Ezra

Ezra

¹ Ka daux num jah Kurux simiang haktiex Pasha tix kwang ka haktiex, sonsang grum naog gumlox pa hoik krai Siyiex khaing daux jheeh Yeramix, Siyiex hoik so rhawm simiang haktiex Pasha mai kieh nawh krai pao daux meung haktiex nawh kudah dee mai hoik tiem daux lai krai ah nin, ² Sairat simiang haktiex Pasha ah nin, "Siyiex piang raoma hoik tawx meung haktiex can pa koe khawmuik ka aux heue. Nawh Cao hoik tawx lox ka aux, sonsang sum aux nyiex bwan son Nawh Cao tix lhang ka daux veng Yerusaliem ka daux haktiex Yudax heue. ³ Ka daux pex mawh pui mawx pa mawh pui Nawh Cao kieh Siyiex ot mai nawh, kieh haok hu ka veng Yerusaliem ka daux haktiex Yudax mai sum nyiex bwan Siyiex ceu pui Isarelax Siyiex pa ot ka daux veng Yerusaliem mawh Siyiex heue. ⁴ Can pui pa kawn deuk kudah dee ka dee peung pan nawh tix ot tivud ticu khankix, kieh pui khankix teem ka mau mai khri, khawm tobrie tix khankix ka nawh, lheu khaing krax tan pa koe khawm rhawm nawh tix tan khankix son nyiex bwan Siyiex daux veng Yerusaliem heue. ⁵ Khaix an cao kaing nyiex ma cub pui Yudax mai Binyamin khankix mai cao giex kaing li pui Lewix khankix mai can pui pa hoik so Siyiex rhawm kix khawmuik, yaog tix kaox hu sonsang sum nyiex bwan Siyiex ka daux veng Yerusaliem heue. ⁶ Pui pa ot hawt rawb rim kix khawmuik mai teem tawx kraung mau kraung khri khankix, khawm kraung khrai mai tobrie pa koe ngawh jum tix khankix lheu khaing can pa koe rhawm kix ti tan heue. ⁷ Simiang Sairat teei kraung shiao khankix khaing nyiex bwan Siyiex, pa hoik rhim simiang Nebukhaneza ti teei khaing veng Yerusaliem mai pa hoik priex ti deuh ka daux nyiex bwan siyiex cie tix, ⁸ mai Sairat simiang haktiex Pasha hoik teei ankix lih khaing daux taix Midaredat pa mawh cao priex kraung mai simin tix tawx ka cao kaing pui Yudax Sheshabaza heue. ⁹ In mawh kraung shiao khankix, klong khri tixngoe mu, klong mau tix rheng mu mai vaig mau tixnga dim kre, ¹⁰ pan khri tixngoe mu, pan mau pon yieh kao mu mai kraung shiao tang ceu khankix tix rheng ceu heue. ¹¹ Can kraung mau kraung khri khawmuik hoik koe phwan rheng pon yieh mai tixgliah dim ceu, Sheshabaza hoik teei kraung shiao ceu inkix khawmuik tau mai pui pa giex laung khankix khaing veng Babulon ing ka veng Yerusaliem heue.

¹ Inkix mawh pui pa ot kien haktiex an pa deeh ing khaing krax pa giex laung tix khankix, pui pa hoik viex Nebukhaneza simiang Babulon hu dee singai ka veng Babulon khankix mai can pui pa deeh ing ka veng Yerusaliem haktiex Yudax ku kaux daux pui ka veng ot tix heue. ² Can pui pa hoek tau mai Terubagelax khankix mawh Yawsux Nehamix, Serayax, Relayax, Modekhie, Bilashan, Misapa, Bizava, Rehum mai Banax heue. Carang ceu pui Isarelax khankix mawh awm in, ³ cub kawn praix Parot khankix ra rheng tix yieh atixgliah ra kaux, ⁴ Cub kawn praix Shaphatiyax khankix loe yieh atixgliah ra kaux. ⁵ Cub kawn praix Arax khankix aliah yieh atixgliah phwan kaux. ⁶ Cub kawn praix Pahat-mawbax, khaing ka daux cub kawn praix Yehu mai Yobax khankix, ra rheng daix yieh kao ra kaux. ⁷ Cub kawn praix Elam khankix tix rheng ra yieh tixphwan pon kaux. ⁸ Cub kawn praix Zatux khankix dim yieh tixpon phwan kaux. ⁹ Cub kawn praix Zakie khankix aliah yieh tigliah kaux. ¹⁰ Cub kawn praix Banix khankix, liah yieh tixpon ra kaux. ¹¹ Cub kawn praix Bebie khankix liah yieh tixnga loe kaux. ¹² Cub kawn praix Azagat khankix, tix rheng ra yieh tixnga ra kaux. ¹³ Cub kawn praix ceu pui Adonikam khankix liah yieh tigliah liah kaux. ¹⁴ Cub kawn praix Bigavie khankix ra rheng mai tixphwan liah kaux. ¹⁵ Cub kawn praix Adim khankix pon yieh tixphwan pon kaux. ¹⁶ Cub kawn praix Ata khaing Hezakiyax khankix, tixdim daix kaux. ¹⁷ Cub kawn praix Bezie khankix loe yieh tixnga loe kaux. ¹⁸ Cub kawn praix Yorax khankix, tix yieh kao ra kaux. ¹⁹ Cub kawn praix Hashum khankix, ra yieh tixnga loe kaux. ²⁰ Cub kawn praix Gibax khankix tixdim phwan kaux. ²¹ Cub kawn praix Bieliehiem khankix tix yieh tixnga loe kaux. ²² Pui veng Netawpha khankix tixphwan liah kaux. ²³ Pui veng Anatok khankix tix yieh tixnga daix kaux. ²⁴ Pui veng Azamaviet khankix tixpon ra kaux. ²⁵ Pui veng Kilayatarim pui veng Khephirax mai Berot khankix, aliah yieh tixpon loe kaux. ²⁶ Pui veng Ramax mai pui veng Gebax khankix, liah yieh tixnga tix kaux. ²⁷ Pui veng Mikhamat khankix, tix yieh tixnga ra kaux. ²⁸ Pui veng Betelax mai pui veng A-ix khankix ra yieh tixnga loe kaux. ²⁹ Pui veng Nebo khankix, tixphwan ra kaux. ³⁰ Pui veng Magabit khankix, tix yieh tixphwan liah kaux. ³¹ Cub kawn praix Elam tang kaux tix rheng ra yieh tixphwan pon kaux. ³² Cub kawn praix Harim khankix, loe yieh tixnga kaux. ³³ Pui veng Lawda, pui veng Hadi mai pui veng Ono khankix, aliah yieh tixnga phwan kaux. ³⁴ Pui veng Yerikho khankix, loe yieh tixpon phwan kaux. ³⁵ Pui veng Senax khankix loe rheng liah yieh tixngoe kaux. ³⁶ Cub kawn praix Yedayax khankix khaing daux nyiex ma cao giex kaing li Yawsux dim yieh atixgliah loe kaux. ³⁷ Cub kawn praix Imerax khankix, tix rheng mai tixphwan ra kaux. ³⁸ Cub kawn praix Pashurax khankix, tix rheng ra yieh tixpon aliah kaux. ³⁹ Cub kawn praix Harim khankix, tix rheng mai kao aliah kaux. ⁴⁰ Cub pui Lewix khankix, tom mawh cub kawn praix Yawsux mai Kamelax khaing daux cub kawn praix Hodavix khankix atixgliah pon kaux heue. ⁴¹ Cub pa ah lai rhax khankix, mawh cub kawn praix Asapha tix yieh tixnga daix kaux. ⁴² Cub kawn praix pa pau siviex khankix, mawh cub kawn praix Shalum khankix, cub kawn praix Ata khankix, cub kawn praix Talamon khankix, cub kawn praix Akkup khankix, cub kawn praix Hatitax khankix mai cub kawn praix Shobiet khawmuik tix yieh tixngoe dim kaux. ⁴³ Netinim cao pa yuh kaing daux nyiex bwan khankix, mawh cub kawn praix Ziha khankix, cub kawn praix Hshupha khankix, cub kawn praix Tabaok khankix, ⁴⁴ cub kawn praix Tarot khankix mai cub kawn praix Siyaha khankix mai cub kawn praix Padon khankix, ⁴⁵ cub kawn praix Lebanax khankix, cub kawn praix Hagabax khankix, cub kawn praix Akkup khankix, ⁴⁶ cub kawn praix Hagap khankix, cub kawn praix Shamlai khankix mai cub kawn praix Hanan khankix, ⁴⁷ cub kawn praix Gidelax khankix, cub kawn praix Gaha khankix mai cub kawn praix Rayax khankix, ⁴⁸ cub kawn praix Rezin khankix, cub kawn Nekodax khankix mai cub kawn praix Gazam khankix, ⁴⁹ cub kawn praix Uzax khankix, cub kawn praix Paseyax khankix mai cub kawn Besie khankix, ⁵⁰ cub kawn praix Asanax khankix, cub kawn praix Mehunim khankix, mai cub kawn praix Nephuzim khankix, ⁵¹ cub kawn praix Bakabuk khankix, cub kawn praix Hakupha khankix mai cub kawn praix Harahurax khankix, ⁵² cub kawn praix Hazalut khankix, cub kawn praix Mehidax