Ezekiel

Ezekiel

¹ Yam hoek ka daux tixngoe num tix num, daux khix pon, phwan ngaix, yam ot aux tau mai pui pa giex laung khankix, hawt rawm klawng Kehebax, raoma baoh mai aux hoik yaox ka riang susai Siyiex heue. ² Yam haok khix phwan ngaix, ka daux phwan num tix num yam kawn ot simiang Yehoyakhim ka daux pa giex laung, ³ gumlox Siyiex hoek ka cao giex kaing li kawn simex Buzix, ka daux haktiex pui Kaladie hawt rawm klawng Khebax mai plawng taix Siyiex koe ka piang nawh tan heue. ⁴ Khaix an yam jhak aux ka an mai aux yaox hoek bhaung ting khaing plak lhaong mai paiawm pa kied ting tau mai pa toh riang hawt vung viang an mai klia ngu pa rup ang jud ang jai, ka daux sigreung ngu an awm grang siang simaox lheung pa lih khaing heue. ⁵ Khaing ka daux sigreung ngu an, pa awm totiag pa im ju lih khaing heue. Grang pakpeung totiag ankix hoik awm pakpeung pui heue. ⁶ Kix ku kaux koe pakngai pon plak mai koe pruik pon mu heue. ⁷ Caong kix hoik rah mai tiag caong kix awm tiag caong kawn mawie, an khankix hoik plang awm grang tawng lheung pa hoik thui ti plang heue. ⁸ Greem pruik kix ka piang pruik kix pon plak, hoik koe taix kawn pui ka mai kix khawm pon kaux hoik koe pakngai mai pruik khankix heue. ⁹ Pruik kix hoik teeh ka paox tix, tix mu hoik tix mu, totiag an khankix hu sivoe rahsee mai ang lai gi plak khaix tix yam hu kix heue. ¹⁰ Pakngai kix ku mu hoik awm pakngai kawn pui mai pakngai kix khawm pon kaux, plak khawn dawm hoik koe pakngai grang sivai sangsi mai pakngai kix khawm pon kaux, plak khawn gwiex koe pakngai grang mawie mai kix khawm pon kaux hoik koe pakngai grang klang heue. ¹¹ Pakngai kix mawh pa awm in, pruik kix hoik neh ti haok plak piang mai pruik an ra mu hoik teeh ka paox tix, tix mu hoik tix mu mai pruik an ra mu hoik kheem ka tokaux cao kix heue. ¹² Kix ku kaux hoik hu sivoe rahsee, kix hoik hu awm pa koe rhawm rhi khwan kix ti sang hu dee mawx ang ah mai kix ang lai gi ka plak khaix tix yam hu kix heue. ¹³ Grang pakpeung totiag pa im ju an khankix, awm grang gaox ngu rup pa jhan riang awm ngu di heue. Taox ngu an hoik tah hu hawt vung viang sinax totiag an khankix mai pa riang ngu an hoik jhan riang tix lih khaing daux ngu an awm pluk plak praix heue. ¹⁴ Totiag im ju an khankix to hu mai deeh hoek awm pluk plak praix heue. ¹⁵ Yam jhak aux ti yaox ka totiag pa im ju an khankix, jhak heue, jaong ling lawx koe ka piang haktiex hawt praok totiag im ju an khankix ku mu, ka plakngai nawh khawm pon plak heue. ¹⁶ Grang pakpeung jaong ling lawx an khankix, awm grang siang simaox pa toh riang kuceu mai khawm pon mu an hoik koe awm paox tix heue. Pak peung pa yuh kix hoik awm koe jaong ling lawx an tix mu khaing mai hoik plaik tix laig ka daux sigreung jaong ling lawx an tix mu heue. ¹⁷ Yam hu kix, kix hu see tau mai paox tix khawm pon plak tidum neh khawmuik heue. Yam hu kix kawx kix ang lai gi ka plak khaix tix yam hu kix heue. ¹⁸ Gawng jaong ling an khankix kied lhaong mai mawh pa koe krax lhat graung kah heue. Gawng jaong ling an hawt vung viang nawh hoik mawh pa naog ka ngai, khawm pon mu heue. ¹⁹ Yam hoik hu totiag im ju an khankix, jaong ling lawx an kawx hawt hu tau praok kix mai yam yaog totiag im ju an khankix khaing ka piang tiex, jaong ling lawx an khankix kawx hawt yaog tix haok tau heue. ²⁰ Can dee sang koe rhawm khwan tix sang hu mai jaong ling lawx an khankix hoik yaog ti hu tidum neh tau mai kix heue. Grawh grawng nawh, khwan totiag im ju khankix hoik koe ka daux jaong ling lawx an khankix heue. ²¹ Yan hu totiag an khankix, jaong ling lawx an kawx hu heue. Yam cung totiag an khankix, jaong ling lawx an kawx cung mai yam yaog totiag tix haok khaing haktiex, jaong ling lawx an khankix kawx, hoik haok tau mai kix tidum neh, grawh grawng nawh, khwan totiag im ju an khankix hoik koe ka daux jaong ling lawx an khankix heue. ²² Ka piang kaing totiag im ju an khankix, awm braux raoma mai awm grang simaox paing pa koe ceu pa lhat graung, pa hoik neh ti lih ka piang kaing kix heue. ²³ Greem braux an kix hoik neh pruik tix lih see see, ka an tix mu heue. Totiag an khankix koe pruik ra mu, pa kheem tokaux kix ku mu heue. ²⁴ Yam hu kix, aux mhong lox sinum pruik kix mai awm lox sinum rawm khankix tom nie, pa siaox awm lox cao pa ting sibrawm, pa awm lox sinum cub kru naing mai yam cung kix, kix ploi pruik tix lih heue. ²⁵ Yam cung kix mai ploi ka pruik tix lih, lox lih khaing braux raoma ka piang kaing kix heue. ²⁶ Ka piang braux raoma ka piang kaing kix, hoik lih koe pa awm dang ngeung tix mu mai grang pakpeung an, awm siang simaox raoh mai ka piang dang ngeung an, hoik lih koe pa awm grang pakpeung pui heue. ²⁷ Jah khaing nyoi nawh mai haok plak piang aux yaox grang pakpeung pa koe awm siang simaox lheung, pa toh awm rup ngu khankix hawt vung viang daux nawh khawmuik mai jah khaing nyoi nawh mai lih plak greem aux yaox grang pakpeung pa toh awm rup ngu pa jhan riang ti hawt vung viang nawh khawmuik heue. ²⁸ Grang pakpeung pa jhan riang tix hawt vung viang an khawmuik awm siyawng sijax mukheu ka daux paiawm singaix yam lih lhiex heue. In mawh grang pakpeung pa awm min sibrawm Siyiex heue. Mawh kheu nan, yam yaox aux ka riang susai an, aux hoik gup ngai tix mai aux mhong lox sikah heue.

¹ Nawh Cao ah nin ka aux, "Kawn pui eue, kaoh cung ka caong maix mai Aux tak sang krai ka maix heue." ² Yam sikah Nawh ka aux mai khwan Nawh Cao laig ka daux aux, kieh aux kaoh cung ka caong tix mai aux hoik mhong lox Nawh, pa ah nin ka aux heue. ³ Nawh ah nin ka aux, "Kawn pui eue, Aux sang ploi maix hu ka kawn praix Isarelax khankix, pa mawh ceu pui pa tieh feen ka Aux, kix mai keeing kix pa hoik lud ka piang Aux tom hoek daux singaix in heue. ⁴ Kheu mawh kix kawn praix pa pu ngai mai pa kiien rhawm heue. Aux sang ploi maix hu ka kix mai maix tak ah nin ka kix, Siyiex ah nin heue. ⁵ Viang kix cu nghiet ang ah, thiang ang ah, kheu mawh kix ceu pui pa tieh feen, viang mawh nan, kix tak sang tawng ka dawg koe cao jhai tix kaux ka daux sinax kix heue. ⁶ "Pa mawh kawn pui eue, paw lhat graung ka kix mai paw ring ka lox kix, viang yeem pang kat koe rawp rim maix mai viang maix ot ka sinax tam tim mai paw lhat ka lox kix mai paw daox ka ngai jhak kix, mawh kheu mawh kix cub nyiex ma pa tieh feen heue. ⁷ Maix tak krai gumlox Aux ka kix, viang kix nghiet ang ah, thiang ang ah, kheu jao mawh kix pui pa chix tieh feen heue. ⁸ Viang mawh nan maix pa mawh kawn pui eue, nghiet ka ceu pa krai Aux ka maix. Paw koe rhawm pa tieh feen, awm cub nyiex ma pa tieh feen an khankix, ang ka jheeh maix mai ih ka ceu pa tawx Aux ka maix heue." ⁹ Yam jhak aux, aux yaox ka khawn taix pa nyeu bua lai pa hoek ka aux tix pheen heue. ¹⁰ Khaix an Nawh naih bua lai an ka plak sivoe aux, pa hoik tiiem tix plak praix khawm plak daux, pa mawh grawng pa yiiem doe mai pa yiiem yo mai pa laux rhawm khankix heue.

¹ Lheu khaing an, Nawh ah nin ka aux, "Kawn pui eue, ih ka ceu pa yaox maix mai ih ka bua lai in khaix an lih hu krai ka nyiex ma ceu pui Isarelax heue." ² Mawh kheu nan, aux ang jheeh tix mai Nawh tawx bua lai an kieh aux ih ka heue. ³ Nawh ah nin ka aux, "Kawn pui eue, ih ka bua lai in, pa tawx Aux ka maix mai kieh maix sak vaig ka heue." Mawh kheu nan, aux hoik ih an mai tie ka daux jheeh aux, awm rawm hia heue. ⁴ Nawh ah nin ka aux, "Kawn pui eue, hu ka ceu pui Isarelax mai krai gumlox Aux ka kix heue. ⁵ Grawh grawng nawh Aux ang tie ploi maix hu ka ceu pui pa ang maix meed ang tawng lox kix mai pa kied nu lox sikah heue. Viang mawh nan, Aux ploi ngie maix hu ka nyiex ma ceu pui Isarelax khankix, ⁶ mai ang tie mawh ka pui ang maix meed ang maix tawng ka lox sikah kix mai ka gumlox pa kied nu, pa ang maix tawng ka heue. Phan Aux ploi maix hu tete mai kix tak sang nghiet ka lox krai maix heue." ⁷ "Viang mawh nan, ceu pui Isarelax khankix tak ang nghiet ka lox maix mawh kheu jao ang kix nghiet ka gumlox Aux heue. Mawh kheu ceu pui Isarelax, mawh pa pu ngai mai pa kied kiien rhawm heue. ⁸ "Jhak heue, Aux yuh pakngai maix kiien ka piang pakngai kix mai yuh dong re maix kiien ka piang dong re kix heue. ⁹ Ang Aux joeng kieh dong re maix kiien awm simaox khaing, tak kieh nie lheu kiien khaing siang simaox heue. Paw koe krax lhat graung ka kix mai paw koe pa daox am ka ngai pa jhak kix, mawh kheu mawh kix nyiex ma pa koe krax tieh feen heue." ¹⁰ Lheu khaing an Nawh ah nin ka aux, kawn pui eue, rieb tix nghiet gumlox pa krai Aux ka yhaok tix mai priex ka daux rhawm tix heue. ¹¹ "Hu heue mai maix hu ka pui pa giex laung ka kawn praix ceu pui maix khankix mai krai kix mhong ka lox pa ah Siyiex yuh nin, viang kix nghiet ang ah mai thiang ang ah heue." ¹² Khaix an khwan Nawh Cao yaog aux haok mai aux hoik mhong lox pa ting sinum awm sinum praix, ka plak khaix tix pa ah nin, "Kieh min sibrawm Siyiex koe ka dee pa ot Nawh Cao heue." ¹³ Aux baox mhong lox luah krox teeh preeik totiag pa im ju, ka paox tix, tix mu hoik tix mu mai khawm lox sinum jaong ling lawx pa koe hawt praok kix mai lox ting pa sinum awm sinum praix heue. ¹⁴ Mawh kheu nan, khwan Nawh Cao yaog ka aux mai viex aux hu dee singai mai hawt hu ka daux krax pa song rhawm tix mai ka daux pa hax rhawm tix heue. Viang mawh nan, taix Siyiex pa kied ting riang hoik koe ka piang aux heue. ¹⁵ Khaix an aux hoik hoek ka pui pa giex laung an khankix ka daux yaong Telabibax, pa ot hawt rawm klawng Khebax mai aux hoik ot tan awm pa daox pa aw ka daux sinax kix aliah singaix heue. ¹⁶ Khaix hoik luan aliah singaix, gumlox Siyiex hoek ka aux ah nin, ¹⁷ "Kawn pui eue, Aux hoik kieh maix mawh cao pa pau ka son ceu pui Isarelax, mawh kheu nan, nghiet ka lox satix pa kaoh khaing jheeh Aux mai krai kix mhong, ¹⁸ phan Aux ah nin ka pui caox caig, maix tak yaox yum tete mai phan maix ang tawx satix ka nawh mai ang krai ka pui caox caig sonsang tik kix pa caox caig yuh tix, sonsang taoh ka ju nawh mai pui caox caig an tak yum ka pa lud tix heue. Viang mawh nan, Aux tak mhaing nham nawh khaing taix maix heue. ¹⁹ Viang mawh nan, phan maix hoik tawx satix ka pui pa caox caig an mai phan nawh ang lai deeh veeh khaing pa caox caig yuh tix mai khaing daux krax pa caox caig tix, nawh tak yum ka phimap pa lud yuh tix heue. Viang mawh nan maix hoik pon taoh ka ju khwan tix heue." ²⁰ Khaix an phan pui rahsee tix kaux deeh veeh khaing krax pa rahsee tix mai deeh lud mai phan Aux deuh pa sideeing ka sivoe ngai nawh, nawh tak yum kheu jao ang maix tawx satix ka nawh heue. Nawh tak yum ka phimap cao tix mai can pa rahsee pa hoik sax yuh nawh khankix tak ang lai simawd lai doh keud ka heue. Viang mawh nan, Aux tak mhaing nham nawh khaing taix maix heue. ²¹ "Phan ang mawh nan, phan maix tawx satix ka pui pa rahsee an, son ang pui pa rahsee an, lai yuh phimap mai phan nawh ang lai yuh phimap, nawh tak yaox tix im ju tete, kheu jao nghiet nawh ka lox tawx maix satix maix kawx tak sang deeh pon taoh ka ju khwan tix heue." ²² Khaix an plawng taix Siyiex hoik ot ka piang aux tan mai Nawh ah nin ka aux, "Kaoh mai lih hu ka daux lung mai Aux tak sang krai ka maix yam hoek maix tan heue." ²³ Mawh kheu nan aux yaog ti kaoh mai lih hu ka daux lung mai jhak heue, min pakngai pa hoik sax yaox aux hawt rawm klawng Khebax mai aux gup ngaix tix ka piang tiex heue. ²⁴ Khaix an khwan Nawh Cao hoik laig ka daux aux mai kieh aux cung ka piang caong tix mai krai ka aux ah nin, "Hu heue, deeh ing glaik maix ka nyiex cao tix ha. ²⁵ Maix pa mawh kawn pui eue, kix tak teei maox mai phyawk maix ka, son ang maix lai pon lih hu ka sinax kix heue. ²⁶ Aux tak sang kieh dak maix aw mai kieh kawb ka dao maix, son ang maix lai yaox tix sidiex kix, kheu jao mawh kix nyiex ma pa tieh feen heue. ²⁷ Viang mawh nan, yam sikah Aux ka maix, Aux tak paoh jheeh mai deeh kieh maix chix sikah maix tak ah nin ka kix, "Siyiex ah nin, pui pa nghiet kieh nawh nghiet mai pui pa thiang kieh nawh thiang, mawh kheu mawh kix nyiex ma cub pa tieh deeh feen heue."

¹ "Kawn pui eue maix teei ka lon tiex lon tiex sin tix mu mai deuh ka plak sivoe tix mai tiiem riang pakpeung veng Yerusaliem ka heue." ² Lai lawm ka veng mai sum ka guh veng vung viang veng mai pum tiex hawt vung viang guh veng mai baox yuh tab hawt vung viang veng mai sum rong lag hawt vung viang guh veng khawmuik heue. ³ Khaix an baox teei plah rhiem tix plah ka son maix mai yuh an awm guh veng ka daux sinax maix mai veng heue.Veeh ngai tix ka plak see veng mai kieh an khankix lai lawm ka veng heue. In tak mawh mhai ruk ka son nyiex ma ceu pui Isarelax heue. ⁴ "Khaix an maix deeh it praok paw khawn gwiex tix mai deuh phimap nyiex ma ceu pui Isarelax ka piang an heue. Bawg yam singaix pa it maix rheung miex grheung, awm an maix tak kham geu phimap kix rheung awm bawg yam singaix an heue." ⁵ Grawh grawng nawh, Aux tak kieh baux num krax pa kham geu kix phimap hoek ka piang maix, sidu awm baux singaix an loe yieh tixdim ngaix heue. Awm an maix tak yaox ti kham geu phimap nyiex ma ceu pui Isarelax heue. ⁶ "Yam hoik grum naog yuh maix ka an khankix, baox deeh tieh maix it ka praok paw khawn dawm tix, khaix an maix tak yaox ti kham phimap nyiex ma pui Yudax tixpon ngaix. Aux hoik kieh tix ngaix an sidu awm tix num heue." ⁷ Mawh kheu nan maix tak vai pakngai tix see plak krax lai lawm veng Yerusaliem mai maix nyeu taix tix krai lox jhai ka piang veng heue. ⁸ "Aux tak phyawk maix ka maox, son ang maix pon tieh tix ka plak in plak an, tom hoek bawg yam ang maix nyang bax sidah yuh baux singaix pa lai lawm maix khankix hoik heue." ⁹ "Khaix an baox teei gaox nghox ca, gaox nghox ca lang sidax, ceem, iien, gaox sivawng mai gaox khawx ka son tix mai sau an khankix tau ka daux aw tix mu mai yuh blah ka son maix. Maix tak ih ankix glang singaix it maix ka praok paw tix loe yieh tixdim ngaix heue." ¹⁰ "Tak yaox ti ciang priex ih maix son tix ngaix tixnga shekhe maix tak yaox ti ih awm pa hoik tat ti deuh an heue. ¹¹ Maix tak yaox ti tiag tong ti nyaux rawm son tix ngaix daux tix heng liah son tix son maix tak yaox tix nyaux awm pa hoik tat ti deuh an heue." ¹² "Maix tak yaox ti ih an, awm blah plah gaox nghox ca lang sidax mai tong an sin ka ngu aing pui, ka plak sivoe ngai kix heue." ¹³ Siyiex ah nin, "Awm an kawn praix ceu pui Isarelax tak yaox ti ih blah pa seeing sinax pui tang ceu, ka dee sang grheu Aux kix lih heue. ¹⁴ Mawh kheu nan, aux deeh ah nin, Siyiex eue, aux ang sax yuh tokaux tix seeing brai, jah tom yam iak aux tom hoek ka daux in singaix, aux ang sax ih to pa tang yum mai to yum pa kiied totiag mai ka nex pa seeing kawx, ang sax laig ka daux jheeh aux heue." ¹⁵ Khaix an Nawh Cao ah nin ka aux, "Simi ti yaox, Aux sang tawx aing mawie ka tang aing pui ka maix mai maix tak khre blah pa sang ih tix ka piang ngu aing mawie an heue. ¹⁶ Lheu khaing an Nawh Cao baox ah nin ka aux, "Kawn pui eue, Aux tak sang tat blah pa sang tawx ka son veng Yerusaliem tete, kix tak yaox ti ciang ka blah pa ih tix tau mai krax pa khi rhawm mai tak tiag tong rawm nyaux tix tau mai krax lhat graung tix, ¹⁷ aux tak kieh blah mai rawm cud cha ka son kix mai tak kieh kix koe krax pa daox pa aw tau mai paox tix, tix kaux lai tix kaux mai krawx rhao kheu jao phimap tix heue."

¹ Maix pa mawh kawn pui eue, teei vaig lawm tix plak pa awm gawn khlao pui khlao hauk mai khlao hauk kaing mai khawm hauk bheup maix ka heue. Khaix an teei jiang mai ciang tang gwieh ti deuh nyum mawx nyum an heue. ² "Yam hoik sidah singaix bawg yam pa lai lawm an maix tak gleeing hauk an loe nyum tix nyum daux sigreung veng, khaix an maix baox teei an mai son pa kawn deuk loe nyum tix nyum an maix tak taing prung prang ka daux bhaung Aux tak sang lawd vaig tix plak mai ploi hawt khaix kix heue." ³ Maix baox teei hauk an ceeix ceeix mai phyawk ka toeh kraung ceep maix heue. ⁴ Khaix an baox teei hauk an ceeix ceeix mai taing ka daux sigreung ngu kieh gleeing heue. Grawh grawng nawh ngu an tak lih prung prang ti hu ka daux sinax nyiex ma ceu pui Isarelax khawmuik heue. ⁵ "Siyiex ah nin, in mawh riang pakpeung veng Yerusaliem, Aux hoik deuh veng an ka sinax ceu pui khankix mai sinax meung haktiex, pa koe hawt vung viang nawh khankix heue. ⁶ Veng Yerusaliem tieh feen ka grawng krax prawng ca Aux mai nie lheu yuh ceu pa caox caig khaing ceu pui an khankix mai nie lheu tieh feen ka lox lai beenli pa deuh Aux khaing haktiex pa koe hawt vung viang nawh khawmuik, mawh kheu kix hoik thiang ka grawng krax prawng ca Aux khankix mai ang lai hawt lawng ka lox lai beenli pa deuh Aux heue." ⁷ Mawh kheu nan Siyiex ah nin, "Mawh kheu kied nie lheu ang pex koe krax cu nghiet lheu khaing pui haktiex khankix, pa koe hawt vung viang pex khawmuik mai kheu ang pex cu hawt ka lox lai beenli pa deuh Aux mai ang priex rien ka krax prawng ca Aux mai ca hawt yuh awm krax prawng ca pui haktiex pa koe hawt vung viang pex khawmuik," ⁸ mawh kheu nan, Siyiex ah nin, tokaux cao Aux hoik tieh feen ka pex mai Aux tak sang tawx krax prawng krax ciyang ka sigreung pex, ka plak sivoe ngai ceu pui khankix heue. ⁹ Aux tak sang yuh ceu pa ang Aux sax yuh ka sinax pex mai pa ang Aux lai baox deeh yuh pa awm ceu in tix bawg kawx, kheu jao grawng krax seeing brai pex khawmuik heue. ¹⁰ Mawh kheu nan, keeing khankix tak ih kawn simex tix ka sigreung pex mai kawn simex khankix tak ih ka keeing tix heue. Can pex pa kawn deuk khankix, Aux tak prung prangti tik pex ka bhaung pa hoek khaing ku plak heue. ¹¹ Mawh kheu nan, Siyiex ah nin, "Awm im ju Aux, kheu jao grawng kieh maix dee pa singax singeh Aux seeing ka can ceu pa seeing brai maix khankix, mawh kheu nan, Aux tak sang kieh maix grai grup mai ang lai lhawk ka maix mai ang koe krax caux rhawm ka piang maix heue. ¹² Khaing daux pex loe nyum tix nyum tak yum ka jhawm saux preng mai laux leeing ka krax hot sibhawm ka daux sinax pex, daux loe nyum an tix nyum, tak goh tix yum ka lawm vaig hawt vung viang maix khankix khawmuik mai Aux tak prung prang ti tik an tix nyum ka bhaung pa hoek khaing ku plak mai Aux tak ploi vaig hawt khaix kix heue. ¹³ "Awm an, krax pa song rhawm Aux tak sang mawh pa hoik grum naog mai Aux tak kieh krax pa song rhawm tix hoek ot ka piang kix mai Aux tak sang fah rhawm ka hoik pawk bix tix mai kix tak sang tawng ka mawh Aux Siyiex, pa hoik krai grawng an ka daux pa kied song rhawm tix yam hoik kieh Aux krax pa sang meet rhawm Aux hoek ka piang kix heue. ¹⁴ Lheu khaing an, Aux tak sang kieh maix mawh dee pa yiien yawg pui pa koe lox salao ka daux sinax ceu pui khankix pa ot hawt vung viang maix khankix mai plak sivoe ngai pui pa lailing ti hu hawt baoh an heue. ¹⁵ Mawh kheu nan an tak sang mawh pa salao sibriem pui mai krax pa tang pui phimap mai pa tawx krax gau krax sawn mai pa daox am, ka ceu pui pa hawt ot hawt vung viang maix khankix, yam tawx Aux krax ciyang ka piang pex tau mai krax pa song rhawm tix, ti sang koe lox ne ka pex khankix heue. Aux pa mawh Siyiex hoik krai ah nin heue. ¹⁶ "Yam ploi Aux krax lhat graung te ak pa caox, pa mawx krax sibhawm praix pa sang yuh kix laux leeing hoek ka piang kix mai Sibhawm praix pa ploi Aux hoek tak sang nie baox hun piang pex mai tat ti tik blah pa sang tawx ka pex heue. ¹⁷ Mawh kheu nan, Aux tak ploi pa sibhawm praix mai khawm totiag khankix pa sang yuh laux mai an kix tak rhim ti teei mai yuh pex laux leeing heue. Saux preng mai pa pah yum khankix tak laig ka daux pex mai Aux tak viex lawm vaig hoek ka piang pex, Aux pa mawh Siyiex hoik krai ti deuh awm an heue.

¹ Yam in, gumlox Siyiex hoek ka aux ah nin, ² "Kawn pui eue, veeh pakngai maix ka plak see gawng Isarelax mai ah lox jhai ka piang kix, ³ ah nin, gawng lua haktiex Isarelax khankix eue, nghiet ka gumlox Siyiex, Siyiex ah nin ka gawng lua mai ka ton mai ka rawm klawng mai daux ngawd khankix heue. Tokaux Cao Aux tak sang viex vaig hoek ka pex mai Aux tak sang yuh dee pa lhaong pex khankix laux leeing heue." ⁴ Khaix an khu dee tan pex khankix tak mawh dee yiien hu pui, khu dee tan nyawng bhawng pex khankix kawx tak sang mawh pa raig pot mai Aux tak tik pui pa yum khankix ka plak sivoe riang grang krub pex khankix heue. ⁵ Aux tak sang deuh tokaux yum kawn praix pui Isarelax khankix ka plak sivoe riang grang krub kix mai Aux tak sang prung prang ti tik si-ang pex khankix, hawt vung viang khu dee tan pex heue. ⁶ Ka veng can dee ot pex khawmuik, tak sang mawh pa laux leeing mai dee pa lhaong khankix tak sang mawh dee yiien mai khu dee tan pex khankix tak mawh pa laux leeing mai hoik lih mawh dee pa yiien, riang grang krub pex khankix tak mawh pa graig mai pa hoik kaog heue. Khu dee tan nyawng bhawng pex khankix kawx tak sang yuh laux mai kaing yuh pex khankix kawx, tak sang mawh pa grai grup heue. ⁷ "Pui khankix tak goh yum sinax pex mai pex tak tawng ka mawh Aux Siyiex heue." ⁸ Viang mawh kawx nan, Aux tak sang prah pui pa deuk koe tix cub, sonsang klawd kix khaing lawm vaig ka daux sinax ceu pui khankix, yam hoik prung prang rairuat pex ka daux haktiex khankix ku plak heue. ⁹ "Khaix an khaing ka daux pex, pui pa pon tix klawd khankix, tak deeh doh keud ka Aux ka daux sinax haktiex kudah, kudee hoik mawh kix pui giex pui laung, kheu jaox grawng hoik tik kix Aux, ka krax pa lud vao rhawm rhi kix, pa hoik lih hu khaing Aux, kheu ngai kix, koe rhawm ti lud vao, hawt khaix riang grang krub kix heue. Kix tak seeing yuh tokaux tix ka pa caox caig, pa hoik lud kix ka tix ka pa seeing brai kix khawmuik heue." ¹⁰ "Kix tak tawng mawh Aux Siyiex mai Aux ang krai lox pa giex going, Aux tak kieh krax pa caox caig ceu in hoek ka piang kix heue." ¹¹ Siyiex, ah nin, "Dieh taix maix mai blauh caong tix ah nin, an hoik lih mawh ceu pa kha rhawm, kheu jao krax pa caox caig pa seeing brai yuh nyiex ma ceu pui Isarelax khankix heue. Grawh grawng nawh, kix tak goh ti yum ka lawm vaig, sibhawm praix mai jhawm saux preng heue." ¹² Pui pa ot dee singai, tak yum ka krax jhawm saux preng mai pui pa ot dee dex, tak goh ti yum ka lawm vaig mai pui pa kawn deuk, ot pa dee lai lawm khankix, tak yum ka pa sibhawm praix, Awm an, Aux tak kieh krax pa song rhawm tix grum naog ka piang kix heue. ¹³ Yam koe pui pa yum pex khankix ka daux sinax riang grang krub kix, hawt vung viang khu dee tan kix khawmuik, ka piang gawng lhaong ku gawng mai ka piang choek gawng mai greem khaox klai khankix mai ka greem veei khaox piak van, ka can dee hoik tan kix nyawng bhawng ka riang grang krub kix khawmuik khaix an pex tak tawng ka mawh Aux Siyiex heue. ¹⁴ "Aux tak nyeu taix tix lih ka piang kix mai yuh haktiex dee ot dee koe kix khawmuik, mawh dee pa nie lheu yiien khaing daux tiagtu ka plak see veng Dibalax, khaix an, kix tak tawng ka mawh Aux Siyiex heue."

¹ Khaix an gumlox Siyiex hoik hoek ka aux ah nin, ² "Maix, pa mawh kawn pui eue, Siyiex ah nin ka haktiex ceu pui Isarelax khankix, mawh ceu pa sidah hoik hoek ka piang haktiex khawm pon daog heue." ³ Yam in, dee sidah hoik hoek ka piang maix, Aux tak sang prawng ca ka maix, awm pa hoik yuh maix khankix heue. Aux tak dee viied ka maix son pa seeing brai pa yuh maix khankix heue. ⁴ Ngai Aux tak ang lai lhawk ka maix mai Aux tak ang lai caux rhawm ka maix heue. Viang mawh nan, Aux tak deeh viied ka maix awm krax pa yuh maix mai pa seeing brai maix khankix tak sang koe ka daux sigreung maix heue. Khaix an maix tak tawng ka mawh Aux Siyiex heue. ⁵ Siyiex, ah nin, "Krax pa laux leeing hoik bleeh tix ceu hoik tix ceu, jhak heue, An hoik hoek heue. ⁶ Dui sidah hoik hoek, dee sidah hoik hoek heue. An hoik hoek bleeh awm bah riang praix tix hoek ka son maix, jhak heue, an hoik hoek heue. ⁷ Pex pa ot ka daux haktiex in khankix eue, krax ciyang hoik bleeh ka pex heue. Bawg yam hoik hoek, singaix krax pa kha rhawm an hoik dex mai ang lai mawh pa ah lox gaux rhawm ka piang gawng lua khankix heue. ⁸ Yam in, ang lai rheung Aux tak sang klup krax pa song rhawm tix, grum naog ka piang maix, Aux tak prawng ca ka maix, awm kra pa yuh maix mai Aux tak sang dee viied ka maix son pa seeing brai yuh maix khankix heue. ⁹ Ngai Aux tak ang lai koe pa lhawk mai Aux tak ang lai koe kra caux rhawm, Aux tak sang deeh viied ka maix, awm krax yuh maix mai pa seeing brai maix khankix, tak sang koe sigreung pex heue. Khaix an maix tak tawng ka mawh Aux Siyiex, pa tawx krax ciyang heue. ¹⁰ Jhak heue, singaix an, jhak heue, singaix an hoik hoek heue. Krax ciyang maix hoik hoek, khaox gix pa hoik pruh tai, pa ca nyhau ting rhawm hoik naog hoik kreh heue. ¹¹ Krax pa kin tuktiak tukte hoik yaog ti kaoh, mawh khaox gix pa caox caig tix gawng, kix mai khawm pui hun kix, tak ang lai deuk pie tix kaux mai pui pa sang yiiem doe son kix tak ang lai koe heue. ¹² Bawg yam hoik hoek singaix bawg yam hoik dex. Paw kieh cao pa liag koe krax gaux rhawm mai paw kieh cao pa coh koe krax pa khi pa ngia ka liak. Grawh grawng nawh, krax pa song rhawm Aux koe ka piang cub pui hun khawmuik heue. ¹³ Grawh grawng nawh, cao pa coh viang nawh kawn im ju kawx, tak ang lai deeh ing ka ceu pa hoik coh tix, mawh kheu krax pa plak jhi an mawh pa dex dawd mai pui hun khawmuik tak mawh pa grum naog pui pa im ju ka daux pa caox caig tak ang lai pon kaux cong heue. ¹⁴ "Kix hoik phlu ka teettawng mai pui ku kaux khre rien tix heue. Viang mawh nan, pui tix kaux kawx ang tie cu tix hu daux naing, mawh kheu krax pa song rhawm Aux, koe ka piang cub pui hun khawmuik heue. ¹⁵ Lawm vaig koe plak praix, jhawm saux preng khawm sibhawm praix koe ka plak daux heue. Can pui pa ot ka daux kaung, tak yum ka lawm vaig mai can pui pa koe ka daux veng khankix tak laux leeing ka sibhawm praix mai jhawm saux preng heue. ¹⁶ Pui pa ghrang ti glawd ju mai ot ka piang gawng lua, awm sikaux khankix pa koe daux ngawd daux lung heue. Kix khawmuik hoik ngia ngheeik ka son phimap cao tix heue. ¹⁷ Pui ku kaux tak sang awn riang mai ngawng ku ngawng tak sang mawh pa yawm riang rao awm rawm heue. ¹⁸ Kix tak sang rawd nyoi tix ka chee rhix pa kawm, krax lhat graung tak kheem ka kix, krax kaig tua tak koe ka piang ngai baox kix mai kix tak khlao kaing tix pak khawmuik heue. ¹⁹ Kix tak tik mau tix ka piang krax mai khri cie kix tak awm pa seeing brai heue. Mau kix mai khri kix tak ang lai deeh pon taoh kix, ka daux singaix lih pa song rhawm Siyiex heue. Kix ang pon kieh ju tix koe kra pa fah rhawm mai ang lai pon kieh vaig tu tix sak heue. Mawh kheu an hoik lih mawh phimap pa sang sideeing kix tix ka heue. ²⁰ Kraung khrai pa mhawm grang pa khre kix hoik kieh kix ting min, viang mawh nan, kix hoik yuh riang grang krub ceu pa seeing brai kix mai ceu pa seeing brai khaing ceu an kix heue. Mawx kheu nan, Aux hoik yuh ceu an mawh pa seeing ka son kix heue. ²¹ Aux tak tawx an kix ka daux tawm taix pui tang praix mai ka pui pa caox caig awm kraung pa tud rhim mai kix tak seeing ka an heue. ²² Aux tak sang veeh pakngai khaing kix mai kix tak sang kieh dee pa singax singeh Aux seeing brai heue. Grawh grawng nawh, pui con tak sang laig ka daux an mai yuh dee an seeing brai heue. ²³ Yuh ti deuh maox ceng tix nyaing. Grawh grawng nawh, haktiex hoik naog ka ceu pa lih nham khankix mai veng hoik naog ka ceu pa yuh pa kin kha rhawm heue. ²⁴ Mawh kheu nan, Aux tak sang viex pui pa kied caox khankix hoek mai pui an kix tak sang rhim ka nyiex ma pex mai kieh pui pa ting rhawm rhi mai pui pa ting riang khankix grai mai kieh dee pa singax singeh kix mawh pa seeing brai heue. ²⁵ Krax pa laux leeing hoik hoek heue. Kix tak sawg ti yaox krax pa nhim rhawm, viang mawh nan, kix tak ang lai pon ti yaox ka heue. ²⁶ Krax laux leeing tak hoek ka piang krax laux leeing mai lox satang hoek tix mu hoik tix mu khaix an, kix sawg ti yaox grawng pa plak jhi khaing cao jhai kawx, viang mawh nan, gumlox hoik grai hu khaing cao giex kaing li mai krax grawng pa tawx krax keud krax sawn, tak grai hu khaing kuad song khankix heue. ²⁷ Simiang khankix tak ngia ngheeik mai Simiang greem nawh khankix tak ceep ka kraung pa laux rhawm mai taix pui meung khankix tak siyaung heue. Aux tak yuh ka kix, awm kaing pa yux kix mai awm ceu pa hoik prawng ca kix, Aux tak sang deeh ka piang kix heue. Khaix an kix tak tawng ka mawh Aux Siyiex heue.

