1234567891011121314151617181920212223242526272829303132333435363738394041424344454647484950
12345678910111213141516171819202122232425262728293031323334353637383940
123456789101112131415161718192021222324252627
123456789101112131415161718192021222324252627282930313233343536
12345678910111213141516171819202122232425262728293031323334
123456789101112131415161718192021222324
123456789101112131415161718192021
1234
12345678910111213141516171819202122232425262728293031
123456789101112131415161718192021222324
12345678910111213141516171819202122
12345678910111213141516171819202122232425
1234567891011121314151617181920212223242526272829
123456789101112131415161718192021222324252627282930313233343536
12345678910
12345678910111213
12345678910
123456789101112131415161718192021222324252627282930313233343536373839404142
123456789101112131415161718192021222324252627282930313233343536373839404142434445464748495051525354555657585960616263646566676869707172737475767778798081828384858687888990919293949596979899100101102103104105106107108109110111112113114115116117118119120121122123124125126127128129130131132133134135136137138139140141142143144145146147148149150
12345678910111213141516171819202122232425262728293031
123456789101112
12345678
123456789101112131415161718192021222324252627282930313233343536373839404142434445464748495051525354555657585960616263646566
12345678910111213141516171819202122232425262728293031323334353637383940414243444546474849505152
12345
123456789101112131415161718192021222324252627282930313233343536373839404142434445464748
123456789101112
1234567891011121314
123
123456789
1
1234
1234567
123
123
123
12
1234567891011121314
1234
12345678910111213141516171819202122232425262728
12345678910111213141516
123456789101112131415161718192021222324
123456789101112131415161718192021
12345678910111213141516171819202122232425262728
12345678910111213141516
12345678910111213141516
12345678910111213
123456
123456
1234
1234
12345
123
123456
1234
123
1
12345678910111213
12345
12345
123
12345
1
1
1
12345678910111213141516171819202122

Ecclesiastes

1

1 Lox bwan kawn simex Davit pa mawh simiang veng Yerusaliem, 2 Lox bwan ah nin, "Pa giex going khaing, pa giex going khaing," "Can kuceu khawmuik mawh pa giex going heue." 3 Ka daux pa sau kawn pui riang rao ti yuh kaing greem singaix koe bwanson ka ceu patix lie? 4 Baux ju pui hoik luan hu tix ju mai baux ju pui tak sang baox deeh hoek tix ju, viang mawh nan, haktiex kaux cong leeing ju heue. 5 Singaix lih mai singaix deeh klip mai deeh to tix hoek ka dee hoik lih tix heue. 6 Bhaung pa phlu hu plak seh mai deeh veeh tix ing ka plak laong, bhaung pa phlu hu jheung jheung mai baox deeh viex hoek khaix dee hoik phlu tix heue. 7 Rawm klawng khankix hu laig daux rawm sigrit sigra, viang mawh nan rawm sigrit sigra ang chix naog, khaing dee kaoh rawm klawng khankix mai deeh baox viex tix ing tan heue. 8 Kuceu khawmuik mawh pa ang lai dak uik krai ka grawng pa taug mao yuh kawn pui heue. Ngai kawx ang chix fah ka pa yaox tix mai yhaok kawx ang chix sak ka pa mhong tix heue. 9 Pa hoik koe tak ang awm ceu pa sang baox koe, ceu pa hoik yuh yam in tak awm ceu pa tak sang yuh mai ceu pa khraox ang lai koe pie tix ceu kawx greem singaix heue. 10 Mawh kawn sang koe pa krai tix ceuceu lie? "Jhak heue, in mawh pa khraox," ceu an hoik dawg mawh pa koe ka sivoe ex heue. 11 Ang koe ceu pa doh keud glang ka an mai tak ang koe krax doh keud ka ceu an khankix, ka can pui pa tak sang hoek khaix an heue. 12 Aux pa sidiex lox bwan, yam mawh tix simiang piang ceu pui Isarelax ka daux veng Yerusaliem heue. 13 Aux hoik koe rhawm sonsang sawg grawng pa dex dawd ka ceu an khawmuik pa koe greem raoma ka cuyi pingnya tix heue. Krax pa kha rhawm in, mawh pa hoik tawx Siyiex sonsang yuh kawn pui ka heue. 14 Aux hoik yaox kaing jhaw can pa hoik yuh tix khankix greem singaix khawmuik mai ceu an khankix hoik mawh pa giex going mai ceu pa ih ka bhaung khaing heue. 15 Ceu pa kawk tak ang pon yuh rah mai ceu pa cud cha tak ang pon simin ka heue. 16 Aux hoik keud mai hoik ah nin daux rhawm tix, "Jhak heue, aux hoik mawh pui pa kied ting lhaong mai hoik lheu koe pingnga cuyi khaing pui khawmuik, pa koe sivoe aux ka veng Yerusaliem heue. Rhawm aux hoik kied koe krax tawng yung ka daux pingnya cuyi pa kied ting lhaong heue." 17 Aux hoik koe rhawm sonsang tawng ka pingnya cuyi mai sonsang tawng ka grawng pa yhot pa vaw khankix heue. Aux hoik tawng ceu in khankix mawh pa ih ka bhaung heue. 18 Mawh kheu pa nie koe pingnya cuyi mawh pa nie koe krax laux rhawm mai kaw pa nie baox ka krax tawng yung nie baox krax pa laux rhawm heue.

