James

James

¹ Yakop, pa mawh siliex Siyiex mai Simiang Yesux Khrit tawx lox nawb hu ka pui kao ceu ra pa hoik prung prang roi rhuat kudah kudee heue. ² Puxaik aux khankix eue, yam yaox pex krax nyaw glaw miex ceu, sawn khawmuik mawh pa gaux rhawm, ³ Mawh kheu tawng pex grawng ceu pa cheu ti yaox krax yum rhawm pex, tak baox yuh ti kieh koe pa gun yeung heue. ⁴ Kieh pa gun yeung yuh kaing tix tom grum naog, sonsang grum naog grum mhawm pex mai ang koe dee taik dee cha heue. ⁵ Phan pex tix kaux kaux kawn taik kawn cud pingnya, kieh nawh rawg ka Siyiex, pa koe rhawm sibieh ti tawx ka pui khawmuik mai pa ang chix map mai tak sang tawx ka nawh heue. ⁶ Kieh nawh rawg ka daux krax yum rhawm mai paw keud jee blaong, mawh kheu kaw pa keud jee blaong awm puk pak rawm sigrit sigra pa phliah bhaung hu pa pukpliak lung lhiang heue. ⁷ Pui pa yuh nan, paw kieh nawh ce ti sang pon tix ceu kawx khaing Siyiex. ⁸ Pui pa koe rhawm ra mu ang kaux cong ka krax can pa yuh ti khawmuik heue. ⁹ Kieh puxaik pa tiem yaw mai gaux rhawm, ka pa hoik yaog nawh ting. ¹⁰ Kieh pa mi pa koe, yaw mai gaux rhawm ka pa hoik yuh nawh tiem, mawh kheu nawh tak sang grai hu awm tai rib tai riem heue. ¹¹ Grawh grawng nawh yam uik lih singaix mai kied hax koek, rib an fit mai kroh hu mai tai nawh cia mai pa mhawm grang nawh laux heue. Awm an pui pa mi pa koe, tak sang laux sang grai ka daux krax pa yuh tix heue. ¹² Pui pa chix kham ka pa nyaw glaw ting bwanson heue. Grawh grawng nawh khaix hoik cheu ti yaox ka nawh, nawh tak sang pon mhok khri pa im ju, pa hoik deuh Siyiex lox sijax mukheu ti sang tawx ka pui pa moh ka Nawh khankix heue. ¹³ Yam yaox nawh krax nyaw glaw, paw kieh pui ah tix kaux kawx, "Mawh Siyiex pa nyaw glaw aux."Mawh kheu Siyiex ang chix nyaw glaw ka pa caox mai tokaux Nawh ang nyaw glaw ka pui tix kaux kawx heue. ¹⁴ Kaux mawx kaux an yam yaox ti kham krax nyaw glaw, hoik mawh kheu alo nex nham tokaux tix, pa nyaw mai bluh nawh hu heue. ¹⁵ Mawh kheu nan, yam hoik nghe alo nex nham, yam keh phimap lih mai yam uik die hwan phimap nawh viex krax yum lih heue. ¹⁶ Puxaik pa moh aux khankix eue, paw kieh pie lhen ka pex. ¹⁷ Totaix pa mhawm mai pa grum ku ceu kaoh khaing dee long mai lih hoek khaing Keeing pa riang, pa ang chix siyox mai ang koe veei pa tie heue. ¹⁸ Nawh teei gum lox pa mawh pa meh, yuh ti kieh ex keh ti mawh awm koe alo Nawh, sonsang mawh ex, plix pa liang ti plix ka daux ceu pa hoik phan hoik yuh Nawh khankix heue. ¹⁹ Puxaik pa moh aux khankix eue, pex hoik tawng grawng in, kieh pui ku kaux nied ti mhong laung laung mai kieh briex koi sikah mai paw kieh hax song rhawm heue. ²⁰ Grawh grawng nawh, pa song rhawm pui, ang chix yuh pa rahsee Siyiex heue. ²¹ Mawh kheu nan tik pa