Hebrews

Hebrews

¹ Siyiex pa hoik sikah ka tax du ex khankix ka daux cao jhai khankix, tom nie bawg mai ka tom nie ceu di dix, ² Ka daux bawg yam sidah singaix inkix, hoik sikah ka ex ka daux Kawn Nawh Cao, pa hoik ciak Nawh ti kieh mawh Cao pa pon sin kuceu khawmuik, Kaw pa hoik teei Nawh Cao ti yuh khawm haktiex khankix kah heue. ³ Nawh mawh pa deeh jhan ghaix ka min pakngai Siyiex mai mawh riang grang tokaux Nawh Cao mai pa joh jhan ka ku ceu khawmuik ka gumlox sibrawm Nawh. Khaix hoik yuh Nawh ti kieh singax khaing phimap, Nawh ngawm ka plak taix khawn dawm min pakngai Siyiex ka dee lhaong heue. ⁴ Kheu hoik lih mawh Nawh pa nie lheu blon ting khaing kawncau Siyiex khankix, mawh kheu hoik pon Nawh son ceu kaux pa nie lheu mhawm khaing ceu kaux kix heue. ⁵ Grawh grawng nawh hoik sax ah Nawh Cao ka kawncau Siyiex kaux mawx, "Maix mawh Kawn simex Aux. Aux hoik kieh Maix keh ka daux singaix in heue."pa baox ah nin, "Aux tak mawh Keeing ka Nawh mai Nawh tak mawh Kawn ka Aux heue."? ⁶ Nawh Cao baox deeh ah nin ka grawng yam sang deeh viex Kawn Ai tix hoek ka piang haktiex, "Kieh kawncau Siyiex khawmuik krub ka Nawh heue." ⁷ Nawh Cao ah nin ka grawng kawncau Siyiex khankix, "Nawh Cao yuh ti kieh kawncau Siyiex cie tix mawh bhaung mai kieh pui cau Nawh mawh rao ngu heue." ⁸ Nawh Cao ah nin ka grawng Kawn Cao, "Siyiex eue, dang ngeung Maix mawh tom leeing ju heue. Khaox gix simiang pa rahsee cie Maix, mawh khaox gix simiang meung Maix heue. ⁹ Maix hoik moh ka pa rahsee mai hoik koeng ka pa ang khaw ang jiet heue. Mawh kheu nan Siyiex, pa mawh Siyiex Maix, hoik groi rawm bee ka Maix, ka rawm bee pa gaux rhawm, lheu khaing piang paox Maix khankix heue." ¹⁰ "Simiang eue, ka daux yam jah Maix hoik kaw num haktiex heue. Raoma khankix mawh khaix taix Maix heue. ¹¹ Ankix tak sang laux leeing, viang mawh nan Maix tak ca kawn kaux koe heue. Khankix khawmuik tak sang prim hu awm kraung ceep. ¹² Maix tak sang pua ka khankix awm ka man fua. Tak sang deeh thai deeh loh khankix awm kraung ceep, viang mawh nan Maix ca awm paox tix mai jhong num Maix khankix ang chix uik sidah heue." ¹³ Hoik sax ah Nawh Cao ka kawncau Siyiex kaux mawx? "Ngawm plak taix khawn dawm Aux, tom kieh Aux pui pa koeng ka Maix, mawh ngot dee deuh Maix caong tix heue." ¹⁴ Kawncau Siyiex khankix khawmuik mawh khuan pa cau, pa hoik ploi ti yuh son kix pa tak sang pon ti cie sin krax taoh ang mawh lie?

¹ Mawh kheu in, ex khaw ti nie lheu nied ti nghiet ka ceu pa hoik mhong ex khankix, phan ang mawh nan ha ex kox tang siyang hu khaing khankix heue. ² Grawh grawng nawh phan gumlox pa hoik kieh kawncau Siyiex khankix krai hoik mawh pa kaux cong mai can pa lud mai pa lieh pa lheu kuceu hoik pon krax ciyang awm pa keung pa khaw, ³ Phan ex dha ti ang kriem ka krax taoh pa ting nie ding nie dod, ex lai chix pon luan khaing krax ciyang yuh ka mawx? Mawh tokaux Simiang pa jah ti krai grawng krax taoh in ka sivoe paox tix mai kix pa hoik mhong khankix hoik kham mhai rug grawng mawh pa mawh meh ka ex, ⁴ Siyiex kawx kham mhai rug tau mai kix, ka mhai mai ka ceu pa daox am mai ka kaing sibrawm tom nie ceu mai ka totaix pa hoik gwieh ti tawx Khuan Singax, awm pa khaw mai alo Nawh Cao heue. ⁵ Grawh grawng nawh Nawh Cao ang lai kieh haktiex ju khaix, pa hoik krai ka ex grawh grawng pa ot ka greem kawncau Siyiex khankix heue. ⁶ tix kaux hoik kham mhai rug kah, tix dah ah nin, "Kawn pui mawh pa yuh ka mawx? Maix lai kawn doh keud ka nawh. Phan ang mawh nan Kawn kawn pui mawh pa yuh ka mawx? Maix lai kawn lai ling ka nawh. ⁷ Maix hoik yuh nawh iak khaing kawncau Siyiex khankix ceeix khaing heue. Maix hoik ceep nawh ka mhok min pakngai mai ceu pa yungyi mai Maix hoik ciak ti deuh nawh ka piang khaix taix Maix khankix heue. ⁸ Maix hoik kieh can ku ceu khawmuik ot greem caong nawh heue." Grawh grawng nawh ka daux pa hoik kieh Nawh Cao can ku ceu ot ka greem nawh, Nawh ang lai grham tix ceu kawx pa ang lai ot ka greem nawh heue. Yam in ex ang nyang bax yaox, pa ot ku ceu ka greem nawh heue. ⁹ Ex yaox Kaw pa hoik yuh ti kieh mawh pa iak khaing kawncau Siyiex khankix ceeix khaing, pa mawh Yesux, mawh kheu ceu pa kham geu krax yum hoik ceep mhok min pakngai mai ceu pa yungyi kah, yuh ka mawx kheu bwanson Siyiex Nawh tak sang cim ka krax yum son pui ku kaux daux pui heue. ¹⁰ Grawh grawng nawh hoik khaw son Nawh Cao, pa mawh Kaw can pa koe ku ceu hoik mawh son Nawh mai can pa koe ku ceu hoik mawh kheu Nawh, ti viex kawn praix hoek tom nie ka min pakngai, son sang kieh Cao pa yuh krax taoh kix grum mhawm kheu krax kham geu heue. ¹¹ Grawh grawng nawh, Kaw pa kieh singax mai khawm pa hoik kieh kix singax khawmuik mawh khaing tix Kaux khaing heue. Mawh kheu jao in ang Nawh lai kaig tua ti kok kix mawh puxaik, ¹² Ah nin, "Aux tak sang krai ceu kaux Maix ka puxaik Aux khankix, Aux tak sang ah lox rhax yaog yaw Maix ka sigreung cub pui pa khrawm paox tix," ¹³ baox ah nin, "Aux tak sang een rhawm ka Nawh Cao heue."baox deeh ah nin, "Jhak heue, Aux mai kawn praix pa hoik tawx Siyiex ka Aux khankix." ¹⁴ Mawh kheu nan, kheu kawn praix khankix mawh pa rom ti neuex ka daux nex mai nham, tokaux Cao Khrit kawx hoik teei nex mai nham pa awm an, kheu pa yum Nawh, Nawh tak sang pon ti yuh laux ka sibrawm kaw pa hoik koe sibrawm ti kieh yum, pa mawh phi caox, ¹⁵ Sonsang pon ploi ka can kix khawmuik, pa hoik mawh siliex, glang yam im ju kix kheu pa lhat graung ka krax yum heue. ¹⁶ Grawh grawng nawh pa hoek Nawh Cao ang lai mawh son sang teem ka kawncau Siyiex khankix, Nawh Cao teem ka doeh ru Abraham heue. ¹⁷ Mawh kheu nan tom tak lai yuh Nawh Cao awm ka puxaik Nawh khankix, ka daux ku ceu khawmuik, son sang lih mawh Nawh, cao giex kaing li pa ting pa chix caux rhawm mai pa kaux sijax, ka ceu pa dex mai Siyiex, son sang yuh pa tan son phimap pui khankix heue. ¹⁸ Mawh kheu tokaux Nawh Cao hoik yaox ti kham geu ka ceu pa nyaw glaw, Nawh Cao tom chix teem ka kix pa yaox krax nyaw glaw heue.

