Isaiah

Isaiah

¹ Grawng riang susai pa pon Isayax kawn simex Amok ti yaox, grawng pa dex dawd mai meung Yudax mai veng Yerusaliem ka daux baux singaix Uziyax, Yotham, Ahaza mai Hezakix, pa mawh simiang Yudax khankix. ² Raoma eue, nghiet liak! mai haktiex eue, daong yhaok ka liak! grawh grawng nawh, Siyiex hoik ah nin; "Aux hoik eei liang kawn nyawm khankix ting lhaong mai kix hoik tieh feen ka Aux heue. ³ Mawie tawng ka cao cie tix, mai la tawng ka kawg cao simiang tix, viang mawh nan, ceu pui Isarelax khankix ang tawng, pui aux khankix ang tawng ti keud heue. ⁴ Eue!, ceu pui pa ting phimap phighram, cub pui pa klawm phimap phighram pa cien cub kawn praix pa yuh pa caox caig, kawn praix pa laux leeing; kix hoik tik vud ka Siyiex, kix hoik so kaoh pa song rhawm song rhi, ka Siyiex pa singax singeh ceu pui Isarelax, kix hoik deeh veeh ti ing ka plak khaix heue. ⁵ Mawh kheu jao patix pex lai tieh feen tix bawg hoik tix bawg sonsang baox pon tix krax ciyang yuh ka mawx lie? Kaing pui khawmuik khawm leeing hoik saux kah mai rhawm rhi pui khawmuik hoik mao kah heue. ⁶ Jah ka tiag caong tom hoek ka kaing, krax pa nyawm ot ang lai koe ka daux kix, viang mawh nan dee mat, dee uah mai dee leem khankix, ang nyang nyeep tix ang nyang fua tix mai ang nyang kraix moi ka bee heue. ⁷ Haktiex pex mawh pa yiien, veng pex hoik gleeing tix ka ngu; pui tang meung khankix yuh haktiex pex laux leeing ka plak sivoe ngai pex mai an hoik mawh pa yiien, awm pa yieh pui tang praix ti tik heue. ⁸ Mawh kheu nan, kawn bun Zion mawh pa hoik prah tix, awm nyiex gox tix lhang ka daux sipeem plix siiet tix gwang, awm nyiex gox tix lhang ka daux sipeem ma ke khankix, awm veng pa hoik lai lawm tix, tix veng heue. ⁹ Phan ang mawh Siyiex Cao kru naing raoma, pa kawn prah kawn deuk ka ex ceeix ex hoik dawg awm veng Sawdom mai veng Gawmawrax heue. ¹⁰ Pex pa mawh cao pa kwang piang veng Sawdom khankix eue, nghiet ka gumlox Siyiex heue, pex pa mawh pui ot daux veng Gawmawrax khankix eue, daong yhaok tix ka lox lai beenli Siyiex ex heue. ¹¹ Krax tan pa appong kied haoh hun cie pex khankix tak sang mawh krax tan pa koe grawng ceu patix ka son Aux lie? Siyiex ah nin, "Aux hoik koe krax tan pa gleeing kawn yung khankix mai klon bee tobrie pa hoik eei tix kluing khankix hoik grum naog heue. Aux ang koe krax khaw rhawm ka nham mawie mai nham yung iak mai nham pex khankix heue. ¹² Yam bleeh pex ka plak sivoe ngai aux, mawh pui mawx pa hoik mhaing ti cie in khaing daux tawm taix pex, sonsang dig ka daux biang nyiex Aux lie? ¹³ Paw deeh viex krax tan pa appong pa giex going khankix hoek, ceu pa sioe bhawng mawh ceu pa seeing brai ka son Aux heue. Singaix haok khix khraox, singaix twah mai singaix kum cub pui hun, aux ang pon kham krax pa koe map koe grham ka daux bang kum pa singax an khankix heue. ¹⁴ Singaix haok khix khraox pex khankix mai pawie pa hoik tat pex ti yuh khankix, khwan ju Aux koeng kah mai ceu ankix mawh pa tawx krax tuktiak tukte ka Aux, Aux hoik taug mao ka kham geu tix ceu an kix heue. ¹⁵ Yam nyeu pex khawn taix tix khankix lih, Aux tak mox ngai khaing pex, pie viang pex yuh krax pa rawg tix bwan tom nie kawx Aux tak ang nghiet kah heue. Taix pex khankix mawh pa hoik naog ka nham heue. ¹⁶ Sighrah tokaux cao pex yuh tokaux cao pex singax, teei ti tik can pa caox yuh pex khaing ka plak sivoe ngai Aux heue. Naox ka ceu pa yuh pa caox, ¹⁷ gau ti yuh ceu pa mhawm, sawg ka pa rahsee, plak jhi ka phimap cao pa gut yeen, tieb tie ka son pa ang koe keeing, khyox khaw ka son miexmai heue. ¹⁸ "Hoek yam in, ex ah grawng an kix tau mai paox tix, "Siyiex ah nin, viang phimap pex raoh rawt kawx, kix tak paing awm rawm rha, viang kix raoh awm raoh lung kawx kix tak awm hauk yung heue. ¹⁹ Phan pex koe rhawm mai koe krax pa cu nghiet, pex tak yaox ti ih ceu pa mhawm khaing daux haktiex heue. ²⁰ Viang mawh nan phan pex thiang mai deeh tieh feen, pex tak laux leeing ka lawm vaig heue. Mawh kheu moing jheeh Siyiex hoik ah ti deuh heue. ²¹ Veng pa kaux sijax hoik lih ti mawh bun pa coh kaux yuh ka mawx lie? An hoik mawh pa naog pa rahsee, krax pa mawh meh hoik ot ka daux nawh glang ka in heue. Viang mawh nan, yam in mawh deeh ot cao pa pah ju pui yum heue. ²² Mau maix hoik lih ti mawh sivun, rawm plix siiet maix hoik mawh pa sikax tix tau mai rawm heue. ²³ Kawn lauxsimiang maix khankix hoik mawh pa deeh tieh feen mai mawh pa rom tix neuex tau mai pui briex pui ku kaux moh ka kraung pa cun praok khankix mai hawt ti hu khaix totaix khankix heue. Kix ang lai tiebtie ka son pa ang koe keeing mai yuh tix ang kieh grawng see miexmai hoek ka plak sivoe kix heue. ²⁴ Mawh kheu nan Siyiex cao kru naing raoma, Siyiex cao pa ting sibrawm ka daux ceu pui Isarelax, ah nin! an! aux tak kieh tokaux cao tix singai khaing daux pui pa tieh feen ka aux khankix mai deeh pawk bix tix ka piang pui pa koeng aux khankix heue. ²⁵ Aux tak deeh veeh khawn taix tix ka maix mai sigrhah sivun maix khawmuik mai teei tawng pa lheung maix khankix hu heue. ²⁶ Aux tak sang baox deeh tawx cao prawng see khankix ka maix phao voe mai cao pa tawx krax keud krax tawng khankix ka maix awm pa koe tom yam jah heue. Khaix an tak kok maix mawh veng pa rahsee mai veng pa kaux sijax heue. ²⁷ Veng Zion tak mawh pa pon krax taoh kheu pa rahsee mai pa deeh doh keud ka phimap tix ka daux pa mawh meh heue. ²⁸ Pui pa lud mai pui pa koe map koe grham khankix, tak sang laux leeing tau mai paox tix mai pui pa hoik tik vud ka Siyiex, tak mawh pa som pa nai heue. ²⁹ Mawh kheu kix tak koe krax pa kaig tua ka pang khaox piak van ka pa hoik koe rhawm maix ka heue mai tak mawh pa laux pakngai, kheu grawng sipeem pa hoik laug maix ti teei heue. ³⁰ Mawh kheu maix tak awm khaox piak van pa kroh lhax mai awm sipeem pa ang koe rawm heue. ³¹ Pa ting riang tak sang awm keei saix ngu mai kaing jhaw yuh nawh tak awm situah ngu an khawm ra gleeing tau mai pui tix kaux kawx tak ang pon preet kah heue.

¹ Gumlox pa hoik pao Isayax kawn simex Amok son grawng meung Yudax mai veng Yerusaliem; ² Ka daux singaix bawg phao khaix, nyiex bwan Siyiex, tak sang pang tix ka piang choek gawng khankix mai tak sang yaog tix lhaong ka piang ton khankix mai can pui khawmuik tak lih hu ka tan heue. ³ Pui khankix tom nie, tak hoek ah nin, "Hoek mai kieh ex haok ka piang gawng Siyiex, ka nyiex bwan Siyiex Yakop; Nawh Cao tak sang gau ex ka daux krax Nawh Cao mai ex tak lawng ka daux krax Nawh Cao heue. "Mawh kheu gumlox beenli tak lih khaing gawng Zion mai gumlox Siyiex tak lih hoek khaing veng Yerusaliem heue. ⁴ Nawh Cao tak prawng ka daux sinax ceu pui khankix mai tak ah ka pui khankix tom nie kix tak lhaw vaid lawm ti mawh tothai mai deeh tawk plia ti mawh sivawg, tix meung mai tix meung tak ang lai puing puah paox tix mai kix tak ang lai yaox ti gau grawng naing tix bawg kawx heue. ⁵ Nyiex ma Yokop eue, hoek mai ex hu ka daux pa riang Siyiex heue. ⁶ Mawh kheu maix hoik tik vud ka ceu pui Maix, pa mawh cub nyiex ma Yakop, grawh grawng nawh, kix hoik mawh pa naog krax pa chix haktiex plak lih singaix kix mawh cao pa chix sibawk awm pui Philitix mai kix nyawm rhawm tau mai kawn praix haktiex tang meung khankix heue. ⁷ Haktiex kix kawx, mawh pa naog ka mau khri mai kraung sinngao kix ang lai chix uik, haktiex kix kawx, mawh pa naog ka brung mai ling lawx naing brung kix ang lai uik simin kah heue. ⁸ Haktiex kix kawx naog ka riang rao, kix krub ka pa yuh kix ka taix cao kix, ka pa hoik yuh kix ka gien taix cao kix heue. ⁹ Pui khankix gup kaing tix mai pui tang yuh rhawm rhi tokaux cao tix tiem, mawh kheu nan, paw doh pluat ploi ka phimap kix. ¹⁰ Laig ka daux simaox rang mai mox tix ka daux phawng tiex, khaing krax pa glhat Siyiex mai khaing min sibrawm pa ting lhaong Nawh heue. ¹¹ Pui pa lhaong jhak khankix tak yeen tiem, pui pa ting rhawm tak gup kaing tix mai mawh Siyiex tix kaux khaing, pa yaog tix ting lhaong ka daux singaix an heue. ¹² Grawh grawng nawh, singaix Siyiex cao kru naing raoma, tak hoek ka piang kuceu, pa ting rhawm mai pa lhaong jhak pa tak yaox tix ka piang kuceu mai tak kieh mawh pa tiem. ¹³ Ka piang khaox Arit Lebanon pa yaog tix lhaong khawmuik mai ka piang khaox tai Bashan khankix, ¹⁴ ka piang gawng pa lhaong khawmuik mai ka piang ton pa pum tix lhaong khawmuik, ¹⁵ ka piang nyiex pau tab dee lhaong ku lhang mai ka piang guh veng pa hoik kaux hoik cong ku guh, ¹⁶ ka piang reu ting veng Tasux khawmuik mai ka piang reu iak pa mhawm grang khawmuik heue. ¹⁷ Pui pa ting rhawm lhaong ngai tak cod rau mai pui pa ting rhawm tak yeen tiem, mawh ngie Siyiex tix kaux khaing pa yaog tix ting lhaong ka daux singaix an heue. ¹⁸ Mai riang grang khankix grai grup pak lawg heue. ¹⁹ Yam yaog Nawh Cao ti kaoh sonsang yung yiang ka haktiex, kix tak hu laig ka daux doh rang mai ka daux rhauk dee bieh rang khankix, kheu krax pa glhat Siyiex mai min sibrawm pa ting lhaong Nawh Cao heue. ²⁰ Ka daux singaix an pui tak tik vud ka riang rao mau mai khri pa hoik yuh kix ti krub son tokaux cao tix, ka beei mai blak khankix. ²¹ Yam yaox Nawh Cao tix kaoh sonsang yung yiang ka haktiex, kix tak hu laig ka daux doh rang mai ka daux rhauk dee bieh rang khankix, kheu krax pa glhat Siyiex mai min sibrawm pa ting lhaong Nawh Cao heue. ²² Paw lai een rhwm ka kawn pui pa toek bhawm ka daux meeh tix, nawh mawh patix lie?

¹ Jhak heue, Siyiex, pa mawh Siyiex Cao kru naing raoma teei kraung pa pum tix mai kraung pa priex tix khankix, blah pa tawx tix khawmuik mai khawm rawm pa tawx tix khawmuik hu khaing veng Yerusaliem mai khaing meung Yudax, ² Khawm pui pa ting riang rao mai pui naing, cao prawng see mai cao jhai cao pa chix sibawk mai kuad song, ³ Khawm cao kaing naing piang pui tixphwan kaux mai pui pa koe min sibrawm, cao pa chix tawx krax keud mai pui pa min ka kaing taix mai pui pa min ka plak lox pih khankix khawmuik heue. ⁴ "Aux tak kieh kawn nyawm mawh lauxsimiang kix, mai kieh kawn ngie mawh cao kwang piang kix heue. ⁵ Pui meung khankix tak sang gut yeen paox tix, pui tix kaux mai tix kaux mai paox plawg paox nyawm tak ra lai gut yeen paox tix, kawn nyawm tak ang lai koe krax nab yam ka pui kuad mai pui beuh tak ang lai koe krax nab yam ka pui pa koe min sibrawm khankix heue. ⁶ Yam giex pui tix kaux ka puxaik tix, ka daux nyiex keeing nawh mai ah nin! "Maix kawn koe kraung ceep maix yuh cao pa kwang ex mai kieh krax pa laux leeing inkix tak ot ka greem pa kwang maix heue." ⁷ Ka daux singaix an, nawh tak thiang ah nin; "Aux ang pon pai pa saux pex, mawh kheu priex preem kraung ceep ang koe ka daux nyiex aux, paw kieh aux yuh cao pa kwang ka piang pui khankix liak!" ⁸ Grawh grawng nawh veng Yerusaliem hoik goh grhup mai meung Yudax hoik som nai kheu dak kix mai pa yuh kix khankix, mawh pa tieh feen ka Siyiex, sonsang so kaoh ka ngai min sibrawm Nawh Cao heue. ⁹ Pakngai kix kham sakse ka son grawng tieh feen kix mai kix hu krai doh ka phimap phighram tix, awm veng Sawdom kix ang lai mox ka heue. An mawh pa kha rhawm son ju kix heue, Mawh kheu kix hoik viex pa caox hoek ka piang tokaux cao kix heue. ¹⁰ Ah nin ka pui pa rahsee, grawng tak sang mawh an pa mhawm son kix heue. Mawh kheu kix tak sang yaox ti ih plix pa kaoh khaing krax pa yuh kix heue. ¹¹ Pui pa caox caig tak kha rhawm, pa caox an tak mawh pa khaw tau mai nawh heue. Mawh kheu nawh tak deeh pon totaix awm pa yuh tix heue. ¹² Phan mawh ka son pui Aux khankix, kawn nyawm khankix kin kha ti ih ka piang kix mai bun khankix mawh cao pa kwang ka piang kix heue. Pui Aux khankix eue, Can pui pa thung ka pex khankix, mawh pa yuh pex lud loe krax mai yuh daux krax hu pex laux leeing heue." ¹³ Siyiex yaog ti kaoh cung sonsang pawk lox mai prawng ca ka pui khankix heue. ¹⁴ Siyiex tak sang laig ka dee prawng see, tau mai kuad song pui Nawh Cao khankix mai cub Simiang khankix mawh kheu pex hoik uik ih plix sipeem plix siiet aux; kraung pa tud rhim khaing pui hot shia hoik koe ka daux nyiex pex heue. ¹⁵ Siyiex Cao kru naing raoma ah nin, "Deeh bleeh gut yeen pex ka pui Aux khankix mai krid pex ngai baoh pui hot pui shia mawh ceu patix lie? ¹⁶ Lheu khaing an Siyiex baox ah nin "Kheu jao grawng mawh kawn bun Zion khankix pa kied ting rhawm mai lai ling ti jhi ngawg tix mai jhak pui ka daog ngai tix, hu lai ling mai sideet diang tix yuh lox proing caong tix luah heue. ¹⁷ Mawh kheu Siyiex tak yuh kix kham geu krax saux pak hauk kaing, ka piang kaing cub kawn bun Zion khankix mai Siyiex tak plak ti tik kraung dee koe krax pa kaig pa tua kix heue. ¹⁸ Ka daux singaix an Siyiex tak teei ti tik ceu pa mhawm khankix, pa mawh ble luah hawt ngai liak, man lawk kaing mai sigiiep hauk pa awm pakpeung haok khix khraox, ¹⁹ Krim ble mai man tie pakngai khankix, ²⁰ Mhok khri maox soi caong mai man rawd nyoi, iiep sidah bhawng hau mau kraung laoh lie khankix, ²¹ mai jeep gien krim meeh khankix, ²² sibex rhi ceep daux pawie mai man fua kaux, kraung ceep plak praix hau mau khankix, ²³ mai siliak jhak, sibex plak daux, lawk kaing mai sibex dhah heue. ²⁴ Ceu an kix tak lih ti mawh son tang pa sioe bhawng, tak mawh pa cux si um, son tang man rawd nyoi tak mawh maox tix nyaing, son tang hauk kaing pa hoik sat tix mhawm, mawh pa pak kaing, son tang sibex dhah mawh maox rawd man pa kawm mai khaix pied gawng rhiem mawh son tang pa mhawm grang heue. ²⁵ Pui maix khankix tak goh ti yum ka vaig lawm mai khawm pa ting riang maix tak yum ka daux naing heue. ²⁶ Diang siviex nawh khankix tak yiiem yo mai koe krax laux rhawm, nawh hoik yiien mai ngawm ka piang tiex heue.

¹ Ka daux singaix an bun aliah kaux tak giex ti deuh simex tix kaux mai ah nin "Ex tak sang ih priex cao tix mai ceep kraung cao tix, kieh yix mawh pa kok tix ka ceu kaux maix nong nong ngie, sonsang teei ti tik krax pa kaig tua yix heue. ² Ka daux singaix an, nyoig kak khaox Siyiex, tak mawh pa mhawm grang ti yaox mai pa koe min sibrawm mai plix piang tiex khankix tak mawh pa kied lheu mhawm mai pa fah rhawm son ceu pui Isarelax pa hoik pon glawd khankix heue. ³ Khaix hoik luan ceu an pui pa kawn prah tix ka daux veng Zion mai pui pa kawn deuk ka daux veng Yerusaliem khankix, tak kok kix ku kaux mawh pa singax ka daux sinax pui pa kawn im ju pa hoik mhai ti deuh carang ka daux veng Yerusaliem heue. ⁴ Yam hoik sigrhah Siyiex pa seeing brai kawn bun veng Zion khankix mai hoik singax yuh nham veng Yerusaliem khaing daux sigreung nawh, ka khwan krax prawng krax ci yang mai ka khwan gleeing ngu. ⁵ Khaix an Siyiex tak phan ti deuh paiawm mai taox ngu ka plak ponngaix mai rao ngu pa jhan riang ka plak ponsawm, ka piang dee ot dee koe kudauh kudee piang gawng Zion mai ka piang dee khrawm pui tix kum heue. Ka piang an khawmuik min sibrawm Nawh tak kheem kah heue. ⁶ An tak mawh son veei plak pon ngaix kheu hax koek mai mawh son dee pan dee mox tix kheu bhaung ting mai lhiex ting heue.

¹ Yam in kieh aux ah lai rhax son paox moh dud aux, lai rhax paox moh dud aux pa dex dawd mai sipeem plix siiet nawh heue. Paox moh dud aux koe sipeem plix siiet tix gwang, ka piang ton gawng pa kied mhawm phon heue. ² Nawh kaong ka daux tiex mai teei lon simaox singax mai sum nhu plix siiet pa kied mhawm ka daux an heue. Nawh sum nyiex pau ka daux sigreung sipeem mai baox yuh dee biiet rawm plix siiet ka daux an; mawh kheu nan nawh hoik keud ce an sang pon plix siiet ceu pa mhawm, viang mawh nan, an hoik lih ti mawh plix siiet tiag heue. ³ "Yam in pui pa ot ka daux veng Yerusaliem mai pui meung Yudax khankix eue, aux rawg pex prawng see sinax aux mai sipeem plix siiet aux liak!" ⁴ Mawh ceu patix pa ang Aux bax pon yuh ka sipeem plix siiet Aux, lheu khaing pa hoik yuh Aux ka daux nawh lie? Khaix an yam hoik keud ce aux nawh sang koe plix siiet ceu pa mhawm, an hoik lih ti koe plix siiet tiag kheu jao pa yuh ka mawx lie? ⁵ Yam in yuh bwanson kieh Aux krai pex mhong grawng sang pon yuh Aux ceu patix ka sipeem plix siiet Aux, Aux tak sang teei ti viex nawh mai gleeing ka ngu mai yieh ti tik guh veng nawh mai kieh pui ting dig ka heue. ⁶ Aux tak deuh nawh mawh daux tiagtu; tak ang lai paog lai kaong, viang mawh nan, pang yeem mai pang kat khankix tak deeh kuah daux an heue. Aux tak baox deeh tawx gumlox ka paiawm khankix, sonsang ang kix lai ploi rawm lih ka piang an heue. ⁷ Grawh grawng nawh sipeem plix siiet Siyiex Cao kru naing raoma mawh nyiex ma ceu pui Isarelax khankix, mai pui Yudax khankix, mawh pang khaox pa khaw rhawm Nawh Cao ka heue. Nawh Cao hoik keud ce mawh son krax pa rahsee, viang mawh nan hoik mawh krax pa yeen tix kha rhawm son pa rahsee, viang mawh nan jhak heue, hoik mawh krax pa yiiem heue. ⁸ Kieh krax pa kha rhawm koe ka piang pui an kix pa sitoe nyiex tix lhaong mai tix lhang mai pa deeh kleuk gwang kaung tix gwang mai tix gwang, tom hoik ang deeh lai koe, ka dee sang pon kix tix ot ka nong nong ka daux sigreung haktiex an heue. ⁹ Ka daux pa mhong aux Siyiex Cao kru naing raoma hoik ah nin nyiex khankix tom nie, tak mawh pa grham tix yiien tete khawm pa ting mai pa mhawm grang an khankix ku lhang tak mawh pa ang pui lai ot kah heue. ¹⁰ Grawh grawng nawh, sipeem plix siiet pa uik kao glawm simie tak pon rawm plix siiet ti pug ngie mai simie pa rhuat kao pung tak pon tix pung ngie heue. ¹¹ Kieh krax kha rhawm koe ka pui an kix pa kaoh caocao plak ponngawb, ka sang hawt tix khaix rawm plai pa khiien nyaux an ang jud tom hoek ponsawm, tom hoik hax bhawm plai ka daux kix heue. ¹² Ting feuk mai ting si khankix, ting plah khaox mai shiao mai rawm plix siiet khankix koe ka daux pawie heue. Viang mawh nan kix ang yuh ti dex dawd mai kaing Siyiex mai ang koe krax keud ka pa yuh Nawh cao ka taix tix heue. ¹³ Mawh kheu nan pui aux khankix yaox ti ot ka daux pa giex laung, kheu jao ang kix koe krax tawng yung, pui koe min sibrawm kix mawh pa hoik yum ca, mai pui kix khankix hoik kroh kroing ka sang nyaux nie tix rawm heue. ¹⁴ Mawh kheu nan, meung yum hoik yuh tokaux cao tix kied vieh mai hoik paoh daux moing jheeh tix ka daux pa ang lai pon tiag min sibrawm kix mai pui hun kix mai min pakngai kix mai pui pa koe krax gaux rhawm khankix tak lih ti glip ka daux an heue. ¹⁵ Pui khankix tak mawh pa khlut rau, pui ku kaux tak yeen tiem mai pui pa lhaong ngai jhak khankix tak yeen tiem heue. ¹⁶ Viang mawh nan Siyiex Cao kru naing raoma tak yaog ti ting lhaong ka daux krax prawng krax ciyang mai Siyiex pa singax singeh, tak mawh pa koe min sibrawm ka daux krax pa rahsee heue. ¹⁷ Khaix an kawn yung khankix tak liang tix ka daux dee mhawm rib cao kix mai ka dah dee pa yiien cie cao mi khankix ku kaux, nyo sinie tak yaox ti koe krax ih ka heue. ¹⁸ Kieh krax kha rhawm koe ka pui pa bluh ti teei pa lud, ka maox nyaing pa giex going, mai phimap phighram awm pa tuk maox nyaing tuk ling lawx tix lhang, ¹⁹ pa ah nin, kieh Nawh Cao sigleeig ti yuh ka kaing jhaw cie Nawh Cao phai, son tak sang pon ex ti yaox an mai kieh krax pa keud pa sawn Siyiex Cao pa singax ceu pui Isarelax tix kaux an, greed hoek dex, sonsang pon ex ti tawng ka ceu an heue." ²⁰ Kieh krax kha rhawm koe ka pui an kix pa kok ceu pa caox mawh pa mhawm mai ceu pa mhawm mawh pa caox, pui deuh pa faik mawh pa riang mai pa riang mawh pa vhaik, pui deuh pa song mawh pa tie mai pa tie mawh pa song heue. ²¹ Kieh krax kha rhawm koe ka pui khankix, pa keud tix koe cuyi pingnya ka daux ngai cao tix mai pa keut tix koe satix ka daux pa yaox cao tix heue. ²² Kieh krax kha rhawm koe ka pui khankix pa keud tix koe riang rao ka nyaux tix plai, kieh krax kha rhawm koe ka pui khankix pa keud tix koe rhawm kwa ka nyaux ti rawm plix siiet khiien pa hoik ku klao ti khankix, ²³ pa yuh krax pa rahsee ka pui pa caox caig sonsang teei tix kraung pa cun praok mai teei grawng krax rahsee hu khaing pui pa rahsee heue. ²⁴ Mawh kheu nan, awm voeg ngu ka brex nghox khankix laux leeing mai awm gleeing rao ngu ka kam khankix, awm an riah kix tak sang awm khaox rham mai pruh tai kix tak sang haok plak piang awm phawng tiex; grawh grawng nawh, kix hoik thiang ti tik ka gumlox Siyiex cao kru naing raoma mai hoik nu nai ka gumlox Siyiex cao pa singax singeh ceu pui Isarelax heue. ²⁵ Mawh kheu nan krax song rhawm song rhi Siyiex hoik lih ka piang pui Nawh cao khankix, Nawh cao hoik nyeu khawn taix tix lih ka piang kix mai tawx krax pa kham pa geu ka kix mai gawng khankix hoik yung yang ka heue. Kaux yum kix hoik mawh pa awm aing pa tik tix ka daux sigreung krax khankix heue. Son in khawmuik krax pa song rhawm Nawh cao ang gah ti hu khaing kix, viang mawh nan, khawn taix Nawh cao ca kawn nyeu tix lih heue. ²⁶ Nawh cao tak jung man chix son ceu pui an khankix pa ot khaing dee singai mai tak phlu siglu ka son kix khaing dee sidah sidu haktiex, kix tak niied ti hoek phai heue. ²⁷ Daux sinax kix pui tix kaux kawx ang lai koe krax taug mao mai krax pa sideeing caong, pui tix kaux kawx tak ang lai gaing ang lai it mai maox khlax rawd nyoi kix tak ang lai bhaw mai maox kiep kix tak ang lai bheeik, ²⁸ te kix mawh pa lawm mai ak kix hoik mawh pa vaik tix, kloh caong brung kix tak awm simaox ngu mai jaong ling lawx cie kix tak awm bhaung keu kang lux heue. ²⁹ Krax pa sinum lox kix tak awm lox graox sivai sangsi, kix tak graox lox tix awm lox sivai sangsi pa kawn awn ju. Kix tak graox lox tix lih, sonsang giex totiag; kix tak teei ti viex an hu ka daux krax pa yiien mai pui tix kaux kawx tak ang lai pon ti deeh taoh ka heue, ³⁰ Ka daux singaix an, kix tak graox lox tix lih, awm sinum siaox rawm sigrit sigra heue. Phan pui tix kaux kawx jhak ti yaox ka haktiex, jhak heue, koe pa faik mai pa laux rhawm mai pa riang hoik mawh pa faik ka paiawm khankix heue.

¹ Ka daux num hoik yum simiang aux hoik yaox ngawm Siyiex ka piang dang ngeung pa lhaong mai hoik yaog ti ot dee lhaong mai sibex dhah Nawh hoik naog ka daux nyiex bwan heue. ² Kawncau Siyiex tix cub cung ti ot hawt Nawh, kix tang koe pruik tix kaux liah mu, pruik ra mu tawb ka pakngai, ra mu tawb ka caong mai ra mu mawh sonsang po heue. ³ Kix tix kaux lai tix kaux kok yo lox tix ah nin, "Singax, singax, singax mai pa mawh Siyiex cao kru naing raoma sibrawm min pakngai Nawh Cao hoik naog ka piang ca haktiex heue." ⁴ rong jaong siviex khankix hoik yung yiang ka lox pa kok yo mai nyiex hoik naog ka taox ngu heue. ⁵ Khaix an aux ah nin "Krax kha rhawm koe ka piang aux, krax keud pot ang lai koe son aux, grawh grawng nawh, aux mawh pui pa ang singax siyieb jheeh tix kaux, mai aux ot sinax pui tix cub pa ang koe krax pa singax siyieb jheeh, mawh kheu ngai aux hoik yaox ka Simiang, pa mawh Siyiex cao kru naing raoma heue." ⁶ Khaix an kawncau Siyiex po ti hoek ka aux, daux taix nawh koe gaox ngu pa kawn cap, pa hoik teei nawh ka sigiiep khaing ka piang khu dee tan heue. ⁷ Nawh piet moing jheeh aux, ka gaox ngu an ah nin, "Jhak heue, in hoik pied ka siyiep jheeh maix, krax pa lud maix hoik teei ti tik mai hoik pluat ploi phimap maix heue. ⁸ Aux baox deeh mhong lox Siyiex, pa ah nin "Aux tak sang ploi ka pui mawx? Mawh pui mawx pa sang hu son ex lie? "Khaix an aux ah nin "Aux koe tin, ploi aux hu heue. ⁹ Nawh Cao ah nin, "Hu heue mai krai ka pui ceu in khankix pex mhong kawx mhong mai ang tix tawng ceeix kawx, pex yaox kawx yaox mai ang tix sidawng ka ceeix kawx. ¹⁰ Yuh rhawm rhi ceu pui inkix sivix mai yuh yhaok kix ang hiex mhong mai yip ngai kix phan ang yuh nan, kix tak chix yaox ka ngai tix mai chix mhong ka yhaok tix mai koe krax pa chix tawng, daux rhawm rhi tix mai deeh tieh tix sonsang cox moi heue. ¹¹ Khaix an aux ah nin, "Siyiex eue, Mawh sang rheung miex grheung lie? "Nawh deeh pawk lox ah nin, "Hoek tom bawg yam mawh veng khankix pa som nai mai hoek tom yam ang cao pa ot lai koe mai nyiex khankix mawh pa ang pui lai ot kah pie tix kaux kawx, haktiex hoik mawh pa yiien, ¹² mai Siyiex hoik gah pui hu dee singai mai dee pa hoik prah hoik grham tix khankix, koe ka daux sigreung haktiex tom nie heue. ¹³ Mai kao son tix son tak koe ka daux an mai tak deeh mawh pa laux leeing ka ngu, awm pang khaox piak van tix pang, phan ang mawh nan, awm pang khaox tiah tix pang, pa kawn deuk awm ngo khaox, khaix hoik gu ti heue. Mawh kheu nan doeh ru pa singax, tak sang awm ngo khaox ka daux haktiex an heue.

¹ Yam in khaix hoik luan ceu an kix, ka daux baux singaix Ahap kawn simex Yotham kawn simex Uziyax pa mawh simiang Yudax, Rezin pa mawh simiang Isarelax hoik haok sonsang puing ka veng Yerusaliem, viang mawh nan, ang koe krax pa pex ka heue. ² Koe pui pa krai ka daux nyiex Davit ah nin, "Haktiex Surix mai haktiex Epharem rom riang rao tix tau heue. Mawh kheu nan rhawm rhi nawh mai rhawm rhi pui nawh khankix hoik awm khaox pa phlu bhaung ot mai siyaung tix heue. ³ Khaix an Siyiex ah nin ka Isayax "Maix mai Shayashup lih hu sonsang sipub ka Ahap daux yam in ka dee sidah rawm khaing dee lih rawm dung pa koe plak laong piang daux krax ting ka kaung cao pa sidaux kraung, ⁴ ah nin ka nawh �Yuh satix maix ot ka daux krax pa yiien yawg, paw lhat graung mai paw laux rhawm son nge khix pa lih taox ngu inkix ra nge mai son pa kied song rhawm song rhi simiang Surix Rezim mai kawn simex Remaliyax heue. ⁵ Grawh grawng nawh, meung Surix mai meung Epharem mai kawn simex Remaliyax koe krax keud krax sawn pa caox ka piang maix ka daux pa ah nin, ⁶ "Kieh ex haok ka meung Yudax mai yuh krax pa tuktiaktukte ka kix mai kieh ex yuh guh nawh doh son cao ex mai yaog ti deuh simiang tix kaux ka piang kix, pa mawh kawn simex Tabelax heue." ⁷ Siyiex ah awm in, an tak ang pon ti cung mai ang pon ti koe heue. ⁸ Mawh kheu kaing meung Surix mawh veng Damasekat mai kaing veng Damasekat mawh simiang Rezin heue. Ka daux tigliah phwan num, meung Epharem tak sang laux leeing tak ang lai pon tix mawh pui meung heue. ⁹ Kaing meung Epharem mawh veng Samarix mai kaing veng Samarix mawh kawn simex Remaliyax heue. Phan pex ang koe krax yum rhawm, pex tak ang pon pang tix cong tete heue. ¹⁰ Lheu khaing an, Siyiex baox deeh sikah ka Ahap ah nin, ¹¹ Rawg mhaing mhai rug tix ceu ka son tokaux cao maix khaing Siyiex maix; rawg mhaing ka pa koe ka daux dee raux, phan ang mawh nan ka daux dee pa lhaong plak piang heue. ¹² Viang mawh nan simiang Ahap ah nin, "Aux tak ang rawg mhaing mai aux tak ang cheuk ti yaox Siyiex heue." ¹³ Khaix an Isayax ah nin, "Nyiex ma Davit khankix eue, nghiet heue, pex kawn sawn pa yuh tix pa nyap pa mao ka pui khankix mawh pa iak mai tak sang baox tawx krax pa nyap mao ka Siyiex aux lie? ¹⁴ "Mawh kheu nan, tokaux Aux Siyiex tak sang tawx mhai rug tix ceu jhak heue, bunkrih tak koe kaux mai keh kawn simex mai kix tak kok ceu kaux Nawh mawh Emannoelax heue." ¹⁵ Nawh tak ih klon bee rawm teeih mai rawm hia, Nawh Cao tawng ti thiang ka ceu pa caox caig, laug ti teei ceu pa mhawm heue. ¹⁶ "Grawh grawng nawh sivoe ang kawn nyawm an nyang bax tawng tix thiang ka ceu pa caox mai chix laug ti teei ceu pa mhawm, haktiex simiang khawm ra kaux pa koe krax luat mai ka tak sang mawh pa tik pa vud tix heue. ¹⁷ "Siyiex tak viex simiang Asurix hoek ka piang maix mai pui maix khankix mai nyiex ma keeing maix, ka daux singaix an kix pa ang sax koe ka daux glang singaix hoik lih hu ceu pui Epharem khaing ceu pui Yudax khankix heue. ¹⁸ Ka daux singaix an Siyiex tak jhak roi pa koe hawt rawm klawng meung Ejiptux mai ka hia pa koe ka daux meung Asurix khankix hoek heue. ¹⁹ Kix tak hoek mai kix khawmuik tak tum ka daux lung daux ngawd pa yiien an khankix mai ka daux sinax doh rang mai ka piang yeem kat mai ka daux biang rib khankix heue. ²⁰ Ka daux singaix an Siyiex tak sang khlao ti tik hauk ka gawn khlao pa vai ka pui an kix pa ot toi rawm klawng ting, pa mawh simiang meung Asurix, hauk kaing hauk caong mai ka hauk bheup khankix heue. ²¹ Ka daux singaix an, pui tix kaux tak sang eei kawn mawie shiang tix mu mai yung ra mu im ju, ²² mai mawh kheu rawm teeih mawie lih ti koe haoh hun, son tak sang ih nawh klon bee rawm teeih khankix mawh kheu pui ku kaux tak yaox ti ih klon bee rawm teeih an kix mai rawm hia pa hoik priex tix ka daux haktiex an heue. ²³ Ka daux singaix an, ka can dee hoik koe nhu plix siiet khankix tix rheng num pa cai ngawh jum tix mawh mau tix rheng shekhe, tak sang mawh pang kat heeik mai pang kat khankix heue. ²⁴ Pui khankix tak viex ak mai te hoek tan, haktiex an kix khawmuik hoik lih ti mawh pang kat heeik mai pang kat khankix heue. ²⁵ Can gawng ma khankix pa hoik sax paog tix ka khaw maix tak ang pon ti hu tan kheu jao lhat tix ka pang kat heeik mai pang kat khankix heue. Viang mawh nan dee an tak lih ti mawh gawng ma liang mawie mai dee lailing yung tix dig ka heue.

¹ Khaix an Siyiex ah nin ka aux, "Teei bua ce pa ting tix bua mai tiem ka piang an ka gawng nam meug cie pui tix kaux pa mawh ngai lai Mahera Shalala Hasha Baza", dee bleeh ngai lai inkix "Tud rhim ti teei mai nied ti yuh kraung an kix laux leeing phai phai heue." ² Aux tak kok ka pui pa kham mhai rug pa kaux sijax pa mawh cao giex kaing li Uriyax mai Zakharix kawn simex Yebarekhi sonsang mhai ti deuh grawh grawng an kix ka son tokaux cao tix heue ³ Khaix an aux hu ka moeng tix cao jhai bun mai nawh koe kaux mai keh kawn simex tix kaux heue. Khaix an Siyiex ah nin ka aux, kok ceu kaux nawh mawh Mahashalahashabaza heue." ⁴ Grawh grawng nawh sivoe ang kawn nyawm an nyang bax tawng ti kok keeing kok miex, sinngao veng Damase khankix mai kraung pa tud rhim veng khankix, tak teei ti tawx ka plak sivoe simiang Asurix heue. ⁵ Siyiex baox sikah ka aux ah nin, ⁶ "Ceu pui inkix hoik thiang ti tik ka rawm klawng Shilaw pa nhim hu mai deeh gaux rhawm ka daux Rezin mai ka daux kawn simex Remali khankix, ⁷ Mawh kheu nan, yam in jhak heue, Siyiex viex an kix ka piang kix, pa mawh rawm daux rawm klawng ting khankix pa kied sidaing ting riang ting rao, khawm simiang Asurix mai khawm min sibrawm Nawh khawmuik nawh tak haok ka piang rawm rawng cao nawh khawmuik mai hu kheem ka piang praok nawh khawmuik heue. ⁸ Nawh tak tiang tix hu ka daux meung Yudax, nawh tak hu kheem ka baoh an mai phlat ti hu, nawh tak hoek mee ngawg, "mai neh pruik tix lih mai tak sang naog yuh dee siva haktiex mai Emannoelax eue, ⁹ Pex pa mawh pui khankix eue, kieh pex mawh pa prung prang rai ruat mai laux leeing meeik groing, pex can pa kaoh khaing haktiex dee singai khankix khawmuik eue, daong yhaok tix heue. Rawd nyoi tokaux cao pex, viang mawh nan kieh laux lak pak leeing heue. ¹⁰ Teei krax pa keud pa sawn paox tix, viang mawh nan, an tak bleeh ti mawh pa ang koe tidtix, tat gumlox, viang mawh nan an tak ang koe krax cong heue. Grawh grawng nawh Siyiex ot tau mai ex heue. ¹¹ Grawh grawng nawh, Siyiex hoik sikah ka aux, tau mai khawn taix pa ting tix mai hoik tawm aux, sonsang ang aux hu ka daux krax hu ceu pui in ah nin, ¹² "Paw ah ex rom ti yuh cub caw tix, tix cub, son ceu pui in khawmuik pa kok mawh cub caw tix cub, paw koe krax lhat ka krax pa glhat kix mai paw koe krax graung rhawm ka heue. ¹³ Siyiex Cao kru naing raoma cao pa caw pex tix nabyam, kieh Nawh Cao mawh pa lhat pex ka mai kieh Nawh Cao mawh pa graung rhawm pex ka heue. ¹⁴ Nawh Cao tak mawh dee pa singax, mai simaox dee sang sideeing, mai rang pa sang kieh lud ka son nyiex ma ceu pui Isarelax khankix, awm kie mai jhawk taong ka pui pa ot ka daux veng Yerusaliem khankix heue. ¹⁵ Ka daux kix tom nie tak sideeing caong tix, kix tak goh mai hoik pot, hoik krix ka jhawk taong mai hoik teei ti hu heue. ¹⁶ Vien ti priex ka mhai rug, tawk cum ka gumlox beenli sinax kawncau aux khankix heue. ¹⁷ Aux tak krox jun ka Siyiex, pa mox pakngai Nawh Cao khaing doeh nyiex ma Yakop mai aux tak koe krax keud pot jun pot ka daux Nawh Cao heue. ¹⁸ Jhak heue, aux mai khawm kawn praix pa hoik tawx Siyiex ka aux khankix, mawh mhai pa daox am ka daux ceu pui Isarelax khaing Siyiex Cao kru naing raoma, pa ot ka piang gawng Zion heue. ¹⁹ Yam ah kix nin ka maix, sawg ti yaox pui an kix pa mawh cao laig phi khankix mai cao pa koe preu khankix, pa koi ah lox tix lih, ex khex ang pon chawk ti yaox ka Siyiex lie? Mawh tak sang chawk kix ti yaox pa yum son tang pa im ju lie? ²⁰ Nghiet ka gumlox pa gau, mai grawng pa kham sakse. Phan pa krai kix ang awm gumlox in, kix tak ang pon yaox pa riang singaix heue. ²¹ Kix tak tiang ti hu ka daux haktiex an tau mai krax pa kied taug mao mai krax pa cai rhawm tix mai an tak lih ti koe yam cai rhawm kix, sonsang song rhawm kix mai jhax lawg ka simiang mai ka Siyiex kix, ²² mai kix maong ka piang raoma mai jhak piang haktiex kawx yaox ka krax pa kha rhawm mai pa faik pa kheem tix naog ka ceu pa laux rhawm rhi mai kix tak mawh pa hoik grheu ti laig ka daux pa faik pa vux heue.

