Exodus

Exodus

¹ In mawh ceu kaux kawn praix Isarelax, pa hoek ka meung Ejiptux, tau mai Yakop khawm pui daux nyiex ma nawh, ² pa mawh Rubin, Simion, Lewix mai Yudax, ³ Isakha, Zebulun mai Binyamin, ⁴ Dan, Napthalix, Gat mai Asha, ⁵ doeh ru Yakop, koe atixgliah kaux, yam an Yosiep hoik ot sivoe kix ka daux meung Ejiptux. ⁶ Khaix an Yosiep mai Puxke nawh mai doeh nyiex ma nawh khankix yum. ⁷ Doeh ru pui Isarelax baox nie haoh hun mai nied ti nie sipie mai kix haok hwan ting riang mai kix naog ka daux haktiex an. ⁸ Yam an koe simiang pa khraox tix kaux daux meung Ejiptux, pa ang tawng ka Yosiep. ⁹ Nawh ah nin ka pui tix, "Jhak heue, pui Isarelax hoik kied nie mai hoik kied ting riang khaing ex." ¹⁰ Hoek, kieh ex yuh cuyi tuktiaktukte ka kix, phan ang mawh nan, ha kix nie haoh hun mai yam koe naing, kix tak hu sitoe ti mai pui koeng mai deeh puing ka ex, khaix an, kix tak lih hu khaing haktiex." ¹¹ Mawh kheu nan, kix yaog cao kaing pa kwang piang kix. Tawx beeh glawm pa cien kieh yuh kaing pa kin daux pa khin mai kix yaox ti sum veng dee sang deuh kraung sinngao Pharaw, pa mawh veng Piton mai veng Ramase. ¹² Viang mawh nan, kix nie yeen ya piang kix mai pui Isarelax baox nie haoh hun mai nie pre sipie. Pui Ejiptux nie yaoh yee jao pui Isarelax. ¹³ Mawh kheu nan, pui Ejiptux nie cau kix daux pa lang taung kin, ¹⁴ Kieh kix yaox pa kin pa song daux pa cau kix yuh kaing, pa mawh kaing lon tiex sin mai kaing ma kaing kaung kuceu, ka daux pa cau pa khin kix yuh kaing. ¹⁵ Khaix an simiang Ejiptux ah nin, ka bun pui Hebrie, cao priex keh ka daux kix pa kaux Shipharax mai Pu-a. ¹⁶ "Yam yuh pax kaing priex keh ka bun Hebrie, jhak yam keh kix, phan mawh kawn simex pax tak pah nawh, viang mawh nan, phan mawh kawn bun deuh nawh im ju." ¹⁷ Cao priex keh an kiex lhat graung ka Siyiex mai kiex ang yuh awm lox pa tawm simiang Ejiptux, kiex deuh kawn nyawm simex khankix im ju. ¹⁸ Simiang Ejiptux kok ka bun priex keh ah nin ka kiex. "Yuh ka mawh pax lai yuh nin mai deuh kawn simex khankix im ju lie?" ¹⁹ Bun priex keh khankiex ah nin ka Pharaw, "Mawh kheu bun Hebrie ang awm bun Ejiptux, kix koe riang rao mai yie keh sivoe ang bun priex keh nyang hoek ka kix." ²⁰ Siyiex yuh pa mhawm ka bun priex keh an kiex, mai pui nie haoh hun pre mai ting riang. ²¹ Mawh kheu bun cao priex keh lhat graung ka Siyiex, Nawh Cao kieh kiex koe kawn praix. ²² Pharaw tawx lox ka pui nawh khawmuik, "Can kawn nyawm simex pa keh khaing pui Hebrie ku kaux pex tak tik ka daux rawm klawng Nilax, pex deuh ngie kawn nyawm bun ku kaux im ju heue."

¹ Pui tix kaux khaing nyiex ma Lewix, teei ti moeng ka kawn bun Lewix. ² Bun an koe kaux mai keh kawn simex tix kaux, yam yaox nawh mhawm grang kawn simex an, nawh mox ka nawh loe khix. ³ Yam yaox nawh ang ti lai pon mox nawh teei kreeb pa taing ka priem son nawh mai kraix graix mai peeh khaox Ashaphat ka mai sau kawn nyawm daux an, hu deuh sinax pang priem pa koe praok rawm klawng. ⁴ Puxke bun nawh pau ti jhak dee singai, sonsang tawng pa sang lih mawh ka kawn nyawm an, ⁵ Kawn bun Pharaw lih hoek ti heem rawm daux rawm klawng, kawncau bun nawh khankix, lailing hawt praok klawng, mai yaox ka kreeb tix mu sinax pang priem. ploi kawncau bun tix hu teei mai kieh viex hoek ka ti. ⁶ Yam paoh nawh ka kreeb an, nawh yaox ka kawn nyawm iak, mai kawn nyawm iak an yiiem. Mawh kheu nan, nawh caux rhawm ka kawn nyawm an ah nin, "In mawh kawn pui Hebrie tix kaux kaux." ⁷ Khaix an puxke bun nawh ah nin ka kawn bun Pharaw, "Sang kieh maix aux hu kok ka bun Hebrie tix kaux kaux sonsang tawx kawn nyawm in peuex son maix lie?" ⁸ Kawn bun Pharaw ah nin ka nawh, "Hu heue." Mawh kheu nan, bun an hu mai kok ka miex kawn nyawm. ⁹ Kawn bun Pharaw ah nin ka nawh, "Teei kawn nyawm in hu mai priex son aux, aux tak tawx riang priex maix ka." Mawh kheu nan bun an teei kawn nyawm mai priex ka nawh. ¹⁰ Kawn nyawm haok hwan mai viex nawh hoek ka kawn bun Pharaw mai nawh lih mawh kawn simex kawn bun Pharaw, nawh kok ceu kaux nawh mawh Mose, nawh ah nin, "Mawh kheu teei aux nawh khaing daux rawm heue." ¹¹ Yam hoik ting Mose, nawh hu ka puxaik tix mai jhak ka kaing cien pa yuh kix, mai nawh yaox pui Ejiptux tawk ka pui Hebrie tix kaux, pa mawh puxaik nawh. ¹² Nawh jhak plak in plak an, yam ang nawh yaox pui tix kaux kawx, nawh pah pui Ejiptux mai sipaung nawh daux maik. ¹³ Yam deeh hu nawh khaix an tix ngaix, jhak heue, pui Hebrie ra kaux simah mai tawk paox tix, nawh ah nin ka pui pa phit an, "Yuh ka mawh maix lai tawk ka paox puxaik tix lie?" ¹⁴ Nawh pawk ah nin, "Mawx pa kieh maix yuh cao kaing mai prawng see ka piang yix? mawh keud maix ti sang pah aux awm hoik pah ti ka pui Ejiptux lie?" Mawh kheu nan, Mose hoik lhat mai keud, "Kix hoik tawng ceu inkix tete." ¹⁵ Yam mhong Pharaw ka grawng in, nawh sawg ti pah Mose, mawh kheu nan, Mose to khaing Pharaw mai hu ot ka daux haktiex Midian, mai ngawm dex rawm daux. ¹⁶ Yam an kawn bun cao giex kaing li Midian aliax kaux, kix hoek ti kin rawm mai sau rawm naog daux dawng sonsang tawx yung mai pex keeing kix nyaux rawm. ¹⁷ Cao liang yung hoek mai grheu kix hu dee singai, viang mawh nan, Mose kaoh cung mai teem ka kix mai tawx yung mai pex khankix nyaux rawm. ¹⁸ Yam deeh kix ka keeing tix Roelax, nawh ah nin, "Kheu pex lai cao hoek in singaix." ¹⁹ Kix pawk ah nin, "Pui Ejiptux tix kaux, hoik taoh yix khaing daux taix cao liang yung khankix mai kin rawm son yix mai tawx yung mai pex nyaux rawm." ²⁰ Nawh ah nin ka kawn bun tix, "Ot nawh dee mawx? Kheu pex lai prah nawh? Kok nawh hoek sawm." ²¹ Mose kied nyawm rhawm ka ot tix mai Roelax, mai nawh tawx Mose moeng kawn bun tix Zipawrax. ²² Nawh keh kawn simex tix kaux mai kix kok ceu kaux nawh mawh Geshom, mawh kheu ah nawh nin, "Aux hoik mawh nyo sinie, daux haktiex pui tang praix." ²³ Yam hoik rheung bawg yam, simiang meung Ejiptux yum." Ceu pui Isarelax khankix ngia mai riag yo kheu yuh siliex, lox riag yox kix hoik hoek ka sivoe Siyiex. ²⁴ Siyiex mhong ka lox ngia kix mai Siyiex deeh doh keud ka gumlox sijax mukheu pa yuh Nawh Cao tau mai Abraham mai Icak mai Yakop. ²⁵ Siyiex jhak ka piang kawn praix Isarelax khankix mai tawng ka grawng kaing pa yaox kix ti yuh heue.

¹ Yam liang Mose yung mai pex paox nawh Yesaraw, pa mawh cao giex kaing li Midian, nawh viex yung mai pex khankix hu plak khaix daux tiag mai hoek ka baoh Hawrap pa mawh gawng Siyiex. ² Kawncau Siyiex lih bleeh ka nawh ka daux rao ngu sigreung yeem khaox, mai nawh jhak ka an, jhak heue, yeem khaox an hoik gleeing ka ngu, viang mawh nan, yeem khaox an ang proe. ³ Mose ah nin, "Aux sang hu jhak ka riang susai pa daox am in, yeem an ang chix proe jao patix lie?" ⁴ Yam yaox Siyiex ka veeh nawh ti hu jhak, Siyiex kok ka nawh khaing daux sigreung yeem ah nin, "Mose! Mose!" mai nawh deeh pawk ah nin, "Aux koe tin." ⁵ Khaix an Nawh Cao ah nin, "Paw hoek dex, Peeik kiep khaing caong maix, mawh kheu dee cung maix mawh tiex dee pa singax." ⁶ Nawh Cao baox ah nin, "Aux mawh Siyiex keeing maix, Abraham, Icak mai Yakop. "Mose mox pakngai ti, kheu lhat graung nawh mai ang pon jhak ka Siyiex. ⁷ Siyiex ah nin, "Aux hoik yaox ka yeen ya kix ceu pui Aux, pa ot daux meung Ejiptux, Aux mhong lox riag yo kix ka cau cao kaing ka kix, mawh kheu Aux hoik tawng krax kha rhawm kix, ⁸ Aux hoek sonsang taoh kix khaing daux tawm taix pui Ejiptux mai sonsang deeh teei Aux kix lih khaing daux haktiex an mai tawx kix hu ka haktiex pa mhawm pa vieh, dee lih rawm teeih mai rawm hia, dee ot ceu pui Khananix, ceu pui Hitix, ceu pui Amawrix, ceu pui Pharazix, ceu pui Hiwix mai ceu pui Yebusix khankix. ⁹ "Yam in, jhak heue, krax yiiem kawn praix Isarelax khankix hoik hoek ka Aux mai Aux hoik yaox ka pa yeen ya ceu pui Ejiptux ka kix. ¹⁰ "Mawh kheu nan, hu yam in, Aux sang ploi maix hu ka simiang Pharaw mai kieh maix teei pui Aux, kawn praix Isarelax lih khaing Ejiptux." ¹¹ Viang mawh nan, Mose deeh ah nin ka Siyiex, "Mawh aux pui yuh ka mawx, lai sang pon hu ka Pharaw mai teei kawn praix Isarelax khankix lih khaing meung Ejiptux." ¹² Nawh Cao ah nin, "Aux tak ot tau mai maix, mai in tak mawh sakse son maix, kheu Aux ploi maix hu Yam hoik viex maix ceu pui lih khaing meung Ejiptux maix tak krub ka Siyiex ka piang gawng in." ¹³ Mose ah nin ka Siyiex, "Yam hoek aux ka kawn praix Isarelax khankix, aux sang ah nin ka kix, Siyiex keeing pex hoik ploi aux hoek ka pex, phan kix deeh chawk aux, mawh kaux nawh patix? aux sang krai yuh ka mawx ka kix?" ¹⁴ Siyiex ah nin ka Mose, "AUX MAWH AWM PA MAWH AUX." Nawh ah nin, krai yuh nin ka ceu pui Isarelax, KAW PA MAWH AUX, hoik ploi aux hoek ka pex" ¹⁵ Siyiex deeh ah nin ka Mose, "Ah yuh nin ka pui Isarelax, Siyiex keeing pex, Siyiex Abraham, Icak mai Yakop, hoik ploi aux hoek ka pex. In mawh ceu kaux aux leeing ju, in mawh ceu kaux pa caw doeh ru pex tix doh keud ka ti ju hoik tix ju. ¹⁶ Hu mai kraix khrawm cub kuad song pui Isarelax khankix, "Siyiex keeing pex, Siyiex Abraham, Icak mai Yakop hoik bleeh ka aux, ah nin, "Aux hoik yaox can ceu pa yuh pui meung Ejiptux khankix ka pex, ¹⁷ Aux hoik yuh sijax mukheu sonsang teei pex lih khaing krax pa kha rhawm khaing Ejiptux mai kieh pex hu ka haktiex ceu pui Khananix, ceu pui Hitix, ceu pui Amawrix, ceu pui Pharazix, ceu pui Hiwix mai ceu pui Yebusix, dee lih rawm teeih mai rawm hia." ¹⁸ Kix tak nghiet lox maix, maix mai kuad song Isarelax tak hu ka simiang Ejiptux ah nin ka nawh, Siyiex ceu pui Hebrie, hoik sipub ka yix mai yam in yuh bwanson, kieh yix hu krax daux tiag loe singaix krax, sonsang rawg yix bwan mai krub ka Siyiex. ¹⁹ Aux tawng ka ang simiang Ejiptux ploi maix lih hu yieyie, phan nawh ang yaox taix pa ting sibrawm Aux. ²⁰ "Aux tak nyeu tiex tix mai ciyang ka pui Ejiptux tau mai pa daox am pa yuh Aux, khaix an nawh tak ploi maix lih hu, ²¹ Aux tak kieh pui in koe min pakngai sivoe ceu pui Ejiptux, yam lih hu pex, pex tak ang yaox ti lih hu mai taix yi tix, ²² bun ku kaux tak deeh mhaing kraung mau, kraung khri mai kraung ceep khaing paox plawg ka bun pa ot ka nyiex nawh khankix mai tak ceep kraung khrai an khankix ka kawn simex kawn bun tix mai tak rhim hu khaing pui Ejiptux heue.

¹ Mose deeh ah nin, "Phan kix ang yum rhawm ka aux phan ang mawh nan ang nghiet ka lox aux, mawh kheu kix tak ah nin, Siyiex ang tie bleeh ka maix." ² Siyiex ah nin ka nawh, "Mawh tix pa koe daux taix maix lie? Nawh ah nin, "Koe Khaox gix tix gawng." ³ Nawh Cao ah nin, "Sivuat an piang tiex, "yam ploi nawh an piang tiex mai khaox grix an lih ti mawh siuing, mai Mose to khaing an. ⁴ Khaix an Siyiex ah nin ka Mose, "Nyeu taix maix mai giex ka sidax nawh." Mose nyeu taix tix mai giex an, an deeh lih ti mawh khaox grix daux taix nawh, ⁵ "Kix tak yum rhawm ka Siyiex pa mawh Siyiex keeing kix, Siyiex Abraham, Icak mai Yakop, pa hoik lih bleeh ka maix." ⁶ Siyiex baox ah nin ka nawh, "Sau taix maix ka naok maix. "Nawh sau taix tix ka naok tix mai yam deeh teei nawh taix tix lih, taix nawh lih mawh jhawm saux sipawb paing awm rawm rha. ⁷ Nawh Cao ah nin, "Baox sau taix maix ka naok maix. "Mawh kheu nan, nawh baox sau taix tix ka naok tix mai yam deeh teei nawh taix tix lih, jhak heue, taix nawh deeh mhawm awm neh nawh. ⁸ "Phan kix ang nyang yum rhawm ka maix, " "Phan ang mawh nan, ang yum rhawm ka sakse pa yuh maix bawg tix, kix tak yum rhawm ka sakse pa yuh maix bawg khaix." ⁹ Phan kix ang yum rhawm ka sakse in ra ceu mai ang cu ti nghiet ka lox maix, maix tak kin rawm khaing daux rawm klawng Nilax mai klup ka piang tiex kroh, rawm pa kin maix khaing rawm klawng Nilax tak lih ti mawh nham ka piang tiex kroh." ¹⁰ Mose ah nin ka Siyiex, "Siyiex aux eue, aux dawg mawh pui pa ang chix sikah, tom yam jah Maix Cao tix sikah tau mai kawncau maix kawx, aux mawh pui pa cien jheeh mai kle." ¹¹ Khaix an Siyiex deeh ah nin ka nawh, "Mawh pui mawx pa phan ka jheeh pui lie? Phan ang mawh nan, mawh pui mawx pa phan pui deux, lheet, chix yaox mai dug ngai lie? Ang hoik mawh Aux Siyiex lie? ¹² "Mawh kheu nan, hu heue, Aux tak ot tau mai jheeh maix mai gau maix ka pa sang krai maix." ¹³ Viang mawh kawx nan, nawh ah nin, "Siyiex aux eue, kieh pui tang kaux hu liak." ¹⁴ Mawh kheu nan, Siyiex song rhawm ka Mose ah nin, "Puxke maix Arun pui Lewix koe ang mawh lie? Aux tawng ka chix sikah nawh mhawm mhawm, jhak heue, nawh hoik hoek ti rieb maix yam in, yam yaox nawh maix nawh tak gaux rhawm ka daux rhawm ti." ¹⁵ Maix tak yaox ti sikah ka nawh mai sau gumlox ka daux jheeh nawh, Aux tak koe tau mai jheeh maix khawm jheeh nawh, Aux tak gau pex ka pa sang yuh pex. ¹⁶ Nawh tak sikah tang maix ka pui khankix, mai nawh tak mawh jheeh tang maix mai maix tak mawh tang Siyiex ka son nawh. ¹⁷ "Maix tak giex khaox grix in daux tawm taix tix, sonsang yuh maix sakse heue." ¹⁸ Mose deeh ing ka paox tix Yesaraw ah nin ka nawh, kieh aux deeh ing ka puxaik tix pa ot daux Ejiptux liak mai jhak ka kawn im ju kix, Yesaraw ah nin ka Mose, "Hu ka daux pa nhim." ¹⁹ Siyiex ah nin ka Mose daux meung Midian, "Deeh ing ka meung Ejiptux, mawh kheu pui pa sawg ka ju maix khankix hoik yum." ²⁰ Mose teei moeng tix mai kawn praix tix mai kieh kix brug la mai kix deeh ing ka haktiex Ejiptux mai Mose teei tix viex khaox grix Siyiex daux tawm taix tix. ²¹ Siyiex ah nin ka Mose, "Yam deeh ing maix ka meung Ejiptux maix tak jhi sibrawm pa daox am pa ap Aux daux tawm tai maix sivoe Pharaw, viang mawh nan, Aux tak kieh rhawm rhi nawh kiien, sonsang ang nawh kieh kix hu." ²² Maix tak ah nin ka Pharaw, "Siyiex ah nin, Isarelax mawh kawn simex Aux mai kawn Ai Aux, ²³ "Aux ah nin ka maix, "Ploi kawn simex Aux sonsang hu krub ka Aux, "phan maix thiang ang tawx nawh hu, aux tak pah ka kawn Ai maix." ²⁴ Yam hu kix krax, Siyiex sawg ka Mose sonsang pah ka nawh. ²⁵ Khaix an Zibawrax teei simaox pa lawm mai pat hak kawn simex tix mai an teeh ka caong Mose ah nin, "Maix mawh mex aux pa dex mai nham aux." ²⁶ Nawh Cao ploi Mose hu, khaix an moeng nawh ah nin, mawh kheu grawng pa pat hak, "Maix mawh mex pa dex dawt mai nham ka aux." ²⁷ Siyiex ah nin ka Arun, "Hu ka daux tiag, sonsang sipub ka Mose. "Nawh hu sipub Mose ka piang gawng Siyiex mai ngheet ka nawh. ²⁸ Mose krai Arun mhong gumlox Siyiex, pa hoik ploi ka nawh mai mhai pa daox am pa tawm Nawh Cao khawmuik. ²⁹ Mose mai Arun hu kraix khrawm kuad song pui Isarelax, ³⁰ Arun krai gumlox pa hoik ah Siyiex ka Mose khawmuik mai hoik yuh mhai pa daox am ka sivoe pui khankix. ³¹ Yam hoik mhong pui khankix ka hoek fi Siyiex ka pui Isarelax mai yaox Nawh Cao hoik kia ngien ka krax kha kix rhawm tix, kix yum rhawm num kaing tix mai krub ka Nawh Cao heue.

¹ Mose mai Arun hu ah nin ka Pharaw, "Siyiex pui Isarelax ah nin, kieh pui Aux Isarelax hu sonsang yuh kix pawie ka Aux, daux tiag" ² Pharaw ah nin, "Mawh Siyiex pa yuh ka mawx! pa sang nghiet aux lox mai sonsang ploi pui Isarelax lie? Aux ang tawng ka Siyiex mai aux tak ang pon ploi kix hu." ³ Kix ah nin, "Siyiex ceu pui Hebrie hoik sipub ka yix, kieh yix hu krax daux tiag loe ngaix mai rawg bwan tan ka Siyiex tix, phan ang mawh nan, Nawh Cao tak kieh jhawm saux preng mai lawm vaid hoek ka piang yix." ⁴ Simiang Ejiptux ah nin ka kix, "Mose mai Arun eue, yuh ka mawx pex lai sang teei pui inkix khaing kaing pa yuh kix? Deeh hu yuh kaing jhaw pa yuh pex. ⁵ Pharaw ah nin, "Jhak heue, yam in pui haktiex khankix tom nie mai pex lai sang kieh kix laux ti khaing kaing jhaw pa yuh ti. ⁶ Daux tix ngaix an Pharaw tawx lox tix hu ka cao thung cao bung kaing jhaw khankix ah nin, ⁷ "Pex tak ang lai yaox ti tawx brex nghox sonsang yuh kix lon tiex sin awm sivoe, kieh kix tang hu sawg brex nghox son cao tix. ⁸ "Kieh kix yuh lon tiex sin awm diag yuh kix sivoe, paw doh kieh yawm ceeix kawx, mawh kheu nieh kix, kix tom riag yo ah nin, kieh yix hu krub ka Siyiex tix, ⁹ Baox tawx kaing tom nie ka piang kix sonsang nie taug mao kix mai paw kieh kix nghiet ka lox pa ang mawh." ¹⁰ Cao thong cao bung kaing jhaw khankix hu ah nin ka pui khawmuik, Pharaw ah nin, aux ang lai tawx brex nghox ka pex. ¹¹ "Hu sawg brex nghox ka dee yaox pex son cao tix, viang mawh nan kaing jhaw pex tak ang pon tix yawm ceeix kawx" ¹² Pui khankix hu ku sidah ka daux haktiex Ejiptux, sonsang khrawm nyhee tang brex nghox. ¹³ Cao thung cao bung kaing jhaw khankix ah nin, "Nied yuh kaing jhaw yuh pex grum naog ku singaix yam koe brex nghox." ¹⁴ Cao thung cao bung kaing jhaw pui Isarelax khankix pa hoik yaog Pharaw kix mawh cao kaing, kix khin mai tawk ka kix mai chawk kix ah nin, "Kheu pex ang lai pon yuh lon tiex sin grum naog awm diag pa yuh glang ka in kawx mai singaix." ¹⁵ Yam an cao thung cao bung kaing jhaw pui Isarelax khankix hoek mai riag yo ka Pharaw ah nin, "Maix lai tawx kaing jhaw pa yuh nin ka kawncau maix yuh ka mawx?" ¹⁶ Kix ang lai tawx brex nghox ka kawncau maix, kix ah nin ka yix, yuh lon tiex sin, jhak heue, kix tawk ka kawncau maix khankix, yam in phimap koe ka piang pui maix. ¹⁷ Nawh ah nin, "Pex kied sidaing nieh, mawh kheu nan, pex tom ah nin, kieh yix hu krub ka Siyiex ¹⁸ "Hu yuh kaing yam in, Brex nghox tak ang tawx ka pex, viang mawh nan, pex tak yaox ti tawx lon tiex sin awm diag prim." ¹⁹ Cao kaing pui Isarelax khankix yaox ka hoek krax pa kha rhawm ka piang tix kheu pa ah nin, "Pex tak ang yaox ti kieh lon tiex sin yuh tix yawm khaing diag prim." ²⁰ Yam hoik lih kix khaing Pharaw, kix sipub Mose mai Arun pa cung ti rieb kix, ²¹ Kix ah nin ka kiex, "Kieh Siyiex jhak mai prawng ca ka piang pax, mawh kheu hoik kieh yix seeing brai ka sivoe ngai Pharaw mai sivoe ngai kawncau nawh khankix, sonsang pah ka yix heue." ²² Mose deeh hoek ka Siyiex ah nin, "Siyiex eue, Maix Cao lai yuh krax pa kha rhawm ka piang ceu pui in yuh ka mawx? Maix Cao lai ploi aux hu yuh ka mawx? ²³ Tom singaix jah aux ti hoek krai lox ka Pharaw ka daux ceu kaux Maix Cao, Pharaw tawx krax kha rhawm ka pui inkix, Maix Cao ang taoh ka pui cie Maix heue."

¹ Siyiex ah nin ka Mose, "Yam in maix tak yaox ka pa yuh Aux ka Pharaw, mawh kheu taix pa ting sibrawm Aux nawh tak ploi kix hu tau mai taix pa koe sibrawm Aux, nawh tak grheu kix lih khaing haktiex." ² Siyiex ah nin ka Mose, "Aux mawh Siyiex." ³ Aux lih bleeh ka Abraham, ka Icak mai ka Yakop, awm mawh Aux Siyiex pa ting riang rao, viang Aux jhi kix ka ceu kaux Siyiex kawx, kix ang tawng ka aux. ⁴ "Aux hoik yuh sijax mukheu tau mai kix, sonsang tawx Aux haktiex Khanan ka kix, pa mawh haktiex dee lailing kix ti mawh nyo sinie. ⁵ Aux mhong ka lox ngia pui Isarelax khankix, pa kieh pui Ejiptux kix yuh kaing pa kin mai deeh doh keud ka gumlox sijax mukheu tix. ⁶ "Mawh kheu nan, ah nin ka pui Isarelax, Aux mawh Siyiex, Aux tak viex pex lih khaing greem beeh glawm pa kin khaing pui Ejiptux mai Aux tak taoh pex khaing kaing siliex pa yuh pex mai nyeu plawng taix tix taoh pex khaing krax pa ting ciyang". ⁷ "Aux tak teei pex mawh pui tix mai Aux tak mawh Siyiex pex, pex tak tawng Aux mawh Siyiex pa viex pex lih khaing greem beeh glawm pa kin yuh pui Ejiptux". ⁸ "Aux tak viex pex hu ka daux haktiex, pa hoik tiextu Aux ti tawx ka Abraham, Icak mai Yokop, Aux tak tawx haktiex an mawh sinngao pex. Aux mawh Siyiex" ⁹ Viang Mose ah nin ka pui Isarelax kawx, kix ang nghiet ka lox Mose, mawh kheu hoik kied taug mao rhawm rhi kix ka yaox tix krax kha rhawm. ¹⁰ Siyiex ah nin ka Mose, ¹¹ "Hu laig mai krai ka Pharaw, simiang Ejiptux, sonsang ploi pui Isarelax khankix lih hu khaing haktiex nawh. ¹² Mose ah nin, pui Isarelax ang nghiet ka lox aux, Pharaw nie sang nghiet ka lox pa lih khaing jheeh aux, pa ang nyang pat hak tix yuh ka mawx? ¹³ Siyiex tawm lox ka Mose mai Arun, son pui Isarelax mai ka Pharaw meung Ejiptux, sonsang teei kix pui Isarelax khankix lih khaing daux haktiex Ejiptux heue. ¹⁴ Inkix mawh cao kaing daux nyiex ma keeing kix, kawn Ai Isarelax mawh Rubin, kawn simex Rubin khankix mawh Hanok, Phalux, Hezaron mai Khamix. Inkix mawh pui nyiex ma Rubin. ¹⁵ Kawn simex Simion khankix mawh Yemoelax, Yamen, Awhat, Yakhin, Zawha mai Shawlax, kawn simex pa pon khaing bun Khanan, inkix mawh pui nyiex ma Simion. ¹⁶ Inkix mawh ceu kaux kawn simex Lewix, awm pa koe doeh ru kix, pa mawh Geshon, Kawhat mai Merarix. Ju Lewix koe tix yieh tixngoe aliah num. ¹⁷ Kawn simex Geshon khankix mawh Libanix mai Shimix, awm pa koe doeh ru nyiex ma kix. ¹⁸ Kawn simex Kawhat khankix mawh Amaran, Izaha, Hebaron mai Awzalax mai ju Kawhat koe tix yieh tixngoe loe num. ¹⁹ Kawn simex Merarix khankix mawh Mahalix mai Mushi, inkix mawh pui daux nyiex ma Lewix, awm pa koe doeh ru kix. ²⁰ Amaram teei moeng ti Yawkhebiet, pa mawh nan keeing tix mai nawh keh Arun mai Mose, ju Amaram koe tix yieh tixngoe aliah num. ²¹ Kawn simex Izaha khankix mawh Korax, Nephiet mai Zikharix. ²² Kawn simex Awzalax mawh Mishelax, Elazapha mai Titirix. ²³ Arun teei ti moeng Elishebax, kawn bun Aminadat nan Nashon, nawh keh Nadat, Abihux, Elaza mai Itama. ²⁴ Kawn simex Korax khankix mawh Asirax, Elakanax mai Abiasap, inkix mawh doeh nyiex ma Korax. ²⁵ Kawn simex Arun, Elaza teei ti moeng kawn bun Putelax mai keh Phinahat, inkiex mawh cao kaing keeing ceu pui Lewix khankix, awm pa koe doeh nyiex ma kix. ²⁶ Inkiex mawh Arun mai Mose, pa hoik krai Siyiex, pa viex ceu pui Isarelax lih khaing haktiex Ejiptux awm cao kaing naing lien. ²⁷ Inkiex mawh pui pa laig hu sikah ka Pharaw simiang Ejiptux, sonsang viex pui Isarelax khankix lih hu khaing meung Ejiptux pa mawh Mose mai Arun heue. ²⁸ Ka daux singaix yam sikah Siyiex ka Mose ka daux haktiex Ejiptux, ²⁹ Siyiex ah nin ka Mose, "Aux mawh Siyiex, krai ka Pharaw simiang Ejiptux, can pa krai Aux ka maix." ³⁰ Mose ah nin ka Siyiex, "Aux mawh pui pa cien jheeh mai pa kle, Pharaw tak sang nghiet lox aux yuh ka mawx?"

