Hosea

Hosea

¹ Gumlox Siyiex hoek ka Hose kawn simex Berix, baux ju singaix Oziyax,Yawtam, Ahap mai Hezakix, pa mawh simiang haktiex Yudax khankix mai baux ju singaix Yerobom kawn simex Yosha simiang haktiex Isarelax heue. ² Yam jah Siyiex ti krai lox ka Hose, Siyiex ah nin ka Hose, "Maix hu teei ti moeng bun coh kaux an mai khawm kawn pa keh nawh khankix heue, grawh grawng nawh, pui haktiex khankix hoik yuh krax pa lud vao pa kied ting lhaong mai lih hu khaing Siyiex heue. ³ Mawh kheu nan, nawh hu teei ti cie Gawma pa mawh kawn bun Dibalem mai koe kaux mai keh ti tawx kawn simex ka son nawh tix kaux heue. ⁴ Siyiex ah nin ka nawh, "Kok ceu kaux nawh mawh Yezerelax heue. Grawh grawng nawh, baox jun tivud, Aux tak sang pawk bix piang nyiex ma Yehu son nham pa jauh ka Yezerelax mai kieh meung haktiex nyiex ma ceu pui Isarelax khankix grai grup heue. ⁵ Hoek ka daux singaix an, Aux tak raig ti tik ak ceu pui Isarelax, ka dau lung Yezerelax heue. ⁶ Gawma baox koe kaux mai keh kawn bun tix kaux mai Siyiex ah nin ka nawh, "Kok ceu kaux kawn bun an mawh Lawruhama heue. Grawh grawng nawh, Aux tak ang lai koe krax caux rhawm ka nyiex ma ceu pui Isarelax mai Aux tak sang tik vud kix heue. ⁷ Aux tak sang koe krax caux rhawm ka nyiex ma ceu pui Yudax mai tak sang taoh kix ka Siyiex pa mawh Siyiex leeing ju kix mai ang mawh taoh kix ka ak mai ka vaid mai ka naing, ka brung khankix mai ka pui naing brung khankix heue. ⁸ Khaix hoik kieh Gawma kawn tix Lawruhama prah teeh, nawh deeh koe kaux mai keh kawn simex tix kaux heue. ⁹ Siyiex ah nin, "Kok ceu kaux nawh mawh Law-ami, grawh grawng nawh, pex ang lai mawh pui Aux mai Aux kawx ang lai mawh Siyiex pex heue. ¹⁰ Viang mawh nan, ceu pui Isarelax khankix, tak sang awm mhaik rawm sigrit sigra, pa ang pon ti tiag mai pa ang uik simin tix heue. Ka in ka baoh khaing dee mawh pa hoik ah nin ka kix, pex ang lai mawh pui Aux heue. Khaix in tak sang mawh pa ah nin ka kix tan, pex mawh kawn Siyiex pa im ju heue. ¹¹ Khaix an, ceu pui Yudax mai ceu pui Isarelax khankix, tak sang mawh pa kraix khrawm tix tau mai yaog ti deuh cao kaing tix kaux ka son tokaux kix mai kix tak sang lih khaing daux haktiex heue. Grawh grawng nawh, krax pa ting lhaong tak sang mawh cie singaix Yezerelax heue.

¹ Ah nin ka pux aik pex khankix, "Pex mawh pui Aux heue. Ah nin ka pux o pex khankix, pex hoik pon krax caux rhawm heue. ² Kah kum mai miex pex, mawh kheu nawh ang mawh moeng aux mai aux ang mawh mex nawh heue. Kieh nawh tik via krax pa lud vao nawh khaing pakngai nawh mai jhawm pa lud vao nawh khaing daux sinax teeh nawh awx. ³ Phan ang mawh nan, aux tak peeik ti tik kraung nawh mai kieh nawh ka kaung, awm ka daux yam tak keh nawh mai kieh nawh awm daux tiagtu dee kroh mai kieh nawh yum ca kheu sang nyaux nie rawm heue. ⁴ Aux tak ang lai koe krax caux rhawm ka kawn praix nawh khankix heue. Grawh grawng nawh, kix mawh kawn praix pa pon khaing krax pa lud vao heue. ⁵ Miex kix hoik yuh krax pa lud vao, nawh pa nghe ka kix, hoik yuh ceu pa kaig tua heue. Mawh kheu nawh ah nin, Aux tak sang hawt ti hu khaix paox moh tix khankix, pa tawx blah aux mai rawm aux, hauk yung aux mai kraung man aux, rawm bee mai rawm plix siiet aux khankix heue. ⁶ Mawh kheu nan, jhak heue, Aux tak sang thox krax hu nawh ka kat lawm mai tie nawh ka ding son ang nawh lai chix yaox ka krax hu tix heue. ⁷ Nawh tak ang to ti hawt khaix paox moh tix mai ang krup kix, nawh tak sang sawg kix mai ang lai yaox kix, khaix an nawh tak ah nin, aux tak sang deeh ing ka mex phao voe aux heue. Mawh kheu dee ot aux sivoe in nie mhawm khaing dee ot aux yam in heue. ⁸ Nawh ang lai tawng ka hoik tawx aux nghox, gaox mai rawm plix siiet pa khraox mai rawm bee khankix ka nawh mai hoik baox naok ti kieh khri, mau nawh khankix nie, viang mawh nan, nawh lai viex ti tan inkix ka siyiex Balax heue. ⁹ Mawh kheu nan, Aux tak sang deeh ing teei nghox aux khankix ka daux bawg yam vawg nghox mai khawm rawm plix siiet pa khraox aux khankix, ka daux baux yam biiet rawm plix siiet mai tak sang deeh teei hauk yung Aux mai kraung man aux khankix, pa sang kheem ti priex tokaux nawh heue. ¹⁰ Yam in aux tak sang plak jhi krax pa kraing nawh, ka plak sivoe ngai paox moh nawh khankix mai pui tix kaux kawx, tak ang lai pon taoh ti teei nawh khaing dau taix Aux heue. ¹¹ Aux tak sang baox deeh kieh krax pa silao rhawm nawh that grai, khawm singaix pawie nawh, haok khix khraox nawh, singaix twah nawh, khawm pawie pa hoik tat nawh ti deuh khawmuik heue. ¹² Aux tak sang kieh nhu plix siiet nawh khankix laux leeing mai khawm khaox ruh nawh, ka pa hoik ah nawh yuh nin, inkix mawh totaix pa hoik tawx paox moh aux ka aux heue. Aux tak sang kieh kix mawh daux tiagtu mai mawh son pa ih totiag khankix heue. ¹³ Aux tak ciyang ka nawh, son phimap baux singaix pa hoik gleeing nawh ti tan nyawng bhawng khankix ka siyiex Balax heue. Yam an nawh hoik jawg tokaux tix ka krim yhaok mai siang ceu pa mhawm mai hoik hu hawt khaix paox moh nawh, nawh hoik piawm ka Aux heue. Siyiex ah nan heue." ¹⁴ Mawh kheu nan, jhak heue, Aux tak sang nyaw glaw nawh mai viex nawh laig ka daux tiagtu mai krai lox pa nyawm rhawm ka nawh heue. ¹⁵ Kaoh khaing tan Aux tak sang tawx sipeem plix siiet ka nawh mai tawx daux lung Akhaw mawh siviex pa koe krax keud pot jun pot, nawh tak sang ah lai rhax tan, awm ka baux singaix yam kawn awn ju nawh, awm ka daux singaix yam lih hoek nawh khaing daux meung Ejiptux heue. ¹⁶ Siyiex ah nin, "Ka daux singaix an maix tak sang kok Aux yuh nin, mex aux eue, mai maix tak ang lai kok ah nin ka Aux, cao aux eue, ¹⁷ Aux tak sang teei ti tik ceu kaux siyiex Balax khaing daux jheeh pui Aux mai kix tak ang lai deeh doh deud ka ceu kaux in khaix in tibawg kawx heue. ¹⁸ Ka daux singaix an, Aux tak sang yuh sijax mukheu tau mai totiag daux tiag khankix mai sim sai daux raoma khankix mai khawm ceu pa chix mu ti hu piang tiex heue. Ak mai vaig pa shiao tix daux naing khankix, Aux tak sang raig pot khaing piang haktiex, sonsang kieh kix nyawm it nyawm tum heue. ¹⁹ Aux tak sang teei maix mawh moeng Aux leeing ju heue. Aux tak sang teei maix mawh cie Aux ka daux krax pa mawh meh mai ka daux krax pa rahsee, ka daux krax pa moh rhawm mai ka daux krax pa caux rhawm. ²⁰ Aux tak sang teei maix mawh cie Aux, ka daux pa kaux sijax mai maix tak tawng ka Siyiex heue. ²¹ Siyiex ah nin, ka daux singaix an, Aux tak sang deeh pawk lox ah nin heue. Aux tak sang deeh pawk lox ka raoma mai raoma tak sang deeh pawk lox ka haktiex heue. ²² Haktiex tak sang deeh pawk lox ka nghox koi ka rawm plix siiet pa khraox mai ka rawm bee khankix, inkix tak sang deeh pawk lox ka Yezerelax heue. ²³ Aux tak sang rhuat nawh son tokaux Aux piang haktiex in mai aux tak sang koe krax caux rhawm ka nawh, pa ang sax pon krax caux rhawm heue. Aux tak ah nin ka pui an kix, pa ang tie mawh pui Aux maix mawh pui Aux, mai nawh tak ah nin Maix Cao mawh Siyiex aux heue."

