khankix, pa hoek tix krub ka daux nyiex bwan Siyiex, can gumlox tawm Aux maix krai ka kix khawmuik, paw mox ka gumlox an pie tix gum kawx. ³ Pui ku kaux tee sang nghiet mai tee veeh khaing krax pa caox caig tix, sonsang doh keud Aux, ka grawng pa dex mai pa kha rhawm, pa keud Aux tix sang viex hoek piang kix, kheu jao pa caox caig yuh kix, ⁴ maix tak ah nin ka kix, Siyiex ah nin, �Phan pex ang nghiet ka Aux mai ang hawt lox tat jhawm prawng pa deuh Aux ka plak sivoe pex, ⁵ awm ang pex nghiet lox kawncau cao jhai Aux khankix pa ploi Aux hoek ka pex lawxlawx mai yam in phan pex ang nghiet ka, ⁶ Aux tak kieh nyiex bwan in awm Shilaw mai tak kieh veng in mawh dee jhax lawg ceu pui piang haktiex khawmuik." ⁷ Mawh kheu nan cao giex kaing li, cao jhai mawh pui hun khankix, hoik mhong gumlox krai Yeramix inkix ka daux nyiex bwan Siyiex heue. ⁸ Yam hoik naox Yeramix ka lox krai tix pa hoik tawm Siyiex nawh krai ka pui khankix, cao giex kaing li, cao jhai mai pui hun khankix giex ka nawh ah nin, Maix tak caw tix yum tete heue. ⁹ Maix chix nab krai lox jhai ka daux ceu kaux Siyiex ah nin, nyiex bwan in tak sang awm yaong Shilaw mai veng in tak sang mawh dee pa yiien pui mai pa ang pui lai ot ka pie tix kaux kawx, kheu jao pa yuh ka mawx lie?" mai pui hun khrawm paox tix hoek ka Yeramix, ka daux nyiex bwan Simiang Siyiex heue. ¹⁰ Yam hoik mhong cao kaing meung Yudax khankix ka ceu inkix mai kix kaoh khaing daux nyiex haw mai hoek bleeh ka nyiex bwan Siyiex mai ngawm ka daux diang siviex khraox nyiex bwan Siyiex heue. ¹¹ Cao gaix kaing li mai cao jhai khankix hoik krai lox ka cao kaing mai ka pui hun khankix ah nin, pui in keung ti yum heue. Mawh kheu nawh hoik krai lox jhai pa tieh feen piang veng in, awm hoik mhong pex nawh ka yhaok ti heue. ¹² Khaix an Yeramix krai ka cao kaing mai ka pui hun khankix ah nin, "Siyiex hoik ploi aux krai lox jhai inkix piang nyiex bwan in mai piang veng in, ka gumlox sikah, pa hoik mhong pex khawmuik heue. ¹³ Mawh kheu nan, yam in deeh tieh loh krax hu pex mai krax pa yuh pex khankix mai cu nghiet ka lox Siyiex pex heue. Khaix an Siyiex tak deeh doh keud grawng pa dex dawd mai pa hoik krai pao Nawh Cao tix sang ciyang ka pex heue. ¹⁴ Phan mawh aux, aux hoik koe ka daux tawm taix pex, yuh krax pa yaogyaw pex mawh ceu pa mhawm mai pa khaw caw ka pex piang aux heue. ¹⁵ Viang mawh nan, priex tix tawng tom kriem, phan pex hoik pah aux yum, pex tak kieh nham pui pa ang koe map grham hoek piang tokaux cao tix tete mai ka veng in khawm pui pa ot ka daux veng khankix, mawh kheu Siyiex hoik ploi Aux hoek ka pex tete mai krai gumlox in kix khawmuik sonsang mhong pex nawh ka yhaok tix heue. ¹⁶ Mawh kheu nan, cao kaing mai pui hun khankix ah nin ka cao giex kaing li mai ka cao jhai khankix, "Pui in ang keung tix yum heue. Mawh kheu nawh hoik krai ka ex ka daux ceu kaux Siyiex pa mawh Siyiex ex heue." ¹⁷ Khaix an kuad song haktiex khankix tiblah, yaog ti kaoh mai krai ka cub pui hun bang kum khankix ah nin, ¹⁸ "Mikha pui yaong Moreshiet hoik gruh krai lox jhai ka daux baux ju singaix Hezakiyax simiang meung Yudax mai krai ka pui haktiex Yudax khankix ka daux pa ah nin, Siyiex Cao kru naing raoma ah nin, gawng Zion tak thai ti awm gwang kaung, veng Yerusaliem tak sang mawh pum tiex khankix mai gawng nyiex bwan kawx tak sang awm nong yu heue." ¹⁹ Mawh hoik pah Hezakiyax simiang meung Yudax mai pui Yudax khankix nawh yum lie? Mawh ang Hezakiyax lhat graung ka Siyiex mai khyox khaw tix ka sivoe ngai Siyiex lie? Siyiex hoik deeh doh keud ka grawng pa dex dawd pa hoik krai pao Nawh Cao tix sang ciyang piang kix. Viang mawh nan, ex kawn ca yuh ceu pa caox pa kied ting piang tokaux tix heue. ²⁰ Kawn koe pui tix kaux, pa gruh krai lox jhai ka daux ceu kaux Siyiex, pa mawh Uriyax kawn simex Shemayax pui veng Kiriyat Yarim, pa hoik gruh krai lox jhai sonsang ciyang ka veng in mai ka haktiex in, awm gumlox krai Yeramix khawmuik heue. ²¹ Yam hoik mhong simiang Yehoyakim tau mai pui ting riang rao nawh mai cao kaing khankix ka gumlox an, simiang sawg tix sang pah nawh yum heue. Yam hoik mhong Uriyax ka an nawh hoik lhat graung mai yaog tix to hu ka meung Ejiptux heue. ²² Khaix an simiang Yehoyakim ploi pui hu ka meung Ejiptux, pa mawh Elanatan kawn simex Akhabo mai pui tang kaux, pa hu tau mai nawh ka meung Ejiptux heue. ²³ Kix deeh viex Uriyax ing khaing meung Ejiptux mai viex nawh hoek ka simiang Yehoyakim, khaix an simiang pah nawh ka vaig mai tik tokaux yum nawh ka daux simeeig pui hot shia heue. ²⁴ Viang mawh nan, plawng taix Ahikam kawn simex Shephan kawn teem ka Yeramix, son ang sang ap nawh ka daux tawm taix pui khankix pa sang pah nawh yum heue."

¹ Yam jah simiang Yehoyakim, kawn simex Yosiyax ti kwang ka haktiex meung Yudax, gumlox khaing Siyiex hoek ka Yeramix ah nin, ² "Siyiex ah nin ka aux, yuh maox pad mai iak son tokaux maix mai sau ka ngawg maix, ³ mai tawx ankix hu ka simiang haktiex Edom, simiang Mawbax, simiang Amon, simiang Turux, simiang Sidon, ka daux tawm taix cao cau khankix pui hoek ka veng Yerusaliem ka Zedekix simiang meung Yudax heue. ⁴ Tawm lox ka kix sonsang krai lao simiang kix ah nin, Siyiex Cao kru naing raoma, pa mawh Siyiex ceu pui Isarelax ah nin, pex tak caw tix krai ka cao simiang ti ah nin, ⁵ "Aux hoik nyeu plawng taix pa ting sibrawm tix mai hoik phan haktiex, kawn pui mai totiag pa koe piang haktiex mai Aux tawx ankix ka pui pa simie Aux tix tawx ka heue. ⁶ Yam in Aux hoik ap haktiex in khawmuik, ka daux tawm taix kawncau Aux simiang haktiex Babulon, mai Aux hoik baox tawx totiag khankix mai sonsang cau nawh ka an khankix heue. ⁷ Mawh kheu nan, ceu pui khawmuik tak sang yuh kaing jhaw nawh mai ka kawn simex nawh kawn saux nawh khankix, tom hoek bawg yam ang haktiex kwang nawh nyang bax sidah mai khaix an, ceu pui khawmuik mai simiang pa ting lhaong khankix tak kieh nawh deeh mawh pa yuh kaing jhaw ka son kix heue. ⁸ An tak lih ti mawh ka ceu pui mai meung haktiex, pa ang yuh ka kaing jhaw Nebukhaneza, simiang Babulon mai pa ang cu ti sau ngawg tix ka greem iak simiang haktiex Babulon, Siyiex ah nin ka haktiex an, Aux tak sang tawx pa ciyang ka lawm vaig, ka sibhawm praix mai ka jhawm saux preng tom hoek bawg yam ang aux bax hoik yuh kix laux leeing ka plawng taix tix heue. ⁹ Mawh kheu nan, paw nghiet ka cao jhai pex khankix, sara cao pa gruh krai, cao pa chix yaox ka camaox, cao pa sibawk mai cao pa chix simeed, pa chix ploi simiang kix pa ah nin, "Pex ang doh yaox ti yuh kaing jhaw simiang veng Babulon heue. ¹⁰ Grawh grawng nawh, kix ah lox jhai pie lhen ka pex, sonsang gah pex hu singai khaing haktiex tix mai sonsang grheu pex lih mai tak laux leeing heue. ¹¹ Simiang ah nin, viang mawh nan, ceu pui pa sau iak ka ngawg tix ka greem iak simiang haktiex Babulon mai yuh kaing jhaw nawh khankix, Aux tak sang kieh kawn deuk ka daux haktiex cao tix, mai kix tak yuh tix ih kaing daux haktiex an mai ot ka daux an heue." ¹² Aux hoik baox krai Zedekix simiang haktiex Yudax, awm pa koe gumlox inkix pa ah nin, "Sau ngawg pex ka greem iak simiang Babulon mai yuh kaing jhaw nawh mai ka pui nawh khankix sonsang im ju pex heue. ¹³ Khawm pui maix khankix lai sang yuh tix yum ka lawm vaig, sibhawm praix mai ka jhawm saux preng khankix, awm hoik ah Siyiex ti deuh piang ceu pui khankix, pa tak ang cu ti yuh kaing son simiang veng Babulon, kheu jao pa yuh ka mawx lie? ¹⁴ Mawh kheu nan, paw nghiet ka lox krai cao jhai khankix pa krai lox pa pie ah nin, pex tak ang yaox ti yuh kaing jhaw son simiang veng Babulon, mawh kheu kix gruh krai lox jhai pie lhen ka pex heue. ¹⁵ Siyiex ah nin, mawh kheu Aux ang tie ploi kix hu, "Viang mawh nan, kix gruh krai lox jhai pie lhen ka daux ceu kaux Aux, sonsang grheu Aux pex lih hu mai sonsang grai grup pex, khawm cao jhai an khankix, pa gruh krai lox jhai ka pex heue." ¹⁶ Aux baox deeh krai ka cao giex kaing li mai ka ceu pui in khawmuik ah nin, "Siyiex ah nin, paw nghiet ka lox krai cao jhai pex khankix, pa gruh krai lox jhai ka pex pa ah nin, jhak heue, kraung shiao nyiex bwan Siyiex tak sang khran deeh viex tix hoek khaing veng Babulon, mawh kheu kix gruh krai lox jhai pie lhen ka pex heue. ¹⁷ Paw nghiet ka kix, yuh kaing jhaw ka son simiang veng Babulon mai sonsang pon im ju pex ka heue. Veng in tak sang mawh pa laux leeing kheu jao grawng pa yuh ka mawx lie? ¹⁸ Viang mawh nan, phan kix mawh cao jhai mai phan gumlox Siyiex koe ka daux kix, kieh kix khyox khaw ka Siyiex Cao kru naing raoma, son ang kraung shiao pa deuk daux nyiex bwan Siyiex mai pa koe ka daux nyiex simiang meung Yudax mai pa koe ka daux veng Yerusaliem khankix viex tix hu ka veng Babulon an heue. ¹⁹ Mawh kheu Siyiex Cao kru naing raoma ah nin, son grawng pa dex dawd mai raoma mai dung rawm mai ling lawx pan khoek mai kraung shiao pa kawn deuk khankix ka daux veng in, ²⁰ pa ang Nebukhaneza simiang veng Babulon rhim hu khankix, yam hoik teei nawh Yekhonix kawn simex Yehoyakim simiang meung Yudax hu mawh pui pa giex laung ka veng Babulon khaing veng Yerusaliem mai khawm pui pa ting lhaong simiang haktiex Yudax mai veng Yerusaliem khawmuik heue. ²¹ Mawh heue, Siyiex Cao kru naing raoma, pa mawh Siyiex ceu pui Isarelax ah nin, son grawng pa dex dawd ka kraung shiao pa kawn deuk ka daux nyiex bwan Siyiex mai ka daux nyiex haw simiang meung Yudax mai khaing ka daux veng Yerusaliem khankix heue. ²² Ankix tak sang teei hu ka veng Babulon mai an tak sang koe tan, tom hoek daux singaix dee hoek kia ngien Aux ka kix, khaix an, Aux tak sang deeh teei ti viex an khankix hoek mai deuh ka dee in heue."

¹ Ka daux num an, yam jah Zedekix simiang meung Yudax tix kwang haktiex pon num tix num khix phwan, Hananix kawn simex cao jhai Azurax pa ot ka veng Gibion, hoik krai ka aux ka daux nyiex bwan Siyiex ka plak sivoe ngai cao giex kaing li mai pui hun khankix ah nin, ² "Siyiex Cao kru naing raoma pa mawh Siyiex ceu pui Isarelax ah nin, Aux hoik raig ti tik iak simiang Babulon heue. ³ Ka daux sinax ra num, Aux tak deeh viex kraung shiao nyiex bwan Siyiex khankix hoek ka dee in, pa hoik rhim Nebukhaneza simiang veng Babulon khaing dee in mai viex hu ka veng Babulon heue. ⁴ Aux tak dee viex Yekhonix kawn simex Yehoyakim, simiang meung Yudax, tau mai pui Yudax pa giex laung khankix, pa hoik hu ka veng Babulon, hoek ka dee in, mawh kheu Aux tak raig ti tik iak simiang veng Babulon, Siyiex ah nin heue." ⁵ Khaix an cao jhai Yeramix deeh krai ka cao jhai Hananix ka plak sivoe ngai cao giex kaing li mai ka plak sivoe ngai pui hun khankix, pa cung ka daux nyiex bwan Siyiex, ⁶ Cao jhai Yeramix ah nin, "Amen! Kieh Siyiex yuh awm an; kieh Siyiex yuh awm koe gumlox pa gruh krai maix khankix, sonsang deeh viex kraung shiao nyiex bwan Siyiex khankix hoek mai khawm pui khankix, pa hoik teei hu mawh pui pa giex laung, khaing veng Babulon tom hoek ka dee in heue. ⁷ Viang yuh ka mawx nghiet ka lox in, pa krai Aux maix mhong mai pa krai Aux pui hun mhong yam in. ⁸ Cao jhai khankix pa hoik dawg koe sivoe aux mai sivoe maix pa mawh lox jhai prim pa hoik gruh krai piang haktiex khankix tom nie mai meung haktiex pa ting lhaong khankix, ka grawng pa dex dawd mai naing, krax kha rhawm mai jhawm saux preng khankix heue. ⁹ Phan mawh cao jhai pa gruh krai lox jhai son pa nhim rhawm, yam hoik rug lox cao jhai an, tak sang tawng mawh nawh cao jhai pa hoik ploi Siyiex hoek tete heue." ¹⁰ Khaix an cao jhai Hananix teei iak lih khaing ngawg Yeramix mai raig ti tik an heue. ¹¹ Hananix krai lox ka plak sivoe ngai pui hun khankix ah nin, "Siyiex ah nin, Aux tak sang raig ngawg ceu pui khawmuik ka daux sinax ra num heue." Khaix an cao jhai Yeramix lih hu krax hu tix heue. ¹² Khaix an gumlox Siyiex hoik hoek ka Yeramix khaix hoik raig cao jhai Hananix ti tik iak khaing piang ngawg cao jhai Yeramix ah nin, ¹³ "Hu mai krai ka Hananix ah nin, Siyiex ah nin maix hoik raig ti tik ka iak khaox, viang mawh nan, Aux tak yuh tix plud iak rhiem ka son an heue." ¹⁴ Grawh grawng nawh, Siyiex Cao kru naing raoma, pa mawh Siyiex ceu pui Isarelax ah nin, "Aux hoik sau iak rhiem piang ngawg ceu pui khankix, sonsang yuh kix kaing jhaw Nebukhaneza simiang veng Babulon mai kix tak sang yuh kaing ka son nawh heue. Aux hoik baox deeh tawx totiag khankix ka nawh heue." ¹⁵ Khaix an cao jhai Yeramix ah nin ka cao jhai Hananix, "Hananix eue, nghiet yam in heue, Siyiex ang tie ploi maix hoek, viang mawh nan maix hoik kieh ceu pui in khankix een rhawm tix ka daux pie kheem heue. ¹⁶ Mawh kheu nan, Siyiex ah nin, jhak heue, Aux tak sang teei ti tik maix khaing piang haktiex heue. Maix tak yaox tix yum ka daux num in, mawh kheu maix hoik gau krax pa tieh feen ka Siyiex heue." ¹⁷ Mawh kheu nan, cao jhai Hananix hoik yum daux num an ka daux khix aliah heue.

¹ In mawh gumlox lai tiiem pa sipaox cao jhai Yeramix khankix khaing veng Yerusaliem ka kuad song pa kawn deuk pa hoik teei hu mawh pui pa giex laung ka cao giex kaing li, cao jhai mai pui hun khankix pa hoik rhim Nebukhaneza kix hu mawh pui pa giex laung khankix khaing veng Yerusaliem, hoek ka veng Babulon heue. ² In mawh khaix hoik lih hu simiang mai miex laux simiang mai pui sieh khankix, cao kaing haktiex Yudax mai veng Yerusaliem khankix, cao pa chix kaing taix mai cao pa chix kaing rhiem khankix khaing veng Yerusaliem heue. ³ Lai an hoik sipaox tix ka daux tawm taix Elasa kawn simex Shapham mai Gemarix kawn simex Hilakix, pa hoik ploi Zedekix simiang haktiex Yudax kiex hu ka veng Babulon ka Nebukhaneza simiang veng Babulon ah nin, ⁴ Siyiex Cao kru naing raoma, pa mawh Siyiex ceu pui Isarelax ah nin, ka kix pa hoik teei hu mawh pa giex laung khawmuik, pa hoik kieh Aux kix lih hu khaing veng Yerusaliem hoek ka veng Babulon, ⁵ sum nyiex khankix mai ot ka daux an, sum sipeem khankix mai ih plix an heue. ⁶ Teei tix koe moeng sonsang koe kawn simex kawn bun, mai teei kawn simex pex khankix koe moeng mai tawx kawn bun pex khankix koe mex, sonsang keh kix kawn praix baox pre haoh hun tan mai ang koe krax pa dieh pa dieh ka heue. ⁷ Sawg krax pa nhim son veng, ka dee hoik kieh Aux pex mawh pa hoik rhim tix hu mawh pui pa giex laung mai rawg bwan ka Siyiex son veng an heue. Grawh grawng nawh, phan veng an koe pa nhim, pex kawx tak koe pa nhim heue. ⁸ Grawh grawng nawh, Siyiex Cao kru naing raoma, pa mawh Siyiex ceu pui Isarelax ah nin, paw doh kieh cao jhai pex mai cao sibawk pa ot ka daux sigreung pex khankix pon pie lhen ka pex mai paw doh nghiet paw yum rhawm ka grawng camaox pex pa kieh pex camaox khankix. ⁹ Grawh grawng nawh, kix hoik gruh krai lox jhai pa lud loe ka pex, ka daux ceu kaux Aux, Aux ang tie ploi kix hu; Siyiex ah nan heue. ¹⁰ Grawh grawng nawh, Siyiex ah nin, khaix hoik naog atixgliah num ka daux veng Babulon, Aux tak sang hoek kia ngien mai yuh lox sijax mukheu pa mhawm Aux naog ka pex mai kieh pex deeh hoek ka dee in heue. ¹¹ Siyiex ah nin mawh kheu Aux hoik tawng ka krax keud pa sang keud tix khankix ka son pex, pa mawh krax keud pa nhim mai ang mawh krax pa caox caig, sonsang tawx krax pa keud pot jun pot pa sang hoek ka son pex heue. ¹² Khaix an pex tak kok ka Aux mai hu rawg bwan ka Aux mai Aux tak nghiet ka lox pex heue. ¹³ Pex tak sawg Aux, yam sawg pex Aux khawm rhawm tix mai tak yaox ka Aux heue. ¹⁴ Siyiex ah nin, Aux tak sang kieh pex yaox tix mai Aux tak sang deeh viex pex ing khaing krax pa giex laung heue. Aux tak sang deeh khrawm pex khaing haktiex an khankix mai khaing dee an ka dee hoik grheu Aux pex, Siyiex ah nin, Aux tak sang viex pex hoek khaing dee pa kieh Aux pex hu mawh pa giex laung heue. ¹⁵ Pex hoik ah nin, Siyiex hoik yaog ti deuh cao jhai khankix ka son ex, ka daux veng Babulon tan heue. ¹⁶ Mawh kheu nan Siyiex ah nin, son grawng pa dex dawd mai simiang pa ngawm piang dang ngeung simiang Davit mai son grawng pa dex dawd mai pui khankix, pa ot ka daux veng in khawmuik mai son grawng pa dex dawd mai puxaik pex khankix pa ang nyang bax lih hu tau mai pex ka daux krax pa giex laung heue. ¹⁷ Siyiex ah nin, jhak heue, Aux tak ploi vaig lawm, sibhawm praix mai jhawm saux preng khankix hoek piang kix mai Aux tak sang kieh kix awm plix ruh pa kied sium tom ang lai chix tix ih ka heue. ¹⁸ Aux tak hawt pheet kix ka vaig lawm, ka sibhawm praix mai ka jhawm saux preng khankix mai Aux tak sang ap kix hoek ka daux krax pa kha rhawm daux sinax meung haktiex an khankix khawmuik pa koe piang ca haktiex sonsang mawh pa jhax lawg mai pa daox deng pui ka mai pa sibriem pui ka mai pa ang koe min plakngai, sinax ceu pui khankix, ka dee hoik grheu Aux ti tik kix heue. ¹⁹ Siyiex ah nin, mawh kheu kix ang nghiet ka gumlox Aux khankix, yam yaog Aux tix kaoh caocao mai ploi kawncau mau soi cao jhai Aux khankix hu krai ka kix kawx, pex ang nghiet ka, Siyiex ah nin heue. ²⁰ Mawh kheu nan, pex khawmuik pa mawh pui pa ot ka daux krax pa giex laung khankix, pa hoik ploi Aux khaing veng Yerusaliem hoek ka veng Babulon eue, nghiet ka gumlox Siyiex heue. ²¹ Siyiex Cao kru naing raoma pa mawh Siyiex ceu pui Isarelax ah nin, son grawng pa dex dawd mai Ahap kawn simex Kolayax mai Zedekix kawn simex Maseyax, pa gruh krai lox jhai pie lhen ka pex ka daux ceu kaux Aux, jhak heue, Aux tak sang ap kix ka daux taix Nebukhaneza simiang veng Babulon mai nawh tak sang pah kix yum ka plak sivoe ngai pex heue. ²² Mawh kheu jao grawng kix, can pui Yudax, pa giex laung khawmuik, pa ot ka daux veng Babulon mai jhax lawg ah nin, kieh Siyiex yuh maix awm Zedekix mai Ahap pa hoik gleeing simiang veng Babulon ka daux ngu heue. ²³ Grawh grawng nawh, kix hoik yuh ceu pa laux min plakngai ka daux ceu pui Isarelax khankix mai hoik lud vao tau mai moeng paox plawg tix khankix mai hoik krai lox pie lox lhen ka daux ceu kaux Aux, ka pa ang Aux sax tawm ka kix heue. Aux tawng tete mai mawh cao pa kham sakse, Siyiex ah nin heue. ²⁴ Tak krai ka Shemayax pa mawh pui yaong Nehalam ah nin, ²⁵ Siyiex Cao kru naing raoma, pa mawh Siyiex ceu pui Isarelax ah nin, Maix hoik sipaox lai hu ka daux ceu kaux tix, ka pui khankix pa ot ka daux veng Yerusaliem, ka Zephanix kawn simex cao giex kaing li mai Maseyax mai ka cao giex kaing li khawmuik ah nin, ²⁶ Siyiex hoik yaox maix mawh cao giex kaing li tang cao giex kaing li Yehoyadax sonsang mawh cao kaing ka daux nyiex bwan Siyiex mai piang pui ku kaux, pa hoik yhot pa keud tokaux cao tix mawh cao jhai sonsang sau maix nawh ka daux thawng mai sau gang ka kix heue. ²⁷ Yam in maix lai ang sidiex gau ka Yeramix pa mawh pui yaong Anatok pa ah tokaux tix mawh cao jhai ka maix, kheu jao pa yuh ka mawx lie? ²⁸ Mawh kheu nawh hoik sipaox lai hoek ka yix ka daux veng Babulon ah nin, krax pa giex laung in mawh pa kied rheung, sum nyiex mai ot ka daux, sum sipeem mai ih ka plix khankix heue." ²⁹ Yam in cao giex kaing li hoik phat cao jhai Yeramix mhong ka lai in heue. ³⁰ Khaix an gumlox Siyiex hoek ka Yeramix ah nin, ³¹ "Sipaox lai hu ka pui pa ot ka daux pa giex laung khawmuik ah nin, Siyiex ah yuh nin, son grawng pa dex dawd mai Shemayax pui yaong Nehelam, mawh kheu Shemayax hoik gruh krai lox jhai ka pex pa ang Aux tie ploi nawh hu mai nawh hoik kieh pex een rhawm tix ka daux pie lhen," ³² mawh kheu nan, Siyiex ah nin, "Jhak heue, Aux tak sang tawx krax ciyang ka Shemayax pui yaong veng Nehelam khawm pui daux nyiex ma nawh khankix, nawh tak ang koe pui pa sang ot ka daux sinax ceu pui in pie tix kaux kawx, Siyiex ah nin, nawh tak ang yaox ka ceu pa mhawm, ka pa tak sang yuh Aux tix tawx son pui Aux khankix, kheu jao gau sawn nawh grawng pa tieh deeh feen ka Siyiex heue."