¹ Siyiex ah nin ka Mose, "Jhak heue, Aux tak kieh maix awm Siyiex ka Pharaw, mai puxke maix Arun tak mawh cao jhai maix. ² Maix tak krai gumlox pa hoik tawm Aux ka maix khawmuik, mai puxke maix Arun tak krai ka Pharaw sonsang ploi nawh pui Isarelax khankix lih khaing haktiex nawh. ³ Aux tak kieh Pharaw kiien rhawm mai kieh mhai rug pa daox am Aux khankix, nie baox haoh hun ka daux haktiex Ejiptux. ⁴ Pharaw tak ang nghiet ka lox maix, Aux tak deuh taix tix ka piang Ejiptux mai viex kru naing tix mai pui ceu Aux pa mawh kawn praix Isarelax khankix, lih khaing Ejiptux tau mai pa ciyang pa ting lhaong. ⁵ "Pui Ejiptux khankix tak tawng mawh Aux Siyiex, yam nyeu Aux taix tix ka piang Ejiptux mai viex pui Isarelax lih khaing sinax kix. ⁶ Mose mai Arun hoik yuh awm pa tawm Siyiex ka kiex. ⁷ Mose koe ju tixdaix num mai Arun koe ju tixdaix loe num, yam sikah kiex ka Pharaw. ⁸ Siyiex ah nin ka Mose mai Arun, ⁹ "Yam ah Pharaw yuh nin ka pax, "Jhi aux yaox mhai pa daox am yuh pax, "khaix an maix tak ah nin ka Arun, "Teei khaox grix maix mai ploi sivoe ngai Pharaw mai an tak lih mawh siuing" ¹⁰ Mose mai Arun laig hu ka Pharaw mai yuh awm pa hoik tawm Siyiex mai Arun ploi khaox grix tix sivoe Pharaw mai kawncau nawh khankix mai an lih mawh siuing. ¹¹ Khaix an Pharaw kok ka pui koe pingnya mai cao chix simeed mai kix pa chix sat ka daux meung Ejiptux kawx hawt yuh awm pa hoik yuh kiex. ¹² Mawh kheu kix ku kaux ploi khaox grix tix mai an khankix lih mawh siuing. Viang mawh nan, khaox grix Arun bleet ka khaox grix cie kix. ¹³ Pharaw ca kawn koe rhawm kien mai nawh ang nghiet ka lox kix, awm pa hoik krai Siyiex heue. ¹⁴ Siyiex ah nin ka Mose, "Pharaw kied kiien rhawm mai nawh thiang ang kieh pui khankix hu. ¹⁵ "Hu ka Pharaw plak ponngawb, yam lih hu nawh ka daux rawm mai maix krox nawh ka praok rawm klawng mai giex khaox grix pa hoik lih ti mawh siuing ka daux taix maix. ¹⁶ Maix tak ah nin ka nawh, Siyiex ceu pui Hebrie, ploi aux hoek ka maix mai kieh aux ah nin, "Kieh pui Aux hu, sonsang krub kix ka Aux daux tiag, tom yam in maix ang nyang cu tix nghiet." ¹⁷ Siyiex ah nin, "Mawh kheu maix tak tawng Aux mawh Siyiex, jhak heue, aux lah rawm klawng Nilax ka khaox grix pa koe daux taix tix mai rawm an tak lih mawh nham. ¹⁸ Kax pa koe daux rawm klawng Nilax khankix tak yum mai rawm klawng Nilax tak lih sioe cux mai pui Ejiptux khankix, tak seeing nyaux ka rawm klawng an. "" ¹⁹ Siyiex ah nin ka Mose, "Krai ka Arun, teei khaox grix maix mai nyeu taix tix ka piang rawm Ejiptux mai ka piang klawng iak, ka piang klawng ting, ka piang rawm nhawng mai ka piang rawm dung rawm daux, kudah dee daux haktiex Ejiptux mai ka daux tawg khaox, aw simaox" ²⁰ Mose mai Arun yuh awm lox tawm Siyiex, nawh yaog khaox grix tix mai lah ka rawm Nilax ka plak sivoe ngai Pharaw mai sivoe ngai kawncau nawh khankix, rawm khawmuik pa koe daux rawm klawng Nilax tieh ti mawh nham khawmuik heue. ²¹ Kax pa koe daux rawm klawng Nilax yum mai rawm klawng Nilax lih sioe cux, mawh kheu nan, pui Ejiptux khankix ang lai pon nyaux rawm khaing daux rawm klawng Nilax, mawh kheu hoik lih naog nham ka daux haktiex Ejiptux kudah dee. ²² Cao chix simeed daux haktiex Ejiptux khankix kawx, yuh awm cuyi pa chix kix, mai rhawm rhi Pharaw nied ti kiien mai ang nghiet ka lox kix, awm pa hoik krai Siyiex. ²³ Pharaw veeh ti ing ka nyiex tix mai nawh ang deuh koe ceu koe mu ka daux rhawm tix. ²⁴ Mawh kheu nan, pui Ejiptux khankix, kaong rawm daux hawt rawm klawng Nilax. Sonsang nyaux kix kah, mawh kheu ang kix lai pon nyaux ka rawm khaing rawm klawng Nilax. ²⁵ Yam hoik luan aliah singaix khaix lah Siyiex ka piang rawm klawng Nilax heue.

¹ Siyiex ah nin ka Mose, "Laig hu ka Pharaw ah nin ka nawh, Siyiex ah nin, kieh pui Aux lih hu, sonsang krub kix ka Aux. ² Phan maix thiang ti ang kieh kix lih hu, jhak heue, Aux tak tawx krax kha rhawm ka haktiex maix ka khet, ³ rawm klawng Nilax hoik naog ka khet khankix pa tak hoek ka piang maix ka daux lawg mai ka piang ku it pex, ka daux nyiex kawncau maix khankix mai pui maix khankix, daux nyiex priex mai ka daux klong yuh pex blah khankix, ⁴ "Khet khankix tak haok ka piang maix mai ka piang pui maix mai ka piang kawncau maix khankix." ⁵ Siyiex krai ka Mose, "Ah nin ka Arun, nyeu taix tix tau mai khaox grix tix ka piang rawm khankix, piang rawm klawng iak, piang rawm klawng ting mai piang rawm dung khankix mai kieh khet hoek naog ka piang haktiex Ejiptux" ⁶ Arun nyeu taix tix ka piang rawm khankix daux meung Ejiptux, mai khet khankix lih kheem ka haktiex Ejiptux. ⁷ Cao chix simeed khankix kawx yuh awm pa chix tix mai viex khet khankix hoek ka piang haktiex Ejiptux. ⁸ Pharaw kok ka Mose mai Arun ah nin, "Khyox khaw ka Siyiex, sonsang deeh teei Nawh khet khankix hu singai khaing aux mai khaing pui aux, mai aux tak kieh pui in khankix hu krub ka Siyiex." ⁹ Mose ah nin ka Pharaw, "Tat bawg yam pa sang khyox khaw aux son maix, son kawncau maix mai son pui maix, sonsang deeh yuh aux khet khankix laux leeing khaing maix mai khaing nyiex ma pex khawmuik mai deeh kieh kix ot ka daux rawm klawng Nilax khaing." ¹⁰ Pharaw ah nin, "Kyox khaw pasax." Mose ah nin, "Kieh awm pa ah maix, maix tak tawng Siyiex yix ang doh awm siyiex tang dah awx. ¹¹ Khet khankix tak lih hu khaing maix khaing daux nyiex ma maix, khaing kawncau maix khankix mai khaing pui maix, kix tak ot daux rawm klawng Nilax khaing." ¹² Mose mai Arun lih hu khaing Pharaw, mai Mose kok yo ka Siyiex, son grawng khet khankix, pa hoik kieh Nawh tuktiak ka Pharaw. ¹³ Siyiex yuh awm pa khyox khaw Mose, khet khankix yum, daux nyiex daux yaong khankix mai daux kaung khankix. ¹⁴ Kix khrawm mai pum ti deuh mai haktiex hoik sioe cux. ¹⁵ Yam yaox Pharaw ka hoik yiien ceu an khankix, nawh deeh kiien rhawm mai ang nghiet lox kix, awm pa hoik krai Siyiex heue. ¹⁶ Siyiex krai ka Mose, "Ah nin ka Arun, nyeu khaox grix maix mai lah ka phawng tiex piang tiex mai an tak lih ti mawh maing, ka daux haktiex Ejiptux khawmuik" ¹⁷ Kiex yuh awm an, Arun nyeu taix tix tau mai khaox grix tix mai lah ka phawng tiex mai an lih ti mawh maing ka piang pui mai piang khawng brie khawmuik mai phawng tiex lih mawh maing ka daux haktiex Ejiptux khawmuik. ¹⁸ Cao simeed khankix coca ti yuh an awm pa chix tix, viang mawh nan, kix ang pon yuh, mawh kheu nan, Maing hoik lih koe piang pui mai totiag. ¹⁹ Cao simeed khankix ah nin ka Pharaw "In mawh gien taix sibrawm Siyiex. "Viang mawh nan Pharaw ca kawn kiien rhawm, nawh ang nghiet ka lox kix awm pa krai Siyiex. ²⁰ Siyiex ah nin ka Mose, "Kaoh caocao ponngawb mai hu pau Pharaw yam hoek hu nawh ka rawm klawng ah nin ka nawh, Siyiex ah nin, "Kieh pui Aux lih hu, sonsang krub kix ka Aux. ²¹ Phan maix ang kieh pui Aux khankix lih hu, Aux tak ploi phung prawp khankix hoek ka piang maix, ka piang kawncau maix, ka piang pui maix, ka nyiex ma maix khawmuik, nyiex ma pui Ejiptux tak naog ka phung prawp mai ka piang tiex dee cung kix." ²² "Ka daux singaix an, Aux tak gwieh ti deuh haktiex Goshen ka dee ot pui Aux mai phung prawp tak ang koe tan, sonsang tawng maix ka mawh Aux Siyiex daux sigreung haktiex. ²³ "Aux tak yuh mhai pa daox am sinax pui Aux mai pui maix, mhai pa daox am in tak lih mawh pasax. "" ²⁴ Siyiex yuh ceu in, mai phung prawp khankix hoek ka daux nyiex Pharaw mai ka daux nyiex kawncau nawh khankix mai ka daux haktiex Ejiptux khawmuik hoik laux leeing ka jao phung prawp. ²⁵ Pharaw kok ka Mose mai Arun ah nin, "Hu heue, krub ka Siyiex pex ka daux haktiex in. ²⁶ Mose ah nin, ang khaw ti yuh nan, mawh kheu ceu pa tan ka Siyiex mawh ceu pa seeing brai pui Ejiptux khankix kah, phan yix tan ceu pa seeing brai pui Ejiptux khankix ka sivoe ngai kix, kix tak dheem yix ka simaox ang mawh lie?" ²⁷ "Yix caw ti hu loe singaix krax ka daux tiag mai tan ka Siyiex yix, awm pa hoik tawm Nawh Cao ka yix." ²⁸ Pharaw ah nin, "Aux tak kieh pex hu krub Siyiex pa mawh Siyiex pex, ka daux tiag, mawh ngie ang pex yaox ti hu dee singai khaing. Khyox khaw son aux liak." ²⁹ Khaix an Mose ah nin, "Aux lih hu khaing maix mai aux tak rawg bwan ka Siyiex, sonsang lih hu phung prawp an khankix khaing maix pasax, khaing kawncau maix mai khaing pui maix khankix, viang mawh nan, maix paw lai baox pie lhen, son ang maix ploi pui khankix hu krub ka Siyiex." ³⁰ Mose lih hu khaing Pharaw mai rawg bwan ka Siyiex. ³¹ Siyiex yuh awm lox pa rawg Mose mai grheu phung prawp khankix khaing Pharaw, khaing kawncau nawh mai khaing pui nawh khankix, tom ang lai deuk tix mu kawx. ³² Pharaw baox nie kiien rhawm yam in mai nie ang ploi pui khankix hu heue.

¹ Khaix an Siyiex ah nin ka Mose, Laig hu ah nin ka Pharaw, "Siyiex, pui Hebrie ah nin, " "Kieh pui Aux lih hu, sonsang krub kix ka Aux. ² "Phan maix kawn thiang ang kieh kix lih hu, ³ Jhak heue, Taix Siyiex tak hoek tau mai jhawm saux preng, ka piang khawng brie pex daux kaung, brung, la, kala-uk, mawie mai yung khankix. ⁴ Siyiex tak yuh ceu pa tang pa siyox sinax khawng brie pui Isarelax mai khawng brie pui Ejiptux khankix, mawh kheu nan, khawng brie pui Isarelax tak ang yum tix mu kawx. ⁵ Siyiex krai ti deuh bawg yam ah nin, "Pasax Siyiex tak sang yuh ceu in khankix ka daux haktiex in." ⁶ Ka daux pasax Siyiex yuh ceu in khankix mai kieh khawng brie pui Ejiptux yum khawmuik, viang mawh nan, khawng brie pui Isarelax khankix ang yum tix mu kawx. ⁷ Pharaw ploi pui hu jhak mai tawng ka ang khawng brie pui Isarelax khankix yum tix mu kawx, viang mawh nan, rhawm rhi Pharaw ca kawn kiien mai ang cu ti ploi pui khankix lih hu heue. ⁸ Siyiex ah nin ka Mose mai Arun, "Teei nyaox tix dawm khaing glah ngu mai kieh Mose rhuat plak raoma ka sivoe ngai Pharaw. ⁹ "Phawng nyaox an tah ka daux haktiex Ejiptux khawmuik mai an lih mawh jhawm saux muad ka piang pui mai khawng brie ka daux meung Ejiptux kudah dee." ¹⁰ Kix teei nyaox khaing glah ngu mai cung ka sivoe Pharaw mai Mose rhuat nyaox an plak raoma mai lih mawh jhawm saux muad ka piang pui mai khawng brie khankix. ¹¹ Cao chix simeed ang lai pon cung sivoe Mose jao jhawm saux muad, mawh kheu jhawm saux muad koe ka piang cao chix simeed mai ka piang pui Ejiptux khawmuik. ¹² Siyiex kieh rhawm Pharaw kiien mai nawh ang nghiet ka lox kix, awm hoik krai Siyiex ka Mose. ¹³ Khaix an Siyiex ah nin ka Mose, "Kaoh ponngawb caocao mai cung ka sivoe Pharaw ah nin ka nawh, "Siyiex pui Hebrie ah nin, "Kieh pui Aux lih hu, sonsang tan krub kix ka Aux. ¹⁴ "Mawh kheu yam in Aux tak ploi ceu pa kha rhawm khawmuik, ka daux rhawm rhi maix, ka piang kawncau maix mai ka piang pui maix, sonsang tawng maix ang pui pa awm Aux koe tix kaux kawx ka daux haktiex in khawmuik. ¹⁵ "Mawh kheu yam in Aux nyeu taix tix mai yuh krax kha rhawm ka maix mai pui maix khankix, ka jhawm saux preng mai tat maix grai grup khaing haktiex, ¹⁶ "Viang mawh nan, grawng pa kieh Aux maix im ju mawh sonsang jhi Aux maix yaox sibrawm tix daux maix mai sonsang ao min Aux ka daux haktiex in khawmuik. ¹⁷ Tokaux maix kawn kiien rhawm mai nunai ka pui Aux mai ang ploi kix hu. ¹⁸ Pasax bawg yam in, Aux tak kieh pre ting lih ka daux meung Ejiptux, pa ang sax koe tom yam jah haktiex Ejiptux ti kaw tix, tom hoek in singaix. ¹⁹ "Ploi pui maix hu khrawm khawng brie pa koe daux kaung khankix, sonsang luad luan. Mawh kheu pre tak sang lih ka piang pui ku kaux mai khawng brie pa ot daux kaung pa ang nyang khrawm hoek ka nyiex khawmuik, kix tak yum." ²⁰ Can pui pa lhat ka gumlox Siyiex, ka sinax kawncau Pharaw, kieh siliex tix mai khawng brie nied to ti ing ka nyiex. ²¹ Viang mawh nan, pui pa ang deuh gumlox Siyiex koe ceu, prah siliex mai khawng brie tix daux kaung. ²² Siyiex ah nin ka Mose, "Nyeu taix maix ka plak raoma, sonsang lih pre ka daux haktiex Ejiptux khawmuik, ka piang pui, ka piang khawng brie mai ka piang khaox ox rib riem pa koe daux kaung, kudah dee ka daux haktiex Ejiptux." ²³ Mose nyeu khaox grix tix ka plak raoma mai Siyiex ploi lox sinum praix, pre mai ngu lih ka piang haktiex. Siyiex kieh lhiex mai pre lih ka piang haktiex Ejiptux, ²⁴ Pre pa khao mai ngu pa kied kin ting lih, pa ang sax koe daux haktiex Ejiptux tix bawk kawx, jah tom yam mawh nawh meung haktiex tix mu. ²⁵ Pre khankix dheem ka can pa koe ka daux haktiex Ejiptux, can pa koe daux kaung, pui, khawng brie, rib riem mai kieh khaox ox khankix goh. ²⁶ Mawh ngie daux haktiex Goshin, dee ot pui Isarelax khankix, pa ang lhiex pre lih kah. ²⁷ Pharaw ploi pui hu, kok ka Mose mai Arun ah nin ka kiex, "Yam in aux hoik lud, Siyiex mawh pa rahsee, pui aux khankix mai aux hoik mawh pa lud." ²⁸ Rawg bwan ka Siyiex, kieh naox heue, son ang sinum praix mai pre khankix baox lih, aux tak kieh pex lih hu, pex tak ang lai yaox ti ot ka meung in." ²⁹ Mose ah nin ka nawh, "Khaix hoik lih aux khaing daux veng, aux tak yaog taix tix ka Siyiex mai lox sinum praix tak yiien yawg. Pre khankix kawx, tak ang lai baox koe, sonsang tawng maix haktiex in mawh cie Siyiex." ³⁰ "Viang mawh nan, son maix mai kawncau maix khankix, aux tawng ang pex nyang lhat graung ka Siyiex tom yam in." ³¹ Yam in khaox gan mai nghox ca khankix hoik laux leeing. Grawh grawng nawh, nghox ca hoik kaux mai khaox gan khankix kawx, hoik pruh tai. ³² Nghox ca mai pang nghox khankix, ang nyang bax laux leeing, kheu mawh plix nghox pa lha khaing paox tix. ³³ Mawh kheu nan Mose lih hu khaing Pharaw daux veng mai yaog taix tix lih ka Siyiex. Khaix an lox sinum praix pre khankix yiien. Mai lhiex ang lai lih ka piang tiex. ³⁴ Yam hoik yaox Pharaw ka hoik yiien lhiex pre mai lox sinum praix khankix, nawh deeh baox lud mai rhawm rhi nawh deeh kiien tau mai kawncau nawh khankix. ³⁵ Mawh kheu nan, rhawm rhi Pharaw baox kiien mai nawh ang kieh kawn praix Isarelax khankix lih hu, awm gumlox pa hoik krai Siyiex ka Mose heue.

¹ Yam in Siyiex ah nin ka Mose, "Hu ka Pharaw, mawh kheu hoik kieh Aux rhawm rhi nawh mai rhawm rhi kawncau nawh khankix kiien sonsang jhi Aux mhai pa daox am sivoe nawh." ² "Maix krai kawn simex, kawn saux tix khankix mhong grawng sibrawm pa ting lhaong, pa hoik yuh Aux, daux meung Ejiptux mai mhai pa daox am pa hoik yuh Aux ka daux sinax kix, sonsang tawng kix mawh Aux Siyiex." ³ Mawh kheu nan, Mose mai Arun hoek ka Pharaw ah nin, "Mawh kheu Siyiex ceu pui Hebrie khankix ah nin maix ang cu ti deuh rhawm tiem sivoe ngai Aux, sang rheung miex ding? Kieh pui Aux lih hu, sonsang krub kix ka Aux." ⁴ "Phan maix kawn thiang ka sang kieh ti pui Aux lih hu, jhak heue, pasax Aux tak kieh sido khankix, hoek ka dah dee kwang maix heue." ⁵ "Kix tak kheem ka piang tiex, son ang pui tix kaux kawx, lai chix yaox ka tiex mai kix kawn sang ih can pa kawn deuk khaix pre. Mai kix tak ih ka lhax khaox lhax ox pa koe daux kaung pex khawmuik." ⁶ "Kix tak naog ka daux nyiex haw maix, ka daux nyiex ma kawncau maix khankix mai ka daux nyiex pui Ejiptux khawmuik, pa ang pex sax yaox tix bawg kawx daux ju tax pex tom yam jah kix ti ot ka piang ca haktiex in, tom in singaix." Nawh deeh veeh ti lih khaing Pharaw. ⁷ Khaix an kawncau Pharaw khankix ah nin ka nawh, "Pui in tak sang tawx krax tuktiak ka ex rheung miex ding? Kieh kix lih hu, sonsang tan krub kix ka Siyiex tix. Ang maix nyang tawng ka laux leeing meung Ejiptux lie?" ⁸ Mawh kheu nan, Mose mai Arun deeh hoek ka Pharaw mai nawh ah nin ka kix, "Hu mai yuh kaing krub ka Siyiex pex. Viang mawh nan, pui pa sang lih hu khankix mawh pui mawx?" ⁹ Mose deeh ah nin, "Yix tak lih hu tau mai pui ting pui iak tau mai kawn simex kawn bun yix tau mai yung, pex mai khawng brie khawmuik, yix tak lih hu. Grawh grawng nawh yix sang yuh pawie ka Siyiex." ¹⁰ Khaix an Pharaw ah nin ka kix, "Kieh Siyiex ot tau mai pex, yam kieh aux pex mai khawm kawn nyawm iak khankix lih hu, yuh satix pex, pa caox caig koe daux rhawm pex." ¹¹ "Ang mawh nan, pex viex pa mawh simex khankix mai lih hu yuh kaing krub ka Siyiex, awm pa hoik koe rhawm rhi pex ti yuh. "Nawh grheu kix lih hu khaing sivoe ngai tix. ¹² Khaix an Siyiex ah nin ka Mose, "Nyeu taix maix ka piang haktiex Ejiptux, ka sido khankix, sonsang lih ka piang haktiex Ejiptux mai ih rib riem pa koe piang tiex, pa kawn deuk khaix pre khawmuik. ¹³ Mose nyeu khaox gix tix ka piang haktiex Ejiptux mai Siyiex kieh bhaung ting hoek khaing plak lih singaix mai phlu ka piang haktiex khawmuik daux singaix an mai daux sawm an. Yam hoek plak ponngawb, bhaung ting plak lih singaix an viex sido khankix hoek. ¹⁴ Sido khankix hoek ka piang haktiex Ejiptux khawmuik mai tum ka piang haktiex mee pa kwang kix Ejiptux. Sido khankix kied mawh pa lang teung. sido awm ankix ang sax lih, bawg yam pa hoik luan mai tak ang lai koe khaix in sax. ¹⁵ Mawh kheu sido khankix, hoik kheem ka piang tiex khawmuik, haktiex hoik faik mai kix ih rib riem kuceu pa koe piang tiex mai plix khaox plix ox pa koe piang khaox, pa hoik deuk khaix pre. Mawh kheu nan can ceu pa klai khankix ang lai koe tix dah kawx piang khaox ox daux kaung mai ka haktiex Ejiptux khawmuik. ¹⁶ Khaix an Pharaw nied ti kok ka Mose mai Arun ah nin, "Aux hoik lud ka Siyiex pex mai pex. ¹⁷ "Mawh kheu nan, yam in yuh bwanson pluat ploi phimap aux pie bawg in ha! mai khyox khaw ka Siyiex pex, sonsang deeh teei Nawh Cao, krax pa yum bawg in hu khaing aux." ¹⁸ Mawh kheu nan, Mose lih khaing Pharaw mai khyox khaw ka Siyiex. ¹⁹ Siyiex deeh veeh bhaung pa ting riang khaing plak klip singaix, sonsang deeh teei sido khankix hu dee singai mai phlu kix hu ka daux rawm sigrit sigra raoh, sido tix mu kawx ang lai deuk ka daux mee haktiex pa kwang kix meung Ejiptux. ²⁰ Viang mawh nan, Siyiex deeh kieh Pharaw deeh baox kiien rhawm rhi mai nawh ang kieh kawn praix pui Isarelax khankix lih hu heue. ²¹ Siyiex ah nin ka Mose, "Nyeu taix maix ka plak raoma, sonsang faik praix ka piang haktiex Ejiptux, pa mawh pa faik kawn chix yaox kix ti pupi ti hu. ²² Mawh kheu nan, Mose nyeu taix tix plak raoma mai pa faik lih koe ka piang haktiex Ejiptux khawmuik daux loe ngaix. ²³ Kix ang chix yaox paox tix, tix kaux lai tix kaux mai kix ang lai pon kaoh khaing dee ot tix been loe ngaix. Viang mawh nan, kawn praix Isarelax khankix pon pa riang ka daux nyiex ot kix khawmuik. ²⁴ Khaix an Pharaw kok ka Mose ah nin, "Hu mai yuh kaing krub ka Siyiex. Prah yung mai pex mai khawng brie pex plak khaix ngie awx. Bun mai kawn nyawm khankix kawx, kieh lih hu tau mai pex." ²⁵ Viang mawh nan, Mose deeh ah nin, "Maix tak tawx khawng brie pa sang tan yix mai kraung tan pa sang gleeing yix sonsang tan yix ka Siyiex yix." ²⁶ "Khawng brie cie yix kawx, tak yaox ti hu tau mai yix, pie gip caong tix mu kawx, tak ang yaox ti prah khaing yix, mawh kheu nan, yix tak viex ankix tiblah, sonsang krub yix ka Siyiex tix, yix ang nyang tawng, ka pa sang krub tix ka Siyiex tom yam hoek yix tan." ²⁷ Viang mawh nan, Siyiex deeh kieh rhawm rhi Pharaw kiien mai nawh ang cu ti ploi kix hu. ²⁸ Khaix an Pharaw ah nin ka Mose, "Hu dee singai khaing aux. Yuh satix maix mai paw lai hoek yaox ka pakngai aux tix bawg kawx. Grawh grawng nawh, singaix yaox maix pakngai aux maix tak yum ka." ²⁹ Mose deeh ah nin, "Awm pa ah maix!, aux tak ang lai baox yaox ka pakngai maix pie tix bawg kawx heue."

¹ Siyiex ah nin ka Mose, "Aux tak deeh viex krax kha rhawm baox koe tix ceu, ka piang Pharaw mai meung Ejiptux. Khaix an nawh tak kieh pex lih hu khaing tin. Yam kieh nawh pex lih hu, nawh tak grheu pex lih tidom neh khawmuik. ² "Krai ka pui khankix, sonsang mhong kix mai kieh simex ku kaux mai bun ku kaux mhaing ti cie kraung mau, kraung khri khankix khaing paox plawg tix." ³ Siyiex kieh pui in khankix pon bwanson ka sivoe ngai pui Ejiptux khankix, lheu khaing an Mose mawh pui pa ting min pakngai ka daux haktiex Ejiptux mai sivoe ngai kawncau Pharaw mai sivoe ngai pui khawmuik. ⁴ Khaix an Mose ah nin, "Mawh kheu Siyiex hoik ah nin, "Yam greung sawm Aux tak lih hu, ka daux sinax pex meung Ejiptux. ⁵ Can pa mawh kawn Ai, pa koe daux haktiex Ejiptux tak yum, jah ka kawn Ai Pharaw, pa ngawm piang dang ngeung mai pa mawh kawn Ai kawncau bun nawh khankix pa ot plak khaix mai kawn liang tix keh khaing khawng brie khawmuik. ⁶ Khaix an krax yiiem riag pa ting lhaong tak koe ka daux haktiex Ejiptux kudah dee, pa ang sax koe glang ka in dix mai pa ang lai deeh koe sax. ⁷ Viang mawh nan, Aux tak ang kieh sox tix mu kawx pon ti raoh ka kawn praix Isarelax tix kaux kawx, khawm pui, khawm khawng brie, sonsang tawng pex ka pa tang pa siyox pa yuh Siyiex sinax pui Ejiptux mai pui Isarelax khankix. ⁸ Kawncau maix khankix, tak hoek ka aux mai gup ti krub ka aux mai kix tak ah nin, lih hu tau mai pui pa hawt khaix maix. Khaix an Aux tak lih hu." Nawh lih hu khaing Pharaw, ka daux pa kied song rhawm song rhi. ⁹ Siyiex ah nin ka Mose, "Pharaw tak ang cu nghiet ka maix, sonsang baox nie mhai pa daox am Aux ka daux haktiex Ejiptux." ¹⁰ Mawh kheu nan, Mose mai Arun yuh mhai pa daox am in khawmuik ka sivoe ngai Pharaw mai Siyiex deeh kieh rhawm rhi Pharaw kiien mai nawh ang cu pui Isarelax khankix lih hu khaing daux haktiex nawh.