2

1 Aux hoik ah nin ka daux rhawm tix, "Hoek yam in, aux sang cheuk cheu ti yaox maix ka krax pa gaux rhawm; mawh kheu nan kieh koe krax gaux rhawm ka daux pa nyawm rhawm, viang mawh nan in kawx baox mawh ceu pa giex going heue. 2 Aux hoik ah nin ka daux pa nyiah tix, "An mawh pa yhot," "Ceu pa gaux rhawm an tak sang mawh pa koe bwanson ka ceu patix lie? 3 Aux hoik keud ti yaox ka daux rhawm nex nham tix pa hoik hawt khaix alo rawm plix siiet, yam kawn naog pingnya cuyi daux rhawm aux mai sonsang deuh aux rhawm tix piang pa vao pa caox, tom hoek yam yaox aux ka can ceu pa mhawm son kawn pui khankix mai pa khaw kawn pui ti yuh ka greem raoma tom sidah ju tix khawmuik heue. 4 Aux hoik yuh kaing jhaw pa ting lhaong mai aux sum nyiex tix mai hoik sum sipeem plix siiet tix heue. 5 Aux hoik cox khre sipeem plix kuceu mai sum khaox plix kuceu pa chix plix khankix. 6 Aux hoik tang yuh rawm dung son cao tix sonsang lhauk rawm ka khaox pa sum tix khankix heue. 7 Aux hoik khrawm tix cie siliex simex siliex bun khankix mai hoik koe siliex pa hoik keh hoik kung ka daux nyiex aux heue. Aux hoik nie lheu koe sinngao tobrie mai cub yung khankix lheu nie khaing pui pa hoik ot ka daux veng Yerusaliem sivoe aux khawmuik heue. 8 Aux hoik kraix khrawm tix cie mau khri mai sinngao can ceu pa dex dawd mai simiang mai can ceu pa lih khaing haktiex an khawmuik son tix heue. Aux hoik khrawm tix cie cub simex mai bun pa chix rhax lai khankix mai pa jiet chix kieh kawn pui gaux rhawm gaux rhi ka, pa mawh bun tom nie heue. 9 Mawh kheu nan aux hoik lih ti mawh pui ting lhaong mai hoik nie lheu mhawm khaing pui pa koe sivoe aux khawmuik ka veng Yerusaliem heue. Pingnya cuyi aux kawx, hoik kaux cong tau mai aux heue. 10 Can ceu pa ghoing ngai aux tix sang pon khankix aux ang thiang khaing ceu an heue. Aux ang pon giex rhawm khaing pa nyawm rhawm tix ceu kawx heue. Grawh grawng nawh rhawm aux hoik koe krax gaux rhawm ka daux kaing jhaw pa yuh tix khawmuik mai in mawh bwanson khaing riang rao pa yuh aux khawmuik heue. 11 Khaix an aux deeh simi ti yaox ka kaing jhaw pa hoik yuh ka taix tix khawmuik mai kaing jhaw pa sau aux riang rao tix yuh khankix mai hoik mawh ceu pa giex going khawmuik mai mawh pa ih ka bhaung khaing heue. Ang lai mawh pa koe bwanson pie tix ceu kawx ka greem singaix heue. 12 Khaix an aux deeh veeh tix sonsang keud ti yaox ka pingnya cuyi mai grawng pa yhot pa vaw khankix heue. Grawh grawng nawh pui pa plud ti hoek khaix simiang sang pon yuh ceu patix lie? Mawh ngie pon yuh nawh can pa hoik sax yuh tix heue. 13 Khaix an aux hoik yaox ka kied mhawm pingnya cuyi khaing pa kwa vao, awm kied mhawm pa riang khaing pa faik heue. 14 Ngai pui koe pingnya cuyi khankix koe ka daux dong kix, viang mawh nan pui kwa pui caox khankix lailing ka daux pa faik heue. Viang yuh nan kawx tokaux aux hoik grux tawng grux yaox ka can pa lih ti mawh awm paox tix piang kix tan heue. 15 Mawh kheu nan aux ah nin ka daux rhawm tix, "Awm hoik lih mawh ceu an piang pui kwa pui caox, an kawx, baox lih ti mawh piang aux mai aux sang nie baox koe pingnya cuyi khaing nawh yuh ka mawh lie? "Khaix an aux deeh ah nin ka daux rhawm tix; "In kawx mawh pa giex going khaing heue." 16 Grawh grawng nawh awm ang pui koe pingnya cuyi lai koe krax doh keud leeing ju, pui kwa pui caox kawx awm an, can pa koe daux yam in tak sang mawh pa piawm tix ka daux bawg yam pa sang hoek heue. Awm yum pui pa koe pingnya cuyi an pui kwa pui caox kawx tak yum heue. 17 Mawh kheu nan aux hoik mee ka krax pa im ju tix, kheu jao pa hoik kha aux rhawm ka grawng kaing jhaw pa yuh tix ka greem singaix heue. Mawh kheu ceu an khankix mawh pa giex going mai pa ih ka bhaung khaing heue. 18 Aux hoik mee ka kaing jhaw pa hoik sau aux riang rao ti yuh ka greem singaix kuceu heue. Mawh kheu sang yaox aux ti prah an ka pui pa tak sang hoek khaix aux, 19 Mai mawh pui mawx pa tawng ka mawh nawh pui koe pingnya cuyi, phan ang mawh nan pui kwa pui caox lie? Viang mawh nan nawh tak sang kwang ka piang kaing jhaw pa hoik sau aux riang rao ti yuh mai pingnya cuyi pa hoik plak jhi aux ka greem singaix heue. In kawx mawh pa giex going heue. 20 Mawh kheu nan aux hoik laux rhawm ka kaing jhaw pa sau aux riang rao ti yuh khawmuik ka greem singaix heue. 21 Grawh grawng nawh viang pui tix kaux yuh kaing jhaw tau mai pa koe pingnya cuyi mai krax tawng yung mai pa min tix kawx, nawh tak sang yaox ti prah sinngao tix ka pui, pa ang yaox ti sau riang rao ti yuh heue. In kawx mawh pa giex going mai ceu pa kied ting caox caig tix ceu heue. 22 Grawh grawng nawh pui pa sau riang rao ti yuh kaing jhaw mai pa kied koe rhawm ti yuh greem singaix kawx, sang koe bwanson ka ceu patix lie? 23 Mawh kheu singaix sawm nawh khankix mawh krax pa laux rhawm mai kaing jhaw yuh nawh kawx mawh ceu pa voi rhawm, yam ponsawm kawx nawh ang yaox tix laux lee rhawm tix heue. In kawx mawh pa giex going heue. 24 Ang lai koe ceu pa lheu mhawm son kawn pui tix ceu kawx, lheu khaing pa ih pa nyaux mai rhawm nawh tak koe krax gaux rhawm ka daux riang rao kaing jhaw pa yuh tix heue. Aux hoik yaox mawh ceu in pa kaoh khaing taix Siyiex heue. 25 Mawh kheu phan ang mawh daux Nawh Cao, mawh pui mawx pa sang yaox ti ih mai mawh pui mawx pa pon tix koe pa nyawm rhawm lie? 26 Grawh grawng nawh Siyiex tawx pingnya cuyi mai krax tawng yung mai krax gaux rhawm ka pui pa mhawm ka plak sivoe Nawh Cao, viang mawh nan, ka pui pa koe phimap, Nawh Cao kieh kix yuh kaing mai khrawm sinngao sonsang tawx nawh ka pui mhawm ka plak sivoe ngai Siyiex heue. In kawx mawh pa giex going mai mawh pa ih ka bhaung khaing heue.

