Judges

Judges

¹ Khaix hoik yum Yawsux, pui Isarelax deeh chawk tix yaox Simiang Siyiex ah nin, "Mawh mawx pa sang hu sivoe yix ka haktiex Khanan, sonsang puing yix ka kix lie?" ² Simiang Siyiex ah nin, "Tak mawh Yudax pa hu sivoe, Aux tak ap haktiex an ka daux tawm taix nawh heue." ³ Mawh kheu nan Yudax deeh ah nin ka pux ke tix Simion, "Hu tau mai aux ka haktiex pa hoik gwieh kix tix tawx son aux, sonsang puing ka pui Khanan, aux tak hu tau mai maix, ka daux haktiex pa hoik gwieh kix ka maix, mai Simion yaog ti hu tau mai nawh heue. ⁴ Yudax lih hu mai Simiang Siyiex ap ti tawx pui Khanan, khawm pui Pherazix ka daux tawm taix kix heue. Mai kix pah pui tix mheen, ka daux veng Beziet heue. ⁵ Kix yaox simiang Adawnix Beziet, ka daux veng Beziet tan mai kix puing ka nawh, kix hoik pex ka pui Khanan mai pui Pherazix khawmuik heue. ⁶ Simiang Adawnix Beziet pon to tix klawd mai kix hawt khaix nawh, pon giex nawh mai kix tat giien ting taix nawh mai giien ting caong nawh heue. ⁷ Mai simiang Adawnix Beziet ah nin, "Aux hoik tat giien ting taix mai giien ting caong simiang atixgliah kaux, can pa ih priex ka greem pheen sawm aux, awm pa hoik yuh aux, Siyiex hoik deeh pawk ka aux heue." Khaix an kix viex nawh hu ka veng Yerusaliem mai nawh yum tan heue. ⁸ Pui Yudax khankix puing veng Yerusaliem mai rhim ti teei an, kix pah pui veng an ka lawm vaig tix mai gleeing veng ka ngu heue. ⁹ Khaix an pui Yudax lih hu sonsang puing ka pui Khanan pa ot ka piang gawng, ka plak seh mai ka dee lung khankix heue. ¹⁰ Khaix an Yudax hu puing ka pui Khanan, pa ot ka daux veng Hebaron, ceu kaux veng Hebaron glang ka an mawh Kirayat Arabax mai kix pah Sheshie, Ahiman mai Talamie khankix heue. ¹¹ Khaix an, kix hu ka pui pa ot ka veng Debirax, ceu kaux veng Debirax glang ka an mawh veng Kirayat heue. ¹² Kaliep ah nin ka kix, "Pui pa pon puing ka veng Kirayat Sepha mai pon rhim ti teei veng khankix, aux tak tawx nawh moeng kawn bun tix Akhasax heue." ¹³ Mai Awtanelax kawn simex Kenat, pa mawh pux Kaliep, hu puing ka veng an, mawh kheu nan Kaliep tawx nawh moeng kawn bun tix Akhasax heue. ¹⁴ Yam hoek bun an ka mex tix nawh nyaw glaw mex tix, mhaing kaung tix gwang ka keeing tix, yam lih bun an khaing la brug tix, Kaliep chawk nawh ah nin, "Simie maix ti cie patix?" ¹⁵ Bun an deeh pawk ah nin ka nawh, "Nawb bwan ka aux liak, awm hoik tawx maix haktiex baoh plak seh ka aux maix baox tawx haktiex dee lih rawm ka aux heue." Khaix an Kaliep tawx nawh cie haktiex dee lih rawm baoh plak laong mai baoh plak seh gwieh ka nawh heue. ¹⁶ Pui Kenix pa mawh paox Mose, lih hu khaing veng dee koe khaox jhie yaong tau mai ceu Yudax mai laig ka daux tiag Yudax, ka baoh plak seh hawt dex veng Arat mai kix ot ka daux sinax pui an kix heue. ¹⁷ Yudax hu tau mai puxke ti Simion mai puing ka pui Khanan pa ot ka veng Zephat mai yuh kix laux leeing mai kok ceu kaux veng an mawh Hawmax heue. ¹⁸ Yudax baox rhim veng Gazax mai veng greem pa kwang nawh, veng Ashakelon tau mai veng greem pa kwang nawh, veng Ekaron tau mai veng greem pa kwang nawh heue. ¹⁹ Mawh kheu Simiang Siyiex ot tau mai Yudax mai kix hoik grheu pui pa ot ka piang gawng khankix, viang mawh nan kix ang pon grheu pui pa ot ka daux lung, kheu jao koe ling lawx brung naing rhiem kix heue. ²⁰ Kix tawx veng Hebaron ka Kaliep awm pa tawm Mose, Kaliep tom grheu kawn simex Anagax loe kaux lih khaing veng tan heue. ²¹ Viang mawh nan pui Benyamin khankix, ang grheu pui Yebusix pa ot ka veng Yerusaliem, mawh kheu nan pui Yebusix, hoik ot tau mai pui Benyamin ka daux veng Yerusaliem tom in singaix heue. ²² Cub nyiex ma Yosiep khankix, lih hu yuh naing ka veng Betelax mai Simiang Siyiex ot tau mai kix heue. ²³ Mawh kheu nan cub nyiex ma Yosiep ploi pui hu jiang ka veng Betelax, ceu kaux veng an glang ka mawh Luzax heue. ²⁴ Yam yaox pui jiang ka pui pa kaoh khaing daux veng an, kix ah nin ka nawh, "Yuh bwanson jhi yix yaox krax laig daux veng mai yix tak jhi krax caux rhawm ti ka maix heue." ²⁵ Mawh kheu nan nawh jhi kix yaox krax laig daux veng mai kix pah pui pa ot daux veng ka lawm vaig tix, viang mawh nan kix deeh ploi pui an, khawm nyiex ma nawh khankix heue. ²⁶ Pui an hu laig ka haktiex pui Hitix mai sum veng tix veng mai kok ceu kaux veng an mawh Luzax tom in singaix heue. ²⁷ Manashe ang grheu pui veng Bietshan mai daux yaong khankix, pui veng Tanak mai daux yaong khankix, pui veng Dawrax mai daux yaong khankix, pui veng Ibalam mai daux yaong khankix, pui veng Megidaw mai daux yaong khankix, mawh kheu pui khankix but rhawm tix ot daux haktiex an heue. ²⁸ Yam ting riang pui Isarelax khankix, viang kix ang grheu pui Khanan khankix lih kawx, kieh kix tawx gha ka tix heue. ²⁹ Awm an pui Epharem ang lai grheu pui Khanan pa ot daux veng Geza lih, mawh kheu nan pui Khanan ot daux sinax kix daux veng Geza heue. ³⁰ Zebulun ang grheu pui veng Kitaton mai pa ot daux veng Nahalawlax khankix lih hu, mawh kheu nan pui Khanan khankix ot sinax kix, kieh kix tawx gha ka tix heue. ³¹ Asha ang grheu pui pa ot daux veng Akhaw mai pa ot daux veng Sidon, veng Alap, veng Akhazip, veng Aphik, veng Rehawbax khankix lih heue. ³² Mawh kheu nan pui Asha yaox ti ot sinax pui Khanan, pa dawk ot daux haktiex an, kheu ang lai grheu kix lih heue. ³³ Napthalix ang grheu pui pa ot daux veng Biet Shemiet mai pa ot daux veng Biet Aniet lih, kix ot sinax pui Khanan pa dawk ot daux haktiex an, viang mawh nan kieh pui pa ot daux veng Biet Shemiet mai veng Betanat tawx gha ka tix heue. ³⁴ Pui Amawrix khin tix grheu pui Dan hu ot ka piang gawng mai ang tawx akhwang ot kix daux lung haktiex, ³⁵ Pui Amawrix but rhawm tix ot daux veng pa koe ka piang gawng Heriet daux veng Ayalon mai daux veng Shalabin, viang mawh nan yam hoik ting riang pui Yosiep khankix, pui khankix deeh yaox ti tawx gha ka kix heue. ³⁶ Mee haktiex pui Amawrix jah ka caong gawng Akarabin, khawm veng Sala mai deeh hu ka baoh plak laong heue.

¹ Kawncau Siyiex hoek ka veng Gilagalax mai hu ka veng Bawkhim ah nin, "Aux hoik thung pex lih khaing meung Ejiptux mai hoik viex pex hoek ka haktiex pa hoik tiextu Aux ka keeing pex, Aux ang yieh sijax mukheu pa hoik yuh tix mai pex heue. ² Pex tak ang pon ti yuh paox pie tau mai pui haktiex in, pex tak yuh khu dee tan kix laux leeing, viang mawh nan pex ang cu tix nghiet ka lox Aux mai hoik yuh ceu in kheu jao patix? ³ Mawh kheu nan Aux deeh ah nin, Aux tak ang grheu kix lih khaing ka plak sivoe pex, viang mawh nan kix tak mawh kat lawm ka paw pex mai siyiex kix tak mawh kie taong ka son pex heue." ⁴ Yam hoik krai kawncau Siyiex lox in ka pui Isarelax khankix, kix riag yo lox ti mai yiiem ka heue. ⁵ Kix kok ceu kaux dee an mawh Bawkhim mai kix yuh krax tan pa appong ka Simiang Siyiex tan heue. ⁶ Khaix hoik ploi Yawsux ka pui khankix, pui Isarelax khankix lih hu ka sinngao haktiex pa hoik pon kix ti cie ku cub heue. ⁷ Mawh kheu nan pui khankix krub ka Simiang Siyiex glang yam im ju Yawsux mai kwad song khaix Yawsux, pa hoik yaox ka kaing jhaw pa ting pa yuh Simiang Siyiex khankix kawx krub ka Simiang Siyiex heue. ⁸ Yawsux kawn simex Nun mai pa mawh siliex Simiang Siyiex hoik yum, yam koe ju tix, tix yieh kao num heue. ⁹ Kix sipaung nawh ka daux mee haktiex sinngao cie nawh, ka veng Timanat Heriet, pa koe ka piang gawng Epharem, ka plak laong gawng Gasha heue. ¹⁰ Pui pa koe baux ju Yawsux kawx hoik kraix khrawm paox ti ka dee ot keeing kix khankix, doeh ru pa ang tawng ka Simiang Siyiex mai kaing pa hoik yuh Nawh Cao son pui Isarelax khankix lih tix koe khaix kix heue. ¹¹ Khaix an pui Isarelax khankix, yuh pa caox caig ka plak sivoe ngai Simiang Siyiex mai yuh kaing jhaw siyiex Balax, ¹² kix tik vud ka Simiang Siyiex keeing kix, pa hoik viex kix lih khaing meung Ejiptux mai hawt khaix siyiex tang kaux ceu pui pa koe hawt vung viang kix mai krub ka siyiex an mai kieh krax song rhawm Simiang Siyiex lih heue. ¹³ Kix tik vud Simiang Siyiex mai yuh kaing siyiex Balax mai siyiex Ashatariet heue. ¹⁴ Mawh kheu nan krax song rhawm Simiang Siyiex hoik lih ka piang pui Isarelax khankix mai Nawh Cao ap kix ka daux tawm taix pui tud rhim mai coh kix ka pui koeng kix, pa ot hawt vung viang kix, tom ang kix lai pon cung tiebtie ka pui pa koeng khankix heue. ¹⁵ Viang kix hu dee mawx kawx, taix Simiang Siyiex hoik tawx krax ciyang pa laux leeing ka kix, awm pa ah mai pa tiextu Simiang Siyiex ka kix heue. Mai kix kied koe krax laux rhawm heue. ¹⁶ Khaix an Simiang Siyiex kieh cao prawng see lih son kix, pa sang hu taoh kix lih khaing daux tawm taix pui tud rhim khankix heue. ¹⁷ Viang mawh nan kix ang cu nghiet ka cao prawng see, kix hu lud mai siyiex tang kaux mai krub ka, kix nied tix veeh ti khaing krax pa lawng keeing kix mai khaing krax pa cu nghiet ka gumlox pingnyap Simiang Siyiex, kix ang hawt ti yuh awm an heue. ¹⁸ Yam kieh Simiang Siyiex Cao prawng see lih ka son kix, Simiang Siyiex ot tau mai cao prawng see mai deeh taoh kix khaing pui koeng kix, daux baux ju cao prawng see, mawh kheu nan Simiang Siyiex deeh koe krax caux rhawm ka lox ngia kix, kheu jao yuh pui koeng pa kha rhawm mai tuktiaktukte ka kix heue. ¹⁹ Khaix hoik yum cao prawng see, kix baox nied ti yuh pa lang teung mai baox nie yuh pa caox caig khaing keeing kix, ka pa hawt tix grawng siyiex tang kaux mai pa yuh ti kaing jhaw siyiex an mai krub ka, kix ang pon yoi tix khaing jhawm pa yuh ti mai khaing pa kiien rhawm ti heue. ²⁰ Krax song rhawm Simiang Siyiex hoik hax awm ngu, ka pui Isarelax khankix mai Nawh Cao ah nin ka kix, mawh kheu pui in ang nghiet ka lox Aux mai hoik yieh sijax mukheu pa hoik tawm Aux ka keeing kix, ²¹ "Aux tak ang lai grheu pui khankix, pa hoik prah Yawsux khaix hoik yum tix cub kawx, ²² in mawh sonsang cheuk Aux ti yaox ka pui Isarelax khankix, ka grawng sang pon priex kix ti hawt krax pa jhi Simiang Siyiex mai hawt daux krax Simiang Siyiex, awm pa hoik hawt keeing kix lie?" ²³ Mawh kheu nan Simiang Siyiex hoik prah pui an kix mai ang lai grheu kix lih dom mawx dom an mai Nawh Cao ang ap kix ka daux tawm taix Yawsux heue.

¹ Inkix mawh pui pa prah Simiang Siyiex sonsang cheuk ti yaox ka pui Isarelax khankix, pa ang nyang tawng ka grawng puing naing ka daux haktiex Khanan tix bawg kawx heue. ² In hoik mawh sonsang gau doeh ru pui Isarelax khankix tix tawng grawng naing, ka pui an khankix, pa ang nyang sax tawng grawng naing glang ka singaix an heue. ³ Pui pa hoik prah Simiang Siyiex khankix, mawh simiang haktiex Philitix phwan kaux, pui Khanan, pui Sidom mai pui Hiwix khankix, pa ot ka piang gawng Lebanon, khaing gawng Balax Hamon, tom hoek ka daux dee laig kix ka veng Hamat heue. ⁴ Mai kix mawh pa prah Simiang Siyiex sang cheuk ti yaox pui Isarelax khankix, ka grawng sang tawng Nawh Cao ka pon cu pon nghiet kix ka gumlox tawm pingnyap Simiang Siyiex, pa hoik tawm Nawh Cao ka keeing kix, ka daux tawm taix Mose heue. ⁵ Mawh kheu nan pui Isarelax khankix, hoik ot ka daux sinax pui Khanan, pui Hetax, pui Amawrix, pui Pherazix, pui Hiwix mai pui Yebusix khankix heue. ⁶ Kix teei ti moeng kawn bun kix khankix mai deeh tawx kawn bun ti ka kawn simex kix mai hoik yuh kaing jhaw siyiex kix heue. ⁷ Pui Isarelax khankix hoik yuh pa caox caig ka plak sivoe ngai Simiang Siyiex, kix hoik piawm Simiang Siyiex tix mai yuh kaing jhaw siyiex Balax mai krub ka Asharat heue.Asharat mawh ceu kaux siyiex bun pa krub pui baoh an heue. ⁸ Krax pa kied song rhawm Simiang Siyiex hoik lih ka piang pui Isarelax khankix heue. Mai Nawh Cao coh kix ka Khushan Rishatem, simiang haktiex Mesopotemia mai pui Isarelax khankix yaox ti yuh kaing jhaw simiang Khushan Rishatem daix num heue. ⁹ Yam riag yo pui Isarelax ka Simiang Siyiex, yam an Simiang Siyiex tawx cao pa taoh son kix tix kaux sonsang taoh ka kix, nawh mawh Awtanelax kawn simex Kenat pux Kaliep heue. ¹⁰ Khwan singax Simiang Siyiex lih ka piang nawh mai nawh prawng see ka pui Isarelax khankix, nawh thong kix daux naing, Simiang Siyiex ap Khushan Rishatem, pa mawh simiang haktiex Mesopotemia ka daux tawm taix nawh mai nawh pex ka simiang an heue. ¹¹ Mawh kheu nan haktiex an hoik yiien yawg tix tixpon num, khaix an Awtanelax kawn simex Kenat yum daux haktiex an heue. ¹² Pui Isarelax khankix dee yuh pa caox caig ka plak sivoe ngai Simiang Siyiex, mawh kheu nan Simiang Siyiex kieh Egalon pa mawh simiang haktiex Mawbax, ting riang rao khaing pui Isarelax khankix, ¹³ Nawh khrawm pui Amon mai pui Amaliet hoek puing ka pui Isarelax mai teei ti cie veng khaox jhie yaong khankix heue. ¹⁴ Mawh kheu nan pui Isarelax yaox ti yuh kaing Egalon pa mawh simiang haktiex Mawbax kao daix num heue. ¹⁵ Yam hoik riag yo pui Isarelax ka Simiang Siyiex, Simiang Siyiex deeh tawx cao pa taoh tix kaux ka son kix, pa kaux Ehudax kawn simex Gerax pui Benyamin, nawh mawh pui pa koe riang plak khawn gwiex yam an pui Isarelax khankix ap totaix ka taix nawh sonsang tawx ka simiang Mawbax heue. ¹⁶ Ehudax yuh gawn pa lawm khawm ra plak pa lang tix sawk mai gieb ti deuh an ka greem kraung ceep ba viang plak khawn dawm tix heue. ¹⁷ Nawh viex totaix an hoek ka Egalon simiang haktiex Mawbax, simiang Egalon mawh pui pa kied kluing heue. ¹⁸ Khaix hoik tawx nawh totaix an, nawh ploi pui pa klawm totaix khankix deeh ing heue. ¹⁹ Viang mawh nan nawh deeh veeh ti ing khaing rong simaox, pa koe hawt veng Gilagalax ah nin, "simiang eue, aux koe lox grawng pa mox tix krai ka maix tix ceu, " simiang deeh ah nin, "Ot yiien yawg, " can pa ot vung viang nawh khankix lih hu khaing nawh heue. ²⁰ Simiang Egalon ngawm ka lawg plak piang nyiex laux lee nawh tix, yam rung praix nong nong, yam an Ehudax ah nin, "Aux koe lox khaing Simiang Siyiex ka son maix, " khaix an simiang yaog ti kaoh ngawm heue. ²¹ Ehudax neh taix khawn gwiex tix lih, teei gawn khaing ba viang khawn dawm tix mai blung vaig simiang ka heue. ²² Sidux gawn mai gawn hoik glip daux vaig mai bee hoik kheem ka piang gawn, mawh kheu nan nawh ang lai pon toek gawn lih, khaing daux vaig nawh mai roing nawh hoik lih ka plak praix heue. ²³ Khaix an Ehuda lih plak praix mai nyeep siviex, ka lawg plak piang khaix tix mai sau ti deuh saw heue. ²⁴ Khaix hoik lih hu nawh ka plak praix, kawncau khankix hoek ti jhak mai kix yaox hoik sau saw siviex lawg plak piang tix, mawh kheu nan kix ah nin, "Nawh kawn it mai laux lee ti ka daux lawg pa sikied nawh heue." ²⁵ Mawh kheu nan kix pau nawh tom rheung mai ang yaox lih nawh awm bawg yam pa lih tix, mawh kheu nan kix teei saw mai paoh siviex ka mai kix yaox ka hoik goh simiang ti yum ka piang meeh nyiex heue. ²⁶ Ehudax to ti klawd glang kawn pau kix mai nawh tiang ti hu, ka plak toi rong simaox an mai hoek ka yaong Sirax heue. ²⁷ Yam hoik bleeh nawh mai nawh phlu teettawng ka piang gawng Epharem mai pui Isarelax khankix lih hu tau mai nawh, khaing piang gawng mai nawh thong kix hu heue. ²⁸ Nawh ah nin ka kix, "Hawt khaix aux Simiang Siyiex hoik ap pui koeng pex ka daux tawm taix pex, " mawh kheu nan kix lih hawt khaix nawh mai rhim ti teei tab khankix pa koe hawt diang rawm Yawdan, pa hu kix ka haktiex Mawbax mai ang lai ploi pui tiang toi plak an tix kaux kawx heue. ²⁹ Yam an kix pah pui haktiex Mawbax tix mheen kaux, ka pui pa ting riang rao vao rhawm khankix heue. Pui tix kaux kawx ang lai pon glawd heue. ³⁰ Mawh kheu nan haktiex Mawbax hoik ot greem pa kwang pui Isarelax khankix mai haktiex hoik yiien yaog daux tixdaix num heue. ³¹ Khaix Ehudax, Shamga kawn simex Anat, baox lih koe tix kaux mai pah pui Philitix yum liah yieh kaux ka gawng khaox lawm pa grheu kix mawie mai nawh mawh pui pa deeh taoh ka pui Isarelax khankix heue.