¹ Viang mawh nan krax pa faik tak ang lai kheem ka piang nawh, pa koe krax laux rhawm lauxrhi, awm sivoe in, Nawh Cao hoik kieh haktiex Zebulun mai haktiex Napthalix mawh pa ang koe min pakngai heue. Khaix hoik an kix Nawh Cao tom kieh krax pa hu plak rawm sigrit sigra, pa koe plak toi rawm klawng Yawdan, ka daux meung Galilie pa mawh dee ot pui tang ceu pon ka min pakngai heue. ² Pui pa lailing ti hu ka daux pa faik khankix, hoik yaox pa riang pa kied ting mai pui an kix pa hoik ot ka daux haktiex veei pa yum, pa riang jhan riang ka piang kix heue. ³ Maix Cao hoik kieh ceu pui pre haoh hun mai hoik baox naog krax pa gaux rhawm kix, kix koe krax gaux rhawm ka plak sivoe ngai Maix Cao awm koe krax pa gaux rhawm yam vawg nghox; awm gaux rhawm pui khankix yam gwieh kix kraung pa tud rhim daux sinax kix heue. ⁴ Grawh grawng nawh Maix Cao hoik raig ti tik khaox glawm pa cien nawh, mai plawng khaox piang klip nawh, krong pliah cie cao pa yeen piang nawh awm ka daux baux singaix ceu pui Midian khankix heue. ⁵ Grawh grawng nawh, kiep ceep pui naing khankix khaing dee pa kied sinum lox naing mai kraung ceep pa hoik caux ka daux nham khankix, tak mawh pa shiao tix son sai ngu mai gleeing kah heue. ⁶ Grawh grawng nawh kawn ngie hoik keh son ex tix kaux, kawn simex tix kaux mawh pa hoik tawx tix ka ex, sibrawm krax kwang tak koe ka piang klip Nawh Cao heue. ceu kaux Nawh Cao tak kok mawh pa daox am, cao pa kwang, Siyiex pa ting riang ting rao, keeing leeing ju, Simiang cao pa nhim heue. ⁷ Krax pa haok hwan ting lhaong sibrawm Nawh mai krax pa nhim Nawh, tak ang koe dee sidah, ka piang dang ngeung simiang Davit mai ka piang meung haktiex Nawh, sonsang khre ti deuh mai pang ti deuh an kaux cong mai prawng ca ka daux krax pa rahsee, jah yam in hu sivoe ngai, tom hoek leeing ju heue. Krax pa kied koe rhawm koe rhi Siyiex Cao kru naing raoma tak yuh tix tawx in heue. ⁸ Siyiex hoik ploi lox tix gum hu ka ceu pui Yakop mai an hoik klup ka piang ceu pui Isarelax khankix, ⁹ mai pui khawmuik tak tawng, mai khawm ceu pui Epharem mai ceu pui pa ot ka daux veng Samarix khankix, pa ah nin ka daux krax pa ting rhawm ca nyhau tix, ¹⁰ "Lon tiex khankix hoik grhup kawx, viang mawh nan, ex tak deeh cox sum ka lon simaox pa hoik saik tix khankix heue. Gaw khaox ruh hoik mawh pa kid tix goh, viang mawh nan, ex tak sang deeh loh ti sum ka khaox Arit khankix heue." ¹¹ Mawh kheu nan Siyiex tak yaog ti deuh pui koeng simiang Rizin ka piang nawh mai so ka riang rao pui koeng nawh khankix, ¹² Plak lih singaix mawh pui Surix, plak klip singaix mawh pui Philitix khankix, mai kix ang jheeh tix sang kiied tix ih ceu pui Isarelax heue. Kheu krax pa song rhawm song rhi Nawh Cao ang nyang veeh ti hu singai, khawn taix Nawh Cao kawn nyeu ti heue. ¹³ Pui khankix ang lai deeh veeh tix hoek ka Nawh Cao, pa tawx krax ciyang ka kix mai kix ang lai sawg ti yaox ka Siyiex Cao kru naing raoma heue. ¹⁴ Mawh kheu nan Siyiex tom kid ti tik kaing mai sidax khaing ceu pui Isarelax, khawm kak khaox sumpalum mai priex khankix ka daux tix singaix ngie heue. ¹⁵ Kuad song mai pui pa koe min pakngai khankix mawh kaing, cao jhai pa gau krax pie lhen khankix mawh sidax heue. ¹⁶ Kix cao kaing ceu pui in, yuh ti kieh kix koe krax lud krax loe mai pui an kix pa mawh cao pa thung ka kix mawh pa hoik laux hoik leeing heue. ¹⁷ Mawh kheu nan Siyiex tak ang lai koe krax khaw rhawm ka pui awn ju kix mai ang lai koe krax caux rhawm ka piang pui pa ang koe miex keeing mai miexmai khankix, pui ku kaux mawh pui pa silao mai pui pa yuh ceu pa caox mai jheeh ku mu sikah lox pa ang cee ang cak heue. Ka piang in khawmuik, krax pa song rhawm Nawh Cao ang nyang veeh ti hu, khawn taix Nawh Cao kawn mawh pa nyeu ti heue. ¹⁸ Jao pa caox caig mawh pa proe awm ngu, an tak gleeing ti tik yeem yaw mai pang kat lawm khankix mai pa keeid tix ka daux yeem tiag khaox nong, kix tak haok awm taox ngu tom nie heue. ¹⁹ Mawh kheu krax song rhawm Siyiex cao kru naing raoma, haktiex hoik mawh pa gleeing tix uik mai pui khankix tak mawh khix sai ngu pa gleeing heue. Puxke mai pux kawx, ang lai lhawk ka paox tix, tix kaux lai tix kaux heue. ²⁰ Viang kix rhim ti teei plak taix khawn dawm kawx, kix kawn cai rhawm, mai kiied ti ih plak taix khawn gwiex kawx, ang chix sak, pui ku kaux tak kiied ti ih nex paox plawg tix heue. ²¹ Ceu pui Manashe tak kiied ti ih ka ceu pui Epharem, mai ceu pui Epharem tak kiied ti ih ka ceu pui Manashe mai kiex khawm ra cub tak mawh pa tieh feen ka ceu pui Yudax heue. Krax pa song rhawm Nawh Cao ang nyang veeh ti hu singai, khawn taix Nawh Cao kawn mawh pa nyeu tix heue.

¹ Krax pa prawng ca pa ang rahsee ka pui hot sibhawm khankix ang ah, pa tieh ka pa hoik tat kix ti priex gumlox, ² sonsang khinkix ka pui cud pui cha mai sonsang teei ceu pa mawh meh khaing pui hot pui shia ceu pui Aux khankix, son tak sang mawh miexmai kraung pa rhim kix mai sonsang pon rhim kix ti teei kraung cie pa ang koe miex koe keeing khankix heue. ³ Pex sang yuh ka mawx ka daux singaix koe krax pa ciyang mai ka daux krax pa laux leeing pa tak sang bleeh ti hoek khaing dee pa kied singai lie? Sang to pex ti klawd ka pui mawx sonsang pon tix krax teem lie? Sang prah pex sinngao tix khankix dee mawx lie? ⁴ Lheu khaing an, kix tak gup kaing tix ka greem pui pa laung daux thawng khankix mai kix tak goh ka greem pui pa hoik pah ti yum heue. Ka piang in khawmuik, krax pa song rhawm Nawh Cao ang nyang veeh ti hu, khawn taix Nawh Cao kawn mawh pa nyeu tix heue. ⁵ Koe krax pa kha rhawm heue. Ceu pui Asurix khankix mawh gawng khaox krax pa song rhawm Aux mai khaox grix pa giex nawh daux taix ti mawh krax pa ciyang Aux heue. ⁶ Aux tak sang ploi nawh hu ka ceu pui pa ang koe siyiex kieh Aux koe pa song rhawm song rhi, sonsang pon rhim ti cie kraung pa tud rhim mai sonsang pon teei ti cie kraung mai sonsang dig ti hu ka piang kix, awm glaox daux krax khankix heue. ⁷ Viang mawh nan, nawh ang nyang teei an kix koe dee bleeh mai rhawm nawh kawx ang nyang keud ti yaox grawng an, viang mawh nan, ka daux rhawm rhi nawh, keud ti sang yuh pa laux leeing mai yieh ti tik ceu pui pa haoh hun heue. ⁸ Mawh kheu nawh ah nin, simiang greem aux khankix hoik mawh simiang khawmuik ang mawh lie? ⁹ Veng Kalanaw ang hoik awm veng Khakhemisha lie? Veng Hamat ang hoik awm veng Arapat lie? Veng Samarix ang hoik awm veng Damasekat lie? ¹⁰ Awm hoik rhim khawn taix aux ka meung haktiex can pa krub riang krub rao khankix, pa hoik saik ti krub riang grang an, pa hoik nie mhawm khaing cie pui pa ot ka daux veng Yerusaliem mai veng Samarix, ¹¹ awm hoik yuh aux ka veng Samarix mai riang rao krub nawh khankix, mawh ang aux tak sang baox yuh ka veng Yerusaliem mai khawm ka riang rao krub nawh khankix awm an lie? ¹² Yam hoik yuh Siyiex kaing jhaw Nawh khankix ka piang gawng Zion mai Nawh Cao tak sang ah nin "Aux tak sang tawx krax ciyang ka krax pa ting rhawm ting rhi simiang haktiex Asurix mai min sibrawm krax pa lhaong jhak ngai nawh heue." ¹³ Mawh kheu nawh ah nin, grawng kaing pa hoik yuh Aux khankix, mawh ka krax pa koe riang rao khawn taix Aux mai ka krax pa koe pingnya heue. Kheu jao grawng lhak lhiem Aux, Aux hoik baox deeh gah ti tik mee ot pui khankix mai hoik tud rhim ti cie sinngao cie kix, aux awm pui pa koe rhawm vao rhawm kwa mai hoik yeen tiem ka glawk pui pa ot tan khankix heue. ¹⁴ Khawn taix aux hoik rhim ka kraung khrai pui khankix awm yaox pui ka mheem sim tix ghlawng mai awm khrawm pui tawm sim pa hoik prah tix khankix, Aux hoik kraix khrawm can pa koe ka piang tiex khawmuik mai pa ang nyang chix dieh preeik tix mai pa ang nyang chix ang gaoh tix mai krax pa lih lox tix gum kawx ang lai koe pie tix kaux kawx heue. ¹⁵ Moe khex chix pon yaw rangdi tix ka cao kid khaox lie? Phan ang mawh nan, jhi khex chix pon ting rhawm ka cao pa leu ka nawh lie? Awm hoik pon yaog pui ti teei gawng khaox hu, phan ang mawh nan, awm hoik pon yaog pui khaox grix tix gawng hu heue. ¹⁶ Mawh kheu nan, Siyiex cao kru naing raoma tak ploi krax pa krawx pa rhao hoek ka daux sinax can pui pa seeing brai khankix mai ka greem min pakngai Nawh, tak cap awm ngu pa proe heue. ¹⁷ Pa riang ceu pui Isarelax khankix tak awm ngu pa proe mai cao pa singax Nawh tak awm rao ngu heue. An tak proe mai laux leeing yuh, pang kat lawm nawh mai khawm yeem yaw nawh khankix ka daux tix singaix ngie heue. ¹⁸ An tak laux leeing yuh plakngai nong khaox nawh khankix mai khawm plix khaox plix ox daux kaung nawh, ju mai khawm kaux cao nawh khawm ra ceu mai kix tak mawh pa awm pui saux an tix kaux, yam koe krax pa uik riang nawh heue. ¹⁹ Khaix an can pang khaox pa kawn deuk ka daux nong khaox nawh khankix, tak mawh pa kawn deuk ceeix ceeix ngie, kawn nyawm iak kawx pon simin mai pon tiem carang heue. ²⁰ Ceu an kix tak sang luan ka daux singaix an, ceu pui Isarelax pa kawn deuk an khankix mai mawh krax pa hoik glawd kix khaing daux nyiex ma ceu pui Yakop, tak ang lai baox deeh een rhawm tix ka nawh pa hoik pex ka kix, viang mawh nan, tak deeh een rhawm tix ka Siyiex, pa mawh cao pa singax singeh ceu pui Isarelax khankix ka daux krax pa kaux sijax heue. ²¹ Pui pa kawn deuk an khankix tak deeh ing mai pui pa kawn deuk khankix khaing ceu pui Yakop, tak deeh ing ka Siyiex pa kied ting sibrawm heue. ²² Ceu pui Isarelax khankix eue, viang ceu pui maix khankix mawh pa nie awm mhaik rawm sigrit sigra kawx, viang mawh nan, mawh pui pa kawn deuk khaing daux kix pa tak deeh ing heue. Krax pa laux leeing hoik tat ti deuh, tak koe krax pa rahsee pa kheem ti tik heue. ²³ Mawh kheu Siyiex Cao kru naing raoma tak yuh krax pa tat tix dee sidauh, ka daux sigreung haktiex khawmuik heue. ²⁴ Mawh kheu nan Siyiex Cao kru naing raoma ah nin. "Ceu pui Aux pa ot ka daux veng Zion khankix eue, paw lhat graung ka pui Surix khankix awx, nawh sivied maix ka gawng khaox mai yaog khaox grix tix lah ka maix, awm krax pa hoik yuh pui Ejiptux heue. ²⁵ Kheu koe bawg yam tivud ticu khaing mai krax pa song rhawm Aux tak sang grai, awm krax pa song rhawm Aux ka daux krax pa laux leeing kix heue. ²⁶ Pui Siyiex cao kru naing raoma tak so krax pa grhiem ka nawh, awm krax pah ceu pui Midian khankix hawt rang Awrebax mai awm hoik yaog gawng khaox Nawh Cao ka piang rawm sigrit sigra mai awm an, Nawh Cao tak yaog ti deuh awm krax pa hoik yuh tix ka daux meung Ejiptux heue. ²⁷ Ka daux bawg yam singaix an, beeh cien nawh tak mawh pa teei ti hu khaing piang klip maix mai teei khaox glawm nawh khaing piang ngawg maix mai khaox glawm an tak laux leeing kheu jao hoik mhawm kluing nawh heue. ²⁸ Nawh hoek ka veng Ayap, nawh tiang ti hu ka plak veng Migaron mai hu deuh kraung tix ka veng Mimat heue. ²⁹ Kix hoik luan hu hawt praok gawng, kix hoik teei dee ot tix hawt veng Gebax, veng Rama koe krax lhat graung, veng Gibax dee ot Sawlux kawx hoik to heue. ³⁰ Kawn bun veng Galim khankix eue, riag yo heue, veng Liesha eue, nghiet heue, veng Anatok pa koe krax kha rhawm eue, ³¹ Veng Madamenax hoik to tua heue. Can pui pa ot ka daux veng Gebim khankix to ti glawd heue. ³² Ka daux singaix nawh kawn ot ka daux veng Nawbax, nawh tak sang lua taix tix tub ka kawn bun Zion pa mawh gawng veng Yerusaliem tan heue. ³³ Jhak heue, Siyiex Cao kru naing raoma, tak kid ti tik kak khaox an tau mai krax pa ghlat, gaw khaox pa lhaong khankix, tak mawh pa tat ti lih mai pa lhaong rhawm, tak mawh pa yeen ti tiem heue. ³⁴ Nawh tak kid ti tik nong khaox pa kied yeem khankix ka moe rhiem mai nong khaox Lebanon tak goh ka cao pa kied ting riang rao heue.

¹ Riah num khaox Yessie tak deeh glaoh ti lih tix kak mai kak an glaoh mai ting lhaong khaing riah tix heue. ² Khwan Siyiex, tak ot ka piang nawh mai khwan pa tawx pingnya mai krax tawng mai khwan pa koe krax keud krax sawn mai riang rao pa kied ting, khwan krax tawng yung mai khawm krax pa lhat graung ka Siyiex heue. ³ Krax pa gaux rhawm nawh koe ka daux krax pa lhat graung ka Siyiex mai Nawh Cao ang ciyang awm pa yaox Nawh ka ngai tix mai ang prawng ca awm pa mhong Nawh ka yhaok tix heue. ⁴ Viang mawh nan, Nawh Cao tak prawng ca ka pui hot pui shia ka daux krax pa rahsee mai tat lox rahsee ka son pui pa viex rhawm awn rhawm tiiem ka piang haktiex, Nawh Cao tak tawx krax pa kha rhawm ka haktiex gawng khaox pa kaoh khaing daux jheeh Nawh Cao mai Nawh Cao pah pui caox caig ka bhawm pa kaoh khaing daux siyieb jheeh Nawh Cao heue. ⁵ Krax pa rahsee an mawh maox rawd nyoi nawh, mai krax pa kaux sijax tak mawh maox rawd naok nawh heue. ⁶ Soxla tak sang ot tau mai kawn yung, sivai tak it tau mai kawn pex, kawn mawie iak mai sivai sangsi mai tobrie pa kluing khankix tak yuh paox pie mai paox tix mai kawn nyawm tak mawh pa thong kix hu heue. ⁷ Mawie mai krih tak ih pa ih tau, kawn mawie mai kawn krih tak it tau mai sivai sangsi tak ih rib awm mawie heue. ⁸ Kawn nyawm pa kawn peuex teeih khankix, tak klieh ka moing daux siuing caox mai kawn nyawm pa hoik pluat peuex tix teeih, tak sau taix tix ka daux siuing pa caox heue. ⁹ Kix tak ang pon tix koe krax pa tuktiak tukte ka paox tix mai ang pon ti yuh laux leeing ka paox tix khawmuik ka piang gawng singax Aux heue.Mawh kheu haktiex tak sang mawh pa grum naog ka krax pa tawng pa yung ka Siyiex, awm kheem rawm ka rawm sigrit sigra heue. ¹⁰ Ka daux singaix an, num riah Yessie tak sang mawh chix pa pak ti deuh son pui khawmuik, pui tang ceu khankix tak sang sawg ti yaox Nawh Cao mai dee laux lee nawh tix, tak koe min pakngai pa ting heue. ¹¹ Ka daux singaix an, Siyiex tak sang baox nyeu taix tix ka piang an ra bawg tix bawg, sonsang deeh taoh ka pui pa kawn deuk ceu pui Nawh Cao, pa kawn prah tix ka meung Asurix mai meung Ejiptux, meung Patarot meung Khushax, meung Elam meung Shina meung Hamat mai khaing klawn tiex khankix pa koe daux rawm sigrit sigra heue. ¹² Nawh Cao tak yaog ti pak chix son ceu pui khankix kuceu mai tak sang kok ti teei pui Isarelax pa hoik grheu ti tik khankix mai khrawm ti deuh pui Yudax, pa hoik prung prang rai ruat ti ot kudauh kudee khaing ka pon praok pon daog ka piang haktiex heue. ¹³ Krax pa ghoing rhawm ceu pui Epharem khankix tak grai hu mai pui koeng riang ciang khoi ka ceu pui Yudax khankix tak mawh pa teei ti tik heue. Ceu pui Epharem tak ang lai koe krax ghoing rhawm ka ceu pui Yudax mai ceu pui Yudax kawx tak ang yuh krax pa koeng riang ciang khoi ka ceu pui Epharem heue. ¹⁴ Kix tak po tix hu ka piang klip pui Philitix pa ot ka plak klip singaix, tau mai pui an kix, kix tak tud rhim ti cie kraung pui pa ot ka plak lih singaix khankix heue. Kix tak deuh khawn taix tix ka piang ceu pui Edom mai ceu pui Mawbax khankix mai ceu pui Amon tak cu tak nghiet ka kix heue. ¹⁵ Siyiex tak yuh rawm sigrit sigra meung Ejiptux hit kroh ka bhaung pa kied hax kied si aoh Nawh Cao, Nawh Cao tak yung yiang taix tix ka piang rawm klawng ting, mai sivied nawh koe rawm klawng iak aliah klawng mai kieh pui khankix ceep kiiep tiang hu ka piang heue. ¹⁶ Daux krax ting tak sang koe tix nyaing, son pui pa kawn deuk ceu pui Nawh Cao khankix, pa kawn deuk khaing meung Asurix, awm hoik koe krax son ceu pui Isarelax khankix, ka daux singaix lih kix khaing daux meung Ejiptux heue.

¹ Ka daux singaix an maix tak ah nin "Siyiex eue, aux tak sang yaog yaw ka Maix Cao, viang Maix Cao hoik song rhawm ka aux kawx krax pa song rhawm Maix Cao hoik veeh tix grai hu mai Maix Cao hoik kieh aux nyawm rhawm heue. ² Jhak heue, Siyiex mawh cao taoh aux, aux tak een rhawm tix ka Nawh Cao mai ang koe krax pa lhat graung, mawh kheu Siyiex mawh riang rao aux mai mawh lai rhax aux, Nawh Cao hoik mawh cao pa taoh aux heue. ³ Pex tak koe krax pa gaux rhawm mai kin tix nyaux rawm, khaing rawm daux krax taoh heue. ⁴ Ka daux singaix an, pex tak sang ah nin yaogyaw ka Siyiex, kok ka ceu kaux Nawh Cao, krai pao kaing jhaw pa yuh Nawh Cao ka daux sinax pui khankix mai krai ka grawng hoik kied ting lhaong ceu kaux Nawh Cao heue. ⁵ Ah lai rhax yaog yaw ka Siyiex, mawh kheu Nawh Cao hoik yuh kaing ceu pa kied mhawm khawmuik, kieh grawng in tah ka piang haktiex heue. ⁶ Can pui pa ot ka daux veng Zion khankix eue, gaux rhawm mai kok yo lox sinum ka, grawh grawng nawh, cao pa ting lhaong pa singax ceu pui Isarelax khankix pa ot ka daux sigreung pex heue.

¹ Grawng pa hoik yaox Isayax kawn simex Amok ka grawng veng Babulon ² Yaog tix pak chix ka gawng pa lhaong, riak yo lox sinum ka kix, vuh vied taix pex, son tak sang pon kix ti laig ka daux siviex cao pa ting lhaong heue. ³ Aux hoik tawm lox ka pui pa hoik singax yuh Aux khankix, Aux hoik baox deeh kok ka can pui pa koe rhawm cong rhawm kwa son krax pa song rhawm song rhi aux, ka can pui an kix, pa koe krax gaux rhawm ka daux krax pa ting lhaongheue. ⁴ Lox sinum pui hun khankix ka piang gawng, awm lox lawh maw pui khankix tom nie heue. Lox sinum lawh maw ceu pui meung haktiex hoik khrawm tix tau, Siyiex Cao kru naing raoma kraix khrawm cub kru naing khankix son naing heue. ⁵ Kix hoek khaing haktiex pa kied singai, khaing dee sidah raoma, hoik mawh Siyiex mai kraung naing pa song rhawm Nawh Cao, sonsang yuh haktiex laux leeing khawmuik heue. ⁶ Yiiem yo heue, mawh kheu singaix Siyiex hoik dex, an tak sang hoek, awm krax pa laux leeing pa ciyang cao pa ting sibrawm heue. ⁷ Mawh kheu nan, taix can pa koe khawmuik, tak mawh pa tak teue hu, rhawm rhi pui khankix tak koe krax pa laux rhawm mai kix hoek krax lhat graung heue. ⁸ Krax saux krax ngia kuceu tak teei ti giex kix, awm saux ngia bun yam keh kawn heue. Kix tix kaux lai tix kaux, jhak ka paox tix, pakngai kix awm rao ngu heue. ⁹ Jhak heue, singaix pa kied lang teung song rhawm song rhi Siyiex hoek ti yuh haktiex laux mai Nawh Cao tak sang yuh pui koe phimap phighram mai pui haktiex khankix laux leeing heue. ¹⁰ Simuing raoma khankix tak ang lai tawx pa riang tix, singaix kawx faik hu mai khix kawx ang lai jhan pa riang heue. ¹¹ Aux tak sang ciyang ka haktiex kheu krax pa caox nawh mai ciyang pui caox kheu krax phit krax lud kix heue. Aux tak kieh krax ting rhawm pui pa ca nyhau grai mai aux tak yeen tiem ka pui pa lang teung lhaong rhawm rhi heue. ¹² Aux tak yuh kawn pui nie lheu ngawh khaing khri nawnaw, mai pui nie lheu ngawh khaing siang, khri, Awphirax heue. ¹³ Mawh kheu in aux tak sang kieh raoma yung yiang mai haktiex gah ti lih khaing dee koe nawh, ka daux krax pa song rhawm Siyiex Cao kru naing raoma mai ka daux singaix koe krax pa kied ting song rhawm song rhi Nawh Cao heue. ¹⁴ An tak awm cak shiang pa hoik leue tix mai awm yung pa ang koe cao priex heue. Pui ku kaux tak veeh ngai tix ka ceu pui tix kaux mawx kaux an, mai pui ku kaux tak deeh ka meung cao tix kaux mawx kaux an heue. ¹⁵ Can pui pa kham pa sipup pui ti yaox tak yaox ti kham krax pa pah, mai pui pa giex laung khankix, tak yaox ti kham pa laux leeing ka lawm vaig heue. ¹⁶ Kawn praix kix tak yaox ti kham pa blah yum piang tiex ka plak sivoe ngai kix heue. Rhim ti teei nyiex ma kix mai yuh pa ang mawh ang meh ka moeng kix heue. ¹⁷ Jhak heue, aux tak sang so rhawm pui Medi khankix tieh feen ka kix, pa mawh pui pa ang moh ka mau khri heue. ¹⁸ Kix teei ak mai pah pui awn ju khankix yum ang lai koe krax caux rhawm ka plix pa kaoh khaing daux vaig heue. Ngai kix tak ang lai koe krax pa lhawk tix ka kawn nyawm khankix heue. ¹⁹ Veng Babulon pa mawh min pa ting lhaong meung haktiex khankix mai pa mhawm grang min pakngai cie ceu pui Khaladie khankix, tak sang awm yam yuh Siyiex ka veng Sawdom mai veng Gawmawrax laux heue. ²⁰ Ka dee an pui tix kaux kawx ang pon ti ot, ku ju leeing ju. Pui Aribiyax tak ang pon ti sum nyiex gox tan mai cao pa liang yung khankix tak ang lai pon ti sum kawg yung tan heue. ²¹ Totiag khankix it ka dee an mai nyiex kix tak mawh pa naog ka sim pang plawh mai sim ka la uk tak ot tan mai pex tiag khankix tak graoh ti ot tan heue. ²² Soxla tak raoh ka daux nyiex tap lhaong, mai sox praix tak raoh ka dah deeh mhawm grang heue. Bawg yam cie nawh khankix tak ang lai mawh pa rheung pa lang heue."

¹ Siyiex koe krax caux rhawm ka ceu pui Yakop mai tak sang laug ti teei ceu pui Isarelax khankix mai deuh kix ot ka daux haktiex cao kix, mai pui tang meung tak hoek ti yuh paox pie mai kix, kix tak kap ti ot tau mai ceu pui Yakop heue. ² Pui tang ceu tak teei kix mai tawx dee ot kix mai ceu pui Isarelax tak sang teei ti cau kix, sonsang mawh siliex simex siliex bun tix ka daux haktiex Siyiex heue. Kix tak deeh giex gang ka pui pa hoik gang ka kix mai pui pa tuktiak ka kix, kix deeh tuktiak ka kix mai kwang ka piang kix heue. ³ Bawg yam an Siyiex tak sang teei maix lih khaing pa nu pa khawm mai pa laux rhawm mai krax pa thux pa khin mai pui maix mawh siliex pa yuh kaing pa nu; ⁴ Maix tak sang teei ti viex gumlox kab in hoek ka simiang Babulon ah nin, "Pui pa yeen ya piang pui hoik deek die veng khri kawx hoik deek die; ⁵ Siyiex hoik raig pot ka khaox grix pui pa caox caig mai gawng khaox pa giex cao kwang haktiex khankix, ⁶ pa hoik sivied pui khankix ka daux krax pa song rhawm mai krax pa sivied jheung jheung, pa hoik kwang ceu pui khankix ka daux krax pa song rhawm, yuh krax pa tuktiak mai koe pui mawx pon tieb tie kah. ⁷ Haktiex khawmuik koe krax pa laux lee mai krax pa yiien yawg mai kix gaux rhawm mai ah lox lai rhax sinum heue. ⁸ Khaox gix mai khaox Arit Lebanon khankix gaux rhwm ah nin, glang khaix hoik kid maix goh, pui kid khaox ang lai pon ti deeh hoek ka ex pie tix kaux kawx heue." ⁹ Meung yum plak greem hoik yaox rhawm rhi maix, ka grawng maix, sonsang sipub ti yaox maix ka bawg yam bleeh maix tix hoek, kheu maix hoik so cao kaing meung yum haktiex an khankix, can pa mawh simiang haktiex khawmuik hoik yaog ti kaoh khaing dang ngeung pa ngawm tix heue. ¹⁰ Kix khawmuik tak sang krai mai ah nin ka maix, mawh hoik lih maix ti mawh pa iak riang iak rao awm yix lie? Mawh hoik lih maix ti awm yix lie? ¹¹ Min sibrawm maix mai khawm lox sinum ting maix khankix hoik viex ti laig ka daux meung yum, pa tawm tix ka greem maix mawh graik, pa lhop ka piang maix mawh ngaw heue. ¹² Simuing griang ngawb mai kawn simex ponngawb eue, maix hoik rau khaing raoma yuh ka mawx! maix pa yuh krax tuktiak ka ku meung khankix eue maix lai hoik kid ti goh ka piang tiex yuh ka mawx! ¹³ Maix hoik ah nin ka daux rhawm tix, aux tak sang haok ka piang raoma heue. Aux tak sang yaog dang ngeung aux deuh ka piang simuing Siyiex khankix, aux tak sang ngawm ka piang gawng pui hun pa kied singai plak laong heue. ¹⁴ Aux tak sang haok plak piang dee lhaong paiawm khankix, aux tak sang mawh pa awm cao pa ot dee pa kied lhaong heue." ¹⁵ Viang mawh nan maix tak sang mawh pa rau ka daux meung yum, ka daux simeeig pa kied raux heue. ¹⁶ Can pui pa yaox ka maix khankix, jeung ngai tix jhak ka maix ka daux krax pa daox pa deng mai keud ti yaox grawng maix ah nin, "Mawh in pui pa hoik yuh haktiex sikua, pa hoik yung yiang yuh meung haktiex an khankix, ¹⁷ pa hoik kieh haktiex awm daux tiagtu mai hoik kieh veng khankix laux leeing, pa ang ploi pui ot daux thawng deeh ing ka nyiex tix mawh kaw in lie? ¹⁸ Simiang haktiex ceu pui khankix mai kix tak it ka daux simeeig min pakngai tix, ku kaux ku pui heue. ¹⁹ Phan mawh maix hoik tik khaing daux simeeig maix, pa awm kak khaox pa seeing brai, awm kraung ceep pui pa hoik yum, pa suat tix ka lawm vaig mai pa rau ka daux simeeig lon simaox an khankix, awm tokaux pui yum pa hoik dig greem caong tix heue. ²⁰ Maix tak ang pon tix sipaung tau maix kix, grawh grawng nawh maix hoik laux leeing yuh haktiex cao maix mai hoik pah ka pui tix khankix heue. Kawn praix pa yuh ceu pa caox khankix, tak ang pon ti sum ceu kaux heue. ²¹ Khre rien grawng krax pah son kawn praix nawh, kheu jao phimap phighram keeing kix heue. Phan ang yuh nan, ha kix yaog ti kaoh mai teei ti cie haktiex an mai naog yuh piang haktiex ka veng khankix heue." ²² Siyiex Cao kru naing raoma ah nin "Aux tak sang yaog ti deeh tieh feen ka kix mai yieh ti tik kix khaing veng Babulon, khawm min ceu kaux mai pa kawn deuk khankix mai khawm kawn saux kawn sex kix, Siyiex ah nin heue. ²³ Aux tak sang baox yuh an mawh dee ot goh, mai yuh mawh dee dung rawm daux bing khankix, Aux tak sang khawt ti tik laux leeing, Siyiex cao kru naing raoma ah nin heue. ²⁴ Siyiex cao kru naing raoma hoik tiextu ti ah nin, awm krax pa keud Aux yuh ka mawx mai an tak sang mawh yuh nan heue. Awm krax pa keud pa bak aux yuh ka mawx mai an tak sang cung yuh nan heue. ²⁵ Aux tak sang raig ti tik pui Asurix khankix khaing daux haktiex Aux mai dig nawh greem caong tix ka piang gawng Aux heue. Gah khaox glawm nawh khaing ceu pui Isarelax mai tah beeh cien khaing piang klip kix heue. ²⁶ In mawh krax keud krax sawn pa hoik keud ti sang yuh ka haktiex khawmuik mai in mawh khawn taix pa hoik nyeu tix lih ka piang ceu pui ku meung khawmuik heue. ²⁷ Mawh kheu Siyiex Cao kru naing raoma, hoik keud hoik sawn ti deuh an kix, mawh pui mawx pa sang pon yieh ti tik lie? Khawn taix Nawh Cao hoik nyeu tix lih mai mawh pui mawx pa sang pon kieh deeh yawn tix lie? ²⁸ In mawh gumlox pa plak jhi hoek ka daux num yum Akhat heue. ²⁹ Pui haktiex Philitix khawmuik eue, paw koe krax gaux rhawm ka hoik pot, gawng khaox pa hoik sivied ka maix awx, mawh kheu khaing num riah ceu siuing khankix, siuing pa koe jai tak bleeh ti hoek mai kawn nawh tak mawh siuing ngu pa chix po heue. ³⁰ Kawn Ai pui pa hot pa shia khankix tak yaox ti ih mai can pa koe krax cud cha khankix tak yaox ti it yiien yawg heue. Aux tak pah num riah maix khankix ka krax sibhawm praix mai pa kawn deuk maix khankix tak sang mawh pa pah yum heue. ³¹ Siviex eue, ngia heue, veng eue yiiem yo heue, pui haktiex khawmuik eue maix hoik daox hoik aw heue, mawh kheu taox ngu tak sang hoek khaing plak laong mai cub nawh ang koe pa tang ot nong nong heue. ³² Mawh pui mawx pa tak sang pon pawk lox ka pui cau haktiex an khankix lie? Siyiex hoik pang ti deuh veng Zion mai pui hot pui shia ceu pui Nawh Cao khankix tak peung ti ot ka daux veng an heue.

¹ Gumlox pa plak jhi ka grawng haktiex Mawbax, ka daux ti sawm khaing, veng Arax haktiex Mawbax mawh pa hoik nai mai hoik laux leeing heue. Ka daux tix sawm khaing, veng Kirax haktiex Mawbax mawh pa hoik nai mai hoik laux leeing heue. ² Kawn bun veng Dibon haok ka dee lhaong sonsang yiiem tix heue. Pui haktiex Mawbax tak sang koe krax ngia ka piang veng Nebaw, mai ka piang veng Medebax, ka piang kaing kix hoik klo ang koe hauk mai pui ku kaux hoik khlao hauk jheeh tix singax heue. ³ Kix tak ceep ka kraung chee rhix ka daux krax khankix, ka piang braux nyiex kix mai ka daux krax ting, pui ku kaux tak koe krax pa ngia mai yiiem ka daux pa kied lih rawm ngai tix heue. ⁴ Veng Heshabon mai veng Elale tak yiiem grai, lox yiiem kix, tak mhong tom hoek dee singai ka veng Yahat heue. Mawh kheu nan, kru naing haktiex Mawbax khankix tak riag yo ti yiiem, rhawm rhi kix hoik siyaung heue. ⁵ Rhawm rhi aux hoik yiiem son haktiex Mawbax, pui pa to khankix tak to hoek ka veng Zawrax, awm to kawn mawie shiang pa koe loe num heue. Kix yiiem khawm haok tix blaong Luhit, mawh kheu ka daux krax hu plak veng Hawronem, kix tak ploi lox yiiem tix kheu hoik laux leeing tix heue. ⁶ Grawh grawng nawh, rawm dung Nimrim kawx hoik hit hoik riem, rib riem khankix hoik fit hoik kroh, rib awn kawx hoik yum, can pa klai ang lai koe pie tix ceu kawx heue. ⁷ Mawh kheu nan, kraung khrai pa hoik pon pui Mawbax pa kied haoh kied nie mai kraung ceu pa hoik rhawm kix ti deuh, kix tak teei ti viex an kix hu ka rawm klawng pang khaox siglai heue. ⁸ Lox yiiem hoik tah hu hawt vung viang mee haktiex Mawbax khankix, lox pa ngia kix hoek tom ka veng Egalim mai lox pa ngia kix hoek tom ka veng Beralim heue. ⁹ Grawh grawng nawh daux rawm klawng Dimon khankix hoik naog ka nham mai aux tak sang baox nie lheu viex ceu pa kha rhawm hoek ka piang veng Dimon, kieh sivai sangsi hoek ka piang kix, pa glawd khaing haktiex Mawbax mai ka piang pui pa kawn deuk khankix daux haktiex an heue.

¹ Kix tawx kawn yung hu ka cao pa kwang haktiex, jah ka veng Sala tom hoek ka daux tiagtu, tom hoek ka gawng kawn bun Zion heue. ² Awm sim pa vung viang tix po hu, pa hoik prah mheem tix, kawn bun Mawbax khankix kawx tak sang mawh awm an, ka dee tiang baoh hawt diang rawm klawng Anon heue. ³ Tawx krax keud krax sawn prawng ca ka daux krax pa rahsee liak. Yuh veei maix awm ponsawm ka daux pa riang jung singaix, mox ti deuh can pui pa hoik grheu ti tik khankix, paw lai jhi ka pui pa hoik to khankix heue. ⁴ Kieh pui pa grheu ti tik khankix khaing haktiex Mawbax ot tau mai maix, mawh dee pan dee peung tix dah son kix khaing plakngai cao pa yuh krax laux leeing heue. Pui pa tuktiak ang lai koe, krax laux leeing ka hoik yiien pa yeen ya ka pui khankix mawh pa hoik laux hoik leeing khaing haktiex heue. ⁵ Dang ngeung tak kaux cong ka daux pa caux rhawm mai pui tix kaux tak ngawm ka piang an ka daux pa kaux sijax, ka daux nyiex gox simiang Davit mai prawng ca rahsee mai khawm sawg tix krax pa rahsee phai phai heue. ⁶ Ex hoik mhong krax pa ting rhawm pui haktiex Mawbax, nawh mawh pa kied ting rhawm, ka daux pa lhaong rhawm nawh mai ka daux krax pa song rhawm nawh mai lox pie lhen nawh khankix tak ang lai pon ti mawh tidtix heue. ⁷ Mawh kheu nan pui Mawbax tak ngia son pui Mawbax ku kaux tak ngia heue. Kheu jao grawng num pang plix siiet veng Kiraharet khankix, pex tak laux rhawm, tak mawh pa hoek krax kha rhawm heue. ⁸ Kheu jao kroh groing tong kaung veng Heshabon khankix mai nhu plix siiet Sibama an, simiang pui tang ceu khankix hoik raig ti tik pang khaox pa mhawm khankix, pa hoik bleeh hoek ka veng Yaza mai hoik vung viang ti hu ka daux tiagtu, kak nawh khankix hoik toek ti lih mai hoik luan hu toi rawm sigrit sigra heue. ⁹ Mawh kheu nan aux tak koe krax yiiem son nhu plix siiet Sibama, tau mai krax pa yiiem tix son veng Yaza heue. Veng Heshabon mai veng Elale khankix eue, Aux tak see maix ka rawm ngai tix heue. Mawh kheu sinum naing hoik hoek ka piang plix khaox daux yam rung praix maix khankix mai khawm ka piang sigleem nghox vawg maix khankix heue. ¹⁰ Krax pa gaux rhawm hoik teei tix hu, khaing daux tong kaung dee kied mhawm ka daux sipeem plix siiet tak ang lai koe pa ah lai rhax, lox lawh maw kawx tak ang lai koe, cao pa dig rawm plix siiet lih khaing ka dah dee biiet kix heue. Aux hoik kieh lox lawh maw kix yiien hu heue. ¹¹ Mawh kheu nan, rhawm aux tak khi mai luah awm ting vawk son haktiex Mawbax, mai ka plak daux sok rhawm aux, hoik mawh pa awm an son veng Kiraharet heue. ¹² Yam hu krub pui Mawbax ka riang grang siyiex kix mai tauk mao ka piang dee pa lhaong, ka tak sang hoek nawh ka dee singax, sonsang rawg tix bwan, viang mawh nan nawh tak ang koe krax pa lih mawh tid tix heue. ¹³ In mawh gumlox pa hoik krai Siyiex son grawng Mawbax glang in heue. ¹⁴ Viang mawh nan yam in Siyiex ah nin, glang daux loe num, awm baux num pa hoik cang caing pui khankix, min pakngai haktiex Mawbax mai cub pui pa kied haoh hun nawh khankix khawmuik tak mawh pa yeen ti tiiem mai pui pa kawn deuk khankix, tak mawh pa kied tux mai pa iak riang rao heue.