3

1 Praix klawng kuceu tak koe baux yam cie tix, bawg yam tang koe son krax keud gau ti yuh kuceu greem raoma, 2 koe bawg yam keh mai koe bawg yam yum, koe bawg yam sum mai koe bawg yam reeig ka pa sum tix, 3 koe bawg yam pah mai koe bawg yam deeh pai moi, koe bawg yam yieh laux mai koe bawg yam pa deeh sum, 4 koe bawg yam yiiem mai koe bawg yam nyiah, koe bawg yam khi rhawm mai koe bawg yam graoh, 5 koe bawg yam prung prang simaox mai koe bawg yam deeh khrawm ka simaox khankix, koe bawg yam kawm ngheet paox tix mai koe bawg yam gwieh paox tix, 6 koe bawg yam sawg mai koe bawg yam grai, koe bawg yam priex deuh mai koe bawg yam luan, 7 koe bawg yam riah ti tik mai koe bawg yam deeh caing, koe bawg yam yiien yawg mai koe bawg yam sang sikah, 8 koe bawg yam moh mai koe bawg yam koeng, koe bawg yam puing naing mai koe bawg yam pa nhim heue. 9 Pui pa sau riang rao ti yuh kaing khankix sang koe bwanson ceu patix lie? 10 Aux hoik yaox ka kaing jhaw pa tawx Siyiex ti deuh sonsang yuh kawn pui khankix ka daux pa taug mao tix heue. 11 Nawh Cao hoik yuh kuceu mhawm grang ka daux bawg yam cie tix heue. Nawh Cao hoik sau ti deuh baux bawg yam leeing ju daux rhawm kawn pui, viang mawh nan kawn pui ang chix pon cied ti yaox ka kaing jhaw pa yuh Siyiex tom jah mai tom sidah heue. 12 Aux tawng ka ang ceu pa mhawm lai koe tix ceu kawx ka son kix lheu khaing krax gaux rhawm mai sonsang yuh ceu pa mhawm ka daux pa im ju kix, 13 mai pui ku kaux tak sang ih mai nyaux mai gaux rhawm ka daux kaing jhaw riang rao pa yuh tix khawmuik, in mawh totaix pa tawx Siyiex heue. 14 Aux tawng can ceu pa yuh Siyiex, mawh pa koe leeing ju heue. Ang laix pon tix baox piang an mai ang lai pon tix tieh khaing an heue. Siyiex yuh in khankix, sonsang lhat graung kawn pui ka plak sivoe Nawh Cao heue. 15 Can pa hoik dawg lih ti koe mai awm can pa koe yam in mai can pa sang lih ti koe, hoik awm pa dawg lih ti koe mai Siyiex deeh mhaing grawh grawng ceu pa hoik luan khankix heue. 16 Lheu khaing an ka greem singaix aux hoik yaox ka koe dee prawng see pa caox caig tan mai ka dah dee koe pa rahsee, pa caox caig kawx koe tan heue. 17 Aux ah nin ka daux rhawm tix, "Siyiex tak sang prawng ca pui pa rahsee mai pui pa caox caig, grawh grawng nawh bawg yam tak koe sonsang cied ka krax keud krax gau kuceu mai son kaing jhaw kuceu heue." 18 Aux hoik ah nin ka daux rhawm tix, "Son grawng dah dee ot kawn pui khankix, Siyiex cheu ti yaox kix mai sonsang tawng kix tokaux tix mawh pa awm totiag khankix heue." 19 Grawh grawng nawh can ceu pa lih ti koe ka kawn pui khankix, tak sang mawh pa lih ti koe piang totiag mai tix ceu tak lih hoek piang kix, awm yum tix ceu, an tang ceu kawx tak yum heue. Mawh kheu kix khawmuik sileed bhawm awm paox tix, kawn pui ang koe ceu pa blon mhawm khaing totiag, mawh kheu mawh ceu an khankix pa giex going khawmuik heue. 20 Kuceu khawmuik hu ka dah dee tix mu khaing, kuceu khawmuik kaoh khaing phawng tiex mai deeh ing ka phawng tiex heue. 21 Mawh pui mawx pa chix gwieh ti tawng ka khwan ju kawn pui khankix pa haok ka dee lhaong mai khwan ju totiag khankix, pa lih hu ka greem haktiex lie? 22 Mawh kheu nan aux hoik tawng ka ang tix ceu kawx lai mawh pa nie lheu mhawm khaing pa gaux rhawm pui ka daux kaing jhaw yuh tix, kheu mawh an nyum son nawh heue. Mawh pui mawx pa sang pon viex nawh yaox ka ceu pa tak sang lih ti mawh khaix nawh lie?

4

1 Khaix an aux deeh keud ti yaox krax pa tuktiak, pa hoik yuh tix greem singaix khawmuik mai jhak ka rawm ngai can pui pa yaox ti kham geu krax tuktiak, mai ang koe pui pa pon tawx krax nyawm rhawm ka kix tix kaux kawx heue. Mawh kheu can pui pa tuktiak khankix koe sibrawm, pui pa pon tawx krax nyawm rhawm ka kix ang koe tix kaux kawx heue. 2 Mai aux hoik keud ti yaox nie lheu koe bwanson khaing pui pa hoik dawg yum khaing pui pa kawn im ju heue. 3 Viang mawh nan pa nie lheu mhawm khaing an kiex khawm ra, mawh pa ang sax lih ti koe mai pui pa ang sax yaox kaing ceu pa caox caig, pa hoik yuh tix khankix greem singaix heue. 4 Khaix an aux hoik yaox pui pa sau riang rao ti yuh kaing mai pa min ka kaing kuceu, mawh pa kieh paox plawg paox nyhawm tix khankix khoi rhawm ka jao an heue. In kawx mawh pa giex going mai pa ih ka bhaung khaing heue. 5 Pui kwa pui vao bhok taix tix mai ih ka nex tix heue. 6 Krax yiien yawg pa koe tix jhawp an, mawh pa nie lheu mhawm khaing taix pa naog khawm ra jhawp, tau mai pa taug mao mai pa ih ka bhaung khaing heue. 7 Khaix an aux deeh keud rhawm tix mai aux hoik yaox ka ceu pa giex going greem singaix, 8 koe pui pa ot nong nong, ang koe paox pie, nawh ang koe kawn praix mai ang koe puxaik. Viang mawh nan nawh yuh kaing ang koe dee sidah sidu mai ngai nawh ang chix fah tau mai krax pa magmi tix heue. Viang yuh nan nawh ang sax chawk yuh nin, Aux sau riang rao ti yuh ceu in khankix mai kha rhawm tix mawh son pui mawx lie? In kawx mawh pa giex going mai ceu pa taug pa mao khaing heue. 9 Pui ra kaux mawh pa nie lheu mhawm khaing pui tix kaux, grawh grawng nawh kiex hoik pon bwanson ceu pa mhawm khaing daux kaing jhaw riang rao yuh tix heue. 10 Grawh grawng nawh phan tix kaux goh, an tix kaux tak deeh yaog nawh kaoh heue. Viang mawh nan krax laux rhawm hoek piang pui goh an nong nong, mawh kheu ang pui pa sang yaog nawh koe heue. 11 Khaix an phan pui ra kaux noi tix it tau, kiex tak sang si u, viang mawh nan phan mawh pui tix kaux khaing tak sang si u yuh ka mawx lie? 12 Viang pui tix kaux hoik pex ka sibrawm pui tang kaux kawx, pui an ra kaux tak pon tiebtie nawh heue. Maox brawm loe nyaing ang pon dud yie heue. 13 Kawn nyawm pui hot pa awn ju pa koe pingnya cuyi an tix kaux, nie lheu mhawm khaing simiang riex ju pa koe rhawm kwa rhawm vao an tix kaux pa ang lai pon sidiex gau ka nawh tix bawg kawx heue. 14 Grawh grawng nawh, nawh chix mawh simiang khaing pa lih tix daux thawng, viang nawh hoik mawh pa keh ka daux krax pa hot shia daux meung haktiex tix kawx heue. 15 Aux hoik yaox krax im ju pui khawmuik pa lih ti mawh greem singaix heue. Kawn nyawm awn ju pa ot glawk ra an, chix pon plud tix ot ka dah dee ot nawh heue. 16 Pui haktiex pa ot greem pa kwang simiang an, ang lai dak uik simin ka, viang mawh nan can pui pa plud tix hoek khaix nawh khankix, ang lai koe krax fah rhawm ka daux nawh heue. In kawx mawh pa giex going tete mai mawh pa ih ka bhaung khaing heue.

