Galatians

Galatians

¹ Pawlux pa mawh kawncau pa ting, ang mawh khaing pui, viang, kheu pui kawx ang mawh, mawh kheu Yesux Khrit mai Siyiex Keeing Cao, pa hoik kieh Nawh deeh kaoh im khaing krax yum, ² puxaik can pa ot tau mai aux, tawx ka ceu cao pa ot ka daux meung Kalatix khankix heue. ³ Kieh bwanson mai pa nhim Keeing ex Siyiex mai Yesux Khrit koe mai pex, ⁴ Kaw pa hoik tawx tokaux tix son phimap ex, sonsang taoh Nawh ex khaing ju pa caox in, awm pa khaw mai alo Keeing ex Siyiex, ⁵ Kieh Nawh Cao koe min pakngai leeing ju liak. Amen. ⁶ Aux daox deng ka grawng pex, phex khran gwieh hu khaing kaw pa hoik kok ka pex ka daux bwanson Cao Khrit, son lox bwan gaux rhawm pa tang siyox, ⁷ pa ang mawh lox bwan gaux rhawm tang ceu, viang mawh nan koe pui tix blah pa lak lheut ka pex mai simie ti loh, lox bwan gaux rhawm Cao Khrit kieh tang heue. ⁸ Ex ang ah, kawncau Siyiex pa kaoh khaing raoma ang ah, phan sidiex ka pex lox bwan gaux rhawm pa lheu pa tang khaing lox bwan gaux rhawm pa hoik sidiex ex ka pex, kieh nawh mawh pa pon pa jhax lawg heue. ⁹ Awm hoik ah ex glang ka, aux baox deeh ah nan yam in tix bawg, phan pui tix kaux kaux sidiex lox bwan gaux rhawm ka pex pa lheu pa tang khaing pa hoik rieb pex ti teei, kieh nawh mawh pa pon pa jhax lawg heue. ¹⁰ Yam in aux sawg ti pon pa khaw khaing pui lie? Phan ang mawh nan khaing Siyiex lie? Phan ang mawh nan aux nied ti yuh son sang caw ka rhawm pui lie? Phan aux kawn yuh pa caw ka rhawm pui, aux tak ang lai mawh siliex Cao Khrit heue. ¹¹ Puxaik khankix eue, aux kieh pex tawng grawng lox bwan gaux rhawm pa hoik sidiex aux ang mawh pa khaw pa dex mai pui heue. ¹² Aux ang pon lox bwan an khaing pui mai ang mawh pa gau ka aux, pon kheu Yesux Khrit pa plak jhi aux yaox heue. ¹³ Pex hoik mhong grawng pa yuh aux ka mawx, yam ot aux daux been Yudax, daux bawg yam pa hoik luan, grawng pa tuktiak aux ka ceu cao Siyiex nie lheu khaing pa chix pon ti tiag mai pa yieh yuh laux leeing heue. ¹⁴ Aux nie ting tawng ka daux been Yudax, khaing ceu pui aux, pa sidu ju mai nie lheu nied ti yuh son been tax keeing aux khankix heue. ¹⁵ Yam caw rhawm Siyiex, Kaw pa hoik tiah ti deuh aux, khaing daux vaig miex tix mai kok aux kheu bwanson Nawh, ¹⁶ son sang plak jhi Kawn Nawh ka daux aux, son sang sidiex aux grawng Nawh ka sinax pui tang ceu khankix mai dom mawx dom an aux ang kum kawng tau mai nex nham, ¹⁷ viang, ka veng Yerusaliem kawx aux ang haok hu ka kix pa hoik mawh kawncau pa ting ka sivoe aux, aux hu ka daux meung Arebia mai aux deeh hu ka veng Damase tix bawg heue. ¹⁸ Khaix an loe num aux haok hu ka veng Yerusaliem,son sang pon ti meed, tawng ka Kephax mai aux ot tau mai nawh kao phwan ngaix heue. ¹⁹ Lheu khaing Yakop pux Simiang ang aux yaox kawncau pa ting tang kaux tix kaux kawx heue. ²⁰ Grawng ceu pa tiiem aux ceu in ka pex, ka plak sivoe Siyiex aux ang pie lhen. ²¹ Khaix an aux hu ka meung Surix mai meung Kilikix heue. ²² Yam an ceu cao Cao Khrit pa koe ka daux meung Yudax khankix ang nyang bax tawng pakngai aux. ²³ Kix hoik mhong ngie lox pa yuh nin, "Kaw pa hoik sax tuktiak ex, yam in sidiex gau grawng krax yum rhawm, pa hoik sax yieh nawh ti yuh laux leeing tix bawg." ²⁴ Kix yaog yaw ka Siyiex kheu grawng aux heue.

