Genesis

Genesis

¹ Yam jah, Siyiex phan raoma mai haktiex. ² Haktiex ang koe pakpeung, mawh bang praix pa yi mai pa faik kheem ka piang tom dee raux an mai Khwan Siyiex ot vung viang piang rawm khankix heue. ³ Khaix an Siyiex ah nin, "Kieh pa riang lih koe" mai pa riang lih koe heue. ⁴ Siyiex yaox mhawm pa riang an, Nawh tom gwieh pa riang khaing pa faik heue. ⁵ Nawh kok pa riang mawh ponngaix mai pa faik mawh ponsawm heue. Koe ponbo mai ponngawb, an mawh singaix tix heue. ⁶ Khaix an Siyiex ah nin, "Kieh mee koe ka daux sigreung rawm khankix mai kieh rawm tang gwieh khaing rawm khankix, " ⁷ Siyiex yuh mee praix mai gwieh rawm pa koe plak greem mee praix mai rawm pa koe plak piang mee praix mai an lih koe heue. ⁸ Siyiex kok ceu kaux mee plak piang an mawh raoma mai koe ponbo mai ponngawb, an mawh singaix ra heue. ⁹ Siyiex ah nin, "Kieh rawm khankix pa koe greem raoma, khrawm paox tix ti dah mai kieh dee kroh tiex lih koe" mai an lih mawh heue. ¹⁰ Siyiex kok dee kroh tiex an mawh haktiex mai dee pa hoik khrawm rawm paox tix, mawh rawm sigrit sigra, Nawh yaox mawh pa mhawm heue. ¹¹ Siyiex ah nin, "Kieh tiex kuah rib riem pa koe simie mai khaox pa koe plix kuceu piang ca haktiex heue." Mai ceu an khankix lih ti koe heue. ¹² Haktiex kuah rib riem taux lhax pa koe simie ceu mawx ceu an mai khaox kuceu pa koe plix simie awm ceu mawx ceu an heue. Siyiex yaox mhawm ceu ankix. ¹³ Koe ponbo mai ponngawb, an mawh singaix loe heue. ¹⁴ Siyiex ah nin, "Kieh pa riang lih koe ka daux mee praix, raoma, sonsang gwieh ponngaix khaing ponsawm mai kieh kix mawh mhai ka son praix klawng son singaix sawm, jhong khix mee num khankix heue." ¹⁵ "Kieh pa riang pa koe daux mee praix an, jhan riang tix piang ca haktiex, " ceu an khankix lih ti koe heue. ¹⁶ Siyiex yuh pa riang ting ra mu, pa riang ting an kwang ka ponngaix mai pa riang iak an, kwang ka ponsawm, Nawh Cao baox yuh simuing khankix heue. ¹⁷ Siyiex tawx pa riang an koe daux mee praix raoma, sonsang jhan pa riang ka haktiex, ¹⁸ Sonsang kwang ponngaix mai ponsawm, sonsang gwieh pa riang khaing pa faik mai Nawh yaox mawh pa mhawm heue. ¹⁹ An mawh ponbo mai ponngawb, an mawh singaix pon heue. ²⁰ Siyiex ah nin, "Kieh totiag pa im ju kuceu lih koe daux rawm tom haoh hun mai kieh sim khankix pu piang haktiex ka daux mee praix raoma." ²¹ Mawh kheu nan, Siyiex phan totiag pa ting pa im ju daux rawm sigrit sigra mai can ceu totiag pa chix mu chix hu daux rawm tau mai sim pa chix pu khankix, awm pakpeung ceu mawx ceu an mai Nawh yaox mawh pa mhawm heue. ²² Siyiex nawb bwan piang ceu an ah nin, "Kieh pex pre haoh hun daux rawm sigrit sigra mai kieh sim sai khankix, pre haoh hun piang haktiex heue." ²³ Ponbo mai ponngawb, an mawh singaix phwan heue. ²⁴ Siyiex ah nin, "Kieh totiag pa im ju ceu mawx ceu an lih koe ka piang haktiex, tobrie mai totiag pa chix mu pa koe ka piang haktiex ceu mawx ceu an" mai ceu ankix lih ti koe heue. ²⁵ Siyiex phan totiag tobrie mai can totiag pa chix mu piang tiex khankix, koe piang haktiex awm ceu mawx ceu an mai Nawh yaox mawh pa mhawm heue. ²⁶ Khaix an Siyiex ah nin, "Kieh Ex yuh kawn pui awm grang pakpeung Cao Ex, awm pa hoik khaw mai grang Ex mai kieh kix kwang piang kax pa koe daux rawm sigrit sigra mai ka piang sim raoma mai piang tobrie khawmuik mai kwang ka haktiex mai khawm pa chix mu pa koe piang haktiex khankix heue." ²⁷ Mawh kheu nan, Siyiex yuh kawn pui awm riang grang tix, pa awm riang grang Siyiex, Nawh Cao yuh kawn pui, pa mawh pui simex mai sibun heue. ²⁸ Khaix an Siyiex nawb bwan piang kiex ah nin, "Kieh pax baox keh pre haoh hun piang haktiex. Kieh pax kwang piang kax pa koe daux rawm sigrit sigra mai sim pa koe daux raoma khawm can pa im ju pa chix mu piang haktiex heue." ²⁹ Siyiex ah nin, "Jhak heue, Aux hoik tawx can ceu rib riem pa koe simie plix piang haktiex in, ka maix khawm khaox pa koe plix simie sonsang mawh pa ih son pex heue. ³⁰ Ka son totiag can pa koe piang haktiex, son sim piang raoma mai son ceu pa chix mu piang tiex khankix pa koe ju, Aux hoik tawx rib riem pa klai son priex ih kix" ceu ankix lih ti koe heue. ³¹ Siyiex yaox ka can pa yuh tix kuceu, ceu an khankix mawh pa kied mhawm. Koe ponbo mai ponngawb, an mawh singaix liah heue.

¹ Mawh kheu nan raoma mai haktiex khawm can ceu pa koe daux an khankix, hoik yuh khawmuik heue. ² Ka daux singaix aliah, Siyiex hoik kaing jhaw pa yuh tix, Nawh Cao laux leu tix, singaix aliah an, khaing kaing jhaw pa yuh tix heue. ³ Khaix an Siyiex nawb bwan ka singaix aliah an, kieh singax singeh, mawh kheu Siyiex hoik yuh kaing jhaw pa phan pa deuh tix khawmuik, Nawh tom laux leu tix heue. ⁴ In mawh grawng been pa hoik phan hoik deuh raoma mai haktiex, ka daux singaix pa hoik yuh Simiang Siyiex haktiex mai raoma khankix heue. ⁵ Yam ang khaox ox mai rib riem khankix nyang kuah piang haktiex, Simiang Siyiex ang nyang kieh rawm lhiex lih piang haktiex mai kawn pui pa sum ti ih kuceu piang tiex ang nyang bax koe heue. ⁶ Viang mawh nan, bhawm rawm ciex khankix kieh haktiex caux heue. ⁷ Khaix an Simiang Siyiex yuh grang pakpeung kawn pui khaing phawng tiex mai phlu bhawm pa im ju daux meeh nawh mai kawn pui lih mawh pa im ju heue. ⁸ Simiang Siyiex sum sipeem tix guang ka plak lih singaix daux praix Eden, Nawh Cao deuh kawn pui pa hoik yuh tix ot tan heue. ⁹ Simiang Siyiex phan khaox ox, pa nyawm ti jhak mai plix khaox pa mhawm son pa ih kuah khaing tiex, ka daux sigreung sipeem an, koe khaox im ju mai khaox pa kieh tawng pa mhawm mai pa ang mhawm heue. ¹⁰ Rawm klawng ting tix klawng lih khaing daux sipeem Eden, sonsang kieh tiex caux, mai khaing klawng an deeh gwieh ti mawh pon klawng ka plak praix sipeem heue. ¹¹ Ceu kaux rawm klawng an tix klawng mawh Pishon mai lih hu plak haktiex Havilax dee koe khri heue. ¹² Khri haktiex an, mawh pa jiet mhawm, peeh khaox Badelax mai siang simaox Shahan kawx koe tan heue. ¹³ Ceu kaux rawm klawng ra klawng tix klawng mawh Gihon mai lih hu plak haktiex Kushax heue. ¹⁴ Ceu kaux rawm klawng loe klawng tix klawng mawh Tigarit mai lih hu plak lih singaix haktiex Asurix. Rawm klawng pon klawng tix klawng mawh Upharat heue. ¹⁵ Simiang Siyiex teei kawn pui mai deuh ka daux sipeem Eden sonsang priex sang yuh sipeem an heue. ¹⁶ Simiang Siyiex tawx gumlox ka kawn pui ah nin, "maix pon ti ih kuceu khaing khaox ku khaox, pa koe daux sipeem awm pa koe rhawm tix, ¹⁷ viang mawh nan, maix tak ang pon ti ih khaing khaox pa kieh tawng pa mhawm mai pa ang mhawm, phan maix ih, maix tak yum singaix an tete heue." ¹⁸ Nawh ah nin, "simex tix kaux ang khaw ti ot nong nong, Aux tak baox yuh pui sang teem, awm pa khaw mai nawh heue." ¹⁹ Simiang Siyiex phan totiag kuceu piang haktiex mai sim raoma kuceu khankix khaing tiex, viex hoek ka Adam sonsang yaox nawh mai chix kok ceu kaux kix, can ceu pa kok kawn pui ka totiag pa im ju an khankix lih mawh ceu kaux kix heue. ²⁰ Adam tawx ceu kaux tobrie mai sim daux raoma khawm totiag kuceu khawmuik pa koe piang tiex, viang mawh nan kawn pui ang nyang yaox ka pui pa sang teem pa khaw mai tix heue. ²¹ Mawh kheu nan Simiang Siyiex kieh Adam laig it, khaix an Nawh Cao teei si-ang praok nawh tix nyaing mai deeh nyeep nex kleuk paox tix heue. ²² Simiang Siyiex teei si-ang praok khaing pui simex, yuh pui bun tix kaux, mai viex hoek ka pui simex heue. ²³ Adam ah nin, "In mawh si-ang khaing si-ang aux mai kok nawh mawh pui bun, mawh kheu mawh nawh pa hoik teei lih khaing pui simex heue." ²⁴ Mawh kheu in, pui simex tak prah ka miex keeing tix mai ot tau mai moeng tix, kiex ra kaux tak mawh nex nham tix mu khaing heue. ²⁵ Kiex mex moeng khawm ra ang nyang koe kraung ceep mai ang nyang koe krax kaig tua heue.

¹ Siuing mawh pa nie lhak khaing can totiag kuceu piang haktiex pa hoik phan Simiang Siyiex. Siuing ah nin ka sibun, "Siyiex hoik ah ka pax sonsang ang pax ih plix khaox kuceu pa koe daux sipeem tete lie?" ² Sibun deeh ah nin ka siuing, "Yiex pon ti ih plix khaox pa koe daux sipeem" ³ Viang mawh nan, Siyiex hoik ah nin, "Pax tak ang pon ti ih ang pon teei ka plix khaox pa koe sigreung sipeem, phan pax ih, pax tak yum heue." ⁴ Siuing deeh ah nin ka pui bun, "Pax ang doh yum tete. ⁵ Siuing baox ah nin ka bun, "Siyiex tawng ngai pax tak blah mai lih tawng pa mhawm mai pa ang mhawm ngaix ih pax plix khaox an heue." ⁶ Yam yaox pui bun ka plix khaox an, mawh pa mhawm son pa ih mai koe grang pa nyawm ti jhak ka ngai tix, grawng simie nawh plix khaox an, tawx krax tawng yung ka tix, nawh tom teei ti ih plix khaox an mai nawh tawx ka mex tix ih heue. ⁷ Khaix an ngai kiex blah khawm ra mai tawng ang kraung ceep tix koe mai kiex caing ti ceep kraung ka lhax khaox ruh sonsang kheem ka cao tix heue. ⁸ Yam bo praix, kiex mhong lox pa hoek Simiang Siyiex daux sipeem mai moeng nawh mox tix sinax khaox daux sipeem sivoe ngai Simiang Siyiex heue. ⁹ Simiang Siyiex kok ka pui simex ah nin ka nawh, "Ot pax dee mawx?" ¹⁰ Nawh pawk ah nin, "Aux hoik mhong lox kok yo Maix Cao daux sipeem, aux koe krax lhat graung, grawh grawng nawh aux ang lai koe kraung ceep mai mox cao tix jao an heue." ¹¹ Nawh Cao deeh ah nin, "Mawh mawx pa krai pax ang koe kraung ceep lie? hoik ih pax plix khaox pa ang Aux kieh pax ih lie?" ¹² Khaix an kawn pui deeh ah nin, "Sibun pa tawx Maix Cao ot mai aux, nawh tawx plix khaox an ka aux, aux hoik ih heue." ¹³ Simiang Siyiex ah nin ka sibun, "Maix hoik yuh ceu inkix jao patix lie?" sibun deeh ah nin, "Siuing hoik pie ka aux, aux hoik ih heue." ¹⁴ Simiang Siyiex ah nin ka siuing, "Mawh kheu hoik yuh maix ceu inkix, maix tak pon pa jhax lawg lheu khaing tobrie, totiag haktiex khawmuik heue. Maix tak mu ka vaig tix mai ih phawng tiex tom sidah ju tix. ¹⁵ Aux tak kieh pa koeng koe sinax maix mai pui sibun, doeh ru maix mai doeh ru sibun, nawh tak dig kaing maix khlaix mai maix tak mat yuh loek caong nawh heue." ¹⁶ Nawh Cao ah nin ka bun, "Aux tak sang nie blon tawx krax kha rhawm ka maix ka daux pa keh maix kawn tix maix tak lo ka mex tix mai nawh tak sang kwang piang maix heue." ¹⁷ Khaix an Nawh Cao ah nin ka pui simex, "Mawh kheu nghiet maix ka lox moeng tix mai ih plix khaox pa tawm Aux maix ang ih, haktiex tak mawh pa jhax lawg kheu maix, maix tak yaox ti ih khaing nawh ka daux pa kha rhawm tix, tom sidah ju tix heue. ¹⁸ Kat lawm mai pang kat khankix tak lih koe son maix, maix tak ih taux lhax khaing haktiex. ¹⁹ Maix tak lih rawm lah rawm lee, son sang pon maix ti ih priex preem mai deeh ing ka phawng tiex heue. Grawh grawng nawh maix hoik mawh pa yuh Aux khaing phawng tiex mai tak deeh ing ka phawng tiex heue." ²⁰ Pui simex kok ceu kaux moeng tix mawh Evax, kheu mawh nawh miex kawn pui pa im ju heue. ²¹ Son Adam mai moeng nawh, Simiang Siyiex yuh kraung ceep ka hak mai tawx kiex ceep ka heue. ²² Khaix an Simiang Siyiex ah nin, "Jhak heue, kawn pui hoik lih ti tawng pa mhawm mai pa ang mhawm awm Siyiex, yam in paw lai kieh nawh nyeu taix tix teei ti ih ka plix khaox im ju an mai im ju leeing ju heue." ²³ Mawh kheu nan Simiang Siyiex grheu kiex lih khaing daux sipeem Eden mai kieh kiex thai ti ih piang tiex, khaing tiex pa hoik kaoh kiex ka heue. ²⁴ Nawh Cao grheu kiex lih khaing tan mai Nawh Cao deeh deuh Cherubin plak lih singaix sipeem Eden mai tawx vaid ngu sah pa lawm ka nawh, sonsang pau krax ku krax, son daux krax pa hu ka khaox im ju an heue.

¹ Adam hoik ot tau mai moeng tix Evax, nawh koe kaux mai keh Ka-inax. Nawh tom ah nin, "Aux hoik pon kawn pui tix kaux khaing Simiang Siyiex heue." ² Khaix an nawh baox koe kaux mai baox keh Abelax pa mawh pux Ka-inax. Yam ting Abelax mawh cao pa liang yung mai Ka-inax mawh cao pa yuh kaing ma kaung heue. ³ Yam hoik hoek bawg yam Ka-inax viex plix nghox plix koi pa pon nawh khaing ma kaung sonsang tan ti ka Simiang Siyiex heue. ⁴ Abelax kawx viex kawn liang plix num khaing daux cub yung pa po ti mai lon bee hoek heue. Simiang Siyiex rieb ti teei ka Abelax mai krax tan nawh. ⁵ Viang mawh nan, Nawh Cao ang rieb ti teei ka Ka-inax mai krax tan nawh, Ka-inax song rhawm mai laux pakngai heue. ⁶ Mawh kheu nan, Simiang Siyiex ah nin ka Ka-inax, "Songrhawm maix jao patix? laux pakngai maix jao patix?" ⁷ "Phan maix yuh pa mhawm maix tak pon rieb pa mhawm ang mawh lie? Phan maix yuh pa ang mhawm, phimap hoik pau maix ka diang siviex tan, phimap an tak hawt alo maix, maix tak caw ti pex ka phimap an heue." ⁸ Ka-inax ah nin ka pux tix Abelax, "Hu ax ka daux kaung, " yam hoek kiex daux kaung, Ka-inax yuh simah ka pux tix Abelax mai pah nawh yum heue. ⁹ Khaix an Simiang Siyiex ah nin ka Ka-inax, "Pux maix Abelax ot dee mawx?" mai nawh deeh pawk lox ah nin, "Aux ang tawng, khex mawh aux pui pa kia ngien ka pux tix lie?" ¹⁰ Nawh Cao ah nin, "Hoik yuh maix ceu patix? lox kok yo nham pux maix khaing daux tiex hoik hoek ka Aux heue." ¹¹ "Mawh kheu nan, haktiex pa hoik ang jheeh tix rieb nham pux maix khaing taix maix an, tak jhax lawg ka maix heue. ¹² Yam yuh maix ma kaung maix tak ang lai pon plix tom nie maix tak sang mawh pui pa vung viang piang haktiex heue." ¹³ Ka-inax, deeh ah nin ka Simiang Siyiex, "Krax pa kham geu aux in, kied ting lhaong khaing pa pon kham aux heue." ¹⁴ "Jhak heue, ka daux in singaix Maix Cao grheu aux hu khaing piang haktiex, son ang aux lai pon ti yaox ka pakngai Maix, aux tak sang yaox ti vung viang piang haktiex, can pui pa yaox ka aux, tak sang pah aux heue." ¹⁵ Simiang Siyiex ah nin ka nawh, "Mawh kheu nan, can pui pa pah Ka-inax krax pawk bix, tak deeh koe piang nawh aliah son" Simiang Siyiex deuh mhai piang Ka-inax sonsang ang pui pa yaox ka nawh pon pah nawh yum heue. ¹⁶ Khaix an Ka-inax lih hu khaing sivoe ngai Simiang Siyiex mai ot ka haktiex Nobax pa koe plak lih singaix Eden heue. ¹⁷ Ka-inax ot tau mai moeng tix mai nawh koe kaux keh kawn simex Enawk, nawh sum veng ting tix mu mai kok mawh veng Enawk, awm ceu kaux kawn tix heue. ¹⁸ Kawn simex Enawk mawh Irat, kawn Irat mawh Mahuyelax, kawn Mahuyelax mawh Mathushaelax, kawn Mathushaelax mawh Lamek heue. ¹⁹ Lamek teei ti koe moeng ra kaux mai ceu kaux mawh Adax mai Zilax heue. ²⁰ Adax keh kawn simex Yabalax pa mawh keeing ka can pui pa ot nyiex gox mai pui pa eei tobrie heue. ²¹ Ceu kaux pux nawh mawh Yubalax pa mawh keeing ka can pui pa tah ting mai pui paung shiao khankix heue. ²² Zilax keh kawn simex Tubalaxka-inax, pa mawh cao pa gau pui ka kaing pa chix yuh kaing rhiem, plak tawng mai rhiem mai nan Tubalaxka-inax, mawh Nemax heue. ²³ Lamek ah nin ka moeng tix khankiex, "Adax mai Zilax eue, nghiet ka lox aux, moeng Lamek eue, nghiet ka lox krai aux mawh kheu aux hoik pah kawn nyawm simex awn ju tix kaux pa tawx nawh krax tuktiak ka aux heue." ²⁴ Phan pui mawx pah ka Ka-inax tak pon pa pawk bix aliah son, phan pui mawx pah ka Lamek tak pon pa pawk bix atixgliah aliah son heue. ²⁵ Adam ot tau mai moeng tix, nawh koe kaux mai keh kawn simex tix kaux, tawx ceu kaux nawh mawh Shetax, mawh kheu Siyiex baox tawx doeh ru kawn pui ka aux, tang Abelax pa hoik pah Ka-inax heue. ²⁶ Shetax koe kawn simex tix kaux, tawx ceu kaux nawh mawh Enot, yam an kawn pui jah ti kok ka ceu kaux Siyiex mai krub ka Nawh heue.

¹ In mawh grawng doeh ru nyiex ma Adam, ka daux bawg yam phan Siyiex ka kawn pui, Nawh Cao yuh awm grang pakpeung tix heue. ² Nawh Cao yuh pui simex mai pui bun mai nawb bwan piang kiex, Nawh kok ceu kaux nawh mawh Adam doeh ru kawn pui ka daux singaix yam hoik phan Nawh kiex heue. ³ Yam koe ju Adam tix yieh tixngoe num, nawh deeh pon kawn simex tix kaux, pa awm grang pakpeung nawh mai kok ceu kaux nawh mawh Shetax heue. ⁴ Khaix hoik keh Shetax, Adam hoik koe ju daix yieh num, nawh yaox ka kawn simex mai kawn bun tix khankix heue. ⁵ Mawh kheu nan, Adam im ju tom hoek dim yieh tixngoe num mai nawh yum heue. ⁶ Shetax im ju tix yieh phwan num mai yaox ka kawn simex tix Enot heue. ⁷ Khaix hoik keh Enot, Shetax im ju tom hoek daix yieh aliah num, nawh baox pon kawn simex kawn bun khankix heue. ⁸ Yam hoik naog ju Shetax dim yieh kao ra num nawh yum heue. ⁹ Enok im ju tixdim num, nawh deeh pon ka kawn tix Khenan heue. ¹⁰ Khaix hoik keh Khenan, Enok im ju tom hoek daix yieh kao phwan num mai nawh deeh baox pon kawn simex kawn bun khankix heue. ¹¹ Mawh kheu nan, Enok yaox ti im ju tom hoek dim yieh phwan num mai nawh yum heue. ¹² Yam hoik koe ju Khenan atixgliah num nawh baox pon kawn tix Mahalelax heue. ¹³ Khaix hoik keh Mahalelax, Khenan im ju tom hoek daix yieh tixpon num mai nawh baox pon kawn simex kawn sibun khankix heue. ¹⁴ Mawh kheu nan, Khenan im ju tom hoek dim yieh kao num mai nawh yum heue. ¹⁵ Yam koe Mahalelax tixgliah phwan num, nawh pon kawn tix Zarit heue. ¹⁶ Khaix hoik pon nawh Zarit, Mahalelax im ju tom hoek daix yieh tixngoe num, nawh pon kawn simex kawn sibun khankix heue. ¹⁷ Mawh kheu nan, Mahalelax im ju tom hoek daix yieh tixdim phwan num, nawh yum heue. ¹⁸ Zarit koe ju tix yieh tixgliah ra num mai nawh pon kawn tix Enawk heue. ¹⁹ Khaix hoik pon nawh Enawk, Zarit im ju tom hoek daix yieh num, nawh pon kawn simex kawn bun khankix heue. ²⁰ Mawh kheu nan, Zarit im ju tom hoek dim yieh tixgliah ra num mai nawh yum heue. ²¹ Yam koe ju Enawk tixgliah phwan num, nawh pon kawn tix Mathusalax heue. ²² Khaix hoik pon nawh Mathusalax, Enawk hawt hu tau mai Siyiex been loe yieh num, nawh baox pon kawn simex kawn bun khankix heue. ²³ Mawh kheu nan, Enawk im ju tom hoek loe yieh tixgliah phwan num heue. ²⁴ Enawk hu tau mai Siyiex, nawh ang lai koe khaix an, mawh kheu hoik deeh teei Siyiex ka nawh heue. ²⁵ Yam koe ju Mathusalax tix yieh tixdaix aliah num nawh pon kawn tix Lamet heue. ²⁶ Khaix hoik pon nawh kawn tix Lamet, Mathusalax im ju tom hoek aliah yieh tixdaix ra num, baox pon ka kawn simex kawn sibun khankix heue. ²⁷ Mawh kheu nan, Mathusalax im ju tom hoek dim yieh tixgliah dim num mai nawh yum heue. ²⁸ Yam koe ju Lamet tix yieh tixdaix ra num nawh pon kawn simex tix kaux heue. ²⁹ Nawh sum ceu kaux nawh mawh Noax, ah nin, "In tix kaux mawh pa tawx krax nyawm rhawm ka kaing jhaw pa taug mao, pa yuh ex ka taix tix, piang haktiex pa hoik jhax lawg Siyiex kah heue." ³⁰ Khaix hoik pon nawh kawn tix Noax, Lamet im ju tom hoek phwan yieh tixdim phwan num, nawh baox pon kawn simex kawn sibun khankix heue. ³¹ Mawh kheu nan, Lamet im ju tom hoek aliah yieh atixgliah aliah num mai nawh yum heue. ³² Yam hoik koe ju Noax phwan yieh num nawh pon kawn tix pa mawh Semax, Hamax mai Yaphiet heue.

¹ Yam jah kawn pui lih ti haoh hun ka piang haktiex, kix koe kawn sibun tom nie, ² Kawn simex Siyiex khankix yaox mhawm grang kawn bun kawn pui, kix laug ti teei mawh moeng tix heue. ³ Simiang Siyiex ah nin, "Khwan Aux tak ang lai ot ka daux kawn pui leeing ju, kheu mawh nawh nex nham, Aux tak sang kieh baux ju nawh die ngie tix yieh tixnga num heue." ⁴ Yam an pui pa ting lhaong lih koe piang haktiex, Kawn simex Siyiex khankix, teei ti moeng kawn bun kawn pui, kix pon kawn praix pa ting riang rao, pa ao min tom yam an son cao tix heue. ⁵ Simiang Siyiex yaox pa caox caig yuh kawn pui hoik ting lhaong piang haktiex, krax keud kix, mawh pa ang mhawm khaing heue. ⁶ Simiang Siyiex laux rhawm ka pa phan pa yuh tix kawn pui piang haktiex, Nawh Cao kied kleuh sigrien sigre heue. ⁷ Mawh kheu nan, Simiang Siyiex ah nin, "Aux kied kleuh ka pa hoik phan hoik yuh ti kawn pui, Aux tak sang yuh can pa koe piang haktiex in laux leeing jah ka kawn pui tom hoek ka totiag can pa chix mu piang tiex khankix mai sim sai raoma khankix heue." ⁸ Viang mawh nan, Noax mawh pui pa caw rhawm sivoe ngai Simiang Siyiex heue. ⁹ In mawh grawng doeh ru Noax, Noax mawh pui pa rahsee mai pa grum naog, daux doeh ru nawh, nawh mawh pa hu tau mai Siyiex. ¹⁰ Noax koe kawn simex loe kaux, pa mawh Shemax, Hamax mai Yaphiet heue. ¹¹ Kawn pui haktiex hoik yuh pa caox caig sivoe ngai Siyiex, piang haktiex in naog ka ceu pa lang teung heue. ¹² Siyiex jhak ka haktiex, Nawh Cao hoik yaox ka laux leeing cux sium haktiex, nex nham kawn pui khankix kawx hoik hu ka daux pa laux leeing haktiex heue. ¹³ Siyiex ah nin ka Noax, "Dee sidah bawg yam kawn pui hoik hoek plak sivoe ngai Aux, mawh kheu hoik naog pa kied lang teung piang haktiex jao kix, jhak heue, Aux tak sang yuh kix laux tau mai haktiex heue. ¹⁴ "Yuh reu ting tix mu son cao maix, ka khaox gawpharax, yuh lawg khankix koe daux reu, kraix peeh khaox gix ka plak daux mai plak praix heue." ¹⁵ "Pa sang caw maix ti yuh mawh nin, krax lang reu kieh koe loe yieh sawk, krax vieh kieh koe tixphwan sawk, krax lhaong kieh koe tixngoe sawk heue." ¹⁶ "Yuh siviex iak koe ka reu an, kieh tiiem greem braux tix sawk, kieh ding siviex koe ka praok reu, yuh reu an koe loe thaix, pa mawh thaix plak greem, thaix sigreung mai thaix plak piang heue, ¹⁷ Jhak heue, Tokaux Aux sang kieh rawm kheem piang haktiex, sonsang yuh kawn pui pa im ju pa koe greem raoma mai can ceu pa koe piang haktiex khawmuik khawm leeing yum heue." ¹⁸ Viang mawh nan, Aux tak deuh lox sijax mukheu tix ka maix, tokaux maix, kawn simex maix, moeng maix mai mun maix khankix, tak yaox ti laig daux reu heue. ¹⁹ "Maix tak yaox ti viex totiag pa im ju mhaing mai shiang ku mawx ku an laig ka daux reu sonsang priex maix kix im ju tau mai maix heue. ²⁰ Sim ceu mawx ceu an, totiag ceu mawx ceu an, can pa chix mu piang tiex, ceu mawx ceu an, pa mawh mhaing mai shiang ku mawx ku an hoek ka maix mai priex kix im ju heue." ²¹ "Maix tak sang yaox ti khrawm pa ih son cao maix mai pa ih son kix khawmuik heue." ²² Mawh kheu nan, Noax yuh kuceu awm gumlox pa hoik tawm Simiang Siyiex ka nawh heue.

¹ Khaix an Simiang Siyiex ah nin ka Noax, "Maix mai nyiex ma maix khawmuik laig ka daux reu, mawh kheu Aux hoik yaox pa rahsee maix sivoe tix, daux doeh ru inkix heue." ² "Maix teei totiag mhaing mai shiang pa singax aliah ku mai totiag mhaing mai shiang pa ang singax ra ku, ³ Sim daux raoma tix ceu aliah ku khawm mhaing mai shiang, sonsang priex maix doeh ru kix im ju piang haktiex khawmuik heue. ⁴ Grawh grawng nawh, khaix hoik naog aliah ngaix Aux tak sang kieh lhiex lih piang haktiex in tixpon ngaix tixpon sawm mai Aux tak kieh can ceu pa im ju, pa hoik phan hoik yuh Aux khankix laux leeing piang haktiex in heue." ⁵ Noax yuh kuceu awm gumlox tawm Simiang Siyiex ka nawh heue. ⁶ Yam kheem rawm piang haktiex Noax koe ju liah yieh num heue. ⁷ Mawh kheu nan, Noax mai kawn simex nawh, moeng nawh mai mun nawh, khankix laig daux reu sonsang luad luan khaing pa kheem rawm heue. ⁸ Totiag pa singax mai pa ang singax, sim sai raoma mai can ceu pa chix mu chix hu piang tiex, ⁹ ku mawx ku an, laig daux reu tau mai Noax, mhaing mai shiang awm gumlox tawm Simiang Siyiex ka Noax heue. ¹⁰ Khaix hoik hoek aliah singaix, rawm khankix, lih kheem piang haktiex heue. ¹¹ Yam koe ju Noax liah yieh num, daux khix ra kao aliah singaix daux khix an rawm keut khaing dee raux khawmuik hoik bih mai siviex raoma hoik baoh heue. ¹² Lhiex lih piang haktiex tixpon ngaix tixpon sawm heue. ¹³ Ka daux singaix an, Noax mai kawn simex nawh Shemax, Hamax, Yaphiet, moeng nawh mai mun nawh loe kaux laig daux reu heue. ¹⁴ Kix mai totiag ceu mawx ceu an, tobrie ceu mawx ceu an mai totiag pa chix mu chix hu piang tiex ceu mawx ceu an, sim raoma ceu mawx ceu an kuceu khankix, ¹⁵ Totiag pa im ju mhaing mai shiang ku mawx ku an laig daux reu tau mai Noax heue. ¹⁶ Totiag pa mawh mhaing mai shiang kuceu laig ka daux reu awm gumlox pa tawm Simiang Siyiex, khaix an Simiang Siyiex nyeep siviex reu ka kix heue. ¹⁷ Rawm ca nied ti kheem piang haktiex tixpon ngaix, rawm khankix haok hwan mai yaog reu haok lhaong khaing haktiex heue, ¹⁸ rawm haok hwan sipie mai ting riang piang haktiex mai reu sibloe piang rawm heue. ¹⁹ Rawm nied ti haok hwan ting riang mai gawng lua pa koe greem raoma hoik glip khawmuik heue. ²⁰ Rawm hoik kheem lhaong khaing gawng lua khankix kao phwan sawk heue. ²¹ Can pa im ju piang tiex, pa mawh sim, totiag tobrie kuceu mai can pa chix mu piang tiex khawmuik mai kawn pui hoik yum heue. ²² Can ceu pa im ju, pa toek bhawm ka meeh tix, pa ot piang haktiex kawx yum khawmuik heue. ²³ Nawh Cao kieh can pa im ju piang haktiex, pa mawh kawn pui, tobrie, totiag pa chix mu chix hu mai sim sai raoma khankix laux leeing heue. Mawh ngie Noax mai can pa ot tau mai nawh daux reu pa klawd ju heue. ²⁴ Rawm ting lhaong mai kheem piang haktiex tix yieh tixphwan ngaix heue.

¹ Siyiex doh keud ka Noax mai can pa im ju pa mawh totiag pa ot mai nawh daux reu. Siyiex kieh bhaung ting lih phlu ka piang haktiex, rawm khankix dieh hu heue. ² Rawm keut khaing dee raux mai siviex raoma hoik deeh nyeep tix, lhiex khaing raoma kawx ang lai lih heue. ³ Rawm khankix, grheuh hu sipie khaing haktiex. Khaix hoik naog tix yieh tixphwan singaix rawm hoik dieh heue. ⁴ Ka daux khix aliah, kao aliah singaix, reu an tum piang choek gawng Ararat heue. ⁵ Rawm grheuh hu sipie tom hoek khix kao, yam haok khix an tix singaix, choek gawng khawmuik blhiien khaing daux rawm heue. ⁶ Khaix hoik naog tixpon singaix Noax paoh ka siviex iak reu pa hoik yuh ti heue. ⁷ Nawh ploi lak tixmu lih hu ka praix mai lak an pu hu pu hoek tom sidah hoek bawg yam kroh haktiex heue. ⁸ Nawh deeh baox ploi sikaux tixmu lih hu ka praix, sonsang tawng nawh ka grawng dieh rawm piang tiex heue. ⁹ Viang mawh nan, sikaux ang nyang yaox dee sang tum sang laux caong tix, nawh deeh ing ka reu, kheu kawn kheem rawm piang haktiex khawmuik, mawh kheu nan nawh nyeu taix tix deeh teei sikaux laig daux reu heue. ¹⁰ Nawh baox deeh pau aliah ngaix, nawh baox ploi sikaux lih hu khaing daux reu, ¹¹ sikaux deeh hoek ka nawh plak bo, jhak heue, nawh teei ti viex lhax khaox Sanlon pa khraox ka gaoh tix, yam an Noax hoik tawng dieh rawm ka piang haktiex heue. ¹² Khaix an nawh deeh baox pau tom hoek aliah singaix mai nawh deeh baox ploi sikaux lih hu plak praix mai sikaux an, ang lai deeh hoek tix bawg kawx heue. ¹³ Yam hoik hoek Noax liah yieh mai tix num, daux khix tix, tix ngaix, rawm hoik dieh mai haktiex kroh, Noax plak ka braux reu mai jhak ka plak praix, nawh yaox hoik kroh haktiex heue. ¹⁴ Ka daux khix ra, tixnga aliah ngaix, piang haktiex hoik deeh kroh khawmuik heue. ¹⁵ Khaix an Siyiex ah nin ka Noax, ¹⁶ "Lih khaing daux reu maix khawm moeng maix, kawn simex maix mai mun maix ku kaux heue. ¹⁷ Viex totiag can pa im ju pa mawh sim, tobrie mai totiag pa chix mu chix hu piang tiex pa ot tau mai maix sonsang baox deeh lih pre haoh hun kix piang haktiex heue." ¹⁸ Mawh kheu nan, Noax lih hu ka praix tau mai kawn simex nawh, moeng nawh mai mun nawh khankix heue. ¹⁹ Can totiag kuceu, pa chix mu chix hu mai sim kuceu mai totiag pa chix chuh ka piang haktiex khawmuik lih hu khaing daux reu heue. ²⁰ Khaix an Noax yuh khu dee tan son Simiang Siyiex tix mu, nawh viex totiag pa singax mai sim pa singax kuceu hoek, gleeing tix tan krax tan pa gleeing ka piang khu dee tan ka Siyiex heue. ²¹ Siyiex khaw rhawm mai rieb ka pa sioe bhawng an mai Simiang Siyiex ah nin ka daux rhawm tix, "Aux tak ang lai baox jhax lawg ka haktiex kheu jao kawn pui khaix in tix bawg kawx, mawh kheu kawn pui koe rhawm pa caox caig jah tom yam iak tix, Aux tak ang lai baox yuh can pa im ju khankix laux leeing awm pa hoik yuh Aux bawg in heue. ²² Glang yam kawn koe haktiex in, baux yam ruat simie, yam vawg nghox mai bawg yam kwat, yam koek praix, yam raux, yam rung, yam pon singaix mai yam ponsawm, Aux tak ang lai kieh jud jai heue."