¹ Gumlox Siyiex hoek ka Yeramix ah nin, ² "Siyiex pa mawh Siyiex ceu pui Isarelax ah nin, tiem tix priex gumlox pa hoik krai Aux ka maix khawmuik ka daux phuk lai maix heue. ³ Siyiex ah nin, jhak heue, singaix bawg yam hoik hoek mai Aux tak deeh viex pui Aux Isarelax mai pui Yudax khankix hoek khaing krax pa giex laung, Siyiex ah nan heue. Aux tak sang kieh kix deeh ing ka haktiex pa hoik tawx Aux ka keeing kix mai kix tak sang pon tix cie an heue." ⁴ In khankix mawh gumlox pa hoik krai Siyiex son grawng pa dex dawd mai ceu pui Isarelax mai ceu pui Yudax khankix heue. ⁵ Siyiex ah nin, "Ex hoik mhong lox ceu pa singax mai krax lhat graung pa ang mawh krax pa nhim heue. ⁶ Mhaing ti yaox mai jhak ti yaox, mawh sax keh simex ka kawn ngie lie? Mawh kheu nan, Aux yaox joh simex ku kaux taix tix piang nyoi tix, awm saux bun pa keh kawn tix mai lheung pakngai khawmuik, kheu jao grawng pa yuh ka mawx lie? ⁷ Alo! singaix an phex mawh singaix pa ting lhaong ang lai koe singaix pa awm an mai mawh bawg yam laux rhawm ceu pui Yakop, viang mawh nan, nawh tak sang mawh pa taoh tix lih khaing an heue. ⁸ Siyiex Cao kru naing raoma ah nin, ka daux singaix an, Aux tak sang raig ti tik iak khaing ngawg kix mai tak sang pat ti tik maox pa vien pex khankix heue. Pui tang meung khankix tak ang lai baox kieh kix mawh siliex tix bawg kawx heue. ⁹ Viang mawh nan, kix tak sang yuh kaing jhaw Siyiex, pa mawh Siyiex kix mai Davit, pa mawh simiang kix, ka pui pa tak sang yaog Aux ka son kix heue. ¹⁰ Mawh kheu nan, Siyiex ah nin, kawncau Aux Yakop eue, paw lhat graung ceu pui Isarelax khankix eue,paw laux rhawm kheu, Aux tak sang taoh maix khaing dee pa kied singai mai ru maix pa kaoh khaing haktiex pa giex laung pex heue. Ceu pui Yakop tak deeh hoek mai koe krax laux lee tix mai krax yiien yawg tix mai pui tix kaux kawx tak ang pon yuh nawh koe krax lhat graung heue. ¹¹ Siyiex ah nin, mawh kheu Aux ot tau mai maix, sonsang taoh ka maix, viang Aux kieh haktiex pa hoik kieh Aux maix prung prang rairuat tix ot mawh pa sidah kawx, Aux tak ang kieh maix hoek dee sidah heue, viang mawh nan, phan Aux ang tawx krax kham geu ka maix, maix tak ang hoek krax rahsee heue. ¹² Siyiex ah nin, jhawm saux maix mawh pa nu moi, mawh kheu dee mat maix mawh pa kied kin heue. ¹³ Ang koe pui sang teem maix mai ang lai koe pui pai sonsang moi jhawm saux maix heue. ¹⁴ Pui pa moh maix khankix, hoik piawm ka maix, kix ang lai sawg lai chawk maix heue. Mawh kheu Aux hoik kieh maix mat, ka krax mat pa tawx pui koeng, tau mai krax kham geu pa kied lang teung kin kheu jao pa kied haoh hun krax lud maix mai phimap maix khankix heue. ¹⁵ Maix lai yiiem yo kheu jhawm saux ti yuh ka mawx lie? Mawh kheu kied haoh hun krax pa lud maix, jhawm saux ceu pa laux rhawm maix ang chix moi heue. Mawh kheu hoik nie haoh hun phimap maix, Aux tom yuh ceu in khankix ka maix heue. ¹⁶ Mawh kheu nan, can pui pa sang kiied tix ih ka maix, tak sang deeh kiied tix ih ka nawh mai can pui koeng maix khankix tak sang hoek ka daux pa giex laung, can pui pa yuh con ka maix tak sang deeh hoek ka daux krax pa deeh con mai can pui pa tud rhim ka maix Aux tak sang deeh kieh nawh hoek ka daux pa tud rhim heue. ¹⁷ Siyiex ah nin, viang pui hoik tik hoik vud ah nin, in mawh veng Zion pa ang pui tix kaux lai priex lai jhung ka, viang mawh nan, Aux tak deeh kieh maix nyawm ot siu koe mai deeh pai ka jhawm saux maix khankix moi heue. ¹⁸ "Siyiex ah nin, jhak heue, Aux tak deeh viex nyiex gox ceu pui Yakop khankix hoek mai koe krax caux rhawm piang dee ot dee koe nawh khankix, mai tak deeh sum veng piang ton cao tix mai nyiex haw tak deeh awm grang pakpeung pa dawg koe tix heue. ¹⁹ Khaix an kix tak ting bwanson yaogyaw Siyiex ka lai rhax mai lox pui pa yuh pa nyawm rhawm, Aux tak sang kieh kix pre haoh hun mai kix tak ang lai dieh hu heue. Aux tak sang yaog min plakngai kix mai kix tak ang lai mawh pa iak heue. ²⁰ Kawn praix kix khankix tak sang awm phao ka mai pui hun khankix tak mawh pa kaux cong ka plak sivoe Aux mai Aux tak sang tawx krax ciyang ka pui khankix pa yeen ya ka kix heue. ²¹ Ru kix khankix tak sang mawh simiang kix mai cao pa kwang ka kix tak sang mawh pa kaoh khaing daux sinax kix. Khaix an Aux tak kieh kix greed tix dex mai kix tak greed tix hoek dex Aux heue. Siyiex ah nin, mawh pui mawx pa kan rhawm tix sang greed tix dex Aux lie? ²² Pex tak sang mawh pui Aux mai Aux tak sang mawh Siyiex pex heue." ²³ Jhak heue, bhaung keukanglux pa song rhawm Siyiex tak phlu tix hu sijheeng mai keukanglux an tak sang taih piang kaing pui pa caox caig khankix sigrien sigre heue. ²⁴ Krax pa kied kin song rhawm Siyiex, tak ang nyang greed nyang yeet tom hoek bawg yam ang Nawh Cao nyang bax hoik yuh krax pa keud Nawh Cao ka daux rhawm daux rhi tix tom grum naog heue. Khaix singaix an pex tak sang tawng ka heue.

¹ Siyiex ah nin, "Ka daux bawg yam an, Aux tak mawh Siyiex paox nyiex ma ceu pui Isarelax khankix mai kix tak mawh pui Aux heue." ² Simiang siyiex ah nin, "Pui pa hoik yaox tix glawd khaing lawm vaig, hoik pon bwanson ka daux tiagtu, Aux hoik tawx ceu pui Isarelax khankix laux lee tix heue." ³ Siyiex hoik dawg bleeh ka aux tom yam an dix ah nin, "Mawh heue, Aux hoik moh maix ka krax moh krax rhawm leeing ju, mawh kheu nan, Aux hoik bluh maix hoek tau mai krax moh pa koe krax caux rhawm heue. ⁴ Kawn bunkrih ceu pui Isarelax eue, Aux tak baox sum ka maix tix bawg mai maix tak sang mawh pa deeh sum tix. Maix tak sang baox khre tix tau mai ting plah khaox, tak hu graoh mai pui pa koe krax gaux rhawm heue. ⁵ Maix tak sum nhu plix siiet piang gawng Samarix, cao yuh sipeem tak sum mai tak yaox ti ih awm pa sum tix heue. ⁶ Grawh grawng nawh, singaix yam tak sang kok yo pui pau veng khaing piang gawng Epharem, kaoh heue mai kieh ex haok piang gawng Zion, ka dee koe Siyiex pa mawh Siyiex ex heue." ⁷ Siyiex ah nin, "Rhax lai mai gaux rhawm son ceu pui Yakop mai riag yo khaing daux sinax cao kaing ting ceu pui khankix, krai pao mai tawx krax pa yaogyaw ah nin, Siyiex eue, taoh ka pui Maix Cao pa mawh ceu pui Isarelax pa kawn deuk khankix heue. ⁸ Jhak heue, Aux tak sang viex kix hoek khaing haktiex plak laong mai deeh khrawm kix hoek khaing dee sidah sidu haktiex, ka daux sinax kix koe pui pa dug ngai mai pui laux caong, bun koe kaux mai bun pa kham jhawm saux yha, khawm pui pa kied haoh hun tak sang deeh hoek tan heue. ⁹ Kix tak sang hoek tau mai krax yiiem mai can pui pa khyox khaw rawg bwan khankix, Aux tak sang thong ka kix heue. Aux tak sang kieh kix lawng hawt rawm klawng dee koe rawm, ka daux krax rah tix nyaing, ka dee ang kix lai sideeing caong tix heue. Grawh grawng nawh, Aux mawh keeing ka ceu pui Isarelax mai ceu pui Epharem khankix mawh kawn Ai Aux heue. ¹⁰ "Ceu pui khankix eue, nghiet ka gumlox Siyiex mai krai pao grawh grawng an ka daux klawn tiex piang rawm sigrit sigra, pa koe ka dee pa kied singai ah nin, Nawh Cao pa hoik prung prangti tik ceu pui Isarelax khankix tak sang deeh kraix khrawm ka nawh mai priex rien nawh, awm pa yuh cao liang ka cub phung yung tix heue ¹¹ Grawh grawng nawh, Siyiex hoik laug ti teei ceu pui Yakop mai hoik taoh nawh khaing daux tawm taix pui pa nie lheu ting riang khaing nawh heue. ¹² Mawh kheu nan, kix tak sang hoek mai pa rhax lai rhax piang gawng lhaong Zion mai lih hu tau mai pon bwanson pa mhawm khaing pa mawh Siyiex, nghox ca, rawm plix siiet pa khraox mai rawm bee, cub kawn yung mai tobrie, khwan ju kix tak awm sipeem pa see ka rawm mai kix tak ang lai koe krax laux rhawm khaix in tix bawg kawx heue. ¹³ "Khaix an bun gaux rhawm mai graoh tix tau mai pui awn ju mai kuad heue. Grawh grawng nawh, Aux tak sang tieh krax khi rhawm kix mawh krax pa gaux rhawm mai sang kieh kix koe krax nyawm rhawm mai yuh kix koe krax gaux rhawm, nie lheu khaing pa laux rhawm heue. ¹⁴ Aux tak sang eei ka cao giex kaing khankix ka priex preem pa ih tom grum naog mai pui Aux khankix tak fah rhawm ka bwanson pa mhawm Aux, Siyiex ah nin heue. ¹⁵ Siyiex ah nin, "Ka daux Ramax mhong lox pa yiiem grai mai pa kied khi rhawm, mawh pa yiiem Rakhelax son kawn kiex mai ang chix khu rhawm kiex, kieh nyawm rhawm, kheu ang kawn kiex lai koe heue." ¹⁶ Siyiex ah nin, "Yawg ka lox yiiem tix mai paw kieh rawm ngai tix lih, Siyiex ah nin, mawh kheu maix hoik pon bwanson khaing kaing pa yuh tix mai kix tak sang deeh hoek, khaing haktiex pui pa koeng heue. ¹⁷ Siyiex ah nin, sivoe ngai krax keud pot koe son maix, kawn praix maix khankix tak deeh hoek ka haktiex cao tix heue. ¹⁸ Aux hoik mhong ka lox ngia ceu pui Epharem ka tokaux tix tete, Maix Cao hoik sidiex gau ka aux mai aux hoik yaox ti kham krax sidiex gau, awm mawie pa ang nyang bax pheuk tix heue. Deeh kieh aux hoek awm pa hoik sax mawh ka aux glang ka an liak, mawh kheu Maix Cao mawh Siyiex aux heue. ¹⁹ Khaix hoik deeh hoek aux, Aux hoik koe krax pa doh keud tete mai khaix hoik yaox aux tix kham geu pa sivied, Aux tak deeh lah ka ba viang tix heue. Aux hoik kaig tua mai hoik laux min pakngai, kheu jao hoik yaox aux tix kham lox sibriem pui yam awn ju tix heue. ²⁰ Mawh Epharem kawn simex pa moh Aux lie? Mawh nawh kawn nyawm pa khaw caw rhawm aux lie? Grawh grawng nawh, yam salao Aux ka nawh, Aux ca kawn koe rhawm doh keud ka nawh, mawh kheu nan, Siyiex ah nin, rhawm Aux kawn simawd ka nawh, Aux tak koe krax caux rhawm piang nawh tete heue. ²¹ Sum rong lhak khankix mai yuh ti deuh mhai haktiex, deuh rhawm maix piang krax ting, pa hoik lawng maix heue. Bunkrih ceu pui Isarelax eue, deeh hoek mai deeh hoek ka veng dee ot tix heue. ²² Bunkrih pa ang kaux sijax eue maix tak sang kawn vung viang yuh nin miex grheung lie? Grawh grawng nawh, Siyiex hoik phan ceu pa khraox piang haktiex, mawh kheu bun tak sang lai lawm ka simex heue." ²³ Siyiex Cao kru naing raoma pa mawh Siyiex ceu pui Isarelax khankix ah nin, "Kix tak sang deeh shiao gumlox in ka daux meung Yudax mai ka daux veng khankix, yam deeh viex Aux kix hoek khaing krax pa giex laung, haktiex dee koe pa rahsee mai gawng pa singax singeh eue, kieh Siyiex nawb bwan ka maix heue. ²⁴ Pui Yudax tak sang ot tau ka daux haktiex an mai ka daux veng khankix tau, pa mawh pui yuh kaing ma mai pui liang yung khankix lih hu tau mai cub phung yung khankix heue. ²⁵ Grawh grawng nawh, Aux hoik tawx pui pa cai rhawm khankix ih tom sak mai Aux hoik kieh can pui pa taug mao khankix nyawm rhawm heue. ²⁶ Khaix an Aux siduad mai jhak hawt vung viang tix mai krax laig it aux hoik mawh pa nyawm rhawm aux ka heue." ²⁷ Siyiex ah nin, "Baux singaix tak sang rhuat Aux simie ceu pui mai simie totiag ka daux haktiex ceu pui Isarelax mai ka daux haktiex ceu pui Yudax tak sang hoek heue. ²⁸ An tak sang lih ti mawh awm in, yam pau Aux ka kix, sonsang reeig Aux ti tik kix mai sonsang yuh Aux kix laux sonsang tik vud Aux kix mai sonsang tawx Aux krax kha rhawm ka kix awm an, Aux tak sang pau ka kix, sonsang deeh pang kaw Aux ka kix mai sonsang deeh sum Aux ka kix. Siyiex ah nan heue. ²⁹ Ka daux singaix an, kix tak ang lai ah nin,keeing khankix ih plix siiet pa niex mai kawn khankix hoik siki rhang ka heue. ³⁰ Pui ku kaux tak yum kheu phimap tix, pa ih ka plix siiet pa niex ku kaux tak saik rhang ka heue." ³¹ Siyiex ah nin, "Jhak heue, singaix bawg yam tak sang hoek, yam yuh Aux sijax mukheu pa khraox tau mai nyiex ma ceu pui Isarelax tau mai nyiex ma ceu pui Yudax, ³² mai ang awm sijax mukheu pa hoik yuh Aux mai keeing kix yam teei Aux taix tix viex kix lih hu khaing meung Ejiptux pa mawh sijax mukheu Aux pa yieh kix laux, viang Aux mawh mex ka kix kawx, Siyiex ah nin heue. ³³ Viang mawh nan, in mawh sijax mukheu, pa sang yuh Aux tau mai nyiex ma ceu pui Isarelax khankix heue. Siyiex ah nin, khaix hoik luan singaix bawg yam khankix Aux tak sang sau lox tat jhawm prawng cie Aux ka daux dee keud kix mai tiem piang rhawm kix mai Aux tak mawh Siyiex kix mai kix tak mawh pui Aux heue. ³⁴ Pui ku kaux tak ang lai yaox tix sidiex gau ka paox plawg tix mai ka puxaik tix khankix khaix in tix bawg kawx tawng ka Siyiex, grawh grawng nawh, kix khawmuik tak tawng ka Aux, jah ka pui iak, tom hoek ka pui ting daux kix, Siyiex ah nan heue. Mawh kheu Aux tak sang pluat ploi krax lud kix mai ang lai doh keud ka phimap kix khaix in tix bawg kawx heue." ³⁵ Siyiex pa tawx singaix sonsang riang ka plak ponngaix mai tawx khix mai simuing sonsang riang plak ponsawm, pa kieh pukpak rawm sigrit sigra sinum kleeg mawh min ceu kaux Siyiex Cao kru naing raoma heue. ³⁶ Phan been pa deuh Aux khankix hoik grai khaing plak sivoe Aux, khaix an ru Isarelax khankix tak dud but khaing pa mawh tix pui tix cub ka plak sivoe Aux leeing ju heue. ³⁷ Siyiex ah nin, "Phan pon tiag diag pa koe piang raoma mai phan pon sawg ti yaox ka greem num riah haktiex, Aux tak sang tik vud ru pui Isarelax pa mhawm can pa hoik yuh kix khawmuik, Siyiex ah nan heue. ³⁸ Siyiex ah nin, Jhak heue, singaix bawg yam khankix tak sang hoek, mai tak sang sum veng an son Siyiex, jah khaing nyiex pau tab lhaong Hananelax tom hoek ka daog siviex veng heue. ³⁹ Maox tiag mee haktiex tak sang phlat hoek see gawng Gariep, khaix an mee haktiex sang deeh veeh tix hoek see gawng Gawtax heue. ⁴⁰ Hoek ka daux lung dee koe to yum khankix mai dee tik pui nyaox, tom singai hoek ka rawm klawng iak Kidaron, tom hoek ka daog siviex brung, ka plak lih singaix, tak sang kieh mawh pa singax singeh son Siyiex heue. An tak ang lai reeig ti tik mai yuh laux khaix in tix bawg kawx leeing ju heue."

¹ Bawg yam kwang Zedekix simiang meung Yudax haktiex kao num mai yam kwang Nebukhaneza haktiex kao daix num, gumlox Siyiex hoek ka Yeramix heue. ² Yam an cub kru naing simiang Babulon khankix, hoik lai lawm ka veng Yerusaliem mai laung ka cao jhai Yeramix ka daux thawng nyiex haw simiang meung Yudax heue. ³ Grawh grawng nawh, Zedekix simiang meung Yudax, hoik laung ka Yeramix ah nin, "Maix lai krai lox jhai grawng pa ah Siyiex yuh nin, jhak heue, Aux tak ap veng in ka daux tawm taix simiang Babulon mai nawh tak sang rhim ti teei veng an, ⁴ mai Zedekix simiang pui Yudax khankix tak ang lai luad luan khaing daux tawm taix pui Khaladie, viang mawh nan, kix tak sang laig ka daux tawm taix simiang Babulon mai tak yaox tix sikah tau mai nawh, pakngai taw pakngai paox tix mai yaox ka ngai paox tix, tix kaux lai tix kaux, ⁵ khaix an nawh tak sang thong Zedekix hu ka veng Babulon mai nawh tak sang ot tan, tom hoek bawg yam ang Aux nyang hoek kia ngien ka nawh, Siyiex ah nin, viang pex puing ka pui Khaladie kawx, pex tak ang pex ka heue." ⁶ Yeramix ah nin, gumlox Siyiex hoek ka aux ah nin, ⁷ Jhak heue, Hanamelax kawn simex keeing iak maix Shalum tak hoek ah nin, taoh ka gwang kaung aux, pa koe ka daux veng Anatok, mawh kheu koe akhwang sang deeh laug maix ka an sonsang liag maix tix cie heue. ⁸ Khaix an Hanamelax kawn simex Keeing iak aux hoek bleeh ka aux ka daux biang thawng awm gumlox Siyiex mai ah nin ka aux, yuh bwanson liag gwang kaung aux, pa koe ka daux veng Anatok, ka daux haktiex Benyamin, mawh kheu koe akhwang maix tix taoh mawh sinngao cie tix mai laug ti teei mawh cie maix, liag maix cie ka an Khaix an aux hoik tawng ka mawh in gumlox Siyiex heue. ⁹ Mawh kheu nan, aux hoik liag gwang kaung an khaing Hanamelax kawn simex keeing iak aux pa koe ka daux veng Anatok mai ciang ti tawx mau ka nawh kao aliah Shekhe heue. ¹⁰ Aux hoik tiiem ka lai mhai rug mai hoik tawk cum piang an mai kok ka cao kham sakse khankix mai hoik ciang ti tawx mau an ka jiang heue. ¹¹ Mawh kheu nan, aux hoik teei lai mhai rug liag kaung, pa hoik tawk cum, awm pa hoik koe been khankix mai hoik paoh ti deuh, ¹² aux hoik ap ka lai mhai rug pa liag kaung ka Baruk, pa mawh kawn simex Nerix kawn simex Maseyax plak sivoe ngai Hanamelax pa mawh kawn simex keeing iak aux mai ka sivoe ngai pui pa kham sakse khankix, pui pa koe ceu kaux piang lai mhai rug grawng liag ka an, sivoe ngai pui Yudax khankix pa ngawm ka daux biang nyiex thawng heue. ¹³ Khaix an aux hoik ah lox khin ka Baruk, plak sivoe kix ah nin, ¹⁴ Siyiex Cao kru naing raoma, pa mawh Siyiex ceu pui Isarelax ah nin, teei pheen lai mhai rug liag kaung pa hoik tawk cum mai pa hoik paoh ti deuh mai sau tix priex ka daux aw tiex, sonsang pon kham lai an tom rheung singaix sawm heue." ¹⁵ Grawh grawng nawh, Siyiex Cao kru naing raoma, pa mawh Siyiex ceu pui Isarelax ah nin, "Nyiex mai kaung mai sipeem plix siiet ka daux haktiex in tak deeh yaox tix cie ka heue." ¹⁶ "Yam ap aux pheen lai mhai rug liag kaung ka Baruk pa mawh kawn simex Nerix, rawg bwan ka Siyiex ah nin, ¹⁷ Siyiex eue, jhak heue, Maix Cao hoik yuh raoma mai haktiex ka sibrawm pa kied ting lhaong tix tau mai pa hoik nyeu Maix Cao plawng taix tix heue. Ang koe ceu pa nu ka son Maix Cao pie tix ceu kawx heue. ¹⁸ Maix Cao jhi krax moh pa caux rhawm tix ka pui kaing rheng kaing mheen mai deeh viied krax pa lud keeing khankix piang kaing kawn praix kix, pa sang hoek khaix kix heue. Siyiex pa kied ting riang rao mai min ceu kaux Maix Cao mawh Siyiex Cao kru naing raoma heue. ¹⁹ Krax keud Maix Cao mawh pa kied ting riang rao mai mawh pa kied ting sibrawm ka daux kaing jhaw pa yuh tix, grawh grawng nawh, ngai Maix Cao mawh pa simi ti jhak ka daux krax hu kawn pui khawmuik, sonsang tawx bwanson ka pui ku kaux awm kaing jhaw plix pa yuh nawh khankix heue. ²⁰ Maix Cao hoik deuh mhai rug mai mhai pa daox deng ka daux meung Ejiptux tom hoek ka daux in singaix mai ka daux haktiex Isarelax mai daux sinax pui kuceu mai min ceu kaux Maix Cao hoik ao min awm pa koe tom hoek ka daux in singaix heue. ²¹ Maix Cao hoik viex ceu pui Isarelax khankix lih khaing meung Ejiptux tau mai mhai rug pa daox deng mai taix pa ting riang rao tau mai pa nyeu ka plawng taix tix, tau mai ceu pa kied lhat kied graung ka heue. ²² Maix Cao hoik tawx haktiex in ka kix, pa mawh haktiex pa hoik tiextu Maix Cao ka keeing kix, pa mawh haktiex dee lih rawm teeih mai rawm hia heue." ²³ Kix hoik laig ka daux mai teei ti cie haktiex an, viang mawh nan, kix ang cu nghiet ka lox Maix Cao mai ang lawng hu ka daux lox tat jhawm prawng Maix Cao heue. Kix ang yuh awm pa hoik tawm Maix kix yuh tix ceu kawx heue. Mawh kheu nan, Maix Cao hoik kieh krax pa kha rhawm in khawmuik hoek piang kix heue. ²⁴ Jhak ti yaox ka tab pau dee lhaong rawb rim guh veng khankix, kix hoik hoek sonsang rhim ka veng mai hoik ap veng an sonsang hoek krax kha rhawm ka lawm vaig mai sibhawm praix mai ka jhawm saux preng, ka ceu pui Khaladie pa sang puing ka kix heue. Maix Cao hoik yaox grum naog awm gumlox pa krai tix heue. ²⁵ Siyiex eue, Maix Cao hoik ah nin ka aux, viang veng an hoik tawx tix ka daux tawm taix pui Khaladie kawx, liag kaung an ka mau mai kok ka pui pa kham sakse khankix heue." ²⁶ Khaix an gumlox Siyiex hoek ka Yeramix ah nin, ²⁷ "Jhak heue, Aux mawh Siyiex pa kwang ka kawn pui mai totiag khawmuik heue. Mawh koe pa nu tix ceuceu pa ang Aux chix yuh lie? ²⁸ Mawh kheu nan, Siyiex ah nin, jhak heue, Aux tak sang ap veng in ka daux tawm tai pui Khaladie mai ka daux tawm taix Nebukhaneza, simiang Babulon mai nawh tak sang rhim ti teei an heue. ²⁹ Pui Khaladie pa hoek puing ka veng in, tak sang keeig veng in ka ngu mai gleeing ti tik an pa mawh nyiex ma pa tan nyawng bhawng ka siyiex Balax piang braux nyiex tix mai pa prauk krax tan pa nyaux ka siyiex tang kaux tang hak, sonsang so Aux song rhawm, ³⁰ kheu jao yuh kawn praix ceu pui Isarelax mai kawn praix ceu pui Yudax pa caox caig ka plak sivoe Aux, jah ka tom yam mawh kix kawn nyawm heue. Grawh grawng nawh, kawn praix ceu pui Isarelax khankix hoik so ngie Aux song rhawm, ka kaing pa yuh tix, Siyiex ah nan heue. ³¹ Grawh grawng nawh, veng in, hoik so Aux koe krax song rhawm mai kieh Aux meet rhawm meet rhi, jah khaing singaix pang ka veng an, tom hoek ka daux singaix heue. Mawh kheu nan, Aux tak sang gah ti tik veng an khaing sivoe ngai Aux. ³² Kheu pa caox caig yuh kawn praix ceu pui Isarelax mai kawn praix ceu pui Yudax khankix mai simiang kix, cao kaing kix mai cao giex kaing li kix, cao jhai kix, pui haktiex Yudax mai can pui pa ot ka daux veng Yerusaliem hoik so krax pa song rhawm Aux lih heue. ³³ Kix hoik ghaix blawg tix ka Aux mai ang lai veeh ngaix tix ka Aux, viang Aux kaoh caocao mai sidiex gau ka kix kawx, kix ang lai nghiet mai ang rieb ka lox sidiex gau Aux heue. ³⁴ Viang mawh nan, kix hoik deuh ceu pa seeing brai khankix sonsang seeing yuh ka daux nyiex bwan, pa hoik kok ka min ceu kaux Aux, ³⁵ kix hoik sum ti deuh ka dee pa kied ting lhaong son siyiex Balax, pa koe ka daux lung kawn simex Hinom sonsang tan kawn simex kawn bun tix khankix ka siyiex Mulawk, pa ang Aux sax tawm ka kix mai pa ang sax keud ka daux rhawm tix, sonsang yuh kix ceu pa seeing brai mai sonsang kieh pui Yudax koe phimap ka heue. ³⁶ Mawh kheu nan, Siyiex pa mawh Siyiex ceu pui Isarelax ah nin, son grawng pa dex dawd mai veng in ah nin, tak sang ap veng an ka daux tawm taix simiang Babulon, ka krax pa kha rhawm ka lawm vaig, ka sibhawm praix mai ka jhawm saux preng khankix heue. ³⁷ Jhak heue, Aux tak deeh khrawm kix lih khaing daux haktiex an khawmuik, ka daux pa song rhawm Aux mai ka daux krax pa meet rhawm Aux mai ka daux pa kied ting saux rhawm tix, Aux tak sang deeh viex kix hoek ka baoh dee in mai Aux kieh kix ot yiien yawg heue. ³⁸ Kix tak sang mawh pui Aux mai Aux tak sang mawh Siyiex kix. ³⁹ Khaix an Aux sang tawx rhawm tix mu mai krax tix nyaing sonsang koe krax lhat graung ka Aux leeing ju, sonsang mawh pa mhawm son kix mai ka son kawn praix kix, pa tak sang hoek khaix kix heue. ⁴⁰ Aux tak sang yuh sijax mukheu leeing ju tau mai kix, sonsang ang Aux lai veeh khaing pa sang yuh tix bwanson pa mhawm ka kix heue. Viang mawh nan, Aux tak sang sau ti deuh krax pa chix lhat graung ka daux rhawm kix, son ang kix lai lih hu khaing Aux heue. ⁴¹ Mawh heue, Aux tak sang gaux rhawm sonsang yuh tix bwanson ceu pa mhawm piang kix mai Aux tak sang sum kix kaux cong ka daux haktiex in, khawm rhawm mai khawm ju khwan Aux khawmuik heue. ⁴² Grawh grawng nawh, Siyiex ah nin, awm hoik viex Aux krax pa ting kha rhawm hoek piang ceu pui in, yuh ka mawx, Aux tak sang viex nang ceu pa mhawm hoek piang kix khawmuik awm hoik koe sijax Aux piang kix heue. ⁴³ Tak sang liag kaung ka daux haktiex in khaing pa hoik ah pex nin, "An mawh dee yiien dee ang pui ot mai dee ang totiag khankix lai koe mai an hoik ap tix ka daux tawm taix pui Khaladie khankix heue. ⁴⁴ Pui khankix tak sang liag kaung ka mau mai yuh lai mhai rug pa liag kaung mai pa hoik tawk cum ka mai kok cao pa kham sakse, khaing ka daux haktiex Benyamin, khaing hawt rawb rim veng Yerusaliem mai khaing ka daux veng Yudax mai khaing veng pa koe piang gawng khankix mai khaing ka daux veng pa koe daux lung daux ngawd mai khaing ka daux veng pa koe plak laong, grawh grawng nawh, Aux tak deeh viex pui pa giex laung khankix deeh hoek, Siyiex ah nin heue."