¹ Mawh kheu nan, puxaik pa singax, pa mawh pa rom ti pon ka pa kok pa dex mai raoma khankix eue, keud ti yaox ka grawh grawng Kawncau Pa Ting mai Cao Giex Kaing Li Pa Ting, pa hoik rieb ex ti teei pa mawh Yesux, ² pa kaux sijax ka Kaw pa hoik ciak ti deuh Nawh, awm Mose kawx hoik kaux sijax ka nyiex Siyiex khawm nyiex heue. ³ Grawh grawng nawh hoik een Nawh mawh pa keung ti nie lheu pon min pakngai khaing Mose, awm kaw pa sum nyiex nie lheu koe min pakngai khaing nyiex an heue. ⁴ Grawh grawng nawh nyiex ku nyiex mawh pa hoik sum pui tix kaux kaux, viang mawh nan Kaw pa hoik sum yuh ku ceu khawmuik mawh Siyiex heue. ⁵ Mose hoik kaux sijax ka nyiex Siyiex khawm nyiex, awm kawncau, son sang mawh mhai rug ka grawng ceu pa tak sang krai khaix khankix heue. ⁶ Cao Khrit kia ka piang nyiex Siyiex, awm kawn simex, phan ex ca giex tom kaux ka pa kwa ex mai ka ceu pa yaw rangdi ex pa dex mai krax keud pot jun pot ex, tom sidah, ex tom mawh nyiex Nawh heue. ⁷ Mawh kheu nan awm pa hoik ah Khuan Singax yuh nin, "Phan pex mhong lox Nawh Cao singaix, ⁸ paw kieh rhawm rhi pex kiien kah, awm ka daux bawg yam pa cheeik ti kieh chu rhawm an, ka daux singaix pa nyaw glaw ka daux tiag, ⁹ Ka dee hoik nyaw glaw tax du pex ti cheuk yaox Aux mai hoik yaox kaing pa yuh Aux khankix been tixpon num heue. ¹⁰ Mawh kheu nan Aux tom ang caw rhawm ka pui ju in ah nin, "Kix lud ka daux rhawm rhi kix ku jheung jheung mai ang kix tawng ka krax Aux khankix heue. ¹¹ Mawh kheu nan Aux song rhawm songrhi mai tiextu ti ah nin, Kix tak ang pon laig ka daux dee laux dee lee Aux heue." ¹² Puxaik khankix eue, rien rhawm tix, phan ang mawh nan ha pex tix kaux kaux kox koe rhawm pa caox pa ang yum rhawm, pa gwieh hu khaing Siyiex pa im ju heue. ¹³ Tix kaux lai tix kaux gau ka paox tix, tix ngaix hoik tix ngaix, glang yam kawn kok mawh singaix in, ha pex tix kaux kaux kox kiien rhawm rhi kheu pa chix pie lhen phimap heue. ¹⁴ Grawh grawng nawh ex hoik rom ti lih mawh paox pie ka Cao Khrit, phan ex giex tom kaux tom sidah, ka pa hoik yum rhawm ti deuh rhawm ex yam jah heue. ¹⁵ Kheu ca kawn ah nin, "Phan pex mhong lox Nawh Cao singaix, paw kieh rhawm rhi pex kiien kah, awm ka daux bawg yam pa cheeik ti kieh chu rhawm an. " ¹⁶ Grawh grawng nawh kix pa hoik mhong mai kawn baox cheeik ti kieh rhawm Nawh chu mawh mawx? Can kix pa hoik lih hoek khaing meung Ejiptux kheu pa thong Mose hoik yuh nan ang mawh lie? ¹⁷ Kix pa ang Nawh caw rhawm ka been tixpon num mawh mawx? Mawh ka kix pa hoik yuh phimap mai pa tokaux kix hoik goh ti yum ka daux tiagtu ang mawh lie? ¹⁸ Nawh Cao hoik tiextu grawh grawng kix tak ang pon ti laig ka daux dee laux dee lee tix, ka pui mawx, phan ang mawh ka kix pa lieh lox pa ang cu nghiet khankix? ¹⁹ Ex yaox grawng ang kix pon ti laig kah, kheu ang lai yum rhawm heue.

¹ Mawh kheu nan kieh ex lhat graung ka, viang hoik deuh lox mukheu grawng sang pon ti laig ka daux dee laux dee lee Nawh Cao kawx, ha pex tix kaux kaux kox ang pon hoek kah heue. ² Grawh grawng nawh hoik sidiex lox bwan gaux rhawm ka ex tete, awm pa hoik sidiex ka khawm kix heue. Lox pa mhong an, ang lai koe bwanson ka kix, mawh kheu ang krax yum rhawm kix lai kleuk ka kix pa nghiet khankix heue. ³ Grawh grawng nawh ex pa hoik yum rhawm khankix pon ti laig ka daux dee laux dee lee an, awm hoik ah Nawh Cao nin, "Aux song rhawm mai tiextu ti ah nin, Kix tak ang pon laig ka daux dee laux lee Aux heue."Viang hoik yuh kaing Nawh Cao khankix tom hoik, tom yam jah ti kaw haktiex dix heue. ⁴ Grawh grawng nawh Nawh Cao hoik ah nin ti dah grawh grawng singaix aliah, " Siyiex hoik laux lee ka daux singaix aliah, khaing kaing pa yuh tix khawmuik heue." ⁵ Hoik baox deeh ah nin, "Kix tak ang pon ti laig ka daux dee laux dee lee Aux heue." ⁶ Mawh kheu nan, kheu hoik yaox grawng tix blah tak sang pon ti laig ka daux dee laux dee lee an mai kheu kix pa hoik mhong pa sidiex lox bwan gaux rhawm ka kix glang ka sivoe in ang lai pon ti laig kah, kheu pa lieh lox mai pa ang cu nghiet, ⁷ Nawh Cao hoik ciak ti deuh tix ngaix ah nin, "Singaix"ka jheeh Davit khaix jih jang glang gleeing, "Phan pex mhong lox Nawh Cao singaix, paw kieh rhawm rhi pex kiien kah," ⁸ grawh grawng nawh phan Yawsux hoik tawx pa laux lee ka kix, nawh ang tau ti krai grawh grawng tang singaix phao khaix heue. ⁹ Mawh kheu nan kawn koe pa laux lee singaix twah son pui Siyiex khankix heue." ¹⁰ Grawh grawng nawh Kaw pa hoik laig ka daux pa laux pa lee tix, tokaux Nawh kawx hoik laux lee khaing kaing pa yuh tix, awm Siyiex kawx hoik laux lee khaing kaing pa yuh Nawh heue. ¹¹ Mawh kheu nan kieh ex nied ti coca son sang pon ti laig ka dee laux lee an, son ang pui tix kaux kawx sang hawt hu ka pa awm riang lox tiag pa lieh lox pa ang cu nghiet an heue. ¹² Grawh grawng nawh gumlox Siyiex mawh pa im mai pa ca yuh mai nie lheu lawm khaing vaid pa lawm khawm ra plak, kre pa yuh ka mawx ang ah mai suat laig tom kieh ju mai khuan gwieh paox tix mai laig khawm ka sinax jhong mai daux gua mai tawng ka pa bak keud daux rhawm rhi heue. ¹³ Ceu pa hoik phan hoik deuh ang koe tix ceu kawx pa ang sidawng ka Nawh Cao, ku ceu khawmuik mawh pa kakaong mai pa hoik paoh ka sivoe ngai Nawh Cao, pa mawh Cao pa sang prawng ca ka ex heue. ¹⁴ Kheu ex koe cao giex kaing li pa ting pa hoik laig ka daux meung raoma, pa mawh Yesux kawn Siyiex, kieh ex giex tom kaux ka ceu pa hoik rieb ex ti teei heue. ¹⁵ Grawh grawng nawh ex ang koe cao giex kaing li pa ting pa ang chix caux rhawm ka ceu pa iak riang ex khankix, ex koe Kaw pa hoik sax yaox ti kham krax nyaw glaw ka can ku ceu ku blawng khawmuik, Nawh ang yuh phimap heue. ¹⁶ Mawh kheu nan kieh ex viex rhawm kwa tix greed hoek ka dang ngeung bwanson, sonsang pon ex krax caux rhawm mai pon ti yaox bwanson pa teem, ka daux bawg yam pa lo ex khankix heue.