¹ Siyiex nawb bwan ka Noax mai kawn nawh khankix ah nin, "Kieh pex baox deeh keh haoh hun mai naog ka haktiex in heue. ² Totiag kuceu pa koe piang haktiex, pa mawh sim raoma mai can pa im ju piang tiex mai can kuceu pa koe daux rawm sigrit sigra khankix tak koe krax lhat graung sivoe maix heue. Ceu inkix khawmuik, Aux hoik appong ka daux tawm taix maix heue. ³ Can ceu pa im ju kuceu, tak sang mawh pa ih son maix, Aux hoik tawx inkix khawmuik ka maix awm tawx taux lhax klai khankix heue. ⁴ Viang mawh nan maix ang pon ti ih nex tau mai nham, kheu mawh nham ju heue. ⁵ Aux tak ciyang ka pui pa pah ka ju pex mai tak ciyang ka totiag pa laux yuh ka ju pex mai ka puxaik pex pa pah ka ju puxaik tix heue. ⁶ Pui mawx ang ah, phan nawh kieh nham kawn pui jauh, nham nawh kawx tak yaox ti jauh ka taix kawn pui heue. Mawh kheu Siyiex hoik yuh kawn pui awm grang pakpeung tix heue. ⁷ Kieh pex deeh pon kawn praix tom nie, kieh pre haoh hun ka piang haktiex heue." ⁸ Khaix an Siyiex sikah mai Noax mai kawn praix nawh khankix ah nin, ⁹ "Jhak heue, Aux tak yuh sijax mukheu ka pex, son doeh ru pex khankix, ¹⁰ can totiag pa im ju khankix tau mai pex pa mawh sim, tobrie, totiag kuceu piang tiex pa hoik lih tau mai pex khaing daux reu khawmuik heue. ¹¹ Aux hoik yuh sijax mukheu tau mai pex, sonsang ang lai yuh totiag pa im ju khankix laux leeing ka pa kheem rawm mai ang lai baox kieh rawm kheem piang haktiex heue." ¹² Siyiex ah nin, "In mawh mhai rug sijax mukheu pa yuh Aux sinax pex mai Aux, totiag pa im ju, pa ot tau mai pex, khawm doeh ru pex leeing ju heue. ¹³ Aux tak deuh siyawng ka daux paiawm, sonsang mawh mhai rug sijax mukheu sinax Aux mai haktiex heue. ¹⁴ Yam kieh Aux paiawm ceep ka piang haktiex, tak sidawng yaox siyawng mukheu an ka daux paiawm heue. ¹⁵ Aux tak doh keud ka sijax mukheu pa hoik yuh tix sinax maix mai Aux, totiag pa im ju kuceu khawmuik, tak ang lai baox deeh kieh rawm kheem laux leeing heue. ¹⁶ Yam jhak Aux ka siyawng mukheu pa koe daux paiawm, Aux tak doh keud ka sijax mukheu pa yuh tix leeing ju, tau mai can totiag pa im ju pa koe ka piang haktiex in heue." ¹⁷ Siyiex baox ah nin ka Noax, "In mawh mhai rug sijax mukheu pa hoik yuh Aux ti deuh sinax Aux mai can totiag pa im ju pa ot piang haktiex khawmuik heue." ¹⁸ Kawn simex Noax khankix pa lih khaing daux reu, mawh Shemax, Hamax mai Yaphiet. Hamax mawh keeing Khanan heue. ¹⁹ Inkix loe kaux mawh kawn simex Noax, pa lih tah hu ka piang haktiex heue. ²⁰ Noax jah ti yuh kaing ma mai yuh sipeem plix siiet heue. ²¹ Khaix an nawh nyaux rawm plix siiet tom yoek tix mai it kakaong daux nyiex gox tix heue. ²² Hamax, keeing Khanan yaox ka it kakaong keeing tix, nawh lih krai puxaik tix ra kaux mhong heue. ²³ Khaix an Shemax mai Yaphiet teei kraung ceep tix pheen mai kiex deuh piang klip tix mai hu deeh khaix, lhop ka keeing kiex, mawh kheu jhak kiex plak praix yam lhop kiex nawh, kiex tom ang chix yaox ot kakaong keeing tix heue. ²⁴ Yam siduad Noax khaing yoek tix ka rawm plix siiet, nawh tawng pa yuh kawn simex tix khankix heue. ²⁵ Nawh jhax lawg Khanan ah nin, "Kieh nawh mawh siliex ka siliex puxaik tix khankix heue." ²⁶ Nawh ah nin, "Kieh Simiang Siyiex nawb bwan ka Shemax mai kieh Khanan mawh siliex nawh heue." ²⁷ "Kieh Siyiex joh jhan Yaphiet ting lhaong mai kieh nawh ot daux nyiex gox Shemax mai kieh Khanan mawh siliex nawh heue." ²⁸ Noax baox im ju loe yieh tixphwan num, khaix kheem rawm ka haktiex in heue. ²⁹ Noax im ju tom hoek dim yieh tixphwan num mai nawh yum heue.

¹ In mawh grawng doeh ru kawn simex Noax, pa mawh Shemax, Hamax mai Yaphiet khankix, Khaix kheem rawm, kix keh kawn praix tom nie heue. ² Kawn simex Yaphiet mawh Gawmax Magawgax, Madie, Yavan, Tubalax, Meshiet mai Tirat khankix heue. ³ Kawn simex Gawmax mawh Ashakeniet, Riphat mai Tawgama heue. ⁴ Kawn simex Yavan mawh Elishax, Tasux, Kiten mai Dawnamix heue. ⁵ Jah ka haktiex praok rawm baoh an, kix gwieh tix ot haktiex tang dah ku plak, awm pa koe lox sikah doeh nyiex ma kix ceu mawx ceu an mai lih mawh ceu pui tan heue. ⁶ Kawn simex Hamax mawh Kushax, Mizareng, Putax mai Khanan heue. ⁷ Kawn simex Kushax mawh Sebax, Havilax, Sabatax, Ramax mai Shatekha mai kawn simex Ramax mawh Shebax mai Dedam heue. ⁸ Kushax pon kawn simex tix Neyawdax mai nawh jah ti mawh pui pa ting riang tix kaux piang haktiex heue. ⁹ Nawh mawh pui jaw pa ting riang sivoe ngai Simiang Siyiex. Mawh kheu nan, kix ah nawh mawh, pui jaw pa ting riang pa awm Neyawdax sivoe ngai Simiang Siyiex heue. ¹⁰ Yam jah meung nawh mawh Babulon, Eren, Akhet mai Kalane, pa koe daux haktiex Shinax heue. ¹¹ Jah khaing haktiex an, nawh hu ka meung Ashuria mai sum veng Nineve, veng Rehobok mai veng Kalax heue. ¹² Sinax veng Kalax mai veng Nineve, Resin mawh veng ting heue. ¹³ Kawn Mizareng mawh Luim, Anamim, Lehabim, Naptuhim, ¹⁴ Patarusim mai Khasaluhim heue, Khasaluhim lih ti mawh ceu pui Philitix mai ceu pui Kapturim heue. ¹⁵ Khanan pon kawn Ai tix Sidon mai khaix an Hetax, ¹⁶ Yebutix, Amorix mai Giragashix, ¹⁷ Hiwix, Akix mai Sinix, ¹⁸ Avadix, Zemarix mai Hamatix heue, khaix an ceu pui Khanan khankix lih hu prung prang ti ot kudah heue. ¹⁹ Mee haktiex pui ceu Khanan jah ka Sidom tom hoek Gerax mai Gezax, khaix an hoek ka Sawdom, Gawmawrax, Adamax mai Zebai tom sidah Lashax heue. ²⁰ Inkix mawh kawn simex Hamax pa tang mawh ru mawx ru an, pa tang lox sikah mai tang dee ot daux haktiex cao kix heue. ²¹ Shemax baox deeh koe kawn simex khankix, pa mawh keeing ka pui Ebax pa mawh puxke Yaphiet heue. ²² Kawn simex Shemax khankix mawh Elam, Ashu, Aphazat, Lutax mai Alam heue. ²³ Kawn simex Aram mawh Uzax, Hulax, Getax mai Mashax heue. ²⁴ Aphazat pon kawn tix Shalax mai Shalax pon kawn tix Ebax heue. ²⁵ Ebax koe kawn simex ra kaux, an tix kaux mawh Phalek, mawh kheu haktiex khankix gweh tix ka daux singaix baux ju nawh mai ceu kaux pux mawh Yoktan heue. ²⁶ Yoktan pon kawn tix Alamodak, Shelap, Hazamaviet, Yerax, ²⁷ Hadawram, Uzalax, Digalax, ²⁸ Awbalax, Abimelax, Shebax, ²⁹ Awphirax, Havilax mai Yawbat, inkix khawmuik mawh kawn simex Yoktan heue. ³⁰ Dee ot kix, jah ka Meshax tom hoek ka gawng plak lih singaix Sephax heue. ³¹ Inkix mawh kawn simex Shemax pa tang ot mai ru tix, pa tang lox sikah daux haktiex ot cao tix heue. ³² Inkix mawh doeh nyiex ma kawn simex Noax mai ru kix mai haktiex lih hu kix ti ot kudah dee khaix hoik kheem rawm ka piang haktiex heue.

¹ Yam an kawn pui haktiex khawmuik, mawh pui tix ceu mai lox sikah tix ceu khaing heue. ² Kix kaoh khaing plak lih singaix mai kix yaox ka haktiex dee lung Shinar mai kix ot tan heue. ³ Kix ah nin ka paox tix, "Hoek heue, ex yuh lon tiex mai gleeing tom kaux, kix yuh lon tiex sin mawh tang simaox mai kix shao graix tang tiex pawng pit heue." ⁴ Kix ah nin, "Hoek heue, ex sum veng ting tix mu mai nyiex lhaong son cao ex, tom cux raoma, sonsang ang ex lai prung prang ka haktiex tang dah mai sonsang ao min ceu kaux ex piang haktiex in heue." ⁵ Siyiex lih jhak ka veng mai nyiex lhaong pa sum kawn pui heue. ⁶ Simiang Siyiex ah nin, "Kawn pui khankix hoik mawh pui tix ceu mai lox sikah kix kawx hoik mawh tix ceu khaing, yam in can pa yuh kix mai can pa keud kix phan ang lai koe ceu tieb ka, kix tak ca yuh awm an heue. ⁷ Hoek heue, kieh Ex lih hu mai tiebtie kix mai kieh lox sikah kix tang khaing paox tix heue." ⁸ Mawh kheu nan, Simiang Siyiex kieh kix prung prang piang haktiex kudah dee mai ang lai kieh kix sum veng ting heue. ⁹ Mawh kheu hoik kieh Simiang Siyiex lox sikah kix tang khaing paox tix mai kieh kix prung prang piang haktiex kudah dee, kix tom kok veng an mawh Babelax heue. ¹⁰ In mawh doeh ru Shemax khaix hoik kheem rawm haktiex ra num, Shemax koe ju tix yieh num mai nawh pon kawn simex tix Aphazat heue. ¹¹ Khaix hoik pon nawh Aphazat, Shemax im ju phwan yieh num mai baox pon kawn simex kawn bun khankix heue. ¹² Yam koe ju Aphazat tixngoe phwan num nawh pon kawn simex tix Shalax heue. ¹³ Khaix hoik pon nawh Shalax, Aphazat im ju pon yieh loe num mai baox pon kawn simex kawn bun khankix heue. ¹⁴ Shalax koe ju tixngoe num mai pon kawn tix Ebax heue. ¹⁵ Khaix hoik pon nawh Ebax, Shalax im ju pon yieh loe num mai baox pon kawn simex kawn bun khankix heue. ¹⁶ Ebax koe ju tixngoe pon num mai nawh pon kawn tix Phalek heue. ¹⁷ Khaix hoik pon nawh Phalek, Ebax im ju pon yieh tixngoe num mai nawh baox pon kawn simex kawn bun khankix heue. ¹⁸ Phalek koe ju tixngoe num mai nawh pon kawn tix Ragaw heue. ¹⁹ Khaix hoik pon nawh Ragaw, Phalek im ju ra yieh dim num mai nawh baox pon kawn simex kawn bun khankix heue. ²⁰ Yam koe ju Ragaw tixngoe ra num mai nawh pon kawn tix Seraok heue. ²¹ Khaix hoik pon nawh Seraok, Ragaw im ju tom hoek ra yieh aliah num mai nawh deeh baox pon kawn simex kawn bun khankix heue. ²² Seraok koe tixngoe num mai nawh pon kawn tix Nakhaw heue. ²³ Khaix hoik pon nawh Nakhaw, Seraok im ju ra yieh num mai nawh baox pon kawn simex kawn bun khankix heue. ²⁴ Nakhaw ot tixnga dim num mai nawh pon kawn tix Terax heue. ²⁵ Khaix hoik pon nawh Terax, Nakhaw im ju tom hoek tix yieh kao dim num mai nawh baox deeh pon kawn simex kawn bun khankix heue. ²⁶ Terax ot atixgliah num mai nawh pon kawn tix pa mawh Abram, Nakhaw mai Haran khankix heue. ²⁷ In mawh doeh ru Terax, Terax pon kawn tix pa mawh Abram, Nakhaw mai Haran, Haran deeh pon kawn tix Lotax heue. ²⁸ Haran yum sivoe keeing tix Terax daux haktiex ceu pui Kaladie veng Urax heue. ²⁹ Khaix an Abram mai Nakhaw teei ti koe moeng, ceu kaux moeng Abram mawh Sarai mai ceu kaux moeng Nakhaw mawh Milakha kawn bun Haran, pa mawh keeing ka Milakha mai Isakah heue. ³⁰ Viang mawh nan, Sarai mawh bun pa neh, pa ang chix koe kawn heue. ³¹ Terax viex kawn simex tix Abram mai kawn saux nawh Lotax, pa mawh kawn Haran mai mun nawh Sarai, pa mawh moeng kawn simex nawh Abram khankix mai kix lih hu khaing haktiex ceu pui Kaladie veng Urax, sonsang hu ka meung Khanan mai kix hoek ka Haran mai ot tan heue. ³² Terax im ju tom hoek ra yieh phwan num mai Terax yum ka daux veng Haran heue.

¹ Simiang Siyiex ah nin ka Abram, "Lih hu khaing haktiex ot maix khaing paox ru maix khaing daux nyiex ma keeing maix mai hu ka meung pa tak sang jhi Aux maix yaox heue. ² Aux tak yuh maix mawh ru pa ting lhaong. Aux tak nawb bwan ka piang maix mai kieh min ceu kaux maix ting lhaong mai maix tak mawh pa tawx bwan ka pui heue. ³ Aux tak nawb bwan ka pui pa nawb bwan ka piang maix, Aux tak jhax lawg ka pui pa jhax lawg ka maix, ceu pui piang haktiex khawmuik tak pon bwanson kheu maix heue." ⁴ Mawh kheu nan, awm hoik tawm Simiang Siyiex lox ka nawh, Abram lih hu, Lotax kawx hu tau mai nawh, yam lih Abram khaing haktiex Haran, ju nawh hoik koe atixgliah phwan num heue. ⁵ Khaix an Abram teei moeng tix Sarai mai Lotax kawn pux nawh, khrawm kraung khrai sinngao khawm pui pa pon nawh khaing meung Haran, kix lih hu ka haktiex Khanan, kix hoek ka haktiex Khanan heue. ⁶ Abram laig ka haktiex an mai hoek ka Shekhem, dee koe khaox piak van mai haktiex an mawh ceu pui Khanan pa dawg ot ka heue. ⁷ Khaix an Simiang Siyiex lih bleeh ka Abram ah nin, "Aux tak sang tawx haktiex in son doeh ru maix heue." Nawh yuh khu dee tan tix mu, ka son Simiang Siyiex, pa hoik lih bleeh ka nawh tan heue. ⁸ Nawh gah ti khaing tan mai hu ka gawng pa koe plak lih singaix ka veng Betelax mai nawh sum nyiex gox man, plak klip singaix veng Betelax mai plak lih singaix veng Ai heue. Nawh sum khu dee tan son Simiang Siyiex tix mu mai nawh yaogyaw ceu kaux Simiang Siyiex tan heue. ⁹ Mawh kheu nan Abram deeh hu khaing tan mai hoek ka plak caong ma seh heue. ¹⁰ Yam an sibhawm praix lih koe daux haktiex Khanan mai Abram lih hu plak meung Ejiptux, sonsang laux lee ti tivud ticu glang sinax koe sibhawm praix daux haktiex an heue. ¹¹ Yam dex laig kix ka meung Ejiptux, nawh ah nin ka moeng tix Sarai, "Aux hoik tawng mawh maix bun mhawm grang heue." ¹² Yam yaox pui Ejiptux khankix ka maix, kix tak ah nin, "In mawh moeng nawh mai kix tak pah aux mai kieh maix im ju heue." ¹³ "Yuh bwanson krai mawh maix nan aux, sonsang mawh pa mhawm son aux, kheu bwanson maix aux tak sang yaox ti im ju heue." ¹⁴ Yam hoek Abram daux meung Ejiptux, pui Ejiptux khankix yaox kied mhawm grang sibun an heue. ¹⁵ Cao kaing greem Pharaw yaox ka nawh mai yaogyaw nawh sivoe Pharaw mai kix viex nawh laig ka nyiex haw Pharaw heue. ¹⁶ Mawh kheu jao sibun an Pharaw tom priex Abram mhawm mhawm, nawh pon ti koe kawn yung, mawie, la mhaing, la shiang mai siliex simex bun mai kala-uk tom nie heue. ¹⁷ Viang mawh nan Simiang Siyiex kieh Pharaw pon jhawm saux ting khawm nyiex khawm ma, kheu teei nawh ti priex Sarai moeng Abram heue. ¹⁸ Pharaw kok ka Abram ah nin, "Grawng pa yuh maix ka aux in mawh pa yuh ka mawx? yuh patix maix lai ang krai nawh mawh moeng tix ka aux lie? ¹⁹ Kheu maix lai krai nawh, mawh nan tix? aux tom teei nawh mawh moeng tix jao grawng in heue. Yam in deeh teei moeng maix hu heue." ²⁰ Pharaw tawx lox ka pui tix khankix mai viex Abram khawm moeng nawh mai can pa koe nawh khawmuik lih khaing tan heue.

¹ Khaix an Abram lih hu khaing meung Ejiptux, khawm moeng nawh mai can pa koe nawh khankix tau mai Lotax, ka plak seh, meung Khanan heue. ² Abram kied magmi koe tobrie mai mau khri tom nie heue. ³ Nawh hu krax tom hoek Betelax, dee sum tix nyiex gox man yam jah, sinax veng Betelax mai veng Ai heue. ⁴ Dee an mawh dee hoik sum nawh khu dee tan ka Siyiex tom yam jah dix. Abram kok ceu kaux Simiang Siyiex mai yaogyaw Nawh tan heue. ⁵ Lotax hu tau mai Abram, nawh kawx yaox ti koe kawn yung tobrie mai nyiex gox man tom nie heue. ⁶ Mawh kheu hoik sikhawp haktiex sonsang ot kiex tau, jao hoik haoh hun kraung khrai tobrie cie kiex khawm ra, kiex tom ang lai chix ot tau heue. ⁷ Krax simah simiang lih koe sinax cao liang tobrie Abram mai Lotax. Pui ceu Khanan mai pui ceu Pherazix khankix ot daux meung an heue. ⁸ Mawh kheu nan, Abram tom ah nin ka Lotax, "Paw kieh krax simah simiang koe sinax cao liang tobrie aux mai maix, kheu mawh ex puxaik heue." ⁹ "Haktiex hoik koe sivoe ngai maix ang mawh lie? tang gwieh ti hu ot khaing aux. Phan maix hu plak gwiex, aux tak hu plak dawm. Phan maix hu ot plak dawm, aux tak sang hu plak gwiex heue." ¹⁰ Lotax yaog ti jhak mai yaox ka dee lung haktiex Yawdan dee koe rawm tom nie. Yam an Simiang Siyiex ang nyang yuh veng Sawdom mai veng Gawmorax laux leeing, haktiex an khankix hoik awm sipeem Simiang Siyiex, jiet mhawm awm haktiex meung Ejiptux baoh krax hu ka haktiex Zorax heue. ¹¹ Khaix an Lotax laug ti teei dee lung haktiex Yawdan son tix, Lotax lih hu plak lih singaix. Kiex tom gwieh paox khaing tan heue. ¹² Abram ot haktiex Khanan mai Lotax hu ot daux veng khankix pa koe daux lung Yawdan mai sum nyiex gox dex baoh veng Sawdom heue. ¹³ Pui pa ot daux veng Sawdom khankix mawh pui pa caox caig mai pui pa ting phimap sivoe ngai Siyiex heue. ¹⁴ Khaix gwieh Lotax khaing nawh, Simiang Siyiex ah nin ka Abram, "Jah ka dee ot maix mai maong ti jhak ka plak lih, plak klip, plak laong, mai plak seh heue. ¹⁵ Haktiex pa yaox maix khawmuik Aux tak sang tawx ka maix mai doeh ru maix leeing ju heue. ¹⁶ Aux tak kieh ru maix haoh hun awm phawng tiex, phan pui tix kaux kaux pon simin ka phawng tiex, ru maix kawx tak pon tix simin ka heue. ¹⁷ Kaoh heue, lih hu ka daux haktiex an, ka plak lang mai ka plak vieh, mawh kheu Aux hoik tawx ka maix heue." ¹⁸ Khaix an Abram gah nyiex gox man tix khaing tan mai hu ot ka haktiex veng Hebron, dee koe khaox piak van khankix mai nawh deeh sum khu dee tan tix mu son Simiang Siyiex tan heue.

¹ Ka daux baux singaix an, simiang meung Shina pa mawh Araphelax, simiang meung Elalax pa mawh Arot, simiang meung Elam pa mawh Khedawralawmax mai simiang meung Gaw-in pa mawh Tidalax, ² Kix yuh naing ka simiang meung Sawdom pa mawh Berax, simiang meung Gawmorax pa mawh Berashax, simiang meung Adamaw pa mawh Shinap, simiang meung Zabaing pa mawh Shemabax mai simiang meung Belax meung Belax an mawh haktiex Zawrax heue. ³ Kix khawmuik khrawm paox tix daux lung haktiex Sidim, (Sidim mawh nhawng kih.) ⁴ Kix yuh siliex simiang Khedawralawmax kao ra num mai yam hoek kao loe num kix tieh feen ka nawh heue. ⁵ Yam hoek kao pon num simiang Khedawralawmax mai simiang pa ot plak nawh khankix hoek ti puing veng Ashatarok kanan pa mawh ceu pui Riepen, ceu pui Zuzen, pa ot daux veng Hamax mai ceu pui Emen pa ot daux veng Kiriyatin, ⁶ Ceu pui Hawrix pa ot piang gawng Sina tom hoek dee singai haktiex Elaparan pa mawh daux tiag tu heue. ⁷ Khaix an kix deeh veeh tix hu plak khaix mai hoek ka veng Enmishapat (pa kok mawh Kadeshax) mai puing ka can haktiex pa koe daux meung Amaliet khawm veng Hazazutanma dee ot pui ceu Amawrix khankix heue. ⁸ Simiang Sawdom, simiang Gawmawrax, simiang Adamax, simiang Zabaing mai simiang meung Belax pa kok mawh Zawrax, khankix lih hu puing naing tau ka daux lung ting Sidim, ⁹ Simiang meung Elam Khedawralawmax, simiang meung Gaw-in Tidalax, simiang Araphelax haktiex Shina mai simiang Arok haktiex Elatax khankix, simiang pon kaux tix plak mai simiang phwan kaux tix plak puing ka paox tix heue. ¹⁰ Daux ngawd Sidim, koe peeh gai rawm ka tom nie, simiang Sawdom mai simiang Gawmawrax to mai cod daux tiex tan tiblah, can pui pa kawn deuk khankix to piang gawng khawmuik heue. ¹¹ Khaix an kix teei can kraung pa mhawm mai pa ih khawmuik khaing veng Sawdom mai Gawmawrax lih hu khaing tan heue. ¹² Kix teei Lotax pa mawh kawn pux Abram pa ot veng Sawdom khawm kraung khrai nawh mai lih hu heue. ¹³ Pui tix kaux pa glawd khaing naing hoek ka Abram ceu pui Hebrie mai krai nawh mhong grawng an, yam an Abram ot tiag khaox piak van Mamre pa sum ceu pui Amawrix, Eshakawlax mai Anerax mawh pa yuh paox pie mai Abram heue. ¹⁴ Yam hoik mhong Abram ka giex kix kawn pux tix hu, nawh teei pui naing pa hoik gau tix loe yieh kao daix kaux mai pui pa hoik keh daux nyiex nawh mai kieh kix lih hawt puing ka kix tom hoek veng Dan heue. ¹⁵ Nawh gwieh cub kru naing tix ra cub daux plak ponsawm, hawt puing kix tom hoek veng Hawbax, pa koe plak laong veng Damase heue. ¹⁶ Mawh kheu nan nawh deeh viex kraung khrai pa mhawm khankix mai kawn pux nawh Lotax, khawm kraung nawh mai cub bun mai pui nawh khawmuik ing heue. ¹⁷ Khaix hoik kaoh Abram khaing pex tix ka simiang Khedawralawmax mai cub simiang pa ot tau mai nawh khankix, simiang veng Sawdom lih rieb Abram ka daux ngawd Shawe pa mawh ngawd simiang tan heue. ¹⁸ Simiang Saliem Malakhizediek, pa mawh cao giex kaing li pa ting cie Siyiex, viex blah mai rawm plix siiet hoek ka nawh. ¹⁹ Nawh nawb bwan piang Abram ah nin, "Siyiex Cao pa ting lhaong, pa phan haktiex mai raoma, nawb bwan ka Abram liak, ²⁰ kieh Siyiex pa koe bwanson koe dee lhaong, pa hoik ap pui koeng maix khankix, daux tawm taix maix" Abram deeh tawx kraung khrai in pa pon nawh ka simiang an, kao son tix son heue." ²¹ Simiang Sawdom ah nin ka Abram, "deeh tawx pui inkix ka aux, teei ti cie kraung khrai in son cao maix heue." ²² Viang mawh nan, Abram deeh ah nin ka simiang Sawdom, "Aux hoik yaog taix tix ka Simiang Siyiex, pa ting lhaong, Cao pa phan haktiex mai raoma, ²³ Aux tak ang doh teei keei tix nyaing mai maox kiep tix gieb tix gawng kawx. Aux tak ang teei kraung cie maix tix ceu kawx, aux ang doh kieh maix ah nin ka tix, Aux hoik kieh Abram magmi heue." ²⁴ Viang mawh nan Aux tak teei priex preem pa hoik ih pui aux khankix mai pa khaw pui pa hawt khaix aux tix pon, pa mawh Aneyax, Eshakawlax mai Mamre khankix, kieh kix tang teei son pa caw kix ti pon heue.

¹ Khaix hoik ceu inkix khawmuik, gumlox Simiang Siyiex lih hoek ka Abram ka daux riang susai ah nin, "Abram eue, paw lhat graung. Aux mawh pa tiebtie son maix heue. Bwanson hoik ting lhaong son maix heue." ² Viang mawh nan, Abram deeh ah nin, "Simiang Siyiex eue, Maix tak sang tawx ceu patix ka aux lie? aux hoik yaox ang kawn tix lai chix koe, sinngao nyiex ma aux khankix, tak yaox ti hu ka Eliza pui veng Damase ang mawh lie?" ³ Abram baox ah nin, "Jhak heue, maix ang nyang tawx doeh ru son aux pie tix kaux kawx. Mawh kheu kawn pa keh daux nyiex ma aux tix kaux caw ti mawh pui pa plud sinngao aux heue." ⁴ Jhak heue, gumlox Simiang Siyiex deeh hoek ka nawh ah nin, "Pui in tak ang pon ti mawh pa plud sinngao maix heue. Viang mawh nan, pui pa kaoh khaing daux tokaux maix, tak sang mawh pui pa plud sinngao maix heue." ⁵ Nawh Cao kok Abram lih hu plak praix ah nin, "Maong ti jhak raoma, simin ti yaox ka simuing khankix heue." Nawh Cao baox ah nin ka nawh, "Doeh ru maix tak sang awm ankix heue." ⁶ Abram koe krax yum rhawm ka Simiang Siyiex, Nawh Cao deuh krax yum rhawm nawh mawh pa rahsee heue. ⁷ Nawh Cao deeh ah nin ka nawh, "Aux mawh Simiang Siyiex pa viex maix lih khaing veng Urax dee ot pui ceu Kaladie, sonsang tawx Aux haktiex in mawh sinngao son maix heue." ⁸ Nawh ah nin, "Simiang Siyiex eue, aux tak sang tawng ka pon tix sinngao an yuh ka mawx?" ⁹ Mawh kheu nan, Nawh Cao deeh ah nin ka nawh, "Viex kawn mawie shiang pa koe loe num tix mu, kawn pex shiang pa koe loe num tix mu, kawn yung mhaing pa koe loe num tix mu mai sikaux tix mu mai keukie pa awn ju tix mu, hoek ka Aux heue." ¹⁰ Nawh tom viex ceu in khawmuik hoek ka Nawh Cao mai lug greung ra plak mai nawh deuh kix tang tiah khaing paox tix plak mawx plak an heue. Viang mawh nan, nawh ang lug nex sim khankix koe ra plak heue. ¹¹ Yam hoek klang preng khankix lih tum piang totiag pa yum ankix, Abram grheu kix hu dee singai heue. ¹² Yam hoik klip singaix, Abram hoik kied lhiak it mai krax lhat graung mai pa faik lih koe piang nawh heue. ¹³ Khaix an Nawh Cao ah nin ka Abram, "Een maix tawng, ru maix khawmuik tak mawh nyo sinie ka daux haktiex pui tang ceu mai yuh kaing siliex mai kha rhawm, been pon yieh num ka pui haktiex an heue. ¹⁴ Aux tak sang prawng ca ka pui pa hoik cau ka kix khawmuik. Khaix hoik an sax, kix tak yaox ti lih hu tau mai kraung khrai tix tom nie heue." ¹⁵ "Phan mawh maix, maix tak yaox ti hu ka keeing maix khankix ka daux pa yiien yawg heue. Maix tak yaox krax sipaung mhawm yam hoik kuad ju maix heue." ¹⁶ "Khaix hoik luan baux ju ru maix pon ju, kix tak sang deeh yaox ti hoek tin. Mawh kheu phimap pa yuh pui ceu Amawrix khankix ang nyang bax grum naog ka heue." ¹⁷ Yam hoek bawg yam klip singaix mai yam faik praix jhak heue, taox ngu lih khaing glah ngu mai kawk ngu pa riang tix mu, lailing sinax khik nex pa hoik lug nawh ti deuh khankix heue. ¹⁸ Ka daux singaix an, Simiang Siyiex yuh sijax mukheu tau mai Abram ah nin, "Son doeh ru maix, Aux hoik tawx haktiex in, jah ka mee rawm klawng meung Ejiptux tom hoek ka rawm klawng ting Uparat, ¹⁹ mai ceu pui Kenix, ceu pui Kenizix, ceu pui Kadamawnix, ²⁰ ceu pui Hittix, ceu pui Pherazix, ceu pui Rephen, ²¹ ceu pui Amawrix, ceu pui Khanan, ceu pui Giragazit mai ceu pui Yebutix khankix khawmuik, Aux hoik ap nawh ka ru maix heue."

¹ Yam in moeng Abram Sarai ang nyang koe kawn tix kaux kawx son nawh mai nawh koe kawncau bun pui ceu Ejiptux tix kaux pa kok ceu kaux nawh mawh Hagarax, ² Mai Sarai ah nin ka Abram, "Jhak yam in, Simiang Siyiex ang nyang bax tawx aux koe kawn, maix hu ka kawncau bun aux mai aux tak pon kawn khaing nawh heue." Abram nghiet ka lox moeng tix Sarai heue. ³ Khaix an moeng Abram Sarai teei bun siliex Hagarax bun Ejiptux mai nawh tawx ka Abram sonsang mawh moeng nawh heue. Yam an Abram hoik ot daux haktiex Khanan kao num heue. ⁴ Mawh kheu nan, nawh hu ka Hagarax mai Hagarax koe kaux heue. Yam yaox nawh hoik koe kaux tix nawh ang lai koe krax nab yam ka sivoe ngai Sarai heue. ⁵ Sarai tom ah nin ka Abram, "Krax pa lud aux kieh koe piang maix heue. Aux hoik tawx kawncau bun tix ka daux tawm taix maix mai nawh ang lai koe krax nab yam ka sivoe ngai aux, jao hoik koe kaux tix heue. Kieh Simiang Siyiex prawng ca ka sinax aux mai maix heue." ⁶ Mawh kheu nan, Abram ah nin ka Sarai, "Bun siliex in koe daux tawm taix maix. Maix simie ti yuh ka mawx kawx, koe ka rhawm maix heue." Yam yuh Sarai krax kha rhawm ka nawh, Hagarax to tix hu khaing nawh heue. ⁷ Kawncau Simiang Siyiex yaox ka Hagarax hawt rawm daux daux tiag tu, plak krax hu veng Shurax heue. ⁸ Nawh ah nin, "Bun siliex Sarai, Hagarax eue, kaoh maix khaing dee mawx mai maix sang deeh hu plak mawx?" Mai nawh pawk lox ah nin, "Aux hoik to khaing cao tix Sarai heue." ⁹ Kawncau Simiang Siyiex ah nin ka nawh, "Deeh ing ka cao maix mai ap tix ka daux tawm taix nawh heue." ¹⁰ Kawncau Simiang Siyiex baox deeh ah nin ka nawh, "Aux tak kieh doeh ru ceucad maix lih koe haoh hun tom ang pui khankix pon uik simin ka heue." ¹¹ Kawncau Siyiex ah nin ka nawh, "Jhak heue, maix hoik koe kaux maix tak sang keh kawn simex tix kaux. Maix tak kok ceu kaux nawh mawh Ishamelax, kheu hoik mhong Simiang Siyiex ka krax kha rhawm maix heue." ¹² "Nawh tak mawh pui maung praix, nawh tak yuh krax simah ka pui ku kaux mai pui ku kaux tak deeh yuh simah ka nawh heue. Nawh tak yaox ti ot tau mai puxaik kawn keeing tix khankix heue." ¹³ Khaix an nawh kok yo ka ceu kaux Simiang Siyiex pa hoik sikah ka nawh, Maix mawh Siyiex Cao pa yaox ka aux, mai nawh ah nin, "Aux hoik yaox Nawh Cao tin, ka kaw pa hoik kia ngien ka aux heue." ¹⁴ Mawh kheu nan, nawh kok rawm daux an mawh Beralahieraw, rawm daux an, koe sinax veng Kadeshax mai veng Beret heue. ¹⁵ Mawh kheu nan, Hagarax keh kawn simex tix kaux son Abram mai Abram kok ceu kaux nawh mawh Ishamelax, pa keh khaing Hagarax heue. ¹⁶ Abram koe ju tixdaix liah num yam keh Hagarax ka Ishamelax pa mawh kawn Abram heue.

¹ Yam hoik koe ju Abram tixdim dim num Simiang Siyiex lih bleeh ka Abram ah nin, "Aux mawh Siyiex pa ting sibrawm, hu plak sivoe ngai Aux, daux pa grum naog awx. ² Aux tak yuh sijax mukheu sinax Aux mai maix heue. Aux tak kieh maix deeh baox haoh hun tom nie hu sivoe ngai heue." ³ Khaix an Abram gup pakngai tix mai Siyiex sikah tau mai nawh ah nin, ⁴ "Jhak heue, lox sijax mukheu Aux koe tau mai maix. Maix tak mawh keeing ceu pui khawmuik heue. ⁵ Ceu kaux maix tak ang lai kok mawh Abram khaix in, ceu kaux maix tak kok mawh Abraham, mawh kheu hoik yuh Aux maix mawh keeing tix kaux, ka can ceu pui khawmuik heue. ⁶ Aux tak kieh maix pre haoh hun mai Aux tak yuh maix mawh ceu pui tom nie mai simiang khankix tak lih koe khaing maix heue. ⁷ Aux tak kieh lox sijax mukheu tix, kaux daux maix, mai khawm doeh ru maix khankix, tix ju hoik tix ju khaix maix heue. Aux tak mawh Siyiex ka maix khawm doeh ru pa koe khaix maix heue. ⁸ Lheu khaing an, Aux tak tawx haktiex in, pa mawh maix nyo sinie mai khawm doeh ru maix khaix maix sax heue. Baoh haktiex Khanan in khawmuik tak mawh cie maix leeing ju mai Aux tak mawh Siyiex ka kix heue." ⁹ Siyiex ah nin ka Abraham, "Maix tak priex sijax mukheu Aux tau mai ru maix khawmuik khaix maix tix ju hoik tix ju heue. ¹⁰ In mawh lox sijax mukheu Aux, pa caw maix tix priex, sinax Aux mai maix tom hoek ka ru maix khaix maix sax heue. Can pa mawh kawn simex ku kaux maix tak kieh kix pat hak khawmuik heue." ¹¹ "Maix tak pat ka hak kix mai in tak sang mawh mhai rug sijax mukheu sinax Aux mai maix heue." ¹² "Can kawn simex pa hoik naog daix ngaix, pa koe daux ru maix, can pui nyo sinie pa hoik liag maix ka mau khawmuik, pa ang mawh doeh ru maix khawmuik tak yaox ti pat hak ku kaux, ¹³ Can pui pa keh daux nyiex ma maix, pui pa viex maix hoek, pa hoik liag maix ka mau khankix kawx, kieh kix pat hak khawmuik heue. Gumlox sijax mukheu Aux, tak ot daux nex nham maix mai mawh gumlox sijax mukheu leeing ju heue. ¹⁴ Kawn simex pa pat hak mai pui pa ang pat hak tix khankix, tak sang kieh nawh tang tiah khaing pui ceu nawh, mawh kheu lheu nawh gumlox sijax mukheu Aux heue." ¹⁵ Khaix an Siyiex ah nin ka Abraham, "Son moeng maix Sarai maix tak ang lai yaox ti kok ceu kaux nawh mawh Sarai, viang mawh nan, tak deeh kok ceu kaux nawh mawh Sara heue." ¹⁶ Aux tak sang nawb bwan piang nawh mai nawh tak tawx maix pon kawn simex tix kaux khaing nawh heue. Khaix an Aux tak nawb bwan ka nawh mai nawh tak mawh miex tix kaux ka can ceu pui khawmuik mai simiang kawn pui khankix, tak kaoh khaing nawh heue." ¹⁷ Khaix an Abraham gup ngai baoh tix mai nyiah daux rhawm tix ah nin, "Kawn tix kaux sang pon keh khaing pui pa hoik koe ju tix yieh num lie? Sara tak chix koe kawn tix kaux yam koe ju nawh tixdim num yuh ka mawx?" ¹⁸ Abraham tom ah nin ka Siyiex, "Kieh Ishamelax im ju sivoe ngai Maix Cao heue." ¹⁹ Siyiex ah nin, "Ang mawh nan, moeng maix Sara tak sang keh kawn simex tix kaux mai kok ceu kaux nawh mawh Icak heue. Aux tak sang priex lox sijax mukheu tix ka nawh, pa mawh lox sijax mukheu leeing ju tau mai doeh ru nawh mai khaix nawh heue." ²⁰ Phan mawh son Ishamelax, Aux hoik mhong lox kok yo maix. Jhak heue, Aux hoik nawb bwan ka nawh mai kieh nawh lih ti pre haoh hun mai kieh nawh baox hun tom nie heue. Nawh tak mawh keeing simiang kao ra kaux mai Aux tak yuh nawh mawh ceu pa ting lhaong heue. ²¹ "Viang mawh kawx nan, Aux tak sang priex lox sijax mukheu tix mai Icak, pa mawh kawn maix khaing Sara daux num pa sang hoek in sax heue." ²² Hoik hoik sikah Nawh Cao mai nawh, Siyiex deeh yaog tix haok khaing Abraham tan heue. ²³ Mawh kheu nan, Abraham teei kawn simex tix Ishamelax, can pui pa keh daux nyiex nawh mai can pui pa hoik liag nawh, ka mau pa mawh simex ka daux nyiex Abraham khawmuik mai kix pat hak daux singaix an tix ngaix ngie, awm gumlox pa hoik tawm Simiang Siyiex ka nawh heue. ²⁴ Abraham koe ju tixdim dim num yam pat nawh hak tix heue. ²⁵ Ishamelax koe ju kao loe num yam pat nawh hak tix heue. ²⁶ Ka daux tix ngaix Abraham mai kawn nawh Ishamelax pat hak tix tau heue. ²⁷ Can kawn simex pa koe daux nyiex ma nawh, khawm nyo sinie pa hoik liag nawh ka mau khankix kawx, hoik pat hak tix tau mai nawh heue.