5

1 Yuh satix ka diang caong hu tix khankix, yam hu maix ka nyiex bwan Siyiex, pa greed tix dex sonsang nghiet ka lox Siyiex, lheu mhawm khaing sonsang tawx pui vao pui caox krax tan pa appong tix khankix heue. Grawh grawng nawh kix ang tawng ka yuh tix pa caox heue. 2 Yuh satix mai priex jheeh tix mai paw kieh rhawm maix luan phai sikah tix ceu kawx ka plak sivoe Siyiex. Mawh kheu Siyiex ot ka daux meung raoma mai maix ot piang haktiex heue. Mawh kheu nan paw kieh lox maix haoh heue. 3 Awm kied haoh hun kaing yuh lih ti mawh camaox, mai tawng ka pui vao pui caox, kheu pa mhong haoh lox sikah nawh heue. 4 Yam yuh maix sijax mukheu ka Siyiex, paw lai greed bawg yam sang yuh tix an, mawh kheu Nawh Cao ang khaw rhawm ka daux pa yuh pa vao pa caox heue. Tawx awm ceu pa hoik yuh maix sijax mukheu heue. 5 Phan ang yuh sijax mukheu nie mhawm khaing yuh maix sijax mukheu mai ang tie hawt ti yuh heue. 6 Paw kieh jheeh maix viex maix hoek ka daux phimap mai paw lai kieh maix yaox tix ah ka plak sivoe kawncau pa ting Siyiex aux hoik lud loe tix heue. Siyiex tak song rhawm ka lox khyox khaw maix mai yuh laux ka kaing jhaw pa yuh maix ka taix tix khankix kheu jao patix lie? 7 Mawh kheu ka daux krax pa kied nie camaox mai ka daux lox sikah haoh hun khankix kawx, mawh ceu pa giex going heue. Mawh kheu nan kieh maix koe krax pa lhat graung ka Siyiex heue. 8 Phan maix yaox ka pui hot shia yaox ka krax tuktiak mai prawng ca ka kix ka daux pa ang rahsee daux haktiex tix dahdah, paw vi daox deng ka grawh grawng ankix awx. Mawh kheu awm jhak simiang ting piang paox tix, tix kaux lai tix kaux mai simiang pa nie lheu ting lhaong khankix koe ka piang kix heue. 9 Lheu khaing an bwanson pa kaoh khaing haktiex mawh son kuceu khawmuik; tokaux simiang kawx mawh pa pon bwanson khaing daux kaung heue. 10 Pui pa moh ka mau, tak ang chix koe krax fah rhawm tau mai mau mai pui pa moh ka sinngao, tak ang chix koe krax fah rhawm tau mai krax pa haok hwan sinngao tix heue. In kawx mawh pa giex going heue. 11 Yam haok hwan kraung khrai, pui pa sang ih kawx haok hwan heue. Mawh kheu nan cao kraung khrai sang koe bwanson ceu patix lheu khaing yaox kix ka ngai tix lie? 12 Pui pa yuh kaing, jiet nyawm laig it, viang nawh ih ceeix ang ah ih tom nie ang ah, viang mawh nan pui pa kied mag kied mi, krax magmi an, ang chix kieh nawh nyawm it heue. 13 Aux hoik yaox krax caox pa kied kin, ka greem singaix, krax magmi pa hoik khrawm kix ti deuh, deeh mawh pa krix cao kix kah, 14 mai can sinngao an khankix grai grup ka daux krax pa ang mhawm, yam pon nawh kawn simex tix kawx, ang lai koe tidtix ka daux taix nawh heue. 15 Awm lih hoek kakaong nawh khaing daux vaig miex tix nawh tak deeh ing awm an mai nawh ang pon teei ti viex tix ceu kawx khaing riang rao pa hoik yuh nawh ka taix tix heue. 16 In kawx mawh krax caox pa kied kin, awm hoik lih hoek nawh yuh ka mawx nawh tak sang yaox ti hu awm an heue. Nawh sang koe bwanson ka ceu patix, ka pa sau nawh riang rao ti yuh kaing son bhaung, 17 mai nawh nai singaix sawm daux pa ih nyaux tix ka daux pa faik mai nawh koe krax laux rhawm mai krax saux krax ngia mai krax pa song rhawm tom nie heue. 18 Jhak heue, in mawh pa hoik yaox aux, an mawh ceu pa mhawm mai pa khaw caw ka son pui pa sang ih sang nyaux mai sonsang koe krax nyawm rhawm daux kaing jhaw pa mhawm yuh nawh khawmuik, ka daux pa sau nawh riang rao tix greem singaix, daux baux singaix ju nawh khankix, ka pa tawx Siyiex ka nawh heue. Mawh kheu an mawh nyum cie nawh heue. 19 Awm hoik tawx Siyiex krax magmi mai krax koe kraung khrai sinngao son pui ku kaux mai hoik tawx sibrawm ka nawh sonsang ih khaing an mai rieb mawh nyum cie tix mai koe krax gaux rhawm ka daux riang rao kaing jhaw yuh nawh, in mawh bwanson totaix pa tawx Siyiex heue. 20 Mawh kheu nawh tak ang yaox ti keud ka daux baux singaix im ju nawh khankix heue. Grawh grawng nawh Siyiex kieh nawh nyawm rhawm ka daux rhawm tix tau mai yuh tix kaing tom nie heue.