¹ Grawh grawng nawh cao giex kaing li pa ting ku kaux, pa hoik laug ti teei khaing ka daux kawn pui, hoik ciak ti deuh son kawn pui, ka grawh grawng ceu pa dex dawd ka Siyiex, sonsang mawh nawh cao tan ka totaix mai ceu pa tan khankix son phimap heue. ² Nawh mawh pa chix gun yeung ka pui pa ang tawng mai ka pui pa lud khankix mhawm mhawm, kheu khawm tokaux nawh kawx mawh pa iak riang, ³ mawh kheu jao an nawh kawx tak lai tan ceu pa tan son phimap tokaux tix, awm pa tan nawh son phimap kawn pui tang kaux khankix heue. ⁴ Pui tix kaux kawx ang tang pon teei ka ara pa koe min plakngai an nong nong, pon ti teei ngie yam kok Siyiex ka nawh, awm pa hoik kok ka Arun heue. ⁵ Awm an viang Cao Khrit kawx ang lai tang yaog tokaux tix ting nong nong, ti mawh cao giex kaing li pa ting, mawh Kaw pa hoik ah nin ka Nawh, "Maix mawh kawn simex Aux, Aux hoik kieh Maix keh ka daux singaix in heue." ⁶ Awm pa hoik ah Nawh Cao nin tang dah, "Maix mawh Cao giex kaing li tom leeing ju, awm pa khaw mai ara Melakhizediek." ⁷ Ka daux bawg yam singaix pa ot Cao Khrit ka daux nex nham, Nawh kok yo lox ting mai roik rawm ngai, rawg bwan mai khyox khaw ka Kaw pa chix taoh Nawh khaing krax yum, hoik nghiet ka lox Nawh an kheu chix nab yam Nawh ⁸ viang Nawh mawh Kawn tete kawx, Nawh hoik gau ti chix cu nghiet ka ceu pa kham geu Nawh khankix, ⁹ mai khaix hoik kieh Nawh grum mhawm, Nawh Cao tom lih mawh Cao pa yuh krax taoh leeing ju, ka son can kix pa cu nghiet ka Nawh khawmuik, ¹⁰ Siyiex hoik sum ceu kaux Nawh mawh cao giex kaing li pa ting, awm pa khaw mai ara Melakhizediek heue. ¹¹ Ex koe lox sang krai grawng Nawh tom nie ceu, pa mawh ceu pa kied nu ti tawng dee bleeh, mawh kheu hoik lih mawh pex pa ang hiex chix nghiet mhong heue. ¹² Phan keud grawng pa hoik luan bawg yam jih jang glang gleeing, pex khaw ti uik mawh cao gau, viang mawh nan pex baox deeh lo cao pa gau pex ka num lox lai beenli Siyiex khankix mai pex hoik lih mawh pa lo rawm teeih mai pa ang lo pa ih pa mawh to heue. ¹³ Grawh grawng nawh pa ih rawm teeih ku kaux daux pui ang lai tawng ka gumlox pa rahsee, mawh kheu mawh nawh kawn ngie heue. ¹⁴ Pa ih pa mawh to, mawh son pui pa uik grum die huan, pa mawh kix pa sax shiao ka kraung grang dee chix tawng kix, tom hoik gau ti chix gwieh ti tawng, mawh pa yuh ka mawx, mawh pa mhawm mai pa ang mhawm heue.

¹ Mawh kheu nan kieh ex prah ka ceu pa gau, pa mawh lox num been Cao Khrit khankix mai hu plak sivoe tom uik grum die huan mai ang baox deeh yuh ti deuh num pa doh keud ka krax twah klaung pa yum mai ka krax yum rhawm ka Siyiex, ² pa dex mai pa gau ka grawng cubcom rawm mai pa deuh taix ka piang mai pa deeh kaoh im khaing krax yum mai pa prawng ca leeing ju heue. ³ Phan Siyiex tawx akhwang ex tak yuh nan heue. ⁴ Phan mawh grawh grawng kix pa hoik pon pa riang tix bawg mai hoik cim ti yaox ka totaix raoma mai hoik kieh mawh pa rom ti pon ka Khuan Singax, ⁵ hoik cim ti yaox ka gumlox Siyiex pa mhawm mai ka sibrawm khankix pa tak sang hoek ju khaix, ⁶ hoik deeh tieh ka khaix, ang tau ti doh chix kieh kix baox deeh mawh pa khraox, ka pa doh keud ka phimap, kheu kix baox deeh teei Kawn Siyiex yum ka piang khaox lhak ka tokaux tix, tix bawg mai yuh ti kieh Nawh mawh pa kaig tua ka sivoe pui heue. ⁷ Grawh grawng nawh haktiex pa hoik nyaux ka rawm lhiex pa lih hoek ka piang nawh law lawx mai pa chix kieh taux lhax lih koe son kix pa hoik yuh ka khankix, pon bwanson khaing Siyiex heue. ⁸ Phan haktiex an kieh pang kat lih koe, sawn nawh mawh pa ang koe bwanson pa jhax lawg hoik dex dee sidah nawh mawh pa gleeing heue. ⁹ Viang ex ah nan kawx, pa moh aux khankix eue, ex tom yum rhawm grawng ceu pa nie lheu mhawm ka grawh grawng pex, pa mawh ceu pa dex pa neuex mai krax taoh khankix heue. ¹⁰ Grawh grawng nawh Siyiex ang lai mawh pa ang rahsee, ti piawm ka kaing krax moh pa hoik jhi pex ka plak ceu kaux Nawh, ka daux pa hoik teem pex ka pui singax khankix mai ka daux pa ca kawn yuh pex nan heue. ¹¹ Ex simie ti kieh pex kaux mawx kaux an jhi pa viex khawm rhawm tix coca awm an, son sang pon krax keud pot jun pot pa grum naog tom sidah, ¹² son ang pex lai sang nieh, mawh pa hawt jawh ka kix pa pon sin lox sijax mukheu khankix kheu krax yum rhawm mai krax gun yeung heue. ¹³ Grawh grawng nawh yam tawx Siyiex lox sijax mukheu ka Abraham, kheu ang Nawh yaox ti tiextu ka pa nie lheu ting, Nawh tom deeh tiextu ka tokaux tix tiru, ¹⁴ Ah nin, "Aux tak sang nawb bwanson ka maix mai tak sang kieh maix pre kah tete heue. ¹⁵ Kheu hoik viex rhawm gun yeung ti krox, Abraham tom pon lox sijax mukheu an heue. ¹⁶ Kawn pui chix tiextu tix sivoe ngai pui pa ting lhaong khankix, phan krax pa tiextu kix kaux cong pon kieh pa thiang kix paox tix yien dud heue. ¹⁷ Mawh kheu Siyiex koe rhawm ti sang nie jhi sidawng laing laing, ka cao pa sang pon sin lox sijax mukheu an, ka grawng pa ang chix tieh loh ceu pa bak Nawh, Nawh tom shiao lox tiex tu sinax, ¹⁸ Kheu ra ceu pa ang chix tieh loh, pa ang doh chix kieh Siyiex pie lhen kah, ex pa hoik to son dee peung ti giex ka krax keud pot jun pot pa hoik deuh sivoe ex, tak sang pon pa baox thiien riang ka ex heue. ¹⁹ Krax keud pot jun pot an mawh awm rhiem ngak ngaw ka son ju ex, pa kaux cong mai hoek tom plak daux man kang, ²⁰ Ka dee hoik grux laig Yesux ti mawh cao pa hu sivoe ka son ex, kheu hoik lih mawh Nawh cao giex kaing li pa ting, leeing ju, awm pa khaw mai ara Melakhizediek heue."

¹ Grawh grawng nawh Melakhizediek in, pa mawh simiang Saliem, pa mawh cao giex kaing li pa ting cie Siyiex pa ting lhaong khaing paox tix, pa hoik sipub ka Abraham yam deeh dak nawh khaing pa pah simiang khankix yum mai nawb bwan ka nawh, ² Ka nawh Abraham kawx, hoik gwieh ti tawx can kraung pin pa pon nawh kao son tix son, phan toe dee bleeh ceu kaux Melakhizediek, phao ka tix ceu mawh Simiang pa rahsee mai khaix an mawh Simiang Saliem, pa mawh Simiang pa nhim, ³ pa ang koe keeing, pa ang koe miex, pa ang koe doeh ru pa toe ti hoek, viang dee jah singaix khankix mai dee sidah kawx ang koe, hoik yuh ti kieh nawh awm Kawn Siyiex, pa ca kawn mawh simiang pa giex kaing li jheung jheung heue. ⁴ Keud ti yaox grawng pui an ting miex ding miex glhaong, keeing ex Abraham, pa hoik teei ti tawx kraung pin ceu pa blon ting mhawm khankix kao son tix son kah heue. ⁵ Kix pa mawh kawn simex Lewix khankix pa hoik pon ara cao giex kaing li, hoik koe lox tawm ti sang teei kao son tix son khaing pui khankix awm pa khaw mai lox lai beenli, pa mawh khaing puxaik kix, viang inkix kawx