¹ Siyiex sikah ka Mose mai Arun, ka daux haktiex Ejiptux ah nin, ² "Khix in tak mawh khix num jah mai mawh khix tix son pex." ³ "Pax krai ka pui Isarelax ah nin, ka daux khix in kao ngaix, pui ku kaux tak teei kawn yung iak son tix, awm pa hoik koe ka daux nyiex keeing nawh, son nyiex ma tix lhang kawn yung iak tix mu. ⁴ Phan nyiex ma mawx mawh pui tux ang uik ih nex kawn yung iak an, kieh nawh greem ti ih tau mai paox plawg tix mai simin ding koe pui miex kaux, tawx son pa ih kix tom kub mai nawh tak teei kawn yung tix mu, ⁵ kawn yung an tak mawh pa ang koe dee mat dee pliag mai kieh mawh kawn yung mhaing pa ang nyang naog tix num. Tak teei khaing yung khankix, phan ang mawh nan khaing pex khankix. ⁶ Maix tak priex kawn yung an tom hoek kao pon ngaix ka daux khix in. Pui haoh hun Isarelax khankix tak pah kawn yung an plak bo. ⁷ Kix tak teei nham tiblah mai kraix ka pang khaox siviex khawm ra mu mai ka piang nuk siviex khankix, ka nyiex dee ih kix. ⁸ Khaix an kix tak ih nex daux sawm an, kix tak ih nex tong ka ngu tau mai khao mun, pa ang sau susaix mai taux mai taux lhax pa song. ⁹ Paw doh ih nex im mai nex ngaik. Viang mawh nan, kaing, caong, tawm mai sok rhawm, pex tak pon ti ih khaix hoik tong pex ka ngu. ¹⁰ Maix tak ang pon ti deuh nex an, tom hoek plak ponngawb mai pa kawn deuk ankix, tom hoek ponngawb maix tak gleeing ankix ka ngu. ¹¹ Pex tak ih nawh yuh nin, Nhawt maox rawd nyoi pex, ceep kiep pex mai giex khaox grix pex. Mawh kheu nan, pex tak ih nawh phaiphai, in mawh pawie Pasakha Siyiex. ¹² Mawh kheu daux sawm an, Aux tak lih hu ka daux meung Ejiptux kudah dee mai pah ka pa mawh kawn Ai khankix, daux haktiex Ejiptux, pui khawm khawng brie Ejiptux khankix Aux tak ciyang ka kix. Aux mawh Siyiex. ¹³ Yam in nham tak mawh mhai rug son pex, ka daux nyiex pa ot pex, yam yaox Aux ka nham, Aux tak via khaing pex mai krax kha rhawm tak ang lai koe ka piang pex mai son ang pex sang laux leeing yam hoek Aux ti pah ka kawn liang haktiex Ejiptux." ¹⁴ "Mawh kheu nan, singaix in tak mawh krax pa doh keud son pex mai pex tak priex nawh mawh pawie tix mu son Siyiex ka daux doeh ru pex, pex tak priex nawh mawh pawie tix mu mai kieh mawh beenli pa caw pex ti yuh leeing ju. ¹⁵ Pex tak ih blah pa ang sau susaix aliah ngaix, daux sigaix jah, pex tak teei ti tik susaix khaing daux nyiex tix. Grawh grawng nawh, pui mawx ang ah, pa ih blah pa sau susaix daux singaix jah tom hoek daux aliah singaix, pui an tak yaox ti tik khaing ceu pui Isarelax. ¹⁶ Daux singaix jah, tak koe krax kraix khrawm pa singax singeh mai ka daux singaix aliah kawx, pex tak koe krax kraix khrawm pa singax singeh, kaing jhaw ceu pa yuh ka mawx kawx, tak ang pon ti yuh daux singaix an khankix, lheu khaing khre pex pa ih tix ku kaux. ¹⁷ Mai pex tak yuh pawie ih blah pa ang sau susaix ka daux singaix an, Aux tak teei kru naing pex lih khaing haktiex Ejiptux, pex tak priex singaix in, daux baux ju doeh ru pex, mawh beenli pa caw pex ti yuh leeing ju. ¹⁸ Ka daux khix jah, kao pon ngaix plak bo, pex tak ih blah pa ang sau susaix tom hoek tixnga tix ngaix daux khix an plak bo. ¹⁹ Glang aliah ngaix an, paw kieh susaix koe daux nyiex pex awx. Can pui pa ih ka blah pa sau susaix, viang nawh mawh nyo sinie mai pui pa keh daux haktiex an kawx Aux tak teei ti tik nawh khaing cub pui hun Isarelax. ²⁰ Pex tak ang yaox ti ih ka ceu pa sau susaix tix ceu kawx, ka dee ot pex, pex tak ih ka blah pa ang sau susaix." ²¹ Khaix an Mose kok ka kuad simiang Isarelax khankix ah nin, "Teei kawn yung iak tix mu, pah yam pawie Pasakha son nyiex ma pex." ²² "Pex tak teei rao taux im krim tix jhoi mai ce daux nham pa koe daux tawg mai awt ka nuk siviex mai pang khaox siviex ra plak ka nham pa koe daux tawg an. Paw kieh pui tix kaux kawx lih hu ka praix nyiex tom hoek ponngawb pasax." ²³ "Grawh grawng nawh, Siyiex tak lih hu sonsang pah ka pui Ejiptux khankix mai yam yaox Nawh Cao nham pa koe piang nuk mai piang pang khaox siviex khawm ra plak, Siyiex tak luan khaing siviex an mai ang tawx akhwang ka pa yuh pex laux leeing laig daux nyiex ma pex sonsang pah ka pex." ²⁴ "Pex tak priex ti yuh ceu in, mawh beenli pa caw pex ti yuh son pex mai son kawn simex pex leeing ju." ²⁵ Yam hoek pex ka daux haktiex pa tawx Siyiex ka pex, awm hoik tawx Nawh Cao gumlox sijax mukheu tix mai pex tak priex ti yuh been kaing in." ²⁶ "Phan kawn praix pex chawk yuh nin, grawh grawng been kaing in, koe dee bleeh yuh ka mawx?" ²⁷ "Pex tak deeh ah nin, "In mawh pawie Pasakha, pa appong tan ex ka Siyiex, pa hoik lih hu mai luan khaing nyiex ma kawn praix pui Isarelax daux meung Ejiptux, yam pah Nawh Cao ka pui Ejiptux khankix mai kieh nyiex ma ex khankix luad luan yam an. "Mawh kheu nan, pui khankix gup kaing tix mai krub ka Siyiex. ²⁸ Khaix an kawn praix Isarelax lih hu mai yuh awm gumlox pa hoik tawx Siyiex ka Mose mai Arun heue. ²⁹ Yam hoek greung sawm, Siyiex pah ka kawn Ai khankix, pa koe daux haktiex Ejiptux, jah ka kawn Ai Pharaw pa ngawm piang dang ngeung nawh, tom hoek ka can kawn Ai pui pa laung kix daux thawng tiex mai kawn liang khawng brie khawmuik. ³⁰ Mawh kheu nan, Pharaw mai kawncau nawh khankix mai pui Ejiptux khankix hoik kaoh daux greung sawm, krax riag yo ti yiiem sigrien sigre koe daux meung Ejiptux. Grawh grawng nawh, nyiex ma pui ku nyiex pa ang koe pui pa yum tix kaux kawx ang lai koe heue. ³¹ Khaix an Pharaw kok Mose mai Arun daux ponsawm ah nin, "Kaoh lih hu khaing sinax pui aux khankix maix khawm kawn praix Isarelax khankix. hu yuh kaing krub ka Siyiex awm pa hoik ah pex." ³² "Teei yung mai pex cie pex khawm khawng brie khankix, awm pa hoik ah pex mai lih hu. nawb bwan ka piang aux awx." ³³ Pui Ejiptux nied sigleeig ka ceu pui Isarelax khankix sonsang ploi kix hu khaing haktiex phaiphai, mai kix ah nin, "Phan pex ang lih hu, yix tak yum khawmuik." ³⁴ Pui ankix teei mien blah im, pa ang sau susaix mai kie ti viex tawg klu klao blah ka man mai kix klawm piang klip tix. ³⁵ Kawn praix Isarelax khankix yuh awm gumlox Mose mai kix mhaing kraung mau, kraung khri tix mai kraung ceep ti ka pui Ejiptux khankix. ³⁶ Siyiex tawx pui ankix, mawh pa pon bwanson ka sivoe ngai pui Ejiptux khankix sonsang khre rien kix ti tawx ceu pa mhaing kix. Mawh kheu nan, kix rhim ti teei kraung khrai pui Ejiptux khankix. ³⁷ Khaix an ceu pui Isarelax khankix lih khaing Ramase mai hu ka Sukok. Pui pa lih hu ka caong tix simex nong nong koe liah sien kaux ang nyang sawn kawn nyawm iak mai bun khankix. ³⁸ Pui haoh hun pa mawh pui luk laig daux kix khawmuik kawx, lih hu tau mai kix, khawm yung pex mai khawng brie kix tom nie. ³⁹ Kix viex mien blah im pa ang viex susaix khankix, khaing daux meung Ejiptux. Grawh grawng nawh, kix hoik grheu kix lih hu khaing meung Ejiptux mai kix ang lai pon pau, sonsang sau kix susaix daux blah mai cox khre sin son cao kix. ⁴⁰ Ceu pui Isarelax khankix hoik ot daux meung Ejiptux koe pon yieh tixngoe num. ⁴¹ Yam hoik hoek dee sidah pon yieh tixngoe num ka daux singaix an, can pui kru naing Siyiex khawmuik lih hu khaing meung Ejiptux. ⁴² Sawm an mawh sawm priex kix ti doh keud ka Siyiex, teei kix lih khaing meung Ejiptux. In mawh sawm Siyiex, son ceu pui Isarelax khawmuik, sonsang koe kix krax priex ku ju leeing ju heue. ⁴³ Siyiex ah nin ka Mose mai Arun, "In mawh beenli son pawie Pasakha. Pui tang ceu tix kaux kawx, tak ang pon ti ih kah." ⁴⁴ "Viang mawh nan, can siliex pa hoik liag ka mau ku kaux phan hoik pat hak tix yam an, nawh tak pon ti ih heue." ⁴⁵ "Nyo sinie mai pui cang pui caing tix kaux kawx tak ang pon ti ih." ⁴⁶ "Tak pon ti ih ka daux nyiex tix lhang, pex tak ang pon ti viex nex lih plak praix nyiex mai pex tak ang pon ti kieh si-ang khankix pot." ⁴⁷ "Cub pui hun Isarelax khawmuik tak priex beenli pawie an." ⁴⁸ "Yam hoek nyo sinie tix kaux kaux ti peung mai pex, phan nawh simie ti priex rien beenli pawie Pasakha Siyiex, kieh simex khawmuik pat hak tix. Khaix an kieh kix hoek dex mai laig daux pawie. Kix tak lih ti awm pui pa keh daux haktiex an. Can pui pa ang nyang pat hak, tak ang yaox ti ih. ⁴⁹ "Beenli pa caw ti hawt yuh, tak koe tix ceu khaing son pui pa keh daux haktiex mai son nyo sinie pa hoek ti peung sinax pex. ⁵⁰ Ceu pui Isarelax khankix hawt ti yuh, awm gumlox tawm Siyiex ka Mose mai Arun. ⁵¹ Ka daux singaix an tix dom neh, Siyiex viex kru naing Isarelax khankix lih khaing daux haktiex Ejiptux cub mawx cub an heue.

¹ Siyiex ah nin ka Mose, " ² "Appong kawn Ai plix num khankix ka Aux, ka daux ceu pui Isarelax, can pa mawh kawn Ai plix num khawm pui mai khawng brie mawh cie Aux heue." ³ Mose ah nin ka pui khankix, "Doh keud ka singaix in, pa mawh singaix lih hu pex khaing meung Ejiptux, khaing daux nyiex yuh pex kaing siliex. Grawh grawng nawh taix ting riang Siyiex, hoik viex pex lih khaing daux haktiex an, pex tak ang pon ti ih ka blah pa sau susaix." ⁴ "Ka daux singaix lih hu pex an mawh daux khix Abibax. ⁵ Yam viex Siyiex pex hoek ka daux haktiex ceu pui Khanan mai ceu pui Hitix, ceu pui Amawrix, ceu pui Hiwix, ceu pui Yebusix, pa hoik tiextu Nawh Cao ka keeing pex khankix, sonsang tawx ka pex. Haktiex an mawh haktiex dee lih rawm teeih mai rawm hia mai pex tak yaox ti priex been kaing in daux khix in." ⁶ "Daux aliah singaix, pex tak ih ka blah pa ang koe susaix mai yam hoek daux singaix aliah pex tak yuh pawie son Siyiex." ⁷ "Blah pa ang koe susaix tak pon ti ih daux aliah singaix, blah pa sau susaix, tak ang pon koe sinax pex mai susaix khankix kawx tak ang pon kieh koe dah dee ot pex khawmuik." ⁸ "Ka daux singaix an maix tak krai ka kawn praix maix ah nin, "Kheu inkix hoik mawh pa yuh Siyiex son aux, yam lih hoek aux khaing meung Ejiptux. ⁹ In tak mawh mhai rug ka daux tawm taix maix mai son krax doh keud ka kaing re maix, kieh gumlox beenli Siyiex koe daux jheeh pex. Mawh kheu taix pa ting riang Siyiex hoik viex pex lih khaing meung Ejiptux. ¹⁰ Mawh kheu nan, pex tak priex ka gumlox beenli in, daux bawg yam ankix ku num heue." ¹¹ Yam viex Siyiex maix laig daux haktiex ceu pui Khanan, awm gumlox pa hoik tiextu Nawh Cao ka maix mai keeing maix mai tawx haktiex inkix ka maix. ¹² Maix tak deuh kawn Ai plix num mai can kawn khawng brie pa liang tix keh mawh son Siyiex. Can pa mawh mhaing khankix tak mawh cie Siyiex." ¹³ "Can kawn la iak pa liang ti keh sivoe ku mu maix tak deeh taoh nawh ka kawn yung iak tix mu. Phan ang rhawm taoh, pex tak raig ngawg kawn la an maix tak deeh taoh ka kawn Ai pa liang ti keh khawmuik. ¹⁴ "Yam mhaing kawn simex maix grawng inkix daux bawg yam pa sang hoek sax mai nawh tak ah nin, "In mawh patix lie? Maix tak deeh ah nin ka nawh, Mawh kheu taix pa ting riang Siyiex, hoik viex ex lih khaing meung Ejiptux, khaing daux nyiex pa yuh ex siliex." ¹⁵ Yam an Pharaw ang kieh ex lih hu, Siyiex pah ka kawn Ai pa koe daux haktiex Ejiptux, khawm kawn Ai pui mai kawn liang khawng brie khankix. Mawh kheu nan, aux tak appong tan can kawn pa liang ti keh khaing khawng brie khawmuik ka Siyiex. Viang mawh nan kawn simex aux khankix, pa mawh kawn Ai khawmuik, aux tak deeh taoh. ¹⁶ "Inkix tak mawh mhai rug ka daux tawm taix maix mai mawh mhai ka kaing re maix. Grawh grawng nawh Siyiex hoik viex ex lih khaing daux meung Ejiptux, ka taix pa ting riang Nawh heue." ¹⁷ Yam kieh Pharaw pui khankix lih hu, Siyiex ang thung kix hu ka daux krax plak haktiex Philitix viang dex kawx, mawh kheu ah Siyiex nin, "Pui inkix tak deeh tieh rhawm tix, yam yaox kix ka naing mai deeh veeh ti ing ka haktiex Ejiptux." ¹⁸ Mawh kheu nan, Siyiex thung pui inkix hu krax daux tiag, baoh vung viang rawm sigrit sigra Edom. Ceu pui Isarelax khankix lih hu cub mawx cub an, khaing haktiex Ejiptux mai khawm kraung naing pa koe kix. ¹⁹ Mose teei ti viex si-ang Yosiep hu tau mai tix. Mawh kheu hoik deuh nawh gumlox pa tiextu ka ceu pui Isarelax khankix ah nin, "Siyiex tak hoek ti kia ngien ka pex tete mai pex tak deeh viex si-ang aux hu khaing tin, tau mai pex." ²⁰ Mawh kheu nan, kix hu khaing Sukok mai bang ka daux veng Etham, pa koe hawt daog daux tiag tan." ²¹ Siyiex hu sivoe kix, yam ponngaix Nawh Cao thung kix hu daux krax ka rong paiawm mai yam hoek ponsawm, Nawh Cao thung kix hu daux krax ka rong ngu, sonsang jhan pa riang ka kix. Mawh kheu nan kix yaox ti hu awm paox tix plak ponngaix mai plak ponsawm. ²² Nawh Cao ang teei rong paiawm an plak ponngaix mai rong ngu an plak ponsawm khaing sivoe pui khankix heue.

¹ Siyiex leeing ju ah nin ka Mose, ² "Krai ka ceu pui Isarelax khankix mai Kieh kix bang sivoe veng Pihahirot, sinax veng Mizadaw mai rawm sigrit sigra pa see veng Balazephon, kix tak bang sivoe an, hawt praok rawm sigrit sigra." ³ "Pharaw tak ah nin ka grawng ceu pui Isarelax khankix, Kix hoik hoek dee si khawp haktiex mai hoik vu vie ti tan, daux tiag tu hoik nyeep kix." ⁴ "Aux tak kieh rhawm Pharaw kiien mai nawh tak hawt khaix pex mai Aux tak pon min pakngai ka piang Pharaw mai ka piang kru naing nawh khawmuik, sonsang tawng pui Ejiptux khankix mawh Aux Siyiex mai kix yuh awm an. ⁵ Koe pui krai simiang Ejiptux mhong grawng hoik to tua pui khankix, rhawm Pharaw mai kawncau nawh khawmuik deeh tieh ti to ka pui ankix ah nin, "Ex hoik yuh ceu inkix mai ex hoik kieh pui Isarelax khankix lih hu khaing pa yuh khaing siliex son ex yuh ka mawx?" ⁶ Pharaw khre ling lawx naing tix mai teei pui naing tix khankix hu tau mai tix. ⁷ Nawh teei ling lawx naing, pa laug tix liah yieh lhang mai can ling lawx naing meung Ejiptux khankix tau mai cao kaing naing pa brug ka piang ling lawx ku lhang. ⁸ Siyiex leeing ju kieh rhawm Pharaw meung Ejiptux kiien, nawh tom hawt khaix ceu pui Isarelax khankix, mawh kheu ceu pui Isarelax khankix lih hu tau mai krax pa vao rhawm tix. ⁹ Pui Ejiptux khankix hawt khaix kix tau mai ling lawx naing Pharaw mai pui naing brung mai kru naing nawh khawmuik krub kix ka dee bang kix hawt rawm sigrit sigra, ka veng Pihahirot pa see veng Palazephong. ¹⁰ Yam dex hoek Pharaw, ceu pui Isarelax khankix yaog ti jhak mai yaox pui Ejiptux khankix hawt khaix kix. Mawh kheu nan, kix kied koe krax lhat graung mai ceu pui Isarelax khankix riag yo ka Siyiex leeing ju. ¹¹ Kix ah nin ka Mose, "Mawh ang simeeig lai koe daux meung Ejiptux maix hoik teei yix hu dee singai, sonsang yum yix daux tiag ang mawh lie? Maix hoik yuh ceu inkix ka yix mai viex yix lih khaing meung Ejiptux yuh ka mawx lie?" ¹² In mawh lox pa dawg krai yix ka maix daux meung Ejiptux ang mawh lie? Paw sivix yix, grham yix yuh kaing pui Ejiptux. Mawh kheu pa yuh yix kaing pui Ejiptux nie lheu mhawm khaing yum yix daux tiag. ¹³ Mose ah nin ka pui khankix, "Paw lhat graung, cung ka daux krax pa nhim rhawm mai pau ti jhak ka krax taoh pa yuh Siyiex leeing ju son pex daux in singaix. Grawh grawng nawh pui Ejiptux pa yaox pex daux in singaix, pex tak ang lai baox yaox kix tix bawg kawx heue." ¹⁴ "Siyiex leeing ju tak puing naing son pex, pex paw nye ot yiien mhawm mhawm." ¹⁵ Siyiex leeing ju ah nin ka Mose, "Maix riag yo ka Aux yuh ka mawx? Krai ka ceu pui Isarelax khankix hu plak sivoe ngai. ¹⁶ Yaog khaox grix maix mai nyeu taix maix ka piang rawm sigrit sigra mai gwieh rawm ra plak, ceu pui Isarelax khankix tak yaox ti hu piang dee kroh tiex daux sigreung rawm sigrit sigra. ¹⁷ Aux tak kieh rhawm pui Ejiptux khankix kiien mai kix tak hawt khaix pex, Aux tak pon min pakngai ka piang Pharaw mai ka piang kru naing nawh khawmuik, khawm ling lawx naing nawh, pui naing brung nawh. ¹⁸ Khaix an pui Ejiptux khankix tak tawng mawh Aux Siyiex leeing ju, yam hoik pon Aux min pakngai ka piang Pharaw mai piang ling lawx naing nawh mai piang pui naing brung nawh khawmuik." ¹⁹ Kawncau Siyiex pa hu sivoe dee bang pui Isarelax deeh gah ti hoek ka plak khaix kix mai rong paiawm pa hu sivoe kix, deeh cung ka plak khaix kix. ²⁰ Hoik hoek daux sinax dee bang pui Ejiptux khankix mai dee bang pui Isarelax, rong paiawm an tawx pa faik ka plak pui Ejiptux mai tawx pa riang ka pui Isarelax, son ang khawm ra plak lai pon hoek dex paox tix leeing sawm. ²¹ Mose nyeu khaox grix tix lih ka piang rawm sigrit sigra mai Siyiex leeing ju kieh rawm sigrit sigra deeh plak khaix ka bhaung ting pa kaoh khaing plak lih singaix leeing sawm mai rawm sigrit sigra lih mawh tiex kroh mai rawm khankix gwieh ti hu khaing paox tix ra plak. ²² Ceu pui Isarelax khankix, lih hu ka daux sigreung rawm sigrit sigra, ka piang tiex kroh mai rawm awm guh ding son kix plak dawm mai plak gwiex kix. ²³ Pui Ejiptux khankix hawt pheet kix daux sigreung rawm sigrit sigra tau mai brung Pharaw ling lawx naing nawh mai pui naing brung nawh khawmuik. ²⁴ Yam hoek plak ponngawb, Siyiex jhak ti yaox ka piang kru naing pui Ejiptux khankix, ka rong ngu paiawm mai Nawh Cao tawx krax sivix ka pui naing Ejiptux khankix. ²⁵ Nawh Cao teei ti tik jaong ling lawx naing kix, sonsang nu kix ti hawh, pui Ejiptux khankix ah nin, "Kieh ex to khaing plakngai ceu pui Isarelax khankix! mawh kheu Siyiex leeing ju hoik puing ex son kix, ²⁶ Siyiex ah nin ka Mose, "Nyeu khaox grix maix piang rawm sigrit sigra, sonsang deeh kleuk rawm tix ka piang pui Ejiptux, ka piang ling lawx naing mai ka piang pui naing brung khawmuik." ²⁷ Mose nyeu khaox grix tix ka piang rawm sigrit sigra mai yam hoek plak ponngawb, rawm sigrit sigra khankix deeh kleuk paox tix mai naog awm diag prim. Yam sang to pui Ejiptux khaing daux rawm, Siyiex kheem pui Ejiptux daux sigreung rawm sigrit sigra. ²⁸ Rawm deeh hoek mai kheem ka ling lawx naing pui naing brung mai khru naing Pharaw khawmuik, pa laig hawt khaix pui Isarelax ka daux rawm sigrit sigra, kix ang lai deuk pie tix kaux kawx. ²⁹ Pui Isarelax khankix, yaox ti hu ka piang tiex kroh, daux sigreung rawm sigrit sigra mai rawm hoik mawh guh ding ka plak dawm mai plak gwiex kix. ³⁰ Ka daux singaix an Siyiex hoik taoh ka pui Isarelax khankix, khaing daux tawm taix pui Ejiptux mai pui Isarelax hoik yaox ka to kaux yum pui Ejiptux hawt praok rawm sigrit sigra. ³¹ Pui Isarelax khankix hoik yaox ka kaing ceu pa ting, pa hoik yuh Siyiex ka pui Ejiptux, pui khankix tom lhat graung ka Siyiex mai yum rhawm ka Siyiex mai kawncau Nawh Mose heue.

¹ Yam an Mose mai pui Isarelax khankix ah lai rhax son Siyiex yuh nin, "Aux tak ah lox rhax ka Siyiex, mawh kheu hoik pex Nawh Cao ka daux pa ting min plakngai! brung khankix mai cao pa brug, Nawh Cao hoik tik daux rawm sigrit sigra! ² Siyiex mawh riang rao aux mai lai rhax aux, Nawh hoik mawh krax taoh son aux, kheu Nawh mawh Siyiex keeing aux mai aux tak yaog yaw Nawh ting. ³ Siyiex mawh pui naing, ceu kaux Nawh mawh Siyiex leeing ju. ⁴ Ling lawx naing Pharaw mai kru naing nawh, Nawh Cao hoik tik daux rawm sigrit sigra, cao kaing naing pa hoik laug nawh kawx, hoik simam daux rawm sigrit sigra Raoh. ⁵ Rawm hoik kheem ka kix, kix hoik com awm lon simaox greem rawm. ⁶ "Siyiex leeing ju eue, taix khawn dawm Maix hoik mawh pa koe min pakngai ka daux sibrawm, Siyiex leeing ju eue, taix khawn dawm Maix hoik dheem pui pa koeng tom phawng. ⁷ Maix Cao hoik mawh pa kied ting sibrawm, Maix Cao hoik pex ka pui an kix pa tieh feen ka Maix, Maix hoik ploi krax song rhawm tix hu awm ngu mai gleeing kix laux leeing awm nyhee. ⁸ Bhawm pa lih khaing daux meeh Maix mai rawm khankix khrawm paox tix tau, rawm khankix jung rahsee awm ton gawng mai dee raux rawm hoik kiien ka daux rawm sigrit sigra heue. ⁹ Pui koeng ah nin, Aux tak hawt pheet kix, Aux tak krup ka kix, Aux tak gwieh kraung pa tud rhim, krax koe rhawm Aux, tak vah ka piang kix. Aux tak teei lawm vaid ti lih, taix Aux tak yuh kix laux leeing." ¹⁰ Maix Cao kieh bhaung ting phlu, Rawm sigrit sigra hoik kheem ka kix, kix com greem rawm awm sivun, ka daux rawm pa ting riang. ¹¹ Siyiex leeing ju eue, ka daux siyiex tang ceu mawh mawx pa awm Maix lie? mawh mawx pa kied singax singe pa kied ting min pakngai mai koe krax lhat graung daux pa yaog yaw kah, yuh pa daox am khankix uik. ¹² Maix nyeu taix khawn dawm tix lih, haktiex hoik bleet ka kix. ¹³ Daux krax caux rhawm Maix, thung pui pa hoik taoh Maix khankix, hu ka riang rao Maix, ka dee ot pa singax Maix." ¹⁴ "Pui tak mhong mai lhat graung kah, krax laux rhawm tak hoek ka piang dee ot pui Philitix. ¹⁵ Yam an cao kaing pui Edom khankix hoik yaoh yee, pui Mawbax pa ting riang rao, krax lhat graung hoik giex kix, pui pa ot Khanan khawmuik, hoik siyaung sikua hu. ¹⁶ Krax lhat mai krax yaoh hoek piang kix, kheu plawng taix pa ting sibrawm Maix, kix hoik kaog awm simaox, tom yam hoik luan pui khankix, Siyiex leeing eue. Tom yam hoik luan pui khankix, Mawh pui pa hoik taoh Maix hu. ¹⁷ Maix tak viex kix laig mai sum kix ot ka daux gawng sinngao Maix an, ka dee an, Siyiex leeing ju eue, mawh dee pa hoik yuh maix son dee ot Maix Cao, Siyiex leeing ju eue, Mawh dee singax singeh pa hoik phan hoik yuh Maix ka taix tix. ¹⁸ "Siyiex tak kuang, leeing ju, ¹⁹ Mawh kheu brung Pharaw mai ling lawx naing nawh mai pui naing brung nawh, laig ka daux rawm sigrit sigra mai Siyiex deeh kieh rawm sigrit sigra kheem ka piang kix. Viang mawh nan, ceu pui Isarelax khankix, hu ka piang tiex kroh, daux sigreung rawm sigrit sigra heue. ²⁰ Puxke bun Arun pa mawh Meriam, bun cao jhai giex kraung daux taix tix mai can bun khawmuik lih hu hawt khaix nawh, tau mai kraung mai graoh. ²¹ Meriam kawx "Rhax lai ka Siyiex leeing ju, mawh kheu hoik pex Nawh cao ka daux krax pa koe min plakngai, brung mai cao pa brug khankix, Nawh Cao hoik tik daux rawm sigrit sigra!" ²² Mose viex pui Isarelax hu khaing rawm sigrit sigra raoh. Khaix an kix lih hu ka daux tiag Shurax loe ngaix ka daux tiag an mai ang yaox ka rawm ceeix kawx. ²³ Yam hoek kix ka Mara, kix ang pon nyaux ka rawm pa koe daux Mara khankix, mawh kheu song, mawh kheu nan, ceu kaux dee an, tak kok mawh Mara tom in singaix. ²⁴ Pui khankix deeh baox ngau tan ah nin ka Mose, "Ex sang nyaux patix lie?" ²⁵ Mawh kheu nan, nawh kok yo ka Siyiex leeing ju mai Siyiex leeing ju jhi nawh yaox khaox tix gaw. Yam tik nawh khaox an ka daux rawm, rawm deeh tie kah, Nawh Cao yuh gumlox beenli son kix tan mai Nawh Cao cheuk ti yaox kix tan. ²⁶ Nawh ah nin "Phan pex cu nghiet ka lox Siyiex leeing ju pex mai yuh pa rahsee sivoe ngai Nawh Cao mai daong yhaok tix ka gumlox pingnyap Nawh khankix mai hawt gumlox beenli Nawh, Aux tak ang lai deuh jhawm saux ka piang pex tix ceu kawx, awm pa hoik viex Aux hoek ka piang pui Ejiptux. Mawh kheu Aux mawh Siyiex leeing ju Cao pai jhawm saux pex. ²⁷ Kix hoek ka Elem dee koe rawm daux kao ra mu mai khaox jhie yaong atixgliah gaw mai kix peung tan hawt rawm heue.

¹ Cub pui hun pui Isarelax khankix lih hu khaing baoh Elem mai hoek ka daux tiag Sin, pa koe sinax Elem mai gawng Sina, ka daux khix ra kao phwan ngaix khaix hoik lih kix khaing haktiex Ejiptux. ² Cup pui hun pui Isarelax khankix, ngau ka Mose mai Arun kheu krax kha rhawm tix daux tiag, ³ Pui Isarelax khankix ah nin ka kiex, "Phan ex yum ka daux taix Siyiex leeing ju, daux haktiex Ejiptux, yam ngawm ex mai aw nex mai sak vaig tix ka priex lheu mhawm, mai maix hoik viex yix hoek ka daux tiag, sonsang kieh maix cub pui hun yum ka pa cai rhawm tix." ⁴ Siyiex leeing ju ah nin ka Mose, "Aux tak kieh lhiex blah lih khaing raoma son pex, mai pui khankix tak lih khrawm kub son tix ngaix ku singaix, Aux tak cheuk ti yaox kix, sonsang tawng Aux ka hawt kix ang hawt ka gumlox Aux." ⁵ "Yam hoek singaix liah, kix tak khre rien pa khrawm ti, lheu khaing ku singaix ra son." ⁶ Mawh kheu nan, Mose mai Arun ah nin ka kawn praix Isarelax khankix, "Daux bo in, pex tak tawng ka mawh Siyiex pa viex pex lih khaing haktiex Ejiptux, ⁷ plak ponngawb, pex tak yaox min pakngai Siyiex, mawh kheu hoik mhong Nawh Cao lox ngau pex, mawh kheu mawh ex pui yuh ka mawx pex lai deuh phimap ka yax lie?" ⁸ Mose deeh ah nin, "Yam tawx Siyiex pex ih nex tom kub plakbo mai blah plak ponngawb gumlox in tak grum naog, mawh kheu Siyiex hoik mhong lox pa ngau tieh feen pex ka Nawh Cao, "Mawh ex pui yuh ka mawx? lox pa ngau tieh feen pex ang mawh ngau tieh feen ka yax, mawh pa ngau tieh feen ka Siyiex. ⁹ Mose ah nin ka Arun, "Krai ka cub pui Isarelax khankix ah nin, hoek dex Siyiex. Mawh kheu hoik mhong Nawh Cao lox pa ngau pex, " ¹⁰ Yam sikah Arun ka cub pui hun Isarelax khankix, kix simi ti jhak ka daux tiag. Kix yaox min pakngai Siyiex jhan lih khaing daux paiawm." ¹¹ Siyiex ah nin ka Mose, ¹² "Aux hoik mhong lox pa ngau pui Isarelax khankix, krai kix mhong, plak ponbo pex tak yaox ti ih nex mai tak yaox ti ih blah plak ponngawb, mai pex tak tawng ka mawh Aux Siyiex pex." ¹³ Plak ponbo keed khankix lih hoek naog hawt dee bang kix, plak ponngawb rawm ciex lih vung viang dee bang kix, ¹⁴ Khaix hoik deeh haok rawm ciex, ceu pa awm mu rawm rha khlawp pa lawmle iak koe ka piang tiex ka daux tiag tan. ¹⁵ Yam yaox kawn praix Isarelax ka an, kix ah nin ka paox tix, tix kaux lai tix kaux, "In mawh patix lie? mawh kheu ang kix tawng ka mawh an patix. Mose ah nin ka kix, "In mawh blah pa hoik tawx Siyiex leeing ju, sonsang ih pex." ¹⁶ "Siyiex leeing ju tawm lox ah nin, kieh pui ku kaux khrawm son pa kub ih ti, tix kaux tix Awmie, awm diag koe kaux pui pa ot daux nyiex gox khankix." ¹⁷ Pui Isarelax khankix, yuh awm pa ah nawh, pui pa nie, khrawm hawt nie mai pui pa tux, khrawm hawt tux. ¹⁸ Yam tong kix ti yaox ka khrawng Awmie, pui pa khrawm tom nie ang lai lheu mai pui pa khrawm iak ang lai cud, pui ku kaux hoik khrawm awm pa kub ih kaux mawx kaux an heue. ¹⁹ Mose ah nin, "Paw kieh pui tix kaux kawx, deuh tom hoek ponngawb." ²⁰ Kix ang nghiet ka lox Mose, kix tiblah kawn deuh tom hoek plak ponngawb mai lih mawh graik mai sioe cux. Mose song rhawm ka kix. ²¹ Kix khrawm an ku ngawb, son pui ku kaux, son pa kub ih kaux mawx kaux an, yam hoik hax koek an lih mawh rawm. ²² Yam hoek singaix liah, kix khrawm blah ra son, tix kaux pui ra Awmie, cao kwang cub pui hun Isarelax hoek ti krai ka Mose, ²³ Nawh ah nin ka kix, "In mawh pa hoik tawm Siyiex, pasax mawh singaix twah mai mawh singaix laux mai singaix pa singax singeh ka Siyiex, nghaong ti deuh awm pa sang nghaong pex mai braong ti deuh awm pa sang braong pex son singaix twah, deuh pa kawn deuk ka son pex tom hoek ponngawb." ²⁴ Kix deuh an tom hoek plak ponngawb, awm lox ah Mose, mai an ang lai sioe mai ang koe graik, ²⁵ Mose ah nin, "Ih pa deuk in daux singaix, mawh kheu mawh singaix twah cie Siyiex, in singaix maix tak ang yaox ceu in daux kaung, ²⁶ "Pex tak khrawm nawh daux liah singaix, viang mawh nan, ka daux singaix aliah, mawh singaix twah, tak ang lai koe mai ang lai yaox." ²⁷ Pui tiblah lih hu ka daux singaix aliah, sonsang khrawm tix kah, kix ang yaox tix ceu kawx. ²⁸ Siyiex leeing ju ah nin ka Mose, "Pex kawn sang thiang ka lox tawm pingnyap Aux mai lox tat jhawm prawng Aux miex grheung lie? ²⁹ Jhak heue, Siyiex tawx singaix twah ka pex, yam hoek liah singaix Nawh Cao tawx blah son ra ngaix, kieh pui ku kaux ot dee ot tix, paw kieh pui lih hu khaing dee ot tix, tix kaux kawx, ka daux singaix aliah. ³⁰ Mawh kheu nan, pui khankix laux lee tix daux singaix aliah. ³¹ Nyiex ma pui Isarelax khankix, kok ceu kaux blah an mawh mannax, an paing awm simie taux ki, awm jhawm blah klu klao tix mai rawm hia. ³² Mose ah nin, "In mawh lox tawm Siyiex, teei ti deuh mannax tix Awmie, sonsang deuh pex son ru ti yaox tix ju hoik tix ju mai kix tak yaox blah pa eei Aux pex ka daux tiag, yam viex Aux pex lih khaing haktiex Ejiptux" ³³ Mose ah nin ka Arun, "Teei ang tix mu mai sau blah mannax an tix Awmie daux an mai deuh sivoe Siyiex, sonsang priex pex an daux ru tix, tix ju hoik tix ju." ³⁴ Awm gumlox pa hoik tawx Siyiex ka Mose, Arun deuh an sivoe khui kham sakse mai priex ka. ³⁵ Pui Isarelax khankix, hoik ih mannax tixpon num, tom hoek kix ka haktiex dee ot tix mai kix ih mannax tom hoek tix ka mee haktiex Khanan. ³⁶ tix Awmie koe kao son tix son Epha heue.