¹ Siyiex ah nin ka aux, "Baox deeh hu moh ka bun pa lud vao an tix kaux, pa hoik moh paox moh nawh ka, awm koe krax moh Siyiex ka ceu pui Isarelax khankix viang kix jhak simi ka siyiex tang kaux mai moh ka blah plix siiet kawx, Siyiex kawn moh ka kix heue. ² Aux hoik liag nawh hoek son Tokaux Cao Aux, ka mau kao phwan shekhe mai ka gaox nghox ca lang sidax tix Awmie plak heue. ³ Aux ah nin ka nawh maix tak ot nong nong son Aux, tom nie singaix. Maix tak ang lai pon yuh bun coh kaux mai maix tak ang lai pon ti koe mex tang kaux heue. Phan yuh nan, aux tak sang pau son maix heue." ⁴ Grawh grawng nawh ceu pui Isarelax khankix, tak sang ot nong tix tom nie singaix ang lai koe simiang mai cao kaing mai ang lai koe krax tan pa appong mai rong simaox pa laoh lie mai ang lai koe sibex sikag mai riang grang Terap khankix heue. ⁵ Khaix an ceu pui Isarelax khankix, tak deeh ing sawg ti yaox Siyiex, pa mawh Siyiex kix mai khawm ka Davit pa mawh simiang kix mai koe krax lhat graung ka Siyiex mai rieb ti teei bwanson Nawh ka daux baux singaix pa sang hoek khaix in heue.