¹ Yam hoek ka daux liah num, ka daux khix liah, daux phwan singaix, aux ngawm ka daux nyiex caox tix tau mai kuad song pui Yudax khankix, pa ngawm plak sivoe aux, khawn taix Siyiex, hoik hoek ka piang aux tan heue. ² Khaix an aux jhak mai yaox pa lih awm grang pakpeung ngu, jah khaing nyoi Nawh lih plak greem hoik awm pa riang ngu mai jah khaing ka nyoi Nawh haok plak piang hoik awm jhan riang awm grang siang simaox pa lheung heue. ³ Nawh nyeu grang pakpeung khawn taix tix lih mai jhawp ka kaux hauk kaing aux tix jhawp mai khwan Nawh Cao yaog aux haok ka daux sinax haktiex mai raoma mai viex aux laig ka daux pa kieh yaox riang susai daux veng Yerusaliem, ka dee laig daux siviex plak laong ka daux lawg plak daux dee deuh kix riang grang krub, pa so krax pa song rhawm heue. ⁴ Jhak heue, min sibrawm Siyiex ceu pui Isarelax hoik lih tan, awm riang pa hoik sax yaox aux ka daux lung Khebax heue. ⁵ Nawh hoik ah nin ka aux, "Kawn pui eue, yaog ngai maix maong ti jhak ka see plak laong, "mawh kheu nan aux yaog ngai tix maong ti jhak ka plak laong, ka daux diang siviex plak laong khu dee tan an, aux yaox koe riang grang pa kieh song rhawm ka diang siviex an heue." ⁶ Khaix an Nawh ah nin ka aux, kawn pui eue, Mawh yaox maix ka ceu pa seeing brai pa kied ting lud pa lud yuh nyiex ma ceu pui Isarelax tin sonsang kiex kix Aux luan khaing dee pa singax singeh Aux lie? Yam in baox veeh maix hu maix tak yaox krax pa nie lheu ting seeing pa brai khankix heue. ⁷ Mawh kheu nan, Nawh hoik viex aux hu ka daux guh ding siviex mai yam hoik jhak aux ti yaox guh ding an hoik koe daux doh ka an heue. ⁸ Khaix an Nawh ah nin ka aux, "Kawn pui eue, kaong ka daux guh ding an mai yam hoik kaong aux ka guh ding an, aux yaox ka daux siviex tix mu heue." ⁹ Nawh hoik ah nin ka aux, "Laig plak daux mai jhak ti yaox pa caox caig pa seeing brai pa yuh kix tan heue. " ¹⁰ Mawh kheu nan, aux laig ka plak daux mai yaox ka ceu pa chix mu tix hu kuceu, pa mawh totiag pa seeing brai khankix mai riang grang krub ceu pui Isarelax khankix, pa hoik tiiem ti deuh pakpeung riang grang hawt vung viang guh ding an khankix khawmuik heue. ¹¹ Pa mawh kuad song daux nyiex ma ceu pui Isarelax khankix atixgliah kaux, hoik cung ka plak sivoe kix tan mai Yazanix, pa mawh kawn simex Shaphan hoik cung sigreung kix tan heue. Pui Kukaux hoik tang giex paung ting ka daux taix tix mai gleeing ka nyawng bhawng taox ngu khankix hoik ceep ti haok ka plak piang heue. ¹² Khaix an Nawh hoik ah nin ka aux, "Kawn pui eue, mawh hoik yaox ka ceu pa yuh kuad song nyiex ma ceu pui Isarelax an khankix ka daux pa faik, ka daux lawg koe riang grang krub cao tix khankix lie? Mawh kheu kix ah nin, Siyiex ang yaox ex, Siyiex hoik tik hoik vud ka haktiex heue." ¹³ Nawh ah nin ka aux, "Baox veeh tix hu mai maix tak yaox ka ceu pa nie lheu ting seeing pa brai khankix ka pa yuh kix heue." ¹⁴ Mawh kheu nan, Nawh viex aux hoek ka daux siviex, nyiex bwan Siyiex pa koe plak laong mai ka dee an bun khankix ngawm mai yiiem son phi Tamuza heue. ¹⁵ Khaix an Nawh ah nin ka aux, kawn pui eue, "Mawh yaox maix ceu in lie?" Baox veeh tix hu maix tak yaox ceu pa nie lheu seeing brai khaing inkix heue. ¹⁶ Mawh kheu nan, Nawh viex aux laig ka plak daux guh ding nyiex bwan Siyiex, daux diang siviex nyiex bwan Siyiex, ka brawk nyiex bwan sinax ka dee koe khu dee tan, koe pui tixnga phwan kaux, pa vai blawg tix ka plak nyiex bwan Siyiex mai veeh ngai tix ka plak lih singaix mai krub ka singaix, ka plak lih singaix heue. ¹⁷ Khaix an Nawh ah nin ka aux, "Kawn pui eue, mawh hoik yaox maix lie? Grawng ceu pa seeing brai pa lud pa yuh nyiex ma ceu pui Yudax khankix tin, keud maix nawh mawh pa chaong lie? Kix hoik kieh haktiex naog ka ceu pa kin mai kix so krax pa song rhawm aux lih heue. Kix hoik giex ti deuh kak khaox ka dex gawng meeh tix heue. ¹⁸ Mawh kheu nan, Aux tak sang baox kieh krax pa song rhawm tix lih, ngai Aux ang lai lhawk mai ang lai koe krax caux rhawm, viang kix riag yo lox ting hoek ka daux yhaok Aux kawx, Aux tak ang lai nghiet ka lox kix heue."

¹ Khaix an Nawh Cao hoik kok yo lox ting sinum hoek ka yhaok aux ah nin, "Kieh pui pa sang tuktiak pa sang yuh veng in laux, pex giex kraung naing ka taix tix hoek dex heue. ² Pui liah kaux, hoek bleeh sijaox khaing siviex plak piang, pa veeh tix plak laong mai kix ku kaux hoik giex ka kraung naing pa sang yuh laux, ka daux pui tix kaux daux kix ceep kraung man rhi mai koe kraung pa tiiem lai tix mu hawt praok nawh, kix hoik laig ka daux mai hoik cung ka praok khu dee tan pa yuh ka tawng lheung heue. ³ Yam in, min plakngai Siyiex ceu pui Isarelax hoik haok luan khaing dee deuh riang Cherubin ka dee hoik dawg koe nawh mai hoik hoek ka piang pang siviex nyiex bwan heue. Nawh kok ka pui pa hoik ceep ka kraung man rhi an pa koe gawng pa tiiem lai hawt praok nawh, ⁴ mai Siyiex ah nin ka nawh, "Hu laig ka daux sigreung veng Yerusaliem mai tawk cum ka piang dong re kix, pa ngia ngheeik mai pa hoik yuh tix ka daux veng heue." ⁵ Nawh Cao hoik ah nin, "Ka daux pa mhong aux, ka pui tang kaux khankix hawt khaix nawh ka daux veng mai pah kix yum, paw lai lhawk mai paw lai caux rhawm ka tix kaux kawx heue." ⁶ "Pah yum ka pui pa riex ju mai pui awn ju, kawn bun krih sinaw khankix mai kawn nyawm iak khankix mai bun khankix pak lawg heue. Viang mawh kawx nan, paw greed tix dex paw chuh pa hoik koe mhai ka piang dong re mai jah ka dee pa singax singeh Aux heue. Mawh kheu nan, kix jah ti pah ka kuad riex ju pa ot ka plak sivoe nyiex bwan khankix yum heue. ⁷ Khaix an Nawh Cao hoik ah nin ka kix, "Yuh nyiex bwan seeing mai kieh brawk naog ka pa yum mai lih hu heue." Kix hoik lih hu ti pah pui yum ka daux veng heue. ⁸ Yam kawn pah kix pui yum, prah aux ot nong nong mai aux gup pakngai tix piang tiex mai riag yo lox tix ah nin, Siyiex eue, Mawh sang yuh Maix Cao ceu pui Isarelax pa kawn deuk khankix laux leeing ka daux krax pa hoik klup Maix Cao krax pa song rhawm tix ka piang veng Yerusaliem lie." ⁹ Khaix an Nawh Cao ah nin ka aux, "Phimap phighram nyiex ma ceu pui Isarelax mai ceu pui Yudax khankix, mawh pa kied ting lhaong mai haktiex hoik mawh pa naog ka nham mai veng hoik naog ka pa ang lai kaux sijax mai kix ah nin, Siyiex hoik tik vud ka haktiex mai Siyiex ang lai jhak ka heue." ¹⁰ "Phan mawh ka son Aux, ngai Aux tak ang lai lhawk ka, Aux ang lai koe krax caux rhawm ka heue. Viang mawh kawx nan, Aux deeh viied kaing pa yuh kix hoek ka piang kaing kix heue." ¹¹ Khaix an pui pa ceep kraung man rhi an, pa hoik koe gawng tiiem hawt praok nawh, deeh krai grawh grawng an khankix ah nin, "Aux hoik yuh awm gumlox pa hoik tawm Maix Cao ka aux heue."

¹ Aux jhak ti yaox ka plak raoma, pa koe ka piang kaing Cherubin tan, pa awm lon siang simaox tix mu, pa koe grang pakpeung awm dang ngeung pa sidawng ti yaox ka daux an heue. ² Nawh Cao krai ka pui pa ceep kraung man rhi an ah nin, "Hu laig daux sinax jaong ling pa koe greem Cherubin mai dawm gaox ngu naog ka daux taix maix mai rhuat ka piang veng heue." Nawh hu laig ka dee an, ka plak sivoe ngai aux heue. ³ Yam an Cherubin, kawn cung ka plak seh nyiex bwan, yam hu laig pui an ka plak daux mai paiawm hoik naog ka daux nyiex bwan heue. ⁴ Khaix an min plakngai Siyiex haok khaing Cherubin mai hoik tiang ka piang kaing pang siviex nyiex bwan mai nyiex bwan hoik naog ka pa ceep paiawm mai ka brawk an, hoik naog ka pa jhan riang min plakngai Siyiex heue. ⁵ Lox luah pruik Cherubin khankix hoik mhong tix tom hoek ka plak praix awm luah lox yam sikah Siyiex pa ting sibrawm heue. ⁶ Yam tawm Nawh Cao lox tix ka pui pa ceep kraung man rhi an ah nin, "Teei ngu khaing sinax jaong ling an khankix mai khaing sinax Cherubin heue." Pui an laig ka plak daux mai cung hawt praok jaong ling ankix heue. ⁷ Cherubin an tix kaux nyeu taix tix lih khaing daux sinax cub Cherubin an khankix, ka ngu pa koe ka daux sinax kix mai teei ngu an tiblah tawx ka daux taix pui pa ceep kraung man rhi an, nawh rieb ti teei mai lih hu heue. ⁸ Cherubin an koe grang pakpeung taix pui ka greem pruik kix heue. ⁹ Yam jhak aux, aux yaox jaong ling pon mu koe hawt Cherubin an khankix tan mai jaong ling hoik tang koe hawt paw kix tix kaux tix mu heue. Jaong ling an khankix hoik koe grang pa awm siang simaox pa mhawm plang tix mu heue. ¹⁰ Phan mawh grang pakpeung kix, khawm pon mu, hoik awm paox tix khawmuik, awm krax pa hoik koe an mai jaong ling an tix mu hoik awm pa koe ka daux jaong ling an tix mu heue. ¹¹ Yam hu jaong ling ankix, hoik tang hu see sivoe tix khawm pon daog tidum neh heue. Kix ang lai veeh tix hu ka praok yam hu tix heue. Kix hawt hu ka plak dee veeh kaing tix mai ang lai veeh ka praok tix yam hu kix heue. ¹² Tokaux kix khawmuik, blawg kix taix kix mai pruik kix mai khawm jaong ling pa koe Cherubin an khankix pon mu hoik naog ka ngai hawt vung viang khawmuik heue. ¹³ Phan mawh jaong ling an khankix, aux mhong kok kix ceu kaux nawh mawh, jaong ling pa yia tix heue. ¹⁴ Cherubin ankix ku mu koe pakngai pon plak, pakngai baoh tix, mawh pakngai Cherubin mai pakngai ra, mawh pakngai pui tix kaux mai pakngai loe hoik mawh pakngai baoh sivai sangsi mai pakngai pon, mawh pakngai klang krih heue. ¹⁵ Cherubin an khankix hoik yaog tix haok, in mawh totiag im ju, pa hoik yaox aux hawt rawm klawng Khebax tan heue. ¹⁶ Yam hu Cherubin an khankix, jaong ling hu hawt praok kix mai yam di Cherubin pruik tix, sonsang yaog tix haok khaing piang tiex, jaong ling ankix ang lai veeh khaing praok kix heue. ¹⁷ Yam Cherubin khankix cung tix kaog, jaong ling khankix kawx cung tix kaog mai yam yaog kix ti haok ka piang jaong ling khankix kawx yaog ti haok heue. Kheu jao koe khwan totiag pa im ka daux jaong ling an heue. ¹⁸ Khaix an min plakngai Siyiex lih khaing piang siviex nyiex bwan mai hoik cung tix ot ka piang Cherubin an khankix heue. ¹⁹ Yam an Cherubin khankix di pruik tix mai yaog tix haok khaing piang tiex ka daux plak sivoe ngai aux heue. Yam lih hu kix, jaong ling khankix kawx koe hawt praok kix mai kix cung tix ot ka diang siviex pa koe plak lih singaix khaing nyiex bwan Siyiex mai min plakngai Siyiex ceu pui Isarelax koe ka piang kix heue. ²⁰ In mawh totiag im ju, pa hoik yaox aux greem Siyiex ceu pui Isarelax khankix hawt rawm klawng Khebax mai aux hoik tawng ka hoik mawh kix Cherubin heue. ²¹ Kix ku kaux koe pakngai pon plak mai koe pruik pon khawn mai pa awm pakpeung taix pui hoik koe greem pruik kix heue. ²² Plakngai kix, hoik awm pakngai pa hoik yaox aux hawt rawm klawng Khebax khawm krax pa koe grang pakpeung kix mai khawm kaux cao kix heue. Kix ku kaux hoik hu rah rahsee see ka plak see siviex heue.

¹ Khaix an khwan singax hoik yaog aux haok mai viex aux hoek ka daux diang siviex plak lih singaix nyiex bwan Siyiex, pa veeh pakngai tix plak lih singaix mai jhak heue, daux siviex an, koe pui pa singax tixnga phwan kaux mai khaing sinax pui khankix, aux yaox ka Yazanix kawn simex, Azurax mai Pelatix kawn simex Benayax khankix pa mawh simiang pa kwang ka piang pui khankix heue. ² Nawh ah nin ka aux, "Kawn pui eue, inkix mawh pui khankix, pa keud tix sang yuh krax pa lud mai pa tawx krax keud pa caox ka daux veng in, ³ pa ah nin "Bawg yam ang nyang dex, sonsang sum ka nyiex, veng in mawh aw mai ex mawh nex heue." ⁴ "Mawh kheu nan, kawn pui eue, ah lox jhai mai sidiex ka kix heue." ⁵ Khaix an khwan Siyiex lih hoek ka piang aux mai ah nin ka aux, "Krai heue, Siyiex ah nin, ceu pui Isarelax khankix eue, pex ah yuh nin, mawh kheu Aux tawng ka ceu pa kaoh khaing daux rhawm rhi pex heue." ⁶ "Pex hoik nie pah pui yum ka daux veng in mai pex hoik tik pui yum naog ka daux krax khankix heue." ⁷ Mawh kheu nan, Siyiex ah nin, "Pui yum pa hoik pah pex, pa deuh pex sigreung krax, kix mawh nex mai veng in mawh aw heue. Viang mawh nan, Aux tak sang viex pex lih khaing daux veng heue. ⁸ "Pex hoik lhat ka vaig mai Aux tak sang viex vaig hoek ka piang pex heue," Siyiex ah nin heue. ⁹ "Aux tak viex pex lih khaing ka daux veng an mai ap pex ka daux taix pui haktiex tang praix khankix mai tawx krax ciyang ka piang pex heue. ¹⁰ "Pex tak goh tix yum ka vaig, Aux tak ciyang pex can daux mee haktiex Isarelax tom sidah heue. Khaix an pex tak tawng ka mawh Aux, Siyiex heue." ¹¹ "Veng in tak ang lai mawh aw pex mai pex tak ang lai mawh nex ka daux aw an heue. Aux tak ciyang pex daux mee haktiex Isarelax tom sidah heue." ¹² "Pex tak tawng mawh Aux Siyiex. Mawh kheu ang pex lawng ka daux krax lox lai beenli pa deuh Aux khankix mai ang lai hawt ti yuh awm lox tat jhawm prawng Aux heue. Viang mawh nan, pex hoik hawt yuh awm koe beenli pui tang ceu, pa ot hawt vung viang pex khawmuik heue." ¹³ Glang yam krai aux lox jhai, Pelatix kawn simex Benayax hoik yum. Khaix an aux gup pakngai tix mai kok yo lox pa ting ah nin, "Siyiex eue, mawh sang yuh maix ceu pui Isarelax pa kawn deuk khankix laux leeing khawmuik lie?" ¹⁴ Gumlox Siyiex baox deeh hoek ka aux ah nin, ¹⁵ "Kawn simex kawn pui eue, puxaik maix, paox nyiex maix, pui doeh ru maix mai nyiex ma ceu pui Isarelax khawmuik, mawh pui veng Yerusaliem hoik krai grawng kix ah nin, kix hoik lih hu singai khaing Siyiex heue. Haktiex in hoik mawh pa tawx tix ka yix, pa pon yix tix cie heue." ¹⁶ "Mawh kheu nan krai ah nin Simiang Siyiex, ah nin, "Viang aux hoik tik kix luan dee singai ka daux sinax pui tang ceu khankix mai hoik prung prang kix ot ku sidah haktiex kawx, viang mawh nan, Aux tak sang mawh dee pa singax singeh tivud ticu ka son kix, ka daux haktiex ka dee hu ot kix heue. ¹⁷ Mawh kheu nan, krai ah nin, �Siyiex ah nin, Aux tak kraix khrawm pex khaing ceu pui khankix mai deeh khrawm pex khaing haktiex, ka dee prung prang pex tix ot mai Aux tak tawx haktiex Isarelax ka pex heue.� ¹⁸ "Yam hoek kix ka haktiex an mai kix tak teei ti tik riang grang ceu pa seeing brai khankix mai khawm pa seeing khawmuik khaing haktiex an heue." ¹⁹ Aux tak tawx kix koe rhawm pa awm paox tix mai tak sau rhawm pa khraox ka daux kix mai teei rhawm pa kiien awm simaox lih khaing daux tokaux kix mai tawx rhawm nex pa awn ka daux kix, ²⁰ sonsang pon hu kix ka daux lox lai beenli pa deuh Aux khankix mai priex tix hawt ka lox tat jhawm prawng Aux khankix mai hawt ti yuh mai kix tak sang mawh pui Aux mai Aux mawh Siyiex kix heue. ²¹ "Phan mawh son pui pa koe rhawm tix kawn sang hawt khaix ceu pa greeing khankix mai yuh pa seeing brai khankix, Aux tak sang deeh viied tix tawx krax kaing pa yuh kix hoek ka piang kaing kix heue," Siyiex, Siyiex ah yuh nan heue. ²² Yam an Cherubin khankix di pruik tix haok mai jaong ling khankix kawx hoik haok hawt praok kix mai min plakngai Siyiex ceu pui Isarelax hoik koe ka piang kix heue. ²³ Min plakngai Siyiex haok khaing ka daux sigreung veng mai hoik cung tix ot ka piang gawng, pa koe plak lih singaix veng heue. ²⁴ Khwan hoik yaog aux haok mai viex aux hu ka daux riang susai, ka khwan Siyiex tom hoek ka daux haktiex Khaladie, ka dee ot pui pa giex laung mai riang susai pa yaox aux hoik haok khaing aux heue. ²⁵ Mawh kheu nan, aux hoik krai ka pui ankix pa ot ka daux pa giex laung khankix, ka grawng pa hoik jhi Siyiex aux yaox khawmuik heue.

¹ Gumlox Siyiex hoik hoek ka aux ah nin, ² "Kawn pui eue, maix ot sigreung nyiex ma pa tieh feen pa koe ngai ti sang yaox, viang mawh nan ang chix yaox mai koe yhaok ti sang mhong, viang mawh nan, ang chix mhong heue. Grawh grawng nawh, kix mawh nyiex ma pa tieh feen heue." ³ "Mawh kheu nan, kawn pui eue, khre kraung khrai maix sonsang to khaing haktiex in, lih hu plak sivoe kix yam pon singaix maix tak lih hu tang dah khaing plak sivoe ngai kix heue. Viang kix mawh nyiex ma pa tieh feen kawx ka kix kawn koe krax doh keud ka heue." ⁴ "Ka daux plak pon singaix maix tak viex kraung khrai maix lih khaing ka daux plak sivoe ngai kix ka plak ponngaix awm kraung pui pa sang to, tang dah mai lih hu plak sivoe ngai kix plak ponbo, awm pui pa sang hu laig ka daux pa giex laung heue." ⁵ "Kaong guh veng ka daux plak sivoe ngai kix mai teei ti viex kraung khrai maix lih hu khaing ka daux doh an heue." ⁶ "Maix tak klawm ankix ka piang klip tix, ka plak sivoe ngai kix, viex ankix lih hu yam faik boi praix heue. Maix tak lhop pakngai tix, son ang maix chix yaox ka tiex heue. Mawh kheu Aux hoik yuh maix mawh mhai tix ceu ka son nyiex ma ceu pui Isarelax heue." ⁷ Aux hoik yuh awm pa hoik tawm Nawh ka aux. Aux hoik viex kraung khrai tix lih hu ka plak ponngaix, awm pui pa sang hu laig ka daux pa giex laung mai aux hoik kaong guh veng doh ka taix tix ka plak ponbo, hoik viex ankix lih hu yam faik boi praix mai aux hoik klawm ankix ka piang klip tix, ka plak sivoe ngai kix heue. ⁸ Yam hoek ka plak ponngawb, gumlox Siyiex hoek bleeh ka aux ah nin, ⁹ "Kawn pui eue, ang hoik mawh nyiex ma ceu pui Isarelax khankix, pa mawh cub nyiex ma pa chix tieh feen, pa hoik ah nin ka maix, "Yuh maix patix lie?" ¹⁰ "Ah nin ka kix, Siyiex ah nin, gumlox in, dex dawd mai can simiang pa kwang ka daux veng Yerusaliem mai ceu pui Isarelax khawmuik, pa koe ka daux an heue." ¹¹ Ah nin "Aux mawh mhai ka son pex awm pa hoik yuh aux an tak sang yuh ka piang kix heue. Kix tak sang mawh pui pa hu laig ka daux pa giex laung heue." ¹² "Simiang kix tak klawm kraung khrai tix ka piang klip tix yam faik boi praix mai lih hu. Kix tak kaong guh veng doh, sonsang viex kraung khrai lih daux doh an heue. Nawh tak lhop pakngai tix, son ang nawh chix yaox ka tiex heue." ¹³ "Aux tak naih rub, ka piang nawh mai nawh tak krix ka daux jhawk taong Aux heue. Aux tak viex nawh hoek ka veng Babulon, haktiex pui Khaladie. Viang nawh yum tan kawx nawh tak ang pon ti yaox ka veng an heue. ¹⁴ "Aux tak kieh bhaung ku plak prung prang ti tik, pui pa teem pa coi pa ot rawb rim nawh khankix mai pui naing nawh khawmuik mai Aux tak kiex vaig hawt khaix kix heue." ¹⁵ "Khaix an kix tak tawng ka mawh Aux Siyiex, yam hoik prung prang Aux ti tik kix ka daux sinax ceu pui khankix mai ka daux haktiex an heue." ¹⁶ "Viang mawh nan, Aux tak sang kieh kix glawd tiblah khaing vaig, khaing pa sibhawm praix mai khaing jhawm saux preng, sonsang pon krai lao grawng pa seeing brai kix khawmuik ka daux sinax pui tang ceu, ka can dee hu kix, khaix an, kix tak tawng ka mawh Aux Siyiex heue." ¹⁷ Lheu khaing an, gumlox Siyiex hoik hoek ka aux ah nin, ¹⁸ "Kawn pui eue, ih blah tau mai pa yaoh yee tix mai nyaux rawm tau mai pa lhat graung khi rhawm tix heue." ¹⁹ Ka pui haktiex khankix, Siyiex ah nin ka can pui pa ot ka daux veng Yerusaliem mai ka haktiex Isarelax." Kix tak ih blah tau mai pa yaoh yee tix, nyaux tau mai pa daox am tix sonsang pon haktiex nawh ti luat luan khaing pa yiien si briem, kheu jao grawng pa kin yuh pui pa ot ka daux nawh khawmuik heue. ²⁰ "Veng pa ot pui tak mawh pa laux leeing mai haktiex tak sang lih mawh dee yiien pui mai pex tak tawng ka mawh Aux Siyiex heue." ²¹ Gumlox Siyiex hoek bleeh ka aux ah nin, ²² "Kawn pui eue, mawh in gumlox kab pa hoik shiao pui Isarelax son grawng haktiex, mawh koe yuh ka mawx lie?" Baux singaix nawh hoik luan mawh grawng pa plak jhi kuceu hoik koe krax som nai heue. ²³ Mawh kheu nan, krai ka kix Siyiex ah nin, "Aux tak sang deuh gumlox kab in grai hu mai Isarelax tak ang lai yaox ti shiao gumlox kab in ka daux haktiex kix tix bawg kawx heue." Mawh kheu nan, ah nin ka kix, �Singaix bawg yam khankix hoik dex mai pa plak jhi kiex yaox tak sang mawh pa grum naog kuceu heue.� ²⁴ "Mawh kheu ceu pa plak jhi pa giex going ang ah mai krai lox jhai pie lhen tak ang lai koe tix bawg kawx ka daux sinax nyiex ma ceu pui Isarelax heue." ²⁵ "Kheu mawh Aux Siyiex, phan Aux krai mai gumlox krai Aux tak mawh pa grum naog mai an tak ang mawh pa greed tix rheeng bawg yam, nyiex ma pa tieh feen khankix eue, mawh kheu ka daux bawg yam singaix pex khankix, Aux tak krai mai yuh grum naog awm pa hoik krai tix, Siyiex ah nin heue. ²⁶ Gumlox Siyiex baox hoek bleeh ka aux ah nin, ²⁷ "Kawn pui eue, jhak heue, ceu pui Isarelax khankix ah nin, riang susai pa yaox nawh mawh pa kawn rheeng, khaing yam in mai nawh krai lox jhai son bawg yam pa kawn kied singai heue." ²⁸ Mawh kheu nan, ah nin ka kix, Siyiex ah nin, "Gumlox Aux, tak mawh pa ang lai greed tix rheeng bawg yam. Viang mawh nan, awm gumlox pa krai Aux khankix, tak yuh grum naog heue, "Siyiex ah nin heue."

¹ Gumlox Siyiex hoek bleeh ka aux ah nin, ² "Kawn pui eue, tiebtie ka cao jhai Isarelax pa kaoh khaing daux rhawm rhi cao kix, ah nin ka kix, nghiet ka gumlox Siyiex liak." ³ Siyiex ah nin, "Kieh krax kha rhawm koe ka cao jhai pa vao, pa hawt khaix rhawm cao kix mai pa ang sax yaox tix ceu kawx heue." ⁴ "Ceu pui Isarelax eue, cao jhai pex awm sox praix pa ot ka daux tiag dau tu heue." ⁵ Ceu pui Isarelax khankix ang haok hu ka dee laux guh veng, cox sum kieh kaux cong, sonsang tiebtie naing yam hoek baux singaix Siyiex heue. ⁶ Kix hoik yaox grawng ceu pa ang koe cee koe cak mai ka grawng pie lhen ah nin, "Siyiex ah nin, yam ang Siyiex tie ploi kix hu, mawh kheu kix kieh pui yum rhawm ka sang grum naog gumlox pa krai tix tom kriem heue." ⁷ "Pex hoik yaox ka riang susai ceu pa giex going mai pex hoik krai lox jhai pie lhen? Pex ca kawn ah, "Siyiex ah nin, viang mawh nan, Aux ang sax krai heue." ⁸ Mawh kheu nan, Siyiex ah nin, "Mawh kheu krai pex lox pa giex going mai yaox ka riang susai pie lhen khankix, mawh kheu nan, Aux tieh feen ka pex tete, Siyiex ah nan heue." ⁹ "Taix Aux tak tiebtie ka cao jhai pa yaox ka riang susai pa giex going mai pa krai lox jhai pie lhien. Kix tak ang yaox ti ot ka daux dee kraix khrawm pui Aux tix khankix mai ang lai tiiem ti deuh carang kix ka daux nyiex ma ceu pui Isarelax mai tak ang lai yaox ti laig ka daux haktiex meung Isarelax mai pex tak tawng mawh Aux Siyiex heue." ¹⁰ Grawh grawng nawh, phan ah tete, kheu hoik pie lhen ka pui Aux khankix daux pa ah nin, "Koe pa nhim, yam ang pa nhim koe mai pui tix kaux sum guh veng mai cao jhai kraix simaox ceed pa ang kaux." ¹¹ Krai ka pui pa kraix simaox ceed pa ang kaux an, ka tak sang grhup guh veng heue. Tak kieh lhiex lih rawm kheem mai mu pre pa kied ting tak cod ka piang pex mai bhaung tak phlu klah an grhup heue. ¹² Khaix hoik grhup guh veng mai pui tak chawk grawng an ka pex, "Phawng simaox pid kaux cong pa hoik kraix pex ka piang an koe dee mawx lie?" ¹³ Mawh kheu nan, Siyiex ah nin, "Aux tak kieh bhaung ting hoek ti phlu klah an laux, ka daux pa song rhawm tix, mai kieh rawm lhiex kheem, ka daux krax pa song rhawm Aux mai kieh pre yuh guh veng laux leeing awm krax pa kied song rhawm tix heue. ¹⁴ "Mawh kheu nan, Aux tak sang yuh guh veng pa hoik kraix pex phawng simaox pid pa ang kaux cong an grhup ka piang tiex mai kieh num riah nawh glaoh mai tak goh mai dheem gut pex laux leeing ka daux sigreung an, khaix an, pex tak tawng mawh Aux Siyiex heue. ¹⁵ Aux tak kieh pa song rhawm Aux grum naog ka piang guh veng an mai ka piang pui pa kraix phawng simaox pid ka guh veng pa ang kaux cong, Aux krai ka pex, guh veng mai khawm pui pa kraix somaox ceed tak ang lai baox koe khaix in, ¹⁶ cao jhai ceu pui Isarelax, pa krai lox jhai son grawng veng Yerusaliem mai pa dha ti yaox riang susai jhi grawng pa koe pa nhim ka son nawh, yam ang pa nhim tie koe, "Siyiex ah nan heue." ¹⁷ Lheu khaing an kawn pui eue, veeh ngai maix ka plak cub bun ceu pui maix, pa krai lox jhai khaing daux rhawm rhi cao tix mai krai lox jhai ka kix, ¹⁸ mai maix ah nin, "Kieh krax kha rhawm koe ka piang bun, pa hoik caing ti deuh kraung pa chix yuh simeed yuh sat hawt rhoi gawng caing ka piang taix sibex tix khankix mai pa yuh man tawb ka piang kaing pui pa iak pa ting, sonsang giex ka khwan ju kix heue, mawh sang pon giex pex khwan ju pui Aux khankix mai kieh tokaux tix im ju lie?" ¹⁹ Pex tak koe lox sibriem ka Aux, ka daux sinax pui khankix, son gaox nghox ca lang sidax tix jhawp mai shiah blah tiblah mai pah ka pui pa ang khaw ti yum mai deuh ka pui pa ang khaw ti im ju, pex krai grawng pie lhien ka pui Aux mai kix nghiet ka lox pie lox lhen an heue. ²⁰ Mawh kheu nan Siyiex ah nin, "Jhak heue, Aux tak tieh feen ka pa yuh simeed yuh sat pa giex ka khwan pex, Aux tak sang riah ti tik rhoi gawng caing khaing ka piang plawng taix sibex pex mai ploi khwan khankix pa hoik giex pex ti deuh lih hu heue." ²¹ "Aux tak baox riah ti tik man tawb kaing pex mai taoh pui Aux lih khaing daux tawm taix pex mai kix tak ang lai ot ka daux tawm taix pex heue. Khaix an pex tak tawng mawh Aux Siyiex heue." ²² Ka pui pa rahsee pa ang Aux kieh laux rhawm khankix, pex hoik kieh laux rhawm kheu jao pie lhien an mai pex hoik tawx riang rao ka taix pui pa caox caig, son ang kix lai veeh khaing daux krax pa caox caig yuh tix mai taoh ka ju tix heue." ²³ "Mawh kheu nan pex tak ang lai yaox ka riang susai pa giex going mai ang yaox tix krai lox jhai. Mawh kheu sang deeh taoh Aux pui Aux khankix khaing daux tawm taix pex mai pex tak tawng mawh Aux Siyiex heue."

¹ Kuad song ceu pui Isarelax tiblah hoek bleeh ka aux mai ngawm ka plak sivoe aux heue. ² Gumlox Siyiex hoek bleeh ka aux ah nin, ³ "Kawn pui eue, pui inkix hoik pang ti deuh riang grang pa krub tix ka daux rhawm rhi kix mai hoik deuh pa sang sideeing pa kieh lud ka plak sivoe kix heue. Mawh sang kieh Aux tokaux tix kham ka pa chawk cheng kix khawmuik lie?" ⁴ Mawh kheu nan, krai ka kix ah nin, Siyiex ah nin, "Khaing daux nyiex ma ceu pui Isarelax khankix tix kaux kaux pa yuh ti deuh riang grang krub ka daux rhawm rhi tix mai deuh pa sideeing kieh lud ka plak sivoe nawh mai hoek bleeh ka cao jhai, Aux tak deeh pawk ka nawh ah nin, awm pa koe riang grang pa krub nawh khankix, ⁵ sonsang pon aux ti giex awm pa koe rhawm rhi nyiex ma ceu pui Isarelax. Mawh kheu kix mawh pa hoik singai hu khaing Aux, kheu jao grawng riang grang krub kix heue." ⁶ Mawh kheu nan krai ka ceu pui Isarelax, Siyiex ah nin, "Koe krax pa deeh doh keud ka phimap tix! Deeh veeh tix luan khaing riang grang krub pex mai deeh veeh ngai tix luan khaing pa seeing brai khawmuik heue." ⁷ "Mawh kheu khaing daux nyiex ma ceu pui Isarelax tix kaux ang ah, khaing nyo sinie pa hoek ti peung ka daux haktiex Isarelax tix kaux kaux ang ah, pa hoik gwieh ti hu khaing Aux mai pang ti deuh riang grang krub ka daux rhawm rhi tix mai pa deuh ceu pa sang sideeing kieh lud plak sivoe nawh mai hoek bleeh ka cao jhai, sonsang chawk cheng ka grawng Aux, Aux pa mawh Siyiex tak deeh pawk krai ka nawh, khaing tokaux cao tix heue." ⁸ "Aux jeung ngai tix ka pui an mai yuh nawh mawh mhai ruk mai lox been yie krai pui mai Aux tak tat ti tik nawh khaing sinax ceu pui Aux mai pex tak tawng mawh Aux Siyiex heue." ⁹ "Phan cao jhai an krai lox pie lhien, Aux, Siyiex tak pie lhen ka cao jhai an mai Aux tak nyeu taix tix ciyang ka nawh mai yuh nawh laux leeing khaing sinax ceu pui Aux Isarelax heue. ¹⁰ "Kix tak kham geu phimap cao tix, krax kham geu cao jhai mai krax kham geu pui pa chawk cheng tak awm paox tix heue." ¹¹ Son ang nyiex ma ceu pui Isarelax lai tang tiah khaing Aux mai son ang lai baox yuh tokaux tix seeing khaix in tix bawg kawx tau mai krax lud tix, viang mawh nan, kix tak sang pon ti mawh pui Aux mai Aux tak mawh Siyiex kix, "Siyiex ah nan heue." ¹² Gumlox Siyiex hoek bleeh ka aux ah nin, ¹³ "Kawn pui eue, yam lud haktiex ka piang Aux mai hawt yuh kaing pa ang kaux sijax mai Aux tak nyeu taix ti yuh haktiex mai tat ti tik priex preem mai ploi sibhawm praix hoek ka piang haktiex mai yuh kawn pui laux mai to brie totiag khaing haktiex heue." ¹⁴ Viang pui inkix loe kaux, pa mawh Noax, Danyelax mai Yawbax ot ka daux haktiex in, kix tak taoh kaux cao tix nong nong, ka pa rahsee kix, Siyiex ah nan. ¹⁵ "Phan Aux kieh totiag pa vao lailing ka daux haktiex an mai yuh laux kieh dee an yi mai mawh dee yiien mai mawh dee ang pui lai pon lailing ka kheu jao totiag khankix, ¹⁶ "Viang pui ankix loe kaux ot ka daux haktiex an, awm pa im ju Aux, kix tak ang lai pon taoh kawn simex kawn bun tix, mawh ngie tokaux kix nong nong pa pon boek khaing, haktiex an tak mawh dee pa yiien," Siyiex ah nan heue. ¹⁷ Phan ang mawh nan, phan Aux viex vaig hoek ka piang haktiex an ah nin, "Vaig eue, hu tiag haktiex an, mug ti tik pui mai totiag khaing ka daux haktiex an; ¹⁸ Viang pui inkix loe kaux ka daux haktiex an awm im ju Aux, kix tak ang lai pon taoh kawn simex kawn bun tix khankix, mawh ngie tokaux kix nong nong pa pon boek khaing heue. Siyiex ah nan heue." ¹⁹ Phan ang mawh nan, phan Aux ploi jhawm saux preng hoek ka daux haktiex an mai klup krax pa song rhawm tix ka piang haktiex an ka nham mai mug ti tik pui mai totiag khaing daux haktiex an, ²⁰ viang pui inkix loe kaux pa mawh Noax, Danyelax mai Yawbax ot ka daux haktiex in, awm im ju Aux, kix tak ang lai deeh pon taoh kawn simex kawn bun tix, mawh ngie tokaux kix nong nong pa pon boek khaing, kheu pa rahsee kix, Siyiex ah nan heue. ²¹ Mawh kheu Siyiex ah nin, "Aux tak sang baox ploi krax ciyang pa kin pon ceu hoek ka piang veng Yerusaliem, pa mawh lawm vaig mai sibhawm praix, totiag pa sang yuh laux, jhawm saux preng, sonsang yuh laux ka pui mai to brie mawh pa sang nie kin ka veng an miex ding lie?" ²² Jhak heue, pui tak sang prah pui pa boek pa kawn deuk ka daux veng an tix cub, pa tak viex kawn simex kawn bun tix lih khaing an, kix tak lih hoek ka pex mai pex tak nyawm rhawm rhi son pa caox caig, pa viex Aux hoek ka piang veng Yerusaliem son can ceu pa viex Aux hoek ka daux haktiex an heue. ²³ "Pex tak nyawm rhawm kheu kix, yam yaox pex ka daux krax mai kaing ceu pa yuh kix mai pex tak tawng ka ang Aux tie yuh tix ceu kawx, ka daux pa ang koe grawng, ka can pa hoik yuh Aux, ka daux veng an," Siyiex ah nan heue.

¹ Khaix an gumlox Siyiex hoek ka aux ah nin, ² "Kawn pui eue, Nhu plix siiet sang nie lheu mhawm khaing khaox tang ceu yuh ka mawx? Kak plix siiet pa koe daux sinax tiag khaox daux nong sang nie lheu khaing kak khaox an yuh ka mawx? ³ Mawx teei nhu plix siiet an sonsang yuh ti kraung tix ceuceu lie? Phan ang mawh nan, mawx sang pon yuh pui kuk feuk kraung tix ceuceu ka an lie? ⁴ "Jhak heue, nawh yuh mawh khix taung daux ngu mai toh khawm ra plak proe ka ngu daux sigreung nawh lih ti mawh swah, an sang koe bwanson ceu patix lie?" ⁵ "Yam kawn grum mhawm an, phan ang chix ti shiao, khaix hoik gleeing lih ti mawh swah, sang nie baox koe bwan son yuh ka mawx, mawh kawn sang chix shiao tix ka an lie?" ⁶ Mawh kheu nan Siyiex ah nin, awm mawh nhu plix siiet pa ot daux sinax khaox daux nong, pa hoik tawx Aux, mawh khix taung son ngu, mawh kheu Aux tak ap ti tawx pui pa ot ka daux veng Yerusaliem khankix awm an heue. ⁷ Aux tak jeung ngai tix sonsang ciyang ka kix, viang glawd khaing pum ngu kawx mai pum ngu tak gleeing ka kix, khaix an, pex tak tawng mawh Aux Siyiex, yam jeung Aux ngai tix ciyang kix heue. ⁸ Mawh kheu nan, Aux tak sang kieh haktiex mawh dee yiien, kheu jao ang kix kaux sijax, Siyiex ah nan heue.