hoik lih hoek khaing Abraham, ⁶ Pa ang toe ru nawh hoek khaing kix, hoik teei kao son tix son khaing Abraham mai hoik nawb bwan ka nawh pa koe lox sijax mukheu khankix heue. ⁷ Ang koe dee thiang grawng mawh kaw pa nie ting pa nawb bwan ka kaw pa iak heue. ⁸ Lheu khaing nan dee in mawh pui chix yum pa pon kao son tix son, dee an tix kaux pa pon kao son tix son, mawh pa koe ceu pa kham mhai rug grawng pa im ju nawh heue. ⁹ Phan krai tix blawng mawh nin, pie Lewix pa pon kao son tix son, hoik yaox ti tawx kao son tix son ka daux Abraham heue. ¹⁰ Grawh grawng nawh yam sipub Melakhizediek ka Abraham, Lewix kawn ot ka daux bloh keeing nawh heue. ¹¹ Mawh kheu nan phan hoik koe ceu pa grum naog kheu cub cao giex kaing li pa dex mai Lewix, kawn baox lo pa lih bleeh cao giex kaing li tang kaux awm pa khaw mai ara Melakhizediek, pa ang sawn mawh pa khaw mai ara Arun, yuh ka mawx? ¹² Mawh kheu thai loh ka cub cao giex kaing li, viang khawm ka lox lai beenli kawx, tak lai loh kah heue. ¹³ Grawh grawng nawh kaw pa hoik krai ceu in khankix ka grawh grawng nawh an, mawh pa dex mai ceu pui tang ceu, pa mawh ceu pui tix kaux kawx ang sax yuh kaing kia ngien ka khu dee tan heue. ¹⁴ Grawh grawng nawh hoik sidawng grawng hoik lih Simiang ex khaing ceu Yudax mai Mose ang lai krai tidtix grawng pa dex ceu Yudax ka pa yuh cao giex kaing li heue. ¹⁵ Ceu pa krai ex nie lheu sidawng laing laing, phan cao giex kaing li tang kaux tak lih bleeh pa awm Melakhizediek, ¹⁶ pa ang mawh cao giex kaing li pa hoik kieh ti mawh awm pa khaw mai lox tawm lai beenli pa dex mai nex nham, mawh pa hoik kieh ti mawh awm pa khaw mai sibrawm ju pa im pa ang chix sidah heue. ¹⁷ Grawh grawng nawh hoik kham mhai rug ah nin, "Maix mawh cao giex kaing li tom leeing ju, awm pa khaw mai ara Melakhizediek." ¹⁸ Grawh grawng nawh hoik tiah ti tik ka lox tawm pa hoik grux tawx sivoe an, kheu mawh pa iak riang iak rao mai pa ang koe bwanson, ¹⁹ Mawh kheu lox lai beenli ang lai kieh tix ceu kawx grum naog kah mai hoik viex ti kieh koe krax keud pot jun pot pa nie lheu mhawm, kheu krax keud pot jun pot an ex tom pon ti hoek dex ka Siyiex heue. ²⁰ Yam kieh Nawh Cao mawh cao giex kaing li ang lai mawh ka pa ang koe lox tiextu, ²¹ Phan mawh ka kix hoik kieh mawh cao giex kaing li, ka pa ang koe lox tiextu, hoik kieh Nawh mawh cao giex kaing li tau mai lox tiextu, kheu Kaw pa hoik ah nin ka Nawh, "Simiang hoik tiextu mai tak ang deeh tieh loh tix khaing pa ah nin, Maix mawh cao giex kaing li tom leeing ju." ²² Mawh kheu an Yesux hoik lih mawh cao tang son sijax mukheu pa nie lheu mhawm heue. ²³ Ka kix hoik kieh mawh cao giex kaing li tom nie kaux, mawh kheu ang kix yaox ti yuh jheung jheung kheu kieh raw krax yum kah heue. ²⁴ Phan mawh Nawh Cao, mawh kheu ca koe Nawh leeing ju, ara cao giex kaing li cie Nawh tom ang thai ang loh heue. ²⁵ Mawh kheu nan, kheu Nawh Cao ca kawn im ju jheung jheung, ti khyox khaw ka son kix pa greed hoek dex ka Siyiex, ka daux Nawh, Nawh tom pon ti taoh kix tom sidah heue. ²⁶ Grawh grawng nawh ex lo ka cao giex kaing li pa ting pa awm an, pa singax, pa ang koe dee phit dee lud, pa ang koe dee seeing brai, pa hoik tang tiah khaing pui phimap khankix mai pa hoik yuh ti kieh lhaong khaing raoma khankix, ²⁷ pa ang shiao lai tan pa tan ku singaix, awm cao giex kaing li pa ting an khankix, tak lai tan son phimap tokaux tix ka sivoe mai khaix ka son pui tang kaux khankix heue. Nawh Cao hoik tan tix bawg khaing son ku jheung jheung, yam tan Nawh tokaux tix heue. ²⁸ Kheu lox lai beenli hoik ciak ti kieh pui pa iak riang mawh cao giex kaing li pa ting, viang lox tiextu koe khaix lox lai beenli, hoik ciak ti deuh Kawn Cao, pa grum son leeing ju heue.

¹ Ka daux grawng ceu pa krai ex khankix, pa mawh lox kaing ting mawh in. Ex hoik koe cao giex kaing li pa ting pa awm an, pa hoik ngawm ka plak khawn dawm dang ngeung min pakngai Siyiex ka daux meung raoma, ² pa mawh kawncau son pui khawmuik, ka dee singax, ka nyiex gox bwan man pa mawh meh, pa hoik sum Simiang, pa ang mawh pa sum pui ka heue. ³ Grawh grawng nawh hoik ciak ti deuh ka cao giex kaing li ku kaux, son sang tan nawh totaix mai khawm pa tan heue. Cao giex kaing li pa ting in kawx tak lai koe ceu pa tan tix ceu ceu heue. ⁴ Phan Nawh Cao ot ka piang haktiex, Nawh ang tau ti mawh cao giex kaing li, mawh kheu hoik koe kix pa tan totaix khankix awm pa khaw mai lox lai beenli, ⁵ kaing cau pa yuh kix, mawh riang pa hawt jawh ti yuh mai pang peue ceu pa dex mai meung raoma khankix, awm pa hoik tawx lox ka Mose yam dex sang yuh nawh nyiex gox bwan man, grawh grawng nawh Nawh Cao hoik ah nin, "Yuh satix, son sang yuh maix ku ceu khawmuik awm pa khaw mai riang grang pa hoik jhi ka maix ka piang gawng heue." ⁶ Kaing cau pa hoik pon Yesux yam in, mawh pa nie blon ting mhawm, mawh kheu mawh Nawh pui sinax ka sijax mukheu pa nie blon ting mhawm, pa hoik kieh mawh kieh kaux ka lox sijax mukheu pa nie blon ting mhawm khankix heue. ⁷ Mawh kheu phan sijax mukheu pa hoik koe ka sivoe an hoik mawh pa ang koe dee ne dee cha, ang tau ti lo sijax mukheu ra mu tix mu heue. ⁸ Nawh Cao deuh phimap ka kix ah nin, "Jhak heue, singaix khankix tak sang hoek, Simiang ah nan, Yam tak sang yuh Aux sijax mukheu pa khraox, tau mai geh nyiex Isarelax tau mai geh nyiex Yudax, ⁹ tak ang khaw mai sijax mukheu pa hoik yuh Aux tau mai tax du kix khankix, ka daux singaix an yam teei Aux taix kix, ti tuk kix lih khaing meung Ejiptux heue. Grawh grawng nawh kheu ang kix lai ot ka daux sijax mukheu Aux, Aux tom hoik grham ti ang keud grawng kix heue. Simiang ah nan. ¹⁰ In mawh sijax mukheu pa tak sang yuh Aux tau mai geh nyiex Isarelax, khaix singaix an khankix, Simiang ah, Aux tak sang sau lox lai beenli cie Aux ka daux dee chix keud kix mai Aux tak sang tiiem khankix khawm ka piang rhawm rhi kix heue. Aux tak mawh Siyiex kix mai kix tak sang mawh pui cie Aux heue. ¹¹ Kix kaux mawx kaux an tak ang gau paox tix ka paox praix paox yaong tix mai kaux pui mawx kaux pui an ka puxaik tix, ah nin, Tawng ka Simiang heue. Grawh grawng nawh, can khawmuik tak sang tawng ka Aux, jah ka pa nie iak khaing paox tix, tom sidah ka pa nie ting khaing paox tix ka daux kix heue. ¹² Grawh grawng nawh Aux tak sang caux rhawm ka jhawm pa lud kix mai Aux tak ang baox lai doh keud ka phimap kix heue." ¹³ Ka daux pa hoik ah Nawh Cao, "Sijax mukheu pa khraox,"Nawh hoik yuh ti kieh sijax mukheu pa hoik koe ka sivoe an mawh pa prim heue. Ceu pa lih prim lih kuad an dex sang grai grhup hu heue.