¹ Gumlox pa plak jhi grawng veng Damasekat ah nin; jhak heue, veng Damasekat tak ang lai deeh mawh veng mai tak mawh pum pa laux leeing heue. ² Veng Araw mawh pa hoik tik grham tix, tak mawh dee it cub yung khankix mai ang lai koe pui pa glhat ka kix heue. ³ Veng pa kaux cong tak ang lai koe ka daux haktiex Epharem, sibrawm kwang simiang tak ang lai koe ka daux veng Damasekat mai ka piang pui pa kawn deuk haktiex Surix khankix, kix tak mawh awm min pakngai ceu pui Isarelax heue. Siyiex cao kru naing raoma ah nin heue. ⁴ Ka daux singaix an, min pakngai ceu pui Yakop tak yawm hu mai kaux hak pa kluing pa bee nawh tak krawx hu heue. ⁵ An tak mawh awm yam khrawm cao pa vawg nghox ka lhiem nghox mai vawg sigleem nghox khankix ka taix tix, an tak mawh awm pui pa khrawm sigleem nghox khankix ka daux ngawd daux lung Rephem heue. ⁶ Can pa khrawm tix tak kawn deuk ang lai nie, pui hoik tawm pieh pui ka plix khaox salon pa koe plix khaox ra loe mu ka choek rao kak nawh mai pa koe plix khaox pon phwan mu piang kak khaox pa kied mhawm nawh khankix, Siyiex ceu pui Isarelax ah nin heue. ⁷ Ka daux an, pui tak jhak ka cao pa phan pa deuh tix mai ngai kix tak maong ti jhak ka cao pa singax singeh ceu pui Isarelax heue. ⁸ Kix tak maong ti jhak ka khu dee tan, pa hoik yuh kix ka taix cao tix khankix, kix tak ang jhak ka ceu pa hoik yuh ka giien taix tix khankix, riang rao pa mawh khaox Asherax an kix mai ka khawm khu dee tan nyawng bhawng khankix heue. ⁹ Ka daux singaix an, veng pa kaux cong kix, tak mawh awm tiag pa hoik tik hoik grham pui Hivit mai Amorix, mai awm kak khaox dee lhaong, pa hoik prah kix ka plak sivoe ngai ceu pui Isarelax khankix mai haktiex an tak mawh pa yiien hu heue. ¹⁰ Kheu jao hoik piawm maix ka Siyiex Cao pa taoh maix mai ang lai koe krax doh keud ka rang pa kaux cong maix, mawh kheu nan maix tak sum pang khaox pa mhawm khankix mai hoik van ti deuh simie khaox haktiex tang meung khankix, ¹¹ Ka daux singaix sum maix simie, maix hoik vie ti deuh die mai ka daux plak ponngawb, maix tak yuh simie tix pruh tai heue. Viang mawh nan, can pa hoik vawg tix khankix tak mawh pum glah pa koe krax laux leeing, ka daux singaix pa koe krax khi rhawm mai krax pa laux rhawm heue. ¹² Eue! lox pa lawh maw pui hun khankix, awm lox sinum puk pak rawm sigrit sigra mai ka lox sinum pui kuceu khankix, awm lox luah sinum rawm pa kied ting riang ting rao heue. ¹³ Pui kuceu khankix tak sinum awm pa kied ting riang kawx; viang mawh nan, Siyiex tak sidiex kix mai kix tak to tom hoek dee singai mai tak pheet kix awm kam ka piang gawng pa phlu bhaung mai awm phawng tiex pa phlu bhaung keu kang lu heue. ¹⁴ Ka daux bawg yam plak bo krax lhat tak koe mai sivoe ang praix nyang riang plak ponngawb, nawh hoik grai heue. In mawh son pui an kix pa tud rhim ka ex mai mawh krax pa deeh pawk bix ka pui an kix pa con ka ex heue.

¹ Eue! lox sinum luah pruik an khankix, pa koe ka plak toi rawm klawng haktiex Ethiopiya, ² ploi cao cau khankix hu ka piang rawm sigrit sigra mai pa brug ka reu briem khankix, ka piang rawm mai ah nin; cao cau pa kied phai khankix eue, hu ka krax ceu pui pa lhaong kaux pa mhawm plang kaux hak khankix, pa mawh ceu pui pa koe krax lhat graung ka, tom yam jah tom hu sivoe ngai mai ceu pui pa kied ting sibrawm khankix mai pa gwieh ti dig haktiex ka pa gwieh rawm khankix ka mee haktiex cie kix heue. ³ Can pui pa ot ka piang haktiex khankix mai pui pa ot ka piang tiex khankix eue, yam yaog nawh ti pak chix ka piang gawng khankix maix jhak heue. Yam phlu nawh teettawng mai nghiet heue. ⁴ Siyiex ah nin ka aux. "Aux tak sang ot yiien yawg ka dee ot tix mai jhak khaing dee ot aux, awm sidawng hax koek bawg yam jhan riang singaix, awm paiawm pa ceep ka rawm ciex ka daux yam siaoh bawg yam vawg nghox heue." ⁵ Mawh kheu sivoe bawg yam teei yam vawg mai yam hoik khrum pruh tai mai yam kawn teem plix siiet pa nie an kix ka daux pruh tai, nawh tak sang pawt ti tik lhax plak rao khankix khawm ra plak ka sivawg mai teei an kix hu mai tat ti tik kak an kix heue. ⁶ An kix tak mawh pa prah tix son sim piang gawng mai son totiag pa ot ka piang haktiex, sim khankix tak pan ka piang ankix daux yam rung praix mai totiag haktiex tak peung ti ot ka piang an kix daux yam kuat praix heue. ⁷ Ka daux bawg yam an ceu pui pa lhaong kaux pa mhawm plang kaux hak khankix pa mawh ceu pui pa koe krax lhat graung ka, tom yam jah tom hu sivoe ngai mai ceu pui pa kied ting sibrawm khankix mai pa gwieh ti dig haktiex, ka pa gwieh rawm khankix ka mee haktiex cie kix, tak viex totaix hoek ka Siyiex cao kru naing raoma ka piang gawng Zion ka dee koe ceu kaux Nawh Cao heue.

¹ Gumlox pa plak jhi grawng meung Ejiptux, pa ah nin, jhak heue, Siyiex brug paiawm pa kied phai mai hoek ka daux meung Ejiptux heue. riang grang meung Ejiptux khankix tak lhat siyaung ka plak sivoe Nawh Cao mai rhawm rhi pui meung Ejiptux tak teh ka daux rhawm rhi kix heue. ² Aux tak sang kieh pui Ejiptux deeh tieh feen ka paox pui Ejiptux khankix, puxaik deeh tieh feen ka puxaik mai pui ku kaux tak deeh tieh feen ka paox plawg tix, tix veng mai tix veng tix meung mai tix meung tak sang puing paox tix heue. ³ Rhawm rhi pui meung Ejiptux tak khrup ka daux nawh heue. Aux tak yuh krax keud krax sawn kix laux leeing mai kix tak chawk ka riang grang ankix mai cao pa sipawk khankix, cao pa laig phi mai ka pui koe phi pheux khankix heue. ⁴ Aux tak sang ap pui Ejiptux khankix ka daux tawm taix Simiang pa kied ting lang teung vao tix kaux mai simiang pa kied kin jhawm tix kaux tak kwang ka piang kix, Siyiex, pa mawh Siyiex cao kru naing raoma ah nin heue. ⁵ Rawm klawng Nilax tak hit uik mai rawm klawng khankix tak kroh hu heue. ⁶ Rawm klawng khankix tak tieh ti mawh pa cux sioe mai kawn kak rawm klawng Nilax daux Ejiptux khankix tak mawh pa ang lai koe tid tix mai pa hoik kroh hu, pang nhu oi mai pang priem tak fit kroh hu heue. ⁷ Rib riem pa kwah hawt rawm klawng Nilax mai pa kwah hawt dee sidah rawm klawng Nilax khankix mai can ceu pa hoik sum ti hawt klawng Nilax tak fit mai tak mawh pa phlu ti luan mai an tak ang lai koe pie tix bawg kawx heue. ⁸ Pui pa sawg kax kawx tak koe krax laux rhawm, pui pa miiet kax ka daux rawm klawng Nilax, tak koe krax ngia mai kix pa ploi rub ka piang rawm khankix, tak khrup rhawm heue. ⁹ Can pui pa yuh kaing shiah maox gan mai pui taing man mhawm tak mawh pa kaig tua, ¹⁰ num riah nawh khankix tak mawh pa hoik yieh ti laux, pui yuh kaing pa koe ngawh koe jum khankix, kix tak laux rhawm heue. ¹¹ Simiang Zawna mawh pui pa yhot tete, pui koe pingnya cao tawx krax keud ka Pharaw mawh pa tawx krax keud pa vao heue, aux mawh pa koe pingnya, aux dawg mawh doeh simiang tom didix, kix chix ah nan ka Pharaw yuh ka mawx lie? ¹² Mawh koe kix dee mawx lie? Pui pa koe pingnya maix khankix koe dee mawx lie? Kieh kix krai ka maix daux yam in mai kieh kix tawng ka ceu pa hoik keud Siyiex cao kru naing raoma ti tieh feen ka piang meung Ejiptux heue. ¹³ Siyiex Zawna hoik lih ti mawh pui pa yhot, simiang Nawpha kawx mawh pa hoik yaog ti kham pie lhien, kix hoik lud ka doeh ru pui Ejiptux khankix pa mawh cao pa kwang ka piang doeh kix heue. ¹⁴ Siyiex hoik saux rhawm pa sivix sivuan pa lud ka daux sigreung nawh mai kix hoik yuh meung Ejiptux koe krax lud loe ka daux kaing jhaw yuh nawh khawmuik, awm goh pui pa yoek ka plai ka piang hao tix heue. ¹⁵ Kaing mai sidax ang ah, pa mawh kak khaox jhie yaong ang ah mai pang priem ang ah, tak ang pon ti lih mawh tid tix son Ejiptux heue. ¹⁶ Ka daux singaix an, pui Ejiptux khankix tak mawh pa awm bun mai tak koe krax lhat graung kheu jao chuh khawn taix Siyiex cao kru naing raoma ka piang kix heue. ¹⁷ Haktiex Yudax mawh krax pa lhat meung Ejiptux kah heue. Pui ku kaux pa krai grawng an kix tak koe krax lhat graung ka daux tokaux cao nawh kheu jao krax pa keud pa sawn Siyiex cao kru naing raoma, ka pa hoik tat Nawh Cao ti deuh ka piang an heue. ¹⁸ Ka daux singaix an, veng pa koe ka daux meung Ejiptux phwan veng, tak sikah lox ceu pui Khanan mai koe krax pa tiextu ka Siyiex cao kru naing raoma, veng an tix veng tak kok mawh veng Singaix heue. ¹⁹ Ka daux singaix an ka daux sigreung meung Ejiptux, tak koe khu dee tan pa hoik yuh son Siyiex tix mu mai hawt mee haktiex nawh tak koe rong simaox lhak pa hoik sum son Siyiex tix mu heue. ²⁰ An tak mawh mhai rug ka son Siyiex cao kru naing raoma ka daux meung Ejiptux heue. Grawh grawng nawh, kix tak kok ka Siyiex kheu jao kham kix krax pa tuktiak pui tix mai Nawh Cao tak ploi cao taoh hoek ka kix tix kaux mai cao pa kied ting riang ting rao mai Nawh Cao tak deeh taoh ka kix heue. ²¹ Khaix an pui meung Ejiptux tak mawh pa tawng ka Siyiex mai pui Ejiptux khankix kheu tawng ka Siyiex daux singaix an kix tak yuh krax tan pa appong mai krax pa krub heue. Kix tak yuh sijax mukheu ka Siyiex mai hawt ti yuh an heue. ²² Siyiex tak ciyang ka meung Ejiptux, Nawh Cao ciyang mai deeh pai moi heue. Kix tak deeh tieh ti hoek ka Siyiex mai Nawh Cao tak nghiet ka lox pa rawg kix bwan mai pai kix moi heue. ²³ Ka daux singaix an, krax ting tak koe tix nyaing, jah khaing meung Ejiptux tom hoek ka meung Asurix mai pui Asurix khankix tak hoek ka daux meung Ejiptux mai pui Ejiptux khankix tak hoek ka daux meung Asurix mai pui Ejiptux khankix tak yuh kaing krub tau mai pui Asurix khankix heue. ²⁴ Ka daux singaix an, ceu pui Isarelax nabat loe meung tix meung rom tix mai pui Ejiptux mai pui Asurix khankix, kix loe meung tak mawh pa rom ti pon bwanson ka piang haktiex heue. ²⁵ Mawh pui pa sang nawb Siyiex cao kru naing raoma bwanson ka daux pa ah nin; "Ceu pui Aux Ejiptux mai ceu pui Asurix pa hoik cox khre Aux mai ceu pui Isarelax khankix pa mawh sinngao Aux kieh koe bwanson heue.

¹ Ka daux num hoik ploi simiang meung Asurix Sogon ka cao giex kaing naing Tatan hu ka veng Ashadok mai nawh hoik puing veng Ashadok mai rhim ti teei veng an, ² Sivoe ka daux bawg yam an, Siyiex hoik sikah ka Isayax kawn simex Amok ah nin, "Hu mai peeik kraung ceep chee rhix khaing nyoi maix mai peeik kiep khaing caong maix heue. "Nawh hawt ti yuh awm an mai lai ling ti hu ka kaong mai bhang caong tix heue. ³ Khaix an Siyiex ah nin, "Awm hoik lailing siliex Aux, pa mawh Isayax ti hu kakaong mai bhang caong tix loe num mawh son mhai rug mai krax pa daox am ka daux meung Ejiptux mai meung Ethiopiya; ⁴ Awm an simiang meung Asurix tak giex ti phyawk pui Ejiptux khankix hu mawh pui giex pui laung mai pui Ethiopiya khankix mawh pui giex pui laung khawm pa iak pa ting mawh pa hu kakaong mai pa bhang caong tix mai pa ang kheem ang tawb ka beem kre tix khankix kieh meung Ejiptux koe krax kaig tua heue. ⁵ Khaix an kix tak koe krax lhat graung mai krax kaig tua, ka pa een rhawm tix ka pui meung Ethiopiya, krax yaw rangdi tix ka pui meung Ejiptux heue. ⁶ Ka daux singaix an can pui pa ot ka hawt rawm plak in mai kix tak ah nin, jhak heue, "An pa een ex rhawm tix mai ka dee to ex ti pon krax teem sonsang glawd khaing simiang meung Asurix mai ex tak sang pon ti glawd yuh ka mawx lie?

¹ Grawng gumlox pa plak jhi ka daux tiagtu hawt rawm sigrit sigra awm tah bhaung keu kang lux khaing plak seh, mawh kheu nan an hoek khaing daux tiag mhaik khaing haktiex pa kied koe krax pa lhat kah heue. ² Mhai riang susai krax pa kha rhawm, hoik mawh pa plak jhi tix ka Aux heue. Pui pie lhien yuh krax pa pie lhien mai pui tud rhim yuh krax pa tud rhim heue. Pui haktiex Elam khankix eue, haok hu heue, pui haktiex Medi khankix eue, lai lawm ti deuh veng heue, Aux hoik yuh krax pa ngia kix grai khawmuik heue. ³ Mawh kheu nan nyoi aux mawh pa hoik naog ka jhawm saux, krax saux krax ngia hoik giex ti deuh aux, awm krax saux krax ngia yam keh bun heue. Aux hoik kied sidaing saux tom ang lai pom mhong, aux hoik khrup rawm tom ang lai chix yaox heue. ⁴ Rhawm aux hoik vung viang, krax lhat graung hoik glhat aux heue. Ponsawm pa gaux rhawm aux, Nawh Cao hoik tieh mawh krax lhat graung son aux heue. ⁵ Kix hoik khan kheu pa ih mai deuh cao pa pau, kix ih mai nyaux heue. Pex pa mawh simiang khankix eue, yaog ti kaoh, kraix bee ka kraung plah tieb naing heue. ⁶ Mawh kheu Siyiex ah nin ka aux, "Hu yuh ti deuh cao pa pau, kieh nawh pao tix krai can ceu pa yaox nawh heue. ⁷ Nawh hoik yaox cub kru naing pa brug brung khankix tix brawm hoik tix brawm mai hoek, cub tab la mai cub tab ka la uk khankix hoek mai nawh nghiet ti yaox mhawm mhawm mai krax pa rien rhawm tix heue." ⁸ Nawh yo lox tix sinum awm sivai sangsi ah nin, Simiang aux eue, "Aux cung ti pau sijheeng ka piang nyiex tab pau leeing singaix mai aux hoik ngawm ti ot ka dee pau tix leeing sawm heue. ⁹ Jhak heue, cub kru naing pa brug brung khankix tix brawm hoik tix brawm hoik hoek heue. Nawh baox ah nin, veng Babulon hoik grhup mai hoik grhup, mai riang grang pa hoik saik tix mawh siyiex pa krub nawh khankix hoik cod hoik pot ka piang tiex heue. ¹⁰ Glah dee pah aux nghox mai nghox pa koe piang glah khankix eue, gumlox pa hoik mhong aux khaing Siyiex cao kru naing raoma, pa mawh Siyiex ceu pui Isarelax, aux hoik pao ti krai ka pex heue. ¹¹ Grawng pa plak jhi ka piang haktiex Duma pui tix kaux khaing gawng Sirax kok yo ka aux ah nin; cao pau eue, daux ponsawm yuh ka mawx lie? Cao pau eue, daux ponsawm yuh ka mawx lie?" ¹² Cao pau deeh ah nin; plak ponngawb hoek phao mai plak ponbo kawx hoek phao heue. Phan pex sang chawk, chawk heue. Deeh ing mai deeh baox hoek heue. ¹³ Grawng pa plak jhi ka piang haktiex Arebiya pex pa mawh cub pui Dedam pa kawn hu krax laux khankix eue, pex tak sang paung ti ot daux nong khaox pa koe ka daux haktiex Arebiya heue. ¹⁴ Can pui pa ot ka daux haktiex Tema khankix eue, viex rawm hoek ka son pui pa simie ti nyaux rawm mai viex blah hu rieb ka kix pui to tua heue. ¹⁵ Grawh grawng nawh, kix to tua tix glawd khaing lawm vaig mai khaing lawm vaig pa hoik lawd tix khankix, khaing ak pa hoik vaik tix mai khaing krax pa lhat graung ka naing heue. ¹⁶ Siyiex ah nin ka aux, ka daux tix num, awm pa hoik simin, num pa cang pa caing pui, min pakngai veng Keda khawmuik tak grai, ¹⁷ mai pui naing ak pa kawn deuk an mai pui pa kied ting riang ting rao ceu pui Keda khankix tak mawh pa tux hu heue. Grawh grawng nawh, Siyiex ceu pui Isarelax hoik ah ti deuh yuh nan heue.

¹ Grawng riang susai pa plak jhi ka daux lung pa ting mawh nin mawh kheu patix pa kieh pex khawmuik haok ka piang braux nyiex lie? ² Maix pa naog ka lox sinum, pa mawh veng pa lawh maw mai veng pa koe krax gaux rhawm an eue, pui maix pa yum khankix ang tie mawh pa pah tix yum ka vaig mai ang tie mawh pa yum ka daux biang puing naing heue. ³ Simiang maix khankix hoik to tau mai paox tix kix hoik mawh pa giex ka pui naing ak khankix heue. Can pui pa hoik yaox tix ka daux maix khawmuik, mawh pa hoik phyawk tix tan, viang kix mawh pa hoik to dee singai kawx heue. ⁴ Mawh kheu nan, aux ah nin, veeh ngai tix, paw jhak ka aux, aux tak sang yiiem sigrien sigre, paw sau riang tix sang yuh krax pa khu rhawm aux, kheu jao krax pa laux leeing kawn bun ceu pui aux khankix liak!" ⁵ Mawh kheu singaix pa kieh Siyiex cao kru naing raoma pa koe ka daux lung riang susai pa mawh krax pa kha rhawm mai krax pa duk dig mai krax pa sivix rhawm rhi mai krax pa yieh ti tik guh veng khankix mai lox pa riag yo kix hoik hoek tom piang gawng heue. ⁶ Ceu pui Elan kawg ti viex mawk te, tau mai pui naing ling lawx khankix mai khawm pui naing brung mai ceu pui Kirax hoik yah ti deuh kraung naing pa tieb tie tix heue. ⁷ Daux lung pa kied sidaing mhawm maix hoik naog ka ling lawx pui naing khankix mai pui naing brug brung tak sang deuh tab sivoe diang siviex veng heue. ⁸ Nawh hoik plak ti tik pa tiebtie haktiex Yudax mai maix jhak ka daux nyiex haw daux nong dee deuh ka kraung naing tix singaix an heue. ⁹ Maix tak yaox krax pa laux leeing veng Davit tom nie mai maix hoik khrawm ti deuh rawm pa koe daux dung ka greem khankix tau heue. ¹⁰ Maix simin ti yaox lhang nyiex Yerusaliem mai khawm nyiex pa hoik yuh laux leeing, sonsang deeh cox guh veng heue. ¹¹ Maix baox yuh rawm dung koe tix mu daux sinax guh veng ra mu son sang rhawm rawm pa kaoh daux dung prim heue. Viang mawh nan maix ang tie jhak ka cao pa phan pa deuh nawh mai maix ang tie koe krax nab yam ka Nawh Cao, pa hoik yuh ti deuh grang pakpeung nawh tom yam an didix heue. ¹² Ka daux singaix an Siyiex Cao kru naing raoma hoik kok yo son krax yiiem mai son krax pa kha rhawm mai sonsang khlao hauk kaing mai sonsang ceep tix ka chee rhix heue. ¹³ Jhak heue, kix yuh krax pa gaux rhawm mai pah mawie mai pah yung mai ih nex mawie mai nyaux rawm plix siiet khankix, "Kieh ex ih mai nyaux heue. Daux pasax ex tak yaox ti yum heue." ¹⁴ Siyiex Cao kru naing raoma plak jhi gumlox ka daux yhaok aux ah nin, phimap phighram pex ang pon tix luan tom sidah yum pex, Siyiex Cao kru naing raoma ah nin heue. ¹⁵ Siyiex Cao kru naing raoma ah nin, hu mai krai ka Shebanax cao pa priex kraung ka krao piang nyiex haw heue. ¹⁶ Mawh yuh maix patix tin mai mawh koe maix pui mawx tin maix lai chix saik simeeig tin? Pa saik ti deuh simeeig son tokaux cao tix ka piang dee lhaong, pa saik dee sang deuh tokaux cao tix ka daux rang lie? ¹⁷ Jhak heue, pui pa ting riang, Siyiex tak reu ti tik maix tete mai tak jhawp ti giex maix tete heue. ¹⁸ Nawh Cao tak bang lia maix tete mai pluk pliak maix jee jee blaong blaong awm plix pa lawm le, ka daux haktiex dee pa kied vieh va heue. Maix tak yum tan mai min pakngai pa koe ling lawx naing brung maix khankix tak mawh pa kaig pa tua nyiex ma cao simiang maix tan heue. ¹⁹ Aux tak teei ti tik ara maix mai grheu maix lih khaing dee ot maix heue. ²⁰ Ka daux singaix an mai Aux tak kok siliex Aux Eliakim kawn simex Hilakhi hoek, ²¹ tak tawx nawh ceep sibex dhah maix, mai kieh nawh nhawt nyoi tix koe riang rao ka maox rawd nyoi maix, ap ti tawx beeh glawm maix ka daux tawm taix nawh, nawh tak mawh keeing ka can pui pa ot ka daux veng Yerusaliem mai ka nyiex ma ceu pui Yudax khankix heue. ²² Aux tak deuh jiak saw siviex nyiex ma simiang Davit ka piang klip nawh heue. Nawh paoh mai ang koe pui pon nyeep, nawh nyeep mai ang koe pui pon paoh heue. ²³ Aux tak deuh nawh kaux awm jim ka dah dee kaux cong tix dah mai nawh tak mawh dang ngeung min pakngai ka daux nyiex ma keeing nawh heue. ²⁴ Min pakngai nyiex ma keeing nawh khankix, pa mawh kawn praix khawm doeh ceu cat kix mai kraung pa shiao mai aw klong, can pa iak, jah khaing klong tom hoek ka singiien rawm kix tak preue ti deuh ka piang nawh khawmuik heue. ²⁵ Siyiex cao kru naing raoma ah nin ka daux singaix an, jim pa hoik deuh tix kaux ka daux dee pa kaux cong an, tak mawh pa hoik toek tix mai mawh pa hoik kid ti goh mai beeh cien pa hoik preue ka piang an, tak mawh pa kid ti tik heue. Siyiex hoik ah ti deuh yuh nin heue.

¹ Grawng pa plak jhi ka veng Turux mawh nin, pa mawh cub reu ting veng Turux khankix eue, koe krax ngia krax ngheeik, grawh grawng nawh, an mawh pa hoik laux hoik leeing, tom ang nyiex ot mai dee bang reu ting khankix lai koe heue. In mawh satang pa mhong khaing meung Khiten heue. ² Can pui pa ot hawt baoh praok rawm sigrit sigra, pa mawh cao lai cao geu veng Sidon pa tiang ti hoek khaing plak rawm sigrit sigra pa hoik mawh pa grum naog khankix eue, kieh ot yiien yawg tix heue. ³ Keun pa pon maix khaing simie si-un khaing rawm klawng Shihawrax mai plix nghox koi hawt rawm klawng Nilax khankix, maix mawh cao lai geu son meung haktiex khankix heue. ⁴ Veng Sidon eue, koe krax kaig tua ka liak! grawh grawng nawh, rawm sigrit sigra pa ting hoik ah lox tix, riang rao rawm sigrit sigra ah nin aux ang sax yuh kaing mai ang sax keh kawn mai aux ang sax eei pui awn ju khankix mai ang sax priex kawn bunkrih ting heue. ⁵ Yam hoek grawng lox satang an ka meung Ejiptux, kix tak baox koe krax pa khi rhawm ka grawng satang veng Turux heue. ⁶ Tiang tix hu ka plak toi veng Tasux! pex pa ot hawt baoh praok rawm sigrit sigra khankix eue, koe krax ngia krax ngheeik heue. ⁷ In mawh veng pa gaux rhawm pex mai mawh pa pang ti deuh tom yam jah dix, caong nawh hoik viex nawh hu pan hu peung dee singai lie? ⁸ Mawh pui mawx pa hoik teei ti priex krax pa keud pa sawn in ka veng Turux mawh veng pa chix tawx mhok khri min plakngai, cao lai geu nawh khankix mawh pui pa ting lhaong ka piang haktiex heue. Mawh pui mawx pa keud pa yuh nin ka piang veng Turux lie? ⁹ Mawh Siyiex cao kru naing raoma pa hoik keud hoik sawn ti deuh, sonsang kieh min pakngai pui pa ting rhawm ca nyhau khankix koe krax kaig tua mai sonsang kieh min pakngai pui pa ting lhaong ka piang haktiex hoek ka daux krax pa yeen tiiem heue. ¹⁰ Kawn bun veng Tasux eue, deeh ing tah hu ka haktiex maix awm rawm klawng Nilax, maox rawd nyoi riang rao maix ang lai baox koe heue. ¹¹ Nawh Cao hoik nyeu taix tix ka piang rawm sigrit sigra, Nawh Cao hoik yung yang meung haktiex khawmuik heue. Siyiex hoik tawx gumlox ka piang meung Khanan, sonsang yuh laux leeing ka dee pa kaux cong nawh khankix heue. ¹² Nawh Cao baox ah nin maix pa mawh kawn bun krih veng Sidon pa hoik yaox krax pa kha rhawm eue maix tak lai baox koe krax gaux rhawm heue. Kaoh mai tiang ti hu ka haktiex Saiprat maix tak ang lai baox yaox ti koe krax pa laux lee tix tan heue. ¹³ Jhak ti yaox ka haktiex ceu pui Khaladie khankix liak! ceu pui an hoik mawh pa ang sax koe tom yam an heue. Haktiex an mawh pa hoik pang simiang haktiex Asurix ti deuh son pui pa ot daux tiagtu heue. Kix hoik deeh sum nyiex tab lhaong nawh khankix, kix hoik kieh nyiex haw simiang nawh khankix, hoek daux krax pa laux leeing khawmuik heue. ¹⁴ Pex pa mawh cub reu sang phaw veng Tasux khankix eue, koe krax pa ngia pa ngheeik heue. Grawh grawng nawh, dee pa kaux cong maix hoik mawh pa laux leeing heue. ¹⁵ Ka daux singaix an, veng Turux tak mawh pa piawm atixgliah num, awm koe baux ju simiang tix kaux heue. Yam hoik sidah atixgliah num, an tak mawh pa lih ti koe ka veng Turux awm pa koe ka daux lai rhax bun coh kaux heue. ¹⁶ Maix pa mawh bun coh kaux pa hoik piawm tix eue, teei ting hu lailing ka daux veng, kieh lox rhax mawh pa mhawm, rhax lai tom nie, sonsang deeh kieh pui doh keud ka maix heue. ¹⁷ Khaix hoik sidah atixgliah num, Siyiex tak deeh kia ngien ka veng Turux, nawh tak sang deeh pon ka ngawh rao, yuh lai geu tau mai meung haktiex pa koe ka piang ca haktiex heue. ¹⁸ Rao pa pon nawh mai ngawh pa pon nawh khankix, tak mawh pa tang gwieh ti deuh son Siyiex, an tak ang pon ti mawh pa priex tix awm sinngao mai ang pon ti kieh mawh pa khrawm ti deuh heue. Grawh grawng nawh, rao pa pon nawh tak mawh son pui an kix pa ot sivoe Siyiex, sonsang ih tom sak mai sonsang ceep kraung pa kaux heue.

¹ Jhak heue, Siyiex yuh haktiex mawh pa yi mai yuh an mawh dee pa riem mai pluk pliak ti tik pakpeung nawh mai prung prang pui pa ot ka daux nawh khankix heue. ² Yam an pui khankix koe yuh ka mawx cao giex kaing li kawx koe yuh nan, mai siliex koe yuh ka mawx cao simiang kawx koe yuh nan, mai cao siliex bun koe yuh ka mawx miex cao nyiex kawx koe yuh nan, mai cao pa liag koe yuh ka mawx cao coh kawx koe yuh nan, mai cao pa tawx ceuk koe yuh ka mawx cao pa koe ceuk kawx koe yuh nan, mai cao pa tawx koe yuh ka mawx cao pa ih rao mau kawx koe yuh nan heue. ³ Haktiex tak mawh pa yi khawmuik mai pa hoik riem pak lawg, mawh kheu Siyiex hoik ah ti deuh gumlox in heue. ⁴ Meung haktiex koe krax khi rhawm mai grai hu heue. Haktiex koe krax iak riang mai grai hu heue. Ceu pui pa ting min pakngai ka piang haktiex khankix koe krax iak riang heue. ⁵ Meung haktiex hoik seeing brai greem pui pa ot ka piang nawh khankix heue. Mawh kheu hoik lheu kix ka gumlox beenli mai hoik tieh kix ka lox tat jhawm prawng mai hoik yieh ti tik gumlox sijax mukheu leeing ju heue. ⁶ Mawh kheu nan krax pa jhax lawg hoik bleet ti ih ka meung haktiex mai can pui an kix pa ot ka daux an hoik lih ti koe phimap mai ngu hoik gleeing pa ot ka piang haktiex mai pui pa kawn deuk an kix tak koe ceeix ngie heue. ⁷ Rawm plix siiet pa khraox koe krax khi rhawm, nhu plix siiet koe krax iak riang, can pui pa koe krax gaux rhawm khankix sang koe krax ngia ngheeik heue. ⁸ Lox ting plah khaox pa nyawm ti nghiet mai lox kraung kawx hoik yiien, lox sinum pui pa gaux rhawm kawx hoik sidah, lox gaux rhawm ting vawk kawx hoik yiien heue. ⁹ Kix tak ang lai yaox ti nyaux rawm plix siiet tau mai ah tix lai rhax, pui pa nyaux plai khiien khankix tak mawh pa song ka kix heue. ¹⁰ Veng pa hoik yi hoik riem mawh pa hoik yieh laux, nyiex ku nyiex mawh pa hoik nyeep tix, son ang pui tix kaux kawx lai pon ti laig ka daux heue. ¹¹ Lox riag hawt krax kheu ang rawm plix siiet lai koe, krax gaux rhawm khankix khawmuik mawh pa hoik grai daux pa faik, lox nyawm rhawm meung haktiex mawh pa hoik yiien hu heue. ¹² Ka daux veng hoik mawh pa yiien pa riem mai siviex veng mawh pa hoik tawk tix laux leeing heue. ¹³ Yam tak sang koe krax pa awm an ka daux sigreung haktiex daux sinax pui khankix, tak mawh awm pa vung viang ka khaox Sanlon mai awm plix siiet pa kawn deuk khaix pieh heue. ¹⁴ Kix yaog lox tix mai kix ah lai rhax, son min sibrawm krax kwang Siyiex, kix tak yo lox tix ting khaing plak rawm sigrit sigra heue. ¹⁵ Mawh kheu nan, yaog yaw min Siyiex ka plak lih singaix mai ka min ceu kaux Siyiex ceu pui Isarelax khankix ka hawt baoh praok haktiex rawm sigrit sigra khankix heue. ¹⁶ Kieh min pakngai koe ka cao pa rahsee, ex hoik mhong lox lai rhax khaing dee sidah haktiex ah nin, viang mawh nan, aux ah nin ka heue. Aux mawh pa hoik laux leeing mai hoik laux hoik leeing heue. Aux koe krax kha rhawm heue, pui pie lhien khankix yuh krax pie lhien mai pui pie lhien khankix yuh krax pa kied pie lhen heue. ¹⁷ Pui pa ot ka piang haktiex eue, krax lhat graung, prai pa taong daux tiex mai kie pa taong khankix, hoek ka maix heue. ¹⁸ Ka pui pa to khaing lox sinum krax pa lhat graung, tak rau ka daux tiex, mai pui pa deeh lih khaing daux tiex tak mawh pa krix ka daux kie heue. Mawh kheu daux siviex iak khankix khaing ka piang raoma hoik baoh mai num riah haktiex khankix hoik yung yiang heue. ¹⁹ Meung haktiex hoik bih hoik grhup, meung haktiex hoik bhieh hoik laux mai meung haktiex hoik yung yiang tix sigren sigre heue. ²⁰ Haktiex tak sang goh jee goh blaong, awm pui pa yoek ka plai mai tak sang vuh vied jee blaong tix awm bang eue, krax pa lud nawh mawh pa cien ka piang nawh mai tak sang goh mai ang lai pon deeh kaoh heue. ²¹ Ka daux singaix an, Siyiex pa ot ka dee pa lhaong, tak ciyang ka pui pa ot dee lhaong, pa mawh pui pa ting lhaong khankix mai khawm ka simiang haktiex pa koe ka piang haktiex heue. ²² Kix tak sang mawh pa khrawm tix tau, awm hoik kraix khrawm pui pa laig daux thawng khankix ti ot ka daux tiex mai tak sang mawh pa laung tix ka daux thawng heue. Khaix hoik luan singaix an kix tom nie, kix tak sang mawh pa yaox tix chawk cheng heue. ²³ Khaix an khix tak mawh pa laux pakngai mai singaix tak mawh pa koe krax kaig tua, mawh kheu Siyiex cao kru naing raoma tak kwang ka piang gawng Zion mai Nawh Cao tak koe min pakngai ka plak sivoe kuad song khankix ka daux veng Yerusaliem heue.

¹ Siyiex eue, Maix mawh Siyiex aux, aux tak sang yaog min bwan Maix, aux tak sang yaog yaw min ceu kaux Maix, kheu mawh Maix pa hoik yuh ceu pa daox am, krax keud krax sawn Maix tom yam jah dix ang tieh loh tix, mawh pa kaux sijax heue. ² Maix hoik kieh veng mawh pum tiex tug, kieh veng pa kaux cong mawh pa laux leeing, kieh nyiex simiang pui haktiex tang dah khankix ang lai pon ti deeh mawh veng khaix in, an tak ang lai mawh pa deeh cox ti sum heue. ³ Mawh kheu nan ceu pui pa koe riang rao khankix, tak yaog yaw ka Maix, veng dee ot ceu pui pa koe krax lhat khankix, tak koe krax lhat graung ka Maix heue. ⁴ Grawh grawng nawh, Maix hoik mawh dee een rhawm son pui pa hot pa shia mai dee een rhawm ka son pui pa cud cha yam koe krax khi glawh, mawh dee mox yam phlu bhaung ting lhiex ting mai mawh veei pa tieb tie yam hax koek, grawh grawng nawh, krax pa song rhawm pui pa koe krax lhat graung ka khankix, mawh pa awm phlu bhaung ting lhiex ting ka ding heue. ⁵ Maix tak kieh lox sinum pui tang ceu khankix yiien hu awm pa hax koek ka dah dee pa kroh, awm grai paiawm ka hax koek, lox lai rhax pui pa koe krax lhat graung ka khankix, tak mawh pa grai hu heue. ⁶ Ka piang gawng in, Siyiex cao kru naing raoma tak sang yuh pawie khan kheu pa ih, ceu pa nyawm pa tie son pui khawmuik mai krax khan kheu pawie rawm plix siiet ceu pa prim khaing ceu pa kluing pa bee khankix pa naog ka gua bee si-ang mai khaing rawm plix siiet pa ciied tix mhawm mhawm khaing rawm plix siiet pa prim khankix heue. ⁷ Ka piang gawng in Nawh Cao tak sang yuh laux leeing ka ceu pa kheem ka pakngai pui khankix mai man tieb pa hoik lhop tix ka piang ceu pui khankix heue. ⁸ Nawh Cao tak sang bleet ti ih krax yum leeing ju mai Siyiex tak awt ti tik rawm ngai khaing pakngai pui khankix heue. Nawh Cao tak teei lox salao pa koe ka ceu pui Nawh Cao khankix hu khaing piang haktiex khawmuik heue. Grawh grawng nawh, Siyiex hoik ah ti deuh yuh nin heue. ⁹ Ka daux singaix an, kix tak sang ah nin jhak heue, in mawh Siyiex ex, pa krox jun ex, Nawh Cao tak sang taoh ex heue. In mawh Siyiex, pa krox jun ex, ex tak sang koe krax gaux rhawm ka daux bwanson krax pa taoh Nawh Cao heue. ¹⁰ Grawh grawng nawh Siyiex tak sang deuh taix tix ka piang gawng in mai Nawh Cao tak sang dig meung Mawbax ka greem tix awm dig brex nghox ka daux dung phon heue. ¹¹ Nawh Cao tak nyeu taix tix ka daux sigreung kix, awm pui pa loe rawm tix kaux mai Nawh Cao tak yeen tiem ka krax pa ting rhawm ca nyau kix mai krax pa vao jhawm pa yuh kix ka taix tix heue. ¹² Nyiex tab dee lhaong pa tieb tie guh veng pex khankix, Nawh Cao tak yieh laux mai rau nawh lih mawh pa tiiem mai viex nawh hoek ka piang tiex mai rau ti tik ka daux phawng tiex heue.