¹ Khaix hoik yum Ehudax pui Isarelax khankix, deeh yuh pa caox caig ka plak sivoe ngai Simiang Siyiex heue. ² Mawh kheu nan Simiang Siyiex coh kix ka daux tawm taix Yabin simiang haktiex Khanan, pa kwang ka veng Hazaw, cao kaing ting kru naing nawh mawh Siserax pa ot daux veng Haroshiet, daux haktiex Gaw-in heue. ³ Simiang Yabin koe ling lawx naing brung pa yuh ka rhiem dim yieh lhang, nawh khin mai yeen ka pui Isarelax khankix tixnga num, mawh kheu nan pui Isarelax khankix riag yo ka Simiang Siyiex heue. ⁴ Yam an Debawrax moeng Lapidot mawh cao jhai bun tix kaux, nawh prawng see ka pui Isarelax khankix heue. ⁵ Nawh ngawm greem khaox jhie yaong pa koe sinax veng Rama mai veng Betelax, ka piang gawng Epharem mai pui Isarelax khankix hoek ka nawh, sonsang prawng ca tix heue. ⁶ Debawrax ploi pui hu kok Barak kawn simex Abinawm khaing veng Kedesha, pa koe ka daux haktiex Napthalix ah nin ka nawh, "Simiang Siyiex pui Isarelax tawx lox ah nin ka maix, lih hu ka pui Napthalix mai pui Zebulun tix mheen mai hu ka gawng Tabaw, ⁷ aux tak viex Siserax cao kaing ting kru naing simiang Yabin hoek ka plak sivoe maix tau, mai ling lawx brung naing nawh mai pui nawh hawt rawm klawng Kishon tan mai aux tak ap nawh ka daux tawm taix maix heue." ⁸ Mai Barak deeh ah nin ka nawh, "Phan maix hu tau mai aux, aux tak hu, phan maix ang hu tau mai aux, aux ang hu heue." ⁹ Debawrax deeh ah nin, "Aux tak hu tau mai maix tete, viang mawh nan min pakngai maix tak ang lai koe ka daux krax hu maix, mawh kheu Simiang Siyiex tak coh Siserax ka daux tawm taix bun tix kaux, " khaix an Debawrax yaog ti kaoh mai lih hu tau mai Barat ka veng Kedesha heue. ¹⁰ Mai Barat kok pui Zebulun mai pui Napthalix hoek ka veng Kedesha, nawh hu tau mai pui naing tix mheen kaux, Debawrax kawx hu tau mai nawh heue. ¹¹ Heba pui Kenix khaing pui Hawbax, pa mawh paox Mose, hoik gwieh tix khaing pui Kenix mai sum nyiex gox dex dee kuah khaox tiah khankix, hawt caong gawng Zanem, pa koe praok veng Kedesha heue. ¹² Mai kix krai grawng hoik lih hu Barak kawn simex Abinawm ka gawng Tabaw ka Siserax heue. ¹³ Mawh kheu nan Siserax khrawm ling lawx naing brung tix pa yuh ka rhiem dim yieh lhang mai can pui nawh khankix, jah ka veng Haroshiet tom hoek ka haktiex Gaw-in tom sidah ka rawm klawng Kishon heue. ¹⁴ Debawrax deeh ah nin ka Barak, "Kaoh heue, in mawh singaix ap Simiang Siyiex Siserax ka daux tawm taix maix, Simiang Siyiex hoik hu ka plak sivoe maix ang mawh lie?" Barak lih hu khaing gawng Tabaw tau mai pui tix mheen kaux pa hawt khaix nawh heue. ¹⁵ Simiang Siyiex kieh Siserax mai ling lawx naing brung nawh prung prang ka lawm vaig ka sivoe Barak, Siserax lih khaing ling lawx naing brung tix mai to ti glawd ka caong tix heue. ¹⁶ Barak hawt pheet ling lawx naing brung an khankix mai kru naing pui ankix tom hoek ka veng Haroshiet, cub kru naing Siserax hoik yum ka lawm vaig khawmuik ang lai deuk tix kaux kawx heue. ¹⁷ Siserax to ti glawd ka caong tix mai nawh hoek ka nyiex gox Yelax moeng Hebax pui Kenix, kheu jao yuh Yabin pa mawh simiang pui Hazaw mai doeh nyiex ma Hebax pui Kenix khankix yux paox pie tau heue. ¹⁸ Yelax lih rieb Siserax ah nin ka nawh, "Simiang eue, laig daux nyiex ha, paw koe krax lhat graung, " mai nawh laig ka daux nyiex gox, Yelax lhop nawh ka prux tix pheen heue. ¹⁹ Khaix an nawh ah nin ka bun an, "Yuh bwanson tawx aux nyaux rawm ceeix, aux kied simie ti nyaux rawm, " nawh paoh kawk rawm teeih mai tawx nawh nyaux heue. ²⁰ Mai nawh deeh ah nin ka nawh, "Cung hawt diang siviex nyiex gox liak, phan pui hoek chawk ka maix ah nin, ot simex tin lie?" maix tak ah, "Ang ot awx." ²¹ Khaix an Yelax moeng Hebax, teei jim nyiex gox mai daix ka daux taix tix, koi hu ka nawh mai tawk jim an ka daux dawng yhaok nawh tom phlat ka tiex, nawh hoik kied lhiag it jao taug mao tix, mawh kheu nan nawh yum tan heue. ²² Khaix an Barak hawt sawg Siserax, Yelax lih rieb nawh plak praix ah nin, "Hoek aux jhi maix yaox pui pa sawg maix heue." Yam hoik laig nawh ka daux nyiex gox, nawh yaox ka yum Siserax mai jim pa hoik tawk daux dawng yhaok nawh heue. ²³ Mawh kheu nan ka daux singaix an, Siyiex yeen ti tik Yabin, pa mawh simiang haktiex Khanan, ka plak sivoe ngai pui Isarelax khankix heue. ²⁴ Plawng taix pui Isarelax khankix, nie lheu ting riang khaing Yabin simiang haktiex Khanan, tom sidah hoik yuh kix simiang Yabin haktiex Khanan laux leeing heue.

¹ Khaix an Debawrax mai Barak, kawn simex Abinawm, rhax lai ka daux singaix an ah nin heue. ² "Mawh kheu cao kaing khankix thong ka pui Isarelax mai pui hot sibhawm khankix koe rhawm tix ap tokaux cao tix, yaogyaw bwanson Siyiex heue." ³ "Simiang khankix eue, nghiet heue.Kawn simiang khankix eue, daong yhaok pex heue. Aux tak rhax lox in ka Simiang Siyiex, aux tak rhax lai rhax yaogyaw in, ka Simiang Siyiex ceu pui Isarelax heue." ⁴ "Simiang Siyiex eue, yam hoik lih hu maix khaing gawng Sirax, yam lih hu maix khaing daux tiag Edom, haktiex khankix hoik yung yang mai rawm lhiex hoik lih khaing daux raoma, paiawm khankix deeh ploi rawm lhiex, ⁵ gawng khankix hoik yung yang, ka plak sivoe Simiang Siyiex mai gawng Sina kawx awm an ka plak sivoe Simiang Siyiex ceu pui Isarelax heue." ⁶ "Daux baux ju singaix Shamga, pa mawh kawn simex Anat khankix mai ka daux baux ju singaix Yayelax khankix, daux krax daux laux khankix hoik yiien hu mai pui pa hu krax khankix via ti hu, hawt praok krax khankix heue." ⁷ Krax ot nyiex yaong hoik mawh pa kaog pa grai, ka daux ceu pui Isarelax phao, tom hoek bawg yam yaog aux pa mawh Debawrax ti kaoh, mawh miex tix kaux ka daux ceu pui Isarelax khankix heue. ⁸ Kix hoik laug ti teei siyiex pa khraox khankix, khaix an, naing hoik koe ka daux diang siviex veng khankix, kraung naing pa tiebtie tix plak mai pliah tix griang, hoik mawh pa ang yaox ti ka daux sinax ceu pui Isarelax khankix, pa koe pon mheen kaux heue. ⁹ Rhawm aux koe tau mai cao pa kwang ceu pui Isarelax khankix, pa koe rhawm ti appong tokaux cao ti tau mai pui khankix heue. Kieh yaogyaw bwanson Simiang Siyiex heue. ¹⁰ "Krai heue, pex can pa brug la paing khankix mai cao prawng see, pa ngawm tau mai kraung ceep tix khankix mai khawm pui pa hu ka daux krax daux laux khankix heue. ¹¹ Pui pa mhaong ka lox sinum khankix mai pa ot vung viang rawm daux khankix, kix tak deeh simin ti yaox, grawng pa rahsee, pa yuh Simiang Siyiex, krax pa rahsee yuh Nawh Cao son nyiex yaong ka daux ceu pui Isarelax, khaix an pui Simiang Siyiex, tak lih hu ka daux diang siviex veng khankix heue." ¹² Kaoh heue, kaoh heue, Debawrax, kaoh heue, kaoh heue mai rhax lai rhax tix phuk, Barak eue, yaog ti kaoh liak! Mai thung pui pa laung pex khankix hu dee singai, kawn simex Abinawm eue, ¹³ Khaix an pui pa kha rhawm khankix hoik lih ti hoek, pui khankix hoik hoek ka pui pa ting lhaong, Simiang Siyiex hoik lih hoek ka aux, ka son pui pa ting riang rao khankix heue. ¹⁴ Khaing kix pa kaoh daux Epharem, pa hoik koe num riah ka daux Amaliet, khaix maix tak mawh Benyamin tau mai pui maix khankix, khaing Makhirax, cao pa kwang hoik lih mai khaing Zebulun, pui an kix hoik kham ti mawh cao kaing kix heue. ¹⁵ Mai simiang cub Issakha khankix, hoek tau mai Debawrax, pui Issakha kawx, hoek tau mai Barak mai kix hawt nawh tom hoek ka praok rawm klawng dee ot ceu pui Rubin mawh pa kied koe krax pa cong rhawm heue. ¹⁶ Kheu maix lai ngawm daux kawg yung, sonsang nghiet tix lox riag cub yung khankix yuh ka mawx lie? Ka praok rawm klawng ceu pui Rubin, mawh pa koe rhawm ting rhawm lhaong ka daux rhawm rhi tix heue. ¹⁷ Ceu pui Gilat khankix, ot ka plak toi rawm klawng Yawdan mai ceu pui Dan khankix, dah tix ot ka piang reu ting kheu jao patix lie? Ceu pui Asha khankix, pa koe praok rawm sigrit sigra mai kix ot diang reu khankix heue. ¹⁸ Zebulun mawh pui tix cub, pa koe rhawm kwa daux krax pa yuh Napthalix mawh pa ot dee lhaong kawx mawh pa koe rhawm awm an heue. ¹⁹ Simiang khankix hoek ti puing naing, khaix an simiang meung Khanan khankix, hoek ti puing naing, ka veng Tanak, pa koe hawt rawm klawng Megidaw, kix ang pon rhim ti teei mau khankix heue. ²⁰ Simuing raoma teem kix puing naing, yam vung viang simuing khankix ti hu mai kix puing Siserax heue. ²¹ Krax lih hu rawm klawng Gishon, hoik pih ti tik kix hu dee singai, krax lih hu rawm an tom didix, mawh rawm pa lih khaing rawm klawng Kishon heue. Khwan aux eue, lih hu ka daux krax pa koe riang rao tix heue. ²² Yam an lox luah kloh brung to khankix kied sinum ah prawp prawp heue. ²³ Kawncau Simiang Siyiex hoik ah nin heue. Kieh krax pa jhax lawg koe ka piang Merawza, kieh krax pa jhax lawg koe piang pui pa ot tan khankix, tom sigrien sigre, mawh kheu ang kix hoek ti teem ka Simiang Siyiex, sonsang teem Simiang Siyiex puing ka pui pa ting riang rao khankix heue. ²⁴ Yayelax mawh pa kied pon bwanson khaing paox bun tix khankix, pa mawh moeng Heba ceu pui Kenix, kieh nawh pon krax pa nawb bwanson, khaing sinax bun pa ot ka daux nyiex gox khankix heue. ²⁵ Siserax mhaing tix nyaux rawm mai nawh hoik tawx rawm teeih mawie, ka daux kawk pa shiao simiang heue. ²⁶ Nawh hoik neh taix ti teei ka jim rhiem nyiex gox mai ka taix khawn dawm nawh, hoik teei ka daix cao pa yuh kaing khankix, nawh hoik tawk Siserax, tawk nawh tom phlat plak an, nawh phlap ti tik mai tawk ka hawt dawng yhaok nawh heue. ²⁷ Mai nawh goh hawt caong nawh, nawh goh mai nyat tix it see see, nawh hoik goh hawt cao bun mai nawh hoik goh tan mai nawh goh tix yum tan heue. ²⁸ Miex Siserax hoik jhak nawh khaing daux doh siviex mai riag yo daux plak man tieb, yuh ka mawx ling lawx brung nawh phex rheung yuh nin lie? Kheu, ling lawx brung nawh phex mawh pa nhim hoek yuh nin lie? ²⁹ Bun pa koe pingnya cuyi khankix, hoik deeh pawk lox yuh nin, mawh heue, nawh deeh pawk lox tokaux cao tix, ³⁰ mawh ang kix nyang yaox ti gwieh ti cie kraung pa tud pa rhim pleue, son pui ku kaux, son kawn bun tix kaux, phan ang mawh nan son kawn bun ra kaux, son Siserax, kraung ceep pa hoik siang tix daux rawm rawn tau mai pa tud pa rhim tix khankix, kraung ceep pa hoik tud hoik rhim tix khankix, mai kraung pa siang tix daux rawm rawn khawm ra plak, mawh pa vhua ka ngawg cao pa tud pa rhim khankix ang mawh lie? ³¹ Mawh kheu nan, Simiang Siyiex eue, kieh pui koeng maix khankix grai grup heue. Viang mawh nan, can pui ankix pa moh ka Nawh Cao, kieh mawh awm singaix pa riang, yam lih hoek nawh ka daux krax pa grum naog riang rao tix heue. Mawh kheu nan, haktiex hoik yiien yawg tix, tixpon num heue.