¹ Khaix an Simiang Siyiex lih bleeh ka nawh hawt daux tiag khaox piakvan, nawh ngawm ka diang siviex nyiex gox man, bawg yam hax koek ka daux singaix an heue. ² Mawh kheu nan nawh yaog ngai tix mai yaox pui loe kaux pa cung hawt nawh tan heue. Yam yaox nawh kix, nawh to hu khaing diang siviex nyiex gox man mai hu rieb ka kix mai krub kix piang tiex tan heue. ³ Nawh ah nin, "Simiang Siyiex aux eue, phan aux mawh pa pon bwanson ka sivoe ngai Maix Cao paw nyang luan khaing siliex Maix Cao liak" ⁴ Kieh aux viex rawm ceeix mai khoek caong pex mai laux lee pex greem khaox ha. ⁵ "Aux tak sang viex blah hoek mai ih sonsang deeh koe riang rao pex khawm rhawm khawm rhi heue. Khaix an pex sang deeh ing khaing siliex tix chix heue." kix ah nin, "yuh awm pa ah maix heue." ⁶ Mawh kheu nan, Abraham niied tix laig daux nyiex gox man ka Sara ah nin, "Niied maix teei gaox nghox ca loe klong mai klu klao tau mhawm mhawm mai yuh blah ka heue." ⁷ Abraham to hu ka cub tobrie eei tix mai teei kawn mawie iak tix mu mai tawx ka kawncau tix sonsang niied kix ti khre priex preem son kix heue. ⁸ Nawh teei bee mai rawm teeih tau mai nex kawn mawie pa hoik khre nawh hoek ka sivoe kix heue. Nawh cung greem khaox dex kix yam ih kix heue. ⁹ Khaix an kix ah nin ka nawh, "Moeng maix Sara ot dee mawx?" mai nawh deeh ah nin, "Ot daux nyiex gox man heue." ¹⁰ Nawh Cao ah nin, "Aux tak deeh hoek ka maix tete, yam hoek singaix keh nawh heue. Jhak heue, moeng maix Sara tak sang koe kawn simex tix kaux heue." Sara ngiiet lox kix ka diang siviex nyiex gox man, plak khaix kix heue. ¹¹ Yam in Abraham mai Sara hoik kuad sipie mai Sara hoik dieh mee been bun daux yam an heue. ¹² Mawh kheu nan Sara briex nyiah ka daux rhawm ti ah nin, "Khaix hoik riex ju aux, aux tak sang pon krax pa nyawm rhawm yuh ka mawx? Abraham kawx hoik kuad heue." ¹³ Simiang Siyiex ah nin ka Abraham, "Sara nyiah jao patix?" mai nawh ah nin, "Aux rug sang pon kawn tix, tix kaux tete yam hoik kuad aux lie?" ¹⁴ Pa ang Simiang Siyiex pon yuh ceu pa nu khankix koe tix ceuceu lie? yam hoik hoek bawg yam keh nawh, Aux tak deeh hoek ka maix tete heue. Sara tak koe kawn simex tix kaux heue. ¹⁵ Viang mawh nan, Sara thiang nawh jao hoik lhat tix ah nin, "Aux ang nyiah heue." Nawh Cao ah nin, "Ang mawh, maix hoik nyiah tete heue." ¹⁶ Khaix an pui khankix, yaog ti kaoh khaing tan mai jhak ka plak Sawdom heue, Abraham lih hu tau mai kix mai nawh hu tawx kix tom hoek daux krax heue. ¹⁷ Simiang Siyiex ah nin, "Aux tak sang mox kaing pa yuh tix ka Abraham yuh ka mawx?" ¹⁸ "Abraham tak mawh pui pa ting sibrawm tete daux ru nawh mai kawn pui piang haktiex in khawmuik, tak pon bwanson ka daux nawh heue." ¹⁹ "Mawh kheu hoik tawng Aux nawh mai nawh tak sidiex gau ka kawn praix tix mai can pui pa koe daux nyiex ma nawh, khaix in sax heue, kix tak hawt grawng lawng khaix Simiang Siyiex mai yuh pa rahsee mai pa khaw caw heue. Awm gumlox Nawh Cao Nawh tak sang viex ceu inkix hoek ka Abraham heue." ²⁰ Simiang Siyiex ah nin, "Mawh kheu lox kok lox yo Sawdom Gawmawrax mai phimap krax lud kix hoik kied ting lhaong heue. ²¹ Aux tak lih hu mai jhak ka pa hoik yuh kix khawmuik, mawh kheu lox kok yo kix hoik hoek ka Aux, mawh ang mawh sonsang tawng Aux ka heue." ²² Khaix an pui an kiex gah ti khaing tan mai hu plak Sawdom! Viang mawh nan, Abraham ca kawn cung sivoe Simiang Siyiex tan heue. ²³ Abraham tom hoek dex Nawh Cao ah nin, "Maix tak yuh pui pa rahsee laux tau mai pui caox caig khankix lie? ²⁴ Phan pui pa rahsee koe daux veng an, tixphwan kaux khex sang yuh Maix dee an laux, Maix ang lhawk ka pui pa rahsee khankix tixphwan kaux pa ot tan lie? ²⁵ "Kieh krax pa pah pui pa rahsee tau mai pui caox caig lih hu singai khaing Maix Cao, kieh pui pa rahsee kham geu tau mai pui pa caox khankix, hu singai khaing Maix Cao liak, krax prawng ca Simiang Siyiex ka haktiex mawh krax pa rahsee ang mawh lie?" ²⁶ Simiang Siyiex ah nin, "Phan Aux yaox pui rahsee daux veng Sawdom tixphwan kaux Aux tak deeh lhawk ka dee an jao kix heue." ²⁷ Abraham deeh pawk lox ah nin, "Mawh tete yam in, viang aux mawh phawng tiex mai nyaox kawx, aux tak sang viex lox khyox khaw in hoek ka Maix Simiang Siyiex heue." ²⁸ Phan pui rahsee an tixphwan kaux, dieh khaing phwan kaux, Maix tak yuh veng an laux kheu ang kix naog tixphwan kaux lie?" Nawh Cao ah nin, "Phan Aux yaox koe kix tixpon phwan kaux, Aux tak ang yuh kix laux leeing heue." ²⁹ Khaix in nawh baox deeh ah nin ka Nawh Cao, "Phan kix koe tixpon kaux Maix sang yuh ka mawx?" Nawh Cao ah nin, "Aux tak ang yuh laux, jao tixpon kaux an heue." ³⁰ Nawh ah nin, "Paw kieh Simiang Siyiex song rhawm liak" aux tak sang ah nin, "Phan ex kawn yaox pui mhawm tixngoe kaux tan, Maix sang yuh ka mawx?" Nawh Cao deeh ah nin, "Aux tak ang yuh laux, phan Aux kawn yaox tixngoe kaux tan heue." ³¹ Khaix an nawh ah nin, "Mawh tete heue. Aux hoik viex ceu inkix piang tokaux cao tix mai krai ka Maix Simiang Siyiex heue. Phan ex kawn yaox kix tixnga kaux tan Maix tak sang yuh ka mawx?" Nawh Cao ah nin, "Aux tak ang yuh kix laux leeing jao pui an khankix tixnga kaux heue." ³² Nawh ah nin, "Paw nyang kieh Simiang Siyiex song rhawm ka ha, kieh aux ghoik tix krai tix bawg khaing, phan ex kawn yaox kix kao kaux tan, Maix tak sang yuh ka mawx?" Nawh Cao ah nin, "Aux tak ang yuh kix laux leeing jao pui an khankix kao kaux heue." ³³ Khaix hoik sikah Nawh Cao tau mai Abraham, dom mawx dom an Nawh Cao hu dee hu tix mai Abraham ing ka dee ot tix heue.

¹ Yam in kawncau Siyiex ra kaux hoek ka veng Sawdom plakbo mai Lotax ngawm ka diang siviex nyiex nawh daux veng Sawdom tan heue, yam yaox Lotax ka kiex, nawh kaoh hu mai rieb kiex heue. Nawh tawx krax nab yam mai gup pakngai ti piang tiex. ² Nawh ah nin, "Yam in Simiang aux eue, laig daux nyiex aux pa mawh siliex maix mai ot tin leeing sawm ha. Khoek caong pax mai deeh kaoh caocao plak ponngawb mai deeh hu krax hu pax heue." kiex ah nin, "Yiex ang laig, viang mawh nan, yiex tak ot ka praix daux krax leeing sawm heue." ³ Viang mawh nan, nawh deeh nyaw kiex sigren sigre, kiex deeh veeh tix plak nawh mai laig daux nyiex nawh, khaix an, nawh yuh krax khan kheu ka kiex mai yuh blah pa ang viex susaix, son kiex mai kiex ih ka heue. ⁴ Sivoe ang kix nyang it, kawn simex pa ting pa iak daux veng Sawdom mai can pui pa kaoh khaing ku plak hoek ti rob ka nyiex, ⁵ kix kok yo ka Lotax ah nin, "Pui pa laig daux nyiex maix bo in ot dee mawx? teei kix lih plak praix ka yix, nyawk ka sang yuh yix mai kix heue." ⁶ Lotax lih khaing diang siviex, hu ka pui ankix, nyeep siviex plak khaix tix, ⁷ mai nawh ah nin, "Puxaik khankix eue, paw doh yuh pa caox caig inkix liak, ⁸ jhak heue, aux koe kawn bun ra kaux pa ang sax dex dawd mai simex, kieh aux viex kiex lih ka pex mai yuh pa koe rhawm pex ti yuh, paw doh yuh tix ceu kawx ka pui in kiex liak, mawh kheu kiex mawh pui pa hoek peung greem veei nyiex aux heue." ⁹ Kix ah nin, "Deeh plak khaix maix!" Kix baox ah nin, "Sang yuh maix ti mawh pui prawng ca ka pui pa hoek ti peung daux nyiex maix lie, yam in, yix tak sang nie yuh pa ang mhawm ka maix lheu khaing pui an kiex." Khaix an kix tom nyheen ti tik Lotax mai kix greed hoek ka dex, sonsang yuh siviex laux heue. ¹⁰ Viang mawh nan, kawncau Siyiex khan kiex nyeu taix tix mai bluh Lotax laig daux nyiex tau mai tix mai kiex nyeep siviex heue. ¹¹ Kiex yuh can pui pa ot hawt diang siviex dug ngai khawm pui ting pui iak khawmuik, sonsang taug mao kix ka sawg ti siviex heue. ¹² Khaix an kawncau Siyiex ah nin ka Lotax, "Kawn koe pui pa dex mai maix tix kaux kaux tin lie? Kheue maix, kawn simex maix, kawn bun maix, can cie maix pa koe daux veng khawmuik teei lih khaing tin, ¹³ Yiex tak yuh dee inkix laux leeing heue. Mawh kheu lox riag yo pui inkix, hoik nie ting lhaong plak sivoe ngai Simiang Siyiex mai Simiang Siyiex hoik ploi yiex yuh kix laux leeing heue." ¹⁴ Mawh kheu nan, Lotax lih hu mai tawx gumlox ka kheue tix, pa mawh mex kawn bun nawh khankix ah nin, "Kaoh, lih hu khaing dee in, mawh kheu Simiang Siyiex tak sang yuh veng in laux phao heue." Viang mawh nan, kheue Nawh khankix keud nawh mawh lox naknon tix heue. ¹⁵ Yam hoik jah praix tix riang plak ponngawb, kawncau Siyiex khankiex niied ti kieh Lotax yuh phai ah nin, "Kaoh heue, teei moeng maix, khawm kawn bun maix ra kaux pa ot tin heue. Phan ang mawh nan maix tak yaox ti kham geu krax laux leeing tau mai pui phimap veng in heue." ¹⁶ Yam yaox kiex rheeng nawh, kawncau Siyiex khankiex bluh nawh mai moeng nawh mai taix kawn bun nawh ra kaux, mawh kheu Siyiex kied caux rhawm ka kix, kiex viex kix lih khaing tan mai deuh kix ot ka praix veng heue. ¹⁷ Mawh kheu nan, khaix hoik viex kix hoek ka praix ah nin, "To tom klawd ju maix, paw doh gi plak khaix mai paw ot daux lung tix dah kawx to tom klawd tix piang gawng khankix heue. Phan ang mawh nan maix tak yaox krax laux leeing heue." ¹⁸ Khaix an Lotax deeh ah nin ka kiex, "Simiang eue, paw ah yuh nan liak" ¹⁹ "Jhak heue, siliex maix hoik pon bwanson sivoe pax, mawh kheu hoik taoh pax ju aux, bwanson krax caux rhawm pax piang aux, hoik kied ting lhaong, viang mawh nan, aux ang pon to ti klawd piang gawng khankix, aux lhat ka ceu pa caox khankix krup ka ti mai yum ka heue. ²⁰ Yam in jhak heue, veng in hoik dex sonsang pon to aux ka heue. Veng an mawh veng pa iak tix mu mai kieh aux to tix klawd tan, veng an ang mawh pa iak tix mu lie?, rhawm aux tak im ju ka heue." ²¹ Nawh ah nin ka nawh, "Jhak heue, aux hoik khaw rhawm grawng pa ah maix inkix heue. Mawh kheu jao lox pa hoik ah pax Aux tak ang lai yuh veng iak an laux heue." ²² "Niied maix to phai tan, phan maix ang nyang hoek veng tan, Aux ang nyang pon yuh tix ceu kawx" Mawh kheu nan, ceu kaux veng an tom kok mawh veng Zawrax ka heue. ²³ Singaix hoik lih piang haktiex, yam hoik laig Lotax daux veng Zawrax heue. ²⁴ Khaix an Simiang Siyiex kieh ngu mai mhat lih khaing daux meung raoma mai lhiex piang veng Sawdom mai Gawmawrax heue. ²⁵ Mawh kheu nan, Nawh Cao yuh veng ankix laux leeing khawm daux lung mai can pui pa ot daux veng khankix, tau mai can ceu pa kuah piang tiex khawmuik heue. ²⁶ Viang mawh nan, moeng Lotax deeh gi ti jhak plak khaix mai nawh lih ti mawh rong kih heue. ²⁷ Abraham lih hu caocao plak ponngawb, ka dee hoik cung nawh ka sivoe ngai Simiang Siyiex tan heue. ²⁸ Khaix an nawh jhak ka plak Sawdom mai Gawmawrax mai hawt daux lung khankix mai nawh hoik yaox ka heue. Jhak heue, taox ngu khankix piang tiex yaog ti haok dee lhaong awm taox ngu pa kaoh khaing glah ngu heue. ²⁹ Yam hoik yuh Siyiex veng pa koe daux lung khankix laux, Siyiex deeh doh keud ka Abraham mai Nawh Cao kieh Lotax luan khaing daux sigreung veng ot nawh, yam yuh Nawh Cao veng khankix laux leeing heue. ³⁰ Khaix an Lotax lih hu khaing veng Zawrax mai ot piang gawng tau mai kawn bun nawh ra kaux tan heue. Mawh kheu hoik lhat ot nawh daux veng Zawrax heue. Nawh khawm kawn bun nawh ra kaux ot ka daux rang tix mu heue. ³¹ Kawn bun ting nawh ah nin ka pux tix, yam in, "Keeing ex hoik kuad mai simex ang lai koe piang haktiex tix kaux kawx, sonsang hoek kix ka ax, awm been pa koe piang haktiex heue. ³² Hoek, ax tawx keeing nyaux rawm plix siiet mai it tau mai nawh, sonsang pon ax ka plix doeh ru keeing tix heue." ³³ Mawh kheu nan, kiex tawx keeing tix nyaux rawm plix siiet daux bo an heue. Kawn bun ting nawh, laig it tau mai keeing tix, nawh ang tawng ka yam laig it nawh mai yam deeh kaoh nawh heue. ³⁴ Ka daux singaix khaix, kawn bun ting nawh ah nin ka pux tix, "Aux hoik it tau mai keeing tix daux bo luan an tete heue. Kieh ax deeh tawx nawh nyaux rawm plix siiet daux bo in, khaix an maix tom deeh laig it mai nawh sonsang pon ax plix doeh ru keeing tix heue." ³⁵ Khaix an kiex tom yuh rawm plix siiet mai baox tawx keeing tix nyaux daux bo an mai kawn bun iak nawh yaog ti kaoh hu mai laig it tau mai keeing tix, nawh ang tawng ka yam laig it nawh mai yam deeh kaoh nawh heue. ³⁶ Mawh kheu nan, kawn Lotax khawm ra kaux koe kaux mai keeing tix heue. ³⁷ Kawn bun ting nawh keh kawn simex tix kaux mai kok ceu kaux nawh mawh Mawbax mai nawh mawh keeing ceu pui Mawbax tom in singaix heue. ³⁸ Kawn bun iak nawh keh kawn simex tix kaux mai kok ceu kaux nawh mawh Benamix, nawh mawh keeing ceu pui Amon tom in singaix heue.

¹ Abraham lih hu ka plak seh mai ot sinax veng Kadeshax mai Shurax mai peung ka veng Gerax tan heue. ² Abraham ah nin ka moeng tix Sara, "Nawh mawh nan aux heue." Mawh kheu nan, simiang Gerax pa mawh Abimaliet ploi pui tix hu teei ka Sara heue. ³ Viang mawh nan, Siyiex hoek ka Abimaliet daux camaox ponsawm ah nin ka nawh, "Maix mawh pui pa yum tix kaux tete heue. Grawh grawng nawh, bun pa hoik teei maix an, mawh moeng pui tix kaux heue." ⁴ Simiang Abimaliet ang nyang pon ti hoek dex nawh, mai nawh ah nin, "Simiang Siyiex eue, Maix tak sang pah ka ceu pui pa rahsee lie? ⁵ Nawh hoik ah, mawh nawh nan tix ka aux, pie cao nawh kawx krai, Nawh mawh puxke aux heue. Ka daux krax pa rahsee mai taix pa singax singeh aux in, aux hoik lud yuh ceu in heue." ⁶ Siyiex ah ka nawh daux camaox, "Mawh heue, Aux tawng hoik yuh maix ceu in ka daux krax pa rahsee rhawm maix, mawh kheu nan, sonsang ang maix koe krax lud ka Aux, Aux hoik tiebtie maix, son ang maix pon ti teei ka nawh heue." ⁷ "Mawh kheu nan, deeh tawx moeng nawh ka nawh, kheu mawh nawh cao jhai tix kaux mai nawh tak rawg bwan son maix mai kieh maix im ju ka heue. Viang mawh nan phan maix ang deeh tawx nawh maix tak yaox ti yum tete, khawm can ceu pui pa dex pa dawt mai maix khawmuik heue." ⁸ Simiang Abimaliet yaog ti kaoh tom cao plak ponngawb mai kok ka kawncau mau soi nawh khawmuik mai krai kix mhong grawng inkix, mai pui khawmuik, kied lhat graung ka heue. ⁹ Simiang Abimaliet kok Abraham ah nin ka nawh, "Kheu maix yuh ceu inkix piang yix? mawh koe krax lud aux ka maix yuh ka mawx? maix tom sang viex phimap pa ting lhaong koe piang aux mai meung haktiex aux lie? maix hoik yuh kaing ceu pa ang maix keung ti yuh heue." ¹⁰ Khaix an simiang Abimaliet ah nin ka Abraham, "Mawh kheu yaox maix ceu pa yuh ka mawx maix tom yuh nin lie?" ¹¹ Abraham ah nin, "Kheu yaox aux pui haktiex inkix ang koe krax lhat graung ka Siyiex mai kix tak pah aux yum son grawng moeng aux, aux tom yuh nin heue." ¹² "Viang mawh nan, nawh mawh pux nan aux tete heue. Nawh mawh kawn bun keeing aux mai ang mawh kawn bun miex aux, mai nawh deeh mawh moeng aux heue." ¹³ Yam hoik hoek bawg yam kieh Siyiex aux vung viang khaing nyiex ma keeing tix mai aux ah nin ka nawh, "In hoik mawh krax pa caux rhawm, pa caw maix ti yuh son aux kudah dee, yam hu dee mawx ang ah, krai, Nawh mawh puxke aux, Aux hoik tawm tix priex ka moeng ti yuh nan heue." ¹⁴ Khaix an simiang Abimaliet teei yung mai mawie, tau mai kawncau simex, bun mai tawx ka Abraham, nawh deeh tawx moeng nawh Sara ka nawh heue. ¹⁵ Abimaliet ah nin, "Jhak heue, haktiex aux hoik koe sivoe ngai maix, sang moh maix tix ot dee mawx, kieh mawh awm rhawm cao maix heue." ¹⁶ Khaix an nawh tom ah nin ka Sara, "Jhak heue, aux hoik tawx lonmau ka puxke maix tix rheng sonsang liag tix tawx man tawb pakngai mai khawm son paox grawm maix khankix heue." Nawh tom hoik yaox krax sidiex gau grawng kuceu heue. ¹⁷ Mawh kheu nan, Abraham rawg bwan ka Siyiex mai Siyiex pai jhawm saux simiang Abimaliet mai moeng nawh, khawm bun pa cau nawh khawmuik heue. Khaix an kix deeh keh kawn, ¹⁸ mawh kheu Simiang Siyiex hoik nyeep vaig pa chix nghe, daux nyiex Abimaliet jao grawng moeng Abraham Sara yam an heue.

¹ Simiang Siyiex hoek tix kia ngien ka Sara awm gumlox pa hoik ah Nawh mai Nawh Cao yuh son Sara awm sijax mukheu pa hoik tawx Nawh heue. ² Sara koe kaux mai keh kawn simex tix kaux son Abraham yam hoik kuad nawh, daux singaix hoik ah Nawh Cao ti deuh ka nawh heue. ³ Abraham kok ceu kaux kawn simex tix, pa keh son nawh khaing Sara mawh Icak heue. ⁴ Khaix an Abraham pat hak kawn simex tix Icak, yam laig nawh daix ngaix, awm gumlox pa tawm Simiang Siyiex ka nawh heue. ⁵ Abraham hoik koe ju tix yieh num yam keh kawn simex nawh Icak son nawh heue. ⁶ Sara ah nin, "Siyiex hoik tawx ceu pa nyiah ka aux, mai can pui pa mhong ku kaux tak yaox ti nyiah tau mai aux heue." ⁷ Sara ah nin, "Mawh pui mawx pa ah ka Abraham, Sara tak yaox ti tawx kawn tix peuex, viang mawh nan, aux hoik keh kawn simex son nawh tix kaux, yam hoik kuad nawh heue." ⁸ Kawn nyawm Icak an haok hwan ting lhaong mai hoik prah teeh miex tix, yam hoik prah Icak ka teeh miex tix, Abraham yuh pawie ting tix mu ka daux singaix an heue. ⁹ Daux tix ngaix Sara yaox ka kawn Hagarax, pui ceu Ejiptux, pa keh son Abraham klieh tau mai kawn simex nawh Icak heue. ¹⁰ Nawh ah nin ka Abraham, "Grheu bun siliex in mai kawn simex nawh, kawn simex nawh tak ang chix pon sinngao tau mai kawn simex aux Icak heue." ¹¹ Grawng in, kied mawh pa sung sang rhawm ka son Abraham jao mawh kawn simex nawh heue. ¹² Viang mawh nan, Siyiex ah nin ka Abraham, "Maix paw doh laux rhawm kheu jao kawn simex in mai jao siliex bun in, nghiet ka lox pa krai Sara ka maix, grawh grawng nawh doeh ru maix tak koe ka daux Icak heue. ¹³ Kheu mawh nawh doeh ru maix, Aux tak yuh kawn simex siliex bun maix an, lih ti mawh ceu pui tix cub heue." ¹⁴ Mawh kheu nan, Abraham kaoh caocao ponngawb teei blah mai singiien hak rawm mai feuk piang klip Hagarax heue. Nawh ap kawn nyawm an ka nawh mai ploi kiex hu dee singai, khaix an nawh lih hu mai vung viang baoh daux tiag Berashabax heue. ¹⁵ Yam hoik uik rawm khaing daux singiien hak, nawh deuh kawn nyawm greem yeem heue. ¹⁶ Khaix an nawh hu ngawm dee singai tix dah, dee pon puing te hoek ti taix ah nin ka tokaux tix, "Paw kieh aux yaox ka yum kawn in liak." Mawh kheu nan nawh ngawm plak sivoe nawh mai riag yo khawm yiiem tix heue. ¹⁷ Siyiex mhong ka lox kawn nyawm an, khaix an kawncau Siyiex kok ka Hagarax khaing daux raoma ah nin ka nawh, "Hagarax eue, koe krax pa laux rhawm maix yuh ka mawx? paw vi khi rhawm grawh grawng nawh, Siyiex hoik mhong lox kawn nyawm an ka dee ot nawh heue. ¹⁸ Kaoh, yaog ka kawn nyawm mai teem nawh ka taix maix, Aux tak yuh nawh mawh ceu pui pa ting tix cub heue." ¹⁹ Siyiex paoh ngai nawh mai nawh yaox ka rawm daux tix mu, khaix an nawh hu mai kin rawm naog daux singiien hak an mai nawh tawx kawn nyawm nyaux heue. ²⁰ Mawh kheu nan, Siyiex ot tau mai kawn nyawm mai nawh hwan sipie, mai nawh ot daux tiag tu Paran, Nawh lih ti mawh pui puing ak tix kaux heue. ²¹ Miex nawh viex moeng son nawh khaing meung Ejiptux heue. ²² Khaix hoik luan bawg yam an, simiang Abimaliet mai cao kaing kru naing nawh Phikawlax sikah tau mai Abraham ah nin, "Siyiex ot tau mai maix, ka daux can ceu pa yuh maix khawmuik heue. ²³ Mawh kheu nan, yam in tawx krax tiextu maix ka aux plak sivoe ngai Siyiex son ang maix lai yuh krax pa lud ka aux mai ka kawn praix aux mai krax magmi aux khankix, awm hoik yuh aux krax pa caux rhawm ka maix, maix tak caw ti yuh son aux mai son haktiex pa hoik yaox maix tix peung ka heue." ²⁴ Abraham ah nin, "Aux tak tiextu ka heue." ²⁵ Yam yaox Abraham tud rhim siliex Abimaliet ka rawm daux tix mu, Abraham ne raw ka simiang Abimaliet heue. ²⁶ Simiang Abimaliet ah nin, "Aux ang nyang tawng ka pui pa yuh ceu in maix kawx ang sax krai ka aux, aux ang nyang bax mhong tom in singaix heue." ²⁷ Mawh kheu nan Abraham teei yung mai mawie khankix, tawx ka simiang Abimaliet mai kiex khawm ra yuh sijax mu kheu tau heue. ²⁸ Abraham gwieh ti deuh kawn yung shiang pa awn aliah mu khaing cub yung nawh tan heue. ²⁹ Khaix an simiang Abimaliet chawk Abraham, "Dee bleeh grawng gwieh maix kawn yung shiang pa awn aliah mu khaing cub yung nawh khankix koe yuh ka mawx?" ³⁰ Nawh ah nin, "Rieb maix teei kawn yung shiang pa awn in aliah mu khaing daux tawm taix aux, ceu inkix tak mawh sakse hoik kaong aux rawm daux in heue." ³¹ Mawh kheu nan nawh kok dee an mawh Berashebax, grawh grawng nawh, kiex ra kaux hoik tiextu ka paox tix heue. ³² Kix yuh sijax mukheu ka Berashebax, khaix an simiang Abimaliet mai cao kaing kru naing nawh Phikawlax yaog ti ing ka haktiex Philitix heue. ³³ Abraham sum khaox plix phak tix num daux Berashebax mai yaogyaw ka Simiang Siyiex, pa mawh Siyiex leeing ju heue. ³⁴ Abraham peung pan ka daux haktiex Philitix tom rheung heue.

¹ Khaix hoik luan ceu inkix, Siyiex cheuk cheu ti yaox Abraham ah nin ka nawh, "Abraham eue, " mai nawh pawk lox, "Aux ot tin heue." ² Nawh Cao ah nin, "Teei kawn simex maix Icak, pa kied moh maix, pa koe tix kaux khaing mai hu ka haktiex Mawrix, yuh krax tan pa gleeing ka ngu son Aux piang gawng pa sang jhi Aux maix yaox heue." ³ Mawh kheu nan Abraham kaoh caocao plak ponngawb mai sau an la khankix mai kok kawncau nawh ra kaux tau mai kawn simex nawh Icak, mai nawh lug khix son pa sang gleeing nawh mai kaoh hu ka dee hoik ah Siyiex ka nawh heue. ⁴ Khaix hoek loe ngaix Abraham yaog ngai tix mai yaox ka dee an, dee singai heue. ⁵ Abraham ah nin ka kawncau nawh khankix, "Ot tin tau mai la awx, kawn nyawm mai aux tak sang hu toi plak an mai krub ka Siyiex mai tak deeh hoek ka pax heue." ⁶ Mawh kheu nan, Abraham teei khix pa sang gleeing ti tan mai kieh kawn simex tix Icak klawm hu, nawh teei ngu mai vaid tix kre mai kiex lih hu tau heue. ⁷ Icak ah nin ka keeing tix Abraham, "Keeing eue, " mai nawh deeh pawk lox Icak, "Kawn simex eue, aux ot tin heue." Nawh tom deeh ah nin, "Jhak heue, ngu mai khix hoik koe, viang mawh nan, kawn yung pa sang gleeing ex tix tan, koe dee mawx?" ⁸ Abraham deeh ah nin, "Kawn eue, Siyiex tak tawx kawn yung an, son pa sang gleeing ex ti tan son Nawh Cao heue." Kiex ra kaux lih hu tau heue. ⁹ Yam hoek kiex ka dee ah Siyiex ka nawh tan, Abraham sum khu dee tan tix mu tan mai deuh khix piang heue, nawh phyawk kawn tix Icak mai deuh nawh piang khix ka khu dee tan heue. ¹⁰ Khaix an Abraham nyeu taix tix mai teei vaid sonsang pah ka kawn tix heue. ¹¹ Yam an, kawncau Simiang Siyiex kok nawh khaing daux raoma ah nin, "Abraham, Abraham" mai nawh deeh pawk lox, "Aux ot tin heue." ¹² Nawh cao ah nin, "Maix paw teeh ka kawn maix mai paw yuh tix ceu kawx ka nawh, grawh grawng nawh, yam in Aux hoik tawng lhat maix ka Siyiex mai Aux hoik yaox ang maix thiang pa mhaing Aux kawn simex maix tix kaux son Aux heue." ¹³ Abraham yaog ngai tix mai jhak, nawh yaox ka kawn yung mhaing tix mu plak khaix nawh, pa vung viien rung tix ka yeem heue. Mawh kheu nan, Abraham hu teei kawn yung iak an mai gleeing piang khu, tang kawn tix heue. ¹⁴ Abraham kok ceu kaux dee an mawh, "Simiang Siyiex tak sang tawx, " tom in singaix pui ah mawh "gawng pa hoik cox khre Simiang Siyiex" ka heue. ¹⁵ Kawncau Simiang Siyiex deeh kok ka Abraham ra bawg tix bawg. ¹⁶ Nawh ah nin, "Aux hoik tiextu ka Tokaux Cao tix, mawh kheu maix hoik yuh ceu inkix mai ang thiang ka kawn tix kaux maix an ka Aux heue." ¹⁷ "Aux nawb bwan ka maix mai Aux tak kieh doeh ru maix nie baox haoh hun awm simuing daux raoma mai awm mhaik pa koe praok rawm sigrit sigra heue. Doeh ru maix khankix kawx, Aux tak kieh kix kwang ka diang siviex pui koeng maix khawmuik heue. ¹⁸ Can ceu pui khawmuik piang haktiex in, tak pon bwanson kheu hoik cu nghiet maix ka gumlox Aux heue." ¹⁹ Mawh kheu nan, Abraham deeh ing ka kawncau nawh khankiex. Kix yaog tix hu tau ka Berashebax mai Abraham ot tan heue. ²⁰ Khaix hoik luan ceu inkix khawmuik, Abraham mhong grawng krai pui ah nin, "Moeng pux nawh Nakhaw pa kaux Milakha hoik keh kawn simex khankix ka son nawh heue." ²¹ Kawn Ai mawh Uzax kawn Nyi mawh Buzax, kawn Sam mawh Kemoelax pa mawh keeing Aram, ²² Kawn Sai mawh Khetiet, kawn Ngox mawh Hazaw, kawn Log mawh Piladaha, kawn Ciet mawh Yidalax mai kawn Piet mawh Betoelax khankix, ²³ Betoelax mawh keeing Rebekha heue. Inkix mawh kawn simex daix kaux pa keh khaing Milakha son Nakhaw pux Abraham khawmuik heue. ²⁴ Moeng iak Nakhaw, pa mawh Ruma kawx, deeh baox keh Tebax, Gahan, Tahashax mai Makha khankix heue.

¹ Sara im ju tix yieh tixnga aliah num, in mawh baux num im ju Sara heue. ² Sara yum daux veng Kirathabax pa mawh veng Hebron, ka meung Khanan, Abraham hoek ti yiiem doe son Sara heue. ³ Abraham cung sivoe lawng moeng tix ah nin ka ceu pui Hetax khankix, ⁴ "Aux mawh pui tang meung mai mawh nyo sinie tix kaux sinax pex. Tawx aux sipaung moeng tix ka simeeig tix dah sinax pex, sonsang glip nawh khaing sivoe ngai aux heue." ⁵ Ceu pui Hetax khankix deeh pawk lox Abraham ah nin, ⁶ "Cao simiang aux eue, nghiet ka lox yix liak, maix hoik mawh pui pa ting min Siyiex sinax yix, laug maix teei simeeig cie yix mai sipaung moeng maix ka, yix ang doh koe krax thiang tix kaux kawx, sonsang sipaung maix pui yum ka heue." ⁷ Khaix an Abraham yaog ti kaoh mai tawx krax nab yam ka can pui pa ot daux meung an, pa mawh ceu pui Hetax khankix heue. ⁸ Nawh ah nin ka kix, "Phan pex koe rhawm ti kieh aux sipaung pui yum in glip sivoe ngai aux, nghiet heue, kieh pex hu khyox khaw ka Epharon kawn simex Zawrax son aux liak, ⁹ sonsang tawx Epharon daux rang Makhapelax pa mawh cie nawh pa koe daog kaung nawh heue. Ngawh miex ding kawx, kieh nawh coh ka aux, sonsang mawh simeeig cie aux sinax pex heue." ¹⁰ Epharon pa mawh ceu pui Hittix, ngawm tau mai ceu pui Hetax, pawk lox Abraham sivoe ngai ceu pui Hetax pa laig ka daux siviex an khawmuik ah nin, ¹¹ "Ang mawh nan, cao simiang aux eue, nghiet ka lox aux, aux tak tawx daux rang pa koe daux kaung an ka maix, mai aux tawx ka maix sivoe ngai pui ceu aux khankix sonsang pon sipaung maix moeng tix heue." ¹² Khaix an Abraham tawx krax nab yam ka ceu pui haktiex an khankix heue. ¹³ Nawh ah nin ka Epharon, sonsang mhong pui haktiex an ka, "Phan maix sang tawx an, nghiet ka lox aux, aux tak sang tawx mau son kaung an mai teei hu, aux tak sipaung moeng tix tan heue." ¹⁴ Epharon deeh pawk lox Abraham ah nin, ¹⁵ "Cao simiang aux eue, nghiet ka lox aux liak, haktiex an, ngawh caw lonmau pon yieh Shekhe heue. Sinax maix mai aux, ang koe grawng tix ceu kawx, mawh kheu nan, sipaung moeng maix ka heue." ¹⁶ Abraham khaw rhawm ka lox Epharon mai nawh ciang tix tawx lonmau ka Epharon, awm hoik tat Epharon jum, pon yieh Shekhe plah, awm pa shiao pui yuh lai geu ka sivoe ngai pui Hetax khankix heue. ¹⁷ Mawh kheu nan, kaung Epharon pa koe ka Makhapelax, veng Morean, khawm daux rang mai khaox ox pa koe daux kaung khawmuik, hoik mawh cie nawh heue. ¹⁸ Nawh hoik ap haktiex an ka Abraham sivoe ngai ceu pui Hetax mai can pui pa laig ka daux siviex veng khankix heue. ¹⁹ Khaix hoik ceu inkix, Abraham sipaung moeng tix Sara ka daux rang Makhapelax, sivoe veng Mamre, pa mawh veng Hebron, daux haktiex Khanan tan heue. ²⁰ Mawh kheu nan, kaung an mai daux rang an, sonsang mawh haktiex simeeig son cie Abraham, ceu pui Hetax khankix hoik ap ka nawh heue.