seeing brai ku ceu khawmuik mai pa chax nie luan yuh pa caox mai viex rhawm awn rhawm tiem mai rieb ti teei gumlox pa hoik sum ka daux pex, pa chix taoh ju pex heue. ²² Kieh mawh pui pa hawt yuh gumlox mai paw kieh mawh ngie pa mhong giex, pie lhen ka tokaux tix heue. ²³ Mawh kheu phan tix kaux kaux pa mhong gumlox mai ang mawh pa hawt ti yuh, nawh awm pui tix kaux pa yaox pakngai riang pakpeung tix ka daux siliak. ²⁴ Grawh grawng nawh khaix hoik jhak hoik yaox nawh tokaux tix, nawh lih hu krax hu tix mai dom mawx dom an nawh piawm grawng mawh nawh pui yaung pa yuh ka mawx heue. ²⁵ Pui mawx ang ah, pa jhak ka daux beenli pa grum mhawm pa chix kieh luan mai pa ca kawn yuh nan mai ang mawh pui pa mhong mai piawm, pa mawh pui pa hawt yuh, pa yuh kaing, pui an tak sang pon bwanson ka daux pa yuh tix heue. ²⁶ Ka daux pex phan pui tix kaux kaux, ce tokaux tix mawh pui pa keud plak been bwan mai ang chix rien chix thox dak tix, nawh pie lhen ka rhawm rhi tokaux tix, pa keud pui an plak bwanson mawh pa giex going heue. ²⁷ Ceu pa hawt yuh plak been bwan pa singax, pa ang kawb pa seeing brai sivoe Keeing ex mai Siyiex mawh nin. Mawh pa hu kia ka kawn doe mai miexmai khankix, ka daux krax kha rhawm kix mai ceu pa chix priex tokaux tix kieh luan khaing pa kawb pa seeing brai haktiex heue.

¹ Puxaik aux khankix eue, paw giex ka krax yum rhawm ka daux Simiang ex Yesux Khrit, pa mawh Simiang pa ting min pakngai tau mai pa chix jhak ka pakngai pui. ² Mawh kheu phan pui tix kaux pa ceep jhup giien khri mai ceep kraung pa jiet mhawm mai phan pui tang kaux tix kaux pa hot pa sibhawm pa ceep kraung pa seeing brai kawx hoek ka daux nyiex sidiex pex, ³ pex nab yam ka kaw pa ceep kraung pa jiet mhawm an ah nin, "Ngawm ka daux dee ngawm pa mhawm tin heue."pex ah ka pui pa hot pa sibhawm an, "Maix cung tan, phan ang mawh nan, ngawm greem ngot dee deuh aux caong tix heue." ⁴ Pex yuh pa tang pa siyox ka daux sinax pex mai lih mawh cao prawng cao ca, pa keud pa caox pa ang mawh ang meh, ang mawh lie? ⁵ Puxaik pa moh aux khankix eue, nghiet heue, Siyiex hoik laug pui pa hot pa sibhawm plak haktiex, tix kieh kix mawh pa mi pa koe plak krax yum rhawm mai pa pon sin Meung an, pa hoik tawx Nawh lox sijax mukheu ti tawx ka kix pa moh ka Nawh ang mawh lie? ⁶ Pex hoik nieb thang yuh ka pui hot pui sibhawm heue. Pui pa mi pa koe khankix, mawh pa khin pex mai reu pex hu sivoe dee ngawm ti prawng ca, khankix ang mawh lie? ⁷ Kix salao ka Ceu kaux pa koe cee, pa hoik kok pex kah, ang mawh lie? ⁸ Phan pex priex ti hawt lox lai beenli Simiang awm pa koe ka daux phuk lai sigang khri, pa ah nin, "Maix tak moh paox plawg tix, awm moh maix tokaux tix,"pex hoik yuh mhawm heue. ⁹ Phan pex jhak ka pakngai pui, pex