1234567891011121314151617181920212223242526272829303132333435363738394041424344454647484950
12345678910111213141516171819202122232425262728293031323334353637383940
123456789101112131415161718192021222324252627
123456789101112131415161718192021222324252627282930313233343536
12345678910111213141516171819202122232425262728293031323334
123456789101112131415161718192021222324
123456789101112131415161718192021
1234
12345678910111213141516171819202122232425262728293031
123456789101112131415161718192021222324
12345678910111213141516171819202122
12345678910111213141516171819202122232425
1234567891011121314151617181920212223242526272829
123456789101112131415161718192021222324252627282930313233343536
12345678910
12345678910111213
12345678910
123456789101112131415161718192021222324252627282930313233343536373839404142
123456789101112131415161718192021222324252627282930313233343536373839404142434445464748495051525354555657585960616263646566676869707172737475767778798081828384858687888990919293949596979899100101102103104105106107108109110111112113114115116117118119120121122123124125126127128129130131132133134135136137138139140141142143144145146147148149150
12345678910111213141516171819202122232425262728293031
123456789101112
12345678
123456789101112131415161718192021222324252627282930313233343536373839404142434445464748495051525354555657585960616263646566
12345678910111213141516171819202122232425262728293031323334353637383940414243444546474849505152
12345
123456789101112131415161718192021222324252627282930313233343536373839404142434445464748
123456789101112
1234567891011121314
123
123456789
1
1234
1234567
123
123
123
12
1234567891011121314
1234
12345678910111213141516171819202122232425262728
12345678910111213141516
123456789101112131415161718192021222324
123456789101112131415161718192021
12345678910111213141516171819202122232425262728
12345678910111213141516
12345678910111213141516
12345678910111213
123456
123456
1234
1234
12345
123
123456
1234
123
1
12345678910111213
12345
12345
123
12345
1
1
1
12345678910111213141516171819202122

Esther

1

1 Khaix hoik luan ceu ankix ka daux baux singaix kwang simiang Ashuerux, in mawh simiang Ashuerux pa hoik kwang haktiex jah khaing haktiex India tom hoek ka haktiex Ethiopia khankix mai nawh kwang ka haktiex tix yieh tixnga aliah baoh heue. 2 Ka daux ngaix ankix, yam hoik ngawm simiang Ashuerux tix mawh simiang piang dang ngeung haktiex cao nawh, pa hoik koe ka daux Shushan pa mawh nyiex tab pa lhaong, 3 ka daux bawg yam kwang nawh ka haktiex daux loe num tix num, nawh yuh pawie son cao kaing nawh mai son kawncau nawh khawmuik mai khawm cao kaing pa koe sibrawm piang haktiex Pasha mai Midix khankix mai cub simiang pa ting lhaong greem nawh khankix mai khawm kawn simiang baoh haktiex an khankix mai sonsang hoek kix ka plak sivoe nawh, 4 yam jhi nawh kix yaox krax pa magmi min plakngai meung haktiex nawh khankix mai khawm krax pa kied haok hwan sibrawm krax kwang krax pang nawh khankix son daux ngaix ankix, mawh tix yieh tixdaix ngaix khawmuik heue. 5 Yam naog ngaix inkix, simiang khan kheu ti yuh pawie pa rheung aliah ngaix son pui khawmuik, pa hoik bleeh ti hoek ka daux nyiex tab lhaong Shushan, jah khaing ka pa ting tom hoek ka pa iak daux gwang piang sipeem nyiex ot simiang heue. 6 Man tieb pa paing mai pa klai raoma khankix hoik phyawk tau mai maox keei man ceu pa mhawm mai hoik teuk teue ti ka maox keei man pa lung pliex an khankix piang jeep mau mai piang rong simaox paing khankix mai ku it ku tawm khankix hoik mawh pa yuh tix ka khri mai man pa koe piang meeh tawm an tix mu pa tawm tix piang simaox paing, siang simaox raoh simaox lheung mai simaox lung khankix heue. 7 Kix khan kheu ti tawx rawm nyaux khankix ka daux kawk khri mai kawk nyaux ankix ku mu hoik tang siyox khaing paox tix, tau mai rawm plix siiet nyaux simiang khankix tom nie, awm krax pa fah rhawm simiang heue. 8 Awm pa koe been krax nyaux ankix ang lai mawh ceu pa sang khin tix nyaux ka. Son grawng an simiang hoik tawx lox ka cub simiang iak pa ot daux nyiex ma nawh khankix, sonsang hawt yuh kix awm krax pa nyawm rhawm kaux pui mawx kaux pui an heue. 9 Laux simiang Vashati baox yuh pawie tix mu son bun khankix ka daux nyiex haw cie simiang Ashuerux heue. 10 Ka daux aliah ngaix tix ngaix, yam gaux rhawm simiang tau mai nyaux ti rawm plix siiet, nawh tawm lox ka Mehuman, Bizata, Habawna, Bigata, Abagata, Zeta mai Kaka khankix pa mawh pui sieh aliah kaux, pa hoik kaing ka daux plak sivoe simiang Ashuerux, 11 sonsang viex laux simiang Vashati hoek ka plak sivoe simiang khawm krax ceep tix mhok khri simiang mai jhi krax pa mhawm grang nawh ka plak sivoe pui khankix, kheu hoik mhawm grang nawh ti jhak heue. 12 Viang mawh nan laux simiang Vashati hoik thieang ti ang hoek ka lox tawm simiang, ka pa hoik viex cub pui sieh nawh khankix, mawh kheu nan simiang meet rhawm mai krax pa song rhawm nawh hoik hax awm ngu ka daux rhawm nawh heue. 13 Khaix an simiang ah nin ka pui pa koe pingnya cuyi khankix, pa hoik chix tawng ka bawg yam khankix, grawh grawng nawh in mawh krax pa yuh simiang ka plak sivoe pui khankix pa hoik tawng ka been mai grawng krax prawng ca, 14 pui inkix pa kied dex ka nawh tom hoik mawh Khashana, Sheta, Adamata, Tashisha, Mariet, Masena mai Memukan khankix pa mawh kawn simiang haktiex Pasha mai haktiex Midix khankix aliah kaux, pa hoik kied laoh lie ka plak sivoe simiang mai pa kied ting lhaong glawk kaing ka daux meung haktiex an khankix heue. 15 Mawh sang caw ex ti yuh patix ka laux simiang Vashati awm krax pa koe been kheu jao ang nawh caw ti nghiet ka lox tawm simiang Ashuerux pa hoik viex kix hoek khaing pa sieh an khankix lie? 16 Memukan deeh pawk ti ah nin, ka plak sivoe simiang mai cub kawn simiang an khankix, laux simiang Vashati ang joeng mawh pa hoik lud ka simiang nong nong ngie mai nawh hoik lud ka kawn simiang an khawmuik mai pui pa koe ka daux baoh haktiex cie simiang Ashuerux khawmuik heue. 17 Jhawm krax yuh laux simiang an tak mawh pa hoik tawng bun khawmuik ka, mawh kheu nan kix tom koe lox sibriem ka mex tix khankix ka daux plak sivoe ngai cao kix, yam deeh krai kix grawng yuh nin, simiang Ashuerux tawm lox tix ka laux simiang Vashati sonsang hoek jhi nawh tix ka plak sivoe nawh, viang mawh nan ang cu ti hoek heue. 18 Daux ngaix in cub moeng simiang haktiex Pasha mai haktiex Midix khankix tak ah nin ka cub cao kaing greem simiang khankix, ka pa hoik mhong tix grawng jhawm laux simiang an, mawh kheu nan krax pa kied kaig tua mai krax pa meet rhawm tak mawh pa koe ka heue. 19 Phan an mawh pa khaw rhawm simiang, kieh sibrawm simiang preet khaing nawh mai kieh mawh pa tiiem ti deuh ka daux been ceu pui Pasha mai Midix, sonsang ang been an sang mawh pa hoik tieh loh tix mai Vashati tak ang lai yaox tix hoek ka plak sivoe simiang Ashuerux khaix in tibawg kawx mai kieh simiang tawx glawk laux simiang mawh nawh ka pui tang kaux, pa mawh pui pa nie lheu mhawm khaing nawh heue. 20 Yam pa pao lox simiang ka daux hatiex dee pang kwang khankix, kheu an hoik mawh pa kied vieh va can moeng pui pa ting pa iak khankix khawmuik tak yaox ti deuh min kix heue. 21 Krax pa deeh pawk lox an, hoik krox rhawm simiang mai cub kawn simiang greem nawh khankix mai simiang hoik yuh nawh awm gumlox pa hoik ah Menukham heue. 22 Khaix an nawh tiiem ti tawx lai khankix hu ka simiang ot hawt baoh haktiex an khankix, pa mawh lai tix pheen son cao haktiex ku plak mai ka pui khankix ku kaux, ka plak lox sikah cao kix mai pui ku kaux tak mawh cao kwang cao pang ka daux nyiex cao tix mai sikah ka lox pui tix heue.