¹ Abraham hoik kuad mai riex ju hu sipie, Simiang Siyiex nawb bwan piang Abraham kuceu heue. ² Mawh kheu nan Abraham kok ka kawncau pa riex ju daux nyiex, pa kwang ka can pa koe nawh khawmuik ah nin, "Deuh taix maix greem ba aux, ³ aux tak kieh maix tiextu ka sivoe ngai Siyiex, pa mawh Cao raoma mai haktiex maix ang pon teei kawn bun ceu pui Khanan ka dee ot ex tin, sonsang mawh moeng kawn simex aux heue." ⁴ Maix hu ka haktiex aux, dee ot ru aux mai teei moeng tix kaux, son kawn simex aux Icak heue." ⁵ Kawncau nawh deeh ah nin ka nawh, "Phan bun ang koe rhawm tix hawt khaix aux hoek daux meung in, mawh sang kieh maix aux deeh viex kawn simex tix hu khaing dee kaoh tix lie?" ⁶ Abraham deeh ah nin ka nawh, "Yuh satix tix, paw doh viex kawn simex aux hu tan heue." ⁷ Simiang Siyiex khaing meung raoma, pa hoik teei aux lih khaing nyiex ma keeing aux mai khaing haktiex dee ot ru aux mai pa tawx lox sijax mukheu ka aux ah nin, "Son doeh ru maix, Aux hoik tawx haktiex in ka son doeh ru maix, Nawh tak ploi kawncau Siyiex hu sivoe maix, maix tak yaox ti viex moeng tix kaux, son kawn simex aux khaing tan heue." ⁸ "Phan bun ang koe rhawm tix hawt khaix maix, maix hoik pon luan khaing lox pa tiextu aux, paw viex ngie kawn simex aux hu ka dee an heue." ⁹ Mawh kheu nan, kawncau nawh deuh taix tix greem ba Abraham mai tiextu ka grawng ceu inkix heue. ¹⁰ Mawh kheu koe kraung kuceu daux tawm taix kawncau Abraham, nawh teei kala-uk kao mu mai lih hu mai nawh kaoh hu ka meung Mesopotimia mai hoek ka veng Nakhaw heue. ¹¹ Nawh kieh kala-uk khankix grux ngawng tix plak praix veng dex rawm daux tan, plakbo pa mawh bawg yam hoek kin bun khankix rawm heue. ¹² Nawh rawg bwan ah nin, "Siyiex Cao aux Abraham eue, kieh krax pa keud aux grum naog daux in singaix, mai jhi krax pa caux rhawm Maix ka cao simiang aux Abraham liak. ¹³ Jhak heue, aux cung dex rawm daux mai cub kawn bunkrih pui veng an khankix hoek ti kin rawm heue. ¹⁴ Kieh kawn bun pa ah aux nin ka, tah singiien maix mai tawx aux nyaux ka, phan nawh ah nin, nyaux heue. Mai aux tak baox tawx kala-uk maix khankix nyaux ka, bun an tak mawh pa hoik tawx Maix Cao ka kawncau tix Icak. Ka ceu inkix, aux tak tawng Maix Cao jhi krax caux rhawm tix ka cao simiang aux Abraham heue." ¹⁵ Yam ang nawh nyang tien hoik rawg bwan, jhak heue, Rebekkax kawn bun Betoelax klawm singiien rawm piang klip tix mai hoek kin rawm, Betoelax mawh kawn simex Melakha moeng Nakhaw, pux Abraham heue. ¹⁶ Kawn bun an, kied sidaing mhawm grang mai nawh mawh kawn bunkrih pa ang sax pied sax pha simex tix bawg kawx, nawh lih hu ka rawm daux mai kin rawm daux singiien tix naog mai deeh viex hoek heue. ¹⁷ Kawncau an nied ti to hu ka kawn bun an ah nin, "Tawx aux nyaux rawm khaing singiien rawm maix ceeix heue." ¹⁸ Nawh ah nin, "Simiang eue, nyaux heue." Khaix an nawh nied ti tah singiien rawm khaing klip tix mai tawx nawh nyaux heue. ¹⁹ Khaix hoik tawx nawh kawncau an nyaux rawm nawh ah nin, "Aux tak kin tix tawx rawm ka kala-uk maix khankix, tom hoik sak nyaux kix heue." ²⁰ Khaix an nawh nied ti hu sau rawm ka daux dawng mai deeh to ti kin rawm, sonsang yaox kala-uk khankix ti nyaux khawmuik heue. ²¹ Kaw an, daox deng ka pa yuh kawn bun an mai yawg tix, nawh keud ti yaox, mawh ang mawh, pa yuh Simiang Siyiex grawng krax hoek nawh heue. ²² Khaix hoik nyaux kala-uk khankix rawm, nawh teei krim khri yhaok tix mu, pa koe tix plak Shekhe mai ble khri ra mu, pa koe kao Shekhe mai tawx ka nawh, ²³ ah nin, "Mawh maix kawn bun mawx, krai aux mhong liak, koe lawg dee sang peeng yix daux nyiex keeing maix lie?" ²⁴ Nawh deeh ah nin ka nawh, "Aux mawh kawn bun Betoelax kawn simex Milakha, pa keh khaing Nakhaw heue." ²⁵ Nawh baox ah nin ka nawh, "Nyiex yix hoik koe brex nghox mai pa ih tom kub mai lawg sang peeng pex kawx koe heue." ²⁶ Khaix an kawncau an gup kaing tix mai yaogyaw ka Siyiex heue. ²⁷ Nawh ah nin, "Kieh bwanson koe ka Siyiex Abraham, Nawh Cao ang sax mox krax pa caux rhawm tix mai krax pa rahsee tix ka simiang aux heue. Siyiex hoik thung aux hu ka nyiex pux simiang aux heue." ²⁸ Kawn bun an, to tix ing krai grawng inkix ka miex tix daux nyiex heue. ²⁹ Yam an puxke Rebekkax, pa mawh Laban to hu ka kaw simex an ka rawm daux heue. ³⁰ Yam yaox nawh krim khri mau mai ble khri khankix ka taix nan nawh mai yam hoik mhong nawh lox Rebekkax ah nin, "Simex an sikah ka aux heue." Laban tom hu ka kaw an, pa cung tau mai kala-uk hawt dex rawm daux heue. ³¹ Nawh ah nin, "Hoek heue, Maix mawh pui pa hoik pon bwanson khaing Simiang Siyiex, maix lai cung plak praix yuh ka mawx? aux hoik khre rien lawg son maix, khawm dee sang ot kala-uk khankix heue." ³² Khaix an kaw simex an laig daux nyiex, Laban tah an kala-uk mai tawx kala-uk sawm brex mai pa ih tang ceu, nawh teei ti tawx rawm sonsang khoek kix caong tix heue. ³³ Khaix an kix khan priex preem sivoe nawh, sonsang ih kix, viang mawh nan, nawh ah nin, "Aux ang nyang sawm, sivoe ang tix nyang hoik krai grawng kaing pa hoek ti heue." Nawh ah nin, "Krai grawng hoek maix heue." ³⁴ Nawh tom ah nin, "Aux mawh kawncau Abraham heue." ³⁵ "Simiang Siyiex hoik kied nawb bwan piang cao simiang aux tom nie mai nawh hoik mawh pui pa ting min, Siyiex hoik tawx yung mai tobrie, mau khri ka nawh, khawm kawncau simex kawncau bun khankix mai kala-uk mai la khankix haoh hun ka nawh heue." ³⁶ "Sara moeng cao simiang aux, keh kawn simex tix kaux son simiang aux, yam riex ju nawh, mai nawh hoik tawx can ceu pa koe tix khawmuik ka nawh heue. ³⁷ Cao simiang aux kieh aux tiextu ah nin, maix paw teei kawn bun pui haktiex Khanan mawh moeng son kawn simex aux, pa hoik ot aux, ³⁸ maix hu ka nyiex ma keeing aux, ka ru aux mai teei tix viex moeng tix kaux, son kawn simex aux heue. ³⁹ Aux ah nin ka cao simiang tix, aux lhat bun ang cu ti hawt khaix tix heue." ⁴⁰ Viang mawh nan, nawh ah nin ka aux, "Simiang Siyiex pa hoik hawt aux grawng lawng khaix Nawh, Nawh Cao tak ploi kawncau Siyiex ot mai maix, tom hoik pon yuh maix kaing yuh tix, maix tak yaox ti viex moeng tix kaux, son kawn simex aux, khaing daux doeh ru aux mai khaing daux nyiex ma keeing aux heue. ⁴¹ Maix tak luad luan khaing krax pa tiextu, yam hoek maix ka doeh ru aux, phan kix ang tawx kawn bun an ka maix, maix tak luan khaing lox pa tiextu aux heue. ⁴² Aux tom hoek ka rawm daux ah nin, Simiang Siyiex Cao Abraham eue, maix cox daux krax pa hu aux grum mhawm liak, ⁴³ jhak heue, aux cung hawt rawm daux tan mai aux yaox hoek bunkrih tix kin rawm mai aux ah nin ka nawh, tawx aux nyaux rawm khaing singiien rawm maix ceeix heue. ⁴⁴ Phan nawh deeh ah nin ka aux, nyaux heue. Mai aux tak kin rawm mai tawx kala-uk maix khankix nyaux ka kieh nawh mawh kawn bun pa hoik ciak Siyiex tix tawx son kawn simex cao simiang aux heue. ⁴⁵ Sivoe ang aux nyang tien hoik sikah grawng in, Rebekkax hoek khawm singiien rawm, piang klip tix mai lih hu plak rawm daux sonsang kin rawm heue. Aux tom ah nin ka nawh, tawx aux nyaux rawm heue. ⁴⁶ Nawh tah singiien rawm tix phaiphai, khaing klip tix ah nin, nyaux ka heue. Aux tak baox kin rawm mai tawx kala-uk maix khankix nyaux ka Mawh kheu nan, aux tom nyaux rawm mai nawh baox kin rawm mai tawx kala-uk aux khankix nyaux heue. ⁴⁷ Khaix an aux chawk ka nawh, mawh maix kawn bun mawx lie? mai nawh ah nin, aux mawh kawn bun Betoelax kawn simex Nakhaw, Nakhaw mawh pa keh khaing Milakha, mawh kheu nan, aux sau krim khri meeh ka nawh mai ble khankix ka taix nawh heue. ⁴⁸ Aux gup ngai tix mai krub ka Simiang Siyiex mai tawx krax yaogyaw ka Simiang Siyiex Abraham, pa hoik jhi aux yaox daux krax pa rahsee, sonsang teei aux kawn puxaik Abraham son kawn simex nawh heue. ⁴⁹ Yam in, phan maix koe krax pa caux rhawm mai pa sang yuh bwanson ka cao simiang aux, pon yuh ang pon yuh krai yam in, aux tak sang hu plak dawm phan ang mawh nan, plak gwiex heue." ⁵⁰ Khaix an Laban mai Betoelax pawk lox ah nin, "Kaing in mawh pa kaoh khaing Simiang Siyiex, yix ang chix krai ka maix mhawm ang mhawm heue. ⁵¹ Jhak heue, Rebekkax hoik koe sivoe ngai maix, teei nawh hu mai kieh nawh mawh moeng kawn simex cao simiang maix, awm lox pa hoik ah Simiang Siyiex heue." ⁵² Yam hoik mhong kawncau Abraham lox krai kix, nawh tom grux ngawng tix piang tiex mai krub ka Simiang Siyiex heue. ⁵³ Kawncau an, teei kraung mau kraung khri khawm kraung ceep khankix mai tawx ka Rebekkax, mai nawh tawx totaix pa ngawh pa mhawm ka prie nawh mai miex nawh heue. ⁵⁴ Kawncau an mai pao nawh, kix ih tau, nyaux tau mai peeng tan daux sawm an heue. Yam kaoh kix ponngawb caocao mai nawh ah nin, "Kieh aux deeh ing ka cao simiang tix liak." ⁵⁵ Prie nawh mai miex nawh ah nin, "Kieh kawn bun in ot mai yix kao ngaix ha, khaix an nawh pon ti hu heue." ⁵⁶ Nawh ah nin ka kix, "Paw nyang tiebtie ka aux liak, awm hoik yuh Siyiex krax hu aux grum mhawm, kieh aux deeh ing ka cao simiang tix heue." ⁵⁷ Kix baox ah nin, "Yix sang kok chawk ti yaox ka rhawm nawh heue." ⁵⁸ Kix kok Rebekkax ah nin ka nawh, "Sang hu maix mai pui in lie?" Mai nawh deeh ah nin, "Aux sang hu heue." ⁵⁹ Mawh kheu nan kix ploi Rebekkax tau mai cao pa priex nawh hu tau mai kawncau Abraham mai pui nawh heue. ⁶⁰ Kix nawb bwan ka Rebekkax ah nin ka nawh, "Kieh nan ex mawh miex ka pui kaing rheng mai kaing mheen, mai kieh ru maix pon kwang ka siviex veng pui pa koeng ka kix heue." ⁶¹ Khaix an Rebekkax mai kawn bun pa priex nawh khankix, yaog ti kaoh mai brug kala-uk mai hawt khaix kawncau an, yam an kawncau Abraham viex Rebekkax hu khaing kix heue. ⁶² Yam an Icak kaoh khaing Beralahieraw mai hu ot ka baoh Negep, caong ma seh heue. ⁶³ Icak lih hu plak praix daux kaung plak bo mai maong ti jhak, nawh yaox ka cub kala-uk pa hoek khankix heue. ⁶⁴ Rebekkax maong ti jhak mai yaox ka Icak, nawh lih khaing kala-uk brug tix heue. ⁶⁵ Nawh ah nin ka kawncau an, "Mawh pui mawx pa lailing daux kaung sonsang rieb ka ex lie?" Cao cau an deeh ah nin, "Nawh mawh simiang aux heue." Mawh kheu nan, nawh tom teei man tawb tix pheen mai tawb ngai tix ka heue. ⁶⁶ Cao cau an, krai grawng kuceu pa hoik yuh ti ka Icak heue. ⁶⁷ Khaix an Icak rieb nawh laig daux nyiex gox man miex tix Sara mai teei Rebekkax mawh moeng tix, kheu hoik mawh pa moh nawh ka heue. Mawh kheu nan, Icak deeh koe krax nyawm rhawm khaix yum miex tix heue.

¹ Abraham baox teei ti koe moeng tix kaux mai ceu kaux nawh mawh Keturax heue. ² Keturax baox keh Zimaran, Yokshan, Madan, Midiam Ishabet mai Shua heue. ³ Yokshan koe kawn simex Shebax mai Bedan. Kawn simex Bedan mawh Ashurim, Letushim mai Lumin khankix heue. ⁴ Kawn simex Midiam mawh Ephax, Epharax, Hanok, Abidax mai Eladax, pui inkix khawmuik mawh kawn praix Keturax heue. ⁵ Abraham tawx can pa koe tix khawmuik ka Icak heue. ⁶ Viang mawh nan, Abraham tawx totaix ka kawn simex, pa pon nawh khaing moeng iak tix, yam kawn im ju nawh, nawh ploi kix hu ot haktiex plak lih singaix dee singai khaing Icak heue. ⁷ In mawh baux singaix num im ju Abraham, nawh im ju tom hoek tix yieh atixgliah phwan num heue. ⁸ Abraham hoik kied kuad mai riex ju, nawh yum mhawm mhawm mai hu tau ka dah dee hu ru tix khankix heue. ⁹ Kawn nawh Icak mai Ishamelax sipaung nawh ka daux rang, Makhapelax ka veng Mamre, daux kaung Epharon kawn Zawrax ceu pui Hittix heue. ¹⁰ Kix sipaung Abraham hawt moeng nawh Sara tan, dee pa hoik liag Abraham khaing ceu pui Hittix heue. ¹¹ Khaix hoik yum Abraham, Siyiex deeh nawb bwan ka kawn nawh Icak. Icak ot dex ka Beralahieraw tan heue. ¹² Inkix mawh grawh grawng doeh ru Ishamelax kawn Abraham, pa pon nawh khaing Hagarax pui ceu Ejiptux. Hagarax mawh kawncau Sara mai keh kawn son Abraham heue. ¹³ Inkix mawh ceu kaux kawn simex Ishamelax tau mai ru kix, kawn simex ting Ishamelax mawh, Nabayok, khaix an Kedax, Adabelax, Mibatan, ¹⁴ Mishamax, Duma, Mashax, ¹⁵ Hadax, Temax, Yeturax, Naphishax mai Kedamax khankix heue. ¹⁶ Pui inkix mawh kawn Ishamelax, khawm ceu kaux kix mai meung dee ot kix mai lih mawh simiang kao ra kaux daux ru pui tix heue. ¹⁷ Yam hoik koe ju Ishamelax tix yieh tixngoe aliah num nawh yum mai hu tau ka dah dee hu ru tix khankix heue. ¹⁸ Cub ceu kawn praix nawh khankix ot sivoe ngai puxaik kawn keeing nawh ka veng Havilax tom hoek meung Asurix, pa koe plak lih singaix meung Ejiptux daux krax hu ka meung Asiriyax heue. ¹⁹ In mawh grawng doeh ru Icak, kawn simex Abraham, Abraham pon kawn simex tix Icak heue. ²⁰ Yam teei nawh moeng tix Rebekkax, Icak hoik naog ju tixpon num, Rebekkax mawh kawn bun Batoelax doeh ru Shurix, pa ot ka Padan-aram mai mawh pux Laban pa ot meung Shurix heue. ²¹ Yam in Icak rawg bwan ka Simiang Siyiex, mawh kheu moeng nawh mawh bun neh, Simiang Siyiex nghiet lox rawg bwan nawh mai moeng nawh Rebekkax koe kaux heue. ²² Kawn ngie pa koe daux vaig nawh, lulax thung theen paox tix mai nawh ah nin, "Grawng pa lih ti mawh ka aux mawh yuh ka mawx?" Mawh kheu nan nawh lih hu sonsang chawk cheng tix ka Siyiex heue. ²³ Siyiex ah nin ka nawh, "Ceu pui ra cub koe daux vaig maix, ceu pui ra kaux tak sang gwieh khaing tokaux maix, ceu pui tix cub tak sang ting riang rao khaing an tix cub mai kawn pa ting tak yaox ti yuh kawncau pa iak an heue." ²⁴ Yam hoik naog bawg yam, nawh keh kawn brawm heue. ²⁵ Kawn pa keh sivoe raoh nex nham, mawh kheu nie hauk awm kraung ceep piang nawh, kix tom kok ceu kaux nawh mawh Esaw heue. ²⁶ Khaix an pux nawh deeh keh mai giex ka loek caong Esaw, mawh kheu nan, kix kok ceu kaux nawh mawh Yakop, yam keh kawn an kiex, Icak hoik koe tixgliah num heue. ²⁷ Mawh kheu nan, kawn nyawm an kiex haok hwan ting sipie, Esaw lih mawh pui leue tiag mai pui pa yuh ti ih kaing ma, viang mawh nan, Yakop mawh pui pa awn rhawm tix kaux, pa ot daux nyiex gox man heue. ²⁸ Icak moh ka Esaw, kheu yaox nawh ti ih nex totiag pa tawx nawh, viang mawh nan, Rebekkax moh ka Yakop heue. ²⁹ Tix singaix, Yakop yuh priex mai ngaik rawm ceem, Esaw kaoh khaing daux tiag khawm taug mao tix heue. ³⁰ Esaw ah nin ka Yakop, "Mawh kheu sidaing taug mao aux, tawx aux ih rawm ceem raoh pa ngaik maix liak." Mawh kheu nan, ceu kaux nawh lih ti mawh Edom heue. ³¹ Yakop ah nin, "Maix coh ara kawn Ai maix tawx ka aux in singaix heue." ³² Esaw ah nin, "Aux dex sang yum mai aux tak sang pon rao ceu patix ka ara kawn Ai aux an lie?" ³³ Khaix an Yakop deeh ah nin, "Tiextu maix ka aux daux in singaix." Mawh kheu nan mai nawh coh tix tawx ara pa caw kawn Ai tix pon ka Yakop heue. ³⁴ Khaix an Yakop tawx Esaw ih blah mai rawm ceem raoh, khaix hoik ih nyaux nawh mai nawh lih hu. Esaw ang nab yam ka ara kawn Ai tix heue.

¹ Khaix hoik koe krax sibhawm praix baux ju Abraham tix bawg, khaix an krax sibhawm praix baox koe daux meung an, Icak hu veng Gerax ka Abimaliet pa mawh Simiang Philitix heue. ² Yam an Simiang Siyiex deeh lih bleeh ka nawh ah nin, "Paw lih hu plak meung Ejiptux, ot ka haktiex pa sang krai Aux ka maix heue. ³ Ot ka daux haktiex in, Aux tak ot tau mai maix mai nawb bwan ka maix, Aux tak tawx haktiex in ka maix mai ka doeh ru maix, Aux tak sang kieh gumlox sijax mukheu pa hoik tiextu Aux ka keeing maix Abraham grum naog heue. ⁴ Aux tak kieh doeh ru maix haoh hun awm simuing ka daux raoma. Aux tak sang tawx doeh ru maix cie haktiex in khawmuik, kheu jao doeh ru maix, can ceu pui piang haktiex in, tak sang pon bwanson ka heue. ⁵ Mawh kheu Abraham hoik cu nghiet ka lox Aux mai priex lox tawm jhawm krai Aux, lox lai beenli Aux mai lox tat jhawm prawng Aux heue. ⁶ Mawh kheu nan, Icak ot ka daux veng Gerax heue. ⁷ Pui pa ot baoh haktiex an chawk ka grawng moeng nawh, nawh ah nin, "Nawh mawh nan aux heue." Mawh kheu lhat nawh mai ang pon krai mawh moeng tix, kheu mhawm grang Rebekkax, nawh lhat pui baoh an pah tix heue. ⁸ Khaix hoik rheung ot kix tan, simiang Abimaliet meung Philitix, jhak plak praix khaing daux siviex iak mai nawh yaox Icak klieh tau mai moeng tix Rebekkax heue. ⁹ Simiang Abimaliet kok ka Icak ah nin, "Bun an hoik sidawng mawh moeng maix, yuh ka mawh maix lai ah mawh nan tix?" Icak deeh ah nin ka nawh, "Phan aux ang ah yuh nin aux lhat tix yum kheu jao nawh heue." ¹⁰ Simiang Abimaliet deeh ah nin, "Maix lai yuh ceu in ka yix yuh ka mawx? Phan pui tix kaux kaux, ot tau mai moeng maix, maix tak sang plee krax lud piang yix lie? ¹¹ Mawh kheu nan, simiang Abimaliet tawx lox hu ka pui ceu tix khawmuik ah nin, "Pui mawx ang ah phan tieh ka pui in mai moeng nawh tak yaox ti yum heue." ¹² Icak ruat simie ka haktiex an mai nawh yaox ti vawg plix nghox daux num an tix yieh son, Simiang Siyiex nawb bwan ka nawh heue. ¹³ Nawh jah tix haok hwan ting lhaong mai nied ti magmi ka kraung khrai kuceu heue. ¹⁴ Nawh koe yung, tobrie mai kawncau mau soi tom nie, mawh kheu nan ceu pui Philitix khankix boh rhawm ka nawh heue. ¹⁵ Pui Philitix deeh ceu rawm daux khankix pa hoik kaong kawncau keeing nawh daux singaix ju Abraham mai deeh ceu deeh kheem tiex naog ka heue. ¹⁶ Simiang Abimaliet ah nin ka Icak, "Lih hu dee singai khaing yix liak, mawh kheu hoik nie ting sibrawm maix khaing yix heue." ¹⁷ Mawh kheu nan Icak lih hu khaing tan mai nawh sum nyiex gox man ka daux lung baoh veng Gerax mai ot tan heue. ¹⁸ Yam an Icak baox kaong rawm daux pa hoik kaong siliex keeing nawh Abraham, pa hoik ceu pui Philitix khaix yum keeing nawh mai nawh deeh kok ceu kaux rawm daux an khankix awm pa hoik kok keeing nawh heue. ¹⁹ Viang mawh nan, yam kaong kawncau Icak khankix rawm daux daux lung mai kix yaox ka dee lih rawm keut tan heue. ²⁰ Cao liang tobrie veng Gerax mai cao liang tobrie Icak khankix, simah ka paox tix ah nin, "Rawm daux inkix mawh cie yix." Mawh kheu simah kix mai cub nawh tan, nawh tom kok ceu kaux rawm daux an mawh Etiet heue. ²¹ Khaix an kix baox kaong rawm daux pa khraox, kix baox simah ka grawng rawm daux an, mawh kheu nan nawh kok ceu kaux mawh Sitanax heue. ²² Nawh deeh gah ti khaing tan mai baox kaong rawm daux tang dah, kix ang lai yaox ti simah ka grawng an, mawh kheu nan nawh tom kok ceu kaux mawh Yehobok, ah nin, "Yam in Simiang Siyiex hoik tawx dee ot son ex mai ex tak haok hwan ka daux haktiex in heue." ²³ Khaix an nawh lih hu khaing tan mai hu ot ka Berashebax heue. ²⁴ Simiang Siyiex lih bleeh ka nawh daux bo an ah nin, "Aux mawh Siyiex keeing maix Abraham, paw koe krax lhat graung, grawh grawng nawh, Aux ot tau mai maix mai nawb bwan ka maix mai kieh ru maix pre haoh hun, kheu jao kawncau Aux Abraham heue." ²⁵ Mawh kheu nan, nawh sum khu dee tan tix mu ka dee an mai kok ka ceu kaux Simiang Siyiex mai nawh sum nyiex gox man tan, kawncau Icak khankix deeh kaong rawm daux heue. ²⁶ Khaix an simiang Abimaliet kaoh khaing veng Gerax mai nawh viex paox grawm tix Ahuziet mai cao kaing naing tix Phikolax hoek ka Icak heue. ²⁷ Icak ah nin ka kix, "Mawh kheu patix maix deeh hoek ka aux, maix hoik koeng ka aux mai grheu aux hu dee singai khaing tix ang mawh lie?" ²⁸ Kix deeh ah nin, "Yix hoik tawng ot Simiang Siyiex tau mai maix, mawh kheu nan kieh ex yuh krax pa kaux sijax sinax paox tix mai kieh ex yuh sijax mukheu tau mai maix heue." ²⁹ "Sonsang ang maix lai tuktiak ka yix, awm ang yix teeh ka maix mai ang yuh tidtix ka maix mai ploi maix hu ka daux pa nhim. Mawh kheu mawh maix pa pon bwanson khaing Siyiex heue." ³⁰ Mawh kheu nan, Icak yuh krax khan kheu kix ka priex mai kix ih tau, nyaux tau tan heue. ³¹ Kix kaoh plak ponngawb caocao mai ah lox pa kaux sijax ka paox tix, Icak deeh ploi kix ing mai kix ing khaing nawh ka daux krax pa nhim heue. ³² Ka daux singaix an, kawncau Icak hoek mai krai nawh mhong grawng hoik kaong kix rawm daux ah nin ka nawh, "Ex hoik yaox rawm heue." ³³ Nawh kok ceu kaux rawm daux an mawh Shibax, mawh kheu nan, ceu kaux veng an tom mawh Berashebax tom in singaix heue. ³⁴ Yam koe ju Esaw tixpon num nawh teei ti moeng Berix, pa kaux Yudi, pui ceu Hittix mai kawn bun Elon pa mawh Bashemiet ceu pui Hittix heue. ³⁵ Kiex hoik kieh Icak mai Rebekkax laux rhawm ka heue.

¹ Khaix an Icak hoik riex ju mai ngai nawh hoik vuvi ang lai chix yaox ka, nawh kok ka kawn Ai tix Esaw ah nin ka nawh, "Kawn simex eue, " nawh pawk lox ah nin, "Aux ot tin heue." ² Nawh ah nin, "Jhak heue, aux hoik kuad mai aux ang lai tawng singaix pa sang yum tix heue." ³ "Yam in, teei kraung naing maix, pa mawh ak mai te, lih hu daux tiag mai yuh tom pon sawg ti viex nex totiag son aux heue." ⁴ "Khre taux nex pa jiet nyawm, pa moh aux ti ih mai viex hoek ka aux, aux tak ih mai aux tak nawb bwan piang maix sivoe sang yum aux heue." ⁵ Rebekkax jawm tix nghiet ka lox krai Icak ka kawn simex nawh Esaw. Yam lih hu Esaw ka daux tiag sonsang viex nex totiag hoek, ⁶ Rebekkax krai ah nin ka kawn simex tix Yakop, "Aux hoik mhong lox krai keeing maix ka puxke maix Esaw yuh nin, ⁷ �Viex nex totiag mai khre priex nyawm son aux, aux tak ih mai nawb bwan piang maix, plak sivoe ngai Simiang Siyiex sivoe yum tix heue.� ⁸ Mawh kheu nan yam in, kawn simex aux eue, nghiet ka lox aux awm pa nhie aux maix yuh heue. ⁹ Yam in hu ka daux phung pex mai viex kawn peh ra mu hoek ka aux, aux tak khre priex nyawm son keeing maix, awm pa moh nawh ti ih, ¹⁰ mai viex keeing maix ih an, sonsang nawb nawh bwan piang maix sivoe sang yum tix heue." ¹¹ Yakop deeh ah nin ka miex tix Rebekkax, "Jhak heue, puxke aux Esaw mawh pa koe hauk mai aux mawh pui plang nex ang mawh lie? ¹² Keeing aux tee rien ti pu pi aux mai nawh tak keud aux awm pui pie lhen, aux lhat ti pon krax pa jhax lawg mai ang pon bwanson heue." ¹³ Miex nawh deeh ah nin ka nawh, "Kieh krax pa jhax lawg ka maix an hoek piang aux, kawn simex aux eue, nghiet ka lox krai aux khaing, hu teei pa ah aux heue." ¹⁴ Nawh lih hu mai teei ti tawx ceu an ka miex tix, mai miex nawh khre priex pa nyawm pa moh keeing kix ka heue. ¹⁵ Khaix an Rebekkax teei kraung ceep pa mhawm kawn Ai tix Esaw pa koe daux nyiex mai nawh kieh kawn simex iak tix Yakop ceep ka, ¹⁶ nawh lhop hak pex piang taix nawh mai dee plang ngawg nawh, ¹⁷ mai nawh tawx priex pa nyawm mai blah pa hoik cox khre tix, ka daux taix kawn simex nawh Yakop heue. ¹⁸ Mawh kheu nan, Yakop hu ka keeing tix ah nin, "Keeing eue, " mai nawh pawk ah nin, "Aux ot tin, kawn simex eue, mawh maix pa mawx?" ¹⁹ Yakop ah nin ka keeing tix, "Aux mawh kawn Ai maix Esaw heue. Aux hoik khre, awm pa hoik krai maix, kaoh ih nex totiag pa viex aux mai maix nawb bwan piang aux heue." ²⁰ Viang mawh nan, Icak ah nin ka kawn simex tix, "Kawn eue, maix phex phai yaox inkix yuh ka mawx?" Nawh pawk ah nin, "Mawh kheu Simiang Siyiex maix, pa hoik viex hoek ka aux heue." ²¹ Khaix an Icak ah nin ka Yakop, "Hoek dex tin, aux sang pu pi ti yaox mawh ang mawh kawn Ai aux Esaw heue." ²² Mawh kheu nan, Yakop hu dex keeing tix Icak mai nawh sibeet ti yaox nawh ah nin, "Lox maix tom mawh lox Yakop mai taix maix tom mawh taix Esaw heue." ²³ Nawh ang lai tawng ka nawh, kheu taix nawh jiet awm hauk taix puxke nawh Esaw, mawh kheu nan, nawh nawb bwan piang nawh heue. ²⁴ Khaix an nawh deeh ah nin, "Rug mawh maix kawn Ai aux Esaw lie?" Nawh pawk ah nin, "Mawh aux heue." ²⁵ Nawh deeh ah nin, "Viex nex an hoek ka aux, aux tak ih nex totiag cie kawn simex aux, mai aux tak nawb bwan ka maix heue." Mawh kheu nan nawh viex nex hoek ka nawh mai nawh ih ka an mai ka rawm plix siiet kawx nyaux ka heue. ²⁶ Khaix an keeing nawh Icak ah nin ka nawh, "Kawn eue, hoek dex aux yam in mai ngheet ka aux heue." ²⁷ Yakop hoek dex mai ngheet ka nawh, nawh mhong jhawm sioe kraung ceep nawh mai nawb bwan ah nin, "Jhawm sioe kraung ceep kawn simex aux awm sioe pa kaoh khaing daux kaung pa hoik nawb Siyiex bwan ka heue. ²⁸ Kieh Siyiex tawx rawm ciex raoma mai bee haktiex mai nghox koi mai rawm plix siiet tom nie ka maix heue. ²⁹ Kieh pui khankix yuh kaing son maix mai kieh ceu pui khawmuik grux ngawng ka maix heue. Kieh maix mawh cao kaing piang puxaik kawn keeing tix mai kieh kawn simex miex maix khankix, grux ngawng ka maix heue. Can pui pa jhax lawg ka maix, kieh nawh yaox krax pa jhax lawg mai can pui pa nawb bwan ka maix, kieh pon bwanson heue." ³⁰ Khaix hoik nawb Icak bwan ka Yakop dom mawx dom an mai yam tak khraox lih hu Yakop khaing keeing tix Icak, puxke nawh Esaw hoek khaing leue tix tiag heue. ³¹ Nawh khre priex pa nyawm mai viex hoek ka keeing tix ah nin, "Keeing eue, kaoh ih nex totiag pa pon kawn simex maix, sonsang nawb maix bwan piang aux heue. ³² Keeing nawh Icak ah nin ka nawh, "Mawh maix pa mawx?" Nawh ah nin, "Aux mawh kawn Ai maix Esaw heue." ³³ Khaix an Icak yaoh siyaung ka tete mai nawh ah nin, "Mawh pui mawx lie? kaw pa hu leue totiag mai viex nex hoek ka aux koe dee mawx?, aux hoik ih cie nawh khawmuik, sivoe ang maix nyang hoek, aux hoik nawb bwan piang nawh mai nawh tak pon bwanson tete heue." ³⁴ Yam hoik mhong Esaw lox keeing tix, nawh riag yo mai yiiem sigrien sigre mai nawh ah nin ka keeing tix, "Keeing eue, nawb bwan ka aux liak, piang aux kawx nawb bwan liak" ³⁵ Viang mawh nan nawh ah nin, "Pux maix hoek pie lhen mai hoik teei bwanson pa nawb aux hu heue." ³⁶ Esaw ah nin, "Ang nawh hoik mawh pa kok ceu kaux mawh Yakop lie? mawh kheu nawh hoik pie lhen ka aux ra bawg, yam jah nawh hoik teei ti cie ara kawn Ai mai jhak heue, yam in nawh baox teei bwanson cie aux", nawh baox ah nin, "Maix ang lai deuh bwanson tix ceuceu son aux lie?" ³⁷ Icak deeh pawk lox ah nin ka Esaw, "Aux hoik kieh nawh mawh cao simiang maix, aux hoik kieh puxaik nawh khankix mawh kawncau nawh, aux hoik kieh nawh grum naog ka nghox koi mai rawm plix siiet, kawn eue, aux kawn sang chix yuh ceu patix son maix lie?" ³⁸ Esaw ah nin ka keeing tix, "Keeing eue, bwanson ang lai koe ka maix tix ceu kawx lie? nawb bwan ka aux liak, baox nawb bwan ka aux" Esaw riag yo lox tix mai yiiem heue. ³⁹ Khaix an keeing nawh Icak pawk lox nawh ah nin, "Jhak heue, dee ot maix tak sang mawh dee koe bee haktiex mai dee koe rawm ciex khaing raoma heue. ⁴⁰ Maix tak eei ju tix ka vaid mai tak yuh kaing son pux tix, yam hoik pon tieh feen maix ka nawh maix tak pon luan khaing pa kwang nawh heue." ⁴¹ Esaw koeng ka Yakop jao hoik nawb keeing kix bwan ka nawh, Esaw ah nin daux rhawm tix, "Singaix pa laux rhawm aux, jao keeing tix hoik dex, khaix an aux tak sang pah ka pux tix Yakop heue." ⁴² Mawh kheu nan Rebekkax hoik mhong ka lox sikah kawn Ai tix mai nawh kok ka kawn simex iak tix Yakop ah nin ka nawh, "Puxke maix Esaw sang yuh krax fah rhawm tix sonsang pah maix yum heue." ⁴³ "Yam in kawn simex aux eue, nghiet ka lox krai aux ha, kaoh mai to hu ka prie aux Laban pa ot ka daux veng Haran sonsang glawd maix, ⁴⁴ ot tau mai nawh ti vud ti cu, glang ang krax song rhawm puxke maix nyang grai heue. ⁴⁵ Tom sidah grai krax song rhawm nawh mai yam hoik piawm nawh pa yuh maix ka nawh, khaix an, aux tak deeh tawm maix hoek khaing tan. Aux tak sang kieh pax khawm ra grai khaing ngai tix ka daux tix ngaix ngie yuh ka mawx?" ⁴⁶ Rebekkax ah nin ka Icak, "Aux hoik kied laux rhawm jao kawn bun Hetax khankix. Phan Yakop baox teei ti moeng bun Hetax, daux haktiex in tix kaux kaux, krax im ju aux chix koe bwanson yuh ka mawx?"