khankix mai cub kawn praix Harasha khankix, ⁵³ cub kawn praix Bakok khankix, cub kawn praix Sisarax khankix, cub kawn praix Tamax khankix, ⁵⁴ cub kawn praix Neziyax khankix mai cub kawn praix Hatipha khankix, heue. ⁵⁵ Cub kawn praix kawncau Sawlamon khankix, mawh kawn praix Sotie khankix, cub kawn praix Sawpheriet khankix, cub kawn praix Parudax khankix, ⁵⁶ cub kawn praix Yolax khankix, cub kawn praix Dakok khankix cub kawn praix Gidelax khankix, ⁵⁷ cub kawn praix Shephatiyax khankix, cub kawn praix Hattilax khankix, cub kawn praix Hokheriet khankix, kawn praix Zebem mai cub kawn praix Ami khankix heue. ⁵⁸ Netanim cao pa yuh kaing daux nyiex bwan khawmuik mai khawm kawn praix kawncau Sawlamon khankix koe loe yieh tixdim ra kaux. ⁵⁹ Pui in khankix mawh pa kaox khaing veng Telamilax veng Talhashax, veng Kherup, veng Adadan mai veng Imerax khankix, viang kix ang pon jhi doeh nyiex ma keeing kix mai doeh nyiex ma ru kix sidawng ka ang kix mawh ceu pui Isarelax, ⁶⁰ kix tom mawh cub kawn praix Delayax khankix, cub kawn praix Tobix khankix mai cub kawn praix Nekodax khankix koe liah yieh tixphwan ra kaux. ⁶¹ Sinax cub kawn praix cao giex kaing li khankix, pa mawh cub kawn praix Hobayax mai cub kawn praix Kozax khankix, mawh kheu teei tax du kix tix moeng bun Bazilie pa mawh pui haktiex Gilat mai hoik kok ceu kaux kix mawh Bazilie heue. ⁶² In hoik mawh pui pa sawg kix ti yaox daux sinax ceu pui pa hoik sau daux carang khaing daux sinax ru kix, viang mawh nan kix ang lai yaox kix ka daux carang, mawh kheu kix hoik mawh pui pa teei tix lih khaing cao giex kaing li kheu ang kix lai singax heue. ⁶³ Cao kwang haktiex tawx lox ang cu kix can ceu pa kied singax singeh tom hoek bawg yam ang cao giex kaing li nyang bax shiao ka Urim mai Tumin heue. ⁶⁴ Cub pui hun khawmuik hoik koe pon mheen ra rheng loe yieh tixgliah kaux, ⁶⁵ lheu khaing an kawncau simex kawncau bun kix, pa ot tau mai kix tan hoik koe aliah rheng loe yieh tixngoe aliah kaux mai kix koe simex, bun cub pa ah lai rhax khankix ra yieh kaux heue. ⁶⁶ Kix koe brung aliah yieh tixngoe liah mu mai kix koe law ra yieh tixpon phwan mu, ⁶⁷ kix koe kala-uk pon yieh tixngoe phwan mu mai kix koe la liah rheng aliah yieh tixnga mu heue. ⁶⁸ Cao kaing cao kap daux nyiex ma tiblah yam hoek kix ka nyiex bwan Siyiex pa koe daux veng Yerusaliem, kix hoik tan tau mai khawmrhawm tix ka son nyiex bwan Siyiex, sonsang sum nyiex bwan ka dah dee prim, ⁶⁹ mai kix hoik tawx krax tan can pa pon yuh tix khankix hoek ka daux krao sinngao son kaing, plah khri liah mheen tix rheng dalit mai mau phwan mheen minax mai kraung ceep cao giex kaing li tix yieh pheen heue. ⁷⁰ Mawh kheu nan cao giex kaing li pui Lewix khankix mai pui khankix tix blax cao pa ah lai rhax khankix mai cao pau diang siviex mai Netinim cao pa yuh kaing daux nyiex bwan khankix, hoik ot daux veng cao tix mai ceu pui Isarelax khankix hoik tang ot ka daux veng cao tix khawmuik heue.

¹ Bleeh ka daux khix aliah mai kawn praix ceu pui Isarelax pa hoik ot ka daux veng daux yaong khankix, kraix khrawm paox tix hoek ka daux veng Yerusaliem ka daux pa grum rhawm heue. ² Khaix an Yawsux kawn simex Yozadak mai puxaik nawh cao giex kaing li khankix mai Zerubabelax kawn simex Shelatilax yaog ti kaoh mai sum khu dee tan Siyiex ceu pui Isarelax, sonsang tan krax tan pa gleeing piang khu dee tan awm krax pa hoik tiem tix ka daux phuk lai been Mose, pa mawh pui Siyiex heue. ³ Mawh kheu lhat graung kix ka pui ot rawb rim kix khankix mai kix sum khu dee tan piang jaong num dee prim mai kix tan krax tan pa gleeing piang an, son Siyiex, pa mawh krax tan pa gleeing son plak ponngawb mai son plak ponbo khawm ra bawg heue. ⁴ Kix deeh yuh pawie nyiex gox bang awm krax pa hoik tiem an ti deuh ka daux phuk lai beenli mai kix tan krax tan pa gleeing ku singaix, ka daux carang been awm pa keung pa khaw tix tan son ku ngaix; ⁵ Khaix an kix tan krax tan pa gleeing awm been pa yuh tix sijheeng mai krax tan yam haok khix khraox mai pawie krax tan pa singax singeh son Siyiex awm pa hoik tat ti deuh khawmuik mai son can pui ku kaux pa koe rhawm tix tan krax tan ka Siyiex heue. ⁶ Jah haok khix aliah tix ngaix, kix tan krax tan pa gleeing tix khankix ka Siyiex, viang mawh nan jaong num nyiex bwan Siyiex ang nyang bax sum tix heue. ⁷ Kix tawx mau ka cao pa chix saik simaox khankix mai ka pa chix yuh kaing khaox khankix mai khawm pa ih mai khawm pa nyaux mai khawm rawm bee khankix ka pui veng Sidon mai pui veng Tairax khankix, sonsang viex khaox Arit khankix hoek khaing gawng Lebanon, sibloe hoek ka daux reu veng Yawppa praok rawm sigrit sigra, awm hoik pon kix khaing Kurux simiang haktiex Pasha heue. ⁸ Ka daux num ra khix ra yam hoek bleeh kix ka nyiex bwan Siyiex ka daux veng Yerusaliem, Zerubabelax kawn simex Shatalilax, Yawsux kawn simex Yozadok mai can puxaik kix Cao giex kaing li mai pui Lewix pa kawn deuk khankix mai can pui pa lih khaing pa giex laung khawmuik mai can pui pa hoek ka veng Yerusaliem, jah ti yuh kaing mai kix laug ka pui Lewix khankix, sonsang kia ngiien kix piang kaing jhaw ka daux nyiex bwan Siyiex heue. ⁹ Khaix an Yawsux mai kawn praix nawh mai puxaik kix khankix, Kadamelax mai kawn praix nawh, khawm kawn praix Yudax khankix, rom tix kaoh sonsang kia ngiien kix piang pui pa yuh kaing nyiex bwan Siyiex tau mai kawn praix Henadat khawm kawn praix kix mai puxaik kix pui Lewix heue. ¹⁰ Yam yaog cao sum nyiex khankix jaong num nyiex bwan Siyiex, cao giex kaing li khankix cung khawm kraung ceep tix mai teettawng khankix, pui Lewix mai kawn praix Asapha khankix, hoik cung tan tau mai tauh chiang sonsang yaogyaw ka Siyiex awm koe been phing beenli pa hoik deuh Davit simiang ceu pui Isarelax heue. ¹¹ Kix rhax lai pa deeh ra lai pawk ka paox tix, ka daux krax pa yaogyaw mai ting bwanson ka Siyiex ah nin; "Mawh kheu Nawh Cao mawh pa mhawm mawh kheu pa caux rhawm Nawh Cao kaux cong leeing ju son ceu pui Isarelax heue. "Khaix an pui khawmuik kok yo lox sinum ka daux krax pa yaogyaw kix ka Siyiex, kheu hoik sum kix jaong num nyiex bwan Siyiex heue. ¹² Mawh kheu nan cao giex kaing li khankix mai pui Lewix khankix mai cao kaing nyiex ma kix, pui riex ju khankix, pa hoik pon yaox ka nyiex bwan phao ka hoik yiiem yo ka lox pa kied ting, yam hoik sum kix jaong num nyiex bwan ka ngai kix, mai pui hun khankix kok yo lox tix ka daux krax pa gaux rhawm heue. ¹³ Mawh kheu nan pui khankix ang lai chix pon gwieh ka lox sinum riag yo pui ka daux krax pa gaux rhawm khaing lox sinum yiiem pui khankix, kheu jao hoik yo pui khankix lox tix daux krax pa kied ting sinum mai lox sinum an hoik mawh pa mhong tom dee singai heue.