¹ Khaix an yam hoik luan kao pon num aux deeh haok ka veng Yerusaliem tau mai Banabax mai khawm Titux kawx, aux viex hu mai tix heue. ² Aux haok hu kheu plak jhi ti kieh aux yaox mai aux krai lox bwan gaux rhawm ceu pa sidiex aux ka sinax pui tang ceu khankix ka sivoe kix, aux krai ngie ka kix pa koe min plakngai, ka dee ang pui ot, phan ang mawh nan ha pa to aux yam in, phan ang mawh nan pa hoik to aux kox mawh pa giex going heue. ³ Pie Titux pa ot tau mai aux, pa mawh pui Helasax kawx ang khin ti kieh pat hak. ⁴ Kheu koe pa yuh grang awm puxaik tix blah pa briex ti laig son sang jiang ka ceu pa ploi ex, pa koe ex daux Yesux Khrit, yuh ka mawx sonsang deeh kieh ex mawh siliex heue. ⁵ Ex ang doh cu ka kix, pie tix nari kawx, ceu pa mawh meh, pa dex mai lox bwan gaux rhawm, tak sang kaux cong ka sinax pex heue. ⁶ Kix pa mawh pa koe min plakngai khankix, kix hoik sax mawh pa yuh ka mawx ang ah, ang mawh tidtix ka aux. Siyiex kienie, ang mawh pa jhak ka pakngai pui), pa ah aux kix pa koe min plakngai khankix ang tie lai tawx tidtix ka aux, ⁷ jalao sang mawh nan, yam yaox kix grawng hoik tawx pong lox bwan gaux rhawm pa ang pat hak ka aux, awm hoik tawx lox bwan gaux rhawm pa pat hak ka Petrux, ⁸ Grawh grawng nawh Kaw pa yuh ka daux Petrux sonsang kieh nawh mawh kawncau pa ting ka son pui pa pat hak khankix, viang ka daux aux kawx, hoik yuh ti kieh mawh kawncau pa ting ka son pui tang ceu khankix, ⁹ Yam tawng kix grawng pa hoik tawx bwanson ka aux, Yakop, Kephax mai Yohan, pui ah mawh kix rong, tawx pa singeuh taix khawn dawm ceu pa yuh paox pie ka aux mai Banabax, sonsang hu yiex ka pui tang ceu mai sonsang hu kix ka pui pa pat hak khankix heue. ¹⁰ Kix koe ngie rhawm ti sang kieh yiex doh keud ka pui hot sia khankix, ceu an mawh pa koe rhawm aux ti sang nied ti coca yuh heue. ¹¹ Yam hoek Petrux ka veng Antiuk, aux ne raw nawh sidu pakngai nawh, mawh kheu koe grawng dee deuh phimap ka nawh. ¹² Ka sivoe sang hoek pui tix blah khaing Yakop, nawh sawm tau mai pui tang ceu khankix, yam hoek kix, nawh deeh toek tokaux tix, tiah khaing kix, kheu ring ka kix pa mawh cub pa pat hak heue. ¹³ Pui Yudax pa deuk khankix yuh ti pie awm paox tix tau mai nawh, tom pie Banabax kawx hu plak kix kheu pa pie kix heue. ¹⁴ Yam yaox aux grawng ang kix hu rahsee, awm pa khaw mai pa mawh meh lox bwan gaux rhawm, aux ah nin ka Kephax sivoe kix khawmuik, "Phan maix pa mawh pui Yudax, yuh ti ot yaung pui tang ceu khankix mai ang yuh ti ot awm pui Yudax mai khex sang khin ti kieh pui tang ceu khankix yuh ti ot awm pui Yudax yuh ka mawx? ¹⁵ Ex raux mawh nex nham pui Yudax mai ang mawh pui phimap tang ceu, ¹⁶ Ex tawng grawng pui ang hoek krax rahsee, kheu pa twah klaung ka lox lai beenli,viang mawh nan hoek kheu krax yum rhawm ka Yesux Khrit, awm hoik yum rhawm ex ka Yesux Khrit, son sang pon ex ti hoek krax rahsee kheu pa yum rhawm ka Cao Khrit mai ang