¹ Lheu khaing an, gumlox Siyiex hoik hoek ka Yeramix ra bawg tix bawg, yam kawn laung nawh ka daux biang thawng ah nin, ² "Siyiex Cao pa yuh ka haktiex, Siyiex Cao pa phan ti deuh an, sonsang mawh pakpeung mai ceu kaux Siyiex pa mawh Yahowa ah nin, ³ kok ka Aux mai Aux tak deeh pawk ka maix, Aux tak sang jhi maix yaox ceu pa kied ting mai ceu pa kied raux pa ang maix doh tawng ka heue. ⁴ Grawh grawng nawh, Siyiex pa mawh Siyiex ceu pui Isarelax ah nin, son grawng pa dex dawd mai nyiex pa koe daux veng in khankix mai nyiex simiang meung Yudax, pa hoik dawg jiieh laux, khawm ka nyiex tab pau guh veng pa hoik lai lawm ti yuh laux ka lawm vaig khankix, ⁵ kix hoek ti puing ka pui Khaladie, viang mawh nan, kix hoek ngie ti kieh tokaux yum tix khankix naog ka daux nyiex, pa hoik pah Aux kix yum daux krax pa song rhawm tix, kheu grawng pa caox yuh kix Aux hoik mox pakngai khaing veng in heue. ⁶ Jhak heue, Aux tak sang viex krax pa nyawm ot siu koe hoek ka veng in, sonsang moi nawh, Aux tak sang pai kix mai deeh jhi kix yaox krax gaux rhawm pa ang jud jai, krax pa nhim mai pa mawh meh heue. ⁷ Aux tak sang kieh pui Yudax pa hoik giex laung khankix hoek mai sang deeh sum kix awm phao voe heue. ⁸ Aux tak sigrhah ka phimap krax lud pa yuh kix khawmuik mai Aux tak pluat ploi phimap pa lud kix khawmuik mai pa tieh feen kix ka Aux heue. ⁹ Khaix an Aux tak sang kieh veng an lih ti koe pa gaux rhawm pa yaogyaw mai krax pa koe min plakngai ka plak sivoe ceu pui pa koe piang haktiex khawmuik mai pui tak sang mhong can ceu pa mhawm pa yuh Aux ka kix khawmuik, lhat graung mai sikua rhawm, ka pa mhawm mai krax haok hwan ting lhaong pa hoik tawx Aux ka kix heue. ¹⁰ Siyiex ah nin, pa ah pex ka dee in, pa mawh dee ang pui lai ot, dee ang totiag lai koe mai dee hoik grham pui yi, ka daux veng Yudax mai ka daux krax veng Yerusaliem khankix mawh dee pa yiien mai dee ang pui koe mai dee ang pui ot lai koe mai dee ang totiag khankix lai koe. ¹¹ Khaix an tak mhong lox gaux rhawm mai lox nyawm rhawm, lox simex sang yuh ka paox mai lox bun sang yuh ka paox mai lox pui pa sang ah nin, "Yaogyaw ka Siyiex Cao kru naing raoma, grawh grawng nawh, Siyiex mawh pa mhawm mai krax caux rhawm Nawh Cao kaux cong leeing ju, mai lox pui pa sang viex krax tan pa appong krax pa yaogyaw ka daux nyiex bwan Siyiex heue. Grawh grawng nawh, Aux tak sang kieh pui pa giex laung daux haktiex an khankix deeh hoek mai ot awm phao voe Siyiex ah nin heue. ¹² Siyiex Cao kru naing raoma ah nin, "Ka dee in pa mawh dee pa yiien pui, ang lai koe pui mai ang lai koe totiag mai ka daux veng khawmuik, tak sang mawh dee ot dee koe cao liang yung, sonsang kieh phung yung ti it tan heue. ¹³ Ka daux veng pa koe piang gawng lua, ka daux veng pa koe ka daux lung, ka daux veng pa koe haktiex plak seh, ka daux haktiex Benyamin, ka haktiex pa koe rawb veng Yerusaliem mai ka daux veng greem tawm taix cao pa simin yung khankix, Siyiex ah nin heue. ¹⁴ Siyiex ah nin, jhak heue, baux singaix bawg yam tak sang hoek, yam sang yuh Aux ceu pa mhawm awm lox sijax pa deuh ka nyiex ma ceu pui Isarelax mai ka nyiex ma ceu pui Yudax khankix. ¹⁵ Ka daux singaix bawg yam an, Aux tak kieh kak khaox pa rahsee lih glaoh ka son Davit, nawh tak sang prawng ca ka haktiex ka daux pa rahsee heue. ¹⁶ Ka daux singaix an, haktiex Yudax tak sang hoek krax taoh mai veng Yerusaliem tak sang yaox ti ot yiien yawg mai in mawh min ceu kaux pa sang kok ka veng an mawh "Simiang Siyiex mawh pa rahsee ex." ¹⁷ Grawh grawng nawh, Simiang Siyiex ah nin, doeh ru Davit pa sang ngawm piang dang ngeung nyiex ma ceu pui Isarelax tak ang chix jud jai, ¹⁸ Ka daux ceu pui Lewix khankix cao giex kaing li pa sang gleeing tix tawx krax tan pa gleeing ka plak sivoe Aux, khawm krax tan phawng nghox ca im mai krax tan pa appong tak ang jud jai heue." ¹⁹ Gumlox Simiang Siyiex hoek ka Yeramix ah nin, ²⁰ "Siyiex ah nin, phan pex yieh ka gumlox sijax mukheu pa deuh Aux son pon singaix mai gumlox sijax mukheu pa deuh Aux son ponsawm, sonsang ang plak pon singaix mai plak ponsawm lai khaw ka daux bawg yam praix klawng, ²¹ Khaix an gumlox sijax mukheu pa deuh Aux ka kawn tix Davit tak sang yieh laux, tak ang lai koe doeh ru pa sang ngawm piang dang ngeung nawh mai pui Lewix cao giex kaing li mai pui pa yuh kaing jhaw Aux khankix tak jud heue. ²² Awm ang pon simin ka kraung can pa koe daux raoma mai awm ang pon tiag tong ti yaox ka mhaik rawm sigrit sigra khankix, mawh kheu nan, Aux tak sang baox nie kieh doeh ru kawncau Aux Davit mai pui Lewix pa yuh kaing jhaw Aux khankix haoh hun heue." ²³ Lheu khaing an, gumlox Siyiex hoek ka Yeramix ah nin, ²⁴ Mawh ang pex sax keud ti yaox ka lox pa krai pui khankix pa ah nin lie? Siyiex hoik tik vud ka doeh nyiex ma pa hoik laug Nawh Cao ra cub, mawh kheu nunai kix ka ceu pui Aux, kix tak ang lai yaox tix mawh ceu pui ka plak sivoe ngai kix heue. ²⁵ Siyiex ah nin, phan gumlox sijax mukheu Aux ang mawh pa koe son pon singaix mai son ponsawm mai phan Aux ang lai deuh been koe son raoma mai haktiex khankix, ²⁶ khaix an, Aux tak tik vud ka doeh ru Yakop mai kawncau Aux Davit mai ang lai laug ka doeh ru nawh, mawh cao pa kwang piang doeh ru Abraham, Icak mai Yakop heue. Grawh grawng nawh, Aux tak deeh viex pui pa giex laung khankix deeh hoek mai Aux tak koe krax caux rhawm piang kix heue."

¹ Gumlox khaing Siyiex hoek ka Yeramix, yam Nebukhaneza simiang Babulon mai cub kru naing nawh khankix mai can meung haktiex pa ot greem pa kwang nawh khawmuik mai can pui pa ot ka daux veng an khawmuik rom tix puing ka veng Yerusaliem pa mawh veng pa dex dawd mai Yerusaliem khankix, Siyiex ah nin heue. ² Siyiex pa mawh Siyiex ceu pui Isarelax ah nin, "Hu mai krai ka Zedekix simiang Yudax mai ah nin ka nawh, Siyiex ah nin, jhak heue, Aux tak sang ap veng in ka daux tawm taix simiang veng Babulon mai nawh tak gleeing veng an ka ngu heue. ³ Maix tak ang pon luan khaing daux tawm taix nawh, viang mawh nan, tak sang giex ka maix tete mai ap maix ka daux tawm taix nawh; ngai maix tak sang yaox ngai simiang Babulon mai nawh tak sang sikah tau mai maix pakngai taw pakngai mai maix tak sang yaox ti hu ka veng Babulon heue. ⁴ Mawh kheu nan, Zedekix simiang Yudax eue, nghiet ka gumlox Siyiex heue. Siyiex ah nin son grawng pa dex dawd mai maix, maix tak ang yaox ti yum ka vaig heue. ⁵ Viang mawh nan maix tak sang yaox tix yum ka daux pa nhim, awm hoik khre rien kix pawie grawng keeing maix, pa hoik mawh simiang pa hoik koe sivoe maix, mawh kheu nan, kix tak sang gleeing nyawng bhawng ka son maix mai yiiem grai ka son maix ah nin, alo! cao simiang eue, grawh grawng nawh, Aux hoik krai pao lox in ka maix, Siyiex ah nan heue. ⁶ Khaix an cao jhai Yeramix hoik krai lox in ka Zedekix simiang Yudax pa ot ka daux veng Yerusaliem, ⁷ yam puing cub kru naing simiang Babulon ka veng Yerusaliem mai veng Yudax pa kawn deuk pa mawh veng Lakhishax mai veng Azaka, mawh kheu mawh ngie veng in pa kawn kaux cong khaing veng pa koe ka daux meung Yudax khankix heue." ⁸ In mawh gumlox khaing Siyiex pa hoek bleeh ka Yeramix, khaix yuh simiang Zedekix sijax mukheu tau mai pui khankix, pa ot ka daux veng Yerusaliem, sonsang krai pao tix krax pa luad luan ka kix, ⁹ mai kieh pui ku kaux ploi ka siliex simex siliex bun tix pa mawh pui Hebrie luad luan, pui tix kaux kawx ang pon tix priex puxaik tix pui Yudax ka daux pa yuh siliex heue. ¹⁰ Yam hoik mhong cao kaing mai pui hun khankix pa laig ti yuh sijax mukheu ka lox in, sonsang ploi ka siliex simex siliex bun luad luan, pui tix kaux kawx tak ang lai yaox tix priex ka daux pa yuh siliex khaix in tix bawg kawx, kix cu nghiet mai ploi kix hu heue. ¹¹ Khaix an kix deeh tieh rhawm tix mai kieh siliex simex siliex bun pa hoik ploi kix luad luan deeh hoek mai deeh kieh kix mawh siliex heue. ¹² Mawh kheu nan, gumlox Siyiex hoek ka Yeramix ka daux pa ah nin, ¹³ Siyiex pa mawh Siyiex ceu pui Isarelax ah nin, Aux hoik yuh sijax mukheu tau mai keeing pex, yam teei Aux kix lih hu khaing daux meung Ejiptux, khaing daux nyiex ma pa yuh kix siliex ah nin, ¹⁴ yam hoik sidah aliah num, kieh pui ku kaux ploi puxaik tix pui Hebrie, pa hoik dawg coh ka nawh khankix luad luan heue. Mawh kheu hoik yuh nawh kaing son pex aliah num, pex tak kieh nawh luad luan khaing pex heue. Viang mawh nan, keeing pex khankix ang lai cu nghiet ka Aux mai ang lai daong yhaok tix ka Aux heue. ¹⁵ Khaix an pex kawn tak khraox doh keud mai yuh pa rahsee ka sivoe ngai Aux mai pui ku kaux krai pao grawng pa luad luan ka paox plawg tix mai pex yuh sijax mukheu ka plak sivoe ngai Aux, ka daux nyiex bwan pa hoik kok tix ka min ceu kaux Aux heue. ¹⁶ Khaix an pex hoik deeh tieh feen mai hoik yuh min ceu kaux Aux seeing brai mai pui ku kaux hoik deeh kok siliex simex siliex bun tix, pa hoik ploi tix luad luan hoek sonsang deeh mawh kix siliex pex heue. ¹⁷ Mawh kheu nan, Siyiex ah nin, pex ang cu nghiet ka Aux, ka grawng pa krai pao pa luad luan, ka puxaik tix mai ka paox plawg tix heue. Siyiex ah nin, Aux tak krai pao grawng pa luad luan son pex, pa mawh lawm vaig, jhawm saux preng mai sibhawm praix heue. Aux tak ap pex kha rhawm tix daux sinax meung haktiex pa koe piang haktiex heue. ¹⁸ Aux tak sang tawx pui pa lud ka sijax mukheu Aux mai pa hoik yuh kix ka plak sivoe Aux, yam mug kix kawn mawie lih koe ra plak mai hoik tiang tix hu ka daux sinax an, ¹⁹ cao kaing meung Yudax, cao kaing Yerusaliem, pui sieh mai cao giex kaing li khankix mai pui haktiex khawmuik, pa hoik tiang tix hu daux sinax nex kawn mawie khankix, ²⁰ Aux tak sang ap kix ka daux tawm taix pui koeng kix mai ka daux tawm taix pa sawg tix pah ju kix. Tokaux yum kix tak sang mawh priex ih sim sai raoma mai totiag khankix heue. ²¹ Aux tak sang ap Zedekix simiang Yudax mai cub cao kaing, ka daux tawm taix pui koeng kix mai ka daux tawm taix pui pa sawg tix pah ju kix mai ka daux tawm taix cub kru naing simiang Babulon pa ing tivud ticu khaing pex heue. ²² Siyiex ah nin, jhak heue, Aux tak sang tawx lox hu mai kieh kix deeh hoek ka veng in, kix tak rhim ti teei mai gleeing ka ngu mai Aux tak kieh haktiex Yudax mawh dee pa yiien mai dee ang pui lai ot ka heue."

¹ Gumlox khaing Siyiex hoek ka Yeramix ka daux baux singaix simiang Yehoyakim kawn simex Yosiyax simiang Yudax ah nin, ² "Hu ka nyiex ceu pui Rakhap khankix, krai ka kix mai viex kix hoek ka daux nyiex bwan Siyiex, ka daux lawg tix mu mai tawx kix nyaux rawm plix siiet heue. ³ Khaix an Aux kok ka Yazania kawn simex Yeramix, pa mawh kawn Habazinia, khawm puxaik nawh mai kawn simex nawh khankix mai nyiex ma ceu pui Rakhap khawmuik, ⁴ aux viex kix laig ka daux nyiex bwan Siyiex, ka daux lawg ot kawn simex Hanan pa mawh kawn simex Igadalix pui Siyiex tix kaux, pa mawh lawg ot cub cao kaing khankix, piang lawg ot Maseyax pa mawh kawn simex Shalum, cao pau siviex ting heue. ⁵ Khaix an aux hoik deuh ang rawm pa naog rawm plix siiet ka khankix, ka plak sivoe ngai cub kawn praix ceu pui Rakhap mai sau ka daux kawk nyaux mai Aux ah nin ka kix, nyaux rawm plix siiet heue. ⁶ Viang mawh nan, kix ah nin, yix tak ang nyaux ka rawm plix siiet, mawh kheu hoik tawm Yonadap pa mawh kawn simex Rakhap, keeing yix ti deuh lox ka yix ah nin, pex tak ang pon tix nyaux rawm plix siiet, pex mai khawm kawn simex pex leeing ju heue. ⁷ Pex tak ang pon tix sum nyiex, ang pon tix ruat simie, ang pon tix sum sipeem plix siiet mai ang pon tix koe tix ceu kawx heue. Viang mawh nan, pex tak yaox ti ot ka daux nyiex gox jheung jheung sonsang lang ju tix ka daux haktiex dee mawh pex nyo sinie heue. ⁸ Yix cu nghiet ka lox Yonadap kawn simex Rakhap pa mawh keeing yix, pa hoik tawm nawh ti deuh lox ka yix, son ang yix nyaux rawm plix siiet, leeing lang ju tix, yix mai khawm moeng yix mai khawm kawn simex kawn bun yix khankix khawmuik, ⁹ ang sum nyiex son cao tix mai ang sum sipeem plix siiet, kaung mai simie khankix heue. ¹⁰ Viang mawh nan, yix hoik ot ka daux nyiex gox mai hoik cu nghiet mai hoik yuh awm ka can pa hoik tawm keeing yix Yonadat khankix khawmuik ka yix heue. ¹¹ Viang mawh nan, yam hoek bleeh Nebukhaneza simiang Babulon ka daux haktiex in, yix tom ah nin, hoek heue, hu ka veng Yerusaliem kheu jao lhat graung ex, ka cub kru naing pui Khaladie mai ka cub kru naing pui Surix khankix heue. Mawh kheu nan, yix ot ka daux veng Yerusaliem daux yam in heue." ¹² Khaix an gumlox Siyiex deeh hoek ka Yeramix ah nin, ¹³ "Siyiex Cao kru naing raoma, pa mawh Siyiex ceu pui Isarelax ah nin, hu mai krai ka pui Yudax khankix pa ot ka daux veng Yerusaliem khankix Siyiex ah nin, mawh ang pex rieb mai cu nghiet lox pa sang sidiex gau Aux ka pex khankix lie? ¹⁴ Gumlox krai Yonadat kawn simex Rakhap mai pa hoik tawm nawh ti deuh ka kawn simex tix khankix, sonsang hawt kix ti yuh, mawh kheu nan, ka daux in singaix kix ang nyaux rawm plix siiet tix bawg kawx mai cu nghiet ka gumlox ping nyap pa tawm keeing kix heue. Viang Aux kaoh caocao mai sikah krai ka pex lawlawx mai pex ang cu nghiet ka Aux heue. ¹⁵ Aux kaoh caocao mai baox ploi kawncau mau soi pa mawh cao jhai Aux khankix hoek ka pex ah nin, deeh veeh khaing krax pa caox yuh tix mai deeh cox jhawm tix mai paw lai hawt hu khaix siyiex tang kaux tang hak mai paw yuh kaing jhaw kix, khaix an pex tak yaox ti ot ka daux haktiex pa hoik tawx Aux ka pex mai ka keeing pex Viang mawh nan, pex ang lai daong yhaok tix mai ang cu nghiet ka Aux heue. ¹⁶ Cub kawn simex Yonadat, kawn simex Rakhap, hawt yuh awm gumlox ping nyap, pa tawm keeing kix, ka kix tete, viang mawh nan, ceu pui in ang lai cu nghiet ka Aux heue. ¹⁷ Mawh kheu nan, Siyiex Cao kru naing raoma pa mawh Siyiex ceu pui Isarelax ah nin, jhak heue, Aux viex krax kha rhawm khankix awm pa hoik krai pao Aux ti deuh hoek piang pui Yudax mai can pui pa ot ka daux veng Yerusaliem khankix, grawh grawng nawh, viang Aux hoik krai ka kix kawx, viang mawh nan, kix ang nghiet, viang Aux hoik kok ka kix kawx, kix ang pawk lox Aux heue." ¹⁸ Yeramix krai gumlox pa kaoh khaing Siyiex Cao kru naing raoma, pa mawh Siyiex ceu pui Isarelax, ka nyiex ma pui Rakhap ah nin, "Mawh kheu jao hoik nghiet pex ka gumlox pingnyap pa tawx keeing pex Yonadat mai hoik priex tix hawt ka lox tat jhawm prawng nawh khankix mai hoik yuh awm pa hoik tawm nawh ka pex khawmuik, ¹⁹ mawh kheu nan, Siyiex Cao kru naing raoma pa mawh Siyiex ceu pui Isarelax ah nin, Yonadat kawn simex Rakhap tak ang lai koe pui jud pa sang cung ka plak sivoe Aux leeing ju heue."