mawh pa yuh phimap mai lox lai beenli jhi sidawng grawng mawh pex pui pa lheu lox heue. ¹⁰ Mawh kheu pui mawx ang ah, pa priex ti hawt lox lai beenli khawmuik mai kawn phit ka tix ceu ngie, nawh lak lih mawh pa phit ka khawmuik heue. ¹¹ Grawh grawng nawh, Kaw pa hoik ah, "Paw phit paw vao,"pa yuh nin kawx baox ah, "paw teei pui yum. "Viang maix ang phit vao kawx, phan maix teei pui yum mai hoik mawh pa lheu lox ka lox lai beenli heue. ¹² Mawh kheu nan pex sikah mai yuh awm pui pa tak sang prawng sang ca ka lox lai beenli pa chix kieh luan heue. ¹³ Grawh grawng nawh kaw pa ang koe krax caux rhawm, tak ang pon krax caux rhawm yam prawng ca ka nawh. Krax caux rhawm chix pex krax prawng ca heue. ¹⁴ Puxaik aux khankix eue, phan pui tix kaux kaux ah koe krax yum rhawm tix, viang mawh nan ang koe krax twah klaung chix koe bwanson yuh ka mawx, krax yum rhawm an chix taoh nawh lie? ¹⁵ Puxaik, phan ang mawh nan, nan tix kaux kaux phan ang yaox ti ceep kraung mai ang kub pa ih son tix ngaix hoik tix ngaix, ¹⁶ phan pex tix kaux kaux lai ah nin ka kix, "Hu mhawm mhawm, kieh pex siu mai sak heue."Maung pa lo kix son tokaux kix kawx pex ang tawx, chix koe bwanson yuh ka mawx? ¹⁷ Awm an krax yum rhawm, phan nawh ang koe krax twah klaung, hoik yum ka daux tokaux tix tiru heue. ¹⁸ Ha pui tix kaux kaux ah nin, "Maix koe krax yum rhawm mai aux koe krax twah krax klaung,"jhi aux yaox krax yum rhawm maix pa ang koe krax twah klaung mai aux tak jhi maix yaox krax yum rhawm aux, ka pa twah pa klaung heue. ¹⁹ Maix yum rhawm grawh grawng pa koe Siyiex tix kaux khaing, pa hoik yuh maix mhawm heue. Phicaox khankix kawx yum rhawm mai siyaung sikua tix heue. ²⁰ Pui pa nieb keud nieb ce eue maix tak chix tawng grawh grawng krax yum rhawm pa ang koe krax twah klaung mawh pa yum lie? ²¹ Keeing ex Abraham pon pa rahsee kheu krax twah krax klaung pa yuh tix, yam hoik tan kawn simex tix Icak piang khu dee tan ang mawh lie? ²² Ang maix pon yaox grawng krax yum rhawm hoik yuh tau mai krax twah klaung pa yuh nawh mai mawh kheu krax twah klaung krax yum rhawm hoik grum naog grum mhawm lie? ²³ Phuk lai sigang khri pa ah nin hoik naog, "Abraham yum rhawm ka Siyiex mai hoik sawn ti mawh pa rahsee son nawh mai hoik kok nawh mawh paox grawm Siyiex heue." ²⁴ Mawh kheu nan pex pon ti yaox, grawh grawng pui pon ti hoek krax rahsee kheu krax twah klaung pa yuh tix mai ang mawh ngie kheu krax yum rhawm nong nong heue. ²⁵ Awm an Rahap bun pa coh kaux kawx hoik pon pa rahsee ka ceu pa yuh tix, yam rieb nawh ti teei pui cau pui soi ankiex mai ploi kiex hu krax tang nyaing, ang mawh lie? ²⁶ Grawh grawng nawh awm tokaux pa ang koe khuan hoik yum, awm an krax yum rhawm pa ang koe krax twah klaung kawx hoik yum heue.

