Habakkuk

Habakkuk

¹ Grawng riang susai pa hoik yaox cao jhai Habakuk, ² Nawh ah nin Siyiex eue, aux kok yo ka Maix mai Maix Cao ang mhong kawn sang rheung miex grheung lie? Aux kok yo ka Maix kheu yaox krax pa kied kin mai Maix Cao ang taoh ka aux, kawn sang rheung miex grheung lie? ³ Maix Cao lai jhi aux yaox krax pa lud yuh ka mawx? Maix Cao yaox krax kha rhawm aux lai ang jhak yuh ka mawx lie? Krax pa tud rhim mai krax pa kin koe ka plak sivoe aux, krax pa thung thiang mai krax pa simah simiang kawx koe heue. ⁴ Mawh kheu nan, gumlox beenli hoik bhaw hu mai ceu pa rahsee ang lai pon jhi lih sidawng heue. Grawh grawng nawh, pui ang rahsee hoik lai lawm pui pa rahsee, mawh kheu nan, krax prawng ca pa ang mawh ang meh lih ti koe heue. ⁵ Jhak ti yaox ka daux sinax ceu pui tang ceu khankix mai koe krax pa kied daox deng kah liak! Grawh grawng nawh, aux tak sang yuh kaing tix ceu ka daux baux singaix pex khankix, viang hoik koe pui pa krai ka pex kawx pex ang lai yum rhawm ka heue. ⁶ Grawh grawng nawh Aux hoik yaog pui Khaladie kaoh, pa mawh ceu pui pa kied lang teung mai pa kied phai, pa yaog ti hu tah ka daux haktiex, sonsang teei ti cie dee ot dee koe khankix, pa ang tie mawh cie kix heue. ⁷ Kix mawh pui pa kied kin mai pa kied koe krax lhat kah, krax prawng ca kix mai krax koe min pakngai kix, hoik mawh pa tang yuh lih khaing tokaux kix heue. ⁸ Brung kix nie lheu phai khaing sivai maox mai nie lheu kin khaing sox la pa lih plak ponsawm heue. Pui naing brung kix liu brung hoek khaing dee singai, kix pu ti hoek awm klang krih pa ki sang ih heue. ⁹ Kix khawmuik hoek sonsang yuh krax pa kin kha rhawm, pakngai kix mawh pa hoik veeh ti hu sivoe awm bhaung pa phlu ti hoek khaing plak lih singaix, kix kraix khrawm pui pa giex laung khankix awm mhaik heue. ¹⁰ Kix salao ka simiang mai nyiah ka simiang khankix, kix ngia ka dee pa kaux cong ankix kudah, grawh grawng nawh, kix pum ti deuh lon tiex mai rhim ti teei heue. ¹¹ Khaix an, bhaung tah kix luan, mawh kheu koe phimap kix mai nawh deuh sibrawm tix mawh Siyiex tix heue. ¹² Siyiex leeing ju pa mawh Siyiex aux, Cao pa singax singeh aux eue, mawh ang Maix mawh pa koe tom ju dix lie? Ex tak ang lai yaox ti yum kah heue. Siyiex eue, Maix hoik tat ti deuh kix mawh son pa prawng carang ting eue, Maix hoik yuh ti deuh kix mawh son pa sivied ti sidiex heue. ¹³ Ngai Maix mawh pa singax ang pon jhak ka ceu pa ang rahsee mai ang pon jhak ka ceu pa lud vao, Maix jhak ka pui ankix pa yuh kaing ceu pa ang kaux sijax, Maix lai yawg tix yuh ka mawx? Yam bleet pui pa ang rahsee ka pui pa nie koe krax pa rahsee khaing tix, Maix lai ang nye yuh ka mawx lie? ¹⁴ Maix kieh pui khankix awm kax pa koe daux rawm sigrit sigra mai awm ceu pa mu ti hu piang tiex khankix pa ang koe cao pa kwang yuh ka mawx lie? ¹⁵ Nawh miiet kix haok khawmuik ka miiet, nawh giex kix ka rub mai teei rub bluh kix tau khawmuik, mawh kheu nan, nawh koe krax gaux rhawm mai koe krax nyawm rhawm kah heue. ¹⁶ Mawh kheu nan, nawh appong ti tan ka rub mai gleeing ti tan nyawng bhawng ka rub heue. Grawh grawng nawh, khaing ceu inkix, nawh pon ti cie pa kied koe ngawh koe jum mai pa ih pa kied kluing kied bee heue. ¹⁷ Mawh kheu nan, nawh khex sang yi yuh rub tix mai sang pah ceu pui khankix yum ang jud mai krax pa ang tix lhawk kah lie?