¹ Cub pui hun Isarelax lih khaing daux tiag baoh haktiex Sin awm gumlox pa hoik tawm Siyiex, kix hu bang ka daux Rephidim, dee an rawm ang koe sonsang nyaux pui rawm. ² Pui khankix simah ka Mose ah nin, "Tawx yix nyaux rawm, " "mai Mose ah nin ka kix, " "Pex lai simah mai aux yuh ka mawx? Pex lai cheuk cheu ka Siyiex yuh ka mawx?" ³ Pui khankix kied sang nyaux nie rawm mai ngau simah ka Mose ah nin, "Maix lai viex yix lih khaing Ejiptux, sonsang pah ti yix mai kawn praix yix mai khawng brie yix tau ka daux pa simie ti nyaux nie rawm yuh ka mawx?" ⁴ Mose riag yo ka Siyiex, "Aux sang yuh ka mawx ka pui inkix? Kix dex sang dheem aux ka simaox." ⁵ Siyiex ah nin ka Mose, "Lih hu sivoe pui khankix mai kok kuad song pui Isarelax, mai viex khaox grix pa koe daux taix maix pa hoik lah maix rawm klawng Nilax ka mai lih hu. ⁶ Aux tak cung plak sivoe maix tan, ka piang rang baoh Hawrap, maix tak lah ka rang an mai rawm tak lih khaing daux an, sonsang pon nyaux pui heue. "Mose yuh awm an ka sivoe ngai kuad song pui Isarelax khankix. ⁷ Nawh kok ceu kaux dee an mawh Masa mai Meribax, mawh kheu pui Isarelax khankix simah mai cheuk cheu ka Siyiex ah nin, "Ot Siyiex sinax yix lie? Phan ang mawh nan ang ot lie?" ⁸ Pui Amaliet hoek mai puing ka pui Isarelax ka baoh Rephidim. ⁹ Mose ah nin ka Yawsux, "Laug pui khankix ka son ex mai hu puing ka pui Amaliet, pasax aux tak cung ka piang choek gawng tau mai khaox grix Siyiex ka daux taix tix." ¹⁰ Yawsux yuh awm pa ah Mose mai puing ka pui Amaliet, Mose, Arun mai Hurax haok ka piang choek gawng. ¹¹ Yam yaog Mose taix tix, pui Isarelax pex ka mai yam nyah nawh taix tix, pui Amaliet pex kah. ¹² Mawh kheu hoik meue taix Mose, kix tom teei simaox tix mu mai deuh ka greem nawh mai nawh ngawm ka piang an. Arun mai Hurax joh taix nawh tix plak tix kaux tom klip singaix. ¹³ Yawsux pah ka simiang Amaliet mai pui nawh khankix yum ka lawm vaig. ¹⁴ Siyiex ah nin ka Mose, "Tiiem ti deuh in ka daux phuk lai, sonsang mawh pa doh keud ka mai phat Yawsux mhong, Aux tak preet ti tik ceu kaux pui Amaliet khaing greem raoma." ¹⁵ Mose sum khu dee tan mai kok ceu kaux mawh Yahowanitsi, dee blee mawh Siyiex cao pa pex. ¹⁶ Taix Siyiex Cao pa pex ah nin, "Siyiex tak yuh naing ka pui Amaliet tix ju hoik tix ju heue."

¹ Yesaraw cao giex kaing li Midian, pa mawh paox Mose, hoik mhong ka can pa yuh Siyiex ka Mose mai son pui nawh Isarelax, grawng pa viex Siyiex pui Isarelax lih khaing Ejiptux. ² Khaix an Paox Mose pa mawh Yesaraw viex moeng Mose, Zibawrax pa hoik ploi nawh ing, ³ tau mai kawn simex nawh ra kaux, ceu kaux tix kaux mawh Gerashom, mawh kheu nawh ah nin, "Aux hoik sax mawh nyo sinie daux haktiex tang dah." ⁴ Ceu kaux an tix kaux mawh Eliaza. Mawh kheu nawh ah nin, "Siyiex keeing aux, mawh pa teem aux mai kieh aux luad luan khaing lawm vaid Pharaw." ⁵ Paox Mose pa mawh Yesaraw viex moeng Mose mai kawn simex nawh, ra kaux hoek tau ka Mose daux tiag, dee bang nawh ka gawng Siyiex. ⁶ Yam an, pui tix kaux hoek ah nin ka Mose, "Paox maix Yesaraw hoek tau mai moeng maix, khawm kawn simex maix ra kaux, " ⁷ Mose lih plak praix mai rieb ka paox tix mai nawh ngeuh kaing tix mai ngheet ka nawh mai kiex chawk grawng krax nyawm ot paox tix, tix kaux hoik tix kaux mai laig daux nyiex gox man. ⁸ Mose krai paox tix Yesaraw mhong grawng pa hoik yuh Siyiex leeing ju, ka Pharaw mai ka pui Ejiptux khankix mai ceu pa yaox pui Isarelax pa nu pa ciien daux krax daux laux mai grawng pa hoik kieh Siyiex kix luad luan. ⁹ Yesaraw gaux rhawm, son krax pa mhawm pa yuh Siyiex khawmuik ka pui Isarelax khankix, pa hoik taoh Nawh Cao kix khaing daux tawm taix pui Ejiptux. ¹⁰ Yesaraw ah nin, "Kieh Siyiex koe bwanson, pa taoh maix luan khaing daux taix pui Ejiptux mai khaing taix Pharaw mai pa taoh pui khankix luan khaing taix pui Ejiptux." ¹¹ "Aux hoik tawng Siyiex leeing ju mawh pa ting khaing siyiex tang kaux mai pex ka pui pa ting rhawm ca nyhau ka piang pui Isarelax khankix." ¹² Paox Mose Yesaraw yuh krax tan pa gleeing mai tan ka Siyiex, Arun mai kuad song pui Isarelax khankix, hoek sonsang ih priex preem tau mai paox Mose sivoe Siyiex. ¹³ Daux singaix pasax, Mose ngawm sonsang prawng ca ka pui khankix mai pui khankix cung sivoe Mose, jah ponngawb tom hoek ponbo. ¹⁴ Yam yaox paox Mose ka ceu pa yuh nawh ka pui khawmuik, nawh ah nin, pa yuh maix ka pui in khankix mawh ceu pa yuh ka mawx? maix lai ngawm ti prawng ca nong nong mai kieh pui cung plak sivoe tix, jah ponngawb tom hoek ponbo yuh ka mawx? ¹⁵ Mose ah nin ka paox tix, "Mawh kheu pui khankix hoek ka aux, sonsang chawk kix ka Siyiex, ¹⁶ Yam si mah kix mai paox tix, kix hoek ka aux mai aux tak prawng see sinax pui tix kaux mai paox plawg kix mai aux kieh kix tawng ka beenli Siyiex mai lox tat jhawm prawng Nawh Cao khankix." ¹⁷ Paox Mose deeh ah nin ka nawh, "Ceu pa yuh maix in, ang mawh pa mhawm." ¹⁸ "Maix mai pui pa ot tau mai maix, tak awn riang rao, mawh kheu beeh glawm in mawh pa ciien son maix, maix ang doh pon yuh nong nong. ¹⁹ Nghiet ka lox aux yam in aux tak tawx rhawm keud dong sawn ka maix mai Siyiex tak ot tau mai maix! maix tak mawh pa yuh kaing khankix sivoe Siyiex mai viex grawng khankix hoek ka Siyiex, ²⁰ mai maix tak gau kix ka lox lai beenli mai lox tat jhawm prawng Siyiex mai kieh kix tawng krax pa sang lawng kix mai kaing pa khaw kix ti yuh. ²¹ Lheu khaing an laug pui pa sang pon yuh kaing, khaing pui in khawmuik, pui pa lhat graung ka Siyiex, pui pa kaux sijax mai pui pa koeng ka sinngao pa ang rahsee, mai yaog cao pa kwang ka piang kix, pa kwang ka piang cub tix rheng, ka piang cub tix yieh, ka piang cub tixphwan mai ka piang cub kao kaux. ²² Kieh kix tang prawng ca ka pui ku bawg yam. See pa ting ceu khankix kix tak viex hoek ka maix, phan mawh see pa iak kuceu, kieh kix tang prawng cao tix, mawh kheu nan, kix rom ti klawm beeh glawm mai maix mai an tak mawh pa chaong son maix. ²³ Phan maix yuh ceu in, awm lox pa tawm Siyiex ka maix, maix tak pex mai kaing tak kaux cong mai pui khawmuik tak hu ka dee ot tix ka daux pa nhim." ²⁴ Mose nghiet ka lox paox tix mai yuh awm pa ah nawh, ²⁵ Mose laug pui pa pon yuh cao kaing ka daux pui Isarelax mai kieh kix yuh cao kaing ka piang pui khankix, pa kwang ka piang cub tix rheng, ka piang cub tix yieh, ka piang cub tixphwan mai ka piang cub kao kaux. ²⁶ Kix prawng ka pui ku bawg yam mai kix viex grawng see pa nu hoek ka Mose, see pa iak kuceu kix tang prawng ca cao tix. ²⁷ Mose kieh paox tix deeh ing mai nawh deeh hu ka haktiex cao tix heue.

¹ Khaix hoik lih hu pui Isarelax khankix khaing haktiex Ejiptux, ka daux khix loe tix ngaix, kix hoek ka daux tiag Sina. ² Khaix hoik lih kix khaing Rephidim mai hoek ka tiag Sina, kix bang ka daux tiag tan, pui Isarelax khankix bang hawt sivoe gawng an, ³ Mose haok ka Siyiex mai Siyiex kok nawh khaing piang gawng ah nin, "Maix tak yaox ti krai ka nyiex ma Yakop mai ka pui Isarelax" ⁴ "Pex hoik sax yaox pa hoik yuh Aux ka pui Ejiptux mai tokaux Aux hoik viex pex lih khaing Ejiptux awm viex klang krih kawn tix ka piang pruik tix." ⁵ "Phan pex cu nghiet ka gumlox Aux mai priex gumlox sijax mukheu Aux, pex tak mawh sinngao cie Aux sinax pui khawmuik, mawh kheu can pa koe ka piang haktiex khawmuik mawh cie Aux." ⁶ "Pex tak mawh simiang cao giex kaing li khankix mai mawh ceu pui pa singax singeh ka Aux, inkix mawh gumlox pa sang krai maix ka kawn praix Isarelax khankix, " ⁷ Mose deeh hoek mai kok kuad song cao kaing pui khankix mai krai gumlox pa hoik tawx Siyiex ka nawh ka plak sivoe ngai kix. ⁸ Pui khawmuik deeh pawk lox tix dum tau ah nin, "Ex tak sang yuh awm lox pa hoik krai Siyiex leeing ju khawmuik. "Mose viex gumlox krai pui khankix hu ka Siyiex. ⁹ Siyiex ah nin ka Mose, "Jhak heue, Aux tak hoek ka maix, ka dee kied pu ceep paiawm, sonsang mhong pui yam sikah Aux ka maix mai yum rhawm ka maix leeing ju. Mawh kheu nan, Mose deeh krai gumlox pa ah kawn pui ka Siyiex. ¹⁰ Khaix an Siyiex ah nin ka Mose, "Hu ka pui khankix mai kieh kix singax singeh daux singaix mai pasax mai kieh kix sidaux kraung tix, ¹¹ yam hoek daux loe singaix kieh kix khre rien ti, mawh kheu yam hoek daux loe singaix, Siyiex tak lih hoek ka piang gawng Sina, ka sivoe ngai kawn pui khawmuik." ¹² Maix tak yuh mee hawt vung viang gawng ah nin, yuh satix pex paw luan khaing mee mai paw haok ka piang gawng mai teeh ka caong gawng, pui mawx ang ah pa teeh ka gawng tak kieh nawh yum tete." ¹³ "Pie taix kawx tak ang pon ti teeh, tak caw ti dheem nawh ka simaox. Phan ang mawh nan puing nawh yum ka te, pui ang ah, to brie ang ah, tak ang yaox ti im Yam mhong luah lox teettawng tom rheung, kix tak yaox ti hoek dex gawng." ¹⁴ Mose lih hoek khaing piang gawng ka pui khankix, kieh pui singax mai kieh kix sidaux kraung tix, ¹⁵ Nawh ah nin ka pui khankix, "Yam hoek daux loe singaix kieh kix khre rien tix paw kieh kix dex mai bun." ¹⁶ Yam hoek daux loe singaix plak ponngawb, lox tuh sah mai puk plak praix lih mai paiawm pa kied pu ceep ka piang gawng mai Lox pa kied ting sinum teet tawng lih, mawh kheu nan, pui pa ot ka daux nyiex bang kied lhat graung ka tete. ¹⁷ Mose viex pui khankix lih khaing daux nyiex bang, sonsang yaox ka Siyiex, mai kix cung hawt caong gawng. ¹⁸ Gawng Sina hoik naog ka taox ngu, mawh kheu Siyiex lih hoek ka piang gawng ka daux sinax ngu, taox ngu an awm taox ngu pa kaoh khaing daux glah ngu mai gawng an hoik yung yang khawmuik. ¹⁹ Yam sinum luah lox teettawng tom rheung mai nie baox nied ti ting sipie, Mose sikah mai Siyiex mai Nawh Cao pawk ka lox nawh ka daux sinum praix. ²⁰ Siyiex lih hoek ka piang choek gawng Sina. Siyiex kok Mose ka piang choek gawng mai Mose kawx haok. ²¹ Siyiex ah nin ka Mose, "Lih hu mai tawx lox kieh pui rien rhawm tix, Aux lhat kix breeng tix laig, sonsang jhak ka Siyiex leeing ju mai pui khankix tak laux leeing tom nie." ²² "Cao giex kaing li pa hoek dex Siyiex leeing ju khankix kawx, kieh kix yuh tokaux tix singax, phan ang mawh nan, Siyiex tak kieh kix laux leeing." ²³ Mose deeh ah nin ka Siyiex, "Pui khankix ang lai pon haok ka piang gawng Sina, kheu Maix Cao hoik tawx krax rien rhawm ah nin ka yix, yuh mee vie hawt vung viang gawng mai kieh gawng singax, " ²⁴ Siyiex deeh ah nin ka Mose, "Lih hu mai deeh viex Arun haok tau mai maix, viang mawh nan, paw kieh cao giex kaing li mai pui khankix, breeng ti haok ka Siyiex, mawh kheu Aux lhat kix hoek krax laux leeing." ²⁵ Mose lih hu ka pui khankix mai krai ka kix heue.

¹ Siyiex leeing ju krai gumlox inkix khawmuik ah nin, ² "Aux mawh Siyiex maix, pa viex maix lih khaing haktiex Ejiptux mai khaing daux dee mawh maix siliex." ³ "Lheu khaing Aux maix tak ang pon ti krub ka Siyiex tang kaux. ⁴ "Maix tak ang pon ti yuh riang grang tix ceu kawx son tokaux tix, pa awm grang pakpeung pa koe daux raoma mai pa koe piang haktiex, phan ang mawh nan, can ceu pa koe daux rawm greem haktiex khankix kawx, ang pon ti yuh, ⁵ "Maix tak ang pon ti krub mai yuh kaing son kix, mawh kheu Aux mawh Siyiex maix, mawh Siyiex pa bak pa viang mai pa deeh viied phimap keeing pex khankix, ka piang kawn praix nawh tom hoek loe ju mai pon ju, ka doeh ru maix mai can pui pa koeng ka Aux." ⁶ Viang mawh nan, Aux tak jhi krax caux rhawm tix ka pui pa moh ka Aux mai can pui pa priex ti hawt gumlox mukheu Aux khankix tom hoek kaing rheng ju pui. ⁷ "Maix tak ang pon ti kok ceu kaux Siyiex maix giex going. Pui pa kok ka ceu kaux Siyiex giex going Siyiex tak ang deuh nawh mawh pa ang koe phimap. ⁸ "Doh keud ka singaix twah mai een singax singeh." ⁹ Maix tak coca ti yuh kaing yuh tix khawmuik daux liah singaix. ¹⁰ Daux singaix aliah, mawh singaix twah Siyiex maix, maix tak ang pon yuh kaing tix ceu kawx daux singaix an maix, kawn simex kawn bun maix, kawncau simex kawncau bun maix, khawm to brie maix, khawm nyo sinie pa ot daux siviex maix khawmuik, ¹¹ Mawh kheu Siyiex hoik phan raoma mai haktiex, rawm sigrit sigra mai can pa koe daux nawh khawmuik, liah singaix laux lee tix ka daux aliah singaix, mawh kheu Siyiex nawb bwan ka singaix twah mai kieh mawh singaix pa singax singeh heue. ¹² "Yungyi ka miex keeing tix, sonsang mhawm ka maix mai sonsang lang ju maix ka piang haktiex pa tawx Siyiex ka maix." ¹³ "Maix tak ang pon ti pah pui yum." ¹⁴ "Ang pon ti phit vao mai moeng kawn pui." ¹⁵ "Ang pon ti briex." ¹⁶ "Ang pon tix kham sakse pa ang mawh meh ka paox plawg tix." ¹⁷ "Maix tak ang pon ti ghoing ka nyiex ma paox plawg tix, ang pon ti ghoing ka moeng paox plawg tix, kawncau simex kawncau bun nawh, mawie nawh, la nawh mai can ceu pa mawh cie paox plawg maix tix ceu kawx heue." ¹⁸ Yam mhong pui khankix sinum praix mai pluk plak praix mai lox teet tawng mai taox ngu khaing daux gawng, pui khankix lhat graung siyaung mai cung dee singai, ¹⁹ mai kix ah nin ka Mose, "Maix sikah ka yix, yix tak sang nghiet lox maix, paw kieh Siyiex sikah tau mai yix liak, phan ang mawh nan, yix tak yum ka." ²⁰ "Mose ah nin ka pui khankix, "Paw lhat graung, mawh kheu Siyiex hoek ti cheuk cheu ka pex sonsang lhat graung pex ka Nawh Cao mai sonsang ang pex yuh phimap." ²¹ Pui khankix cung dee singai, viang mawh nan Mose greed tix dex ka dee pu ceep paiawm ka dee ot Siyiex. ²² Siyiex ah nin ka Mose, "Maix tak ah nin ka pui Isarelax khankix. Pex hoik yaox sikah Aux tau mai khaing daux raoma. ²³ Maix tak ang pon ti yuh riang siyiex mau mai riang siyiex khri son tokaux tix lheu khaing Aux. ²⁴ Maix tak yuh khu dee tan ka tiex son Aux mai maix tak tan krax tan pa gleeing mai krax tan pa nhim, pa mawh yung mai mawie tix ka piang an, ka dah dee deuh Aux min ceu kaux tix kudah, Aux tak hoek ti nawb bwan ka maix. ²⁵ Phan maix yuh khu dee tan simaox son Aux maix tak ang pon ti yuh ka simaox pa hoik bre ti mhawm mhawm, phan maix yuh ka kraung taix pa shiao ti ka simaox an maix hoik kieh nawh seeing brai. ²⁶ Maix tak ang pon ti haok ka khu dee tan ka bawng, sonsang ang krax kakaong maix sidawng piang an heue.

¹ "In khankix mawh grawng krax prawng ca pa sang deuh maix sivoe ngai kix. ² Phan maix liag ka siliex ceu pui Hebrie tix kaux, nawh tak yaox ti yuh kaing son maix liah num, yam hoek ka daux aliah num, nawh tak pon ti luad luan mai ang yaox ti tawx tidtix. ³ Phan nawh hoek tix kaux nong nong, nawh tak dee lih hu tix kaux nong nong, phan nawh hoek mai moeng tix, nawh tak yaox ti lih hu mai moeng tix. ⁴ Phan cao simiang nawh teei nawh koe moeng mai moeng nawh keh kawn simex kawn bun, moeng nawh mai kawn praix nawh khankix tak mawh cie cao simiang mai nawh tak yaox ti lih hu nong nong. ⁵ Phan siliex ah lox sidawng yuh nin, aux moh ka simiang tix mai moeng kawn praix tix, aux ang rhawm lih hu ka daux pa luad luan. ⁶ Khaix an cao simiang nawh tak viex nawh hu ka Siyiex mai nawh tak viex nawh hoek ka diang siviex, phan ang mawh nan, ka rong sidub, mai cao simiang nawh tak cieh yhaok nawh ka kat lawm mai nawh tak mawh pui pa yuh kaing nawh leeing ju. ⁷ Phan pui tix kaux kaux coh kawn bun tix, sonsang mawh siliex, nawh tak ang yaox ti lih hu awm siliex simex khankix, " ⁸ "Phan bun an ang yuh pa khaw rhawm ka cao simiang tix, pa hoik teei nawh ti moeng, khaix an nawh tak kieh bun an pon krax taoh, nawh ang koe akhwang tix coh bun an, ka pui haktiex tang praix, mawh kheu hoik pie lhen nawh ka bun an. ⁹ "Phan nawh hoik liag bun an mawh moeng kawn simex tix, nawh tak priex nawh awm kawn bun tix." ¹⁰ "Phan nawh baox teei tix koe moeng tang kaux, nawh tak ang kieh priex preem, kraung ceep nawh mai akhwang pa caw nawh ti pon awm glang ka an, ang caw ti yawm pie ceeix kawx." ¹¹ "Phan ang pon yuh ceu in loe ceu son nawh, bun an tak lih hu giex mai ang lai pon mau ngawh tokaux tix heue." ¹² "Pui mawx pa tawk pui tix kaux yum mai tak deeh kieh nawh yum tete." ¹³ "Viang mawh nan, phan nawh ang keud ti pah ka nawh kawx phan Siyiex kieh nawh yum daux taix nawh, Aux tak sang khre rien dah dee sonsang to nawh ti klawd. ¹⁴ "Phan pui tix kaux kaux, keud pa ang khaw ka paox plawg tix mai pah ka nawh, viang to tix mox ka khu dee tan Aux kawx, tak bluh nawh lih khaing khu dee tan mai pah ka nawh." ¹⁵ "Pui pa pah ka miex keeing tix tak kieh nawh yum tete." ¹⁶ "Pui pa briex ka pui mai coh nawh phan yaox ka daux tawm taix nawh, tak kieh nawh yum tete." ¹⁷ "Pui pa jhax lawg ka miex keeing tix tak kieh nawh yum tete." ¹⁸ "Phan pui simah mai paox tix mai dheem ka simaox, phan ang mawh nan, tap nawh ka taix tix, phan nawh ang yum mai ot ka dee it tix." ¹⁹ "Phan nawh deeh pon kaoh, hu lailing plak praix mai grix tix khaox, khaix an pui pa hoik tawk ka nawh, tak pon krax pluat ploi, viang mawh nan, nawh tak yaox ti plud son kaing jhaw pa hoik gla nawh mai kia ngiien ka nawh tom deeh nyawm ot nawh." ²⁰ "Phan pui tix kaux tawk ka siliex simex siliex bun tix ka khaox mai yum daux taix nawh, nawh tak pon krax pa ciyang." ²¹ "Phan siliex an kawn im ju tix ngaix, ra ngaix, cao nawh tak ang lai pon krax ciyang, mawh kheu siliex an mawh pa hoik liak nawh ka mau tix." ²² "Phan pui simah ka paox tix mai hu krox ka bun pa koe kaux tix kaux mai laux kawn, viang nawh ang koe khaix mat kawx, nawh tak pon krax ciyang tete khaing mex bun an, mai nawh tak plud awm pa hoik tat cao prawng see." ²³ "Phan bun an koe khaix mat tix ceuceu, nawh tak tawx ju son ju, ²⁴ "Ngai son ngai, rhang son rhang, taix son taix, caong son caong, ²⁵ "Pa hax ngu son pa hax ngu, pa pliag son pa pliag, pa mat son pa mat." ²⁶ "Phan pui tix kaux tawk ka ngai siliex simex mai siliex bun tix kieh laux, nawh tak ploi nawh lih hu kheu hoik laux ngai." ²⁷ "Phan nawh tawk ka siliex simex siliex bun tix khankix, tom goh rhang, nawh tak ploi nawh lih hu kheu hoik goh rhang heue." ²⁸ "Phan mawie teed ka simex bun tix kaux kaux tom yum, tak dheem mawie an ka simaox mai ang pon ti ih ka nex. Viang mawh nan, cao mawie tak pon krax pluat ploi." ²⁹ "Phan mawie an dawg teed pui ka daux bawg yam pa luan mai pui hoik krai grawng in ka cao mawie, phan nawh ang priex rien mai mawie an baox deeh teed ka simex bun tix kaux kaux yum, tak dheem mawie an yum ka simaox mai cao mawie kawx tak pah nawh yum." ³⁰ "Phan kix kieh plud ka mau, nawh tak yaox ti deeh taoh ju tix, ka ngawh nawh, awm pa hoik tat kix ka piang nawh." ³¹ "Phan teed ka kawn simex kawn bun pui, nawh tak yaox ti sau awm been pa hoik tat." ³² "Phan mawie teed ka siliex simex siliex bun tix kaux kaux, cao mawie tak yaox ti tawx mau tixngoe shekhe ka cao siliex an mai tak dheem mawie an yum ka simaox." ³³ "Phan pui tix kaux kaux paoh ti deuh daux o, phan ang mawh nan, kaung daux tiex mai ang tawb kheem, phan brung mai mawie pui cod ka daux o an, ³⁴ "Cao daux tiex an, tak deeh cox nawh mhawm, nawh tak plud mau ka cao to brie an mai to brie pa yum tak mawh cie nawh." ³⁵ "Phan mawie pui tix mu hu teed ka mawie pui tang kaux tom yum, kiex tak coh mawie pa kawn im an mai gwieh mau, mawie pa hoik yum an kawx, kiex tak gwieh greung." ³⁶ "Phan cao mawie hoik tawng mawie an hoik sax teed pui bawg yam pa hoik luan mai phan cao mawie an ang priex rien, nawh tak yaox ti plud, mawie son mawie, to brie pa hoik yum an tak mawh cie nawh heue."