¹ Ceu pui Isarelax eue, nghiet ka gumlox Siyiex heue. Grawh grawng nawh, Siyiex tak sang prawng see piang pui pa ot ka daux haktiex in heue. Mawh kheu piang haktiex in ang koe pa kaux sijax, ang koe pa caux rhawm mai ang koe pa tawng ka Siyiex heue. ² Ka lox pa jhax lawg mai ka lox pie lhen, krax pah pui yum mai krax pa briex mai krax pa lud vao ka moeng kawn pui khankix, kix yuh krax vao lud mai krax pa jauh nham ang jud heue. ³ Mawh kheu nan, haktiex tak sang koe krax khi rhawm mai pui ku kaux pa ot ka daux haktiex an, tak dieh hu mai totiag daux tiagtu khankix mai sim sai daux raoma, khawm kax daux rawm sigrit sigra tak sang mawh pa uik heue. ⁴ Yam in paw lai kieh pui tix kaux kawx koe krax pa thung thiang mai paw kieh koe lox ne ah ka pui tang kaux, grawh grawng nawh, pui maix khankix mawh pa awm pui an kix, pa hoik tiebtie ka cao giex kaing li heue. ⁵ Mawh kheu nan maix tak sideeing ti goh daux plak ponngaix, cao jhai kawx tak sang sideeing ti goh tau mai maix ka plak ponsawm mai Aux tak yuh miex maix laux leeing heue. ⁶ Pui Aux khankix hoik laux leeing kheu ang kix koe pingnya cuyi mawh kheu maix hoik thiang ti tik pingnya cuyi, Aux kawx tak sang thiang ti tik maix khaing pa mawh maix cao giex kaing li Aux, mawh kheu hoik piawm maix ka beenli Siyiex Cao maix, Aux tak sang piawm ka kawn praix maix khankix heue. ⁷ Cao giex kaing li baox nie hun, kix baox nie lheu lud ka Aux, Aux tak sang tieh loh min plakngai kix hoek ka daux krax pa kaig tua heue. ⁸ Kix ih krax tan pa taoh phimap pui Aux khankix, daux rhawm kix simie pui Aux lud heue. ⁹ Mawh kheu nan pui khankix yuh ka mawx mai cao giex kaing li khankix kawx yuh nang nan heue. Aux sang tawx krax pa kham geu piang kix, awm krax pa yuh kix mai tak deeh tawx ka kix, awm kaing pa yuh kix heue. ¹⁰ Kix tak ih mai ang sak, kix tak lud vao mai ang koe krax haoh hun, grawh grawng nawh, kix hoik tik vud mai ang cu nghiet ka Siyiex heue. ¹¹ Krax lud vao, rawm plix siiet mai rawm plix siiet pa khraox mawh pa kieh rhawm pui yoek heue. ¹² Pui Aux khankix chawk ti yaox ka riang rao krub kix mai keud khaox gix kix mawh pa chix tawx krax keud ka kix heue. Grawh grawng nawh, rhawm pa lud vao hoik kieh kix vu vie mai kix hoik yuh pa lud vao mai tik vud ka Siyiex kix heue. ¹³ Kix tan ti tawx krax pa appong piang choek gawng khankix mai gleeing nyawng bhawng piang gawng, ka greem khaox tiah, khaox libana mai khaox piak van, kheu mhawm veei kix heue. Mawh kheu nan, kawn bun pex khankix yuh krax pa lud vao mai mun pex kawx hoik lud vao heue. ¹⁴ Aux tak ang lai tawx krax kham geu ka kawn bun pex khankix yam lud vao kix mai khawm mun pex, yam lud vao kix heue. Grawh grawng nawh, simex khankix hoik tang hu mai rom ti ot tau mai bun coh kaux mai tan ti tawx krax tan pa appong tau mai bun coh kaux an heue. Mawh kheu nan, pui pa ang koe krax tawng khankix, tak sang hoek krax som nai heue. ¹⁵ Ceu pui Isarelax khankix eue, viang maix yuh pa lud vao kawx, paw kieh ceu pui Yudax koe krax lud kah heue. Paw doh greed ti hoek ka veng Gilagalax mai paw hu ka veng Bietavin mai paw doh ah lox tiextu ka Siyiex pa im leeing ju heue. ¹⁶ Ceu pui Isarelax khankix mawh pa ang cu ti sug awm pheuk ka mawie shiang heue. Siyiex tak sang liang kix, awm liang kawn yung iak ka haktiex dee vieh va heue. ¹⁷ Epharem mawh pa hoik hawt ka riang grang an khankix, grham nawh heue. ¹⁸ Pa nyaux kix hoik deeh tieh ti niex, kix ca yuh krax lud vao, simiang cao kix, kied koe krax moh krax rhawm ka pa kaig tua heue. ¹⁹ Bhaung hoik pua ti viex kix ka daux pruik tix mai kix tak sang mawh pa kaig tua, kheu krax tan pa appong kix heue.

¹ Cao giex kaing li khankix eue, nghiet heue. Nyiex ma ceu pui Isarelax khankix eue, koe krax cu nghiet ka liak, pui daux nyiex ma simiang khankix eue, daong yhaok tix nghiet heue. Krax pa ciyang tak sang hoek piang pex kheu mawh pex kie piang gawng Mizapa mai rub pa nih tix piang gawng Tabaw heue. ² Pui pa tieh feen khankix hoik kied raux vieh yuh ka daux pa pah pui yum, mawh kheu nan Aux tak sang ciyang ka kix khawmuik heue. ³ Aux tawng ka Epharem mai Isarelax ang lai pon mox tix khaing Aux heue. Yam in Epharem eue maix hoik yuh krax pa lud vao, Isarelax mawh pa hoik seeing kah heue. ⁴ Kaing pa yuh kix, kieh kix ang lai deeh veeh ti ing ka Siyiex kix heue. Mawh kheu krax pa lud vao khankix kawn koe ka daux rhawm kix mai kix ang lai tawng ka Siyiex heue. ⁵ Krax lhaong rhawm ceu pui Isarelax hoik kham mhai rug ka pakngai nawh heue. Mawh kheu nan, Isarelax mai Epharem tak sideeing ti goh ka daux phimap kix, ceu pui Yudax kawx, tak sideeing ti goh tau mai kix heue. ⁶ Kix tak sang viex phung yung mai phung mawie kix hu sawg ti yaox Siyiex, viang mawh nan, kix tak ang lai yaox ka Nawh Cao heue. Nawh Cao hoik deeh veeh tokaux tix hu khaing kix heue. ⁷ Kix hoik yuh ceu pa ang kaux sijax ka Siyiex, Grawh grawng nawh, kix hoik keh kawn praix ceu pui tang ceu khankix heue. Yam hoek khix khraox, tak sang laux yuh kix mai sinngao kix heue. ⁸ Phlu teet luah ka daux veng Gibax mai phlu teettawng luah ka daux raoma, Riag yo lox tix ting lhaong ka daux veng Bietavin, ceu pui Benyamin eue, "Deeh jhak ka plak khaix maix heue." ⁹ Epharem tak sang mawh pa laux leeing, ka daux singaix pa ne raw heue. Ka daux sinax doeh ceu pui Isarelax khankix Aux tak jhi ceu pa tak sang hoek ti mawh heue. ¹⁰ Simiang pui Yudax khankix, mawh pa awm pui an kix, pa gah mee haktiex, Aux tak sang klup krax pa song rhawm aux lih piang kix awm rawm heue. ¹¹ Epharem hoik yaox ti kham krax tuktiak mai laux leeing ka daux krax pa ciyang, kheu hoik koe rhawm tix hawt ka daux been kawn pui heue. ¹² Mawh kheu nan, Aux tak sang kieh Epharem mawh pa awm ceu pa ih viag mai kieh nyiex ma ceu pui Yudax mawh pa awm ceu pa sium heue. ¹³ Yam hoik yaox Epharem ka krax saux tix mai yam hoik yaox Yudax ka dee mat tix, khaix an, Epharem ploi pui hu ka haktiex Asurix mai hu ka simiang Yeriep, viang mawh nan, nawh ang lai pon pai pex mai ang lai pon pai pex khaing daux dee mat maix heue. ¹⁴ Grawh grawng nawh, aux tak sang mawh pa awm sivai sangsi ka son Epharem mai awm kawn sivai sangsi pa awn ju ka son nyiex ma pui Yudax khankix heue. Aux tak sang puk paig ti tik kix mai hu, Aux tak sang teei kix luan mai ang lai koe pui pon kieh kix heue. ¹⁵ Aux tak sang deeh ing ka dee ot Aux, tom hoek bawg yam deeh doh deud kix ka phimap pa lud tix heue. Khaix an, kix tak sawg ti yaox pakngai Aux, ka daux yam koe krax pa kha rhawm kix, kix tak sau riang tix sawg Aux heue."

