Ephesians

Ephesians

¹ Pawlux pa mawh kawncau pa ting Yesux Khrit kheu alo Siyiex, tawx ka pui pa singax pa ot ka daux veng Efesux mai ka pui pa kaux sijax ka daux Yesux Khrit heue. ² Kieh pex koe bwanson, pa nhim pa kaoh khaing Keeing ex Siyiex mai Simiang Yesux Khrit heue. ³ Kieh keeing Siyiex mai Simiang ex Yesux Khrit ting bwanson, pa hoik tawx bwanson pa dex mai khuan ku ceu ka ex ka meung raoma daux Cao Khrit, ⁴ awm hoik laug Nawh Cao ti teei ex daux Cao Khrit, tom ka sang jah ti kaw haktiex, sonsang mawh ex pa singax, pa ang koe dee cha pa loig sivoe Nawh ka daux krax moh, ⁵ hoik grux ciak ti kieh ex mawh kawn tokaux Nawh Cao, kheu Yesux Khrit, awm pa khaw caw mai alo Nawh, ⁶ sonsang yaogyaw min pakngai bwanson Nawh pa hoik yuh bwanson ti tawx ka ex ka daux kawn pa moh Nawh, ⁷ pa hoik pon ex krax taoh kah, kheu nham Nawh, sonsang pon ex pa pluat phimap awm pa khaw mai bwanson pa mi pa koe Nawh, ⁸ pa hoik kieh Nawh koe tom nie, plak ex ka daux pingnya mai daux krax tawng, ⁹ yam kieh ex tawng alo Nawh pa hoik mox kah, awm pa khaw mai alo Nawh pa hoik bak yiak ti kieh mawh daux Khrit, ¹⁰ yam hoik naog bawg yam khankix, ti kraix khrawm kieh grum kuceu khawmuik, can ceu pa koe piang raoma mai can ceu pa koe ka piang haktiex li mawh tix mu khaing ka daux Khrit. Pa ah aux, mawh ka daux Nawh heue. ¹¹ Pa hoik kieh ex mawh sin, kheu hoik ciak ti deuh ex awm pa khaw mai pa hoik bak yiak, kaw pa yuh kuceu khawmuik hawt alo pa keud tix, ¹² son ex pa hoik keud pot jun pot ka daux Cao Khrit ka sivoe paox tix, sang mawh son pa yaogyaw min pakngai Nawh heue. ¹³ Ka daux Nawh kawx, pex hoik mhong gum lox pa mawh meh, pa mawh lox bwan gaux rhawm pa dex mai krax taoh pex mai kheu hoik yum rhawm ka daux Nawh, hoik tawk cum ka pex ka Khuan Singax pa dex mai lox sijax mukheu heue. ¹⁴ Khuan an mawh gawng ka grawng sin ex, tom bawg yam sang taoh Nawh Cao cie tokaux tix, sonsang yaogyaw min pakngai Nawh heue. ¹⁵ Kheu hoik mhong aux grawng krax yum rhawm pa koe pex ka daux Simiang Yesux mai krax moh pa koe pex ka pui singax khawmuik, ¹⁶ aux tom yaogyaw bwanson, son pex ang jud ang jai mai simawd pex ka daux pa rawg bwan, ¹⁷ Siyiex ex Yesux Khrit, pa mawh Keeing min pakngai, tak tawx rhawm pa koe pingnya pa chix keud chix doh, ka daux krax tawng yung ka Nawh Cao, ¹⁸ sonsang kieh ngai rhawm rhi pex riang, sang tawng pex pa keud pot jun pot pa hoik kok Nawh pex ka, mawh pa yuh ka mawx, grawng sin pa sang pon Nawh Cao ka daux pui singax khankix ting miex ding, ¹⁹ siawp sibrawm pa kied ting Nawh, ka plak ex pa yum rhawm ting miex ding, awm pa khaw mai pa yuh siawp sibrawm pa ting riang Nawh an, ²⁰ pa yuh Nawh daux Cao Khrit, yam kieh Nawh Cao Khrit deeh kaoh im khaing krax yum mai kieh Nawh ngawm plak taix khawn dawm Nawh Cao kadaux raoma, ²¹ kied ting ka piang ceu pa giex kaing, pa koe min pakngai, siawp sibrawm mai simiang haktiex, can ceu kaux ku ceu pa hoik kok kah, ang joeng mawh ngie ka ju haktiex in, viang mawh nan khawm daux ju pa tak sang hoek phao khaix khawmuik heue. ²² Nawh Cao hoik teei ti deuh kuceu khawmuik ka greem caong Nawh mai tawx ti kieh Nawh mawh Kaing ka piang ku ceu khawmuik ka daux ceu cao, ²³ pa mawh tokaux Nawh, pa grum naog Kaw pa kieh grum naog ku ceu khawmuik heue.