¹ Yam hoik hoek bawg yam num kwang Yehoyakim kawn simex Yosiyax pa mawh simiang meung Yudax ka haktiex pon num tix num, gumlox hoik hoek ka Yeramix khaing Siyiex ah nin, ² "Teei bua lai tix pheen mai tiiem ti priex gumlox an khankix khawmuik, pa hoik krai Aux ka maix, son ceu pui haktiex khawmuik, jah khaing singaix pa hoik krai Aux ka maix mai yam jah singaix baux ju Yosiyax tom hoek ka daux singaix heue. ³ Yam mhong nyiex ma ceu pui Yudax khankix, krax pa kha rhawm, pa keud Aux tix sang viex hoek piang kix, sonsang pon dee veeh pui ku kaux khaing daux krax pa caox caig yuh tix mai sonsang pluat ploi Aux ka krax pa lud kix mai phimap kix heue. ⁴ Khaix an Yeramix hoik kok ka Baruk pa mawh kawn simex Nerix mai Baruk hoik tiem ti deuh gumlox Siyiex pa krai Yeramix ka daux bua lai tix pheen, pa mawh gumlox Siyiex pa hoik krai Nawh Cao ka nawh heue." ⁵ Yeramix tawm lox ah nin ka Baruk, "Mawh kheu hoik giex laung ka aux, aux ang pon laig ka daux nyiex bwan Siyiex heue. ⁶ Mawh kheu nan maix hu mai phat pui mhong khaing daux bua lai pa hoik tiem maix ti deuh, ka grawng pa jhi aux, pa mawh gumlox krai Siyiex khankix, sonsang mhong pui khankix, yam twah kix pa ih heue. Phat pui Yudax mai pui pa kaoh khaing daux veng khankix mhong ka heue. ⁷ Ha pui ku kaux sang deeh veeh khaing daux krax pa caox caig pa yuh tix mai khyox khaw ka Siyiex heue. Mawh kheu krax song rhawm mai krax meet rhawm pa krai pao Siyiex mawh pa kied ting lhaong piang ceu pui in heue." ⁸ Baruk, pa mawh kawn simex Nerix yuh awm pa hoik tawm cao jhai Yeramix ka nawh khawmuik mai phat gumlox Siyiex khaing daux phuk lai khankix ka daux nyiex bwan Siyiex heue. ⁹ Yam hoik hoek bawg yam num kwang Yehoyakim, pa mawh kawn simex Yosiyax simiang Yudax ka haktiex phwan num tix num, daux khix dim, kix hoik krai pao yam twah kix pa ih ka plak sivoe Siyiex, ka pui pa ot ka daux veng Yerusaliem mai ka pui pa hoek khaing veng haktiex Yudax ka daux veng Yerusaliem heue. ¹⁰ Khaix an Baruk phat gumlox krai Yeramix khaing daux phuk lai an, ka daux nyiex bwan Siyiex, daux lawg Gemarix kawn simex Shaphan cao tiiem lai, ka daux lawg plak piang dee laig ka diang siviex khraox nyiex bwan Siyiex, sonsang mhong pui ka heue. ¹¹ Yam hoik mhong Mikhayax kawn simex Gemarix pa mawh kawn simex Shaphan cao tiiem lai ka gumlox Siyiex khankix khaing daux phuk lai an, ¹² khaix an, nawh lih hu ka nyiex haw simiang ka daux lawg cao tiiem lai, mai cub cao kaing khankix pa ngawm tan khawmuik, mawh Elishama cao tiiem lai, Delayax kawn simex Shemayax, Elanatan kawn simex Akhabo, Gemarix kawn simex Shaphan, Zedekix kawn simex Hananit mai cub cao kaing khawmuik heue. ¹³ Khaix an Mikhayax hoik krai pao gumlox pa hoik mhong nawh, yam phat Baruk phuk lai an, sonsang nghiet pui khankix ka heue. ¹⁴ Mawh kheu nan, cub cao kaing khankix ploi ka Yehudix kawn simex Netamitga kawn simex Shalamix kawn simex Kushix hoek ka Baruk ah nin, "Teei bua lai pa hoik phat maix pui khankix mhong hoek ka daux taix maix heue." Mawh kheu nan, Baruk kawn simex Nerix hoik teei ti viex bua lai an ka daux taix tix mai hoek ka kix heue. ¹⁵ Kix ah nin ka nawh, "Ngawm mai phat yix mhong ka heue." Mawh kheu nan, Baruk hoik phat kix mhong heue. ¹⁶ Yam hoik mhong kix ka gumlox an khankix, kix jhak ka paox tix, tix kaux lai tix kaux ka daux pa lhat graung tix heue. Kix ah nin ka Baruk, "Ex tak sang krai simiang mhong gumlox in tete heue." ¹⁷ Kix chawk grawng an ka Baruk ah nin, "Krai ka ex, mawh tiiem maix ka gumlox in khawmuik, ka daux pa jhi nawh yuh ka mawx lie?" ¹⁸ Mawh kheu nan, Baruk deeh pawk ah nin ka kix, "Nawh hoik krai pao gumlox inkix khawmuik ka jheeh tix ka aux mai aux hoik tiem an khankix ka rawm nam meug ka daux phuk lai heue." ¹⁹ Khaix an cao kaing khankix ah nin ka Baruk, "Hu mai mox tix tau mai Yeramix mai paw kieh pui tix kaux kawx tawng ka dee ot maix heue." ²⁰ Kix hu ka dee ot simiang ka nyiex haw, viang mawh nan, kix deuh bua lai an ka daux lawg ot Elishama cao tiiem lai mai krai gumlox pa hoik mhong tix khawmuik ka simiang heue. ²¹ Mawh kheu nan, simiang ploi Yehudix sonsang teei ka bua lai an mai nawh teei an khaing daux lawg Elishama cao tiiem lai heue. Yehudix phat simiang mai cao kaing pa cung hawt praok simiang khankix mhong heue. ²² Yam an, simiang ngawm tix laux lee tix bawg yam kwat ka daux khix dim, tau mai glah ngu pa lah gaox ngu ka plak sivoe nawh heue. ²³ Yam hoik phat Yehudix lai an been loe mu, simiang pat ka bua lai an ka gawn cao tiiem lai mai tik ka daux ngu pa koe piang glah ngu, tom hoik proe phuk bua lai an khawmuik ka daux ngu heue. ²⁴ Viang yuh nan kawx, simiang mai khawm kawncau nawh khankix pa hoik mhong ka gumlox in khankix, kix ang koe krax lhat graung ka mai ang riah ka kraung ceep tix, tix kaux kawx heue. ²⁵ Viang mawh nan, Elanatan, Delayax mai Gemarix khankix hoik khyox khaw ka simiang sonsang ang nawh gleeing ka bua lai an, viang mawh nan, nawh ang nghiet ka lox kix heue. ²⁶ Simiang tawx lox tix ka Yeramelax kawn simex simiang mai Sareyax kawn simex Azarelax mai Shelamiyax kawn simex Abadelax khankix sonsang hu giex ka Baruk cao tiiem lai mai ka cao jhai Yeramix, viang mawh nan, Siyiex hoik mox ka kiex heue. ²⁷ Khaix hoik gleeing simiang ka bua lai an, pa koe gumlox hoik tiiem Baruk ti deuh grawng krax pa jhi Yeramix, gumlox Siyiex hoik hoek ka Yeramix ah nin, ²⁸ "Baox teei bua lai tang mu mai tiiem ka daux an, awm gumlox pa hoik koe ka daux bua lai phao ka khawmuik, pa hoik gleeing Yehoyakim simiang Yudax heue. ²⁹ Maix tak ah nin ka Yehoyakim simiang pui Yudax, Siyiex ah nin, maix hoik gleeing ka bua lai an grawng sang kriem hoek simiang Babulon ti yuh laux ka haktiex in mai kieh kawn pui khawm totiag khankix grai hu khaing tin kheu jao grawng pa yuh ka mawx lie? ³⁰ Mawh kheu nan, Siyiex ah nin son grawng pa dex dawd mai Yehoyakim simiang Yudax, Doeh ru nawh tak ang koe pui ngawm piang dang ngeung Davit mai tokaux yum nawh, tak sang grok tix ka daux koek mai ka daux rawm ciex ponsawm heue. ³¹ Aux tak sang ciyang ka nawh, khawm daux nyiex nawh mai kawncau nawh khankix, ka grawng pa lud kix mai Aux tak sang tawx krax kha rhawm pa hoik krai pao Aux hoek piang kix mai ka piang pui pa ot ka daux veng Yerusaliem mai ka piang pui Yudax khankix, viang mawh nan, kix ang nghiet heue." ³² Khaix an Yeramix teei bua lai tang mu mai hoik tawx an ka Baruk cao tiiem lai, pa mawh kawn simex Nerix, pa hoik tiiem grawh grawng pa jhi Yeramix ka daux an awm gumlox daux bua lai pa hoik gleeing Yehoyakim, simiang Yudax ka daux ngu khawmuik heue. Lheu khaing an, nawh hoik baox naok gumlox pa awm an tom nie heue.

¹ Khaix simiang Zedekix kawn simex Yosiyax hoik kwang haktiex tang Khoniyax pa mawh kawn simex Yehoyakim, ka pui pa hoik yaog Nebukhaneza simiang Babulon nawh mawh simiang ka daux haktiex meung Yudax heue. ² Viang mawh nan, nawh mai kawncau nawh khawm pui haktiex khankix ang nghiet ka gumlox Siyiex pa hoik krai Nawh Cao ka cao jhai Yeramix heue. ³ Simiang Zedekix ploi Yehukalax pa mawh kawn simex Shelamix mai cao giex kaing li pa mawh kawn simex Maseyax mai hu ka cao jhai Yeramix, ah nin, "Yam in rawg bwan son ex ka Siyiex pa mawh Siyiex ex liak." ⁴ Yam in Yeramix hoik hoek mai hu sinax pui hankix, mawh kheu ang kix nyang bax sau nawh ka daux thawng heue. ⁵ Yam an cub kru naing Pharaw khankix hoik lih hoek khaing haktiex Ejiptux, pui Khaladie khankix pa hoik lai lawm ka veng Yerusaliem mhong ka grawng satang an, kix lih hu khaing veng Yerusaliem heue. ⁶ Yam an, gumlox Siyiex hoek ka cao jhai Yeramix ah nin, ⁷ "Siyiex pa mawh Siyiex ceu pui Isarelax ah nin, maix tak ah nin ka simiang Yudax, pa hoik ploi maix hoek sonsang chawk ka Aux, jhak heue, cub kru naing Pharaw khankix pa sang hoek teem ka maix, tak deeh ing ka meung Ejiptux ka daux haktiex cao kix heue. ⁸ Pui Khaladie khankix tak deeh hoek puing mai rhim ka veng in mai gleeing ka ngu heue. ⁹ Siyiex ah nin, paw pie lhen ka tokaux ti ah nin, Pui Khaladie khankix tak sang lih hu khaing ex tete, mawh kheu kix tak ang cu tix lih hu heue. ¹⁰ Viang pex hoik pex ka cub kru naing pui Khaladie pa puing ka pex khawmuik kawx mai deuk ngie pui mat ka daux sinax kix kawx, kix ku kaux tak kaoh khaing daux nyiex gox tix mai gleeing veng ka ngu heue." ¹¹ Yam hoik prah cub kru naing pui naing Khaladie khankix ka lai lawm tix veng Yerusaliem, kheu jao lhat tix ka cub kru naing Pharaw khankix, ¹² Yeramix lih hu khaing daux veng Yerusaliem, sonsang laig ka daux haktiex Benyamin, sonsang pon tix sinngao ka daux sinax puxaik tix khankix heue. ¹³ Yam hoek nawh ka diang siviex veng Benyamin cao kaing naing pa kaux Iriyax kawn simex Shelamix, pa mawh kawn simex Hananix mai nawh giex ka cao jhai Yeramix ah nin, "Maix mawh pa tiang tix hu ka plak pui Khaladie khankix heue." ¹⁴ Khaix an Yeramix ah nin, "An ang mawh, aux ang tiang tix hu ka plak pui Khaladie khankix heue." Viang mawh nan, nawh ang nghiet ka lox Yeramix heue. Mawh kheu nan Iriyax giex ka Yeramix mai viex nawh hoek ka cub cao kaing khankix heue. ¹⁵ Cub cao kaing khankix song rhawm ka Yeramix mai kix sivied nawh mai laung nawh ka daux thawng, pa koe ka nyiex Yawnasan cao tiiem lai heue. Grawh grawng nawh, kix hoik grux yuh nyiex an mawh thawng heue. ¹⁶ Yam laig Yeramix ka daux thawng tiex pa koe greem nyiex, Yeramix yaox ti ot tan tom rheung singaix, ¹⁷ khaix an simiang Zedekix ploi pui hu teei nawh lih heue. Simiang briex mox tix chawk nawh ka daux nyiex haw tix ah nin, "Mawh koe gumlox tix ceuceu khaing Siyiex lie?" Yeramix ah nin, koe heue, khaix an Yeramix ah nin, tak sang ap maix ka daux tawm taix simiang Babulon heue." ¹⁸ Mawh kheu nan, Yeramix ah nin ka simiang Zedekix, "Mawh lud aux ceu patix ka maix mai lud aux ka kawncau maix khawm ka ceu pui in khankix ka ceu patix maix lai laung aux daux thawng lie? ¹⁹ Cao jhai pex khankix, pa hoik gruh krai lox jhai ka maix pa ah nin simiang Babulon ang lai hoek tix puing ka pex mai ka haktiex in, ot dee mawx yam in lie? ²⁰ Mawh kheu nan, cao simiang pa mawh simiang aux eue, yuh bwanson nghiet lox aux liak. Yuh bwanson rieb ka lox khyox khaw aux ka plak sivoe maix mai paw lai kieh aux deeh ing ka nyiex Yawnasan cao tiiem lai, phan yuh nan aux tak yum tan heue." ²¹ Khaix an simiang Zedekix tawx lox tix, sonsang priex kix Yeramix ka daux biang nyiex thawng mai kix yaox tix tawx blah khaing cao pa yuh blah khankix tix ngaix tix lon ka nawh ku ngaix tom sidah ang blah pa koe ka daux veng khankix nyang uik heue. Mawh kheu nan, Yeramix yaox ti ot ka daux biang nyiex thawng heue.

¹ Khaix an Shephatix kawn simex Mattan, Gedalix kawn simiex Pashurax, Yehukalax kawn simex Shelamix mai Pashurax kawn simex Malakhix khankix hoik mhong ka gumlox pa krai Yeramix ka pui khankix ah nin, ² "Siyiex ah nin, pui pa kawn deuk ka daux veng in tak yaox tix yum ka lawm vaig mai ka sibhawm praix mai ka jhawm saux preng, viang mawh nan, pui pa lih hu ot ka plak pui Khaladie khankix, tak yaox tix im ju, mai ju nawh tak mawh pa awm kraung pa pon rhim ti teei heue. ³ Siyiex ah nin, veng in tak sang ap ti ka daux tawm taix cub kru naing simiang veng Babulon, pa tak sang rhim ti teei ka an heue." ⁴ Mawh kheu nan, cao kaing khankix ah nin ka simiang, "Yuh bwanson kieh pui in yum heue, kheu jao lox krai nawh, hoik kieh khawn taix pui naing pa kawn deuk daux veng in mai khawm pui hun khankix khawmuik dieh riang kheu lox sikah tix heue. Mawh kheu pui in ang tie sawg pa koe bwanson ka son pui in khankix mai sawg ngie krax pa kha rhawm khaing heue." ⁵ Khaix an simiang Zedekix ah nin, "Jhak heue, nawh hoik koe ka daux tawm taix pex heue. Mawh kheu simiang ang pon tiebtie ka alo pex heue." ⁶ Mawh kheu nan, kix teei Yeramix mai sau nawh ka daux thawng tiex Malakhix kawn simex simiang pa koe ka daux veng nyiex thawng mai kix ploi Yeramix lih daux an ka maox heue. Kadaux an ang koe rawm, mawh ngie glaox, mawh kheu nan, Yeramix hoik cub tix ka daux glaox heue. ⁷ Yam an Ebadameliet ceu pui Ethiopia, pa mawh pui sieh tix kaux, pa ot ka daux nyiex haw simiang, mhong ka hoik sau kix Yeramix ka daux thawng tiex heue. Yam ngawm simiang ka diang siviex Benyamin, ⁸ Ebadameliet lih hu ka nyiex simiang mai sikah ka simiang ah nin, ⁹ "Cao simiang aux eue, pa yuh pui in khankix pa caox caig ka cao jhai Yeramix hoik mawh pa lud, kix hoik tik nawh ka daux thawng tiex mai nawh tak yum tan ka pa cai rhawm tix, mawh kheu blah ang lai koe ka daux veng pie ceeix kawx heue." ¹⁰ Khaix an simiang hoik tawx lox ka Ebadameliet pui Ethiopia ah nin, "Kok pui tixngoe kaux hu tau mai maix khaing tin mai bluh ka cao jhai Yeramix lih khaing thawng tiex sivoe ang nawh nyang yum heue." ¹¹ Mawh kheu nan, Ebadameliet kok pui khankix hu tau mai nawh mai laig ka daux nyiex simiang greem nyiex krao mau mai hoik teei siyuh caox mai kraung prim khankix mai ploi an khankix pa lih ka maox ka dee ot Yeramix ka daux thawng tiex heue. ¹² Khaix an Ebadameliet pui Ethiopia ah nin ka Yeramix, "Yuh bwanson sau siyuh caox mai kraung prim khankix ka greem klaik maix sonsang mhawn maox ka heue." Yeramix yuh awm an heue. ¹³ Mawh kheu nan, kix bluh Yeramix haoh ka maox mai yaog nawh lih khaing daux thawng tiex heue. Yeramix kawn yaox ti ot ka daux biang nyiex thawng heue. ¹⁴ Khaix an simiang Zedekix ploi pui hu kok ka Yeramix mai kieh viex ka cao jhai Yeramix hoek ka tix ka diang laig glawk loe nyiex bwan Siyiex heue. Simiang ah nin ka Yeramix, "Aux sang chawk ka maix tix ceu, paw mox tix ceu kawx ka aux." ¹⁵ Khaix an Yeramix ah nin ka Zedekix, "Phan aux krai grawng an ka maix, mawh ang maix kriem pah aux yum lie? phan aux tawx krax keud ka maix kawx maix ka ang tau tix nghiet ka aux heue." ¹⁶ Mawh kheu nan, simiang Zedekix briex tiextu tix ah ka Yeramix, "Awm im ju Siyiex, cao pa phan ka ju kawn pui kieh im, aux kawx tak ang lai ap maix ka daux tawm taix pui pa sawg tix pah ju maix heue." ¹⁷ Khaix an Yeramix ah nin ka Zedekix, "Siyiex Cao kru naing raoma, pa mawh Siyiex ceu pui Isarelax ah nin, phan maix ap tix ka cao kaing simiang Babulon khankix maix tak im ju mai ang lai gleeing veng in ka ngu maix mai khawm kawn nyiex ma maix khankix tak sang im ju heue. ¹⁸ Viang mawh nan, phan maix ang ap tix ka cao kaing simiang Babulon khankix, veng in tak sang ap tix ka daux tawm taix pui Khaladie khankix, kix tak gleeing veng in ka ngu mai maix tak ang lai pon tix glawd khaing daux tawm taix kix heue." ¹⁹ Simiang Zedekix ah nin ka Yeramix, "Aux lhat grawng ka pui Yudax khankix, pa hoik tieh tix ka plak pui Khaladie khankix, phan ang yuh nan, kix tak ap aux ka daux tawm taix kix mai kix tak nunai ka aux heue." ²⁰ Khaix an Yeramix ah nin, "Kix tak ang ap maix heue. Yuh bwanson nghiet ka lox Siyiex pa hoik krai aux ka maix heue. Mawh kheu an tak mawh ceu pa mhawm ka son maix mai ju maix tak im heue. ²¹ Viang mawh nan, phan maix thiang tix ang ap tix, in mawh gumlox pa hoik jhi Siyiex ka aux, ²² jhak heue, bun khankix pa kawn deuk ka nyiex simiang Yudax, tak sang ap tix ka cao kaing simiang Babulon khankix mai bun khankix tak ah nin, paox grawm pa kied dex mai maix khankix hoik jeeh nyaw ka maix mai pa hoik pex ka maix, caong maix khankix kawx hoik cub tix daux glaox mai kix hoik yoi lih khaing maix heue. ²³ Mawh kheu nan, kix tak ap moeng kawn maix khankix ka pui Khaladie heue. Maix tak ang luad luan khaing daux tawm taix kix, tak sang rhim maix hu daux tawm taix simiang Babulon heue. Tak kieh veng in mawh pa hoik gleeing tix ka ngu heue." ²⁴ Khaix an Zedekix ax nin ka Yeramix, "Paw kieh pui tix kaux kawx tawng ka lox in khankix mai maix tak ang lai yaox tix yum heue. ²⁵ Viang mawh nan, phan cao kaing khankix mhong ka pa hoik krai aux ka maix khankix mai phan kix hoek ah nin ka maix, krai ex mhong lox pa hoik ah maix simiang mai lox pa ah simiang ka maix, paw lai mox lox in tix ceu kawx ka yix mai yix tak ang lai pah maix yum heue. ²⁶ Khaix an maix tak ah nin ka kix, aux hoik khyox khaw ka simiang sonsang ang nawh lai kieh aux ing ka nyiex Yawnasan, sonsang yum tix tan heue." ²⁷ Khaix an cao kaing khankix hoek ka Yeramix mai chawk ka nawh heue. Nawh deeh krai grawng an khankix, awm lox pa hoik tawm simiang heue. Mawh kheu nan, kix ang lai chawk mai yawg tix heue. Mawh kheu ang pui lai tawng ka grawng pa sikah kiex mai paox tix heue. ²⁸ Yam an Yeramix kawn yaox ti ot ka daux biang nyiex thawng, tom hoek bawg yam ang nyang rhim veng Yerusaliem, nawh ot tau tom yam hoik rhim ka veng Yerusaliem heue.

¹ Ka daux num kwang simiang Zedekix ka haktiex dim num, daux khix kao, Nebukhaneza simiang Babulon mai cub kru naing nawh khankix, hoek puing ka veng Yerusaliem mai lai lawm ka veng an heue. ² Ka daux num kwang Zedekix ka haktiex daux kao tix num, khix pon dim ngaix veng hoik laux heue. ³ Khaix an cao kaing simiang Babulon khankix hoek bleeh mai laig ngawm ka daux siviex veng pa koe sigreung mai cao kaing khankix mawh Neragala Shareza, cao kaing naing vaig mai Samagara Nebaw mai Sarasekhim, cao kwang bun daux nyiex haw mai Rabasarix, cao kaing ting mai Neragala Shareza, cao kwang plak pingnya mai Rabamaga, cao kaing naing ting khankix, tau mai cao kaing simiang Babulon khankix heue. ⁴ Mawh kheu nan, yam hoik yaox Zedekix simiang Yudax mai pui naing nawh ka pui khankix, kix hoik to mai lih hu khaing veng plak ponsawm, ka krax sipeem simiang ka diang siviex pa koe sinax guh veng ra mu heue. Lih hu ka plak lung Yawdan heue. ⁵ Viang mawh nan, pui naing Khaladie khankix hawt khaix kix mai krup Zedekix, ka daux lung Yerikho heue. Yam hoik giex kix ka nawh, kix viex nawh hoek ka Nebukhaneza, simiang Babulon ka veng Ribalax daux haktiex Hamat mai simiang Babulon prawng ca ka Zedekix heue. ⁶ Khaix an simiang Babulon hoik pah ka kawn simex Zedekix khankix ka plak sivoe ngai nawh, ka daux veng Ribalax, simiang Babulon baox deeh pah ka pui ting lhaong Yudax khankix heue. ⁷ Khaix an nawh koh sok ngai Zedekix mai baox phyawk nawh ka maox tawng lheung, sonsang viex nawh hu ka veng Babulon heue. ⁸ Pui Khaladie khankix hoik gleeing ka nyiex haw simiang mai nyiex pui meung ka ngu mai yieh ti tik guh veng, veng Yerusaliem heue. ⁹ Khaix an Nebuzaradan cao kaing naing piang pui naing pa pau simiang khankix hoik rhim tix viex pui pa kawn deuk ka daux veng khankix, khawm pui pa hoik blak tix hoek ka plak nawh mai pui pa goh khankix, hu mawh pa giex laung tix ka daux veng Babulon heue. ¹⁰ Yam an Nebuzaradan cao kaing naing piang pui naing pa pau simiang khankix, hoik prah pui hot sibhawm khankix, pa ang lai koe kraung koe sinngao tix ceu kawx ka daux meung Yudax mai nawh hoik tawx kix cie sipeem plix siiet khankix mai gwang kaung khankix yam an heue. ¹¹ Yam an Nebukhaneza simiang Babulon tawx lox tix son grawng pa dex dawd mai Yeramix ka Nebuzaradan cao kaing naing piang pui naing pa pau simiang ah nin, ¹² "Teei Yeramix mai kia ngien ka nawh mai paw yuh krax kha rhawm ka nawh, yuh awm pa ah nawh ka maix heue." ¹³ Mawh kheu nan, Nebuzaradan cao kaing naing piang pui naing pa pau simiang khankix, ploi Nebushaban, Rabasarix, Neragalashareza, Rabamaga mai cub cao kaing ting simiang Babulon khankix, ¹⁴ khaix an, kix ploi pui hu kok Yeramix khaing daux biang nyiex thawng mai ap nawh ka Gedalix kawn simex Ahikam, pa mawh kawn simex Shapham, sonsang deeh tawx nawh ing ka nyiex heue. Mawh kheu nan, Yeramix yaox ti ot tau mai pui haktiex khankix heue. ¹⁵ Yam an gumlox Siyiex hoek ka Yeramix, yam kawn laung nawh ka biang nyiex thawng ah nin, ¹⁶ "Hu krai ka Ebedameliet pui Ethiopia, ah nin, Siyiex Cao kru naing raoma, pa mawh Siyiex ceu pui Isarelax ah nin, jhak heue, Aux tak sang viex gumlox ceu pa caox grum naog piang veng in mai ang mawh lox koe bwanson mai pa mhawm mai an tak sang mawh pa grum naog ka plak sivoe ngai maix ka daux singaix an heue. ¹⁷ Viang mawh nan, Siyiex ah nin, Aux tak sang deeh taoh maix khaing ka daux singaix an, maix tak ang hoek ka daux tawm taix pui khankix pa lhat graung maix ka heue. ¹⁸ Mawh kheu Aux tak sang taoh ka maix tete mai maix tak ang yum ka lawm vaig heue. Viang mawh nan, ju maix tak sang mawh pa awm kraung pa pon rhim ti teei, mawh kheu een maix rhawm tix ka Aux, Siyiex ah nin heue."