¹ Pui Isarelax khankix yuh pa caox caig ka plak sivoe ngai Simiang Siyiex, mawh kheu nan Simiang Siyiex ap kix ka daux tawm taix Midian aliah num heue. ² Pui Midian pex ka pui Isarelax khankix, mawh kheu jao pui Midian, pui Isarelax tom kaung ti ot daux tiex daux rang ka dee kaux cong son cao tix ka piang gawng khankix heue. ³ Yam ruat pui Isarelax simie nghox koi, pui Midian mai pui Amaliet, khawm pui pa ot ka plak lih singaix khankix hoek puing ka kix heue. ⁴ Kix hoek yuh tab mai yuh simie pa hoik sum kix laux leeing tom hoek ka veng Gaza mai ang lai prah pa ih, pex, yung, mawie mai la khankix son pui Isarelax, ⁵ Kix hoek tau mai to brie eei tix mai khawm nyiex gox tix, awm sido pa kied haoh hun tau mai kala uk pa ang lai uik simin mai hoek laig sonsang yuh haktiex laux leeing heue. ⁶ Mawh kheu nan pui Isarelax hoik kied hot sibhawm, kheu jao pui Midian khankix mai pui Isarelax riag yo ka Simiang Siyiex heue. ⁷ Yam riag yo pui Isarelax khankix ka Simiang Siyiex, kheu jao pui Midian khankix, ⁸ Simiang Siyiex deeh ploi cao jhai, son pui Isarelax ah nin, in mawh gumlox pa ah Simiang Siyiex ka pui Isarelax, "Aux hoik viex pex lih khaing dee yuh pex siliex, ⁹ Aux hoik taoh pex lih khaing daux taix pui Ejiptux mai khaing daux taix pui pa khin pex khawmuik mai Aux hoik grheu kix ka plak sivoe pex mai hoik tawx haktiex kix ka pex heue. ¹⁰ Aux mawh Simiang Siyiex pex, paw lhat graung ka siyiex pui Amawrix, ka daux haktiex dee ot pex, viang mawh nan pex ang koe krax cu krax nghiet ka gumlox Aux heue." ¹¹ Kawncau Simiang Siyiex hoek mai ngawm ka greem khaox tiah, pa koe ka daux yaong Awpharax, pa mawh cie Yawsha pui Abezarix, Gideon kawn simex Yawsha pah ka nghox ca ti hawt dee biiet kix rawm plix siiet, sonsang mox nawh ti khaing pui Midian khankix heue. ¹² Kawncau Simiang Siyiex hoek bleeh ka nawh ah nin, "Simiang Siyiex ot tau mai maix, pa mawh pui pa ting riang rao mai pa koe rhawm kwa heue." ¹³ Gideon deeh ah nin ka Nawh Cao, "Simiang aux eue, phan Maix ot tau mai yix, ceu inkix hoik lih koe ka piang yix, jao pa ti lie?" Mai pa daox daing pa yuh Nawh Cao, pa hoik krai keeing yix ka yix ah nin, "Simiang Siyiex hoik viex yix lih khaing daux meung Ejiptux, ceu an koe dee mawx? Yam in Simiang Siyiex hoik tik vud ka yix mai hoik ap yix ka daux taix pui Midian khankix heue." ¹⁴ Simiang Siyiex deeh veeh ti jhak nawh ah nin, "Hu ka daux riang rao pa hoik pon maix, maix tak deeh taoh pui Isarelax, khaing daux taix pui Midian, ang hoik mawh Aux pa ploi maix lie?" ¹⁵ Mai Gideon deeh ah nin ka Nawh Cao, "Simiang Siyiex eue, aux tak pon taoh pui Isarelax yuh ka mawx? doeh nyiex aux mawh pa kied iak ka daux cub pui Manashe mai aux mawh pa kied iak khaing daux nyiex ma keeing aux heue. ¹⁶ Mai Simiang Siyiex deeh ah nin ka nawh, "Aux tak ot tau mai maix tete mai maix tak pex pui Midian awm pui tix kaux heue." ¹⁷ Khaix an nawh dee ah nin ka Nawh Cao, "Yam in phan aux mawh pa hoik pon bwanson ka plak sivoe ngai Maix Cao, jhi aux yaox mhai rug tix ceu sonsang tawng aux Maix Cao mawh pa sikah tau mai tix heue." ¹⁸ Aux rawg maix ang nyang hu khaing tin, tom hoek bawg yam deeh viex krax tan tix hoek mai deuh ka plak sivoe Maix Cao, mai Nawh Cao deeh ah nin, "Aux tak pau tom yam deeh hoek maix heue." ¹⁹ Khaix an Gideon deeh ing ka nyiex mai khre kawn pex awn tix mu, khawm blah phawng nghox ca pa ang viex susaix tix Epha mai sau nex ka daux khrawng tix mu mai rawm nex tung pex ka daux aw tix mu mai viex ti tan ka kawncau Siyiex, hawt greem khaox tiah, ²⁰ Kawncau Siyiex ah nin ka nawh, "Teei nex in mai blah pa ang sau susaix hu deuh ka piang rang mai lhauk rawm nex tung ka piang, "mai nawh yuh awm an heue. ²¹ Khaix an kawncau Simiang Siyiex nyee khaox gix pa giex tix mai teeh ka nex mai blah pa ang sau susaix ankix, ngu lih khaing rang mai gleeing ka nex khawm blah pa ang sau susaix mai kawncau Simiang Siyiex deeh grai khaing plak sivoe ngai nawh heue. ²² Gideon hoik tawng ka mawh Nawh kawncau Simiang Siyiex, mawh kheu nan Gideon ah nin, "Simiang Siyiex eue, aux hoik yaox kawncau Maix plakngai taw plakngai heue." ²³ Simiang Siyiex deeh ah nin ka nawh, "Kieh pa nhim koe tau mai maix, paw koe krax lhat graung maix tak ang yum heue." ²⁴ Mawh kheu nan Gideon sum khu dee tan son Simiang tix mu tan mai kok ceu kaux an mawh Simiang Siyiex Shalon, an mawh pa koe ka daux yaong Awpharax pui Abeza tom in singaix heue. ²⁵ Ka daux sawm an Simiang Siyiex ah nin ka nawh, "Teei kawn mawie awn keeing maix mai mawie mhaing koe ju aliah num ra mu tix mu mai yieh ti tik khu dee tan Balax, pa hoik sum keeing maix mai kid ti tik khaox riang grang Asherax khankix pa koe hawt praok nawh, ²⁶ mai deeh sum khu dee tan tix mu, son Simiang Siyiex maix, ka piang rang in awm pa krai Aux mai teei kawn mawie mhaing ra mu tix mu an gleeing krax tan pa gleeing, ka khaox riang rao pa hoik kid maix ti tik ka heue. ²⁷ Mawh kheu nan Gideon kok siliex tix khankix kao kaux mai yuh awm pa hoik ah Simiang Siyiex ka nawh, viang mawh nan jao lhat nawh ka pao nyiex keeing tix mai ka pui pa ot ka daux veng khankix, nawh ang pon yuh plak ponngaix mai nawh yuh an plak ponsawm heue. ²⁸ Yam kaoh pui pa ot ka daux veng ponngawb caocao, kix yaox khu dee tan Balax hoik prung prang laux leeing mai khaox rong riang grang Asherax pa koe hawt praok an, mawh khaix kid ti tik mai hoik tan kawn mawie ra mu tix mu ka piang khu dee tan pa hoik baox sum ti tan heue. ²⁹ Mawh kheu nan kix chawk ah nin ka paox ti, tix kaux lai tix kaux, "Mawh mawx pa yuh ceu in?" Khaix hoik ciied kix ti yaox ka grawng an, kix ah nin, "Mawh Gideon kawn simex Yawsha pa yuh ceu in heue." ³⁰ Khaix an can pui pa ot ka daux veng ah nin ka Yawsha, "Viex kawn simex maix lih sonsang yum nawh, mawh kheu nawh hoik prung prang ti tik khu dee tan Balax mai hoik kid ti tik khaox riang grang Asherax an khankix pa koe hawt praok an heue." ³¹ Mai Yawsha ah nin ka pui pa cung ti yuh see ka nawh khankix, "Mawh sang ot pex plak Balax ah nin ka aux lie? mawh sang deeh taoh pex ka nawh lie?" Kieh pui pa krai lox son nawh, mawh pa yum ka sang bah riang praix, phan nawh mawh Siyiex tete, khu dee tan pa hoik prung prang an, kieh nawh krai lox ka son cao nawh heue. ³² Mawh kheu nan jah ka daux in singaix, nawh kok ceu kaux kawn nawh mawh Yerubalax, kheu ah nawh nin, "Kieh Balax deeh krai lox ka son cao tix, ka pui pa hoik prung prang khu krub dee tan nawh laux leeing heue." ³³ Khaix an pui Midian mai pui Amaliet, ceu pui plak lih singaix khankix khrawm paox ti khawmuik, kix tiang ka plak an mai bang tix ot ka daux ngawd Yezerelax heue. ³⁴ Khwan Simiang Siyiex lih ka piang Gideon, khaix an nawh phlu teettawng mai pui Abeza khrawm paox tix hoek ka plak khaix nawh heue. ³⁵ Mai nawh ploi cao cau khankix hu ka haktiex Manashe khawmuik, pui Manashe kawx khrawm paox ti hawt khaix nawh, nawh baox ploi cao cau khankix hu ka haktiex Asha, haktiex Zebulun mai ka haktiex Napthalix mai kix kawx khrawm paox ti hawt khaix nawh khawmuik heue. ³⁶ Mai Gideon deeh ah nin ka Siyiex, "Phan maix cao sang deeh taoh pui Isarelax, ka taix aux awm pa hoik ah Maix Cao, ³⁷ aux tak deuh hauk yung ka daux glah dee pah nghox, phan rawm ciex koe ka piang hauk yung an mai haktiex mawh pa kroh, khaix an aux tak tawng ka sang deeh taoh Maix Cao ka pui Isarelax khankix, ka daux taix aux, awm pa hoik ah Maix Cao heue." ³⁸ Yam kaoh nawh ponngawb caocao singaix khaix, nawh siyiet hauk yung an mai rawm ciex lih khaing hauk yung, tom naog ka daux pheung tix mu heue. ³⁹ Khaix an Gideon deeh ah nin ka Siyiex, "Paw nyang song rhawm ka aux liak, kieh aux baox krai lox tix bawg ha, aux rawg tix baox cheuk ti deuh hauk yung tix bawg, kieh rawm ciex kroh ka piang hauk yung mai kieh rawm ciex lan piang tiex khawmuik heue." ⁴⁰ Mai Siyiex yuh ka daux sawm an, mawh hauk yung pa kroh ngie, viang mawh nan tiex khawmuik hoik lan ka rawm ciex heue.

¹ Yerubalax pa mawh Gideon mai can pui pa ot mai nawh kaoh caocao mai hu bang ka praok rawm daux Harot, pui Midian khankix bang ka plak laong khaing kix, ka daux ngawd hawt caong gawng Mawre heue. ² Mai Simiang Siyiex ah nin ka Gideon, "Pui pa ot tau mai maix kied nie, Aux ang pon ap pui Midian khankix ka daux taix kix, Aux lhat pui Isarelax khankix yaw rang di tix khaing Aux ah nin, plawng taix cao Aux hoik deeh taoh ka aux heue. ³ Mawh kheu nan krai pao pui mhong ah nin, "Pui pa koe krax lhat graung mai pa khi rhawm khankix, kieh nawh dee ing caocao khaing gawng Gilat mai pui deeh ing ra mheen, kawn deuk tix mheen kaux heue." ⁴ Mai Simiang Siyiex ah nin ka Gideon, "Pui khankix kawn nie tete, viex kix hu ka dee nyaux rawm mai Aux tak cheuk ti yaox kix, son maix tan, ka pui pa ah aux pon ti hu pui an tak mawh pa hu tau mai maix, ka pui mawx pa ah aux ang pon ti hu, pui an tak ang pon ti hu tau mai maix heue. ⁵ Mawh kheu nan nawh viex kix hu ka dee nyaux rawm mai Simiang Siyiex ah nin ka Gideon, "Pui pa lied ti nyaux rawm ka dak tix awm sox maix tak gwieh ti deuh tix cub mai pui pa grux ngawng tix nyaux rawm maix tak gwieh kix tix cub heue." ⁶ Pui pa dawm rawm lied tix nyaux ka daux taix tix, simin ti yaox koe pui loe yieh kaux, pui pa kawn deuk khankix mawh pa grux ngawng tix nyaux rawm heue. ⁷ Khaix an Simiang Siyiex ah nin ka Gideon, "Ka pui loe yieh kaux inkix, pa hoik lied ti nyaux rawm Aux tak taoh maix ka mai ap pui Midian khankix ka daux tawm taix maix, kieh pui pa deuk khankix deeh ing ka dee ot tix heue. ⁸ Mawh kheu nan pui khankix teei ti viex priex ih tix mai viex teettawng ka daux taix tix mai nawh ploi pui Isarelax pa kawn deuk khankix deeh ing ka nyiex gox cao kix ku kaux mai nawh yut ngie pui loe yieh an tau mai tix, pui Midian hoik bang ti ot plak greem ka daux ngawd heue. ⁹ Daux sawm an Simiang Siyiex ah nin ka nawh, "Kaoh heue, lih hu ka dee bang pui koeng maix khankix, mawh kheu Aux hoik ap kix ka daux taix maix heue." ¹⁰ "Phan maix koe krax lhat graung kok kawncau maix Phura hu tau mai maix, ¹¹ mai maix tak mhong ka ceu pa ah kix, khaix ceu an khawn taix maix tak koe riang rao, sonsang lih hu dee bang kix, mai nawh lih hu tau mai kawncau Phura, ka dee pau kru naing ka plak praix tab dee bang kix heue." ¹² Yam an pui Midian mai pui Amaliet mai pui pa kaoh khaing plak lih singaix khankix, kied haoh hun awm haoh hun sido khankix mai kix laig it ka daux ngawd khawmuik mai kala uk kix kawx mawh pa ang lai dak uik simin awm mhaik rawm sigrit sigra heue. ¹³ Yam hoek Gideon tan nawh mhong ka krai pui, grawng camaox tix ka paox grawm tix khankix ah nin, "Aux camaox blah nghox ca tix lon bang lia hoek ka dee bang pui Midian, hu krox ka nyiex gox tix lhang, nyiex gox an pluk pliak mai laux leeing heue." ¹⁴ Paox grawm nawh deeh ah nin, in ang mawh grawng tidtix, mawh vaig Gideon kawn simex Yawsha, pui Isarelax, mawh kheu Siyiex hoik ap pui Midian mai khawm kru naing kix khawmuik ka daux taix nawh heue." ¹⁵ Yam hoik mhong Gideon ka krai kix camaox an mai dee bleeh, nawh krub ka Simiang Siyiex, nawh deeh ing ka dee bang pui Isarelax khankix ah nin heue. "Yaog tix kaoh, mawh kheu Simiang Siyiex hoik ap cub kru naing pui Midian ka daux taix pex heue." ¹⁶ Khaix an nawh gwieh pui loe yieh koe loe cub mai kieh kix viex teettawng ku kaux, ka daux taix tix tau mai aw tiex pa koe kawk ngu ka plak daux heue. ¹⁷ Mai nawh ah nin ka kix, "Jhak ka aux mai hawt ti yuh awm aux mai pau tix jhak aux, yam hoek aux ka dex mee dee bang kix, pex tak yuh awm pa yuh aux heue." ¹⁸ Yam phlu aux teettawng mai pui pa ot tau mai aux ka teettawng, pex pa ot ka praok dee bang kix khawmuik tak phlu teettawng ah nin heue. "In mawh vaig Simiang Siyiex mai Gideon heue." ¹⁹ Pui tix yieh pa hu tau mai Gideon hoek ka tab dee bang kix greung sawm, yam taug khraox loh cao pau tab paox ti mai kix phlu teettawng viex tix mai pah aw tiex pa koe daux taix tix max heue. ²⁰ Cub pui naing nawh khawm loe cub phlu teettawng tix mai pah aw tiex max, kix giex kawk ngu ka taix khawn gwiex mai giex teettawng ka taix khawn dawm mai yo ah nin, "Vaig Simiang Siyiex mai Gideon heue." ²¹ Pui tang cung ka dee ot tix hawt vung viang tab mai kru naing kix khawmuik riag yo mai to tua tix heue. ²² Yam phlu pui loe yieh kaux ka teettawng tix, Simiang Siyiex kieh vaig kix, ra lai mug ka paox ti ka daux tab kix khawmuik mai kru naing ankix, lih to ka plak veng Bietshita, pa koe plak see veng Zererax, tom hoek ka mee haktiex veng Abelmehawla pa koe hawt veng Tabat heue. ²³ Pui Isarelax khrawm paox ti ka haktiex Napthalix, haktiex Asha mai haktiex Manashe mai hawt ti pheet pui Midian heue. ²⁴ Mai Gideon ploi pui cau tix khankix hu ka gawng Epharem mai tawm lox ka kix ah nin, kieh pui Midian hoek mai pau diang rawm Yawdan tom hoek ka yaong Bietbarax haktiex hawt rawm Yawdan heue. Pui Epharem kawx khrawm paox tix mai pau diang rawm, tom hoek ka yaong Bietbarax heue. ²⁵ Mai kix hoik pon giex cao kaing naing ting pui Midian ra kaux, pa kaux Awrebax mai Zebax, kix pah Awrebax piang rang Awrebax mai pah Zebax ka dee biiet Zebax rawm plix siiet, kix hawt khaix pui Midian mai viex kaing Awreba mai kaing Zebax hoek ka Gideon, ka toi rawm Yawdan heue.

¹ Yam an pui Epharem deuh phimap sigrien sigre ah nin, "Kheu maix yuh ceu in ka yix, yam hu puing maix pui Midian maix ang kok yix lie?" ² Mai nawh deeh ah nin ka kix, ceu pa hoik yuh aux khex sang pon tiag awm kaing pa hoik yuh pex lie? Plix siiet pa sut pex Epharem kawn nie lheu mhawm khaing sigleem plix siiet khrawm Abeza ang mawh lie? ³ "Siyiex hoik ap cao kaing naing ting pui Midian pa mawh Awrebax mai Zebax ka daux taix pex, aux sang pon yuh ceu patix, sonsang tiag aux tokaux tix mai pex lie?" Yam an krax song rhawm kix deeh grai, kheu ah nawh ceu an ka kix heue. ⁴ Yam hoek Gideon ka rawm Yawdan, tau mai pui loe yieh kaux, pa hu tau mai nawh khankix, tiang rawm an tau mai pa taug mao tix heue. Viang mawh nan kix kawn pon hawt pheet heue. ⁵ Nawh ah nin ka pui pa ot ka daux veng Sukhok, "Yuh bwanson tawx blah ka pui pa hawt khaix aux khankix liak! Kix kied taug mao mai aux kawn hawt tix sawg simiang Zebaha mai Zalamunax, pa mawh simiang pui Midian heue." ⁶ Mai cao kaing veng Sukhok ah nin, "Sonsang tawx yix blah ka kru naing maix khankix mawh hoik koe simiang Zabaha mai Zalamunax daux taix maix yam in lie? ⁷ Mai Gideon deeh ah nin, "Jao grawng in yam hoik ap Simiang Siyiex Zebaha mai Zalamunax ka daux taix aux sax, aux tak sivied blawg pex, ka kat lawm pa koe daux tiag tom griah nex pex ka heue." ⁸ Khaix an nawh lih hu khaing tan mai hoek ka veng Penuelax mai krai ka kix, awm pa hoik krai tix mai pui veng Penuelax pawk lox nawh, awm pawk pui veng Sukhok ka nawh heue. ⁹ Mawh kheu nan nawh ah nin ka pui veng Penuelax, "Yam deeh hoek aux ka daux pa nhim tix bawg sax, aux tak yuh nyiex tab pau pex laux leeing heue." ¹⁰ Yam an Zebaha mai Zalamunax ot ka daux veng Karakawtao mai kru naing kix tix mheen phwan rheng, pui naing khankix mawh pa kawn deuk, khaing kru naing pui pa kaoh ka plak lih singaix, mawh kheu pui pa giex vaig giex pliah hoik yum tix sien mai ra mheen ka daux naing heue. ¹¹ Gideon hu plak ot pui Midian ka daux nyiex gox kix, ka plak lih singaix dau veng Nawbaha mai veng Yubeha mai puing ka kru naing an kix mai ang koe krax khi tit tix dee bang tix heue. ¹² Simiang pui Midian pa mawh Zebaha mai Zalamunax lih to mai Gideon nied tix pheet kix mai pon giex kiex khawm ra kaux, nawh yieh ti tik tab mai kieh kru naing kix prung prang khawmuik heue. ¹³ Khaix an Gideon kawn simex Yawsha, deeh ing khaing daux biang naing mai hoek hawt krax caong gawng Herie heue. ¹⁴ Nawh giex pui awn ju pa ot daux veng Sukhok tix kaux mai chawk cheng nawh, kaw an tiem tix tawx ceu kaux cao kaing veng Sukhok, khawm ceu kaux kwad song pa ot ka daux veng an atixgliah aliah kaux ka nawh heue. ¹⁵ Khaix an Gideon hoek ka veng Sukhok ah nin, "Jhak heue, in mawh simiang Zebaha mai Zalamunax, pa koe lox sibriem pex ka aux, pa ah pex nin, "Mawh koe Zebaha mai Zalamunax, ka daux taix maix yam in, sonsang tawx yix blah ka pui pa taug mao maix khankix lie?" ¹⁶ Nawh kok kwad song pa ot ka daux veng an khankix mai sidiex pui veng Sukhok, ka kat lawm pa koe daux tiag khankix heue. ¹⁷ Khaix an nawh yieh ti tik nyiex tab pau veng Penuelax mai pah ti tik pui veng an kix heue. ¹⁸ Mai nawh ah nin ka Zebaha mai Zalamunax, "Pui pa pah pex daux veng Tabaw mawh pui pa yuh ka mawx?" Kiex deeh pawk ah nin, "Kix awm maix mai kix ku kaux hoik awm grang kawn simex simiang heue." ¹⁹ Gideon deeh ah nin, "Kix hoik pux aux mai mawh kawn simex miex aux, awm pa im ju Simiang Siyiex, phan pex kieh kix im ju yam an naox, aux ang tau tix pah pex yum heue." ²⁰ Mai nawh ah nin ka kawn Ai tix Yeta, "Yaog tix kaoh mai pah kix heue." Viang mawh nan kawn nawh ang pon lawd vaig tix lih, kheu lhat tix jao kawn mawh nawh kawn nyawm heue. ²¹ Mawh kheu nan Zebaha mai Zalamunax khankiex ah nin, "Cao maix kaoh mai pah ka yiex, mawh kheu pui tak koe riang rao, awm diag pa mawh nawh pui tix kaux, mawh kheu nan Gideon yaog ti kaoh mai pah Zebaha mai Zalamunax khawm ra kiex mai peeik ti teei kraung khri pa sau kiex ka ngawg kala uk tix heue. ²² Yam an pui Isarelax ah nin ka Gideon, "Hoik deeh taoh maix yix khaing daux tawm taix pui Midian maix mai kawn praix maix khawm kawn saux kawn sex maix kwang ka piang yix heue." ²³ Gideon ah nin ka kix, "Aux ang pon kwang piang pex, kawn simex aux kawx, ang pon kwang piang pex, Simiang Siyiex tak mawh pa kwang piang pex heue." ²⁴ Mai Gideon ah nin ka kix, "Aux simie ti khyox khaw ka pex tix ceu, aux rawg pex tawx krim pa pon tud rhim pex khankix khaing pui koeng ka aux, " mawh kheu pui koeng khankix mawh pui Ishamelax mai koe krim khri yhaok khankix heue. ²⁵ Mawh kheu nan kix deeh ah nin, "Yix tak tawx ka maix daux pa gaux rhawm ti, " Kix tawm prux ka piang tiex mai pui ku kaux, deuh krim khri yaog pa pon tud rhim tix ka piang prux an heue. ²⁶ Pa cien krim khri yhaok pa rawg mhaing nawh khankix, koe tix rheng aliah yieh shekhe, lheu khaing an nawh baox pon kraung tauk ka ngawg, maox soi ngawg mai sibex dah raoh rawt, pa ceep simiang Midian, tau mai kraung maox ngawg pa sau vung viang ngawg kala uk kix heue. ²⁷ Khaix an Gideon yuh sibex dhah dawd taix ka kraung khri mai deuh ka daux veng ot tix ka veng Awpharax, pui Isarelax hoik lud vao tau mai kraung an kix tan, an deeh lih mawh kie taong ka Gideon mai pao nyiex nawh khankix heue. ²⁸ Pui Midian hoik som ka plak sivoe pui Isarelax mai ang lai pon yaog kaing tix, tix bawg kawx, haktiex hoik yiien yawg tix tixpon num, daux baux ju Gideon heue. ²⁹ Yerubalax kawn simex Yawsha, deeh ing ot ka daux nyiex cao tix heue. ³⁰ Gideon koe kawn simex atixgliah kaux, pa hoik mawh kawn cao nawh, mawh kheu koe moeng nawh tom nie heue. ³¹ Moeng iak nawh pa ot ka daux veng Shekhim, keh kawn simex tix kaux son nawh, ceu kaux nawh mawh Abimaliet heue. ³² Yam in Gideon kawn simex Yawsha, hoik kuad mai yum, kix sipaung nawh ka daux simeeig keeing nawh Yawsha ka daux veng Awpharax dee ot Abeza heue. ³³ Mai khaix hoik yum Gideon pui Isarelax baox deeh lud vao mai siyiex Balax mai kix deeh yaog Bala Berit mawh siyiex tix heue. ³⁴ Pui Isariax ang lai doh keud ka Simiang Siyiex, pa hoik deeh taoh kix khaing daux tawm taix pui koeng kix, pa ot hawt praok kix kudah, ³⁵ mai kix ang lai jhi krax caux rhawm tix ka nyiex ma Yerubalax pa mawh nyiex ma Gideon, awm ceu pa mhawm hoik yuh nawh son pui Isarelax khankix heue.