¹ Hoek mai kieh ex deeh ing ka Siyiex, mawh kheu Nawh Cao hoik puk paig ex kawx mai Nawh Cao tak sang pai ex moi, Nawh Cao hoik kieh ex mat kawx mai Nawh Cao tak sang gie dee mat ex heue. ² Khaix hoik luan ra singaix, Nawh Cao tak sang deeh kieh ex im ju ka daux loe singaix, Nawh tak sang kieh ex kaoh son tak sang pon ex ti im ju ka plak sivoe ngai Nawh Cao heue. ³ Kieh ex tawng kieh ex hawt sawg ti tawng ka Siyiex heue. Yam lih bleeh Nawh, mawh pa hoik blang awm plak ponngawb, Nawh Cao tak sang bleeh ti hoek ka ex awm rawm lhiex cao mai awm rawm lhiex lha mai caux piang tiex heue. ⁴ Epharem eue, Aux tak sang yuh ceu patix ka maix lie? Yudax eue, Aux tak sang yuh ceu patix ka maix lie? Grawh grawng nawh, krax pa mhawm rhawm pex mawh pa awm paiawm plak ponngawb mai awm rawm ciex pa grai ti hu cao cao heue. ⁵ Mawh kheu nan, Aux teei cao jhai khankix kid kix, Aux pah kix yum ka gumlox pa kaoh khaing daux jeeh Aux mai grawng krax ciyang Aux khankix awm jhan riang pa lih hu plak sivoe heue. ⁶ Aux khaw rhawm ka krax pa caux rhawm mai ang khaw rhawm ka krax tan pa appong mai khaw rhawm ka daux krax tawng yung ka Siyiex, lheu khaing krax tan pa gleeing khankix heue. ⁷ Kix hoik lheu ka gumlox sijax mukheu awm Adam mai kix yuh krax pa ang kaux sijax ka Aux heue. ⁸ Veng Gilat mawh veng ot pui pa yuh pa caox mai mawh pa hoik seeing ka nham heue. ⁹ Awm jawm cub pui pa tud rhim khankix ti pau ka pui awm an, cub cao giex kaing li tak pah pui yum piang krax hu plak veng Shekhim mai kix hoik lud ka daux ceu pa kied kin heue. ¹⁰ Aux hoik yaox ceu pa lhat graung ka daux nyiex ma ceu pui Isarelax, krax lud vao koe ka daux ceu pui Epharem, Isarelax mawh pa hoik koe krax seeing brai heue. ¹¹ Ceu pui Yudax eue, bawg yam vawg nghox mawh pa hoik tat ti deuh ka son maix, yam tawx Aux pui Aux pa giex laung khankix deeh ing heue.

¹ Yam tak sang pai Aux dee saux Isarelax, phimap Epharem, hoik lih jhi sidawng mai khawm krax pa caox Samarix. Mawh kheu kix yuh pie kheem, ka plak daux koe pui briex, ka plak praix koe tud rhim khankix pa sivix. ² Kix ang tie keud ti yaox ka daux rhawm kix, ka doh keud Aux ka pa caox caig kix khawmuik, yam in pa caox yuh kix hoik lai lawm kix mai kix hoik koe plak sivoe ngai Aux. ³ Kix yuh krax pa caox caig sonsang kieh simiang koe krax gaux rhawm mai yuh krax pie kheem kieh Simiang khankix koe krax gaux rhawm heue. ⁴ Kix mawh pui pa lud vao khawmuik, awm glah ngu pa hoik hax khaing ka cao nghaung blah. Nawh ang tie seeh ngu, glang klu klao tix blah im, tom ang nyang bax hoek bawg yam ploh nawh heue. ⁵ Ka daux singaix simiang yix, simiang khankix hoik koe krax saux mai hoik yoek ka rawm plix siiet, nawh hoik nyeu taix tix lih mai khawm pui pa nieb yuh krax pa ang cee ang cak khankix heue. ⁶ Ah tete yam jhak kix ti gaid, kix hoik kieh rhawm tix awm glah ngu, blah kix viang it leeing sawm kawx hax awm ngu pa cap ponngawb heue. ⁷ Kix mawh pa hax awm daux glah ngu khawmuik mai hoik gleeing ka simiang kix, simiang kix hoik goh khawmuik heue. Pui daux sinax kix, pa kok ka Aux ang lai koe pie tix kaux kawx heue. ⁸ Epharem hoik saxso tix ka daux sinax pui tang ceu khankix, Epharem mawh khlawp blah pa ang lai plu plie tix, tix plah heue. ⁹ Pui tang ceu hoik ih riang rao nawh mai nawh ang tawng, hauk kaing hoik saxso tix paing piang kaing nawh mai nawh ang bax tawng ka heue. ¹⁰ Krax lhaong rhawm ceu pui Isarelax hoik kham mhai rug ka pakngai nawh, viang mawh nan, kix ang cu tix deeh ing ka Siyiex, pa mawh Siyiex kix mai ang lai sawg ti yaox Nawh Cao ka son grawng in khawmuik heue. ¹¹ Epharem mawh pa awm sikaux pa aw, pa ang tawng ti keud, kix kok yo ka meung Ejiptux kix hu laig ka haktiex Asurix heue. ¹² Yam tak hu kix, Aux tak sang nih rub Aux piang kix. Aux tak sang kieh kix rau lih piang tiex, awm sim sai daux raoma khankix, Aux tak ciyang kix awm ceu pa hoik mhong cub pui hun kix heue. ¹³ Kix koe krax kha rhawm heue. Kheu hoik to kix ti luan khaing Aux heue. Kix tak hoek krax laux leeing, kheu hoik lud kix ka aux heue. Viang Aux sang deeh taoh kix kawx mai kix hoik ah lox pie lhen ka Aux heue. ¹⁴ Kix ang tie kok yo ka Aux khawm rhawm tix, yam ngia kix ka piang ku it kix. Kix kraix khrawm paox tix tau son nghox koi mai rawm plix siiet pa khraox mai kix deeh yaog ti deeh tieh feen ka Aux heue. ¹⁵ Viang Aux hoik gau mai hoik tawx riang rao plawng taix tix kawx mai kix deeh keud ti sang yuh pa caox ka Aux heue. ¹⁶ Kix deeh ing viang mawh nan, ang tie deeh ing ka Siyiex Cao pa kied ting lhaong, kix mawh pa awm ak pa deeh tieh bung tix heue. Simiang kix tak sang goh ti yum ka lawm vaig, kheu krax pa chax nie vao dak kix heue. In tak sang mawh, krax pa nyia son kix ka daux meung Ejiptux heue.