¹ "Phan pui tix kaux briex mawie mai yung, pah ang ah, coh ang ah, nawh tak deeh yaox ti plud mawie phwan mu son mawie tix mu mai yung pon mu son yung tix mu." ² "Phan yaox yam preeng pui briex tix laig daux nyiex mai phan kix tawk nawh yum, phimap tak ang koe son nham pa hoik jauh yuh nawh heue, " ³ "Phan singaix hoik lih, nawh tak koe phimap son pa jauh nham heue. Mawh kheu nawh tak deeh yaox ti plud tom grum naog, phan nawh ang koe tix ceu kawx, nawh tak coh tokaux tix kheu jao briex nawh, " ⁴ "Phan kawn yaox mawie ang ah yung ang ah pa kawn im ka daux taix cao briex, nawh tak deeh yaox ti plud ra son." ⁵ "Phan pui tix kaux kieh to brie ti hu ih ka kaung pui, phan ang mawh nan, sipeem plix siiet mai bla to brie ti ih ka kaung pui, nawh tak yaox ti teei can ceu pa nie mhawm khaing daux kaung cao nawh mai ceu pa nie mhawm pa kaoh khaing daux sipeem plix siiet nawh plud kah." ⁶ "Phan keeig ngu hax yeem pang kat khankix mai deeh hu proe ka lhiem nghox, pum nghox pui mai kieh kaung pui laux khawmuik, cao pa jah keeig ngu an tak deeh yaox ti plud tete heue." ⁷ "Phan pui tix kaux, kieh paox plawg tix priex mau ang ah, kraung ang ah, phan pui briex pon briex, khaing daux nyiex nawh, phan pon giex cao briex, nawh tak deeh plud nawh ra son." ⁸ "Phan kix ang yaox cao briex, kix tak viex cao nyiex hoek ka plak sivoe ngai Siyiex mai ciied ti yaox grawng hoik teei ang teei ka kraung paox plawg tix." ⁹ "Grawng ceu pa lud mai kraung pui, pa dex mai mawie, la, yung ang ah, kraung ceep mai tang ceu pa ah, in mawh kraung cie aux, phan tang kaux ah nan, kiex ra kaux tak yaox ti hoek ciied sivoe ngai Siyiex, pui pa som tak deeh kieh nawh plud ka paox plawg tix ra son." ¹⁰ "Phan pui tix kaux kieh paox plawg tix priex la, mawie, yung mai to brie tang ceu tix mu ang ah, phan hoik yum, phan mat mai ang yaox yam grheu pui nawh hu dee singai, ¹¹ Khaix an cao pa priex kraung an tiextu ka sivoe ngai paox plawg tix mai sivoe ngai Siyiex, grawng ang tix sax teei kraung paox plawg tix mai cao kraung tak caw ti rieb ka lox an mai ang lai kieh nawh plud." ¹² to brie an, phan pui briex khaing nawh tete, nawh tak deeh yaox ti plud ka kraung an. ¹³ Phan mawh totiag pa kiied kah, nawh tak yaox ti jhi to yum mawh mhai rug, nawh ang lai yaox ti plud kah. ¹⁴ "Phan pui tix kaux vai tix ceuceu khaing paox plawg tix, phan an lih ti mat ang ah, yum ang ah, yam ang cao ot, cao vai tak yaox ti plud awm pa khaw mai jum an." ¹⁵ "Viang mawh nan, phan cao nawh ot, cao vai tak ang yaox ti plud, phan mawh pa vai ka ngawh, cao to brie tak pon ngie ngawh vai khaing heue. ¹⁶ "Phan pui tix kaux nyaw glaw ka bunkrih pa ang koe paox klieh, it tau mai nawh, nawh tak tawx phak ka bun an mai kieh mawh moeng tix." ¹⁷ Phan keeing bun an thiang ti ang tawx ka simex an, nawh tak yaox ti plud mau, awm ngawh phak son bunkrih an. ¹⁸ "Maix tak ang pon kieh bun pa koe preu im ju." ¹⁹ "Pui pa phit vao mai khawng brie, tak kieh nawh yum tete." ²⁰ "Pui pa hu yuh krax tan, ka siyiex tang kaux lheu khaing Siyiex tix kaux khaing, nawh tak pon krax laux leeing." ²¹ "Maix tak ang pon ti yuh krax khin ka nyo sinie mai tuktiaktukte ka nawh, mawh kheu pex hoik sax mawh nyo sinie ka daux haktiex Ejiptux." ²² "Maix tak ang pon ti map grham ka miexmai kawn doe." ²³ "Phan maix map grham kix ka ceu patix ang ah, lox riag yo kix ka Aux khawmuik, Aux tak mhong kah, " ²⁴ krax pa kied song rhawm Aux tak lih mai Aux tak pah pex ka lawm vaig, moeng pex khankix tak mawh miexmai mai kawn praix pex khankix tak lih ti mawh kawn doe." ²⁵ "Phan maix tawx pui Aux, pa hot pa sibhawm daux sinax pex tix kaux, yaog mau maix tak ang pon ti yuh awm cao pa ploi mau ka nawh. Maix tak ang pon ti mhaing rao ka nawh." ²⁶ "Phan paox plawg maix tang prux it tix ka maix, maix tak deeh tawx an ka nawh, ka ang singaix nyang klip." ²⁷ Mawh kheu nawh koe prux pa lhop tix pheen ngie ka son tokaux tix, nawh tak sang lhop patix yam it tix lie? Yam riag yo nawh ka Aux, Aux tak mhong, kheu Aux koe krax pa caux rhawm. ²⁸ "Maix tak ang pon ti ah lox pa ang cee ang cak ka Siyiex mai ang pon ti jhax lawg cao kaing piang pui ceu pex tix kaux kawx." ²⁹ "Maix tak ang pon ti tuk bawg yam sonsang tan tix plix khaox plix ox pa liang tix pon mai rawm plix siiet. "Maix tak yaox ti tawx kawn Ai tix ka Aux." ³⁰ "Awm an maix tak yuh ka mawie mai yung maix khankix. Maix tak kieh kawn mawie kawn yung ot mai miex nawh aliah ngaix, ka daux daix ngaix maix tak yaox ti ap ka Aux." ³¹ "Maix tak mawh pui pa singax ka son Aux, maix tak ang pon ti ih nex pa hoik kiied totiag daux kaung maix tak taing sox ih heue."

¹ "Maix ang pon ti krai lox pao pa lud maix ang pon rom taix tix kham sakse pa ang mawh meh tau mai pui pa ang rahsee." ² "Maix tak ang pon ti hawt khaix pui hun mai yuh pa caox caig maix tak ang pon kham sakse pa ang rahsee pui ting pui hun, sonsang via khaing pa rahsee, ³ Yam prawng maix see paw jhak pakngai pui hot sia. ⁴ "Phan maix yaox ka mawie, la pui koeng ka maix hoik lud krax maix tak deeh tuk hoek tawx ka nawh." ⁵ Phan maix yaox ka la cie pui pa koeng maix ka, goh greem lhang kraung ciien tix maix tak ang pon ti via sonsang teem ka maix tak caw ti teem kah tete. ⁶ "Maix tak ang pon ti prawng ca ka pui hot sia ka daux krax pa ang see. ⁷ "Kieh tokaux maix singai khaing pa ang mawh ang meh, paw pah ka pui pa ang koe phimap mai pui pa rahsee, mawh kheu Aux tak ang pluat ploi ka pui pa ang rahsee. ⁸ Maix tak ang pon ti teei mau chun praok, mawh kheu mau chun prauk tak kieh ngai pui pa koe cuyi dug mai kieh gumlox pui rahsee khankix lud krax. ⁹ "Pex tak ang pon ti yuh pa khin ka nyo sinie, kheu hoik mawh pex nyo sinie ka daux haktiex Ejiptux, pex tawng rhawm rhi nyo sinie heue." ¹⁰ "Maix rhuat simie liah num ka daux ma kaung maix mai khrawm ka plix, ¹¹ Ka daux num aliah maix ang lai yaox ti yuh mai prah laux tix, mawh kheu nan, pui pa hot sia paox ceu pui maix khankix tak yaox ti sum tix ih ka, can pa deuk an, to tiag tak yaox ti ih ka. Maix tak yaox ti yuh sipeem plix siiet maix mai sipeem khaox sanlun maix awm an. ¹² "Ka daux liah singaix maix tak yuh kaing jhaw tix mai ka daux singaix aliah maix tak laux lee ti, mawie mai la maix khankix kawx tak yaox ti laux lee tix, siliex simex siliex bun maix mai nyo sinie maix, tak deeh pon riang rao khraox kah. ¹³ Rien rhawm ka can ceu pa hoik krai Aux ka maix, paw krai min ceu kaux siyiex tang kaux mai paw kieh pui mhong grawng in khankix khaing jheeh maix heue. ¹⁴ "Ka daux tix num maix tak yuh pawie ka son Aux loe bawg." ¹⁵ "Maix tak yuh pawie blah pa ang sau susaix, pawie Azumax, maix tak ih blah pa ang sau susaix aliah singaix, awm gumlox pa hoik tawm Aux ka maix, bawg yam hoik tat Aux ti deuh daux khix Abibalax, mawh kheu daux khix an maix hoik lih hu khaing meung Ejiptux. Pui tix kaux kawx ang pon ti hoek plak sivoe ngai Aux mai taix yi tix." ¹⁶ "Maix tak yuh pawie gaing nghox, pa mawh pawie pa pon maix plix khaox plix ox pa liang khaing riang rao tix pa hoik sum maix daux ma kaung mai pawie khrawm maix plix khaox plix ox ka riang rao maix khaing daux ma kaung bawg yam sidah num. ¹⁷ "Ka daux tix num pex can pa mawh nyawm simex khawmuik, tak yaox ti bleeh ka sivoe Siyiex loe bawg." ¹⁸ "Maix tak ang pon ti tan nham pa hoik appong ti ka Aux, tau mai blah pa koe susaix mai ang pon ti priex bee pa hoik appong tix ka Aux, deuk tom hoek plak ponngawb." ¹⁹ "Plix khaox plix ox pa liang maix ti pon khaing haktiex khankix tak viex laig ka daux nyiex bwan Siyiex maix. "Maix tak ang pon ti ngaik nex kawn pex daux rawm teeih miex nawh heue. ²⁰ "Aux ploi kawncau Siyiex ka sivoe maix, sonsang kia ngiien ka maix daux krax mai sonsang viex maix hu ka dee hoik khre rien Aux." ²¹ Rien rhawm mai cu nghiet ka lox nawh, paw thiang ka nawh, mawh kheu nawh tak ang pluat ploi phimap pex, mawh kheu min ceu kaux Aux hoik koe ka daux nawh. ²² "Phan maix cu nghiet ka lox nawh mai hawt ti yuh awm pa krai Aux khawmuik, Aux tak koeng ka pui pa koeng ka maix khankix mai Aux tiebtie ka pui pa tiebtie ka maix." ²³ "Kawncau Siyiex Aux tak hu sivoe maix mai viex maix laig ka dee ot ceu pui Amawrix, ceu pui Hitix, ceu pui Pharazix, ceu pui Khananix, ceu pui Hiwix mai ceu pui Yebusix khankix, Aux tak yuh kix laux leeing, ²⁴ "Maix tak ang pon ti ngeuh kaing tix ka siyiex kix mai hawt beenli kix mai yuh kaing awm pa yuh kix maix tak klup ti tik an khawmuik mai raig ti tik riang grang krub kix laux leeing. ²⁵ Maix tak yuh kaing Siyiex tix mai Nawh Cao tak nawb bwan ka blah mai rawm maix, mai tak teei ti tik jhawm saux khaing sinax pex. ²⁶ "Aux tak ang kieh pa laux kawn mai pa neh koe ka daux haktiex pex, Aux tak kieh baux ju pex grum naog." ²⁷ "Aux tak ploi rhawm pa chix lhat graung ka Aux koe sivoe pex, Aux tak kieh krax sivix rhawm koe sinax ceu pui pa sang yuh pex laux pa sipub pex kah, Aux tak deeh kieh pui koeng deeh veeh ti to khaing pex. ²⁸ Aux tak ploi awng lung hu sivoe pex, sonsang grheu pui Hiwix mai pui Hitix mai pui Khananix khaing sivoe pex. ²⁹ Aux tak ang grheu pui an khankix lih khaing sivoe maix daux tix num, phan yuh nan haktiex tak lih ti yi mai totiag khankix tak pre haoh hun sonsang kieh maix laux. ³⁰ "Aux tak grheu kix khaing sivoe maix, tix bawg ceeix ceeix tom sidah pre haoh hun maix mai pon ti cie haktiex an mawh sinngao tix. ³¹ "Aux tak tat mee haktiex maix jah ka rawm sigrit sigra raoh tom hoek ka rawm sigrit sigra Philitix mai jah khaing daux tiag tom hoek ka rawm klawng Upharetix, mawh kheu Aux tak ap pui pa ot haktiex an daux tawm taix maix, maix tak grheu kix lih sivoe maix. ³² "Maix tak ang pon ti yuh sijax mukheu tau mai kix mai siyiex kix. ³³ "Kix tak ang yaox ti ot daux haktiex pex, phan yuh nan kix tak kieh pex lud ka Aux, mawh kheu phan pex yuh kaing siyiex kix, an tak mawh kie ka pex heue."

¹ Nawh Cao ah nin, ka Mose, "Hoek mai haok ka Siyiex maix mai Arun, Nadat mai Abihux, khawm kuad song pui Isarelax atixgliah kaux mai kieh kix krub ka dee singai. ² Mawh ngie Mose pa pon hoek dex mai Siyiex, pui tang kaux tak ang pon ti dex mai pui khankix kawx, tak ang pon ti haok tau mai nawh." ³ Mose deeh hoek krai gumlox Siyiex mai lox lai beenli ka pui khawmuik mai pui khawmuik deeh pawk lox tix gum tau ah nin, "Ex tak sang yuh awm gumlox pa hoik krai Siyiex khawmuik." ⁴ Mose tiiem ti deuh gumlox Siyiex khawmuik, Nawh kaoh caocao plak ponngawb mai sum khu dee tan hawt caong gawng mai rong simaox kao ra mu awm koe ru pui Isarelax kao ra ceu. ⁵ Nawh ploi kawn nyawm sinaw pui Isarelax khankix, pa tan krax tan pa gleeing mai krax tan pa nhim ka mawie mhaing ting ka Siyiex. ⁶ Mose teei nham tix plak mai sau ka daux pan khoek, nham an tix plak nawh phruah ka piang khu dee tan. ⁷ Nawh teei phuk lai sijax mukheu mai phat an sonsang mhong pui ka khawmuik, mai kix ah nin, "Ex tak sang yuh mai cu nghiet awm pa hoik krai Siyiex khawmuik." ⁸ Mose teei nham mai phruah ka piang pui khankix ah nin, jhak heue, "Nham sijax mukheu in, hoik mawh pa yuh Siyiex sakse tau mai pex awm gumlox nawh khawmuik heue." ⁹ Mose haok ka piang gawng tau mai Arun, Nadat mai Abihux khawm kuad song pui Isarelax atixgliah kaux, ¹⁰ Kix yaox ka Siyiex pui Isarelax mai ka greem caong Nawh Cao, koe siang simaox pa klai singi raoma. ¹¹ Khaix hoik yaox cao kaing pui Isarelax khankix ka Siyiex, Nawh Cao ang tawx taix tix ka kix, mawh kheu nan, kix ih mai nyaux tau tan. ¹² Siyiex ah nin ka Mose, "Haok ka Aux piang gawng mai pau tan, Aux tak tawx khlawp simaox pa hoik tiiem Aux ti deuh gumlox beenli mai gumlox pingnyap khankix, ka sonsang gau maix ka kix." ¹³ Mose kaoh cung mai cao pa teem tix Yawsux, haok ka piang gawng Siyiex. ¹⁴ Nawh ah nin ka kuad song khankix, "Pau yix tin, tom deeh hoek yix ka pex, Arun mai Hurax tak ot tau mai pex, phan pui tix kaux kaux yaox krax pa nu tix ceuceu, kieh nawh hu ka kiex." ¹⁵ Khaix an Mose haok ka piang gawng mai paiawm tawb kheem ka gawng. ¹⁶ Min pakngai Siyiex laux lee ti ka piang gawng Sina mai paiawm ceep ka piang gawng liah singaix, yam hoek daux aliah ngaix Nawh Cao kok Mose khaing daux sigreung paiawm. ¹⁷ Min pakngai Siyiex jhan riang ka piang choek gawng awm gleeing ngu, kawn praix Isarelax khankix pon ti yaox ka. ¹⁸ Mose laig daux sigreung paiawm mai haok ka piang gawng. Mose ot ka piang gawng tixpon ngaix tixpon sawm heue.

¹ Siyiex krai ah nin ka Mose, ² "Krai ka pui Isarelax khankix, sonsang viex kix krax pa tan ti ka Aux, maix tak rieb ti teei khaing pui pa gaux rhawm tix tan ka Aux ku kaux. ³ Krax tan pa caw maix ti teei rieb khaing kix, tak mawh khri, mau mai tawng, ⁴ kraung klai raoma mai kraung pa lung pliex mai kraung pa raoh rawt khawm kraung man pa taing ti ka keei ceu pa mhawm mai kraung hauk pex khankix, ⁵ hauk kawn yung pa hoik siang tix raoh, hak phix mai khaox Akashax. ⁶ Bee pa sang tok, bee pa sang groi mai ceu pa sioe bhawng son nyawng bhawng pa sang gleeing. ⁷ Siang simaox bawd raoh, siang simaox pa sang tok ka naok sibex dhah dawd taix ceep cao giex kaing li khankix. ⁸ Kieh kix yuh dee singax son Aux mai Aux tak ot sinax kix. ⁹ Maix tak yuh awm pa hoik jhi Aux ka maix khankix, pa mawh pakpeung nyiex gox bwan man mai pakpeung kraung khrai khawmuik heue. ¹⁰ "Kix tak yuh khui bwan tix mu ka khaox Akashax, krax lang ra sawk mai tix diex, krax vieh tix sawk mai tix diex, krax lhaong tix sawk mai tix diex. ¹¹ "Maix tak om ka khri naw plak daux mai plak praix mai kawb khri ka praok vung viang khawmuik. ¹² Maix tak yuh jeep khri pon mu mai kab ka daog khui bwan an pon plak. Kieh jeep khri koe tix plak ra mu mai kieh jeep khri an ra mu koe ka an tix plak ra mu. ¹³ Maix tak yuh khaox glawm ka khaox Akashax mai om an ka khri. ¹⁴ Maix tak sau khaox glawm ka daux maox jeep khri an, pa hoik kab tix ka daog khui bwan sonsang klawm kix an kah. ¹⁵ Tak kieh khaox glawm laig ka daux jeep khri khui bwan mai ang pon ti teei lih khaing daux an. ¹⁶ Maix tak sau mhai rug pa sang tawx Aux ka maix daux khui bwan an. ¹⁷ Maix tak deeh yuh dawb khui bwan pa caux rhawm an ka khri, krax lang kieh koe ra sawk mai tix diex, krax vieh tix sawk mai tix diex. ¹⁸ Maix tak yuh riang Cherubin ra mu ka khri mai kab ka piang toh dawb khui bwan pa caux rhawm plak in plak an. ¹⁹ Deuh riang Cherubin ka daog plak in tix mu mai ka daog plak an tix mu maix tak kieh riang Cherubin pa koe daog khui bwan rop ti mawh tix mu tau ka dawb khui dang ngeung pa caux rhawm an. ²⁰ Riang Cherubin tak di pruik tix ka piang khui bwan mai tawb dawb khui bwan ka pruik tix mai rhax lai veeh plakngai ka plak paox tix, plakngai Cherubin khankix jhak ka daog khui bwan dang ngeung pa caux rhawm an. ²¹ Maix tak tawb dawb khui bwan pa caux rhawm an ka piang khui bwan maix tak sau ceu pa kham mai mhai rug pa sang tawx Aux ka maix ka daux khui bwan. ²² Aux tak sipub maix tan mai sikah tau mai maix khaing ka piang khui bwan pa caux rhawm ka daux sinax riang Cherubin ra mu ka piang khui pa kham sakse, Aux tak tawm gumlox ka maix son pui Isarelax khankix heue. ²³ "Maix deeh yuh pheen tix mu ka khaox Akashax, kieh lang ra sawk, vieh tix sawk mai krax lhaong tix sawk mai tix diex. ²⁴ Maix tak om ka khri naw mai kawb khri ka hawt vung viang an. ²⁵ Maix tak yuh lat koe tix tawp taix mai kawb hawt vung viang an ka khri. ²⁶ Maix tak yuh daux jeep khri pon mu mai sau ka caong pheen khawm pon daog. ²⁷ Kieh jeep khri an dex mai lat pheen, sonsang giex khaox glawm pa klawm ka pheen. ²⁸ Maix tak yuh khaox glawm ka khaox Akashax mai om ka khri, sonsang pon klawm ka pheen. ²⁹ Maix tak yuh pan, lawk tuh, klong mai kawk nyaux pa sang lhauk pa dex mai kraung pa shiao piang pheen maix tak yaox ti yuh ceu ankix ka khri nawnaw. ³⁰ Maix tak deuh blah pa tan tix ka piang pheen an sivoe Aux jheung jheung. ³¹ "Maix tak yuh jawk ten khri tix mu, ka khri nawnaw, jaong num, pang nawh khankix tak bre ti tawk ka daix, kawk nawh, plix nawh mai tai nawh khankix kieh lih mawh tix mu tau mai an. ³² Kieh kak lih koe khaing pang jawk ten khri tix plak loe mu. ³³ Kak loe kak pa lih khaing pang jawk ten khri, ka piang, ku mu koe tux tai kraox nhawng ka mai caw ti koe kawk loe mu pa awm grang plix Batan, ³⁴ Ka piang pang jawk ten khri kieh koe pa awm tux tai kraox nhawng tau mai kawk pon mu pa awm grang plix Batan. ³⁵ Kak khankix pa lih khaing pang jawk ten khri liah kak, ka greem kak khawm ra plak caw ti koe tux tai ka tix plak tix mu. ³⁶ Tux tai mai kak khankix tak kleuk ti mawh tix mu tau, pang jawk ten khri an khawm kreng tak mawh pa yuh ka khri naw. ³⁷ Maix tak yuh kawk ngu aliah mu, mai tok ka kawk ngu an, sonsang jhan pa riang ka sivoe pheen. ³⁸ Sigiiep ngu mai kawk sau sigiiep ngu kawx, tak mawh pa yuh ka khri naw. ³⁹ Can kraung pa shiao ka pang jawk ten khri khankix, tak caw ti yuh ka khri naw. ⁴⁰ Rien tix sonsang yuh maix kuceu awm pa khaw mai grang pa hoik jhi Aux ka maix ka piang gawng heue."

¹ "Lheu khaing an maix tak yuh nyiex gox bwan man, ka man tie kao pheen pa hoik taing ka keei ceu pa mhawm pa klai raoma mai pa lung pliex mai pa raoh rawt khawmuik maix yuh ti sau riang Cherubin pa mhawm khaix taix ka piang an. ² Man tie tix pheen kieh lang tixnga daix sawk, plak vieh pon sawk. man tie an ku pheen kieh sidu paox tix. ³ Man tie an phwan pheen caing kleuk paox tix mawh tix pheen, mai pa deuk an phwan pheen kawx caing kleuk paox tix mawh tix pheen. ⁴ Maix tak yuh daux jhup maox koe ka praok man tie ka man pa klai raoma see dee sitoe kix ti caing ku pheen, awm an maix tak deeh yuh nawh ka daog plak praix man tie an tix mu, sonsang sitoe man ra pheen mawh tix mu. ⁵ Maix tak yuh daux jhup maox koe tixphwan mu, ka man tie an tix mu mai deeh yuh daux jhup maox koe tixphwan mu ka daog man tie an ra mu tix mu, sonsang sitoe daux jhup man an kix ti kab tix tau. ⁶ Maix tak yuh grok khri tixphwan mu mai vhak man tie an kix tau ka grok khri kieh kleuk paox tix, sonsang mawh nyiex gox bwan man tix lhang. ⁷ "Maix tak yuh man tawb kao tix pheen ka hak pex, son sang lhop ka piang nyiex gox bwan man. ⁸ Man tie tix pheen kieh lang tixngoe sawk mai plak vieh pon sawk, man tie ankix kao tix pheen kieh sidu paox tix. ⁹ Maix tak kleuk man tie an phwan pheen tau mai man tie an liah pheen tau, maix tak niiep ti deuh man tie liah pheen an ka sivoe nyiex gox bwan man heue. ¹⁰ Ka daog man tie an tix pheen maix tak yuh daux jhup man koe tixphwan daux mai ka daog man tie an ra pheen tix pheen yuh daux jhup man koe tixphwan daux. ¹¹ "Maix tak yuh grok tawng lheung tixphwan mu mai vhak ankix ka daux jhup man khankix mai kleuk an ka piang kieh mawh nyiex gox bwan man tix lhang. ¹² Toh man pa kawn deuk ka piang nyiex gox bwan man an tix plak, kieh teuk teue tix lih ka plak khaix nyiex gox bwan man. ¹³ Man tawb nyiex gox bwan pa lheu khaing plak piang ra sawk, sonsang tawb nyiex gox bwan man kieh teuk teue tix ka praok nyiex gox bwan man tix plak tix sawk. ¹⁴ Maix tak yuh pa tawb nyiex gox bwan man ka hak yung pa hoik siang tix raoh mai hak phix khankix ka piang hauk yung. ¹⁵ "Maix tak yuh ding jung nyiex gox bwan man ka khaox phia Akashax. ¹⁶ Krax lang phia kieh koe kao sawk, krax vieh tix sawk mai tix diex. ¹⁷ Phia ku plah, tak koe caong ra mu deeh sau kleuk paox tix, mawh kheu nan maix tak yuh nyiex gox bwan man an ka phia khawmuik. ¹⁸ Maix tak yuh phia ding son nyiex gox bwan man plak seh koe tixnga plah, ¹⁹ Maix tak yuh jhup jaong mau pa sang jhup ka jaong phia tixpon mu, phia ku plak kieh koe daux jhup ra dah, ²⁰ awm an maix tak yuh phia ding nyiex gox bwan man, plak laong koe tixnga plah, ²¹ Maix tak yuh jhup jaong mau tixpon mu, son sang jhup jaong phia tix plah ra mu. ²² Maix tak yuh phia ding nyiex gox bwan man son plak klip singaix koe liah plah. ²³ Maix tak yuh phia ding ra plah son daog nyiex gox bwan man an, ka plak khaix ra dah, ²⁴ kix sau jhup ka plak caong mai ka plak piang kieh sidu paox tix, mawh kheu nan, an tak mawh son daog khawm ra plak, ²⁵ phia daix plah, jhup jaong mau koe kao liah mu, phia tix plah koe daux jhup jaong ra dah. ²⁶ "Maix tak yuh lat pa lang ka khaox Akashax, sonsang sau ka jhup phia pa koe praok nyiex gox bwan man an tix plak phwan gawng. ²⁷ Maix tak yuh lat pa lang sonsang sau ka jhup phia, plak khaix nyiex gox bwan man phwan gawng. ²⁸ Lat pa koe sigreung, tak kieh laig daux jhup phia, jah ka toh plak in tom hoek ka toh plak an. ²⁹ Maix tak om phia ankix ka khri mai yuh daux jhup maox ka khri, sonsang giex lat kaux, mai om lat ka khri. ³⁰ Maix tak yaox ti sum nyiex gox bwan man, awm grang pa hoik jhi ka maix ka piang gawng. ³¹ "Maix tak yuh man pa tie ka keei klai raoma, keei lung pliex mai keei pa raoh rawt pa hoik taing ka keei ceu pa mhawm, mai yuh ti sau riang Cherubin pa mhawm khaix taix ka piang an, ³² Maix tak vhak man tie an ka rong khaox Akashax pon gawng pa hoik om ka khri, ka rong khaox an tak koe grok khri mai jhup jaong mau pon mu. ³³ Maix tak vhak man tie an ka rong khaox grok khri, khaix an maix tak viex khui pa kham sakse laig tan ka plak khaix man tie an, man tie an tak mawh pa khan sinax, dee singax mai ka dee kied blon singax. ³⁴ Maix tak sau dawb khui krax pa caux rhawm an ka piang khui bwan pa kham sakse ka daux dee pa kied blon singax. ³⁵ Maix tak deuh pheen ka plak praix man tieb an, ka praok plak laong. deuh pang jawk ten khri tix plak ka praok nyiex gox bwan man ka plak seh mai kieh see paox tix. ³⁶ "Maix tak yuh man tie diang siviex laig daux nyiex gox bwan man tix pheen ka keei pa klai raoma mai keei pa lung pliex mai keei pa raoh rawt pa taing ka keei ceu pa mhawm khaing cao pa taing man. ³⁷ Maix tak yuh rong Akashax phwan rong, son man tie diang siviex an om ka khri mai grok khri ka piang. Maix tak baox deeh yuh daux jhup jaong phwan daux ka tawng lheung son an kix heue.

¹ "Maix tak yuh khu dee tan ka khaox Akashax, kieh krax lang koe phwan sawk mai krax vieh koe phwan sawk. Kieh khu dee tan an sidu khawm pon daog mai kieh krax lhaong koe loe sawk. ² Maix tak yuh rung koe pon mu ka piang daog pon daog, mai rung ankix tak kieh mawh khaox Akashax tix ceu ngie. Maix tak om nawh ka tawng khawmuik. ³ Maix tak yuh aw tawng son pa sang sau kix nyaox mai sipeed vieh plah mai klong mai khaox sigawng nex, mai kraung pa shiao mai aw ngu khawmuik maix tak yuh kraung pa shiao maix inkix ka tawng. ⁴ Maix tak yuh grheeng tix mu ka tawng mai yuh daux jhup maox pon daux, ka daog grheeng an pon plak. ⁵ Maix tak deuh grheeng an ka greem toh khu dee tan, kieh grheeng pa yuh maix khankix jah khaing plak greem tom hoek sigreung khu dee tan. ⁶ Maix tak yuh khaox glawm ka khaox Akashax mai om ka tawng. ⁷ Sau khaox glawm ka daux maox jhup mai kieh khaox glawm koe praok khu dee tan khawm ra plak, sonsang pon klawm kah. ⁸ Maix tak yuh khu dee tan ka phia, koe daux doh plak piang mai plak greem, mawh kheu nan, kix tak yuh awm pa hoik jhi Aux ka maix piang gawng heue. ⁹ "Maix tak baox yuh vung viang biang nyiex gox bwan man, son daog plak seh ka vung viang biang nyiex gox bwan man an, tak vhak ka man pa taing ka keei ceu pa mhawm, krax lang man an koe tix yieh sawk. ¹⁰ Rong khaox pa sang jung ka man an, tak kieh koe tixnga gawng mai daux jhup jaong nawh tixnga mu mai ankix tak mawh tawng khawmuik. Can grok pa koe ka rong ankix mai gawng lat nawh khawmuik, tak kieh mawh pa yuh ka mau. ¹¹ Awm an son krax lang plak laong maix tak vhak man tie tix yieh sawk mai rong khaox tixnga gawng mai daux jhup jaong tawng tixnga mu mai ka grok ka rong khaox khankix, khawm gawng lat mau heue. ¹² Plak vieh vung viang biang plak klip singaix, tak kieh vhak ka man tie pa koe tixphwan sawk mai rong jung nawh kao rong mai daux jhup jaong ankix kao mu. ¹³ Plak vieh vung viang biang plak lih singaix kawx, tak kieh nawh koe tixphwan sawk. ¹⁴ Man tie khankix, ka siviex lawng tix plak, tak kieh nawh koe kao phwan sawk ka plak in mai rong nawh loe rong, mai daux jhup jaong loe mu. ¹⁵ Ka plak an tix plak kieh man tie koe kah kao phwan sawk mai rong nawh loe rong mai daux jhup jaong loe mu. ¹⁶ Son diang siviex lawng vung viang biang nyiex bwan, tak kieh man tie koe kah, plak lang tixnga sawk mai kieh mawh man pa klai raoma, man pa lung pliex mai man pa raoh rawt, pa hoik taing tix ka keei ceu pa mhawm khaing cao pa taing man. Ankix tak koe rong pon rong mai daux jhup jaong pon mu." ¹⁷ Can rong khaox pa koe vung viang biang, tak kieh nawh koe gawng lat pa yuh ka mau khawmuik. Grok khankix kawx, tak mawh pa yuh ka mau mai daux jhup jaong ankix, tak kieh nawh mawh pa yuh ka tawng. ¹⁸ Krax lang man tie vung viang biang, tak kieh nawh koe tix yieh sawk, krax vieh tak kieh nawh koe tixphwan sawk khawmuik mai krax lhaong nawh tak kieh koe phwan sawk pa hoik taing tix ka keei ceu pa mhawm, yuh daux jhup jaong nawh khankix ka tawng heue. ¹⁹ Can kraung pa shiao son nyiex gox bwan man khawmuik mai lhak khawmuik mai lhak pa shiao son vung viang biang, tak kieh nawh mawh pa yuh ka tawng. ²⁰ "Maix tak tawx gumlox tix ka pui Isarelax khankix, sonsang viex kix bee pa singax pa krid khaing plix khaox Sanlun, son pa riang mai sonsang kieh jawk ten khri riang ang jud ang jai. ²¹ Kieh bang kum ka daux nyiex gox bwan man an, koe ka praix man tie ka sivoe ngai khui pa kham sakse, Arun mai kawn simex nawh khankix, tak cox rien kawk ngu tan, jah plak bo tom hoek plak ponngawb, sivoe Siyiex. An tak mawh beenli ka doeh ru pui Isarelax khankix leeing ju heue.