2

1 Yam hoik deeh fah rhawm krax pa meet rhawm simiang Ashuerux, nawh doh keud ka Vashati mai khawm ceu pa hoik yuh nawh khankix mai gumlox sibrawm ceu pa hoik prawng ca ka nawh heue. 2 Cub kawncau simiang khankix ah nin ka simiang, "Kieh ex rawg bunkrih awn ju pa mhawm grang pa loig son simiang heue." 3 Kieh simiang yaog ti deuh cao kaing khankix, ka daux baoh haktiex nawh khankix, sonsang pon kix tix kraix khrawm bunkrih awn ju, pa mhawm grang pa loig an khankix hoek ka nyiex pau dee lhaong Shushan greem krax pa appong Hegie pa mawh simex sieh cie simiang pa mawh cao pa appong tix priex bun khankix mai tawx sidah ceu pa sang khre rien kix tix mhawm grang ka heue. 4 Khaix an kieh bun awn ju pa pon tawx krax krox rhawm simiang deeh mawh laux simiang tang Vashati, ceu inkix hoik mawh pa khaw rhawm simiang mai hoik hawt ti yuh awm an heue. 5 Ka daux nyiex pau dee lhaong Shushan koe pui Yudax tix kaux, pa kaux Mawdakie, kawn Ya-irax kawn simex Shimi pa mawh kawn simex Kisha, pa mawh ceu pui Binyamin tix kaux heue. 6 Nawh mawh pui pa viex kix luan dee singai, khaing veng Yerusaliem tau mai cub pui pa giex laung khankix, pa mawh pa giex tix tau mai Yekhawnix pa mawh simiang meung Yudax, pa hoik teei Nebukhaneza pa mawh simiang veng Babulon hu heue. 7 Mawdakie teei tix eei Hadasa, pa kaux Isata pa mawh kawn bun keeing iak nawh kheu jao mawh nawh pa ang koe miex koe keeing, kawn bun awn ju an, mhawm grang ti yaox, yam hoik yum keeing nawh mai miex nawh Mawdakie teei ti eei nawh awm kawn bun tix heue. 8 Yam hoik mhong kix ka lox simiang mai ka lox pa ghaok khankix mai yam kraix khrawm cub bun awn ju an khankix ti hoek tom nie ka nyiex dee lhaong Shushan greem krax pa kwang Hegie, Isata kawx hoik mawh pa teei ti hu tau ka nyiex haw simiang, ka daux krax pa priex pa rien Hegie, pa mawh cao pa kwang ti jhak piang bun an khankix heue. 9 Bun awn ju an hoik yuh krax pa khaw rhawm Hegie mai Isata hoik pon krax pa koe pakngai, Hegie nied ti tawx kraung sidah ceu pa sang khre rien nawh tix koe krax pa mhawm grang mai khawm kraung khrai pa sang ceep nawh khankix heue. Khaix an bun kawncau pa hoik laug tix khankix aliah kaux, hoik baox tawx ka nawh khaing daux nyiex haw simiang mai kieh nawh mai khawm bun kawncau nawh khankix hu ka daux pa kied mhawm daux nyiex cub bun khankix heue. 10 Isata ang nyang bax krai ceu pui tix mai grawng paox nyiex ma tix khankix, mawh kheu Mawdakie tawx satix ka nawh sonsang ang nawh krai grawng an heue. 11 Mawdakie lailing ti jhak ka daux plak sivoe rawb rim piang brawk dee ot cub bun khankix ku ngaix, sonsang tawng nawh grawng ot koe Isata mai grawng ceu pa hoik yuh kix ka nawh heue. 12 Bun awn ju ankix kaux mawx kaux an, lai loh ti hoek ka simiang Ashuerux, khaix hoik naog bawg yam cox khre kix tokaux tix daux kao ra khix awm pa hoik koe been krax pa hawt kix ti yuh son bun an khankix, mawh kheu awm hoik tat kix ti deuh bawg yam singaix pa sang khre rien kix tokaux tix ka bee muran liah khix mai ka sidah bhawng liah khix mai khawm krax pa khre rien son krax pa sang mhawm grang bun khankix heue. 13 Kix khre rien tix awm bun awn ju ankix kaux mawx kaux an hu jhi tokaux tix ka simiang mai kix hoik pon ceu pa koe rhawm kix ti sang viex tau mai khaing brawk dee ot cub bun khankix, hoek ka nyiex haw simiang heue. 14 Ka daux plakbo nawh hu laig mai ka plak ponngawb nawh deeh ing ka nyiex cub bun ankix ra dah tix dah ka dee ot cao pa kwang cub bun ankix, pa mawh Shagaza pui sieh cie simiang pa kia ngien ka cub moeng iak simiang khankix, viang simiang koe rhawm kawx, phan ang kok ceu kaux, nawh tak ang yaox ti laig daux dee ot simiang bawg khaix heue. 15 Yam hoik hoek bawg yam cie Isata kawn bun Abihie pa mawh keeing iak Mawdakie pa hoik teei ti eei nawh awm kawn bun tix, sonsang hu laig ka dee ot simiang nawh ang lai mhaing ti viex tix ceu kawx, lheu khaing krax keud pa tawx Hegie pa mawh pui sieh cie simiang pa mawh cao pa kwang cub bun khankix mai Isata hoik pon pa khaw rhawm ka plak sivoe ngai pui khawmuik, pa hoik pon ti yaox ka nawh heue. 16 Isata hoik mawh pa viex tix hu ka simiang Ashuerux, ka daux nyiex haw nawh, ka daux bawg yam khix kao, pa mawh khix tobiet ka daux bawg yam pa kwang nawh ka haktiex aliah num tix num heue. 17 Simiang hoik moh ka Isata nie lheu khaing bun tang kaux an khankix mai nawh hoik pon bwanson mai pa koe pakngai, ka plak sivoe ngai simiang nie lheu khaing bunkrih khankix, mawh kheu nan nawh yaog ti deuh mhok khri laux simiang piang nawh mai yaog nawh mawh laux simiang son tang Vashati heue. 18 Simiang yuh pawie ting, pa mawh pawie Isata son cao kaing greem nawh mai kawncau nawh khankix mai hoik pao ti krai singaix laux lee pui khankix been tix ngaix ka daux baoh haktiex an khankix mai hoik tawx totaix tix hu kudah dee awm krax pa koe rhawm simiang heue. 19 Yam deeh kraix khrawm cub bunkrih khankix tix tau ka daux ra bawg tix bawg, Mawdakie ngawm tix ot ka daux diang siviex simiang heue. 20 Yam in Isata ang nyang bax krai pa ot paox nyiex ma tix mai kawncau pui tix, awm krax pa hoik tawm Mawdakie ti deuh ka nawh, mawh kheu Isata hoik cu nghiet ka lox tawm Mawdakie awm hoik eei nawh ting heue. 21 Ka daux bawg yam singaix ankix, glang yam kawn ngawm Mawdakie diang siviex simiang pui sieh cie simiang ra kaux pa mawh Bigatan mai Tariet cao pau siviex ankiex kied koe krax meet rhawm sawg krax pa sang sau taix tix piang simiang Ashuerux heue. 22 Mawdakie tawng ka grawng an mai nawh dee krai grawng an ka laux simiang Isata, mai Isata krai ka simiang ka daux min ceu kaux Mawdakie heue. 23 Yam hoik yuh nawh krax pa chawk cheng ka pui ankiex nawh hoik tawng mawh tete mai teuk teue kiex piang plawng khaox mai an hoik mawh pa hoik tiiem tix ka daux phuk lai been ankix, plak sivoe simiang heue.