¹ Abimaliet kawn simex Yerubalax hu ka veng Shekhim, dee ot pux miex tix mai nawh sikah tau mai kix mai ka paox nyiex keeing nawh ah nin heue. ² "Krai pui pa ot daux veng Shekhim khankix mhong, mhawm krax kwang kawn simex Yerubalax atixgliah kaux ka piang pex lie? Phan ang mawh nan mhawm krax pa kwang pui tix kaux ka piang pex lie? Doh keud ka mawh aux nex nham pex heue." ³ Paox nyiex ma keeing nawh deeh krai pui veng Shekhim mhong lox in mai kix tat rhawm tix sonsang hawt khaix Abimaliet, mawh kheu kix hoik ah nin, "Nawh mawh puxaik yix heue." ⁴ Mawh kheu nan kix teei ti tawx mau atixgliah shekhe khaing daux nyiex vad Balax Berit ka nawh, Abimaliet deeh cang pui pa lu lhia vu vie mai pui pa ang cu nghiet ka mau an heue. ⁵ Khaix an nawh hu ka nyiex keeing tix, ka daux veng Awpharax mai pah puxaik nawh khankix, pa mawh kawn simex Yerubalax atixgliah kaux ka piang rang, viang mawh nan Yawtan kawn ghoik Yerubak pon glawd kheu jao mox nawh tokaux tix heue. ⁶ Pui veng Shekhim mai pui veng Bietmilaw khankix khrawm paox tix mai yaog Abimaliet mawh simiang tix, hawt praok tiag khaox tiah, ka dee koe rong simaox ka daux veng Shekhim heue. ⁷ Yam hoik krai kix grawng an ka Yawtan, nawh lih hu mai cung ka piang choek gawng Gerazim, nawh yo lox tix ah nin ka kix, "Pex pui veng Shekhim khankix eue, sonsang nghiet Siyiex lox pex heue." ⁸ Daux tix bawg, khaox khankix hu, sonsang yaog simiang tix kaux, pa sang kwang piang kix mai kix ah nin ka khaox Sanlun, "Kwang ka piang yix liak." ⁹ Yam an khaox Sanlun deeh ah nin ka kix, "Mawh sang tik aux bee tix pa yaogyaw pui min plakngai Siyiex mai min plakngai kawn pui khankix mai kwang ka piang khaox ankix lie?" ¹⁰ "Khaix an, khaox an khankix, deeh ah nin ka khaox ruh, hoek maix kwang ka piang yix liak? ¹¹ Mai khaox ruh deeh ah nin ka kix, mawh sang tik aux rawm pa tie tix mai khawm plix pa mhawm tix mai hu kwang ka piang khaox an kix lie?" ¹² Khaix an khaox khankix deeh ah nin ka nhu plix siiet, "Hoek maix kwang ka piang yix liak." ¹³ Mai nhu plix siiet deeh ah nin ka kix, "Mawh sang tik aux rawm plix siiet khraox tix, pa tawx krax nyawm rhawm ka Siyiex mai ka pui khankix mai hu kwang ka piang khaox an kix lie?" ¹⁴ Khaix an khaox khankix deeh ah nin ka pang kat, hoek maix kwang ka piang yix liak! ¹⁵ Mai pang kat deeh ah nin ka khaox khankix, phan pex sang yaog aux mawh simiang pa kwang ka piang pex tete, hoek ot greem veei aux, phan pex ang rhawm ot greem veei aux ngu tak lih khaing daux pang kat mai gleeing ti tik khaox gix, pa koe ka piang gawng Lebanon khankix heue. ¹⁶ "Yam in pex yaog Abimaliet mawh simiang tix, mawh hoik yuh pex ceu an ka daux pa mawh meh mai daux pa rahsee lie? Ka Yerubalax mai khawm paox nyiex nawh khankix kawx, pex caw ti yuh pa khaw pa mhawm, ceu pa yuh pex an kix mawh pa caw nawh ti pon ang mawh lie?" ¹⁷ "Keeing aux hoik puing naing son pex mai hoik kham ti tawx ju tix, sonsang deeh taoh pex, khaing daux tawm taix ceu pui Midian khankix heue." ¹⁸ Viang mawh nan pex hoik tieh feen ka nyiex ma keeing aux, daux in singaix mai pah kawn simex nawh atixgliah kaux, ka piang rang mai pex hoik kieh Abimaliet kawn simex kawncau bun nawh, mawh simiang ka piang pui veng Shekhim, kheu hoik mawh nawh puxaik pex heue." ¹⁹ "Yam in phan pex yuh ceu pa mawh meh mai pa rahsee ka Yerubalax tau mai pao nyiex nawh, kieh pex koe krax gaux rhawm tau mai Abimaliet mai nawh tak koe krax gaux rhawm tau mai pex heue." ²⁰ "Phan ang mawh nan kieh ngu lih khaing daux Abimaliet mai yuh pui veng Shekhim khankix mai pui veng Biet Milaw khankix laux leeing, phan ang mawh nan kieh ngu deeh lih khaing pui veng Shekhim mai khaing pui veng Biet Milaw khankix, deeh hu gleeing Abimaliet laux leeing heue." ²¹ Khaix an Yawtan to hu ka veng Berax mai ot tan kheu jao lhat nawh ka pux ke tix Abimaliet heue. ²² Khaix hoik kwang Abimaliet ka pui Isarelax loe num, ²³ Siyiex ploi khwan pa caox hoek ka piang Abimaliet mai pui veng Shekhim kix ang lai kaux sijax ka Abimaliet, ²⁴ grawng see in mawh pa hoik yuh nawh ka piang kawn simex Yerubalax atixgliah kaux, pa deeh hoek ka piang nawh mai nham phimap kix tak mawh pa glup ka piang puxaik Abimaliet, pa hoik pah ka kix mai ka piang pui veng Shekhim, pa hoik teem nawh pah ka puxaik ti heue. ²⁵ Pui veng Shekhim kieh pui kix yuh naing jhawm ka Abimaliet mai deuh pui ka piang choek gawng mai yuh con ka pui pa hu khre hawt baoh an khawmuik, Abimaliet deeh mhong ka grawng an heue. ²⁶ Galax kawn simex Ebiet mai puxaik ti khankix hoek ka veng Shekhim, pui veng Shekhim deuh rhawm ti ka nawh heue. ²⁷ Kix lih hu ka daux kaung mai teei plix siiet, khaing daux sipeem plix siiet, sonsang yuh kix krax gaux rhawm kix biiet rawm plix siiet mai an kix laig ka daux nyiex siyiex tix mai nyaux rawm plix siiet tan mai jhax lawg ka Abimaliet heue. ²⁸ Galax kawn simex Ebiet ah nin, sonsang yuh ex kaing jhaw nawh, Abimaliet mawh pui pa yuh ka mawx? Mai Shekhim kawx mawh pa yuh ka mawx? Nawh mawh kawn simex Yerubalax mai Zebulax hoik mawh cao kaing nawh ang mawh lie? Kieh ex yuh kaing jhaw pui Hamaw, pa mawh keeing Shekhim, jao patix ex lai sang yuh kaing jhaw Abimaliet" ²⁹ "Phan pui inkix hoik ot ka daux tawm taix aux, aux tak gah Abimaliet, mai krai ah nin ka Abimaliet, baox khre kru naing maix mai lih hoek heue." ³⁰ Yam mhong Zebulax pa kwang veng ka gumlox Galax kawn simex Ebiet, krax song rhawm nawh hoik kaoh dom mawx dom an heue. ³¹ Nawh yuh cuyi mai ploi cao cau khankix hu ka Abimaliet mai kieh kix ah nin ka nawh, "Galax kawn simex Ebiet mai puxaik nawh khankix, hoik hoek ka veng Shekhim mai kix ot tin, " yam in kix hoik yuh veng tix kaux cong sonsang puing ka maix heue. ³² "Mawh kheu nan daux sawm in maix khawm pui pa ot tau mai maix khankix, kaoh mai hu jawm ti pau kix ka daux kaung heue." ³³ Maix kaoh plak ponngawb caocao yam lih singaix mai hu laig sijaox ka daux veng, yam lih hoek nawh tau mai pui nawh khankix ka maix, maix tak pon ti yuh ka kix, awm pa khaw maix ti yuh heue." ³⁴ Mawh kheu nan Abimaliet mai pui pa ot tau mai nawh khankix, kaoh ka daux ponsawm mai hu jawm ti pau veng Shekhim tau mai pui naing pon cub heue. ³⁵ Yam lih cung Galax kawn simex Ebiet mai pui nawh ka diang siviex veng, Abimaliet mai pui ot tau mai nawh, yaog ti kaoh khaing dee jawm kix ti pau heue. ³⁶ Yam hoik yaox Galax ka pui khankix nawh ah nin ka Zebulax, "Jhak heue, pui khankix hoik lih khaing choek gawng, viang mawh nan Zebulax deeh ah nin ka nawh, maix hoik yaox veei gawng awm mawh jung pui khankix heue." ³⁷ Mai Galax baox ah nin, "Jhak heue, pui khankix hoik lih jee khaing sigreung gawng mai an tix cub kaoh khaing Divina pa mawh Mawnenim, dee koe khaox tiah khankix heue." ³⁸ Khaix an Zebulax deeh ah nin ka nawh, "Awm pa hoik ah maix, ex lai sang yuh kaing jhaw nawh, Abimaliet mawh pui pa yuh ka mawx lie? pui in kix hoik mawh pa sibriem maix ka ang mawh lie? Lih hu mai puing ka kix yam in heue." ³⁹ Mawh kheu nan Galax lih hu mai thong pui veng Shekhim khankix puing ka Abimaliet heue. ⁴⁰ Abimaliet hawt pheet ka nawh mai Gilax pon to khaing nawh mai pui nawh khankix hoik kied mat tom nie mai yum hawt daux diang siviex veng heue. ⁴¹ Khaix an Abimaliet ot ka daux veng Aruma mai Zebulax grheu Galax mai puxaik nawh khankix, son ang kix lai pon ti ot ka daux veng Shekhim heue. ⁴² Yam hoek ka daux singaix khaix Abimaliet mhong grawng sang lih hu pui khankix ka daux kaung, ⁴³ mawh kheu nan nawh deeh kok lien ti khankix mai gwieh kix koe loe cub mai kieh kix hu jawm ti pau ka daux kaung mai jhak ti yaox ka kix, yam yaox lih pui khankix khaing daux veng, kix yaog ti kaoh mai hu puing ka kix heue. ⁴⁴ Abimaliet mai cub pui naing pa ot tau mai nawh, nied ti hu mai pau diang siviex laig daux veng mai tang cub nied tix lih hu ka pui pa hoik ot daux kaung khankix mai pah ti tik kix heue. ⁴⁵ Abimaliet puing ka veng an leeing lang singaix mai pah pui pa ot ka daux veng khankix mai yieh guh veng khankix laux leeing mai ruat kih ka piang dee laux guh veng heue. ⁴⁶ Yam mhong pui pa ot ka piang nyiex pau tab Shekhim khankix ka grawng an, kix laig ot ka dee kaux cong pa mawh nyiex vad Berit heue. ⁴⁷ Yam hoik mhong Abimaliet, pui khankix pa ot ka daux nyiex pau tab veng Shekhim, hoik khrawm paox ti tau heue. ⁴⁸ Abimaliet lih hu ka piang gawng Zalamon tau mai pui nawh khankix Abimaliet viex moe ti mag daux taix tix mai kid kak khaox tix gawng, nawh teei kak khaox an mai klawm hu ka piang klip ti ah nin ka can pui pa ot tau mai nawh khankix, yaox pex yuh aux ka mawx pex nied ti hawt yuh awm pa hoik yuh aux heue." ⁴⁹ Awm an pui ku kaux kid kak khaox cie ti mai hawt khaix Abimaliet mai deuh ka dee pa kaux cong ot pui an, kix keeig ngu ka nyiex pau tab pa kaux cong ot kix simex khawm bun pa ot ka daux nyiex pau tab Shekhim khankix yum tix rheng kaux heue. ⁵⁰ Khaix an Abimaliet deeh hu ka veng Tebiet mai kix lai lawm ka veng Tebiet mai puing ka veng an heue. ⁵¹ Viang mawh nan nyiex pau tab pa kaux cong kawn koe tix mu ka daux veng, pui veng khankix to laig tan mai nyeep siviex ka plak daux mai kix haok ka piang choek nyiex pau tab an heue. ⁵² Abimaliet hoek dex nyiex pau tab an mai puing ka dee an mai nawh greed tix dex siviex nyiex pau tab an, sonsang keeig ka ngu heue. ⁵³ Bun tix kaux teei simaox mhaw tix plak dheem ka piang kaing Abimaliet mai kaing nawh max heue. ⁵⁴ Nawh nied ti kok kawn lien pa viex kraung naing ti ah nin ka nawh, "Lawd vaig maix mai pah ka aux, "Phan ang mawh nan aux lhat pui khankix ah nin ka tix, "Mawh bun pa pah ka nawh, "mawh kheu nan kawn lien nawh suat nawh ka vaig tix mai nawh yum tan heue. ⁵⁵ Yam yaox pui Isarelax khankix ka hoik yum Abimaliet, kix ku kaux lih hu ka dee ot cao ti heue. ⁵⁶ Mawh kheu nan Siyiex deeh pawk pa caox caig ka Abimaliet, pa hoik yuh nawh ka keeing ti, ka hoik pah nawh puxaik ti khankix atixgliah kaux heue. ⁵⁷ Pa caox caig yuh pui veng Shekhim khankix Siyiex hoik deeh kieh hoek ka piang cao kix mai awm lox pa hoik jhax lawg Yawtan kawn simex Yerubalax, hoik hoek ka piang kix khawmuik heue.

¹ Khaix Abimaliet cao pa sang deeh taoh ka pui Isarelax khankix deeh lih tix koe mai nawh mawh Tawlax kawn simex Pu-a pa mawh kawn simex Dodo ceu pui Issakha nawh ot ka daux veng Shamira ka piang gawng Epharem khankix heue. ² Nawh prawng see ka piang pui Isarelax tixnga loe num, khaix an nawh yum mai kix sipaung nawh ka daux veng Shamira tan heue. ³ Khaix nawh deeh mawh Ya-irax ceu pui Gilat, mawh pa prawng see ka piang pui Isarelax khankix tixnga ra num heue. ⁴ Nawh hoik koe kawn simex tixngoe kaux, pa hoik brug la tixngoe mu, kix baox koe veng tixngoe veng mai kok ceu kaux veng an mawh Havot Ya-irax tom in singaix mai veng an kix hoik koe ka daux haktiex Gilat heue. ⁵ Ya-irax yum mai kix sipaung nawh ka daux veng Khamon heue. ⁶ Khaix an pui Isarelax khankix, baox deeh yuh pa caox caig, ka plak sivoe ngai Simiang Siyiex mai yuh kaing jhaw siyiex Balax mai siyiex Ashatariet, siyiex, Shurix, siyiex Sidon, siyiex Mawbax, siyiex pui Amon mai siyiex pui Philitix khankix, kix hoik tik vud ka Simiang Siyiex mai ang lai yuh kaing jhaw Nawh Cao heue. ⁷ Mawh kheu nan krax pa kied song rhawm Simiang Siyiex, hoik lih ka piang pui Isarelax mai Nawh Cao coh kix ka daux taix pui Philitix mai pui Amon khankix heue. ⁸ Jah ka daux num an kix hoik yuh krax tuk krax kha mai yeen yah ka pui Isarelax khankix kao daix num, pa ot ka praok toi rawm klawng Yawdan, dee ot pui Amawrix ka daux haktiex Gilat heue. ⁹ Lheu khaing an pui Amon khankix hoik tiang hoek ka plak toi rawm Yawdan, sonsang puing ka pui Yudax mai ka pui Benyamin mai ka doeh nyiex ma pui Epharem khankix, mawh kheu nan pui Isarelax kied yaox krax kha rhawm heue. ¹⁰ Pui Isarelax riag yo ka Simiang Siyiex ah nin, "Yix hoik lud ka Maix Cao, mawh kheu hoik tik vud yix ka Simiang Siyiex tix mai hoik hu yuh kaing jhaw siyiex Balax heue." ¹¹ Mai Simiang Siyiex deeh ah nin ka pui Isarelax, "Ang mawh Aux pa hoik taoh pex khaing pui Ejiptux, khaing pui Amawrix khaing pui Amon mai khaing pui Philitix khankix lie?" ¹² "Yam ciyang pui Sidon, pui Amaliet mai pui Mawnix ka piang pex, pex riag yo ka Aux mai Aux hoik taoh pex khaing daux taix kix heue." ¹³ "Viang mawh nan pex hoik tik vud ka Aux mai hu yuh kaing jhaw siyiex tang kaux, mawh kheu nan Aux tak ang lai baox deeh taoh pex heue." ¹⁴ "Lih hu mai riag yo ka siyiex pa laug pex ti teei khankix, kieh kix deeh taoh pex yam hoek pex krax laux rhawm heue." ¹⁵ Khaix an pui Isarelax khankix deeh ah nin ka Simiang Siyiex, "Yix hoik lud, yuh ka yix awm pa koe alo Maix Cao, yix rawg Maix Cao deeh taoh yix daux in singaix khaing heue." ¹⁶ Mawh kheu nan kix tik vud siyiex tang meung pa koe daux sinax kix mai deeh yuh kaing jhaw Simiang Siyiex mai rhawm rhi Nawh Cao, ang lai pon yaox krax kha rhawm pui Isarelax khankix heue. ¹⁷ Pui Amon khrawm paox tix mai hu yuh tab ka haktiex Gilat, pui Isarelax khankix kawx deeh baox khrawm paox tix mai hu yuh tab ka veng Mizapa heue. ¹⁸ Cao kaing haktiex Gilat khankix ah nin ka paox tix ti kaux lai ti kaux, "Mawh pui mawx pa sang jah ti puing ka pui Amon, nawh tak pon ti mawh cao kaing ka piang pui pa ot ka daux haktiex Gilat khankix heue."