¹ Yam hoik mhong pui koeng ceu pui Yudax mai ceu pui Binyamin khankix ka sang sum doeh ru can pui pa giex laung tix khankix ka nyiex bwan Siyiex ceu pui Isarelax, ² Kix hoik hoek ka Zerubabelax mai doeh cao kaing pui Isarelax khankix mai ah nin ka kix "Kieh yix sum nyiex bwan in tau mai pex liak, grawh grawng nawh yix sawg Siyiex pex awm sawg pex ka, mai yix hoik tan ka Nawh Cao, jah daux singaix thong Esarahadon simiang Asurix yix hoek tin heue." ³ Viang mawh nan Zerubabelax mai Yawsux mai doeh cao kaing daux nyiex ma ceu pui Isarelax khankix ah nin ka kix, "Pex ang pon yuh tix ceu kawx tau mai yix sonsang sum nyiex bwan Siyiex yix heue. Viang mawh nan yix sang tang sum ka son Siyiex ceu pui Isarelax nong nong, awm pa hoik tawm simiang Kurux pa mawh simiang Pasha ka yix heue." ⁴ Khaix an pui haktiex khankix hoik kieh pui Yudax khankix awn riang rao mai tuktiak kix, ⁵ mai vai cao pa hawt grawng see khankix, yuh krax keud pa sawn kix laux leeing prung prang, jah singaix baux Kurux simiang haktiex Pasha tom hoek baux ju krax kwang Darix simiang haktiex Pasha heue. ⁶ Yam jah Ahashoerux tix kwang haktiex, kix hoik tiiem tix tawx lai pa tang phimap ka can pui pa ot ka daux haktiex Yudax mai veng Yerusaliem heue. ⁷ Ka daux singaix Atazerit kawx, Bishalam, Mitaretat, Tabelax mai paox pie kix pa kawn deuk, baox tiiem tix tang ka Atazerit simiang haktiex Pasha mai lai in mawh pa tiiem tix ka ngai lai Aremix mai deeh thut tix ka plak lox Aremix khankix heue. ⁸ Rehum pa mawh cao kaing ting Shimashie pa mawh cao tiiem lai, hoik tiiem lai tieh feen ka pui veng Yerusaliem mai tawx ka simiang Atazerit awm in heue. ⁹ Rehum pa mawh cao kaing ting pa kwang teug lai, Shimashie pa mawh cao pa tiiem lai khawm paox pie kiex, pui haktiex Dinie, pui haktiex Aphasatakhit khankix, pui haktiex Tapalax, pui haktiex Pasha khankix pui haktiex Eriet mai pui haktiex Babulon pui haktiex Shushan, pui haktiex Dehavi khankix mai pui haktiex Elam khankix, ¹⁰ mai can pui khankix, pa hoik gah simiang Osanapa pa mawh pui ting lhaong mai pa kied laoh lie, kieh ot daux nyiex veng yaong haktiex Samarix khankix mai can pui pa kawn deuk baoh haktiex ka plak toi rawm klawng Upharetix khankix ka plak klip singaix heue. ¹¹ In mawh lai pa hoik sipaox kix ka nawh son simiang Atazerit mai khaing kawncau maix khankix pa ot baoh haktiex plak toi rawm Upharetix khankix heue. ¹² Kieh simiang tawng ka pui Yudax pa hoik hoek khaing maix khankix, hoik bleeh ka daux veng Yerusaliem mai kix sum veng pa yie tieh feen pa caox caig an mai yuh guh veng an dex hoik mai deeh cox sum ka jaong num veng heue. ¹³ Kieh simiang tawng yam in, phan veng in hoik mawh pa sum guh veng tix kaux, kix tak ang lai tawx gha mai keen mai mau gawng mai krao mau cie simiang tak mawh pa nie iak hu sipie ka heue. ¹⁴ Yam in mawh kheu ih yix kih kied mau cai pa kaoh khaing daux nyiex simiang, yix ang rhawm yaox ka krax ceet min simiang; mawh kheu nan yix tom ploi pui hu krai grawng inkix ka simiang heue. ¹⁵ Sonsang sigaw maix ti yaox ka grawh grawng ceu an ka daux phuk lai keeing maix khankix heue. Maix tak yaox grawng an khankix ka daux phuk lai pa hoik tiiem tix khankix mai tawng ka veng in mawh pa yie tieh feen mai pa tawx krax pa tuktiak ka simiang khankix mai ka kien haktiex an tom dix, mawh kheu jao in tom kieh veng in laux leeing heue. ¹⁶ Ex gruh krai grawng in ka simiang phan veng in sum tix mai phan guh veng hoik sang tix khawmuik, khaix an maix tak ang yaox tix kwang ka baoh haktiex plak toi rawm klawng heue. ¹⁷ Khaix an simiang deeh tawx lox pawk tix son Rehum cao kaing ting mai son Shimashie cao tiiem lai mai ka son paox pie pa kawn deuk tau mai kix khawmuik, pa ot daux haktiex Samarix mai ka son can pa kawn deuk khankix daux haktiex plak toi rawm klawng, kieh pa nhim koe piang pex heue. ¹⁸ Lai pa sipaox pex ka aux hoik toe tix phat sidawng ka plak sivoe aux heue, ¹⁹ mai aux hoik tawx lox tix kieh kix sawg ciied ti yaox mai hoik yaox veng in yuh krax tieh feen ka simiang ka daux bawg yam pa hoik luan mai pa tieh feen mai grawng kaing pa ang mhawm khankix, hoik kleuk tix ka daux veng an heue. ²⁰ Simiang pa koe sibrawm khankix pasax ot ka daux veng Yerusaliem mai kix hoik kwang ka kien haktiex an khawmuik pa koe toi rawm klawng plak klip singaix mai hoik tawx gha mai keen mai mau gawng khankix ka kix heue. ²¹ Yam in, naox ka pa sum pex veng in, sonsang krox jun tom hoek bawg yam tawx aux lox tix hoek heue. ²² Yuh satix tix, paw lai nhim, chix lai sang kieh pa som nai pa laux leeing pa cien hoek piang simiang yuh ka mawx lie? ²³ Yam in yam phat kix lai simiang Atazerit ka sivoe Rehum mai Shimashie cao tiiem lai khawm paox kiex khankix, kix niied tix hu ka veng Yerusaliem tiebtie khin ka pui Yudax khankix, kieh naox ka kaing yuh kix heue. ²⁴ Mawh kheu nan kaing jhaw nyiex bwan Siyiex daux veng Yerusaliem hoik kaog tom hoek bawg yam kwang simiang haktiex Pasha ra num tix num heue.