3

1 Simiang Ashuerux yaok ti deuh Hamam kawn simex Hamedata pa mawh ceu pui Agat mai deuh nawh mawh pa ting lhaong mai deuh dee ngawm nawh lhaong khaing piang cub simiang greem cao nawh khawmuik, pa ot tau mai nawh heue. 2 Kawncau simiang pa ot ka daux siviex lhaong simiang, ngeuh kaing tix mai krub ka Haman, kheu jao hoik tawm simiang ti deuh lox tix son grawng nawh awm an, viang mawh nan Mawdakie ang cu tix ngeuh kaing tix mai ang krub ka heue. 3 Cub kawncau simiang khankix pa ot ka daux siviex lhaong simiang khankix ah nin ka Mawdakie maix lai yuh pa lud ka gumlox tawm simiang kheu jao pa yuh ka mawh lie? 4 Yam sikah kix ka nawh ku ngaix, nawh ang cu tix nghiet ka lox kix mai kix hu krai ka Haman grawng Mawdakie kriem ang kriem, mawh kheu Mawdakie krai ka hoik mawh nawh pui Yudax tix kaux ka kix heue. 5 Yam yaox Haman ka ang Mawdakie cu tix ngeuh kaing tix mai ang krub ka tix, Haman kied koe krax pa song rhawm ka heue. 6 Nawh keud ti sang pah Mawdakie yum nong nong, kheu kix hoik krai nawh mhong grawng ceu pui Mawdakie, lheu khaing an Haman hoik sawg ti yuh krax laux leeing ka pui Yudax pa koe ka daux haktiex simiang Ashuerux khawmuik, can pa mawh ceu pui Mawdakie. 7 Ka daux khix tix, pa mawh khix nisan yam hoek ka daux num kwang Ashuerux ka haktiex kao ra num tix num, kix cawk pura pa mawh nieb, ka plak sivoe Haman sonsang tat kix singaix mai khix tom hoek bawg yam caw ka daux khix kao ra pa mawh khix Adax heue. 8 Haman ah nin ka simiang Ashuerux, koe cub pui khankix tix cub pa hoik prung prang mai pa hoik klu klao tix sinax pui khankix, daux veng khawmuik pa mawh haktiex maix been ot kix mawh pa tang siyox khaing cie pui mai kix ang cu ti priex rien gumlox been cie simiang, mawh kheu nan an ang lai mawh pa koe bwanson ka son simiang sonsang kawn deuh kix ot heue. 9 "Phan an mawh pa khaw rhawm simiang, kieh tiiem lai tawx lox sonsang yuh kix laux leeing mai aux tak tawx mau tix mheen talantan, ka daux tawm taix pui ankix pa yuh kaing grawh grawng an, sonsang viex laig ka daux krao sinngao simiang heue." 10 Simiang peeik cum jeep gien khaing taix tix mai tawx ka Haman kawn simex Hamedata ceu pui Agat, pa mawh pui koeng ceu pui Yudax khankix heue. 11 Simiang ah nin ka Haman, "Mau mai pui khankix hoik mawh pa tawx ka maix, sonsang yuh ka kix, awm krax pa yaox maix mawh pa mhawm son maix heue. 12 Cao pa tiiem lai simiang khankix mawh pa kok tix hoek ka daux khix tix kao loe ngaix mai lox tawm an hoik mawh pa tiiem tix, awm pa hoik tawm Haman ti deuh ka son kuad yaong pui simiang khankix mai ka son cao pa kwang veng khankix pa hoik kwang piang baoh haktiex ankix kudah dee mai ka son cao kaing pui khawmuik mai ka son baoh haktiex ankix ku dax, awm pa koe ngai lai cao kix mai ka son pui khankix ku kaux ka daux pa koe gumlox sikah cao kix, ka daux min ceu kaux simiang Ashuerux an hoik mawh pa tiiem tix mai hoik mawh pa yeen tix ka cum jeep gien taix cie simiang heue. 13 Lai khankix hoik mawh pa tawx tix hu khaing cao pa tawx lai, ka daux baoh haktiex cie simiang khawmuik, sonsang yuh pa laux leeing mai, sonsang yuh krax pa pah yum mai sang yuh ceu pui Yudax khankix laux leeing pah lawk, khawm pa awn ju mai khawm pa riex ju mai khawm kawn nyawm mai khawm bun khankix ka daux tix ngaix ngie yam hoek daux khix kao ra pa mawh khix Adax kao loe ngaix mai sonsang yuh kix krax tud rhim ka kraung khrai sinngao kix khawmuik heue. 14 Gumlox lai an tix pheen, tak sang mawh pa pao tix awm gumlox tawm ka daux baoh haktiex ankix kudah mai tak mawh lai pa yang tix ka son pui khawmuik sonsang khre kix tix ka daux singaix an heue. 15 Cao pa tawx lai khankix nied tix lih hu awm gumlox pa hoik tawm simiang mai gumlox tawm an, mawh pa pao tix ka daux nyiex pau dee lhaong Shushan, mawh kheu nan simiang mai Haman ngawm tix nyaux rawm plix siiet tau, viang mawh nan pui veng Shushan hoik koe krax pa sung sang rhawm ka heue.