¹ Khaix an Icak kok ka Yakop mai nawb bwan piang nawh ah nin, "Maix tak ang pon teei ti moeng ka bun ceu pui Khanan heue. ² Kaoh, hu ka haktiex Padan-aram nyiex Betoelax pa mawh keeing ka miex maix, teei maix moeng kawn bun Laban pre miex maix tix kaux kaux heue. ³ Kieh Siyiex pa ting sibrawm nawb bwan ka maix mai kieh maix haok hwan mai pre haoh hun mai Kieh maix mawh ceu pui ting daux ceu pui khawmuik. ⁴ Kieh Nawh Cao tawx bwanson Abraham ka maix mai ka ru maix, sonsang yaox maix tix pon sinngao ka haktiex dee hoik mawh maix nyo sinie pa hoik tawx Siyiex ka Abraham heue." ⁵ Mawh kheu nan, Icak ploi Yakop hu dee singai mai nawh hu ka haktiex Padan-aram ka Laban kawn simex Betoelax ceu pui Shurix. Laban mawh prie Rebekkax miex Yakop mai Esaw heue. ⁶ Esaw hoik yaox Icak nawb bwan ka Yakop mai ploi nawh hu ka Padan-aram, sonsang teei nawh ti koe moeng tan mai yam nawb Icak bwan ka Yakop mai tawm lox ka nawh sonsang ang nawh teei ti moeng ka bun Khanan khankix heue. ⁷ Yakop hoik cu nghiet ka lox miex keeing tix mai lih hu ka haktiex Padan-aram heue. ⁸ Esaw tawng ka ang keeing kix Icak khaw rhawm ka bun Khanan khankix heue. ⁹ Mawh kheu nan, Esaw lih hu ka Ishamelax mai teei ti moeng ka Mahalax pux Nabayok kawn bun Ishamelax, Ishamelax mawh kawn simex Abraham heue. ¹⁰ Yakop lih hu khaing Bereshabax mai hu plak meung Haran heue. ¹¹ Nawh hoek tix dah mai nawh ot tan leeing sawm, mawh kheu hoik klip singaix heue. Nawh teei simaox tix lon khaing tan, sonsang gaong yam it tix heue. ¹² Nawh camaox, jhak heue, bawng tix mu jung ti tom cux toh ti ka raoma, kawncau Siyiex khankix lih lih haok haok piang bawng an heue. ¹³ Jhak heue, Simiang Siyiex cung piang toh bawng dee lhaong ah nin, "Aux mawh Simiang Siyiex keeing maix Abraham mai Siyiex Icak, haktiex pa it maix in, Aux tak tawx ka maix, khawm doeh ru maix heue. ¹⁴ "Doeh ru maix tak nie awm phawng tiex mai to tah hu khawm pon caong daog raoma, jah ka plak lih singaix, plak klip singaix, plak caong ma seh, tom hoek ka plak caong ma laong, tokaux maix khawm doeh ru maix khankix, tak lih mawh nyiex ma pa pon bwanson piang haktiex in heue. ¹⁵ Jhak heue, Aux ot tau mai priex ka maix ka can dee hu maix kudah dee mai deeh viex maix hoek ka haktiex in, mawh kheu Aux tak ang tik vud ka maix, tom sidah hoik yuh Aux, can ceu pa hoik krai Aux ka maix heue." ¹⁶ Khaix an Yakop siduad khaing it tix ah nin, "Simiang Siyiex ot ka dee in tete, mai aux ang tawng ka heue." ¹⁷ Nawh lhat graung ah nin, "Dee in mawh dee koe krax lhat graung ka miex ding, ka dee in ang awm tang dah, mawh nyiex bwan Siyiex mai siviex raoma heue." ¹⁸ Yakop kaoh caocao yam ponngawb mai teei simaox gaong nawh kaing tix mai sum mawh rong mai groi bee ka toh rong an heue. ¹⁹ Nawh kok ceu kaux dee an mawh Betelax, viang mawh nan, ceu kaux veng an hoik dawg mawh Luza heue. ²⁰ Yam an Yakop yuh sijax mukheu ah nin, "Phan Siyiex ot tau mai aux, Nawh tak priex aux ka can dee hu aux kudah mai tawx pa ih sonsang ih aux mai kraung ceep pa sang ceep aux ka, ²¹ mawh kheu nan aux tak deeh hoek ka nyiex keeing aux ka daux pa nhim mhawm mhawm, Simiang Siyiex mawh Siyiex aux. ²² Simaox sum aux pa mawh rong in, tak mawh nyiex bwan Siyiex, can ceu pa tawx Maix ka aux khawmuik aux tak deeh tan kao son tix son Maix heue."

¹ Yam an Yakop hu krax mai hoek ka haktiex dee ot ceu pui plak lih singaix heue. ² Nawh jhak mai yaox ka rawm daux tix mu daux tiag tan, koe phung yung loe cub pa it praok rawm daux heue. Yung khankix nyaux rawm plak praix tan, piang moing rawm daux an, koe simaox ting tix mu, ³ cao liang yung khankix khrawm yung cie kix tan mai gah simaox ting an khaing moing rawm daux, khaix hoik kin kix ti tawx yung khankix nyaux rawm, kix deeh tawb moing rawm daux an ka simaox heue. ⁴ Yakop chawk ah nin ka kix, "Puxaik khankix eue, kaoh pex khaing dee mawx?" Kix deeh ah nin, "Yix kaoh khaing veng Haran heue." ⁵ Nawh baox chawk ah nin ka kix, "Tawng pex Laban, kawn simex Nakhaw lie?" Kix ah nin, "Yix tawng nawh heue." ⁶ Nawh baox chawk kix ah nin, "Nyawm ot nawh lie?" Mai kix deeh ah nin, "Nawh nyawm ot, jhak heue, kawn bun nawh Rakhelax hoek tau mai phung yung nawh heue." ⁷ Nawh ah nin, "Yam in kawn mawh yam jung singaix, ang nyang mawh bawg yam khrawm ka tobrie, tawx yung nyaux rawm mai deeh hu liang kix ha." ⁸ Viang mawh nan kix ah nin, "Yix ang nyang pon tawx phung yung nyaux rawm sivoe ang tix nyang gah simaox khaing moing rawm daux heue." ⁹ Yam kawn sikah nawh tau mai kix, Rakhelax hoek tau mai phung yung keeing nawh, kheu mawh nawh cao liang yung heue. ¹⁰ Yam yaox Yakop ka Rakhelax kawn bun Laban, pre miex nawh, Yakop gah simaox khaing rawm daux an mai nawh kin ti tawx phung yung Laban, pre miex nawh nyaux rawm heue. ¹¹ Khaix an Yakop ngheet ka Rakhelax nawh yo lox tix mai yiiem heue. ¹² Yakop krai ka mawh tix paox nyiex ma keeing nawh mai mawh kawn simex Rebekkax, mawh kheu nan, Rakhelax to ti ing krai ka keeing tix heue. ¹³ Yam mhong Laban hoek kawn nan tix Yakop, nawh to ti hu rieb nawh, kawm nawh mai ngheet nawh, kok nawh ing ka nyiex tix heue. Yakop krai grawng tix khawmuik ka Laban heue. ¹⁴ Laban ah nin ka nawh, "Maix mawh si-ang aux mai nex nham aux." Mai nawh ot tau mai Laban tix khix heue. ¹⁵ Khaix an Laban ah nin ka Yakop, "Mawh kheu mawh maix kawn pha aux maix ang chix pon ti yuh kaing giex going. Krai ngawh riang pa simie maix tix pon ka aux miex ding?" ¹⁶ Laban koe kawn bun ra kaux, Ceu kaux kawn Yex mawh Leax mai ceu kaux kawn I mawh Rakhelax heue. ¹⁷ Leax awn kawn ngai, viang mawh nan, Rakhelax kied mhawm grang mai nyawm tix jhak heue. ¹⁸ Yakop moh ka Rakhelax mai nawh ah nin, "Aux tak yuh kaing son maix aliah num sonsang yaox aux ti cie kawn bun iak maix Rakhelax heue." ¹⁹ Laban ah nin, "Nie mhawm sonsang tawx aux ka maix, khaing tawx aux ka pui tang kaux, ot tau mai aux heue." ²⁰ Mawh kheu nan, Yakop yuh kaing aliah num, sonsang pon ka Rakhelax. Kheu kied moh nawh Rakhelax, nawh keud singaix sawm an awm ngie tivud khaing heue. ²¹ Khaix an Yakop ah nin ka Laban, "Mawh kheu hoik naog singaix, tawx moeng aux ka aux, sonsang ot tau aux mai nawh heue." ²² Laban kraix khrawm pui baoh an mai yuh krax khan kheu heue. ²³ Yam hoek plak bo, Laban viex kawn bun tix Leax hoek ka Yakop mai laig ot tau mai nawh heue. ²⁴ Laban ap kawncau bun tix Zilapa ka Leax sonsang kia ngien ka nawh heue. ²⁵ Yam hoek plak ponngawb, jhak heue, bun an mawh Leax mai Yakop ah nin ka Laban, "Kheu maix lai yuh nin ka aux? Aux hoik yuh kaing son maix, jao Rakhelax ang mawh lie? Mawh kheu jao patix maix pie lhen ka aux lie?" ²⁶ Laban ah nin, "Daux haktiex yix tin, yix ang sax koe been ti tawx pux koe mex sivoe puxke tix heue." ²⁷ "Pau tom naog aliah singaix ha, khaix hoik baox yuh maix kaing son aux aliah num, yix tak deeh tawx Rakhelax ka maix heue." ²⁸ Yakop rieb awm pa ah kix, yam naog aliah singaix, Laban baox tawx kawn bun tix Rakhelax sonsang mawh moeng nawh heue. ²⁹ Laban ap kawncau bun tix Bilaha ka Rakhelax, sonsang kia ngien ka nawh heue. ³⁰ Yakop ot tau mai Rakhelax mai nawh moh Rakhelax lheu khaing Leax mai nawh baox yuh kaing son Laban aliah num heue. ³¹ Yam yaox Simiang Siyiex koeng nawh ka Leax, Nawh Cao kieh nawh koe kawn mai kieh Rakhelax neh heue. ³² Leax koe kaux mai keh kawn simex tix kaux mai kok ceu kaux nawh mawh Rubin mai Leax ah nin, "Simiang Siyiex hoik yaox ka krax kha aux rhawm tix tete, mawh kheu nan mex aux tak moh ka aux phao heue." ³³ Nawh baox koe kaux mai keh kawn simex ah nin, "Mawh kheu mhong Simiang Siyiex krax pa koeng nawh ka aux, Nawh Cao baox tawx kawn simex in ka aux, " mai kok ceu kaux nawh mawh Simion heue. ³⁴ Nawh baox koe kaux mai keh kawn simex tix kaux ah nin, "Mawh kheu hoik keh aux kawn simex loe kaux son nawh, yam in, mex aux tak nie lheu moh ka aux phao, " kiex tom kok ceu kaux nawh mawh Lewix heue. ³⁵ Nawh baox koe kaux mai keh kawn simex tix kaux ah nin, "Yam in aux tak sang yaogyaw ka Simiang Siyiex, " mawh kheu nan, kiex tom kok ceu kaux nawh mawh Yudax. Khaix an kiex ang lai koe kawn heue.

¹ Yam yaox Rakhelax ka ang ti koe kawn son Yakop tix kaux kawx, Rakhelax boh rhawm ka puxke tix mai nawh ah nin ka Yakop, "Tawx aux koe kawn praix, phan ang mawh nan, deuk ngie yum aux khaing heue." ² Yakop song rhawm ka Rakhelax mai nawh ah nin, "Khex mawh aux tang tokaux Siyiex, pa tawx maix ang chix koe kawn lie?" ³ Khaix an nawh ah nin, "Maix laig ot mai kawncau aux, Bilaha mai nawh tak koe kawn piang ngawng aux mai aux tak yaox ti cie kawn praix khaing nawh heue." ⁴ Khaix an nawh tawx Yakop ka kawncau tix Bilaha awm moeng mai kieh nawh laig ot mai nawh heue. ⁵ Bilaha koe kaux mai keh kawn simex tix kaux son Yakop heue. ⁶ Khaix an Rakhelax ah nin, "Siyiex hoik prawng ca ka plak aux mai hoik mhong ka lox aux mai tawx kawn simex tix kaux ka aux, " mawh kheu nan, kiex tom kok ceu kaux nawh mawh Dan heue. ⁷ Kawncau Rakhelax Bilaha baox koe kaux mai keh kawn simex ra kaux tix kaux son Yakop heue. ⁸ Khaix an Rakhelax ah nin, "Aux hoik silah tix blok paox tix mai puxke aux mai aux hoik pex ka, " mawh kheu nan, kiex tom kok ceu kaux nawh mawh Napthalix heue. ⁹ Yam yaox Leax ang ti lai koe kawn, nawh tawx Yakop ka kawncau tix Zilapax mawh moeng nawh heue. ¹⁰ Kawncau Leax pa mawh Zilapax keh kawn simex tix kaux son Yakop heue. ¹¹ Leax ah nin, "Aux hoik mhawm son, " mawh kheu nan, kiex kok ceu kaux nawh mawh Gat heue. ¹² Kawncau Leax, Zilapax baox keh kawn simex ra kaux tix kaux, son Yakop heue. ¹³ Leax ah nin, "Aux kied gaux rhawm! mawh kheu kawn bun khankix, tak kok aux mawh pa koe bwanson, " mawh kheu nan, kiex tom kok ceu kaux nawh mawh Asha heue. ¹⁴ Yam hoek bawg yam vawg nghox ca Rubin hu ka daux kaung, nawh yaox plix makkheu niex mai viex ing ka miex tix Leax heue. Khaix an Rakhelax tom ah nin ka Leax, tawx plix makkheu niex pa viex kawn maix tiblah ka aux liak. ¹⁵ Kiex deeh ah nin ka nawh, "Pa teei maix mex aux hu keud maix mawh grawng pa kawn iak lie? mawh sang baox teei maix plix makkheu niex, khaing kawn simex aux lie?" Rakhelax tom ah nin, "Phan maix tawx aux ih plix in, aux tak tawx mex tix it tau mai maix daux bo in heue." ¹⁶ Yam hoek Yakop khaing daux kaung plak bo, Leax lih hu plak praix mai rieb nawh, ah nin, "Maix caw ti laig ot mai aux, mawh kheu aux hoik vai maix ka plix makkheu niex, pa viex kawn simex aux." Daux bo an, nawh it mai kiex heue. ¹⁷ Siyiex nghiet ka lox Leax mai nawh baox koe kaux mai keh kawn simex phwan kaux tix kaux son Yakop heue. ¹⁸ Leax ah nin, "Mawh kheu hoik tawx aux, kawncau bun tix ka mex tix, Siyiex hoik tawx ngawh vai aux, " mai kiex tom kok ceu kaux mawh Issakha heue. ¹⁹ Khaix an Leax baox koe kaux mai keh kawn simex liah kaux tix kaux, son Yakop heue. ²⁰ Leax ah nin, "Siyiex hoik tawx totaix pa mhawm ka aux, yam in mex aux, tak ot tau mai aux jheung jheung, kheu hoik keh aux kawn simex liah kaux son nawh, " mawh kheu nan, kiex tom kok ceu kaux mawh Zebulun heue. ²¹ Khaix an nawh baox keh kawn bun tix kaux mai kok ceu kaux mawh Dina heue. ²² Siyiex deeh doh keud ka Rakhelax mai Siyiex nghiet ka lox nawh mai baox tawx nawh koe kawn heue. ²³ Nawh koe kaux mai keh kawn simex tix kaux. Nawh ah nin, "Siyiex hoik teei krax pa salao aux hu." ²⁴ Mawh kheu nan, kiex tom kok ceu kaux nawh mawh Yosiep ah nin, "Kieh Siyiex baox tawx kawn simex tang kaux ka aux heue." ²⁵ Khaix hoik keh Rakhelax ka Yosiep, Yakop ah nin ka Laban, "Ploi aux hu, sonsang deeh aux ka haktiex dee ot tix heue. ²⁶ Tawx moeng aux mai kawn aux khankix pa hoik yuh aux tix tawx kaing ka maix son kix mai kieh aux lih hu, mawh kheu hoik tawng maix ka kaing pa yuh aux son maix heue." ²⁷ Laban ah nin ka nawh, "Kieh mawh awm pa koe rhawm maix, aux hoik tawng Simiang Siyiex nawb bwan piang aux jao maix." ²⁸ Khaix an nawh ah nin, "Sawn ngawh riang kaing maix ka aux mai aux tak sang tawx heue." ²⁹ Yakop ah nin ka nawh, "Maix hoik tawng yuh aux kaing son tix miex ding mai hoik tawng tobrie tix koe ka aux miex ding" ³⁰ "Sivoe ang aux nyang hoek, kraung khrai maix koe ngie ceeix khaing, yam in hoik haok hwan tom nie, Simiang Siyiex hoik nawb bwan ka maix glang yam hoek aux heue. Mawh kheu nan aux tak yaox ti sang nyiex ma tix yam mawx lie?" ³¹ Nawh ah nin, "Aux sang tawx ceu patix ka maix?" mai Yakop deeh ah nin, "Paw lai tawx tix ceu kawx ka aux, phan maix simie ti yuh bwanson ka aux, kieh aux baox deeh liang mai priex ka cub yung maix khankix heue." ³² "Daux in singaix aux sang hu ciied ti yaox ka phung yung, phung pex cie maix khawmuik, aux sang gwieh ti deuh kawn yung pa preeh cun mai pa lung khankix khaing paox tix mai aux deeh sang gwieh ti deuh kawn pex pa preeh pa lung hauk khankix. In khawmuik tak mawh ngawh riang kaing yuh aux heue." ³³ "Mawh kheu nan maix tak yaox krax rahsee aux, yam krai aux ngawh riang tix sivoe ngai maix. Can pex pa ang preeh mai yung pa ang lung khankix, phan koe mai aux maix tak ah mawh pa briex aux cie maix heue." ³⁴ Laban ah nin, "Kieh mawh awm lox pa ah maix heue." ³⁵ Ka daux singaix an Laban tang gwieh pex mhaing preeh mai pa lung, khawm pex shiang preeh cun mai pa lung mai baox laug pex paing mai kawn yung pa lung khankix mai nawh ap ka kawn simex tix heue. ³⁶ Nawh khan sinax dee ot tix mai Yakop singai khaing paox tix loe singaix krax mai Yakop deeh liang ka cub yung mai cub pex Laban pa kawn deuk khankix heue. ³⁷ Yakop teei gawng khaox klai Lipanax, Luzax mai Aramon mai kheet ti tik lhox nawh, sonsang sidawng pa klai pa paing ti yaox mhawm mhawm heue. ³⁸ Nawh jung ti deuh gawng khaox pa hoik kheet ti lhox khankix sivoe yung mai pex ka dee nyaux rawm mai hawt dawng rawm nyaux kix. Inkix mawh sonsang koe kaux kix yam hoek ti nyaux rawm heue. ³⁹ Cub yung mai pex khankix, koe kaux mai keh pa preeh mai pa lung hauk khawmuik heue. ⁴⁰ Yakop tang gwieh yung mai pex pa preeh, pa preeh cun mai pa lung cie nawh khankix. Veeh ngai tix ka plak cub yung mai cub pex Laban mai nawh tang deuh cub yung mai pex cie tix nong nong khaing cie Laban heue. ⁴¹ Yam sikeeing tobrie pa ting riang khankix ka paox tix, sonsang koe kaux ka yaox ti khaox an, Yakop tom jung gawng khaox an sivoe ngai dee chix yaox kix ka dee nyaux rawm heue. Mawh sonsang koe kaux kix mai gawng khaox an heue. ⁴² Viang mawh nan, nawh ang deuh gawng khaox an ka sivoe ngai cub yung mai pex pa awn riang, pa awn riang mawh cie Laban mai pa ting riang mawh cie Yakop heue. ⁴³ Yakop baox nie magmi hu sipie mai nawh koe tobrie tom nie pa mawh yung, pex, kawncau simex kawncau bun, kala-uk mai la haoh hun heue.

¹ Yakop mhong sikah kawn simex Laban khankix, pa ah kix nin, "Yakop hoik teei kraung khrai cie keeing ex hu khawmuik, nawh hoik yaox ti magmi kheu sin keeing ex" ² Yakop yaox ka pakngai Laban ang lai awm sivoe an, hoik tang ti yaox heue. ³ Khaix an Simiang Siyiex ah nin ka Yakop, "Deeh ing ka haktiex keeing maix khankix mai ka doeh ru maix, Aux tak ot tau mai maix heue." ⁴ Mawh kheu nan, Yakop ploi pui kok Rakhelax mai Leax ka daux tiag dee koe cub phung yung nawh heue. ⁵ Nawh ah nin ka kix, "Aux hoik yaox ka ngai baoh keeing pex, nawh ang lai koe rhawm ka aux, awm glang ka an. Viang mawh nan, Siyiex keeing aux, hoik ot tau mai aux heue." ⁶ "Pex tawng ka hoik yuh aux kaing son keeing pex, khawm riang rao tix khawmuik heue." ⁷ "Keeing pex hoik pie lhen ka aux mai hoik loh ngawh riang rao pa keung aux ti pon kao bawg, viang mawh nan, Siyiex ang tawx akhwang sonsang yuh nawh aux laux heue." ⁸ "Yam ah keeing maix kieh tobrie pa preeh mawh ngawh riang maix, khaix an, cub yung khankix lih keh yung pa preeh, yam ah keeing maix, kieh tobrie pa preeh cun mawh ngawh riang maix, khaix an yung khankix lih keh kawn yung pa preeh cun heue. ⁹ Mawh kheu nan, Siyiex hoik teei tobrie keeing pex mai tawx ka aux heue. ¹⁰ Yam sikeeing tobrie khankix, aux maong ti jhak mai yaox ka mawh mhaing preeh, pa preeh cun mai pa lung khankix pa hawt khaix tobrie shiang khankix ka daux camaox aux heue." ¹¹ Khaix an kawncau Siyiex ah nin ka aux daux camaox, Yakop eue mai aux deeh pawk ah nin, aux ot tin heue. ¹² Nawh ah nin, "Maix maong ti jhak awx, tobrie mhaing pa hawt tobrie shiang khankix mawh tobrie mhaing preeh, pa preeh cun mai pa lung khawmuik, mawh kheu aux hoik yaox ka ceu pa yuh Laban ka maix heue. ¹³ Aux mawh Siyiex Betelax, dee hoik groi maix bee ka rong simaox an mai dee hoik yuh maix sijax mukheu ka Aux heue. Yam in, kaoh hu khaing haktiex in mai deeh ing ka haktiex doeh ru maix heue." ¹⁴ Khaix an Rakhelax mai Leax pawk lox Yakop ah nin, "Kawn koe nyum pa sang pon ex tix ceuceu, phan ang mawh nan, sinngao tix ceuceu khaing daux nyiex keeing ex lie?" ¹⁵ Nawh hoik keud ex mawh pui tang ceu tang meung ang mawh lie? mawh kheu nawh hoik coh ex mai hoik shiao mau ex khawmuik heue. ¹⁶ "Sinngao pa hoik teei Siyiex khaing keeing ex, hoik mawh cie ex mai son kawn praix ex, yam in, kieh Siyiex maix yuh ka mawx maix yuh awm an heue." ¹⁷ Khaix an Yakop kaoh mai yaog ti sau kawn moeng tix khankix brug kala-uk heue. ¹⁸ Nawh viex tobrie mai kraung khrai pa pon khaing haktiex Padan-aram khawmuik mai hu ka keeing tix daux haktiex Khanan heue. ¹⁹ Yam hu rhip Laban hauk yung tix dah, Rakhelax briex ti teei riang krub cie keeing khaing daux nyiex heue. ²⁰ Yakop briex tix lih hu, yam ang Laban tawng, mawh kheu ang nawh rhawm krai grawng sang to ti ka nawh heue. ²¹ Nawh to tau mai kraung pa koe tix khawmuik, nawh kaoh mai tiang ka rawm klawng mai hu see ka plak gawng Gilat heue. ²² Khaix hoik to Yakop loe singaix, kix taug krai Laban mhong heue. ²³ Nawh kok ka puxaik tix mai hawt khaix nawh, aliah singaix krax mai krup kix ka gawng Gilat heue. ²⁴ Viang mawh nan, Siyiex hoek ka Laban pui Asurix ka daux camaox ponsawm ah nin, "Rien rhawm tix, paw lai krai Yakop mhawm ang mhawm tix ceu kawx awx" ²⁵ Laban krup ka Yakop, yam in Yakop sum ka nyiex gox man piang gawng tan, Laban mai puxaik nawh khankix kawx, sum nyiex gox tix piang gawng Gilat heue. ²⁶ Laban ah nin ka Yakop, "Mawh yuh maix ka mawx? maix lai pie aux mai viex kawn bun aux khankix hu awm pui pa rhim ti teei ka vaig yuh ka mawx?" ²⁷ Kheu maix lai pie aux mai mox tix hu khaing aux ngiiep ngiiep mai ang krai aux mhong yuh ka mawx? mawh kheu aux tak ploi maix hu ka daux pa gaux rhawm mai ah lai rhax tau mai tauh chiang khawm ting khankix heue. ²⁸ "Kheu maix lai ang tawx akhwang ngheet aux ka kawn saux mai kawn bun tix lie? maix lai yuh awm pa daox pa aw." ²⁹ Aux koe sibrawm ti yuh maix laux, viang mawh nan, Simiang Siyiex keeing maix krai ka aux daux camaox ponsawm kawx, ah nin, "Rien rhawm tix, paw lai krai Yakop mhawm ang mhawm tix ceu kawx awx. ³⁰ Yam in, mawh kheu kied byaong maix ka nyiex ma miex keeing tix maix tom to tix ing, yuh ka mawx maix lai briex riang siyiex aux hu?" ³¹ Yakop deeh pawk lox Laban ah nin ka, "Mawh kheu lhat aux maix tud rhim mai deeh teei kawn bun khaing aux, aux tom to heue." ³² Yaox maix riang siyiex tix ka pui mawx ang ah, paw lai deuh im ju heue. Hu ci kraung cie maix ka sivoe ngai puxaik ex khankix mai teei hu heue. Mawh kheu Yakop ang tawng ka briex Rakhelax an heue. ³³ Laban laig ka daux nyiex gox man Yakop, nyiex gox man Leax mai nyiex gox man kawncau bun kiex ra kaux, viang mawh nan, nawh ang yaox heue. Khaix an nawh lih khaing nyiex gox man Leax mai laig daux nyiex gox man Rakhelax heue. ³⁴ Rakhelax teei riang krub an mai sau ka daux an brug kala-uk mai ngawm piang heue. Laban hoik tah sawg ka daux nyiex gox man mai ang yaox heue. ³⁵ Rakhelax ah nin ka keeing tix, "Mawh kheu jao hoek mee bun ka aux, paw nyang song rhawm ka ang aux pon kaoh sivoe ngai maix liak" nawh sawg khrieh, viang mawh nan, nawh ang yaox ka riang krub daux nyiex heue. ³⁶ Yakop song rhawm ah nin ka Laban, "Mawh lud aux ka ceu tix? mawh koe phimap aux yuh ka mawh maix phex tix hawt aux yuh nin lie?" ³⁷ "Maix hoik khrieh kraung aux khawmuik kawx, mawh hoik yaox maix kraung nyiex ma tix, tix ceuceu lie? deuh sivoe ngai puxaik aux mai puxaik maix mai kieh kix prawng ca sinax ax heue. ³⁸ "Aux hoik ot tau mai maix tixnga num, kawn yung shiang mai kawn pex shiang maix khankix ang sax laux kawn tix bawg kawx, aux ang sax ih ka nex kawn yung mhaing khaing cub yung maix heue. ³⁹ Can pa kiied totiag vao khankix, aux ang sax viex hoek ka maix, aux kawn kham ti som ka, pa briex pui daux tawm taix aux, ponngaix, ponsawm ang ah maix nhie aux plud jheung jheung heue." ⁴⁰ Yam ponngaix, aux hoik grok ti ka koek mai yam ponsawm, aux hoik caux ka rawm ciex mai ang laig it laig tum ka heue. ⁴¹ "Aux hoik ot daux nyiex maix tixnga num mai hoik yuh kaing son maix kao pon num, sonsang pon aux kawn bun maix khankix, aux hoik baox yuh kaing son maix liah num, sonsang pon aux tobrie maix, maix hoik loh ka ngawh riang aux kao bawg heue. ⁴² Phan Siyiex keeing aux, Siyiex Abraham mai Siyiex pa lhat graung Icak kah, ang ot tau mai aux maix tee ploi aux ing mai taix yi tix tete. Siyiex hoik yaox ka krax kham geu aux mai kaing pa hoik yuh aux ka taix tix, Nawh tom kieh thiang ka maix daux ponsawm kawx heue." ⁴³ Laban deeh pawk lox ka Yakop ah nin, "Kawn bun ankix kawx mawh kawn bun aux mai kawn praix ankix kawx mawh kawn praix aux, cub kawn yung khankix kawx, mawh kawn yung aux, can pa yaox maix khawmuik kawx mawh cie aux heue. Mawh kheu nan, daux in singaix aux sang chix yuh ka mawx ka kawn bun aux khankix, phan ang mawh nan, ka kawn praix pa hoik keh khaing kix lie?" ⁴⁴ "Hoek yam in, kieh ex yuh sijax mukheu ka maix mai aux kieh mawh mhai rug sinax maix mai aux heue." ⁴⁵ Yakop teei simaox tix lon mai sum mawh rong heue. ⁴⁶ Yakop ah nin ka puxaik tix khankix, "Kieh ex sut simaox" mai kix sut simaox mai pum ti deuh. Kix ih priex ka praok pum simaox an heue. ⁴⁷ Laban kok ceu kaux simaox an mawh, "Yegadax Sahadutax, viang mawh nan, Yakop kok mawh Gilat heue." ⁴⁸ Laban ah nin, "Pum simaox in mawh mhai rug sinax maix mai aux daux in singaix" Mawh kheu nan, tom kok ceu kaux mawh Gilat heue. ⁴⁹ Baox kok mawh Mizapa, mawh kheu nawh ah nin, "Kieh Siyiex kia ngien sinax maix mai aux, yam tang ot ex singai khaing paox tix heue." ⁵⁰ "Phan maix yuh krax kha rhawm ka kawn bun aux khankix, phan ang mawh nan, phan maix teei ti moeng bun tang kaux, piang kawn bun aux khankix, viang kawn pui ang koe mhai rug sinax ex kawx, doh keud ka Siyiex mawh mhai rug sinax maix mai aux heue." ⁵¹ Laban ah nin ka Yakop, "Jhak ka pum simaox mai rong simaox in, pa hoik deuh aux sinax maix mai aux heue." ⁵² "Kieh pum simaox mai rong simaox in mawh sakse, aux tak ang pon luan khaing mee pum simaox in sonsang tuktiak tix ka maix, maix kawx tak ang pon tix luan khaing mee pum simaox in mai rong simaox in sonsang tuktiak tix ka aux heue." ⁵³ "Kieh Siyiex Abraham, Siyiex Nakhaw mai Siyiex keeing kix, prawng ca sinax ex" Yakop tiextu ka Siyiex pa lhat graung keeing nawh Icak heue. ⁵⁴ Yakop yuh krax tan piang gawng mai kok puxaik tix khankix ih priex preem, mai ot piang gawng leeing sawm heue. ⁵⁵ Laban kaoh ponngawb caocao mai ngheet ka kawn saux mai kawn bun tix khankix mai nawb bwan piang kix, Khaix an Laban lih hu khaing tan mai ing ka nyiex tix heue.

¹ Yakop baox hu krax hu tix mai kawncau Siyiex hoek rieb nawh heue. ² Yam yaox Yakop ka kix, nawh ah nin, "In mawh cub kru naing Siyiex heue." Nawh kok ceu kaux dee an, mawh Mahanem heue. ³ Yakop ploi pui cau tix khankix hu sivoe ka puxke tix Esaw ka haktiex Sirax meung Idom, ⁴ Nawh tawm lox ka kix ah nin, "Krai inkix ka Simiang aux Esaw mai aux pa mawh kawncau maix Yakop, pa ot mai Laban kawn koe tom in singaix heue. ⁵ Aux hoik koe mawie, la, yung, pex mai kawncau simex, kawncau bun khankix, aux hoik ploi kix hu krai cao Simiang aux mhong grawng in, sonsang mawh pa khaw caw ka rhawm maix heue." ⁶ Kawncau khankix, deeh hoek ka Yakop ah nin, "Yix hoik bleeh ka puxke maix Esaw, nawh hoik ah tix sang viex pui pon yieh hoek rieb ka maix heue." ⁷ Yam an Yakop kied lhat graung mai khi rhawm, nawh gwieh pui pa ot mai nawh, yung, pex, mawie mai kala-uk khankix mawh ra cub. ⁸ Nawh ah nin, "Phan Esaw hoek ti puing ka cub ex tix cub, khaix an cub pa kawn deuk tak pon ti luad luan heue." ⁹ Khaix an Yakop rawg bwan ah nin, "O Siyiex keeing aux Abraham mai Siyiex keeing aux Icak, Simiang Siyiex pa hoik ah nin ka aux, deeh ing ka haktiex cao maix, ka doeh ru maix, Aux tak yuh bwanson ka maix heue." ¹⁰ Aux ang doh keung ti pon krax caux rhawm mai pa kaux sijax pa jhi Maix Cao ka kawncau tix ceeix kawx, yam an dix, aux tiang rawm klawng Yawdan mai khaox gix tix mai yam in aux hoik lih ti koe paox pie ra cub heue. ¹¹ Aux rawg bwan ka Maix, kieh aux luad luan khaing daux tawm taix puxke tix Esaw liak, mawh kheu lhat aux nawh hoek puing yix, tau mai miex kawn nyawm khankix heue. ¹² Maix Cao hoik ah nin, "Aux tak yuh bwanson ka maix tete mai kieh doeh ru maix haoh hun awm mhaik daog rawm sigrit sigra, tom ang pui lai uik simin ka heue." ¹³ Mawh kheu nan, nawh paung tan daux sawm an mai nawh teei pa koe daux taix tix tiblah, sonsang tawx totaix ka puxke tix Esaw heue. ¹⁴ Nawh teei pex shiang ra yieh mu mai pex mhaing tixnga mu khawm yung shiang ra yieh mu mai yung mhaing tixnga mu, ¹⁵ kala-uk pa biiet rawm teeih khawm kawn pa peuex tixngoe mu, mawie shiang tixpon mu mai mawie mhaing kao mu, la shiang tixnga mu mai kawn la iak kao mu khankix heue. ¹⁶ Nawh tawx ceu ankix ka daux tawm taix kawncau nawh mai kieh kix hu cub mawx cub an ah nin ka kawncau tix khankix, "Pex hu sivoe aux mai kieh diang hu pex singai sinax cub mawx cub an heue." ¹⁷ Nawh tawm lox ka cub pa hu sivoe, cub tix ah nin, "Yam yaox pex ka puxke aux Esaw mai yam chawk pex yuh nin, "Mawh pex cub pui mawx mai sang hu pex plak mawx lie? totaix koe sivoe pex in mawh cie pui mawx lie? ¹⁸ Khaix an pex deeh ah, " "Inkix mawh cie kawncau maix Yakop, mai mawh totaix pa tawx ex ka maix cao simiang ex Esaw, tokaux Yakop ot plak khaix yix heue." ¹⁹ Nawh baox tawm lox ka cub ra mai cub loe, can pa hawh tobrie hu khankix ah nin, "Yam yaox pex ka Esaw tak krai awm pa tawm aux in, ²⁰ mai baox ah nin, " "Kawncau maix Yakop ot plak khaix yix heue. Mawh kheu keud nawh nin aux tak kieh rhawm nawh deeh nghie ka totaix pa hu sivoe aux an, aux tak yaox ngai baoh nawh mai nawh tak rieb ka aux heue." ²¹ Mawh kheu nan, cub pa viex totaix nawh khankix hu sivoe nawh mai tokaux nawh it dee paung kix tan daux sawm an heue. ²² Ka daux sawm an, Yakop kaoh teei moeng tix ra kaux mai kawncau bun nawh khankiex mai kawn simex nawh kao tix kaux mai tiang dee thaw rawm klawng Yabok heue. ²³ Nawh kieh kix tiang hu plak toi rawm klawng tau mai kraung khrai pa koe nawh khawmuik heue. ²⁴ Yakop ot tan nong nong, mai pui tix kaux blok paox tix mai nawh tom dex bah riang praix heue. ²⁵ Yam hoik yaox kaw an ang ti lai pex ka nawh, nawh tub ka siviang nawh mai siviang Yakop khluk khlaik tau mai yam blok kiex paox tix heue. ²⁶ Nawh ah nin, "Kieh aux hu, mawh kheu dex sang riang praix heue." Viang mawh nan nawh ah nin, "Phan maix ang nyang nawb bwan ka aux, aux tak ang ploi maix hu heue." ²⁷ Nawh ah nin ka nawh, "Kaux maix patix?" nawh ah nin, "Aux mawh Yakop heue." ²⁸ Khaix "Ceu kaux maix tak ang lai kok mawh Yakop, tak deeh kok mawh Isarelax, mawh kheu hoik pon blok maix paox tix ka Siyiex mai kawn pui maix hoik pex heue." ²⁹ Khaix an Yakop chawk nawh ah nin, "Aux rawg maix krai ceu kaux tix ka aux liak" Nawh ah nin, "Maix chawk ceu kaux Aux jao patix lie?" mai Nawh nawb bwan ka nawh tan heue. ³⁰ Mawh kheu nan Yakop tom kok ceu kaux dee an mawh Penilax, "Mawh kheu aux hoik yaox ka pakngai taw pakngai Siyiex tan mai ju aux kawn pon glawd luan heue." ³¹ Khaix hoik luan Yakop khaing dee Penilax dom mawx dom an, singaix hoik lih piang nawh, nawh hu mai chawh tix heue. ³² Mawh kheu nan, kawn praix ceu pui Isarelax khankix ang lai ih ka nex siniag ba, pa koe hawt siviang tom in singaix, mawh kheu hoik tub ka siviang Yakop dee koe siniag nawh heue.

¹ Yakop maong ti jhak, yaox ka hoek Esaw tau mai pui pon yieh kaux, mawh kheu nan, nawh gwieh ti tawx kawn nyawm khankix ka Leax mai Rakhelax khawm kawncau bun kiex ra kaux heue. ² Nawh deuh kawncau bun ra kaux mai kawn nawh khankix hu sivoe tix, khaix kix mawh Leax mai kawn nawh, pa hu sigreung nawh deuh Rakhelax mai kawn nawh Yosiep ghoik khaix paox tix heue. ³ Khaix an nawh jah tix hu sivoe kix mai nawh gup piang tiex, aliah bawg, tom hoek nawh ka puxke tix heue. ⁴ Yam an, Esaw to tix hu rieb nawh mai kawm ka ngawg nawh mai ngheet paox tix mai yiiem heue. ⁵ Esaw yaog ngai tix mai yaox ka bun tau mai kawn nyawm khankix ah nin, "Pui pa ot mai maix khankix mawh pui mawx lie?" Yakop ah nin, "Kawn nyawm an khankix mawh bwanson pa hoik tawx Siyiex ka kawncau maix heue." ⁶ Khaix an kawncau bun khankiex, viex kawn tix hoek mai krub ka nawh, ⁷ Leax kawx viex kawn tix khankix hoek mai krub ka Esaw, khaix an Yakop mai Rakhelax hoek dex mai kix krub ka nawh heue. ⁸ Esaw ah nin, "Cub tobrie pa yaox aux khankix, mawh pa yuh ka mawx?" mai Yakop ah nin, "Inkix mawh pa sang kieh aux mawh pa khaw caw rhawm ka sivoe maix simiang heue." ⁹ Esaw ah nin, "Pux aux eue, aux mawh pui pa hoik kub, deeh priex pa koe maix khankix son cao maix awx." ¹⁰ Yakop ah nin, "Ang mawh nan, phan awm hoik mawh pa khaw caw ka rhawm maix, rieb maix teei totaix in khaing daux taix aux liak, kied laoh lie ka hoik yaox aux ka pakngai maix, awm hoik yaox aux ka pakngai Siyiex, mawh kheu hoik rieb maix aux ka daux pa gaux rhawm tix. ¹¹ "Yuh bwanson, rieb maix teei bwanson pa viex aux hoek ka maix liak, grawh grawng nawh, Siyiex hoik tawx bwanson ka aux, tom hoik kub hoik naog" Nawh niied tix khyox khaw mai nawh rieb ti teei heue. ¹² Esaw ah nin, "Kieh ex deeh hu krax hu tix, aux tak hu sivoe maix heue." ¹³ Yakop deeh ah nin ka nawh, "Simiang aux eue, awm hoik tawng maix, kawn nyawm khankix kawx kawn awn riang mai yung, pex, mawie khankix kawx, kawn koe kawn pa peuex tau mai aux, phan sidhiiet kix hu tix ngaix ngie, kix tee yum ka heue." ¹⁴ "Mawh kheu nan kieh simiang aux hu sivoe ngai kawncau maix, aux tak koi thong tobrie pa koe tau mai aux mai kawn nyawm khankix, sonsang pon hoek tom dee ot maix simiang daux meung Sirax heue." ¹⁵ Esaw ah nin, "Yam in kieh aux prah pui tix tiblah tau mai maix" Viang mawh nan nawh deeh ah nin, "Mawh koe grawng yuh ka mawx lie? kieh aux pon pa khaw caw rhawm maix simiang heue." ¹⁶ Mawh kheu nan, Esaw deeh ing ka meung Sirax daux singaix an heue. ¹⁷ Yakop lih hu plak Sukok mai sum nyiex cao tix, tix lhang mai kawg son tobrie nawh khankix tan, mawh kheu nan, ceu kaux dee an tom kok mawh Sukok heue. ¹⁸ Yakop hoek ka veng Shekhem pa koe ka daux haktiex Khanan mai krax boek khaing kuceu, yam hoik kaoh nawh khaing haktiex Padan-aram, mai nawh sum nyiex gox ot tix, ka sivoe veng an heue. ¹⁹ Nawh liag gwang haktiex, dee hoik sum nawh nyiex gox man tix, khaing kawn Hamo pa mawh keeing Shikhem tix yieh plah mau heue. ²⁰ Ka dee an, nawh sum khu dee tan tix mu mai kok mawh Elelaw Isarelax heue.