mawh kheu krax twah klaung ka lox lai beenli, mawh kheu pui tix kaux kawx ang hoek krax rahsee, kheu pa twah klaung ka lox lai beenli heue. ¹⁷ Yam sawg ex ti hoek krax rahsee ka daux Cao Khrit, phan yaox tokaux ex mawh pui pa yuh phimap, khex mawh Cao Khrit cao pa yuh son phimap lie? Ang doh mawh nan. ¹⁸ Phan aux deeh cox sum ceu pa hoik yieh aux laux, aux plak jhi grawng tokaux aux mawh pui lud tiru heue. ¹⁹ Lheu khaing an kheu lox lai beenli aux hoik yum ka pa dex mai lox lai beenli, son sang im aux ka pa dex dawd mai Siyiex heue. ²⁰ Aux hoik yum tau mai Cao Khrit ka khaox lhak mai yam in aux kawn ang baox mawh pa im, Cao Khrit im ka daux aux heue. Ceu pa im aux ka daux nex nham yam in, aux im ka daux krax yum rhawm, pa mawh pa yum rhawm ka Kawn Siyiex, pa hoik moh ka aux mai hoik tawx tokaux tix son aux heue. ²¹ Aux ang yuh ti kieh bwanson Siyiex mawh pa giex going, phan pon krax rahsee kheu lox lai beenli, pa yum Cao Khrit mawh pa giex going heue.

¹ Pui Kalatix pa daox aw khankix eue, pa hoik plak kieh sidawng grawng pa yum Yesux Khrit piang khaox lhak sivoe ngai pex, mawh mawx pa hoik kieh pex nih son ang sang nghiet ka lox pa mawh meh? ² Aux simie ti tawng ngie ceu in khaing pex, pa pon pex Khuan Cao, hoik mawh kheu twah klaung pex ka lox lai beenli lie? Phan ang mawh nan pon kheu yum rhawm ka lox bwan pa mhong pex lie? ³ Pex phex daox nie ding lie? Viang pex hoik jah ti yuh ka daux Khuan Cao, yam in pex sang grum naog ka daux nex nham lie? ⁴ Ceu pa hoik kham geu pex tom nie ceu ding dod, mawh ngie pa giex going lie? Phan mawh pa giex going tete, ⁵ Kaw pa tawx Khuan Cao ka pex mai pa yuh mhai pa daox am ka daux pex, Nawh yuh kheu twah klaung pex ka lox lai beenli lie? Phan ang mawh nan, mawh kheu yum rhawm pex ka lox bwan pa mhong tix lie? ⁶ Awm hoik yum rhawm Abraham ka Siyiex mai hoik sawn krax yum rhawm an mawh pa rahsee son nawh heue. ⁷ Mawh kheu nan een ti tawng grawng kix pa koe krax yum rhawm, mawh kawn Abraham heue. ⁸ Phuk lai sigang khri hoik grux yaox grawng Siyiex tak sang kieh pui tang ceu khankix hoek ka krax rahsee kheu krax yum rhawm, tom hoik grux sidiex lox bwan gaux rhawm ka Abraham ah nin, "Ceu pui khawmuik tak sang pon bwanson ka daux maix heue." ⁹ Mawh kheu nan kix pa koe krax yum rhawm khankix pon bwanson tau mai Abraham pa yum rhawm heue. ¹⁰ Can pui pa dex dawd mai pa twah klaung ka lox lai beenli khankix ot ka greem pa jhax lawg, grawh grawng nawh hoik tiiem ti deuh ah nin, "Ku kaux daux pui pa ang lai hawt ti yuh ku ceu khawmuik can pa hoik tiiem ka daux phuk lai beenli, mawh pa jhax lawg kah heue." ¹¹ Lheu khaing an grawng pui tix kaux kawx ang hoek krax rahsee sivoe Siyiex kheu lox lai beenli, hoik sidawng kah, grawh grawng nawh, "Pui pa rahsee tak sang im kheu krax yum rhawm heue." ¹² Lox tawm lai beenli ang dex dawd mai krax yum rhawm, "Kaw pa hawt ti yuh lox tawm an khankix, tak sang im