¹ Yephata pa mawh pui Gilat, mawh pui pa koe riang mai koe rhawm kwa rhawm vao, nawh mawh kawn simex bun coh kaux mai keeing nawh mawh Gilat heue. ² Moeng Gilat keh kawn simex tom nie yam hoik ting lhaong kix ku kaux, kix grheu Yephata lih hu khaing kix ah nin ka nawh, "Maix tak ang pon ti koe sinngao tix ceu kawx, ka daux nyiex ma keeing yix, mawh kheu maix hoik mawh kawn simex bun tang kaux heue." ³ Khaix an Yephata to khaing puxaik nawh khankix mai hu ot ka daux haktiex Tawbax, cub pui pa lu lia vu vie pa ang mhawm jhawm khankix, khrawm paox tix mai Yephata mai kix hawt khaix nawh heue. ⁴ Khaix hoik luan bawg yam tix baux, pui Amon yuh naing ka pui Isarelax heue. ⁵ Yam yuh pui Amon naing ka pui Isarelax khankix, kuad simiang haktiex Gilat khrawm paox tix hu kok Yephata khaing daux haktiex Tawbax heue. ⁶ Mai kix ah nin ka Yephata, "Hoek mai yuh cao kaing naing ting yix, sonsang pon yix ti puing ka pui Amon khankix heue." ⁷ Mai Yephata deeh ah nin ka kuad simiang haktiex Gilat, "Pex hoik koeng ka aux mai hoik grheu aux lih khaing daux nyiex ma keeing aux ang mawh? Yam in pex lai hoek ka aux, yam koe krax pa laux rhawm ti yuh ka mawx?" ⁸ Mai kuad simiang haktiex Gilat deeh ah nin ka Yephata, "Kheu jao an yix hoik baox hoek ka maix yam in, hu tau mai yix mai puing ka pui Amon khankix sonsang kieh yix maix mawh cao kaing ka piang pui pa ot daux haktiex Gilat khankix heue." ⁹ Yephata deeh ah nin ka kuad simiang haktiex Gilat, "Pex deeh viex aux ing ka daux nyiex mai puing ka pui Amon khankix, phan Simiang Siyiex ap kix ka aux, mawh sang kieh pex aux mawh cao kaing pex?" ¹⁰ Mai kuad simiang haktiex Gilat ah nin ka Yephata, "Phan yix ang cu ti yuh awm lox krai maix khankix Simiang Siyiex tak mawh mhai rug sinax ex heue." ¹¹ Khaix an Yephata lih hu mai kuad simiang haktiex Gilat mai pui an kix yaog nawh mawh cao kaing naing ting ka piang kix mai Yephata deeh krai lox ka plak sivoe Simiang Siyiex ka daux veng Mizapa tan heue. ¹² Yephata ploi pui cau tix hu ka simiang pui Amon mai kieh kix ah nin, "Mawh koe aux grawng ceu patix ka maix, maix lai sang hoek puing ka haktiex ot aux?" ¹³ Simiang pui Amon pawk ah nin ka pui cau Yephata, "Jao hoik teei pui Isarelax haktiex aux khaix hoik lih hu kix khaing haktiex Ejiptux, jah khaing rawm klawng Anon, rawm klawng Yabok tom hoek ka rawm klawng Yawdan, mawh kheu nan yam in deeh tawx haktiex an kix ka daux pa nhim heue." ¹⁴ Mai Yephata baox ploi pui cau tix hu ka simiang pui Amon, ¹⁵ mai kieh kix ah nin, "Yephata ah yuh nin, pui Isarelax khankix ang teei haktiex Mawbax mai haktiex pui Amon khankix heue." ¹⁶ Yam lih hoek pui Isarelax khaing haktiex Ejiptux, kix lawng hu ka daux tiag tom hoek ka rawm sigrit sigra raoh pa mawh rawm sigrit sigra Edom mai kix bleeh ka yaong Kadesha heue. ¹⁷ Pui Isarelax khankix deeh ploi pui cau tix hu ka simiang Edom ah nin, "Yuh bwan son kieh yix tiang ka daux haktiex maix liak." Viang mawh nan simiang Edom ang nghiet lox kix, awm an kix deeh ploi pui cau tix hu ka simiang haktiex Mawbax, viang mawh nan nawh ang nghiet, mawh kheu nan pui Isarelax kawn kut ti ot daux yaong Kadesha tan heue. ¹⁸ Mai kix lih hu ka plak krax daux tiag mai via haktiex Edom mai haktiex Mawbax mai kix hoek ka haktiex Mawbax plak lih singaix mai kix ot ka plak toi rawm klawng Anon, yam an kix ang laig ka daux haktiex Mawbax, kheu mawh rawm klawng Anon mee haktiex Mawbax heue. ¹⁹ Khaix an pui Isarelax deeh ploi pui cau tix hu ka Sihong simiang pui Amawrix kwang ka veng Heshabon mai pui Isarelax ah nin ka nawh, "Yuh bwanson kieh yix tiang ka daux haktiex maix, sonsang hu yix ka dee ot tix heue." ²⁰ Viang mawh nan Sihong ang yum rhawm ka pui Isarelax, sonsang tiang kix ka dee pa kwang nawh, mawh kheu nan Sihong deeh khrawm pui tix khawmuik mai hu bang ka daux veng Yahat mai puing ka pui Isarelax heue. ²¹ Simiang Siyiex pui Isarelax, hoik ap simiang Sihong, khawm pui nawh ka daux taix pui Isarelax mai hoik pex ka kix, mawh kheu nan pui Isarelax rhim ti cie haktiex mai kraung khrai pui Amawrix pa ot daux haktiex an khawmuik heue. ²² Kix teei ti cie kraung khrai dee kwang pui Amawrix khawmuik, jah ka rawm klawng Anon, tom hoek ka rawm klawng Yabok, jah ka daux tiag, tom hoek ka rawm klawng Yawdan heue. ²³ Mawh kheu Simiang Siyiex hoik grheu pui Amawrix ka plak sivoe pui Nawh Cao, pa mawh pui Isarelax maix khex sang deeh teei lie? ²⁴ Mawh ang pex pon teei ti cie haktiex pa tawx siyiex Khemosha, ka pex lie? Mawh kheu nan can haktiex pa hoik grheu Simiang Siyiex ka plak sivoe yix khankix, yix hoik pon ti cie heue. ²⁵ Mawh lheu mhawm pex khaing Baliet kawn simex Ziphaw simiang haktiex Mawbax lie? Mawh hoik sax tieh nawh ka pui Isarelax lie? Mawh hoik sax puing nawh ka kix lie? ²⁶ Glang kawn ot pui Isarelax ka daux yaong daux veng Heshabon khankix mai ka daux yaong daux veng hawt rawm klawng Anon loe yieh num, pex lai ang deeh pon teei an kix yuh ka mawx? ²⁷ Aux ang koe krax lud ka maix, viang mawh nan maix hoik lud ka aux, kheu jao puing maix aux, kieh Simiang Siyiex mawh cao prawng see mai tat see ka daux sinax pui Isarelax mai pui Anon daux in singaix heue. ²⁸ Viang mawh nan simiang pui Anon ang nghiet ka lox pa hoik ploi Yephata ka nawh heue. ²⁹ Khwan Simiang Siyiex lih ka piang Yephata mai nawh preeng hu ka haktiex Gilat mai haktiex Manashe mai phlat hu ka veng Mizapa pa koe ka daux haktiex Gilat mai hu ka dee ot pui Anon khankix heue. ³⁰ Yephata yuh lox mukheu ka Simiang Siyiex ah nin, "Phan Maix Cao sang ap pui Anon ka daux tawm taix aux tete, ³¹ Can pui pa liang ti lih khaing daux diang siviex nyiex aux mai rieb ka aux, yam deeh hoek aux daux krax pa nhim khaing pui Anon, tak mawh cie Simiang Siyiex mai tak tan ti tawx pui an mawh son krax tan pa gleeing heue. ³² Yephata lih hu ka plak dee ot pui Anon mai puing ka kix mai Simiang Siyiex ap kix ka daux tawm taix nawh heue. ³³ Nawh hoik pex ka kix, jah ka veng Araw, tom hoek ka veng Minnit, khawm veng Abelax Keramin khankix tixnga veng tau mai krax pa kied pah kix pui yum, mawh kheu nan pui Anon khankix hoik som, ka plak sivoe pui Isarelax khankix heue. ³⁴ Yam deeh hoek Yephata ka nyiex tix daux veng Mizapa, kawn bun nawh lih hoek ti rieb nawh tau mai tah tix chang mai graoh, nawh mawh kawn bun tix kaux khaing, lheu khaing nawh Yephata ang koe kawn simex tix kaux kawx heue. ³⁵ Yam yaox Yephata ka kawn bun tix, nawh riah kraung ceep tix ah nin, "Kawn bun aux eue mai hoik kied kieh aux laux rhawm maix hoik mawh pui tuktiak ka aux, mawh kheu aux hoik krai lox ka Simiang Siyiex mai aux ang lai chix deeh tieh khaing grawng ceu an heue." ³⁶ Kawn bun nawh deeh ah nin ka nawh, "Keeing aux eue, phan maix hoik krai lox ka Simiang Siyiex, yuh ka aux awm ceu pa hoik lih khaing daux jheeh maix, mawh kheu Simiang Siyiex hoik pawk bix son maix ka pui koeng maix pui Anon khankix heue. ³⁷ Nawh deeh ah nin ka keeing tix, "Tawx akhwang ka aux liak, kieh aux ot nong nong ra khix, sonsang lailing aux ka piang gawng mai yiiem yo grawng mawh aux bun krih tau mai paox grawm tix khankix heue." ³⁸ Keeing nawh ah nin, "Hu heue, " mai ploi nawh hu been ra khix mai nawh lih hu tau mai paox grawm tix mai yiiem yo grawng mawh tix bun krih ka piang gawng heue. ³⁹ Khaix hoik naog bawg yam ra khix nawh deeh ing ka keeing tix mai keeing nawh yuh awm pa hoik koe lox mukheu tix, kawn bun an mawh pa ang nyang sax dex dawd mai simex, ⁴⁰ mai ceu an hoik lih ti mawh been pa priex pa deuh pui Isarelax khankix, kawn bun pui Isarelax khankix lih hu tix num pon ngaix ku num, sonsang yiiem yo kix ka kawn bun Yephata pa mawh pui Gilat heue.

¹ Pui Epharem khankix khrawm paox ti mai tiang hu ka plak veng Zaphon ah nin ka Yephata, "Yam hu puing ka pui Anon maix ang kok yix hu tau mai tix yuh ka mawx? Yix tak gleeing nyiex maix ka ngu ka piang maix heue." ² Yephata deeh ah nin ka kix, "Yam yuh lung pui aux khawm cao aux ti puing ka pui Anon khankix, yam kok aux ka maix, maix ang deeh taoh aux khaing daux tawm taix kix heue. ³ Yam hoik yaox aux ka ang maix taoh tix, aux tan ju tix mai hu puing ka pui Anon mai Simiang Siyiex ap kix ka daux tawm taix aux, pex lai sang hoek puing ka aux yuh ka mawx?" ⁴ Yephata deeh khrawm pui Gilat khawmuik mai puing ka pui Epharem khankix, pui Gilat pah ka pui Epharem, kheu jao ah kix nin, "Pex pa mawh pui Gilat hoik mawh pui Ephrem pa ot khaing sinax pui Epharem mai khaing sinax pui Manashe heue." ⁵ Pui Gilat pau diang rawm klawng Yawdan sivoe pui Epharem, yam hoek pui Epharem pa pon to ti klawd tiblah ah nin, "Kieh aux tiang liak?" Pui Gilat deeh ah nin ka nawh, "Mawh maix pui Epharem lie?" Phan nawh ah ang mawh! ⁶ Kix tak sang ah nin ka nawh maix cheu ah gumlox Shibawliet, mai nawh deeh ah Sibawliet, mawh kheu kix ang chix ah gumlox an sidawng, kix tom giex nawh mai pah nawh hawt diang rawm klawng Yawdan, pui Epharem pa hoik yum yam an koe pon mheen ra rheng kaux heue. ⁷ Yephata hoik prawng see ka piang pui Isarelax liah num, Yephata pui Gilat yum mai kix sipaung nawh ka daux veng pa koe daux haktiex Gilat heue. ⁸ Khaix Yephata pui veng Bieliehiem pa mawh Ibazan deeh yaog ti mawh cao prawng see ka pui Isarelax heue. ⁹ Nawh koe kawn simex tixngoe kaux mai kawn bun tixngoe kaux, nawh kieh kawn bun tix, teei pui tang ceu mai nawh deeh teei kawn bun pui tang ceu tixngoe kaux, son kawn simex tix khankix, nawh hoik prawng see ka piang pui Isarelax aliah num heue. ¹⁰ Khaix an Ibazan yum mai sipaung nawh ka daux veng Bieliehiem heue. ¹¹ Khaix Ibazan, Elon ceu pui Zebulun deeh mawh cao prawng see ka piang pui Isarelax kao num heue. ¹² Mai Elon ceu pui Zebulun yum mai kix sipaung nawh daux veng Aiyalon daux haktiex Zebulun heue. ¹³ Khaix Elon, Abadon kawn simex Hilelax pui veng Piraton deeh mawh cao prawng see ka piang pui Isarelax heue. ¹⁴ Nawh koe kawn simex tix pon kaux mai kawn saux tixngoe kaux, pa brug kawn la awn atixgliah mu, nawh hoik prawng see ka piang pui Isarelax daix num heue. ¹⁵ Khaix an Abadon kawn simex Hilelax pui veng Piraton yum, kix sipaung nawh ka daux veng Piraton, pa koe ka daux haktiex Epharem, ka piang gawng pui Amaliet heue.

¹ Pui Isarelax khankix baox yuh pa caox caig ka plak sivoe ngai Simiang Siyiex mai Simiang Siyiex deeh ap kix ka daux tawm taix pui Philitix tix pon num heue. ² Koe pui veng Zawrax tix kaux, pa kaoh khaing doeh ru pui Dan, ceu kaux nawh mawh Manaw, moeng nawh mawh bun neh pa ang koe kawn heue. ³ Kawncau Simiang Siyiex lih bleeh ka bun an ah nin ka nawh, Glang ka in maix mawh bun neh mai ang sax keh kawn tix bawg kawx, viang mawh nan maix tak koe kaux mai keh kawn simex tix kaux heue." ⁴ "Mawh kheu nan yuh satix maix, son ang maix sang nyaux rawm plix siiet mai plai mai son ang maix sang ih ka ceu pa ang singax singeh tix ceu kawx heue." ⁵ Grawh grawng nawh maix tak koe kaux mai keh kawn simex tix kaux mai ang pon ti khlao ka hauk kaing nawh, grawh grawng nawh kawn an tak mawh pui Nazarix tix kaux, son Siyiex khaing daux vaig miex tix heue. Mai nawh tak mawh pa jah tix taoh ka pui Isarelax khaing daux tawm taix pui Philitix heue. ⁶ Bun an deeh hoek mai krai ah nin ka mex tix, pui Siyiex hoek ka aux mai pakngai nawh awm pakngai kawncau Siyiex, pa kied koe krax lhat graung ka, aux ang lai chawk dee kaoh Nawh mai Nawh ang lai krai ceu kaux tix ka aux heue." ⁷ Nawh ah nin ka aux, "Maix tak koe kaux mai keh kawn simex tix kaux, mawh kheu nan paw nyaux ka rawm plix siiet mai plai mai paw ih pa ang singax singeh, mawh kheu kawn an tak mawh pui Nazarix tix kaux, ka son Siyiex jah khaing daux vaig miex tix, tom hoek singaix yum nawh heue." ⁸ Khaix an Manaw rawg bwan ka Simiang Siyiex ah nin, "Simiang Siyiex aux eue, yuh bwanson kieh pui Siyiex pa hoik ploi Maix Cao baox hoek gau yix ka ceu pa sang yaox yix ti yuh ka son kawn simex pa sang lih tix keh an liak, " ⁹ Mai Siyiex nghiet ka lox Manaw mai kieh kawncau Siyiex baox hoek ka bun an, yam kawn ngawm nawh ka daux kaung, yam an mex nawh Manaw ang ot tau mai nawh tan heue. ¹⁰ Bun an nied ti hu krai ka mex tix ah nin, "Jhak heue, pui pa hoek ka aux singaix an nhaox tak khraox bleeh ka aux yam in heue." ¹¹ Manaw yaog ti kaoh mai hawt khaix moeng ti ka pui an mai nawh ah nin ka Nawh, "Mawh maix pui pa hoik sikah mai bun in lie?" mai Nawh deeh ah nin, "Mawh Aux heue." ¹² Manaw ah nin, "Kieh gumlox Maix grum naog, kawn nyawm simex in, sang mawh pui yuh ka mawx? sang caw ti yuh ka mawx ka nawh?" ¹³ Kawncau Simiang Siyiex deeh ah nin ka Manaw, "Can ceu pa hoik krai Aux ka bun an khawmuik, kieh nawh yuh satix tix ka heue." ¹⁴ "Nawh tak ang pon ti ih can ceu pa lih khaing nhu plix siiet tix ceu kawx mai tak ang pon ti nyaux rawm plix siiet mai plai mai tak ang pon ti ih ka ceu pa ang singax singeh tix ceu kawx, can ceu pa hoik tawm Aux khawmuik, kieh nawh hawt ti yuh awm an heue." ¹⁵ Manaw deeh ah nin ka kawncau Simiang Siyiex, "Yuh bwanson kieh yix gang ti deuh Maix, yix sang ing khre kawn pex iak tix mu son Maix heue." ¹⁶ Mai kawncau Simiang Siyiex deeh ah nin ka Manaw, "Viang maix gang ti deuh Aux kawx, Aux tak ang ih priex preem pa khre maix, phan maix sang tan krax tan pa gleeing maix caw tix tan ka Simiang Siyiex, " Mawh kheu Manaw ang tawng ka hoik mawh Nawh kawncau Simiang Siyiex heue. ¹⁷ Manaw ah nin ka kawncau Siyiex, "Yam hoik grum naog gumlox Maix sax, sonsang pon yaogyaw yix ka Maix, ceu kaux Maix mawh pa yuh ka mawx?" ¹⁸ Mai kawncau Simiang Siyiex ah nin ka nawh, "Kheu maix lai chawk ceu kaux Aux? ceu kaux Aux mawh pa daox ding heue." ¹⁹ Manaw teei kawn pex iak tau mai krax tan phawng nghox ca mai nawh tan an kix ka piang rang, ka son Simiang Siyiex, Nawh Cao yuh grawng ceu pa daox ding tix ceu, yam simi Manaw mai moeng nawh ti yaox, ²⁰ Yam haok rao ngu ka plak raoma, khaing ka piang khu dee tan an, kawncau Simiang Siyiex haok ka daux rao ngu pa lih khaing piang khu dee tan an, yam hoik yaox Manaw mai moeng nawh ka ceu inkix, kiex gup pakngai tix ka piang tiex heue. ²¹ Kawncau Simiang Siyiex ang lai baox bleeh ka kiex, khaix an Manaw tawng ka hoik mawh Nawh kawncau Simiang Siyiex heue. ²² Manaw deeh ah nin ka moeng tix, "Ax tak yum tete mawh kheu hoik yaox ax ka Siyiex heue." ²³ Moeng nawh deeh ah nin ka nawh, "Phan Simiang Siyiex koe rhawm ti sang pah ax, Nawh Cao ang tau ti rieb krax tan pa gleeing mai krax tan phawng nghox ca ax khaing daux tawm taix ax mai Nawh Cao ang tau ti jhi ax yaox ceu inkix mai Nawh Cao ang tau ti krai ceu pa awm inkix ka daux bawg yam in heue." ²⁴ Mawh kheu nan bun an keh kawn simex tix kaux mai kok ceu kaux nawh mawh Samson, kawn simex an haok hwan ting lhaong mai Simiang Siyiex nawb bwan ka piang nawh heue. ²⁵ Mai khwan Simiang Siyiex jah ti hoek ka piang nawh, ka daux tab pui Dan pa koe sinax veng Zawrax mai veng Eshatawlax heue.