¹ Phan mawh sijax mukheu ka sivoe an tix mu, hoik koe been grawng pa krub mai hoik koe dee singax nawh pa dex mai haktiex in heue. ² Grawh grawng nawh hoik cox yuh nyiex gox bwan man tix lhang, pa koe nyiex plak praix tix nyiex, pa kok mawh "Dee Singax,"dee koe jawk ten,pheen mai blah pa tan heue. ³ Plak daux man kang ra mu tix mu, koe nyiex gox man pa kok mawh, "Dee Kied Singax Khaing Paox tix." ⁴ Pa koe khu khri dee tok nyawng bhawng mai khui sijax mukheu pa hoik om ka khri khawmuik heue. Ka daux khui an koe aw khri tix mu, pa koe Mannax ka daux, khaox gix Arun pa hoik tux tai, khlawp simaox sijax mukheu, ⁵ ka piang khui an koe Cherubim, pa dex mai min plakngai, pa tawb veei ka dang ngeung pa caux rhawm heue. Phan mawh grawh grawng ceu in khankix, ang ex pon ti krai tom grum tom sidah yam in heue. ⁶ Khaix hoik cox ceu in khankix yuh nin, cao giex kaing li khankix, ca laig ka daux nyiex gox plak praix tix nyiex ku jheung jheung ti yuh kaing krub heue. ⁷ Phan mawh ka daux nyiex gox man ra nyiex tix nyiex, cao giex kaing li pa ting tix kaux khaing nong nong, laig ngie tix num tix bawg mai ang sax laig phan ang viex nham, pa tan nawh son tokaux tix mai son ceu pa lud pui tang kaux khankix heue. ⁸ Khuan Singax Singeh tom teei grawng an jhi kieh sidawng, grawng krax pa laig ka daux Dee Kied Singax ang nyang bax paoh yam kawn kaux kawn koe nyiex gox man plak praix heue. ⁹ In mawh riang lox tiag ka son bawg yam in awm pa khaw mai totaix mai ceu pa tan pa teei ti tan khankix, viang ceu an khankix ang chix kieh dee chix keud tawng pui pa krub Siyiex grum mhawm kah, ¹⁰ kheu khankix mawh ngie ka pa ih mai pa nyaux mai pa khoek pa heem tom nie ceu, pa mawh been nex nham pa hoik deuh tom sang hoek bawg yam yam sang cox yuh pa khraox khaing heue. ¹¹ Cao Khrit hoik hoek ti mawh Cao Giex Kaing Li Pa Ting pa dex mai ceu pa mhawm pa tak sang hoek ti mawh khaix, ka daux nyiex gox bwan man pa nie lheu ting lheu grum mhawm, pa ang lai yuh ka taix, pa ah nan sang ah, pa ang dex mai ceu pa phan pa yuh ka haktiex in, ¹² ang Nawh lai teei nham pex mai nham kawn mawie khankix, teei ka nham tokaux tix mai laig ka daux Dee Kied Singax, tix bawg khaing son ku jheung jheung, khaix hoik pon krax taoh leeing ju ka son ex heue. ¹³ Grawh grawng nawh phan nham pex mai nham mawie mhaing khankix mai nyaox mawie shiang, pa phruah ka kix pa hoik seeing brai, dee chix kieh nex nham kix singax kah, ¹⁴ nham Cao Khrit tokaux Nawh pa loig pa ang koe dee ne hoik tan ka Siyiex kheu Khuan Singax Singeh leeing ju, tak sang nie lheu kieh dee chix keud chix tawng pex singax khaing krax twah klaung pa dex mai krax yum, ti sang yuh kaing krub ka Siyiex pa im ju miex ding? ¹⁵ Mawh kheu jao in Nawh Cao tom mawh pui sinax ka sijax mukheu pa khraox, kheu hoik yum sonsang taoh ka ceu pa lud pa hoik ot ka greem sijax mukheu pa yuh ka sivoe an tix mu, son kix pa hoik kok ka khankix tak sang pon sin leeing ju, awm lox sijax mukheu heue. ¹⁶ Grawh grawng nawh dee koe lai alo grawng pa gwieh sin, tak sang koe mhai rug grawng pa hoik yum cao pa yuh lai an heue. ¹⁷ Grawh grawng nawh lai alo grawng pa gwieh sin, koe cue ngie khaix hoik yum cao pa yuh lai an khaing mai yam kawn klawd nawh ang sax koe bwanson heue. ¹⁸ Mawh kheu nan pie sijax mukheu pa hoik yuh ka sivoe an kawx, ang lai jah ti deuh ti kieh mawh ka pa ang lih nham heue. ¹⁹ Grawh grawng nawh khaix hoik krai Mose lox tawm ku gum ka pui khawmuik awm pa khaw mai lox lai beenli, nawh teei nham kawn mawie mai nham pex khankix, tau mai rawm mai hauk yung pa raoh mai khaox Hesop mai phruah ka phuk lai an mai ka khawm pui khawmuik, ²⁰ Ah nin, "In mawh nham sijax mukheu pa hoik tawm Siyiex ti yuh tau mai pex heue." ²¹ Lheu khaing an ka nyiex gox bwan man mai ka khawm kraung can pa shiao yam yuh kaing krub kawx, nawh teei nham mai phruah sau kah awm an heue. ²² Phan awm pa khaw mai lox lai beenli, dex kieh ku ceu khawmuik singax ka nham, phan ang mawh ka pa lih nham ang koe krax luan khaing phimap heue. ²³ Mawh kheu nan ceu pa mawh pa hoik hawt jawh ti yuh ka ceu pa koe ka daux meung raoma khankix, tak lai kieh singax ka ceu inkix heue. Viang mawh nan ceu pa mawh pa koe ka daux meung raoma tete, tak lai kieh singax ka pa tan pa nie lheu mhawm khaing inkix heue. ²⁴ Grawh grawng nawh Cao Khrit ang lai laig ka daux Dee Kied Singax Singeh, pa yuh ka taix, pa mawh riang grang Dee Kied Singax pa mawh meh an, viang mawh nan pon hoik laig ka daux raoma tete, sonsang plak jhi tokaux Nawh ka sivoe pakngai Siyiex ka son ex yam in heue. ²⁵ Nawh Cao ang lai tan ka tokaux tix lawlawx, awm pa laig cao giex kaing li pa ting ka daux Dee Kied Singax tix num hoik tix num, ka pa viex nham pa ang mawh cie tokaux tix, ²⁶ Phan raux mawh nan, jah ka yam kaw haktiex, tom sidah yam in, Nawh Cao tak hoik yaox ti kham geu lawlawx, yam in, yam mawh bawg yam sidah baux ju khankix, Nawh Cao hoik lih bleeh sonsang teei ti tik ka phimap, ka daux pa tan ka tokaux Nawh tix bawg khaing heue. ²⁷ Awm pa hoik ciak ti kieh pui yum tix bawg mai khaix hoik yum tak sang yaox pa prawng pa ciyang, ²⁸ Awm an Cao Khrit kawx hoik tan ka tokaux tix, tix bawg khaing, sonsang vieh phimap pui tom nie hu mai Nawh tak sang lih bleeh ra bawg tix bawg, ka pa tang tiah pa ang dex mai phimap, ka kix pa krox son Nawh Cao, sonsang taoh ka kix heue.

¹ Grawh grawng nawh kheu lox lai beenli koe pang peue ceu pa mhawm pa tak sang hoek khaix khankix mai ang lai koe riang pakpeung ceu an khankix tete, pa ca tan ceu pa tan cao giex kaing li kix tix num hoik tix num jheung jheung, ang lai chix kieh kix pa greed hoek dex khankix grum mhawm kah heue. ² Phan chix kieh grum mhawm, tak hoik naox ka pa tan khankix ang mawh lie? Mawh kheu phan hoik kieh pui pa yuh kaing krub khankix singax kah tix bawg khaing, dee chix keud chix tawng kix ang tau lai baox mhong koe phimap heue. ³ Ka daux pa tan an khankix koe ceu pa doh keud ka phimap tix num hoik tix num heue. ⁴ Grawh grawng nawh nham mawie mai nham pex khankix pon ang doh chix teei ti tik phimap heue. ⁵ Mawh kheu nan yam hoek Cao Khrit ka piang haktiex Nawh Cao ah nin, "Maix ang lai simie ka ceu pa tan viang mawh nan Maix hoik cox khre tokaux ka son Aux tix mu heue. ⁶ Ka daux ceu pa gleeing ti tan khawm kaux mai ceu pa tan son phimap, Maix ang khaw rhawm kah heue. ⁷ Khaix an Aux tom ah nin, Jhak heue, Aux hoik hoek ti sang yuh alo Maix, Siyiex eue" ⁸ Awm pa hoik ah phao ka nux, "Ka ceu pa tan ka ceu pa gleeing ti tan khawm kaux mai ceu pa tan son phimap, Maix ang lai simie mai ang khaw rhawm kah heue."Ceu an khankix mawh pa tan awm pa khaw mai lox lai beenli. ⁹ Khaix an Nawh Cao hoik ah nin, "Jhak heue, Aux hoik hoek ti sang yuh alo Maix heue."Nawh Cao teei ti tik ka ceu pa koe ka sivoe an, sonsang kieh kaux cong ka ra ceu tix ceu heue. ¹⁰ Ka daux alo pa yuh nan, hoik kieh ex singax kheu pa teei