6

1 Aux hoik yaox ka koe ceu pa caox ka greem singaix mai an mawh pa kied cien ka piang kawn pui khankix, 2 pui tix kaux Siyiex hoik tawx krax magmi mai kraung khrai mai min plakngai khankix, son ang nawh lai koe krax cud krax cha pie tix ceu kawx son tokaux tix ka can pa simie rhawm nawh khawmuik; viang mawh nan Siyiex ang tawx sibrawm sonsang ih nawh ka an, viang mawh nan pui tang praix klawng tix kaux tak teei ti ih heue. In mawh pa giex going mai mawh pa kied caox caig heue. 3 Phan pui tix kaux koe kawn praix tix yieh kaux mai yaox ti ot tom reung num, bawg yam singaix tix kawx, viang mawh nan rhawm nawh ang nyang fah ka ceu pa mhawm koe tix heue. Yum ka daux pa ang yaox ti sipaung heue. Aux ah nin, kawn nyawm pa lawt an tix kaux kawn nie lheu mhawm khaing nawh heue. 4 Mawh kheu nawh lih bleeh ka daux pa giex going mai lih hu ka daux pa faik mai ceu kaux nawh mawh pa hoik kheem tix ka pa faik heue. 5 lheu khaing an, nawh ang sax yaox ka singaix mai ang sax tawng ka grawng tix ceu kawx, nawh hoik nie lheu pon krax laux lee khaing pui ting an, 6 viang nawh yaox tix im ju ra rheng num kawx mai ang mawh pa koe bwanson heue. Ku kaux khawmuik hoik mawh pa hu tix dah ang mawh lie? 7 Can kaing jhaw pa yuh pui khawmuik mawh son jheeh nawh, viang yuh nan kawx rhawm pa simie tix ih ang chix fah heue. 8 Grawh grawng nawh pui pa koe pingnya cuyi sang nie lheu koe ceu patix khaing pui vao pui caox lie? Mawh koe bwanson krax im ju pui hot sibhawm ka plak sivoe ngai pui im ju khankix yuh ka mawx lie? 9 Grawng pa chix yaox ngai ceu pa mhawm khankix mawh pa nie lheu mhawm khaing krax lunglang rhawm maix tix cie heue. In kawx mawh pa giex going mai mawh pa ih ka bhaung khaing heue. 10 Can pa koe yam in ceu patix ang ah, dawg sum ti deuh ceu kaux heue. Mawh kheu tawng grawng kawn pui mawh pa giex going mai nawh ang pon silah tix tau mai Nawh Cao pa nie lheu ting sibrawm khaing nawh heue. 11 Mawh kheu kied haok hwan krax pa giex going, kawn pui sang koe bwanson ka ceu patix lie? 12 Grawh grawng nawh mawh pui mawx pa tawng ka ceu pa mhawm son pui ka daux baux ju pa giex going nawh khankix khawmuik, pa luan hu awm veei lie? Mawh pui mawx pa pon krai ceu pa sang lih ti koe khaix nawh greem singaix ka kawn pui lie?

7

1 Min ceu kaux pa mhawm mawh pa nie lheu mhawm khaing rawm bee sioe bhawng mai singaix yum mawh pa nie lheu mhawm khaing singaix keh heue. 2 Hu ka daux nyiex yum nie lheu mhawm khaing hu ka daux nyiex pa khan kheu priex, grawh grawng nawh an mawh dee sidah sidu hoek pui khankix khawmuik mai can pui pa im ju khankix, tak pon sau tix priex an ka daux rhawm tix heue. 3 Krax laux rhawm mawh pa nie lheu mhawm khaing krax pa nyiah heue. Grawh grawng nawh, kheu jao koe pakngai pa laux rhawm an chix kieh rhawm nie lheu mhawm ka heue. 4 Rhawm pa koe pingnya cuyi koe ka daux nyiex pa yum, viang mawh nan, rhawm pui pa vao pa caox khankix, koe ka daux nyiex pa gaux rhawm heue. 5 Pa nghiet lox sidiex gau pui pa koe pingnya cuyi, mawh pa nie lheu mhawm khaing nghiet ka lox lai rhax pui pa vao pa caox khankix heue. 6 Grawh grawng nawh lox nyiah pui pa vao pa caox, awm lox luah taoh khaox ka gleeing greem aw, in kawx mawh pa giex going heue. 7 Krax pa yeen ya chix kieh pui pa koe pingnya cuyi yhot ka mai krax pa ih mau cun praok chix kieh rhawm pui dieh jum ka heue. 8 Dee sidah sidu an mawh pa nie lheu mhawm, khaing dee jah tix koe mai pa koe rhawm gun rhawm yeung, mawh pa nie lheu mhawm khaing pa lhaong rhawm heue. 9 Paw phai dawd rhawm tom lih koe krax pa song rhawm, grawh grawng nawh, krax pa song rhawm ot piang dieb rhawm pui vao pui caox khankix heue. 10 Paw doh chawk ah nin glang ka singaix pa hoik luan khankix hoik mawh pa nie lheu mhawm khaing baux in singaix kheu jao grawng patix lie? Grawh grawng nawh pa chawk cheng maix ti yaox an maix ang chawk ka daux pa koe pingnya cuyi heue. 11 Pingnya cuyi mawh ceu pa mhawm awm sinngao mai mawh pa koe bwanson ka son pui khankix, pa yaox ka singaix heue. 12 Grawh grawng nawh pingnya cuyi chix tiebtie, awm an mau kawx mawh pa chix tiebtie heue. Krax tawng yung mawh pa kied mhawm mai tawx ju ka pui hoik koe pingnya heue. 13 Keud ti yaox ka kaing jhaw pa hoik yuh Siyiex, grawh grawng nawh, pa hoik yuh Nawh Cao vawk an mawh pui mawx pa sang pon yuh rah? 14 Ka daux singaix pa haok hwan gaux rhawm kah, ka daux singaix koe pa kha rhawm, keud ti yaox sonsang tawng kawn pui ka pa tak sang bleeh tix koe khaix nawh, Siyiex hoik lailoh ti tawx ceu pa mi mai ceu pa hot ka kawn pui heue. 15 Aux hoik yaox ceu an khawmuik ka daux singaix baux ju pa giex going aux, pui pa rahsee tak laux leeing daux pa rahsee nawh, mai pui caox caig tak lang ju ka daux pa yuh tix pa caox heue. 16 Paw doh mawh pa blon rahsee mai paw doh mawh pa blon koe pingnya cuyi maix lai sang yuh tokaux tix laux leeing kheu grawng ceu patix lie? 17 Paw doh mawh pa blon caox caig mai paw doh mawh pa vao pa caox, yuh patix maix lai simie tix yum sivoe bawg yam cie maix? 18 An mawh pa mhawm sonsang jhawp maix tix priex in mai paw lai yah taix tix son ang an lai gah tix hu ka tang kaux heue, mawh kheu pui pa lhat graung ka Siyiex, tak glawd khaing kix khawmuik heue. 19 Pingnya mawh pa kieh pui koe pingnya cuyi, koe sibrawm khaing cao kaing naing ot daux veng kao kaux heue. 20 Mawh kheu ang kawn pui piang haktiex rahsee, pa yuh ceu pa mhawm mai pa ang koe phimap, ang koe tix kaux kawx heue. 21 Paw priex ceu pa krai pui kuceu khankix daux rhawm tix, phan yuh nan maix tak mhong lox jhax lawg siliex maix ka tix, 22 mawh kheu rhawm maix hoik tawng ka jhax lawg tix ka pui tang kaux ku bawg yam heue. 23 Ka daux kuceu khawmuik aux cheuk cheu ti yaox piang tix heue. Aux hoik ah nin, Aux deuh tix mawh pa koe pingnya cuyi, viang mawh nan pingnya cuyi an hoik mawh pa singai khaing aux heue. 24 Mawh pui mawx pa pon sawg ti yaox ka ceu pa singai mai ceu pa kied blon raux an lie? 25 Rhawm aux deeh keud ti yaox sonsang tawng mai sawg cied ti yaox ka pingnya mai ka grawng ceu an khankix, sonsang tawng ka pa caox caig, pa dex mai phimap mai pa vao pa caox mai pa yhot vaw heue. 26 Aux yaox ceu pa nie lheu song khaing krax yum, pa mawh bun koe rhawm keud ti sang taong jhawk mai rub khankix mai maox ceu pa jiet chix phyawk pui ka taix nawh heue. Pui pa een rhawm ka Siyiex, tak glawd khaing bun an heue. Viang mawh nan pui yuh phimap khankix, tak krix ka bun an heue. 27 Jhak heue, cao krai lox bwan ah nin, In mawh ceu pa hoik yaox aux, mai baox naok grawng tix ceu hoik tix ceu sonsang pon sawg ti yaox ka grawng tang ceu, 28 pa kawn koe rhawm aux tix sawg, viang mawh nan aux ang nyang bax sipub ka, ka sinax simex tix rheng kaux aux hoik yaox ka tix kaux; viang mawh nan, ka sinax bun tix rheng kaux aux ang yaox ka tix kaux kawx heue. 29 Jhak heue, aux hoik yaox ngie ka an tix ceu, Siyiex hoik yuh kawn pui rahsee, viang mawh nan kix hoik sawg ti yaox kuceu ka daux krax keud tix tom nie heue.