¹ Tix bawg Samson lih hu ka veng Timana mai yaox ka bun pui Philitix tix kaux ka daux veng Timana heue. ² Nawh deeh ing krai ka miex keeing tix ah nin, "Aux hoik yaox bun pui Philitix tix kaux ka daux veng Timana, mawh kheu nan yam in teei aux moeng nawh liak." ³ Miex keeing nawh ah nin ka nawh, "Mawh ang bun lai koe tix kaux kawx sinax kawn bun puxaik maix mai sinax pui maix sonsang teei maix ti moeng pui Philitix, pa ang nyang pat hak tix lie? "Mai Samson deeh ah nin ka keeing tix, "Teei nawh son aux liak! Mawh kheu aux hoik khaw rhawm ka nawh heue." ⁴ Miex keeing nawh ang tawng ka mawh pa hoik yuh Simiang Siyiex, sonsang sawg Nawh Cao grawng ceu pa sang yuh tix ka pui Philitix, ka daux bawg yam an mawh yam kwang pui Philitix ka piang pui Isarelax khankix heue. ⁵ Yam an Samson lih hu ka veng Timana tau mai miex keeing tix, yam hoek ka sipeem plix siiet Timana, sivai sangsi awn ju tix mu hoek ti graox ka nawh heue. ⁶ Khwan Simiang Siyiex lih hoek ka piang nawh tom nie, viang nawh ang koe kraung tidtix kawx nawh hoik ciah ti tik nex sivai sangsi awn ju an, awm ciah tix ka kawn pex tix mu, viang mawh nan nawh ang krai pa hoik yuh tix ka miex keeing tix heue. ⁷ Khaix an nawh lih hu sikah tau mai bun an mai mawh pa khaw caw rhawm Samson ka heue. ⁸ Khaix an ang awt rheung yam deeh hu nawh ti sang teei bun an, nawh veh praok krax, sonsang jhak ka to yum sivai sangsi an mai jhak heue, cub phung hia mai rawm hia koe ka daux to yum sivai sangsi an heue. ⁹ Nawh teei an ka taix tix mai ih hu hawt krax, yam hoek nawh ka miex keeing tix, nawh tawx an ka kix mai kix kawx ih ka, viang mawh nan nawh ang krai kix mhong ka hoik teei ti rawm hia an, khaing ka daux to yum sivai sangsi heue. ¹⁰ Keeing nawh baox lih hu ka bun an mai Samson yuh pawie tix mu tan, mawh kheu kawn nyawm sinaw khankix hoik dawg koe been pa yuh awm an heue. ¹¹ Yam yaox kix ka Samson kix kok paox grawm tix tixngoe kaux, sonsang yuh pawie tau mai nawh heue. ¹² Khaix an Samson ah nin ka kix, "Kieh aux ah lox nieb ka pex, phan pex pon krai ka daux aliah singaix, glang sinax pawie in, aux tak tawx pex cie prux lhop tixngoe pheen mai kraung ceep tixngoe jung heue." ¹³ Viang mawh nan phan pex ang pon krai dee bleeh pex tak yaox ti deeh tawx prux lhop tixngoe pheen mai kraung ceep tixngoe jung ka aux, mai kix ah nin ka nawh, "Krai lox nieb maix ka yix heue." ¹⁴ Nawh ah nin ka kix, "Khaing daux ceu pa chix ih, hoik koe ceu pa ih mai khaing daux pa kied ting riang hoik koe ceu pa tie, " tom hoek loe singaix, kix ang pon krai dee bleeh lox nieb an heue. ¹⁵ Yam hoik hoek daux pon singaix, kix ah nin ka moeng Samson, "Nyaw glaw ka mex maix, sonsang krai nawh dee bleeh lox nieb an ka yix, phan ang mawh nan yix tak keeig maix, khawm nyiex ma keeing maix ka ngu mai hoik ghaok yix hoek sonsang teei ceu pa koe ka yix lie?" ¹⁶ Moeng Samson yiiem sivoe nawh ah nin, "Maix hoik koeng ka aux maix ang tie moh aux maix hoik krai lox nieb ka kawn simiex pui aux khankix mai ang krai dee bleeh ceu an kix ka aux, " Samson ah nin ka nawh, "Miex keeing aux kawx aux ang nyang krai mhong, aux sang pon krai ka maix yuh ka mawx?" ¹⁷ Bun an hoik yiiem sivoe nawh, tom hoek daux aliah singaix glang yuh kix pawie, yam hoek ka daux aliah singaix, nawh krai dee bleeh an ka nawh, mawh kheu hoik kied yuh bun an nawh sivix rhawm, khaix an bun an deeh ing krai dee bleeh lox nieb an ka kawn simex pui nawh khankix heue. ¹⁸ Mawh kheu nan pui daux veng khankix hoek ah nin ka nawh yam hoik naog aliah singaix ka sang klip singaix, "Mawh ceu patix pa lheu tie khaing rawm hia? mawh ceu patix pa lheu ting riang khaing sivai sangsi?" nawh ah nin ka kix, "Phan pex ang hoik thai ma ka kawn mawie shiang aux, pex ang tawng dee bleeh lox nieb aux heue." ¹⁹ Khwan Simiang Siyiex lih hoek ka piang nawh tom nie, nawh lih hu ka veng Ashakelon mai pah pui veng an tixngoe kaux, nawh teei kraung khrai kix mai tawx ka pui pa hoik pon krai dee bleeh lox nieb nawh heue. Mawh kheu nan, krax song rhawm nawh hoik lih mai nawh deeh ing ka nyiex ma keeing tix heue. ²⁰ Mai kix tawx moeng Samson ka paox grawm nawh, pa mawh pui pa kied mhawm ka piang nawh heue.

¹ Yam hoek bawg yam vawg kix nghox ca, Samson viex kawn pex tix mu hu fi ka moeng tix ah nin, "Kieh aux laig ka daux lawg moeng aux liak." Viang mawh nan paox nawh ang tawx akhwang laig nawh ka daux heue. ² Paox nawh ah nin ka nawh, "Aux keud maix hoik koeng ka nawh tete mai aux hoik tawx paox grawm maix moeng nawh, pux bun nawh nie lheu mhawm khaing nawh ang mawh lie? Teei maix cie pux tang pux ke heue." ³ Mai Samson deeh ah nin ka nawh, "Aux mawh pa luan khaing pa deuh pui Philitix phimap son grawng daux pa yuh aux krax pa kha rhawm ka kix heue." ⁴ Samson hu mai giex sox praix loe yieh mu mai phyawk sidax sox praix an kix ra mu tau mai nawh vien ngu proh ka sinax toh sidax sox praix an kix heue. ⁵ Nawh keeig ngu ka proh an mai kieh sox praix an kix hu ka daux biang kaung pui Philitix khankix mai gleeing lhiem nghox khawm gawng nghox mai khawm sipeem plix siiet, sipeem khaox Sanlun kix khawmuik heue. ⁶ Pui Philitix khankix ah nin, "Mawh pui mawx pa yuh ceu in, " Mai kix pawk lox ah nin, "Mawh Samson heue" Pui veng Timana, mawh kheu hoik teei nawh ti tawx moeng Samson ka paox grawm nawh, mawh kheu nan pui Philitix hoek ti gleeing bun an mai keeing nawh ka ngu heue. ⁷ Samson ah nin ka kix, "Awm hoik yuh pex ceu in, aux tak deeh pawk bix tix ka piang pex, khaix an aux tak naox pa yuh tix heue. ⁸ Mawh kheu nan nawh klah piang si-ang khaix kix mai ba kix pot mai pah kix mai lih hu haok ot ka daux rang Etham heue. ⁹ Pui Philitix lih hu mai yuh tab ka daux haktiex Yudax mai ploi pui tix naog hawt baoh Lehi heue. ¹⁰ Pui Yudax ah nin, "Pex hoek ti puing ka yix yuh ka mawx?" Kix pawk ah nin, "Yix hoek sonsang giex Samson mai sang yuh ka nawh awm hoik yuh nawh ka piang yix heue." ¹¹ Pui Yudax loe rheng hu ka daux rang Etham ah nin ka Samson, "Mawh ang maix tawng ka kwang pui Philitix ka piang yix lie? Maix hoik yuh ceu in ka piang yix kheu jao patix?" Nawh deeh ah nin ka kix, "Aux yuh ka kix awm pa hoik yuh kix ka aux heue." ¹² Kix ah nin ka nawh, "Yix hoek ti giex maix sonsang tawx maix ka pui Philitix, " Samson deeh ah nin ka kix, "Tiextu gumlox pex ka aux, son ang tokaux cao pex pah aux heue." ¹³ Kix krai ah nin ka nawh, "Yix ang pah maix! yix tak phyawk maix tom kaux mai ap maix ka taix kix, yix ang doh pah ka maix, " Mai kix phyawk nawh ka maox ra nyaing mai viex lih khaing rang heue. ¹⁴ Yam hoek nawh ka baox Lehi, pui Philitix hoek riag yo mai nawh, khaix an khwan Simiang baox lih hoek ka piang nawh tom nie, maox phyawk ka piang taix nawh awm maox pa hoik gleeing ngu mai hoik gah khaing taix nawh heue. ¹⁵ Nawh yaox kap la pa taug khraox tix mu mai nawh teei an pah pui tix rheng kaux ka heue. ¹⁶ Khaix an Samson ah nin, "Aux hoik pah ti pum pui tix rheng ka kap la heue." ¹⁷ Khaix hoik krai nawh ceu an nawh sivun kap la an mai nawh kok ceu kaux dee an mawh "Ramat Lehi heue." ¹⁸ Nawh kied simie ti nyaux rawm mai rawg bwan ka Simiang Siyiex ah nin, "Maix Cao hoik tawx krax taoh pa ting lhaong in, ka daux tawm taix kawncau Maix Cao, yam in aux dex sang yum ka sang nyau nie tix rawm mai aux tak sang hoek ka daux tawm taix pui pa ang pat hak khankix lie?" ¹⁹ Mawh kheu nan Siyiex paoh daux tiex ka daux ngawd Lehi tan mai kieh rawm lih khaing tan, khaix hoik nyaux nawh rawm an nawh deeh koe riang mai pon toek bhawm tix, mawh kheu nan nawh kok ceu kaux dee an mawh Hakawra, pa koe ka daux Lehi tom in singaix heue. ²⁰ Mai nawh hoik prawng see ka piang pui Isarelax tixnga num, daux bawg singaix kwang pui Philitix khankix heue.

¹ Khaix an Samson hu ka plak veng Gaza, nawh yaox ka bun coh kaux tix kaux mai nawh laig ot tau mai nawh heue. ² Yam mhong pui veng Gaza ka hoek Samson daux veng kix, kix lai lawm ti pau nawh, leeing sawm hawt dex diang siviex veng, kix ot yiien yawg leeing sawm ah nin, "Yam bah riang praix plak ponngawb, ex pah nawh yum heue." ³ Samson it tom hoek greung sawm, nawh yaog ti kaoh greung sawm mai nawh hu laoh ti viex siviex veng mai pang siviex ra mu mai jhong siviex khawmuik mai klawm ka piang klip tix viex hu ka piang choek gawng pa koe siveo veng Hebaron heue. ⁴ Khaix an nawh baox deeh moh ka bun pa ot ka daux ngawd Sawriet tix kaux, ceu kaux nawh mawh Delila heue. ⁵ Simiang pui Philitix hoek ka bun an ah nin, "Nyaw glaw mai yuh tix tawng dee koe riang rao nawh mai sonsang pon phyawk ex nawh ka ceu patix mai sonsang pon yuh ex krax kha rhawm ka nawh mai yix ku kaux tak tawx lon mau ka maix ti rheng tix yieh shekhe heue." ⁶ Delila chawk ah nin ka Samson, "Yuh bwanson krai aux mhong dee ting riang rao maix mai grawng ceu pa sang pon phyawk pui maix ka maox mai sonsang pon yuh pui krax pa kha rhawm maix liak." ⁷ Samson ah nin ka bun an, "Phan kix phyawk aux ka maox gan pa ang nyang kroh aliah nyaing, aux tak awn riang mai awm pui tang kaux heue." ⁸ Mawh kheu nan cub simiang pui Philitix, viex maox gan klai pa ang nyang kroh aliah nyaing hoek ka nawh mai bun an phyawk nawh ka heue. ⁹ Pui tiblah mox tix, jawm nawh ka daux lawg it bun an, bun an ah nin ka nawh, "Samson eue, pui Philitix hoek ti puing maix, " nawh rud ti tik maox gan an awm dud maox keei pa hoik gleeing ka ngu heue. Kix ang nyang tawng grawng deeh koe riang rao nawh heue. ¹⁰ Khaix an Delila ah nin ka Samson, "Maix hoik naknon mai pie lhen ka aux, yuh bwanson krai aux mhong ka grawng ceu pa sang pon phyawk ka maix liak." ¹¹ Nawh ah nin ka bun an, "Phan kix phyawk aux ka maox khraox, pa ang nyang sax shiao tix bawg kawx, aux tak awn riang mai awm pui tang kaux heue." ¹² Delila teei maox khraox mai phyawk ka nawh ah nin ka nawh, "Samson eue, pui Philitix hoek ti puing ka maix, " pui tiblah mox tix, jawm nawh ka daux lawg, viang mawh nan nawh rud ti tik maox pa koe ka piang taix tix awm gawng keei tix nyaing heue. ¹³ Delila ah nin ka Samson, "Tom yam in maix naknon mai pie lhen ka aux, krai aux mhong ceu pa sang pon phyawk ka maix liak, " Mai nawh ah nin ka nawh, "Phan maix taing hauk aux, ka daux kraung taing aliah brawm mai tawk ti deuh ka ding, riang rao aux tak awn hu mai aux tak awm pui tang kaux heue." ¹⁴ Delila taing hauk kaing nawh tom kaux aliah brawm ka daux kraung taing mai tawk jim tom kaux ka piang ding ah nin ka nawh, "Samson eue, pui Philitix hoek ti puing ka maix, " Samson si duad mai bluh ti tik maox pa hoik taing mai jim an khaing kraung taing heue. ¹⁵ Bun an ah nin ka nawh, "Maix lai ah moh tix ka aux khawm ang maix tie koe rhawm rhi ka aux yuh ka mawx? Maix hoik pie lhen ka aux loe bawg phao mai ang cu tix krai aux mhong grawng dee koe riang rao pa ting maix heue." ¹⁶ Bun an ah lox thux mai lak lheet tix nawh ka lox kuceu, ku singaix rhawm rhi Samson hoik kied laux tom dex sang yum tix, ¹⁷ nawh hoik krai pa koe daux rhawm tix khawmuik ka bun an, "Ang sax khlao hauk kaing tix, tix bawg kawx, mawh kheu aux hoik mawh pui Nazarix son Siyiex tom daux vaig miex aux, phan aux khlao hauk kaing tix, riang rao aux tak lih khaing aux mai aux tak awn riang aux tak awm pui tang kaux heue." ¹⁸ Yam yaox Delila ka krai nawh pa koe daux rhawm tix, nawh ploi pui kok ka simiang pui Philitix ah nin, "Deeh hoek tix bawg ha! mawh kheu hoik krai nawh aux mhong pa koe daux rhawm tix khawmuik, " Mai cub simiang pui Philitix hoek ka nawh mai viex mau hoek heue. ¹⁹ Khaix an Delila teem nawh it ka piang ngawng tix mai kok pui tix kaux khlao hauk kaing brawm nawh aliah nyaing, khaing kaing nawh, nawh hoik jah ti yuh krax kha rhawm ka nawh mai riang nawh hoik grai hu heue. ²⁰ Bun an ah nin ka nawh, "Samson eue, pui Philitix hoek ti puing ka maix, " Mawh kheu nan nawh yaog ti kaoh khaing dee it tix ah nin, "Aux tak sang lih hu awm phao ka mai nawh sau riang rao tix, " Viang mawh nan nawh ang tawng ka hoik tik Simiang Siyiex tix heue. ²¹ Pui Philitix hoek giex nawh mai kuat sok ngai nawh lih, kix deeh viex nawh hu ka veng Gaza, kix phyawk nawh ka maox tawng mai kieh nawh krid mhaw daux thawng heue. ²² Hauk kaing nawh baox deeh kuah, khaix khlao kix heue. ²³ Cub simiang pui Philitix khrawm paox tix, sonsang tan krax tan pa appong pa ting lhaong ka siyiex Dagon cie kix mai yuh krax pa gaux rhawm mai kix ah nin, siyiex ex hoik ap Samson pa mawh pui koeng ex, ka daux taix ex heue." ²⁴ Yam yaox pui khankix ka Samson, kix yaogyaw ka siyiex tix ah nin, "Siyiex ex hoik ap pui koeng ex ka daux taix ex, pa yuh haktiex ex laux mai pa kieh pui ex yum tom nie heue." ²⁵ Yam gaux rhawm kix, kix ah nin, "Kok Samson hoek ti klieh ex yaox, " Mawh kheu nan kix kok Samson khaing daux thawng mai yaox ti klieh kix yaox, kix phyawk nawh ot ka sinax rong nyiex heue. ²⁶ Khaix an Samson ah nin ka kawn nyawm pa tuk ka taix nawh, "Kieh aux giex rong nyiex vad in sonsang neung aux tix ka heue." ²⁷ Pui naog ka daux nyiex vad khawm simex khawm bun mai cub simiang pui Philitix kawx ot tan khawmuik, ka piang an pui pa hoek ti jhak yam klieh Samson, simex, bun, pa ot piang braux nyiex koe pui loe rheng kaux heue. ²⁸ Samson rawg bwan ka Simiang Siyiex ah nin, "Simiang Siyiex eue, doh keud ka aux liak! Aux rawg Maix Cao deeh baox tawx riang rao ka aux, pie bawg in tix bawg khaing, Siyiex eue, sonsang deeh pawk aux bix tix ka pui Philitix, son sok ngai aux ra mu tix dum neh liak." ²⁹ Samson giex ka rong pa koe daux sigreung pa joh nyiex vad ra mu, nawh teei riang tix ka rong an, plak khawn dawm tix mu, plak khawn gwiex tix mu heue. ³⁰ Samson rawg bwan ah nin, "Kieh aux yum tau mai pui Philitix, " Nawh sau riang rao tix lih khawmuik mai nyheen ka rong mai nyiex vad an grhup ka piang simiang mai pui pa ot daux an khawmuik, mawh kheu nan pui pa hoik pah nawh yum yam im ju tix nie lheu khaing pa pah nawh yum yam yum tix heue. ³¹ Puxaik nawh mai paox nyiex keeing nawh hoek mai teei tokaux yum nawh ing, kix sipaung nawh ka sinax veng Zawrax mai veng Eshatawlax daux simeeig keeing nawh Manaw, nawh hoik prawng see ka piang pui Isarelax tixnga num heue.