¹ "Maix tak teei puxke tix Arun, khawm kawn simex nawh khankix, khaing daux pui Isarelax, sonsang mawh kix pui pa yuh kaing cao giex kaing li son Aux. Arun mai kawn simex nawh Nadat, Abihux, Eliza, Itama tak mawh cao giex kaing li greem maix. ² Maix tak yuh kraung ceep pa singax son puxke maix Arun, sonsang mawh pa koe min plakngai mai krax pa mhawm grang. ³ Maix tak krai lox ka pui pa koe pingnya khankix pa hoik kieh Aux naog ka rhawm rhi pingnya, pa chix tawng mai kix tak yuh kraung ceep Arun sonsang kieh nawh mawh pa singax son nawh. Nawh tak mawh pui pa yuh kaing jhaw cao giex kaing li son Aux. ⁴ Inkix tak mawh kraung ceep pa sang yuh kix, pa mawh man tie naok tix plah, sibex dhah plak daux tix pheen sibex lang plak praix tix pheen sibex dawd taix pa mhawm taing tix pheen, man lawk kaing tix pheen mai man rawd nyoi tix mu. Mawh kheu nan, kix tak yuh kraung ceep pa singax son puxke maix Arun mai kawn simex nawh khankix, sonsang yuh kix kaing jhaw cao giex kaing li son Aux. ⁵ Kix tak teei khri mai keei pa klai raoh mai pa lung pliex mai pa raoh rawt mai man ceu pa mhawm, ⁶ kix yuh sibex dhah dawd taix ka keei awm khri, khawm man pa klai raoma, man pa lung pliex, man pa raoh rawt mai man pa mhawm taing pa nie blon mhawm khaing paox tix. ⁷ Sibex dhah dawd taix an tak koe maox rawd piang klip ra nyaing mai kieh toh an khawm ra plak kleuk paox tix sonsang toe tau. ⁸ Man tie naok pa koe piang sibex dhah dawd taix an, tak mawh pa taing ka keei khri mai keei pa klai raoma mai pa lung pliex mai pa raoh rawt mai man ceu pa mhawm. ⁹ Maix tak teei simaox siang bawd raoh ra mu mai saik ti deuh ceu kaux kawn simex Isarelax khankix ka piang an. ¹⁰ Kieh ceu kaux kix liah kaux koe ka piang simaox tix khlawp mai ceu kaux pa kawn deuk an liah kaux koe ka piang simaox an tix khlawp awm jhong keh kix. ¹¹ Kieh cang mhaw saik ti deuh ceu kaux kawn simex Isarelax ka piang khlawp simaox khawm ra khlawp maix tak priex an daux jawk aw khri. ¹² Maix tak kawb simaox an ra khlawp ka piang klip sibex dhah dawd taix khawm ra plak mai priex awm simaox pa sang doh keud kix ka kawn simex Isarelax. Arun tak viex ceu kaux kix ka sivoe Siyiex ka piang klip nawh khawm ra khawn, sonsang mawh krax pa doh keud ka." ¹³ Maix tak yuh jawk aw simaox an ka khri, ¹⁴ Maix tak yuh maox khri pa mhawm ra nyaing awm maox duing mai phyawk ti deuh maox pa hoik duing an ka jawk aw simaox. ¹⁵ "Maix tak yuh man tie naok, sonsang shiao bawg yam prawng see, yuh awm sibex dhah dawd taix pa taing ka keei khri pa klai raoma, pa lung pliex mai pa raoh rawt man ceu pa blon mhawm taing khaing paox tix. ¹⁶ Man an tak yuh koe ra gawp mai kieh krax lang koe tix diex, krax vieh tix diex mai kieh daog sidu khawm pon plak. ¹⁷ Maix tak sau siang simaox ka piang man tie naok an pon rhoi, rhoi tix tak mawh siang simaox raoh, siang simaox Utapharax siang simaox pa raoh. ¹⁸ Rhoi ra tak mawh siang simaox pa klai, siang simaox pa klai riex mai siang simaox kiien. ¹⁹ Rhoi loe tak mawh siang simaox klai singi, siang simaox bawd paing mai siang simaox raoh klai. ²⁰ Rhoi pon tak mawh siang simaox raoh toh, siang simaox paing pau mai siang simaox pa toh riang, siang simaox ankix khawmuik tak priex daux jawk aw simaox khri. ²¹ Ka piang siang simaox ankix, tak kieh ceu kaux kawn praix Isarelax khankix koe kah awm koe ceu kaux kix kao ra kaux. Ka piang siang simaox an tix mu, tak kieh kix saik ti deuh ceu kaux cum kao ra mu. Siang simaox ankix tak kieh koe awm doeh ru kix kao ra cub. ²² Maix tak yuh maox koe ka toh man tie naok, ka maox khri mhawm pa duing tix tau. ²³ Maix tak yuh daux jhup khri ra mu pa koe daux son man tie naok an mai tok daux jhup khri ra daux ka toh man tie naok khawm ra plak. ²⁴ Khaix an maix tak sau maox khri pa hoik duing tix ra mu ka daux jhup khri pa koe ka toh man tie naok an. ²⁵ Toh maox khri pa duing kliien ra nyaing tak phyawk ti deuh ka aw simaox ra mu ka piang maox rawd piang klip, pa koe ka sibex dhah dawd taix an plak sivoe ngai. ²⁶ Maix tak dee yuh daux jhup khri ra mu mai sau nawh ka piang toh man tie naok an ra plak ka daog plak daux sibex dhah dawd taix. ²⁷ Maix tak baox yuh daux jhup khri ra mu mai sau ka piang maox rawd piang klip ra mu ka plak greem sibex dhah dawd taix ka plak sivoe ngai. Kieh gawng caing sitoe paox tix, ka plak dee kleuk gawng caing pa taing kix, sibex dhah dawd taix an. ²⁸ Kix tak sitoe daux jhup khri, pa koe piang man tie naok an, ka daux jhup maox khri pa koe ka sibex dhah dawd taix. Kieh kix sitoe nawh ka maox keei pa klai raoma mai kieh an koe ka plak piang gawng caing pa hoik taing kix ka sibex dhah dawd taix, sonsang ang man tie naok an, chix gah ti hu khaing sibex dhah dawd taix. ²⁹ Arun tak viex ceu kaux kawn simex pui Isarelax khankix, ka piang man tie naok pa prawng see an ot ka piang dieb rhawm tix, yam laig nawh ka dee singax, sonsang mawh krax pa doh keud ka sivoe ngai Siyiex ku bawg yam. ³⁰ Nawh tak sau Urim mai Tumin ka daux man tie naok prawng see an, ankix tak koe ka piang dieb rhawm Arun, yam hu nawh ka plak sivoe ngai Siyiex. Mawh kheu nan, Arun tak viex krax prawng see, piang dieb rhawm tix, son kawn praix Isarelax khankix, ka plak sivoe ngai Siyiex jheung jheung heue. ³¹ "Maix tak yuh sibex dhah jiet khaw peung mai sibex dhah dawd taix ka man klai raoma. ³² Kieh plak kaing koe daux ceep sigreung mai kieh man pa hoik taing an kawb hawt vung viang moeng daux ngawg sibex dhah an tix grawng son ang lai chix griah. ³³ Ka piang hawt vung viang caong sibex dhah maix tak sau plix sibex pa lawmle khankix, pa yuh tix ka man pa klai raoma, man lung pliex, man raoh rawt hawt vung viang caong sibex dhah an. Kieh plix hing khri koe ka sinax plix lawmle an. ³⁴ Kieh plix hing khri tix mu mai plix sibex pa awm plix kla jiang tix mu, khan sinax paox tix ka piang hawt vung viang caong sibex dhah ceep kix ku plak. ³⁵ Arun tak ceep ka sibex dhah in yam yuh nawh kaing jhaw Siyiex mai lox luah ankix, tak kieh pui mhong yam laig nawh ka dee pa singax singeh ka sivoe ngai Siyiex, khawm yam deeh lih nawh ka praix, sonsang ang nawh lai yaox ti yum kah. ³⁶ Maix tak deeh baox yuh khlawp plah khri tix khlawp mai saik ngai lai ka piang pa awm cum tix mu, pa ah nin, "Kieh mawh pa singax singeh son Simiang Siyiex. ³⁷ Maix tak phyawk ka maox pa klai raoma mai kieh koe ka piang man lawk kaing an, ka plak sivoe ngai. ³⁸ Khlawp plah khri an tak koe ka piang dong re Arun, sonsang mawh Arun cao pa klawm phimap pa dex mai pa tan pa singax Pui Isarelax mai viex hoek sigrah sonsang mawh krax tan pa singax mai khlawp khri an kieh ot piang dong re Arun jheung jheung sonsang pon mawh kix pa rieb ti teei ka sivoe ngai Siyiex. ³⁹ "Maix tak taing sibex dhah ceep nawh plak daux ka keei ceu pa mhawm. Maix tak yuh lawk kaing ka man ceu pa mhawm mai maox rawd nyoi ka man pa hoik taing tix ka rawm siang kuceu pa blon mhawm khaing paox tix. ⁴⁰ "Maix tak yuh sibex dhah son kawn simex Arun khankix mai maix tak yuh maox rawd nyoi son kix. Maix tak baox yuh mhok pa koe min pakngai mai pa mhawm grang. ⁴¹ Maix tak ceep ankix ka piang puxke tix Arun mai ka piang kawn simex nawh khankix. Maix tak groi bee ka kix, appong kix mai kieh kix singax, sonsang mawh kix pa yuh kaing jhaw cao giex kaing li son Aux. ⁴² Maix tak caing kix ceep khlax ka man, sonsang kheem kix krax kaig tua tix, jah ka nyoi tom hoek ka ba. ⁴³ Kraung ceep ankix, tak koe ka piang Arun mai kawn simex nawh khankix, yam hoek kix ka daux nyiex gox bwan man bang kum pui hun. Phan ang mawh nan kix tak ceep kraung ankix yam hoek kix hawt dex khu dee tan son kaing jhaw Siyiex ka dee pa singax, son ang kix koe phimap mai yum. In mawh grawng beenli pa caw ti yuh leeing ju, nawh khawm doeh ru nawh khankix heue.

¹ "Inkix tak mawh grawng pa sang yuh maix mai kawn simex nawh singax, son kaing jhaw cao giex kaing li son Aux. Teei kawn mawie mhaing tix mu mai kawn yung mhaing ra mu pa ang koe dee ne pa mhawm loig. ² Blah pa ang sau susaix mai blah pa kluklao mai bee pa ang sau susaix mai blah rhi khlawp pa sau bee mai pa ang sau susaix. Maix tak yuh blah an ka mien gaox nghox ca. ³ Maix tak sau blah an ka daux khrawng tix mu mai viex hoek tau mai kawn mawie mhaing mai kawn yung iak ra mu. ⁴ Arun mai kawn simex nawh khankix tak kieh kix hoek daux diang siviex nyiex gox bwan man bang kum pui hun. Maix tak kieh kix heem rawm. ⁵ Maix tak tawx Arun ceep kraung, pa mawh sibex dhah plak daux tau mai sibex dhah dawd taix mai man tie naok mai kieh nawh rawd maox rawd nyoi pa nie blon mhawm taing pa koe ka sibex dhah dawd taix an. ⁶ Maix tak ceep man lawk kaing ka piang kaing nawh mai sau mhok khri pa singax ka piang man lawk kaing an. ⁷ Maix tak teei bee mai groi ka piang kaing nawh, ⁸ Maix tak viex kawn simex nawh khankix hoek mai ceep kix cie sibex dhah plak daux. ⁹ Maix tak rawd maox rawd nyoi, ka nyoi Arun mai kawn simex nawh khankix mai ceep kix cie mhok, kraung ceep cao giex kaing li khankix tak mawh cie kix, awm mhai rug gumlox beenli leeing ju. Mawh kheu nan maix tak appong kaing jhaw cao giex kaing li ka Arun mai kawn simex nawh khankix. ¹⁰ "Maix tak viex mawie mhaing an, hoek ka daux bang kum pui hun sivoe nyiex gox bwan man mai Arun khawm kawn simex nawh khankix, tak deuh taix tix ka piang kaing mawie mhaing an. ¹¹ Khaix an maix tak suat mawie mhaing an sivoe ngai Siyiex hawt diang siviex laig bang kum pui hun daux nyiex gox bwan man. ¹² Maix tak teei nham mawie mhaing an tiblah ka giien taix tix mai kraix ka piang rung khu dee tan maix tak hieh nham pa kawn deuk ka praok caong khu dee tan khawmuik tan. ¹³ Maix tak teei bee pa kheem kraung vaig, bee pa kheem ka piang tawm mai bee pa koe piang soklax mai khawm soklax an ra mu maix tak deuh an khankix ka piang khu krub dee tan mai gleeing ka ngu. ¹⁴ Phan mawh nex mawie an, hak khawm roing khankix maix tak gleeing nawh ka ngu ka plak praix nyiex bang, in mawh son krax tan pa pluat ploi phimap. ¹⁵ "Maix tak teei yung mhaing tix mu, kieh Arun mai kawn simex nawh khankix deuh taix tix ka piang kaing yung mhaing an. ¹⁶ Maix tak suat yung an, teei nham nawh mai phruah ka praok vung viang khu dee tan. ¹⁷ Khaix an maix tak pat nex yung khik mawx khik an mai sigrhah kraung vaig mai caong khankix ka rawm mai sau ti deuh khik nex mai kaing tau. ¹⁸ Maix tak gleeing nex yung an kix khawmuik ka piang khu dee tan. An mawh krax tan pa gleeing son Siyiex pa sioe baux mai an mawh krax tan, pa gleeing tix ka ngu son Siyiex leeing ju. ¹⁹ "Maix tak baox teei yung mhaing an tang mu, kieh Arun mai kawn simex nawh khankix deuh taix tix ka piang kaing yung an. ²⁰ Khaix an maix tak pah yung an, teei nham nawh tiblah mai kraix ka piang dawng yhaok plak dawm Arun mai ka piang dawng yhaok kawn simex nawh khankix mai ka piang giien ting taix khawn dawm kix mai ka piang giien ting caong khawn dawm kix mai phruah nham ankix khawmuik hawt vung viang praok khu dee tan. ²¹ Maix tak teei nham pa koe ka piang khu dee tan tiblah mai bee tiblah phruah ka piang Arun mai kawn simex nawh khankix mai ka piang kraung ceep kix, tokaux cao nawh mai kraung ceep nawh tak kieh singax mai tokaux kawn simex nawh khankix mai kraung ceep kix tak kieh singax. ²² "Maix tak teei bee yung mai sidax mai bee pa kheem ka piang kraung vaig, bee pa kheem ka piang tawm mai soklax ra mu mai bee pa koe ka piang soklax mai ba taix khawn dawm, in mawh yung pa hoik appong ti tan son Ara kix. ²³ Maix teei blah tix lon, blah pa hoik kluklao tix mai bee tix lon, blah pa rhi khlawp tix khlawp, pa mawh blah pa ang sau susaix khaing daux kraung pa koe sivoe ngai Siyiex, ²⁴ Maix tak sau inkix khawmuik ka daux tawm taix Arun mai ka daux tawm taix kawn simex nawh khankix, kieh mawh krax tan pa yang yeuh mai yang yeuh sivoe Siyiex. ²⁵ Maix tak deeh rieb ti teei ankix khaing daux tawm taix kix mai gleeing ka ngu ka piang khu dee tan krax tan pa gleeing, pa sioe bhawng ka sivoe Siyiex mawh krax tan pa gleeing ka ngu son Siyiex. ²⁶ "Maix tak teei yung mhaing pa hoik appong Arun ara kieh mawh krax tan mai yang yeuh sivoe Siyiex, naok an tak mawh son cie maix. ²⁷ Khaing yung mhaing pa hoik appong an maix tak kieh nex naok pa yang yeuh khaing pa hoik yang yeuh mai krax tan pa yaog khawm ba, pa hoik yaog mawh pa singax. Ankix tak mawh son Arun mai kawn simex nawh khankix, ²⁸ an tak mawh krax tan pa kaoh khaing kawn praix Isarelax son Arun mai kawn simex nawh khankix leeing ju heue. Mawh kheu krax tan pa yaog pa kaoh khaing kawn praix Isarelax, khaing pa hoik appong kix ka krax tan pa nhim, ankix tak mawh krax tan pa yaog son Siyiex. ²⁹ "Kraung ceep pa singax Arun, tak mawh cie kawn simex nawh khankix khaix nawh sax, kix tak ceep yam groi bee ka kix mai yam appong kix tokaux tix, ka kaing jhaw cao giex kaing li. ³⁰ Kawn simex pa plud ti mawh cao giex kaing li tang nawh, tak ceep kraung ankix, aliah singaix, yam laig nawh ka daux nyiex gox bwan man, bang dee kum pui hun, sonsang yuh nawh kaing jhaw Siyiex ka dee pa singax. ³¹ "Maix tak teei nex yung mhaing pa hoik appong son Ara mai ngaik ka dee pa singax. ³² Khaix an Arun mai kawn simex nawh khankix, tak ih nex yung mhaing mai blah pa koe daux khrawng hawt diang siviex nyiex gox bwan man bang kum pui hun. ³³ Kix tak ih ceu ankix pa pluat ploi phimap sonsang appong kix tokaux tix mai kieh kix mawh pa singax. Viang mawh nan, pui tang kaux tak ang pon ti ih ankix, mawh kheu ceu ankix mawh pa singax. ³⁴ Phan nex pa hoik appong son ara mai blah pa kawn deuk tom hoek plak ponngawb maix tak gleeing ti tik ka ngu. Kheu mawh pa singax mai pui mawx kawx, tak ang pon ti ih. ³⁵ "Mawh kheu nan maix tak yuh ankix ka Arun mai kawn simex nawh khankix, awm gumlox beenli pa hoik tawm Aux ka maix. Maix tak appong Ara kix tom hoek aliah singaix. ³⁶ Maix tak tan mawie mhaing tix mu ku singaix, son krax tan pa taoh phimap maix tak cox khre khu dee tan an singax yam yuh maix krax pluat ploi phimap tix maix tak awt nawh ka bee, sonsang deeh singax. ³⁷ Daux aliah singaix maix tak yuh krax pluat ploi phimap tix son khu mai kieh singax. khu dee tan an tak mawh pa kied singax. Can ceu pa hu teeh ka khu dee tan an, tak mawh pa singax heue. ³⁸ "Pa sang tan maix ka piang khu dee tan ku ngaix, mawh kawn yung pa naog tix num ra mu, ³⁹ Maix tak tan kawn yung tix mu, plak ponngawb mai kawn yung an tix mu plakbo. ⁴⁰ Pa tan tau mai kawn yung tix mu, tak mawh mien nghox ca im kao son tix son tix Epha pa klao tix tau mai bee khaox Sanlun pon son tix son pa mawh tix Hing mai rawm plix siiet pon son tix son pa mawh tix Hing, son krax tan pa nyaux. ⁴¹ Kawn yung an tix mu tak mawh pa tan plakbo maix tak tan tau mai krax tan mien nghox ca im mai krax tan pa nyaux, awm plak ponngawb, son pa sioe bhawng pa mawh krax tan pa gleeing tix ka ngu son Siyiex. ⁴² In tak mawh krax tan pa gleeing sijheeng son doeh ru pex ku ju, ka diang siviex nyiex gox bwan man bang dee kum pui hun, sivoe Siyiex, Aux sang yaox pex tan sikah tau mai pex. ⁴³ Aux tak yaox kawn praix Isarelax khankix tan mai nyiex gox bwan man an tak singax kheu min pakngai Aux. ⁴⁴ Aux tak kieh nyiex gox bwan man bang kum pui hun mai khu dee tan singax, Aux tak kieh Arun mai kawn simex nawh khankix singax mai kieh kix yuh kaing jhaw cao giex kaing li son Aux. ⁴⁵ Aux tak ot sinax kawn praix Isarelax khankix mai mawh Siyiex kix. ⁴⁶ Kix tak tawng mawh Aux Siyiex kix, pa viex kix lih khaing haktiex Ejiptux. Aux tak ot sinax kix mai Aux tak mawh Siyiex kix heue."

¹ "Maix tak yuh khu dee tan ka khaox Akashax, sonsang gleeing nyawng bhawng ka piang an. ² Krax lang kieh koe tix sawk mai krax viex tix sawk mai kieh sidu khawm pon daog mai krax lhaong tak kieh koe ra sawk. Rung kawx tak mawh pa kleuk tau tix mai nawh. ³ Maix tak om khri pa mhawm plak piang hawt vung viang praok an khankix mai rung nawh khankix maix tak kawb rhang khri ka praok vung viang khawmuik. ⁴ Maix tak yuh daux jhup khri ra mu son an, ka greem dee kawb tix rhang khri khawm ra plak. Maix tak deuh ankix ka praok khawm ra plak mai an tak mawh dee sau kix ti giex khaox glawm sonsang mawh dee klawm kix nawh. ⁵ Maix tak yuh khaox glawm ka khaox Akashax mai om nawh ka khri. ⁶ Maix tak deuh an sivoe man tieb khui pa kham sakse see dang ngeung krax caux rhawm, ka teug pa kham sakse dee sang yaox Aux maix. ⁷ Arun tak gleeing nyawng bhawng ka piang an ku ngawb yam cox nawh ka kawk ngu khankix mai nawh tak gleeing nyawng bhawng ka piang an. ⁸ Yam tok Arun kawk ngu khankix plak bo, nawh tak gleeing nyawng bhawng ka piang an sivoe Siyiex, pa mawh nyawng bhawng pa gleeing jheung jheung son doeh ru maix ku ju. ⁹ Maix tak ang pon ti gleeing nyawng bhawng pa ang khaw ka piang. Krax tan pa gleeing ang ah, krax tan phawng nghox ca im ang ah mai krax tan pa lhauk pa nyaux ang ah maix tak ang pon ti yuh ka piang. ¹⁰ Arun tak yuh krax tan pa pluat ploi phimap ka piang rung khu dee tan an tix num tix bawg tau mai nham krax tan son krax pluat ploi phimap. Nawh tak yuh krax pluat ploi phimap ka piang an tix num tix bawg, mawh beenli ka son doeh ru maix ku ju. Khu dee tan an mawh pa kied singax singeh son Siyiex heue." ¹¹ Siyiex ah nin ka Mose, ¹² "Yam teei maix ca rang ceu pui Isarelax khankix grawng koe kix miex ding, khaix an pui ku kaux tak yaox ti tawx mau pa taoh tokaux tix ka Siyiex yam simin maix kix. An mawh son ang krax kha rhawm lai koe sinax kix yam simin maix kix. ¹³ Can pui pa hoik laig carang ku kaux tak tawx mau tix plak Shekhe awm mau Shekhe pa hoik appong kix ti tan, mau Shekhe tix plah koe tixnga Gerax. Mau tix plah Shekhe tak mawh pa tan ka Siyiex. ¹⁴ Pui pa hoik teei kix carang ku kaux jah tixnga num haok ka piang, tak tawx krax tan ceu an ka Siyiex. ¹⁵ Cao mi tak ang yaox ti tawx lheu mai pui pa hot sia tak ang yaox ti tawx yawm khaing tix plak Shekhe yam tawx maix krax tan tix ka Siyiex. Sonsang yuh maix krax pluat ploi phimap tokaux cao tix. ¹⁶ Maix tak teei mau tan pa pluat ploi ceu pui Isarelax khankix ka phimap tix mai deuh mawh pa shiao son nyiex gox bwan bang kum pui hun, an tak mawh krax pa doh keud ka ceu pui Isarelax khankix, sivoe Siyiex, sonsang yuh kix krax pluat ploi phimap mai taoh tokaux cao tix." ¹⁷ Siyiex ah nin ka Mose, ¹⁸ "Maix tak yuh pan khoek mai yuh caong nawh ka tawng sonsang khoek kah. Maix tak deuh nawh sinax nyiex gox bwan man bang kum pui hun mai khu dee tan maix tak sau rawm ka daux. ¹⁹ Arun mai kawn simex nawh khankix, tak khoek taix caong tix ka rawm an. ²⁰ Yam laig kix daux nyiex gox bwan man bang kum pui hun, phan ang mawh nan, yam hoek kix ka khu dee tan, sonsang yuh kaing krup ka Siyiex mai yam gleeing kix krax tan tix, ka ngu son Siyiex, kix tak khoek tix ka rawm an, son ang kix yum kah. ²¹ Mawh kheu nan, kix tak khoek taix caong tix, son ang kix yum ka an tak mawh gumlox beenli son nawh mai son doeh ru nawh khankix, tom hoek sidah leeing ju khawmuik heue. Bee Groi Nyawng Bhawng ²² Siyiex deeh ah nin ka Mose, ²³ "baox teei nyawng bhawng son cao maix, pa mawh Muran phwan yieh Shekhe, khaox cai hung pa sioe bhawng ra yieh tixphwan Shekhe, mex pa nyawm sioe bhawng ra yieh tixphwan Shekhe, ²⁴ Khaox cai hung phwan yieh Shekhe mai bee Sanlun tix Hing. ²⁵ Maix tak teei ka bee groi pa singax singeh, pa mawh bee groi pa hoik klao pui pa chix yuh ceu pa sioe bhawng mhawm mhawm. ²⁶ Maix tak groi ankix ka nyiex gox bwan man mai bang kum pui hun, khui sijax mukheu pa kham sakse khanki, ²⁷ pheen mai kraung shiao piang pheen khawmuik, pang jawk ten khri mai kraung shiao tau mai an mai khu dee gleeing kix ti tan nyawng bhawng, ²⁸ khu dee tan krax tan pa gleeing mai kraung shiao tau mai pan khoek mai khawm caong nawh. ²⁹ Maix tak kieh ankix singax singeh, sonsang mawh pa kied singax mai can pa teeh ka an tak pon pa singax. ³⁰ Maix tak groi bee ka Arun mai kawn simex nawh khankix mai appong kix, sonsang yuh kix kaing jhaw cao giex kaing li son Aux. ³¹ Maix tak krai ka ceu pui Isarelax khankix ah nin, in tak mawh bee groi pa singax, ka son Aux daux doeh ru pex ku ju. ³² Bee an tak ang pon ti kraix ka pui maix tak ang pon ti yuh bee ceu pa awm an tix ceu kawx, an mawh pa singax mai tak deuh an mawh pa singax ka son maix. ³³ Pui pa yuh ceu bee pa awm an, phan ang mawh nan, pui mawx pa kraix an ka pui pa ang mawh cao giex kaing li tak teei ti tik nawh khaing pui ceu nawh. ³⁴ Siyiex ah nin ka Mose, "Teei ceu pa sioe bhawng, pa mawh peeh khaox Natap mai lhox khaox pa sioe bhawng mai peeh khaox Galaban mai peeh khaox Lawban pa singax tau mai pa sioe bhawng khawmuik mai ciang sidu ceu mawx ceu an. ³⁵ Maix tak yuh nyawng bhawng ka ceu inkix, cao pa chix yuh mhawm mhawm, klao tau mai kih sonsang kieh ankix singax. ³⁶ Maix tak teei ceu ankix tiblah mai tah tom mien, deuh ka sivoe khui bwan pa kham sakse daux nyiex gox bwan man, bang kum pui hun ka dee sang yaox Aux maix tan. An tak mawh pa kied singax ka son pex. ³⁷ Nyawng bhawng pa sang yuh maix in maix tak ang pon ti yuh ka son tokaux tix, awm pa hoik klao kix ti yuh pex tak sang deuh an mawh pa singax ka son Siyiex. ³⁸ Pui mawx ang ah pa yuh nyawng bhawng awm an, sonsang ngheet kah, tak teei ti tik nawh khaing pui ceu nawh khankix heue."

¹ Siyiex ah nin ka Mose, ² "Jhak heue, Aux tak kok ka ceu kaux mai laug Bezalelax, kawn simex Urix, pa mawh kawn simex Hurax ka daux doeh ru Yudax. ³ Aux hoik kieh khwan Siyiex naog ka daux nawh, tawx pingnya mai krax tawng mai krax keud mai son grawng pa nhim ka kaing khawmuik. ⁴ Sonsang min yuh nawh kaing jhaw khaox kraung pa mhawm, kraung khri, kraung mau, kraung tawng, ⁵ grawng kaing pa chix pat, chix klaing, chix kleuk siang simaox mai kaing pa chix saik khaox mai grawng kaing pa chix yuh nawh kuceu. ⁶ Aux hoik yaog Aholibax kawn simex Ahisamat, doeh ru Dan, yuh kaing tau mai nawh. Aux tak tawx pingnya ka pui pa koe pingnya daux rhawm khankix, sonsang pon yuh kix can ceu pa tawm Aux ka kix, ⁷ pa mawh nyiex gox bwan man bang kum pui hun mai khui pa kham sakse mai dang ngeung pa caux rhawm, pa koe ka piang an mai can kraung pa shiao kuceu daux nyiex gox bwan man, ⁸ pheen mai kraung pa shiao tau mai pheen, pang jawk ten khri pa singax mai kraung pa shiao tau mai an mai hu dee tan pa tok nyawng bhawng, ⁹ khu dee tan kix krax tan pa gleeing tau mai kraung pa shiao ka an, pan khoek mai caong pan khoek, ¹⁰ kraung ceep yam yuh kaing krup ka Siyiex, kraung ceep pa singax son cao giex kaing li pa mawh Arun mai kraung ceep kawn simex nawh khankix, sonsang yuh kix kaing jhaw cao giex kaing li son Siyiex. ¹¹ Bee groi mai nyawng bhawng son dee singax, kix tak yuh ceu an awm gumlox pa tawm Aux ka maix heue." ¹² Siyiex ah nin ka Mose, ¹³ "Maix krai ka pui Isarelax khankix ah nin, pex tak priex ka singaix twah Aux, mawh kheu mawh mhai rug sinax Aux mai pex, leeing ju sonsang tawng pex mawh Aux Siyiex pex, pa kieh pex singax. ¹⁴ Mawh kheu nan, pex tak priex rien ka singaix twah mawh pa singax son pex. Can pui pa yieh singaix twah an, tak kieh nawh yum kah tete. Grawh grawng nawh pui pa yuh kaing ka daux singaix an, tak teei ti tik khaing sinax pui ceu nawh khankix. ¹⁵ Yuh kaing daux liah singaix, viang mawh nan, ka daux aliah singaix, mawh singaix twah klaung mai singaix laux tix mai mawh singaix pa singax son Siyiex. Pui pa yuh kaing ka daux singaix twah an, tak kieh nawh yum. ¹⁶ Mawh kheu nan, daux doeh ru ceu pui Isarelax khankix tak priex rien ka singaix twah mawh gumlox sijax mukheu leeing ju. ¹⁷ An mawh mhai rug sinax Aux mai ceu pui Isarelax khankix leeing ju. Grawh grawng nawh ka daux liah singaix, Siyiex hoik yuh raoma mai haktiex mai ka daux singaix aliah Nawh Cao ang lai yuh kaing mai laux lee tix heue." ¹⁸ Yam hoik sikah Nawh Cao tau mai Mose ka piang gawng Sina, Nawh Cao tawx khlawp simaox ra khlawp ka Mose, pa mawh lox tawm pingnyap pa hoik tiiem Siyiex ka giien taix tix heue.