8

1 Mawh pui mawx pa awm pui koe pingnya lie? mawh pui mawx pa pon tawng tix toe dee bleeh ceu pa kied raux an lie? Pingnya cuyi kawn pui mawh pa kieh pakngai nawh riang mai grang pakngai nawh hoik tieh loh tix heue. 2 Aux tawx krax keud ka maix, "Priex ti hawt ka lox tawm simiang ka min pa hoik tiextu maix ka Siyiex heue. 3 "Paw nieb lih hu khaing ka plak sivoe ngai simiang mai paw cung ti ot ka daux ceu pa caox tix ceu kawx, mawh kheu simiang pon yuh kuceu awm pa koe rhawm tix heue. 4 Gumlox simiang mawh pa koe sibrawm mai mawh pui mawx pa pon ah ka simiang yuh nin, Mawh yuh maix ceu patix lie?" 5 Pui pa priex ti hawt ka lox tawm nawh, tak ang yaox krax pa kha rhawm pie tix ceu kawx mai rhawm pui pa koe pingnya cuyi, chix yaox ka baux yam mai krax prawng ca khawm ra heue. 6 Grawh grawng nawh son grawng kuceu koe bawg yam mai pa prawng ca, viang mawh pa kied kha rhawm kawx koe tom nie piang nawh heue. 7 Grawh grawng nawh, nawh ang tawng ka ceu pa tak sang lih ti mawh, mawh kheu nan, mawh pui mawx pa pon krai, pa tak sang lih ti mawh an lie? 8 Ang koe pui tix kaux kawx pa koe sibrawm ti giex ka khwan mai phan ang mawh nan ang koe sibrawm ka daux singaix yum heue. Ang koe daux krax pa sang glawd ka daux naing an mai pa caox caig tak ang pon taoh ka pui khankix khaing pa caox caig an heue. 9 Aux hoik sipub ka ceu in khawmuik mai hoik keud sawn ti yaox daux rhawm tix ka kaing kuceu pa hoik yuh tix greem singaix heue. Koe bawg yam pa kwang pui tix kaux piang pui tang kaux pa deeh kieh bwanson tokaux cao nawh laux heue. 10 Khaix an aux yaox ka sipaung pui ka pui caox caig khankix, pui pa hoik laig lih khaing dee pa singax singeh mai koe pui pa piawm ka kix pa yuh pa caox ka daux veng ka dee pa hoik yuh kix ceu an heue. In kawx mawh pa giex going heue. 11 Grawh grawng nawh mawh kheu ang khran ciyang piang kaing pa caox caig an khankix phaiphai, rhawm kawn pui khankix hoik naog ka ceu pa sang simie ti yuh ka pa caox heue. 12 Viang pui koe map yuh pa caox tix yieh bawg mai viang nawh lang ju kawx, viang mawh nan aux tawng ka pui pa lhat graung ka Siyiex mai pa lhat graung ka plak sivoe Nawh Cao mawh pa pon bwanson tete heue. 13 Viang mawh nan mawh kheu pui caox caig ang koe pa lhat graung sivoe ngai Siyiex mai nawh tak ang pon bwanson pa mhawm mai baux singaix pa im ju nawh pa awm veei kawx tak ang lang heue. 14 Koe pa giex going tix ceu pa lih ti mawh piang haktiex awm lih ceu an ti mawh piang kaing yuh pui rahsee khankix, piang pui caox kawx awm an, awm lih ceu an ti mawh piang ju pui caox khankix piang pui rahsee kawx awm an heue. Aux hoik ah in mawh pa giex going heue. 15 Mawh kheu nan aux yaogyaw ka krax pa gaux rhawm heue. Grawh grawng nawh kawn pui ang lai koe ceu pa nie lheu mhawm ka greem singaix khaing ceu pa ih pa nyaux mai krax pa gaux rhawm heue. Grawh grawng nawh mai kaing jhaw pa sau nawh riang rao ti yuh daux baux singaix im ju tix, nawh tak pon bwanson pa tawx Siyiex greem singaix heue. 16 Aux hoik so rhawm tix sonsang tawng tix ka pingnya mai sonsang pub tix ka kaing jhaw pa hoik yuh tix khankix piang haktiex, mawh kheu pui tiblah ang yaox ti it pon ngaix mai ponsawm heue. 17 Khaix an aux hoik yaox ka kaing jhaw pa hoik yuh Siyiex khawmuik, ka ang pui tix kaux kawx pon khre ti yaox ka kaing pa yuh Nawh Cao greem singaix heue. Grawh grawng nawh, viang kawn pui sau riang tix khre kawx nawh ang pub ka an heue. Viang pui koe pingnya cuyi sau riang tix sonsang tawng ka an kawx, nawh ang pub ang yaox ka an heue.