¹ Phlu teettawng ka jheeh maix heue, pui koeng tak sang hoek awm klang krih mai puing ka nyiex Siyiex, grawh grawng nawh, kix hoik lud ka gumlox sijax mukheu aux mai hoik deeh tieh feen ka lox beenli Aux heue. ² Kix tak sang kok yo ka Aux ah nin, "Siyiex ex eue, ex ceu pui Isarelax tawng ka Maix Cao heue. ³ Ceu pui Isarelax hoik tik ceu pa mhawm, pui koeng tak sang hawt pheet khaix nawh heue. ⁴ Kix yaog ti deuh simiang mai ang tie mawh pa kaoh khaing Aux, kix yaog ti deuh cub simiang khankix mai Aux ang tie cu ka grawng an heue. Kix teei mau, khri kix mai yuh riang grang krub tix ka son tokaux kix, tom sidah pon kix ti mawh pa hoik tat tix heue. ⁵ Samarix eue, Siyiex hoik tik vud kawn mawie maix, krax song rhawm Aux hoik deeh kaoh ka piang kix heue. Son bawg yam pon kix tix singax singeh tak sang seeing miex grheung lie? ⁶ Rieng kawn mawie an hoik mawh pa lih khaing ceu pui Isarelax, mawh pui yuh kaing taix tix kaux pa yuh ka an mai ang tie mawh siyiex, mawh kheu nan, riang kawn mawie Samarix tak sang mawh pa phawng heue. ⁷ Kix rhuat simie bhaung mai vawg bhaung keukanglux heue. Can pa rhuat kix ang lih ti koe gawng, viang lih ti koe gawng kawx ang chix plix, viang mawh pa lih plix kawx, pui tang ceu tak sang bleet ti ih heue. ⁸ Ceu pui Isarelax mawh pa hoik bleet ti grai, yam in kix ot ka daux sinax pui tang ceu tang meung, awm aw tawng, pa ang pui khaw rhawm kah heue. ⁹ Mawh kheu kix hoik lih hu tu tix ka haktiex Asurix, awm la tiag pa hu nong, Epharem hoik liag ti tawx totaix ka paox moh tix khankix heue. ¹⁰ Viang kix hoik mawh pa liag ti tawx totaix ka pui yam ot tix sinax ceu pui khankix kawx, yam in Aux tak kraix khrawm kix mai kix tak koe krax pa laux rhawm tivud ticu, kheu beeh glawm pa cien simiang mai simiang khankix heue. ¹¹ Mawh kheu jao hoik baox yuh Epharem, khu dee tan khankix tom nie son phimap an, kix hoik lih ti mawh khu dee tan phimap ka son nawh, ¹² Aux hoik tiem ti deuh gumlox beenli tom nie ka son nawh, viang mawh nan, nawh kawn keud mawh pa ang dex ang dawd mai tix heue. ¹³ Son krax appong pa tan ka Aux, kix appong ti tan nex mai ih heue. Siyiex ang doh rieb ti teei kix heue. Yam in Nawh Cao tak doh keud ka krax pa lud kix mai tak sang tawx krax kham geu ka son phimap kix mai kix tak sang deeh ing ka meung Ejiptux heue. ¹⁴ Ceu pui Isarelax hoik piawm ka cao pa phan pa deuh tix mai hoik sum nyiex haw khankix, Yudax hoik baox sum veng pa kaux cong tom nie heue. Viang mawh nan, Aux tak sang ploi ngu hoek piang veng nawh khankix mai tak sang gleeing ti tik nyiex haw nawh khankix heue."

¹ Ceu pui Isarelax khankix eue, paw koe krax gaux rhawm mai krax pa nyawm rhawm, awm pui tang ceu, grawh grawng nawh, pex hoik yuh krax pa lud vao mai hoik tik vud ka Siyiex pex heue. Pex hoik koe krax moh son totaix pa koe piang glah dee pah nghox heue. ² Glah dee pah nghox mai dee biiet rawm plix siiet khankix, tak ang kub eei kix mai rawm plix siiet pa khraox kawx tak cud heue. ³ Kix tak ang pon ti ot ka daux haktiex cie Siyiex mai Epharem tak sang deeh yaox ti ing ka meung Ejiptux mai tak sang yaox ti ih ceu pa ang singax khankix, ka daux haktiex Asurix heue. ⁴ Kix tak ang pon ti tan, krax tan rawm plix siiet ka Siyiex mai krax tan pa appong kix kawx, tak ang lai mawh pa khaw rhawm ka Nawh Cao heue. Ceu pa tan kix an tak mawh pa awm pa ih pui pa khu rhawm nyiex yum mai can pui pa ih ka an khawm uik, tak mawh pa seeing kah heue. Mawh kheu pa ih cie kix, mawh ngie son tokaux kix khaing, tak ang lai pon laig ka daux nyiex bwan Siyiex heue. ⁵ Ka daux singaix pawie Siyiex, pex yuh ceu patix lie? ⁶ Jhak heue, kix hoik lih hu khaing pa laux leeing, pui meung Ejiptux tak sang deeh kha rhawm ti deuh kix, pui veng Miemphi tak sang sipaung kix heue. Pang kat heeik khankix tak kheem piang mau pa koe ngawh jum kix, pang kat khankix tak sang koe ka daux nyiex gox kix heue. ⁷ Ceu pui Isarelax tak tawng singaix pa ciyang hoik hoek, singaix pa sang deeh pawk bix hoik hoek heue. Cao jhai mawh pui pa pheem tix kaux, pui pa koe khuan mawh pa yhot, kheu krax pa kied ting phimap maix mai rhawm cao pa kied ting maix heue. ⁸ Epharem mawh cao pau ka plak Siyiex aux, viang mawh nan, cao jhai mawh kie pui pa taong sim ka daux krax nawh khankix khawmuik mai pui pa yuh pa caox koe ka daux nyiex Siyiex nawh heue. ⁹ Kix mawh pa kied koe krax laux jhawm, awm ka daux baux singaix ot ka veng Giba heue. Nawh Cao tak deeh doh keud ka phimap kix mai tawx krax kham geu ka son phimap kix heue. ¹⁰ Aux hoik yaox ka ceu pui Isarelax, awm plix siiet pa koe ka daux tiagtu mai Aux yaox keeing pex khankix, awm plix ruh pa liang ti teem piang khaox ruh bawg yam rung praix heue. Kix hu ka Balapeawrax mai gwieh ti deuh tokaux tix ka siyiex Balax pa mawh pa kaig tua, kix hoik lih ti mawh pa seeing brai awm ceu pa hoik moh kix heue. ¹¹ Phan mawh ka son Epharem min plakngai kix tak sang po ti luan awm sim, tak ang koe kawn, ang nghe mai pa ang koe kaux heue. ¹² Viang kix eei kawn praix tix haok hwan ting lhaong kawx mai Aux tak sang kieh kawn praix kix som nai khawmuik, ang lai kieh deuk tix kaux kawx heue. Yam tik vud Aux ka kix mai kix tak koe krax kha rhawm heue. ¹³ Aux yaox ka Epharem awm veng Turux, pa hoik sum tix ka dee pa mhawm tiex mai Epharem tak sang viex kawn praix tix khankix tawx ka cao pah pui yum heue. ¹⁴ Siyiex eue, tawx ka kix liak, tak sang tawx Maix Cao ceu patix lie? Tawx daux vaig pa ang chix koe kaux mai gun teeh pa kroh rawm ka kix liak. ¹⁵ "Krax pa caox yuh kix khawmuik koe ka daux veng Gilagalax, Aux hoik koeng ka kix tan heue. Mawh kheu krax pa caox kaing yuh kix, Aux grheu kix luan khaing daux nyiex aux, aux tak ang lai mox ka kix khaix in heue. Cub simiang kix mawh pui pa deeh tieh feen khawmuik heue. ¹⁶ Epharem mawh pa pon pa kham geu, riah kix hoik kroh kroing, kix tak ang lai chix koe plix, viang kix keh kawn kawx, Aux tak sang pah kawn pa kied moh kix yum heue." ¹⁷ Siyiex aux tak sang tik kix luan, kheu ang kix koe krax cu nghiet ka Nawh Cao mai kix tak sang mawh pui pa vung viang ti hu ka daux sinax ceu pui tang meung khankix heue.