¹ Gumlox khaing Siyiex pa hoek ka Yeramix, khaix hoik ploi Nebuzaradan cao kaing naing piang pui naing pa pau simiang ka Yeramix lih hu khaing veng Ramax, yam viex Yeramix mai phyawk nawh ka maox ceng tau mai pui daux pa giex laung khaing veng Yerusaliem mai pui haktiex Yudax khankix rhim hu mawh pui pa giex laung ka veng Babulon, ² cao kaing naing cub pa pau simiang kok mai ah nin ka nawh, "Siyiex pa mawh Siyiex maix hoik gruh krai pa kha rhawm pa hoek piang veng in heue. ³ Siyiex hoik kieh ceu in hoek mai yuh awm pa hoik ah Nawh Cao heue. Mawh kheu hoik lud pex ka Siyiex mai cu nghiet ka lox Nawh Cao, mawh kheu nan, ceu in hoik hoek piang pex heue. ⁴ Yam in Aux sang ploi maix luad luan khaing maox ceng pa phyawk tix ka taix maix heue. Phan maix koe rhawm tix sang hu mai aux ka Babulon hoek heue, Aux sang kia ngien maix mhawm mhawm, viang mawh nan, phan maix ang koe rhawm tix sang hu tau mai aux ka veng Babulon, ot tin heue. Jhak heue, haktiex khawmuik koe ka plak sivoe maix, dee mawx mawh pa mhawm pa khaw tix hu son maix hu tan heue." ⁵ Glang ang Yeramix nyang lih hu, Nebuzaradan ah nin, "Deeh ing ka Gedalix kawn simex Ahukam pa mawh kawn simex Shaphan, pa hoik yaog simiang Babulon mawh pa kwang veng piang meung Yudax mai ot tau mai pui haktiex, phan ang mawh nan, hu ka dee sang simie maix tix hu heue. Mawh kheu nan, cao kaing naing cao pau simiang tawx ngawh priex preem ih nawh mai tawx totaix ka nawh mai kieh nawh lih hu heue." ⁶ Khaix an Yeramix hu ka Gedalix kawn simex Ahikam ka veng Mizapa mai ot tau mai nawh sinax kix pa kawn deuk ka daux haktiex an heue. ⁷ Yam mhong cao kaing naing mai cub kru naing khankix, pa ot ka daux tiagtu, ka hoik yaog simiang veng Babulon Gedalix kawn simex Ahikam mawh cao kwang haktiex mai hoik ap kix tix tawx simex, bun mai kawn nyawm khankix mai pui hot sibhawm daux haktiex an pa ang lai viex hu mawh pa giex laung ka veng Babulon ka nawh. ⁸ Khaix an Ishamelax kawn simex Netanix, Yohanan mai Yawnasan kawn simex Kare, Shariyax kawn simex Thumiet kawn simex Ephie khankix pa mawh ceu pui Netophatix mai Yezanix kawn simex Makhatix, kix mai khawm pui kix hoek ka Gedalix ka veng Mizapa heue. ⁹ Gedalix kawn simex Ahikham, pa mawh kawn simex Shaphan, ah nin ka plak sivoe kix mai khawm pui kix, "Paw lhat graung ka sonsang yuh tix kaing jhaw ceu pui Khaladie khankix, ot ka daux haktiex in mai yuh kaing son simiang Babulon mai an tak mawh pa mhawm ka son pex heue. ¹⁰ Phan mawh aux, aux sang ot ka veng Mizapa mai yuh kaing pui Khaladie pa hoek ka yix heue. Viang mawh nan, pex tak yaox tix khrawm rawm plix siiet mai plix khaox daux rung praix mai rawm bee khankix mai sau khankix ka daux aw pex mai ot ka daux veng pa hoik teei kix heue." ¹¹ Yam an pui Yudax pa ot ka daux haktiex Mawbax mai pa ot sinax pui Among, pa ot ka daux haktiex Edom mai can pa ot ka haktiex tang dah khankix mhong ka hoik prah simiang Babulon pui Yudax khankix deuk mai ka hoik yaog nawh Gedalix kawn simex Ahikam, pa mawh kawn simex Shaphan kwang ka ping kix, ¹² khaix an pui Yudax khawmuik deeh hoek khaing haktiex pa hoik grheu kix lih khaing khankix mai kix hoek ka haktiex Yudax ka Gedalix daux veng Mizapa mai khrawm ti teei rawm plix siiet mai khawm plix khaox plix ox daux rung praix khankix tom nie heue. ¹³ Lheu khaing an Yohanan kawn simex Kare mai cub cao kaing naing khankix, pa ot ka daux tiag hoek bleeh ka Gedalix daux veng Mizapa, ¹⁴ ah nin ka nawh, "Mawh kriem tawng maix ka ploi Balit simiang Amon, Ishamelax kawn simex Netanix sonsang pah nawh maix lie?" Viang mawh nan, Gedalix kawn simex Ahikam ang yum rhawm ka kix heue. ¹⁵ Khaix an Yohanan kawn simex Kare briex krai ka Gedalix daux veng Mizapa ah nin, "Yuh bwanson kieh aux hu pah ka Ishamelax kawn simex Netanix mai ang kieh pui tix kaux kawx tawng ka grawng an heue. Nawh sang pah maix yum, sonsang kieh nawh pui Yudax pa ot mai maix khankix prung prang rairuat mai sang kieh pui pa kawn deuk daux haktiex Yudax khankix laux leeing kheu jao pa yuh ka mawx lie?" ¹⁶ Viang mawh nan, Gedalix kawn simex Ahikam ah nin ka Yohanan kawn simex Kare, "Maix ang pon ti yuh ceu in, grawh grawng nawh maix hoik lud krai lox grawng pa dex dawd mai Ishamelax heue."

¹ Yam an ka daux khix aliah, Ishamelax kawn simex Netanix kawn simex Elishama, khaing daux paox nyiex ma simiang mai khaing daux cao kaing greem simiang khankix, hoik hoek ka Gedalix kawn simex Ahikam daux veng Mizapa, tau mai pui kao kaux heue. Kix ih priex preem tau ka daux veng Mizapa heue. ² Khaix an Ishamelax kawn simex Netanix mai pui kao kaux pa ot tau mai nawh khankix yaog ti kaoh mai mug Gedalix kawn simex Ahikam, pa mawh kawn simex Shaphan ka vaig mai pah ka nawh pa mawh pui hoik yaog simiang Babulon mawh cao kwang ka haktiex heue. ³ Ishamelax baox pah pui Yudax pa ot tau mai Gedalix ka daux veng Mizapa khawmuik mai pui naing Khaladie pa yaox nawh baoh tan khawmuik heue. ⁴ Khaix hoik pah ka Gedalix yum, ka daux ra singaix kawx ang koe pui tawng ka grawng an tix kaux kawx. ⁵ Pui khankix hoik hoek khaing veng Shekhim, khaing veng Shilaw mai khaing veng Samarix, tixdaix kaux tau mai pa hoik khlao hauk bheup tix khawm kraung caox tix khankix mai pa pat tokaux tix, tau mai krax tan nyawng bhawng daux taix tix sonsang viex an khankix hoek ka daux nyiex bwan Siyiex heue. ⁶ Ishamelax kawn simex Netanix lih hu khaing Mizapa sonsang rieb kix, tau mai pa yiiem tix mai sipub ka kix mai ah nin ka kix, "Hoek ka Gedalix kawn simex Ahikam heue." ⁷ Mawh kheu nan, yam hoik laig kix ka daux veng, Ishamelax kawn simex Netanix, pah kix mai taing kix ka daux tiex, nawh khawm pui pa ot tau mai nawh khankix heue. ⁸ Viang mawh nan, ka daux sinax kix, koe pui kao kaux pa ah nin ka Ishamelax, "Paw pah yix liak, grawh grawng nawh, yix koe sinngao pa mawh nghox ca, rawm bee mai rawm hia khankix ka daux kaung heue." Mawh kheu nan, nawh deeh yoi tix mai ang lai pah kix tau mai puxaik kix heue. ⁹ Daux tiex dee hoik tik Ishamelax tokaux yum, pa hoik pah nawh Gedalix mai pui nawh khankix, mawh daux tiex pa hoik kaong simiang Asa ti deuh kheu jao lhat tix ka Basha simiang Isarelax heue. Ishamelax kawn simex Netanix, hoik sau pui pa pah nawh khankix naog ka daux an heue. ¹⁰ Khaix an Ishamelax hoik viex pui pa kawn deuk khankix pa ot ka daux veng Mizapa, hu mawh pui pa giex laung khawm kawn bun simiang mai pui pa kawn ot ka daux veng Mizapa khankix, ka pui pa hoik ap Nebuzaradan cao kaing naing piang pui naing pa pon simiang khankix ka Gedalix kawn simex Ahikam heue. Ishamelax kawn simex Netanix, hoik viex kix hu mawh pui pa giex laung mai viex kix hoek bleeh ka ceu pui Amon khankix heue. ¹¹ Viang mawh nan, yam hoik mhong Yawhanan kawn simex Kare mai cao kaing naing pa ot tau mai nawh khankix ka grawng krax caox caig yuh Ishamelax kawn simex Netanix khawmuik. ¹² Kix kok pui khawmuik mai hu sonsang puing ka Ishamelax, kawn simex Netanix mai kix yaox nawh hawt rawm dung ting pa koe ka daux veng Gebion heue. ¹³ Mawh kheu nan, yam yaox pui hun pa ot tau mai Ishamelax khankix ka Yawhanan kawn simex Kare mai cao kaing naing pa ot tau mai nawh khankix, kix kied gaux rhawm ka heue. ¹⁴ Khaix an pui pa hoik viex Ishamelax hu mawh pui pa giex laung khaing veng Mizapa khawmuik deeh veeh ti ing mai hu ka Yawhanan kawn simex Kare heue. ¹⁵ Viang mawh nan, Ishamelax kawn simex Netanix pon glawd khaing Yawhanan tau mai pui nawh khankix daix kaux mai kix hoik hu ka ceu pui Amon heue. ¹⁶ Khaix an Yawhanan kawn simex Kare mai cao kaing naing pa ot tau mai pui nawh khankix hoik viex can pui pa kawn deuk khawmuik khaing veng Mizapa, ka pui pa hoik taoh nawh khaing Ishamelax kawn simex Netanix khaix hoik pah nawh ka Gedalix kawn simex Ahikam mai pui naing pa kied ting riang rao khankix, kawn simex Ahikam mai pui naing pa kied ting riang rao khankix mai kawn nyawm mai pui sieh khankix, ka pa hoik viex nawh khaing veng Gebion heue. ¹⁷ Kix lih hu mai ot ka yaong Khimaham pa koe dex veng Bieliehiem, kix koe rhawm ti sang hu ka meung Ejiptux, ¹⁸ grawh grawng nawh, kheu jao lhat kix ka pui Khaladie khankix, jao hoik pah Ishamelax kawn simex Netanix ka Gedalix kawn simex Ahikam, pa hoik yaog simiang Babulon nawh mawh cao kwang ka daux haktiex an heue.

¹ Khaix an cao kaing naing khankix, pa mawh Yawhanan kawn simex Kare mai Yezanix kawn simex Hosha mai pui khankix jah ka pui iak tom hoek ka pui ting khawmuik hoek bleeh, ² mai ah nin ka cao jhai Yeramix, "Yuh bwanson rieb ka lox khyox khaw yix ka maix mai rawg bwan son yix ka Siyiex, pa mawh Siyiex maix, son pui pa kawn deuk khawmuik, kheu mawh yix pa deuk ceeix ngie khaing daux pui pa hun, awm pa yaox maix, ³ sonsang jhi Siyiex krax pa sang caw yix tix lawng mai ceu pa sang khaw sang caw yix ti yuh khankix heue." ⁴ Khaix an cao jhai Yeramix ah nin ka kix, "Aux hoik mhong heue. Aux tak sang rawg bwan ka Siyiex, pa mawh Siyiex pex tete awm pa krai pex, can pa deeh pawk Siyiex ka pex khankix, aux tak sang deeh krai pao an ka pex heue. Aux tak ang lai mox tix ceu kawx khaing pex heue." ⁵ Khaix an kix ah nin ka Yeramix, "Kieh Siyiex mawh pa mawh meh mai mhai rug pa kaux sijax daux sinax yix, phan yix ang hawt ti yuh an kuceu awm pa hoik tawm Siyiex pa mawh Siyiex maix hoek ka yix khaing maix, ⁶ viang an mawh pa mhawm ang ah, pa caox ang ah, yix tak sang cu nghiet ka lox krai Siyiex pa mawh Siyiex ex, ka pui pa ploi yix hu ka maix, sonsang mawh an pa mhawm piang yix, yam cu nghiet yix ka lox krai Siyiex pa mawh Siyiex ex heue." ⁷ Khaix hoik rheung kao ngaix, gumlox Siyiex hoek ka Yeramix heue. ⁸ Khaix an nawh kok ka Yawhanan kawn simex Kare mai cub cao kaing naing pa ot tau mai nawh khankix, jah ka pui iak tom hoek ka pui ting, ⁹ mai ah nin ka kix, "Siyiex pa mawh Siyiex ceu pui Isarelax pa hoik kieh pex aux hu khyox khaw tang pex ka plak sivoe Nawh Cao ah nin, ¹⁰ "Phan pex kawn ca ot ka daux haktiex in, Aux tak sang pang sang sum pex mai ang yieh pex laux mai Aux tak sang sum pex mai ang lai reeig ka pex heue. Mawh kheu Aux deeh doh keud ka grawng pa laux leeing, pa viex Aux hoek piang pex heue. ¹¹ Paw doh koe krax lhat graung ka simiang Babulon, pa mawh pui pa lhat pex ka, Siyiex ah nin, paw doh lhat graung ka nawh, mawh kheu Aux ot tau mai pex, sonsang taoh ka pex mai sonsang deeh teei pex lih khaing daux tawm taix nawh heue. ¹² Aux tak jhi krax caux rhawm tix ka pex mai nawh tak sang caux rhawm piang pex mai tak kieh pex deeh ing ka haktiex cao tix heue. ¹³ Viang mawh nan, phan pex ah nin, yix ang lai ot ka daux haktiex in mai ang cu nghiet ka gumlox Siyiex, pa mawh Siyiex pex ¹⁴ ah nin, ang mawh, yix sang hu ka meung Ejiptux ka dee ang yix lai pub ka naing mai dee ang yix lai mhong ka lox teettawng mai ka dee ang yix cai rhawm ka blah mai yix tak sang hu pang tix ot tan heue. ¹⁵ "Pui Yudax pa kawn deuk khankix eue, nghiet ka gumlox Siyiex yam in liak! Siyiex Cao kru naing raoma, pa mawh Siyiex ceu pui Isarelax ah nin, phan pex veeh ngai tix sonsang laig ka daux meung Ejiptux mai rug ot tan tete, ¹⁶ Khaix an vaig lawm pa lhat graung pex ka, tak sang krup pex ka daux meung Ejiptux mai sibhawm praix ceu pa hoik lhat graung pex ka, tak sang hawt khaix pex ka daux meung Ejiptux mai pex tak yaox tix yum tan heue. ¹⁷ Mawh kheu nan, pui ku kaux pa veeh ngai tix hu ka meung Ejiptux mai sonsang ot tan, kix tak yum ka vaig mai ka sibhawm praix mai ka jhawm saux preng heue. Pui tix kaux kawx tak ang lai deuk mai ang lai glawd khaing pa laux leeing, pa sang viex Aux hoek piang kix heue. ¹⁸ Grawh grawng nawh, Siyiex Cao kru naing raoma pa mawh Siyiex ceu pui Isarelax ah nin, Awm hoik klup Aux krax song rhawm mai krax meet rhawm tix lih piang pui ot ka veng Yerusaliem khankix, awm an, Aux tak sang klup krax meet rhawm tix lih piang kix yam laig ot kix daux meung Ejiptux heue. Pex tak sang yaox ti kham pa jhax lawg, pa daox deng, pa nunai mai lox sibriem mai pex tak ang lai pon ti yaox ka dee in khaix in tix bawg kawx heue. ¹⁹ Pui Yudax pa kawn deuk khankix eue, Siyiex hoik krai grawng pa dex dawd mai pex, paw hu ka meung Ejiptux kieh pex kriem tawng ka tawx Aux satix ka pex daux in singaix heue. ²⁰ Grawh grawng nawh, pex hoik mawh pui pie lhen ka daux rhawm yam ploi pex aux hu ka Siyiex, pa mawh Siyiex pex ka daux pa ah nin, rawg bwan son yix ka Siyiex, pa mawh Siyiex ex mai awm pa krai Siyiex, pa mawh Siyiex maix khawmuik, awm an deeh krai pao grawng an ka yix mai yix tak sang hawt ti yuh an heue. ²¹ Aux hoik krai pao grawng an ka pex daux in singaix, viang mawh nan, pex ang lai cu nghiet ka lox Siyiex pa mawh Siyiex pex mai ka can pa hoik tawm Nawh Cao hoek ka pex khaing aux heue. ²² Mawh kheu nan, yam in kieh pex kriem tawng ka sang yaox pex ti yum ka vaig ka sibhawm praix mai ka jhawm saux preng khankix ka dee koe rhawm pex ti sang hu bang tix ot heue."

¹ Khaix hoik krai Yeramix gumlox pa tawm Siyiex khawmuik ka pui hun, pa mawh gumlox Siyiex pa mawh Siyiex kix khawmuik, ² Azarix kawn simex Hosha, Yawhanan kawn simex Kare mai can pui pa yaw ka tokaux tix khankix, ah nin ka Yeramix, "Maix krai lox pie lhen heue. Siyiex yix ang lai ploi maix hoek ah nin, paw hu ka meung Ejiptux, sonsang bang tix ot tan heue. ³ Viang mawh nan, Baruk kawn simex Nerix, hoik jeeh nyaw maix hoek tieh feen ka yix sonsang ap yix ka daux tawm taix pui Khaladie khankix, sonsang pah kix yix yum mai rhim yix hu mawh pui pa giex laung ka veng Babulon heue." ⁴ Mawh kheu nan, Yawhanan kawn simex Kare mai cao kaing naing khaing daux kru naing khankix mai khawm pui hun khankix, ang lai cu nghiet ka lox Siyiex, sonsang ot tix ka daux meung Yudax heue. ⁵ Viang mawh nan, Yawhanan kawn simex Kare mai cao kaing naing khaing daux kru naing khawmuik, hoik viex pui Yudax pa kawn deuk khankix pa hoik deeh ing, sonsang ot ka daux meung Yudax, can meung haktiex pa hoik grheu kix khaing, ⁶ simex, bun mai kawn nyawm, khawm kawn bun simiang mai ka pui pa hoik prah Nebuzaradan cao kaing naing piang pui naing pa pau simiang khankix, tau mai Gedalix kawn simex Ahikam kawn simex Shaphan mai cao jhai Yeramix mai Baruk kawn simex Nerix khankix hu heue. ⁷ Mawh kheu nan, kix hu ka meung Ejiptux, mawh kheu kix ang lai cu nghiet ka lox Siyiex. Kix hu singai tom hoek ka veng Taphaniet heue. ⁸ Khaix an gumlox Siyiex hoek ka daux veng Taphaniet ah nin, ⁹ "Yaog simaox ting khankix ka taix tix mai sipaung an khankix plak sivoe ngai pui Yudax ka daux biang lon tiex sin, pa koe ka diang dee laig ka nyiex Pharaw ka daux veng Taphaniet, ¹⁰ ah nin ka kix, Siyiex Cao kru naing raoma pa mawh Siyiex ceu pui Isarelax ah nin, jhak heue, Aux sang ploi maix viex kawncau Aux Nebukhaneza simiang Babulon hoek mai sang deuh dang ngeung nawh piang simaox an khankix, pa hoik sipaung Aux heue. Nawh tak naih nyiex gox tix piang simaox an khankix heue. ¹¹ Yam hoek nawh, nawh tak yuh laux ka meung Ejiptux mai ap kix pa keung tix yum ka daux pa yum mai pa keung ti mawh pa giex laung ka daux pa giex laung mai pa keung ti yum ka lawm vaig ka daux lawm vaig heue. ¹² Nawh tak gleeing nyiex siyiex Ejiptux khankix ka ngu mai nawh tak gleeing kix mai rhim kix hu mawh pa giex laung heue. Awm ceep cao liang yung ka kraung ceep tix, nawh tak ceep ka meung Ejiptux mai nawh tak sang lih hu ka daux krax pa nhim rhawm khaing tan heue. ¹³ Nawh tak raig ti tik ka rong simaox pa singax singeh veng Bietshemiet, pa koe ka daux haktiex Ejiptux mai nyiex pui Ejiptux khankix laux leeing mai nawh tak gleeing ka ngu heue."

¹ Gumlox pa hoek ka Yeramix grawng pa dex dawd mai pui pa ot ka meung Ejiptux, pui ot daux veng Migadawlax, ka veng Taphaniet, ka veng Nawpha mai ka haktiex Patarot khankix ah nin, ² "Siyiex Cao kru naing raoma, pa mawh Siyiex ceu pui Isarelax ah nin, pex hoik yaox ka krax kha rhawm pa viex Aux hoek piang veng Yerusaliem mai piang meung Yudax khankix, mai jhak heue, daux singaix baoh dee in hoik yiien yawg mai ang lai koe pui pa ot ka tix kaux kawx, ³ kheu jao pa caox caig yuh kix, hoik so krax pa song rhawm Aux lih, mawh kheu gleeing kix nyawng bhawng mai yuh kaing jhaw krub siyiex pui tang kaux khankix pa ang pex mai keeing pex sax tawng ka heue. ⁴ Viang Aux hoik ploi kawncau cao jhai tix khankix, kaoh caocao hoek krai ka pex lawlawx son ang pex sang yuh ceu pa seeing in pa koeng Aux ka kawx." ⁵ Viang mawh nan, kix ang nghiet mai ang daong yhaok tix sonsang via khaing pa caox kix mai ka pa gleeing ti nyawng bhawng ka siyiex tang kaux khankix heue. ⁶ Mawh kheu nan, krax meet rhawm meet rhi Aux mai krax song rhawm aux hoik klup lih mai hoik gleeing veng pa koe daux haktiex Yudax mai pa koe piang krax veng Yerusaliem khankix mai an khankix laux leeing mai mawh dee yiien pui awm pa hoik lih ti mawh ka daux in singaix heue. ⁷ Mawh kheu nan, Siyiex Cao kru naing raoma, pa mawh Siyiex ceu pui Isarelax ah nin, "Kheu pex lai yuh pa caox ceu pa kied ting piang tokaux tix, sonsang tat dud simex, bun mai kawn nyawm khawm kawn ngie lih khaing haktiex Yudax tom ang lai deuk tix kaux kawx, ⁸ kheu pex lai so Aux koe krax pa meet rhawm ka kaing jhaw pa yuh taix tix, ka pa gleeing nyawng bhawng ka siyiex tang kaux khankix, ka daux haktiex Ejiptux dee hu ot pex, sonsang tat dud pex tokaux cao tix mai mawh pa pon krax pa jhax lawg mai lox sibriem sinax ceu pui pa koe piang haktiex kheu jao pa yuh ka mawx lie? ⁹ Mawh hoik piawm pex pa caox yuh keeing tix, pa caox yuh simiang pui Yudax mai pa caox yuh moeng kix mai pa caox yuh cao pex mai pa caox yuh moeng pex khankix, pa lud kix ka daux haktiex Yudax mai piang krax veng Yerusaliem khankix lie? ¹⁰ Kix ang sax koe krax tiem rhawm tom hoek ka daux in singaix, kix ang lhat graung mai kix ang lawng hawt gumlox tat jhawm prawng Aux mai ang yungyi ka lox lai beenli, pa deuh aux khankix ka plak sivoe pex mai keeing pex heue." ¹¹ Mawh kheu nan, Siyiex Cao kru naing raoma, pa mawh Siyiex ceu pui Isarelax ah nin, "Jhak heue, Aux tak veeh ngai tix sonsang yuh pa caox ka pex mai sonsang tat dud ka pui Yudax khawmuik heue. ¹² Aux tak teei pui Yudax pa kawn deuk khankix, pa veeh pakngai tix sonsang laig ka daux meung Ejiptux mai sonsang bang tan mai kix tak yaox krax laux leeing mai yum ka daux meung Ejiptux tan heue. Kix tak laux leeing ka vaig mai ka sibhawm praix heue. Jah ka pui iak tom hoek ka pui ting, kix tak yum ka vaig mai sibhawm praix mai kix tak sang yaox ti kham pa jhax lawg pa daox deng mai pa salao mai lox sibriem heue. ¹³ Grawh grawng nawh, Aux tak ciyang ka pui pa ot ka daux meung Ejiptux, awm hoik ciyang Aux veng Yerusaliem ka vaig, ka sibhawm praix mai ka jhawm saux preng khankix, ¹⁴ son ang pui Yudax pa kawn deuk khankix, pa hoik lih hu ka daux meung Ejiptux, sonsang bang tan, ang lai klawd mai ang lai im ju tix kaux kawx mai kix tak ang lai deeh pon ing ka meung Yudax, ka dee koe rhawm kix ti sang ing ot heue. Grawh grawng nawh, pui tix kaux kawx ang lai yaox ti ing, lheu khaing pui glawd khaing an khankix heue." ¹⁵ Khaix an pui khankix pa hoik tawng ka grawng pa gleeing moeng kix nyawng bhawng ka siyiex tang kaux an khankix, tau mai bun pa hoik cung tix ot hawt an, tom haoh hun mai pui khawmuik, pa ot ka meung Ejiptux, ka baoh haktiex Patarot, deeh pawk lox ka Yeramix ah nin, ¹⁶ "Awm gumlox pa hoik krai maix ka yix ka daux min ceu kaux Siyiex, yix tak ang lai nghiet heue. ¹⁷ Viang mawh nan, yix tak sang yuh awm can ceu pa hoik lih khaing daux jheeh cao yix, sonsang gleeing nyawng bhawng ka laux simiang raoma mai lhauk krax tan pa nyaux khankix, ka son nawh, awm hoik sax yuh yix mai keeing yix khankix mai simiang yix mai cao kaing yix khankix heue. Mawh kheu yix hoik kied koe pa ih tom nie mai hoik mhawm ot mhawm koe mai ang lai yaox krax kha rhawm heue. ¹⁸ Viang mawh nan, khaix ang yix lai geeing nyawng bhawng ka laux simiang raoma mai ang lai lhauk krax tan pa nyaux ka nawh, yix hoik cud cha kuceu mai hoik laux leeing ka lawm vaig mai ka sibhawm praix heue." ¹⁹ Bun khankix baox ah nin, "Yam gleeing yix nyawng bhawng ka laux simiang raoma mai yam lhauk krax tan pa nyaux khankix ka nawh, mawh yuh yix khlawp blah sonsang krub ka nawh mai lhauk krax tan pa nyaux khankix ka nawh, khawm ang ti pon akhwang ka mex tix lie?" ²⁰ Khaix an Yeramix deeh krai ka pui khankix pa mawh simex, bun mai pui khankix pa deeh pawk lox nawh, ka daux pa ah nin, ²¹ "Nyawng bhawng pa hoik gleeing pex ti tan ka veng Yudax mai piang krax veng Yerusaliem khankix, pex mai khawm keeing pex khankix, simiang pex mai cao kaing pex mai pui haktiex khankix, mawh ang Siyiex lai doh keud ka kix mai ang Nawh Cao lai deuh ka daux rhawm tix lie? ²² Mawh kheu nan, Siyiex ang lai pon gun yeung ka an tom rheung, kheu jao pa caox yuh pex mai pa seeing brai pa lud pex heue. Mawh kheu nan, haktiex pex tom mawh dee yiien pui mai dee pa daox deng mai dee jhax lawg mai ang lai koe pui ot ka tix kaux kawx, awm pa koe daux in singaix heue. ²³ Mawh kheu hoik gleeing pex nyawng bhawng mai kheu hoik lud pex ka Siyiex mai ang cu nghiet ka lox Siyiex mai ang lawng hu hawt gumlox tat jhawm prawng Nawh Cao mai lox lai beenli Nawh Cao mai pa kham sakse Nawh Cao khankix, mawh kheu nan, krax kha rhawm in lih hoek piang pex awm pa koe ka daux in singaix heue. ²⁴ Lheu khaing an, Yeramix deeh ah nin ka pui hun mai ka bun khankix, "Pui Yudax pa ot ka daux meung Ejiptux khankix eue, nghiet ka gumlox Siyiex heue. ²⁵ Siyiex Cao kru naing raoma pa mawh Siyiex ceu pui Isarelax ah nin, pex mai moeng pex khankix, hoik krai ka jheeh tix mai hoik yuh an khankix ka taix tix ah nin, yix tak sang yuh awm lox sijax pa deuh yix tete, sonsang gleeing yix nyawng bhawng ka laux simiang raoma mai lhauk krax tan pa nyaux ka nawh heue. Pex tak sang priex awm lox sijax pa yuh tix tete mai hawt ti yuh awm lox sijax an heue. ²⁶ Mawh kheu pui Yudax pa ot ka daux meung Ejiptux khankix eue, nghiet ka gumlox Siyiex, Siyiex ah nin, jhak heue, Aux hoik tiextu ka min ceu kaux pa ting lhaong tix, son ang pui Yudax pa ot ka daux meung Ejiptux tix kaux kawx lai kok ceu kaux Aux ka jheeh ti ah nin, Siyiex mawh Siyiex pa im ju heue. ²⁷ Jhak heue, Aux tak pau tix jhak ka kix, son krax pa laux mai ang lai mawh son krax pa mhawm heue. Pui Yudax khankix, pa ot ka daux meung Ejiptux, tak laux leeing ka lawm vaig ka sibhawm praix, tom ang bawg yam dee sidah sidu nyang hoek ka kix heue. ²⁸ Viang mawh nan, pui pa glawd khaing lawm vaig pa deeh ing khaing meung Ejiptux mai hoek ka haktiex meung Yudax mawh pa tux, pui lih hu ka meung Ejiptux, sonsang bang tan, tak tawng ka gumlox pa kaux cong mawh gumlox Aux pa kaux cong lie? Phan ang mawh nan, gumlox kix lie? ²⁹ Siyiex ah nin, in tak sang mawh mhai rug ka son pex mai Aux tak sang ciyang ka pex, ka dee in sonsang tawng pex kaux cong gumlox Aux tete yam hoek krax kha rhawm piang pex heue. ³⁰ Siyiex ah nin, jhak heue, Aux tak sang ap Pharaw Hawphara simiang meung Ejiptux ka daux tawm taix pui koeng nawh khankix mai ka daux tawm taix pui pa sawg ka ju nawh, awm ap Aux Zedekix simiang Yudax, ka daux tawm taix Nebukhaneza simiang Babulon pui koeng nawh pa sawg ka ju nawh heue."