¹ Yam yaox pui Isarelax khankix ka rheung Mose ang lih khaing piang gawng, kix kraix khrawm paox tix hoek ka Arun ah nin, "Kaoh heue, Yuh riang siyiex ka son yix pa sang thong yix hu sivoe, mawh kheu viex Mose yix lih khaing haktiex Ejiptux, yix ang tawng ceu pa hoik lih ti mawh ka nawh." ² Arun ah nin ka kix, "Peeik krim khri pa koe ka yhaok moeng pex, kawn simex kawn bun pex khankix mai viex hoek ka aux." ³ Mawh kheu nan, pui khawmuik peeik krim khri pa koe ka yhaok tix mai viex hoek ka Arun. ⁴ Nawh rieb ti teei khri khaing daux taix kix mai nawh yuh grang pakpeung ka kraung taix tix mai raug ti tawx riang kawn mawie. Khaix an kix ah nin ceu pui Isarelax eue, in mawh siyiex pex pa viex pex lih khaing meung Ejiptux." ⁵ Yam yaox Arun an, nawh sum khu dee tan ka sivoe kawn mawie an mai Arun pao lox ah nin, "Pasax mawh singaix pawie son Siyiex." ⁶ Singaix pasax kix kaoh caocao mai yuh krax tan pa gleeing mai krax tan pa nhim, pui khankix ngawm ti ih mai nyaux, khaix an, kix deeh kaoh mai yuh krax klieh krax nyiah. ⁷ Siyiex ah nin ka Mose, "Lih hu heue, grawh grawng nawh, pui maix pa hoik viex maix lih khaing haktiex Ejiptux khankix, hoik yuh krax pa laux leeing ka tokaux tix. ⁸ Kix hoik niied ti veeh hu khaing daux krax pa hoik tawm Aux ka kix. Kix hoik raug riang kawn mawie son tokaux kix mai krub kah mai appong krax tan tix ka an ah nin, pui Isarelax khankix eue, in mawh siyiex pa viex pex lih khaing meung Ejiptux" ⁹ Siyiex ah nin ka Mose, "Aux hoik yaox pui inkix mai kix mawh ceu pui pa kiien ngawg tete. ¹⁰ Mawh kheu nan maix grham Aux, sonsang lih krax song rhawm Aux ka piang kix, Aux sang yuh kix laux leeing. Aux tak kieh maix mawh ceu pui pa ting lhaong." ¹¹ Mose khyox khaw ka Siyiex ah nin, "Siyiex eue, Maix song rhawm ka piang pui Maix khankix yuh ka mawx? Pui inkix mawh pa hoik viex Maix lih khaing haktiex Ejiptux ka sibrawm pa ting lhaong Maix, khawm taix pa ting riang Maix. ¹² Chix sang kieh pui Ejiptux pon ti krai ah nin yuh ka mawx? Nawh Cao hoik viex kix lih hu, sonsang yuh krax kha rhawm kix mai sonsang pah Nawh kix daux tiag mai sonsang yuh kix laux leeing ka piang haktiex deeh veeh krax song rhawm Maix Cao mai deeh tieh rhawm Maix ang tawx krax kha rhawm ka pui inkix, son ceu pui Maix khankix liak. ¹³ Doh keud ka Abraham, Icak mai Isarelax pa mawh kawncau Maix khankix, pa hoik tiextu Maix Cao ti ah nin, Aux tak kieh doeh ru pex haoh hun, awm simuing piang raoma long mai haktiex inkix khawmuik, pa hoik ah Aux ti tawx ka doeh ru kix mai kix tak mawh pui pa pon sinngao ankix leeing ju" ¹⁴ Mawh kheu nan, Siyiex deeh doh keud tieh loh rhawm tix mai ang lai tawx krax kha rhawm pa hoik ah Nawh Cao tix sang yuh ka ceu pui Nawh khankix. ¹⁵ Mose veeh ti lih hu khaing ka piang gawng tau mai khlawp simaox ra plah, pa hoik tiiem ka gumlox tawm pingnyap ka daux tawm taix nawh. Khlawp simaox an ra plah hoik tiiem tix khawm ra plah. ¹⁶ Khlawp simaox ra plah an, hoik mawh kaing pa yuh Siyiex mai khaix taix pa tiiem an, hoik mawh khaix taix pa hoik tiiem hoik pawd Siyiex ka piang khlawp simaox an. ¹⁷ Yam mhong Yawsux ka lox sinum riag yo pui khankix, nawh ah nin ka Mose, "Lox sinum naing koe daux nyiex bang." ¹⁸ Mose deeh ah nin, "Lox ankix ang lai mawh lox riag yo kix grawng pex tix naing, ang lai mawh lox pa yiiem kix grawng som tix naing, awm pa mhong aux, lox ankix mawh lox rhax kix lai." ¹⁹ Yam hoek nawh dex nyiex bang dom mawx dom an, nawh yaox ka riang kawn mawie mai krax graoh krax klieh kix mai Mose song rhawm mai taing ti tik khlawp simaox an pa koe daux taix nawh mai pah max ka greem caong gawng. ²⁰ Khaix an nawh teei riang kawn mawie pa hoik yuh kix mai gleeing ka daux ngu, krid tom mien, mai rhuat ankix ka piang rawm mai kieh pui Isarelax khankix nyaux kah. ²¹ Mose ah nin ka Arun, "Pui inkix yuh patix ka maix kieh maix viex phimap pa ting hoek ka piang kix yuh ka mawx?" ²² Arun tom ah nin, "Paw nyang kieh krax song rhawm simiang aux lih ha liak. Maix hoik tawng koe krax pa caox ka daux rhawm rhi pui inkix. ²³ Kix ah nin ka aux, yuh riang siyiex son yix, pa sang thong yix hu sivoe, mawh kheu Mose cao pa viex yix lih khaing haktiex Ejiptux an, yix ang lai tawng ceu pa hoik lih ti mawh ka nawh. ²⁴ Aux ah nin ka kix, "Can pui pa koe krim khri kieh peeik lih, kix tom tawx khankix ka aux mai aux sau ka daux ngu mai lih ti mawh riang kawn mawie." ²⁵ Yam yaox Mose ka ang pui khankix ceep kraung, mawh Arun pa hoik grham kix sonsang kieh pui koeng ka sinax kix mai nyiah kix, ²⁶ Mose cung diang siviex nyiex bang kix ah nin, "Pui mawx pa ot plak Siyiex, kieh nawh hoek ka aux" mai kawn simex Lewix khankix khrawm paox tix hoek ka nawh. ²⁷ Nawh ah nin ka kix, "Siyiex pa mawh Siyiex ceu pui Isarelax ah nin, kieh pui ku kaux tang giieb vaig ka nyoi tix mai hu lailing ka daux nyiex bang, laig ka daux siviex nyiex in tom hoek ka siviex nyiex an mai kieh pui ku kaux pah ka puxaik tix, paox grawm tix mai paox plawg tix ku kaux." ²⁸ Kawn simex Lewix khankix yuh awm gumlox Mose mai pui khankix yum been loe rheng kaux ka daux singaix an. ²⁹ Mose ah nin, "Tang yuh tokaux tix singax mai appong ka Siyiex daux singaix, sonsang tawx Nawh bwanson ka piang pex, mawh kheu hoik tieh feen pui ku kaux ka kawn simex tix mai puxaik tix." ³⁰ Singaix khaix, Mose ah nin ka pui khankix, "Pex hoik lud mai yuh phimap pa ting, mawh kheu nan, yam in aux sang deeh haok ka piang gawng dee ot Siyiex, sonsang deeh pon aux ti yuh krax pluat ploi son phimap pex." ³¹ Mose deeh hoek ka Siyiex ah nin, "Pui inkix hoik lud mai yuh phimap pa ting mai hoik yuh riang siyiex khri son cao tix. ³² Phan Maix Cao koe rhawm ti pluat ploi ka phimap kix pluat ploi liak. Viang mawh nan, phan Maix Cao ang koe rhawm, aux rawg Maix preet ceu kaux aux khaing daux phuk lai pa hoik tiiem Maix Cao liak." ³³ Siyiex deeh ah nin ka Mose, "Pui mawx ang ah pa hoik lud ka Aux, Aux tak preet ceu kaux nawh khaing daux phuk lai Aux. ³⁴ Yam in deeh hu mai thong pui in hu ka dee pa hoik tawm Aux ka maix, jhak heue, kawncau Aux tak hu ka plak sivoe maix, yuh ka mawx ang ah, ka daux singaix yam hoek Aux ti tawx krax ciyang, Aux tak hoek ti tawx krax ciyang ka piang kix, son phimap pa yuh kix." ³⁵ Siyiex tawx krax kha rhawm jhawm saux preng ka pui an khankix, kheu jao yuh kix riang kawn mawie tau mai Arun.

¹ Siyiex ah nin ka Mose, "Lih hu khaing tin maix khawm can pui pa viex maix lih khaing meung Ejiptux khawmuik hu ka haktiex pa hoik tiextu Aux ti tawx ka Abraham, Icak mai Yakop awm lox pa hoik ah Aux yuh nin, Aux tak sang tawx ankix ka son doeh ru maix. ² Aux tak ploi kawncau Siyiex Aux hu sivoe maix mai Aux tak grheu ceu pui Khanan, ceu pui Amawrix ceu pui Hitix, ceu pui Parazi, ceu pui Hiwix mai ceu pui Yebusix lih khaing tan." ³ Hu ka haktiex dee lih rawm teeih mai rawm hia, Aux tak ang lai hu tau mai pex, phan ang mawh nan, Aux lhat ti yuh pex laux leeing hawt krax, kheu mawh pex ceu pui pa kiien ngawg." ⁴ Yam mhong pui ka lox grawng pa caox in, kix riag yo mai laux rhawm tix mai pui tix kaux kawx ang lai ceep khaox kraung. ⁵ Grawh grawng nawh Siyiex hoik ah nin ka Mose, "Krai ka ceu pui Isarelax khankix, pex mawh ceu pui kiien ngawg. Phan Aux pon ti laig daux sinax pex been tivud ticu mai Aux sang yuh pex laux leeing, mawh kheu nan, yam in peeik khaox kraung pa koe ka kaux pex, sonsang tawng Aux pa sang yuh tix ka pex." ⁶ Ceu pui Isarelax khankix peeik khaox kraung pa koe ka tokaux tix, hawt caong gawng Hawrap tan heue. ⁷ Mose sum nyiex gox bwan man ka praix nyiex bang, ka dee singai khaing nyiex bang mai nawh kok an mawh nyiex gox bwan man bang kum pui hun mai can pui ku kaux pa sawg ka Siyiex, lih hu ka nyiex gox bwan man bang kum pui hun, pa koe ka praix nyiex bang. ⁸ Yam lih hu Mose ka nyiex gox bwan man yam mawx ang ah, pui kaoh cung ku kaux, hawt diang siviex tix mai jhak ka Mose tom laig nawh ka daux nyiex gox bwan man. ⁹ Yam laig Mose ka daux nyiex gox bwan man, rong paiawm lih cung ka diang siviex nyiex gox bwan man, Siyiex sikah tau mai Mose. ¹⁰ Pui khawmuik yaox ka cung rong paiawm hawt diang siviex nyiex gox bwan man mai pui ku kaux kaoh mai krub nawh daux diang siviex nyiex gox cao tix. ¹¹ Siyiex sikah tau mai Mose pakngai taw pakngai, awm pa sikah pui tau mai paox grawm tix, khaix an, Mose deeh ing ka nyiex gox tix, mawh kheu nan, Yawsux kawn simex Nun ang lai lih hu khaing nyiex gox bwan man heue. ¹² Mose ah nin ka Siyiex, "Jhak heue, Maix Cao hoik ah nin ka aux, viex pui inkix hu, viang mawh nan, Maix Cao ang nyang kieh aux tawng ka pui pa sang ploi Maix Cao hu tau mai aux. Maix Cao hoik ah nin ka aux, Aux tawng ka ceu kaux maix mai maix hoik mawh pa pon bwanson ka plak sivoe ngai Aux ¹³ Phan aux mawh pa pon bwanson ka sivoe ngai Maix, aux rawg mhaing Maix jhi aux yaox daux krax Maix Cao, sonsang tawng aux ka Maix Cao mai sonsang pon aux bwanson ka sivoe ngai Maix Cao mai doh keud ka pui inkix mawh ceu pui Maix Cao." ¹⁴ Nawh Cao ah nin, "Aux tak hu tau mai maix mai Aux tak tawx maix laux lee tix." ¹⁵ Mose deeh ah nin ka Nawh Cao, "Phan Maix Cao ang hu tau mai yix, paw doh viex yix lih khaing tin liak. ¹⁶ Ceu pui Maix Cao mai tokaux aux, pui tang ceu tak sang tawng krax pa pon yix bwanson ka sivoe ngai Maix Cao ka grawng ceu patix lie? Mawh kheu hu Maix Cao tau mai yix mai kieh yix tang siyox khaing ceu pui tang ceu pa ot ka piang ca haktiex in ang mawh lie?" ¹⁷ Siyiex ah nin ka Mose, "Aux tak yuh ceu inkix, pa hoik rawg mhaing maix, mawh kheu hoik pon maix bwanson ka plak sivoe ngai Aux mai Aux tak tawng ka ceu kaux maix." ¹⁸ Nawh ah nin "Yuh bwanson jhi aux yaox min pakngai Maix Cao liak!" ¹⁹ Nawh Cao ah nin "Aux tak kieh pa mhawm Aux hu sivoe ngai maix mai Aux tak kieh ceu kaux Siyiex kok yo sivoe maix. "Aux tak yuh bwanson ka pui pa si mie Aux ti yuh bwanson kah mai Aux tak caux rhawm ka pui pa si mie Aux tix caux rhawm kah." ²⁰ Viang mawh nan Nawh Cao ah nin, "Maix ang pon ti yaox ka pakngai Aux, grawh grawng nawh pui pa yaox pakngai Aux tak ang pon tix im ju tix kaux kawx." ²¹ Siyiex ah nin, "Jhak heue, koe dee ot dex Aux tin tix dah, mai maix tak cung ka piang rang." ²² "Yam kawn hu min pakngai Aux mai Aux tak sau maix ka daux, doh rang an mai tawb veei maix ka taix tix, yam hu Aux hawt maix." ²³ "Khaix an Aux tak deeh yhawn taix Cao tix hoek, mai maix tak yaox ka plak blawg Aux. Viang mawh nan maix tak ang pon ti yaox ka pakngai Aux heue."

¹ Siyiex ah nin ka Mose, "Deeh saik khlawp simaox ra mu, awm khlawp simaox pa yuh sivoe nhaox mai Aux tak tiiem gumlox Aux khankix ka piang khlawp simaox an, awm pa koe ka piang khlawp simaox pa hoik tik maix nhaox. ² "Mawh kheu nan, kieh khlawp simaox an hoik ka plak ponngawb pasax mai haok ka piang gawng Sina jhi tokaux maix ka Aux, ka piang choek gawng tan." ³ Pui mawx ang ah tak ang pon ti haok tau mai maix, tak ang pon ti ot vung viang gawng khawmuik, pie cub kawn yung mai cub to brie khankix kawx, tak ang pon ti sawm rib riem hawt caong gawng an." ⁴ Mose saik khlawp simaox ra mu awm khlawp simaox pa yuh sivoe nhaox, Mose kaoh caocao plak ponngawb mai haok ka piang gawng Sina, awm gumlox pa hoik tawm Siyiex ka nawh, nawh viex khlawp simaox an ra mu ka daux tawm taix tix. ⁵ Siyiex lih hoek ka daux paiawm, cung tau mai Mose tan mai krai pao ceu kaux Siyiex. ⁶ Siyiex hu plak sivoe nawh mai krai pao ah nin, "Simiang! Siyiex pa koe krax caux rhawm mai pa koe bwanson, pa koe krax lang rhawm mai pa grum naog ka daux krax moh mai pa mawh pa meh, ⁷ "Pa priex krax caux rhawm ka pui kaing rheng kaing mheen, pa pluat ploi ka pa lud mai phimap pui khankix, yuh ka mawh kawx Nawh Cao ang doh pluat ploi phimap ankix daux krax pa mawh pa giex going, son phimap keeing nawh khankix, tak ciyang piang kawn praix nawh mai kawn saux kawn sex nawh tom hoek doeh ru nawh loe pon ju." ⁸ Mose nied ti gup kaing tix piang tiex mai krub ka Nawh cao, ⁹ ah nin, "Phan aux hoik mawh pa pon bwanson ka sivoe Maix Cao, Siyiex eue, aux rawg mhaing ka Maix Cao mai kieh Maix hu tau sinax yix, viang yix mawh ceu pui pa kiien ngawg kawx mai pluat ploi phimap pa caox pa hoik yuh yix, khawm phimap tokaux yix mai teei yix mawh sinngao Maix Cao." ¹⁰ Nawh Cao ah nin "Jhak heue, Aux yuh gumlox sijax mukheu tix mu sivoe ngai pui inkix khawmuik, Aux tak yuh krax pa daox am pa ang sax yuh ka daux haktiex in mai ka ceu pui tix cub kawx. Pui tang ceu pa ot sivie siveng maix, tak yaox ka kaing pa yuh Siyiex. Mawh kheu krax pa yuh Aux ka pex mawh krax pa lhat graung kah heue." ¹¹ "Deuh tix tawng can gumlox pa hoik tawx Aux ka maix daux in singaix, jhak heue, Aux tak grheu ceu pui Amawrix ceu pui Khanan, ceu pui Hitix, ceu pui Pharazix, ceu pui Hiwix mai ceu pui Yebusix lih hu sivoe maix." ¹² "Rien rhawm tix paw lai yuh sijax mukheu tau mai ceu pui pa ot haktiex an, dee sang hu maix ka, phan ang mawh nan, Aux lhat kix mawh kie taong ka daux sinax pex." ¹³ "Viang mawh nan maix tak yieh khu dee tan kix laux leeing khawmuik mai raig ti tik rong simaox riang grang pa krub kix mai kid ti tik riang grang pa mawh khaox krub kix khawmuik." ¹⁴ "Maix tak ang pon ti krub ka siyiex tang kaux, mawh kheu Siyiex mawh pa bak pa viang koeng ka pa caox, mai ceu kaux Nawh Cao kawx mawh pa bak pa viang koeng ka pa caox." ¹⁵ "Aux lhat maix yuh sijax mukheu tau mai can pui pa ot haktiex an mai pui khankix hawt yuh kaing krub ka siyiex kix mai lud kah mai yam appong kix krax tan tix ka siyiex kix mai pui tix kaux kaux khaing daux kix, tak kok ka maix mai maix tak ih ka pa appong pa tan kix." ¹⁶ "Lhat maix kieh kawn simex tix khankix teei kawn bun kix mai hawt yuh krax lud tau mai siyiex kix mai kieh kawn simex maix khankix lud tau mai siyiex kix." ¹⁷ "Ang pon raug ti yuh riang grang siyiex son tix." ¹⁸ "Maix tak priex rien ka pawie blah pa ang koe susaix maix tak ih blah pa ang koe susaix ka daux aliah singaix, awm gumlox pingnyap pa hoik tawx Aux ka maix bawg yam khix Abibax pa hoik tat Aux ti deuh, mawh kheu lih maix khaing daux meung Ejiptux ka daux khix Abibax an." ¹⁹ "Can kawn Ai plix num mawh cie Aux, to brie pa eei pex, mawie ang ah, yung ang ah, kawn pa pon pex phao ka pa mawh mhaing khawmuik tak mawh cie Aux." ²⁰ "Viang mawh nan, kawn la pa keh phao ka maix tak deeh taoh nawh ka kawn yung, phan maix ang deeh taoh tak raig ti tik ngawg nawh maix tak deeh taoh ka kawn Ai tix khankix. Paw kieh pui tix kaux kawx hoek mai taix yi tix ka sivoe Aux." ²¹ "Maix tak yuh kaing krub liah singaix, daux singaix aliah maix tak laux lee tix, viang mawh bawg yam yuh ma yuh kaung ang ah mai bawg yam vawg nghox koi khankix maix tak laux lee tix." ²² "Maix tak yuh pawie gaing nghox daux aliah vang twah, son plix nghox ca pa vawg maix phao ka mai pawie priex khrawm nghox ca yam hoik sidah num." ²³ "Pui maix pa mawh simex khankix tak hoek bleeh plak sivoe ngai Siyiex, pa mawh Siyiex ceu pui Isarelax tix num loe bawg." ²⁴ "Aux tak grheu pui tang ceu sivoe maix mai kieh mee haktiex maix khankix nie baox vieh va mai tak ang koe pui pa ghoing ka haktiex maix yam hoek maix plak sivoe Siyiex tix num loe bawg." ²⁵ "Maix tak ang pon ti tan nham tau mai blah pa koe susaix maix tak ang pon ti deuh pa tan tix daux pawie Pasakha tom hoek plak ponngawb." ²⁶ "Plix khaox plix ox pa liang maix ti pon khaing haktiex maix khankix, tak viex laig ka daux nyiex bwan Siyiex maix, maix tak ang pon ti ngaik nex kawn pex daux rawm teeih miex nawh." ²⁷ Siyiex ah nin ka Mose, "Tiiem ti deuh gumlox in khankix, grawh grawng nawh awm gumlox ceu pa kied ting ceu in, Aux tak yuh sijax mukheu mai maix khawm ceu pui Isarelax khankix." ²⁸ Mose ot tau mai Siyiex tan, tixpon singaix tixpon sawm, nawh ang ih priex mai ang nyaux rawm, Nawh Cao tiiem gumlox sijax mukheu ka piang khlawp simaox an, pa mawh gumlox pingnyap kao gum heue. ²⁹ Yam lih Mose khaing piang gawng Sina mai khlawp simaox gumlox pingnyap ra mu koe daux taix Mose, yam lih nawh khaing ka piang gawng. Mose ang tawng ka riang hak nex pakngai tix, yam sikah nawh tau mai Nawh Cao. ³⁰ Yam jhak Arun mai ceu pui Isarelax khankix ka Mose, yaox hak nex pakngai nawh hoik riang mai kix koe krax lhat graung sonsang hoek kix dex nawh. ³¹ Mose kok ka kix mai Arun khawm cao kaing hoek ka tix mai sikah tau mai kix. ³² Khaix an ceu pui Isarelax khankix hoek dex nawh mai nawh tawx gumlox pingnyap khankix ka kix, awm gumlox pa hoik sikah Siyiex tau mai nawh khawmuik ka piang gawng Sina. ³³ Yam hoik sikah Mose tau mai kix, nawh tie man ka pakngai tix. ³⁴ Viang mawh nan, yam laig Mose tix sikah tau mai Nawh Cao yam mawx ang ah, nawh plak man tie pakngai an, sivoe ang nawh nyang lih hu ka plak praix mai nawh tak lih plak praix mai krai gumlox ceu pa hoik tawm Siyiex ka ceu pui Isarelax khankix. ³⁵ Yam yaox ceu pui Isarelax khankix ka pakngai Mose yam mawx ang ah, hak nex pakngai Mose riang, Mose tak baox deeh tie pakngai tix ka man tie, tom hoek bawg yam laig sikah nawh tau mai Nawh Cao heue.

¹ Mose kraix khrawm cub pui hun ceu pui Isarelax khankix ah nin, "Inkix mawh gumlox pa hoik tawm Siyiex ka pex sonsang hawt yuh pex ka." ² "Yuh kaing ka daux liah singaix, singaix aliah mawh singaix pa singax singeh mai mawh singaix twah singaix laux lee son Siyiex, can pui pa yuh kaing ka daux singaix an, tak kieh nawh yum." ³ "Maix tak ang pon ti phlu ngu, ka dee ot tix daux singaix twah." ⁴ Mose krai ka cub pui hun ceu pui Isarelax khankix ah nin, "In mawh ceu pa hoik tawm Siyiex. ⁵ Ka daux pex pa sang tan son Siyiex, can pui pa koe rhawm rhi kieh nawh viex an khankix hoek tan ka Siyiex, can pa mawh khri mau mai tawng, ⁶ man pa klai raoma, man lung pliex, man raoh rawt, man keei ceu pa mhawm mai hauk pex khankix. ⁷ Hak yung mhaing pa siang tix raoh, hak phix mai khaox Akashax, ⁸ "Bee tok mai bee groi mai ceu pa sioe bhawng son nyawng bhawng pa sang gleeing, ⁹ "Siang simaox bawd raoh mai siang simaox tang ceu khankix pa sang sau daux kraung ceep sibex dhah dawd taix mai ka daux man tie naok heue." ¹⁰ "Can pui pa koe pingnya ka kaing khawmuik daux sinax pex, tak hoek mai yuh kaing ceu pa hoik tawm Siyiex khawmuik, ¹¹ "Nyiex gox bwan man mai pa tawb ka piang nyiex gox, can ceu gok, khaox phia mai lat mai rong mai daux jhup jaong khankix, ¹² "khui bwan sijax mukheu mai khaox glawm mai diep khui bwan dang ngeung krax pa caux rhawm mai man tieb pa sang tie khankix. ¹³ Pheen mai khaox glawm nawh mai kraung pa shiao khankix mai blah pa khan ka plak sivoe ngai Siyiex, ¹⁴ Pang jawk ten khri mai kraung pa shiao tau mai an mai kawk ngu mai bee tok." ¹⁵ "Khu dee tan dee gleeing kix nyawng bhawng mai khaox glawm khankix mai bee groi mai ceu pa sioe bhawng son nyawng bhawng pa sang gleeing mai man tieb diang siviex dee laig kix ka daux nyiex gox bwan man, ¹⁶ khu tan dee tan krax tan pa gleeing tau mai grheeng tawng mai khaox glawm nawh mai pa shiao tix khawmuik mai pan khoek khawm caong nawh, ¹⁷ man pa sang vhak tix daux biang nyiex gox bwan man mai rong khaox nawh khankix mai jhup jaong daux nawh khankix mai man tie ka diang siviex dee laig kix ka daux biang nyiex gox bwan man, ¹⁸ mai lhak nyiex gox bwan man khankix, lhak pa shiao son daux biang nyiex gox bwan mai maox nawh khankix khawm ra plak. ¹⁹ Kraung ceep yam yuh cao giex kaing li khankix kaing, ka daux dee pa singax mai kraung ceep pa singax son cao giex kaing li Arun mai kraung ceep son kawn simex nawh khankix yam yuh kix kaing heue." ²⁰ Cub pui hun Isarelax khawmuik li hu khaing sivoe Mose. ²¹ Can pui ku kaux pa ceh daux rhawm rhi mai can pui ku kaux pa koe rhawm khankix, viex krax tan tix ka Siyiex, son pa yuh kix nyiex gox bwan man, bang kum pui hun, grawng kaing jhaw Nawh khawmuik mai son kraung ceep pa singax khankix. ²² Kix khawm simex mai bun, awm pa koe rhawm tix mai kix viex ble, krim meeh, jheep giien mai kong nhang khankix mai kraung khri kraung mau khawmuik, pui ku kaux tawx ceu pa tan pa mawh khri ka Siyiex. ²³ Pui ku kaux viex man klai raoma man lung pliex man raoh rawt man pa taing tix ka keei ceu pa mhawm, hauk pex khankix, hak pex pa siang tix raoh mai hak phix khankix hoek. ²⁴ Can pui ku kaux pa tan ka mau mai tawng khankix kawx mai viex hoek sonsang tan ka Siyiex mai pui ku kaux pa koe khaox Akashax khankix viex hoek tawx sonsang shiao ka kaing jhaw Siyiex. ²⁵ Bun pa chix taing khankix, taing man ka taix cao tix, pa mawh man pa klai raoma, man lung pliex mai man raoh rawt tau mai man pa taing tix ka keei ceu pa mhawm khankix hoek. ²⁶ Can bun pa ceh daux rhawm rhi mai pa koe pingnya khawmuik taing hauk pex. ²⁷ Kuad song cao pa kwang piang kix viex siang simaox bawd raoh siang simaox tang ceu khankix pa sang tok kix ka piang kraung ceep sibex dhah dawd taix mai ka piang man tie naok, ²⁸ mai teei ceu pa sioe bhawng yuh nyawng bhawng, bee tok mai bee groi khankix. ²⁹ Ceu pui Isarelax khankix, viex ceu pa tan hoek ka Siyiex, awm pa koe rhawm kix ti tawx, can simex bun pa koe rhawm ti viex kraung kuceu, pa hoik chix yuh kix, son kaing kuceu khawmuik, ka Siyiex kix yuh awm gumlox pa hoik tawm Siyiex ka Mose. ³⁰ Mose ah nin ka ceu pui Isarelax khankix, "Nghiet heue, Siyiex hoik kok ka ceu kaux Bezalelax pa mawh kawn simex Urix, Urix pa mawh kawn simex Hurax, pa mawh doeh ru pui Yudax, " ³¹ Nawh hoik naog ka khwan Siyiex, pa kieh koe pingnya mai daux krax pa chix keud yuh mai krax tawng pa chix yuh grawng kaing kuceu, ³² "Kaing pa chix yuh riang grang kuceu ka khri, ka mau mai tawng khankix, ³³ pa chix pat chix kleuk ka siang simaox khankix, pa chix saik riang grang ka khaox mai pa min ka grawng kaing kuceu khawmuik. ³⁴ Nawh Cao hoik tawx krax keud krax chix kuceu daux rhawm rhi nawh mai ka Ahawliba kawn simex Ahisamat doeh ru Dan, sonsang deeh chix gau sawn kiex ka pui khankix. ³⁵ Nawh Cao hoik kieh kix grum naog ka pingnya pa chix pa min ka kaing kuceu, son kaing pa saik mai kaing pa chix yuh pakpeung kuceu mai kaing pa chix taing man kuceu, sonsang taing kix man pa klai raoma, man lung pliex, man raoh rawt mai man keei ceu pa mhawm mai kaing krax chix taing pakpeung kuceu khankix heue."