¹ Yam an cao jhai Hagie mai Zakharix kawn simex Ido mai cao jhai khankix krai lox jhai tawx riang rao ka pui Yudax, pa ot daux haktiex Yudax mai veng Yerusaliem, ka daux min ceu kaux Siyiex ceu pui Isarelax heue. ² Mawh kheu nan Zerubabelax kawn simex Shalatilax mai Yawsux kawn simex Yozadak kaoh mai jah tix sum nyiex bwan Siyiex pa koe ka daux veng Yerusaliem, mai cao jhai Siyiex khankix, hoik ot tau mai kix mai teem ka kix heue. ³ Ka daux bawg yam an Tatenie pa mawh cao pa kwang hawt baoh haktiex toi rawm klawng Upharetix plak klip singaix mai Shetabozanie mai paox pie kiex khankix, hoek mai chawk ka kix ah nin, "Mawh pui mawx pa tawx lox ka pex, sonsang sum nyiex bwan in mai sonsang yuh ka guh veng in lie?" ⁴ Khaix an yix hoik krai kix mhong ceu kaux pui an khankix pa pang tix sum nyiex bwan in heue. ⁵ Viang mawh nan ngai Siyiex kix kia ngiien piang kuad song pui Yudax khankix, son ang kix kaog tom hoek bawg yam deeh hoek lai grawng an khaing simiang Darix heue. Khaix an kix deeh pawk lai tix pheen ka grawng pa dex dawd mai in heue. ⁶ Lai in tix pheen mawh lai tiiem Tatenie cao kwang baoh haktiex plak toi rawm klawng plak klip singaix mai Shetabozanie khawm paox pie kix khankix mai pui Pasha khankix pa ot ka baoh haktiex plak toi rawm klawng plak klip singaix ka son simiang Darix. ⁷ Kix hoik tawx lai in hu ka nawh tix pheen ka daux pa tiiem ah nin, "Kieh pa nhim koe piang simiang Darix heue. ⁸ Kieh simiang tawng ka hu yix laig daux haktiex Yudax mai hoek ka nyiex bwan Siyiex pa ting lhaong, pa hoik sum ka lon simaox pa kied ting khankix mai khaox khankix hoik sau tix ka ding nyiex mai kaing hoik phai ka daux pa sau kix riang rao tix mai tak sang pon tix hoik ka daux tawm taix kix heue. ⁹ Khaix an yix chawk ka kuad song khankix, mai ah nin ka kix, "Mawh pui mawx pa tawx lox kieh pex sum nyiex bwan in mai yuh ka guh veng inkix lie?" ¹⁰ Yix baox deeh chawk ceu kaux kix sonsang deeh krai yix ka maix mai sonsang pon tiem yix tix tawx ceu kaux pui khankix pa mawh cao kaing ting ka daux sinax kix heue. ¹¹ Kix hoik deeh pawk ka yix ah nin, "Yix mawh cub kawncau mau soi Siyiex raoma mai haktiex mai yix deeh sum nyiex bwan pa hoik dawg sum tix tom num pa hoit kied rheeng dix, pa hoik grum naog sum simiang pa ting lhaong ceu pui Isarelax tix kaux heue. ¹² Mawh kheu jao hoik so keeing yix khankix pa song rhawm Siyiex meung raoma, Nawh Cao tom ap kix ka daux taix Nebukhaneza simiang haktiex Babulon mai ceu pui Khakladie khankix, pa hoik yuh nyiex in laux leeing mai rhim pui khankix hu ka veng Babulon. heue. ¹³ Viang yuh nan kawx, ka daux num jah Kurux simiang Babulon tix kwang ka haktiex, simiang Kurux hoik tawx lox hoek sonsang deeh sum ka nyiex bwan Siyiex in heue. ¹⁴ "Kraung khri kraung mau nyiex bwan Siyiex pa hoik rhim Nebukhaneza khaing daux nyiex bwan ka daux veng Yerusaliem mai can pa viex nawh laig ka daux nyiex bwan veng Babulon, simiang Kurux hoik deeh teei kraung khrai an khankix lih khaing daux nyiex bwan Babulon mai nawh ap tix tawx ankix ka cao kaing ting pa kaux Sheshaboza heue. ¹⁵ simiang ah nin ka nawh, "Teei kraung shiao inkix lih hu ka daux nyiex bwan pa koe ka daux veng Yerusaliem mai deeh sum nyiex bwan Siyiex ka gwang prim heue." ¹⁶ Mawh kheu nan Sheshaboza hoek tix sum jaong num nyiex bwan Siyiex, pa koe ka daux veng Yerusaliem; mai jah khaing daux bawg yam an tom hoek ka daux bawg yam ca kawn yuh tix mai ang nyang chix hoik heue. ¹⁷ Yam in phan ceu ankix mawh ceu pa mhawm ka son simiang, kieh ciied ti yaox pa koe ka daux krao sinngao nyiex haw simiang Kurux sonsang deeh sum kix nyiex bwan Siyiex in, ka daux veng Yerusaliem mai kieh simiang deeh krai yix mhong ka khaw rhawm ang khaw rhawm ka grawh grawng in heue.

¹ Khaix an simiang Darix tawx lox mai sonsang sawg ka bua lai, dee deuh kix sinngao daux veng Babulon heue. ² Kix yaox bua lai tix bua, ka daux nyiex veng Akhametax pa koe ka daux haktiex Medix, ka daux bua lai an hoik tiiem tix awm in heue. ³ Ka daux num jah simiang Kurux tix kwang ka haktiex, simiang Kurux tawx lox son gawng nyiex Siyiex pa koe ka daux veng Yerusaliem heue. "Kieh nyiex bwan mawh pa deeh sum tix, ka dee pa hoik appong kix krax tan, mai kieh jaong num nyiex bwan, mawh pa sum tom kaux cong mai kieh krax lhaong koe tixgliah sawk mai krax vieh koe tixgliah sawk, ⁴ mai sang ka simaox ting lon loe tia mai ka khaox pa khraox tix tia heue. Kieh krax pa uik shiao tix khankix mawh pa lih khaing daux krao sinngao cie simiang heue. ⁵ Deeh kieh tawx kraung khri kraung mau nyiex bwan Siyiex, pa hoik rhim simiang Nebukhaneza khaing nyiex bwan, veng Yerusaliem mai pa hoik viex hu ka veng Babulon khankix, deeh tawx ing ka nyiex bwan pa koe ka daux veng Yerusaliem mai sau ka dah dee koe ceu mawx ceu an ka daux nyiex bwan Siyiex." ⁶ Yam in Tatenie cao kaing ting ka baoh haktiex toi rawm klawng plak klip singaix mai Shetabozanie mai can paox pie pex pa mawh ceu pui Aphatiet pa ot ka toi rawm klawng plak klip khankix, lih hu singai khaing tan heue. ⁷ Paw sidien ka kaing nyiex bwan in mai yuh hu sivoe; kieh cao kaing ting pui Yudax mai cub kuad song ceu pui Yudax khankix, sum nyiex bwan Siyiex in piang dee prim heue. ⁸ Lheu khaing an aux tawx lox tix ka pa tak sang caw pex ti yuh son kuad song ceu pui Yudax khankix, sonsang sum nyiex bwan Siyiex in, ngawh riang yuh kaing nyiex bwan khankix, mawh pa tawx tix ka daux krax pa shiao simiang khaing keen pa pon koh piang baoh haktiex toi rawm klawng plak klip singaix; in mawh pa tawx tix dom mawx dom an ka pui inkix, sonsang ang kix lai laux ka kaing jhaw heue. ⁹ Pa mawh can ceu pa lo kix, kawn mawie iak, yung mhaing mai kawn yung khankix, son krax tan pa gleeing cie Siyiex raoma, nghox ca, kih, rawm plix siiet mai bee khankix, awm been pa hoik tat cub cao giex kaing li pa ot ka daux veng Yerusaliem khankix, tawx ka kix tix ngaix hoik tix ngaix paw kieh jud heue. ¹⁰ Son tak sang appong kix tix tan krax tan pa sioe bhawng ka Siyiex raoma mai rawg bwan ka son ju simiang mai kawn simex nawh khankix heue. ¹¹ Aux baox deeh tawx lox tix, phan pui tix kaux kaux tieh loh ka lox in, teei khaox rong nyiex nawh tix gawng mai tak teue nawh mai kieh nyiex nawh mawh pum aing mawie kheu jao grawng in heue. ¹² Phan simiang tix kaux kaux ang ah mai can pui pa sau taix tix sonsang tieh loh ka ceu an ang ah mai sonsang yuh pa laux leeing ka nyiex bwan Siyiex pa koe ka daux veng Yerusaliem in mai kieh Siyiex pa yuh min ceu kaux Cao tix ot tan yuh kix laux leeing heue. Aux Darix hoik tawx lox in, kieh mawh pa yuh tix phai phai heue. ¹³ Khaix an Tatenie cao kaing ting pa kwang baoh haktiex plak toi rawm plak klip singaix, Shetabozannie mai paox pie kiex khankix, hoik sau riang sau rao ti yuh kaing in phai phai awm lox pa hoik tawx simiang Darix heue. ¹⁴ Mawh kheu nan kuad song pui Yudax khankix hoik sum nyiex bwan mhawm mhawm, awm gumlox pa hoik grux sidiex cao jhai Hagie mai Tekhariyax kawn simex Ido khankix heue. Kix hoik sum mai yuh ankix hoik khawmuik, awm gumlox pa hoik tawm Siyiex ceu pui Isarelax mai lox tawx simiang Kurux mai simiang Darix mai Atazarit simiang haktiex Pasha heue. ¹⁵ Yam in nyiex bwan hoik sum tix daux khix Adarax loe ngaix daux num kwang simiang Darix ka haktiex liah num tix num heue. ¹⁶ Khaix an kawn praix ceu pui Isarelax mai cao giex kaing li pui Lewix mai doeh ru ceu cat pa kawn deuk khaing krax pa giex laung tix khankix, yuh pawie pa appong nyiex bwan Siyiex, tau mai krax gaux rhawm tix heue. ¹⁷ Krax tan pa appong kix nyiex bwan Siyiex in, ka mawie mhaing tix yieh mu, khawm krax tan pa pluat ploi phimap ka son ceu pui Isarelax khankix ka pex mhaing kao ra mu, awm koe carang doeh ru pui Isarelax khankix heue. ¹⁸ Kix hoik yaog ti deuh cao giex kaing li mai pui Lewix khankix awm pa tang koe cub caw kix ka son kaing jhaw Siyiex ka daux veng Yerusaliem, awm pa hoik tiem ti deuh ka daux phuk lai Mose heue. ¹⁹ Cub doeh ru can pa giex laung tix khankix hoik yuh pawie Pasakha ka daux khix tix kao pon ngaix heue. ²⁰ Cao giex kaing li mai Lewix khankix hoik kieh tokaux tix singax singeh khawmuik mai kix pah kawn yung iak pawie Pasakha son doeh ru pui pa giex laung khawmuik mai son puxaik kix pa mawh cao giex kaing li khankix mai son tokaux cao kix heue. ²¹ Khaix an kawn praix ceu pui Isarelax khankix pa deeh ing khaing krax pa giex laung tix mai pui pa hoik tang tiah tokaux khaing ceu pa seeing brai ceu pui baoh haktiex ankix sonsang sawg kix ka Siyiex ceu pui Isarelax kix hoik ih pawie Pasakha tau heue. ²² Kix gaux rhawm yuh pawie blah pa ang sau susaix, aliah ngaix; mawh kheu Siyiex kieh kix gaux rhawm mai kieh rhawm simiang Asurix deeh veeh tix hoek ka plak kix, sonsang tuk taix yaing caong kix mai koe riang rao ti yuh kaing jhaw nyiex bwan Siyiex, pa mawh Siyiex ceu pui Isarelax heue.