¹ Gumlox pa krai cao jhai Yeramix ka Baruk kawn simex Nerix, gumlox pa hoik tiiem nawh ka daux phuk lai tix pheen, ka grawng pa jhi Yeramix ka nawh, ka daux baux num kwang Yehoyakim kawn simex Yosiyax simiang Yudax haktiex ka daux pon num tix num ah nin, ² "Baruk eue, Siyiex pa mawh Siyiex ceu pui Isarelax ah nin ka maix, ³ maix ah nin, kieh krax kha rhawm hoek ka aux yam in heue, grawh grawng nawh, Siyiex hoik baox naok krax laux rhawm piang krax pa laux rhawm aux heue. Aux taug mao mai hoik ngia tom ang aux lai yaox dee laux lee tix heue. ⁴ Siyiex ah nin, mawh kheu nan maix tak sang krai ah nin ka nawh, jhak heue, ceu pa hoik pang Aux ti deuh khankix Aux tak sang yieh laux ka mai pa hoik sum Aux khankix, Aux tak reeig ti tik, ka can pa koe ka daux haktiex in khawmuik khawm leeing heue. ⁵ Mawh sawg maix ka ceu pa kied ting lhaong ka son tix lie? Paw lai sawg kah, Siyiex ah nin, Aux tak sang viex krax kha rhawm hoek piang can pa koe nex koe nham khawmuik heue. Viang mawh nan, Aux tak tawx ju ka maix awm kraung pa pon rhim ti teei ka can dee sang hu maix heue."

¹ Gumlox Siyiex pa hoik hoek ka cao jhai Yeramix son grawng pa dex dawd mai pa ciyang son ceu pui khankix, ² grawng haktiex Ejiptux pa dex dawd mai cub kru naing Pharaw Nekhaw, simiang haktiex Ejiptux pa ot hawt rawm klawng Yupharitix, ka baoh haktiex Rakhamix mai pa hoik pex Nebukhaneza simiang Babulon ka daux num kwang Yehoyakim kawn simex Yosiyax, simiang Yudax ka haktiex pon num tix num heue. ³ "Kieh khre rien kraung naing mai kraung plah tieb naing khankix mai greed tix dex daux naing heue. ⁴ Pex pui naing brung khankix eue, tok ka an brung mai brug ka brung, cung sijung tau mai pa ceep tix mhok rhiem, klaing pliah lawm mai ceep ka kraung naing heue. ⁵ Aux hoik yaox ka daox aw kix mai deeh veeh tix ing plak khaix, kheu jao pa yuh ka mawx lie? Pui naing ting riang rao kix khankix hoik som nai, kix nied tix to mai ang lai jhak plak khaix tix, grawh grawng nawh, krax lhat graung hoik koe hawt vung viang kix khawmuik, Siyiex ah nan heue. ⁶ Pui phai ang pon to hu mai pui pa kied ting riang rao tak ang glawd, kix tak sideeing caong tix mai goh, ka see haktiex plak laong, hawt rawm klawng Yupharitix heue. ⁷ In mawh pui mawx, pa hoek awm hwan rawm klawng Nilax mai lih hu awm rawm klawng khankix lie? ⁸ Haktiex Ejiptux tak yaog ti kaoh awm hwan rawm klawng Nilax mai awm lih hu rawm klawng khankix, mai nawh ah nin, Aux tak haok piang an mai kheem ka haktiex an mai yuh veng an mai pui ot ka daux an laux leeing heue." ⁹ Brung khankix eue, haok heue, ling lawx naing brung khankix eue, kieh lox sinum lih heue. Kieh pui pa kied ting riang rao khankix lih hoek plak sivoe, pa mawh pui Ethiopia mai pui Libiyan khankix pa giex kraung plah tieb naing mai pui Libiyan pa cheung ka puing tix ak khankix heue. ¹⁰ Mawh kheu singaix in mawh singaix Siyiex Cao kru naing raoma, singaix pa deeh pawk bix, sonsang pawk Nawh Cao bix tix ka pui koeng Nawh khankix, lawm vaig Nawh kiied tix ih tom sak mai nyaux tom yoek ka nham kix heue. Mawh kheu Siyiex Cao kru naing raoma, hoik yuh krax tan pa appong ka haktiex plak laong, hawt rawm klawng Yupharitix heue. ¹¹ Kawn bunkrih haktiex Ejiptux, hu ka haktiex Gilat mai teei ka peeh khaox Balasan heue. Hoik shiao sidah khankix tom nie giex going maix ang tie moi jhawm saux ka heue. ¹² Can pui khankix hoik mhong ka grawng krax pa kaig tua maix mai lox yiiem yo maix hoik tah khawm bee haktiex heue. Grawh grawng nawh, pui pa ting riang rao hoik lai sideeing ka paox tix, tix kaux lai tix kaux mai kiex khawm ra hoik goh tau piang tiex heue." ¹³ Gumlox pa krai Siyiex ka cao jhai Yeramix, sonsang hoek Nebukhaneza simiang Babulon ti sang puing ka haktiex Ejiptux, ka daux pa ah nin heue. ¹⁴ "Krai pao grawng an ka daux haktiex Ejiptux mai krai ka daux veng Migadawlax mhong heue. Krai pao ka daux veng Nawpha mai veng Taphaniet ah nin, cung sijung mai khre rien tokaux tix, mawh kheu lawm vaig Nawh Cao kiied ti ih can pui ot hawt rawb rim maix khawmuik heue. ¹⁵ Pui pa koe rhawm vao rhawm cong maix khankix lai mawh pa som kheu jao pa yuh ka mawx lie? Kix ang lai pon cung sijung kheu hoik nyhot Siyiex kix goh heue. ¹⁶ Nawh Cao hoik kieh pui tom nie goh piang paox tix, tix kaux lai tix kaux mai kix ah nin, yaog ti kaoh heue, kieh ex deeh ing ka ceu pui tix mai ka haktiex dee keh dee kung ex, khaing krax pa kha rhawm ka lawm vaig in heue. ¹⁷ Kix kok yo ah nin, "Pharaw simiang haktiex Ejiptux, mawh pa giex going khaing, hoik kieh bawg yam pa tat tix luan hu heue. ¹⁸ Simiang pa koe min ceu kaux Siyiex Cao kru naing raoma, ah nin, "Awm im ju Aux, mai awm kriem koe gawng Tabaw ka sinax gawng lua khankix mai awm koe gawng Kharamelax hawt rawm sigrit sigra, awm an pui tix kaux tak sang hoek heue. ¹⁹ Maix kawn bun pa ot haktiex Ejiptux eue, khre rien tokaux tix, sonsang hu mawh pui pa giex laung heue. Mawh kheu veng Nawpha tak sang mawh pa laux leeing mai mawh dee pa yiien pui mai dee ang pui lai ot ka heue. ²⁰ Haktiex Ejiptux, mawh mawie shiang pa kied mhawm tix mu, viang mawh krax laux leeing, tak sang hoek khaing plak laong heue. ²¹ Viang pui pa vai nawh khankix hoik awm mawie pa kied kluing sinax kawx, mawh kheu kix hoik deeh veeh ti ing mai to luan tau mai paox tix heue. Kix ang lai pon cung sijung, mawh kheu singaix pa kha rhawm mai bawg yam krax ciyang hoek piang kix heue. ²² Lox nawh sinum awm luah lox siuing, mawh kheu kix hoik yaog tix hoek ka nawh tau mai kru naing tix cub mai viex moe hoek awm pui pa sang kid ka khaox heue. ²³ Siyiex ah nin, kix tak sang kid ka nong cie nawh, viang nong an mawh pa kied nhik kawx, mawh kheu mawh kix pa ang lai dak uik simin mai kied haoh hun khaing sido klai khankix heue. ²⁴ Kawn bun haktiex Ejiptux, tak sang kaig tua mai tak ap nawh ka daux tawm taix ceu pui pa kaoh khaing haktiex plak laong heue." ²⁵ Siyiex Cao kru naing raoma pa mawh Siyiex ceu pui Isarelax ah nin "Jhak heue, Aux tak sang viex krax ciyang hoek piang siyiex Amon pa koe ka daux veng nawh, piang simiang mai piang haktiex Ejiptux, piang siyiex kix, piang Pharaw kix mai piang pui pa een rhawm tix ka daux nawh khankix heue. ²⁶ Aux tak sang ap kix ka daux tawm taix, pui pa sawg tix pah ju kix mai ka daux tawm taix Nebukhaneza simiang Babulon mai ka daux tawm taix kawncau nawh khankix heue. Khaix an haktiex Ejiptux, tak sang deeh awm ka bawg yam singaix prim an khankix, Siyiex ah nan heue." ²⁷ Viang mawh nan, kawncau Aux Yakop eue, paw lhat graung, ceu pui Isarelax khankix eue, paw laux rhawm, grawh grawng nawh, jhak heue, Aux tak deeh taoh maix khaing dee pa kied singai mai khawm doeh ru maix khaing haktiex pa hoik yaox kix ti mawh pa giex laung, ceu pui Yakop tak dee hoek mai krax nyawm rhawm, pui tix kaux kawx tak ang lai pon kieh nawh koe krax lhat graung heue. ²⁸ Siyiex ah nin, kawncau Aux Yakop eue, paw lhat graung, mawh kheu Aux ot tau mai maix, Aux tak sang yuh ceu pui haktiex khawmuik, khaing dee hoik grheu Aux maix hu sidah sidu kawx, viang mawh nan, Aux tak ang lai kieh maix koe dee sidah sidu heue. Aux tak sang kieh maix mawh pa mhawm mhiem, mawh kheu Aux tak ang lai prah maix khaing krax pa kham geu khawmuik heue."

¹ Gumlox Siyiex, pa hoek bleeh ka cao jhai Yeramix Grawng pa dex dawd ka ceu pui Philitix khankix,sivoe sang puing Pharaw ka veng Gaza heue. ² Siyiex ah nin, "Jhak heue, rawm khakix tak sang lih khaing baoh plak laong mai khrawm tix lih mawh rawm ting, rawm an tak lih kheem haktiex mai can pa koe ka daux nawh khawmuik mai ka veng, khawm piang pui pa ot ka daux nawh khankix heue. Khaix an pui khankix tak yiiem yo mai can pui pa ot ka daux haktiex an khankix khawmuik, tak koe krax ngia ngeeit ka heue. ³ Yam mhong ka lox sinum kloh brung pa brug pui ting riang rao mai khawm lox sinum ling lawx naing brung pa to khankix, keeing khankix tak ang lai deeh veeh tix jhak ka kawn praix tix kheu hoik awn riang rao kix." ⁴ Mawh kheu singaix pa sang yuh ka pui Philitix khankix laux leeing tak sang hoek mai sonsang tat ti tik kix khaing veng Turux mai veng Sidon cao pa sang teem pa kawn deuk khankix heue. Mawh kheu Siyiex tak sang yuh ceu pui Philitix khawm pui pa kawn deuk khaing haktiex Kaptorax laux leeing heue. ⁵ Bawg yam sang khlao kaing veng Gaza hoik hoek, veng Ashakalon hoik tat khaing daux pui pa kawn deuk khaing baoh haktiex daux lung heue. Pex kawn sang pat nex rheung miex grheung lie? ⁶ Vaig lawm Siyiex eue, maix tak sang kawn rheung ang yawg tix miex grheung lie? Deeh laig ka daux phak vaig cao maix, laux lee tix mai ot yiien yawg heue. ⁷ Mawh kheu Siyiex hoik tawx lox ka nawh, sonsang yuh lawx piang veng Ashakelon mai ka haktiex praok rawm sigrit sigra nawh sang chix ot yawg ti yuh ka mawx lie? Nawh Cao hoik yaog ti deuh nawh yuh kaing ceu an tan heue."

¹ Grawng pa dex dawd mai haktiex Mawbax, Siyiex Cao kru naing raoma pa mawh Siyiex ceu pui Isarelax ah nin, "Kieh krax kha rhawm koe ka veng Nebaw, mawh kheu grawh grawng nawh veng an hoik laux leeing, veng Kirayarim hoik kaig tua mai hoik rhim hu, veng Misagap pa kaux cong pa koe dee lhaong hoik kaig tua mai hoik laux rhawm, ² ang lai koe pui yaogyaw ka haktiex Mawbax khaix in tix bawg kawx, ka daux veng Heshabon, kix sawg ti yuh pa caox ka veng Mawbax, veng Madamenax eue, hoek heue, mai tak tat maix hoek krax laux leeing, lawm vaig tak sang hawt khaix maix, ³ lox riag yo tak kaoh khaing veng Horonem, tau mai krax kha rhawm mai krax pa laux leeing pa ting lhaong heue. ⁴ Haktiex Mawbax hoik laux leeing mai mhong lox yiiem grai kawn nyawm iak khankix heue. ⁵ Kix hoik haok yiiem ka gawng Luhit, grawh grawng nawh, pui koeng khankix hoik mhong ka lox yiiem yo khaing krax lih ka veng Horonem grawng pa laux leeing heue. ⁶ To heue, sonsang glawd tix mai kieh awm gaw khaox kroh daux tiag heue. ⁷ Grawh grawng nawh, kheu jao een maix rhawm tix ka kaing yuh tix mai ka sinngao tix khankix maix kawx pui tak sang rhim hu heue. Siyiex Khemoshax tak sang rhim hu mawh pa giex laung, tau mai cao giex kaing li mai cao kaing nawh khankix heue. ⁸ Pui tud rhim tak sang hoek ku veng, ang lai koe veng pa glawd tix veng kawx heue. Daux lung daux ngawd khankix tak sang laux leeing, awm pa hoik krai Siyiex heue. ⁹ Tawx pruik ka haktiex Mawbax, sonsang pon to nawh ti hu dee singai, grawh grawng nawh, veng nawh khankix, tak yiien hu mai ang koe pui ot ka daux veng an tix kaux kawx heue. ¹⁰ Kieh pa jhax lawg koe piang pui an pa yuh kaing jhaw Siyiex ka daux pie lhen mai kieh pa jhax lawg koe piang pui an pa deeh yoi vaig khaing nham heue. ¹¹ Haktiex Mawbax hoik dawg koe pa yiien yawg tom yam kawn awn ju nawh, Nawh hoik tang sum ti ot piang riang rao cao ti mai ang lai yaox ti lih hu ka daux pa mawh tix pa giex laung heue. Mawh kheu nan, jhawm nawh kawn deuk ka daux nawh mai pa sioe bhawng nawh ang lai tieh loh tix heue." ¹² Mawh kheu nan, Siyiex ah nin, "Jhak heue, singaix bawg yam tak sang hoek mai Aux tak sang ploi pui hoek klup ka Mawbax awm klup ka rawm plix siiet heue. Kix tak klup aw plix siiet tom yi mai pah aw an lih mawh shiag mawh, shiag an heue. ¹³ Pui haktiex Mawbax tak sang kaig tua kheu jao siyiex Khemoshax, awm hoik kaig tua nyiex ma pui Isarelax khankix ka siyiex Betelax, pa een kix rhawm tix ka heue. ¹⁴ Pex tak sang pon ah, ex mawh pa kied ting riang rao mai mawh pui pa kaux cong son naing yuh ka mawx lie? ¹⁵ Haktiex Mawbax hoik laux leeing mai veng nawh khankix kawx hoik gleeing, pui awn ju pa hoik laug nawh khankix lih hu sonsang ap tokaux tix yum pa koe min ceu kaux simiang Siyiex Cao kru naing raoma ah nan heue. ¹⁶ Krax kha rhawm haktiex Mawbax hoik kied dex mai taix nawh mai krax tug kha nawh, hoik nied ti hoek heue. ¹⁷ Pex pa ot rawb rim nawh khankix eue, yiiem doe ka son nawh mai pex pa tawng ceu kaux nawh khankix eue, ah nin, khaox gix pa koe sibrawm mai pliah pa koe min plakngai hoik pot heue. ¹⁸ "Kawn bun pa ot daux veng Dibon eue, lih khaing pa koe min maix mai ngawm piang tiex sonsang siya tix heue. Grawh grawng nawh, pui pa sang tud rhim haktiex Mawbax hoik hoek dee ot maix, Nawh hoik yuh dee pa kaux cong maix khankix laux leeing heue. ¹⁹ Pui veng Aro khankix eue, cung ka praok krax mai pau tix jhak, chawk ti yaox ka pui pa to mai chawk ti yaox bun pa glawd ah nin, mawh ceu patix pa lih ti koe lie? ²⁰ Haktiex Mawbax hoik kaig tua, mawh kheu nawh hoik phawng max heue. Yiiem grai ka son nawh, krai an ka veng Anon, ka grawng hoik laux leeing haktiex Mawbax heue. ²¹ Krax prawng ca hoik hoek, dee lung haktiex, piang veng Holon mai veng Yahaza mai veng Mephat, ²² ka piang veng Dibon mai veng Nebaw mai veng Bietdibalatem, ²³ ka piang veng Kirayatem mai veng Bietgamulax mai veng Bietmeon, ²⁴ ka piang veng Kerot mai veng Bawzarax, piang veng haktiex Mawbax, pa koe dee singai mai dee dex heue. ²⁵ Rung haktiex Mawbax hoik tat dud mai plawng taix nawh hoik graig, Siyiex ah nan heue. ²⁶ Grawh grawng nawh, mawh kheu jhi nawh krax pa lhaong rhawm tokaux tix piang Siyiex, kieh nawh yoek heue. Mawbax tak sang lulieh tix piang haoh nawh mai nawh tak sang yaox ti kham krax nunai pui tix heue. ²⁷ Grawh grawng nawh, ang hoik mawh pui Isarelax, pa pon krax nunai khaing maix lie? Mawh hoik sax yaox ka nawh daux sinax pui briex lie? Mawh kheu yam krai maix grawng nawh yam mawx ang ah maix hoik vuh vied kaing tix kah heue. ²⁸ Pui pa ot ka daux haktiex Mawbax khankix eue, prah ka veng in khankix mai hu ot ka sinax rang mai kieh awm sikaux pa yuh mheem tix ka moing guh rang khankix heue. ²⁹ Ex hoik mhong ka koe min ting rhawm Mawbax mai ka daux pa kied ting rhawm nawh mai krax pa ca nyhau nawh, ka daux pa koe min tix mai pa kied blon lhaong rhawm nawh heue." ³⁰ Siyiex ah nin, "Aux tawng krax pa meet rhawm nawh, viang mawh nan, an ang lai mawh pa mhawm mhiem, krax pie lhen nawh khankix ang lai mawh ceu pa mawh meh tix ceu kawx heue." ³¹ Mawh kheu nan, Aux tak ngia ngheeik son Mawbax mai Aux tak yiiem son haktiex Mawbax khawmuik, Aux tak yiiem doe son pui pa ot ka daux veng Kirahariet khankix heue. ³² Nhu plix siiet Sibama eue, "Aux yiiem yo son maix, lheu khaing sang yiiem tix son veng Yaza heue. Kak maix khankix hoik luan tom hoek toi rawm sigrit sigra mai hoek bleeh tom ka rawm sigrit sigra Yaza heue. Pui tud rhim hoik bleeh sonsang rhim tix ka plix maix mai nhu plix maix heue. ³³ Krax gaux rhawm mai krax nyawm rhawm khankix, hoik rhim ti teei khaing daux tong kaung mai khaing haktiex Mawbax, Aux hoik kieh rawm plix siiet cud khaing dee krid rawm plix siiet mai ang lai koe lox yo pa gaux rhawm mai krid tix rawm plix siiet mai lox riag yo an ang mawh lox riag pa nyawm rhawm heue. ³⁴ Lox yiiem jah ka veng Heshabon tom hoek ka veng Elale mai veng Yahat, kix yo lox tix lih khaing veng Zawrax tom hoek ka veng Horonem awm lox mawie shiang pa tak kawn koe loe num heue. Grawh grawng nawh, rawm dung Nimarim tak mawh dee yiien pui ka heue." ³⁵ Lheu khaing an, Siyiex ah nin, "Aux tak kieh pui tan krax tan pa appong, ka dee lhaong khankix mai can pa gleeing nyawng bhawng ka siyiex nawh khankix dud hu heue. ³⁶ Mawh kheu nan, rhawm Aux tak ngia ngeeit son haktiex Mawbax awm lox luah shiao mai rhawm aux tak ngia ngheet son pui veng Kirahariet awm lox luah shiao, mawh kheu nan, sinngao pa hoik sawg kix khankix, hoik laux leeing heue. ³⁷ Mawh kheu pui ku kaux, tak khlao kaing tix mai khawm hauk bheup tix, piang taix kix kawx, tak sang mawh rhoi khaix pat khawmuik mai ceep chee rhix kawm piang nyoi tix heue. ³⁸ Krax yiiem doe pa kied ting tak hoek piang braux nyiex haktiex Mawbax khawmuik mai ka daux krax, Siyiex ah nin, mawh kheu Aux hoik yieh ka haktiex Mawbax laux awm pah ka aw pa ang lai chix shiao heue. ³⁹ Kix tak ngia ngeeit, ka pa hoik yieh nawh laux mai pa hoik deeh gah haktiex Mawbax ti ing tau mai krax pa kaig tua tix heue. Mawh kheu nan, haktiex Mawbax tak sang yaox ti kham krax pa nunai pui mai tak sang mawh pa lhat graung ka son pui khankix, pa ot hawt rawb riem nawh heue." ⁴⁰ Grawh grawng nawh, Siyiex ah nin, "Jhak heue, pui tix kaux tak po awm klang krih mai naih pruik tix piang haktiex Mawbax heue. ⁴¹ Nawh tak rhim ka veng Kerot mai tab pau dee pa kaux cong khankix heue. Yam an rhawm pui naing pa kied ting riang rao, pa ot ka daux haktiex Mawbax khankix, tak awm rhawm bun yam kham geu nawh krax saux yha bawg yam sang keh kawn tix heue. ⁴² Haktiex Mawbax tak sang laux leeing, tom ang nawh lai yaox ti mawh ceu pui tix cub, kheu jao hoik yaog nawh min plakngai tix lhaong khaing piang Siyiex heue. ⁴³ Siyiex ah nin, pui haktiex Mawbax eue, ceu pa lhat graung mai daux tiex mai kie hoik hoek piang maix heue. ⁴⁴ Pui pa to khaing pa lhat graung tak sang cod ka daux tiex mai pui pon lih khaing daux tiex, tak sang krix ka kie heue. Grawh grawng nawh, Aux tak sang yieh jhong num krax ciyang hoek piang haktiex Mawbax, Siyiex ah nin heue. ⁴⁵ Pui pa to ti peung greem veei veng Heshabon kawx taug mao heue. Viang mawh nan, ngu tak sang lih khaing veng Heshabon, pa mawh rao ngu tak lih khaing dee ot simiang Sihon, tak gleeing tom hoek ka daog haktiex Mawbax, khawm ka mhok khri pa ceep kawn simex, pa kieh ting rhawm ca nyhau khankix heue. ⁴⁶ Haktiex Mawbax eue maix tak kha rhawm tix heue. Pui Khemoshax khankix eue, pex tak laux leeing heue. Mawh kheu kawn praix pex khankix hoik mawh pui pa giex laung heue. ⁴⁷ Viang mawh nan, Aux tak sang deeh viex pui pa giex laung haktiex Mawbax khankix deeh ing, ka daux singaix pa sang hoek khankix, Siyiex ah nan heue. Mawh kheu nan, in mawh grawng pa prawng ca piang haktiex Mawbax heue."