4

1 Yam hoik tawng Mawdakie ka an khawmuik, nawh riah kraung ceep tix khankix mai ceep kraung pa kawm mai kraix nyaox khankix piang tix mai hu laig ka daux sigreung veng heue. Nawh riag yo lox tix tau mai lox pa kied ting mai yiiem sigrien sigre heue. 2 Nawh hu tom hoek ka bing pak pa koe ka plak sivoe diang siviex simiang kheu jao ang pui tix kaux kawx yaox tix laig ka daux diang siviex tau mai krax pa ceep tix kraung pa kawm heue. 3 Ka daux baoh haktiex dee hoik koe lox tawm simiang lox ngia pa kied ting koe ka daux sinax pui Yudax khankix, tau mai krax pa twah pa ih mai krax pa yiiem riag yiiem yo mai pui khankix it tom nie tau mai kraung pa kawm mai nyaox khankix heue. 4 Kawncau bun Isata mai pui sieh nawh khankix, hoek krai nawh mhong grawng an mai laux simiang hoik koe krax pa laux rhawm ka, khaix an nawh sipaox kraung ceep khankix, sonsang ceep Mawdakie ka mai sonsang peeik kix ti teei kraung kawm khaing piang nawh, viang mawh nan nawh ang cu tix rieb kraung ankix heue. 5 Isata kok ka Hatiet pa mawh pui sieh tix kaux khaing daux cub pui sieh cie simiang, pa hoik tawx kix mawh cao pa jhak pa ngien ka nawh mai Isata tawx lox tix ka nawh son grawng Mawdakie, sonsang hu jhak mawh ceu patix mai jao patix heue. 6 Hatiet hu ka Mawdakie ka dah dee ot nawh bing pak, pa koe plak sivoe diang siviex simiang heue. 7 Mawdakie krai nawh mhong grawng ankix khawmuik khawm leeing pa hoik lih piang nawh mai khawm grawng mau pa hoik ah Haman tix sang tawx sau ka daux krao sinngao cie simiang khankix, sonsang yuh kix krax pa laux leeing ka pui Yudax khankix heue. 8 Nawh baox tawx lai gumlox pao pa hoik tiiem tix son krax pa sang yuh kix laux leeing ka pui Yudax ka nawh mai pa hoik tawx khaing Shushan pa mawh nyiex simiang sonsang pon jhi nawh lai an ka Isata mai krai lao gumlox an sidawng ka Isata sonsang hu laig nawh ka dee ot simiang mai sonsang hu yuh nawh krax pa khyox khaw lox awn tix ka nawh mai khyox khaw tix krai lox ka plak sivoe simiang son ceu pui nawh khankix heue. 9 Hatiet hoik deeh ing mai krai Isata mhong gumlox sikah Mawdakie khankix heue. 10 Isata sikah mai Hatiet mai nawh tawx gumlox tawm tix ka nawh son Mawdakie heue. 11 Cub kawncau simiang khankix mai can pui pa ot baoh haktiex simiang khankix, tawng ka koe been tix mu, simex kaux mawx ang ah, bun kaux mawx ang ah, pa hu laig ka plak daux piang dee ot simiang mai pa ang nyang mawh pa kok tix hoek khankix, tak sang mawh pa pah yum khawmuik, lheu khaing pui tix kaux pa nyee simiang pliah khri giex tix lih ka son pui an mai nawh tak pon tix im ju heue. Ka daux tixngoe singaix inkix tokaux cao aux mawh pa ang nyang bax kok tix laig ka dee ot simiang heue. 12 Mawh kheu nan kix krai gumlox Isata ka Mawdakie. 13 Mawdakie krai kix mhong lox pa sang dee pawk tix ka Isata ah nin, "Paw doh keud ka daux rhawm maix, ka tak sang pon glawd maix ka ot tix daux nyiex laux simiang nie lheu khaing pui Yudax tang kaux khankix heue." 14 Phan maix kawn ca kut tix ot ka daux krax pa yiien yawg ka daux bawg yam in, krax im ju maix pa taoh lawd tak sang lih kaoh ka son pui Yudax khankix khaing tang dah tang dee, viang mawh nan maix mai nyiex ma keeing maix khankix, tak sang laux leeing heue. Khex ang maix nyang bax tawng grawng krax pa hoik pon maix tix mawh laux simiang ka daux haktiex in, son daux bawg yam an awm in lie? 15 Khaix an Isata deeh krai kix mhong sonsang deeh ing kix tawx gumlox pawk in ka Mawdakie heue. 16 "Hu heue, kraix khrawm ceu pui Yudax pa koe ka daux veng Shushan khankix mai twah pa ih son aux, paw ih paw nyaux son daux loe ngaix loe sawm, kawncau bun aux khankix mai aux kawx tak twah ka pa ih awm an mai khaix an aux tak hu ka simiang, ka daux krax pa tieh feen been, mai phan mawh pa yum, aux tak kham tix yum ka. 17 Khaix an Mawdakie hu krax hu tix mai yuh awm gumlox pa hoik tawm Isata ka nawh khawmuik.