¹ Gumlox Siyiex hoek ka aux ah nin, ² Kawn pui eue, kieh veng Yerusaliem tawng ka krax pa seeing brai cao nawh khankix, ³ ah nin, Siyiex ah yuh nin ka veng Yerusaliem, dee kaoh dee keh maix mawh khaing daux haktiex Khanan, keeing maix mawh ceu pui Amon mai miex maix mawh ceu pui Hitix heue. ⁴ "Phan mawh grawng pa keh kung maix, yam hoik keh maix, kix ang pat ka maox sitaing maix mai ang heem ka rawm, sonsang singax mai ang kraix kih mai ang pua maix ka leem heue." ⁵ Ang koe ngai tix mu kawx pa sang caux rhawm ka maix sonsang koe krax moh ti yuh tix ceuceu ka maix, viang mawh nan maix hoik mawh pa tik tix ka daux kaung, mawh kheu hoik seeing cao maix ka daux singaix keh tix heue. ⁶ Yam preeng Aux tix hu dex maix mai yaox ka lu lieh maix tix ka daux nham tix, Aux ah nin ka maix yam kawn ot maix ka daux nham, �Im ju, ⁷ mai Aux hoik kieh maix kuah ting lhaong awm khaox tix pang ka daux tiag.� Mai maix hoik ting lhaong mai lih mawh pa kied mhawm grang heue. Teeih maix kawx hoik lih ti koe pakpeung mai hauk maix hoik lang heue. Viang mawh nan maix hoik ot ka kaong heue. ⁸ Yam baox preeng Aux ti hu dex maix mai Aux jhak ka maix jhak heue, yam hoik hoek bawg yam pa tawng maix tix koe krax moh, mawh kheu nan, Aux hoik naih toh kraung ceep tix ka piang maix mai kheem tokaux ka kaong maix ka, Aux hoik tiextu ti ah nin ka maix mai hoik yuh lox mukheu tau mai maix mai maix hoik lih ti mawh cie Aux," Siyiex ah nan heue. ⁹ "Khaix an Aux hoik heem maix ka rawm mai Aux hoik sigrhah maix khaing nham pa kawb ka maix mai Aux hoik kraix rawm bee ka maix heue." ¹⁰ "Aux hoik tawx maix ceep kraung pa hoik jawg ti caing ka man mhawm kuceu mai hoik tawx maix ceep kiiep hak Tahasha, Aux hoik kieh maix ceep man rhi ceu pa mhawm mai hoik lhop maix ka man luat heue." ¹¹ "Aux hoik jawg maix ka kraung pa ceep pa mawh ble ka taix maix mai maox soi ka ngawg maix heue. ¹² Aux sau krim siang simaox pa laoh lie ka meeh maix mai krim ka yhaok maix mai ceep mhok pa mhawm grang ka piang kaing maix heue. ¹³ "Awm an maix hoik jawg tix ka khri ka mau mai kraung ceep man rhi pa mhawm mai luat, pa hoik jawg ti caing ka man mhawm kuceu, maix yaox ti ih blah phawng nghox ca ceu pa mhawm, rawm hia mai rawm bee khankix heue. Maix hoik kied mhawm grang ti yaox mai hoik pon tix mawh moeng simiang, pa ot ka daux nyiex haw heue." ¹⁴ "Krax pa ao min maix hoik tah hu ka daux haktiex, kheu jao pa kied mhawm grang maix mai an hoik mawh min pa grum naog pa hoik ap Aux ka maix heue," Siyiex ah yuh nan heue. ¹⁵ Viang mawh nan maix hoik een rhawm tix ka pa mhawm grang tix mai hoik yuh bun coh kaux kheu jao pa ao min tix mai hoik tawx krax pa lud vao ka piang pui pa lailing baoh an, ku kaux, pa koe rhawm tix lud vao ka heue. ¹⁶ "Maix hoik teei kraung ceep maix tiblah mai jawg tix ka kraung pa mhawm grang kuceu dee lhaong mai yuh bun coh kaux ka dee an, ceu pa ang khaw tix lih koe mai pa ang caw tix koe heue." ¹⁷ "Baox teei siang simaox pa mhawm khri mai mau pa hoik tawx Aux ka maix mai yuh ti cie riang grang simex ka son tokaux tix mai hoik lud vao tau mai an kix heue." ¹⁸ "Maix teei kraung pa hoik caing maix ti deuh kuceu mai hoik lhop riang grang ankix mai maix deuh rawm bee mai nyawng bhawng Aux ka plak sivoe riang grang ankix heue." ¹⁹ "Can pa ih pa hoik tawx Aux ka maix, pa mawh blah phawng nghox ca pa mhawm, rawm bee mai rawm hia pa hoik tawx Aux maix ih maix hoik deuh nawh sivoe riang grang sonsang sioe bhawng ka heue," Siyiex ah nan heue. ²⁰ "Lheu khaing an maix baox teei kawn simex kawn bun tix, pa hoik keh maix ka son Aux mai maix hoik appong tix tan ka riang grang an, sonsang mawh pa laux leeing heue. Krax lud vao ceu pa yuh maix mawh grawng ceu pa iak tix ceu lie? ²¹ Maix hoik pah kawn praix aux yum mai ap tix tawx kix ka riang grang sonsang tan, ka daux ngu lie? ²² Ka daux ceu pa yuh maix ceu pa seeing brai mai pa lud vao khankix maix ang lai doh keud ka baux singaix awn ju tix, yam ang maix ceep kraung mai ot ka kaong ka daux pa lu lieh tix daux nham cao tix heue." ²³ Khaix hoik yuh maix krax pa caox caig, kieh krax pa kha rhawm mai krax pa kied kha rhawm koe ka piang maix, Siyiex ah nan heue. ²⁴ Maix baox sum nyiex moeg tix lhang son tix mai hoik yuh dee pa lhaong ka son tix, ka krax ku dah heue. ²⁵ "Maix hoik sum dee pa lhaong ka piang kaing krax ting ku krax mai kieh pa mhawm grang tix mawh pa seeing brai maix hoik di ba viang tix ka pui ku kaux pa lailing hawt baoh tan mai baox nie lheu yuh kaing pa lud vao tom nie heue." ²⁶ "Maix baox lud vao mai pui Ejiptux, pa mawh paox plawg maix pa kied seeing mai baox nie yuh kaing pa lud vao sonsang so aux koe krax pa song rhawm ka heue." ²⁷ "Mawh kheu nan jhak heue, Aux nyeu taix tix ka piang maix mai hoik tat ti tik pa ih maix, maix hoik ap tix tawx maix ka pui pa koeng ka maix, pa mawh kawn bun ceu pui Philitix pa hoik koe krax nie seeing ka maix heue." ²⁸ "Maix baox lud vao tau mai pui Asurix, kheu ang maix chix koe krax pa fah rhawm. Maix hoik yuh bun tau mai kix mai ang nyang bax koe krax pa fah rhawm ka heue." ²⁹ "Lheu khaing an maix baox nie yuh kaing pa lud vao an khankix, tom hoek haktiex pui pa yuh lai yuh geu ka daux haktiex Khaladie mai khaix hoik yuh maix ceu an maix ang nyang koe krax pa fah rhawm ka heue. ³⁰ Rhawm maix hoik mawh pa kied caox caig miex ding, yam yaox Aux pa yuh maix ceu in khawmuik, pa mawh kaing yuh bun coh kaux pa laux min heue." ³¹ Maix hoik sum ti deuh nyiex moeg ka piang kaing krax ku krax mai hoik sum dee pa lhaong ka piang krax ku krax heue. Viang mawh nan maix ang tie awm bun coh kaux, kheu ang maix tie mhaing ngawh tix heue. ³² "Maix awm moeng pa hoik lud vao mai nyo sinie tang kaux son tang mex tix heue." ³³ "Simex khankix tawx totaix ka bun coh kaux, viang mawh nan maix hoik tawx totaix ka paox moh tix mai hoik vai kix pa ot hawt baoh vung viang ti hoek, sonsang lud vao mai tix heue. ³⁴ Maix mawh pa tang siyox khaing bun tang kaux khankix, ka daux kaing pa lud vao yuh tix, mawh kheu pui tix kaux kawx ang nyaw glaw maix yuh bun coh kaux mai maix deeh tawx ngawh riang ka daux pa ang pui sax tawx awm maix mawh kheu nan maix mawh pa tang siyox heue." ³⁵ Mawh kheu bun coh kaux eue, nghiet ka gumlox pa kaoh khaing Siyiex, ³⁶ Siyiex ah nin, "Mawh kheu hoik plak maix krax pa kaig pa tua tix lih mai pa ot ka kaong sidawng, ka daux pa lud vao tix mai paox moh tix khankix mai lud tau mai riang grang krub can pa seeing brai mai mawh kheu tan maix nham kawn praix tix ka an khankix, ³⁷ Jhak heue, Aux tak khrawm paox moh maix khawmuik mai pui pa yuh maix krax nyawm rhawm rhi tix tau mai can pui pa moh ka maix mai khawm pui pa koeng ka maix khankix mai Aux tak khrawm kix hoek khaing ku plak sonsang hoek yuh maix laux leeing mai tak sang jhi krax pa ka kaong maix ka kix, sonsang yaox kix ka pa ot ka kaong maix heue. ³⁸ Aux tak prawng ca ka maix awm prawng ca tix ka bun pa lud vao mai pa hoik kieh nham pui jauh khankix, Aux tak viex nham phimap an hoek ka piang maix, ka daux pa kied song rhawm rhi mai ka daux pa bak pa viang heue. ³⁹ Aux tak ap maix ka daux tawm taix paox moh maix mai kix tak yuh nyiex moeg maix laux mai yieh dee pa lhaong maix laux leeing, kix tak peeik kraung ceep maix mai rhim ti teei kraung mhawm maix mai prah maix ot ka kaong heue. ⁴⁰ Kix tak viex cub pui hun hoek puing ka maix mai kix tak dheem maix ka simaox mai mug maix lih mawh baux mawx baux an ka vaig kix heue. ⁴¹ Kix tak gleeing nyiex maix ka ngu mai ciyang ka piang maix ka plak sivoe ngai bun tom nie mai Aux tak kieh maix naox yoi khaing kaing yuh bun coh kaux mai maix tak ang lai yaox tix vai paox moh tix khaix in heue. ⁴² Aux tak kieh pa song rhawm tix vai ka piang maix mai kieh pa bak pa viang tix lih hu khaing maix, Aux tak koe pa nhim mai ang lai koe pa song rhawm tix bawg kawx heue. ⁴³ Mawh kheu ang maix lai doh keud ka singaix yam awn ju tix mai hoik yuh Aux song rhawm ka ceu in, Aux tak sang viied ngawh kaing yuh maix ka piang kaing maix, yuh ka mawx maix lai baox hawt ti yuh pa caox caig mai baox gawp ka piang pa seeing brai lie? Siyiex ah yuh nan heue. ⁴⁴ "Pui pa chix krai lox kab khankix, tak sang shiao lox kab ka grawng maix, �Awm miex, awm kawn bun.� ⁴⁵ Maix mawh kawn bun khaing cub pa seeing ka mex mai kawn tix mai maix mawh puxo khaing bun pa seeing ka mex mai kawn tix. Miex maix mawh ceu pui Hitix mai keeing maix mawh ceu pui Amon heue." ⁴⁶ "Puxke bun maix mawh veng Samarix, pa ot tau mai kawn bun tix, ka plak laong mai pux bun maix, mawh veng Sawdom pa ot plak seh tau mai kawn bun tix heue." ⁴⁷ "Maix ang lawng hu ka daux krax hu kix maix ang yuh pa seeing brai awm kix maix hoik deuh grawng ankix, awm pa iak pa liied mai hoik nie lheu kin yuh pa caox caig khaing kix kuceu heue." ⁴⁸ Siyiex ah nin, "Awm im ju Aux, pux bun maix veng Sawdom mai kawn bun maix ang lai hawt yuh awm pa hoik yuh maix mai kawn bun maix khankix heue." ⁴⁹ "Jhak heue, in mawh phimap yuh pux bun maix veng Sawdom, nawh mai kawn bun nawh hoik ting rhawm ting rhi, ka daux pa kub ih kub un tix mai ka daux pa kied nyawm rhawm tix mai ang sax teem ka can pa lo pui hot sibhawm heue." ⁵⁰ Kix ting rhawm ting rhi mai yuh pa seeing brai ka plak sivoe Aux, mawh kheu nan, yam yaox Aux ceu pa yuh kix an, Aux hoik yuh kix laux leeing heue. ⁵¹ "Veng Samarix ang nyang yuh krax lud awm pa hoik yuh maix been tix plak; maix hoik nie lheu yuh pa seeing brai khaing kiex mai hoik kieh puxke bun mai pux bun tix awm pui rahsee, kheu pa seeing brai pa yuh maix heue. ⁵² Maix hoik deuh phimap mai prawng ca ka puxke bun mai pux bun tix, kieh maix laux min ka, mawh kheu phimap pa yuh maix kied nie lheu mawh ceu pa seeing brai khaing kiex, kiex nie lheu rahsee khaing maix heue. Mawh kheu nan, kieh maix kaig ka mai kieh maix kham geu pa laux min, mawh kheu hoik kieh maix puxke bun tix mawh pa rahsee heue. ⁵³ Yam deeh viex Aux pui pa giex laung pa mawh pui Sawdom mai kawn bun nawh khankix mai pui Samarix mai kawn bun nawh khankix deeh ing, Aux tak sang viex pui pa giex laung maix deeh hoek tau mai kix, ⁵⁴ "maix tak laux min mai hoek krax kaig tua kheu jao pa yuh tix, mawh kheu hoik kieh maix kix koe krax nyawm rhawm rhi heue." ⁵⁵ "Yam deeh ing pux bun maix, pa mawh Sawdom mai kawn bun nawh khankix, ka haktiex dee ot kix glang ka in mai yam deeh ing Samarix mai kawn bun nawh khankix ka haktiex dee ot kix glang ka in maix mai kawn bun maix khankix, tak yaox tix deeh ing ka haktiex dee ot tix glang ka in heue." ⁵⁶ Ang hoik mawh jheeh maix pa salao ka pux bun maix Sawdom ka daux singaix pa ting rhawm tix ang mawh lie? ⁵⁷ Sivoe ang krax pa caox caig yuh maix nyang sidawng, yam in maix hoik lih tix awm Sawdom, pa yaox ti kham ka pa salao kawn bun Edom mai rawb biang maix mai kawn bun Philitix khankix mai pa nu nai pui pa ot rawb rim maix ka maix heue. ⁵⁸ Maix tak yaox ti kham geu krax ciyang mai krax pa seeing brai pa yuh tix, Siyiex ah nan heue. ⁵⁹ "Siyiex ah nin, Aux tak yuh ka maix, awm ceu pa hoik yuh maix, pa nu nai maix ka lox pa hoik tiextu tix mai yieh laux ka gumlox sijax mukheu heue." ⁶⁰ Viang mawh nan, Aux tak doh keud ka sijax mukheu pa hoik yuh tix tau mai maix baux singaix yam awn ju maix mai Aux tak yuh sijax mukheu leeing ju tau mai maix heue. ⁶¹ Khaix an maix tak doh keud ka pa yuh tix mai tak kaig tua ka, yam rieb maix ka puxke bun tix mai pux bun tix mai tawx kix sonsang mawh kawn bun maix, viang mawh nan, an ang lai mawh jao sijax mukheu pa yuh Aux tau mai maix heue. ⁶² Aux tak yuh sijax mukheu tix tau mai maix mai maix tak tawng ka mawh Aux Siyiex. ⁶³ Aux tak pluat ploi ka can pa lud pa hoik yuh maix khankix, viang mawh nan, yam doh keud maix ka phimap an mai maix tak kaig tua tom ang tix lai pon ang jheeh tix, Siyiex ah nin heue.

¹ Gumlox Siyiex hoek bleeh ka aux, ² "Kawn simex kawn pui eue, krai lox phektem ka ceu pui Isarelax khankix, ³ ah nin, Siyiex ah nin, koe klang krih ting tix mu, pa ting pruik mai hauk pruik kawx kied lang mai naog ka hauk pa koe rawm siang kuceu mai hoek ka gawng Lebanon mai tud tix viex kak khaox gix, ⁴ Nawh tud tix viex nyoig rao awn mai viex an hu ka haktiex dee yuh pui lai geu mai sum an ka daux veng cao lai cao geu heue. ⁵ Khaix an nawh teei simie haktiex an tiblah mai sum an ka dee mhawm tiex mhawm phon, nawh van simie an hawt ka dee pa kied haoh rawm mai deuh an awm khaox siglai heue. ⁶ Simie lih kuah mai ting lhaong mai lih ti mawh nhu plix siiet pa tiiem mai kak nawh khankix yie lang hu ka plak see klang krih mai riah nawh kawx ot cung greem nawh heue. Mawh kheu nan, an hoik lih ti mawh nhu plix siiet mai kak khankix pre hu tom hoik preung tix lih lhax ka rao an heue." ⁷ Viang mawh nan, koe klang krih ting tang mu, pa ting preeik mai pa kied nie hauk, jhak heue, nhu plix siiet in kawk riah tix hu ka plak see nawh mai nyeu kak tix lih hu ka plak see nawh, sonsang pon see rawm ka an, jah hawt rawb sipeem tom hoek ka dee sum an khankix heue. ⁸ Sum an ka dee mhawm tiex mhawm phon, ka dee kied nie rawm, sonsang pre kak mai plix haoh hun mai sonsang lih ti mawh nhu plix siiet pa koe min heue. ⁹ Siyiex ah nin, mawh kawn sang haok hwan ting lhaong khaox an lie? Mawh tak sang reeig riah nawh mai pieh plix sonsang fit lhax awn nawh lie? Ang lai lo ka plawng taix ting riang mai pui tom nie sonsang reeig ka riah nawh heue. ¹⁰ Jhak heue, yam gah ti sum, mawh kawn sang haok hwan ting lhaong khaox an lie? Mawh ang fit hu yam hoek phlu bhaung plak lih singaix ka nawh lie? An tak sang fit hu ka dee sum tix daux rawng ang mawh lie? ¹¹ Khaix an gumlox Siyiex hoek bleeh ka aux, ¹² "Ah nin ka nyiex ma pa chix tieh feen, mawh ang pex tawng ka dee bleeh ceu in lie? Krai ka kix ah nin, simiang Babulon hoek ka Yerusaliem mai hoik rhim ti viex simiang mai cub cao kaing cao kap, hu ka Babulon heue." ¹³ Nawh teei ceu cat doeh nyiex ma Simiang tix kaux mai hoik yuh sijax mukheu tau mai nawh, ka daux pa tiextu tix ka nawh heue. Rhim ti viex cao kaing pa ting riang ka daux haktiex an hu, ¹⁴ sonsang yeen meung haktiex an tix tiem mai ang lai yaog tokaux tix, ka daux pa priex rien nawh ka sijax mukheu tom kaux cong sijung heue. ¹⁵ Viang mawh nan, Zedaki hoik tieh feen ka piang Nebukhaneza kheu ploi nawh pui cau ti hu ka Ejiptux, sonsang pon ti brung mai pui naing tom nie heue. Mawh sang haok hwan nawh ka lie? Mawh sang pon klawd nawh ka yuh tix ceu an lie? Mawh sang pon yeen nawh sijax mukheu an mai pon luat luan ka lie? ¹⁶ Siyiex ah nin, awm im ju Aux, pui pa salao ka simiang mai yieh ka sijax mukheu pa hoik tiextu tix ka simiang an, pa hoik yaog nawh mawh simiang, tak yum ka sigreung veng Babulon dee ot simiang an heue. ¹⁷ Viang Pharaw mai cub kru naing pa kied ting riang rao mai cub pui hun nawh khankix, tak ang pon teem nawh ka naing, viang kix kaw guh veng mai yuh tab lai lawm veng sonsang pah ka pui tom nie kawx, kix ang pex heue. ¹⁸ Mawh kheu jao nu nai nawh ka lox tiextu mai yieh sijax mukheu pa hoik yuh tix tau mai ca kawn yuh ceu in, mawh kheu nan, nawh tak ang pon tix glawd heue. ¹⁹ Siyiex ah nin, awm im ju Aux, kaw pa nu nai lox tiextu tix ka Aux mai pa yieh ka sijax mukheu Aux, Aux tak sang kieh phimap hoek ka piang kaing nawh heue. ²⁰ Aux tak naih rup tix rob ka piang nawh mai nawh tak krix ka jhawk taong Aux, Aux tak viex nawh hoek ka Babulon mai ciyang nawh tan, mawh kheu ang nawh kaux sijax ka piang Aux heue. ²¹ Pui naing pa vao nawh khawmuik, tak goh ti yum ka lawm vaig mai pa kawn deuk tak prung prang ti rairuat kudah mai pex tak tawng mawh lox sikah Aux, pa mawh Siyiex heue." ²² Siyiex ah nin, "Aux tak sang caik rao nyoeg khaox gix pa kied lhaong mai sum ka, Aux tak raig ka kak awn an mai sum ka piang gawng lhaong, ²³ Aux tak sum an ka piang gawng lhaong Isarelax, sonsang lih kak tom nie mai lih plix pa mhawm, pa lih mawh khaox gix pa mhawm grang, mai sim kuceu hoek tix ot greem nawh mai kix tak yuh mheem tix greem veei kak khaox an heue. ²⁴ Khaox ka daux tiag ku pang, tak tawng ka mawh Aux Siyiex pa kieh khaox lhaong tiem mai deeh yaog khaox tiem lhaong mai pa kieh khaox klai deeh kroh mai kieh khaox kroh deeh klai, Aux mawh Siyiex pa yuh awm pa krai tix heue."

¹ Gumlox Siyiex baox hoek ka aux, ² Lox kab pa dexdawt mai haktiex pui Isarelax pa shiao maix, pa ah nin, keeing khankix ih plix siiet pa niex mai kawn praix khankix siki rhang ka koe dee bleeh yuh ka mawx? ³ Siyiex ah nin, awm im ju Aux, khaix in pex tak ang lai yaox ti shiao lox kab in ka daux haktiex Isarelax tix bawg kawx heue. ⁴ Jhak heue, ju khwan khankix mawh cie Aux, awm mawh ju khwan keeing cie Aux mai ju khwan kawn kawx, mawh cie Aux, ju khwan pa yuh phimap tak yum heue. ⁵ Phan pui tix kaux koe rhawm pa rahsee mai yuh ceu pa mawh meh ka daux pa khaw caw mai been, ⁶ phan nawh ang sax ih priex ka piang gawng mai ang sax yaog ngai tix krub ka riang grang nyiex ma ceu pui Isarelax mai ang sax lud vao mai moeng paox plawg tix mai ang sax hu dex ka bun yam hoek mee kix, ⁷ ang sax yuh pa khin ka pui tix kaux kawx, viang mawh nan, hoik deeh tawx ka kraung pa tang pui ka tix mai ang sax rhim ka kraung cie pui mai hoik tawx pui cai rhawm sawm mai tawx pui ka kaong ceep kraung, ⁸ nawh ang sax tawx pui yaog mau sonsang pon rao, phan ang mawh nan, deeh ghaok rao mau mai hoik yoi taix tix ka pa lud mai pa prawng see ka paox kawn pui tix ka daux pa mawh pa meh, ⁹ hawt lawng hu ka daux lox lai beenli mai yuh satix ti hawt been pa phan pa deuh Aux ka daux krax pa kaux sijax tix, pui an tak mawh pui pa rahsee, nawh tak yaox ti im ju tete, Siyiex ah nan heue. ¹⁰ Phan nawh koe kawn simex pa yuh con mai pa kieh nham jauh, pa yuh ceu in tix ceuceu ka puxaik tix, ¹¹ pui pa ang yuh awm pa koe been pa mhawm pa mawh pui pa ih priex ka piang gawng khankix, phan ang mawh nan, pa lud vao mai moeng paox plawg tix, ¹² pa yuh krax khin ka pui pa hot sibhawm mai pui pa cud cha mai pa rhim ka kraung khrai pui ka daux pa kin mai pa ang lai deeh tawx ka kraung pa tang pui ka tix mai pa yaog ngai ti krub ka riang grang mai yuh ceu pa seeing brai, ¹³ pa tawx pui yaog mau sonsang teei rao mau mai baox ghaok rao, mawh sang yaox nawh ti im ju lie? Nawh tak ang yaox ti im ju, mawh kheu hoik yuh nawh ceu pa seeing brai khankix, nawh tak yaox ti yum tete mai nham phimap nawh tak hoek ka piang nawh heue. ¹⁴ Viang mawh nan, phan nawh koe kawn simex pa yaox ka phimap yuh keeing tix mai lhat graung ka, ang hawt yuh awm an, ¹⁵ pa ang sax ih priex ka piang gawng mai pa ang sax yaog ngai tix krub ka riang grang nyiex ma ceu pui Isarelax mai pa ang sax lud vao mai moeng paox plawg tix, ¹⁶ pa ang sax yuh krax lud ka pui tix kaux kawx mai pa ang sax rhim ka kraung pa tang pui mai pa ang sax ghrang ka kraung khrai pui, viang mawh nan, hoik tawx pui pa cai rhawm sawm mai hoik tawx pui pa ot ka kaong ceep kraung, ¹⁷ pa nyeu taix tix tawx ka pui hot sibhawm mai pa ang lai rieb ti teei rao mau ceuk, phan ang mawh nan, pa ang ghaok rao mau, pa priex ti hawt ka been pa phan pa deuh Aux mai pa lawng hu ka daux lox lai beenli Aux, nawh tak ang yaox ti yum son phimap keeing tix, nawh tak yaox ti im ju tete heue. ¹⁸ "Phan mawh son keeing nawh, kheu hoik kied kin yuh nawh krax kha rhawm, ka puxaik tix mai hoik rhim ka kraung cie pui mai yuh pa ang mhawm ka daux sinax pui nawh khankix, jhak heue, nawh tak yum kheu phimap tix heue." ¹⁹ Viang mawh nan maix kawn ah nin, kawn simex tak ang yaox ti kham phimap keeing tix, kheu jao patix lie? Mawh kheu kawn simex hoik hawt awm been pa phan pa deuh mai pa khaw caw mai hoik priex rien ti hawt ka lox lai beenli pa deuh Aux khankix, ²⁰ "Ju khwan pa yuh phimap tak yum tete, kawn praix tak ang lai yaox ti kham phimap keeing tix mai keeing tak ang yaox ti kham phimap kawn praix tix, pui pa rahsee tak pon bwanson pa rahsee mai pui pa caox caig, tak pon ka bwanson pa caox caig, ²¹ phan pui pa caox tix kaux deeh veeh khaing phimap pa hoik yuh tix mai priex rien ti hawt ka lox lai beenli Aux mai yuh awm lox tat jhawm prawng ka daux pa khaw caw, nawh tak yaox tix im ju tete, nawh tak ang yaox ti yum heue." ²² Tak ang lai deeh doh keud ka krax pa lud hoik yuh nawh pie tix ceu kawx, kheu jao pa rahsee hoik yuh nawh khankix nawh tak yaox ti im ju heue. ²³ Mawh nyawm rhawm Aux ka daux pa yum pui pa caox caig khankix lie? Ang Aux nie simie ti deeh kieh kix veeh khaing krax nawh mai im ju lie? Siyiex ah nan heue. ²⁴ Viang mawh nan, yam deeh veeh pui pa rahsee ti khaing krax pa rahsee tix mai yuh phimap mai pa caox caig mai pa seeing brai, awm yuh pui pa ang rahsee tix im ju lie? Can pa rahsee pa hoik yuh nawh tak ang lai doh keud kah, kheu ang nawh kaux sijax mai hoik lud mai yuh phimap, kheu jao grawng in nawh tak yaox ti yum heue. ²⁵ Viang mawh nan maix kawn ah nin, pa prawng ca Siyiex ang rahsee, nyiex ma pui Isarelax eue, nghiet heue, krax prawng ca Aux mawh pa rahsee, ang hoik mawh krax prawng ca pex pa ang lai rahsee ang mawh lie? ²⁶ Yam veeh pui pa rahsee khaing krax pa rahsee tix mai yuh phimap mai pa caox caig, nawh tak yaox ti yum kheu pa caox caig yuh tix heue. ²⁷ Awm an yam deeh veeh pui pa caox caig khaing krax pa caox caig tix, pa hoik lud yuh tix mai deeh yuh pa rahsee mai pa khaw caw, nawh mawh pui pa taoh tokaux tix im ju heue. ²⁸ Mawh kheu nawh hoik tiag cheu ti yaox ka ceu an khankix mai deeh veeh khaing ceu pa lud tix, nawh tak sang yaox ti im ju tete mai nawh tak ang yaox ti yum heue. ²⁹ Viang mawh nan, nyiex ma ceu pui Isarelax kawn ah nin, krax prawng ca Siyiex ang rahsee nyiex ma pui Isarelax eue, krax prawng ca Aux mawh pa rahsee, ang hoik mawh krax prawng ca pa ang lai rahsee ang mawh lie? ³⁰ "Mawh kheu nan, nyiex ma pui Isarelax eue, Aux tak ciyang pex ku kaux awm pa yuh nawh, Siyiex ah nan. Doh keud mai veeh khaing phimap pa lud tix khawmuik, son ang pex sang hoek daux krax laux leeing kheu pa caox an heue. ³¹ Tik ka can pa lud mai pa tieh feen ka Aux mai kieh pex koe rhawm rhi pa khraox mai ju pa khraox heue. Nyiex ma pui Isarelax eue, pex lai simie ti yum kheu jao patix? ³² Mawh kheu Aux ang lai mawh pa nyawm rhawm ka yum pui tix kaux kaux, Siyiex ah nin, mawh kheu nan, doh keud mai im ju heue."

¹ Mawh kheu nan, yiiem doe son cao kaing cao kap pui Isarelax khankix ² ah nin, miex maix mawh tix? Mawh sivai sangsi, miex nawh it sinax sivai sangsi mai nawh tawx kawn tix ih priex sinax sivai sangsi awn ju heue. ³ Nawh eei kawn tix ting, tom lih mawh sivai sangsi awn ju, nawh hoik gau nawh giex totiag mai nawh hoik kiied ti ih pui heue. ⁴ Pui kuceu mhong ka grawng nawh, pa hoik pon giex nawh daux tiex mai phyawk nawh ka maox rhiem viex hu ka haktiex Ejiptux heue. ⁵ Yam yaox miex sivai sangsi an ka pau tix nawh tom rheung mai ang lai koe krax keud pot jun pot ka nawh mai nawh baox teei kawn tang mu mai eei nawh ting tom lih mawh sivai sangsi awn ju heue. ⁶ Nawh lailing sinax sivai sangsi khankix, tom lih mawh sivai sangsi awn ju, nawh hoik gau ti giex totiag mai nawh kiied ka pui khankix heue. ⁷ Nawh tawng ka nyiex haw ot kix yiien mai yuh veng ot kix laux leeing, haktiex pa grum naog pui ka hoik lih tix yiien kheu lox sinum graox nawh heue. ⁸ Khaix an pui kuceu hoik hoek ti puing ka nawh khaing ku plak mai kix neh rub tix ka piang nawh, nawh hoik krix ka daux tiex yuh kix heue. ⁹ Kix phyawk nawh ka maox ceng mai sau nawh ka daux grau mai viex nawh hu ka simiang Babulon, son ang lai baox deeh mhong lox nawh ka piang gawng Isarelax khaix in tix bawg kawx mai kix laung nawh ka daux veng pa kaux cong heue. ¹⁰ Miex maix awm nhu plix siiet pa sum ka daux sipeem plix siiet ka dee pa kied mhawm rawm, pa plix tom nie pa kied haoh hun kak khankix, kheu jao kied haoh hun rawm heue. ¹¹ Kak nawh khankix kied kaux cong, sonsang mawh khaox gix pa shiao cao kwang haktiex, kak nawh khankix kied yeem kied tan mai kied lhaong, tom pui khawmuik pon yaox ka heue. ¹² Viang mawh nan, hoik reeig nhu plix siiet an ka daux pa song rhawm mai tik ka piang tiex mai bhaung plak lih singaix hoik kroh yuh plix nawh, kak pa kied kaux cong an khankix kawx hoik fit hoik kroh mai hoik graig hoik proe ka daux ngu heue. ¹³ Yam in hoik reeig ti sum an ka daux tiag dee kroh haktiex mai ka daux haktiex dee ang rawm koe heue. ¹⁴ Ngu hoik lih ti hoek khaing sinax kak tix kak mai gleeing kak mai plix, son ang kak pa kaux cong lai koe lai deuk ka daux an mai ang lai koe khaox gix son cao pa kwang tix gawng kawx heue. In mawh grawng pa yiiem pa doe mai kieh mawh lox pa yiiem pa doe heue.

¹ Yam hoek ka daux aliah num khix phwan, kao ngaix daux khix an, cub kuad song nong yu ceu pui Isarelax hoek sonsang chawk cheng ka Siyiex mai kix ngawm sivoe aux heue. ² Gumlox Siyiex hoek ka aux ah nin, ³ "Kawn pui eue, krai ka kuad song nong yu ceu pui Isarelax mai ah nin ka kix, Siyiex ah nin, mawh hoek pex ti sang chawk cheng ka Aux lie? Siyiex ah nin, awm im ju Aux, Aux tak ang kieh pex chawk cheng ka tix heue." ⁴ "Kawn pui eue, mawh ang maix prawng ca kix lie? Mawh ang maix prawng ca kix lie? Kieh kix tawng ka ceu pa seeing brai pa yuh keeing kix, ⁵ ah nin ka kix, Siyiex ah nin, singaix yam laug Aux ka pui Isarelax, aux hoik tiextu ka doeh nyiex ma ceu pui Yakop mai hoik jhi kieh kix tawng tokaux tix ka daux haktiex Ejiptux mai tiextu gumlox ka kix ah nin, Aux mawh Siyiex pex heue. ⁶ Ka daux singaix an, Aux hoik tiextu sonsang viex tix kix lih khaing haktiex Ejiptux mai laig ka daux haktiex pa hoik sawg Aux son kix, pa mawh haktiex dee lih rawm teeih mai rawm hia mai pa koe min plakngai khaing haktiex khawmuik heue. ⁷ Aux ah nin ka kix, "Tik ceu pa seeing brai pa moh pex ka ngai tix, paw lai yuh tokaux tix seeing ka riang krub ceu pui Ejiptux, Aux mawh Siyiex pex heue." ⁸ "Viang mawh nan, kix tieh feen mai ang cu nghiet ka Aux, kix ku kaux ang tik ka pa seeing brai pa hoik moh kix ka ngai tix mai ang tik ka riang grang krub haktiex Ejiptux heue." Khaix an Aux keud ti sang klup krax pa song rhawm tix ka piang kix mai kieh krax pa song rhawm tix fah ka piang kix, ka sinax pui Ejiptux heue. ⁹ Viang mawh nan, Aux hoik yuh son min ceu kaux cao tix son ang lai mawh pa salao ka plak sivoe pui tang ceu ka sinax dee ot kix mai jhi tokaux tix kieh kix tawng grawng pa viex Aux kix lih khaing meung Ejiptux heue. ¹⁰ Mawh kheu nan Aux teei kix lih khaing Ejiptux mai viex kix laig ka daux tiag heue. ¹¹ "Aux tawx lox lai beenli tix ka kix mai jhi daux krax daux blawng ka kix, ka pui pa hawt ti yuh awm an, tak yaox tix im ju heue." ¹² Lheu khaing an Aux hoik tawx singaix twah mawh mhai sinax Aux mai kix, sonsang tawng kix ka mawh Aux Siyiex, pa yuh kix singax heue. ¹³ Viang mawh nan, pui Isarelax hoik tieh feen Aux ka daux tiag, kix ang lawng hu ka daux lox lai beenli pa deuh Aux mai hoik thiang ka been pa phan pa deuh Aux, ka pui pa hawt ti yuh awm an tak yaox ti im ju, mai kix hoik kied map ka singaix twah Aux mai ang yungyi ka heue. Khaix an Aux keud tix sang klup krax pa song rhawm tix ka piang kix ka daux tiag sonsang yuh kix laux leeing heue. ¹⁴ Aux hoik yuh son min ceu kaux cao tix, son ang mawh pa salao ka plak sivoe ngai pui tang ceu pa hoik viex Aux pui Isarelax lih khaing kix heue. ¹⁵ Lheu khaing an Aux hoik tiextu ka kix daux tiag, son ang Aux lai viex kix hu ka daux haktiex pa hoik tawx Aux ka kix, pa mawh haktiex dee lih rawm teeih mai rawm hia, pa koe min pakngai khaing haktiex khawmuik, ¹⁶ Mawh kheu hoik thiang kix ka been pa phan pa deuh Aux mai ang lawng hu ka daux lox lai beenli Aux khankix mai hoik map ka singaix twah Aux, mawh kheu rhawm rhi kix hoik hawt khaix riang grang krub kix heue. ¹⁷ Viang yuh nan kawx, ngai Aux kawn lhawk ka kix, Aux ang lai yuh kix laux leeing mai ang kieh kix som nai ka daux tiagtu heue. ¹⁸ "Aux ah nin ka kawn praix kix ka daux tiagtu, paw lai lawng hu ka daux lox lai been miex keeing pex khankix mai paw hawt yuh awm been pa phan pa deuh kix mai paw kieh tokaux pex seeing brai ka riang grang krub kix heue. ¹⁹ Aux mawh Siyiex pex, lawng hu ka daux lox lai beenli pa deuh Aux, yuh satix mai hawt yuh awm been pa phan pa deuh Aux khankix, ²⁰ yungyi ka singaix twah Aux, kieh mawh pa singax mai an tak mawh mhai ruk sinax Aux mai pex, sonsang tawng pex mawh Aux Siyiex pex heue. ²¹ Viang mawh nan, kawn praix kix hoik tieh feen ka Aux, kix ang lawng hu ka daux lox lai beenli pa deuh Aux mai ang yuh satix hawt yuh awm been pa phan pa deuh Aux, ka pui pa hawt ti yuh an tak yaox ti im ju, kix hoik map ka singaix twah Aux heue. Khaix an Aux keud tix sang klup krax song rhawm tix ka piang kix mai kieh pa song rhawm tix fah ka piang kix, ka daux tiagtu heue. ²² Aux deeh yoi taix tix mai hoik yuh son min ceu kaux cao tix son ang mawh pa salao ka sivoe ngai pui tang ceu, ka daux pui Isarelax pa hoik viex Aux lih khaing kix heue. ²³ Aux hoik baox tiextu kix ka daux tiag, sonsang kieh Aux kix prung prang rai ruat ka sinax pui tang ceu mai rhuat kix tah sidah haktiex, ²⁴ Mawh kheu ang kix yuh hawt awm been pa phan pa deuh Aux mai thiang ka lox lai beenli pa deuh Aux mai ang yungyi ka singaix twah Aux mai ngai kix ca jeung ti ka piang riang grang krub keeing kix heue. ²⁵ Mawh kheu nan, Aux tom tawx lox lai beenli pa ang mhawm mai been pa ang mhawm sonsang ang kix lai pon tix im ju, ²⁶ Aux tak kieh kix seeing brai, ka daux pa tan pa lu kix kawn Ai tix ka ngu, sonsang kieh Aux kix tua khwan lwan paux ka mai kix tak tawng mawh Aux Siyiex heue. ²⁷ "Mawh kheu nan kawn pui eue, krai ka nyiex ma pui Isarelax mai ah nin ka kix, Siyiex ah nin, in mawh grawng pa hoik baox nu nai miex keeing pex ka Aux, ka daux pa ang kix kaux sijax ka Aux heue." ²⁸ "Mawh kheu yam hoik viex Aux kix hu ka haktiex pa hoik tiextu Aux sonsang tawx ka kix, yam yaox kix ka gawng lhaong mai ka khaox klai lhax mai kix yuh krax tan son tix tan, sonsang so kix krax song rhawm Aux lih mai kix yuh krax tan nyawng bhawng mai rauk krax tan pa nyaux tix heue." ²⁹ Aux ah nin ka kix, dee lhaong pa hu pex an mawh patix? Mawh kheu nan, kix kok ceu kaux dee an mawh Bama tom hoek in singaix heue. ³⁰ Krai ka nyiex ma ceu pui Isarelax, Siyiex ah nin, mawh ca kawn yuh pex tokaux tix seeing brai awm been pa yuh miex keeing pex mai kawn ca lud loe lud vao ka ceu an khankix lie? ³¹ Yam yuh pex krax tan mai tan kawn simex tix ka daux ngu mai pex seeing yuh tokaux tix ka riang grang krub, tom hoek daux in ngaix heue. Nyiex ma pui Isarelax eue, mawh sang hoek pex tix chawk cheng ka Aux lie? Siyiex ah nin, awm im ju Aux, Aux tak ang kieh pex chawk cheng ka tix heue. ³² "Ceu pa keud pex daux rhawm rhi tix, tak ang lai mawh awm pa keud pex, yix tak sang awm pui tang ceu mai awm pui pa ot ka daux haktiex an, pa krub ka siyiex khaox mai siyiex simaox khankix heue. ³³ Siyiex ah nin, "Awm im ju Aux, Aux tak mawh simiang ka piang pex tau mai taix pa ting riang ka daux pa nyeu ka plawng taix tix, tau mai pa klup tix krax song rhawm ka pex heue. ³⁴ Aux tak viex pex lih khaing daux pui tang ceu mai, khrawm pex lih khaing haktiex kudah ka dee hoik prung prang rai ruat pex khankix, tau mai taix pa kied ting riang, ka daux pa nyeu ka plawng taix tix tau mai pa klup tix krax pa song rhawm tix. ³⁵ Aux tak viex pex hoek ka daux tu ceu pui khankix mai Aux tak prawng ca tau mai pex pakngai taw pakngai. ³⁶ Awm hoik prawng ca Aux tau mai keeing pex ka daux tiag meung Ejiptux, mawh kheu nan Aux tak sang prawng ca tau mai pex, Siyiex ah nan. ³⁷ Aux tak viex pex lailing greem khaox puat mai viex pex laig ka daux pa phyawk ka sijax mukheu, ³⁸ Aux tak tik pui pa tieh feen mai pa lud ka Aux ka daux sinax pex mai Aux tak viex kix lih khaing daux haktiex ka dee paung dee pan kix mai kix tak ang lai yaox ti laig ka daux haktiex Isarelax. Khaix pex tak tawng mawh Aux Siyiex. ³⁹ "Nyiex ma ceu pui Isarelax khankix eue, Siyiex ah nin, hu heue, tang hu krub ka riang grang krub pex ku kaux, phan pex ang cu nghiet ka Aux mai pex tak ang lai yaox tix ah lox salao ka min ceu kaux pa singax singeh Aux tau mai krax tan tix ka riang grang krub pex khankix. ⁴⁰ Siyiex ah nin, nyiex ma ceu pui Isarelax khawmuik tak krub Aux ka piang gawng pa singax singeh Aux mai ka piang gawng pa lhaong Isarelax, Aux tak rieb pex tan mai Aux tak mhaing krax tan lu pex mai khawm plix pa liang ti plix pa hoik laug pex mawh krax tan pa singax singeh. ⁴¹ Aux tak rieb pex, awm nyawng bhawng pa sioe baux, yam viex Aux pex lih khaing sinax ceu pui khankix mai khrawm pex hoek khaing haktiex pa hoik prung prang rairuat pex, mai Aux tak jhi pex yaox ka pa singax singeh tix, kaplak sivoe pui tang ceu. ⁴² Pex tak tawng mawh Aux Siyiex, yam viex Aux pex laig ka haktiex Isarelax pa mawh haktiex pa hoik tiextu Aux ti tawx ka keeing pex khankix. ⁴³ Pex tak dee doh keud ka krax hu tix mai ceu pa seeing yuh tix khankix mai pex tak koeng ka tokaux tix kheu pa seeing tix. ⁴⁴ Nyiex ma pui Isarelax eue, pex tak tawng mawh Aux Siyiex, yam yuh Aux ceu in ka pex, son min ceu kaux cao tix mai pa seeing brai yuh pex, Siyiex ah nan. ⁴⁵ Gumlox Siyiex hoek ka aux ah nin, ⁴⁶ "Kawn pui eue, veeh ngai maix ka see plak seh mai sidiex lox pa ciyang ka pui plak seh mai ah lox jhai pa ciyang ka tiag khaox haktiex plak seh, ⁴⁷ ah nin ka tiag khaox haktiex plak seh, nghiet ka gumlox Siyiex, Siyiex ah nin, jhak heue, Aux tak keeig ngu ka daux maix mai tak proe yuh khaox klai mai khaox kroh ku gawng pa koe ka daux pex mai rao ngu tak ang chix yeet haktiex baoh an khawmuik, jah khaing plak seh tom hoek plak laong tak gleeing khawmuik. ⁴⁸ Kawn pui khawmuik tak yaox mawh Siyiex pa keeig ka an, pui tix kaux kawx ang pon preet ka." ⁴⁹ Khaix an aux ah nin, "Siyiex eue, kix ah nin ka aux, lox pa krai nawh ang mawh ngie lox tiag lie?"