¹ Siyiex krai grawng pa dex dawd mai ceu pui Amon khankix ah nin, "Mawh ang pui Isarelax koe kawn simex lie? Mawh ang koe pui pa sang plud sinngao nawh lie? Khaix an siyiex Milakham lai plud sinngao haktiex Gat mai pui nawh khankix hoik ot ka daux veng nawh khankix, kheu jao pa yuh ka mawx lie? ² Mawh kheu nan, Siyiex ah nin, jhak heue, singaix bawg yam tak sang hoek mai Aux tak sang kieh mhong ka lox sinum naing ka daux veng Raba dee ot ceu pui Amon khankix, an tak mawh pum pa laux leeing dee yiien pui mai nyiex yaong nawh khankix tak sang gleeing ka ngu heue. Khaix an Isarelax tak sang teei ti cie sinngao nawh, pa hoik rhim pui hu khaing nawh, Siyiex ah nan heue." ³ Veng Heshabon eue, "Ngia ngeeit heue, mawh kheu veng Ai hoik laux leeing, kawn bun veng Raba khankix eue, yiiem heue, fua tokaux pex ka chee rhix pa kawm heue. Yiiem doe mai to hu jee hu blaong ka hawt guh veng, mawh kheu siyiex Milakham khawm cao giex kaing li nawh mai cao kaing nawh khankix hoik mawh pa giex laung heue. ⁴ Kawn bun pa ang kaux sijax eue, maix lai yaw rangdi ka daux lung daux ngawd ot tix khankix mai een rhawm ka kraung khrai sinngao tix ka daux pa ah nin, mawh pui mawx pa sang pon hoek yuh aux laux lie? ⁵ Siyiex Cao kru naing raoma ah nin, jhak heue, Aux tak sang viex krax lhat graung hoek piang maix, khaing pui pa ot hawt rawb rim maix khawmuik heue. Tak sang grheu pex lih ku kaux tete mai ang lai koe pui pa sang deeh kraix khrawm pex pa hoik prung prangtix kaux kawx heue. ⁶ Viang mawh nan, khaix an, Aux tak sang deeh viex pui Amon pa giex laung khankix hoek heue. Siyiex ah nan heue." ⁷ Siyiex Cao kru naing raoma ah nin ka grawng pa dex dawd mai haktiex Edom, "Mawh hoik uik pingnya cuyi ka daux haktiex Teman lie?, mawh hoik grai grup pui pa chix tawx krax keud ka daux pa lhak haing lie? Mawh hoik grai pingnya cuyi kix lie? ⁸ Pui ot ka daux veng Dedan khankix eue, deeh plak tix to mai hu ot ka dee raux heue. Grawh grawng nawh, Aux sang viex krax kha rhawm Esaw hoek piang nawh yam ciyang Aux ka nawh heue. ⁹ Phan pui kraix khrawm plix siiet khankix hoek ka maix, mawh ang kix lai kieh plix siiet khankix deuk tiblah lie? Phan pui briex hoek yam pon sawm, mawh ang kix yuh krax laux leeing, tom hoik fah rhawm tix lie? ¹⁰ Viang mawh nan, Aux sang peeik ka kraung ceep Esaw mai Aux plak ka dee mox nawh tix khankix tom ang nawh lai glip heue. Doeh ru nawh khankix hoik laux leeing, puxaik nawh mai paox plawg nawh mai khawm nawh ang lai koe khaix in pie tix bawg kawx heue. ¹¹ Prah ka kawn nyawm pa ang koe miex keeing maix khankix, Aux tak sang priex kix im ju mai kieh miexmai khankix een rhawm tix ka Aux heue." ¹² Mawh kheu Siyiex ah nin, "Jhak heue, pui pa ang keung tix nyaux ka kawk nyaux an mai phan nyaux ka, Mawh Sang khaw maix tix luan khaing pa ciyang lie? Maix tak ang yaox ti luan khaing pa ang ti nyaux, viang mawh nan maix tak yaox ti nyaux tete heue. ¹³ Siyiex ah nin, mawh kheu Aux hoik tiextu ka tokaux tix, sonsang lih mawh haktiex Bawzarax dee yiien pui, pa sibriem pui, dee pa som nai mai dee jhax lawg heue. Veng an tak mawh pa hoek krax laux leeing sijheeng khawmuik heue. ¹⁴ Aux mhong lox satang khaing Siyiex mai grawng pa hoik ploi Nawh cao cau hu ka ceu pui khankix, kaoh mai khrawm paox ti hoek yuh naing ka haktiex Edom heue. ¹⁵ Mawh kheu Aux tak sang yux maix mawh ceu pui pa iak ka daux sinax ceu pui khankix mai pa nunai pui khankix ka heue. ¹⁶ Krax ting rhawm ca nyhau maix mai pa yaw rangdi ka daux rhawm tix hoik pie lhen ka maix, pex, pa ot ka daux rang mai ka gawng lhaong khankix eue, Viang maix yuh mheem tix ot dee lhaong awm klang kawx, Aux tak sang teei maix lih khaing tan, Siyiex ah nan heue. ¹⁷ Haktiex Edom tak mawh pa daox deng, pui pa hu ka baoh an ku kaux tak koe pa daox deng mai tak sibriem ka nawh khankix khawmuik heue. ¹⁸ Siyiex ah nin, awm laux leeing veng Sawdom mai veng Gawmawrax khankiex mai veng pa dex hawt rawb rim nawh khankix, ang lai koe pui pa ot ka daux haktiex Edom mai kawn pui pa ot ka daux haktiex an tak ang lai koe tix kaux kawx heue. ¹⁹ Jhak heue, nawh tak sang kaoh awm sivai sangsi khaing daux tiag hawt rawm klawng Yawdan mai hoek ka dee ot pui pa kaux cong khankix heue. Viang mawh nan, Aux tak sang kieh nawh to sijaox khaing nawh heue. Aux tak laug mai yaog pui pa sang kwang piang nawh heue. Grawh grawng nawh, mawh pui mawx pa sang awm aux lie? Mawh pui mawx pa pon tat bawg yam piang Aux lie? Mawh cao liang yung mawx, pa pon cung ka plak sivoe Aux lie?" ²⁰ Mawh kheu nan, nghiet ka kaing pa yiag pa bak Siyiex, pa sang yuh Nawh Cao krax laux leeing piang haktiex Edom mai kaing pa yiag pa bak Nawh Cao ti yuh krax laux leeing piang pui pa ot ka daux haktiex Teman mai sigrhang ka cub yung iak khankix hu tete, Nawh Cao tak kieh dee ot dee koe kix mawh dee yiien pui heue. ²¹ Haktiex yung yang kheu pa grhup kix, hoik mhong ka lox riag yo kix, tom hoek ka rawm sigrit sigra raoh heue. ²² Jhak heue, nawh tak hoek mai po awm klang krih mai naih pruik tix kheem piang veng Bawzarax, daux singaix ah rhawm pui pa ting riang rao haktiex Edom khankix, tak awm rhawm bun pa saux yam sang keh nawh kawn tix heue." ²³ Gumlox pa dex dawd ka veng Damasekat, veng Hamat mai veng Arapat hoik koe krax twah, mawh kheu hoik mhong kix lox satang pa ang mhawm, kix hoik laux rhawm, krax khi rhawm kix hoik awm puk pak rawm sigrit sigra mai ang lai chix yiien yawg heue. ²⁴ Veng Damasekat hoik kied iak riang iak rao mai veeh tix sang to, krax lhat graung hoik ceep ka nawh heue. Krax saux mai krax laux rhawm hoik hoek piang nawh, awm bun pa saux yam sang keh nawh heue. ²⁵ Veng pa koe min mai veng pa koe krax gaux rhawm Aux, ang lai prah tix kheu jao pa yuh ka mawx lie? ²⁶ Mawh kheu nan, pui awn ju veng an khankix tak goh ka daux krax mai tak yuh laux ka pui naing khawmuik daux singaix an heue. Siyiex Cao kru naing raoma ah nan heue. ²⁷ Aux tak cux ngu ka guh veng Damasekat mai proe yuh ka nyiex haw Benhadat khankix heue." ²⁸ Siyiex ah nin, son grawng pa dex dawd mai haktiex Keda, haktiex Hazaw khankiex, pa sang puing Nebukhaneza simiang Babulon heue. Yaog tix kaoh mai haok rhim ka haktiex Keda ka pui plak lih singaix khankix heue. ²⁹ Kix tak rhim ka nyiex gox mai phung yung kix hu singai heue. Teei man tieb, khawm kraung shiao mai kala uk khankix mai kix kok yo ah nin ka kix, krax lhat graung hoik hoek ku daog dawn heue. ³⁰ Siyiex ah nin, pui haktiex Hazaw khankix eue, to hu dee singai, ot ka baoh dee raux, mawh kheu Nebukhaneza simiang Babulon hoik bak viang ti sang yuh pex laux leeing mai hoik koe rhawm keud grawng pa sang yuh tix ka pex heue. ³¹ Siyiex ah nin, kaoh heue, hu ka ceu pui magmi mai pa ang koe krax khi glawh mai pa ang sax koe siviex veng mai pa ang sax song jhong siviex khankix, pa tang ot nong nong heue. ³² Kala-uk kix mai tobrie pa kied nie haoh kix tak sang mawh son pa tud rhim heue. Aux tak sang kieh ceu pui khlao hauk sibax tix khankix prung prang rairuat tom hoek kudaog dawn ka dee singai mai Aux tak viex krax kha rhawm khaing kudah dee hoek piang khawmuik, Siyiex ah nin heue. ³³ Haktiex Hazaw mawh dee ot sox praix mai mawh dee yiien yawg pui leeing ju, ang lai koe pui pa ot tan mai ang lai koe kawn pui pa sang ot ka daux haktiex an pie tix kaux kawx heue." ³⁴ Gumlox Siyiex hoek bleeh ka cao jhai Yeramix grawng pa dex dawd son yuh laux ka haktiex Elam, num jah Zedekix simiang Yudax ti kwang ka haktiex ah nin, ³⁵ "Siyiex Cao kru naing raoma ah nin, jhak heue, Aux tak raig ka ak haktiex Elam, pa dawg mawh riang rao pa kied ting lhaong kix heue. ³⁶ Aux tak viex bhaung pon ceu khaing pon daog raoma khankix hoek ka haktiex Elam mai prung prang kix luan ka sivoe bhaung an, haktiex dee ang pui Elam pa hoik grheu Aux khankix hoek kah, ang lai koe tix meung kawx heue. ³⁷ Grawh grawng nawh, Aux tak kieh pui haktiex Elam khankix koe krax lhat graung ka sivoe pui koeng kix mai sivoe pui pa sawg ti pah ju kix heue. Aux tak viex krax laux leeing mai krax pa song rhawm Aux hoek piang kix, Siyiex ah nin, mai Aux tak ploi vaig hawt kix, tom sidah hoek bawg yam ang Aux nyang hoik yuh kix laux leeing heue. ³⁸ Aux tak sang yaog ti deuh dang ngeung tix ka daux haktiex Elam mai tak sang kieh simiang mai cao kaing khankix laux leeing khaing tan, Siyiex ah nan heue. ³⁹ Viang mawh nan, khaix singaix an, Aux tak sang deeh viex pui haktiex Elam pa giex laung an khankix deeh hoek, Siyiex ah nan heue."

¹ Gumlox pa krai Siyiex grawng pa dex dawd ka veng Babulon mai ka ceu pui Khaladie khankix khaing cao jhai Yeramix, ² krai pao grawng ceu an ka sinax ceu pui khankix, kok yo mai pak ka chix, krai lao ka grawng an khankix mai paw mox ti deuh ka an mai krai ah nin, "Hoik rhim ka veng Babulon heue. Siyiex Balax hoik kaig hoik tua heue. Siyiex Merawdak hoik graig hoik pot, riang rao krub Babulon khankix hoik kaig tua mai hoik graig hoik pot heue. ³ Mawh kheu ceu pui tix cub tak kaoh khaing plak laong mai yuh haktiex Babulon laux leeing mai kieh haktiex an mawh dee yiien pui mai pui ot tan ang lai koe tix kaux kawx heue. Kix mai tobrie kix, tak sang gah tix heue. ⁴ Siyiex ah nin, ka daux singaix an mai bawg yam an, kawn praix ceu pui Isarelax tak sang hoek bleeh tau mai kawn praix ceu pui Yudax mai kix sawg ka Siyiex, pa mawh Siyiex tix tau mai lox pa yiiem yo tix heue. ⁵ Kix veeh ngai tix sawg krax sang hu ka veng Zion ah nin, hoek mai kieh ex sitoe tix ka Siyiex tau mai yuh sijax mukheu pa kaux cong leeing ju, pa ang lai chix piawm ka heue. ⁶ Pui Aux khankix hoik sax mawh yung pa grai heue. Cao liang yung hoik thong kix lud krax mai kix hoik lud hu khaing tix gawng hoik tix gawng heue. Kix hoik piawm ka dee laux lee tix heue. ⁷ Pui pa yaox ka kix khawmuik hoik kiied ti ih kix mai pui koeng kix hoik sax ah nin, ex ang sax koe krax lud, mawh kheu kix hoik yuh phimap piang Siyiex pa ot ka dee koe pa rahsee mai ka Simiang siyiex, pa mawh krax keud pot jun pot keeing kix heue. ⁸ Gah khaing Babulon mai lih hu khaing haktiex pui Khaladie khankix mai yuh tix awm yung mhaing plak sivoe phung yung khankix heue. ⁹ Grawh grawng nawh, jhak heue, Aux tak sang yaog cub pui pa kied ting riang rao khankix, khaing haktiex plak laong mai viex kix hoek ka veng Babulon mai kix khre rien ti hoek puing ka Babulon mai rhim ti teei ka tan heue. Te ak puing kix awm pui pa kied min ka puing naing, pa ang lai khluk khlaik ka puing tix heue. ¹⁰ Haktiex Khaladie tak lih mawh dee tud rhim pui mai can pui pa tud rhim khankix, tak sang sak vaig tu, Siyiex ah nan heue. ¹¹ Can pui pa yuh sinngao Aux laux leeing khankix eue, "Pex hoik koe krax nyawm rhawm mai hoik koe krax gaux rhawm, awm kawn mawie shiang pa sawm dee klai rib mai hoik riag awm brung mhaing, ¹² Miex pex kied koe krax kaig tua, nawh pa hoik keh pex, tak laux pakngai ka heue. Jhak heue, nawh tak lih ti mawh ceu pui iak piang haktiex an mai lih ti mawh tiag tu mai dee kroh khroing mai tiag mhaik heue. ¹³ Kheu jao pa song rhwm song rhi Siyiex, ka dee an ang lai koe pui ot ka mai lih ti mawh haktiex dee yiien pui khankix heue. Can pui pa lailing hawt baoh Babulon ku kaux, tak koe krax daox deng mai nunai ka yaox ti krax pa kham geu nawh khankix heue. ¹⁴ Sau tab pex hawt vung viang veng Babulon sonsang puing ka, pex pa vaik ka ak tix khankix eue, puing ka nawh mai paw lhawk ka te tix, mawh kheu kix hoik yuh phimap ka Siyiex heue. ¹⁵ Kok yo hawt vung viang veng mai puing ka nawh, mawh kheu nawh hoik som hoik ap tix, jaong num nawh khankix hoik laux leeing mai guh veng nawh khankix kawx hoik grhup, mawh kheu an mawh krax pa pawk Siyiex bix tix heue. deeh pawk bix piang nawh, awm kaing pa hoik yuh nawh heue. ¹⁶ Tat ti tik pui ruat simie mai pui vawg nghox khaing veng Babulon, mawh kheu jao krax lhat graung ka lawm vaig pui pa yeen ya khankix, pui ku kaux tak deeh blak ti ing ka ceu pui tix khankix mai pui ku kaux tak dee to ti ing ka haktiex cao tix heue. ¹⁷ Ceu pui Isarelax awm yung pa hoik prung prang rairuat ku sidah, pa hoik pheet sivai sangsi hu dee singai heue. Simiang Asurix, hoik kiied ti ih nawh phao voe, dee ghoik Nebukhaneza simiang Babulon hoik raig si-ang kix pot heue." ¹⁸ Mawh kheu nan, Siyiex Cao kru naing raoma pa mawh Siyiex ceu pui Isarelax ah nin, "Jhak heue, Aux tak sang ciyang ka simiang Babulon mai ka haktiex nawh, awm hoik ciyang Aux ka simiang Asurix heue. ¹⁹ Viang mawh nan, Aux tak viex pui Isarelax khankix deeh hoek ka dee ot kix mai kix tak deeh yaox ti ih piang gawng Kharamelax mai gawng Bashan khankix, khwan ju nawh, tak yaox ti sak piang gawng Epharem mai gawng Gilat khankix heue." ²⁰ Siyiex ah nin, "Ka daux singaix an mai bawg yam an, tak ciied ti yaox ka pa yuh Isarelax khankix, viang mawh nan, ang yaox ka phimap kix tix kaux kawx mai ka phimap pui Yudax khankix kawx, ang lai yaox ka heue. Mawh kheu Aux tak pluat ploi ka phimap pui pa prah Aux nawh deuk khankix heue. ²¹ Siyiex ah nin, "Hu haok ka haktiex Meratem mai puing ka an mai haok ka pui pa ot ka daux haktiex Pekot khankix mai yuh kix laux lak pak leeing khawmuik, yuh awm pa hoik tawm Aux ka pex khawmuik heue. ²² Hoik mhong ka lox sinum naing mai khawm krax laux leeing pa kied ting lhaong ka daux haktiex an heue. ²³ Daix rhiem pa tawk ka haktiex khawm bee ma lai hoik graig hoik pot yuh ka mawx? Veng Babulon hoik lih ti mawh dee yiien pui ka daux sinax ceu pui khankix yuh ka mawx? Aux hoik taong ti deuh kie ka son maix heue. ²⁴ Veng Babulon eue, maix hoik krix ka kie, yam ang maix tien rien rhawm tix, pui koeng maix hoik pub mai pon giex ka maix, kheu jao hoik tieh maix ka sibrawm Siyiex heue. ²⁵ Siyiex hoik paoh krao kraung naing tix mai hoik hoe ka kraung naing song rhawm tix khankix lih, mawh kheu in mawh kaing pa yuh Siyiex Cao kru naing raoma, ka haktiex Khaladie khankix heue. ²⁶ Hoek puing ka nawh, jah khaing mee plak in tom hoek plak an, paoh ka nyiex krao nawh khankix mai pum nawh awm pum nghox mai yuh nawh laux leeing pak lawg heue. Paw lai kieh nawh deuk tix ceu kawx heue. ²⁷ Pah ti tik ka mawie nawh khankix, kieh kix lih hu sonsang mawh pa pah ka kix, kix tak kha rhawm, mawh kheu hoik hoek singaix kix mai bawg yam pa sang ciyang ka kix heue. ²⁸ Lox pui pa to ti glawd khaing haktiex Babulon, krai pao grawng pa pawk Siyiex pa mawh Siyiex ex bix tix ka daux veng Zion mai pa mawh krax pawk bix son nyiex Nawh Cao heue. ²⁹ Kok pui naing ak khankix hoek puing ka veng Babulon, can pex pa chix puing ak khankix yuh tab hawt vung viang veng mai lai lawm khawmuik, paw lai kieh kix glawd tix kaux kawx. Deeh viied ka kix awm kaing pa hoik yuh kix mai deeh yuh ka nawh awm can pa hoik yuh nawh khankix heue. Mawh kheu nawh hoik yaw rangdi tix sonsang tieh feen ka Siyiex pa mawh Siyiex Cao pa singax singeh ceu pui Isarelax heue. ³⁰ Mawh kheu nan, pui awn ju daux veng khankix tak goh daux krax mai pui naing nawh khankix tak mawh pa laux leeing ka daux singaix an, "Siyiex ah nin heue. ³¹ Siyiex Cao kru naing raoma ah nin, pui pa ting rhawm eue, "Jhak heue. Aux tak sang yuh maix laux leeing. Grawh grawng nawh, singaix pa sang ciyang Aux ka maix hoik hoek heue. ³² Pui pa ting rhawm tak sang sideeing caong tix mai goh mai ang koe pui pa yaog nawh kaoh, Aux tak sang keeig veng ot nawh ka ngu mai ngu an tak sang gleeing ka pui ot rawb rim nawh khawmuik heue." ³³ Siyiex Cao kru naing raoma ah nin, "Kawn praix ceu pui Isarelax hoik yaox ti kham krax yeen ya, tau mai kawn praix ceu pui Yudax khankix, can pui pa hoik teei ti mawh pa giex laung khankix hoik laung ti deuh kix mai kix thiang ti ang lai ploi kix lih heue. ³⁴ Viang mawh nan, cao pa deeh taoh kix mawh pa kied ting riang, min ceu kaux Nawh Cao mawh Siyiex Cao kru naing raoma heue. Nawh Cao tak sang deeh pawk bix ka grawng see kix khawmuik, sonsang tawx Nawh Cao pa yiien yawg ka haktiex tix mai kieh pui ot ka veng Babulon ang koe krax pa yiien yawg heue. ³⁵ Siyiex tak sang ah nin, lawm vaig tak sang hoek piang ceu pui Khaladie mai piang ceu pui pa ot ka daux veng Babulon mai piang cao kaing mai piang pui pa koe pingnga cuyi khankix heue. ³⁶ Lawm vaig tak sang hoek piang cao jhai pie lhen khankix, sonsang lih mawh kix pui yhot heue. Lawm vaig tak sang hoek piang pui naing ting riang rao khankix, sonsang lih mawh kix pui laux rhawm heue. ³⁷ Lawm vaig tak sang hoek piang brung kix mai piang ling lawx naing brung kix khankix mai piang ceu pui pa rom pa khon tix ot tau ka daux sinax kix khawmuik, pa awm bun heue. Lawm vaig tak sang hoek piang krao sinngao nawh khankix, sonsang lih mawh pa hoik rhim pui koeng heue. ³⁸ Ceu pa kroh hit tak sang hoek piang rawm khankix mai an tak sang lih ti mawh pa hit hu heue. Grawh grawng nawh, haktiex an hoik naog ka riang grang pa krub pa saik tix khankix mai kix hoik yhot tau mai riang grang krub tix heue. ³⁹ Mawh kheu nan, totiag mai sox praix khankix tak ot tau ka daux veng Babulon tan heue. Si kala-uk khankix kawx tak ot ka daux veng an heue. Veng an tak mawh pa ang pui lai ot ka khaix in leeing ju mai ang lai koe ru pui pa ot ka daux an, tix ju hoik tix ju heue. ⁴⁰ Siyiex ah nin, awm hoik yieh Siyiex ka veng Sawdom mai veng Gawmawrax, khawm veng pa koe hawt dex an khankix laux, awm an ang lai koe pui bang tix ot tan, mawh kheu nan, kawn pui pa ot ka veng Babulon tak ang koe tix kaux kawx heue. ⁴¹ Jhak heue, ceu pui tix ceu tak sang hoek khaing haktiex plak laong mai ceu pui tang ceu pa kied ting lhaong tau mai simiang khankix tom nie, tak sang yaog ti kaoh khaing dee sidah haktiex heue. ⁴² Kix tak sang giex ak mai pliah khankix, kix mawh pui pa kied lang teung kin jhawm mai ang lai koe krax caux rhawm heue. Lox sikah kix sinum siaox awm lox sinum rawm sigrit sigra, kawn bunkrih Babulon eue, kix tak brug brung hoek mai khre tix sang puing naing ka maix heue. ⁴³ Yam mhong simiang Babulon ka grawh grawng an mai taix nawh hoik dieh riang, krax pa kha rhawm hoik ceep nawh, awm bun pa saux yha bawg yam keh tix heue. ⁴⁴ Jhak heue, nawh tak sang kaoh awm sivai sangsi, khaing daux tiag hawt rawm klawng Yawdan mai hoek ka dee ot dee koe pui pa kaux cong khankix heue. Viang mawh nan, Aux sang kieh nawh to sijaox khaing nawh heue. Mai Aux tak laug mai yaog pui pa sang kwang piang nawh heue. Grawh grawng nawh, mawh pui mawx pa pon tat bawg yam piang Aux lie? mawh cao liang yung mawx pa pon cung ka plak sivoe Aux lie?" ⁴⁵ Mawh kheu nan, nghiet ka grawng kaing pa bak pa viang Siyiex tix sang yuh piang veng Babulon mai grawng krax pa bak pa viang Nawh Cao ti sang yuh piang haktiex pui Khaladie khankix heue. Cub phung yung iak an tak sang rhim hu tete, Nawh Cao tak sang kieh dee ot dee koe kix mawh dee pa hoik yiien pui ka tete heue. ⁴⁶ Haktiex hoik yung yang tix ka, kheu jao lox pa rhim ti teei ka veng Babulon mai ka daux sinax ceu pui khankix hoik mhong ka lox yiiem kix heue."