¹ Bezalelax mai Ahawliba mai can pui pa chix yuh kaing taix awm pa koe piangnya cuyi kix, pa hoik sau Siyiex pingnya daux rhawm kix mai pa chix keud yuh, sonsang tawng kix ti yuh kaing khawmuik mai son kaing jhaw dee pa singax singeh, kix tak yuh an awm lox tawm Siyiex." ² Mose kok ka Bezalelax, Ahawliba mai can pui pa chix yuh kaing taix ku kaux, pa hoik tawx Siyiex pingnya daux rhawm kix mai pui ku kaux pa ceh rhawm rhi ti yuh kaing khankix hoek ti yuh kaing. ³ Kix rieb ti teei kraung pa tan ceu pui Isarelax khankix khaing Mose, pa mawh kraung pa viex kix hoek, son kaing jhaw pa sang yuh kix dee pa singax mai kix baox viex kraung pa tan hoek awm pa koe rhawm kix ku ngawb. ⁴ Khaix an can pui pa yuh kaing taix khankix mai pa yuh kaing kuceu, son dee pa singax singeh hoik naox kaing jhaw pa yuh tix mai tang ing kaux mawx kaux an, ⁵ mai kix hoek krai ka Mose ah nin, "Pui khankix hoik viex pa nie lheu khaing pa kub shiao ex son kaing jhaw pa hoik tawm Siyiex ka ex." ⁶ Mose tawx lox kieh kix krai pao pui pa ot daux nyiex bang mhong ah nin. "Simex ang ah, bun ang ah, paw lai baox viex kraung pa tan dee pa singax singeh hoek." Pui khankix deeh yoi khaing krax tan tix. ⁷ Grawh grawng nawh, kraung pa pon kix, hoik kub hoik naog son kaing pa sang yuh kix khawmuik hoik nie tete heue. ⁸ Can pui pa chix yuh kaing kuceu daux sinax kix pa mawh pui pa koe pingnya daux rhawm khankix, yuh man tie kao plah ka man pa hoik taing ti ka keei ceu pa mhawm, pa mawh man pa klai raoma, man lung pliex mai man pa raoh rawt mai kix yuh riang grang Cherubin ka piang man an, awm pa chix yuh kix. ⁹ Krax lang man tie ku plah koe tixnga daix sawk, krax vieh koe pon sawk mai man tie an sidu tau khawmuik. ¹⁰ Kix kleuk ti caing man tie an phwan pheen lih mawh tix pheen mai baox kleuk ti caing pa deuk an phwan pheen mawh tix pheen. ¹¹ Nawh yuh daux jhup maox koe ka praok man tie ka man pa klai raoma see dee sitoe kix ti caing ku pheen, awm pa hoik yuh ka piang praok ka praix man tie an tix pheen, pa mawh man tie ra pheen tix pheen. ¹² Nawh yuh daux jhup maox koe tixphwan daux, ka piang man tie tix pheen mai baox yuh daux jhup maox koe tixphwan daux ka praok plak laong ka man tie an ra pheen tix pheen mai kieh daux jhup maox an lai giex man tie an tix pheen hoik tix pheen. ¹³ Nawh yuh grok vhak khri tixphwan mu mai brawm man tie an tau ka kraung pa vhak an, sonsang lih ti mawh nyiex gox bwan man tix lhang. ¹⁴ Nawh yuh man tawb braux nyiex gox bwan man ka hak pex mai yuh koe kao tix pheen. ¹⁵ Krax lang man tawb braux an ku mu, koe tixngoe sawk mai krax vieh koe pon sawk, man tawb braux an kao tix pheen, mawh pa sidu tau. ¹⁶ Nawh kleuk ti caing man tie an phwan pheen lih mawh tix pheen mai man tieb an liah pheen baox kleuk mawh tix pheen tau. ¹⁷ Nawh yuh daux jhup maox koe tixphwan daux ka piang praok man tie an see plak praix tix pheen mai nawh baox yuh daux jhup maox koe tixphwan daux ka piang praok man tie an pa mawh ra pheen tix pheen. ¹⁸ Nawh baox yuh grok ka tawng tixphwan mu, sonsang kleuk man tawb nyiex gox bwan man tau mai kieh mawh tix lhang khaing. ¹⁹ Nawh yuh pa tawb braux nyiex gox bwan man ka hak yung pa hoik siang raoh mai deeh yuh pa tawb piang an ka hak phix. ²⁰ Son nyiex gox bwan man, nawh yuh phia jung ka khaox Akashax khawmuik. ²¹ Krax lang phia ku plah koe kao sawk mai krax viex ku plah koe tix sawk mai tix diex. ²² Phia ku plah kieh kawp tix ka lat ra mu, sonsang kleuk paox tix, mawh kheu nan nawh yuh phia an khankix son nyiex gox bwan man awm paox tix. ²³ Nawh baox deeh yuh khaox phia khankix son nyiex gox bwan man tixnga plah, son pa sang sau ka plak seh. ²⁴ Nawh yuh daux jhup jaong tixpon mu ka mau mai kieh koe greem khaox phia an tixnga plah. Ka greem phia tix plah kieh daux jhup jaong koe ra mu, son lat ra mu mai daux jhup jaong ra mu ka greem phia an tix plah mai son lat ra mu. ²⁵ Son plak laong nyiex gox bwan man pa koe plak an tix plak, nawh yuh phia koe tixnga plah, ²⁶ daux jhup jaong an khankix tixpon mu, pa yuh tix ka mau. Kieh daux jhup jaong koe ra mu greem phia tix plah mai baox kieh daux jhup jaong koe ra mu ka phia an tix plah. ²⁷ Son plak klip singaix nyiex gox bwan man, nawh yuh phia koe liah plah. ²⁸ Nawh baox deeh yuh phia ra plah son daog plak khaix nyiex gox bwan man khankix khawm ra daog. ²⁹ Deeh kleuk an khankix ka plak greem mai ka plak toh tau ka daux jhup tix mu, mawh kheu nan nawh yuh ceu an khawm ra, son ra daog. ³⁰ Phia koe daix plah, khawm daux jhup jaong hankix kao liah daux pa yuh ka mau mai kieh daux jhup jaong koe ra mu ka greem phia an khankix ku plah. ³¹ Nawh yuh khaox jhong pa sang chup ka khaox Akashax tix plak phwan gawng pa sang chup ka phia an khankix, ³² mai nawh baox yuh khaox jhong phwan gawng pa sang chup tix ka khaox phia an khankix son praok nyiex gox bwan man ka plak an tix plak mai khaox jhong pa sang chup tix ka phia an phwan gawng son praok pa koe ka plak klip singaix. ³³ Nawh yuh khaox jhong pa sang chup tix ka daux sigreung phia an khankix, sonsang chix laig tom hoek ka toh an tix plak mai plak an tix plak. ³⁴ Nawh om phia an ka rawm khri mai yuh daux jhup khankix ka khri, sonsang ra lai giex khaox jhong pa hoik chup tix tau, nawh deeh om khaox jhong pa hoik chup an ka khri. ³⁵ Nawh yuh man tie pa taing tix pheen ka man pa klai raoma mai man lung pliex mai man raoh rawt pa hoik taing ka keei ceu pa mhawm. Man an khankix hoik taing tix ka grawng pa chix keud ti mai kix yuh riang grang Cherubin ka piang. ³⁶ Nawh yuh rong khaox pon mu, ka khaox Akashax mai om ka khri, khawm grok khri pa koe ka rong mai deeh raug daux jhup jaong pon mu ka mau son rong an khankix. ³⁷ Nawh baox deeh yuh man tie diang siviex nyiex gox bwan man tix pheen, ka man pa hoik taing tix pa mawh man klai raoma mai man lung pliex mai man raoh rawt mai man pa taing ti ka keei ceu pa mhawm khaing cao pa taing man tix kaux, ³⁸ kieh rong khaox an phwan mu grum tau mai grok nawh khankix mai nawh om kaing rong an khankix mai toh lat ka khri, viang mawh nan, daux jhup jaong phwan mu yuh ka tawng heue.

¹ Bezalelax yuh khui bwan sijax mukheu ka khaox Akashax, krax lang koe ra sawk mai tix diex, krax vieh koe tix sawk mai tix diex, krax lhaong koe tix sawk mai tix diex. ² Nawh om khri naw plak daux mai plak praix mai kawb rhang khri ka hawt vung viang gawng nawh khawmuik. ³ Nawh raug daux jhup khri pon mu, sonsang sau nawh ka daog khui pon daog, daux jhup khri an sau tix plak ra mu. ⁴ Nawh yuh khaox glawm ka khaox Akashax mai om khri ka piang an. ⁵ Nawh sau khaox glawm an ka daux jhup khri pa koe ka praok khui bwan, sonsang pon klawm kix ka khui bwan an. ⁶ Nawh baox deeh yuh dangngeung krax pa caux rhawm ka khri nawnaw, krax lang koe ra sawk mai tix diex krax vieh koe tix sawk mai tix diex. ⁷ Nawh yuh riang Cherubin ra mu ka khri pa hoik raug tix mai deuh ka piang dangngeung krax pa caux rhawm an tix plak tix mu. ⁸ Riang Cherubin di pruik tix kheem ka piang dangngeung pa caux rhawm an mai kieh pakngai Cherubin khankiex ra lai veeh ka paox tix ka piang dangngeung krax pa caux rhawm an. ⁹ Riang Cherubin di pruik tix ka piang mai kheem dangngeung krax pa caux rhawm an ka pruik tix mai kieh pakngai Cherubin khankiex jhak simi ka paox tix, ka piang dangngeung krax caux rhawm an heue. ¹⁰ Nawh yuh pheen ka khaox Akashax, plak lang koe ra sawk, plak vieh koe tix sawk mai plak lhaong koe tix sawk. ¹¹ Nawh om an ka khri nawnaw mai kawb rhang khri khankix hawt gawng vung viang praok khawmuik. ¹² Nawh baox yuh khaox lat praok pheen pa vieh been tix tiag taix, ka praok vung viang pheen mai kawb khri hawt vung viang praok an khawmuik. ¹³ Nawh raug daux jhup khri pon mu ka son pheen an mai sau daux jhup khri an khankix ka daog pon daog ka piang caong pheen pon mu. ¹⁴ Daux jhup khri koe dex hawt khaox lat praok pheen ka dee chup khaox yam klawm kix pheen an hu. ¹⁵ Nawh yuh khaox glawm ka khaox Akashax, sonsang klawm kix pheen hu mai om khri ka an. ¹⁶ Nawh yuh kraung shiao piang pheen khankix ka khri nawnaw, pa mawh pan, klong, lawk tuh mai kawk nyaux sonsang lhauk ankix kah heue. ¹⁷ Nawh baox yuh pang jawk ten khri ka khri nawnaw, jaong num, pang nawh, klong nawh, plix nawh mai riang tai pa pruh hoik mawh pa tawk kleuk tau khawm kreng. ¹⁸ Kak liah mu pa lih khaing jawk ten khri an ra plak mai lih khaing jawk ten khri plak in loe mu, plak an loe mu. ¹⁹ Piang kak pa koe plak in koe klong loe mu pa awm pakpeung pruh tai khaox Batan mai koe plix koe tai, ka piang kak pa koe plak an kawx koe klong loe mu pa awm pakpeung pruh tai khaox Batan mai koe plix koe tai, ka kak pa lih ka khaing jawk ten khri an khawm liah kak, tak awm an khawmuik. ²⁰ Ka piang jawk ten khri an, koe klong pon mu, pa yuh awm pakpeung pruh tai khaox Batan, khawm plix nawh mai pruh tai nawh. ²¹ Ka greem kak pa lih khaing pang jawk ten khri ra mu, koe plix pa hoik kleuk tix tau mai kak an ra mu, kak khankix liah mu pa lih khaing pang jawk ten khri hoik yuh nan khawmuik. ²² Plix nawh mai kak nawh khankix mawh pa kleuk tix tau mai pa hoik tawk ti yuh ka khri nawnaw tau. ²³ Nawh yuh kawk ngu aliah mu mai sigiiep ngu mai tawg nyaox khankix ka khri naw. ²⁴ Nawh yuh pang jawk ten khri mai kraung pa shiao khankix ka khri nawnaw tix talantan heue. ²⁵ Nawh yuh khu dee tan pa gleeing nyawng bhawng ka khaox Akashax, krax lang tix sawk, krax vieh tix sawk, khawm pon daog sidu paox tix, krax lhaong koe ra sawk, rung khankix mawh pa kleuk tix tau mai an khankix. ²⁶ Nawh om khri ka piang an khankix mai praok vung viang mai rung nawh khankix, nawh baox deeh kawb hawt vung viang praok nawh ka rhang khri khawmuik. ²⁷ Nawh yuh daux jhup khri ra mu koe ka greem rhang khri khankix ka plak daog khawm ra plak, sonsang giex khaox glawm yam klawm kix hu. ²⁸ Nawh yuh khaox glawm ka khaox Akashax mai om ka khri heue. ²⁹ Nawh baox yuh bee groi pa singax singeh mai nyawng bhawng pa singax, ka ceu pa jiet nyawm sioe bhawng, awm pa yuh cao sidah ka ceu pa sioe bhawng khankix heue.

¹ Nawh yuh khu dee tan krax tan pa gleeing ka khaox Akashax, plak lang koe phwan sawk, plak vieh koe phwan sawk, plak lhaong koe loe sawk mai daog sidu khawm pon daog. ² Nawh yuh rung koe ka daog pon daog pa kleuk tix tau mai khu dee tan mai om khankix ka tawng. ³ Nawh yuh kraung pa shiao son khu dee tan ka tawng, aw, sipeed, pan, sigawng nex mai pan khoek khankix. ⁴ Nawh yuh grheeng tawng tix mu son khu dee tan mai deuh ka vung viang khu dee tan, jah ka plak caong hoek ka sigreung. ⁵ Nawh raug daux jhup pon mu, son grheeng tawng an pon daog, sonsang chup khaox glawm kah. ⁶ Nawh yuh khaox glawm ka khaox Akashax mai om tawng ka piang an. ⁷ Nawh chup khaox glawm ka daux jhup pa koe praok khu dee tan, sonsang mawh dee klawm kix kah, nawh yuh daux doh ka piang mai plak greem ka phia heue. ⁸ Nawh yuh pan khoek tawng mai caong ka tawng mai deuh siliak tawng ka diang siviex nyiex gox bwan man bang kum pui hun tan, son bun pa khrawm paox tix hoek kum. ⁹ Nawh yuh gwang nyiex bwan plak seh mai vie gwang an ka man taing ceu pa mhawm, lang tix yieh sawk. ¹⁰ Rong khaox son an tixnga gawng, tau mai daux jhup jaong tawng tixnga mu mai grok pa ot ka rong khaox an mai lat khankix mawh pa yuh ka mau khawmuik. ¹¹ Ka plak laong man tie khankix koe tix yieh sawk, tau mai rong khaox tixnga gawng mai daux jhup jaong tawng tixnga mu, grok ot ka rong an khankix mai khaox lat mawh pa yuh ka mau khawmuik. ¹² Plak klip singaix man tie koe tixphwan sawk, tau mai rong khaox kao gawng mai daux jhup jaong kao mu, grok ot ka rong khaox an kix mai lat mawh pa yuh ka mau khawmuik. ¹³ Son plak lih singaix man tie koe tixphwan sawk. ¹⁴ Man tie khankix pa koe ka praok diang siviex tix plak, krax lang koe kao phwan sawk tau mai rong loe rong khawm daux jhup jaong loe mu, ¹⁵ mai krax plak sidu praok diang siviex plak an tix plak, koe man tie lang kao phwan sawk, tau mai rong khaox loe rong, khawm daux jhup jaong loe mu. ¹⁶ Can man pa vie ka hawt vung viang biang khankix, mawh pa taing ka man ceu pa mhawm khawmuik. ¹⁷ Daux jhup jaong rong khaox khawmuik, mawh pa yuh ka tawng mai grok pa koe ka rong mai ka khaox khankix, mawh pa yuh ka mau mai ka toh rong mawh pa om ka mau, khawm can rong khaox pa koe hawt vung viang biang mawh pa kleuk tau mai lat mau. ¹⁸ Man tie vung viang biang siviex khankix, mawh pa taing ka man klai raoma, man lung pliex mai man pa raoh rawt pa taing ka keei ceu pa mhawm, krax lang koe tixnga sawk mai krax lhaong koe phwan sawk awm man tie pa koe vung viang biang an. ¹⁹ Rong khaox pon rong tau mai daux jhup jaong tawng pon mu, grok khankix pa koe ka rong mai lat mawh pa yuh ka mau mai ka piang toh rong mawh pa om ka mau. ²⁰ Can lhak pa tawk ka nyiex gox bwan man mai hawt vung viang biang khawmuik mawh pa yuh ka tawng heue. ²¹ Inkix mawh carang yuh kix nyiex gox bwan man, pa mawh nyiex gox bwan man khui pa kham sakse, awm pa hoik simin kix khaing gumlox pa krai Mose, son kraung pa hoik shiao ceu pui Lewix khankix, khaing daux tawm taix Itama kawn simex cao giex kaing li Arun. ²² Bezalelax kawn simex Urix, Urix pa mawh kawn simex Hurax doeh ru Yudax, yuh an kix khawmuik awm gumlox pa hoik tawm Siyiex ka Mose. ²³ Pui pa yuh kaing tau mai nawh, mawh Ahawliba kawn simex Ahisamat doeh ru Dan, nawh mawh pui pa chix yuh kaing taix kuceu mai pa chix yuh riang grang kuceu mai pa chix taing man pa klai raoma, man lung pliex man raoh rawt mai pa chix taing ka keei ceu pa mhawm khawmuik. ²⁴ Can khri pa shiao kix ka daux kaing jhaw son dee pa singax, mawh khri pa tan kix khawmuik, koe tixnga dim Talantan mai aliah yieh tixngoe Shekhe, awm pa sawn kix ka plak jiang dee pa singax. ²⁵ Kraung mau pa hoik yuh kix carang, pa pon kix khaing cub pui haoh hun khankix, koe tix yieh Talantan mai tix rheng aliah yieh atixgliah phwan Shekhe, awm pa hoik sawn kix jiang dee pa singax. ²⁶ Jah ka pui pa koe ju tixnga num tom haok ka piang, pa hoik simin carang koe pui liah sien mai loe rheng phwan yieh tixphwan kaux, kix mawh pui pa yaox ti tawx mau tix plak shekhe awm pa hoik sawn kix jiang dee pa singax. ²⁷ Khaing mau an tix yieh Talantan, kix raug daux jhup jaong khankix ka dee pa singax singeh mai daux jhup jaong ka plak caong man tie, kix yuh daux jhup jaong tix yieh mu ka mau tix yieh Talantan, son daux jhup jaong tix mu caw ti mawh mau tix Talantan. ²⁸ Khaing mau an tix rheng aliah yieh atixgliah phwan Shekhe, nawh yuh grok pa ot ka rong khankix mai son pa om nawh ka piang toh rong mai yuh lat ka mau an kix. ²⁹ Tawng pa tan kix khawmuik koe atixgliah Talantan mai ra rheng pon yieh Shekhe. ³⁰ Khaing ankix, nawh yuh daux jhup jaong, son diang siviex nyiex gox bwan man bang kum pui hun mai khu tawng dee tan, grheeng tawng mai can kraung pa shiao kix ka khu dee tan. ³¹ Daux jhup jaong khankix hawt vung viang biang, son daux jhup jhaong diang siviex biang, son lhak nyiex gox bwan man mai son lhak pa shiao kix hawt vung viang biang heue.

¹ Kix caing kraung ceep pui pa yuh kaing krup ka Siyiex ka man klai raoma, man lung pliex mai man raoh rawt, sonsang yuh kix kaing ka dah dee pa singax mai caing kraung ceep pa singax son Arun, awm gumlox pa hoik tawm Siyiex ka Mose. ² Nawh caing sibex dhah dawd taix ka keei khri tau mai man klai raoma, man lung pliex mai man raoh rawt, pa hoik taing ka keei ceu pa mhawm. ³ Kix tawk khri lih mawh khlawp rhi mai kip lih mawh keei khri sonsang caing ka man klai raoma, man lung pliex mai man raoh rawt pa hoik taing ka keei ceu pa mhawm ka kaing ceu pa min. ⁴ Kix caing maox rawd piang klip sibex dhah dawd taix ra nyaing, sonsang kleuk tau mai kieh toh maox an ra plak kleuk paox tix. ⁵ maox pa taing son pa rawd piang klip sibex dhah dawd taix an, hoik awm krax grawng pa taing kix ka khri tau mai man klai raoma, man lung pliex, man raoh rawt, pa taing ka keei ceu pa mhawm, awm lox pa hoik tawm Siyiex ka Mose. ⁶ Baox teei siang simaox bawd raoh ra mu mai saik ceu kaux kawn simex ceu pui Isarelax khankix ka daux, awm ngai lai cum mai sau ka daux jawk aw simaox khri. ⁷ Nawh sau siang simaox an ra mu ka piang klip sibex dhah dawd taix, sonsang mawh siang simaox ra mu pa doh keud, son kawn simex ceu pui Isarelax khankix awm lox pa hoik tawm Siyiex ka Mose heue. ⁸ Nawh yuh man tie naok ka man pa chix taing kix kuceu awm krax grawng pa caing kix sibex dhah dawd taix ka khri ka man klai raoma, man lung pliex, man raoh rawt, pa hoik taing ka keei ceu pa mhawm. ⁹ Kix yuh man tie naok an sidu pon daog mai kix niiep kieh gawp piang paox tix, krax lang koe tix diex mai krax vieh koe tix diex. ¹⁰ Kix sau siang simaox ka daux rhoi khawm pon rhoi, kix tom sau siang simaox raoh, siang simaox raoh eem mai siang simaox yi raoh ka rhoi tix, ¹¹ ka rhoi ra, kix sau siang simaox klai, siang simaox klai riex mai siang simaox paing. ¹² Ka rhoi loe, kix sau siang simaox klai singi, siang simaox lung pliex mai siang simaox raoh klai, ¹³ Ka rhoi pon, kix sau siang simaox raoh toh, siang simaox paing pau mai siang simaox pa toh riang, kix sau siang simaox ankix ka daux jawk aw khri pa hoik raug tix khankix. ¹⁴ Siang simaox koe kao ra mu, awm ceu kaux kawn simex Isarelax khankix, ceu kaux kix hoik saik ti deuh awm cum ngai lai, son siang simaox tix mu, hoik tang koe ceu kaux cao kix ka piang, awm koe doeh ru kix kao ra ceu. ¹⁵ Kix yuh maox khri ka plak toh man tie naok, awm maox pa hoik duing tau ka khri. ¹⁶ Kix baox yuh jawk aw khri ra mu mai daux jhup khri ra mu mai sau ka piang toh man tie naok khawm ra plak. ¹⁷ Kix sau maox khri pa hoik duing tau ra nyaing, daux jhup khri ra mu, pa koe ka toh man tie naok an. ¹⁸ Kix deeh phyawk toh maox khri an ra nyaing ka daux jawk aw khri ra mu mai deuh ka piang maox rawd klip, pa koe plak sivoe ngai sibex dawd taix. ¹⁹ Kix yuh daux jhup khri ra mu mai sau ka greem toh praok man tie naok, pa koe ka daux sibex dhah dawd taix. ²⁰ Kix baox yuh daux jhup khri ra mu mai sau ka piang maox rawd klip an ra nyaing, ka plak greem sivoe ngai sibex dhah dawd taix, ka plak piang dee sitoe tix tau mai maox rawd klip sibex dawd taix an. ²¹ Kix teei ka maox klai raoma tix nyaing, pa hoik taing ti ka keei ceu pa mhawm mai phyawk ka man tie naok mai chup ka daux jhup khri pa koe ka sibex dhah dawd taix, son ang man tie naok pon tix tang tiah khaing sibex dhah dawd taix, awm lox pa hoik tawm Siyiex ka Mose heue. ²² Nawh yuh sibex dhah jiet khaw peung mai sibex dhah dawd taix ka man klai raoma khawmuik. ²³ Kieh dee paoh koe tix mu ka daux sibex dhah plak piang an, son ang chix griah, kix caing praok vung viang dee paoh an, khawmuik ka keei pa kab tix tau. ²⁴ Kix yuh plix sibex pa awm plix kla cang, hawt vung viang caong sibex dhah plak piang an, ka man klai raoma, man lung pliex man raoh rawt pa hoik taing tix ka keei ceu pa mhawm. ²⁵ Kix yuh hing plix sibex ka khri naw mai sau hing plix sibex an sinax plix sibex pa awm plix kla jiang pa koe ka hawt vung viang caong sibex dhah plak piang an. ²⁶ Kieh hing plix sibex tix mu kham ka sinax plix sibex pa awm plix kla cang, ka hawt vung viang caong sibex dhah plak piang yam yuh kaing Siyiex, awm lox pa hoik tawm Siyiex ka Mose. ²⁷ Kix yuh sibex dhah plak daux pa ceep Arun mai kawn simex nawh khankix ka man ceu pa mhawm pa min taing kix, ²⁸ mai yuh lawk kaing, mhok mai khlax ka man ceu pa mhawm, ²⁹ kix yuh maox rawd nyoi tix nyaing ka man klai raoma, man lung pliex mai man raoh rawt pa taing tix ka keei ceu pa mhawm awm lox tawm Siyiex ka Mose. ³⁰ Kix yuh khlawp mhok khri pa singax ka khri nawnaw mai tiiem ngai lai ka piang mhok an, awm cum pa hoik saik tix daux tix mu pa ah nin "Kieh Mawh Pa Singax Singeh ka Siyiex." ³¹ Kix phyawk khlawp khri ka maox klai raoma tix nyaing, ka piang man lawk kaing, awm lox pa hoik tawm Siyiex ka Mose. ³² Mawh kheu nan, can kaing nyiex gox bwan man bang kum pui hun hoik khawmuik mai ceu pui Isarelax khankix, yuh awm ankix, awm lox pa hoik tawm Siyiex ka Mose. ³³ Kix viex nyiex gox bwan man hoek ka Mose, khawm man tie mai can kraung pa shiao khankix, pa mawh grok, phia, jhong, rong mai khawm daux jhup jaong khankix, ³⁴ hak yung pa hoik siang tix raoh, mai hak phix pa sang lhop mai man tie plak daux khankix, ³⁵ khui bwan sijax mukheu pa kham sakse tau mai khaox glawm mai dawb khui bwan mai dang ngeung krax pa caux rhawm, ³⁶ pheen khawm kraung pa shiao khawmuik mai blah pa khan plak sivoe Nawh Cao, ³⁷ pang jawk ten khri nawnaw tau mai kawk ngu, kawk ngu pa deuh dee mawx dee an khawm kraung pa shiao khawmuik mai bee tok, ³⁸ Khu khri dee tan, bee groi mai ceu pa sioe bhawng mai man tie ka diang siviex nyiex gox bwan man, ³⁹ Khu tawng dee tan, grheeng tawng, khaox glawm mai kraung nawh khawmuik, pan khoek khawm caong nawh, ⁴⁰ man tie khankix son vung viang biang rong mai daux jhup jaong, man tie son diang siviex biang mai maox nawh mai lhak tawk khankix, pa mawh kraung pa shiao son nyiex gox bwan man, bang kum pui hun, ⁴¹ kraung ceep yam yuh kaing jhaw khankix, sonsang yuh kix kaing krub ka dee pa singax, kraung ceep pa singax son Arun mai kraung ceep kawn simex nawh khankix, yam yuh kix kaing cao giex kaing li. ⁴² Awm lox pa hoik tawm Siyiex ka Mose, ceu pui Isarelax khankix yuh ceu ankix khawmuik. ⁴³ Mose jhak ka kaing pa yuh kix khawmuik mai kix yuh awm lox pa hoik tawm Siyiex khawmuik mai Mose nawb bwan ka piang kix heue.

¹ Siyiex ah nin ka Mose, ² "Ka daux khix tix, tix ngaix maix tak sum nyiex gox bwan man bang kum pui hun. ³ Maix tak deuh khui bwan sijax mukheu daux lawg mai tie ka man tie. ⁴ Maix tak viex pheen hoek tau mai can kraung pa shiao ka piang mai khre ti deuh kraung nawh khankix mhawm mhawm maix tak viex pang jawk ten khri hoek mai tok kawk ngu khankix. ⁵ Maix tak baox deuh khu khri dee tan, dee tok kix nyawng bhawng, ka plak sivoe khui bwan pa kham sakse mai sau man tie khankix, ka diang siviex nyiex gox bwan man. ⁶ Maix tak deuh khu dee tan krax tan pa gleeing ka plak sivoe siviex nyiex gox bwan man bang kum pui hun. ⁷ Maix tak deuh pan khoek sinax nyiex gox bwan man bang kum pui hun mai khu dee tan mai sau ti deuh rawm ka daux. ⁸ Maix tak jung tix priex man tie hawt vung viang biang mai vhak ka dee laig kix daux siviex biang. ⁹ Maix tak teei bee groi mai kraix ka nyiex gox bwan man mai ka can pa koe plak daux khawmuik maix tak kieh nawh singax khawmuik mai khankix tak mawh pa singax singeh. ¹⁰ Maix tak kraix ka khu dee tan krax tan pa gleeing mai can kraung pa shiao khawmuik mai kieh khu dee tan an singax, an tak mawh pa singax khaing paox tix. ¹¹ Maix tak kraix ka pan khoek mai caong nawh khankix mai kieh nawh mawh pa singax. ¹² Maix tak viex Arun mai kawn simex nawh khankix hoek ka diang siviex nyiex gox bwan man bang kum pui hun tan mai heem kix. ¹³ Maix tak tawx Arun ceep kraung pa singax singeh mai groi nawh ka bee, kieh nawh singax sonsang yuh nawh kaing cao giex kaing li Aux. ¹⁴ Maix tak viex kawn simex nawh khankix hoek mai tawx kix ceep sibex dhah plak daux. ¹⁵ Maix tak groi bee ka kix, awm hoik groi maix ka keeing kix, sonsang yuh kix kaing cao giex kaing li Aux, ka can pa hoik groi maix bee khankix, tak mawh pa kieh kix yuh kaing cao giex kaing li tom sidah doeh ru kix tix ju hoik tix ju leeing ju." ¹⁶ Mose yuh an khankix awm lox pa hoik tawm Siyiex khawmuik. ¹⁷ Daux num ra, khix tix, tix ngaix, kix yaog jung nyiex gox bwan man mai sum kah. ¹⁸ Mose yaog ti sum nyiex gox bwan man, sau daux jhup jaong mai tok ka phia, sau jhong mai jung rong nawh khankix. ¹⁹ Nawh nih man lhop ka piang nyiex gox bwan man mai sau braux ka piang choek an, awm lox pa hoik tawm Siyiex ka nawh. ²⁰ Nawh teei khlawp simaox pingnyap sau ka daux khui, chup khaox glawm ka daux jhup khui mai sau dawb dang ngeung krax pa caux rhawm, ka piang khui. ²¹ Nawh viex khui laig daux nyiex gox bwan man mai vhak man tie, sonsang tie nawh lawg dee koe teug awm lox pa hoik tawm Siyiex ka nawh. ²² Nawh deuh pheen daux nyiex gox bwan man, bang kum pui hun, ka praok plak laong nyiex gox bwan man, ka plak praix man tie an khankix, ²³ khan kheu blah ka piang pheen ka plak sivoe ngai Siyiex, awm lox pa hoik tawm Siyiex ka Mose. ²⁴ Nawh deuh pang jawk ten khri, ka daux nyiex gox bwan man bang kum pui hun, see dee koe pheen plak an, ka plak seh nyiex gox bwan man, ²⁵ Nawh tok kawk ngu an khankix sivoe Siyiex, awm lox pa hoik tawm Siyiex ka Mose. ²⁶ Nawh deuh khu khri dee tan, ka daux nyiex gox bwan man bang kum pui hun ka plak sivoe man tie, ²⁷ mai nawh gleeing nyawng bhawng pa sioe bhawng ka piang an, awm lox pa hoik tawm Siyiex ka Mose. ²⁸ Nawh vhak man tie khankix, ka diang siviex nyiex gox bwan man. ²⁹ Nawh deuh khu dee tan krax tan pa gleeing ka plak sivoe siviex nyiex gox bwan man bang kum pui hun mai tan krax tan pa gleeing mai krax tan phawng nghox ca im ka piang an, awm lox pa hoik tawm Siyiex ka Mose. ³⁰ Nawh deuh pan khoek sinax nyiex gox bwan man bang kum pui hun mai dee tan, nawh sau ti deuh rawm ka daux sonsang khoek kix ti ka, ³¹ Mose mai Arun khawm kawn simex nawh khankix khoek taix caong tix ka rawm an. ³² Yam laig kix ka daux nyiex gox bwan man bang kum pui hun mai yam hoek kix dex khu dee tan, kix khoek taix caong tix awm lox pa hoik tawm Siyiex ka Mose. ³³ Nawh yaog ti jung man tie, hawt vung viang biang nyiex gox bwan man mai khu dee tan khawmuik mai nawh vhak man tie khankix ka diang siviex laig kix uik, mawh kheu nan, Mose hoik yuh kaing in khankix khawmuik heue. ³⁴ Yam an paiawm ceep ka piang nyiex gox bwan man bang kum pui hun mai min pakngai Siyiex grum naog ka daux nyiex gox bwan man. ³⁵ Mose ang pon laig ka daux nyiex gox bwan man bang kum pui hun kheu hoik ceep paiawm ka piang mai min pakngai Siyiex hoik grum naog ka daux nyiex gox bwan man. ³⁶ Yam hoik deeh haok paiawm khankix khaing piang nyiex gox bwan man ku bawg, ceu pui Isarelax khankix lih hu krax hu tix. ³⁷ Phan paiawm ang nyang haok khaing tan, kix ang nyang hu krax hu tix, krox tom hoek singaix deeh haok paiawm. ³⁸ Mawh kheu ponngaix paiawm Siyiex koe ka piang nyiex gox bwan man mai yam ponsawm koe ngu pa jhan riang ka piang sivoe nyiex ma ceu pui Isarelax khanix, ka daux krax hu kix leeing lang krax heue.