¹ Gumlox Siyiex hoek ka aux ah nin, ² "Kawn pui eue, veeh pakngai maix ka see veng Yerusaliem mai sidiex lox pa ciyang ka dee pa singax singeh mai krai lox jhai pa ciyang ka haktiex Isarelax, ³ mai ah nin ka haktiex Isarelax, Siyiex ah nin, jhak heue, Aux tak mawh pui koeng pex mai lawd vaig tix lih khaing daux gieang mai yuh pui rahsee mai pui ang rahsee khankix laux leeing heue. ⁴ Mawh kheu Aux tak tat ti tik pui rahsee mai pui ang rahsee khaing daux maix, mawh kheu nan, vaig lawm Aux tak sang lih khaing daux gieang tix mai yuh can kawn pui laux leeing, jah khaing plak seh tom hoek plak laong, ⁵ Sonsang tawng kawn pui khankix pa mawh Aux Siyiex, pa lawd vaig khaing daux gieang mai ang lai deeh sau vaig ka daux gieang tix bawg kawx heue. ⁶ Kawn pui eue, ngia ngheeik tau mai pa laux rhawm laux rhi mai pa kin song ka plak sivoe ngai kix heue. ⁷ Yam chawk kix ka maix ah nin, ngia ngheeik maix kheu patix? Maix tak deeh ah nin, mawh kheu grawng lox satang an, yam hoek grawng an, rhawm rhi pui ku kaux, tak sang khrup mai taix caong tak pawng poe mai khwan taug mao mai ngawng tak sang siyaung awm puk pak rawm. Jhak heue, lox satang an hoek mai grum naog, Siyiex ah nan heue. ⁸ Gumlox Siyiex baox hoek ka aux ah nin, ⁹ "Kawn pui eue, krai lox jhai ah nin, Siyiex ah nin vaig tix kre, pa hoik klaing nawh lawm mai hoik awt kieh plang, ¹⁰ hoik klaing lawm sonsang pah pui, hoik awt plang awm pluk plak praix! Sang mawh pa gaux rhawm ex ka lie? Khaox puat kawn simex Aux hoik nu nai ka can khaox khawmuik heue. ¹¹ Hoik ap vaig pa hoik klaing awt kieh plang an sonsang shiao ka, hoik ap vaig pa hoik klaing kieh plang an ka daux taix cao pa pah pui heue. ¹² Kawn pui eue, yiiem grai mai ngia ngheeik ka, mawh kheu in mawh grawng pa sang yuh pui Aux khankix laux leeing mai yuh laux ka cao kaing cao kap pui Isarelax, ceu pa lhat graung khaing vaig an tak hoek ka piang pui Aux, mawh kheu nan tub ka ba viang heue. ¹³ In mawh ceu pa cheuk ti yaox ka pui Aux mai phan kix kawn thiang ti ang doh keud ka phimap tix, ceu in khawmuik tak sang hoek ka piang kix, Siyiex ah nan heue. ¹⁴ Kawn simex kawn pui eue, krai lox jhai mai dieh taix tix mai vaig tak sang hoek ra bawg, loe bawg an mawh vaig pa pah pui, pa mawh vaig pa sang pah pui ting lhaong, pa ot hawt vung viang kix kudah kudee heue. ¹⁵ Sonsang laux rhawm lauxrhi kix, Aux hoik deuh vaig ka siviex veng kix khawmuik mai mawh vaig pa hoik awt plang pa awm pluk plak praix pa ap sonsang pah ka pui heue. ¹⁶ Vaig pa kied lawm eue, mug ka plak khawn dawm, plak khawn gwiex mai ka plak see dee veeh maix tix hu ka heue. ¹⁷ Aux kawx tak tup taix tix tau mai kieh krax song rhawm tix yiien kah, Aux pa mawh Siyiex krai lox in heue." ¹⁸ Gumlox Siyiex baox hoek ka aux mai ah nan, ¹⁹ "Kawn pui eue, mhai ti deuh daux krax ra nyaing sonsang hoek vaig simiang Babulon, krax an ra nyaing tak sang lih khaing daux haktiex tix mu khaing mai sum ti deuh mhai lhak tix mu ka gah krax pa kieh jhi krax hu daux veng." ²⁰ Yuh krax tix nyaing sonsang hoek vaig ka veng Raba ceu pui Amon mai ka haktiex Yudax mai ka veng Yerusaliem pa kaux cong. ²¹ Mawh kheu simiang Babulon cung ka gah krax ting ra nyaing, sonsang tawx sibawk chawk jai, nawh rang reuh ti yaox ka te ak, nawh chawk ka riang grang Terat mai jhak ti yaox ka tawm totiag. ²² Ka daux taix khawn dawm nawh koe te ak sibawk son veng Yerusaliem mai an krai sonsang hu yuh nawh khaox dung mai sonsang kok yo ka lox naing, sonsang dheem siviex veng laux ka khaox dum mai yuh ku tab mai kaong guh veng, ²³ viang mawh nan, lox sibawk an mawh ceu pa giex going pa kieh kix lud, ka kix pa hoik tiextu mai kieh kix doh keud ka ceu pa lud tix, sonsang rhim kix hoek ka daux pa giex laung heue. ²⁴ Mawh kheu nan, Siyiex ah nin, phimap pex hoik plak jhi yaox sidawng pui ku kaux hoik tawng ka phimap pa lud pex, kaing pa yuh maix khankix hoik jhi ka phimap maix, maix tak yaox ti kham ka pa ciyang mai cung tix mai Aux tak ap maix ka daux tawm taix pui koeng maix heue. ²⁵ Maix pa mawh cao kaing cao kap pui Isarelax pa seeing brai eue, bawg yam singaix pa ghoik pa sang ciyang ka pex tak sang hoek, ²⁶ Siyiex ah nin, yah lawk kaing mai peeik mhok khri pex, ceu an tak ang lai baox koe awm sivoe an mai tak sang yaog pui pa tiem mai yeen ka pui pa lhaong khankix heue. ²⁷ Aux tak sang yuh laux leeing, laux leeing, laux leeing mai ceu an tak ang lai baox koe tom sidah hoek pui koe akhwang ti prawng ca rahsee mai Aux tak sang ap ti tawx an ka nawh heue." ²⁸ Maix pa mawh kawn pui eue, krai lox jhai ah nin, Siyiex ah nin son grawng pa dex dawd ka pui Amon mai grawng lox pa salao pa ah nin, vaig tix kre mai vaig tix kre pa hoik klaing tix plang hoik lawd sonsang pah mai vaig pa hoik awt plang awm pluk plak praix mawh sonsang yuh kawn pui laux leeing, ²⁹ riang susai pa yaox pex mawh pa lud mai lox jhai pa krai pex mawh pie lhien, pex mawh pa seeing brai mai mawh pui pa caox caig, bawg yam singaix ghoik pa sang ciyang ka maix hoik hoek mai vaig tak sang hoek ka piang ngawg pui caox heue. ³⁰ Deeh sau vaig daux gieang. Aux tak sang prawng ca maix, ka dee hoik phan Aux maix mai haktiex keh maix heue. ³¹ Aux tak klup krax song rhawm ka piang maix mai Aux tak phlu ngu pa song rhawm tix ka maix mai Aux tak ap maix ka daux tawm taix pui pa lang teung kin yuh krax laux leeing heue. ³² Maix tak mawh khix taung ka ngu, nham maix tak ot ka daux sigreung haktiex, pui tix kaux kawx tak ang lai krai lox in heue.

¹ Gumlox Siyiex hoek ka aux ah nin, ² Maix pa mawh kawn pui eue, mawh hoik khre rien maix sonsang prawng ca ka veng pa naog ka pa pah pui lie? Jhi nawh yaox grawng pa seeing brai yuh nawh khawmuik. ³ Maix tak krai ah nin, Siyiex ah nin, veng pa hoik kieh nham jauh ka sigreung tix mai pa kieh tokaux tix seeing brai ka pa krub riang grang bawg yam singaix maix hoik hoek heue. ⁴ Maix hoik lih ti koe krax lud kheu hoik kieh maix nham jauh mai hoik kieh tokaux tix seeing ka riang grang pa yuh tix, mai hoik kieh bawg yam singaix tix dex mai hoik kieh khix num tix hoek heue. Mawh kheu nan Aux tak kieh pui tang ceu salao ka maix mai kieh meung haktiex khawmuik nu nai ka maix heue. ⁵ "Pui pa ot dee dex mai dee singai khaing maix, tak sang nu nai ka maix, haktiex khawmuik tak sang yuh pa ang cee ang cak ka maix." ⁶ Jhak heue, cub cao kaing cao kap pui Isarelax pa ot ka daux maix ku kaux hoik shiao min sibrawm tix sonsang kieh nham khankix jauh heue. ⁷ Ka daux veng ang lai koe pui pa yungyi ka miex keeing tix daux sigreung maix tix kaux kawx, kix hoik yuh krax tuktiak ka daux sigreung maix, kix hoik yuh pa ang khaw ang caw ka kawn doe mai ka miexmai heue. ⁸ Maix hoik nu nai ka ceu pa singax singeh Aux mai ang yungyi ka singaix twah Aux. ⁹ Ka daux maix koe pui cheeik sonsang kieh nham jauh mai ka daux maix koe pui pa ih priex ka piang gawng mai ka daux sigreung maix koe pui pa yuh pa seeing brai heue. ¹⁰ Ka daux maix koe pui pa lud vao mai moeng keeing tix, ka daux maix koe pui pa khin tix lud vao mai bun pa ang nyang singax kaux heue. ¹¹ Pui tiblah lud vao mai moeng paox plawg tix mai tiblah lud vao yuh pa seeing ka mun tix mai ka daux maix tiblah lud vao ka daux pa khin ka nan tix, pa mawh kawn bun keeing nawh heue. ¹² Ka daux maix koe pui rieb mau cun praok sonsang kieh nham jauh, maix tawx paox plawg tix yaog mau mai teei rao tom nie ka daux pa khin tix mai maix hoik piawm ka Aux, Siyiex ah nan heue. ¹³ Mawh kheu nan jhak heue, Aux dieh taix tix ka rao mau pa pon maix daux pa ang rahsee, pa yuh tix mai ka nham pa hoik jauh ka sigreung maix heue. ¹⁴ Yam prawng ca Aux ka maix mawh koe rhawm pa pon kham geu maix nang lie? Phan ang mawh nan, mawh kawn koe riang rao taix maix lie? Aux mawh Siyiex tak sang yuh awm pa krai tix heue. ¹⁵ Aux tak kieh maix prawng sinax ceu pui mai kieh maix tah hu ku sidah haktiex mai teei ti tik pa caox caig khaing maix heue. ¹⁶ Siyiex leeing ju ah! Maix tak sang yaox ti kham geu krax pa nunai sivoe ngai pui, tak tawng grawng pa mawh Aux Siyiex leeing ju heue. ¹⁷ Gumlox Siyiex hoek ka aux ah nin, ¹⁸ "Kawn pui eue, nyiex ma pui Isarelax hoik lih mawh aing kawn ka plak sivoe Aux, kix mawh tawng lheung, tawng paing, rhiem mai sivun, ka daux sigreung glah ngu, kix lih mawh aing kawn khaing mau heue." ¹⁹ "Siyiex ah nin, mawh kheu hoik lih pex ti mawh aing kawn, jhak heue, Aux tak khrawm pex hoek ka sigreung veng Yerusaliem heue." ²⁰ Awm khrawm pui mau, tawng, rhiem, sivun mai tawng paing khaing sigreung glah ngu mai phlu ngu sonsang rauk lih mawh rawm, awm an, Aux tak khrawm pex hoek ka daux pa song rhawm tix mai ka daux pa meet rhawm tix mai Aux tak sang khrawm pex tan mai tong pex lih mawh rawm heue. ²¹ Aux tak khrawm pex mai phlu ngu krax meet rhawm tix lih ka piang pex mai raug pex lih mawh rawm ka sigreung veng heue. ²² Awm raug mau lih mawh rawm ka daux glah ngu, awm an tak raug pex lih mawh rawm ka daux sigreung an, pex tak tawng grawng mawh Aux Siyiex, pa klup krax meet rhawm tix ka piang pex heue. ²³ Gumlox Siyiex hoek ka aux ah nin, ²⁴ "Kawn pui eue, ah nin ka nawh maix mawh haktiex pa ang singax mai pa ang lhiex lai lih ka daux singaix pa song rhawm heue." ²⁵ Cub cao kaing pa ot sigreung haktiex an khankix riag yo awm sivai sangsi pa kiied ti ih totiag, kix ih kawn pui, kix hoik rhim ti teei sinngao mai kraung khrai pa ting ngawh, kix kieh miexmai koe tom nie ka daux sigreung haktiex an heue. ²⁶ Cao giex kaing li khankix hoik yieh ka lox tat jhawm prawng Aux mai hoik kieh dee singax Aux seeing brai, kix ang lai gwieh ceu pa singax mai ceu pa ang singax khankix siyox, kix ang lai gau pui chix gwieh pa singax mai pa ang singax mai kix hoik veeh pakngai tix khaing singaix twah, sonsang laux min Aux ka sinax kix heue. ²⁷ Cao kaing ka daux sigreung haktiex an, awm sox praix, pa sang kiied ti ih totiag pa kieh nham jah mai kix pah ka pui sonsang magmi tix ka daux pa ang rahsee heue. ²⁸ Cao jhai haktiex an hoik mox phimap tix awm kraix pui tiex phawng pid ka ding mai kix yaox riang susai pa ang mawh meh mai krai lox jhai pie lhien, mawh lox Siyiex, viang mawh nan ang mawh lox krai Siyiex heue. ²⁹ Pui haktiex kawx hoik yuh pa khin, hoik yuh con, mai hoik gut kheem ka pui pa hot sibhawm, pa cud cha, mai kix tuktiak tukte ka nyo sinie daux pa ang rahsee heue. ³⁰ Aux sawg pui tix kaux kaux daux sinax kix, pa sang kaw guh veng mai pa pon cung ka dee grhup guh veng sivoe Aux, sonsang pon tiebtie ka veng an, son ang Aux sang yuh haktiex an laux. Viang mawh nan, Aux ang lai yaox tix kaux kawx heue. ³¹ Mawh kheu nan, Siyiex ah nin, Aux klup krax song rhawm tix ka piang kix, Aux tak gleeing kix ka ngu pa meet rhawm tix, aux deeh kieh phimap kix hoek ka piang kaing kix heue.

¹ Gumlox Siyiex hoek ka aux ah nin, ² "Kawn pui eue, koe bun ra kaux, pa mawh kawn miex tix kaux khaing, ³ Kiex yuh pa lud vao ka haktiex Ejiptux mai kiex yuh pa lud vao yam kawn awn ju tix, pui hoik kloek ka teeih kiex daux meung an mai kieh min plakngai bun krih mawh kiex laux heue. ⁴ Ceu kaux puxke mawh Ahawlax mai ceu kaux pux Ahawlibax. Kiex mawh cie Aux mai kiex khawm ra keh kawn simex kawn bun. ceu kaux kawn Ahawlax mawh Samarix mai ceu kaux kawn bun Ahawlibax mawh Yerusaliem heue." ⁵ Ahawlax yuh bun coh kaux, khawm mawh tix cie Aux mai nawh ghoing rhawm ka paox moh tix pa mawh paox plawg paox nyhawm nawh pui Asurix, ⁶ pa ceep kraung raoh rawt, pa mawh cao kaing naing mai cao kwang haktiex, kix ku kaux kawn mawh nyawm sinaw silao, pa mawh pui naing brung pa brug brung. ⁷ Nawh hoik lud vao mai kix, pa mawh pui laoh lie pa hoik laug khaing haktiex Asurix mai kieh tokaux tix seeing mai riang grang krub tau mai pa kieh tokaux tix ghoing ka kix heue. ⁸ Nawh ang cu ti tik bun pa coh kaux tix awm yam ot nawh daux haktiex Ejiptux, mawh kheu hoik kieh nawh pui it mai tix yam awn ju tix mai hoik kieh min plakngai bun krih mawh tix laux heue. ⁹ Mawh kheu nan, Aux hoik ap nawh, ka daux taix paox moh nawh, pui Asurix, ka pui pa ghoing nawh ka heue. ¹⁰ Kix peeik kraung ceep nawh mai rhim kawn simex kawn bun nawh khankix mai pah nawh yum ka vaig, nawh lih ti mawh pa salao pui ka daux sinax bun khankix, yam prawng ca ka piang nawh heue. ¹¹ Yam yaox pux bun nawh Ahawlibax ka ceu in, nawh nie lheu koe rhawm nie yuh pa caox khaing puxke tix, pa coh kaux tix heue. ¹² Nawh koe rhawm ghoing ka pui Asurix pa ot hawt rawb rim nawh, pa mawh cao kaing naing mai cao kwang haktiex, pa ceep kraung pa kied mhawm grang sinaw pa silao pa mawh pui naing brung pa brug brung khankix heue. ¹³ Aux hoik yaox mawh nawh pa seeing brai, kiex khawm ra hoik hu daux krax pa awm paox tix heue. ¹⁴ Grawng pa nie lheu yuh nawh bun coh kaux ka pui khankix nawh jhak ka riang pa hoik tiiem ti deuh ka piang ding pa mawh riang pui Khaladie pa tiiem ka rawm siang raoh, ¹⁵ pa hoik rawd maox khlax ka nyoi tix mai pa fua lawk kaing ka kaing tix, pa awm grang cao kaing naing, pui Babulon haktiex Khaladie, pa mawh haktiex dee keh kix heue. ¹⁶ Yam yaox nawh ka riang kix, nawh hoik koe rhawm ghoing ka mai ploi pui cau hu ka kix ka haktiex Khaladie heue. ¹⁷ Pui Babulon hoek ka nawh ka piang ku it krax moh mai kix seeing yuh nawh ka daux pa lud vao, kheu hoik yuh kix seeing brai khaix an nawh deeh tieh ti koeng ka kix heue. ¹⁸ Nawh hoik yuh pa coh kaux tix ka daux pa sidawng mai jhi grawng pa ot kaux kaong tix, aux tieh ti deeh koeng ka nawh awm koeng aux ka puxke bun nawh heue. ¹⁹ Nawh doh keud ka yuh bun coh kaux yam awn ju tix ka haktiex Ejiptux mai nawh ca kawn baox yuh bun coh kaux tix bawg hoik tix bawg heue. ²⁰ Nawh koe rhawm ghoing ka paox moh tix, pa koe nex nham awm nex nham la mai pa koe rawm ngang awm brung heue. ²¹ Mawh kheu nan maix ca kawn baox yuh ceu pa seeing brai awm yam kawn awn ju maix, kheu pa kloed pui Ejiptux ka teeh maix, kieh min plakngai maix laux heue. ²² Ahawlibax eue, Siyiex ah nin, "Jhak heue, Aux tak so paox koeng maix kaoh tieh feen ka maix, ka pui pa deeh tieh maix ti seeing ka, aux tak viex kix hoek puing ka maix khaing ku plak, ²³ pui Babulon mai pui Khaladie, pui Pekawdax, pui Shoa pui Kaw-ax mai pui Asurix khankix tau mai kix pui awn ju pa kawn koe rhawm silao mai cao kwang, cao kaing mai pui pa ao min khankix mai pui naing brung, pa brug brung heue. ²⁴ Kix kaoh khaing plak laong hoek puing ka maix, tau mai kraung naing ling lawx brung, tau mai pui kuceu, kix sang hoek yuh naing ka maix, ka plah rhiem tiebtie naing mai plah rhiem tiebtie naing pa iak mai mhok rhiem hawt vung viang maix, Aux tak ap krax prawng ca ka kix mai kix tak prawng ca ka maix, awm koe been kix heue. ²⁵ Aux tak kieh pa boh rhawm koe ka piang maix mai kix tak yuh pa kied kin kha rhawm ka maix. Kix tak sang pat gawng meeh maix mai yhaok maix mai pui pa kawn deuk, tak mug yum ka vaig, kix tak rhim kawn simex kawn bun maix mai pui pa kawn deuk, tak gleeing ka ngu heue. ²⁶ Kix tak peeik kraung ceep maix mai rhim kraung pa laoh lie pa koe ngawh maix heue. ²⁷ Aux tak kieh pa ghoing rhawm maix mai pa coh maix tokaux tix pa viex maix hoek khaing haktiex Ejiptux yiien grai, son ang maix lai simi ka pui Ejiptux mai son ang lai doh keud ka Ejiptux khaix in tix bawg kawx heue. ²⁸ Siyiex ah nin, "Aux tak ap maix ka daux taix pui koeng maix mai ka daux taix pui pa seeing maix ka heue." ²⁹ Kix tak yuh awm koe rhawm koeng tix ka maix mai rhim kraung can pa hoik khrawm maix ti deuh mai kieh maix ot kaux kaong mai kieh pa yuh maix bun coh kaux, pa ghoing rhawm maix, pa lud vao maix sidawng heue. ³⁰ Aux tak yuh ceu in ka maix, kheu jao yuh maix bun coh kaux mai pui tang ceu hoik kieh tokaux tix seeing brai mai riang grang krub kix heue. ³¹ Maix hoik lawng hu daux krax pa hu puxke bun tix, mawh kheu nan, Aux tak ap kawk nyaux nawh ka daux taix maix heue." ³² Siyiex ah nin, "Maix tak yaox ti nyaux kawk nyaux puxke bun maix, pa mawh kawk nyaux pa raux pa ting, maix tak yaox ti kham pa nyiah pa sibriem, mawh kheu laig rawm ka kawk nyaux an tom nie. ³³ Maix tak sak tak yoek mai krax laux rhawm ka kawk nyaux puxke bun maix Samarix, pa mawh kawk nyaux pa laux leeing mai pa lhat graung heue. ³⁴ Maix tak yaox ti nyaux tom uik pak khaing kawk mai teei bliah kawk max an pat ka teeih cao tix mawh kheu Aux mawh Siyiex pa hoik krai ah nan heue. ³⁵ Mawh kheu nan Siyiex ah nin, mawh kheu piawm maix ka Aux mai hoik tik Aux ka plak khaix tix, maix tak yaox ti kham geu phimap, ghoing rhawm mai pa lud vao tix heue. ³⁶ Siyiex ah nin ka aux, "Kawn pui eue, mawh sang khre maix ti prawng ca ka Ahawlax lie? Krai pao grawng pa seeing brai pa yuh kix, ³⁷ mawh kheu kix hoik lud vao mai nham phimap koe ka daux taix kix, tau mai pa lud vao tix mai riang grang krub kix mai gleeing ti tan kawn simex tix pa hoik keh kix son Aux, sonsang mawh pa ih son riang grang krub kix heue. ³⁸ Lheu khaing an kix hoik yuh ceu in ka Aux mai kix yuh dee pa singax Aux seeing brai ka daux tix ngaix khaing mai ang yungyi ka singaix twah Aux heue. ³⁹ Khaix pah kix kawn praix tix tan ka riang krub ka daux tix singaix an, kix hoek laig ka dee pa singax Aux, sonsang yuh seeing brai mai awm an, kix hoik yuh ceu an ka daux greung nyiex bwan Aux heue. ⁴⁰ Lheu khaing an maix ploi cao cau tix hu kok ka simex pa ot dee singai khankix hoek kix kawx hoek mai maix heem tix mai kraix sidah ngai mai jawg khre tokaux tix ka kraung mhawm ka son kix. ⁴¹ Maix ngawm ka piang ku it pa koe min mai deuh pheen tix mu pa deuh nyawng bhawng mai bee cie Aux ka plak sivoe ku an heue. ⁴² Mhong ka lox sinum pa nyawm rhawm pui hun tau mai nawh, pui pa nyaux tom yoek tix khankix pa kaoh khaing daux tiag hoek tau mai pui nyiex pui yaong mai kix cheep ble ka taix bun an kiex mai ceep mhong khri pa mhawm grang ka piang kaing kiex heue. ⁴³ Khaix an Aux ah nin son grawng bun an, mawh kawn sang lud vao pui an khankix tau mai pa yuh bun coh kaux tom rheung bawg yam lie? ⁴⁴ Kix laig ka dee ot nawh, awm laig simex ka dee ot bun coh kaux, awm an kix hoik laig ka dee ot Ahawlax mai Ahawlibax, pa mawh bun koe rhawm kraing an kiex heue. ⁴⁵ Mawh kheu nan pui rahsee tak prawng ca ka bun pa lud vao mai bun pa kieh nham jauh, mawh kheu mawh kix pa lud vao mai nham phimap an tak koe ka piang taix kix heue. ⁴⁶ Siyiex ah nin, "Aux tak viex cub pui hun hoek ka kiex mai tawx akhwang yuh krax kha rhawm mai rhim ka kix heue." ⁴⁷ Cub pui hun an, tak dheem kix ka simaox mai pah kix yum ka vaig, kix tak pah kawn simex kawn bun kix mai keeig nyiex kix ka ngu heue. ⁴⁸ Aux tak kieh rhawm kraing rhawm he kix yiien grai khaing haktiex, sonsang mawh pa tawx satix ka bun mai son ang kix kraing hu awm maix heue. ⁴⁹ Pax ra kaux tak yaox ti kham phimap awm pa koe rhawm kraing tix mai pax tak yaox ti kham geu phimap grawng pa krub tix riang grang mai pex tak tawng ka grawng mawh Aux Siyiex heue.

¹ Ka daux dim num tix num, khix kao, kao ngaix daux khix an, gumlox Siyiex hoek ka aux, ² "Kawn pui eue, mhai ti deuh singaix ing simiang veng Babulon hoik jah ti lai lawm ka veng Yerusaliem ka daux in singaix heue. ³ Krai lox tiag ka nyiex ma pui tieh feen mai ah nin ka kix, Siyiex, pa mawh Siyiex ah nin, tang aw ka piang kiang ngu mai sau rawm ka daux. ⁴ Sau khik nex pa kied mhawm, pa mawh nex ba viang mai nex klip mai si-ang pa kied mhawm ka daux aw an tom naog heue. ⁵ Laug yung pa kied mhawm tix mu, sau si-ang kre aw mai sau nex ka piang, khaix an phlu ngu tom ting sonsang sin si-ang mai nex heue." ⁶ Siyiex ah nin, "Kieh krax kha rhawm koe ka veng pa naog ka nham mai ka aw pa ang sax plok pa ih rhaw mai teei nex lih tix khik hoik tix khik ka daux pa ang yuh nieb kab heue. ⁷ Mawh kheu nham pa hoik kieh nawh jauh kawn koe sigreung veng nawh ang kheem nham an ka phawng tiex mai deuh dee sidawng ka piang rang heue. ⁸ Sonsang mawh an pa pawk Aux bix krax pa song rhawm tix, Aux ang lai kheem ka an mai deuh nham pa hoik kieh nawh jauh an ka dee sidawng piang rang heue. ⁹ Siyiex ah nin, "Kieh krax kha rhawm koe ka veng pa kieh nham jauh, Aux kawx tak khre glah ngu pa ting heue." ¹⁰ Pum ti deuh khix mai phlu ngu ka, ngaik nex kieh klai mhawm mhawm, klu klao ceu pa sioe bhawng mai kieh si-ang gleeing ka heue. ¹¹ Tang aw tawng pa yi ka piang gaox ngu, sonsang gleeing mai kieh pa seeing daux nawh lih mawh rawm mai sonsang singax rawm khaing daux an heue. ¹² Nawh hoik taug ka coca ti yuh, viang mawh nan, rhaw pa kied ting daux nawh, ang chix lih, rhaw an ang cu ti bah singax ka ngu heue. ¹³ Rhaw pa seeing pa koe daux maix mawh pa caox caig, mawh kheu Aux hoik sigrhah ka maix mai maix ang cu tix sigrhah, tom sidah ang pa song rhawm Aux hoek ka piang maix, maix tak ang lai mawh pa sigrhah tix, tix bawg kawx heue. ¹⁴ Aux pa mawh Siyiex hoik krai ti deuh grawng pa sang hoek an mai Aux tak sang yuh awm an, Aux tak ang lai deeh plak khaix mai Aux ang lai lhawk mai ang lai klih kah, Siyiex ah nin, Aux tak mhai ti deuh kaing yuh maix krax hu maix mai Aux tak prawng ca ka maix heue. ¹⁵ Gumlox Siyiex hoek ka aux ah nin, ¹⁶ "Kawn pui eue, jhak heue, Aux tak teei pui pa khaw ka ngai maix yum khaing maix dom mawx dom an, viang mawh nan maix paw khi rhawm paw yiiem mai paw lih rawm ngai ka. ¹⁷ Ngia ngheeik daux pa yiien, paw yiiem doe son pui yum. Ceep lawk kaing mai ceep kiep ka caong maix, paw thox siyieb jheeh maix mai paw ih priex pui yiiem doe." ¹⁸ Mawh kheu nan, Aux hoik krai ka pui plak ponngawb, yam hoek plak ponbo, moeng aux hoik yum mai aux yuh an ngawb ngaix khaix awm pa hoik tawm ka aux heue. ¹⁹ Pui khankix chawk ka aux ah nin, "Mawh ang maix krai grawng pa yuh tix in, koe dee bleeh son yix yuh ka mawx?" ²⁰ Khaix an aux deeh ah nin ka kix, "Gumlox Siyiex hoek ka aux ah nin," ²¹ Krai ka nyiex ma pui Isarelax, Siyiex ah nin, jhak heue, pex yaw rangdi tix ka nyiex bwan an mai ting rhawm kah, pex simie ti simi ka nyiex bwan an mai koe rhawm tix sang fi kah, viang mawh nan, Siyiex tak sang kieh an seeing brai, kawn praix daux nyiex ma pex pa ot ka Yerusaliem pa awn ju khankix Aux tak kieh yum ka daux naing heue. ²² Pex tak yaox ti yuh awm pa hoik yuh Aux, pex tak ang yaox ti thox siyieb jheeh tix mai ang yaox ti ih priex pui pa yiiem doe heue. ²³ Pex tak yaox tix ceep lawk kaing ka kaing tix mai ceep kiep ka caong tix. Pex tak ang yaox tix khi rhawm mai ang yaox tix yiiem. Pex tak krawx rhao kheu phimap tix mai pex tak ra lai ngia ngheeik ka paox tix heue. ²⁴ Awm an Yezakelax tak mawh mhai ka son pex, mai pex tak yaox ti yuh awm can ceu pa yuh nawh. Yam hoek ceu in pex tak tawng ka mawh Aux Siyiex heue. ²⁵ "Maix pa mawh kawn pui eue, Aux tak teei nyiex bwan pa kaux cong kix mai pa yaw kix rangdi mai pa gaux rhawm kix hu singai khaing kix, pa mawh pa simi kix tix jhak mai pa koe rhawm kix tix fi kah heue. Aux tak viex kawn simex kawn bun kix hu singai khaing kix heue. ²⁶ Ka daux singaix an pui pa pon tix glawd tak hoek krai grawng an ka maix heue. ²⁷ Ka daux singaix an, jheeh maix tak baoh mai chix sikah ka sivoe ngai pui pa glawd an maix tak chix sikah mai maix ang lai baox aw. Awm an maix tak mawh mhai ka kix mai kix tak tawng ka mawh Aux Siyiex heue.

¹ Gumlox Siyiex hoek ka aux, ² "Kawn pui eue, veeh ngai tix ka plak pui Amon mai krai lox jhai pa ciyang ka kix heue." ³ Krai ka pui Amon, nghiet ka gumlox Siyiex, Siyiex ah nin, mawh kheu maix ah aha, ka piang dee pa singax singeh Aux, yam hoik seeing brai dee an mai yam yiien pui khaing ka piang haktiex Isarelax mai yam hoik laig pui Yudax ka daux pa giex laung, ⁴ mawh kheu nan, aux tak ap maix ka pui plak lih singaix sonsang mawh sinngao kix mai nawh tak yuh bang ka sinax maix mai kix yuh dee ot daux sinax pex; kix tak ih plix khaox plix ox mai nyaux rawm teeih pex heue. ⁵ Aux tak yuh veng Raba mawh kawg kala-uk mai kieh haktiex Amon mawh dee liang cub yung, khaix an pex tak tawng ka mawh Aux Siyiex heue. ⁶ Siyiex ah nin, mawh kheu dieh pex taix caong tix mai koe krax gaux rhawm tau mai pa boh rhawm boh rhi tix ka haktiex Isarelax, ⁷ mawh kheu nan, Aux tak nyeu taix tix mai puing ka pex, mai tak ap pui tang ceu tud rhim ka pex, Aux tak sang tat ti tik pex khaing ceu pui khankix mai tak yuh pex grai krup khaing haktiex, Aux tak yuh pex laux leeing mai pex tak tawng ka mawh Aux Siyiex heue. ⁸ Siyiex ah nin, "Mawh kheu haktiex Mawbax mai veng Sirax ah nin, jhak heue, nyiex ma pui Yudax hoik awm pui tang ceu, ⁹ Mawh kheu nan jhak heue, Aux tak yuh veng pa koe rawb rim mee haktiex Mawbax pa mawh veng pa koe min sibrawm pa mawh veng Bietyeshimot, veng Balameon mai veng Kiriyatem khankix laux leeing heue. ¹⁰ Aux tak ap haktiex an ka ceu pui Amon ka pui pa ot plak lih singaix sonsang mawh sinngao cie kix, son ang lai deeh doh keud ka ceu pui Amon ka sinax meung haktiex heue. ¹¹ Aux tak prawng ca ka piang haktiex Mawbax mai kix tak tawng ka mawh Aux Siyiex heue." ¹² Siyiex ah nin, "Mawh kheu haktiex Edom dee pawk bix tix ka nyiex ma ceu pui Yudax, ka daux pa kin lang teung yuh tix mai krax pawk bix ka pa lud kix deeh hoek ka piang pui Edom, ¹³ mawh kheu nan Siyiex ah nin, Aux tak nyeu taix tix mai puing ka Edom mai tat ti tik pui mai to brie khaing Edom, mai yuh haktiex an mawh dee yiien pui, jah khaing veng Teman tom hoek ka veng Dedan kix tak goh gup ka lawm vaig heue. ¹⁴ Aux tak kieh taix pui Aux Isarelax deeh pawk bix ka haktiex Edom mai kix tak pawk bix tix ka pui Edom ka pa kied song rhawm mai ka pa kied meet rhawm cie Aux ka piang kix mai kix tak tawng ka mawh Aux pa pawk bix tix, Siyiex ah nan heue." ¹⁵ Siyiex ah nin, "Mawh kheu pui Philitix koe rhawm ti deeh pawk bix ka pui pa koeng nawh ka, ka daux pa kin lang teung yuh tix krax pa laux leeing, ¹⁶ mawh kheu nan, Siyiex ah nin, Aux tak nyeu taix tix puing ka pui Philitix mai Aux tak tat ti tik pui Kheratix mai pui pa deuk praok rawm sigrit sigra khankix laux leeing heue. ¹⁷ Aux tak viex krax pawk bix pa ting lhaong hoek ka piang kix tau mai ciyang kix ka daux pa kied song rhawm tix mai kix tak tawng ka mawh Aux Siyiex pa pawk bix tix ka piang kix heue.