¹ Siyiex ah nin, "Jhak heue, Aux tak kieh bhaung pa yuh laux leeing hoek piang veng Babulon mai piang pui pa ot ka daux veng Lebakamie heue. ² Aux tak sang ploi pui pa chix keem ka bia hoek ka veng Babulon, pa sang keem ti tik haktiex nawh yi heue. Grawh grawng nawh, yam hoek ka daux singaix pa kha rhawm an, kix tak sang yuh hawt vung viang veng hawt nawh khawmuik laux leeing heue. ³ Kieh pui naing ak ceep ka kraung tiebtie naing mai vaik ak tix puing ka nawh, paw lai lhawk ka pui pa ot ka daux veng tix kaux kawx heue. ⁴ Mawh kheu nan, tak pah kix goh yum ka daux haktiex pui Khaladie khankix mai kix tak mat ka piang krax laux heue. ⁵ Viang ceu pui Isarelax mai ceu pui Yudax khankix hoik tik vud ka Siyiex tix, pa mawh Siyiex Cao kru naing raoma mai viang haktiex kix hoik naog ka phimap, pa lud piang Siyiex Cao pa singax singeh ceu pui Isarelax kawx, Siyiex ang tik vud ka kix heue. ⁶ To ti lih khaing daux veng Babulon mai tang deeh taoh ka tokaux tix ku kaux, paw lai rom ti ot tau mai pui lud veng an sonsang som nai tau mai kix, grawh grawng nawh, in mawh bawg yam pawk Siyiex bix tix, Nawh Cao tak deeh tawx ka kix awm pa yuh pui mawx pui an heue. ⁷ Veng Babulon hoik sax mawh kawk khri pa koe ka daux taix Siyiex mai pa hoik kieh haktiex khawm bee ma yoek ka heue. Hoik kieh ceu pui pa nyaux ka rawm plix siiet pa koe daux kawk an khankix yhot ka heue. ⁸ Veng Babulon hoik grhup sijaox mai laux leeing heue. Yiiem grai ka son nawh, teei ka peeh khaox Balasan, sonsang pai ka dee saux nawh moi ka heue. ⁹ Ex sang pai ka saux veng Babulon moi, viang mawh nan, nawh ang cu tix moi heue. Prah ka nawh mai kieh ex ku kaux lih hu ka haktiex cao tix heue. Grawh grawng nawh, krax ciyang son nawh hoek tom raoma mai hoik cux ka paiawm khankix heue. ¹⁰ Siyiex hoik jhi grawng krax pa rahsee ex heue. Hoek mai kieh ex hu krai pao grawng kaing jhaw Siyiex pa mawh Siyiex ex, ka daux veng Zion heue. ¹¹ Rawn te mhawm mai giex ka kraung plah tieb naing, Siyiex hoik yaog ka khwan simiang ceu pui Medix khankix kaoh heue. Mawh kheu Nawh Cao bak viang ti yuh veng Babulon laux leeing heue. Grawh grawng nawh, an mawh pa pawk Siyiex bix tix, pa pawk bix son nyiex bwan Nawh Cao heue. ¹² Pak chix ka sivoe guh veng Babulon, deuh cao pau khankix koe mai kieh pau mhawm mhawm, khre rien ka cub pa yuh naing jawm khankix, grawh grawng nawh, Siyiex sang yuh awm pa hoik bak tix khawm ra ceu sidah, ka lox pa hoik krai Nawh Cao sonsang yuh pui pa ot ka daux veng Babulon khankix laux heue. ¹³ Maix pa ot hawt dee pa kied nie rawm mai pa kied haoh hun kraung khrai sinngao khankix eue, deeh sidah singaix laux leeing maix mai krax pa ghoing rhawm maix hoik hoek phao heue. ¹⁴ Siyiex Cao kru naing raoma hoik tiextu tix ah nin, Aux tak sang kieh pui khankix naog ka daux maix, awm pa naog sido klai khankix tete mai kix tak sang yo lox tix piang maix heue. ¹⁵ Nawh cao hoik yuh haktiex ka sibrawm tix, Nawh Cao hoik pang ti deuh haktiex ka pingnya cuyi tix mai hoik naih raoma ka krax tawng yung tix heue. ¹⁶ Yam ploi Nawh Cao lox tix, lox sinum rawm lhiex khankix lih ti koe ka daux raoma, Nawh Cao yuh bhawm rawm haok ka dee sidah haktiex heue. Nawh Cao yuh puk plak praix pa viex lhiex mai Nawh Cao teei bhaung lih khaing daux teug kraung khrai Nawh heue. ¹⁷ Pui ku kaux hoik mawh pa deux pa awm pa ang koe krax tawng yung, cao chix kaing rhiem pa raug riang rao krub khankix tak pon krax kaig tua, ka riang rao krub pa hoik raug tix heue. Mawh kheu riang rao krub pa hoik raug nawh, mawh pie lhen mai ang lai koe bhawm pa toek bhawm pa lih heue. ¹⁸ Kix mawh ceu pa giex going mai pie lhen heue. Ka daux bawg yam singaix prawng ca, kix tak grai grup heue. ¹⁹ Nyum cie ceu pui Yakop ang lai awm cie kix, grawh grawng nawh, Nawh Cao mawh cao pa phan pa deuh kuceu khawmuik mai ceu pui Isarelax khankix mawh doeh ru sinngao Nawh Cao heue. Min ceu kaux Nawh Cao mawh Siyiex Cao kru naing raoma heue. ²⁰ Mawh daix mai kraung naing Aux khankix son naing, grawh grawng nawh, Aux tak shiao maix mai yieh haktiex khankix phawng vid, Aux tak shiao maix mai yuh meung haktiex khankix laux leeing, ²¹ Aux tak shiao maix mai yieh ka brung khawm cao brug khankix phawng vid, Aux tak shiao maix mai yieh ka ling lawx naing brung mai cao brug khankix phawng vid, ²² Aux tak shiao maix mai yieh ka simex mai bun phawng vid, Aux tak shiao maix mai yieh ka pui riex ju mai pui awn ju phawng vid, Aux tak shiao maix mai yieh ka sinaw mai bunkrih khankix phawng vid, ²³ Aux tak shiao maix mai yieh cao liang yung mai phung yung khankix phawng vid, Aux tak shiao maix mai yieh ka pui yuh ma kaung mai iak moi khankix phawng vid, Aux tak shiao maix mai yieh ka cao kaing mai cao kwang haktiex khankix phawng vid heue. ²⁴ Siyiex ah nin, "Aux tak deeh viied phimap pa yuh pui veng Babulon mai pui pa ot ka daux haktiex Khaladie khawmuik, son grawng pa caox caig yuh kix ka veng Zion, plak sivoe ngai pex heue." ²⁵ Siyiex ah nin, gawng pa yuh haktiex khankix laux leeing eue, jhak heue, Aux tak yuh maix laux, "Mai Aux tak nyeu taix tix mai yuh maix laux leeing mai bang lia maix khaing rang khankix mai kieh maix mawh gawng pa hoik proe heue. ²⁶ Siyiex ah nin, kix tak ang pon teei simaox tix lon, son num daog nyiex mai ang pon teei simaox tix lon, son num riah nyiex, khaing maix heue. Viang mawh nan maix tak mawh dee yiien pui leeing ju heue." ²⁷ Pak chix ka daux haktiex an mai phlu teettawng ka sinax ceu pui haktiex khankix, kieh ceu pui khankix khre rien tix puing ka nawh, kok meung haktiex Ararat, haktiex Minix mai haktiex Ashakhenaza khankix sonsang puing ka nawh, laug cao kaing naing sonsang puing ka nawh, kieh cao brug brung haok awm sido riex hauk khankix heue. ²⁸ Kieh ceu pui khankix khre rien tix sonsang puing tix ka nawh tau mai simiang haktiex Medix mai cao kwang haktiex mai cao kaing, khawm pui meung khankix khawmuik heue. ²⁹ Haktiex Babulon tak siyaung mai laux rhawm, grawh grawng nawh, krax pa bak pa viang Siyiex tak sang lih mawh piang veng Babulon, sonsang kieh Babulon mawh dee yiien pui mai dee ang pui lai ot lai koe heue. ³⁰ Pui naing veng Babulon khankix hoik yawg tix ang lai puing naing mai kix hoik laig ot ka daux tab pa kaux cong kix heue. Riang rao kix hoik dieh mai lih tix awm bun mai kix gleeing dee it nawh khankix mai jhong siviex khankix kawx hoik pot hoik graig heue. ³¹ Pui pa ploi khan kiex ra kaux ra lai sipub paox tix, pa mawh pa viex lox satang an ra lai sipub paox tix, tix kaux lai tix kaux, sonsang krai simiang Babulon mhong ka hoik rhim veng an tix ku daok ku dawn khawmuik, ³² Daux diang krax khankix kawx hoik thox tix mai kix gleeing pang priem khankix ka ngu mai pui naing khankix hoik lhat graung ka heue. ³³ Grawh grawng nawh, Siyiex Cao kru naing raoma, pa mawh Siyiex ceu pui Isarelax ah nin, "Kawn bun veng Babulon hoik awm glah dee pah nghox, ka bawg yam sang pah ka nawh, mawh kheu bawg yam sang vawg nghox hoik dex hoek heue." ³⁴ "Nebukhaneza simiang Babulon hoik kiied ti ih aux mai hoik krid aux phawng, nawh hoik yuh aux mawh aw yi tix mu, nawh hoik bleet ti ih aux, awm siyawng mai nawh hoik kieh vaig tix naog ka ceu pa gaux rhawm aux khankix, Nawh grheu aux lih hu heue. ³⁵ Pui pa ot ka daux veng Zion tak sang ah nin, "Kieh ceu pa kin, pa hoik yuh nawh ka aux mai ka nex aux hoek piang veng Babulon, veng Yerusaliem tak ah nin, "Kieh nham aux hoek piang pui pa ot ka daux haktiex Khaladie khankix heue." ³⁶ Mawh kheu nan, Siyiex ah nin, "Jhak heue, Aux tak sang yuh son maix mai tak sang deeh viied ka phimap pa yaox maix ti kham heue. Aux tak sang kieh rawm sigrit sigra mai rawm keut nawh khankix hit heue. ³⁷ Veng Babulon tak sang lih ti mawh pum nyhee mai dee ot dee koe sox praix khankix, dee pa daox deng mai dee koe lox sibriem pui mai dee ang pui lai ot ka tix kaux kawx heue. ³⁸ Kix tak graox awm sivai sangsi mai kix tak kieh lox tix sinum awm kawn sivai sangsi khankix heue. ³⁹ Siyiex ah in, yam koe krax nyawm rhawm kix, Aux tak khan kheu pa ih son kix mai kieh kix yoek ka daux pa koe krax gaux rhawm tix mai kieh kix nyawm it nyawm tum ang jud ang jai mai ang lai haing heue. ⁴⁰ Aux tak sang kieh kix lih, awm kawn yung pa sang pah khankix, awm yung mhaing mai pex mhaing heue. ⁴¹ "Veng Sheshiet lai mawh pa hoik rhim ti yuh ka mawx mai veng pa hoik yaogyaw pui haktiex khankix khawmuik ka, lai mawh pa hoik rhim ti yuh ka mawx, veng Babulon lai lih ti mawh dee yiien pui ka daux sinax haktiex in yuh ka mawx. ⁴² Rawm sigrit sigra hoik haok piang veng Babulon mai puk pak rawm khankix hoik kheem piang nawh heue. ⁴³ Veng nawh khankix mawh dee yiien pui, dee kroh haktiex mai daux tiagtu mai haktiex dee ang pui lai ot pie tix kaux kawx mai ka dee ang kawn pui lailing ka tix kaux kawx heue. ⁴⁴ Aux tak sang ciyang ka siyiex Balax pa koe ka daux veng Babulon mai Aux tak kieh nawh deeh hao ka can ceu pa hoik bleet nawh khaing daux jheeh tix mai ceu pui khankix tak ang lai khrawm paox ti hoek ka nawh khaix in tix bawg kawx heue. Mawh heue, guh veng Babulon tak sang grhup heue. ⁴⁵ "Pui Aux eue, lih hu khaing veng Babulon mai kieh pui ku kaux, deeh taoh ka tokaux tix, khaing krax pa kied kin song rhawm Siyiex heue. ⁴⁶ Paw kieh pex sung sang rhawm mai lhat graung ka mhong tix grawng satang veng an, tak sang mhong ka grawng lox satang tix num hoik tix num mai krax pa kied kin kha rhawm, tak koe ka daux haktiex mai simiang cao kwang haktiex tak sang tud rhim ka paox tix, tix kaux lai tix kaux heue. ⁴⁷ Mawh kheu nan, jhak heue, singaix bawg yam tak sang hoek mai aux tak sang ciyang ka riang rao krub pui veng Babulon khankix mai haktiex an tak sang hoek krax kaig tua khawmuik khawm leeing mai pui naing khankix tak goh gup tix yum daux veng heue. ⁴⁸ Khaix an raoma mai haktiex khawm can ceu pa koe ka daux nawh khankix, tak sang rhax lai mai gaux rhawm piang veng Babulon, mawh kheu pui tud rhim khankix khaing plak laong hoik hoek bleeh ka nawh, Simiang siyiex ah nan heue. ⁴⁹ Awm hoik goh yum ceu pui Isarelax kheu sipiag veng Babulon, awm an, pui haktiex veng Babulon tak goh tix yum khawmuik heue. ⁵⁰ Can pex pa hoik glawd khaing vaig khankix eue, "Hu dee singai paw lai kaog lai cung, doh keud ka Siyiex khaing ka dee singai mai kieh veng Yerusaliem hoek ka daux rhawm pex heue. ⁵¹ Ex hoik kaig tua kheu hoik mhong ex lox pa nunai pui heue. Krax kaig krax tua hoik kheem ka ngai ex, kheu hoik laig pui tang ceu khankix ka dee singax singeh nyiex bwan Siyiex heue. ⁵² "Mawh kheu nan, Siyiex ah nin, jhak heue, singaix bawg yam khankix tak sang hoek," "Aux tak sang prawng ca ka riang grang krub, pui haktiex Babulon khankix mai pui pa mat khankix tak sang ngia ngheeik heue. ⁵³ Siyiex ah nin, viang veng Babulon hoik haok daux raoma kawx mai viang nawh kieh guh veng dee pa lhaong tix kaux cong kawx, viang mawh nan, pui tud rhim khaing Aux tak sang hoek bleeh ka nawh heue." ⁵⁴ Lox sinum yiiem grai hoek khaing veng Babulon mai lox sinum krax pa kied laux kied leeing, hoek khaing haktiex pui Khaladie khankix, ⁵⁵ Kheu jao yuh Siyiex veng Babulon laux leeing mai kieh lox ting lhaong nawh yiien, viang mawh lox sinum kix kawx awm lox sinum pukpak rawm pa kied ting lhaong mai kix hoik sinum ah reeng reeng heue. ⁵⁶ Mawh kheu pui tud rhim hoek mai yuh veng Babulon laux mai pui naing ting riang nawh khankix hoik laig daux tawm taix pui koeng heue. Ak pa giex kix ku kaux kawx hoik pot hoik graig heue. Grawh grawng nawh, Siyiex mawh Siyiex pa chix deeh tawx deeh viied ka phimap awm pa yuh kix tete heue. ⁵⁷ "Aux tak sang kieh cao kaing cao mai pui koe pingnya cuyi mai cao pa kwang haktiex, khawm simiang ot greem nawh mai pui pa kied ting riang rao nawh khankix yoek heue. Kieh kix nyawm it nyawm tum ang jud ang jai mai ang lai haing, "Simiang pa koe min ceu kaux Siyiex Cao kru naing raoma ah nan heue. ⁵⁸ Siyiex Cao kru naing raoma ah nin, "Guh veng pa kied vieh, veng Babulon tak sang yieh laux lak pak leeing mai siviex veng pa kied ting lhaong nawh kawx, tak sang gleeing ka ngu, pui khakix yuh kaing pa giex going mai khawm pa taug mao tix ka daux ngu heue." ⁵⁹ Gumlox pa tawm cao jhai Yeramix ka Serayax kawn simex Nerix, kawn simex Maseyax yam hu nawh tau mai Zedekix, simiang haktiex Yudax ka veng Babulon, ka daux yam kwang nawh ka haktiex pon num tix num, yam an, Serayax mawh cao kwang piang kaing jhaw heue. ⁶⁰ Mawh kheu nan, Yeramix hoik tiiem ti deuh grawng pa caox caig pa tak sang hoek piang veng Babulon ka daux phuk lai tix mai gumlox in khawmuik, mawh pa tiiem ka grawng pa dex dawd mai veng Babulon heue. ⁶¹ Yeramix ah nin ka Serayax, "Yam hoek maix ka daux veng Babulon, jhak ka lai an mai phat ka lai an khawmuik heue. ⁶² "Khaix an maix tak ah nin, Siyiex eue, Maix Cao hoik krai ti deuh lox ka son baoh in, sonsang yuh laux mai tat ti tik dee in, son ang tix ceu kawx lai deuk ka dee in, pui mai khawm totiag mai ka dee an tak mawh dee yiien pui leeing ju heue ⁶³ "Yam hoik phat maix ka grawng lai in maix tak phyawk simaox tix lon ka lai an mai taing ka daux rawm klawng Yufrethix heue. ⁶⁴ "Khaix an maix tak ah nin, awm an, veng Babulon tak glip ka daux rawm mai ang lai deeh baox yaog ti kaoh khaing krax kha rhawm, pa tak sang viex Aux hoek piang nawh, kix tak koe krax taug mao heue." Gumlox Yeramix mawh ding heue.

¹ Yam hoik koe ju Zedekix tixnga tix num, nawh mawh simiang mai kwang ka veng Yerusaliem kao tix num heue. Ceu kaux miex nawh mawh Hamutalax kawn bun Yeramix khaing veng Libanax heue. ² Nawh baox yuh pa caox caig ka plak sivoe ngai Siyiex, awm pa hoik yuh simiang Yehoyakim heue. ³ Mawh kheu jao grawng pa song rhawm Siyiex, ceu in lih ti mawh ka veng Yerusaliem mai ka haktiex Yudax, tom hoek sidah hoik grheu Nawh Cao kix lih hu khaing ka plak sivoe ngai Nawh Cao heue. Khaix an simiang Zedekix hoik yaog tix tieh feen ka simiang Babulon heue. ⁴ Ka daux num kwang nawh haktiex dim num tix num, daux khix kao, kao singaix, Nebukhaneza simiang Babulon mai kru naing nawh khankix hoek tix puing ka veng Yerusaliem mai lai lawm veng mai kaong tab hawt vung viang veng heue. ⁵ Mawh kheu nan, kix hoik lai lawm ka veng tom hoek num kwang simiang Zedekix ka haktiex kao tix num heue. ⁶ Yam hoek daux khix pon dim singaix, sibhawm praix lih ti koe ka daux veng mai ceu pa ih ang lai koe son pui haktiex khankix heue. ⁷ Yam an guh veng hoik grup mai pui naing khankix lih hu khaing daux veng yam pon sawm ka plak krax diang siviex, pa koe sinax guh veng an ra mu, pa koe hawt sipeem simiang, mawh kheu pui Khaladie khankix hoik lai lawm vung viang veng heue. Kix hu ka krax plak daux lung daux ngawd rawm klawng Yawdan heue. ⁸ Viang mawh nan, cub kru naing pui Khaladie khankix hawt khaix simiang mai kix krup Zedekix ka daux lung Yerikho heue. Cub kru naing nawh khankix hoik prung prang khaing nawh heue. ⁹ Mawh kheu nan, kix pon giex ka simiang mai viex nawh hoek ka simiang Babulon ka veng Ribalax ka daux haktiex Hamat mai nawh krai pao grawng pa sang ciyang ka nawh heue. ¹⁰ Khaix an simiang Babulon pah kawn simex Zedekix yum sivoe ngai nawh heue. Mai baox pah cub cao kaing haktiex Yudax khankix yum, ka daux veng Ribalax heue. ¹¹ Nawh hoik baox koh sok ngai simiang Zedekix mai simiang Babulon phyawk nawh ka maox tawng, viex nawh hu ka veng Babulon mai laung nawh daux thawng tom hoek sidah yum nawh heue. ¹² Ka daux khix phwan kao singaix, num kwang simiang Nebukhaneza veng Babulon kao dim num tix num, Nebuzaradan cao kaing naing piang pui naing pa pau simiang, Babulon khankix hoek bleeh ka veng Yerusaliem heue. ¹³ Nawh hoik gleeing nyiex bwan Siyiex mai nyiex haw simiang mai nyiex pa koe ka daux veng Yerusaliem khawmuik, pa mawh nyiex pui ting lhaong khankix broe ka ngu heue. ¹⁴ Cub kru naing pui Khaladie pa hoek tau mai cao kaing naing, pa pau simiang khankix, hoik yieh ti tik hawt vung viang guh veng Yerusaliem laux leeing khawmuik heue. ¹⁵ Khaix an Nebuzaradan cao kaing naing piang pui naing pa pau simiang hoik viex pui pa hot shia khankix tiblah mai pui pa kawn deuk ka daux veng mai can pui pa hoik grux tieh tix ot plak simiang Babulon khankix mai can pui pa chix kaing taix kaing caong pa kawn deuk khankix heue. ¹⁶ Viang mawh nan, Nebuzaradan cao kaing naing piang pui naing pa pau simiang khankix, prah pui hot shia tiblah kieh mawh pui yuh kaing sipeem plix siiet mai ma kaung khankix heue. ¹⁷ Rong tawng lheung pa koe ka daux nyiex bwan Siyiex khankix mai jaong ling lawx, pan ting heem rawm khankix mai dung rawm tawng lheung, pa koe ka daux nyiex bwan Siyiex khankix pui Khaladie khankix hoik raig pot phawng mai hoik viex can tawng lheung pa koe hu ka veng Babulon heue. ¹⁸ Kix baox viex aw tawng, sipeed plah, sigiiep ngu, klong, cawn mai kraung tawng lheung khankix, pa shiao cao giex kaing li khankix yam yuh tix kaing jhaw Siyiex heue. ¹⁹ Tawg ting, aw khang, klong ting, aw, jawk kawk ngu, cawn mai kawk nyaux khankix, can pa yuh tix ka kraung khri kraung mau khankix, cao kaing naing pa pau ka simiang hoik rhim tix viex hu uik heue. ²⁰ Rong tawng lheung ra gawng, dung rawm tix mu, riang mawie tawng lheung pa koe greem dung rawm an kao ra mu mai khawm jaong lawx khankix, pa hoik yuh simiang Sawlamon son nyiex bwan Siyiex pa mawh kraung tawng lheung khankix pa ang lai dak uik tawng kawx hoik viex hu uik heue. ²¹ Grawng pa dex dawd mai rong an, plak lhaong koe kao daix sawk, krax rob lawm le rong an koe kao ra sawk mai plak pu koe pon giien mai an koe daux heue. ²² Kaing rong an hoik yuh tix ka tawng lheung mai krax lhaong an koe phwan sawk mai hawt rim an hoik yuh plah tawng pa awm ngai rub mai yuh riang plix kla jiang ka tawng lheung naog hawt vung viang kaing rong an khawmuik, rong ankiex ra mu hoik yuh awm paox tix heue. ²³ Ka piang kaing rong khawm pon daog an, koe riang plix kla jiang tixdim liah mu mai hawt vung viang plah tawng pa awm ngai rub an, koe riang plix kla jiang ka tix yieh mu heue. ²⁴ Nebuzaradan cao kaing naing piang pui naing pa pau simiang giex ka Serayax pa mawh cao kaing ting cub cao giex kaing li, Zephanix pa mawh cao kaing ting cub cao giex kaing li ra kaux tix kaux mai cao pa pau diang siviex nyiex bwan khankix loe kaux hu heue. ²⁵ Nawh hoik giex cao kaing naing pa kwang piang pui naing khaing daux veng tix kaux mai pui pa tawx rhawm keud dong sawn ka simiang pa ot ka daux veng aliah kaux mai cao kaing ting cao tiiem lai khaing cub kru naing tab tix kaux pa hoik yuh kaing so pui haktiex kaoh mai pui haktiex pa ot ka daux veng tigliah kaux khankix hu heue. ²⁶ Nebuzaradan cao kaing naing piang pui naing pa pau simiang khankix hoik viex kix hoek ka simiang Babulon daux veng Ribalax heue. ²⁷ Khaix an simiang Babulon hoik tap toi ka kix mai pah kix yum daux veng Ribalax ka daux haktiex Hamat heue. Mawh kheu nan, pui Yudax hoik yaox ti mawh pui pa rhim ti hu mawh pui pa giex laung khaing haktiex cao tix heue. ²⁸ In mawh pui pa hoik viex Nebukhaneza kix mawh pui pa giex laung ka daux num kwang nawh haktiex aliah num tix num, pui Yudax pa viex hu khankix koe loe rheng mai tixnga loe kaux heue. ²⁹ Ka daux num kwang Nebukhaneza ka haktiex kao daix num tix num, nawh baox viex pui khankix khaing veng Yerusaliem daix yieh tixngoe ra kaux hu mawh pui pa giex laung heue. ³⁰ Ka daux num kwang Nebukhaneza ka haktiex daux tixnga loe num tix num, Nebuzaradan cao kaing naing piang pui naing pa pau simiang khankix, hoik viex pui Yudax khankix aliah yieh tixpon phwan kaux heue. Pui pa viex nawh khawmuik koe pui pon rheng liah yieh kaux heue. ³¹ Yam hoik naog bawg yam mawh Yehoyakim simiang Yudax pui pa giex laung tixngoe aliah num, ka daux khix kao ra, tixnga phwan ngaix, yam jah Evilax Merawdat simiang Babulon tix kwang haktiex, nawh hoik yaog ti taoh kaing Yehoyakim simiang Yudax mai kieh nawh lih khaing daux thawng heue. ³² Nawh sikah lox nab lox yam ka nawh mai tawx dang ngeung dee ngawm pa lheu koe min ka nawh khaing cub simiang pa ot tau mai nawh khankix ka daux veng Babulon heue. ³³ Mawh kheu nan, Yehoyakim hoik peeik kraung ceep pui thawng mai nawh yaox ti ih nyaux priex preem tau mai simiang glang baux singaix im ju nawh jheung jheung heue. ³⁴ Simiang Babulon hoik tawx nyum priex pa sang ih nyaux nawh son tix ngaix hoik tix ngaix glang singaix yam im ju nawh tom sidah hoek yam yum nawh heue.