ti tan tokaux Yesux Khrit tix bawg khaing son ku jheung jheung heue. ¹¹ Cao giex kaing li ku kaux cung ku singaix, tix ngaix hoik tix ngaix yuh kaing krub mai tan ka ceu pa tan pa awm paox tix law lawx, pa ang tau ti chix teei ti tik ka phimap tix bawg kawx heue. ¹² Khaix hoik tan Nawh Cao ka pa tan tix mu khaing, son phimap ka son leeing ju, hoik ngawm ka plak taix khawn dawm Siyiex heue. ¹³ Ca krox jun tom sang kieh pui pa koeng ka Nawh, mawh ngot dee deuh caong Nawh heue. ¹⁴ Grawh grawng nawh ka pa tan tix bawg khaing, Nawh Cao hoik kieh grum mhawm leeing ju ka kix, pa yuh ti kieh singax khankix heue. ¹⁵ Khawm Khuan Singax Singeh kawx kham mhai rug ka ex, kheu khaix hoik ah Nawh nin, ¹⁶ "In mawh sijax mukheu pa tak sang yuh Aux tau mai kix, khaix singaix an khankix, Simiang ah.Aux tak sang sau lox lai beenli cie Aux ka piang rhawm rhi kix mai Aux tak sang tiiem khankix khawm ka dee chix keud kix heue." ¹⁷ Nawh baox ah nin, " Aux tak ang baox lai doh keud ka phimap mai ka jhawm pa lud kix heue." ¹⁸ Dee koe ceu pa luan khaing phimap khankix, ang lai baox tan ka son phimap heue. ¹⁹ Mawh kheu nan, puxaik khankix eue, kheu koe ex rhawm kwa ti pon laig ka daux Dee Kied Singax, kheu nham Yesux, ²⁰ Ka krax pa khraox pa im, pa hoik paoh Nawh ka son ex, phlat ka man kang, pa ah nan, sang ah ka tokaux Nawh, ²¹ kheu koe cao giex kaing li pa ting piang nyiex Siyiex, ²² Kieh ex viex rhawm pa mawh meh ka daux pa naog ka krax yum rhawm mai greed dex khaix hoik phruah rhawm rhi ex khaing dee chix tawng pa mhong koe pa caox caig mai khaix hoik sigrhah tokaux ex ka rawm pa singax heue. ²³ Kieh ex giex tom cong ka krax keud pot jun pot pa hoik rieb ex ti teei, son ang lai yung yiang kah, grawh grawng nawh Kaw pa tawx lox sijax mukheu mawh pa kaux sijax heue. ²⁴ Kieh ex keud grawng paox tix, tix kaux lai tix kaux, sonsang kieh koe krax moh mai krax twah klaung pa mhawm. ²⁵ Paw vi yuh ti tik ka pa khrawm ex paox tix, awm koe been pui tix blah, gau ka paox tix mai nie lheu baox yuh nan yam yaox pex dex hoek singaix an heue. ²⁶ Grawh grawng nawh khaix hoik grum tawng ex ka pa mawh meh, phan ex baox ca nieb lak yuh phimap, ang baox lai koe ceu pa tan son phimap, ²⁷ tak koe pa keud pot ce pot ceu pa lhat graung, grawng pa sang pon krax prawng mai pa song rhawm ngu pa tak sang gleeing ka kix pa koeng pa tieb tie khankix heue. ²⁸ Pui pa hoik nieb een ti ang koe cue ka lox lai beenli Mose, phan koe cao pa kham mhai rug ra loe kaux, ang lai koe krax caux rhawm mai teei yum kah heue. ²⁹ Kaw pa hoik dig ka Kawn Siyiex ka greem caong nawh mai hoik een nham sijax mukheu pa hoik kieh nawh singax singeh, mawh ceu pa ang singax mai hoik nieb yuh pa ang cee ang cak ka bwanson Khuan Cao, pex ce nawh mawh pa keung ti pon krax ciyang pa nie lheu lang teung nu miex ding? ³⁰ Grawh grawng nawh ex tawng ka Kaw pa hoik ah nin, "Pa pawk bix mawh cie Aux heue, Aux tak sang deeh viied kah"baox ah nin, "Simiang tak sang prawng sang ca ka pui cie Nawh heue." ³¹ Pa rau tix laig ka daux tawm taix Siyiex pa im ju, mawh ceu pa kied lhat kied graung heue. ³² Doh keud ka singaix glang ka sivoe in khankix, khaix hoik pon pex pa riang, grawng pa hoik yaox pex ti kham ceu pa lah paox tix pa ting ka krax kham geu heue. ³³ Bawg blah hoik mawh kheu pa yuh ti kieh pex mawh pa nieb jhak pui kah, kheu pa yuh ceu pa ang cee ang cak mai khawm pa tuktiak mai bawg blah kheu pa rom ti neuex mai kix pa yuh pui nan kah heue. ³⁴ Grawh grawng nawh pex hoik caux rhawm ka kix pa hoik phyawk laung mai hoik gaux rhawm ti rieb ti teei ka ceu pa tud rhim ti teei kraung khrai pex, kheu hoik tawng pex grawng koe kraung ceu pa nie lheu mhawm son tokaux pex tix ceu pa tak kaux cong jheung jheung heue. ³⁵ Mawh kheu nan paw tik ka ceu pa viex pex rhawm kwa, mawh ceu pa kieh pon bwanson pa ting heue. ³⁶ Grawh grawng nawh pex lo ceu pa gun pa yeung, khaix hoik yuh alo Siyiex, pex tak sang pon awm lox sijax mukheu an heue. ³⁷ "Grawh grawng nawh, khaix in deuk bawg yam ceeix ceeix ngie, Kaw pa sang hoek, tak hoek mai tak ang gla heue. ³⁸ Kaw pa rahsee cie Aux tak sang im kheu krax yum rhawm, phan Nawh deeh yawn tix, ju Aux tak ang khaw rhawm ka daux Nawh heue." ³⁹ Ex ang neuex ka daux kix pa sang hoek ka krax laux leeing, viang mawh nan ex neuex tix ka daux kix pa koe krax yum rhawm tom pon ex ti hoek krax taoh ju heue.

¹ Krax yum rhawm kienie, mawh ceu pa uik fah rhawm grawng sang pon ka ceu pa keud pot jun pot kah mai mawh pa sang een rhawm ti pon ka ceu pa ang nyang bax yaox heue. ² Hoik mawh ka daux an, kuad song khankix pa hoik pon pa kham mhai rug grawng kix heue. ³ Mawh kheu krax yum rhawm ex chix tawng, grawng pa hoik lih mawh haktiex, kheu gumlox pa teei ti yuh khaing ceu pa pon ti yaox heue. ⁴ Mawh kheu krax yum rhawm Abelax tan ceu pa tan pa nie lheu mhawm ka Siyiex, khaing pa tan Ka-inax, mawh kheu nan nawh tom pon pa kham mhai rug ka grawng nawh, grawng pa mawh nawh pa rahsee. Siyiex kham mhai rug ka grawng totaix pa tan nawh khankix mai viang nawh hoik yum kawx, nawh kawn sikah tom yam in heue. ⁵ Mawh kheu krax yum rhawm hoik teei ti gah Enawk, son ang nawh sang yaox krax yum mai sawg ang lai yaox nawh, kheu hoik gah Siyiex nawh hu heue. Nawh Cao hoik kham mhai rug ka grawng nawh, grawng pa hoik yuh nawh pa khaw caw ka rhawm Siyiex, ka sivoe sang gah nawh hu heue. ⁶ Phan ang koe krax yum rhawm pon ang doh chix khaw caw ka rhawm Siyiex, grawh grawng nawh kaw pa hoek ka Siyiex, tak lai yum rhawm grawng mawh Nawh mai grawng mawh Nawh cao pa tawx bwanson ka kix pa sawg ka Nawh heue. ⁷ Mawh kheu krax yum rhawm, yam tawx Siyiex lox ka Noax, ka grawng ceu pa ang nyang bax yaox khankix, nawh lhat graung mai yuh nyiex reu ting, tom pon taoh pui nyiex nawh heue. Mawh kheu nan nawh hoik prawng ti deuh phimap ka haktiex mai hoik lih mawh cao sin ceu pa rahsee awm pa khaw mai krax yum rhawm heue. ⁸ Mawh kheu krax yum rhawm yam kok ka Abraham, nawh nghiet mai lih hu ka dee tak sang pon nawh son sin mai nawh lih hu, viang nawh ang tawng dee sang hu nawh kawx heue. ⁹ Mawh kheu krax yum rhawm, nawh hoik lih mawh nyo sinie ka daux haktiex pa dex mai lox sijax mukheu an, awm mawh ka daux haktiex pa ang mawh cie nawh mai nawh ot ka daux nyiex gox man, tau mai Icak mai Yakop, pa rom ti mawh cao sin lox mukheu tix mu khaing tau mai nawh heue. ¹⁰ Grawh grawng nawh, nawh ca krox ti jhak son veng pa koe num jaong rong, cao sum cao yuh pa mawh Siyiex heue. ¹¹ Mawh kheu krax yum rhawm viang tokaux Sara kawx, pon sibrawm ti nghe doeh ru, yam hoik luan riex ju nawh, mawh kheu, nawh een nawh sawn Kaw pa hoik tawx lox sijax mukheu an mawh pa kaux sijax heue. ¹² Mawh kheu nan pui tix kaux pa awm pa hoik yum lih mawh keeing cub pui hun pa awm simuing ka daux raoma khankix mai awm mhaik praok rawm sigrit sigra pa ang lai uik chix simin heue. ¹³ Pui in khankix khawmuik