¹ Ka daux kao tix num tix num, ka daux khix tix, tix ngaix, gumlox Siyiex hoek ka aux ah nin, ² "Kawn pui eue, mawh kheu veng Turux hoik ah, ha ha ka pa dex dawd mai Yerusaliem, nawh pa mawh siviex veng pui ku meung hoik laux leeing, nawh hoik veeh tix hoek ka aux, veng an hoik mawh dee yiien mai aux tak mawh pa haok hwan," ³ mawh kheu nan, Siyiex ah nin, "Veng Turux eue, jhak heue, Aux sang puing ka maix, awm haktiex puk pak rawm sigrit sigra Aux tak viex pui kuceu hoek puing ka maix, ⁴ mai kix tak yuh guh veng Turux laux mai yieh nyiex pau dee lhaong kix grhup, Aux tak khut tiex lih khaing veng an mai kieh deuk lon simaox giex heue." ⁵ "Veng an tak mawh dee hok pui rub ka daux greung rawm sigrit sigra, Siyiex ah nin, mawh kheu Aux hoik grux krai, veng an tak sang mawh dee pa tud rhim ceu pui khankix, ⁶ kawn bun nawh pa ot daux haktiex khankix kawx tak yaox ti yum ka lawm vaig mai kix tak tawng ka mawh Aux Siyiex heue." ⁷ Siyiex ah nin, "Jhak heue, Aux tak viex Nebukhaneza simiang veng Babulon, pa mawh simiang piang simiang, tau mai brung, ling lawx naing brung mai cub kru naing khankix tom nie, pa kaoh khaing plak laong hoek ka veng Turux heue." ⁸ Nawh tak pah kawn bun maix pa ot ka daux veng khankix ka lawm vaig, nawh tak pum tiex kaw guh veng sonsang puing ka maix mai yuh tab sonsang tiebtie ka maix mai yaog braux nyiex kieh mawh plah tiebtie mai puing ka maix heue. ⁹ Nawh tak yuh khaox dung ting khankix sonsang yuh guh veng maix laux mai kaong nyiex tab lhaong maix khankix grhup ka sibeet heue. ¹⁰ Kheu jao kied nie brung nawh, phawng tiex khaix caong brung kheem ka maix, guh veng maix tak yung yang ka lox sinum pui naing brung mai ling lawx tang kraung mai ling lawx naing brung, yam laig nawh ka siviex veng maix, awm laig pui ka daux guh veng pa grhup pa doh heue. ¹¹ Kloh brung tak dig krax hu maix khawmuik, nawh tak pah pui maix yum ka lawm vaig mai rong simaox riang grang pa krub maix khankix tak grhup ka piang tiex heue. ¹² Kix tak tud rhim ka sinngao maix mai kraung lai geu maix, kix tak yieh guh veng maix mai yuh nyiex mhawm grang maix laux, kix tak teei ti tik rong simaox maix khaox maix mai tiex maix khankix ka sigreung rawm heue. ¹³ Aux tak kieh lai rhax ah maix yiien mai ang lai kieh pui mhong ka lox ting tah maix tix bawg kawx heue. ¹⁴ Aux tak kieh maix mawh tiag simaox dee hok pui rub mai maix tak ang chix pang chix sum tix bawg kawx, mawh kheu Siyiex pa mawh Siyiex hoik grux krai ah nan heue. ¹⁵ "Siyiex ah nin ka grawng pa dex dawd ka veng Turux pui pa ot ka baoh haktiex rawm sigrit sigra khankix tak siyaung ka lox sinum pa grhup maix, yam riag yo pui mat mai yam hoek ceu pa pah yum ka daux sigreung maix lie?" ¹⁶ Simiang rawm sigrit sigra khankix khawmuik, tak lih khaing dang ngeung tix mai peeik sibex lang jung ceep tix mai kraung ceep pa mhawm grang tix mai deeh ceep ka kraung ceu pa lhat graung, kix tak ngawm ka piang tiex mai koe krax lhat graung mai daox deng ka maix heue. ¹⁷ Kix tak yiiem doe ka son maix ah nin, veng pa ao min eue, veng pa kaux cong daux rawm sigrit sigra pa yungyi pui ka maix hoik laux leeing, mawh kheu kieh maix pui pa ot baoh rawm sigrit sigra lhat graung. ¹⁸ Yam in klawn tiex tak siyaung, daux singaix goh grhup maix, klawn tiex daux rawm sigrit sigra hoik daox deng ka yam grai grup maix heue. ¹⁹ Siyiex ah nin, "Yam yuh Aux maix mawh veng pa laux leeing mai dee yiien pui, yam viex Aux rawm sigrit sigra pa kied raux mai puk pak rawm ting hoek kheem ka piang maix, ²⁰ Aux tak sang viex maix lih hu daux meung yum tau mai pui dawg yum didix mai Aux tak kieh maix ot ka daux meung yum greem haktiex, ka dee pa yiien pui ka dee ot pui dawg yum di dix, pui son ang maix lai yaox ti im ju tau mai pui pa ot ka piang haktiex, mawh kheu nan, Aux tak kieh min sibrawm ot ka haktiex pui im ju heue. ²¹ Aux tak kieh ceu pa kin lhat graung maix ang koe dee deek maix tak ang lai koe khaix in tix bawg kawx, viang pui sawg maix kawx, pui tak ang lai yaox ka maix tix bawg kawx, Siyiex ah nan heue."

¹ Gumlox Siyiex hoek ka aux ah nin, ² "Kawn pui eue, yiiem grai son veng Turux, ³ mai ah nin ka veng Turux, pui pa ot diang laig rawm sigrit sigra mai pa mawh cao yuh lai geu tau mai pui pa ot ka klawn tiex, Siyiex ah nin, veng Turux eue, maix hoik ah nin, Aux hoik grum naog ka daux pa mhawm grang heue." ⁴ Mee haktiex maix koe ka daux rawm sigrit sigra, cao pa sum ka maix hoik kieh maix grum naog ka pa mhawm grang heue. ⁵ Kix yuh reu maix ka phya khaox gix pa kaoh khaing gawng Senira, kix yuh rong man reu ka khaox piak van pa kaoh khaing gawng Lebanon, ⁶ kix yuh khaox vai reu maix ka khaox tiah pa kaoh khaing Bashan, kix yuh phya tawm ka khaox gix kaoh khaing Saiprat mai bre ka plak daux nawh ka nga sang heue. ⁷ Pex yuh man reu ka man taing mhawm pa kaoh khaing haktiex Ejiptux, pex yuh braux plak daux ka man klai raoma mai ka man raoh rawt, pa kaoh khaing haktiex Elisha heue. ⁸ Pui veng Sidom mai veng Aravat, mawh pui vai reu maix, veng Turux eue, pui koe pingnya cuyi daux maix mawh cao phat reu maix heue. ⁹ Pui cheung pa koe pingnya cuyi cao yuh reu khankix mawh pui chix khaox pa kaoh khaing Babulon, reu sang phaw daux rawm sigrit sigra mai pui yuh kaing reu khankix, kix mawh pa yuh lai geu mai maix heue. ¹⁰ "Pui Pasha pui Lidayax mai pui Libiyax hoek yuh lien maix, ka daux kru naing maix mai kix fak plah rhiem tiebtie mai mhok rhiem ka daux tab maix, kix hoik kieh min plakngai maix koe heue. ¹¹ Pui veng Aravat mawh lien pau guh veng maix mai cub kru naing Gamada mawh cao pau nyiex pau tab lhaong maix mai kix fak plah rhiem tiebtie ka hawt vung viang guh veng, kix hoik kieh pa mhawm grang maix grum naog heue." ¹² Veng Tasux mawh cao yuh lai geu mai maix, mawh kheu kied magmi maix ka kraung mhawm pa kied koe ngawh koe jum kuceu, kix hoek loh mau, rhiem, tawng paing mai sivun ka kraung maix heue. ¹³ Veng Yavan, veng Tubalax mai veng Meshiet hoik yuh lai geu mai maix, kix loh pui siliex mai pan tawng lheng ka kraung cie maix heue. ¹⁴ Pui Biettawgamax loh kraung cie maix ka brung tang kraung, brung pui naing mai la khankix heue. ¹⁵ Pui veng Dedan mawh cao yuh lai geu mai maix, pui pa ot ka daux klawn tiex yuh lai geu nga sang mai khaox koe ngawh koe jum mai rung totiag khankix hoek loh ka kraung maix heue. ¹⁶ Haktiex Surix mawh pui yuh lai geu mai maix, kheu kied haoh kraung pa koe ngawh koe jum daux maix, kix hoek loh simaox siang raoh rawt, man klai raoma mai man pa koe rawm siang kuceu, man ceu pa mhawm, simaox siang paing mai simaox siang pa raoh khankix ka kraung cie maix heue. ¹⁷ Haktiex Yudax mai haktiex Isarelax mawh paox yuh lai geu maix, kix hoek loh diang lai geu pa koe tix pa mawh nghox ca, pa kaoh khaing veng Minit mai peeh khaox sidah Muran, rawm hia, bee mai peeh khaox Balasam ka kraung maix heue. ¹⁸ Veng Damasekat mawh paox yuh lai geu maix, kheu kied haoh hun kraung pa koe ngawh koe jum maix, kheu kied magmi maix ka kuceu mai kix hoek loh rawm plix siiet Helabon mai hauk yung paing ka kraung maix heue. ¹⁹ Veng Dedan mai haktiex Yavan hoek loh rawm plix siiet, gawng rhiem pa hoik raug tix khankix mai miex rhiem, khaox cai hung mai ox mex ka kraung khrai maix heue. ²⁰ Veng Dedan mawh cao yuh lai geu man an brug mai maix heue. ²¹ Haktiex Arebiya mai cao kaing cao kap haktiex Keda khankix mawh cao yuh lai geu mai maix sijheeng, kix viex kawn yung, yung mhaing mai pex hoek loh ka kraung maix heue. ²² Haktiex Sheba mai haktiex Rama mawh cao yuh lai geu mai maix, kix hoik loh sidah bhawng pa kied mhawm, simaox siang pa koe ngawh koe jum mai khri ka kraung pa koe maix heue. ²³ Veng Haran, veng Khanie mai veng Eden mai cao lai haktiex Sheba Asurix mai Khilamat mawh cao yuh lai geu mai maix heue. ²⁴ Cao lai khankix viex kraung pa ao min kuceu, pa mawh man klai raoma, kraung ceep pa bre ti yuh ka keei rawm rawn kuceu, kraung mhawm grang pa plaik ka keei kuceu, pa hoik klung kliien tix ka maox pa kaux, pa cong pa hoik koe ka daux bang lai maix heue. ²⁵ Reu ting veng Tasux hoik tang kraung diang lai maix, maix hoik grum naog mai hoik kied koe min sibrawm ka daux greung rawm sigrit sigra heue. ²⁶ Cao vai reu maix viex maix hu ka dee pa kied raux rawm sigrit sigra, bhaung pa kaoh khaing plak lih singaix hoik klah maix laux leeing ka sigreung rawm sigrit sigra heue. ²⁷ Krax magmi maix, kraung khrai maix mai diang lai maix, cao yuh kaing reu maix mai cao thong krax reu maix, cao cox kraung reu mai cao lai cao geu maix mai pui naing maix khankix mai cub caw pui maix pa ot tau mai maix khawmuik, tak com ka daux sigreung rawm sigrit sigra, daux singaix yam hoek maix krax laux leeing heue. ²⁸ Haktiex baoh an hoik yung yang ka lox sinum riag yo cao thong krax reu maix, ²⁹ cao pa giex khaox vai reu mai pui brug reu ting maix mai pui thong krax reu daux rawm sigrit sigra khawmuik, tak lih khaing daux reu mai cung ka caong raog, ³⁰ Kix tak yiiem doe sigrien sigre ka son maix mai hoik rhuat phawng tiex ka piang kaing tix mai lu lieh tix ka daux nyaox, ³¹ kix khlao hauk kaing tix mai fua tokaux tix ka chee rhix mai kix yiiem doe sigrien sigre heue. ³² Kix pao lox yiiem tix ka daux pa yiiem doe tix ka son maix mai mawh veng pa yuh ka mawx pa laux leeing awm veng Turux ka sigreung rawm sigrit sigra lie? ³³ Yam hoek diang lai maix khaing rawm sigrit sigra mai hoik kieh pui tom nie fah rhawm ka mai simiang haktiex hoik magmi ka kraung khrai diang lai pa kied mhawm grang cie maix heue. ³⁴ Yam in maix hoik laux leeing daux rawm sigrit sigra mai hoik com ka daux rawm dee kied raux, diang lai maix mai cub caw maix khawmuik hoik som nai tau mai maix heue. ³⁵ Can pui pa ot ka klawn tiex khawmuik, tak daox deng ka sipiag maix, simiang khankix tak lhat graung mai pruh hauk haw mai laux pakngai tix heue. ³⁶ Cao lai cao geu ka sinax pui khankix tak sibriem ka maix, krax lhat graung maix tak ang koe dee die maix tak ang lai koe khaix in leeing ju tix bawg kawx heue.

¹ Gumlox Siyiex hoek ka aux ah nin, ² Kawn pui eue, krai ka cao kaing cao kap veng Turux, Siyiex ah nin, "Mawh kheu koe rhawm rhi yaw pex rangdi tix mai maix ah nin, aux mawh Siyiex tix kaux, aux ngawm ka piang dang ngeung Siyiex ka sigreung rawm sigrit sigra mai ang mawh Siyiex, viang maix hoik keud tokaux tix awm Siyiex kawx maix mawh kawn pui mai ang mawh Siyiex, ³ maix mawh pa lheu koe pingnya khaing Dayelax, ceu pa mox glip son ang maix sang tawng ang koe tix ceu kawx, ⁴ maix pon krax magmi sinngao cuyi mai krax tawng yung tix maix hoik khrawm mau khri daux krao sinngao tix, ⁵ kheu krax pa kied koe pingnya cuyi maix, maix hoik kied magmi ka pa yuh lai geu mai rhawm maix hoik koe pa yaw rangdi kheu an khankix heue." ⁶ Mawh kheu nan, Siyiex ah nin, "Mawh kheu hoik deuh maix rhawm tix, awm Siyiex tix kaux, ⁷ mawh kheu nan, jhak heue, Aux tak sang viex pui tang ceu pa mawh pa kied koe krax lhat graung hoek ka maix mai kix tak lawd vaig tix mug ka pa mhawm grang pingnya maix mai yuh min plakngai maix laux heue. ⁸ Kix tak sau maix ka daux tiex mai maix tak yaox tix yum ka pa pah pui tix, ka daux sigreung rawm sigrit sigra heue. ⁹ Mawh kawn sang ah maix aux mawh Siyiex ka plak sivoe pa pah maix yum lie? Viang mawh nan maix mawh ngie pui tix kaux mai ang mawh Siyiex, ka daux taix pui pah maix yum heue. ¹⁰ Maix tak yum awm yum pui pa ang nyang pat hak, ka daux taix pui tang ceu, mawh kheu Aux Siyiex hoik krai ah nin heue." ¹¹ Gumlox Siyiex baox hoek ka aux ah nin, ¹² Kawn pui eue, yiiem doe son simiang veng Turux ah nin, Siyiex ah nin, "Maix hoik mawh cum pa grum naog pa naog ka pingnya cuyi mai pa grum naog ka pa mhawm grang heue. ¹³ Maix hoik ot ka daux Eden sipeem Siyiex maix hoik ceep siang simaox pa laoh lie kuceu ka kaing tix, pa mawh siang simaox raoh, siang simaox pa raoh eem mai siang simaox pa kiien, siang simaox klai paing siang simaox bawd raoh paing pau mai siang simaox pa toh riang kuceu, siang simaox pa klai singi mai siang simaox klai sim tau mai khri, ting plah khaox mai lawk leh pa yuh ka khri khankix hoik khre ti deuh son maix, ka daux singaix pa hoik phan hoik deuh maix heue. ¹⁴ Maix mawh Cherubin pa hoik groi rawm bee ka piang mai pa sang tawb veei tix, hoik deuh maix ot ka piang gawng pa singax singeh Siyiex, mai lailing ka daux sigreung simaox pa rup ngu heue. ¹⁵ Maix hoik mawh pa grum naog ka daux pa yuh tix khankix jah khaing singaix hoik phan hoik deuh maix, tom hoek yam hoik sidawng yaox ka phimap ka daux maix heue." ¹⁶ Mawh kheu kied nie diang lai yuh maix, maix hoik lih mawh pa naog ka pa kin pa khreeing brai mai pa yuh phimap, mawh kheu nan, jao pa caox caig maix, Aux hoik grheu maix lih khaing gawng Siyiex, Cherubin, pa koe krax pa tawb veei eue, Aux hoik yuh maix laux leeing khaing daux sigreung simaox pa rup ngu heue. ¹⁷ Rhawm rhi maix hoik yaog tix ting kheu jao pa mhawm grang tix, maix hoik kieh pingnya cuyi mai min pa haok hwan laux yuh tix, Aux tak yeen maix tiem tom cux tiex, Aux hoik deuh maix ka plak sivoe simiang khankix, sonsang jhak mai mawh mhai ka son kix heue. ¹⁸ Maix hoik seeing yuh dee pa singax singeh kheu jao pa kied nie phimap tix mai ang rahsee ka daux pa yuh tix lai geu mai Aux keeig ngu sigreung maix mai gleeing ka maix mai Aux kieh maix mawh nyaox ka piang tiex, ka plak sivoe ngai pui pa hoik yaox ka maix heue. ¹⁹ Pui pa hoik tawng ka maix khankix tak koe krax daox deng ka maix, maix tak lih mawh dee pa lhat graung mai tak ang lai baox koe khaix in tix bawg kawx leeing ju heue. ²⁰ Gumlox Siyiex hoek bleeh ka aux ah nin, ²¹ Kawn pui eue, veeh ngai maix ka plak veng Sidom mai krai lox jhai grawng pa yuh laux ka nawh, ²² ah nin, Siyiex ah nin, "veng Sidom eue, jhak heue, Aux tak yuh maix laux, Aux tak kieh min sibrawm pa ting lhaong lih sigreung maix yam prawng ca Aux ka daux nawh, mai lih mawh pa koe krax nab yam ka Aux ka daux nawh mai kix tak tawng ka mawh Aux Siyiex heue. ²³ Aux tak ploi jhawm saux preng hoek ka piang nawh mai kieh nham lih ka piang krax hu nawh, yam goh pui mat ka vaig pa mug hoek khaing ku plak sigreung nawh, khaix an, kix tak tawng ka mawh Aux Siyiex heue. ²⁴ Ngu khaox pa sang sideeing ang ah mai pang kat pa sang dung tix ang ah, tak ang lai koe ka son pui Isarelax khaix in tix bawg kawx, khaing daux sinax pui pa ot rawb rim kix khawmuik mai pa ah lox pa sibriem ka kix, khaix an, kix tak tawng ka mawh Aux Siyiex heue." ²⁵ Siyiex ah nin, "Yam kraix khrawm Aux ceu pui Isarelax pa prung prangtix ot ka daux sinax pui kuceu mai Aux tak mawh pa koe krax nab krax yam kheu kix, ka plak sivoe pui tang ceu mai kix tak ot ka daux haktiex pa hoik tawx Aux ka kawncau Aux Yakop heue. ²⁶ Kix tak yaox ti ot yiien yawg tan mai sum nyiex sum sipeem plix siiet, kix tak sang yaox ti ot ka daux krax pa yiien, yam prawng ca Aux ka piang pui pa ot vung viang kix, pa yuh pa ang cee ang cak ka kix, khaix an, kix tak tawng ka mawh Aux Siyiex heue."

¹ Yam hoik hoek kao num tix num, daux khix kao, kao ra ngaix, gumlox Siyiex hoek ka aux ah nin, ² "Kawn pui eue, veeh ngai maix ka plak Pharaw meung Ejiptux mai krai lox jhai grawng pa ciyang ka piang nawh mai ka piang meung Ejiptux khawmuik heue." ³ Krai ah nin, Siyiex ah nin, Pharaw simiang meung Ejiptux, pa mawh goe rawm ting pa ot ka daux sigreung rawm klawng eue maix ah nin, rawm klawng Nilax mawh cie aux mai aux phan ti deuh ka son tix, jhak heue, Aux ciyang ka maix heue. ⁴ Aux tak teei miiet mai feuk ka kap maix mai kieh kax ot daux rawm klawng maix khankix klieb ka sibriak maix mai Aux tak teei maix lih khaing sigreung rawm klawng maix mai kax pa koe ka daux rawm klawng maix tak sang klieb tix ka sibriak maix heue. ⁵ Aux tak prah tak grham pex ka daux tiag maix mai kax pa koe ka daux rawm klawng maix khawmuik, cod ka daux lung mai ang lai koe pui khrawm sipaung ka maix, Aux hoik ap maix mawh priex ih totiag ka piang haktiex mai sim raoma heue. ⁶ Khaix an can pui pa ot ka daux meung Ejiptux, tak tawng ka mawh Aux Siyiex, mawh kheu mawh maix khaox gix, priem ka nyiex ma ceu pui Isarelax heue. ⁷ "Yam teei kix taix tix giex ka maix, maix hoik graig mai hoik kieh klip kix khluik, yam neung kix tix piang maix mai hoik pot mai hoik kieh nyoi kix saux heue." ⁸ Siyiex ah nin Aux tak sang viex vaig hoek ka piang maix mai tat ti tik pui mai totiag khaing maix, ⁹ haktiex Ejiptux, tak sang lih mawh dee yiien mai dee pa laux leeing, khaix an, kix tak tawng ka mawh Aux Siyiex. Kheu jao hoik ah maix nin, rawm klawng Nilax mawh cie aux, aux phan deuh ka son tix, ¹⁰ Aux tak mawh pui koeng ka maix mai ka rawm klawng maix mai Aux tak kieh haktiex Ejiptux laux leeing mai mawh dee yiien khawmuik, jah khaing veng Migadawlax tom hoek ka veng Sune, tom sidah hoek ka mee haktiex Ethiopia heue. ¹¹ Ka daux tixpon num ang lai koe caong pui lailing ka daux nawh mai ang lai koe caong totiag pa lailing ka daux nawh mai ang lai mawh haktiex dee ot pui ka daux nawh tix kaux kawx heue. ¹² Aux tak kieh haktiex Ejiptux mawh dee yiien pui ka daux sinax haktiex dee pa yiien khankix, mai veng an tak yiien tixpon num ka daux sinax veng pa laux leeing mai Aux tak kieh pui Ejiptux prung prang sinax ceu pui khankix mai kieh kix prung prang ka daux haktiex heue. ¹³ Siyiex ah nin, "Yam hoik sidah tixpon num Aux tak deeh khrawm pui Ejiptux, khaing sinax pui pa hoik prung prang kix tix ot, ¹⁴ Aux tak dee viex pui pa giex laung pui Ejiptux khankix deeh hoek mai kieh kix deeh ing hoek ka haktiex cao kix Patarot mai kix tak mawh meung haktiex pa tiem son tan heue. ¹⁵ An tak mawh meung haktiex pa kied tiem son khaing meung haktiex an mai ang lai pon yaog kaing tix ka piang ceu pui khaix in tix bawg kawx, Aux tak kieh kix iak riang mai ang lai pon kwang ka piang ceu pui khankix tix bawg kawx heue. ¹⁶ Nyiex ma ceu pui Isarelax tak ang lai een rhawm tix ka kix son krax teem mai kieh kix deeh doh keud ka phimap pa caox caig pa hoik yuh tix, yam deuh kix rhawm tix ka pui Ejiptux. Khaix an kix tak tawng ka mawh Aux Siyiex heue." ¹⁷ Yam hoek ka daux tixnga aliah num ka daux khix tix, tix ngaix, ka daux khix an, gumlox Siyiex hoek ka aux, ¹⁸ "Kawn pui eue, Nebukhaneza simiang Babulon hoik kieh cub krung naing sau riang ti puing ka veng Turux, pui naing ku kaux hoik pak kaing mai klaoh klip ka, viang yuh nan kawx nawh mai kru naing nawh khankix ang lai pon ngawh riang tidtix ka puing tix Turux heue. ¹⁹ Mawh kheu nan, Siyiex ah nin, Aux tak ap haktiex Ejiptux ka Nebukhaneza simiang Babulon mai nawh tak rhim sinngao maix hu mai viex kraung pa tud rhim tix khankix mai rhim ti teei tawx ngawh riang pui naing tix ka heue. ²⁰ Aux hoik tawx meung Ejiptux ka nawh son ngawh riang yuh nawh kaing, mawh kheu kix hoik yuh kaing ka son Aux, Siyiex ah nan heue. ²¹ Ka daux ngaix an, Aux tak kieh nyiex ma ceu pui Isarelax kuah rung mai Aux tak paoh jheeh maix sonsang sidiex gau maix ka daux sinax kix. Khaix an kix tak tawng ka mawh Aux Siyiex heue."

¹ Gumlox Siyiex hoek ka aux ah nin, ² "Kawn pui eue, krai lox jhai ah nin, Siyiex ah nin, alo ngaix pa sang hoek mawh ngaix pa kied ting koe krax pa laux rhawm heue. ³ Mawh kheu singaix an hoik dex, singaix Siyiex kawx hoik dex, singaix an, tak sang mawh singaix ceep paiawm, mawh bawg yam pa tat ti deuh son ceu pui khawmuik. ⁴ Vaig lawm tak sang hoek ka piang meung Ejiptux mai pa kied khi rhawm tak koe ka haktiex Ethiopia, yam koe ceu pa pah yum ka daux haktiex Ejiptux mai kix tak viex sinngao nawh hu mai raig jhong num nawh laux leeing heue. ⁵ Pui haktiex Ethiopia mai Putix mai Ludix mai Arabia khawmuik mai Libia mai pui pa yuh paox pie tau mai kix tak goh gup ka lawm vaig tau mai pui Ejiptux heue." ⁶ Siyiex ah nin, "Pui pa joh jhan ka haktiex Ejiptux, tak goh gup mai min plakngai sibrawm pa yaw nawh rangdi tix tak grhup, jah khaing veng Migadawlax tom hoek ka veng Sune, pui pa ot ka daux nawh khankix, tak goh gup ka vaig, Siyiex ah nan heue." ⁷ Nawh tak mawh dee pa yiien ka daux sigreung haktiex dee pa yiien mai veng nawh khankix tak ot ka daux sigreung pa laux leeing heue. ⁸ Khaix an kix tak tawng ka mawh Aux Siyiex, yam cux Aux ngu ka meung Ejiptux mai pui pa teem ka nawh tak laux leeing khawmuik heue. ⁹ "Ka daux ngaix an, cao cau pa ploi Aux khankix, tak brug reu ting, sonsang hu krai ka pui Ethiopia pa ang tawng ti koe krax khi glawh mai krax khi rhawm pa kied ting, tak sang hoek ka piang kix, awm ngaix laux leeing meung Ejiptux, mawh kheu ngaix an hoik dex heue. ¹⁰ Siyiex ah nin, "Aux tak tat sinngao meung Ejiptux grai grup ka taix Nebukhaneza simiang Babulon heue. ¹¹ Nawh mai pui nawh khankix, pa mawh ceu pui pa kied koe krax lhat graung pui ka, tak hoek sonsang yuh haktiex an laux leeing, kix tak lawd vaig tix yuh laux ka meung Ejiptux mai haktiex hoik naog ka pui yum heue. ¹² Aux tak kieh rawm klawng Nilax hit mai coh haktiex ka daux tawm taix pui pa caox caig, Aux tak kieh haktiex an mai can pa koe daux nawh mawh dee yiien ka taix pui tang meung, Aux pa mawh Siyiex ah nan heue." ¹³ Siyiex ah nin, "Aux tak sang yuh riang grang krub laux leeing mai tat ti tik riang grang raug grai ka daux haktiex Nawphax, ang lai koe cao kaing cao kap ka daux haktiex Ejiptux khaix in tix bawg kawx, Aux tak kieh krax lhat graung koe ka daux haktiex Ejiptux heue. ¹⁴ Aux tak kieh haktiex Patarot deeh yiien mai tak cux ngu ka veng Zawna mai prawng ca ka veng Thebit heue. ¹⁵ Aux tak klup krax song rhawm ka piang veng Pelushem, pa mawh pa ting riang haktiex Ejiptux, Aux tak tat ti tik pui veng Thebit khankix. ¹⁶ Aux tak cux ngu ka haktiex Ejiptux, veng Pelushem tak pub krax kha rhawm pa kied ting, Thebit tak grhup mai guh veng Nawphax tak kham pa puing pui koeng tix ponngaix heue. ¹⁷ Pui awn ju veng Avin mai veng Pebesiet, tak goh ka lawm vaig mai bun khankix tak mawh pa giex laung heue. ¹⁸ Ka daux veng Taphaniet, ponngaix tak lih tix faik, yam raig Aux ti tik krong pliah haktiex Ejiptux mai riang rao min plakngai nawh kieh yiien, paiawm tak sang kheem ka nawh mai kawn bun nawh tak mawh pa giex laung heue. ¹⁹ Awm an, yam prawng ca Aux ka phimap meung Ejiptux, khaix an, kix tak tawng ka mawh Aux Siyiex heue." ²⁰ Yam hoek ka daux kao tix num tix num, daux khix jah, aliah ngaix, gumlox Siyiex hoek ka aux ah nin, ²¹ "Kawn pui eue, Aux hoik raig ti tik plawng taix Pharaw meung Ejiptux ang koe sidah pa cox kie, ang koe man pa pua ka, sonsang deeh koe riang awm yam jah mai sonsang pon giex vaig heue." ²² Mawh kheu Siyiex ah nin, "Jhak heue, Aux yuh Pharaw meung Ejiptux laux mai tak raig plawng taix pa kaux cong nawh an tix khawn mai pa hoik graig an tix khawn khawm ra mai Aux tak kieh vaig cod khaing taix nawh heue." ²³ "Aux tak sang prung prang ti tik pui Ejiptux daux sinax ceu pui khankix mai rhuat kix hu ka daux haktiex ku dah heue." ²⁴ Aux tak tawx riang rao plawng khawn taix simiang Babulon mai tawx vaig Aux ka daux taix nawh, viang mawh nan, Aux tak sang raig plawng taix Pharaw mai nawh tak ngia sivoe nawh awm pui pa mat pa dex sang yum heue. ²⁵ Aux tak tawx riang rao plawng taix simiang Babulon, viang mawh nan, riang rao plawng taix Pharaw tak rau, kix tak tawng ka mawh Aux Siyiex yam tawx Aux vaig tix ka daux taix simiang Babulon mai nawh tak yuh laux ka meung Ejiptux heue. ²⁶ "Aux tak prung prang ti tik pui Ejiptux khankix ka daux sinax ceu pui mai rhuat kix hu ka daux haktiex kudah, khaix an, kix tak tawng ka mawh Aux Siyiex heue."

¹ Ka daux kao tix num tix num, ka daux khix loe, tix ngaix, gumlox Siyiex hoek ka aux ah nin, ² "Kawn pui eue, krai ka Pharaw meung Ejiptux mai ka pui nawh khankix maix mawh pa ting sibrawm awm pui mawx lie? ³ Pui Surix mawh num khaox Arit ka daux Lebanon, tau mai kak pa mhawm grang mai pa koe veei ka daux nong tiag khaox mai pa lhaong gaw mai rao nyoig koe ka sinax yeem kak khaox ting an heue." ⁴ "Rawm hoik kieh nawh kuah tix lih ting, greem tiex pa kied raux kieh nawh mawh pa kied lhaong mai rawm klawng khankix lih hu hawt vung viang ka dee hoik sum tix mai kieh rawm klawng iak caux yuh num khaox pa koe daux nong khawmuik heue. ⁵ Mawh kheu nan, nawh hoik lhaong khaing gaw khaox daux nong, kak nawh nie haoh hun mai kied lhaong, kheu jao kied nie rawm pa lih hu tan heue." ⁶ Sim sai daux raoma yuh mheem tix ka piang kak nawh, ka greem kak nawh totiag hoik keh kawn tix ka, mai ka greem veei nawh ceu pui pa kied ting lhaong ot ka heue. ⁷ Kheu koe riah nawh ka dee nie rawm, nawh ting lhaong kak nawh kawx lang mai kied mhawm grang heue. ⁸ Num khaox Arit pa koe daux sipeem Siyiex an, tak ang pon mox ka nawh, num khaox gix mai num khaox Aramon ang grum awm kak nawh, can num khaox pa koe ka daux sipeem Siyiex khawmuik ang mhawm grang awm nawh heue. ⁹ Aux hoik yuh nawh mhawm grang ka pa haoh kak khankix, sonsang koe pa boh rhawm num khaox baoh Eden sipeem Siyiex ka nawh heue. ¹⁰ Siyiex ah nin, mawh kheu kied lhaong nawh mai kieh rao nyoik lhaong khaing sinax kak khaox an kix mai kieh rhawm nawh yaog ti lhaong ka daux pa yaw rangdi tix, ¹¹ Aux ap nawh ka daux taix ceu pui pa kied ting riang rao mai kix yuh pa kin ka nawh awm pa hoik yuh nawh. Aux hoik grheu nawh lih kheu krax pa caox caig yuh nawh heue. ¹² "Pui tang praix klawng ceu pui pa kied vao, tak kid nawh goh mai prah nawh. Kak nawh khankix cod ka piang gawng lua mai ka daux ngawd daux lung mai kak nawh hoik graig hawt rawm klawng pa koe daux haktiex khawmuik mai pui haktiex khankix hoik lih hu khaing greem veei nawh mai prah nawh heue." ¹³ Sim sai daux raoma, tak sang tum ka piang kak pa kawn deuk mai totiag daux nong tak sang ot ka piang kak nawh khankix, ¹⁴ son ang num khaox pa koe hawt rawm pon yaw rangdi ka pa kied ting lhaong tix mai ang pon yaogyaw rao nyoig tix ka sinax kak mai son ang num khaox pa nyaux rawm khankix, tak ang lai pon tiag pa lhaong tix sigreung ankix, mawh kheu kix hoik dawg mawh pa ap tix ka krax yum, ka greem tiex sinax kawn pui, pa lih hu ka daux tiex heue. ¹⁵ Siyiex ah nin, "Ka daux ngaix yam hu nawh ka daux meung yum, Aux kieh krax khi rhawm koe son nawh mai kieh rawm dee pa raux an kheem ka nawh, Aux hoik gang ti deuh rawm klawng khankix mai Aux kieh gawng Lebanon koe krax khi rhawm son nawh mai num khaox daux nong khankix hoik fit hoik kroh kheu jao nawh heue." ¹⁶ Aux kieh ceu pui sikua ka lox sinum rau nawh, yam tik Aux nawh lih ka daux meung yum, tau mai pui pa lih ka daux tiex, can num khaox pa koe ka daux Eden mai khaox pa kied mhawm khaing piang gawng Lebanon khankix, can pa pon tix nyaux ka rawm, hoik koe krax nyawm rhawm ka greem tiex tau heue. ¹⁷ Kix hoik lih hu tau ka daux meung yum, tau mai nawh, khawm pui pa yum ka vaig mai ceu pui pa mawh riang rao plawng taix nawh mai pa ot ka greem veei nawh sinax ceu pui khankix heue. ¹⁸ Maix hoik awm khaox pa koe min plakngai mai pa kied ting lhaong khaing khaox can pa koe ka daux sipeem Eden ang mawh lie? Tak sang viex maix laig tau mai khaox can pa koe ka daux sipeem Eden ka greem tiex, maix tak sang it tau mai pui pa ang pat hak mai pui pa yum ka vaig. "In mawh pa sang lih mawh ka Pharaw mai khawm pui nawh khawmuik Siyiex ah nan heue.