¹ Puxaik aux khankix eue, paw phex yuh cao gau tom nie, kheu pex hoik tawng, grawng ex tak sang nie blon pon pa prawng ca heue. ² Mawh kheu ex khawmuik sideeing caong ka tom nie ceu heue. Phan pui tix kaux kaux ang sax lud lox ah sikah krai, kaw an mawh pui pa grum mhawm mai pa chix pex khawm tokaux tix khawmuik heue. ³ Phan ex sau keu ka daux jheeh brung, sonsang cu kix ka ex, ex pon kieh veeh khawm tokaux kix khawmuik heue. ⁴ Jhak ka khawm reu khankix heue, viang kix kied ting ding dod mai bhaung ting caox phlu kix kawx, chix kieh kix veeh kheu khaox saoh sidax reu pa kied iak, dee cao kia sidax reu koe rhawm ti sang kieh hu heue. ⁵ Awm an dak mawh pa iak ka daux kraung pakpeung tokaux kawx, jiet chix yaw chix bied heue. Jhak heue, ngu iak ceeix khaing chix kieh khix nie ding gleeing heue. ⁶ Dak kienie, mawh ngu mai mawh phimap heue. Dak kawx awm an ka sinax kraung pakpeung tokaux ex mai nawh kieh khawm tokaux tix khawmuik seeing brai mai kieh ling alo nex nham khawmuik rup awm ngu mai ngu mawnarhok kieh dak an rup heue. ⁷ Grawh grawng nawh totiag can pa koe ku ceu mai sim khankix mai siuing mai pa chix mu hu khankix mai khawm ceu pa koe ka daux rawm sigrit sigra khawmuik, chix kieh nge mai kawn pui hoik sax yuh kieh nge heue. ⁸ Dak kienie, pui tix kaux kawx ang chix kieh nge. Dak mawh pa caox pa ang chix gau chix pheuk mai pa naog ka pa awp pa chix kieh yum heue. ⁹ Ex teei dak tix mai yaog yaw ka Simiang mai Keeing Cao mai ex teei dak tix lawg jhax ka kawn pui pa hoik yuh yaung Siyiex heue. ¹⁰ Ka daux jheeh tix mu khaing lih lox pa yaogyaw mai khawm pa lawg pa jhax heue. Puxaik aux khankix eue, ang khaw ti mawh nan. ¹¹ Daux rawm keut tix daux, chix lih rawm pa nyawm mai khawm rawm pa song tix dom neh lie? ¹² Puxaik aux khankix eue, khaox ruh chix lih tix plix, plix sanlun lie? Phan ang mawh nan nhu plix siiet chix lih tix plix, plix ruh lie? Awm an rawm kih pa khien, ang chix tix lih mawh rawm pa nyawm heue. ¹³ Ka daux pex kaux pui mawx, mawx pa koe pingnya, pa chix tawng? Kieh nawh jhi ka daux ceu pa yuh tix pa mhawm, pa awn rhawm ka pingnya heue. ¹⁴ Phan pex koe pa boh rhawm mai pa ang khaw paox tix daux rhawm, paw yaw rangdi ka tokaux tix mai pie lhen ka pa mawh meh. ¹⁵ Pingnya in ang mawh pa lih hoek khaing dee long, mawh pa dex dawd mai haktiex, mawh alo nex nham mai phi caox caig heue. ¹⁶ Mawh kheu dee koe pa boh rhawm mai pa ang khaw paox tix, koe pa cuci mai pa yuh ceu pa caox caig ku ceu heue. ¹⁷ Pingnya pa kaoh khaing dee long phao ka tix ceu mawh pa singax, lheu khaing an pa chix khaw paox tix mai pa awn rhawm mai ceu pa yie ti gau ti glaw, pa naog ka pa caux rhawm mai plix pa mhawm khankix, pa ang jhak ka pakngai pui ti yuh tang siyox mai pa ang koe pa pie lhen heue. ¹⁸ Simie ceu pa rahsee khankix, mawh pa chix yuh pa nhim, kix rhuat ka daux pa nhim heue.