hoik yum ka daux krax yum rhawm, yam ang nyang pon lox mukheu khankix, viang mawh nan kix hoik kuk puan khankix dee singai mai ah lox rieb ka khankix mai hoik kham grawng mawh kix pui tang meung mai nyo sinie ka piang haktiex heue. ¹⁴ Grawh grawng nawh kix pa ah lox ceu pa yuh nan kieh grawng sawg kix son meung cie tokaux kix sidawng heue. ¹⁵ Phan kix hoik keud grawng haktiex dee hoik lih hoek kix khaing an tete, kix hoik pon tix deeh ing kah heue. ¹⁶ Kix simie ti cie meung pa nie lheu mhawm, pa mawh meung ka raoma heue. Siyiex ang kaig tua, ka pa kok Nawh mawh Siyiex kix, grawh grawng nawh Siyiex hoik cox khre veng tix veng son kix heue. ¹⁷ Mawh kheu krax yum rhawm, yam cheuk ti yaox ka Abraham, nawh tan ka Icak. Mawh heue, kaw pa hoik gaux rhawm ti rieb ti teei lox sijax mukheu khankix, teei ti tan ka kawn simex tix, pa koe tix kaux khaing, ¹⁸ pa mawh kaw pa hoik ah nin ka grawng nawh, "Ka daux Icak tak sang kok mawh ru maix heue." ¹⁹ Mawh kheu nawh deuh rhawm grawng pa chix Siyiex ti kieh Icak deeh kaoh im khaing krax yum kawx heue. Phan awm lox tiag nawh, hoik deeh pon nawh khaing krax yum heue. ²⁰ Mawh kheu krax yum rhawm Icak nawb bwan ka Yakop mai Esaw, ka grawng ceu pa tak sang hoek khaix heue. ²¹ Mawh kheu krax yum rhawm yam dex sang yum Yakop nawh nawb bwan ka kawn simex Yosiep khawm ra kaux mai nawh tum piang khaox grix tix mai krub ka Siyiex heue. ²² Mawh kheu krax yum rhawm yam dex sang sidah ju Yosiep, nawh simawd ka grawng yam sang lih hu kawn praix Isarelax mai tawm lox ka grawng si ang tix heue. ²³ Mawh kheu krax yum rhawm yam keh Mose, kheu yaox miex keeing nawh, grawng mawh nawh kawn pa mhawm grang, kiex ang lhat ka lox pa hoik tawm simiang mai kiex mox nawh been loe khix heue. ²⁴ Mawh kheu krax yum rhawm khaix hoik ting Mose, nawh ang cu ti kieh kok nawh mawh kawn, kawn bun Pharaw, ²⁵ laug ti rom ti kham geu ceu pa nu pa khawm tau mai pui Siyiex, khaing pa pon ti gaux rhawm, ka krax gaux rhawm pa dex mai phimap tix vong vong, ²⁶ yiag ceu pa map pa dex mai Cao Khrit, mawh sinngao pa nie lheu ting khaing sinngao meung Ejiptux, grawh grawng nawh, nawh ca jeung ngai tix ka bwanson pa tak sang pon khaix heue. ²⁷ Mawh kheu krax yum rhawm nawh ang lhat ka krax song rhawm simiang mai prah ka meung Ejiptux. Grawh grawng nawh, nawh kaux cong awm pa yaox nawh ka Kaw pa ang ngai chix yaox heue. ²⁸ Mawh kheu krax yum rhawm nawh priex ti yuh pawie Pasakha mai pa phruah nham, cao pa yuh laux ka kawn Ai khankix, tak ang teeh ang chuh ka pui Isarelax heue. ²⁹ Mawh kheu krax yum rhawm kix hu preeng ka rawm sigrit sigra pa raoh, awm pa hu ka haktiex pa kroh pa sioh mai yam hu pui Ejiptux khankix ti yaox awm an, rawm lhop ka kix heue. ³⁰ Mawh kheu krax yum rhawm guh veng, veng Yerikho grhup, khaix hoik cuang kix kah, aliah singaix heue. ³¹ Mawh kheu krax yum rhawm Rahap bun coh kaux, ang lai laux leeing tau mai kix pa ang chix cu nghiet khankix, kheu hoik rieb nawh ti teei pui jiang ka daux krax pa nhim pa yuh paox pie heue. ³² Aux tak sang baox krai pa yuh ka mawx? Grawh grawng nawh bawg yam aux tak ang kub phan aux krai grawh grawng Gideon, Barak, Samson Yephathax, grawng Davit, Samoelax mai cao jhai khankix. ³³ Mawh kheu krax yum rhawm kix hoik pex ka meung haktiex khankix mai hoik yuh pa rahsee, hoik pon lox sijax mukheu khankix, hoik thox ka jheeh sivai sangsi, ³⁴ hoik kieh sibrawm ngu laux kah hoik luan khaing krax laux ka lawm vaid, hoik kieh ting riang khaing daux pa iak riang, hoik lih mawh pa ting riang ka daux pa yuh naing mai hoik kieh kru naing pui tang ceu khankix to heue. ³⁵ Bun khankix hoik pon pa deeh kaoh im kawn tix khaing krax yum mai tang kaux tix blah ang rieb ti teei ka krax ploi krax taoh mai kham ceu pa tap toi yum, son sang pon kix pa deeh kaoh im pa nie lheu mhawm heue. ³⁶ Tang kaux tix blah kham geu ceu pa nieb yuh pa ang cee ang cak kah mai pa sivied kah, mawh heue. Mai lheu khaing an kham geu ceu pa phyawk mai pa laung daux thawng heue. ³⁷ Hoik dheem kix ka simaox, hoik si kix dud ka jhi, hoik nyaw glaw ka kix, hoik mug kix yum ka vaid, kix hoik ceep hak yung mai hak pex mai hu vung viang, kheu raux ang koe tidtix mai kham geu ceu pa tug kha mai pa tuktiak, ³⁸ mai hu vung viang ka daux tiagtu mai piang gawng lua mai ka daux rang mai ka daux tiex heue. ³⁹ Inkix khawmuik, viang hoik koe ceu pa kham mhai rug grawng kix, kheu krax yum rhawm kix, kix ang lai pon ka lox sijax mukheu, ⁴⁰ grawh grawng nawh, Siyiex hoik kieh koe ceu pa nie lheu mhawm ka son ex, son ang lai yuh ti kieh kix grum naog, ka pa tang tiah khaing ex heue.

¹ Mawh kheu yaox ex grawng koe cub pui ex pa kham mhai rug nie ding nie dod pa rob ka ex, kieh ex tik ka kraung pa cien ku ceu khawmuik mai ka phimap pa yie vung vhien kah mai kieh viex rhawm gun yeung mai to, ka ceu pa lah paox tix to pa hoik deuh ka sivoe ex, ² jhak ka Yesux pa mawh cao pa yuh mai cao pa kieh krax yum rhawm ex grum kah, pa een ceu pa kaig pa tua mawh pa ang koe cee mai hoik kham geu ka khaox lhak, kheu krax gaux rhawm pa hoik deuh sivoe Nawh mai hoik ngawm ka plak taix khawn dawm dang ngeung Siyiex heue. ³ Mawh kheu nan son ang pex sang laux sang khrup rhawm, keud ka grawh grawng Kaw pa hoik kham geu ceu pa kieh pa raw khaing daux tawm taix pui phimap ka tokaux Nawh awx. ⁴ Pa lah pex paox tix ka phimap, pex ang nyang bax cheu ti yuh tom sidah lih nham, ⁵ pex hoik piawm ka lox sidiex lox gau pa hoik jeeh nyaw ka pex, awm ka kawn simex, "Kawn simex Aux eue, paw nieb een ti ang koe cee ka ceu pa sivied ti gau Simiang ka ex. Yam ah yam ne Nawh Cao ka maix paw vi laux rhawm kah ⁶ Grawh grawng nawh kaw pa moh Simiang kah, Nawh sivied ti gau mai puat ka kawn pa rieb Nawh ti teei ku kaux heue." ⁷ Ceu pa yaox pex ti kham geu khankix mawh sonsang sivied ti gau ka pex. Siyiex yuh ka pex awm yuh ka kawn tix heue. Grawh grawng nawh, koe kawn kaux pui mawx, pa ang keeing nawh sivied ti gau kah? ⁸ Phan pex ang yaox ti kham ceu pa sivied ti gau, pa hoik rom ti kham khawmuik kah, pex mawh kawn cang mai ang mawh kawn tete heue. ⁹ Lheu khaing an ex hoik koe keeing pa dex mai nex nham ex, sonsang sivied ti gau ka ex mai ex hoik yung yi ka kix heue. Ex tak ang nie lheu cu nghiet ka Keeing khuan khankix mai im lie? ¹⁰ Grawh grawng nawh kix hoik sivied ti gau ka ex glang been singaix ceeix ceeix awm pa ce kix mhawm heue. Nawh Cao sivied ti gau ka ex sonsang koe bwanson sonsang mawh ex pa neuex ti pon ka ceu pa singax Nawh Cao heue. ¹¹ Can ceu pa sivied ti gau khawmuik, yam in, ang lai ce mawh pa gaux rhawm, ce mawh pa tug pa kha heue. Bawg khaix ceu pa sivied ti gau chix kieh kix pa yaox ti kham kah, pon plix pa nhim, pa mawh plix pa rahsee heue. ¹² Mawh kheu nan yaog ka taix pa hoik tak teue mai ka ngawng pa hoik groik, ¹³ mai yuh krax pa see son caong pex,son pa chawh tak ang baox kluik jhong kah, viang mawh nan