5

1 Ka daux bawg yam hoek daux loe singaix, Isata ceep kraung ceep laux simiang mai ex cung ka plak daux piang nyiex haw simiang pa koe plak toi nyiex simiang glang yam kawn ngawm simiang piang dang ngeung cie nawh ka daux nyiex haw, khawm simi ti jhak ka plak see diang laig daux nyiex haw heue. 2 Yam yaox simiang ka cung laux simiang Isata ka daux piang plak daux an, Isata hoik yaox pon tix bwanson plak sivoe nawh mai simiang yaog tix tawx pliah khri pa koe daux taix tix ka Isata, khaix an Isata hu dex mai hu teeh ka toh pliah an. 3 Simiang ah nin ka nawh, "Laux simiang Isata eue, mawh sang lo maix ceu patix lie? mawh sang mhaing maix ceu patix lie? Aux tak sang tawx ka maix tom haktiex aux khankix tix plak." 4 Isata deeh pawk ah nin, "Phan mawh pa khaw rhawm simiang, kieh simiang mai Haman hoek tix ih priex pawie khan kheu pa khre rien son nawh ka daux in singaix." 5 Simiang ah nin, "Kok Haman hoek phai phai, sonsang pon nawh ti yuh, awm ah Isata, mawh kheu nan simiang mai Haman hu ka pawie priex pa hoik khre rien Isata heue. 6 Ka daux pawie khan kheu rawm plix siiet simiang ah nin ka Isata, "Mawh koe rhawm maix tix sang lo ceu patix lie? Aux tak tawx ka maix, mawh sang mhaing maix ceu patix lie? tom meung haktiex aux tix plak lie? Aux tak tawx heue." 7 Isata deeh pawk lox ah nin, "Ceu pa sang lo aux mai ceu pa sang khyox khaw aux rawg mhaing aux mawh inkix, 8 phan aux mawh pa pon bwanson ka plak sivoe simiang mai phan mawh pa khaw rhawm simiang tix sang tawx ceu pa lo aux mai yuh ceu pa khyox khaw rawg mhaing aux khankix grum naog, kieh simiang mai Haman hoek ka pawie pa khre rien aux tix khan kheu ka son kix mai ka daux pasax, aux tak yuh awm pa ah simiang heue." 9 Ka daux singaix an Haman lih hu ka plak praix khawm gaux rhawm mai nyawm rhawm tix, viang mawh nan yam yaox Haman ka Mawdakie ka daux diang siviex simiang mai Mawdakie ang lai kaoh cung nab yam ka plak sivoe nawh tan, nawh kied koe krax pa song rhawm ka Mawdakie. 10 Haman gun rhawm tix mai ing ka nyiex mai nawh ploi pui hu kok ka paox grawm nawh khankix mai khawm moeng nawh Zeriet. 11 Haman krai kix mhong grawng pa magmi tix mai pa haoh hun kawn praix tix khankix mai grawng pa hoik yaog simiang ti deuh nawh mawh pa kied ting lhaong khaing piang cao kaing khankix mai khawm piang kawncau cub simiang khankix. 12 Haman baox ah nin, "Lheu khaing aux, laux simiang Isata ang lai ghaok pui tix kaux kawx, sonsang hoek tix tau mai simiang ka pawie priex pa hoik khre rien nawh mai ka daux pasax kawx nawh baox deeh ghaok aux, hu tau mai simiang. 13 Glang yam kawn yaox aux Mawdakie pa mawh pui Yudax an, pa ngawm diang siviex simiang, ceu inkix khawmuik ang lai mawh pa koe bwanson ka son aux. 14 Khaix an moeng nawh Zeriet mai khawm paox grawm nawh khankix khawmuik ah nin ka nawh, "Yuh khaox sigang, kieh lhaong tixphwan sawk mai yam hoek plak ponngawb, tawx krax pa keud maix ka simiang, sonsang teuk teue Mawdakie yum piang an, khaix an hu ka daux pa gaux rhawm tix tau mai simiang ka pawie priex khan kheu an mai ceu an mawh pa khaw rhawm Haman, mawh kheu nan nawh tom yuh tix jung khaox sigang heue.

6

1 Ka daux sawm an simiang ang lai laig it, mawh kheu nan nawh tawx lox kieh pui tix kaux viex phuk lai grawng can pa hoik tiiem daux lai been khankix hoek, mai kix phat ka plak sivoe simiang, 2 hoik yaox ka daux pa hoik tiiem an ti deuh ka pa hoik krai Mawdakie grawng Bigatan mai Teriet mai pa mawh pui sieh cie simiang ra kaux, pa mawh cao pa pau diang siviex khankix, pa sawg tix sang sau taix tix piang simiang Ashuerux heue. 3 Simiang ah nin, "Hoik yaog tix tawx min ceu patix ka piang Mawdakie son grawng in lie?" Kawncau simiang pa hoik hoek ka plak sivoe nawh khankix ah nin, "Ang nyang bax yaox tix tawx tidtix ka nawh, " 4 simiang ah nin, "Mawh pui mawx pa koe ka lawg plak daux lie? Yam in Haman taug khraox laig ka daux lawg plak praix nyiex haw simiang, sonsang tawx tix krax pa keud sonsang kieh simiang teuk teue Mawdakie yum, piang khaox sigang jung pa hoik khre rien nawh ti deuh." 5 Kawncau simiang khankix ah in ka nawh, "Haman koe tan, nawh cung ka daux piang lawg tan, " mai simiang ah nin, "Kieh laig heue." 6 Haman laig ka plak daux mai simiang chawk ti yaox nawh, "Mawh sang yuh ceu patix son pui pa koe krax gaux rhawm simiang tix sang yaog min pakngai nawh lie? Haman hoik keud ti ah nin ka daux rhawm tix, "Mawh pui pa gaux rhawm simiang tix sang yaog min pakngai nawh, lheu khaing aux lie?" 7 Haman pawk ti ah nin ka simiang, "Son pui pa tak sang gaux rhawm, simiang tix sang yaog min pakngai nawh, 8 kieh viex hoek kraung ceep lang jung cie simiang tix pheen mai khawm brung brug simiang tix mu, pa koe mhok khri simiang ti deuh piang kaing nawh heue. 9 Ap sibex lang jung in mai brung, ka daux tawm taix pui pa mawh simiang pa kied laoh lie cie simiang tix kaux, son tak sang pon jhi pui pa gaux rhawm simiang tix sang yaog min pakngai nawh mai kieh nawh brug brung, lailing ka daux bing pak veng mai pao krai grawng ankix ka plak sivoe nawh mawh kheu nan an tak mawh pa hoik yuh tix ka pui an, ka pa gaux rhawm simiang tix sang yaog min pakngai nawh heue." 10 Simiang ah nin ka Haman, "Nied ti yuh phai phai, teei sibex lang jung mai brung, awm krax keud pa hoik tawx maix mai yuh awm an ka Mawdakie pa mawh pui Yudax, ka pa ngawm daux diang siviex simiang, paw prah tix ang yuh can ceu pa hoik ah maix khawmuik awx." 11 Haman teei sibex lang jung mai brung hoek mai tawx Mawdakie ceep mai kieh nawh bruk brung mai lailing daux bing pak veng mai pao lox tix ka plak sivoe nawh ah nin, "Awm krax pa yuh nin mawh pa yuh ka pui pa khaw rhawm simiang tix sang yaog min pakngai nawh heue. 12 Mawdakie deeh ing ka diang siviex simiang mai Haman kawx nied tix ing ka nyiex tix tau mai krax pa voi rhawm mai kheem kaing tix. 13 Yam hoik krai Haman grawng ankix ka moeng tix Zariet khawm ka paox grawm tix khankix, ka ceu ankix kuceu, pa hoik lih ti mawh piang nawh khankix, pui pa koe pingnya cuyi khankix mai khawm moeng nawh Zariet deeh ah nin ka nawh, "Maix hoik jah ti som ka sivoe Mawdakie, phan nawh ruk mawh pui pa kaoh khaing daux doeh ru pui Yudax maix tak ang pex ka nawh maix tak mawh pa som nai ka plak sivoe nawh tete. 14 Glang yam kawn sikah kix tau mai pui sieh cie simiang khankix hoek mai sigleeig Haman hu ka pawie priex pa hoik khre rien Isata heue.