¹ Sinax pex krax naing mai krax simah kaoh khaing dee mawx? Kaoh khaing alo nex nham pex, pa koe krax naing sinax kraung pakpeung tokaux tix, ang mawh lie? ² Pex koe krax lhawk mai ang lai koe, pex teei pui yum mai pex simie ti cie mai ang chix pon, pex koe krax simah simiang mai krax naing, pex ang pon, mawh kheu ang pex rawg heue. ³ Pex rawg mai ang pon, mawh kheu rawg pex pa ang khaw, sonsang shiao ka son alo nex nham tix heue. ⁴ Pex pa mawh bun pa ang kaux sijax, pa phit vao khankix eue, ang pex tawng pa yuh paox pie, pa dex dawd mai haktiex, mawh ceu pa koeng ka Siyiex lie? Mawh kheu nan pui mawx ang ah, pa yuh paox pie ka haktiex, yuh ti kieh tokaux tix mawh pa koeng ka Siyiex heue. ⁵ Pex keud ce phuk lai sigang khri pa ah nin, "Khuan Cao pa hoik kieh Nawh ot ka daux ex, mawh pa koe rhawm pa sang ghoing kah lie?"Pa ah nan mawh pa giex going lie? ⁶ Nawh nie blon tawx bwanson heue. Mawh kheu nan phuk lai sigang khri ah nin, "Siyiex tieb tie ka pui ting rhawm ca nyhau khankix, Nawh tawx bwanson ka pui pa tiem rhawm khankix heue." ⁷ Mawh kheu nan pex cu nghiet ka Siyiex, viang mawh nan tiebtie ka phicaox mai nawh tak to hu khaing pex heue. ⁸ Greed tix hoek dex ka Siyiex mai Nawh Cao tak greed tix hoek dex ka pex heue. Pui pa koe phimap khankix eue, kieh taix pex khankix singax heue. Pex pa koe rhawm ra mu khankix eue, kieh rhawm pex singax singeh heue. ⁹ Kieh koe krax kha rhawm mai krax khi rhawm mai yiiem riag yo heue. Kieh krax nyiah pex deeh tieh ti mawh pa khi rhawm mai kieh krax gaux rhawm pex, deeh tieh ti mawh krax voi rhawm heue. ¹⁰ Yuh tokaux pex tiem sivoe Simiang mai Nawh tak yaog pex ting heue. ¹¹ Puxaik khankix eue, paw krai lox deuh phimap grawng paox tix heue. Kaw pa ah lox deuh phimap ka puxaik, phan ang mawh nan pa prawng ca ka puxaik tix, nawh ah lox deuh phimap ka lox lai beenli mai prawng ca ka lox lai beenli heue. Phan maix prawng ca ka lox lai beenli maix ang mawh pui pa hawt yuh lox lai beenli, mawh cao prawng ca heue. ¹² Cao pa tawx lox lai beenli mai cao prawng ca koe tix kaux khaing, pa mawh kaw pa chix taoh mai pa chix yieh yuh laux heue. Maix phex mawh pui pa yuh ka mawx, pa prawng ca ka paox plawg tix? ¹³ Pex pa ah, "Singaix, phan ang mawh nan, pasax, ex tak sang hu ka daux veng an mai ot tan tix num mai yuh lai geu sonsang pon rao tix kah,"khankix eue, nghiet ha. ¹⁴ Pex ang tawng grawh grawng ceu pa tak sang mawh pasax heue. Ju pex mawh pa yuh ka mawx? Grawh grawng nawh pex mawh awm taox simawg pa sidawng tivud khaing mai deeh grai khaix heue. ¹⁵ Mawh kheu nan pex khaw ti ah nin, "Phan Siyiex koe alo, ex tak pon ti im ju mai yuh nin, phan ang mawh nan, yuh nan heue." ¹⁶ Yam in pex yaw rangdi ka daux pa bied tix, ceu pa yaw rangdi ti yuh nan khawmuik mawh pa caox heue. ¹⁷ Mawh kheu nan kaw pa tawng ti yuh ceu pa mhawm mai ang yuh ceu an, mawh phimap ka son nawh heue.