sonsang moi kah heue. ¹⁴ Nied ti coca sonsang koe krax nhim tau mai pui khawmuik mai ceu pa singax phan pui ang koe, tak ang pon ti yaox ka Simiang tix kaux kawx heue. ¹⁵ Jhak mhawm mhawm, phan ang mawh nan, ha pui tix kaux kaux kox tak ang pon ang hoek ka bwanson Siyiex heue. Phan ang mawh nan ha riah pa song tix ceu ceu kox lih kuwah ti lak lheut pex mai pui tom nie seeing brai kheu heue. ¹⁶ Son tak ang koe pui phit pui vao tix kaux kaux, phan ang mawh nan pui pa ang chix nab chix yam ka Siyiex, awm Esaw, pa hoik coh ara kawn Ai, ka son pa ih tix tix brie heue. ¹⁷ Grawh grawng nawh pex hoik tawng grawng yam simie nawh ti pon cie sin ngao son khaix, nawh yaox ti kham ceu pa tik pa vud mai ang yaox dee sang pon ti doh keud ka ceu pa hoik lud nawh, viang nawh lih rawm ngai mai nied ti sawg kawx heue. ¹⁸ Grawh grawng nawh ang pex lai hoek ka gawng pa pon ti teeh ka mai pa gleeing ka ngu mai pa lung mai pa faik mai pa bhaung, ¹⁹ mai ka lox luah teet tawng mai ka lox gum lox khankix. Kix pa mhong lox an khyox khaw son ang lai baox sikah ka kix, ²⁰ Mawh kheu ang kix pon ti kham lox pa tawm an, "Pie phan totiag teeh ka gawng an, tak lai dheem nawh yum ka simaox heue." ²¹ kheu ceu pa yaox an mawh pa koe dee lhat sigrien sigre, Mose tom ah nin, "Aux kied lhat mai siyaung kah heue." ²² Pex hoik hoek ka gawng Zion mai ka veng Siyiex pa im ju, pa mawh veng Yerusaliem raoma mai ka cub kawncau Siyiex pa ang doh uik chix simin kah, ²³ mai ka cub pa raug rum grum phroik khawmuik mai ka ceu cao kawn pa liang ti keh, pa hoik tiiem daux lai carang ka daux meung raoma mai ka Siyiex pa mawh Cao prawng ca ka khawmuik mai ka khuan pui pa rahsee khankix, pa hoik yuh ti kieh grum mhawm, ²⁴ ka Yesux pa mawh pui sinax ka sijax mukheu pa khraox mai ka nham pa phruah, pa nie blon mhawm sikah khaing pa sikah nham Abelax heue. ²⁵ Rien rhawm tix son ang pex lai mawh pa ang cu ti nghiet ka Kaw pa sikah heue. Grawh grawng nawh phan kix pa ang cu ti nghiet ka lox kaw pa tawx lox ne ka kix ka piang haktiex, ang pon ti luan kah, ex tak nie lheu ang pon ti luan phan ex veeh tix ang nghiet ka Kaw pa tawx lox ne khaing meung raoma, ²⁶ Kaw pa hoik kieh haktiex yung yiang ka lox Nawh yam an, yam in Nawh tawx lox sijax mukheu ah nin, "Aux tak ang joeng kieh haktiex baox deeh yung yiang kah khaing, viang ka khawm raoma kawx tak sang baox deeh kieh yung yiang tix bawg heue." ²⁷ lox pa ah, "Baox deeh kieh tix bawg,"dee bleeh sang ah ka pa sang teei ti tik ka ceu pa hoik yung yiang khankix, awm ceu pa hoik yuh khankix, ceu pa ang lai yung yiang ka khankix, tak kawn ca ot ca koe heue. ²⁸ Mawh kheu hoik pon ex meung pa ang chix kieh yung yiang kah, kieh ex koe bwanson, sonsang chix ex ti yuh kaing krub pa khaw caw ka rhawm Siyiex, ka krax pa chix yung yi heue. ²⁹ Grawh grawng nawh Siyiex ex mawh ngu pa gleeing heue.

¹ Kieh kawn ca koe krax pa moh rhawm ka puxaik khankix awx. ² Paw piawm ti jhi krax moh ka pui pa ang pex meed pex tawng, grawh grawng nawh, ka daux pa yuh nan, tix blah hoik kia ngien ka kawncau Siyiex yam ang lai tawng heue. ³ Doh keud ka kix pa hoik phyawk laung, awm mawh pex pa hoik rom ti phyawk tau mai kix mai doh keud ka kix pa tuktiak pui kah, mawh kheu pex kawx kawn ot ka daux tokaux heue. ⁴ Kieh pa teei mex teei moeng mawh pa koe min plakngai ka daux pui khawmuik mai kieh dee it mawh pa ang seeing brai heue. Grawh grawng nawh pui pa phit vao mai pa phit vao mai mex mai moeng pui, Siyiex tak prawng tak ciyang kah heue. ⁵ Kieh pex luan khaing ceu pa moh ka mau mai fah rhawm ka ceu pa hoik koe pex awx. Grawh grawng nawh tokaux Nawh Cao hoik ah nin, "Aux tak ang doh tik ka maix mai Aux tak ang doh grham ka maix heue." ⁶ Mawh kheu nan ex tom chix viex rhawm kwa ti ah nin, "Simiang mawh cao pa teem aux, aux tak ang lhat graung heue. ⁷ Doh keud doh sawn ka kix pa hoik giex kaing ka piang pex, pa mawh pui pa hoik krai gumlox Siyiex ka pex awx. Keud ka grawh grawng krax twah klaung kix mai yam sidah ju kix mai hawt jawh ka krax yum rhawm kix awx. ⁸ Yesux Khrit ca awm paox tix, kawx kawx mai singaix mai son leeing ju heue. ⁹ Paw vi kieh been ceu pa gau tom nie ceu, pa tang siyox pa ang pex tawng khankix, viex pex hu awx. Grawh grawng nawh mhawm ti kieh koe rhawm pa kaux cong kheu bwanson mai pa ang mawh pa kaux cong kheu pa ih, pa mawh ceu pa hawt hu kix ti yuh nan khankix ang lai pon bwanson kah heue. ¹⁰ Ex koe khu dee tan tix mu, kix pa yuh kaing krub ka nyiex gox bwan man, ang lai koe akhwang ti ih ka khaing an heue. ¹¹ Grawh grawng nawh tokaux totiag khankix, cao giex kaing li pa ting hoik teei ti viex nham kix laig ka Dee Kied Singax, ti sang tan son phimap, teei ti gleeing plak praix dee bang heue. ¹² Mawh kheu nan Yesux kawx, sonsang kieh pui khankix singax kheu nham tokaux tix, Nawh hoik kham geu ka plak praix siviex veng heue. ¹³ Mawh kheu nan kieh ex lih hu plak praix dee bang ka Nawh mai rom ti kham ka ceu pa nieb map ka Nawh Cao heue. ¹⁴ Grawh grawng nawh ang ex lai koe veng pa kaux cong tin, viang mawh nan ex sawg son veng pa tak sang hoek ti mawh khaix heue. ¹⁵ Mawh kheu nan kieh ex ca tan ceu pa tan pa yaogyaw ka Siyiex jheung jheung, ka daux Nawh Cao, pa mawh plix siyieb jheeh khankix pa yaog yaw ceu kaux Nawh heue. ¹⁶ Paw piawm ti yuh ceu pa mhawm mai pa vieh rhawm sibieh ti teem pui, grawh grawng nawh ceu pa tan pa yuh nan, mawh pa khaw caw ka rhawm Siyiex heue. ¹⁷ Nghiet ka kix pa giex kaing ka piang pex mai cu nghiet ka kix, grawh grawng nawh kix mawh pa pau ka son ju pex, awm kix pa tak sang kham ceu pa chawk ka grawh grawng pex. Kheu son pa yuh kix nan tak mawh ka krax gaux rhawm mai tak ang mawh ka krax pa khi rhawm, mawh kheu phan mawh ka krax khi rhawm tak ang koe bwanson son pex heue. ¹⁸ Rawg bwan son ex awx. Grawh grawng nawh ex yum rhawm grawng dee chix keud ex, ang lai koe dee deuh phimap kah mai ex simie ti yuh pa mhawm ka daux ku ceu khawmuik heue. ¹⁹ Aux nie lheu khyox khaw ka pex sonsang rawg bwan yuh nin, sonsang deeh hoek aux ka pex laung laung heue. ²⁰ Yam in kieh Siyiex cao pa nhim, pa hoik deeh viex Simiang ex Yesux lih khaing krax yum, pa mawh cao liang Yung pa ting, pa liang yung khankix, ka daux nham sijax mukheu leeing ju, ²¹ Kieh pex grum mhawm ka pa hawt yuh alo Nawh Cao ka daux ceu pa mhawm ku ceu mai yuh ceu pa khaw caw plak sivoe Nawh Cao, ka daux pex, kheu Yesux Khrit. Kieh Nawh koe min pakngai ku ju leeing ju liak. Amen. ²² Puxaik khankix eue, aux khyox khaw sonsang yeung pex ka lox pa sidiex gau in, mawh kheu hoik tiiem aux lox ka pex ceeix ceeix khaing. ²³ Kieh pex tawng grawng pa hoik pluat ploi ka puxaik ex Timose. Phan nawh khran hoek, yiex tak yaox pex tau heue. ²⁴ Nawb ka kix, can pa giex kaing ka piang pex mai ka pui pa singax khankix khawmuik awx. Puxaik meung Itali khankix nawb ka pex heue. ²⁵ Kieh bwanson ot tau mai pex khawmuik liak. Amen.