¹ Ka daux singaix an, lai rhax in tak sang mawh pa rhax tix ka daux meung Yudax ah nin, ex hoik koe veng pa kaux cong, Siyiex tak sang yuh ti deuh bwanson krax taoh pa mawh guh veng khankix mai son pa tieb tie naing khankix heue. ² Siviex veng khankix, sonsang kieh ceu pui pa rahsee mai pa kaux sijax khankix laig heue. ³ Ka pui pa deuh rhawm tix ka Maix, Maix tak priex nawh ka daux krax pa nhim, mawh kheu nawh een rhawm tix ka Maix heue. ⁴ Een rhawm tix ka Siyiex leeing ju, mawh kheu Siyiex, mawh dee een rhawm pa kaux leeing ju heue. ⁵ Nawh Cao kieh pui pa ot ka dee lhaong khankix rau ka dee tiiem, veng pa ting lhaong, Nawh Cao yieh laux yeen tiem tom hoek ka tiex, Nawh Cao kieh nawh rau tom hoek ka daux phawng tiex heue. ⁶ Nawh tak kham krax pa dig ka caong, pa mawh caong pui pa hot pa shia mai caong pui pa cud cha khankix tak dig ti hu piang nawh heue." ⁷ Daux krax hu pui rahsee mawh pa rahsee heue. Siyiex pa kied rah kied see eue, Maix hoik cox krax hu pui pa rahsee sidawng heue. ⁸ Siyiex eue, ka daux krax prawng ciyang Maix khankix, ex hoik krox jun ka son Maix heue. Krax pa koe rhawm rhi yix, mawh son ceu kaux Maix mai son krax pa doh keud ka Maix heue. ⁹ Yam ponsawm, rhawm rhi aux sawg ka maix, yam ponngawb khwan aux sawg ka Maix heue. Mawh kheu yam ciyang Maix ka piang haktiex, can pui pa ot ka piang haktiex khankix, tak sang gau grawng krax pa rahsee heue. ¹⁰ Viang bwanson mawh pa hoik yuh tix ka pui pa caox caig kawx, nawh tak ang lai gau ti tawng krax pa rahsee heue. Ka daux haktiex koe krax pa rahsee kawx, nawh tak yuh krax pa ang rahsee mai tak ang lai koe krax jhak ka min sibrawm kwang Siyiex heue. ¹¹ Siyiex eue, viang Maix hoik yaog taix ix kawx, kix ang cu ti jhak ti simi, viang mawh nan, kix tak yaox mai koe krax kaig tua, ka hoik koe rhawm rhi Maix ka pui khankix; ngu tak sang gleeing ti tik ka pui koeng Maix khankix heue. ¹² Siyiex eue, Maix tak sang tawx krax pa nhim ka son yix, grawh grawng nawh, Maix hoik yuh ti tawx kaing yix khawmuik ka daux yix heue. ¹³ Siyiex eue, lheu khaing Maix simiang tang kaux hoik koe krax pa kwang ka piang yix, viang mawh nan, yix tak yuh krax yaogyaw ka ceu kaux Maix nong nong heue. ¹⁴ Kix hoik yum mai ang lai deeh kaoh im, kix hoik ot daux simeeig mai ang lai pon tix deeh kaoh, mawh kheu Maix hoik ciyang ka kix mai hoik yuh kix laux leeing mai hoik yuh min ceu kaux kix grai grup heue. ¹⁵ Siyiex eue, Maix hoik kieh ceu pui khankix pre haoh hun heue. Kheu hoik yuh Maix ceu pui, pre haoh hun, Maix hoik ting min pakngai kah mai hoik kieh mee haktiex Maix vieh va kah heue. ¹⁶ Siyiex eue, ka daux krax pa kha rhawm, kix hoik greed tix hoek ka Maix, kix hoik viex rhawm rhi tix rawg bwan, yam hoek krax pa sidiex gau Maix ka piang kix heue. ¹⁷ Awm saux bun koe kaux yam dex sang keh kawn tix mai nawh riag yo kheu saux tix, Siyiex eue, yix hoik ot ka plak sivoe ngai Maix awm an heue. ¹⁸ Yix hoik sax koe kaux mai hoik kham krax saux krax ngia kawx yix hoik awm pa keh bhaung heue. Yix ang sax yuh krax taoh pie tix ceu kawx ka piang haktiex mai can pui pa ot ka piang haktiex khankix ang nyang bax goh heue. ¹⁹ Pui yum cie Maix tak deeh im ju mai tokaux yum kix kawx deeh kaoh heue. Pex pa ot ka daux phawng tiex khankix eue, siduad mai ah lai rhax heue. Grawh grawng nawh, rawm ciex Maix, mawh pa awm rawm ciex pa koe ka piang rib mai haktiex tak deeh plih pui yum lih heue. ²⁰ Pui aux khankix eue, hoek heue, laig ka daux lawg plak daux pex mai nyeep ti deuh siviex pex heue. Mox tokaux cao pex been tivud ticu, tom hoik luan krax song rhawm Nawh Cao heue. ²¹ Grawh grawng nawh, jhak heue, Siyiex lih hoek khaing dee ot Nawh Cao sonsang ciyang ka can pui pa yuh phimap phighram ka piang haktiex heue. Haktiex tak paoh ti jhi nham pui ka Nawh mai tak ang lai kheem ti mox pui pa pah tix yum ka daux Nawh Cao tix bawg heue.

¹ Ka daux singaix an Siyiex tak teei vaig lawm pa kaux cong Nawh Cao pa ting mai pa koe riang mai ciyang ka siuing Levitan (Goe rawm) pa phai hu mai siuing Levitan pa kawk vawk tix mai Nawh Cao tak sang pah siyawng pa ot ka daux rawm sigrit sigra heue. ² Ka daux singaix an, rhax lai ka son Nawh, pa mawh grawng sipeem plix siiet pa koe rawm plix siiet kah heue. ³ Aux pa mawh Siyiex pau rien nawh, Aux see rawm ka nawh ku bawg yam, son ang pui lai pon chuh ka nawh pie tix kaux kawx Aux pau rien nawh ku singaix heue. ⁴ Krax song rhawm Aux ang lai koe, mawh pui mawx pa hu deuh yeem kat heeik mai pang kat lawm khankix ka plak sivoe Aux ka daux biang naing lie? Aux tak hu laig ti puing ka kix Aux tak sang gleeing ti tik kix tau ka ngu heue. ⁵ Phan ang mawh nan, kieh nawh een rhawm tix ka riang rao Aux, sonsang yuh nawh paox pie mai Aux mai nawh tak yuh paox pie tau mai Aux heue. ⁶ Ka daux singaix khaix in sax num riah Yakop tak sau tix kaux cong, ceu pui Isarelax khankix tak glaoh mai pruh tai tix mai naog yuh ka piang haktiex ka plix tix heue. ⁷ Mawh hoik sax sivied Nawh Cao ka ceu pui Isarelax khankix, awm hoik sax sivied Nawh Cao ka pui an kix, pa hoik sivied ka nawh lie? Phan ang mawh nan, mawh hoik sax pah Nawh Cao kix yum, awm krax pah pui an kix, pa hoik sax pah ka nawh lie? ⁸ Ka daux pa ploi Maix kix luan dee singai, mawh krax pa simah simiang tau mai kix ceeix khaing, Nawh Cao gah ti tik kix ka bhaung pa kied ting Nawh Cao ka daux singaix phlu bhaung plak lih singaix ti hoek heue. ⁹ Mawh kheu nan phimap phighram ceu pui Yakop tak mawh pa pon krax pluat ploi mai in mawh bwanson pa viex luan ka phimap phighram nawh, yam yuh nawh lon simaox khu dee tan khankix, awm simaox ceed pa hoik tawk tix phawng, tom ang riang rao pa mawh khaox Asherax khankix mai khu dee tan nyawng bhawng lai pon ti kaoh cung heue. ¹⁰ Viang mawh nan veng pa kaux cong an, tak mawh pa yiien hu pui, dee ot dee koe khankix mawh pa tik pa vud tix mai pa hoik prah tix awm daux tiagtu heue. Kawn mawie iak tak rhiex ka dee an mai noi tix ka dee an mai ih ka nyoig khaox heue. ¹¹ Yam hoik kroh hu kak khaox, kix tak mawh pa raig ti tik, bun tak hoek mai keeig an kix ka ngu, grawh grawng nawh, an mawh ceu pui pa ang koe krax tawng heue. Mawh kheu nan, Nawh Cao pa hoik phan ti deuh kix, tak ang lai koe krax pa caux rhawm ka piang kix mai Nawh Cao hoik yuh kix koe pakpeung, tak ang lai jhi bwanson tix ka piang kix heue. ¹² Pex pa mawh ceu pui Isarelax khankix eue mai hoek ka daux singaix an, Siyiex tak khrawm ti teei plix khaox Nawh khankix, jah khaing ka rawm klawng ting Yupharetix, tom hoek ka rawm klawng iak Ejiptux mai pex tak mawh pa kraix khrawm tix heue. ¹³ Ka daux singaix an tak phlu lox teettawng pa ting sinum mai kix pa tak sang grai grup ka daux haktiex Asurix khankix mai kix pa hoik tik vud tix ka daux meung Ejiptux, tak bleeh tix hoek mai kix tak krup Siyiex ka piang gawng singax singeh pa koe ka daux veng Yerusaliem heue.

¹ Kieh krax kha rhawm koe ka pui ceep mhok khri pa ting rhawm ca nyhau, pui Epharem pa pleeng tom yoek ka plai mai ka min pakngai mhawm grang pa fit awm pruh tai, pa ot ka choek gawng daux lung pa mawh pui pa chax nie luan yoek ka rawm plix siiet. ² Jhak heue, Siyiex koe pui tix kaux pa ting riang mai pa ting siawp, awm bhaung ting lih pre, pa mawh bhaung ting pa yuh krax laux leeing, awm kheem rawm ting mai pa tak sang viex rau ka piang tiex ka plawng taix tix. ³ Pui ceep mhok khri pa ting rhawm ca nyhau pui Epharem pa pleeng tom yoek ka plai tak dig kix ka greem caong, ⁴ min pakngai mhawm grang pa fit awm pruh tai, pa ot choek gawng daux lung, awm plix ruh liang ti plix sivoe rung praix, yam yaox pui ka mai teei ti ih yam hoek ka daux taix nawh. ⁵ Ka daux singaix an Siyiex Cao kru naing raoma tak mawh mhok khri min pakngai mai mhok khri pa mhawm grang ka pui pa kawn deuk ka pui Nawh Cao, ⁶ Mawh khwan pa rahsee ka nawh cao ngawm ti prawng ca mai mawh riang rao ka pui pa pheet tix puing pui koeng tom hoek ka diang siviex. ⁷ Kix hoik lud kheu rawm plix siiet mai lud krax kheu plai khien, cao giex kaing li mai cao jhai khankix hoik pleeng tix ka rawm plix siiet mai hoik lud kheu plai khien mai hoik lud loe ka gumlox pa plak jhi kieh yaox mai kix sideeing ti goh ka krax prawng ca. ⁸ Peen sawm khankix hoik naog ka hao mai hoik seeing ku sidah. ⁹ Nawh tak gau ti tawx pingnya ka pui mawx, nawh tak sigrhah pui mawx tawng ka grawh grawng, mawh gau ka pui prah teeih mai ka pui pa teei khaing naok miex nawh lie? ¹⁰ Gumlox pingnyap baox ka piang gumlox pingnyap mai gumlox pingnyap ka piang gumlox pingnyap, tix grawng rhoi baox ka piang tix grawng rhoi mai grawng rhoi ka piang grawng rhoi tin ceeix mai tan ceeix. ¹¹ Nawh Cao tak teei jheeh pui kle, dak pui pheem mai sidiex ka pui in khankix, ¹² Nawh Cao ah nin ka kix, in mawh ceu pa laux lee tix, pa sang kieh pui pa taug pa mao laux lee tix mai in mawh pa nyawm rhawm, viang mawh nan kix ang lai nghiet kah. ¹³ Mawh kheu nan gumlox Siyiex hoik koe ka piang kix awm in, gumlox pingnyap baox ka piang gumlox pingnyap mai gumlox pingnyap ka piang gumlox pingnyap, grawng rhoi baox ka piang grawng rhoi mai grawng rhoi ka piang grawng rhoi, tin ceeix mai tan ceeix, yam hu kix goh dang riex, hoik pot, hoik krix daux kie mai pon giex kah. ¹⁴ Mawh kheu nan pex pa mawh pui ot ka veng Yerusaliem pa chix naknon ang koe ceu eue, nghiet ka gumlox Siyiex. ¹⁵ Mawh kheu pex hoik ah nin, yix hoik yuh sijax mukheu tau mai krax yum mai yuh paox pie tau mai meung yum, yam hoek kheem pa kha rhawm tak ang hoek ka yix, yix hoik een rhawm ka pie lhien mai hoik mox tix ka ceu pa giex going. ¹⁶ Mawh kheu nan Siyiex ah nin, "Jhak heue, Aux hoik deuh lon simaox ka piang gawng Zion son riah jaong num, pa mawh lon simaox pa hoik cheuk cheu ti yaox mai pa mawh riah jaong num ka daog pa kaux cong, simaox pa koe ngawh jum mai pa mawh kaing ka daog, can pui pa een rhawm ka lon simaox an tak ang lai nied ti ki. ¹⁷ Aux tak yuh pa rahsee kieh mawh maox pa tiag mai yuh pa mawh meh kieh mawh kla maox pa tiag. Mu pre tak kieh pa caox caig laux leeing mai rawm tak kheem ka dee mox kix tix. ¹⁸ Sijax mukheu yuh pex tau mai krax yum, tak laux leeing mai pa khaw rhawm maix ti yuh paox pie tau mai meung yum, tak ang kaux cong, yam hoik luan krax kha rhawm an mai an tak dig ka pex. ¹⁹ Yam hoek an ku bawg, an tak teei pex hu, mawh kheu an tak hoek ku ngawb, ku singaix jheung jheung, yam hoik tawng ka an tak lih mawh ceu pa yaoh pa lhat. ²⁰ Mawh kheu ngaing ku it, ang lai kub nyat tix kah, mai prux lhop kawx mawh pa sikhawp ang lai kub lhop tokaux tix kah. ²¹ Mawh kheu Siyiex tak yaog ti kaoh awm pa hoik lih mawh ka piang gawng Perazem, Nawh Cao tak song rhawm, awm pa hoik lih mawh ka daux lung Gibaong, sonsang pon yuh Nawh Cao kaing jhaw tix, kaing jhaw Nawh Cao mawh pa daox am, sonsang pon yuh ka kaing jhaw Nawh Cao mawh pa daox deng ka. ²² Yam in paw yuh ti mawh pui pa ang koe cee koe cak, phan yuh nan, lhat krax mat krax lheut lang teung kin ka pex. Mawh kheu aux hoik mhong khaing Siyiex, pa mawh Siyiex cao kru naing raoma, tak yuh haktiex laux leeing khawmuik. ²³ Daong yhaok tix mai nghiet ka lox aux, nghiet mai priex ka lox aux. ²⁴ Pui thai kaung thai leeing singaix sonsang sum tix simie lie? Mawh toi nawh lon tiex ku jheeng lie? ²⁵ Khaix hoik khre yuh nawh kaung an mhawm mhawm, mawh ang nawh rhuat simie taux ki mai simie taux kila mai sum simie nghox ca tia mawx tia an mai sum nghox ca lang sidax ka dee hoik cox khre tix mai sum sivawng ka hawt praok kaung ang mawh lie? ²⁶ Mawh kheu hoik tawx Siyiex krax chix keud ka nawh mai Siyiex gau ka nawh. ²⁷ Simie taux ki an ang lai dig tix ka phia mai simie taux kila ang lai kling tix ka ling lawx, mawh kheu nan, simie taux ki pah tix ka khaox puat mai simie taux kila pah ka gawng saux. ²⁸ Nghox ca pa sang yuh blah, tak krid nawh phawng, viang mawh nan, ang lo ti dig sijheeng, viang krid an ka ling lawx brung tix kawx ang lai chix kie yuh nghox. ²⁹ In kawx mawh pa kaoh khaing Siyiex cao kru naing raoma, pa daox am kah mai pingnya Nawh Cao ting lhaong heue.

¹ Kieh pa kha rhawm koe ka veng Arelax pa mawh veng Yerusaliem mai ka veng Arelax pa mawh veng ot simiang Davit, kieh num hoik tix num gawp paox tix mai kieh pawie lai loh ti koe sijheeng. ² Aux tak kieh veng Arelax khi rhawm, laux rhawm mai ngia ngheeik mai veng an tak awm veng Arelax sivoe ngai Aux. ³ Aux tak deuh tab hawt vung viang maix mai lai lawm maix ka guh tab. ⁴ Maix tak krai lox khaing dee raux haktiex mai lox ah maix tak lih khaing dee tiiem daux phawng tiex, lox maix tak lih khaing tiex, awm lox phi mai lox pa sup siep maix tak lih khaing daux phawng tiex. ⁵ Pui koeng Pa haoh hun maix, tak awm phawng tiex, pui pa lhat graung maix, tak awm kam pa tah hu sidah. an tak lih mawh dom mawx dom an. ⁶ Siyiex cao kru naing raoma, tak hoek fi ka maix khaing, sinum praix, khaing tuk kla reem, khaing bhaung ting lhiex ting mai bhaung keu kang lux mai khaing rao ngu pa koe krax laux leeing. ⁷ Pui hun meung haktiex tak puing ka veng Arelax, pui khawmuik pa puing ka nawh mai ka nyiex tap nawh, kieh nawh laux rhawm, an tak awm ca maox ka daux riang susai ponsawm; ⁸ Tak awm pui cai rhawm pa ca maox tix sawm, yam siduad, nawh kawn cai rhawm ang nyang sak, phan ang mawh nan awm pui sang nyaux rawm pa camaox ti nyaux rawm, yam siduad nawh kawn awn riang mai ghok nawh kawn kroh, pui hun piang haktiex pa puing ka gawng Zion tak awm an heue. ⁹ Kieh ot yawg mai kieh koe krax pa daox am, kieh tokaux tix dug mai lih mawh pui dug. Kix hoik yoek, viang mawh nan, ang mawh ka rawm plix siiet, kix hu tu tiex, viang mawh nan, ang mawh ka plai khien. ¹⁰ Mawh kheu Siyiex hoik sau khwan pa kied lhiak it ka pex mai hoik thox ngai pex pa mawh cao jhai khankix mai hoik tawb kaing pex pa mawh cao pa grux yaox. ¹¹ Riieng susai pa yaox pex, awm gumlox pa hoik tawk cum ka mai tawx ka pui pa chix phat lai ah nin "Phat yaox ka lai in, "nawh ah nin, "Aux ang chix phat, mawh kheu koe cum ka. ¹² Kix tawx phuk lai an ka pui ang chix phat ah nin, "Phat yaox ka lai in, "Nawh ah nin, aux ang chix lai." ¹³ Siyiex ah nin, "Pui ceu in yungyi Aux ka siyieb jheeh tix, viang mawh nan, rhawm rhi kix singai khaing Aux mai kix krub ka Aux giex going, kheu nghiet kix lox been pa yuh kawn pui. ¹⁴ Mawh kheu nan, jhak heue, Aux tak baox yuh ceu pa kied daox kied am, ka sinax ceu pui in, pa mawh kaing pa kied ting lhaong mai pa daox am; pingnya pa koe pui pa koe pingnya tak grai tak grup mai krax pa tawng pa yung pa koe krax pa tawng pa yung pui tak tawb tak mox tix." ¹⁵ Kieh krax kha rhawm koe ka pui pa keud pa raux pa mox mai pa keud ti yuh kaing dee glip khaing Siyiex mai kix ah nin, "Mawh pui mawx pa yaox ka ex mai mawh pui mawx pa tawng ka ex lie?" ¹⁶ Pex hoik deeh pluk pliak ti yuh kaing gah, khex keud pex cao yuh aw mawh tiex glaox lie? Kraung shiao pa hoik yuh tix khex chix deeh ah nin ka cao pa yuh nawh ang bax yuh ka aw, phan ang mawh nan, khex chix ah kraung pa hoik yuh ka cao pa yuh tix, nawh ang koe krax tawng lie? ¹⁷ Mawh ngie tivud khaing Lebanon tak tieh ti mawh tong kaung plix khaox mai tong kaung plix khaox deeh mawh tiag nong ang mawh lie? ¹⁸ Singaix an, pui lheet tak mhong gumlox pa koe daux phuk lai in mai pui dug ngai tak chix yaox khaing pa pupi daux pa vhaik. ¹⁹ Pui pa awn rhawm tak koe krax gaux rhawm daux Siyiex mai pui hot tak gaux rhawm ka daux pa singax singeh Siyiex ceu pui Isarelax. ²⁰ Mawh kheu pui pa lhat graung pui ka tak grai grup, pui pa jhax lawg hoik laux leeing mai pui pa jawm ti yuh pa caox tak tat ti tik kah. ²¹ Pui pa kieh see koe ka pui tang kaux kheu lox tix mai hoik taong ti deuh kie ka daux diang siviex, ka pui pa ang koe dee lud mai yuh pa ang mawh ka pui rahsee. ²² Mawh kheu nan, Siyiex pa hoik taoh Abraham ah nin ka grawng pa dex dawd mai nyiex ma Yakop "Yakop tak ang lai baox kaig tua mai ang lai baox laux pakngai. ²³ Mawh kheu yam yaox nawh ka kawn praix tix, pa mawh kaing yuh Aux ka taix tix, ka sinax nawh, kix tak yungyi ka ceu kaux Aux mai nab yam ka pa singax singeh Siyiex pui Yakop mai lhat graung ka Siyiex pui Isarelax. ²⁴ Pui pa lud daux khwan rhawm tak deeh doh, mai rhawm pui pa ngau tak rieb ka lox sidiex lox gau heue.

¹ Siyiex ah nin, "Kieh krax kha rhawm koe ka kawn praix pa thiang lox," "Pui pa tang yuh awm krax keud tix, ang mawh pa kaoh khaing Aux, pui pa yuh paox pie tau, viang mawh nan, ang mawh pa kaoh khaing rhawm rhi Aux, kix baox phimap ka piang phimap. ² Pui lih hu ka meung Ejiptux mai pa ang rawg mhaing ka Aux, sonsang peung pan ka daux riang rao Pharaw mai een rhawm tix ka greem veei bwan meung Ejiptux. ³ Mawh kheu nan, pa peung pan ka Pharaw, tak lih mawh krax kaig ka pex. Pa een rhawm tix ka greem veei bwan meung Ejiptux, tak lih mawh pa laux pakngai pex ka. ⁴ Viang cao yuh kaing nawh ot ka veng Zawrax mai pui cau nawh hoek ka veng Haniet kawx. ⁵ Pui ku kaux tak kaig tua ka pui pa ang tawx koe bwanson ka kix, pa ang viex krax teem mai pa ang viex bwanson tidtix, pon ngie krax kaig mai pa laux pakngai. ⁶ Grawng plak jhi ka piang totiag pa ot baoh plak seh khankix mawh inkix heue. "Khaing daux haktiex pa koe krax kha rhawm mawh inkix, sivai sangsi mhaing, sivai sangsi shiang, siuing lung mai siuing ngu pa chix po khankix, hoik mawh pa kaoh khaing an heue. Kix tak tang ti viex kraung tix khankix ka piang blawg kawn la awn mai tang kraung sinngao tix ka piang ka la uk, hu ka pui pa ang pon tawx krax pa koe bwanson ka piang kix heue. ⁷ Mawh kheu krax teem pui Ejiptux, mawh pa giex going, mawh kheu nan, Aux tom kok nawh mawh Rakhap, pa ngawm giex khaing mai pa ang koe krax chix chuh heue. ⁸ Yam in hu heue, tiem an ka piang phia tiiem, ka sivoe ngai kix mai mhai ti deuh an ka daux phuk lai, sonsang mawh mhai rug ka bawg yam pa sang hoek leeing ju. ⁹ Mawh kheu kix mawh pui thiang lox mai pa mawh kawn praix pie lhen mai kawn praix pa ang nghiet ka gumlox beenli Siyiex, ¹⁰ pui pa ah nin ka cao pa grux yaox. "Paw lai yaox heue, "Mai pui pa ah nin ka cao jhai, "Paw krai lox jhai pa mawh meh ka yix, krai ngie ceu pa nyawm rhawm ka yix, pa mawh lox jhai pie lhen. ¹¹ Lih hu khaing daux krax mai veeh khaing an, kieh Siyiex pa singax singeh pui Isarelax lih khaing sivoe ngai yix. ¹² Mawh kheu nan Siyiex pa singax singeh pui Isarelax ah nin "Mawh kheu nu nai pex ka gumlox in mai een rhawm tix ka pa yeen ya, veeh rhawm tix ka krax pa vawk mai peung ka an, ¹³ mawh kheu nan, phimap in tak lih mawh ka pex awm guh veng pa bih sang grhup, pa sang bih, yam in dom mawx dom an. ¹⁴ Nawh Cao tak kieh max awm max aw tiex, pa yuh cao aw tiex. Pa max ang koe ceu, ang lai yaox ka shiag max pa mhawm, pa sang khaw ti teei gaox ngu khaing glah ngu mai pa sang khaw ti pug rawm khaing dung rawm." ¹⁵ Mawh kheu Siyiex pa singax singeh pui Isarelax ah nin "Phan pex tieh loh tix mai ot yiien yawg, pex tak pon krax taoh, pa ot yiien yawg mai pa een rhawm, mawh riang rao pex." Mai pex ang cu ka. ¹⁶ Viang mawh nan pex ah nin, "Ang mawh! yix tak brug brung mai to," mawh kheu nan, pex tak sang yaox tix to mai pex tak baox ah, "Yix tak brug brung to phai," mawh kheu nan, pui pheet ka pex tak phai khaing pex. ¹⁷ Pui kaing rheng tak to kheu lox glhat pui tix kaux, pex ku kaux tak yaox ti to kheu lox glhat pui phwan kaux, tom sidah deuk maix tix kaux, awm rong chix ka piang choek gawng mai awm mhai ka piang ton heue. ¹⁸ Mawh kheu nan Siyiex tak krox jun ti yuh bwanson ka pex mai Nawh Cao tak jhi krax caux rhawm tix ka pex. Mawh kheu Siyiex mawh Siyiex pa rahsee pui pa krox jun ka Nawh Cao tak pon bwanson. ¹⁹ Pui pa ot ka Zion ka veng Yerusaliem eue, Maix tak ang lai baox yiiem tix bawg kawx. Yam mhong Nawh Cao ka lox yiiem pex, Nawh tak caux rhawm ka pex, Nawh Cao tak pawk ka pex yam mhong lox kok pex. ²⁰ Viang Siyiex tawx blah pa kha rhawm mai rhawm pa kham geu ka maix kawx, viang yuh nan kawx, cao gau maix tak ang lai mox khaing maix, viang mawh nan, ngai maix tak yaox ka cao gau tix. ²¹ Yam veeh maix tix plak dawm ang ah, plak gwiex ang ah, yhaok maix tak mhong lox ka plak khaix maix ah nin "In mawh daux krax mai hu krax in heue." ²² Maix tak seeing ka mau om tix ka riang rao mai riang rao saik pa om tix mai riang rao raug krub tix maix tak tik ku sidah awm kraung seeing mai maix tak ah nin, "Lih hu heue." ²³ Nawh Cao tak tawx lhiex son simie nghox pa rhuat maix piang tiex mai tawx plix nghox pa pon khaing tiex mai nghox koi tak plix mhawm mhawm, singaix an to brie maix tak sawm ka dah dee siva haoh rib. ²⁴ Mawie thai mai la thai tak ih nghox pa klu klao mai kih, pa hoik keem ka bya mai grheeng. ²⁵ Ka piang gawng lhaong kudah mai ka piang ton ku ton tak koe rawm klawng pa lih rawm tom nie singaix yam koe krax pah pa ting lhaong, yam grhup nyiex tab lhaong. ²⁶ Lheu khaing an, pa riang khix tak awm pa riang singaix mai pa riang singaix tak lheu riang aliah son, awm riang, pa riang daux aliah singaix, singaix an, Siyiex tak cox dee mat pui Nawh Cao mai pai dee saux kix, pa sivied Nawh Cao kah kix. ²⁷ Jhak heue, ceu kaux Siyiex hoek khaing dee singai, pa hax krax song rhawm Nawh Cao, ka daux paiawm ceep haok ka dee lhaong; siyieb jheeh Nawh naog mai pa song rhawm mai dak Nawh awm ngu pa gleeing. ²⁸ Bhawm Nawh Cao awm kheem rawm klawng, pa kheem tom hoek ka ngawg, sonsang grheeng kawn pui ka grheeng ceu pa laux leeing mai sau maox keu ka jheeh kix. ²⁹ Pex tak ah lai rhax, awm ponsawm pa yuh pawie pa singax singeh mai nyawm rhawm ka daux rhawm tix, awm yam phlu pui ka pi, sonsang hu ka gawng Siyiex, tom hoek ka rang ting pui Isarelax. ³⁰ Siyiex ploi lox sibrawm tix, sonsang mhong pui ka mai Nawh Cao jhi plawng taix pa koe sibrawm mai song rhawm mai rao ngu pa cap, tau mai bhaung ting, lhiex ting mai mu pre. ³¹ Pui Asurix kied lhat ka lox lih khaing Siyiex mai Nawh Cao sivied kix ka khaox gix tix. ³² Khaox gix pa ciyang, pa deuh Siyiex ka piang kix ku bawg, tak lih mawh pa tah ting tah kraung, Nawh Cao tak yuh naing ting mai kix. ³³ Hoik dawg khre rien sonsang gleeing ka baoh haktiex Tawphiet, hoik khre tix son simiang, ka dee an hoik kied raux mai kied siva, hoik pum khix mai ngu tau, bhawm Siyiex awm rawm ngu mhat pa cap ngu ka heue.

¹ Kieh krax kha rhawm hoek ka pui an, pa lih hu ka Ejiptux, sonsang mhaing krax teem mai pa deuh rhawm ka brung, pa een rhawm ka ling lawx naing brung, kheu jao haoh hun mai een rhawm ka pui naing brung, kheu kied ting riang kix mai ang jhak ka cao pa singax singeh pui Isarelax mai ang chawk ka Siyiex. ² Mawh kheu Nawh Cao koe pingnya mai tak viex saux preng hoek mai ang lai tieh gumlox tix mai tak yaog ti yuh ka nyiex ma pa yuh pa caox mai yuh ka pui pa tawx krax teem ka pui an pa yuh phimap. ³ Pui Ejiptux mawh kawn pui ang lai mawh Siyiex mai brung kix mawh nex nham, ang lai mawh khwan. Yam nyeu Siyiex plawng taix tix lih, pui tawx krax teem tak goh, pui pa pon krax teem kawx tak som mai kix tak laux leeing tau. ⁴ Mawh kheu Siyiex ah nin ka aux, awm graox sivai sangsi mai sivai sangsi awn ju ka piang kug pon tix, yam kok nawh cao liang yung tix cub hoek puing ka an, nawh ang lhat ka lox kix mai ang reeing ka lox sinum kix, kheu an, Siyiex cao kru naing raoma tak lih hoek, puing ka gawng Zion mai ka ton an. ⁵ Awm awm u sim kawn tix, awm an Siyiex cao kru naing raoma tak tieb tie ka veng Yerusaliem, Nawh Cao tak tieb tie mai taoh kah, Nawh Cao tak priex rien mai teem kah. ⁶ Pui Isarelax pa kin tieh feen eue, deeh hoek sawg ka Siyiex. ⁷ Mawh kheu singaix an, pui ku kaux tak tik riang rao mau mai riang grang khri can pa yuh tix, pa naog mai phimap pa yuh pex ka taix son tokaux tix. ⁸ Pui Asurix tak goh yum ka vaig pa ang mawh vaig cie kawn pui mai tak ih ka nawh mai nawh tak to khaing vaig mai pui awn ju yuh kaing siliex cawng. ⁹ Rang ting nawh tak to mai lhat graung mai cub simiang greem nawh tak lhat graung ka pak tix chix tix, Siyiex pa koe rao ngu ka Zion mai pa koe glah ngu ka Yerusaliem ah nan heue.

¹ Jhak heue, simiang tix kaux tak kwang ka daux pa rahsee mai simiang greem nawh tak kwang mai krax rahsee, ² tix kaux tak awm dee mox khaing bhaung mai dee tieb tix ka bhaung ting, awm rawm klawng ka dee kroh, awm veei rang ting ka haktiex pa taug pa mao. ³ Ngai pui pa yaox tak yaox sidawng mai yhaok pui pa nghiet tak mhong sidawng. ⁴ Rhawm pheem rhawm deux tak sidawng pingnya mai pui kle tak chix sikah sidawng. ⁵ Pui pheem tak ang lai kok mawh pui laoh lie mai pui siviien kawx tak ang lai kok mawh pui pa tawx pa taing. ⁶ Mawh kheu pui pheem tak sikah lox pheem mai rhawm nawh keud pa caox caig, sonsang yuh pa ang rahsee, sonsang ah lox pa lud ka Siyiex mai sonsang kieh pui cai rhawm nie lheu cai rhawm mai kieh pui pa sang nyaux nie rawm nie lheu sang nyaux rawm. ⁷ Kraung shiao pui pheem mawh pa caox, nawh keud ngie kaing pa caox, sonsang yuh pui hot laux leeing ka lox pie, viang lox sikah pui pa cud cha rahsee kawx. ⁸ Viang mawh nan, pui pa sibieh rhawm sawg ti yuh kaing sibieh rhawm mai cung sijung ka daux pa sibieh rhawm jheung jheung heue. ⁹ Bun pa ot vawd khankix eue, kaoh mai nghiet ka lox Aux, kawn bun pa ang tawng tix khi rhawm khankix eue, daong yhaok tix mai nghiet ka lox krai Aux. ¹⁰ Pex bun pa ang tawng tix khi rhawm khankix eue, khaix an tix num pex tak yaox krax khi rhawm. Mawh kheu sipeem plix siiet tak ang koe plix, bawg yam khrawm plix, plix tak ang lai hoek. ¹¹ Bun pa ot vawd khankix eue, siduad kah heue. Pex pa ang tawng ti khi rhawm khankix eue, kieh khi rhawm heue, Peeik kraung tix mai ot ka kaong mai rawd nyoi tix ka man chee rhix. ¹² Tub naok ti son ma kaung pa mhawm mai son nhu plix siiet pa hun plix. ¹³ Pang kat heeik mai pang kat lawm, tak lih koe ka haktiex pui Aux mai ka nyiex pa gaux rhawm mai ka veng pa hawt krax gaux rhawm. ¹⁴ Mawh kheu nyiex haw tak tik grham tix, veng pa khu pui kawx tak riem, grawng Awphelax mai nyiex tab lhaong, tak riem leeing ju mai mawh dee gaux rhawm la tiag mai mawh tiag rib ka son yung khankix. ¹⁵ Tom hoek bawg yam groi khwan singax khaing dee long ka piang ex mai daux tiag tu, dee lih mawh sipeem plix mai sipeem plix an, lih mawh nong khaox. ¹⁶ Khaix an pa rahsee tak koe ka daux tiagtu mai pa mawh meh ak koe ka sipeem plix khankix. ¹⁷ Bwanson pa mawh meh ak lih mawh pa nhim mai bwanson pa mawh meh ak mawh krax yiien yawg mai pa kaux cong leeing ju. ¹⁸ Pui Aux khankix tak yaox ti ot ka dah dee pa nhim mai ka dah dee lawd luan mai ka dee laux lee pa yiien yawg. ¹⁹ Lhiex pre lih yieh ka nong khaox mai yieh veng tau mai haktiex. ²⁰ Kieh pui pa rhuat simie praok rawm mai pui ploi caong mawie caong la khankix lih hu koe bwanson heue.

¹ Kieh krax kha rhawm koe ka pui pa tud rhim, viang maix ang sax yuh pa tud rhim maix mawh pui pa tud rhim, viang ang pui yuh pa tud rhim ka maix kawx, yam naox maix krax pa tud rhim maix tak kham pa tud rhim, yam hoik sidah naox maix yuh tix pa tud rhim, kix tak yuh pa tud rhim ka maix. ² Siyiex eue, caux rhawm ka yix liak, yix krox jun ka Maix, kieh plawng taix Maix mawh riang rao yix ku ngawp mai taoh yix yam yaox krax kha rhawm liak. ³ Yam lih lox sinum siaox, pui khankix to hu, yam yaog Maix ti kaoh, pui khankix prung prang rai ruat. ⁴ Kraung pa tud rhim pex, tak khrawm tix awm khrawm sido ka nghox sum pex, awm phoh sido ka piang pui, tak phoh ti ka piang an. ⁵ Siyiex mawh pa yaog ting lhaong kah, mawh kheu Nawh Cao ot ka piang dee lhaong, Nawh Cao hoik naok yuh veng Zion ka pa rahsee mai pa mawh meh. ⁶ Pingnya mai krax tawng yung, tak mawh pa kaux cong ka daux baux yam im ju maix mai pa naog ka bwanson krax taoh, krax lhat graung ka Siyiex mawh sinngao nawh. ⁷ Pui vao rhawm tak riag yo plak praix mai pui cau pa krai lox pa nhim, tak yiiem sigrien sigre. ⁸ Daux krax ting kawx hoik yiien mai ang koe pui lai ling; Nawh hoik yieh ka sijax mukheu, yuh pa ang cee ang cak ka veng, Nawh ang lai nab yam ka pui. ⁹ Haktiex koe pa khi rhawm mai pa iak riang, Lebanon hoik kaig tua mai hoik kroh fit, haktiex Sharon awm daux tiagtu mai plix khaox gawng Bashan mai gawng Kharamelax hoik yung yiang. ¹⁰ Siyiex ah nin, "Aux sang kaoh yam in," "Aux sang yaog cao tix yam in, Aux sang yaog cao tix ting lhaong. ¹¹ Pex tak nghe kam, pex tak keh nyhee, bhawm sileed pex mawh ngu, pa tak gleeing ka pex. ¹² Pui khankix tak awm simaox ceed pa gleeing tix, awm pang kat lawm pa hoik soh tix mai tak gleeing tix ka daux ngu. ¹³ Pex pa ot dee singai eue, nghiet ka kaing pa hoik yuh Aux, pex pa ot dex khankix eue, rieb ti teei ka sibrawm Aux. ¹⁴ Pui phimap daux veng Zion kawx lhat, krax yaoh hoik jhawp ti giex ka pui caox. "Mawh pui mawx daux sinax ex pa pon ot mai ngu pa hax lie, mawh pui mawx daux sinax ex pa pon ot mai ngu gleeing leeing ju lie?" ¹⁵ Nawh pa yuh kaing pa mawh meh mai sikah lox pa rahsee, Nawh pa seeing ka pa pon khaing pa yeen ya, nawh pa tieb taix tix ang teei kraung cun praok, nawh pa thox yhaok tix ang nghiet ka grawng lih nham mai pa yip ngai tix ang jhak ka pa caox, ¹⁶ Nawh tak ot ka dee lhaong, dee een nawh rhawm tix mawh nyiex tab rang pa kaux cong, tak koe pui tawx priex ka nawh, rawm nyaux nawh ang jud jai. ¹⁷ Ngai maix tak yaox ka mhawm grang simiang mai tak yaox ti jhak ka haktiex pa singai. ¹⁸ Yam doh keud maix ka pa yaoh yee, "Cao pa tiiem carang koe dee mawx? Cao pa ciang jiang koe dee mawx, cao simin ti yaox nyiex tab lhaong koe dee mawx lie?" ¹⁹ Maix ang lai yaox ka pui vao, pui caox, lox pa ang maix chix rieb dee bleeh, pui pa sikah lox pa nu maix ti nghiet tom ang maix tawng dee bleeh. ²⁰ Jhak ka veng Zion veng dee yuh ex pawie, ngai pex tak yaox ka veng Yerusaliem, pa mawh dee yiien yawg, mawh dee koe nyiex gox bwan, pa ang lai dux, rong lhak kawx ang lai toek kah mai maox vien kawx tak ang lai chix dud. ²¹ Min pakngai Siyiex tak ot ka daux veng an, pa mawh dee vieh haktiex mai rawm klawng ting an khawm ra plak, ka dee an koe reu mai reu ting lai ling baoh an. ²² Siyiex mawh cao prawng see ka ex, Siyiex mawh cao kwang ka ex, Siyiex mawh simiang ex, Nawh Cao tak taoh ex. ²³ Maox phyawk man reu maix, hoik gah, kix ang lai pon jung ka rong khaox jung man reu mai ang lai pon nih ka man reu. Kix gwieh kraung pa tud rhim ka paox tix mai pui chawh kawx tak rhim ti cie ka an. ²⁴ Ang koe pui ot ka daux veng pa ah nin, "Aux saux heue," pui pa ot ka veng an, pon krax pluat ploi ka phimap tix heue.