9

1 Aux keud ti yaox ka grawng in khawmuik ka daux rhawm tix, sonsang tiag cheu aux ti yaox ka kaing jhaw pa yuh pui rahsee mai pui koe pingnya khankix ka daux tawm taix Siyiex heue. Krax moh krax rhawm ang ah mai krax koeng krax khoi ang ah, kawn pui ang tawng ka tix kaux kawx, can pa koe sivoe ngai kix khawmuik mawh pa giex going heue. 2 Grawng kuceu khawmuik, lih ti mawh ka pui ku kaux awm paox tix, tix ceu khaing, ka pui rahsee mai pui caox caig, ka pui mhawm mai pui ang mhawm, ka pui singax singeh mai ka pui pa seeing brai, ka pui pa tawx krax tan mai ka pui pa ang tawx krax tan heue. Pui koe phimap mai pui pa ang koe phimap, grawng ceu in hoek ka piang pui pa tiextu mai ka piang pui pa lhat ka pa tiextu heue. 3 In mawh ceu pa caox pa lih ti koe khawmuik ka greem singaix, an tix ceu pa hoek khaing piang pui khawmuik heue. Rhawm rhi kawn pui khankix hoik naog ka pa caox tete, mai rhawm pa yhot koe ka daux rhawm kix glang yam kawn im ju kix mai khaix an kix hu ka dee yum heue. 4 Viang mawh nan, son can pui pa kawn im ju an khankix khawmuik mawh pa koe krax keud pot jum pot, mawh kheu sox pa im tix mu lheu mhawm khaing sivai sangsi pa yum tix mu heue. 5 Mawh kheu pui pa im ju tawng ka tak sang yum tix, viang mawh nan, pa hoik yum ang tawng tit tix mai kix ang lai pon totaix, mawh kheu kix hoik piawm ka nawh heue. 6 Krax moh krax rhawm kix mai krax pa koeng kix mai rhawm pa khoi kix khankix kawx, hoik grai hu, kix ang lai yaox ti dex dawd mai kaing jhaw pui pa kawn im, ka daux pa yuh tix greem singaix pie tix ceu kawx heue. 7 Hu heue, ih pa ih tau mai krax pa gaux rhawm mai nyaux rawm plix siiet tau mai pa nyawm rhawm, grawh grawng nawh, Siyiex hoik rieb ti teei kaing jhaw pa yuh maix khankix heue. 8 Kieh kraung ceep maix mawh pa paing jheung jheung mai paw kieh rawm bee sioe bhawng cud khaing kaing maix tix bawg kawx heue. 9 Ot ka daux pa nyawm rhawm tau mai moeng pa moh maix daux singaix im ju pa giex going pa hoik tawx Nawh Cao ka maix greem singaix mai kieh singaix sawm maix luan daux pa nyawm rhawm tix, mawh kheu an mawh nyum ka daux ju maix mai ka daux riang rao kaing pa yuh maix greem singaix heue. 10 Can kaing pa sang yaox maix ti yuh khankix coca mai sau riang ti yuh awx, mawh kheu ka daux meung yum pa sang hu maix an kaing pa yuh ang ah krax keud krax gau ang ah, krax tawng yung ang ah, pingnya cuyi ang ah, ang lai koe ka heue. 11 Khaix an aux hoik jhak ti yaox ka greem singaix, pui pa phai to viang silah ti to kawx ang lai pex jheung jheung, pui ting riang ang lai pex ka naing jheung jheung, pui lhak pui haing ang lai yaox tix sak vaig jheung jheung, pui pa koe krax tawng yung ang lai magmi jheung jheung, pui pa min ka kaing jhaw ang lai koe min plakngai jheung jheung, viang mawh nan bawg yam mai akhwang pa chix pon tix ka son khawmuik heue. 12 Mawh kheu kawn pui ang tawng ka bawg yam cie tix. Awm kax pa hoik krix ka rub mai awm sim pa krix ka jhawk, mawh kheu nan, kawn pui kawx kix ang tien tawng yam krix tix ka jhawk taung pa caox caig piang kix heue. 13 Pingnya cuyi pa yaox aux greem singaix mai pa khaw tix yaogyaw ka mawh awm in heue. 14 Koe veng iak tix veng pa tux ot pui ka; mai simiang pa kied ting riang rao tix kaux hoek tix puing veng an mai lai lawm ka veng an mai yuh tab hawt vung viang veng an heue. 15 Yam an ka daux veng an koe pui lhak pa hot tix kaux mai nawh hoik taoh veng an ka pingnya tix heue. Viang mawh nan pui tix kaux kawx ang lai doh keud ka pui hot an heue. 16 Khaix an aux ah nin, "Pingnya cuyi mawh pa nie lheu mhawm khaing riang rao heue. Viang mawh nan pingnya cuyi pui hot shia an, mawh pa sibriem pui ka mai ka lox nawh kawx pui ang nghiet ka heue. 17 Lox sikah pui lhak ka daux pa yiien yawg, mawh pa nyawm tix nghiet lheu khaing lox riag yo cao kwang piang pui vao pui caox khankix heue. 18 Pingnya cuyi mawh pa nie lheu mhawm khaing kraung naing pa shiao son naing; viang mawh nan, pui pa koe map grham tix kaux, mawh pa yuh ceu pa mhawm khankix laux leeing heue."

10

1 Roi yum khankix chix kieh rawm bee pa sioe bhawng cux si um heue. Awm an ceu pa caox ceeix khaing kieh pui koe pingnya pa nab yam pui ka laux min plakngai heue. 2 Rhawm pui koe pingnya cuyi, koe ka taix khawn dawm nawh, viang mawh nan rhawm pui pa vao pa caox an, koe ka taix khawn gwiex heue. 3 Yam hu pui vao pui caox krax, nawh yie piawm rhawm tix mai jhi mawh tix pui vao pui caox ka pui ku kaux heue. 4 Phan pui kwang maix lih tix song rhawm piang maix, paw gah tix hu khaing dee ot maix, grawh grawng nawh krax pa gun yeung chix kieh krax lud ting yiien ka heue. 5 Koe pa caox caig tix ceu pa hoik yaox aux greem singaix, mawh krax lud pa kaoh khaing cao pa kwang heue. 6 Pui vao pui caox ngawm ka dee pa lhaong mai pui magmi ngawm ka dee pa tiiem heue. 7 Aux hoik yaox ka brug siliex khankix brung mai yaox hu simiang khankix ka caong tix piang tiex awm siliex heue. 8 Pui pa kaong daux o tak dee cod ka daux an mai pui pa yieh ka vie lawng siuing tak sang tut ka nawh heue. 9 Pui pa gah ka simaox khankix, simaox tak dheem ka nawh mai pui pa lug khix, tak deeh mat ka an heue. 10 Phan moe beem mai ang deeh klaing lawm, tak nie lheu yaox ti sau riang tix heue. Viang mawh nan pingnya mawh pa tawx bwanson ka pex heue. 11 Phan siuing hoik tut cao simeed sivoe, cao simeed ang lai koe bwanson tidtix, 12 gumlox pa kaoh khaing daux jheeh pui koe pingnya, mawh pa koe min pa mhawm, viang mawh nan jheeh pui vao pui caox tak bleet nawh heue. 13 Lox pa jah nawh tix sikah mawh pa vao pa caox mai deeh sidah lox pa krai nawh mawh lox caox caig pa yhot vaw heue. 14 Pui pa vao pa caox kied nie lox sikah, pui tix kaux kawx ang tawng ka ceu pa sang lih tix mawh, mawh pui mawx pa pon krai nawh mhong ceu pa tak sang lih ti mawh khaix nawh lie? 15 Kaing pa yuh pui vao pui caox khankix, tawx krax pa taug mao ka kix heue. Mawh kheu awm kix pui pa ang tawng ka krax pa sang hu tix ka veng heue. 16 Pa mawh meung haktiex pa kwang simiang pa awn ju mai simiang cao kaing cao maix khankix pa kaoh ih nyaux ngie priex ponngawb caocao khankix eue, pex tak hoek krax laux leeing heue. 17 Pa mawh meung haktiex pa kwang simiang mai simiang cao kaing maix khankix pa ang chax nie luan ih luan nyaux pa ih nyaux mai pa khaw bawg yam khankix eue, kieh bwanson koe piang pex heue. 18 Kheu jao pa kied nieh, braux nyiex tak rham mai taix pa nieh cox braux nyiex, nyiex tak roik heue. 19 Pawie mawh pa yuh tix son pa gaux rhawm mai rawm plix siiet mawh pa yuh tix sonsang nyawm rhawm, viang mawh nan mau mawh pa pex ka kuceu heue. 20 Pie ka daux rhawm keud maix kawx paw doh jhax lawg ka simiang, pie ka daux lawg it maix kawx paw doh jhax lawg ka cao mi, mawh kheu sim pa pu daux raoma tak viex lox maix hu mai sim pa pu an tak krai grawh grawng an heue.