7

1 Simiang mai Haman hu ih priex tau mai laux simiang Isata. 2 Ka daux ra ngaix tix ngaix, ka daux pawie nyaux rawm plix siiet, simiang baox ah nin ka Isata, "Laux simiang Isata eue maix sang lo ceu patix lie? Aux tak sang tawx ka maix, maix mhaing ceu patix aux tak sang tawx ka maix tom meung haktiex aux khankix tix plak. 3 Laux simiang Isata deeh pawk ah nin, "Simiang eue, phan aux mawh pa pon bwanson ka plak sivoe ngai maix mai phan mawh pa khaw rhawm simiang kah, kieh ju aux deeh mawh pa tawx tix ka aux ka daux krax pa lo aux mai khawm ju pui ceu cie aux khankix, ka daux krax pa khyox khaw rawg mhaing aux. 4 Aux mai pui ceu aux khankix yix hoik mawh pa coh tix, sonsang yuh laux leeing mai sonsang pah yix yum mai song sang mawh yix pa grai grup laux leeing pak lawg, phan yix mawh pa hoik coh tix awm siliex simex mai bun khankix, aux tak sang nyeep jheeh tix ang nye nyux, viang son krax pa som nai simiang. Pui koeng ang pon tawx ngawh tawx jum tix bawg kawx." 5 Simiang Ashuerux pawk lox ah nin ka laux simiang Isata, "Mawh nawh pui mawh? mai ot nawh dee mawh? mai mawh pui mawx pa koe rhawm vao tix keud grawng an ka daux rhawm tix, sonsang yuh nawh ceu pa awm an lie?" 6 Isata deeh ah nin, "Pui koeng pa sang yuh krax pa tieh feen mai pui koeng an mawh Haman pa caox caig in, " mawh kheu nan Haman hoik koe krax lhat graung ka plak sivoe simiang mai laux simiang. 7 Simiang kaoh khawm song rhawm khaing daux pawie nyaux rawm plix siiet mai hu laig ka daux sipeem nyiex haw simiang, viang mawh nan Haman kaoh cung mai khyox khaw son ju nawh plak sivoe ngai laux simiang Isata kheu grawng hoik tawng nawh ceu pa caox caig pa hoik tat piang nawh khaing simiang. 8 Yam deeh hoek simiang khaing daux sipeen nyiex haw, yam hoek nawh ka dee nyaux kix pawie rawm plix siiet, Haman hoik gup tix plak see ku it, dee ot Isata tan mai simiang ah nin, "Mawh tak sang baox deeh yuh nawh krax pa khin ka laux simiang yam kawn koe aux ka daux nyiex lie?" Awm hoik lih lox sikah an khaing daux jheeh simiang, kix hoik kheem ngai baoh Haman daux yam an heue. 9 Habawnax pa mawh pui tix kaux khaing daux cub pui sieh khankix ah nin ka simiang, "Jhak heue, khaox sigang jung an pa lhaong tixphwan sawk, pa hoik yuh Haman ti deuh son Mawdakie, pa hoik krai lox pa mhawm son tang simiang kawn jung ti ka daux nyiex Haman tan. Simiang ah nin, "Teuk teue nawh yum piang khaox an heue." 10 Kheu nan, kix tom teuk teue Haman piang khaox sigang jung pa hoik cox khre nawh son Mawdakie. Khaix an simiang kawx hoik pon krax pa nhim rhawm heue.