¹ Nawh Cao hoik yuh ti kieh pex im ka, yam hoik yum pex kheu pa lud mai phimap. ² Pa hoik sax hu pex ka, awm pa khaw mai been haktiex, pa khaw mai simiang siawp sibrawm bhawm, pa mawh khuan pa yuh kaing ka daux kawn pa lieh lox khankix. ³ Ex khawmuik kawx hoik rom tau mai kix tix bawg, ka daux pa hawt alo nex nham tokaux tix mai hawt yuh pa mie nex nham mai pa lak keud ti yuh mai ex hoik mawh nang kawn praix pa song rhawm, awm hoik mawh pa deuk khankix heue. ⁴ Siyiex, pa mi pa koe ka daux krax caux rhawm, kheu krax moh pa kied lang teung moh Nawh Cao ka ex, ⁵ Pie yam hoik yum ex kheu phimap tix kawx, Nawh hoik kieh ex im tau mai Cao Khrit, Pex hoik hoek krax taoh kheu bwanson heue. ⁶ Hoik kieh ex deeh kaoh tau mai Nawh, hoik kieh ex ngawm tau mai Nawh ka daux raoma, ka daux Yesux Khrit. ⁷ Ka daux ju pa tak sang hoek khankix, Nawh tak sang pon ti jhi ceu pa kied ting mi koe bwanson tix, ka daux pa yuh bwanson ka ex ka daux Yesux Khrit heue. ⁸ Pex hoik hoek krax taoh kheu bwanson ka daux krax yum rhawm mai ang mawh kheu tokaux tix, mawh totaix pa tawx Siyiex. ⁹ Ang mawh kheu krax twah pa yuh tix, mawh kheu nan ang pui pon yaw tix, tix kaux kawx ka grawng an heue. ¹⁰ Ex mawh khaix taix Nawh, pa hoik phan hoik yuh ka daux Yesux Khrit, sonsang twah, yuh ceu pa mhawm, pa hoik grux cox Siyiex sonsang hu ex ka daux ceu an khankix heue. ¹¹ Mawh kheu nan doh keud grawh grawng pex pa mawh pui tang ceu ka daux nex nham, kix pa mawh pa pat hak ka daux nex nham, pa hoik yuh ka taix, kok mawh pa ang pat hak, ¹² hoik mawh pa tang ot khaing Cao Khrit tix bawg, pa hoik tang tiah tix, ang mawh paox khaing pui Isarelax mai pa hoik mawh pa ang dex mai sijax mukheu, pa dex dawd mai lox sijax mukheu, ang koe krax dee sang keud pot jun pot, ang koe Siyiex ka daux haktiex in heue. ¹³ Yam in ka daux Yesux Khrit, pex pa hoik singai tix bawg, hoik kieh dex kheu nham Cao Khrit heue. ¹⁴ Nawh Cao mawh pa nhim ex, pa hoik kieh khawm ra mawh tix mu khaing mai yuh ding tie ka sigreung laux, ¹⁵ kheu hoik kieh Nawh ceu pa koeng pak lawg ka daux tokaux tix, pa mawh lox tawm mai been khankix pa koe ka daux lai beenli, sonsang pon Nawh ti phan, yuh kiex khawm ra mawh pui khraox tix kaux khaing, ka daux tokaux tix mai kieh nhim heue. ¹⁶ Sonsang kieh khawm ra deeh ih rhawm paox tix, ka daux tokaux tix mu khaing, ka Siyiex, kheu khaox lhak mai pah ceu pa koeng yum ka khaox lhak an heue. ¹⁷ Nawh Cao viex ti sidiex lox bwan gaux rhawm pa nhim, ka pex pa ot dee singai, mai ka ex pa ot dee dex heue. ¹⁸ Mawh kheu Nawh Cao, ex khawm ra tom pon ti laig ka daux khuan tix mu khaing ka Keeing Cao heue. ¹⁹ Mawh kheu nan pex ang lai baox mawh pui tang praix tang klawng mai nyo sinie, pex hoik mawh ngie pui tix meung khaing tau mai pui singax singeh khankix mai pui geh nyiex Siyiex, ²⁰ pa hoik sum piang jaong rong, pa mawh kawncau pa ting mai cao jhai khankix, tokaux Yesux Khrit mawh Simaox kaing ka daog heue. ²¹ Ka daux Nawh Cao khaox joh rong jhan khawmuik jawg ti tok mai lih mawh nyiex bwan pa singax singeh son Simiang heue. ²² Pex kawx hoik sum tau ka daux Nawh Cao, sonsang mawh dee ot Siyiex ka daux Khuan Cao heue.