¹ Koe pui tix kaux khaing ka piang gawng Epharem mai ceu kaux nawh mawh Mikha heue. ² Nawh ah nin ka miex tix, "Mau kawn pa hoik grai khaing pax tix rheng tix yieh shekhe mai pa mhong aux hoik jhax lawg pax ka koe mai aux, aux hoik teei ti deuh, " Mai miex nawh deeh ah nin, "Kawn simex aux eue, kieh Simiang Siyiex nawb bwan ka piang maix heue." ³ Yam deeh tawx nawh lon mau an tix rheng tix yieh shekhe ka miex tix, miex nawh ah nin, "Aux hoik tan lon mau pa koe an khawmuik ka Simiang Siyiex sonsang raug maix riang grang Asherax tix mu, mawh kheu nan yam in aux tak deeh tawx an ka maix heue." ⁴ Mawh kheu nan nawh deeh tawx lon mau an ka miex tix, miex nawh teei lon mau an ra yieh shekhe mai tawx pa chix kraung mau yuh riang grang Asherax pa saik tix mu mai riang grang Asherax pa raug tix mu mai deuh riang grang Asherax an ka daux nyiex Mikha heue. ⁵ Pui Mikha an koe nyiex krub tix mu mai nawh yuh ti deuh sibex dhah tix pheen mai riang grang Asherax pa krub kix son daux nyiex daux ma tix mai nawh hoik yaog kawn simex tix, tix kaux mawh cao giex kaing li tix heue. ⁶ Baux yam an simiang ang koe ka daux pui Isarelax, pui ku kaux tang yuh awm rhawm keud cao tix khaing heue. ⁷ Koe pui pa awn ju pa ot daux veng Bieliehiem khaing meung Yudax, pa kaoh khaing pui Yudax, nawh mawh pui Lewix tix kaux, nawh hoek ti paung daux veng Bieliehiem heue. ⁸ Pui an lih khaing veng Bieliehiem meung Yudax, sonsang ot dee yaox ti dee mhawm praix tix dah mai nawh bleeh ka gawng Epharem mai paung ka nyiex Mikha, yam kawn hu nawh krax hu tix heue. ⁹ Mikha ah nin ka nawh, "Kaoh maix khaing dee mawx?" nawh deeh ah nin, "Aux mawh pui Lewix khaing veng Bieliehiem meung Yudax, aux hu sawg dee paung tix heue." ¹⁰ Mikha ah nin ka nawh, "Ot mai aux tin mai mawh keeing khawm cao giex kaing li ka son aux, aux tak tawx mau ka maix kao shekhe ku num, khawm kraung ceep tix jung mai priex ih maix, " Mawh kheu nan pui Lewix an laig ka daux nyiex nawh heue. ¹¹ Pui Lewix an fah rhawm ka ot tix mai pui an mai pui awn ju an, lih ti awm kawn simex ka son nawh heue. ¹² Mawh kheu nan Mikha yaog pui Lewix an mawh cao giex kaing li mai pui awn ju an lih ti mawh cao giex kaing li nawh mai ot ka daux nyiex Mikha heue. ¹³ Mai Mikha ah nin ka nawh, "Yam in aux hoik tawng Simiang Siyiex tak yuh ceu pa mhawm ka piang aux, kheu hoik pon aux pui Lewix tix kaux mawh cao giex kaing li heue."

¹ Ka daux baux yam ang pui Isarelax nyang koe simiang, doeh pui Dan kawn sawg haktiex sinngao pa caw kix ti pon tom yam an, kix ang nyang bax pon sinngao haktiex cie cao tix, khaing sinax doeh ru pui Isarelax heue. ² Mawh kheu nan pui Dan laug pui pa ting riang daux pao nyiex kix phwan kaux khaing veng Zawrax mai veng Eshatawlax mai ploi hu sonsang jiang ka haktiex mai tawm lox ah nin ka kix, "Lih hu sawg ti yaox ka haktiex, " Mawh kheu nan kix hu ka piang gawng Epharem mai hoek ka nyiex Mikha mai paung tan heue. ³ Yam kawn ot kix daux nyiex Mikha, kix pon ci ka lox sikah pui awn ju Lewix an, kix laig ka dee ot nawh ah nin ka nawh, "Mawh pui mawx pa viex maix hoek tin? Yuh maix ti ka dee in? Mawh koe grawng ceu patix ka son maix tin?" ⁴ Nawh ah nin ka kix, "Mawh Mikha pa yuh grawng ceu in ka aux, nawh hoik vai aux mai kieh aux mawh cao giex kaing li tix heue." ⁵ Mawh kheu nan kix ah nin ka nawh, "Yuh bwanson chawk cheng sonsang tawng yix krax pa sang hu tix ka Siyiex liak, pon lie?" ⁶ Mai cao giex kaing li ah nin ka kix, "Hu daux pa nhim rhawm, Simiang Siyiex tak ot tau mai pex, ka daux krax hu pex heue." ⁷ Mawh kheu nan pui an kix phwan kaux, lih hu khaing tan mai hoek ka veng Lesha, kix yaox ka krax ot pui pa ot tan, hoik awm krax ot pui Sidon, pa ang koe krax khi ot yiien yawg tix, cao kwang haktiex pa sang sidiex gau kix kawx ang koe tix kaux kawx, kix hoik singai khaing pui Sidon mai ang lai sitoe tix ka pui tix kaux kawx heue. ⁸ Khaix an cao pa jiang deeh ing ka puxaik kix pa ot daux veng Zawrax mai veng Eshatawlax, puxaik kix ah nin ka kix, "Koe grawng pa sang krai pex ceu patix?" ⁹ Kix deeh ah nin, "Yaog tix kaoh, kieh ex hu puing kix, mawh kheu ex hoik yaox haktiex an, mawh pa kied mhawm tete, pex lai kawn kaog yuh nin yuh ka mawx? Paw lai nhim sonsang laig puing ex mai teei ti cie haktiex an heue." ¹⁰ "Yam hu pex, pex tak hoek ka dee ot pui ang koe satix mai ka dee va haktiex, mawh kheu Siyiex hoik tawx in ka daux taix pex, dee an mawh dee ang cud cha ka can pa koe ka piang haktiex in tix ceu kawx heue." ¹¹ Pui liah yieh kaux, khaing pao nyiex Dan, lih hu khaing veng Zawrax mai veng Eshatawlax tau mai kraung naing tix sonsang puing naing heue. ¹² Khaix an kix lih hu mai bang ka daux veng Kirayat Yarim, daux meung Yudax, mawh kheu nan, kix kok ceu kaux dee an mawh dee bang dee paung pui Dan tom hoek daux in singaix, dee an koe plak klip singaix veng Kirayat Yarim heue. ¹³ Kix lih khaing tan mai hu ka piang gawng Epharem mai hoek bleeh ka nyiex Mikha heue. ¹⁴ Yam an pui phwan kaux pa hu jiang haktiex Lesha krai ah nin ka puxaik tix, "Ang pex tawng koe sibex dhah mai riang grang Asherax siyiex khawm riang grang Asherax pa saik mai riang grang Asherax pa raug, ka daux nyiex inkix lie? sang caw ti yuh ka mawx keud ti yaox yam in heue." ¹⁵ Mawh kheu nan kix veh tan mai laig ka nyiex pui awn ju Lewix an, ka nyiex Mikha mai kix singeuh taix nawh heue. ¹⁶ Pui Dan khankix pa viex kraung naing liah yieh kaux, hoik cung daux siviex heue. ¹⁷ Pui phwan kaux pa hu jiang ka haktiex laig ka daux nyiex, kix teei riang grang Asherax pa hoik saik mai sibex dhah mai riang grang Asherax pa koe ka daux nyiex mai riang grang Asherax pa raug ti khawmuik, cao giex kaing li mai pui pa viex kraung naing liah yieh, cung hawt diang siviex tau heue. ¹⁸ Yam laig kix daux nyiex Mikha mai teei riang grang Asherax pa saik mai sibex dhah mai riang grang Asherax pa koe daux nyiex, khawm riang grang Asherax pa raug khankix, cao giex kaing li ah nin ka kix, "Mawh yuh pex ceu patix?" ¹⁹ Mai kix deeh ah nin ka nawh, "Yawk ti thox jheeh maix mai hawt khaix yix mai deeh mawh keeing mai mawh cao giex kaing li tix kaux ka son yix, khaing sang yuh maix cao giex kaing li ka son pui tix kaux ngie, phan maix yuh cao giex kaing li ka son doeh pui tix cub mai ka daux pao nyiex pui Isarelax khankix nie lheu mhawm son maix ang mawh lie?" ²⁰ Mawh kheu nan cao giex kaing li an koe krax gaux rhawm mai teei sibex dhah mai riang grang Asherax pa koe daux nyiex daux ma khankix mai riang grang Asherax pa saik mai laig hu sinax pui khankix heue. ²¹ Kix deeh veeh tix mai lih khaing tan, kix kieh kawn nyawm iak mai to brie, kraung khrai pa pon kix hu sivoe kix heue. ²² Yam hoik hoek kix dee singai khaing nyiex Mikha, pui pa ot hawt rawb rim Mikha khankix, deeh khrawm paox tix hawt pheet pui Dan tom krup heue. ²³ Mai kix kok yo ka pui Dan khankix, mawh kheu nan pui Dan deeh gi ti jhak ah nin ka Mikha, mawh koe grawng ceu patix maix lai khrawm pui ding dod hawt khaix yix!" ²⁴ Mikha deeh ah nin, "Pex hoik teei ti viex siyiex pa yuh aux khankix khawm cao giex kaing li hu, lheu khaing in aux kawn deuk ceu patix? Pex lai kawn ah nin, mawh koe grawng ceu patix ka aux?" ²⁵ Pui Dan khankix deeh ah nin ka nawh, "Paw lai kieh yix mhong lox maix, phan ang mawh nan ha pui pa song rhawm in kix kox puing maix mai kieh ju maix khawm paox nyiex maix khankix hoek krax som nai heue." ²⁶ Khaix an pui Dan hu krax hu tix, yam yaox Mikha ka hoik kied ting riang rao kix khaing tix, nawh deeh veeh ti ing ka nyiex tix heue. ²⁷ Mawh kheu nan kix teei can pa hoik yuh Mikha mai cao giex kaing li pa ot tau mai nawh hu mai kix deeh hu ka veng Lesha, ka pui pa ot daux pa ang koe satix khankix mai pah pui ankix ka lawm vaig mai gleeing veng an ka ngu heue. ²⁸ Pui pa sang deeh taoh ka kix ang lai koe, mawh kheu dee ot kix mawh pa singai khaing veng Sidom mai kix ang tie sitoe tau mai pui tix kaux kawx, veng an koe dex ngawd veng Biet Rehawbax, mawh kheu nan kix baox deeh sum veng khraox mai kix ot tan heue. ²⁹ Kix sum ceu kaux veng an hawt ceu kaux keeing kix, pa hoik keh kaing pui Isarelax pa kaux Dan mai kok mawh veng Dan, ceu kaux veng an glang ka dex mawh veng Lesha heue. ³⁰ Pui Dan khankix deeh kaw deeh pang ti deuh riang grang Asherax pa saik Mikha ka son cao kix mai kix kieh Yawnatan kawn simex Geshom, kawn simex Manashe mai kawn simex nawh khawmuik, mawh cao giex kaing li ka doeh ru Dan tom hoek bawg yam pa giex kix hu khaing haktiex heue. ³¹ Mawh kheu nan kix hoik pang hoik kaw ti deuh riang grang Asherax pa hoik saik Mikha, ka son cao kix, glang bawg yam kawn koe nyiex bwan Siyiex ka daux veng Shilaw heue.

¹ Daux baux yam ang simiang nyang koe ka daux pui Isarelax, koe pui Lewix tix kaux pa hu bang tix ot ka praok caong gawng Epharem, nawh teei moeng iak ka daux veng Bieliehiem daux meung Yudax heue. ² Bun an lud ka nawh mai deeh ing ka nyiex keeing tix daux veng Bieliehiem daux meung Yudax mai ot tan pon khix heue. ³ Khaix an mex nawh hawt khaix nawh, sonsang deeh nyaw nawh ing, nawh viex kawncau tix kaux mai la ra mu hu tau mai tix, bun an viex nawh laig daux nyiex keeing tix, yam yaox keeing bun an ka kheue tix, kied koe krax gaux rhawm ka heue. ⁴ Paox nawh pa mawh keeing bun an, gang ti deuh nawh mai nawh ot mai paox ti loe singaix, mawh kheu nan kix ih nyaux mai paung tan heue. ⁵ Yam hoek ponngaix tix ngaix, kix kaoh caocao ponngawb mai khre tix sang hu khaing tan, viang mawh nan keeing bun an ah nin ka kheue tix, "Ih blah ceeix ha, sonsang koe riang pex, khaix an pex hu krax pa sang hu pex heue." ⁶ Mawh kheu nan kiex deeh ngawm khawm ra mai ih nyaux tau, khaix an keeing bun an, deeh ah nin ka nawh, "Yuh bwanson laux tix tin sawm in ha mai kieh pax koe krax gaux rhawm ka heue." ⁷ Yam deeh khre nawh ti sang hu, paox nawh deeh nyaw nawh ot, mawh kheu nan nawh baox yaox ti paung tan heue. ⁸ Yam hoek phwan ngaix tix ngaix nawh kaoh caocao ponngawb sonsang hu tix, keeing bun an ah nin, "Yuh bwanson baox naok riang pex ha mai gun tom hoek yam jung singaix mai kiex khawm ra baox ih ka pa khan kheu nawh heue." ⁹ Yam deeh khre nawh ti sang hu tau mai moeng iak tix khawm kawncau nawh, paox nawh pa mawh keeing bun an ah nin ka nawh, "Ponngaix hoik dex uik mai dex hoek plak ponbo, yuh bwanson paung tin sonsang koe krax gaux rhawm, kaoh ponngawb caocao pasax mai hu ka krax hu pex, phan yuh nan pex tak pon ti hoek ka nyiex tix heue." ¹⁰ Viang mawh nan nawh ang lai koe rhawm ti sang it tan daux sawm an, mawh kheu nan nawh sau lhang ka piang kawn la ra mu mai yaog ti kaoh hu tau mai moeng iak tix mai hoek ka dah dee tix dah, pa koe sivoe veng Yebok pa mawh veng Yerusaliem heue. ¹¹ Kix hoek dex veng Yebok mai praix dex sang faik ka kix tan mai kawncau an ah nin ka cao simiang tix, "Kieh ex veh daux veng in, dee koe pui Yebusix mai paung ka heue." ¹² Viang mawh nan cao simiang nawh deeh ah nin, "Ex ang pon ti veh daux veng pui tang ceu pa mawh pui Isarelax, ex tak hu ka veng Giba heue." ¹³ Mawh kheu nan nawh ah nin ka kawncau tix, "Hoek heue, kieh ex hu tom hoek ka veng Giba, phan ang mawh nan veng Rama ang ah mai it tan sawm in heue." ¹⁴ Kix lih khaing tan mai hu krax hu tix, singaix klip ka kix hawt dex veng Giba daux haktiex pui Benyamin heue. ¹⁵ Yam laig kix dau veng Giba sonsang paung tan, ang koe pui pa viex kix laig ka dee paung, nawh ngawm ka daux bing pak daux veng heue. ¹⁶ Yam an kix yaox tax kuad tix kaux, pa kaoh khaing dee yuh tix kaing daux tong kaung hoek bleeh ka kix plak ponbo, nawh mawh pui pa kaoh khaing gawng Epharem pa hoek paung ka veng Giba, ka daux veng Giba mawh pui Benyamin pa ot ka heue. ¹⁷ Yam maong nawh ti jhak nawh yaox ka pui hu krax an kix pa ngawm daux bing pak daux veng mai kuad an ah nin ka kix, "Sang hu pex krax mawx, kaoh pex khaing dee mawx?" ¹⁸ Mai nawh deeh ah nin, "Yix kaoh khaing veng Bieliehiem daux meung Yudax mai yix sang hu ka plak praok caong gawng Epharem, aux mawh pui pa ot tan, aux hoik hu ka veng Bieliehiem, daux meung Yudax mai yam in sang hu ka nyiex bwan Simiang Siyiex, pui rieb aux laig daux nyiex tix ang koe tix kaux kawx heue. ¹⁹ Yix koe brex nghox mai rib kroh son la yix mai blah khawm rawm plix siiet son cao tix, khawm son moeng, son kawncau bun pa ot tau mai tix, yix ang lai lo tix ceu kawx heue." ²⁰ Pui kuad an ah nin ka kix, "Kieh pa nhim koe tau mai maix liak, can ceu pa lo maix khankix kieh mawh beeh glawm aux, paw doh it ka daux bing pak daux sawm in" ²¹ Nawh viex kix laig ka daux nyiex tix mai tawx la kix sawm mai kix khoek caong tix mai ih nyaux heue. ²² Yam tak yuh kix pa nyawm rhawm cao tix, pui caox tiblah hoek ti lai lawm ka nyiex mai klah ka siviex, kix ah nin ka kuad cao nyiex, "Teei pui pa hoek paung daux nyiex maix lih plak praix, sonsang lud vao yix tau mai nawh heue." ²³ Yam an cao nyiex lih plak praix ah nin ka kix, "Puxaik khankix eue, ang chix! aux khyox khaw ka pex, paw doh yuh pa caox caig pa kied ting liak! Pui in mawh pa hoek paung ka daux nyiex aux, paw yuh kaing ceu pa seeing brai yuh nin liak." ²⁴ "Kawn bun krih aux mai moeng iak simex in koe tin, kieh aux viex kiex lih ka praix yam in, map nai kiex mai yuh can pa koe rhawm pex ti yuh ka kiex, viang mawh nan paw doh yuh ceu pa caox ka kaw simex in!" ²⁵ Viang mawh nan pui an kix ang nghiet lox nawh, mawh kheu nan pui Lewix an, teei moeng iak tix mai viex lih plak praix ka kix, kix lud vao mai nawh leeing sawm tom hoek ponngawb, yam jah praix ti riang, kix deeh ploi bun an lih hu heue. ²⁶ Yam bah riang praix bun an deeh hoek ka nyiex dee paung mex tix mai goh it hawt siviex nyiex tan tom lih singaix heue. ²⁷ Yam hoik kaoh mex nawh khaing it tix ponngawb, nawh paoh siviex nyiex sonsang lih hu krax hu tix, nawh yaox ka it moeng iak tix hawt diang siviex nyiex mai deuh taix ti ka piang siviex heue. ²⁸ Mai nawh ah nin ka bun an, "Kaoh, hu ex phao, "Viang mawh nan bun an ang pon pawk lox nawh, mawh kheu nan simex an yaog tix sau nawh ka piang la mai ing ka dee ot tix heue. ²⁹ Yam hoek nawh daux nyiex tix, nawh teei vaig tix kre mai tat nex moeng iak tix khawm si ang, koe kao ra baux mai tawx hu ka can dee ot pui Isarelax khawmuik heue. ³⁰ Can pui pa yaox ka ceu in khawmuik, kix ah nin, "Kaing ceu in ang mawx sax yuh mai ang sax koe, jah tom singaix, lih pui Isarelax khaing haktiex Ejiptux tom hoek daux in singaix, keud ti yaox grawh grawng in mai kum paox tix grawng sang caw ti yuh ka mawx heue."