8

1 Ka daux singaix an simiang Ashuerux tawx laux simiang Isata cie nyiex Haman pa mawh pui koeng ceu pui Yudax khankix mai Mawdakie hoek ka plak sivoe ngai simiang kheu jao hoik krai Isata ka grawng mawh nawh paox nyiex ma tix. 2 Simiang peeik jeep gien cum tix ka pa hoik deeh teei nawh tix priex khaing Haman mai tawx ka Mawdakie mai Isata ap ti deuh Mawdakie kwang piang nyiex Haman. 3 Isata deeh baox sikah ka simiang mai gup tix hawt caong nawh mai khyox khaw ka nawh mai roik rawm ngai, sonsang teei nawh ti tik pa caox caig pa yuh Haman, pa mawh ceu pui Agazit mai khawm krax grawng pa rang ti yuh ka pui Yudax khankix. 4 Simiang nyeu gawng pliah khri ka plak see Isata mai Isata yaog ti kaoh cung ka plak sivoe simiang, 5 ah nin, "Phan an mawh pa khaw rhawm simiang mai aux pon bwanson ka plak sivoe ngai nawh mai phan ceu an tak sang mawh pa yaox tix daux pa khaw caw ka simiang mai phan aux mawh pa khaw rhawm sivoe ngai nawh, kieh lai an mawh pa tiiem tix, sonsang deeh preet ti tik lai grawng pa hoik yuh tix khankix, khaing Haman pa mawh kawn simex Hamedata pa mawh ceu pui Agat pa hoik tiiem nawh ti yuh krax laux leeing ka pui Yudax khankix, pa ot ka daux baoh haktiex cie simiang khawmuik. 6 Aux sang pon kham geu ti yaox grawng krax pa caox caig ankix, pa tak sang hoek piang ceu pui aux khankix yuh ka mawx lie? Phan ang mawh nan aux khex sang pon kham geu ti yaox krax laux leeing doeh ru aux khankix yuh ka mawx lie? 7 Simiang Ashuerux ah nin ka laux simiang Isata mai Mawdakie pa mawh pui Yudax, "Aux hoik tawx nyiex Haman ka Isata tete, mai hoik teuk teue nawh yum piang khaox sigang jung an, kheu jao grawng hoik coca nawh ti sang sau taix tix piang pui Yudax khankix." 8 Tokaux cao maix deeh tiiem gumlox pa tawm tix pheen ka son pui Yudax khankix, awm krax pa koe rhawm maix ti yuh, ka daux ceu kaux simiang mai yeen ka cum jeep gien simiang; mawh kheu lai tix pheen pa hoik tiiem tix ka daux ceu kaux simiang mai pa hoik yeen tix ka cum jeep gien simiang pui tix kaux kawx tak ang pon tix preet, 9 kix hoik kok cao tiiem lai simiang khankix hoek daux khix loe, pa mawh khix sivan tixnga loe ngaix mai an hoik mawh pa tiiem tix awm can pa hoik tawm Mawdakie ka pui Yudax cao kwang veng khankix mai cub simiang pa kwang baoh haktiex Idiyax tom hoek ka haktiex Ethiopia, Khusha pa koe tix yieh tixnga aliah meung, son meung ankix ku meung ka plakngai lai cao kix mai son ceu pui kuceu ka plak lox sikah cao kix mai son pui Yudax khankix ka plakngai lai cao kix mai ka plak lox sikah cao kix. 10 Nawh hoik tiiem lai ankix ka daux ceu kaux simiang Ashuerux mai hoik yeen cum jeep gien simiang mai tawx lai ankix hu ka cao tawx lai pa brug brung eei simiang pa kied phai to an. 11 Ka daux lai ankix simiang tawx akhwang ka pui Yudax khankix, pa koe ka daux veng ku veng, sonsang kraix khrawm kix paox tix tau mai tiebtie son ju kix sonsang yuh laux leeing, pah yum mai kieh grai grup singax pak lawg ka pui baoh haktiex pa sang hoek tix puing ka kix, khawm kawn nyawm mai bun dai khankix mai tud rhim tix cie kraung khrai kix, 12 ka daux tix ngaix ngie, daux baoh haktiex simiang Ashuerux ka daux khix kao ra pa mawh khix Adax kao loe ngaix. 13 Lai gumlox tiiem tix pheen mawh pa hoik tawx tix hu, ka daux baoh haktiex ankix kudah, mai ka pui khankix, sonsang rien pui Yudax khankix tix ka daux singaix an, sonsang deeh pawk kix bix tix ka pui koeng kix, 14 mai cao pa tawx lai ankix, hoik yaog tix brug brung simiang, li hu ka daux lox pa si dhiiet simiang ka kix mai lox tawm an hoik mawh pa ploi tix lih khaing daux nyiex pau dee lhaong Shushan an. 15 Mawdakie lih khaing plak sivoe dee ot simiang, ka daux dee hoik ceep nawh kraung ceep simiang pa klai raoma mai pa paing khankix tau mai ceep tix mhok khri ting pa ceep simiang mai khawm kraung ceep man ceu pa mhawm pa lung pliex tix pheen, mai pui Shushan hoik grum naog ka daux krax pa gaux rhawm. 16 Pui Yudax khankix hoik koe krax pa chaong rhawm tau mai krax pa gaux rhawm tau mai pa koe min pakngai tix. 17 Ka daux baoh haktiex ankix mai khawm veng ku veng ka dee hoek gumlox tawm simiang mai pui Yudax khankix hoik koe krax pa nyawm rhawm mai khawm krax pa gaux rhawm tix mai kix khan kheu ti yuh pawie mai laux lee tix tingaix, khaix an pui haktiex ankix hoik kied nie deeh tieh tix laig ka been pui Yudax kheu jao lhat graung kix ka pui Yudax heue.