¹ Ceu pui Isarelax mawh nhu plix siiet pa kied mhawm yeem mhawm plix heue. Awm pa nie blon plix nawh khankix, nie baox yuh khu dee tan nawh khankix tom nie, awm pa mhawm koe haktiex nawh, kix hoik baox nie yuh ti deuh rong pa krub kix nie mhawm heue. ² Kix koe rhawm ra mu yam in kix tak sang kham krax ciyang son phimap tix heue. Siyiex tak yieh ti tik khu dee tan kix mai khawm rong pa krub kix heue. ³ Kix tak ah nin, " Yix ang koe simiang, mawh kheu ang yix koe krax lhat graung ka Siyiex heue. Simiang kawx, nawh tak sang pon yuh ceu patix ka son yix lie?" ⁴ Kix ah lox giex going mai tiextu ti yuh sijax mukheu pie lhen. Awm an krax ciyang tak sang yaog ti koe awm rib pa koe jai, pa kuah ka daux rawm tong kaung khankix heue. ⁵ Can pui pa ot ka daux veng Samarix koe krax lhat graung, kheu riang kawn mawie Bietavin an heue. Pui pa krub riang kawn mawie khankix tak koe krax khi rhawm son nawh mai cao giex kaing li nawh khankix tak lhat graung, kheu hoik lih hu min plakngai khaing nawh heue. ⁶ Riang kawn mawie an tak sang viex hu ka haktiex Asurix, kieh mawh totaix pa tan ka son simiang Yariet heue. Epharem tak sang pon krax pa kaig tua ka grawng keud cao kix heue. ⁷ Phan mawh ka son Samarix, simiang nawh tak mawh pa kheem ti grai awm bai piang rawm heue. ⁸ Dee pa lhaong veng Avin khankix, pa mawh dee koe phimap Isarelax, tak sang mawh pa laux heue. Pang kat mai pang kat heeik, tak kuah piang khu dee tan kix, kix tak ah nin ka gawng ting, "Kheem piang yix liak, mai ah nin ka gawng iak khankix, grhup piang yix liak." ⁹ "Isarelax eue, pex hoik koe phimap tom daux baux singaix ot pex daux veng Giba mai kix hoik cung ti ot tan heue. Yam in pui pa ot ka daux veng Giba, lai keud naing ceu pa puing ka kawn praix pa koe phimap sivoe in dix ang lai mawh pa hoek piang kix heue. ¹⁰ Aux tak sang sidiex gau ka kix awm pa koe rhawm Aux heue. Pui khankix tak sang kraix khrawm ti hoek puing ka kix, yam phyawk Aux ti deuh kix, ka son pa lud kix ra ceu heue. ¹¹ Epharem, mawh kawn mawie shiang pa hoik pheuk tix, pa moh ti sang dig nghox heue. Aux hoik tok ieak piang ngawg pa mhawm nawh, Aux tak sang kieh pui brug Epharem, Yudax tak sang thai, Yakop tak sang pheu lon tiex an khankix max heue. ¹² Ruat simie pa rahsee ka son tokaux pex, vawg ka daux krax pa caux rhawm, thai ma dee pa ang pex sax yuh, mawh kheu bawg yam in mawh bawg yam sawg ka Siyiex, krox tom bawg yam hoek Nawh Cao mai yam kieh Nawh rawm lhiex pa rahsee khankix lih piang pex heue. ¹³ Pex hoik thai ti sau pa caox, pex hoik vawg phimap heue. Pex hoik ih plix pie lhen khankix, grawh grawng nawh, pex hoik een rhawm tix ka daux krax pa yuh tix mai ka daux pa nie haoh hun pui pa kied ting riang rao tix khankix heue. ¹⁴ Mawh kheu nan, grawng krax pa lawh pa mawh, tak sang yaog ti koe ka daux sinax pui pex khankix mai nyiex tab lhaong pex khawmuik, tak sang jieh laux awm hoik yieh simiang Shalaman ka veng Bietarabelax, ka daux singaix puing naing, miex khawm kawn praix hoik blat kix yum tau piang tiex heue. ¹⁵ Awm an Betelax eue, an tak sang mawh pa hoik yuh tix ka pex, kheu krax pa caox kied ting lhaong yuh pex heue. Ka daux plak ponngawb, simiang Isarelax, tak sang mawh pa hoik but ti grai pak lawg heue."