11

1 Taing pa ih maix piang rawm, grawh grawng nawh ang lai rheung mai tak deeh yaox an khankix tom nie heue. 2 Gwieh tix tawx nyum ka pui aliah kaux mai baox tawx ka pui daix kaux, mawh kheu ang maix tawng ka ceu pa caox pa tak sang lih ti koe piang haktiex heue. 3 Phan paiawm khankix naog ka rawm lhiex mai lhiex lih piang haktiex mai phan gaw khaox goh ka plak seh ang ah, ka plak laong ang ah, ka gaw khaox an, tak noi tix ot ka dee goh tix tan heue. 4 Pui pa chix tawng grawng bhaung, ang ruat simie mai pui pa chix keud chix sawn ti yaox ka paiawm khankix, ang lai vawg nghox heue. 5 Awm ang maix tawng ka hu khwan mai ang tawng ka haok khwan si-ang kawnngie ka daux vaig bun nghe, mawh kheu nan maix kawx ang tawng ka kaing yuh Siyiex kuceu khawmuik heue. 6 Ruat simie plak ponngawb mai plak ponbo kawx paw doh yoi ka taix maix, grawh grawng nawh maix ang tawng ka pa yuh ka mawx pa sang koe bwanson mai pa ang koe bwanson, mawh kheu in khawm ra ceu mawh pa mhawm awm paox tix heue. 7 Pa riang mawh pa tie tete mai yam yaox ngai ka pa riang singaix kied gaux rhawm ka heue. 8 Viang mawh nan phan pui lang ju tom rheung num mai koe krax gaux rhawm ka daux ceu an khawmuik, viang mawh nan kieh nawh deeh doh keud ka baux singaix pa faik an khankix mawh kheu singaix an mawh pa kied rheung heue. Can pa tak sang lih ti mawh khawmuik, mawh pa giex going heue. 9 Pui awn ju eue, gaux rhawm yam kawn awn ju maix mai kieh rhawm maix koe krax nyawm rhwm baux yam kawn awn ju maix, hawt hu ka daux krax pa koe rhawm maix mai ka daux pa yaox maix ka ngai tix khankix heue. Viang mawh nan tawng ka mawh kaing ceu an khankix pa sang viex Siyiex tix prawng ca ka maix heue. 10 Mawh kheu nan teei ti tik krax laux rhawm khaing daux rhawm maix mai teei ti tik pa caox khankix khaing daux tokaux maix heue. Mawh kheu baux yam mawh maix kawn nyawm mai baux yam awm ju maix khankix mawh pa giex going heue.

12

1 Doh keud ka cao pa phan pa deuh maix ka daux baux singaix yam kawn awn ju maix, sivoe sang hoek singaix pa caox caig khankix mai num khankix hoit greed tix dex yam sang ah maix nin, "Aux ang lai koe krax nyawm rhawm ka daux ceu an heue. 2 Sivoe ang singaix, mai pa riang khix mai simuing khankix nyang bax faik mai paiawm nyang bax ceep khaix lhiex, 3 ka dau singaix cao pau nyiex khankix hoik sikua mai pui pa ting riang rao khankix hoik die riang awn riang, cao krid mhaw khankix, hoik naox kaing yuh tix kheu hoik tux pui mai pui pa sigaig khaing daux siviex iak khankix pa riang tak faik ka kix, 4 yam hoik yiien lox krid mhaw siviex dex krax khankix hoik yeep tix singip mai nawh kaoh caocao kheu mhong ti lox sim mai lox rhax kawn nyawm bun khankix yiien hu, 5 kix lhat ka dee pa lhaong mai ceu pa yaoh yee koe ka daux krax daux laux, yam pruh tai khaox Batan, sido hoik cien ka tokaux tix mai rhawm pa simiex nawh tak dieh hu heue. Mawh kheu kawn pui tak kawn hu ka nyiex leeing ju tix mai pui pa yiiem yo khankix tak hu hoek ka hawt krax heue. 6 Doh keud ka Cao pa phan pa deuh maix sivoe ang maox mau nyang dud, phan ang mawh nan sivoe max klong khri, phan ang mawh nan sivoe max singiien rawm ka daux dee lih rawm keut, phan ang mawh nan sivoe graig jaong ling hawt rawm dung heue. 7 Khaix an phawng tiex tak sang deeh ing ka tiex ka dee hoik kaoh tix mai khwan tak sang deeh ing ka Siyiex, Cao pa tawx nawh heue. 8 Lai lox bwan ah nin, "Pa giex going khaing pa giex going, kuceu khawmuik mawh pa giex going heue." 9 Lheu khaing an kheu hoik koe pingnya cuyi cao sidiex lox bwan, nawh ca kawn gau krax tawng yung ka pui khankix, nawh sawg mai tiag ti yaox ka gumlox kab khankix tom nie glawk mawx glawk an heue. 10 Cao sidiex lox bwan hoik sawg ti yaox gumlox pa nyawm tix nghiet mai tiem ti deuh gumlox pa rahsee mai pa mawh meh khankix heue. 11 Gumlox sikah pui koe pingnya cuyi khankix awm khaox lawm mai gumlox sikah cao pa gau khankix awm gawng rhiem pa hoik tawk tix laig mhawm mhawm, pa kaoh khaing cao liang yung pa ting heue. 12 Lheu khaing an kawn simex aux eue, rieb ti teei ka gumlox sidiex gau in khankix liak, phan yuh ka phuk lai tom nie kawx, mawh pa ang chix sidah sidu mai pa sawg tix gau lai khankix tom nie mawh pa tawx krax taug mao ka nex nham heue. 13 Gumlox ghoik mawh yuh nin; lhat graung ka Siyiex mai priex tix hawt ka gumlox tawm pingnyap Nawh Cao khankix, mawh kheu in mawh beeh glawm kawn pui khawmuik heue. 14 Mawh kheu Siyiex tak cied ka kaing kuceu mai rom tix prawng ca tau khawm ceu pa hoik mox tix khankix, viang mawh pa mhawm ang ah mawh pa caox ang ah heue.