¹ Aux tak cung dee pau mai pau ka piang grah dee pau tix mai pau ti jhak ceu pa sang ah Nawh Cao ka aux, ceu pa sang deeh pawk aux ti ah yuh ka mawx heue. ² Siyiex deeh pawk lox aux ah nin, tiiem ti deuh riang susai ankix mai kieh mawh pa sidawng ka piang phia sonsang kieh pui pa to pon ti phat heue. ³ Grawh grawng nawh, riang susai an mawh pa kawn krox jun bawg yam pa hoik tat ti deuh son nawh, hoik dex hoek bawg yam sidah, mai ang lai koe krax pie lhen heue. Viang mawh pa rheung kawx caw ti krox jun heue. Grawh grawng nawh, mawh pa tak sang hoek tete, tak ang lai rheung heue. ⁴ Jhak heue, pui pa lhaong rhawm rhi ang lai koe rhawm rahsee ka daux nawh, mawh ngie pui pa rahsee, tak sang im ju kheu krax yum rhawm heue. ⁵ Kheu rawm plix siiet nawh koe krax pie lhen, nawh mawh pui pa lhaong rhawm lhaong rhi mai ang ot ka daux nyiex heue. Mawh kheu kied yuh nawh rhawm tix va awm meung yum mai nawh mawh pa awm krax yum mai ang lai pon ti koe krax pa fah rhawm fah rhi, nawh kraix khrawm ceu pui khankix khawmuik hoek ka tokaux tix mai pum ti deuh pui khankix khawmuik ka nawh heue. ⁶ Mawh ang pui an kix khawmuik, sang mawh pa teei lox tiag ka nawh mai lox been prim mai salao ka nawh, ah nin, pui pa yuh krax haok hwan, ka kraung ceu pa ang tie mawh cie nawh rheung miex grheung lie? Mai ka nawh pa teei kraung tang pui tom nie sonsang mhawm tokaux tix koe krax kha rhawm heue. ⁷ Mawh ang pui pa teei maix rao mau ka sang yaog ti kaoh sijaox lie? Mawh ang pui pa yuh krax tuktiak maix khankix sang siduad lie? Mai Maix tak sang lih ti mawh kraung pa tud pa rhim kix heue. ⁸ Mawh kheu hoik tud rhim maix ka ceu pui khankix tom nie, can pui pa kawn deuk an khawmuik, tak sang deeh tud rhim ka maix, kheu maix jah yuh nham pui khankix mai krax pa lang teung kin yuh maix ka haktiex mai veng mai can pui pa ot ka daux an khawmuik heue. ⁹ Pa khrawm kraung khrai pa caox ka daux nyiex son tix pa yuh mheem tix ka dee pa lhaong, sonsang pon nawh ti luan khaing krax pa laux leeing koe krax pa kha rhawm heue. ¹⁰ Maix hoik tawx krax keud sawn pa kaig tua ka nyiex tix, pa tat ti tik pui khankix tom nie mai hoik lud ka ju maix heue. ¹¹ Lon simaox ka daux ding tak sang riag yo lox tix lih mai khaox lat nyiex khankix, tak sang deeh pawk lox heue. ¹² Pa sum guh veng ka krax pa jauh nham, pa pang ti deuh veng ka krax pa lud koe krax kha rhawm heue. ¹³ Jhak heue, ang in mawh pa kaoh khaing Siyiex lie? Ka pa mawh ngu pa gleeing kaing pa yuh pui khankix mai ka pa mawh krax pa taug pa mao ceu pui khakix pa giex going heue. ¹⁴ Grawh grawng nawh, haktiex tak sang mawh pa naog ka pingnya cuyi min plakngai Siyiex, awm naog rawm ka rawm sigrit sigra heue. ¹⁵ Pa tawx paox plawg tix nyaux plai, pa baox saix ka daux mai kieh kix nyaux ti yoek, sonsang pon ti yaox ka pa ot ka kaung kix, koe krax kha rhawm heue. ¹⁶ Maix hoik naog ka krax pa kaig tua, ang koe min plakngai heue. Maix kawx deeh nyaux mai jhi tix awm pui pa ang nyang bax pat hak tix heue. Kawk nyaux plak taix khawn dawm Siyiex, tak sang mawh pa deeh hoek ka maix mai min plakngai maix tak deeh tieh ti mawh krax kaig tua pa kied ting heue. ¹⁷ Krax kin pa hoik yuh maix ka gawng Lebanon tak sang kheem ti deuh maix mai krax laux ju totiag an khankix, pa hoik kieh kix koe krax lhat graung kheu jao nham pui mai krax kin pa yuh ka haktiex mai veng mai can pui pa ot ka daux an khankix heue. ¹⁸ Riang grang pa hoik saik pui ti yuh koe khankix koe bwanson patix? Riang rao pa hoik raug ti mawh cao gau krax pie lhen, cao pa raug ti yuh een, rhawm tix ka riang grang pa ang chix sikah an, koe bwanson patix lie? ¹⁹ Pa ah nin ka khaox riang grang khankix, Siduad heue. Pa ah nin ka simaox pa ang chix sikah khankix yaog ti kaoh koe krax kha rhawm heue. Ankix khex sang chix gau pui lie? Jhak heue, An mawh pa hoik om tix ka rawm khri mai rawm mau mai ka daux an ang koe krax pa toek bhawm im ju heue. ²⁰ Siyiex ot ka daux nyiex bwan singax singeh Nawh Cao heue. Kieh pui haktiex khawmuik ot yiien yawg tix ka plak sivoe Nawh Cao heue."