ka daux lox tawm an khankix heue." ¹³ Cao Khrit hoik taoh ex khaing pa jhax lawg lox lai beenli, kheu hoik mawh Nawh pa jhax lawg son ex, grawh grawng nawh hoik tiiem ti deuh ah nin, "Pa preue ka piang khaox ku kaux daux pui, mawh pa jhax lawg heue." ¹⁴ Son sang pon pui tang ceu khankix bwanson Abraham ka daux Cao Khrit heue. Son sang pon ex sijax mukheu grawng Khuan Cao, kheu krax yum rhawm heue. ¹⁵ Puxaik khankix eue, aux krai hawt awm been pui. Viang mawh ngie sijax mukheu pa yuh kawn pui kawx, khaix hoik een sijax mukheu an ti mawh pa lung loi, pui tix kaux kawx ang pon ti tik sijax mukheu an mai ang baox thiien thie kah heue. ¹⁶ Lox sijax mukheu khankix hoik krai ka Abraham mai ka ru nawh heue. Nawh Cao ang ah "Doeh ru khankix,"awm sang ah grawng pui hun, hoik ah, "Doeh ru maix,"awm sang ah ngie grawng tix kaux khaing, pa mawh Cao Khrit heue. ¹⁷ Aux ah nin, sijax mukheu pa hoik grux een Siyiex ti mawh pa lung loi, lox lai beenli, pa jah ti kieh mawh khaix an pon yieh tixngoe num, ang pon tiyieh laux, son sang kieh lox sijax mukheu an mawh pa giex going heue. ¹⁸ Phan sin an mawh pa dex dawd mai lox lai beenli, ang baox lai mawh pa dex dawd mai lox sijax mukheu, Siyiex hoik tawx sin an ka Abraham, ka lox sijax mukheu heue. ¹⁹ Phan mawh nan lox lai beenli mawh son pa yuh ka mawx? Hoik baox thiien thie lox lai beenli kheu phimap, tom sang hoek ru pa hoik tawx lox sijax mukheu kah heue. Hoik kieh kawncau Siyiex khankix teei ti tawx lox lai beenli ka tawm taix pui sinax heue. ²⁰ Pa ah pui sinax ang mawh ngie son tix kaux khaing, Siyiex mawh ngie tix kaux khaing heue. ²¹ Phan mawh nan lox lai beenli mawh pa cha ka lox sijax mukheu Siyiex lie? Ang doh mawh nan. Phan hoik tawx lox lai beenli pa chix kieh im, tak lai pon pa rahsee kheu lox lai beenli tete heue. ²² Viang mawh nan phuk lai sigang khri hoik laung pui khawmuik ka greem phimap, son sang tawx lox sijax mukheu an kheu krax yum rhawm kix ka Yesux Khrit heue. ²³ Viang mawh nan ka sivoe sang hoek krax yum rhawm, hoik laung mai pau ex ka greem lox lai beenli, sonsang khre ex son krax yum rhawm pa tak sang lih bleeh khaix heue. ²⁴ Mawh kheu nan lox lai beenli hoik mawh cao thong cao gau ex tom hoek Cao Khrit, sonsang hoek ex krax rahsee kheu krax yum rhawm heue. ²⁵ Viang mawh nan yam in kheu hoik hoek krax yum rhawm an ex ang lai baox ot greem cao gau heue. ²⁶ Grawh grawng nawh pex khawmuik mawh kawn Siyiex kheu krax yum rhawm ka Yesux Khrit heue. ²⁷ Can pex pa hoik cubcom ka daux Yesux Khrit, hoik ceep ka Cao Khrit heue. ²⁸ Ang doh lai pon koe pui Yudax phan ang mawh nan, pui Helasax, ang doh lai pon koe siliex, phan ang mawh nan pui ploi, ang doh lai pon koe simex, phan ang mawh nan bun, mawh kheu pex khawmuik mawh ngie tix kaux khaing ka daux Yesux Khrit heue. ²⁹ Phan pex mawh cie Cao Khrit, pex mawh ru Abraham mai cao pa pon sin awm pa khaw mai lox sijax mukheu heue.