¹ Yam in khaix hoik ceu inkix, ka daux bawg yam kwang Atazerit simiang Pasha ka haktiex, Ezarax kawn simex Serayax pa mawh kawn simex Azarix, kawn simex Hilakhix. ² Hilakiyax mawh kawn simex Shalum, Shalum mawh kawn simex Tadok, Tadok mawh kawn simex Ahitup, ³ Ahitup mawh kawn simex Amariyax, Amariyax mawh kawn simex Azariyax, Azariyax mawh kawn simex Merayok, ⁴ Merayok mawh kawn simex Tarahiyax, Tarahiyax mawh kawn simex Awzi, Awzi mawh kawn simex Bukhix, ⁵ Bukhix mawh kawn simex Abishu, Abishu mawh kawn simex Phinehiet, Phinehiet mawh kawn simex Elaza, Elaza mawh kawn simex Arun pa mawh cao giex kaing li pa ting heue. ⁶ Ezarax in hoik hoek khaing Babulon; mai nawh mawh cao pa min ka lai lox tat jhawm prawng pa hoik tawx Siyiex ceu pui Isarelax ka Mose heue. Simiang hoik cu tix tawx pa mhaing nawh khankix ka nawh, mawh kheu hoik koe plawng taix Siyiex piang nawh heue. ⁷ Kawn praix ceu pui Isarelax khankix tiblah, pa mawh cao giex kaing pui Lewix, cao pa ah lai rhax, cao pau siviex mai cao pa kham geu ti yuh kaing nyiex bwan Siyiex khankix hoik hoek ka veng Yerusaliem, baux yam kwang simiang Atazarit ka daux haktiex aliah num heue. ⁸ Ezarax hoek ka veng Yerusaliem daux khix phwan, baux num kwang simiang ka haktiex aliah num tix num heue. ⁹ Ka daux khix tix, tix ngaix nawh jah krax khaing veng Babulon mai ka daux khix phwan tix ngaix nawh hoek ka veng Yerusaliem, mawh kheu hoik koe plawng taix mhawm Siyiex piang nawh heue. ¹⁰ Grawh grawng nawh Ezarax hoik but rhawm tix sawg gumlox tat jhawm prawng Siyiex mai sonsang hawt yuh mai sonsang gau tix gumlox beenli mai lox tat jhawm prawng pa deuh tix khankix ka daux ceu pui Isarelax heue. ¹¹ In mawh bua lai pa tiiem simiang Atazerit tix tawx ka cao giex kaing li pa mawh cao pa tiiem lai mai pa min ka gumlox pingnyap Siyiex mai ka gumlox beenli Nawh Cao pa hoik tawx ka ceu pui Isarelax khankix, ¹² khaing Atazerit pa mawh simiang piang simiang khankix, tawx hoek ka cao giex kaing li Ezarax, pa mawh cao tiiem lai pa min ka gumlox tat jhawm prawng Siyiex meung raoma tix kaux, kieh pa nhim pa grum naog koe piang maix hu sivoe ngai heue. ¹³ Aux tawx lox tix ka can pui Isarelax khankix mai cao giex kaing li mai pui Lewix pa ot ka daux meung haktiex aux khankix, pa tang koe rhawm tix hu ka veng Yerusaliem khawmuik, tak pon ti hu tau mai maix heue. ¹⁴ Simiang mai cao tawx krax keud nawh khankix aliah kaux hoik ploi maix hu, sonsang chawk cheng ka grawng haktiex Yudax mai veng Yerusaliem, tau mai gumlox tat jhawm prawng Siyiex maix pa koe ka daux tawm taix maix khankix, ¹⁵ mai baox teei maix viex mau khri an khankix, pa koe rhawm simiang mai cao pa tawx krax keud nawh khankix tix tan ka Siyiex ceu pui Isarelax, pa ot ka daux veng Yerusaliem, ¹⁶ tau mai mau mai khri pa pon maix khaing baoh haktiex Babulon khankix mai khawm krax tan pa koe rhawm pui mai cao giex kaing li khankix tix tan, ka son nyiex cao kix ka daux veng Yerusaliem; ¹⁷ mawh kheu nan yam in maix teei mau in mai nied teei ti tawx mawie mhaing, yung mhaing mai kawn yung iak khankix tau mai krax tan phawng nghox ca im mai khawm ka pa nyaux khankix mai tan ceu an piang khu dee tan nyiex bwan Siyiex daux veng Yerusaliem heue. ¹⁸ Ka can mau khri pa kawn deuk khankix maix mai puxaik maix khankix mhawm ti yuh ka mawx son pex yuh ceu ankix awm pa koe alo Siyiex pex heue. ¹⁹ Son kraung shiao son kaing jhaw nyiex bwan Siyiex pa hoik ap ka maix, teei maix tawx khankix khawmuik ka plak sivoe Siyiex daux veng Yerusaliem heue. ²⁰ Can ceu pa kawn lo khankix son nyiex bwan Siyiex maix mai pa kawn sang caw maix teei ti tawx khankix, teei ti tawx khaing daux krao sinngao cie simiang heue. ²¹ Aux pa mawh simiang Atazerit tawx lox tix ka cao pa priex sinngao khankix, pa ot ka baoh haktiex toi rawm klawng plak klip singaix khawmuik, tak tawx can ceu pa mhaing cao giex kaing li Ezarax cao tiiem lai pa min ka gumlox tat jhawm prawng Siyiex meung raoma, kieh pex khre tix tawx phai phai, ²² tom hoek mee tix yieh talantan mau mai gaox nghox ca tix yieh kawrax, khawm rawm plix shiiet khankix tix yieh bat mai rawm bee tix yieh bat, khawm kih pa ang lai simin heue. ²³ Can ceu pa hoik tawx Siyiex meung raoma, kieh mawh pa coca ti yuh grum naog mhawm mhawm, son nyiex bwan Siyiex meung raoma heue. Kheu lai sang kieh krax song rhawm hoek piang simiang mai piang meung haktiex simiang khawm doeh kawn simex nawh khankix yuh ka mawx lie? ²⁴ Aux baox krai mai kieh pex tawng ang lai mawh pa khaw daux been sonsang koh tix keen mai mau gawng mai ngawh gha khankix ka cao giex kaing li pui Lewix khankix mai cao pa ah lai rhax, cao pa pau siviex, pa khaw ti yuh kaing son nyiex bwan mai pui cau son nyiex bwan Siyiex heue. ²⁵ Maix pa mawh Ezarax eue, pa hoik tawx Siyiex cuyi pingnya ka maix, maix tak yaog ti deuh cao prawng see mai cao tat see mai cao pa kwang ka baoh haktiex toi rawm klawng plak klip singaix khawmuik, ka can pui pa tawng ka gumlox tat jhawm prawng Siyiex maix mai gau ka can pui pa ang nyang tawng ka ceu ankix heue. ²⁶ Can pui pa ang hawt yuh awm gumlox tat jhawm prawng Siyiex maix mai ka lox tawx simiang khankix, kieh nied tix prawng ca piang nawh, ka daux pa pah yum ang ah, krax pa grheu lih ang ah, krax pa rhim ti teei kraung khankix ang ah, krax pa laung ka daux thawng ang ah heue. ²⁷ Kieh krax pa yaogyaw bwanson Siyiex keeing ex khankix, pa hoik sau ti deuh pa awm in ka daux rhawm simiang sonsang sum nyiex bwan Siyiex pa koe daux veng Yerusaliem mhawm grang, ²⁸ mai hoik pon krax pa caux rhawm ka plak sivoe simiang mai cub cao tawx krax keud nawh khankix mai ka plak sivoe cub cao kaing naing ting khawmuik pa ot greem tawm taix simiang heue. Mawh kheu nan aux hoik koe riang rao, awm hoik koe plawng taix Siyiex piang aux mai aux hoik kraix khrawm cao kaing ting pui Isarelax khankix lih hu tau mai tix heue.