¹ Mawh kheu jao in aux Pawlux pa mawh pui pa laung kheu grawng Yesux Khrit, son pex pui tang ceu. ² Pex tee hoik mhong grawng bawg yam bwanson pa hoik tawx Siyiex ka aux son pex, ³ grawh grawng hoik plak kieh aux yaox, kieh aux tawng ceu pa raux pa mox, awm lox pa hoik tiiem aux phao ka ceeix, ⁴ mawh kheu yam phat pex, pex tak sang tawng grawng krax tawng aux ka ceu pa raux pa mox pa dex mai Cao Khrit, ⁵ ceu pa ang sax kieh tawng ka Kawn kawn pui daux ju pa hoik luan khankix, awm Khuan Cao hoik plak kieh yaox yam in ka kawncau pa ting mai cao jhai pa singax singeh cie Nawh khankix, ⁶ pa mawh grawng pui tang ceu kawx sang mawh pui pa rom ti pon sin tau mai pui Yudax mai rom ti mawh kraung pakpeung tau ka daux tokaux tix mu khaing mai pa rom ti pon tau ka lox sijax mukheu pa koe ka daux Yesux Khrit kheu lox bwan gaux rhawm., ⁷ pa mawh aux cao sidiex gau kah, awm pa khaw mai totaix bwanson Siyiex, pa hoik tawx ka aux, awm pa khaw mai pa yuh siawp sibrawm Nawh heue. ⁸ Ka aux pa mawh pa nie iak khaing pui pa singax singeh khawmuik, hoik tawx bwanson in, pa kieh aux sidiex lox bwan gaux rhawm ka pui tang ceu, grawh grawng pa mi pa koe pa ang lai dak uik sawg sikaw ti yaox cie Cao Khrit, ⁹ sonsang kieh pui khawmuik yaox grawng pa raux pa mox, pa hoik ciak ti deuh, ceu pa hoik mox tom ju di dix ka daux Siyiex pa phan pa yuh kuceu khawmuik mawh pa yuh ka mawx. ¹⁰ Sonsang kieh pingnya cuyi Siyiex sidawng yam in ka simiang giex kaing mai siawp sibrawm khankix ka daux raoma kheu ceu cao, ¹¹ awm ceu pa hoik bak hoik yiak Siyiex ti deuh ka daux Simiang ex Yesux Khrit leeing ju heue. ¹² Mawh kheu krax yum rhawm ka daux Nawh ex tom koe rhawm kwa ti hoik een rhawm ka Nawh Cao heue. ¹³ Mawh kheu nan aux tom khyox khaw ka pex, son ang pex sang laux rhawm ka krax kha rhawm aux son pex, pa mawh sonsang pon pex min pakngai heue. ¹⁴ Mawh kheu jao in aux tom grux ngawng rawg bwan ka Keeing Simiang ex Yesux Khrit, ¹⁵ pa mawh Kaw pa tawx ceu kaux ka ku jieh nyiex ka daux meung raoma mai ka piang haktiex heue. ¹⁶ Sonsang tawx Nawh ka pex, awm pa khaw mai pa mi pa koe min pakngai Nawh, sonsang baox riang rao pex ka siawp sibrawm kheu Khuan Nawh Cao ka daux pui plak daux heue. ¹⁷ Sonsang ot Cao Khrit ka daux rhawm rhi pex kheu krax yum rhawm, kheu sang kaux cong riah pex ka daux krax moh krax rhawm, ¹⁸ sonsang pon pex ti tawng tau mai pui singax singeh khawmuik, grawng plak vieh plak lhaong, mai plak raux mawh miex ding, ¹⁹ sonsang tawng ka krax moh Cao Khrit, pa nie lheu khaing pa chix tawng, sonsang naog pex ka pa grum naog Siyiex khawmuik heue. ²⁰ Yam in ka kaw pa kied nie lheu chix yuh khaing pa rawg pa keud ex khawmuik, awm pa khaw mai siawp sibrawm pa yuh kaing ka daux ex, ²¹ kieh Nawh koe min plakngai ka daux ceu cao mai ka daux Yesux Khrit ku ju khawmuik leeing ju liak. Amen.