¹ Aux ah nin, yam ca kawn mawh kaw pa sang pon sin kawn nyawm, nawh ang siyox khaing pa mawh siliex, viang mawh nawh cao sin khawmuik kawx, ² Tak lai ot greem pui pa pau mai pa kia ngien khankix tom hoek singaix pa hoik ciak keeing nawh ti deuh heue. ³ Awm an ex kawx, yam mawh ex kawn nyawm, hoik een ti kieh mawh siliex greem been haktiex pa ang grum naog heue. ⁴ Viang mawh nan yam hoik naog bawg yam, Siyiex ploi Kawn tix lih keh khaing bun, keh ka greem lox lai beenli, ⁵ son sang taoh Nawh ex, pa ot ka greem lox lai beenli, son sang pon ex ti mawh kawn Nawh heue. ⁶ Kheu mawh ex kawn, Siyiex hoik ploi Khuan Kawn tix ka daux rhawm ex ti yo, "Abax Keeing eue" . ⁷ Mawh kheu nan pex ang baox lai kawn mawh siliex, mawh kawn heue. Phan mawh kawn, mawh pa sang pon sin kheu Siyiex heue. ⁸ Glang ka in kheu ang tawng ka Siyiex, pex tom hoik mawh siliex ka kix pa ang mawh siyiex. ⁹ Yam in pex hoik tawng ka Siyiex, phan ang mawh nan nie lheu mawh Siyiex hoik tawng ka pex, pex lai deeh tieh ti hu ka lox been pa ang grum naog, pa bhaw riang mai pa ang koe bwanson, pex khex mie ti baox deeh mawh siliex lie? ¹⁰ Pex lai twah klaung ka singaix mai jhong khix mee num. ¹¹ Aux lhat kheu grawh grawng pex, ha pa nyhap sidieb aux kox mawh pa giex going son pex heue. ¹² Puxaik khankix eue, aux khyox khaw ka pex, kieh mawh awm aux, kheu aux kawx hoik mawh awm pex heue. Pex ang lud tidtix ka aux, ¹³ Pex hoik tawng mawh kheu grawng jhawm saux, aux tom hoik sidiex lox bwan gaux rhawm ka pex bawg phao ka, ¹⁴ ceu pa mawh pa nyaw glaw ka pex ka daux nex nham aux, pex ang lai nieb yuh mai ang tik, viang mawh nan pex rieb ti teei aux, awm mawh aux kawncau Siyiex mai Yesux Khrit heue. ¹⁵ Phan mawh nan pa hoik gaux rhawm pex an koe dee mawx? Grawh grawng nawh, aux kham mhai rug, phan chix, pex tee hoik koik ngai tix mai tawx ka aux heue. ¹⁶ Kheu hoik krai aux pa mawh meh ka pex, khex lih mawh aux pui pa koeng ka pex lie? ¹⁷ Kix nied ti coca grawng pex, ang mawh son ceu pa