¹ In mawh cub nyiex ma cao kaing khankix mai doeh ru, kix pa hoik lih hu tau mai aux khaing veng Babulon ka baux yam kwang simiang Atazerit, ² khaing daux cub kawn praix Phinehiet khankix mawh Gerashom mai khaing cub kawn praix Itama khankix mawh Danyelax mai khaing cub kawn praix Davit khankix mawh Hatux. ³ Khaing cub kawn praix Shekhanix daux doh doeh Parot khankix mawh Zekharix mai pa rom carang tix tau mai nawh khankix koe simex tix yieh tixphwan kaux. ⁴ Khaing daux cub kawn praix Pahat-mawbax mawh Elihonie kawn simex Zerahiyax mai simex pa rom tix tau mai nawh ra yieh kaux, ⁵ khaing daux cub kawn praix Shekhanix mawh Yahazilax mai simex pa rom tix tau mai nawh loe yieh kaux, ⁶ khaing daux cub kawn praix Adin, mawh Ebiet kawn simex Yawnasan mai simex pa rom tix tau mai nawh mawh tixphwan kaux, ⁷ khaing daux cub kawn praix Elam, mawh Yeshayax kawn simex Athaliyax mai simex pa rom tix tau mai nawh atixgliah kaux, ⁸ khaing daux cub kawn praix Shephatiyax, mawh Zebadiyax kawn simex Mikhalax mai simex pa rom tix tau mai nawh tidaix kaux, ⁹ khaing daux cub kawn praix Yobax, mawh Obadix kawn simex Yehelax mai simex pa rom tix tau mai ra yieh kao daix kaux, ¹⁰ khaing daux kawn praix Shelomit, mawh Yoshiphin mai simex pa rom tix tau mai nawh tix yieh tixgliah kaux, ¹¹ khaing daux cub kawn praix Bebie, mawh Zakharix. Kawn simex Bebie mai smex pa rom tix tau mai nawh tixnga daix kaux, ¹² khaing daux kawn praix Azagat, mawh Yohanan kawn simex Hakatan mai simex pa rom tix tau mai nawh tix yieh kao kaux, ¹³ khaing cub kawn praix ghoik Adonikam, ceu kaux mawh inkix Elipheliet, Yoelax mai Shemayax mai simex pa rom tix tau mai kix tigliah kaux. ¹⁴ Khaing daux kawn praix Bigavie, mawh Utie mai Zabuk mai simex pa rom tix tau mai kix atixgliah kaux. ¹⁵ Yam in aux kraix khrawm kix hoek ka hawt rawm klawng pa lih hu plak veng Ahava mai kix bang tix ot tan loe singaix heue. Aux hoik jhak ka sinax pui mai daux sinax cao giex kaing li khankix mai ang yaox ka cub kawn praix pui Lewix khankix tan heue. ¹⁶ Khaix an aux kok ka cao kaing khankix pa mawh Eliaza, Arelax, Shemayax, Elanatan, Yarip, Elanatan, Natan, Zakharix mai Meshulam mai khawm pui pa koe krax tawng yung khankix pa mawh Yoyarip mai Elanatan hoek ka tix heue. ¹⁷ Aux tawx lox kieh kix hu Ido pa mawh cao kaing ting ka dah dee pa mawh veng Khasiphia mai tawm grawng pa sang caw kix tix krai ka Ido mai puxaik nawh khankix pa mawh pui kham ti yuh kaing son nyiex bwan Siyiex, ka dah dee ot kix ka daux veng Khasiphia, son tak sang viex kix kawncau mau soi an khankix hoek ka yix, son nyiex bwan Siyiex ex heue. ¹⁸ Khaix an ka daux bwanson sibrawm plawng taix Siyiex ka piang ex, kix viex pui tix kaux pa koe krax tawng yung, pa kaoh khaing kawn praix Mahali kawn simex Lewix pa mawh kawn praix ceu pui Isarelax mai pa kok ceu kaux mawh Sheribix tau mai kawn praix nawh khankix mai puxaik kix kao daix kaux, ¹⁹ mai Hashabix tau mai Yeshayax khaing kawn praix Merarix khawm puxaik nawh khankix mai cub kawn praix kix tixnga kaux, ²⁰ ma pui pa kham ti yuh kaing nyiex bwan Siyiex khankix, pa hoik yaog Davit mai cao kaing khankix ti deuh beeh glawm son kaing jhaw ceu pui Lewix khankix ra yieh tixnga kaux, kix khawmuik hoik mawh pa tiiem ti deuh ceu kaux heue. ²¹ Yam an aux krai pao sonsang twah ka pa ih ka hawt baoh rawm klawng Ahava tan, sonsang tiem rhawm ex plak sivoe Siyiex ex, sonsang sawg ex krax pa rahsee khaing ka daux Nawh Cao son ex mai son kawn praix ex khankix mai son kraung khrai sinngao cie ex khawmuik heue. ²² Grawh grawng nawh aux kaig tua ka mhaing tix krax teem ka simiang pa mawh pui naing mai pui naing brung khankix sonsang tiebtie kix ex khaing daux krax daux laux khaing pui koeng, mawh kheu hoik krai ex lox yuh nin ka simiang, "Sibrawm plawng taix Siyiex koe piang ex can pui pa sawg ka pa mhawm Nawh Cao mai krax song rhawm Nawh Cao koe piang pui pa tik vud ka Nawh Cao heue. ²³ Mawh kheu nan ex hoik twah pa ih hoik khyox khaw grawng in ka Siyiex ex mai Nawh cao hoik pawk lox rawg ex bwan heue. ²⁴ Khaix an aux laug ti deuh cao giex kaing li pa ting kao ra kaux, pa mawh Sherebix, Hashubix mai khawm puxaik kix khankix kao kaux, ²⁵ mai hoik ciang tix tawx mau mai khri khawm kraung pa shiao khankix, ka kix pa mawh pa tan son nyiex bwan Siyiex ex, pa hoik tan simiang mai cao pa tawx krax keud nawh khankix khawm cao kaing ting greem nawh khankix mai pui Isarelax khankix pa ot tan khawmuik heue. ²⁶ Pa hoik ciang aux tix tawx ka daux tawm taix kix mawh mau liah yieh tixphwan talantan mai kraung mau khankix tix yieh talantan mai khri khankix tix yieh talantan, ²⁷ pan khri tixnga mu, pa sidu cien mai plah khri tix rheng plah mai kawk nyaux ra mu pa yuh tix ka tawng pa mhawm plang mai pa kied koe ngawh koe jum awm khri khankix heue. ²⁸ Aux ah nin ka kix, "Pex mawh pa singax singeh son Siyiex, kraung shiao khankix kawx mawh pa singax singeh mai mau khankix kawx mawh pa tan ka daux pa koe rhawm tix ka son Siyiex keeing pex heue. ²⁹ Yuh satix mai pau tix jhak tom sidah hoik ciang maix tix tawx plak sivoe cao giex kaing li pa ting mai pui Lewix khankix mai cao kaing nyiex ma ceu pui Isarelax khankix, ka daux lawg nyiex bwan Siyiex pa koe ka daux veng Yerusaliem heue." ³⁰ Mawh kheu nan cao giex kaing li mai pui Lewix khankix, hoik rieb ka mau mai khri mai khawm kraung shiao khankix pa hoik ciang tix, sonsang viex ankix hu ka nyiex bwan Siyiex ex ka veng Yerusaliem heue. ³¹ Khaix an ex hoik lih khaing rawm klawng Ahava ka daux khix tix kao ra ngaix, sonsang hu ka veng Yerusaliem heue, sibrawm plawng taix Siyiex ex koe piang ex mai Nawh Cao taoh ex khaing tawm taix pui koeng mai khaing pui jawm khankix hawt krax laux heue. ³² Mawh kheu nan ex hoik hoek ka veng Yerusaliem mai ot tan loe ngaix heue. ³³ Yam hoek ka daux pon ngaix tingaix, mau khri mai kraung shiao can pa hoik viex ex hoek mai tix khankix, hoik ciang ti ka daux nyiex bwan Siyiex ex mai tawx ka taix Meremot kawn simex cao giex kaing li Uriyax mai Eliza kawn simex Phineniet pa ot tau mai nawh tan mai pui Lewix khankix pa mawh Yozabat kawn simex Yawsux mai Nodix kawn simex Binnui khankix hoik koe tau mai kix. ³⁴ Ka daux singaix an, kix simin tix ciang can pa koe ceu mai tiiem ti deuh ka daux carang khawmuik heue. ³⁵ Can pui pa hoik deeh hoek khaing hoik giex laung tix khankix, hoik tan krax tan pa gleeing tix khankix ka Siyiex ceu pui Isarelax, ka mawie mhaing kao ra mu, son ceu pui Isarelax khawmuik mai yung mhaing tixdim liah mu mai kawn yung iak atixgliah aliah mu mai khawm pex mhaing khankix kao ra mu, son krax tan pa pluat ploi phimap, in khawmuik mawh krax tan pa gleeing son Siyiex heue. ³⁶ Kix ap lox tawm simiang ka pui tang tokaux simiang mai ka cao pa kwang haktiex khankix ka baoh haktiex toi rawm klawng plak klip singaix khankix heue. Mawh kheu nan kix hoik tawx krax teem ka pui khankix mai ka nyiex bwan Siyiex heue.