¹ Mawh kheu nan aux pa mawh pui pa laung son Simiang, khyox khaw ka pex, sonsang hu awm pa keung mai ceu pa hoik kok ka pex, ² Ka rhawm pa awn pa tiem pa lang gun lang yeung mai yeung ka paox tix ka daux krax moh krax rhawm. ³ Nied ti coca sonsang priex pa mawh tix mu khaing pa dex mai Khuan Cao, ka daux pa hoik vien tix tau ka ceu pa nhim heue. ⁴ Koe ngie tokaux tix mu khaing mai Khuan Cao tix mu khaing, awm ceu pa kok pa hoik kok ka pex mawh ka daux krax keud pot jun pot tix mu khaing. ⁵ Koe ngie Simiang tix kaux, krax yum rhawm tix ceu mai krax cubcom tix ceu khaing, ⁶ koe Siyiex pa mawh Keeing khawmuik tix kaux khaing, Nawh mawh pa ting piang khawmuik mai pa tah preeng khawmuik mai pa koe ka daux khawmuik heue. ⁷ Hoik tawx bwanson ka ex ku kaux daux pui, awm pa khaw mai diag totaix Cao Khrit heue. ⁸ Mawh kheu nan Nawh Cao hoik ah nin, "Yam haok Nawh dee lhaong, Nawh thong ka pui pa hoik pon giex laung khankix mai nawh tawx totaix khankix ka pui khankix heue." ⁹ Pa hoik ah "Nawh haok," sang bleeh ka pa yuh ka mawx, phan Nawh ang nyang bax hoik lih khawm ka greem daux tiex? ¹⁰ Kaw pa hoik lih, mawh khawm kaw pa hoik haok ka dee nie lhaong khaing piang raoma khawmuik, sonsang kieh Nawh ku ceu khawmuik grum naog heue. ¹¹ Nawh Cao kieh tix blah mawh kawncau pa ting, kieh tix blah mawh cao jhai, kieh tix blah mawh cao sidiex lox bwan, kieh tix blah mawh sara pa kia ceu cao mai sara cao gau, ¹² sonsang kieh pui pa singax singeh khankix grum mhawm, son kaing sidiex gau, sonsang sum, yuh tokaux Cao Khrit ting, ¹³ tom hoik mawh ex khawmuik tix mu khaing ka daux krax yum rhawm mai krax tawng ka kawn Siyiex, tom mawh ex pui pa uik grum die huan mai awm pa grum pakpeung Cao Khrit. ¹⁴ Son ang ex lai baox mawh kawn nyawm awm pa phlu bhaung ku bhaung, ceu pa gau bhaung phlu vied ve, kheu pa nieb lak keud ti yuh cuyi pie lhen, sonsang lud loe heue. ¹⁵ Kheu giex pa mawh meh ka daux pa moh rhawm, ex tak ting huan ka ku ceu khawmuik ka daux Nawh Cao, kaw pa mawh kaing, mawh Cao Khrit heue. ¹⁶ Tokaux khawmuik mawh khaing Nawh Cao pa sitoe tokaux ti klia tix tau ka pa deeh lih pon tawx riang kraung daux tokaux ku ceu, awm pa yuh kraung daux tokaux mawx, kraung tokaux an, sonsang ting huan tokaux tix ka daux krax moh krax rhawm heue. ¹⁷ Mawh kheu nan aux tom ah nin mai kham mhai rug ka daux Simiang, son ang pex lai baox hu awm pa hu pui tang ceu ka pa nieb keud kix ceu pa giex going daux rhawm tix. ¹⁸ Kheu krax tawng kix hoik faik, kix hoik tang tiah hu khaing Siyiex pa im ju, mawh kheu pa pheem pa ang tawng tidtix pa koe ka daux kix, mawh kheu kiien rhawm rhi kix heue. ¹⁹ Kheu hoik grai krax chix kaig tua, kix tom hoik tawx tokaux tix sonsang yuh hawt alo nex nham kuceu mai rhawm ghoing tix, nieb yuh pa seeing brai ku ceu heue. ²⁰ Viang mawh nan pa gau pex grawng