¹ Lox bwan rawg cao jhai Habakuk ka Shigawnot, ² Siyiex eue, aux hoik mhong ka lox sikah Maix mai koe krax lhat graung kah heue. Siyiex eue, kaing pa yuh Maix Cao deeh yaog tix ka daux num inkix, ka daux num inkix, hoik yuh ti lih sidawng ka daux krax pa song rhawm, doh keud ka krax pa caux rhawm liak. ³ Siyiex hoek khaing veng Teman, Siyiex pa singax singeh hoek khaing gawng Paran, min plakngai Nawh tawb kheem ti deuh raoma khankix mai haktiex hoik naog ka krax pa yaog yaw Nawh Cao heue. ⁴ Krax pa jhan riang Nawh Cao hoik awm pa riang singaix, Nawh Cao hoik koe krax jhan riang khankix khaing daux taix Nawh mai sibrawm Nawh hoik mox tix tan heue. ⁵ Sivoe Nawh hoik koe jhawm saux preng mai hawt khaix caong Nawh Cao koe jhawm saux pa kied siaoh heue. ⁶ Nawh Cao cung mai kieh haktiex yung yiang, Nawh Cao jhak mai kieh ceu pui kuceu sikua heue. Gawng lua pa koe sijheung hoik bih hoik laux, ton pa kaux sijheung hoik grhup heue. Daux krax pa yuh Nawh mawh pa awm paox tix leeing ju heue. ⁷ Aux hoik yaox ka koe nyiex gox haktiex Khushan khankix ka daux krax pa kha rhawm, man tieb haktiex Midian khankix hoik siyaung heue. ⁸ Siyiex eue, mawh ang Maix lai koe krax khaw rhawm ka rawm klawng khankix, mawh hoik koe krax pa song rhawm Maix ka rawm klawng, mawh hoik koe krax saux rhawm rhi Maix ka rawm sigrit sigra, ka yam brug Maix ka brung tix, pa mawh ling lawx krax pa taoh Maix khankix lie? ⁹ Ak Maix hoik mawh pa jhi tix lih khawmuik, lox sijax mukheu pa ah Maix son pui kuceu mawh pa kaux cong heue. Maix hoik gwieh ti deuh haktiex ka rawm klawng khankix heue. ¹⁰ Gawng khankix yaox ka Maix mai hoik koe krax siyaung, rawm khankix hoik tiang ti hu heue. Dee raux rawm sigrit sigra hoik lih lox sinum mai hoik yaog taix tix hoek ka piang dee lhaong heue. ¹¹ Singaix mai khix hoik kaog ka dah dee ot dee koe kix, kheu krax pa riang te Maix ti lih mai ka daux pa blang sawng riang plia Maix heue. ¹² Maix yaog ti hu daux haktiex ka daux krax pa saux rhawm saux rhi tix, Maix hoik dig ti tiang ceu pui khankix ka daux krax pa song rhawm tix heue. ¹³ Maix lih hoek, sonsang taoh ka pui Maix khankix mai taoh ka kaw pa hoik groi Maix bee kah heue. Maix yieh laux ka cao kaing nyiex pui pa ang rahsee mai plak khaing daux num riah nawh tom hoek ka ngawg heue. ¹⁴ Maix teei pliah blung phlat ka kaing pa mawh cao kaing pui naing nawh khankix heue. Kix hoik lih hoek awm bhaung kang lux sang kieh aux prung prang, krax gaux rhawm kix, mawh krax pa sang jawm kiied kix ti ih pui hot shia ka daux pa glip heue. ¹⁵ Maix bruk brung dig daux sigreung rawm sigrit sigra, ka daux puk pak rawm khankix ti kaoh ka daux pa kied ting kied lhaong heue. ¹⁶ Yam mhong aux lox sinum kaux aux hoik graung, siyieb jheeh aux hoik siyaung, krax rham krax sium hoik laig ka daux si-ang aux mai aux hoik koe krax siyaung rhawm ka daux tokaux aux, sonsang pon yiien yawg aux ka daux singaix hoek krax pa kha rhwm ka pui khankix, yam laig kix ti puing pui heue. ¹⁷ Viang khaox ruh ang pon ti glaoh rao kawx, viang nhu plix siiet ang plix kawx mai khaox sanlun ang piien kawx mai viang tong kaung ang pon tawx pa ih, viang cub phung yung jud khaing daux kawg mai viang mawie ang lai koe ka daux kawg kawx, ¹⁸ viang mawh nan, aux tak sang koe krax gaux rhawm ka daux Siyiex, aux tak sang nyawm rhawm ka daux Siyiex Cao taoh aux heue. ¹⁹ Siyiex leeing ju mawh riang rao aux, Nawh Cao kieh caong aux awm caong cak mai Nawh Cao kieh aux cong hu ka piang choek gawng dee pa lhaong khankix heue. In mawh son cao kaing ting cub pui pa tah ting khankix mai lox maox ting tah aux heue.