¹ Pui pa mi pa koe khankix eue, hoek yam in mai yiiem grai mai riag yo, kheu ceu pa kha rhawm khankix pa tak sang hoek ka piang pex heue. ² Sin ngao pex hoik sium hoik rham mai kraung ceep pex khankix pung piang siah hoik ih nyao heue. ³ Mau khri pex hoik haok tai hoik rhaw mai rhaw an tak mawh mhai rug pa deuh phimap ka piang pex mai tak sang ih nex pex awm ngu heue. Pex hoik pum hoik deuh sinngao ka daux singaix ghoik khaix khankix heue. ⁴ Jhak heue, mau riang pui pa hoik vawg ma kaung pex, pa hoik nieb pie pex ti ang tawx, kok yo heue. Lox yo pui vawg khankix, hoik laig ka yhaok Simiang cub kru naing raoma heue. ⁵ Pex hoik pon ot mhawm mhawm ka piang haktiex mai hoik thang pon yuh krax gaux rhawm pex. Pex hoik khankheu ka rhawm rhi tix, ka daux singaix teei yum heue. ⁶ Pex hoik prawng ca mai pex hoik teei yum ka Kaw pa rahsee. Nawh ang tieb tie pex kah heue. ⁷ Mawh kheu in puxaik khankix eue, gun yeung tom deeh hoek Simiang heue. Jhak ka pui yuh ma kaung pa krox jun son plix haktiex pa ngawh, pa chix gun yeung son plix an, tom hoik pon rawm lhiex cao mai lhiex lha heue. ⁸ Pex kawx kieh koe krax gun yeung mai kieh rhawm pex kaux cong heue. Mawh kheu bawg yam sang hoek Simiang dex hoek heue. ⁹ Puxaik khankix eue, paw vi salao ka paox tix, son ang pex sang hoek krax prawng ca. Jhak heue, cao prawng ca hoik ot sivoe siviex khankix heue. ¹⁰ Puxaik aux khankix eue, teei krawng ceu pa kham pa geu mai pa chix gun chix yeung cao jhai khankix, sonsang mawh dee hawt jawh ti yuh. ¹¹ Jhak heue, ex kok kix pa hoik kham hoik geu khankix mawh pa ting bwanson. Pex hoik mhong grawh grawng pa chix gun chix yeung Yawbax mai hoik pon yaox pa hoik yuh Simiang ka nawh yam sidah mai hoik yaox grawh grawng pa grum naog Simiang ka krax caux rhawm saik rhawm heue. ¹² Puxaik aux khankix eue, ka piang ku ceu khawmuik, paw tiextu heue, paw tiextu ka raoma, viang ka haktiex kawx paw tiextu kah mai paw tiextu ka tang ceu tix ceu kawx. Son ang pex sang laig greem krax prawng ca, phan mawh ceu pa mawh, ah "mawh heue,"phan mawh ceu pa ang mawh, ah, "ang mawh heue." ¹³ Ka daux pex koe tix kaux kaux pa yaox ti kham geu krax kha rhawm lie? Kieh nawh rawg bwan heue. Koe tix kaux kaux pa nyawm rhawm lie? Kieh nawh rhax lai yaogyaw heue. ¹⁴ Koe pui saux ka daux pex tix kaux kaux lie? Kieh nawh kok kuad ceu cao khankix mai kieh kix groi rawm bee ka nawh mai rawg bwan ka piang nawh ka daux ceu kaux Simiang Siyiex heue. ¹⁵ lox rawg bwan pa koe krax yum rhawm, tak sang taoh kaw pa saux an mai Simiang tak sang kieh nawh kaoh mai phan nawh hoik yuh phimap, tak sang pluat ploi phimap nawh heue. ¹⁶ Mawh kheu nan krai doh grawh grawng phimap pex ka paox tix, tix kaux lai tix kaux mai rawg bwan son paox tix, tix kaux lai tix kaux sonsang deeh moi nyawm ot pex heue. Lox rawg bwan pui pa rahsee koe sibrawm mai ting bwanson ka daux pa yuh kieh mawh heue. ¹⁷ Eliyax viang nawh mawh kawn pui pa koe krax keud awm ex kawx, nawh rawg bwan, son ang lhiex sang lih mai lhiex ang lai lih son loe num mai liah khix heue. ¹⁸ nawh baox deeh rawg bwan tix bawg mai raoma tawx lhiex lih mai haktiex deeh chix kieh nawh plix plix heue. ¹⁹ Puxaik aux khankix eue, ka daux pex phan tix kaux kaux lud loe khaing krax pa mawh meh mai tix kaux kaux deeh viex nawh hoek, ²⁰ Kieh nawh tawng grawh grawng kaw pa deeh kieh pui koe map koe grham tix kaux, deeh tieh ti hoek khaing krax lud loe tix, tak sang taoh ju tix mu, khaing krax yum mai tak sang pie lhen phimap Pa haoh hun heue.