Khrit ang doh mawh nan, ²¹ Phan pex hoik mhong Nawh Cao mai hoik gau ka daux Nawh, ceu pa mawh meh pa koe ka daux Yesux. ²² Kieh pex peeik ti tik ceu pa hoik sax yuh pex glang ka, pa mawh pui prim, pa kieh tokaux tix cux sium, kheu hawt alo nex nham pie lhen heue. ²³ Kieh pex mawh pa khraox ka daux khuan rhawm rhi pex, ²⁴ mai ceep ka pui pa khraox pa hoik phan hoik yuh ka daux pa rahsee mai pa singax singeh pa dex mai pa mawh meh, awm Siyiex heue. ²⁵ Mawh kheu nan tik ceu pa pie lhen, tix kaux lai tix kaux ah lox pa mawh meh ka paox plawg paox nyhawm tix, grawh grawng nawh ex tix kaux lai tix kaux hoik ra lai mawh kraung pak peung ka paox tix heue. ²⁶ Viang pex song rhawm kawx, paw ot kieh mawh phimap. Paw kieh singaix klip ka piang ceu pa song rhawm pex. ²⁷ Paw kieh tawx dee ot phicaox koe. ²⁸ Kaw pasax briex paw kieh nawh baox deeh briex, viang mawh nan kieh nawh yuh kaing pa mhawm pa yuh ka taix tix, sonsang koe nawh ceu pa tawx ka pui pa lo pa ang yaox ti ih khankix heue. ²⁹ Paw kieh lox pa seeing brai lih khaing daux jheeh pex tix gum kawx, ah ceu pa mhawm, awm pa lo sonsang kieh ting lhaong yam mawx yam an, sonsang koe bwanson son kix pa mhong khankix heue. ³⁰ Paw yuh ti kieh Khuan Singax Singeh Siyiex khi rhawm, pa mawh pa hoik tawk pex cum ka daux Nawh, tom hoek singaix pa taoh heue. ³¹ Kieh tik ka ceu pa song rhawm, pa hax rhawm, pa chu rhawm, pa lawh maw, pa map, pa koeng riang ciang khoi khaing pex heue. ³² Pex tix kaux lai tix kaux caux rhawm ti yuh pa mhawm ka paox tix, viex pa awn rhawm awn rhi, pluat ka phimap paox tix, awm hoik pluat Siyiex phimap pex ka daux Cao Khrit heue.

¹ Mawh kheu nan kieh pex hawt jawh ti yuh pa yuh Siyiex, awm kawn praix pa moh khankix, ² hu ka daux pa moh rhawm, awm Cao Khrit kawx hoik moh ka pex mai hoik tawx tokaux tix son ex, ti mawh pa tan ka Siyiex, sonsang mawh bhawng pa sioe baux heue. ³ Awm pa khaw mai pui pa singax khankix, ceu pa phit pa vao mai ceu pa ang singax khankix khawmuik. Pie pa ghoing pa simawd ka ceu in khankix kawx, paw doh kieh koe ka daux pex. ⁴ Awm an ceu pa seeing brai, lox pa nieb ah, nieb naknon, pa mawh ceu pa ang khaw caw khankix paw kieh koe, yuh pa yaogyaw khaing pa yuh ceu an kix heue. ⁵ Pex tawng mhawm mhawm grawng pui pa phit pa vao, pui pa seeing brai, pui pa ghoing, pa mawh pui pa krub riang grang, ang koe sin ka daux meung Cao Khrit mai Siyiex tix kaux kawx heue. ⁶ Paw kieh pui tix kaux kawx teei lox pa giex going mai pie lhen pex kah, mawh kheu mawh grawng ceu in khankix ceu pa song rhawm Siyiex hoek ka piang kawn praix pa ang cu nghiet khankix heue. ⁷ Mawh kheu nan paw kieh pex mawh pa rom tau mai kix, ⁸ Pex hoik mawh pa faik tix bawg, yam in pex hoik mawh pa riang ka daux Simiang, kheu nan hu awm kawn pa riang heue. ⁹ Grawh grawng nawh plix pa riang mawh pa