¹ Dina kawn bun Leax pa hoik keh nawh son Yakop, lih hu fi ka kawn bun haktiex baoh an heue. ² Yam yaox kawn simex Hamo, ceu pui Hiwix, pa mawh Shekhem pa kwang haktiex an, nawh giex tix lud vao mai Dina, laux yuh min plakngai nawh heue. ³ Rhawm rhi nawh kied koe ka Dina kawn bun Yakop mai nawh moh ka bun an mai nyaw glaw tix sikah ka bun an, ka lox pa mhawm heue. ⁴ Mawh kheu nan Shekhem krai ka keeing tix Hamo ah nin, "Teei aux cie ka kawn bun in, sonsang mawh moeng aux heue." ⁵ Yakop hoik mhong ka laux yuh nawh min plakngai kawn bun tix Dina, yam an kawn simex nawh khankix, ot mai tobrie kix daux tiag, mawh kheu nan, Yakop ot yawg tix mai krox tom hoek kix heue. ⁶ Keeing Shekhem, Hamo lih hu ka Yakop sonsang sikah tau mai nawh heue. ⁷ Yam deeh hoek kawn simex Yakop, khaing daux tiag kix mhong grawng an, kix kied laux rhawm mai kied song rhawm ka, mawh kheu hoik yuh pui an ceu pa vao ka pui Isarelax mai lud vao mai kawn bun Yakop, pa ang khaw ti yuh heue. ⁸ Viang mawh nan, Hamo sikah tau mai kix ah nin, "Kawn simex aux Shekhem, hoik kied moh ka kawn bun maix. Yuh bwanson, kieh nawh teei ti moeng ka liak" ⁹ "Kieh ex yuh paox nyiex tau mai pex, mai tawx kawn bun maix ka yix mai deeh teei pex cie kawn bun yix khankix heue. ¹⁰ "Pex tak ot tau mai yix mai haktiex in tak koe sivoe pex, ot daux haktiex in mai yuh lai geu, mai teei ti cie kraung khrai pa koe daux haktiex in khawmuik heue. ¹¹ Shekhem ah nin ka keeing bun mai puxaik nawh, "Kieh aux pon bwan sivoe ngai pex, can ceu pa rawg pex, aux tak tawx heue." ¹² "Kraung krub mai totaix pa rawg pex, viang nie kawx, aux tak sang tawx awm pa rawg pex ka aux, tawx ngie kawn bun an ka aux, sonsang mawh moeng aux heue." ¹³ Kawn simex Yakop khankix deeh pawk lox ka Shekhem mai keeing nawh Hamo, ka daux pa lhak lhiem tix, mawh kheu hoik yuh nawh krax kaig tua ka pux kix Dina heue. ¹⁴ Kix ah nin, "Yix ang pon tawx nan yix cie pui pa ang nyang pat hak, mawh kheu phan yix yuh nan tak lih ti mawh krax pa kaig tua ka yix heue. ¹⁵ "Phan mawh son grawng in, yix tak khaw rhawm phan pex yuh awm been yix mai simex pex ku kaux pat hak tix. ¹⁶ Khaix an yix tak tawx kawn bun tix khankix ka pex mai yix tak teei kawn bun pex, yix tak ot tau mai pex mai ex tak mawh pui tix ceu khaing heue. ¹⁷ Phan pex ang cu ti nghiet ka lox yix mai ang cu ti pat hak tix, khaix an yix tak deeh teei kawn bun tix hu heue." ¹⁸ Lox krai kix khawmuik Hamo mai kawn simex nawh Shekhem khaw rhawm ka heue. ¹⁹ Kawn simex an mawh kheu kied moh nawh ka kawn bun Yakop, nawh rieb ka lox pa krai kix, nawh mawh pui pa koe min plakngai khaing can pui daux nyiex keeing tix khawmuik heue. ²⁰ Hamo mai kawn simex nawh Shekhem deeh hoek ka diang siviex veng kix mai krai ka pui pa ot daux veng ah nin, ²¹ "Pui inkix hoik yuh pa nhim tau mai ex, kieh kix ot haktiex in mai yuh lai geu, mawh kheu haktiex hoik sidaing vieh mai kub son kix, kieh ex teei ti moeng kawn bun kix mai kieh ex tawx kix teei ti moeng kawn bun ex khankix heue." ²² "Viang mawh nan phan ex rieb ti teei been pa pat hak awm kix mai kawn simex daux sinax ex ku kaux tak pat hak tix, kix tak khaw rhawm tix ot tau mai ex mai tak mawh ceu pui tix mu heue." ²³ "Khawng brie kix, kraung khrai cie kix mai yung mai mawie cie kix kumu, tak mawh cie ex khawmuik sax ang mawh lie? hawt rhawm kix mai kieh kix ot tau mai ex heue." ²⁴ Can pui pa lih hu ka siviex veng kix ku kaux, hoik cu nghiet ka lox Hamo mai kawn simex nawh Shekhem mai can kawn simex, pa lih ti hu ka diang siviex veng, pat hak tix ku kaux heue. ²⁵ Khaix hoik luan loe ngaix, yam kawn saux nex khaix pat kix hak tix, kawn simex Yakop Simion mai Lewix ra kaux, pa mawh prie Dina, teei vaig tix ku kaux mai laig daux veng an mai pah kawn simex pa ot tan khawmuik heue. ²⁶ Kiex pah Hamo mai kawn nawh Shekhem ka vaig mai deeh teei Dina ing khaing nyiex Shekhem heue. ²⁷ Kawn simex Yakop khankix, deeh hu ka dee pah kix pui mai yuh veng laux leeing jao hoik laux yuh kix min plakngai nan kix heue. ²⁸ Kix rhim ti teei phung yung kix, mawie mai la kix khawm can pa koe daux veng mai can pa koe daux kaung daux ma kix, ²⁹ mai kraung khrai kix khawmuik mai giex ti viex moeng kawn kix mawh pa giex laung mai rhim ti teei can pa koe daux nyiex kix mai yuh laux leeing heue. ³⁰ Khaix an Yakop ah nin ka Simion mai Lewix, "Pex hoik yuh krax kha rhawm aux mai kieh pui haktiex in, ceu pui Khanan mai ceu pui Pherazix khankix seeing brai ka aux, mawh kheu tux ex sinax kix, kix tak khrawm paox tix mai hoek puing ka aux, aux tak yaox ti laux leeing tau mai kawn nyiex ma tix heue." ³¹ Kix deeh ah nin, "Krax pa yuh kix ka nan ex awm bun coh kaux khex khaw caw daux krax lie?"

¹ Siyiex ah nin ka Yakop, "Kaoh, hu ka Betelax mai ot tan, yuh khu dee tan tix mu son Siyiex pa hoik lih bleeh ka maix, yam to maix khaing puxke tix Esaw heue." ² Yakop ah nin ka pui kawn nyiex ma tix mai can pui pa ot mai nawh khawmuik, "Tik ka siyiex pui tang kaux khankix khaing daux sinax pex, kieh tokaux pex singax singeh mai loh kraung ceep tix. ³ "Ex kaoh mai hu ka Betelax, aux tak sang yuh khu dee tan tix mu tan, son Siyiex pa hoik pawk lox aux, yam laux rhawm aux mai Cao pa ot tau ka daux krax hu aux kudah dee heue." ⁴ Mawh kheu nan, kix tawx siyiex pui tang kaux pa koe mai kix ka Yakop khawmuik, kix baox tawx krim pa koe ka yhaok tix khawmuik ka nawh mai Yakop sipaung an khankix greem khaox piak van pa koe dex veng Shekhem heue. ⁵ Yam lih hu kix khaing tan, pui pa ot baoh veng an, lhat graung ka Siyiex, kix tom ring hawt khaix kawn simex Yakop heue. ⁶ Yakop hoek ka veng Luzax, pa mawh Betelax pa koe daux haktiex Khanan tau mai pui pa ot mai nawh khawmuik heue. ⁷ Nawh sum khu dee tan tix mu tan mai kok dee an mawh Ela Betelax, yam to nawh khaing puxke tix heue. ⁸ Kawncau bun Rebekkax pa mawh Deborax yum tan mai kix sipaung nawh ka Betelax greem khaox piak van, kix tom kok ceu kaux khaox an mawh Alonbakut heue. ⁹ Yam deeh hoek Yakop khaing Padan-aram, Siyiex lih bleeh ka nawh mai nawb bwan ka nawh heue. ¹⁰ Siyiex ah nin ka nawh, "Yam in ceu kaux maix mawh Yakop, khaix in ceu kaux maix tak ang lai kok mawh Yakop mai tak kok maix mawh Isarelax" Mawh kheu nan, Nawh Cao kok ceu kaux Yakop mawh Isarelax heue. ¹¹ Siyiex baox ah nin ka nawh, "Aux mawh Siyiex pa ting sibrawm, kieh maix haok hwan haoh hun mai ceu pui tix ceu mai cub pui kuceu, tak lih koe khaing maix mai simiang khankix tak lih khaing doeh ru maix heue." ¹² Haktiex pa hoik tawx Aux ka Abraham mai Icak khankix, Aux sang tawx ka maix mai khawm doeh ru maix khawmuik heue." ¹³ Khaix an Siyiex haok dee lhaong khaing Yakop, dee hoik sikah Nawh Cao tau mai nawh heue. ¹⁴ Yakop sum rong simaox tix mu, ka dee hoik sikah Nawh Cao tau mai nawh, nawh groi krax tan ceu pa nyaux piang simaox an mai groi bee piang heue. ¹⁵ Yakop kok ceu kaux dee hoik sikah Siyiex mai nawh tan, mawh Betelax heue. ¹⁶ Khaix an kix lih hu khaing Betelax, yam dex sang hoek kix ka veng Epharat, bawg yam sang keh Rakhelax kawn hoik hoek mai nawh yaox ti kham geu krax saux sigrien sigre heue. ¹⁷ Yam kham geu nawh saux sang keh tix, bun pa priex keh nawh ah nin, "Paw lhat graung, maix tak baox pon kawn simex tix kaux heue." ¹⁸ Yam sang yum mai yam dex sang lih khwan nawh, nawh kok ceu kaux kawn simex tix mawh Bennawnix, viang mawh nan, keeing nawh tom kok nawh mawh Binyamin heue. ¹⁹ Rakhelax yum mai kix sipaung nawh, hawt krax hu kix ka veng Epharat pa kok mawh veng Bieliehiem, ²⁰ mai Yakop sum rong simaox tix lon piang simeeig kiex, rong simaox an, kawn koe ka simeeig Rakhelax tom in singaix heue. ²¹ Isarelax lih hu mai sum nyiex gox man, plak toi nyiex pau Edax heue. ²² Yam ot Isarelax ka haktiex an, Rubin hu it tau mai moeng iak keeing tix Bilahax, Isarelax mhong ka grawng an heue. ²³ Yakop koe kawn simex kao ra kaux, kawn simex Leax khankix Rubin mawh kawn Ai, Simion, Lewix, Yudax, Issakha mai Zebulun heue. ²⁴ Kawn simex Rakhelax khankix, mawh Yosiep mai Binyamin heue. ²⁵ Kawn simex Bilahax pa mawh kawncau bun Rakhelax mawh Dan mai Napthalix heue. ²⁶ Kawn simex Zilapa pa mawh kawncau bun Leax, mawh Gat mai Asha heue. Inkix mawh kawn simex Yakop pa keh son nawh daux haktiex Padan-aram heue. ²⁷ Yakop hoek ka keeing nawh Icak, ka baoh Mamre, phan ang mawh nan Kirayabax, an mawh veng Hebron dee paung Abraham mai Icak heue. ²⁸ Yam an Icak koe ju tix yieh tixdaix num heue. ²⁹ Icak hoik kied riex ju mai kuad hu sipie hoik sidah ju mai yum, hu ka dah dee khrawm ru nawh ti mai kawn simex nawh Esaw mai Yakop sipaung nawh heue.

¹ In mawh grawng doeh ru Esaw pa mawh ceu pui Edom heue. ² Esaw teei ti moeng kawn bun Khanan pa mawh Adax kawn bun Elon ceu pui Hittix mai Aholibama, kawn bun Anax pa mawh kawn simex Zibeon ceu pui Hewix, ³ Bashamat nan Nabayok pa mawh kawn bun Ishamelax heue. ⁴ Adax keh kawn simex Eliphat son Esaw mai Bashamat keh kawn simex Yoelax heue. ⁵ Aholibama keh kawn simex Yushax, Yalam mai Korax heue. ⁶ Khaix an Esaw viex moeng tix khankix mai kawn simex kawn bun tix mai can pui pa ot daux nyiex nawh khawmuik, tau mai tobrie, kraung khrai nawh khawmuik pa hoik pon daux haktiex Khanan khankix mai hu ka haktiex dee singai tix dah, khaing pux nawh Yakop heue. ⁷ Mawh kheu kied nie kraung khrai kiex, kiex ang lai chix ot tau mai haktiex ot kiex hoik sikhawp kheu hoik kied nie tobrie eei kiex heue. ⁸ Mawh kheu Esaw ot piang gawng Sirax, Esaw lih ti mawh ceu pui Edom heue. ⁹ In mawh doeh ru Esaw pa mawh keeing ka ceu pui Edom pa ot piang gawng Sirax heue. ¹⁰ In mawh ceu kaux kawn simex Esaw, moeng nawh Adax keh kawn simex Eliphat, moeng nawh Bashamat keh kawn simex Yoelax heue. ¹¹ Kawn simex Eliphat khankix mawh Teman, Awma, Zepho, Gatan mai Kenat heue. ¹² Moeng iak kawn simex Esaw pa mawh Eliphat, pa kaux Timanax keh kawn simex tix Amaliet son Eliphat, inkix mawh doeh ru Adax moeng Esaw heue. ¹³ Kawn simex Yoelax khankix mawh Nahat, Shama mai Miza. Inkix mawh doeh ru Bashamat moeng Esaw heue. ¹⁴ Aholibama moeng Esaw, mawh kawn bun Anax mai Anax mawh kawn simex Zibeon, Aholibama keh kawn simex pa mawh Yushax, Yalam mai Korax son Esaw heue. ¹⁵ Inkix mawh cao kaing ka kawn simex Esaw khankix heue. Kawn simex Eliphat pa mawh kawn Ai Esaw khankix mawh, cao kaing Teman, cao kaing Awma, cao kaing Zepho, cao kaing Kenat, ¹⁶ Cao kaing Korax, cao kaing Gatan mai cao kaing Amaliet heue. Inkix mawh cao kaing kawn simex Eliphat khankix heue. Kix mawh doe ru kawn simex Adax heue. ¹⁷ Kawn simex Yoelax, pa mawh kawn simex Esaw khankix mawh, cao kaing Nahat, cao kaing Zerax, cao kaing Shama mai cao kaing Miza heue. Inkix mawh cao kaing khankix, pa mawh kawn simex Yoelax daux haktiex meung Edom heue. Kix mawh doeh ru kawn simex Beshemat moeng Esaw heue. ¹⁸ Kawn simex Aholibama moeng Esaw khankix mawh, cao kaing Yushax, cao kaing Yalam mai cao kaing Korax heue. Inkix mawh doeh ru cao kaing pa lih khaing Aholibama moeng Esaw, kawn bun Anax heue. ¹⁹ Inkix mawh kawn simex Esaw, pa mawh pui meung Edom mai pa mawh cao kaing kix tan heue. ²⁰ Kawn simex Sirax, pa mawh ceu pui Hawrix pa ot daux haktiex an, mawh Lawtan, Shawbax, Zibeon mai Anax, ²¹ Dishon, Ezax mai Dishan. Inkix mawh cao kaing ceu pui Hawrix pa mawh kawn simex Sirax, ka daux haktiex Edom heue. ²² Kawn simex Lawtan khankix mawh Hawrix mai Henan, nan Lawtan mawh Timinax heue. ²³ Kawn simex Shawbalax khankix mawh Alavan, Manahat, Ebalax, Shephaw mai Awnam heue. ²⁴ Kawn simex Zibeon mawh Ayax mai Anax, Anax mawh pui pa yaox ka dee lih rawm lhaox, ka daux tiag yam liang nawh la keeing tix Zibeon heue. ²⁵ Kawn Anax mawh Dishon mai Aholibama pa mawh kawn bun nawh heue. ²⁶ Kawn simex Dishon khankix mawh, Hemdan, Eshaban, Itaran mai Kheran heue. ²⁷ Kawn simex Ezax khankix mawh, Bilahan, Zavan mai Akan heue. ²⁸ Kawn simex Dishan mawh, Uzax mai Aram heue. ²⁹ Inkix mawh cao kaing ceu pui Hawrix. Kix tom mawh cao kaing Lawtan, cao kaing Shawba, cao kaing Zibeon, cao kaing Anax, ³⁰ cao kaing Dishon, cao kaing Eza mai cao kaing Dishan, inkix khawmuik, mawh cao kaing ceu pui Hawrix, pa yuh cao kaing ka haktiex Sirax heue. ³¹ Inkix mawh simiang pa kwang ka haktiex Edom, sivoe ang simiang tix kaux kawx nyang bax kwang piang pui Isarelax heue. ³² Belax kawn simex Pawrax kwang ka haktiex Edom mai ceu kaux veng ting nawh mawh Dinhabax heue. ³³ Khaix yum Bakax, kawn simex Zerax pa mawh Yawbap ceu pui haktiex Bawzarax deeh plud ti kwang khaix nawh heue. ³⁴ Khaix yum Yawbap, Husham ceu pui haktiex Temanix deeh plud ti kwang khaix nawh heue. ³⁵ Khaix yum Husham, kawn simex Bedat pa mawh Hadax, pa puing ka ceu pui Midian khankix, ka daux tong Mawbax, deeh plud ti kwang khaix nawh, ceu kaux veng ting nawh, mawh Avit heue. ³⁶ Khaix yum Hadat, Samalax ceu pui haktiex Masariet deeh plud ti kwang khaix nawh heue. ³⁷ Khaix yum Samalax, Shawlax ceu pui haktiex Rehobot pa ot hawt rawm klawng deeh plud ti kwang khaix nawh heue. ³⁸ Khaix yum Shawlax, Balahanan kawn simex Akhabaw deeh plud ti kwang khaix nawh heue. ³⁹ Khaix yum Balahanan, kawn simex Abaw, Hadax deeh plud ti kwang khaix nawh mai ceu kaux veng ting nawh mawh Paw, ceu kaux moeng nawh mawh Mahetabalax, kawn bun Matariet mai Matariet mawh kawn bun Mezahat heue. ⁴⁰ In mawh grawng ceu kaux cao kaing doeh nyiex ma Esaw khankix mai dee ot kix mai min ceu kaux kix pa mawh, cao kaing Timanax, cao kaing Alavax, cao kaing Yetiet, ⁴¹ cao kaing Aholibama, cao kaing Elax, cao kaing Pinon, ⁴² cao kaing Kenat, cao kaing Teman, cao kaing Mibaza, ⁴³ cao kaing Magadilax, cao kaing Iram khankix, inkix khawmuik mawh cao kaing haktiex Edom, ka dee ot kix, ka haktiex pa hoik pon kix ti cie heue. Esaw mawh keeing ka ceu pui Edom heue.

¹ Yam in Yakop hoik ot ka haktiex pa hoik mawh keeing nawh nyo sinie, daux haktiex Khanan heue. ² In mawh grawng doeh ru Yakop khankix. Yosiep koe ju kao aliah num mai nawh mawh cao liang yung mai pex tau mai puxke tix khankix, nawh ot tau mai kawn simex Bilaha mai kawn simex Zipalax, Bilaha mai Zipalax mawh moeng keeing nawh, Yosiep yie krai grawng phimap pa yuh kix ka keeing tix heue. ³ Yam in Isarelax kied moh ka Yosiep khaing kawn nawh khankix, kheu mawh nawh kawn simex pa pon nawh yam kuad riex ju tix mai caing nawh ceep kraung sibex pa mhawm grang pa shiang ka rawm rawn kuceu heue. ⁴ Viang mawh nan, yam yaox puxke nawh khankix ka kied moh keeing kix ka Yosiep khaing kix mai kix koeng ka nawh mai kix ang lai rhawm sikah ka nawh heue. ⁵ Yosiep camaox mai nawh krai puxke tix khankix mhong mai kix nie baox koeng ka nawh heue. ⁶ Nawh ah nin ka kix, "Yuh bwanson nghiet ka grawng pa hoik camaox aux liak, ⁷ jhak heue, yam vien ex lhiem nghox ka daux kaung, lhiem nghox cie aux, yaog ti cung see see mai lhiem nghox cie pex khankix kaoh cung hawt vung viang an mai krub ka lhiem nghox cie aux heue." ⁸ Puxke nawh khankix ah nin ka nawh, "Tak sang kwang maix piang yix lie? phan ang mawh nan, tak sang mawh maix simiang yix lie?" mawh kheu nan, kix nie baox koeng ka nawh, ka grawng camaox pa krai nawh heue. ⁹ Khaix an nawh baox deeh camaox tix ceu mai nawh krai ka puxke tix khankix, nawh ah nin, "Jhak heue, aux hoik baox deeh camaox grawng tang ceu, singaix, khix mai simuing kao tix mu krub ka aux heue." ¹⁰ Yam krai nawh ceu an ka keeing tix mai puxke nawh khankix, keeing kix ne raw nawh ah nin, "Grawng pa hoik camaox in, mawh grawng camaox ceu patix lie? Aux mai miex maix khawm puxke maix khankix, tak sang yaox ti hoek gup ti piang tiex plak sivoe ngai maix lie? ¹¹ Puxke nawh khankix boh rhawm ka nawh, viang mawh nan, keeing nawh een tix tawng grawng in daux rhawm tix heue. ¹² Khaix an puxke nawh khankix, hu liang yung mai pex cie keeing kix ka veng Shekhem heue. ¹³ Isarelax ah nin ka Yosiep, "Puxke maix khankix hu liang yung mai pex plak veng Shekhem ang mawh lie? Hoek heue, aux tak sang ploi maix hu ka kix." Mai nawh deeh ah nin, "Aux koe tin heue." ¹⁴ Nawh ah nin ka nawh, "Hu jhak yam in, mawh nyawm ot puxke maix khankix lie? deeh viex lox hoek ka aux" Mawh kheu nan nawh ploi nawh khaing ka daux lung Hebron mai nawh hoek ka veng Shekhem heue. ¹⁵ Pui tix kaux yaox ka lailing nawh ka daux tiag mai pui an chawk ka nawh ah nin, "Sawg maix patix lie?" ¹⁶ "Aux sawg ka puxke tix khankix" yuh bwanson krai aux mhong dee liang kix yung liak?" ¹⁷ Pui an ah nin, "Kix hoik lih hu khaing tin, mawh kheu hoik mhong aux ah kix nin, Hu ex plak veng Doktan" Mawh kheu nan Yosiep deeh hawt khaix puxke tix khankix mai yaox kix daux veng Doktan heue. ¹⁸ Yam yaox kix hoek nawh dee singai mai sivoe ang nawh nyang bax hoek dex kix, kix kum paox tix sonsang pah kix nawh heue. ¹⁹ Kix ah nin ka paox tix, "Jhak heue, cao camaox hoik hoek phao. ²⁰ Ex!, ex pah nawh yum yam in mai tik nawh ka daux o tixdah dah, ex tak sang ah nin, mawh totiag tix ceuceu hoik kiied nawh, ex pau ti jhak grawng camaox nawh sang lih ti mawh yuh ka mawx." ²¹ Yam mhong Rubin ka lox an mai nawh taoh Yosiep khaing daux tawm taix kix ah nin, "Ex paw doh pah nawh." ²² Rubin ah nin ka kix, "Paw kieh nham jauh, ploi nawh ka daux o pa koe daux tiag, paw doh kieh taix pex krox ka nawh, " Rubin keud ti sang taoh nawh khaing daux tawm taix kix mai deeh viex nawh ing ka keeing tix heue. ²³ Mawh kheu nan yam hoek Yosiep ka puxke tix khankix mai kix peeik ti tik sibex pa mhawm grang pa shiang ka rawm rawn kuceu pa ceep nawh piang tix heue. ²⁴ Kix teei ti ploi nawh daux o, daux o an ang koe tidtix mai rawm kawx ang koe ka heue. ²⁵ Yam ngawm kix ti sang sawm, kix maong ti yaox ka ceu pui Ishamelax tix cub pa kaoh khaing haktiex Gilat tau mai kala-uk, kix tang ceu pa sioe bhawng peeh khaox Balasan, peeh khaox Muran khankix piang kala-uk kix mai viex hu ka meung Ejiptux heue. ²⁶ Khaix an Yudax ah nin ka puxaik tix khankix, phan ex pah pux tix mai mox nham nawh, sang koe bwanson yuh ka mawx? ²⁷ "Hoek heue, ex coh nawh ka ceu pui Ishamelax khankix mai paw kieh taix ex hoek piang nawh, kheu mawh nawh pux ex mai nex nham ex" mai puxaik nawh khankix nghiet ka lox nawh ku kaux heue. ²⁸ Khaix an ceu pui Midian pa yuh lai geu khankix, pha ka dee ot kix tan, mawh kheu nan puxke nawh khankix bluh Yosiep lih khaing daux o mai coh nawh ka ceu pui Ishamelax ka mau tixnga Shekhe mai kix viex Yosiep hu ka meung Ejiptux heue. ²⁹ Yam deeh hoek Rubin ka daux o mai ang lai yaox Yosiep ka daux o, nawh riah ti tik kraung ceep tix jao heue. ³⁰ Nawh deeh ing ka puxaik tix ah nin, "Kawn nyawm ang lai koe tan mai aux sang yuh ka mawx?" ³¹ Khaix an kix teei sibex Yosiep mai kix pah ka kawn pex tix mu mai cub sibex an daux nham, ³² Kix tawx sibex pa shiang ka rawm rawn kuceu mai viex hoek ka keeing kix ah nin, "Yix hoik yaox ka sibex in, jhak ti yaox mawh ang mawh sibex kawn maix lie?" ³³ Nawh pon ci ka sibex an ah nin, "In mawh sibex kawn aux, totiag pa vao hoik kiied tix ih ka nawh mai Yosiep hoik phawng nex phawng nham heue." ³⁴ Khaix an Yakop riah kraung ceep tix mai fua nyoi tix ka chee rhix mai laux rhawm son kawn simex tix tom rheung singaix sawm heue. ³⁵ Kawn praix nawh khankix, hoek ti khu rhawm nawh, nawh thiang ka lox khu rhawm kix ah nin, "Aux tak sang lih hu daux simeeig tau mai kawn simex tix, ka daux pa voi rhawm rhi tix" mawh kheu nan keeing nawh yiiem grai son Yosiep heue. ³⁶ Pui Midian khankix, deeh coh Yosiep ka daux meung Ejiptux ka Pawtiphax, pa mawh cao kaing greem Pharaw, Pawtiphax mawh cao kaing naing, pa pau ju Pharaw heue.

¹ Yam an, Yudax gwieh ti hu khaing puxaik nawh khankix, hu ot mai ceu pui Adulan tix kaux pa kaux Hirax heue. ² Yudax yaox kawn bun ceu pui Khanan pa kaux Shua mai nawh teei tix moeng heue. ³ Nawh koe kaux mai keh kawn simex tix kaux, nawh kok ceu kaux nawh mawh Erax heue. ⁴ Nawh baox koe kaux mai keh kawn simex tix kaux mai nawh kok ceu kaux nawh mawh Awnan heue. ⁵ Nawh baox koe kaux mai keh kawn simex tix kaux mai nawh kok ceu kaux nawh mawh Shelax. Nawh ot daux veng Khezip yam keh tix Shelax heue. ⁶ Khaix an Yudax teei kawn Ai tix Erax koe moeng tix kaux mai ceu kaux nawh mawh Tama heue. ⁷ Viang mawh nan, kawn Ai Yudax pa mawh Erax yuh pa caox caig ka sivoe ngai Simiang Siyiex mai Simiang Siyiex pah nawh yum heue. ⁸ Yudax ah nin ka Awnan, "Hu ka moeng puxke maix mai teei ti moeng, sonsang deeh plud doeh puxke maix heue." ⁹ Viang mawh nan, Awnan tawng ka kawn an, ang lai yaox ti kok mawh kawn tix yam hu it nawh mai moeng puxke tix, nawh kieh rawm ngang tix lih piang tiex, mawh kheu ang rhawm kieh kawn tix plud ka doeh puxke tix heue. ¹⁰ Can pa yuh nawh, Siyiex ang lai khaw rhawm, mawh kheu nan, Nawh cao baox pah nawh yum heue. ¹¹ Khaix an Yudax ah nin ka mun tix Tama, "Ing ot awm miex mai ka nyiex keeing maix, glang ang kawn simex aux Shelax nyang ting" mawh kheu lhat Yudax Shelax yum awm puxke tix khankix, mawh kheu nan Tama lih hu mai deeh ot ka nyiex keeing tix heue. ¹² Khaix hoik rheung bawg yam, kawn bun Shua pa mawh moeng Yudax yum, Yam hoik deeh nyawm rhawm nawh, Yudax hu ka pui pa rhip hauk yung tix, daux veng Timanax tau mai paox grawm tix Hirax, ceu pui Adulan heue. ¹³ Pui krai ka Tama ah nin, "Jhak heue, paox maix hoik hu sonsang rhip hauk yung ka veng Timanax heue." ¹⁴ Nawh peeik kraung ceep miexmai mai kheem tix ka man tawb ngai mai lhop ka tokaux tix mai nawh ngawm plak krax laig ka veng Timanax, kheu hoik yaox nawh ting Shelax mai nawh ang nyang bax yaox ti mawh moeng Shelax heue. ¹⁵ Yam yaox Yudax ka nawh, Yudax keud nawh mawh bun coh kaux, kheu kheem nawh pakngai tix heue. ¹⁶ Khaix an nawh hu ka nawh praok krax tan ah nin, "Kieh aux hoek ka maix" mawh kheu ang Yudax tawng mawh nawh mun tix heue. Bun an ah nin, "Phan maix sang hoek ka aux, sang tawx maix, patix ka aux lie?" ¹⁷ Yudax ah nin, "Aux tak tawx kawn pex ka maix tix mu khaing tobrie aux heue." Nawh baox ah nin, "Sivoe ang maix nyang bax tawx ceu an, pon tawx maix aux priex kraung sakse tix ceuceu lie?" ¹⁸ Nawh ah nin, "Sang kieh maix aux tawx kraung sakse ceu pa yuh ka mawx ka ti lie?" Nawh deeh pawk lox ah nin, "Tang maix deuh cum tix, maox rawd nyoi tix mai khaox gix tix, khankix pa koe daux tawm taix maix heue." Mawh kheu nan nawh tawx ceu ankix ka nawh mai hu it tau mai nawh, bun an koe kaux heue. ¹⁹ Khaix an bun an kaoh hu mai peeik man tawb ngai tix mai deeh ceep ka kraung ceep miexmai heue. ²⁰ Sonsang deeh teei Yudax kraung pa hoik tang tix ka bun an, nawh ploi paox grawm tix, ceu pui Adulan hu tawx kawn pex ka nawh, viang mawh nan, nawh ang yaox ka bun an heue. ²¹ Nawh chawk ka pui pa ot baoh an ah nin, "Bun pa coh kaux an, pa yie ot praok krax tin, ot dee mawx?" kix deeh ah nin, "Bun pa coh kaux ang koe tin tix kaux kawx heue." ²² Nawh deeh ing ka Yudax ah nin, "Ang aux yaox nawh, pui pa koe baoh an kawx, krai ka ang bun coh kaux koe tan heue." ²³ Yudax ah nin, aux hoik tawx kawn pex in mai maix ang tie yaox ka nawh, kieh nawh teei ti cie kraung khrai an khankix mawh kheu lhat ex tix kaig tua ka jao an heue. ²⁴ Khaix hoik luan loe khix, kix krai Yudax mhong ah nin, "Mun maix Tama, hoik yuh bun coh kaux, lheu khaing an nawh hoik koe kaux kheu sipiag yuh ti bun coh kaux" Yudax ah nin, viex nawh lih ka praix mai gleeing nawh heue." ²⁵ Yam viex kix Tama lih ka praix, nawh tawm lox mai sipaox kraung ka paox tix, ah nin, "Kraung in mawh cie pui mawx? aux hoik koe kaux mai nawh heue." mai nawh baox ah nin, "Yuh bwanson jhi aux yaox, cao kraung inkix, pa mawh cum mai maox rawd nyoi mai khaox gix heue." ²⁶ Khaix an Yudax tawng kraung an mawh cie tix ah nin, "Nawh hoik nie rahsee khaing aux, kheu ang aux tawx kawn simex tix Shelax ka nawh" Yudax ang lai dex mai nawh khaix an heue. ²⁷ Khaix an yam hoek bawg yam sang keh Tama, jhak heue, kawn brawm koe daux vaig nawh heue. ²⁸ Yam keh nawh, an tix kaux plih taix tix lih ka praix mai bun cao pa priex keh nawh teei keei raoh tix nyaing mai phyawk ka taix nawh ah nin, "In mawh pa sang keh sivoe heue." ²⁹ Viang mawh nan, kawn an deeh leed taix tix laig mai puxke nawh deeh tieh tix lih sivoe mai bun cao pa priex keh an ah nin, "Kheu maix lai sigrhang tix lih? Kieh see in, hoek piang maix!" Mawh kheu nan kix kok ceu kaux nawh mawh Pharet. ³⁰ Khaix an pux nawh pa phyawk keei raoh ka taix lih keh mai kix kok ceu kaux nawh mawh Zerax heue.

¹ Pui Ishamelax viex Yosiep hu ka meung Ejiptux mai coh nawh ka Pawtiphax pa mawh cao kaing naing tix kaux, greem Pharaw cao pau ju nawh heue. ² Simiang Siyiex ot tau mai Yosiep mai kaing jhaw pa yuh nawh haok hwan ting lhaong mai nawh yaox ti ot daux nyiex cao simiang tix, ceu pui Ejiptux heue. ³ Cao simiang nawh hoik yaox ka ot Simiang Siyiex tau mai nawh, Simiang Siyiex kieh can pa yuh nawh khankix haok hwan ting lhaong, daux tawm taix nawh heue. ⁴ Mawh kheu nan, Yosiep mawh pa khaw caw rhawm sivoe cao simiang tix mai kaing yuh nawh son cao simiang tix kawx, mawh pa khaw caw uik mai kieh Yosiep mawh pa kia ngien ka nyiex ma tix mai nawh ap can ceu pa koe ti khawmuik ka daux tawm taix Yosiep heue. ⁵ Jah bawg yam kieh nawh Yosiep mawh cao kwang piang nyiex ma mai kraung khrai tix khankix, Siyiex nawb bwan piang nyiex pui Ejiptux an, kheu jao Yosiep, bwanson Siyiex lih koe piang kraung daux nyiex ma nawh mai can pa koe daux kaung nawh heue. ⁶ Nawh ap can ceu pa koe tix khawmuik daux tawm taix Yosiep, lheu khaing blah, pa sang ih nawh, nawh ang lai yuh ti tawng ka kraung khrai pa koe tix khankix ceeix kawx. Yosiep kied mhawm grang mai pakpeung kaux hak nawh kawx jiet nyawm ti yaox heue. ⁷ Mawh kheu nan moeng cao simiang nawh ghoing rhawm ka Yosiep ah nin, "It tau mai aux heue." ⁸ Yosiep thiang ah nin ka moeng cao simiang tix, "Jhak heue, cao simiang aux ang yuh ti tawng ka can pa koe daux nyiex tau mai aux mai nawh hoik ap kuceu daux tawm taix aux heue." ⁹ "Pui lheu ting khaing aux daux nyiex in ang koe tix kaux kawx, lheu khaing maix pa ang nawh ap ka aux ang koe tix ceu kawx, mawh kheu mawh maix moeng cao simiang aux, aux lai sang pon yuh pa caox caig ting ceu in mai lud ka Siyiex yuh ka mawh?" ¹⁰ Nawh nyaw glaw ka Yosiep tix ngaix hoik tix ngaix, Yosiep ang cu nghiet ka lox kiex mai ang it ang ot tau mai kiex heue. ¹¹ Daux tix ngaix Yosiep laig ka daux nyiex, sonsang yuh kaing jhaw tix yam ang pui ot ka daux nyiex tix kaux kawx, ¹² Nawh giex Yosiep mai bluh ka sibex ceep nawh ah nin, "It tau mai aux heue." Viang mawh nan Yosiep prah sibex tix daux taix nawh mai to ti lih ka praix heue. ¹³ Yam yaox nawh prah Yosiep sibex tix ka daux taix nawh mai lih to ka praix, ¹⁴ nawh kok yo ka pui pa ot ka daux nyiex mai krai ka grawng in mai nawh ah nin ka kix, "Jhak heue, cao simiang aux viex pui Hebrie in hoek yuh pa ang khaw ang jiet ka ex, nawh hoek sonsang laig it tix mai aux, aux tom riag sau riang riag yo jao an heue." ¹⁵ "Yam hoik mhong nawh sau aux riang tix riag yo, nawh prah sibex tix ka aux mai to ti hu ka praix heue." ¹⁶ Mawh kheu nan nawh priex sibex Yosiep ka tix, tom deeh hoek cao simiang tix daux nyiex heue. ¹⁷ Khaix an nawh krai lox awm pa hoik krai ti ah nin, "Kawncau Hebrie pa viex maix hoek ka ex laig dee ot aux sonsang yuh pa ang khaw ang jiet ka aux, ¹⁸ Mawh kheu nan aux riag yo lox tix mai nawh prah sibex tix mai aux, mai to ka plak praix heue." ¹⁹ Yam hoik mhong cao simiang ka lox krai moeng tix pa ah nin, "Kawncau maix hoik yuh nin ka aux" mai nawh kied song rhawm heue. ²⁰ Cao simiang Yosiep teei mai sau nawh laig daux thawng, dee priex kix pui pa laig thawng simiang mai Yosiep ot daux thawng tan heue. ²¹ Viang mawh kawx nan, Siyiex ot tau mai Yosiep mai jhi nawh yaox krax moh pa caux rhawm tix, Nawh Cao kieh nawh mawh pa khaw rhawm ka sivoe ngai cao kaing thawng heue. ²² Can pui pa ot daux thawng mai kaing khawmuik cao kaing thawng hoik ap daux tawm taix Yosiep heue. ²³ Cao kaing thawng ang lai simi ti jhak ka can ceu pa koe greem tawm taix Yosiep tix ceu kawx, mawh kheu Simiang Siyiex ot tau mai nawh, can ceu pa yuh nawh kuceu, Simiang Siyiex kieh haok hwan heue.