¹ Yam hoek ka daux kao ra num tix num, khix kao ra tix ngaix, gumlox Siyiex hoek ka aux ah nin, ² Kawn pui eue, yiiem doe ka son Pharaw, simiang meung Ejiptux mai ah nin ka nawh, "Maix mawh pa awm sivai sangsi pa awn ju daux sinax ceu pui khankix mai mawh pa awm goe rawm ka daux rawm sigrit sigra mai yam tiang maix tix hu khaing daux rawm klawng mai kieh rawm sigu ka caong tix mai pa seeing sioe yuh rawm klawng heue." ³ Siyiex ah nin, "Aux tak ploi rub lih ka piang maix, tau mai cub pui hun mai kix tak sang bluh maix haok ka rub Aux heue. ⁴ Aux tak prah maix ka piang tiex mai tik maix ka piang dee sidawm tiex, daux tong khankix mai kieh sim sai daux raoma hoek tum ka piang maix mai Aux tak sang kieh totiag piang haktiex khawmuik sak ka maix heue. ⁵ Aux tak sang nih nex maix ka piang gawng lua mai to yum maix tak naog yuh daux tong daux ngawd, ⁶ Aux tak kieh haktiex caux ka nham maix, tom hoek ka piang gawng lua mai rawm klawng khankix tak sang naog ka nham maix heue. ⁷ Yam yuh Aux maix laux leeing, Aux tak pie lhien ka raoma mai kieh simuing khankix faik, Aux tak tawp kheem singaix ka paiawm mai khix tak ang lai tawx pa riang tix heue. ⁸ Can pa jhan riang tix lih khaing raoma khawmuik Aux tak kieh faik ka piang maix mai kieh pa faik kheem ka piang haktiex maix, "Siyiex ah nan heue. ⁹ "Yam viex Aux krax laux leeing maix hoek sinax ceu pui khankix, ka daux haktiex pa ang maix sax tawng, Aux tak kieh pui tom nie khi rhawm heue. ¹⁰ Aux tak sang yuh pui tom nie, koe krax daox am ka maix mai simiang tak koe krax lhat graung ka maix, yam nyeu Aux vaig tix ka plak sivoe kix mai kix tak khi rhawm ku bawg yam, ka son ju tix ku kaux, ka daux ngaix yam goh grhup maix heue. ¹¹ Mawh kheu Siyiex ah yuh nin, lawm vaig simiang Babulon tak hoek ka piang maix heue. ¹² Aux tak kieh pui hun maix goh ti yum ka lawm vaig pui pa ting riang rao an khankix, pa mawh ceu pui pa tawx krax pa kied lhat ka sinax ceu pui kix tak yuh pa ting rhawm ca nyhau Ejiptux mai khawm pui hun nawh khankix hoek krax laux leeing heue. ¹³ Aux tak kieh to brie cie nawh pa sawg tix ih priex hawt praok rawm klawng laux leeing mai tak ang lai kieh caong pui mai caong to brie khankix sigu yuh rawm khaix in pie tix bawg kawx heue. ¹⁴ Khaix an Aux tak deeh kieh rawm kix singaong mai kieh rawm klawng kix hu awm bee, Siyiex ah nan heue. ¹⁵ "Yam yuh Aux haktiex meung Ejiptux mawh dee pa yiien mai kieh haktiex an mawh pa ang lai koe tidtix tix ceu kawx, pa hoik grum koe nawh glang ka an tix bawg dix, yam prawng ca Aux ka pui pa ot ka daux haktiex an khawmuik, khaix an, kix tak tawng ka mawh Aux Siyiex heue." ¹⁶ "In mawh grawng pa khi rhawm pa tak sang koe krax yiiem doe kix ka son nawh, kawn bun ceu pui khankix tak khi rhawm yiiem doe, ka son meung Ejiptux mai son pui hun nawh khawmuik," Siyiex ah nan heue. ¹⁷ Yam baox hoek ka daux kao ra num tix num, ka daux khix tix, kao phwan ngaix, gumlox Siyiex hoek ka aux ah nan, ¹⁸ "Kawn pui eue, yiiem doe ka son pui hun haktiex meung Ejiptux mai kix pa hoik tik lih ka daux tiag, cao nawh mai khawm kawn bun ceu pui pa kied ao min khankix, tau mai pui pa lih hu ka daux tiex, ¹⁹ Mawh nie lheu mhawm maix khaing pui mawx lie? Lih hu ot tau mai pui pa ang nyang pat hak khankix heue. ²⁰ "Kix tak goh tix yum ka daux sigreung pui pa hoik pah yum ka vaig kheu mawh pa hoik ap nawh ka vaig, bluh nawh mai khawm pui nawh khawmuik lih heue." ²¹ Pui pa kwa pa vao daux sinax pui pa ting riang ting rao tak sikah ka nawh khaing daux sigreung meung yum mai pui pa teem ka nawh, kix hoik lih hu ot tau mai pui pa ang nyang pat hak pa hoik yum ka vaig heue. ²² "Asurix mai cub pui nawh ot tau daux simeeig tan, hawt vung viang nawh kix sipaung kawn lien nawh ka, pa pah tix yum mai pa goh ti yum ka vaig heue," ²³ Simeeig nawh khankix, ot ka dee die daux simeeig mai cub pui nawh koe hawt vung viang moing simeeig nawh khawmuik, pa mawh pui pa hoik goh tix yum ka vaig, pa hoik kieh pui haktiex pa im ju lhat graung ka tix heue. ²⁴ "Elam mai pui nawh khankix ot vung viang simeeig nawh tan, kix mawh pa pah tix yum mai pa goh ka vaig mai pa lih hu daux meung yum tau mai pui ang nyang pat hak tix, pa hoik kieh pui haktiex pa im ju khankix lhat graung ka tix, yam in, kix hoik pon krax kaig tua tau mai pui pa lih hu ka daux tiag heue." ²⁵ Kix hoik deuh dee it nawh ka daux sinax pa yum tau mai cub pui nawh mai simeeig kix koe hawt vung viang nawh khawmuik, kix khawmuik mawh pa ang nyang pat hak, mawh pa hoik pah yum ka vaig viang kix hoik kieh pui haktiex pa im ju lhat graung ka tix kawx, yam in kix tak yaox ti kham krax kaig tua tix tau mai pui pa lih hu ka daux tiex, nawh yaox ti ot ka daux sinax pa yum heue. ²⁶ "Meshiet mai Tubalax, khawm cub pui nawh ot tan, simeeig kix koe hawt vung viang an khawmuik, kix mawh pa ang nyang pat hak mai mawh pa hoik pah tix yum ka vaig, viang kix hoik kieh pui haktiex pa im ju lhat graung ka tix kawx heue." ²⁷ Kix ang yaox ti it tau mai pui pa ting riang rao pa hoik goh ti yum ka daux pa ang nyang pat hak tix mai pa lih hu ka daux meung yum tau mai kraung naing tix kix hoik deuh vaig tix ka greem kaing tix mai plah tieb naing koe ka piang si-ang kix, kheu jao pa ting riang ting rao an hoik kieh pui haktiex pa im ju lhat graung ka tix heue. ²⁸ Mawh kheu maix tak raig laux leeing ka daux sinax pui pa ang nyang pat hak mai it tau mai pui pa hoik pah ti yum ka vaig heue. ²⁹ "Edom kawx koe tan, simiang nawh mai cao kaing cao kap khankix mai pa koe sibrawm mai pui ting riang rao kix hoik deuh tix tau mai pui pa pah tix yum ka vaig, mai kix tak it tau mai pui pa ang nyang pat hak khankix tau mai pui pa lih hu ka daux tiex heue. ³⁰ Cub simiang haktiex plak laong mai pui Sidom khawmuik koe tan, lih hu tau mai pui pa yum, ka daux pa kaig tua, pa lhat graung, kheu sibrawm riang rao pa yuh tix, kix it ka daux pa ang tix nyang pat hak, tau mai pui pa hoik yum ka vaig mai yaox ti kham krax kaig tua, tau mai pui pa lih hu ka daux tiex heue. ³¹ Pharaw tak koe krax pa nyawm rhawm ka yaox tix cub pui hun nawh khankix mai cub kru naing nawh pa yum ka vaig daux naing, Siyiex ah nan heue. ³² Mawh kheu Aux hoik kieh krax lhat koe ka daux haktiex pa im ju, mai nawh hoik mawh pa deuh tix ka daux sinax pui pa ang nyang pat hak, tau mai pui pa hoik yum ka vaig mai khawm Pharaw mai cub pui hun nawh khawmuik, "Siyiex ah nan heue."

¹ Gumlox Siyiex hoek ka aux ah nin, ² "Kawn pui eue, krai ka pui maix khankix ah nin, yam viex Aux lawm vaig hoek ka haktiex tixdah pui haktiex an laug ka pui tix kaux khaing daux haktiex kix mai kieh nawh mawh cao pa pau son kix, ³ yam yaox pui an ka hoik bleeh lawm vaig ka piang haktiex mai phan nawh phlu teettawng mai tawx satix ka pui khankix, ⁴ khaix an pui mawx ang ah, pa mhong ka lox teettawng mai ang rien rhawm tix, phan lawm vaig an hoek bleeh mai phan nawh som ju tix, nham phimap nawh tak koe ka piang kaing cao nawh heue. ⁵ Pui pa mhong ka lox teettawng mai ang rien rhawm tix, nham phimap nawh tak koe ka piang cao nawh, viang mawh nan, pui pa rien rhawm tix tak pon taoh ka ju tix heue. ⁶ "Viang mawh nan, phan cao pau yaox ka hoek lawm vaig mai ang phlu lox teettawng mai pui khankix ang yaox tix rien rhawm tix mai lawm vaig an hoek bleeh kieh pui tix kaux kaux som ju tix daux sinax kix ka daux pa koe phimap tix kawx, viang mawh nan, Aux tak sang mhaing ngawh nham phimap nawh khaing taix cao pa pau heue. ⁷ "Mawh kheu nan maix pa mawh kawn pui eue, Aux hoik kieh maix mawh cao pau, son nyiex ma ceu pui Isarelax, maix tak yaox ti tawx satix ka kix khaing gumlox pa hoik mhong maix khaing daux jheeh Aux heue." ⁸ "Yam ah Aux nin ka pui caox caig an, pui caox caig eue maix tak yaox ti yum tete maix ang tawx satix ka pui caox caig an sonsang veeh khaing daux krax pa yuh nawh mai pui caox caig an tak yum ka daux pa caox caig yuh tix, viang mawh nan, Aux tak mhaing ngawh nham phimap nawh khaing taix maix heue." ⁹ Phan maix hoik tawx satix ka pui caox caig an sonsang veeh khaing krax pa yuh tix, phan nawh ang veeh khaing daux krax pa yuh cao tix, nawh tak yum ka daux pa caox caig pa yuh tix, viang mawh nan maix hoik taoh ka ju tix heue." ¹⁰ "Maix pa mawh kawn pui eue, krai ah nin ka nyiex ma ceu pui Isarelax, pex krai yuh nin, phan pa lud ex mai phimap koe ka piang cao ex mai hoik koe krax pa awn riang rao ka, mawh sang pon im ju ex yuh ka mawx lie?" ¹¹ "Krai ka kix, Siyiex ah nin, awm im ju Aux, Aux ang nyawm rhawm ka yum pui caox caig, viang mawh nan, Aux koe rhawm ka veeh pui caox caig khaing daux krax pa yuh tix mai im ju, nyiex ma ceu pui Isarelax khankix eue, deeh veeh tix, deeh veeh khaing daux pa caox caig pa yuh pex, mawh kheu tix pex lai simie ti yum yuh ka mawx lie?" ¹² "Maix pa mawh kawn pui eue, krai ka ceu pui maix khankix, phan pui rahsee lud, krax rahsee nawh glang ka an, ang pon taoh nawh ngaix pa koe krax lud nawh, phan pui pa caox caig via khaing pa caox caig yuh tix, nawh ang koe krax som nai, kheu jao singaix deeh veeh nawh khaing pa caox caig yuh tix mai pui rahsee kawx, tak ang pon tix im ju kheu jao singaix koe krax lud nawh heue." ¹³ "Yam ah Aux nin ka pui rahsee nawh sang pon tix im ju tete kawx, phan nawh kawn een rhawm ka krax pa rahsee tix mai lud, pa rahsee yuh nawh khankix, tak mawh pa ang lai deeh doh keud ka, viang mawh nan, nawh tak yum kheu phimap pa lud tix heue. ¹⁴ Yam deeh ah Aux nin ka pui pa caox caig maix tak yaox ti yum tete, phan nawh deeh veeh khaing pa caox caig yuh tix mai yuh awm pa koe ka daux lox lai beenli mai yuh ceu pa rahsee, ¹⁵ phan pui pa caox caig an, deeh tawx ceu pa hoik tang pui ka nawh mai kraung pa rhim nawh khankix mai lawng ti hu ka daux krax pa im ju pa mawh lox tat jhawm prawng mai ang lai yuh phimap, nawh tak yaox ti im ju mai ang yaox ti yum kah heue. ¹⁶ Phimap pa hoik lud yuh nawh khankix tak ang lai deeh doh keud ka piang nawh tix ceu kawx, kheu hoik yuh nawh pa khaw caw mai pa rahsee, nawh tak pon tix im ju ka tete heue." ¹⁷ Viang mawh nan, ceu pui maix khankix kawn ah nin, pa prawng ca Siyiex ang rahsee, mawh ngie pa prawng ca kix pa ang rahsee khaing heue. ¹⁸ Phan pui rahsee tik vud pa rahsee tix mai deeh yuh pa caox caig, nawh tak yum kheu jao an heue. ¹⁹ "Phan pui caox caig deeh veeh khaing pa rahsee, nawh tak im ju kheu jao an heue." ²⁰ "Viang yuh nan, pex ah nin, pa prawng ca Siyiex ang rahsee, nyiex ma ceu pui Isarelax eue, Aux tak prawng ca ka pex ku kaux awm kaing pa yuh pex heue." ²¹ Yam hoek num pa giex laung ex, ka daux kao ra num, khix kao, phwan ngaix, pui tix kaux pa to tix glawd khaing veng Yerusaliem, hoek ka aux ah nin, "Veng hoik laux leeing heue. ²² Yam in taix Siyiex koe ka piang aux, plak ponbo sivoe ang pui pa glawd an nyang hoek ka aux, yam hoik bleeh pui an tix hoek ka aux plak ponngawb, Nawh cao paoh daux jheeh aux mawh kheu nan jheeh aux chix sikah heue." ²³ Gumlox Siyiex hoek ka aux, ²⁴ "Kawn pui eue, kix pa kawn ot daux haktiex Isarelax pa laux leeing khankix, ca kawn ah nin, mawh Abraham tix kaux khaing, pa pon haktiex in mawh sinngao tix, viang mawh nan, yix mawh pui hun, haktiex in hoik mawh sinngao pa tawx ka son yix heue." ²⁵ "Mawh kheu nan, krai ka kix, Siyiex ah nin, pex ih nex tau mai nham mai yaog ngai ti jhak ka riang grang krub pex mai kieh nham jauh, kawn keud pex ti sang pon cie haktiex in lie?" ²⁶ "Pex een rhawm ka lawm vaig tix, pex hoik yuh ceu pa seeing brai lud vao mai moeng paox tix, kawn keud pex ti sang pon ti cie haktiex in lie? ²⁷ Ah nin ka kix, Siyiex ah nin, "Awm im ju Aux, pui pa ot ka dah dee pa laux leeing khankix, tak goh yum ka lawm vaig mai pui ot ka daux lung daux blang, Aux tak ap totiag vao kiied tix ih kix mai pui pa ot ka daux dee pa kaux cong mai ka daux rang khankix, tak yum ka jhawm saux preng heue." ²⁸ "Aux tak sang yuh haktiex in mawh dee pa laux leeing yiien yawg mai riang rao min plakngai kix kawx tak grai, mai gawng haktiex Isarelax khankix kawx tak mawh pa yiien mai ang koe pui pa lailing ka dee an tix kaux kawx heue." ²⁹ "Khaix an kix tak tawng ka mawh Aux Siyiex, yam hoik yuh Aux haktiex in mawh dee pa laux leeing pa yiien kheu jao pa seeing brai yuh kix kuceu heue." ³⁰ Lheu khaing an maix pa mawh kawn pui eue, ceu pui maix khankix kawn krai grawng maix hawt praok ding nyiex mai ka hawt diang siviex nyiex mai kix ca sikah tau mai paox tix, tix kaux lai tix kaux mai ka puxaik tix, �Hoek! ex nghiet mawh gumlox ceu tix, pa kaoh khaing Siyiex.� ³¹ Kix hoek ka maix awm khrawm pui hun paox tix, kix ngawm ka plak sivoe maix awm ceu pui Aux mai kix mhong ka gumlox maix, viang mawh nan, kix ang hawt ti yuh, viang jheeh kix jhi mhai rug pa kied moh tix kawx, rhawm rhi kix hawt khaix pa ghoing ka sinngao haktiex heue. ³² "Maix awm lox rhax pa kied nyawm ti nghiet khaing pui pa koe lox pa naog ka ceu pa khaw rhawm khaing cao pa jiet chix tah ting ka son kix, viang kix mhong lox maix kawx, kix ang hawt ti yuh heue." ³³ Yam hoek bleeh an, an tak hoek bleeh tete, khaix an, kix tak tawng ka hoik dawg ot cao jhai tix kaux sinax kix heue.

¹ Gumlox Siyiex hoek ka aux ah nin, ² "Kawn pui eue, krai lox jhai ka cao liang yung ceu pui Isarelax, krai lox jhai mai ah nin ka kix, Siyiex ah nin ka cao liang yung, kieh krax kha rhawm koe ka cao liang yung pa priex ka tokaux khaing, mawh ang cao liang yung khankix priex ka cub yung kix lie?" ³ Pex nyaux ka rawm teeih yung mai ceep ka hauk yung mai pah ti ih yung pa kluing, viang mawh nan, pex ang tawx yung ih priex heue. ⁴ "Pex ang teem ka yung pa iak riang mai pex ang pai ka yung pa saux mai ang kie sidah ka yung pa pot si-ang mai ang deeh viex yung pa grheu to deeh hoek mai ang sawg ka yung pa hoik grai an. Viang mawh nan, pex kwang ka kix ka daux pa lang teung kin heue. ⁵ "Mawh kheu nan, kix hoik prung prang kheu ang cao liang yung lai koe, mai kix lih ti mawh ceu pa ih son totiag, yam hoik prung prang rairuat kix heue." ⁶ "Yung Aux khankix hoik vung viang, ka piang gawng lua an mai ka piang ton gawng lhaong khankix, cub yung Aux khankix hoik prung prang rairuat sidah piang ca haktiex khawmuik mai pui pa sawg pa khrieh ka nawh ang lai koe tix kaux kawx heue." ⁷ "Mawh kheu nan, pex pa mawh cao liang yung khankix eue, nghiet ka gumlox Siyiex heue." ⁸ "Siyiex ah nin, awm im ju Aux, kheu jao hoik lih mawh cub yung Aux pa tud rhim mai lih ti mawh priex pa ih totiag kheu ang cao liang yung lai koe, mai ang cao liang yung hawt sawg ka cub yung Aux khankix, viang mawh nan, cao liang yung khankix priex tokaux cao khaing mai ang tawx priex ih cub yung Aux khankix, ⁹ Mawh kheu nan, cao liang yung khankix eue, nghiet ka gumlox Siyiex, ¹⁰ Siyiex ah nin, "Jhak heue, Aux tak yuh cao liang yung an khankix laux, mai Aux tak deeh mhaing cub yung Aux khaing daux taix kix, Aux tak pluat kix khaing cao liang yung, mai kix tak ang lai yaox ti priex tokaux cao tix, khaix in tix bawg kawx, Aux tak sang deeh taoh cub yung Aux khankix khaing daux jheeh kix, son ang lai mawh pa ih son kix heue. ¹¹ Siyiex ah nin, "Tokaux Aux tak sang hu sawg ka yung tix mai taoh ka kix," ¹² "Awm sawg cao liang yung tix khrawm ka cub yung tix daux sinax yung pa hoik prung prang khankix, awm an Aux tak sawg yung Aux khankix mai deeh taoh ka kix, khaing dee pa hoik prung prang kix ka daux singaix ceep paiawm mai singaix koe pa kied faik heue." ¹³ "Aux tak viex kix lih khaing ceu pui khankix mai khrawm kix khaing haktiex an mai deeh viex hoek ka haktiex cao kix, mai Aux tak liang kix ka piang gawng lua haktiex Isarelax mai ka praok rawm klawng khankix mai ka can dee ot pui daux haktiex an heue." ¹⁴ "Aux tak sang liang kix ka dee mhawm rib mai kawg kix tak koe ka piang gawng lhaong haktiex Isarelax, kix tak it ka daux kawg pa mhawm mai yaox tix sawm ka dee kied mhawm klai rib khankix ka piang gawng haktiex Isarelax heue. ¹⁵ "Aux tak liang ka cub yung Aux mai Aux tak kieh kix it, Siyiex ah nan heue. ¹⁶ "Aux tak sawg ka yung pa grai mai deeh viex yung pa hoik grheu ti tik khankix hoek mai kie ka dee pot si-ang ka man mai tawx riang rao ka yung pa awn riang khankix, viang mawh nan, Aux tak kieh yung pa kluing mai pa koe riang khankix laux leeing mai liang kix ka daux krax prawng krax ciyang heue. ¹⁷ Phan mawh son pex, cub yung Aux khankix eue, Siyiex ah nin jhak heue, Aux tak sang prawng ca sinax yung mai yung khankix mai sinax yung mhaing mai pex mhaing khankix heue. ¹⁸ Pex yaox ti ih ka dee pa kied mhawm klai rib mai dig rib pa kawn deuk ka caong tix, pex keud mawh pa kied iak ka son pex lie? Mai pex yaox ti nyaux rawm singaong mai dig ka rawm pa kawn deuk khankix ka caong tix kieh sigu, pex keud mawh pa iak ka son pex lie? ¹⁹ "Yung Aux khankix ih rib pa hoik dig pex ka caong tix mai nyaux rawm pa hoik sigu dig pex ka caong tix heue." ²⁰ "Mawh kheu nan, Siyiex ah nin ka kix, jhak heue, tokaux cao Aux, tak prawng ca sinax yung pa kluing mai yung pa krawx heue." ²¹ Mawh kheu hoik cot pex paw kix, klip kix mai teed yung pa iak riang an khankix, prung prang hu kudah kudee, ²² Aux tak taoh cub yung Aux mai ang lai mawh pa rhim totiag ka mai Aux tak sang prawng ca sinax yung khankix heue. ²³ "Aux tak deuh cao liang yung koe tix kaux ka piang kix mai nawh tak sang liang kix, mai nawh tak mawh kawncau Aux Davit, nawh tak sang liang kix mai mawh cao liang yung ka piang kix heue." ²⁴ "Aux pa mawh Siyiex, tak mawh Siyiex kix mai kawncau Aux Davit tak mawh simiang kix, Aux pa mawh Siyiex hoik krai nawh heue." ²⁵ "Aux tak yuh gumlox sijax mukheu pa nhim tau mai kix mai kieh totiag pa vao grai khaing haktiex an mai kix tak yaox ti ot yiien yawg ka daux tiagtu mai yaox tix nyawm it ka daux nong heue. ²⁶ "Aux tak kieh kix ot rawb rim gawng Aux mai pon bwanson pa nawb Aux, mai tak kieh lhiex lih ka daux bawg yam kix mai lhiex bwanson tak sang lih tan heue." ²⁷ Khaox daux tiag khankix tak sang koe plix mai haktiex tak sang tawx plix simie, kix tak yaox ti ot yiien yawg ka daux haktiex tix mai kix tak tawng ka mawh Aux Siyiex, yam hoik tat Aux ti tik maox khaox glawm kix, mai yam taoh Aux kix khaing daux tawm taix pui pa kin kieh kix yuh siliex heue. ²⁸ "Kix tak ang lai mawh pa rhim son ceu pui tang ceu mai totiag haktiex tak ang lai pon kiied ti ih kix, kix tak yaox ti ot yiien yawg mai pui tix kaux kawx ang lai pon kieh kix koe krax lhat graung heue." ²⁹ "Aux tak khre sipeem pa koe min plakngai ka son kix mai kix tak ang lai koe pa laux leeing ka pa cai rhawm ka daux haktiex mai ang lai yaox ti kham krax kaig tua pa yuh pui tang ceu khaix in tix bawg kawx heue." ³⁰ Kix tak tawng ka mawh Aux, Siyiex pa mawh Siyiex Cao kix, pa ot tau mai kix mai pa mawh nyiex ma ceu pui Isarelax, pui cie Aux, Siyiex ah nan heue. ³¹ "Pex mawh cub yung Aux, pa sawm dee klai rib Aux, pex mawh pui Aux mai Aux mawh Siyiex pex, Siyiex ah nan heue.

¹ Gumlox Siyiex hoek ka aux ah nin, ² "Kawn pui eue, veeh ngai maix ka plak gawng Sirax mai krai lox jhai pa yuh laux ka piang nawh, ³ ah nin ka nawh, Siyiex ah nin, gawng Sirax eue, Aux tak yuh maix laux leeing, Aux tak nyeu taix tix ka piang maix mai yuh maix laux kieh mawh dee pa yiien heue." ⁴ "Aux tak kieh veng maix mawh pa laux leeing mai maix tak mawh dee pa yiien, mai maix tak tawng ka mawh Aux Siyiex heue." ⁵ "Mawh kheu jao hoik dawg koe rhawm pa koeng maix sijheeng mai hoik kieh nham kawn praix ceu pui Isarelax jauh ka lawm vaig yam koe krax kha rhawm kix, yam hoek dee sidah phimap yuh kix, ⁶ mawh kheu nan Siyiex ah nin, awm im ju Aux, Aux tak khre pa jauh nham ka son maix mai nham phimap an tak hawt khaix maix, kheu ang maix koeng ka pa jauh nham, mawh kheu nan, nham an tak hawt khaix maix heue. ⁷ Aux tak yuh gawng Sirax mawh dee pa yiien mai tat ti tik pui pa lih mai pui pa laig khankix daux nawh heue. ⁸ "Aux tak kieh gawng maix khankix naog ka pa yum mai ka piang ton mai ka daux lung daux ngawd mai hawt klawng, pui pa yum ka lawm vaig tak koe ka heue." ⁹ "Aux tak kieh maix mawh dee pa yiien jheung jheung mai veng maix tak mawh dee ang pui lai ot ka, khaix an maix tak tawng ka mawh Aux Siyiex heue." ¹⁰ "Mawh kheu maix hoik ah nin, ka ceu pui ra ceu mai ka haktiex inkix ra dah tak mawh cie aux mai ex tak pon ti cie ka inkix, viang Siyiex hoik ot tan kawx, ¹¹ mawh kheu nan, Siyiex ah nin, awm im ju Aux, Aux tak sang yuh awm pa song rhawm maix mai awm pa boh rhawm maix, pa hoik jhi maix pa koeng tix ka piang kix, mai Aux tak kieh kix tawng ka daux singaix yam ciyang aux ka maix heue." ¹² Maix tak tawng ka mawh Aux Siyiex, mhong ka lox pa lud maix khawmuik, pa mawh lox pa sibriem maix ka gawng lua haktiex Isarelax khankix pa ah nin, kix tak mawh dee pa yiien mai kix tak mawh pa tawx son pa sang ih yix heue. ¹³ "Awm an mai jheeh maix hoik ah lox yaw rangdi piang Aux mai hoik baox ah lox haoh hun ka piang Aux, Aux hoik mhong ka lox an heue. ¹⁴ Siyiex ah nin, haktiex khawmuik tak koe krax gaux rhawm, yam yuh Aux maix laux leeing heue." ¹⁵ "Awm hoik gaux rhawm maix ka laux leeing haktiex sinngao nyiex ma ceu pui Isarelax, Aux yuh ka maix awm an, gawng Sirax eue maix tak laux leeing awm laux leeing haktiex Edom mai can pa koe ka daux nawh khawmuik, khaix an kix tak tawng ka mawh Aux Siyiex heue.

¹ Maix pa mawh kawn pui eue, krai lox jhai ka gawng haktiex Isarelax ah nin, "Gawng haktiex Isarelax khankix eue, nghiet ka gumlox Siyiex. ² Siyiex ah nin, mawh kheu pui koeng ah, aha ka pex, gawng pa lhaong khankix tom didix, hoik lih mawh cie yix, ³ mawh kheu nan, krai lox jhai ah nin, Siyiex ah nin, mawh kheu hoik yuh kix pex laux leeing mai hoik bleet pex khaing ku daog ku dawn, sonsang lih mawh pex cie ceu pui pa kawn deuk khankix mai mawh pa tud rhim ti hu ka pa salao khaing jheeh pui khankix," ⁴ mawh kheu nan, gawng lua haktiex Isarelax khankix eue, nghiet ka gumlox Siyiex, Siyiex ah nin, ka gawng mai ton mai ka rawm klawng mai ka daux ngawd daux lung, dee pa laux leeing ti yiien mai veng pa hoik tik vud tix pa mawh dee pa tud rhim mai dee pa koe lox pa salao ka ceu pui pa kawn deuk pa ot hawt vung viang an khankix, ⁵ Siyiex ah nin, "Aux hoik krai grawng in ka daux pa kied song rhawm tix ka ceu pui pa kawn deuk khankix mai ka ceu pui Edom, khawmuik, pa hoik tud rhim ti teei haktiex Aux ka son cao kix sonsang mawh sinngao tix tau mai krax gaux rhawm, tau mai rhawm rhi pa caox caig tix, sonsang pon tud rhim kraung can pa koe daux haktiex nawh heue." ⁶ "Krai lox jhai son grawng haktiex Isarelax ah nin, ka gawng lua mai ton rawm klawng mai daux lung daux ngawd khankix, Siyiex ah nin, jhak heue, Aux hoik krai ka daux pa song rhawm tix mai ka daux pa kied saux rhawm tix heue. Mawh kheu hoik yaox pex ti kham krax kaig tua ceu pui khankix heue." ⁷ Siyiex ah nin, "Aux hoik yaog taix tix mai tiextu sonsang yaox ceu pui pa ot hawt vung viang pex krax kaig tua." ⁸ "Pex pa mawh gawng haktiex Isarelax khankix eue, pex tak glaoh lhax mai koe kak mai plix ka son ceu pui Aux Isarelax, mawh kheu bawg yam sang deeh hoek kix hoik dex." ⁹ Mawh kheu Aux mawh son pex mai Aux tak deeh hoek ka pex mai pex tak sang thai mai ruat simie heue. ¹⁰ "Aux tak baox kieh pui pex pa mawh nyiex ma ceu pui Isarelax haoh hun piang pex mai pui tak ot ka daux veng mai cox sum can dee pa laux leeing khankix." ¹¹ "Aux tak kieh pui mai to brie haoh hun ka piang pex mai kieh kix pre haoh hun mai keh kawn praix tom nie, Aux tak kieh pex ot ka dee ot pex glang ka in mai yuh ceu pa lheu mhawm ka pex lheu khaing yam jah, khaix an pex tak tawng ka mawh Aux Siyiex heue. ¹² Aux tak sang kieh pui lailing ka daux sinax pex pa mawh ceu pui Aux Isarelax, kix tak rhim ti teei pex mai pex tak yaox ti mawh sinngao kix, kawn praix kix tak ang lai som nai ka daux maix khaix in tix bawg kawx heue." ¹³ "Siyiex ah nin, kheu jao ah kix nin ka maix, maix kiied ti ih pui mai rhim ti kieh kawn praix ceu pui cao tix koe krax som nai, ¹⁴ mawh kheu nan maix tak ang lai baox yaox kiied ti ih pui khankix mai ang lai yaox ti tud rhim ka ceu pui tix khaix in tix bawg kawx, Siyiex ah nan heue. ¹⁵ Aux tak ang lai kieh maix yaox ti mhong lox pa salao pui mai ang lai kieh maix yaox ti kham pa deuh pui phimap khaix in tix bawg kawx mai maix tak ang lai yaox ti tud rhim ka ceu pui tix, tix bawg kawx, Siyiex ah nan heue." ¹⁶ Gumlox Siyiex hoek ka aux mai ah nin heue. ¹⁷ "Kawn pui eue, yam ot nyiex ma ceu pui Isarelax ka daux haktiex cao tix, kix hoik seeing yuh haktiex tix ka can pa yuh tix, kaing mai jhawm pa yuh kix hoik seeing brai sivoe ngai Aux awm bun pa hoek mee heue. ¹⁸ Aux hoik klup krax pa song rhawm tix ka piang kix, son nham pa hoik kieh kix jah ka daux haktiex an, mawh kheu hoik kieh kix tokaux tix seeing brai tau mai riang grang krub tix heue. ¹⁹ Aux hoik rhuat kix ka daux sinax ceu pui khankix mai kix hoik prung prang ka daux haktiex kudah, Aux prawng ca kix, awm been kaing pa yuh cao kix heue." ²⁰ Yam hoek kix ka haktiex pui tang ceu ka dee mawx ang ah mai kix nu nai ka ceu kaux pa singax singeh Aux, pui khankix tom ah nin ka kix, inkix mawh pui Siyiex, pa hoik grheu Nawh Cao lih khaing haktiex cao kix heue. ²¹ Aux kawn lhawk ka min ceu kaux pa singax singeh tix, pa hoik nu nai nyiex ma ceu pui Isarelax khankix, ka sinax ceu pui can dee hu kix kudah heue." ²² Mawh kheu nan, ah nin ka nyiex ma ceu pui Isarelax, Siyiex ah nin, "Nyiex ma ceu pui Isarelax khankix eue, Aux ang lai yuh ceu in ka son min plakngai pex, viang mawh nan, mawh ka son min ceu kaux pa singax singeh Aux, pa nu nai pex sinax ceu pui khankix, can dee hu pex heue." ²³ Aux tak yaog min ceu kaux pa ting lhaong pa singax singeh Aux an, pa hoik sax nu nai pex sinax ceu pui khankix mai pa hoik salao pex sivoe ngai kix mai ceu pui tak tawng ka mawh Aux Siyiex, Siyiex ah nan, yam yaog Aux min ceu kaux pa singax singeh tix sivoe ngai kix heue. ²⁴ Mawh kheu Aux tak teei pex lih khaing daux sinax ceu pui khankix mai kraix khrawm pex khaing daux haktiex khankix mai deeh viex pex laig ka daux haktiex cao pex heue. ²⁵ Khaix an Aux tak sang phreeh rawm pa singax ka piang pex mai pex tak singax khaing pa seeing brai tix, Aux tak kieh pex singax khaing riang grang pa krub tix. ²⁶ Aux tak tawx rhawm rhi pa khraox ka pex mai sau khwan pa khraox ka daux pex, Aux tak teei rhawm pa kiien awm simaox lih khaing daux nex pex mai tawx rhawm pa awn awm nex nham ka pex heue. ²⁷ Aux tak sau khwan aux daux pex mai kieh pex lawng hu daux lox lai beenli Aux khankix mai priex ti hawt lox tawm jhawm krai Aux khankix heue. ²⁸ Pex tak yaox ti ot ka daux haktiex pa hoik tawx Aux ka keeing pex, mai pex tak mawh pui Aux mai Aux tak mawh Siyiex pex. ²⁹ Aux tak taoh pex khaing pa seeing brai, Aux tak kok nghox koi hoek mai kieh grum naog mai ang lai kieh sibhawm praix hoek ka piang pex heue. ³⁰ Aux tak kieh plix khaox mai plix nghox plix koi pex haoh hun, son ang pex lai yaox ti kham krax pa salao pui kheu pa hot sibhawm tix sinax ceu pui khankix. ³¹ Khaix an pex tak deeh doh keud ka pa caox caig yuh tix mai kaing pa ang mhawm yuh pex mai pex tak seeing ka tokaux tix, ka plak sivoe ngai cao pex, kheu phimap pa seeing brai pa yuh pex heue. ³² "Siyiex ah nin, pa yuh Aux in, ang mawh son min plakngai pex, nyiex ma ceu pui Isarelax khankix eue, kieh pex tawng kaing pa yuh pex mawh pa kaig pa tua mai pa daox am ka krax yuh tix." ³³ Siyiex ah nin "Ka daux ngaix kieh Aux pex singax khaing pa seeing brai yuh tix khawmuik, Aux tak kieh pex ot ka daux veng mai deeh cox sum can pa laux leeing khawmuik heue. ³⁴ Haktiex pa hoik yi pa yiien an khankix pa lailing pui ti hu ka, tak deeh thai mai sum ti ih ka heue." ³⁵ Kix tak ah nin, haktiex pa yi dee pa yiien hoik lih ti awm sipeem Eden mai dee pa laux leeing mai dee pa yiien mai veng pa hoik laux an, yam in hoik mawh dee pa kaux cong mai dee pa ot pui ka heue. ³⁶ Khaix an ceu pui pa deuk hawt vung viang pex, tak tawng ka mawh Aux Siyiex, pa hoik deeh cox sum dee pa laux leeing mai deeh sum deeh yuh kaing ka dee yi dee pa laux leeing an, Aux pa mawh Siyiex, tak yuh an awm pa krai tix heue. ³⁷ "Siyiex ah nin, Aux tak kieh nyiex ma ceu pui Isarelax chawk cheng sonsang yuh ceu pa sang yuh son kix, sonsang haoh hun kix awm phung yung khankix, ³⁸ awm naog phung yung pa singax singeh pa sang tan bawg yam pawie daux veng Yerusaliem, awm an veng pa laux leeing tak deeh naog ka phung yung mai pui khankix, khaix an, kix tak tawng ka mawh Aux Siyiex heue."

¹ Plawng taix Siyiex ot ka piang aux mai khwan Siyiex viex aux hu mai deuh aux ot ka daux si ngreung daux lung ka dee naog si-ang khankix. ² Nawh Cao kieh aux lailing sinax vung viang kix mai jhak heue, ka daux lung an koe si-ang tom nie mai si-ang an khankix hoik mawh pa kied kroh heue. ³ Nawh Cao ah nin ka aux, "Kawn pui eue, mawh sang chix im si-ang in lie?" Mai aux deeh pawk ah nin, "Siyiex eue, Maix Cao hoik tawng heue." ⁴ Nawh Cao baox ah nin ka aux, "Krai lox ka si-ang inkix mai ah nin ka kix, si-ang kroh khankix eue, nghiet ka gumlox Siyiex. ⁵ Siyiex ah nin ka si-ang in khankix, jhak heue, Aux tak sau bhawm im ju laig ka daux pex mai pex tak im ju heue." ⁶ "Aux tak sang sau siniag ka piang pex mai viex nex haok ka piang pex mai kieh hak kheem ka piang pex mai sau bhawm im ju ka daux pex mai pex tak im ju mai pex tak tawng mawh Aux Siyiex heue." ⁷ "Mawh kheu nan, Aux hoik krai lox jhai awm pa hoik tawm tix mai yam krai aux lox jhai, lox sinum lih koe tan mai jhak heue, si-ang khankix chix chuh mai kleuk paox tix, tix mu hoik tix mu heue." ⁸ Yam jhak aux ka ankix, siniag koe ka piang kix mai nex haok ka piang kix mai hak kheem ka kix, viang mawh nan, ju pa im ang nyang koe ka daux kix heue. ⁹ Khaix an Nawh Cao ah nin ka aux, "Krai lox jhai ka bhaung, kawn pui eue, krai lox jhai mai ah nin ka bhaung Siyiex ah nin, bhaung pa kaoh khawm pon plak eue, hoek phlu ka si-ang inkix sonsang im ju pa yum inkix." ¹⁰ Aux hoik krai lox awm pa hoik tawm Nawh Cao ka aux mai bhawm im ju laig ka daux kix mai kix kawx im ju mai kaoh cung awm kru naing cub pa ting lhaong heue. ¹¹ Nawh Cao ah nin ka aux, "Kawn pui eue, si-ang inkix mawh cub nyiex ma pui Isarelax khankix, jhak heue, kix ah nin, si-ang yix hoik mawh pa kroh mai krax keud pot jun pot yix hoik grai, mai tokaux yix hoik laux leeing heue." ¹² "Mawh kheu nan, krai lox jhai ah nin ka kix, Siyiex ah nin, jhak heue, Aux tak paoh simeeig pex mai yaog pex lih khaing simeeig tix, pui Aux khawmuik eue, Aux tak viex pex hoek ka nyiex pex daux haktiex Isarelax. ¹³ Pex tak tawng ka mawh Aux Siyiex, yam paoh Aux daux simeeig pex mai yaog pex lih khaing daux simeeig pex heue." ¹⁴ "Aux tak sang sau khwan tix ka daux pex mai pex tak im ju mai Aux tak kieh pex ot ka daux haktiex cao pex, khaix an, pex tak tawng mawh Aux Siyiex, pa hoik krai mai pa hoik yuh ka an, Siyiex ah nin heue." ¹⁵ Gumlox Siyiex hoek ka aux ah nin, ¹⁶ "Kawn pui eue, teei khaox tix gawng mai tiiem lai piang an, grawng ceu pui Yudax mai son kawn praix ceu pui Isarelax mai son paox grawm paox gru nawh, khaix an baox teei khaox tix gawng mai tiiem lai piang an, son Yosiep, pa mawh khaox cie ceu pui Epharem mai son nyiex ma ceu pui Isarelax mai son paox grawm paox gru nawh, ¹⁷ "Kleuk khaox an tau kieh mawh tix gawng khaing mai giex khaox pa mawh tix gawng an ka daux taix maix heue." ¹⁸ "Yam krai ceu pui maix ka maix ah nin, mawh ang maix pon krai ex tawng dee bleeh ceu in khankix lie?" ¹⁹ Ah nin ka kix, Siyiex ah nin, "Aux tak teei gawng khaox cie Yosiep, pa koe ka daux taix Epharem mai ceu pui Isarelax mai khawm paox grawm paox gru nawh mai Aux tak kleuk tau mai khaox ceu pui Yudax mai kix mawh tix gawng khaing mai an tak mawh khaox tix gawng khaing ka daux tai Aux heue." ²⁰ "Giex gawng khaox pa hoik tiiem maix lai ka plak sivoe ngai kix, ²¹ "Khaix an ah nin ka kix, Siyiex ah nin, Aux tak teei ceu pui Isarelax khaing sinax ceu pui ka dee hoik hu kix mai tak khrawm kix hoek khaing ku praok ku dawn mai viex kix laig ka daux haktiex cao kix, ²² Aux tak kieh kix mawh pui tix ceu khaing ka daux haktiex, ka piang gawng pui Isarelax mai simiang tix kaux khaing pa kwang ka piang kix khawmuik, kix tak ang lai mawh ceu pui ra ceu mai meung haktiex ra meung tix bawg kawx heue. ²³ Kix tak ang lai seeing yuh tokaux tix, ka riang grang krub mai ka ceu pa seeing brai, tau mai ka ceu pa lud tix bawg kawx, Aux tak deeh taoh kix lih khaing ka can dee hoik lud yuh kix phimap mai tak kieh kix singax, mai kix tak mawh pui Aux mai Aux tak sang mawh Siyiex kix heue. ²⁴ "Kawncau Aux Davit tak mawh simiang ka piang kix mai kix tak koe cao liang yung tix kaux khaing, kix tak sang hawt lox tat jhawm prawng Aux mai priex rien ka lox lai beenli Aux heue." ²⁵ Kix tak yaox ti ot ka daux haktiex tawx Aux ka kawncau Aux Yakop, pa mawh dee pa hoik ot keeing kix mai kix tak sang yaox ti ot tau mai kawn praix kix mai khawm kawn saux kawn sex kix leeing ju mai kawncau Aux Davit tak mawh simiang kix leeing ju heue. ²⁶ Aux tak yuh sijax mukheu pa nhim tau mai kix, mai sijax mukheu an tak koe mai kix leeing ju, Aux tak nawb bwan ka kix mai kieh kix pre haoh hun mai Aux tak deuh dee pa singax singeh Aux ka daux sinax kix leeing ju heue. ²⁷ Nyiex bwan Aux tak koe tau mai kix mai Aux tak mawh Siyiex kix mai kix tak mawh pui Aux heue. ²⁸ Ceu pui kuceu tak tawng ka mawh Aux Siyiex pa kieh pui Isarelax singax singeh, yam koe dee pa singax singeh Aux ka daux sinax kix leeing ju heue.