mhawm mhiem mai pa rahsee mai pa mawh meh ku ceu khawmuik heue. ¹⁰ Ceu pa khaw caw mai rhawm Simiang Siyiex mawh pa yuh ka mawx cheu ti yaox, ¹¹ paw lai yuh paox pie ka kaing pa faik pa ang koe bwanson khankix, viang mawh nan ne raw ka kix khaing pa yuh nan. ¹² Grawh grawng nawh ceu pa moh kix ti yuh dee glip, pie pa phaw grawng khankix kawx mawh ceu pa kaig tua heue. ¹³ Grawng pa sidawng phimap ku ceu khawmuik, mawh kheu pa riang, grawh grawng nawh, ku ceu sidawng kheu pa riang heue. ¹⁴ Mawh kheu nan Nawh Cao hoik ah nin, "Kaw pa laig it eue, siduad heue. Mai kaoh im khaing krax yum mai Cao Khrit tak jhan riang ka piang maix heue." ¹⁵ Mawh kheu nan rien rhawm tix ka grawng pa hu pex, paw kieh awm pa ang koe pingnya, viang mawh nan kieh awm pa koe pingnya, ¹⁶ mai taoh ka bawg yam, mawh kheu singaix in khankix mawh pa caox heue. ¹⁷ Mawh kheu nan paw vi mawh pa daox aw, viang mawh nan kieh mawh pa chix tawng grawng alo Simiang mawh pa yuh ka mawx heue. ¹⁸ Paw kieh yoek ka plai rawm plix siiet, pa nieb chix kieh luan yuh cuci, viang mawh nan kieh naog ka Khuan Cao, ¹⁹ sikah ka paox tix, tix kaux lai tix kaux ka daux lox yaogyaw mai lox rhax lai, lox rhax bwan mai yuh lox pa mhawm rhawm pex ka Simiang Siyiex, ²⁰ mai yaog yaw son ku ceu khawmuik ka keeing Siyiex jheeng jheeng, ka daux ceu kaux Simiang ex Yesux Khrit heue. ²¹ Pex tix kaux lai tix kaux ot greem paox tix ka daux ceu pa lhat ka Cao Khrit heue. ²² Moeng khankix eue, kieh koe krax cu nghiet ka mex tix, awm koe ka Simiang Siyiex awx. ²³ Grawh grawng nawh, mex mawh kaing piang moeng tix, awm Cao Khrit kawx, mawh kaing ka piang ceu cao, tokaux Nawh pa mawh Cao Taoh ka tokaux heue. ²⁴ Mawh kheu nan awm cu nghiet ceu cao ka Cao Khrit, kieh moeng khankix koe krax cu nghiet ka mex tix ka daux ku ceu heue. ²⁵ Mex khankix eue, moh ka moeng tix, awm moh Cao Khrit ka ceu cao, tawx tokaux tix son ceu cao, ²⁶ sonsang kieh Nawh ceu cao singax, hoik sigrah ceu cao ka daux rawm mai ka gum lox, ²⁷ sonsang pon tawx Nawh ceu cao pa koe min plakngai ka tokaux tix, pa ang koe dee pliag dee deen mai ang koe pa awm an tix ceu kawx, sonsang mawh ceu cao pa singax pa loig heue. ²⁸ Awm an mex khankix kawx khaw ti moh ka moeng tix awm moh ka tokaux tix heue. Kaw pa moh ka moeng tix moh ka tokaux tix heue. ²⁹ Pui tix kaux kawx ang sax koeng ka nex nham tokaux tix, nawh kia ngien kah, awm kia ngien Cao Khrit ka ceu cao, ³⁰ kheu mawh ex kraung pakpeung ka tokaux Nawh Cao heue. ³¹ "Mawh kheu grawng in simex tak prah miex keeing tix mai ot tau mai moeng tix, kiex ra kaux tak mawh nex nham tix mu khaing heue." ³² Grawng in mawh pa kied ting raux, aux sang krai ka grawng Cao Khrit mai ceu cao heue. ³³ Pex kaux pui mawx kaux pui an tak lai moh ka moeng tix awm moh ka tokaux tix, kieh pa mawh moeng yung yi ka mex tix heue.