mhawm. Kix simie ti klat pex ot plak praix, son sang nied pex ti coca son kix heue. ¹⁸ Viang mawh nan pa nied ti coca ka daux ceu pa mhawm. Mawh pa mhawm, ang joeng mawh ngie yam ot aux tau mai pex heue. ¹⁹ Kawn nyawm iak aux, pa baox deeh loi aux ti keh, tom hoik lih mawh Cao Khrit ka daux pex khankix eue. ²⁰ Yam in kawx, aux kied mie ti ot tau mai pex, sonsang pon aux ti tieh loh, lox aux, mawh kheu kied daox aw aux ka grawng pex heue. ²¹ Krai ka aux liak, pex pa simie ti ot greem lox lai beenli khankix eue, ang pex nyang mhong lox lai beenli lie? ²² Hoik tiiem ti deuh grawng Abraham koe kawn simex ra kaux, tix kaux mawh pa koe khaing bun pa mawh siliex mai tix kaux mawh pa koe khaing bun pa mawh pui ploi heue. ²³ Kawn simex pa koe khaing bun siliex an hoik keh hawt been nex nham, viang mawh nan kawn simex pa koe khaing bun pa ploi an, mawh pa keh kheu lox sijax mukheu heue. ²⁴ Grawng ceu in khankix koe lox tiag heue. Bun in kiex, mawh sijax mukheu ra mu, tix mu mawh pa kaoh khaing gawng Sina, pa mawh Hagarax, pa keh kawn tix mawh siliex heue. ²⁵ Hagarax mawh gawng Sina pa koe ka daux meung Arebia, veng Yerusaliem pa koe yam in, pa hoik mawh siliex tau mai kawn praix nawh heue. ²⁶ Veng Yerusaliem pa koe dee long, mawh pa ploi, pa mawh miex ex heue. ²⁷ Hoik tiiem ti deuh ah nin, "Bun neh pa ang sax keh kawn eue, gaux rhawm heue. Bun pa ang yaox ti geu pa saux yha eue, kok yo kah heue. Bun pa hoik grham an, nie lheu koe kawn khaing bun pa koe mex an heue." ²⁸ Puxaik khankix eue, ex mawh kawn lox sijax mukheu awm hoik mawh I cak heue. ²⁹ Awm kaw pa hoik keh hawt been nex nham yam an hoik tuktiak ka kaw pa hoik keh hawt Khuan Cao, yam in kawx mawh nang nan heue. ³⁰ Lox phuk lai sigang khri ah ka mawx? "Grheu ti tik bun siliex mai kawn simex kiex, mawh kheu kawn simex bun siliex, tak ang lai pon sin tau mai kawn simex bun pa ploi heue." ³¹ Mawh kheu nan puxaik khankix eue, ang ex mawh kawn praix bun siliex, mawh kawn praix bun pa ploi heue.