¹ Yam an pui Isarelax lih hoek khawmuik, jah khaing veng Dan tom hoek ka veng Berashebax tau mai haktiex Gilat khankix, hoik mawh rhawm tix mu tau mai khrawm paox tix ka plak sivoe ngai Simiang Siyiex ka daux veng Mizapa heue. ² Cao kaing doeh ru pui Isarelax khawmuik khrawm paox tix hoek ka dee kum kawng pui Siyiex ti tau mai nyawm lien pa giex vaig pon sien kaux heue. ³ Pui Benyamin mhong ka lih hu pui Isarelax ka veng Mizapa, Yam an pui Isarelax chawk ah nin, "Krai yix mhong grawng kaing pa caox caig in ti koe yuh ka mawx?" ⁴ Pui Lewix pa mawh mex bun pa hoik yum an deeh pawk lox ah nin, "Moeng iak aux mai aux hoek ka daux veng Giba veng pui Benyamin, sonsang laux lee ti tan daux sawm an heue." ⁵ "Pui veng Giba khankix hoek lai lawm nyiex paung aux, daux sawm an sonsang pah ka aux, kix hoik map nai moeng iak aux, tom hoik yum kiex heue." ⁶ "Mawh kheu nan aux teei tokaux yum moeng iak tix mai tat mawh baux mawx baux an mai roi hu daux haktiex sinngao dee kwang pui Isarelax khawmuik, mawh kheu kix hoik lud mai khin ti yuh pa caox caig ka daux sinax pui Isarelax heue." ⁷ "Pex mawh pui Isarelax, tawx krax keud mai keud ti yaox tin yam in tau liak." ⁸ Khaix an pui khawmuik yaog ti kaoh awm pa koe rhawm pui tix kaux khaing ah nin, yix tak ang lai ing nyiex gox tix, phan ang mawh nan ka nyiex cao tix, tix kaux kawx heue. ⁹ Viang mawh nan in mawh ceu pa sang yuh ex ka pui veng Giba yam in, "Ex tak hu puing veng an, ka daux pa cawk nieb heue." ¹⁰ "Ex tak laug pui khaing doeh ru pui Isarelax khawmuik, khaing pui tix yieh kao kaux, khaing pui tix rheng tix yieh kaux mai khaing pui tix mheen tix rheng kaux, sonsang hu tawx priex preem ka son pui naing khankix, yam hoek kix ka veng Giba, ka daux haktiex Benyamin, kix tak pon ti deeh pawk pa caox caig pa hoik yuh kix ka pui Isarelax heue." ¹¹ Mawh kheu nan pui Isarelax khrawm paox tix, daux pa rob rum grum phroik mai puing ka veng an heue. ¹² Pui Isarelax ploi pui hu ka dee ot pui Benyamin ah nin, "Krax caox caig pa hoik yaox ex in ka daux sinax pex, mawh pa yuh ka mawx?" ¹³ "Yam in ap pui khankix pa hoik yuh pa caox ka daux veng Giba, sonsang pah yix kix yum mai sonsang teei yix ti tik pa caox caig in khaing daux pui Isarelax, "viang mawh nan kawn praix pui Benyamin, ang nghiet ka lox krai puxaik kix pui Isarelax heue. ¹⁴ Pui Benyamin deeh khrawm paox ti khaing veng cao kix ku veng mai hoek ka veng Giba, sonsang yuh naing ka pui Isarelax heue. ¹⁵ Yam an pui Benyamin pa kaoh khaing daux veng cao kix ku veng, pa giex vaig tix lih hoek ra mheen liah rheng kaux, ka piang an pui pa ot ka daux veng Giba pa hoik laug kix ti deuh, koe aliah yieh kaux heue. ¹⁶ Ka daux sinax pui in kix khawmuik, pa hoik laug kix ti deuh aliah yieh kaux, mawh pui pa koe riang taix khawn gwieh mai mawh pa chix puing lon simaox ka ak maox vuh vied, pa ang lai khluk khlaik pie ka gawng hauk tix gawng heue. ¹⁷ Lheu khaing pui Benyamin pui Isarelax, pa hoik simin kix ti deuh pa viex vaig tix koe pon sien, pui in khankix mawh pui naing khawmuik heue. ¹⁸ Pui Isarelax kaoh mai hu daux nyiex bwan Siyiex mai chawk ah nin ka Siyiex daux cub yix, "Mawh cub mawx pa caw tix puing ka pui Benyamin siveo lie?" Simiang Siyiex ah nin ka kix mawh cub pui Yudax pa caw ti lih hu sivoe heue." ¹⁹ Pui Isarelax khankix kaoh caocao plak ponngawb mai hu yuh tab hawt veng Giba heue. ²⁰ Pui Isarelax lih hu puing naing ka pui Benyamin mai yuh naing ka kix sivoe veng Giba heue. ²¹ Yam an pui Benyamin lih khaing daux veng Giba mai pah pui Isarelax goh piang tiex, ra mheen kaux daux singaix an heue. ²² Pui Isarelax teei rhawm vao sau riang tix mai baox yuh naing ka dee hoik yuh kix naing daux singaix phao ka heue. ²³ Khaix an pui Isarelax hu mai yiiem yo ka plak sivoe Simiang Siyiex tom hoek plak bo mai chawk Simiang Siyiex ah nin, "Mawh kawn sang yaox yix ti hu yuh naing ka puxaik yix pui Benyamin lie?" Simiang Siyiex ah nin, "lih hu mai puing ka nawh heue." ²⁴ Mawh kheu nan pui Isarelax, deeh hoek dex pui Benyamin ka daux ra ngaix tix ngaix heue. ²⁵ Pui Benyamin lih khaing veng Giba daux ra ngaix tix ngaix mai pah kru naing vaig pui Isarelax, goh piang tiex tix mheen daix rheng kaux heue. ²⁶ Khaix an cub pui hun Isarelax hu ka nyiex bwan Siyiex tau mai yiiem tix, kix ot ka plak sivoe Simiang Siyiex mai twah pa ih leeing singaix, tom hoek plak bo mai kix tan krax tan pa gleeing mai krax tan pa nhim ka plak sivoe Simiang Siyiex heue. ²⁷ Mawh kheu nan pui Isarelax, deeh chawk cheng ti yaox ka Simiang Siyiex yam an, teug bwan sijax mukheu Siyiex kawn koe ka daux veng Betalax, ²⁸ yam an mawh Phenihat kawn simex Eliza kawn saux Arun, mawh pa cung ka plak sivoe teug bwan sijax mukheu Siyiex, kix chawk ah nin, "Mawh kawn caw yix ti baox lih hu puing ka puxaik yix pui Benyamin lie? Phan ang mawh nan ang lai caw ti hu lie?" Mai Simiang Siyiex deeh ah nin, "Lih hu heue, pasax, Aux tak ap kix ka daux taix pex heue." ²⁹ Khaix an pui Isarelax ploi pui hu yuh naing jawm hawt vung viang veng Giba khawmuik heue. ³⁰ Pui Isarelax lih hu puing ka pui Benyamin, ka daux loe singaix tix ngaix mai yaog tix laig daux bang naing mai kix puing ka veng Giba awm bawg sivoe heue. ³¹ Mawh kheu nan pui Benyamin lih hu puing ka pui khankix mai kix hoik singai hu khaing daux veng, kix jah ti pah pui tiblah, awm singaix ka piang krax ting pa hu ka veng Betelax mai krax pa hu ka veng Giba daux kaung, kix pah pui Isarelax yum tixngoe kaux heue. ³² Pui Benyamin deeh ah nin, "Kix hoik som ka plak sivoe ngai ex, awm singaix ka heue." Viang mawh nan pui Isarelax ah nin, "Kieh ex to mai nyaw kix lih hu singai khaing veng ka piang krax ting heue." ³³ Mawh kheu nan pui Isarelax khawmuik yaog ti kaoh khaing dee ot tix mai puing ka kix hawt veng Balax Tama, pui Isarelax pa yuh naing jawm kawx kaoh khaing dee ot tix ka daux lung Giba heue. ³⁴ Mai simex pa hoik laug kix ti deuh tix mheen kaux khaing daux pui Isarelax, hoek ti puing ka veng Giba mai naing hoik kied kin tete, viang mawh nan pui Benyamin ang nyang tawng pa dex sang hoek krax pa laux leeing ka piang tix heue. ³⁵ Simiang Siyiex hoik kieh pui Benyamin som ka plak sivoe pui Isarelax mai pui Isarelax hoik yuh kru naing giex vaig pui Benyamin laux leeing ra mheen phwan rheng tix yieh kaux daux singaix an heue. ³⁶ Mawh kheu nan pui Benyamin hoik tawng ka hoik som tix, pui Isarelax deeh plak khaix sivoe pui Benyamin, mawh kheu hoik een rhawm tix ka pui pa sang yuh naing jawm khankix pa hoik deuh kix hawt sivoe veng Giba tan heue. ³⁷ Pui pa pau ti yuh naing jawm khankix, yaog tix jaox mai laig puing daux veng Giba, hoik tah daux veng khawmuik mai pah kix ka lawm vaig tix heue. ³⁸ Mhai pa hoik tat kix ti deuh sinax pui Isarelax mai can pui pa yuh naing jawm khankix, mawh nin, kix tak kieh taox ngu pa ting tix mu, yaog tix haok khaing daux veng, ³⁹ Yam deeh pui Isarelax plak khaix tix daux bang naing, pui Benyamin hoik jah ti pah pui Isarelax been tixngoe kaux mai kix ah nin, "Kix hoik baox som ka plak sivoe ngai ex awm daux naing bawg tix heue." ⁴⁰ Viang mawh nan yam hoik jah taox ngu ti haok awm ceep paiawm khaing daux veng, pui Benyamin jhak ka plak khaix tix mai yaox haok taox ngu ka raoma, khaing daux veng khawmuik heue. ⁴¹ Yam an pui Isarelax deeh veeh ti hawt ka plak khaix kix, pui Benyamin hoik koe krax pa daox ding kah, mawh kheu hoik yaox kix hoek krax laux leeing ka piang tix heue. ⁴² Mawh kheu nan kix daox deng ka mai veeh ti to sivoe pui Isarelax, plak see daux tiag, viang mawh nan pui naing deeh krup kix tan mai yuh can pui pa hoik lih khaing daux veng daux yaong khankix, laux leeing ka daux sigreung kix heue. ⁴³ Kix hoik lai lawm pui Benyamin mai nied ti baox pheet kix mai hoik pon ti dugdig kix jah ka yaong Nukha tom hoek sivoe veng Giba plak lih singaix heue. ⁴⁴ Pui Benyamin hoik goh ti yum tix mheen daix rheng kaux, pui in kix khawmuik mawh pa koe rhawm vao rhawm cong heue. ⁴⁵ Pui pa kawn deuk khankix deeh veeh ti to plak daux tiag ka rang Rimon, cao pa pheet hawt pon mug kix yum phwan rheng kaux hawt krax, kix deeh nied ti hawt khaix kix, tom hoek ka veng Gideon mai baox pah kix yum ra rheng kaux heue. ⁴⁶ Mawh kheu nan pui naing pa koe rhawm kwa rhawm vao pa giex vaig daux naing son pui Benyamin pa hoik yum daux singaix an, koe ra mheen phwan rheng kaux heue. ⁴⁷ Viang mawh nan pui liah yieh kaux, deeh veeh ti to ka plak rang Rimon mai kix kut tix ot daux rang Rimon an pon khix heue. ⁴⁸ Pui Isarelax deeh veeh ti ing mai baox puing ka pui Benyamin mai mug kix yum ka lawm vaig tix, can pui mai to brie pa yaox ti khawmuik ka daux veng mai kix keeig ti tik yaong mai veng can pa yaox tix khawmuik heue.

¹ Pui Isarelax hoik tiextu, ka daux veng Mizapa ah nin, "Ex tix kaux kawx tak ang pon ti tawx pui Benyamin teei ti moeng kawn bun tix heue." ² Pui khankix hoek ka nyiex bwan Siyiex mai ot ka plak sivoe Siyiex tan tom hoek plak bo, kix riag yo tix yiiem, ³ Mai ah nin, "Simiang Siyiex pui Isarelax eue, kaing pa sang kieh ru pui tix cub grai khaing daux pui Isarelax, daux in singaix lih koe kheu patix?" ⁴ Mawh kheu nan pui khankix yaog ti kaoh ponngawb caocao mai sum khu dee tan tix mu tan mai tan krax tan pa gleeing, khawm krax tan pa nhim heue. ⁵ Pui Isarelax khankix ah nin, "Pui mawx ang hoek kum ka plak sivoe Simiang Siyiex tau mai paox tix, khaing daux doeh ru pui Isarelax lie?" Mawh kheu kix hoik yuh krax tiextu pa kied ting, son grawng pa dex mai pui pa ang hoek ka plak sivoe Simiang Siyiex daux veng Mizapa tak pah nawh yum heue." ⁶ Pui Isarelax kied laux rhawm ka son pux kix Benyamin mai kix ah nin, "Doeh ru pui tix cub hoik grai khaing pui Isarelax daux in singaix heue." ⁷ "Mawh kheu hoik tiextu ex ka Simiang Siyiex, son ang ex lai tawx kix moeng kawn bun tix, ex tak sang yuh ka mawx, sonsang koe moeng pui pa kawn deuk an khankix lie?" ⁸ Mai kix ah nin, "Khaing daux doeh ru pui Isarelax, mawh pui mawx pa ang hoek ka veng Mizapa ka plak sivoe Simiang Siyiex lie?" Yam an kix yaox mawh pui veng Yabiet pa ot daux haktiex Gilat pa ang hoek dee bang dee khrawm pui khankix paox tix, tix kaux kawx heue. ⁹ Mawh kheu yam simin kix ti yaox ka pui khankix, pui pa ot ka daux veng Yebiet, daux haktiex Gilat, ang lai koe pie tix kaux kawx tan heue. ¹⁰ Mawh kheu nan cub pui hun deeh ploi pui pa kied koe rhawm kwa rhawm vao tix mheen ra rheng kaux hu tan mai tawm kix ah nin, "Hu mai pah ti tik pui pa ot ka daux veng Yabiet, daux haktiex Gilat khankix ka lawm vaig pex, simex, bun mai kawn nyawm khankix heue." ¹¹ "Pa sang caw pex ti yuh, pex tak yuh simex, bun ku kaux pa hoik koe mex khankix laux lak pak leeing heue." ¹² Mawh kheu nan kix yaox bun krih pa ang nyang koe mex pon yieh kaux, daux sinax pui pa ot daux veng Yebiet daux haktiex Gilat mai kix viex kix hoek ka dee bang dee paung tix daux veng Shilaw daux haktiex Khanan heue. ¹³ Khaix an cub pui hun khawmuik deeh ploi pui hu krai ka pui Benyamin, pa ot hawt rang Rimon mai krai pao lox pa nhim rhawm ka kix heue. ¹⁴ Mawh kheu nan pui Benyamin deeh hoek daux bawg yam an, pui Isarelax tawx kix moeng bun pa hoik deuh kix im ju, pa mawh bun veng Yebiet daux haktiex Gilat, viang mawh nan bun ang nyang kub son kix heue. ¹⁵ Pui Isarelax kied koe krax laux rhawm son pui Benyamin, mawh kheu Simiang Siyiex hoik yuh ceu pa laux leeing koe daux doeh ru pui Isarelax heue. ¹⁶ Khaix an kuad cao kaing cub pui hun khankix ah nin, "Mawh kheu hoik laux leeing bun pui Benyamin, ex sang yaox bun dee mawx son pui pa kawn deuk khankix heue." ¹⁷ Mai kix ah nin, "Son ang doeh ru pui tix cub lai grai khaing daux pui Isarelax, caw ti koe haktiex sinngao son pui Benyamin, dee pa pon glawt ti dah heue. ¹⁸ "Viang yuh ka mawx kawx, ex ang pon ti tawx kix moeng kawn bun ex heue. Mawh kheu pui Isarelax hoik koe lox pa tiextu ah nin, "Kieh krax pa jhax lawg koe ka piang pui pa tawx kawn bun tix mex ka ceu pui Benyamin heue." ¹⁹ Mai kix ah nin, "Pawie Simiang Siyiex koe tix num tix bawg daux veng Shilaw, plak laong veng Betelax plak lih singaix ka krax pa hu, jah ka veng Betelax tom hoek ka veng Shekhim, pa koe plak seh veng Lebawna heue. ²⁰ Mawh kheu nan kix tawx lox ka pui Benyamin ah nin, "Hu mai jawm ti pau daux sipeem plix siiet khankix, ²¹ Yam lih hu kawn bun veng Shilaw daux pawie mai graoh tix, pex lih khaing daux sipeem plix siiet mai hu giex ti moeng bun an kix son cao tix mai viex ing ka haktiex pui Benyamin heue. ²² Phan keeing kix mai puxaik kix hoek ti ah grawng see ka yix mai yix tak ah nin ka kix, "Koe krax pa caux rhawm ka kix mai jhak ka pakngai yix liak, mawh kheu yix ang lai deuh moeng kix pie tix kaux kawx son kix ka daux naing, jao ang tie mawh pex pa teei ti tawx kawn bun inkix ka kix daux bawg yam in, phan koe krax lud ka lox pa hoik tiextu pex heue." ²³ Pui Benyamin hoek ti yuh awm an mai teei moeng son cao tix awm ding koe kix, khaing daux kawn bun pa hoek graoh tan mai giex kix ing ka daux haktiex sinngao cao tix mai kix deeh cox ti sum veng mai ot ka daux heue. ²⁴ Mawh kheu nan bawg yam an pui Isarelax lih hu khaing tan mai ing ka dee ot cao tix mai doeh nyiex ma cao tix, ka daux haktiex sinngao cao tix heue. ²⁵ Ka daux baux yam an pui Isarelax ang nyang koe simiang, pui ku kaux tang yuh awm pa yaox nawh mawh pa khaw caw ka ngai cao tix heue.