¹ Kawn nyawm khankix eue, nghiet lox miex lox keeing tix ka daux Simiang, kheu in mawh pa khaw caw heue. ² "Yung yi ka miex keeing tix" pa mawh gumlox tawm pingnyap gum tix, tau mai lox mukheu heue. ³ "Sonsang mhawm ka maix mai sonsang lang ju maix ka piang haktiex heue." ⁴ Keeing khankix eue, paw yuh ti kieh kawn pex song rhawm eei kix ting mai sivied ti gau mai sidiex ngoig nge ka kix ka daux pa khaw mai Simiang heue. ⁵ Siliex khankix eue, nghiet lox kix pa mawh cao pex awm pa khaw mai nex nham, tau mai krax lhat graung, ka daux pa viex rhawm tix khawmuik, awm nghiet pex ka Cao Khrit. ⁶ Ang mawh ceu pa yuh pa yaox ka ngai khaing, sonsang caw rhawm pui kah, viang mawh nan yuh awm siliex Cao Khrit, pa yuh hawt alo Siyiex khaing daux rhawm rhi heue. ⁷ Viex rhawm pa mhawm ti yuh kaing pa cau pa soi, awm pa yuh son Simiang Siyex, ang awm pa yuh son kawn pui. ⁸ Mawh kheu hoik tawng pex, grawng pui pa yuh ceu pa mhawm ceu pa yuh ka mawx ang ah, tak sang deeh pon awm an khaing Simiang Siyex, siliex ang ah, pui ploi ang ah, ⁹ pex pa mawh cao khankix eue, yuh ceu pa awm an ka siliex khankix, tik pa ah lox ghlat, kheu hoik tawng pex grawng Cao pex mai Cao kix pa ot ka daux meung raoma, ang jhak ka pakngai pui heue. ¹⁰ Dee ghoik mawh nin, kieh koe riang rao ka daux Simiang Siyiex mai ka daux riang rao siawp sibrawm Nawh heue. ¹¹ Ceep kraung naing Siyiex khawmuik, sonsang pon pex ti tiebtie ka jhawm lhak phicaox heue. ¹² Kheu pa ngah ex ang mawh ka nex nham, mawh ka simiang khankix mai ka siawp sibrawm khankix mai ka simiang giex kaing haktiex pa faik in khankix mai ka cub phicaox pa ot plak raoma khankix heue. ¹³ Mawh kheu nan teei kraung naing Siyiex khawmuik, sonsang pon pex ti thang ka daux singaix pa caox an mai khaix hoik yuh khawmuik, kawn pon ti cung sijung heue. ¹⁴ Mawh kheu nan cung heue, khaix hoik nhawt maox rawd nyoi pa mawh, pa mawh meh, ka nyoi tix, khaix hoik ceep kraung naing pa tie naok pa mawh pa rahsee, ¹⁵ khaix hoik ceep kiep pa mawh ceu pa hoik rien tix sidiex lox bwan gaux rhawm pa nhim, ¹⁶ lheu khaing ceu inkix teei kraung naing pa tiebtie, pa mawh krax yum rhawm, sonsang pon pex ti preet ka te ngu kaw pa caox heue. ¹⁷ Teei mhok rhiem pa mawh ceu pa taoh, vaid Khuan Cao pa mawh gumlox Siyiex, ¹⁸ ca rawg bwan ku bawg yam, ka krax rawg mhaing khawmuik, ka daux Khuan Cao, pau ti jhak mai viex rhawm cong sijung mai rawg bwan, son pui singax singeh khawmuik, ¹⁹ mai son aux, yuh ka mawx sonsang tawx pa chix ah lox ka aux, ka daux pa ang aux jheeh tix, sonsang chix viex rhawm kwa tix kieh tawng, grawng pa raux pa mox lox bwan gaux rhawm, ²⁰ Aux pa mawh pui pa yuh kaing tang, ka daux pa phyawk ka ceng. Rawg bwan sonsang pon aux ti viex rhawm kwa tix sidiex lox bwan an, awm pa khaw aux ti sidiex heue. ²¹ Kheu sonsang pon pex ti tawng grawng aux mai khawm pa yuh aux, Tukhik, pa mawh puxaik pa moh mai pa mawh sara pa kaux sijax ka daux Simiang, tak sang kieh pex tawng ku ceu khawmuik. ²² Mawh kheu grawng in aux hoik ploi nawh hu ka pex, sonsang tawng pex ka grawng yix mai sonsang kieh nawh pex nyawm rhawm kah heue. ²³ Kieh pa nhim koe ka puxaik khankix mai krax moh tau mai krax yum rhawm pa kaoh khaing Siyiex Keeing Cao mai Simiang Yesux Khrit heue. ²⁴ Kieh bwanson koe mai kix khawmuik pa moh Simiang ex Yesux Khrit, ka krax moh krax rhawm ceu pa mawh tete heue. Amen.