¹ Khaix hoik grawng ceu inkix, cub cao kaing khankix hoek ka aux ah nin, "Pui Isarelax khankix mai cao giex kaing li mai pui Lewix khankix ang nyang pon tang tiah khaing pui haktiex baoh an khankix, tau mai krax pa seeing brai ceu pui Khannan, ceu pui Hitix, ceu pui Perazix, ceu pui Yebutix, ceu pui Amawnix, ceu pui Mawbax, ceu pui Ejiptux mai ceu pui Amawrix khankix heue. ² Mawh kheu kix hoik teei ti moeng kawn bun kix tiblah son tokaux tix mai son kawn simex tix khankix, sonsang lai laig kix simie pa singax singeh tix tau mai pui pa ot ka daux haktiex an khankix heue. Taix cao kaing mai cao kwang haktiex khankix hoik grux yuh pa lud in heue. ³ Mawh kheu nan yam mhong aux grawng ceu in, aux riah kraung ceep tix mai sibex lang jung tix mai aux reeig hauk kaing hauk bheup tix khankix tiblah mai ngawm ka daux pa daox deng tix heue. ⁴ Khaix an pui ku kaux pa sikua ka gumlox Siyiex ceu pui Isarelax, hoik deeh kraix khrawm tix hoek ka aux, kheu pa lud yuh pui ankix pa hoik veeh tix hu mawh pa giex laung mai ngawm ka daux pa daox deng tix tom hoek bawg yam appong tix krax tan plak bo heue. ⁵ Yam hoek bawg yam pa appong krax tan plak bo, aux yaog ti kaoh khaing pa twah tix pa ih mai kraung hoik griah tix khawm sibex lang jung tix, aux grux ngawng tix mai yaog taix tix ka Siyiex aux, ⁶ ah nin, "Siyiex aux eue, aux kied kaig mai laux min plakngai ang lai pon yaog ngai baoh tix ka Maix Siyiex aux heue. Mawh kheu pa lud yuh yix, hoik kheem piang kaing cao yix mai phimap yix hoik cux ka daux raoma heue. ⁷ Jah baux singaix ju keeing ex khankix tom hoek ka daux in singaix, ex hoik kied koe pa lud, mawh kheu phimap ex, simiang ex khankix, khawm cao giex kaing li ex khankix, mawh pa hoik ap tix ka daux taix simiang haktiex tang dah khankix, krax pa yum krax pa giex laung, krax pa tud rhim mai pa laux min plakngai, awm pa koe ceu inkix daux singaix heue. ⁸ Yam in daux tivud ticu, bwanson sibrawm Siyiex hoik jhi tix ka ex kawn kieh ex deuk mai glawd tiblah mai hoik tawk ex awm jim kaux cong dee pa singax singeh Nawh Cao mai Siyiex tak kieh ngai ex riang mai deeh tawx ex pon toek bhawm khaing dee pa kham ex tix mawh siliex heue. ⁹ Mawh kheu ex hoik mawh siliex, viang mawh nan Siyiex ang nyang tik vud ka ex, khaing dee pa kham ex tix mawh siliex, mawh kheu nan Nawh Cao kawn kieh ex pon krax pa caux rhawm ka plak sivoe ngai simiang haktiex Pasha sonsang deeh kieh ex im ju mai deeh sum ka nyiex bwan Siyiex ex mai sonsang deeh cox ex ka dee pa laux khankix, sonsang tawx guh veng dee peung ex daux haktiex Yudax veng Yerusaliem heue. ¹⁰ Yam in Siyiex eue, yix kawn koe ceu pa ah khaix in lie? mawh kheu yix hoik tik vud ka gumlox ping nyap Maix khankix, ¹¹ pa hoik tawm Maix Cao ka kawncau cao jhai Maix khankix, pa ah nin, haktiex pa sang hu laig maix teei ti cie mawh haktiex pa seeing brai, kheu pa seeing brai pui haktiex an khankix, jah ka daog haktiex plak in tom hoek ka daog haktiex plak an hoik naog ka pa seeing brai kix heue. ¹² Mawh kheu nan paw doh tawx kawn bun pex khankix mawh moeng kawn simex kix mai paw doh teei kawn bun kix mawh moeng kawn simex pex mai paw doh sawg krax pa nhim kix mai krax pa magmi kix, sonsang pon pex pa koe riang rao mai sonsang pon yaox pex tix ih ceu pa mhawm khaing haktiex in mai prah ankix, mawh sinngao ka son kawn praix pex khankix leeing ju awx. ¹³ Mawh kheu kaing pa caox caig mai pa lud ting yuh ex, ex tom yaox ti kham geu yuh nin, viang Siyiex ciyang ka ex kawx, kawn lheu iak khaing phimap pa caw ex tix kham geu mai hoik tawx ex pon krax pa taoh awm in, ¹⁴ ex kawn sang deeh baox lud ka gumlox pingnyap Maix Cao khankix mai teei mex teei moeng tau mai pui pa seeing brai inkix yuh ka mawx lie? Mawh ang Maix Cao song rhawm ka yix tom hoik yuh Maix Cao yix laux leeing, son ang pui pa kawn deuk lai koe pa kawn glawd lai koe tix kaux kawx lie? ¹⁵ Siyiex Isarelax eue, Maix Cao mawh pa rahsee, yix pa mawh pui pa kawn deuk tom yaox tix glawd tom hoek ka daux in ngaix, yix ot ka plak sivoe ngai Maix Cao tin, tau mai pa koe phimap tix, mawh kheu nan ang koe pui pa pon cung tix ot ka plak sivoe ngai Maix Cao kheu jao in heue."