¹ Yam kawn mawh Isarelax kawn nyawm, Aux hoik moh ka nawh mai khaing ka daux meung Ejiptux, Aux hoik kok kawn simex tix hoek heue.. ² Awm hoik kok cao jhai ka kix mai kix nied ti hu singai, kix hoik appong krax tan ka siyiex Balax mai hoik gleeing nyawng bhawng ka riang grang pa hoik saik khankix heue. ³ Aux hoik gau Epharem chix lai ling ti hu, kliien kix ka plawng taix Aux, viang mawh nan, kix ang tawng ka hoik pai aux dee saux kix moi heue. ⁴ Aux hoik tuk kix ka maox pa awn mai maox krax moh krax rhawm khankix mai aux hoik awm pui an kix, pa teei ieak lih khaing piang ngawg kix mai Aux hoik tawx kix sawm heue. ⁵ Kix tak ang lai deeh ing ka meung Ejiptux mai pui Asurix tak sang mawh simiang kix, kheu hoik thiang kix ti ang lai deeh hoek ka Aux heue. ⁶ Lawm vaig lawm pliah tak sang hoek ka daux veng kix mai laux leeing yuh jhong siviex mai laux yuh kix, kheu krax pa keud kix heue. ⁷ Pui Aux khankix hoik veeh ti hu khaing Aux, viang cao jhai khankix kok yo kix deeh hoek ka Siyiex Cao pa kied ting lhaong kawx, pui khawmuik ang tie yaog min Nawh lhaong heue. ⁸ Epharem eue, Aux tak sang pon tik maix yuh ka mawx lie? Isarelax eue, aux tak sang pon ap ti tawx maix yuh ka mawx lie? Aux tak sang kieh maix awm veng Adama yuh ka mawx lie? Aux tak sang pon deuh maix awm veng Zeboim yuh ka mawx lie? Rhawm rhi Aux hoik tieh loh tix, krax caux rhawm Aux hoik so tix kaoh heue. ⁹ Aux tak ang lai song rhawm, Aux tak ang lai yuh Epharem laux leeing heue. Grawh grawng nawh, Aux mawh Siyiex mai ang tie mawh kawn pui, Aux mawh cao pa singax singeh ka daux sigreung pex mai Aux tak ang lai hoek ka pex daux krax pa song rhawm heue. ¹⁰ Kix tak hawt ti hu khaix Siyiex heue. Nawh Cao tak graox awm sivai sangsi heue. Yam graox Nawh Cao, kawn praix Nawh khankix tak nied ti lih khaing ka plak glip singaix heue. ¹¹ Kix tak nied ti hoek, awm sim sai khaing meung Ejiptux, awm sikaux pa hoek khaig haktiex Asurix heue. Aux tak kieh kix ot ka daux nyiex kix heue. Siyiex ah nin heue. ¹² Epharem ah lox pie lhen hawt rob Aux mai nyiex ma ceu pui Isarelax khankix hoik pie lhen ka Aux heue. Yudax ca kawn een rhawm tix ka Siyiex Cao pa singax singeh mai koe krax pa kaux sijax heue.

¹ Epharem ih ka bhaung mai hawt ti hu khaix bhaung plak lih singaix, nawh hoik baox ah lox pie lhen mai krax pa laux leeing heue. Kix deeh yuh sijax mukheu tau mai pui Asurix khankix mai hoik teei ti viex rawm bee ing ka meung Ejiptux heue. ² Siyiex yuh see ka Yudax mai tak sang tawx krax kham geu ka Yakop awm krax pa yuh nawh khankix, Nawh Cao tak sang deeh pawk ti tawx ka nawh awm krax pa yuh nawh khankix heue. ³ Yakop hoik giex loek caong puxke nawh ka daux vaig miex nawh mai yam koe riang rao nawh, nawh hoik silah tix tau mai Siyiex heue. ⁴ Nawh hoik silah tix tau mai kawncau Siyiex mai pex kah heue. Nawh yiiem mai khyox khaw ka Nawh Cao heue.Nawh hoik yaox ka Nawh Cao daux veng Betelax, mai Nawh Cao hoik sikah lox tix ka nawh tan, ⁵ pa mawh Siyiex Cao kru naing raoma, Siyiex mawh ceu kaux Nawh Cao heue, ⁶ Mawh kheu nan, deeh ing hoek ka Siyiex maix, priex ti hawt ka daux krax pa caux rhawm mai ka daux krax pa rahsee mai krox jun ka Siyiex maix sijheung heue. ⁷ Epharem mawh pui pa yuh lai geu mai jiang pie kheem koe ka daux taix nawh, nawh moh ti yuh krax gut kheem heue. ⁸ Epharem ah nin, aux hoik lih ti koe krax magmi heue. Aux hoik pon krax pa magmi ka son tokaux tix ka daux kaing riang rao aux khankix, kix tak ang yaox ka krax lud pa mawh phimap ka daux aux pie tix ceu kawx heue. ⁹ Mawh kheu Aux mawh Siyiex, pa mawh Siyiex maix, tom yam kawn ot maix ka daux meung Ejiptux, Aux tak sang baox deeh kieh maix ot ka daux nyiex gox khankix, awm ka daux singaix pawie khan kheu pa hoik tat tix khankix heue. ¹⁰ Aux hoik sikah ka cao jhai mai hoik baox jhi riang susai tom nie, Aux hoik tawx lox tiag khaing cao jhai khankix tom nie heue. ¹¹ Haktiex Gilat ang koe phimap lie? Kix hoik mawh pa giex going khawmuik. Kix appong ti tan mawie khankix ka daux veng Gilagalax, khu dee tan kix tak sang awm pum nyhee ka daux rawng daux tong kaung khankix heue. ¹² Yakop hoik to ti luan ka haktiex Surix, Isarelax hoik yuh kaing son krax pa tak sang pon moeng tix mai son pa sang koe moeng tix nawh hoik liang yung khankix heue. ¹³ Khaing ka cao jhai Siyiex hoik viex ceu pui Isarelax khankix lih khaing daux meung Ejiptux, mai khaing ka cao jhai, nawh hoik yaox ti pon krax kia ngien heue. ¹⁴ Epharem hoik so kaoh ka krax song rhawm pa kied ting Nawh Cao, mawh kheu nan, nham phimap pa kieh nawh lih tak deeh hoek piang nawh, Siyiex tak tawx lox salao pa caw nawh ti kham deeh hoek piang nawh heue.