¹ Cao Khrit hoik ploi ex sonsang mawh pui ploi, mawh kheu nan kieh kaux cong kah mai paw baox deeh kieh nien ka ceu pa sang deeh kieh mawh siliex. ² Jhak heue, Aux Pawlux ah nin ka pex, phan pex lai rieb ti kieh pat hak, Cao Khrit tak ang koe bwanson tidtix son pex. ³ Mawh heue, aux baox deeh kham mhai rug, grawng ku kaux daux pui pa rieb ti kieh pat hak, nawh tak mawh pa koe ceuk ti sang yuh lox lai beenli khawmuik heue. ⁴ Pex pa mie ti hoek krax rahsee kheu lox lai beenli, hoik dud gwieh hu khaing Cao Khrit, pex hoik rau hu khaing bwanson heue. ⁵ Grawh grawng nawh ex hoik krox ti pon pa keud pot jun pot son krax rahsee, pa sang pon kheu Khuan Cao ka daux krax yum rhawm heue. ⁶ Grawh grawng nawh ka daux Yesux Khrit, ceu pa pat hak ang ah, pa ang pat hak ang ah, ang koe bwanson tidtix, mawh krax yum rhawm pa yuh kheu krax moh, pa koe bwanson heue. ⁷ Glang ka in pex hoik to mhawm heue. Mawh mawx pa hoik sidien pex son ang pex sang nghiet ka lox pa mawh meh? ⁸ Ceu pa jeeh nyaw ka pex in ang mawh pa kaoh khaing Kaw pa hoik kok ka pex heue. ⁹ Susaix ceeix ngie chix laig ka pum khawmuik mai kieh ploh kah heue. ¹⁰ Aux hoik yum rhawm ka pex ka daux Simiang, grawng pex tak ang keud pa tang siyox, pa lak lheut ka pex, mawh pui mawx ang ah, nawh tak geu pa prawng pa ciyang tokaux tix heue. ¹¹ Puxaik khankix eue, phan aux kawn sidiex been pat hak, lai kawn tuktiak ka aux? Phan mawh nan ceu pa sideeing ka khaox lhak hoik teei ti tik heue. ¹² Aux mie ti kieh kix, pa kieh pex lulax, deeh kid ti tik tokaux tix tiru heue. ¹³ Grawh grawng nawh puxaik khankix eue, hoik kok pex sonsang mawh pui ploi, viang mawh nan paw vi shiao krax pa ploi pex, ti mawh dee du sonsang hawt yuh alo nex nham, viang mawh nan pex tix kaux lai tix kaux yuh son paox tix ka daux krax moh heue. ¹⁴ Grawh grawng nawh lox lai beenli khawmuik hoik grum naog ka daux lox in tix gum khaing, pa ah nin, "Maix tak moh paox plawg paox nyhawm maix awm moh ka tokaux tix heue." ¹⁵ Phan pex kiied mai ih paox tix, rien rhawm tix, son ang pex paklawg kheu paox tix, tix kaux lai tix kaux heue. ¹⁶ Aux ah nin, hu ka daux Khuan heue. Mai pex tak ang yuh ti kieh naog alo nex nham heue. ¹⁷ Grawh grawng nawh alo nex nham mawh pa lah cha ka Khuan mai Khuan mawh pa lah cha ka alo nex nham, mawh kheu ceu in kiex mawh pa ang khaw mai paox tix, tom ang pex pon yuh ceu pa mie pex ti yuh heue. ¹⁸ Phan Khuan Cao thong pex hu, pex ang lai ot greem lox lai beenli heue. ¹⁹ Krax twah klaung pa khaw mai alo nex nham, mawh in khankix, pa phit vao mai pa yuh pa ang singax, pa chax nie luan yuh, ²⁰ pa krub riang grang, pa yuh pa dex mai phi, pa koeng ka paox tix, pa simah simaing, pa boh rhawm, pa song rhawm, pa thiang paox tix, pa tang gwieh paox tix, pa tang yuh cub caw, ²¹ pa ghoing, pa pah pui yum, pa yoek ka plai, pa silao ti yuh pawie mai ceu pa awm in khankix, pa baox grux krai aux ka pex yam in, awm pa hoik sax grux krai aux ka pex, grawng pui pa yuh ceu in khankix tak ang lai pon sin meung Siyiex heue. ²² Plix cie Khuan Cao mawh, pa moh rhawm, pa gaux rhawm, pa nhim, pa lang gun lang yeung, pa chix caux rhawm, pa mhawm, pa kaux sijax, ²³ pa awn rhawm, pa chix priex rhawm tix, lox been pa sang lah cha ka ceu in khankix ang koe heue. ²⁴ Kix pa dex dawd mai Yesux Khrit, hoik tawk nex nham yum piang khaox lhak, tau mai ceu pa keud pa yuh alo nex nham heue. ²⁵ Phan ex im kheu Khuan Cao, viang pa hu ex kawx kieh mawh daux Khuan Cao heue. ²⁶ Paw kieh ex lih ti mawh pa sawg min plakngai pa giex going mai paw choeng ka paox tix mai paw ghoing ka paox tix heue.