¹ Ceu pui kuceu eue, greed dex sonsang mhong pex ka, pui hun khankix eue, nghiet heue, kieh haktiex mai pui pa ot ka daux nawh nghiet ka, ka piang haktiex mai pa kaoh khaing daux nawh. ² Mawh kheu pa song rhawm Siyiex hoek ka piang ceu pui khawmuik mai pa meet rhawm Nawh hoek ka piang kru naing kix. Nawh Cao hoik kieh an khankix laux leeing, Nawh Cao hoik ap kix ka cao pa pah ka pui yum. ³ Pui pa pah yum khankix tak tik kix ka plak praix, tokaux yum kix tak cux sium, nham kix tak kheem ka gawng. ⁴ Can pa koe piang raoma, tak laux leeing mai raoma tak pua tix, awm bua lai. Can pa koe ka daux nawh tak grhup, awm cia lhax ruh khaing khaox tix. ⁵ Mawh kheu vaig lawm Aux, hoik nyaux tom sak ka piang raoma, jhak heue, an lih hoek sonsang ci yang ka Edommai ka piang pui pa jhax lawg Aux ka. ⁶ Vaid lawm Siyiex hoik sak ka nham mai hoik kluing ka klon bee mai ka nham kawn yung mai pex mai ka klon bee sok lax yung mhaing. Mawh kheu Siyiex yuh krax tan pa appong ka veng Bawzarax mai yuh krax pah pa kied ting ka Edom. ⁷ Mawie praix tak sikrub tau mai kix mai kawn mawie awn ju mai mawie ting riang khankix. Haktiex ot kix hoik yoek ka nham mai phawng tiex hoik kluing ka klon bee. ⁸ Mawh kheu Siyiex koe singaix pawk bix mai koe num ciyang son veng Zion. ⁹ Rawm klawng Edom tak lih mawh peeh khaox gix mai phawng tiex tak lih mawh mhat, haktiex an tak lih mawh peeh khaox gix pa cap ngu heue. ¹⁰ An tak ang lai yeet ku singaix, taox tak haok leeing ju.Tak grham an riem tix ju hoik tix ju mai ang koe pui lai ling ka leeing ju. ¹¹ Viang mawh nan klang mai goh tak rhim an mawh sinngao tix, pang plawh mai lak tak ot ka daux an mai Nawh Cao tak tuk maox yi mai kla maox tiag pa ang koe tid tix ka piang haktiex an. ¹² Ang lai koe simiang pa sang yaog mawh simiang, cao simiang kix ang lai koe ngawh koe jum. ¹³ Yeem kat tak kwah ka nyiex haw, rib tak kwah ka nyiex tab lhaong, an tak mawh dee ot sox praix mai sim kala-uk khankix. ¹⁴ Totiag tak sipub ka sox la mai pex tiag tak kok ka paox pie tix mai totiag pa hu sawm tak yaox dee laux tix mai laux lee tix heue. ¹⁵ Siuing lah ak tak yuh mheem tix tom tan mai num ti vah kawn tix tan sonsang khrawm kawn tix greem veei tix, klang preng tak khrawm ti ot giep mawx giep an tan. ¹⁶ Sawg ti yaox khaing daux phuk lai Siyiex mai phat ti yaox heue. Inkix pie tix mu kawx, tak ang koe krax cud krax cha, ang tix mu kawx tak ang koe krax cud krax cha ka son paox ku tix heue. Grawh grawng nawh, jheeh Aux hoik tawm ti deuh an mai Khwan Nawh Cao hoik kraix khrawm ka kix heue. ¹⁷ Nawh Cao hoik yuh nieb son kix mai taix Nawh Cao hoik tiag ti tawx dee ot kix ka maox kix tak pon mawh sinngao cie tix leeing ju mai ot ka dee an leeing ju heue.

¹ Daux tiag mai haktiex dee kroh, tak gaux rhawm mai haktiex mhaik, tak nyawm rhawm mai pruh tai awm pruh tai kat ngim klang. ² An tak pruh tom nie mai kied nyawm rhawm, tau mai krax gaux rhawm mai ah lai rhax. Min pakngai Lebanon mai pa mhawm grang Kharamelax mai haktiex Sharon, kix tak yaox ka min pakngai Siyiex mai pa mhawm grang Siyiex ex. ³ Kieh plawng taix iak riang koe riang mai kieh nge ngawng pa siyaung koe riang. ⁴ Ah nin ka pui pa koe rhawm lhat, "Paw lhat, teei riang tix jhak heue, Siyiex pex tak hoek mai krax pa pawk bix mai krax ciyang pa tawx Siyiex, Nawh Cao tak hoek mai taoh ka pex." ⁵ Khaix an ngai dug, tak deeh blah mai yhaok lheet, tak deeh kieh hawng. ⁶ Pui chawh caong, tak jaloh tix awm cak mai dak pa aw tak ah lai rhax. Mawh kheu rawm keud tak lih khaing daux tiag mai rawm klawng tak lih khaing daux mhaik. ⁷ Mhaik hax tak mawh rawm dung mai haktiex hit rawm, tak mawh rawm keut, ka dee it sox praix, tak mawh rib mai priem mai rib nhu oi khankix. ⁸ Krax ting tak koe tan, kix tak kok krax ting an mawh pa singax, pui pa ang singax, tak ang pon tiang ka piang krax an, pie pui daox kawx ang lud krax an. ⁹ Sivai sangsi ang koe tan, totiag vao ang hu ka piang krax an, sawg ka ceu an kawx ang lai yaox tan, Viang mawh nan, pui pa hoik pon krax taoh tak lai ling ka tan. ¹⁰ Pui pa hoik taoh Siyiex kah, tak deeh hoek mai hoek ka veng Zion mai pa rhax lai mai pa gaux rhawm koe ka piang kaing kix leeing ju, kix tak pon krax gaux rhawm mai pa nyawm rhawm mai krax khi rhawm krax ngia krax ngheeik tak luan singai heue.

¹ Ka daux num kwang simiang Hezakix ka haktiex kao pon num, Shenakherip simiang haktiex Asurix hoek puing ka veng pa kaux cong ka daux haktiex Yudax mai rhim ka an khankix. ² Simiang Asurix ploi Rabasakha hu tau mai kru naing pa ting riang khaing veng Lakhisha ka simiang Hezakix pa ot ka Yerusaliem mai nawh cung hawt taoh rawm rawng khaing rawm dung plak laong, ka piang krax ting hu ka kaung pui pa sidaux kraung. ³ Eliyakim kawn simex Hilaki, cao kwang nyiex haw, khawm Shebanax, cao tiiem lai mai Yaw A, kawn simex Asapha cao tiiem lox bang kum hoek ka nawh. ⁴ Rabashaka ah nin ka kix, yam in pex hu ah nin ka Hezakix, simiang ting pa mawh simiang Asurix, mawh een maix rhawm tix ka patix? ⁵ Maix keud ti koe riang rao sonsang puing naing, viang mawh nan, an kix mawh lox pa giex going. Yam in maix een rhawm tix ka pui mawx, sonsang tieh feen ka aux lie? ⁶ Jhak heue, maix ca kawn een rhawm tix ka gawng priem pa hoik pot in, pa mawh meung Ejiptux, phan pui deuh rhawm tix ka nawh, an tak suat ti phlat ka taix nawh, awm an Pharaw simiang Ejiptux tak yuh pui an kix pa een rhawm tix ka nawh. ⁷ Phan maix ah nin ka aux, "Yix een rhawm tix ka daux Siyiex, pa mawh Siyiex yix, "Ang an mawh dee lhaong mai khu dee tan cie Siyiex an pa hoik yieh Hezakix kah mai ah nin ka pui Yudax mai ka pui Yerusaliem, pex tak krub sivoe khu dee tan in ang mawh lie? ⁸ Hoek heue, yuh mhai rug ka cao simiang aux, simiang Asurix mai aux tak tawx brung ra rheng mu ka maix, sonsang kub brung shiao maix. ⁹ Phan ang mawh nan maix khex dak sang pon yuh cao kaing naing pa kied iak, an tix kaux khaing ka daux cub kawncau cao simiang aux khankix mai pa een rhawm tix ka pui meung Ejiptux, ka ling lawx naing brung mai pui naing brung an khankix yuh ka mawx lie? ¹⁰ Mawh hoek aux ka daux ang tix pon akhwang pa tawx Siyiex ka haktiex in, sonsang yuh laux leeing yam in lie? Siyiex hoik ah nin ka aux, haok yuh haktiex an laux leeing. ¹¹ Khaix an Eliyakim, Shebanax mai Yaw A ah nin ka Rabasakha, "Yuh bwanson sikah lox Aramix ka yix, kheu tawng yix lox an, sonsang mhong pui ot piang guh veng kah, paw krai lox Hebrie ka yix. ¹² Rabasakha deeh ah nin, "Mawh hoik ploi cao simiang aux, ka aux, sonsang hoek tix ka cao simiang maix mai sonsang sikah tix lox an kix ka maix mai ang tie mawh ka pui pa ngawm ka piang guh veng, pa tak sang ih aing mai tak sang nyaux rawm neem cao kix tau mai maix lie?" ¹³ Khaix an Rabasakha yaog ti cung mai yo lox ting plak lox Hebrie ah nin, "Nghiet ka lox simiang ting, simiang Asurix. ¹⁴ Simiang ah nin, paw kieh Hezakix pie lhen ka pex. Mawh kheu nawh tak ang pon deeh taoh ka pex, ¹⁵ mai paw kieh Hezakix yuh pex een rhawm tix ka daux Siyiex awm pa ah nawh yuh nin, Siyiex tak sang deeh taoh ti teei ex tete, veng in tak ang doh tawx tix ka taix simiang Asurix. ¹⁶ Paw nghiet ka lox Hezakix mawh kheu simiang Asurix ah nin, yuh paox pie pa khaw caw tau mai aux mai hoek tu ka aux mai pex tak yaox ti ih khaing nhu plix siiet cao tix mai yaox ti ih khaing plix ruh cao tix mai yaox ti nyaux rawm khaing rawm dung cao tix. ¹⁷ Tom hoek bawg yam teei aux pex hu ka haktiex pa awm haktiex cao pex mai haktiex haoh nghox koi mai rawm plix siiet pa khraox mai haktiex haoh blah mai sipeem plix siiet khankix. ¹⁸ Rien rhawm tix lhat Hezakix nyaw glaw ah nin, "Siyiex tak deeh taoh ti teei ex. "Mawh sax taoh Siyiex ceu pui haktiex tang dah tix kaux kaux ka haktiex cao nawh, khaing daux tawm taix simiang Asurix lie? ¹⁹ Siyiex haktiex Hamat mai siyiex haktiex Arapat khankix koe dee mawx lie? Siyiex haktiex Sepharaviem koe dee mawx lie? Mawh hoik pon taoh kix ti teei veng Samarix khaing daux tawm taix aux lie? ²⁰ Siyiex meung inkix mawh siyiex kaux mawx pa pon deeh taoh ti teei haktiex cao kix khaing daux tawm taix Aux, khex sang pon deeh taoh Siyiex veng Yerusaliem khaing daux tawm taix aux lie?" ²¹ Viang mawh nan, kix hoik yawg tix mai ang lai pawk lox nawh pie tix gum kawx, kheu jao hoik tawm simiang lox ka kix ah nin, paw pawk lox nawh. ²² Khaix an Eliyakim kawn simex Hilaki cao kwang ka nyiex haw mai Shebanax cao tiiem lai mai Yaw Ax kawn simex Asapha cao tiiem lox bang kum, riah kraung ceep tix mai hoek ka Hezakix mai krai nawh mhong lox pa hoik ah Rabasakha heue.

¹ Yam mhong simiang Hezakix ka lox an, nawh riah ka kraung ceep tix mai lhop tokaux cao tix ka chee rhix mai hu laig ka daux nyiex bwan Siyiex. ² Khaix an nawh ploi Eliyakim cao kwang ka nyiex haw mai Shebanax cao pa tiiem lai mai kuad song cub cao giex kaing li khankix pa lhop chee rhix hu ka cao jhai Isayax kawn simex Amok. ³ Kix ah nin ka nawh, "Hezakix ah nin in singaix mawh singaix pa kha rhawm pa kham krax pa sivied ti gau mai pa kham lox salao singaix pa awm hoek bawg yam sang keh kawn ngie, viang mawh nan, ang lai koe riang rao tix keh. ⁴ Kieh Siyiex pa mawh Siyiex maix mhong ka lox pa hoik krai Rabasakha, pui pa ploi cao simiang nawh, pa mawh simiang Asurix sonsang hoek ah lox salao ka Siyiex pa im ju pa mawh Siyiex maix mhong ka gumlox in mai tak sang deeh pawk tix ah ka, mawh kheu nan maix rawg bwan son pui pa kawn deuk khankix. ⁵ Yam hoek kawncau simiang Hezakix ka Isayax. ⁶ Isayax ah nin ka kix, "Ah nin ka cao simiang pex, Siyiex ah nin, paw lhat ka lox pa hoik mhong pex mai lox salao ah kawncau simiang Asurix ka Aux. ⁷ "Aux tak kieh rhawm tang ceu laig ka daux nawh mai nawh tak mhong lox satang mai deeh ing ka haktiex cao tix mai Aux tak kieh nawh yum ka vaig lawm ka daux haktiex cao nawh. ⁸ Rabasakha deeh ing mai yaox ka puing simiang Asurix veng Libana, kheu hoik mhong nawh lih simiang khaing veng Lakhisha. ⁹ Simiang mhong grawng krai pui Tiraka simiang Ietiopiya, "Sang hoek puing ka nawh. "Yam mhong nawh ka an mai ploi cao cau khankix hu ka Hezakix ah nin, ¹⁰ "Pex ah nin ka Hezakix simiang Yudax, ka pa ah nin, paw kieh Siyiex pa een pex rhawm tix pie lhen ka pex mai deeh ah nin, veng Yerusaliem tak ang ap tix ka daux taix simiang Asurix. ¹¹ Jhak heue maix hoik mhong yuh simiang Asurix khankix haktiex an laux lak pak leeing, mawh pon taoh maix tokaux tix lie? ¹² Mawh hoik taoh Siyiex pui haktiex an, ka pui an kix pa hoik yuh cub keeing aux nawh laux leeing, pa mawh pui Gawzan, pui Haran, pui Rezap mai pui Edim khankix pa koe ka veng Telasa lie? ¹³ Mawh koe simiang Hamat, simiang Apat, simiang Sepharaviem, khawm veng Hena, veng Iva khankix dee mawx lie?" ¹⁴ Hezakix pon lai khaing cao cau khankix mai phat ti yaox an mai Hezakix hu ka nyiex bwan Siyiex mai plak lai an plak sivoe Siyiex. ¹⁵ Hezakix rawg bwan ka Siyiex ah nin, ¹⁶ "Siyiex Cao kru naing raoma, Siyiex ceu pui Isarelax mai Siyiex pa ngawm ka piang riang Cherubin eue, Maix Cao mawh Siyiex ka piang meung haktiex inkix khawmuik tix kaux khaing, Maix Cao hoik phan raoma mai haktiex. ¹⁷ Siyiex eue, daong yhaok Maix Cao mai nghiet liak! Siyiex eue, blah ngai Maix Cao mai jhak liak mai nghiet lox Shenakherip pa ploi pui hoek ah lox salao ka Siyiex pa im ju. ¹⁸ Siyiex eue, simiang Asurix khankix hoik yuh ceu pui khankix mai haktiex kix laux leeing tete, ¹⁹ "hoik tik siyiex krub kix ka daux ngu, mawh kheu ang kix mawh siyiex mai mawh ngie kaing taix yuh pui ka khaox mai lon simaox, mawh kheu nan, kix tom yuh laux leeing. ²⁰ "Mawh kheu nan, yam in Siyiex pa mawh Siyiex ex eue, taoh yix khaing tawm taix nawh liak, sonsang tawng meung haktiex ku meung ka mawh Maix Cao Siyiex, pa mawh Siyiex tix kaux khaing." ²¹ Khaix an Isayax kawn simex Amok ploi pui hu ah nin ka Hezakix, "Siyiex pui Isarelax ah nin, mawh kheu hoik rawg maix bwan ka Aux, son grawng Shenakherip, simiang Asurix, ²² in mawh gumlox pa krai Siyiex grawng pa dex dawd nawh mai bunk rih Zion hoik nu nai ka maix, hoik nyiah sibriem ka maix. Kawn bun veng Yerusaliem hoik vud vied kaing tix ka plak khaix maix. ²³ Mawh jhax lawg mai sibriem maix ka pui mawx lie? Mawh briah maix ka piang pui mawx mai blin maix ngai tix ka pui mawx? An kix maix hoik yuh ka Siyiex pa singax singeh pui Isarelax. ²⁴ Maix hoik kieh kawncau tix, sibriem jhax lawg ka Siyiex ah nin, aux hoik viex ling lawx naing brung tix tom nie, haok ka gawng dee lhaong, tom hoek ka choek gawng Lebanon. Aux kid ti tik khaox Arit pa lhaong mai khaox gix pa kied mhawm nawh, Aux tak laig ka dah dee pa kied lhaong nawh mai ka daux nong pa kied haoh plix nawh. ²⁵ Aux hoik kaong rawm daux mai nyaux rawm mai aux tak kieh tiag caong tix, kroh yuh rawm klawng Ejiptux khankix. ²⁶ Ang maix sax mhong hoik khre aux ka ceu an tom didix, Aux hoik yuh ti deuh jah tom didix, tom hoek yam in ang mawh lie? Aux hoik kieh maix yieh veng pa kaux cong khankix laux leeing, lih mawh pum simaox pa laux leeing. ²⁷ Pui veng an hoik iak riang, hoik kaig mai laux rhawm, kix hoik lih mawh awm khaox ka tong kaung mai awm rib klai awn kwah ka piang nyiex mai awm kawn nghox pa fit sivoe sang hwan. ²⁸ Aux tawng ka dee ngawm maix mai dee lih hu mai dee laig maix mai pa song rhawm maix ka Aux. ²⁹ Mawh kheu song rhawm maix ka Aux mai pa ting rhawm ca nyhau maix, hoik hoek ka daux yhaok Aux, mawh kheu nan Aux tak cieh meeh maix mai sau maox keu ka jheeh maix mai Aux deeh kieh maix ing ka krax hoek tix. ³⁰ "In tak mawh mhai rug ka maix, daux num in pex tak ih khaing plix pa tang kwah mai daux num ra tak yaox ti ih awm an, daux num loe tak yaox tix rhuat simie mai vawg nghox mai yuh sipeem plix siiet mai ih ka plix an. ³¹ Pui Yudax pa glawd pa kawn deuk khankix tak kawn sau num riah tix tom plak greem mai plix ka plak piang, ³² pui pa kawn deuk tak lih khaing veng Yerusaliem mai pui pa glawd tak lih khaing gawng Zion, mawh kheu Siyiex cao kru naing raoma koe rhawm ti yuh in. ³³ Mawh kheu nan, Siyiex ah nin ka grawng pa dex dawd mai simiang Asurix, nawh tak ang yaox ti laig ka daux veng in mai ang pon puing te tix taix kawx ka daux veng mai ang pon hoek sivoe veng an tau mai kraung pa tiebtie mai ang pon sang guh veng pa sang puing veng an. ³⁴ Hoek nawh krax mawx nawh tak deeh ing krax an mai nawh tak ang pon laig ka daux veng Siyiex ah nin, ³⁵ Aux tak tiebtie ka veng in kheu jhak Aux pakngai tix mai pakngai siliex Aux Davit. ³⁶ Kawncau Siyiex lih hu mai pah pui pa ot ka daux tab pui Asurix tix sien daix mheen mai phwan rheng kaux mai yam yaog kix tix kaoh ponngawb caocao, jhak heue, kix yaox tokaux pui pa yum khankix. ³⁷ Sanakherip simiang Asurix hoik lih hu mai ing ot ka veng Nineve. ³⁸ Yam kawn rawg nawh bwan ka daux nyiex bwan Nisarot pa mawh siyiex nawh, kawn simex nawh Adrameliet mai Shareza mug nawh yum ka vaig mai kiex to ka haktiex Ararat. Kawn simex nawh, Esarahadon kwang haktiex tang nawh heue.

¹ Yan an Hezakix saux tom dex sang yum mai cao jhai Isayax kawn simex Amok, hu ah nin ka nawh, "Siyiex ah nin, tawm lox ka pui nyiex ma maix, mawh kheu maix tak sang yum mai ang lai im." ² Khaix an Hezakix veeh ngai tix plak ding mai rawg bwan ka Siyiex ah nin, ³ "Siyiex eue, yam in doh keud ka aux, mawh kheu aux im ju plak sivoe ngai Maix Cao, ka daux pa kaux sijax mai khawm rhawm mai yuh pa mhawm ka plak sivoe ngai Maix Cao. "Hezakix yiiem sigrien sigre. ⁴ Khaix an gumlox Siyiex deeh hoek ka Isayax ah nin, ⁵ "Hu mai krai ka Hezakix, Siyiex, Siyiex keeing maix Davit ah nin, Aux hoik mhong lox rawg maix bwan, aux hoik yaox lih rawm ngai maix mai Aux tak baox toe ju maix kao phwan num. ⁶ "Aux tak taoh ka maix mai veng in khaing tawm taix simiang mai Aux tak sang tiebtie veng in." ⁷ "In tak mawh mhai rug ka maix, khaing Siyiex, pa sang yuh Siyiex ceu in, awm pa hoik deuh Nawh Cao sijax mukheu. ⁸ Jhak heue, Aux tak sang kieh veei singaix ka piang nari cie Ahap deeh plak khaix tix kao taix, awm an, veei singaix kawx deeh plak khaix tix, kao taix ka piang nari. ⁹ In mawh lai pa tiiem Hezakix simiang Yudax, yam hoik moi nawh khaing saux tix. ¹⁰ Aux ah nin, "Ka daux bawg yam greung ju aux, aux tak hu ka siviex meung yum, aux hoik tik singaix num pa kawn deuk ju tix." ¹¹ Aux ah nin, aux tak ang lai yaox ka Siyiex ka haktiex ot pui pa im ju, Aux tak ang lai yaox pui tix kaux kawx, ka daux cub pui haktiex. ¹² Dee ot aux hoik gah tix singai khaing aux awm nyiex gox pui pa liang yung. Aux hoik bua ju tix awm man bua, Nawh Cao hoik rhip ti tik aux khaing kraung kaing taing, jah pon singaix tom hoek ponsawm, Maix Cao hoik kieh aux sidauh. ¹³ Aux hoik keud ti yaox tom hoek plak ponngawb, mawh kheu nan, Nawh Cao hoik raig ti tik si-ang aux khankix khawmuik awm sivai sangsi heue. Jah khaing plak ponngawb tom hoek ka plak ponbo, Nawh Cao hoik kieh aux sidah sidu heue. ¹⁴ Aux ah lox tix awm sim sivaig mai sim tiet tiao, aux hoik doe awm yiiem sikaux, ngai aux hoik awn riang kheu maong ti jhak plak piang. Siyiex eue, Aux hoik kham geu krax pa yeen pa ya, tiebtie ka aux liak! ¹⁵ "Aux tak sang ah ka mawx lie? Nawh Cao hoik yuh awm sijax mukheu pa tawx Nawh ka aux. Kheu hoik teek ka rhawm rhi aux, num singaix ju aux tak hu. ¹⁶ Siyiex eue, kawn pui yaox tix im ju mai ju khwan aux kawx im jao ka daux ceu in, kieh aux moi mhawm mhawm mai kieh aux im ju. ¹⁷ Aux hoik moi khaing pa kham jhawm saux mai hoik caux rhawm ka ju aux, taoh aux khaing daux pa laux leeing, Maix Cao hoik tik phimap aux ka plak khaix aux. ¹⁸ Mawh kheu meung yum ang chix ting bwanson ka Maix Cao, meung yum ang chix yaogyaw ka Maix Cao; pui pa lih hu ka meung yum ang chix koe krax keud pot jun pot ka pa kaux sijax Maix Cao. ¹⁹ Pui im ju, pui im ju, nawh yaogyaw ka Maix Cao, awm pa yuh aux ka daux singaix, keeing kieh kawn praix tix tawng ka pa kaux sijax Maix Cao. ²⁰ "Siyiex taoh ka aux mai ex tak ah lai rhax mai ting cie aux, ka daux nyiex bwan Siyiex leeing lang ju ex. ²¹ Isayax ah nin, kieh kix teei blah plix ruh tix lon mai klu klao mai puag ka dee saux nawh tak moi ka. ²² Hezakix chawk ah nin, "Mawh koe mhai rug patix, ka sang haok aux ka nyiex bwan Siyiex lie?

¹ Yam an Merawdak Baladan kawn simex Baladan simiang Babulon ploi pui tawx lai mai totaix ka Hezakix, kheu hoik mhong saux nawh mai hoik deeh moi. ² Hezakix nyawm rhawm kheu kix mai jhi kix yaox nyiex krao sinngao nawh, pa mawh mau, khri mai pa sioe bhawng mai rawm bee kraix pa ngawh mai nyiex krao kraung naing mai hoik jhi kix yaox ka sinngao, ka daux nyiex nawh mai haktiex kwang nawh khawmuik, pa ang Hezakix jhi kix yaox ang lai koe pie tix ceu kawx. ³ Khaix an cao jhai Isayax hu ka simiang Hezakix mai ah nin ka nawh, mawh ah pui an kix patix, mawh kaoh kix khaing dee mawx hoek ka maix lie? Hezakix deeh ah nin, kix hoek khaing haktiex pa kied singai khaing Babulon. ⁴ Isayax baox ah nin mawh hoik yaox kix patix ka nyiex maix lie? Hezakix deeh pawk ah nin, "Kix hoik yaox can pa koe daux nyiex aux khawmuik, khaing nyiex kraung sinngao aux, ang lai koe pa ang jhi kix yaox tix ceu kawx." ⁵ Khaix an Isayax ah nin ka Hezakix, "Nghiet ka gumlox Siyiex cao kru naing raoma; ⁶ Jhak heue, singaix bawg yam tak sang hoek yam can pa koe ka daux nyiex maix mai can pa rhawm keeing maix ti deuh tom hoek in singaix, tak viex hu ka veng Babulon, tak ang lai prah tix, tix ceu kawx, Siyiex ah nan. ⁷ Kix tak viex kawn simex keh maix tiblah hu mai mawh pui sieh ka daux nyiex haw cie simiang Babulon." ⁸ Hezakix ah nin ka Isayax, "Gumlox Siyiex pa krai maix mawh pa mhawm. Tak mawh krax nyawm ot mai pa nhim pa koe ngie ka daux singaix ju aux heue."

¹ Siyiex pex ah nin, tawx pa nyawm rhawm, tawx pa nyawm rhawm ka pui aux khankix. ² Krai lox nyawm rhawm ka veng Yerusaliem mai krai ka meung an, naing ang lai koe son maix mai phimap phighram maix kawx hoik pluat ploi ka mai nawh hoik rieb ti kham phimap khaing Siyiex, mawh phimap ra son khaing maix. ³ Lox pa kok yo pui ka daux tiagtu, "Khre rien daux krax Siyiex, cox daux krax ting rahsee ka daux tiag son Siyiex ex. ⁴ Daux klawk ku klawk tak sang kieh naog, gawng ku gawng mai ton ku ton tak sang kieh tiem mai pa kawk vawk tak sang kieh see mai krax khluk khlek tak sang kieh plang. ⁵ Min pakngai Siyiex, tak lih hoek mai kawn pui tak yaox tau ku kaux, mawh kheu jheeh Siyiex hoik krai ti deuh." ⁶ Lox lih hoek ah nin, "Yiiem heue, "Mai aux ah nin "Aux sang yiiem yuh ka mawx?" Kawn pui kuceu awm rib riem mai krax mhawm grang awm tai ka daux tiag. ⁷ Rib riem an kawx tak kroh, tai kawx tak khrum, yam phlu Siyiex bhaung ka piang an, kawn pui kuceu mawh rib riem tete. ⁸ Rib riem tak kroh mai tai tak khrum, viang mawh nan, gumlox Siyiex ex tak kaux cong leeing ju. ⁹ Pui viex lox bwan mhawm hoek ka Zion eue, haok piang gawng lhaong, pui viex lox bwan mhawm hoek ka Yerusaliem eue, sau riang tix mai yo lox sinum, yo lox tix paw lhat mai ah nin ka meung Yudax, "Jhak ka Siyiex pex." ¹⁰ Jhak heue, Siyiex hoek mai sibrawm mai plawng taix Nawh Cao tak kwang son Nawh Cao mai bwanson koe ka Nawh Cao mai totaix koe sivoe Nawh Cao. ¹¹ Nawh Cao tak liang phung yung Nawh, awm cao liang yung, Nawh Cao khrawm kawn yung ka plawng taix tix mai kliien ka piang naok tix mai koi thong miex yung pa kawn iak kawn. ¹² Mawh pui mawx pasax tong ti yaox rawm ka tawm taix tix mai sax tiag ti yaox raoma ka diex tix mai sax tong ti yaox phawng tiex ka khrawng, pasax ciang ti yaox gawng ting ka jiang lie? Mai ciang gawng iak ka daux jiang yoi lie? ¹³ Mawh pui mawx pasax ciied ti yaox ka khwan Siyiex mai gau sawn tawx rhawm keud ka Nawh Cao? ¹⁴ Mawh kum Nawh Cao mai pui mawx, sonsang sidawng Nawh Cao ka, pui mawx pasax gau pa rahsee ka Nawh Cao mai gau Nawh ka krax tawng mai jhi Nawh Cao sidawng ka lie? ¹⁵ Jhak heue, ceu pui kuceu, awm rawm roik jauh khaing pung mai pa simin awm phawng tiex ka piang jiang yoi. Jhak heue, Nawh Cao yaog klawn tiex awm phawng tiex. ¹⁶ Ang kub yuh khix ka Lebanon mai ang kub yuh krax tan pa gleeing ka totiag. ¹⁷ Ceu pui khawmuik ang mawh tidtix, ka plak sivoe Nawh Cao mai sawn kix nie lheu iak khaing pa ang mawh tidtix mai mawh pa giex going ka Nawh Cao. ¹⁸ Mawh pon jhi pex Siyiex awm pui mawx lie? Phan ang mawh nan, mawh pon tiag pex Nawh Cao awm riang pakpeung patix lie? ¹⁹ Rieng grang mawh pa raug cang lhaw, cao chix kraung mau mawh pa om khri mai pa raug soi mau. ²⁰ Pui hot laug ti yuh krax tan ka khaox pa ang chix rham, nawh sawg cang mai pa min sonsang saik riang grang pa ang chix lung lhiang. ²¹ Ang pex tawng mai ang pex sax mhong, mawh ang pui sax krai ka pex tom yam jah mai ang pex sax tawng tom yam jah ti kaw num haktiex lie? ²² Nawh Cao mawh pa ngawm ka piang haktiex mai pui pa ot daux haktiex awm sido, Nawh Cao tawm ti deuh raoma awm man tie mai nih ti deuh awm nyiex gox sonsang ot ka daux an. ²³ Simiang khankix ang kieh mawh tidtix mai kieh cao kwang haktiex khankix mawh pa giex going, ²⁴ Yam sum mai yam hoik rhuat ka kix, num kix tak sau riah tix daux tiex, yam phlu Nawh Cao ka piang kix, kix kawx fit hu mai bhaung keukanglux tak phlu kix luan awm kam. ²⁵ Siyiex pa singax singeh ah nin maix sang pon jhi ka pui pa awm Aux ka lie? ²⁶ Yaog ngai pex jhak ka dee lhaong mai jhak mawh pui mawx, pa phan ka ceu in khankix, Nawh Cao pa singax viex kix hu mai kok ceu kaux kix khawmuik. Ka riang rao pa ting tix, mawh kheu Nawh Cao koe sibrawm, ang koe pa grai tix kaux kawx. ²⁷ Pui Yakop eue, yuh patix pex lai ah, pui Isarelax eue, yuh patix pex lai ah nin, "Krax hu aux hoik mox khaing Siyiex mai pa rahsee aux Siyiex ang lai chawk ka."? ²⁸ Ang pex sax tawng mai ang pex sax mhong lie? Siyiex, mawh Siyiex leeing ju, cao pa phan haktiex tom hoek ka num ka rao, Nawh Cao ang awn riang mai ang chix taug chix mao, ang pon sawg ti yaox ka krax tawng yung Nawh Cao. ²⁹ Nawh Cao tawx sibrawm ka pui pa taug pa mao mai baox riang ka pui awn riang. ³⁰ Viang pui awn ju taug mao mai awn riang kawx mai pui koe riang tak goh pak lawg. ³¹ Pui pa krox jun ka Siyiex, tak koe riang rao khraox, kix tak di pruik tix mai po awm klang krih, kix to kawx ang taug mao mai nawh hu ang awn riang heue.

¹ Klawn tiex rawm sigrit sigra eue, ot yiien yawg nghiet ka Aux, kieh pui ku kaux deeh koe riang rao pa khraox, kieh kix greed tix dee dex, khaix an, kieh kix krai, kieh kix viex paox hoek dex son krax prawng ca. ² Pui mawx pa so ka pui tix kaux hoek khaing haktiex plak lih singaix lie? Pui ka koe riang rao tix pex, Nawh Cao tak ap pui kuceu ka nawh, nawh tak dig simiang khankix greem caong tix mai yuh awm phawng tiex ka vaig lawm tix mai ak nawh kieh kix awm kam phlu bhaung hu sidauh. ³ Nawh pheet ka kix mai preeng ka kix tom pon luat luan, ka krax pa ang nawh sax dig ka caong tix. ⁴ Mawh pui mawx pa khre mai yuh ceu an, pa kok ka doeh ru tom yam jah, mawh Aux pa mawh Siyiex, pa mawh yam jah mai pa mawh tom sidauh. ⁵ Klawn tiex rawm sigrit sigra hoik yaox mai lhat mai dee sidah sidu haktiex kawx siyaung ka mai kix greed tix hoek dex. ⁶ Pui kukaux teem ka paox plawg tix mai ah nin ka puxaik tix, "Kieh koe rhawm kwa heue." ⁷ Pui min ka kaing taix kawx tawx riang ka cao chix kraung mau, pui pa tawk mhawm ka daix kawx, tawx riang ka pui pa tawk ka piang dum mai ah nin ka pui cuat rhiem, "An mhawm heue." Mai nawh kawx teei jim rhiem tawk ka son ang lung lhiang. ⁸ Viang mawh nan maix pui Isarelax pa mawh siliex Aux, Yakop pa hoik laug aux ti deuh mai doeh ru Abraham paox grawm aux; ⁹ Maix mawh pui pa hoik teei Aux khaing dee sidah haktiex mai pa hoik kok khaing daog haktiex, ah nin ka maix, "Maix mawh siliex Aux, Aux hoik laug maix mai ang tik vud maix." ¹⁰ Paw lhat, mawh kheu aux ot mai maix, paw yaoh, mawh kheu Aux mawh Siyiex maix, Aux tak kieh maix kaux cong, Aux tak teem ka maix, Aux tak joh maix ka plawng taix dawm pa ting riang tix. ¹¹ Jhak heue, pui pa song rhawm ka maix, tak kaig tua mai laux pakngai mai pui koeng riang ciang khoi ka maix, tak ang mawh tidtix, tak laux leeing. ¹² Maix tak sawk ka pui tix mai maix ang pub kix, pui yuh naing ka maix, tak ang mawh tidtix, mawh pa giex going. ¹³ Mawh kheu Aux mawh Siyiex maix, tak giex taix dawm maix, tokaux Aux ah nin ka maix, "Paw lhat, Aux tak teem ka maix." ¹⁴ Siyiex ah nin, Yakop pa mawh ngaw eue, paw lhat, pex pui Isarelax eue, Aux tak teem ka maix, cao taoh ka maix mawh Siyiex pa singax singeh pui Isarelax. ¹⁵ Jhak heue, Aux tak kieh maix mawh cak khraox lawm pah nghox, koe rhang maix tak pah ka gawng ting tom phawng mai kieh gawng iak awm kam. ¹⁶ Maix tak boe ka an mai bhaung ting tak phlu hu mai bhaung keukanglux tak phlu an prung prang maix tak gaux rhawm ka daux Siyiex, mai yaw rangdi ka Siyiex cao pa singax singeh pui Isarelax. ¹⁷ "Yam sawg pui hot mai pui cud cha ka rawm ang yaox ka mai dak kix kroh ka sang nyaux nie rawm, Aux pa mawh Siyiex pawk lox kix, Aux pa mawh Siyiex pui Isarelax, tak ang tik vud ka kix. ¹⁸ Aux tak paoh rawm klawng lih khaing dee lhaong mai paoh rawm keut lih khaing daux lung, Aux tak yuh daux tiag koe rawm mai haktiex kroh mawh dee lih rawm. ¹⁹ Ka daux tiag Aux tak sum khaox Arit mai khaox Akashax, khaox Muratu, khaox Sanlun, ka daux tiag mhaik Aux tak priex khaox gix, khaox Taderax mai khaox Tashurax tau, ²⁰ Sonsang yaox mai tawng pui ka, kix tak simie ti keud mai doh rhawm ka, mawh taix Siyiex pa yuh ka ceu in mai mawh Siyiex pa singax pui Isarelax pa phan ka ceu in. ²¹ Siyiex ah nin, viex see pex hoek heue, Siyiex pui Yakop ah nin, viex mhai rug cie pex hoek heue. ²² Kieh kix viex an hoek mai jhi ex yaox mawh patix pa sang lih ti mawh, jhi ex yaox pa koe glang ka an, mawh pa yuh ka mawx, sonsang tawng pa sidah sidu ceu an khankix, phan ang mawh nan, krai ex mhong ka can pa sang hoek khankix. ²³ Jhi ex yaox jah yam in mawh patix pa sang lih mawh, sonsang tawng ex ka mawh pex siyiex mai yuh pa mhawm mai yuh pa caox, sonsang daox am ex mai yaoh ka. ²⁴ Jhak heue, pex ang mawh tidtix mai kaing pex kawx mawh pa giex going, kaw pa laug ka pex kawx, mawh pa seeing brai, ²⁵ Aux kieh pui tix kaux lih khaing caong ma laong mai hoek khaing plak lih singaix, nawh tak kok ka ceu kaux Aux mai nawh dig ka cub simiang, awm dig cao yuh aw tiex ka glaox. ²⁶ Mawh pui mawx pa krai pao tom yam jah sonsang tawng ex ka mai bawg yam sivoe in, sonsang pon ah ex nin, "Nawh mawh pa mawh meh lie? "Pui pa sang jhi ang lai koe pie tix kaux kawx, pui pa sang krai pao kawx ang lai koe, pui pa sang mhong ka gumlox maix, ang lai koe tix kaux kawx. ²⁷ Aux tak ploi pui ah nin ka veng Zion, "Jhak heue, jhak ka kix ku kaux, "Mai ploi pui viex lox bwan gaux rhawm ka veng Yerusaliem. ²⁸ Yam jhak Aux tan ang koe pui, tawx rhawm keud dong sawn ka sinax pui in khankix, yam chawk Aux ka kix, ang koe pui pawk tix kaux kawx. ²⁹ Jhak heue, siyiex an khankix mawh pa giex going, kaing yuh kix kawx ang koe ceu, riang rao raug kix kawx mawh bhaung pa giex going heue.

¹ Jhak ka kawncau Aux, pa yaog Aux kah, pa mawh pui laug Aux, pui pa khaw rhawm Aux, Aux hoik deuh khwan tix ka piang nawh, nawh tak viex pa rahsee hoek ka pui kuceu. ² Nawh tak ang yo mai ang ploi lox tix mai ang kieh pui mhong ka daux krax. ³ Nawh ang raig gawng priem graig mai ang preet ka ngu pa hoik laix yeet, Nawh tak viex pa rahsee mai pa mawh meh hoek. ⁴ Tom sidah ang Nawh nyang pang pa rahsee ka piang haktiex, Nawh ang khrup rhawm, ang laux rhawm mai ka piang haktiex krox jun ka gumlox Nawh. ⁵ Siyiex pa phan raoma mai pa nih an khankix, pa tawm ti deuh haktiex mai can pa kaoh khaing daux haktiex, Cao tawx bhawm ka kawn pui pa ot ka piang haktiex, ah nin. ⁶ "Aux mawh Siyiex hoik kok maix hoek ka daux pa rahsee, Aux tak giex mai priex ka maix, Aux hoik kieh maix mawh lai sijax mukheu son pui kuceu mai pa riang ka pui tang ceu. ⁷ Sonsang paoh ka ngai dug mai sonsang ploi pui pa laig thawng lih khaing daux thawng mai viex pui ngawm daux pa faik lih khaing ka daux nyiex thawng. ⁸ Aux mawh Siyiex, in mawh ceu kaux Aux, Aux tak ang tawx min pakngai tix ka pui tang kaux mai ang tawx krax pa yaogyaw tix ka riang rao saik khankix. ⁹ Jhak heue, grawng pa dawg koe hoik lih tix mawh, Aux jhi ka ceu pa khraox, sivoe sang bleeh ceu an mai Aux hoik krai pex mhong kah heue. ¹⁰ Pui pa tiang ka rawm sigrit sigra mai can pa ot ka daux an, pa ot ka klawn tiex rawm sigrit sigra mai pa ot ka daux an khankix eue, rhax lai pa khraox ka Siyiex mai yaogyaw Nawh Cao tom deeh sidah sidu haktiex. ¹¹ Kieh daux tiagtu mai veng pa koe daux an yaog lox tix lhaong, khawm nyiex yaong pa ot pui Kedax ka, kieh pui Selax ah lai rhax gaux rhawm mai kieh yo lox ka piang choek gawng khankix. ¹² Kieh kix tawx min pakngai ka Siyiex mai yaog yaw Nawh Cao ka klawn tiex rawm sigrit sigra. ¹³ Siyiex tak lih awm pui naing pa ting riang mai so rhawm rhi tix, awm pui naing, Nawh Cao tak kok yo mai kok yo lox ting lhaong, Nawh Cao tak pex ka pui pa koeng Nawh Cao heue. ¹⁴ Aux hoik ot yawg rheung nyao, mawh kawn sang ot Aux awm an mai kham geu ka lie? Aux tak yo awm bun kha rhawm yam sang keh tix, Aux tak toek bhawm taug tix mai deeh ploi bhawm ting tix lih. ¹⁵ Aux tak kieh gawng ting gawng iak riem mai kieh plix khaox taux lhax fit, Aux tak kieh rawm klawng mawh klawn tiex mai kieh rawm nhawng hit. ¹⁶ Aux tak tuk pui duk hu krax pa ang kix tawng, Aux tak thong kix hu ka krax ang kix tawng. Aux tak kieh pa faik mawh pa riang ka plak sivoe kix mai kieh krax vawk mawh pa rauh, Aux tak yuh ceu in khankix ka son kix mai ang tik vud kix. ¹⁷ Pui pa een rhawm ka riang rao pa saik mai pa ah nin ka pui raug riang rao an, "Maix mawh siyiex yix, "Kix tak deeh veeh tix plak khaix mai hoek krax kaig pa ting lhaong. ¹⁸ Pui lheet eue, nghiet heue, pex pa dug eue, jhak heue, pex tak yaox. ¹⁹ Lheu khaing kawncau Aux, mawh mawx pa dug, mawh pui mawx pa lheet awm cao cau ploi Aux, mawh pui mawx pa dug awm paox grawm Aux mai pui mawx pa dug ngai awm siliex Siyiex lie? ²⁰ Viang maix yaox kuceu kawx mai ang tie priex ti deuh, viang yhaok nawh bhang kawx, nawh ang chix mhong. ²¹ Siyiex khaw rhwm kheu pa rahsee tix, kieh lox tat jhawm prawng tix ting lhaong mai koe min plakngai. ²² Pui in khankix mawh pui pa kham krax tud krax rhim, kix khawmuik hoik laung tix daux tiex mai mox tix ka daux thawng, yam yaox kix krax laux leeing ang koe pui taoh ka kix, kix mawh pui pa giex laung ang koe pui pa ah nin, deeh tawx heue." ²³ Pui mawx ka daux pex, pa daong yhaok ti nghiet mai sonsang nghiet tix ka mhawm mhawm. ²⁴ Pui mawx pa ap Yakop ka pui tud rhim mai pui Isarelax, ka daux taix pui con lie? Ang mawh Siyiex, pa lud ex ka lie? pa ang kix hawt khaix Nawh mai ang cu nghiet ka lox tat jhawm prawng Nawh Cao. ²⁵ Mawh kheu nan, Nawh Cao klup krax song rhawm tix ka piang kix mai kieh naing hoek ka piang kix mai kieh ngu proe rawb reem kix, kix ang doh rhawm ka mai ngu an gleeing ka kix, viang mawh nan kix ang een ka daux rhawm tix heue.