¹ Gumlox Siyiex hoek ka aux, ² "Kawn pui eue, veeh pakngai tix ka plak simiang Gawgax, pa mawh pui haktiex Magawgax, pa kwang ka piang haktiex Rawsha, haktiex Meshiet, haktiex Tubalax mai krai lox jhai pa sang puing ka nawh, ³ ah nin, Siyiex ah nin, jhak heue, Simiang Gawgax cao pa kwang ka piang haktiex Rawsha haktiex Meshiet mai haktiex Tubalax khankix eue, Aux tak yuh maix laux heue. ⁴ Aux tak feuk kap maix ka miiet mai bluh maix hoek, tau mai cub kru naing maix, khawm brung maix mai pui naing brung maix, pa ceep ka kraung naing pa koe min sibrawm, pa giex plah rhiem tiep tie naing mai pa giex vaig. ⁵ Pui Pasha pui Ethiopia mai pui Libia khankix pa ot tau mai kix pa giex plah rhiem tiebtie naing mai pa ceep mhok rhiem, ⁶ haktiex Gawma mai cub lien nawh khankix, nyiex ma cub ceu pui Biettawgamax khaing haktiex plak laong mai khawm lien nawh khankix, pa mawh pui hun ot tau mai maix heue. ⁷ "Maix mai can pui pa khrawm tix mai maix, rien rhawm ti yuh satix mai pau ti jhak kix heue. ⁸ Khaix hoik luan bawg yam tom rheung maix tak yaox ti kraix khrawm sonsang yuh naing ka daux haktiex an, pa hoik deeh hoek khaing haktiex kudah pa glawd khaing krax kha rhawm ka lawm vaig khaing pui kuceu tom nie pa ot ka piang gawng haktiex Isarelax, pa hoik dawg mawh haktiex dee pa yiien, kix mawh pa kaoh khaing daux haktiex kudah, yam in kix hoik yaox ti ot yiien yawg heue." ⁹ "Maix tak sang hoek awm lih bhaung ting mai kheem ka haktiex awm ceep paiawm, khawm maix mai kru naing maix mai khawm pui pa ot tau mai maix tom nie heue." ¹⁰ Siyiex ah nin daux singaix an, rhawm keud pa caox caig tak lih ka daux rhawm rhi maix, ¹¹ maix tak ah nin, Aux tak hu puing ka haktiex nyiex yaong pa ang koe guh veng, Aux tak yuh laux ka pui pa koe krax yiien yawg mai pa ang koe krax khi glawh khawmuik, dee pa ang guh veng koe mai dee pa ang jhong siviex koe mai siviex veng khankix, ¹² sonsang tud rhim mai con ka kraung khrai mai to brie kix mai nyeu taix ti yuh laux leeing ka dee pa hoik sax yiien pui ka, pa mawh dee ot pui yam in mai dee khrawm ceu pui kuceu ti ot kah, pa chix pon tobrie mai kraung khrai khankix, pa ot ka sigreung haktiex heue. ¹³ "Pui Shebax mai pui Dedan mai cao lai geu veng Tasux mai pui awn ju daux nyiex yaong, tak ah nin ka maix, mawh sang hoek maix ti sang tud rhim ka kraung khrai kix lie? Mawh khrawm cub kru naing ti hoek sonsang rhim kraung khrai sinngao mai mau khri, to brie mai kraung pa mhawm khankix sonsang yuh krax laux leeing pa kied ting lhaong lie?" ¹⁴ "Mawh kheu nan, kawn pui eue, krai lox jhai mai ah nin ka Gawgax, Siyiex ah nin, daux singaix yam yaox pui Aux Isarelax tix ot yiien yawg, ang maix tawng ka lie? ¹⁵ Maix tak hoek khaing dee pa kied singai ka plak laong maix mai ceu pui kuceu tom nie mai kru naing pa ting riang pa brug brung khankix, ¹⁶ maix tak hoek puing ka pui Aux Isarelax awm ceep paiawm ka haktiex. Gawgax eue, yam hoek bawg yam Aux tak sang viex maix hoek puing ka haktiex Aux, sonsang tawng ceu pui kuceu ka Aux, yam jhi Aux grawng singax singeh tix ka daux maix ka plak sivoe ngai kix heue. ¹⁷ "Siyiex ah nin maix mawh pui an pa hoik kieh Aux kawncau tix cao jhai ceu pui Isarelax hoik gruh krai ka daux bawg yam pa hoik luan sonsang viex Aux maix hoek puing ka kix ang mawh lie?" ¹⁸ Siyiex ah nin yam hoek Simiang Gawgax ti puing ka haktiex Isarelax, krax pa kied song rhawm Aux tak lih hoek heue. ¹⁹ Mawh kheu pa kied song rhawm Aux hoik rup awm ngu mai ceu pa kied ting lhat graung ka daux ngaix an tak hoek yung yiang ka daux haktiex Isarelax, ²⁰ Kax ka daux rawm sigrit sigra mai sim sai daux raoma, totiag daux tiagtu mai ceu pa chix chuh chix mu ti hu ka piang tiex khankix mai can pui pa ot ka piang ca haktiex khawmuik, tak siyaung ka plak sivoe ngai Aux, gawng khankix tak sang grhup mai dee pa kied rieh rhauk tak grhup mai guh veng ku mu tak sang bhieh ka piang tiex heue. ²¹ Siyiex ah nin, Aux tak viex vaig tix hoek khaing gawng Aux ku gawng mai puing ka Gawgax mai vaig pui ku kaux, tak sang mug ka puxaik nawh heue. ²² Aux tak viex krax ciyang saux preng mai krax jauh nham hoek ka nawh, Aux tak sang kieh lhiex lih ka piang nawh mai lien nawh mai pui pa ot tau mai nawh khankix mai pa kheem rawm mai pre pa kied ting, khawm ngu mhat lih ka piang kix heue. ²³ Mawh kheu nan, Aux tak jhi min pa ting lhaong tix mai pa singax singeh tix, sidawng ka plak sivoe ngai ceu pui khankix. Khaix an kix tak tawng mawh Aux Siyiex heue.

¹ "Maix pa mawh kawn pui eue, krai lox jhai pa sang puing ka Gawgax ah nin, Siyiex ah nin, Gawgax Simiang haktiex Rawsha, Meshiet mai Tubalax eue, jhak heue, Aux mawh pa tieh feen ka maix, ² Aux tak deeh kieh maix veeh tix mai thong maix hu sivoe mai viex maix hoek ka dee singai khaing baoh plak laong mai kieh maix hoek puing ka gawng Isarelax khankix heue. ³ Aux tak kieh ak pa koe daux taix khawn gwiex maix mai te pa koe daux taix khawn dawm maix khankix cod heue. ⁴ Maix tak goh grhup ka piang gawng haktiex Isarelax tan mai lien maix mai pui pa ot tau mai maix khawmuik, Aux tak ap maix mawh priex ih sim mai totiag kuceu pa ot ka daux nong daux yu heue. ⁵ Siyiex ah nin, goh yum ka daux lung, mawh kheu Aux hoik krai ah nan heue. ⁶ Aux tak ploi ngu ka piang haktiex Magawgax mai ka piang pui pa ot yiien yawg ka piang klawn tiex rawm sigrit sigra, mai kix tak tawng mawh Aux Siyiex heue." ⁷ Aux tak kieh min ceu kaux pa singax tix sidawng ka daux sinax pui Aux Isarelax mai kix tak ang lai salao ka min ceukau pa singax singeh Aux tix bawg kawx, mai ceu pui kuceu tak tawng ka mawh Aux Siyiex Isarelax cao pa singax singeh heue. ⁸ Siyiex ah nin, an tak sang hoek mai hoik lih mawh awm pa hoik krai Aux daux in ngaix heue. ⁹ Pui pa ot ka daux haktiex Isarelax tak lih hu mai teei ngu gleeing kraung naing khankix, plah rhiem tiebtie naing mai kraung plah tie naing khawm ra ceu, ak mai te, krong pliah mai pliah mai kix tak keeig an khankix ka ngu aliah num heue. ¹⁰ Kix tak ang yaox ti kraix khix mai sawg khix daux tiag, daux nong khankix, kheu hoik mawh kraung naing son khix pa sang taong kix mai kix tak tud rhim ka pui pa hoik tud rhim ka kix mai kix tak con ka pui pa hoik yuh con ka kix, Siyiex ah nan heue. ¹¹ "Ka daux singaix an, Aux tak sang tawx dee pa sipaung Gawgax ka daux haktiex Isarelax, ka daux ngawd lailing pui ka plak lih singaix rawm sigrit sigra mai an tak thox daux krax pa sang lailing pui krax khankix, mawh kheu jao sipaung kix Gawgax mai pui nawh tan, mawh kheu nan, kix tom kok dee an mawh daux ngawd Hamon Gawgax heue. ¹² Nyiex ma ceu pui Isarelax tak sang sipaung kix aliah khix sonsang kieh kix haktiex singax heue. ¹³ Pui haktiex khawmuik tak sipaung ka kix ka daux pa ao min tix son an, ka daux singaix yam pruh min sibrawm Aux, Siyiex ah nan heue. ¹⁴ Yam hoik sidah aliah khix, kix tak laug mai yaog ti deuh pui pa sang lailing sonsang yuh kaing sipaung ka pui yum pa kawn deuk ka daux haktiex, sonsang yuh kix haktiex an singax heue. ¹⁵ Yam lailing kix cub pa sawg ka daux haktiex, yam yaox kix si-ang pui yum dee mawx ang ah, kix tak sum ti deuh mhai rong dex an tix mu, tom hoek bawg yam hoik sidah sipaung cao sipaung pui yum ka nawh daux ngawd Hamon Gawgax heue. ¹⁶ Ceu kaux veng an pa koe tan mawh Hamona, kix tak kieh haktiex singax heue. ¹⁷ "Kawn pui eue, Siyiex ah nin, kok ka sim kuceu mai ka totiag pa ot ka daux tiagtu khankix, khrawm paox tix hoek mai rom paox tix hoek khaing ku daog ku dawn khawmuik mai hoek ka pawie krax tan pa khre Aux ka son pex, pawie krax tan pa kied ting ka piang gawng haktiex Isarelax, sonsang ih pex nex mai nyaux nham heue." ¹⁸ "Pex tak sang yaox ti ih nex pui pa kied ting riang ting rao mai yaox tix nyaux nham cub cao kaing cao kap pui haktiex, awm ih pex nex yung mhaing mai kawn yung mai nex pex mhaing mai nex mawie mhaing khankix, pa mawh pa jawg tix eei kluing khaing daux haktiex Bashan heue." ¹⁹ Pex tak yaox ti ih klon bee tom sak mai yaox tix nyaux nham pawie krax tan pa khre rien Aux ka son pex tom yoek tix heue. ²⁰ Pex tak sang sawm ka pheen Aux mai nex brung mai nex cao pa brug brung, nex pui pa kied ting riang ting rao mai nex pui naing khankix, Siyiex ah nan heue. ²¹ Aux tak kieh min sibrawm tix sidawng sinax ceu pui mai ceu pui khawmuik tak yaox krax prawng ca pa rahsee pa deuh Aux taix tix ka piang kix heue. ²² Jah yam in hu sivoe ceu pui Isarelax tak tawng ka mawh Aux Siyiex, ²³ ceu pui tang ceu tak tawng ka mawh nyiex ma ceu pui Isarelax pa hu ka daux pa giex laung son phimap tix, kheu ang kix kaux sijax ka Aux, mawh kheu nan, Aux hoik mox pakngai khaing kix mai ap kix ka daux tawm taix pui koeng kix mai kix goh gup ka lawm vaig khawmuik heue. ²⁴ Aux deeh yuh ka kix awm pa ang kix singax mai awm pa lud kix mai Aux hoik mox pakngai khaing kix heue. ²⁵ Siyiex ah nin, yam in Aux tak viex ceu pui Yakop deeh ing khaing pa giex laung mai koe krax caux rhawm ka piang nyiex ma ceu pui Isarelax khawmuik, kheu kied koe rhawm Aux ka min ceu kaux pa singax singeh tix heue. ²⁶ Kix tak yaox ti kham geu krax kaig tua mai pa ang kaux sijax pa lud tieh feen ka Aux, yam ot kix yiien yawg ka daux haktiex tix tau mai pa ang koe pui pa kieh kix koe krax lhat graung, ²⁷ yam deeh viex Aux kix hoek khaing sinax pui kuceu mai khrawm kix lih khaing haktiex pui koeng kix mai yam yaog Aux min plakngai tix ka plak sivoe ngai ceu pui tang ceu tom nie, ²⁸ khaix an kix tak tawng ka mawh Aux Siyiex kix, Aux ploi kix hu mawh pa giex laung ka daux sinax ceu pui khankix mai aux deeh khrawm kix hoek ka haktiex cao kix, ang lai prah ang lai deuk kix tix kaux kawx khaing ka daux sinax pui tang ceu tix bawg kawx heue. ²⁹ Siyiex ah nin, mawh kheu hoik rauk Aux khwan lih ka piang nyiex ma ceu pui Isarelax mai Aux tak ang lai veeh pakngai khaing kix tix bawg kawx heue.

¹ Yam kawn mawh ex pui pa giex laung ka daux tixnga phwan num tix num, khix tix kao ngaix, yam hoik naog laux veng Yerusaliem kao pon num, ka daux ngaix an, plawng taix Siyiex hoik koe ka piang aux mai Nawh Cao viex aux hu ka veng an. ² Ka daux riang susai Siyiex, Nawh Cao viex aux hu ka daux haktiex Isarelax mai hoik deuh aux ka piang gawng an see plak seh hoik koe pa awm pakpeung veng tix mu heue. ³ Nawh Cao viex aux hu tan, jhak heue, pui tix kaux hoek awm grang pakpeung tawng lheung hoek bleeh tan, tau mai pa giex gawng priem mai maox diag tiag tix nyaing ka daux taix tix mai cung ka diang siviex veng heue. ⁴ Pui an ah nin ka aux, "Kawn kawn pui heue, jhak ka ngai maix mai nghiet ka yhaok maix mhawm mhawm mai priex can ceu pa sang jhi Aux ka maix, ka daux rhawm rhi tix, Aux hoik viex maix hoek tin, sonsang krai maix can ceu pa yaox maix kuceu ka nyiex ma ceu pui Isarelax heue." ⁵ Jhak heue, guh veng hoek hawt vung viang plak praix nyiex bwan, ka daux taix pui an koe khaox diag tiag pa lang liah sawk ka tix gawng, tix diag khaox an koe been tix sawk mai tix tiag taix mai nawh tiag ti yaox ka krax vieh guh veng an koe tix diag khaox tiag an tix gawng mai krax lhaong kawx awm an heue. ⁶ Khaix an nawh laig ka diang siviex plak lih singaix mai haok ka glawk bawng khankix mai tiag ti yaox diang siviex an, plak vieh koe tix diag khaox tiag an mai plak lhaong kawx awm an heue. ⁷ Nyiex pau yam, krax lhaong koe tix diag khaox tiag mai krax vieh kawx koe tix diag khaox tiag an, mai sinax lawg pau yam khankix, khan paox tix, tix lawg hoik tix lawg phwan sawk. diang siviex laig plak daux koe tix diag khaox tiag heue. ⁸ Nawh deeh baox tiag ti yaox siviex sidub plak daux mai koe daix sawk heue. ⁹ Rong sidub an khankix koe ra sawk mai sidub an koe ka praok plak daux heue. ¹⁰ Ka diang siviex plak lih singaix ka plak in plak an tang koe nyiex pau yam ka loe mu, an loe mu krax lhaong krax vieh hoik sidu lhaong awm paox tix mai rong kawx sidu lhaong awm paox tix heue. ¹¹ Nawh tiag ti yaox plak vieh diang laig daux siviex an koe kao sawk mai krax lhaong daux siviex an koe kao loe sawk heue. ¹² Ka sivoe ngai lawg pau yam an koe ding pa khan plak in plak an, pa vieh tix sawk, lawg pa koe plak in plak an plak vieh mai plak lhaong koe liah sawk awm paox heue. ¹³ Khaix an nawh tiag ti yaox braux lawg jah khaing braux plak in tom hoek braux lawg plak an pa hu krax sinax plak vieh koe tixnga phwan sawk mai siviex lawg an kix see paox tix heue. ¹⁴ Nawh jah ti tiag ka rong sidub tom hoek ka brawk nyiex koe tigliah sawk. ¹⁵ Jah khaing siviex laig plak praix tom hoek ka siviex sidub nyiex, pa laig plak daux koe tixphwan sawk. ¹⁶ Hawt vung viang daux krax siviex veng koe siviex iak ka mai siviex iak an khankix sikhawp hu sipie tom hoek ka diang siviex sidub nyiex, lheu khaing an ka plak daux sidub nyiex koe siviex iak hawt vung viang mai ka piang pang siviex iak khankix ku mu koe riang khaox jhie yaong kah. ¹⁷ Khaix an nawh viex aux hu plak praix ka brawk, jhak heue, kix tawm simaox jah ka daux lawg tom hoek ka brawk nyiex mai lawg pa tawm simaox koe tixngoe lawg heue. ¹⁸ Simaox pa tawm an, koe hawt praok krax hu ka diang siviex khankix mai sidu lang awm siviex an khankix, in mawh simaox tawm ka dee tiem heue. ¹⁹ Khaix an nawh tiag ti yaox krax vieh, jah khaing sivoe siviex veng plak greem tom hoek ka sivoe brawk, koe tix yieh sawk, pa koe see plak lih singaix mai ka plak laong heue. ²⁰ Khaix an nawh tiag ti yaox krax vieh krax lang siviex veng pa veeh ngai tix plak laong heue. ²¹ Nyiex pau yam plak an plak in koe lawg tix plak loe lawg, pang siviex mai pang sidub an sidu awm pang siviex pa koe sivoe khankix, krax lang koe been tixphwan sawk mai krax vieh koe tixnga phwan sawk heue. ²² Siviex iak mai sidub koe riang khaox jhie yaong pa awm pa hoik koe ka siviex veng sivoe an, pa veeh ngai tix ka plak lih singaix, koe glawk bawng aliah glawk pa haok ka siviex an mai sidub koe ka plak daux heue. ²³ Siviex veng ot see plak siviex plak krax laong mai awm daux siviex veng pa koe plak lih singaix mai koe siviex pa laig ka lawg plak daux mai nawh tiag ti yaox ka siviex tix mu hoik tix mu koe tix yieh sawk heue. ²⁴ Khaix an nawh viex aux hu plak seh mai yaox ka koe siviex ka plak seh tix mu tan mai nawh tiag ti yaox pang siviex sidub khankix hoik awm diag pa koe sivoe an heue. ²⁵ Dee an koe siviex iak hawt vung viang sidub, awm siviex iak pa koe sivoe khankix, krax lang koe tixphwan sawk mai krax vieh koe tixnga phwan sawk heue. ²⁶ Koe glawk bawng aliah glawk pa haok ka siviex an mai sidub an koe ka plak daux sivoe bawng an, pang siviex plak in plak an koe riang khaox jhie yaong ka tix plak tix mu heue. ²⁷ Koe siviex ka plak seh pa laig ka plak daux tix mu mai nawh tiag ti yaox siviex veng tix mu hoik tix mu tom hoek ka plak seh koe tix yieh sawk heue. ²⁸ Khaix an nawh viex aux laig ka daux siviex veng ka brawk an plak seh mai nawh tiag ti yaox siviex veng plak seh, pa hoik sidu awm pa hoik koe sivoe heue. ²⁹ Nyiex pau yam mai pang siviex mai sidub sidu awm pa koe sivoe khankix mai siviex iak koe hawt vung viang ka daux sidub an, krax lang koe tixphwan sawk mai krax vieh koe tixnga phwan sawk heue. ³⁰ Sidub pa koe hawt vung viang baoh an khawmuik, krax lang koe tixnga phwan sawk mai krax vieh koe phwan sawk heue. ³¹ Sidub nyiex veeh ngai tix ka plak praix brawk nyiex mai ka pang siviex koe riang khaox jhie yaong ka mai koe glawk bawng ka daix glawk heue. ³² Khaix an nawh viex aux laig ka daux brawk nyiex plak lih singaix mai nawh tiag ti yaox siviex veng an, awm diag pa hoik koe sivoe an heue. ³³ Nyiex pau yam mai pang siviex mai sidub nyiex hoik awm diag pa koe sivoe an mai siviex iak koe ka daux hawt vung viang sidub nyiex, krax lang koe tixphwan sawk mai krax vieh koe tixnga phwan sawk heue. ³⁴ Sidub an veeh ngai tix see plak praix brawk nyiex mai ka piang pang siviex plak in plak an koe riang khaox jhie yaong tix plak tix mu mai koe glawk bawng ka daix glawk heue. ³⁵ Khaix an nawh viex aux hu ka siviex veng pa koe ka plak laong mai nawh tiag ti yaox ka an, hoik awm diag pa hoik koe sivoe an heue. ³⁶ Nyiex pau yam khankix, pang siviex mai sidub nyiex awm pa hoik koe sivoe an, mai hawt vung viang an koe siviex iak, krax lang koe tixphwan sawk mai krax vieh koe tixnga phwan sawk heue. ³⁷ Sidub nyiex veeh pakngai ti see ka plak praix brawk nyiex mai ka pang siviex koe riang khaox jhie yaong ka plak an plak in tix plak tix mu mai koe glawk bawng ka daix glawk heue. ³⁸ Koe lawg tix mu pa kleuk tix ka pang siviex pa laig daux lawg ting, lawg an mawh lawg dee sigrhah kix krax tan pa gleeing heue. ³⁹ Ka daux siviex laig ka sidub an koe pheen ka praok plak in plak an tix plak ra mu, ka piang pheen an mawh dee pa sang pah kix krax tan pa gleeing mai krax tan pa pluat ploi phimap mai krax tan pa pluat krax lud heue. ⁴⁰ Ka plak praix siviex laig ka sidub plak laong ka plak an plak in koe pheen ka tix plak ra mu heue. ⁴¹ Ka praok siviex plak in plak an koe pheen pon mu, khawmuik mawh pheen daix mu sonsang pah kix krax tan tix ka piang heue. ⁴² Koe pheen simaox pon mu, pa hoik bre tix saik mhawm mhawm, son krax tan pa gleeing, krax lang koe tix sawk plak mai krax vieh koe tix sawk plak mai krax lhaong koe tix sawk, pheen an mawh pa deuh kix kraung pa shiao tix khankix yam pah kix krax tan pa gleeing mai krax tan pa appong tix heue. ⁴³ Hawt vung viang pheen an, kix phyawk gok rhiem pa lang tix diex ka, sonsang feuk kix nex krax tan pa appong tix ka piang heue. ⁴⁴ Nawh viex aux lih khaing plak praix mai laig ka plak daux, ka dee an koe lawg ra lawg ka plak daux mai lawg an tix mu koe dex siviex veng plak laong mai veeh ngai tix plak seh mai lawg an tang lawg koe dex siviex veng plak seh mai veeh ngai tix plak laong heue. ⁴⁵ Nawh ah nin ka aux, lawg pa veeh ngai tix plak seh in, mawh sonsang ot cao giex kaing li pa koe beeh glawm ti yuh kaing daux nyiex bwan heue. ⁴⁶ Lawg an pa veeh ngai tix ka plak laong mawh sonsang ot cao giex kaing li pa koe beeh glawm ti yuh kaing ka khu dee tan, inkix mawh kawn simex Zadok, pa kaoh khaing daux cub kawn simex pui Lewix khankix, pa pon greed ti dex Siyiex khaing sonsang yuh kaing jhaw ka son Nawh Cao heue. ⁴⁷ Nawh tiag ti yaox brawk nyiex, krax lang koe tix yieh sawk mai krax vieh koe tix yieh sawk, sidu paox tix khawm pon daog, khu dee tan koe ka plak sivoe nyiex bwan heue. ⁴⁸ Khaix an nawh viex aux hu ka sidub nyiex bwan mai tiag ti yaox ka rong sidub khankix, rong sidub nyiex ku mu koe phwan sawk khawm ra plak mai krax vieh daux siviex an, koe tix plak loe sawk heue. ⁴⁹ Krax lang sidub nyiex, koe tixnga sawk mai krax vieh koe kao tix sawk mai koe glawk bawng kao glawk pa sang haok ka, rong koe ka sivoe sidub nyiex tix plak tix mu heue.

¹ Khaix an nawh viex aux laig ka daux nyiex bwan pa singax mai tiag ti yaox rong pang siviex, krax vieh plak in plak an koe liah sawk, ² siviex laig ka nyiex bwan koe kao sawk, mai dee laig praok ding plak in plak an koe phwan sawk mai nawh tiag ti yaox krax lang koe tixpon sawk mai krax vieh koe tixnga sawk heue. ³ Khaix an nawh laig ka lawg plak daux mai hoik tiag ti yaox rong diang siviex koe ra sawk mai diang dee laig an krax vieh koe liah sawk mai krax lhaong diang laig an koe aliah sawk heue. ⁴ Nawh tiag ti yaox daux lawg an, krax lang koe tixnga sawk mai krax vieh koe tixnga sawk mai nawh ah nin ka aux, ka plak toi nyiex bwan pa singax, in mawh dee pa kied singax singeh heue. ⁵ Khaix an nawh tiag ti yaox ding nyiex bwan, krax pu koe liah sawk mai lawg pa koe hawt vung viang nyiex bwan, krax vieh koe pon sawk ku mu heue. ⁶ Lawg pa koe praok khankix koe loe can, daux tix can koe tixngoe lawg, lawg ghoik ka piang ang lai lo ka rong joh, mawh kheu hoik neung tix ka khaox lat ding nyiex bwan heue. ⁷ Phan yeh nyiex haok tix glawk hoik tix glawk, lawg pa koe praok ding kawx nie vieh hu sipie hawt vung viang khawmuik, mawh kheu lat pa joh ka ding nyiex bwan khankix hoik lih dung awm glawk bawng, mawh kheu nan, pakpeung krax vieh nyiex bwan an hoik baox nie hu awm haok glawk jah ka plak greem glawk sigreung tom hoek ka glawk plak piang heue. ⁸ Aux baox yaox plak dee lhaong num riah nyiex bwan hawt vung viang khawmuik mai num riah nyiex bwan an koe tix diag khaox tiag mai lhaong liah sawk heue. ⁹ Krax pu ding lawg plak praix koe phwan sawk mai lawg pa deuk khankix kleuk tix mai nyiex bwan, ¹⁰ ding lawg pa koe hawt vung viang ding nyiex bwan, keu paox tix tixnga sawk khaing paox tix ku mu heue. ¹¹ Siviex pa koe ka praok hoik paoh tix plak laong krax an mai siviex an veeh tix see plak laong mai an tang mu veeh tix ka plak see piak seh mai krax vieh blawng krax an koe phwan sawk hawt vung viang khawmuik heue. ¹² Nyiex pa koe sivoe brawk nyiex bwan plak klip singaix, plak vieh koe tigliah sawk, mai ding hawt vung viang nyiex an krax pu koe phwan sawk mai krax lang koe tixdim sawk. ¹³ Khaix an nawh tiag ti yaox krax lang nyiex bwan, koe tix yieh sawk mai sinax brawk nyiex tom hoek ka ding lang tix yieh sawk, ¹⁴ krax vieh brawk nyiex bwan plak lih singaix koe tix yieh sawk heue. ¹⁵ Nawh tiag ti yaox, krax lang brawk nyiex an pa veeh tix plak lih singaix, tau mai brawk plak klip singaix khawm lawg nyiex pa koe ka praok plak an plak in koe tix yieh sawk heue. ¹⁶ Pang siviex mai lat siviex iak mai pang siviex iak pa koe hawt vung viang glawk loe can, pa jah ka meeh phia tom hoek ka siviex iak, plak piang hoik tawm hoik kab ka phia khawmuik, ¹⁷ ka siviex iak siviex ting plak praix plak daux khawmuik mai khawm ka piang hawt vung viang ding plak daux mai plak praix, nawh tiag ti yaox heue. ¹⁸ Koe riang Cherubin mai khaox jhie yaong tix pang koe sinax Cherubin ra mu. Cherubin an tix mu koe pakngai ra mu, ¹⁹ mai hoik tawk tix sau pakngai pui tix kaux ka see pang khaox jhie yaong tix pang ka praok mai ka pakngai sivai sangsi awn ju an tix mu ka see pang khaox jhie yaong an mai kix tawk tix sau an khankix ka hawt vung viang nyiex bwan khawmuik heue. ²⁰ Jah khaing piang meeh tawm hoek ka daux piang siviex ting mai ka piang ding khawmuik tawk tix sau riang Cherubin mai riang khaox jhie yaong ka khawmuik heue. ²¹ Rong siviex nyiex bwan khankix koe pakpeung pon daog mai khu dee tan pa koe plak sivoe dee pa singax singeh an kawx hoik awm pakpeung rong siviex nyiex bwan an heue. ²² Khu tan pa yuh ka khaox, krax lhaong koe loe sawk mai krax vieh koe ra sawk, rong khawm pon daog mai plak daux khawm ding yuh tix ka khaox khawmuik mai nawh ah nin ka aux, "In mawh pheen pa deuh ka plak sivoe Siyiex heue." ²³ Nyiex bwan mai dee pa singax singeh an koe siviex ting ra mu heue. ²⁴ Siviex ting koe plah siviex ra mu, mawh pa chix niiep tix laig khawm ra mu tau heue. ²⁵ Awm saik kix tix sau riang Cherubin mai riang khaox jhie yaong ka piang ding nyiex bwan khankix, ka piang plah siviex nyiex bwan khankix kawx, hoik saik ti sau awm an, mai tawk ti sau phia ka piang sidub nyiex plak praix heue. ²⁶ Daux siviex iak hoik saik ti sau riang khaox jhie yaong ka piang praok plak in mai plak an, ka piang praok sidub nyiex mai vung viang ka piang praok nyiex bwan mai ka piang pang siviex heue.

¹ Khaix an nawh viex aux lih hoek ka ding plak praix, ka krax see plak laong mai nawh viex aux laig ka daux, pa koe ka sivoe brawk ding pa khan tix mai pa koe sivoe lawg ka see plak laong heue. ² Krax lang lawg an tom hoek ka siviex plak laong koe tix yieh sawk mai krax vieh koe tixphwan sawk, ³ ka plak sivoe ding plak daux koe tixnga sawk mai ka plak praix ding dee tawm simaox, koe lawg pa koe loe thaix heue. ⁴ Ka sivoe lawg an ka plak daux koe krax pa sang lailing ka pa vieh kao sawk mai krax lang tix yieh sawk mai siviex ting an veeh ngai tix ka plak laong heue. ⁵ Lawg pa koe plak piang khankix nie sikhawp, kheu jao hoik laig meeh tawm an plak daux lheu khaing lawg plak greem mai lawg sigreung glawk nyiex khankix heue. ⁶ Mawh kheu hoik koe an kix loe thaix mai ang koe rong, awm ding khankix, mawh kheu nan, nawh nie lheu sikhawp khaing lawg plak greem mai lawg sigreung heue. ⁷ Ding pa lih ka plak praix an tix mu, koe lawg pa sidu see ka ding khankix mai lawg pa koe see ding an plak praix mai krax lang koe tixphwan sawk heue. ⁸ Krax lang lawg an plak praix ding koe tixphwan sawk, krax lang nawh khaing plak sivoe ngai nyiex bwan koe been tix yieh sawk heue. ⁹ Ka greem lawg pa koe ka plak lih singaix, koe siviex pa sang lih khaing ding an plak praix heue. ¹⁰ Ka plak seh nyiex bwan ka baoh dee yi ka praok ding tan baox koe lawg kah. ¹¹ Krax lailing pa koe sivoe lawg ankix mai pakpeung krax vieh krax lang mai krax laig krax lih lawg an hoik awm lawg pa koe plak laong heue. ¹² Siviex lawg pa koe plak seh, hoik awm siviex lawg pa koe plak laong mai koe siviex ting tix mu pa sang laig ka krax pa lailing, ka plak sivoe ding see plak lih singaix heue. ¹³ Nawh ah nin ka aux, "Lawg plak laong mai lawg plak seh, pa koe sivoe brawk an khankix, mawh lawg pa singax singeh, dee ot cao giex kaing li, pa greed ti dex Siyiex sonsang ih krax tan lu, pa kied singax singeh ka dee an, kix deuh krax tan phawng nghox ca im, krax tan pa pluat ploi phimap mai krax tan son pa lud, mawh kheu mawh pa singax singeh heue." ¹⁴ "Yam laig cao giex kaing li ka daux lawg pa singax singeh, kix ang yaox tix lih hu ka plak praix lawg pa singax singeh tom hoek ka brawk ding plak praix, kix tak yaox ti peeik ti deuh kraung ceep pa yuh kaing jhaw, mawh kheu kraung in mawh pa singax singeh, kix tak ceep kraung tang ceu khaix an, kix tak pon hu greed dex ka pui khankix heue. ¹⁵ Yam hoik tiag ti yaox ka diag plak daux nyiex bwan, nawh viex aux lih khaing siviex pa veeh ngai tix see plak lih singaix mai tiag ti yaox diag gwang hawt vung viang nyiex bwan khawmuik heue. ¹⁶ Nawh tiag ti yaox praok plak lih singaix ka gawng khaox tiag an mai koe phwan yieh sawk ka diag khaox tiag an heue. ¹⁷ Nawh tiag ti yaox praok plak laong mai koe phwan yieh sawk diag khaox tiag an heue. ¹⁸ Nawh hoik tiag ti yaox praok plak seh mai hoik koe been phwan yieh sawk ka diag khaox tiag an heue. ¹⁹ Nawh tiag ti yaox praok plak klip singaix mai koe phwan yieh sawk ka diag khaox tiag an heue. ²⁰ Nawh tiag an khawm pon praok, hawt vung viang ding an, krax lang phwan yieh sawk mai krax vieh phwan yieh sawk, sonsang tang gwieh dee pa singax mai dee pa ang singax heue.