¹ Glang yam kawn rawg Ezarax bwan mai glang yam kawn khyox khaw nawh mai yiiem khawm roik rawm ngai tix, gup tix ka plak sivoe ngai nyiex bwan Siyiex, cub pui hun khaing ceu pui Isarelax pa mawh simex, bun mai kawn nyawm khankix, kraix khrawm paox tix hoek ka nawh mai yiiem khawm tug rhawm tix sigrien sigre heue. ² Shekhanix kawn simex Yeshelax pa kaoh khaing daux cub kawn praix Elam khankix tix kaux mai ah nin ka Ezarax, "Ex hoik lud ka Siyiex ex mai hoik teei ti moeng pui tang ceu khaing daux pui haktiex an khankix, viang grawng in koe yuh nin kawx krax keud pot jun pot kawn koe ka daux ceu pui Isarelax heue. ³ Mawh kheu nan kieh ex yuh sijax mukheu tau mai Siyiex ex yam in, sonsang pon tik ex cub bun inkix khawmuik mai kawn praix pa keh khaing kix, awm krax keud pa hoik tawx cao simiang ex mai khawm can pui pa hoik lhat hoik graung ka gumlox pingnyap Siyiex ex khankix mai yuh ankix awm pa koe lox tat jhawm prawng heue. ⁴ "Kaoh heue, in mawh grawng beeh glawm maix heue, yix tak ot tau mai maix. Kieh koe pa kwa rhawm kwa mai yuh tix an heue." ⁵ Khaix an Ezarax yaog ti kaoh mai kieh cao kaing cao giex kaing li mai pui Lewix khankix mai pui Isarelax khankix, tiextu sonsang hawt yuh kix awm gumlox in heue. Mawh kheu nan kix hoik tiextu ka heue. ⁶ Khaix an Ezarax yaog ti kaoh khaing plak sivoe nyiex bwan Siyiex mai hu laig ka daux lawg Yehohanan kawn simex Eliaship, mai yam hoek nawh tan, nawh ang ih blah mai ang nyaux rawm, mawh kheu nawh hoik ngia mai khi rhawm kheu jao son phimap pui pa kaoh khaing pa giex laung heue. ⁷ Kix tawx lox hu ka daux haktiex Yudax mai veng Yerusaliem son doeh ru pa deeh giex hoek khaing pa giex laung khawmuik, sonsang kraix khrawm kix hoek ka daux veng Yerusaliem, ⁸ mai can pui pa ang hoek ka daux loe singaix, awm lox pa hoik tat cao kaing mai kuad song khankix mai rhim kraung khrai sinngao nawh khawmuik mai gwieh tokaux nawh lih khaing cub pui hun pa hoik kaoh khaing pa giex laung tix heue. ⁹ Mawh kheu nan cub simex ceu pui Yudax mai Binyamin khawmuik, khrawm paox tix ka veng Yerusaliem daux loe singaix heue. Ngaix an mawh khix dim tixnga ngaix, mai pui khawmuik ngawm tix ot ka daux bing pak sivoe nyiex bwan Siyiex, tau mai sikua lhat tix kheu jao grawng in mai kheu kied ting lhiex heue. ¹⁰ Khaix an cao giex kiang li kaoh cung mai ah nin ka kix, "Pex hoik koe krax lud kheu hoik teei ti moeng bun pui tang ceu mai pex hoik nie thie phimap piang ceu pui Isarelax khankix heue. ¹¹ "Mawh kheu nan khyox khaw ka Siyiex keeing pex yam in mai yuh awm lox Nawh Cao, mai gwieh tokaux pex khaing pui haktiex an mai khaing moeng pui tang ceu khankix heue." ¹² Khaix an cub pui hun khawmuik, deeh pawk lox pa kied ting ah nin, "Mawh heue, ex tak sang yuh awm lox hoik tat maix heue. ¹³ Viang mawh nan pui kawn koe tom nie, mai kawn mawh bawg yam ting lih lhiex mai ex ang nyang pon hu cung plak praix heue. In ang tie mawh pa chix hoik daux tix ngaix ra ngaix, mawh kheu jao kawn kied nie koe pa lud ex ka grawh grawng in heue. ¹⁴ Yuh bwanson kieh cao kaing khaing daux cub pui hun ex khawmuik ot tan, mai kieh pui pa ot ka daux veng ex, pa teei ti moeng pui tang ceu khankix hoek bleeh ka daux bawg yam pa hoik tat ti deuh, tau mai kuad song khankix khaing daux veng cao kix, tom hoek bawg yam hoik luan pa kied kin song rhawm Siyiex ex khaing ex ka son grawng in heue." ¹⁵ Mawh ngie Yawnasan kawn simex Asahelax mai Yahaziyax kawn simex Tikavax pa kieh pa thiang ka grawng in mai Meshulam mai Shabethie pa mawh pui Lewix khankix pa hoik joh jhan ka kix heue. ¹⁶ Khaix an cub doeh ru pui pa giex laung khankix hawt yuh awm an heue. Cao giex kaing li Ezarax tau mai cao kaing doeh nyiex ma keeing nawh khankix, hoik mawh pa tang gwieh nawh ti deuhawm pa koe doeh nyiex ma keeing nawh khankix, ka daux ceu kaux kix ku kaux mai kix ngawm cied ti yaox grawng an khix kao tix ngaix heue. ¹⁷ Yam hoek khix tix, tix ngaix kix hoik cied ka pui, pa hoik teei ti moeng bun pui tang ceu khankix heue. ¹⁸ Ka daux sinax cub kawn praix cao giex kaing li khankix pa hoik teei ti moeng bun pui tang ceu khankix hoik yaox awm in plak greem, khaing daux cub kawn praix Yawsux kawn simex Yozadak mai pux nawh pa mawh Maseyax, Eliaza, Yarip mai Gedaliyax khankix heue. ¹⁹ Kix hoik kham sijax mukheu son tak sang tik kix moeng tix khankix mai pa hoik lud tix, kix teei ti tan yung tix mu khaing daux cub yung son phimap pa hoik lud kix heue. ²⁰ Khaing daux cub kawn praix Imerax, pa mawh Hananix mai Zebadix, ²¹ khaing daux cub kawn praix Harim, pa mawh Meseyax, Eliyax, Shemayax, Yehelax mai Uziyax khankix, ²² khaing daux cub kawn praix Pashurax, pa mawh Elionie, Maseyax, Ishamelax, Natanelax, Yozabat mai Elasa khankix heue. ²³ Khaing daux cub pui Lewix, tom mawh Yozabat, Shimi, Kelayax, pa mawh Kelata, Petahiyax, Yudax mai Eliaza khankix heue. ²⁴ Khaing daux cub cao pa ah lai rhax, tom mawh Eliaship, khaing daux cao pa pau siviex, tom mawh Shalum, Teliem mai Urix khankix heue. ²⁵ Pui tang kaux ceu pui Isarelax, pa kaoh khaing kawn praix Parot pa mawh Ramix, Yezix, Malakhix, Miyamin, Eliza, Malakhiyax mai Benayax khankix, ²⁶ khaing daux cub kawn praix Elam, tom mawh Matania, Zakharix, Yehelax, Abadix, Yeramot mai Elia khankix, ²⁷ khaing daux cub kawn praix Zadux, tom mawh Elionie, Eliaship, Matania, Yeramot, Zabat mai Azizax khankix, ²⁸ khaing daux cub kawn praix Bebie, tom mawh Yehohanan, Hananiyax, Zabie mai Atalie khankix, ²⁹ khaing daux cub kawn praix Banix, tom mawh Meshulam, Maluk, Adayax, Yashup, Shelax mai Ramot khankix, ³⁰ khaing daux kawn praix Pahat-mawbax, tom mawh Adanax, Khelelax, Benayax, Maseyax, Matania, Bezalelax, Binnui mai Manashe khankix, ³¹ khaing daux cub kawn Harim, tom mawh Eliaza, Ishiyax, Malakhiyax, Shemayax, Simeon, ³² Binyamin, Maluk mai Shemariyax khankix, ³³ khaing daux cub kawn praix Hashum, tom mawh Matenie, Matata, Zabat, Eliphaliet, Yeramie, Manashe mai Shimix khankix, ³⁴ khaing daux cub kawn praix Banix, tom mawh Madie, Amaram, Uelax, ³⁵ Beneyax, Bedeyax, Kheluk, ³⁶ Vanix, Meramot, Eliaship, ³⁷ Matania, Matenie, Yasaw, ³⁸ Banix, Binnui, Shimix, ³⁹ Shelemix, Nasan, Adayax, ⁴⁰ Makhanadebie, Shashie, Sharie, ⁴¹ Azarelax, Shelamix, Shemarix, ⁴² Shalum, Amarix mai Yosiep khankix, ⁴³ khaing daux cub kawn praix Nebo, tom mawh Yeyelax, Matithix, Zabat, Zebinax, Yadie, Yolax mai Benayax khankix heue. ⁴⁴ Inkix mawh can pui pa hoik teei ti moeng bun pui tang ceu khankix mai khaing daux cub kix tiblah, hoik koe kawn simex kawn bun tau mai moeng tix khankix heue.