¹ Yam in, Siyiex, pa phan maix Yakop, pa mawh Siyiex pa phan Isarelax ah nin, "Paw lhat mawh kheu Aux hoik taoh ka maix. Aux hoik kok maix ka ceu kaux maix, maix mawh cie Aux. ² Yam tiang maix daux rawm, Aux tak ot tau mai maix mai yam tiang rawm klawng tak ang kheem maix, yam hu maix ka daux ngu maix tak ang gleeing mai rao ngu tak ang hax yuh maix. ³ Aux Siyiex, pa mawh Siyiex maix, Siyiex pa singax singeh pui Isarelax, Aux hoik tawx meung Ejiptux, mawh ngawh riang taoh ka maix mai Ethiopia mai Sebax sonsang loh maix ka, ⁴ Mawh kheu koe ngawh jum maix ka plak sivoe ngai Aux mai pon min pakngai mai moh ka maix, Aux tom tawx pui sonsang loh maix ka mai tawx ceu pui khankix sonsang loh ju maix ka. ⁵ "Paw lhat heue, mawh kheu ot Aux mai maix, Aux tak viex doeh ru maix hoek khaing plak lih singaix mai Aux tak khrawm maix khaing plak klip singaix. ⁶ Aux tak ah nin, ka caong ma laong ploi heue mai ah nin ka caong ma seh, paw teei tix priex, viex cub kawn simex Aux hoek khaing dee singai mai kawn bun Aux khaing dee sidah sidu haktiex. ⁷ Pa mawh ceu pui pa hoik kok ka daux ceu kaux Aux, mawh pui pa hoik phan Aux ka son min pakngai tix, pa mawh pui hoik phan hoik yuh Aux." ⁸ Viex pui dug pa koe ngai mai pui lheet pa koe yhaok khankix hoek. ⁹ Kieh ceu pui khawmuik, kum paox tix mai kieh ceu pui khawmuik rom paox tix, mawh pui mawx ka daux sinax kix, pa pon pao grawng in mai jhi ex yaox ceu pa koe sivoe in, kieh kix jhi mhai rug tix, sonsang luan khaing krax prawng ca phan ang mawh nan, kieh kix mhong ah nin, an mawh pa mawh tete." ¹⁰ Siyiex ah nin "Pex mawh mhai rug Aux mai siliex pa hoik laug Aux, sonsang tawng maix mai yum rhawm ka Aux mai tawng mawh Aux Siyiex, sivoe Aux ang koe Siyiex pa phan mai khaix Aux kawx tak ang koe. ¹¹ Aux mawh Siyiex, lheu khaing Aux, ang koe cao taoh. ¹² Aux hoik plak jhi mai Aux hoik taoh, Aux hoik krai pao mai siyiex tang kaux tang hak ang lai koe ka daux sinax pex mai pex mawh mhai rug Aux, Siyiex ah nan. ¹³ Sivoe ang singaix sawm nyang koe, Aux hoik dawg mawh Siyiex, ang koe pui rud pex lih khaing daux taix Aux, mawh pui mawx pa pon tieb ka kaing jhaw yuh Aux. ¹⁴ Pa mawh Siyiex cao pa taoh pex, Siyiex pa singax singeh pui Isarelax ah nin, "Mawh kheu jhak Aux ka plakngai pex, Aux tak ploi pui ka Babulon awm pui to tua, pa mawh pui Khaladie ka daux reu ting, pa hoik sax gaux rhawm kix ka daux. ¹⁵ Aux mawh Siyiex, pa mawh Siyiex pa singax singeh pex, cao pa phan pui Isarelax, pa mawh simiang pex." ¹⁶ Siyiex cao pa phan krax ka daux rawm sigrit sigra mai krax ka sinax rawm pa kied ting riang. ¹⁷ Cao pa viex ka kru naing brung mai pui naing hoek, kix it tau mai ang lai pon kaoh, hoik laux leeing mai yeet awm keei kawk ngu. ¹⁸ Siyiex ah nin, "Paw lai keud pa hoik luan mai paw lai tiag cheu ka ceu pa prim. ¹⁹ Jhak heue, Aux tak sang yuh ceu pa khraox, yam in hoik lih mawh, ang pex nyang yaox lie? Aux tak yuh krax doh ka daux tiag mai rawm klawng ka tiag mhaik. ²⁰ Totiag tak tawx min ka Aux, pa mawh sox praix mai sim kala uk khankix, mawh kheu tawx Aux rawm koe daux tiag mai rawm klawng ka tiag mhaik, sonsang tawx rawm nyaux ka pui Aux, pa hoik laug Aux ka. ²¹ Pa mawh pui pa phan Aux son tix. Sonsang yaogyaw kix ka Aux. ²² Pui Yakop khankix eue, pex ang lai kok yo ka Aux, pui Isarelax eue mai ang lai rhawm yaox ka Aux. ²³ Pex ang lai viex yung, sonsang yuh krax tan pa gleeing ka Aux mai ang lai tawx min ka Aux ka daux krax tan pa yuh tix, Aux ang tie kieh pex nyhap mao mai yuh krax tan mai ang lai taug mao kheu tok nyawng bhawng. ²⁴ Pex ang sax liag oxmex ka mau tix, sonsang tawx ka Aux mai ang kieh Aux khaw rhawm ka klon bee krax tan tix, viang mawh nan pex hoik kieh Aux cien beeh glawm ka son phimap tix mai pex hoik kieh Aux khi rhawm ka grawng phimap pa yuh tix. ²⁵ Aux mawh Siyiex heue, kaw pa hoik preet ka krax phit pex, sonsang yaox ka plakngai cao tix mai Aux tak ang lai doh keud ka phimap pa yuh pex. ²⁶ Kieh Aux, doh keud mai kieh ex rom ti tat see tau, krai grawng see pex, sonsang lawd luan pex. ²⁷ Keeing pa jah pex dix, hoik yuh phimap mai cao pa gau pex hoik lud ka Aux. ²⁸ Mawh kheu nan, Aux tak khlut ti tik ka simiang dee pa singax mai kieh pui Yakop pon krax pa jhax lawg mai pui Isarelax pon pa salao heue."

¹ "Yakop pa mawh kawncau Aux, Isarelax pa mawh pui laug Aux eue, nghiet heue. ² Siyiex pa phan pex, pa hoik phan hoik yuh pex, tom ka daux vaig mai tak teem ka pex ah nin kawncau Aux Yakop, pa mawh Yeshuron pa laug Aux eue, paw khi rhawm. ³ Mawh kheu Aux tak hieh rawm ka piang pui pa simie ti nyaux rawm mai kieh rawm lan ka piang tiex kroh, Aux tak lhaok khwan tix ka piang doeh ru maix mai lhaok bwanson tix ka piang kawn saux kawn sex maix. ⁴ Kix tak kuah khaing daux sinax rib riem, awm khaox siglai hawt klawng lih rawm." ⁵ In tix kaux tak ah nin "Aux mawh pui Siyiex. An tang kaux tak kok ceu kaux tix mawh Yakop mai an tix kaux tak tiem piang taix tix mawh pui Siyiex mai kok ceu kaux tix mawh ceu pui Isarelax." ⁶ Siyiex simiang Isarelax mai pa taoh pui Isarelax mai Siyiex cao kru naing raoma ah nin "Aux mawh cao pa jah mai Aux mawh cao sidax; lheu khaing Aux ang lai koe Siyiex tang kaux. ⁷ Mawh pui mawx pa awm Aux lie? Kieh nawh krai pao heue, kieh nawh jhi sonsang tawng ka mai kieh nawh jhi ceu an sidawng sivoe Aux mai ceu pa mawh yam in mai pa tak sang hoek ti mawh, kieh nawh jhi ceu inkix ka kix. ⁸ Paw khi rhawm mai paw lhat, Aux hoik krai ceu an ka pex tom yam an dix, ang mawh lie? Pex hoik mawh mhai rug Aux, lheu khaing Aux, kawn koe Siyiex tang kaux lie? Lheu khaing Aux num riah pa jah ang koe, Aux ang tawng pui tix kaux kawx." ⁹ Pui pa yuh ka riang rao khankix, mawh pa giex going, pa khaw caw rhawm kix ang lai koe bwanson, kix kham sakse pa ang ti yaox mai pa ang tix tawng, kix tak pon krax kaig tua. ¹⁰ Mawh pui mawx pa yuh riang siyiex mai raug ka riang rao pa ang koe bwanson tidtix lie? ¹¹ Jhak heue, paox grawm paox nawh khankix pon krax kaig. Cao pa yuh kawx, mawh ngie kawn pui khaing, kieh kix khrawm paox tix tau, kieh kix yaog ti cung, kix tak lhat graung mai kaig tua tau mai paox tix. ¹² Cang lhek sau riem ka daux ngu suah mai teei daix tawk an koe pakpeung mai yuh kaing an ka riang rao taix tix, nawh cai rhawm mai awn riang, nawh ang nyaux rawm mai taug mao. ¹³ Cang mai tiag ka keei mai mhai ti deuh an ka tiex paing, nawh yuh pakpeung an koe ka rhiem thui khaox, nawh mhai ti deuh an ka kumpa, pa mawh jim rhiem pa tiag tix krax mee pa lawmle, mai yuh an mhawm grang mawh riang pui, sonsang deuh ot ka daux nyiex. ¹⁴ Nawh kid khaox Arit son cao tix mai teei khaox gix mai khaox tiah khankix, nawh laug ti cie an son khaing daux sinax pang khaox daux tiag nong, nawh sum khaox gix tix num mai rawm lhiex kieh an hwan. ¹⁵ An lih ti mawh khix taung son pui, nawh teei an kix tiblah, sau daux ngu kieh tokaux tix siu kah, nawh phlu ngu mai ping blah kah, nawh yuh riang griang siyiex ka an mai krub kah, khaix an nawh yuh riang griang pa hoik saik mai grux ngawng tix krub ka an. ¹⁶ Nawh taung khix an tix plak ka daux ngu mai an tix plak nawh tung ti ih nex mawie kah, nawh ping ti ih nex tom sak tom fah rhawm tix, tokaux nawh cox ngu ah nin, "Aha! Aux hoik siu phao, Aux hoik yaox ka ngu phao." ¹⁷ Ka pa kawn deuk an, nawh yuh siyiex tix mu, pa mawh riang rao pa hoik saik tix, nawh grux ngawng mai krub ka an, rawg bwan ka an ah nin, "Deeh taoh ti teei aux liak! Mawh kheu maix mawh siyiex aux." ¹⁸ Kix ang tawng tidtix mai kix ang doh rhawm, mawh kheu nyeep ngai kix tix, kix tom ang chix yaox tidtix mai rhawm kix kawx, hoik yeep tix kix tom ang doh rhawm kah heue. ¹⁹ Pui tix kaux kawx, ang lai tawng ti keud ka daux rhawm tix mai ang lai koe krax tawng mai ang tawng ka pa sang ah tix nin, "Aux hoik gleeing an tix plak ka daux ngu, aux hoik ping ti ih blah ka piang gaox ngu an mai hoik tung ti ih nex mawie kah, mawh khaw aux ti yuh pa kawn deuk seeing brai lie? Mawh khaw aux ti grux ngawng tix ka nawng khaox an lie?" ²⁰ Nawh ih ka nyaox, rhawm caox caig hoik kieh nawh lud mai nawh ang pon taoh cao tix ah nin, "Mawh ang pa pie koe ka daux taix khawn dawm aux lie?" Ang lai tawng ti doh keud. ²¹ Ceu pui Yakop eue, doh keud ka inkix, pui Isarelax eue, "Pex mawh siliex Aux, Aux mawh cao phan pex, pex mawh siliex Aux pui Isarelax eue, Aux ang piawm ka pex. ²² Aux hoik preet krax lud pex awm paiawm mai preet phimap pex awm taox simawg, deeh lih hoek ka Aux, mawh kheu Aux hoik taoh lawd pex. ²³ Raoma eue, ah lai rhax, mawh kheu hoik yuh Siyiex ceu in, dee pa raux greem haktiex eue, kok yo heue, gawng lua, khaox mai pang khaox can pa koe daux nawh eue, ah lox rhax sinum, mawh kheu Siyiex hoik taoh lawd Yakop mai hoik rieb min ka daux pui Isarelax. ²⁴ Siyiex cao pa taoh lawd maix, cao pa phan maix tom yam jah khaing daux vaig ah nin, "Aux mawh Siyiex, cao yuh kuceu mai cao nih raoma lih nong nong mai cao tawm haktiex, mawh pui mawx pa ot tau mai Aux. ²⁵ Pa preet mhai rug pui ah lox pie lox lhen mai pa kieh cao sipawk yhot, pa kieh pui koe pingnya deeh plak khaix mai kieh pa tawng kix mawh pa deux pa aw ²⁶ Pui kham ka gumlox siliex Nawh Cao mai yuh awm pa gau awm kawncau Nawh Cao, cao pa ah nin ka Yerusaliem maix tak mawh dee pa ot pui kah, pa ah nin ka veng meung Yudax, pex tak sum kah, Aux tak deeh yaog ka can pa hoik laux leeing. ²⁷ Pa ah nin kieh rawm sigrit sigra pa raux kroh, Aux tak kieh rawm klawng pex hit. ²⁸ Pa ah nin ka simiang Kurux, nawh mawh cao liang yung Aux mai kieh alo aux grum naog mai ah nin ka veng Yerusaliem, tak koe pui pa deeh sum kah mai ah nin ka nyiex bwan, jaong num riah maix tak deuh kaux cong."

¹ Siyiex ah nin ka pui groi Nawh Cao rawm bee ka piang, pa mawh simiang Kurux, pui pa giex Aux ka taix khawn dawm nawh, sonsang kieh simiang ku meung tiem sivoe ngai Nawh mai kieh maox rawd nyoi Simiang khankix bhaw mai kieh siviex khawm ra plak bhang sivoe ngai nawh mai ang nyeep siviex veng. ² "Aux tak sang hu sivoe maix mai kieh gawng sidawm, aux tak kieh siviex tawng laux mai tat gawng rhiem dud baux mawx baux an. ³ Aux tak tawx sinngao pa faik ka maix mai kraung dee glip sonsang tawng ka Aux, Siyiex, Siyiex pui Isarelax pa kok maix ka daux ceu kaux Aux." ⁴ Kheu yaox plakngai siliex Aux Yakop mai pui Isarelax pa hoik laug Aux, Aux hoik kok maix ka ceu kaux maix, Aux hoik sum ceu kaux maix, khawm ang maix tawng ka Aux. ⁵ Aux mawh Siyiex, lheu khaing Aux ang lai koe Siyiex tang kaux tang hak, Aux rawd nyoi maix, viang maix ang tawng ka Aux kawx. ⁶ Sonsang tawng pui jah khaing plak lih singaix tom hoek plak klip singaix, lheu khaing Aux ang lai koe Siyiex tang kaux tang hak, Aux mawh Siyiex maix ang lai koe tang kaux. ⁷ Aux phan pa riang mai yuh pa faik, Aux yuh ka pa nhim mai phan pa kha rhawm, Aux mawh Siyiex Cao pa phan ceu in khankix. ⁸ "Raoma khaing dee lhaong eue, kieh lhiex lih khaing dee long mai kieh piang raoma ploi pa rahsee lih, kieh haktiex baoh sonsang lih krax taoh, tau awm lih pa rahsee, Aux mawh Siyiex phan ka an. ⁹ Kieh krax kha rhawm koe ka pa lah cha ka cao pa phan nawh, nawh mawh ngie bliah aw tiex tix bliah khaing, khex chix ah glaox nin ka cao pa yuh tix, mawh kawn yuh maix patix lie? Phan ang mawh nan, khex chix ah ceu pa yuh maix nin, maix ang koe taix lie? ¹⁰ Kieh krax kha rhawm koe ka pui ah nin ka keeing tix, mawh kieh maix ceu patix lih lie? Phan ang mawh nan, pa ah nin ka miex tix, mawh keh maix ceu patix lie?" ¹¹ Siyiex pa singax singeh pui Isarelax, cao pa phan ka Isarelax ah nin, "Maix chawk Aux ka ceu pa sang lih ti mawh, son grawng pa dex dawd mai kawn praix Aux mai tawm lox ka Aux grawng pa dex dawd ka kaing mai khaix taix Aux. ¹² Aux hoik yuh haktiex mai hoik phan kawn pui pa ot ka piang an, plawng taix Aux hoik nih raoma mai Aux tawm lox ka can pa koe daux raoma. ¹³ Aux kieh nawh lih koe ka daux krax pa rahsee mai Aux tak kieh krax hu nawh see, nawh tak sang sum ka veng Aux mai kieh pui Aux pa giex laung lawd luan, pa ang lai teei ka ngawh jum mai ka totaix, Siyiex cao kru naing raoma ah nin. ¹⁴ Siyiex ah nin sinngao khaing meung Ejiptux mai kraung lai geu meung Kushax mai lai geu pui Sebax pa ting lhaong kaux, tak hoek ka pex mai an tak mawh cie pex, kix tak hawt khaix pex, kix tak hoek ka daux pa phyaok tix ka maox ceng mai krub ka maix, kix tak khyox khaw tix ka maix ah nin Siyiex ot mai maix tete, lheu khaing Siyiex in, Siyiex tang kaux ang lai koe" ¹⁵ Siyiex pui Isarelax, pa mawh cao taoh eue, Maix mawh Siyiex tete, pa mox tokaux tix. ¹⁶ Can pa yuh riang grang khankix, kix tak pon krax kaig mai kix tak laux min pakngai tau. ¹⁷ Pui Isarelax hoik lawd luan tau mai krax taoh Siyiex, leeing ju, pex tak ang lai kaig mai ang lai laux min pakngai, leeing ju. ¹⁸ Siyiex, pa phan raoma, Nawh Cao mawh Siyiex cao pa phan haktiex yuh ka an, Nawh Cao phan ka ceu an, Nawh Cao ang lai phan mawh pa giex going, Nawh Cao phan an kieh kawn pui ot ka ah nin, "Aux mawh Siyiex mai ang lai koe pui tang kaux." ¹⁹ Aux ang tie mox tix sikah ka daux pa glip, ka tix dah dah ka piang haktiex pa faik, Aux ang tie ah nin ka doeh ru Yakop, sawg Aux ka daux pa giex going, Aux mawh Siyiex pa sikah pa rahsee, Aux krai pao kieh tawng ka pa mawh pa meh. ²⁰ "Khrawm paox pex mai hoek, pa mawh pex pa hoik glawd khaing krax yum khaing pui tang ceu, pui pa teei ti viex riang rao khaox pa hoik saik kix, kix ang koe krax tawng yung mai rawg bwan ka siyiex pa ang tie chix taoh ka kix." ²¹ Krai mai viex grawng see maix hoek, kieh kix ra lai teei krax keud ka paox tix, mawh pui mawx pa hoik krai grawng in khaing tom yam jah, Ang hoik mawh Aux pa mawh Siyiex lie? Lheu khaing Aux ang lai koe siyiex tang kaux tang hak, Siyiex pa rahsee mai cao taoh, lheu khaing Aux ang lai koe pui tang kaux tang hak. ²² "Pex pa ot ku sidah haktiex eue, deeh hoek ka Aux pex tak pon krax taoh, mawh kheu Aux mawh Siyiex mai ang lai koe siyiex tang kaux. ²³ Aux hoik tiextu ka cao tix, gumlox pa lih khaing jheeh Aux mawh pa rahsee mai ang lai deeh hoek, ngawng ku ngawng tak grux tix ka Aux, dak ku dak tak tiextu tix ka Aux." ²⁴ Pui ku kaux tak ah nin ka grawng Aux, mawh ngie pa rahsee mai riang rao pa koe ka daux Siyiex khaing, pui pa boh rhawm ka Nawh Cao hoek ka Nawh Cao mai tak hoek krax kaig tua. ²⁵ Doeh ru pui Isarelax, tak hoek daux pa rahsee mai pa yaw rangdi ka daux Siyiex heue.

¹ Balax grhup goh, Nebaw buk pot. Rieng krub kix hoik tang ka totiag mai mawie hoik tang piang totiag kieh mawh beeh cien ka piang totiag. ² Hoik grhup goh mai buk pot tau, ang chix taoh ka beeh cien tix, tokaux nawh lih mawh pui pa giex laung. ³ Nyiex ma pui Yakop eue, can pui pa deuk khaing pui Isarelax, "Nghiet ka Aux, Aux hoik dawg klien pex tom yam jah pex ti keh mai hoik teem pex khaing daux vaig, ⁴ tom sidah yam kuad pex Aux mawh kaw an, Aux tak teem pex, tom paing hauk kaing pex, Aux mawh cao pa phan mai cao pa joh jhan, Aux tak teem mai kieh pex pon krax taoh." ⁵ "Pex sang tiag Aux sidu mai pui mawx mai tiag Aux awm pui mawx mai tiag Aux ah awm paox tix." ⁶ Kix teei khri khaing daux hau mau mai ciang mau ka jiang, kix vai cao chix yuh kaing mau khri mai yuh riang grang siyiex mai krub ka an. ⁷ Kix klawm an ka piang klip tix mai viex an deuh tix dah mai an cung tan ang chix gah khaing dee ot, pui mawx kok nawh kawx, an ang chix pawk mai ang chix taoh nawh khaing pa kha rhawm. ⁸ "Doh keud ka in, kieh pex tawng mawh cao tix simex mhaing, pex pa lud eue, keud ti yaox ka daux rhawm tix. ⁹ Doh keud ka pa hoik luan, pa hoik lih mawh tom yam jah dix, mawh kheu Aux mawh Siyiex mai ang lai koe tang kaux, Aux mawh Siyiex mai ang lai koe pui awm Aux. ¹⁰ Aux hoik jhi tom jah tom sidah mai hoik jhi can pa lih ti mawh tom didix mai ah nin krax keud Aux tak kaux cong mai Aux tak kieh kuceu grum naog awm alo tix. ¹¹ Kok ka sim klang khaing plak lih singaix, ka pui pa sang cau Aux khaing haktiex dee singai, Aux hoik krai mai Aux tak yuh awm pa krai tix. Aux hoik but rhawm tix mai yuh an. ¹² "Pex pa kiien rhawm pa singai khaing krax taoh eue, "Nghiet ka lox Aux. ¹³ Aux viex krax taoh hoek phao, ang lai singai, krax taoh Aux ang lai rheung lai koi, Aux tak deuh krax taoh ka piang Zion, son pui Isarelax, pa mawh min pakngai Aux heue."

¹ Kawn bun krih veng Babulon eue, lih hoek mai ngawm daux phawng tiex, kawn bun krih ceu pui Khaladie eue, ngawm ka piang tiex ang lai koe dang ngeung, mawh kheu Aux ang lai baox kok maix mawh pa awn nex pa mhawm kaux tix bawg kawx. ² Teei mhaw mai krid nghox kah, plak man tie khaing ngai maix, peeik ka sibex dhah maix, paw lai kheem caong tix mai loe rawm klawng. ³ Maix tak ot kakaong mai pon pa kaig tua, Aux tak pawk bix, Aux tak ang lai jhak ka plakngai pui tix kaux kawx. ⁴ Cao taoh ka ex, Nawh mawh Siyiex cao kru naing raoma pa singax singeh pui Isarelax. ⁵ Kawn bun krih pui Khaladie eue, ngawm yawg tix mai laig hu ka daux pa faik, mawh kheu ang lai kok maix mawh cao nang ku haktiex. ⁶ Aux song rhawm ka pui tix, Aux teei sinngao tix lih mai ap kix ka tawm taix maix, maix ang lai caux rhawm ka kix maix deuh beeh glawm pa cien ka piang kuad. ⁷ Maix ah nin, "Aux tak mawh cao nang leeing ju," Maix tom ang lai sawn rhawm tix, ka ceu an mai ang lai keud dee sidah sidu an kix. ⁸ "Mawh kheu nan maix pa moh ka pa gaux rhawm silao, nghiet ka grawng in ha, pa mawh pui pa ngawm mai pa ang tie koe krax khi, pa keud daux rhawm tix ah nin, "Lheu khaing aux ang lai koe pui tix kaux kawx, Aux tak ang lai ngawm awm miexmai mai pa ang lai tik grham kawn tix." ⁹ In ra ceu tak hoek ka maix tix taix neh, ka daux tix ngaix khaing, pa mawh pa tik grham kawn tix mai pa mawh miexmai, tak bleeh ka piang maix tete, kheu jao pa yuh maix phi caox, pa ploi sat mai sibawk. ¹⁰ Mawh kheu maix hoik een rhawm tix ka pa caox yuh tix, "Ang koe pui yaox ka aux," pingnya mai krax tawng maix hoik kieh maix lud krax mai maix ah nin daux rhawm tix, "Mawh aux heue, lheu khaing Aux, ang lai koe pui tix kaux kawx." ¹¹ Mawh kheu nan, krax pa kha rhawm tak hoek ka piang maix, maix tak ang tawng yam hoek krax kha rhawm pa ang maix pon kham, hoek ka piang maix, maix pub krax laux leeing pa ang tix keud ce dom mawx dom an. ¹² Kaoh mai yuh phi caox, ploi sat mai sibawk pa hoik yuh maix tom yam kawn awn ju maix, phan khaw ti pon bwanson maix tak pon bwanson mai haok hwan kah heue. ¹³ Maix hoik taug mao ka daux pa keud pa sawn tix, kieh nawh kaoh mai teem maix luat luan, pa mawh pa chix jhak ka raoma mai pa chix kia ka simuing mai pa chix sawn khix pa grux krai grawng pa tak sang lih mawh ka piang maix. ¹⁴ Jhak heue, kix tak awm pum nyhee mai gleeing ka ngu, kix ang pon taoh cao khaing ngu gleeing an, in ang mawh gaox ngu pa ka tix siu ka mai ang mawh ngu pa sang co tix kah. ¹⁵ Pui pa yuh maix kaing tau mai pui pa hoik yuh maix lai geu tau, tom yam awn ju tix, tak yuh ceu an ka maix, kix tak tang hu krax hu tix mai ang koe pui taoh ka maix tix kaux kawx heue.

¹ Nyiex ma pui Yakop eue, nghiet heue, pa hoik kok ti mawh ceu kaux Isarelax mai pui pa hoek khaing rawm keut haktiex Yudax, pa hoik tiextu ka ceu kaux Siyiex mai pa krai grawng Siyiex pui Isarelax, ka daux pa ang kaux sijax mai pa ang koe krax rahsee. ² Kix kok cao tix mawh pui veng pa singax mai deuh rhawm tix ka Siyiex pui Isarelax, ceu kaux Nawh Cao mawh Siyiex cao kru naing raoma. ³ Aux hoik krai pa koe phao ka tom yam jah, ceu an mawh pa lih khaing jheeh Aux mai Aux hoik kieh kix mhong, Aux hoik yuh ceu an sijaox mai an hoik lih ti mawh. ⁴ Mawh kheu Aux hoik tawng maix kiien rhawm mai ngawg maix mawh rhiem mai dongre maix mawh tawng lheung; ⁵ Aux hoik krai grawng kaing in ka maix, tom yam jah, sivoe ang an nyang bax hoek, Aux hoik krai maix mhong, phan ang mawh nan maix tak ah nin, aux yuh cao ka riang rao krub an mai aux hoik tawx lox ka riang rao pa saik tix. ⁶ "Maix hoik mhong mai pau maix yaox ka in, mawh ang maix sax krai pui mhong lie? Jah yam in Aux sang krai maix mhong ceu pa khraox, mawh ceu pa mox pa ang maix tawng kah. ⁷ Mawh ceu pa khraox pa phan tix ang nyang rheung maix ang nyang sax mhong sivoe ngaix in, phan ang mawh nan, lhat maix ah nin, �Jhak heue, aux hoik tawng.� ⁸ Maix ang sax mhong maix ang sax tawng, jah tom yam an dix maix ang nyang bhang yhaok tix, Aux hoik tawng yuh maix kaing pie lhen mai hoik tawng jah tom yam keh khaing daux vaig miex, nawh kok mawx mawh pui tieh feen. ⁹ "Mawh kheu jhak Aux ka plakngai cao tix mai mawh kheu yaox Aux pa yaogyaw cao tix, Aux tom gun yeung ka maix, sonsang ang Aux teei ti tik ka maix. ¹⁰ Jhak heue, Aux hoik thi ka maix mai ang awm thi ka mau, Aux hoik cheuk ti yaox maix ka daux glah ngu pa kha rhawm. ¹¹ Aux yuh awm an kheu jhak Aux plakngai cao tix, Aux ang pon kham ka pa salao ka ceu kaux Aux mai ang tawx min pakngai tix ka pui tang kaux." ¹² Yakop mai Isarelax pa kok Aux eue, nghiet ka Aux, Aux mawh Nawh Cao, Aux pa mawh cao pa jah mai cao pa sidah. ¹³ Taix Aux hoik yuh ti deuh num riah haktiex mai taix dawm aux hoik neh raoma, yam kok aux kix, kix yaog ti hoek tau. ¹⁴ "Pex khawmuik khrawm paox tix mai nghiet kah, mawh pui mawx pa krai ceu in ka sinax kix? Siyiex moh ka nawh, nawh tak yuh pa khaw mai alo Nawh Cao ka veng Babulon mai taix nawh, tak puing ka pui Khaladie. ¹⁵ Hoik mawh Aux cao pa krai mai cao kok ka nawh, Aux hoik viex nawh hoek mai nawh tak haok hwan krax hu. ¹⁶ Greed hoek dex Aux, nghiet ka in, tom yam jah Aux ang sax mox tix krai ka dee glip, jah khaing yam an, Aux hoik ot tan, yam in Siyiex mai khwan cao hoik ploi Aux hoek. ¹⁷ Siyiex Cao taoh maix mai Siyiex pa singax singeh pui Isarelax ah nin "Aux mawh Siyiex pa mawh Siyiex maix, pa gau maix koe bwanson, cao thong maix hu krax pa khaw maix ti hu. ¹⁸ Phan maix cu nghiet ka lox pingnyap Aux, pa nhim pa grum naog maix tak awm rawm klawng mai pa rahsee maix tak awm puk pak rawm sigrit sigra. ¹⁹ Doeh ru maix, tak nie awm mhaik mai kawn praix cao maix, tak awm mu mhaik, ceu kaux nawh tak ang tat ti tik mai ang yuh laux leeing ka plak sivoe Aux." ²⁰ Lih hu khaing veng Babulon mai to khaing pui Khaladie mai ah lox lai rhax gaux rhawm, krai pao kix mhong ceu in mai krai tom sidah sidu haktiex, "Siyiex taoh lawd siliex tix Yakop." ²¹ Yam thung Nawh Cao kix hu ka daux tiag mhaik, kix ang simie ka rawm, Nawh Cao kieh rawm lih khaing rang son kix. Nawh Cao lug rang mai rawm preeng ti lih. ²² Siyiex ah nin, "Pa nhim ang lai koe son pui caox caig heue."

¹ Klawn tiex khankix eue, nghiet ka Aux, pex pui kuceu khaing dee singai eue, nghiet heue, Siyiex hoik kok ka Aux, tom ka daux vaig, Nawh cao hoik dauk ceu kaux aux tom yam ot aux daux vaig miex tix. ² Nawh yuh jheeh aux awm vaig lawm mai mox aux ka greem veei taix tix. Yuh aux mawh te rawn tix plang mai Nawh mox aux ka daux mawk te tix. ³ Nawh ah nin ka aux, "Maix mawh siliex Aux, pui Isarelax pa rieb Aux min pakngai kheu maix." ⁴ Khaix an aux ah nin, "Aux hoik yuh kaing ka daux pa giex going, Aux hoik nai riang rao tix, pa ang tie mawh tidtix, viang mawh nan, pa mawh meh aux, koe mai Siyiex mai totaix pa khaw aux ti pon koe tau mai Siyiex." ⁵ Yam in Siyiex, cao pa yuh aux jah tom daux vaig, sonsang mawh siliex Nawh Cao mai sonsang deeh viex Yakop hoek ka Nawh Cao, sonsang khrawm pui Isarelax ti hoek ka Nawh ah nin, mawh kheu aux rieb min pakngai ka daux ngai Siyiex mai Siyiex aux tak mawh riang rao Aux. ⁶ Nawh Cao ah nin, "Awm pa mawh maix siliex Aux, sonsang yaog ka doeh ru Yakop mai sonsang kieh pui Isarelax, pa deuk deeh mhawm krax ot, jhak ti yaox ka an awm pa mawh pa iak ngie, Aux kieh maix mawh pa riang ka pui piang haktiex, sonsang tah hu krax taoh tom sidah sidu haktiex." ⁷ Siyiex cao pa taoh pui Isarelax mai cao pa singax singeh, ah nin ka pui pa salao mai ka pui pa koeng ceu pui haktiex kah mai pa mawh siliex cao pa kwang haktiex, "Simiang tak jhak mai kaoh cung, cub kawn simiang tak krub ka nawh, kheu Siyiex mawh cao pa kaux sijax, cao pa singax singeh pui Isarelax, cao pa laug ka maix." ⁸ Siyiex ah nin ka daux bawg yam pa khaw, Aux hoik pawk lox maix mai ka daux singaix krax taoh, Aux hoik teem ka maix, Aux hoik kia ngien ka maix mai kieh maix yuh sijax mukheu ka pui piang haktiex, sonsang pang ka haktiex, sonsang tawx sinngao ka haktiex dee yiien yawg. ⁹ Ah nin ka pui pa laung khankix, hoek heue mai ka pui pa ot ka daux pa faik, "Jhi tokaux tix heue, "Kix tak eei ju tix hawt krax laux, ka dee koe rib ka piang dee lhaong mawh dee sawg kix ti ih. ¹⁰ Kix tak ang lai cai rhawm mai ang lai simie ti nyaux rawm, si aoh praix mai singaix ang lai hoek ka piang kix, mawh kheu Nawh Cao caux rhawm thung kix mai thung kix hu ka rawm keut. ¹¹ Aux tak kieh gawng cie tix mawh krax mai yaog krax ting Aux lhaong. ¹² Jhak heue, cub pui in tak hoek khaing dee singai, tiblah tak hoek khaing plak laong mai plak klip singaix mai tiblah kaoh khaing haktiex Sinim. ¹³ Raoma eue, ah lai rhax, kheu pa gaux rhawm, haktiex eue, gaux rhawm heue, gawng khankix eue, gaux rhawm ah lai rhax, mawh kheu Siyiex tawx riang rao ka pui Nawh Cao mai caux rhawm ka pui tix pa kha rhawm tix khankix. ¹⁴ Zion ah nin "Siyiex hoik tik vud ka aux mai cao simiang Aux hoik piawm ka aux." ¹⁵ "Mawh sang piawm bun pa sang tawx kawn ngie tix peuex mai ang caux rhawm ka kawn pa keh khaing vaig tix lie? Viang kix kawn piawm kawx, Aux tak ang piawm ka maix. ¹⁶ Jhak heue, Aux hoik tiiem maix ka daux tawm taix tix, guh veng maix koe sivoe ngai Aux jheung jheung. ¹⁷ Cao phan maix tak pex ka pui yuh maix laux mai kieh pui pa tik vud ka maix lih hu khaing maix." ¹⁸ Yaog ngai tix jhak hawt vung viang tix, kix tak khrawm paox tix hoek ka maix, Siyiex ah nin "Awm im ju Aux maix tak ceep ka kix awm kraung ceep mai rhawt kix ka nyoi tix awm bun yuh ka paox. ¹⁹ Dah dee tik maix mai dee ang pui ot mai haktiex pa laux leeing maix, tak sikhawp ka pui pa ot kah mai pui pa sang bleet ka maix tak ot singai. ²⁰ Khaix yum kawn praix, pa keh yam yaox maix krax tuk tak ah nin ka daux yhaok maix, dee in sikhawp son aux, sawg ka dee sang tawx tix aux ot. ²¹ Yam an maix tak sang ah nin ka daux rhawm tix, mawh pui mawx pa keh ti tawx in son aux, aux hoik tuk kheu yum kawn tix mai hoik mawh pui neh mai mawh pui pa giex laung mai pa vung viang, mawh pui mawx pa eei kix ting laong lie? Jhak heue mai hoik prah aux ot nong nong mai pui in khankix kaoh khaing dee mawx?" ²² Siyiex ah nin, "Jhak heue, Aux tak yaog taix tix, ka piang haktiex ku meung mai pak chix tix, son pui kuceu, kix tak klien kawn simex maix hoek mai kix tak pux kawn bun maix hoek ka piang klip tix. ²³ Simiang khankix tak mawh keeing seep maix mai laux simiang khankix tak mawh miex seep maix, kix tak ngeuh kaing tix ka maix mai gup pakngai tix ka piang tiex mai lied phawng tiex ka caong maix mai maix tak tawng mawh Aux Siyiex, pui pa krox jun ka Aux, tak ang pon krax kaig." ²⁴ Tak rhim kug khaing pui ting riang mai tak teem pui pa giex laung khaing pui pa pex lie? ²⁵ Siyiex ah nin, "Pie ka pui pa giex laung pa viex pui pa ting riang hu, tak deeh viex hoek mai kug pui pa lhat ex kah kawx, tak deeh pon taoh kah, mawh kheu Aux tak yuh ka pui pa simah ka maix mai tak taoh ka kawn praix maix. ²⁶ Aux tak kieh pui yeen ya ka maix ih ka nex cao tix, kix tak yoek ka nham cao tix, awm yoek ka rawm plix siiet mai kawn pui kix tak tawng, Aux mawh Siyiex Cao pa taoh maix mai cao pa taoh lawd maix, Siyiex pa ting riang pui Yakop heue.

¹ Siyiex ah nin, "Mawh koe lai grieh miex pex, pa hoik ploi aux nawh luan di mawx? Phan ang mawh nan, mawh hoik coh Aux pex ka ceuk rom Aux ka kaux pui mawx lie? Mawh kheu jao phimap pex, pex hoik kham krax pa coh tix mai mawh kheu jao pa lud pex khankix, miex pex tom mawh pa hoik ploi tix luan heue. ² Yam hoek aux, pui tix kaux kawx ang lai koe kheu jao pa yuh ka mawx lie? Yam kok Aux pui pa sang deeh pawk ang lai koe pie tix kaux kawx, kheu jao pa yuh ka mawx lie? Mawh hoik ngaing taix Aux, ka ang pon ti deeh taoh lie? Phan ang mawh nan, mawh ang Aux koe sibrawm ti sang deeh taoh lie? Jhak heue, Aux ah mai rawm sigrit sigra kroh hu heue. Aux kieh rawm klawng khankix mawh daux tiagtu, ka pa koe ka daux kix sium kheu ang rawm lai koe mai yum ka sang nyaux nie tix rawm heue. ³ Aux ceep raoma ka kraung lung mai Aux yuh chee rhix mawh pa kheem kix heue." ⁴ Siyiex pa mawh Siyiex hoik tawx dak pa chix gau chix sawn ka Aux, sonsang tawng Aux ti chix sikah gumlox pa teem ka pui pa koe krax taug mao heue. Nawh so Aux ku ngawb, Nawh so yhaok Aux, sonsang chix mhong, awm pui pa gau lai heue. ⁵ Siyiex pa mawh Siyiex hoik paoh daux yhaok Aux mai Aux ang lai koe krax pa kieh thiang mai Aux ang lai deeh veeh tix plak khaix heue. ⁶ Aux tawx blawg tix ka pui an kix, pa sivied ka Aux mai tawx sibax Aux ka pui an kix pa reeig ka hauk sibax Aux heue. Aux ang lai mox pakngai khaing krax kaig tua mai khaing krax baig heue. ⁷ Siyiex pa mawh Siyiex tak teem ka Aux. Mawh kheu nan, Aux tak ang lai koe krax pa laux pakngai. Mawh kheu nan, Aux kieh pakngai tix kiien awm simaox pai mai Aux tawng ka ang Aux mawh pa kaig pa tua heue. ⁸ Mawx pa kok Aux koe krax pa rahsee, ot dex Aux heue. Mawh pui mawx pa sang simah ka aux lie? Kieh ex cung ti ot tau heue. Pui koeng ka aux mawh pui mawx lie? Kieh nawh hoek dex Aux heue. ⁹ Jhak heue, Siyiex pa mawh Siyiex tak teem ka Aux. Mawh pui mawx pa tak sang prawng ka piang Aux lie? Kix tak sang prim hu khawmuik, awm kraung ceep, pung piang shiah tak ih an kix uik heue. ¹⁰ Mawh pui mawx ka daux sinax pex pa koe krax lhat graung ka Siyiex lie? Mawh pui mawx pa nghiet lox krai siliex nawh lie? Mawh pui mawx pa lailing ti hu ka daux pa faik mai pa ang koe pa riang, kieh nawh een rhawm tix ka daux ceu kaux Siyiex mai deuh rhawm tix ka Siyiex nawh heue. ¹¹ Pex khawmuik, pa keeig ti deuh ngu lai lawm tokaux cao pex mai lailing ti hu ka daux rao ngu pex mai ka daux ngu pa hoik keeig pex khankix, pex tak pon ti koe in khaing daux tawm taix Aux, pex tak ot ka daux krax khi rhawm heue.