¹ Khaix an cao kaing tawx kawk nyaux simiang mai cao kaing tawx priex ih simiang, lud ka simiang tix meung Ejiptux heue. ² Pharaw song rhawm ka cao kaing ra kaux, pa mawh cao kaing tawx kawk nyaux mai cao kaing tawx priex ih nawh, ³ mai nawh sau kiex daux thawng, ka daux nyiex cao kaing pa pau thawng an tau mai dee laung kix Yosiep tan heue. ⁴ Cao giex kaing lien pa pau simiang, ap kiex ka Yosiep mai kieh priex kiex mai kiex yaox ti ot tan tom kub rheung heue. ⁵ Khaix an cao kaing tawx kawk nyaux mai cao kaing tawx priex ih simiang meung Ejiptux, pa hoik laung kix daux thawng khawm ra kiex, kiex tang camaox pa koe dee bleeh son kaux mawx kaux an daux tix sawm tau heue. ⁶ Yosiep hoek ka kix plak ponngawb mai jhak ka kix mai yaox voi rhawm kiex khawm ra heue. ⁷ Mawh kheu nan, nawh chawk cao kaing an kiex, pa ot greem Pharaw pa hoik laung kix tau mai nawh daux nyiex cao simiang kix ah nin, "In ngaix pax lai laux rhawm jao patix?" ⁸ Kiex ah nin ka nawh, "Yiex camaox tix kaux tix ceu mai pui pa sang krai yiex mhong dee bleeh ang koe tix kaux kawx" Yosiep ah nin ka kiex, "Grawng pa krai dee bleeh camaox mawh pa dex mai Siyiex ang mawh lie? pax krai aux mhong, " ⁹ khaix an cao kaing tawx kawk nyaux, krai camaox ti ka Yosiep ah nin ka nawh, "Ka daux camaox aux koe nhu plix siiet tix nhu sivoe aux, ¹⁰ nhu plix siiet an, koe kak loe kak, piang kak an, koe kho pa sang dex pruh ka mai lih pruh, kak plix nawh hoik si gleem plix mai jiet mhawm teem heue. ¹¹ Kawk nyaux Pharaw koe daux taix aux mai aux teei plix siiet an, biiet daux kawk nyaux Pharaw mai ap kawk an daux taix Pharaw heue." ¹² Yosiep ah nin ka nawh, "Dee bleeh kak loe kak an mawh loe singaix, ¹³ khaix in loe singaix, Pharaw deeh yaog kaing maix mai deeh tawx dee ot maix, maix tak deeh yaox ti tawx kawk nyaux Pharaw ka daux taix nawh, awm pa hoik yaox maix ti yuh glang ka in, yam mawh maix cao tawx kawk nyaux nawh heue. ¹⁴ "Doh keud ka aux, yam yaox maix krax gaux rhawm mai jhi krax caux rhawm maix ka aux, krai grawng aux ka Pharaw, sonsang yaox aux ti lih khaing nyiex thawng in heue. ¹⁵ "Aux mawh pui pa briex kix khaing ceu pui Hebrie tete, aux ang tie koe dee lud daux haktiex in mai kix sau aux daux thawng heue." ¹⁶ Yam yaox cao kaing tawx priex ih simiang, mhawm lox dee bleeh camaox an nawh ah nin ka Yosiep, "Aux kawx camaox ti cah khrawng blah loe mu piang kaing ti, ¹⁷ Ka daux khrawng pa koe piang paox tix, koe priex ih kuceu son Pharaw, sim khankix hoek mai tut tix ih, pa koe daux khrawng cah aux piang kaing tix heue." ¹⁸ Yosiep ah nin, "Dee bleeh camaox in mawh nin, khrawng loe mu mawh loe singaix, ¹⁹ "Khaix in loe singaix, Pharaw tak tat kaing maix mai takteue maix piang khaox, sim khankix tak tut tix ih nex maix khaing maix heue." ²⁰ Khaix luan daux loe singaix, mawh singaix keh Pharaw, nawh yuh pawie singaix keh ti mai kok kawncau tix ku kaux mai nawh deeh teei cao kaing tawx kawk nyaux mai cao kaing tawx priex ih lih khaing daux thawng heue. ²¹ Nawh deeh taoh ju cao kaing tawx kawk nyaux nawh mai deeh kieh nawh yuh cao kaing tawx kawk nyaux, nawh deeh yaox ti mawh cao tawx kawk nyaux daux taix Pharaw, ²² mai nawh takteue cao kaing tawx priex ih, awm pa khaw mai lox krai Yosiep ka kiex heue. ²³ Viang mawh nan, cao kaing tawx kawk nyaux ang lai doh keud ka Yosiep mai hoik piawm ka nawh heue.

¹ Khaix hoik luan ra num, Pharaw camaox yuh nin, nawh cung hawt klawng Nilax, ² mawie miex pa mhawm plang pa kluing aliah mu lih khaing daux rawm klawng Nilax mai kix sawm rib pa kuah hawt klawng tan heue. ³ Mai jhak heue, mawie miex pa ang mhawm grang pa krawx rhao aliah mu, baox lih khaing rawm klawng Nilax mai cung hawt praok mawie miex lih sivoe aliah mu ka praok rawm klawng Nilax heue. ⁴ Mawie miex pa ang mhawm grang pa krawx pa rhao aliah mu khankix, bleet ka mawie miex pa mhawm plang pa kluing an aliah mu. Pharaw kawx siduad khaing it tix heue. ⁵ Nawh baox lhiak it mai baox camaox ra bawg tix bawg, sigleem nghox pa ting mu jiet mhawm sok aliah sigleem lih khaing num nghox tix pang heue. ⁶ Mai jhak heue, sigleem nghox pa grhip aliah mu, pa laux jao bhaung lih khaing plak lih singaix, deeh kuah sijaox khaix kix heue. ⁷ Sigleem nghox pa grhip aliah mu an, bleet sigleem nghox pa ting mu pa jiet mhawm sok an mai Pharaw siduad, nawh tawng mawh camaox tix heue. ⁸ Yam hoek ponngawb, nawh kied koe krax khi rhawm, nawh ploi pui kok ka cao sibawk mai pui koe pingnya khankix pa ot ka daux meung Ejiptux, Pharaw krai kix mhong grawng camaox tix, viang mawh nan, pa pon krai dee bleeh caomaox Pharaw ang koe tix kaux kawx heue. ⁹ Khaix an cao kaing tawx kawk nyaux ah nin ka Pharaw, "Aux doh keud ka pa lud tix in ngaix heue. ¹⁰ Yam song rhawm Pharaw ka kawncau tix khankix maix sau aux daux thawng tau mai cao kaing tawx priex ih, ka daux nyiex cao kaing naing pau ju simiang, ¹¹ yiex ra kaux tang camaox daux tix sawm mai yiex khawm ra camaox grawng pa koe dee bleeh cie mawx cie an heue. ¹² Pui Hebrie pa awn ju tix kaux, pa mawh kawncau ka cao kaing pau ju simiang ot tau mai yiex tan, yam krai yiex camaox tix ka nawh mai nawh toe dee bleeh camaox yiex kaux mawx kaux an, awm pa hoik camaox yiex heue. ¹³ Awm pa hoik toe nawh dee bleeh son yiex hoik lih ti mawh awm an maix deeh tawx beeh glawm cao kaing tawx kawk nyaux ka aux mai ka kaw an maix takteue ka nawh kieh nawh yum heue." ¹⁴ Khaix an Pharaw ploi pui hu kok ka Yosiep mai kix nied ti teei nawh lih khaing daux thawng, nawh khlao hauk jheeh ti mai loh kraung ceep tix hoek ka Pharaw heue. ¹⁵ Pharaw ah nin ka Yosiep, "Aux hoik camaox tix ceu mai pui pa pon toe dee bleeh ang koe tix kaux kawx mai aux hoik mhong krai kix grawng chix toe maix dee bleeh camaox heue." ¹⁶ Yosiep pawk lox Pharaw ah nin, "Ang mawh aux pa tang pon krai, Siyiex tak pawk ka dee bleeh camaox maix heue." ¹⁷ Khaix an Pharaw ah nin ka Yosiep, "Jhak heue, ka daux pa camaox aux, aux cung ka praok rawm klawng Nilax, ¹⁸ mawie miex pa mhawm plang pa kluing aliah mu lih dom mawx dom an, khaing daux rawm klawng Nilax mai kix sawm rib tan, ¹⁹ mawie miex pa ang mhawm grang pa krawx pa rhao tang mu aliah mu lih hoek khaix kix, aux ang sax yaox pa awm an daux haktiex Ejiptux tix bawg kawx heue. ²⁰ Mawie miex pa ang mhawm grang pa krawx pa rhao an ih ka mawie miex pa kluing pa lih sivoe aliah mu, ²¹ khaix ih kix ka mawie miex an, pui tix kaux kawx, ang tawng ka hoik ih kix ka mawie an, mawh kheu kawn ca krawx rhao mawie ankix awm phao voe heue. Khaix an aux siduad ka heue. ²² Aux baox deeh yaox ka daux camaox ti yuh nin, sigleem nghox aliah mu pa jiet mhawm sok aliah sigleem, lih khaing num nghox tix pang, ²³ mai sigleem nghox pa kroh pavhit aliah sigleem pa laux ka bhaung pa hoek plak lih singaix, kuah sijaox khaix kix heue. ²⁴ Sigleem nghox pa kroh pa fit an, bleet ka sigleem nghox pa mhawm an aliah sigleem an heue. Aux krai ceu in ka cao sibawk khankix, viang mawh nan, ang pui chix toe dee bleeh pa camaox aux tix kaux kawx heue." ²⁵ Khaix an Yosiep ah nin ka Pharaw, "Grawng camaox Pharaw mawh ngie tix ceu khaing, Siyiex hoik jhi Pharaw yaox ka grawng pa sang yuh Nawh Cao heue. ²⁶ Mawie miex aliah mu, mawh aliah num mai sigleem nghox pa mhawm kawx, mawh aliah num mai camaox in mawh tix ceu khaing heue. ²⁷ Mawie miex pa krawx pa rhao, pa ang mhawm grang pa lih hoek khaix kix, mawh aliah num, sigleem nghox pa ang koe tidtix aliah sigleem, pa hoik laux ka bhaung pa kaoh khaing plak lih singaix an, mawh sibhawm praix aliah num heue. ²⁸ Grawng ceu pa krai aux ka Pharaw in, mawh pa jhi Siyiex Pharaw yaox pa sang yuh Nawh Cao heue. ²⁹ Tak koe pa ih tom haoh tom lheu daux haktiex Ejiptux aliah num, ³⁰ khaix hoik aliah num, sibhawm praix tak baox hoek aliah num, tom hoik piawm kix ka pa haoh lheu ti ka daux haktiex Ejiptux mai sibhawm praix tak kieh haktiex khawmuik laux leeing heue. ³¹ Mawh kheu pa lang teung sibhawm praix an, pui khankix hoik piawm ka pa haoh lheu kix ka glang ka an heue. ³² Grawng deeh baox Pharaw ti camaox ra bawg in, mawh pa hoik tat Siyiex ti deuh mai Siyiex tak sang khran kieh ceu in lih ti mawh heue. ³³ Mawh kheu nan yam in, kieh Pharaw laug pui pa naog mai krax tawng mai pui pa koe pingnya mai kieh nawh kwang piang haktiex Ejiptux heue. ³⁴ Kieh Pharaw yuh ceu in mai kieh deuh cao kaing khankix, pa sang kwang piang haktiex khawmuik mai kieh kix khrawm gaox, nghox phwan son tix son, pa lih khaing meung Ejiptux, yam kawn nie nghox daux aliah num heue. ³⁵ Kieh kix khrawm pa ih ka daux num pa mhawm pa hoek an mai khrawm ti deuh nghox koi khankix greem sibrawm Pharaw mai kieh kix rhawm pa ih ka daux veng khankix heue. ³⁶ Pa ih pa rien ti deuh in, mawh son bawg yam sibhawm praix aliah num, pa sang lih ti hoek daux haktiex Ejiptux, sonsang ang pui haktiex yaox krax laux leeing glang yam sibhawm praix heue." ³⁷ Pharaw mai kawncau nawh khankix khaw rhawm ka lox pa krai Yosiep heue. ³⁸ Pharaw ah nin ka kawncau tix khankix, "Mawh sang pon yaox ex ka pui pa ot khwan Siyiex ka daux nawh awm pui in dee mawx lie?" ³⁹ Mawh kheu nan Pharaw ah nin ka Yosiep, "Mawh kheu Siyiex hoik jhi maix yaox grawng in khawmuik, pui pa koe rhawm keud pa mhawm mai pui koe pingnya awm maix ang lai koe tix kaux kawx, ⁴⁰ "Maix tak kwang piang nyiex haw aux mai pui haktiex aux khawmuik, tak yuh awm gumlox pa tawm maix khankix, mawh ngie ting aux khaing maix, piang dang ngeung tix heue." ⁴¹ Pharaw ah nin ka Yosiep, "Jhak heue, aux hoik yaog maix kwang piang haktiex Ejiptux khawmuik heue." ⁴² Khaix an Pharaw peeik jeep gien khaing taix tix mai ceep ka taix Yosiep mai ceep sibex man pa mhawm piang nawh mai maox khri ka ngawg nawh heue. ⁴³ Kieh nawh brug ling lawx brung ra mu tix mu cie tix, pui khankix kok yo lox sinum sivoe nawh, "Grux ngawng ka nawh!" mawh kheu nan, Pharaw yaog nawh kwang piang haktiex Ejiptux khawmuik heue. ⁴⁴ Pharaw ah nin ka Yosiep, "Aux mawh Pharaw, lheu khaing pa khaw rhawm maix, pui tix kaux kawx ang pon yaog taix caong tix ka daux haktiex Ejiptux heue." ⁴⁵ Pharaw kok ceu kaux Yosiep mawh Zaphanata-panax mai nawh tawx Yosiep teei Asanax, kawn bun cao giex kaing li Pawtipherax pui veng Awnax, mawh moeng tix heue. Yosiep lih hu ka daux pa kwang tix haktiex Ejiptux kudah dee heue. ⁴⁶ Yosiep hoik koe ju tixngoe num, yam yaox nawh ti cung sivoe Pharaw, simiang Ejiptux. Yosiep lih hu khaing sivoe plakngai nawh, ka daux haktiex Ejiptux kudah heue. ⁴⁷ Bawg yam koe ceu pa haoh lheu aliah num, haktiex lih ti koe plix tom haoh hun heue. ⁴⁸ Nawh khrawm pa ih khaing haktiex Ejiptux daux aliah num mai priex ti deuh daux veng, pa ih lih khaing daux kaung pa koe rawb rim veng tang kieh khrawm veng mawx veng an heue. ⁴⁹ Yosiep khrawm nghox koi, haoh hun awm mhaik praok rawm sigrit sigra, tom ang nawh lai uik simin kheu hoik haoh hun heue. ⁵⁰ Sivoe ang num sibhawm praix nyang hoek, Yosiep pon kawn simex ra kaux khaing Asanax pa mawh kawn bun cao giex kaing li Pawtipherax veng Awnax heue. ⁵¹ Yosiep kok ceu kaux kawn simex tix mawh Manashe, mawh kheu Siyiex hoik kieh aux piawm krax taug mao mai kawn nyiex ma keeing tix heue. ⁵² Nawh kok ceu kaux kawn simex ra kaux tix kaux mawh Epharen, mawh kheu Siyiex hoik kieh aux haoh hun ka daux haktiex pa kha aux rhawm tix heue. ⁵³ Num pa haoh lheu pa ih aliah num daux haktiex Ejiptux hoik sidah, ⁵⁴ num sibhawm praix aliah num hoik jah ti hoek, awm pa hoik krai Yosiep, sibhawm praix lih koe ka daux haktiex kudah, viang mawh nan, daux haktiex Ejiptux koe pa ih heue. ⁵⁵ Yam sibhawm praix daux haktiex Ejiptux, pui khankix riag yo ka Pharaw son pa ih, mai Pharaw ah nin ka pui Ejiptux khankix, "Hu ka Yosiep, yuh awm pa krai nawh ka pex heue." ⁵⁶ Sibhawm praix lih koe piang haktiex khawmuik, Yosiep paoh nyiex krao khankix mai coh nghox ka pui Ejiptux mai sibhawm praix nied ti nie kin daux haktiex Ejiptux heue. ⁵⁷ Kheu kied kin sibhawm praix ka meung tang dah khankix, pui haktiex khankix hoek ti liag nghox ka Yosiep daux haktiex Ejiptux heue.

¹ Yam mhong Yakop koe nghox daux Ejiptux, Yakop ah nin ka kawn simex tix khankix, "Yuh ka mawx, pex lai jhak paox tix, tix kaux lai tix kaux?" ² Mai nawh ah nin, "Aux hoik mhong koe nghox daux meung Ejiptux tete; hu ka dee an mai liag ti viex nghox son ex, sonsang im ju ex mai ang yaox ti yum ka heue." ³ Puxke Yosiep kao kaux hu meung Ejiptux sonsang liag kix nghox heue. ⁴ Yakop ang kieh Binyamin, pux Yosiep, hu mai puxke nawh khankix, kheu lhat nawh ceu pa kha rhawm hoek piang nawh heue. ⁵ Kawn simex Isarelax khankix, hu liag nghox tau mai pui hoek liag nghox, mawh kheu sibhawm praix hoik lih ka daux haktiex Khanan heue. ⁶ Yosiep mawh cao kwang ka haktiex, mai nawh mawh cao coh nghox ka pui haktiex, puxke Yosiep khankix hoek mai gup ngai tix piang tiex sivoe ngai nawh heue. ⁷ Yosiep yaox ka puxke tix khankix mai tawng ka kix, viang mawh nan nawh yuh ti ang tawng mai briah ka kix ah nin, "Kaoh pex khaing dee mawx?" Mai kix ah nin, "Yix kaoh khaing haktiex Khanan, sonsang liag pa ih." ⁸ Viang Yosiep tawng ka puxke nawh khankix kawx, kix ang lai tawng ka nawh heue. ⁹ Yosiep doh keud ka camaox tix, pa hoik camaox nawh grawng kix ah nin ka kix, "Pex mawh pui hoek ti jiang ka ceu pa iak riang yix, daux haktiex in heue." ¹⁰ Kix ah nin ka nawh, "Simiang eue, ang doh mawh nan, yix mawh kawncau maix pa hoek ti liag pa ih khaing. ¹¹ Yix mawh kawn keeing tix kaux khaing, yix mawh pui rahsee, kawncau maix inkix ang mawh pui jiang." ¹² Nawh ah nin ka kix, "Ang mawh, pex hoek ti jhak ceu pa iak riang daux haktiex in." ¹³ Kix ah nin, "Yix pa mawh kawncau maix, koe puxaik kao ra kaux mai mawh kawn keeing tix kaux khaing daux haktiex Khanan, pux ghoik ot mai keeing yix tom yam in mai an tix kaux ang lai koe heue." ¹⁴ Yosiep baox ah nin ka kix, "Hoik mawh awm pa ah aux ka pex, pex mawh pui jiang. ¹⁵ Tak yaox ti cheuk cheu ka pex, phan pex ang viex pux ghoik tix hoek, awm im ju Pharaw, pex tak ang lai yaox ti lih khaing tin heue. ¹⁶ Ploi pui tix kaux daux pex ing mai kieh nawh viex pux pex hoek, pex pa kawn deuk, tak sau daux thawng, awm im ju Pharaw, lox krai pex, mawh ang mawh, tak cheuk ti yaox ka, pex rug mawh pui jiang heue." ¹⁷ Nawh sau kix daux thawng loe singaix heue. ¹⁸ Khaix hoik naog loe singaix, Yosiep ah nin ka kix, "Yuh awm in sonsang im ju pex, kheu mawh aux pui lhat graung ka Siyiex, ¹⁹ phan pex mawh pui rahsee, kieh puxaik daux pex tix kaux kaux ot daux thawng, kieh pui deuk khankix viex nghox ing ka nyiex pex, dee sibhawm praix, ²⁰ viex pux ghoik pex hoek ka aux, sonsang tawng aux rug mawh lox pex pa mawh meh mai pex tak ang yaox ti yum." Mai kix yuh awm an heue. ²¹ Khaix an kix ah nin ka paox tix, "Ex hoik lud ka pux tix tete, grawh grawng nawh, ex hoik yaox krax kha nawh rhawm tix mai yam khyox khaw nawh ka ex, ex ang nghiet, mawh kheu nan, krax pa kha rhawm in hoik hoek piang ex phao heue." ²² Rubin deeh ah nin ka kix, "Aux hoik krai ka pex paw yuh phimap pa lud ka kawn nyawm in, ang mawh lie?, viang mawh nan, pex ang nghiet. Mawh kheu nan, krax ciyang son nham nawh hoik hoek piang ex phao heue." ²³ Kix ang tawng Yosiep hoik tawng ka pa krai tix, mawh kheu sikah Yosiep mai kix, ka pui pa toe lox heue. ²⁴ Nawh veeh ti hu khaing kix mai yiiem; mai nawh deeh hoek sikah mai kix. Nawh teei Simion khaing kix mai phyawk nawh sivoe ngai kix heue. ²⁵ Yosiep tawx lox mai kieh kix sau nghox naog daux chee mai deeh sau mau cie mawx cie an, daux chee kix mai kieh tawx pa ih kix son daux krax mai kix yuh awm an heue. ²⁶ Khaix an kix tang nghox piang la mai lih hu heue. ²⁷ Ka daux kix ti kaux, paoh chee cie tix, sonsang tawx la sawm, dee bang kix, nawh deeh yaox mau cie tix ka daux moing chee, ²⁸ mai nawh ah nin ka puxaik tix khankix, jhak pex yaox mau aux hoik deeh sau ti daux moing chee aux!" Kix siyaoh lhat graung ah nin ka paox tix, tix kaux lai tix kaux, "Pa yuh Siyiex ka ex in, mawh pa yuh ka mawx lie?" ²⁹ Yam bleeh kix ka keeing tix Yakop daux haktiex Khanan, kix krai nawh mhong grawng pa hoik lih mawh ka kix ah nin, ³⁰ "Pui pa mawh simiang daux haktiex an, briah ka yix mai ah yix mawh pui hoek jiang ka haktiex. ³¹ Yix ah nin ka nawh, yix mawh pui rahsee, yix ang lai mawh pui jiang, ³² yix mawh puxaik kao ra kaux, pa mawh keeing tix kaux khaing, an tix kaux ang lai koe mai pux ghoik yix ot mai keeing yix, tom yam in daux haktiex Khanan heue. ³³ Kaw an pa mawh simiang ka haktiex an, ah nin ka yix, sonsang tawng aux mawh pex pui rahsee, prah pui tix kaux, daux puxaik pex ka aux mai teei pa ih son nyiex ma pex pa yaox ka sibhawm praix mai lih hu heue. ³⁴ Viex pux ghoik pex hoek ka aux, sonsang tawng aux ang pex mawh pui jiang mai tawng pex mawh pui rahsee, aux tak deeh ap ka puxaik pex mai pex tak yaox ti yuh lai geu daux haktiex in heue." ³⁵ Yam thawk kix chee ti, kix daox deng ka deeh yaox ka gie mau cie mawx cie an daux chee tix, yam yaox kix mai keeing kix gie mau an, kix yaoh ka heue. ³⁶ Keeing kix Yakop ah nin ka kix, "Pex hoik rhim ti teei kawn aux khankix khaing aux, Yosiep kawx ang lai koe mai Simion kawx ang lai koe, yam in pex kawn sang deeh viex Binyamin, ceu in hoik mawh pa tug ka aux heue." ³⁷ Khaix an Rubin deeh krai ah nin ka keeing tix, phan aux ang lai deeh viex Binyamin hoek ka maix, pah ka kawn simex aux khawm ra kaux, ap nawh daux taix aux mai aux tak deeh viex nawh hoek ka maix heue. ³⁸ Yakop ah nin, "Ang aux doh tawx kawn simex tix hu tau mai pex, kheu hoik yum puxke nawh mai kawn deuk nawh nong nong. Phan pa caox lih ti mawh ka nawh, daux krax hu pex, pex tak viex hauk kaing paing aux laig daux simeeig tau mai krax laux rhawm heue."

¹ Sibhawm praix, kied nie kin daux haktiex Khanan heue. ² Khaix hoik uik ih kix nghox pa viex ti khaing Ejiptux, keeing kix ah nin ka kix, "Deeh hu liag priex son ex ceeix heue." ³ Yam an Yudax ah nin ka nawh, "Pui an hoik tawx satix mai hoik ah lox kin ka yix yuh nin, phan pex ang viex pux tix hoek, pex tak ang pon ti yaox ka ngai aux heue." ⁴ Phan maix ploi pux yix hu mai yix, yix tak hu liag pa ih, ⁵ viang mawh nan phan maix ang ploi nawh hu, yix tak ang lai hu, mawh kheu hoik ah pui an ka yix yuh nin, phan pex ang viex pux ti hoek, pex tak ang pon ti yaox ngai aux heue." ⁶ Isarelax ah nin, "Mawh kheu tix, pex lai krai pui an mhong ka kawn koe pux tix mai yuh krax kha rhawm ka aux yuh ka mawx?" ⁷ Kix ah nin, "Pui an, chawk grawng yix mai grawng doeh ru yix kriem kre, nawh ah nin, kawn im ju keeing pex lie? Koe pux tang kaux pex lie?" Yix deeh krai nawh mhong awm pa chawk nawh, mawx sang tawng ah nawh, "Viex pux pex hoek yuh ka mawx?" ⁸ Yudax ah nin ka keeing tix Isarelax, "Ploi kawn nyawm tau mai yix mai yix sang yaog tix hu, sonsang im ju ex mai ang yum, ex ku kaux khawm maix mai kawn nyawm iak khankix heue. ⁹ "Aux lawk mawh cao kham nawh maix tak deeh mhaing nawh khaing daux taix aux, phan aux ang pon viex nawh hoek mai deuh sivoe ngai maix, kieh aux klawm phimap an leeing ju heue. ¹⁰ Phan yix ang rheung yuh nin yam in, yix tee hoik hoek ra bawg heue." ¹¹ Keeing kix Isarelax ah nin ka kix, "Phan mawh nan, yuh nin, teei pex viex plix khaox pa mhawm khaing daux haktiex in daux bau pex mai tawx totaix ka pui an, viex sidah peeh khaox ceeix, rawm hia ceeix, nyawng bhawng mai sidah muran, plix khaox pa awm sok kram jung mai plix khaox pa awm sok ceem tiex heue. ¹² Teei pex viex mau ra son daux taix tix mai mau pa yaox pex ka daux moing chee kawx deeh viex hu, bawg blah ha mawh kix pa pi nieh. ¹³ "Viex pux pex mai deeh kaoh hu ka pui an, phan aux yaox ti som kawn tix, aux tak lai kham ka heue. ¹⁴ Kieh Siyiex pa ting sibrawm tawx krax caux rhawm ka pex sivoe pui an, sonsang deeh ploi nawh puxke pex mai Binyamin heue." ¹⁵ Mawh kheu nan kix teei totaix mai mau ra son daux taix tix, khawm Binyamin lih hu ka meung Ejiptux mai cung sivoe Yosiep heue. ¹⁶ Yam yaox Yosiep ka Binyamin tau mai kix, nawh ah nin ka pui cau tix daux nyiex, "Viex pui inkix laig ka daux nyiex mai pah tobrie yuh priex preem, mawh kheu pui inkix, sang ih priex ngaix tau mai aux heue." ¹⁷ Pui ankix yuh awm pa krai Yosiep mai viex kix hu nyiex Yosiep heue. ¹⁸ Kix kied koe krax lhat graung, mawh kheu kok nawh kix hoek ka nyiex Yosiep ah nin, "In tee mawh grawng mau, pa deeh viex ex ing daux chee ex bawg voe nhaox, kix tom kok ex hoek tin, sonsang sawg krax lud ex mai plee piang ex mai sang khrawt la viex ex mai kieh ex mawh siliex tix heue." ¹⁹ Yam an kix greed ti dex pui cau nyiex Yosiep, kix sikah tau mai nawh hawt diang siviex, ²⁰ mai kix ah nin, "Cao simiang eue, bawg sivoe nhaox, yix hoek ti liag priex tete, ²¹ yam hoek yix ka dee bang tix, yix paoh chee tix mai yaox mau daux cie pui mawx cie pui an daux moing chee, mau yix khankix kawn grum uik, mawh kheu nan, yix tom deeh viex mau in hoek heue. ²² Yix baox viex mau tang dah, daux taix tix, sonsang liag pa ih, yix ang lai tawng ka pui pa sau mau yix, daux chee yix heue." ²³ Pui cau an deeh ah nin, "Kieh pa nhim koe mai pex, paw lhat graung, Simiang Siyiex pex mai Siyiex keeing pex, sau mau daux chee pex, aux hoik pon mau pex, " khaix an nawh ap Simion ka kix heue. ²⁴ Kawncau an, viex kix laig daux nyiex Yosiep mai tawx rawm kieh kix khoek caong tix mai nawh tawx la kix sawm, ²⁵ kix dah ti cox khrex totaix ka hoek Yosiep yam ponngaix, mawh kheu mhong kix ti sang ih priex ngaix tau mai nawh heue. ²⁶ Yam hoek Yosiep ka nyiex, kix ap totaix pa viex kix daux taix Yosiep mai gup ti piang tiex sivoe nawh heue. ²⁷ Yosiep singeuh taix kix ah nin, "Keeing pex tax kuad pa ah pex kawx nyawm ot lie? Kawn im ju nawh lie?" ²⁸ Kix ah nin, "Yix pa mawh kawncau maix, keeing yix nyawm ot, nawh kawn im ju." Kix gup ngai tix mai krub ka nawh heue. ²⁹ Nawh maong ti jhak mai yaox pux tix Binyamin pa mawh kawn simex miex nawh ah nin, "In mawh pux ghoik pa hoik krai pex ka aux lie?" Nawh ah nin, "Kawn simex aux eue, kieh Siyiex nawb bwan piang maix." ³⁰ Nawh kied koe krax caux rhawm yam yaox ka pux tix, mawh kheu nan, Yosiep yaog ti kaoh sijaox mai sawg dee sang yiiem tix, nawh laig daux lawg it tix mai yiiem heue. ³¹ Khaix an nawh khoek ngai tix mai lih plak praix, gun rhawm tix ah nin, "Khan priex heue." ³² Kix khan dah dee son Yosiep tix dah, son puxaik nawh tix dah mai son pui Ejiptux pa sawm tau mai nawh tix dah, mawh kheu pui Ejiptux ang sax ih priex tau mai pui Hebrie, kheu mawh pa seeing pui Ejiptux ka heue. ³³ Kix ngawm sivoe ngai nawh, jah ka kawn Ai tom hoek ka kawn ghoik, pa ting pa iak awm hoik koe been kix, kix ra lai jhak pakngai paox tix, ka daux pa daox deng heue. ³⁴ Khaix an Yosiep teei pa khan kheu kix sivoe nawh mai tawx ka kix, viang mawh nan, pa khan kheu nawh son Binyamin hoik nie khaing kix phwan son mai kix ih nyau tau mai nawh ka daux pa gaux rhawm heue.

¹ Nawh tawm lox ka pui tix daux nyiex ah nin, "Sau pa ih ka chee pui inkix, tom pon viex kix ing mai deeh sau mau cie pui mawx cie pui an, daux moing chee kix heue. ² Sau kawk mau pa nyaux aux, daux moing chee kawn ghoik an mai mau ngaw nghox nawh awx." Kawncau nawh yuh awm lox pa krai Yosiep heue. ³ Yam bah riang praix plak ponngawb, kawncau nawh ploi kix ing tau mai la kix heue. ⁴ Yam ang kix nyang luan singai veng, Yosiep ah nin ka kawncau tix, "Kaoh, nied ti hawt ka pui ankix mai yam krup maix kix maix ah nin ka kix, pex lai deeh tawx pa caox ka pa mhawm yuh ka mawx lie? Yuh ka mawx, pex lai briex kawk nyaux aux? ⁵ In mawh kawk nyaux cao simiang aux, pa priex nawh sonsang koe pingnya tix ang mawh lie? pa yuh pex ang lai mawh pa mhawm heue." ⁶ Yam krup kawncau an ka kix, nawh krai kix mhong awm lox in heue. ⁷ Kix ah nin ka nawh, "Yuh ka mawh cao simiang aux lai ah lox yuh nin? Kieh ceu in singai khaing yix pa mawh kawncau maix khankix, yix ang doh yuh ceu in. ⁸ Jhak heue, yix deeh viex mau pa yaox yix daux moing chee tix, khaing haktiex Khanan ka maix, yix kawn sang deeh briex mau nyiex cao simiang maix yuh ka mawx?, ⁹ yaox maix an ka mawx ang ah, kieh nawh yum mai yix kawx tak mawh siliex cao simiang maix heue." ¹⁰ Nawh ah nin, "Kieh mawh awm lox pa ah pex, phan aux yaox ka pui mawx, kieh mawh siliex aux, pex pa deuk tak ang koe phimap ka heue." ¹¹ Khaix an kix nied tah chee ti piang tiex mai tang paoh ka chee tix ku kaux heue. ¹² Nawh khrieh kraung kix, jah ka pui pa ting tom hoek ka pa iak mai yaox kawk nyaux daux chee Binyamin heue. ¹³ Khaix an kix riah kraung ceep tix mai deeh sau lhang la tix ku kaux mai deeh ing daux veng heue. ¹⁴ Yam hoek Yudax mai puxaik nawh khankix ka nyiex Yosiep, nawh kawn ot tan mai kix gup ti piang tiex sivoe nawh heue. ¹⁵ Yosiep ah nin ka kix, "Kheu patix pex lai yuh nin? Ang pex tawng mawh aux simex pa koe pingnya tix kaux lie?" ¹⁶ Yudax ah nin, "Ex sang khaw ti ah yuh ka mawx ka cao simiang aux lie? Ex sang krai yuh ka mawx?, phan ang mawh nan, ex tak sang luad luan khaing yuh ka mawx? Siyiex hoik yaox krax lud kawncau maix khankix, jhak heue, yix kham ti mawh siliex cao simiang aux, pui pa hoik yaox pex kawk nyaux mai nawh heue." ¹⁷ Yosiep ah nin, "Sonsang yuh aux an, kieh ceu in singai khaing aux, mawh ngie pui pa hoik yaox ex kawk daux taix nawh, tak mawh siliex aux, phan mawh pex, deeh ing ka keeing pex daux pa nhim heue." ¹⁸ Khaix an Yudax hoek dex nawh ah nin, "Cao simiang aux eue, kieh kawncau maix krai cao simiang mhong lox tix gum liak, paw nyang kieh krax song rhawm maix lih piang kawncau maix ha, mawh kheu hoik awm maix Pharaw heue. ¹⁹ Cao simiang aux hoik chawk ka kawncau tix khankix ah nin, koe keeing pex lie? phan ang mawh nan, koe pux pex lie?" ²⁰ Yix deeh ah nin, "Yix koe keeing pa hoik kuad mai pux ghoik pa iak tix kaux, pa pon nawh yam riex ju ti, puxke nawh hoik yum, pa keh khaing miex nawh, mawh ngie nawh pa deuk khaing, keeing nawh kied moh ka nawh heue. ²¹ Khaix an maix deeh ah nin ka kawncau tix, viex nawh hoek ka aux, sonsang yaox aux ka ngai tix heue. ²² Yam an yix ah nin ka cao simiang tix, kawn nyawm an ang doh pon gwieh khaing keeing nawh, phan nawh gwieh hu khaing keeing tix, keeing nawh tak yum heue. ²³ Khaix an maix ah nin ka kawncau tix, phan pex ang viex pux ghoik tix hoek tau mai pex, pex tak ang lai pon ti yaox ka pakngai aux heue. ²⁴ Yam deeh ing yix ka keeing tix, pa mawh kawncau maix, yix krai nawh mhong gumlox maix cao simiang heue. ²⁵ Yam ah keeing yix nin, deeh hu liag pa ih son ex ceeix heue. ²⁶ Yix deeh ah nin, phan pux ghoik ang hu tau mai yix, yix ang pon hu, phan pux ghoik hu tau, yix tom pon hu, mawh kheu phan yix ang viex pux ghoik ti hu, yix tak ang lai pon ti yaox pakngai pui an heue. ²⁷ Khaix an keeing yix pa mawh kawncau maix ah nin ka yix, pex hoik tawng keh moeng aux kawn simex son aux ra kaux, ²⁸ tix kaux hoik hu khaing aux mai aux hoik krai pex mhong, tee hoik phawng nex nawh tete, jah tom yam an aux ang lai yaox nawh, ²⁹ phan pex baox viex in tix kaux khaing aux mai kieh pa caox hoek piang nawh, pex tak viex hauk kaing paing aux laig daux simeeig tau mai krax laux rhawm heue. ³⁰ Mawh kheu nan, yam deeh hoek aux ka keeing tix pa mawh kawncau maix, phan kawn nyawm in ang hoek tau mai yix, mawh kheu rhawm nawh kied koe ka daux ju kawn nyawm an heue. ³¹ Yam yaox nawh ang kawn nyawm an koe tau mai yix, nawh tee yum mai yix kawncau maix tak yaox ti viex hauk kaing paing keeing yix pa mawh kawncau maix hu ka daux simeeig tau mai krax laux rhawm nawh heue. ³² Mawh kheu aux kawncau maix mawh cao pa kham son kawn nyawm in ka keeing aux yuh nin, phan aux ang viex nawh hoek ka maix, aux tak yaox ti klawm phimap sivoe keeing tix leeing ju heue. ³³ Mawh kheu nan kieh aux ot tang kawn nyawm an mai yuh siliex maix cao simiang mai kieh kawn nyawm an deeh ing tau mai puxke nawh khankix liak. ³⁴ Phan kawn nyawm an, ang hoek mai aux, aux sang chix ing ka keeing tix yuh ka mawx? Aux lhat ti yaox hoek ceu pa caox piang keeing tix heue."