¹ Khaix an nawh viex aux hoek ka siviex, pa veeh ngaix tix ka see plak lih singaix heue. ² Jhak heue, min sibrawm Siyiex pui Isarelax hoek khaing plak lih singaix, mai lox pa hoek nawh awm lox sinum rawm, mai min sibrawm Nawh jhan riang ka piang haktiex heue. ³ An hoik awm riang susai pa yaox aux yam hoek Nawh ti yuh veng laux leeing mai awm riang susai pa hoik sax yaox aux hawt rawm klawng Kheba, mai aux goh gup ngai tix piang tiex. ⁴ Min sibrawm Siyiex hoek laig ka daux nyiex bwan khaing siviex pa veeh ngai tix ka plak lih singaix, ⁵ khwan Siyiex yaog aux haok mai viex aux hoek ka brawk nyiex bwan, mai jhak heue, min sibrawm Siyiex hoik naog ka daux nyiex bwan heue. ⁶ Yam cung pui tix kaux ka praok aux, aux mhong sikah pui tix kaux ka aux, khaing daux nyiex bwan, ⁷ mai Nawh ah nin ka aux, "Kawn pui eue, in mawh dang ngeung Aux mai mawh dee deuh Aux caong tix, ka sinax kawn praix ceu pui Isarelax leeing ju. Nyiex ma ceu pui Isarelax tak ang lai salao ceu kaux pa singax Aux khaix in tix bawg kawx, cao kix mai simiang kix, ang lai lud vao mai ang krub riang yum simiang kix ka dee pa lhaong kix heue. ⁸ Kix hoik yuh pang siviex kleuk tix mawh pang siviex Aux mai kieh rong siviex dex mai rong Aux, mawh ding ngie pa khan sinax kix mai aux, kix hoik kieh ceu kaux pa singax singeh Aux seeing brai, ka pa lud tix, mawh kheu nan, Aux hoik kieh kix laux leeing ka krax pa song rhawm tix heue. ⁹ Kieh kix teei ti tik krax pa lud vao tix mai tokaux yum simiang kix singai khaing Aux mai Aux tak ot ka sinax kix leeing ju heue. ¹⁰ "Kawn pui eue, krai nyiex ma ceu pui Isarelax mhong grawng nyiex bwan mai kieh kix tiag ti yaox pakpeung nyiex bwan an, sonsang kaig tua kix ka phimap yuh cao tix. ¹¹ Phan kix hoik kaig tua ka ceu pa hoik yuh tix, jhi kix yaox grang pakpeung nyiex bwan mai krax laig krax lih son pa sang khre rien tix khankix mai kieh kix tawng grawng been mai lox tat jhawm prawng khawmuik mai tiiem ti deuh grawng an khankix ka plak sivoe ngai kix, son tak sang hawt kix ti yuh awm been mai awm lox tat jhawm prawng khankix. ¹² In mawh been lox tat jhawm prawng pa dex dawd mai nyiex bwan, ka dah dee vung viang ka piang choek gawng tak mawh dee pa kied singax jhak heue, in mawh been lox tat jhawm prawng nyiex bwan heue." ¹³ Inkix mawh grawng pa tiag ka khu dee tan ka diag sawk, tix sawk an koe tix sawk mai tix plah taix, jaong num nawh lhaong tix sawk mai vieh tix sawk mai krax pu hawt vung viang an koe tix diex, in mawh krax lang khu dee tan. ¹⁴ Jah ka jaong num khaing piang tiex tom hoek ka glawk mee ka greem koe ra sawk mai krax vieh koe tix sawk, jah ka glawk iak tom hoek ka glawk pa ting lhaong koe pon sawk mai krax vieh tix sawk, ¹⁵ glah ngu khu dee tan lhaong pon sawk, tau mai rung pa koe tix sawk pon mu jung tix haok ka piang khaing daux glah ngu heue. ¹⁶ Pakpeung glah ngu khu dee tan an sidu paox tix khawm pon daug, krax lang koe kao ra sawk mai krax vieh kao ra sawk. ¹⁷ Pakpeung glawk an kawx tak sidu paox tix khawm pon daog, krax lang koe kao pon sawk krax vieh kao pon sawk, hawt vung viang moing vieh tix sawk plak, num plak greem lih tix sawk hawt vung viang mai bawng khu dee tan tak veeh ngai tix ka plak lih singaix. ¹⁸ Nawh Cao ah nin ka aux, "Kawn pui eue, Siyiex ah nin, in mawh been pa dex dawd son khu dee tan ka daux singaix yam yuh maix ka khu dee tan sonsang tan ka krax tan pa gleeing khankix ka piang an mai sonsang phruah nham ka piang an heue." ¹⁹ Maix tak tawx kawn mawie mhaing awn ju tix mu, son krax tan pa pluat ploi phimap ka cao giex kaing li ceu pui Lewix khaing nyiex ma Zadok, pa greed ti hoek dex Aux, sonsang yuh kaing jhaw Aux khankix, Siyiex ah nan. ²⁰ Maix teei nham tiblah mai sau nawh ka piang rung khu dee tan pon mu, khawm pon daog glawk mee an mai hawt vung viang ka piang moing an, maix tak ap khu dee tan in mawh pa singax singeh ka heue. ²¹ Maix tak baox teei kawn mawie mhaing son krax tan pa pluat ploi phimap mai gleeing an ka dah dee pa hoik laug ti deuh daux nyiex bwan ka plak praix dee pa singax heue. ²² Ka daux ra ngaix tix ngaix maix tak tan kawn pex mhaing pa loig tix mu, son krax tan pa pluat ploi phimap, maix tak kieh khu dee tan an singax awm hoik kieh maix khu dee tan an singax ka nham mawie mhaing heue. ²³ Yam kieh maix khu dee tan singax maix tak tan kawn mawie mhaing pa loig tix mu mai kawn yung mhaing pa loig khaing phung yung. ²⁴ Maix tak viex an hoek ka plak sivoe Siyiex, cao giex kaing li tak groi kih ka piang an khankix mai tan an mawh krax tan pa gleeing ka Siyiex heue. ²⁵ Son aliah singaix ku ngaix maix tak tan pex tix mu son krax tan pa pluat ploi phimap tix mai kawn mawie mhaing pa loig mai kawn yung mhaing pa loig khaing phung yung maix tak yaox tix tan heue. ²⁶ Daux aliah singaix, kix tak yuh khu dee tan mawh pa singax singeh mai ap dee an mawh pa singax singeh heue. ²⁷ Yam hoik naog pa singax aliah singaix, ka daux daix ngaix hu sivoe, cao giex kaing li tak tan krax tan pa gleeing pex mai krax tan pa nhim pex ka piang khu dee tan, mai Aux tak rieb ti teei pex, Siyiex ah nan heue."

¹ Khaix an Nawh Cao deeh viex aux hoek ka plak praix siviex dee pa singax singeh, veeh ngai tix ka plak lih singaix, mai siviex an hoik nyeep tix. ² Nawh ah nin ka aux, "Siviex in tak nyeep tix, mai tak ang lai paoh tix mai pui tak ang yaox tix laig ka tix kaux kawx, mawh kheu Siyiex mawh Siyiex ceu pui Isarelax, hoik laig ka daux siviex an, mai siviex an tak nyeep tix. ³ Mawh ngie cao kaing, pa tak ngawm ti ih priex preem sivoe Siyiex, mai nawh tak yaox ti laig daux krax siviex sidub mai laig lih ka daux krax an heue. ⁴ Khaix an Nawh Cao viex aux hoek ka daux krax diang siviex plak laong sivoe nyiex bwan mai aux simi ti yaox, jhak heue, min sibrawm Siyiex naog ka daux nyiex bwan Siyiex mai aux hoik gup ngai tix ka piang tiex. ⁵ Siyiex ah nin ka aux, "Kawn pui eue, jhak ti yaox mai priex mhawm mhawm mai nghiet ka pa krai Aux pa dex dawd mai been lox tat jhawm prawng grawng nyiex bwan Siyiex khawmuik mai een ti tawng pui pa pon laig pon lih ka daux nyiex bwan khaing daux dee pa singax singeh mhawm mhawm." ⁶ Krai ah nin ka nyiex ma ceu pui Isarelax pa tieh feen khankix. Siyiex ah nin, "Nyiex ma ceu pui Isarelax eue, paw lai yuh pa seeing brai yuh pex khankix." ⁷ Yam viex pex krax tan pa ih Aux pa mawh klon bee mai nham. Pex kieh nyiex bwan Aux seeing brai, kheu viex pex pui tang meung pa ang nyang pat hak rhawm rhi tix mai pa ang nyang pat hak tokaux tix, sonsang ot kix ka dee pa singax singeh Aux, sonsang seeing yuh kix ka pa mawh nyiex bwan Aux mai pex hoik yieh gumlox sijax mukheu Aux laux leeing kheu jao pa seeing brai pex heue. ⁸ Pex ang priex kraung khrai ceu pa singax singeh Aux khankix mai yaog pui tang ceu mawh cao pa priex kraung khrai dee pa singax singeh Aux heue. ⁹ "Siyiex ah nin, pui tang praix klawng pa ang nyang pat hak rhawm tix ang ah, pa ang nyang pat hak tokaux tix mai pa ot sinax ceu pui Isarelax khankix tak ang pon ti laig ka daux dee pa singax singeh Aux. ¹⁰ Ceu pui Lewix pa hoik singai hu khaing Aux mai ceu pui Isarelax kawx lih hu khaing Aux mai hawt khaix riang grang krub tix, kix tak yaox ti kham phimap cao tix heue. ¹¹ Kix tak mawh pa yuh kaing jhaw ka dee pa singax singeh Aux mai pau diang siviex nyiex bwan mai yuh kaing jhaw daux nyiex bwan, kix tak mawh cao pa pah krax tan pa gleeing mai krax tan pa appong tix son pui mai kix tak yaox ti cung ka plak sivoe pui, sonsang yuh kaing son kix heue. ¹² Mawh kheu hoik yuh kix kaing jhaw ka sivoe riang grang ka son pui mai hoik kieh nyiex ma ceu pui Isarelax sideeing rau ka daux pa lud, mawh kheu nan, Aux hoik yaog khawn taix tix mai jhax lawg ka kix, sonsang yaox kix tix kham phimap cao kix, Siyiex ah nan heue. ¹³ Kix tak ang lai yaox ti yuh kaing cao giex kaing li mai greed ti dex Aux mai ang pon ti hoek dee pa kied singax singeh Aux mai kix tak yaox ti kham geu krax pa kaig pa tua kix mai krax pa seeing brai, ceu pa lud kix heue. ¹⁴ Aux tak kieh kix teei beeh glawm priex rien nyiex bwan, son kaing nawh khawmuik mai son can ceu pa sang yuh ka daux nyiex bwan heue. ¹⁵ Yam hoik lud hu ceu pui Isarelax mai lih khaing Aux, cao giex kaing li ceu pui Lewix kawn simex Zadok khankix pa kawn priex rien mai yuh kaing dee pa singax singeh Aux, kix tak pon ti yuh kaing Aux mai greed tix hoek dex Aux, sonsang tan krax tan krax lu pa gleeing klon bee mai nham ka Aux, Siyiex ah nan heue. ¹⁶ Kix tak yaox ti laig ka dee pa singax singeh Aux mai yaox ti hoek dex pheen Aux, sonsang yuh kaing ka son Aux mai tak priex rien ka beeh glawm Aux heue. ¹⁷ Yam laig kix ka daux siviex, plak daux ding yam mawx ang ah, kix yaox ti ceep kraung man mai ang pon ti ceep kraung hauk yung glang yam kawn yuh kix kaing jhaw Aux ka plak daux ding nyiex bwan heue. ¹⁸ Kix tak ceep mhok pa yuh ka man mai khlax pa caing ka man, kix tak ang pon ti ceep kraung pa sang kieh rawm lauh lih tix ceu kawx. ¹⁹ Yam lih kix ka plak praix ding, dee ot pui hun, kix tak peeik kraung ceep tix pa ceep yam yuh kaing jhaw mai prah ka daux lawg pa singax singeh, mai yaox ti ceep kraung tang ceu mai kraung pa singax singeh ceep kix an tak ang pon ti mawh pa khi rhawm ka pui khankix heue. ²⁰ Kix tak ang pon ti khlao hauk kaing tix mai ang pon ti kieh lang, kix tak priex mai rhip mhawm mhawm. ²¹ Cao giex kaing li ang pon tix nyaux rawm plix siiet, yam laig nawh ka plak daux ding. ²² Kix ang pon ti teei ti moeng miexmai, bun pa hoik tik mex tix, viang mawh nan, kix pon ti teei bunkrih nyiex ma ceu pui Isarelax ang ah, miexmai pa hoik mawh moeng cao giex kaing li heue. ²³ Kix tak yaox ti gau pui Aux sonsang chix gwieh tix tawng pa singax mai pa ang singax, pa mhawm mai pa ang mhawm. ²⁴ Yam prawng kix see tak yaox tix prawng hawt awm been pa koe lox tat jhawm prawng Aux khankix, kix tak priex ti hawt gumlox been Aux mai lox lai beenli pa deuh Aux, ka daux bang pawie pa hoik tat Aux ti deuh mai kix tak yungyi nab yam ka singaix twah Aux heue. ²⁵ Kix ang pon ti kieh tokaux tix seeing ka greed ti dex pui yum, mawh ngie son miex keeing tix, son kawn simex kawn bun tix, son puxaik tix, son nan pa ang nyang koe mex khankix khaing pa pon kieh tokaux tix seeing brai kah. ²⁶ Khaix hoik mawh nawh pa singax, nawh yaox ti jun aliah singaix, khaix an nawh mawh pa singax. ²⁷ Ka daux ngaix sang hu laig nawh ka dee pa singax singeh, sonsang yuh kaing jhaw, ka daux dee pa singax singeh an, nawh tak yaox tix tan krax tan pa pluat phimap cao tix ka plak daux ding, Siyiex ah nan heue. ²⁸ Grawng pa dex mai sinngao kix, Aux mawh sinngao khraung khrai kix, pex tak ang pon ti tawx kix cie sinngao ka daux haktiex Isarelax tix ceu kawx, Aux mawh sinngao pa sang pon kix heue. ²⁹ Kix tak ih krax tan plix nghox koi mai krax tan pa pluat ploi phimap mai krax tan son pa lud, mai can ceu pa hoik tiextu tix tan kuceu ka daux haktiex Isarelax tak mawh cie kix heue. ³⁰ Plix khaox pa liang ti plix kuceu khawmuik mai krax tan kuceu khaing daux krax tan krax lu, tak sang mawh cie cao giex kaing li, mai phawng blah pa liang pex ti yuh khankix pex tak yaox ti tawx ka cao giex kaing li sonsang nawb bwan ka piang nyiex ma pex. ³¹ Nex sim ang ah nex totiag ang ah pa tang yum mai pa kiied totiag khankix, cao giex kaing li tak ang pon ti ih ka heue.

¹ Yam gwieh pex haktiex ka pa caw nieb sonsang mawh sinngao, pex tak tang deuh haktiex tix gwang son Siyiex mai tan haktiex mawh pa singax singeh son Siyiex, krax lang caw tix koe ra mheen phwan rheng sawk mai krax vieh caw tix koe tix mheen sawk, mee haktiex an khawmuik tak mawh dee pa singax singeh. ² Khaing daux sigreung haktiex in, tak yaox ti deuh son dee pa singax singeh pa sidu pon daog, plak lang phwan yieh sawk mai plak vieh phwan yieh sawk, tau mai tixphwan sawk hawt vung viang gwang an sonsang mawh dee pa singax singeh. ³ Khaix hoik tiag maix krax lang ra mheen phwan rheng sawk mai krax vieh tix mheen sawk ka daux an tak mawh dee pa singax singeh, mawh pa kied singax singeh pa koe ka heue. ⁴ An tak mawh haktiex dee pa singax singeh tidah, pa mawh nyum son cao giex kaing li pa yuh kaing ka dee pa singax singeh mai cao pa greed ti hoek dex Siyiex, sonsang yuh kaing jhaw Nawh mai tak mawh dee sum tix ot kah mai mawh dee pa singax singeh sonsang sum dee pa singax singeh kah heue. ⁵ Dah dee pa koe krax lang ra mheen phwan rheng sawk, krax vieh tix mheen sawk tak mawh cie ceu pui Lewix, pa yuh kaing ka daux nyiex bwan mai sonsang yuh lawg ot kix tixnga mu heue. ⁶ Pex tak tat ti deuh haktiex tixdah sonsang mawh haktiex veng mai pa koe krax vieh phwan rheng sawk, plak krax lang ra mheen phwan rheng sawk, pa koe plak toi haktiex pa singax singeh an, an tak mawh cie nyiex ma ceu pui Isarelax khawmuik heue. ⁷ Cao kaing tak sang yaox ti cie nyum pa koe ka praok mee toi plak an ka baoh haktiex dee pa singax singeh mai haktiex cie veng, jah ka baoh mee haktiex dee pa singax singeh an mai ka baoh haktiex veng khankix, hu plak klip singaix tom hoek plak lih singaix krax lang tak mawh pa sidu koe awm nyum pa pon ceu pui Isarelax khankix heue. ⁸ Haktiex an tak mawh cie kix ka daux haktiex Isarelax mai cao kaing Aux khankix tak ang lai baox yaox ti yuh krax kha rhawm ka pui Aux khaix in tix bawg kawx, viang mawh nan, kix tak gwieh haktiex pa kawn deuk an ka nyiex ma ceu pui Isarelax awm koe doeh ceu cat kix heue. ⁹ "Siyiex ah nin, cao kaing Isarelax khankix eue, fah rhawm heue, tik ceu pa yuh krax khin mai pa tud rhim mai prawng ca rahsee ka pa mawh pa meh, mai paw lai baox yuh krax kha rhawm ka piang pui Aux khankix, Siyiex ah nan heue." ¹⁰ Pex caw tix koe jiang ciang pa see mai Epha mai Bat pa see heue. ¹¹ Diag Epha mai Bat tak mawh pa sidu, kao son tix son Epha koe tix Awmie mai kao son tix son Bat koe tix Awmie. Diag pa tiag kix mawh Awmie heue. ¹² Tix shekhe koe tixnga Gera, tixnga shekhe, tixnga phwan shekhe mai kao phwan shekhe, tak caw ti mawh Mina cie pex heue. ¹³ "In mawh krax tan lu pa tak caw pex ti yuh, pex tak yaox ti tawx nghox ca liah son tix son Epha khaing daux tix Awmie mai koi liah son tix son Epha khaing daux tix Awmie," ¹⁴ Lox pingyap pa deuh tix son krax tan rawm bee, pex tak yaox tix tawx kao son tix son Bat khaing daux tix kawrax, ¹⁵ teei kawn yung tix mu, khaing phung yung ra yieh khaing baoh dee klai rib ka daux haktiex Isarelax, in tak mawh son krax tan phawng nghox ca im mai krax tan pa gleeing mai krax tan pa nhim, sonsang pluat ploi phimap son kix, Siyiex ah nan heue. ¹⁶ "Pui haktiex khawmuik, tak tawx krax tan in ka cao kaing cao kap ceu pui Isarelax heue." ¹⁷ An tak mawh beeh glawm son cao kaing cao kap pa sang gleeing krax tan pa gleeing, krax tan phawng nghox ca im mai krax tan pa nyaux khankix ka daux pawie, ka daux khix khraox mai ka ngaix twah mai pawie pa hoik tat son ka daux bawg yam pa hoik tat nyiex ma ceu pui Isarelax khankix, Nawh tak khre rien krax tan pa pluat ploi phimap, krax tan phawng nghox ca im, krax tan pa gleeing mai krax tan pa nhim, sonsang yuh krax pa pluat ploi phimap son nyiex ma ceu pui Isarelax khankix heue. ¹⁸ Siyiex ah nin, "Ka daux khix tix, haok khix tix ngaix, pex tak teei kawn mawie mhaing pa loig tix mu mai sigrhah ka dee pa singax singeh an ka heue." ¹⁹ Cao giex kaing li tak teei nham krax tan pa pluat ploi phimap tiblah mai kraix ka piang pang siviex nyiex bwan mai khawm pon daog khu dee tan mai ka rong siviex nyiex bwan plak daux khankix. ²⁰ Yam haok khix an aliah ngaix tix ngaix pex tak yuh awm an, son pui pa yuh phimap tix kaux kaux ka daux pa ang tawng nam nex tix, mawh kheu nan maix tak yuh pa sigrhah ka son nyiex bwan heue. ²¹ Ka daux khix tix, haok khix kao pon ngaix, pex tak yuh pawie Pasakha, ka daux pawie pa rheung aliah ngaix an, pex tak caw tix ih blah pa ang sau susaix heue. ²² Ka daux singaix an cao kaing cao kap mai pui haktiex khawmuik tak yuh krax tan pa pluat ploi phimap tix ka mawie mhaing tix mu heue. ²³ Ka daux vong pawie aliah ngaix nawh tak yuh krax tan pa gleeing ka son Siyiex, mawie mhaing pa loig aliah mu mai yung mhaing aliah mu mai son krax pluat ploi phimap ka pex mhaing tix ngaix tix mu ka daux aliah ngaix ku ngaix heue. ²⁴ Nawh tak khre krax tan phawng nghox ca im tix Epha son mawie mhaing ku mu tix Epha son yung mhaing ku mu mai rawm bee tix Heng tau mai ku Epha heue. ²⁵ "Ka daux khix aliah haok khix kao phwan ngaix, son pawie aliah ngaix an maix tak yuh awm koe krax tan pluat ploi phimap mai krax tan pa gleeing mai krax tan phawng nghox ca im mai krax tan rawm bee awm an khankix heue."

¹ Siyiex ah nin, "Siviex laig plak daux pa veeh ngai tix see plak lih singaix, an tak yaox tix nyeep yam yuh kaing daux liah ngaix, viang mawh nan, daux singaix twah mai yam haok khix khraox tak paoh heue. ² Cao kaing cao kap tak laig khaing plak praix sidub nyiex mai nawh cung hawt pang siviex cao giex kaing li khankix tak tan krax tan pa gleeing mai krax tan pa nhim, nawh tak krub hawt pang siviex tan, khaix an nawh lih hu plak praix mai siviex an tak ang nyeep ti tom hoek plak bo heue. ³ Awm an pui haktiex khankix tak krub Siyiex ka dee laig diang siviex veng sivoe Siyiex, ka daux ngaix twah mai yam haok khix khraox heue. ⁴ Ka daux ngaix twah, cao kaing cao kap khankix tak viex kawn yung pa loig liah mu mai yung mhaing tix mu sonsang yuh krax tan pa gleeing ka Siyiex, ⁵ son krax tan yung mhaing an tix mu, tak yaox tix sau phawng nghox ca im tix Epha mai krax tan phawng nghox ca im son kawn yung iak, tak tan awm pa koe rhawm tix mai khawm rawm bee been tix Hing tau mai an khankix ku Epha heue. ⁶ Ka daux singaix haok khix khraox, nawh tak tan kawn mawie mhaing pa loig tix mu mai kawn yung iak liah mu mai yung mhaing pa loig tix mu, ⁷ Nawh tak khre krax tan phawng nghox ca im tix Epha mawh son mawie mhaing tix mu mai tix Epha mawh son yung mhaing an tix mu mai krax tan son kawn yung iak tak tan awm pa koe rhawm tix khawm rawm bee tix Heng tau mai an khankix ku Epha heue. ⁸ Yam laig cao kaing cao kap khankix, kix tak laig ka siviex sidub plak lih singaix mai deeh lih hu plak praix ka daux krax an heue. ⁹ Yam hoek pui haktiex ka plak sivoe Siyiex, ka daux pawie bawg yam pa hoik tat ti deuh, pui pa laig ka siviex baoh plak laong khankix, sonsang krub ka Siyiex tak yaox ti lih hu ka daux siviex plak seh, mai pui pa laig ka daux siviex plak seh, tak yaox ti lih hu ka daux siviex baoh plak laong, nawh tak ang pon ti deeh ing ka daux siviex pa hoek tix, viang mawh nan, nawh tak lih hu daux diang siviex pa koe sivoe nawh heue. ¹⁰ Yam laig pui haktiex ka daux, cao kaing tak laig tau mai yam lih hu kix nawh tak lih hu. ¹¹ Ka daux vong pawie bawg yam pa tat ti deuh son krax tan phawng nghox ca im tix Epha mawh son mawie mhaing tix mu an mai tix Epha mawh son yung mhaing tix mu mai krax tan son kawn yung iak tak tan tau awm pa koe rhawm tix mai khawm rawm bee been tix Heng tau mai an khankix ku Epha heue. ¹² Yam yuh kawn lauxsimiang krax tan pa gleeing awm pa koe rhawm tix mai krax tan pa nhim awm pa koe rhawm tix ka Siyiex, tak caw ti paoh siviex pa veeh ngai tix see plak lih singaix son nawh mai nawh tak yuh krax tan pa gleeing mai khawm krax tan pa nhim cie nawh khankix, awm pa hoik yuh nawh ka daux ngaix twah, khaix hoik yuh nawh krax tan nawh lih hu plak praix mai deeh nyeep siviex heue. ¹³ "Maix tak yuh krax tan pa gleeing ku ngaix ka son Siyiex khaing kawn yung iak pa loig pa ang nyang naog num, ponngawb ku ngawb heue. ¹⁴ Maix tak yuh krax tan phawng nghox ca im ponngawb ku ngawb, pa koe diang liah son tix son daux tix Epha mai loe son tix son khaing daux tix Heng rawm bee, sonsang caux yuh ka phawng nghox ca, in mawh been krax tan phawng nghox ca im pa caw ti yuh ka son Siyiex jheung jheung heue. ¹⁵ Awm an, kix tak yuh krax tan pa gleeing kawn yung tix mu tau mai phawng nghox ca im mai rawm bee khankix pa mawh krax tan pa gleeing jheung jheung ku ngawb heue." ¹⁶ Siyiex ah nin, "Phan kawn lauxsimiang tawx totaix tix ceuceu ka kawn simex nawh tix kaux kaux, an tak mawh sinngao cie kawn simex nawh, an mawh kraung pa caw nawh ti pon khaing daux sinngao heue. ¹⁷ Viang mawh nan, phan nawh tawx totaix tix ceuceu khaing daux sinngao tix ka kawncau tix, tix kaux kaux, an tak mawh cie nawh tom hoek ngie num luat luan nawh, khaix an nawh yaox tix deeh ap totaix an ka cao kaing cao kap, sinngao nawh tak mawh cie kawn simex nawh jheung jheung heue. ¹⁸ Lheu khaing an, kawn lauxsimiang tak ang pon rhim ti teei haktiex sinngao cie pui ka daux pa khin ti yuh mai grheu kix lih khaing haktiex sinngao cie kix, nawh tak yaox ti tawx sinngao ka kawn simex khankix, khaing daux haktiex cie nawh son ang pui Aux khankix yaox ti prung prang rairuat khaing sinngao haktiex cie tix heue. ¹⁹ Khaix an nawh viex aux laig ka daux diang laig, pa koe hawt praok siviex pa veeh ngai tix ka plak laong, ka daux lawg singax singeh son cao giex kaing li mai jhi aux yaox dah dee pa koe ka dee ghoik plak klip singaix heue. ²⁰ Nawh ah nin ka aux, "In mawh dah dee ngaik cao giex kaing li krax tan pluat ploi mai krax tan son phimap mai dah dee pa ping kix krax tan phawng nghox ca im, son ang kix lai pon viex ankix lih ka plak praix ding sonsang kieh mawh pa singax ka son pui khankix." ²¹ Nawh baox viex aux lih plak praix ding ka brawk mai kieh aux lailing khawm pon daog brawk mai ka daog brawk khawm pon daog koe ding kah, ²² ding iak pa koe khawm pon daog khankix, krax lang koe tixpon sawk, krax vieh tixngoe sawk, khawm pon mu mawh pakpeung tix mu khaing. ²³ Hawt vung viang ding plak daux sang simaox ka khawm pon daog mai kix yuh glah ngu hawt vung viang greem simaox sang tix, ²⁴ mai nawh ah nin ka aux, "Inkix mawh nyiex priex, ka dee ngaik pui pa yuh kaing jhaw daux nyiex bwan krax tan pa appong pui khankix kah heue."

¹ Khaix an nawh dee viex aux hoek ka siviex ting nyiex bwan mai jhak heue, koe rawm pa lih khaing greem siviex nyiex bwan pa hu ka plak lih singaix, mawh kheu nyiex bwan hoik veeh ngai tix ka plak lih singaix mai rawm lih hu plak greem praok plak dawm siviex nyiex bwan, ka plak seh khu dee tan heue. ² Nawh viex aux lih krax siviex plak laong mai kieh aux lailing vung viang plak praix tom hoek ka diang siviex veng plak praix, siviex pa veeh ngai tix see plak lih singaix mai koe rawm pa lih hu ka praok taix khawn dawm tan heue. ³ Pui an lih hu ka plak lih singaix tau mai maox diag tiag tix nyaing ka daux taix tix, nawh tiag diag koe tix rheng sawk mai nawh kieh aux tiang rawm mai rawm an raux tom hoek pie mee ngai liag aux. ⁴ Nawh baox tiag diag koe tix rheng sawk mai deeh baox kieh aux tiang ka rawm mai rawm an raux tom hoek mee si ngawng aux mai Nawh baox tiag diag koe tix rheng sawk mai kieh aux tiang ka rawm mai rawm an raux tom hoek mee nyoi aux. ⁵ Nawh baox tiag diag koe tix rheng sawk mai an lih ti mawh rawm klawng pa ang aux lai pon tiang kah, mawh kheu rawm an haok mai raux mai lih mawh rawm tom pon loe pui kah mai lih mawh rawm klawng pa ang lai pon tiang kah. ⁶ Nawh ah nin ka aux, "Kawn pui eue, mawh hoik yaox maix ceu in lie?" Khaix an nawh deeh viex aux hoek ka praok rawm klawng. ⁷ Yam deeh hoek aux, aux yaox ka khaox tom nie ka praok rawm klawng plak in plak an, ⁸ nawh ah nin ka aux, "Rawm in lih hu plak lih singaix tom hoek ka Arabax, mai laig ka daux rawm sigrit sigra yum, yam laig ka daux rawm sigrit sigra yum mai kieh mawh rawm pa pon nyaux pui kah heue. ⁹ Ka dee hoek rawm klawng an kudah kudee mai totiag pa chix chuh chix mu kuceu tak yaox ti im ju mai dee an kax tak koe tom nie, mawh kheu hoek rawm ka dee an, mawh kheu rawm klawng an laig ka daux rawm sigrit sigra mai rawm an lih ti singaong, mawh kheu nan, hoek rawm klawng an dee mawx, can pa chix chuh chix mu kuceu im ju kah heue. ¹⁰ Pui teei kax tak cung ka praok rawm sigrit sigra, jah khaing yaong Engedi tom hoek ka yaong En-galem mai baoh dee an tak mawh dee sang ploi rub ka mai ka dee an tak koe kax kuceu tom nie pa awm kax koe ka daux rawm sigrit sigra pa kied ting. ¹¹ Viang mawh nan, ka daux ung daux glaox nawh tak ang mawh rawm singaong mai tak mawh rawm song awm kih heue. ¹² Ka praok rawm klawng pa koe khawm ra plak, tak kuah khaox kuceu son pa ih, lhax tak ang fit mai plix nawh tak ang lai chix jud mai plix pa mhawm ku khix, mawh kheu rawm lih son khaing dee pa singax singeh, plix khaox an kix tak mawh son pa ih mai lhax nawh mawh son pa pai jhawm saux heue. ¹³ Siyiex ah nin, "In mawh haktiex mee praix pa tak sang gwieh maix ti tawx mawh sinngao ka daux sinax ceu pui Isarelax kao ra ceu, Yosiep tak pon son cie tix ra nyum. ¹⁴ Pex tak gwieh sidu ka paox tix, mawh kheu Aux hoik tiextu tix tawx an ka keeing pex mai haktiex in tak lih mawh sinngao pex. ¹⁵ "In tak mawh haktiex mee praix pa koe ka baoh plak laong, jah khaing rawm sigrit sigra ting ka krax hu Hetalon tom hoek ka krax laig Hamat mai hoek ka veng Zedat, ¹⁶ veng Berawta veng Sibarem pa koe mee praix Damasekat mai Hamat tom hoek ka veng Hazahatikon, pa koe ka piang mee praix veng Hawran, ¹⁷ awm an, mee praix tak jah khaing rawm sigrit sigra tom hoek ka veng Hazaenan pa koe ka mee praix plak laong veng Damasekat tau mai mee praix Hamat plak laong an mawh mee praix plak laong. ¹⁸ "Mee praix plak lih singaix, jah ka sinax veng Hawran mai veng Damasekat mai ka sinax haktiex Gilat mai haktiex Isarelax tom hoek ka rawm klawng Yawdan mai tom sidah hoek ka rawm sigrit sigra plak lih singaix, in mawh mee praix plak lih singaix." ¹⁹ "Mee praix plak seh, jah ka veng Tama tom hoek ka rawm Meribakadiet tom sidah ka rawm klawng Ejiptux ka rawm sigrit sigra ting. In mawh mee haktiex plak seh." ²⁰ "Mee praix plak klip singaix, jah ka rawm sigrit sigra ting pa koe plak seh, tom hoek ka plak sivoe veng Hamat plak in plak an, in mawh mee praix plak klip singaix heue." ²¹ Mawh kheu nan maix tak deeh gwieh ti tawx haktiex in, ka sinax ceu pui Isarelax awm pa koe doeh ru kix. ²² Maix tak yuh nieb son sinngao cie cao pex mai son pui tang meung pa peung ti ot ka daux sinax pex khankix mai pa koe ka daux sinax pex. Kix tak pon ti mawh pui doeh ru pa keh ka daux haktiex ceu pui Isarelax awm pex mai pex tak yuh nieb sonsang pon sinngao ka daux ceu pui Isarelax. ²³ Siyiex ah nin, "Pui tang ceu khankix tak pon sinngao tix ka can haktiex dee ot tix kudah heue."

¹ In mawh ceu kaux ceu pui khankix, jah ka mee praix plak laong, khaing rawm sigrit sigra tom hoek ka krax ting Hetalon diang laig ka veng Hamat mai tom sidah hoek ka veng Hazarenan pa koe ka mee haktiex Damasekat dex ka haktiex Hamat mai toe ti hu khaing praok plak lih singaix tom hoek plak klip singaix mawh nyum cie pui Dan. ² Pa dex Haktiex mee praix cie Dan jah khaing praok plak lih singaix tom hoek ka plak klip singaix, mawh nyum cie Asha, ³ pa dex haktiex mee praix Asha jah khaing praok plak lih singaix tom hoek ka plak klip singaix mawh nyum cie Napthalix, ⁴ pa dex haktiex mee praix Napthalix, jah khaing praok plak lih singaix tom hoek ka baoh plak klip singaix, mawh nyum cie Manashe, ⁵ pa dex haktiex mee praix Manashe jah khaing praok plak lih singaix tom hoek ka plak klip singaix, mawh nyum cie Epharem, ⁶ pa dex haktiex mee praix Epharem jah khaing praok plak lih singaix tom hoek ka plak klip singaix, mawh nyum cie Rubin, ⁷ pa dex haktiex mee praix Rubin jah khaing praok plak lih singaix tom hoek ka plak klip singaix, mawh nyum cie Yudax. ⁸ Pa dex Haktiex mee praix Yudax jah khaing praok plak lih singaix tom hoek ka plak klip singaix, caw ti koe haktiex pa tan lu kah, pa koe krax lang ra mheen phwan rheng sawk mai pa sidu lang awm an, khaing daux nyum an khankix tang dah, jah khaing praok plak lih singaix tom hoek ka plak klip singaix, ka daux sigreung an dee pa singax singeh tak koe ka heue. ⁹ Haktiex pa tang deuh pex mawh pa tan pa lu son Siyiex, krax lang caw tix koe ra mheen phwan rheng sawk mai krax vieh tix mheen sawk. ¹⁰ Haktiex dee pa hoik kok pex mawh pa singax singeh tak mawh son cao giex kiang li pa koe ka plak laong, krax lang ra mheen phwan rheng sawk mai pa koe ka plak klip singaix krax vieh tix mheen sawk mai pa koe ka plak lih singaix krax vieh tix mheen sawk mai pa koe ka plak seh krax lang ra mheen phwan rheng sawk, dee pa singax singeh Siyiex tak koe ka daux sigreung heue. ¹¹ An tak mawh son cao giex kaing li kawn simex Zadok khankix, pa kieh tix singax mai yuh kaing jhaw Aux, pa ang lai lud krax hu tix yam lud hu kawn praix ceu pui Isarelax mai ceu pui Lewix khankix. ¹² Haktiex mee praix hawt baoh dee ot ceu pui Lewix khankix, pa hoik kok pex mawh dee pa singax singeh an, tak mawh haktiex pa kied singax singeh son cao giex kaing li khankix. ¹³ Ka praok mee dee ot cao giex kaing li khankix, caw ti koe haktiex son ceu pui Lewix tix dah, pa koe krax lang phwan rheng sawk, krax vieh tix mheen sawk. ¹⁴ Kix tak ang pon ti coh mai ang pon ti loh haktiex an ceeix kawx, plix pa liang ti plix tak ang pon ti loh ka tang ceu mai ang pon ti coh kah, mawh kheu an mawh pa singax singeh ka son Siyiex heue. ¹⁵ Pa kawn deuk phwan rheng sawk an, hawt dex mee ra mheen mai phwan rheng sawk an, tak mawh dee ot pui sonsang sum veng kah, veng tak caw ti koe ka daux sigreung heue. ¹⁶ In mawh diag tiag pa koe veng plak laong pon rheng phwan yieh sawk, plak seh pon rheng phwan yieh sawk, praok plak lih singaix pon rheng phwan yieh sawk mai praok plak klip singaix pon rheng phwan yieh sawk heue. ¹⁷ Mee haktiex pa koe vung viang veng plak lhaong ra yieh tixphwan sawk, plak seh ra yieh tixphwan sawk, ka plak lih singaix ra yieh tixphwan sawk mai ka plak klip singaix ra yieh tixphwan sawk. ¹⁸ Haktiex pa kawn deuk praok dee pa singax singeh an ka plak lih singaix tak koe tix mheen sawk mai ka plak klip singaix tix mheen sawk mai can ceu pa lih khaing haktiex an tak mawh pa ih son pui pa yuh kaing khankix ka daux veng heue. ¹⁹ Can pui pa yuh kaing khankix daux veng, tak mawh pa laug khaing doeh ru pui Isarelax khankix, tak pon ti sum ti ih daux an. ²⁰ Haktiex pa tan pa lu an khawmuik, krax lang koe ra mheen phwan rheng sawk mai krax vieh ra mheen phwan rheng sawk, sidu khawm pon daog, pex tak tang deuh haktiex dee pa singax singeh tau mai sinngao veng. ²¹ "Nyum pa singax singeh pa kawn deuk khawm ra plak pa mawh sinngao veng an, tak mawh son cao kaing cao kap, nyum pa singax singeh pa jawn ti lih plak lih singaix pa koe khaing mee haktiex plak lih singaix pa koe ra mheen phwan rheng sawk, tak mawh nyum cie ceu pui cao kaing cao kap, haktiex pa kok mawh dee pa singax singeh mai dee singax singeh nyiex bwan tak koe ka daux sigreung heue. ²² Pa kawn deuk khaing nyum cie ceu pui Lewix mai pui veng khankix pa koe ka sigreung cie cao kaing cao kap mai pa koe sinax mee haktiex cie Yudax mai mee haktiex cie Benyamin, tak mawh son cie cao kaing cao kap khawmuik heue. ²³ Son cie doeh ru pa kawn deuk khankix, jah khaing plak lih singaix tom hoek ka plak klip singaix mawh nyum cie ceu pui Benyamin. ²⁴ Pa dex Haktiex mee praix cie ceu pui Benyamin, jah khaing plak lih singaix, tom hoek ka baoh plak klip singaix, mawh nyum cie ceu pui Simion. ²⁵ Pa dex Haktiex mee praix Simion, jah khaing baoh plak lih singaix tom hoek ka baoh plak klip singaix, mawh nyum cie Issakha, ²⁶ pa dex Haktiex mee praix ceu pui Issakha jah khaing plak lih singaix tom hoek ka plak klip singaix, mawh nyum cie Zebulon, ²⁷ pa dex haktiex mee praix ceu pui Zebulon jah khaing plak lih singaix, tom hoek ka plak klip singaix, mawh nyum cie Gat, ²⁸ haktiex mee praix ceu pui Gat jah khaing praok plak seh, tom hoek ka baoh haktiex Negep, mee haktiex tak jah khaing veng Tama tom hoek ka rawm Meribax pa koe hawt veng Kadesha tan mai deeh lawng tix hawt klawng tom hoek ka rawm sigrit sigra ting heue. ²⁹ Siyiex ah nin, in mawh haktiex sinngao pa sang gwieh pex ti tawx ka daux pa yuh nieb ka daux sinax ceu pui Isarelax khankix mai in mawh nyum haktiex son cie kix heue. ³⁰ In tak mawh daux krax lih khaing veng ka praok plak laong, mawh pa tiag diag koe pon rheng phwan yieh sawk, ³¹ koe siviex veng ka plak laong loe mu pa kok hawt ceu kaux ceu pui Isarelax, siviex veng Rubin, siviex veng Yudax mai siviex veng Lewix. ³² Ka praok plak lih singaix, krax vieh koe pon rheng phwan yieh sawk mai koe siviex veng loe mu, siviex veng Yosiep, siviex veng Benyamin mai siviex veng Dan. ³³ Ka praok plak seh, krax vieh koe pon rheng phwan yieh sawk, koe siviex veng loe mu, siviex veng Simion, siviex veng Issakha mai siviex veng Zebulon. ³⁴ Ka praok plak klip singaix, krax vieh koe pon rheng phwan yieh sawk, koe siviex veng loe mu, siviex veng Gat, siviex veng Asha mai siviex veng Napthalix. ³⁵ Tiag ti yaox hawt vung viang an khawmuik, koe tix mheen daix rheng sawk mai jah daux singaix an ceu kaux veng tak mawh Yehowa Shama, pa koe dee bleeh Siyiex ot tan heue.