¹ "Pex pa hoek ti hu ka pa rahsee khankix mai pex pa sawg ti yaox ka Siyiex khankix eue, nghiet ka lox aux heue, jhak ka riang pa hoik saik pex lih an mai ka daux doh pa hoik kaong pex heue. ² Jhak ka keeing pex Abraham mai ka Sara pa hoik keh ka pex heue. Grawh grawng nawh, aux hoik kok ka Abraham yam ot nawh nong nong mai nawb bwan ka nawh mai kieh nawh pre haoh hun heue." ³ Grawh grawng nawh, Siyiex tak tawx krax nyawm rhawm ka veng Zion Nawh Cao tak tawx krax nyawm rhawm ka can dee pa yiien nawh khankix heue. Nawh Cao tak yuh daux tiagtu nawh awm Eden mai daux tiang mhaik nawh awm sipeem Siyiex heue. Krax gaux rhawm mai krax pa nyawm rhawm, tak sang mawh pa yaog tix ka daux veng Zion, khawm krax pa yaog yaw bwanson mai lox rhax pa nyawm ti nghiet khankix heue. ⁴ Ceu pui Aux khankix eue, nghiet ka lox Aux mai cub pui Aux khankix eue mai daong yhaok tix ka lox Aux heue. Grawh grawng nawh, gumlox been tak lih khaing Aux mai Aux tak yuh krax pa mawh meh Aux kaux cong, mawh krax pa riang son pui khankix heue. ⁵ Krax pa rahsee Aux hoik dex. Krax taoh Aux hoik lih bleeh mai plawng tai Aux tak prawng ca ka pui khawmuik heue. Klawn tiex rawm sigrit sigra khankix, tak krox jun ka Aux mai een rhawm tix ka plawng taix Aux heue. ⁶ Yaog ngai pex jhak ka raoma mai num ti jhak ka piang haktiex heue. Mawh kheu raoma khankix tak grai hu awm taox ngu, haktiex tak prim hu sinyek awm kraung ceep mai pui an kix pa ot ka daux haktiex tak yum ka daux awm bu heue. Krax taoh Aux tak koe leeing ju mai krax pa rahsee Aux, tak ang lai mawh pa grai hu heue. ⁷ "Pex pa tawng ka krax pa rahsee mai pex pa mawh pui pa teei gumlox been Aux laig daux rhawm tix khankix eue, nghiet ka lox Aux heue. Paw khi rhawm ka lox pa deuh pui phimap mai paw koe krax lhat graung ka lox pa salao kix heue. ⁸ Grawh grawng nawh, mawt tak ih kix awm kraung ceep mai viag tak ih kix awm kraung hauk yung heue. Krax pa rahsee Aux tak koe leeing ju mai bwanson krax taoh Aux tak koe ku ju leeing ju heue." ⁹ Plawng taix Siyiex eue, siduad heue, siduad mai ceep kraung son koe riang rao siduad awm singaix baux yam an kix dix, ka daux baux ju pa hoik luan khankix heue. Ang mawh plawng taix Maix an, pa hoik mat yuh ka Rakhap mai hoik suat ka siyawng lie? ¹⁰ Pa hoik yuh rawm sigrit sigra, pa mawh rawm pa kied raux mai pa hoik yuh dee pa raux rawm sigrit sigra khankix mawh krax sonsang tiang pui pa hoik taoh khankix ti hu, ang mawh Maix lie? ¹¹ Mawh kheu nan pui pa hoik deeh taoh Siyiex tak deeh ing mai hoek ka veng Zion tau mai ah lai rhax, tau mai krax gaux rhawm, leeing ju tak hoek piang kaing kix heue. Kix tak pon krax pa gaux rhawm mai krax pa nyawm rhawm, krax khi rhawm mai krax ngia krax ngheeik tak to ti luan heue. ¹² "Mawh Aux khaing, pa mawh cao pa tawx krax nyawm rhawm pex. Mawh maix pui mawx pa koe krax lhat graung, ka pui pa tak sang yum mai ka kawn pui pa tak sang awm rib riem lie? ¹³ Maix hoik piawm ka Siyiex, cao pa phan pa deuh maix pa hoik neh raoma khankix lih mai pa hoik sum ti deuh riah haktiex khankix heue. Maix hoik koe krax khi rhawm leeing lang singaix, kheu jao grawng krax song rhawm cao pa yeen ya yuh krax laux, krax song rhawm cao pa yeen ya an koe dee mawx lie? ¹⁴ Pui pa kham krax pa giex laung khankix, koe krax pa khran son tak sang pon nawh ti mawh pa ploi ti luan, nawh tak ang yaox ti yum ka daux thawng mai son pa ih nawh tak ang lai koe krax cud cha heue. ¹⁵ Aux mawh Siyiex, pa mawh Siyiex maix, pa ku klao ka rawm sigrit sigra, pa kieh puk pak rawm sinum siaox, ceu kaux Nawh mawh Siyiex Cao kru naing raoma heue. ¹⁶ Aux hoik sau gumlox Aux khankix ka daux jheeh maix, Aux hoik kieh veei pang peue taix Aux tawb ka maix, sonsang pon Aux tix nih raoma khankix mai pang ti deuh num riah haktiex mai ah nin ka veng Zion maix mawh ceu pui aux heue." ¹⁷ Maix pa hoik nyaux kawk krax pa song rhawm khaing ka daux taix Siyiex, pa mawh veng Yerusaliem eue, siduad heue, siduad mai yaog ti kaoh heue maix hoik nyaux kawk nyaux tom uik mai hoik koe krax pa tu tiex tix heue. ¹⁸ Pui pa sang jhi daux krax ka nawh, ang lai koe tix kaux kawx, khaing ka daux kawn simex khankix khawmuik pa hoik keh nawh mai pui pa sang tuk taix nawh ang lai koe tix kaux kawx, khaing daux kawn simex khankix khawmuik, pa hoik eei nawh ting lhaong heue. ¹⁹ Ceu inkix hoek ka maix, pa mawh krax yiien hu pui mai krax pa laux leeing, krax pa sibhawm praix mai vaig lawm khankix heue. Mawh pui mawx pa tak sang koe krax laux rhawm son maix lie? Aux tak sang pon tawx krax nyawm rhawm ka maix lie? ²⁰ Kawn simex maix khankix hoik awn hoik peei, kix it ka daux gah krax khankix, awm kiah pa hoik krix ka kie heue. Kix mawh pa naog ka krax pa song rhawm Siyiex mai khawm krax pa ah Siyiex maix heue. ²¹ Mawh kheu nan maix pa koe krax pa kha rhawm mai pa yoek ka ceu pa ang mawh rawm plix siiet eue, Yuh bwanson nghiet ka lox in awx! ²² Simiang maix, pa mawh Siyiex mai pa mawh Siyiex maix, pa hoik prawng ca son pui nawh khankix, ah nin jhak heue, Aux hoik teei kawk nyaux pa hoik koe maix krax pa tu tiex tix ka an pa mawh kawk nyaux krax pa song rhawm Aux, hu khaing daux taix maix, maix tak ang lai yaox ti nyaux khaix in heue. ²³ Aux tak sau ti deuh kawk an ka daux tawm taix pui an kix pa yuh krax kha ka maix mai kix hoik sax ah nin ka maix, gup maix it, sonsang daw yix ti hu ka piang maix heue. "Maix hoik tawm kaux cao tix ka piang tiex mai awm daux krax, son pui an kix pa sang daw ti hu heue."

¹ Veng Zion eue, siduad heue, siduad kaoh mai teei riang rao maix heue. Veng Yerusaliem, pa mawh veng pa singax singeh eue, ceep kraung pa mhawm grang maix khankix heue. Grawh grawng nawh, pui pa ang nyang pat hak tix mai pui pa ang nyang singax singeh khankix, tak ang lai hoek ka maix khaix in heue. ² Veng Yerusaliem eue, khruah ti tik phawng tiex khaing maix, yaog ti kaoh mai ngawm ka dee lhaong heue. Kawn bun veng Zion, pa mawh pui pa giex laung eue, yah maox ceng khaing ngawg maix heue. ³ Siyiex ah nin "Pex hoik coh tokaux tix ka daux pa ang pon ngawh mai maix tak sang mawh pa deeh taoh ti teei ka krax pa ang yaox ti tawx mau heue." ⁴ Grawh grawng nawh, Siyiex ah nin, "Pui Aux khankix hoik lih hu phao voe, ka daux haktiex meung Ejiptux sonsang peung ti ot tan, khaix an, pui Asurix khankix yeen ya ka piang kix ka daux krax pa ang koe grawng koe ceu heue. ⁵ Yam in Siyiex ah nin, pui Aux khankix hoik teei ti hu ka daux pa ang pon ngawh, Aux sang ot yuh patix tin lie? Siyiex ah nin, "Pui an kix pa kwang ka piang kix, ah lox ting lox lhaong mai ceu kaux Aux mawh pa hoik salao leeing lang singaix heue. ⁶ Mawh kheu nan, pui Aux khankix tak tawng ka ceu kaux Aux, mawh kheu nan, kix tak tawng ka daux singaix an, ka mawh Aux, pa sikah, "Jhak heue mawh Aux heue." ⁷ Pui pa krai pao krax pa nhim, pui pa viex lox bwan gaux rhawm ceu pa mhawm khankix hoek, pui pa pao grawng krax taoh, ah nin, veng Zion, Siyiex maix hoik mawh simiang pa kwang. Caong kix pa viex lox bwan gaux rhawm, mawh pa mhawm grang ti yaox ka piang gawng khankix miex ding! ⁸ Nghiet lox cao pa pao maix khankix mai kix tak yaog lox tix lih tau mai ah lai rhax tau mai paox tix heue. Grawh grawng nawh, ngai kix tak yaox yam deeh viex Siyiex veng Zion hoek heue. ⁹ Ka dee pa hoik laux leeing veng Yerusaliem khankix eue, yo lox tix lih ka daux krax pa gaux rhawm mai ah lai rhax tau heue. Grawh grawng nawh, Siyiex hoik tawx krax pa nyawm rhawm ka pui nawh khankix, Nawh Cao hoik deeh taoh ti teei ka veng Yerusaliem heue. ¹⁰ Siyiex hoik jhi plawng taix pa singax singeh Nawh, ka plak sivoe ngai ceu pui khawmuik mai pui deeh sidah haktiex khawmuik tak yaox ka bwanson krax taoh Siyiex ex heue. ¹¹ Lih hu heue, lih hu heue, lih hu khaing tan, paw hu krox hu teeh ka ceu pa ang singax, lih hu khaing daux sigreung an heue. Pex pa klawm kraung pa shiao Siyiex khankix eue mai kieh tix mawh pa singaix heue. ¹² Pex tak ang pon ti lih hu ka daux pa nied tix mai ang pon ti to hu heue. Grawh grawng nawh, Siyiex tak hu ka plak sivoe pex mai Siyiex ceu pui Isarelax tak mawh pa pau plak khaix maix heue. ¹³ Jhak heue, siliex Aux tak yuh kaing ka daux krax pa koe pingnya heue. Nawh tak mawh pa yaog ti ting lhaong mai tak mawh pa kied lhaong heue. ¹⁴ Awm krax pa hoik daox deng pui tom nie ka Nawh, mawh kheu grang pakngai Nawh hoik nie lheu khaing pui tang kaux mai grang grao Nawh hoik nie lheu laux khaing kawn pui khankix, ¹⁵ Awm an Nawh Cao tak kieh ceu pui tom nie singax heue. Simiang khankix tak nyeep jheeh tix ka Nawh heue. Mawh kheu kix tak sang yaox can ceu pa ang sax krai ka kix mai kix tak tawng sidawng ka can ceu pa ang kix sax mhong heue.

¹ Mawh pui mawx pa hoik yum rhawm ka pa krai ex lie? Siyiex hoik jhi plawng taix tix ka pui mawx lie? ² Mawh kheu Nawh tak haok hwan ka plak sivoe Nawh Cao, awm nyoig khaox pa awn mai awm riah khaox pa preung tix lih khaing daux tiex kroh heue. Nawh Ang koe pakpeung pa mhawm sonsang jhak ex ka Nawh ang koe krax pa mhawm grang sonsang simie ex ka Nawh heue. ³ Nawh mawh pa hoik kham krax pa nu nai mai pa hoik kham krax tik pui khankix, pa kham geu krax kha rhawm tom nie mai pa hoik meed ka ceu pa saux ngia heue. Nawh awm pa hoik mox pui pakngai khaing, nawh hoik kham krax pa nu nai mai ex ang lai koe krax yungyi ka Nawh heue. ⁴ Nawh hoik klawm ceu pa saux ngia ex khankix mai hoik peeh krax pa kha rhawm ex khankix, viang mawh nan, ex hoik keud Nawh mawh pa hoik pon krax kham geu mai pa kham krax sivied Siyiex heue. ⁵ Viang mawh nan, Nawh hoik pon krax mat, kheu krax pa lud ex khankix, Nawh hoik saux nex kheu phimap phighram ex mai kheu krax pa kham geu Nawh, ex pon krax pa nhim mai kheu pa mat Nawh, ex pon ti moi heue. ⁶ Ex khawmuik, hoik awm yung pa lud krax, ex ku kaux hoik tang veeh ti hu daux krax cao tix mai Siyiex hoik deuh phimap phighram ex khawmuik ka piang Nawh heue. ⁷ Nawh hoik mawh pa kham krax yeen ya mai yam kham Nawh krax kha rhawm, Nawh koe krax tiem rhawm ang ang moing tix, Nawh hoik tuk tix hu, awm kawn yung pa sang pah tix yum mai awm yung pa ang nye ka plak sivoe cao pa rhip hauk nawh khankix heue. Mawh kheu nan, Nawh ang jheeh tix heue. ⁸ Nawh hoik mawh pa teei ti kham krax yeen ya mai krax ciyang mai ka daux baux ju Nawh, mawh pui mawx pa doh keud grawh grawng pa hoik mawh Nawh pa teei khaing daux haktiex pui pa im ju lie? Mawh kheu jao pa lud pui Aux khankix, Nawh Cao hoik pon krax pa kham geu kah heue." ⁹ Viang Nawh ang sax yuh ceu pa kin mai ang sax koe krax pie lhen ka daux jheeh Nawh tix ceu kawx mai kix hoik yuh simeeig Nawh tau mai pui caox, viang mawh nan, Nawh sipaung tix daux simeeig cao mi heue. ¹⁰ Viang yuh nan, an hoik mawh pa khaw rhawm Siyiex sonsang yuh Nawh mat mai kieh Nawh koe krax saux nex heue. Nawh Cao hoik yuh Nawh mawh krax tan pluat ploi phimap. Nawh Cao tak yaox ka doeh ru Nawh mai tak tuk ju singaix Nawh lang mai krax pa khaw rhawm Siyiex tak haok hwan ka daux tawm taix Nawh heue. ¹¹ Nawh tak yaox bwanson kaing jhaw pa yuh Nawh mai koe krax pa fah rhawm fah rhi ka. Ka daux krax tawng yung ka siliex pa rahsee Aux, tak kieh pui tom nie koe krax pa rahsee. Nawh tak yaox ti kham son phimap kix heue. ¹² Mawh kheu nan, Aux tak gwieh ti tawx Nawh pon nyum tau mai pui ting mai Nawh tak gwieh ti pon kraung pa tud rhim khankix, tau mai pui pa ting riang rao heue. Mawh kheu Nawh Cao hoik klup ju tix ka piang krax yum mai Nawh hoik mawh pa simin tix tau mai pui pa lud khankix mai Nawh hoik kham geu phimap phighram tom nie mai khyox khaw son pui pa lud khankix heue.

¹ Bun pa neh eue, ah lai rhax heue maix pa ang nyang sax keh kawn mai maix pa ang nyang sax yaox ti kham krax saux mai keh kawn eue, yo ti ah lai rhax mai kok yo lox tix lhaong heue. Grawh grawng nawh, bun pa ang koe mex nie lheu koe kawn praix khaing bun pa hoik koe mex. Siyiex ah nin heue. ² Yuh dee ot nyiex gox maix vieh va mai nih man tie dee ot dee koe maix lih heue. Paw koe krax lhawk ka liak! Kieh maox maix baox lang mai kieh khaox maix kaux cong heue. ³ Grawh grawng nawh, maix tak nie baox yieh veng plak khawn dawm mai plak khawn gwiex mai doeh ru maix khankix, tak pon ti cie sinngao haktiex pui tang ceu khankix mai yuh veng pa hoik yiien an kix mawh dee ot pui heue. ⁴ "Paw koe krax khi rhawm heue. Mawh kheu maix tak ang hoek krax kaig tua mai ang pon ti mawh pa laux pakngai, mawh kheu maix tak ang lai mawh pa kham krax salao heue. Grawh grawng nawh maix tak piawm krax kaig tua yam awn ju maix mai tak ang lai koe krax keud ka lox salao yam mawh maix miexmai, khaix in pie tix bawg kawx heue. ⁵ Grawh grawng nawh, cao pa phan pa deuh maix mawh mex maix heue. Ceu kaux Nawh mawh Siyiex cao kru naing raoma mai cao pa taoh maix mawh Siyiex pa singax singeh ceu pui Isarelax heue. Nawh tak kok tix mawh Siyiex piang haktiex khawmuik khawm leeing heue. ⁶ Grawh grawng nawh, Siyiex hoik kok ka maix, awm bun hoik tik hoik vud mai pa hoik koe krax laux rhawm, awm moeng pa teei yam awn ju maix pa hoik tik tix. Siyiex maix ah nin heue." ⁷ "Aux tik vud maix tivud ticu khaing, viang mawh nan, ka daux krax pa caux rhawm pa kied ting Aux tak sang khrawm maix hoek heue." ⁸ Ka daux krax pa kied song rhawm song rhi, Aux mox plakngai khaing maix tivud ticu, viang mawh nan, ka daux krax moh krax rhawm leeing ju, Aux tak koe krax caux rhawm ka piang maix heue." Siyiex, cao pa taoh maix ah nin heue. ⁹ "In mawh pa awm krax kheem rawm ju Noax ka Aux heue. Awm krax pa hoik tiextu Aux, krax kheem rawm ju Noax tak ang lai baox kheem ka piang haktiex khaix in heue. Awm hoik tiextu Aux, tak ang lai koe krax song rhawm ka maix mai ang lai ah ka maix heue. ¹⁰ Grawh grawng nawh gawng ting khankix tak gah tix mai gawng iak tak mawh pa yung yiang mai gah tix heue." Viang mawh nan, krax moh krax rhawm Aux tak ang lai gah khaing maix mai gumlox sijax mukheu pa nhim Aux tak ang lai yung yiang mai gah tix. "Siyiex pa caux rhawm ka maix ah nin heue. ¹¹ Maix pa mawh pa hoik kha rhawm tix mai pa hoik phlu bhaung ting mai pa ang nyang koe krax pa nyawm rhawm eue, jhak heue, Aux tak sang yuh ti deuh jaong simaox maix ka siang simaox pa toh riang mai yuh ti deuh num riah maix khankix ka siang simaox pa klai heue. ¹² Aux tak yuh ka piang guh veng maix khankix ka siang simaox pa raoh mai siviex maix ka siang simaox yi mai guh veng maix khawmuik ka siang simaox pa laoh lie heue. ¹³ Kawn praix maix tak mawh pa hoik gau Siyiex mai kawn praix maix tak pon krax nhim pa kied ting lhaong heue. ¹⁴ Maix tak mawh pa kaux cong ka daux krax pa rahsee maix tak mawh pa singai khaing krax pa yeen ya, grawh grawng nawh maix tak ang lai koe krax lhat graung mai singai khaing krax pa glhat, grawh grawng nawh, krax pa glhat tak ang lai hoek dex maix heue. ¹⁵ Kix tak sang deeh kraix khrawm tix, viang mawh nan, ang tie mawh kheu grawng Aux heue. Can pui pa kraix khrawm ti tieh feen ka maix tak deeh hoek tu tix ka Maix heue. ¹⁶ Jhak heue, Aux hoik phan ti deuh cao pa yuh kraung naing cao chix kaing rhiiem pa phlu suah ka daux ngu mai pa viex kraung shiao tix hoek son kaing yuh nawh heue. Aux hoik phan ti deuh cao pa yuh krax laux leeing son pa laux leeing heue. ¹⁷ Can kraung naing pa hoik yuh tix puing ka maix, tak ang lai koe krax pa chix shiao mai can dak pa hoik yaog ti tieh feen ka maix, ka daux yam pa prawng ca maix tak tat ti tawx krax ciyang ka an heue. In mawh sinngao pa pon siliex Siyiex mai krax pa rahsee kix mawh pa kaoh khaing Aux. Siyiex ah nin heue.

¹ Can pui pa sang nyaux nie rawm khankix eue, Hoek ka dee koe rawm. Pex pa ang koe mau khankix eue, hoek liag maix ih nyaux heue. Mawh heue, hoek liag rawm plix siiet mai rawm teeih ka daux pa ang tix viex mau mai ka pa ang tix tawx ngawh heue. ² Pex cai mau son ceu pa ang mawh pa ih mai riang kaing yuh pex khankix, son ceu pa ang pon tawx krax pa fah rhawm kheu jao pa yuh ka mawx lie? Nghiet mhawm mhawm ka lox Aux mai ih priex ceu pa mhawm mai kieh rhawm rhi pex koe krax gaux rhawm ka daux krax pa ih pa nyaux pa tie heue. ³ Daong yhaok maix hoek ka Aux nghiet ka lox Aux mai khwan ju maix tak im ju mai Aux tak yuh gumlox sijax mukheu leeing ju tau mai maix, pa mawh bwanson pa een Davit rhawm tix ka heue. ⁴ Aux hoik yaox nawh, mawh pui pa kham sakse ka pui khawmuik, pa mawh cao bung kwang son pui khawmuik heue. ⁵ Maix tak kok ceu pui pa ang maix sax tawng hoek mai ceu pui pa ang sax tawng ka maix khankix, tak to ti hoek ka maix, kheu jao Siyiex, pa mawh Siyiex maix, pa mawh Siyiex pa singax singeh ceu pui Isarelax heue. Mawh kheu Nawh Cao hoik yaog min pakngai maix heue. ⁶ Sawg ka Siyiex, yam kawn pon pex ti sawg ka Nawh Cao, kok ka Nawh Cao yam dex Nawh Cao heue. ⁷ Kieh pui caox caig tik vud ka daux krax cao tix mai pui pa ang rahsee khankix tik vud ka krax keud tix, kieh nawh deeh ing hoek ka Siyiex mai Siyiex tak koe krax caux rhawm ka nawh mai hoek ka Siyiex ex. Mawh kheu Nawh Cao tak yuh krax pluat ploi pa kied ting heue. ⁸ Grawh grawng nawh, Siyiex ah nin, "Krax keud Aux ang awm krax keud pex, daux krax Aux ang awm daux krax pex khankix heue. ⁹ Grawh grawng nawh, awm nie lheu lhaong raoma khaing haktiex, daux krax Aux mawh pa nie lhaong khaing daux krax pex khankix heue. Krax keud Aux mawh pa nie lheu lhaong khaing krax keud pex khankix heue. ¹⁰ Grawh grawng nawh, awm lih lhiex mai rawm rha khaing raoma mai ang lai deeh ing tan, viang nawh nan, cao yuh haktiex mai kieh haktiex kuah nghox koi mai simie sonsang pon cao rhuat simie ti koe simie mai kieh cao pa ih koe pa ih, ¹¹ awm an gumlox Aux tak mawh pa lih khaing daux jheeh Aux heue. An tak ang lai deeh ing ka Aux ka daux krax pa giex going, viang mawh nan, tak grum naog yuh ceu pa khaw rhawm Aux mai an tak koe krax haok hwan ka daux ceu pa hoik ploi Aux an hu heue. ¹² Grawh grawng nawh pex tak lih hu tau mai krax pa gaux rhawm mai mawh pa hoik thung ti lih tau mai krax pa nhim heue. Gawng ting mai gawng iak khankix, tak kok yo ti ah lai rhax ka plak sivoe pex mai pang khaox pa koe daux tiag tak dieh taix tix heue. ¹³ Dee koe pang kat lawm khankix, khaox gix tak kwah, dee koe pang kat heeit khaox Muratu tak deeh kwah ti ot, an tak mawh son dee pa doh keud ka ceu kaux Siyiex mai son mhai rug leeing ju, pa tak ang lai mawh pa tat ti tik heue."

¹ Siyiex ah nin, "Priex rien ka krax pa khaw caw mai yuh ceu pa rahsee heue. Grawh grawng nawh, bwanson krax taoh Aux hoik dex hoek mai krax pa rahsee Aux tak sang mawh pa jhi tix heue. ² Bwanson koe ka pui yuh nin, ka kawn pui pa priex rien khaing krax pa koe lox salao ka singaix twah mai pa chix priex rien taix khaing krax yuh ceu pa caox khankix heue. ³ Paw kieh pui tang ceu, pa hoik rom tix mai Siyiex ah nin, "Siyiex hoik gwieh ti deuh aux, khaing pui Nawh khankix, paw kieh pui sieh ah nin, aux mawh khaox kroh tix gawng heue." ⁴ Grawh grawng nawh, Siyiex ah nin, "Pui sieh pa priex rien ka singaix twah Aux khankix mai pa laug ti teei ceu pa kha rhawm Aux mai pa jhawp ti priex gumlox sijax mukheu Aux kaux cong, ⁵ Aux tak kieh kix ot daux nyiex Aux mai ka daux lawg Aux, koe krax pa doh keud mai ceu kaux pa nie lheu mhawm khaing pa koe kawn simex kawn bun khankix, Aux tak tawx ceu kaux leeing ju ka kix pa ang lai mawh pa tat ti tik heue. ⁶ Pui tang ceu pa hoik rom tix tau mai Siyiex sonsang yuh kaing jhaw Nawh mai sonsang moh ka ceu kaux pa priex rien khaing krax pa koe lox salao ka singaix twah mai pa jhawp ti priex gumlox sijax mukheu Aux kaux cong, ⁷ Aux tak viex kix hoek ka gawng pa singax Aux mai kieh kix koe krax gaux rhawm ka pa rawg bwan ka daux nyiex Aux. Krax tan pa gleeing kix mai krax tan pa appong kix khankix, tak mawh pa pon krax rieb ti teei ka piang khu dee tan Aux heue. Grawh grawng nawh, nyiex Aux tak kok mawh, nyiex dee rawg bwan son ceu pui khawmuik heue. ⁸ Siyiex pa mawh Siyiex, pa deeh kraix khrawm ceu pui Isarelax khankix pa hoik prung prang ti hu kudauh kudee, ah nin, "Aux tak baox khrawm ka pui tang ceu khankix, lheu khaing pui an kix pa hoik kraix khrawm ti hoek ka nawh heue." ⁹ Pa mawh totiag daux tong kaung khankix eue mai pa mawh totiag khaing ka daux nong tiag khaox khawmuik eue, hoek sonsang kieh ti ih heue. ¹⁰ Pui pau ka nawh khankix mawh pa dug ngai, kix mawh pa ang koe krax tawng yung khawmuik, kix mawh sox pa aw khawmuik, pa ang pon raoh mai tawng ngie it tix mai noi tix mai krax gaing ngie heue. ¹¹ Kix mawh sox khankix pa kied ghoeng ngie ka pa ih mai pa ang chix sak heue. Kix mawh cao liang yung khankix, pa ang pon ti koe krax tawng yung, kix khawmuik tang hu ngie ka daux krax hu cao tix, pui ku kaux tang sawg ngie krax pa sang pon tix bwanson tokaux cao tix heue. ¹² Kix tix kaux ah nin, "Hoek heue, Aux tak sang viex rawm plix siiet hoek mai ex tak nyaux tom sak rawm plix pa khiien heue. Pasax tak awm daux in singaix mai tak nie lheu mawh pa kied gaux silao heue."

¹ Yum pui pa rahsee ang lai koe pui pa teei laig daux rhawm tix heue. Teei pui pa koe krax nab yam khankix tix luan, ang lai koe pui pa doh keud ka tix kaux kawx, teei pui pa rahsee tix luan, mawh sonsang luan khaing pa caox heue. ² Kix tak sang yaox ti laig ka daux krax pa nhim ka daux krax pa rahsee hu cao kix heue. Kix tak tang laux lee tix ka dah dee it pui mawx pui an heue. ³ Viang mawh nan, pex pa mawh kawn simex kawn bun pa koe phi khankix, pex pa mawh kawn praix bun pa phit vao mai bun coh kaux tix khankix eue, "Hoek tin heue." ⁴ Mawh nyiah pex ka pui mawx lie? Pex ang jheeh tix mai blex dak tix lih ka pui mawx lie? Ang pex mawh kawn pa lud, doeh kawn praix pie lhen lie? ⁵ Pex pa koe rhawm ka riang griang khankix pa koe greem khaox klai khankix, pa pah kawn nyawm ka daux ngawd daux lung mai ka greem daux doh rang khankix lie? ⁶ Pa koe daux lon somaox pa plang pa nyu daux ngawd khankix, mawh nyum ciex maix heue. Ceu an khankix mawh sinngao cie maix, ka piang an kix kawx maix hoik lhauk krax tan pa nyaux maix hoik tawx krax tan pa mawh krax tan phawng ngox ca im. Mawh tak sang pon gun pon yeung Aux ka kaing ceu inkix lie? ⁷ Ka piang gawng dee pa kied lhaong maix hoik deuh ku it tix ka, ka dee an maix hoik haok ti sang tan krax pa appong tix heue. ⁸ Ka plak khaix siviex mai ka rong khaox siviex mai hoik yuh ti deuh krax pa doh keud maix ka heue. Grawh grawng nawh maix hoik tieh khaing Aux mai hoik peeik kraung ceep maix ka pui tang kaux mai hoik haok yuh ka piang ku it maix va mai hoik yuh sijax mukheu tau mai kix. Maix hoik moh ka ku it kix, ka dee hoik yaox maix kakaong kix heue. ⁹ Maix viex bee kraix hu ka simiang mai baox naok ceu pa bhawng tom nie maix hoik ploi cao cau tix khankix hu dee singai mai hoik yeen tokaux ti tiiem tom hoek daux meung yum heue. ¹⁰ Maix hoik taug mao kheu singai krax maix, viang mawh nan maix ang tie ah nin, "Krax keud pot jun pot ang lai koe heue. "Maix hoik yaox ka deeh koe riang rao plawng taix tix, mawh kheu nan maix ang lai koe krax pa laux rhawm ka heue. ¹¹ Maix lhat graung ka pui mawx? Khi rhwm kheu jao pui nawh, pa hoik pie lhen maix khankix mai ang lai koe krax pa doh keud ka Aux mai ang tie teei an laig ka daux rhawm tix, ang Aux mawh pa ot yawg tix ang nye ang nyux sonsang ang maix koe krax lhat graung ka lie? ¹² Aux tak pao tix krai pa rahsee maix mai kaing jhaw pa yuh maix khankix, viang mawh nan, kix tak ang lai tawx krax pa koe bwanson ka maix heue. ¹³ Yam riag yo maix lox tix, kieh riang griang krub ceu pa khrawm maix khankix deeh taoh ti teei maix heue. Viang mawh nan, bhaung tak tah kix hu dee singai khawmuik mai bhawm phlu kix luan tix dom neh khawmuik heue. Viang mawh nan, nawh pa een rhawm tix ka daux Aux, tak pon ti cie haktiex mai tak pon ti cie gawng pa singax singeh Aux mawh sinngao tix heue. ¹⁴ Siyiex ah nin, "Baox naok daux tiex. Baox naok daux tiex. Khre daux krax, teei ceu pa sang sideeing caong lih khaing daux krax hu pui Aux khankix heue." ¹⁵ Grawh grawng nawh, cao dee lhaong mai cao pa kied lhaong, pa koe leeing ju, pa ceu kaux mawh pa singax singeh, ah nin, "Aux ot ka dah dee lhaong mai dee pa singax, ot tau mai pui pa koe krax pa kied laux rhawm mai pa koe rhawm awn rhawm tiiem, sonsang kieh khwan pa koe krax pa awn rhawm khankix deeh im ju mai sonsang kieh rhawm pui pa laux rhawm khankix deeh im ju heue. ¹⁶ Grawh grawng nawh, Aux ang koe krax pa simah simiang leeing ju mai Aux ang koe krax pa song rhawm sijheeng heue. Grawh grawng nawh, lhat ju tak koe krax som nai ka plak sivoe Aux mai khawm khwan khankix, pa hoik phan hoik deuh Aux heue. ¹⁷ Kheu jao phimap phighram pa ghoeng rhawm nawh, Aux hoik song rhawm mai hoik tawx krax geu ka nawh heue. Aux mox pakngai tix mai hoik koe krax pa song rhawm mai nawh deeh tieh ti hu ka krax deeh plak khaix tix ka daux krax koe rhawm nawh heue." ¹⁸ Aux hoik yaox krax yuh nawh khankix mai tak sang pai krax saux nawh moi, Aux tak sang baox thong ka nawh mai deeh tawx krax pa nyawm rhawm ka nawh mai ka pui khu rhawm nawh khankix, ¹⁹ "Aux phan ti deuh siyieb jheeh khankix, kieh bwanson krax pa nhim koe ka pui pa ot dee singai mai ka pui pa ot dee dex heue. "Siyiex ah nin, "Aux tak pai krax saux nawh moi heue." ²⁰ Mawh ngie pui pa caox caig pa awm puk pak rawm sigrit sigra, ang pon ti koe krax yawg yiien mai awm pa hoik tik rawm glaox mai nyhee nyhawk luan heue. ²¹ Siyiex aux ah nin, "Krax pa nhim ang lai koe son pa caox caig heue."

¹ "Kok yo lox tix tom ting mai paw kieh jud heue. Yaog lox maix ting awm lox teettawng. Krai pui Aux mhong grawng krax pa lud kix mai jhi nyiex ma ceu pui Yakop khankix yaox grawng phimap kix heue. ² Kix sawg ti yaox Aux ku singaix mai gaux rhawm sonsang tawng tix daux krax Aux, awm ceu pui pa hoik yuh pa rahsee mai ang lai tik vud ka been krax prawng ca Siyiex mai kix mhaing been krax ciyang pa rahsee khankix ka Aux, kix gaux rhawm ka daux pa greed tix dex Siyiex heue." ³ Kix ah nin, "Ex hoik twah pa ih mai Maix Cao ang yaox yuh ka mawx lie? Ex hoik gun rhawm rhi tix mai Maix Cao ang tie deuh tix tawng yuh ka mawx lie? Jhak heue, ka daux singaix twah maix pa ih maix yuh krax pa nyawm rhawm tix mai cau ti ih pui yuh kaing maix khankix ka daux krax pa taug pa mao heue. ⁴ Pex twah pa ih mawh ngie son krax pa simah simiang! mai son krax pa thiang paox tix mai sonsang tawk pui ka lua taix pa caox caig an heue. Awm krax pa twah pex pa ih yuh nin, singaix in, tak kieh lox pex mawh pa ang pon mhong tix piang dee lhaong heue. ⁵ Krax twah pa ih yuh nin, khex mawh singaix hoik laug Aux pui gun rhawm tix lie? Mawh son pa sang ngum nawh kaing tix, awm lhax priem mai sonsang tawm nawh man chee rhix ka daux nyaox lie? Mawh tak sang kok maix in mawh krax twah pa ih mai mawh singaix pa sang rieb Siyiex ti teei lie? ⁶ "Krax twah pa ih pa hoik laug Aux, ang mawh sonsang yuh maox viang ceu pa caox caig khankix bhaw, sonsang tah ti deuh beeh pa cien khankix, sonsang kieh pui pa hoik kham krax yeen ya lih hu mai pa raig maix ti tik khaox glawm ku mu lie? ⁷ Ang mawh sonsang gwieh maix ti tawx pa ih ka pui pa cai rhawm mai ka pa viex maix pui pa hot pa shia pa mawh pa vu vie ti hoek ka nyiex maix, yam yaox maix pui pa ang koe kraung ceep maix tawx nawh ceep mai ang mox tokaux cao maix khaing pa dex mai nex nham cao maix lie? ⁸ Khaix an pa riang maix tak jhan lih awm pa riang plak ponngawb. Krax pai saux maix tak deeh phai moi mai krax pa rahsee maix tak hu plak sivoe maix heue. Min pakngai Siyiex tak mawh pa tieb plak khaix maix heue." ⁹ Yam an maix kok yo mai Siyiex tak pawk ka. Maix riag yo mai Nawh tak ah nin, Aux koe tin. "Phan maix teei ti tik khaox glawm khaing ka daux sigreung maix mai gien taix pa ci tix mai ah lox caox lox caig, ¹⁰ phan rhawm maix koe krax caux rhawm ka pui pa cai rhawm mai kieh pui pa kha rhawm khankix, koe krax fah rhawm, pa riang maix tak lih riang ka daux pa faik mai pa faik maix tak lih mawh awm yam jung singaix heue. ¹¹ Siyiex tak thung ka maix sijheeng mai tawx krax pa nyawm rhawm maix ka daux bawg yam kroh kroing mai kaux cong yuh si-ang maix. Maix tak mawh pa awm sipeem pa hoik see tix ka rawm mai awm rawm keut pa lih ang jud ang jai heue. ¹² Pui pa kaoh khaing maix, tak cox sum dee pa dawg laux. Maix tak yaog ti deuh num riah baux ju didix mai maix tak kok tix mawh, cao pa deeh cox sum guh veng pa hoik laux khankix mai cao pa deeh cox khre krax laux mai dee ot dee koe pui heue." ¹³ "Phan maix ang veeh caong tix hu khaing daux singaix twah mai ang yuh krax pa nyawm rhawm tokaux tix, ka daux singaix singax Aux mai kok singaix twah mawh pa gaux rhawm mai kok singaix singax singeh Siyiex mawh pa koe krax nab krax yam mai tak koe krax nab yam ka Nawh ka daux pa ang maix yuh awm rhawm cao tix mai ang sawg ti yaox ka krax pa nyawm rhawm rhi cao tix mai ang sikah ka gumlox cao tix khankix, ¹⁴ maix tak yuh krax gaux rhawm ka daux Siyiex mai aux tak sang kieh maix brug ka piang gawng lhaong piang haktiex khankix mai eei maix ka sinngao keeing maix Yakop, jheeh Siyiex ah nin heue."