9

1 Ka daux khix kao ra, pa mawh khix Adax kao loe ngaix, mawh yam hoek son gumlox pa tawm simiang mai pa hoik pao nawh khankix, sonsang mawh pa yuh tix ka daux singaix an, pui koeng Yudax khankix hoik keud pot jun pot ti sang koe krax pex sibrawm kix mai pui Yudax deeh tieh ti pex ka sibrawm pui pa hoik koeng ka kix. 2 Pui Yudax khankix hoik kraix khrawm paox tix ka daux nyiex yaong veng cao kix, pa koe ka daux haktiex simiang Ashuerux khawmuik, sonsang sau kix taix pah yum ka pui pa sawg ti yuh krax pa kha rhawm ka kix mai pui tix kaux kawx ang pon yaog tix tiebtie ka kix kheu jao hoik lhat graung pui khawmuik ka kix. 3 Simiang cao pa kwang daux ku kien, ku veng mai cao kaing tang simiang mai cao pa kwang veng khankix mai can pui pa yuh kaing jhaw simiang khankix, hoik teem ka pui Yudax khankix, kheu jao hoik lhat graung kix ka Mawdakie. 4 Mawh kheu Mawdakie mawh pa ting lhaong ka daux nyiex haw simiang mai krax ao min nawh hoik tah hoek ka daux haktiex khawmuik, pa mawh Mawdakie hoik kied nie yaog tix haok hwan ting lhaong tix ngaix hoik tix ngaix. 5 Pui Yudax khankix hoik pah pui koeng ka kix khankix ka vaig mai yuh can ceu pa koe rhawm kix ti yuh ka pui pa koeng ka kix. 6 Ka daux nyiex pau dee lhaong Shushan an, pui Yudax khankix hoik yuh laux pah yum ka pui khankix phwan yieh kaux. 7 Khawm Pashandata, Dalaphon, Asapata, 8 Phawrata, Adalia, Aridata, 9 Pamashata, Arisai, Aridai mai Vayezata, 10 Pui inkix kao kaux mawh kawn simex Haman, kawn simex Hamedatax pa mawh pui koeng pui Yudax khankix pa hoik pah kix yum viang mawh nan kix ang sau taix ti teei ka kraung khrai kix. 11 Ka daux singaix an carang pui ankix pa hoik pah kix yum ka daux nyiex pau dee lhaong Shushan an, hoik mawh pa viex tix jhi ka simiang. 12 Simiang ah nin ka laux simiang Isata, "Pui Yudax khankix hoik yuh laux pah yum ka pui phwan yieh kaux, ka daux nyiex pau dee lhaong veng Shushan mai khawm kawn simex Haman khankix kao kaux, mawh hoik yuh kix ceu patix? ka daux baoh haktiex pa kawn deuk cie simiang lie? Yam in sang lo maix ceu patix? Aux tak tawx ka maix, phan ang mawh nan sang baox mhaing maix ceu patix lie? Aux tak sang yuh son maix, 13 mai Isata ah nin, "Phan mawh pa khaw caw rhawm simiang kieh pui Yudax pa ot daux veng Shushan khankix sonsang deeh pon yuh kix daux pasax awm gumlox pa hoik pao tix ka daux in ngaix, kieh kix teuk teue kawn simex Haman kao kaux piang khaox sigang jung heue. 14 Simiang tawx gumlox in kieh kix yuh gumlox pao lih khaing nyiex Shushan mai kix teuk teue kawn simex Haman khankix kao kaux. 15 Ka daux khix Adax kao pon ngaix pui Yudax pa ot daux veng Shushan baox kraix khrawm paox tix tau mai pah yum ka pui loe yieh kaux daux veng Shushan, viang mawh nan kix ang sau taix ti teei ka kraung khrai khankix. 16 Cub pui Yudax pa kawn deuk ka daux haktiex simiang khankix kraix khrawm paox tix tau mai tiebtie ju tix laux lee khaing pui koeng mai pah ka pui koeng yum aliah mheen phwan rheng kaux, viang mawh nan kix ang sau taix ti teei ka kraung khrai khankix. 17 In mawh pa hoik yuh ka daux khix Adax kao loe ngaix mai yam hoek ka daux kao pon ngaix, kix laux lee tix mai yuh ti deuh an mawh ngaix pawie tix ngaix mai khawm singaix pawie pa gaux rhawm. 18 Pui Yudax pa ot ka daux veng Shushan khankix kraix khrawm paox tix tau ka daux singaix kao loe mai ka daux singaix kao pon mai khawm ka daux singaix kao phwan khix an, kix laux lee tix mai yuh ti deuh an mawh singaix pawie tingaix mai singaix pawie pa gaux rhawm. 19 Pui Yudax daux nyiex daux yaong pa ang nyang bax lai lawm tix ka guh veng khankix, hoik khan kheu ti yuh pawie ka daux singaix kao pon, daux khix Adax an, mawh singaix pa gaux rhawm mai khawm singaix khan kheu, pawie singaix laux lee mai deuh singaix an mawh singaix tawx totaix ka paox tix, tix kaux lai tix kaux. 20 Mawdakie tiiem grawng ceu inkix tawx hu ka pui Yudax khawmuik, pa koe daux haktiex simiang Ashuerux, khawm dee dex mai dee singai khawmuik, 21 sonsang yuh kix pawie an ka daux sinax kix mai sonsang khan kheu kix yuh pawie an ku num, ka daux khix Adax kao pon, kao phwan ngaix, 22 awm ngaix laux lee pui Yudax khaing pui koeng tix khankix, awm mawh khix pa hoik dee tieh kix krax pa laux rhawm tix, hoek krax pa gaux rhawm son kix mai khaing krax khi rhawm tom hoek ngaix laux lee kix ti yuh mawh singaix khan kheu pawie mai singaix pa gaux rhawm mai hoik deuh mawh singaix tawx tix totaix ka paox tix, tix kaux lai tix kaux mai singaix tawx tix totaix ka pui pa hot shia khankix heue. 23 Pui Yudax khankix hoik rieb been yungyi pa jah kix ti yuh, awm pa hoik tiem Mawdakie ka kix, 24 kheu jao grawng Haman pa mawh kawn simex Hamedata pa mawh ceu pui Agat pui koeng cub pui Yudax khankix, hoik keud tix sang pah ka pui Yudax khankix yum mai sang yuh kix grai grup mai hoik yuh nieb, pura sonsang yuh kix laux leeing pak lawg. 25 Yam hoik hoek Isata ka plak sivoe simiang, nawh tawm lox tix ka lai, grawng ceu pa caox caig in, pa hoik keud Haman ti yuh piang pui Yudax khankix, deeh kieh hoek piang kaing cao nawh mai teuk teue nawh mai kawn simex nawh khankix piang khaox sigang jung an. 26 Mawh kheu nan kix kok singaix in mawh purim, khaix ceu kaux pura, mawh kheu jao grawng gumlox ankix pa koe ka daux lai in mai khawm ceu pa hoik yaog kix ka son grawng in mai khawm ceu pa hoik lih ti koe piang kix, 27 pui Yudax khankix pang ti deuh been mai deuh beeh glawm piang tokaux cao kix mai khawm piang doeh ru kix mai can pui pa tak sang sitoe tix mai kix mai ka daux krax pa ang lai tik vud kix tak khan kheu ti yuh singaix in ra ngaix, daux ku num, awm krax pa hoik tiiem tix gumlox pa sang hawt kix ti yuh khankix mai awm bawg yam krax pa hoik tat tix, 28 mai singaix inkix, mawh pa doh keud tix mai pa hawt priex rien ka daux baux ju sinax doeh ru kix ku cub caw, ku nyiex ma, ku kien mai ku veng, son ang ngaix purim inkix tak ang lai piawm tix mai khan kheu ti yuh pawie ngaix an ka daux sinax pui Yudax khankix mai krax pa deeh doh keud kix ka ankix, tak mawh pa ang chix grai ka daux sinax doeh ru kix. 29 Laux simiang Isata kawn bun Abihelax mai Mawdakie pa mawh ceu pui Yudax, hoik tiiem lai sibrawm pa grum naog ra bawg tix bawg sonsang kaux cong lai purim. 30 Mawdakie tawx lai ankix hu ka pui Yudax khawmuik, pa ot ka daux haktiex kwang simiang Ashuerux khankix tixnga aliah kien, tau mai gumlox pa nhim mai pa mawh meh, 31 song sang kaux cong singaix purim in ka daux bawg yam pa hoik tin ti deuh awm hoik tat Mawdakie, pa mawh pui Yudax mai laux simiang Isata ti deuh nawh son kix mai awm hoik tawx kix gumlox paox an ka son tokaux cao kix mai ka son doeh ru kix, sonsang twah kix priex preem mai yiiem yo. 32 Mawh kheu nan gumlox Isata hoik kieh grawng purim cong mai grawng in mawh pa hoik tiiem tix ka daux phuk lai heue.

10

1 Simiang Ashuerux pon keun piang haktiex mai piang klawn tiex rawm sigrit sigra. 2 Grawng kaing can pa yuh nawh khankix ka sibrawm nawh khawmuik mai krax pa koe riang rao nawh khankix mai grawng pa hoik yaog simiang ka Mawdakie ting lhaong, ka dee pa hoik yaog simiang ang hoik mawh pa tiiem ti deuh daux phuk lai gumlox been cub simiang haktiex Midix mai haktiex Pasha lie? 3 Grawh grawng nawh Mawdakie pa mawh ceu pui Yudax, hoik mawh simiang ra kaux tix kaux greem simiang Ashuerux mai hoik mawh pa kied ting lhaong ka daux sinax ceu pui Yudax khankix mai pui hun pa mawh puxaik nawh khankix hoik rieb ti teei nawh daux krax pa mhawm mai mawh pa sawg ka krax pa mhawm son ceu pui nawh khankix mai mawh pa sikah gumlox pa nhim ka doeh ru tix khawmuik heue.