¹ Puxaik khankix eue, phan krup pui tix kaux kaux ka daux phimap pa yuh nawh, pex pa kawn dex mai khuan, khaw ti viex rhawm awn pa mhawm ti deeh cox cai nawh mhawm heue. Deeh gi ka tokaux tix, ha maix kox hoek ka krax nyaw glaw heue. ² Tix kaux lai tix kaux klawm glawm paox tix mai kieh lox lai beenli Cao Khrit naog kah heue. ³ Phan pui tix kaux kaux ce tokaux tix mawh pa laoh lie, yam ang nawh mawh tidtix, nawh deeh pie ka tokaux tix tiru heue. ⁴ Kieh kaux pui mawx kaux pui an tiag cheu ti yaox kaing pa yuh tix phan yuh nan nawh tak koe min plakngai ka grawng tokaux tix khaing, mai ang yaw rangdi ka tang kaux heue. ⁵ Grawh grawng nawh kaux pui mawx kaux pui an tak lai klawm glawm tokaux tix heue. ⁶ Kieh kaw pa pon krax gau ka daux gumlox bwan, gwieh ti tawx ceu pa mhawm can pa koe tix ka cao gau ka nawh heue. ⁷ Paw kieh pie ka tokaux tix, ang doh nieb pon yuh pa ang cee ang cak ka Siyiex heue. Grawh grawng nawh pui rhuat simie ceu pa yuh ka mawx ang ah, nawh tak deeh vawg ceu an heue. ⁸ Kaw pa rhuat ka daux nex nham tokaux tix, tak sang deeh vawg pa cux sium khaing nex nham heue. Kaw pa rhuat ka daux Khuan Cao, tak sang deeh vawg ju leeing ju khaing Khuan Cao heue. ⁹ Ex paw kieh laux rhawm ka ceu pa yuh pa mhawm mhiem, grawh grawng nawh yam hoek bawg yam ex tak sang pon ti vawg, phan ex ang khrup rhawm heue. ¹⁰ Mawh kheu in, yam yaox ex dee pon ti yuh, kieh ex yuh ceu pa mhawm ka pui khawmuik mai nie lheu mawh ka kix pa mawh pui geh nyiex krax yum rhawm heue. ¹¹ Pex yaox grawng aux hoik tiiem ngai lai pa ting miex ding ka pex, ka khaix taix tokaux aux heue. ¹² Can pui pa mie ti ao min plakngai ka daux nex nham khankix khin ti kieh pex pat hak, son ang kix sang yaox ti geu krax tuktiak son khaox lhak Cao Khrit heue. ¹³ Grawh grawng nawh pie tokaux kix pa hoik rieb ti teei been pa pat hak khankix kawx ang priex ti hawt ka lox lai beenli, kix simie ti kieh pex pat hak, son sang pon kix ti yaw rangdi ka daux nex nham pex heue. ¹⁴ Paw kieh aux yaw rangdi ka tix ceu kawx lheu khaing khaox lhak Simiang ex Yesux Khrit, haktiex hoik yum ka aux mai aux hoik yum ka haktiex heue. ¹⁵ Ka daux Yesux Khrit pa pat hak ang ah, pa ang pat hak ang ah, ang koe bwanson tidtix, ceu pa koe bwanson mawh ngie pa mawh pui pa khraox heue. ¹⁶ Can kix pa sang hawt hu ka daux lox tawm in, kieh pa nhim mai pa caux rhawm koe ka piang kix mai ka piang Isarelax cie Siyiex heue. ¹⁷ Jah tom yam in, paw kieh pui lak lheut ka aux tix kaux kawx, mawh kheu aux hoik peeh khaix rhoi pa hoik yuh ka Yesux daux tokaux aux heue. ¹⁸ Puxaik khankix eue, kieh bwanson Simiang ex Yesux Khrit ot tau mai khuan pex liak. Amen.