¹ Jhak heue, Plawng taix Siyiex ang mawh pa ngaing tix ang pon taoh mai yhaok Nawh ang mawh pa lheet, ka tak sang pon mhong tix heue. ² Viang mawh nan, krax pa lud pex khankix hoik kieh pex gwieh khaing Siyiex pex mai phimap pex hoik kieh Nawh mox pakngai khaing pex, sonsang ang Nawh lai mhong heue. ³ Mawh kheu taix pex mawh pa hoik seeing ka nham mai gien taix pex hoik seeing ka krax pa lud, siyieb jheeh pex hoik krai lox pie lox lhen mai dak pex hoik ah lox pa ca nyhau heue. ⁴ Ang koe pui tix kaux kawx pa kaoh ka daux pa rahsee mai ang koe pui tix kaux kawx pa ah see ka daux pa kaux sijax, kix een rhawm tix ka gumlox pa ang koe cue koe cak mai krai lox pie lhen. Kix koe kaux ceu pa caox mai ka map grham heue. ⁵ Kix num tom siuing pa koe jai mai taing nyiex greeh heue. Pui pa ih ka tom an kix tak yum mai khaing tom pa hoik max an tak guah ti mawh siuing pa koe jai heue. ⁶ Keei nyiex greeh an khankix, ang pon ti mawh kraung ceep mai kix ang pon kheem tokaux tix ka kaing pa yuh kix heue. Kaing yuh kix mawh kaing pa koe map koe grham mai kaing pa kied kin koe ka daux taix kix heue. ⁷ Caong kix to ti hu ka pa caox mai kix nied ti yuh krax pa jauh nham pui pa ang koe phimap. Krax keud kix mawh krax keud pa koe map, krax pa nai mai krax pa laux leeing koe ka daux krax hu kix heue. ⁸ Daux krax pa nhim, kix ang tawng mai pa rahsee ang lai koe ka daux krax hu kix heue. Kix hoik cox krax pa vawk mawh son tokaux tix, can pui pa hu ka krax an, tak ang lai tawng ka krax pa nhim heue. ⁹ Mawh kheu nan krax pa rahsee mawh pa singai ot khaing ex mai krax pa rahsee ang pon hawt ti krup ex heue. Ex maong ti yaox ka pa riang, viang mawh nan, ex lailing ti hu ka daux krax pa ceep pa faik heue. ¹⁰ Ex pupi ti sawg ding nyiex awm pui pa dug ngai, awm ang ex koe ngai heue. Ex sideeing tix ka bawg yam jung singaix, awm bawg yam faik praix. Ex awm pui pa yum ka daux sigreung pui pa kluing pa bee khankix heue. ¹¹ Ex khawmuik briah lox tix lih awm krih mai yiiem doe awm sikaux, ex maong ti jhak ka pa rahsee, viang mawh nan, ang koe heue. Ex maong ti jhak ka krax taoh viang mawh nan, an mawh pa kied singai khaing ex heue. ¹² Grawh grawng nawh, krax pa lud ex, mawh pa hoik kied nie ka plak sivoe Maix Cao mai phimap phighram ex, mawh pa kham sakse ka ex heue. Grawh grawng nawh, krax pa lud ex khankix, mawh pa kawn koe tau mai ex mai ex tawng ka koe map grham ex, ¹³ ka grawng pa lud mai daux krax pa thiang ti tik ka Siyiex mai krax pa lih hu khaing Siyiex ex, krax ah lox pa yeen ya mai krax pa deeh tieh feen mai krax krai lox pa ang mawh ang meh mai krax pa hawt ah lox khaing daux rhawm tix, pa mawh gumlox pa lud loe khankix heue. ¹⁴ Krax pa rahsee mawh pa hoik deeh dak tix plak khaix, krax pa rahsee cung ti ot dee singai heue. Krax kaux sijax hoik goh daux krax mai pa rahsee ang pon ti laig heue. ¹⁵ Krax kaux sijax ang lai koe, pui pa via ti hu khaing pa caox, sipub krax pa tud rhim, yam yaox Siyiex ka pa ang rahsee an Nawh Cao koeng kah heue. ¹⁶ Nawh Cao hoik yaox ka ang lai koe pie tix kaux kawx mai hoik daox am ka ang cao pa khyox khaw ti kieh raw koe pie tix kaux kawx heue. Mawh kheu nan, plawng taix Nawh Cao hoik viex krax taoh hoek ka son Nawh mai krax pa rahsee Nawh mawh pa deeh joh jhan Nawh heue. ¹⁷ Nawh Cao hoik ceep krax pa rahsee, mawh son kraung naing pa tieb tie naok mai ceep krax taoh mawh son mhok khri ka piang kaing. Nawh Cao hoik ceep pa pawk bix, mawh son kraung ceep mai hoik ceep krax pa koe rhawm ti mawh son sibex dhah heue. ¹⁸ Nawh Cao tak deeh viied ti tawx awm kaing ceu pa yuh kix, song rhawm ka pui pa koeng ka nawh mai tawx krax pa kham geu ka pui koeng nawh khankix mai ka pui pa ot ka klawn tiex rawm sigrit sigra, Nawh Cao tak deeh viied ti tawx tom grum tom naog heue. ¹⁹ Mawh kheu nan, jah khaing dee klip singaix pui khankix tak koe krax lhat graung ka cau kaux Siyiex mai jah khaing dee lih singaix kawx pui koe krax lhat graung ka min pakngai Nawh Cao, yam laig pui koeng khankix, awm krax pa kheem rawm ti hoek, bhaung cie Siyiex tak yaog ti hoek phai heue. ²⁰ Siyiex ah nin, "Cao pa deeh taoh tak hoek ka veng Zion mai ka ceu pui Yakop khankix pa veeh khaing krax pa lud heue." ²¹ Siyiex ah nin, "Phan mawh son Aux, in mawh gumlox sijax mukheu pa hoik yuh Aux tau mai kix, pa mawh khwan Aux, pa ot ka piang maix mai gumlox Aux pa hoik sau ti deuh ka daux jheeh maix mai tak ang lai lih hu khaing daux jheeh doeh ru maix, pa sang toe doeh ru maix khankix, jah yam in mai khaix in leeing ju heue. Siyiex ah nin heue."

¹ Yaog ti kaoh, jhan riang heue. Mawh kheu pa riang maix hoik hoek mai min pakngai Siyiex mawh pa hoik jhan tix lih ka piang maix heue. ² Jhak heue, kheu pa faik tak sang kheem ka piang haktiex mai krax pa kied ceep pa faik tak sang kheem ti hoek ka piang pui khawmuik heue. Viang mawh nan, Siyiex tak yaog ti lih ka piang maix mai min pakngai Nawh tak mawh pa sidawng ka piang maix heue. ³ Pui tang ceu khawmuik tak hoek ka pa riang maix mai simiang tak hoek ka krax jhan riang pa lih khaing maix heue. ⁴ Maong ti jhak hawt vung viang maix khawmuik, kix kraix khrawm paox tau khawmuik mai hoek ka maix heue. Kawn simex maix khankix tak hoek khaing dee kied singai mai kawn bun maix khankix tak mawh pa kliien ti hoek ka hawt praok maix heue. ⁵ Khaix an maix tak sang yaox pa riang koe krax pa sigluang rhawm mai dee koe krax pa gaux rhawm ka heue. Grawh grawng nawh, krax pa magmi rawm sigrit sigra tak mawh pa veeh ti hoek ka maix mai krax magmi ceu pui tang ceu kawx tak hoek ka maix khawmuik heue. ⁶ Krax pa kied nie haoh hun phung kala uk, tak naog ka haktiex maix, cau kala uk hatiex Midim mai haktiex Epha khankix hoik tah ka daux haktiex maix heue. Haktiex Shebax khawmuik tak sang bleeh ti hoek mai kix tak viex khri mai Lawban hoek mai kix tak pao ti yo lox pa yaog yaw Siyiex heue. ⁷ Cub phung yung haktiex Kadax khawmuik, tak mawh pa kraix khrawm ti hoek ka maix, kawn yung mhaing haktiex Nabayok khankix, tak tawx maix shiao heue. Kix tak haok tau mai pa hoik rieb ti teei ka piang khu dee tan Aux mai Aux tak yaog min pakngai nyiex pa koe min pakngai Aux heue. ⁸ Pui mawx pa po ti hoek awm paiawm mai pa awm sikaux ka daux mheem kix lie? ⁹ Pui pa ot hawt baoh klawn tiex rawm sigrit sigra tak krox jun ka son Aux mai reu ting Tasux tak bleeh ti hoek phao ka, sonsang viex kawn simex maix hoek khaing dee singai mai khawm mau khri kix hoek tau mai kix, ka son ceu kaux Siyiex pa mawh Siyiex maix mai ka Siyiex pa singax singeh ceu pui Isarelax khankix, mawh kheu Nawh Cao hoik yaog ka min pakngai maix heue. ¹⁰ Pui tang meung khankix tak ang sum guh veng maix mai simiang kix tak yuh ti tawx kaing ka maix heue. Grawh grawng nawh, ka daux krax pa song rhawm Aux hoik sax tawx krax pa kham geu ka maix, viang mawh nan, yam in ka daux pa koe rhawm Aux, Aux hoik koe krax caux rhawm ka maix heue. ¹¹ Siviex maix khankix tak mawh pa paoh ti deuh sijheeng, kix tak ang lai mawh pa nyeep tix ku singaix, sonsang kieh pui viex krax mag mi pui tang meung khankix hoek ka maix mai khawm simiang kix hoek heue. ¹² Mawh kheu pui ceu tix ang ah, meung haktiex mawx ang ah pa ang yuh kaing jhaw maix khankix, tak grai grup tix hu mai haktiex an kix tak mawh pa laux leeing pak lawg heue. ¹³ Min pakngai Lebanon, tak hoek ka maix, khawm khaox gix, khaox Taderax mai khaox Tashurax tau, sonsang mhawm grang yuh dee pa singax singeh Aux, Aux tak sang yuh dee een Aux caong tix khankix koe min pakngai ka heue. ¹⁴ Kawn simex pui pa hoik yuh krax kha rhawm ka maix khankix, tak hoek num kaing tix ka maix mai pui khawmuik pa hoik nu nai ka maix, tak krub hawt caong maix, kix tak kok maix, mawh veng Siyiex, veng Zion cie Siyiex pa singax singeh ceu pui Isarelax heue. ¹⁵ Viang maix mawh pa hoik dawg tik vud mai pa hoik koeng, son ang pui tix kaux kawx hu laig ka maix, Aux tak yuh maix mawh ceu pa kied blon mhawm leeing ju, son krax gaux rhawm pui khankix ku ju heue. ¹⁶ Maix tak nyaux ka rawm teeih ceu pui tang meung mai tak peuex teeih simiang khankix heue. Maix tak tawng ka mawh Aux cao taoh maix, pa mawh Siyiex mai cao pa taoh maix, pa mawh cao pa kied ting sibrawm ceu pui Yakop heue. ¹⁷ Aux sang viex khri hoek son tang tawng lheung, viex mau hoek son tang rhiem mai viex tawng lheung hoek son tang khaox mai viex rhiem hoek son tang simaox, Aux tak yuh pa nhim mawh son simiang maix khankix mai krax pa rahsee mawh son cao pa koh keen maix khankix heue. ¹⁸ Krax pa kin tak ang lai mhong tix ka daux haktiex maix khaix in, krax pa nai pa nawk mai krax pa laux leeing kawx, tak ang lai koe ka daux sinax mee haktiex maix khankix heue. Viang mawh nan maix tak kok guh veng maix mawh krax taoh mai siviex veng maix mawh krax yaog yaw heue. ¹⁹ "Singaix tak ang lai mawh pa riang maix ka daux plak ponngaix khaix in, pa riang khix tak ang lai jhan pa riang ka maix heue. Viang mawh nan, Siyiex tak mawh pa riang leeing ju ka son maix mai Siyiex tak mawh min pakngai maix heue. ²⁰ Singaix maix tak ang lai klip khaix in mai khix maix tak ang lai jee heue. Grawh grawng nawh, Siyiex tak mawh pa riang leeing ju ka son maix mai baux singaix khi rhawm maix tak mawh pa hoik sidah heue. ²¹ Pui maix khawmuik tak mawh pa rahsee, kix tak pon ti cie haktiex mawh sinngao tix leeing ju heue. Mawh khaox pa hoik sum Aux mai kaing jhaw taix aux khankix tak mawh pa pon Aux ti koe min pakngai ka heue. ²² Kawn nyawm iak tix kaux tak pon ti mawh pui tix rheng kaux mai pa iak riang rao tix kaux tak mawh ceu pui pa kied ting riang tix cub heue. Aux pa mawh Siyiex, tak nied ti yuh grawng an ka daux bawg yam nawh heue.

¹ Khwan Siyiex ot ka piang Aux, mawh kheu hoik groi Nawh rawm bee ka piang Aux, sonsang kieh sidiex gau lox bwan gaux rhawm ka pui pa hot pa shia khankix heue. Nawh hoik ploi Aux hoek sonsang pai ka pui pa laux rhawm khankix mai sonsang krai pao krax pa lawd luan ka pui pa giex laung mai paoh siviex thawng ka pui an kix pa hoik laung tix, ² sonsang pao ti krai num bwanson Siyiex mai ka singaix pa sang pawk Siyiex ex bix tix, sonsang tawx krax pa nyawm rhawm ka pui pa khi rhawm, ³ sonsang yuh krax pa nyawm rhawm pui an kix pa koe krax khi rhawm ka daux veng Zion, sonsang tawx mhok khri pa mhawm grang ka kix son tang nyaox mai rawm bee pa gaux rhawm son tang krax pa khi rhawm mai kraung ceep pa yaog yaw, son tang khwan pa khi, son krax pa sum Siyiex, sonsang pon Nawh ti koe min pakngai ka heue." ⁴ Kix tak deeh cox sum dee pa dawg laux leeing khankix, kix tak deeh cox veng pa hoik laux an mai khawm ka dee yiien hu pui ju dix heue. ⁵ Nyo sinie khankix tak cung tix ot mai liang cub yung pex mai pui tang ceu, tak mawh pui thai ma maix mai khawm cao pa priex sipeem plix siiet maix heue. ⁶ Phan mawh pex tak sang kok mawh cao giex kaing li Siyiex pui tak kok pex mawh siliex Siyiex heue. Pex tak yaox ti ih krax pa mag mi ceu pui tang meung mai ka daux min pakngai kix, pex tak koe krax yaw rangdi tix heue. ⁷ Tang krax kaig tua pex, pex tak deeh pon min pakngai ra son mai tang krax pa laux pakngai, kix tak koe krax gaux rhawm ka daux nyum cie kix heue. Mawh kheu nan, kix tak pon ti cie sinngao ra son khaing ka daux haktiex kix, krax gaux rhawm leeing ju, tak mawh cie kix heue. ⁸ Aux mawh Siyiex pa moh ka krax pa rahsee, Aux koeng ka pa tud rhim mai pa caox caig heue. Aux tak deeh yuh tix tawx ka kix ka daux krax pa kaux sijax mai yuh sijax mukheu leeing ju tau mai kix heue. ⁹ Doeh ru kix tak mawh pa tawng tix ka daux sinax ceu pui tang meung, khawm doeh kawn praix kix ka daux sinax pui khankix heue. Pui pa yaox ka kix khawmuik, tak tawng kix, mawh doeh ru pa hoik nawb Siyiex bwanson heue. ¹⁰ Aux kied gaux rhawm ting lhaong ka daux Siyiex, khwan ju aux kied koe krax gaux rhawm ka daux Siyiex aux heue. Nawh Cao hoik tawx aux ceep kraung krax taoh, Nawh Cao hoik fua aux ka sibex dhah pa rahsee, awm ceep simex pa sang yuh ka paox ka mhok khri pa mhawm grang, awm jawg bun pa sang yuh ka paox ka khaox kraung siang simaox, khri khankix heue. ¹¹ Awm kuah simie ka daux haktiex mai awm kieh sipeem ceu pa hoik rhuat ka daux nawh khankix kuah ti lih, awm an, Siyiex, pa mawh Siyiex tak kieh pa rahsee mai krax yaog yaw lih bleeh ka plak sivoe ceu pui khawmuik heue.

¹ Son veng Zion, Aux tak ang lai ot yawg tix mai son veng Yerusaliem, Aux tak ang lai laux lee tix, tom sidah lih krax pa rahsee nawh awm krax pa jhan riang mai krax taoh Nawh tak mawh pa awm kawk ngu pa tok ti riang heue. ² Ceu pui tang meung khankix tak yaox krax pa rahsee maix, mai simiang khawmuik tak yaox ka min pakngai maix heue. Maix tak pon kok ka ceu kaux pa khraox, pa sum Siyiex ka jheeh tix heue. ³ Maix tak baox mawh mhok khri, ka daux taix Siyiex mai mawh ciiem mhok khri pa mhawm grang ka daux tawm taix Siyiex maix heue. ⁴ Tak ang lai kok maix mawh pui pa tik vud tix khaix in mai haktiex pa riem maix tak ang lai mawh pa kok mawh dee riem khaix in. Viang mawh nan, tak kok maix mawh pui pa khaw rhawm Aux mai haktiex maix tak kok mawh haktiex bun pa koe mex. Grawh grawng nawh, Siyiex hoik khaw rhawm ka maix, haktiex maix tak mawh pa hoik koe mex heue. ⁵ Grawh grawng nawh, awm teei pui awn ju ti cie bunkrih, awm an kawn simex maix tak sang teei ti cie maix heue. awm koe krax gaux rhawm simex pa sang yuh ka paox ka bun pa sang yuh ka paox, awm an Siyiex maix tak koe krax gaux rhawm ka maix heue. ⁶ Veng Yerusaliem eue, Aux hoik deuh pui pau veng ka piang guh veng maix pa tak ang lai yiien yawg ti ku singaix. Can pui pa kok ka Siyiex, paw laux lee tix. ⁷ Paw kieh nawh laux lee tix tom hoek yam yuh Nawh Cao ti deuh ka veng Zion mai tom hoek yam kieh Nawh Cao veng Yerusaliem mawh pa yaog yaw ka piang haktiex heue. ⁸ Siyiex hoik tiextu ka taix khawn dawm tix mai ka plawng taix pa ting siawp Nawh Cao ah nin, "Aux tak ang lai tawx simie nghox khaix in sonsang mawh pa ih pui pa koeng maix, kawn simex pui tang ceu ang lai yaox ti nyaux ka rawm plix siiet pa khraox maix, ka pa hoik sau maix riang rao ti yuh heue. ⁹ Mawh ngie pui an kix pa hoik vawg ti deuh tak yaox ti ih mai yaog yaw ka Siyiex heue. Pui an kix pa hoik khrawm ti viex hoek tak yaox ti nyaux ka daux lawg plak daux dee singax singeh nyiex Aux heue. ¹⁰ Lih hu heue, lih hu khaing daux siviex, khre daux krax hu son pui khankix heue. Kheem ti sau tiex heue. Kheem tix sau tiex ka daux krax ting. Sut ti tik lon simaox yaog ti pak chix son pui khawmuik heue. ¹¹ Jhak heue, Siyiex hoik krai pao tom hoek ka dee sidah sidu haktiex mai ah nin ka kawn bun veng Zion, cao taoh maix hoik hoek, jhak heue, totaix koe tau mai Nawh Cao mai krax pa deeh viex ti tawx koe ka plak sivoe Nawh Cao heue. ¹² Pui tak kok kix mawh pui pa singax singeh, pa hoik taoh Siyiex ti teei mai maix tak kok ti mawh veng pa hoik pon sawg pui mai veng pa ang tik vud tix heue.

¹ Mawh in pui mawx pa kaoh khaing meung Edom mai pa hoek khaing veng Bawzarax pa ceep kraung pa mhawm grang pa hoik siang tix raoh pa ting sibrawm mai pa yaog diang dig tix ting lhaong, mawh pui mawx lie? "Mawh Aux, pa sikah ka daux krax pa rahsee mai pa koe sibrawm pa ting lhaong ti taoh heue." ² Mawh kheu patix maix lai ceep kraung pa raoh mai kraung ceep maix lai awm kraung ceep pui pa biiet ka rawm plix siiet, yuh ka mawh lie? ³ Aux hoik biiet rawm plix siiet nong nong mai pui tix kaux kawx ang lai ot tau mai aux, khaing daux pui khankix heue. Grawh grawng nawh, Aux hoik biiet an kix ka daux krax pa song rhawm Aux, hoik dig an kix ka daux pa kied song rhawm Aux heue. Nham kix hoik phrit ti lih ka piang kraung ceep Aux mai hoik kawm yuh kraung ceep Aux khawm jung heue. ⁴ Mawh kheu singaix pa pawk bix koe ka daux rhawm Aux mai num pa deeh taoh Aux hoik hoek heue. ⁵ Aux hoik jhak ti yaox mai ang koe pui pa teem ka Aux mai Aux hoik daox deng ka ang koe pui pa joh jhan heue. Mawh kheu nan, plawng taix cao Aux hoik viex krax taoh hoek ka son aux mai krax pa song rhawm Aux hoik mawh pa joh jhan ka aux heue. ⁶ Aux hoik dig pui ka daux krax pa song rhawm Aux mai hoik kieh kix yoek ka daux krax pa kied song rhawm Aux mai hoik klup nham kix ka piang tiex heue. ⁷ Aux tak sang krai grawng krax moh pa caux rhawm Siyiex mai khawm krax pa yaogyaw Siyiex, awm ceu pa hoik tawx Siyiex ka piang khawmuik mai bwanson pa ting lhaong pa tawx ka nyiex ma ceu pui Isarelax, ka pa hoik yaog Nawh Cao tix tawx ka piang kix awm koe krax caux rhawm Nawh Cao, awm pa kied ting koe krax moh pa caux rhawm Nawh Cao heue. ⁸ Nawh Cao ah nin, "Kix mawh pui Aux tete mai mawh kawn praix, pa ang pie lhen. Mawh kheu nan, Nawh Cao hoik mawh cao taoh kix heue. ⁹ Ka daux krax pa kha rhawm kix khawmuik, Nawh Cao hoik kha rhawm tix mai kawncau Siyiex pa ot plak sivoe Nawh, hoik taoh ka kix, ka daux krax moh Nawh Cao mai ka daux krax pa caux rhawm Nawh Cao, hoik deeh taoh kix mai Nawh Cao hoik kliien kix mai teei kix hu awm baux singaix pa prim khankix heue. ¹⁰ Viang mawh nan, kix hoik tieh feen mai hoik yuh krax pa laux rhawm khwan singax Nawh Cao, mawh kheu nan, Nawh Cao deeh tieh ti mawh pui koeng kix mai tokaux Nawh Cao puing ka kix heue. ¹¹ Yam an nawh deeh doh keud baux singaix pa prim, ka ah Mose mai pui nawh khankix nin, "Nawh Cao pa hoik viex kix lih khaing rawm sigrit sigra, tau mai cao liang yung Nawh Cao, koe dee mawx lie? Nawh Cao pa sau ti deuh khwan singax Nawh, ka daux kix koe dee mawx lie? ¹² Pa kieh min pakngai plawng taix Nawh Cao koe ka taix khawn dawm Mose, pa gwieh rawm ka plak sivoe ngai kix, sonsang yuh ceu kaux Cao Nawh koe leeing ju, ¹³ pa thung kix tiang ka dee raux, awm hu bhaung ka daux tiag, son ang kix sideeing koe dee mawx lie? ¹⁴ Awm tobrie pa lih hu ka daux ngawd daux lung mai khwan Siyiex kieh kix laux lee tix heue. Mawh kheu nan, Maix thung pui maix hu, sonsang yuh ceu kaux Cao Maix koe min pakngai heue. ¹⁵ Jhak ti yaox khaing daux raoma mai kok puan khaing dee pa singax singeh mai dee koe min pakngai Maix heue. Krax pa kied koe rhawm Maix mai krax pa ting sibrawm Maix, koe dee mawx lie? Krax pa kied moh Maix mai krax pa caux rhawm Maix ka aux koe dee mawx lie? ¹⁶ Viang Abraham ang koe krax pa tawng ka ex mai ceu pui Isarelax ang lai deuh ti tawng ka ex kawx, Siyiex eue, Maix mawh keeing ex heue. Cao pa taoh ti teei ex tom ju dix mawh ceu kaux Maix heue. ¹⁷ Siyiex eue, Maix hoik kieh ex via khaing daux krax Maix, hoik kiien yuh rhawm rhi ex khaing krax lhat graung ka Maix kheu jao grawng pa yuh ka mawx lie? Deeh ing son siliex Maix mai ka son ru pui pa pon sinngao Maix khankix heue. ¹⁸ Pui pa singax singeh Maix khankix hoik pon ti cie an kix tivud ticu khaing heue. Pui koeng ex hoik dig ka dee pa singax singeh Maix heue. ¹⁹ Ex hoik lih ti mawh pa awm pui an kix, pa ang Maix sax kwang mai ka pui an kix, pa ang sax kok ka ceu kaux Maix heue.

¹ Kieh Maix paoh daux raoma mai lih hoek, kieh gawng khankix yung yiang tix ka plak sivoe ngai Maix heue. ² Awm hax ngu ka khix khaox kroh mai awm kieh ngu rawm lok, sonsang kieh pui koeng maix khankix tawng ka ceu kaux Maix, sonsang kieh ceu pui ku meung siyaung ka plak sivoe ngai Maix. ³ Yam hoik yuh Maix ceu pa daox pa deng an kix, pa ang ex hoek ti keud, Maix hoik lih hoek mai gawng khankix hoik yung yiang ka plak sivoe ngai Maix heue. ⁴ Tom yam jah dix, pui ang sax tawng mai yhaok ang sax mhong mai ngai ang sax yaox ka Siyiex tang kaux lheu khaing Maix, pa yuh son pui pa krox jun ka Nawh Cao heue. ⁵ Maix rieb ti yaox nawh, pa koe krax gaux rhawm mai pa yuh pa rahsee, pa doh keud ka daux krax Maix. Maix koe krax pa song rhawm, kheu jao hoik phit yix heue. Ka daux krax inkix hoik kied rheung mai yix kawn sang pon krax taoh lie? ⁶ Yix khawmuik, awm ceu pa ang singax mai krax pa rahsee yix khawmuik awm kraung pa seeing heue. Yix khawmuik fit hu awm lhax khaox mai phimap yix hoik taih yix hu awm bhaung heue. ⁷ Pui pa kok ka ceu kaux Maix ang koe, mai pui pa sau riang rao tix jhawp ka Maix an koe pie tix kaux kawx heue. Maix hoik mox plakngai khaing yix mai hoik laux leeing yuh yix, kheu jao grawng phimap yix khankix heue. ⁸ Viang mawh nan, ka daux yam in Siyiex eue, Maix mawh keeing ex heue. Yix mawh glaox mai Maix mawh cao yuh aw heue. yix khawmuik mawh kaing khaix taix Maix heue. ⁹ Siyiex eue, paw koe krax pa song rhawm ka liak! mai paw lai deeh doh keud ka phimap pa hoik phit hoik lud an khankix leeing ju liak! yuh bwanson, jhak ti yaox heue, yix khawmuik mawh pui Maix heue. ¹⁰ Veng pa singax singeh Maix khankix hoik mawh daux tiag, veng Zion kawx hoik mawh daux tiagtu, veng Yerusaliem mawh dee hoik riem pa yiien hu pui heue. ¹¹ Nyiex bwan pa singax singeh pa mhawm grang yix, ka dee hoik yaog yaw keeing yix ka Maix, mawh pa hoik hax ka ngu mai ceu pa koe krax khaw rhawm yix, mawh pa hoik nai nawk khawmuik heue. ¹² Siyiex eue, Maix pon gun ka grawng ceu inkix lie? Maix khex gun ti ang nye mai kieh yix kham geu krax kha rhawm sigrien sigre lie?"

¹ Ka pui an kix pa ang sax mhaing ka Aux, yam inkix hoik chawk ka Aux heue. Pui an kix pa ang sax sawg ka Aux, tak kieh kix yaox ka Aux heue. Ka pui an kix pa ang sax kok tix ka greem ceu kaux Aux mai Aux ah nin ka kix, "Aux ot tin, Aux ot tin heue. ² Aux hoik nyeu taix tix lih leeing singaix mai kok ka ceu pui pa tieh feen khankix, pa lailing ti hu ka daux krax pa ang mhawm awm rhawm keud cao kix heue. ³ Ceu pui inkix so kaoh krax pa song rhawm Aux sijheeng ka see plakngai Aux, ka pa appong krax tan tix ka daux sipeem khankix mai pa gleeing nyawng bhawng khu dee tan lon tiex sin. ⁴ Pa ngawm ka daux sinax simeeig mai pa it ka daux tiag simeeig mai pa ih nex lig mai pa koe rawm rheep ceu pa seeing brai khankix ka daux aw tawng kix, ⁵ pa ah nin cung tix ot dee ot maix, paw hoek dex Aux, mawh kheu aux nie lheu singax khaing maix heue. Pui inkix mawh taox ngu pa kaoh khaing ka daux gawng meeh aux, mawh ngu pa cap leeing ngaix heue. ⁶ "Jhak heue, an mawh pa hoik tiem tix ka plak sivoe Aux, Aux tak ang lai ot yiien yawg Aux tak deeh viied mai deeh viied tom hoek ka piang naok kix, ⁷ teei krax pa lud yuh maix khankix mai krax pa lud yuh keeing maix khawmuik tau khawm pui pa hoik gleeing nyawng bhawng ka piang gawng khankix, Siyiex ah nan heue. Mawh kheu nan, Aux tak tiag kaing pa yuh kix glang ka an ka piang naok kix heue. ⁸ Siyiex ah nin, "Awm hoik yaox rawm plix siiet pa khraox ka daux sigleem plix siiet khankix mai pui tix kaux ah nin, �Paw yuh an laux! mawh kheu bwanson koe ka daux an heue.� Mawh kheu nan, Aux tak sang yuh tix tawx an son ceu kaux siliex Aux, son ang Aux pon yuh kix laux leeing khawmuik heue. ⁹ Aux tak viex doeh ru khankix lih khaing ceu pui Yakop mai khaing ceu pui Yudax, pa mawh cub pa pon sinngao grawng Aux khankix heue. Kix pui pa hoik laug Aux tak sang pon tix cie sinngao an mai siliex Aux tak yaox ti ot tan heue. ¹⁰ Baoh haktiex Sharon tak sang mawh kawg cub phung yung mai daux lung Akhaw tak mawh dee it mawie mai son pui Aux khankix pa hoik sawg ti yaox Aux heue. ¹¹ Viang mawh nan, pex mawh pui an kix pa tik pa vud ka Siyiex, pa piawm ka gawng pa singax singeh Aux mai pa khan kheu ka siyiex Gadax mai cox khre krax tan pa nyaux son siyiex Menix heue. ¹² Mawh kheu nan Aux tak simin ti ap pex ka lawm vaig mai pex khawmuik tak gum kaing tix kham krax pa pah heue. Grawh grawng nawh, yam hoik kok Aux, pex hoik ang tie pawk heue. Yam sikah Aux pex ang tie nghiet. Pex hoik yuh ceu pa caox ka plak sivoe ngai Aux mai hoik laug ti teei ka pa ang Aux khaw rhawm ka heue." ¹³ Mawh kheu nan, Siyiex pa mawh Siyiex ah nin, jhak heue, siliex Aux khankix tak yaox ti ih, viang mawh nan, pex tak mawh pa cai rhawm heue. Jhak heue, siliex Aux khankix tak yaox ti nyaux rawm, viang mawh nan, pex tak mawh pa simie ti nyaux rawm heue. Jhak heue, siliex Aux khankix tak koe krax gaux rhawm viang mawh nan, pui tak mawh pa kaig tua heue. ¹⁴ Jhak heue, siliex Aux khankix tak ah lai rhax, kheu koe krax gaux rhawm ka daux rhawm kix viang mawh nan, pex tak yiiem kheu koe krax laux rhawm ka daux rhawm pex, ngia kheu koe krax pa laux rhawm daux khwan ju tix heue. ¹⁵ Pex tak prah ceu kaux pex, awm pa jhax lawg ka pui pa hoik laug Aux. Grawh grawng nawh, Siyiex, pa mawh Siyiex tak sang pah pex yum mai kok siliex Nawh khankix ka ceu kaux tang ceu heue. ¹⁶ Nawh pa rawg bwan sonsang pon cao tix bwanson ka piang haktiex, tak rawg bwan ka Siyiex pa mawh meh mai nawh pa koe krax tiextu ka piang haktiex, tak mawh pa tiextu tix ka Siyiex pa mawh meh heue. Grawh grawng nawh, krax kha rhawm glang ka an khankix, mawh pa hoik piawm tix mai an kix hoik mox khaing plakngai Aux heue. ¹⁷ Jhak heue, Aux phan raoma pa khraox mai haktiex pa khraox, pa koe glang ka an, tak ang lai deeh doh keud ka mai daux rhawm tak ang lai keud ce kah heue. ¹⁸ Koe krax nyawm rhawm mai krax gaux rhawm leeing ju ka daux pa phan pa deuh Aux, jhak heue, Aux phan veng Yerusaliem mawh son krax pa gaux rhawm mai son pui pa ot daux nawh khankix heue. ¹⁹ Aux tak gaux rhawm ka veng Yerusaliem mai gaux rhawm ka pui Aux khankix heue. Lox yiiem tak ang lai mhong tix khaix in ka daux veng mai khawm lox pa riag yo heue. ²⁰ Kawn ngie peuex pa ang naog singaix tix, tak ang lai koe tan, pui kuad pa ang naog ju kawx tak ang lai koe heue. Grawh grawng nawh, pa yum yam koe ju tix tix yieh num, kawn sawn mawh kawn nyawm, pui phimap pa yum yam koe ju tix tix yieh num kawx, tak sawn mawh pa hoik kham krax pa jhax lawg tix heue. ²¹ Kix tak sum nyiex mai ot ka daux. Kix tak sum sipeem plix siiet khankix mai yaox ti ih plix heue. ²² Kix tak sum nyiex mai pui tang kaux tak ang yaox ti ot ka daux. Kix tak sum sipeem plix siiet mai pui tang kaux tak ang yaox ti ih, mawh kheu ju pui Aux khankix tak awm ju khraox mai pui laug Aux tak rheung koe krax pa nyawm rhawm ka kaing yuh taix tix khankix heue. ²³ Kix tak ang yaox ti yuh kaing ka daux krax pa giex going mai tak ang yaox ti keh kawn nyawm ka daux krax pa kha rhawm heue. Grawh grawng nawh, kix tak mawh doeh ru pa hoik nawb Siyiex bwanson ka piang mai doeh kawn praix kix pa ot tau mai kix heue. ²⁴ Ka sivoe sang kok kix, Aux hoik pawk lox kix mai yam tak sikah kix, Aux hoik nghiet kah heue. ²⁵ Sox la mai kawn yung tak sawm tau, sivai sangsi tak ih rib awm mawie, phawng tiex tak mawh pa ih siuing heue. Kix tak ang koe krax mat yuh paox tix mai ang koe krax laux leeing ka piang gawng pa singax singeh Aux khawmuik, Siyiex ah nin heue.

¹ Siyiex ah nin, "Raoma mawh dang ngeung Aux mai haktiex mawh ngot dee deuh Aux caong tix, nyiex pa tak sang sum pex son Aux koe dee mawx lie? dee pa sang laux lee Aux tix koe dee mawx lie? ² Siyiex ah nin, ceu an kix khawmuik, ceu pa lih ti koe khawmuik mawh pa yuh taix Aux heue. Viang mawh nan, ka ceu pa tak sang jhak Aux, mawh pui pa hot pa shia, pa koe rhawm awn rhawm tiem, pa koe krax laux rhawm mai pa koe krax graung ka gumlox Aux heue." ³ "Pui pa pah mawie awm pah nawh pui, pui pa appong ti tan kawn yung, awm siyied nawh ngawg sox, pui pa tan ti tawx krax tan phawng nghox ca im, awm tan nawh ti tawx nham lig, pui pa gleeing nyawng bhawng, awm nawb nawh bwanson ka riang griang heue. Pui inkix hoik laug ka daux krax hu cao kix mai ka daux rhawm kix koe krax khaw rhawm khaw rhi ka krax pa seeing brai kix heue. ⁴ Aux tak sang laug ka krax pie lhen yuh kix mai viex krax pa lhat graung kix hoek ka piang kix heue. Grawh grawng nawh, yam kok Aux, pui tix kaux kawx ang tie pawk, yam sikah Aux, kix ang tie nghiet ka. Kix hoik yuh ceu pa caox ka sivoe ngai Aux mai hoik laug ka pa ang Aux koe krax khaw rhawm ka heue." ⁵ Pex pa koe krax graung ka gumlox Nawh Cao khankix eue, nghiet ka gumlox Nawh Cao heue. Puxaik pex khankix pa koeng ka pex, pa hoik grheu pex lih kheu jao ceu kaux Aux hoik sax ah nin, "Kieh Siyiex koe min plakngai, son tak sang pon ex ti yaox ka krax pa gaux rhawm pex. Viang mawh nan, kix tak mawh pa kaig tua heue." ⁶ Lox pa sinum siaox khankix ka daux veng mai koe lox pa lih khaing daux nyiex bwan, mawh lox pa deeh viied Siyiex ti tawx ka pui koeng Nawh khankix heue. ⁷ Sivoe ang nawh nyang bax saux, nawh hoik keh kawn tix, sivoe ang nawh nyang saux ki, Nawh hoik keh kawn simex heue. ⁸ Mawh pui mawx pa sax mhong ka ceu in lie? Mawh pui mawx pa sax yaox ka ceu in lie? Mawh haktiex mawx pa tak sang keh ka daux tix singaix ngie lie? Phan ang mawh nan, mawh haktiex mawx pa hoik keh ti lih ka daux tix taix neh lie? Grawh grawng nawh, yam kawn taug kham kawn bun veng Zion ka krax saux pa sang keh, nawh hoik keh kawn praix tix heue. ⁹ Siyiex ah nin, "Aux hoik kieh bawg yam pa sang keh nawh hoek mai ang kieh nawh keh lie? Siyiex maix ah nin, Aux pa hoik kieh krax pa kawn koe, khex sang nyeep ti deuh daux vaig lie?" ¹⁰ Pex pa moh ka veng Yerusaliem khankix eue, gaux rhawm tau mai Nawh heue. Pex pa koe krax khi rhawm son nawh khawmuik, gaux rhawm ka riang pa gaux rhawm tau mai nawh, ¹¹ tak sang kieh pex koe krax fah rhawm mai peuex tix rawm teeih nawh tom sak, kieh pex pon min pakngai pa blon nie nawh mai koe krax gaux rhawm mai biiet tix rawm teeih pa kied haoh hun heue. ¹² Siyiex ah nin, "Jhak heue, Aux tak greed lang krax pa nhim rhawm ka nawh, awm rawm klawng mai kieh plakngai pui tang meung naog kreh nawh awm rawm klawng pa lih hu heue. Pex tak yaox ti peuex, pex tak mawh pa klien tix ka paw nyoi nawh mai mawh pa glaw tix ka piang ngawng nawh heue. ¹³ Awm glaw miex ka kawn tix koe krax nyawm rhawm, awm an Aux tak kieh pex koe krax pa nyawm rhawm mai pa tak sang koe krax pa nyawm rhawm nyawm rhi ka daux veng Yerusaliem heue. ¹⁴ Yam yaox pex ka in, rhawm pex tak koe krax gaux rhawm mai si ang pex tak hwan awm rib pa klai, taix Siyiex tak mawh pa sidawng tawng tix ka siliex Nawh mai khawm krax pa song rhawm Nawh ka pui koeng nawh khankix heue. ¹⁵ Jhak heue, Siyiex tak hoek awm ngu mai ling lawx naing bhaung Nawh, awm bhaung keu kang lux, sonsang jhi krax pa song rhawm Nawh awm taox ngu mai krax pa sivied gau Nawh awm rao ngu heue. ¹⁶ Mawh kheu Siyiex tak ciyang ka can pa koe nex nham khankix khawmuik ka ngu mai ka vaig lawm, mai krax pa pah Siyiex pui yum tak mawh pa koe tom nie heue. ¹⁷ "Pui an kix pa yuh tix singax mai pa yuh tokaux cao kix singax khankix, sonsang hu laig tix ka daux sipeem, hawt khaix pui tix kaux pa koe daux sigreung an mai ih nex lig mai pa ih nex kiang priex pa seeing brai an khankix, tak mawh pa koe krax laux leeing tau heue. ¹⁸ Aux tawng ka kaing yuh kix mai khawm ka krax keud kix. Aux sang hoek mai tak sang khrawm ceu pui khawmuik mai khawm pa tang lox sikah khankix mai kix tak hoek mai yaox ka min pakngai Aux heue." ¹⁹ "Aux tak sang deuh mhai rug ka daux sinax kix mai pui an kix pa pon ti glawd ka daux sinax kix, Aux tak ploi kix hu ka haktiex tang meung, ka veng Tasux, meung Pulax mai haktiex Luta mai ka haktiex Tupalax mai meung Ya-wan mai khawm klawn tiex rawm sigrit sigra pa koe dee singai khankix pa ang sax mhong ka grawng krax pa ao min Aux mai pa ang sax yaox ka min pakngai Aux mai kix tak pao ti krai min pakngai Aux ka daux sinax pui tang meung khankix heue." ²⁰ Kix tak sang viex puxaik pex khankix hoek khaing daux haktiex tang meung khawmuik, ka piang brung mai ka daux ling lawx brung mai ka daux khreng klawm khankix mai ka piang la mai ka piang kala uk khankix, bleeh ka gawng pa singax Aux, veng Yerusaliem son krax pa tan ka Siyiex awm viex kawn praix ceu pui Isarelax khankix krax tan hoek ka daux tawg klong pa singax mai laig ka daux nyiex bwan Siyiex. Siyiex ah nin, ²¹ "Ka daux kix tiblah Aux tak sang teei pui khankix son cao giex kaing li mai pui Lewix khankix heue." Siyiex ah nin, ²² "Awm hoik yuh Aux ti deuh raoma pa khraox mai haktiex pa khraox koe ka plak sivoe ngai Aux, awm an doeh ru pex khankix mai ceu kaux pex tak mawh pa kawn deuk." Siyiex ah nin, ²³ "Ngaix haok khix khraox ku ngaix mai ngaix twah ku twah, can pui khawmuik tak hoek ti krub ka sivoe ngai Aux." Siyiex ah nin heue. ²⁴ Kix tak sang lih hu ti jhak ka tokaux pui pa hoik lud ka Aux. Mawh kheu viag pa koe daux kix ang chix yum mai ngu kix, mawh pa ang lai chix yeet. Kix tak mawh ceu pa seeing brai ka son pui khawmuik heue."