¹ Yam sikah Epharem pui khankix koe krax lhat graung kah, nawh hoik yaog tokaux tix ting lhaong ka daux ceu pui Isarelax, viang mawh nan, nawh hoik lud ka yuh kaing jhaw siyiex Balax mai nawh hoik yum heue. ² Yam in kix baox lud tix bawg hoik tix bawg mai hoik raug ti yuh riang grang ka mau khankix ka son tokaux kix, awm koe krax pa min yuh kix kaing khankix, an khawmuik mawh kaing yuh cao pa yuh kaing taix khaing heue. Koe pui pa ah nin ka kix, "Kieh pui khankix pa appong ti tan ngheet ka riang grang kawn mawie iak an heue. ³ Mawh kheu nan, kix tak sang awm paiawm ka daux plak ponngawb mai awm rawm ciex pa grai ti hu cao cao, awm nghox pa hoik phlu ti luan khaing biang glah dee pah nghox mai awm taox ngu pa haok khaing daux dawh rong ngu heue. ⁴ Aux mawh Siyiex, pa mawh Siyiex maix, tom yam kawn ot pex ka daux meung Ejiptux mai maix tak ang koe krax tawng Siyiex tang kaux lheu khaing Aux heue. Cao taoh ang lai koe pie tix kaux kawx lheu khaing Aux heue. ⁵ Aux hoik dawg tawng maix ka daux tiagtu, ka daux haktiex pa kied kroh kroing khankix heue. ⁶ Yam hoik tawx Aux pa ih ka kix, kix hoik ih tom sak heue. Kix hoik sak mai rhawm kix hoik yaog ti ting lhaong, mawh kheu nan, kix hoik piawm ka Aux heue. ⁷ Mawh kheu nan, Aux tak sang awm sivai sangsi ka son kix mai awm sivai simuing pa jawm ti ot hawt krax, Aux tak sang jawm ti pau kix heue. ⁸ Aux tak sang sipub ti yaox kix, awm krih miex pa hoik tang tiah tix khaing kawn nawh khankix, Aux tak sang riah ti tik dieb rhawm kix doh mai Aux tak sang kiied ti ih kix tan, awm sivai sangsi miex heue. Totiag tak sang riah kix laux heue. ⁹ Isarelax eue, krax pa teem maix mawh pa kaoh khaing Aux, viang mawh nan maix mawh pa hoik tang yuh tix laux leeing heue. ¹⁰ Maix hoik sax rawg mhaing ka Aux ah nin, "Tawx simiang mai simiang ka aux, yam in simiang maix koe dee mawx lie? Cao prawng see maix khankix koe dee mawx lie? Kieh nawh hoek ti taoh maix ka daux veng dee ot maix heue. ? ¹¹ Aux hoik tawx simiang ka daux krax pa song rhawm tix mai hoik teei ti tik nawh ka daux pa kied song rhawm tix heue. ¹² Krax lud pa yuh Epharem, mawh pa hoik pua ti deuh, phimap nawh mawh pa hoik priex ti deuh heue. ¹³ Krax kha rhawm bun ka daux bawg yam keh nawh kawn tak hoek piang nawh heue. Nawh mawh kawn simex pa ang koe pingnya cuyi heue. Nawh tak yaox ti ot tom rheung, ka daux dee keh tix heue. ¹⁴ Aux tak sang taoh titeei kix khaing daux sibrawm meung yum, Aux tak sang taoh titeei kix khaing krax pa yum heue. Krax pa yum eue, Aux tak sang mawh pa pex ka maix, meung yum eue, Aux tak sang mawh pa laux yuh maix heue. Krax caux rhawm ang koe sivoe ngai Aux heue. ¹⁵ Viang nawh mawh pa koe plix tom nie ka daux sinax puxaik nawh khankix kawx, bhaung plak lih singaix tak sang hoek ti phlu, pa mawh bhaung Siyiex pa kaoh khaing plak daux tiagtu heue. Rawm keut nawh tak lih ti mawh pa hoik kroh mai taoh dee lih rawm nawh, tak sang mawh pa hit, pui koeng tak sang tud rhim teei kraung sinngao can pa khrawm nawh ti deuh kuceu heue. ¹⁶ Veng Samarix mawh pa tang klawm phimap tokaux tix, kheu hoik tieh feen nawh ka Siyiex Cao nawh heue. Kix tak goh ti yum ka vaig, kawn ngie kix tak sang mawh pa kham krax blat ti yum mai bun pa koe kaux kix khankix tak kham pa pih ti doh daux vaig heue."

¹ Isarelax eue, deeh ing ka Siyiex, pa mawh Siyiex maix heue. Mawh kheu maix hoik sideeing caong tix, kheu krax pa lud tix, ² Viex gumlox rawg maix mai deeh ing ka Siyiex maix ah nin, "Teei phimap khankix luan, rieb ti teei ceu pa mhawm heue. Mawh kheu nan, yix tak sang tan ti tawx, krax pa appong khaing daux siyieb jheeh yix son tang kawn mawie heue. ³ Asurix tak ang lai pon taoh ka yix, yix tak ang lai brug brung mai yix tak ang lai ah nin ka kaing pa yuh taix yix khankix khaix in pie tix bawg kawx maix mawh Siyiex heue. Grawh grawng nawh, ka daux Maix Cao, kawn doe yaox ti pon krax pa caux rhawm heue. ⁴ Aux tak sang pai jhawm saux krax pa tieh feen kix mai moh ka kix awm krax pa koe rhawm aux, grawh grawng nawh, krax song rhawm Aux hoik veei ti luan khaing kix heue. ⁵ Aux tak sang mawh pa awm rawm ciex piang Isarelax, nawh tak pruh awm tai siyak mai kieh riah nawh khankix tuk tix lang awm gaw khaox Lebanon heue. ⁶ Kak nawh khankix tak sang lang, krax pa mhawm grang nawh tak sang mawh pa awm khaox Sanlon mai pa sioe bhawng nawh, tak sang awm daux tiag khaox Lebanon heue. ⁷ Pui an kix, pa ot greem veei nawh tak sang deeh ing, kix tak sang deeh im awm nghox mai glaoh awm nhu plix siiet heue. Krax pa sioe bhawng kix, tak sang awm rawm plix siiet Lebanon heue." ⁸ Epharem tak sang ah nin "Aux koe krax pa sang yuh ceu patix ka riang grang krub khankix lie? Aux hoik mhong mai hoik jhak simi ti priex nawh heue. Aux mawh pa awm khaox gix klai tix gaw, plix maix mawh pa hoik pon tix ka daux Aux heue." ⁹ Pui mawx pa koe pingnya cuyi kieh nawh tawng ka ceu inkix, pui mawx pa koe krax lhak lhiem, kieh nawh tawng ka inkix khawmuik, grawh grawng nawh, daux krax Siyiex mawh pa rahsee, pui pa rahsee, tak hawt lawng ka daux an kix, viang mawh nan, pui pa lud tak sideeing caong tix ka daux an kix heue.