¹ Khaix an Yosiep ang lai pon gun gut rhawm tix sivoe pui pa cung hawt nawh khankix mai nawh kok yo ka kix, "Kieh kix ku kaux lih hu khaing aux heue." Mawh kheu nan pui tang kaux ang lai ot mai nawh tix kaux kawx, yam jhi Yosiep puxaik tix tawng ka tokaux tix heue. ² Nawh yiiem riag, tom hoik mhong pui Ejiptux, khawm can pui pa ot nyiex haw Pharaw heue. ³ Yosiep ah nin ka puxaik tix khankix, "Aux mawh Yosiep, kawn im ju keeing aux lie?", puxaik nawh khankix ang pon pawk lox nawh, mawh kheu kix hoik daox aw sivoe ngai nawh heue. ⁴ Yosiep ah nin ka puxaik tix khankix, "Hoek dex ka aux, aux khyox khaw ka pex." Mai kix kawx hoek dex, nawh ah nin, "Aux mawh pux pex Yosiep, pa hoik coh pex daux meung Ejiptux heue. ⁵ Yam in pex paw laux rhawm mai paw song rhawm ka cao tix, kheu hoik coh pex aux tin, kheu hoik mawh Siyiex pa ploi aux hu sivoe pex, sonsang taoh ka ju pui heue. ⁶ Mawh kheu sibhawm praix, tak hoik ra num, khaix in kawn deuk phwan num pa ang pui nyang pon thai kaung mai vawg nghox heue. ⁷ Siyiex hoik ploi aux hu sivoe pex, sonsang deuk pex piang haktiex mai sonsang taoh aux ju pex khawmuik ka daux pa pluat ploi pa ting lhaong heue. ⁸ Mawh kheu nan ang lai mawh pex pa ploi aux hoek tin, mawh Siyiex mai Nawh Cao kieh aux mawh keeing ka Pharaw mai mawh cao ka daux nyiex haw mai kwang piang haktiex Ejiptux khawmuik heue. ⁹ Nied kaoh mai hu ka keeing aux mai krai nawh mhong grawng pa krai kawn simex nawh Yosiep, yam in Siyiex hoik kieh aux mawh simiang daux haktiex Ejiptux khawmuik, hoek ka aux mai paw lai tuh rhawm ka tidtix. ¹⁰ Pex tak yaox ti ot ka haktiex Goshen, dex tau mai aux, viex kawn praix pex, kawn saux kawn sex pex mai yung, tobrie mai can pa koe pex khawmuik heue. ¹¹ Aux tak kia ngien mai eei ka pex, phan ang mawh nan pex mai kawn praix pex mai can pa koe pex khawmuik tak hoek krax kha rhawm ka sibhawm praix, mawh kheu sibhawm praix kawn koe phwan num heue. ¹² Jhak heue, ngai pex mai ngai pux aux Binyamin, hoik yaox ka mawh lox sikah aux, khaing jheeh tix ka pex heue. ¹³ Pex krai keeing ex mhong grawng koe min aux mai krax ot krax koe aux daux meung Ejiptux, awm pa hoik yaox pex. Nied pex viex keeing aux hoek tin heue." ¹⁴ Khaix an nawh kawm ngawg pux tix Binyamin mai yiiem mai Binyamin kawx kawm ngawg nawh mai yiiem heue. ¹⁵ Nawh ngheet ka puxke tix ku kaux mai yiiem piang kix, khaix an puxke nawh khankix sikah mai nawh heue. ¹⁶ Yam mhong pui pa ot daux nyiex haw Pharaw khankix grawng hoek puxke Yosiep Pharaw mai kawncau nawh khankix gaux rhawm ka heue. ¹⁷ Pharaw ah nin ka Yosiep, "Krai ka puxke maix khankix mai yuh nin, tang kraung pex piang la mai deeh ing ka haktiex Khanan. ¹⁸ Viex keeing pex mai pui daux nyiex ma nawh hoek ka aux, aux tak tawx haktiex pa jiet mhawm Ejiptux ka pex mai pex tak sang yaox ti ih ka dee koe phon haktiex heue. ¹⁹ Aux tawx sibrawm kieh maix yuh in, teei ling lawx khaing meung Ejiptux khankix son kawn nyawm mai moeng pex, mai deeh viex keeing pex hoek heue. ²⁰ Paw lai lhawk ka sinngao pex, mawh kheu can ceu pa nie mhawm daux haktiex Ejiptux hoik mawh son pex heue." ²¹ Kawn simex Isarelax khankix, yuh awm an, Yosiep tawx ling lawx ka kix, awm lox pa hoik tawm Pharaw mai tawx priex pa ih kix son daux krax heue. ²² Nawh baox tawx kraung ceep pa sang loh kix ti ka ku kaux, viang mawh nan, nawh tawx mau ka Binyamin loe yieh shekhe mai kraung pa sang loh nawh ti ka phwan jung heue. ²³ Nawh sipaox ceu inkix ka keeing tix, la kao mu pa tang kraung pa mhawm khaing Ejiptux mai la shiang kao mu, pa tang nghox koi, blah mai pa ih, pa sang ih keeing nawh ka daux krax heue. ²⁴ Khaix an nawh ploi puxke tix khankix ing mai tawm lox ka kix yuh nin, "Paw simah ka paox tix hawt krax awx." ²⁵ Kix lih hu khaing Ejiptux mai hoek ka haktiex Khanan ka keeing tix Yakop heue. ²⁶ Kix ah nin ka nawh, "Yosiep kawn im ju mai nawh mawh cao kwang piang haktiex Ejiptux khawmuik." Yakop daox deng mai ang yum rhawm ka kix heue. ²⁷ Kix krai can ceu pa ah Yosiep ka nawh mai yam yaox nawh ka ling lawx pa ploi Yosiep sonsang rieb ti kieh nawh brug ing, rhawm keeing kix Yakop deeh koe riang rao heue. ²⁸ Khaix an Isarelax ah nin, "Aux hoik fah rhawm ka, kheu kawn simex aux Yosiep kawn im ju, aux sang hu yaox nawh sivoe yum ti heue."

¹ Isarelax viex kraung pa koe tix khawmuik mai lih hu krax, yam hoek nawh ka Berashibax, nawh yuh krax pa tan mai krub ka Siyiex keeing nawh Icak heue. ² Siyiex sikah tau mai Isarelax, ka daux riang susai ponsawm ah nin, "Yakop, Yakop!" nawh ah nin, "Aux ot tin" ³ Nawh Cao ah nin, "Aux mawh Siyiex, Siyiex keeing maix, paw lhat graung, sonsang hu maix meung Ejiptux, Aux tak kieh maix mawh ceu pui pa ting lhaong daux haktiex an heue. ⁴ Aux tak hu tau mai maix ka meung Ejiptux mai aux tak sang baox deeh viex maix ing, Yosiep tak yaox ti sibeet ngai maix heue." ⁵ Yakop lih hu khaing Berashibax mai kawn simex nawh khankix, viex keeing tix Yakop, khawm kawn nyawm mai moeng kix daux ling lawx pa hoik sipaox Pharaw sonsang viex kix hoek heue. ⁶ Kix teei tobrie eei ti mai kraung khrai pa hoik pon ti daux haktiex meung Khanan mai hu ka meung Ejiptux tau mai Yakop khawm doeh ru pa koe mai kix uik heue. ⁷ Nawh viex kawn simex tix mai kawn saux kawn sex nawh mai doeh ru nawh khawmuik hu tau mai ti ka meung Ejiptux heue. ⁸ Inkix mawh ceu kaux daux simie Isarelax, pa hoek ka haktiex Ejiptux, Yakop mai kawn simex nawh khankix Rubin mawh kawn Ai heue. ⁹ Kawn simex Rubin khankix mawh Hanok, Phalux, Hezaron mai Kamix heue. ¹⁰ Kawn simex Simion khankix mawh Yemoelax, Ya-min, Awhat, Yakhim, Zawha mai Shawlax pa mawh kawn simex khaing bun Khanan heue. ¹¹ Kawn simex Lewix mawh Geshon, Kawhat mai Merarix heue. ¹² Kawn simex Yudax khankix mawh Erax, Awnan, Shelax, Pharet mai Zerax. Viang mawh nan Erax mai Awnan hoik yum daux haktiex Khanan, mai kawn simex Pharet khankix mawh Herazon mai Hamulax heue. ¹³ Kawn simex Issakha khankix mawh Tawlax, Puvax, Yawbax mai Shiraron heue. ¹⁴ Kawn simex Zebulon khankix mawh Siriet, Elon mai Yalelax heue. ¹⁵ Inkix khawmuik mawh kawn simex Leax pa keh nawh khaing Yakop daux haktiex Padam-aram tau mai kawn bun Dina, Can pui khawmuik tau mai kawn simex kawn bun nawh khankix koe tixngoe loe kaux heue. ¹⁶ Kawn simex Gat khankix mawh Ziphion, Hagix, Shonix, Ezabon, Elix, Arawdix mai Arelix heue. ¹⁷ Kawn simex Asha khankix mawh Yimanax, Ishuah, Ishix, Beriyax mai nan kix Sherax, kawn simex Beriyax khankix mawh Hebax mai Malakhe heue. ¹⁸ Inkix mawh kawn simex Zilapax, pa mawh kawncau bun pa tawx Laban ka kawn bun tix Leax, pa keh nawh son Yakop kao liah kaux heue. ¹⁹ Kawn simex Rakhelax, moeng Yakop, mawh Yosiep mai Binyamin heue. ²⁰ Yam ot Yosiep ka haktiex Ejiptux, nawh pon kawn tix Manashe mai Epharim, kawn simex in kiex, mawh pa pon nawh khaing kawn bun cao giex kaing li Pawtipherax, pui veng Awnax pa kaux Ashanat heue. ²¹ Kawn simex Binyamin khankix mawh Belax, Bekhax, Ashabelax, Garax, Ne man, Ehix, Rawshax, Muppim, Huppim mai Aradax heue. ²² Inkix mawh kawn simex Rakhelax, pa keh nawh son Yakop, kao pon kaux heue. ²³ Kawn simex Dan mawh Hushen, ²⁴ Kawn simex Napthalix khankix mawh, Yazelax, Gunix, Yezax mai Shiliem heue. ²⁵ Inkix mawh kawn simex Bilaha pa mawh kawncau bun pa tawx Laban ka kawn bun tix Rakhelax pa keh nawh son Yakop aliah kaux heue. ²⁶ Can pui pa hu mai Yakop ka meung Ejiptux pa kaoh khaing nawh, ang nyang sawn ka mun nawh, koe tixgliah liah kaux heue. ²⁷ Kawn simex Yosiep, pa keh ka daux Meung Ejiptux koe ra kaux, Can pui pa kaoh khaing daux nyiex ma Yakop, pa hu ka meung Ejiptux khawmuik koe atixgliah kaux heue. ²⁸ Nawh ploi Yudax hu sivoe tix ka Yosiep, sonsang jhi kix yaox daux krax Goshen mai kix hoek ka haktiex Goshen heue. ²⁹ Yosiep khre ling lawx nawh mai hu ka Goshen sonsang rieb ka keeing tix Isarelax, yam hoik hoek sivoe keeing tix, nawh kawm ngawg keeing tix mai yiiem rheung nyao heue. ³⁰ Isarelax ah nin ka Yosiep, "Yam in kieh aux yum, aux hoik yaox ka ngai baoh maix, mawh kheu kawn im ju maix heue." ³¹ Yosiep ah nin ka puxke tix khankix mai can pui daux nyiex ma keeing nawh khanix, "Aux sang hu ka Pharaw mai krai ka nawh, puxke aux khankix mai can pui pa ot daux nyiex keeing aux pa kaoh khaing daux haktiex Khanan hoik hoek ka aux heue. ³² Pui inkix mawh cao liang yung mai kix yuh kaing pa eei tobrie, kix hoik viex yung, pex mai tobrie tix mai can pa koe tix heue. ³³ Yam kok Pharaw ti chawk ka pex ah nin, yuh pex kaing jhaw patix? ³⁴ Pex tak ah nin, kaing jhaw pa yuh kawncau maix khankix dawg mawh cao liang tobrie, jah yam iak ti tom hoek in singaix, khawm yix mai keeing yix, phan pex krai yuh nan pex tak yaox ti ot Goshen, mawh kheu cao liang yung ku kaux mawh pa seeing brai ka son pui Ejiptux heue."

¹ Khaix an Yosiep ing krai ka Pharaw ah nin, "Keeing aux mai puxke aux khankix, khawm yung, pex mai tobrie mai kraung khrai kix khawmuik, hoik hoek khaing meung Khanan, mai kix ot ka daux haktiex Goshen heue." ² Nawh teei pui phwan kaux khaing sinax puxke nawh khankix mai viex kix hoek ka Pharaw heue. ³ Pharaw ah nin ka puxke nawh khankix, "Yuh pex kaing jhaw patix?" mai kix ah nin ka Pharaw, "Kawncau maix khankix, mawh cao liang yung, awm tax yiex miex keeing tix heue." ⁴ Kix ah nin ka Pharaw, "Yix hoik hoek sonsang paung tix daux haktiex in, mawh kheu kied kin sibhawm praix ka daux meung Khanan, ang lai koe dee ih dee liang son tobrie yix, mawh kheu nan yuh bwanson, kieh kawncau maix khankix ot ka daux haktiex Goshen liak." ⁵ Khaix an Pharaw ah nin ka Yosiep, "Keeing maix mai puxke maix khankix hoik hoek ka maix. ⁶ Haktiex Ejiptux koe sivoe maix, kieh keeing maix mai puxke maix khankix, ot dee mhawm ka daux haktiex Goshen, mai phan maix tawng pui pa cheung ka daux kix tix kaux kaux, yaog kix mawh cao giex kaing liang tobrie aux heue." ⁷ Yosiep viex keeing tix Yakop hoek sivoe Pharaw mai Yakop nawb bwan piang Pharaw heue. ⁸ Pharaw ah nin ka Yakop, "Hoik koe ju maix miex ding?" ⁹ Yakop ah nin ka Pharaw, "Num singaix mawh aux nyo sinie hoik koe tix yieh tixngoe num, num pa yaox aux krax mhawm mawh ceeix khaing, mai num pa yaox aux krax pa caox hoik kied nie, ang nyang krup ka baux ju keeing aux khankix, yam mawh kix nyo sinie heue." ¹⁰ Yakop nawb bwan ka Pharaw mai lih hu khaing sivoe Pharaw heue. ¹¹ Yosiep tawx keeing nawh mai puxke tix khankix ot dee mhawm haktiex meung Ejiptux, pa mawh haktiex dex ka veng Ramase mai tawx kix cie haktiex an, awm lox pa hoik tawm Pharaw heue. ¹² Yosiep tawx pa ih ka keeing nawh, puxke nawh mai can pui pa ot daux nyiex ma keeing nawh, awm diag koe kix daux nyiex ma tix heue. ¹³ Pa ih ang lai koe daux haktiex kudah dee, sipiag kied kin sibhawm praix, mawh kheu nan, haktiex Ejiptux mai haktiex Khanan khankix hoik dieh riang jao sibhawm praix heue. ¹⁴ Yosiep khrawm mau pa pon coh ti nghox khaing daux haktiex Ejiptux mai haktiex Khanan khawmuik mai Yosiep viex mau an hoek ka nyiex haw Pharaw heue. ¹⁵ Yam hoik uik cai pui haktiex Ejiptux mai pui haktiex Khanan mau can pa koe tix khawmuik, pui Ejiptux hoek ka Yosiep ah nin, "Tawx pa ih ka yix liak, yuh ka mawx yix lai sang yum ka plak sivoe ngai maix? Mawh kheu hoik uik cai yix mau tix heue." ¹⁶ Yosiep ah nin, phan mau pex hoik uik, "Viex ti tawx tobrie pex ka aux mai aux tak sang tawx pa ih son pex heue." ¹⁷ Mawh kheu nan kix viex tobrie tix hoek ka Yosiep mai Yosiep deeh loh kix ih nghox ka brung, yung mai pex mai la khankix, nawh loh kix ih priex preem ka tobrie cie kix daux num an heue. ¹⁸ Khaix hoik sidah num an, kix deeh hoek ka nawh num khaix ah nin ka nawh, "Yix ang lai mox tidtix grawng uik mau tix sivoe maix cao simiang, tobrie yix khankix kawx, hoik mawh cie maix, yix ang lai koe tix ceu kawx, plak sivoe ngai maix, lheu khaing tokaux yix mai haktiex yix heue. ¹⁹ Kheu yix lai sang yaox ti yum ka sivoe ngai maix, khawm yix mai haktiex ti yuh ka mawx? liag ka yix mai haktiex cie yix, ka son pa ih, yix mai haktiex yix tak yuh siliex Pharaw mai ang yum mai son ang haktiex lai riem, tawx simie nghox ka yix heue." ²⁰ Yosiep liag haktiex Ejiptux khawmuik son Pharaw, mawh kheu pui Ejiptux khankix hoik coh kaung tix, jao kied sibhawm praix ka kix, haktiex khawmuik hoik mawh cie Pharaw heue. ²¹ Nawh gah pui haktiex hoek ot ka daux veng, jah khaing taoh mee haktiex Ejiptux, tom hoek ka caw mee haktiex heue. ²² Mawh ngie haktiex cao giex kaing li khankix pa ang nawh lai liag, mawh kheu Pharaw hoik tawx pa ih ka cao giex kaing li khankix mai kix hoik pon pa ih khaing Pharaw, kix tom ang lai yaox ti coh haktiex ti khankix heue. ²³ Khaix an Yosiep ah nin ka pui khankix, "Aux hoik liag pex mai haktiex pex daux in singaix son Pharaw, jhak heue, teei simie son pex mai rhuat ka haktiex heue. ²⁴ Yam hoik vawg pex nghox sax, pex tak yaox ti tawx ka Pharaw phwan son tix son, pon son tak mawh cie pex mai son simie kaung mai son priex ih pex daux nyiex ma mai priex ih son kawn praix pex khankix heue." ²⁵ Kix ah nin, "Maix hoik taoh ka ju yix, kieh yix mawh pa pon bwanson ka sivoe maix cao simiang ex liak mai yix tak mawh kawncau Pharaw heue." ²⁶ Yosiep yuh been pa dex mai meung Ejiptux, pa kaux cong tom in singaix, lheu khaing haktiex cie cao giex kaing li nong nong, pa ang mawh cie Pharaw, Pharaw tak yaox ti pon phwan son tix son heue. ²⁷ Pui Isarelax ot ka daux haktiex Ejiptux, baoh Goshen mai kix nie baox koe kraung khrai mai nied ti baox haoh hun sipie heue. ²⁸ Yakop ot ka daux haktiex Ejiptux kao aliah num, mai nawh koe ju tix yieh tixpon aliah num heue. ²⁹ Yam hoek bawg yam dex sang yum Isarelax, nawh kok ka kawn simex tix Yosiep ah nin ka nawh, "Yam in phan aux hoik mawh pa pon bwanson ka sivoe ngai maix, deuh taix maix greem siviang ba aux mai koe krax caux rhawm, pa kaux sijax rahsee ka aux maix paw lai sipaung aux daux meung Ejiptux liak, ³⁰ kieh aux it tau mai keeing aux, tax aux khankix, maix deeh viex aux lih khaing meung Ejiptux mai sipaung aux dee koe simeeig kix heue." Yosiep ah nin, "Aux tak yuh awm lox pa krai maix heue." ³¹ Isarelax ah nin, "Tiextu maix ka aux." Mai nawh kawx tiextu khaix an, Isarelax gup tokaux tix piang kaing gaong ku it tix heue.

¹ Yam in khaix hoik luan bawg yam ceu inkix, kix krai Yosiep mhong grawng keeing nawh ah nin, "Keeing maix kied saux tete heue." Nawh viex kawn simex tix ra kaux, Manashe mai Epharen hu heue. ² Pui krai Yakop mhong, ka hoek kawn simex nawh, "Jhak heue, kawn simex maix Yosiep hoek ka maix phao" Isarelax teei riang tix mai kaoh ngawm piang ku it tix heue. ³ Yakop ah nin ka Yosiep, "Siyiex pa ting sibrawm hoik lih bleeh ka aux, ka veng Luza daux haktiex Khanan mai nawb bwan ka aux, ⁴ "ah nin ka aux, Jhak heue, Aux tak sang kieh maix pre haoh hun mai kieh ru maix lih mawh ceu pui tom nie mai Aux tak tawx haktiex in ka doeh ru maix mai mawh cie kix leeing ju khaix maix heue. ⁵ "Yam in kawn simex maix ra kaux, Epharem mai Manashe, pa pon maix, daux haktiex Ejiptux, sivoe hoek aux ka maix daux Ejiptux tin, caw ti mawh kawn simex aux, awm Rubin mai Simion heue." ⁶ Kawn praix pa baox pon maix khaix in, tak mawh kawn praix maix, maix tak kok kix, ka greem ceu kaux puxke kix, son sinngao kix heue. ⁷ "Yam hoek aux khaing Padan-aram, Rakhelax yum hawt krax meung Khanan, dex hoek ka Epharat, mai aux sipaung kiex tan dex krax hu ka veng Epharat", Epharat pa mawh Bieliehiem in singaix heue." ⁸ Yam yaox Isarelax ka kawn simex Yosiep khankiex, nawh chawk ah nin, "In kiex mawh pui mawx lie?" ⁹ Yosiep ah nin ka keeing tix, "Kiex mawh kawn simex aux, pa tawx Siyiex ka aux ka dee in" nawh ah nin, "Viex kiex hoek ka aux, aux tak sang nawb bwan ka kiex heue." ¹⁰ Yam in ngai Isarelax ang lai chix yaox kheu hoik riex ju nawh, Yosiep viex kiex hoek dex nawh mai nawh kawm tix ngheet kiex heue. ¹¹ Isarelax ah nin ka Yosiep, "Aux keud ti ang lai yaox ka pakngai maix, yam in, Siyiex hoik jhi aux yaox khawm kawn praix maix heue." ¹² Khaix an Yosiep teei kiex lih khaing ngawng nawh mai nawh gup pakngai ti piang tiex heue. ¹³ Yosiep teei kiex khawm ra kaux mai teei taix khawn dawm tix, giex ka Epharem mai deuh khawn gwiex Isarelax mai nawh teei taix khawn gwiex giex ka Manashe mai deuh dex plak khawn dawm Isarelax heue. ¹⁴ Isarelax neh taix khawn dawm tix mai deuh piang kaing Epharem pa mawh pux mai taix khawn gwiex tix piang kaing Manashe, viang nawh tawng Manashe mawh kawn Ai kawx heue. ¹⁵ Nawh nawb bwan ka Yosiep ah nin, "Siyiex pa dawg koe pa krub keeing aux Abraham mai Icak, Siyiex pa tawx pa ih ka aux leeing ju, tom hoek in singaix, ¹⁶ kawncau Siyiex pa taoh aux khaing pa caox caig, nawb bwan ka kawn nyawm in kiex mai kieh ceu kaux aux, ceu kaux keeing aux, Abraham mai Icak koe piang kiex mai kieh kiex ting lhaong, haok hwan tom nie piang haktiex in heue." ¹⁷ Yam yaox Yosiep keeing ti deuh taix khawn dawm nawh piang kaing Epharem, nawh ang nyawm rhawm ka mai nawh sang teei taix keeing khaing kaing Epharem mai gah ti deuh piang kaing Manashe heue. ¹⁸ Yosiep ah nin ka keeing tix, "Keeing aux eue, ang caw, mawh kheu mawh in kawn Ai, deuh taix khawn dawm maix piang kaing nawh liak" ¹⁹ mai keeing nawh thiang ah nin, "Kawn simex aux eue, aux tawng, aux tawng, nawh tak lih ti mawh ceu pui pa ting tix cub, viang mawh nan, pux nawh, tak nie lheu ting khaing nawh mai doeh ru nawh khankix tak lih ti mawh ceu pui ku cub heue." ²⁰ Nawh nawb bwan ka kix daux singaix an ah nin, "Mawh kheu maix pui Isarelax tak pon bwanson, kieh Siyiex kieh maix awm Epharem mai Manashe" Mawh kheu nan, nawh yaog Epharem ting sivoe Manashe heue. ²¹ "Khaix an Isarelax ah nin ka Yosiep, "Jhak heue, hoik hoek bawg yam dex sang yum aux, viang mawh nan Siyiex tak ot tau mai pex, mai tak deeh viex pex hoek ka haktiex keeing pex tix bawg heue. ²² Lheu khaing an, aux tak tawx haktiex Shekhem ka maix pa pon teei ka lawm vaig mai ak, khaing daux tawm taix Amawrix, lheu khaing pa tawx aux ka puxke maix heue."

¹ Yakop kok ka kawn simex tix khankix ah nin, "Khrawm paox tix tau, aux sang krai pex mhong pa sang lih hoek ti mawh piang pex sivoe ngai heue. ² "Kawn praix Yakop khankix eue, khrawm paox tix mai nghiet ka lox keeing pex Isarelax heue." ³ "Rubin eue, maix mawh kawn Ai aux mai mawh riang aux, plix liang aux ti pon yam ting riang tix mai mawh min plakngai pa lheu mhawm mai mawh sibrawm pa lheu mhawm, ⁴ awm rawm pa ang chix ot tix dah mai phrit tix lih maix tak ang yaox ti mawh pui pa kaux cong, mawh kheu haok maix ka dee it keeing tix maix hoik kieh ku it keeing tix seeing heue." ⁵ Simeon mai Lewix kiex mawh puxaik, vaig lawm kix mawh kraung naing pa yuh pa caox caig heue. ⁶ "Ju aux eue, paw laig daux bang kum kix, khwan aux eue, paw yuh paox pie tau mai kix, jao song rhawm kix, kix hoik pah ka pui, kix hawt alo tokaux cao tix mai mug ka si nieag mawie ngha dud heue. ⁷ Kieh kiex pon krax jhax krax lawg kheu kin jhawm pa yuh tix mai krax song rhawm pa kied lang teung, aux tak gwieh kiex khaing pui Yakop mai kieh kiex prung prang khaing pui Isarelax heue. ⁸ Yudax eue, puxaik maix khankix tak yaogyaw maix, taix maix tak jhawp ka ngawg pui pa koeng ka maix khankix, puxaik maix khankix kawx, tak hoek ti krub ka maix heue." ⁹ Yudax mawh kawn sivai sangsi mhaing, kawn simex aux eue maix kaoh khaing dee sawg ti ih kug mai gup tix awm sivai sangsi miex, mawh pui mawx pa sang pon hu so ka maix lie? ¹⁰ Pliah tak ang lai tang tiah khaing Yudax, khaox gix pa kwang ang gah ti khaing sinax caong nawh, tom sidah sang hoek Shilaw mai kawn pui khawmuik tak cu nghiet ka nawh heue. ¹¹ Nawh phyawk la tix ka nhu plix siiet mai phyawk kawn la iak tix ka nhu plix siiet pa mhawm, nawh sidaux kraung tix ka rawm plix siiet, sidaux sibex tix ka rawm plix siiet pa raoh awm nham, ¹² Ngai nawh hoik raoh kheu rawm plix siiet, mai rhang nawh hoik paing kheu rawm teeh heue. ¹³ Zebulun tak ot praok rawm sigrit sigra, mai mawh dee bang reu sangphaw khankix mai mee haktiex nawh hoek tom veng Sidom heue. ¹⁴ Issakha mawh pa ting riang awm la mai nawh it tum sinax kawg yung, ¹⁵ Nawh yaox dee laux lee pa mhawm, mai haktiex dee nyawm ti ot, nawh tak klawm beeh glawm kraung cien piang klip tix mai mawh siliex pa tawx gha heue. ¹⁶ Dan tak prawng ka ceu pui tix, awm doeh ru pui Isarelax tix ceu heue. ¹⁷ Dan tak mawh siuing pa koe jai pa ot piang krax, siuing pa ot hawt daux krax, sonsang tut ka loek caong brung brug pui, ti sang kieh cao brug rau plak khaix heue. ¹⁸ "Simiang Siyiex eue, aux hoik krox jun ka bwanson krax taoh Maix Cao heue. ¹⁹ Gat tak mawh pa hawt cub pui yuh naing puing ka nawh, nawh tak deeh pon hawt phoek loek caong kix heue." ²⁰ Asha, Haktiex nawh tak mawh pa haoh priex preem pa mhawm khaing, mawh pa kied nyawm tete mai nawh tak pon yuh priex ih simiang lih tom nie heue. ²¹ Napthalix, mawh cak miex pa blha ti pa ang koe dee tuh, pa keh kawn pa mhawm heue. ²² Yosiep mawh kak khaox pa nie plix, plix hawt rawm keut, mai kak khankix jao luan ka guh veng heue. ²³ Pui naing ak, yuh krax kin mai hawt puing ka nawh, kix puing mai koeng ka nawh, ²⁴ viang mawh nan ak nawh kawn koe riang mai plawng taix nawh cong sijung, riang rao tawm taix pa ting sibrawm Siyiex pa koe daux Yakop, pa mawh cao liang yung, rang ting ceu pui Isarelax heue. ²⁵ Pa mawh Siyiex keeing maix, tak teem maix, Cao pa ting sibrawm tak nawb bwan ka maix tau mai bwanson pa kaoh khaing daux raoma long, bwanson pa raux mox pa koe plak greem, bwanson pa pon khaing teeh mai pa kaoh khaing daux vaig heue. ²⁶ Bwanson pa nawb keeing maix khankix, nie lheu mhawm khaing bwanson pa kaoh khaing gawng leeing ju mai lheu mhawm khaing bwanson grum naog khaing ton leeing ju heue. Son inkix tak ot piang Yosiep mai piang mhok khri pa koe piang dong re nawh heue. Hoek piang puxaik pa tang gwieh hu khaing nawh heue. ²⁷ Binyamin tak mawh sox praix, pa leue ti kiied totiag, nawh ih ka nex totiag pon ti ponngawb caocao mai deeh gwieh nex totiag pa pon sigrhang tix son ponbo heue. ²⁸ In mawh doeh ru Isarelax kao ra ceu mai mawh gumlox sikah keeing kix, ka kix mai lox nawb bwan ka kix mai nawb bwan ka kix ku kaux, awm bwanson pa khaw kix ti pon heue. ²⁹ Khaix an nawh tawm lox ka kix ah nin, "Aux sang deeh hu neuex tix tau mai ceu pui aux, sipaung aux tau mai keeing aux khankix ka daux rang pa koe daux kaung Epharon ceu pui Hittix, ³⁰ daux rang pa koe daux kaung Makhapelax ka plak lih singaix haktiex Khanan, kaung an Abraham hoik liag ka Epharon ceu pui Hittix sonsang mawh haktiex simeeig cie nawh heue." ³¹ Kix hoik sipaung Abraham mai moeng nawh Sara tan mai kix baox sipaung Icak mai moeng nawh Rakhelax tan mai Leax kawx aux hoik sipaung tan heue. ³² Kaung mai daux rang an, mawh pa hoik liag nawh khaing ceu pui Hittix heue." ³³ Khaix hoik tawm Yakop lox ka kawn simex tix khankix, nawh yaog caong ti deuh piang ku it tix, nawh dud rhawm mai hu ka dee khrawm ru tix heue.

¹ Khaix an Yosiep gup ngai tix piang ngai keeing nawh, yiiem mai ngheet ka nawh heue. ² Yosiep tawx lox ka kawncau tix khankix, pa mawh cao chix sidah mai kieh kix khre keeing nawh ka sidah bhawng heue. Mawh kheu nan cao chix sidah khankix, cox khre Isarelax ka sidah bhawng heue. ³ Kix sau sidah bhawng ka nawh mai deuh lawng nawh tixpon singaix awm hoik koe been pa deuh kix pui yum, khaix hoik luan tixpon singaix pui Ejiptux khankix yiiem doe son Yakop atixgliah singaix heue. ⁴ Khaix hoik luan singaix yiiem doe kix, Yosiep kok pui yuh kaing nyiex haw Pharaw ah nin, "Phan aux khaw ti pon bwanson sivoe ngai pex, hu krai ka Pharaw ah nin, ⁵ Keeing aux hoik kieh aux tiextu ah nin, Aux hoik dex sang yum, pex hu sipaung aux ka daux simeeig pa hoik kaong aux son tix, daux haktiex Khanan heue. Mawh kheu nan, yam in, kieh aux hu yuh mai sipaung ka keeing tix mai aux tak deeh hoek heue." ⁶ Pharaw ah nin, "Hu, mai sipaung ka keeing maix awm hoik kieh nawh maix tiextu ka ti heue." ⁷ Mawh kheu nan Yosiep lih hu sonsang sipaung nawh keeing tix, kawncau Pharaw mai khawm cao kaing daux nyiex haw mai cao kaing ka daux haktiex Ejiptux khankix hu tau mai Yosiep heue. ⁸ Pui nyiex ma Yosiep, pui nyiex puxke nawh mai pui nyiex nawh keeing nawh khankix lih hu tan, mawh ngie kawn nyawm iak cub yung mai pex mai tobrie khankix, pa prah kix daux haktiex Goshen heue. ⁹ Cub ling lawx mai cub lien brung pa kied haoh hun lih hu tau mai nawh heue. ¹⁰ Khaix an kix hoek ka glah pah nghox Atat, pa koe toi rawm klawng Yawdan, kix khrup rhawm sigrien sigre mai yiiem, Kix khi rhawm yiiem doe son keeing tix tan aliah singaix heue. ¹¹ Yam yaox can pui pa ot daux haktiex Khanan khankix, ka krax pa yiiem doe kix ka daux glah pah nghox Atat, kix ah nin, "In mawh krax pa kied yiiem doe ceu pui Ejiptux, " dee an, kix kok mawh Abelax Mizaren, pa koe toi rawm klawng Yawdan heue. ¹² Kawn simex nawh khankix yuh awm pa hoik tawm nawh ka kix heue. ¹³ Kawn simex nawh khankix viex nawh hu ka haktiex Khanan mai sipaung nawh daux rang pa koe daux kaung Makhapelax, plak lih singaix veng Mamre, pa hoik liag Abraham ka Epharon, ceu pui Hittix, son gwang simeeig tix heue. ¹⁴ Khaix hoik sipaung nawh keeing tix, Yosiep deeh ing ka meung Ejiptux tau mai puxke nawh khawm pui pa hu sipaung keeing nawh khankix heue. ¹⁵ Yam yaox puxke Yosiep khankix ka hoik yum keeing tix, kix ah nin, "Ex lhat Yosiep koeng ka ex mai deeh pawk bix ka ex, son kaing pa caox caig, pa yuh ex ka nawh heue." ¹⁶ Kix ploi pui cau hu ka Yosiep ah nin, "Sivoe sang yum keeing ex, nawh hoik tawm lox ka yix, ¹⁷ hu krai ka Yosiep ah nin, aux rawg maix pluat ploi ka krax lud pa yuh puxke maix khankix mai phimap kix, mawh kheu hoik yuh kix pa caox caig ka maix heue. Yam in rawg maix pluat ploi pa lud kawncau maix khankix, ka daux min plakngai Siyiex keeing maix heue." Yam mhong Yosiep ka lox krai kix nawh yiiem ka heue. ¹⁸ Puxke nawh khankix, hoek gup ti ka sivoe nawh ah nin, "Jhak heue, yix mawh kawncau maix heue." ¹⁹ Yosiep deeh ah nin ka kix, "Paw khi rhawm ka, khex keud pex aux mawh Siyiex lie? ²⁰ Viang pex keud mawh yuh ti pa caox ka aux kawx, viang mawh nan, Siyiex hoik kieh mawh ceu pa mhawm, sonsang taoh ju pui tom nie awm pa hoik yaox pex daux in singaix heue. ²¹ Mawh kheu nan paw koe krax khi rhawm, aux tak eei liang pex mai kawn praix pex ku kaux heue." Nawh krai lox nyawm rhawm ka kix mai lox pa caux rhawm ka kix heue. ²² Yosiep mai pui nyiex ma keeing nawh khankix, ot daux Ejiptux mai Yosiep im ju tom hoek tix yieh kao num heue. ²³ Yosiep hoik yaox ka kawn sex nawh khankix, pa mawh kawn saux Epharem, kawn praix Makhirax pa mawh kawn simex Manashe kawx mawh pa keh piang ngawng Yosiep heue. ²⁴ Yosiep ah nin ka pux aik nawh khankix, "Aux dex sang yum, viang mawh nan, Siyiex tak hoek ti kia ngien ka pex mai deeh viex pex lih khaing haktiex in mai tawx pex hu ka haktiex pa hoik tiextu Nawh Cao ka Abraham, Icak mai Yakop heue." ²⁵ Khaix an Yosiep kieh kawn praix Isarelax khankix, tiextu ti ah nin, "Siyiex tak hoek ti kia ngien ka pex mai pex tak viex si-ang aux hu khaing tin heue." ²⁶ Yosiep yum yam hoek ju nawh tix yieh kao num mai kix khre sau sidah bhawng ka nawh mai sau ka daux lawng meung Ejiptux heue.